དཔལ་ཆེན་བཀའ་འདུས་རྒྱ་མཚོ་ལསཿ འཇམ་དཔལ་གཤིན་རྗེ་འཆི་བདག་ཟིལ་གནོན།
༂ དཔལ་ཆེན་བཀའ་འདུས་རྒྱ་མཚོ་ལསཿ འཇམ་དཔལ་གཤིན་རྗེ་འཆི་བདག་ཟིལ་གནོན་བཞུགསཿ
དཔལ་ཆེན་འདུས་པའི་ལྷ་ལ་འདུདཿ ཁམས་དྲུག་ལྡན་པའི་ལུས་ཀྱི་རྟེནཿ རྡོ་རྗེ་བཞི་ཡི་གོ་འཕང་ལཿ སྦྱོར་བ་རྡོ་རྗེའི་ཏནྟྲ་ལསཿ རྒྱུ་འབྲས་དག་གྲོལ་ལམ་གྱིས་མིནཿ དེ་ལ་གཟུགས་ཕུང་སྐུ་རྡོ་རྗེརཿ འཇམ་དཔལ་སྐུ་ཡི་སྒྲུབ་པའི་གནདཿ ཟླ་གསང་སྡིག་པ་སྟོབས་ཆེན་གྱིཿ རྒྱུད་དོན་མ་ནོར་འདི་ཁོ་ནའོཿས་མ་ཡཿརྒྱ་རྒྱ་རྒྱཿསྒྲུབ་ཆེན་དཀྱིལ་འཁོར་གཞུང་བཞིན་ལཿ བསྙེན་པའི་དམ་ཚིག་ཕྱག་རྒྱ་ནིཿ སེང་ལྡེང་རྡོ་རྗེ་བེ་ཅོན་ལཿ སྐུ་གསུང་ཐུགས་ཡོན་ཕྲིན་ལས་སྔགསཿ རིན་ཆེན་གང་རུང་ཁུ་བས་བྲིསཿ སྐུ་ཡི་སྙིང་པོ་བཅུ་བདུན་ནིཿ ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུཾ་ཕཊཿགསུང་གི་སྙིང་པོ་འབྲུ་དགུ་བཿ ཨོཾ་ཀཱ་ལ་རཱུ་པ་ཡ་ཨཱཿཧཱུཾ་ཕཊཿཐུགས་ཀྱི་སྙིང་པོ་བཅོ་ལྔ་ནིཿ ཨོཾ་ཧྲཱིཿཥྟི་ཝི་ཊི་ཏཱ་ན་ན་ཧཱུཾ་ཧཱུཾ་ཕཊཿཕཊ་སྭཱ་ཧཱཿཉེ་བསྙེན་ཡོན་ཏན་འབྲུ་ཉི་ཤུཿཨོཾ་ས་མ་ཡ་མཉྫུ་ཤྲཱི་ཡ་མཱནྟ་ཀ་པ་ན་ཙཿཏེ་རོ་ནི་ཧཱུཾ་ཛཿཕྲིན་ལས་སྙིང་པོ་བཅུ་བདུན་ནིཿ ཡ་མ་མེ་ད་ཀྵེ་རཱ་ཛཿས་ཏྭོ་རུ་ན་ཡོ་ནི་ར་ཡ་ཙ་ནིཿ ཞེས་བྲིས་དར་ནག་ཁུད་དུ་དྲིལཿ སྲིད་གསུམ་ལྟོ་རུ་འཆིང་བ་ཡིཿརུས་སྦལ་འཁོར་ལོའི་ནང་དུ་བཅུགཿ དེ་ལ་འཁོར་ལོ་འདི་ཡིན་ཏེཿབེ་ཅོན་ཕྱག་རྒྱའི་ལེའུ་ལསཿ དཀྱིལ་འཁོར་པདྨ་འདབ་བརྒྱད་ལཿ གྲུ་ཆད་མུ་ཁྱུད་གསུམ་བརྩེགས་བྱཿདེ་ཡི་དབུས་ཀྱི་ལྟེ་བ་ལཿ འདུད་འདུལ་སྙིང་པོ་འདི་དགོད་དོཿཨོཾ་ཐ་ག་བྷ་ན་མཱ་ར་ན་ཎཿཤར་གྱི་པདྨ་ལ་སྲིན་པོ་དབང་དུ་བསྡུ་བའི་སྙིང་པོཿཨོཾ་རཀྵ་ཁ་ག་ན་ཎཿལྟོ་རུ་མུ་སྟེགས་དབང་དུ་བསྡུ་བའི་སྙིང་པོཿཨོཾ་ཏི་ར་ཏི་ཀ་ན་ཎཿནུབ་ཏུ་བགེགས་
