ཀློང་ཆེན་སྙིང་གི་ཐིག་ལེ་ལསཿ རྟ་མགྲིན་འདུས་པའི་སྒྲུབ་ཐབས།
འུྃཿ ཀློང་ཆེན་སྙིང་གི་ཐིག་ལེ་ལསཿ རྟ་མགྲིན་འདུས་པའི་སྒྲུབ་ཐབས་བཞུགསཿ སྡུག་བསྔལ་རང་གྲོལ་སྐུ་ལ་འདུདཿ དེ་ཉིད་ཁྲོ་རྒྱལ་ལྟར་སྒྲུབ་པཿ མངའ་བདག་རྒྱལ་པོའི་ཐུགས་དམ་ཡིནཿ སྔོན་འགྲོ་ཞི་བའི་གཞུང་ལྟར་ལཿ ཧྲཱིཿ དབྱིངས་རིག་ཟུང་འཇུག་དག་པ་ཆེན་པོའི་དབྱིངསཿ རང་སྣང་ལྷུན་གྲུབ་རི་བོ་པོ་ཏ་ལཿ བརྡ་རྟགས་མཚན་ཉིད་རྫོགས་པའི་དཀྱིལ་འཁོར་དབུསཿ སྣ་ཚོགས་པདྨ་སྟོང་ལྡན་ཉི་ཟླའི་སྟེངཿ ཧྲཱིཿལས་རང་ཉིད་འཕགས་མཆོག་ཐུགས་རྗེའི་ལྷཿ ཡོངས་གྱུར་ཁྲོ་རྒྱལ་རྟ་མགྲིན་འདུས་པ་ནིཿ ཀླུ་དང་རྒྱལ་བསེན་བསྣོལ་བའི་གདན་གྱི་སྟེངཿ སྐུ་མདོག་དམར་པོ་དུས་མཐའི་མེ་ལྟར་འབརཿ ཞལ་གཅིག་ཕྱག་གཉིས་སྤྱན་གསུམ་མཆེ་བ་གཙིགསཿ ཕྱག་གཡས་དབྱུག་ཏོས་སྣང་སྲིད་ཟིལ་གྱིས་གནོནཿ གཡོན་པས་སྡིགས་མཛུབ་ཀླུ་གཉན་སྡེ་བརྒྱད་གཟིརཿ རལ་པ་ཁམ་ནག་ཐོད་སྐམ་ལྔ་ཡིས་བརྒྱནཿ རྟ་མགོ་ལྡང་ཞུར་འཚེར་པའི་རྔོག་པ་ནསཿ རྡོ་རྗེའི་ཚྭ་ཚྭས་དྲེགས་པ་བརྒྱལ་ཞིང་སྔངསཿ སྐུ་ཆེ་ཡན་ལག་རགས་པའི་བ་སྤུ་ཀུནཿ ཁྲོ་ཆུང་གོ་མཚམས་མེད་པའི་སྲུང་བས་གཏམསཿ ཞིང་གི་གཡང་གཞི་སྟག་གི་ཤམ་ཐབས་དངཿ ཐོད་ཕྲེང་ཚར་གསུམ་སྦྲུལ་གྱི་ཚངས་སྐུད་དཔྱངསཿ རིགས་བཞིའི་ལྟོ་འགྲོས་ཕྱག་ཞབས་གདུ་བུ་བྱསཿ རང་འདྲའི་རིག་མ་གྲི་ཐོད་འཛིན་མས་
འཁྱུདཿ དོར་སྟབས་མེ་དཔུང་འབར་བའི་ཀློང་ན་འགྱིངསཿ རྩིབས་བཞིར་དབང་ཆེན་སྡེ་བཞི་ལས་མདོག་ཡུམཿ གཡས་པ་རང་རྟགས་གཡོན་པ་ཁྱུང་ཁྲ་འགྱེདཿ ཁྱམས་ལ་ཟིལ་གནོན་སྒོ་བཞིར་ཤར་སྒོ་ནསཿ རྟ་གདོང་ལྕགས་ཀྱུ་ཕག་གདོང་ཞགས་པ་མཿ སེང་གདོང་ལྕགས་སྒྲོག་ཁྱི་གདོང་དྲིལ་བུ་འཛིནཿ གཡོན་པ་རང་རྟགས་དཀར་སེར་དམར་ལྗང་མདོགཿ སྣང་སྟོང་སྒྲིབ་གཡོགས་བྲལ་བའི་དབྱིངས་ནས་གསལཿ ཀུན་ཀྱང་གནས་ལུགས་ཡིག་འབྲུ་གསུམ་གྱིས་མཚནཿ སོགས་ཞི་བ་ལྟར་ལཿ བསྟོད་པའི་སྐབསཿ སྡུག་བསྔལ་རང་གྲོལ་གྱི་མཚནཿ ཧྱ་གྲཱི་བའི་སྐུརཿ ཞེས་དངཿ རིགས་བཞིའི་སེམས་མ་ཞེས་པརཿ དབང་ཆེན་སྡེ་བཞིཿ ཞེས་བསྒྱུརཿདེ་ནས་བསྙེན་པ་བྱ་བ་ནིཿཡེ་ཤེས་སེམས་དཔའ་སེམས་ཉིད་ངལ་བསོར་གསལ་བའི་ཐུགས་ཀར་པད་ཉིའི་སྟེང་དུ་ཧྲཱིཿཡིག་དམར་པོའི་མཐརཿ ཨོཾ་བཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊཿཞེས་པས་བསྐོར་བ་ལ་དམིགས་པ་གཏད་ནས་འབྲུ་འབུམ་ལས་རུང་གི་ཚད་དོཿ ལས་ལ་སྦྱོར་ནཿ རྩ་སྔགས་ཀྱི་མགོརཿཨེ་ཨ་ར་ལི་དངཿཞབས་ལ་བཛྲ་དུན་བྷྱོཿ ཏྲིག་ནན་ཛཿཛཿས་མ་ཡ་སྟཱཾཿཞེས་བཏགས་ལ་སྣང་སྲིད་ཐམས་ཅད་མེའི་ཚྭ་ཚྭས་བསྲེགས་ཤིང་སྟོང་པར་སྦྱངས་བའི་ངང་ལ་ཆོས་ཉིད་ཀྱི་རང་མདངས་བསྐྱངས་བས་སྡེ་བརྒྱད་དབང་དུ་འདུ་བར་འགྱུར་རོཿ ཐུན་མཐར་ཚོགས་ཀྱི་འཁོར་ལོ་སོགས་རྗེས་ཆོག་རྣམས་རིག་འཛིན་གཞུང་ལ་ཚིག་ཕྲད་བསྒྱུར་བར་བྱའོཿ བྱ་སླ་ཁྱེར་བདེ་བྱིན་རླབས་ཆེཿ འདི་ལ་བརྟེན་ནས་བཙན་པོ་ཡིསཿ རྟ་སྐད་སྟོང་གསུམ་གང་བ་བསྒྲགསཿ དེ་ཕྱིར་འདི་ལ་རྟ་མགྲིན་ནིཿ རྒྱལ་པོའི་ལུགས་ཞེས་གནག་པའི་ཆོསཿ ས་མ་ཡཿ རྒྱ་རྒྱ་རྒྱཿ དྷ་ཐིམཿ