སྔ་འགྱུར་རྡོ་རྗེ་ཐེག་པའི་བསྟན་པའི་མཚན་ཉིད།
སྤྱི་དོན་བཞི་པ། ད་ནི་ལྷ་བཙན་པོ་ཁྲི་སྲོང་ལྡེ་བཙན་གྱི་དུས་ན་སྤྲུལ་པའི་ལོ་པཎ་ཆེན་པོ་རྣམས་ཀྱིས་བསྒྱུར་ཞིང་དར་བའི་གསང་སྔཊ་སྔ་འགྱུར་གྱི་མཚན་ཉིད་གང་ཡིན་བཤད་ནས། དེ་བསྟན་པ་ལ་བྱ་བ་བྱས་ཤིང་རྡོ་རྗེའི་ལམ་ལས་དངོས་གྲུབ་བརྙེས་པའི་སྐྱེས་བུ་དམ་པ་རྣམས་ཀྱི་རྟོགས་པ་བརྗོད་པར་བྱ་སྟེ། དེ་ལ་སྟོན་པ་མྱ་ངན་ལས་འདའ་ཁར། ང་ཡོངས་སུ་མྱ་ངན་ལས་འདས་ནས་འདུལ་བ་ལ་སྣང་། མདོ་སྡེ་ལ་འཇུག །ཆོས་ཉིད་དང་མི་འགལ་ན་བཀའ་ཡིན་པར་བཟུང་ཞེས་གསུངས་པ་ལྟར། བསྐྱེད་པ་མ་ཧཱ་ཡོ་ག་ཏནྟྲ་སྡེ་བཅོ་བརྒྱད་ལ་སོགས་པའི་བསྐྱེད་རྫོགས་ཟབ་མོས་རང་རྒྱུད་ཀྱི་ཉོན་མོངས་པ་མ་སྤངས་གནས་དག་ཏུ་འདུལ་བས་རྡོ་རྗེ་ཐེག་པའི་འདུལ་བ་ལ་སྣང་། ལུང་ཨ་ནུ་ཡོ་ག་གསང་ཆེན་དགོངས་པ་འདུས་པ་ལ་སོགས་པས། སེམས་ཀྱི་བསླབ་པའི་མཚན་ཉིད་ཟབ་མོ་ཕུང་ཁམས་སྐྱེ་མཆེད་དབྱིངས་ནས་སངས་རྒྱས་པར་སྟོན་
པས། གསང་བ་སྔགས་ཀྱི་མདོ་སྡེ་ལ་འཇུག །མན་ངག་རྫོགས་པ་ཆེན་པོ་ངོ་བོ་ལ་སྐྱེ་འགག་མེད། རང་བཞིན་ལ་རྟག་ཆད་བྲལ། མཚན་ཉིད་རྣམ་པ་ཐམས་ཅད་མཁྱེན་པའི་ཆོས་ཉིད་དང་མི་འགལ་ཞིང་ཡེ་ཤེས་ཐུགས་ཕྲད་དུ་སྟོན་པ་མདོ་སྒྱུ་སེམས་གསུམ་གྱི་ངོ་བོར་གནས་པ་སྟེ། གང་གི་ཚེ་བདག་ཅག་གི་སྟོན་པ་འདི་དང་པོའི་སངས་རྒྱས་ཀུན་ཏུ་བཟང་པོ་མཚན་གྱིས་སྙན་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཤིང་། ཆོས་ཉིད་འོད་གསལ་གྱི་ཞིང་ཁམས་གང་དུ་སྒྲིབ་པ་མཐའ་དག་སྤངས་པའི་ཡོན་ཏན་གྱི་བཀོད་པ་ཟད་མི་ཤེས་པའི་འོག་མིན་ཡེ་ཤེས་རོལ་པའི་རྒྱན་ཉིད་དུ་བཞུགས་ནས། རྡོ་རྗེ་འཆང་རྒྱ་མཚོའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་རོལ་པ་བསམ་གྱིས་མི་ཁྱབ་པའི་མངའ་ཐང་ཆེན་པོས་ཆོས་ཀྱི་སྒྲོན་མ་རྣམ་པར་བཀོད་དེ། དུས་བཞི་མཉམ་པ་ཉིད་དེ་སྲིད་དུ་སོ་སོའི་སྐལ་བ་ཇི་ལྟ་བ་བཞིན་དུ་བྱང་ཆུབ་གསུམ་གྱི་ལམ་དང་འབྲས་བུར་འགོད་པའི་འཕྲིན་ལས་ལྷུན་གྱིས་གྲུབ་པ་ནི་འདི་ལྟ་སྟེ། སྐུ་གསུམ་རང་རང་ལ་མཚན་ཉིད་གསུམ་གྱིས། ཆོས་སྐུའི་སྟོན་པ་དཔལ་ཀུན་ཏུ་བཟང་པོ། ཆོས་རང་བཞིན་རྫོགས་པ་ཆེན་པོ། འཁོར་ཡེ་ཤེས་རྒྱ་མཚོ། དུས་བསམ་གྱིས་མི་ཁྱབ་པ། གནས་ཆོས་ཉིད་དོན་གྱི་འོག་མིན་ནོ། །ལོངས་སྤྱོད་རྫོགས་
པ་སྐུའི་སྟོན་པའི་རིགས་ལྔའི་སངས་རྒྱས། ཆོས་གསང་སྔགས་ཕྱི་ནང་། འཁོར་གསང་བའི་བདག་པོ་དང་། འཇམ་དཔལ་རྣོན་པོ་ལ་སོགས་དབང་པོ་ཡུལ་སྣང་དག་པ་འབྲས་བུའི་སེམས་དཔའ། དུས་འཕོ་འགྱུར་མེད་པ། གནས་རང་སྣང་སྟུག་པོ་བཀོད་པའི་ཞིང་ཁམས་སོ། །སྤྲུལ་པ་སྐུའི་སྟོན་པ་རྡོ་རྗེ་འཆང་དང་ཐུབ་པ་དྲུག །ཆོས་ཐེག་པ་ཆེ་ཆུང་། འཁོར་སར་གནས་དང་། སོ་སོའི་སྐྱེ་བོ་དང་། མཁའ་འགྲོ་དང་། རིག་པ་འཛིན་པ་ལ་སོགས་ཐ་དད་པའི་ཚོགས། དུས་འདས་དང་མ་འོངས་ད་ལྟར་མ་ངེས་པའོ། །གནས་ལྷ་གནས་ཀྱི་འོག་མིན་དང་། དུར་ཁྲོད་ཆེན་པོ་དང་། རྡོ་རྗེ་བཙུན་མོའི་བྷ་ག་ལ་སོགས་ཏེ་གསང་བ་ཆེན་པོའི་འོག་མིན། འགྲོ་དྲུག་སོ་སོའི་གནས་རིགས་ཐ་དད་པའོ། །དེ་དག་ཀྱང་ཐེག་པའི་རྣམ་གྲངས་སུ་བསྡུ་བའི་སྒོ་ནས། ཀུན་འབྱུང་འདྲེན་པའི་ཐེག་པ་དང་། དཀའ་ཐུབ་རིག་བྱེད་ཐེག་པ་དང་། དབང་བསྒྱུར་ཐབས་ཀྱི་ཐེག་པའོ། །ཞེས་སྡེ་སྣོད་གསུམ། ཕྱི་རྒྱུད་སྡེ་གསུམ། ནང་རྒྱུད་ཡོ་ག་གསུམ་སྟེ་རིམ་པ་དགུར་རྫོགས་པ་ཉིད་དུ་བསྟན་པའང་། དཔུང་བཟང་གིས་ཞུས་པར། བྱེ་བ་ཕྲག་གསུམ་དང་ནི་འབུམ་ཕྲག་ལྔ། །རིག་འཛིན་སྡེ་སྣོད་དུ་ནི་རྒྱལ་བས་གསུང་། །ཞེས་པས་སྤྱིར་བཏང་དམན་པ་གསུམ་གྱི་ཐེག་པའི་སྤྱི་གཞིར་གྱུར་པས་སྡེ་སྣོད་བཞི་པའམ། དམིགས་བསལ་རིག་འཛིན་སྡེ་སྣོད་ཉག་
གཅིག་ཏུ་བསྟན་པ་ཡིན་ནོ། །མདོར་བསྡུ་ན། བསྐལ་པ་དཔག་ཏུ་མེད་པ་ནས་ད་ལྟའི་བར་དུ་ཀུན་ཏུ་བཟང་པོ། རྡོ་རྗེ་འཆང་། རྡོ་རྗེ་སེམས་དཔའ་ཞེས་བྱ་བ་གདོད་མའི་མགོན་པོས་གསུངས་པ་ཐམས་ཅད། དུས་གང་དུ་འཁོར་གྱི་མཁའ་འགྲོ་དང་། གྲུབ་པ་མཆོག་དང་། རྡོ་རྗེ་ཆོས་ལ་སོགས་པས་ལེགས་པར་བསྡུས་ཤིང་། ཚེ་ལ་དབང་བའི་མཁའ་འགྲོ་མ་གྲུབ་པ་ཅན་དག་གིས། ལྷ་དང་། ཀླུ་དང་། གནོད་སྦྱིན་དང་། དྲི་ཟའི་ཡུལ་ལ་སོགས་པ་ནས། འཛམ་བུའི་གླིང་གིའང་ཨོ་རྒྱན་དང་། ཟ་ཧོར་གྱི་གནས། ཤམྦྷ་ལ་དང་། སིངྒ་ལ། ལངྐའི་ཡུལ་གྱི་མ་ལ་ཡ་གནམ་ལྕགས་འབར་བའི་རྩེ། འོག་མིན་དང་། དགའ་ལྡན་དང་། རི་རབ་ཀྱི་རྩེ་སྟེ་ལྷ་གནས་གསུམ་དུ་གྲགས་པ་ལ་སོགས་པར་མཁའ་འགྲོ་མས་བཟུང་ནས་བཞུགས་པ་དག །སློབ་དཔོན་ཆེན་པོ་པདྨ་དང་། ཀླུ་སྒྲུབ་དང་། དགའ་རབ་དང་། བཱི་མ་ལ་ལ་སོགས་པས་ཡེ་ཤེས་དང་། རྫུ་འཕྲུལ་གྱིས་སྤྱོད་ཡུལ་ཁོ་ནས་སྤྱན་དྲངས་ཏེ་འཕགས་པའི་ཡུལ་དང་། བོད་ཡུལ་དུ་དར་ཞིང་དེ་ལས་གྲུབ་པ་ཐོབ་པ་མང་པོ་བྱུང་བ་ཡིན་ནོ། །བློ་གྲོས་མཐུ་ཆུང་བ་དག །ཤཱཀྱ་ཐུབ་པ་ཉིད་ནང་ལྟར་རྡོ་རྗེ་འཆང་དུ་བཞེངས་ནས། ཚེ་ལོ་བརྒྱ་པའི་གནས་སྐབས་ན་གསུངས་པ་འགའ་ཞིག་ཡུལ་དུས་དེའི་རིག་པ་འཛིན་པ་དག་ལ་གྲགས་ཆེ་བ་ཙམ་གཏན་ཚིགས་སུ་བཟུང་ནས། དེ་ལས་གཞན་པའི་རྒྱུད་མི་སྲིད་དོ་སྙམ་པ་ནི་འཕགས་པའི་བློ་གྲོས་ཀྱི་ཕྱོགས་ཙམ་མ་ཉེ་
བའི་འདོད་པ་གྱི་ན་ཡིན་ཏེ། རྫོགས་ལྡན་དང་པོ་བྱ་བའི་རྒྱུད། ཅེས་དང་། འཇམ་དཔལ་སྒྱུ་འཕྲུལ་ལས། འདས་པའི་སངས་རྒྱས་རྣམས་ཀྱིས་གསུངས། །མ་འོངས་རྣམས་ཀྱང་གསུང་འགྱུར་ལ། །ཞེས་དང་། ཡེ་ཤེས་རོལ་པའི་རྒྱུད་ལས། ཐོག་མའི་རྡོ་རྗེ་འཆང་བ་ངས། །བསྐལ་པ་ཀུན་གྱི་སྔོན་རོལ་ནས། །ཕྱི་མའི་མུ་མཐར་ཐུག་གྱུར་པ། །དེ་སྲིད་བླ་མེད་གསང་བའི་ཆོས། །རྨད་བྱུང་རྒྱལ་པོ་འགྲོ་བ་ལ། །གསུངས་སོ་གསུང་ངོ་གསུང་བར་འགྱུར། །ཞེས་པའི་རང་བཞིན་ལ་རྨོངས་པའོ། །དེ་ལས་སྔགས་གསར་མའི་བརྡའ་ཆད་ནི། བཅོམ་ལྡན་འདས་ཀྱིས་རི་རབ་ཀྱི་ཟོམ། ཨོ་རྒྱན་གྱི་གནས། དཔལ་ལྡན་འབྲས་སྤུངས། རི་བོ་བྱ་རྐང་ཅན། འོག་མིན་ལ་སོགས་པར་ཆགས་བྲལ་དང་། ལོངས་སྤྱོད་རྫོགས་པའི་རྣམ་པ་ཅི་རིགས་པས་གསུངས་པ་དག་སྟེ། རྒྱུད་སྡེ་བཞིའམ། ལྔར་ཡང་གྲགས་པ་བྱམས་པ་ལ་སོགས་པའི་བྱང་ཆུབ་སེམས་དཔའ་དང་། མཁའ་འགྲོ་མ་དང་། གྲུབ་པ་ཆེན་པོ་དང་། རིགས་གསུམ་སེམས་དཔའ་ལ་སོགས་པས་བསྡུས་པ་སྟེ། མཚན་ཉིད་ཇི་ལྟར་ཡིན་པ་མདོར་བསྡུ་ན། ཆོས་ཀྱི་དབྱིངས་རང་བཞིན་གྱི་རྣམ་
པར་དག་པ་དང་། དེ་བཞིན་གཤེགས་པ་ཐམས་ཅད་ཀྱི་གསང་བ་བསམ་གྱིས་མི་ཁྱབ་པའི་ཐུགས་རྡོ་རྗེའི་ཡེ་ཤེས་ཏེ། རྡོ་རྗེ་རྩེ་མོ་ལས། སྔགས་རྣམས་ཀུན་གྱི་མཚན་ཉིད་ནི། །སངས་རྒྱས་ཀུན་གྱི་ཐུགས་ཡིན་ནོ། །ཞེས་སོ། །འདི་གཉིས་འགྱུར་གྱི་སྔ་ཕྱིའི་དབྱེ་བ་ལ། ཉོན་མོངས་པ་དང་། ལྟ་བའི་སྙིགས་མར་གྱུར་པ་དག་གི་སྡེ་ཚན་དང་ཕྱོགས་རིས་སུ་དབྱེ་ན་འཆོས་ཀྱང་། གཟུ་བོར་གྱུར་པ་དག་དྲི་མ་མེད་པའི་བློ་གྲོས་ཆེན་པོས་སྡེ་པ་བཅོ་བརྒྱད་བཀར་བསྡུ་ཞེས་པས་མཚོན་པར་བྱས་ཏེ་རགས་པའི་མཚན་ཉིད་ཆ་ཕྱེད་པའི་སླད་ཙམ་དུ་བལྟ་བ་སྟེ། པཎྜི་ཏ་སྒྲའི་ཚེར་མ་ཡན་ཆོད་དང་ལོ་ཙཱ་བ་རིན་ཆེན་བཟང་པོ་མན་ཆོད་ཀྱི་འགྱུར་ལས་བཏགས་པའི་ཕྱིར་རོ། །དོན་དུ་ན་ད་ལྟ་གསར་མར་གྲགས་པའི་རྒྱུད་སྡེའི་ཁྲོད་ན་བསྟན་པ་སྔ་དར་གྱི་ཚེ་འགྱུར་བའི་རྒྱུད་ཀྱང་ཡོད་ལ། ད་ནི་ལྔ་བརྒྱའི་ཐ་མར་གྱུར་པས། འཕགས་པའི་ཡུལ་གྲུའང་སྡིག་ཏོ་དང་ཀླ་ཀློས་ཁེངས་ན། རང་རང་གི་འདོད་པས་བླང་བར་འོས་པའི་རྒྱུད་གསར་ལྟར་བྱོན་དུ་ག་ལ་སྲིད། གལ་ཏེ་ན་རེ་ཞིག་གི་བློ་ལ་ཐེ་ཚོམ་ཟ་བའི་ཆོས་སྐད་རྣམ་པ་ཐམས་ཅད་པ་ཅན་ཞིག་ཀྱང་། གསར་མའི་སྡེ་ཚན་དུ་འཇོག་དགོས་པས་འགྲོ་ལྡིང་དང་ཨོ་རྒྱན་གྱི་གླིང་དུ་དེངས་ཤིག །དེ་སྐད་དུ། སློབ་དཔོན་གསང་ཕུ་བས། བསམ་ཡས་ཀྱི་
དཔེ་ཁང་ན། རྒྱ་གར་ནས་སྤྱན་དྲངས་ནས་བོད་དུ་མ་འགྱུར་བའི་ཆོས་མང་པོ་ཡོད། ང་ལ་རྫུ་འཕྲུལ་ཅི་ཡོད་ན། ཟབ་ཤོས་ཞིག་བསྒྱུར་ན། བོད་ཀྱི་སྟོན་པ་འདི་ཀུན་ང་ལ་ཇི་སྐད་ཟེར་ན། འདི་འདྲའི་ཆོས་ཤིག་གང་ནས་བྱུང་། ཚིག་ལེགས་ཏེ་ཁུངས་ལ་ཐེ་ཚོམ་ཟ་ཟེར་ནས། སྒྲོ་སྐུར་བྱེད་ཅིང་ལོག་ལྟ་འཕེལ་བ་ལས་མི་འོང་། འོ་སྐོལ་བོད་ཀྱི་སྟོན་པ་འདི་ཚོ། མི་ཚེ་བཤད་སྐམ་རེ་ལ་བསྐྱལ་ནས། མངོན་ཤེས་ཀྱི་སྣ་རྩེ་བག་རེ་མི་སྒྲུབ་པར། ཕོ་ཚོད་འོད་གཏོད་དཔགས་ཀྱིས་ཕྱོགས་གཅིག་ཏུ་ཁ་ཆོད་རྦད་དེ་བཅད་ནས་ཆོས་ཟབ་མོ་ལ་སྒྲོ་སྐུར་བཏབ་ནས། ངན་འགྲོའི་གཡང་ལ་འགྲོ་སྟེ། རང་རེའི་ཐོས་པ་ཕྱོགས་རེ་བ་རེས་ང་རྒྱལ་བས་བརླག་པ་ཡིན། ཞེས་པ་དང་། དེའི་ཐིག་ལེ་བཅུ་དྲུག་དང་། གཏེར་གྱི་ཆོས་སྐད་འདིས་ཇོ་བོ་བཀའ་གདམས་པའི་གྲུབ་མཐའི་སྙིང་པོའང་གང་དུ་དེངས་པར་འགྱུར། དེའི་ཕྱིར་སངས་རྒྱས་རྣམས་ཀྱི་ཕྲིན་ལས་དང་། ཐབས་ལ་མཁས་པའི་གདུལ་ཚུལ་དང་། བྱིན་བརླབས་ཀྱི་ཆོ་འཕྲུལ་ཆེན་པོ་བསམ་གྱིས་མི་ཁྱབ་པའི་རང་བཞིན་ཁོང་དུ་ཆུད་པ་ནི། བློ་གྲོས་ཆེན་པོ་སྟེ། གང་དང་གང་དུ་སྐུ་གསུམ་གྱི་སྟོན་པའི་རོལ་པ་ཆེན་པོ་དང་། ཞིང་ཁམས་དང་། ཆོས་འཁོར་གྱི་མཚན་ཉིད་གང་ཡང་མི་འགལ་ཞིང་། བསམ་གྱིས་མི་ཁྱབ་པའི་དོན་དྲན་པར་བྱའོ། །དེ་ལ་བཟང་པོའི་བསྐལ་པ་འདིར་
ཐུན་མོང་མ་ཡིན་པའི་གསང་སྔགས་འབྱུང་བའི་གླེང་གཞིར་བསྟན་པའི་བཙས་གསུམ་གྱི་བྱིན་བརླབས་ལས། གྲགས་ཆེན་གྱི་སྟོན་པ་བཅུ་གཉིས་སུ་བསྟན་ནས་མདོ་སྔགས་ཀྱི་ཆོས་ཚུལ་མ་ལུས་ཤིང་ལུས་པ་མེད་པ་རྒྱལ་བ་དགོངས་པའི་བརྒྱུད་པ་གཅིག་ཏུ་ཐ་མི་དད་པའི་རྣམ་གཞག་བློ་གྲོས་ཆེན་པོའི་སྤྱོད་ཡུལ་དུ་བྱང་ཆུབ་པའི་རང་བཞིན་ཁོ་བོའི་བླ་མ་ཀུན་མཁྱེན་ངག་གི་དབང་པོས་ཐེག་མཆོག་རིན་པོ་ཆེའི་མཛོད་ལས་རྒྱ་ཆེར་བསྟན་པ་ལས་ཤེས་པར་བྱོས་ཤིག །འདིར་རེ་ཞིག་འཛམ་བུའི་གླིང་འདིའི་དབང་དུ་བྱས་ནས་ཐེག་མཆོག་སྙིང་པོའི་བསྟན་པ་མི་ཡུལ་དུ་ཇི་ལྟར་བབས་ནས་བོད་དུ་བྱོན་པའི་རྣམ་གཞག་བཤད་པར་བྱའོ། །དེ་ལ་ཐེག་པའི་རྩེ་མོ་མན་ངག་རྫོགས་པ་ཆེན་པོ་ནི། ཨོ་རྒྱན་གྱི་ཡུལ་དྷ་ན་ཀོ་ཤའི་གླིང་ན་རྒྱལ་པོ་ཨུ་པ་རཱ་ཛའམ། དྷརྨཱ་ཨ་ཤྭ་དང་། བཙུན་མོ་སྣང་གསལ་འོད་ལྡན་མ་གཉིས་ལ་སྲས་མོ་མི་ལས་འདས་པའི་དགེ་སློང་མ་ཞིག་ཡོད་ཅེས་གྲག་གོ །དེ་གསེར་གྱི་བྱེ་མ་བརྡལ་བའི་རྒྱ་མཚོའི་འགྲམ་ན་བསམ་གཏན་བྱེད་པའི་ཚེ། ཤེལ་གྱི་སྐྱེས་བུ་འོད་དང་ལྡན་པ་གཅིག་གིས་ཤེལ་བུམ་དཔའ་བོ་འབྲུ་ལྔས་མཚན་པས་དབང་བསྐུར་བ་རྨིས། གཡོག་མོ་མཁའ་འགྲོའི་མཚན་དང་ལྡན་པ་ལ་བཤད་པས་སྤྲུལ་པའི་སྐུ་འབྱུང་བའི་རྟགས་ཡིན་ཟེར། མི་རིང་བར་རྡོ་རྗེ་སེམས་དཔའི་སྤྲུལ་པ་ལྷའི་བུ་སེམས་ལྷག་ཅན་ཞེས་རྫོགས་
པ་ཆེན་པོ་ལྷ་ཡུལ་དུ་དར་བར་བྱེད་པ་དེ་དགེ་སློང་མའི་རུམ་ནས་བཙས། ཕ་མེད་ཀྱི་བུར་གྱུར་པས་གནོང་སྟེ་ཐལ་ཁུང་དུ་བོར་བས་སྒྲ་དང་འོད་དང་མེ་ཏོག་གི་ཆར་བྱུང་། ཞག་གསུམ་གྱི་ནངས་པར་བལྟས་པས་མ་མཉམ་པར་འདུག་ནས་ཁྲུས་གསོལ་བ་ན། ནམ་མཁའ་ནས་ལྷ་དང་མཁའ་འགྲོས་ཀྱང་མཆོད་པ་བྱས། ལོ་བདུན་ལོན་པའི་ཚེ་ཡུམ་ལ་པཎྜི་ཏ་དང་ཆོས་གཏམ་བྱ་བ་གསོལ་བས། བུ་སོ་མ་བརྗེས་པས་ཆོས་གཏམ་མི་འོང་ཟེར་ནས་གནང་བ་མ་བྱིན། ནན་གྱིས་གསོལ་ནས་རྒྱལ་པོ་ཨུ་པ་རཱ་ཛའི་མཆོད་གནས་པཎྜི་ཏ་ལྔ་བརྒྱ་དང་རྩོད་པ་བྱས་པས་སུས་ཀྱང་མ་ཐུབ་སྟེ་སྤྲུལ་པའི་སྐུར་བཟུང་ནས་ཞབས་སྤྱི་བོར་བླངས། རྒྱལ་པོ་རབ་ཏུ་དགའ་བས་དགའ་རབ་རྡོ་རྗེར་མཚན་བཏགས། བྱང་ཕྱོགས་ཉི་མ་སྣང་བྱེད་ཅེས་ཡི་དྭགས་དྲག་པོ་གནས་པའི་རི་ལ་ལོ་སུམ་ཅུ་རྩ་གཉིས་ཏིང་ངེ་འཛིན་མཛད་པས་ས་གཡོ་བ་དང་མུ་སྟེགས་ཕམ་པར་བྱས་སོ་ཞེས་པའི་སྒྲ་ཡང་བྱུང་། དེ་ཕྱུགས་རྫིས་བསྙད་པ་ལས་མུ་སྟེགས་ཀྱི་རྒྱལ་པོས་གཤེད་མ་བཏང་ཡང་། སྐུ་ཉི་ཞུར་ལྟ་བུར་གྱུར་པས་གནོད་མ་ནུས། སླར་ནམ་མཁའི་ལམ་ལ་གྱ་གྱུར་གཤེགས་པས་དད་དེ། སངས་རྒྱས་པའི་རྗེས་སུ་ཞུགས། དེར་སྡེ་སྣོད་ཀྱི་ཆོས་རྒྱ་མཚོ་ལྟ་བུ་དང་རྫོགས་པ་ཆེན་པོ་ཤོ་ལོ་ཀ་འབུམ་ཕྲག་དྲུག་ཅུ་རྩ་བཞི་གདོད་ནས་
ཐུགས་ལ་མཆིས་པ་དེ། རྡོ་རྗེ་སེམས་དཔའ་ཞལ་མངོན་སུམ་དུ་བསྟན་ནས། འོད་ཟེར་ཆེན་པོའི་དབང་གི་སློབ་པའི་ཡེ་ཤེས་མངོན་སུམ་དུ་གསལ་བའི་ཚུལ་བསྟན། ཚིག་གི་རྒྱུད་ཡི་གེར་འགོད་པའི་གནང་བ་བྱིན་ནས། རྡོ་རྗེ་དབྱིངས་དང་ཡོན་ཏན་མཐའ་ཡས་པའི་མཁའ་འགྲོ་མ་ལ་སོགས་པས་གླེགས་བམ་དུ་བཀོད། མཁའ་འགྲོ་སེམས་ལྡན་མས་བཟུང་སྟེ་མཆོད་པར་བྱེད་ཅིང་སློབ་དཔོན་ཉིད་ཁྱབ་འཇུག་གི་བུ་མོ་གཅེར་བུ་ལ་ཆིབས་ཏེ་དུར་ཁྲོད་བསིལ་བའི་ཚལ་དུ་བྱོན་ནས་མཁའ་འགྲོ་རྣམས་ལ་ཆོས་སྟོན་ཏོ། །དེའི་ཚེ་མ་ག་དྷ་རྡོ་རྗེ་གདན་གྱི་ནུབ་ཕྱོགས་རིམ་པ་གཉིས་པའི་གྲོང་ཁྱེར་དུ་བྲམ་ཟེ་སྙིང་པོ་གྲུབ་པའམ་འཇམ་དཔལ་བཤེས་གཉེན་ཞེས་བྱ་བ་རིག་པའི་གནས་ལྔ་ལ་མཁས་པ་ཞིག་བྱོན། རྣམ་ཐར་བཻ་རོའི་འདྲ་འབག་ལ་གསལ་ཞིང་རྒྱལ་རིགས་ལྟར་བཤད་པ་འོག་ཏུའང་བྲི་བར་བྱའོ། །དེ་ལ་འཇམ་དཔལ་རྣོན་པོས་ལུང་བསྟན་ནས་དགའ་རབ་རྡོ་རྗེའི་དྲུང་དུ་བརྟོལ། ལོ་དོན་ལྔར་ཆོས་ཉན། མཐར་དགའ་རབ་རྡོ་རྗེ་ཆུ་བོ་དན་ཏིའི་མགོར་འོད་ཕུང་དུ་ཡལ་བའི་ཚེ་འདས་རྗེས་ཀྱི་གླེགས་བམ་བབས། གཟིགས་པ་ཙམ་གྱིས་སློབ་དཔོན་དང་རྟོགས་པ་མཉམ་པར་གྱུར་ནས། རྫོགས་པ་ཆེན་པོ་འབུམ་ཕྲག་དྲུག་ཅུ་རྩ་བཞི་གནས་པ་སེམས་ཀྱི་སྡེ། བྱ་བྲལ་
ཀློང་གི་སྡེ། གནད་དོན་མན་ངག་གི་སྡེ་དང་གསུམ་དུ་ཕྱེ། གནད་ལས་ཟབ་པ་སྙིང་གི་ཐིག་ལེའི་སྐོར་ལ་བཤད་རྒྱུད་དང་། རྣལ་འབྱོར་རྒྱུད་གཉིས་སུ་ཕྱེ། རྣལ་འབྱོར་རྒྱུད་མཆན་བུར་བཏབ། བཤད་རྒྱུད་སྤེལ་བའི་ཡུལ་མ་རྙེད་ནས་རྡོ་རྗེ་གདན་དུ་གཏེར་ལ་སྦས། ནུབ་ཕྱོགས་ཀྱི་དུར་ཁྲོད་ཆེན་པོ་སོ་ས་གླིང་དུ་ལོ་བརྒྱ་དང་རྩ་དགུར་བཞུཊ་སོ། །དེའི་ཚེ་རྒྱ་ནག་ཏུ་ཁྱིམ་བདག་གི་རིགས་ལས་ཤྲཱི་སིངྷ་ཞེས་བྱ་བ་རིག་པའི་གནས་ལྔ་ལ་མཁས་པ་གཅིག་བྱུང་། སྤྱན་རས་གཟིགས་ཀྱིས་ལུང་བསྟན་ནས་འཇམ་དཔལ་བཤེས་གཉེན་གྱི་མན་ངག་མྱུར་དུ་རྟོགས་པའི་སླད་དུ། རབ་ཏུ་བྱུང་ཞིང་གསང་སྔགས་མཐའ་དག་སྦྱངས་པས་ཚེའི་རིག་འཛིན་དང་རྫུ་འཕྲུལ་ཡང་གྲུབ། དེར་སླར་ཡང་ཐུགས་རྗེ་ཆེན་པོས་བསྐུལ་ཏེ་འཇམ་དཔལ་བཤེས་གཉེན་ལོ་ཉེར་ལྔ་བསྟེན། སློབ་དཔོན་འོད་ཕུང་དུ་ཡལ་བའི་དུས་འདས་རྗེས་ཤྲཱི་སིངྷའི་ཕྱག་ཏུ་བབས་པས་རྟོགས་པ་མཉམ་པར་སོང་། དེ་ནས་ལོ་བརྒྱ་ཉེར་ལྔ་ན་འཇམ་དཔལ་བཤེས་གཉེན་ཕྱི་མ་ནུབ་ཕྱོགས་ཀྱི་པདྨ་ལས་བརྫུས་ཏེ་སྐྱེས་པ་སློབ་དཔོན་ཆེན་པོ་པདྨའི་གསང་སྔགས་མང་པོའི་འབྱུང་ཁུངས་ཀྱང་ཡིན། འདིས་ཨརྱ་དེ་ཝ་ལ་སྙིང་ཐིག་བསྟན་པས་འོད་དུ་ཡལ་ཞིང་། སངས་རྒྱས་ཡེ་ཤེས་ཞབས་ལ་རྫོགས་པ་ཆེན་པོ་ཡེ་ཤེས་སྤྱི་ཡི་གཟུགས་ཞེས་པས་མཚོན་རྫོགས་
ཆེན་དང་ཐ་མི་དད་པའི་འཇམ་དཔལ་ཞལ་ལུང་གི་དོན་བསྟན་པའང་བསྟན་བཅོས་རྒྱུད་ཀྱི་དངོས་པོ་ཅན་རྫོགས་པ་ཆེན་པོའི་གྲུབ་མཐའི་ངོ་བོར་གནས། འདིས་མཚོན་ནས་རྒྱ་གར་གྱི་པཎ་གྲུབ་ཕལ་མོ་ཆེ་ཞིག་རྫོགས་པ་ཆེན་པོའི་ལྟ་བ་ལས་དངོས་གྲུབ་བརྙེས་པ་མང་མོད་ཀྱི། མན་ངག་གི་རྒྱུད་འདི་གཞུང་གིས་གསང་ཞིང་ལུ་གུ་རྒྱུད་ལ་སོགས་པའི་མིང་ཙམ་བརྗོད་ཀྱང་དམ་ཚིག་མ་ཡིན་པར་བཤད་པས། རྒྱ་གར་ནའང་ཆིག་བརྒྱུད་འབའ་ཞིག་ཏུ་བཀའ་རྒྱ་དམ། འགྲོ་དོན་ཀྱང་མཁའ་འགྲོ་མ་དང་། མི་མ་ཡིན་གྱི་གནས་ཁོ་ན་ལ་ཆེ་བར་གསུངས་པས་ཐ་མལ་གྱི་གདུལ་བྱ་ལ་ཁྲོམ་བསྒྲགས་སུ་གནང་བའང་མེད། བྱེ་བྲག་ཏུ་རྒྱ་གར་གྱི་སློབ་དཔོན་རྣམས་གསང་བ་བསྲུང་བ་ལ་ཐུགས་སྒམ། ལྷ་དང་སྔགས་ཀྱི་དེ་ཉིད་ཁྱབ་བརྡལ་དུ་མི་སྟོན་པའི་དམ་ཚིག་ལ་ཤིན་ཏུ་གནས་པས་ནམ་དངོས་གྲུབ་ཆེན་པོ་ཐོབ་པའི་མཚན་མ་ཀུན་གྱི་སྤྱོད་ཡུལ་དུ་མངོན་པའི་ཚེ། ཀྱེ་མ་དེ་ནི་སྔགས་ལ་སྤྱོད་པའི་རིགས་ཅན་ནོ། །ཞེས་གླེང་ཞིང་ཤེས་པ་ལས། བསྟན་པ་སྙིགས་ཤིང་གསང་སྔགས་འཆལ་བའི་གནས་སྐབས་ལྟར། གསང་བ་ཁྲོམ་དུ་གྱེར་ཞིང་། རྒྱུད་དང་མན་ངག་རླུང་གིས་དེད་པའི་ཤིང་ལོ་བཞིན་དཔེ་འཁྱམས་སུ་བྱེད་པ་མེད། དཔེར་ན་མར་པས་མིང་ཙམ་ཐོས་པའི་ནཱ་རོ་མཁའ་སྤྱོད་བལ་པོ་ཕམ་མཐིང་པ་ལ་གྲགས་ཟེར་བ་བཞིན་ནོ། །འདི་
ལྟར་བྲེང་ཆགས་ཀྱི་བརྒྱུད་པར་མ་བཞུགས་ཀྱང་མངོན་གྱུར་པ། པཎ་ཆེན་ཤཱཀྱ་ཤྲིས་སློབ་དཔོན་ཆེན་པོ་ལ་རྡོ་རྗེ་ཕུར་པ་དངོས་སུ་ཐོབ་པ་དང་། ཕ་དམ་པས་སངས་རྒྱས་གསང་བ་ལས་ཡོ་གའི་གདམས་པ་མནོས་ཤིང་། རྫོགས་པ་ཆེན་པོའི་ལྟ་བའི་གྲུབ་མཐའ་འཛིན་པ་དང་། ཞང་གཡུ་བྲག་པའི་མཆིམས་ཕུ་བཀའ་རྒྱ་མར། སློབ་དཔོན་ཆེན་པོ་དང་། བྷོ་དྷི་སཏྭ། བཱི་མ་མི་ཏྲ་རྣམས་ལས་དངོས་སུ་གསན་པའི་རྫོགས་ཆེན་ཡོད། རྗེ་བཙུན་མི་ལས་རྫོགས་ཆེན་ཉན་ཏེ་ལྟ་བ་རིག་ཐོག་ཏུ་མཉམ་པར་མ་བཞག་པས་རེ་ཞིག་རྟེན་འབྲེལ་འཆུགས་མོད་ཀྱི། མཐར་ཐུག་མར་པའི་ཐབས་ལམ་གྱི་རྒྱུ་བྱས་ནས་འབྲས་བུ་རྫོགས་པ་ཆེན་པོ་ཀ་དག་ཆོས་ཟད་ཀྱི་ཀློང་དུ་དངོས་གྲུབ་བརྙེས་པ་ཡིན་ཏེ་ལྟ་བའི་ཞེ་ཕུགས་ལ་ལྟོས། རྣལ་འབྱོར་གྱི་དབང་ཕྱུག་ཀརྨ་པཀྴི། དགའ་རབ་རྡོ་རྗེའི་སློབ་མ་ཏོག་རྩེ་བར་གྱུར་ནས་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་ཁོང་དུ་ཆུད་པའི་སྔོན་གནས་རྗེས་དྲན་ལས་དངོས་གྲུབ་བརྙེས། ཀུན་མཁྱེན་རང་བྱུང་རྡོ་རྗེས་རང་གི་མཛོད་སྤུར་བཱི་མ་ལ་ཐིམ་པའི་རྐྱེན་གྱིས་སྙིང་ཐིག་ཁོང་དུ་ཆུད་དེ་དགོངས་གཏེར་བྱོན། མདོ་སྔགས་གཉིས་ཀ་ལ་བྱང་བའི་གྲུབ་ཆེན་ཨོ་རྒྱན་པ་དང་། ཡང་དགོན་པ་སོགས་འཁོར་འདས་རོ་གཅིག་ཏུ་ཤར་བ་དེ་རྣམས་ཀྱང་རྫོགས་པ་ཆེན་པོ་ལས་དངོས་གྲུབ་བརྙེས་པ་ཤ་སྟག་ཡིན་
