ཤོག་ལྷེབ། ༢༣༢ ནས་ ༣༠༠ བར།
ད་ནི་སྔ་འགྱུར་རྡོ་རྗེ་ཐེག་པ་ལས་དངོས་གྲུབ་བརྙེས་ཤིང་གང་ལ་བཤད་སྒྲུབ་ཀྱི་བྱ་བ་བྱེད་པའི་སྐྱེས་བུ་དམ་པ་ཇི་ལྟར་བྱོན་པའི་རྣམ་གཞག་བརྗོད་པར་བྱའོ། །དེ་ལ་སེམས་ཕྱོགས་ཀྱི་ཤིང་རྟ་ཆེན་པོ་སློབ་དཔོན་བཻ་རོ་ཙཱ་ན་ལས་ཇི་ལྟར་བརྒྱུད་པ་ནི། སློབ་དཔོན་དེ་ནི་ཡུལ་ཉང་ཆབ་དང་གཙང་ཆབ་འཛོམས་པའི་འགྲམ་སྙེ་མོ་བྱེ་མཁར་རམ། ཡང་ན་བྱིས་པའི་དུས་ཀྱི་ཞབས་རྗེས་ཡོད་པས་གཙང་ཟངས་དཀར་ཞེས་པའི་གྲོང་དང་ཉེ་བར་འཁྲུངས་སོ་ཟེར་ཏེ་ཕྱོགས་གཉིས་ཡོད། དགུང་ལོ་བརྒྱད་པའི་སྐབས་སུ་ནག་མོ་རི་དང་། བྲག་པོ་ཆེ་གཉིས་སུ་ཉི་ཟེར་ལ་ཞོན་ནས་ཕན་ཚུན་དུ་འགྲོ་ཞིང་བརྡའ་སྐད་དང་ཆོས་ཀྱི་རིམ་པ་རྩོལ་མེད་དུ་མཁྱེན་པར་བྱུང་བས་སྤྲུལ་པའི་སྐུར་ཡོངས་སུ་གྲགས། དེ་ཉིད་བཙན་པོས་བསམ་ཡས་སུ་སྤྱོན་པར་བྱས་ནས་འཕགས་པའི་ཡུལ་དུ་དཀའ་བ་བཅུ་དྲུག་སྤྱད་དེ་མན་ངག་གི་ཆོས་བླངས། དང་པོར་རྒྱལ་པོ་ལ་གསུངས། དེ་ནས་ཚ་བ་རོང་དུ་སྤྱུགས་པས། རྒྱལ་རོང་བྲག་ལྷ་མགོན་པོའི་དགོན་པར་གཡུ་སྒྲ་སྙིང་པོ་ལ་གསུངས། དེ་ནས་ཚ་རོང་སྟག་རྩེ་མཁར་དུ་གསང་སྟོན་ཡེ་ཤེས་བླ་མ་ལ་གསུངས། དེ་ནས་སྟོང་ཁུང་རོང་གི་བྲག་དམར་དགོན་རྫོང་དུ་སྤངས་སངས་རྒྱས་མགོན་པོ་ལ་གསུངས། དེ་ནས་དབུས་སུ་གཉགས་དང་ལི་བཟའ་ཤེས་རབ་སྒྲོན་མར་གསུངས་ཏེ་རིམ་པ་ལྔར་གྲགས། དེ་ལས་གཉགས་ཀྱིས་སོག་པོ་དཔལ་གྱི་ཡེ་ཤེས། གྲྭ་དཔལ་གྱི་སྙིང་པོ། ལྷ་ལུང་དཔལ་གྱི་རྡོ་རྗེ། འོ་བྲན་དཔལ་གྱི་གཞོན་ནུ་སོགས་ལས་རིམ་
པར་བརྒྱུད་པའི་ལུགས་གཅིག །ཡང་སོག་པོས་སངས་རྒྱས་ཡེ་ཤེས་ལ་སོགས་ཏེ་རིམ་པར་བརྒྱུད་པའི་ལུགས་གཅིག །ཡང་གཙང་ཤཱཀ་རྡོར་གྱིས་སྤངས་རཀྵི་ཏ་ལ། དེས་ཡར་ཟི་དར་མ་ཤེས་རབ། དེས་ཟེར་མོ་དགེ་སློང་མ། དེས་མར་པ་ཤེས་རབ་འོད། དེས་ལྷ་རྗེ་ལ་བཀའ་དྲིན་ནོད་དུ་འོངས་པ་དང་། ནད་དྲག་པོ་གཅིག་བྱུང་བ། ཤངས་ཀྱི་ལང་ཟ་སྟོན་པ་དར་མ་བསོད་ནམས་ཀྱིས་བཅོས་པས། དེའི་དྲིན་ལན་དུ་རྡོ་རྗེ་མེ་ལོང་དང་། ལམ་རྣམ་བཀོད་དང་། ཟབ་མོའི་དབང་གི་མན་ངག་དང་། མདོའི་འགྲེལ་པ་ལུང་བསྟན་རྡོ་རྗེ་སོགས་བི་མ་ལས་བརྒྱུད་པའི་གདམས་པ་དང་། སེམས་ཕྱོགས་མ་ལུས་པ་གནང་ངོ་། །དེ་ལས་གསང་བདག་སྒྲོ་ཕུག་པར་བརྒྱུད་པ་དེ་བྱུང་བ་ཡིན་ནོ། །སློབ་དཔོན་བཻ་རོ་ཙཱ་ནས་སྤངས་སངས་རྒྱས་མགོན་པོ་ལ་བརྒྱུད་དེ་འཇའ་ལུས་ཤ་སྟག་བྱུང་བའི་ལོ་རྒྱུས་ནི། སྤངས་རྒན་པོའི་སློབ་མ་ངན་ལམ་བྱང་ཆུབ་རྒྱལ་མཚན་ཡིན། དེ་ནི་ཡུལ་དབུ་རུ་ངན་ལམ་རལ་གསུམ་པ་དགེ་སློང་ལོ་དྲུག་ཅུ་རྩ་བདུན་ལོན་པ་ཞིག་གིས་རྒྱལ་མོ་སྟག་རྩེ་མཁར་དུ་བྱོན། སྤངས་མི་ཕམ་མགོན་པོ་ལ་གདམས་པ་ཞུས་པས་གནང་སྟེ། ད་ཡུལ་དུ་མ་འགྲོ། ཝ་སེངྒེ་བྲག་ལ་བསྒོམ་གསུངས། སློབ་དཔོན་གྱི་བཀའ་བཞིན་ཉན་ཏེ་དེར་བྱོན་ནས་བསྒོམས་
པས་ལོ་བརྒྱ་དང་བདུན་ཅུ་རྩ་གཉིས་ལོན་པའི་ཚེ་ཕུང་པོ་ལྷག་མེད་དུ་གཤེགས་སོ། །དེ་ལ་སློབ་མ་ཟ་དམ་རིན་ཆེན་དབྱིག་བྱ་བ་མདོ་ཁམས་སྟོད་པ་ཞིག་བྱུང་། དེས་ངན་ལམ་ལ་གདམས་པ་ཞུས། བྲག་དེ་ཉིད་དུ་བླ་མ་དང་འབྲལ་བ་མེད་པར་སྒོམ་བཞིན་བཞུགས་པས། ལོ་བརྒྱ་དང་བཞི་བཅུ་ཞེ་བཞི་ལོན་པའི་ཚེ་ཕུང་པོ་ལྷག་མེད་དུ་གཤེགས། དེ་ལ་ཡར་ཀླུང་འཕྱོང་རྒྱས་ནས་ཁུ་འགྱུར་གསལ་བའི་མཆོག་ཅེས་བྱ་བའི་སློབ་མ་རྟེན་དགེ་སློང་ཡིན་པ། ལོ་ལྔ་བཅུ་རྩ་བདུན་ལོན་པ་གཅིག་བྱུང་། ཟ་དམ་རིན་ཆེན་གྱིས་གདམས་ངག་གནང་བས་ཡུལ་དུ་ལོག་པའི་བསམ་པ་སྤངས། ཝ་སེངྒེ་བྲག་ཉིད་དུ་བཞུགས་ནས་བསྒོམས་པས་ཁུ་འགྱུར་གསལ་ལོ་བརྒྱ་དང་བཅུ་བདུན་ལོན་པའི་ཚེ། ཕུང་པོ་ལྷག་མེད་དུ་གཤེགས། དེ་ལྟར་སློབ་དཔོན་གསུམ་ཀ་ཝ་སེངྒེ་བྲག་ཅེས་བྱ་བར་སྦྲུལ་གྱི་ལོ་གཅིག་སྟེང་ལ་གཅིག་སྐུ་ན་བུན་ནམ་འཇའ་ཚོན་ཡལ་བ་བཞིན་དུ་གཤེགས་སོ། །དེ་ལ་སློབ་མ་བྱང་ཆུབ་གྲགས་ཞེས་བྱ་བ། ཡུལ་ཉང་གཡུ་འབྲུག་སྟོད་པ་རྟེན་དགེ་སློང་ལོ་བཞི་བཅུ་རྩ་གཉིས་ལོན་པ་ཞིག་བྱུང་། ཁུ་འགྱུར་གསལ་བ་ལས་གདམས་པ་ཞུས་ནས་ཡར་ལོག །བསམ་ཡས་མཆིམས་ཕུར་སྒོམ་གྱིན་བཞུགས་ཙ་ན། དབུ་རུ་ཞྭའི་ཉང་ཤེས་རབ་འབྱུང་གནས་ཞེས་བྱ་བ་དགེ་སློང་བགྲེས་པོ་གཅིག་བཞུགས་འདུག་པ་དང་མཇལ། ཁོང་ན་རེ། བསྙེན་པར་རྫོགས་
ནས་ལོ་ང་རྒན་ཡང་གདམས་པ་ཁྱེད་ཆེ་བར་འདུག །རྗེས་སུ་བཟུང་འཚལ་ཞུས་པས། མྱང་བྱང་ཆུབ་གྲགས་ཀྱིས་ཁོང་ལ་གདམས་པ་རྣམས་བྱིན། ཕུག་པོ་ཆེ་དང་ཡང་རྫོང་དུ་བཞུགས། རང་གི་སློབ་མ་དང་ཡང་སློབ་དག་ལ་འབྱུང་བཞི་ཟད་པར་གྱི་སྤྲུལ་བསྒྱུར་བསྟན། མཐར་རང་ཉིད་གཙང་རྒྱ་མ་ཉེ་དུ་ཁའི་ཕུང་པོ་རི་བོ་ཆེ་ལ་ད་ལྟ་རང་འདུག་པའི་འཕྲོ་ལ་རི་ཟུར་ན་ཡར་སྐུ་ལུས་སྤྲིན་ཆད་པ་བཞིན་དུ་ཕུང་པོ་ལྷག་མེད་དུ་གཤེགས་སོ། །དེར་ཉང་ཤེས་རབ་འབྱུང་གནས་ཀྱི་མཆིམས་ཕུ་དཔལ་གྱི་ནགས་ཁྲོད། སྒྲགས་ཀྱི་ཡང་རྫོང་ཕུག་པོ་ཆེ་རྣམས་སུ་བཞུགས། དེར་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་མངོན་དུ་ཤར་ནས། ཕུག་པོ་ཆེ་ལྷ་རིའི་རྩེ་མོ་ལ་ཡོད་པའི་ཤུག་པ་རྐང་གཅིག་པར་ན་བཟའ་དང་ཕྲེང་བ་དང་། ཀ་པཱ་ལ་རྣམས་གཟེད་ནས། སྐུ་ནམ་མཁའ་ལ་འཇའ་ཚོན་དེངས་པ་བཞིན་སོང་ངོ་། །དེ་ལ་སློབ་མ་ཡུལ་ལོ་མོ་བ། རུས་སྦ་ཡིན་པ་གཅིག་བྱུང་བས་སློབ་དཔོན་སྦ་སྒོམ་དུ་གྲགས། དེ་རང་གི་ཡུལ་ན་ཡོད་པའི་ཚེ་འཁྲུག་པ་ཡོད་པས། ཡུམ་ན་རེ། བུ་འདི་སྲིང་མོ་དྲུག་གི་མིང་པོ་གཅིག་པོ་ཡིན། སློབ་དཔོན་ཤེས་རབ་འབྱུང་གནས་ལ་འཆོལ། མ་ཤི་བ་རང་གིས་ཆོག་ཟེར་ལོ་བཅུ་དྲུག་པ་གཅིག་ཉང་ལ་བཅོལ་ནས་ཡོད་ཙ་ན། སྔར་གྱི་ཉང་བྱང་ཆུབ་གྲགས་པ་དེ་ཕུག་པོ་ཆེ་དང་། ཡང་རྫོང་དང་། མཆིམས་
ཕུ་རྣམས་སུ་ཤ་བ་གཅིག་ཁྲིད་ནས་འབྱོན་པས། ཉང་ཤ་བ་ཅན་ཞེས་ཀྱང་གྲགས། ཕུག་པོ་ཆེར་ཕྱི་མའི་རེས་བྱོན་ཙ་ན། ངས་ཁྱོད་གཉིས་ལ་ལྟད་མོ་གཅིག་བསྟན་གྱིས་ལྟོས་ཤིག་གསུངས། དེར་སློབ་དཔོན་ཤེར་འབྱུང་དང་། སྦ་སྒོམ་གཉིས་ཀྱིས་གཡས་གཡོན་ནས་བལྟས་ཙ་ན། སློབ་དཔོན་དབུས་ན་ཡོད་པ་དེ་མི་སྣང་བར་སོང་། དེར་ངོ་མཚར་སྐྱེས་ནས་ཡོད་ཙ་ན་རླུང་འཚུབ་ཁྲུ་གང་བ་གཅིག་ཏུ་གྱུར་ནས་ཕར་བསྐྱིལ་ཚུར་བསྐྱིལ་བྱས། དེ་མེར་སོང་། དེ་ཡང་ཆུ་གཏོར་གཏོང་བའི་མཁར་གཞོང་གཅིག་ཏུ་འཕོས་ནས་ཆུར་ལྟེམ་གྱིས་སོང་། དེ་ས་འཚུབ་གཅིག་གི་ངང་ལ་སློབ་དཔོན་རང་དུ་ཀྲོང་གིས་སོང་། དེ་ལྟར་འབྱུང་བཞི་ཟད་པར་གྱི་སྐྱེ་མཆེད་ལ་དབང་བསྒྱུར་ནས་འདི་སྐད་དུ། འབྱུང་བའི་སྙིགས་མ་དྭངས་ནས་དྭངས་མ་མ་ཡལ་བའི་བར་དུ་དེ་ལྟར་འོང་བ་ཡིན། ཤེས་རབ་ཀྱི་སྒོམ་རྒྱུ་མེད་པའི་དོན་མཐོང་ཡང་། བརྡའ་ལ་ཡེངས་པ་མེད་པར་བསྐྱངས་ན་དེ་ལྟར་དུ་རང་དབང་ཐོབ་པ་ལ་ཚེགས་མེད། མ་ཡེངས་པར་སྐྱོང་བ་གལ་ཆེ་བ་ཡིན་གསུངས། དེ་ནས་རེ་ཞིག་ན་སྦ་སྒོམ་གྱིས་བལ་བུའི་ནགས་ལ་ཤིང་འཐུ་བར་ཕྱིན་པས། ཁོང་རང་གི་འཇགས་སྤྱིལ་མེ་དམར་བུན་བུན་འདུག་པ་མཐོང་། སློབ་དཔོན་ནི་མེ་མི་འབུད་མེ་ཤོར་བ་ཡིན་ནམ་སྙམ་པ་ལྟར་ཕྱིན་པས་འཇགས་སྤྱིལ་སྔར་བཞིན་ལས་མེ་མི་སྣང་། སློབ་དཔོན་ལ་དེ་ཅི་ཙུག་ཡིན་དྲིས་པས། ངས་མེའི་ཏིང་ངེ་
འཛིན་ལ་མཉམ་པར་གཞག་པ་ཡིན། ངའི་བླ་མ་ཉང་བྱང་ཆུབ་གྲགས་པའི་དེ་མི་དྲན་ནམ་གསུངས། ཡང་སྐབས་ཤིག་སློབ་དཔོན་གྱི་བཞུགས་སར་ཆུ་ལྟེམ་མེ་འདུག་པ་མཐོང་། མཐར་སློབ་དཔོན་གྱིས། ང་མི་འདུག་ན་ལྷ་རིའི་རྩེ་མོ་ལ་ལྟོས་ཤིག་གསུངས། རེ་ཞིག་ན་སློབ་དཔོན་མ་བྱུང་ནས་རི་ལ་སྐྱོ་སེང་ལ་བཞུད་པ་ཡིན་གྱི། སང་དགོང་འབྱོན་དུ་འོང་སྙམ་ཙ་ན་ཡང་མ་བྱོན། བལྟར་ཕྱིན་ཙ་ན། ན་བཟའ་དང་། དབུ་ཞྭ་དང་། བྷོ་དྷི་ཙིའི་ཕྲེང་བ་ལ་སོགས་པ་ཤུག་པ་ལ་གཟེད། སློབ་དཔོན་ཕུང་པོ་ལྷག་མེད་དུ་གཤེགས་སོ། །འདི་ནི་རང་བཞིན་རྫོགས་པ་ཆེན་པོ་ལ་ནམ་མཁའ་དང་མཁའ་འགྲོའི་འཆི་ལུགས། མེ་དཔུང་དང་རིག་འཛིན་གྱི་འཆི་ལུགས་ཞེས་པའི་ཡ་གྱལ་གཅིག་ཡིན་ནོ། །སྦ་སྒོམ་ལོ་ཉི་ཤུ་རྩ་བཞི་ལོན་ཙ་ན་ཉང་ཤེར་འབྱུང་གིས་གདམས་པ་བཏབ་པ་ཡིན། སྦ་སྒོམ་འདི་རྟེན་དགེ་བསྙེན་དུ་བཞུགས། མཚན་ཡེ་ཤེས་བྱང་ཆུབ་ཏུ་གྲགས། རྟོགས་པ་ཁྱད་པར་ཅན་མངའ། རྡོ་ལ་འདམ་རྫབ་ལྟར་མཛད། བྲག་ལ་སྐུའི་པར་འདེབས། དགུང་ལོ་དགུ་བཅུ་རྩ་བརྒྱད་ལོན་པའི་ཚེ་སྐུ་སྙུན་པ་མེད་པར་གཤེགས། ཇོ་མོ་གང་མོས་ཕྱི་རོལ་གྱི་མི་རྣམས་ལ་སྤུར་མཇལ་མ་བཏང་བར། མཆོད་ཁང་དུ་སྤུར་མེ་ལ་སྦྱངས་པས། འོད་རྫ་མ་ཙམ་ཞིག་ནམ་མཁའ་ལ་འགྲོ་བ་ཕྱི་རོལ་
གྱི་མི་ཀུན་གྱིས་མཐོང་། ཤུལ་དུ་གདུང་རུས་གཅིག་ཀྱང་མ་བྱུང་ངོ་། །དེའི་སློབ་མ་ནི་འཛེང་སྟེ། ཡུམ་མཚར་དགུ་སྐྱིད་དེ་ཞེས་བྱ་བ་ཡར་ཀླུང་ཐང་ཆུང་པའི་མ་ཇོ་ཡིན། ཐང་ཆུང་བཙན་པོའི་བུ་ཆེ་བས་ཕབ་ནས་འཛེང་འཁྲུངས། ལོ་བཅུ་དྲུག་ལོན་པའི་དུས། འགྲུལ་ཟླ་ཁ་ཤས་དང་བཅས་དོལ་གྱི་གདོང་སྣར་ཚོང་ལ་ཕྱིན་ཙ་ན། དོལ་གྱི་འཚེར་ཆུང་ན་མི་མང་པོ་སྤུངས་འདུག །བལྟར་ཕྱིན་པས་དམ་པ་རྒྱ་གར་དང་མཇལ་ཟླ་བ་བཅུ་བཞི་དམ་པའི་ཕྱག་ཕྱིར་འབྲངས། གཙང་གི་གནས་གཞི་བཟངས་ཅན་དུ་སླེབས་ཙ་ན། དམ་པས་སྣམ་བུ་གཅིག་གནང་ནས། ཁོང་ངང་ཐུང་འདུག་པས་ཁྱོད་རང་ཡུལ་དུ་ལོག །དྭགས་པོ་ནས་ཁམ་བུ་ཁྱེར་ལ་ཤོག །དོལ་དུ་འགྲོ་བའི་ཟླ་བོ་འདུག་གོ་གསུངས། དེར་འཛེང་གི་ལམ་དུ་ཞུགས་པ་ན། དམ་པ་ཚུར་བྲེང་གིས་བྱོན། འཛེང་གི་མདན་པ་གཉིས་ནས་འཇུས་ཏེ། ཅི་ཡང་མ་ཡིན་གནས་གྱུར་པ། །གནས་གྱུར་པ་ལ་གཉིས་འཛིན་མེད། །ཅེས་གསུངས་ནས་མགོ་ཐུག་ལན་གཉིས་རྒྱབ་པས། སེམས་ཧང་ངེ་བ་ལས་ཤེས་པ་བཀྲ་གསལ་བ་ཞིག་བྱུང་། ཁ་ནང་ན་ཆུ་ཁྱིལ་ལེ་སྣང་། དེ་ནི་དམ་པས་བྱིན་གྱིས་བརླབས། རྡོ་རྗེ་ཟམ་པ་དང་མཇལ་བའི་ལུང་བསྟན་པར་འདུག་སྟེ། དུས་ཕྱིས་ལས་མ་གོ་གསུངས། དམ་པས་རྟེན་འབྲེལ་འགའ་ཙམ་དང་། སྔགས་ཀྱི་གནད་མང་དུ་གནང་།
རྒྱ་རོ་ཚལ་མར་ཡི་གེ་དྲུག་པའི་གདམས་ངག་གནང་ནས་བསྒྲུབས་པས་བྱིན་རླབས་ཆེན་པོ་བྱུང་། ཡང་ཆུ་བོ་ཆེན་པོ་འདིའི་ཤར་ཕྱོགས་ན། ཙན་དན་གྱི་ནགས་ཡོད། དེ་ན་ཁྱོད་ཀྱི་བླ་མ་ཡོད་གསུངས་ནས་ལུང་བསྟན། དེ་ནས་དབུས་སུ་བྱོན། ཨ་ཁུ་དཔལ་འབར་ལས་ཁྲག་འཐུང་དང་དཔེ་དཀར། གནུབས་ཤང་པོ་ཆེ་ལ་ཀྲི་ཡ་དང་ཁ་འབར་མའི་གཏོར་ཆེན་ཞུས། ཁོང་གིས་གཙང་དུ་བ་རི་བལ་འབུལ་བ་བསྐྱེལ་དུ་བཏང་བས། བ་རི་ལའང་འཇམ་དཔལ་དང་ཁྱུང་སྒྲུབ་ཞུས། དགེ་བཤེས་སྦོ་ལ་སྔ་འགྱུར་རིགས་ཞུས། དེ་ནས་སུམ་ཅུ་རྩ་ལྔ་ལོན་པའི་ཚེ་ངོམ་ཤོད་རྒྱུད་ལྕང་ཚིགས་སུ་བྱོན། ཕུག་པོ་ཆེའི་ལ་ཁ་ན་དགེ་བཤེས་བཙན་ཁ་བོ་ཆེ་རྒྱ་གར་ནས་བྱོན་མ་ཐག་པ་ཞིག་ཇོ་མོ་བས་སྤྱན་དྲངས་ནས་ཆོས་དང་བཟའ་དང་ལྟད་མོ་ཡོད་ཟེར། ནངས་པར་སྔ་བར་བྱོན་ཙ་ན། བུད་མེད་ཅིག་ན་རེ། ཁྲ་བ་ནས་ལམ་ཟུར་འདི་ནས་ཡར་ཕྱིན་ན། སློབ་དཔོན་སྦ་སྒོམ་བྱ་བ་ལྟོ་སྟེར་བ་ལ་ཡངས་པ་ཞིག་ཡོད་ཟེར། ཕྱིན་པས་རྣལ་འབྱོར་པ་ཚོ་གཅིག་གིས་ཀྱང་སླེབས་ནས་ཚ་བ་དྲངས། ཕྱེ་ཟངས་ཀྱིས་ཁྱེམ་བུ་རེ་ཡང་གཏོང་གི་འདུག་དེ་ཚོར་བྱིན་ཟིན་ནས། དེ་ནས་གསར་བུ་གཅིག་ཀྱང་འདུག་གསུངས་ནས་ཆུ་བུམ་པ་གང་ལན་དུ་བཅུག །ཆུ་གཏོར་མཛད་ནས་ཕུག་ཆུང་ཟུ་རར་ཁྲིད།
ཚོད་མ་ཀེ་རུ་ཕོར་པ་གང་བྱིན། དེ་ནུབ་ཀྱང་བཟའ་བྱིན་ནས་བྲག་རྩ་ཞིག་ཏུ་ཉལ། ནངས་པར་འགྲོ་དགོས་སེམས་ཙ་ན། ཡང་ལྟོ་བྱིན་ནས་ངའི་ཉེ་གནས་བཙུན་ཆུང་གཅིག་ཡོད་པ་ཟོ་ཐང་དུ་གསེར་ལེན་དུ་སོང་བ་ཆར་ཆེས་པས་མ་བྱུང་། ཤིང་ཞིག་འཐུས་གསུངས། དེར་ནགས་ཁྲོད་ནས་ཤིང་ཁུར་ཆེ་བ་གཅིག་བསྐྱེལ་བས། སྦ་སྒོམ་མཉེས་ནས་ཕྱག་རྒྱ་ཆེན་པོ་བརྡའི་མན་ངག་དང་། རྫོགས་པ་ཆེན་པོ་སྐོར་བདུན་རང་ཆས་བྱ་བ་བཤད། དེར་ཉེ་གནས་ཀྱང་བྱུང་། ངེད་མ་སླེབས་པས་སློབ་དཔོན་འོ་བརྒྱལ་སེམས་ཙ་ན་ཁྱེད་ཀྱི་གོ་བཅད་འདུག་པ་དང་ད་དུང་ཞག་འགའ་ཙམ་བཞུགས་ཟེར། ཡང་ཡར་ཀླུང་ལན་གཅིག་བསྐོར་ནས་བྱུང་། དེར་སྦ་སྒོམ་གང་ཟག་ཁྱད་པར་ཅན་དུ་ཤེས་ནས་ཡུལ་དུ་མ་ཕྱིན་པར་འོན་དང་ཟངས་རི་ཡན་ཆད་དུ་བསོད་སྙོམས་བྱས། སྒྱེ་གཅིག་ཉོས། ནས་སྒྱེ་གང་དང་བཅས་པ་སློབ་དཔོན་སྦ་སྒོམ་ལ་ཕུལ་པས། ཁྱོད་ཀྱིས་ངའི་གཡོག་བྱས་པ་ཡིན་པས་དེས་རུང་། འདི་ལ་ཁྱོད་རང་གི་རྒྱགས་ཀྱིས། ང་ལ་མན་ངག་རྡོ་རྗེ་ཟམ་པ་ཞེས་བྱ་བ་སྐད་ཅིག་མས་དོན་རྟོགས་ནས་ཚེ་གཅིག་ལུས་གཅིག་ལ་ཕུང་པོ་ལྷག་མེད་དུ་སངས་རྒྱ་བའི་བརྒྱུད་པ་བྲེང་མ་ཆད་པ་གཅིག་ཡོད། དེ་གོང་ཕན་ཆད་སུ་ལའང་མ་སྨྲས་པ་ཡིན། ད་ཁྱོད་ལ་སྦྱིན་ནོ་གསུངས། ནས་ནན་གྱིས་ཕུལ་ནས་འདི་
