གཏོར་མ་བརྒྱ་རྩའི་རིམ་པ་མཚུངས་མེད་ཆོས་ཀྱི་རྗེ་བློ་བཟང་གྲགས་པའི་ཕྱག་ལེན
གཏོར་མ་བརྒྱ་རྩའི་རིམ་པ་མཚུངས་མེད་ཆོས་ཀྱི་རྗེ་བློ་བཟང་གྲགས་པའི་ཕྱག་ལེན་བཞུགས་སོ། །
བླ་མ་དམ་པ་རྣམས་ལ་ཕྱག་འཚལ་ལོ། །གཏོར་མ་བརྒྱ་རྩ་གཏོང་བའི་ཚུལ་འདི་ལ། སྔོན་འགྲོའི་རིམ་པ། དངོས་གཞིའི་ཆོ་ག །མཇུག་གི་བྱ་བ་གསུམ་གྱི། དང་པོ་ནི། གཏོར་མའི་སྣོད་བཤམ་པའི་ཚུལ། གཏོར་མའི་མགྲོན་གྱི་རིམ་པ། ཞལ་ཟས་ཀྱི་རིམ་པ། ཞལ་ཟས་འབུལ་ཚུལ་ལོ། །སྣོད་བཤམ་པའི་ཚུལ་ནི། གཏོར་སྣོད་ལྕགས་སམ་བསེ་ལ་སོགས་པ་མ་ཡིན་པ། ཟངས་སམ་རིན་པོ་ཆེའི་སྣོད་དམ། མ་འབྱོར་ན་ཤིང་ངམ་རྫ་ལ་སོགས་པ་གང་ཡང་རུང་སྟེ། སྣོད་དེ་གང་ཡིན་ཡང༌། ལེགས་པར་བཀྲུས་ཤིང་བྱི་དོར་བྱས་ལ། བཤམ་པའི་དུས་སུ་གཏོར་སྟེགས་ཀྱི་སྟེང་དུ་གྲལ་གྱི་རིམ་པ་ཁྲིག་གི་ཡོང་བར་བྱ་ཞིང༌། ཡ་ཡོ་འགྱལ་
འགྱེལ་མེད་པར་གཏོར་སྣོད་གཅིག་ལ་གཅིག་མ་རེག་པར་བཤམ་མོ། །བཅུད་བཤམ་པའི་ཚུལ་ནི། གཏོར་མའི་ཡོ་བྱད་ཆང་ལ་སོགས་པ་མ་དག་པའི་རྫས་མ་ཡིན་པ། ཕྱེ་ཕུད་གཙང་མ་ལ་དཀར་གསུམ་ལ་སོགས་པ་དང་ལྡན་པའི་གཏོར་ཟན་ལེགས་པར་བསྒྲུབས་ལ། དེའི་ཕུད་ལ་ཞལ་ཟས་བཅད་དེ་ལྷ་བཤོས་བྱ། གཞན་རྣམས་དུ་མ་བུ་བཅུ་གཅིག་ཏུ་བགོས་ལ། བཅུ་པོ་རེ་རེའང་ཆ་བཅུ་བཅུར་གསིལ་ལ། བཅུ་གཅིག་པ་དེ་དུ་མ་བུ་བརྒྱད་དུ་བགོས་ལ་བཤམ་པའི་ཚེ། གཏོར་སྣོད་ནང་དུ་ཟན་རྣམས་གཅིག་གིས་གཅིག་ལ་མ་རེག་པར་བཤམ་ཞིང༌། དེ་ལ་ཆུ་གཙང་གཏོར་ཟན་གྲངས་དང་མཉམ་པའི་ཐིགས་པའམ། ཡང་ན་གཏོར་སྣོད་རེ་རེ་ལ་མཚམས་བཅད་ཅིང་