ཏེ། བསྟན་པའི་བབས་ཚུལ་གྱི་རྟེན་འབྲེལ་ལས། དེ་དག་ལས་རྒྱ་ཆེར་བརྒྱུད་པ་དང་བརྒྱུད་པའང་བཞུགས་པ་ནི། རྒྱལ་བ་རང་བྱུང་རྡོ་རྗེ་ཙམ་ལས་མ་བྱུང་བ་ལྟ་བུས་ཤེས་སོ། །འཇམ་དཔལ་བཤེས་གཉེན་མི་སྣང་བའི་རྗེས་ཤྲཱི་སིངྷས་མན་ངག་གི་དཔེ་ཕྱུངས། ཐིག་ལེའི་སྐོར་ལ་ཕྱི་ནང་གསང་བ་ཡང་གསང་བླ་ན་མེད་པ་སྟེ་སྐོར་བཞིར་ཕྱེ་ནས་དང་པོ་གསུམ་གཏེར་དུ་སྦས། ཕྱི་མ་ཐུགས་ལ་གབ་པ་མཁའ་འགྲོའི་ལུང་གིས་སྐབས་དབྱེ་ཞིང་དེ་ཉིད་དུ་སྦས། སློབ་དཔོན་ཉིད་བསིལ་སྦྱིན་དུར་ཁྲོད་ན་དཔའ་བོ་དང་མཁའ་འགྲོའི་ཚོགས་རྗེར་མཛེས་པ་ཉིད་དོ། །དེ་ལ་བཱི་མ་ལ་མི་ཏྲ་དང་། ཛྙ་ན་སཱུ་ཏྲས་ཞུས་ཏེ། དང་པོ་ནི་ཁྱིམ་བདག་གི་བུ། ཕྱི་མ་ནི་གདོལ་པའི་རིགས་ལས་རབ་ཏུ་བྱུང་། གཉིས་ཀའང་མཁས་པའི་བྱ་བ་མཐར་ཕྱིན་པས་རྡོ་རྗེ་གདན་ན་པཎྜི་ཏ་ལྔ་བརྒྱའི་གཙོ་བོར་གྱུར། ཚེ་སྔོན་སྤུན་ཟླར་གྱུར་པའི་རྟེན་འབྲེལ་ལས་ཐུགས་ཤིན་ཏུ་གཅུགས། རེ་ཞིག་ན་སྐྱོ་སངས་ལ་བྱོན་པས་ནམ་མཁར་རྡོ་རྗེ་སེམས་དཔའི་ཞལ་གཟིགས། ཁྱེད་གཉིས་སྐྱེ་བ་ལྔ་བརྒྱར་པཎྜི་ཏར་གྱུར་མོད་ཀྱི་འབྲས་བུ་ཅི་ཡང་མ་ཐོབ། ད་ཚེ་གཅིག་གིས་སངས་རྒྱ་བར་འདོད་ན་རྒྱ་ནག་བྱང་ཆུབ་ཤིང་དྲུང་ན་སོང་ཞིག་པར་བསྐུལ། བཱི་མ་ལ་བརྩོན་འགྲུས་ཆེ་བས་སྔོན་ལ་བརྟོལ། རྣལ་འབྱོར་རྒྱུད་དང་མན་ངག་ཕྱི་ནང་གསང་གསུམ་གྱིས་ཚིམས་ནས་
ལོག །རྗེས་ལ་ཛྙཱ་ན་སཱུ་ཏྲས་བྱོན་བླ་མའི་བྱིན་བརླབས་ཀྱིས་ཟླ་བ་དགུའི་ལམ་ཉིན་ལམ་ལ་བཅད། མཛེས་མ་ཆུའི་བུམ་པ་ཁྱེར་བས་བཀྲ་ཤིས་ཁྲི་སྒོ་ལུང་བསྟན། དེར་བརྟོལ་བ་ན་སློབ་དཔོན་བསིལ་སྦྱིན་དུར་ཁྲོད་ན་བཞུགས་སོ་ཞེས་མཁའ་འགྲོ་མས་ལུང་བསྟན་པ་བཞིན་སོང་། ཤྲཱི་སིངྷ་ཐོད་པའི་ཁང་བུ་བརྩེགས་པ་ན་ཁྱབ་འཇུག་གི་སྟན་ལ་རོལ་པའི་སྟ་སྟངས་སུ་འདུག་པའི་དྲུང་དུ་སླེབས། ཕྱག་སོར་གསུམ་གྱེན་ལ་བསྟན་བྱུང་བས་གདམས་པ་ལོ་གསུམ་ན་ཐོབ་པར་གོ །དེའི་བར་བླ་མའི་ཞབས་ཏོག་བྱས། དེ་ནས་ལོ་དགུར་རྣལ་འབྱོར་རྒྱུད་དང་ཕྱི་ནང་གསང་གསུམ་པོ་གསན། འདི་ལ་དཔེ་ཞིག་འོང་ཐང་སྙམ་པ་སློབ་དཔོན་གྱིས་དགོངས་ཏེ་དཔེ་རྣམས་ཕྱུང་ནས་གནང་། ལྡོག་པར་ཆས་པ་ན་ཚིམ་མམ་གསུངས། ཚིམས་ལགས་ཞུས་པས། གཏད་པ་མེད་གསུངས་པས་གདམས་པ་མ་རྫོགས་པར་གོ །སླར་གསོལ་བ་བཏབ་པས། སྤྲོས་བཅས་བུམ་པའི་དབང་རྫོགས་པར་བསྐུར། གསང་བ་བླ་མེད་ཀྱི་མན་ངག་ལོ་གསུམ་དུ་གནང་། གླེགས་བམ་ནི་མ་བསྟན་ཏེ་དུས་ལ་བབ་པའི་ཚེ་ཁྱོད་ལ་སྣང་བར་འགྱུར་རོ། །ཞེས་ལུང་བསྟན། ད་ནི་གདམས་ངག་ཀྱང་རྫོགས་པར་ཐོབ། ཉམས་སུ་བླངས་བཞིན་པས་བླ་མའི་ཞབས་ཏོག་བྱའོ་སྙམ་པ་ན། སྣོད་ཁྱད་པར་ཅན་དུ་གཟིགས་ནས་
སྤྲོས་མེད་ཀྱི་དབང་རྫོགས་པར་གནང་། ལོ་གཅིག་ཏུ་འཁོར་འདས་རུ་ཤན་འབྱེད་པའི་སྤྱོད་པ་ཚད་དུ་ཕྱིན་པར་བྱས། གདམས་པ་དུས་གཅིག་ཏུ་མི་སྟོན་པ་ཐེག་པ་རྒྱལ་པོ་འདིའི་རིང་ལུགས་ཡིན་པས། སླར་ཤིན་ཏུ་སྤྲོས་མེད་ཀྱི་དབང་བསྐུར་བས་གནས་ལུགས་ཡིད་དཔྱོད་ལ་མི་རེ་བའི་ངེས་ཤེས་ཁྱད་པར་ཅན་དུ་སྐྱེས། མཐར་རབ་ཏུ་སྤྲོས་མེད་ཀྱི་དབང་རྫོགས་པ་ན་རིག་པ་ཚད་ལ་ཕེབས། ལོ་བཅུ་དྲུག་གི་བར་དུ་བླ་མའི་མཛད་སྤྱོད་ལྟ་ཞིང་ཉམས་སུ་བླངས། དེའི་ཚེ་སློབ་དཔོན་ནི་རྟུལ་ཞུགས་ཀྱིས་ཀུན་ཏུ་སྤྱོད་པ་རྒྱ་མཚོའི་གནས་ལ་ཞུགས་ཏེ་འཇིགས་སུ་རུང་བའི་དུར་ཁྲོད་རྣམས་མྱུལ། འབྱུང་བཞི་ཟད་པར་གྱི་སྤྲུལ་བསྒྱུར་དང་། ཕྱོགས་ལས་རྣམ་རྒྱལ་གྱི་སྤྱོད་པས་མཁའ་འགྲོ་དང་། འབྱུང་པོ་དང་། ཤ་ཟའི་དབུས་ན་བག་ཚ་བ་མེད་པར་བཞུགས་ཞེས་གྲག་གོ །དེར་རྒྱལ་པོ་དཔལ་བྱིན་ཞེས་བྱ་བ་དད་དེ་སྤྱན་དྲངས་པ་ན། སེངྒེ་དཀར་མོ་ཡན་ལག་དྲུག་པ་ལ་བཅིབས་ཏེ་གཤེགས། རེ་ཞིག་ནས་གཡོ་བ་དང་། སྒྲ་དང་འོད་ཆེན་པོ་བྱུང་བས་སྐུ་ཡལ་བར་ཤེས་ཏེ་ཛྙཱ་ན་སཱུ་ཏྲས་གསོལ་བ་བཏབ་པས། ཞལ་ཆེམས་གཟེར་བུ་བདུན་པ་ཕྱག་ཏུ་བབས། གསང་བའི་མན་ངག་རྣམས་བཀྲ་ཤིས་ཁྲི་སྒོའི་ཀ་བའི་ཁོང་ནས་ལོངས་ལ་དུར་ཁྲོད་བསིང་གི་ནགས་སུ་སོང་ཞིག་པར་ལུང་བསྟན་ཐོབ། དེར་སྔོན་གྱི་ལུང་
བསྟན་བཞིན་གླེགས་བམ་རྣམས་ཕྱུང་། རྡོ་རྗེ་གདན་གྱི་ཤར་ཕྱོགས་ནས་རིང་པོར་ཐལ་བ་ན་དུར་ཁྲོད་དེ་ཡོད་སར་བྱོན་ནས་མཁའ་འགྲོ་མ་རྣམས་ལ་ཆོས་སྟོན་ཅིང་བཞུགས་སོ། །དེའི་ཚེ་པཎྜི་ཏ་གྲུབ་པའི་རྣལ་འབྱོར་ཆེན་པོ་བཱི་མ་ལ་དུར་ཁྲོད་དུ་སྤྱོད་པ་ལ་རྒྱུ་བའི་ཚེ། མཁའ་འགྲོ་མ་དཔལ་གྱི་བློ་གྲོས་ཞེས་བྱ་བས་སྔ་མ་ནི་ཐུན་མོང་གི་མན་ངག་ཡིན་གྱི། ཡང་གསང་བླ་ན་མེད་པ་ཐུགས་ལ་གབ་པ་ཡོད་པས། བསིང་གི་དུར་ཁྲོད་དུ་སོང་ཞིག་པར་བསྐུལ། འདི་ལྟར་སྐྱེས་བུ་དམ་པ་རྣམས་ནི་གདམས་པ་དང་ཡེ་ཤེས་ཐོབ་པའི་གནས་ལ་ཤིན་ཏུ་གུས་པར་སྟོན་པས། རྫུ་འཕྲུལ་གྱི་ཀུན་ཏུ་སྤྱོད་པས་སྐད་ཅིག་ལ་གཤེགས་ཏེ་མཉམ་འགྲོགས་དང་ཡིད་གཉིས་སྤངས་ནས་རྗེས་སུ་འཛིན་པར་ཞུས་པ་ན། མཛོད་སྤུ་ནས་འོད་ཟེར་བཀྱེ། སྤྱན་གྱེན་དུ་ལྡོག་པ་ཙམ་གྱིས་ལོངས་སྐུའི་ཞིང་ཁམས་བསྟན་པས་དད་པ་ཤིན་ཏུ་ཐོབ། སྤྲོས་བཅས་ཀྱི་དབང་བསྐུར་བའི་མོད་ལ་སློབ་དཔོན་བི་མ་ལའི་མཛོད་སྤུའི་སྒོ་ཕྱེ། སྤྲོས་མེད་ཀྱི་དབང་བསྐུར་བས་བ་སྤུའི་སྒོ་ནས་འོད་ཟེར་བྱུང་། ཟླ་བ་བཅུ་འཁོར་འདས་རུ་ཤན་ཕྱེ་ནས་ཤིན་ཏུ་སྤྲོས་མེད་ཀྱི་དབང་བསྐུར་བས་ཡོན་ཏན་ཁྱད་པར་ཅན་སྐྱེས། ཤངས་ཀྱི་རྩེར་ཡི་གེ་ཨ་དཀར་པོ་ཐིགས་ལ་ཁད་པ་བྱུང་། རབ་ཏུ་སྤྲོས་མེད་ཀྱི་དབང་བསྐུར་བས་རིག་པ་བཞི་ཐོག་ལས་རྣམ་པར་གྲོལ། འདི་ཙམ་ན་སློབ་
དཔོན་གཉིས་ཀ་དགུང་ལོ་བརྒྱ་དང་གསུམ་ཡིན་ཞེས་གྲགས། བརྒྱ་དང་བཅུ་གསུམ་ལོན་ཚེ་ཛྙཱ་ན་སཱུ་ཏྲ་འཇའ་ལུས་འཕོ་བ་ཆེན་པོའི་སྐུར་གཤེགས་ནས་འདས་རྗེས་བི་མ་ལའི་ཕྱག་ཏུ་བབས་པས་སློབ་དཔོན་དང་དགོངས་པ་མཉམ། དེ་ནས་བི་མ་ལས་རྒྱལ་པོ་དྷརྨ་པ་ལ་དང་། ཡུལ་ཀ་མ་རུའི་རྒྱལ་པོ་གཉིས་ཀྱི་མཆོད་གནས་ལོ་ཉི་ཤུ་རེ་མཛད། སླར་རབ་ཏུ་སྣང་བྱེད་ཅེས་བྱ་བར་སྤྱོད་པ་ལ་གཤེགས་ནས་མཁའ་འགྲོ་མའི་ཚོགས་དཔག་ཏུ་མེད་པ་དབང་དུ་བསྡུ་བཞིན་པར་གསང་བ་མན་ངག་གི་དཔེ་ཚར་གསུམ་བྲིས། གཅིག་ཨོ་རྒྱན་གྱི་ཡུལ་གསེར་གྱི་བྱེ་མ་བརྡལ་བའི་གླིང་དུ་སྦས། གཅིག་ཁ་ཆེའི་མཐའ་འཁོབ་རིགས་ངན་གྱི་གྲོང་ཁྱེར་དང་ཉེ་བའི་བྲག་སྐྱིབས་སུ་སྦས། གཅིག་དུར་ཁྲོད་དེ་ཉིད་དུ་རྒྱས་བཏབ་བོ། །སྤྱིར་འཛམ་བུའི་གླིང་ན་དུར་ཁྲོད་ཆེན་པོ་བརྒྱད་ཀྱི་དབུས། མཁའ་འགྲོ་ངེས་པར་འདུ་བའི་དུར་ཁྲོད་བརྒྱ་དང་བཅུ་གསུམ་ཡོད། ཀུན་ཀྱང་མི་མ་ཡིན་གདུག་པ་ཅན་དང་། མཁའ་འགྲོ་མས་དབང་བྱས་པས་གདུག་རྩུབ་ཆེ། སྲོག་ལ་བར་གཅོད་ཤིན་ཏུ་རྩུབ་ཅིང་སྐྱི་གཡའ་བ་ཅན། ཨོ་རྒྱན་དང་། ཟ་ཧོར་དང་། ཤམྦྷ་ལ་སོགས་འཛམྦུ་གླིང་གི་གྲུབ་པའི་གནས་ཐམས་ཅད་དུ་སློབ་དཔོན་བི་མ་ལས་སྤྱོད་པ་མཛད་པས། ཉེ་བའི་འཐུང་སྤྱོད་ཙ་རི་ཏྲ་ནའང་མུ་སྟེགས་ཀྱི་རྣལ་འབྱོར་པ་བཏུལ་བའི་ཞབས་རྗེས་ཡོད་པར་
གྲགས། སློབ་དཔོན་བཱི་མ་ལས་དགུང་ལོ་ཉིས་བརྒྱར་ཉེ་བའི་ཚེ་བཙན་པོ་ཁྲི་སྲོང་ལྡེའུ་བཙན་གྱིས་བོད་ན་བསྟན་པ་བཙུགས་པའི་སྐབས་སུ་གྱུར། བཙན་པོ་ཉིད་སྐྱེ་བ་སྔ་མ་ལ་རྒྱ་གར་ན། དགེ་སློང་ཨ་བ་དྷུ་ཏི་བར་གྱུར་པའི་བག་ཆགས་ལས་རྒྱུ་འབྲས་བྱ་རྩོལ་ལས་འདས་པའི་ཐེག་པ་རྒྱ་གར་ན་བལྟར་མི་མངོན་པར་ཡོད་པ་ཡང་མཁྱེན། ཁྱད་པར་ཉང་ཏིང་འཛིན་བཟང་པོ་ཞེས་བྱ་བ། མངའ་བདག་གཞོན་ནུར་བཙའ་བའི་བུ་རྫིར་གྱུར་ལ། ཕྱིས་རབ་ཏུ་བྱུང་ནས་ལོ་བདུན་དུ་མཉམ་པར་གཞག་པས་ཏིང་ངེ་འཛིན་གྱིས་འཚོ་ཞིང་། ཤའི་སྤྱན་གྱིས་གླིང་བཞི་ཅིག་ཅར་དུ་གཟིགས་པས་ཉང་བན་ཤའི་སྤྱན་ཅན་ཞེས་གྲགས་པ་དེས་ལུང་བསྟན་ཅིང་བསྐུལ་ནས། རྒྱལ་པོས་བཱི་མ་ལ་རྒྱ་གར་མ་ཧཱ་ར་ཛའི་མཆོད་གནས་སུ་བཞུགས་པ་ལ། གསེར་གྱི་སྐྱེས་བཟང་པོ་དང་བཀའ་རྟགས་མཛད་ནས་ལོ་ཙཱ་བ་སྐ་ཅོག་གཉིས་སྤྱན་འདྲེན་དུ་མངགས། བོད་གདུལ་བྱར་གཟིགས་ནས་ཨ་ཙ་ར་ས་སྙིང་གཡོག་ཏུ་ཁྲིད་ནས་བྱོན། རྒྱ་གར་བ་རྣམས་ཀྱི་རྨི་ལམ་དང་ཆུ་ཚོད་ཀྱི་རྩིས་འཁྲུགས། རྩི་ཤིང་མེ་ཏོག་རྣམས་ཀྱང་བོད་དུ་ཁ་བསྟན། མཁའ་འགྲོ་མ་རྣམས་ཀྱང་ཕྲག་པ་དོག་པས་མཁས་པ་པཎྜི་ཏས་འབྲས་བུའི་ཆོས་ཁྱེར་ནས་བོད་དུ་སོང་བས་ལན་ཟེར། དེར་བོད་ཐེ་ཚོམ་བསྐྱེད་པའི་རྐང་
མགྱོགས་པ་བཏང་ནས་ཕྲ་མེན་གྱི་ངན་སྔགས་མཁན་པོ་སོང་ངོ་ཞེས་བི་མ་ལའི་སྔོན་དུ་བརྟོལ་ནས་དབྱེན་ཆེན་པོ་བཅོས་པས། པཎྜི་ཏ་བསམ་ཡས་སུ་ཕེབས་ཀྱང་བོད་རྣམས་ཐེ་ཚོམ་སྐྱེས་པས་བཙན་པོ་དང་མ་མཇལ། སྤྱིར་སློབ་དཔོན་འདི་དགའ་རབ་རྡོ་རྗེ་དང་ལན་བདུན་མཇལ། རྫོགས་པ་ཆེན་པོ་ལ་གྲུབ་པ་ཤིན་ཏུ་བརྙེས་པས། འཁོར་འདས་བློས་བཅོས་ཤིང་རྒྱུ་འབྲས་ལས་འདས་པར་སྟོན་ཕྱིར། དབུ་ཚལ་དུ་རྣམ་སྣང་གི་ལྡེར་ཚོ་ལ་ཕྱག་མཛད་པས་ཐལ་ཕུང་དུ་སོང་། སླར་ལ་ཐེ་ཚོམ་ཆེར་སོང་བས་དབུ་ཞྭ་བསྐོན་ཅིང་ཕྱག་རེག་པ་ཙམ་གྱིས་སྔར་ལས་གཟི་བྱིན་ཆེ་བར་བྱུང་། རྟགས་རྣལ་འབྱོར་པར་ཡོད་པས་ཕྱི་རོལ་པར་དོགས་པའི་ཉེས་པ་སེལ་ཕྱིར་ཡིན་ཡང་ཟེར་ཏེ་ཇི་ལྟར་ཡང་། རྒྱལ་བློན་ཡིད་ཆེས་མ་གྱུར་པས། སྐྱབས་འགྲོ་ཡན་ལག་དྲུག་པ་བྱས། གསུངས་པ་ནི་མད། རྒྱལ་པོ་སླར་དད་དེ་རྒྱུ་འབྲས་ཀྱི་ཆོས་སྤྱི་དང་བྱེ་བྲག་ཏུ་གཉགས་ཛྙཱ་ནས་ལོ་ཙཱ་མཛད་དེ་སྒྱུ་འཕྲུལ་དང་གཡུ་སྒྲ་དང་བཅས་ཏེ་སེམས་སྡེ་ཕྱི་འགྱུར་བཅུ་གསུམ་བསྒྱུར། མན་ངག་སྙིང་ཐིག་རྗེ་བློན་གཉིས་སོགས་སྐལ་བ་དང་ལྡན་པ་འགའ་ཙམ་ལའང་། ལྐོག་ཆོས་སུ་གདམས་པ་འདི་འཐད་པ་ཀུན་མཁྱེན་ཆེན་པོ་བཞེད། ཆོས་འདི་བློ་ལ་ཆུད་པ་དང་། ལྟ་སྤྱོད་ཟུང་འབྲེལ་དུ་ཉམས་སུ་བླངས་ནུས་པ་ཤིན་ཏུ་དཀོན་པར་གཟིགས་ནས། གསང་བ་སྙིང་
ཐིག་བོད་ཡིག་ཏུ་བྱས་ནས་མཆིམས་ཕུའི་དགེ་གོང་དུ་སྦས། རྒྱ་དཔེ་རྣམས་ཕྱི་མའི་དུས་མན་ངག་བསླད་པ་ཅན་འོང་བར་གཟིཊ་ནས་ཞུ་དག་གི་ཆེད་དུ་སྦས་པ་ཞུ་དག་པར་བྱེད་ཅིང་། རྒྱ་ཆེར་འགྲེལ་པ་པོ་ཀུན་མཁྱེན་ངག་གི་དབང་པོ་བསྟན་པ་མི་ནུབ་པའི་རྒྱལ་མཚན་དུ་བྱོན་ཏོ། །བཱི་མ་ལ་སྔ་ཕྱི་གཉིས་སུ་བྱོན་པར་འདོད་པ་ནི། སློབ་དཔོན་འདི་མདོ་སྔགས་ཀྱི་ཆོས་རྒྱ་མཚོ་ལྟ་བུ་ལ་མཁས་པས་སོ་སོ་ཐར་པའི་རྒྱ་ཆེར་འགྲེལ་ལ་སོགས་པའི་བསྟན་བཅོས་དགག་པར་མི་ནུས་པ་དག་མཆིས་པ། རྫོགས་པ་ཆེན་པོ་ཕྱོགས་གཞན་དུ་འཕུལ་བར་འདོད་པ་དག་གིས་ཀུན་སློང་མིན་ན་རུང་སྟེ། དོན་ལ་ཤེས་རབ་སྙིང་པོའི་རྒྱ་ཆེར་འགྲེལ་དང་། རིམ་གྱིས་དང་། ཅིག་ཅར་འཇུག་པའི་སྒོམ་དོན་གཉིས་ཀྱང་སློབ་དཔོན་འདིས་མཛད་ཅིང་། ཡེར་པའི་དཀར་ཆག་ལས་རབ་བྱུང་གི་མཁན་པོ་མཛད་པའི་ལོ་རྒྱུས་བསྙད་པ་སོགས་རྟགས་ཀྱང་གང་ཡིན་བསྒྲུབ་དཀའ་ལ། སྤྱིར་འཕགས་པའི་གནས་བརྟན་བཅུ་དྲུག་དང་། ཇོ་བོ་ཨ་ཏི་ཤ་ཡང་བཤུལ་ལམ་ལ་ན་བཟའ་དཀར་པོ་ཡིན་ལ། བོད་དེ་ལ་ཁྱིམ་པར་འཛིན་པ་གསན་པས། ན་བཟའ་བརྗེས་ནས་ཕེབས་པ་སོགས་རྟགས་འབའ་ཞིག་ལ་ངེས་པ་ཁོ་ནའང་ཡོད་དཀའོ། །དེ་ལྟར་ལོ་བཅུ་གསུམ་བོད་ཡུལ་དུ་བཞུགས་ནས་སླར་རྒྱ་ནག་རི་བོ་རྩེ་ལྔར་གཤེགས། སངས་རྒྱས་ཀྱི་བསྟན་པ་ཇི་སྲིད་གནས་
ཀྱི་བར་ལ་གནས་དེར་འཕོ་བ་ཆེན་པོའི་སྐུར་བཞུགས། ལོ་བརྒྱ་བརྒྱ་ན་བོད་དུ་སྐུའི་བཀོད་པ་རེ་བསྟན་ནས་རྫོགས་པ་ཆེན་པོའི་ལྟ་སྒོམ་ནོར་བ་བསལ་བར་བྱེད། མ་འོངས་པ་ན་བསྟན་པའི་བཙས་གསུམ་འཇིག་རྟེན་གཞན་དུ་འཕོ་བའི་ཚེ། རྡོ་རྗེ་གདན་དུ་འོད་སྐུར་དེངས་པར་འགྱུར་རོ། །ཨ་ཙ་ར་ས་སྙིང་མཆིམས་ཕུར་གྲོངས་པ་ལའང་ལྟས་ཁྱད་པར་ཅན་བྱུང་ནས་བཱི་མ་ལ་གྲོངས་པར་ནོར་བར་བྱུང་ངོ་། །དེ་ལྟར་བཱི་མ་ལ་གཤེགས་ནས་ལོ་ལྔ་བཅུ་རྩ་ལྔ་ན། དེས་མན་ངག་རྗེས་སུ་གདམས་པ་ཉང་ཏིང་འཛིན་བཟང་པོ་རྒྱུད་རྣམ་པར་དག་སྟེ་ཕུང་པོ་ཟག་མེད་དུ་གྱུར། རྡོ་རྗེ་ལེགས་པས་ཁམས་སུ་སེར་བ་ཕབ་པའི་ནས་རྔ་མོའི་ཁལ་རྒྱབ་བརྒྱ་བཀལ་བྱུང་བ་ལ་རྡོ་རྗེ་འཕངས་པས་དམ་ཚིག་དྲན་ཏེ་ནས་རྣམས་ལས་ཕྲལ་ཕུལ། དེ་ལ་རྒྱུ་བྱས་ནས་དབུ་རུ་ཞྭའི་ལྷ་ཁང་བཞེངས་སོ། །གདམས་པ་རྣམས་ཀེ་ཚང་རིས་གསུམ་གྱི་སྒོའི་ཀ་བའི་ཁོང་སེང་དུ་སྦས། སྙན་བརྒྱུད་སྲོལ་མི་ཉམས་པའི་ཆེད་དུ་འབྲོ་རིན་ཆེན་འབར་བ་ལ་བཤད། ཉང་བན་ཆེན་པོ་ལྷ་ས་བྲག་ལྷའི་ཕུག་ཏུ་འཇའ་ལུས་འཕོ་བ་ཆེན་པོའི་སྐུར་ཡལ་ལོ། །མན་ངག་སྙིང་གི་ཐིག་ལེའི་སྐབས་ཀྱི་གཏམ་མོ། །རྫོགས་པ་ཆེན་པོ་སེམས་ཕྱོགས་སུ་གྲགས་པ་ནི། དུས་དེར་བསྟན་བཅོས་བྱེ་བྲག་བཤད་མཛོད་ཆེན་མོ་བསྒྱུར་བའི་རྣམ་དཔྱོད་བསམ་གྱིས་མི་ཁྱབ་པ་གཅིག་པོའི་གནས་ལའང་ཕྱིས་རྔོག་ལོ་ཆེན་པོ་བློ་ལྡན་ཤེས་རབ་ཀྱིས། བཻ་རོ་ཙཱ་ན་ནམ་མཁའི་
མཐའ་དང་མཉམ། །སྐ་ཅོག་རྣམ་གཉིས་ཉི་ཟླ་ཟུང་གཅིག་འདྲ། །རིན་ཆེན་བཟང་པོ་ཐོ་རངས་སྐར་ཆེན་ཙམ། །ཞེས་བསྔགས་པའི་བ་དན་དཀར་པོར་གཟེངས་སུ་མཐོ་བར་མཛད་ཅིང་། སངས་རྒྱས་ཐམས་ཅད་ཀྱི་གསུང་གི་གསང་བ་བསམ་གྱིས་མི་ཁྱབ་པའི་ཡེ་ཤེས་རྡོ་རྗེ། མཁྱེན་པ་དང་རྫུ་འཕྲུལ་དཔག་ཏུ་མེད་པའི་སྤྲུལ་པའི་ལོ་ཙཱ་བ་བཻ་རོ་ཙཱ་ན་དང་། གཙང་ལེགས་གྲུབ་གཉིས་པ་བཙན་པོའི་ཐུགས་བསྐྱེད་ཀྱི་ཤིང་རྟ་ལས་མན་ངག་ཡིད་བཞིན་ནོར་བུ་འདྲེན་པའི་དེད་དཔོན་དམ་པར་རྒྱ་གར་འཕགས་པའི་ཡུལ་ལ་ཆས་སོ། །དེར་བཻ་རོ་ལ་ལམ་དུ། མེ་དང་། ཆུ་དང་། དུག་དང་། མཚོན་དང་། ཁང་པ་རྡིབ་པ་དང་། གཅན་འཕྲང་པས་སྲོག་ལ་རྒོལ་བ་ལ་སོགས་འཆི་ལ་ཐུག་པའི་ཡེ་འབྲོག་ཆེན་པོ་ལྔ་བཅུ་རྩ་བདུན་བྱུང་ཡང་ལ་ལ་ནི་དཀའ་སྤྱད་ཁུར་དུ་བཟོད་པའི་སྙིང་སྟོབས་ཀྱིས་བཟློག །ལ་ལ་ནི་སྙིང་རྗེ་ཆེན་པོ་གཞན་དབང་གིས་བསལ། ལ་ལ་ནི་རྫུ་འཕྲུལ་གྱི་བཀོད་པ་ཟད་མི་ཤེས་པས་སྤྲུལ་ཞིང་བསྒྱུར་བ་སོགས་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལས་ཉམས་པ་མེད་དོ། །དེར་སློབ་དཔོན་ཆེན་པོ་ཤྲཱི་སིངྷའི་རྫུ་འཕྲུལ་གྱི་བཀོད་པས་མངོན་པར་འདུ་བྱས་པ་དྷ་ན་ཀོ་ཤའི་ཙན་དན་བསིལ་བྱེད་ཀྱི་ནགས་རིན་པོ་ཆེ་ཟ་མ་ཏོག་སྤུངས་པའི་ཁབ་ཞེས་བྱ་བ། དཔེར་ན་སྒྱུ་མ་མཁན་བཟང་པོས་བདག་ཅག་གི་སྟོན་པ་སྒྱུ་མའི་མིག་འཕྲུལ་གྱིས་བསླུ་
བར་བརྩམས་པའི་ཚེ། བཟང་པོའི་མདུན་ཁང་ཀྱང་སྐུ་ལུས་ཀྱི་བཀོད་པས་མཛེས་པར་བྱས། མ་སྐྱེས་དགྲའི་ཁང་ཁྱིམ་ན་ཆོས་སྟོན་གསོལ། ཀུན་ཏུ་རྒྱུའི་སྲང་ན་བསོད་སྙོམས་བྱེད། འཚོ་བྱེད་ཀྱི་ཚལ་ན་འཁོར་རྣམ་པ་བཞི་ལ་ཆོས་སྟོན། སུམ་ཅུ་རྩ་གསུམ་ན་ལྷ་རྣམས་ལ་ཆོས་སྟོན་པས་མཚོན་པར། ཀེ་ཚང་ཆེན་པོ་རིམ་པ་དགུའི་ཡང་སྟེང་ན་དགའ་རབ་རྡོ་རྗེ་ལ་སོགས་པ་བཞུགས་པའི་གནས་སུ་བརྟོལ་ཏོ། །འདི་ཚོང་དཔོན་རིན་ཆེན་གཙུག་ཕུད་ཀྱི་ཁང་བརྩེགས་བཅུ་པའི་ཡང་ཐོག་ན། སངས་རྒྱས་རྣམས་ཆོས་བགྲོ་བ་དང་། བརྩེགས་དགུ་པ་ན་ས་བཅུ་པ་རྣམས་གནས་པ་དང་ཆོས་མཚུངས་པའི་གནས་ཕལ་པ་མིན་པར་དཔའ་བོ་གཙུག་ཕྲེང་འཆད་པ་ནི་རྣམ་དཔྱོད་ཆེ། དེར་བཻ་རོས་གསེར་རྣམས་ས་འོག་ཏུ་བསྐུངས། མན་ངག་གི་ཆོས་ལ་སུ་མཁས་དྲིས་པས། མཁས་པ་ཉེར་ལྔའི་སྲས་པཎྜི་ཏ་སྟོང་གི་སློབ་དཔོན་ཤྲཱི་སིངྷ་ཉིད་ཡིན་ཟེར། ཆུ་ལེན་གྱི་རྣལ་འབྱོར་མ་ཞིག་བྱུང་བར་ཕྲིན་དུ་མར་རྫངས་ཀྱང་ལན་མ་བྱུང་། ལན་ཅིག་བཻ་རོས་ལྟ་སྟངས་བྱས་པས་དེའི་ཆུ་བན་ས་ལ་འབྱར། དེ་ན་རེ་ཁྱོད་ཀྱང་རྫུ་འཕྲུལ་ཅན་ཞིག་སྟེ་བདག་ལའང་འདི་ལྟ་བུ་ཟེར་ནས་རང་གི་བྲང་ཕྱེ་ཏེ་རྡོ་རྗེ་དབྱིངས་ཀྱི་ལྷ་སོ་བདུན་བཀྲ་ལམ་མེ་བསྟན། སླར་བརྡ་ཐབས་ཀྱི་ནང་དུ་བརྟོལ་བར་གྱིས། བརྡའ་འདི་ལ་ལན་འདི་སྟོན་གྱི་གསང་ཚིག་བསླབས། དེར་སྐབས་
བཙལ་ནས་ནང་དུ་ཚམ་ཚོམ་མེད་པར་བྱོན། ཀེ་ཚང་འོག་མའི་མཁས་པ་རྣམས་ཕྱག་དང་བརྡའ་ལན་གྱིས་མཉེས་པར་བྱས། ནང་པར་ཤྲཱི་སིངྷ་དང་མཇལ། གསེར་གྱི་ཕྱག་རྟེན་དཔག་ཏུ་མེད་པ་ཕུལ། རྩོལ་མེད་ཀྱི་ཐེག་པ་གསུང་བར་གསོལ་བ་བཏབ་པས། ཆོས་ཀྱི་བཀའ་རྩིས་གསལ་བའི་ཕྱིར་དོ་ནུབ་བརྟག་གིས་གསུང་། ནང་པར་དུས་གསུམ་གྱི་ལུང་བསྟན་དང་རྩིས་རྒྱ་བཏབ་ནས་ད་ནི་ཁྱོད་ལ་བསྟན་པར་བྱ་སྟེ། གསང་བ་མ་བསྲུངས་ན་མན་ངག་འདི་གང་དགར་སྤྱད་དུ་མེད། རྒྱལ་པོའི་ཆད་པས་འུ་ཅག་གསུམ་ཀའི་སྲོག་ལ་ཡོང་མཆིས། དེས་ན་པཎྜི་ཏ་བརྒྱ་ལ་གསེར་གྱི་ཕྱག་རྟེན་ཕུལ་ལ་རྒྱུ་འབྲས་ཀྱི་ཆོས་ཉོན། དེ་ཁོ་ན་གཉེར་བྱའི་གཙོ་བོ་ཡིན་པ་ལྟར་གྱིས། མཚན་མོ་མན་ངག་གིས་ཆོས་བསྟན་གྱིས་གསུངས། དེར་བྲམ་ཟེ་ཤིན་ཏུ་བཙན་པར་ཡོད་པས་དཔྱད་མི་བཟོད་པའི་རྟེན་འབྲེལ་བྱས། སློབ་དཔོན་གྱིས་མཚན་མོ་གསང་བ་གདམས་པའི་མན་ངག་སེམས་སྡེ་བཅོ་བརྒྱད་རྣམས་དར་དཀར་ལ་ར་དཀར་མོའི་འོ་མས་བྲིས་དུད་པས་བདུགས་ན་ཡི་གེ་གསལ་བའི་ཐབས་བྱས། བམ་པོ་མང་པོ་ཡུད་ཡུད་ལ་ཚར་བར་མཛད། གཙང་རིས་ཀྱི་མགོན་པོ་མ་ཚང་བ་མེད་པ་དང་། གསང་སྔགས་ཕྱི་ནང་གི་སྲུང་མ་ཐམས་ཅད་ལྷགས་ཏེ་བསྟན་པ་འདི་བསྲུང་བའི་ཆད་ཐོ་བླངས་ཤིང་།
