ཤོག་ལྷེབ་ ༥༠༡ ནས་ ༦༠༠ བར།
དབྱེ་ནས། སྒྱུ་འཕྲུལ་ཞི་བ་ཁྲོ་བོ། སངས་རྒྱས་མཉམ་སྦྱོར་ཡང་དག་ཟླ་གདམ་དགུ་པ། སེམས་སྡེ་བཅོ་བརྒྱད། ན་རཀ་དོང་སྤྲུགས། བཀའ་མའི་མགོན་པོ་ལེགས་ལྡན་སོགས་ཉན། དཀྱིལ་ཐང་བཞེངས། དབང་ཆོག །སྒྲུབ་ཕྲིན་ཕྱག་རྒྱ། ཐིག་རྩ་སོགས་ཀྱང་བླངས་ནས་རྫོགས་ཆེན་པའི་བླ་མཆན་བསོད་ནམས་ཆོས་ལྡན་ལའང་འཕེལ་རར་བྱས་པ་མདོ་ཁམས་སུ་ཕན་ལ་རེ། སྟོན་སེར་རྡུལ་ཚོན་གྱི་དཀྱིལ་འཁོར་ལ་བརྟེན་ནས་ཕུར་པ་རྒྱུད་ལུགས་ཀྱི་སྒྲུབ་ཆེན་གྱི་ཐོག་མ་ཚེ་སྣ་སྣ་དགོན་རྩེ་སྤྲུལ་སྐུ་རིན་པོ་ཆེའི་གསུངས་བྲིས་སྙན་ཚིག་ཅན་ཞིབ་ལ་བཙེར་བ་འབྱོར། རྟེན་འབྲེལ་ཁྱད་པར་ཅན་གྱིས་མཚམས་སྦྱར་ནས་ལྷུན་གྲུབ་ཕོ་བྲང་གི་ནང་རྟེན་རཏྣ་པའི་སྒྲུབ་ཕུར་དེ་འདིར་ལོ་སྟར་གྱི་བསྒྲུབ་པ་དང་། འཕར་མ་བཅས་ལ་ཤིན་ཏུ་མཁོ་ཆེ་བས་བསླུ་མ་ཙམ་གྱི་རྒྱུ་མཚན་ཞུས་པར་སྤྲུལ་སྐུ་རིན་པོ་ཆེ་ཐུགས་བསྐྱེད་དང་དགོངས་པ་ཆེ་བས་འདིར་རིང་ལུགས་འཛིན་པ་ནི་མེད། དེར་བསྟན་དོན་ལ་སྨན་ན་རྩ་བ་ནས་འབུལ་ཞེས་བསྐྱེལ་མི་གནང་། ཁྲོ་བཅུ་བྱང་ཤིང་བྱིངས་རྣམས་ཙན་དན་དཀར་དམར་ཤ་སྟག་ལ། ཁྲ་ཕྱག་རྣམས་ཉམས་དོད་པ་འདུག །ཕུར་པ་བྱིན་རླབས་ཅན་དེ་ཡང་
རྡུལ་ཁྲོད་ནས་འགྲོ་དོན་ཆེ་སར་ཕེབས་པས་ཆོས་བདག་དགྱེས་པའི་མཚན་མའང་མཐོང་། དེ་ཡང་མདོ་ལས། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་པ་ལྟར་གང་ཟག་དམ་པ་རྣམས་ནི་ཆོས་ཀྱི་མཚན་ཉིད་རང་སྟོབས་ཀྱིས་དཔྱོད་ཅིང་བླུན་དད་དང་ཕྱོགས་འཛིན་གྱི་རྗེས་སུ་འབྲང་བ་མ་ཡིན་པས་ཀུན་མཁྱེན་ཆེན་པོའི་གྲུབ་མཐའ་ལ་རྒྱུ་མཚན་ཤེས་པའི་ཐུགས་མོས་ཀྱིས་དྲངས་ཏེ་མཛོད་བདུན་དང་། ཤིང་རྟ་སྐོར་གསུང་ཆ་ཚང་ཞིག་གཉེར་གདམས་པས། །དངུལ་སྲང་ཉི་ཤུ་རྩ་ལྔ་བྱུང་བ་མདོ་ཁམས་ཀྱི་འགྲིམ་འགྲུལ་ལོ་ཕྱེད་དང་གཉིས་ཐོག་ཏུ་ཕྱག་ཏུ་འབྱོར་པ་བྱས། ཡོན་ཏན་མཛོད་རྩ་འགྲེལ་ཀྱང་གསར་བསྐྲུན་བཅས་གང་ཞིག་བསྟན་པ་ལ་ཕྱག་བཞེས་ཆེ་བ་རྣམས་བསྟན་འཛིན་དུ་འབོད་ཀྱིས། བཅོམ་ཆེན་པོ་དང་རང་གཞན་གྱི་ཕྱོགས་རིས་ཆེ་བ་ནི་བྱིས་པ་སོ་སོ་སྐྱེ་བོ་ཐམས་ཅད་ཀྱི་རྣམ་པར་ཐར་པའོ། །ར་སྟོན་སྐུ་སྐྱེ་རིན་པོ་ཆེ་དང་། ཁམས་བླ་ཅན་སོགས་ཉི་ཤུ་སྐོར་ལ་བླ་མ་དགོངས་འདུས་ཀྱི་དབང་ཆེན་པོ་ཏི་ལུང་དབང་དང་བཅས་པ་བྱས། དེའི་ཚེ་ཁམས་བླ་ལ་བཛྲ་ཨཙཱརྱ་ཉང་རལ་པ་ཅན་
དང་། རང་ཉིད་བུདྷ་དྭི་པར་གསལ་སྣང་མངོན་སུམ་ཤར་ཟེར། ཁམས་རྫོགས་ཆེན་པའི་གྲ་རིས་སྒོམ་ཆེན་རིགས་འཛིན་ཅན་གཉིས་ལྟོ་ཐེབས་དངུལ་རྟ་རྨིག་མ་ཞིག་ཡོད་པར་མོ་ཆེའི་འགག་ཏུ་གྲ་པ་ཞིག་གིས་སིལ་མ་དང་བརྗེ་རོགས་བྱའོ་ཟེར་དངུལ་ནང་ལུགས་སུ་ཁྱེར་ནས་སྒོར་མ་དོན་པས་ཁོང་གཉིས་ཡི་ཆད་ནས་བྱུང་། དངུལ་བོར་བས་མཚོན་གཟུ་བོར་མི་གནས་པ་རྐྱང་པ་དང་ཕྲད་ཟེར་བ་ལ། །བླ་མའི་ཞབས་ལ་ཕྱག་འཚལ་ལོ། །ཁྱེད་མདོ་ཁམས་ནས་བྱོན་པའི་བན་གཞོན་གཉིས། །དང་པོ་གྲ་སར་ཞུགས་པ་དེ། །བཙུན་གཟུགས་ཡིན་ཏེ་ལེགས་སྨོན་ཙམ། །དེ་ནས་གྲོགས་པོ་ཅིག་ཤོས་ལ། །ཁྱིམ་པར་འབབ་དགོས་ཟེར་བ་དེ། །དཔོན་གྱི་ངག་བཀོད་ལ་བརྫུས་པའི། །བདུད་ཀྱི་བསླུ་བྲིད་དང་པོ་ཡིན། །དེ་ནས་འབྲོས་པའི་བསམ་པ་ནི། །དཀོན་མཆོག་གི་སྐྱབས་འོག་ཏུ་ཚུད་པས་བྱུང་། །ད་ནི་དཀོན་མཆོག་གི་དྲིན་བསམ་ལས་། །མི་ལུས་ལན་ཅིག་ཐོབ་པ་འདི། །སྟོང་ལོག་བྱས་ན་གླེན་པ་ཡིན། །སྲོག་ལ་བབ་པའི་གསེས་བྱུང་ཡང་། །དམ་ཆོས་བློ་ཡིས་མ་གཏོང་ཨང་། །དེ་ནས་ཆོས་འཁོར་ལྷ་ས་རུ། །རྟ་རྨིག་ཐུར་སྲང་ལྔ་བཅུ་པོ། །མ་བྱིན་བླངས་པའི་ལག་ཏུ་ཤོར། །ཁྱེད་གཉིས་ལ་སྤྲང་
པོའི་གོ་འཕང་དང་། །འགྱུར་བའི་སྡུག་བསྔལ་མངོན་སུམ་བསྟན། །བྱེད་པོ་དགེ་སློང་ཡིན་ཟེར་ན། །ཁོང་གི་སོ་སོ་ཐར་པ་དེ། །དགེ་སློང་ལྷས་བྱིན་རོ་གཅིག་གྱུར། །སྡོམ་རྩ་གཅོད་ལ་སྙིང་རེ་རྗེ། །དེ་གཅིག་ཏུ་རང་གི་ཚེ་རབ་སྔོན། །མ་བྱིན་བླངས་པའི་རྣམ་་སྨིན་ཡིན། །གཉིས་སུ་ལན་ཆགས་འཁོར་བའི་ཕྱིར། །ཁོང་ལ་ཕན་པའི་སེམས་བསྐྱེད་ན། །སྦྱིན་པའི་བསོད་ནམས་ངེས་པར་ཐོབ། །དེ་ཕྱིར་ལས་འབྲས་ལ་གུས་པར་མཛོད། །བླ་མའི་གནས་ཚུལ་དྲིས་ཙ་ན། །གཏེར་གསར་ཕྱོགས་མི་འཛིན་ཞེས་བསྐུར། །ཆོས་ཀྱི་སྤྱན་ལྡན་བཻ་རོ་ལའང་། །ངན་སྔགས་ཕྲ་མེན་ཅན་ཟེར་ན། །དངོས་ཅག་ཙམ་ལ་སྨོས་ཅི་དགོས། །གཅིག་ཏུ་དེ་ལྟར་ཡིན་པ་སྲིད། །རང་ཉིད་གཟུ་བོར་གནས་བསམས་ཀྱང་། །ཁོང་གིས་དེ་ལྟར་མཐོང་བའི་ཕྱིར། །དངོས་ལ་གཏད་ནས་ཡོངས་པའི་ཕྱིར། །བླ་མ་དམོད་པའི་གང་ཟག་དང་། །ཕྲད་ནས་འགྲོ་ལམ་དགག་པ་དེ། །བདུད་ཀྱི་གྲོགས་པ་མངོན་གསུམ་ཕྲད། །དགེ་བའི་གྲོགས་ཀྱི་རྟེན་འབྲེལ་ལས། ངོ་མཚར་མེད་ཀྱང་དངོས་ཅག་དང་། །ཕྲད་ནས་དམ་ཆོས་ཐོབ་པ་འདི། །བྱང་ཆུབ་སེམས་ཀྱི་ནུས་མཐུ་ཡིན། །དབང་ཁྲིད་གདམས་པ་
མངོན་དུ་བསྟན། །རང་སེམས་ཆོས་སྐུར་ངོ་སྤྲད་པས། །ད་རེས་བདུད་ཀྱི་གཡུལ་ལས་རྒྱལ། །ད་རུང་བྱང་ཆུབ་མ་ཐོབ་པར། །བདུད་ཀྱི་ཕྲང་ལ་ཟད་པ་མེད། །དེ་བས་སྐྱེས་པའི་ཕ་ཡུལ་སྤོངས། །ཆགས་སྡང་གྲ་སའི་འབྲེལ་འདྲིས་ཞོག །གྲོང་ཆོག་རྙེད་འཚོལ་ལ་མ་ཞེན། །བྱིས་དང་སྡིག་གྲོགས་འདུ་འཛི་གསུམ། །བྱང་ཆུབ་བསྒྲུབ་པའི་གནད་གཅོད་ཡིན། །དེ་ཕྱིར་བདེན་པ་འབའ་ཞིག་བསྟེན། །ཁམས་པའི་བློ་བཤོད་ཨ་ས་སྤང་དང་། །བོད་པའི་གཡོ་སྒྱུ་ཁྲམ་གསུམ་གྱི། །རྣམ་ཐར་མ་འཛིན་དམའ་ས་ཟུངས། །བློ་གཏད་དཀོན་མཆོག་གསུམ་ལ་གྱིས། །རང་ངོ་རིག་པས་མི་ཆོག་གིས། །དྲན་པ་ཉམས་པས་འཁོར་བར་འཁྱམས། །དེ་ཕྱིར་རིག་པ་རྐྱང་དེད་ཐོངས། །སྐྱིད་སྡུག་ལེགས་ཉེས་རྣམ་རྟོག་གི། གཞི་རྩ་ཆོད་ལ་རང་ངོ་ལྟོས། །ལམ་ལ་གོལ་འཕྱུགས་སྤང་བའི་ཕྱིར། །ཡོན་ཏན་རིན་ཆེན་མཛོད་འིད་ཟུངས། །ཆོས་ཀྱི་རྩ་བ་བྱང་ཆུབ་སེམས། །ཀུན་རྫོབ་དོན་དམ་གཉིས་ལ་འདུ། །དེ་ཕྱིར་ཕྱིན་དྲུག་ལམ་མཆོག་ལ། །བརྟེན་ནས་ཚོགས་གཉིས་རྫོགས་པར་མཛོད། །རོ་སྙོམས་ལམ་དུ་སློང་ཤེས་ན། །རྐྱེན་ངན་ཐམས་ཅད་དགེ་བའི་གྲོགས། །ཡིན་གྱིས་ལོག་ལྟའི་རིམ་གྲོ་སྤོངས། །ང་ཡིས་བསྒོས་པ་
བཞིན་བསྒྲུབ་ན། །ནམ་ཞིག་ཐུགས་ཡིད་འདྲེས་གྱུར་ནས། །བློ་འདས་ཆེན་པོའི་རྟོགས་པ་འཆར། །ཆོས་སྐུའི་ཀློང་ན་གཉིས་སུ་མེད། །བསམ་པ་ཡིད་བཞིན་འགྲུབ་པར་ཤོག །ཅེས་པ་འདི་སེམས་ལ་ཕན་ཐོགས་ཆེན་པོ་བྱུང་ཟེར། ཁམས་པའི་བླ་མ་མི་ལ་རས་པ་ཞེས་བྱང་གནམ་མཚོར་བྱ་བྲལ་གྱིས་འཚོ་བ་ཞིག་གིས་འདི་ཁར་ཕྱག་བྲིས་མཛད་ནས། ངེད་འདིར་འབྱོར་ནས་ལོ་གསུམ་སོང་། དགོན་གནས་ཆུང་དུ་ཞིག་བཙས་པ་དང་སློབ་མའི་ཚོགས་ཁྱེད་ལ་འབུལ་བས་ཅིས་ཀྱང་འདི་ཕྱོགས་སུ་ཕེབས་དགོས་ཞེས་འདུག །ཁོང་དག་སྣང་ཆེན་པོ་ཞིག་ཡོད་འདུག་པས་འདི་ཕྱོགས་སུ་སྤྲིན་ལ་ཚད་བཞག་པ་ལ་ཕྱག་མཛད་ཟེར། བྱང་ཤ་ཟན་གྱི་ཡུལ་དུ་འགྲོ་ག་ལ་ནུས། འབྱོར་ལན་དམ་རྫས་ཀྱི་འབྲེལ་བ་དང་བཅས་ཕུལ། འདི་སྐབས་ལོ་སྔ་ཕྱིར་ཚོར་འབྲུམ་བའི་ནད་ཡམས་ཐོར་ལོང་ཀུན་ཏུ་ཁྱབ་པས་གནས་ནས་དབྱུང་བ་རྣམས་ལ་སྙིང་རྗེ་དྲག་པོ་སྐྱེས། དེ་ལ་དམིགས་ནས་ཕུར་པའི་སྒྲུབ་པ་དང་། སྦྱིན་སྲེག །ཟས་བསུར་བསྔོ་བ་ལ་སོགས་པ་བྱས། བྱིས་པ་གཏེར་སྟོན་གྱི་འབྲུམ་སྲུང་ཟབ་མོ་དེ་དར་ཅོག་ལ་བྲིས། ཤིས་བརྗོད་དང་སྨོན་ཚིག་ཀྱང་སྦྱར། ཤྲཱི་བརྤ་ཏ་དང་འདི་གཉིས་ཀར་བཙུགས་པས་ནད་དེ་ཡེམ་
བྱུང་། སྲུང་བ་དེ་ཡིད་ཆེས་ཀྱི་གནས་དུ་འདུག་ཀྱང་། འདི་ཚོར་པོ་ལྷའི་བྱིན་རླབས་ཡིན་ཟེར། ཡིན་ཤས་ཀྱང་ཆེ། རང་ངོ་ལ་སྙིང་རྗེ་དང་ཕན་སེམས་དྲག་པོ་རྒྱུན་མ་འཆད་པར་ཤར་བས་བསོད་ནམས་ཀྱི་ཚོགས་འཕེལ། ཉེ་སྐོར་གྱི་རི་སུལ་དུ་དབྱུང་བ་ཚོར་ཕན་དུ་རེ་ནས་སྨན་པ་དྲག་པ་འདྲ་ལ་ཡོན་ཆེན་པོ་སྟབས་ནས་སྨན་སྦྱིན་གཏོང་རོགས་བསྐུལ་ཀྱང་ཐོག་ཏུ་ཁེལ་མིན་མ་ཤེས། ལྟོགས་གྲིར་ཤི་ཉེ་རྣམས་ལ་སྡེ་བར་ཡང་བསྐུལ་ནས་ཡོན་མཆོད་གཉིས་ཀས་རྩམ་པ་ཁལ་རྒྱབ་གསུམ་བསྐྱེལ་དུ་བཏང་བས་ཕན་ཐོག་བྱུང་ངེས། དེའི་ཚེ་རྨི་ལམ་ན་མཆིམས་ཕུའི་གེའུ་འདོག་དེ་ཡིན་རྒྱུའི་མདུན་ན་ཆུ་ཆེན་པོ་དཔའ་རླབས་ཅན་འགྲོ། དེའི་བྲག་ལ་ཆུ་འཐབ་ཀྱི་ལམ་ལ་མ་ཐར་ནས་ཕྱིར་ལོག་ཙ་ན། ཆུའི་རིན་བཙུན་རྒན་མ་མགོ་དཀར་འགྲོ་ཤེས་ཚད་ཅིག་པ་ངན་མེ་ལྷབ་ལྷབ་འབར་བ་དང་། ཕྲག་པ་ན་སྣོད་ཆུས་བཀང་བ་ཁྱེར་ནས་ཁྱོར་ཁྱོར་འགྲོ་བ་མཐོང་། རི་དེའི་རྒྱབ་ཏུ་སླེབ་པ་དང་རྒན་མོ་དེ་ཆུས་ཁྱེར་མེད་ལས་ཆེ་སྙམ་པའི་ངང་ལ་གྲྭ་པ་ཞིག་བྱུང་། དེ་ལ་རྒན་མོ་དེ་ཤུས་ཁྱེར་ན་སྙིང་རྗེ། ཁྱོད་ཀྱིས་ཟུང་ཤོག་བྱས་པས་དབུགས་མ་ཆད་ཙམ་བྱས་པ་མཆན་འོག་ཏུ་ཁྱེར་བྱུང་བས་ནད་བདག་ཡིན་པ་འདྲ། དེ་གསོ་
བའི་ཐབས་བྱེད་ཀྱིན་ཡོད་ཙ་ན། བནེྡ་དེ་ན་རེ། དེ་རིང་བསྐང་གསོའི་འདུ་བ་ལ་འོངས། ཚོགས་འཁོར་མ་བྱུང་། ང་སློབ་དཔོན་པདྨའི་དགེ་བསྙེན་ཇོ་བོ་ནག་བྱུང་ཡིན་ཟེར། ལར་བསྐང་གསོ་སྨར་ཆ་ངས་བྱས་པས་ཚོགས་སོགས་རྗེས་ཆོག་ཀྱང་ག་ལ་ཡོང་། དེ་སྐབས་བསམ་པར་ཉིན་ལྟར་གཏོར་གསོས་ཐོག་དཔལ་ཆེན་གྱི་ལས་གཞུང་བསྲངས། དེ་ཡང་བགེགས་གཏོར་དང་ཚོགས་མེད་ན་གཉིས་ཀ་ལ་ཕན་ཡོན་རེ་ཡོད་པ་དེ་མ་བསམས་པར་སྣང་། དེས་གདོན་བགེགས་ཀྱི་གཉེན་པོར་ཡང་འགྲོ། ཚོད་དང་སོ་ནམ་སོགས་ལ་སྙིང་ཐག་པ་ནས་མི་དགའ་སྟེ། རྟིང་སོར་ཕྱོགས་འགྲོན་མང་སྐུ་གསུང་ཐུགས་རྟེན་བཞེངས་པ་དང་། སྒྲུབ་མཆོད་སྟོང་མཆོད་སོགས་སྒོ་གང་ས་ནས་ཉོས་པ་གཅིག་པུས་མི་འདུས་ཟེར། ཁྲལ་མི་འདི་ཚོའང་རྒྱ་རྡུགས་སྐབས་སྔ་ཕྱི་རིང་ཐུང་ཙམ་ཡང་བཀག་ན་དེའང་སྡིག་པར་འདུག་ དེ་ལ་སྤྲོད་རྒྱུ་ནི་ཞིང་ཆུང་རེ་གཉིས་ལས་ཅི་ཡོང་རྒྱུ་དེས་མཆོད་ཁང་འདིར་ཡང་ཉིན་ལྟར་ཞལ་ཟས་གསུམ་རེ་མ་ཆག་ན་ལོ་གཅིག་ལ་སྟོང་མཆོད་འགྲོ། དེ་བཞིན་དུ་དཀོན་གཉེར་དེས་སྔ་ཞོགས་ཀྱི་ཆར་བཀའ་འགྱུར་རྒྱུན་ཀློག་གི་སྒྲ་མ་ཆག་ཙམ་བྱུང་ན་དགེ་སྡིག་འདུན་པའི་ཁྱད་པར་དུ་འདུག་པས་འབྲེལ་ཐོགས་
ཐམས་ཅད་ལ་ཕན་སྙམ་སྟེ་དགེ་སྦྱོང་ཀོ་ཀ་ལའི་ལོག་འཚོའི་རྩོད་བ་ལ་ཡིད་དབྱུང་ངོ། །རང་ལོ་དྲུག་ཅུ་པ་མེ་སྤྲེལ་སར་མ་ཐག་ཆོས་རྗེ་བྲག་ཕུག་དང་། རྣམ་རྒྱལ་གྲེ་ཚང་གི་དགེ་སློང་རི་ཁྲོད་པ་འཇམ་དབྱངས་ཅན་ལ་རྒྱ་ཅན་གྱི་དབང་ལུང་ཡོངས་རྫོགས་དང་། ཀློང་སྙིང་གི་རྩ་དབང་ཡང་བཞེད་སྐྱར་བྱས། དེ་སྐབས་ཆོས་རྗེའི་རྨི་ལམ་ན་ངོ་ཁྲི་ཆེན་པོའི་ཁར་འདུག་བའི་རྩ་ན་དགེ་སློང་རྣམ་རྒྱལ་བ་ཡོད་པ་ལ་ནང་བཅར་འདྲིས་བཤེས་ཆེ་མདོག་བྱེད་པའི་མུར་ཁོང་གིས་སླེབས་ཙན། ང་ལྔ་པ་ཆེན་པོའི་དུས་ཁོ་གསོལ་དཔོན་ཆུང་བ་ཡིན་པས་འདི་ལྟར་རེད་ཟེར། དེ་ཁོང་ལ་བསྙད་པས་དེའི་རྒྱུ་མཚན་བླ་མའི་ཕྱག་རྟགས་ཀྱིས་མནན་པ་དགོས་ཟེར་སྐད། དགེ་སློང་ལྔ་པ་ཆེན་པོ་ལ་མོས་པ་ཆེན་པོར་སྣང་བས་དེའི་རྟེན་འབྲེལ་འདྲ། འདི་སྐབས་རྨི་ལན་ན་སྟག་ལྤགས་ཆེན་པོ་ཞིག་འབུལ་མཁན་བྱུང་བ་ཆོས་སྐྱོང་གི་ཕྲིན་ལས་སུ་སྣང་། འདི་ལོ་གོང་ས་རིན་པོ་ཆེའི་སྐུ་ཚེ་ཚེ་སྒྲུབ་དང་བསྟན་དོན་ལར་རྒྱའི་སྐུ་རིམ་བྱེད་དགོས་ཀྱི་རྒྱ་མ་རིམ་པར་བྱུང་། ལར་སྐྱེས་བུའི་ཚེ་མི་རྟག་ཅིང་ཟང་ཟིང་ལ་སྙིང་པོ་མེད་པ་དེ་རྟག་པར་དྲན་པའི་སྟེང་། བསྟན་འགྲོའི་བདེ་སྐྱིད་ཀྱི་རྩ་བསས་མ་ཡས་གཙུག་ལག་ཁང་གི་རབ་གནས་གསོ་བའི་ལུང་བསྟན་བཞིན་བར་ཁང་
གཡུ་བཅལ་དུ་བྱང་ཆེན་མཆོད་རྟེན་ཐོག་ཚད་བཞེང་པའི་ཉེར་བསྔོགས་ཡིད་ལ་བཀོད་ཀྱང་བཟོ་བོ་མཁས་པ་ཞིག་མ་འབྱོར། དཀོན་མཆོག་གསུམ་མཆོག་ཡིན་པའི་བདེན་པས་འདོད་པ་ལ་མཁན་པོ་སྡེབ་སྤྱང་གྲོང་ཆོས་མཛད་རང་རེ་ལ་ཐུགས་མོས་ཐོབ་ནས་བསྟན་བཅོས་གསར་བརྩམས་རིགས་གཡར་པོ་དགོས་ཚུལ་གནང་དེ་ལན་དང་སྤྲགས་མཆོད་སྡོང་གི་རྒྱུ་མཚན་ཕུལ་བ་བསྡོམ་འབྱུང་ལས། ཤར་གྱི་ལུས་འཕགས་བ་ལང་སྤྱོད། །དེ་བཞིན་བྱང་གི་སྒྲ་མི་སྙན། །གླིང་གསུམ་པོ་ཡི་མི་རྣམས་ནི། །ལོངས་སྤྱོད་ཆེན་པོས་ཡང་དག་འཚོ། །རྣམ་རྟོག་མེད་ཅིང་རྟོགས་དཔྱོད་མེད། །བུན་རྨོངས་བྱེ་བྲག་མི་ཕྱེད་པའོ། །འཛམ་བུ་གླིང་དུ་ལེགས་སྐྱེས་པ། །ལས་ཀྱིས་པར་རབ་ཏུ་གྲགས། ལེགས་བྱས་ཉེས་པར་བྱས་པའི་ལས། མཆོག་དང་འབྲིང་དང་ཐ་མ་ཡིད། །སྐྱེ་སྔོན་མའི་རྣམ་སྨིན་འདིར། །སྐྱེས་བོ་ཀུན་ལ་མཐོང་བར་འགྱུར། །ཞེས་པ་ལྟར་གངས་རིའི་ཁྲོད་འདིར་བཟོ་གནས་སྤྲུལ་བའི་རིག་པ་སྟོབས་སུ་གྱུར་ཀྱང་། །དེའི་གྲུབ་འབྲས་ཀྱིས་ཆོས་འཁོར་གསུམ་ལ་སོགས་པ་སྤངས་ནས་ས་མཐའ་འགྲིམ་པ་ལའང་དཔྱད་བཞུགས་འདྲ་བས་འདི་ནི་དོན་ཆེན་ཁོ་ནར་འདུག་པས་བྱ་བའི་ཁུར་བདག་གིས་བླང་བྱར་བྱའོ་ཞེས་རྩེར་
སྙན་ཞེས་ལའང་བླ་མའི་འདི་བསྟན་འགྲོའི་བདེ་ཐབས་སུ་སུ་འདུག་པས་གྲོགས་དན་བཟང་གིས་ཕེབས། དེ་མ་ཐག་རང་ལུགས་ཀྱི་ཐིག་རྩའི་འཆར་དང་། བཟོ་རྒྱུ་རྟ་སྨིག་མས་གཙོས་པའི་རྒྱ་དངུལ་ངོ་ཐོག་གི་འཕྲོས་རྣམས་འདི་ལོ་འཛར་ཁྱད་སྲང་བདུན་ཅུ་དོན་གཉིས་དོན་གསུམ་ཤ་སྟག་གིས་བརྗེས་ནས་སྤྱིར་རྒྱ་དངུལ་སྲང་ལྔ་བརྒྱ། གསེར་སྲང་བཅུ་གཉིས། ཕུལ་ཟངས་ཁལ་བཅུ་གཉིས། ཨིནྡྲ་ནཱི་ལ་རིན་ཐང་ཅན་གྱིས་གཙོས་པའི་རིན་པོ་ཆེའི་འཕྲ་རྒྱན་ལག་ཏུ་གང་ཡོད་དང་། གཞིས་ཀ་གཡུང་དྲུང་ནས་སྤོས་ཆེ་ལེགས། ཆེ་ཞེ་ཚེ་རིང་མས་ཨ་སྒོར་པུལ་བ་བཅས་ཕྲལ་རྫོང་བྱས། རིན་ཆེན་ཆོས་ཀྱང་དཀོན་ལ་རྟག་ཏུ་འཚེ་བ་མང་། ཞེས་པ་ལྟར་འདི་བསྟེན་འགྲོའི་དོན་ཆེན་ཡིན་པས་གསེར་དངུལ་བཀལ་བའི་དྲེའུ་དམ་ལ་རྒྱག་གྲབས་དང་། གཙང་ཆུ་ལ་འགྲོ་གྲབས་སོགས་འཚུབ་ཆ་རེ་ཆེ་བྱུང་ཟེར། ནག་ཕྱོགས་པའི་མཐུ་དཀར་ཕྱོགས་ཀྱི་བདེན་པས་འཇོམས་པ་ནང་པ་སངས་རྒྱས་པའི་ཁྱད་ཆོས་ཡིན་པས་རྣམ་དཀར་གྱི་བུངས་བསྐྱེད་པ་དང་། སྤྲེལ་ལོ་སྔ་ཕྱི་གསུམ་གྱི་ཁོངས་སུ་མཆོད་པ་སྣ་ལྔ་ཁྲི་ཚར་རྫོགས་པའི་སླད་ཆོ་འཕྲུལ་དང་བསྟུན་བསམ་ཡས་སུ་སྟོང་མཆོད་འབུལ་བར་བསྐྱོད། བར་ཁང་དུ་ཚོགས་མཆོད།
ཇོ་བོ་རིན་པོ་ཆེའི་སྐུ་མདུན་དུ་བྱང་སྡོམ། རབ་བྱུང་པར་མང་ཇ་སོགས་སྔར་རྒྱུན་བཞིན་བྱས། ལར་མིག་ལྟོས་དང་དགེ་སྡིག་གི་གྲོགས་པོའི་ཁྱད་པར་འདི་མཐུ་ཆེ་བས་རང་གིས་གནས་དང་། ཆེ་ཞེ་ཚེ་རིང་ནས་ཀྱང་སྟོང་མཆོད་རེ་ཕུལ། འདིས་མཚོན་ངོས་ནས་དགེ་བསྐུལ་བྱས་པ་ལ་རྟེན་གཞིས་ཀ་ནས་ཀྱང་ཤི་གསོན་སོ་སོའི་ཐད་དུ་སྟོང་མཆོད་ལན་ལྔ་ཙམ། མཚོ་སྣ་ཐང་གནས་སོགས་དངོས་ལ་དད་ལྟོས་ཐ་དད་པ་ནས། བསམ་ཡས་འདིར་སྟོང་མཆོད་བཅོ་ལྔ་སྐོར་ལ་ཐུག །རབ་གྲྭ་ལྔ་བཅུ་སྐོར་དང་ཚེས་བཅུས་མཚོན། བར་ཁང་དུ་ཤོང་ཐང་ཞིག་ལ་གསང་འདུས་ལེའུ་བརྒྱད་མའི་དབང་ལུང་དང་། ཐུན་དྲུག་གསོལ་འདེབས་ཀྱི་ལུང་བྱས། རབ་གྲྭ་བཅུ་སྐོར་ལ་སྔོན་འགྲོའི་ཁྲིད་བཏབ། ཆོས་རྗེ་བྲག་ཕུག་པས་ཡོན་སྦྱར་ནས་རྟ་མགྲིན་གླིང་དུ་སྒྲུབ་ཆེན་བཀའ་བརྒྱད་ཀྱི་སྨན་སྒྲུབ་བདུན་གཅིག་བཙུགས། གྲོལ་དབང་ལ་མི་སྟོང་ཕྲག་ཙམ་ཚོགས་པ་ལ་དམ་རྫས་བཀྱེ། གཞུངས་ནས་དེང་དཔོན་སློབ་གཉིས་ཆར་ལོག་ཆོག་རོགས་དང་བཅས་ཧས་པོ་རི་རྩེར་ལྷ་སྲིན་དམ་འདོགས་དང་། ཕུར་པའི་སྒྲུབ་པ་མཐའ་སྡུད་དང་བཅས་འཛུགས་དགོས་ལ། གནས་དེར་རྡུལ་ཚོན་ལ་ཕུར་ཆ་བཀྲམ་པའི་རྒྱུད་ལུགས་ཀྱི་སྒྲུབ་པ་གནད་སྨིན་བཙུགས། ངེད་
གཏོར་རྒྱག་ལ་མི་སྤྲོ་ཡང་བསྟན་དོན་ལ་རྩ་ལྟུང་ཡོད་པས་ཆས་ཞུགས་ཀྱི་ཟོར་ལས་སྤྲོས་པ་ཅན་བྱས། རླུང་རྟགས་ཤིན་ཏུ་འཚུབས་ཤིང་ཟོར་པྲ་ཡང་ལེགས་རྒྱུ་མ་བྱུང་། ཆོས་རྗེའི་རྨི་ལམ་དུ་སྤྲེའུ་ཆེན་པོ་གཉིས་འོངས་པ་ཕྱི་རོལ་པའི་ལྷ་སྲུང་ཚོགས་བདག་ཏུ་ངེས། གཡའ་མ་ལུང་དུ་བསྐྱོད་ནས་ཚེ་དཔག་མེད་སྐུ་གསུམ་འདུས་པའི་བདག་འཇུག་དང་འབྲེལ་བར་ཚོགས་བརྒྱ། བརྒྱ་མཆོད་མེ་མཆོད་སོགས་བྱས། འདི་ལོ་ཙཱ་རི་རོང་སྐོར་གྱི་སྟབས་ཁམས་པ་ཤིན་ཏུ་མང་བ་དང་། ངེད་ཀྱིས་ར་དང་པོ་རང་འོངས་པའི་གྲས་ཁམས་རྫོགས་ཆེན་པའི་གྲ་རིས་ཚོགས་གཉིས་དང་གྲོལ་གྱིས་སྐྱེས་རབས་བརྒྱ་བའི་སྨོན་ལམ་གསར་བརྩམས་དེ་བར་ལ་བརྐོ་བའི་བར་ཤིང་དང་། དེ་དུས་ངེད་ཀྱི་སྒྲ་དང་རྟེན་དུ་གདུར་བཅངས་པ་ལ་ཇེ་ཞིག་ནས་རིང་བསྲེལ་རྡོས་མི་གཞིག་པ་གསུམ་འཕེལ་བ། རྫོགས་སྤྲུལ་གྱི་ཕྱག་ན་ཡོད་ཚུལ་འབྱོར། དེས་ཁམས་པ་རྣམས་བླུན་དད་ཀྱི་རྒྱུར་སོང་ནས་ཕྱག་དབང་དང་ཆོས་འབྲེལ་ཞུ་མི་ཤིན་ཏུ་མང་། དེ་འཕགས་པ་གསུམ་གྱི་རིང་བསྲེལ་ཡིན་ན་དཀོན་པའི་གནས་ཡིན་ལ། གཞན་སོ་སོ་སྐྱེ་བོའི་རིང་བསྲེལ་ཐམས་ཅད་ནི་བརྟག་པར་བྱ་བའི་གནས་སོ། །རང་གནས་སུ་སླེབ་ཕྲལ་དགོན་རྩེ་སྤྲུལ་སྐུ་རིན་པོ་ཆེ་ཙཱ་རི་རོང་བསྐོར་ལ་ཕེབས་འགྲུལ་ལམ་ནས་
