ཀློང་ཆེན་སྙིང་གི་ཐིག་ལེ་ལསཿ རིག་འཛིན་ཐུགས་སྒྲུབ་དཔལ་ཆེན་འདུས་པ།
༂ ཀློང་ཆེན་སྙིང་གི་ཐིག་ལེ་ལསཿ རིག་འཛིན་ཐུགས་སྒྲུབ་དཔལ་ཆེན་འདུས་པ་བཞུགསཿ
བིདྱཱ་དྷཱ་ར་ཏུཊཿམ་ཧཱ་ཤྲཱི་བསྟྲི་ཏཿ དཔལ་ཆེན་ཧེ་རུ་ཀ་ལ་འདུདཿ མ་འོངས་ལྔ་བརྒྱ་ཐ་མའི་ཚེཿམཐའ་ཡི་རྒྱ་འདྲེ་འབྱུང་པོ་དངཿ དབུས་ཀྱི་དམ་སྲི་གློ་བུར་བསྡོངསཿ ཆོས་པའི་སྙིང་བཞུགས་མི་དགེ་སྤྱོདཿ སྐྱེ་བོའི་སྙིང་ཞུགས་སྡིག་རྒྱུན་སྤེལཿ རྨི་ལམ་བཙུན་པ་བྱ་སྤྲེལ་རྨིཿབག་མི་ཕེབས་ཤིང་སྙིང་རླུང་ལྡངཿ དེ་ཚེ་གཉེན་པོ་སྟོབས་ཀྱི་ལྷཿཕལ་གྱིས་ཐུལ་བར་མི་འགྱུར་བསཿ ཕྱི་ལྟར་བྱང་སེམས་ནང་རིག་འཛིནཿ གསང་བ་དྲག་གཏུམ་འབར་བའི་ལྷཿབདེ་གཤེགས་ཡོངས་རྫོགས་སྒྲུབ་སྡེ་བརྒྱདཿ དཔལ་ཆེན་འདུས་པའི་སྒྲུན་པ་འདིསཿ ལོག་འདྲེན་འདུལ་བར་ཐེ་ཚོམ་མེདཿ ཤིན་ཏུ་གསང་ཞིང་རང་ཉམས་ལོངསཿ བསྟན་འགྲོའི་དོན་དུ་སྙིང་སྟོབས་བསྐྱེདཿ སམ་ཡཿདང་པོ་
དབེན་ཞིང་ཉམས་དགའི་གནསཿ གྲུབ་ཐོབ་ཞབས་ཀྱིས་བཅག་པ་དངཿ ཁྱད་པར་དུར་ཁྲོད་རྩུབ་འགྱུར་ཚལཿ དཀྱིལ་འཁོར་རྩིབས་བཅུ་སྒོ་རྫོགས་ཅནཿ མཚན་ཉིད་ཚང་བར་བྲིས་པའི་སྟེངཿ སྒྲུབ་རྫས་ཐོད་སྐུ་སྔགས་བྱང་དངཿ ཙན་དན་འམ་ནི་སེང་ཕུར་སོགསཿ སྤྲོས་བཅས་སྒྲུབ་ཡིག་ལྟར་དུའམཿ ཡང་ན་གཙོ་ཕུར་ཙམ་ལ་བརྟེནཿ ཉེར་སྤྱོད་སྨན་གཏོར་རཀྟ་དངཿ དཀྱིལ་འཁོར་རྒྱན་བཀོད་ལེགས་པར་བཀྲམཿ བདེ་བའི་སྟན་ལ་བག་ཕབ་ནསཿ མཚམས་བཅད་གཡེལ་དང་མ་ཞུད་གཅེསཿ དང་པོ་སྐྱབས་སུ་འགྲོ་བ་ནིཿ ཧཱུྃཿ བདེ་གཤེགས་ཡོངས་རྫོགས་དཀོན་མཆོག་གསུམ་གྱི་ངངཿ དཔལ་ཆེན་འདུས་པའི་ངོ་བོར་ཡོངས་ཤར་བཿ སྤྲོ་བསྡུའི་བྱེད་པོ་བྱང་ཆུབ་སེམས་ཀྱི་ལྷརཿ རང་ངོ་ཤེས་པའི་ངང་ནས་སྐྱབས་སུ་མཆིཿལན་གསུམ། གཉིས་པ་སེམས་བསྐྱེད་ནིཿ ཧཱུྃཿ ཆོས་ཀྱི་དབྱིངས་ལ་ཕྱོགས་རིས་མཉམ་བརྡལ་ཡངཿ མ་རྟོགས་
འཁྲུལ་པར་འཁྱམས་པའི་བདག་འཛིན་བདུདཿ འོད་གསལ་ཆོས་སྐུའི་ཀློང་དུ་བསྒྲལ་བའི་ཕྱིརཿ དཔལ་ཆེན་ལྷ་ཚོགས་བསྒྲུབ་པར་སེམས་བསྐྱེད་དོཿལན་གསུམ། གསུམ་པ་ཚོགས་གསོག་ནིཿ ཧོཿརྡོ་རྗེ་སློབ་དཔོན་སངས་རྒྱས་དཔལཿ དུས་གསུམ་བཞུགས་ལ་ཕྱག་འཚལ་ལོཿམཆོག་གསུམ་བསྟེན་པའི་ཞིང་གྱུར་ལཿ གཉིས་མེད་ཡིད་ཀྱིས་སྐྱབས་སུ་མཆིཿདངོས་འབྱོར་ཡིད་ཀྱིས་རྣམ་སྤྲུལ་པའིཿདག་པའི་མཆོད་པ་བཞེས་སུ་གསོལཿ དངོས་གྲུབ་ཆུ་བོ་གཅོད་པའི་གེགསཿ ཉེས་བྱས་མ་ལུས་བཤགས་པར་བགྱིཿ ཕྱོགས་བཅུ་འཁོར་གསུམ་དག་པའི་ཆོསཿ མ་ཆགས་སྤྱོད་ལ་རྗེས་ཡི་རངཿ དག་པའི་མཐའ་བཞི་དྲི་མ་མེདཿ རྫོགས་པའི་བྱང་ཆུབ་སེམས་བསྐྱེད་དོཿབདེ་གཤེགས་དབང་ཕྱུག་སེམས་ཅན་ལཿ དགོས་པ་གསུམ་ཕྱིར་ལུས་འབུལ་ལོཿཚེ་རབས་བགྲངས་པའི་ལས་རྣམས་ཀུནཿ བསྡུས་ཏེ་བྱང་ཆུབ་ཆེན་པོར་བསྔོཿབཞི་པ་བགེགས་གཏོར་གཏོང་བ་ནིཿ ཧཱུྃཿ ང་ནི་སྤྱི་དཔལ་ཆེན་པོ་སྟེཿབྱང་ཆུབ་བསྒྲུབ་ལ་བར་གཅོད་པའིཿགནོད་བྱེད་ལོག་འདྲེན་འབྱུང་པོ་རྣམསཿ གཏོར་མ་ལོངས་ལ་ཕྱིར་དེངས་ཤིགཿ གལ་ཏེ་བཀའ་ལས་འདའ་བྱེད་རྣམསཿ མགོ་བོ་ཚལ་པ་བརྒྱར་བཀས་ཤིངཿ ལུས་ནི་རྡུལ་ཕྲན་བཞིན་དུ་
བཤིགཿ དྲག་སྔགས་མེ་དཔུང་ཐུན་བཅས་བརྡེགཿ ཨོཾ་བཛྲ་མ་ཧཱ་ཀྲོ་དྷ་པདྨ་ཀྲོ་དྷཱི་ཤཱ་རི་བཛྲ་ཀཱི་ལི་ཀཱི་ལཱ་ཡ་མ་ཧཱ་ཡཀྴ་ཀཱ་ལ་རཱུ་པ་ཀརྨཱ་རཾ་རཾ་ཛྭ་ལ་རཾ་ཧཱུྃ་ཕཊཿལྔ་པ་མཚམས་གཅོང་སྲུང་འཁོར་ནིཿ ཧཱུྃཿབདག་ཉིད་ཞེ་སྡང་རྡོ་རྗེ་ཡིཿསྤྱན་མིག་ཉི་ཟླར་འབར་ཞིང་བསྲེགཿ ཐུགས་ལས་ཁྲོ་བོའི་ཚྭ་ཚྭ་འཕྲོཿསྟོང་གསུམ་སྤྲུལ་པའི་མེ་ཡིས་འགེངསཿ ཕྱོགས་མཚམས་མཚོན་ཆ་འཆོལ་པས་གཏམསཿ བདག་མེད་སྟོང་པར་མཚམས་བཅད་དོཿཨོ་སཱུརྱ་ཙཎྜ་བཛྲ་ཀྲོ་ཏ་ཛྭ་ལ་རཾ་རཾ་ཙཀྲ་ཝརྟི་མ་ཧཱ་ཀྲོ་ཏ་སརྦ་དུཥྚཾ་ཨ་ཧཱུྃཿཕཊཿདྲུག་པ་བརྡ་སྒོ་དབྱེ་ཕྱག་འཚལཿ ནོངས་བཤགས་དམ་བཅའ་བཟུང་བ་ནིཿ ཧཱུྃཿམ་རིག་ལིང་ཏོག་ཡེ་ཤེས་ཐུར་མས་དབྱེཿསེམས་ཉིད་ལྷ་སྐུར་རྟོགས་པའི་བརྡ་ཕྱག་འཚལཿ འགལ་འཁྲུལ་ནོངས་པ་ཆོས་སྐུའི་ཀློང་དུ་བཤགསཿ དཔལ་ཆེན་སྲོག་གི་ཕྱིར་ཡང་མི་གཏོང་ངོཿཨ་ལ་ལ་ཧོཿབདུན་པ་སྣོད་བཅུད་བྱིན་འབེབས་ནིཿ ཧཱུྃཿདཔལ་ཆེན་འདུས་པའི་ལྷ་ཚོགས་རྣམསཿ ཆོས་སྐུའི་ཀློང་ནས་ཐུགས་རྗེ་བསྐྱེདཿ ལོངས་སྐུའི་རྣམ་རོལ་ཅིར་ཡང་བསྒྱུརཿ སྤྲུལ་སྐུའི་དཀྱིལ་འཁོར་བརྟེན་པར་བཅསཿ དབང་བསྐུར་བྱིན་ཕོབ་རྟགས་མཚན་སྟོནཿ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊཿསརྦ་ས་མ་ཡ་ཨ་བེ་ཤ་ཡ་ཕཻཾཻཾ་ཕཻཾཻཾཿ བརྒྱད་པ་མཆོད་