ཤིན་ཏུ་གསང་བའི་རྒྱས་བཏབ་བོ། །དེའི་ཚེ་གཙང་བན་ལེགས་གྲུབ་མན་ངག་དེ་ཙམ་གྱིས་ཚིམ། རྒྱལ་པོ་ལ་ངོ་སོ་འདོད་ནས་སྔོན་ལ་དེངས་པ་ལམ་དུ་གཅན་ཕྲང་པས་བསད། བཻ་རོ་ཙཱ་ན་སྙིང་སྟོབས་འགྲན་ཟླ་མེད་པས་ད་དུང་མ་ཚིམ་པར་བཞུགས་པས་སློབ་དཔོན་གྱིས་ནའམ་གསུངས། བཻ་རོས་མཐོང་སྟེ་མ་ཕྲད་རང་སེམས་ན། མྱང་སྟེ་མཚིམ་རང་སེམས་ན་བྱ་བ་ལ་སོགས་པ་དང་། ལྟ་བ་ཕྱོགས་རིས་མེད་པ་དེ། །ལས་དང་རྟོག་པའི་འཕྲང་ལ་རྡུགས། །སྤྱོད་པ་བླང་དོར་མེད་པ་དེ། །འདོད་རྩོལ་གཉིས་ཀྱི་འཕྲང་ལ་རྡུགས། །ལམ་ལ་བགྲོད་དུ་མེད་པ་དེ། །ལུང་དང་རིག་པའི་འཕྲང་ལ་རྡུགས། །རང་བྱུང་ཡེ་ཤེས་ཆེན་པོ་དེ། །བག་ཆགས་སྟུག་པོའི་འཕྲང་ལ་རྡུགས། །དུས་གསུམ་སངས་རྒྱས་དགོངས་པ་དེ། །བྱིང་རྒོད་གཉིས་ཀྱི་འཕྲང་ལ་རྡུགས། །འབྲས་བུ་སྐུ་གསུམ་ལྷུན་གྲུབ་དེ། །བརྡའ་དོན་ཕྲད་པའི་འཕྲང་ལ་རྡུགས། །རྫོགས་ཆེན་བྱ་བྲལ་ལྷུན་གྲུབ་དེ། །བརྡའ་དོན་དབྲལ་བའི་འཕྲང་ལ་རྡུགས། །སངས་རྒྱས་སྤྱོད་ཡུལ་རང་དབང་དེ། །སྤྱི་བླུགས་ཚང་བའི་དབང་ལ་རྡུགས། །ཆ་ལ་སེར་སྡེ་བཅོ་བརྒྱད་པོས། །འཕྲང་བརྒྱད་སྐྱེལ་མ་མ་གཤོགས་པས། །བདག་ཉིད་བཻ་རོ་ཙཱ་ན་པ། །ཡུལ་དུ་འགྲོ་བའི་འཕྲང་ལ་རྡུགས། །ཞེས་གསུངས། འདི་ནི་ཚིག་ཚོན་པོ་བླ་ན་མེད་པར་སྣང་སྟེ། སྤྱིར་སྔགས་ཀྱི་རྡོ་རྗེའི་གནས་ཆེན་པོ་རྣམས་དང་ཁྱད་པར་ཐེག་པའི་
རྒྱལ་པོའི་དགོངས་པ་ལ་མཁས་སུ་རློམ་པའི་རྟོག་དཔྱོད་ཅན་རྣམས་ཀྱི་སུན་འབྱུང་གི་བློས་གཞལ་ན་རྒྱུ་འབྲས་རྣམ་པ་འགལ་བ་ལྟར་འཆར་བའི་མཚང་དང་། གོལ་ས་མུས་པ་འདིས་བསྟན་ཏོ། །དེར་སློབ་དཔོན་ཤྲཱི་སིངྷས་རྒྱུད་སྡེ་དྲུག་ཅུའི་དབང་དང་མན་ངག་བྱིན། འབྲས་བུ་རང་ཆས་སུ་སྟོན་པ་རྒྱ་མཚོའི་ཀློང་ལ་སོགས་པ་བསྟན་པས་རྟོགས་པའི་མཐར་ཕྱིན། ད་དུང་མ་ཚིམ་པ་ལྟར་མཛད་ནས་ཆད་ལ་བོར་བས། ཆོས་ཀྱི་དབྱིངས་ལ་ཟད་མེད་ཀྱང་། །དེ་བཞིན་ཉིད་ལ་གཅིག་ཤེས་ན། །མ་ལུས་དེ་ལ་ཡོངས་སུ་རྫོགས། །དེ་ལས་ཡོད་ན་སིདྡྷི་ཀན། །ཞེས་གསུངས་ནས་གདམས་པ་མིག་འབྲས་ལྟར་བཙའ་བ། ཁོང་སྙིང་ལྟར་བཙའ་བ། སྲོག་ལྟར་བཙའ་བ་སྟེ་བཙའ་ལུགས་གསུམ། དེ་བཞིན་དུ་སྦྱིན་པའི་གནས་བཞི། མི་སྦྱིན་པའི་གནས་བཞི་ལེགས་པར་གདམས། དགའ་རབ་རྡོ་རྗེ་དང་མཇལ་བའི་ལུང་བསྟན་ཐོབ་པས་དེ་ཉིད་དུ་བཙལ་ཡང་མ་རྙེད། མཁའ་འགྲོའི་ལུང་གི་ཨོ་རྒྱན་དུ་སོང་ཞིག་པར་སྐབས་དབྱེ་བས། དྷུ་མ་ཐ་ལའི་དུར་ཁྲོད་ཆེན་པོར། སློབ་དཔོན་དགའ་རབ་རྡོ་རྗེ་དང་མཇལ་ནས། རྫོགས་པ་ཆེན་པོ་འབུམ་ཕྲག་དྲུག་ཅུ་རྩ་བཞིའི་དངོས་གྲུབ་ཐོབ་ཅིང་སློབ་དཔོན་འོད་ཕུང་དུ་ཡལ་ལོ། །བོད་འདིར་བསམ་གྱིས་མི་ཁྱབ་པའི་
ཆོས་ཉིད་བློར་མི་གནས་པས། ཐ་མལ་གྱི་རྟོག་དཔྱོད་ཁོ་ནས་ཆོས་ཀྱི་ཚིག་དོན་འཇལ་བ་བྱུང་མོད། འདིར་དགའ་རབ་རྡོ་རྗེ་ཀེ་ཚང་དང་པོ་ན་བཞུགས་པའོ་སྙམ་ན། མཆོག་གཟིགས་ཀྱི་གྲུབ་པའི་དབང་ཕྱུག་རྣམས་ལ་ཨོ་རྒྱན་ལས་འོག་མིན་ཡང་ལོ་ཟླས་བཅད་པའི་ཡུན་ན་མེད་དེ། འདིར་སློབ་དཔོན་བཻ་རོ་ཙཱ་ནས་གནས་དེ་ཉིད་དུ་རྟོགས་གྲོལ་དུས་མཉམ་གྱི་དངོས་གྲུབ་ཆེན་པོ་བརྙེས་པས་ཨོ་རྒྱན་གྱི་ཡུལ་ལ་དྲན་པ་ཉེ་བར་གཞག་ནས་གོམ་པ་གཅིག་ཙམ་ཡང་འཕགས་པའི་གཏན་ཚིགས་བསྒྲུབ་པར་མི་བྱའོ། །དཔེར་ན་ཏེ་ལོ་པས་ནཱ་རོ་པ་རིམ་པ་མང་པོའི་ཡང་ཐོག་ནས་སྐྱུར་ཟེར་བ། དོན་ལ་རྡེའུ་གཅིག་གིས་སྟེང་ནས་ཀྱང་ལྷུང་བ་མེད་པའི་ཆོས་ཉིད་རྣལ་འབྱོར་དབང་པོ་ཨ་ནནྟས་རང་གི་རྣམ་ཐར་ན་བཀོད་པ་བཞིན་ནོ། །དེ་བཞིན་དུ་གཏན་ཚིགས་ལ་མངོན་པར་ཞེན་པའི་བློ་ཆུང་གིས་ཤྲཱི་སིངྷ་དང་བཻ་རོ་སྔ་ཕྱི་འགལ་བའང་མཐོང་སྲིད་ཀྱི། དེ་དག་ཡེ་ཤེས་སྐུ་ཅན་ཡིན་པ་སྐུ་ལ་འདས་གྲོངས་མི་མངའ། ལས་དག་པས་ད་ལྟའང་མཇལ་དུ་ཡོད་ལ། མ་ཏཾ་གི་པ་ཀླུ་སྒྲུབ་ཀྱི་སློབ་མར་གྲགས་པ་བཞིན། དེ་གཉིས་སྔ་ཕྱི་རིང་བོར་འཛོལ་བའི་དཔེ་ཤེས་པར་བྱའོ། །མཚན་ཉིད་འདི་ལ་བློ་གྲོས་ཚད་མ་ཏཱ་ར་ནཱ་ཐས། སྔོན་བོད་དུ་བྱུང་བའི་ལོ་རྒྱུས་རྣམས་ན། དབང་བསྐུར་ཞིང་གདམས་པ་དང་རྗེས་སུ་གདམས་པ་མཐའ་དག་སྩལ་ཞེས་
པ་ནི། སོ་སོའི་སྐྱེ་བོའི་སློབ་དཔོན་གྱིས་སློབ་མ་ཕལ་པ་གཅིག་ལ་བྱེད་པ་བཞིན་དུ། རྡུལ་ཚོན་བཞེངས། དབང་རྫས་བསགས། ཆོག་འདོན་བཏང་། ཉིན་མོ་བསྒྲུབས། མཚན་མོ་བསྐུར། དཔེ་ཆ་སྒྲོག་པ་དང་། གཞུང་གི་འབྲུ་བཤད་མཛུབ་ཁྲིད་བྱེད་པ་དང་། འཛིན་ཆོས་བཏང་བ་མ་ཡིན་ཏེ། སློབ་དཔོན་ནག་པོ་སྐལ་ལྡན་གྱི་གང་ཟག་དེ་ལ། སྤྲུལ་པའི་སྐུ་ཡེ་ཤེས་ཀྱི་མཁའ་འགྲོ་མ་དེས། དགོངས་པ་གཏད་དེ་ཐུགས་རྒྱུད་བྱིན་གྱིས་བརླབས་པ་ཙམ་གྱིས། སྐད་ཅིག་དེ་ལ་ཡེ་ཤེས་ཁྱད་པར་ཅན་བརྙེས། རྒྱུད་དོན་མ་ལུས་པ་ཐུགས་སུ་ཆུད། བཀའི་གནང་བ་སྩལ་པ་ཙམ་གྱིས་སེམས་ཅན་གྱི་དོན་རྒྱ་ཆེར་སྤྱོད་པའི་ནུས་པ་ཐོབ་པ་དེ་ཀ་དབང་བསྐུར་བ་དང་གདམས་ངག་རྗེས་གདམས་བླ་ན་མེད་པ་ཡིན་ནོ། །འདིས་མཚོན་པའི་སྔོན་གྱི་གྲུབ་ཐོབ་ཆེན་པོ་རྣམས་ཀྱི་རྣམ་ཐར་ན། གཅིག་གིས་གཅིག་ལ་གདམས་ཚུལ་ཡོད་པ་རྣམས། ཕལ་ཆེར་དེ་བཞིན་ཡིན་ལ། རང་ཅག་བོད་འདི་ན་གོ་བ་འདི་ཙམ་ལ་ཡང་མཐའ་གཉིས་གང་རུང་གཅིག་ཏུ་ལྷུང་བར་སྣང་སྟེ། བླུན་པོ་རྣམས་དང་། བླུན་པོའི་རྗེས་འབྲངས་མཁས་འདོད་ཡོད་པ་ཕལ་ཆེར་ཞིག་ནི། གྲུབ་ཐོབ་རྣམས་ལ་དེ་ལྟར་ཡིན་པའི་གོ་བ་རབ་རིབ་གཅིག་ཤར་བ་རྒྱུ་མཚན་དུ་བྱས་ནས། ད་ལྟའི་བླ་མ་དང་། སློབ་མ་ཕལ་པ་ལམ་སྣ་ཙམ་ཡང་མ་ཟིན་པ། རྒན་
རྒོན་རྣམས་ལ་ཡང་གྲུབ་ཐོབ་ཀྱི་རིགས་འགྲེ་འགྲན་འདོད་བྱས་ཏེ། དབང་བསྐུར། རྒྱུད་བཤད། མན་ངག་ཐམས་ཅད་རྩ་བས་བཅད། པོ་ཏི་མགོ་ལ་འཇོག་པ་དང་། དགོངས་པ་གཏད་པས་ཆོག་པ་སོགས་མི་ཤེས་པ་དང་མ་ལྕོགས་པ་ལ་བཟང་བཟང་མོ་དང་དཔའ་བོ་དཔའ་མོ་བྱེད་དོ། །དེ་རིགས་བླ་མས་མ་བཤད། སློབ་མས་མ་གོ། དཔོན་སློབ་གཉིས་ཀར་གྱིས་ཅི་ཡང་མི་ཤེས་པ་ལ་ཤེས་མདོག་བྱེད་པ་ལས་མི་ཡོང་བར་འདུག་པ་འདི་ཆད་པའི་མཐའ་ཡིན་ཡང་། སྔགས་གཞུང་དང་ཆོ་ག་ལ་གཙིགས་སུ་བྱེད་པ་རྣམས་ཀྱང་། ད་ལྟ་ལས་དང་པོ་པ་གང་བྱེད་པའི་རྒྱས་བཀབ་སྟེ། འཕགས་པ་དང་། གྲུབ་ཐོབ་དང་། སྒྲུབ་པ་པོ་མཆོག་རྣམས་ལའང་བྱེད་པ་ནི། བསྒྲིགས་བཀོད་དམ་དམ་མོ་དང་། མཁས་འདོད་བྱས་པས་གཏི་ཐུག་ཏུ་སོང་སྟེ། འདི་ག་ལ་ལྟོས་པའི་རྟག་པའི་མཐའ་ཡིན་ནོ། །དེས་ན་ལས་དང་པོ་པ་ལ་བརྒྱུད་པ་ཁུངས་ལ་ཐུག་པའི་ཆོས་བཀའ་མ་ཆད་པ་ཞིག་དགོས། ཆོ་ག་ལག་ལེན་བྱང་ལ་མ་ནོར་བ་ཞིག་དགོས། བསྙེན་བསྒྲུབ་ལ་སོགས་པ་ཚད་དུ་ཕྱིན་པ་ཞིག་དགོས། རང་རང་གི་གཞུང་བཤད་ཐེ་ཚོམ་ཆོད་ངེས། བློ་རྩེ་གཏད་མཚམས་ཡོད་ངེས་པ་ཞིག་དགོས། མན་ངག་རྣམས་ལག་ལེན་དུ་བཏབ་ན་ཐེབས་ངེས་
པ་ཞིག་དགོས་སོ། །གྲུབ་པ་ཐོབ་པ་རྣམས་ཀྱི་སྤྱོད་ཡུལ་ནི་གཞན་མ་ཡིན་པས། དེ་འདྲའི་ངེས་ཁྲིགས་མེད་ཀྱང་། དེ་ལ་ལོག་ལྟ་དང་ཐེ་ཚོམ་མི་བྱ། གུས་པས་གསོལ་བ་ཐོབ་ཅིག་ཅེས་སོ། །དེར་རྒྱ་གར་བ་ཆོས་ལ་ཕྲག་དོག་པས་རྗེས་བསྙེགས་བྱུང་གིས་དོགས་པས། བཻ་རོས་རྐང་མགྱོགས་ཀྱི་གདམས་པ་ཉམས་འོག་ཏུ་བཙུད། རྐང་མགྱོགས་ཀྱི་གཙོ་བོ་ལ་བརྔན་པ་བྱིན་པས་རྗེས་མ་ཟིན་པ་ལྟར་བྱས། བོད་དུ་མྱུར་བར་ཕེབས། བཙན་པོ་ལ་ཉིན་མོ་རྒྱུ་འབྲས་ཐུན་མོང་བའི་ཆོས་དང་། མཚན་མོ་རྫོགས་པ་ཆེན་པོ་ལྐོག་ཆོས་སུ་གསུངས། དེའི་ཚེ་རྒྱ་གར་བའི་རྨི་ལྟས་ལོག །རྡོ་རྗེ་གདན་གྱི་ཆོས་མཛོད་ཆེན་པོའི་རྒྱ་རུ་སྤྲོད་ཞིག་པས་ཆོས་མ་ཚང་པར་ཤེས། བོད་ཐེ་ཚོམ་བསྐྱེད་པའི་ཕྲ་མ་མཁན་བཅུག །བཙུན་མོ་ཚེ་སྤོང་བཟས་བཻ་རོ་བསླུ་བར་མ་ཚུགས་པས་སྡིག་བློན་རྣམས་བསླད། རྒྱ་གར་བའི་ཕྲ་མ་ལ་བསྙད་ནས་བཻ་རོ་ཁྲིམས་ལ་སྦྱར་བར་གསོལ། རྒྱལ་པོས་སྤྱུགས་པར་ཞལ་གྱིས་བཞེས་ནས་ཀུན་རྫོབ་ཏུ་སྤྲང་པོ་ཆུ་ལ་སྦྱངས། སློབ་དཔོན་དབུ་རྩེའི་གདུགས་ཁང་དུ་བལྟར་མི་མངོན་པར་བྱས་པའང་། དམར་རྒྱན་གྱིས་ཤེས་ནས་བཻ་རོ་ཚ་བའི་རོང་དུ་སྤྱུགས་དགོས་པ་བྱུང་། འདི་དག་གི་གཏམ་འདྲ་འབག་ལ་སོགས་པ་ལས་རྒྱས་
པར་བྱུང་བ་འདིར་དེ་ཙམ་མོ། །དམ་པའི་ཆོས་བསྒྱུར་བའི་རྣམ་གྲངས་ནི། བྱང་ཆུབ་ཀྱི་སེམས་ཀུན་བྱེད་རྒྱལ་པོ་ལ་སོགས་པ་སེམས་སྡེ་ཉེར་གཅིག །ལུང་བམ་པོ་བཅོ་བརྒྱད། ཀློང་སྡེའི་རྒྱུད་ནམ་མཁའ་ཀློང་ཡངས་ལ་སོགས་པ་ཚིག་བམ་པོ་ཉི་ཁྲི། དེ་དག་ཀྱང་གྲུབ་པའི་སྐྱེས་བུ་རྣམས་ཀྱི་ཕྱག་ན་བཞུགས་པའི་དབང་དུ་བྱས་ཏེ་ཚང་བར་མ་འགྱུར་རོ། །སླར་བཻ་རོས་རྒྱལ་མོ་ཚ་བའི་རོང་དུ་གཡུ་སྒྲ་སྙིང་པོ་རྗེས་སུ་བཟུང་། ཡུལ་དེ་སྨིན་པར་མཛད། ཁམས་སུའང་འགྲོ་དོན་མཛད། རྒྱ་ནག་ཏུ་གཤེགས་ནས་གྲུབ་པ་མཆོག་དང་མཁའ་འགྲོ་མ་རྣམས་དང་ཆོས་སྐད་འདྲེས། ཡར་ལམ་ཡེ་ཤེས་གསང་བ་ལ་སོགས་པའི་རྒྱུད་ལ་བརྟེན་པ་རྡོ་རྗེ་ཟམ་པའི་མན་ངག་གིས། སྤངས་མི་ཕམ་མགོན་པོ་རྗེས་སུ་བཟུང་། དེ་ནི་ལོ་བརྒྱད་ཅུ་རྩ་ལྔ་ལོན་པ་གཞོན་ནུའི་དུས་ཆོས་མ་གྲུབ། རྒས་ནས་ཉེ་འཁོར་དང་སྤུན་ཡང་སྡང་བར་གྱུར་པ་ཞིག་སྟེ། རྒས་ཆེས་པས་ལུང་ཟུངས་ངན་པ་ལ་སྒོམ་ཐག་དང་སྒོམ་བརྟེན་བཅས། གདམས་པ་ཡིད་ལ་ཟིན་པའི་ཕྱིར་ཚུལ་ཤིང་གཏད། སློབ་དཔོན་གྱི་ལུང་བཞིན་ཉམས་སུ་བླངས་པས་ཆོས་ཉིད་གཅེར་མཐོང་དུ་ངོ་འཕྲོད། རྟོགས་པ་ཐོད་རྒལ་དུ་སྐྱེས་པས་རྒད་པོ་དགའ་ཆེ་སྟེ་སློབ་དཔོན་གྱི་མགུལ་པར་འཁྱུད་ནས་ཞག་གཅིག་ཏུ་མ་བཏང་། དངོས་གྲུབ་བརྙེས་
པས་ལོ་བརྒྱ་ལྷག་བཅས་སུ་ཐུབ། དེས་ངན་ལམ་བྱང་ཆུབ་རྒྱལ་མཚན་ལ་བཤད་ནས་རིམ་པར་འཇའ་ལུས་གྲུབ་པ་ཤ་སྟག་བྱུང་སྟེ། འོག་ཏུ་རྡོ་རྗེ་ཟམ་པའི་རྒྱུད་རིམ་ལ་འཆད་དོ། །དེ་ལྟར་བཻ་རོས་རིམ་པ་སྔར་བཤད་པའི་ཕྱི་མ་ལི་བཟའ་ཤེས་རབ་སྒྲོན་ཏེ། འདིས་བཻ་རོ་ལི་ཡུལ་དུ་སྤྱན་དྲངས། མཐར་བལ་བོ་བ་སེངྒེ་ནགས་སུ་འོད་ཀྱི་སྐུར་དེངས་ཞེས་གྲག་གོ །གངས་ཅན་པ་རྣམས་ཀྱི་སྐྱབས་དང་། མགོན་དང་། རྟེན་དང་། དཔུང་གཉེན་གཅིག་པུ་པ་ཨུ་རྒྱན་སངས་རྒྱས་གཉིས་པ་ལས་ཇི་ལྟར་བརྒྱུད་པ་ནི། སྤྱིར་སློབ་དཔོན་ཉིད་སྐུ་གསུམ་གྱི་སྟོན་པ་རྒྱ་མཚོའི་ངོ་བོ་ཉིད་ཡིན་པས་བརྒྱུད་པ་བྲེང་ཆགས་ཀྱི་མཚན་ཉིད་ལའང་ལྟོས་པ་མེད་དེ། སྐུ་གསུམ་གྱི་ཞིང་ཁམས་རྟེན་བརྟེན་པར་བཅས་པ་རང་གི་མཚན་ཉིད་དང་གཉིས་སུ་མེད་པས་སོ། །དེ་ལས་གཞན་སྣང་འཁྲིད་ཚུལ་གྱི་སྒོ་ནས་ཤྲཱི་སིངྷ་དང་། འཇམ་དཔལ་བཤེས་གཉེན་སོགས་ལས་གདམས་པའི་བཀའ་བབས་རྙེད་པའི་ཚུལ་བསྟན། བོད་དུ་བི་མ་ལས་མན་ངག་སྙིང་ཏིག་དང་། བཻ་རོས་སེམས་ཕྱོགས་དར་བར་མཛད་པས། དེ་དག་ཕྱི་མཐར་འཆལ་ཞིང་། གདམས་པའི་སྙིང་པོ་དང་བྲལ་བའི་ཚེ་འགྲོ་དོན་ཆེ་བར་དགོངས་ནས་རང་གི་སྙིང་ཐིག་གཞོ་སྟོད་ཏི་སྒྲོར་མཁའ་འགྲོ་ཡེ་ཤེས་མཚོ་རྒྱལ་ལ་ལྐོག་ཆོས་སུ་གདམས། མངའ་
བདག་གི་བཙུན་མོ་འབྲོམ་བཟའ་བྱང་ཆུབ་སྨན་ལས་འཁྲུངས་པ་ལྷ་ལྕམ་པདྨ་གསལ་ལོ་བརྒྱད་ལོན་པ་ཞིག་ཚེའི་དུས་བྱས་པར། ཡབ་རྒྱལ་པོ་མྱ་ངན་གྱིས་དུབ་པ་བསལ་བའི་ཕྱིར། མཆིམས་ཕུར་ལྷ་ལྕམ་གྱི་ཕུང་པོའི་སྙིང་ཁར་མཚལ་གྱི་ཡི་གེ་ནྲྀ་གཅིག་བྲིས། ཏིང་ངེ་འཛིན་གྱི་ལྕགས་ཀྱུ་རྣོན་པོས་རྣམ་ཤེས་བཀུག་པས། མིག་ལྟ་ཞིང་སྨྲ་ཤེས་པར་གྱུར་པའི་ཚེ་མན་ངག་མཁའ་འགྲོའི་སྙིང་ཐིག་བྱིན་རླབས་འཕོ་བའི་སྟོབས་ཀྱིས་གདམས་ནས། སྐྱེ་བ་ཕྱི་མའི་ཆོས་སྐལ་དུ་དབང་བསྐུར། ཟབ་མོའི་གཏེར་དུ་བཙས་པ་ཕྱིན་ཆད་པདྨ་ལས་འབྲེལ་རྩལ་གྱིས་བཏོན་པས་མཁའ་འགྲོའི་སྙིང་ཐིག་ཏུ་གྲགས་པ་སོགས་གཏེར་ལས་བྱོན་པའི་སྙིང་ཐིག་གནད་མ་འཁྲུལ་ཞིང་དོན་ཚང་བ་དག་ཡིན་ནོ། །ལུང་ཨ་ནུ་ཡོ་ག་ནི། མདོ་སྡེ་གདམས་ངག་འབོགས་པའི་རྒྱལ་པོ་ལས། འདྲེན་པའི་ཐེག་པ་གསུམ་པོ་དག །བཅོམ་ལྡན་ངེས་པར་གསུངས་ལགས་ན། །ཞེས་པའི་ལུང་འདྲེན་གྱི་ཁུངས་བཤད་པའི་རྒྱུད་དགོངས་པ་འདུས་པ་འདི་ནི། འདྲེན་པའི་ཐེག་པ་རྣམ་གསུམ་ལ། །གང་དག་ངེས་པར་བཀོད་ལགས་ན། །མཉམ་པས་བླང་དོར་མེད་སྤྱོད་ཅིང་། །བྱང་ཆུབ་གཞན་ནས་མི་འཚོལ་བའི། །ཐབས་མཆོག་དབང་གིས་མི་ལང་བའི། །ངེས་པའི་
ཐེག་པ་ཡོངས་མ་གསུངས། །ཞེས་ཡོད་པ་དེ་ཡིན་པར་སྣང་ཞེས་འགོས་ལོ་གཞོན་ནུ་དཔལ་ཡང་བཞེད། སྤྱིར་འདྲེན་པའི་ཐེག་པ་ཞེས་པའི་ཆོས་སྐད་ཁོ་ནས་ཀྱང་མདོ་སྡེ་གདམས་ངག་འབོགས་པ་དེ་ཀུན་འབྱུང་འདྲེན་པ་ལ་སོགས་ཏེ་རིམ་པ་དགུའི་ངེས་འབྱེད་ཀྱི་རྣམ་གྲངས་སུ་འདུ་བའི་ཕྱིར། གྲུབ་པའི་མཐའ་འདི་ལ་ཡིད་གཉིས་བྱེད་པ་རྣམས་རྟེན་དང་རྟེན་བཤད་འགལ་བ་ཡིན་ནོ། །དེ་ལ་སྟོན་པ་མྱ་ངན་ལས་འདས་ནས་རེ་ཞིག་ན་དགྲ་བཅོམ་པ་ཡང་ཉུང་ངུར་གྱུར་ཅིང་བསྟན་པ་ཉམས་དམས་པས་མུ་སྟེགས་པ་རྣམས་ཀྱིས་གཽ་ཏ་མའི་བསྟན་པ་ནི་མེ་ཤི་བའི་དུད་པ་བཞིན་ནོ་ཞེས་ཁ་ཟེར་བར་བྱེད་པའི་ཚེ། འདི་ལྟར་སྤྲུལ་སྐུ་ཆུ་ཟླ་ལྟ་བུ་གཅིག་འདས་ཀྱང་། འོག་མིན་གྱི་ལོངས་སྐུ་ཟླ་བ་དངོས་ལྟ་བུ་རྟག་པ་རྒྱུན་གྱི་འཁོར་ལོར་བཞུགས་པས། སེམས་ཅན་གྱི་མོས་པ་དང་སྐལ་བའི་ཆུ་སྣོད་དང་འཚམས་པའི་སྤྲུལ་པ་དང་། ཐེག་པ་གང་གིས་འདུལ་བའི་ཆོས་འབྱུང་བའི་གནས་ཡིན་པས། མདོ་དགོངས་འདུས་ལེའུ་བཞི་པར། དྲག་ཤུལ་ཅན་ཞེས་བྱ་བའི་རི། །དགོན་པ་ཆེན་པོའི་གནས་དེ་ནི། །ཡེ་ཤེས་སྙིང་པོ་ཅན་རྣམས་ཀྱི། །ཐེག་ཆེན་གདམས་ངག་འབྱུང་བའི་གནས། །ཞེས་གསུངས་པ་ལ་བདེ་མཆོག་རྡོ་རྗེའི་མདོ་འགྲེལ་གྱིས་
ཟ་ཧོར་གྱི་ཡུལ་དང་ཉེ་བར་བསྟན་ཅིང་ལངྐའི་ཡུལ་དུ་གྲགས་པ་རི་མ་ལ་ཡ་གནམ་ལྕགས་ཡོད་པའི་རྩེར། རིགས་ཅན་དྲ་མ་ལྔ་རང་རང་གི་མངོན་ཤེས་དང་རྫུ་འཕྲུལ་གྱིས་འདུས། གདུང་ཚིག་ཉི་ཤུ་རྩ་གསུམ་བཏོན་པས། སངས་རྒྱས་རྣམས་ཀྱི་བྱིན་རླབས་ཀྱིས་བསྐུལ་ནས་གསང་བདག་དངོས་སུ་བྱོན། སྔོན་འོག་མིན། དགའ་ལྡན། རི་རབ་ཀྱི་རྩེ་སྟེ་ལྷ་གནས་གསུམ་དུ་གྲགས་པའི་ཐེག་པ་བླ་ན་མེད་པ། རྩ་བའི་རྒྱུད་ཀུན་འདུས་རིག་པ་དང་། བཤད་པའི་རྒྱུད་དགོངས་པ་འདུས་པ་གཉིས་བཤད་དེ་སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བམ་བཻ་ཌཱུརྱ་ཞུན་མས་བྲིས། དགོངས་པའི་རྩལ་བདུན་གྱིས་ནམ་མཁའ་ལ་སྦས་པའང་རྒྱལ་པོ་ཛ་ལས་བརྒྱུད་དེ་དར་རོ། །བསྐྱེད་པ་བ་མ་ཧཱ་ཡོ་ག་ལ་རྒྱུད་སྡེ་དང་སྒྲུབ་སྡེ་གཉིས་ལས་དང་པོ་ནི། རྒྱལ་ཚབ་རྡོ་རྗེ་སེམས་དཔས་རིགས་གསུམ་སེམས་དཔའ་ལ་བཤད། དེ་ལས་འཇམ་དཔལ་གྱིས་ལྷ་གྲགས་ལྡན་མཆོག་སྐྱོང་། སྤྱན་རས་གཟིགས་ཀྱི་ཀླུ་རྒྱལ་གྲྀཧྣ་ནག་པོ། ལག་ན་རྡོ་རྗེས་གནོད་སྦྱིན་སྐར་མདའ་གདོང་། ལངྐ་མགྲིན་བཅུས་མི་མ་ཡིན། ལི་ཙཱ་བཱི་དྲི་མེད་གྲགས་པས་མི་རྣམས་ལ་རིག་འཛིན་རིག་པས་བརྒྱུད་དེ་རང་རང་གི་འཁོར་ཚོམ་བུ་འབུམ་སྡེ་དང་བཅས་པ་སངས་རྒྱས། དེ་ནས་
མི་ཡུལ་དུ་སྔོན་དུ་དར་བ་ནི། གསང་བའི་བདག་པོས་རིགས་ཅན་ལྔ་ལ་ཆོས་འཁོར་བསྐོར་བའི་བྱིན་རླབས་ལས། ལྷོ་ཕྱོགས་ཟ་ཧོར་གྱི་ཡུལ་དུ་རྒྱལ་པོ་ཛ་ཞེས་བྱ་བ་ལ་སྔོན་དུ་ལྟས་ཁྱད་པར་ཅན་གྱི་རྨི་ལམ་བདུན་ཤར། ཕྱག་ན་རྡོ་རྗེ་ཟླ་བ་བདུན་བསྒྲུབས་པས་ཕོ་བྲང་གི་ཡང་ཐོག་ཏུ་གླེགས་བམ་གྱི་ཆར་བབས། དོན་མཁྱེན་ཀྱང་གབ་པར་བྱས་ཏེ་ཨུ་པ་རཱ་ཛ་སོགས་ལ་དྲིས་པས་བརྡའ་མ་ཁྲོལ། དགེ་སློང་ཀུ་ཀུ་རཱ་ཛས་སྒྱུ་འཕྲུལ་དྲྭ་བའི་ལེའུ་སྟོང་ཕྲག་བརྒྱ་པའི་ལེའུ་གསུམ་པ་རྡོ་རྗེ་སེམས་དཔའ་ཞལ་མཐོང་གི་ལེའུར་རྟོགས། རང་གི་ཟླ་བ་བདུན་བསྒྲུབས་པས་གྲུབ་སྟེ། ལུང་བསྟན་པ་བཞིན། རྒྱལ་པོས་ཕྱག་ན་རྡོ་རྗེ་ཟླ་བ་བདུན་བསྒྲུབས་པས་དངོས་སུ་བྱོན་ནས་དབང་བསྐུར་བྱིན་གྱིས་བརླབས། ཚིག་རྣམས་ལི་ཙ་བཱི་དྲི་མེད་གྲགས་པར་ཞུས་ཤིག་པའི་ལུང་བསྟན་ཐོབ་པ་ལྟར་མཉན་པས་ཏནྟྲ་སྡེ་བཅོ་བརྒྱད་བྱུང་། དེ་ལ་སྡེ་ཚན་གྱིས་དབྱེ་བས། སྐུའི་རྒྱུད་གསུམ་ནི། སངས་རྒྱས་མཉམ་སྦྱོར། གླང་པོ་རབ་འབོག །གླང་པོ་མཚོ་ཞུགས། གསུང་གི་རྒྱུད་གསུམ་ནི། ཟླ་གསང་ཐིག་ལེ། གཅིག་ལས་འཕྲོས་པ། དུ་མ་ལས་འཕྲོས་པ། ཐུགས་ཀྱི་གསུམ་ནི། གསང་བ་འདུས་པ། རི་བོ་བརྩེགས་པ། རྩེ་གཅིག་འདུས་པ།
