ཀློང་ཆེན་སྙིང་གི་ཐིག་ལེ་ལསཿ བཀའ་སྲུང་སྨན་བཙུན་མཆེད་ལྔའི་ཕྲིན་ལས་དཔག་བསམ་ཡོངས་འདུ།
འུྃཿ ཀློང་ཆེན་སྙིང་གི་ཐིག་ལེ་ལསཿ བཀའ་སྲུང་སྨན་བཙུན་མཆེད་ལྔའི་ཕྲིན་ལས་དཔག་བསམ་ཡོངས་འདུ་བཞུགསཿ
ཡེ་ཤེས་མཁའ་འགྲོའི་སྐུ་ལ་འདུདཿ ཕྱི་ལྟར་སྨན་བཙུན་མཆེད་ལྔ་ལཿ ནང་ལྟར་རིགས་ལྔའི་ཌཱཀྐི་ནིཿ གསང་བ་དབྱིངས་ཀྱི་ཡུམ་ཆེན་མོཿ བཀའ་སྲུང་སྨན་མོ་ལྟར་སྒྲུབ་པའིཿ ཕྲིན་ལས་དཔག་བསམ་ཡོངས་འདུ་བསྟནཿ ས་མ་ཡཿ ཤིན་ཏུ་ཡིད་འོང་དབེན་པའི་གནསཿ ནགས་ཚལ་མེ་ཏོག་བཀྲ་བའི་སརཿ འཁར་བའི་མེ་ལོང་ཆེ་ལེགས་སྟེངཿ རང་བྱུང་ལི་ཁྲིའི་ཐིག་ལེ་བསྐུསཿ དབུས་མདུན་ནས་བརྩམས་གཡས་བསྐོར་དུཿ བཾ་དང་ཧ་རི་ནི་ས་བྲིསཿ དེ་སྟེང་རང་བྱུང་ཤེལ་དཀར་དངཿ རྨ་བྱའི་སྒྲོ་མདོངས་དུང་གི་ཤྭཿ གཡུ་བྱང་མིག་མེད་ས་ལེ་སྦྲམཿ རིན་ཆེན་སྣོད་བླུགས་ལྡིང་གུར་ཕུབཿ ཉེར་སྤྱོད་སྨན་གཏོར་རཀྟ་དངཿ བཟའ་བཏུང་སྣ་ཚོགས་མཐར་བསྐོར་བཀྲམཿ རིག་འཛིན་བླ་མའི་ས་མ་དྷིསཿ ཀྱཻཿ རང་སྣང་འོད་སྣང་འོད་གསལ་སྦྲུལ་བའི་གནསཿ ཁོར་ཡུག་གངས་རིའི་ཕྲེང་བ་ཅནཿ ཤིན་ཏུ་ཡིད་འོང་སྐྱེད་མོས་ཚལཿ ནེའུ་སེང་མེ་ཏོག་བཀྲ་བའི་དབུསཿ རིན་ཆེན་གཡུ་ཡི་ཁང་བཟང་ནིཿ དྭངས་གསལ་ཤེལ་གྱི་ཐེམ་སྐས་ཅནཿ བྱི་རུའི་ཁ་བད་མཛེས་པའི་ཀློངཿ སྣ་ཚོགས་རཏྣའི་ཁྲི་སྟེངས་སུཿ དཔའ་བོ་ཡོངས་ཀྱི་སྲིང་གཅིག་མཿ རིག་འཛིན་ཡོངས་སྒྲུབ་སྡེ་མོཿ སྨན་བཙུན་བཀྲ་ཤིས་ཚེ་རིང་མཿ རྡོ་རྗེ་ཀུན་ཏུ་བཟང་མོ་ནིཿ དཀར་དམར་མཛེས་པའི་ལང་ཚོ་ཅནཿ ཕྱག་གཡས་ཡིད་བཞིན་ནོར་བུ་དབངཿ གཡོན་པ་མདའ་དར་དུང་ཤོ་ཅནཿ སྲིད་གསུམ་གསལ་བའི་མེ་ལོང་འཛིནཿ དར་དཀར་ན་བཟའ་གསར་པའི་སྟེངཿ རྨ་བྱའི་སྒྲོ་ཐུལ་གཡང་ལུགས་