པ་བྱིན་བརླབ་ནིཿ ཧཱུྃཿདབྱིངས་ནས་ཡེ་ཤེས་འབྲུ་གསུམ་ཆར་དུ་བབསཿ མཆོད་རྫས་ཉེས་སྐྱོན་མ་དག་བསྲེགས་གཏོར་བཀྲུསཿ བྷྲཱུྃ་ལས་རིན་ཆེན་ཨ་ལས་བྷནྡྷའི་ནངཿ ཕྱི་ནང་གསང་གསུམ་མཆོད་སྤྲིན་རྒྱ་མཚོར་གྱུརཿ ཨོཾ་བཛྲ་ཨརྒྷཾཿཔཱ་དྱཾ་པུཥྤེ་དྷུ་པེ་དཱི་པཾ་གྷནྡེ་རཱུ་པ་ཤཔྟ་གྷནྡྷེ་རཱ་ས་པརྴེ་སརྦ་པཱུ་ཙ་ཨཱཿཧཱུྃཿསྨན་གཏོར་རཀྟའི་སྔགས་ཀྱིས་བརླབསཿ ཨོཾ་ཨཿཧཱུྃ་སརྦ་པཉྩ་ཨམྲྀ་ཏ་ཧཱུྃ་ཧྲཱིཿཋཿཨོཾ་ཨཱཿཧཱུྃ་མ་ཧཱ་བ་ལིཾ་ཏ་ཏྭེ་ཛྭ་བྷ་ལིངྟ་བྷ་ལ་བྷ་ཏི་གུ་ཧྱ་ས་མ་ཡ་སྭཱ་ཧཱཿཨོཾ་ཨཱཿཧཱུྃ་མ་ཧཱ་རཀྟ་ས་མནྟ་མནྜལ་ཧཱུྃ་ཕཊཿདགུ་པ་སྒོང་སྐྱེས་སྦྱོང་བ་རྒྱས་པ་ཆེན་པོའི་བསྐྱེད་རིམ་ནིཿ ཧཱུྃཿརང་བྱུང་རིག་པ་བདག་མེད་དེ་བཞིན་ཉིདཿ རོལ་རྩལ་ཀུན་སྣང་སྙིང་རྗེ་ཆེན་པོའི་གདངསཿ རྒྱུ་ཡི་རིག་པ་ཧཱུྃ་གིས་སྣོད་བཅུད་སྦྱངསཿ དེ་ཉིད་གནས་འགྱུར་རྡོ་རྗེ་རྩེ་ལྔ་པཿསྐད་ཅིག་ཡོངས་གྱུར་རྒྱུ་ཡི་ཧེ་རུ་ཀཿབརྗོད་མེད་ཀློང་ལྔ་ཡུམ་གྱི་མཁའ་ལ་ཤརཿ ཐུགས་ལས་ཨེ་ཡཾ་ར་སུཾ་ཀེཾ་རཾ་ཆདཿ ཨེ་ལས་ནམ་མཁའ་ཡཾ་ལས་གཡོ་བྱེད་རླུངཿ ར་ལས་རཀྟ་སུཾ་ལས་ཞིང་ཆེན་གཞིཿཀེཾ་ལས་རུས་པའི་རི་དབང་བང་རིམ་ཅནཿ རཾ་ལས་བསྐལ་མེ་རབ་འབར་རྔམ་བརྗིད་ཀློངཿ ཧཱུྃ་ལས་གནམ་ལྕགས་རྡོ་རྗེའི་བྲག་ཆེན་སྟེངཿ ནམ་མཁའི་དབྱིངས་ནས་བྷྲཱུྃ་ཡིག་ལྔ་ལྡན་བབསཿ བྷྲཱུྃ་རཏྣ་བྷཉྫ་ཛྙཱ་
ན་ཙཀྲ་མཎྜལ་བྷྲཱྃཿབྷྲཱུྃ་ཡིག་གནས་འགྱུར་སྤྲུལ་པའི་གཞལ་མེད་ཁངཿ ཕྱི་ནང་རིན་ཆེན་ནང་ནི་ཐོད་པའི་མཁརཿ གྲུ་བཞི་སྒོ་བཞི་ཚད་དང་མཚན་ཉིད་ལྡནཿ གུ་ཎ་ཏྭ་ར་རྟ་བབས་བང་རིམ་བརྒྱདཿ ཆོས་འཁོར་རི་དྭགས་གདུགས་དང་ནོར་བུའི་ཏོགཿ ཕྱི་རོལ་རིན་ཆེན་རྩིག་པའི་རྨང་གི་གཞིཿའདོད་སྣམ་དམར་པོར་ལྷ་མོ་བཅུ་དྲུག་འཁོདཿ ཕ་གུ་སེར་པོ་དྲྭ་བ་དྲྭ་ཕྱེད་མཛེསཿ ཤར་བུ་མདའ་ཡབ་ཁང་བརྩེགས་རྡོ་རྗེའི་ཏོགཿ ནང་ནི་དུར་ཁྲོད་རོལ་བའི་གཞལ་མེད་ཁངཿ ཕྱི་འཁོར་རོ་གླིང་བརྒྱད་དང་རྡོ་རྗེའི་གུརཿ བསྐལ་མེད་འུར་འུར་ཆེམ་ཆེམ་འབར་བའི་ཀློངཿ འོག་མིན་གསང་ཆེན་རོལ་བའི་ཕོ་བྲང་ཆེཿརབ་འཇིགས་གནམ་ལྕགས་ཙཀྲ་རྩིབས་བརྒྱད་དབུསཿ བདེ་ཆེན་ཀུན་ཏུ་བཟང་མོའི་ཨེ་ཀློང་དུཿ བྱོལ་སོང་གཙོ་རྣམས་དྲེགས་པ་ཆེ་དགུ་བརྫིསཿ མ་ཆགས་པདྨ་ཐབས་ཤེས་ཉི་ཟླ་འབརཿ རུ་ཏྲ་ཀྲོ་ཏི་ཏི་ར་བཾཿཔཾ་པདྨ་མ་དྷ་ལཿ མ་སཱུརྱ་མ་དྷ་ལཿ ཨ་ཙཎྜ་མ་དྷ་ལཿ ཧཱུྃ་རང་བྱུང་རྒྱུ་ཡི་ཧེ་རུ་ཀཿཡི་ཤེས་དབྱིངས་ནས་གདན་ལ་བབསཿ མཉམ་སྦྱོར་བདེ་བ་ཆེན་པོའི་སྒྲསཿ འཕགས་པ་མཆོད་ཅིང་གཞན་དོན་བྱསཿ ཡོངས་འགྱུར་འབྲས་བུའི་ཧེ་རུ་ཀཿཆེ་མཆོག་བཛྲ་ཐོད་ཕྲེང་རྩལཿ མཐིང་ནག་དབུ་གསུམ་ཕྱག་
དྲུག་པཿཞབས་བཞི་གྱད་ཀྱི་དོར་སྟབས་བགྲདཿ རྒྱལ་འགོང་བདུད་བཞིའི་དཔྱི་ནས་བརྫིསཿ གཡས་དཀར་དགོད་ཅིང་གཤེ་བའི་ཞལཿ གཡོན་དམར་ཨམ་གཙིགས་འཇིགས་པར་སྟོནཿ དབུས་མཐིང་རྔམ་བརྗིད་ཁྲོ་བོའི་ཞལཿ སྐུ་མཆོག་རིགས་ལྔ་དབུ་ལ་རྫོགསཿ རྡོ་རྗེ་བྱ་ཁྱུང་སྤྱི་བོར་ལྡིངཿ སྤྱན་དགུ་ལྗགས་འདྲིལ་མཆེ་བ་གཙིགསཿ གཡས་ཀྱི་དང་པོ་རྡོ་རྗེ་དངཿ བར་པ་ཁ་ཊཱཾ་ཐ་མ་མེཿགཡོན་གྱི་དང་པོ་བྷནྡྷ་དམརཿ བར་པ་ཐོང་གཤོལ་ཐ་མ་ནཿ ལྕགས་ཀྱི་སྡིག་པ་མགོ་དགུ་བསྣམསཿ དུར་ཁྲོད་དཔལ་གྱི་ཆས་རྣམས་རྫོགསཿ གནམ་ཞལ་ཡུམ་མཆོག་ཀུན་བཟང་སྦྱོརཿ གཡས་པ་གཙོ་འཁྱུད་ཁ་ཊཱཾ་བསྣམསཿ གཡོན་པ་ཆགས་པའི་དུང་དམར་སྟོབཿ སྐུ་མདོག་སྔོན་མོ་རྒྱན་དང་ལྡནཿ བསྐལ་པའི་མེ་དཔུང་འབར་བའི་ཀློངཿ དགའ་བཞི་བདེ་བ་ཆེན་པོར་བཞུགསཿ དཔལ་ཆེན་ཡབ་ཡུམ་སྦྱོར་མཚམས་ནསཿ ཕྱོགས་བཞི་མཚམས་བཞིའི་རྩིབས་སྟེངས་སུཿ མཐིང་ནག་ཧཱུྃ་གི་ཡི་གེ་སྤྲོསཿ ཁྲག་འཐུང་ཡབ་ཡུམ་སྲས་བཅས་བསྐྱེདཿ ཧཱུྃཿཧཱུྃཿཧཱུྃཿཧཱུྃཿཧཱུྃཿཧཱུྃཿཧཱུྃཿཧཱུྃཿཧཱུྃ་ཆེན་སྔགས་ཀྱི་སྒྲ་བསྒྲགས་པསཿ ཁྲོ་རྒྱལ་དཀྱིལ་འཁོར་ལྷུན་གྱིས་གྲུབཿ བསྐལ་པའི་མེ་ལྟར་འབར་ཀློང་ནསཿ རང་བྱུང་ཡེ་ཤེས་