སློབ་དཔོན་རང་ལ་བསྔགས་པ་ཡིན། གདམས་ངག་ཐུགས་ལ་གདགས་པར་ཞུ་རྒྱགས་རྙེད་དེ་འོང་བྱས་པས། ཕྱག་གཡོན་པས་སྤྱི་བོ་ནས་བཟུང་གཡས་པས་ལྟག་ཁུང་ནས་རྟབ་རྟབ་བྱེད་ཅིང་། འོར་ཆེ་དམ་ཚིག་ཅན་དུ་འདུག །གདམས་ངག་གིས་ཕན་ཐོགས་པར་གདའ་གསུངས། དེར་ལོ་ཆུང་གི་སྔགས་པ་གཅིག་ལ་གཤིན་རྗེ་དམར་པོའི་སྒྲུབ་ཐབས་ཤིག་བྱིན་པས། སྲན་ནས་ཁལ་བརྒྱད་བྱུང་། འོ་མ་དང་ཕྲུམ་དུ་སྲུང་སྐྱོབ་ཞག་རེ་ཙམ་དུ་བྱས་པས་ཆོས་རྒྱགས་ལྡང་བ་རྙེད། དེར་རྡོ་རྗེ་ཟམ་པའི་བྱིན་རླབས་ཞུ་བ་ལ་ཚོགས་ཀྱི་ཡོ་བྱད་མ་ཚོགས་པའི་ངང་། སློབ་དཔོན་གྱིས་བྱིན་རླབས་ད་ལྟ་བྱ། ཕྱི་ནས་བར་ཆད་འོང་གསུངས། གངས་བར་དུ་གྲོགས་པོ་གཅིག་ལ་སེར་མོ་གཅིག་བཅོལ་བའི་རིན་སློང་དུ་ཕྱིན་པས། མ་ཇོའི་ཤམ་ཐབས་གཅིག་ཐོབ། དེའི་རྣམ་པ་ཚོ་ཕྲལ་ནས་བཙོངས། ཆང་ཕུད་དང་། གཏོར་མ་ནས་བྲེ་ལྔ་རྣམས་ལ་བརྟེན་ནས། མར་མེའི་དོད་ཉིན་པར་བྱའོ་གསུངས་ནས་གྲོལ་ལམ་དབང་བཞི་རྫོགས་པར་བསྐུར། གདམས་ངག་མ་ལུས་པ་གནང་། ཕྱི་ནས་ཀྱང་བྱིན་བརླབས་ལན་བཞི་ཙམ་ཞུས། ནས་དང་གསེར་ལ་སོགས་པའི་འབུལ་བ་ལན་ལྔ་བསྐྱལ། རེ་ཞིག་ན། སྣང་བ་འདི་ཀུན་རྫུན་པའི་ཆོས་ཅན་ཡིན་གསུངས་ནས། ཆུ་རྡོ་གཅིག་ལ་ཕྱག་
ཆར་གྱིས་བརྒྱབ་པས་གྲུ་མོ་ཡན་ཆད་ཐིམ་གྱིས་སོང་། ཡང་སྐུ་ལུས་ཕྱིར་བཤིགས་མཛད་པས་བྲག་ལ་འདམ་གྱིས་ཐལ་ནས་རྗེས་ཝལ་ལེ་བྱུང་། ཕུག་ཆུང་སྟོད་ནས་སྟ་སྟངས་ཀྱིས་ཤུག་པའི་གདུང་མང་པོ་བཀུག །ཇོ་མོའི་མཆོད་ཁང་ཕུག་པའི་ཤིང་ཡིན་གསུངས། དེ་ལྟ་བུའི་སློབ་དཔོན་ལས་རྡོ་རྗེ་ཟམ་པའི་སྐོར་མ་ལུས་པ་ཐོབ་ཅིང་གཞན་ཡང་ཇོ་བོ་རྗེའི་ཕ་རོལ་ཏུ་ཕྱིན་པའི་ལམ་རྐྱང་ཁུག་སོགས་ཀྱང་ཐོབ། དེ་བཞིན་དུ་ཡུ་མོ་ལས་སྦྱོར་དྲུག །ཁམས་པ་ལུང་པ་ལ་ཐུན་བརྒྱད་མ། སྣེའུ་ཟུར་པའི་སློབ་མ་ལས་དམིགས་པ་སྐོར་གསུམ། ཤོད་བུ་ལོ་ཙཱ་བ་ལས་འགྲེལ་ཆུང་། དགེ་བཤེས་གྲོལ་སྒོམ་ལས་ནཱ་རོའི་ཐབས་ལམ་ཞུས་ཤིང་། རྡོ་རྗེ་ཟམ་པ་ཕར་ལ་བཤད། སྙུན་གདངས་ལ་སྒྲོན་སྤྲུལ་དང་རྒྱབ་ཤ །རྫ་བོར་ལ་བདུད་རྩི་ཐིགས་གསུམ། རི་ཁྲོད་དུ་རླུང་ཆུང་ལས་རྣལ་འབྱོར་རྒྱུད་ཚིགས་གསུམ། རླུང་དམ་ཆེན་པོ་ལས་དོ་ཧའི་མན་ངག །ལབ་སྒྲོན་ལས་གཅོད་ཡུལ། རྒྱལ་བ་སྦོ་སྟོན་ལས་སྡེ་སྐོར་བདུན་པ། གནུབས་ཤངས་ལས་ཆེན་ལས་བ་རི་བའི་ཀྲི་ཡའི་ཆོས་བཅོ་ལྔ། དིང་རི་ཀུན་དགའ་ལས་གདམས་པ་སྣ་ཚོགས་སོགས་ཐོབ་པ་ཤིན་ཏུ་མང་། དྭགས་པོ་ལྷ་རྗེ་ལས་ཆོས་དྲུག་དང་སྐྱེས་སྦྱོར་ཞུས། རྟོགས་པ་ཉམས་བསྡུར་བས་ཤིན་ཏུ་མཉེས། སྤྱན་སྔ་རྣལ་འབྱོར་གྱི་གྲྭ་ས་རུ་སྤྱོད་པ་བྱས་པས་བརྟུལ་ཞུགས་ཅན་དུ་གྲགས། གྲོགས་མཆེད་
ཀྱང་ཨ་ཙ་ར་སྟག་ཤམ་ཅན་དང་། བླ་མ་དབུ་འདྲེན་པ་དང་། བླ་མ་ཐུད་ཁ་འབར། བླ་མ་དྲེད་འབྱོར། ཞང་འགྲོ་སྨྱོན་པ་ལ་སོགས་དེ་ཙ་ནའི་རྣལ་འབྱོར་གྱི་དབང་པོ་ཤ་སྟག་དང་འགྲོགས། གཙང་དུ་གཅེར་བུ་ལོ་ལྔ་བྱས། གཞན་ཡང་སྣང་བ་ལ་ཐོག་བརྫིས་ཤིན་ཏུ་ཆེ་བས་དགུན་འཁྱགས་པའི་རུམ། དབྱར་ཆུ་བོའི་གཞུང་། མ་ངེས་པའི་གཡང་རོང་ཟབ་མོར་མཆོངས་པ་དང་། མགོ་རྡེབ་པ་དང་། མཚོན་བརྡེག་པ་ལ་སོགས་ཏེ་སྤྱོད་པ་ཚན་པོ་ཆེ་མ་བྱས་བྱ་བ་མེད་པས་དཔའ་བོ་འཛེང་ཆུང་དུ་གྲགས། སོ་མང་བཙན་ལ་ཕྱག་རྒྱ་ཆེན་པོ་བཏབ་པས་འཁྲུལ་སྣང་ཡེ་ཤེས་སུ་གནས་འགྱུར། རི་ཁྲོད་ཀླུང་ཆུང་བ་དང་། དངུལ་མོ་རྒྱ་ལེ་ལྕམ་ལ་ཡི་གེ་བཞི་པ་དང་རྫོགས་ཆེན་བཏབ་པས་འཁྲུལ་ཞིག་ཆེན་པོར་གྱུར་ཏེ་མཐར་ཕུང་པོ་ལྷག་མེད་དུ་དེངས། དེ་བཞིན་དུ་མ་ཇོ་དད་པ་ཅན་དང་། ཁམས་པ་སྙིང་རུས་ཅན་ཞིག་ལ་རྡོ་རྗེ་ཟམ་པ་བསྟན་པས། མཇོ་མོ་ན་ཁ་ཟེར་མོའི་མཚོ་དང་། ཁམས་པ་ཀོང་པོ་མཚོ་རྫོང་དུ་ནམ་མཁའ་དང་མཁའ་འགྲོའི་འཆི་ལུགས་ཀྱི་ཕུང་པོ་ལྷག་མེད་དུ་སོང་། རས་པ་སྒོམ་སྟག །ཤོ་རས། རྒྱ་རས། རླུང་རས་སོགས་ལ་གདམས་པ་བཏབ་པ་ཙམ་གྱིས་བདེ་དྲོད་འབར། དེ་བཞིན་དུ་ཆོས་ཉིད་བསྟན་པ་ཙམ་གྱིས་རྟོགས་གྲོལ་དུ་སོང་བ་ཤིན་ཏུ་མང་། འཛེང་དྷརྨཱ་བྷོ་དྷི་ཉིད་ཀྱི་གསུང་ནས་ཀྱང་། ངའི་གམ་དུ་ལོ་ཙཱ་བ་ཡང་བཞི་ཙམ་བྱུང་། རབ་བྱུང་
དང་། སྟོན་ཆེན་དང་། སྒོམ་པ། སྒོམ་མ་ཡུས་པོ་ཆེ་རང་མཐོང་ཅན་མང་ཞིག་བྱུང་། ཚུལ་བཞིན་ཉམས་སུ་ལེན་པ་ཨ་ཅང་ཆེ་སྟེ། དྭགས་པོར་ཉམས་ལེན་ཨེན་རེ་བྱེད་པའི་ཉ་མ་བཅུ་གཅིག་ཙམ། དང་པོར་འཆི་དུས་ཐེབས་པ། འཆི་ཁར་གནད་གཅོད་མེད་པ། རོ་ལ་འཇའ་ཟུག་པ་བྱུང་བ་ཡིན། ངའི་གདམས་པ་འདི་ལ་བལ་མ་བལ་ལས་བྱེད་པ་དང་། ཕ་མ་སྲིའུ་གསོ་བ་འདྲ་བའི་ཉམས་ལེན་ལོ་ལྔ་དྲུག་གཅིག་བྱས་ན། ཕུང་པོ་ལྷག་མེད་དུ་སོང་ནས་ཤུལ་དུ་མིའི་ལུས་པོ་མི་ཡོང་ངེས་གསུང་། རྫུ་འཕྲུལ་གྱི་བཀོད་པ་རྒྱ་མཚོ་ལྟ་བུ་ལ་དབང་འབྱོར་པས་རེས་སྐུ་ལུས་འཇའ་རུ་འཁྱིལ། རེས་ཞབས་ས་ལ་མི་རེག་པར་གཤེགས། སྣང་སེམས་རོ་གཅིག་ཏུ་འདྲེས་པས་ཐག་རིང་པོའི་ས་ཡད་ཡུད་ཙམ་ལ་འཁོར། གཞན་སེམས་ཤེས་པ་ལ་སོགས་པའི་མངོན་པར་ཤེས་པ་ཐོགས་མེད་མངའ་བས་མ་འོངས་པ་ཐམས་ཅད་ལུང་སྟོན། ལྷའི་མིག་དག་པས་ཇོ་སྲས་མ་རྡོ་རྗེ་སྐྱིད་ཀྱི་བུ་ནམ་ཕྱེད་ན་གཉིད་ལོག་པ་རྒྱ་མཐོངས་ནས་མར་སྦབ་ཏུ་འཆོར་ལ་ཁད་པ་གཟིགས། སྣང་བ་ལ་ཉིན་མཚན་མེད་པས་ནུབ་མོ་སྦུར་མའི་ཁྲོད་དུ་རྒྱ་ཁབ་ལྷུང་བ་བདེ་བླག་ཏུ་མཐོང་བ་སོགས་ཡོད། ཕྱི་རེས་གཙང་དུ་ལོ་བདུན་བཞུགས་ནས་སླར་ཕུག་པོ་ཆེར་བྱོན་པས། སློབ་དཔོན་སྦ་སྒོམ་གྱིས་ནམ་མཁའ་འདི་ཁོང་དུ་ཆུད་པར་གྱིས། དེ་རྟེན་མེད་དུ་རྟོགས་ན་སྒོམ་མེད་ཀྱི་གཟེར་ཆེན་
ཐེབས་པ་ཡིན་གསུངས་པས་ངེས་ཤེས་གཏིང་ནས་འདྲོངས། དེ་ནས་དྭགས་པོ་ཞུ་རུ་བླ་མ་ཞལ་གདམས་ལ་གུ་རུ་ཞི་བ་སྡེ་སྐོར་བདུན་པའི་གདམས་པ་ཞུས། དེའི་ལྷ་ཟུར་དགོན་པར་བརྡའ་བཞི་ལོ་གསུམ་བསྐྱངས་པས། ཆོས་ཐམས་ཅད་ལ་བྱན་ཆུད། སྤྲོས་བྲལ་གྱི་དགོངས་པ་ནམ་མཁའ་ལྟ་བུར་སོང་། ལར་དཀའ་ཐུབ་ལ་ཤིན་ཏུ་བཟོད་པས། ཕུག་པོ་ཆེར་རྡོ་རྗེ་ཟམ་པ་ཞུས་ནས་བདུད་རྩིའི་དཀའ་ཐུབ་མཛད་པས་རིམ་གྱིས་བརྫི་བར་མ་ནུས། གནུབས་ཤངས་པོ་ཆེའི་དྲུང་དུ་བླ་མའི་བྲན་གྱིས་དཀའ་ཐུབ་བྱས་པས་གར་ཕྱིན་དུ་བླ་མས་ཐུགས་ལ་འདོགས། དམ་པ་རྒྱ་གར་གྱི་དྲུང་དུ་རྟོག་དཔྱོད་ཀྱི་དཀའ་ཐུབ་བྱས་པས་ཆོས་ཐམས་ཅད་ལ་རང་བྱན་ཆུད། སྐྱིད་ཁུང་དུ་ཕུར་པའི་བཟླས་པ་ལ་དཀའ་ཐུབ་བྱས་པས་འཇིག་རྟེན་གྱི་ལྷ་འདྲེས་ཅི་སྨྲས་ཉན། ཇོ་བོ་བཀའ་གདམས་པའི་ས་རུ་ཞི་དུལ་གྱི་དཀའ་ཐུབ་བྱས་པས་གར་ཕྱིན་དུ་གཞན་གྱིས་བྱམས། ཡི་གེ་བཞི་ལ་མི་སྡོད་པ་གསུམ་གྱི་དཀའ་ཐུབ་བྱས་པས་བདེ་དྲོད་འབར་ནས་གཅེར་བུ་ལོ་ལྔ་བྱས། དེ་ལ་ངེས་ཤེས་སྐྱེས་ནས་ཕག་མོ་མངོན་བྱུང་ལ་སྒྲུབ་པའི་དཀའ་ཐུབ་བྱས་པས། འགུར་མོའི་ནུབ་ཕྱོགས་སུ་རྗེ་བཙུན་མའི་ཞལ་གཟིགས། བརྡའ་མང་པོ་གནང་། གནུབས་ཡུལ་རོང་དུ་རྨི་ལམ་སྦྱངས་པས་སྣང་བ་ཐམས་ཅད་རྨི་ལམ་དུ་ཤེས། གཞུ་སྟོད་ཏི་སྒྲོའི་ཤེལ་
ཕུག་ཏུ་ཁྲོ་བོ་བདུད་རྩི་འཁྱིལ་པའི་ཞལ་མཐོང་། མི་མ་ཡིན་གཅིག་གིས་བསྙེན་བཀུར་ཆེར་བྱས། བཙུན་གཟུགས་གཅིག་ནམ་མཁའ་ལ་འཕུར་ནས་ཕར་འགྲོ་ཚུར་འགྲོ་བྱེད་པ་མཐོང་། བཙལ་བས་མ་རྙེད། མི་ཡིན་མིན་མ་ཤེས་གསུངས། དྭགས་པོ་ཞུ་རུར་ཨ་ཛི་བསྒྲུབས་པས་ཉི་མ་དྲོ་ཁར་ཞལ་གཟིགས། དམ་བསྲེ་བྱེད་སྙམ་ཙ་ན་ཇོ་མོ་ཕྱལ་ལོ་བྱོན་ནས། བུད་མེད་ཅན་ཟེར་ནས་འོད་གཅིག་ཏུ་ཡལ། ལྷ་ཟུར་དུ་བཅུད་ལེན་གྱི་སྒྲུབ་པ་བྱས་པས་ཚེ་དཔག་མེད་ཞལ་མཐོང་། ཆོས་མང་པོའི་རྣམ་གཞག་རྒྱུད་ལ་ཤར། ཨོ་དཀར་བྲག་ཏུ་སྒྲུབ་པ་མཛད་པས་བདེ་མཆོག་ཡབ་ཡུམ་ཞལ་གཟིགས། ལན་ཅིག་འགྲོ་སྙིང་འདོད་པ་ཞིག་བྱུང་ནས། མོན་འགར་གྲོང་མོ་ཆེའི་མདུན་དུ་བྱོན། ཆུའི་རྫིང་མོ་ཞིག་ལ་ཐུབ་ཆོད་བྱས་མཆོངས་པས། འཁྱག་པ་ཆག་ནས་ཆུར་བྱིང་། སྐྱེངས་པའི་རྣམ་རྟོག་ཅིག་ཤར་ཙ་ན། ཆུ་ལ་རླངས་པ་ནམ་མཁའ་མི་མཐོང་བ་ཙམ་བྱུང་། མི་རྣམས་ངོ་མཚར་སྐྱེས་ནས་དགུན་གྲང་བདོ་བ་ལ་ཆུ་ལ་དེ་ཙམ་ཚུགས་པ། ལྕགས་བསྲེགས་ཆུ་ལ་བཙུད་པ་འདྲ་བ་བྱུང་ཟེར། རང་ལ་འཁྱགས་པའི་སྣང་བ་ནི་བྱུང་གསུང་། ཡང་ལན་གཅིག་ཇོ་མོ་དང་གཉིས་ཀྱིས་ཤིང་འཐུར་ཕྱིན་པས་ཤིང་ཁུར་ཆེ་བ་གཅིག་རྙེད། དེ་ཁུར་ནས་མཐའ་ཆེན་པོ་ཞིག་གི་ཁར་སླེབ་པ་དང་། འདི་ནི་རྨི་ལམ་དུ་འདུག་སྙམ་ནས་མཆོངས་པས་བྱ་བབས་པ་བཞིན་དུ་སོང་། ཇོ་མོ་ན་རེ་བླ་མ་ཁྱེད་མིའམ་ཞིག་མི་འདུག །དམ་པ་རྒྱ་གར་
དྲན་ཟེར། དེ་ཡན་དུ་གདམས་པ་མང་དུ་མ་འཕེལ། གྲོང་ཆོག་མཛད་ཅིང་གསང་སྤྱོད་བསྐྱངས། དེ་ནས་ཐག་རིང་ནས་སློབ་མ་མང་དུ་བྱུང་ནས་འཕེལ། རེ་ཞིག་ན་བལ་བུ་དོར་ལས་སྤྱན་དྲངས། གདམས་ངག་གསུངས་པས། ཉི་མ་སྔ་དྲོ་དང་པོ་ལ་འཇའི་གདུགས་དང་རེ་མིག་མང་པོ་བྱུང་། ཆོས་ཐོན་ནས་རི་ལོགས་ལ་སྐྱོ་སངས་ལ་བྱོན། འཇའ་དེ་བླ་མ་གྲོངས་པའི་རྟགས་མི་དགའ་བ་མིན་ནམ་ཞུས་པས། ངའི་བླ་མ་སྦ་སྒོམ་གྱིས། འབར་སྟོན་ཤེས་རབ་གྲགས་སྤུན་གཉིས་ལ་གདམས་པ་འདི་གནང་བའི་དུས་ཀྱང་ངོམ་ཤོད་ལུང་པ་དང་། ཕུག་པོ་ཆེའི་རི་ལོགས་ཁེངས་པ་ཙམ་བྱུང་བ་ཡིན། གདམས་པ་འདི་ལ་རྟགས་འདི་འོང་གསུང་། ཡང་བླ་མ་འདི་འཛིན་ན་བཞུགས་པའི་དུས་སུ། སློབ་མ་ཇོ་སྲས་འཛེང་གི་དྲུང་དུ་བྱོན་པས། མཆོད་རྟེན་རྩའི་གད་རྩ་གཅིག་ན་བཞུགས་འདུག །དེ་ནས་དབྱེན་ཁང་དུ་ཕྱིན་ཙ་ན་བླ་མ་འཛེང་ནི་མ་མཐོང་། འོད་ཕུབ་ཙམ་ཞིག་འདུག །རྩར་ཉེ་ཙ་ན་འོད་དེ་མི་འདུག་ནས་དེ་ཙུག་ལགས་ཞུས་པས། མཉམ་པར་བཞག་པའི་རྟགས་ཡིན་མི་ལ་མ་སྨྲས་གསུངས། ཡང་ཨ་ཇོ་དངོས་གྲུབ་ལ་མཛེ་བྱུང་བས། ངས་བཟླས་གྲོགས་བྱས་པས་མཛེ་ནི་མ་གསོས། ངས་ཕྱག་ན་རྡོ་རྗེ་ཞལ་མཐོང་། དགོད་བྲོ་གསུང་། དེ་ལྟར་ཆོས་ཚུལ་གཞན་ལ་གྲགས་པའི་རོ་སྙོམས་དང་། ཆོས་དྲུག་དང་གཅོད་ཡུལ་དང་། རིམ་པ་ལྔ་ལ་སོགས་
པའི་གདམས་པའི་དོན་གྱི་ཐོབ་བྱ་གང་ཡིན་པ་ཉམས་འོག་ཏུ་ཆུད་པའི་འཛེང་སྒོམ་དྷརྨཱ་བྷོ་དྷི་འདི་དགུང་ལོ་བརྒྱ་དང་གཉིས་ལོན་པའི་དུས་ཞིག་སྙུང་བ་ལྟར་བསྟན་པས། འཁོར་རྣམས་ཀྱི་བླ་མ་གྲོངས་ཀྱིས་དོག་ཙ་ན། ཞལ་ནས་མདང་རྨི་ལམ་བཟང་། ང་མི་འཆི་རྒྱལ་པོ་རའི་སྟེང་ན་འདུག་པ་ལ་ཉི་ཟླ་གཉིས་ཤར་བྱུང་། རུས་པའི་སྤྱིལ་བོ་མང་པོའི་སྟེང་ན་བུད་མེད་མང་པོ་འདུག་པས། བླ་མ་འཛེང་ཁྱོད་ལོ་བཞིན་ཤོག་ཟེར་བ་གཅིག་རྨིས་གསུངས། ཡང་རེ་ཞིག་ན། ངས་ལོ་མང་པོ་ལོན་ཏེ་ང་རང་ལའང་ཏིག་པོ་བཤད་རྒྱུ་མེད་གསུངས། དེ་ནི་རྟོག་དཔྱོད་ལ་འཛིན་པ་དག་པས་ནང་དུ་དགོངས་པ་ཟད་སར་འཁྱོལ་བའི་རྟགས་ཡིན་ནོ། །དེའི་འཁོར་རྣམས་ཀྱིས་དགེ་རྩ་གཅིག་མཛད་པར་ཞུས་པས། འདུས་བྱས་ཀྱི་དགེ་རྩ་ལ་ཐུགས་མི་གཏོད། བཅུད་ལེན་ཞིག་མཛད་པར་ཞུས་པས་ཀྱང་། བཅུད་ལེན་བྱས་ན་ལོ་བཅུ་ཙམ་ཚེ་བསྲིང་ནུས་ཏེ། དུས་ངན་གྱི་ཚེ་རིང་བ་ལ་དགོས་པ་མེད་གསུངས། གཞན་ལ་སྐྱོ་བ་ཡང་དག་བསྐུལ་ནས་སྐུ་གཤེགས། སྤུར་སྦྱངས་པས་ནམ་མཁའ་འཇས་གང་། མཆོད་རྟེན་དང་རིང་བསྲེལ་ཡང་མང་དུ་བྱོན། །འདི་ནི་ཚོགས་པ་བསྐྱངས་པས་སྙིགས་མ་འཇའ་ལུས་སུ་མ་དེངས་ཀྱང་། དོན་གྱི་ཀ་དག་ཆོས་ཟད་ཀྱི་ས་ལ་མྱ་ངན་ལས་འདས་པའི་རྟགས་མཐའ་དག་ཚང་ཞིང་སྙན་བརྒྱུད་རྡོ་རྗེ་ཟམ་པའི་དར་རྒྱས་ཀྱང་འདིའི་རིང་ནས་ཆེ་བར་བྱུང་སྟེ་དངོས་ཀྱི་སློབ་མ་ཡང་། སློབ་དཔོན་
