མཁའ་འགྲོའི་ལས་ཚོགས་བཅོ་ལྔ་པ་སྒྲིབ་སྦྱོང་གནས་ལུང་གི་ཆོག་བསྒྲིགས་དག་བྱེད་གཏེར་བུམ།
མཁའ་འགྲོའི་ལས་ཚོགས་བཅོ་ལྔ་པ་སྒྲིབ་སྦྱོང་གནས་ལུང་གི་ཆོག་བསྒྲིགས་དག་བྱེད་གཏེར་བུམ་བཞུགས། །
བདེ་བར་གཤེགགས་པ་ཀུན་ཀྱི་ཡུམ། །འཕགས་མ་སྒྲོལ་མ་རྣལ་འབྱོར་མ། །ཤེས་རབ་ཕ་རོལ་ཕྱིན་མ་ལ། །བརྟེན་ནས་གནས་ལུང་སྦྱོང་བ་བཤད། །དབེན་པའི་གནས་སུ་མཁའ་འགྲོ་བདེ་ཆེན་རྒྱལ་མོའི་རས་བྲིས་མཚན་ཉིད་དང་ལྡན་པ་དང༌། མཆོད་གཏོར། དབང་རྫས། རྣམ་བུམ་དང༌། ཁྲུས་བུམ། མདོར་ན་འོག་ཏུ་དགོས་པའི་སྦྱོང་བའི་ཡོ་བྱད་ཐམས་ཅད་ཚོགས་པར་བསག་གོ། དེ་ནས་བདག་མདུན་འཇུག་པ་གཅིག་གི་ཆོ་གས་བསྐྱེད་ནས་བཟླས་པ་སྔོན་དུ་སོང་རྗེས། ཁྲུས་བུམ་ལ་དམིགས་ནས། སྭ་བྷ་ཝས་སྦྱངས། སྟོང་པའི་ངང་ལས་བཾ་ལས་པདྨ་ཨ་ལས་ཟླ་བའི་སྟེང་དུ་བྷྲཱུཾ་ཡིག་འོད་དུ་ཞུ་བ་ལས་བྱུང་བའི་ཁྲུས་ཀྱི་བུམ་པ་རིན་པོ་ཆེའི་རང་བཞིན་ཡངས་ཤིང་རྒྱ་ཆེ་བ། ལྟོ་བ་ལྡིར་བ། ཞབས་ཞུམ་པ། མཆུ་འཕྱང་བ། མགྲིན་པ་ཕྲ་བ།
ལྷའི་གོས་པཉྩ་ལི་ཀས་དཀྲིས་ཤིང༌། དཔག་བསམ་ཤིང་གིས་ཁ་བརྒྱན་པའི་ནང་མཁའ་འགྲོའི་གཞལ་མེད་ཁང་ཟླ་གམ་སྒོ་གཅིག་པའི་རྣམ་པར་གནས་པའི་དབུས་སུ་རྗེ་བཙུན་རྡོ་རྗེ་རྣལ་འབྱོར་མ་པདྨ་རིགས་ཀྱི་མཁའ་འགྲོ་བདེ་ཆེན་ཡེ་ཤེས་ཀྱི་རྒྱལ་མོ་སྐུ་མདོག་དམར་གསལ་རྒྱན་དང་ཆ་ལུགས་ཡོངས་སུ་རྫོགས་པའི་ཐུགས་ཀར་རྗེ་བཙུན་སྒྲོལ་མ་རབ་ཏུ་ཞི་མ་སྐུ་མདོག་དཀར་གསལ་ཆུ་ཤེལ་གྱི་ཕུང་པོ་ལ་ཟླ་བ་ཤར་བ་ལྟ་བུ་དམིགས་བྱའི་སྡིག་སྒྲིབ་ཞི་བ་ལ་ཐུགས་བྱང་ཆུབ་སེམས་ཀྱི་འོད་ཟེར་སྤྲོ་བཞིན་པར་བཞུགས་པར་གྱུར། ཧཱུྃ། བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། །དུས་ལས་མི་འདའ་ཐུགས་རྗེའི་དབང་གིས་ན། །སེམས་
