རིག་འཛིན་འཇིགས་མེད་གླིང་པའི་འཁྲུངས་རབ་རྣམ་ཐར་ཉུང་བསྡུས།
རིག་འཛིན་འཇིགས་མེད་གླིང་པའི་འཁྲུངས་རབ་རྣམ་ཐར་ཉུང་བསྡུས་བཞུགས།
དེ་ལ་བདག་ཅག་གི་བླ་མ་དམ་པ་འདི་ཐུགས་རྗེ་ལས་སྦྲུལ་གྱི་རྣམ་པས་བསྟན་བ་དང་སེམས་ཅན་གྱི་དོན་དུ་བྱོན་པ་སྟེ། །མན་ངག་རྫོགས་པ་ཆེན་པོས་གདུལ་བའི་དུས་ལ་བབ། མགོན་པོ་འཇིག་རྟེན་དབང་ཕྱུག་གི་ཐུགས་བསྐྱེད་ལས་རྒྱལ་པོ་དྷརྨ་ཨ་ཤའི་སྲས་མོ་མི་ལས་འདས་པའི་དགེ་སློང་མ་ཞིག་ལ་ཤེལ་གྱི་སྐྱེས་བུ་བཀྲག་དང་ལྡན་པ་ཞིག་གིས་དབང་བསྐུར་བས་སྐྱེས་བུ་མཚན་དང་ལྡན་པ་ཅིག་འཁྲུངས། ཕ་མེད་ཀྱི་བུར་གྱུར་པས་ཐལ་ཁུང་དུ་བོར། ཞགས་གསུམ་ནའང་མ་ཉམས་པར་འདུག་པས་སྤྲུལ་པའི་སྐུར་ཡིན་ཆེས། ལོ་བདུན་ན་པཎིྜ་ཏ་དང་ཆོས་གཏམ་བྱས་པས་སུས་ཀྱང་མ་ཐུབ་སྟེ་ཞབས་སྤྱི་བོར་བླངས།
ཡབ་དགྱེས་བས་དགའ་རབ་རྡོ་རྗེར་བཏགས། ཉི་མ་སྣང་བྱེད་ཀྱི་རི་ལ་ལོ་སུམ་ཅུ་རྩ་གཉིས་སུ་བསམ་གཏན་ལ་གཞོལ། སྐུ་ཉེ་ཞུར་ལྟ་བུར་གྱུར་ཅིང་། ནམ་མཁའ་ལ་གཤེགས་བཞུད་མཛད། རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་གདོད་ནས་ཐུགས་སུ་ཡོད་པ་འདོན་དུ་མཛད་ཅིང་། མཁའ་འགྲོ་མས་བཀའི་བསྡུ་བ་བྱས་ནས་ཡི་གེར་བཀོད། ཁྱབ་འཇུག་གི་བུ་མོ་གཅེར་བུ་ལ་ཆིབ་ས་ཏེ་དུར་ཁྲོད་བསིལ་ཚལ་དུ་བྱོན་ནས་མཁའ་འགྲོ་རྣམས་ལ་ཆོས་སྟོན། མཐར་ཆུ་བོ་དན་ཏིག་གི་འགོར་འོད་ཕུང་དུ་ཡལ། སངས་རྒྱས་འོད་སྲུངས་ཀྱི་དྲུང་དུ་རྒྱལ་པོ་ཀྲི་ཀིའི་སྲས་སུ་གྱུར་ནས་བྱང་ཆུབ་ཏུ་སེམས་བསྐྱེད། འོད་