བཤམ་མོ། །གཏོར་མགྲོན་གྱི་གོ་རིམ་ནི། བླ་མ་དགེ་བའི་བཤེགས་གཉེན་རྣམས་ཀྱི་བཞེད་པས། གཏོར་མགྲོན་མི་འདྲ་བ་འགའ་རེ་ཡོད་ཀྱང༌། བྱང་སེམས་ཟླ་བ་རྒྱལ་མཚན་གྱིས་མཛད་པའི་གཏོར་མའི་རིམ་པ་ནི། །དམ་པ་རྣམས་ཀྱིས་ཕྱག་ལེན་དུ་མཛད་པ་མང་ཞིང༌། རྣམ་པར་དག་པ་དང་འཇུག་པ་བདེ་བས་དེའི་རྗེས་སུ་འབྲངས་ནས་བརྗོད་པ་ནི།བླ་སོགས་མཁའ་སོགས་དྲང་སྲོང་སོགས། །ལྷན་སྐྱེས་གཞི་བདག་འཕྲོག་མ་སོགས། །གནོད་བྱེད་རིགས་དྲུག་ཡི་དྭགས་སོགས། །ལན་ཆགས་ལྷག་མའི་འབྱུང་པོ་སོགས། །ཞེས་པའི་ངོས་འཛིན་ནི། བླ་སོགས་དང་པོ་གཏོར་མ་བཅུ་ཚན་དང་པོ། བླ་མ་དཀོན་མཆོག་དང་སོགས་ཁོང་ནས་སངས་རྒྱས་བྱང་ཆུབ་སེམས་དཔའ་སྤྱི་ལ་འབུལ། མཁའ་སོགས་ཞེས་པ། བཅུ་ཚན་གཉིས་པ་མཁའ་འགྲོ་ཆོས་སྐྱོང་བསྟན་པ་བསྲུང་བ་སྤྱི་ལ་འབུལ། དྲང་སྲོང་སོགས་ཞེས་པ། གསུམ་པ་བྲམ་ཟེ་དྲང་སྲོང་བདེན་ཚིག་དང་སྨོན་ལམ་འགྲུབ་པ་རྣམས་ལ་འབུལ། ལྷན་སྐྱེས་ཞེས་པ། བཞི་པ་དེ་སྤྱིར་ནོར་ལྷ་ཐམས་ཅད་དང་། ལྷན་ཅིག་སྐྱེས་པའི་ལྷ་ལ་སོགས་པ་རང་གི་སྒོས་ཀྱི་ལྷ་སྲུང་རྣམས་ལ་འབུལ། གཞི་བདག་ཅེས་པ། ལྔ་པ་སྤྱི་དང་བྱེ་བྲག་གི་གཞི་བདག་གཉུག་མར་གནས་པ་རྣམས་ལ་འབུལ། འཕྲོག་མ་སོགས་ཞེས་པ། དྲུག་པ་འཕྲོག་མ་དང་འབྲོག་གནས་ལ་སོགས་ལྷ་སྲིན་སྡེ་བརྒྱད་ལ་བསྔོ། །གནོད་བྱེད་ཅེས་པ། བདུན་པ་གནོད་བྱེད་འབྱུང་པོ་གདོན་བགེགས་
སྤྱི་ལ་བསྔོ། །རིགས་དྲུག་ཅེས་པ། བརྒྱད་པ་འགྲོ་བ་རིགས་དྲུག་གི་སེམས་ཅན་སྤྱིལ་བསྔོ། །ཡི་དྭགས་སོགས་ཞེས་པ། དགུ་པ་ཁ་ལ་མེ་འབར་མས་གཙོ་བྱས་ཡི་དྭགས་སྤྱིལ་བསྔོ། །བཅུ་པ་ལན་ཆགས་ཞེས་པ། བུ་ལོན་ཤ་ཁོན་ཆགས་པ་ཐམས་ཅད་ལ་བསྔོའོ། །ལྷག་མའི་འབྱུང་པོ་སོགས་ཞེས་པ། བཅུ་གཅིག་པ་ལྷག་མ་དང་བཤལ་ཆུ་ལ་དབང་བའི་འབྱུང་པོ་ཐམས་ཅད་ལ་བསྔོ། །ཞལ་ཟས་འབུལ་པའི་ཚུལ་ནི། ཐོག་མར་རང་གི་ལག་ཏུ་ལྷ་བཤོས་ཐོགས་ཏེ། རབ་འབྱམས་རྒྱ་མཚོ་དཔག་མེད་ན། ཞེས་སོགས་སྔགས་ལ། ཨརྒྷཾ་གྱི་གནས་སུ་ནཻ་ཝིདྱེ་བཅུག་པ་དང༌། །གཞན་ཡང་ཞལ་ཟས་ཕལ་ཆེར་ཞལ་ཟས་བླ་བྲེ་དང༌། །ཞལ་ཟས་བཀོད་པའི་འོད་ཟེར་རབ་བཀྱེ་ཞིང༌། །ཞལ་ཟས་སྣ་ཚོགས་ཀུན་ཏུ་བཀྲམ་བྱས་ནས། བདག་ཉིད་ཆེན་པོ་རྒྱལ་བ་སྲས་བཅས་མཆོད། །ཞལ་ཟས་རོ་བརྒྱ་ལྡན་པའི་ཡིད་འཕྲོག་པ། ཞེས་སོགས་བརྗོད། ༀ་སརྦ་ཏ་ཐཱ་ག་ཏ་བཛྲ་ནཻ་ཝི་དྱེ་ཨཱཿ ཧཱུཾ་ཞེས་པས་ཞལ་ཟས་འབུལ་བར་བྱའོ། །དེ་དག་ནི་སྔོན་དུ་བྱ་བའི་རིམ་པའོ། །དངོས་གཞིའི་ཆོ་ག་ལ་དོན་གྱི་རྣམ་གྲངས་བཅུ་གཉིས་ཏེ། སྐྱབས་འགྲོ་སེམས་བསྐྱེད། གཏོར་མ་བསང་སྦྱང༌། བྱིན་གྱིས་བརླབ་པ། གཏོར་མགྲོན་སྤྱན་འདྲེན་པ། བཞུགས་གདན་འབུལ་བ། དམིགས་པ་གསལ་གདབ་པ། གཟུངས་སྔགས་ཟློས་པ། མཆོད་པ་འབུལ་བ། བསྔོ་བའི་རྒྱུ་བསྟན་པ། མགྲོན་ལ་སྟོབ་པ། ཕྲིན་ལས་འཆོལ་བ། བདེན་བསྟོབས་བརྗོད་པའོ། །ལྔ་པ་མན་ཆད་ལ་
གདན་འབུལ་དང་མཆོད་འབུལ་མི་དགོས། མཆོད་འབུལ་གྱི་གནས་སུ་དེ་བཞིན་གཤེགས་པ་བཞིའི་མཚན་བརྗོད་ཅིང༌། བདེན་སྟོབས་ཀྱི་མཇུག་ཏུ་ཆོས་ཀྱི་སྦྱིན་པ་བཏང་སྟེ། དོན་གྱི་རྣམ་གྲངས་བཅུ་གཉིས་ཀྱིས་ཚང་བར་བྱའོ། །དེ་ལ་དང་པོ་ནི། སྐྱབས་འགྲོ་སེམས་བསྐྱེད་སྤྱི་དང་འདྲ་བར་བྱ་ཞིང༌། ཁྱད་པར་དུའང་འཇུག་པ་སེམས་བསྐྱེད་ཀྱི་སྐབས་སུ་སེམས་ཅན་ཐམས་ཅད་ཀྱི་དོན་དུ་གཏོར་མའི་ཆོ་ག་ལ་འཇུག་པར་བྱའོ། ཞེས་པའི་སེམས་བསྐྱེད་དང༌། ཚད་མེད་བཞི་བསྒོམ་པར་བྱའོ། །གཉིས་པ་བསང་སྦྱང་ནི། ཨམྲི་ཏའི་སྔགས་ཀྱིས་གཏོར་མ་ལ་གནོད་པའི་བགེགས་བསལ། སྭ་བྷ་ཝའི་སྔགས་ཀྱིས་གཏོར་མའི་སྣོད་བཅུད་སྟོང་པར་བསམས་ལ་མ་དག་པ་སྦྱང་ངོ་། གསུམ་པ་བྱིན་གྱིས་བརླབ་པ་ནི། ༀ་ཨཱཿ ཧཱུཾ་གསུམ་བརྗོད་པའི་དང་པོས་གཏོར་མའི་ཉེས་སྐྱོན་དང་དྲི་མ་ཐམས་ཅད་དག་པར་བསམ། གཉིས་པས་རིན་པོ་ཆེ་དང་བཅུད་ལྷའི་བདུད་རྩིར་བསམ་མོ། །གསུམ་པས་འདོད་ཡོན་ཟད་མི་ཤེས་པར་འཇིག་རྟེན་གྱི་ཁམས་ཐམས་ཅད་གང་བར་བསམ། བཞི་པ་གཏོར་མགྲོན་སྤྱན་འདྲེན་པ་ནི། ལག་པ་གཉིས་ཀྱི་མཛུབ་མོ་གཉིས་ལྕགས་ཀྱུའི་ཚུལ་དུ་བྱས་ལ། དཔུང་བའི་ཐད་དུ་གཡས་གཡོན་གཉིས་བསྣོལ་ཏེ་སེ་གོལ་གདབ་རྡོ་རྗེ་བསྡུ་བའི་ཕྱག་རྒྱ་གཅས་ལ། གཏོར་མགྲོན་གང་ཡིན་པའི་མིང་སྦྱར་ལ། མཆོད་སྤྱིན་གྱི་གཏོར་མའི་མགྲོན་ལ་བཛྲ་ས་མཱ་ཛཿ ཞེས་པས་རང་རང་གི་གནས་ནས་མདུན་གྱི་ནམ་མཁར་བྱོན་པར་བསམས་
ལ་སྤྱན་དྲང་ངོ༌། །ལྔ་པ་བཞུགས་གདན་འབུལ་བ་ནི། པདྨ་ཀ་མ་ལ་ཡེ་སྟྭཾ་ཞེས་པས་པདྨའི་གདན་ཕུལ་བས་མཉེས་བཞིན་དུ་འཁོད་པར་བསམ་མོ། །དྲུག་པ་དམིགས་པ་གསལ་གདབ་པ་ནི། གཏོར་མའི་མགྲོན་དེ་དག་གི་ལྗགས་རྡོ་རྗེའི་ལམ་ནས་འོད་ཟེར་གྱི་སྦུ་གུ་བྱུང་ནས་གཏོར་མ་ལ་རེག་པས་ཡོངས་སུ་དགྱེས་ཤིང་ཚིམ་པར་ལོངས་སྤྱོད་པར་བསམ་པ་ནི་གཏོར་མ་ལ་ལོངས་སྤྱོད་པའི་ཏིང་ངེ་འཛིན་ནོ། །བདུན་པ་གཟུངས་སྔགས་བཟླ་བ་ནི། ན་མཿསརྦ་ཏ་ཐཱ་ག་ཏ་ཞེས་པ། བླ་མ་དཀོན་མཆོག་ལ་ཉེར་གཅིག །ཆོས་སྐྱོང་དྲང་སྲོང་ལྷན་སྐྱེས་རྣམས་ལ་བཅུ་དགུ །ལྔ་པ་མན་ཆད་ལ་བདུན་བདུན་བརྗོད་པས་དག་པར་སེམས་སོ། །གཟུངས་སྔགས་བརྗོད་པའི་བར་ལ་གོང་གི་གཏོར་མ་ལོངས་སྤྱོད་པའི་ཏིང་ངེ་འཛིན་དེ་ཉིད་བསྒོམ་པ་ཡིན་ནོ། །བརྒྱད་པ་མཆོད་པ་འབུལ་བ་ནི། ཨརྒྷཾ་ལ་སོགས་པའི་སྔགས་བརྗོད་ཅིང༌། མཆོད་ཡོན་ལ་སོགས་པ་སོ་སོའི་ཕྱག་རྒྱ་དང་བཅས་པའམ། ཡང་ན་སྔགས་ཙམ་གྱི་སྒོ་ནས་མཆོད་ཡོན། མེ་ཏོག །བདུག་སྤོས། སྣང་གསལ། དྲི་ཆབ། ཞལ་ཟས། རོལ་མོ་རྣམས་འབུལ་ལོ། །དགུ་པ་བསྔོ་རྒྱུ་བསྟན་པ་ནི། མཆོད་སྤྱིན་གྱི་གཏོར་མ་གཟུགས་སྒྲ་དྲི་རོ་རེག་བྱ་ཞེས་པ་ནས་བཟུང་སྟེ། ལྷ་དང་མིའི་དཔལ་འབྱོར་ལོངས་སྤྱོད་ཐམས་ཅད་དང་ལྡན་པ་འདི་ཞེས་པའི་བར་ངག་ཏུ་བརྗོད་ཅིང༌། བརྗོད་པ་ལྟར་ཡིད་ཀྱི་ཀྱང་གཏོར་མའི་ཡོ་བྱད་རྣམས་བསམ་གྱིས་མི་ཁྱབ་པར་བསྐྱེད་ལ་དེ་ཉིད་བསྔོ་རྒྱུ་ཡིན་