དབང་དུ་བསྡུ་བའི་སྙིང་པོཿཨོཾ་བིག་ནན་མཱ་ར་ཡ་ན་ཎཿབྱང་དུ་ལོག་འདྲེན་དབང་དུ་བསྡུ་བའི་སྙིང་པོཿཨོཾ་ཀྲང་ཀ་རི་ན་ཎཿམཚམས་ཀྱི་པདྨ་བཞི་པོ་ལཿ ཧཱུཾ་དྷཿཧཱུཾ་པཱཿཧཱུཾ་མཿ ཧཱུཾ་སཿ རྣམས་བྲིའོཿགྲུ་ཆད་བཞི་ལ་ཐོད་པ་ལྕང་ལོ་ཅན་བཞི་བྲིའོཿམུ་ཁྱུད་ཟླུམ་པོ་ལ་ཐོད་པའི་ཕྲེང་བ་བཏངཿ དེའི་ཕྱི་རིམ་ལ་སྦྲུལ་བྲིཿདེ་ལྟར་དཀྱིལ་འཁོར་བཅས་ནས་ནིཿ དོག་པ་དམར་པོས་བཅིངས་ནས་ནིཿ དཀྱིལ་འཁོར་དབུས་སུ་དགོད་པར་བྱཿདྲེགས་པ་ཟིལ་གནོན་མན་ངག་ཡིནཿ སྤྲོས་པ་མེད་ཅིང་དམིགས་པ་གསལཿ ཤེས་པ་གསུམ་ལྡན་དོན་རིག་ནཿ གཏོར་མ་གཅིག་པོས་ལས་ཀུན་འགྲུབཿ འོག་མ་རྣམས་ལའང་དེ་ཡིས་འགྲེཿསྔོན་འགྲོ་དཔལ་ཆེན་འདུས་པ་ལྟརཿ སྨན་གཏོར་རློབ་པ་ཡན་སོང་རྗེསཿ ཡོ་ག་གོང་མའི་བསྐྱེད་རིམ་ནིཿ ཨཿརང་བཞིན་མི་གནས་མཉམ་པའི་ངངཿ ལྷུན་གྲུབ་ཡེ་ཤེས་གཞལ་མེད་ཁངཿ རིན་ཆེན་དུར་ཁྲོད་བརྟན་པར་གནསཿ ཕྱི་ནང་གཉིས་མེད་བརྡལ་ཁྱབ་གསལཿ གྲུ་གསུམ་མཐིང་ནག་འབར་བའི་དབྱིངསཿ ཟླ་གམ་དམར་པོ་དབང་གི་ཚུལཿ ལྷག་པའི་ཡེ་ཤེས་ཐོད་མཁར་བཞིཿལྕགས་མཁར་བཅུ་གཉིས་བཅུ་དྲུག་འོབསཿ རྡོ་རྗེའི་གདུང་འཁོར་གྲུ་ཆད་བཞིཿབར་ཁྱམས་དམར་པོ་སྒོ་ཁྱུད་ལྡནཿ གྲུ་བཞི་སྒོ་ལ་རྟ་བབས་ལྡནཿ རྩེ་མོ་གནམ་ལྕགས་འབར་བ་མཐོཿལྷ་བརྒྱད་ཀླུ་བརྒྱད་ཤིང་དང་རོཿདྲ་བ་དྲ་ཕྱེད་ཆུན་འཕྱང་སྦྲུལཿ གླང་ཆེན་འབྲུག་དང་སེངྒེ་