ཡོན་ཏན་གྱི་གསུམ་ནི། དཔལ་མཆོག་དང་པོ། བདུད་རྩི་མཆོག་དང་པོ། ཡིད་བཞིན་ནོར་བུའི་རྒྱུད་འཕྲིན་ལས་ཀྱི་གསུམ་ནི། ཀརྨ་མཱ་ལེ། སྒྲོན་མ་འབར་བ། ཀཱི་ལ་ཡ་ཡིག་འབྲུ་བཅུ་གཉིས་སོ། །སྤྱིའི་རྒྱུད་གསུམ་ནི། སྒྱུ་འཕྲུལ་དྲ་བ། དམ་ཚིག་བཀོད་པ། ཐབས་ཀྱི་ཞགས་པ་སྟེ་བཅོ་བརྒྱད་དོ། །རྒྱལ་པོ་ཛ། སྲས་ཨིནྡྲ་བྷོ་དྷི། སིངྷ་ར་ཛ། ཨུ་པ་རཱ་ཛ། སྲས་མོ་གོ་མ་དེ་ཝ་སོགས་ཀྱི་ཚོགས་ཀྱི་དཀྱིལ་འཁོར་བསྒྲུབས་པ་ཚོམ་བུ་འབུམ་པ་ལ་སོགས་པ་རིག་འཛིན་གྱི་ས་ལ་གཤེཊ་པའང་བསམ་གྱིས་མི་ཁྱབ། བྲེང་ཆགས་ཀྱི་བརྒྱུད་པའང་། ཀུ་ཀུ་རཱ་ཛ་ཕྱི་མ། རོ་ལངས་བདེ་བའི་དངོས་གྲུབ། རྡོ་རྗེ་བཞད་པ། ཟ་ཧོར་གྱི་མཁན་པོ་པྲ་བྷ་ཧ་སྟི། སངས་རྒྱས་གསང་བ། བི་མ་ལ། དེས་རྒྱ་གར་གྱི་པཎྜི་ཏ་ལྔ་བརྒྱ་ལ་བཤད་ཅིང་། བོད་དུ་གཉགས་ཛྙཱ་ནས་ལོ་ཙཱ་བྱས་ཏེ་མདོ་དང་སེམས་ཕྱོགས་བསྒྱུར། རྨ་རིན་ཆེན་མཆོག་གིས་མཚན་ཉིད་དང་སྒྱུ་འཕྲུལ་བསྒྱུར། སྒྱུ་འཕྲུལ་དེ་ལའང་ནང་གསེས་སུ་དབྱེ་ན། རྩ་རྒྱུད་གསང་བ་སྙིང་པོ། རོལ་པ་མངོན་པར་བརྗོད་པ་ལྷ་མོ་སྒྱུ་འཕྲུལ། དཀྱིལ་འཁོར་སྟོན་པ་སྒྱུ་འཕྲུལ་བརྒྱད་པ། འཕྲིན་ལས་སྟོན་པ་སྒྱུ་འཕྲུལ་བཞི་བཅུ་པ། དབང་གཙོ་བོར་སྟོན་པ་སྒྱུ་འཕྲུལ་བླ་མ། ཡོན་ཏན་
མཐར་ཕྱིན་པ་སྟོན་པ་སྒྱུ་འཕྲུལ་བརྒྱད་བཅུ་པ། སྡེ་སྣོད་ཡོངས་ལ་ཁྱབ་པར་སྟོན་པ་སྒྱུ་འཕྲུལ་དྲྭ་བ་ཆེན་པོ། དམ་ཚིག་གཙོ་བོར་སྟོན་པ་སྒྱུ་འཕྲུལ་ལེ་ལག་སྟེ་སྡེ་བརྒྱད། ས་ལམ་སྟོན་པ་ཡེ་ཤེས་སྙིང་པོ། ཅིག་ཅར་སྟོན་པ་རྡོ་རྗེ་མེ་ལོང་། ཐབས་ལམ་རིམ་གྱིས་སྟོན་པ་རྡོ་རྗེ་ཐལ་བ། ཅིག་ཅར་སྟོན་པ་རྡོ་རྗེ་རྒྱ་མཚོ་སྟེ་བཤད་རྒྱུད་སྡེ་བཞི་ཞེས་བྱའོ། །དེ་ལས་སྡེ་བརྒྱད་བི་མ་ལས་རྨ་རིན་ཆེན། དེས་གཙུག་ཏུ་རིན་ཆེན་གཞོན་ནུ་དང་། གྱེར་མཆོག་གཉིས། དེ་གཉིས་ལས་དར་རྗེ་དཔལ་གྲགས་དང་། ཞང་རྒྱལ་བའི་ཡོན་ཏན་གཉིས། དེས་དར་རྗེ་ལ་བཀའ་ཡོངས་གྲགས་དང་། ཞང་ལ་བཀའ་མཆིམས་ཕུ་མར་གྲགས་ཏེ། སྒྱུ་དྲྭ་མ་གཏོགས་པ་གནུབས་ཆེན་གྱིས་གསན་ཏོ། །འདུས་པ་མདོ་ནི། རྒྱལ་པོ་ཛས་སྲས་ཨིནྡྲ་བྷོ་དྷི་དང་། ནཱ་ག་བྷོ་དྷི། གུ་ཧྱ་བོ་དྷི་ལ། ནཱ་ག་བྷོ་དྷི་ནི། ཀླུ་བ་སུ་རིགས་དྲུག་གི་ལོ་དགུར་བཤད་དུ་མ་སྟེར། ཨིནྡྲས་ཁྱིའི་རྒྱལ་པོ་ཀུ་ཀུ་རཱ་ཛ། དེས་རོ་ལངས་བདེ་བ། དེས་རྡོ་རྗེ་བཞད་པ། པྲ་བྷ་ཧ་སྟི། ཤཱཀྱ་སེངྒེ། ཤཱཀྱ་པྲ་བྷ། ཤཱཀྱ་མུ་ཏྲ་གསུམ་ལ་བཤད། ཤཱཀྱ་སེངྒེས་དྷ་ན་རཀྵི་ཏ། དེས་སྠི་ར་མ་ཏི་ལ། དེས་བདེ་བ་གསལ་མཛད། དེས་དྷརྨ་བྷོ་དྷི་དང་། བ་སུ་དྷ་ར་ལ་བརྒྱུད་པའམ། ཡང་དྷ་ན་རཀྵི་ཏ་བྲུ་ཤའི་རུ་ཆེ་བཙན་སྐྱེས་ཀྱིས་གདན་
དྲངས་ནས། བྲུ་ཤའི་ཡུལ་གྱི་ཁྲོམ་དུ་བསྒྱུར་བར་བྱས་པས། མོས་པ་ཆུང་བས་མ་འགྱུར་བར་བལ་ཡུལ་དུ་བྱོན། དྷརྨ་བྷོ་དྷི་དང་བ་སུ་དྷ་ར་ལ་བཤད། དེ་ནས་ཕྱིས་བྲུ་ཤའི་ཡུལ་དུ་ཁྲོམ་བསྒྱུར་བྱས། རུ་དྷརྨ་བོ་དྷི་དང་། བ་སུ་དྷ་ར་དང་བྲུ་ཤའི་མཁན་པོས་གནུབས་ཆེན་ལ་བཤད་ནས་བོད་ལ་བྱོན་ཏོ། །དེ་ལ་པོ་ཏིའི་ཆར་བབས་པ་ནི་གདམས་ངག་རང་ཉིད་ལེན་པའི་ཕྱོགས་ཡིན་ཟེར་བ་བྱུང་མོད། རྒྱུད་རང་གི་ངོ་བོ་ནས་རྩོད་པ་མེད་པའི་མངོན་སུམ་ཚད་མ་ནི་ཤེར་ཕྱིན་བརྒྱ་ལྔ་བཅུ་པའི་འགྲེལ་པ་ནས་གསུང་རབ་འདིའི་ལོ་རྒྱུས་ཤིན་ཏུ་ཞིབ་པ་བྱུང་བས་བོ་དོང་པ་ཆེན་པོས་རྒྱུད་སྡེ་སྤྱི་རྣམ་དུའང་བཀོད་ཅིང་། མཉམ་སྦྱོར་གྱི་འགྲེལ་པར་ཡང་དེ་དང་ཚུལ་འདྲ་བ་གཅིག་བཤད་པས་དགག་པར་མི་བྱའོ། །ཞེས་གསུངས་ལ། གཟུ་བོར་གནས་པ་དག་གིས་ཀྱང་དེ་ལ་བསྐྱར་བཟློས་མཛད་སྣང་། སྤྱིར་ཕྱག་ན་རྡོ་རྗེའི་བྱིན་རླབས་ཀྱི་བླ་མའི་གོ་ཆོད་མོད། གདམས་ངག་རང་ཉིད་ལེན་པའི་ཉེས་པ་དེ་རང་རྒྱུད་པ་ལ་ཡིན་ནམ་སྤྲུལ་པའི་སྐུ་ལ་ཡིན། དང་པོ་ལ་ཡིན་ན་རྒྱལ་པོ་ཛའི་ཁང་སྟེངས་སུ་གླེགས་བམ་འབབ་པར་བྱེད་པའི་ཐུགས་རྗེ་དང་རྫུ་འཕྲུལ་གྱི་མངའ་དབང་ཅན་དེ་དག་གིས་ཀྱང་རྒྱལ་པོའི་རྒྱུད་ཆུད་གཟོན་པ་མ་མཁྱེན་པའོ། །ཕྱི་མ་ལ་ཡིན་ན། ཤཱཀྱ་ཐུབ་པས། ང་ལ་མཁན་པོ་མེད་པས་ན། །ང་ནི་རང་བྱུང་
དགེ་སློང་ཡིན། །ཞེས་གསུངས་ཤིང་དོན་ལ་གནས་པས་ཤཱཀྱ་ཐུབ་པའང་རང་གི་བསྟན་པའི་ཆོམ་རྐུན་པ་ཉིད་དུ་ཁྱེད་ཀྱིས་སྨྲ་བར་ཤེས་སོ། །པོ་ཏིའི་ཆར་དེ་ཡང་རིགས་པས་བཏགས་པ་ཡིན་སྙམ་ན་དཔལ་ནཱ་ལེནྡྲའི་གྱང་རིས་ལ་མངོན་སུམ་དུ་བྲིས་པ་ལོ་ཙཱ་བ་ཟུ་དགའ་རྡོར་གྱིས་ཀྱང་མཐོང་བའི་ཕྱིར་རོ། །དེ་ལྟར་རྒྱུད་སྡེ་དེ་དག་ལ་སློབ་དཔོན་ཀུ་ཀུ་རཱ་ཛ་དང་། ཨིནྡྲ་བོ་དྷི་དང་། གོ་མ་དེ་ཝི་དང་། པྲ་བྷ་ཧ་སྟི། རྡོ་རྗེ་བཞད་པ་ལ་སོགས་རིམ་པར་དགོངས་འགྲེལ་ཀྱང་དཔག་ཏུ་མེད་པ་བྱུང་སྟེ་གཞན་ལས་ཤེས་སོ། །དེ་དག་ནི་རྣམ་པ་མང་པོ་སྡེ་ཚན་གྱི་བསྡུས་པ་ལས་མདོ་སྒྱུ་སེམས་གསུམ་མམ་ཡོ་ག་གསུམ་གྱི་སྒྲས་སྤྱིར་བསྙད་པ་ཡིན་ནོ།། །།གཉིས་པ་སྒྲུབ་སྡེ་ལ་བཀའ་གཏེར་གྱི་ཕྱོགས་གཉིས་ལས། དང་པོ་ནི། སྐུའི་རྒྱུད་གཤེད་སྐོར་རྣམས་ནི་སློབ་དཔོན་འཇམ་དཔལ་བཤེས་གཉེན་ལས་བྱུང་བ་གཙོ་བོར་བྱུང་ལ། དེ་ནི་སིངྒ་ལའི་རྒྱལ་པོ་གཞོན་ནུ་དཔལ་གྱི་སྲས་ཁྱེའུ་དཔལ་བཟང་ཞེས་བྱ་སྟེ། རྒྱལ་སྲིད་ལ་སྐྱོ་ནས་ལྷོ་ཕྱོགས་བེ་ཏའི་ཡུལ་དུ་བྲོས། སྤྲུལ་པའི་སྐུ་དགའ་རབ་རྡོ་རྗེ་ལ་རབ་ཏུ་བྱུང་ཞིང་། རྒྱུད་ལུང་མན་ངག་ཐམས་ཅད་ཐུགས་ལ་ཆུད། དེས་འཇམ་དཔལ་ལ་ཡི་དམ་བྱས་ནས་བསྒྲུབས་པས། བུམ་པ་ཁོལ། བྲིས་སྐུ་བཞད། མེ་ཏོག་འཁྲུངས་པ་བྱུང་བས། དེའི་ནུབ་མོ་འཇམ་
དཔལ་ཞལ་གཟིགས། ཚེ་ལ་དབང་བའི་དངོས་གྲུབ་བརྙེས། ཕྱི་ནུབ་ཡི་གེ་འཁོར་ལོ་ཚོགས་ཆེན་གྱིས་ནོན། འཇམ་དཔལ་ཡ་མཱནྟ་ཀའི་ཞལ་མཐོང་ཞིང་དབང་རྒྱུད་མན་ངག་ལུང་དང་བཅས་པ་བཤད་པར་རྨིས། མནལ་སད་ཙ་ན་སྤྲུལ་པའི་གཤིན་རྗེ་མང་པོ་སྐོར་བ་བྱེད་ཅིང་འདུག །དེ་ཐམས་ཅད་ཀྱི་སྲོག་སྙིང་ཕུལ། དེའི་ཚེ་ནམ་མཁའ་ལ་སྒྲ་ཆེན་པོ་གྲགས་པས་པཎྜི་ཏ་རྣམས་ཐེ་ཚོམ་སྐྱེས། དགའ་རབ་རྡོ་རྗེའི་ཞལ་ནས། འདི་ནི་དགེ་སློང་དཔལ་བཟང་གིས་འཇམ་དཔལ་གྲུབ་པའི་རྟགས་ཡིན་གསུངས། མཚན་ཡང་འཇམ་དཔལ་བཤེས་གཉེན་དུ་བཏགས། ནམ་མཁའ་ལས་རི་གནམ་ལྕགས་འབར་བར་སོང་། དེ་ན་རྒྱུད་སྡེ་ལ་མ་ལུས་པ་ཡོད་པ་ལོངས་སྤྱོད་ལ་འགྲོ་བའི་དོན་གྱིས་ཞེས་བྱུང་། དེར་གཤིན་རྗེ་གཤེད་ཀྱི་བརྟུལ་ཞུགས་རོལ་པའི་སྤྱོད་པ་བསྐྱངས་པས་སྨྱོན་པ་བརྟུལ་ཞུགས་ཅན་དུ་གྲགས། སློབ་དཔོན་ཤྲཱི་སིངྷའི་སྡུན་ན་བཙུན་པ་ཤམ་ཐབས་ཐོད་དུ་བཅིངས། ཐོང་གཤོལ་ཕྲག་པ་ལ་བཟུང་བའི་རྨོས་མཁན་དུ་བསྟན། ཤྲཱི་སིངྷ་ཡིད་མ་ཆེས་པས་འདི་ནི་འཇམ་དཔལ་བཤེས་གཉེན་ག་ལ་ཞིག་སྟེ་དེ་ནི་ཡང་ན་པཎྜི་ཏའམ། ཡང་ན་རྣལ་འབྱོར་པའི་ཆ་བྱད་དུ་འོང་ཐང་སྙམ་ནས་བཟའ་ཞིག་བསླངས་པས། ངའི་ཆུང་མ་ལ་སློངས་ཟེར། དེ་ནས་གྲོང་ཁྱེར་དུ་ཕྱིན་ནས་བསླངས་པས། ཇོ་མོས་ཚོང་འདུས་ནས་བྱིའུ་མཆིལ་པ་བདུན་ཉོས། དེ་འབྲས་ཆང་དང་བསྲེས་ནས་དྲངས་བྱུང་། ང་དགེ་སློང་ཡིན་པས་
མི་རུང་བྱས་པས་རྗེས་སུ་ཡི་རང་ཟེར་ལག་མཐིལ་དུ་བཞག །ཕུས་བཏབ་པས་ཙོ་དིར་གྱིས་ནམ་མཁའ་ལ་དེངས། དེར་ཁྱིམ་བཙུན་བྱོན་ནས། འདི་ལ་བཟའ་བྱིན་ནམ་གསུངས་པས། ཇོ་མོ་ན་རེ་བཟའ་བྱིན་ཀྱང་ཁོང་མི་འདོད་པར་གདའ་གསུངས་པས། གང་ཟག་འཆིང་བ་ཅན་གསུངས། ཤྲཱི་སིངྷས་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞལ་འདོན་མཛད་པས། སློབ་དཔོན་གྱི་དང་པོར་མལ་ལས་གཟིམས་བཞིན་དུ་གསན། དེ་ནས་བཞེངས་ཏེ་གསན། རྫོགས་པ་དང་དོན་ལ་ལྟ་ཅི་ཚིག་ལའང་རྨོངས་གསུངས་པས་འཇམ་དཔལ་བཤེས་གཉེན་ཡིན་ནམ་དགོངས། དེ་བཞིན་དུ་གྲོང་ཁྱེར་དུ་གྲུབ་པའི་སྤྱོད་པ་ཡ་མ་ཟུང་མང་དུ་བསྟན་པས། རྒྱལ་པོའང་ངོ་མཚར་སྐྱེས་ཏེ་རྣལ་འབྱོར་གྱི་དབང་ཕྱུག་ཆེན་པོར་གྲགས། རི་མ་ལ་ཡ་ཞེས་སྣང་བ་རང་མཚན་པས་བགྲོད་པར་མི་ནུས་པའི་གནས་དེར་བྱོན་པས་གནོད་སྦྱིན་གྱི་བུ་མོ་ཟངས་ཀྱི་འོད་འཕྲོ་མ་སོགས་ཀྱིས་འབྱོན་དུ་མ་སྟེར། དེར་བདེན་པའི་ཚིག་གིས་བཀྲོལ་བས་ལྕགས་ཀྱི་སྡིག་པ་འཇིགས་སུ་རུང་བ་ཞིག་བྱུང་། དེ་ནི་སྤྲུལ་པར་ཤེས་ནས་བསྟི་སྟངས་བྱས་པས་བསེའི་སྒྲོམ་བུར་སོང་། དེ་ནས་ལས་བཞི་ཚང་བའི་གསེར་གྱི་གླེགས་བམ་བཻ་ཌཱུརྱས་བྲིས་པ་བྱུང་། གཟིགས་པ་ཙམ་གྱིས་ཐུགས་སུ་ཆུད་ནས་མུ་སྟེགས་འདུལ་བའི་སྔགས་རྒོད་
རྣམས་བསྒྲུབས་ཏེ་ལས་ལ་སྦྱར་ནས་མུ་སྟེགས་ཀྱི་རྒྱལ་ཁམས་བརླག་པར་མཛད། གླེགས་བམ་དངོས་རྡོ་རྗེ་གདན་གྱི་བྱང་དུ་མི་སྣང་བར་རྒྱས་བཏབ་བོ། །དེ་ཉིད་ལ་སློབ་མ་བསམ་གྱིས་མི་ཁྱབ་མོད་ཀྱི། གཙོ་བོར་གྱུར་པ་ཧཱུཾ་ཀཱ་རའི་ལུགས། པདྨའི་འབྱུང་གནས་ལ་བརྒྱུད། དྷ་ན་ཏ་ལ་མན་ངག་གསུངས་ནས་དར། འཇམ་དཔལ་བཤེས་གཉེན་འདིར་ལོ་རྒྱུས་རྙིང་པ་ཐམས་ཅད་ལ་རྒྱལ་རིགས་གཅིག །བྲམ་ཟེའི་རིགས་གཅིག །རྫུས་ཏེ་སྐྱེས་པ་གཅིག་སྟེ་གསུམ་སྣང་བ་རང་ས་རང་སར་གསུམ་ཀ་འཐད་ལ། དོན་ལ་སྤྲུལ་པ་སྒྱུ་མ་ལྟ་བུས་འདུལ་བའི་སྟོན་པ་ཡིན་ཏེ་གདམས་ངག་འབྱུང་བའི་གླེང་གཞི། རྡོ་རྗེ་བཙུན་མོའི་བྷ་ག་དང་ཨོ་རྒྱན་གྱི་གནས་བཞིན་ནོ། །གཤེད་སྐོར་རྣམས་བོད་དུ་གཙོ་བོར་སློབ་དཔོན་ཤཱནྟིང་གཪྦྷ་བྱོན་ནས་དར་ཤིང་། འདིས་བསམ་ཡས་ཀྱི་རབ་ཏུ་གནས་པའང་བྱས་སོ་ཞེས་གྲགས་པ་སྣང་ངོ་། །གསུང་གི་རྒྱུད་རྟ་མགྲིན་ལ་སོགས་པ་པདྨའི་རིགས་མཆོག་དག་ནི་དཔལ་མགོན་ཀླུ་སྒྲུབ་ལས་རིམ་གྱིས་པདྨ་སམྦྷ་ཝ་ལ་བརྒྱུད་པ་སྟེ། སློབ་དཔོན་ཆེན་པོ་འདིའི་རྣམ་པར་ཐར་པ་ཐུན་མོང་དུ་གྲགས་པ་དག་ལས་འདི་ལྟར་མ་གསལ་སྙམ་ན། སྔགས་ཀྱི་རྒྱུད་སྡེ་ཕལ་མོ་ཆེ་ཡང་མཛད་པ་བཅུ་གཉིས་ཀྱི་ཁོང་ནས་གསལ་བས་དེ་དག་ཀྱང་གཞན་དུ་འཕེན་པར་འགྱུར་རོ། །སྤྱིར་གྱི་སློབ་དཔོན་དེའི་དུས་རྒྱ་གར་ན་
གདམས་ངག་ཁྱབ་བརྡལ་དུ་དར་བ་ལྟ་ཅི་སྨོས། ཐེག་པ་ཆེན་པོ་དར་བའི་མགོ་རྩོམ་པ་ལའང་ཉན་ཐོས་པ་རྣམས་ཀྱིས་ཀླུ་སྒྲུབ་ཀྱི་ཐེག་པ་ཆེན་པོར་གྲགས་པའི་ཆོས་ལོག་བསྟན་ནོ་ཞེས་སྐུར་པ་བཏབ་པའི་ཕྱིར་གདམས་ངག་གི་གྲུབ་པ་མཆོག་རྣམས་ཀྱི་ཡུལ་དུ་སྤྱོད་པ་ལས་མིང་ཙམ་ཡང་མི་མངོན་པའི་སྐབས་སོ། །ཐུགས་ཀྱི་རྒྱུད་ཡང་དག་གམ། དཔལ་ཧེ་རུ་ཀ་ནི། དོན་གྱི་སངས་རྒྱས་མཉམ་སྦྱོར་ཉིད་དུ་གནས་པ་སློབ་དཔོན་ཧཱུཾ་ཀཱ་ར་ལས་བརྒྱུད་པའི་ཆོས་ཏེ། འདི་བལ་པོའི་ཡུལ་དུ་འཁྲུངས་གོ་ལེབ་ཞེས་བྱ་བའི་དབུལ་པོར་གྱུར་པས་རྒྱ་གར་དུ་བྱོན་ནས་རྒྱལ་པོའི་ཕྱུགས་རྫི་བྱས། ནགས་གསེབ་ཏུ་ཕྱུགས་འཚོར་སོང་བ་ན། སློབ་དཔོན་ཀུ་ཀུ་རཱ་ཛ་སྒོམ་ལ་བཞུགས་པ་དང་མཇལ། ཤིན་ཏུ་དད་དེ་ཕྱག་དང་བསྐོར་བ་བྱས། མ་ཧེའི་འོ་མ་བཞོས་ཏེ་དྲངས་པས། བྱིས་པ་ཁྱོད་ཀྱིས་ཆོས་ནུས་སམ་གསུངས། ཆོས་ནུས་ཏེ་བརྒྱགས་མེད་ཞུས་པས། བརྩོན་པས་ནུས་ན་གྲུབ་པ་ཡིན་གསུངས་ནས་རྡོ་རྗེ་སེམས་དཔའ་རྒྱན་གཅིག་པའི་སྒོམ་བཟླས་གནང་། དེར་ཕྱུགས་འཚོ་བཞིན་བསྒོམས་པས་རྡོ་རྗེ་སེམས་དཔའ་གྲུབ་སྟེ། ལན་ཅིག་བྲག་ལ་སྒོམ་པའི་ཚེ་རྒྱལ་པོས་དེའི་ཐད་ཀ་ན་རྡོ་རྗེ་སེམས་དཔའ་འོད་ཁྱིལ་ལེ་བཞུགས་པ་མཐོང་། དགོངས་
ཁར་སོང་བ་དང་ཕྱུགས་ཐམས་ཅད་ཀྱང་དེར་འདུས་རྡོ་རྗེ་སེམས་དཔས་ཕྱུགས་དེད་ནས་འོང་བ་མཐོང་། ཕོ་བྲང་ལ་ཉེ་བར་སོང་དུས་ལྷ་མི་གསལ་དུ་སོང་། སྒོ་རྩར་སླེབས་དུས་ཕྱུགས་རྫི་རང་དུ་སྣང་བས་རྒྱལ་པོ་ཐེ་ཚོམ་སྐྱེས། ནངས་པར་གོས་བརྗེས་ནས་ཕྱུགས་རྫིའི་ཕྱི་བཞིན་བལྟར་ཕྱིན་པས། ཡང་བྱིས་པ་དེ་རྡོ་རྗེ་སེམས་དཔར་ཀྲོང་ངེར་སོང་། སླར་ཕྱུགས་རྫི་གཙང་ཁང་དུ་བོས། དེང་ཕན་ཆད་མ་ཤེས་པ་བཟོད་པར་མཛོད་ལ། ངའི་མཆོད་གནས་མཛོད་ཅེས་བསྒོས་པས། བདག་ལ་ཆེ་བའི་ཡོན་ཏན་ཅི་ཡང་མེད་པས་མི་རུང་ཟེར། རྒྱལ་པོས་སྔར་གྱི་ལོ་རྒྱུས་བརྗོད་པས། ངས་སྐྱེ་བ་འདི་ལ་རྒྱལ་པོ་གདུལ་བ་བྱར་མེད། ཕྱི་མ་མངོན་པར་དགའ་བའི་ཞིང་དུ་མཇལ་ལོ་ཟེར། དེར་རྒྱལ་པོས་ངས་ཡོ་བྱད་སྦྱར་གྱིས་བསྒྲུབ་པ་ལ་ཞུགས་སྨྲས་པ་ན། བྱིས་པ་སློབ་དཔོན་ཀུ་ཀུ་རཱ་ཛའི་དྲུང་དུ་སོང་ནས་སྒྲུབ་ཐབས་དངོས་གཞི་ཞུས་པས། སྔར་ལས་འཕྲོ་ཡོད་པས་ལྷ་ངོ་བསྟན་པ་ཡིན། ངས་ཁྱོད་འདུལ་བའི་དུས་ལ་མ་བབས་པས་ཨུ་ཏ་ཡའི་གྲོང་ཁྱེར་ན་སློབ་དཔོན་དུར་ཁྲོད་རོ་ལངས་བདེ་བ་ཡོད་པས་དེར་སོང་ཞེས་ལུང་བསྟན། བྱིས་པས་གྲོང་ཁྱེར་དེར་བཙལ་བས། སློབ་དཔོན་གྲོངས་ནས་པུར་དུར་ཁྲོད་དུ་བསྐྱལ་ཟེར། སླར་ལོག་ནས་ཀུ་ཀུ་རཱ་ཛ་ལ་ཞུས་
པས། རོ་ལངས་སྒྲུབ་པའི་མན་ངག་གནང་སྟེ་ཞག་ཉེར་གཅིག་ལ་འགྲུབ། སློབ་དཔོན་ལངས་ཏེ་རོ་ལངས་བདེ་བའི་དངོས་གྲུབ་ཅེས་གྲགས་སོ། །དེར་ཡན་ལག་དྲུག་ཅུ་རྩ་བརྒྱད་ཀྱི་དཀྱིལ་འཁོར་བཞེངས་ནས་སྨིན་པར་བྱས། དཀྱིལ་འཁོར་གྱི་མེ་ཏོག་ཧཱུྃ་ཀཱ་ར་ལ་བབས་པས་གསང་མཚན་བཛྲ་ཧཱུྃ་ཀཱ་ར་ཞེས་གྲགས། དེར་གདམས་པ་མ་ལུས་པ་རྫོགས་པའི་ཚེ་སློབ་དཔོན་གྱིས། དངོས་གྲུབ་ཀྱི་རྟེན་དུ་ཕྱག་རྒྱ་མཚན་དང་ལྡན་པ་ཞིག་བཟུང་ལ། བསེ་བྲག་བྱ་ཁྱུང་གི་ཚལ་དུ་བསྒྲུབ་པར་སོང་ཞེས་བསྐུལ། དེར་ཧཱུྃ་ཀཱ་རས་རིགས་ངན་གྱི་གྲོང་ཁྱེར་དུ་བྱོན་ནས་བཙལ་བས། རྒན་རྒོན་རང་ཐག་མཁན་གཉིས་ལ་བུ་མོ་མཚན་དང་ལྡན་པ་ཞིག་འདུག །འདི་ནི་ངའི་སྒྲུབ་བདེ་མོར་སྦྱིན་དགོས་བྱས་པས། བུ་མོ་ཁྱོད་ལ་མི་བསྐུར་ཟེར་སྟེར་དུ་མ་འདོད། རིན་འཇལ་བར་བྱས་ནས་ཡུལ་གྱི་རྒྱལ་པོ་ལ་དཔང་པོ་བཅོལ་བས་གསེར་མོ་རང་དང་མཉམ་པ་དགོས་ཟེར། སླར་ལོག་ནས་སློབ་དཔོན་རོ་ལངས་ལ་ལོ་རྒྱུས་བརྗོད་པས་མི་རོ་ལས་གསེར་དུ་བསྒྲུབ་པའི་མན་ངག་གནང་། དུར་ཁྲོད་ནས་རོ་བཙལ་ཏེ་བསྒྲུབས་པས་ལོ་གཅིག་གིས་འགྲུབ། དེར་གསེར་དང་བུ་མོ་བརྗེས་ཏེ་གཉིས་ཀས་སློབ་དཔོན་ཀུ་ཀུ་རཱ་ཛའི་དྲུང་དུ་བྱོན་ནས་གདམས་པ་ལ་མཐའ་གཅོད་བྱས། ཡོ་གའི་ཤིང་རྟ་ཆེན་པོ་སངས་
རྒྱས་གསང་བ་ལའང་གཏུགས་ཏེ་སྒྲོ་འདོགས་བཅད། དེ་བཞིན་དུ་སློབ་དཔོན་གྱི་ཤཱཀྱ་དེ་བ་ལ་ཡང་དག་གི་བསྒྲུབས་ལུང་མན་ངག་ཞུས། བསེ་བྲག་བྱ་ཁྱུང་ཚལ་དུ་བསྒྲུབས་པས། དཔལ་ཆེན་པོའི་ཞལ་མངོན་སུམ་དུ་མཐོང་། ཚེ་ལ་དབང་བའི་རིག་འཛིན་ཐོབ། ཡུམ་གྱི་མཱ་མ་ཀཱིའི་དངོས་གྲུབ་བརྙེས། གཞན་དོན་དུ་ཡང་དག་རྩ་བའི་སྒྲུབ་པ་མཛད། འདིས་རྒྱ་གར་དུ་སློབ་དཔོན་ཆེན་པོ་པདྨ་ལ་གསུངས་ཤིང་། བོད་དུའང་བྱོན་ནས་དར་བ་ཡིན་ནོ། །རིན་པོ་ཆེའི་རིགས་བདུད་རྩི་ཡོན་ཏན་ནི། རྒྱལ་རིགས་གང་ཟག་གསུམ་ལས་རིམ་པར་བརྒྱུད་དེ་བདུད་རྩིའི་དངོས་གྲུབ་ཐོབ་པས་བསྐལ་པར་མི་བཤིགས་པའི་ཚེ་ལ་མངའ་དབང་འབྱོར་པ་སློབ་དཔོན་བཱི་མ་ལ་མི་ཏྲ་ལས་བྱུང་བ་ཡིན་ཏེ། སློབ་དཔོན་དེ་ནི་རྒྱ་གར་ནུབ་ཕྱོགས་ཀྱི་གྲོང་ཁྱེར་གླང་པོ་སྒང་ཞེས་བྱ་བ་མི་ཁྱིམ་འབུམ་ཚོ་ཉི་ཤུ་རྩ་དགུ་ཡོད་པ་ན། ཁྱིམ་བདག་བདེ་ལྡན་ཞེས་བྱ་བ་དང་། ཡུམ་བདག་ཉིད་གསལ་རིག་ཅེས་བྱ་བའི་སྲས་སུ་འཁྲུངས། ལོ་བདུན་སློབ་མའི་གྲྭར་ཞུགས་པས་སུས་ཀྱང་དོ་མེད་པ་གཅིག་བྱུང་བས་རིག་པ་ཆེ་བར་གྲགས། བསྟན་པ་ལ་ཞུགས་ནས་བཤེས་གཉེན་མང་དུ་བསྟེན། རིག་པའི་གནས་ཆེ་བ་རེ་ལ་སློབ་མ་གསུམ་གསུམ་བསྟེན་ཏེ་བཅོ་ལྔ་ལ་ཕྲུགས་གཅིག་ཏུ་བསླབས་པས་ལོ་ཉེར་གཅིག་པ་ལ་པཎྜི་ཏའི་གྲལ་དུ་ཐོན། པཎྜི་ཏ་རྒྱ་མཚོའི་དབུས་ན་སྒྲ་སྐད་མི་འདྲ་བ་སུམ་བརྒྱ་དྲུག་ཅུ་ཤེས། འབྱུང་བ་བཞིའི་
སྒྲ་དང་། དུད་འགྲོའི་སྐད་ལས་ཀྱང་དོན་འཆར་ཞིང་འཆད་པར་ནུས། ཤེས་རབ་ཀྱི་ཕ་རོལ་ཏུ་ཕྱིན་པའི་བཀའ་ཐམས་ཅད་ལ་ཞལ་འདོན་མཛད་ཅིང་། ནང་དུ་དེའི་དོན་མཉམ་གནས་རྫོགས་པ་ཆེན་པོ་ལ་དྲན་པ་ཉེ་བར་གཞག་པ་དེ་ལ་བཤད་ལུང་དང་སྒོམ་ལུང་ནོད་པའི་སློབ་དཔོན་བརྒྱ་དང་དྲུག་ཅུ་ཡོད་པའི་ནང་ནས་སློབ་དཔོན་སངས་རྒྱས་གསང་བས་འཁོར་འདས་ཀྱི་ཆོས་ཐམས་ཅད་ཡེ་ཤེས་ཀྱི་བདུད་རྩི་བཅིང་གྲོལ་མེད་པའི་ངོ་བོར་སངས་རྒྱས་པའི་རྒྱུད་སྡེ་རྣམས་བསྟན་ཅིང་། ཁོང་དུ་ཆུད་ནས་མན་ངག་གི་ཡི་གེ་ཡང་མང་དུ་མཛད་དེ་དར་རོ། །དོན་གྲུབ་ཀྱི་རིགས་ལས་འཕྲིན་ལས་ཕུར་པ་ནི། སློབ་དཔོན་ཆེན་པོ་པདྨ་ལས་བྱུང་བའི་མན་ངག་སྟེ། བདག་ཉིད་ཆེན་པོ་འདིའི་རྣམ་པར་ཐར་པ་ནི་བསམ་པར་མི་ནུས་མོད་ཀྱི། རེ་ཞིག་གདུལ་བྱ་ངོར་སྣང་གི་ཚུལ་འཇིག་རྟེན་ན་ཤིན་ཏུ་གྲགས་པ་གསལ་བ་ཡིན་པས་འདིར་འགོད་པའང་ངལ་བའི་ལས་འདུ་བྱེད་པ་ཙམ་མོ། །དེ་ལྟ་ནའང་མཁས་པས་ལུང་རིགས་གཏན་ཚིགས་མི་འགལ་བར་བསྒྲིགས་པའང་ངོ་མཚར་ཆེ་ཞིང་། ལས་ཅན་གྱི་སྣང་ངོར་རྗེས་སུ་གནང་བ་གཏེར་མའི་ཕྱོགས་ལས་བྱོན་པ་ལའང་འཐད་པ་དང་། དགོས་པ་དང་། བྱིན་རླབས་བསམ་གྱིས་མི་ཁྱབ་པ་འདུག་པས། དཀོན་མཆོག་བརྩེགས་པར། འོད་སྲུངས་
ངའམ་ང་དང་འདྲ་བས་ཆོས་དང་གང་ཟག་གི་ཚོད་བཟུང་བར་རུང་གི། གཞན་དག་གིས་ནི་མ་ཡིན་ཏེ་ལོག་པར་ལྟུང་བའི་ཕྱིར་རོ། །ཞེས་གསུངས་པ་ལེགས་པར་བསམས་ཏེ། རྟོག་གེའི་རིགས་པ་ཁོ་ནས་མཐའ་གཅིག་ཏུ་སེམས་པ་དང་། ཕྲག་དོག་དང་། ཀུན་སློང་ངན་པས་བསླད་པ་དག་གི་རྗེས་སུ་བློ་གྲོས་ཆེན་པོ་སུའང་མི་འཇུག་པ་ཉིད་དོ། །འདི་ལྟར་ཕུར་པའི་ལོ་རྒྱུས་ཉིད་ལས་ཀྱང་རང་ལུགས་ཀྱི་རྣམ་པར་ཐར་པ་ཡོད་མོད་ཀྱི། སྐབས་ཀྱི་བརྗོད་དོན་ལ་སློབ་དཔོན་ཉིད་ཕྱག་རྒྱ་ཆེན་པོའི་རིག་འཛིན་བསྒྲུབ་པར་དགོངས་ནས། བལ་ཡུལ་ཡང་ལེ་ཤོད་ཀྱི་བྲག་ཕུག་ཏུ་བལ་མོ་ཤཱཀྱ་དེ་ཝས་སྒྲུབ་བདེ་མོ་བྱས་ཏེ་དཔལ་ཡང་དག་ཟླ་གམ་དགུ་པའི་དཀྱིལ་འཁོར་ཞལ་ཕྱེ་སྟེ་བསྒྲུབས་པས། ཀླུ་གྱོང་པོ་གནོད་སྦྱིན་རྒོད་མ་ཁ། བྱི་དུར་བར་སྣང་ཁམས་ཀྱི་གློག་མ་སྤྲིན་དང་གསུམ་གྱིས་བར་གཅོད་བྱས། ནམ་མཁའི་ཆར་བཅད། རྩི་ཤིང་ལོ་ཏོག་ཐམས་ཅད་བསྐམས་པར་བྱས་པས། བལ་པོ་ཤཱི་ལ་མཉྫུ་དང་། བལ་པོ་ཀུན་ཞིག་གཉིས་རྒྱ་གར་གྱི་པཎྜི་ཏ་ལས་བར་ཆད་འདུལ་བའི་ཆོས་ལེན་དུ་བཏང་། པཎྜི་ཏ་རྣམས་ཀྱིས་ནཱ་ལེནྡྲའི་གཙུག་ལག་ཁང་ནས། བི་ཏོ་ཏ་མ་ལ་འབུམ་སྡེ་དང་ཕུར་པ་མི་ཁུར་གཉིས་བརྫངས། ཡང་ལེ་ཤོད་དུ་ཕེབས་པ་ཙམ་གྱིས་བར་ཆད་ཞི། བསྒྲུབས་