ཀུན་བཟང་དང་། འཛེང་ཇོ་སྲས་དང་། བཙན་ཐང་པ་ཉང་དྷརྨ་སིདྷི་དང་། སློབ་དཔོན་གསེར་ལུང་པ་དང་། བླ་མ་ངུ་རྡོ་རྗེ་རྒྱལ་མཚན་དང་། གཟིགས་ཡེ་ཤེས་དབང་པོ་དང་། གཡག་སྟོན་ཟླ་བ་འོད་ཟེར་ལ་སོགས་མང་དུ་བྱོན་ནོ། །དགུང་ལོ་ཡང་བརྒྱ་དང་བཅུ་བདུན་ལོན་ཚེ་གཤེགས་པ་ཡིན། འདི་ཇོ་འབྲོམ་དང་། ཕྱ་པ་ཆོས་ཀྱི་སེང་གེ་དང་། རྗེ་བཙུན་མི་ལ་དཔོན་སློབ་དང་སྔ་ཕྱིར་ཐོག་མཉམ་པ་ཙམ་ཡིན་ནོ། །དེ་ལ་འཛེང་ཇོ་སྲས་ནི། སྔགས་པའི་རིགས་ལས་བཙས་པས་ཆུང་ངུ་ནས་ཡིག་རྩིས་ལ་སྦྱངས། འོལ་ཁའི་ལྷ་བྲིས་པ་ལས་སྒྱུ་འཕྲུལ་ལ་སོགས་རྙིང་མ་དང་། དགྱེས་རྡོར་དང་མཚན་བརྗོད་ཞུས། དེར་སློབ་དཔོན་ལྷ་བྲིས་པས་འདའ་ཀར། ངས་གཞུང་ཆེན་པོ་འདི་ཙམ་ཤེས་ཀྱང་འཆི་ཁར་ཕན་པ་ཨ་རོ་ཐུན་བདུན་ལས་མ་བྱུང་། ཁྱོད་ཀྱང་གཞུང་མ་བསླབས་པར་གདམས་ངག་ཁོ་ན་ལ་ནན་ཏན་གྱིས། དྭགས་པོ་ན་ཁྱོད་རང་གི་བླ་མ་འཛེང་བྱ་བ་ཞིག་ཡོད་འདུག་པ་དེར་སོང་ཞེས་ལུང་བསྟན། གང་པར་དུ་རྫོགས་ཆེན་ལྷུན་གྲུབ་མཁན་སློབ་དཔོན་ཟེམ་གྱི་སར་དབྱར་དགུན་ཐོག་དྲུག་བསྡད་ཀྱང་ཐུགས་ལ་མ་བཏགས། གདམས་ངག་གིས་སྤྲོས་པ་མ་ཆོད་ནས་སློབ་དཔོན་འཛེང་ལ་དཔལ་ལུང་དུ་རྡོ་རྗེ་ཟམ་པ་ཚར་གསུམ་ཞུས། བྱིན་རླབས་མཛད་ནས་ཁྱེད་རང་རེ་ཞིག་གཙང་ལ་སོང་ལ་གཞུང་སློབ། གཙང་ནས་འཁོར་ཙ་ན་ཨ་མིས་
དགོན་པ་གཅིག་ཀྱང་བསྡོཊ་ཀྱི་གསུངས། དེར་གདམས་པ་མི་གནང་བར་དགོངས་ནས། གཞན་སུས་ཤེས་དྲིས་པས། གྲྭ་ཕྱིའི་ཇོ་སྲས་ཞང་ལ་སྐྱབས་བྱ་བས་ཤེས་གསུངས། དེ་ལ་ཞུ་བར་སེམས་ཙ་ན་ཁོང་གྲོངས། ཡང་དྭགས་པོ་རང་དུ་ལོག་ནས་འཛེང་ལ་ཞུས་པས་ཀྱང་མ་གནང་། སློབ་མ་གཅིག་ལ་ཞུ་བསམས་ནས། ཤོ་སྐྱམ་དུ་སློབ་དཔོན་ངུའི་སྤྱན་སྔར་ཕྱིན་ཙ་ན། རེ་བ་ཙམ་བཅོས་ནས་འདིས་མི་འོང་ད་དུང་དྭགས་པོར་སོང་ལ་ཞུས་གསུངས། ཡང་དྭགས་པོར་བྱོན་ནས་ཞུས་པས། ཅིས་ཀྱང་འདོད་ན་གདམས་པ་ལ་ནན་ཏན་བྱེད་དགོས་པ་ཡིན་གསུངས་ནས་རྫོགས་པར་གནང་། དབྱར་དགུན་ཐོག་འགའ་སློབ་དཔོན་གྱི་དྲུང་དུ་བསྡད། ལོ་དྲུག་ཙམ་ལོན་ནས་ཕྲན་ཚེགས་རྣམས་ཀྱང་རྫོགས། གཞན་ལ་བྱིན་རླབས་མཛད་པའི་ལས་སློབ་ཀྱང་བྱས། ཐོད་པའི་སློབ་མ་རོག་པོ་དགའ་དང་། མ་ཇོ་ཟློ་བ་ལ་སོགས་པ་ལྔ་བཅུ་ཙམ་གྱིས་རྡོ་རྗེ་ཟམ་པ་ཞུས་པས་ཇོ་སྲས་ཀྱིས་ཤོད། ཁྱེད་ཚོས་ཉོན་གསུངས་ནས་སློབ་དཔོན་གྱིས་ཁྲི་ཁ་ནས་གསུངས། དཔོན་སློབ་གཉིས་ལོ་ངོ་བཅོ་བརྒྱད་ཙམ་དུ་འགྲོགས། གདམས་ངག་གི་བཀའ་ཕོག་ནས་བརྒྱུད་འཛིན་དུ་བསྐོས་སོ། །དེ་ལྟར་འཛེང་དྷརྨཱ་བྷོ་དྷི་དང་ཇོ་སྲས་འཛེང་ཆུང་སྨྱོན་པ་གཉིས་ཀའི་སློབ་དཔོན་ཀུན་བཟང་ཡིན་ཏེ། དེ་ནི་ཁུ་བོ་ཕ་ཇོ་དབུས་པ་ཕག་མོ་གྲུབ་པའི་སློབ་མ་སྒོམ་ཆེན་བཟང་པོ་ཞིག་ཡིན། མ་ཟི་བཟའ་
དེས་ཆོག་བྱ་བ་མ་ཇོ་སྨྱོན་མ་བསམ་འགྲུབ་བྱ་བ་ལས་ཆོས་ཐོས་པ་གཉི་ག་ལ་རྨི་ལམ་གྱི་ལྟས་བཟང་པོ་དང་བཅས་ཏེ་འཁྲུངས། ལོ་བརྒྱད་དགུ་ལ་སློབ་དཔོན་ཀོར་སྟོན་རཱ་ཛ་ལ་སློབ་གཉེར་ཅུང་ཟད་རེ་བྱས། བཅོ་ལྔ་ལོན་པའི་ཚེ་ཁོང་གྲོངས་ནས་སློབ་དཔོན་ངུའི་གམ་དུ་ལོ་ལྔ་ཙམ་ཞི་བྱེད་ཞུ་ཞིང་བསྡད་ནས་ཞབས་ཏོག་འགྲུབ་ཚད་བྱས། གསེར་ལུང་དགོན་པར་སློབ་དཔོན་ངུའི་སར་ཇོ་སྲས་འཛེང་དང་མཇལ་ནས་འཛེང་གི་གསང་སྒྲུབ་དང་ཕག་མོ་མངོན་འབྱུང་ཞུས། རྡོ་རྗེ་ཟམ་པ་ལྷག་མ་ལུས་པར་དབུ་སྙུང་བཞེས་པའི་ནུབ་ཀྱི་རེས་ལ་དཔོན་སློབ་གཉི་ག་ལ་རྨི་ལམ་བཟང་པོ་རྨིས། དེར་འཛེང་ཆུང་བས་ཁྲིད་ནས་འཛེང་དྷརྨཱ་བྷོ་དྷི་དང་མཇལ་བའི་ཚེ་བཅོ་ལྔའི་ཟླ་བའི་རུམ་ན་སྐར་མ་གཉིས་ཐིམ་པ་རྨིས། འཛེང་ཆེན་པོ་ལ་རྡོ་རྗེ་ཟམ་པ་ཚར་གཅིག་ཞུས། དེ་ནས་འཛེང་ཇོ་སྲས་སྤུང་རིངས་སུ་སྤྱན་དྲངས་ནས་རྡོ་རྗེ་ཟམ་པ་ཚར་བདུན་ཞུས། དྭགས་པོར་དགུན་ཐོག་བཞི་ཕྱིན། རྡོ་རྗེ་ཟམ་པ་ཚར་ཕྱེད་པ་གཅིག་དང་བཅུ་བཞི་ཐོབ། ཇོ་སྲས་དང་ལོ་བརྒྱད་འགྲོགས་ནས་རྡོ་རྗེ་ཟམ་པ་ཚར་བདུན་ཞུས། ཕྱི་ནས་ཤོ་རུ་ཚར་གཉིས། གསེར་ལུང་དུ་ཚར་གཅིག །གཞན་ལ་གསུང་འཕྲོར་མཇལ་བ་དང་དྲིལ་བས་འཛེང་མེས་དབོན་གཉིས་ལ་རྡོ་རྗེ་ཟམ་པ་ཚར་སུམ་ཅུ་རྩ་ལྔ་ཐོབ། གཉིས་ཀའི་གདམས་པ་བཀའ་བབས་ནས་གཞུང་བཤད་ཆེ་ཆུང་གཉིས་ཀྱང་མཛད་དོ། །འདི་ལ་སྲས་
སྤྲུལ་སྐུ་འོད་འབར་སེངྒེ་བྱ་བ་བྱུང་། དེ་ནི་བློ་རྣོ་བ། ཤེས་རབ་ཕུན་སུམ་ཚོགས་པ་ཞིག་སྟེ། ལོ་བཅུ་བཞི་པ་ལ་རྡོ་རྗེ་ཟམ་པ་གསུངས། དེས་རྒྱུད་འཛིན་ཇོ་མགོན་ལ་གནང་། དེས་བྱ་མེད་ཚུལ་རིན་ལ་གནང་ངོ་། །ཡང་འཛེང་གིས་ཡར་ཀླུངས་བཙན་ཐང་པ་ཉང་དྷརྨཱ་སིདྷི་ལ་རྡོ་རྗེ་ཟམ་པ་བཤད་པས་བྱིན་བརླབས་ཞུགས། རྟོགས་པ་ཐོད་རྒལ་དུ་སྐྱེས། དུར་ཁྲོད་དགོན་པར་བཞུགས་ཏེ་འགྲོ་དོན་རྒྱ་ཆེན་པོ་མཛད། མཐར་དགུང་ལོ་དོན་བདུན་པ་ལ་གཤེགས། འདི་ནས་བརྒྱུད་པའི་གཞུང་བཤད་ཀྱང་ཡོད་དོ། །དེའི་སློབ་མ་བཛྲ་པཱ་ནི། དེའི་སློབ་མ་བླ་མ་ལྷའོ། །ཡང་འཛེང་གིས་གསེར་ལུང་བ་ལ་བཤད། དེས་སློབ་དཔོན་རང་གྲོལ། དེས་སྲས་པོ་ཆོས་རིན་ལ་བཤད་དོ། །ཡང་འཛེང་གིས་ངུ་རྡོ་རྗེ་རྒྱལ་མཚན་ལ་བཤད། དེས་ངུ་སྟོན་དད་པ་བརྩོན་འགྲུས། དེའི་སློབ་མ་ཞིག་གིས་བྱས་པའི་གཞུང་བཤད་ཀྱང་ཡོད། ཡང་འཛེང་གིས་གཟིགས་ཡེ་ཤེས་དབང་པོ། དེས་མཁན་པོ་ལ་ཁ་བ། དེས་སློབ་དཔོན་མགོན་སྐྱ་བ། དེས་སློབ་དཔོན་གོ་རི་བ། དེས་སོ་སྟོན་པ་ལ་བཤད་དེ་སོ་སྟོན་གྱི་གཞུང་བཤད་ཀྱང་སྣང་ངོ་། །ཡང་འཛེང་གིས་སྤུང་རིང་པ་གཡག་སྟོན་ཟླ་བ་འོད་ཟེར། དེས་ཀློག་སྟོན་དགེ་འདུན་སྐྱབས། འདི་ནས་བརྒྱུད་པའི་གཞུང་བཤད་ཀྱང་ཡོད། ཡང་སྤུང་རིང་གཡག་སྟོན་གྱིས་ལོ་བརྒྱ་ལ་ཉེ་བ་ཐུབ། དེས་འོ་ན་ནག་སྟོད་པ་གླ་རུ་བན་དེ་ལ་
བཤད་ནས་ཀྱང་དར། ཡང་འཛེང་གིས་སྐྱེ་ཚེ་ཡེ་ཤེས་དབང་ཕྱུག་ལ་བཤད་དེས་གཟིགས་ཡེ་ཤེས་དབང་པོ། དེས་མཁན་ཆེན་ངུར་པ། དེས་ངུ་སྟོན་བཛྲེ་ཤྭ་ར། དེས་མཁན་ཆེན་བསོད་ནམས་རྒྱལ་མཚན། དེས་མཁན་ཆེན་ཤེས་རབ་རྒྱལ་མཚན། དེས་མཁན་ཆེན་གཞོན་ནུ་ཤེས་རབ། དེས་སློབ་དཔོན་གཞོན་ནུ་གྲགས་པ། དེས་མཁན་ཆེན་སངས་རྒྱས་བཟང་པོ། །དེས་བླ་མ་བརྩོན་འགྲུས་དབང་ཕྱུག །དེས་མཐའ་བཞི་གྲགས་པ་རིན་ཆེན། དེས་སློབ་དཔོན་ཤཱཀྱ་རྒྱལ་པོ། འདི་སྐུ་གཞོན་ནུའི་ཚེ་ཁྲབ་ལ་ཁར་རབ་ཏུ་བྱུང་། ལོ་དུས་ལ་བསྙེན་པར་རྫོགས། མཛོད་དང་འདུལ་བ་ལ་བྱང་བས་སྐྱོར་ལུང་དུ་གྲ་སྐོར་མཛད། ཐུགས་དམ་འཕེལ་བར་བཞུགས་པ་ལ། སྐུ་ན་ཧ་ཅང་མཐོ་བས་སྤྱན་མི་གསལ་ཡང་། གཞན་གྱིས་སྤྱན་ཚབ་བྱས་ཏེ་རྗེས་སུ་བརྗོད་ནས་གསུང་བ་སོགས་ཐུགས་བསྐྱེད་ཤིན་ཏུ་ཆེ། དགུང་ལོ་བརྒྱར་ཉེ་བར་བཞུགས་ནས་གཤེགས་པའི་རྗེས་ཐུགས་ལས་རིང་བསྲེལ་ཟད་པ་མེད་པར་འབྱོན་པ་བྱུང་། འདིས་འགོས་ལོ་གཞོན་ནུ་དཔལ་ལ་གསུངས་པ་ཡིན་ནོ། །རྡོ་རྗེ་ཟམ་པའི་ལོ་རྒྱུས་བཤད་ཟིན་ཏོ། །ད་ནི་མན་ངག་སྡེའི་ཤིང་རྟ་ཆེན་པོ་སློབ་དཔོན་བཱི་མ་ལ་ལས་བརྒྱུད་པའི་སྙིང་ཏིག་གི་ལོ་རྒྱུས་བཤད་པར་བྱ་སྟེ། དེ་ལ་གདགས་གཞིའི་མིང་ལ་བརྟེན་ནས་
ཡང་ཏི་དང་སྤྱི་ཏི་ལ་སོགས་པ་འགོག་མོད། གནད་ལས་གནད་དུ་བསྡུས་པ་མིང་དུ་མི་འགྲུབ་ན། འདུལ་བའི་འདུལ་བ་དང་འདུལ་བའི་མངོན་པ་དང་འདུལ་བའི་མདོ་སྡེ་ལ་སོགས་པ་དང་། དེ་བཞིན་དུ་ཆོས་སྐད་གཞན་སྟོང་པ་དང་སྟོང་པ་ཆེན་པོ་དང་། ཤིན་ཏུ་སྟོང་པ་དང་རབ་ཏུ་སྟོང་པ་ལ་སོགས་པའང་ཉམ་ཉེས་པར་བྱས་སོ། །འདི་ནི་རྣམ་པའི་ཚིག་ཁོ་ན་ལ་རྟོག་ཅིང་དོན་ལ་རྟོན་པ་མི་བསམ་པ་སྟེ་སྟོང་པ་སྟོང་དུ་བགྲོད་མེད་པས་སྟོང་པ་ཉིད་སྟོང་པ་ཉིད་ཅེས་བྱ་བ་མི་འཐད་དོ་ཟེར་བ་ལྟ་བུའོ། །དེ་བཞིན་དུ་གདུང་ཆེན་ལྔར་དང་པོའི་སངས་རྒྱས་ཀྱི་རྣམ་པར་གཞག་ཅིང་། དངོས་སུའང་འགྲུབ་ན། ཤ་རི་རམ་གཅིག་པོའི་སྐད་དོད་ལ་ཕུ་གཏུགས་པ་མ་ཡིན་ཏེ། སཾ་སྐྲྀ་ཏའི་སྐད་ཁོ་ནས་བཤད་པ་ནི། དྲང་དོན་དང་། དུས་ཀྱི་འཁོར་ལོ་ལྟར་སྐད་ཆེན་པོ་བཅོ་བརྒྱད་ཀྱིས་བཤད་པ་ལ་ངེས་དོན་ཡིན་པ་མཁས་པ་རྣམས་ལ་གྲགས་པའི་ཕྱིར་རོ། །དེ་བས་ན་སྔ་འགྱུར་གྱི་རྒྱུད་རྣམས་ལ་ནི་མཁའ་འགྲོ་དང་མི་མ་ཡིན་གྱི་བརྡའ་སྐད་ལ་སོགས་པའི་རྣམ་གྲངས་བསམ་གྱིས་མི་ཁྱབ་བོ། །འདིར་ཐིག་ལ་ཏིག་ཏུ་བྱས་པའང་ཇི་སྐད་དུ། ཏིག་ནི་ཤེས་རབ་མིང་དུ་སྨྲ། ཞེས་བརྡའ་སྙིང་དུ་མི་འགལ་ལ། ལར་དབང་པོ་རབ་ཀྱིས་རྒྱུད་ལ་སོགས་པའི་མཚན་སྨོས་པ་ཁོ་ནས་དོན་ཤེས་པའི་དགོས་པ་འཇོག་པའི་ཕྱིར་འདི་དག་ལ་འཐད་པ་མ་གྲུབ་ན། ལི་ཤིའི་གུར་ཁང་
ནང་དུ་འགལ་འབྲེལ་གྱི་མིག་མངས་རིས་ལ་བརྩེ་བར་བྱའོ། །དེ་ལ་ཉང་ཏིང་འཛིན་བཟང་པོ་དེ་ཕུང་པོ་ལྷག་མེད་དུ་དེངས་ནས་ལོ་བརྒྱད་ལོན་ཅིང་ཉང་མི་དར་མ་དང་དུས་མཚུངས་པ། དབུ་རུ་གཞོའི་ལྡང་མ་དགེ་མཆོག་གི་བུ་གནས་བརྟན་ལྡང་མ་པ་ལྷུན་གྲུབ་རྒྱལ་མཚན་ཞེས་བྱ་བ། ངོ་བོ་བི་མ་ལའི་སྤྲུལ་པར་གྲགས་ཀྱང་རྣམ་པར་ཤེས་པ་ལྐོག་ཏུ་གྱུར་པ་རྣམས་ལ་གནས་བརྟན་དཀྱུས་མའི་ངང་ཚུལ་དུ་སྣང་བ་ཞིག་ལ་རྡོ་རྗེ་ལེགས་པས་ལུང་བསྟན་ནས་སྔར་སྦས་པའི་གཏེར་རྣམས་ཕྱུང་། སྦས་བློ་གྲོས་ལས་ཚིག་བརྒྱུད་ཀྱང་མཉན་ནས་ཆོས་ཉིད་ཡིད་སྤྱོད་དུ་མ་ལུས་པར་ཉམས་སུ་བླངས། མན་ངག་རྙེད་ནས་བཅོ་ལྔ་པ་ལ་བཤད་བརྒྱུད་བཞག་པའི་སྣོད་འཚོལ་དུ་བྱོན་པ་ན། ཉང་སྟོད་ནས་ལྕེ་བཙུན་སེང་གེ་དབང་ཕྱུག་ཅེས་བྱ་བ་རྙེད། དེ་ལ་གདམས་པ་རིམ་པ་བདུན་དུ་བཏབ། དེ་དང་ཉེ་བར་ཁ་རག་སྒོམ་ཆུང་ལའང་བཏབ་པས་ཁོང་ཡང་དེས་གྲོལ། ལྕེ་བཙུན་ལ་དཔེ་རྣམས་དག་པར་བྲིས་ལ་ཁྲའི་ཟླ་བ་ལ་སྐྱོལ་ཅིག་གསུངས། ཕྱི་ཞིག་ལྕེ་བཙུན་གྱིས་འབུལ་བ་ཤིན་ཏུ་མང་པོ་དང་བཅས་བྱོན་པས་སྙེ་ཐང་དུ་མལ་གྲོའི་ཉང་བཀའ་གདམས་པ་བྱ་བ་དང་ཕྲད། དེས་ལྡང་མ་གཤེགས་པའི་གཏམ་བཤད་པས། འབུལ་བ་རྣམས་གནས་གཞི་ཞིག་འདུག་པའི་དགེ་འདུན་རྣམས་ལ་ཕུལ། ཉང་བཀའ་གདམས་པ་ན་རེ། ལྡང་མ་དེ་གནས་བརྟན་ཡིན་པ་
ཙམ་ལས་གང་ཟག་བཟང་པོར་སྔར་སུས་ཀྱང་མ་རྟོགས། སྐུ་གཤེགས་པའི་དུས་ནམ་མཁའ་འཇས་ཁེངས། སྐུ་གདུང་དང་རིང་བསྲེལ་དཔག་ཏུ་མེད་པ་བྱོན་པས་ཐམས་ཅད་ངོ་མཚར་ཞིང་འགྱོད་པ་སྐྱེས་གདའ། ཁྱེད་ཀྱང་འབུལ་བ་འདི་ཙམ་ཁྱེར་ལུགས་ཀྱིས་གདམས་ངག་ཁྱད་པར་ཅན་ཡོད་མཆིས་པས་བདག་ལ་སྩོལ་ཅིག་ཞུས་པས། གདམས་པ་བྱིན། དེས་གཞོའི་ཏི་སྒྲོ་བྲག་ལ་ལོ་གཉིས་བསྒོམས་ནས་ཕུང་པོ་ལྷག་མེད་དུ་སོང་བ་ཡིན་ནོ། །དེ་ལ་ལྕེ་བཙུན་ཆེན་པོ་ནི། ཡུལ་ཉང་རོང་གཉན་ཚོའི་ལྕེ་ཐུབ་པའི་དབང་པོ་ཞེས་བྱ་བའི་བུ་གཞོན་ནུ་ནས་ཆོས་མང་པོ་ལ་ཐོས་པའི་ཕ་རོལ་ཏུ་སོན་པ་ཞིག་ཡིན། གནས་བརྟན་ལྡང་མ་བ་དང་། རི་གཟར་རྒོད་པོ་ལུང་དུ་མཇལ། ཁ་རག་ཏུ་གདམས་པ་གསུང་བའི་དུས་བཏབ་སྟེ་རྫོགས་པར་ཐོབ། སློབ་དཔོན་གཤེཊ་ནས་གཏེར་དཔེ་རྙིང་པ་རྣམས་ལང་གྲོ་ཆད་པ་སྟག་འདྲའི་ཆུ་མིག་གི་རྩ་དང་། འུ་ཡུག་དང་། ཇལ་གྱི་ཕུ་སྟེ་གཏེར་ཁ་གསུམ་དུ་སྦས། འུ་ཡུག་ནས་ཤངས་མན་ཆོད་ཀྱི་རི་རྒྱུད་རྣམས་ལ་འཕོ་ཞིང་སྒོམ་པའི་ཚེ། རྨི་ལམ་ན་ཨ་ཙ་ར་གཅིག་བྱུང་ནས། བདག་ནི་བི་མ་མི་ཏྲ་མཁས་པ་སྟེ། །སྐལ་ལྡན་སྙིང་པོའི་ཡང་བཅུད་དོན་འདོད་ན། །མཆིམས་ཕུ་བྲག་དམར་དགེ་གོང་ཡར་འདེབས་ལ། །གསང་བ་སྙིང་ཏིག་སྙིང་དང་འདྲ་བ་ཡོད། །དེ་དག་ཁྱེར་ལ་འུ་ཡུག་ཕྱི་གོང་དུ། །སུས་ཀྱང་མཐོང་བ་མེད་པར་ལོ་བདུན་སྒོམས། །
ཟག་བཅས་ཕུང་པོ་སྣང་བ་མ་ཡིན་ནོ། །ཞེས་གསུངས་པ་ཐོས་ནས་མཆིམས་ཕུར་བྱོན། བུད་མེད་དུང་སོ་འཁོར་མ་གཡུའི་སྨིན་མ་ཅན་ཞིག་གིས་དཔེ་རྣམས་བྱིན། སླར་འུ་ཡུག་ཕྱི་གོང་རྫའི་ར་བར་བཞུགས་པས་བཱི་མ་ལ་དངོས་སུ་བྱོན། ཟླ་བ་ཕྱེད་དུ་དབང་ཁྲིད་གདམས་པ་རྫོགས་པར་གནང་ནས་སློབ་དཔོན་བཱི་མ་ལ་རྒྱ་ནག་ཏུ་གཤེགས། དེ་ནས་ལྕེ་བཙུན་གྱིས་ལོ་བདུན་བསྒོམས་པས་ཕུང་པོ་ལྷག་མེད་གྲུབ། སྤྲུལ་པའི་སྐུ་ཞང་སྟོན་ལ་གདམས་ངག་རྫོགས་པར་བྱིན་ནས། ལོ་བརྒྱ་དང་ཉི་ཤུ་རྩ་ལྔ་ན་ནམ་མཁའ་ལ་འཇའ་འོད་ཀྱི་ཕུང་པོ་གཅིག་ཏུ་གཤེགས་སོ། །གཏེར་སྦས་པའི་ལོ་སུམ་ཅུ་ན་རོང་སྣར་མདའི་ལྕེ་སྒོམ་ནག་པོས་ཁ་ཤས་བཏོན་ནས་རང་ཉམས་ལོངས་ཤིང་། གཞན་མང་པོ་ལའང་བཤད། དེ་བཞིན་དུ་ལང་གྲོ་འཆད་པ་སྟག་ནས་ཤངས་པ་རས་པ་ཞེས་བྱ་བས་ཀྱང་བཏོན་ནས་དར་རྒྱས་བྱུང་ཞེས་གྲགས། དེ་ལ་ཞང་སྟོན་ནི། ཡུལ་ཡར་འབྲོག་དོ་ནང་དུ་འཁྲུངས། མཚན་བཀྲ་ཤིས་རྡོ་རྗེ་ཞེས་བྱ་སྟེ། ལོ་བཅུ་གཅིག་པར་བླ་མ་ལྕེ་སྒོམ་ལ་གདམས་པ་མང་དུ་ཞུས། དེ་ནས་ཉི་ཤུ་རྩ་གཅིག་གི་བར་མཁས་གྲུབ་ཀྱི་བླ་མ་མང་དུ་བསྟེན་ནས། སྡེ་སྣོད་གསུམ་དང་རྒྱུད་སྡེ་གསར་རྙིང་གི་ཕྱོགས་ཐམས་ཅད་ལ་སྦྱངས་པས་མཁྱེན་རབ་ཀྱི་པདྨོ་རྒྱས། ཉང་སྟོད་ཁུ་ཡུལ་ན་ཡོད་པའི་ཚེ་ནམ་མཁའ་ལས་བླ་མ་དང་། ཐུགས་རྗེ་ཆེན་པོ་སྒྲོལ་