གསོལཿ རཏྣའི་པྲོག་ཞུ་དར་ཐོད་ཅནཿ མཛེས་སྡུག་མཉམ་པའི་སྟབས་ཀྱིས་བཞེངསཿ མདུན་དུ་མཐིང་གི་ཞལ་བཟང་མཿ སྣང་གསལ་པྲ་ཡི་མེ་ལོང་འཛིནཿ གཡས་སུ་ཅོད་པན་མགྲིན་བཟང་མཿ རིན་ཆེན་གཏེར་གྱི་བུམ་པ་བསྣམསཿ རྒྱབ་ཏུ་མི་གཡོ་གླང་བཟང་མཿ རྨ་གཡང་ནོར་གྱི་གཞོང་པ་འཛིནཿ གཡོན་དུ་གཏལ་དཀར་འགྲོ་བཟང་མཿ དངུལ་སྐྱོགས་འོ་མས་གང་བ་བསྣམསཿ ཀུན་ཀྱང་གཡོན་པས་རང་རྟགས་ལཿ གཡས་པས་མདའ་དར་གཡོབ་པའི་ཚུལཿ དར་དཀར་ན་བཟའ་གཡང་ལུགས་གསོལཿ རིན་ཆེན་སྣ་ཚོགས་དོ་ཤལ་མཛེསཿ གཡོན་བསྐུམ་གར་གྱི་སྟབས་སུ་འགྱིངཿ མཐའ་སྐོར་སྤྲུལ་པ་ཡང་སྤྲུལ་དངཿ ཉིང་སྤྲུལ་བྲན་གཡོག་བསམ་མི་ཁྱབཿ གཙོ་མོའི་ཐུགས་ལས་འོད་འཕྲོས་པསཿ ནུབ་ཕྱོགས་ཨོ་རྒྱན་མཁའ་སྤྱོད་ཞིངཿ གནས་ཡུལ་དུར་ཁྲོད་ལྷའི་འདུན་སཿ གངས་ཆེན་ཤེལ་གྱི་ཟུར་ཕུད་སོགསཿ མ་ངེས་པདྨའི་སྒྲུབ་གནས་དངཿ རང་བཞིན་སྤྲུལ་པའི་གནས་མཆོག་ནསཿ སྤྱན་འདྲེན་གནས་འདིར་ད་ཚུར་བྱོནཿ བཛྲ་པྲ་མོ་ཧ་ཙིཏྟ་ཧྲིཾ་ཧྲིཾ་ཛཿཛཿ ཧཱུྃཿ བཞེངས་ཤིག་ཆོས་སྐུའི་ཀློང་ཡངས་ལསཿ བསྐྱོད་ཅིག་ལོངས་སྤྱོད་རྫོགས་པའི་མཿ དགོངས་ཤིག་སྤྲུལ་པའི་
གནས་མཆོག་འདིརཿ དམ་ཚིག་གཉེན་པོས་ད་ཚུར་བྱོནཿ འདའ་ཀ་རྡོ་རྗེའི་གདན་ལ་བཞུགསཿ ཉམས་ཆག་སྐོང་ཞིང་ཞིག་རལ་གསོཿ སྲོག་དང་དམ་ཚིག་གཅིག་ཏུ་བསྲེཿ བརྟན་པར་བཞུགས་ལ་དངོས་གྲུབ་སྩོལཿ ས་མ་ཡཿ ཏིཥྛ་ལྷནཿ ཧཱུྃཿ བདེ་ཆེན་ཆོས་སྐུའི་ཀློང་ཡངས་ལསཿ ཞེན་མེད་རང་གྲོལ་མཆོད་པའི་སྤྲིནཿ ཉེར་སྤྱོད་འདོད་པའི་ཡོན་ཏན་དངཿ བཏུང་བ་སྣ་ཚོགས་མཚོ་ལྟར་བསྐྱིལཿ སྨན་གཏོར་རཀྟ་ཕྱེ་མར་སྤོདཿ སྐྱེད་ཚལ་ཟས་གོས་དཀོར་ནོར་རྫསཿ ཤ་རྐྱང་མ་ཧེ་འདོད་འཇོའི་བཿ རྫུ་འཕྲུལ་ཤུགས་ལྡན་དྲེའུ་སྔོཿ རླུང་གི་རྩལ་ལྡན་ཅང་ཤེས་རྟཿ སྤོས་ཀྱི་གླང་པོ་འབྲོང་གཡག་ཞོལཿ སྣ་ཚོགས་དར་གྱི་འཕུར་ལྡིང་གཡོཿ རྔ་མའི་ལྡིང་གུར་འཇའ་རིས་འཁྱིལཿ རྨ་བྱ་ཟློས་གར་བསྒྱུར་བ་དངཿ བྱ་ནག་མཆུ་སེར་ལ་སོགས་པཿ མདོར་ན་སྨན་མོ་མཉེས་པའི་རྫསཿ མ་ཚང་མེད་པ་མཆོད་པའི་སྤྲིནཿ མིག་འཕྲུལ་ལྟ་བུའི་ཏིང་འཛིན་གྱིསཿ ནམ་མཁའ་མཛོད་ཀྱི་འཁོར་ལོར་འབུལཿ དཔལ་ལྡན་ལྷ་མོའི་ཐུགས་དམ་བསྐངཿ རྡོ་རྗེ་བདུད་མོའི་ཐུགས་དམ་བསྐངཿ ཚེ་རིང་མཆེད་ལྔའི་ཐུགས་དམ་བསྐངཿ སྤྲུལ་པ་ཡང་སྤྲུལ་ཐུགས་དམ་བསྐངཿ ཐུགས་དམ་བསྐངས་ལ་ཉམས་ཆག་སོལཿ བདག་ཅག་དཔོན་སློབ་ཡོན་མཆོད་ཀྱིཿ
ལྟ་བ་ལོག་ན་དབྱིངས་སུ་གསོཿ སྒོམ་པ་ཡེངས་ན་རིག་པས་སྐྱོངཿ སྤྱོད་པ་ནོར་ན་ཚོགས་ཀྱིས་བསྐངཿ སྲོག་ལ་བདུད་དུ་མ་འབེབ་ཅིགཿ སྙིང་ལ་རླུང་དུ་མ་འཇུག་ཅིགཿ དབྱིངས་ཀྱི་རྗེ་མོ་མ་གཡེལ་ཅིགཿ འཁོར་གྱི་རྣམ་རྟོག་མ་འཁྲུལ་ཅིགཿ ཁྱོད་ནི་འཁོར་འདས་ཀུན་གྱི་བདགཿ དགའ་ན་གདོད་མའི་སངས་རྒྱས་སྟོནཿ ཁྲོས་ན་གཟའ་སྐར་ཐང་ལ་འབེབསཿ སྣོད་བཅུད་འབྱུང་བའི་བྱེད་པ་མོཿ དུས་བཞི་ཀུན་གྱི་དྲོད་ཀྱང་འཛིནཿ བཀའ་གསང་གཉེན་པོའི་བྱ་ར་མཛདཿ མཐུ་རྩལ་ཅན་ལ་བདག་བསྟོད་དོཿ ༈ རྒྱལ་དབང་པདྨ་ཐོད་ཕྲེང་དངཿ རིག་འཛིན་བརྒྱུད་པའི་སྤྱན་སྔ་རུཿ བསྟན་པ་བསྲུང་བར་ཁས་བླངས་བཞིནཿ ཐེག་མཆོག་རྫོགས་པ་ཆེན་པོ་དངཿ ཁྱད་པར་འོད་གསལ་སྙིང་ཐིག་འདིའིཿ བསྟན་པ་ཡར་ངོའི་ཟླ་ལྟར་སྤེལཿ བསྟན་འཛིན་སྐྱེས་བུའི་སྐུ་ཚེ་དངཿ མཛད་ཕྲིན་ནམ་མཁའི་ཕ་མཐར་བརྡོལཿ བརྒྱུད་འཛིན་སློབ་མ་བུ་བཞིན་སྐྱོངསཿ བསྟན་པའི་སྦྱིན་བདག་མངའ་ཐང་བསྐྱེདཿ གངས་ཅན་བོད་ཀྱི་རྒྱལ་ཁམས་སུཿ ནད་ཁ་ཆོད་ལ་དལ་ཁ་སྤོསཿ དགྲ་ཁ་བསྒྱུར་ལ་མཚོན་རྩེ་ཐུལཿ ཆར་ཆུ་དུས་ཕོབས་བཙའ་ཐན་སོགསཿ མི་མཐུན་དུས་ཀྱི་རྒུད་པ་སོལཿ མདོར་ན་ཡིད་ལ་གང་འདོད་པའིཿ བསམ་དོན་
ལྷུན་གྱིས་གྲུབ་པར་མཛོདཿ ཅེས་བརྗོད་འོད་ཟེར་དྲ་བས་བཅིངསཿ འདོད་དོན་མངོན་དུ་སྒྲུབ་པར་བསམཿ བཾ་ཧ་རི་ནི་ས་བཛྲ་པྲ་མོ་ཧ་ཙིཏྟ་ཧྲིཾ་ཧྲིཾ་ཛཿཛཿ ཅེས་བཟླ་ཏིང་འཛིན་གནད་ནས་བསྐུལཿ མཐའ་བསྒྱུར་གབ་ཡིག་བཞིན་དུ་བྱཿ ལས་ཀུན་འགྲུབ་པར་ཐེ་ཚོམ་མེདཿ འདི་ཉིད་ཤིན་ཏུ་སྙིང་ཉེ་བསཿ ཀུན་ལ་སྦྱིན་པར་མི་བྱའོཿ ས་མ་ཡཿ རྒྱ་རྒྱ་རྒྱཿ