སྟགཿ རུས་སྦལ་ཆུ་སྲིན་གནམ་ལྕགས་ཐོགཿ ཞིང་དང་ཞིང་ཆུང་ཐོད་པར་ཁྱུངཿ ཁ་ཁྱེར་ལྷ་མོས་མཛེས་པར་བྱེདཿ མ་བསྐྱེད་དབྱིངས་ནས་ཡེ་ཤེས་གསལཿ དྲག་པོ་ཨེ་ཡི་ཕོ་བྲང་དུཿ ཀླུ་འབུམ་གཉན་ཁྲི་ས་བདག་སྟོངཿ ཕྱོགས་སྐྱོང་མ་ཧེ་ཉི་ཟླའི་གདནཿ དབུས་སུ་ཟིལ་གནོན་ལྷུན་གྲུབ་སྐུཿ མཐིང་ནག་དུག་ཆེན་ཧ་ལའི་མདོགཿ དབུ་གསུམ་ཕྱག་དྲུག་ཞབས་བཞི་བགྲདཿ གཡས་པ་ཀུ་མུ་ཏ་འདྲ་བསཿ རོ་ཉེ་ཟ་དང་རྔམས་པར་གཟིགསཿ གཡོན་པ་རཱ་ག་གཉན་ཁྲི་གསོལཿ དབུས་མཐིང་དགྲ་བགེགས་ས་བདག་ཟཿརྡོ་རྗེ་འཁོར་ལོར་རལ་གྲི་གཡསཿ བེ་ཅོན་གཏུན་ཤིང་སྡིགས་མཛུབ་འབརཿ གླང་ཆེན་ཀོ་རློན་དུར་ཁྲོད་ཆསཿ སྦྲུལ་དང་རིན་ཆེན་ཙིཏྟས་བརྒྱནཿ དབུ་ལ་རིགས་ལྔ་ཁྲོ་བོའི་སྐུཿ དྲེགས་པའི་སྙིང་དང་ནཱ་གའི་མགོའིཿདོ་ཤལ་ཁྲོ་བོའི་ཆས་ཀ་རྫོགསཿ དེ་བཞིན་ཉིད་དབྱིངས་ཁྲོས་པའི་ཡུམཿ མཐིང་ནག་སྙིང་སྟོབས་གྲི་ཐོགས་འཁྱུདཿ གཙོ་བོའི་ཐུགས་ཀར་ཡ་མའི་སྐུཿ ཞེ་སྡང་རྡོ་རྗེ་སྨུག་ནག་འཇིགསཿ འཁོར་ལོ་ཙིཏྟ་ཕྱག་ན་བསྣམསཿ ཡ་མའི་ཐུགས་ཀར་དྲེགས་པ་ཆེཿང་རྒྱལ་རྡོ་རྗེ་ལྗང་ནག་རྔམསཿ རྡོ་རྗེ་སྙིང་ཕྲེང་ཕྱག་ན་བསྣམསཿ དྲེགས་པའི་ཐུགས་ཀར་ཁྱམས་ཁང་སྟེཿཕྲག་དོག་རྡོ་རྗེ་འཇིགས་པའི་སྐུཿ
རུས་སྦལ་འཇིང་བསྣོལ་ཐུར་དུ་བལྟཿསྤྱི་གཙུག་འདབ་ཆགས་ཀུ་མུ་ཏཿའདོད་ཆགས་རྡོ་རྗེ་ཟིལ་གནོན་སྐུཿ རོ་ཉེ་འདྲེན་པའི་སྟོབས་དང་ལྡནཿ ཕྲག་དོག་ཁྱུང་མོ་སྔོ་ནག་གཉིསཿ ནུ་མར་སེང་གེ་དཔུང་པར་སྟགཿ སྟ་ཟུར་སྦྲུལ་ནག་ཅེ་སྤྱང་རྔམསཿ ཁྲོ་ཆུང་མང་པོས་སྐུ་ལ་གཏམསཿ ཐོད་མཁར་གློ་འབུར་གྲུ་གསུམ་ཁ་བད་ཅནཿ བཞི་པའི་ཤརཿ ཆོས་རྒྱལ་ནག་མ་ཧེ་ནག་པོ་ཞོནཿ སྲིད་གསུམ་སྲོག་ལ་རྒྱལ་ས་འཛིནཿ ལྷོ་ཕྱོགས་ཡ་བ་ཏི་ནག་པོཿཆུ་གླང་ཞོན་ནས་ཁྲག་ལ་རྔམསཿ ནུབ་ཏུ་ཨ་བ་གླང་མགོ་ནགཿ དྲེལ་རྟ་ཞོན་ནས་རྒྱལ་བར་བྱེདཿ བྱང་དུ་རལ་པ་ཚར་དགུ་སྨུགཿ སྦྲུལ་ནག་ཞོན་ནས་སྐྱེ་འགྲོ་གསོདཿ ཕྱ་སངས་ཏེལ་པ་འཆར་ཀ་དངཿ གྭ་དམར་མ་ཙེ་གྲུ་ཆད་འཛིནཿ གཤེད་ཆེན་བཅུ་གཉིས་ཚོགས་དང་བཅསཿ དེའི་ཕྱི་ལྕགས་མཁར་དོང་གྲུ་གསུམ་བཅུ་གཉིས་ནངཿ ཟླ་གཤེད་བཅུ་གཉིས་འོབས་རྣམས་ལཿ ཞག་གཤེད་སོ་གཉིས་གཉིས་རེ་གནསཿ གྲུ་ཆད་བཞི་དང་བར་ཁྱམས་ལཿ བདུད་དང་མོན་པ་ཀི་ཀང་ཚོགསཿ རྒྱལ་བ་གཅིག་གི་ཡེ་ཤེས་ལཿ དུ་མར་འཕྲུལ་ནས་རྒྱུག་ཅིང་འཕྲོགཿ དོ་དམ་གཉིས་མེད་གཅིག་ཏུ་རྫོགསཿ ཤར་སྒོར་དཀར་པོ་སྙིང་འབྱིན་དངཿ ལྷོ་སྒོར་མགོན་ནག་ནུབ་སྒོར་
བདུདཿ བྱང་སྒོར་གནོད་སྦྱིན་ཁྲབ་ཅན་རྣམསཿ འཁོར་ལོ་ཐུན་ཁྲག་གཡས་གཡོན་བསྣམསཿ བདུད་དང་མུ་སྟེགས་རྒྱལ་པོ་དངཿ ཐེ་བྲང་གཉན་དང་གནོད་སྦྱིན་བཙནཿ བཀྲག་མདངས་ཚེ་སྲོག་སྡུད་པ་དངཿ མཛེ་འདྲེ་ས་སྲིན་ཀླུ་སྲིན་གདོནཿ གཅན་གཟན་གདུག་པ་ཁ་འཆིང་ཞིངཿ དམོད་པའི་དུག་དང་རིགས་བཞིའི་དུགཿ ཐམས་ཅད་འཇོམས་ཤིང་ཟིལ་གྱིས་གནོནཿ རྩ་བཅད་ཁྲག་སྐེམས་སྲོག་ཟུངས་གཅོདཿ མགོ་བཅད་ཚེ་སྲོག་རྟེན་འབྲེལ་འཆརཿ མཁྲིས་པ་འབྱིན་ཅིང་ཤ་ཁྲག་རོལཿ བླ་དང་དྲོད་དང་རླན་དབུགས་འབྲལཿ ཤེས་པ་དྭངས་སྙིགས་འབྱེད་པར་བྱེདཿ འབྲས་བུ་ཆོས་སྐུ་ཟུག་རྔུ་མེདཿ བྱེད་རྩོལ་གཡང་སའི་ཁོ་ཐག་ཆོདཿ མ་བཅོས་དེ་ཉིད་གཉུག་མར་གནསཿ འཁོར་བ་དོང་སྤྲུགས་ཀ་དག་ཀློངཿ སྣང་སྟོངས་གཉིས་མེད་ཡེ་ཤེས་སྐུཿ མི་ཟད་རྒྱན་གྱི་འཁོར་ལོ་རྫོགསཿ དེ་ལ་དབང་བསྐུར་བ་ནིཿ ཧཱུཾཿརང་ལས་ཤར་བའི་དཔལ་ཆེན་ལྷཿལ་སོགས་དཔལ་ཆེན་གཞུང་༼ཤཱུ་ནྱ་ཏའི་ཚབ་ཏུ་ཨ་དརྴ་བཅུག་ལ་རིགས་བདག་རྣམ་སྣངཿ ༽ལྟར་ལཿ སྤྱན་འདྲེན་གྱི་ནི་མལ་དག་ཏུཿཧཱུཾཿདབུས་ཕྱོགས་མཐིང་ནག་གྲུ་གསུམ་དཀྱིལ་འཁོར་ནསཿ རལ་པ་ཁམ་ནག་གྱེན་དུ་འཁྱིལ་བའི་ལྷསཿ སུམ་ཅུ་རྩ་གསུམ་ལྷ་ཡང་འདར་ཞིང་སྔངསཿ སྤྱན་མིག་
གདངས་དགུ་གྱེན་དུ་ལྡོག་པ་ཡིསཿ ཕྱོགས་བཅུའི་ཁྲོ་བོ་ཀུན་ཀྱང་ཁ་སྦུབ་བསྲེགསཿ སྨིན་མ་གློག་སྟོང་འོད་དུ་འབར་བ་ལསཿ སྤྲུལ་བའི་ཕོ་ཉ་མང་པོས་སྲིད་གསུམ་འགེངསཿ ཤངས་ནས་རླུང་འབྱུང་རྡོ་རྗེའི་འཚུབས་མ་ལྡངཿ ས་གཞི་གཡོ་ཞིང་བར་སྣང་འཁྲུག་པར་བྱེདཿ མཆེ་བ་ཟླ་ཚེས་དཀར་པོ་གཙིགས་པ་ཡིསཿ དགྲ་བགེགས་སྲོག་རྩ་དམར་པོ་གཅོད་པར་མཛདཿ ཞལ་ནས་ཁྲོ་བོའི་བརྡ་སྐད་བྱུང་བ་ཡིསཿ ཁམས་གསུམ་སྲིད་གསུམ་འགུལ་བཞིན་སྡེག་པར་བྱེདཿ སྨ་ར་སེར་པོ་མེ་སྟག་འཕྲོ་བ་ཡིསཿ སྟོང་ཁམས་འོད་ཀྱིས་འགེངས་ཤིང་དགྲ་བགེགས་བསྲེགསཿ ཕྱག་དྲུག་མཚོན་ཆ་གདུག་པ་མང་པོ་ནིཿ གནོད་པའི་དགྲ་བགེགས་ཐམས་ཅད་ཐལ་བར་རློགསཿ ཐུགས་དམ་བསྐུལ་ལོ་གནས་འདིར་གཤེགས་སུ་གསོལཿ ཨོཾ་ཡ་མཱནྟ་ཀ་ཡ་མ་རཱ་ཙཀྵ་ཡ་ནནཿ ཛཿཧཱུཾ་བཾ་ཧོཿགུཧྱཿཨ་ཀྲ་མ་ཛཿབཞུགས་གསོལ་ལ་སོགས་གཞུང་ལྟར་ལཿ བསྟོད་པའི་ཁྱད་པར་འདི་ལྟར་རོཿཧཱུཾཿམི་གནས་མི་དམིགས་ཆོས་སྐུར་དག་པ་ལསཿ བདུད་འདུལ་ཁྲོ་བོ་མཆོག་གི་སྐུར་སྤྲུལ་ཏེཿཐུགས་རྗེའི་གཟི་ལྡན་གདུག་པ་ཐབས་ཀྱིས་འདུལཿ ཁྲོ་རྒྱལ་གཤིན་རྗེའི་གཤེད་ལ་ཕྱག་འཚལ་བསྟོདཿ གཏུམ་ཁྲོ་མི་བཟད་རྩུབ་པའི་སྒྲར་ལྡན་པསཿ ཁྱོད་ཀྱི་མཚན་ཐོས་ཙམ་གྱིས་བགེགས་རྣམས་ཕུངཿ འབར་བའི་སྐུ་མཐོང་གསུང་སྒྲ་ཐོས་པ་ཡིསཿ