ཁྲོ་ཚོགས་ཤརཿ ཤར་དུ་བཛྲ་ཧེ་རུ་མཐིངཿ རྡོ་རྗེ་གཡས་ལ་དུང་ཁྲག་གཡོནཿ བཛྲ་ཀྲོ་ཏི་ཤྭ་རཱི་སྦྱོརཿ ལྷོ་རུ་འཇམ་དཔལ་གཤིན་རྗེ་སེརཿ བེ་ཅོན་གཡས་ལ་སྡིག་མཛུབ་གཡོནཿ བཻ་ཏ་ཟ་བྱེད་ནག་མོ་ཡུམཿ ནུབ་ཏུ་དབང་ཆེན་རྟ་མགྲིན་དམརཿ རལ་གྲི་གཡས་ལ་པདྨ་གཡོནཿ པདྨ་གཟི་ལྡན་ཁྲོ་རྒྱལ་ཡུམཿ བྱང་དུ་རྡོ་རྗེ་གཞོན་ནུ་ལྗངཿ ཕྱག་གཉིས་རྡོ་རྗེ་ཕུར་བུ་འདྲིལཿ འཁོར་བ་རྒྱས་འདེབས་དཔལ་གྱི་ཡུམཿ ཤར་ལྷོ་བླ་མེད་ཧེ་རུ་ཀཿམཐིང་ནག་བྱ་ཁྱུང་ཞིང་དབྱུག་ཐོགསཿ ཡུམ་ཆེན་ཉིད་ཞི་བདེ་མཆོག་མཿ མ་ལྔ་ལ་སོགས་འཁོར་དང་བཅསཿ ལྷོ་ནུབ་རིག་འཛིན་རྡོ་རྗེ་དཀརཿ ཐོད་དབྱུག་གཡས་ལ་དྲིལ་བུ་གཡོནཿ བདེ་ཆེན་རྡོ་རྗེ་རྣལ་འབྱོར་ཡུམཿ ནུབ་བྱང་དྲེགས་པ་ཀུན་འདུལ་མཐིངཿ ཐོ་བ་གཡས་ལ་མདུང་ཐུང་གཡོནཿ ཁམས་གསུམ་སྲིད་པ་སྤྱི་འདུལ་ཡུམཿ བྱང་ཤར་སྟོབས་ལྡན་ནག་པོ་ཆེཿལྕགས་ཀྱུ་གཡས་ལ་སྦྲུལ་ཞགས་གཡོནཿ འབྱུང་བ་ལྔ་ཡི་བདག་མོ་ཡུམཿ གཟུགས་ཁམས་མཁར་འདེགས་འདོད་ཁམས་གནོནཿ ཀུན་ཀྱང་རིགས་བཞིའི་འཁོར་དང་བཅསཿ ཞབས་ཀྱི་ལྷ་ཆེན་ཕོ་མོ་བརྫིསཿ ཆོས་ཉིད་མི་འགྱུར་ཡུམ་རྣམས་མཐིངཿ གྲི་གུག་ཐོད་འཛིན་ཡབ་ལ་འཁྱུདཿ ཕྱི་
རོལ་སྒོ་བ་རིགས་བཞི་ནིཿ ལྕགས་ཀྱུ་ཞགས་པ་ལྕགས་སྒྲོགས་དྲིལཿ ཚོམ་བུ་དགུ་ཡི་དཀྱིལ་འཁོར་ལྷཿབདུན་བརྒྱ་ཉེར་ལྔའི་ལྷ་ཚོགས་ཀུནཿ ཉི་ལས་འོད་ཟེར་བཞིན་དུ་ཤརཿ སྐུ་མདོག་ཕྱག་མཚན་རྒྱན་ཆ་ལུགསཿ མ་འདྲེས་ཡོངས་རྫོགས་ཆེན་པོར་གསལཿ བཅུ་པ་དབང་བསྐུར་བ་ནིཿ ཧཱུྃཿརང་ལས་ཤར་བའི་དཔལ་ཆེན་ཚོགསཿ མཐུ་རྩལ་ཡོངས་སུ་རྫོགས་བྱའི་ཕྱིརཿ སྐུ་གསུང་ཐུགས་སུ་བྱིན་བརླབ་ཅིངཿ ཡེ་ཤེས་ལྔ་ཡི་དབང་བསྐུར་རོཿཨོཾ་ཨཱཿཧཱུྃཿཨོཾ་ཧཱུྃ་སྭཱ་ཧྲཱིཿཨཿརང་གི་སྤྱིར་བོར་ཟླ་བ་ལ་ཨོཾཿམགྲིན་པར་པདྨ་ལ་ཨཱཿསྙིང་གར་ཉི་མ་ལ་ཧཱུཾ་གིས་མཚན་པ་ལས་འོད་ཟེར་འཕྲོསཿ དེ་བཞིན་གཤེགས་པ་ཐམས་ཅད་སྤྱན་དྲངསཿ ཡི་གེ་གསུམ་ལ་ཐིམཿ དེ་ཡོངས་སུ་གྱུར་པ་ལསཿ སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡེ་ཤེས་རྡོ་རྗེའི་ངོ་བོར་རྣམ་པ་ཉི་ཤུས་བྱང་ཆུབ་པའི་ལྷཿསྤྱི་བོར་རྣམ་སྣང་དཀར་པོ་འཁོར་ལོ་འཛིན་པཿམགྲིན་པར་སྣང་མཐའ་དམར་པོ་པདྨ་འཛིན་པཿཐུགས་ཀར་མི་བསྐྱོད་པ་སྔོན་པོ་རྡོ་རྗེ་འཛིན་པས་རྒྱས་བཏབ་པསཿ གཞི་ལམ་འབྲས་བུའི་ཡོན་ཏན་ཡོངས་སུ་རྫོགས་པར་གྱུརཿ རྡོ་རྗེ་རྩེ་ལྔ་པ་དང་གསུམ་པ་དངཿ གཅིག་པ་ཕྱག་རྒྱ་གནས་སོ་སོར་གཏུག་ཅིངཿ ཨོཾ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཏྨ་ཀོ྅ཧཾཿདེ་བཞིན་དུ་ཝཀྐ་དངཿ
ཙིཏྟ་ཡང་སྦྱར་རོཿ ཡང་སྤྱི་བོའི་གནས་སོ་སོར་རིགས་ལྔའི་དབང་རྒྱ་བཅས་ལཿ ཨོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་ས་བྷ་ཝ་ཨཱཏྨ་ཀོ྅ཧཾཿཨོཾ་དེ་བཞིན་དུཿ ་མ་ཧཱ་ཨ་དརྴཿཨོཾ་མ་ཧཱ་ས་མ་ཏཿཨོཾ་མ་ཧཱ་པྲ་ཏྱ་བེ་ཀྵ་ཎཿ ཨོཾ་མ་ཧཱ་ཀྲྀ་ཏྱཱ་ནུཥྛ་ན་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾཿསྤྱི་བོའི་གནས་ལྔར་དབང་ལྷ་ཡབ་ཡུམ་རྗེས་ཆགས་རྒྱས་པའི་ཞུ་བདེའི་ཆུ་རྒྱུན་བྱང་ཆུབ་སེམས་ཀྱི་རོལ་པས་དབང་བསྐུརཿ ཉོན་མོངས་པ་ལྔའི་དྲི་མ་སྦྱངསཿ ཕུང་པོ་ལྔ་རིགས་ལྔའི་སངས་རྒྱས་སུ་གནས་འགྱུར་བས་ཀུན་བརྟགས་ལ་གཞན་དབང་གིས་རྒྱས་བཏབཿ ཆུ་ལྷག་མ་སྤྱི་བོར་ལུད་པ་ལསཿ གཞན་དབང་ལ་ཡོངས་གྲུབ་ཀྱིས་རྒྱས་ཐེབས་ཤིང་ཡེ་ཤེས་འགྱུར་བ་མེད་པའི་བརྡར་དབུ་གཙུག་ན་རྡོ་རྗེ་ཕྱེད་པ་དངཿ རིགས་བདག་སྣང་བ་མཐའ་ཡས་ཀྱིས་དབུ་བརྒྱན་པར་གྱུརཿ རང་གི་འདུན་པ་སེམས་པ་དངཿ སྙིང་གའི་འོད་ཀྱི་རོལ་པ་ཆེན་པས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ནམ་མཁའ་གང་བའི་དཀྱིལ་འཁོར་གྱི་འཁོར་ལོར་བཛྲ་ས་མ་ཛཿཞེས་སྙན་བརྣན་ལཿ བཅུ་གཅིག་པ་སྤྱན་འདྲེན་པ་ནིཿ ཚིལ་ཆེན་དང་སྦྱར་སྤོས་བསྲེག་ཅིང་རོལ་མོའི་སྒྲ་དང་བཅསཿ ཧཱུྃཿའོག་མིན་ཆོས་དབྱིངས་བདེ་ཆེན་ཞིང་ཁམས་ནསཿ ལྷུན་གྲུབ་རོལ་པ་ཡེ་ཤེས་ཀློང་དགུའི་གརཿ ཞི་ཁྲོ་རབ་འབྱམས་དཔལ་ཆེན་བཀའ་བརྒྱད་ལྷཿ
གདུག་པ་འདུལ་ཕྱིར་གནས་འདིར་གཤེགས་སུ་གསོལཿ ཨེ་ཧྱ་ཧི་ཛཿཧཱུྃ་བཾ་ཧོཿས་མ་ཡ་ཧྲིང་ཧྲིང་ཛཿཛཿབཅུ་གཉིས་པ་བཞུགས་གསོལ་ནིཿ ཧཱུྃཿམ་དག་སྣང་བ་དག་པར་རབ་འབྱམས་ཀྱིཿརྟེན་དང་བརྟེན་པའི་འཁོར་ལོར་ཡོངས་ཤར་བཿ ཏིང་འཛིན་སྤྲུལ་པའི་ཞིང་མཆོག་ཉམས་དགའ་བརཿ དམ་ཡེ་གཉིས་མེད་ངོ་བོར་བརྟན་པར་བཞུགསཿ ས་མ་ཡ་ཨ་བེ་ཤ་ཡ་ཏིཥྛ་ལྷནཿ བཅུ་གསུམ་པ་ཕྱག་འཚལ་བ་ནིཿ ཧཱུྃཿརང་བྱུང་རང་ཤར་སྤྲུལ་པའི་དཀྱིལ་འཁོར་ལཿ བཟང་ངན་གཉིས་འཛིན་ཀུན་རྟོག་རྣམ་དག་ཀྱངཿ རང་རིག་ཆོས་སྐུར་མཇལ་བའི་བརྡའ་ཕྱག་གརཿ སྤང་བླང་མེད་པའི་ངང་ནས་བཙལ་བར་བགྱིཿ ཨ་ཏི་པུ་ཧོཿན་མ་ཡ་དྷིཿབཅུ་བཞི་པ་ཕྱག་རྒྱ་གར་མཆོད་ནིཿ ཧཱུྃཿསྒེག་དཔའ་འཇིགས་རུང་སྐུ་ཡི་གརཿ དགོད་གཤེ་དྲག་ཤུལ་གསུང་གི་གརཿ སྙིང་རྗེ་རྔམ་ཞི་ཐུགས་ཀྱི་གརཿ རང་བྱུང་གར་དགུའི་མཆོད་པ་བཞེསཿ མ་ཧཱ་མུ་དྲ་པཱུ་ཙ་ཏོཿབཅོ་ལྔ་པ་ཡེ་ཤེས་གླུའི་མཆོད་པ་ནིཿ ཧཱུྃཿདགའ་བ་བཅུ་དྲུག་རྡོ་རྗེའི་གླུཿཡེ་ཤེས་གླུ་དང་མཉམ་སྦྱོར་བཿ རང་ལས་བྱུང་ཞིང་རང་ལ་མཆོདཿ མི་རྟོག་ཡེ་ཤེས་མངོན་དུ་སྟོནཿ མ་ཧཱ་ཛྙཱ་ན་ཏེ་ཏེ་ཧཱུྃཿཏེ་ན་ཏེ་ཏེ་ཧཱུྃཿབཅུ་དྲུག་པ་ཉེར་སྤྱོད་འདོད་ཡོན་གྱི་མཆོད་པ་ནིཿ ཧཱུྃཿཉེར་སྤྱོད་ལྔ་དང་འདོད་ཡོན་ཀུནཿ
