སྒྲ་མི་སྙན་གྱི་ཚེ་གྲུབ། །
སྒྲ་མི་སྙན་གྱི་ཚེ་གྲུབ་བཞུགས་སོ། །
རྩ་བརྒྱུད་བླ་མའི་ཞབས་བཏུད་ནས། །ཚེ་ཡི་རིག་འཛིན་སྒྲུབ་པའི་ཐབས། །ཀུན་མཁྱེན་བླ་མའི་གདམས་པ་བཞིན། །འདིར་ནི་གསལ་བར་འདྲི་བར་བྱ། །འཆི་མེད་རང་གཟུངས་ཉམས་སུ་ལེན་པར་འདོད་པས་ནང་པར་བྱ་རོག་གིས་སྐད་མ་བཏོན་པའི་གོང་དུ་གྲུབ་ན་རབ། གང་ཡིན་ཀྱང་སུ་ལའང་ངག་མ་སྨྲས་པའི་གོང་དུ་བདེ་བའི་སྟན་ལ་འཁོད་དེ། སྐྱབས་འགྲོ་སེམས་བསྐྱེད་སྤྱི་འགྲོ་དང་མཐུན་པར་ཡིད་ཁུལ་ངེས་ཤེས་པ་བྱ། ཁྱད་པར་དུ་འདི་ཉིད་ཀྱི་རྩ་བ་དང་བརྒྱུད་པར་བཅས་པའི་བླ་མ་ལ་མོས་གུས་ཆེར་བསྐྱེད། སངས་རྒྱས་བསྒྲུབ་པའི་ཆེད་དུ་ཆོས་སྒྲུབ་པ་ལ་ཚེ་རིང་བ་གལ་ཆེ་བས་ཚེའི་རིག་འཛིན་
བསྒྲུབ་སྙམ་དུ་སེམས་བསྐྱེད། དེ་ནས་རང་ཉིད་ཚེ་དཔག་མེད་དུ་གསལ་བའི་སྙིང་གའི་ཧྲཱིཿ ཡིག་གི་འོད་ཟེར་གྱིས་བདེ་བ་ཅན་ནས་ཚེ་དཔག་མེད་ལ་རྩ་བརྒྱུད་ཀྱི་བླ་མ་སོགས་ཀྱིས་བསྐོར་བ་མདུན་གྱི་ནམ་མཁར་སྤྱན་དྲངས་ལ། མཆོད་པ་དང་ཡན་ལག་བདུན་པ་བྱ། ཚད་མེད་བཞི་བསྒོམ།ཚོགས་ཞིང་རྣམས་མཉེས་ཏེ་རང་ལ་ཐིམ་པས་ལུས་འོད་དུ་གྱུར། ༀ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱ་ཏྨ་ཀོཉཧཾ། ཞེས་བརྗོད་ལ་སྟོང་ཉིད་བསྒོམ། སྟོང་པའི་ངང་ལས་པཾ་ལས་ལྕགས་ཀྱི་པདྨ་འདབ་མ་བརྒྱད་པ། སྐྱ་ཁྲོམ་མེ་བ་ཞིག་གི་སྟེང་དུ་ཨ་ལས་ཟླ་བའི་དཀྱིལ་འཁོར་ཉ་གང་བ། དེའི་སྟེང་དུ་ཧྲཱིཿདམར་པོ་ཚེག་དྲག་རིང་ཆ་དང་བཅས་པ་
ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། ཁྱད་པར་དུ་ཚེའི་བར་ཆད་སྦྱངས་ནས་ཚེ་དཔག་མེད་ཀྱི་གོ་འཕང་ལ་བཀོད། སངས་རྒྱས་སྲས་བཅས་རྣམས་ལ་མཉེས་པའི་མཆོད་པ་ཕུལ། ཐུགས་རྒྱུད་བསྐུལ། དེ་རྣམས་ཀྱི་བྱིན་རླབས་དང་འཇིག་རྟེན་དང་འཇི་རྟེན་ལས་འདས་པའི་རྫས་སོགས་སྨན་བཅུད་ཀྱི་ནུས་པ་ཐམས་ཅད་བསྡུས། ཧྲཱིཿཡིག་ལ་ཐིམ་ཡོངས་སུ་གྱུར་པ་ལས་རང་ཉིད་སངས་རྒྱས་ཚེ་དཔག་ཏུ་མེད་པ་སྐུ་མདོག་དམར་པོ་བྱུ་རུའི་མདོག་ལྟ་བུ་ཞལ་གཅིག་ཕྱག་གཉིས་ཀྱིས་མཉམ་གཞག་གི་ཕྱག་རྒྱ་མཛད་པའི་སྟེང་དུ་འཆི་མེད་ཚེའི་བདུད་རྩིས་གང་བའི་རིན་པོ་ཆེ་གསེར་གྱི་བུམ་པ་དཔག་བསམ་གྱི་ཤིང་གིས་ཁ་བརྒྱན་པ། ལྷའི་གོས་ཀྱིས་མགུལ་ཆིངས་བྱས་པ་བསྣམས་ཤིང༌། ཞབས་གཉིས་རྡོ་རྗེའི་སྐྱིལ་ཀྲུང་གིས་བཞུགས་པ། དར་དམར་པོའི་ཆོས་གོས་རྣམ་གསུམ་སྐུ་ལ་གསོལ་ཞིང༌། དབུའི་གཙུག་ཏོར་ལ་སོགས་པ་མཚན་དང་དཔེ་བྱད་ཀྱིས་མཛེས་པ། ཟླ་བ་ཉ་ཡོངས་སུ་གང་བའི་རྒྱབ་ཡོལ་དང་ལྡན་ཅིང་ཕྲག་གོང་གཡས་གཡོན་དུ་ཉི་ཟླ་འཆར་བ། འོད་དམར་པོ་འབར་ཞིང་འཁྱིལ་བའི་དབུས་སུ་བཞུགས་པ་དེའི་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུཾ་སྔོན་པོ། ཁོང་པའི་ནང་རྒྱབ་ལ་ཉེ་བར་ལྕགས་ཀྱི་སྲོག་རྩ་སྦ་དབྱུག་ཙམ་ཡར་སྣ་སྦྱི་གཙུག །མར་སྣ་གསང་གནས་སུ་ཟུག་པ་
དེའི་ནང་དུ་རྩ་དབུ་མ་མདའ་སྨྱུག་ཙམ། མདོག་སྔོན་སྐྱ་ལ་དམར་བའི་མདངས་ཆགས་པའི་ནང་འོད་གསལ་གྱི་རླུང་དམར་ལྗང་ཁྱུག་གི་བས་གང་བ། དེ་ལ་མེ་ལོང་ལ་གཟུགས་བརྙན་ཤར་བ་ལྟར་གསལ་བའི་སྔགས་ཕྲེང་ཚར་བརྒྱད་ཀྱི་ཕྱོགས་བཞིའི་མགོ་བོ་གྱེན་བསྟན། མཚམས་བཞིའི་མགོ་བོ་ཐུར་བསྟན་ཏེ། སྔགས་མགོ་མཇུག་འབྲེལ་བས། དབུ་མའི་ཡར་རྩེ་ནས་མར་རྩེའི་བར་མ་ལུས་པ་ཁྱབ་པ། དབུ་མའི་མར་སྣའི་ནང་དུ་རང་འདྲའི་ཚེ་དཔག་མེད་དམར་པོ་དང༌། ཡར་སྣའི་ནང་དུ་ཚེ་དཔག་མེད་དཀར་པོ་ཆ་ལུགས་རང་དང་འདྲ་བ་འོད་ཀྱི་ཕུང་པོ་ཅན། མགོ་བོ་གྱེན་བསྟན་དུ་བཞུགས་པ། སྙིང་གའི་རྩ་འཁོར་གྱི་དབུས་ཀྱི་ཐད་ཀའི་དབུ་མའི་ནང་དུ་རང་འདྲའི་ཚེ་དཔག་མེད་དམར་ལ་སྔོ་བའི་་མདངས་ཆགས་པ། དེའི་སྙིང་གར་ཟླ་བའི་སྟེང་དུ་འཆི་མེད་ཚེའི་བདུད་རྩིས་གང་བའི་བུམ་པ། དེའི་ནང་དུ་ཟླ་བ་ལ་གནས་པའི་གསེར་གྱི་རྡོ་རྗེ་རྩེ་ལྔ་པ། དེའི་ལྟེ་བའི་ཐང་དུ་ཟླ་གདན་ལ་འོད་ཀྱི་གའུ་ཁ་སྦྱོར་གྱི་ནང་དུ་ཧྲཱིཿ ཡིག་གམར་པོ་ཚེག་དྲག་རིང་ཆ་དང་བཅས་པ་དང༌། ཧཱུཾ་ཡིག་སྔོན་པོ་གཉིས་ཕན་ཚུན་དུ་འཁྲིལ་བ། འོད་ཟེར་ལྔ་འཕྲོ་བ་ཡེ་ཤེས་ལྔའི་བདག་ཉིད་ཅན་རང་གི་སེམས་ཀྱི་ངོ་བོར་མོས། ནང་གི་ཧྲཱིཿདང་ཕྱིའི་ཧཱུཾ་གཉིས་ལས་འོད་ཟེར་ལྕགས་ཀྱུ་ལྟ་བུ་འཕྲོས། སྟེང་ཕྱོགས་ཡོན་ཏན་བཀོད་པའི་ཞིང་ཁམས་
ནས་རང་དང་ཇི་བཞིན་དུ་འདྲ་བའི་ཚེ་དཔག་མེད་ཡེ་ཤེས་པ་སྤྱན་དྲངས་ཏེ། རང་གི་སྤྱི་གཙུག་གི་རྒྱབ་ངོས་ན་བཞུགས་པར་བསྒོམས་ལ། ༀ་ཨ་པར་མི་ཏ་ཨཱ་ཡུར་ཛྙཱ་ནས་བ་རི་ཝཱ་ར་བཛྲ་ས་མཱ་ཛཿ ཞེས་བརྗོད། རྡོ་རྗེ་བསྡུ་བའི་ཕྱག་རྒྱ་བྱ། འཇིག་རྟེན་འདྲེན་པའི་ཞེས་སོགས་ཤློ་ཀ་གཅིག་གིས་བསྟོད། མཆོད་པས་མཆོད་ལ། ཧཱུཾ་སྐྱེ་འཆི་རབ་སྤངས་རྡོ་རྗེའི་ཚེ། །བདག་ལ་ཚེ་ཡི་དངོས་གྲུབ་སྩལ་དུ་གསོལ། །ༀ་བཛྲ་ཨཱ་ཡུ་ཥེ་ས་ར་ཧ་ཀ་ར་རེ་ཤ་ར་རི་ཧཱུཾ་ཕཊ། ཅེས་ལན་གསུམ་གྱིས་གསོལ་བ་བཏབ་པས་སྟེང་གི་ཚེ་དཔག་མེད་ཀྱི་ཐུགས་ཀ་ནས་འོད་ཟེར་དམར་པོ་ལྕགས་ཀྱུ་ལྟ་བུ་ཕྱོགས་བཅུར་འཕྲོས་པས། རང་གི་ཐོག་མ་མེད་པ་ནས་ཚེ་དང་བསོད་ནམས་སོགས་གཞན་གྱིས་བརྐུས་པ། ཡར་བ། འཐོར་བ། བླ་བཀུག་པ། གཏད་དུ་བཅུག་པ་སོགས་གང་ན་ཡོད་པ་ཐམས་ཅད་བཅིངས་པ་རྣམས་བཀྲོལ་ཏེ་བཀུག་ནས་འཆི་མེད་བདུད་རྩིའི་རྣམ་པར་སྟེང་གི་ཚེ་དཔག་མེད་ཀྱི་བུམ་པའི་ནང་དུ་ཐིམ་བདུད་རྩི་ཁོལ་ཏེ་ལུད་པ་བུམ་པ་ཕྱིར་ཡོ་བའི་ཁ་ནས་རང་གི་སྦྱི་གཙུག་ཏུ་ཞུགས་པས་ལུས་ཀྱི་རྩ་ཐམས་ཅད་གང༌། རང་གི་ཚེ་དང་བསོད་ནམས་ཉམས་པ་རྣམས་གསོས། ཆད་པ་རྣམས་འཐུད། ཟད་པ་རྣམས་གསོས་ཏེ་འཕེལ་བར་བྱས་ནས་འཆི་མེད་ཚེའི་དངོས་གྲུབ་ཐོབ་པར་བསམ། སླར་ཡག་སྔར་བཞིན་གསོལ་བ་བཏབ་པས། སྟེང་གི་ཚེ་དཔག་མེད་ཀྱི་ཐུགས་ཀ་ནས་འོད་ཟེར་