སྲུངས་ཀྱི་མཆོད་སྡོང་ལ་གདུགས་ཕུབ་པས། སྟོབས་ཀྱི་འཁོར་ལོས་སྒྱུར་བའི་ཡུང་བསྟན་ཐོབ། ཤཱཀྱ་ཐུབ་པའི་དུས་སུ་སྐུའི་མ་ཆད་དུ་གྱུར་པས་ཅུང་དགའ་བོར་གྲགས། སྟོན་བས་ཐབས་ལ་མཁས་པའི་འདུལ་བས་དགྲ་བཅོམ་པའི་གོ་འཕང་མངོན་དུ་མཛད། སྔོ་སངས་རྒྱས་འོད་སྲུངས་ལ་བྱུག་པ་ཕུལ་བས་བགས་པ་གསེར་གྱི་མདོག་ཏུ་སྣང་བ་དང་། གཙུག་ཏོར་གྱི་རྣམ་བ་སོགས་མཚན་གྱི་མེ་ཏོག་ཅན་དུ་གྱུར། སྲོང་བཙན་སྒོམ་པོའི་དུས་ན་རྒྱལ་བོ་ཉིད་ཀྱི་མཛོད་སྤུ་ལས་སྤྲུལ་བའི་དགེ་སློང་ཨ་ར་མ་མ་ཏིར་གྲགས། ཙན་དན་གརིྴ་ཤ་ལེན་ཕྱིར་འཕགས་པའི་ཡུལ་དུ་བྱོན་ནས་རང་བྱོན་འཕགས་བའི་སྐུ་སྤྱན་དྲངས། དྲི་མེད་ཀུན་ལྡན་གྱི་བུས་ནོར་བུ་ཕ་རོལ་དཔུང་འཇོམས་ཀྱིས་གཙོས་ལོངས་སྤྱོད་གཅེས་ནོར། བུ་དང་བུ་མོ། རང་གི་མིག་ལ་སོགས་པ་བཏང་སྟེ་གཏོང་བ། གཏོང་བ་ཆེན་པོ་དང་། ཤིན་ཏུ་གཏོང་པས་སྦྱིན་པའི་ཕ་རོལ་ཏུ་ཕྱིན་པ་རྫོགས་པར་མཛད། བསྟན་པ་སྔ་དར་གྱི་དུས་ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་དུ་གྱུར་ནས་དཔལ་གྱི་བསམ་ཡས་བཞེངས། མཁན་སློབ་ཆོས་གསུམ་ལ་སོགས་པའི་སྤྲུལ་པའི་ལོ་པཎ་མང་པོ་སྤྱན་དྲངས། བོད་དུ་སངས་རྒྱས་ཀྱི་བསྟན་པ་ཉི་མ་ཤར་བ་ལྟ་བུར་མཛད། སྤྲུལ་པའི་དམག་གིས་རྒྱ་གར་
ཆུ་བོ་གདྷཱ་ཚུན་ཆད་དབང་དུ་བསྡུས་ནས་དགེ་བཅུའི་ཁྲིམས་ལ་བཀོད། ཉིད་དང་ཐུགས་རྒྱུད་གཅིག་པ་ལྷ་ལྕམ་པདྨ་གསལ་གྱི་ཐུགས་བསྐྱེད་ལས་མན་ངག་མཁའ་འགྲོའི་སྙིང་ཏིག་ཆོས་སྐལ་དུ་ཐོབ་ནས་དངོས་སྤྲུལ་ཡང་སྦྲུལ་དུ་མས་ལས་ཅན་གྱི་གདུལ་བྱ་མང་པོ་སྨིན་གྲོལ་ལ་བཀོད། འཕགས་པའི་ཡུལ་དུ་རྣལ་འབྱོར་གྱི་དབང་ཕྱུག་རྭི་པར་གྱུར་ནས་ཀྱེའི་རྡོ་རྗེའི་ལམ་འབྲས་བུ་དང་བཅས་པའི་སྨིན་གྲོལ་བསྟན། མངའ་བདག་རལ་བ་ཅན་གྱི་དུས་གཙུག་ལག་འཛིན་གྱི་སྐྱེ་བ་རྒྱལ་སྲས་ལྷ་རྗེར་གྱུར་ནས་སློབ་དཔོན་ཆེན་པོ་ལས་གཡུ་རུའི་ཁྲ་འབྲུག་ཏུ་བཀའ་འདུས་ཆོས་ཀྱི་རྒྱ་མཚོ་ནོས་ཤིང་གཏེར་སྟོན