དབང་པོ་ལྔ་ཡི་རྒྱན་དུ་ཤརཿ མཆོད་པའི་ཕྱག་རྒྱ་ཆེན་པོ་ཡིསཿ དཔལ་ཆེན་ལྷ་ཚོགས་མཉེས་གྱུར་ཅིགཿ ཨོཾ་ཤྲཱི་བཛྲ་ས་པ་རི་ཝཱ་ར་དྷུ་པེ་ཧཱུྃཿཔུཥྤེ་ཏྲཱཾཿཨཱ་ལོ་ཀེ་ཧྲཱིཿགྷེནྡྷཻཿཧོཿནཻ་ཝི་དྱེ་ཨཱཿཤཔྟ་ཧཱུྃཿསརྦ་པཱུ་ཛ་ས་མ་ཡ་ཧོཿབཅུ་བདུན་པ་གསང་བ་དུག་གསུམ་གནས་སུ་དག་པའི་མཆོད་པ་ནིཿ ཧཱུྃཿའདོད་ཆགས་ཁྲག་ཆེན་ཞེ་སྡང་རུསཿ གཏི་མུག་ཤ་སྟེང་དུག་གསུམ་ཡངཿ གདོད་ནས་སྐུ་གསུམ་ཆེན་པོའི་ངངཿ རང་ལས་ཤར་ཞིང་རང་སར་གྲོལཿ ཧ་ལ་པཉྩཱ་པཱུ་ཛ་ཧོཿབཅོ་བརྒྱད་པ་སྨན་མཆོད་ནིཿ རྡོ་རྗེའི་དམ་ཚིག་རྨད་པོ་ཆེཿརྩ་བརྒྱད་སྟོང་ལ་སྦྱར་བའི་བདུདཿ རྒྱུ་དྲུག་སྡུག་བསྔལ་འཇོམས་པའི་རྩིཿརིགས་ལྔ་ཡེ་ཤེས་ལྔ་ཡི་དངོསཿ ཨོཾ་ཨཱཿཧཱུྃ་སརྦ་པཉྩ་ཨམྲྀ་ཏ་ཧཱུྃ་ཧྲཱིཿཋཿདབྱིངས་རིག་ཡབ་ཡུམ་སྣང་སྟོང་ཧེ་རུ་ཀཿཆོས་ཀྱི་རྡོ་རྗེ་མཁའ་འགྲོ་ལས་ཀྱི་དབངཿ རིག་འཛིན་འདུས་པ་བླ་མའི་དཀྱིལ་འཁོར་ལཿ མྱོང་གྲོལ་བདུད་རྩིའི་སྨན་གྱི་མཆོད་པ་འབུལཿ སརྦ་པཉྩ་ཨམྲྀ་ཏ་ཁ་རཾ་ཁཱ་ཧིཿའཇམ་དཔལ་རྡོ་རྗེ་ཁྲི་སྲོང་ལྡེའུ་བཙནཿ གྲུབ་ཆེན་བརྒྱད་དང་ལས་ཅན་དག་པའི་འཁོརཿ བརྒྱུད་པ་བདུད་ལྡན་ཐུགས་གཏེར་བདག་པོ་ལཿ མྱོང་གྲོལ་བདུད་རྩི་སྨན་གྱི་མཆོད་པ་འབུལཿ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧིཿཡེ་ཤེས་དགུ་རྫོགས་ཁྲག་
འཐུང་དཀྱིལ་འཁོར་ལྷཿདཔལ་གྱི་བཀའ་སྡོད་འཇིག་རྟེན་དྲེགས་པའི་སྡེཿབདུན་བརྒྱ་ཉེར་ལྔ་བསམ་ཡས་ལྷུན་གྲུབ་ལཿ མྱོང་གྲོལ་བདུད་རྩི་སྨན་གྱི་མཆོད་པ་འབུལཿ སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧིཿབཅུ་དགུ་པ་དངོས་གྲུབ་བླང་བ་ནིཿ བདུད་རྩི་སྙིང་པོ་ཅན་གྱི་དབུསཿ སངས་རྒྱས་ཀུན་ཀྱི་སྐུ་གསུང་ཐུགསཿ ཡི་གེ་གསུམ་གྱི་རྣམ་པ་ཅནཿ དམ་ཚིག་ཕྱག་རྒྱ་གཉེན་པོས་བླངཿ ཀཱ་ཡ་སིདྡྷི་ཨོཾཿཝཱཀྐ་སིདྡྷི་ཨཱཿཙིཏྟ་སིདྡྷི་ཧཱུྃཿམཐེབ་སྲིན་ཉི་ཟླའི་གའུས་བླངཿ ཉི་ཤུ་པ་དམ་རྫས་གཏོར་མའི་མཆོད་པ་ནིཿ ཧཱུྃཿབྷ་ག་ཡངས་པའི་གཏོར་གཞོང་དུཿ ལིངྒ་འདོད་ཡོན་གཏོར་མར་འབརཿ རྡོ་རྗེ་བཟའ་བའི་དམ་ཚིག་རྫསཿ ཨ་ལ་ལ་སྟེ་དགྱེས་པར་རོལཿ མ་ཧཱ་བ་ལིང་ཏ་ཁཱ་ཧིཿཉེར་གཅིག་པ་རཀྟའི་མཆོད་པ་ནིཿ ཧཱུྃཿལྕང་ལོར་བཅས་པའི་དུང་ཆེན་དུཿ ཆགས་སྡང་དབྱིངས་སུ་བསྒྲལ་བའི་ཁྲགཿ འཁོར་བ་གནས་སུ་དག་བྱའི་ཕྱིརཿ བླང་དོར་མེད་པར་བཞེས་སུ་གསོལཿ མ་ཧཱ་རཀྟ་ཁཱ་ཧིཿཉེར་གཉིས་པ་བདུད་རྩི་གསང་ནན་ནིཿ ཧཱུྃཿཡབ་དང་ཡུམ་གྱི་རྒྱུ་གཉིས་ཀྱངཿ ཕྱག་རྒྱ་བཞི་ཡི་རྐྱེན་གྱིས་སྦྱརཿ དུག་ལྔ་སྨན་དུ་གྱུར་པའི་རྫསཿ ཛ་གད་དཔའ་བོའི་བདུད་རྩིས་མཆོདཿ མ་ཧཱ་བཛྲ་ཨ་མྲྀ་ཏ་ཛ་གད་པཱུ་ཛ་ཧོཿཉེར་གསུམ་པ་སྦྱོར་སྒྲོལ་གྱི་མཆོད་པ་ནིཿ ཧཱུྃཿརྡོ་རྗེ་པདྨོའི་
གྲོང་ཁྱེར་ལཿ སྙོམས་པར་ཞུགས་པར་རབ་བསྐུལ་བསཿ ལྷ་ཚོགས་ཀུན་ཀྱང་མཉེས་གྱུར་ཏེཿསྡུག་བསྔལ་བདེ་བ་ཆེན་པོར་སྦྱོརཿ རྣམ་རྟོག་བདག་མེད་དབྱིངས་སུ་སྒྲོལཿ ཛཿཧཱུྃ་བཾ་ཧོཿཏ་ན་ག་ན་པཱུ་ཛ་ཧོཿཉེར་བཞི་པ་བསྟོད་པ་ནིཿ ཧཱུྃཿམི་སྡུག་སྲིན་པོའི་སྐུ་ནི་སྒེག་ཅིང་དཔའཿདྲག་ཤུལ་རྡོ་རྗེའི་གད་མོ་གཤེ་བའི་སྒྲཿམཆོག་ཏུ་ཞི་བའི་ཐུགས་ནི་སྙིང་རྗེ་རྔམསཿ གར་དགུས་ས་གསུམ་རྣམ་གནོན་ཁྱོད་ལ་བསྟོདཿ རྡོ་རྗེ་ཐོད་ཁྲག་ཆགས་སྡང་དབྱིངས་སུ་སྦྱོརཿ ཁ་ཊཱཾ་དཀུར་བརྟེན་ནས་ཕྲག་པར་སློང་བ། ཐོད་གཤོལ་དུག་གསུམ་ཐ་རྒོད་འཇོམསཿ མེ་དཔུང་ལྕགས་སྡིག་རྣམ་རྟོག་རྒྱལ་འགོང་གཤེདཿ རྟོག་མེད་དྲེགས་པ་འདུལ་ལ་ཕྱག་འཚལ་བསྟོདཿ ཆོས་སྐུ་འགྱུར་བ་མེད་པས་སྐུ་མདོག་མཐིངཿ དབུ་ནི་སྐུ་གསུམ་ཕྱག་ནི་ཕར་ཕྱིན་དྲུགཿ ཞབས་ནི་ཚད་མེད་བཞི་ཡི་རང་བཞིན་ཏེཿརྟགས་དང་ཡོན་ཏན་རྫོགས་པའི་སྐུ་ལ་བསྟོདཿ ཆོས་ཉིད་གཅིག་ལ་ཡེ་ཤེས་ཀློང་དགུའི་རྩལཿ གདུལ་བྱའི་ཁམས་ལ་དགྱེས་ཆགས་ཁྲོ་བའི་ཉམསཿ རོལ་བའི་ཆོ་འཕྲུལ་མི་བཟད་འབར་བའི་སྐུཿ བདུན་བརྒྱ་ཉེར་ལྔའི་དཀྱིལ་འཁོར་ལྷ་ལ་བསྟོདཿ ཉི་ཤུ་རྩ་ལྔ་འཛབ་དོན་ལཿ བསྟེན་དང་སྒྲུབ་པ་ལས་སྦྱོར་རོཿ དང་པོ་