མ་ལ་སོགས་པའི་ཞལ་མཐོང་ཞིང་ལུང་བསྟན་ཐོབ། རྡོ་རྗེ་ལེགས་པ་མི་དཀར་ཞྭ་དཀར་ཅན་དུ་བྱས་པས་དངོས་གྲུབ་བྱིན་གྱིས་འདོང་ཟེར་ནས་ཁྲིད། ཉང་སྨད་པ་ཚབ་ཏུ་ལྷ་གསོལ་བ་མང་པོས་བཟའ་བཏུང་བྱིན་པས་དངོས་གྲུབ་དེ་ལ་ཟེར་རམ་སྙམ་ཙ་ན། མི་དཀར་དེས་དངོས་གྲུབ་གཞན་དུ་ཡོད་ཀྱིས་འདོངས་ཟེར་འོད་ཀྱིས་ལམ་སྣ་བྱས་ནས་བྱོན། ཁང་སྟོང་ཞིག་ཏུ་ཉལ་བས་འདིར་མི་རུང་ཟེར། བྲག་ཕུག་གཅིག་ཏུ་བྱོན་ཙ་ན་ཁ་སྟོང་འགྱེལ། ཁོའི་སྤྲུལ་པས་བཟའ་བཏུང་ཡང་བྱིན། འུ་ཡུག་མདའ་ན་འཁྲུག་པ་ཆེན་པོ་ཡོད་པ་ཡང་རྡོ་རྗེ་ལེགས་པས་བསྒྲིབས་ནས་དམག་གིས་མ་མཐོང་། དེར་བྲག་སེང་གེ་འདྲ་བའི་རྩེར་སླེབས་ཙ་ན་ཁོ་སྟོར། ཕྱིར་ལོག་གོ་སྙམ་ནའང་མ་ཐར། ཆ་མ་ཕྱེད་པའི་ངང་ལ་བལྟས་ཙ་ན་བྲག་ཕུག་ཁ་བྱང་བསྟན་གྱི་སྒོ་རྩས་འགགས་པ་མཐོང་། དེ་བྲུས་པས་དང་པོར་སྦྲུལ་དང་སྦལ་པ་ཤིག་ཤིག་སྣང་། དེ་ནས་ཁ་བྱང་རྙེད་དུས་མི་དཀར་དེས་སྒྲོན་མེ་བཏེག་བྱུང་བས། དར་ཅིག་ན་གདོང་དང་སྐད་ཤིན་ཏུ་མི་བསྲུན་པ་ཞིག་བྱུང་། ཁོས་བརྡའ་སྦྱར་བས། ངས་ཨ་ལྕེ་བོས་ཀྱི་ཟེར་བའི་མོད། ཨེ་ཀ་ཙ་ཊཱི་སྤྱན་གཅིག་ཁྲག་ཏུ་ཁོལ་བས། མཆེ་བ་གཙིགས་ཤིང་བལྟར་མི་བཟོད་པ་ཙམ་དུ་བྱུང་། ཁོས་འདི་ནི་ལུང་བསྟན་པ་དེའོ་བྱས་པས། ཚོགས་འཁོར་བརྒྱ་རྩ་བརྒྱད་ཐོང་། ལོ་གསུམ་དུ་སུ་ལའང་མ་བཤད་ཟེར། བྲག་ཕུག་གི་སྒོ་རྩ་ནས་གཡུ་གཉིས་རྙེད་པ་ལས་རྒྱུ་བྱས།
ཚོགས་འཁོར་བརྒྱ་རྩ་བརྒྱད་བཏང་། ལོ་ཉི་ཤུ་རྩ་ལྔ་ལ་དབུས་སུ་བྱོན། མཆིམས་ཕུ་ནས་བི་མ་ལའི་ཆོས་གཏེར་ཡང་ཐོན། དངོས་དང་ཞལ་མཇལ་ནས་རྗེས་གནང་ཐོབ། སླར་ཤངས་རྟ་ནག་ཏུ་བྱོན་པའི་ཟམ་ཁར་ལྕེ་བཙུན་ཆེན་པོ་དང་མཇལ། གསང་བ་སྙིང་ཏིག་གི་གདམས་པ་རྫོགས་པར་ཐོབ། སྐུ་ན་མཐོན་པོར་སོང་ནས་བརྒྱུད་འཛིན་གྱི་སླད་དུ་སྲས་ཉི་འབུམ་བསྐྲུན་ངས་ཚོགས་པ་མ་བསྐྱངས་ན་ཕུང་པོ་ལྷག་མེད་འོང་བ་ཡིན་གསུངས། ལུས་ཤིན་ཏུ་སྦྱངས་པ་བྱང་ཆུབ་ཀྱི་ཡན་ལག་ལ་དབང་ཐོབ་པས་རེས་འགའ་རྒྱལ་བ་རིགས་ལྔར་གསལ། སྐུ་ལུས་ལ་གྲིབ་མ་གཏན་མི་མངའ། རྫོགས་པ་ཆེན་པོའི་ཆོས་གསུང་དུས་འཇའ་གུར་འཁྱིལ་པ་སོགས་ངོ་མཚར་གྱི་ལྟས་མང་པོ་ཡོང་། དགུང་ལོ་བདུན་ཅུ་དོན་གཅིག་པ་མེ་མོ་ཕག་གི་ལོ་ས་ག་ཟླ་བའི་ཉེར་གཉིས་ལ་ཤར་ཕྱོགས་ཀྱི་ནམ་མཁའ་ལས་སྒྲ་ཆེན་པོ་ལན་བདུན་བསྒྲགས་ཤིང་ས་ཆེན་པོ་འདི་ལན་གསུམ་གཡོས། འཇའ་དང་། འོད་དང་། སིལ་སྙན་གྱི་སྒྲ་དང་། དྲི་ཞིམ་གྱི་ངད་ལ་སོགས་པ་གདོད་མའི་ས་ལ་མངོན་པར་བྱང་ཆུབ་པའི་རྟགས་མ་ལུས་པ་བསྟན་ཏེ་གཤེགས་སོ། །དེའི་ཕྱི་ནུབ་སྤུར་སྦྱངས་པས་གདུང་ཆེན་ལྔ་དང་། རིང་བསྲེལ་ཁ་དོག་ལྔ་པ་སྐུ་ལྔའི་རྒྱལ་ཚབ་ཏུ་བཞག །མེ་ཏོག་གི་ཆར་དང་འཇའི་གུར་ལ་སོགས་པས་འགྲོ་བ་མང་པོ་དད་པའི་གནས་ལ་སྦྱར་ཞིང་རང་
བཞིན་གྱི་བསམ་གཏན་ལ་གནས་པ་བྱུང་ངོ་། །དེའི་སློབ་མ་སྲས་ཉི་འབུམ་སྟེ། ཡུམ་རྒྱལ་མོ་གཡང་ངེའི་ལྷུམས་སུ་ཞུགས་པའི་དུས་ཉི་མ་མང་པོ་དུས་གཅིག་ལ་ཤར་བྱུང་བས། ཡབ་ཀྱིས་སེམས་ཅན་གྱི་མ་རིག་པའི་མུན་པ་བསལ་བར་ལུང་བསྟན་ནས་ཉི་མ་འབུམ་དུ་བཏགས། ལོ་ལྔ་ནས་རིམ་པར་ཡབ་ལས་གསང་བ་སྙིང་ཏིག་གི་དབང་ཁྲིད་གདམས་པ་ཉམས་འོག་ཏུ་ཆུད་པར་མཛད། དགུང་ལོ་བཅུ་པ་ལ་ཆེ་སར་བཏོན་དུས་རྒྱུད་བཅུ་བདུན་ལ་བཤད་པ་མཛད་པས་བུ་སློབ་ཀུན་ངོ་མཚར་སྐྱེ་བ་བྱུང་། ལོ་ཉི་ཤུའི་བར་དུ་བསྒྲུབ་པ་ཁོ་ན་ལ་ནན་ཏན་མཛད། དེ་ནས་རྗེས་ཐོབ་སྒྱུ་མ་ལྟ་བུའི་ཏིང་འཛིན་དང་འགྲོགས་ནས། རྔོག་རྒྱལ་རྩེའི་སར་གསར་མའི་རྒྱུད་མན་ངག་དང་བཅས་པ་ལ་གསན་པ་མཛད། ཉི་ཤུ་རྩ་གཉིས་པ་ལ་ཇོ་མོ་རྒྱ་གར་དངོས་གྲུབ་ཀྱི་རྟེན་དུ་བཟུང་། ཉི་ཤུ་རྩ་བདུན་ལ་འཁོན་གྲགས་པ་རྒྱལ་མཚན་དང་། བླ་མ་སྟག་སོ་བ་བསྟེན་ནས་རྒྱུད་གསུམ་གདམས་ངག་དང་བཅས་པ་དང་། བདེ་མཆོག་མལ་གྲོ་ལུགས་མཁྱེན་པར་མཛད། ཁ་རག་གི་འབྲུག་སྟོན་གྲགས་པ་ལས་བདེ་མཆོག་དང་། རྗེ་བཙུན་མར་ལུགས། ཡེ་ཤེས་མགོན་པོ་སོགས་ཞུས། ཞང་གཡུ་བྲག་པ་དང་གཞུང་གི་རྔོག་རྡོ་རྗེ་སེང་གེ་ལ་སོགས་ཏེ་མཁས་གྲུབ་ཀྱི་བླ་མ་མང་པོ་བསྟེན་ནས་མདོ་རྒྱུད་དུ་མ་ལ་ཐོས་བསམ་ཕྱོགས་མེད་མཛད། ཚིག་དོན་ཆེན་མོ་ཞེས་
བྱ་བའི་བསྟན་བཅོས་ཀྱང་མཛད་དེ་དགུང་ལོ་ལྔ་བཅུ་རྩ་དྲུག་ལ་གཤེགས། སྤུར་སྦྱངས་པས་གདུང་རིགས་ལྔ་བྱོན། འཇའ་ཚོན་གྱི་གུར་ཕུབ། ཆོ་འཕྲུལ་ཟླ་བ་ལ་ཁུག་ཆོས་མེ་ཏོག་སྐྱེས་པ་སོགས་བྱུང་ངོ་། །འདི་སྒྲ་ཐལ་འགྱུར་ནས་ཕྱག་རྡོར་གྱི་སྤྲུལ་པ་བཛྲ་པ་ལར་ལུང་བསྟན་པ་ལ་ངོས་འཛིན་པར་གྲགས་སོ། །དེའི་སློབ་མ་གུ་རུ་ཇོ་འབེར་ནི་གཅུང་པོ་ཟླ་བ་འབུམ་གྱི་སྲས་ཡིན། ལོ་བདུན་མན་ཆད་ལྐུགས་པ་འདྲ་བར་ཡོད་པ་ལ། བརྒྱད་ནས་ཤེས་རབ་མེ་ལྟར་འབར། བཅོ་བརྒྱད་ཀྱི་བར་དུ་ཁུ་བོ་ཉི་འབུམ་དང་འགྲོགས། གསང་བ་བླ་མེད་ཀྱི་དབང་ཁྲིད་གདམས་པ་དང་བཅས་རྫོགས་པར་མཛད་ཅིང་རྒྱུད་ཀྱི་བཤད་པ་ལ་ཐོས་པས་སྒྲོ་འདོགས་གཅོད་པ་དང་། མན་ངག་གི་དོན་ལ་སྒོམ་པས་ཉམས་སུ་བླང་བ་ལ་བརྩོན། བཅུ་དགུ་ནས་ཉི་ཤུའི་བར་ས་སྐྱ་ལོ་ཙཱ་བ་ལ་རྒྱུད་གསུམ་མན་ངག་དང་བཅས་པ་དང་། བདེ་མཆོག་མལ་གྲོ་ལུགས་ཉན། དབུ་ཚད་ལ་སོགས་པའི་རིག་པའང་ཁོང་དུ་ཆུད་པར་བྱས། དེ་བཞིན་དུ་ཁྲོ་ཕུ་ལོ་ཙཱ་བ་ལས་མི་ཏྲ་ཛོ་ཀིའི་གདམས་པ་དང་། ཆུ་མིག་པ་ལས་ཚད་མ་བསྡུས་པ། བལ་པོ་གྲགས་འབུམ་ལས་དོ་ཧ་དང་ཕྱག་ཆེན་ཁ་འཐོར་སོགས་མཁས་གྲུབ་དུ་མ་ལས་སྡེ་སྣོད་དང་རྒྱུད་ལུང་མང་པོ་ལོ་སུམ་ཅུ་རྩ་དྲུག་ཚུན་མཉན་པས་རིག་པ་རྣོ་ཞིང་ཐོས་པ་ཤིན་ཏུ་མང་བར་གྲགས། བསྒྲུབ་པ་མཛད་རེས་ཡི་
དམ་གྱི་ལྷ་ཞལ་མཐོང་བ་ཡིན་ཏེ་ཐུགས་སྒམ་པས་མི་གསུང་། ལྷ་སར་ཇོ་བོ་ལ་མཆོད་པ་ཕུལ་དུས་འོད་ཀྱི་ཐིག་ལེའི་ཁོང་ནས་འཕགས་པ་ལག་ན་པདྨ་དང་། རྡོ་རྗེ་འཛིན་པ་ཞལ་གཟིགས། ཐོ་རེངས་ཤིག་ཚེ་དཔག་མེད་ཀྱི་ཞལ་མཐོང་བས། ངེད་ཅག་ལ་ཚེ་རིང་རྒྱུད་མེད་ཀྱང་ཁོ་བོ་ལེགས་པར་བྱུང་བ་དེའི་བྱིན་རླབས་ཡིན་གསུངས། དེ་ལྟར་ཚད་མེད་པའི་མཁྱེན་རབ་དང་ཐུགས་རྗེའི་མངའ་བདག་གིས། འགྲོ་བ་འདྲེན་པའི་དེད་དཔོན་དུ་གྱུར་ནས་དྲུག་ཅུ་པ་ལ་གཤེགས། ཞག་བདུན་དུ་འཇའི་དྲྭ་བས་འབྲེལ། སྐུ་གདུང་ལ་ཨོཾ་ཨཱཿཧཱུཾ་དང་རིང་བསྲེལ་མང་པོ་བྱོན་ཏོ། །དེའི་སློབ་མ་འཁྲུལ་ཞིག་སེང་གེ་རྒྱལ་བ་ཡིན་ཏེ། གཡོ་རུ་གྲའི་བུ་སོ་གད་ཕྲེང་གི་གྲོང་དུ་ཉི་མ་རྩེ་ཤར་ལ་འཇའི་གུར་ཕུབ་ཅིང་འཁྲུངས། ལོ་དགུ་ནས་རིགས་སད་དེ་དག་སྣང་དང་མོས་གུས་དཔག་མེད་ཤར། བཅུ་པའི་ཚེ་སྣང་བ་འདི་རྨི་ལམ་ལྟ་བུ་སྒྱུ་མ་ལྟ་བུ་ལ་སྲ་ཞིང་འཐས་འཐས་འདྲ་བ་མི་བདེན་སྙམ་པ་དང་བཅུ་གཉིས་པ་ལ་འཁོར་བ་ལ་སྐྱོ་བ་ཚད་མེད་པ་སྐྱེས་ནས་ཆོས་འབའ་ཞིག་ལས་གཞན་གང་གིས་ཀྱང་མི་ཕན་པར་ངེས་ཤེས་རྙེད། བཅུ་གསུམ་གྱི་ཐོ་རངས་ཉི་ཟླ་དུས་གཅིག་ལ་ཤར་བའི་རྨི་ལམ་སད་དུས། འཕགས་པ་ཐུགས་རྗེ་ཆེན་པོའི་ཞལ་མཐོང་། ཚེ་གཅིག་གིས་གྲོལ་བ་སྙིང་ཏིག་གི་དོན་སྒོམས་ཤིག་གསུངས། དེ་ནས་བཟུང་སྙིང་རྗེ་ཕྱོགས་མེད་དུ་རྒྱས། འགྲོ་བ་ཀུན་ལ་བུ་གཅིག་པའི་འདུ་
ཤེས་ཤར། རྐྱེན་རེ་ལ་བརྟེན་ནས། གཞན་ལ་མཐོ་འགྲོགས་དང་ཁྱད་གསོད་མི་བྱེད་པའི་དམ་བཅའ་བྱས། ལུས་ཀྱི་སྲིན་བུ་དག་སྙིང་རྗེ་ཆེན་པོས་མི་འདོར་ཞིང་། ལོང་སྤྲང་དང་དམན་པ་ཁོ་ན་ལ་བྱམས་པ་སོགས་ཐེག་པ་ཆེན་པོའི་རིགས་སད་པའི་རྟགས་ཁྱད་པར་ཅན་མངའ། བཅོ་བརྒྱད་ལ་སྣང་བ་བདེན་མེད་དུ་རྟོགས་པས་སྨྱོན་པ་ཁྲོ་ལངས་པ་ལྟ་བུར་སོང་སྟེ། ཕ་མས་ལྷ་གསོལ་བའི་ཡོ་བྱད་གསར་པ་གཏོར་ཞིང་། ཕོ་གདོན་རྒྱལ་པོ་མཆོད། མོ་གདོན་བསེན་མོ་མཆོད། ཅེས་བྱས་པས། ཁྱོད་འདྲ་བའི་བུ་སྐྱེ་བ་ཟེར་འཐབས། ཉི་ཤུ་ལ་མཁན་པོ་ལྡེའུ་སྒང་པ་དང་། སློབ་དཔོན་བཀྲས་སྒང་པ་ལས་རབ་ཏུ་བྱུང་། ཉི་ཤུ་རྩ་ལྔ་ལོན་ཚེ་སྲི་ཞལ་གྱི་སེངྒེ་རྒྱབ་ཏུ་བྱོན། སེངྒེ་རྒྱབ་པ་བར་པ་ལས་ཚལ་པའི་ཆོས་བསྐོར། བླ་མ་ཙ་རི་པ་ལས་སེངྒེ་འཇིང་བསྣོལ། རས་པ་དྲི་མེད་འོད། ལྷ་རི་དཔལ། གཞོན་ནུ་འབུམ། སྟོན་ཆར། བྱང་ཡོན། ཇོ་སྲས་སུ་གྲགས་པ་རྣམས་ལས་གསང་སྔགས་གསར་རྙིང་། ཞི་བྱེད། གཅོད་ཡུལ། ཕྱག་ཆེན་མང་དུ་ཉན། ཁྱད་པར་ཐུགས་རྗེ་ཆེན་པོའི་ལུང་བསྟན་བཞིན་གུ་རུ་ཇོ་འབེར་ལས་རྫོགས་པ་ཆེན་པོ་ཐོས་པས་རྟོགས་པ་ཐོད་རྒལ་དུ་སྐྱེས། ཁྲོ་བོ་མ་ལ་སོགས་པའི་རི་ཁྲོད་དང་ལུང་སྟོང་རྣམས་སུ་ལོ་མང་པོའི་བར་དུ་སྒྲུབ་པ་ཁོ་ན་ལ་གཞོལ་བས་དགོངས་པ་ཀ་དག་གི་སར་གཤེགས། སྐལ་ལྡན་མང་པོ་སྨིན་
གྲོལ་ལ་བཀོད་ནས། དྲུག་ཅུ་རྩ་བཞི་པ་ལ་ཐེག་པ་མཆོག་གི་འབྲས་བུ་ཐོབ་པའི་རྟགས་ཁྱད་པར་ཅན་རྣམས་མངོན་དུ་བསྟན་ནས་གཤེགས་སོ། །དེའི་སློབ་མ་གྲུབ་ཆེན་མེ་ལོང་རྡོ་རྗེ་ནི། སྒྲགས་ཀྱི་ཕུར་རྣལ་འབྱོར་པ་བསམ་ཡས་ཀྱི་སྲས་སུ་བཙས། ལོ་དགུ་ན་གྲུབ་ཐོབ་ཟ་ལུང་པ་དང་། མཁན་པོ་སེ་ལུང་པ་ལས་རབ་ཏུ་བྱུང་། དེ་དུས་གཤིན་པོའི་དགེ་རྩར་ཡུམ་རྒྱས་འབྲིང་བསྡུས་གསུམ་ཁོ་ན་སྒྲོགས་པས་ལོ་བཅུ་དྲུག་པའི་དུས་སྒྲགས་ཀྱི་ཕུའི་ཞོགས་སྟེང་བྱ་བར་བརྒྱད་སྟོང་བརྒྱ་རྩར་མཛད་པས་གནས་ལུགས་ཀྱི་དོན་རྟོགས། ཟངས་ཚོར་བསྒོམས་པས་ཉམས་འབར་ཞིང་མངོན་ཤེས་ཕྲ་མོའང་ཤར། དེ་ནས་ཕྱོགས་མེད་དུ་འགྲིམས་ཏེ། མཚུར་ཕུའི་དོ་པོ་རས་པ་སོགས་བླ་མ་མང་པོ་བསྟེན། ཤ་འུག་སྟག་སྒོ་དང་། མཁར་ཆུ་ལ་སོགས་པའི་གནས་ཆེན་མང་པོར་བྱོན། ནས་བྲེ་གང་གིས་ཟླ་བ་གཅིག་དང་ཞག་ཉི་ཤུའི་འཚོ་བ་བྱས་པ་སོགས་དཀའ་ཐུབ་ལ་ཤིན་ཏུ་བཟོད་པ་ཞིག་ཡིན། དཀའ་བ་སྤྱད་པའང་བསམ་གྱིས་མི་ཁྱབ། ལོ་བཅོ་བརྒྱད་པའི་ཚེ་སེངྒེ་རྒྱལ་བ་སངས་རྒྱས་དབོན་པོ་མཇལ་ནས་མན་ངག་སྙིང་ཏིག་ཐོབ། དེ་མན་ངག་གིས་འཚེངས་བསམ་པའི་སྤོབས་པ་སྐྱེས་ཏེ་བསྒོམས་པས་སྔོན་འགྲོའི་དུས་རང་ནས་ཞག་དྲུག་ཏུ་རྡོ་རྗེ་སེམས་དཔའི་ཞལ་ཉིན་མཚན་མེད་པར་མཐོང་། དངོས་གཞིའི་དུས་བརྒྱུད་པའི་བླ་མ་རྣམས་རྨི་ལམ་དུ་མཇལ་ནས་བྱིན་གྱིས་བརླབས།
ཉི་ཤུ་རྩ་གསུམ་པར་སངས་རྒྱས་རས་པ་ལས་རྡོ་རྗེ་ཕག་མོ་ལ་སོགས་པའི་གཏེར་ཆོས་དུ་མ་གསན་ནས་བསྒྲུབས་པས། རྡོ་རྗེ་ཕག་མོ་མངོན་སུམ་དུ་མཇལ། བྲག་ལ་གསང་རྡོར་བསྣུན་པས་ཐིམ་གྱིས་སོང་། རྟ་མགྲིན། སྒྲོལ་མ། སྤྱན་རས་གཟིགས། སློབ་དཔོན་ཆེན་པོ། ཀུན་ཏུ་བཟང་པོ། རྡོ་རྗེ་སེམས་དཔའ། བི་མ་ལ། ཟ་ལུང་པ། སངས་རྒྱས་རས་པ། འགྲོ་མགོན་ཕག་གྲུབ་རྣམས་ཞལ་གཟིགས། དུང་ལུང་དུ་མཁའ་འའི་སྒྲ་ཤིན་ཏུ་སྙན་པས་སྐྱེ་རྒྱུན་ཆོད་པའི་ལུང་བསྟན། ཀ་བ་ཅན་དུ་ཕག་མོ་དམར་མོ་དང་གྲུབ་ཐོབ་ཟ་ལུང་པ་ནམ་མཁའི་ཀློང་དུ་མཇལ། ངར་ཆུང་ན་བཞུགས་པའི་ཚེ་རྨི་ལམ་ན་ཕག་མོ་གཙོ་འཁོར་ལྔ་མཐོང་། དེར་མནལ་སད་ཙ་ན། འོད་ཀྱི་ཕག་མོ་དངོས་སུ་གཟིགས། སྐྱབས་གནས་རྫོང་དུ་རྡོ་རྗེ་སེམས་དཔའ་རྨི་ལམ་དུ་རྫོགས་པ་ཆེན་པོའི་དབང་བསྐུར། སྤྱིར་བླ་མ་མང་པོ་བསྟེན་ཅིང་ཁྱད་འཕགས་ཀྱི་བླ་མ་བཅུ་གསུམ་བཞུགས། བཀའ་དྲིན་འགྲན་ཟླ་བྲལ་བ་གྲུབ་ཐོབ་ཟ་ལུང་པ། མཚུར་ཕུའི་དོ་བོ་རས་པ། འཁྲུལ་ཞིག་སེང་གེ་རྒྱལ་བ་ལས་སྙིང་པོའི་དོན་རྙེད་པ་ཡིན། འདི་བརྟུལ་ཞུགས་ཤིན་ཏུ་ཆེ་བས་ཞིག་པོའི་སྤྱོད་པ་བླང་དོར་མེད་པས་གསང་སྔགས་ཀྱི་དམ་ཚིག་ལ་སྒྲ་ཇི་བཞིན་པར་སྤྱོད་ནུས། རྒོད་ཕྲུག་ནམ་མཁའ་ལ་ལྡིང་བ་མཐོང་བས་རིག་པ་བརྟུལ་ཞུགས་ཀྱི་ངར་ཐོགས་ནས་ནམ་མཁའི་ལམ་ལ་འགྲོ་བ་དང་། བྲག་