་རྐྱང་པའི་སྐྱེ་བ་བཅུ་གསུམ་བླངས་ནས་ཕྲིན་ལས་རླབས་ཆེན་འགྲུབ་པའི་ལུང་བསྟན་ཐོབ། སྐྱེ་བ་བདུན་པ་ཡིན་བས་སྐུ་ཤའི་ཆ་ཤས་ཙམ་གྱིས་ཀྱང་སེམས་ཅན་གྱི་དོན་རླབས་པོ་ཆེ་བསྒྲུབས། དེའི་སྐྱེ་བ་ཕྱི་མ་ལ་ཡར་རྗེ་ཨོ་རྒྱན་གླིང་པར་གྱུར་ནས་ཤེལ་བྲག་ནས་བཀའ་འདུས་ཆོས་ཀྱི་རྒྱ་མཚོ་ཀླེགས་བམ་བརྒྱ་ཕྲག་ཏུ་ལོངས་པའི་གཏེར་སྨྱོན་དང་། ཐང་ཡིག་སོགས་སྤྱན་དྲངས། དེ་བཞིན་དུ་བསམ་གཏན་གླིང་པའི་དུས་ཨ་ཏིའི་ཆོས་སྐོར་རྨད་དུ་བྱུང་བ་གདན་དྲངས་ནས་འགྲོ་བ་མང་པོའི་དོན་མཛད། །དྭགས་པོ་ཟླ་འོད་གཞོན་ནུའི་ཚེ་དགེ་བའི་བཤེས་གཉེན་སྙུག་རུམ་པ་སོགས་
ལས་བཀའ་གདམས་དང་། །རྣལ་འབྱོར་དབང་ཕྱུག་མི་ལ་ལས་ནཱ་རོའི་ཆོས་དྲུག་ཕྱག་ཆེན་ལ་སོགས་པ་ནོས་ཤིང་ཀློང་དུ་གྱུར་ནས་དཔལ་སྒོམ་པོ་བ་ཞེས་པའི་སྙན་གྲགས་ཀྱིས་འཇིག་རྟེན་ཕལ་ཆེར་བཀབ་ཅིང་གྲུབ་ཐོབ་ཀྱི་ས་བོན་བཏབ། །དཔལ་ས་སྐྱའི་དཀར་པོ་རྣམ་གསུམ་ལས་རྗེ་བཙུན་གྲགས་པ་རྒྱལ་མཚན་ཞེས་མཁས་པ་དང་རུབ་པའི་རྣམ་དཔྱོད་ཀྱིས་གསར་རྙིང་གཉིས་ཀའི་བསྟན་པའི་བདག་པོ་མཛད། ཁ་ཆེ་པཎ་ཆེན་དང་མཇལ་འཛོམ་བཤེས་པར་མཛད་ཅིང་དབོན་པོ་ས་པན་གྱི་རྡོ་རྗེ་སློབ་དཔོན་མཛད། ཁྱད་བར་དུ་པཎ་ཆེན་བི་མ་ལ་བོད་ཡུལ་དུ་བྱོན་པ་དཔལ་བསམ་ཡས་པ་ཀུན་མཁྱེན་ངག་གི་དབང་པོར་གྱུར་ནས་འཛམ་བུའི་གླིང་གི་རྒྱན་དྲུག་མཆོག་གཉིས་ཐམས་ཅད་ཀྱི་སྤངས་རྟོགས་གཅིག་ཏུ་སྤུངས་པ་ལྟ་བུ་སྔོན་མེད་པའི་བསྟན་པའི་ཆོས་འཁོར་མཛོད་ཆེན་བདུན་དང་ཤིང་རྟ་རྣམ་གསུམ་རྩ་འགྲེལ་སོགས་གསུང་རབ་ཀྱི་སྣང་བས་འཇིག་རྟེན་ཀྱི་མུན་པ་ལ་བསལ་པར་མཛད་ཅིང་ཕྱོགས་རེས་མིག་ཅན་རྣམས་ཐེག་པའི་ཡང་རྩེ་གཤུང་བར་མི་ནུས་པའི་དམ་བཅའ་ལ་བཀོད་ཅིང་། ལྷ་དང་མི་མཁའ་འགྲོའི་འདུ་བ་ལ་ཆོས་ཀྱི་སྒོ་རྒྱ་ཆེན་པོ་བསྟན། མངའ་རིས་གློ་བོ་བ་པདྨ་དབང་རྒྱལ་གྱི་ཚེ་སྟེང་ཁང་སྙིང་མཛེད་ནས་བཀའ་འདུས་ཕྱི་མ་རིག་འཛིན་ཡོངས་འདུས་སྤྱན་དྲངས་ཤིང་། མངའ་བདག་ཉང་གི་
