ཚེ་རིང་མའི་གཡང་འགུགས་ཉུང་བསྡུས
ཚེ་རིང་མའི་གཡང་འགུགས་ཉུང་བསྡུས་བཞུགས།། བྷྱོ། མཁའ་འགྲོ་ཆེན་མོ་སྡེ་ལྔ་ནི། །ཡེ་ཤེས་ལྔ་ཡི་ཀློང་ནས་སྤྲུལ། །འབྱུང་བ་ཆེན་པོ་ཀུན་ལ་ཁྱབ། །འབྱུང་བ་ཆེན་པོ་ནམ་མཁའ་ནི། །འབྱུང་བ་ལྔ་ཡི་བདག་པོ་སྟེ། །དེ་ཉིད་ལས་ནི་ཐམས་ཅད་སྤྲུལ། །སྲ་ཞིང་འཐས་པ་བརྟན་པའི་གཞི། །རིན་པོ་ཆེ་ཡི་འབྱུང་གནས་ལས། །བརྟན་གཡོའི་དངོས་པོ་ཐམས་ཅད་སྤྲུལ། །རིན་ཆེན་འབྱུང་དང་རྟ་ནོར་ཕྱུགས། །སྣ་ཚོགས་དབྱིག་གི་གཡང་ཁུག་ཅིག །རླན་ཞིང་གཤེར་བ་ཆུ་ཡི་ཀློང༌། །རྒྱ་མཚོ་ཆེ་དང་རོལ་མཚོ་བདུན། །ཀླུ་དབང་རྣམས་ཀྱི་མཛོད་ཡིན་པས། །སྣ་ཚོགས་ནོར་བུའི་ཕྱྭ་དང་གཡང༌། །འབད་པ་མེད་པ་དེང་འདིར་ཁུག །དྲོད་ནི་སྲེག་པ་མེ་ཡི་ཀློང༌། །རྟ་གདོང་རྒོད་མ་ཁའི་དབྱིངས་ལ། །སྨིན་ཞིང་བསྐྱེད་པའི་རྟེན་འབྲེལ་དང༌། །དེ་ལས་གྱུར་ཞིང་སྨིན་པའི་བཅུད། །དངོས་གྲུབ་ཡོན་ཏན་གཡང་ཁུག་ཅིག །ཡང་ཞིང་གཡོ་བ་རླུང་གི་ཁམས། །བསྐྱེད་དང་སྡུད་པའི་བདག་པོ་སྟེ། །ཆུད་མི་ཟ་བའི་སྲོག་འཛིན་བྱེད། །དེ་ལས་བྱུང་བའི་ཕྱ་གཡང་དང༌། །དངོས་གྲུབ་ཐམས་ཅད་འདིར་ཁུག་ཅིག །མདོར་ན་ལྷ་ཀླུ་མིའི་ནོར་བུ། །གླིང་བཞི་རི་རབ་རྒྱ་མཚོའི་བཅུད། །
ས་རྡོ་རི་བྲག་སྣོད་བཅུད་དང༌། །ལྷ་དབང་ཀླུ་དབང་རྒྱལ་པོའི་མཛོད། །ཉི་ཟླ་གཟའ་སྐར་གོ་ལའི་གནས། །ལྷ་དང་དྲང་སྲོང་མངོན་ཤེས་ཅན། །བསྐལ་པར་གནས་པའི་ཕྱ་དང་གཡང༌། །མ་ལུས་ལུས་པ་མེད་པ་ཀུན། །རྟེན་འབྲེལ་རྫས་ཀྱི་ནུས་པ་ཡིས། །དེང་གི་རྒྱུ་སྦྱོར་ཡོན་བདག་འདིའི། །བསོད་ནམས་ཚེ་དཔལ་ལོངས་སྤྱོད་ལ། །ཉི་ཟླ་བཞིན་དུ་ཀྱི་ལི་ལི། །ལོངས་སྤྱོད་བཞིན་དུ་མེ་རེ་རེ། །ཆུ་ཀླུང་བཞིན་དུ་འདུ་རུ་རུ། །འདྲེས་ཤིང་བརྟན་པའི་གཡང་ཁུག་ཅིག །གཡང་འགུགས་ཀྱི་འདོན་ཆ། མཐུ་རྩལ་ཅན་ལ་བདག་བསྟོད་དོ། །ཞེས་པའི་མཚམས་སུ་སྦྱར་རོ།། །།