ཅན་དོན་ལ་དགོངས་པའི་དཀོན་མཆོག་གསུམ། །ཡིད་ཀྱི་སྤྲུལ་ཞིང་བཤམས་པའི་གནས་འདི་རུ། །རྒྱལ་བ་འཁོར་བཅས་མ་ལུས་གཤེགས་སུ་གསོལ། །བཛྲ་ས་མ་ཡ་ཛ། ཡེ་ཤེས་ཀྱི་དཀྱིལ་འཁོར་མ་ལུས་ཤིང་ལུས་པ་མེད་པ་ཐམས་ཅད་མདུན་གྱི་ནམ་མཁར་བྱོན། ཛཿཧཱུྃ་བཾ་ཧོཿཞེས་བརྗོད་པས་དམ་ཚིག་པ་དང་གཉིས་སུ་མེད་པར་འདྲེསཿ ཨོཾ་ཨཱཿཧཱུྃ་གིས་སྐུ་གསུང་ཐུགས་རྡོ་རྗེ་གསུམ་དུ་བྱིན་གྱིས་རློབ། གནས་སོ་སོར་རིགས་ལྔའི་དབང་རྒྱ་བཅས་ལ། ཨོཾ་བཛྲ་ས་མ་ཡ་ཨོཾ། ཨཱཿབཛྲ་ས་མ་ཡ་ཨཱཿཧཱུྃ་བཛྲ་ས་མ་ཡ་ཧཱུྃ། སྭཱ་བཛྲ་ས་མ་ཡ་སྭཱ། ཧཱ་བཛྲ་ས་མ་ཡ་ཧཱ། དབང་ལྷ་ཡབ་ཡུམ་རྗེས་ཆགས་ཞུ་བདེའི་ཆུ་རྒྱུན་བྱང་ཆུབ་སེམས་ཀྱི་རོལ་བས་དབང་བསྐུར། བདུད་རྩི་གྱེན་དུ་བརྟན་པ་གནས་སོ་སོའི་དབུ་རྒྱན་དུ་བཞུགས་པར་གྱུར། སྙིང་ཁའི་འོད་ཟེར་གཟུངས་ཐག་ལ་འཁྲིལ་ཏེ་སོང་བས་བུམ་ལྷ་ལས་བདུད་རྩིའི་རྒྱུན་བབས་པར་བསམ་ཞིང༌། ཛབ་དགོངས་ཀྱི་དམིགས་པས་ཚེ་འདས་ཀྱི་སྡིག་སྒྲིབ་སྦྱོང་བར་བསམ་མོ། །མཁའ་འགྲོའི་ཐུགས་ཀར་པད་ཟླའི་སྟེངཿ རབ་ཏུ་ཞི་མ་སྐུ་མདོག་དཀརཿ ཞབས་གཉིས་རྟ་བབས་སྐྱིལ་མོ་ཀྲུངཿ ཕྱག་གཡས་མཆོག་སྦྱིན་གཡོན་པ་ནིཿ དཀོན་མཆོག་གསུམ་མཚོན་སྐྱབས་སྦྱིན་རྒྱསཿ ཨུཏྤལ་ལ་གནས་སྤྱི་བླུགས་འཛིནཿ
ཐུགས་ལས་དག་བྱེད་ལྷ་མོ་ནིཿ བུམ་པ་ཐོགས་པ་དཔག་མེད་སྤྲོསཿ ཟླ་གདན་ལ་གནས་དམིགས་བྱ་ཡིཿངན་སོང་སྡིག་སྒྲིབ་བཀྲུས་པར་གྱུརཿ ཨོཾ་པདྨོ་ཡོ་གི་ནི་ཏཱ་རེ་ཏུཏྟཱ་རེ་ཏུ་རེ་སརྦ་པཱ་པཾ་ག་ཏེ་ག་ཏེ་སྭཱ་ཧཱཿཅེས་སྟོང་རྩ་ལས་མི་ཉུང་བར་བཟླས་རྗེས་ཚོགས་བསགས་གི་ཕྱིར་དུ་མཆོད་ཕྲེང་རྒྱས་པའམ། མ་ནུས་ན། མེ་ཏོག་དམ་པ་ཕྲེང་བ་དམ་པ་སོགས། ཤླཽ་ཀ་གཉིས་ཀྱིས་མཆོད། དེ་དག་བསྔགས་པ་མི་ཟད་རྒྱ་མཚོ་དང༌། སོགས་ཤླཽ་གཅིག་གིས་བསྟོད། ཡི་གེ་བརྒྱ་པས་ལྷག་ཆད་བསྐང༌། ཨོཾ་ཨཱཿཧཱུྃ་གིས་དུང་ཆོས་ཀྱི་ཆུ་མཆོད་ཡོན་དུ་ཕུལ་བས། བུམ་པའི་ལྷ་བདེ་སྟོང་ཆེན་པོའི་ངོ་བོའི་འོད་དུ་ཞུ་བར་བསམ་མོ། །བར་འདིར་ཚོགས་ཀྱི་འཁོར་ལོ་དང༌། བདག་འཇུག་ཀྱང་བླང་ངོ༌། །དེ་ནས་སྦྱོང་བ་ལ་འཇུག་པར་བྱ་སྟེ། ཐོག་མར་རྟེན་ལ་དགུག་པ་ནི། སྟོང་པའི་ངང་ལས་པདྨ་དང་ཟླ་བའི་སྟེང་དུ་ནྲྀ་ཡོངས་སུ་གྱུར་པ་ལས་ཚེ་འདས་ཀྱི་ཕུང་པོ་དང་སྐྱེ་མཆེད་གསོན་གྱི་གནས་སྐབས་ཇི་ལྟ་བར་ཡོད་པར་གྱུར། ན་མོ། བྱིན་རླབས་ཀྱི་རྩ་བ་བླ་མ་རྣམས་ཀྱི་བདེན་པ་དང༌། བསླུ་བ་མེད་པ་དཀོན་མཆོག་གསུམ་གྱི་བདེན་པ་དང༌། གསང་སྔགས་དང་རིགས་སྔགས་དང་གཟུངས་སྔགས་རྣམས་ཀྱི་བདེན་པ་དང༌། དོན་དམ་རང་བཞིན་གྱི་རྣམ་པར་དག་པའི་བདེན་པ་དང༌། ཀུན་རྫོབ་རྟེན་འབྲེལ་བསླུ་བ་མེད་པའི་བདེན་པ་དང༌། བཅོམ་
ལྡན་འདས་རྒྱལ་བ་ཞི་ཁྲོ་རབ་འབྱམས་ཀྱི་ཡུམ་གྱུར་ཤེས་རབ་ཀྱི་ཕ་རོལ་ཏུ་ཕྱིན་མའི་བདེན་པ་དང༌། བདེན་པ་ཆེན་པོའི་བྱིན་རླབས་ཀྱིས་རང་བཞིན་སྐྱེ་གནས་ཀྱི་བར་དོ་ནས་ཆོས་ཉིད་དང་སྲིད་པའི་བར་དོར་བརྒྱུད་ཁ་འཁྱལ་བའི་ཚེ་འདས་ཆྒཻ་མོའི་རྣམ་པར་ཤེས་པ་འགྲོ་བ་རིགས་དྲུག །སྐྱེ་གནས་རྣམ་པ་བཞི། སྲིད་པ་བར་མ་དོ་གང་དུ་གནས་ཀྱང་སྙིང་རྗེ་ཆེན་པོ་དང་གསང་སྔགས་ཟབ་མོའི་བདེན་པས་རྟེན་འདི་ལ་མཆིས་པར་གྱུར་ཅིག །ལན་གསུམ། རྣམ་པར་ཤེས་པ་འོད་ཀྱི་རང་བཞིན་དུ་རྟེན་ལ་ཐིམ་པར་གྱུར། ཛཿཧཱུྃ་བྃ་ཧོཿཞེས་ཕྱག་རྒྱ་བཞིས་ཅིང༌། ཕྱིར་འབྲང་གི་བགེགས་སྦྱང་བའི་ཕྱིར། གཏོར་མ་གསུམ་རེ་རེ་ནས་བསྐོར་ཞིང༌། ཨོཾ་སརྦ་བིག་ནན་ན་མཿ སརྦ་ཏ་ཐཱ་ག་ཏ་བྷྱོ་བི་ཤྭ་སོགས་མཐར། ཚེ་ལས་འདས་པའི་སྡིག་པ་སྦྱོང་བ་ལ་བར་དུ་གཅོད་པའི་བགེགས་རྣམས་ལ་གཏོར་མ་འདི་བརྔན་དུ་སྦྱིན་གྱིས་སོང་ཞིག །ཅེས་སྦྲེལ་བ་ལན་གསུམ། ཏིང་ལོ་ཆང་བུ་དང་བཅས་བསྐོར་ཞིང༌། སུཾ་བྷ་ནིའི་མཐར་ཏིང་ལོ་འདིས་སྣང་བ་དང༌། ཆང་བུ་འདིས་ལམ་རྒྱགས་གྱིས་ལ་སོང་ཞིག །ཅེས་སྦྲེལ་བ་གསུམ་གྱི་མཐར། འབར་བ་མེའི་ཕྱག་རྒྱ་བསྟན་ཏེ། ཨོཾ་བཛྲ་ཛྭ་ལ་ཨ་ན་ལ་ཧ་ན་མ་ཐ། ད་ཧ་པ་ཙ་ཧཱུྃ་ཕཊཿཅེས་མཚམས་བཅད། དེ་ནས་རྟེན་གྱི་གཡས་སུ་མེ། གཡོན་དུ་ཆུ། མདུན་དུ་