བྱ་བྲལ་ཁོ་ནའི་ཚུལ་གྱིས་རེ་བས། ལམ་གྱི་ཆ་ལ་གོ་བ་ལེགས་པར་ཆག་ཀྱང་། སྔར་འབྲས་སྤུངས་སུ་གཞུང་ལུགས་ལ་ཐོས་བསམ་དང་གཙང་བ་དགེ་བཤེས་རིན་པོ་ཆེར་ལམ་རིམ་ཆེ་ཆུང་། ཕྱག་ཆེ་ཡང་གསལ་དང་སྙིང་པོ་དོན་གསུམ་ལ་སོགས་དང་། གསང་བདེ་འཇིགས་གསུམ། དུས་འཁོར་ལ་སོགས་པ་ཡང་ཡང་གསན་པས། ལམ་གྱི་ཆ་ལ་གོ་བ་ལེགས་པར་ཆག་ཀྱང་། ངེས་པར་འཚང་རྒྱ་བའི་མདོ་འགག་ལྟ་བ་རྣམ་པར་དག་པ་ཡིན། དེ་ལ་དགག་སྒྲུབ་མང་བས་རང་ལྟ་མཆོག་འཛིན་སྤངས་ཏེ་རི་ཁྲོད་དུ་རྒྱུད་ཐོག་ལ་ཁེལ་བའི་ཕྱོགས་ལ་བསྙེན་བའི་ཕྱིར། འཁྲིད་ཀྱི་སྔོན་འགྲོན་རྣམས་དགེ་བ་གསུམ་གྱི་དོན་འཁྲིད་རྩ་བར་བྱས་པ་ལ་གཞན་ལུགས་ཀྱི་ཉམས་འོག་ཏུ་འཛུལ་བའི་སྐབས་སྦྱར་དང་། དངོས་གཞི་སྟོང་པ་ཉིད་ཀྱི་སྐབས་དེ་ལ། མདོ་ལུགས་སུ་ཞི་གནས་དང་ལྷག་མཐོང་གི་མཚན་ཉིད་བཤད་ནས་འཁྲིད་པ་དང་། སྔགས་སུ་རྒྱུད་ལ་བཤད་པ་བྱེད་མཁན་ཡིན་ན་རྒྱུད་ནི་རྒྱུན་ཆགས་ཀྱི་མིང་དོན་ལ་ཐོས་བསམ་གཉིས་ཀས་དཔྱད་ནས་གཞི་རྒྱུད་བདེ་གཤེགས་སྙིང་པོ་རྣམ་ཤེས་ཚོགས་བརྒྱད་དང་ཕྱེ་ནས་ངོ་སྤྲད་པ་དང་། དེའི་བོགས་དབང་གསུམ་པས་འདོན་པ་ལ་སོགས་མདོ་རྒྱུད་ཟབ་མོའི་དགོངས་པར་སྣང་ཡང་། ད་ནི་བསྟན་པ་སྙིགས་པས་དེ་འདྲའི་སྐལ་པ་ཅན་དང་བློ་མཐུ་ཡོད་པའི་དཔོན་
སློབ་གཉིས་ཆར་ཉུང་། བྱུང་གནས་འགྲོ་སུམ་ལ་བརྟེན་ནས་སེམས་འཚོལ་བྱེད་པ་སྒྲུབ་རྒྱུད་ཀྱི་བསྟན་པ་ལ་ཕལ་ཆེར་ལ་གྲགས་ཤིང་། དེས་ནི་ཐོས་པ་སྔོན་དུ་མ་སོང་བའམ། སོང་ཡང་རུང་སྟེ་སེམས་ངོ་རྒྱུད་ཐོག་ཏུ་སྣང་། ངེས་པའི་གོ་ཉམས་དང་པོ་ཚོད་ཀྱི་སྟོང་པ་ལྟར་སྣང་ལས་འདས་པའི་ངེས་ཤེས་སྐྱེས་ནས་གནས་འགྱུ་རིག་གསུམ་གྱི་རྩ་བ་ཆོད་ཀྱང་དོན་ལ་སྐྱེ་འགག་གྲངས་སུ་འདེབས་པས་བྱིས་པ་ཉེར་སྤྱོད་ཀྱི་སྔོན་འགྲོ་ཙམ་ཡིན། དེ་ལྟར་སྐྱེ་འགག་གྲངས་སུ་འདེབས་པ་ལ་གོམས་པ་ཆེར་བརྟས་ཀྱང་རང་གི་ངོ་བོ་ཉིད་བློ་ལས་འདས་པར་མ་གྲོལ་བའི་སྒོམ་ཆེན་དུ་རློམ་པ་དང་། དབུ་མ་ཆེན་པོའི་ལྟ་བ་ནི་ངེད་ཀྱི་ལྟར་ཡིན་གྱིས་གཞན་ཐམས་ཅད་ནི་རྫུན་པའོ། །ཞེས་རྟོག་དཔྱོད་ལ་ཆོས་ཉིད་དུ་འདོད་པ་གཉིས་མིང་འོད་གས་རྣམ་དཔྱོད་ཆེ་ཆུང་ལས་སེམས་རྣམ་གཡེང་ལ་སྐྱོད་ལུགས་འདྲ་ཞིན་སྔ་མ་ཤིས་ཤོར་དང་། ཕྱི་མ་ལམ་ཤོར་ཡིན། དེ་ལ་སྙིང་བསྲན་ཆེན་པོར་གྱུར་དུ་ཟིན་ཀྱང་། ཕྱིས་པ་ཉེར་སྤྱོད་དངོས་གཞི་ལས་མི་འདའ་བའི་ཚུལ་ཏིང་ངེ་འཛིན་གྱི་ཚོགས་དམ་པའི་ལེའུ་ལས། ཏིང་ངེ་འཛིན་ཀྱང་རབ་བརྟན་ལ། །དེ་ལ་མངོན་པར་ཞེན་བྱེད་ན། །བྱིས་པ་ཉེར་སྤྱོད་ས་ཞེས་བྱ། །མྱ་ངན་འདས་པ་ཉིད་མི་འགྱུར། །ཞེས་སོ། །
ཁ་ཅིག་རྣམ་པར་དཔྱོད་པ་དེ་ནི་ཤེས་བྱ་ཡིན་ཏེ། བདེན་པ་གཟིགས་པའི་ཡུལ་དུ་རུང་བའི་ཕྱིར་རོ། །ཞེས་ཁ་ཕྱིར་བལྟས་འདོར་དུ་མི་འདོད་ཀྱང་རྡོ་རྗེ་གཅོད་པ་ལས། ཆོས་ཉིད་ཞེས་བྱ་མ་ཡིན་ཏེ། །དེ་ནི་རྣམ་པར་ཤེས་མི་ནུས། །ཞེས་པ་ལ་སོགས་པའི་རྒྱུ་མཚན་ཡང་ཡང་སྙད་ནས་རྫོགས་པ་ཆེན་པོའི་ཀ་དག་གི་ལྟ་བ་གཤིས་ཐོག་ཏུ་རྡོ་རུས་ཐུག་བའི་ངོ་སྤྲོད་དང་། དེ་དག་གི་དོགས་སེལ་ལ་ནན་ཏན་ཆེན་པོས་བསྐུལ་མ་གནང་བ་མ་ལྡོག་པས་རྣམ་གྲངས་པའི་དོན་དམ་ལ་དཔྱད་པ་དེ་བྲིས། འཕྲོས་དོན་ལ་གཞན་འགའ་ཞིག་ན་རེ། གཞན་སྟོང་དང་དབུ་མ་སེམས་ཙམ་པ་གཅིག །རྫོགས་ཆེན་ཡང་དེ་དང་འདྲའོ་ཟེར་བའི་བླ་བརྡོལ་འབྱུང་བའི་རྒྱུ་ནི། གཞན་སྟོང་པ་རྣམས་བྱམས་ཆོས་བར་པ་གསུམ་རང་ལུགས་ཀྱི་དབུ་མར་འདོད་པ་དེ་སེམས་ཙམ་པ་དང་། ངོ་བོ་གཅིག་བྱས་ནས་སྒྲོ་བཏགས་པའི་ཚུལ་ཀུན་སྙིང་གིས། དགེ་ཤེས་འདི་རྣམས་ཀྱིས་མི་གོ་རྒྱུ་ཡང་འདིར་འདུག་སྟེ། གཞན་སྟོང་པ་རྣམས་ནི་བྱམས་ཆོས་བར་བ་གསུམ་གྱི་དགོངས་པ་རང་ལུགས་ཀྱི་དབུ་མར་འདོད་ཟེར་བའི་གཏམ་ཙམ་ཞིག་རྣ་བར་ལྷུང་བ་དེས། རང་རང་གི་གྲས་ན་རྣམ་འགྲེལ་གྱི་སེམས་ཙམ་རྣམ་རྫུན་པའི་སྐབས་དང་། བྱམས་ཆོས་བར་བ་གསུམ་གྱི་དོན་ཡིན་རྒྱུ་བ་སེམས་
ཙམ་དུ་འདོད་པའི་གྲུབ་མཐའི་ཁུལ་ཞིག་འདུག་པ་དེ། གཞན་སྟོང་དུ་མིང་བསྒྱུར་བ་མ་གཏོགས་དེ་ཁོ་རང་ཡིན་ཡོད་སྙམ་ནས་གཞན་སྟོང་དང་སེམས་ཙམ་གྱི་ཁྱད་པར་ཤིན་ཏུ་ཆེ་བ་ཡེ་མི་གོ་བར། །ཁྱད་ཆོས་དེ་དག་ཁོར་ང་ཚོའི་འདོད་ཚུལ་རྙིང་བའི་སེམས་ཙམ་པའི་ལུགས་དེ་ཀ་ལ་ཡོད་དམ། སྔར་གྱི་དེ་དང་ནི་འབྲལ་འདྲ་མིན་ཞིག་བྱུང་སྙམ་བམ་མགོ་བོ་སྦོས་དེ་དཀར་འདུག་གོ །ཞེས་གྲུབ་མཐའ་རྩ་བ་མ་ཟིན་པའི་དག་བཞག་ཁ་ཕྱིར་བལྟས་པ་དེ་ཆོས་ཉིད་ཀྱི་ངོ་བོ་དོན་དམ་དང་རྫས་འགལ་ཞིང་། རྟོག་གེའི་འདོད་ཞེན་གྱི་རྗེས་སོན་པའི་མིང་འདོགས་དེ་དང་དེར་འགྱུར་བ་འདོད་ཁའི་ལྟ་གྲུབ་ཙམ་མོ། ལར་ཡང་ཀུན་གཞིའི་རྣམ་ཤེས་མ་བསྒྲིབས་ལ་ལུང་དུ་མ་བསྟན་པ་ཀུན་ཏུ་འགྲོ་བ་ལྔའི་རྗེས་སུ་འགྲོ་བ་དེ་ཉིད་རྡོ་རྗེ་ལྟ་བུའི་ཏིང་ངེ་འཛིན་གྱིས་མ་བཅོམ་བར་དུ་ཤེས་བྱའི་སྒྲིབ་བ་བག་ལ་ཉལ་མི་ལྡོག་བ་བསོད་ནམས་དང་ཡེ་ཤེས་ཀྱི་ཚོགས་ལ་བརྩོན་དགོས། དེ་ལྟར་བརྩོན་པ་ལ་སྔགས་ལམ་ཐབས་ཟབ་བས་ལམ་བསྐྱེད་རྫོགས་ཀྱིས་བགྲོད་ཀྱང་ཚོགས་ལམ་པ་ནི་ཉེས་སྤྱོད་སྡོམ་པའི་ཚུལ་ཁྲིམས་ལ་གཙོ་བོར་བགྱིད་པ་གོལ་ས་ཆུང་བར་མ་ཟད། ད་ནི་སངས་རྒྱས་ཀྱི་བསྟན་པ་རིན་པོ་ཆེ་ཡང་སྒྲུབ་པའི་དུས་ཀྱི་མཐའ་ལ་ཡོད་ཅིང་རིང་མིན་རྟགས་ཙམ་
འཛིན་པས་མ་རུངས་པར་བགྱིད་ན། དངོས་ཅག་ལ་མཐོང་ལ་མ་སྐྱེས་པའི་སློབ་མ་ནི་མེད་འདྲ་བས་སོ་ཐར་རིགས་བདུན་གྱི་གནད་བཀག་ལྟ་སྒོམ་སྤྱོད་པའི་རྟུལ་ཞུགས་དང་མི་འགལ་བར་སྤྱོད་པ་ཡོན་ཏན་གྱི་གཞི་རྟེན་གཟུང་ན་ལེགས་སྨོན་གྱི་གཟུགས་བརྙན་ལ་རེ་ཅི་དགོས། ཐེག་པ་ཆེན་པོའི་དགེ་འདུན་ཡང་རྟགས་དང་ཆོ་ག་ལ་ལྟོས་དགོས་ན། རྣལ་འབྱོར་དབང་ཕྱུག་བིཪྺ་བ། །ཏཻ་ལོ་ན་རོ་ལ་སོགས་པ། །དགེ་སློང་བརྟུལ་ཞུགས་བོར་པ་ཡི། །གྲུབ་ཐོབ་རྣམས་ཀྱང་སྡིག་ཅན་འགྱུར། །ཙནྡན་སྤོས་ཀྱི་དད་ལྡང་བའི། །དགེ་སློང་ཇི་སྙེད་ཐམས་ཅད་ཀྱང་། །རྒྱན་དང་བཅས་ཤིང་གོས་དཀར་བ། །དེ་དག་ཀྱང་ནི་སྡིག་ཅན་འགྱུར། །གཤིས་ཀྱི་མི་དགེ་སྤྱོད་ཕྱིར་རོ། །ཞེས་ཐེག་ཆེན་ཚུལ་ཁྲིམས་ངོ་བོ་བླང་དོར་གྱི་ཁམས་པ་ལ་བཤད་དོ། །ཕུར་པ་རྒྱུད་ལུགས་དང་། ཀློང་ཆེན་སྙིང་ཐིག་གི་མཚོན་པའི་དབང་ལུང་། ཤིང་རྟ་དང་མཛོད་བདུན་ལ་སོགས་པའི་ལུང་རགས་རིམ་གཏད་རྒྱ་སོགས་བྱས། དེ་དག་ལའང་ཆོས་ཡོན་རྒྱ་ཆེ་པོ་དང་། ཟླ་བ་གཉིས་བཞུགས་རིང་ཉིན་ལྟར་ནཻ་པ་ལའི་དོང་ཙེ་དང་། ཁ་བཏགས་ཀྱི་ཕྱག་མཇལ། གདན་བཟོས་དང་། བསྟི་སྟང་ཇི་ལྟ་བུ་བྱས་ཀྱང་དང་དུ་མི་བཞེས་པ་སོགས་སྲིད་
འབྱོར་དང་། དགོན་གནས་ཀྱིས་སྙེམས་པའི་ཁེངས་བསྐྱུངས་ནས་བླ་མ་བསྟེན་ཚུལ་མདོ་རྒྱུད་ལས་བཤད་པ་ལྟར་མཛད་པ་ལ་ནི་ངོ་མཚར་ཆེན་པོ་སྐྱེ། དེ་སྐབས་ཟླ་བ་གཉིས་པའི་ཚེས་བཅུ་དགུའི་ཐོ་རེངས། གཉིད་རང་མ་ཡིན་པ་ཞིག་ལ། གཞུང་སའི་རྒྱ་མ་ཁ་བྱང་དར་སྔོན་དམར་ཐམ་ཅན་ཞིག་བྱུང་བ་ཁ་ཕྱེ་བས། ཀར་དྲིལ་དངོས་ཞི་ལས་འཐུག་པ་གཅིག །ཐོད་ཊཾ་ཆུང་དུ་ཟུར་བཞི་པ་གཅིག །ཐོད་ཚུགས་ལ་སོགས་པའི་དབང་ཆས་ཆ་གཅིག །སྒྲོལ་མའི་དངུལ་སྐུ་གཅིག །གཡེར་ཁ་ཁོང་དཀྱུས་མ་སྒོར་མོ་གཉིས། ཏིང་འཛིན་ལྷ་བསངས་ལམ་ཁོ་ནས་ཕུལ་ཟེར་ཐམ་དམར་དར་ཅོག་གཅིག་རྣམས་དང་། རྒྱ་མ་དེ་གཞན་ཞིག་གིས་ཀློག་པ་ལགོརྵའི་གནས་ཚུལ་དང་། ཁོའི་ཨ་མའི་ཕོར་པ་དང་ཕྲེང་བ་ཡིན་ཟེར་བ་ཞིག་ཕྱར་ནས་ཁོང་ཚོའི་མོ་ཕྱ་བྱེད་དུས་དམོད་བོས་ས་འདི་ཡིན། མོ་རྒྱག་ཐེངས་དགུ་ཅར་ལ་བབས་ན། ཟེར་འཕྲོ་ནས་སྡོགས། བསམ་པ་ལ་བབས་ན་བོད་ལ་དམག་བྱེད་རྒྱུད་འདུག་བསམ་པའི་རང་ཁོང་ཚོའི་ཤི་གསོན་གྱི་བྱ་བ་ཐམས་ཅད་རྡོ་རྗེ་གླིང་དུ་བྱས་པ་རེད་ཟེར་བ་སོགས་ཐམས་ཅད་རང་མ་ངེས། འདི་མ་འོངས་ལུང་བསྟན་དུ་སྣང་། སྔ་ཐོག་ཟུར་པའི་སློབ་བརྒྱུད་མོད་ཁམས་སུ་རྙིང་
དགོན་ཆགས་པ་ལ་སྔ་བཀཐོག་རྡོ་རྗེ་ནས་དགེ་རྩེ་སྤྲུལ་སྐུ་དང་། ཕྱག་ཚ་སྤྲུལ་སྐུ་རྣམ་གཉིས། ལྕགས་མདུད་དང་ས་ངན་པའི་གྲ་རིགས་བདུན་ཅུ་སྐོར་དང་། སྡེ་དགེའི་གཉེར་བ་མགོན་པོ་ཆོས་བཟང་བཅས་འབྱོར། ཀློང་སྙིང་གི་དབང་ལུང་དང་། ཚེ་དབང་སྤྱི་ཆོས་སྙིང་ཐིག་ཡ་བཞི། །མཛོད་བདུན་སྐོར་བཅས། །ཡོན་ཏན་མཛོད་རྩ་འགྲེལ་རྣམས་ལ་སྨོན་ལམ་གཏད་རྒྱ། སྤྲུལ་སྐུ་རྣམ་གཉིས་དང་། བླ་མཆན་སོ་སོ་ས་རྟོགས་འབུལ་ལ་ངོ་སྤྲོད་ཞུན་ཐར་བྱས། ཀཐོག་ཁྲི་ཐོག་བ་ཞིང་སྐྱོང་མགོན་པོ་ཞི་བར་གཤེགས་པའི་ཡོང་བསྔོ་རྟེན། ཡང་སྲིད་མྱུར་འབྱོན་གྱི་བརྟག་བ་དང་གསོལ་འདེབས་སོགས་ཀྱང་ཞུས། གཞུང་གི་སྣེ་ཤན་དོས་རྟ་དང་བཅས་ཡོར་ཆེ་བས་ཞག་ཅིག་ལས་བཞུགས་མཐུབ་བས་འཁྲེན་བས་བཞིན་པར་བྱོན། རེས་ཤིག་ཁམས་པ་གྲུབ་ཐོབ་ཡིན་ཟེར་བྱ་བ་ཐོངས་པའི་ཚད་ཅིག་བྱུང་། འདིར་ཞག་ཁ་ཤད་རིང་དབང་ཆོས་ཅི་ཐོབ་ཞུ། རྟོགས་པའི་བོགས་འདོན་ནི་འདྲི་རྒྱུ་མེད་ཟེར།་ རོད་སྐོར་ལའང་དེངས་ས་འདུག་བས་ལམ་བདེན་གྱི་རེ་དོགས་ནི་མ་སངས་པ་འདྲ་སྙམ་ནས། རིགས་པས་བརྟགས་པའི་སྟོང་ཉིད་ལ། །བློ་དང་མིག་གི་རྣམ་འགྱུར་ལྡང་། །འཛིན་སྟངས་དབྱིངས་སུ་
མ་གྲོལ་བར། །རྟོགས་པའི་རོ་མྱང་མ་མཛད་ཨང་། །ཆོས་མིག་རྡུལ་བྲལ་མ་ཐོབ་པར། རྟོགས་སོ་སྙམ་པ་མཐོང་ལམ་ཡིན། །ཐེ་ཚོམ་གཅོད་རྒྱུ་མེད་སྙམ་པའི། །ངེས་ཤེས་སྒྲོག་དང་ཕྲོལ་ཅིག་ཨང་། །ཆོས་དང་གང་ཟག་ཐར་པ་དང་། །གནས་ལ་གདུང་བ་མ་ཞིག་བར། །བླང་དོར་སྤྱོད་པ་མི་འབྲལ་བས། །རོ་སྙམས་མལ་སར་མཛོད་ཅིག་ཨང་། །ཚིག་ལ་འགྲངས་ན་རྐང་བཅུ་གཉིས། །དོན་ལ་དཔྱད་རྒྱུ་ཆེས་མང་ངོ། །གཙང་ནས་ཡང་སྟེངས་པའི་སྲས་ཅན་དང་། །རབ་གྲ་གསུམ་ལ་སྨིན་འཁྲིད་བཏབ། །སྲས་ནས་ཀློང་འགྲེལ་གསར་བསྐྲུན་ལ་ཞུས་དག་དང་སྦྲགས་ལུང་བྱས། གཞུངས་ནས་སྤྲེལ་ཟླར་ཁྲ་འབྲུག་ཏུ་ཆོག་རོགས་དགུ་དང་བཅས་བཀའ་བརྒྱད། །རྟ་མགྲིན་ཐུགས་རྗེ་ཆེ་པོ་གསུམ་གྱི་སྒྲུབ་པ་དང་། སྲོང་བསྟན་དུའང་དཔལ་རི་བ་བརྒྱད་གྲའི་སློབ་དཔོན་དུ་ཕྱིན་པའི་གུ་རུའི་སྒྲུབ་པ་བྱེད་དགོས་ལ། དོས་རྟ་སོགས་གནང་ཡང་མི་སེར་ལ་ཐེམ་ འཕོག་པ་བྱས། སྤྲེལ་ལོ་བྱུང་རེས་སྨན་བསྒྲུབ་ལྟོས་ཆེ་བ་རེ་བྱེད་རྒྱུན་ཡོད་བ་གདུང་བསམ་རྒྱ་དྲུང་གི་ཨར་དོ། །ཛ་ལི་གཉིད་ཕོན་ཆེ། ཞོལ་ཁང་དང་། ཚོང་དཔོན་འབྲུག་ཨར་དོ་བཅས་སྨན་འབོར་ཆེ་བས་དཀྱིལ་འཁོར་གྱི་ཁང་
པར་བྱ་བ་མི་རྫོགས་ཀྱང་། གཞུང་གི་དགོངས་བརྟེན་འབྲེལ་གྱིས་མཚོན་པར་བྱས་ནས་ཁྲ་འབྲུག་ཏུ་བཀའ་བརྒྱད་ཀྱི་སྒྲུབ་ཁོངས་སུ་ལས་ལ་སྦྱར། དེ་དུས་རངྣའི་བྲོག་ཞུ་གྱོན་པའི་དབང་རྟེན་ལ་ཐར་པ་ལ་བརྟེན་པར་རྨིས་པས་སྨན་གྱི་ལྷ་མོ་འདུས་སམ་སྙམ། སྤྲེལ་ཟླའི་མི་ཚོགས་ལ་སུན་སྣང་ཆེན་པོ་ཤར་བས་གྲོལ་དབང་བྱེད་རྩིས་མ་བྱས་ཀྱང་། དངོས་གྲུབ་བླང་ཆོག་ལ་ཁེ་གསུམ་ཞལ་ངོ་རྣམས་བྱོན་པས་སྤྲ་འཁྲོགས་ཏེ་མི་སྟོང་ཕྲག་ཏུ་ཉེ་བ་འདུས་པ་ལ་དམ་རྫས་བཀྱེ་ཞིང་སྒྲུབ་རྫས་མགོ་ཐོག་ཏུ་བཞག །མཆོད་ཁང་ཆེན་མོར་སྟོང་མཆོད་དབུ་གདུགས་གོགས་པ་གསར་བརྗེ། ཨོ་རྒྱན་ལྷ་ཁང་དུ་བརྒྱ་མཆོད། ཚོགས་བརྒྱ། བསྟན་སྲིད་བདེ་བའི་སྨོན་ལམ་སོགས་བྱས། བརྒྱད་གྲ་ལྔ་གྲ་པ་དང་། བཀྲས་ཆོས་པ་ཉི་ཤུ་སྐོར་བཅས་ལ་མང་ཇའི་འབྲེལ་བ་བྱས། སྲོག་བསླུ་ལྔ་བཏང་ནས་ཚེ་ཐར་སར་ཕྱིན། ཟླ་བ་དྲུག་པར་སྲོང་བཙན་དུ་རྗེ་བཙུན་ཤཱནྟ་པུ་རི་བའི་བསྟན་པའི་ཕན་རེས་གྲོལ་ཏིག་ལམ་རྒྱས་པས་གཞུང་བསྲངས་ཏེ་གུ་རུའི་བསྒྲུབ་བཙུགས། གྲྭ་པ་ཚོར་ཆོ་ག་ཕྱག་ལེན་གྱི་བགྲོས་དང་། བདག་འཇུག་ཡང་ཡང་ལེན་པ་སོགས་བྱས། ཉིན་ལྟར་མང་ཇ་བཏང་། སྲོང་བཙན་དུ་སྟོང་མཆོད་ཀྱི་སྲོལ་ཡོང་ལ་རེས་སྡེ་བར་བསྐུལ་ནས་སྟོང་མཆོད་ཕུལ་བའི་མཆོད་
རོ་བཞི་བརྒྱ་རེ་སྤྲང་པོར་སྟེར་བར་བྱས། ངེད་ཀྱི་སྲོག་བསླུ་བབསྟར་ཆགས་བྱེད་པ་ཤེས་པས་འབྲོག་པ་དང་གནས་པོ་གཉིས་འཛོམ་གྱིས་ལུག་ཁྲིད་ནས་འདིར་འདུག་རིང་སྲོག་བསླུ་ཉི་ཤུ་སྐོར་བཏང་། རྨོངས་པ་དེ་ཚོ་ཡང་གསོད་བ་ལ་འཚེར་ངང་ཆེན་པོ་བྱེད་པ་དེ་འདྲ་ལ་རྗེས་སུ་ཡི་རང་བར་ཤར། འདི་ཡན་ཆད་ལ་ཕྱུགས་ལུ་ག་ཉིས་བརྒྱ་སྐོར་སོང་། རང་སློབ་མོན་ལྗོངས་དཀར་བླ་མ་གཤེགས་པའི་དགེ་ཚོགས་བསྐྲུན་པ་ལ་བླ་མའི་དཔོན་པ་སྨིན་གླིང་དགེ་སློང་དཔལ་འབྱོར་ཅན། བཅོ་ལྔ་སྐོར་། ལེ་བོ་བླ་མ་རྫ་དཀར་པདྨ་ཚེ་རིང་། སྲིབ་མོ་བླ་མ་དཀོན་མཆོག་ནོར་བུ་བཅས་ཀྱང་འཛོམ་བ་ལ་ཚོགས་དབར་ལ་ཁྲིད་བཏབ། བསམ་མཆིམས་ནས་གྲ་ཚང་ཕེབས་པ་དང་འགྲིག་བས་སྲོང་བཙན་དུ་ཉིན་འཁྱོངས་མངོ་མང་དེ་སྒྲོགས། ཚ་ཡོན་དོད་སྒྲིལརས་ཚ་ལེགས་པ་བསྟབས། དགོན་པར་སྐུ་སྐལ་མང་ཇ་བཏང་། བཟོད་བ་དཀའ་ཐུབ་ཀྱི་མི་མཐུན་ཕྱོགས་ལས་གྲོལ་བའི་སྨོན་ལམ་བཏབ། རང་གནས་སུ་འབྲས་སྤུངས་བློ་གསལ་གླིང་བའི་དགེ་བཤེས་མིང་དོན་མཐུན་པ་ཞིག་ཐུགས་རྗེ་ཆེན་པོའི་སྒོ་ནས་སྨིན་གྲོལ་དང་། རྟ་མགྲིན་གསང་སྒྲུབ་སོགས་ཞུ་བར་བྱོན། ཁོང་ལྔ་པ་རིན་པོ་ཆེར་དད་པའི་རྒྱུས་སྔ་འགྱུར་ལ་དག་སྣང་ཆེ་ཡང་། ལྷོ་བྲག་བདུད་འཇོམས་གླིང་གི་བླ་མར་བྱོན་མ་རག་པ་ནས་ས་
དེར་ཡེ་ཤེས་པ་དང་འཇིག་རྟེན་པ་ངོ་བོ་གཅིག་གུ་བྱས་པའི་ཆོས་གསར་ཡིན་ཟེར་བ་མཐོང་ནས་ཁོང་ཚོ་ལའང་ལུང་སྐྱོགས་བླུན་པོའི་རང་རྟགས་མ་འཛིན་ཅེས་ཚོགས་གཏམ་བྱས་པ་ཡིན། འདྲི་འདྲ་བས་རང་གཞན་ཐམས་ཅད་ལ་ཐེ་ཚོམ་སྐྱེ་བའི་རྒྱུར་སྣང་ཟེར། དེའི་ལེན་རྒྱུད་འབུམ་དཀར་ཆག་ཏུ་བྲིས་ཡོད་པས་གཟིགས། ལར་ནི་ཆོས་ཀྱི་གཏེར་ནི་གང་ཟག་ས་མཐོན་པོ་ལ་གནས་པའི་སྤྱོད་ཡུལ་དུ་མོད་ལས་བཤད་ན་དེ་དག་ནི་རྒྱུད་ལུང་དང་འགལ་བའང་མི་སྲིད་ལ། དངོས་གྲུབ་པ་བསྒྲུབ་པར་ཡང་མི་བསླུ་བའི་ཁྱད་ཆོས་ཅན་རྣམས་ལས་ཆོས་རྗེ་ཆོས་ཞེས་བསྐུར་བ་བདུད་ཀྱི་ལས་ཡིན། གཞན་དུ་ན་བསྐྱེད་རིམ་ལ་སྐྱེ་གནས་བཞིའི་སྦྱང་གཞི་སྦྱོང་བྱེད་ལྟ་ཅི་སྨོས། ངོ་བོ་དང་རྣམ་པ་མི་ཕྱེད་པས་བསྒྲུབ་བྱ་ངོས་མི་ཛིན་པའི་ཚིག་རྐྱང་དང་། དངོས་གྲུབ་འགུགས་པར་བྱེད་པའི་རྒྱུའི་གཙོ་བོར་སྔགས་དོན་ལོག་པར་ཞུགས་པ་དང་། རྫོགས་རིམ་ལ་སྤྱད་གཞི་རྩ་རླུང་ཐིག་ལེ་སྦྱོང་བྱེད་ཀྱི་ཐབས་ཤེས་དང་བྲེལ་བས་ཞུགས། གནས་ཐིམ་གསུམ་གྱི་དྲོད་ཚད་མེད་ཅིང་བདེ་དྲོད་ཙམ་ལ་དམིགས་པ་དང་། དེ་གཉིས་ཀའི་ཕྱི་སོའམ་སྐུ་བཞིའི་ས་བོན་དུ་གྱུར་པ་དབང་གི་ཆུ་བོ་དང་བྲལ་ཞིང་དག་རྫོགས་སྨིན་གསུམ་གྱི་ཡོན་ཏན་སྐྱེ་རྒྱུད་མེད་ན། གསང་སྔགས་ཀྱི་གཟུགས་བརྙན་ནི་ཡིན་ནོ། །དེ་བཞིན་དུ་རྒྱུ་ཀུན་རུ་འབྱུང་དང་འབྲས་བུ་
སྡུག་བསྔལ་སྤོང་བའི་བྱེད་ལས་མེད་ཅིང་། བྱང་ཆུབ་མཐོ་རིས་བླངས་སྐྱེ་དང་། །ཆོས་དང་ཟང་ཟིང་ཕྱིར་བཅོས་རུང། །ཞེས་སྡོམ་པའི་དགོས་པ་དྲུག་དང་བྲལ་བའི་སོ་ཐར་དང་། དབུ་སེམས་བསྲེས་པའི་བྱང་སྡོམ་དང་། །རང་ལྟ་མཆོག་འཛིན་གྱི་སྟོང་ཉིད་སྟོན་པ་སོགས་གསུང་རབ་ཀྱི་གནད་བཅོས་པའི་ཆོས་ཀྱི་གཟུགས་བརྙན་ནི་གསར་རྙིང་གང་གི་ཐད་དུའང་མཆི་བས་ན། མདོར་ན་སངས་རྒྱས་གསུང་རབ་དང་། །ཕལ་ཆེར་མཐུན་པར་སྟོན་བྱེད་ཅིང་། །གནས་རྣམས་ལོག་པར་སྟོན་པའི་ཆོས། །ལེགས་ལེགས་འདྲ་བར་སྟོན་ན་ཡང་། །བདུད་ཀྱི་བྱིན་རླབས་ཡིན་ནོ་ཞེས། །མོད་རྒྱུད་ཀུན་ནས་གསལ་བར་གསུངས། །ཞེས་པའི་དོན་དེ་ཡིན་ལ་དེ་ལྟར་ནའང་གཞན་གྱིས་ཆེད་དུ་བྲིས་པ་དང་། ལྟ་སྒོམ་གྱི་དགོས་པ་སེལ་ཕྱིར་བསྐུལ་བའི་ལན་མི་ལྡོན་ཁ་མེད་ལས་གཞན་དུ་ན་རྒྱན་ལས། །མི་རིགས་པ་ཡི་གཟུགས་ལཱང་མི་རིགས་ན། །ཐེ་ཚོམ་ཟ་བའི་ཆོས་ལ་སྨོས་ཅི་འཚལ། །ཞེས་བཏང་སྙོམས་ཆེན་པོའི་ཆོས་ཉིད་ལ་ཀུན་ནས་དཀྲིས་པའི་སེམས་མེད་པས་སྣང་བ་དག་པ་རབ་འབྱམས་དང་མི་འགལ་ལོ་ཞེས་བརྗོད། ཁོང་འདིར་ལོ་གསུམ་ཞིག་གཏོང་འདོད་འདུག་ཀྱང་། བཞུགས་ཕུལ་འཐད་པ་མེད་པས་ཆགས་
སྡང་མེད་པའི་རི་ཁྲོད་ཅིག་ལ་བཞུགས་ན་རྟོགས་བ་འཁོགས་ཐོན་པ་ཡིན་ཞེས་ལུང་བསྟན། དེ་ཡང་རྟེན་དགེ་སློང་དུ་འདུག་པས་དེ་ལ་རྗེས་སུ་ཡི་རངས། སྟོང་ཉིད་ཀྱི་ལྟ་བ་ཀླུངས་སུ་ཕེབས་ནས་འོག་མ་ལ་རང་ཤུགས་ཀྱི་ཞེན་པ་མ་ལྡོག་པར་ལས་འབྲས་རྣམ་རྟོག་གི་རྗེས་སུ་སོན་བས་བདེན་བཞིའི་ལམ་ཡང་ཁྱད་དུ་ཅིང་སོ་སོ་ཐར་པ་རྣམ་པར་རིག་བྱེད་བྱེ་བྲག་སྨྲ་བའི་ལུགས་མ་ཡིན་པའི་གཟུགས་སྤོང་བ་བདུན་འཁོར་བཅས་ལ་ཚུལ་ཁྲིམས་སུ་བཤད་པ་ཡིན་པས་ལྟ་བ་དེའི་ལུགས་སུ་སྐྱོངས་། སྤྱོད་པ་ཁྱེད་རང་གི་ལུགས་སུ་གྱིས་ལ་རི་ཁྲོད་བདེན་པར་འདུལ་བ་ལས་དགེ་སློང་གཅིག་པའི་གསོ་སྦྱོང་དང་། དབྱར་གནས་བཤད་པ། དེ་ལག་ལེན་ལ་ཐེབས་པར་མཛོད། ཅིག་ཅེས་གདམས། ཁམས་བླ་འཇིགས་མེད་འཕྲིན་ལས་ཀྱང་རག་ཆུ་ནས་རྒྱ་དཔོན་གུ་རུའི་སྐྱབས་འཇུག་ཞུ་རྒྱུ་དང་བཅས་ཐོན་ཕྱག་ལ་འབྱོར། ཁོང་ལས་ཅན་གྱི་སློབ་མ་ཡིན་བས་ལམ་རིང་གི་བགྲོད་པ་ལ་མི་འཚོར་བར་ད་དུང་མཇལ་ཐེང་ཞིག་ཨེ་ཡོད་དང་། མཐར་མཛད་པ་བརྟུལ་བར་གྱུར་ཀྱང་ཡང་སྲིད་ངེད་ཀྱི་སྲ་ཕེབས་ནས་རང་དབང་ཅན་དུ་འགྱུར་བའི་ཐུགས་བསྐྱེད་དགོས་ཞེས་རྐང་པ་ལ་མགོ་གཏུགས་ནས་སོང་། རུ་དམ་ནས་རྫོགས་ཆེན་སྤྲུལ་པའི་སྐུ་གཉེར་པ་ཡང་འབྱོར། རྟེན་འབྲེལ་ལ་དགོངས་
པའི་དྲིལ་བུ་གསེར་འགོ་མ་དང་། བསྐལ་བཟང་གསེར་བྲིས་མའི་རྟེན་ལྡན་གྱི་གསུང་བྲིས། རིང་འཚོའི་ཚོགས་བཅད་བཅས་འཕྲོད་ཅིང་། བསྐལ་བཟང་དངུལ་འབུམ་གྱི་གཟུངས་ལ་རྟེན་འབྲེལ་ཤིན་ཏུ་བཟང་། མ་གིར་གཙུག་ལག་ཁང་རྒྱ་ཚོགས་ར་བསྐྲུན་གྱི་ནང་རྟེན་རྣམས་ལ་འདི་ནས་རབ་གནས་བྱེད་དགོས་དང་། ཆེད་དུ་བསྐུལ་མ་མཛད་པས་དམ་པ་ལ་སྤྲིང་བའི་གཏམ་དེ་བསྔགས། སེ་ར་ནས་ཁལ་ཁའི་སོག་བཙུན་གཉིས་བྲ་འབེབས་ཀྱི་མན་ངག་ཞུ་ཞེས་ནན་ཏུར་ཆེན་པོ་བྱེད་པས་ཐག་རིང་ནས་གཞུང་ལུག་ལ་ཐོས་བསམ་བྱེད་པར་འོངས་ནས་དོན་གཉེར་འདི་འདྲ་ལ་བྱེད་པ་ཆོས་སྐལ་ཆད་པ་འདྲ་ཞེས་སྨྲས། ཟླ་བ་དྲུག་པའི་ནང་གཉའ་ནང་བལ་པོས་འཇབས་ནས་དུས་ཟིངས་ལངས་། གཞུང་ས་ནས་བླ་མ་མང་པོར་དམག་བཟློག་བསྒྲུབ་རྒྱུ་གནང་བའི་འགག་དོགས་སློབ་དཔོན་པདྨ་ལ་ཅོལ། སྤྱིར་རྔ་བརྡུང་བ་དང་སྒོས་མངོན་སྤྱོད་ལ་འདུན་པ་ལྷོད་ཀྱང་། བོད་འདི་སངས་རྒྱས་ཀྱི་བསྟན་པ་ཡོང་བའི་ཞིང་། ཡུལ་གྲུ་གཞན་ལ་ལྟོས་ན་སྐྱེས་ཕལ་བ་རྣམས་ཀྱིས་ཀྱང་དགེ་སྡིག་གི་སྒྲ་ཤེས་པས་མི་ཁོམ་པའི་གནས་གཞན་དང་ཁྱད་པར་ཆེ། དེ་ལ་ཕྱི་རོལ་པའི་བརྟུལ་ཞུགས་ཅན་གྱིས་གྲགས་ལྟ་བ་འདིས་སེམས་ཅན་གྱི་བདེ་སྐྱིད་དང་
རྒྱལ་བའི་ཕྲིན་ལས་གཉིས་ཆུད་གཟོན་པའི་གེགས་ཆག་ཆེན་པོར་སྣང་ཡང་དེ་གོ་མཁན་ཆེར་མི་སྣང་བས་ཡིད་སྐྱོ། རྣམ་པ་ཀུན་ཏུ་རྒྱལ་པོའི་མངའ་རིས་དང་དཀོར་ལ་བརྟེན་ནས་སྤྱོད་བྱེད་པ་དག་ཀྱང་ཁྱད་མེད་ཟེར་ན། །ས་རྒྱ་སྦར་མིལ་ཙམ་དང་། དཀོར་ལ་རིས་བཅད་ཀྱི་ཤོར་གོད་ཏིལ་འབྲུ་ཙམ་ཡང་མེད་པར་མ་ཟད། ལོ་སྔ་པྱིའི་ཁོང་དུའང་འཚོ་རྩིས་དང་རྟག་འཛིན་གྱི་སེམས་པས་ཆོས་ཀྱི་དབྱིངས་ནི་བདེ་བ་ཆེན་པོ་ཡིན། གནས་སྐབས་ཀྱི་གནས་འཕོ་དགོས་ནའང་མཐའ་སྐོར་ཐམས་ཅད་གདུལ་བྱའི་རང་བཞིན་དུ་ཡོད་པས་རེ་དོགས་ཏིལ་འབྲུག་ཙམ་ལང་མེད་ཀྱང་། སངས་རྒྱས་ཀྱི་བསྟན་པ་དང་སེམས་ཅན་གྱི་བདེ་སྐྱིད་ཇི་ལྟར་བྱེད་སྙམ་པའི་བློ་གཡེང་ཆེན་པོ་ལངས། དེ་ལ་ཐབས་མཁས་པའི་བྱང་ཆུབ་སེམས་དཔའ་རྣམས་ཀྱི་རྗེས་ཐོབ་ཀྱི་ཚོགས་ནི་ཨ་བྷི་ཙརྱའི་ཕྲིན་ལས་ལ་བརྟེན་ནས་ཀྱང་རྫོགས་པའི་ཚུལ་རྒྱུད་ལས། འཇིག་རྟེན་ཕ་རོལ་དག་ཏུ་ནི། །བསྒྲལ་བ་རྣམས་ཀྱང་མཐོ་རིས་ཐོབ། །བདག་ཀྱང་བྱང་ཆུབ་གཉིས་སུ་མེད། །བསམ་པ་འབྱོར་བའི་ཤེས་རབ་ལ། །སྡིག་ཅན་བསད་ན་ལས་ངན་འཆད། །ཅེས་པ་ལྟར་བསྟན་འགྲོ་ཁོ་ནའི་དོན་དུ་དམིགས་ནས་ཁྲོ་བོ་རོལ་བ་དང་། ཁྱད་པར་ཕུར་བ་རྒྱུད་ལུགས་ཀྱི་སྨད་ལས་
སྤུ་གྲི་རླུང་འཁོར་གྱི་བཅའ་ག་སྒྲིགས། འཁོར་བའི་རང་བཞིན་ཕུང་པོ་ལྔ་དང་ཚོགས་བརྒྱད་ཀྱི་གནད་གཅོད་པའི་གདབ་ཁ་ཀི་ལཱ་ཡ་ཚད་ཀྱི་མི་རིག་པ་སློབ་དཔོན་ལག་ལྷག་ལ་དྲིས་ནས། རྩ་བའི་རྒྱུད་ཀྱི་དགོངས་པ་ལས་དྲུག་མན་ངག་གིས་གཏོར་བ་སྒྲ་ཇི་བཞིན་པ་ཉམས་སུ་བསྟར། ལར་ངེད་ལ་གཞེ་སྡང་རང་རྒྱུད་པ་མི་འཆར་བས་རྡོ་རྗེ་ཁྲོས་པའི་རྟེན་འབྲེལ་ཀྱང་དཔལ་ཆུང་བས་རྟགས་མྱུར་པོ་འོད་དཀའ། དེ་ལྟ་ནའང་། ལྟོ་འགྲོས་དབང་བའི་སངས་རྒྱས་ཅན་མའི་དབྱིངས། །རྣམ་ཐར་གསུམ་ལྡན་ལ་ཉལ་བླ་གཟུགས་ནི། །ལྡང་བའི་ཆོ་ག་ཉམས་ཀྱང་མནར་མེད་ཀྱི། །རྒྱུ་རྐྱེན་ཆ་ཤད་མོ་ཚོགས་རྙི་ལ་འཐོགས། །རང་སློབ་རྡོ་རྗེ་ཀློད་གསལ་གྱིས་སྐྱིད་གྲོང་དུ་ཡོན་ཏན་རིན་པོ་ཆེའི་མཛོད་པར་དུ་བརྐོས་པའི་བར་ཤིང་དང་། རྒྱ་གདུགས་ཛ་ཏི་ཉིས་བརྒྱ་བཅས་འབྱོར། ལྷོ་གདུང་བསམ་པའི་དབེན་རིགས་པུནྡ་རི་ཀ་སྔ་སོར་ནས་དད་མོས་དང་ལྡན་པ་ལ་དཔོ་དོན་འབྲེལ་བའི་གཏམ་གྱིས་རྗེས་སུ་གདམས་བཞིན་ལོ་གྲངས་དོན་གསུམ་པའི་སྟེང་ཆོས་དོན་གཉེར་བའི་བསམ་པས་སློབ་པ་རྗེས་སུ་བཟུང་། སྔ་ལོ་རྒྱ་མཚམས་སུ་ཡོན་ཏན་མཛོད་དང་རྣམ་ཐར་རོ་ཧའི་རྒྱན་སོགས་པར་དུ་བརྐོས་པའི་དགེ་བ་རྫོགས་བྱང་དུ་བསྔོས།
ངེད་ལ་ཨ་ཙ་རའི་དཔྱད་པ་ངོ་མཚར་བ་དག་བྱིན། ཁོང་གིས་ལྷོ་འབྲུག་དང་གྷ་ཊགའི་ཚངས་ལ་ཀ་ལ་ཏར་ལོ་གསུམ་བསྡད། བྷངྒ་ལ་སོགས་པར་འཁྱམས་ནས་ལྷོ་ཕྱོགས་རྒྱ་མཚོའི་རླབས་ལོག་པ་མཐོང་མཐོང་ཕྱིན་པས། ཡུལ་གྱི་ལོས་རྒྱུས་བཤད་པ་ལ་ད་དུང་གཏམ་རྒྱུས་གཞན་གྱིས་དཔྱད་པ་དང་བཅས་རྒྱ་གར་ལྷོ་ཕྱོགས་ཀྱི་གཏམ་དེ་རྩེད་མོའི་ཚུལ་དུ་བྲིས། དེའི་དགོས་པའང་སྤྱིར་སེམས་ཅན་བསོད་ནམས་དམན་ཅིང་གློ་བུར་པའི་བསམ་སྦྱོར་བརླང་པས་ད་ནི་དུས་ཀྱི་རྒུད་པའང་རིམ་བས་དམན་པ་ལས་འོས་མི་འདུག་ཀྱང་། མངོན་གྱུར་མི་ཤེས་བཞིན་དུ་ལྐོག་གྱུར་འོལ་ཚོད་དུ་སྨྲ་བས་སྒྲ་འགྲོགས་ནས་གངས་ཅན་བ་རྣམས་ཡུལ་སྤོང་བ་ལ་ཞུགས་པ་ལ་ཕན་ཕྱིར་ཡིན། སྤྱིར་ན་བཅོམ་ལྡན་འདས་ཀྱིས་མ་རིག་པའི་རྐྱེན་གྱིས་འདུ་བྱེད་ཅེས་བྱ་བའི་མ་རིག་པ་གང་ཞེ་ན། སྔོན་གྱི་མཐའ་མི་ཤེས་པ་དང་། ཕྱི་མའི་མཐའ་མི་ཤེས་པ་དང་། སྔོན་དང་ཕྱི་མའི་མཐའ་མི་ཤེས་འདང་། ནང་མི་ཤེས་པ། ཕྱི་མ་ཤེས་པ་དང་། ནང་དང་ཕྱི་མི་ཤེས་པ་དང་། ལས་མི་ཤེས་པ་དང་། རྣམ་པར་སྨིན་པ་མི་ཤེས་པ་དང་། ལས་དང་རྣམ་པར་སྨིན་པ་མི་ཤེས་པ་དང་། ཞེས་པ་རྣས་མ་མཐོང་བ་དང་། མངོན་པར་མ་རྟོགས་པ་དང་། རྨོངས་པ་དང་།
ཀུན་ཏུ་རྨོངས་པ་དང་། མ་རིག་པ་དང་། མུན་པའི་རྣམ་པ་ཞེས་བྱ་བ་འདི་ནི་མྲིག་པ་ཞེས་བྱའོ། །ཞེས་པའི་བར་གསུངས་པས་སོ། །ཟླ་བ་དགུ་པའི་ནང་མཆོད་སྡོང་རིན་པོ་ཆེ་ལེགས་པར་ཚར་ཕྱིན་པས་བསམ་ཡས་སུ་གཟུངས་འབུལ་རབ་གནས་ལ་བསྐྱོད། གངས་རིའི་ཁྲོད་འདིར་སངས་རྒྱས་ཀྱི་བསྟན་པ་ཡུན་དུ་གནས་པའི་རྟེན་འབྲེལ་དུ་བསམ་ཡས་གཙུག་ལག་ཁང་གི་རབ་གནས་གསོ་བར་ལུང་བསྟན་ཐོབ་ཅིང་། དེ་ཡང་ལྷ་ཐོ་ཐོ་རི་གཉན་བཙན་གྱི་རིང་ལ་དམ་པ་ཆོས་ཀྱི་དབུ་བརྙེས་པའི་རྟེན་ཅིང་འབྲེལ་འབྱུང་གི་སྒོ་དང་པོ་གཉན་པོ་གསང་བ་བརྒྱ་ཟག་གཅིག ཟམ་ཏོག་བཀོད་པ། བསྐལ་བཟང་སངས་རྒྱས་སྟོང་གི་མཚན་འབུམ། གང་ཞིག་རབ་ཏུ་གནས་བྱའི་ངོ་བོ་ནི་སངས་རྒྱས་ཆོས་ཀྱི་སྐུ་དང་། དེའི་རྣམ་པར་ཐར་པ་ནི་བྱང་ཆུབ་ཕྱོགས་ཀྱི་ཆོས་སུམ་ཅུ་སོ་བདུན་གྱི་དཔེ་བྱད་དུ་རྫོགས་པས་ན་འཕགས་བརྟེན་ཅིང་འབྲེལ་འབྱུང་གི་མདོར། རྟེན་ཅིང་འབྲེལ་བར་འབྱུང་བ་འདི་ནི་དེ་བཞིན་གཤེགས་པ་རྣམས་ཀྱི་ཆོས་ཀྱི་སྐུ་ཡིན་ཏེ། སུས་རྟེན་ཅིང་འབྲེལ་པར་འབྱུང་བ་མཐོང་བ་དེས་ནི་དེ་བཞིན་གཤེགས་པ་མཐོང་ངོ། །སྤྱན་རས་གཟིགས་དབང་ཕྱུག་རིགས་ཀྱི་བུའམ་རིགས་ཀྱི་བུ་མོ་དད་པ་ཅན་གང་ལ་ལ་ཞིག་གིས་མིག་ནས་བའི་ཕྱོགས་སུ་
མཆོད་རྟེན་ནི་སྒྱུ་རུ་རའི་འབྲུ་ཙམ། སྲོག་ཤིང་ནི་ཁབ་ཙམ། གདུགས་ནི་བ་ཀུ་ལའི་མེ་ཏོག་ཙམ་ཞིག་བྱས་ལ། རྟེན་ཅིང་འབྲེལ་པར་འབྱུང་བ་ཆོས་ཀྱི་དབྱིངས་ཚིགས་སུ་བཅད་པ་ནང་དུ་བཅུག་ན་དེ་ཚངས་པའི་བསོད་ནམས་བསྐྱེད་པར་འགྱུར་ཏེ། འདི་ནས་ཤི་འཕོས་ཤིང་འཆི་བའི་དུས་བྱས་ནས་ཚངས་པའི་འཇིག་རྟེན་དུ་སྐྱེ་བར་འགྱུར་རོ། །དེ་ནས་ཤི་འཕོས་ཏེ་འཆི་བའི་དུས་བྱས་ནས་གནས་གཙང་མའི་རིས་ཡི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །ཞེས་གསུངས་བལྟར་རྟེན་སྙིང་འབུམ་ཐེར་ལྷག་བཅས་ཀྱིས་གཙོབ་པའི་རིང་བསྲེལ་རྣམ་པ་བཞི། ཤིན་ཏུ་རྣལ་འབྱོར་དང་། རྗེས་སུ་རྣལ་འབྱོར་དང་། རྣལ་འབྱོར་ཆེན་པོ་ཐམས་ཅད་ཀྱི་རིག་པ་སྤྱི་བླུགས་ཀུན་གུ་བཟང་པོའི་ཙཀྲ་དང་། རྒྱུ་ཀུན་འབྱུང་ལས་འབྲས་བུ་སྡུག་བསྔལ་བསྐྱེད་པའི་འཇིགས་པ་ཆེན་པོ་བརྒྱད་ཚན་གཉིས་འགོག་པ་དམ་ཚིག་སྒྲོལ་མའི་ཙཀྲ་སོ་སོ་ནས་བརྒྱ་རྩ་རེ་སོགས་ལ་མཐའ་དམག་གིས་མཚོན་དུས་ཀྱི་རྒུད་པ་ཞི་བའི་འདོད་གསོལ་སྦྱར། གསེར་སྦྱངས་ཀྱིས་བྲིས་པའི་སྲོག་ཤིང་དྲི་མེད་རྣམ་གཉིས་ཀྱི་ཆོ་གས་བརྟན་པར་བྱས་པ་དང་། གནོད་སྦྱིན་བང་མཛོད་དཀོར་ཆ་དང་ལྡན་པ་སོགས་ཉེར་བསྡོགས་གྲུབ་པའི་དེ་མ་ཐག་འདོད་དཔལ་ནས་བལ་པོ་དང་། ཟངས་བརྡུངས་
དབུ་མཛད་རེ་འབྱོར་པས་དངུལ་དཀར་གྱི་བ་གཏུམས་ཀྱི་སྟེང་། འཕུལ་མ་ཚ་གསེར་ཅན་ཟུར་བཀག་པ་ཏྲ་བཅུ་གཉིས། བཟོ་སྤྲོས་གཙང་ཁྱད་གར་བླུགས་ཚ་གསེར་གྱི་སེང་གེ་མཐོ་ཚད་པ་བརྒྱད། རྒྱལ་པོ་ཆེན་པོ་བཞི། སྒོ་ཁྱིམ་པ་ཏྲ་ཕྲ་འཕུལ་ཤིན་ཏུ་མཚར་བའི་ནང་སྐུ་ཚབ་ཤོས་ལི་རྒྱུག་མཐོ་གང་བ། བུམ་པ་ལ་དྲ་བ་དྲྭ་ཕྱེད། གསེར་ཟངས་ཀྱི་ཆོས་འཁོར་ཕུལ་མ་ལཉྫ་ཅན། ཆར་ཁེབས་བར་ཆགས་ཉི་ཟླ་ནོར་བུའི་ཏོག །གསེར་དང་སྟོང་སྐོར་རི་བའི་ཨིནྡྲནཱི་ལ་མཐེབ་ཚིགས་ཕྲ་ཕྱོགས་དང་། བཻ་ཌཱུརྱའི་རིགས་སུ་བགྲངས་བའི་ཕྱིལ་མིག་སྲན་སྔོས་ཙམ་དང་། ག་ཛ་ཙམ་མུ་ཏིག་དེ་ཙམ། མུ་ཏིག་ཆེ་བ་ཆིབ་ཁ་ཙམ་དང་། ཆུང་བ་གཡུ་དྲུག་དམར་སོགས་རང་ཀྱ་ཕེར་བ་དང་། གཡུ་པད་ཆེ་ཆུང་། སྤོས་ཤེལ་ཆེ་ལེགས་ཀྱི་གཙོས་པས་སྣ་ཚོགས། བྱུ་རུའི་ཕྲེང་བས་གཙོས་རིན་པོ་ཆེའི་རིགས་རང་བྱུང་དང་བཅོས་བུའི་ཕྲ་བུང་ཕུལ་མ་ཤིན་ཏུ་མང་བ་རྣམས་སྦྱར་ཞིང་རང་ཅག་གིས་གཟུངས་བཞུགས་སློབ་དཔོན་ཀླུ་སྒྲུབ་དང་། ཛེ་ཏེ་ཏིའི་རྒྱ་གཞུང་གི་རྗེས་སུ་འབྲངས་པ་ཕུལ། དབུ་ཐོག་ཏུ་གོས་རྙིང་བླ་བྲེ་མཐོང་བཟང་གོས་བཀྲལ་བཏགས་པར་འཇའ་སྨད་ཤམ་དམར་པོ་དང་། མཐའ་རྒྱན་བཞི་སྙུག་ཁ་ཆུ་བྲག་ཅན། ཀ་བ་བཞིའི་
ལྕམ་གླིང་བྱི་བ་ཁེབས། མདུན་ཅོག་ཤིང་བརྐོས་ཅི་མི་འདྲའི་གདོད་ཆེན་འབུར། དོད་པ་ཏྲ་ཁོང་སེང་ཁོར་ཡུག་ཅན་གྱི་སྟེང་དངུལ་སྲང་བཅུ་གསུམ་ལས་གྲུབ་པའི་མཆོད་ཀོང་དངུལ་སྲང་ཅུ་ལས་གྲུབ་པའི་ཏིང་བདུན་ཚར། རྒྱ་རག་གི་ཏིང་འགག་གཟུགས་མཆེ་ལེགས་བདུན་ཚར་སོགས་ངེས་པ་བརྗོད་དུ་ཞིབ་གསལ་ལྟར་དང་། མདོར་ན་རྟེན་བཞེངས་འདིའི་ཆེད་དུ་རྒྱུ་འགྲོ་སྤྱིར་སྟོང་དངུལ་དུ་ལྡང་བ་སོང་ཞིང་། འདི་ལ་བརྟེན་ནས་རིན་པོ་ཆེ་བརྟག་པའི་གཏམ་དེ་ཡང་བྲིས། ཇི་ལྟར་རྨི་ལམ་ནང་གི་རྙེད་པ་ལ། །རྨི་ལམ་ལྟ་བུའི་བསོད་ནམས་དམ་པའི་ཚོགས། །ཐར་པ་ཆ་མཐུན་ཉིད་དུ་མི་བསླུ་ཡང་། །ཆོས་དབྱིངས་ངང་ན་དེ་ལ་རེ་དོགས་བྲལ། །རྟེན་སྒྲིགས་གྲུབ་པའི་དེ་མ་ཐག་གི་གྲལ་ཚེས་ཉི་ཤུ་གཅིག་ལ་སྒྲུབ་ཆེན་བཀའ་བརྒྱད་བདེ་གཤེགས་འདུས་པའི་ཚོན་དཀྱིལ་ལ་བརྟེན་དཀྱིལ་འཁོར་སྒྲུ་མཆོད་དང་། གཟུངས་ཁྲུས་ཀྱི་བུམ་བསྒྲུབ་དང་། བདག་ཉིད་འཇུག་པ་སྔོན་དུ་བཏང་ནས་སྟ་གོན་གྱི་ཆོས་མ་ཚང་བ་མེད་པ་དང་། སང་ནང་པར་ལྷ་བབ་ཀྱི་དུས་ཆེན་ཐོག་དབུ་རྩེ་རིགས་གསུམ་དང་། གླིང་བཞི་གླིང་ཕྲན་བརྒྱད་ལ་སྟོང་མཆོད་རེ་བཅས་པའི་མཆོད་པའི་སྤྲིན་ཆེན་པོ་རྣམ་པར་བཀོད་དེ་མཚན་མའི་ཐུན་མཚམས་ལྔ་པ་ནས་ལྡང་བའི་རྣལ་འབྱོར་གྱི་ཉི་མ་འཆར་ཀ་དང་ཁྲུས་ཀྱི་བྱ་བ་འགྲིག་པའི་
རབ་གནས་དངོས་གཞིའི་ཆོ་ག་མ་ཉམས་ཤིང་མཆོད་བ་མེད་པ། གསེར་སིལ་མའི་མཎྜལ་སྙན་ཤལ། གསེར་ཆབ་བྱང་སྡོམ་བླང་བ། ཕྱི་རོལ་པའི་གཏོར་མ། ཚོགས་བརྒྱ། བསྐང་གསོ་དང་བཅས་པའི་རྗེས་སོང་གི་ཉིན་མོའི་སྟ་གོན་གྱི་ཆོ་ག་མ་འཁྲུགས་ཤིང་མ་འཛིངས་པ་ཉམས་སུ་བསྟར། དེ་ལྟ་བུའི་དངོས་སྟ་སྦྲེལ་མའི་རབ་གནས་ཉིན་ཞག་བརྒྱད་པའི་ཉིན་མངའ་དབུལ་དང་རྒྱས་པའི་སྦྱིན་སྲེག་གི་ཞལ་གསོ་དགཱ་སྟོན་ནས་བསྔོན་བའི་བར་བྱ། དགུ་པའི་ཉིན་གླིང་བཞི་གླིང་ཕྲན་ཇོ་མོ་གླིང་གསུམ་ལ་དམིགས་པའི་སྟ་གོན་དང་། སང་ཉིན་གནམ་སྟོང་གི་དུས་ཆེན་ལ་ནང་པར་སྔ་བའི་ཆ་ནས་མཆོད་རྟེན་དཀར་པོ་ནས་གཟུངས་སྦྱང་བ་སྔོན་དུ་འགྲོ་བའི་ཁྲུས་གསོལ་དང་། རྟེན་བསྐྱེད་དགུག་བསྟིམ། དབང་བསྐུར་བ་བསྡུས་པ། བརྟན་བཞུགས་བཞི་པོ་རབ་གནས་ཀྱི་ངོ་བོ་ཉིད་ཡིན་པའི་མཐར་ཤིས་བརྗོད་དང་དམག་འཁྲུག་སོགས་དུས་ཀྱི་རྒུད་པ་ཞི་བའི་གདུང་ཤུགས་དྲག་པོས་ཉིན་ཐོག་ཐག་འདའ་བར་བྱས་སོ། །དེ་ལྟར་རབ་གནས་ཀྱི་སྦྱིན་བདག་གཞུང་ས་ནས་གནང་བའི་དགོས་ཆ་དངུལ་སྲང་བཅོ་ལྔ་དང་། ཇ་སྒམ། ཤིང་རྒྱུགས་སོགས་སྩལ་ཞིང་། དེ་ཐམས་ཅད་ཀྱི་བདག་པོའི་རྐྱེན་དུ་སྨོན་ལམ་གྱི་མཐུ་གྲུབ་པ་འདོད་དཔལ་མཁན་པོ་སྦྱང་གྲོང་ནས་ཀྱང་མཆོད་ཆོགས་ཀྱི་ཞལ་
འདེགས་དངུལ་སྲང་ལྔ། ཀོ་ལེགས་འབྲུ་དང་། མར་དོ་ཆེ་བ། གསེར་བཏུལ་དང་སྙན་ཤལ་ཕོན་ཆེ་བ་རྣམས་དང་། མདོར་ན་བཟོ་རྒྱུའི་ཆ་རྐྱེན་མ་ཚོགས་པ་ལ་གསེར་སྲང་གསུམ་གྱི་མཚོན་ཆད་པ་འཐུད་པའི་འགན་བཞེས་རང་ཉིད་ལས་ཁུར་ཆེ་བ་མཛད། རང་སློབ་བསམ་གླིང་སློབ་དཔོན་ལགས་གཙོ་བོར་གྱུར་པའི་རབ་བྱུང་གྲ་ཚང་གི་འཁྲིད་ཞུ་བ་རྣམས་དང་། སྐུ་གཉེར་དཔོན་ཡོན་ཏན་རྒྱ་མཚོ། བསྟན་པའི་སྦྱིན་བདག་སྡེ་པ་ཕན་ཚུན་གཉིས་རྣམས་སོ་སོ་ནས་རབ་གནས་ཀྱི་ཞབས་ཏོག་ཉིན་འཁྱོངས་འབུལ་ནོད་འགྱེད་བཅས་ཀྱི་བསྙེན་བཀུར་གྱ་ནོམ་པ་མཛད། སྐུ་གཉེར་དཔོན་གྱིས་བསྐུལ་ནས་བར་ཁང་གི་གནས་བཤད་རགས་བསྡུས་དང་། ཞགས་རྗེས་དང་། གུ་རུ་མཚོ་སྐྱེས་རྡོ་རྗེའི་རྟེན་བཤད། བསམ་ཡས་ལ་རབ་གནས་གསོལ་བའི་གཏམ་ཉུང་དུ་དང་བཅས་བྲིས། བཟོ་བོ་དབུ་མཛད་གཉིས་ལ་གྱོན་པ་ལུས་གང་། དངུལ་སྲང་ལྔ་རེ། སྡེར་རྒྱབ་ཁ་བཏགས་སྔ་ཕྱི་བཅས་དང་། བྱིངས་ལ་མཚར་དགའ་དངུལ་སྲང་ཉི་ཤུ་རྩ་ལྔ། ཡོར་ཤུབས་ལེགས་པ་གཉིས། ཟོང་རས། མཁན་པོར་དངུལ་སྲང་བཅུ་སྐོར། སྤྲེལ་ཟླ་དང་བཅས་པར་གཟན་ཕྲུག་རེ་དང་ཕྱི་མཛོད་རེ། རྩེར་སྐུ་གསུང་ཐུགས་རྟེན་དང་བ་སོའི་བསིལ་ཡབ། སྐུ་གཟན། ནང་མཛོད་དང་བཅས་པའི་ཐུགས་རྗེ་
ཆེ་བྱུང་བརྡ་མཚོན་ཙམ་ཕུལ་བར། བཟང་ཇ་འཁོར་དྲུག་དང་བཅས་རབ་གནས་བྱས་པ་དགོངས་འབྱོར་གྱི་རྒྱ་མ་སྩོལ། བསམ་ཡས་མཆིམས་ཕུར་བསྐྱེད་དེ་མཆོད་འབུལ་གསེར་ཆབ་ཚོགས་བསྐངས། མཁའ་འགྲོའི་མེ་མཆོད་ཁྲི་ཚར། བྲག་དམར་ཀེའུ་ཚང་གཟིམ་ཕུག་ཏུ་བཟང་གོས་འཁོར་བརྒྱད་མ་སེར་བོའི་མཐའ་འཇའ་སྔོན་ག་མེ་རྟོག་རིས་ཀྱི་གནམ་རྒྱན། མཆོད་ཁང་གསར་མར་གྲགས་བརྒྱལ་བ་གཉིས་པའི་སྤྱིལ་ལྕམ་རྩ་རུལ་བས་རྡིབ་ལ་ཉེ་བ་སྔ་ལོ་གནས། ཀོ་རྩེ་སྦག་དང་། དགུ་ཚན་བཟང་པོ་བླ་བྲང་དུ་སྤྲད་ནས་ཐོག་བཀབ་རྒྱུ་བསྐུལ་བ་བཞིན་སོར་ཆུད་པ་ལ་བླ་བྲེ་ཞིག་ཕུལ། གསེར་གསོལ་དང་མཆོད་འབུལ་བྱས། གློང་སྟོད་སྨད་ལ་མང་ཇ་གཉིས་དང་ཇ་འགྱེད་བཏང་། བཀའ་བློན་བླ་མ། བླ་བྲང་། ཆོས་རྗེ་བ་སོགས་ཀྱི་ཚོགས་བརྒྱ་དང་བསྙེན་བཀུར་བཅས་ཀེ་ཚང་དུ་འདུག་རིང་སྔ་ཞོགས་ཐམས་ཅད་ཚེ་དཔག་མེད་སྐུ་གསུམ་འདུས་པའི་བདག་འདུག་བླངས་ཤིང་གྲོལ་དབང་ཉིན་མི་བརྒྱ་སྐོར་ལ་ཚེ་དབང་བསྐུར། འདི་ལོ་སྡེ་དགེ་རྒྱལ་པོ་དབུས་ཕེབས་ཀྱི་འཆར་ཡོད་པས། རང་གནས་སུ་ཕེབས་ན་མི་སེར་ལ་དཀའ་སྤྱངས་བྱུང་དོགས། ཁམས་བླ་ཐོན་གདོང་། ཁྱེད་དང་གང་མཇལ་སར་ཞམ་རིང་བ་འདྲིས་ཡོད་ལ་ཟླ་བ་
དགུ་པར་དེང་བསམ་ཡས་སུ་མཆོད་སྡོང་རབ་གནས་ལ་ངེས་བཅར་ཡོང་ངེས་ཀྱི་དེར་མཇལ་འཛོམ་ལེགས་ཚུལ་བརྡ་འཕྲོད་བར་མཛོད་ཅེས་བསྐུལ་བ་བཞིན་རྒྱལ་པོའི་མི་སྣ་འབྱོར་པ་ལ། མཇལ་ས་བསམ་ཡས་ལས་ལེགས་པ་མི་དགོས་ཚུལ་ཕུལ། དེ་ནས་འགྱང་མེད་ལ་ཕེབས་ཕྲལ་བསམ་རྫོང་དུ་མཇལ་འཛོམ་དང་། དབང་བཀའ་རྗེས་གནང་མང་པོ་བྱེད་དགོས་ཕར་ཁང་གི་གཟིམ་ཆུང་བ་སོ་ལྷ་ཁང་དུ་བྱས། མཆིམས་ཕུར་ཕེབས་པ་ལ་རྟ་འུལ་བཞི་བཅུ་ཞེ་ལྔ་དགོས་པས་མི་སེར་རྣམས་ཅི་དྲག་ལ་གྱར་བར། རྒྱལ་པོའི་དགེ་བའི་ས་བོན་མངོན་དུ་སད་པ་ནི། མི་དབང་ཁྱོད་ནི་བྱང་ཆུབ་སེམས་དཔའི་རིགས། །སེམས་ཅན་རྣམས་ནི་ལས་ཀྱི་གཞན་དབང་ཅན། །སྙིགས་མ་ལྔ་བདོ་ཁྱད་པར་གངས་ཅན་འདིར། ལྔ་ལོ་ལོ་ཉེས་ནད་ཡམས་སྣ་ཚོགས་དང་། འདི་ལོ་དམག་དང་ཁྲལ་གྱིས་ཤིན་ཏུ་གདུངས། །ཁྱད་པར་གནས་འདིར་དག་པའི་ཞིང་ཉིད་ཀྱང་། །ཡུལ་མཐུ་ཆུང་ཞིང་མི་རྣམས་འབྱོར་པས་ཕོངས། །ཉིན་རེ་བཞིན་དུ་ཡུལ་འཁྱར་གྲོང་སྟོང་བའི། སྐལ་ངན་མཐོང་བས་སྙིང་རྗེ་སྐྱོ་ཤས་འཕེལ། །གནས་རི་མིག་གིས་མཐོང་ཡང་བསྟུད་པའི་ཚེ། །ཤུལ་རིང་རྡོ་སྐད་འཛེགས་བཞིན་སླར་ལ་བསྲིང་། །རྟ་རེར་དངུལ་ཞོ་གསུམ་གྱི་གླ་འབབས་པས། །དབུགས་
འབྱིན་ཆེན་པོའི་གནས་ལ་སྦྱར་དུ་གསོལ། །ཞེས་སྤྲིངས་པས་རྟ་འུལ་བཅུ་ཐམ་པ་ཆོས་ཆོག་པ་བྱུང་། །སང་ཉིན་བཀའ་བརྒྱད་ཀྱི་དབང་བསྐུར་དུས། །རྟ་འུལ་ཉུང་ངུར་བསྡུས་རྗེས་སུ་ཡི་རང་ཕུལ་ནས་ད་དུང་ཡང་ལུངས་ཕྱོགས་སུའང་མེས་དབོན་གྱི་གནས་རྙིང་ལས་གཞན་ཐམས་ཅད་དུ་ཕེབས་ན་དཔོན་གཡོག་སྟོབས་ཆེ་བས་ལས་དཀར་ལ་རྣམ་སྨིན་གནག་པ་འབྱུང་ཚུལ་ཞུས་པར་གསན་དགོངས་མཛད། བཙུན་མོ་མཁྱེན་རབ་ཆེ་ཞིང་བག་ཆགས་བཟང་བས་འཁྲིད་སྤུང་ཉི་མ་གསུམ་ལ་གོ་བརྡ་འཕྲོད་དེ་བྱུང་། བླ་མ་དང་ཡང་ཡང་མཇལ་དགའ་བས་བསམ་ཡས་སུ་ལྷོད་ཙམ་བྱེད་གསུངས་པས། སྣེ་ཤན་པ་སོགས་མཛད་དཀའ་གཏད་ཀྱང་དབང་ཆོས་རྣམ་གྲངས་མང་པོ་མྱུར་དུ་རྫོགས་པའི་ཐབས་ལ་འབད་པས་ཞག་དྲུག་ལས་མ་འཐོགས། ཇོ་བོའི་སྐུ་མདུན་དུ་་སྨོན་ལམ་ལྷན་ཅིག་མཛད་དགོས་གསུང་བར་སྟོང་མཆོད་གཅིག་ཕྲལ་དུ་གཤོམ་པར་བསྐུལ་ནས་དེ་བཞིན་བྱས། ལར་ངེས་འབྱུང་གི་བརླན་བ་དག་ཀྱང་རྒྱལ་ཁབ་ལ་སོགས་པའི་བསྟི་སྟང་ལ་ཇི་མི་སྙམ་ན། ཆོས་ཉིད་ཀྱི་བདེན་པ་ནི་རེ་དོགས་ཀྱི་གཞན་དབང་ཅན་མ་ཡིན་ཀྱང་། ཀླ་ཀློ་དང་སྡིག་སྤྱོད་ཀྱིས་བཀབ་པའི་རྒྱལ་ཕྲན་གཞན་དང་མི་མཚུངས་ཤིང་། བསྟན་པ་དང་དེ་འཛིན་ལ་གུས་པའི་མངོན་རྟོགས་འིད་
ལྟར་རོ་ཞས་བསྙད་ན། བླ་མར་བྱ་བའི་གནས་ལ་ལྟ་བ་བཟང་པོས། སྤོས་སྣ་དང་། ལྡང་ཕྱག །དྲི་མཉམ་སོགས་བསྟི་སྟང་དང་། སྟོན་མོས་སྔོན་བསུས་པའི་བློན་ཆེན་གྱི་མས་གཏམ་སྔོན་དུ་བཏང་ནས། འབུལ་ཐོ་འདི་ལྟ་སྟེ། གསང་ཆེན་ཐེག་པ་མཆོག་གི་ཁང་བཟང་དབུས། །མི་ཤིགས་ཟག་མེད་དོན་དམ་བདེ་བ་ཆེར། །རྣམ་རོལ་མཁྱེན་བརྩེའི་འོད་འགྲོ་བའི་མགོན། །དཀོན་མཆོག་ཀུན་འདུས་ངོ་བོར་སྐྱབས་སུ་བསྟེན། །དངོས་འབྱོར་ཡིད་སྤྲུལ་ཀུན་བཟང་མཆོད་པའི་སྤྲིན། །རབ་འབྱམས་ཞིང་ཁམས་རྒྱ་མཚོར་རབ་སྤྲོ་ཞིང་། །ཚེ་རབས་ནས་བསགས་སྡིག་ལྟུང་ཉེས་པའི་དྲི། །མ་ལུས་སྟོབས་བཞིའི་ཆོ་གས་བཤགས་པར་བགྱིས། །དུས་གསུམ་དྲི་མས་དབེན་པའི་འཁོར་འདས་ཀྱི། །ཇི་སྙེད་དགེ་བའི་ཚོགས་ལ་རྗེས་ཡི་རང་། །མགོན་ཁྱོད་སྲིད་པ་མཐའ་ཅན་མ་གྱུར་པར། །བརྟན་པར་བཞུགས་ལ་བདག་སོགས་འགྲོ་ཀུན་གྱི། །སྒྲིབ་གཉིས་གཉེན་པོར་རྟག་ཏུ་ཆེ་བ་ཡི། །ཟབ་རྒྱས་ཆོས་ཀྱི་འཁོར་ལོ་བསྐོར་བར་བསྐུལ། །འདིས་མཚོན་དུས་གསུམ་དགེ་བའི་ཆུ་ཀླུང་ཀུན། །བླ་མེད་བྱང་ཆུབ་རྒྱ་མཚོར་རོ་གཅིག་ཏུ། །ཡོངས་སུ་བསྔོ་བའང་འཁོར་གསུམ་ཡོངས་དག་ནས། །སྒྱུ་མའི་རྩེ་འཇོར་རོལ་པའི་ཚུལ་གྱིས་སོ། །ཞེས་སྔགས་བརྗོད་ཡན་ལག་བདུན་པ་སྔོན་དུ་བཏང་ནས།
རྒྱལ་བ་ཉིད་ཀྱིས་རྡོ་རྗེའི་ལུང་གིས་བསྟན་པ་ལྟར། གངས་ལྡན་རྭ་བ་དཀར་པོའི་ལྗོངས་འདིར་ཆོས་རྒྱལ་ལོ་པཎ་རྣམས་ཀྱི་ཐུགས་རྗེར་བརྟེན། སངས་རྒྱས་ཀྱི་བསྟན་པ་དར་ཞིང་རྒྱས་པར་གྱུར་པའི་གནང་ནས། ཁྱད་པར་དུ་འཇམ་དབྱངས་མིའི་སྲིད་པ་ཆོས་རྒྱལ་ཁྲི་སྲོང་ལེའུ་བཙན་གྱིས་སློབ་དཔོན་ཆེན་པོ་པདྨ་སམྦྷ་ཝ་སྤྱན་དྲངས། དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་འདི་ཉིད་བཞེངས། རྗེ་འབངས་ཐམས་ཅད་ཐར་པའི་ལམ་ལ་བཀོད། སངས་རྒྱས་ཀྱི་བསྟན་པ་དང་སེམས་ཅན་གྱི་བདེ་སྐྱིད་རྫོགས་ལྡན་གྱི་བསྐལ་པ་བཟང་པོའི་དཔལ་ལ་འགྲན་པར་མཛད་པ་བཞིན་དེང་རྒྱལ་དབང་པདྨ་ཀཱ་རའི་ཞལ་སྐྱིན་དམ་པ་བསམ་ཡས་སུ་བྱོན་ཞིང་། བདག་ཅག་གིས་སྦྱིན་བདག་གི་ཁུར་བླངས་ཏེ་ཚོགས་ཀྱི་མཆོད་པ་ཕུལ་ནས་འཇིག་རྟེན་གྱི་ཁམས་སུ་བདེ་སྐྱེད་འབྱུང་བ་དང་། བདག་ཅག་རྣམས་ཕལ་ཡུན་དགེ་ཞིང་ཤིས་པའི་རྟེན་འབྲེལ་གྱམ་སྒོམ་འཕར་སྟོང་ཕྲག་བྱེ་བའི་སྨོན་ལམ་དང་། སྨིན་བྱེད་ཀྱི་དབང་།གྲོལ་བྱེད་ཀྱི་གདམས་པ་ཟབ་མོ་སྩལ་བ་སོགས་ཐུགས་རྗེ་ཆེན་པོས་བསྐྱངས་པའི་མཎྜལ་མཚོན་བྱེད་དུ། ལྷ་གོས་སྲིད་དུ་རིང་བ། རྡོར་དྲིལ་ཐེག་ཆེན་གསེར་རྩིམ། ཏིང་ཤག་དངུལ་གྱི་ཉག་ཐག་ཅན། མ་ཧེ་ཉེྩ་ཡུག་ཆེན། ལིང་ཚོས་ཁ་སྣ་ཚོགས་
ཡུག་ལྔ། གོས་ཆེན་གསེར་བྱུས་ཡུག །པགས་བྱུག་ཡུག ཟམ་ཡུག་ཆོས་ཁ་སྣ་ཚོགས་དྲུག མཛོད་གོས་སྔོན་གཡུག གསེར་རྡིལ་ཚད། དངུལ་རྟ་རྨིག་མ་གཉིས་དང་། ཁོལ་ཚེ་སྲང་བཅུ་གསུམ། གསེར་ཞོ་ལྔ་པ་གཅིག །ཇ་བཟང་འབྲིང་འཁོར་དྲུག་ལྔ། རྟ་ཆིབས། རོལ་གཉིས། དྲིའུ། ཀ་ཤི་ཀའི་རས་བཅས་ཕུལ། དེ་སྲིད་སྐྱེ་བར་དལ་འབྱོར་ལུས་ཐོབ་ཅིང་་ །དམ་པས་རྗེས་བཟུང་ཚུལ་ཁྲིམས་རྣམ་པར་དག །ཐོས་བསམ་སྒོམ་པའི་འབྲས་བུས་རྒྱུད་ཕྱུག་ནས། །བསྟན་དང་འགྲོ་བའི་དཔལ་དུ་བདག་གྱུར་ཅིག །ཅེས་སྣང་། རྙེད་བཀུར་དང་ནི་བསྟི་སྟང་ལ། །རློམ་བ་སྐྱེས་ནས་བྲིས་པ་མིན། །རྒྱལ་བའི་བསྟན་དང་དེ་འཛིན་ལ། །གུས་དེ་ཆོས་རྒྱལ་རྣམ་ཐར་ཡིན། སང་ཉིན་བཀྲ་ཤིས་དཔལ་རར་ཐོན་ཕྱག་ལ་བྱོན་ཐོག་ཐོར་སྣམ་དང་། འགོ་སྣམ་གྱི་གཙོས་པའི་ཕེབས་རྫོང་བརྡ་མཚོན་དང་། རྒྱལ་པོ་སྟངས་དཔྱལ་གྱིས་གཙོས་པའི་ནང་མ་རྣམས་ལ་ཚེ་དབང་། ཕྱི་རོལ་དུ་བྱིངས་དམངས་ཉིས་བརྒྱ་སྐོར་ལ་བྱིན་རླབས་དང་མདུད་དམ་སྤྲད། མཐའ་འདུལ་ཡང་འདུལ་གྱི་གྲས་ཀློང་ཐང་སྒྲོལ་མ་དེ། སྡེ་དགེའི་མངའ་རིས་ན་ཡོད་འདུག་པ་ཉམས་གསོས་དགོས་པའི་ཚུལ་དང་། ཕེབས་ལམ་གྱིས་མཚོན་གཞིས་བྱེས་ཐམས་ཅད་དུ་འབངས་ལ་བྱམས་
པས་སྐྱོང་དགོས་ཚུལ་ཞུས་ཏེ་ཐེགས། སྐུ་སྲུང་བཞུ་ཆེན་དཔོན་ལ་ཡོན་ཏན་མཛོད་ཆོས་འབྲེལ་དུ་བྱས་ཤིང་། གཞན་སྐུ་འཁོར་དྲག་གཞན་སོ་སོའི་རེ་བ་བསྐངས། རྒྱལ་པོ་བསམ་ཡས་སུ་བཞུགས་རིང་ཕྱིར་འབྲེལ་གྱི་གནས་སྐོར་ལྟོས་ཆེ་བ་ཀུན་ཏུ་རྒྱུའི་གྲས་ཞིག་འཕྱོང་རྒྱས་ཞོལ་པས་རྡོ་ཚོམས་བྱས་ནས་རྐྱེན་ལམ་དུ་སོང་བ་། ཁྲ་འབྲུག་ཏུ་ཕེབས་བསྟུན་ཤ་ལན་ལེན་མའི་དཔུང་འོང་ཚུལ་གྱིས་སྐྲག་ནས། ངེད་ལ་ཞུ་ངོ་སྒྲོན་རོགས་ཀྱི་བང་མི་གཉིས་འབྱོར། འདི་པ་ཚོ་ལྷོ་བྲག་མར་པའི་ཡུལ་མི་ལྟ་བུ་ཡིན་ཀྱང་སྙིང་རྗེ་ཆེན་པོས་རྒྱལ་པོ་ལ་ཐལ་སོང་དེ་རིགས་གནང་ན་ཉེས་པ་ཤིན་ཏུ་ཆེ་བས་ངོ་ཆེན་དགོས་ཚུལ་ནན་གྱི་ཞུ་ཡིག་ཕུལ། གཞན་ཁམས་པའི་སྲོལ་ལ་ཤ་ལན་ལེན་པ་ཁྲིམས་སུ་བཅའ་བས་ལུང་སྐྱོག་གི་ཐུབ་ཚོད་མཐིལ་རྡེལ་བ་ཐུག །བསམ་ཡས་རྫོང་དཔོན་སྤེལ་གཞི་འབྱོར་རྒྱས་པ་ལ་ཚེ་དབང་དང་། རྟ་མགྲིན་གསང་སྒྲུབ་ཀྱི་རྗེས་གནང་བྱས་ རང་གནས་སུ་ལྡོག་ལ་སྤོརར་ཞག་གསུམ་བསྡད་དེ་ཚེ་དབང་དང་སྦྱིན་སྲེག་སོགས་བྱས། སླེབ་ཕྲལ་ཁམས་པ་བཅོ་ལྔ་སྐོར་ལ་ཁྲིད་བཏབ། གངས་རིའི་ཁྲོད་ཙམ་ན་སྦྱངས་ཡོན་བཅུ་གཉིས་དང་ལྡན་པའི་དགེ་སློང་ཀོང་པོ་རྒོད་ཚང་པ་སྣ་ཚོགས་རང་གྲོལ་གྱི་སྐྱེ་བ་གསུམ་པ་རྒྱ་ལར་བྱུང་བ་རྒྱལ་ཆོས་མཛད་ནས་འདིར་གསན་བསམ་ལ་ཕེབས་ཐུབ་རེ་བྱས་ཀྱང་གཞན་
དབང་དུ་གྱུར་པ་འདི་སྐབས་སྐུ་ནར་སོན་པའི་དགོངས་དཔྱད་ཀྱི་མཇལ་མ་ཐུབ་ཚུལ་དང་། རྣམ་བ་ཀུན་ཏུ་རྗེས་སུ་འཛིན་དགོས་ཞེས་ལྷ་རྫས་བཟང་པོ་དང་། སྒམ་དྲིལ་ལེགས་པ་བཅས་འབྱོར་། དེ་ཀའི་ལན་དང་བདུད་རྩིའི་ཕུར་མ་ཕེན། ཡོན་ཏན་མཛོད་བཅས་ཕུལ། བར་སྐབས་ན་ལྷོ་རྒྱུད་གཉལ་ཕྱོགས་ལ་མདོ་སྒྱུ་སེམས་གསུམ་གྱི་མཚོན་སྔ་འགྱུར་གྱི་རིང་ལུགས་འཛིན་པ་ཏ་མྦྷོ་བ་སངས་རྒྱས་བཙོན་འགྲུས་དང་། ཤ་གཟུགས་བ་མངྒལ་སོགས་ཀྱི་ཆོས་རྒྱུད་འཛིན་པ་ས་ལ་བླ་མ་དང་། དམོ་སྨད་རུ་དམ་པ་འཇིགས་མེད་བློ་གསལ་ཅན་མདོའི་སྒྲུབ་མཆོད་ཐོག་འཛིམ་པ་ལ་ཉེ་བཟང་ཞིང་སྐྱེས་ཐོབ་དང་ལྡན་པ་སྨིན་གྲོལ་གྱི་གོ་བརྡ་འཕྲོད་པས་མཛོད་གསར་རྙིང་གི་བཤད་ལུང་དང་རགས་རིམ་བཀའ་གཏད་སོགས་ཀྱང་བྱས། ཤི་བརྤ་ཏར་ཚོགས་འཁོར་དང་བཅས་འདུ་ཁང་གི་ཀ་རིང་ཐོབ་ལྕམ་གླིང་འདོམ་དྲུག་གིས་བྱིབ་ཁེབས་ལ་རྒྱ་གར་ཁ་ཐིའི་གནམ་རྒྱན་དང་། དྲིལ་བུ་ཐེག་ཆེན་ཆེ་བ་སྤྱི་རྫས་སུ་སྦྱར། མདོ་ཁམས་པ་འཇིགས་མེད་ཕྲིན་ལས་འོད་ཟེར་གྱི་དཔལ་ཆེན་གྱི་ལས་མཐའ་རོལ་བ་ཆེན་པོའི་གཏོར་བཟློག་སོགས་བཏང་སྙོམས་སུ་མི་བཞུགས་པར་ཅི་ནས་གཏན་འབེབས་མཛད་དགོས་ཞེས་ནན་ཏན་ཆེ་ཡང་། སྤྱིར་བརྡ་སྒྱུར་རྟེན་འབྲེལ་གྱིས་ཆེ། ཁྱད་པར་མངོན་སྤྱོད་བ་ཞེན་པས་ཅི་མི་སྙམ་བར་ལུས་ཐོག །རུ་དམ་པ་འཇིགས་
མེད་བློ་གསལ་ཅན་གྱིས་གསོལ་བ་ནན་ཏན་དང་བཙུན་མོའི་ཕོ་ཉ་འཛོམ། དབྱིངས་ཀྱི་ཌཱཀྐིའི་ཞལ་ལུང་ལྟར་རྒྱུད་ལུགས་སྒྲ་ཇི་བཞིན་པའི་ཧེའུ་ཀ་རིགས་བཞིའི་སྒོས་སྒྲུབ་བཀའ་གཏེར་ཟུང་འཇུག་གི་འབྲེལ་བའི་གཏེར་རྒྱ་གྲོལ། དེ་ཡང་རང་གཞུང་ལས། གལ་པོ་ལ་སོགས་ཧེ་རུ་ཀའི ཏནྟྲཀུན་གྱི་བཅུད་ཀྱང་འདྲིལ ཞེས་པ་ལྟར་ཧེ་རུ་ཀ་གལ་པོ། གཤིན་རྗེ་ཟླ་གསང་སྡིག་པ་སྟོབས་ཆེ། རྟ་མཆོག་རོལ་བ། ཕུར་བ་རྩ་རྒྱུད་རྡོ་རྗེ་ཁྲོས་པ་གཙོ་གྱུར་རྒྱུད་ལས་མན་ངག་ཏུ་འདྲིལ་ཞིང་སྒྲུབ་མཆོད་ཀྱི་རྒྱུན་བཙུགས་པས་ཁྲི་སྲོང་ལེའུ་བཙན་གྱི་ལོ་པཎ་སྤྱན་དྲངས་ཤིང་འབད་པས་བསྒྱུར་བའི་རྒྱུད་རྣམས་རྡུལ་ཁྲོད་ལས་དབུགས་འབྱིན་ཐོབ། རོལ་པ་ཆེན་པོའི་གཏེར་བཟློག་གི་བརྡ་རིས་གྲོལ་བའི་འབྲེལ་སོགས་ཀྱི་བདག་པོའི་རྐྱེན་ནི་བཙུན་མོ་དམ་བ་ངང་ཚུལ་བྱང་ཆུབ་རྒྱལ་མོས་མགུལ་རྒྱན་བསྐུར་བ་ལས་བྱུང་བས་ལུང་ཟིན་གྱི་སྐྱེས་བུར་སྣང་། སྔ་སོར་ལྷོ་འབྲུག་ཕྱོགས་ནས་སློབ་མའི་དམ་པ་ཀུན་གྲོལ་བུ་མ་ཐང་ཐ་བའི་བྲག་ལ་ལོ་གསུམ་གྱི་དུས་རྨི་ལྟས་ལ། །དགོངས་པས་བརྒྱུད་པའི་ཆོས་བཀའ་འདིར། །ཤོག་དྲིལ་ཁ་དོག་རྣམ་ལྔ་ལས། །བཞི་ནི་ཀློང་ཆེན་སྙིང་ཐིག་སྟེ། །གཉིས་ནི་དངུལ་གཏན་མ་ཕེབས། །དོན་དམ་ངོ་བོ་ཨོཾ་ཨཱ་ཧཱུྃ། །ཡི་གེ་གསུམ་གྱི་རྣམ་པར་གནས། །དེ་ལ་བསམ་བརྗོད་སྤྲོས་པ་བྲལ། །
ཞེས་བླ་མ་དང་མཇལ་ནས་གསུང་བྱུང་བས་གཉིས་པོའང་བཏང་སྙོམས་སུ་མི་འཇོག་པར་གསོལ་བ་སྙིང་ནས་འདེབས་ཞེས་བྱུང་བའང་དོན་ལ་གནས། །ཁོང་ཅག་གིས་བསྐུལ་ནས་བར་དོ་དང་བདེ་བ་ཅན་གྱི་སྨོན་ལམ། བཙུན་མོ་ལ་སྤྲིང་བའི་གཏམ་རྐང་པ་བཅོ་ལྔ་པ་ཡང་བྲིས། དབྱར་ངོ་འདིར་སྲིད་པ་ཕྱི་མའི་རྟེན་འབྲེལ་དུ་དམིགས་ནས་རང་བཞིན་སྤྲུལ་སྐུའི་ཞིང་ཁམས་ལས་རྣམ་གྲོལ་དབུགས་ཆེན་འབྱིན་པ་ལྔ་སོགས་ཐང་སྐུ་རྒྱུ་ཚོགས་དག་བགྲ་ཚེར་བརྒྱད་བཞེངས། དམིགས་ཡུལ་འབྲེལ་ཐོགས་ལ་ཆུ་གཏོར་འབུམ་ཐེར་དང་། ཡུལ་མི་དབུལ་པོ་ལ་སྦྱིན་གཏོང་གང་ལྕོགས་བྱས། ཆོས་རྗེ་བྲག་ཕུག་པར་སྤྲོ་བ་བསྐུལ་བ་བཞིན་ཁོང་གིས་དང་དུ་བླངས་ནས་བསམ་མཆིམས་སུ་སློབ་དཔོན་ཆེན་པོ་སྐུ་ཚད་ཆེ་བ་བཞེངས་པའི་རབ་གནས་ལ་བསྐྱོད། དངོས་སྟ་སྤྲེལ་བ་དང་། བོད་ཁམས་བདེ་བའི་སྨོན་ལམ་བྱས། བྲག་དཀར་ཀེའུ་ཚང་དུ་བརྒྱ་མཆོད། ཚེ་ཆོག་དང་འབྲེལ་བར་ཚོགས་བརྒྱ། མེ་མཆོད་ཁྲི་ཚར། གཟིམ་ཕུག་ཏུ་རྒྱ་རག་གྱི་མཎྜལ་ཕུལ་མ་ཆེ་ལེགས་ཞིག་ཕུལ། དགོན་པས་སྦུག་ཏུ་དད་ལྡན་སློབ་དཔོན་ལགས་ཀྱིས་བསྙེན་བཀུར་འབུལ་ནོད་དང་བཅས་རིང་འཚོའི་རྟེན་འབྲེལ་མཛད། བསམ་ཡས་སུ་སྟོང་མཆོད་དང་སྙན་ཤལ་བརྒྱ་ཕྲག་ཕུལ། ཁྲུས་གསོལ་བརྟན་བཞུགས། བོད་ཁམས་བདེ་བའི་སྨོན་ལམ་བཏབ།
བར་ཁང་དུ་དགེ་བྱམས་བསྟན་འཛིན་གཉིས་ཀྱིས་ཞབས་ཏོག་དང་བཅས་ཚེ་ཆོག་ཚོགས་བརྒྱ་བཏང་སར་རབ་བྱུང་དབུ་མཛད་པས་ཧོར་དྲིལ་ཞིག་ཕུལ། བཀྲལ་དཔལ་དུ་ནོར་རྒྱུན་མའི་གཡང་རྟེན་རྒྱས་པར་བཙུགས། གཙུག་ལག་ཁང་གི་ཉེ་ལོགས་ཡིན་པས་ས་བཅུད་གསོ་བའི་རྟེན་འབྲེལ་བསྒྲིགས། དཀོན་གཉེར་དཔོན་གྱིས་སྡུམ་པར་བསྟི་སྟང་རྒྱས་པར་མཛད། ཀ་ཆུ་རྡོ་རིང་པའི་མས་རྣ་རྒྱན་ཕུལ་བའི་དགེ་བ་རྫོགས་བྱང་དུ་བསྔོས། གཞུངས་ནས་དོ་དམ་གཏོང་ཁྲ་འབྲུག་གཙུག་ལག་ཁང་ལ་རབ་གནས་བྱེད་དགོས་ཕེབས་པ་ཆོག་རོགས་པ་བཅོ་ལྔ་བཅས་དངོས་སྟ་ཉིན་གསུམ་མའི་རབ་གནས་རྒྱས་པའི་སྦྱིན་སྲེག་རྣམས་གཏོང་སྒྲོའི་ཁྲལ་འཇལ་ལ་ཆ་མ་བཞག་པར་བསྟན་འགྲོའི་ཉེར་འཚེ་མེས་དཔོན་གྱི་གཙུག་ལག་ཁང་ལ་གནས་པས་ངེས་པས་གཏོར་ཚོགས་དང་མཆོད་པའི་སྤྲིན་རང་སྟོབས་ཀྱིས་དང་དུ་བླངས། ཕན་ཚུན་གྱི་རབ་གནས་ཐམས་ཅད་ལ་ཐན་སྒང་ལ་ཆར་ཆུད་གློ་བུར་དུ་བརྡོལ་བ་སོགས་དཀོན་མཆོག་གི་ཐུགས་རྗེ་ལ་ངེས་ཤེས་སྐྱེས། འཇིག་རྟེན་པ་རྣམས་ནི་ཕོ་ལྷ་ཆེ་གེ་མོའི་ཐུགས་རྗེ་ཡིན་ཟེར་བ་ཡི་དགས་ལ་ཡིད་ཆེས་པ་ཙམ་དཀོན་མཆོག་ལ་བྱུང་ན་ཨཱ་སྙམ་པ་ཤར། འབྱུང་པོ་རང་རྒྱུད་པ་ལ་ཆར་བའི་དབང་ཡོད་མིན་མདོ་སྡེ་དྲན་བ་ཉེར་གཞག་ལ་ལྟོས། འབྲས་སྤུངས་བདེ་
ཡངས་བླ་མས་སྔ་སོར་ཡོན་ཏན་མཛོད་གཟིགས་པས་འདི་ཕྱོགས་སུ་ཕྱག་མཛོད་པ་དང་ལྷན་ཅིག་ངེད་ཚོལ་འདི་འདྲ་ཡོད་ན་གདུགས་བཅུ་གསུམ་བསྐོར་ཞེས་ཞལ་བཀྱལ་མཛད་ཟེར་བ་བཞིན་རྩེ་ཚོགས་མཁན་པོར་ཕེབས་མ་ཐག་པ་དང་འགྲིག་པས་གསང་སྔགས་ཕོ་བྲང་དུ་མཇལ་དུ་ཕེབས། མགྲིན་པ་ལོངས་སྤྱོད་ཀྱི་འཁོར་ལོའི་རྩ་མདུད་གྲོལ་བ་ཁྱེད་ལ་ཕྱག་འཚལ་ལོ་ཞེས་གཏིང་ནས་གུས་པའི་རྣམ་འགྱུར་དང་བླ་མ་དང་མཇལ་བ་སྐལ་བ་ཆེ། ཁ་ཕྱིར་བལྟས་ཀྱི་ཐོས་བསམ་གྱིས་ལྟ་བའི་དེ་ཉིད་མི་རྟོགས་པས་ད་རེས་རྫོགས་པ་ཆེན་པོའི་ངོ་སྤྲོད་མཐིལ་ཕྱིན་པ་ཞིག་ཞུ། མཁས་པ་ཀློང་ཆེན་པའི་གསུང་རབ་མཐོང་བ་ལ་བརྟེན་ནས་ཕྱོགས་འདི་ལ་ངེས་ཤེས་རྙེད་པ་ཡིན་གསུང་། དྲི་བ་དྲི་ལན་གྱི་སྒོ་ནས་ཆོས་ཉིད་གཤིས་ཐོག་ཏུ་ངོ་སྤྲད། སྐྱེ་བ་ཕྱི་མ་བླ་མ་གང་ཕེབས་སར་ང་ཡང་ཁྲིད་ཅིག་གསུང་། དེའི་གོང་ཙམ་དུ་བརྤ་ཏའི་སྐྱོང་བྱེད་དུ་གྲགས་པས་སྤངས་རྟོགས་ཀྱི་ཡོན་ཏན་གང་ཡོད་ཅེས་བསྒྱུར་སྦྱངས་བྱས་བྱུང་བ་དང་། འཇིག་རྟེན་ལ་གྲགས་ཚོད་ཀྱི་གོས་དང་། སྡེ་སྣོང་མཁྱེན་པའི་བཤེས་གཉེན་ཆེན་པོ་འདི་ཙམ་གྱིས་གཟིགས་སྟངས་འཛོལ་ལུགས་ཀྱིས་ཀྱང་སེམས་ཅན་གྱི་ལས་སྣང་ལ་སྐྱོ་བ་ཆེན་པོ་སྐྱེས། ཡོན་ཏན་མཛོད་དང་སྐྱེས་རབས་ཆོས་འབྲེལ་དུ་ཕུལ། སླན་ཆད་རབ་བྱུང་ལ་སྤྲིང་བའི་གཏམ་དེ་བསྔགས།
གོང་ས་རིན་པོ་ཆེའི་བཀའ་ཤོག་རིན་ཆེན་གཉིས་པ་སྤང་བཅོ་ལྔ་བཅས་པ་དེ་གཟར་ཆིངས་སྒྲི་སྐོར་ལ་ཕ་རོལ་སྣང་བ་དབང་བསྒྱུར་གྱི་ཕྱིན་ལས་བྱེད་དགོས་ལ། སེམས་ཅན་བདེ་ཐབས་ལ་སེམས་སྟོབས་ཆེན་པོའི་ཁུར་ལྷན་སྐྱེས་སུ་ཡོད་པས་སྔ་འགྱུར་རྟ་མཆོག་རོལ་བའི་བསྙེན་སྒྲུབ་བདག་གི་སྦྱིན་སྲེག་བཅས་རྟགས་མཐོང་གི་བར་དང་དུ་བླངས། འདི་ཙམ་ན་ཏིང་ངེ་འཛིན་ལས་སུ་རུང་བས་དུས་གཅིག་ཅར་དུ་ཕྲིན་ལས་བཞིའི་དམིགས་པ་ལའང་རང་དབང་ཐོབ། དེའི་ཚེ་སངས་རྒྱས་འབྱུང་བ་ལ་མཉེས་པར་མི་བགྱིད་པའི་གནས་སུ་གཟིགས་པ་དུས་ལས་ཡོལ་བའི་ཇོ་བོ་ཕྱོགས་ལས་རྣམ་རྒྱལ་པདྨ་འོད་གླིང་གི་བཀའ་འགྱུར་རྟེན་གཙོར་བྱོན། བཟོ་བགྲོས་དང་སྐུ་རྒྱུ་གཅིག་པོས་ཀྱང་ངོམས་པར་སྣང་བས་སྤྱན་དྲངས་པའི་ཡོན་སྲང་འཁོར་སུམ་ཅུ་བསྟབས། དཔལ་འཁོར་ཆོས་སྡེ་ནས་རིན་སྡིངས་བླ་མ་སངས་རྒྱས་ཕྲིན་ལས་ཀྱིས་བྷ་ན་དྷ་དུམ་བུ་གཅིག་པ་དང་། གོང་ས་ལྔ་པའི་ཕྱག་དྲིལ་ཡིག་རྟགས་འབྱར་བའི་ཁྱེད་བྲེལ་ངོ་མ་འབུལ་བར་རྒྱང་མཁར་དགེ་སློང་འབྱོར་བརྟེན་འབྲེལ་གྱི་སྒོ་ཆེན་པོར་སྣང་། རྒྱང་རུ་ནས་དཔལ་སྡིངས་རྗེ་བཙུན་དྲུང་དང་ཡབ་ཀྱི་སྐུ་སྐྱེ་འཇིགས་མེད་བསྟན་པའི་ཕྲིན་ལས། ཡང་ཞབས་གཅུང་པོ། ཧཱུྃ་ལྕམ་བཅས་ཉི་ཤུ་སྐོར་ལ་ཁྲིད་དང་། དབང་ལུང་། ཕུར་བརྒྱུད་ལུགས། སྒྱུ་འཕྲུལ་ཞི་ཁྲོ། རང་
མཛོད་རྩ་འགྲེལ་སོགས་བཀའ་གཏད་བྱས། འདི་དག་དད་ལྡན་གྱི་སློབ་བརྒྱུད་ཡིན་བས་འདི་ལོ་རེ་གཅིག་པའི་ཀེག་དོགས་པ་དམིགས་པའི་རིང་འཚོའི་རྟེན་འབྲེལ་མཛད། ལོ་མཇུག་ལྕགས་ཟམ་ནས་གྲུབ་དབང་ཆེན་པོའི་གདན་ས་བརྟན་འཕེལ་གྱི་ཕྱིར་རྟེན་གསུམ་ལ་རབ་གནས་བསྐྱར་བས་མཚོན་པའི་དོན་གཉེར་ཆེན་པོའི་སླད་དུ་གདན་འདྲེན་ནན་ཏན་ཆེ་བའི་ཞལ་ངོ་མ་ལྡོག་པར་སྐོར་ཅིག་བསྐྱོད་དགོས་ལ། ཆུ་མིག་ཁ་ནས་ཡིན་ཟེར་བའི་ཆོས་སྐྱོང་ཕོ་རྒྱུད་གཉིས་དང་། མོ་རྒྱུད་གཙོ་འཁོར་ལྔ་པས་གདན་འདྲེན་གྱི་རྣམ་པ་བྱས། བསྟན་པ་ལ་དགའ་བའི་རིགས་རྣམས་དམ་ཚིག་ལ་གུས་པར་སྣང་། ཀློང་ཆེན་སྙིང་ཏིག་ནས་བཀའ་འདུས་ཆོས་ཀྱི་རྒྱ་མཚོའི་སྐོར་སོགས་སར་བྱུང་གི་དབང་ལུང་རྣམས་ཕུལ། ཆོས་སྒོ་གསར་པ་རྣམས་ལ་ལྗགས་བསྙེན་གྱི་དམ་བཅའ་ཡང་མཛད་པས་དེའི་གོང་དེར་རྨི་ལམ་དུ་སྤྲུལ་པའི་སྐུ་སངས་རྒྱས་མཉམ་སྦྱོར་ལ་འགྲེལ་པ་མཛད་པར་མཐོང་བས་ཡང་དག་འདི་ལག་པར་བཀའ་བབས་ཀྱི་ཆོས་བདག་ཡིན་པར་རིག །གཟའ་ཚེས་ལེགས་པ་དང་བསྟུན་བཀའ་འདུས་ཕུར་པ་བདུད་དཔུང་ཟིལ་གནོན་གྱི་དཀྱིལ་འཁོར་ཐོག་མར་ཞལ་ཕྱེ་ནས་དངོས་སྟ་ཉིན་གཉིས་མའི་རབ་གནས་ཀྱི་ཁོངས་སུ་ཞི་རྒྱས་གཉིས་ཀྱི་སྦྱིན་སྲེག །སྐུ་འབུམ་ལྕགས་ཟམ་གཙང་ཁང་ཆེན་ཆེན་མོས་མཚོན་པའི་
གནས་རྟེན་ཐམས་ཅད་ལ་མེ་ཏོག་གཏོར། ལྡོག་པར་ཉེ་བ་ན་སྐུ་གསུང་ཐུགས་རྟེན་གྱིས་གཙོས་པའི་འབུལ་ནོད་གྱ་ནོམ་པ་དང་བཅས་བསུ་བཟློག་དང་འབྲེལ་བའི་བརྟན་བཞུགས་མཛད་པའི་ཤིས་བརྗོད་ཀྱི་དུས་སྤྲུལ་པའི་སྐུ་རིན་པོ་ཆེ་མཁྱེན་རབ་ཆེ་བས་རྙེད་བར་དཀའ་བའི་རྡོ་རྗེ་སློབ་དཔོན་དུ་ངེས་པའི་བསྔགས་བརྗོད་འགྲེལ་ཆགས་པ་དང་བཅས་ལོ་བརྒྱ་ཕྲག་ནས་བརྒྱད་ཅུའི་བར་དུ་འཚོ་ཞིང་གཞེས་གདུང་བ་ཆེན་པོ་མཛད་པ་ཡང་དྲུག་ཅུ་རེ་གཅིག་པའི་ཀེག་དོགྲ་ནས་གསོས་ཐེབས་པའི་རྟེན་འབྲེལ་ཆེན་པོར་གྱུར། གྲུ་སོའི་རྣམ་གཡེང་དང་ཁྱིམ་པ་ཚོའི་གནས་དུས་ཀྱི་དབྱ་ཁྲལ་ལ་ངེས་འབྱུང་དང་སྙིང་རྗེ་ལྷན་སྐྱེས་སུ་ཤར། ཉེ་ཕུལ་ཤས་བརྟེན། རང་གནས་སུ་སླེབས་ནས་པད་གླིང་རུས་བརྒྱུད་བུམ་ཐང་ཆུ་སྨད་ཞལ་ངོ་དགེ་སློང་ཆོས་གྲགས་ཅན་བརྒྱད་ལ་ཀློང་ཆེན་སྙིང་ཏིག་ནས་ཁྲིད་སྨིན་པར་བཤད། མོན་ཡུལ་ཝང་ཐང་ནས་བརྒྱུད་འཛིན་གྱི་སློབ་བུ་ཀུན་གྲོལ་ཅན་གྱིས་བསྐུལ་བྱང་ལ་རྟེན་མ་མགོན་གྱི་བརྡ་བསྒྱུར་གྲོལ་བའི་རྟགས་སུ་སོག་པོ་ལྷ་བཟང་ཁོང་བཙུན་མོ་དང་བཅས་པས་དངོས་ཅག་ལ་གཙུག་ཕུད་དབྱུང་ཞིང་དགེ་བསྙེན་གྱི་སྡོམ་པ་ནོད་པའི་རྨི་ལྟས་གསལ་བ་བཞིན་ཆོས་སྐྱོང་སྲོག་བཅའ་བར་གཉིས་ལ་སྤེལ། བཀའ་མཁྱད་པར་ཅན་འདི་དག་མི་ནུབ་པར་རེ་