ཞི་བར་བསྙེན་པ་ནིཿ བདག་ཉིད་ཆེ་མཆོག་ཡབ་ཡུམ་གྱིཿ ཐུགས་མཆོག་འོད་ཀྱི་དྲྭ་བའི་ཀློངཿ གསལ་སྟོང་ཟུང་འཇུག་ཉི་ཟླའི་སྟེངཿ ཀུན་བཟང་ཡབ་ཡུམ་ཞལ་སྦྱོར་ལཿ རྡོ་རྗེ་སྐྱིལ་ཀྲུང་མཉམ་གཞག་ཅནཿ ཐུགས་ཀར་བདེ་གཤེགས་ཀུན་ཀྱི་སྲོགཿ ཡི་གེ་འབྲུ་གསུམ་བརྩེགས་མར་གསལཿ དེ་ལས་འོད་འཕྲོས་སྣང་སྲིད་ཀུནཿ ཡེ་ཤེས་ལྔ་རུ་སངས་རྒྱས་བསམཿ འཁོར་འདས་རོ་གཅིག་ལྟ་བའི་ངངཿ ཨོཾ་ཨཱ་ཧཱུྃཿརིགས་རྣམས་ཀུན་ཀྱི་དབང་ཕྱུག་མཆོགཿ སངས་རྒྱས་ཀུན་ཀྱི་མེས་པོ་སྒོམཿ རྒྱལ་བའི་དཀྱིལ་འཁོར་བསམ་ཡས་ཀུནཿ བདེ་གཤེགས་གཅིག་སྒྲུབ་ཀུན་ཀྱི་ངངཿ གྲངས་ཀྱི་བསྙེན་པ་བྱེ་བ་གསུམཿ ཚེ་གཅིག་བྱང་ཆུབ་འདོད་པ་རྣམསཿ འདི་ལ་རྟག་ཏུ་ནན་ཏན་གྱིསཿ འབྱུང་འཇུག་སྔགས་སུ་གོམས་པ་ནཿ ཕུང་པོ་འོད་སྐུར་དེངས་པར་འགྱུརཿ ས་མ་ཡཿགཉིས་པ་ཁྲོ་བོར་བསྒྲུབ་པ་ནིཿ ཡེ་ཤེས་རྒྱལ་པོ་སྟང་དཔྱལ་གྱིཿ ཐུགས་ཀར་པདྨ་ཉི་ཟླའི་སྟེངཿ གསེར་གྱི་རྡོ་རྗེ་རྭ་དགུ་པའིཿདབུས་རྭར་ཏིང་འཛིན་སེམས་དཔའ་ཧཱུྃཿ རྭ་བརྒྱད་མདུན་ནས་རིམ་པ་བཞིནཿ ཐོག་མཐའ་གཉིས་དང་གྲོང་ཁྱེར་དྲུགཿ ཀུན་ཀྱང་ཐུགས་ཀའི་ཧཱུྃ་ལ་བལྟཿ ཤིན་ཏུ་ཕྲ་ཞིང་འོད་ཟེར་འབརཿ ཨོཾ་གུ་རུ་ཤྲཱི་བཛྲ་ཡཀྵ་ཀྲོ་དྷ་ཙིཏྟ་ཧཱུྃཿ ལྷ་ལ་གསལ་སྣང་ཐོན་པ་དངཿ འཕྲོ་འདུའི་གཟེར་ལ་
ལྡེ་ཁ་བསྒྱུརཿ རང་རང་སྔགས་ཀྱི་ཡིག་འབྲུ་ལསཿ སྔགས་ཕྲེང་ལུ་གུ་རྒྱུད་དུ་ཐོནཿ ཡབ་ནས་ཡུམ་གྱི་ཞལ་དུ་ཞུགསཿ སྐུ་ཡི་དབྱིབས་བརྒྱུད་མཁའ་གསང་ནསཿ རྡོ་རྗེ་ནོར་བུའི་ལམ་ཞུགས་ཏེཿཐུགས་སྲོག་ཧཱུྃ་ལ་ཐིམ་ཞིང་འཁོརཿ བདེ་བ་ཆེན་པོའི་འོད་ཟེར་གྱིསཿ རྒྱལ་བ་མཆོད་ཅིང་དངོས་གྲུབ་དབྱིགཿ ཐམས་ཅད་བསྡུས་ནས་རང་ལ་བསྟིམཿ སླར་འཕྲོས་འགྲོ་བའི་ལས་ཉོན་སྦྱངསཿ ཀུན་ཀྱང་དཔལ་ཆེན་གོ་འཕངས་ལཿ དང་པོར་མོས་པས་འགོད་པ་སྟེཿལྷ་དང་ཞིང་ཁམས་ཆོས་ཉིད་གསུམཿ གཅིག་ཏུ་འདྲེས་པའི་གཟེར་ཐེབས་ཚེཿརང་སྣང་དོན་གྱི་འོག་མིན་དུཿ འཚང་རྒྱ་འདི་ལ་ཐེ་ཚོམ་མེདཿ ཧཱུྃཿཧཱུྃཿཧཱུྃཿལྷ་ཚོགས་འཕྲོ་འདུ་བསམ་ཡས་ཀྱངཿ གཙོ་བོ་གཅིག་པུའི་ཆོ་འཕྲུལ་ཏེཿདཔལ་ཆེན་སྲོག་ལ་དབང་ཐོབ་ནཿ ཚོམ་བུའི་འཁོར་ལོ་མ་སྒྲུབ་ཤརཿ ཨོཾ་བཛྲ་ཙཎྡྲ་སརྦ་དུཥྟཾ་ཏ་ཀ་ཧ་ན་ད་ཧ་པ་ཙ་ཧཱུྃ་ཕཊཿལྷ་ཚོགས་ཀུན་ཀྱང་སྤྱི་དྲིལ་སྔགསཿ འུར་ཆེམ་འབྲུག་གི་སྒྲ་བཞིན་སྒྲོགཿ ལྔ་ལྡན་འོད་ཀྱིས་སྟོང་གསུམ་གངཿ ནད་གདོན་ཞི་ཞིང་ཚེ་དཔལ་རྒྱསཿ ཁམས་གསུམ་དབང་འདུས་དམིགས་བྱ་བསྒྲལཿ རིག་འཛིན་བཞི་ཡི་གནས་ཐོབ་བསམཿ གཙོ་ལ་འབྲུ་འབུམ་ལས་རུང་སྟེཿ གཞན་དུ་དེ་ཡི་བཞི་འགྱུར་ལཿ སྤྱི་དྲིལ་བཅུ་ཆ་དག་ཏུའོཿ འདི་ནི་བླ་མ་ཡི་དམ་གྱིཿ རྣམ་པར་བསྒྲུབས་
པས་བྱིན་རླབས་མྱུརཿ གལ་པོ་ལ་སོགས་ཧེ་རུ་ཀའིཿ ཏནྟྲ་ཀུན་གྱི་བཅུད་ཀྱང་འདྲིལཿ ལས་ལ་མི་ལྟོས་དཔལ་ཆེན་པོའིཿ སྲོག་ནས་འཕྲོག་པས་རྣོ་ལ་མྱུརཿ དབང་གི་ཆུ་བོ་མ་ཉམས་སྟེངཿ བརྒྱུད་པ་བདུན་ལྡན་སྒྲུབ་ཐག་ཉེཿགསང་ཆེན་རྒྱུད་སྡེ་རྒྱ་མཚོ་ཀུནཿ སྒྲུབ་སྡེ་ཆེན་པོ་བརྒྱད་ལ་འདུཿ རིག་འཛིན་བརྒྱད་དང་མཁས་པ་བཞིཿགོང་འོག་རྒྱ་མཚོ་ལྟ་བུའི་འཇིངཿ བརྒལ་བར་མི་ནུས་བློ་དམན་ལཿ བཅུད་འདྲིལ་འདི་ལས་གཞན་མ་གསུངསཿ གུ་ཧྱཿགསུམ་པ་ལས་ལ་སྦྱོར་བ་ནིཿ སྐད་ཅིག་གནམ་ལྕགས་རྡོ་རྗེ་ནིཿ རྩེ་དགུ་སྟོང་གསུམ་གང་བའི་ཁྱོནཿ སྦུབས་སྟོང་འབར་བའི་ལྟོ་བ་རུཿདཔལ་དགུ་རྔམས་པའི་དྲགས་སྔགས་སྒྲོགསཿ ཡར་རྩེ་བརྒྱད་ཀྱི་སྲོག་ཤིང་ལཿ ཐུབ་དབང་བདུད་འདུལ་ཆ་བྱད་ཅནཿ རྣམ་པ་བཞི་ཡི་འཁོར་གྱིས་བསྐོརཿ རྭ་ལ་རིག་འཛིན་གྲུབ་ཐོབ་བརྒྱདཿ མཉེན་ཞུ་ཕོད་ཆེན་སྡིག་མཛུབ་ཅནཿ དྲང་སྲོང་དམོད་པ་ལས་ཀྱི་ཆསཿ ཀུན་ཀྱང་ཛཿབྷྱོཿཕཊཿཀྱི་སྒྲསཿ འགུགས་བསྒྲལ་སྦར་བའི་ལས་ལ་བརྩོནཿ མར་རྩེ་དགུ་ཡིས་འགོང་པོ་དགུའིཿ སྙིང་ག་དབང་ཆེན་གཞི་ལ་ཕུགཿ འཆང་བཟུང་ཙཀྲ་རྩིབས་བརྒྱད་པའིཿ མཆན་ལ་སྤྲུལ་པའི་ལྕགས་སྡིག་འཕྱོཿ སྤུ་གྲི་གཡོན་དུ་འཁོར་བ་ཡིསཿ གནོད་བྱེད་དགྲ་གདོན་ཉལ་ཉལ་གཏུབསཿ སྡིག་པས་ཧབ་ཧབ་ཟོས་པ་ཡིསཿ ལོག་པར་འདྲེན་པའི་དགྲ་འདྲེ་དངཿ