པས་ཟླ་བ་གཅིག་ན་རྡོ་རྗེ་གཞོན་ནུའི་ཞལ་གཟིགས། སླར་ཡང་ཕུར་སྦྲགས་མའི་སྒྲུབ་པ་མཛད། དམ་ཅན་མ་མོ་བཅུ་གཉིས་ཀྱི་སྲོག་སྙིང་ཕུལ་ཏེ་དམ་ལ་བཏགས། དེའི་ཚེ་བི་ཏོ་ཏ་མ་ལའི་རྒྱུད་སྡེ་ཚན་བཞི་བཅུ་ཞེ་བརྒྱད་དམ། སུམ་ཅུ་སོ་དྲུག་ཏུ་ཕྱེ་ཞེས་གྲགས། དེར་རྒྱུད་སྡེ་ལེ་ལག་དང་བཅས་པ་དབང་ཆེན་པོའི་ཕྲག་པ་ན་བཟུང་། སློབ་དཔོན་ཉིད་ཀྱང་གཤེགས་པས། ཡུལ་ཚ་བ་ཚ་ཤོད་དུ་ནུབ་གཅིག་གཟིམས་པའི་ནམ་ཕྱེད་ན་ཆོ་འཕྲུལ་ཆེན་པོ་བྱུང་། གཟིགས་པས་མདུན་ན་ནེ་གུ་དྲུང་དྲུང་བ་ཞིག་འདུག །དེར་ཕྱག་རྒྱས་བསྡམས། ལྷུང་བཟེད་དུ་བཅུག །སང་ཆུ་མིག་བྱང་ཆུབ་རིས་སུ་བྲོ་བཏབ་པའི་ཚེ་ཁ་ཕྱེ་བས་བུད་མེད་བཞིན་བཟང་མ་བཞི་འདུག །སུ་ཡིན་དྲིས་པས་ཡུལ་ཚ་བ་ཚ་ཤོད་ལ་དབང་བྱེད་པའི་ས་བདག་མོ་བཞི་ཡིན། ངེད་ཅག་སེམས་ཅན་རྣམས་ཀྱི་ཚེ་སྲོག་ལ་དབང་བའི་བདག་པོར་སློབ་དཔོན་གྱིས་དབང་བྱིན་ཅིག་ཟེར། སློབ་དཔོན་གྱིས་དེ་ལྟར་མི་རུང་གསང་སྔགས་རྡོ་རྗེ་ཕུར་པ་བསྒྲུབ་པ་ལ་བར་དུ་གཅོད་པའི་དགྲ་བགེགས་རྣམས་ཀྱི་ཚེ་སྲོག་ལ་དབང་བྱེད་པར་བསྐུར་རོ་གསུངས་ནས་དེ་ལྟར་མཛད། གསང་བའི་མཚན་རྡོ་རྗེ་ཡ་བྱིན་ལ་སོགས་པར་བཏགས། དེ་ནས་ནཱ་ལེནྡྲར་བརྟོལ། པཎྜི་ཏ་རྣམས་ལ་དཔེ་སྔ་མ་གཏད་ཅིང་། རང་གི་མན་ངག་ཏུ་ཕྱེ་བ་རྣམས་
གཟིགས་བཅུག་པས། འདི་དག་ནི་ལུང་དང་མི་འགལ་ལ་བསྒྲུབ་པའི་ཆ་རྐྱེན་དུ་འཕཊ་སོ་གསུངས་ནས་རྒྱལ་མཚན་གྱི་རྩེ་ལ་འཕྱར། དེར་དུར་ཁྲོད་སོ་ས་གླིང་དུ་མཁའ་འགྲོ་མ་བདེ་བའི་འཁོར་ལོ་ལས་རྡོ་རྗེ་ཕུར་པའི་དཀྱིལ་འཁོར་དུ་དབང་ཐོབ་པ་སློབ་དཔོན་པྲ་བྷ་ཧ་སྟི་ལས། ཕུར་པའི་ཆོས་ཚར་བཅོ་བརྒྱད་གསན། ཚེ་དང་། ལས་དང་། ས་འོག་གི་རིག་འཛིན་གསུམ་གྲུབ། བོད་ཀྱི་སྤྱན་འདྲེན་པའང་ལྷགས་པ་མཁྱེན་ནས་སླར་ཡང་ལེ་ཤོད་དུ་བྱོན། སློབ་དཔོན་གསུམ་གདན་འཛོམ་པ་ན། བི་མ་ལས་ཕུར་པ་གདེངས་པས་ཆུ་བོ་གྱེན་ལ་ལྡོག །བལ་པོ་ཤཱི་ལ་མཉྫུས་བྲག་ལ་ཕུར་པ་བཏབ། སློབ་དཔོན་ཆེན་པོས་ནགས་ཚལ་ལ་མེ་ཤོར་བའི་སར་བསྡིགས་པས་ཙན་དན་གྱི་ནགས་སུ་སོང་། དེ་ནས་བསམ་ཡས་སུ་རྒྱལ་པོ་ལ་ཕུར་པའི་ཆོས་གསུངས། མཁར་ཆེན་བཟའ་མཚོ་རྒྱལ་མ། ཅོག་རོ་བཟའ་མཆོད་གནས་མ། ཨ་ཙ་ར་ས་ལེ་གསུམ་ལ་མདུན་གྱི་ནམ་མཁར་དཀྱིལ་འཁོར་སྤྲུལ་ཏེ། དབང་ལྷ་ལ་ཞུའམ་བླ་མར་ཞུ་གསུངས་པས། མཁར་ཆེན་བཟས་བླ་མ། ཅོག་རོས་ལྷ་ལ་གདམས། ས་ལེས་བླ་མའི་དགོངས་པ་དང་སྦྱར་བར་ཞུས་པས། རྟེན་འབྲེལ་གྱི་དབང་ལས་ཡང་ཕུར་བདུད་རྩི་གསུམ་ལྕམ་ལུགས་མི་ཟབ་པར་གྲགས། མཁར་ཆེན་བཟའ་ལ་རྒྱུད་
དང་མན་ངག་སྙིང་པོར་དྲིལ་ནས་གནང་སྟེ་ས་ལེ་ལའང་ཤོད་གསུངས་པས་ཕུར་པ་ཇོ་མོ་ལུགས་ཟབ་པ་ཡིན་ནོ། །སྤྱིར་བོད་ཡུལ་འདིར་ཕུར་པ་ཤིན་ཏུ་དར་ཞིང་དེ་ལས་དངོས་གྲུབ་བརྙེས་པའང་བསམ་གྱིས་མི་ཁྱབ་ལ། གསར་མ་རྣམས་མ་དར་གྱི་བར་ལ་བོད་དུ་ཡི་དམ་དང་སྔགས་ཀྱི་བསྟན་པའི་སྲོག་ཀྱང་ཡང་ཕུར་གྱིས་བཟུང་། བརྒྱུད་པ་བྱིན་གྱིས་བརློབ་པར་ནུས་པའི་རིག་སྔགས་འཆང་བའི་གདུང་དང་། དེ་ལས་མཁས་ཤིང་གྲུབ་པ་བརྙེས་ནས་བསྟན་པའི་ཆུ་མགོ་ཐ་དད་པར་ཤར་བའི་སྐྱེས་བུ་དམ་པ་རྣམས་ཀྱང་བྱུང་མོད། དེ་ལྟ་ནའང་། ཕལ་ཆེར་ཡོངས་སུ་འདྲིས་ལ་སྡང་། །རྟག་ཏུ་གསར་པ་གསར་པ་འཚོལ། །ཞེས་པ་ལྟར་དཔལ་ཡེ་བཟང་རྩེ་བས། བོད་འདིར་རྡོ་རྗེ་ཕུར་པའི་སྒྲུབ་པ་ཤིན་ཏུ་དར་ལ། དེ་ལའང་ཁ་ཟེར་བ་དག་ཡོད་མོད་ཀྱི། དུས་ཕྱིས་ཆོས་རྗེ་ས་སྐྱ་བས་ཤངས་སྲེག་ཤིང་ནས་སློབ་དཔོན་པདྨ་དངོས་ཀྱི་ཕྱག་དཔེའི་རྒྱ་དཔེ་རྙེད་ནས་འགྱུར་མཛད་པས་ཕལ་ཆེར་ཁ་རོགས་ཏེ་འདུག་གོ །ཞེས་གསུངས་པ་ལྟར་ས་པཎ་གྱིས་ཕུར་པའི་རྒྱ་དཔེ་རྙེད་པས་དགྱེས་ཆེས། སྣམ་སྦྱར་མནབས་ནས་རྒྱ་དཔེ་ཕྱག་ཏུ་བཟུང་། བསུ་བ་དང་རོལ་མོའི་བྱེ་བྲག་གིས་སྤྱན་དྲངས་པས་བོད་དུ་བྱུང་བའི་ཆོས་སུ་སྒྲོ་འདོགས་པའི་གཟུ་བོར་མི་གནས་པ་དག་གི་བཞིན་རས་ལ་མུན་
པའི་བྱུག་པ་བྱེད་པའི་སྐབས་བྱུང་བ་ཡིན་ནོ། །གཉིས་པ། བདེ་འདུས་གཏེར་མའི་ལོ་རྒྱུས་ནི། འོག་མིན་ཆོས་ཀྱི་དབྱིངས་ཀྱི་ཕོ་བྲང་ན་སྟོན་པ་བཅོམ་ལྡན་འདས་ཆོས་སྐུ་ཀུན་ཏུ་བཟང་པོ་ཉིད་དགོངས་པ་མཉམ་ཉིད་བསལ་བཞག་མེད་པའི་ངང་དུ་བཞུགས་པ་ལ། ཡུམ་ཀུན་ཏུ་བཟང་མོས་རྡོ་རྗེའི་དམ་ཚིག་ཆེན་པོའི་གླུས་བསྐུལ་ནས། ལོངས་སྤྱོད་རྫོགས་པའི་སྐུར་བཞེངས་ཏེ། ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་རྣམ་པར་འཕྲུལ་ཏོ། །ཞི་བའི་གདུལ་བྱར་མ་གྱུར་པ་རྣམས་ལ་ཁྲོ་བོ་ཆེ་མཆོག་ཧེ་རུ་ཀའི་སྐུར་བཞེངས་ནས་ཁྲོ་བོའི་དཀྱིལ་མཁོར་བསྟན་ཏེ་དགོངས་པས་བརྒྱུད་པ་དག །རིག་འཛིན་རྣམས་ལ་བརྡ་ལས་བརྒྱུད་དེ་གཙོ་བོར་གྱུར་པ་སྟོན་པ་ཉིད་བྱང་ཆུབ་སེམས་དཔའི་ངང་ཚུལ་ཅན་རིག་འཛིན་རྡོ་རྗེ་ཆོས་ཀྱི་ཕྱོགས་སུ་བསྡེབས་ཏེ་གླེགས་བམ་དུ་སྣང་བར་མཛད་དོ། །དེར་རེ་ཞིག་མིའི་ནང་དུ་སྐལ་བར་གྱུར་པ་མ་རྙེད་ནས་མཁའ་འགྲོའི་གཙོ་མོ་ལས་ཀྱི་དབང་མོ་ཆེ་ལ་གཏད་རྒྱས་བརྒྱུད། མཁའ་འགྲོ་མས་བདེ་གཤེགས་འདུས་པའི་སྤྱི་རྒྱུད་ལྔ་དང་། བྱེ་བྲག་གི་རྒྱུད་བཅུ་རྣམས་རིན་པོ་ཆེ་སྣ་བརྒྱད་ལས་བྱས་པའི་སྒྲོམ་བུར་སྩལ། སྒོས་རྒྱུད་རྣམས་སྒྲོམ་བུ་ཐ་དད་པར་བཅུག་ནས་དུར་ཁྲོད་བསིལ་བའི་ཚལ་གྱི་མཆོད་རྟེན་བདེ་བྱེད་བརྩེགས་པར་
རྒྱས་བཏབ་བོ། །དེར་དུས་ལ་བབ་པའི་ཚེ་ཉིན་པར་ཐོག་སེར་འབབ་ཅིང་། མཚན་མོ་གློག་འགྱུ་བ་ལ་སོགས་པའི་ཆོ་འཕྲུལ་ཟད་མི་ཤེས་པ་སློབ་དཔོན་བརྒྱད་ཀྱིས་དགོངས་ཏེ། ཐམས་ཅད་ནམ་མཁར་བྱོན་ནས། དགོངས་པ་གཅིག་ཏུ་བསྡུས། མཆོད་རྟེན་ཆེན་པོའི་མདུན་དུ་ལྷགས་ནས་མཐུན་པའི་རྫས་དང་བདེན་པའི་ཚིག་གིས་དཀྲོལ། གཞན་དོན་དུ་དགོངས་པའི་བརྟུལ་ཞུགས་བསྐྱེད་དེ་དབང་དུ་བསྡུས་པས། གདུགས་བདུན་གྱི་ནུབ་མོ་མཁའ་འགྲོ་མ་ལས་ཀྱི་དབང་མོ་ཆེ་མངོན་སུམ་དུ་བྱོན་ནས་མཆོད་རྟེན་ནས་སྒྲོམ་བུ་ཕྱུང་སྟེ། ཆེ་མཆོག་གི་བསེ་སྒྲོམ་བི་མ་ལ། ཡང་དག་གི་དངུལ་སྒྲོམ་ཧཱུཾ་ཀཱ་ར། གཤིན་རྗེའི་ལྕགས་སྒྲོམ་འཇམ་དཔལ་བཤེས་གཉེན། རྟ་མགྲིན་གྱི་ཟངས་སྒྲོམ་ཀླུ་སྒྲུབ། ཕུར་པའི་གཡུ་སྒྲོམ་སློབ་དཔོན་པདྨ། མ་མོའི་བསེ་སྒྲོམ་དྷ་ན་སཾ་སྐྲྀ། མཆོད་བསྟོད་ཀྱི་མཆོད་སྒྲོམ་རོམ་བུ་གུ་ཧྱ། དྲག་སྔགས་ཀྱི་གཟི་སྒྲོམ་ཤཱནྟིང་གཪྦྷ་སྟེ་སོ་སོར་བཀའ་བབས་ཀྱི་ངེས་པ་གཏད་པས་རང་རང་གི་དོན་ལ་མཁས་ཤིང་གྲུབ་པ་ཐོབ་པར་གྱུར། རིན་ཆེན་སྣ་བརྒྱད་ཀྱི་སྒྲོམ་དུས་དེར་རྒྱ་མ་བཀྲོལ་བ། ཕྱིས་སློབ་དཔོན་པདྨར་གཏད་པ་ནས་བདེ་གཤེགས་ཡོངས་རྫོགས་ཚོམ་བུ་གཅིག་ཏུ་སྒྲུབ་པའི་རྒྱུད་དང་མན་ངག་བྱུང་། སླར་བོད་དུ་བཙན་པོ་ཁྲི་སྲོང་ལྡེ་
བཙན་གྱིས་གསོལ་བ་བཏབ་པ་ལས་བསམ་ཡས་མཆིམས་ཕུའི་བྲེ་གུ་དགེའུ་ར་ལས་ཅན་གྱི་རྗེ་འབངས་བརྒྱད་ལ། ཕྱི་ནང་གསང་བའི་དབང་དང་མན་ངག་རྫོགས་པར་བྱིན། དེའི་ཚེ་གསེར་སྲང་བཅུ་རེ་ལས་བྱས་པའི་མེ་ཏོག་སོ་སོར་དོར་བས། མངའ་བདག་ཉིད་དབུས་ཀྱི་ཆེ་མཆོག །ནམ་མཁའི་སྙིང་པོ་ཡང་དག །སངས་རྒྱས་ཡེ་ཤེས་གཤིན་རྗེ། ངན་ལམ་མཆོག་དབྱངས་རྟ་མགྲིན། མཁར་ཆེན་བཟའ་ཕུར་པ། དཔལ་གྱི་ཡེ་ཤེས་བླ་མེད་ཧེ་རུ་ཀ །རླངས་དཔལ་སེང་དྲེགས་པ་ཀུན་འདུལ། བཻ་རོ་ཙཱ་ན་སྟོབས་ལྡན་ནག་པོ་ལ་བབས་པས་ལྷ་སོ་སོ་ཞལ་གཟིཊ། མཁར་ཆེན་བཟས་བླ་མ་སངས་རྒྱས་ཐམས་ཅད་འདུས་པའི་ངོ་བོ་མཐོང་། དེ་དག་མཆོག་གི་གདུལ་བྱ་ཡིན་པས་དབང་དུས་སུ་རྟོགས་པ་བརྙེས། བཀའ་བབས་སོ་སོར་བསྒྲུབས་པས་བཙན་པོས་ཏིང་འཛིན་ཁྱད་པར་ཅན་གྲུབ། རྩ་མདུད་གྲོལ་བས་ཤེས་རབ་ཕྱོགས་མེད་དུ་རྒྱས་ནས། བཀའ་ཡང་དག་པའི་ཚད་མ་ཞེས་པའི་བསྟན་བཅོས་ཀྱང་མཛད། སྐུ་ཚེ་ཕྱིར་བསྲིངས། ནམ་མཁའི་སྙིང་པོས་ཉི་ཟེར་ལ་བཅིབས་ཤིང་བྲག་ལ་འདམ་རྫབ་ལྟར་མཛད། སངས་རྒྱས་ཡེ་ཤེས་ནམ་མཁའ་ལ་བྱ་ལྟར་གཤེགས་ཤིང་ཚེའི་རིག་འཛིན་བརྙེས། རྒྱལ་བ་མཆོག་དབྱངས་བསྐྱེད་རིམ་གྱད་དུ་གྱུར་པས་དབུ་གཙུག་ན་རྟ་མགོ་འབྱིན་
ཅིང་རྟ་སྐད་ཧི་ཧིར་བསྒྲགས། མཁར་ཆེན་བཟས། འཕགས་ཡུལ་གྱི་གྲུབ་ཐོབ་དག་གིས་ཀྱང་སྤྱོད་ཡུལ་དུ་དོགས་པའི་བསད་པ་གསོ་ནུས། འབྲོག་མི་དཔལ་ཡེས་མ་མོ་ལས་ལ་དངོས་སུ་འཁོལ། རླངས་དཔལ་སེང་གེས་སྡེ་བརྒྱད་བྲན་དུ་འཁོལ། བཻ་རོ་ཙཱ་ན་ཡེ་ཤེས་ཀྱི་སྤྱན་དང་ལྡན་ཞིང་རྫུ་འཕྲུལ་གྱི་བཀོད་པ་ལ་མངའ་བརྙེས་པ་སོགས་བྱུང་བས་འདི་དག་ལ་གྲུབ་ཆེན་བརྒྱད་ཞེས་གྲགས། འདིའི་སྟེང་དུ་སློབ་དཔོན་ཆེན་པོས་མན་ངག་རྗེས་སུ་གདམས་པ་ལས་དངོས་གྲུབ་ཆེན་པོ་བརྙེས་པ། གཉགས་ཛྙཱ་ན་ཀུ་མཱ་ར་དང་། ལྷ་ལུང་དཔལ་གྱི་རྡོ་རྗེ་ལ་སོགས་པ་ནམ་མཁའ་ལ་འདབ་ཆགས་བཞིན་བྱ་བ་དང་། ཆུ་བོ་ལ་གར་མཁན་བཞིན་བྱ་བ་དང་། མཁའ་སྤྱོད་དུ་འོད་ཕུང་གིས་འགྲོ་བ་དང་། གཅན་གཟན་གྱི་གཉའ་བ་ནས་འཛིན་པ་དང་། ཆུ་བོ་གྱེན་ལ་ལྡོག་པ་དང་། རོ་ལངས་གསེར་དུ་བསྒྱུར་བ་དང་། ལྟ་སྟངས་ཀྱིས་གཡག་རྒོད་འགུགས་པ་དང་། རི་བྲག་ལ་ཐོགས་རེག་སྤངས་པ་དང་། ཐོག་མདས་བྲག་རི་བསྙིལ་བ་དང་། ཕ་བོང་ཟན་ལྟར་གཅོད་པ་དང་། ནམ་མཁའ་ལ་སྐྱིལ་མོ་ཀྲུང་བཅའ་བ་དང་། བར་སྣང་ནས་འདབ་ཆགས་འཛིན་པ་དང་། ཕུར་པ་གདེངས་ཆད་སྲོག་གི་རྒྱུ་བ་འགགས་པ་ལ་སོགས་ལྟར་མངོན་པའི་རྫུ་འཕྲུལ་ཡ་མ་ཟུང་དང་། ནང་ཏིང་ངེ་འཛིན་གྱི་དགོངས་པ་ཚད་དུ་ཕྱིན་པས་མི་བརྗེད་པའི་
གཟུངས། མངོན་པར་ཤེས་པ་དྲུག །རྒྱུན་གྱི་ཏིང་ངེ་འཛིན། གཡུང་དྲུང་ལྟ་བུའི་ལུས་ལ་སོགས་ཏེ་དངོས་གྲུབ་རྣམ་པ་གཉིས་ཀྱི་གོ་འཕང་ལ་རྐང་སྟེཊ་འཇོག་པ་བཅུ་བདུན་བསྣན་པས་རྗེ་འབངས་ཉི་ཤུ་རྩ་ལྔར་གྲགས་པ་ཡིན་ནོ། །དཔལ་འཛིན་གྱིས། འཇིག་རྟེན་མཆོད་བསྟོད་དཀྱིལ་འཁོར་དུ། །བོད་ཀྱི་ལྷ་འདྲེ་འཛུད་ལུགས་ཀྱིས། །གཞན་དུ་འབྱུང་པོ་ཟད་དམ་ཅི། །ཞེས་ཁ་ཟེར་བ་བྱས་མོད། དེ་དག་ཡེ་ཤེས་ཀྱི་དཀྱིལ་འཁོར་ཡིན་པས་དྲེགས་པ་ཅན་འཁོར་དུ་མི་རུང་ཟེར་ན། དཔལ་ལྡན་འབྲས་སྤུངས་རྒྱུ་སྐར་གྱི་དཀྱིལ་འཁོར་ལའང་ཉེས་པ་དེ་ཡོད་པས་སོ། །ཡང་བོད་ཀྱི་ལྷ་འདྲེའི་མིང་སྣང་ལུགས་ཀྱིས་བོད་དུ་བྱས་སོ་ཟེར་ན་ནི། གཟུངས་གྲྭ་ལྔར་ཡུལ་སོ་སོའི་གནོད་སྦྱིན་མང་དུ་བཀོད་པ་དེ་ཡང་ནོར་བར་འགྱུར་ལ། སྤྱིར་རྟོག་གེའི་རིག་པས་གཞལ་ནའང་། འཇིག་རྟེན་གྱི་ཁམས་ན་མིང་འདྲ་དང་རུས་འདྲ་ཇི་སྙེད་ཡོད། ཕྱིན་ཅི་ལོག་འདིས་ཕུང་པོ་གསུམ་པའི་སངས་རྒྱས་གྲྭར། སྲེད་མེད་བུ་སོགས་འཛུད་ལུགས་ཀྱིས། །གཞན་དུ་འདྲེན་པ་ཟད་དམ་ཅི། །ཞེས་ཚངས་པ་དང་ཆུ་ལྷ་དང་། སྲེད་མེད་བུ་ལ་སོགས་པ་དངོས་བསྟན་དུ་སྨྲ་བར་འགྱུར་བ་ཤིན་ཏུ་ཐ་ཆད་པའི་ཚིག་གོ །ཁྱད་པར་རྒྱུད་ཀྱི་གླེང་གཞི་མ་མཐོང་ཞིང་། སངས་རྒྱས་ཀྱི་འཕྲིན་ལས་རླབས་པོ་ཆེའི་ཚུལ་ཁོང་དུ་མ་ཆུད། ཆོས་ཉིད་བསམ་གྱིས་
མི་ཁྱབ་པའི་གནས་ལ་ལྟ་བའི་སྐལ་བ་ནི་ཆད། བེམ་པོའི་རུམ་ནས་སྣང་བ་ཀོ་ལེར་ཤར་བའི་གཏན་ཚིགས་ཀྱིས་རང་གི་ཚི་ཆད་པར་བྱ་བ་རྒྱ་གར་ནས་བྱུང་བའི་རྒྱུད་ལ་བོད་ཀྱི་ལྷ་འདྲེ་མི་རུང་བར་བསྟན་པའི་ཤུགས་ཀྱིས་རྒྱ་གར་ཉིད་ཀྱི་ལྷ་འདྲེ་བྱུང་སྲིད་ན་འགལ་བ་མེད་པར་དོན་གྱི་སོང་བས། གང་དུ་སྟོན་པས་གསང་སྔགས་གསུངས་པའི་གནས་དང་མཚན་ཉིད་སོགས་ཀྱི་གོ་བ་རབ་རིབ་ཙམ་ཡང་མ་ཆགས་པ་ཉིད་དོ། །འདིར་འཇིག་རྟེན་མཆོད་བསྟོད་ཀྱི་རྒྱུད་ལས། བཅོམ་ལྡན་འདས་འབར་བ་ཆེན་པོའི་སྐུར་བཞེངས་ཚུལ་བསྟན་པའི་རྗེས། འཇིག་རྟེན་ཁམས་ཀྱི་དྲེགས་པ་ཅན་ལྷའི་ཚོགས་དང་། བདུད་དང་། གཤིན་རྗེ་དང་། སྲིན་པོ་དང་། གནོད་སྦྱིན་དང་། གཟའ་དང་། ཀླུ་དང་། རྒྱལ་པོ་དང་། གིང་དང་། མ་མོ་ཆེན་མོ་རྣམས་དང་། ཌཱཀྐིའི་ཚོགས་དང་། རཱུ་ཏྲ་དང་། མུ་སྟེགས་དང་། སྲོག་གི་བདག་པོ་དང་། ནོར་གྱི་བདག་པོ་དང་། ཚེའི་བདག་པོ་དང་། སྲིད་པའི་བདག་པོ་དང་། གཞན་ཡང་འཇིག་རྟེན་གྱི་ཁམས་ཐམས་ཅད་དང་། དུར་ཁྲོད་ཆེན་པོ་དང་། འཛམ་བུའི་གླིང་མཐའ་འཁོབ་ཀྱི་ས་དང་། རིའི་རྒྱལ་པོ་དང་། རི་ཕྲ་མོ་དང་། རྒྱ་མཚོ་དང་། ཆུ་ཕྲན་དང་། ཡོངས་སུ་འདུ་བའི་ཤིང་དང་། ནགས་ཚལ་ཆེན་པོ་དང་གནས་ཕྲ་
མོ་བསམ་གྱིས་མི་ཁྱབ་པ་དག་ན་གནས་པའི་འཇིག་རྟེན་གྱི་དྲེགས་པ་ཅན་ཕོ་དང་མོའི་རྣམ་པར་འདུག་པ་དང་། གཙོ་བོ་དང་འཁོར་གྱིས་ཁྱད་པར་དུ་གྱུར་པ་དང་། བྲན་དང་གཡོག་གི་ཚོཊ་དང་བཅས་པ་དག་རང་རང་གི་གནས་ནས་མྱུར་དུ་སྔངས་ཤིང་སྐྲག་ལ་འཇིགས་པ་དང་། ཡ་ང་བའི་སེམས་དང་། དུལ་བའི་སེམས་ཀྱིས་ཐོན་ཏེ། བཅོམ་ལྡན་འདས་དེའི་སྤྱན་སྔར་རླུང་དྲག་པོའི་ཤུགས་ཀྱིས་རབ་ཏུ་བསྐྱོད་པའི་ཤིང་བལ་གྱི་འདབ་མ་བཞིན་དུ་རང་དབང་མེད་པར་ལྷགས་པར་གྱུར་ཏེ། ཞེས་སྟོན་པ་བཅོམ་ལྡན་འདས་གསང་བའི་བདག་པོ་དཔལ་ཧེ་རུ་ཀས་གང་དུ་རང་སྣང་གི་འོག་མིན་སྤྲུལ་པའི་གནས་དེར་འཇིག་རྟེན་ཁམས་ཀྱི་དྲེགས་པ་ཅན་ཐམས་ཅད་དབང་དུ་བསྡུས། སྲོག་སྙིང་བླངས། འཁོར་གྱི་རོལ་པར་མཛད་པའི་ཕྱིར། འཇིག་རྟེན་གྱི་ཁམས་ཞེས་པས་སྤྱིར་བསྡུས་པ་ལ་འཛམྦུའི་གླིང་ཞེས་པས་བྱེ་བྲག་གིས་བསྡུས་པའི་ཁོངས་སུ་བོད་ཅེས་བྱ་བའི་ཡུལ་ཕྲན་ཀོ་ལེ་བ་འདི་ཡོད་པ་བ་ལང་རྫི་བོ་ཡན་ཆད་ཀྱིས་ཀྱང་ཤེས་པར་འགྱུར་རོ། །རྒྱུད་སྡེའི་གནས་ཆེན་པོ་འདི་དག་གཟིགས་ནས་གཡུང་སྟོན་རྡོ་རྗེ་དཔལ་བས་མདོ་སྔགས་ཀྱི་སངས་རྒྱས་ལ་ཁྱད་པར་ཕྱེ་ཞིང་། སྔགས་ཀྱི་སྟོན་པས་གདུལ་བྱ་ནག་ཕྱོགས་པ་འདུལ་ནུས་པར་བཤད་པའང་དོན་འདི་ལྟ་བུ་ལ་དགོངས།
དེ་བཞིན་དུ་བློ་གྲོས་བསམ་གྱིས་མི་ཁྱབ་པ་འགོས་ལོ་གཞོན་ནུས། ལྷ་ཆེན་པོ་འདི་རྣམས་ཀྱང་སངས་རྒྱས་མཐོང་བ། རང་རང་གི་གསང་སྔགས་ཀྱི་གསང་ཚིག་དང་བཅས་ཤིང་དེས་འཇིག་རྟེན་ལ་ཕན་འདོགས་པ་ཤ་སྟག་ཡིན། ཞེས་གསུངས་པའང་དོན་འདིར་གནས་ལ། གཞན་དུ་བོད་ཀྱི་ལྷ་འདྲེས་སངས་རྒྱས་མཐོང་བའི་ཚུལ་སྟོན་པ་མེད། ཤམྦྷ་ལ་སོགས་པ་ནག་ཕྱོགས་སུ་བྲིས་པའང་ཡོད་དེ་གནས་སྐབས་ཀྱི་གཏམ་ཙམ་མོ། །དེ་བཞིན་དུ་དཔལ་འཛིན་གྱིས་གསར་མའི་རྒྱུད་འགྲེལ་འདི་ཙམ་ཞིག་འགྱུར་བ་ལ། ཐ་ན་རྫོགས་པ་ཆེན་པོ་ཞེས་པའི་མིང་ཙམ་ཡང་མེད་ཅེས་རང་མཚང་རང་གིས་སྟོན་པ་ཉིད་དེ། འཇམ་དཔལ་ཞལ་ལུང་ལས། རྫོགས་པ་ཆེན་པོ་ཡེ་ཤེས་སྤྱི་གཟུགས་ཅན། །ཞེས་དང་། ཡེ་ཤེས་ཞབས་ཀྱིས་སྒྲུབ་ཐབས་ཀུན་ཏུ་བཟང་མོར་ཡང་རྫོགས་པ་ཆེན་པོ་ཞེས་བཤད་པས་རྒོད་འགྱོད་ལ་སོགས་པའི་སྒྲིབ་པ་ལྔ་ཅར་ཉམས་སུ་མྱོང་བར་བྱས་སོ། །ལར་རྟོག་དཔྱོད་འདི་ནི་བློ་གྲོས་ཕུར་ཁུང་ཐུག་པ་ཡིན་ཏེ། གཅིག་ལ་གཅིག་ལྟོས་ཀྱི་ལུང་བསྟན་པ་མེད་པས་ཆོས་མ་ཡིན་པར་འགྲོ་ན། མདོ་སྡེ་རྣམས་ནས། གསང་སྔགས་སྤྱིའི་མཚན་ཉིད་དང་མིང་ཙམ་ཡང་མ་བསྟན་པས་དེ་ཐམས་ཅད་ཀྱང་རྫུན་པར་འགྱུར་རོ། །དེ་བཞིན་དུ་
གཟུ་བོར་མི་གནས་པའི་རྫུན་གཏམ་དང་། དྲང་དོན་གྱི་ཕྱོགས་ལ་འཆེལ་བ་དང་། རི་བོང་གི་ཆ་ལ་བྲག་ཆ་ལྟ་བུར་བཟློ་བ་ལ་སོགས་པའི་ཕྱོགས་ཀྱང་བསལ་བར་བྱ་སྟེ། དེ་ལ་བཙན་པོ་ཁྲི་སྲོང་ལྡེ་བཙན་གྱི་ཐུགས་བསྐྱེད་བླ་ན་མེད་པས། གངས་ཅན་པ་རྣམས་ཀྱི་བསོད་ནམས་དམ་པའི་བགོ་སྐལ་དུ། བསྐལ་པ་དང་པོ་ཆགས་པ་ནས་ད་ལྟའི་བར་དུ་བཅོམ་ལྡན་འདས་དཔལ་ཀུན་ཏུ་བཟང་པོའི་བྱིན་རླབས་ལས། འོག་མིན་གྱི་གནས་སུ་དྲུག་པ་རྡོ་རྗེ་འཆང་དུ་རྣམ་པར་འཕྲུལ་ཏེ། གསང་བ་འཛིན་པ་རྣམས་ལ་གསང་སྔགས་རྡོ་རྗེ་ཐེག་པའི་ཆོས་ཀྱི་འཁོར་ལོ་རྒྱ་མཚོའི་རྡུལ་གྱིས་ཀྱང་མཐའ་མི་དཔོགས་པར་གསུངས་པ་ཉིད། རིགས་གསུམ་སེམས་དཔའ་ལ་སོགས་པས་ལྷ་དང་། ཀླུ་དང་། གནོད་སྦྱིན་ལ་སོགས་པའི་ཡུལ་དུ་སྣང་བར་མཛད་ཅིང་། མཁའ་འགྲོ་དང་། གྲུབ་ཐོབ་རིག་པ་འཛིན་པ་དུ་མས་བཟུང་སྟེ་གནས་པ་དག་ཀྱང་བོད་འདིར་བྱོན་མོད་ཀྱི། དེ་དག་ལ་འཇམ་དཔལ་གང་དེ་བཞིན་གཤེགས་པས་གསུངས་པའི་བཀའ་ལ་ལ་ནི་བཟང་བར་འདུ་ཤེས། ལ་ལ་ནི་ངན་པར་འདུ་ཤེས་པ་ནི་ཆོས་སྤོང་བའོ། །ཞེས་གསུངས་པ་ལྟར་སྔོན་གྱི་སྤྲུལ་པའི་ལོ་པཎ་ཆེན་པོ་རྣམས་ལ་ཕྱག་བྱ་བ་དང་། རྗེས་སུ་ཡི་རང་བ་ལྟ་ཅི་སྨོས། རྒྱ་གར་ན་མེད་པ་དང་། བོད་དུ་བཅོས་