ནས་ཡང་དག་ལྷ་དགུ་དང་། སངས་རྒྱས་མཉམ་སྦྱོར་གྱི་དབང་འདུས་པ་བཅོ་ལྔ་སྐོར་ལ་བསྐུར། བུམ་ཐང་པ་བླ་མ་ཆོས་གྲགས་བླ་མའི་ཕྱོགས་སུ་གཏོང་ཕོད་ཆ་བས་སྐུ་གསུང་ཐུགས་རྟེན། རི་དྭགས་ཀྲྀཥྞ་སའི་སྟན་འཇའ་ལྡན། གསེར་སྲང་ལྔ། དངུལ་ལྔ་བཅུ་མ་བཅས་རིང་འཚོའི་རྟེན་འབྲེལ་བསྒྲིགས་ཤིང་མཎྜལ་གྱི་བཤད་པ་རྒྱས་པར་བྱུང་། ནགས་ཤོད་ནས་ཉི་གྲགས་སྤྲུལ་སྐུ་འཇིགས་མེད་བསྟན་པའི་སྡེ་དཔོན་གཡོག་ཉི་ཤུ་སྐོར་བྱོན་པར་ཀློང་སྙིང་ཡོངས་རྫོགས། བླ་མ་གསང་འདུས། ཕག་མོ་ཟབ་རྒྱ། རྒྱ་ཅན་དབང་ཁག་སུམ་ཅུ་སྐོར་ཆ་ཚང་། རང་བསྟན་ལ་སྨན་རེས་གྲོལ་ཏིག་ཆ་ཚང་། སྨན་བླ་དང་། ལྷ་མོ་འོད་ཟེར་ཅན་མ་སོགས་རྗེ་གནང་ཁ་ཤས་དང་། འཁྲིད་ཤིན་ཏུ་སྨིན་པ་བྱས། བརྟན་བཞུགས་དང་འབྲེལ་བར་ཆོས་ཡོན་དུ་དངུལ་རྟ་རྨིག་མ་གཉིས། རྟ་མཛོ་འདྲེས་པ་བཅོ་ལྔ་སྐོར། མར་ཁལ་ཉི་ཤུ་བཅས་འབུལ་ནོད་རྒྱ་ཆེ། ལྨ་བདེན་ལ་རེ་དོངས་ཀྱི་སྦྱོས་པ་ཉེ་བར་ཞི་བའི་ཚེ་ཟང་ཟིང་གི་རྙེད་པ་ལ་དགའ་བློམ་མི་འཆར་བ་ཆོས་ཉིད་དུ་འདུག་ཀྱང་། གཞན་དགོང་འདི་ཅེས་པ་ཙམ་ནས་དབང་བཅུ་ཐོབ་བའི་བྱང་ཆུབ་སེམས་དཔའ་ཡིན་ན་མ་གཏོགས་བླ་མ་དང་དགེ་བཤེས་སུ་གྲགས་པ་རྣམས་ཀྱི་ཚེ་ལ་གཞར་བའི་སྤུ་གྲིར་ངེས། ལམ་བདེན་ལ་རེ་དོགས་ཀྱི་བློས་ཉེ་བར་ཞི་དངོས་བསྟན་ཅིག་ཡིན་ཀྱང་
ལུས་འིད་སྡུག་བསྔལ་བདེན་པའི་རང་དུ་འདུག་ན་ཡོན་སྦྱངས་ལ་འབད་དགོས་པར་འདུག །ལོ་འདིར་རང་གཞན་གྱི་ཚོགས་གསོགས་ལ་དམིགས་ཁྲག་འཐུང་རིགས་ལྔའི་དཀྱིལ་འཁོར་དུ་ཞི་བའི་སྦྱིན་སྲེག་འབུམ་ཐེར། གཙོ་བོར་ལག་འདོན་ལ་སེམས་བསྐྱེད་མཆོད་པའི་ཞལ་འདེབས་དང་བཅས་སྙིང་རྗེ་ཤེས་མི་བཟོད་པའི་བློས་ལུག་སུམ་ཅུ་ཐམ་པ་གྲི་འོག་ནས་བསླུས། ཚེ་གཟུངས་འབུམ་ཐེར། སྒོམ་གྲར་ཚོགས་སྟོང་རྩ་དང་འཚོ་བའི་མཐུན་རྐྱེན། དཔལ་རིང་ཉིན་བདུན་གྱི་བར་བཀའ་འགྱུར་གསུང་སྒྲོགས་པ་ཊཾ་ཁ་རེ་དང་། མང་འགྱེད། ཟོང་རས་ཞོ་སུམ་རེ་བཏང་། སྤྱི་རྫས་དངུལ་དཀར་གྱི་ཕུད་སྐྱོགས་ཆེ་ལེགས་དང་འཕྱར་དར་ཟིན་སྐྱ་ཆ་གཉིས་སྦྱར། ཕྱོགས་མགྲོན་གྱིས་སུན་པས་མཚམས་རྒྱའི་མུ་ཡིན་ཀྱང་གྲ་ཚང་གི་ནན་བསྟུད་དང་བསྟུན་ཆོགས་དབུར་བརྟན་བཞུགས་ལ་ཕྱིན། དཔལ་རྙིང་པ་རྣམས་ལ་སྣང་སྦྱོར་སྦྲེལ་དང་ཐུག་པ། དེ་པའི་མི་ལྟོགས་རྣམས་ལ་ཞོ་རེའི་སྦྱིན་གཏོང་བྱས། རི་བདེར་ཇག་སུམ། མངའ་གྲར་ལོ་ལྟར་གྱི་མང་ཇ། འདི་པའི་ཡུལ་མི་དབུལ་པོ་རྣམས་ལ་སྦྱིན་པ་ཅི་ནུས་སོགས་བྱས། འདི་སྐོར་སྐྱེ་བོ་མང་པོ་ལ་གྲི་བ་གནོན་ལྟ་བུར་འཚོ་ཞིང་སྒོམ་གྲར་རྒྱུ་ཅུང་ཟད་ཀྱང་མེད་པར་ངན་སེམས་འཆར་བའི་སྡིག་ཏོ་ཅན་ལ་ལས་སྔ་
ལོ་སྒྱུར་སྦྱོང་བྱས་པ་ནས་བཟུང་རང་ཉིད་ཀྱི་བསོད་ནམས་ཟད་བའི་རྒྱུར་སོང་ནས་དམ་ཅན་རྣམས་ཀྱི་ཨ་བྷི་ཙརྱའི་ཕྲིན་ལས་ལ་སྦྱར་བའི་མངོན་རྟགས་གྲལ་དུ་གསལ་བ་ལ་སྙིང་རྗེ་ཆེན་པོ་སྐྱེས་ཤིང། སྨོན་ལམ་ཡང་བྱས། སྡིག་གྲོགས་བླུན་པོའི་ཕྱོགས་འཛིན་པའི་དམ་ཚིག་སྐྱོན་ཅན་དག་གིས་བཤགས་པ་བྱུང་བར། སངས་རྒྱས་ལ་ལྷས་བྱིན་དང་མ་སྐྱེས་དགྲས་སྒྱོགས་འཕངས། གླང་ཆེན་སྨྱོན་པ་ཆུ་པ་ལའང་འཁོན་དུ་བལྟ་བ་མེད་ན་དྲེན་ལན་ལོག་འཇལ་བྱེད་བ་འཇིག་རྟེན་ན་མང་བས་བྱང་ཆུབ་སེམས་དཔའི་སྡེ་སྣོད་རྒྱུད་ལ་འདྲིས་པའི་གཞན་དབང་དུ་བཏང་ཡང་གསངསྔགས་ཀྱི་སྲོག་དམ་ཚིག་ལ་གནས་བའི་རྟེན་འབྲེལ་གྱིས་ཉམས་གྲིབ་ལ་བརྟེན་པའི་འདུ་བ་འཁྲུགས་པ་དང་། ཚེ་ཕྲེང་གློ་བུར་དུ་ལྷགས་པའི་ལྟས་ཀྱང་བྱུང་བས་ཆོས་སྐྱོང་རྣམས་ལ་བཤགས་པ་ནན་གྱིས་བྱས། བྱང་ཆུབ་སེམས་དཔའ་ལ་ངན་སེམས་སྐྱེས་པ་རྣམས་ལ་འབྲས་བུ་མཐོང་ཆོས་སུ་སྨིན་པར་གདའ། །ཇོ་ཤག་དྲུང་དུ་་བཟང་སྤྱོད་འབུམ་ཐེར་གདོན་པའི་འབྲུག་པ་དགེ་སློང་ཅན་ཁ་ཤད་ལ་འཁྲིད་སྨིན་རྒྱས་དང་བཟང་སྤྱོད་ཀྱི་འགྲེལ་བ་རྒྱ་གཞུང་གི་རྗེས་སུ་འབྲངས་ནས་བཤད། ལར་སངས་རྒྱས་ཕལ་པོ་ཆེ་ནས་བྱུང་བས་ཕན་ཡོན་ལ་མཐའ་མི་འཚལ་ཏེ། ལས་དང་པོ་བས་ཐེག་པ་ཆེན་པོའི་སྤྱོད་ཕྱོགས་ཀྱི་གོ་འཆགས་པ་ལ་བྱམས་སྨོན་ཁ་གསལ། ཟླ་
བ་བཞི་པའི་དུས་ཆེན་དང་བསྟུན་འདུས་པ་མདོའི་སྒྲུབ་མཆོད་དང་འབྲེལ་བར་གཙང་རྒྱང་རུ་དཔལ་སྡིངས་པ་ཅན། ཡང་ཞབས། གཙང་ཐེག་མཆོག་གླིང་པའི་གྲ་རིགས་ཨོ་རྒྱན་ཆོས་འཕེལ་ཅན་ལྔ། གཉལ་ས་ལ་ཆོས་རྗེ། ཤ་གཟུགས་སྐུ་སྐྱེ། རབ་བྱུང་སློབ་དཔོན་ཅན་སོགས་འདུས་པ་བདུན་ཅུ་སྐོར་ལ་མངོན་པར་ཆེན་མོ་ཞག་བཅུ་གསུམ་དང་། ཕུར་པ་རྒྱུད་ལུགས། ཀློང་སྙིང་བཀའ་འདུས། བཀའ་བརྒྱད་རྣལ་འབྱོར་རྒྱུན་དབང་། བླ་མ་ཡང་ཏིག་སོགས་དང་འཕྲེལ་བར་སྨིན་ཁྲིད་སྨར་པ་བཏབ། བླ་མཚོར་བྲི་ཐིག །ཆོ་ག་དང་ཕྱག་རྒྱ་སོགས་བསྟན་རྒྱུན་ལ་ཕན་རེས་ལེགས་པར་བསླབས། གཞུང་ས་ནས་དཔལ་རིའི་སྐུ་སྐྱེ་མ་བྱུང་བར་གྲྭ་ཚང་གི་བླ་མའི་ཁུར་བྱེད་དགོས་ཀྱི་རྒྱས་ཕེབས་ཀྱང་། འཇིག་རྟེན་གྱི་མཐུན་འཇུག་ནི་ངོས་ཅག་གི་མི་ཡོད། དེང་སང་གི་གྲ་ཚོགས་ལ་ཆོས་ཀྱི་སྒོ་ནས་ནམ་ཕན་ཐོགས་པ་དཀའ་སྙམ་བྱུང་བ་རང་མལ་དུ་བཞག །འདི་སྐབས་ཤིག་ཉིང་འཁྲུལ་དུ་རྩ་དཱུརྦའི་ཆུན་པོ་སྔོ་ལྗང་འགའ་ཞིག་གིས་བཀང་བའི་ཤིང་རྟའི་ཐག་པ་ཁུ་བྱུག་མི་སྐད་སྒྲོག་པ་ཞིག་གིས་དྲངས་ནས་རང་མདུན་དུ་བཞག་པ་རིམ་གྲོའི་རྟེན་འབྲེལ་དང་། །བསྟན་འགྲོར་ཕན་སེམས་ཀྱིས་བྱ་བའི་འཁོར་ལོའི་མཐུས་ཚེ་འཕྲེང་བསལ་བར་མངོན། རང་ལོ་དྲུག་ཅུ་རེ་གཉིས་པ་འདིར་མཚོ་སྣ་དགོན་རྩེ་ནས་སྤྲུལ་པའི་སྐུ་རིན་པོ་ཆེས་སྤྱན་འདྲེན་
ནན་བསྟུད་ལ། སྔ་སོར་ས་ཕྱོགས་དེར་བསྐྱོད་དུས་འབུལ་བའི་ཕྱི་མར་ང་དེར་བྱམས་མགོན་བཞེངས་ཀ་མའི་སྐུ་ཞིག་སྟེར་མཁན་བྱུང་ཚོ་རྟོག་པ་ལ་ད་ནི་ས་ཕྱོགས་འདིར་བསྐྱོད་པའི་རྒྱུ་མེད་དེ་རྟེན་འབྲེལ་དེ་ནི་དེ་འདྲར་སྣང་ངོ་སྙམ་པ་ལྟར། ན་ཚོད་ཅུང་ཟད་ཐལ་ཀྱང་ད་ནི་རང་གི་བསམ་སྦྱོར་གཉིས་ཀའི་སྒོ་ནས་རང་འདོད་ཀྱི་འཁྲི་བ་མེད་པར་སེམས་ཅན་ལ་ཕན་པའི་དུས་སུ་འདུག་སྙམ་སྤྲུལ་པའི་སྐུའི་དགོངས་པ་བསྐངས། རྟ་ཁལ་བཅོ་ལྔ་སྐོར་གྱི་བསུ་བ་འབྱོར་ནས་རྗེས་འབྲེང་ཆོས་ཞུ་བ་དང་བཅས་རང་འཁོར་ཉི་ཤུ་སྐོར་བསྐྱོད། མགྱོགས་འཕྱད་ཞོན་རྟ་རེ་མོས་བྱས་རང་གཞན་ཐམས་ཅད་མི་སྦྱོར་བའི་དལ་འགྲོས་ཐོག་རྡོ་ཁོག་ལ་ཁར་ཕྱག་མཛོད་པའི་ཆིབས་སུ་དང་། བཅགས་བོར་ཐབ་བསུ་བཅས་སྤྲུལ་པའི་སྐུ་རིན་པོ་ཆེ་རྒྱ་སྒོའི་ཕྱིར་བསུ་བ་ལ་བྱོན། ཁོང་རང་སྲབ་སྟན་འབའ་ཞིག་ལ་བཞུགས་ཤིང་སངས་རྒྱས་འཇིག་རྟེན་དུ་བྱོན་པ་ལྟ་བའི་བསྙེན་བཀུར་དང་བསྟི་སྟང་མཛད། མཚན་ཉིད་དང་ལྡན་པའི་བླ་མ་བསྟེན་ཚར་ནས་སྒོམ་དུས་སྤྱི་བོར་སྒོམ་རྒྱུ་ཡིན་བསྟེན་ཚུལ་ཀྱང་འདི་འདྲ་ཡིན་པ་སྡེ་སྣོད་མཁྱེན་བའི་རྟགས་སུ་འདུག །ཆོས་ཀྱང་རྒྱུད་ཚོད་ལ་དཔགས་དགོངས་པས་དཔྱད་ནས་ཞུ་གསུང་བ་ལས་ཐོབ་རྩིས་མི་མཛད་པས་རང་ཁམས་དང་བསྟུན་ཆོག་པས་གཟུགས་ཡང་བདེ་བར་བྱུང་། མདོ་མཁར་ནས་ཤིང་
མངས་སྐུ་སྐྱེ། ཅོག་པོ་སྐུ་སྐྱེ། གཉལ་ས་ལ་ཆོས་རྗེ། ལེས་པོའི་བླ་མ་གཉིས། རྗེས་འབྲངས་བླ་མ་ཆོས་གྲགས་ཅན་སོགས་དང་། དགོན་རྩེའི་དབུ་མཛད་དགེ་རྒན་སོགས་དབུ་ཆེ་རྣམས་དང་ཕྱོགས་བསྡོམས་འདུས་པ་ལྔ་བཅུ་སྐོར་ལ་ཉིང་ཐིག་ཡ་བཞིའི་བུམ་དབང་རྗེས་འབྲང་ཐུན་མོང་པས་སྨིན་པར་བྱས་ནས། ཐུགས་འདོད་བཞིན་ཀློང་ཆེན་སྙིང་ཏིག་གི་སྤྱི་དབང་སྙིང་པོ་དོན་གསལ་དང་། བཤེས་གཉེན་མང་དག་ཚོགས་པས་སྡེ་སྣོད་ཀྱི་བཤད་པ་རྒྱ་ཆེན་པོ་འབྲེལ་བའི་གདམས་ངག་འཁྲིད་ཀྱི་ལུགས་སུ་སྨིན་པར་བྱས། གཟིམ་ཆུང་ཡངས་པ་ཅན་དུ་སེམས་བསྐྱེད་མཆོད་པ་ལ་སྟོང་མཆོད་སྔོན་དུ་འགྲོ་བས་གྲྭ་ཚང་ཡོངས་རྫོགས་དང་བཅས་སྐྱེས་བུ་ཉིས་བརྒྱ་ཉེ་བ་ལ་དབུ་སེམས་ལུགས་གཉིས་ཀྱི་བཤད་པས་སྣ་དྲངས་ནས་དབུ་མ་ལུགས་ཀྱི་བྱང་སྡོམ་ཕོག །རྗེས་འབྲེལ་དུ་བཟང་སྤྱོད་ཀྱི་འགྲེལ་བཤད་བློ་ཐོག་ནས་བཤད་ཅིང་། ཆེ་ཕྱུགས་གསུམ་དང་། ལུག་བརྒྱད་ཀྱི་སྲོག་བསྐྱབས། འཁྲིད་པ་བྱིངས་ལ་དཔལ་མོ་ལུགས་ཀྱི་བཅུ་གཅིག་ཞལ་དང་། གནས་བཅུ་སོགས་དབང་བཀའ་རྗེས་གནང་གཞན་གྱི་མཐའ་བརྟེན་དང་རྩ་ལྟུང་བཅུ་བཞིའི་འགྲེལ་བ། སྤྲུལ་པའི་སྐུ་རིན་པོ་ཆེར་ཁྲག་འཐུང་རིགས་བཞིའི་སྒོས་དབང་དང་། ཆོས་སྐྱོང་འགའ་ཞིག་གི་
སྲོག་གཏད་སོགས་བྱས། དགོངས་བཞེད་བཞིན་སྒྲུབ་ཆེན་བཀའ་བརྒྱད་ཀྱི་སྨན་སྒྲུབ་བདུན་གཉིས་བགྱིས་པའི་གྲོལ་དབང་འདུ་ཁང་གི་བཞུགས་ཁྲིའི་སྟེང་ནས་བགྱིས་ཤིང་། ཁྲོམ་དབང་ལ་རྟ་དབང་ཆོས་རྫོང་སོགས་མི་དྲག་གིས་དབུས། ལ་འོག་ཡུལ་གསུམ། མེ་རག །སག་སྟེངས། དག་པ་ཤག་ཏི། དུ་་རང་ཚུན་ཚོད་ཀྱི་ལྷ་མོན་དང་། གཉལ་ལོར། ཚོང་དུས་ཀྱི་མི་སྣ་སྟོང་ཕྲག་བདུན་དུ་ཉེ་བ་འདུས་པས་སྐྱབས་འགྲོ་དང་འབྲེལ་བར་ལས་འབྲས་ཀྱི་ཆོས་བཤད། བྱིན་རླབས་དམ་རྫས་ཀྱི་འབྲེལ་པ། སངས་རྒྱས་ཀྱི་མཚན་གཟུངས་སྒྲོགས་པ་སོགས་སྨོན་འཇུག་རྒྱ་གང་ཆེ་བ་བྱས། མི་ཚོགས་དེ་ཙམ་སྔར་མ་དྲན་ཟེར་བ་ལ་སེམས་བསྐྱེད་སྨོན་ལམ་གྱི་འགྲེལ་པ་བཞག་པས་བློ་ཁ་རྫོགས་པར་བྱུང་། ཆོས་སྨན་འབོར་ཀྱང་ཁལ་བཅུ་སྐོར་ཙམ་སྣང་བས་མཚོ་ཆེན་རྣམས་ལའང་བཏབ་ཅིང་ཁྱབ་ཆེ། ས་བཅུད་གསོ་ཕྱིར་ཡུམ་ཀའི་ལས་ཚོགས་ལ་བརྟེན་ནས་ཟངས་བུམ་གྱི་བཅའ་གས་བུམ་གཏེར་བརྒྱ་སྐོར་དང་འབྲེལ་བར་གཡང་སྒྲུབ་གནད་སྨིན་བགྱིས་ཤིང་གཡང་གཏའ་བསྡམས། སྤྱིར་སེམས་ཅན་གྱི་ལས་སུས་འགོག་ཐུབ་ཀྱང་འདི་ལོའི་ཆར་བྱང་ཐང་འདིར་ལོ་ཐོག་སད་ཀྱི་མ་བཅོམ་པ་སོགས་དཀོན་མཆོག་གི་ཐུགས་རྗེ་བསྐུལ་བ་དང་། བྱང་ཆུབ་སེམས་ཀྱི་ནུས་པ་ལ་མཐོང་ཆོས་སུ་
ཡིད་ཆེས། དགོངས་བཞེད་བཞིན་དངོས་སྟ་སྦྲེལ་མའི་རབ་གནས་འབྲེལ་བར་གཙུག་ལག་ཁང་ཡོངས་རྫོགས་ལ་མེ་ཏོག་འཐོར། གྲྭ་ཚང་ལ་མང་ཇ་ལྔ་དང་སྤྱི་འབུལ་ཀ་འཕན་གཉིས། འགྱེད་སྣ་གཉིས། ཇི་སྲིད་བར་ལོ་ལོ་བཞིན་མང་ཇ་ལྔ་རེའི་སྦྱོར་འཇགས་བྱས། དཀར་པོ་བཟང་དུ་བརྒྱ་མཆོད་ཚོགས་བརྒྱ་བཟང་གོས་ཀྱི་རྒྱལ་མཚན་ཆ་བཅས་འབུལ་མི་མང་ག་ སྟག་ཚང་དོམ་ཚང་ལཱང་རྒྱལ་མཚན་ཆུང་དུ་རེ་ཕུལ། ཐོན་ཁར་བརྟན་བཞུགས་ཀྱི་སྔོན་འགྲོར་སྤྲུལ་སྐུ་རིན་པོ་ཆེ་སྡེ་སྣོད་ཀྱི་མཁྱེན་པ་རླབས་ཆེ་བས་གངས་རིའི་ལྗོངས་ཀྱི་རྒྱལ་བསྟན་ཉེ་འཁོན་མེད་པར་སྦྱོར་བའི་དགག་སྒྲུབ་གནད་ཐོག་ཏུ་འགྲོ་བས་མཎྜལ་གྱི་བཤད་པ་དེ་ཙམ་སྔ་ན་མ་བྱུང་བས་ཐོག་དྲངས། སྐུ་གསུང་ཐུགས་རྟེན། དངུལ་དཀར་གྱི་མཎྜལ་ཕུལ་མ། ཧོར་སྦུག་ཤུབས་བཅས། གཡང་ཏྲིའི་ཡོལ་གོ །འཕྲེང་བ་རིན་ཐང་ཅན། འགོ་སྣམ་གྱི་སྟན་དམར། འགན་སྦྱར། སྐུ་འགག །གསེར་ཞོ་བཅོ་ལྔ། དངུལ་རྡིལ་ཚད་ལྔ། གླང་མཆེ། རྒྱ་ཀོང་། སྟག་སྒམ་ཆ། ནང་མཛོད་སྣ་ལྔ་། མར་དོ་བཅུ་གཉིས། འབྲས་ལྟང་སུམ་ཅུ། དེས་མཚུང་རྒྱ་ཚོས་ལྟང་། བཙོད་དོ། སྟག་གཟིག་དོམ་ལྤགས དོ་པོ་རེ་རེ་བཞིན་རས་ཆའི་དགུ་ཚན་སྤེལ་བ་སོགས་དངོས་གྲངས་བརྒྱ་འབུལ་ལྷག་བཅས་ཀྱི་
བསྟི་སྟང་སྔ་ན་མེད་པ་མཛད། ངེད་ལྡོག་པར་ཐུགས་ཤིན་ཏུ་འཕྲེང་བས་དགུན་མོན་མཚམས་སུ་བསྡད་ན་དགོངས་པ་འདུག་ཅིང་ཚོ་གསུམ་ནས་སངས་རྒྱས་གླིང་པ་དང་ཁོ་ལོད་སྟོད་པ་སོགས་ཀྱི་གདན་འདྲེན་ནན་ཆེ་ཡང་འདུ་འཛི་ལ་འཇིགས་ཤིང་དབེན་པའི་ཡོན་ཏན་དྲན་པར་མ་ཟད་ནམ་ཟླ་ལྡོག་གདོང་གི་བཤོལ་ཐེབས་མ་བྱུང་ཡང་སྡོད་རིང་དབང་རྣོན་ཆོས་རྗེས་འབྲེལ་པའི་འབྲེལ་གཏམ་ནར་མ་དང་། ཐེག་པ་ཆེན་པོའི་བསྟན་བཅོས་ཤོག་གྲངས་ཉིས་བརྒྱར་ཉེ་བ་ཞིག་མཛད་འདུག་བར་ཡང་ཁེངས་སྐྱུངས་འབའ་ཞིག་གི་དོན་ལ་མི་གནས་ན་བྱིན་ཟ་ལ་འབུལ། ཞུས་དག་གི་འཐུས་ན་དཔྱད་གསུམ་དག་པས་བྱི་དོར་བགྱིད་པར་བསྐུལ་མ་མཛད་པས་ཐུགས་བསྐྱེད་འཕེལ་བའི་ཕྱིར་ཚིག་དོན་གཉིས་ཀའི་ཆ་ལ་དཔྱད་ཞུས་བྱས་ཤིང་དེང་སང་བསྟན་བཅོས་འདི་ཙམ་བརྩམས་ནུས་པའང་དཀོན་པར་མཐོང་བས་རྗེས་སུ་ཡི་རང་བསྒོམས། ཐང་གྲོང་གནས་ཆེན་སོགས་འདྲིས་ཆན་གྱི་སར་སྐོར་ཙམ་རེ་ལས་བསྐྱོད་ལོང་མ་བྱུང་། གསེར་དངུལ་ལྷོ་ཟོང་། བསེ་རུ། གླང་མཆེ། རྟ་མཛོས་མཚོན་དང་འབུལ་རྒྱ་ཆེ་བས་དགེ་བ་རྫོགས་བྱང་དུ་བསྔོས། འབྲུ་དཀར་ལ་སོགས་པའི་དོ་བོ་ལྕིད་ཅན་རྣམས་ཁལ་མ་ལ་སྤྱོད་གཅོད་དང་། ཁེ་གསང་འཚོལ་བའི་ཉེས་དམིགས་ལ་འཇིགས་ནས་གནས་དེ་རང་དུ་ཡང་ཟོང་དུ་བསྒྱུར།
ཚུར་ལམ་མདོ་མཁར་དུ་སྤྱན་འདྲེན་ནན་ཆེ་བས་དེ་བར་དགོན་རྩེ་ནས་མྱོགས་འཕྱང་གསར་བཟོ་འགྱོགས་མི་གྭ་པ་ཞོ་ཤའི་སྟོབས་ལྡན་བརྒྱད་དང་། དྲེའི་གཉིས་སོགས་གནང་བས་ངལ་ཞིང་དུབ་པའི་མཐའ་ལའང་བརྟེན་མ་དགོས་ཤིང་རང་ཉིད་རྡོ་རྗེ་སེམས་པར་བསྒོམས་ནས་བདུད་རྩི་འབེབས་སྦྱོང་གི་དམིགས་པ་ཡང་བྱས། ཚ་ལུང་ཐང་ཀར་དུ་མདོ་མཁར་ཕྱག་མཛོད་པའི་ཕེབས་བསུ་དང་བཅས་རྫོང་དུ་འདུག་རིང་དེ་པའི་དཔོན་གཡོག་སུམ་ཅུ་སྐོར། གྲྭ་ཚང་ཁག་ཆོས་ལུགས་མ་ངེས་པའི་སྨན་བླ་བ། བསྐང་གསོ་བ་དང་བཅས་བར་སྐྱེས་བུ་ཆུང་འདྲིད་གཙོ་བོར་གྱུར་པའི་བཤད་ཁྲིད་དང་བླ་མའི་རྣལ་འབྱོར། །རྟ་མགྲིན་གྱི་རྗེས་གནང་། ཚོམ་ཆེན་དུ་ཡུལ་བ་སྟོང་ཕྲག་ཏུ་ཉེ་བ་ལ་དབང་དང་དམ་རྫས་ཀྱི་འབྲེལ་བ་སོགས་སྔོན་བཞིན་བགྱིས། བྱམས་ཁང་སོགས་སུ་གསུང་ཐུགས་རྟེན་གསར་རྙིང་རྣམས་ལ་ཤིས་བརྗོད་མེ་ཏོག་འཐོར། ཚེ་དཔག་མེད་ཀྱི་སྐུ་དངུལ་ལྔ་བཅུ་མ་དང་། མར་སྟང་བདུན་ རས་ཆའི་དགུ་ཚན་སོགས་མདོར་ན་ལྷོ་རྒྱུད་འདིར་ཆེ་ཆུང་དྲག་ཞན་ཐམས་ཅད་ནས་འབུལ་ནོད་བསྙེན་བཀུར་རྒྱ་ཆེ་ཡང་དཀོར་ཡི་ཉེས་དམིགས་ལ་འཇིགས་བསམ་པ་མ་གཏོགས་བྲོད་སྙམ་པ་མ་སྐྱེས། ཡར་ལམ་ས་སྐྱའི་དགོན་ལག་ཤིང་མང་བླ་གྲས་སྤྱན་འདྲེན་ནན་བསྟུད་སར་
འགག་ཆོས་སྡེའི་མཁན་པོ་བགྲེས་པོ་དང་གྲ་པ་ཕལ་ཆེར་གྱིས་བྱོན་པས་མཚོན་ཡུལ་པ་སྤྱི་དམངས་ལ་ཚེ་དཔག་མེད་སྐུ་གསུང་འདུས་པ་ཁྲོམ་དབང་དུ་བསྐུར། ཤིང་མང་དགོན་པར་ཇ་སྦྱོར་གཉིས། ཊཾ་འགྱེད། འགག་ཆོས་སྡེར་ཀྱང་མང་ཇ་དང་འགྱེད་བཏང་། ལར་དེད་ནི་བསྟན་པ་ཐམས་ཅད་ལ་གུས་ཤིང་གྲུབ་མཐའ་ཐ་དད་པའི་རིང་ལུགས་ལ་ཕྱོགས་ལྷུང་མེད་པས་དེ་དག་སོ་སོའི་བཞེད་པའང་ཉམས་འོག་ཏུ་འཛུལ་བའི་རྟེན་འབྲེལ་གྱི་གཟུ་བོར་གནས་པ་དང་ཡོན་ཏན་ཡོད་པ་ཐམས་ཅད་བྱམས་པར་བྱུང་། ཤིང་མང་བླ་མས་རྟ་འབུལ་དང་། ཆུ་དཀར་ཆོས་རྗེས་མཛོ་མོ་སོགས་དད་འབུལ་ཐམས་ཅད་ཀྱེ་དགེ་བ་རྫོགས་བྱང་དུ་བསྔོས། ལམ་བར་དང་རང་གནས་བསྡོམས་ཕྱུགས་ཕུག་སུམ་ཅུ་སྐོར་གྱི་སྲོག་བསླུ་བྱས། ཤིང་མང་བས་ར་མོའི་བར་ཐབས་བསྐྱེལ་མཛད། དེ་ནུབ་སྒོ་རྒྱར་ར་བ་ཞིག་ཏུ་གནས་མལ་བཏང་། ངོས་ཅག་གི་མཚོ་སྣའི་རྙེད་པ་གཡག་ཁལ་བརྒྱ་སྐོར་མཐོང་བས་དེ་བའིགནས་བརྟན་དེས་བླ་རྒྱུན་པར་ནོར་བསྒྲུབ་དང་སྡུད་རང་མཛད་ཀྱི་ཡོད་བ་ཨེ་ཡིན་བྱས་སྐད། ངེད་བྱང་ཆུབ་སེམས་གཉིས་དང་། ཆོས་ཀྱི་ལོངས་སྤྱོད་རྒྱ་ཆེན་པོ་ལ་དབང་ན། ཟང་ཟིང་ཙམ་ལ་སྙིང་པོར་ཅི་ཞིག་བསྒྲུབ། ལར་དལ་བ་དང་འབྱོར་བ་བདུན་པའི་ཆོས་གཟུགས་རྣམས་ནི་དབང་བཅུ་ཐོབ་
པའི་བྱང་ཆུབ་སེམས་དཔའ་མཐོང་ཡང་ཕྲག་པ་དོག་བར་སྣང་བ་ནི། བཤེས་སྤྲིང་ལས། སེར་སྣ་འཕགས་མིན་ལགས་པར་མཁྱེན་མཛོད། །ཅེས་རང་ཉིད་སོ་སྐྱེ་ཡིན་པའི་མདོ་ན་རྟགས་སུ་བསྟན་ནོ། གནས་དུས་དེར་ལམ་པར་ཆོར་ཁ་བ་དང་བུ་ཡུག་འཚུབས་པའི་འཇིགས་པ་ཤིན་ཏུ་ཆེ་བས་སྐྱེ་བོ་དུ་མའི་སྲོག་འགགས་ཀྱང་དཀོན་མཆོག་གི་ཐུགས་རྗེ་དང་ཆོས་སྲུང་གི་ཕྲིན་ལས་ལ་ཡིད་ཆེས་ཆེན་པོ་སྐྱེས། རང་གནས་སུ་སློབ་ཕྲལ་སྲོང་བཙན་བང་སོར་གཞུང་སའི་ཕུར་སྒྲུབ་བདུན་ཕྲག་དང་འབྲེལ་བར་བརྒྱ་གོང་གསར་འབུལ་གྱི་ཞལ་བསྲོར་སྟོང་མཆོད་དང་། ཕྱེ་བུར་ཆེ་བ་གཉིས་ཕུལ། རིང་མིན་བསམ་ཡས་མཆིམས་ཕུར་བླ་བྲག་པས་མཁའ་འགྲོ་གཉིས་བཞེངས་པའི་རབ་གནས་ལ་བཏེག །དངོས་སྟ་ཉིན་གཉིས་མ་མཐའ་རྒྱས་སྦྱིན་སྲེག་དང་བཅས་གྲུབ་ནས་བྲག་དམར་ཀེའུ་ཚང་དུ་སྒྲུབ་ཆེན་བཀའ་བརྒྱད་ཀྱི་སྨན་སྒྲུབ་དང་། བསྟན་སྲིད་ལར་རིམ་གྱི་རོལ་བ་ཆེན་པོའི་གཏོར་བཟློག་བདུན་ཕྲག་ཀྱང་བྱས། གླེང་སྟོད་སྨད་ལ་མང་ཇ་ལྔ་དང་གསུམ་ཊཾ་བཀྱེས། རང་ཉིད་ཀྱི་མར་མེ་སྟོང་ཕྲག་དང་ཚོགས་བསྐང་མེ་མཆོད་འབུམ་ཟེར་བྱས། འདི་དུས་གཟིམ་ཕུག་ཏུ་ཉལ་སྐབས་བླ་མ་བགྲེས་པོ་ཞིག་གིས་ཚེ་ཆོད་ཡིན་ཟེར་བའི་ཤོག་དྲིལ་ཞིག་ལ་བྲོ་དུས་མེ་