ལ་འདམ་ལྡར་བྱེད་པ་བྱུང་། མཁན་པ་ལྗོངས་དང་། མཁན་པ་གླིང་དང་། སེངྒེ་རྫོང་དང་། མཁར་ཆུ་རྣམས་སུ་སྒྲུབ་པའི་རྒྱལ་མཚན་བཙུགས་ཤིང་འགྲོ་དོན་མཛད། ཚེ་ཚད་སུམ་ཅུ་རྩ་བདུན་ཡིན་པ་ལ། སློབ་དཔོན་ཀུན་དགའ་ཞེས་པའི་སྐལ་ལྡན་ཞིག་གིས་གསོལ་བ་ཐེབས་པས། དགུང་ལོ་དྲུག་ཅུ་རྩ་གཅིག་པ་ལ་དུར་ཁྲོད་ལ་ཁར་གཤེགས་པའི་ཚེ་འོད་ཆེན་པོ་སྒྲ་དང་བཅས་པ་ནུབ་ཕྱོགས་སུ་ཡལ་བ་ཀུན་གྱིས་མཐོང་། སྤུར་གྱི་རྣམ་པར་སྦྱང་དུས། ནམ་མཁའི་ལམ་ནས་སྤུར་ཁང་ལ་འོད་ལྔའི་སྣམ་བུ་བསྐྱངས་པ་སོགས་ངོ་མཚར་བའི་ལྟས་དཔག་ཏུ་མེད་པ་བྱུང་ཞིང་། སྐུ་ལྔ་ཐོབ་པའི་རྟགས་ཀྱི་གདུང་ཡང་རྒྱུད་ལས་ཇི་སྐད་བཤད་པ་བཞིན་བྱོན་ཏོ། །འདི་གྲུབ་ཐོབ་ཨུ་རྒྱན་པ་དང་དུས་མཚུངས། ཨུ་རྒྱན་པ་བཅུ་ཕྲག་ལྷག་བཅས་ཀྱིས་བགྲེས་ལ་སྐུ་ཚེ་ཡང་རིང་ངོ་། །མེ་ལོང་བའི་སློབ་མ་ནི་རིག་འཛིན་ཀུ་མ་རཱ་ཛ་སྟེ། གཡོ་རུ་འོན་པར་གསར་རྫིང་ཁ་ཞེས་བྱ་བའི་གྲོང་རྡལ་དུ་འཁྲུངས། ཐར་པ་རྒྱན་དུ་བཏགས། ཆུང་ངུ་ནས་དད་པ་དང་སྙིང་རྗེ་དང་ཤེས་རབ་ལ་སོགས་ཏེ་འཕགས་པའི་ནོར་གྱི་ཁྱད་ཆོས་མང་པོ་མངའ་བས་ཀློག་ཡིག་མ་བསླབས་པར་མཁྱེན། ལོ་བདུན་པ་ལ་ཀོང་པོ་འོར་ཤོད་མཐོ་སྟེངས་དགོན་པའི་བླ་མ་དགྱེས་རྡོར་པ་ལས། ཀྱེ་རྡོ་རྗེ་དང་བདེ་མཆོག་གི་དབང་ཞུས། ལོ་དགུ་པའི་ཚེ་མཁན་པོ་གཙང་བ་ལས་ཡོངས་རྫོགས་ཀྱི་དགེ་བསྙེན་བླངས། སྤྱན་རས་གཟིགས་འཁོར་བ་དོང་སྤྲུགས་ཀྱི་ཆོས་
སྐོར་ལ་སྦྱངས། བཅུ་གཉིས་པ་ལ་ཕག་མོ་གྲུའི་མཁན་པོ་ཡེར་བ་དང་སློབ་དཔོན་མངའ་རིས་པ་ལས་རབ་ཏུ་བྱུང་། མཚན་གཞོན་ནུ་རྒྱལ་པོར་བཏགས། འདུལ་བ་བསླབས། རིན་པོ་ཆེ་གྲགས་ཡེ་པ་ལས་ལོ་ལྔའི་བར་དུ་ནཱ་རོ་ཆོས་དྲུག་ལ་སོགས་པ་དང་། མཚར་སྟེངས་པ་ལས་བརྟག་གཉིས་ཉན། དབོན་སངས་ཤེ་ལས་བཟོ་རིག་པ་བསླབས། ཡི་གེ་དྲུག་པ་བཟླས་པས་ཤེལ་གྱི་ཁང་བུ་ཞིག་ན་ཐུགས་རྗེ་ཆེན་པོ་ཞལ་འཛུམ་པ་མཐོང་། ཁྱུང་ནག་ཤག་དར་ལས་རྙིང་མའི་རྒྱུད་ལུང་མན་ངག་མང་དུ་ཞུས། ངང་ཕུག་ཏུ་མེ་ལོང་རྡོ་རྗེ་དང་མཇལ། ཕྱག་རྒྱ་ཆེན་པོའི་ཁྲིད་ཞུས་པས་སེམས་ཅེར་མཐོང་དུ་ངོ་འཕྲོད། དེ་ནས་གྲུབ་ཆེན་པ་མོན་གྱི་མཁའ་འགྲོའི་གླིང་ལ་གཤེགས་པའི་ཕྱག་ཕྱི་ལ་བྱོན། རྡོ་རྗེ་ཕག་མོའི་ཆོས་སྐོར་སོགས་ཞུས་ནས་བསྙེན་པ་མཛད་པས། ཚེས་བཅུའི་ནུབ་གཅིག་ཨོ་རྒྱན་པདྨ་དང་མཇལ། ཨེ་མ་རིགས་ཀྱི་བུ། རྟག་ཏུ་ཆོས་གྱིས་ཤིག་གསུངས། དེ་ནས་མཚུར་ཕུར་བྱོན་ནས་གཉན་རས་དང་དར་མ་མགོན་པོ་ལས་ཀརྨ་པའི་ཆོས་སྐོར་རྣམས་ཞུས། དེ་ནས་ལ་སྟོད་དིང་རི་དང་། སྤུད་ཏྲར་བྱོན་པས། གྲུབ་ཆེན་ཨོ་རྒྱན་པ་དང་། རྗེ་ཀརྨ་པ་རང་བྱུང་རྡོ་རྗེ་དགུང་ལོ་བདུན་པ་རབ་ཏུ་བྱུང་མ་ཐག་པ་དང་མཇལ། ཨོ་རྒྱན་པ་ལས་གདམས་པ་མང་དུ་ནོད། དེ་ནས་ལོ་འགའ་ན་ཨོ་རྒྱན་པས་གཉན་རས་ལས་སྙིང་ཏིག་ཞུས་པའི་ཟླ་ལ་ཚང་བར་ཐོབ། རྒྱ་
སྨན་པ་ནམ་མཁའ་རྡོ་རྗེ་ལས་གསང་སྐོར་གནད་ཀྱི་ངོ་སྤྲོད་དང་། སྐལ་ལྡན་པ་ཆོས་ཀྱི་སེངྒེ་ལས་གསང་བ་གནད་ཀྱི་མེ་ལོང་སོགས་རྫོགས་ཆེན་གསང་བའི་སྐོར་ཞུས། སླར་མཁར་ཆར་གྲུབ་ཆེན་མེ་ལོང་རྡོ་རྗེར་གསང་བ་སྙིང་ཏིག་དབང་ཁྲིད་གདམས་པ་དང་བཅས་པ་ལེཊ་པར་ཐོབ། འབུལ་རྒྱུ་གཞན་མེད་པས་ལུས་ངག་གི་ཞབས་ཏོག་དང་། དབྱར་རིལ་པོ་གཉིས་སུ་རི་མོ་མཛད། ནས་ཁལ་བཞི་བཞི་གནང་བའི་གཉིས་གཉིས་ཀྱིས་ཤོག་བུ་ཉོས་མཚན་མོ་དཔེ་རྣམས་བྲིས། ཕྱེད་པོས་མར་མེ་དང་གསོལ་མཛད་པས། དཀའ་ཐུབ་ཀྱི་མཐུས་ཤིག་ནད་དྲག་པོ་ཞིག་བྱུང་། བྱིན་རླབས་དད་པའི་རྗེས་སུ་འབྲང་བས་ཐུགས་དམ་ཡང་ཁྱད་པར་ཅན་འཁྲུངས། བླ་མ་མཉེས་ནས་འགྲོ་དོན་གྱིས་ཤིག་པའི་རྗེས་སུ་གནང་བ་ཐོབ། དབང་གྲལ་དུ་བླ་མའི་དབུའི་བར་སྣང་ལ་མགོན་པོ་ཕྱག་བཞི་པ་དང་། སྒོའི་ཐད་ན་ཨེ་ཀ་ཛ་ཊཱི་མཐིང་མོ་ཞིང་དབྱུག་དང་སྤྱང་མོ་བསྣམས་པ་བོངས་ཉིས་ཐོག་ཙམ་པ། ཕྱི་ངོས་ན་ལས་ཀྱི་མ་མོ་ཁྲག་རལ་ཅན་ལག་པས་ཁྲག་བཅུས་ནས་འཐུང་བ་རྣམས་མཐོང་། ལོ་བརྒྱད་དུ་བླ་མ་འདུ་འབྲལ་མེད་པར་བསྟེན། ཨོ་རྒྱན་གྱི་སྒྲུབ་གནས་སྨྱུག་ཚལ་སྦུག་ཏུ་དགུན་ཐོག་གཅིག་བཞུགས་པས་རྡོ་རྗེ་ཕག་མོའི་ཞལ་གཟིགས། དེ་ནས་ཤེས་རབ་ཕྱོགས་མེད་དུ་རྒྱས། རེ་ཞིག་ཡར་ཀླུང་མཚར་སྟེངས་ཀྱི་རི་ཁྲོད་བཏབ་ནས་བཞུགས། དེ་ནས་
བླ་མ་འདའ་བར་མཁྱེན་ནས་མཁར་ཆུར་བྱོན་ཙ་ན། བླ་མའི་སྲས་གཉིས་ས་སྐྱགས་སུ་འཛོམས། སླར་ལོག་ཉི་ཤུ་ལྔའི་དུས་མཆོད་བཙུགས། ཙ་རི་ལ་བྱོན་པས་ཀྲིག་མོ་ལྷའི་ནེའུ་གསིང་གི་རྡོ་སྐུ་ལ་འཇའ་ཚོན་སྣ་ལྔ་ཟུག་པ་སོགས་བྱུང་། དེ་ནས་མཚུར་ཕུར་ཆོས་རྗེ་རང་བྱུང་རྡོ་རྗེས་གདན་དྲངས་ཏེ་སྙིང་ཏིག་གི་གདམས་པ་རྣམས་ཕུལ། ཤངས་སུ་བྱོན་ནས་ལྕེ་སྒོམ་ནག་པོའི་བརྒྱུད་པ་སློབ་དཔོན་སྒོམ་པ་ལ་གསང་སྐོར་སྙན་བརྒྱུད་རྣམས་དང་བསམ་གཏན་མིག་གི་སྒྲོན་མེ་ཞུས། དིང་རི་སྣ་དམར་དུ་དབོན་པོ་བྱང་སྒྲུབ་ལ་ཡང་དགོན་པའི་རི་ཆོས་རྣམས་ཉན། ཨོ་རྒྱན་པ་རང་བྱུང་དཔལ་དར་ཡང་མཇལ། མར་ལམ་བླ་མ་བཀྲ་ལུང་པ་ལས་གཤིན་རྗེ་དགྲ་ནག་ལ་སོགས་པ་ཞུས། སློབ་དཔོན་ཡེ་མགོན་ལ་སོགས་པ་བཤེས་གཉེན་མང་དག་ལས་གསང་སྐོར་དང་རྒོད་ཚང་པའི་ཁྲིད་ཀྱི་སྐོར། ཨ་རོའི་ཁྲིད་མོ་ཆེ་དོན་སྐོར་ལ་སོགས་པ་བོད་ན་གྲགས་པ་ཆེ་བའི་རྫོགས་རིམ་ཕལ་མོ་ཆེ་ཁོང་དུ་ཆུད། ཆོས་ཕྱིར་དཀའ་སྤྱད་བཟོད་པས་ཙ་རི་གསར་མ་བགྲོད་ནས་རྙིང་མའི་གཡུ་མཚོའི་འགྲམ་དུ་གཅིག་པུར་ཟླ་བ་བརྒྱད་བཞུགས། ཆོ་འཕྲུལ་ཆེན་པོ་བྱུང་བ་གཤིས་ཐོག་ཏུ་རོ་སྙོམས་པས་གཞི་བདག་དབང་དུ་འདུས་ནས། ཁོང་པར་གདན་དྲངས་བསྙེན་བཀུར་བྱས། ཛམ་བྷ་ལས་ནོར་བུ་བྱིན། མཚོ་ནང་དུ་འོད་ལྔའི་ལྦུ་བ་སེལ་པོ་
ཙམ་གཅིག་ཐིམ་འགྲོ་བ་གཟིགས། ཐུགས་ངེས་འབྱུང་དང་སྐྱོ་ཤས་ཀྱིས་རྒྱུད་བརླན་པས། དུས་རྟག་ཏུ་ཤམ་པོ་ལ་སོགས་གངས་ཁྲོད་དང་ལུང་སྟོང་འབའ་ཞིག་ཏུ་ལྷགས་སྐྱོབ་ཙམ་ལ་བརྟེན་ནས་བཞུགས་པས། སློབ་མའི་ཚོགས་མང་པོ་འཁོར་བ་མཐའ་ཅན་དུ་མཛད། སྤྲུལ་པའི་སྐུར་གདོན་མི་ཟ་བ་ཀརྨ་པ་རང་བྱུང་རྡོ་རྗེ་དང་། རྒྱལ་བ་ཀློང་ཆེན་པ་གཉིས་རྫོགས་པ་ཆེན་པོའི་སློབ་མའི་གཙོ་བོར་གྱུར་པས་བསྟན་པ་འདི་སྤེལ་བའི་འཕྲིན་ལས་ལ་མུ་དང་མཐར་མ་སོན། དེ་སྐད་དུ་འབྲི་གུང་པ་ཆོས་རྒྱལ་རིན་ཆེན་ཕུན་ཚོགས་ཀྱིས། ཆོས་འདིའི་བསྟན་པའི་བདག་པོ་ཀུན་མཁྱེན་ཀློང་ཆེན་པ་ཡིན། རྒྱལ་བ་རང་བྱུང་རྡོ་རྗེའི་དུས་འཕྲིན་ལས་རྒྱ་ཆེ་ཞེས་གསུངས་པས་མཚོན་ནོ། །བྱང་ཆུབ་སེམས་དཔའི་སྤྱོད་པ་ལ་ཤིན་ཏུ་གོམས་པས། སྙིང་རྗེ་ཆེན་པོའི་དབང་གིས་གྲོང་དང་ཡུལ་འཁོར་མང་པོ་དག་ལའང་ཐབས་ལ་མཁས་པས་ཐར་པའི་ས་བོན་འདེབས་པ་ཁོ་ན་ལྷུར་མཛད་ཅིང་། ཀོང་པོ་ནས་ཨེ་ལ་ཐུག་གི་བར་འཇིགས་པས་ཉེན་པའི་ལམ་ཕྲང་ལ་འགྲོ་བ་དག་གི་དབུགས་འབྱིན་པ་དང་། རི་དྭགས་དང་ཉ་ལ་སོགས་པའི་སེམས་ཅན་ཉམ་ཆུང་བ་དེ་དག་ལ་ཐུགས་ཤིན་ཏུ་བརྩེ་བས་བདོག་པ་ལ་འཕང་སེམས་མེད་པས། རི་རྒྱ་དང་། ལམ་རྒྱ་དང་། ཆུ་རྒྱ་ལ་སོགས་པ་མཛད་ནས་བདེ་འཇམ་ལ་བཀོད། གང་དུ་བཞུགས་པའི་ལུང་པ་དང་། ཡུལ་གྲོང་ཐམས་ཅད་ཀྱི་སད་སེར་ཡམས་ནད་ལ་སོགས་པ་ཞི་བར་མཛད་ཅིང་ཕན་
པ་འབའ་ཞིག་ལྷུར་ལེན། སྙིང་ཏིག་གི་གདམས་པ་རྫོགས་རིམ་གཞན་དང་མ་འདྲེས་པར་རང་སྐད་ཀྱི་གྲུབ་མཐའ་བསླངས་ཏེ་འཆད་ནུས་པ་དང་ཤངས་ལ་སྨེ་བ་ཨའི་རི་མོ་ཅན་མངའ་བ་དང་སྔགས་བདག་གཟའ་དང་དམ་ཅན་རྣམས་ཀྱིས་བཀའ་ལ་ཉན་ཅིང་མི་དང་མི་ལབ་པ་བཞིན་དུ་ཡོད་པ་དང་། མངོན་པར་ཤེས་པས་གདུལ་བྱའི་བསམ་པ་མཁྱེན་ནས་འདུལ་ལུགས་མཁས་པ་དང་། གཞན་རྒྱུད་བྱིན་གྱིས་རློབ་ནུས་པ་དང་རྗེས་སུ་བཟུང་བའི་སྐལ་ལྡན་ཀུན་ལ་འདས་དུས་རྟགས་ཁྱད་པར་ཅན་འབྱུང་བ་སོགས་སློབ་དཔོན་བི་མ་ལའི་སྐུའི་བཀོད་པར་གྲགས་ཤིང་། ཐལ་འགྱུར་ལས་དགེ་སློང་དཔལ་ལྡན་ཞེས་ལུང་བསྟན་ཏོ། །དེ་ལྟར་དོན་གྱི་འགྲོ་དོན་བསམ་གྱིས་མི་ཁྱབ་པའི་ངང་ནས་བདུན་ཅུ་རྩ་བརྒྱད་པ་ཆུ་མོ་ལུག་གི་ལོའི་སྟོན་ཟླ་འབྲིང་པོའི་ཉི་ཤུ་ལྔ་ལ་སྒྲ་དང་། འོད་དང་། གུར་ཁྱིམ་ལ་སོགས་པའི་རྟགས་ངོ་མཚར་བ་དང་བཅས་སྐུ་གཤེགས་པས། ཉེ་གནས་སྒོམ་དར་ལ་སོགས་པ་དྲུང་ན་ཡོད་པ་རྣམས་ཀྱིས་མོས་གུས་ཆེན་པོས་གདུང་བ་བསྐྱེད་པས་སླར་བཞེངས་ཏེ་སྐྱིལ་མོ་ཀྲུང་བཅས། ཞལ་འཛུམ་པའི་ངང་ནས་ཁྱེད་རྣམས་མྱ་ངན་མ་བྱེད། ང་ཤི་བ་མིན་གསུངས་ནས་གདམས་ངག་དང་ཞལ་ཏ་ཅི་རིགས་པ་བྱོན། ཞག་བཅུ་གསུམ་སྐུ་ཚེ་སླར་ལ་བསྲིངས། དེར་ཚེས་བདུན་གྱི་ཉིན་གཤེགས་པའི་ཕྱིར་ཇི་ལྟར་བགྱི། བླ་མ་ཀུན་མཁྱེན་པ་གདན་འདྲེན་ནམ་ཞུས་པས། ཁོང་
འོ་བརྒྱལ་དུ་མ་འཇུག །ད་བཟོད་ཆོས་ཀྱི་ཞུན་མཐར་མ་ཆོད་པ་ཡོད་ན་དེར་སོང་། ཁ་ཏ་མང་པོ་སྔར་ནས་བྱས་ཟིན་ཅལ་ཅོལ་མ་སྨྲ་གསུངས། དྲང་སྲོང་ཙོག་པུའི་འདུག་སྟངས་དང་། ཆོས་སྐུའི་གཟིགས་སྟངས་ཀྱི་ངང་ལས་ཞལ་འཛུམ་པར་མཛད་དེ། ཚེས་བརྒྱད་ཀྱི་ཐོ་རེངས་ཁ་ན་གདོད་མའི་གྲོང་ཁྱེར་ག་ལ་བ་དེར་གཤེགས་སོ། །ཉི་ཤུ་ལྔ་ལ་སྤུར་བཞུ་བས་དབུ་ཐོད་རིལ་པོར་བྱོན་པའི་ནང་ན་རིགས་ལྔའི་ཚོམ་དཀྱིལ་དང་། སྙན་གོང་གཡས་ན་རྗེ་བཙུན་མ་མཐིང་ག་ཚོན་གང་བ། གདུང་རིགས་ལྔ་དང་། རིང་སྲེལ་ལ་སོགས་པ་བྱོན་ཅིང་འཇའི་གུར་གྱི་འཁོར་ར་ཁོར་ཡུག་ཏུ་དཀྲིགས་སོ། །དེ་ལ་རྒྱལ་བའི་དབང་པོ་ཀརྨ་པ་རང་བྱུང་རྡོ་རྗེ་ནི། འཕགས་པ་སྤྱན་རས་གཟིགས་འཇིག་རྟེན་དུ་དངོས་སུ་བྱོན་པ་སྟེ། ཆོས་ཀྱི་དབྱིངས་ནས་ཡེ་ཤེས་ཀྱི་མཁའ་འགྲོ་མ་རྣམས་ཀྱིས་རྡོ་རྗེའི་གླུས་བསྐུལ་ནས་སེམས་ཅན་རྣམས་ལ་ཚད་མེད་པའི་སྙིང་རྗེས་གཟིགས་ཏེ། སྟོད་ལུང་དུ་རྒན་རྒོན་གཉིས་ཀྱི་བུ་ཤི་བའི་རོ་ལ་གྲོང་འཇུག་གི་རྣམ་པས་གཤེགས་ཙ་ན། ཤི་མིག་གསོན་ལ་བལྟ་བ་ལྟས་ངན་ཡིན་ཟེར་ནས་མིག་ཁབ་ཀྱིས་གཙགས། དལ་འབྱོར་གྱི་ཆོས་བརྒྱད་ཚང་བའི་ལུས་ལས་གཞན་དུ་གྱུར་པས་སླར་འཕོས་ཏེ་རྣལ་འབྱོར་ཕོ་མོ་གཉིས་ཀྱི་བུར་སྲིད་པ་བཟུང་། སྔོན་གནས་རྗེས་སུ་དྲན་པ་ལ་སྒྲིབ་བྱེད་སྐྲའི་རྩེ་མོ་ཙམ་ཡང་མེད་པས་མངལ་གྱི་དྲི་མས་གཏན་ནས་མ་གོས་པ་རྒྱ་གར་ན་ཤཱཀྱ་ཐུབ་པ་དང་།
བོད་དུ་སྐྱེས་བུ་ཆེན་པོ་འདི་ལས་མེད་པར་གྲགས། རྒྱ་བོད་གཉིས་ཀར་སངས་རྒྱས་ཀྱི་བསྟན་པའི་སྲོག་ཤིང་གཅིག་པུར་བཞུགས། བསམ་ཡས་མཆིམས་ཕུ་དང་གཡའ་མ་ལུང་སོགས་ནས་ཚེ་ཆུའི་གཏེར་བཞེས་ནས་གོང་མ་རྒྱལ་པོའི་ཚེ་བསྲིངས། བཱི་མ་ལ་མི་ཏྲ་རང་གི་མཛོད་སྤུར་ཐིམ་པ་གཟིགས་པའི་མོད་ལ་སྙིང་ཐིག་གི་དགོངས་པ་ཇི་ལྟ་བ་བཞིན་མངོན་དུ་གྱུར། འོན་ཀྱང་གསང་སྔགས་བླ་མ་ལ་བསྟེན་པའི་མིག་ལྟོས་ཙམ་སྟོན་པའི་སླད་དུ་གཅོམ་བསྐྱུངས་ནས་རིག་འཛིན་ཀུ་མ་རཱ་ཛ་ལས་གསང་བ་སྙིང་ཏིག་གི་མན་ངག་ཡོངས་སུ་རྫོགས་པ་གསན། འདི་ནི་སློབ་དཔོན་ཆེན་པོ་པདྨ་ལས་བརྒྱུད་པ་ཞིག་འོང་ཐང་དགོངས་པའི་ཚེ་སློབ་དཔོན་སངས་རྒྱས་གཉིས་པ་ཞལ་གཟིགས། མན་ངག་སྙིང་ཏིག་དངོས་སུ་ཐོབ་ཀྱང་ཚིག་བརྒྱུད་ལ་ནན་ཏན་དུ་བྱ་བའི་ཕྱིར་ཤོའི་རྒྱལ་སྲས་ལེགས་ལྡན་པ་སྤྱན་དྲངས་ནས་ཙ་རི་དགོན་གསར་དུ་རྫོགས་པར་གསན། སླར་སློབ་མ་རྣམས་ལ་རྩལ་དུ་སྟོན་ནས་གསུངས། བཀའ་ལས་ཆོས་འདི་ལྟ་བུ་ནུབ་ཏུ་འཕངས་པས་གཡུང་སྟོན་རྡོ་རྗེ་དཔལ་གྱིས་གཙང་ཡེ་རྒྱལ་བས་ཁམས་ཀོང་ཡེ་ཤེས་རྒྱལ་མཚན་པས་ཧོར་དང་རྒྱ་ནག །སྤྲུལ་སྐུ་བས་དབུས་སུ་དར་བར་གྱིས་ཞེས་སྨན་ལུང་པ་ཤཱཀྱ་གཞོན་ནུ་སོགས་ལ་རྗེས་སུ་གདམས། ས་ལ་གནས་པའི་བྱང་སེམས་ཀྱིས། རྒྱ་མཚོའི་བར་དུ་སྤེལ་བར་
བྱེད། ཅེས་པ་དེ་ཡིན་པར་གྲགས། ཀུན་ཏུ་བཟང་པོ་ཐུགས་ཀྱི་ཀློང་ན་རང་གསལ་ཏེ་དགོངས་པའི་གཏེར་མཛོད་ཆེན་པོ་ལ་དབང་བསྒྱུར་ནས་ཀརྨ་སྙིང་ཏིག་ཅེས་གྲགས་པའི་གདམས་པ་ཡང་བྱུང་། འདི་དག་ཀྱང་བསྟན་པའི་ཆུ་མགོ་གཅིག་ཡིན་ནོ། །རྒྱལ་བ་གཉིས་པ་དཔལ་བསམ་ཡས་པ་ཀུན་མཁྱེན་ངག་གི་དབང་པོའམ། ཀློང་ཆེན་རབ་འབྱམས་ནི། གཡོ་རུ་གྲའི་ཆ་སྟོད་གྲོང་དུ་ངན་ལམ་བཙན་པོ་འོད་ཀྱི་དཀྱིལ་འཁོར་ཅན་ཞེས་བྱ་བ་མ་སྨད་པའི་རིགས་ཀྱི་ཡོན་ཏན་ཅན་ནོ། །རུས་ནི་རོག་སྟེ་སད་མི་བདུན་གྱི་ནང་ཚན་ཛྙཱ་ན་ཨིནྡྲ་རཀྵི་ཏའམ་། བོད་སྐད་དུ་ཡེ་ཤེས་དབང་པོ་བསྲུངས་པ་སློབ་དཔོན་ཆེན་པོའི་དངོས་སློབ། དགེ་སློང་རྒྱལ་བ་མཆོག་དབྱངས་དང་གདུང་གཅིག་པའི་རབས་ཉེར་ལྔ་པ། མེས་པོ་ལྷ་སྲུང་ཞེས་བདུད་རྩིའི་བཅུད་ལེན་གྲུབ་པས་ལོ་བརྒྱ་དང་ལྔར་འཚོ་བ་དེའི་སྲས་སློབ་དཔོན་བསྟན་པ་སྲུང་ཞེས་རིག་གནས་དང་། སྔགས་ཀྱི་རྣལ་འབྱོར་ལ་རང་བྱན་ཆུད་པ་ཞིག །འབྲོམ་སྟོན་རིན་པོ་ཆེ་རྒྱལ་བའི་འབྱུང་གནས་ཀྱི་གདུང་ལས་བྱོན་པ་འབྲོམ་བཟའ་མ་བསོད་ནམས་རྒྱན་ཞེས་བྱ་བ་དང་འདུས་པ་ལས་སྐྱེ་བའི་མྱུ་གུ་བཟུང་ངོ་། །དེའི་ཚེ་ཡུམ་ལ་སེང་གེ་ཆེན་པོ་གཅིག་གི་དཔྲལ་བ་ན་ཉི་མའི་འོད་ཟེར་འབར་བས་སྲིད་པ་གསུམ་ལྷག་གེར་གསལ་བ་ཞིག་རང་ཉིད་ལ་ཐིམ་པར་རྨིས་སོ། །དེ་ནས་རབ་བྱུང་ལྔ་པའི་ཕུར་བུ་ས་སྤྲེའུ་དབོ་ཟླའི་ཚེས་