ཏིལ་བཞག་ནས། ཚེ་འདས་ཀྱི་སྡིག་སྒྲིབ་ཐམས་ཅད་སྙིང་གར་ཀཾ་ནག་པོའི་རྣམ་པར་གནས་པ་སྣ་སྒོ་ལས་སྡིག་པ་རྭ་ཅན་གྱི་རྣམ་པར་འཐོན། ཏིལ་ལ་ཐིམ་པ་ཡེ་ཤེས་ཀྱི་མེ་དང་ཆུ་བོར་དོར་བས་སྡིག་སྒྲིབ་དག་པར་གྱུར། ཨོཾ་བཛྲ་ཌ་ཀ་ཁ་ཁ་ཁཱ་ཧི་ཁཱ་ཧི་སརྦ་པཱ་པཾ་ད་ཧ་ན་བྷསྨིཾ་ཀུ་རུ་སྭཱ་ཧཱ། ཆྒཻ་མོའི་སྡིག་པ་དང་སྒྲིབ་པ་ཐམས་ཅད་སརྦ་པཱ་པཾ་ཤིནྟཾ་ཀུ་རུ་སྭཱ་ཧཱ། གསང་སྔགས་ཟབ་མོ་བཟླས་བའི་བྱེ་མས་བྲབ་ཅིང༌། རྩ་རིག་དང་ཡིག་བརྒྱ་གང་མང་བརྗོད། དེ་ནས་ཁྲུས་བུམ་གྱི་ཆུས་མེ་ལོང་ངོས་སུ་བཀྲུ་ཞིང་དམིགས་པ་ལྡན་པས། ཕྱག་འཚལ་བདེ་མ་དགེ་མ་ཞི་མ། །མྱ་ངན་འདས་ཞི་སྤྱོད་ཡུལ་ཉིད་མ། །སྭཱ་ཧཱ་ཨོཾ་དང་ཡང་དག་ལྡན་པས། །སྡིག་པ་ཆེན་པོ་འཇོམས་པ་ཉིད་མ། །ཨོཾ་པདྨོ་ཡོ་གི་ནི་ཏཱ་རེ་ཏུཏྟཱ་རེ་ཏུ་རེ་སརྦ་པཱ་པཾ་ག་ཏེ་ག་ཏེ་སྭཱ་ཧཱ། ཞེས་ལན་མང་དུ་བཀྲུས་མཐར་འབྱུང་བའི་དུག་དབྱུང་བ་ནི། ས་ལ་སོགས་པ་མདུན་དུ་ཞགས་ལ། ཀུ་ཤའི་ཆུན་བོས་དབྱུང་བའི་ཚུལ་དུ། ས་ནི་དུག་གི་ཕ་ཡིན་ཏེ། །ས་ནི་དུག་གི་མ་ཡང་ཡིན། །བདེན་པའི་བདེན་ཚིག་འདི་བརྗོད་པས། །དུག་གསུམ་ས་ཡི་ནང་དུ་སོང༌། །ཆུ་ནི་དུག་གི་ཕ་ཡིན་ཏེ། །ཆུ་ནི་དུག་གི་མ་ཡང་ཡིན། །བདེན་པའི་བདེན་ཚིག་འདི་བརྗོད་པས། །དུག་གསུམ་ཆུ་ཡི་ནང་དུ་སོང༌། །མེ་ནི་དུག་གི་ཕ་ཡིན་ཏེ། །མེ་ནི་དུག་གི་མ་ཡང་ཡིན། །བདེན་པའི་བདེན་ཚིག་འདི་བརྗོད་པས། །དུག་གསུམ་མེ་ཡི་ནང་དུ་སོང༌། །རླུང་ནི་དུག་གི་ཕ་
ཡིན་ཏེ། །རླུང་ནི་དུག་གི་མ་ཡང་ཡིན། །བདེན་པའི་བདེན་ཚིག་འདི་བརྗོད་པས། །དུག་གསུམ་རླུང་གི་ནང་དུ་སོང༌། མཱུཾ་ལཱཾ་མཱཾ་པཱཾ་ཏཱཾ་ཆྒཻ་མོའི་འབྱུང་བའི་དུག་ཐམས་ཅད་ཤཱིནྟཾ་ཀུ་རུ་སྭཱ་ཧཱ། བདེན་པའི་སྟོབས་ཀྱི་དུག་གཞོམ་པ་ནི། འདོད་ཆགས་ཞེ་སྡང་གཏི་མུག་གསུམ། །འདི་དག་ཚེ་འདས་དུག་གསུམ་སྟེ། །བཅོམ་ལྡན་སངས་རྒྱས་དུག་མི་མངའ། །སངས་རྒྱས་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་གསུམ། །འདི་དག་ཚེ་འདས་དུག་གསུམ་སྟེ། །བཅོམ་ལྡན་དམ་ཆོས་དུག་མི་མངའ། །དམ་ཆོས་བདེན་པས་དུག་བཅོམ་མོ། །འདོད་ཆགས་ཞེ་སྡང་གཏི་མུག་གསུམ། །འདི་དག་ཚེ་འདས་དུག་གསུམ་སྟེ། །བཅོམ་ལྡན་དགེ་འདུན་དུག་མི་མངའ། །དགེ་འདུན་བདེན་པས་དུག་བཅོམ་མོ། །ཆྒཻ་མོའི་ཉོན་མོངས་པ་དུག་གསུམ་ཐམས་ཅད་དཀོན་མཆོག་གསུམ་གྱི་བདེན་པས་ཤཱིནྟཾ་ཀུ་རུ་སྭཱ་ཧཱ། དེ་ནས་ཤིས་པ་བརྗོད་པ་ནི། བྱང་ཆུབ་སྙིང་པོར་གཤེགས་པ་ནས། །ས་རྣམས་དྲུག་པོ་གཡོས་གྱུར་ཅིང༌། །བདུད་ཡིད་མི་བདེར་གྱུར་པ་དེས། །ཁྱོད་ལ་བདེ་ལེགས་མཛད་པར་གྱུར། །ཁྱེད་ཅག་སྡིག་པར་མ་གྱུར་ཅིག །ཆོས་ཀྱི་འཁོར་ལོ་བསྐོར་བ་ནས། །འཕགས་པའི་བདེན་པ་རྣམས་གསུང་ཞིང༌། །ཐུབ་པའི་སྙན་པ་གང་བྱུང་དེས། །ཁྱོད་ལ་བདེ་ལེགས་མཛད་པར་གྱུར། །ཁྱེད་ཅག་
སྡིག་པར་མ་གྱུར་ཅིག །ཡིད་འཕྲོག་གང་ཞིག་མུ་སྟེགས་བྱེད། །ཐམས་ཅད་ཆོས་ཀྱིས་ཕམ་མཛད་ཅིང༌། །ཚོགས་ཀུན་དབང་དུ་མཛད་པ་དེས། །ཁྱོད་ལ་བདེ་ལེགས་མཛད་པར་གྱུར། །ཁྱེད་ཅག་སྡིག་པར་མ་གྱུར་ཅིག། ༈ཚེ་ལས་འདས་པས་གཙོ་བྱས་པའི་སེམས་ཅན་ཐམས་ཅད་སྡིག་པའི་ཕྱོགས་ལས་རྒྱལ་ཞིང་ཤིན་ཏུ་བཀྲ་ཤིས་པར་གྱུར་ཅིག །དེ་ནས་དབང་བསྐུར་བ་ནི། ཉེ་དུ་ལ་སོགས་པ་ཡིད་བཅུགས་པས་བྱང་བུ་བཟུང་ལ། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བ། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་སྩོལ། །ལན་གསུམ། རྒྱུན་བཤགས་དང་སྡོམ་བཟུང་ལ་དམིགས་ནས། དཀོན་མཆོག་གསུམ་ལ་བདག་སྐྱབས་མཆི། །སོགས་ལན་གསུམ་ཡེ་ཤེས་དབབ་པ་ནི། ཚེ་འདས་ཀྱི་སྙིང་ཁར་རྣམ་པར་ཤེས་པའི་ངོ་བོ་རཾ་ཡིག་དམར་སེར་གསལ་བ་ལས་མེ་འབར། རྣམ་སྨིན་བག་ཆགས་ཀྱི་ལུས་གཞོབ་ཐུལ་གྱི་ཚིག །སྐད་ཅིག་ཉིད་ལ་བདེ་ཆེན་རྡོ་རྗེ་རྣལ་འབྱོར་མར་གསལ་བའི་སྙིང་ནང་དུ་གདན་གསུམ་ཚང་བའི་དཀྱིལ་འཁོར་གྱི་ལྷ་ཚོགས་ནམ་མཁའ་ལས་ཁ་ཆར་བབས་པ་བཞིན་དུ་བྱོན་ནས་ཐིམ་པར་བསམ་ཞིང༌། ཧཱུྃ། བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། དུས་ལས་མི་བདའ་ཐུགས་རྗེའི་
དབང་གིས་ན། །སེམས་ཅན་དོན་ལ་དགོངས་པའི་དཀོན་མཆོག་གསུམ། །ཡིད་ཀྱིས་སྤྲུལ་ཞིང་བཤམས་པའི་གནས་འདི་རུ། །རྒྱལ་བ་འཁོར་བཅས་མ་ལུས་གཤེགས་སུ་གསོལ། །ཨོཾ་པདྨོ་ཡོ་གི་ནི་ཏཱ་རེ་ཏུཏྟཱ་རེ་ཏུ་རེ་ཛྙཱ་ན་ཝཱ་རཱ་ཧཱི་ཕེཾ་ཕེཾཿཞེས་རོལ་མོ་དཀྲོལ། ཏིཥྛ་བཛྲས་བརྟན་པར་བྱ། བུམ་པ་སྤྱི་བོར་བཞག་ལ། ཧོཿགསང་སྔགས་དམ་ཚིག་བླ་ན་མེད། །རང་བྱུང་ལྷུན་གྲུབ་བུམ་པའི་དབང༌། །སངས་རྒྱས་ཀུན་ཀྱི་གསང་གསུམ་གྱི། །དབང་བསྐུར་དམ་པ་ཁྱོད་ལ་སྦྱིན། །རྩ་སྔགས་མཐར། ཀ་ལཱ་ཤ་ཨ་བྷི་ཥིཉྩ་ཧཱུྃ། བདུད་རྩི་སྦྱིན་ཞིང༌། ཧོཿབྱང་ཆུབ་སེམས་ཀྱི་དམ་ཚིག་ནི། །རྩ་ཁམས་ཡི་གེའི་འཁོར་ལོར་བསྟིམ། །བརྗོད་པ་མེད་ལས་ཐམས་ཅད་སྐྱེས། །གྲགས་སྟོང་གསུང་གི་དབང་ཐོབ་ཤོག །རྩ་སྔགས་མཐར། བྷོ་དྷི་ཙིཏྟ་ཨ་བྷི་ཥིཉྩ་ཧཱུྃ། སིན་དྷུ་རའི་དཀྱིལ་འཁོར་གཏད་ལ། ཧོཿཡེ་ཤེས་རྣམ་པ་ཐམས་ཅད་པ། །དགའ་བ་བཞི་ལ་ཡང་དག་བརྟེན། །ཐབས་ཤེས་འབྲེལ་བའི་དམ་ཚིག་གི། ཕྱག་རྒྱ་ཆེན་པོ་ཁྱེད་ཀྱིས་ལོངསཿ ཛཿཧཱུྃ་བཾ་ཧོཿཨ་ཧོ་མ་ཧཱ་སུ་ཁ། དྲིལ་བུ་དཀྲོལ་ཞིང༌། སྒྲ་ནི་གྲགས་པ་ཉིད་ནས་སྟོང༌། །དེ་བཞིན་སེམས་ལ་ངོ་བོ་མེད། །ངོ་བོ་མེད་པའི་གནས་ལུགས་ལ། །བལྟ་བྱ་སྤངས་ནས་ཡང་དག་ལྟོས། །ཨ་ཨཱཿ ཞེས་ཚེ་འདས་ཀྱི་སེམས་དང་རང་སེམས་ཐ་དད་མེད་པར་བསྲེ།