ཟེར་བའི་གྲངས་ངེས་ཤིག་མཐོང་བ་གུ་རུ་རིན་པོ་ཆེའི་ལུང་བསྟན་དུ་མངོན། བླ་མས་བརྟན་བཞུགས་ལ་དངུལ་སྲང་བཅོ་ལྔ་དང་གོས་ཡུག་སོགས་བསྟབས། བསམ་ཡས་སུ་སྐུ་གཉེར་དཔོན་ཡོན་ཏན་རྒྱ་མཚོ་ཁུ་དབོན་ནས་ཡོན་སྦྱར་ཏེ་བར་ཁང་དུ་རབ་གནས་དངོས་སྟ་སྦྲེལ་མ་ཉིན་བརྒྱད་དང་ཕྱི་ཉིན་འཕན་གདུགས་རྒྱལ་མཚན་རོལ་ཆ་ལ་སོགས་པས་སྣ་དྲངས་ཏེ་གཙུག་ལག་ཁང་བྱིངས་ལ་མེ་ཏོག་གཏོར་ཞིང་མཐའ་རྒྱས་སྦྱིན་སྲེག་དང་བཅས་པ་བསྒྲུབས། རབ་གནས་ཀྱི་ཐོག་མཚོ་སྣའི་རྙེད་པ་རྣམས་ལས་སྟོང་མཆོད་ཚར་གསུམ་དང་གསེར་སིལ་མའི་མཎྜལ། ནང་མཛོད་ཀྱི་གཙོས་པའི་སྙན་ཤལ་ཉིས་བརྒྱ་སྐོར་དང་། ལྷ་ས་དང་ཁྲ་འབྲུག་གི་གཙུག་ལག་ཁང་གཉིས་སོ་སོ་མར་མེ་སྟོང་ཕྲག་རེ་རེ་ཕུལ། ཉི་ལྡོག་གི་དུས་ཡིན་ཀྱང་རབ་གནས་ཚུགས་ནས་མ་གྲོལ་བར་ནམ་མཁའ་འཇམ་ཞིང་རླུང་བསེར་བུའི་རྒྱུ་བའང་འགགས་པས་རྟེན་འབྲེལ་བཟང་། རང་གྲར་མང་ཇ་གཉིས་དང་གསུམ་ཊཾ་བཀྱེས། ཁམས་བླ་འཇིགས་མེད་ཕྲིན་ལས་བླ་མ་དྲན་པའི་གདུང་བས་བསྐུལ་ཏེ་མདོ་ཁམས་སུ་སློབ་ཕྲལ་ཡར་ལྡོག་པའི་ས་ཡོན་སྦྱར་ཏེ་རྟ་མགྲིན་སྨན་སྒྲུབ་གནད་སྨིན་དང་། དཀོན་གཉེར་དཔོན་དང་ལྡན་ཁུ་དབོན་གྱིས་བསྐུལ་ནས་དཀར་བཅལ་མཐིལ་དུ་ཁྲོམ་དབང་ལ་མི་སྟོང་ཕྲག་གཉིས་གཙམ་འདུས་པ་ལ་ཆོས་དང་མྱོང་གྲོལ་གྱི་
ལས་འབྲེལ་བཞག །རབ་བྱུང་མཁན་པོས་དབུས་གྲ་ཚང་སྤྱི་ཚོགས་དང་། ཁམས་བླ་གསར་འབྱོར་དཔལ་ལྡན་རྒྱ་མཚོ་དང་། དགེ་རྩེ་བླ་མ། རྫོགས་ཆེན་ཆོས་ཁྲིམས་བཀྲ་ཤིས་འབུམ་ཅན་མང་དག་ལ་དབུ་མ་ལུགས་ཀྱི་བྱང་སྡོམ་དང་བླ་མ་གསང་འདུས། རིག་འཛིན་ནང་སྒྲུབ། ཡུམ་ཀ་བཅས་པའི་དབང་ལུང་བྱས། རབ་གྲ་ཆེ་བགྲེས་རྣམས་ཀྱི་བཞེད་པ་བཞིན་སྐྱེས་བུ་གསུམ་དང་འབྲེལ་བའི་ཀློང་སྙིང་གི་སྔོན་འགྲོའི་འཁྲིད་སྤུངས་ཤིག་བྱས། བར་ཁང་དངུལ་འབུམ་ལ་དཀར་མེ་རྒྱུན་འཛུགས་སྦྱར། ཞལ་འདེབས་འབུལ་མ་ཞིང་དེ་བསྟབས་ནས་ཐོབ་ཐང་ཕྱུགས་བཅུ་གཉིས་ལ་འཕར་མ་གསུམ་དང་བཅས་འབྲི་བཅོ་ལྔ་སྦྱར། ཁམས་བླ་འཇིགས་མེད་ཕྲིན་ལས་ནས་ཇོ་བོའི་སྐུ་མདུན་དུ་ཚེས་བཅུའི་མཆོད་པའི་ཐོག་གསེར། དངུལ། རྟེ་དྲེའུ་ལྔ། མཇོ་ཕོ་མོ་ལྔ། །ཇ་སྒཾ་གཟི་དུང་། པེ་ཏོང་གི་ཉེར་སྤྱད་སོགས་འབུལ་ནོང་རྒྱ་ཆེ། དེ་མཚུངས་ཁམས་བླ་དཔལ་ལྡན་རྒྱ་མཚོ་དང་དགོ་རྩ་བླ་མ་དཔོན་སློབ་སོ་སོས་ཀྱང་རྟ་འབུལ་སོགས་མཛད་པའི་དགེ་བ་རྫོགས་བྱུང་དུ་བསྔོས། ས་སྐྱོང་སྡེ་དགེ། །རྫོགས་ཆེན་སྤྲུལ་སྐུ་རིན་པོ་ཆེ། རྒྱ་རོང་སྐུ་སྐྱེས་གཉིས་དཔོན་སློབ་སོ་སོའི་གསེར་དངུལ། རྒྱ་སྦུབ་གཉིས་སོགས་ཀྱི་རྟེན་དང་བཅས་པའི་མཚམས་ཞུའི་ལན་བཞེད་པ་བཞ་ཕུལ། ལས་ལྡན་ཀརྨ་བསམ་འགྲུབ་ཀྱིས་
ཀློང་སྙིང་ཆོས་སྐོར་ལ་ལོ་གསུམ་མཛད་རྒྱུའི་དམ་བཅའ་རྟོགས་འབུལ་གསེར་གྱི་སྐྱེས་བཅས་འབྱོར། །ལར་ཟང་ཟིང་འབྱོར་པའི་ལོ་རྒྱས་འདྲི་བ་ཐ་ཆེད་ཀྱི་གཏམ་དུ་སྣང་ཡང་། སེམས་ཅན་མོས་པ་ཐ་དད་པའི་སྣང་ངོར་མི་འདྲི་ཀ་མེ་ཅིག་ཀྱང་སྣང་། ཟུར་མཁར་མཐོང་ཁ་རུའི་ཁྱིམ་ལ་མེ་ཏོག་འཐོར་བ་དང་ཚེ་དབང་སོགས་སྐོར་ཅིག་བསྐྱོད། ཐོན་པའི་ལམ་ཞོར་རྡོ་གཞིས་གྲོང་སྨད་པའི་ཁྱིམ་དུ། ཚེ་དབང་སྦྱིན་སྲེག་དང་། དགའ་རྣམ་པའི་གྲ་པ་བཅུ་སྐོར་ལ་ཆོས་འབྲེལ་སྣ་ཚོགས་བྱས། རང་གནས་སུ་འབྱོར་ཕྲལ། ཀོང་པོ་ནས་རྒོད་ཚང་སྤྲུལ་སྐུ་འཇིགས་མེད་བསྟན་པའི་རྒྱལ་མཚན་བྱོན་ནས་སྐུ་གསུང་ཐུགས་རྟེན་དང་དངུལ་བུམ་ལེགས་བས་གཙོས་དུང་དཀར་ཇ་སིག་མར་ལྟང་སོགས་འདུལ་ནོད་རྒྱ་ཆེ་བ་དང་བཅས་བརྟན་བཞུགས་མཛད། སྤྲུལ་པའི་སྐུ་ཟླ་བ་དྲུག་ཙམ་བཞུགས་རིང་ཁམས་བླ་གསུམ་དང་བཅས་དབང་འཁྲིད་ཀྱི་གཙོས་བློ་སྐྱེད་འཕེལ་བའི་ཆོས་ཀྱིས་འབེལ་གཏམ་དང་། དུས་འདི་ཙམ་ནས་མིག་སྐྱོན་ཆེ་བས་སྤྱན་ཚབ་པ་བསྐོས། པའི་རྒྱུད་འབུམ་རིན་པོ་ཆེ་དང་། མཛོད་བདུན་སོགས་ཀྱི་ལུང་ཡང་སོང་། གཅང་པོ་མགོ་དབུར་འདུས་པ་མདོའི་སྒྲུབ་མཆོད་འཛུགས་རྒྱུ་མཛད་པའི་ཞལ་འདེབས་སུ་དངུལ་སྲང་ལྔ་བརྒྱ་སྦྱར། རང་ལོ་དྲུག་ཅུ་རེ་གསུམ་པ་ལྕགས་ཕག་ཟླ་བ་དང་པོར་ཤྲི་བརྤཏར་བསྐྱོད་དེ། བཀའ་འགྱུར་གསུམ་སྒྲོགས་དང་
འབྲེལ་བར་རྡུལ་ཚོན་གྱི་དཀྱིལ་འཁོར་ལ་བརྟེན་ཚོགས་ཆེན་འདུས་པའི་སྒྲུབ་མཆོད་ཀྱི་རྒྱུན་བཙུགས། ཁྱུ་མཆོག་གི་རྗེསུ་བ་ལང་ཕལ་བ་དོགས་མེད་དུ་རྒྱུ་བ་བཞིན་འཇིག་རྟེན་ནི་རྨོངས་པའི་གཞན་དབང་ཅན་ཁོ་ནའི་སྟེང་། ལྷ་མིན་གྱི་འཇུག་པ་ཅན་དང་དངེས་ཤིང་། རང་ཉིད་གདན་ཚབ་ཏུ་སྡོད་སྐབས་བཅས་ཕྱོགས་བསླད་པའི་རིགས་མེད་ཅིང་བྱ་བ་དེ། སྤྱིར་སྔ་འགྱུར་གྱི་བསྟན་པ་དང་སྒོས་ཀུན་གཟིགས་ཤནྟ་པུ་རི་བའི་བསྟན་པ་ལ་བྱ་བ་ཆེན་པོ་བགྱིད་པའི་བློས་ཆོ་ག་ཕྱག་ལེན་རྒྱ་སོགས་ངག་ཐོག་ནས་འདེམས་པར་བྱས། སྔར་བསམ་པ་ཐོག་ཏུ་ཁེ་ལན་ཆོག་སྒྲིགས་གསར་པ་ཞིག་དང་། དབང་ཆེན་སོགས་ལམ་དུ་འགྲོ་བ་ཡོད་དོ། ད་ནི་དབང་པོ་འགྲིབས་པས་དེ་རིག་མ་གྲུབ་ཀྱང་། དཔེ་རྒྱུན་རྙིང་པ་ལ་རྟེན་ཅིང་ལུང་ལུགས་ཀྱི་སྨོན་ལམ་སོགས་རྒྱུད་ཀྱི་དགོངས་པར་ཧ་ཅང་མི་འབྲེལ་ཞིང་ཆོ་ག་ཉོག་པས་བཏང་སྙོམས་སུ་བྱས། ཇི་སྲིད་བསྟན་པ་རྣམ་གནས་བར་གྱི་སྒྲུབ་མཆོད་ཐེབས་དངུལ་སྲང་བརྒྱ་ཐམ་པ་དང་བཟང་ཇ་འཁོར་གསུམ་གཅིག་སྦྱར། འདི་ལོ་ཊཾ་འགྱེད་ཀྱིས་དབུ་ལ་ཞོ་ལྔ་རེ་ཐོབ་པའི་རྩིས་བཏང་། གྲོལ་སྟོན་ལ་ཚེས་བཅུའི་འཆམས་དབྱངས་ཐོག་མཚན་བརྒྱད་ལ་བཟང་གོས་ལས་གྲུབ་པའི་གར་ཕོད་བཞི་དང་ལྷ་ཕྲུག་གི་གོས་སོགས་སྦྱོར་འཇགས་བྱས། འཆམས་དབྱངས་
རྒྱུན་ཇ་ཉམས་སུ་སོང་བར་ལུས་ངག་གི་སྒོ་ནས་བསླབ་སྦྱོངས་གང་དྲག་བྱས་ཀྱང་རྔས་དང་ལྷམ་གྱི་དཔེར་སྣང་། གྲོལ་དབང་ལ་མི་ཚོགས་ཤིན་ཏུ་ཆེ་ཞིང་། གྲྭ་ཚང་ཆོས་བརྟན་བཞུགས་ཀྱང་མཛད། དཔལ་རྙིད་པ་རྣམས་ལ་མང་ཇ་སྦྱོར་སྦྲེལ་དང་། དབུལ་པོ་རྣམས་ལ་སྦྱིན་བཏང་། རི་སྡེར་མང་ཇ་སྦྱོར་སྦྲེལ་དཔལ་ལུག་དྲུག་བརྒྱའི་འགྱེད་སྐལ་ཀྱང་བྱས། འདི་ལོ་ས་སྐྱ་གོང་མ་རིན་པོ་ཆེས་དབྱར་དགུན་གྱི་མཚམས་རྟེན་འཆར་ཅན་མ་ཡིན་པའི་རང་འཚོའི་རྟེན་འབྱུང་པཎ་ཞ་དངུལ་རྡོར་ཉི་ཟླས་མཚན་པ་དང་གསེར་ཞོ་བདུན་བཅས་སྣང་བ་རྟེན་འབྲེལ་གྱི་གྱི་སྒོ་ཆེན་པོར་གྱུར། འདི་ཡན་ཆད་ཉི་གྲགས་གསུམ་པས་ནགས་ཤོད་ནས་བཟང་གོས་ཀྱི་རྟེན་དང་བཅས་བསྐུལ་མ་མཛད་བ་བཞིན་བྲིས་པའོ། །མོས་གུས་ཀྱི་བླ་མ་དབང་དུ་འདུ་བའི་དཔེ་ལྟར་དངོས་ཅག་དཀོན་མཆོག་ལ་དད་པའི་རྟེན་འབྲེལ་གྱིས་ལོ་སྔ་ཕྱི་འདི་གཉིས་རང་ལ་སྐུ་རྟེན་གསེར་ཟངས་ལི་མ་སུམ་ཅུ་སྐོར་ལག་ཏུ་འབྱོར། སྡེ་དགེ་དཔོན་མ་དང་ཚུལ་བྱང་ཆུབ་རྒྱལ་མོའི་བདག་རྐྱེན་ལས་མདོ་འགྲེལ་བདེན་གཉིས་ཤིང་རྟ་དང་། སྔགས་འགྲེལ་རྣམ་མཁྱེན་ཤིང་རྟ་གཉིས་བར་དུ་འཁོད་པའི་གནས་ཚུལའབྱོར། ལྕགས་ཕག་ཟླ་བ་གཉིས་པའི་ནང་ཉིང་འཁྲུལ་ལ་བུད་མེད་མ་སྨད་གཉིས་ཀྱིས། གཞོན་པ་ན་རེ་ཟླ་བ་ལྔ་པར་དམག་ལངས་
པར་འདུག་ཀྱང་། ངེད་ཀྱི་མ་རྒན་འདི་ཞེན་ཆགས་ཆེ་བས་སྣང་བར་མི་འདུག་ཟེར། སེམས་ཅན་ལ་བདེ་སྐྱིད་མ་བྱུང་དོགས་པའི་བློ་ངན་དང་སྙིང་རྗེ་ཆེན་པོ་སྐྱེས། གཞུང་ས་ནས་དམག་འཁྲུག་དང་ནད་ཡམས་ཞི་བར་དམིགས་པའི་ལྷ་ཆེན་གྱི་དམར་མཆོད་དང་། ཕུར་པའི་སྒྲུབ་པ་འཇུགས་རྒྱུ་གནང་བ་ལྷག་བསམ་རྣམ་དག་གིས་བྱས། བཀའ་བློན་བླ་མས་ཡོན་སྦྱར་མཛད་ནས་དཔལ་ཆེན་རོལ་པ་ཆེན་པོའི་གཏོར་བཟློག་དམིགས་འཛུགས་དོག་ཀྱང་བསྟན་འགྲོར་དམིགས་ནས་ནན་ཏན་བགྱིས། པའི་ནུབ། ཁམས་པའི་བླ་མཆན་གཉིས་ཀྱི་རྩེད་མོ་བྱས་པ་ཡིན་སྙམ་པའི་སྣམ་ཕད་གྲུ་བཞི་པའི་ནང་ཚངས་ཐམས་ཅད་གྲོག་མ་འབའ་ཞིག་གིས་བསྐྱངས་འདུག་པས་དེ་དག་སྤུབས་འཐུངས་ནས་ཤི་དོགས་སེམས་ལས་ཆེན་པོ་བྱེད་པ་ཞིག་རྨིས་པ་དམག་གི་བླར་འདུག་དབྱར་ངོ་གོར་ཥ་ཨ་སུར་པའི་དམག་གིས་གཙང་སྟོད་རུ་ལག་གི་སའི་ཆར་གྱིས་སེམས་ཅན་གྱི་བདེ་སྐྱེད་ལ་གནོད་པ་ཆེན་པོ་བྱས། མྱང་བ་དང་བྱེད་པ་རྒྱུ་མཐུན་གྱིས་ལས་འབྲས་མངོན་སུམ་པར་ཤར། སེམས་ཅན་ཐམས་ཅད་ལ་འགྱུར་བའི་སྡུག་བསྔལ་དང་། སྡུག་བསྔལ་གྱི་སྡུག་བསྔལ་བར་མི་ཆོད་པའི་མགོ་ཚུགས། གཞན་ཕྱོགས་པ་ཉིད་ཀྱང་ཁྱབ་པ་འདུ་བྱེད་ཀྱི་སྡུག་བསྔལ་ལ་སྤྱོད་པའི་མཚན་ཉིད་ཤེས་
ཕྱིར་སྐྱོ་ཤས་དང་ངེས་འབྱུང་ཚད་མེད་པ་སྐྱེས། དེའི་ཚེ་རྨི་ལམ་ལ་ཐང་སྟོངས་ཤིག་ཏུ་རུ་དར་ཁྱེར་བའི་མི་ཞིག་འགྲོ་བའི་ལག་ན་ལུང་བསྟན་ཡིན་ཟེར་བའི་ཤོག་དྲིལ་ཞིག་འདུག་པ་ལ་ཚིག་བཅད་ཤོ་ལོ་ཀ་གཅིག་སྣང་བས་ད་དུས་བརྗེད་ཐལ། དོན་ད་རེས་གར་དམིགས་པའི་སར་ཕྱིན་ནས་ཕྱིར་ལྡོག་ཅེས་པར་སྣང་། ལར་སྔོན་ཆད་རྒྱ་གར་འཕགས་པའི་ཡུལ་ཞེས་བསྔགས་འོས་བསྟོད་འོད་ཀྱི་གནས་ཀྱང་ད་ནི་སྡིག་སྤྱོད་ཀླ་ཀློས་ཁེབས་པས་མཐའ་འཁོབ་ཆེན་པོར་གྱུར་པ་དེ་དག་ན། སངས་རྒྱས་མི་ཤེས། ཆོས་མི་ཤེས། ལོག་བར་ལྟ་བ་འཛིན་པ་ཅན་ཤ་སྟག་ཡིན་པས་དམྱལ་བ་མནར་མེད་ཀྱི་རྒྱུ་ཚོགས་བསྒྲུབ་བ་ལ་སྐྱོ་ཤས་དང་སྙིང་རྗེ་ཆེན་པོ་འཕེལ། བོད་གངསཅན་འདིར་སེམས་ཅན་གྱི་འདི་་སྐྱིད་སངས་རྒྱས་ཀྱི་བསྟན་པ་ལ་རག །བསྟན་པ་ནི་འཛིན་བྱེད་ཀྱི་སྐྱེས་བུ་ལ་རག་ལས་པ་ཉིད་ཀྱང་ད་ནི་ལྔ་བརྒྱའི་ཐ་མར་གྱུར་པས་བསྟོན་པའི་ངོ་བོ་ལུང་དང་རྟོགས་པ་གཉིས་ནི་ཆུ་ལྷའི་ཕང་བར་ཕྱོགས། ལྔ་བརྒྱ་ཕྲག་བཅུའི་ཕྱི་མས་གཏུགས་པའི་རྟགས་སྡོམ་པའི་གཟུགས་བརྙན་ཀྱང་འཇིགས་སྐྱོབ་དང་། ལེགས་སྨོན་ལ་རེ། རྒྱུ་དེས་ངེས་འབྱུང་ཡོད་པའི་གང་ཟག་ཤིན་ཏུ་དཀོན་ཞིང་ཐུབ་ཚོད་དང་བརླང་པོར་སྤྱོད་པ་མང་བས། སྔོན་ཆད་ཆོས་རྒྱལ་མེས་དབོན་རྣམ་གསུམ་གྱིས་དབང་
དགེ་འདུན་ལ་བསྐུར་བ་དེ་ཡང་དུས་ད་ལྟ་སེམས་ཅན་རྣམས་ཀྱི་ཁུར་དུ་སོང་། ཆོས་པ་རྣམས་ཆོས་བཞིན་མི་བྱེད། དགོན་གནས་མཐུ་ཆེ་བ་རྣམས་ནས་ཁྲལ་ཁྲིམས་ཁུར་བའི་ཁྱིམ་པ་རྣམས་ལ་འཕྲོག་ཆོམ་དང་། ཁྲིམས་རྐུན་འདོད་རྒྱལ་དུ་སྤྱོད་པས་རང་སའི་སྡོམ་པ་འཇིག་པའི་ཚུལ་མཛོད་ལས། འཆལ་བའི་ཚུལ་ཁྲིམས་མི་དགེའི་གཟུགས། ཞེས་པས་གཞན་གནོད་གཞི་བཅས་ལྷུར་ལེན་པ་ནི་རྟགས་ཙམ་འཛིན་པའི་ངོ་བོ་ཉིད་ཡིན། དེས་ཁྱིམ་པ་གསུན་འབྱིན་ཆེན་པོར་གྱུར་ནས་བསྟན་པ་ལ་མོས་པ་ལྡོག་ཅིང་བསྙེན་བཀུར་ཡང་ཁྲལ་འཇལ་གྱི་གནས་སུ་ལྟ། ཆོས་བྱེད་ཀྱི་གང་ཟག་དང་། བྱང་ཆུབ་སེམས་དཔའི་རིགས་ཅན་འགའ་ཙམ་སྲིད་ན་ཡང་། ཚེར་མ་དང་དར་ཟབ་ལྷན་ཅིག་ཏུ་བསྲེས་པས་བསོད་ནམས་འཕེལ་བའི་རྒྱུ་དང་འབྲས་བུ་གཉིས་ཀ་མ་རུངས་པར་བྱས་པས་མགོན་དང་དཔུང་གཉེན་མེད་པའི་དུས་སུ་འདུག་སྙམ་སྐྱོ་བ་ཤིན་ཏུ་འཕེལ། །དེ་ལྟར་ནའང་ཡུལ་གྱི་ཉེས་དམིགས་ལ་སྐྱོ་བའི་ཞི་བདེའི་སེམས་ནི་བྱང་ཆུབ་སེམས་དཔའི་རྩ་ལྟུང་རྒྱུ་ཡིན་པས་ན། རྒྱལ་སྲས་ཞི་བ་ལྷས། འགྲོ་བ་ཀུན་གྱི་དཀའ་བའི་རྒྱུ། །སེམས་ཅན་སྡུག་བསྔལ་རྩིར་གྱུར་པ། །རིན་ཆེན་སེམས་ཀྱི་བསོད་ནམས་གང་། །དེ་ལ་ཇི་ལྟར་གཞལ་གྱིས་ལང་། །
ཕན་པར་བསམ་པ་ཙམ་གྱིས་ཀྱང་། །སངས་རྒྱས་མཆོད་ལས་ཁྱད་འཕགས་ན། །སེམས་ཅན་མ་ལུས་ཐམས་ཅད་ཀྱི། །བདེ་དོན་བརྩོན་པ་སྨོས་ཅི་དགོས། པ་ལྟར། སེམས་ཅན་ལ་དམིགས་པའི་སྙིང་རྗེ་ཆེན་པོས་དུས་ཀྱི་ཆད་པ་སྣ་ཚོགས་ཞི་བའི་ཕྱིར། དཀོན་མཆོག་གི་ཐུགས་རྗེ་རྒྱུན་མི་འཆད་པ་བསྐུལ། །ལྷ་སའི་གཙུག་ལག་ཁང་དུ་དངུལ་སྲང་བརྒྱ་ཕྲག་ལྷག་བཅས་ཀྱིས་བསྒྲུབས་པའི་སྟོང་མཆོད་དང་གསེར་ཆབ་སྙན་ཤལ་འབུལ་དུ་འབྲུག་པ་བླ་མ་ཆོས་གྲགས་མངག །འགྲོ་ལ་ཕན་མཆོག་རྒྱལ་བའི་ཐུགས་ལའང་སྨན། །གང་ལ་གནོད་མ་ཚོག་ཀྱང་ནི་དེ་བཞིན་ཕྱིར། །ང་དང་སེམས་ཅན་བདེ་སྡུག་མཚུངས་གསུངས་ན། འཕགས་པའི་སྤང་རྟོགས་བདེན་པས་འགྲོ་འདི་སྐྱོབས། །རྒྱལ་བསྟན་ལྔ་ཕྲག་ཐ་མས་མི་བརྫི་ཞིང་། འགྲོ་བའི་བདེ་སྐྱིད་བདུན་གྱི་བདུན་པའི་ཞལ། ནད་མཚོན་མུ་གེའི་བསྐལ་པ་ངན་པ་དང་། །ལོག་སྨོན་བདུད་ཀྱི་གཡུལ་ལས་རྒྱལ་བས་ཤོག །ཅེས་སྨོན་ཚིག་ཏུ་སླེལ་ནས་ཇོ་བོའི་སྐུ་མདུན་དུ་འབུམ་ཐེར་འདོན་པར་བསྐུལ། ཤི་གསོན་གྱི་རྫས་རྣམས་དོན་ལྡན་བྱ་བའི་ཕྱིར་བཟང་གོས་སྣེ་ཚང་དང་ཁ་འཁྱར་སྡོམས་ཡུག་བཅུ་སྐོར་ལ་མཆོད་རྫས་འགའ་ཞིག་བཙེམས། བསམ་ཡས་དུ་སྟོང་མཆོད་དང་བསྟན་འགྲོའི་བདེ་སྐྱིད་ཀྱི་
རྟེན་འབྲེལ་ལ་དམིགས་པའི་བར་ཁང་ཞལ་འདེབས་གཡས་གཡོན་དུ་ཕྱོགས་བཅུ་དུས་གསུམ་གྱི་སངས་རྒྱས་དང་བདེ་བ་ཅན་གྱི་ཞིང་བཀོད་བཅས་ཐང་ཆེན་ཐོག་ཚད་མ་བཅུ་བཞི་རྒྱུན་འགྲམ་དང་བཟང་གོས་འཇའ་སྒྲིགས་ཀྱི་གོང་ལྡན་ལ་ཚོས་སྣ་ལྔ་སྤེལ་གྱི་ཕུར་མ་དང་ནང་མཛོད་སྣ་ལྔའི་ཕུར་མ་བརྩེགས་པའི་གདུང་ཁེབས་བྱིངས་ཁེབས། བཟང་གོས་ནམ་ཞུའང་ལྡན་སྨྱུག་ཁའི་རྒྱལ་མཚན་གོང་བ་སྨལ་ག་གཤམ་མཚལ་ཁ། སྟོང་མཆོད། དཔལ་རིར་ནང་མཛོད་བརྒྱད་ལ་བསྐང་རྫས་བྲིས་པ་བཟང་གོས་ཀྱི་འཇའ་ཅན། མདོ་ཁམས་རྫོགས་ཆེན་པའི་དགོན་དེ་དང་ཞེ་མཚུངས་ལྷ་མོ་བཅུ་དྲུག་གི་སྣང་བརྙན་བཅས་སྦྱར། དཔལ་ཆེན་བཀའ་བརྒྱད་རོལ་བ་ཆེན་པོའི་ཐང་ཆེན་གསེར་བཅད་མ་དགུ་དང་། སངས་རྒྱས་སུམ་ཅུ་སོ་ལྔའི་ཐང་ཀ་བདུན་ཚར་བཟང་གོས་འབའ་ཞིག་གི་གོང་འཇའ་ཅན་བཞེངས། མངའ་རིས་གྲྭ་ཚང་པ་ལ་མང་ཇ་བཅོ་ལྔ་དང་། གཟན་སྟོད་ལེགས་པའི་སྤོང་དག་ བསམ་ཡས་རབ་བྱུང་བར་སྨན་བླ་ཉིན་འཁྱོངས་དང་། དངུལ་སྤང་བཅོ་ལྔའི་ཟོང་རས་འགྱེད་བཏང་། འགྲོ་བའི་བདེ་སྐྱིད་དང་རྒྱལ་བསྟན་མི་ནུས་པའི་རྟེན་འབྲེལ་ལ་དམིགས་ནས་གཞུང་སར་བཟོ་རྒྱུ་དངུལ་སྲང་བརྒྱ་ཐམ་པའི་ཉེན་ཟངས་དང་། བཞུས་གསེར་བྱང་
ཞོ་བརྒྱ་ཕྲག་ལྷག་བཅས་ཕུལ་ཏེ་བསམ་ཡས་རྟ་མགྲིན་གླིང་དུ་བཞུགས་རྒྱུའི་སློབ་དཔོན་ཆེན་པོའི་སྣང་བརྙན་བཞེངས་པའི་བཟོ་གྲ་འདོད་དཔལ་དུ་ཚུགས། ཧོར་གོས་ཟབས་རྒྱས་དངུལ་སྲང་སུམ་ཅུ་རེ་རེ་བའི་ན་བཟའ་སྐུ་བེར་ཀྱང་ཚེམ། སྐྱེས་ནས་འཆིབ་ལས་མ་འདས་པའི་འབྱུང་འགྱུར་མཆོད་སྡོང་གི་ཆར་ཏོག་བཅས་དང་། ཟུར་བཀག །སྒོ་ཁྱིམ་ཏྲ། སང་ཁྲིའི་རྒྱན་སོགས་ཕུལ་ཟངས་ཁལ་བཅུ་གཉིས་དང་། གསེར་སྲང་བཅུ་གཉིས་ཀྱིས་བསྒྲུབས། ལར་དངོས་ཅག་གི་འཇིག་རྟེན་མཐུན་འཇུག་མ་བྱས། འདུ་འཛི་དང་རྣམ་གཡེང་སྤངས་བཞིན་ཤུགས་འབྱུང་གི་དཀོར་རྫས་ཕན་བུ་འབྱོར་བ་དག་དགེ་ཚོགས་སུ་འགྱུར་བའི་ཡིད་དང་ཆོས་སུ་རྟོགས་པ་ཙམ་ཡང་བསམ་གཏན་གྱི་ཚེར་མར་བྱུང་། བྷོ་ཊའི་བླ་མ་ཕྱུག་པོ་ཚོའི་རྣམ་གཡེང་དང་ཐུགས་སྲུན་ལ་རང་ཉིད་ཤ་ཐང་ཆད། ཡེ་ཤེས་སྐུ་མཆོག་མར་གཉག་དཔལ་དབྱངས་ཀྱི་འགྲེལ་པ་ཡོད་སྐད་སྔོན་ཆད་མ་མཐོང་ཡང་། གཞུང་འདི་ཁྱབ་ཆེ་བས་དཔེ་ལུང་སོགས་ལ་མ་བརྟེན་པར། བློ་ཐོག་ནས་འགྲེལ་པ་བྱས། རྒྱུད་འབུམ་དུར་ཁྲོད་མངོན་པར་རོལ་པ་མཚོན་ཆ་འཁོར་ལོ་དང་། མེ་ལྕེ་ཕྲེང་བའི་རྒྱུད་གཉིས་ནས་མངོན་རྟོགས་དང་བསྐང་བ་བསྡུས་ཏེ་མགོན་པོ་ལེགས་ལྡན་ཚོགས་ཀྱི་བདག་པོའི་རྟེན་གཏོར་བསྐང་བའི་
རྒྱུན་འཛུག་བྱས། སྤྱིར་སོ་བྱང་སྔགས་གསུམ་གྱི་སྡོམ་པ་འབོགས་པ་པོ་ལ་ལྷག་པར་ཡང་ལྡན་དགོས་ན་དེ་དག་གི་བླངས་འདས་སྒྲ་ཇི་བཞིན་པར་ཤེས་པའང་དཀོན་པའི་གནས། བལྟར་སྣང་ཙམ་དུ་རྟགས་དང་ཆོ་གས་མི་བྱེད་པས་འདུལ་བའི་ལས་ཆོག་བྱེད་སྲོལ་མེད་མོད། མདོ་སྨད་གསེར་ཁ་དགོན་སོགས་ཁམས་པའི་གྲ་རིགས་བླུན་དད་ཅན་རྣམས་ཀྱི་ནན་པོ་མ་ལྡོག་པས་བྱང་ཆུབ་སེམས་དཔའི་སོ་ཐར་འབོགས་ཆོག་བརྒྱ་སྐོར་ལ། ལུང་སྡེ་བཞི་དང་མཚོ་ཊིག་ཉམས་འོག་ཏུ་ཚུད་པས་དགེ་སློང་གི་སྤྲེང་ཡིག་ཀྱང་བྱས། གཙང་ཐེག་མཆོག་གླིང་བའི་དབུ་མཛད་ཅན་ལྔ་ལ་སོགས་མོན་པོར་ཁམས་གསུམ་གྱི་མི་སྣ་འདུས་པ་ལ་འཁྲོད་ཚར་གསུམ་ཙམ་བཏབ། ཐེག་མཆོག་གླིང་པ་རྣམས་ལ་རྙིང་ལུགས་ཀྱི་བླ་མ་གསང་བ་འདུས་པའི་ཚེས་བཅུའི་ཚོ་ག་ཡང་སེ་བཏང་དུ་བཅུག །གེར་ལྟ་བའི་ཡུམ་ལ་བླ་མའི་རྣལ་འབྱོར་སོགས་ཀྱི་ཆོས་འབྲེལ་བྱས། ཀ་ཐོག་ཞིང་སྐྱོང་གི་ཡང་སྲིད་སྐོར་ལ་བླ་མ་མགོན་ཆུང་གདན་ཚབ་རྣམ་གཉིས་ཀྱི་མཚུམས་ཞུ་ཁྱེར་ནས་ཆེད་དུ་བྱོན་པ་ལ་ཆོས་འབྲེལ་དང་བཀའ་གཏད་བྱས། དེ་མཚུངས་སྡེ་དགེ། །རྫོགས་ཆེན། ཉི་གྲགས་ཟེ་ཆེན། རྒྱ་རོང་། ཉིན་བྱེད་སྐུ་སྐྱེ་སོ་སོའི་མཚམས་ཞུས་དང་དངོས་མཇལ་བྱེད་འདོད་གསུང་པར། རང་རེ་ནི་རྒ་བའི་ཆད་པས་གཏུགས་པས་བློ་སྣ་