བཅུའི་ཉིན་མངལ་གྱི་ཆུ་འཛིན་ལས་རྣམ་པར་གྲོལ། གཞོན་ནུ་དོན་གྲུབ་ལ་ལྷའི་དབང་པོས་བྱ་བ་བཞིན་དུ་ནམ་གྲུ་རེ་མ་ཏིས་ངས་བསྲུངས་པ་ཡིན་ཞེས་ལག་ཏུ་བླངས། སླར་ཡུམ་ལ་གཏད་ནས་མི་སྣང་བར་སོང་ཞིང་། འདི་ལྟར་བྱང་ཆུབ་སེམས་དཔའ་ནི་འཕགས་པའི་ནོར་གྱིས་གདོད་ནས་ཕྱུག་པས་དད་པ་དང་། སྙིང་རྗེ་ལ་སོགས་པའི་ཡོན་ཏན་སྒྲིབ་མེད་དུ་གསལ། ལོ་ལྔ་ནས་བྲིས་ཀློག་ལེགས་པར་མཁྱེན། ཡབ་ལས་བཀའ་བརྒྱད་བདེ་འདུས། ཕུར་པ། རྟ་མགྲིན། བླ་མའི་ལས་གཞུང་སོགས་སྒྲུབ་ཕྲིན་མང་དུ་གསན། སྨན་རྩིས་ལ་སོགས་པའི་རིག་པའང་ཁོང་དུ་ཆུད། དགུ་པའི་སྟེང་དུ་ཉི་ཁྲི་དང་བརྒྱད་སྟོང་བརྒྱ་ཚར་བཏོན་པས་ལྷག་མེད་དུ་ཐུགས་ལ་འཛུལ། བཅུ་གཉིས་པའི་ཚེ་བསམ་ཡས་པ་མཁན་པོ་བསམ་གྲུབ་རིན་ཆེན་དང་། སློབ་དཔོན་ཀུན་དགའ་འོད་ཟེར་ལས་རབ་བྱུང་གི་དངོས་པོ་བརྙེས། མཚན་ཚུལ་ཁྲིམས་བློ་གྲོས་སུ་གྲགས། དམ་པའི་ཆོས་འདུལ་བ་ལ་ལེགས་པར་སྦྱངས་པས་ལོ་བཅུ་བཞི་པར་བཤད་པའི་བ་དན་བཟུང་ཆོག་པ་བྱུང་། བཅུ་དྲུག་པར་སློབ་དཔོན་བཀྲ་ཤིས་རིན་ཆེན་ལས་ལམ་འབྲས་དང་། ཆོས་དྲུག་གཉིས། ཕག་མོ་ཆོས་དྲུག །བདེ་མཆོག་དྲིལ་བུ་པ། ཕྱག་རྡོར་འཁོར་ཆེན་ལ་སོགས་པའི་དབང་ཁྲིད་གདམས་པ་མང་དུ་ཉན། སློབ་དཔོན་དབང་ཡེས། སྟོན་ཚུལ། ཁྲོ་ཕུ་པ་ལ་སོགས་
པར། བྱ་སྤྱོད། རྣལ་འབྱོར། རྡོ་རྗེ་གུར། མཁའ་འགྲོ་རྒྱ་མཚོ། སངས་རྒྱས་ཐོད་པ། རྡོ་རྗེ་ཕྲེང་བ། དུས་ཀྱི་འཁོར་ལོ་ལ་སོགས་པའི་སྔགས་རྒྱུད་མང་པོ་དང་། རིན་པོ་ཆེ་ཟ་ལུང་པ་སོགས་ལས་ཞང་ཚལ་བའི་གདམས་སྐོར། རྒོད་ཚང་བའི་ལམ་ཁྲིད། གཅོད་ཡུལ། ཞི་བྱེད་སྔ་ཕྱི་བར་གསུམ་ལ་སོགས་པ་མང་དུ་ཉན། བཅུ་དགུ་པར་གངས་རིའི་ཁྲོད་ན་ཚད་མ་སྨྲ་བའི་རིགས་གྲྭ་ཆེན་པོ་རྔོག་ལེགས་པའི་ཤེས་རབ་ཀྱིས་ལེགས་པ་བསྐྲུན་པའི་གནས་གསང་ཕུ་ནེའུ་ཐོག་གི་མ་ལ་ཡའི་ནགས་ཀླུང་ཆེན་པོར་ཞུགས་ནས་གླིང་སྟོད་གདན་རབས་བཅོ་ལྔ་པ་སློབ་དཔོན་བཙན་དགོན་པ་དང་། གདན་རབས་བཅུ་དྲུག་པ་བླ་བྲང་བ་ཆོས་དཔལ་རྒྱལ་མཚན་གཉིས་ལས། བྱམས་པའི་ཆོས་ལྔ། ཚད་མ་སྡེ་བདུན། ཕར་ཕྱིན། དབུ་མ་ལ་སོགས་མཚན་ཉིད་ཐེག་པའི་ལུང་རིགས་ཀྱི་པདྨའི་རྩ་བ་མངར་པོར་གྱུར་པ་དག་ལོ་དྲུག་གི་བར་དུ་ལྷག་མ་མ་ལུས་པར་ཟོས་པས། བློ་གྲོས་ཆེན་པོའི་ལུས་ཀྱི་སྟོབས་ལྷག་པར་རྒྱས། དཔང་ལོ་བློ་གྲོས་བརྟན་པ་ལ་མདོ་ཏིང་ངེ་འཛིན་རྒྱལ་པོ་ལ་སོགས་པའི་ཟབ་ཆོས་མདོ་ལྔ། ཤེས་རབ་སྙིང་པོ་རྒྱ་ཆེར་འགྲེལ་པས་མཚོན་པའི་ལུང་ཕྲན་མང་པོ་སོགས་ནང་པའི་གཞུང་། སྒྲ་དང་། སྙན་དངགས་དང་། སྡེབ་སྦྱོར་དང་། ཟློས་གར་ལ་སོགས་པ་ཕྱི་རོལ་པ་དང་ཐུན་མོང་དུ་གྱུར་པའི་གནས་ཐམས་ཅད་ལ་ཐོས་བསམ་མཐར་ཕྱིན་པའི་སྣ་ཞགས་རིང་པོར་བརྐྱང་།
ཤེས་རབ་ཀྱི་ལྷ་འཇམ་པའི་དབྱངས། མཚོ་ལྡན་མ། མི་གཡོ་བ། ཕག་དཀར་རྣམས་ལ་བསྒྲུབ་པ་མཛད་པས་ཀུན་ཀྱང་ཞལ་གཟིགས། ཁྱད་པར་སྒྲ་དབྱངས་ལྷ་མོས་ཕྱག་མཐིལ་དུ་བཞག་ནས། གླིང་བཞི་རི་རབ་དང་བཅས་པ་ཞག་བདུན་དུ་བསྟན་ཅིང་ལུང་བསྟན་ཐོབ། ལྷག་པའི་ལྷ་དེ་དག་གིས་ཀྱང་ཐོགས་པ་མེད་པའི་བློ་གྲོས་ཀྱི་དངོས་གྲུབ་ཆེན་པོའི་གནས་གང་ཡིན་པའི་དྲྭ་བ་དང་དྲྭ་བ་ཕྱེད་པའི་འཕྱང་འཕྲུལ་དང་། རིན་པོ་ཆེའི་ཏོག་གི་རྣམ་པར་དཔྱངས་པས། བརྒལ་བ་དང་། བརྟག་པ་དང་། རིགས་པའི་ཐལ་འགྱུར་གྱི་སྒྲ་ཆེན་པོས་ས་འདི་གཡོ་བ་ཙམ་དུ་གྱུར་ནས། རྒོལ་བ་ངན་པའི་ཁྱུ་མཆོག་རྭ་གཅིག་པའི་བརྟུལ་ཞུགས་འཛིན་པ་རྣམས་བསྒྲུབ་པ་དང་། སུན་འབྱིན་པའི་རྐང་པ་མཆོག་གིས་རྣམ་པར་བརྫི་བ་དང་། རྣམ་པར་འཐག་པ་དང་། རྣམ་པར་ཉམ་ཉེས་པར་བྱས་ནས་ཅང་མི་སྨྲ་བའི་གནས་ལ་བཀོད་པས་བསམ་ཡས་ལུང་མང་པོའམ། ཀློང་ཆེན་རབ་འབྱམས་ཞེས་པའི་མཚན་གྱི་རྔ་བོ་ཆེ་མཁའ་ལ་འགྲོ་བ་དང་མི་མ་ཡིན་གྱི་གནས་སུའང་གྲགས་པ་གསལ་བ་ཉིད་དོ། །དེ་ལྟར་ལུང་དང་རིག་པའི་གནས་རྒྱ་ཆེན་པོ་ལ། མི་འཇིགས་པའི་ཉམས་བརྟས་པར་གྱུར་ནའང་། འདི་ལྟར་སྐྱེས་བུ་ཆེན་པོ་རྣམས་ནི་རྣམ་པར་གྲོལ་བའི་ལམ་ལ་གང་ཉེ་བའི་ཕྱོགས་ལ་འཇུག་པ་རྩོམ་སྟེ། ཕྱོགས་དང་ཕྱོགས་བྲལ་གྱི་གནས་སུ་ལྷགས་ནས་
བྱང་ཆུབ་སེམས་དཔའ་རྟག་ཏུ་ངུའི་རྣམ་པར་ཐར་པ་ལ་ཡིད་གཞུངས་པས། བླ་མ་དང་དགེ་བའི་བཤེས་གཉེན་དུ་མ་ལས་མདོ་དང་། རྒྱུད་དང་། མན་ངག་མང་དུ་ཞུས་ནས་ཐོས་པ་དང་བསམ་པའི་བློ་གྲོས་ཆེར་བསྐྱེད། གངས་རིའི་ཁྲོད་ན་གཞུང་ལུགས་དང་མན་ངག་མང་དུ་གནས་པ་ལ་ཕྱོགས་དང་རིས་སུ་བཅད་པ་སྤངས་ཏེ། བུང་བ་གཞོན་ནུས་སྦྲང་རྩིའི་སྙིང་པོ་ལ་བྱ་བ་བཞིན་དུ། དན་བག་པ་སློབ་དཔོན་གཞོན་ནུ་དོན་གྲུབ། མྱོས་མཐིང་མ་བ། སངས་རྒྱས་གྲགས་སོགས་བླ་མ་བཞི་ལ་མདོ་སྒྱུ་སེམས་གསུམ་རྙིང་མ་རྒྱུད་འབུམ་གྱིས་གཙོས་མང་དག་གསན་པས་སྔ་འགྱུར་རྡོ་རྗེ་ཐེག་པའི་གྲུབ་མཐའ་ཆེན་པོ་གཅིག་ཏུ་འཇུག་པའི་རྟེན་འབྲེལ་ཤར། ཕྱིས་གསང་བའི་སྙིང་པོ་ལ་སྙིང་ཏིག་དང་མཐུན་པའི་ཊཱི་ཀ་ཕྱོགས་བཅུ་མུན་སེལ་ཉི་ཟླའི་སྤྲིན་གྱི་སྣང་བ་ཞེས་བྱ་བ་དང་། སྤྱིའི་ཁོག་འབུབས་གཉིས་མཛད། གསང་སྙིང་འགྲེལ་པ་སྤར་ཁབ་ཀྱི་ལུགས་ལྟར་འཆད་པ་མི་ལེགས་ཀྱི། རོང་ཟོམ་གྱི་ལུགས་ལྟར་ལེགས་པ་ཡིན་ཞེས་གསུངས། ལར་གཡུང་འགྲེལ་དང་བཅས་འདི་གསུམ་རང་བཤད་སྒྲོམ་ཆེ་བར་སྣང་། སློབ་དཔོན་གཞོན་རྒྱལ་ལ་སོགས་པར་དབུ་མ་ཚིག་འཇུག་ལ་སོགས་འཕགས་སྐོར་རྣམས་ཚང་བ་དང་། གཞོན་རྡོར་ལས་སྤྱོད་འཇུག་དང་བསླབ་བཏུས་ལ་སོགས་པ། ཇོ་བོའི་ཡི་དམ་སྐོར། སྦྱོར་དྲུག་ཆོས་དྲུག །
མཁན་པོ་ལས་ཁྲོ་ཕུ་བའི་སྐོར། ཁ་རག་ཆོས་སྐོར། སྒྲུབ་ཐབས་རྒྱ་མཚོ། ཆོས་འབྱུང་བརྒྱ་རྩ། འདུལ་བ་ལུང་ལ་སོགས་ཤིན་ཏུ་མང་བ། རྗེ་རང་བྱུང་རྡོ་རྗེ་ལས། སྦྱོར་དྲུག་གེགས་སེལ་དང་བཅས་པ། ནཱ་རོ་ཆོས་དྲུག །སྐུ་གསུམ་ངོ་སྤྲོད། རྒྱལ་བ་རྒྱ་མཚོ། སྤྱན་རས་གཟིགས་རྒྱལ་པོ་ལུགས། གསང་འདུས། སམྦུ་ཊི། མ་ཧཱ་མ་ཡ། གཤིན་རྗེ་གཤེད་དམར་ནག་སོགས་ཆོས་བཀའ་རྒྱ་ཆེན་པོ། སློབ་དཔོན་དབང་ཚུལ་ལས་སྦྱོར་དྲུག་དང་། བསྙེན་སྒྲུབ། རླུང་སྐོར་ལ་སོགས་པ་མང་པོ། ས་སྐྱ་པ་བླ་མ་དམ་པ་ལས། སེམས་བསྐྱེད་ཆེན་མོ་དང་། ལམ་འབྲས་སོགས་ས་སྐྱ་པའི་ཆོས་ཟབ་དགུ་གསན་ཅིང་། འདི་ལ་གཞི་ལམ་འབྲས་བུ་གསུམ་གྱི་རྣམ་པར་གཞག་པའི་ཞུ་ཡིག་རིན་པོ་ཆེ་གསེར་གྱི་མཆོད་སྡོང་ཞེས་བྱ་བའང་ཕུལ་པ་སྣང་། ཞི་བྱེད་རྒྱུད་པ་རྨ་སོ་ཀཾ་གསུམ་དུ་གྲགས་པའི་སློབ་རྒྱུད་ཤུག་གསེབ་རི་པ་གཞོན་རྡོར་ལས། དོ་ཧ་སྐོར་གསུམ། རི་ཆོས་སྐོར་གསུམ། རྟེན་འབྲེལ་བརྒྱ་རྩ་ལ་སོགས་མདོར་ན་གངས་རིའི་ཁྲོད་ན་གྲགས་པའི་གྲུབ་པའི་མཐའ་ཕལ་མོ་ཆེ་ཐུགས་སུ་ཆུད་ཅིང་འཆད་རྩོད་རྩོམ་གསུམ་ལ་ཐོགས་པ་མེད་པའི་ཐུགས་རབ་སྐྱེས། ཐ་སྙད་ཀྱི་རིག་པ། མདོ་སྔགས་ཀྱི་གཞུང་ལུགས་མན་ངག་གི་སྐོར་སོགས་གང་ལའང་རང་བྱན་ཆུད་པར་མཛད་དོ། །འདི་ལྟར་སྐྱེས་བུ་ཆེན་པོ་རྣམས་ནི། ཐོས་
བསམ་གྱི་མཐའ་སྒྲུབ་པས་ཉམས་འོག་ཏུ་བཙུད་ནས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་འབབ་སྟེགས་ཉིད་དུ་མཛད་དེ། དེ་ལ་རྣམ་པ་ཀུན་ཏུ་འཁོར་བའི་རང་བཞིན་ལ་ཐུགས་སྐྱོ་ཤས་དང་ངེས་འབྱུང་ཚད་མེད་པས་སྔོན་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྔགས་པའི་གནས་ནགས་ཁྲོད་དང་། བས་མཐའ་འབའ་ཞིག་དོན་དུ་གཉེར་བའི་དགོངས་པ་གཏོད་པའི་ཚེ། བཅོམ་ལྡན་འདས་ཀྱིས་ངེས་པར་འབྱུང་བའི་རྐྱེན་བཞི་གཟིགས་པ་བཞིན་དུ། གྲྭ་ས་དེར་ཁམས་པའི་གྲྭ་པ་དག་གིས་གཟུ་བོར་མི་གནས་པའི་སྤྱོད་པ་ངན་པས་ཐུགས་ངེས་པར་འབྱུང་སྟེ་བྱ་བྲལ་གྱི་ཀུན་ཏུ་སྤྱོད་པས་གཤེགས་པར་ཉེ་བའི་ཚེ། མཁན་སློབ་རྣམས་སྐྱེས་བུ་དམ་པ་འདིའི་རྣམ་དཔྱོད་ལ་དཀོན་པའི་འདུ་ཤེས་བཟོད་པར་དཀའ་བས་ནན་གྱིས་བཤོལ་བཏབ་ནའང་། སེམས་ཅན་གྱི་བསོད་ནམས་ལས་གཞན་དོན་རླབས་པོ་ཆེའི་ཕྲིན་ལས་ཀྱི་འཇུག་པ་དུས་ལས་མ་ཡོལ་བས་བཤོལ་མ་ཐེབས་པར་ཆས་ཙ་ན། རྔོག་ལོ་ཆེན་པོའི་གདུང་རྟེན་རྩར་དགེ་འདུན་དཔྱོད་ལྡན་པ་ཞིག་དང་འཕྲད། ཁོང་གིས་ཀྱང་བཤོལ་བཏབ་ཅིང་སྐྱོ་བའི་རྣམ་པ་སྟོན་པ་ལ་གནས་ཚུལ་རྣམས་བཤད་པས། ཁོང་ཡང་ཁམས་པའི་ཚོགས་ལ་འཁུན་པར་བྱེད་ཅིང་། ད་ཅིས་ཀྱང་གཤེགས་ན་རང་རེ་ལ་རྩོམ་པ་ནི་ཐོགས་རྡུགས་མེད། ཁམས་པ་རྣམས་ལ་ངན་སྨྲས་ཤིག་འཇོག་པར་འཚལ་ཞེས་བསྐུལ་བས། ཀུ་རེའི་ཚུལ་
དུ་ཤོག་བུ་བྲེ་ཁ་གཅིག་ལ་ཤོང་ཐང་བྲིས་པ་ཁོང་གིས་ཁྱེར་ནས། ཆོས་རའི་ཁྲི་ལ་སྦྱར་བ་ཁམས་པ་རྣམས་ཀྱིས་རིག་སྟེ་མཐོང་དུ་མ་སྟེར། ཀ་ལིང་ཡུལ་དུ་སྲིན་པོ་རྒྱུ་བ་བཞིན། ཞེས་པ་ལ་སོགས་པའི་ཀ་ཐོ་སུམ་ཅུ་པ་འདི་རྒྱལ་ཁམས་ཀུན་ཏུ་དར་རོ། །དེ་ནས་ངེས་པ་མེད་པའི་གནས་སུ་འཁྱམས་ཞིང་སྒྲུབ་པ་འབའ་ཞིག་ལྷུར་མཛད་པ་ལས་རྒྱ་མའི་ཅོག་ལ་བྲག་ཕུག་ཏུ་ཟླ་བ་ལྔ་མུན་པའི་རྣལ་འབྱོར་ལ་བཞུགས་པའི་ཚེ། སིལ་སྙན་གྱི་སྒྲ་གླུ་དབྱངས་དང་བཅས་པ་གཅིག་གསན་པས། དེ་ལ་བལྟ་བའི་སྣང་བ་ཤར་ཙ་ན་བུད་མེད་ལོ་བཅུ་དྲུག་པ་ཟ་འོག་གི་འཇོལ་བེར་དང་གསེར་གཡུའི་རྒྱན་གྱིས་སྤྲས་ཤིང་། བསེ་ཁྲབ་དྲིལ་བུས་བརྒྱན་པའི་རྟ་ལ་བཅིབས་པ་གདོང་གསེར་གྱི་དྲྭ་བས་གཡོགས་པ་ཞིག་དང་མཇལ། དེའི་ཐུ་བ་ནས་འཇུས་ཏེ་འཕགས་མ་རྗེས་སུ་འཛིན་པར་ཞུ་ཞེས་བཏུད་པས། རིན་པོ་ཆེའི་དབུ་རྒྱན་ཅིག་འདུག་པ་ཕུད་ནས་ཀུན་མཁྱེན་པའི་དབུ་ལ་བསྐོན། དེང་ནས་དུས་རྟག་ཏུ་བྱིན་གྱིས་བརློབ་ཅིང་དངོས་གྲུབ་སྦྱིན་ནོ་གསུང་། བདེ་གསལ་མི་རྟོག་པའི་ཏིང་འཛིན་ལ་ཡུན་རིང་པོར་འབྱམས། མན་ངག་རྫོགས་པ་ཆེན་པོའི་ཆོས་དང་མཇལ་བའི་རྟེན་འབྲེལ་བསྒྲིཊ། དེ་ནས་ཉི་ཤུ་རྩ་དགུ་པར་བསམ་ཡས་སུ་ཕེབས་པའི་དཔྱིད་སོས་བླ་མ་དམ་པ་
ཀུ་མ་རཱ་ཛ་ཡར་སྟོད་སྐྱམ་གྱི་ཕུ་ན་བཞུགས་པ་ལ་གཏད་དེ་བྱོན་པས། ལམ་དུ་གཡག་སྡེ་པཎ་ཆེན་དང་མཇལ་ནས། རྗེ་དྲུང་ཀརྨ་པའི་དྲུང་ན་དེངས་ཞེས་བསྐུལ་ནའང་མ་ཉན་པར་ལྷགས། ཡར་སྟོད་སྐྱམ་གྱི་ཕུ་ན་རིག་འཛིན་པ་སློབ་མའི་ཚོགས་ཆ་ཐེར་ལྷག་སྐྱོབས་བདུན་ཅུ་ཙམ་དང་། བཅས་པ་བཞུགས་པ་དང་མཇལ། མདང་ལྷའི་བྱ་ཡིན་ཟེར་བའི་བྱ་ཡ་མཚན་ཅན་ཞིག་ལ་བྱ་བྲན་མང་པོའི་ཚོགས་དང་བཅས་བྱུང་ནས། ངའི་དཔེ་ཆ་རྣམས་ཕྱོགས་མཚམས་ཐམས་ཅད་དུ་ཁྱེར་སོང་བར་རྨིས་པས་བརྒྱུད་པ་འཛིན་པ་གཅིག་འོང་གསུངས་ནས་ཤིན་ཏུ་མཉེས། དེར་ཆོས་ཁྲལ་འདེགས་རྒྱུ་མེད་པས་ཐུགས་ལ་སྐྱོ་བ་དཔག་ཏུ་མེད་པ་འཁྲུངས། ཆོས་ཁྲལ་ལ་འཐོགས་ནས་བླ་མའི་དྲུང་ནས་འགྲོ་དགོས་པ་ང་ལས་མེད་པས་ཉིན་པར་འགྲོ་བ་ངོ་ཚ། སང་ནམ་ལྡང་ཙ་ན་ལུང་པ་འདིའི་མདའ་ལ་སླེབས་པར་འགྲོ་དགོས་དགོངས་ཙ་ན་བླ་མའི་མངོན་མཁྱེན་གྱིས་དགོངས་ནས་འདིའི་ཆོས་ཁྲལ་ནང་ནས་འདེབས་པ་ཡིན་པས་མ་གཙེར་ཞེས་གྲྭ་པ་གཉིས་ཀྱིས་བསྐྱར་བྱུང་བས་དགའ་ཆེས། རིག་འཛིན་པ་དེ་སློབ་མའི་ཚོགས་ལ་སྐྱོ་བ་བསྐུལ་ཕྱིར་གཞི་མི་འཛིན་པས་ལོ་དེའི་དཔྱིད་སོས་ལུང་སྟོངས་གཅིག་ནས་གཅིག་ཏུ་འཕོ་སྐྱས་ལན་དགུ་མཛད་པས། གཞི་རེ་ཟིན་དུས་འཕོ་དགོས་པ་འདྲ། དེས་རང་ལ་ན་བཟའ་དང་བཟའ་བཏུང་གཉིས་ཀ་མེད།