པ་སོགས་ཀྱི་བརྟིང་ཚིག་མང་དུ་སྨྲས་ནས་ཐོས་པ་ཉུང་ཞིང་རྨོངས་པའི་ཕྱོགས་ལ་མངོན་པར་ཞེན་པ་རྣམས་ཀྱང་། ངན་འགྲོའི་ལམ་ལ་འཁྲིད་པར་རྩོམ་པའི་ཉེས་སྤྱོད་ཆེན་པོ་འདི་བཟོད་པར་དཀའ་བས། བཏང་སྙོམས་ལས་བསླང་བར་བྱའོ། །དེ་ལ་རྒྱ་གར་ན་མེད་པ་ཁོ་ནས་རྒྱུད་ཡང་དག་པ་མ་ཡིན་པའི་གཏན་ཚིགས་མི་འགྲུབ་སྟེ། རྒྱ་གར་གྱི་རྒྱུད་རྣམས་ཀྱང་། ལྷ་དང་། ཀླུ་དང་། གནོད་སྦྱིན་དང་། མཁའ་འགྲོ་མའི་གནས་དང་། ཁྱད་པར་དུ་འཛམ་བུའི་གླིང་གི་ཟ་ཧོར་དང་། ཤམྦྷ་ལ་དང་། སིངྒ་ལ་དང་། མ་ལ་ཡ་དང་། ཨོ་རྒྱན་ལ་སོགས་པ་མཁའ་འགྲོའི་གནས་ཆེན་པོ་དག་ནས་སློབ་དཔོན་དགའ་རབ་རྡོ་རྗེ་དང་། ཀླུ་སྒྲུབ་སྙིང་པོ་དང་། པདྨ་འབྱུང་གནས་དང་། ས་ར་ཧ་པ་དང་། བཱི་མ་ལ་མི་ཏྲ་ལ་སོགས་པས་སྤྱན་དྲངས་ཏེ་བྱོན་པ་ཡིན་ནོ། །གལ་ཏེ་བཞུགས་པ་དག་ཀྱང་ཡོད་སྲིད་དེ་ཁྱོད་ཀྱི་ལན་རེ་ཙམ་ཕྱིན་པས་མཐོང་མི་ནུས་ཏེ། ཉམ་ཆུང་བོད་ཀྱི་རྒྱལ་ཁམས་ཙམ་ན་ཡོད་པའི་གླེགས་བམ་གྱི་རྣམ་གྲངས་ཀྱང་ཤུལ་རིངས་ཀྱི་མགྲོན་པོས་ཁ་ཚོན་མི་ཆོད་ན། སྔོན་གྱི་སྤྲུལ་པའི་ལོ་པཎ་ཆེན་པོ་རྣམས་ལྟར་རྫུ་འཕྲུལ་གྱི་བཀོད་པས་ཡུལ་ཉེར་བཞི་ལ་སོགས་པ་མཁའ་འགྲོའི་གསང་མཛོད་ལ་བགྲོད་ནུས་པ་ནི་ཕྱིས་ཀྱི་ལོ་ཙཱ་བས་མ་བྱུང་། རྒྱུ་མཚན་དེས་ཇོ་བོ་
ཨ་ཏི་ཤས་ཀྱང་རྒྱ་གར་གྱི་སློབ་དཔོན་ནག་པོ་པ་དེ་ཚེ་འཕོས་པ་འདི་ཁོ་ན་ཡིན་ཏེ། ཁོ་བོས་འདི་དང་ཆོས་གཏམ་ག་ན་ནུས་གསུངས་པའི་རོང་ཟོམ་ཆོས་ཀྱི་བཟང་པོའི་ཞལ་ནས། སྔོན་པ་གོར་བཻ་རོ་ཙཱ་ན་དང་། རྨ་རིན་ཆེན་མཆོག །གཉགས་ཛྙཱ་ན་ཀུ་མཱ་ར། ཀ་ཅོག་རྣམ་གཉིས་ལ་སོགས་སྤྲུལ་པའི་ལོ་ཙཱས་བསྒྱུར་བའི་ཆོས་ཡིན་ལ། ད་ལྟའི་ལོ་ཙཱ་བ་དགུན་བལ་ཡུལ་དུ་བསྡད། དབྱར་ཚད་པས་འཇིགས་ནས་མང་ཡུལ་དུ་དོན། སྔོན་གྱི་མཁས་པའི་འགྱུར་ལ་རང་བཟོ་བཅོས་མ་སྣ་ཚོགས་བྱས་པ་དང་མི་འདྲ། མཁས་པ་པཎྜི་ཏའི་ཁྱད་ཀྱང་། པདྨ་འབྱུང་གནས་དང་། བཱི་མ་ལ་མི་ཏྲ། བོ་དྷི་སཏྭ། སངས་རྒྱས་གསང་བ་ལ་སོགས་པ་རིག་འཛིན་གྱི་ས་ལ་བཞུགས་པའི་བྱང་ཆུབ་སེམས་དཔས་གདན་དྲངས་པའི་ཆོས་ཡིན་ལ། ད་ལྟའི་པཎྜི་ཏ་ལྟོ་མ་ཕྱིད་བོད་དུ་གསེར་འཚོལ་དུ་འོངས་པའི་བཟང་སྤྲང་ཁ་ཅིག་དང་མི་འདྲའོ། །ཞེས་གསུངས་པ་ལྟར་བོད་ལ་བསྟན་པ་ཕྱི་དར་གྱི་སྐབས་ཤིག་ཙ་ན། རྒྱ་གར་ལ་བློ་གྲོས་ཅུང་ཟད་རྣོ་ལ་གསེར་ཟོང་རྙེད་པའི་རྐང་པ་ཡང་བ་ཐམས་ཅད་ཀྱི་དེང་སང་ཁམས་པ་གནས་བསྐོར་ལ་ཁ་ལུང་པ་བཞིན་ལྷགས་འགྲོ་བ་ཞིག་ཀྱང་བྱུང་། བསམ་པ་སྦྱོར་བ་ཐམས་ཅད་ནས་སངས་རྒྱས་ཀྱི་བསྟན་པ་སྙིང་ལ་གཅགས་པ་ཡིན་ན་དེ་ཡང་རྗེས་སུ་ཡི་རང་སྟེ་འདི་ལྟར་ངན་སྨྲས་བྱེད་པ་ཕལ་མོ་ཆེ་བོད་དུ་རང་གི་བླ་མ་དང་། བཤེས་གཉེན་ལ་སོགས་
པ་དང་ཉོན་མོངས་པའི་དབང་གིས་འགྲས་ནས་ལྷགས་པ་མང་། རྒྱུ་མཚན་དེས་མདོ་སྔགས་ཀྱི་ཆོས་རང་སའི་གནས་གཅིག་ལ་ཕན་ཐོགས་པ་དང་ལྟར་སྣང་ཡང་། དོན་རྒྱལ་བའི་འཕྲིན་ལས་བསམ་གྱིས་མི་ཁྱབ་པ་ལ་སྐུར་པ་བཏབ་པས་ཆོས་ཆོས་སུ་མ་སོང་བདུད་ཀྱི་ལས་སུ་གྱུར་པ་ཡིན། ལར་ཆོས་ནི་ཚིག་ལ་མི་རྟོན་དོན་ལ་རྟོན་པ་ཡིན་པས་འགྱུར་གྱི་རྣམ་ཆ་རིགས་པས་དཔྱད་དུ་བཟོད་པ་འགའ་ཙམ་བྱུང་སྲིད་ནའང་མུ་སྟེགས་པ་ཚིག་ལ་གྲིམས་པ་དང་། ཞིང་པ་སོ་ནམ་ལ་གྲིམས་པ་ལྟ་བུ་ལས་དགོས་པ་ལྷག་པོ་མེད་དེ། དུས་འཁོར་འགྲེལ་ཆེན་ལས། ཡུལ་གྱི་སྐད་དང་ཟུར་ཆག་སྒྲ་ལས་ཀྱང་། །རྣལ་འབྱོར་ལྡན་པས་དོན་ནི་འཛིན་བྱེད་དེ། །ཆུ་ལ་འོ་མ་ངེས་པར་ཞུགས་པ་དེ། །ངང་པས་རབ་ཏུ་ཕྱུང་ནས་འཐུང་བར་བྱེད། །དོན་དམ་དེ་ཉིད་ཡུལ་ལ་རྟག་ཏུ་ནི། །ཆེན་པོ་རྣམས་ལ་ཚིག་ལ་རྟོན་པ་མིན། །ཡུལ་གྱི་མིང་རྣམས་ཀྱིས་ནི་དོན་ཤེས་ན། །བསྟན་བཅོས་སྨྲ་རྣམས་ཀྱིས་ནི་ཅི་ཞིག་བྱ། །ཞེས་བཤད་པས་སོ། །སྔར་བོད་ན་བསྟན་པའི་གཟུགས་བརྙན་ཙམ་ཡང་མེད་པས། ཆོས་སྐད་ཙམ་སློབ་པ་ལའང་བློ་མཐུ་ཆུང་ངུར་གྱུར་པའི་དུས་བྱོན་པའི་སྤྲུལ་པའི་ལོ་པཎ་གྱིས་བསྒྱུར། འཐོར་བ་བསྡུས། གཅུས་པ་བསྲངས། གཞི་གཏན་ལ་ཕབ། ལམ་
ཉམས་འོག་ཏུ་བཙུད་ཚར་བས་རང་གི་བློ་གྲོས་དེའི་སྣོན་མར་སོང་པ་འདི་མ་ཚོར། དེའི་ཕྱིར་ཀུན་མཁྱེན་རོང་པས། སངས་རྒྱས་ཀྱི་བསྟན་པ་གྲྭ་མ་ཉམས་པའི་དུས་སུ། སྤྲུལ་པའི་ལོ་ཙཱ་བས་བཀའ་འགྱུར་བ་མེད་པར་གཏན་ལ་ཕབ་ནས། ཤེས་བྱ་དངོས་པོའི་འདུག་ཚུལ་འབེབས་ཤིང་། དེ་རྟོགས་པར་བྱེད་པའི་ཐབས་དུ་མས་བརྒྱན་པའི་ཆོས་དང་། དུས་ད་ལྟའི་ལོ་ཙཱ་རྫུན་པོ་ཆེ་སྔོན་གྱི་འགྱུར་ལ་བཅོས་མ་སྣ་ཚོགས་བྱས་ནས། འགྱུར་ང་བཟང་། ཁུངས་ང་བཙུན་ཟེར་ནས་སངས་རྒྱས་ཀྱི་བཀའ་དང་བླ་མའི་གསུང་ལ་རས་ཆོད་བྱས་ནས། མི་རེས་ཆོས་རེ་བཅོས། གཅིག་སྐྱོན་གཅིག་ལ་འགེལ། ཕའི་ཆོས་ལ་བུའི་དཔེ་མི་བཏུབ་པའི་ཆོས་དང་མི་འདྲ་ཞེས་གསུངས་པ་འདི་ཤིན་ཏུའང་མད། ལར་བོད་མ་ཡིན། རྫུས་མ་ཡིན་བྱས་པ་ཐམས་ཅད་ལ་རིམ་པར་བསྟན་པ་སྔ་དར་གྱི་རྒྱ་དཔེ་རྙེད་ནས་རྫུན་ཕུགས་རྡིབ་པ་ཤ་སྟག་ཡིན་ཏེ། དེ་ལ་དང་པོར་ཁྱེད་ཅག་གིས་རྒྱ་གར་དུ་ཕྱིན་ནས་མ་མཐོང་མ་ཐོས་པ་དེ། ངེད་ཅག་གིས་སྟན་ཐོག་གཅིག་ཏུ་མཐོང་ཞིང་ཐོས་པ་འདི་བསོད་ནམས་ཆེ་སྟེ། འགོས་ལོ་ཐམས་ཅད་གཟིགས་པའི་ཕྱག་ཏུ་བྱུང་བའི་གསང་རྙིང་རྒྱ་དཔེའི་རས་མའང་མཐོང་། བསོད་ནམས་ཀྱིས་མངོན་པར་མཐོ་བ་རྒྱལ་པོ་སེ་ཆེན་ལྟ་བུའི་
དྲེགས་རློམ་ཀྱང་བརྟུལ་ཞུགས་ཀྱི་ཟིལ་གྱིས་ནོན་པ་མཁས་གྲུབ་ཆེན་པོ་ཨོ་རྒྱན་པ་རང་བྱུང་དཔལ་གྱིས། བོད་ཀྱི་ལོ་ཙཱ་བ་ཁ་ཅིག་རྒྱ་གར་ན་རྙིང་མ་བསྒྱུར་རྒྱུ་མི་འདུག་ཟེར། དེ་ལ་ཆག་ལོ་ཙཱ་བ་བདག་རང་གི་དབང་ཞུས་ཀྱི་བླ་མ་ཡིན་ཡང་། རྒྱ་གར་ན་རྙིང་མ་བསྒྱུར་རྒྱུ་མི་འདུག་ཟེར། དེ་འདྲ་ཁོང་རང་བློ་ཆུང་གི་གཏམ་ཡིན། ལོ་ཙཱ་བ་རྒྱ་གར་ཤར་ཕྱོགས་སུ་ཡུག་རེ་ལས་མ་ཕྱིན་པར་རྒྱ་གར་ན་གང་ཡོད་ཀྱི་ཆ་ཅི་ཆོད། དེ་ལས་བོད་ན་གང་ཡོད་ཀྱི་ཆ་ཡང་མི་ཆོད། སྤྱིར་ཡང་རྒྱ་གར་ཚད་ཁུངས་ཆེ་བས། རྒྱ་གར་གྱི་དཔེ་རྣམས་རུལ་པ་མང་། སངས་རྒྱས་ཀྱི་བཀའ་ལ་ཚད་བཟུང་མེད་པ་ལ། བོད་ཀྱི་ལོ་ཙཱ་བ་རྣམས་ཀྱིས་དེའི་ཁུངས་ཅི་ཆོད། ངས་ནུབ་ཕྱོགས་ཨུ་རྒྱན་གྱི་ཡུལ་ལ་ཕྱིན་པ་ཡང་། མུ་མཐའ་མ་ཆོད། དེ་ཡང་དང་པོའི་རྒྱུད་དཔེ་རྣམས། དུས་ཕྱིས་བལ་པོ་ན་མང་བ་ཡིན། དེ་ནས་བལ་པོ་བྷེ་ཧ་རའི་གཙུག་ལག་ཁང་ཞིག་ན། རྙིང་མའི་རྒྱུད་རྣམས་ཀྱི་རྣམ་གྲངས་རང་ཡང་བསམ་གྱིས་མི་ཁྱབ་པར་བཞུགས་འདུག །ངས་བོད་ཀྱི་རྙིང་མ་རྣམས་ལ་ངས་རྙིང་མའི་རྒྱ་དཔེ་དང་པཎྜི་ཏ་ཚུར་དགུག །ཁྱེད་རང་རྣམས་མང་ཡུལ་གྲོང་དུ་འདེངས། ངས་ལོ་ཙཱ་བ་བྱས་བསྒྱུར་ཟེར་བ་བྱས་ཏེ་མ་གྲུབ། དེང་འགྱུར་རྙིང་མའི་འགྱུར་ད་རུང་བྱ་རུ་ཡོད་པ་ལ། ཡང་བོད་ཀྱི་ཤེས་པར་འདོད་པ་འགའ་ཞིག་ན་རེ། རྙིང་མའི་དགོངས་
པ་འདུས་པ་བོད་ཀྱི་སྔགས་རྒན་ཚོས་བཅོས་པ་ཡིན་མི་དག་ཟེར། དེ་འདྲ་ཡང་འོས་སུ་མི་འགྲོ་བའི་གཏམ་ཡིན། ཤེས་ན་དེ་འདྲ་བའི་ཆོས་རང་རེ་ཚོས་ཡང་འཆོས་དང་། དེ་ལས་ལེགས་རྒྱུ་ནི་སངས་རྒྱས་ཀྱི་བཀའ་ལའང་མེད། ཅེས་སོ། །དེ་བཞིན་དུ་ནུབ་པ་ཡང་ཤིན་ཏུ་མང་སྟེ། འདི་ལྟར་བཙན་པོ་ཁྲི་སྲོང་ལྡེ་བཙན་དང་དུས་མཉམ་པ་ཙམ་དུ་གྲགས་པ་རྒྱལ་པོ་དྷརྨ་པཱ་ལའི་ཚེའི་སྨད་ཙམ་ན། རྡོ་རྗེ་གདན་གྱི་ལྷ་ཁང་ཞིག་ན་ཧེ་རུ་ཀའི་སྐུ་དངུལ་ལས་བྱས་པ་སྐུ་ཚད་མཐོན་པོ་ཞིག་དང་། གསང་སྔགས་ཀྱི་གླེགས་བམ་མང་རབ་ཅིག་ཡོད་པ་སིངྒ་གླིང་པ་སོགས་ཉན་ཐོས་སནྡྷེ་པ་འགའ་ཞིག་གིས། འདི་དག་ནི་བདུད་ཀྱིས་བྱས་པའོ་ཞེས། སྐུ་གཟུགས་དུམ་བུར་བགོས་ནས་རང་རང་གི་རྙེད་པ་བྱས། གླེགས་བམ་རྣམས་མེ་ལ་བསྲེགས། དེ་བཞིན་དུ་བྷཾ་ག་ལའི་ཡུལ་ནས་བི་ཀྲ་མ་ཤི་ལར་མཆོད་པའི་ཕྱིར་དུ་འགྲོ་བ་མང་པོའང་བློ་བསྒྱུར་ནས། དེ་དག་ནི་ཐེག་ཆེན་ཞེས་བྱ་བ་ལྟ་བ་ལོག་པར་སྤྱོད་པ་ཡིན་པས། ཡང་དག་པའི་ཆོས་སྤྱོད་པ་ངེད་རྣམས་ལ་བྱིན་ཅིག་ཅེས་སྨྲས་ནས་རྙེད་པ་འཚོལ་བ་སོགས་བྱས་པ་རྒྱལ་པོས་ཐོས་ནས་ཆད་པ་བྱུང་ངོ་ཞེས་རྒྱ་གཏམ་ཚད་མར་གྱུར་པ་དག་ལ་གྲགས། དེ་བཞིན་དུ་སྒྲོལ་བའི་མགོན་པོས། འགྲོ་ལྡིང་གི་གླིང་ན་སྔོན་བསྟན་པ་རྣལ་མ་མེད་པ་ལས། སློབ་དཔོན་པདྨ་འབྱུང་གནས་ཀྱིས་དང་པོར་བཙུགས། མར་
མེ་མཛད་བཟང་པོས་ཀྱང་བྱོན། དེ་ནས་བརྩམས་ཏེ་ལོ་བརྒྱ་ཙམ་གྱི་བར་དུ་མ་ག་དྷ་དང་། ཨོ་རྒྱན་དང་། ཁ་ཆེ་ལ་སོགས་པའི་རྡོ་རྗེ་འཛིན་པ་མང་པོ་བྱོན་ཏེ། སྔགས་ཀྱི་ཐེག་པ་ལྷག་པར་རྒྱས་པར་མཛད། སྔོན་རྒྱལ་པོ་དྷརྨ་པཱ་ལའི་སྐབས་སུ་སྦས་ཏེ། རྒྱ་གར་དུ་ནུབ་པའི་རྒྱུད་ཀྱི་རིགས་དང་། ཨོ་ཊི་ཡ་ན་ནས་སྤྱན་དྲངས་པའི་རིགས་ཀྱི་རྒྱུད་རྒྱ་གར་ན་མེད་པ་མང་དུ་ཡོད། ཅེས་བསྟན། འདི་དག་ནི་ཤེས་རབ་ཕྱོགས་རེ་བའི་བློ་མིག་རྣམ་པར་དག་ཅིང་། འཕགས་པའི་ཡུལ་གྱི་དངོས་གནས་དང་། གཏམ་རྒྱུད་ལ་འདྲིས་ནས་རང་བཞིན་སྲོང་པོར་བརྗོད་པ་ལ་བསྙེལ་བ་སྤངས་པའི་སྨྲ་བའི་སེངྒེ་ཆེན་པོ་ཡིན་ནོ། །དེ་བཞིན་དུ་ཇོ་བོའི་རྣམ་ཐར་ན། ཡང་ཇོ་བོའི་ཐུགས་དགོངས་ལ། མི་ཡུལ་དུ་བཞུགས་པའི་གསང་སྔགས་ལ་ང་ལས་མཁས་པ་མེད་སྙམ་པའི་ཐུགས་རྒྱལ་མངའ་བ་ལ། ཕྱིས་བོད་དུ་བྱོན་ནས་པེ་དཀར་གླིང་གི་དཀོར་མཛོད་ཅིག་སྒོ་ཕྱེ་ནས་རྒྱ་དཔེ་གཟིགས་པས། ཇོ་བོས་དེ་གོང་དུ་མ་གསན་མ་གཟིགས་པ་མང་པོ་བཞུགས་འདུག་ནས། ཐེག་པ་ཆེན་པོ་གདམས་ངག་འདི་ལ་མི་ཤེས་པ་མེད་སྙམ། ཌཱཀྐི་མས་ཀྱང་ནམ་མཁའ་ནས་གཞལ་ཡས་ཁང་དཔག་ཏུ་མེད་པ་བསྟན། རྒྱུད་སྡེ་མང་པོ་བསྟན་པ་ཡིན་པ་ལ། འདི་རྣམས་མི་གདའ། ཐེག་པ་ཆེན་པོའི་
གསང་སྔགས་འདི་ལ་མཐའ་ཡོད་ཡོད་མི་འདྲ་གསུངས་ཐུགས་རྒྱལ་ཆག །བོད་ཀྱི་རྒྱལ་པོ་ལ་རྗེས་སུ་ཡི་རང་བ་མང་པོ་ཕུལ། བོད་དུ་བསྟན་པ་དར་བ་འདྲ་བ་རྒྱ་གར་དུ་ཡང་མ་བྱུང་བ་འདྲ་གསུངས་ཞེས་དང་། སློབ་དཔོན་པདྨ་རྡོ་རྗེ་འཆང་གཉིས་པ་དེའི་དྲིན་ལ་རྒྱ་གར་ན་ཡོངས་སུ་མ་གྲགས་པའི་མཁའ་འགྲོའི་གསང་མཛོད་མང་པོ་བསྒྱུར་ནས་བསམ་ཡས་པེ་དཀར་གྱི་དཀོར་མཛོད་ན་བཞུགས་སོ། །ཞེས་པ་འདི་ལ་ཅིས་བསྙོན། དེ་ལྟར་མི་འདུག་དང་། མ་དག་ཟེར་བའི་རྫུན་གཏམ་གཅིག་གིས་བློ་འདྲོགས། མཁས་སུ་རེ་བའི་རྟོག་དཔྱོད་ཅན་རྣམས་ཀྱང་ཕྲ་མ་སྔ་བཙན་ལ་ཡི་དམ་དུ་མ་བཟུང་ན་རང་ཉིད་ཀྱང་སྡེ་ཚན་དེ་ལས་གྱར་གྱི་དོགས་ནས་ཡང་དག་པའི་མདོ་དང་། རྒྱུད་ལུང་མང་པོ་ལ་སྐུར་པ་འདེབས། སྔོན་དུ་བསྒྱུར་བའི་གཞུང་ལུགས་ཆེན་པོ་གཅིག་ལ་རང་གིས་རིག་པས་བཏགས་པའི་སྐྱོན་འགེལ་ནུས་ན་དེ་ལ་རྗེས་འབྲངས་དང་བཅས་པས་ངོ་མཚར་དུ་བྱེད་ཅིང་། མཁས་པའི་གྲལ་དུ་རྗེས་སུ་ཡི་རང་བསྒོམ་པ་འདི་དུས་རིང་མོ་ཞིག་ནས་སྣང་སྟེ་དགེ་བཤེས་ལོ་ཙཱ་བ་བོད་ན་བཞུགས་པའི་ཚེ་ཆོས་སྤྱོད་ཐམས་ཅད་ཀྱི་རྒྱུད་བྱ་བ་དེ་དགེ་ཚུལ་ཁྱུང་གྲགས་བྱ་བས་བྱས་པ་ཡིན་ཟེར་ནས་རྫུན་མར་བྱེད་པ། རྒྱ་གར་དུ་ཇོ་བོ་གདན་འདྲེན་ལ་ལྷགས་པའི་ཚེ། བི་ཀ་མ་ལའི་དགེ་འདུན་རྣམས་ཉན་བཤད་བྱེད་ཅིང་སྣང་། དེ་ལ་གདམས་པ་བདུད་
རྩིའི་སྙིང་པོ་བྱ་བ་ཡང་འདུག་པ་སླར་ལོ་ཙཱ་བས་བོད་དུ་བསྒྱུར་བས་ཆོས་སུ་སོང་། དེ་བཞིན་དུ་བགྲང་གིས་མི་ལང་བ་ཡོད། སྔོན་གྱི་དུས་སུ་བྱུང་བ་དག་བཅོས་མ་ཡིན་ན། རྩོམ་གཞི་གང་ལ་བྱས། དེ་ལྟར་ན་ཕྱིས་བྱུང་བ་རྣམས་དེ་བས་ཀྱང་བཅོས་མ་ཡིན། རྩོམ་གཞི་སྔོན་མ་ལ་བྱས་ཤིང་། དོན་སྔོན་བས་བཟང་དུ་མ་སོང་། ཚིག་མི་འདྲ་བ་དང་མང་ཉུང་ལས་མེད་པ་གསང་བ་འདུས་པའི་རྒྱུད་ལྟ་བུས་མཚོན་ནོ། །འགོས་ལྷས་བཙས་ཆོས་རྗེ་ཟུར་པའི་སྐུ་དྲུང་ནས་གཞན་དུ་གྱུར་པས། དང་པོར་གསང་བའི་སྙིང་པོ། ཕྱིས་ནས་སྔ་འགྱུར་གྱི་ཆོས་རྒྱ་མཚོ་ལྟ་བུ་ལ་མ་ཡིན་མ་འགྱུར་ཞེས་ཁ་ཟེར་བ་བྱས་མོད་ཀྱི། སྐྱོན་བཞིའི་འགལ་སྤོང་ལ་སོགས་པ་ཟུར་པའི་རྗེས་འབྲངས་རྣམས་ཀྱིས་རྒྱུད་ཀྱི་བཤད་པ་རྒྱ་མཚོ་ལྟ་བུའི་ཞར་ཆོས་སུའང་། རྒོལ་ངན་རྩོད་པས་ཐལ་བར་བརློག་པའི་བརྟུལ་ཞུགས་བཟུང་ནས། སྤོབས་པ་ལན་མེད་དུ་བཏང་བས་འདིར་མ་བཀོད་ལ། གསང་སྙིང་བོད་མར་དབྱེན་བཅོས་པའི་རྫུན་ཕུགས་བཅོམ་ལྡན་རིག་རལ། པཎ་ཆེན་ཤཱཀྱ་ཤྲཱི། ཐར་ལོ་ཆེན་པོ། འགོས་ལོ་གཞོན་ནུ་དཔལ་ལ་སོགས་པའི་སྤྱན་སྔར་རྒྱ་དཔེའི་དངོས་པོ་ཁོ་ནས་རྟིབ་ཅིང་། ཆོས་ཀྱི་རང་ངོ་ནས་ནི་མུ་སྟེགས་བྱེད་སམ་ག་ཨ་ཙརྱས། དཔལ་ལྡན་ཆོས་ཀྱི་གྲགས་པ་ལ་རྒོལ་བ་བཞིན་དུ་རང་ཉིད་ཀྱི་སྐྱེ་བ་ནས་སྐྱེ་བར་བརྒྱུད་ཀྱང་། དགེ་སློང་ལྷ་ཆེན་པོའི་བརྟུལ་ཞུགས་
ཀྱིས་བསྟན་པའི་དབྱེན་ཙམ་དུ་འགྱུར་སྲིད་ཀྱི། དེ་ལས་བསམ་པ་མཐར་ཐུག་པའི་ལམ་དུ་མ་སོང་ངོ་། །མཁས་པ་ཆེན་པོ་བུ་ནི་གཞོན་ནུའི་ཚེ་རྙིང་མའི་ཆོས་དང་ཡང་དམ་ཚིག་གིས་འབྲེལ་ཏེ། ཐ་སྙད་ལ་བློ་གྲོས་བསམ་གྱིས་མི་ཁྱབ་པས། རང་གི་བླ་མ་མཁས་པའི་དབང་ཕྱུག་ཆེན་པོ་ཉི་མ་རྒྱལ་མཚན་ལྟ་བུའི་རྣམ་དཔྱོད་ལའང་ཚད་མར་མི་བྱེད་པས། རྙིང་མར་བཏང་སྙོམས། གསར་མའི་ཕྱོགས་མང་པོ་ཡང་བརྫུས་མར་གཟིགས་མོད་ཀྱི། སློབ་དཔོན་སངས་རྒྱས་གསང་བས། ཧ་ཅང་ཐོས་པ་མང་པོ་ཡང་བདུད་ཀྱི་ལས་སོ་གསུངས་པ་དེ་མིན་ན་བསྟན་པའི་བྱི་དོར་ཆེན་པོ་ཉིད་དོ། །འོན་ཀྱང་སི་ཏུ་ཐམས་ཅད་མཁྱེན་པ་དགེ་བའི་བློ་གྲོས་ཞེས་སྤོབས་པ་བསམ་གྱིས་མི་ཁྱབ་པ་དེས་ཚལ་པ་བཀའ་འགྱུར་གྱི་ཞུ་དག་ལ་བུ་སྟོན་སྤྱོན་པར་བྱས་མོད། དེའི་བཀའ་འགྱུར་ཁྲོད་ན་ནི་མདོ་སྒྱུ་སེམས་གསུམ་གྱི་རྒྱུད་སྡེ་ཚན་ཚང་མ་རེ་དང་། བསྟན་སྲུང་གི་སྐོར་ཀྱང་མཆིས་གདའ་བ་ལ་སྦྱིན་པའི་བདག་པོའང་། བློ་གྲོས་བསམ་གྱིས་མི་ཁྱབ་པས་གཤུང་བར་དཀའ་བའམ། གདོད་ནས་ཚད་མ་མ་ཡིན་པའི་གཏན་ཚིགས་ལ་ངེས་པ་འདྲོངས་ན་ནི་བྱི་དོར་མཁན་པོར་དམིགས་ཀྱིས་བསལ་བས། དེ་དག་ཀྱང་འཇོག་མི་ཐང་སྟེ་སྣང་ངོ་། །སྤྱིར་ཡོངས་གྲགས་སུ་དེ་ལྟ་མོད་ཀྱི། སྒྲ་ཚད་པས་མཛད་པའི་རྣམ་ཐར་ལ་དཔྱད་ན། སྔ་འགྱུར་ལ་རུས་ཞེན་དང་། ལྟ་བའི་ཆོས་སྐད་
ཀྱང་དེ་རྗེས་ཟློ་ཞིང་། མེས་པོའི་ཡི་དམ་ལ་ཉམས་བཞེས་མཛད་པས་གུ་རུ་མཚན་བརྒྱད་ཞལ་གཟིགས་ནས་ལུང་བསྟན་ཐོབ་ཚུལ་སོགས་དངོས་བསྟན་ཡིན་ན་རྒྱུད་འབུམ་ལ་དཔྱད་ཞུས་སོགས་གཞན་སྣང་དང་བསྟུན་པའི་དྲང་དོན་དུ་ངེས་སོ། །ཡང་གསེར་མདོག་ཅན་པས་གསེར་གྱི་ཐུར་མར་དཔལ་འཛིན་གྱི་རྫུན་གཏམ་འཕྲོས་དོན་དུ་བྱས་པས། དེས་གང་ཟག་བློ་གྲོས་གསར་བུ་རྣམས་ལ་ཐེ་ཚོམ་དུ་མ་བསྐྱེད་ཅིང་། བླུན་པོ་དང་ཕྱོགས་ལྷུང་ཅན་རྣམས་ཀྱི་རྒྱབ་བརྟེན་དུ་འཁྱེར་བ་བྱུང་མོད་ཀྱི། དེ་ལ་དཔྱད་པར་བྱ་བ་ཞིག་སྟེ། ཆོས་རྗེ་བསྐལ་བཟང་རྒྱ་མཚོས་གསེར་ཐུར་ལས་བརྩམས་པའི་དོགས་གཅོད་ཀྱི་ལན་ངེས་དོན་རབ་གསལ་ཞེས་བཏགས་པར། གསེར་མདོག་ཅན་པས་ཁོ་བོ་ཅག་གི་འབེལ་གཏམ་རྣམ་པར་ངེས་པའི་ཡི་གེ་དཀྱུས་མ་ན། གསར་རྙིང་ལ་ཆོས་ཡིན་མིན་གྱི་རྣམ་དབྱེ་བྱས་པ་ལྟ་ཅི་སྨོས། རྙིང་མ་ཞེས་པའི་ཚིག་ཙམ་ཡང་བྱུང་བ་མེད་ཀྱི་སྟེང་དུ། དྲི་བ་དང་ལན་གཉིས་ཀའི་ནང་ན། འགོས་ལོ་ཙཱ་བ་སོགས་ཀྱིས་ཆོས་ལོག་དྲི་མ་ཅན་དུ་བགྲངས་པའི་རྣམ་གྲངས་མང་པོ་དེ་དག་དེ་ལྟར་དུ་འཐད་ན་ཧ་ཅང་ཐལ་བར་འགྱུར་བའི་ཀླན་ཀ་དག་བཀོད་ནས་ཞེས་དང་། གྲུབ་མཐའ་ལ་མ་ཞུགས་པའི་སྐྱེ་བོ་དག་གིས། དཔལ་འཛིན་གྱིས་སྨྲས་པའི་ཚིག་དེ་དག་ཁ་བཏོན་དུ་བྱས་པ་ན།
གྲུབ་མཐའ་སྨྲ་བར་ཁས་འཆེ་བའི་སྨྲ་བ་པོ་དག་ཀྱང་། ལ་ལ་དག་རྟོག་དཔྱོད་མ་བཏང་བར་གང་ཐོས་སུ་དབྱངས་སུ་གྱེར་བའམ། སྨྲ་བ་པོ་ཁ་ཅིག་ནི་འགའ་དང་འགའ་ལ་ཕྲ་མ་བགྱིད་པའི་བསམ་པ་ཁོ་ན་སྔོན་དུ་བཏང་ནས། གཞུང་རྩ་བ་ན་ཅི་ཡོད་མི་རྟོག་པར་འབེལ་གཏམ་གྱི་ཚིག་ཁོ་ན་ལ་སྐྱོར་འབྱིན་བྱེད་པ་དག་ཡོད་པར་སྣང་ངོ་། །ཞེས་འགོས་དང་དཔལ་འཛིན་གྱིས་བྱས་པའི་ངག་བགྲོས་རླབས་པོ་ཆེ་ཧ་ཆང་ཐལ་བར་བཤད་ཅིང་། རང་གི་འདོད་པའི་སྙིང་པོའི་མཐར་ཐུག་ལ་དཔྱད་པ་མ་ཞུཊ་བཞིན་དུ་འབེལ་གཏམ་ན་ཡམས་སུ་བྱས་པ། བཤད་བྱའི་རྩ་བར་འཁྲུལ་པ་རྣམས་ཀྱིས་ནོངས་པ་ཡིན་ནོ་ཞེས་པས། གསེར་ཐུར་གྱི་རྙིང་མ་ལ་སྐུར་པ་བཏབ་བོ་ཟེར་བའི་འདོད་པ་བཀག་ནས། འདི་སྐད་དུ། སྤྱིར་རྙིང་མ་ཆོས་མ་ཡིན་པར་ཁས་ལེན་ནུས་པ་དག་ཡོད་ན། དེའི་ཚེ་དེ་ལྟར་འདོད་པ་དེས་སྐ་ཅོག་ཞང་གསུམ་གྱིས་བསྒྱུར་བའི་སྡེ་སྣོད་གསུམ་གྱི་ཆོས་རྣམས་དང་། བྱ་བ་དང་། སྤྱོད་པ་དང་། རྣལ་འབྱོར་གྱི་རྒྱུད། ལོ་ཆེན་རིན་ཆེན་བཟང་པོ་མ་བྱོན་གོང་དུ་འགྱུར་བ་ཐམས་ཅད་ཆོས་མ་ཡིན་པ་ཉིད་དུ་ཁས་ལེན་དགོས་པར་འགྱུར་རོ། །བྱེ་བྲག་ཏུ་གསང་སྔགས་བླ་མེད་ཀྱི་རྒྱུད་རྙིང་མ་ཆོས་མ་ཡིན་པར་ཁས་ལེན་ནུས་པ་དག་ཡོད་ན། དཔལ་གསང་བ་འདུས་པ་དང་། ཟླ་གསང་ཐིག་ལེ་དང་། སངས་རྒྱས་མཉམ་