ཐུང་དུ་ལས་མ་མཆིས་སོ། །དབུལ་པོ་ལ་སྦྱིན་གཏོང་སྲོག་བསླུ་ལུག་གསུམ་ཅུ་སྐོར། ཆབ་གཏོར་འབུམ་ཐེར་སོགས་བགྱིས། ས་སྐྱོང་སྡེ་དགེའི་སྐུ་རིམ་བསྒྲུབ་རྟེན་གསེར་སྲང་དོ་འབྱོར་བ་བཞིན། དཔོན་སློབ་བཅུ་སྐོར་ནས་ཕུར་པ་རྒྱུད་ལུགས་ཀྱི་སྒྲུབ་ཆེན་བདུན་ཕྲག་དང་། དེའི་སྒོ་ནས་སྦྱིན་སྲོག་འབུམ་ཐེར་སོགས་བྱས། བྲི་བ་ནོ་མོ་ཁང་། རྒྱལ་ཡུམ། ཟངས་རི་གུང་། མདའ་དཔོན་ལྕང་ཅན་སོགས་ཀྱི་བསྔོ་རྟེན་བྱུང་བས་རྒྱལ་བ་ལ་གདམས་པའི་མདོའི། མི་རྟག་པ་ལྷག་པར་དྲན། མཚན་ཉིད་བླ་མ་དགའ་ལྡན་བྱང་རྩེ་བས་ཁྱོད་དང་ཕྲད་འདོད་ཤིན་ཏུ་ཆེ་ཡང་སྟེས་དབང་མ་འགྲིག་ཅེས། སྐྱབས་འཇུག་ཞུ་རྟེན་བསྐུར་བ་མཛད། །ཐོས་པས་དོན་མ་ཡིན་པ་སྤོང་། །ཐོས་པས་སྡིག་ལས་ལྡོག་པར་བྱེད། །ཅེས་པ་དེར་སྣང་། ཨེ་ཤག་བྱང་པའི་གདན་འདྲེན་ནན་བསྟུད་ཆེ་བར་མགྱོགས་འཕྱང་ལ་བརྟན་ཁྱུག་ཙམ་ཕྱིན། འབུལ་ནོད་བསྙེན་བཀུར་རྒྱ་ཆེན་པོ་མཛད། གཙང་འགྲམ་དུ་ཉ་ཁ་ཤས་བསླུས། རྩེས་ཐང་ཀླུ་གཟིམས་གཉིས་སོགས་ནས་ཞག་ཤས་བཞུགས་དགོས་ཨུ་ཚུགས་བྱེད་ཀྱང་། གྲོང་རྡལ་གྱི་དབུས་སུ་སུན་སྣང་ཆེན་པོ་སྐྱེས་ཏེ་ཞག་ས་ལས་མ་བསྡད། དེ་ཡི་ཆོས་ཀུན་སྒྱུ་མ་ལྟ་བུ་དང་། སྐྱེ་བ་སྐྱེད་མོས་ཚལ་འགྲོ་ལྟར་རྟོགས་ནས། ཞེས་བའི་ཡང་སྲིད་མང་པོ་ཡོད་པ་མི་འདྲ་སྟེ། དགོན་གནས་སུ་
སྐྱེས་འཛིན་པ་བོད་ཀྱི་ལུགས་སུ་སྣང་བས། ལུགས་གཉིས་གང་རུང་ནས་དགོན་པར་ཕན་དུ་རེ་བ་དག་ལ། བྲག་དམར་ཀེའུ་ཚང་དུ་བརྟགས་སྒྲིལ་བྱས་པའི་དོན་རྩེར་སྙན་སྒྲོན་བྱས་ནས། ཤྲཱི་བརྤ་ཏའི་སྐུ་སྐྱེ་ངོས་འཛིན་གྱི་འགོ་འདྲེན་བྱས། གཉལ་ཤ་གཟུགས་པ། རྡོ་བླ་འཇིགས་མེད། སྡེ་པ་རྣམ་རྒྱལ། དྷརྨ་ཀིརྟི། དཔལ་ལྡིང་རྗེ་བཙུན་མ་རྣམས་ཀྱིས་རིང་འཚོའི་རྟེན་འབྲེལ་རྒྱས་པས་མཛད། རང་ལོ་རེ་བཞི་པར་སླེབ་མ་ཐག་སྟེ། སྡེ་དགེའི་མཆོད་དཔོན་སངས་རྒྱས་བཟང་པོ་ཆེད་དུ་བྱོན་བར་དབང་ཁྲིད་ཀྱི་གདམས་པས་རྗེས་སུ་བཟུང་། མི་གཞི་བཟང་ཞིང་རྒྱུད་དུལ་བས་ཆོས་ཀྱི་གདུལ་བར་རུང་བའི་མཚན་ཉིད་དུ་སྣང་། སྒྲོལ་མ་རྒྱ་གར་མ་བྱིན་ཅན། རཏྣའི་ལྡི་གུ་དེ་ཉིད་ཀྱི་གྲངས་ལྡན་བཅས་བརྟན་བཞུགས་མཛད་པས་རྟེན་འབྲེལ་ལེགས་ཚོགས་ཆེན་པོར་གྱུར། རྒྱ་དངུལ་སྲང་ལྔ་བཅུའི་འབུལ་བ་དང་བཅས་གསོལ་བ་བཏབ་པ་བཞིན་རྣམ་ཐར་ཁ་བསྐངས་འདི་ཡང་བྲིས་པའོ། སེར་སྨད་ནས་མཁན་པོའི་སྐུ་སྐྱེ་ཁྲིད་གསན་པ་ལ་བྱོན། ཁོང་སྨོན་ལམ་ཚོགས་ཆེན་ལ་དམ་བཅའ་བཞག་པའི་སྡེ་སྣོད་འཛིན་པ་ཆེན་པོར་འདུག །རྙིང་མ་བས་མདོས་ཟོར་འཕེན་པ་ཙམ་ལས་སྡེ་སྣོད་མི་ཤེས་སྙམ་པ་ཡོད་ཀྱང་ཡོན་ཏན་མཛོད་མཐོང་བས་བློ་འཕྲོག་པ་ཡིན་ཞེས་གསུངས། གུས་པ་
ཆེན་པོ་མཛད། ཁོང་ལ་ཁྲིད་བཏབ་པའི་འཇུག་པ་སེམས་བསྐྱེད་ཀྱི་བསླབ་ཡའི་འཕྲོས་དོན་ལ་དེང་སང་། དགེ་སློང་གིས་བསྙེན་གནས་བླངས་ན་བསྙེན་རྫོགས་ཀྱི་སྡོམ་པ་འཇིག་ཟེར་བ་གཅིག་དང་། དེ་འདྲའི་རྟོག་དཔྱོད་མེད་པར་དུས་ཁྲིམས་ཡན་ལག་བརྒྱད་པ་ལེན་པའི་སྲོལ་ཞིག་འདུག་པ་གཉིས་ལ་འགག་དགོས་ཇི་ལྟར་ཡོད་དྲིས་པས། ཉིས་བརྒྱ་ལྔ་བཅུའི་ཁྲིམས་ལ་ཕམ་ལྟུང་དང་ཉེས་བྱས་ཀྱིས་གཏན་ནས་མ་གོས་པའི་དགེ་སློང་ཡོད་ན་འཇིག་པ་བདེན་ཏེ། དུས་དང་སང་རང་བསྟན་པ་རྟགས་ཙམ་ལ་ཉེ་བས་གཏན་ཁྲིམས་ཡོད་ལོ་ལས་དུས་ཁྲིམས་ལ་གུས་པ་བསྐྱེད་བ་གསོ་སྦྱོང་གི་ཡན་ལག་ཏུ་ལེགས་ཞེས་པའི་ལན་རྣམ་དཔྱོད་ཆེ་བ་བྱུང་། དེ་བཞིན་དུ་ཚངས་གནས་བཞིའི་སྐོར་ལ་དྲིས་པས་ཀྱང་དགེ་སློང་མ་དཔལ་མོའི་པོ་བསྟོད་ལ་བཅོས་འཆོས་པ་རྣམས་ལས་ལྷག་པའི་གོ་བ་མིང་དོན་མཐུན་བའི་དགེ་བཤེས་སུ་བྱུང་། སེམས་ངོའི་ཚེ་ཞི་གནས་ལྷག་མཐོང་ལ་ཐོས་བསམ་གྱི་དཔྱད་སྒོམ་ཧ་ཅང་གྲིམས་ཆེས་པའི་བླ་རྟོག་སེལ་དཀའ་ཙམ་སྣང་ཡང་ངེས་འབྱུང་གི་བློ་དང་དབེན་པའི་ཕྱོགས་ལ་སྣང་བ་འགྱུར་ཆེ་བ་བྱུང་བར་ཞལ་གདམས་དགོས་གསུང་བ་དང་དེ་བཞིན་དུ་སྨྲས། དཔོན་པོ་འོད་ཟེར་ལ་གསང་སྙིང་འགྲེལ་པ་ཕྱོགས་བཅུ་མུན་སེལ་གྱི་ལུགས་ལྟར་བཤད། ལར་འགྲེལ་པ་འདི་དོན་ལ་རྟོན་པ་གཙོ་བོར་
བཤད་པས་ཕྱི་དོན་དུ་འཛིན་པའི་རྣམ་རྟོག་ཅན་གྱིས་གོ་དཀའ་བར་སྣང་། ས་སྐྱོང་སྡེ་དགེའི་དགོངས་རྫོགས་བསྒྲུབ་མི་མདུན་སྐོར་མགོན་པོ་ལྷུན་འགྲུབ་ཅན་འབྱོར། ཐེག་ཆེན་རྩེ་ལྔ་པ་དང་། འགལ་སྦྱར། རྒྱ་དངུལ་སོགས་སྤམས་ཆེ་བ་དང་། དབོན་མོ་ཡུམ་སྲས་མཚམས་ཞུ་དངུལ་དཀར་གྱི་བཟང་ཞལ་སྤུས་ལེགས་སོགས་ཉེར་སྤྱད་དང་སུ་ཝཎ་སོགས་འབྱོར། ཁོང་ཚོ་མ་འབྱོར་གོང་ནས། མི་སེར་ལ་ཐོ་འཕོག་དོགས། འདི་གར་རྟེན་ཆས་བསྐྱེལ་མི་མཛད་ན་རྣམ་པའི་ཟུར་ཟོས་བྱོན་མིན་ལ་མ་ཏོས་པ་ཡོང་ཞེས་ལན་གྲངས་བསྟུད་ནས་ལགས་ཀྱང་། རང་བསམ་མི་བསག་ག་ལ་གཅིག །འདི་གར་འབྱོར་ནས་རྟ་དྲེའུ་དྲུག་ཅུ་སྐོར་གྱི་རྟ་གསོས་སོགས་འདུག་ཀྱང་མི་སེར་ལ་ཕན་པའི་ཕྱིར་ཞུ་གསོལ་བྱས་ནས་བཟན་རིན་ཕྲན་བུས་འཐུས་པར་བྱས།་ བོད་ཁམས་བདེ་ཐབས་ལ་དམིགས་པའི་སློབ་དཔོན་ཆེན་པོའི་སྣང་བརྙན་གེགས་མེད་དུ་གྲུབ་པས་གཟུངས་འབུལ་རབ་གནས་ཕྱིར་བསམ་ཡས་ལ་བསྐྱོད། གཟུགས་འབུལ་ཞག་གསུམ། རབ་གནས་དངོས་སྟ་སྤྲེལ་མ་ཞག་བརྒྱད་བྱས། སྐུ་གཉེར་དོན་གྱི་བསྐུལ་མ་མཛད་ནས་མཆོད་ཁང་བྱིངས་ལའང་མེ་ཏོག་འཐོར། ཟབ་བབ་རིན་ཐང་ཅན་གྱི་སྐྱ་བེར། དཔྱད་ལྡན་དམར་ལྗང་སྤེལ་བའི་སྐུ་བེར། གན་གོས་ཁོན་མཆུ་ལིའི་མཐོང་ཅན་གྱི་བླ་བྲེ།
རྒྱན་བཞི་དམར་པོ་དང་རྒྱ་ཡིག་སེར་པོ་ཅན་གྱི་སྤེལ་བའི་རྒྱལ་ཡོལ། ཉེར་སྤྱད་དྲིལ་བུ་སྡེ་དགེ་ཐེག་ཆེན་རྩེ་ལྔ་གསེར་རྩི་མ་སྤུས་དང་། །དངུལ་གྱི་མཎྜལ་སྤྱི་ཁབ་ཀྱི་ཚོམ་བུ་ཅན། འདེགས་བྱེད་རྒྱ་བཟོའི་གྲུལ་བུམ་གཟུགས་ཆེ། སྣོད་ཨ་ཤོང་གི་ཐ་ལི། རི་དགས་ཤྭ་ར་བྷས་བཏེག་པའི་མེ་དམ་རྒྱ་བཟོ་ཆེ། དཀལ་ཡོལ་སྟེགས་བཅས། གླང་མཆེ་ཆ། ཕྱི་ཕུར་ཆ། ཇུས་དཀར་གྱི་རྒྱལ་མཚན། བར་ཁང་དུ་རྡོ་རྗེ་གསང་ལམ་མའི་ཀ་ཐུམས་བཅས་ཕུལ། ས་ཟླའི་དུས་ཆེན་ཉིན་སྟོང་མཆོད་དང་། རབ་བྱུང་བར་མང་ཇ་གསུམ། དྲུག་ཊཾ། ཁྱིམ་པ་རྣམས་དམག་ཁྲལ་གྱི་ཉམ་ཐག་བར་སྙིང་རྗེ་ཆེན་པོའི་བློས། བསམ་ཡས་སྤྲོ་འཇུག་སྤྱིར་དངུལ་སྲང་བཞི་བཅུ་སྐོར་གྱི་སྦྱིན་པ་བཏང་། ཁྲལ་དངུལ་མི་འབྱོར་བའི་སྐྱེ་བོ་གཉིས་བཙོན་རར་བཅིངས་པ་ཐར་བར་བྱས། ཞ་ལོང་གིས་མཚོན་པའི་སྤྲང་པོ་རྣམས་ལ་ཟས་གོས་ཀྱི་ཕན་བརྟགས། བསྟན་སྲིད་ལར་རིམ་ལ་དམིགས་ནས་རྟ་མཆོད་རོལ་པའི་སྒྲུབ་པ་ཞག་བདུན་དང་། ཞི་རྒྱ་ཀྱི་སྦྱིན་སྲེག་སོགས་བྱས། དེ་དག་གི་རིང་ལ་རང་སློབ་དད་ཅན་སློབ་དཔོན་ཨ་ནན་དང་། ལྷ་གཉེར་དཔོན་ཡོན་ཡོན་རྒྱ་མཚོ་སོགས་རབ་བྱུང་ཆེ་བྲེས་ཐམས་ཅད་ནས་ཞབས་ཏོག་དང་འབུལ་འགྱེད་སོགས་བསྟི་སྟང་གྱ་ནོམ་པ་མཛད། རབ་གྲྭ་དབུ་མཛད་བསམ་གཏན་ལ་སོགས་གྲྭ་
ཚང་བཅོ་ལྔ་སྐོར་ལ་ཀློང་སྙིང་གི་དབང་ཁྲིད་སྨིན་པར་བཏབ། འདི་དག་གི་ཁྲོད་ན་ཆོས་སྣང་དང་མོས་པ་ཅན་མང་བས་བློ་བསྐྱེད་ཡོད་པའི་རིགས་ཅན་དུ་འདུག་ སེམས་བསྐྱེད་མཆོད་པའི་ཞལ་འདེགས་ལ་གཞིར་བཅོལ་བའི་ལུག་བཅོ་ལྔ་སྐོར་སྲོག་བསླུ་བྱས། རྡོ་གཞིས་པས་བསྙེན་བཀུར་བྱས་ཏེ་ཞགས་བཅགས་མལ་དང་བཅས་རང་གནས་སླེབ་འཕྲལ། རབ་གྲྭ་ཀུན་ཚུལ་དང་རྒྱད་རྩེ་རྩེ་ཆེན་པ་ཅན་གྲྭ་སློབ་བརྒྱད་ལ་ཁྲིད་ཁ་བཏབ། ལུས་འདི་བླངས་པ་ཙམ་ནས་སྡུག་བསྔལ་བདེན་པའི་རང་གཟུགས་ཅན་ཡིན་ཕྱིར། སྔ་ལོ་ནས་ཕུང་པོའི་སྐྱེ་མཆེད་ལས་དེ་ཝི་ཀི་ཌའི་ཡུལ་ལ་ཉེ་བར་ལོངས་སྤྱོད་པའི་རྟེན་འབྲེལ་འགགས་པ། སྔོན་ཆད་ལྔ་པ་རིན་པོ་ཆེ་འགྲིབས་ཚུལ་བསྟན་པའི་ཚེ། འཕགས་པའི་ཡུལ་གྱིས་ཐར་དཔྱད་མཁན་གྱིས་དབྱེ་བའི་རྒྱན། བླའི་སྨན་པ་གཉིས་ལ་ གཉེར་དུ་གཏད་པའི་ཐུགས་བསྐྱེད་པར་མ་ཆད་པའི་སློབ་རྒྱུད་ཡར་ལྷའི་མདུན་ནས་བྱེ་གྲོང་པ་ལ་ཀྴི༚་མིང་ཅན་ལ་གནས་པས། ལོ་སྔ་ཕྱི་གཉིས་ལ་ཐུར་དཔྱད་རེས་མོས་ཀྱིས་པས་གསོར་ཆུད། ལར་བཅོམ་ལྡན་འདས་ཀྱིས་སྔོན་གྱི་རྣམ་པར་སྨིན་པ་ནི་གང་ལའང་མ་གཏོགས་སོ་ཞེས་གསུངས། ལས་བདག་གིར་བྱ་དགོས་པའི་རིགས་ལ་དེ་ལྟ་མ་ཡིན་ཀྱང་། ངོས་ཅག་གི་འདི་ཕ་
མའི་འགྲིབ་རྒྱུན་ལས་བྱུང་ཞིང་ཉེ་བར་ལེན་པའི་ཕུང་པོ་ལྔ་རང་བཞིན་མེད་པར་ཤེས་པའི་གོ་མྱོང་གིས་ན་ཟུག་ལ་སོགས་པའི་ཚོར་བ་རང་རྒྱུད་པའང་ཉམས་སུ་མ་མྱོང་བས། འཕགས་པས་རྒ་དང་ན་བ་དང་། སྐྱེ་བའི་སྡུག་བསྔལ་རྩད་ནས་སྤངས། ཞེས་པའི་དོན་ཀྱང་འདིར་རིག་གོ །ཟླ་བ་ལྔ་པའི་ནང་རྒྱ་དཔུང་བལ་ཡུལ་དུ་བཅུག་པའི་དམག་བཟློག་བསྒྲུབ་རྒྱུ་འབྱོར། སེམས་ཅན་ལ་ཉེ་རིང་མེད་ཀྱང་ས་སྤྲེལ་ལ་ལོ་ནས་ད་ལྟའི་བར་འཇིག་རྟེན་མི་བདེ་བའི་བྱེད་པོ་གང་ཡིན་ལ་དམིགས་ནས་ཕུར་པ་རྒྱུད་ལུགས་ཀྱི་སྒོ་ནས་གདབ་ཁ་དྲུག་གི་ལས་སྦྱོར་བཙུགས། བསད་རྟགས་ཀྱི་དབང་དུ་བྱས་ན་གཙོ་བོའི་གྲལ་ན་ཕག་ལོ་ཞིག་ཡོད་པར་ངེས། སྒྲུབ་པའི་སྒང་ལ་ཡུལ་གྱི་ཕུར་བྱ་རྒོད་ནམ་མཁའ་ནས་མངོན་སུམ་ལྷུང་སྟེ་ཤི་བ་དང་། །སྒྲུབ་པ་པོ་གཅིག་གི་རྨི་ལམ་དུ། འབྲོག་མོ་རྒབ་མོ་དུང་ཕྲེང་ཅན་ཁྲོ་ཉམས་ཤིག་གིས་གཙོ་བྱས་པའི་སྐྱེ་བོ་མང་པོས་མཚོན་ཆ་སྣ་ཚོགས་ཀྱིས་ནོར་ལུག་མང་པོ་གསོད་པ་ལ་མོ་ན་རེ། ང་རྒས་ནས་སྡོད་ལོང་ནི་མི་འདུག །རྒྱང་མིག་རང་བལྟ་དགོས་པས་མིག་ཀྱང་ཆ། སེམས་ཅན་སྨྱོ་ཚད་གསོད་དགོས་བྱུང་ན་རང་གཞན་གྱི་ནོར་ཐམས་ཅད་དོགས་པ་འདུག་སྐད། ཞིང་བཅུ་ཚར་བ་རང་སྡེ་ནའང་ཡོད་ཟེར་བ་
འདུག་ ལར་ཕུར་བའི་དམ་ཅན་འདི་ཤིན་དུ་མཐུ་རྩེལ་ཆེ་ཞིང་རྒྱུད་ལུགས་ཀྱི་སྐུ་རིམ་འིད་ཡང་བཀའ་གཉན་པར་འདུག་གོ །མངོན་སྤྱོད་ཀྱི་དུས་དང་དེའི་སྔོན་རང་ནས་ཕ་རོལ་ལ་བཅོས་མིན་གྱི་སྙིང་རྗེ་ཆེན་པོ་སྐྱེས་པས་ཕྱིན་ཆད་ནའང་བསྔོ་སྨོན་ནན་ཏན་བྱས། མེ་ལོག་ལོའི་རྨི་ལྟས་དེ་ལ་ཐོག་མཐའ་བར་གསུམ་གྱི་ལུང་བསྟན་སྣང་ངོ། །ལར་བྱང་ཆུབ་ཀྱི་སེམས་དང་། རྒྱུད་སྡེའི་མན་ངག་ལ་ངེས་པ་འདྲོངས་དང་བཅས་པའི་རྒྱུ་མཚན་དུ་བཀོད་ཀྱི། ངས་བྱས་ང་རྒོད་ཀྱི་ཁྲལ་དུ་འཚངས་ནི་མ་ཡིན་ནོ། །མི་རིང་བར་འདུས་པ་མདོའི་སྒྲུབ་མཆོད་བཙུགས། ལྷོ་འབྲུག་གི་ཟླ་ཟུར་བསྲེས་པོ་སངས་རྒྱས་བཟང་པོས་ཡོན་ཏན་མཛོད་མཐོང་བས་ཡི་འཕྲོག་པའི་མོས་པ་ཐོབ་ཚུལ་གྱི་མཚམས་ཞུ་རྟེན་བཅས་དང་། ཁོང་གི་སློབ་མཁ་ལིང་བ་དང་། གཞོང་དཀར་བ་གཉིས། མོན་ཤར་རོ་ལམ་པ་ལྔ་། བོ་ལོད་པ་ནང་ཚང་དུའང་སྐད་རིགས་མི་གཅིག་པ་ལྔ་སྐོར་ལ་ལོ་ཙཱ་བཙུགས་ནས་འཁྲིད་བཤད། འདི་ཚོ་ཆོས་ལ་མོས་པ་ཆེ་ཡང་སྐད་རིགས་མི་གཅིག་པས་གོ་དཀའ་བ་ལ་དཔག་ན་ཕུང་པོ་གསུམ་པ་ལས་མི་ཁོམ་པ་དགུར་ཕྱེ་པ་དེ་བདེན་པར་སྣང་ཞིང་། ཡུལ་དབུས་ཀྱི་མི་ལ་ནི། ཆོས་སྣང་དང་མོས་པ་ཟུང་ཟད་ཀྱང་མེད་པ་འདི་ཤིན་ཏུའང་སྐྱི་
བའི་གནས། རོ་ལམ་ཝ་སྒོ་མའི་རི་རྒྱུའི་བྲག་རི་ལ་གནས་པའི་སྦྲང་ཚང་། བྱ་རི་དྭགས་ཀྱི་སྲོག་སྐྱོབ་པའི་དོན་དུ་དངུལ་སྲང་བཅུ་ཐམ་པས་བྲག་རི་ཉོས་ཏེ། བསྐལ་པ་མ་སྟོངས་ཀྱི་བར་དུ་རི་རྒྱ་བྱས། རང་ལོ་རེ་ལྔ་པར་རྒྱལ་སྲིད་གཏོ་མ་ནས་རྒོད་ཚང་རིན་པོ་ཆེས་འོད་དཔག་མེད་ཀྱི་སྐུ་འཇོན་དམར་བྱིན་ཅན། མཛོད་དགོས་འཁོར་བརྒྱད་མ་ཡུག །གསེར་དངུལ་མར་ལྟང་སོགས་བ་དོག་པ་བྱ་ནོམ་བ་དང་བཅས་པའི་རང་འཚོ་འབུལ་མི་ལྷགས། དེ་མཚུངས་དགོན་རྩེ་རིན་པོ་ཆེས་འདྲིན་བྱེད་ལེགས་འབུལ་གྲུ་གཡུ་སྤུས་དང་། །གསེར་དངུལ། ཟོང་རས་བཅས་དང་། སྒོམ་ཕྱོགས་ལ་བསམ་བྱུང་གི་ཤེས་རབ་དཔྱད་བཟོད་པའི་དྲི་བ་རྒྱ་ཆེན་པོ་མཛོད་པ་ལ་དེ་ལན་དང་། གྲུ་གཡུ་རྟེན་བཞེངས་ཀྱི་མཛོད་སྤུར་དབྱངས། །ཆོས་སྤྱོད་བཅུའི་གཏམ་དེ་བློ་ལ་ཐོལ་བྱུང་དུ་ཤར། ས་སྐྱོང་སྡེ་དགེའི་མཚམས་ཞུ་བསྟུད་མ་དང་། རིན་ཆེན་རིལ་བུ་བཅུ་གསུམ་གསེར་དངུལ་སྤམས་མཐོ་བ་འབྱོར། ལར་ཁོ་བོ་ཅག་འདོད་བ་ཟད་པའི་བློ་སྐྱེས་པ་ནས་བཟུང་སྟེ་ཟང་ཟིང་ཆར་ལྟར་བབས་ཀྱང་། དཀོར་གྱི་ཉེས་དམིགས་ལ་འཇིགས་ཤིང་། དེ་བསོད་ནམས་སུ་སྦྱར་བའི་གཡེང་ལ་སུན་སྣང་ཆེན་པོའང་སྐྱེས། ཁ་རག་སྒོམ་ཆུང་བས། སྙན་གྲགས་བདུད་ཀྱི་ཕྱེ་གཏོར་ཡིན། །རྙེད་བཀུར་འཆིང་བའི་ཞགས་པ་ཡིན། །བསོད་ནམས་དགེ་
སྦྱོར་གྱི་བར་ཆད་ཡིན། །དུག་ལ་སྨན་དུ་མ་བལྟར་ཡང་། །གསུངས་པ་ལ་ངེས་ཤེས་སྐྱེས་པས་ལྷའི་ཤུའི་བདུད་དང་རྟག་པར་གཡུལ་སྤྲད། ཤཱཀྱ་ཐུབ་པ་ལས་ལྷག་པའི་འདྲེན་པ་མ་མཆིས་ཏེ་ཁོང་ལའང་ཉེར་སྤྱད་རྡོའི་ལྷུང་བཟེད་ལས་མེད་པས། གསེར་དངུལ་གྱི་རྟ་སྒ་དང་། ཇི་ལྟར་གྱི་གཟི་བྱིན་བསྒྲུབས་སྤངས་ཤིང་། བདག་པོས་གཟུང་བའི་རྟེན་མཆོད་དང་། རང་སའི་གཙུག་ལག་ཁང་ལ་ཁྱིམ་གྱི་འདུ་ཤེས་ཤར་བའི་རྟེན་བཞེངས་འདི་ཡང་། རྟ་ལ་རྒྱན་དུ་གྱིས་པ་དེ། །བདག་པོ་ཉིད་ལ་མཛེས་པ་ཡིན། ཞེས་པ་དེར་སྣང་། ངས་བསོད་ནམས་ཀྱི་རྒྱུན་གཏན་ནས་མི་འགྲོ་བར་རིག་ནས། །སངས་རྒྱས་ཀྱི་བསྟན་པ་དར་བ་དང་། འཇིག་རྟེན་གྱི་ཁམས་སུ་དམག་འཁྲུག་ནན་དལ་མུ་གེ་སོགས་རྗེ་ཆེར་དར་བ་ཞི་བ་ལ་དམིགས་ནས་བསམ་ཡས་ཆོས་འཁོར་ཆེན་པོར་ཆོས་ལོངས་སྤྲུལ་གསུམ་གྱི་རྟེན་བཞེང་དགོས་པ་ལས། འདི་ལོ་འཕགས་པ་འཇིག་རྟེན་དབང་ཕྱུག་གི་སྐུ་རྒྱུར་དངུལ་སྲང་བཞི་བརྒྱ་ཐམ་པ། ཁྲི་རྒྱབ་སོགས་གསེར་ཟངས་ཀྱི་རྒྱུར་ཟངས་ཁལ་བརྒྱད། གསེར་སྲང་བརྒྱད་ལས་འཕགས་པའི་ལྡེམ་སྐུ་སླེའུ་ཆུང་དང་བཟོ་སྒྲོས་ཐ་མི་དད་བྱོན་གཙང་ཡིད་དུ་འོང་བར་ཕྲ་རྒྱན་གྲུ་གཡུ་སྤུས་དག་གི་ཕྲ་སྤུངས། ཤེལ་ཕྲེང་བྱུ་རུ་ཆེ་ལེགས་བཅུའི་རྒྱན་བཅས་དང་། ཇོ་བོ་བྱང་ཆུབ་ཆེན་པོའི་
སྐུ་མདུན་དུ་བོད་འབངས་བཀྲ་ཤིས་པའི་རྟེན་འབྲེལ་དུ་གསེར་སྲང་ཉི་ཤུ་རྩ་ལྔ་ལ་བརྡུངས་པའི་བཀྲ་ཤིས་རྟགས་བརྒྱད་རྣམས་ཀྱི་བཟོ་རྒྱུ་དང་། གླ་ཐོབ་སྲང་ལྔ་བཅུ་བཅས་འདོད་དཔལ་དུ་བསྐྱལ། གྲུབ་མཚམས་གོང་ས་རིན་པོ་ཆེས་བཀའ་ཤོག་རྟེན་བཟང་གོས་ཡུག་དང་། རྒྱ་དངུལ་རྟ་རྨིག་མ་བཅས་བསམ་ཡས་ཆོས་འཁོར་ཆེན་པོར་སྦྱར་ཆོག་རོགས་ཉི་སྣུ་སྐོར་དང་བཅས་རབ་གནས་བདུན་ཕྲག་གཅིག་གི་བར་བྱེད་དགོས་པ་ཕེབས་པ་བཞིན། བསམ་ཡས་སུ་འདུས་པ་མདོའི་རྡུལ་ཚོན་གྱི་དཀྱིལ་འཁོར་ལ་བརྟེན་པའི་སྒྲུབ་པ་དང་འབྲེལ་བར་ཞག་བཅུ་སྐོར་གྱི་བར་དུ་དངོས་སྟ་སྤྲེལ་མ་རྒྱ་གཞུང་གི་ཆོ་གར་ལྡན་པ་རྒྱས་པའི་བྱིན་སྲེག་གི་མཐའ་རྟེན་བ་བྱས། གཙུག་ལག་ཁང་ཡོངས་རྫོགས་རབ་གནས་ཀྱི་དོན་པོ་བཞི་དང་ལྡན་པའི་ལྷག་གནས་ཀྱི་མེ་ཏོག་གཏོར། སེམས་བསྐྱེད་གླིང་དུ་ཆོས་ཉིད་ཀྱི་ངང་གཅིག་ལ་མ་ཆགས་པདྨ་ཅན་གྱི་སྣ་ཚོགས་ལས་འདས་པའི་གསུང་གི་སྣང་པར། དབང་བཅུའི་དང་པོ་དཔེ་བྱད་གྲགས། །དེ་སྟེང་ཡེ་ཤེས་ལྔ་ལྡན་དཔལ། །ཞེས་པའི་དོན་དུ་སྣང་། ཞལ་གསེར་སྟོང་མཆོད་དང་། རབ་བྱུང་གྲྭ་ལ་ཉིན་གསུམ་གྱི་རབ་བཀའ་འགྱུར་གསུང་སྒྲོགས་བཙུགས། ཚར་དོད་ཡོན་ཐོབ་ལ་དངུལ་དང་ཟོང་རས་སྨར་བ་བཏབ། འཕགས་པའི་དབུ་ཐོག་དང་ཉེ་བའི་བར་
ཁང་གི་ཀ་གླིང་བཞི་པ་གཅིག་ལ་བྱི་བ་ཁེབས་མཐོང་རྒྱ་སེར་གྱི་གོས་ཆེན་དང་སྨད་ཤ་མ་རྒྱན་བཞི། འཇའ་ཁོན་ཆུ་ལི་རིན་ཐང་ཅན་སོགས་སྤེལ་བའི་གནམ་རྒྱན་དངུལ་སྲང་བརྒྱད་ཅུའི་རྒྱུ་འགྲོ་ཅན་དང་། ལྕམ་གླིང་གཅིག་ལ་མཐོང་མཛོད་དགོས་ལཉྩ་མས་བྱས་པའི་གནམ་རྒྱན་བཅས་དང་། ཞབས་རྗེས་རིན་པོ་ཆེར་བཟང་གོས་ཚོན་སྤེལ་གྱི་ཕུལ་མ། བསམ་མཆིམས་ཀུན་མཁྱེན་ཆེན་བོའི་དབུ་ཐོག་རྡོ་རྗེ་གསང་ལམ་མ་སེར་པོའི་བླ་བྲེ། བྲག་དམར་ཀེའུ་ཚང་དུ་གདུང་ཁེབས་འཕུར་མ་བཅས་ཕུལ། ཇོ་བོའི་སྐུ་མདུན་གསེར་ཞོ་དང་། ཊཾ་ཁ་སོ་བདུན་གྱི་ཚོམ་བུ་མཎྜལ་དང་མཆོད་འབུལ་གྱི་མཐར། བོད་འབངས་བདེ་བ་དང་། འབྲེལ་ཐོགས་ལ་སྨོན་ལམ་རྒྱ་ཆེན་པོ་བཏབ། རབ་གྲྭ་གཙོ་བོར་གྱུག་པའི་མོན་བོད་ཀྱི་སེར་སྐྱ་བརྒྱ་སྐོར་ལ་དབུ་མ་ལུགས་ཀྱི་བྱང་སྡོམ་ཕོག །རབ་གྲྭ་ཉི་ཤུ་སྐོར་དང་། མོན་ཤར་རོ་ལམ་པ། ར་མ་གྱང་ར་བ། གཞོང་མ་རལ་པ། གདུང་བསམ་པ་བཅས་སྐད་རིགས་མི་གཅིག་པ་སུམ་ཅུ་སྐོར་ལ་ཁྲིད་ཚར་གཉིས་བཤད། ལོ་གསུམ་དང་། ལོ་མཚམས་གུ་རུའི་སྙིང་པོ་དང་། མ་ཎི་དུང་ཕྱུར་གྱི་དམ་བཅའ་འབུལ་བའང་ཁ་ཤེས་བྱུང་། སྔ་ལོ་ལྟར་མོན་ཤར་ནུབ་ཚོར་རི་དྭགས་སྦྲང་ཚང་སོགས་བསླུ་རྒྱུའི་དངུལ་སྲང་ཉི་ཤུ་སྐོར་བསྒྲུབ་ཅིང་རི་རྒྱ་བཏབ། སེམས་