བག་ཆགས་སད་པས་བདེ་གཤེགས་སྒྲུབ་པ་བཀའ་བརྒྱད་ཀྱི་བསྟན་པ་ལ་བྱ་བ་རྒྱ་ཆེན་པོ་དང་། མགོར་ན་གསར་རྙིང་བཀའ་གཏེར་གྱི་ཆོས་ལ་མི་མཁྱེན་བྱ་བ་དང་། །ཐུགས་ཉམས་སུམ་བཞེས་པ་མེད་པ་ལྟ་བུས་བསྟན་པ་དང་སེམས་ཅན་གྱི་དོན་མཛད། རིན་ཆེན་ཕུན་ཚོགས་ཀྱི་རྡོ་རྗེའི་སློབ་དཔོན་དུ་གྱུར་པའི་རྟེན་འབྲེལ་དེ་ཉིད་ཀྱི་སྲས་ཆོས་རྒྱལ་ཕུན་ཚོགས་སུ་འཁྲུངས་ནས་རང་གི་ཡབ་རྗེ་དང་། །རྗེ་བཙུན་པྲཛྙཱའི་ཞབས་ལ་དམ་པའི་བདུད་རྩི་ནོད་ནས། འབྲི་གུང་བའི་ཆོས་སྲིད་་ཀྱི་སྡེ་ལ་ཕན་ཏོག་རྒྱ་ཆེན་པོ་བསྒྲུབས། བྱངས་བདག་བཀྲ་ཤིས་སྟོབས་རྒྱལ་གྱི་ཚེ་བཀའ་གཏེར་གྱི་གདམས་པའི་གསང་མཛོད་དུ་རྒྱུ་ཅིང་། ཟབ་མོའི་གཏེར་ཁ་ཕྱེ་ནས་དབུས་གཙང་ཁམས་གསུམ། རྒྱ་ནག་གི་ཡུལ་བུའི་ཆལ་ཐུག་པར་ཕྲིན་ལས་རླབས་ཆེན་པོས་རྒྱལ་དབང་པདྨའི་བསྟན་པ་ལ་ཞབས་ཏོག་རྒྱ་ཆེན་པོ་བསྒྲུབས། དེ་ནས་ཀོང་ཡུལ་བདུད་རི་ནག་པོ་བྱ་རོག་སྒྲ་ཅན་གྱི་འདབས་སུ་རིག་འཛིན་འདམ་གླིང་རྡོ་རྗེར་འཁྲུངས་ཏེ་བདུད་མཚོའི་ཀློང་ནས་ཁྲིམ་གཏེར་སྤྱན་དྲངས་ཤིང་མཐའ་ཁོབ་སློ་བོ་ལ་སོགས་པའི་གདུལ་བྱ་རྣམས་ཆོ་ཀྱི་སྣོད་དུ་མཛད། དེ་ནས་ད་རེས་སེམས་ཅན་གྱི་དོནདུ་སྤྲུལ་པའི་སྐུར་བཟུང་ཚུལ་ནི། ཡུལ་དབུས་གཡོ་རུའི་སའི་ཆ་བཀྲ་