སྦྱོར་རྣམས་ཆོས་མ་ཡིན་པ་ཉིད་དུ་ཁས་ལེན་དགོས་པར་འགྱུར་ཏེ། དེ་གསུམ་རྙིང་མའི་ལུགས་ཀྱི་ཏནྟྲ་སྡེ་བཅོ་བརྒྱད་དུ་གྲགས་པ་དེའི་གཙོ་བོར་གྱུར་པ་དང་། རྩ་བ་དེ་གསུམ་ལ་བརྟེན་ནས་བོད་དུ་རྙིང་མར་གྲགས་པའི་ཆོས་མང་དག་ཅིག་བྱུང་བར་སྔོན་གྱི་ཆེན་པོ་དག་གིས་འཆད་པའི་ཕྱིར། བྱེ་བྲག་ཏུ་ཡང་ཕུར་ཆོས་མ་ཡིན་པར་ཁས་ལེན་པ་དག་ཡོད་ན། དེའི་རྒྱུད་ཀྱི་རྒྱ་དཔེ་དང་། ལོ་ཙཱ་བ་ཚད་ལྡན་གྱིས་བསྒྱུར་བ་སོགས་ཀྱི་གཏན་ཚིགས་ལས་རྣམ་དག་ཏུ་གྲུབ་ཟིན་པ་དང་ཁྱད་པར་རྙིང་མའི་རྒྱུད་དུ་གྲགས་པ་གཞན་དང་གཞན་རྣམས་རྒྱུད་འབུམ་གྱི་དཀར་ཆག་ཏུ་འདེབས་པར་མི་མཛད་པའི་ཆེན་པོ་དེ་དག་གིས་ཀྱང་ཡང་དག་དང་ཕུར་པ་རྩོད་མེད་དུ་གྲུབ་ཟིན་པའི་ཕྱིར། དཔེར་ན་རལ་གྲི་དང་། བུ་སྟོན་རིན་པོ་ཆེའི་ཆོས་འབྱུང་ལས་བཤད་པ་བཞིན་ནོ། །ཞེས་གཞན་གྱི་འདོད་པའང་ཞར་བྱུང་ན་ཡམས་སུ་བཀོད་དོ། །ལར་ཆོས་ཀྱང་བདག་གིར་བྱེད་པ་པོའི་གཟི་བྱིན་ལ་ལྟོས་ནས་ཡང་དག་དང་ཅིག་ཤོས་སུ་བསྒྲུབ་ཤེས་པའི་དཔྱོད་ལྡན་དེ་འདྲ་ལ་ལྔ་པ་ཆེན་པོའི་ཞབས་ཀྱིས། སྒྲུབ་སྡེ་བརྒྱད་པོ་ལྷ་སྔགས་རྒྱུད་མན་ངག་སྨིན་གྲོལ་གྱི་གནད་མཐའ་དག་ཕྱོགས་མཚུངས་པ་ཁོ་ནར་ཡོད་པས། ཆེ་མཆོག་གཤིན་རྗེ་སོགས་གཞན་རྣམས་མ་དག་ན་ཡང་ཕུར་གཉིས་སྒེར་དུ་དག་དོན་མེད་པས། གྲུབ་མཐའི་ཕྱོགས་ཁྱེར་གྱི་ཞེ་སྡང་བ་ཁོ་ནས་
དགག་ཅིང་། ཡང་ཕུར་གཉིས་ས་སྐྱ་པའི་ཡབ་ཆོས་སུ་སོང་ཞིང་དུས་དེར་བོད་ཆོལ་ཁ་གསུམ་གྱི་བདག་པོ་ས་སྐྱ་པ་ཡིན་པའི་ངོས་འཛིན་ཁོ་ན་ཡིན་པར་གསལ་བས་རྩོད་ཡིག་གི་ནང་ཟོང་གནག་རྫི་རྒན་པོ་ཡན་ཆོད་ཀྱི་མཐོང་བར་གསལ་པོར་བསྟན་པ་གོར་མ་ཆག །དབུ་རུ་དཔལ་འཛིན་སྔགས་རྒྱུད་རྙིང་མ་ཡིན་པར་རང་གི་སློབ་དཔོན་དང་འགྲས་པའི་ལེ་ལན་དུ། དགག་པ་ཚིགས་བཅད་ལྷུག་སྤེལ་མ་བརྩམས་པ་ཞེ་སྡང་གི་ངན་སྨྲས་ལས་ལུང་རིགས་རྣམ་དག་ཆེར་མི་འདུག །ཅེས་གསུངས་པ་ནི་ཤིན་ཏུའང་མད། གསེར་མདོག་ཅན་པར་རང་གིས་བཞེད་པ་ནི་འདི་སྐད་དུ། བསྟན་པ་འདིའི་བདག་པོ་སྟོན་པ་ཐུབ་པའི་དབང་པོས་ཆགས་བྲལ་གྱི་གཟུགས་ཀྱིས་སམ་འཁོར་ལོས་སྒྱུར་བའི་གཟུགས་ཀྱིས་གསུངས་ཀྱང་རུང་སྟེ། སྟོན་པ་གཅིག་པུ་དེ་ཉིད་ཀྱི་ལྷ་དང་སྔགས་ཀྱི་རིམ་པ་ཁོ་ན་ཉམས་སུ་བླངས་པ་ལས་གྲུབ་པ་བརྙེས་པའི་སློབ་དཔོན་པདྨ་འབྱུང་གནས་དང་། དེའི་སློབ་མ་རིམ་པ་གཉིས་ལ་བརྟན་པ་ཐོབ་ནས་གྲུབ་པའི་ས་བརྙེས་པ་དེ་དག་གིས་བོད་དུ་དམ་པའི་ཆོས་དར་བ་ལ་གེགས་སུ་གྱུར་པའི་ལྷ་འདྲེ་གདུག་པ་ཅན་འདུལ་བ་དང་། རྡོ་རྗེ་ཐེག་པའི་སྣོད་དུ་གྱུར་པ་རྣམས་ནི་རིག་འཛིན་གྱི་ས་ལ་འགོད་པའི་ཕྱིར་དུ། གང་དང་འཚམས་པའི་ལྷ་དང་། སྔགས་དང་། ལྟ་བའི་རིམ་པ་རྣམས་གསུངས་པ་དང་། དེའི་དོན་སློབ་མས་
ཚུལ་བཞིན་ཉམས་སུ་བླངས་པ་དང་། དེ་ལས་གྲུབ་པའི་ས་བརྙེས་པའི་རིག་པ་འཛིན་པ་མང་དུ་བྱོན་པ་དང་། དེ་དང་མཐུན་པའི་སྙན་བརྒྱུད་དང་དགོངས་པ་ཡི་གེར་བཀོད་པ་ལ་བརྟེན་ནས་རྙིང་མར་གྲགས་པའི་ཆོས་རྣམ་པར་དག་པ་འདི་ཉིད་བྱུང་བ་ཡིན་ལ། འདི་དག་ལའང་ཡང་དག་པར་ན་བསྟན་བཅོས་ཀྱི་མཚན་ཉིད་ཚང་བ་ཡིན་ཏེ། ཇི་སྐད་དུ། གང་ཞིག་རྒྱལ་བའི་བསྟན་པ་འབའ་ཞིག་གིས། །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཅེས་སོགས་ཀྱི་མཚན་ཉིད་དེ་ཚང་བའི་ཕྱིར་སློབ་དཔོན་པདྨས་གསུངས་པའི་བསྟན་བཅོས་ནི་སངས་རྒྱས་ཀྱི་བཀའ་དང་ཁྱད་པར་ཡོད་པར་མ་ཡིན་ཏེ། ཐར་པ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོར་བླངས། །ཞེས་གསུངས་པའི་ཕྱིར་རོ། །ཞེས་སྣང་བས་འདི་དག་ནི་གཟུ་བོར་གྱུར་པའི་ཤེས་བྱ་རིག་པས་གཞལ་བའི་གཏན་ཚིགས་སུ་ཤེས། ཡང་ཁ་ཅིག་གིས། ད་ལྟའི་ཕྱག་རྒྱ་ཆེན་པོ་དང་། །རྒྱ་ནག་ལུགས་ཀྱི་རྫོགས་ཆེན་གཉིས། །ཞེས་གཤིས་ལ་བྱ་བ་དང་བྲལ་བའི་གྲུབ་མཐའ་བློར་མ་ཆུད་ནས། ཀུན་རྫོབ་ཙམ་དུའང་ཐབས་ཀྱི་ཆ་ཡལ་བར་དོར་རོ་སྙམ་པས་རྫོགས་ཆེན་རྒྱ་ལུགས་མ་འཆོས་པ་ནི་གཟུགས་བརྙན་སྤངས་པའི་གྲིབ་མའོ། །རང་གཞུང་སེམས་སྡེའི་རྒྱུད་ཆེན་པོ་
རྡོ་ལ་གསེར་ཞུན་དུ། །བདེ་གཤེགས་མ་ལུས་ཡུམ་དུ་གྱུར་པས་རྒྱལ་བ་ཀུན་གྱི་ལམ་གཅིག་པུ། །ཚུལ་ཁྲིམས་ལ་སོགས་ཕ་རོལ་ཕྱིན་ལམ་སྤྱོད་པ་རྒྱ་མཚོའི་གཞིར་གྱུར་པ། །ཞེས་གྲུབ་མཐའི་འཆའ་ལུགས་ཆེན་པོ་འདི་ཡོད་པས་ཀུན་རྫོབ་བདེན་པ་ཇི་ལྟར་འགོག །དེ་ལྟར་ནའང་འོག་མར་དགོངས་ཏེ་གསུངས་པ་འདིར་བདེན་གཉིས་དབྱེར་མེད་ཆེན་པོར་རྣམ་པར་དག་པའི་ཚུལ། སེམས་སྡེ་ཕྱི་འགྱུར་ལས། སོ་སོ་ཐར་པའི་སྡོམ་པ་དང་། །བྱང་སེམས་ཚུལ་ཁྲིམས་རྒྱ་ཆེན་པོས། །མ་ལུས་ཀུན་སྦྱར་ཡུལ་དུ་གནས། །དེ་དག་ཐེག་པའི་ཁྱད་པར་མཆོག །སངས་རྒྱས་ཀུན་གྱིས་དགོངས་མཛད་དེ། །སྤྱོད་པ་ཐབས་བཅས་གསང་བའི་ཚུལ། །དེ་ལྟར་ཕ་རོལ་ཕྱིན་སྒོམ་པ། །སྔགས་ཀྱི་ཐེག་པ་གྲངས་མེད་རྣམས། །བསྟན་པ་སོ་སོར་སྣང་བའི་ཚུལ། །མ་ལུས་ཀུན་འདུས་རྣམ་པར་དག །ཅེས་དང་། རང་བཞིན་མེད་པའི་ངང་དུ་ཕྱིན་དྲུག་རྫོགས་པའི་ཚུལ་ཡང་། སེམས་ཕྱོགས་རིན་པོ་ཆེ་རྒྱས་པའི་རྒྱུད་ལས། དབྱེར་མེད་མཉམ་པར་གནས་པས་སྦྱིན་པའོ། །རང་བཞིན་མེད་པར་ཤེས་པས་ཕ་རོལ་ཕྱིན་པ་ཡིན། །ཆོས་སྐུ་རང་བཞིན་གོས་པ་མེད་པ་ལས། །ངོ་བོ་རང་བཞིན་དག་པ་ཚུལ་ཁྲིམས་ཏེ། །གང་གིས་ནོས་པ་ཚུལ་ཁྲིམས་ཕ་རོལ་ཕྱིན། །ཆོས་ཉིད་རང་བཞིན་གདོད་ནས་ཞི་བ་ལས། །རང་བཞིན་ཁོང་ཁྲོ་མེད་པ་བཟོད་པ་སྟེ། །
དབྱེར་མེད་གཉིས་སུ་མེད་པས་ཕ་རོལ་ཕྱིན་པའོ། །སྐྱེ་མེད་གདོད་ནས་རང་བཞིན་ཀུན་ལ་ཁྱབ། །དོན་ཐོབ་ལེ་ལོ་མེད་པ་བརྩོན་པ་སྟེ། །ཀུན་ཁྱབ་དབྱེར་མེད་གནས་པས་ཕ་རོལ་ཕྱིན། །ཆོས་ཉིད་གདོད་ནས་རང་བཞིན་རྣམ་དག་པས། །རྟོག་མེད་མཉམ་ཉིད་གནས་པས་བསམ་གཏན་ཏེ། །རང་བཞིན་གཡེང་བ་མེད་པས་ཕ་རོལ་ཕྱིན། །ཆོས་ཀྱི་སྐུ་ཡི་རང་བཞིན་དེ་ཉིད་ལ། །ཐམས་ཅད་དེ་བཞིན་ཉིད་ལ་གནས་པས་ཤེས་རབ་སྟེ། །རང་བཞིན་དེ་ལྟར་རྟོགས་པས་ཕ་རོལ་ཕྱིན། །ཆོས་ཀྱི་སྐུ་ཡི་རང་བཞིན་དོན་རྟོགས་ན། །ཕ་རོལ་ཕྱིན་པ་ཐམས་ཅད་ཡོངས་སུ་རྫོགས་པ་སྟེ། །རྫོགས་པ་ཆེན་པོ་འོད་ལ་གང་གནས་པ། །འདི་བསྒོམས་ཐམས་ཅད་ཡོངས་སུ་བསྒོམས་པའོ། །ཞེས་སོ། །རྒྱུ་མཚན་དེ་ལ་དམིགས་ནས་འཕགས་པ་ལྷས། ཚུལ་ཁྲིམས་ལས་ནི་ཉམས་སླ་ཡིས། །ལྟ་ལས་དེ་ལྟར་མ་ཡིན་ནོ། །ཞེས་པ་འདིས་དོན་དམ་པར་ཐབས་སྤྱོད་པའི་ཕྱོགས་ལས་ཤེས་རབ་ལྟ་བའི་ཆ་ཁོ་ན་གཙོ་ཆེ་བར་སྟོན་པ་འདི་ཕྱག་རྫོཊ་ཙམ་མ་ཟད་མདོ་ལུགས་ཤིང་རྟ་ཆེན་པོའི་དགོངས་པ་ལའང་ཡོད་པར་གསལ། སེམས་ཕྱོགས་དག་ནས་ཀྱང་གཤིས་ལ་བྱ་བ་དང་བྲལ་བར་གཙོ་བོར་སྟོན་པས། ལྟ་བ་རིག་ཐོག་ཏུ་མཉམ་པར་འཇོག་པའི་ཚེ། ཆོས་ཉིད་ཁས་ལེན་དང་བྲལ་བ། །རང་བཞིན་ཡིད་བྱེད་དང་བྲལ་བ། །ཐོབ་བྱ་
རེ་དོགས་ལས་འདས་པ། །སྤྱོད་པ་བླང་དོར་མེད་པ་ནི་གྲུབ་པའི་མཐའ་ཆེན་པོ་འདིའི་ངོ་བོའི་བརྗོད་བྱ་མཐར་ཐུག་པས་ཚིག་གི་ལམ་དུ་དེ་ལས་ཅི་ཞིག་བསྒྲགས། གཞན་དུ་ཆོས་ཉིད་ནི་བསམ་གྱིས་མི་ཁྱབ་པ་ཡིན་ལ། ཚིག་ནི་རྟོག་དཔྱོད་ཀྱི་ངོ་བོར་གནས་པའི་ཕྱིར་དེ་ཉིད་གཅིག་ཏུ་མཛའ་བ་མ་ཡིན་པས། སྐྱེས་བུའི་བློ་སྟོབས་ཀྱིས་རང་རང་གི་འདོད་པ་བསྒྲུབ་པའི་ཕྱོགས་ཇི་སྙེད་པ་འདི་བྱུང་ལ། ཇི་ལྟ་བ་ནི་སངས་རྒྱས་རྣམས་དང་། བྱང་ཆུབ་སེམས་དཔའ་མཆོག་གཟིགས་རྣམས་ཀྱི་རྒྱུད་ལ་རང་བཞིན་གྱིས་ཡོད་པའོ། །དེ་ལྟར་ཡོད་པས། རྔོག་ལོ་ཆེན་པོ་ནས་ཇོ་ཞལ་ཡན་ཆོད་ཀྱི་ཀློག་པ་ཐོས་བསམ་ལ་མཁས་པ་དག་དང་། གངས་རིའི་ཁྲོད་ཀྱི་བསམ་གཏན་པ་འཁྲུལ་མེད་ཀུན་གྱི་ཡི་གེ་ན་དོན་འདི་ཡོད་པས་སོ། །དེའི་ཕྱིར་སངས་རྒྱས་ནི་གཉིས་སུ་མི་གསུངས་པ་ཡིན་པས་ཤིང་རྟ་ཆེན་པོ་གཉིས་ཀྱི་དགོངས་པའི་མཐར་ཐུག་པའང་འདིར་གནས་ངེས་པ་ཡིན་ནོ། །དེ་ལྟ་ནའང་རེ་ཞིག་དབུ་མའི་གཞུང་ལས། ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མི་སྲིད། །ཅེས་པས་རྟོག་དཔྱོད་ཀྱི་མཐའ་ལ་བཀར། དགག་བསྒྲུབ་ཀྱི་རྫོང་ལ་བསྐོར་བ་བྱས་པས། རང་གི་ཡེ་ཤེས་རང་ལ་ལྐོག་ཏུ་གྱུར་ནས་བསླུ་བའི་རིང་། རང་བཞིན་རྫོགས་པ་ཆེན་པོ་འདུག་སྟངས་གསུམ་གྱིས་རྡོ་རྗེའི་ལུས་ལ་གནད་དུ་བསྣུན་པ་དང་། རིག་པ་ཐོད་རྒལ་གྱི་
ངང་དུ་ཡེ་ཤེས་དབབ་པ་དང་། རིག་པའི་རྩལ་དབང་གིས་ཆོས་ཉིད་མངོན་དུ་བསྟན་པའི་གནད་ཀྱིས་ལམ་ཁྱད་གནམ་ས་ལྟ་བུར་ཡོད་པ་ཡིན་ནོ། །ཡང་བླང་དོར་མེད་པ་ལྟ་བ་ཡིན་གྱི་སྤྱོད་པར་ཅི་འགྲོ་ཟེར་མོད། ཁོ་བོ་ཅག་ནི་ཆོས་ཀྱང་རྫོགས་པ་ཆེན་པོ། གང་ཟག་ཀྱང་རྫོགས་པ་ཆེན་པོ། ལྟ་སྤྱོད་མཉམ་པ་རིས་མེད་དུ་ཁས་བླངས་པའི་དབང་དུ་བགྱིད་ན། རྣམ་ཤེས་ཀྱི་ངོ་ན་བླང་དོར་ཀྱང་ཡོད་པས་ཐབས་ལ་སྐུར་པ་མ་བཏབ། ཡེ་ཤེས་ཀྱི་ངོ་ན་གཟུང་འཛིན་མེད་པས་ཐབས་ལ་རེ་བ་མི་འཚོལ། དེའི་ཕྱིར་བྱང་ཆུབ་ཀྱི་སེམས་ཀུན་བྱེད་རྒྱལ་པོ་ནི་རྒྱུ་འབྲས་གཉིས་སུ་མེད་པའི་ངོ་བོ་བསྒྲུབ་བྱ་སྟེ། གངས་རིའི་ཁྲོད་ན་འདི་ལ་སྐྲག་པར་གྱུར་ནས། གཞི་དུས་སུ་ཀུན་རྫོབ་ཚད་མས་མ་གྲུབ་ན་རྒྱུ་འབྲས་ལ་སྐུར་པ་བཏབ། ལམ་གྱི་དུས་ན་ཅི་ཡང་ཡིད་ལ་མི་བྱེད་པ་ཧྭ་ཤང་གི་ལྟ་བ་ཡིན། འབྲས་བུའི་དུས་སངས་རྒྱས་ཀྱི་ཡེ་ཤེས་ལ་ཀུན་རྫོབ་མི་སྣང་ན་ཐམས་ཅད་མཁྱེན་པ་ནས་བུད་ཟེར་ཏོ། །ཁོ་བོ་ཅག་ནི་ཀུན་རྫོབ་འཁྲུལ་སྣང་ཡིན་པས་ཚད་མའི་གཏན་ཚིགས་འགལ། ཡིད་བྱེད་རྣམ་རྟོག་ཡིན་པས་མཉམ་བཞག་ཏུ་ཅི་ཡང་མི་བསྒོམ། སངས་རྒྱས་ནས་མ་རིག་པ་ཤེས་བྱ་ལ་མི་སྲིད་ན་ཀུན་རྫོབ་གང་ལ་སྣང་། དེ་ཀ་འཁོར་ལོ་ཐ་མ་དང་། དབུ་མ་ལ་འཇུག་པ་རྩ་འགྲེལ་གྱི་དགོངས་པ་མཐར་ཐུག་པ་ཡིན་ན་གཤིས་ཀྱི་བཞུགས་ཚུལ་གཙོ་བོར་འདོན་པའི་གྲུབ་པའི་མཐའ་རྫོགས་པ་ཆེན་པོ་ཕྱོགས་
གཞན་དུ་འཕུལ་བའི་དོན་པོ་གང་། རྫོགས་ཆེན་པས་མི་དགེ་བཅུ་དང་། མཚམས་མེད་ལྔ་ལ་རྣམ་པའི་ཆ་ནས་ཀྱང་བསྒྲུབ་བྱར་བྱེད་པ་མེད། དེ་བཞིན་གཤེགས་པས་ལེགས་པར་གསུངས་པའི་གནས་གཞན་ཡལ་བར་འདོར་བའང་མེད། གང་དང་གང་དུ་གདུལ་བྱ་ལས་ངན་པ་ལྟ་བ་གཞན་དབང་ཅན། བདེ་གཤེགས་བཀའ་འདས་ཀྱི་རྩ་ལྟུང་ལ་ཉམ་མི་ང་བའི་སྤྱོད་པ་རླབས་པོ་ཆེ་ཆོས་ལྟར་འཆོས་པ་དག་མཐོང་ནས། སྔགས་ལོག་སུན་འབྱིན་དུ་སྨྲས་པ་ཡིན་ཟེར་ན། དེ་ལྟ་བུ་གསར་རྙིང་གང་གི་ཁྲོད་དུའང་མཆི་བས་གང་ཟག་སུན་འབྱིན་དུ་སྨྲ་བར་འོས་ཀྱིས། སྔགས་ལོག་སུན་འབྱིན་དུ་སྨྲ་བ་རྟེན་དང་བརྟེན་པ་རྫས་འགལ་བའི་ཕྱིར་རོ། །ཡང་རྒྱུད་ལས་སྦྱོར་སྒྲོལ་ལ་སོགས་པའི་ཚིག་ཟིན་དངོས་བསྟན་པས་སྔགས་ལོག་ཡིན་ཟེར་ན། དེར་སྤྱིར་གསང་སྔགས་ཀྱི་ཆོས་ལ་འཚལ་ཏོ་ཅོག་ཆུད་གསན་ཅིང་། ཁྱད་པར་རང་ཉིད་ཁ་ཏོན་དུ་བགྱིད་པའི་གསང་འདུས་རྩ་རྒྱུད་ལེའུ་བཅུ་དྲུག་པར། ཁྱོད་ཀྱིས་སྲོག་ཆགས་གསད་པར་བྱ། །རྫུན་གྱི་ཚིག་ཀྱང་སྨྲ་བར་བྱ། །མ་བྱིན་པར་ཡང་ཁྱོད་ཀྱིས་ལོངས། །བུད་མེད་དག་ཀྱང་བསྟེན་པར་བྱ། །རྡོ་རྗེའི་ལམ་ནི་འདི་དག་གིས། །སེམས་ཅན་ཐམས་ཅད་བསྐུལ་བར་བྱ། །ཞེས་པ་འདི་ལ་དགོངས་པ་ལུང་སྟོན་ལྟར་མ་ཡིན་པས་མངོན་གྱུར་ཉིད་དུ་སྤྱད་དེ། དྲག་ཤུལ་གྱི་སྦྱོར་བ་རྩོམ་པ་དང་རྫུན་གྱི་ངག་སྨྲ་བ་དང་།
ཚོང་ལ་སོགས་པའི་ཐབས་ཀྱིས་གཞན་ནོར་བརྐུ་བ་དང་འཁོར་བ་མ་སྟོངས་ཀྱི་བར་དུ་ཆོ་འབྲང་གི་ཕྲེང་བ་བསྟར་ལ་རྒྱུ་བའི་འདུན་པ་ཅན་གསར་མའི་ཁྲོད་ནའང་ཇི་ཙམ་ཡོད། འདི་ལྟར་ཁྱིམ་པ་འདོད་ཡོན་གྱི་རོ་ལ་བརྐམ་ཆགས་ཅན་དག་ལ་ལྟོས་ནས། སྔ་མ་བྲམ་ཟེ་ལ་སོགས་ཏེ་གཙང་སྦྲའི་བརྟུལ་ཞུགས་ལ་མངོན་ཞེན་བརྟས་པའི་བྱེད་པ་རྒྱུ་མཐུན་ལས། ཚེ་འདིར་འབག་བཙོག་ལ་སོགས་པ་ཡ་ང་བར་བལྟ་ཞིང་། དབང་པོ་ལས་སུ་མ་གྱུར་པའམ། རང་བཞིན་གྱིས་འཁྲིག་པའི་ཆོས་བསྟེན་པ་ལ་སྤྲོ་བ་ཞན་པ་དག་གིས་ཐོས་པ་དང་། བསམ་པ་དང་། སྒོམ་པའི་ཤེས་རབ་འགོག་ཅིང་། རྡོར་དཀར་དང་། བཀྲུ་ཤལ་དང་། ཆུང་མ་མེད་པ་ཙམ་ཚུལ་ཁྲིམས་ཀྱི་ཕུང་པོར་བལྟས་ནས། གཡུལ་གྱི་བྱ་བ་དང་། རྒྱལ་པོའི་ཞལ་ལྕེ་བ་དང་། དཔྱ་སྡུད་པ་དང་། སོ་ནམ་གྱི་འདུ་འགོད་དང་། ཤོ་གམ་གྱི་ལས་དང་། འགྲན་ཟླར་གྱུར་པའི་ཕུན་སུམ་ཚོགས་པ་གཞོམ་པ་དང་། འབངས་སུ་གྱུར་པ་དག་ལ་སྲོག་དང་། ནོར་གྱི་ཆད་པ་སྦྱིན་པ་སོགས་ལ་ཚམ་ཚོམ་མེད་པར་འཇུག་པ་དག་ཡོད་ན། དེ་དག་ལ་ལྔ་བརྒྱའི་ཐ་མར་གྱུར་པས་བསྟན་པ་གཤིས་ཀྱིས་སྙིགས་པའི་སྐྱོ་བ་མི་སྒོམ་པར་འདུལ་ལོག་སུན་འབྱིན་དུ་སུ་ཞིག་གིས་སྨྲ་བར་ནུས། བརྗོད་པ་དེ་ལ་ཚེར་མ་ཆགས་པར་གྱུར་སྲིད་ན་ཆོས་ཀྱི་དབྱིངས་ཅི་ཡང་མ་ཡིན་པའི་ཀློང་ནི་དགག་བསྒྲུབ་
མེད་པ་ཉིད་དེ་མི་འཆབ་བོ། །ཡང་ཐེག་པའི་གདགས་གཞི་ལ་ཁ་ཟེར་ན། དཔུང་བཟང་གིས་ཞུས་པར་གསང་སྔགས་མདོ་སྡེའི་ཚུལ་དུ་བཤད་ཀྱི་ཉོན། །ཞེས་དང་། རྣམ་འཇོམས་སུ། མདོ་སྡེ་འདི་ཡི་གཟི་བརྗིད་ཀྱིས། །ཞེས་ལན་གཉིས་སྨོས་པའང་རྒྱུད་ལས་གཞན་དུ་འཕེན་ཏོ། །མདོ་སྔཊ་ཐམས་ཅད་རིག་འཛིན་གྱི་སྡེ་སྣོད་དུ་བསྡུས་ནས་གསུང་བ་རིམ་པ་དགུའི་རྣམ་གཞག་ལ་ཀླན་ཀ་བྱས་མོད། དོན་གྱི་སངས་རྒྱས་པའི་གྲུབ་མཐའ་ཡོངས་རྫོགས་མཚན་ཉིད། དེ་ལ་མི་གནས་པའི་དགག་བྱ་ཅི་ཞིག་ཡོད། ཐམས་ཅད་ཐེག་པར་མི་རུང་ཟེར་ན་ལང་ཀར་གཤེགས་པ་ལས། ཇི་སྲིད་སེམས་ཀྱི་འཇུག་པའི་བར། །ཐེག་པའི་མཐའ་ལ་ཐུག་པ་མེད། །ཅེས་པའི་གོ་དོན་གང་གིས་ལེན། ཡང་ལྟ་བ་ལ་ཁྱད་པར་བྱས་པས་སོ་ཟེར་མོད། དེ་ལ་ལྟ་བའི་ཐེམ་སྐས་བཙུགས་པ་གང་དུ་བཤད། སྒོམ་པའི་རིམ་པ་ལ་ལྟ་བའི་བརྡའ་ཆད་ཙམ་བཞག་པ་བྱུང་ནའང་། ལྟ་བ་ཡིན་ན་སྒོམ་པ་ཡིན་པས་མ་ཁྱབ་ལ། སྒོམ་པའི་ཀློང་ན་ལྟ་བ་ཡོད་པས་ཁྱབ་པའི་ཕྱིར་མཆོག་གཟིགས་རྣམས་ལ་ལྟ་སྒོམ་དུ་མ་རོ་གཅིག་གོ །ཡང་མདོ་སྔགས་གཉིས་ལྟ་བའི་སྒོ་ནས་ཁྱད་པར་མེད་པ་ལ་ཟེར་མོད། བཞུགས་ཚུལ་ལ་དེ་བཞིན་ཉིད་དེ་སྒོམ་ཚུལ་ལ་ཁྱད་པར་ཤིན་ཏུ་ཡོད་དོ། །དབྱིངས་དག་མཉམ་རང་བཞིན་གྱིས་རྣམ་པར་དག་པའི་
འོད་གསལ་རང་གནས་ཆེན་པོ་བཅོས་བསྒྱུར་མེད་པའི་ཡེ་ཤེས་དང་། བློས་བཀོད་ནས་རྟག་ཆད་ཀྱི་མཐའ་བསལ་ཞིང་སེམས་དང་སེམས་བྱུང་བླང་དོར་གྱི་གོ་ན་གནས་པ་གཉིས། གདོད་ནས་རང་བཞིན་གྱིས་གྲུབ་པའི་སྤྲོས་བྲལ་དང་། རྩོལ་བས་བྱས་པའི་ཁྱད་པར་ཆེས་ཆེ་བ་ཡོད་པས། ཤིན་ཏུ་རྣལ་འབྱོར་དུ་བཞག་པ་ཡིན་ནོ། །དེ་སྐད་དུ་ཨིནྡྲ་བྷཱུ་ཏིས། བླ་མའི་ཁྱད་པར་དང་། སྣོད་དང་། ཆོ་ག་དང་། ལས་དང་། དམ་ཚིག་དང་། སྒོམ་པའི་ལྟ་བ་དང་། སྤྱོད་པའི་ཁྱད་པར་གྱིས་འཕགས་སོ་ཞེས་པས་གསལ་ལོ། །ངོ་བོའི་ཆ་ནས་བསྒྲུབས་ཀྱང་། པདྨ་རྩེ་མོ་ལས། དྲི་མེད་དབྱིངས་ཀྱི་རང་བཞིན་ནི། །སྐུ་གསུམ་ཡེ་ཤེས་བཞི་དང་བཅས། །གང་ཚེ་དག་པ་དེ་ཉིད་དུ། །རང་གསལ་མངོན་དུ་འཆར་བ་དང་། །འདྲ་བ་ལམ་དུ་བྱེད་པ་ལ། །འབྲས་བུའི་ཐེག་པར་ཡང་དག་བརྗོད། །ཅེས་དབྱིངས་ངོ་བོ་ཉིད་ཀྱི་འབྲས་བུ་དམ་པར་ཡེ་ནས་བཞུགས་པའི་མཚན་ཉིད་ཤེས་ནས། དེ་ཁོ་ན་ཉིད་ལ་བསླབ་པའམ། བསྐྱེད་རྫོགས་ལ་ལྟོས་ནས་གློ་བུར་གྱི་དྲི་མ་དང་མཛའ་བར་མི་བྱེད་པའི་གནད་ཁྱད་པར་ཅན་ཡོད་དོ། །དེའི་ཕྱིར་ཡེ་ཤེས་ལ་ཐེག་པའི་ངེས་བརྗོད་བྱུང་བ་མི་འགལ་གྱི་སྟེང་དུ་གཞུང་ལུགས་སྤྱིའི་དགོངས་པར་གནས་པ་ཡིན་ཏེ། ཤེར་ཕྱིན་རབ་རྩལ་རྣམ་གནོན་གྱིས་ཞུས་པ་ལས། སངས་རྒྱས་ཀྱི་ཡེ་ཤེས་ནི་ཐེག་
པ་ཆེན་པོའོ། །ཞེས་པ་ལ་ཅིས་བསྙོན། རྒྱུ་མཚན་དེས་སྤྲོས་བྲལ་གྱི་ལྟ་བའང་ཡེ་ཤེས་ཉིད་ལ་ས་ལམ་གྱི་རྣམ་གཞག་ཐམས་ཅད་རྫོགས་དགོས་པ་དང་། མི་སློབ་པའི་ལམ་འབྲས་བུ་ཡིན་པའང་ལམ་གྱི་རྩེ་མོར་བཞག་པའི་ཕྱིར་རོ། །དེ་ལ་འདི་སྐད་ཅེས་བྱ་སྟེ། བདག་ཅག་གི་བླ་མ་དམ་པ་རང་དང་གཞན་གྱིས་གྲུབ་པའི་མཐའ་རྒྱ་མཚོའི་ཕ་རོལ་ཏུ་སོན་པ་དཔལ་བསམ་ཡས་པ་ཀུན་མཁྱེན་ངག་གི་དབང་པོས། ཐེག་པ་རྣམས་ཀྱི་གྲངས་ནི་མཐའ་གཅིག་ཏུ་མ་ངེས་ཏེ། དབྱེ་བསྡུ་དཔག་ཏུ་མེད་པ་བྱར་ཡོད་ཅིང་། སྔོན་གྱི་རྡོ་རྗེ་འཆང་དང་གྲུབ་པ་ཆེན་པོ་བརྙེས་པའི་སློབ་དཔོན་མཁས་པ་དག་གིས་མཛད་པའི་ཕྱིར་རོ། །བློ་ཆུང་ཞིང་ཤེས་རབ་ཀྱི་མིག་རྒྱང་ཐུང་བ་དག་གཅིག་ཏུ་ཞེན་ནས། ཐེག་པའི་གྲངས་དང་། གྲུབ་མཐའི་རྣམ་གྲངས་བསམ་གྱིས་མི་ཁྱབ་པའི་རྣམ་གཞག་ལ་དངངས་ཞིང་མི་བདེན་ཏོ་ཞེས་སྨྲ་བ་ནི། བ་གླང་ལ་སོགས་པ་མ་ཧེ་དག་བདག་ཅག་དུད་འགྲོ་རྣམས་ནི་རྭ་དང་བཅས་པའི་ཕྱིར། མི་དང་ལྷ་རྣམས་ཀྱང་རྭ་ཅན་ཁོ་ནའོ་ཞེས་འཛིན་པ་བཞིན་ནོ། །དེ་བས་ན་ཐེག་པའི་ཚུལ་རྣམས་ནི། མིང་ཚིག་དང་དོན་གྱི་རྣམ་གྲངས་མཐའ་ཡས་ཤིང་། ལམ་བགྲོད་ཚུལ་དང་། ས་དང་། ཏིང་ངེ་འཛིན་གྱི་འཇོག་ཚུལ་དཔག་ཏུ་མེད་དེ། ཐམས་ཅད་མཁྱེན་པ་ནི་གང་ཡང་མཁྱེན་ཅིང་གསུངས་པའི་ཕྱིར། ལམ་བགྲོད་དུ་ཡོད་པ་དང་།
མེད་པ་དང་། རྩོལ་བ་དང་བཅས་པ་དང་། རྩོལ་བ་མེད་པ་དང་། ཚེ་གཅིག་གིས་གྲོལ་བ་དང་། བསྐལ་པས་གྲོལ་བ་ལ་སོགས་པ་ནས། གྲུབ་པའི་རྣམ་གཞག་གང་ལ་དགའ་ཞིང་མོས་པའི་བསམ་པ་དང་མཐུན་པའི་ཆོས་གསུངས་ཏེ། ཆོས་ཚུལ་རྒྱ་མཚོ་རྣམས་ལ་དངངས་ཤིང་སྐྲག་པས་ལོག་པར་ལྟ་བ་རྣམས་དོར་ནས་དོན་དུ་གཉེར་བས་འཇུག་པར་བྱ་བ་ནི་གདམས་ངག་དམ་པའོ། །ཞེས་སོ། །དེ་ཙམ་གྱིས་ཕྱིན་ཅི་ལོག་གི་ཀླན་ཀ་ཉམས་བརྟས་པར་མི་འགྱུར་ཏེ། གཞན་དུ་འགོས་ཀྱིས་ནི་གསང་བ་སྙིང་པོ་ལ་སྐྱོན་བཞིར་བཀོད་ཅིང་། ཁྱད་པར་རྒྱ་གར་ན་མ་གྲགས་ཟེར་བ་ཁོ་ན་ཤེས་བྱེད་དུ་བྱས་པ་དང་། དཔལ་འཛིན་གྱིས་ཚིག་དོན་ལ་ནོར་བའི་གཏན་ཚིགས་བཀོད་པ་དག་ནི་ཕལ་ཆེར་སྡོམ་གསུམ་རབ་དབྱེ་ལ་རྟོག་དཔྱོད་བྱས་པའི་རྒན་གྱི་ལད་མོ་བྱིས་པས་བྱེད་པ་ལྟར་བས། རབ་དབྱེའི་དོན་ནི་རྙིང་མ་ལ་བརྟག་དཔྱད་མཛད་པ་ཆ་ཤས་ལས་མེད་པས་དེའི་ལན་ནི་གོང་དུ་བརྗོད་མ་ཐག་པ་ཉིད་དེ། ཚིག་དོན་གྱི་ནོར་བ་ཕལ་ཆེར་ནི་གསར་མ་སྨྲ་བ་ཁོ་ན་ལ་ཡིན། དེའང་དོན་གྱི་དེ་ལྟར་འཐད་ན་གངས་ཅན་པ་རྣམས་སངས་རྒྱས་ཀྱི་བསྟན་པའི་ནང་ནས་བཞེངས་ཤིག །ཡང་ཆག་དང་། ཕོ་བྲང་ཞི་བ་འོད་དང་། ལྷ་བླ་མས་མཛད་པར་གྲགས་པ་དང་། རྔོག་གི་གཟེ་མ་ར་མགོར་བཏགས་པ་རྣམས་ལ་ནི། གང་ཟག་འདི་ཞེས་བྱ་བས་བྱས་པ་འདི་ནི་