བསྐྱེད་མཆོད་པའི་ཞབས་འདེབས་དང་བཅས་ལུག་ཉི་ཤུ་སྐོར་ཚེ་ཐར་བྱས། དབུལ་བོ་རྣམས་ལ་སྦྱིན་པ་རྒྱ་གང་ཆེ་བྱས། རས་ཕུག་སྐུ་སྐྱེས་བསྐུལ་མ་མཛད་ནས་སྐྱ་སེར་མང་ཞིག་ལ་གསོལ་འདེབས་མན་ངག་བཅུ་གསུམ་པའི་གཏོར་དབང་བྱས། རྟ་མགྲིན་གླིང་དང་དགོན་པ་ས་སྦུག་སོགས་སུ་གོང་ས་རིན་ཆེ་དང་། སྲིད་སྐྱོང་རྟ་ཚག་གི་ཚེ་སྒྲུབ་སྦྱིན་སྲེག་སོགས་བསྒྲུབས། སློབ་དཔོན་ཚུལ་ཁྲིམས་བསོད་ནམས་སོགས་ནས་ཡོད་དགུ་བླ་མར་བསྔོ་བའི་བསྙེན་བཀུར་དང་བརྟན་བཞུགས། དེ་མཚུངས་ཆོས་རྗེ་བྲག་ཕུག་པ་ཁེ་སྨད་རིགས་ལྡན་སྒྲོལ་འབུམ་སོགས་ནས་བསྙེན་བཀུར་ཕུལ་ནོད་རྒྱ་ཆེ་བ་དང་། བརྟན་བཞུགས་ཡང་ཡང་མཛད། སྒྲོལ་འབུམ་མའི་མུ་ཏིག་སྲན་སྤོས་ཙམ་དྲུག་ཅུ་སྐོར་དང་། གཡུ་དམར་གྱི་སྐེད་ཕྲ་ཆ་བཅས་རྟ་མགྲིན་གླིང་སློབ་དཔོན་ཆེན་པོའི་དབུ་ཞྭ་གསར་ཕུལ་ལ་དབྱངས། ཆོས་རྗེ་བྲག་ཕུགས་པས་སྦྱིན་བདག་མཛོད་དེ་བསྟན་སྲིད་བདེ་ཐབས་སུ་མ་མགོན་གཡུལ་མདོས་རྒྱས་པ་བདུན་ཕྲག་ལྷག་བཅས་བཙུགས་ བསད་མདོས་སུ་ཞལ་བསྒྱུར་ནི་ཉེར་དགུའི་མདོས་ཟོར་འཕེན་ཁར་ཚར་གཅིག་ལས་མ་བྱས་པས། ཉེར་བརྒྱད་ཀྱི་ནུབ་མོ་དཔལ་སྡིངས་རྗེ་བཙུན་མའི་མན་ལ་ལམ་དུ་བུད་མེད་ཁྲོས་པའི་གཟུགས་ཅན་མང་པོས་ངེད་ཅག་ལ་དམག་བརྡ་ནི་བྱུང་། ལག་ཆ་མ་སྤྲད་ཟེར་བ་དང་། སྐོར་
ལམ་དུ་འདྲེའི་འདུ་ཚོགས་མངོན་སུམ་དུ་མཐོང་བ་སོགས་འཚུབ་ལྷོང་ཆེན་པོ་བྱུང་བས་གཡུལ་མདོས་འདི་བསྟན་སྲིད་ཀྱི་རིམ་མགྲོར་བསྙེན་སྒྲུབ་ཐེངས་པ་ལས་གང་དྲན་དུ་གྱེར་ན་རང་སྲོག་ལ་གནོད་པར་འདུག །ས་སྦུག་ཏུ་འབྲི་གུང་པའི་འདག་སྦྱར་བ་དཀའ་སྤྱད་སྡུག་སྒུར་གྱི་འཇུར་དྲན་ཅན་ལ་གེགས་སེལ་བོགས་འདོན་བྱས་ཤིང་དངུལ་སྲང་གསུམ་གྱི་མཐུན་རྐྱེན་བྱིན། གླིང་སྟོད་སྨད་ལྔ་བཅུ་སྐོར་སྤྱིར་མང་འགྱེད། སྟོད་པ་བ་རྣམས་ལ་དགོངས་པ་ཡང་ཟབ་ཀྱི་ཚོགས་བརྒྱ་མཛད་བཅུག །རྗེ་བཙུན་རཏྣའི་སྐུ་ལ་སྙན་ཤལ་ཕུལ། བཀའ་བརྒྱུད་པ་འདི་དག་སྣང་ཆེ་བས་འབྲི་གུང་ལྗོངས་པ་སྐུ་སྐྱེ་གཤེགས་པའི་དགོངས་རྫོགས་དང་། ཆུང་ཚང་ཐུར་པ་རང་གི་ཡབ་གཤེགས་པའི་བསྔོ་རྒྱུན་ཁོངས་སུ་མཚམ་ཞུག་གནང་བ་ལ་དེ་ལན་དང་ཡོན་ཏན་མཛོད་ཕུལ་བས་སླར་བང་མི་ཆེད་གནང་གི་ཞུ་འཕྲིན་དྲི་བཟང་ཕོན་ཆེ་བ་བཅས་འབྱོར་བ་ལ་དགོངས་བཞེད་བཞིན་མཛོད་འགྲེལ་ཀྱང་ཕུལ་བཀའ་བློན་ཕ་ལྷས་རྟེན་བཞེངས་ཀྱི་ལེགས་སོར་ཟ་བབས་ཡུག་རང་བཅས་ལྷ་ལྡན་དུ་གདན་འདྲེན་གྱི་ཆབ་ཤོག་དང་མི་སྣ་ནན་བསྟུད་བྱུང་ཡང་དད་གཤིན་གྱི་དཀོར་ལ་བརྐུམ། ཆགས་དང་། ཆེ་གཉན་ལ་བསྟེན་ནས་རེ་དོགས་བྱེད་རྒྱུ་གང་ཡང་མེད་བས་རང་གནས་སུ་ལོག་རྡོ་བའི་རྟ་བསུར་དང་བཅས་སྦྱིན་བདག་གདོན་
གནོད་ཀྱིས་ཆོས་ཆེར་གཟིག་ནས་ཉེན་པ་ལ་བཀའ་བསྒོ། སྦྱིན་སྲེག་ ཚེ་དབང་སོགས་བྱས་པས་འཕྲལ་དུ་ཕན། ཞག་གསུམ་གྱི་བར་བཀའ་བརྒྱད་དང་ཕུར་པའི་སྦྱིན་སྲེག །དམངས་མི་ལ་ཚེ་དབང་སོགས་སྩལ། གྲུ་ནང་དུ་ཆུ་ཀླུང་འདིའི་རྒྱུད་ལ་གནས་པའི་སྲོག་ཆགས་དང་། ཆུ་ངོགས་སུ་འགྲོ་བ་རྣམས་ལ་སྤྱོད་འཇུག་གི་སྨོན་ལམ་སོགས་བཏབ། གྲུ་ཁ་ནས་ཁེ་སྨད་ཀྱི་རྟ་བསུ་དང་བཅས་ཁྲ་འབྲུག་ཏུ་ཡུམ་སྒྲོལ་འབུམ་མས་མཆོད་པ་དང་ཚོགས་བརྒྱ་བཤམས་འདུག་པ་བཞིན། མཆོད་ཁང་རྣམས་ལ་སྙན་ཤལ་དང་། གུ་རུ་ལྷ་ཁང་དུ་ཚོགས་བརྒྱ་བཏང་། སྣེ་རྫོང་གི་ཁང་གཉེར་ཆོས་ལ་དད་པ་ཅན་ཞིག་སྐུགས་འདུག་པ་ལ་བླ་མའི་རྣལ་འབྱོར་གྱི་ཆོས་འབྲེལ་བྱས། ཁྱིམ་ན་གནས་པ་ལ་སྐྱོ་བ་བདེན་ཀྱང་སེམས་ཅན་ལ་འཐོམ་ཕོག་པ་དང་། ཕན་སེམས་ཡང་དག་བྱས་ནས་ལྟར་སྣང་གི་བཙུན་གཟུགས་ལ་སྨོན་མི་དགོས་ཞེས་སྨྲས། ཁེ་སྨད་དུ་བདུན་ཕྲག་ལྷག་བཅས་རིང་ཉིན་ལྟར་ཚེ་ཆོག །ཚོགས་བསྐང་། ཕུར་པའི་སྦྱིན་སྲེག་སོགས་བྱས། ལར་དད་ཅན་དང་། ཁྱིམ་བ་ཕལ་ཆེར་སྣང་བ་དག་པས་ཡོན་གནས་བླ་མའི་རིགས་ཕེབས་པས་ཆོག་བར་བ་ལྟ་ཡང་དཀོར་སྦྱོང་མི་བྱེད་པར་ཧོར་འདྲ་ལྟར་ངོ་གཡོག་མང་པོས་འདིར་དཀོན་མཆོག་ཁྲེལ་བ་ཡིན་པས་བསམ་ཡས་འཁོར་བར་ཐང་
ཆད་སེ་བྱུང་། ཡུམ་སྒྲོལ་འབུམ་འདི་ཡོན་གནས་ཐམས་ཅད་ལ་དད་གཏོང་ཆེ། རྣལ་འབྱོར་མའི་བསྐྱེད་རིམ་རྒྱུན་ཆགས་སུ་མཛད་པའི་སྟེང་རྫོགས་པ་ཆེན་པོའི་ཁྲིད་བཏབ་པས་བསྐྱེད་རིམ་རང་རྒྱུད་དུ་འཛིན་པའི་གེགས་ལས་གྲོལ། གྱོན་པ་ཆ་ཚང་དང་། གསེར་དངུལ། མཛོ་མོ་སོགས་ཀྱི་དགེ་བ་རྫོགས་བྱང་དུ་བསྔོས། རང་གནས་སུ་འབྱོར་འཕྲལ་ལྷོ་རྒྱུད་དུ་རང་བསྟན་ལ་སྨན་པ་སློབ་དཔོན་འཇིགས་མེད་ཀུན་གྲོལ་འབྱོར་བའི་ཀུན་མཁྱེན་ཆེན་པོའི་བཀའ་འབུམ་འཐོར་བུའི་བོད། རང་ཉིད་ཀྱི་དགོངས་གཏེར་བསྟན་བཅོས་ཆ་ཚང་གྲ་མཚུངས་བཅོད་བཅུ་སྐོར། གསེར་དངུལ། བྱེ་རུའི་བརྒྱ་ཕྲེང་། འགོ་སྣམ་ཚོས་སྤེལ་གྱི་འབོག་ཁེབས། རྒྱ་དར་ཟོང་རས་སྤུས་དག་འབོར་ཆེ། ཐོ་ཀི། ཐ་ལི། ལིའི་ག་ཌ་ཆེ་ཆུང་། བ་སོའི་སམ་ཆུང་སོགས་ཨ་ཙ་ཏའི་ཉར་སྤྱས་རྒྱ་ཆེ་བ་དང་བཅས་པའི་བརྟན་བཞུགས་མཛད། ཁོང་གི་རོང་ཡུལ་དུ་ལོ་གསུམ་ཚར་གཉིས་ཀྱིས་མཚོན་པའི་སྒྲུབ་པའི་ཞབས་ཏོག་དང་། རྒྱུད་འབུམ། མཛོད་བདུན། སྙིང་ཏིང་སོགས་རང་བསྟན་ལ་འཆད་སྤེལ་གྱི་ཕྲིན་ལས་དང་གསུང་རབ་དེ་དག་གསར་བཞེངས་ཁྲིད་ཡིག་པར་བརྐོ། རྒྱ་བོད་ཀྱི་མཚམས་གདུང་བསམ་གྱི་རེ་རྩེར་སྒྲུབ་གྲྭ་བསྟན་རྒྱས་རི་བོ་
བཙུགས་ནས་གྲ་བཙུན་བཞི་བཅུ་སྐོར་མཚམས་སྒྲུབ་ལ་འཇུག་པའི་སྒྲིགས་སྲོལ་ལེགས་པས་བསྟན་པ་འཕེལ་རྒྱས་སུ་ཞབས་ཏོག་གཅིག་ཏུ་ཆེ། དད་དམ་ཤེས་རབ་གསུམ་གྱི་སྣང་བ་ཡངས་བས་གཞན་དོན་ནུས་པའི་ཁར་བློ་གཙང་ཞིང་ཀུན་སྤྱོད་ཞིབ་པས་བསྙེན་རྫོགས་ཀྱི་བསླབ་པ་ཞིག་བླངས་ན་འཐད་མིན་ཞུ་བར། དེང་སང་སྔགས་ལམ་གྱི་དྲོད་ཐོབ་བ་ལྟ་ཅི། གོ་དོན་ཙམ་ལའང་རྨོངས་པས་ཀུན་ཏུ་བཟང་པོའི་ཁྲེལ་བག་གི་སྤྱོད་པ་ལ་འགོང་བའི་དུས་འདིར་བསྟན་པའི་མིག་རྐྱེན་ལའང་ཕན་པ་ཤིན་ཏུ་ཆེ་ཞིང་། བླ་མའི་དགོངས་པའང་དེས་རྫོགས་སོ་ཞེས་སྤྲོ་བ་བསྐྱེད། དུས་དབང་གིས་བརྟེན་མཁས་ཀྱི་ཡོན་ཏན་ཚང་བའི་མཁན་པོ་དཀོན་ཡང་། ངེས་འབྱུང་ལ་གུས་ཤིང་གཞན་གནོད་གཞི་བཅས་ལ་ལྡོག་པའི་སར་དེངས་ཤིག་ཅེས་བསྐུལ། སྔར་མ་ཐོབ་པའི་དབང་བཀའ་རྗེས་གནང་ཐམས་ཅན་ཀྱི་བཀའ་གཏད་བྱས། མཚོ་རྒྱལ་བླ་མཚོའི་ལུང་བསྟན་ཡང་འིད་ལ་བལྟ་བ་འདྲ། རང་གནས་སུ་ཁོང་གི་སློབ་མ་རྣམས་དང་། ཁོ་ལོང་བ་བཅུ་གྲངས་ལ་ཁྲིད་བཏབ། སྡེ་དགེ་ལྷ་ལྕམ་དང་ཚུལ་མས་ཡོན་ཏན་མཛོད་རྩ་འགྲེལ་པོད་གཉིས་ལ་ཤོག་གྲངས་སྟོང་ལ་ཉེ་བའི་བར་ཕུད་གླེགས་བམ་ཆ་བདུན། མཚམས་ཞུ་དང་བཅས་པ། རིག་
པའི་གནས་རྣམས་ལ་རྣམ་དཔྱོད་ཡངས་པ་རང་ཁབ་ཀྱི་དྲུང་ཡིག་པདྨ་རྣམ་དག་གིས་ཞུས་དག་མཛད་བའི་མཚམས་ཞུ་དང་། དོགས་སེལ་བཅས་འབྱོར། པར་ཤིང་ཡར་དགོས་ནའང་འབུལ་གསུང་སྟེ། བོད་ཆོས་ཉམས་ཆུང་། ཕྱོགས་རིས་ཆེ། ཕལ་ཆེར་ཆོས་ཀྱིས་སུན། །དར་ལ་མ་སྨིན་པའི་སྐབས་འདིར་དགོས་པ་ཆུང་ཞིང་། ས་ཐག་རིང་པོ་ནས་ཁལ་མའི་དཀའ་སྤྱོད་གཅིག་པོར་ཡང་འཇིགས་པས་རང་སར་བཞག་དཔོན་འབངས་གཉིས་ཁར་ལེགས་སོའི་ཞུ་ལན་དང་། དངོས་པོ་མི་དགོས་སྐྲ་སེན་སོགས་དགོས་ཚུལ་ལ་བླ་མ་དཔལ་སྡིངས་པའི་གའུར་རང་ཉིད་ཀྱི་འགྲམ་སོར་སྐྱེས་པའི་རིང་བསྲེལ་འབུར་གཉིས་དོད་པ་འཕེལ་ཕྱེ་དང་བཅས་པ་དང་། འཇོན་དམར་གྱི་སྣང་མཐའ། འགོ་སྣམ་སོགས་རྟེན་བཅས་འོས་རིས། དྲུང་ཡིག་དང་བར་དཔོན་ལའང་དེ་མཚུངས་བཅས་སོང་། དགེ་སྦྱོང་སྦེག་ལ་རྦད་དང་། མཚོན་གྱི་དབང་བ་རྦད་དུ་ནོར་བ་སོགས་ལས་པར་འཛུགས་མང་པོ་བར་ཆུད་ཟོས་ཀྱི་རྒྱུར་སྣང་། དཔལ་གྲ་སུམ་ཅུ་སྐོར་གྱིས་གཙོས་འདུས་པ་བཞི་བཅུ་སྐོར་ལ། གྲོལ་ཐིག་རིག་འཛིན། ཐུགས་རྗེ་ཆེན་པོ་ཞི་དྲག །འཆི་མེད་སྐུ་གསུམ་འདུས་པ། གཤིན་རྗེ་གསུམ་དྲིལ་རྣམས་ཀྱི་དབང་དང་།
འདོན་ཆོས་ཕལ་ཆེར་གྱི་ལུང་བཅས་བགྱིས་ཤིང་། མདོ་སྔགས་སྨོན་ལམ་ལ་གོ་དོན་བཤད་པ་ཡིག་ཐོག་འཁོད་པ་བྱས། སྲིད་སྐྱོང་རྟ་ཚག་རིན་པོ་ཆེས་རྒྱུད་འབུམ་དཀར་ཆག་གི་མཚོན་པའི་རྩོམ་རིགས་གཡར་པོ་དགོས་ཚུལ་དང་། རྒྱུད་འབུམ་གསུང་སྒྲོག་བྱེད་དུ་གནང་བ་ཉིན་གསུམ་གྱི་རིང་གྲྭ་པ་རྣམས་ཀྱིས་བསྒྲུབ། གྲོལ་ཐིག་གི་བདག་འཇུག་བླངས་ཤིང་། ཆོ་ག་ཕྱག་ལེན་ལའང་གདར་བྱས། གཤིན་རྗེའི་སྐོར་དང་། ཐུགས་རྗེ་ཆེན་པོའི་སྐོར་ལ་ཡིག་གསར་བྱུང་བ་ཞབས་ཏོག་ཡིན་ཀྱང་། གཏེར་གཞུང་དང་སྤྲུལ་པའི་གཏེར་སྟོན་གྱི་ལྗངས་སྒྲིགས་ལ་བཅོས་ན་མི་ལེགས་པས་ནོར་བ་ཡོད་སར་མཆན་བུས་བཏབ། ལར་ཚེ་བདག་ཟླ་གསང་ནག་པོ་དང་། འཆར་ཀ་ཆུ་ཐིག་སྔན་པོའི་རྒྱུད་ན་བསྡུ་ལུགས་ལེགས་པ་གནུབས་ཆེན་གྱི་རྣལ་དཔྱོད་དུ་ཆེ་བ་བཞིན་སྤྲུལ་པའི་གཏེར་སྟོན་ཆེན་པོ་འདིས་གཤེད་སྐོར་ལ་དེ་བཞིན་གཤེགས་པའི་རིགས་ཕྱག་རྒྱ་ཟིལ་གནོན་རྡོ་རྗེའི་རིགས་འཇོམས་བྱེད་ནག་པོ། །རིན་པོ་ཆེའི་རིགས་ཁ་ཐུན། པདྨའི་རིགས་འཇིགས་བྱེད་དུ་མཚན་དམར་པོ། །ལས་ཀྱི་རིགས་གཤོར་སོང་ཉི་མ་ཁྲོས་པ་སོགས་རིགས་ལྔ་དང་། ཚེ་བདག་བཀའ་གཏེར། ལྕགས་འདྲ་ལྕགས་སྡིག །ཁྲོ་ཆུ་ཀི་ཀང་། ཡང་བཟློག །
གསར་མའི་གཤེད་སྐོར་རྒྱ་མཚོ་ལྟ་བུ་གསན་ཅིང་ལྷོངས་སུ་གྱུར་པ་ཡིན་ན། གང་ཅན་མཚོའི་ཞིང་ཁམས་ལ་འཛམ་བུའི་གླིང་གི་གླིང་བཤད་བྱེད་པའི་སྔ་རབས་པ་ཁ་ཅིག་གིས་འཇིགས་བྱེད་ཡོད་པ་གཞན་ཕྱོགས་དང་འདྲེས་པའོ་སྙམ་དུ་རྟོག་ཅིང་དཔྱོད་བ་ནི་མུ་ཅོར་སྨྲ་བ་ཡིན་ནོ། །ལོ་སྔ་ཕྱིར་ཕུར་པ་རྒྱུད་ལུགས་ཀྱི་སྦྱིན་སྲེག་འབུམ་ཐེར་རེ། ཆབ་གཏོར་དེ་མཚུངས། ཚེ་གཟུངས་འབུམ་ཐེར། བཤགས་རྒྱུད་བརྒྱ་རྩ། རྒྱས་འབྲིང་བསྡུས་གསུམ། ཚེ་མདོ་བརྒྱ་རྩ་དང་། དཔལ་རིར་འདུས་པ་མདོའི་སྒྲུབ་མཆོད་ལ་ཞབས་ཏོག་ཉིན་འཁྱོངས། འགྱེད་ཊཾ་ཁ་རེ། རྒྱུད་འབུམ་པོད་ཉེར་ལྔ་དང་། མཛོད་བདུན་ཤིང་རྟ་སྐོར་གསུམ་རྩ་འགྲེལ་དང་བཅས་ཁྱོན་པོད་སུམ་ཅུ་སོ་བདུན་ལ་ན་བཟའ། གདོང་དར། གླེགས་ཆབ་དངུལ་དཀར་གཟོང་རིས་མཆེ་གསེར་ཅན་ཞོ་ལྔ་རེའི་ལྗོད་ལྡན། ཏོང་སྐུད་ལྗང་གུའི་སི་ཏ་ཏུ་ཞེ་མཚུངས་དང་། རྟེན་གཙོ་རྣམ་སྣང་ལ་རིན་པོ་ཆེའི་པྲོག་ཞུ་གཡུ་བད་གསུམ་པ། གཡུ་བྱུར་སྤེལ་བའི་སྐྲ་སྡོམ་བཅས་དངུལ་སྲང་བརྒྱའི་རིན་ཐང་ཅན་ཕུལ། ལྷ་བབ་དུས་ཆེན་ཉིན་སྲོང་བཙན་དུ་སྟོང་མཆོད་དང་། ཀ་འཕན་ཆེ་བ་ཆ། བཟང་གོས་ཀྱི་གདུང་འཕུར་མ་ཅན། ཁྲ་འབྲུག་ཨོ་རྒྱན་ལྷ་ཁང་གི་ཕྱི་ཁྱམས་ཀ་གླིང་བཞིའི་སར་བཟང་གོས་བཅད་ལྡན་མེ་ཏོག་སེར་པོ་དང་། །རྒྱན་བཞི་སྔོན་པོས་
མཐོངས་བྱས་པའ་མཛོད་གོས་ཚོས་སྤེལ་ཡུག་བཅུ་དྲུག་གི་གནམ་རྒྱན་དང་། ཞལ་གསོའི་སྟོང་མཆོད་བཅས་ཕུལ། ལྷོ་བྲག་ཐུགས་སྲས་སྐུ་སྐྱེ་རིན་པོ་ཆེ་གཞིས་ཀར་འཁོར་ཞག་ལ་ཕེབས། དབང་ཞིག་དགོས་གསུངས་པ་ལ་ཐུགས་རྒྱུད་སྨིན་དུ་རེ་བས་མཁའ་འགྲོ་ཡང་ཏིག་བྱས། ཐེགས་ཁར་གཅོད་ཀྱི་ལུང་དགོས་གསུང་པ་བླ་མ་སྐུན་ཕྲ། ལས་དང་པོ་བ་ཡི་སེམས་ཅན་ལ། །སྟོན་པའི་འདུ་ཤེས་བསྐྱེད་པར་བྱ། །ཞེས་པ་ལ་སེམས་བསྐྱེད་ནས་རྟེན་འབྲེལ་མི་ལྡོག་པར་བྱས་ཤིང་། མཛོད་བདན་ཤིང་རྟ་སྐོར་གསུམ་དང་། རང་མཛོད་རྩ་འགྲེལ་སོགས་ཀྱི་བཀ་གཏད་སྨོན་ལམ་བྱས། ལར་ཕལ་མོ་ཆེ་ལ། མཛའ་མིན་དེ་ནི་ཤེས་རབ་མགོན། །སྡིག་དང་བྱིས་གྲོགས་ཀྱིས་བཀབ་པའི། །གླང་པོ་བསྟི་གནས་ཙམ་གྱིས་དྲེགས། །རྒྱ་ཆེན་ཆོས་ཀྱི་སྣོད་ལས་བསྐལ། །ཀརྨ་པ་ཞྭ་ནག་རིན་པོ་ཆེའི་གསུང་འཕྲིན་ལ་ཡོན་ཏན་མཛོད་ཀྱི་སྐྱེས་ལན་ཕུལ། ལྷོ་མོན་ཁོ་ལོང་སྟོད་རྩ་མདའ་ཞེས་པའི་ས་ཡུལ་དུ་རང་སློབ་ཕྲིན་ལས་རྒྱལ་མཚན་གྱི་དགོན་གནས་མཆོད་ཁང་གསར་བཞེངས་ལ། རྟེན་སྐལ་སྒྲོལ་མ་ཆོས་ལི། ཐུབ་དབང་བཀའ་ལི་ ཙནྡན་དམར་པོའི་སློབ་དཔོན་ཆེན་པོག་ཙོ་འཁོར། ཙན་འདམ་གྱི་མཆོད་རྟེན་བྱིན་ཅན། རྡོར་དྲིལ། མཎྜལ། མཆོད་ཀོང་སོགས་མཆོད་ཆ་དང་། རྟེན་གསར་
བཞེངས་ཀྱི་གཟུངས་ལ་སངས་རྒྱས་གསེར་ཐུབ་ཀྱི་རིང་བསྲེལ། འབོར་ཆེ། བྱིན་རྟེན་སྣ་འདུས། ཉེ་བར་སྤྱད་པའི་གྱོན་པ་སོགས་བསྐུར་ཞིང་དགོན་པའི་མིང་འགྲོ་ཕན་འོད་ཟེར་གླིང་དུ་བཏགས། སློབ་དཔོན་འཇིགས་མེད་པ་དེངས་ཁར། གདུང་བསམ་ཡོངས་ལྷ་བསྟན་རྒྱས་རི་བོ་དཔལ་འབར་གླིང་གི་རྟེན་སྐལ་དུ་ཆོས་ལི་ལས་གྲུབ་པའི་ཨོ་རྒྱན་ཆེན་པོའི་སྣང་བ་བརྙན་ཆེ་ལེགས་བྱིན་ཅན། རྡོར་དྲིལ་གསེར་མགོ་མ་ལེགས་པ། ཧོར་སྦུབ་མཛོད་འགྲེལ་བོད་གཉིས་བཅས་བསྐུར། སྲིད་སྐྱོང་རྟ་ཚག་རིན་པོ་ཆེའི་ཕུར་སྒྲུབ་བདུན་ཕྲག་གཅིག་བཙུགས། ཇོ་བོ་ཤཱཀྱ་མུ་ནེར་ཆོ་འཕྲུལ་ཟླ་བ་རིལ་པོར་མཆོད་མེ་སྡོང་རྐང་ཉིན་འཁྱོངས་བ་དང་། སྙན་ཤལ་ཨ་ཡུ་ཤེ་བསྲངས། མཁའ་འགྲོའི་མེ་མཆོད་འཐུམ་ཐེར། ཚེ་གཟུངས་འབུམ་ཐེར། མངའ་གྲར་མང་ཇ། དབུལ་བོར་སྦྱིན་གཏོང་སོགས་བྱས། རྣམ་སྨིན་གྱི་ལུས་རྟེན་འདིའི་ཆོས་ཉིད་ཀྱི་རྟེན་ཅན་བྷི་དྷིཙིཏྟ་རཏྣ་དྲི་བཞོན་གྱི་དཔྱར་ཐག་ལ་དྲང་བ་དང་། ཁྱབ་པར་གསལ་བ་སོགས་ལ་ལང་ཚོའི་དུས་ནས་འབད་མི་དགོས་པའི་རང་དབང་ཅན་ཉིད་ནའང་། རྒྱལ་དང་རྒྱལ་སྲས་རྣམས་ཀྱི་ཐུགས་རྗེའམ། །ལས་ཀྱི་གཞན་དབང་གང་ཡིན་ཀྱང་། །རིང་མོའི་གང་ནས་རྒྱ་གར་རྒྱལ་པོས་གླང་ཆེན་ཐལ་ཀར་གཞོན་
ནུའི་སྐྱེས་བསྐུར་བའི་རྨི་ལྟས་ལྟར་ཀུནྟའི་མྱུ་གུ་ཞིག་ཀྱང་འཕེལ། སྔ་ལོ་སྒོམ་པ་ཞིག་གཡའ་ལུང་དུ་བསྒྲུབ་པའི་རྨི་ལྟས་སུ། པདྨ་འོད་གླིང་ནས་ཡོན་བདག་གི་ཁྱིམ་ཐོག་རྒྱལ་མཚན་ལ་འོད་ཟེར་འཕྲོ་བ་དང་། སྐྱེད་ཚལ་དེར་ཧ་ལོའི་སྡོང་པོ་ཡ་མཚན་ཅན་སྐྱེས་པ་ལ་མིང་མང་པོས་བསྐོར་བ་བྱེད་པ། ལོ་འདིར་སྐྱ་རེངས་དང་ཉི་མ་ནུབ་ཕྱོགས་ནས་གསུམ་ཤར་བ་དང་། བླ་མ་དཔལ་སྡིངས་པ་ལོ་གསུམ་ལ་ཡོད་ཐོག་ལྷུམས་དུས་དང་མཚུངས་པར་ཁང་ཐོག་དེར་ཁྲི་ལྕོག་མཐོན་པོ་དཀར་ཡོལ་དང་བཅས་པ་རས་དཀར་གྱིས་ཁེབས་བྱས་པ་སོགས་བྱུང་ཟེར་ཀྱང་རེ་དོགས་དང་འདུས་བྱས་ནི། བསླུ་བའི་ཆོས་ཅན་ཉིད་ཡིན་ཕྱིར་མཉམ་པ་ཆེན་པོར་གདལ། འོན་ཀྱང་ལ་ཉེ་ནི་བཟང་སྟེ། དེ་མ་ཐག་པའི་ཞག་བདུན་པ་ལ་མདོ་ཁམས་ནས་རང་སློབ་དད་དམ་ཤེས་རབ་ཅན་འཇིགས་མེད་བློ་གསལ་ས་སྐྱོང་སྡེ་དགེའི་བརྟན་བཞུགས་འབུམ་རྒྱུ་དང་། རྡོ་བླ་འཇིགས་མེད་ཀྱིས་དབུས་རྫོགས་ཆེན་ཕྱོགས་ཀྱི་བླ་མ་བླ་མཆན་སྡེ་དགེའི་མི་དྲག་རྣམས་དང་བཅས་པའི་མཚམས་ཞུ་རྟེན་སུམ་ཅུ་སྐོར་འབྱོར། རྡོ་བླ་འཇིགས་མེད་ཕྲིན་ལས་འོད་ཟེར་དཔོན་སློབ་སྡེ་དགེའི་ཕོ་བྲང་དུ། ཕུར་པ་རྒྱུད་ལུགས་དང་། དཔལ་ཆེན་གྱི་སྒྲུབ་པ་མཛད་པས། མངོན་རྟགས་ལེགས་ཚུལ་དང་། སྡེ་དགེའི་མངའ་རིས་
དགེ་རྩེ་ཞེས་པའི་ཡུལ་དུས་སྐྱོང་དབང་མོས་བདག་རྐྱེན་མཛད་ནས་མི་སེར་ལ་ཐོ་མི་ཕོག་པའི་གནང་སྦྱིན་དངུལ་སྲང་བརྒྱ་སྐོར་བཅས་རང་ལུགས་ཀྱི་ཆོས་བརྒྱུད་འཛིན་པའི་དགོན་པ་འདུ་ཁང་ཀ་བ་བཅུ་དྲུག་གིས་གསར་འདེབས་མཛད། སྔ་སོར་པར་ཁང་གི་བཀའ་བསྟན་པར་ཤོག་ངན་པ་བཟང་དུ་བཏང་བའི་དགེ་བསྐུལ་དང་ལན་གནང་ཚུལ་བཅས་འབྱོར། གནད་བྱང་ལས། ངང་ཚུལ་ལོ་གྱོང་རྒྱལ་མོ་བཙུན དབྱིངས་ཕྱུག་མཁའ་འགྲོ་ཨར་ཀ་ཛས ཆོས་སྲིད་རྟེན་འབྲེལ་ལེགས་ཚོགས་སྤེལ ཞེས་པ་དང་། རྡོ་བླས་ཀློང་སྙིང་གི་ཁྲིད་བཤད་པའི་དུས་པ་སྔ་ཕྱི་བར་གསུམ་ལ། ཉིས་སྟོང་དང་། སུམ་སྟོང་དང་། ལྔ་སྟོང་ལ་སོགས་པ་བྱུང་ཞིང་། ཁྱིམ་པ་རྣམས་ཀྱི་རྔོན་པ་མི་བྱེད་པའི་དམ་བཅའ་འབུལ་བས་སྲོག་ཆགས་པ་གྲངས་ལས་འདས་པ་ཚེ་ཐར་ཞིང་མི་འཇིགས་པའི་སྦྱིན་པ་ཐོབ་པས། ངེད་ཀྱི་དབེན་པ་བཟུང་ནས་སྨོན་འཇུག་གི་སེམས་བསྐྱེད་པ་ལ་གྲུབ་འབྲས་ཟུང་ཟད་བྱུང་སྙམ་པའི་སྤྲོ་བསྐྱེད། ནམ་སྙིང་ཉང་ནམ་མཆོག་དབྱངས་དང་ ལྷ་སྲས་སྤྲུལ་པས་ཆོས་སྒོ་འབྱེད ཅེས་པའི་ལུང་བསྟན་རྣམས་མངོན་དུ་གྱུར། དགོན་རྩེ་སྤྲུལ་པའི་སྐུ་ཕེབས་ནས་ཟླ་གཅིག་ལྷག་བཅས་བཞུགས་རིང་དབང་ཆོས་དང་ཆོས་དོན་གྱི་དྲི་བ་མཛད་པ་
རྣམས་ལ་རྟོན་པ་བཞི་ལྡན་གྱི་ལན་ཡང་དག་བྱས། ཆོས་མཐུན་དད་ལྡན་གྱི་སློབ་མ་འཇིགས་མེད་བློ་གསལ་ཅན་དང་འཇིགས་མེད་ཆོས་ལྡན། གླིང་སྤྱི་བོ་རི་ཁྲོད་ཀྱི་སློབ་དཔོན་རིག་འཛིན། ཆབ་མདོ་ཀརྨ་རབ་རྒྱས། དར་མདོ་བ་པདྨ་སྐལ་བཟང་། རྒྱལ་རོང་པ་བསོད་ནམས་བཀྲ་ཤིས། ཡིད་ལྷུང་བ་པདྨ་དཀོན་མཆོག །ཀརྨ་ཕུན་ཚོགས་གཉིས་སོགས་འདུས་པ་ཉི་ཤུ་སྐོར་ལ་ཀློང་སྙིང་གི་ཁྲིད་སོགས་སྨིན་གྲོལ་གྱི་སྒོ་ཕྱེ། དཔལ་འཛིན་གྱི་འབྱམས་ཡིག་ལན་རྒྱལ་བ་གཉིས་པས་མཛད་པ། དཀར་ཆག་རིན་པོ་ཆེའི་མཛོད་ཁང་དུ་ཡང་མ་ཐེབས་ཤིང་། དཔེ་རྒྱུན་ད་བན་མཐོང་ཐོས་མ་བྱུང་བ་འདི་ལོ་གཙང་ནས་རྙེད་པ་ལ་ལྷན་ཐབས་གསར་བསྣན་དང་། ཀུན་སློང་ངན་པའི་ངག་ཚིག་བརླང་པོས་ཀ་དག་ལ་ཟུར་ཟ་བྱས་པའི་ལན་དགོས་ཚུལ་ལ། བོད་འདིར་སྔོན་གྱི་མཁས་པ་རྣམས་ཀྱི་དགག་སྒྲུབ་ཀྱང་ཕྱོགས་ལྷུང་གི་ཀུན་ནས་བསླང་པའི་ཆོས་སྤང་དང་བསྟན་སེལ་སྡེ་འཁྲུགས་སོགས་ཀྱི་རྒྱུ་འབའ་ཞིག་ཏུ་སོང་སྣང་ན། དེང་སང་ཕྱོགས་རེའི་མིག་ཅན་ལ་གག་ལན་དགོས་པའི་རྒྱུ་མི་སྣང་སྟ། གཟུ་བོར་གནས་པ་དང་། དད་པའི་རྗེས་འབྲངས་རྣམས་ཡིད་གཉིས་ལས་གྲོལ་བའི་ཕྱིར། རྡོ་རྗེ་གཟིགས་མའི་མཚོན་ཆ་དེ་བློ་ཐོག་ནས་ཡུད་ཙམ་ལ་བྲིས། ལར་ཀ་དག་གི་