ཁྱད་པར་འགོང་པོ་སྤུན་དགུའི་སྡེཿརྫས་ལ་མེ་མཆེད་ལྟ་བུར་བསམཿ ཨོཾ་ཨཱཿཧཱུྃ་བཛྲ་ཡཀྴ་ཀྲོ་དྷ་སརྦ་དུཥྚཾ་ཧ་ན་ཧ་ན་ཧཱུྃ་ཕཊཿམ་འོངས་བསྐལ་པའི་ཐ་མ་ལཿ སྔགས་ལ་སྤྱོད་ཅིང་དམ་ཚིག་དྲལཿ དེ་དག་འགོང་པོའི་དབང་གྱུར་ཏེཿབྱ་རུ་མི་རུང་སྣ་དགུ་སྤྱོདཿ དེ་ཀུན་བདག་ཏུ་ལྟ་ལས་བྱུངཿ དེ་ཡི་རྒྱུ་འབྲས་འཇོམས་པ་ལཿ གཉེན་པོ་འདི་ལས་གཞན་དུ་མེདཿ སྲོག་ཆགས་བསད་དང་རི་ཆེན་བསྙིལཿ དྲེགས་པ་དམ་ལ་ཆུད་པའི་རྟགསཿ ཉམས་དང་སྤྱད་ཞིང་རིག་པས་དཔགཿ ཏིང་འཛིན་མི་ལྡན་རང་ལ་སྡིགསཿ དེ་ཕྱིར་མཁས་པས་འཚོ་ཤེས་བྱཿསྲི་ཀེག་བྱད་ཕུར་ལ་སོགས་པཿཀུན་ལ་རིག་པའི་ལྡེ་ཁ་བསྒྱུརཿ བར་ཆད་འདུལ་བར་ཐེ་ཚོམ་མེདཿ རྗེས་ལ་ཚོགས་ལས་རིམ་པ་ནིཿ ཧཱུྃཿདཔལ་ཆེན་ཐུགས་ལས་རཾ་ཡཾ་ཁཾཿའཕྲོས་པས་ཚོགས་ཀྱི་དངོས་འཛིན་སྦྱངསཿ སྣང་སྲིད་བདེ་ཆེན་ཀ་པཱ་ལརཿ བཅུད་རྣམས་རིགས་ལྔའི་དམ་རྫས་གྱུརཿ ཨོཾ་ཨཱཿཧཱུྃ་ཧ་ཧོ་ཧྲཱིཿསྤྱན་འདྲེན་ནིཿ ཧཱུྃཿའོག་མིན་ཆོས་དབྱིངས་ཕོ་བྲང་དངཿ ཡན་ལག་བདུན་ལྡན་ལོངས་སྤྱོད་རྫོགསཿ རང་བཞིན་སྤྲུལ་སྐུའི་ཞིང་ཁམས་ནསཿ དཔལ་ཆེན་དཀྱིལ་འཁོར་ལྷ་ཚོགས་དངཿ གནས་དང་ཉེ་གནས་རྣམ་པ་གཉིསཿ ཡུལ་ནི་རོལ་པ་ཉེ་ཡུལ་རོལཿ ཞིང་དང་ཉེ་བའི་ཞིང་དང་ནིཿ འདུ་དང་ཉེ་བའི་འདུ་བ་དངཿ ཚན་དྷོ་ཉེ་བའི་ཚན་དྷོ་སྟེཿ
ཧེ་རུ་ཀ་ཡི་གནས་བཅུ་དངཿ དུར་ཁྲོད་ཆེན་པོ་བསིལ་པའི་ཚལཿ ཨོ་ཌི་ཡ་ནར་པདྨ་བརྩེགསཿ ཟ་ཧོར་ཡུལ་ན་ཁུ་བྱུག་ཀློངཿ སེང་ཧའི་ཡུལ་ན་སྐུ་ལ་རྫོགསཿ ཁ་ཆེའི་ཡུལ་ན་ཧེ་ཆེན་རོལཿ བལ་པོའི་ཡུལ་ན་ཡ་མ་ཁཿཐོ་གར་ཡུལ་ན་གསང་ཆེན་རོལཿ ལི་ཡུལ་འཇིག་རྟེན་མངོན་རྫོགས་ཏེཿདུར་ཁྲོད་ཆེན་པོ་བརྒྱད་རྣམས་ནཿ བཞུགས་པའི་དཔའ་བོ་མཁའ་འགྲོ་དངཿ ཤུགས་འགྲོ་རྣལ་འབྱོར་ཞིང་སྐྱོང་དངཿ ཚོགས་ལ་སྤྱན་འདྲེན་གཤེགས་སུ་གསོལཿ ཚོགས་ཁང་འདི་ནི་སྤྲུལ་པའི་ཞིངཿ ཚོགས་རྫས་འདོད་ཡོན་རོལ་པའི་རྒྱནཿ ཐབས་དང་ཤེས་རབ་ལྕམ་དྲལ་ལྡནཿ རྡོ་རྗེ་གླུ་གར་བྱིན་རེ་ཆགསཿ ཅང་ཏེའུ་དྲིལ་བུ་སྙན་ཅིང་འཁྲོལཿ འདི་ནི་དམ་ཚིག་མཆོག་གི་གནསཿ གཤགས་དང་རྩོད་པ་ཀུ་ཅོ་མེདཿ རིག་པ་བརྟུལ་ཞུགས་ཉམས་དང་ལྡནཿ དམ་ཚིག་འདི་ནི་དང་དུ་བཞེསཿ མཆོག་དང་ཐུན་མོང་དངོས་གྲུབ་སྩོལཿ གུ་རུ་ངྷེ་ཝ་ཌཱཀྐ་ཌཱཀྐི་ནི་དྷརྨ་པཱ་ལ་ས་མ་ཡ་ཛཿཕུད་དང་པོ་ནིཿ ཧཱུྃཿསངས་རྒྱས་དམ་ཚིག་བླ་ན་མེདཿ ཤ་ལྔ་བདུད་རྩི་རྣམ་པ་ལྔཿབཟའ་བཅའ་བཏུང་བ་ཕྱི་ཡི་ཚོགསཿ འདོད་ཡོན་ལྷ་མོ་རྣམ་པ་ལྔཿདབང་པོའི་ལོངས་སྤྱོད་ནང་གི་ཚོགསཿ བདེ་སྟོང་ཡེ་ཤེས་བླ་ན་མེདཿ དགའ་བཞི་རྣམ་རོལ་གསང་བའི་ཚོགསཿ དཀྱིལ་འཁོར་ལྷ་ལ་མཆོད་པ་འབུལཿ བཞེས་ནས་དབང་དང་དངོས་
གྲུབ་སྩོལཿ ག་ན་ཙཀྲ་པཱུ་ཙ་ཧོཿབར་བ་བཤགས་པ་ནིཿ ཧཱུྃཿ གང་ཞིག་འཁྲུལ་པར་གྱུར་པ་དེ་ནས་བཟུངཿ རྣམ་སྨིན་ལུས་ལ་བརྟེན་པ་དེ་སྲིད་དུཿ མི་དགེ་བཅུ་དང་མཚམས་མེད་ཉེ་བ་ལྔཿ ལྕི་བ་བཅུ་དྲུག་ལོག་པ་བརྒྱད་ལ་སོགསཿ ཐེག་པ་གསུམ་དང་རིག་པ་འཛིན་པ་ཡིཿསྡོམ་གསུམ་དམ་ཚིག་ཉམས་པ་མཐའ་དག་ཀུནཿ ག་ན་ཚོགས་ཀྱི་འཁོར་ལོ་ལ་བརྟེན་ནསཿ འཆད་པ་མེད་པའི་སེམས་ཀྱིས་མཐོལ་ལོ་བཤགསཿ དག་ཚངས་ཆེན་པོའི་དངོས་གྲུབ་བདག་ལ་སྩོལཿ ཧེ་རུ་ཀའི་ཡིག་བརྒྱ་བཟླའོཿཐ་མ་བསྒྲལ་མཆོད་ནིཿ ཨེ་ལས་ཐར་མེད་སྲིད་པའི་བྲུབ་ཁུང་ནངཿ མ་རིག་འཁྲུལ་པས་བཅིངས་པ་བདག་ལྟའི་དགྲཿཡེ་ཤེས་དབྱིངས་ལ་སྒྲིབ་པའི་གཟུང་འཛིན་བགེགསཿ དག་ཆེན་ཡེ་ཤེས་རིག་པའི་ལྕགས་ཀྱུས་ཟུངཿ མཉམ་པར་མ་བཞག་མེད་པའི་ཞགས་པས་ཆིངསཿ ལྷག་མཐོང་ལུ་གུ་རྒྱུད་ཀྱི་དྲྭ་བས་སྡོམསཿ རྗེས་ཐོབ་འཁྲུལ་པ་མེད་པའི་དྲིལ་བུས་མྱོསཿ ཕུང་པོ་ལྔ་ཡི་ཉེ་བར་ལེན་པ་ཀུནཿ བདག་མེད་རྟོགས་པའི་མཚོན་གྱིས་རྣམ་པར་གཏུབསཿ སྐྱེ་མེད་ཁྲོས་པའི་ལྷ་ཚོགས་ཞལ་དུ་བསྟབཿ མཱཾ་ས་རཀྟ་ཙིཏྟ་གོ་རོ་ཙ་ན་བྷ་སུ་ཏ་ཀེཾ་ནིརྟི་ཏ་ན་ཙཀྲ་པཱུ་ཙ་ཁ་ཁ་ཁཱ་ཧི་ཁཱ་ཧིཿ རྒྱས་པར་སྤྲོ་ན།
སྐབས་འདིར་སྐོངས་བཤགས་རྡོ་རྗེའི་ཐོལ་གླུས་ཐུགས་དམ་བསྐང་ངོཿདེ་ནས་ལྷག་མ་ནིཿ ཞིང་ལྤགས་ཀྱི་སྟེང་དུ་བཞག་ལཿ ཧེ་རུ་ཀའི་དམ་རྒྱས་ཁ་ཕྲུ་དབབཿ ཨ་ཀཱ་རོས་བརླབས་ཅིངཿ སྤྱུགས་གླུ་དང་བཅསཿ ཀྱཻཿ དང་པོ་ཕུད་ཀྱིས་མི་མཆོད་རྒྱུཿདཔལ་ཆེན་དཀྱིལ་འཁོར་ཚོགས་ཀྱི་བདགཿ བར་དུ་བཤགས་པ་མི་བགྱི་རྒྱུཿརྣལ་འབྱོར་ལྡན་ལ་དམ་ཚིག་གཉནཿ ཐ་མ་བསྒྲལ་བསྟབས་མི་བགྱི་རྒྱུཿ རྟོགས་པས་བདག་རྒྱུད་སྔོན་བསྒྲལ་ཕྱིརཿ ད་ལྟ་ལྷག་མས་མི་མཆོད་རྒྱུཿམ་ཚོགས་དབང་ཕྱུག་གིང་ལངྐཿཕོ་ཉ་སུམ་བརྒྱ་དྲུག་ཅུ་སོགསཿ ཀུན་ཀྱང་དཔལ་ཆེན་སྤྲུལ་པ་ཡིནཿ ལྷག་མ་ཁ་ཆུས་མི་བྲན་རྒྱུཿདམ་ཚིག་གཅིག་ཏུ་བསྲེ་བའི་ཕྱིརཿ འབངས་ཐོག་རྗེ་ཡིས་མི་མནན་རྒྱུཿཅི་བཅོལ་ལས་ལ་བསྐུལ་བའི་ཕྱིརཿ རྗེ་ལ་འབངས་ཀྱིས་མི་རྒོལ་རྒྱུཿདྲག་ཤུལ་ལས་ཐབས་མྱུར་བའི་ཕྱིརཿ ཧཱུྃཿརྣམ་དག་རང་བཞིན་ཞི་བ་ལསཿ བཅོམ་ལྡན་དཔལ་ཆེན་སྤྲུལ་པ་ནིཿ ཐབས་ཤེས་ཟླ་གསང་རོལ་པ་ལསཿ དཀྱིལ་འཁོར་མུ་རན་སྐྱོང་བ་སྟེཿཁྱེད་ཅག་སྔོན་གྱི་ཡལ་གམ་ཅནཿ ལག་ན་གློ་སྙིང་ནང་ཁྲོལ་ཐོགསཿ ལེགས་ཉེས་སྟངས་འཛིན་ཚོགས་ཁང་ཉུལཿ མཐུ་དང་རྫུ་འཕྲུལ་དཔག་ཏུ་མེདཿ སྔོན་ཚེ་དཔལ་ཆེན་ཧེ་རུ་ཀསཿ