ནམ་ཟླ་དང་གངས་རྩ་ཡུལ་ཤིན་ཏུ་གྲང་བས་ལུས་སེམས་ལ་ངལ་དུབ་དཔག་ཏུ་མེད་པ་བྱུང་། ཕྱེ་བྲེ་གསུམ་དང་དངུལ་ཆུ་རིལ་བུ་རིལ་མ་ཙམ་ཉི་ཤུ་རྩ་གཅིག་ལས་མེད་པས་དེས་ཟླ་བ་གཉིས་ཀྱི་འཚོ་བ་བྱས། ཁ་བ་བབས་དུས་འབོག་གི་དོད་སྒྱེ་གཅིག་ཡོད་པ་དེའི་ནང་དུ་ཞུགས་ནས་གོས་སྟན་གཉིས་ཀའི་གོ་བཅད་པ་སོགས་ཆོས་ཕྱིར་དཀའ་བ་སྤྱད་པ་བསམ་གྱིས་མི་ཁྱབ། ལོ་དེར་རྫོགས་པ་ཆེན་པོ་གསང་བ་སྙིང་ཏིག་གི་དབང་ཁྲིད་གདམས་པ་དང་བཅས་པ་ཐོབ་ཅིང་བསྒོམས། ཕྱི་ལོ་དེ་དབང་གོང་མ་དང་། རྫོགས་ཆེན་སྡེ་གསུམ་གྱི་རྒྱུད་ལུང་མན་ངག་བསྟན་སྲུང་དང་བཅས་པ་བུམ་པ་གང་བྱོར་གནང་ནས། བསྟན་པའི་རྒྱལ་ཚབ་ཏུ་དབུགས་འབྱིན་མཛད། ལོ་དྲུག་གི་བར་དུ་བསྒྲུབ་པའི་དམ་བཅའ་ཕུལ། སུམ་ཅུ་རྩ་གཅིག་པ་ལ་སྙིང་ཕུའི་ཤུག་གསེབ་ཏུ་སྙིང་ཐིག་གི་སྒོ་ནས། སྐལ་ལྡན་དུ་མ་ལ་སྨིན་གྲོལ་མཛད། རྣལ་འབྱོར་པ་འོད་ཟེར་གོ་ཆས་དཀའ་སྤྱད་ཆེན་པོས་མཁའ་འགྲོ་སྙིང་ཐིག་གི་དཔེ་བཙལ་བ་གཟིགས་ཕུལ་པ་དང་མཚུངས་པར། གཟིམས་ལམ་དུ་ཤན་པ་སྲོག་སྒྲུབ་མས་གླེགས་བམ་གཏད། སང་ཕོད་སུམ་ཅུ་རྩ་གཉིས་པར་མཆིམས་ཕུའི་རི་མོ་ཅན་དུ་སྒྲུབ་པ་ལ་བཞུགས་དུས། སྐལ་ལྡན་གྱི་རྣལ་འབྱོར་ཕོ་མོ་བརྒྱད་ལ་སྙིང་ཏིག་གི་གདམས་པ་བཏབ། སྤྲོས་བཅས་ཀྱི་དབང་གི་དུས་བྱིན་ཕབ་པས། རྣལ་འབྱོར་མ་
གཅིག་ལ་སྔགས་སྲུང་མ་མངོན་སུམ་དུ་བབས་ཏེ་འཁྲབ་བྱུང་བས། སློབ་མ་རྣམས་ཀྱིས་ཟིལ་མ་བཟོད་པར། བླ་མའི་ཞལ་ནས་འདིར་མཁའ་འགྲོ་བབས་པ་ཡིན་པས་ཨའུ་རྩི། ང་སྣང་སེམས་རོ་གཅིག་ཏུ་རྟོགས་པའི་རྣལ་འབྱོར་པ་ཡིན། བར་ཆད་མི་འོང་གསུངས། དེར་རྣལ་འབྱོར་མས་བླ་མ་ལ་ཕྱག་བྱས། དཀྱིལ་འཁོར་ལ་བལྟས་ནས་རྨ་བྱ་མ་འཛོམས་པ་ག་རེ་ཟེར། ཡིད་ཀྱིས་བསམ་པ་ཡིན་གསུངས་པས་བརྡའི་ཆོས་ལ་ཡིད་ཀྱིས་ག་ན་འོང་ཟེར། ཡང་བུམ་པའི་སྟེགས་ཀྱི་མཉྫི་དོར་ཏེ་བུམ་པ་གསུམ་སྦྲེལ་ནས་བཞག །ཆོ་གའི་རྣམ་གཞག་ཞིབ་མོ་མཛད་དུས་ཐལ་མོ་སྦྱར་ཏེ་ལེགས་སོ་བརྗོད། རིགས་ཀྱི་ཡི་གེའི་ས་མཐའ་ཆད་ནས་རིག་ཏུ་བོས་པ་ལས། མིན་མིན་རིགས་ཟེར་བ་ཡིན་ཞེས་དང་སྔགས་བཟླས་དུས། ངའི་ལད་མོ་གྱིས་ཟེར་ནས་མཁའ་འགྲོའི་སྐད་དུ་འབྲེལ་ལ་མ་འབྲེལ་བའི་གདངས་སྙན་པོ་བྱས། དངོས་གཞིའི་སྐབས་སུ། བློ་སྒོམ་དང་བྲལ་ན་དགའ་བ་ལ། །བློ་སྒོམ་དང་བྲལ་ན་ཨ་རེ་སྐྱིད། །ཅེས་དོན་གྱི་ལྟ་སྒོམ་ཡིད་དཔྱོད་དང་བྲལ་བའི་གླུ་བླངས། མཆོད་པ་ངན་པ་ལ་འདི་མི་ལྟོ་ཟེར། མཆོད་དབྱངས་སྙན་པོ་བྱས། ཚོགས་ཀྱི་དུས་བླ་མ་ལ་བདུད་རྩི་དྲངས་དུས། འདི་མཁའ་འགྲོའི་དམ་རྫས་ཡིན་པས་ཅིས་ཀྱང་བསྟེན་དགོས་ཟེར་ལྷག་མེད་དུ་དྲངས། དེའི་ཚེ་སློབ་མའི་ཚོགས་ཀྱང་ཉམས་འུར་ནས་གླུ་ལེན་བྲོ་བརྡུང་ཐ་
མལ་གྱི་གཉིད་ལས་འདས་པའི་འོད་གསལ་རྩེ་གཅིག་ཏུ་ཤར། དཔའ་བོ་དང་། མཁའ་འགྲོ་དང་། ཆོས་སྐྱོང་། སྣ་ཚོགས་པའི་གཟུགས་བརྙན་མངོན་སུམ་དུ་མཐོང་ནས། བུད་མེད་ནག་མོ་གཅིག་གིས་ཕྱེ་ཕུད་ཉམས་ཟེར་བ་དང་། དམ་ཅན་པ་མི་དཀར་པོར་བསྟན་ནས་ངའི་གཏོར་མ་ལ་དམར་རྒྱན་ཆད་ཟེར་བ་དང་། ཇོ་བོ་མདངས་ལྷ་མི་དཀར་རྟ་དཀར་ཅན་དུ་འོངས་ནས་གཏོར་མ་འདོད་པ་ལ་དམར་གཏོར་སྦྱིན་པས་མ་འདོད་པ་དང་། མཁའ་འགྲོའི་ཚོགས་ཀྱིས་བླ་མ་ལ་གདུགས་འབུབས་པ་དང་། བསྐོར་བ་བྱེད་པ་དང་ཧཱུཾ་དང་ཕཊ་ལ་སོགས་པའི་སྒྲ་དྲག་པོ་དང་། སྦུག་ཆོམ་ཆེན་པོ་སོགས་ཆོ་འཕྲུལ་བསམ་གྱིས་མི་ཁྱབ་པ་བྱུང་བས། རྣལ་འབྱོར་པ་གཅིག་གིས་དོ་ནུབ་གནམ་ས་ངོ་ལོག་པ་འདུག །ཤ་དུམ་ཁྲག་དུམ་བྱེད་ལས་ཆེ་ཟེར་ནས་སྐྲག་པ་སོགས་བྱུང་། དེ་བཞིན་དུ་འོ་དེ་གུང་རྒྱལ་དང་གཉན་ཆེན་ཐང་ལྷ་དང་། སྨན་མོ་མཆེད་བདུན་ལ་སོགས་གཏོར་མ་ལེན་དུ་འོངས། རྡོ་རྗེ་ཕག་མོ་སྐུ་མདོག་མཐིང་ཀ་རིན་པོ་ཆེ་དང་རུས་པས་བརྒྱན་པ་མངོན་སུམ་དུ་བྱོན་ནས་དྲིས་པས། དོ་ནུབ་དུས་གཉན་པས་ལས་ཅན་གྱི་སློབ་མ་ཉུལ་དུ་འོངས། བླ་མ་དམ་པ་སྐུ་ཁམས་བཟང་ཟེར། ད་ལོ་སྐུ་ཆགས་བདོ་བས་ཇི་ལྟར་མཆི་དྲིས་པས། མཁའ་འགྲོ་མས། སངས་རྒྱས་ཀྱི་རྣམ་འཕྲུལ་ལ་བར་
ཆད་ག་ན་འོངས། གདུལ་བྱ་ལ་དགོངས་པ་ཡིན། བཱི་མ་ལ་བོད་ཡུལ་དུ་བྱོན་པ་མི་ཤེས་སམ་ཟེར། ད་ཅི་ཙམ་བཞུགས་དྲིས་པས། ལུག་ལོ་ཕྱི་མའི་བར་བཞུགས། དེ་ནས་གདུལ་བྱ་དང་བསྟུན་པའི་ངེས་པ་མེད་ཟེར། འོ་ན་ང་བླ་མ་ཀུ་མ་རཱ་ཛས་གཞན་དོན་ལ་བསྐུལ་བ་འདི་བླ་མ་ཁྱེད་ཀྱིས་བསྐུལ་ལམ་དྲིས། འོ་འོ་དེ་ཀ་དེ་ཀ་ཟེར་དུས། ངས་གཅིག་པོར་བསྒྲུབས་ནས་འོད་ལུས་སྒྲུབ་བམ། གཞན་དོན་བྱས་ན་སེམས་ཅན་ལ་ཕན་ཐོགས་འོང་ངམ། ལོ་ཇི་ཙམ་ཐུབ་དྲིས་པས། འོད་ལུས་འགྲུབ་ཀྱང་སེམས་ཅན་ལ་ཕན་འདོགས་དགོས། གཞན་དོན་འུར་འུར། ད་ལོ་ནས་སུམ་ཅུ་ཐུབ་ཟེར། ང་ལ་བཀའ་སྲུང་ཇི་ལྟར་ཡོད་དྲིས་པས། མང་མང་བླ་མའི་ཐམས་ཅད་ཁྱེད་ལ་ཡོད། ཁྱད་པར་རྡོ་རྗེ་གཡུ་སྒྲོན་མ་ཟེར། དེ་བཞིན་དུ་འགྲོ་དོན་ལྷོ་ནུབ་ཕྱོགས་ན་ཡོད། ཚེ་ཕྱི་མ་འདི་བས་ཀྱང་འགྲོ་དོན་ཆེ་ཟེར། འོ་ན་མཁའ་འགྲོ་སྙིང་ཏིག་ནས་བཤད་པ་དེ་ཡིན་ནམ། དབང་ཁྲིད་གདབ་ཏུ་རུང་ངམ་དྲིས་པས། འོ་དེ་ཀ་དེ་ཀ་མ་ནོར་མ་ནོར། ཆོས་ཀྱི་བདག་པོ་ཁྱེད་རང་ཡིན་པ་ལ་ལོས་ལོས་ཟེར། ཡང་མི་རྣམས་ཀྱིས་ཟོག་པོར་འཛིན་དུ་མི་འོང་ངམ་དྲིས་པས། མིའི་ཁ་ལ་གཏད་པ་ཅི་ཡོད། སྐལ་ལྡན་རྣམས་ཁོ་མོས་བསྡུད། སྐལ་མེད་སངས་རྒྱས་ལའང་སྐུར་པ་འདེབས་ཟེར། སྙིང་ཏིག་གི་ཆོས་བཀའ་རྡོ་རྗེ་གཡུ་སྒྲོན་མའི་གནས་སུ་འབྱེད་དམ་དྲིས་པས། འདི་ན་མཁའ་འགྲོ་རང་
བཞིན་གྱིས་འདུ་བས་འདིར་འབྱེད་དགོས་ཟེར། བུམ་ཐང་གི་གཏེར་ཁའི་ལུང་ཡང་གསལ་བར་བཤད། སློབ་དཔོན་ཆེན་པོ་དང་མཇལ་ལམ་དྲིས་པས། ལུང་གསུམ་གྱི་ཕུ། རི་གསུམ་གྱི་མདའ། བྲག་ཆུང་ངེ་བ་ཁ་ནུབ་ཏུ་བལྟ་བའི་གཡས་ཟུར་དུ་མཇལ་ཟེར། བཱི་མ་ལ་དང་ནམ་མཇལ་དྲིས་པས། མཇལ་ཟིན་འདུག་པ་ལ་ཟེར་རོ། །ངས་རྟོགས་པའི་ལྟ་བ་འདི་སྙིང་ཏིག་གི་དགོངས་པའི་མཐར་ཐུག་གམ་དྲིས་པས། མཐར་ཐུག་པ་ལ་ནོར་འཁྲུལ་མེད་ཟེར། སློབ་དཔོན་རིན་རྡོར་གྱིས་སྤང་སྒང་པ་རིན་ཆེན་རྡོ་རྗེ་གང་ན་བཞུགས་དྲིས་པས། བླ་མ་ལ་མཛུབ་མོ་བཙུགས་ནས་འདི་ན་བཞུགས་འདུག་པ་ཟེར། དེར་བླ་མས། ཁོང་སྐྱེ་བ་དེའི་འོག་ཏུ་བུམ་ཐང་དུ་སྐྱེ་བ་ལ་ང་ག་ན་ཡིན་གསུངས་པས། དེ་ཀ་ལྟར་སྐྱེ་བ་མིན། བར་དུ་ལོངས་སྐུའི་ཞིང་ཉུལ་དགོས་པ་དེ་སློབ་དཔོན་རིན་ཆེན་རྡོ་རྗེས་གཏེར་ཐོན་རྗེས། ལོ་འགའ་ཡར་གསོང་ནས་བསྒྲུབ་པ་མཛད་ན་རང་དོན་དུ་འོད་གསལ་ལོངས་སྐུའི་རྩལ་སྦྱོངས་དང་། གཞན་ལ་ཕན་པ་རྒྱ་ཆེན་པོ་འོང་བ་ལ། མ་གསོང་པས་སྐུ་ཚེ་མཐར་མ་ཕྱིན། ད་ལྟ་ཁྱེད་དུ་སྐྱེས་དུས་འོད་གསལ་གྱི་སྣང་བ་ལམ་དུ་འཁྱེར་བ་འདི་ནི། ལོངས་སྐུའི་ཞིང་ཁམས་དར་གཅིག་ཉུལ་བ་དེ་ཡིན་ཟེར། ངས་ཕུང་པོ་ལྷག་མེད་ཨེ་འགྲུབ་དྲིས་པས། གཅིག་པུར་བསྒོམ་ན་ད་ལྟ་འགྲུབ། གཞན་དོན་མཛད་པས་བར་དོར་
གྲོལ། སྤྲུལ་པས་བུམ་ཐང་དུ་སྐྱེ་བ་བླངས་གཞན་དོན་བྱས། དེའང་ནུབ་ཕྱོགས་ཨོ་རྒྱན་གྱི་ཡུལ་དུ་གཤེགས་ནས་སངས་རྒྱ་བའི་ཚུལ་སྟོན་གསུངས། ཡང་ངས་སྙིང་ཏིག་གིས་ཕན་ཐོགས་བཱི་མ་ལ་དང་། མཁའ་འགྲོའི་གཉིས་གང་ཆེ་དྲིས་པས། གཉིས་ཀས་ཕན་ཐོགས། བཱི་མ་ལ་རྒྱ་ཆེ་ལོ་བརྒྱ། མཁའ་འགྲོ་སྙིང་ཏིག་ལོ་ལྔ་བརྒྱར་གནས། ད་ནས་མགོ་རྩོམ་པ་ཡིན་ཟེར། དེར་བླ་མ་ཡང་ཐུགས་ཉམས་འུར་ནས་སྐུ་བཞེངས་ཏེ་རྡོ་རྗེའི་གླུ། ཚེ་འདི་ཡང་བདེ་སྟེ་ཕྱི་མ་སྐྱིད། །བར་དོ་རང་ངོ་ཤེས་པས་བདེ། །ད་ནི་བདེ་ནས་བདེ་བར་འགྲོ། །གླུ་མཆོད་པར་འབུལ་ལོ་དཀོན་མཆོག་གསུམ། །ཐུགས་དགྱེས་པར་མཛོད་ཅིག་མཁའ་འགྲོའི་ཚོགས། །ཞེས་པའི་མཐའ་ཅན་དེ་གནང་། ད་དུང་མཁའ་འགྲོའི་སྣང་བ་བསམ་གྱིས་མི་ཁྱབ་པ་མཐོང་ཞིང་དེ་ཐམས་ཅད་མཐར་བླ་མ་ལ་ཐིམ། བླ་མ་ཡང་རེས་ལོངས་སྐུར་གནས་འགྱུར་བ་སོགས་མཐོང་། དེར་ཉེར་བརྒྱད་ཀྱི་ཉིན་ཞིག །ལྷོ་ནུབ་མཚམས་ནས་སློབ་དཔོན་ཆེན་པོ་སྐུ་མདོག་དཀར་གསལ་ཟ་འོག་གི་བེར་དང་། ཤ་བའི་མཉེན་ཞུ་ཅན་འཁོར་དཔག་ཏུ་མེད་པས་བསྐོར་བ་བྱོན་ཏེ་བླ་མར་ཐིམ་པ་མཐོང་། དེའི་ནུབ་མཁའ་འགྲོ་མ་རུས་པའི་རྒྱན་ཅན་ནམ་མཁའ་ལ་བུན་བུན་འགྲོ་བས་བླ་མར་མཆོད་པ་བྱེད་ཅིང་། བུད་མེད་སྨུག་ནག་གསུམ་བྲོ་འཁྲབ་པ་དང་། ངེད་ཡོང་ཡོང་བདེ་ཆེན་གྱི་གནས་ནས་ཡོང་། །
ལས་ཅན་གྱི་སློབ་མ་ཉུལ་དུ་འོངས། །དམ་ཚིག་གི་གཙང་སྦྲ་བལྟ་རུ་འོངས། །འགྲོ་དོན་མཛོད་ཅིག་རིཊ་ཀྱི་བུ། །ཟེར་བ་དང་། ཡང་ནང་མཆོད་མཛད་པའི་དུས་སློབ་དཔོན་ཆེན་པོའི་གཡས་ན་བི་མ་ལ། གཡོན་ན་རྡོ་རྗེ་ཕག་མོ། མདུན་ན་མཁའ་འགྲོ་མ་མང་པོ་མི་རྐང་འབུད། རྒྱབ་ན་སྔགས་པ་མང་པོ་འཆམས། མཁའ་འགྲོ་མ་གསེར་གྱི་གོ་ཞུབ་ཅན་མང་པོས་གླུ་གར་བྱེད་ཅིང་བསྐོར་བའི་དབུས་ན་བླ་མ་བཞེངས་ནས། དགའ་བོ་སྐྱིད་དོ་རྣལ་འབྱོར་ཀུན། །དུས་དོ་ནུབ་འོག་མིན་དག་པའི་ཞིང་། །རང་ལུས་ཞི་ཁྲོའི་ཕོ་བྲང་ན། །སྟོང་གསལ་རྒྱལ་བའི་དཀྱིལ་འཁོར་རྒྱས། །སངས་རྒྱས་ཕྱི་ན་མེད་དེ་ནང་ན་ཡོད། །ཅེས་དང་། སེམས་གཅིག་པུར་གནས་པའི་བསམ་གཏན་པ། །ཡིད་གཅིག་ལ་མི་འཛིན་གང་བདེར་ཐོང་། །སེམས་འཕྲོ་ཡང་སྟོང་ལ་གནས་ཀྱང་སྟོང་། །གང་ཤར་ཡེ་ཤེས་ཀྱི་རོལ་པ་ཡིན། །ཞེས་པ་ལ་སོགས་རྡོ་རྗེའི་གླུ་བཞེངས། དེ་དུས་རྡོ་རྗེ་གཡུ་སྒྲོན་མ་དཀར་མོ་མཆེད་བདུན་དང་བཅས་པ་བྱོན་ནས་ངའི་གནས་སུ་གཤེགས་པ་ཞུ་ཟེར། བླ་མས་ང་ཁྱེད་ཀྱི་གནས་སུ་རྒྱུན་དུ་སྡོད་དགོས་གསུངས་པས། རྒྱུན་དུ་བཞུགས་ན་དགའ་སྟེ་དགུན་སྟོད་ལས་མི་བཞུགས་པ་འདྲ་ཟེར། ཁྱོད་ལ་ཅིའི་ཕྱིར་འགོ་དྲིས་པས། གུ་རུའི་དམ་འོག་ཏུ་ཆུད་པས་
གཏེར་གྱི་ཕྱི་ལ་འབྲངས་ཟེར། དེར་ཆོས་ནི་ཕ་གིར་ཡོད། འདོན་མཁན་ནི་ཤི །འདིར་ཅི་བྱེད་བྱས་པས། ཆོས་ཕ་གི་ན་ཡོད་ཀྱང་དོན་འདི་ན་ཡོད། ཁྱེད་ཚེ་འཕོས་ཀྱང་སྐལ་ལྡན་ཚེ་མ་འཕོས་པས་ཡོང་པ་ཡིན་ཟེར། བཀའ་སྲུང་རྣམས་ལུང་བསྟན་ཅིང་། འདི་ཤིན་ཏུ་གཉན་པས་སྐུ་ཚེ་ལ་བར་ཆད་འོང་ཉེན་ཡོད། ཁྲིད་ཐེབས་ཉུང་ན་དགའ་ཟེར། ངའི་གཏེར་ཤོག་རྣམས་ཨེ་ཡོད་དྲིས་པས། སིབ་སིབ་ངེད་རྣམས་ཀྱི་ཡིད་བསྒུལ་བ་ཡིན་མོད་ཟེར། ཡང་ངས་ཁྱེད་ལ་དབུ་རུར་དངོས་གྲུབ་བྱིན་པ་མི་དྲན་ནམ་ཟེར། སྔར་ཅོག་ལའི་བྲག་ཕུག་གི་དེ་དྲན་ནས་རྡོ་རྗེ་གཡུ་སྒྲོན་མ་ཨེ་ཡིན་བྱས་པས། མིན་མིན་རྡོ་རྗེ་ཕག་མོ་ཡིན་ངོ་མ་ཤེས་སམ་ཟེར། འདི་ནི་འཇིག་རྟེན་པའི་གཟུགས་ཀྱིས་འཕྲིན་ལས་བྱས་པ་དང་། འདས་པའི་གཟུགས་ཀྱིས་མཆོག་གི་དངོས་གྲུབ་སྟེར་བའི་རྣམ་པ་ཆ་ཕྱེད་དགོས་པའོ། །འདི་ནས་ཐིག་ལེ་གཙོ་བོར་བཤད་ནས་དབང་གསུམ་རྟེན་ཅན་དུ་བསྐུར་བ་ཇི་ལྟར་ལགས་དྲིས་པས། དེས་ཆགས་ཅན་ལམ་དུ་འཇུག་པ་ལ་དགོས་པ་ཡིན། ཆགས་བྲལ་ལ་ཡིད་རིག་ཙམ་གྱིས་ཆོག་གསུངས། ངོ་སྤྲོད་ཀྱི་སྐབས་སུ། རྟོག་པ་སྐྱེ་མེད་དུ་འཇོག་པ་དང་། བློ་རྩིས་མེད་དུ་འཇོག་པ་གང་ཡིན་དྲིས་པས། རྟོག་པ་ལ་བརྟན་པོས་ཅི་བྱེད། ཡེ་གྲོལ་ཀློང་ཡངས་ཆེན་པོར་ངོ་སྤྲོད་ཅིག་ཟེར། འོ་ན་སྙིང་ཏིག་འདི་བཤད་
མི་མང་པོ་ནི་སྣང་ན་ངས་བཤད་ཅི་དགོས། ལུང་བྱེད་པ་ཀརྨ་པ་དང་། རིན་ཆེན་གླིང་པ་སོགས་པའང་འདུག་པས་སོ་བྱས་པས། བཤད་ཚུལ་དེ་དག་ལ་ངེད་མི་མགུ། ལུང་དང་རྫ་ལའང་ཡོད་དེ། དེས་གར་ཆོག །བདག་པོ་རེ་ཡོད་པ་དེ་དགོས་པ་ཡིན་མོད་ཟེར་རོ། །རིན་ཆེན་གླིང་པའི་གཏེར་ཁ་དྲིས་པས་ཡིན་པ་ལ་ཡིན། དག་རྒྱུ་མེད་མེད་ཟེར། ངས་ཁྱེད་མ་བསྒོམས་པར་གྲུབ་པའི་རྒྱུ་དྲིས་པས། ང་ལ་སྒོམ་པའི་ལྷ་འདུག་གམ། བཟླས་པའི་སྔགས་འདུག་གམ། མཆོད་པའི་ཡུལ་འདུག་གམ། རྣལ་འབྱོར་པ་དམ་ཚིག་དང་རྟོགས་པར་ལྡན་པ་ཀུན་ལ་ང་རྒྱུན་དུ་ཡོད་པ་མི་ཤེས་སམ། ཁྱོད་དང་ཚེ་རབས་ཐམས་ཅད་དུ་འདུ་འབྲལ་མེད་ཟེར། མཆིམས་ཕུར་ལྷ་ལྕམ་གྱི་ནོར་ཡོད་པ་དེ་ཅི་འདྲ་ཞིག་འདུག་དྲིས་པས། བྲག་ལྷ་བཤོས་འདྲ་བ་རྩེ་མོ་མེད་པ་གཅིག་ན་འདུག །ད་དུང་དུས་ལ་མ་བབས་ཟེར། བི་མ་ལའི་གཏེར་ཇི་ཙམ་ན་འདོན་དྲིས་པས། ད་ནས་ལོ་བཅོ་ལྔ་ན་སྔགས་པ་དཀར་པོ་གཅིག་གིས་བཏོན་ནས་དར་བར་བྱེད། ཟབ་པ་པོད་བཞི་ཁྱེད་རང་གི་ལག་ན་འོང་བར་འདུག་ཟེར། དེར་ཟླ་བ་ཚེས་པའི་ཚེས་བཅུ་གཅིག་ལ་རྣལ་འབྱོར་པ་འོད་ཟེར་གོ་ཆ་དཔེ་ལེན་དུ་བཏང་ནས་ལམ་དུ་འོང་དུས། འཇའ་ཚོན་གྱི་དཔེ་ལ་ཟུག་ཅིང་འཁོར་བ་དང་ཁྱད་པར་ཟུང་མཁར་མདའི་མཆོད་རྟེན་གྱི་ཉེ་ལོཊ་ཕྱུག་པོ་བྲག་