དགྲ་བགེགས་རློག་བྱེད་ཁྱོད་ལ་ཕྱག་འཚལ་བསྟོདཿ ལུས་ངག་ཡིད་གསུམ་དང་བས་ཕྱག་འཚལ་ཞིངཿ དད་པ་རབ་ཀྱིས་འཕགས་མགོན་མི་གཏོང་བརཿ འགྲོ་ལ་ཕན་ཕྱིར་ཁྲོ་རྒྱལ་ཁྱོད་བསྒོམས་ནཿ མི་མཐུན་ཚོགས་རྣམས་རྡུལ་དུ་བརླག་ཏུ་གསོལཿ དེ་ནས་འཛབ་ཀྱི་དགོངས་པ་ནིཿ ཡ་མའི་ཐུགས་ཀར་ཉི་སྟེང་ཧཱུཾཿསྐྱེ་བ་མེད་པའི་ཡེ་ཤེས་ཀྱིཿརྣམ་པའི་གཟུགས་བརྙན་ཡི་གེས་བསྐོརཿ ངོ་བོ་ལྷ་ཡི་སྐུ་རུ་བཤདཿ ཨེ་ཀ་ཡ་མ་ཧེ་དུན་སྙིང་ཁྲག་ར་མ་ཙ་ཡ་ཧཱུཾ་ཕཊཿཨེ་ནི་ཕྱག་རྒྱ་ཟིལ་གནོན་ཏེཿཀ་ནི་ཚེ་བདག་ནག་པོར་རྫོགསཿ ཡ་ནི་ཡ་མ་རཱ་ཛ་སྟེཿམ་ནི་རྡོ་རྗེ་ཁྲོས་མའོཿཧེ་ནི་བྱ་ཁྱུང་རྒྱལ་པོ་སྟེཿདུན་ནི་ལས་ཀྱི་འཆི་བདག་གོཿསྙིང་ནི་ཁྱུང་མོ་རྣམ་གཉིས་ཏེཿཁྲག་ནི་དྲེགས་པ་འཇོམས་བྱེད་དོཿར་ནི་ཞེ་སྡང་སྦྲུལ་ནག་སྟེཿམ་ནི་བདུད་མོ་ཁྲག་རལ་ཅནཿ ཙ་ནི་སྲོག་བདག་རུས་སྦལ་རྔམཿ ཡ་ནི་སྲོག་བདག་ལས་གཤིན་ཚོགསཿ མི་འགྱུར་རྩ་བའི་སྙིང་པོར་བཤདཿ ལྷ་ལ་གསལ་སྣང་ཐོན་པ་དངཿ རྒྱལ་བ་མཆོད་ཅིང་ཐུགས་དམ་བསྐུལཿ དངོས་གྲུབ་སྡུད་པས་བདག་བྱིན་རློབསཿ དེ་ལ་བསྙེན་པ་ཞེས་སུ་བྱཿཡང་འཕྲོས་བརྟན་གཡོ་ཐ་མལ་པའིཿསྣང་ཞེན་དག་པའི་སྣོད་དང་བཅུདཿ ལྷ་དང་གཞལ་ཡས་ལ་སྦྱོར་བཿ ཉེ་བསྙེན་ནམ་ནི་སྒྲུབ་པ་སྟེཿསྒྲུབ་ཆེན་དོ་ལིའི་བཟླས་པ་ལཿ བསླབ་པས་སྲོག་སྡོམས་གཟེར་བཞི་ཐོབཿ འདི་ནི་འཇམ་དཔལ་བཤེས་གཉེན་གྱིསཿ ཨོ་རྒྱན་རང་བྱུང་མཆོད་རྟེན་ནསཿ དབྱིངས་ཀྱི་ཌཱཀྐིའི་ཐུགས་མཛོད་བརྟོལཿ རྒྱུད་ལས་ལུང་དང་སྒྲུབ་ཐབས་སུཿ བསྡུས་འདི་པདྨའི་རིང་ལུགས་ཡིནཿ རྗེས་ཀྱི་ལས་རིམ་གཞུང་བཞིན་བྱཿས་མ་ཡཿརྒྱ་རྒྱ་རྒྱཿ