དུག་གསུམ་རཱུ་ཏྲ་བསྒྲལ་བའི་ཚེཿཁས་བླངས་དམ་བཅས་དྲན་གྱིས་ལཿ སྲིན་མོའི་ཟ་ལམ་ཆེན་པོ་རུཿཕམ་ཕབས་ལོང་ལ་བསྟན་པ་སྲུངསཿ བཅོལ་བའི་ཕྲིན་ལས་འགྲུབ་པར་མཛོདཿ ཐུགས་དམ་བསྐུལ་བ་ནིཿ ཧཱུྃཿམི་གནས་ཡེ་ཤེས་ཆོས་སྐུའི་ཕོ་བྲང་ནསཿ ལོངས་སྤྱོད་རྫོགས་པ་ཞི་དང་ཁྲོ་བོའི་ལྷཿཐུགས་དམ་བསྐུལ་ལོ་འགྲོ་བའི་དོན་ལ་དགོངསཿ རིག་པའི་རང་བཞིན་བདེ་གཤེགས་སྙིང་པོ་ཡངཿ མ་རིག་འཛིན་པའི་ཀུན་གཞི་ལུང་མ་བསྟནཿ སྒོ་ལྔའི་ཡུལ་དང་རྟེན་ཅིང་འབྲེལ་བ་ལསཿ རིགས་དྲུག་རྒྱུད་ལྔའི་གནས་སུ་འཁྱམས་པ་རྣམསཿ ལས་དང་ཉོན་མོངས་མཐུ་ཡིས་གཟིར་བའི་མཐུཿཕྱི་རོལ་ཡུལ་ལ་སྨིན་པའི་སྡུག་བསྔལ་དངཿ ནད་མཚོན་མུ་གེ་དགྲ་བགེགས་འབྱུང་པོའི་གདོནཿ འཇིགས་པ་ཆེན་པོ་བརྒྱད་དང་བཅུ་དྲུག་ཀུནཿ མངོན་སྤྱོད་དྲག་པོའི་རོལ་པས་ཚར་བཅད་ནསཿ ལོག་རྟོག་དངོས་པོར་ཞེན་པའི་སེམས་ཅན་རྣམསཿ རྒྱུ་འབྲས་ཐེག་པ་གཞན་གྱིས་གདུལ་དཀའ་བསཿ རང་བྱུང་ཡེ་ཤེས་རྟོགས་པའི་ཕྲིན་ལས་མཛོདཿ ཆད་ཐོ་བསྒྲག་པ་ནིཿ ཧཱུྃཿདུས་གསུམ་རྣམ་དག་ཀུན་ཏུ་བཟང་པོའི་དུསཿ མངོན་རྫོགས་ཡེ་ཤེས་དམ་པའི་འོག་མིན་དུཿ ཀུན་གཞི་ཡིད་ཆོས་དག་པའི་
སྟོན་པ་ཡིསཿ རང་སྣང་རང་བཞིན་མེད་པའི་འཁོར་ཚོགས་ལཿ རྒྱལ་བ་དགོས་བརྒྱུད་རྫོགས་པའི་ཡོ་ག་གསུམཿ བརྡ་ཚིགས་བརྗོད་པ་བྲལ་བར་བསྟན་པའི་ཚེཿགྲགས་ཆེན་གསལ་བའི་སྟོན་པ་བཅུ་གཉིས་དངཿ དགའ་རབ་དཔའ་བོ་གསང་འཛིན་རྡོ་རྗེ་ཆོསཿ བརྡ་བརྒྱུད་རིག་འཛིན་གྲུབ་པ་མཆོག་རྣམས་ཀྱིསཿ སྟོན་འཁོར་དགོངས་པ་གཅིག་པའི་དབང་ཐོབ་བཞིནཿ ཚོགས་བརྒྱད་རང་གྲོལ་གཏོར་མ་འདི་བཞེས་ལཿ འཁྲུལ་བ་གཞི་ལ་དག་པའི་ཕྲིན་ལས་མཛོདཿ དེ་རྗེས་གསང་སྔགས་བསྟན་པ་བྱུང་བའི་ཚེཿའོག་སྨིན་དགའ་ལྡན་རི་རབ་ལྷུན་པོའི་རྩེཿལྷ་གནས་གསུམ་དུ་གྲགས་པའི་གནས་མཆོག་དངཿ ཤམ་བྷ་ལ་དང་ཨོ་རྒྱན་ཟ་ཧོར་ཡུལཿ སིངྒ་ལ་དང་གནམ་ལྕགས་འབར་བའི་རྩེཿམཆོད་རྟེན་ཆེན་པོ་བདེ་བྱེད་བརྩེགས་པ་རུཿརིག་འཛིན་སྡེ་སྣོད་མཐའ་དག་བབས་པའི་ཚེཿའཇིག་རྟེན་འཇིག་རྟེན་འདས་པའི་མཁའ་འགྲོ་དངཿ དཀྱིལ་འཁོར་མུ་རན་སྐྱོང་བ་ཐམས་ཅད་ཀྱིསཿ གཏོར་མ་ལེན་ཅིང་ལེགས་ཉེས་སྟངས་འཛིན་པའིཿཁས་བླངས་དམ་བཅའ་བཞིན་དུ་ཕྲིན་ལས་མཛོདཿ དེ་རྗེས་འགྲོ་དོན་དུས་ལ་བབས་པའི་ཚེཿཀླུ་སྒྲུབ་སྙིང་པོ་པདྨ་ཐོད་ཕྲེང་སོགསཿ གྲུབ་པའི་རིག་འཛིན་ཆེན་པོ་བརྒྱད་རྣམས་
ཀྱིསཿ འཛམ་བུའི་གླིང་དུ་དར་ཞིང་རྒྱས་མཛད་ཅིངཿ ཁྱད་པར་བྲག་དམར་དཔལ་གྱི་མཆིམས་ཕུ་རུཿརིག་འཛིན་སློབ་དཔོན་པདྨ་འབྱུང་གནས་ཀྱིསཿ ལྷ་སྲས་རྒྱས་པོ་ཚངས་པའི་མེ་ཏོག་ལཿ སྒྲུབ་པ་བཀའ་བརྒྱད་དཀྱིལ་འཁོར་ཞལ་ཕྱེ་ཞིངཿ སེངྒེ་རྣམ་རོལ་ཁས་པུ་རི་ཡི་རྩེརཿ གནོད་སྦྱིན་ཐམས་ཅད་དམ་ལ་བཞག་པའི་ཚེཿསྲོག་སྙིང་ཕུལ་ཏེ་ཆད་ཐོ་བཟུང་བ་ལྟརཿ མཆོད་གཏོར་བཞེས་ལ་ཕྲིན་ལས་གྲུབ་པར་མཛོདཿ དེ་རྗེས་ཚོགས་བདུན་རོལ་བ་བལ་པོའི་ཡུལཿ རང་སྣང་མཆོད་རྟེན་བྱ་རུང་ཁ་ཤོར་དུཿ རང་བྱུང་རྡོ་རྗེ་འཇིགས་མེད་གླིང་པ་ལཿ དབྱིངས་ཀྱི་མཁའ་འགྲོས་ནམ་མཁའ་མཛོད་ཀྱི་བརྡཿཡེ་ཤེས་ལྔ་ལྡན་སྤྲུལ་པའི་ཤོག་སེར་ལསཿ བྲག་དམར་བྲེ་གུ་བརྩེགས་པའི་དགེ་འུ་རུཿཀུན་ཏུ་བཟང་པོ་དྲི་མེད་འོད་ཟེར་གྱིསཿ བཀལ་རྒྱ་ལུང་རྫོགས་གཏད་རྒྱ་བཀྲོལ་བའི་ཚེཿསྤྱན་གཅིག་ཁྲག་ཏུ་ཁོལ་བའི་མ་མོ་དངཿ བྱ་རོག་གཙུག་ཕུད་འཛིན་པའི་དྲང་སྲོང་གིསཿ ཁས་བླངས་ཐ་ཚིག་བཞིན་དུ་ཕྲིན་ལས་མཛོདཿ བཤལ་ཆུ་གཏོར་མར་བྲན་ལ་བསྟན་མ་སྐྱོང་བ་ནིཿ བྷྱོཿཚོགས་དང་བཀའ་ཡེ་བདག་ཉིད་ནིཿ ཁྲག་འཐུང་རྡོ་རྗེ་ནམ་མཁའི་ཡུམཿ གངས་རི་ཅན་གྱི་ཡུལ་ལྷ་ནིཿ