གཏང་རག་གི་མཎྡྲལ་དབུལ། གཙོ་བོས་ཇི་ལྟར་བཀའ་སྩལ་པ། །ཞེས་སོགས་བརྗོད་པར་བསམ། དེ་ནས་འཁོར་བ་དང་འབྲེལ་བཅད་ནས་ལམ་བསྟན་པ་ནི། སྣང་གསལ་འོད་འཕྲོ་བ་ཅིག་བཏེག་ནས། གསོན་ཅིག་ཚེས་འདས་རིགས་ཀྱི་བུ། །འཁོར་བ་སྡུག་བསྔལ་ཅན་ཕུང་པོ། །འགྱུར་དང་འདུ་བྱེད་ཉིང་འཁྲུལ་ཅན། །ལས་ལས་སྐྱེས་ཤིང་ལས་ལ་བརྟེན། །དེ་ཕྱིར་དེ་ལ་མ་ཆགས་པར། །བླ་མ་དཀོན་མཆོག་རྣམས་ཀྱི་མཐུ། །དད་པའི་ཡུལ་ལ་ཤིན་ཏུ་སྣང༌། །མོས་གུས་བསྐྱེད་ཅིག་རིགས་ཀྱི་བུ། །འདི་ནས་ནུབ་ཀྱི་ཕྱོགས་རོལ་ན། །སྲིད་གསུམ་དྲི་མ་རབ་སྤངས་པ། །རང་བཞིན་སྤྲུལ་པའི་ཞིང་ཁམས་ནི། །པདྨོ་བརྩེགས་པ་ཞེས་བྱ་བར། །མགོན་པོ་འོད་དཔག་མེད་པ་བཞུགས། །གང་ཞིག་ཡིད་ལ་དྲན་པའི་མོད། །ཁྱེད་ཀྱང་དེ་རུ་ཕྱིན་འགྱུར་བས། །དད་གུས་བསྐྱེད་ལ་དེ་མཚན་ཟུངས། །སྟོན་པ་དེ་ཡི་ཞལ་མཐོང་བའི། །མོད་ལ་སྒྲིབ་པ་རྣམ་པ་གཉིས། །ཡུད་ལ་སྤངས་ནས་མངོན་སངས་རྒྱས། །ཡིད་གཉིས་སྤོངས་ལ་དེར་གཤེགས་ཤིག །ཅེས་བརྗོད་པའི་མོད་ལ་བྱང་བུའི་རྣམ་ཤེས་ཧཱུྃ་གི་རྣམ་པས་དེར་འཕངས། བྱང་བུ་སྲེག་ཅིང༌། ཧོཿགསོན་ཅིག་དགོངས་ཤིག་རིགས་ཀྱི་བུ། །ཕུང་པོ་ལྔ་ཡི་བུད་ཤིང་ལ། །རྒྱལ་བ་རིགས་ལྔའི་མེ་སྦར་རོ། །འབྱུང་བ་ལྔ་ཡི་
བུད་ཤིང་ལ། །གཤེགས་མ་ལྔ་ཡི་མེ་སྦར་རོ། །རྣམ་ཤེས་བརྒྱད་ཀྱི་བུད་ཤིང་ལ། །སེམས་དཔའ་བརྒྱད་ཀྱི་མེ་སྦར་རོ། །སྐྱེ་མཆེད་དྲུག་གི་བུད་ཤིང་ལ། །ཐུབ་པ་དྲུག་གི་མེ་སྤར་རོ། །ཡུལ་དང་དབང་པོའི་བུད་ཤིང་ལ། །དག་བྱ་དག་བྱེད་མེ་སྤར་རོ། །ལུས་ངག་ཡིད་གསུམ་བུད་ཤིང་ལ། །རྒྱལ་བའི་སྐུ་གསུམ་མེ་སྦར་རོ། །སྐུ་གསུམ་ཡེ་ཤེས་ལྔ་ལྡན་པ། །འགྲོ་བའི་དོན་དུ་འགྲུབ་པར་ཤོག །ཅེས་དང༌། ལམ་སྦྱོང་བ་ནི། དཀོན་མཆོག་རིན་ཆེན་དཔལ་ཞིང་དུ། །དཀོན་མཆོག་རིན་ཆེན་འོད་ཟེར་གྱི། །རིན་ཆེན་ཕྲེང་བ་རྣམ་དག་པ། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་སྒོམ་པའི་ལམ། །བླ་ན་མེད་པའི་ཁྱད་པར་ལམ། །བྱང་ཆུབ་བར་ཆད་མེད་པའི་ལམ། །རྣམ་པར་གྲོལ་བའི་ལམ་དག་ལ། །བརྟེན་ནས་སྡིག་སྒྲིབ་ཀུན་སྦྱངས་ནས། །འཕགས་པའི་ལམ་དེར་བགྲོད་པར་ཤོག །ཅེས་དང༌། རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །སོགས་སྨོན་ལམ་ཀྱང་གདབ་པས་ཚེ་འདས་དེ་ཉིད་བདེ་བ་ཅན་ནས་སླར་སྟེང་གི་ནམ་མཁའ་ལ་འོངས་ནས་དྲིན་ལན་བསབས་ཕྱིར་མེ་ཏོག་འཐོར་ཞིང་རྒྱལ་བའི་ཕྲིན་ལས་ལ་ཆེད་དུ་བརྗོད་པ། ཨེ་མ་སངས་རྒྱས་ངོ་མཚར་ཆེ། །ཨེ་མ་སངས་རྒྱས་ཕྲིན་ལས་འཕགས། །གང་ཕྱིར་བདག་ཅག་ངན་སོང་སྦྱངས། །བྱང་ཆུབ་སྤྱོད་པ་ཉིད་ལ་
བཞག །སངས་རྒྱས་འདྲ་བའི་སྟོན་པ་མེད། །ཆོས་དང་འདྲ་བའི་སྐྱོབ་པ་མེད། །དགེ་འདུན་འདྲ་བའི་ཞིང་ས་མེད། །སྔགས་དང་འདྲ་བའི་མྱུར་ལམ་མེད། །བདག་གཞན་སེམས་ཅན་ཐམས་ཅད་ཀྱང༌། །ལམ་མཆོག་འདི་ནས་དབུགས་དབྱུང་གསོལ། །ཅེས་བརྗོད་ནས་སླར་ཡང་བདེ་བ་ཅན་དུ་སོང་ནས་ལམ་སྦྱངས་ཏེ། དབུས་ཕྱོགས་མེ་རི་འབར་བར་ཀུན་ཏུ་བཟང་པོའི་ཞིང་ཁམས་སུ་སངས་རྒྱས་པར་གྱུར། ཅེས་བརྗོད་ཅིང༌། བཟང་པོ་སྤྱོད་པའི་སྨོན་ལམ་འདོན། ཆོ་གའི་རྗེས་ཆོག་རྣམས་དཀྱུས་བཞིན་བྱས་ལ། ཤི་རྒབ་གཅོད་པའི་ཕྱིར་ཤིས་བརྗོད་རྒྱ་ཆེན་པོ་ཡང་བྱའོ། །འདི་ལྟར་སྦྱང་བ་བགྱི་བའི་རིམ་པ་ལ་མིང་བཞི་འདུས་པའི་ཕུང་པོ་ཅན་མཐའ་དག་དབང་གི་རྟེན་དུ་རུང་མི་རུང་སོགས་དང༌། དབང་གི་སྔོན་འགྲོའི་སྡོམ་བཟུང་རྣམ་པ་གསུམ་གྱི་ཐ་སྙད་ལ་བརྟེན་ནས་དངོས་གཞི་ཐོབ་ཚུལ་སོགས་ལ་དཔྱད་པ་བྱེད་པ་ཡོད་ཀྱང་བྱང་ཆུབ་ཀྱི་སེམས་ལྷག་པའི་བསམ་པ་བརྟན་པོ་དང་མི་ལྡན་ན་ནི་ཆོ་གའི་ཐ་སྙད་རྫོགས་ཀྱང་བར་མ་དོའི་ཡིད་ཅན་ཕན་པའི་ཡོན་ཏན་སྒྲ་ཇི་བཞིན་པ་མི་ཐོབ་ལ། རང་འདོད་མེད་ཅིང་སྙིང་རྗེ་ཆེན་པོའི་བློ་ཡོངས་སུ་དག་པ་རྣམས་ལ་ནི་འདི་ཙམ་གྱིས་ཕན་པ་འགྲུབ་པར་ངེས་པ་རྙེད་ནས་ཚིག་གི་སྦྱོར་བ་ཉུང་བ་ཉིད་གཙོ་བོར་བྱས་པའོ། །ཞེས་པའང་རྒྱང་རུ་དཔལ་ལྡིངས་རྗེ་བཙུན་མས་ནན་གྱིས་བསྐུལ་བའི་ངོར་རྫོགས་ཆེན་པ་རང་བྱུང་རྡོ་རྗེས་སོ། །མངྒ་ལཾ།། །།