ཅེས་བྱ་བར་སླེབས་པའི་མཚན་མོ་རི་མོ་ཅན་ནས་འདིའི་བར། འཇའ་ཚོན་ཁ་དོག་སྣ་ལྔས་འབྲེལ་བ་རྣལ་འབྱོར་པ་ཕོ་མོ་ཀུན་གྱིས་མཐོང་ངོ་། །དེར་ཚོགས་འཁོར་བསྐོངས་ལ་སོགས་པ་མཛད་ནས་མན་ངག་མཁའ་འགྲོའི་སྙིང་ཏིག་གི་ཆོས་སྒོ་ཕྱེ། མཚན་མོའི་འོད་གསལ་གྱི་སྣང་བ་ལས་ཆོས་སྐུའི་དགོངས་པ་ཀ་དག་གི་དབྱིངས་སུ་འཁྱིལ་ཚུལ། དེའི་རྩལ་སྣང་ལོངས་སྐུར་འཆར་ལུགས། ཕྱིར་གསལ་ལས་སྤྲུལ་པའི་སྐུ་འགྱེད་ཅིང་། རིགས་དྲུག་གི་འཆར་ཚུལ་སོགས་འོད་གསལ་གྱི་ཆོས་སྐད་སྒྲ་བོ་ཆེ་དང་། རྩིས་པོ་ཆེ་དག་གིས་ཀྱང་ཕྱོགས་མི་མཚོན་པའི་ངོ་བོའི་བཞུགས་ཚུལ་ཆེན་པོ་གང་ཡིན་པ། བླ་མ་ཡི་དམ་མཁའ་འགྲོའི་ཚོགས་ཀྱི་ཐུགས་རྒྱུད་ལ་མངོན་དུ་གསལ་བར་བྱིན་གྱིས་བརླབས་ཤིང་། མཁའ་འགྲོ་མས་ངོ་སྤྲོད་ཅེར་མཐོང་དུ་མཛད། དེའི་ཚེ་མན་ངག་མཁའ་འགྲོའི་ཡང་ཏིག་གི་ཡིག་ཆ་མཛད་དུས་སློབ་དཔོན་རིན་པོ་ཆེ་ཐུགས་སྒྲུབ་ཀྱི་ཆ་ལུགས་སུ་བྱོན། གཡས་ན་མཚོ་རྒྱལ་དང་། གཡོན་ན་གཡུ་སྒྲོན་མས་ཚིག་དཔོད་པ་རྣལ་འབྱོར་མ་མཁའ་འགྲོའི་མཚན་རྟགས་ཚང་བ་གཅིག་གིས་ཀྱང་མཐོང་། ཁྱད་པར་དུ་ཡེ་ཤེས་མཚོ་རྒྱལ་ཉིན་ཞག་དྲུག་གི་བར་དུ་དངོས་སུ་བྱོན་ནས་མཁའ་འགྲོ་སྙིང་ཏིག་གི་བརྡ་དོན་དཔེ་གསུམ་གྱི་ངོ་སྤྲོད་གཏད་རྒྱ་དང་བཅས་མཛད་པས་དམིགས་པ་དང་། ངོ་སྤྲོད་ལུགས་དང་། བརྗོད་པའི་ཚུལ་ངོ་མཚར་ཅན་སྔ་ན་མ་གྲགས་ཤིང་། ཡི་གེ་ན་
མི་གསལ་བ་མང་པོ་ཐུགས་ལ་རང་རྡོལ་དུ་བྱོན་པས་གངས་རིའི་ཁྲོད་ན་གཞན་སྙིང་ཐིག་གི་ཡི་གེ་ཟབ་མོར་གྲགས་པ་ཇི་སྙེད་ལའང་། ཀུན་ཏུ་བཟང་པོ་གཉིས་པས་ཆོས་ཀྱི་འཁོར་ལོ་བསྐོར་བའི་དགོངས་གཏེར་རྒྱ་མཚོའི་རྡོ་རྗེའི་གནས་འདི་ན་གསལ་བའི་ཟབ་གནད་ཀྱི་ཆ་ཤས་ཀྱིས་ཀྱང་མ་གོས་པ་ཉིད་དུ་མཐོང་བས། ཡིག་ཆ་འདི་ལ་མ་བརྟེན་པ་གང་ཞིག་རི་མོའི་མར་མེ་དང་མཚུངས་པ་ཉིད་དུ་རིགས་པར་བྱས་ནས་བསྟན་པ་འདི་ལ་གཅེས་སྤྲས་སུ་བྱ་བར་འོས། འདི་ལྟར་གདམས་པའི་ས་བོན་ཕལ་ཆེར་གནས་འདིར་བྱུང་ཡང་གཏན་ལ་འབེབས་པ་གངས་རི་ཐོད་དཀར་དུ་མཛད་པས་སྦྱར་བྱང་ལ་དེ་ལྟར་ཐེབས་པ་ཡིན་ནོ། །ལར་ཆོས་འདི་མཁའ་འགྲོའི་སྙིང་ཁྲག་ལྟ་བུར་གྱུར་ལ་གནས་འདིའང་བྱིན་རླབས་ཆེ་བས་རྩ་བ་གསུམ་དང་མཁའ་འགྲོའི་འདུ་བ་ཟད་མི་ཤེས་པ་དང་། རྨ་བྱའི་གདུཊ་རིན་པོ་ཆེའི་ཏོག་གིས་མཚན་པ་བླ་མའི་དབུ་སྟེང་ན་བཟུང་བ་མཐོང་བ་དང་། དཀྱིལ་འཁོར་གྱི་ཐིག་མཛད་དུས་ཐིག་སྣ་བུད་མེད་དམར་མོས་འཛིན་པ་དང་། རེ་ཁཱ་དགྲམ་པའི་ཚེ་བུད་མེད་གསེར་གཡུའི་ལན་ཚར་ཅན་གྱིས་འབྲི་རོགས་བྱེད་པ་དང་། དབང་གོང་མའི་དུས་སློབ་མ་བདུན་ཙམ་ཚོགས་པ་ལ། ཤངས་ཁྲག་གློ་བུར་དུ་བྱུང་ནས། བླ་མའི་གསུང་གིས་དབང་འདི་ལ་གསུམ་ལས་མི་ཚུད་པ་ལ་གྲངས་ཐལ་བས་ལན། ཁྱེད་བཞི་ཕྱིར་དེངས་གསུངས་པས་
དབང་ཁང་ལ་འཇའ་ཚོན་ཟུག་པ་དང་། ནམ་གྲུ་རེ་མ་ཏིས་མངོན་སུམ་དུ་འོངས་ནས་ང་ལ་གཏོར་མ་མི་སྟེར་བ་ཨེ་ཡིན། ངས་དཀའ་ལས་ཡུན་རིང་རབ་བྱས་ཟེར་ནས་རང་ཉིད་གཙོ་འཁོར་རྣམས་ཀྱི་མངོན་རྟོཊ་གསལ་བར་བཤད་ཅིང་། གཏེར་གྱི་ལུང་བསྟན་དང་ཆོ་འཕྲུལ་ཆེན་པོ་བསྟན་པས། ང་ནང་འོད་གསལ་གྱི་གཏེར་ཁ་ཕྱེ་བ་ལ། །བྲག་སེར་ཀའི་གཏེར་གྱིས་དགོས་པ་མེད། །གཏེར་ཡོད་ཀྱང་ཆོག་ལ་མེད་ཀྱང་ཆོག །སྐལ་ལྡན་ཡིན་ཀྱང་ཆོག་ལ་མིན་ཀྱང་ཆོག །ཆོས་ཟད་བློ་ཟད་ཀྱི་རྣལ་འབྱོར་ལ། །ཁྱེད་གཏེར་སྲུང་གི་ཡུས་ཆེ་འཚོང་མི་དགོས། །ཞེས་གསུངས། རྒྱབ་ཆོས་དང་རིན་པོ་ཆེ་གསང་བའི་ངོ་སྤྲོད་མཛད་པའི་ཚེ། ཡེ་ཤེས་མཚོ་རྒྱལ་གྱིས་བུམ་པ་བསྣམས་ནས་དབང་བསྐུར་བ་མཐོང་བས་ཐམས་ཅད་འུར་ལངས་ཕྱག་འཚོལ་ཟེར་བ་བྱུང་། བར་དོ་དང་འོད་གསལ་ཟུང་འཇུག་གི་ངོ་སྤྲོད་མཛད་དུས། མཁའ་འགྲོ་མ་རྣམས་མཉེས། ངའི་ཆོས་འདི་ལ་མི་ལས་མི་མ་ཡིན་གཙིགས་ཆེ་ཞིང་དོན་གཉེར་དང་འདུན་པ་ཆེ་བར་འདུག་ཁྱེད་རང་ཚོ་སེམས་ལ་ཞོག་གསུངས། འོད་གསལ་ཡེ་ཤེས་ཀྱི་ངོ་སྤྲོད་མཛད་པའི་ཚེ་བར་སྣང་ཐམས་ཅད་མཁའ་འགྲོས་གང་ནས་ཐལ་མོ་སྦྱར། ནུབ་མོ་སྔགས་སྲུང་མ་བབས་ནས་གར་བྱེད་པ་ལ། བླ་མས་ཁོ་བོ་སྙིང་ཏིག་དེ་ལྟར་དུ་སྟོན་པ་ཡིན། ཁྱེད་བཀའ་སྲུང་དང་མཁའ་འགྲོ་རྣམས་ཨེ་དགའ་
གསུངས་པས། གུ་རུ་དང་ཡེ་ཤེས་མཚོ་རྒྱལ་དེ་བཞིན་གསུངས། གཞན་དེ་ལྟར་ཤེས་པ་ག་ན་ཡོད་ངོ་མཚར་ཆེ། སྤྱིར་མཁའ་འགྲོ་ཐམས་ཅད་དགའ། ལྷག་པར་ཨོ་རྒྱན་རྫོང་ན་གསོལ་བ་འདེབས་པ་གཅིག་མཉེས་ནས་གདའ་ཟེར། དེ་ནས་སྐྱེས་བུ་ཆེན་པོ་བྱུང་ནས་ཨོ་རྒྱན་རྫོང་དུ་འབྱོན་པར་བསྐུལ། ཁྱེད་ལ་སློབ་མ་འགྲོ་དོན་ནུས་པ་སུམ་ཅུ་འོང་། དེའི་ནང་ནས་ཀྱང་སེམས་ཅན་ལ་ཕན་པ་ཆེ་བ་བཅུ་གཅིག་འོང་། ཁྱད་པར་ཅན་དགུ་ཡོང་། ཁྱེད་ཚོ་བླ་མ་འདི་དང་འཕྲད་པས་འཚེངས་པ་ཡིན་ཟེར། ཆོས་སྐྱོང་གི་གཏད་རྒྱ་བྱེད་དུས། ཤན་པ་སྲོག་སྒྲུབ་མས་ངའི་སྒྲུབ་ཐབས་མི་ཀློག་པ་ཞུ་ཟེར་བའང་བྱུང་། དེ་ལྟར་མཁའ་འགྲོ་སྙིང་ཏིག་གི་དབང་ཁྲིད་ཐམས་ཅད་རྫོགས་པའི་ནུབ། ཁ་སང་ནས་མཁའ་འགྲོ་མ་རྣམས་ཀྱིས་དངོས་གྲུབ་བྱིན་པ་ཡིན། དོ་ནུབ་བོས་ཀྱང་ཨེ་ཡོང་ལྟ་ཡི་ཆང་ལ་ཆུ་རྒྱོབ་ཅིག་གསུངས། ཡོད་ཚད་བཙགས་པས་རྫ་ཆུང་གང་བྱུང་། དེས་ཆོག་ལས་ཆེ་ཞུས་པས། དེས་མི་ལྡང་ད་དུང་ཆུ་རྒྱོབ་ལ་ཆོག་གསུངས། དེ་བཞིན་བྱས་པས་བཙགས་ཚད་ཆང་དུ་བྱུང་ནས་དེར་ཚོགས་པ་ཐམས་ཅད་བཟི་བ་ཙམ་སོང་བས། དངོས་པོ་སྤྲུལ་བསྒྱུར་བྱ་བ་དེ་ལྟར་ཡིན་གསུངས། དེ་ནས་གཡུ་སྒྲོན་མས་ཀྱང་ངའི་གནས་སུ་གཤེགས་པ་ཞུ་ཞེས་བསྐུལ་ནས་ཞལ་གྱིས་
བཞེས་ཙ་ན། ཤིན་ཏུ་དགའ་བའི་ཚུལ་གྱིས་ཁོ་མོ་སྔོན་ལ་འགྲོ་ཟེར། དེར་ནམ་གྲུ་བབས་ནས་བླ་མ་མི་གཤེགས་པར་ཞུ་ཟེར། ཁྱེད་མི་མ་ཡིན་རྣམས་ལ་ངས་ཆོས་དེ་འདྲ་བཤད་ཀྱང་མ་གོ། དགའ་མི་དགའ་བློའི་ཆོ་འཕྲུལ་ཡིན། ང་གང་ཡོང་སར་འོངས་པས་ཆོག་གསུངས་ནས་ཏིང་ངེ་འཛིན་གྱི་དབང་བསྐུར་ཅིག་མཛད་པས་ཐུགས་ལ་བཏགས་ཟེར། ཁ་སང་གར་དེངས་དྲིས་པས། འབྲོག་ཏུ་རུ་སྡུད་ཅིག་ལ་ཕྱིན་ཟེར། དེ་དུས་ཕྱུགས་ནད་མང་པོ་བྱུང་བར་གྲགས། དེ་ནས་རྣལ་འབྱོར་ཕོ་མོ་རྣམས་ཀྱིས་ཀྱང་རང་རང་གི་གོས་དང་རིན་པོ་ཆེའི་མཎྜལ་ཕུལ། བསྒྲུབ་པའི་དམ་བཅའ་བྱས་པས། ངའི་ཆོས་འདི་ལ་གཏོང་ཕོད་དང་བསྒྲུབ་པའི་དམ་བཅའ་བརྩོན་པ་མང་པོ་ཡོང་གསུངས། ཡང་འོད་གསལ་སྦུབས་འཇུག་གི་གདམས་པ་གསུངས་ནས། ངའི་མན་ངག་འདི་དག་འཛམ་བུའི་གླིང་ན་དཀོན་པ་ཡིན། སྣོད་ཀྱིས་འཆུན་ན་འོད་ལུས་མྱུར་དུ་འགྲུབ་བོ་གསུངས། བསམ་ཡས་མཆིམས་ཕུ་ནས་ཕྱག་ཕེབས། ཕྱུག་པོ་བྲག་ཏུ་ཚོགས་འཁོར་མཛད། གཡུ་སྒྲོན་མས་བསུ་བའི་རྣམ་པ་ཡང་བྱས། དེ་ནས་ཤུག་གསེབ་ཏུ་གདན་དྲངས་དུས་རྣལ་འབྱོར་མ་གཅིག་ལ་མཁའ་འགྲོ་བབས་ནས་བླ་མ་ཨོ་རྒྱན་རྫོང་དུ་གཤེགས་པར་ཞུ་ཟེར། དེ་ནས་གངས་རི་ཐོད་དཀར་ཨོ་རྒྱན་རྫོང་འོད་ཟེར་སྤྲིན་གྱི་སྐྱེད་མོའི་ཚལ་དུ་ཕེབས། རྣལ་འབྱོར་པ་འོད་ཟེར་གོ་ཆས་
གསོལ་བ་བཏབ་ནས་མཁའ་འགྲོ་ཡང་ཏིག་གཏན་ལ་ཕབ། དེའི་ཚེ་ནམ་མཁའ་འཇས་ཁེངས། མཁའ་འགྲོའི་སྣང་བ་དང་ཆོ་འཕྲུལ་ཟད་མི་ཤེས་པ་ཀུན་གྱི་མཐུན་གྲུབ་ཏུ་བྱུང་། དེ་དག་གིས་བར་སྐབས་ཅི་རིགས་པར་བླ་མའི་དྲུང་དུའང་གདམས་ངག་གི་ཞུན་ཐར་བཅད། གང་དུ་བཞུགས་སར་སྒྲུབ་པའི་རྒྱལ་མཚན་བཙུགས་ནས་བླ་མ་མཉེས་པར་བྱས། འདི་སྣང་ལ་ཆགས་ཞེན་མེད་ཅིང་། འཁོར་འདས་ལ་རེ་དོགས་སུ་འཛིན་པ་དག་ནས་དགོན་གནས་དང་གཞི་འཛིན་པའི་འདུ་འགོད་མ་མཛད། བླ་མའི་དྲུང་དུ་འཁོར་གསུམ་ཡོངས་སུ་དག་པའི་འབུལ་བ་ལན་ལྔ། འབུལ་མོ་ཆེ་གཉིས་དང་། བདུན་རྣམ་དག་གིས་མཆོད། ཟླ་བ་བྱུང་ངོ་ཅོག་གི་ཚེས་བཅུ་རྣམ་གཉིས་དང་བརྒྱད་མཆོད་བཟུང་ནས། དཔའ་བོ་དང་མཁའ་འགྲོ་རྣམས་ཚོགས་གཏོར་རྒྱ་ཆེན་པོས་མཉེས་པར་མཛད། གནས་འདིར་འོད་གསལ་ཐོད་རྒལ་གྱི་གསེབ་ལམ་ལས་རིག་པར་ཚད་ཕེབས་ཀྱི་གྲོང་ཁྱེར་ག་ལ་བ་དེར་བྱོན་ཏེ། རྒྱུན་གྱི་རྣལ་འབྱོར་ལྷུམས་སུ་ཞུགས། ཡི་དམ་གྱི་ལྷ་དཔག་ཏུ་མེད་པ་ཞལ་མཇལ། ཁྱད་པར་སློབ་དཔོན་བི་མ་ལའི་ཞལ་གཟིགས་ནས། ངའི་སྙིང་ཏིག་འདི་དོན་བསྡུས་གོ་སླའི་ཉིང་ཁུ་ཞིག་བསྡེབས། ཀུ་མ་རཱ་ཛའི་སྐྱེ་བ་ད་ལྟའི་སློབ་མ་གཞོན་ནུ་སངས་རྒྱས་ལ་སྟོན། དེ་ནས་ཀྱང་། སྣ་ལ་ཨ་ཡིག་གིས་མཚན་པའི་གཞོན་ནུའི་
མིང་ཅན་བདུན་འབྱུང་བས་ཆོས་འདི་འཛིན་སྤེལ་བྱེད་པར་ལུང་བསྟན་པས་ཡང་ཏིག་ཡིད་བཞིན་ནོར་བུ་ཆོས་སྡེ་སུམ་ཅུ་རྩ་ལྔ་པར་གདམས། ས་མོ་ཡོས་ཀྱི་ལོར་ཁོ་བོ་ཅག་ལའང་མཆིམས་ཕུ་ནགས་ཀྱི་དུར་ཁྲོད་ཆེན་པོར་མངོན་སུམ་པའི་ཞལ་ལན་གསུམ་དུ་བསྟན་ཅིང་། གསོལ་བ་དྲག་པོ་བཏབ་པ་ལས། མི་དང་མི་བཟློ་བ་ལྟ་བུའི་གསུང་གིས་དབུགས་འབྱིན་ཆེན་པོ་ཐོབ། ཤིང་རྟ་ཆེན་མོ་ལ་སོགས་པའི་མན་ངག་གབ་པ་ཐམས་ཅད་འདིས་གསལ་བ་ཡིན་གསུངས་ནས་གླེགས་བམ་ཞིག་ལག་ཏུ་སྤྲད། མན་ངག་དང་བྱིན་རླབས་ཀྱི་རྗེས་སུ་གདམས་པ་ཐམས་ཅད་སྩལ་བས་ཆོས་ཉིད་ཀྱི་དྲན་པ་མཁའ་ལྟར་དག །ཆོས་ཚུལ་རྒྱ་མཚོ་དང་ཁྱད་པར་ཀུན་མཁྱེན་བླ་མ་ཉིད་ཀྱི་གཞུང་ལུགས་དང་མན་ངག་ཐམས་ཅད་ལ་གོ་བ་ཅུང་ཟད་རྙེད་པ་འདི་བྱུང་། རྟེན་འབྲེལ་དེ་ལས་གསུངས་པ་འདི་དག་གཅིག་ཏུ་ཚོཊ་པའང་དཀོན་པའི་གནས་སྐབས་སུ་རིང་མོ་ཉིད་ནས་གྱུར་པ་ལ། སྡེ་དགེ་བཙད་པོའི་ཁབ་ཏུ་པར་གྱི་སྒོ་འཕར་ཕྱེ་མ་ཐག་པའང་གནས་དེར་སོན་པས་ལུང་རྒྱུན་གསོ་བའི་རྟེན་འབྲེལ་ཆེན་པོ་དང་། རིང་མིན་མཆིམས་ཕུ། ཀོང་པོ། གཡོ་རུ་རྣམས་ནས་ཀྱང་ཀུན་མཁྱེན་ཆེན་པོའི་ཕྱག་དཔེ་ཡིན་ཞེས་ཡང་ཏིག་ཡིད་བཞིན་ནོར་བུ་ཚར་གསུམ་བསྐུར་ནས་འཕྲོད་པ་རྒྱལ་བ་གཉིས་པ་དེའི་འཕྲིན་ལས་ཀྱི་བྱེད་པ་ཡིན་པར་བལྟའོ། །དེ་བཞིན་དུ་བི་མ་ལས་དབུ་རུ་
ཞྭའི་ཕྱོགས་སུ་སྡིགས་མཛུབ་གཏད་ནས་ཞིག་གསོས་དགོས་པར་ལུང་བསྟན་པ་ལྟར། དེ་ཉིད་དུ་བྱོན་ནས་ཞིག་གསོས་མཛད་པའི་ཚེ། མནན་པའི་ཐོད་པ་མང་པོ་ནམ་མཁའ་ལ་འཕར་བ་ཏིང་ངེ་འཛིན་གྱི་ངང་ལས་སྡིགས་མཛུབ་གཏད་པ་ཙམ་གྱིས་བཀུག །དབུ་རྩེའི་རྒྱབ་ནས་ལྷ་ཁང་གསོ་བའི་ཐེབས། གསེར་འགུ་ཙེ་གང་བཅུས། དམ་ཅན་པ་བྱིས་པ་གཡུ་རྣ་ཅན་དུ་སྤྲུལ་ནས་ཉིན་བཞིན་བཟོ་བའི་གྲོགས་བྱས། རྡོ་རིང་ཆེན་པོ་གཉིས་འགྱེལ་བ་ཐབས་དང་དཔུང་གང་གིས་ཀྱང་བསླང་མ་ནུས་པར། ཆོས་སྐྱོང་ལ་གཏོར་མ་བྱིན། བདེན་ཚིག་བརྗོད། ཐུགས་འུར་བའི་ཚུལ་གྱིས་སྐུ་ཆོས་བརྡབས་པས་མོད་ལ་སློང་ནུས་པ་བྱུང་། ཐོད་པ་སྣ་ཚོགས་ན་དམ་སྲི་མནན་ཡོད་པའི་བཅའ་ག་ཞིག་པ་རྣམས་སོར་བཙུད་དེ་སླར་ཡང་དེ་ཉིད་དུ་རྒྱས་འདེབས་པར་བརྩམས་པ་ན་འཐོར་རླུང་དྲག་པོ་གཡོས། ས་རྡོའི་ཆར་བབས་པས་མི་རྣམས་ཀྱང་བྲོས། ཐོད་པ་རྣམས་འཕར་ནས་ཕན་ཚུན་བརྡབས། ཆེ་ཤོས་ཞིག་དམ་སྲིའི་འཕྲུལ་གྱིས་ནམ་མཁའ་ལ་ཡར་བ་དྲག་ཤུལ་རབ་ཏུ་འབར་བའི་ཏིང་ངེ་འཛིན་དང་ལྟ་སྟངས་ཀྱིས་བཀུག་ནས། ཞབས་ཀྱི་འོག་ཏུ་བཙུད་པས། གསལ་བ་གྱད་དུ་གྱུར་པའི་རྟགས་གུ་རུ་དྲག་པོའི་སྐུར་གཞན་གྱིས་དངོས་སུ་མཐོང་། སླར་ཐོད་པ་རྣམས་ཕྲ་མེན་མཆོད་རྟེན་གྱི་ཞབས་སུ་མནན། རབ་
གནས་དུས་སྐུའི་བཀོད་པ་དུ་མ་ངོ་མཚར་བར་བསྟན། ཐུབ་པ། བྱམས་པ། གནས་བརྟན་བཅུ་དྲུག་རྣམས་ཞལ་འཛུམ་ལྷག་ལྷག་སྟོན་པ་དང་། བྱམས་པས་ཕྱག་མཛུབ་དེངས་ནས་ཁྱོད་ཀྱི་སྐྱེ་བའི་མཐར་པདྨ་བརྩེགས་པའི་ཞིང་དུ་དེ་བཞིན་གཤེགས་པ་རི་རབ་མར་མེའི་རྒྱལ་མཚན་དུ་འཚང་རྒྱའོ་ཞེས་པའི་ལུང་བསྟན་ཐོབ། དབུས་སྟོད་སྐྱིད་ཆུའི་འགྲམ་ཕན་ཚུན་གཉིས་ཀར་ཆོས་ཉན་མང་དུ་ཚོགས་པ་ལ་གསང་བ་བླ་ན་མེད་པའི་ཁྲིད་བཏབ། ཚོགས་པ་རྣམས་ལ་ཚོགས་ཀྱི་འཁོར་ལོ་རྒྱ་ཆེན་པོ་ཡང་ཡང་གནང་། གསང་ཕུའི་ཆོས་གྲྭ་ལའང་སྔ་ཕྱིར་གནང་སྦྱིན་བཟང་པོ་མཛད། གོང་པོ་རིའི་ཐད་ནས་གདོང་འཇིགས་སུ་རུང་བ་ཞིག་གཟིཊ། འཇིག་རྟེན་ལ་མི་དགེ་བ་དང་། ས་ཕག་གི་རྩོད་པ་འོང་བ་མཁྱེན་ནས་མོན་བུམ་ཐང་དུ་ཕེབས། བསྟན་པའི་སྣང་བ་ཉུང་བས་ཤིན་ཏུ་གདུལ་དཀའ་བའི་གནས་དེར་ཡང་གདུལ་ཞིང་རྒྱ་ཆེ། ཚོགས་པ་མང་པོ་འདུ་བའི་དགེ་འདུན་གྱི་སྡེ་བཙུགས་ཏེ་ཐར་པ་གླིང་དུ་བཏགས། སློབ་དཔོན་སངས་རྒྱས་ཀུན་དགའ་བསྐོ་འཇའ་གནང་། སྔ་འགྱུར་སྤྱི་དང་རྫོགས་ཆེན་གྱི་འཕྲིན་ལས་སྤེལ། གསང་སྔཊ་རང་གར་སྤྱོད་པ་དག་ལ་མིག་ལྟོས་བསྟན་པའི་ཆེད་བྱར་ནས་གཏེར་སྟོན་གྱི་དངོས་སློབ་ཤོའི་རྒྱལ་སྲས་ལེགས་པ་ལས་མཁའ་འགྲོའི་སྙིང་ཏིག་གི་ཚིག་རྒྱུད་གསན། ལྷ་སར་བྱོན་ནས་ཇོ་བོ་མཇལ་དུས་མཛོད་