དམར་པོ་ལྕགས་ཀྱུ་ལྟ་བུ་ཕྱོགས་བཅུར་འཕྲོས་པས། རྩ་བ་དང་བརྒྱུད་པའི་བླ་མ་སངས་རྒྱས་བྱང་སེམས། དཔའ་པོ་དཔའ་མོ། གྲུབ་པ་དང་རིག་པ་འཛིན་པ་རྣམས་ཀྱི་བྱིན་རླབས་དང་ནུས་མཐུ་དང༌། སྣོད་བཅུད་ཀྱི་འཇིག་རྟེན་ཐམས་ཅད་ཀྱི་བཅུད་དང་ནུས་པ་རྣམས་འཆི་མེད་ཚེའི་བདུད་རྩིའི་རྣམ་པར་བསྡུས། ཚེ་དཔག་མེད་ཀྱི་བུམ་པའི་ནང་དུ་ཐིམ། ཁོལ་ཞིང་ལུད་པ་བུམ་པ་ཕྱིར་ཡོ་བའི་ཁ་ནས་སྦྱི་གཙུག་གི་དབུ་མའི་ནང་ནས་བརྒྱུད་དེ། རིམ་གྱིས་བབས་པས་ཉི་མའི་དཀྱིལ་འཁོར་གྱིས་གྲིབ་མ་དེད་པ་བཞིན་དུ་ཐོག་མ་མེད་པ་ནས་བསགས་པའི་སྡིག་སྒྲིབ་ནད་གདོན་བར་ཆད་རྣམས་དང་ཁྱད་པར་དུ་ཚེའི་བར་ཆད་རྣམས་རིམ་གྱིས་ཕྱིར་དེད། སེན་མོ་ཉི་ཤུ་དང་འོག་སྒོ་གཉིས་དང་བ་སྤུའི་བུ་ག་རྣམས་ནས། སྣག་ཚའི་ཁུ་བ་ལྟ་བུར་ནག་ཉིལ་ཉིལ་དོན་ཏེ། ས་རིམ་པ་བདུན་གྱི་འོག་ཏུ་སོང་བར་བསམ། སེན་མོ་ཉི་ཤུའི་བར་ནས། བདུད་རྩི་གྱེན་དུ་ལུད་པས་མཁྲིག་མ་ཕན། བརླ་རྩ་མན་བདུད་རྩིས་གང་བར་བསྒོམས་ལ་བུམ་པ་ཅན་གཅིག་བཟུང༌། དེ་ནས་གྲུ་མོ་དང་ལྟེ་བའི་བར་གང་བ་དང༌། ཕྲག་པ་དང་སྙིང་གའི་བར་གང་བ་དང༌། མགྲིན་པ་མན་ཆད་གང་བ་དང༌། སྣ་བུག་མན་ཆད་གང་བ་དང༌། སྦྱི་གཙུག་མན་ཆད་གང་བར་བསྒོམས་ལ་བུམ་བ་ཅན་རེ་རེ་བཟུང༌། ལུས་ཐམས་ཅད་འཆི་མེད་ཚེའི་བདུད་རྩིས་
གང་བར་བསྒོམས་ལ། བུམ་པ་ཅན་གཅིག་སྟེ་བདུན་བཟུང་པར་བྱའོ། །དེ་ནས་ལྷ་དང་སྔགས་ཕྲེང་གསལ་བའི་ངང་ནས། རང་གི་སེམས་ཧྲཱིཿཡིག་དང་དབྱེར་མེད་པས་སྔགས་ཕྲེང་ཀློག་པའི་ཚུལ་གྱིས་སྔགས་འདྲེན་པར་བྱ་ཞིང༌། སྐབས་སུ་དབུ་མའི་ནང་གི་ཚེ་དཔག་མེད་གསུམ་པོ་ལ་བརྟེན་པའི་སྤྲོ་བསྡུ་བྱ་སྟེ་ཞལ་ལས་ཤེས། ཐུན་འཇོག་ཁར་མཆོད་བསྟོད་བྱས་ལ། སྟེང་གི་ཚེ་དཔག་མེད་གདན་ལ་སོགས་པ་དང་བཅས་པ་རྣམས། རང་གདན་བཅས་སོ་སོ་ལ་ཐིམ་ནས། བྱིན་གྱིས་བརླབས་ཤིང་དངོས་གྲུབ་ཐོབ་པ་བརྟན་པར་བྱ་བའི་དམིགས་པ་བྱས་ལ་བུམ་པ་ཅན་ཅི་ནུས་བསྒོམ། དེ་རྗེས་ཚེ་དཔག་མེད་ཀྱི་གཟུངས་རིང་ཚར་བདུན་སོགས་གང་འཕྲོད་འདོན། བསྔོ་བ་སྨོན་ལམ་རྒྱས་པར་བཏབ། སྤྱོད་ལམ་ཐམས་ཅད་དུ་ཚེ་དཔག་མེད་ཀྱི་ང་རྒྱལ་བརྟན་པར་བྱ་ཞིང༌། ཐུན་མཚམས་སུ་དཀོན་མཆོག་མཆོད་པ། འབྱུང་པོ་ལ་གཏོར་མ། སྐུ་གཟུགས་བཞེང་བ་སོགས་ལ་བརྩོན་པར་བྱའོ། །ལོངས་སྦྱོད་ཆེ་རུ་འགྲོ་བ་ཡིན་པས་འདི་ཞུ་བའི་དུས་སུ་བླ་མ་ལ་འབུལ་བ་བཟང་དགོས་གསུང༌། བླ་མའི་ཞལ་སྔ་ནས་ངའི་གོང་གི་འདིའི་བརྒྱུད་པ་ལ་ལོ་དགུ་བཅུ་མ་བརྒལ་བ་གཅིག་ཀྱང་མེད། ལོ་རྒྱུས་དང་བླ་མའི་རྣམ་ཐར་རྣམས་ནི་གཞན་དུ་ཤེས་པར་བྱའོ། །བསྡུ་བར་འདོད་ན། ཚོགས་ཞིང་མཆོད་པ་བཞག་ཀྱང་ཆོག །
དེ་ལྟར་དམ་ཚིག་པ་བསྐྱེད་ཟིན་མ་ཐག །བདེ་བ་ཅན་ནས་ཡེ་ཤེས་པ་ཞིག་སྤྱན་དྲངས་ལ་བསྟིམ། དེ་ནས་དཀྱུས་བཞིན་བྱ་གསུང༌། ཤིན་ཏུ་བསྡུ་ན། རྫས་དང་དམིགས་མེད་ཀྱི་ངང་ནས་སྔགས་ཚར་ཉི་ཤུ་རྩ་གཅིག་རེ། གཞན་དུ་ཉིན་རེ་བཞིན་དུ་མ་ཆག་བར་བཟླས་ན་དེས་ཀྱང་ལོ་དགུ་བཅུ་མི་ཐུབ་མི་སྲིད་གསུང་། སྔགས་ནི། ན་མོ་བུད་དྷཱ་ཡ། ན་མོ་ངྷ་རྨཱ་ཡ། ན་མོ་སངྒྷཱ་ཡ། ཏདྱ་ཐཱ། ༀ་ཨད་ཏེ། བྷིད་ཏེ། བྷད་ཏེ། བྷིད་ཏེ། བྷི་ནན་ཏེ། ཀུ་ནན་ཏེ། ཏ་ཀེ། ཐ་ཀེ། ཐ་ར་ཀེ། ཏ་ར་ཀེ། ཧཱུ་རུ་མ་ཏི། ཧི་ལི་ཧི་ལི། མི་ལི་མི་ལི། སཾ་བྷཀྵ། བྷི་མུ་ན། ཛི་ཛཱ་བ་ནཱཾ། སི་སནྶ་ངྷུ། བྷནྡྷ་སྭཱཧཱ། ཞེས་སོ། །ཀུན་མཁྱེན་བླ་མའི་ཞལ་གྱི་བཅུད། །འདི་ནི་བློ་བཟང་གྲགས་པ་ཡིས། །བཤེས་གཉེན་བློ་གསལ་དོན་གཉེར་ཅན། །སངས་རྒྱས་མགོན་པོས་བསྐུལ་ཏེ་བཀོད། །ཞལ་གདམས་ཡི་གེར་བྲིས་པ་ལ། །མ་ཡིས་བུ་གཅིག་པ་ལ་བཞིན། །ཆོས་བདག་རྣམས་ཀྱིས་བཟོད་པར་མཛོད། །དགེ་བས་འགྲོ་བ་མ་ལུས་པ། །འཆི་བདག་བདུད་ལས་རབ་རྒྱལ་ཏེ། །རྡོ་རྗེའི་ཚེ་ནི་ཐོབ་པར་ཤོག །འདི་ཡང་མཁས་བཙུན་བླ་མའི་གསུང་བཞིན་བཀོད་པའོ།། །།ཤུ་བྷ་མསྟུ། སརྦ་མངྒ་ལཾ།། །།ཨོཾ་སྭ་སྟི། རྒྱལ་བསྟན་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདབ་རྒྱས་རྣམ་གྲོལ་སྦྲང་རྩིའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ།། །།