ཤིས་སྲོང་བཙན་བང་སོ་དང་ཉེ་བའི་གནས་སུ་རིགས་རུས་ཆོ་འབྲང་གིས་བཙུན་པར་སྐུ་འཁྲུངས། དགོང་ལོ་དྲུག་པ་ནས་བསྟན་པའི་སྒོར་ཞུགས་ཤིང་། ཆུང་དུ་ནས་ཤེས་རབ་ཀྱི་སྤོབས་པ་དང་སྙིང་རྗེ་ཆེན་པོ་བློ་བཅོས་མིན་དུ་ཤར། སྐྱོ་ཤས་དང་ངེས་འབྱུང་ལྷག་པར་ཆེ་བས་ཉི་ཞུ་རྩ་ལྔ་པ་ནས་སུམ་ཅུ་རྩ་ལྔའི་བར་ཐེག་མི་འདའ་བའི་དམ་བཅའ་དང་། དབེན་པར་བཅད་རྒྱ་འབའ་ཞིག་མཛད། སྔོན་གྱི་བག་ཆགས་དཔས་དགེ་བའི་བཤེས་གཉེན་མཁས་པ་བསྟེན་པ་དང་། བསླབ་གཉེར་སོགས་ལ་ཅུང་ཟད་ཀྱང་མ་ལྟོས་པར་མགྲིན་པའི་རྩ་མདུད་གྲོལ་བས་གསུང་རབ་ཀྱི་དོན་བདེ་བླག་ཏུ་མཁྱེན་པའི་རྟོགས་པའི་ཀློང་བརྡོ་ལ། མཆིམས་ཕུར་རྒྱལ་བ་ཀླང་ཆེན་པའི་ཡེ་ཤེས་ཀྱི་སྐུ་དང་མི་དང་མི་འཕྲད་བ་ལྟ་བུས་ལན། །གསུམ་མཇལ་ནས་བྱིན་རླབས་རྗེས་གནང་ཐོབ་པས་མདག་རྒྱུད་ཐམས་ཅ་ལ་སྤོབས་པའི་གཏེར་མཛོད་གྲོལ། མཁའ་འགྲོའི་ཀློད་བྱང་གི་བརྡ་རིས་གཏད་པས་རྫོགས་པ་ཆེན་པོ་ཀློང་ཆེན་སྙིང་ཏིག་དང་། ཡོན་ཏན་མཛོད་རྩ་འགྲེལ་སོགས་པ་དགོངས་ཏེ་ར་བསྟན་བཅོས་པོད་ཆེན་བཅུ་སྐོར་མཛད། དབུས་གཙང་ཁམས་གསུམ། མོན་ཁ་སྣ་བཞི་ལ་སོགས་པ་ནས་སློབ་མ་སྐད་རིགས་མི་གཅིག་པ་ཅན་རྟག་ཏུ་འདུལ་བས་ཆོས་ཀྱི་འཁོར་ལོ་ལ་རྒྱུན་ཆད་མེད། དབང་བཅུ་རྗེས་མཐུན་པ་ཐོབ་བས་སྐུ་ཚེ་རིང་པོར་བཞུགས་ཤིང་
སྐྱོང་སྡེ་དགེས་གཙོས་པའི་ཟང་ཟིང་གི་འབུལ་ནད་གྱ་ནོམ་པ་འབྱོར་ཡང་གནས་མིན་དུ་གང་ཟགས་མ་མཛད་པར་བཀའ་འགྱུར་ཀློག་པ་དང་། རྙིང་མ་རྒྱུད་འབུམ་ཆ་ཆང་། རྣམ་ཐར་ཤེལ་བྲག་མ་སོགས་ཀྱི་བྲིས་ཐང་སྤུས་དག་དྲུག་ཅུ་སློར་བཞེས་པེ། མེས་དབོན་རྣམ་གསུམ་གྱི་བཙུག་ལག་ཁང་ལ་ཁྲི་མཆོད་མང་པོ་དང་མཆོད་རྫས་ཡོ་བྱད་སྣ་ཚོགས་སྦྱར་བ། བསམ་ཡས་སུ་སྟང་དངུལ་གཉིས་ཙམ་གྱི་རྒྱུ་འགྲོའི་ཆོས་ལོངས་སྤྲུལ་གསུམ་དང་འཁོར་ལོ་རིན་པོ་ཆེ་གསེར་སྲང་བརྒྱ་ལས་གྲུབ་པ་སོགས་ཀྱིས་མཚོན་རྟེན་བཞེངས་མང་པོ་མཛད། །སེམས་ཅན་ལ་སྙིང་རྗེ་ཆེན་པོ་རྒྱུན་མི་འཆད་པས་ཕོངས་པ་དང་སྡུག་བསྔལ་བ་ལ་བརྩེ་ཞིང་ཟང་ཟིང་གི་སྦྱིན་པ་དང་། ཕྱུགས་ལུག་སྟོང་ཕྲག་ལྡང་བ་ཉེའུ་འདོན་པ། ལོ་ལྟར་སྦྲང་ཚང་བསླུ་བ་སོགས་སྲོག་ཆགས་དུང་གྱུར་མང་པོ་ལ་མི་འཇིགས་པའི་སྐྱབས་སྦྱིན་མཛད། ཆེན་པོར་རློམ་པ་དང་། སྟོབས་འབྱོར་གྱིས་དྲེགས་པ་ཅན་སུ་ལའང་ཅི་མི་སྙམ་པར་བཞུགས་ཀྱང་། གཞན་ལ་ངན་སྨྲས་དང་། ཕྲག་དོག་དང་མཚང་འདྲུ་བའི་ཐུགས་བསམ་དན་པ་གཏན་ནས་མི་འཆར། །གནོད་བ་ཅན་དག་ལའང་འཁོན་འཛིན་མི་མཛད། །བོད་གངས་ཅམ་ཙམ་མན་ཐམས་ཅས་ཀྱིས་འདྲེན་པར་བཀུར་བ་ས་སྐྱ་བ་ཆེན་པོས་དབུ་བླར་མཛད་ཅིང་། སྐུ་ཞབས་རྒྱལ་བ་ཡབ་སྲས་ཀྱིས་གཙོ་ཀརྨ་པ་དང་། འབྲིང་གུང་བ་
སོགས་ཀྱིས་དངོས་དང་ཆབ་ཤོག་གི་ལམ་ནས་གཟེངས་བསྟོད་པས་མཚོན་འཇིག་རྟེན་གྱི་ཕྱོགས་ནས་བླ་སྤྲུལ་ཆེ་བར་གྲགས་བ་དང་། གྲས་ཆེན་པོ་སེར་འབྲས་དགེ་གསུམ་གྱི་དགེ་བཤེས་གཟུ་བོའི་བློ་ལྡན་རྣམས་ཀྱིས་ཆོས་ཉན་པ་དང་བསྟི་སྟང་མཛད་ཀྱང་དྲེགས་བསྙེམས་དང་། ཆོས་བརྒྱད་ཀྱིས་གཟི་བྱིན་མི་རྔམ་པར་འཁྲུལ་ཞིང་ཆེན་པོར་བཞུགས་ཤིང་། ཁྱད་པར་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་རང་བྱན་ཆུད་པས་དབུ་སྐྲ་དང་། སེན་མོ་དང་། ཆོམས་ཕྲེང་སོགས་ལ་དད་ཅན་གྱི་གདུང་རིང་བ་སྲེལ་མངོན་སུམ་དུ་སྐྱེས་ཤིང་འཕེལ་བ་སོགས་འབྲེལ་ཚད་དོན་ལྡན་གྱི་སྐྱེས་བུ་དམ་བ་ཡིན་ལ། དེ་ལྟ་བུ་ལས་བརྒྱུད་པའི་གདམས་པ་འདེབས་པར་བྱེད་པ་ལ་སོགས་མཚམས་སྦྱོར་རོ། སངས་རྒྱས་ཉིད་ཀྱང་རང་བསྟོད་གསུང་བ་ལ། །བསྙེམས་པ་བཏང་ན་ལོག་ཤེས་ཅན་དག་གིས། །མཐོང་ཐོས་བྱུང་དོགས་སྐྲག་པ་སྐྱེས་ན་ཡང་། །ཁམས་བླའི་ཨུ་ཚུགས་མ་ལྡོག་དབང་མེད་དུ། །བྲིས་འདི་བདེན་པ་མ་ཡིན་རྫུན་པའང་མིན། །མོས་པ་ཐོབ་ཚད་བདག་གི་བདུལ་བྱར་ཤོག་། །མངྒལ།