ཆོས་ལོག་དྲི་མ་ཅན་ཡིན་ཞེས། ཆོས་ཀྱིས་ཚིག་དོན་ལ་ནོར་བ་འདི་ཡོད་ཀྱི་གཏན་ཚིགས་མེད་པར་དབང་ཡོད་དང་སྨྱོན་ཧམ་ཁོ་ནས་ལུང་བསྒྲགས་པ་འབའ་ཞིག་གོ །དེ་ལྟར་ཁྱི་སོགས་ཟའི་རྗེས་སུ་འབྲངས་ནས་འདི་ལ་ནོར་བ་དང་འཁྲུལ་པ་ཡོད་ཅེས་སྒྲོ་འདོགས་ནུས་ན་རང་ཉིད་ཀྱང་མཁས་པའི་གྲལ་དུ་སོན་པར་གྱུར་སྙམ་ནས་ཁ་ཟེར་བ་དག་གཞན་ཡང་བྱུང་མོད་དེ། དེ་དག་ལ་འདི་སྐད་ཅེས་སྨྲའོ། །འདི་ལྟར་སྟོན་པ་བདེ་བར་གཤེགས་པས་གསུང་རབ་དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ་དག་ནི་བྱང་ཆུབ་སེམས་དཔའ་ས་བཅུ་པས་ཀྱང་བསྡུ་བར་མི་ནུས་ན། གཞན་མཁས་པ་དང་། གྲུབ་པ་དང་། བཙུན་པ་དག་གིས་སྤྱོད་ཡུལ་དུ་ག་ལ་ཞིག་གོ །རྒྱུ་མཚན་དེས་གསང་བ་འདུས་པའི་འགྲེལ་པར་སློབ་དཔོན་མཚོ་སྐྱེས་ཀྱིས། སློབ་དཔོན་ཕལ་ཆེར་འདི་སྐད་བརྗོད། །དཔལ་ལྡན་འདུས་པ་མདངས་ཆེན་གྱིས། །རྒྱུད་ཀྱི་སྡུད་པར་བྱེད་པ་པོ། །དཔའ་བོ་འཇིག་རྟེན་དབང་ཕྱུག་ཟེར། །བླ་མའི་ཞབས་ཀྱི་བཀའ་དྲིན་གྱིས། །དཔལ་ལྡན་འདུས་པའི་སྡུད་པ་པོ། །གཞན་དག་ཡོད་པ་མ་ཡིན་ཞེས། །བདག་ཉིད་འབའ་ཞིག་སྨྲ་བར་བྱེད། །རྒྱུད་མཛད་པོ་ནི་ཐུགས་རྡོ་རྗེ། །ཞེས་གསུང་བ་པོ་སངས་རྒྱས་ཉིད་ཀྱིས་སྡུད་པར་བཞེད་པའི་ཕྱིར། སངས་རྒྱས་ཀྱིས་འོག་མིན་དུ་གསུངས་པའི་རྒྱུད་བོད་རང་དུ་ནི་
འབྱུང་མི་སྲིད་པར་ཁས་ལེན་ཅིང་གལ་ཏེ་བྱུང་སྲིད་ནའང་། བསྟན་བཅོས་རྒྱུད་ཀྱི་དངོས་པོ་ཅན་དུ་བྱེད་པ་མཁས་པར་གྲགས་པ་རྣམས་ཀྱིས་དཔྱད་མོད། ཁོ་བོ་ཅག་ལ་དེ་ལས་གཞན་དུ་གྱུར་པའི་གོ་བ་བསམ་གྱིས་མི་ཁྱབ་པ་གཅིག་ཡོད་དེ། གསང་སྒྲོག་གིས་ཉེས་པ་ཆེན་པོ་འབྱུང་སྲིད་པས་འདིར་དབུ་མའི་ལམ་དུ་བཞག་ནས། སྔ་འགྱུར་གྱི་རྒྱུད་འདི་རྣམས་ལ་ལོ་པཎ་ཆེན་པོ་རྣམས་ཞལ་འཛོམ། རྒྱ་གར་དུ་དཀའ་བ་སྤྱད། གྲུབ་པའི་གནས་དང་མཁའ་འགྲོའི་གསང་མཛོད་རྣམས་ནས་བླངས་པའི་གཏན་ཚིགས་དཔྱད་པ་གསུམ་གྱི་སྲང་ལ་གཞལ་ནས་བཀོད་པ་དེ་ལྟར་ཡིན་མོད། གལ་ཏེ་ཁྱོད་ཅག་གི་འདོད་པ་སོར་བཞག་སྟེ་བོད་དུ་བྱས་པར་བྱེད་ན། དེ་ལའང་བདག་ཅག་སྤྲོ་བ་ལྷག་པར་བསྐྱེད་པར་བྱ་སྟེ། བཅོམ་ལྡན་འདས་ཀུན་ཏུ་བཟང་པོའི་ཁྱད་དུ་འཕགས་པའི་གསང་བ་ཆེན་པོ་མཆོག་དང་ཐུན་མོང་གི་དངོས་གྲུབ་ལ་ངེས་པར་མི་བསླུ་ཞིང་། ཤིན་ཏུ་ལྐོག་གྱུར་གྱི་གནས་མངོན་དུ་གསལ་བ་ས་བཅུའི་དབང་ཕྱུག་དག་གིས་ཀྱང་སྤྱོད་ཡུལ་དུ་མ་ཡིན་པའི་རྒྱུད་ཆེན་པོ་དེ་དག་སློབ་དཔོན་ཆེན་པོ་བཱི་མ་ལ་དང་། བཻ་རོ་ཙཱ་ན་དང་། རྨ་རིན་ཆེན་མཆོག་དང་། གཉགས་ཛྙཱ་ན་ཀུ་མཱ་ར་རྣམས་ཀྱིས་མཛད་པའི་ཕྱིར་དེ་དག་རིག་པ་འཛིན་པའམ། ས་མཐོན་པོ་ལ་གནས་པ་ཙམ་གྱི་ཡོན་ཏན་ལས་ཀྱང་འཕགས་པ་སྟོན་པ་ཀུན་ཏུ་བཟང་པོའམ། རྡོ་རྗེ་འཆང་
ངམ་རྒྱལ་ཚབ་རིགས་ལྔ་ལ་སོགས་པར་མངོན་སུམ་དུ་སོང་ཞིང་། མཁན་སློབ་ཆོས་གསུམ་གྱི་ཐུཊ་རྗེའི་ཟླ་ཟེར་གྱིས་བསྐྲུན་པའི་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་འདི་ཡང་ངེས་པ་དོན་གྱི་འོག་མིན་ཆེན་པོར་གྲུབ་བོ། །ཅིའི་ཕྱིར་ན་རྗེ་བཙུན་བྱམས་པའི་ཆོས་ལྔ་དང་། དུས་ཀྱི་འཁོར་ལོའི་བསྡུས་པའི་རྒྱུད་དང་། དེའི་འགྲེལ་པ་དྲི་མེད་འོད་ལ་སོགས་པ་བཞིན་ནོ། །དེ་བཞིན་དུ་བདག་པོའི་རྐྱེན་ལས་དབྱེ་ན། བཅོམ་ལྡན་འདས་ཀྱི་ཞལ་ནས་གསུངས་པ་དང་། བྱིན་གྱིས་བརླབས་པ་དང་། རྗེས་སུ་གནང་བའི་བཀའ་གསུམ་དུ་ཡོད་པ་ལས། དང་པོ་ནི། འོག་མིན་ལ་སོགས་པར་གསུངས་པ་རྣམས་ཏེ། གཉིས་པ་ནི་སྐུས་བྱིན་གྱིས་བརླབས་པའི་བཀའ་རྡོ་རྗེ་སྙིང་པོའི་སྤྱི་བོར་ཕྱག་བཞག་ནས་བྱིན་གྱིས་བརླབས་པས་མདོ་སྡེ་ས་བཅུ་པ་འཆད་པའི་སྤོབས་པ་སྐྱེས། རྣམ་པར་གྲོལ་བའི་ཟླ་བས་དྲིས་པ་ལྟ་བུའོ། །གསུང་གིས་བྱིན་གྱིས་བརླབས་པའི་བཀའ་ནི། འཇམ་དཔལ་ལ་མ་སྐྱེས་དགྲའི་འགྱོད་པ་སོལ་ཅིག་ཅེས་བཀའ་སྩལ་པས། འཇམ་དཔལ་གྱིས་མ་སྐྱེས་དགྲའི་འགྱོད་པ་བསལ་བའི་མདོ་བྱུང་བ་ལྟ་བུའོ། །ཐུགས་ཀྱིས་བྱིན་གྱིས་བརླབས་པའི་བཀའ་ནི་བཅོམ་ལྡན་འདས་ཟབ་མོ་སྣང་བའི་ཏིང་ངེ་འཛིན་ལ་བཞུགས་ནས། ཤཱ་རིའི་བུ་དང་། སྤྱན་རས་གཟིགས་ལ་བྱིན་གྱིས་བརླབས་པས། ཤེས་རབ་སྙིང་པོ་
གསུངས་པ་ལྟ་བུའོ། །ཡོན་ཏན་དང་འཕྲིན་ལས་ཀྱིས་བྱིན་གྱིས་བརླབས་པ་ནི། བཤད་སྦྱར་ལས། སྟོན་པ་འདི་ཡི་བྱིན་བརླབས་ཀྱིས། །བྱ་འམ་ཤིང་བུ་རྡེའུ་དང་། །པདྨོ་དག་དང་དཔག་བསམ་ཤིང་། །རྔ་བོ་ཆེ་ལས་བྱུང་བ་ཡང་། །རྒྱལ་བས་བྱིན་གྱིས་བརླབས་པའི་ཕྱིར། །དེ་དག་བཀའ་ཞེས་བྱ་བར་འདོད། །ཅེས་གསུངས་པའི་ཕྱིར་རོ། །གསུམ་པ་ནི། །པདྨ་དཀར་པོ་ལས། ཀུན་དགའ་བོ་ང་ཡོངས་སུ་མྱ་ངན་ལས་འདས་པའི་འོག་ཏུ་བསྡུ་བར་བྱེད་པའི་ཚིག འདི་སྐད་བདག་གིས་ཐོས་པའི་དུས་གཅིག་ན་ཞེས་པས་གླེང་བསླང་ལ། བར་དུ་མཚམས་སྦྱར་བའི་ཚིག །མཐར་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཞེས་བྱ་བའི་བར་གྱིས་བསྡུས་ཤིག་གསུངས་པས་མཚོན་ནོ། །མཆོག་དང་ཐུན་མོང་གི་དངོས་གྲུབ་ལ་མི་བསླུ་བ་ཅིས་ཤེས་ན། རྒྱུད་སྡེ་འདི་དག་ཉམས་སུ་བླངས་པ་ལས་བོད་འདིར་འཇའ་ལུས་འཕོ་བ་ཆེན་པོའི་སྐུ་བརྙེས་པ་ཇི་སྙེད་བྱུང་བ་དང་། ཟུར་ཆེ་ཆུང་ལ་སོགས་གསད་གསོ་ནུས་པའི་གྲུབ་ཐོབ་ཇི་སྙེད་བྱུང་བ་དང་། རོང་ཟོམ་ཆོས་ཀྱི་བཟང་པོ་དང་། རྒྱལ་བ་ཀློང་ཆེན་པ་སོགས་རྒྱན་དྲུག་མཆོག་གཉིས་ལྟ་བུའི་འཕགས་པའི་བློ་གྲོས་དང་ལྡན་པ་ཇི་ལྟར་བྱུང་གིས་ཤེས་ལ། དེ་བཞིན་དུ་ཐུན་མོང་ལ་བཻ་རོ་ཙཱ་ནས་བསྒྱུར་བའི་སྨན་དཔྱད་ཀྱི་རྒྱུད་སྡེ་བཞི་པོས་ཤིན་ཏུ་ལྐོག་གྱུར་
གྱི་དོན་ལ་མི་བསླུ་བས་འགྲོ་བ་ནད་པའི་ཚོགས་ལ་དབུགས་འབྱིན་ཆེན་པོ་སྟེར་བ་དང་། སྔ་འགྱུར་གྱི་དྲག་སྔགས་རྒྱ་མཚོས་བསྟན་པ་ལ་འཚེ་བའི་མི་དང་མི་མ་ཡིན་སྡེ་དང་བཅས་པ་བརླག་པར་བྱས་པ་དང་། ནད་དང་། མཚོན་དང་། མུ་གེ་དང་། འཇིགས་པ་ཆེན་པོའི་ཚོགས་ལས་སྐྱོབ་ཅིང་། དེ་བཞིན་དུ་ཆར་དབབ་པ་དང་། གནོད་མཛེས་དབང་པོའི་བཅའ་ཀ་ལ་བརྟེན་ནས་འཇིག་རྟེན་གྱི་འབྱོར་པ་རྒྱས་པ་ལ་སོགས་མདོར་ན་དབང་དུ་བྱ་བ་དང་། ཞི་བ་དང་། རྒྱས་པ་དང་། དྲག་ཤུལ་གྱི་ལས་གང་དང་གང་ལའང་ནུས་པའི་གཟུགས་བརྙན་ལྐོག་ཏུ་མ་གྱུར་པ་མངོན་སུམ་ཚད་མ་ཡིན་ན། སངས་རྒྱས་ནི་འཇིག་རྟེན་ལ་ཕན་པ་འབའ་ཞིག་པས། དེའི་བཀའ་མངོན་མཐོ་དང་ངེས་ལེགས་ཀྱི་གནས་ལ་གཞན་དབང་དུ་གྱུར་པའི་ཕྱོགས་གང་དུ་འཕུལ། འདི་ལྟར་སྤྲུལ་པའི་སྐུ་དང་ཆོས་ཚུལ་རྒྱ་མཚོ་ནི་སྔོན་ཚེ་ལོ་བརྒྱ་པ་ལ་སོགས་པའི་གནས་སྐབས་ན་བྱུང་སྟེ། དེ་ལས་གཞན་དུ་མ་ཡིན་ནོ་བསམ་པར་མི་བྱ་སྟེ། སངས་རྒྱས་ནི་རྟག་པར་བཞུགས་ཤིང་གདུལ་བྱའི་དོན་མཛད་པས། དེས་སྔོན་མདོ་དང་རྒྱུད་ལ་མ་གྲགས་པ་གསལ་བར་བྱེད་པའང་སྲིད་པས། ཐེག་པ་དང་གྲུབ་མཐའི་རྣམ་གཞག་བསམ་གྱིས་མི་ཁྱབ་པ་དག་གསང་བ་ཟབ་མོ་ལ་རྨོངས་པའི་རྟོག་དཔྱོད་ཀྱིས་གཞལ་བྱ་དང་མ་མཐུན་ཀྱང་། སངས་རྒྱས་ནི་ཐམས་ཅད་མཁྱེན་ཅིང་གང་ཡང་གསུངས་
པ་ཡིན་པས་གང་ཞིག་ཐར་པའི་ལམ་དུ་འཇུག་ཅིང་འཁོར་བ་སྤོང་བ་ཐམས་ཅད་སྟོན་པ་སངས་རྒྱས་ཀྱི་གྲུབ་པའི་མཐའ་ཡིན་པར་ངེས་སོ། །འདི་ལྟར་ཚིག་དོན་ལ་ནོར་འཁྲུལ་ཡོད་མེད་སངས་རྒྱས་ཀྱི་བཀའ་དང་ཆ་མི་ཕྱེད་པ་ཙམ་དུ་འཁྲུལ་ནས་དཔྱད་མི་བཟོད་པ་དེ་སྲིད་ཀྱི་གྲུབ་པའི་མཐའ་བཟང་པོ། མཆོག་དང་ཐུན་མོང་གི་དངོས་གྲུབ་ལ་མི་བསླུ་བའི་མངོན་སུམ་ཚད་མ་དག་ཀྱང་བཅོས་མ་དང་རྫུན་མར་ཡིད་གཉིས་བྱེད་ན། རང་གི་རྣམ་པར་ཤེས་པའང་རང་ལས་ཤིན་ཏུ་ལྐོག་ཏུ་གྱུར་པ་ཚད་མ་ཉིད་ཀྱི་ཕྱིར། སོ་སོ་རིག་བཞི་ས་དགུ་པ། །མ་ཐོབ་དེ་སྲིད་ཆོས་ཀུན་གྱི། །ངེས་ཚིག་ཤེས་མེད་དེ་ཡི་ཕྱིར། །ཞེས་པ་ལ་དཔྱད་ནས་རང་གི་དབང་པོ་དང་སྐལ་བའི་སྣང་ངོར་བཀའ་མ་ཡིན་པ་ལྟར་མཐོང་སྲིད་ནའང་། སྡུད་པ་ལས། རྒྱལ་བའི་ཉན་ཐོས་གང་དག་ཇི་སྙེད་ཆོས་སྟོན་དང་། །འཆད་དང་རིག་པ་དག་དང་ལྡན་པར་བརྗོད་པ་དང་། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཅིའི་ཕྱིར་ཞེ་ན་རྒྱལ་བའི་ཆོས་ཚུལ་གང་བསྟན་པ། །དེ་ལ་མི་མཆོག་སློབ་མར་གྱུར་པས་སྔོན་བསླབས་ཤིང་། །མངོན་སུམ་བྱས་ནས་བསླབ་པ་ཇི་བཞིན་སྟོན་བྱེད་པ། །སངས་རྒྱས་མཐུས་བྱེད་རང་གི་སྟོབས་ཀྱི་མཐུས་མ་ཡིན། །ཞེས་དང་། རྒྱུད་བླ་མར། ཁམས་གསུམ་དག་ནི་ཉོན་མོངས་སྤོང་བྱེད་གསུངས། །
ཞི་བའི་ཡོན་ཏན་བརྗོད་པར་མཛད་པ་གང་། །དེ་ནི་དྲང་སྲོང་གསུམ་ཡིན་ལྡོག་པ་གཞན། །ཞེས་པ་ལ་དྲན་པ་ཉེ་བར་འཇོག་དགོས་ཏེ། དེ་ལྟར་མ་བཞག་ན་ཆོས་དང་གང་ཟག་ལ་སྐུར་པ་བཏབ་པའི་སྒྲིབ་པ་ནི་ཤིན་ཏུ་ཚད་མེད་པའི་ཕྱིར་རོ། །དེ་སྐད་དུ་རྒྱུད་བླ་མ་ལས། འཕགས་པ་བསྐུར་དང་དེས་གསུངས་ཆོས་ལ་བརྙས་པ་གང་། །དེ་ཀུན་རྨོངས་པའི་མངོན་ཞེན་བརྟས་བྱས་ཉོན་མོངས་ཡིན། །དེས་ན་ཞེན་ལྟའི་དྲི་ཅན་དེ་ལ་བློ་མི་སྦྱར། །ཞེས་སོ། །མཚན་ཉིད་དེས་རྒྱུད་བླ་མའི་འགྲེལ་པར། སྤྲིན་མཐོངས་མཁའ་ལ་ཉི་བཞིན་འདིར་ཁྱོད་ཕྱོགས་གཅིག་བློ་གྲོས་ཅན། །བློ་མིག་དག་པའི་འཕགས་རྣམས་ཀྱིས་ཀྱང་ཐམས་ཅད་མཐོང་མ་ལགས། །ཞེས་སངས་རྒྱས་པའི་ཆོས་ཁམས་རྒྱ་མཚོ་ནི་དེ་བཞིན་གཤེགས་པ་ཉིད་ལས་གཞན་བློ་མིག་དག་པའི་འཕགས་པ་རྣམས་ཀྱིས་ཀྱང་སྤྱོད་ཡུལ་མ་ཡིན་ན་གངས་རིའི་ཁྲོད་ཙམ་ན་མཐོང་བ་རྒྱ་ཆེ་བའམ། མཁས་པར་གྲགས་པ་དག་གིས་ཆོས་ཚུལ་རྒྱ་མཚོ་ལྟ་བུ་ལ་བླང་དོར་བྱ་བ་ནུས་པ་མ་ཡིན་པས། ལེགས་པར་མཐོང་བའི་བློ་མིག་ཟུམ་པ་དང་། དྲང་དོན་གྱི་ཆོ་ངེ་འདོན་པ་དང་། ཕྱོགས་ཞེན་གྱི་རྣམ་གཞག་བསྐྱང་བ་དང་། ཕྲག་དོག་གི་མཆེ་བ་བརྡར་བ་དང་། རྙེད་པའི་ལུས་སྟོབས་ངོམ་པ་དག་གིས་སྐུར་པ་བཏབ་པའི་ངག་ལ་ཡིད་ཆེས་སུ་བཟུང་ནས་ལོག་པར་ལྟ་བ་ནི་སྒྲིབ་པ་ཚད་མེད་པས།
མཁས་ཤིང་གཟུ་བོར་གྱུར་པ་དག་གིས། སྲོག་གི་སླད་དུའང་སྡིག་པ་དེ་ལྟ་བུ་ལ་འཇུག་པར་མི་བརྩོན་ཏེ། དཔལ་འཛིན་བཞིན་དུ་མཐོང་བའི་ཆོས་ལ་མནར་མེད་པའི་དམྱལ་བར་འགྲོ་བའི་ཕྱིར་རོ། །འདི་ལྟར་གྲུབ་མཐའ་ལ་མ་ཞུགས་པ་དག་གིས་མཚམས་མེད་པ་ལྔ་བྱས་པའང་ཟབ་མོའི་དོན་ལ་བསམ་པས་ནམ་ཞིག་ཐར་པའི་སྐབས་ཡོད་ན། ཆོས་སྤངས་པས་དེ་ལྟ་མ་ཡིན་ཏེ། རྒྱུད་བླ་མ་ལས། བློ་དམན་ཕྱིར་དང་དཀར་པོའི་ཆོས་བྲལ་ལོག་པའི་ང་རྒྱལ་ལ་བརྟེན་ཕྱིར། །དམ་ཆོས་སྤོང་བའི་སྒྲིབ་པ་དག་ཕྱིར་དྲང་དོན་དེ་ཉིད་འཛིན་པའི་ཕྱིར། །རྙེད་ལ་བརྐམ་ཕྱིར་ལྟ་བའི་དབང་ཕྱིར་ཆོས་སུན་འབྱིན་པ་བསྟེན་པའི་ཕྱིར། །ཆོས་འཛིན་བསྲིང་ཕྱིར་མོས་པ་དམན་ཕྱིར་དགྲ་བཅོམ་རྣམས་ཀྱིས་ཆོས་སྤོང་བྱེད། །ཇི་ལྟར་ཟབ་མོའི་ཆོས་ཉམས་དེ་བཞིན་མཁས་པ་རྣམས་ཀྱང་མེ་དང་ནི། །མི་བཟད་སྦྲུལ་དུག་གཤེད་མ་དང་ནི་ཐོག་ལའང་ཤིན་ཏུ་འཇིགས་མི་བྱ། །མེ་སྦྲུལ་དགྲ་དང་རྡོ་རྗེའི་མེས་ནི་སྲོག་དང་བྲལ་བ་ཙམ་བྱེད་དེ། །དེ་ལས་མནར་མེད་རྣམས་ཀྱིས་འགྲོ་བ་ཤིན་ཏུ་འཇིགས་པར་འགྲོ་མི་འགྱུར། །གང་ཞིག་གང་ཡང་སྡིག་གྲོགས་བསྟེན་པས་སངས་རྒྱས་ངན་སེམས་ལྡན་གྱུར་དང་། །ཕ་མ་དགྲ་བཅོམ་གསོད་གང་བྱ་བ་མིན་བྱེད་མཆོག་ཚོགས་འབྱེད་པའི་མི། །དེ་ཡང་ཆོས་ཉིད་ངེས་པར་བསམས་པས་མྱུར་དུ་དེ་ལས་ཐར་འགྱུར་གྱི། །
གང་ཞིག་ཡིད་ནི་ཆོས་ལ་སྡང་བ་དེ་ལ་ཐར་པ་ག་ན་ཡོད། །ཅེས་སོ། །དེ་བཞིན་དུ་སེམས་ཅན་གྱི་མོས་པ་དང་བསམ་པ་ཐ་དད་པས། འགྲོ་བའི་སྐད་ནི་བསམ་ཡས་པར། །བདེ་གཤེགས་གསུང་གིས་དེ་སྙེད་སྟོན། །ཐུགས་ལས་ངེས་མེད་གཟུགས་བྱུང་བ། །ཞེས་གང་ཟག་དང་། ཆོས་ཀྱང་སྣ་ཚོགས་སུ་སྣང་བས་དོན་བྱེད་པའི་ཕྱིར་འདི་ནི་ལོག་པའོ། །འདི་ནི་བཅོས་མའོ། །ཞེས་སྒྲོ་སྐུར་གྱིས་སྟངས་གཅོད་པ་ནི་བརྣག་པར་དཀའ་བའི་ལས་ཡིན་ནོ། །འདིར་ཀློག་པ་དག །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་པ་ལ་རྒྱབ་བརྟེན་མོད། དེ་ནི་རང་རང་གི་གློ་བར་ཞེན་པ་གཅིག་ཡི་དམ་དུ་བཟུང་ནས་ཆོས་ཀྱི་རྣམ་གྲངས་རླབས་པོ་ཆེ་ལ་ཡིན་མིན་གྱི་རིག་པ་འཕེལ་པའི་དོན་མ་ཡིན་གྱི། གང་ཞིག་དོན་དུ་གཉེར་བྱའི་ཆོས་དེ་སློབ་དུས་ཚིག་དོན་གྱི་རིམ་པ་ལ་བསམ་བྱུང་གི་ཤེས་རབ་རྣམ་པར་དག་པས་གདར་བྱ་བའི་དགོངས་པ་ཡིན་གྱི། དཀོན་མཆོག་བརྩེཊ་པར་འོད་སྲུངས་ངའམ་ང་དང་འདྲ་བས་ཆོས་དང་གང་ཟག་གི་ཚོད་བཟུང་བར་རུང་གིས། གཞན་དག་གིས་ནི་མ་ཡིན་ཏེ་ལོག་པར་ལྟུང་བའི་ཕྱིར་རོ་ཞེས་པའི་དོན་ལ་བསམ་མོ། །རྒྱུ་མཚན་དེ་ལྟ་བུས་བློ་གྲོས་ཀྱི་འདུན་ཁང་མཛེས་པར་བྱས་པ་འགོས་ལོ་གཞོན་ནུ་དཔལ་གྱིས་
འཕགས་པའི་ཡུལ་དུ་སྡེ་པ་བཅོ་བརྒྱད་བཀར་བསྡུ་ཞེས་པ་ལྟ་བུས་གངས་རིའི་ཁྲོད་ཀྱི་བསྟན་པ་ཇི་སྙེད་པ་རང་རང་གི་འཐད་པ་བཞིན་ཕྱོགས་ལྷུང་མེད་པའི་གནས་སུ་བསྡུས་ནས། ཆོས་སྤོང་གི་ལས་ལས་ལྡོག་པར་མཛད་པ་ནི་རྣམ་པར་ཐར་པ་བསམ་གྱིས་མི་ཁྱབ་མོད། དེ་བཞིན་དུ་ཐུབ་པའི་དབང་པོས། རྒན་པ་འམ་ནི་གཞོན་པའང་རུང་། །གང་ལ་ཆོས་ནི་རྣམ་ཤེས་པ། །དེ་ལ་གུས་པས་ཕྱག་བྱས་ཏེ། །བྲམ་ཟེ་གཙང་མས་མེ་ལ་བཞིན། །ཞེས་དང་། བྱས་པ་ཤེས་ཤིང་བྱས་པ་དྲན། །བྱས་པ་དྲིན་དུ་གཟོ་བ་ཡི། །མི་ལ་དཔལ་མགོན་ཉེ་བར་གནས། །ཞེས་པ་ལྟར། གོང་མ་ལྔ་པས་རང་གི་ཐུགས་བསྐྱེད་ཀྱི་ངོས་ནས་གངས་རིའི་ཁྲོད་ཀྱི་བསྟན་པ་མཐའ་དག་ལ་རི་མོར་མཛད་ཅིང་། ཆོས་རྒྱལ་མེས་དབོན་རྣམ་གསུམ་གྱིས་བཙུགས་པའི་བསྟན་པ་ལ་སྲི་ཞུ་དང་བསྟི་སྟངས་བླ་ལྷག་ཏུ་མཛད་པས། སྔ་འགྱུར་རྡོ་རྗེ་ཐེག་པའི་ཕྱོགས་ལའང་རྒྱུ་མཚན་ཤེས་ནས་རྗེས་སུ་ཞུགས་པའི་གཏན་ཚིགས་དང་། ལོག་པར་སྨྲ་བ་དག་ལ་དགག་བསྒྲུབ་ཀྱི་བགྱི་བ་ལྷུར་བླངས་ནས་རྒྱུད་འབུམ་རིན་པོ་ཆེ་གཟེངས་སུ་བསྟོད་པའི་ཚུལ་གང་གི་གསན་ཡིག་གླེགས་བམ། ང་པའི་ཤོག་གྲངས་བརྒྱ་གོ་ལྔ་པ་ནས་ཉིས་བརྒྱ་ཐམ་པའི་བར་གྱིས་ལེགས་པར་རྟོགས་པར་འགྱུར་ལ། མདོར་བསྡུ་ན་གསེར་མདོག་ཅན་པས། རྙིང་མའི་ཆོས་ཀུན་འཕགས་
ཡུལ་ནས། །བསྒྱུར་བར་འབད་པས་བསྒྲུབ་མི་དགོས། །སློབ་དཔོན་སྤྲུལ་པའི་སྐུ་ཉིད་ཀྱིས། །གསུངས་པ་ཉིད་དུ་གྲུབ་པས་ཆོག །འཕགས་པའི་ཡུལ་ནས་ཕྱིས་འགྱུར་བས། །སྔགས་དང་བརྡ་སྐད་མ་མཐུན་ཀྱང་། །མཆོག་དང་ཐུན་མོང་གྲུབ་པ་ལ། །མི་བསླུར་གྲུབ་ཕྱིར་དེ་ཚད་མ། །དཔེར་ན་ཡུལ་ཆེན་སོ་སོ་ནས། །གྲུབ་པ་མཆོག་རྣམས་ཀྱིས་བླངས་པའི། །ཆོས་ཀྱང་གླེགས་བམ་སོ་སོ་ལས། །འཕགས་པའི་ཡུལ་དུ་བསྒྱུར་བ་མིན། །རྡོ་རྗེ་སེམས་དཔས་གནང་ཐོབ་པའི། །བཀའ་ཡི་བསྡུ་བ་པོ་ཉིད་ཀྱིས། །ཡུལ་ཁམས་སོ་སོའི་སྐད་ཉིད་དུ། །བཤད་པས་ཆོག་པར་གསུངས་པ་ཡིན། །རྙིང་མའི་ཆོས་ལུགས་འཕགས་ཡུལ་ནས། །འགྱུར་བར་ངེས་རྣམས་སྒྲུབ་མི་དགོས། །མ་ངེས་པ་རྣམས་བསྟན་བཅོས་སུ། །བསྒྲུབས་ལས་གྲུབ་པར་གྱུར་འདི་ཡང་། །གང་འདིའི་རྣམ་རྟོག་རང་བཟོའི་ལམ། །རྙེད་ནས་འཕྱན་པར་གྱུར་མིན་གྱི། །བོད་ཀྱི་ཡུལ་དུ་སྔོན་བྱོན་པའི། །ཆེན་པོ་རྣམས་ཀྱིས་དེར་བཤད་པའོ། །ཞེས་དང་། འགོས་ལོ་ཆེན་པོའི་དེབ་ཐེར་དུ། སྤྱིར་ན་དར་མས་བསྟན་པ་བསྣུབས་ནས་ལོ་བདུན་ཅུ་ལྷག་ཅིག་གི་བར་དུ་དབུས་གཙང་ན་རབ་ཏུ་བྱུང་བ་ནི་གཅིག་ཀྱང་མེད། རྙིང་མ་པའི་སྔགས་འཆང་མང་དུ་ཡོད་པ་རྣམས་ཀྱིས་ཡུལ་སོ་སོར་སྒྲུབ་པར་ཁྱད་པར་ཅན་གྱིས་བཀྲ་
ཤིས་པར་མཛད་ཅིང་། ཁྱིམ་པ་རྣམས་ཀྱིས་ཀྱང་དེ་དག་ལ་དད་ཅིང་ཟས་གོས་སོགས་ཀྱིས་མཉེས་པར་བྱས། བུམ་དབང་ཙམ་རེ་བླངས་ཤིང་། རྒྱུད་རིམ་གྱིས་སྨིན་པ་ལ་བརྟེན་ནས། ཀླུ་མེས་ལ་སོགས་པའི་དབུས་གཙང་མི་དྲུག་གམ་བརྒྱད་དུ་གྲགས་པ་རྣམས་བྱོན་པའི་ཚེ། ཡུལ་དང་ཡུལ་རྣམས་སུ་གཙུག་ལག་ཁང་དང་དགེ་འདུན་གྱི་སྡེ་གྲངས་མེད་པ་འཕེལ། སྔོན་རྒྱལ་བློན་གྱི་དུས་སུ་འགྱུར་བའི་བཀའ་བསྟན་བཅོས་རྣམས་ལ་མ་ཉམས་པར་ལོངས་སྤྱོད་པས་ཆོག་པ་བྱུང་། མཁས་པ་དང་གྲུབ་པའི་སྐྱེས་བུ་མང་དུ་བྱུང་བ་ཕལ་ཆེར་ཡང་། རྙིང་མ་པའི་གྲུབ་ཐོབ་བརྒྱུད་པ་ལས་བྱུང་བ་ཡིན། ཞེས་འདོམས་པར་མཛད་པ་བཞིན་ནོ། །དེ་བཞིན་གཤེགས་པས་ལེགས་པར་གསུངས་པའི་གསུང་རབ་རྒྱ་མཚོའི་སྙིང་པོར་གྱུར་པ་རིག་པ་འཛིན་པའི་སྡེ་སྣོད་དམ། སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་མཐའ་གྲུར་ཁྱབ་པའི་རྒྱན་ཅེས་བྱ་བ་ལས། གངས་རིའི་ཁྲོད་ན་བསྟན་པ་ཇི་ལྟར་བྱོན་པ་ལས་བརྩམས་ཏེ་བཙན་པོ་ཁྲི་སྲོང་ལྡེ་བཙན་གྱི་དུས་ན་གསང་སྔགས་ནང་གི་རྒྱུད་རྣམས་བྱུང་བའི་གཏམ་གསལ་བར་སྨོས་པའི་རབ་ཏུ་བྱེད་པ་སྟེ་བཞི་པའོ།། །།