བདུད་དང་གནོད་སྦྱིན་སྨན་མོ་བཞིཿཚུར་སྤྱོན་ཚུར་སྤྱོན་གཏོར་མ་ལོངསཿ རྟེན་འབྲེལ་ཡན་ལག་བཅུ་གཉིས་དངཿ དུས་སྦྱོར་བཅུ་གཉིས་གནས་དག་པསཿ བལ་བོད་མཚམས་ན་ཚེ་རིང་མཿ ལ་སྟོད་རྡོ་རྗེ་གཡའ་མ་སྐྱོངཿ གནོད་སྦྱིན་གངས་ལ་ཀུན་བཟང་མོཿ འབྲོག་ཆེན་འཁོར་འདུལ་བགེགས་ཀྱི་གཙོཿ ཇོ་མོ་གངས་རར་སྤྱན་གཅིག་མཿ བྱང་ན་མཁའ་ལྡིང་ཀླུ་མོ་རྒྱལཿ ཁ་རག་རྡོ་རྗེ་ཁྱུང་བཙུན་མཿ རྨ་ཆེན་སྤོམ་རར་དྲག་མོ་རྒྱལཿ ཀོང་བཙུན་དེ་མོ་བོད་ཁམས་སྐྱོངཿ འབྲོག་བཙན་རྡོ་རྗེ་སྨན་གཅིག་མཿ ཇོ་མོ་ནགས་རྒྱལ་གཡར་མོ་བསིལཿ དབུས་ན་རྡོ་རྗེ་ཟུ་ལེ་སྨནཿ ཀུན་ཀྱང་པདྨའི་བཀའ་ཉན་ཏེཿདམ་ལ་གནས་ཤིང་རིགས་ལ་འགོཿཐ་ཚིག་བཞིན་དུ་གཏོར་མ་ལོངསཿ མཐའ་ཡི་དམག་དང་རྒྱ་འདྲེའི་འཚུབསཿ མུ་སྟེགས་འགྱུ་བའི་སྒོ་འཕྲང་དངཿ འགོང་པོ་སྤུན་དགུའི་ནད་དལ་སྲུངསཿ རྟག་ཆད་ཐར་པར་འཁྲུལ་པ་ཡིཿའཇིགས་ཚོགས་ལྟ་བ་དབུ་མར་བཟློགཿ བདེན་དོན་རྣམ་པ་བཅུ་གཉིས་ཀྱིཿབསྟན་པ་དར་བའི་ཕྲིན་ལས་མཛོདཿ ཨོཾ་ལ་ལཿ ལེ་ལེཿཏཾ་ཏཾཿཏེ་ཏེ་ཁ་རག་མཿ མ་མ་སྲིང་འགྲོ་མ་ཧཱུྃ་བྷྱོ་ཧཱུྃ་ཧཱུྃཿགཏོར་གཞོང་རི་རབ་ཏུ་བསམ་པ་ཁ་སྦུབ་ལཿ ཧཱུྃཿ དམ་སྲི་བྱ་བའི་
སྡིག་ཅན་ཁྱོདཿ འགྲོ་བ་ཡོངས་ཀྱི་རྒྱུད་ལ་རྒོལཿ བྱང་ཆུབ་སེམས་ཀྱི་བརྟུལ་ཞུགས་བྲོསཿ མནན་ནོ་སྟོང་ཆེན་འོག་ཏུ་མནནཿ གཏད་དོ་ཆུ་སྲིན་གྲེ་བར་གཏདཿ བསྒྱུར་རོ་གཤིན་རྗེའི་ཁ་རུ་བསྒྱུརཿ བསྲེག་གོ་ཡེ་ཤེལ་མེ་ཡིས་སྲེགཿ བདག་ཏུ་བལྟ་བ་མ་ཞིག་པརཿ བསྐལ་པ་ཞིག་ཀྱང་མི་བཏང་ངོཿཨོཾ་ཨཱཿཧཱུྃ་སྟྭ་བྷ་ཡ་ལཾ་ནནཿ དེ་ནས་དངོས་གྲུབ་བླང་བ་ནིཿ སྔར་བཞིན་མཆོད་ཅིང་བསྟོད་ལཿ ཧཱུྃཿབྱིན་རླབས་ཀུན་ཀྱི་རྩ་བ་བླ་མ་ནིཿ དངོས་གྲུབ་སྩོལ་ཕྱིར་དཔལ་ཆེན་རོལ་པའི་ལྷཿརྣམ་ཐར་སྒོ་གསུམ་ཐུགས་ཀྱི་དཀྱིལ་འཁོར་ནསཿ རང་བཞིན་ཡོངས་གྲུབ་བྱང་ཆུབ་སེམས་ཀྱི་དངོསཿ ཕྱག་རྒྱ་ཆེན་པོ་མཆོག་གི་དངོས་གྲུབ་སྩོལཿ ས་བཅུ་ལམ་ལྔ་དབང་བཅུ་ཕྱི་ནང་གཉིསཿ རིག་འཛིན་བཞི་དང་སྐུ་ལྔ་ཡེ་ཤེས་ལྔཿགྲུབ་ཆེན་བརྒྱད་དང་ཕྲིན་ལས་རྣམ་པ་བཞིཿའཁོར་བའི་རང་བཞིན་གློ་བུར་སྒྲིབ་པ་གཉིསཿ ཀུན་གཞིའི་ཁམས་ལ་བག་ལ་ཉལ་གྱི་ཚུལཿ ཤིན་ཏུ་རྣམ་དག་རྣམ་ཀུན་མཆོག་ལྡན་གྱིཿ དངོས་གྲུབ་དམ་པ་དེང་འདིར་སྩལ་དུ་གསོལཿ རྩ་སྔགས་མཐརཿ དྷཱརྨ་ཀཱ་ཡཿསཾ་བྷོ་ཀཱ་ཡཿནིརྨ་ཀཱ་ཡ་ཙིཏྟ་སིདྡྷི་ཕ་ལ་ཧཱུྃཿཞེས་སྒྲུབ་རྫས་གནས་གསུམ་དུ་གཏུག་ཅིང་མྱོང་ངོཿ སླར་ཡང་གཏང་རག་གི་མཆོད་བསྟོད་ཕུལ་ལཿ
བཤགས་པ་བྱ་བ་ནིཿ ཧོཿསྔགས་ཀྱི་དངོས་གྲུབ་མ་ལུས་པཿདམ་ཚིག་ཉིད་ལ་བརྟེན་གྱུར་ཀྱངཿ རྨོངས་དང་མ་རིག་ཉོན་མོངས་པསཿ ཟིལ་གྱིས་ནོན་པ་བདག་ཅག་ནིཿ ཉེས་པ་དུ་མའི་སྣོད་ལགས་ཏེཿམགོན་པོ་ཐུགས་རྗེ་ཆེ་རྣམས་ཀྱིཿཐུགས་ལ་ཁྲོ་བ་མི་མངའ་ཡངཿ ལེགས་ཉེས་སྟངས་འཛིན་བདག་པོ་རྣམསཿ སྐྱོན་མཐོང་ཙམ་ན་ཆད་པ་གཅོདཿ འགལ་ཞིང་ནོངས་པ་ཅི་མཆིས་པཿམཐོལ་ལོ་བཤགས་སོ་ཚངས་པར་སྩོལཿ ཡི་གེ་བརྒྱ་པ་ལན་གསུམ་གྱི་སྙིང་ནས་བཤགས་པར་བྱའོཿཉེར་བསྡུ་ནིཿ ཧཱུྃཿསྣོད་བཅུད་ལྷ་དང་གཞལ་ཡས་སུཿ ཤར་བ་དག་པའི་སྣོད་བཅུད་ཀྱངཿ རྟེན་ཉིད་བརྟེན་པ་ལྷ་རྣམས་ཀྱངཿ གཙོ་བོ་ལ་ཐིམ་དེ་ཡང་ཧཱུྃཿཞབས་ཀྱུ་ནས་བཟུང་ནཱ་དའི་བརཿ རིམ་ཡལ་གདོད་མའི་གཤིས་སུ་ཨཱཿཞེས་མཉམ་པར་བཞགཿ སྤྱོད་ལམ་གྱི་རྣལ་འབྱོར་དུ་ལྡང་བ་ནིཿ སླར་ཡང་རིག་པ་བྱང་ཆུབ་སེམསཿ རྗེས་ཐོབ་གཉུག་མའི་ཧེ་རུ་ཀཿཕྱག་རྒྱ་གཅིག་པའི་གནས་གསུམ་དུཿ ཡི་གེས་མཚན་པས་རྣམ་རྟོག་སྲུངསཿ བཛྲ་རཀྵ་ཧཱུྃཿཞེས་རྡོ་རྗེའི་གོ་བསྒོ་ཞིངཿ ཡི་གེ་བརྒྱ་པས་བརྟན་པར་བྱའོཿདེ་ནས་བསྔོ་སྨོན་ནིཿ ཧཱུྃཿསྣང་གྲགས་རིག་པ་དཀྱིལ་འཁོར་གསུམ་གྱི་ངངཿ བསོད་ནམས་ཡེ་ཤེས་རིམ་གཉིས་རྣལ་འབྱོར་ཚོགསཿ མི་
གནས་ཡེ་ཤེས་མྱ་ངན་འདས་པར་བསྔོཿཀུན་ཀྱང་དཔལ་ཆེན་གོ་འཕང་ཐོབ་པར་ཤོགཿ ལན་གསུམ་བཀྲ་ཤིས་ནིཿ ཧཱུྃཿགདོད་མའི་མགོན་པོ་རིགས་ལྔ་གང་ཆེན་མཚོཿསྐུ་ལྔ་ལྷུན་རྫོགས་སྤྲུལ་པའི་ཞིང་ཁམས་ལཿ བསྐལ་བཟང་སངས་རྒྱས་སྟོང་རྩ་བྱོན་པ་ཡིསཿ སྒྲོན་མེའི་བསྐལ་པ་བཟང་པོའི་བཀྲ་ཤིས་ཤོགཿ སྟོང་གསུམ་མི་མཇེད་རྡོ་རྗེ་ཐེག་པའི་ཞིངཿ འཕུར་འགྲོའི་བསྟན་པ་འབྱུང་གནས་ཨོ་རྒྱན་ཡུལཿ གངས་རིའི་ཁྲོད་དུ་འབོད་པ་ཁྲི་སྲོང་རྗེའིཿཐུགས་བསྐྱེད་བསྟན་པ་མཐའ་རྒྱས་བཀྲ་ཤིས་ཤོགཿ འཛམ་གླིང་ས་ཡི་ལྟེ་བ་རྡོ་རྗེའི་གདནཿ པཎ་གྲུབ་ཆོས་རྒྱལ་འཛོམ་པ་ཆོས་འཁོར་གསུམཿ མདོ་སྔགས་བསྟན་པ་དར་བ་གངས་ཅན་ལྗོངསཿ རྒྱལ་བསྟན་ཡུན་དུ་གནས་པའི་བཀྲ་ཤིས་ཤོགཿ ས་མ་ཡཿརྒྱ་རྒྱ་རྒྱཿ གཏེར་འདི་གཞི་ལམ་འབྲས་བུའི་རྒྱུདཿ རྒྱལ་བ་དགོངས་དང་རིག་འཛིན་གྱིཿ བརྡ་ལས་དབང་དང་བྱིན་རླབས་འབྱུངཿ མཁའ་འགྲོ་གསང་བའི་ཡི་གེ་ལསཿ ཚིག་དང་དོན་དུ་མི་འགལ་ཞིངཿ དངོས་གྲུབ་བསྒྲུབ་ལ་མི་བསླུ་བཿ པདྨ་ང་ཡི་ཁྱད་ཆོས་ཏེཿརང་བྱུང་རྡོ་རྗེའི་དཔལ་དུ་ཤོགཿ བུ་ཧྱཿདྷ་ཐིམཿ ཿ