པར་དམིགས་ཀྱིས་བཀར་ཏེ་སྦྱིན་པར་བྱ་བའི་དངོས་པོ་ངོས་བཟུང་བའི་ཚུལ་གྱིས་བརྗོད་དོ། །བཅུ་པ་མགྲོན་ལ་སྟོབ་པ་ནི། གཏོར་མ་འབུལ་བར་བྱ་བའི་ཡུལ་འོག་ནས་འབྱུང་བ་ལྟར། མགྲོན་སོ་སོའི་རྣམ་གྲངས་རྒྱས་པར་བརྗོད་པས། གཏོར་མའི་མགྲོན་གང་ཡིན་ངོས་བཟུང་ལ་དེ་ལ་འབུལ་ཞིང་སྟོབ་པར་བྱའོ། །བཅུ་གཅིག་པ་འཕྲིན་ལས་འཆོལ་བ་ནི། མགྲོན་སོ་སོའི་རང་རང་གི་ཕྲིན་ལས་དང་མཐུན་པའི་འཕྲིན་ལས་དེ་ཉིད་ཞུ་ཞིང༌། འདོད་པའི་དོན་གང་ཡིན་པ་དེ་ཉིད་ལ་གསོལ་བ་གདབ་པར་བྱའོ། །བཅུ་གཉིས་པ་བདེན་སྟོབས་བརྗོད་པ་ནི། བདག་གི་བསམ་པའི་སྟོབས་དང་ནི། ཞེས་པ་ནས། ཐོགས་པ་མེད་པར་འབྱུང་གྱུར་ཅིག །ཅེས་པའི་ཚིག་རྐང་བཞིའི་སྐབས་སུ་མགྲོན་ལ་སོགས་པའི་མིང་འདོན་པ་བརྗེ་ཞིང་ཚིག་རྐང་གཞན་ཁྱད་པར་མེད་པར་བརྗོད་པར་བྱའོ། །འདི་དག་ནི་གཏོར་མའི་རྣམ་གཞག་གོ་སླ་བར་བྱ་བའི་ཕྱིར་སྡོམ་ཚིག་གི་གོ་དོན་ངོས་འཛིན་ཅིང་སྤྱི་ཆིངས་དང་རྣམ་གཞག་བསྟན་པ་ཡིན་ནོ།། ༈ ད་ནི་འཇུག་པ་བདེ་ཞིང་ལག་ཏུ་བླང་བ་བདེ་བའི་ཕྱིར། ངག་འདོན་གྱི་རིམ་པ་བརྗོད་པར་བྱ་སྟེ། བདག་དང་འགྲོ་བ་ཁམས་གསུམ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོ་ཆོས་ཀྱི་ཕུང་པོ་སྟོག་ཕྲག་བརྒྱད་ཅུ་རྩ་བཞིའི་འབྱུང་གནས་འཕགས་པའི་དགེ་འདུན་ཐམས་ཅད་ཀྱི་མངའ་བདག་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་རྣམས་
དང་ཡི་དམ་དཀྱིལ་འཁོར་གྱི་ལྷ་ཚོགས་རྣསམ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་་མཆིའོ། །ༀ་བཛྲ་ཨ་མྲི་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ། ༀ་སྭ་བྷཱ་ཝ་ཤུངྔྷ་སརྦ་ངྷ་རྨཱཿསྭ་བྷཱ་ཝ་ཤུངྔྷོཉ་ཧཾ། སྟོང་པའིངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ལྷ་རྫས་ལས་གྲུབ་པའི་གཏོར་མ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ༀཨཱཿ ཧཱུཾ། ལན་གསུམ་བརྗོད། རང་གི་སྙིང་གནས་འོད་ཟེར་འཕྲོས་པས་དཔལ་ལྡན་བླ་མ་དམ་པ་རྣམས་དང༌། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད་སྦྱིན་གྱ་གཏོར་མའི་མགྲོན་ལ་མཛྲ་ས་མཱ་ཛཿ མདུན་གྱི་ནམ་མཁའི་གནས་སུ་བྱོན། པདྨ་ཀ་མ་ལ་ཡེ་སྟྭཾ། པདྨ་དངཟླ་བའི་གདན་ལ་མཉེས་བཞིན་དུ་འཁོད་ཅིང༌། སྤྲིན་གྱི་ཕུང་པོ་གཏིབས་པ་བཞིན་དུ་ནམ་མཁའ་བར་སྣང་ཐམས་ཅད་གང་བར་བཞུགས་ཤིང༌། དེ་དག་གི་ལྗགས་རྡོ་རྗེའི་ལམ་ནས་འོད་ཟེར་གྱི་སྦུ་གུ་བྱུང་ནས། མཆོད་སྤྱིན་གྱི་གཏོར་མ་ལ་རེག་པས། ཡོངས་སུ་དགྱེས་ཤིང་ཚིམ་པར་ལོངས་སྤྱོད་པར་གྱུར། ན་མཿ སརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ། ༀ་སཾ་བྷ་ར་སཾ་བྷ་ར་ཧཱུཾ་ལན་བདུན་ཨརྒྷཾ་ནས་ཤཔྟའི་བར་བརྗོད། མཆོད་སྦྱིན་གྱི་གཏོར་མ་གཟུགས་སྒྲ་དྲི་རོ་རེག་བྱ་འདོད་པའི་ཡོན་ཏན་རྣམ་པ་ལྔ་དང་ལྡན་པ་འདི་དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་
པ་རྣམས་དང༌། སངས་རྒྱས་དཀོན་མཆོག །ཆོས་དཀོན་མཆོག །དགེ་འདུན་དཀོན་མཆོག་སྟེ། སྐྱབས་གནས་དཀོན་མཆོག་རིན་པོ་ཆེ་རྣམ་པ་གསུམ། ཡི་དམ་དཀྱིལ་འཁོར་གྱི་ལྷ་ཚོགས་ཕྱོགས་བཅུའི་རྒྱལ་བ་སྲས་དང་སློབ་མར་བཅས་པ་ཐམས་ཅད་ལ་འབུལ་ཞིང་བསྔོ་བར་བགྱིའོ། བདག་དང་སེམས་ཐམས་ཅད་ཀྱི་སྒྲིབ་གཉིས་བྱང་ཞིང་ཚོགས་གཉིས་རྫོགས་ནས། རྣམ་མཁྱེན་སངས་རྒྱས་ཀྱི་གོ་འཕང་རིན་པོ་ཆེ་མྱུར་དུ་ཐོབ་ཅིང༌། སངས་རྒྱས་མ་ཐོབ་བར་དུ་བྱང་ཆུབ་བསྒྲུབ་པའི་ལམ་གྱི་འགལ་རྐྱེན་བར་ཆད་ཞི་བ་དང༌། ལམ་གྱི་མཐུན་རྐྱེན་ཐམས་ཅད་ཆོས་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ་ལོ། །བདག་གི་བསམ་པའི་སྟོབས་དང་ནི། །དེ་བཞིན་གཤེགས་པའི་བྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །འཕགས་པ་རྣམས་ལ་མཆོད་པ་དང༌། །སེམས་ཅན་རྣམས་ལ་ཕན་གདགས་ཕྱིར། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པར། །ཐོགས་པ་མེད་པར་འབྱུང་གྱུར་ཅིག །དང་པོའི་ཆོ་གའོ།། ༈ བཅུ་ཚན་གཉིས་པ་ལ། སྐྱབས་འགྲོ་སེམས་བསྐྱེད་གོང་དང་འདྲ། “སྤྱན་འདྲེན་གྱི་སྐབས་སུ་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་ཆོས་སྐྱོང་བཀའ་སྲུང་དམ་ཅན་རྒྱ་མཚོའི་ཚོགས་དང་བཅས་པ་ཐམས་ཅད་མཆོད་སྦྱིན་གྱི་གཏོར་མའི་མགྲོན་ལ་བཛྲ་ས་མཱ་ཛཿ སྐུའི་མགོན་པོ། གསུང་གི་མགོན་པོ། ཐུགས་ཀྱི་མགོན་པོ།
ཡོན་ཏན་གྱི་མགོན་པོ། ཕྲིན་ལས་ཀྱི་མགོན་པོ། ཕྱོགས་སྐྱོང་བ་བཅུ། ལྷ་ཆེན་བརྒྱད། ཀླུ་ཆེན་བརྒྱད། རྒྱལ་ཆེན་བཞི། གཟའ་ཆེན་བརྒྱད། རྒྱུ་སྐར་ཉི་ཤུ་རྩ་བརྒྱད། འཇིགས་བྱེད་ཆེན་པོ་དགུ་ཆུང་མ་དང་བཅས་པ་སྟེ། གཙང་རིས་ཀྱི་མགོན་པོ་བདུན་ཅུ་རྩ་ལྔ་ལ་སོགས་པ་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་ཆོས་སྐྱོང་སྲུང་མ་ཡེ་ཤེས་ཀྱི་སྤྱན་དང་ལྡན་པ། རྫུ་འཕྲུལ་གྱི་མཐུ་མངའ་བ། སངས་རྒྱས་ཀྱི་བསྟན་པ་གཉན་པོ་བསྲུང་བར་ཞལ་གྱིས་བཞེས་པའི་བཀའ་སྲུང་དམ་ཅན་རྒྱ་མཚོའི་ཚོགས་དང་བཅས་པ་ཐམས་ཅད་ལ་འབུལ་ཞིང་བསྔོ་བར་བགྱིའོ། །སངས་རྒྱས་ཀྱི་བསྟན་པ་དར་ཞིང་རྒྱས་པ། དཀོན་མཆོག་གི་དབུ་འཕང་མཐོ་བ། སེམས་ཅན་ཐམས་ཅད་བདེ་ཞིང་སྐྱིད་པ། བདག་དང་སེམས་ཅན་ཐམས་ཅད་ཀྱི་བསམ་སྦྱོར་དམ་པའི་ཆོས་དང་མཐུན་པའི་འཕྲིན་ལས་མཛད་དུ་གསོལ། བདེན་སྟོབས་ཀྱི་ཚིག་རྐང་བཞིའི་སྐབས་སུ། མཁའ་འགྲོ་ཆོས་སྐྱོང་མཆོད་བྱའི་ཕྱིར། ཞེས་འདོན་པ་སྤོ་བ་རྣམས་མི་འདྲ་བའི་ཁྱད་པར་ཡིན་ལ། ཆོ་ག་གཞན་ཐམས་ཅད་ནི་བཅུ་ཚན་དང་པོ་དང་འདྲ་བར་བྱའོ།། ༈ བཅུ་ཚན་གསུམ་པ་ལ། བྲམ་ཟེ་དྲང་སྲོང་མངོན་པར་ཤེས་པ་ལྔ་དང་ལྡན་ཞིང༌། སྨོན་ལམ་གྱི་ས་ལ་དབང་བ་བདེན་པའི་ཚིག་གྲུབ་པ་རྣམས། མཆོད་སྦྱིན་གྱི་གཏོར་མའི་མགྲོན་ལ་བཛྲ་ས་མཱ་ཛཿ གཏོར་མ་འདི་ལྷའི་དྲང་སྲོང་རི་རབ་ཀྱི་ཁོང་གསེང་ན་གནས་པ། ཀླུའི་དྲང་སྲོང་རྒྱ་མཚོའི་ནང་ན་
གནས་པ། མིའི་དྲང་སྲོང་གཙང་འགྲམ་ན་གནས་པ། བྲ་མ་ཟེའི་དྲང་སྲོང་གཙང་སྦྲ་དང་དཀའ་ཐུབ་ལ་གནས་པ། མངོན་པར་ཤེས་པ་ལྔ་དང་ལྡན་ཞིང༌། མཐུན་དང་སྨོན་ལམ་ལ་དབང་བ། བདེན་པའི་སྟོབས་བརྗོད་པ། དྲང་སྲོང་དམོད་པ་འདོར་ནུས་ཤིང་རིག་སྔགས་འཆང་གྲུབ་པའི་ཚོགས་ཐམས་ཅད་ལ་འབུལ་ཞིང་བསྔོ་བར་བགྱིའོ། །འཇིག་རྟེན་གྱི་ཁམས་སུ་བཀྲ་ཤིས་བདེ་ལེགས་ཕུན་སུམ་ཚོགས་པ་འབྱུང་བ་དང༌། བདག་དང་སེམས་ཅན་ཐམས་ཅད་ཀྱི་ཆོས་སྤྱོད་བཅུའི་བསྒྲུབ་པ་འཕེལ་ཞིང་རྒྱས་པའི་སྨོན་ལམ་རྣམ་པར་དག་པ་གདབ་ཏུ་གསོལ། བདེན་སྟོབས་བརྗོད་ལ། བྲམ་ཟེ་དྲང་སྲོང་མཆོད་བྱའི་ཕྱིར། ཞེས་འདོན་པ་བསྒྱུར་རོ།། ༈ བཅུ་ཚན་བཞི་པ། འཇིག་རྟེན་དང་འཇིག་རྟེན་ལས་འདས་པའི་ནོར་ལྷ་ཁྱད་པར་ཅན་ཐམས་ཅད་དང༌། ཁྱད་པར་དུ་བདག་གི་སྟོང་གྲོགས་བྱེད་པའི་ལྷ་སྲུང་ཐམས་ཅད་གཏོར་མའི་མགྲོན་ལ་བཛྲ་ས་མཱ་ཛཿ གཏོར་མ་འདི་ཛམྦྷ་ལ། ནོར་རྒྱུན་མ། རྣམ་ཐོས་སྲས། ཚོགས་ཀྱི་བདག་པོ། ཨ་པ་ར་ཙི་ཏ་ལ་སོགས་པའི་ནོར་ལྷ་ཁྱད་པར་ཅན་ཐམས་ཅད་དང༌། བདག་ཅག་གི་ལྷན་ཅིག་སྐྱེས་པའི་ལྷ་དང༌། འགོ་བའི་ལྷ། བསྲུང་བའི་ལྷ། སྐྱོབ་པའི་ལྷ། སྟོང་གྲོགས་བྱེད་པའི་ལྷ་སྲུང་ཐམས་ཅད་ལ་འབུལ་ཞིང་བསྔོ་བར་བགྱིའོ། །བདག་དང་སེམས་ཅན་ཐམས་ཅད་ལ་མི་མཐུན་པའི་ཕྱོགས་ཐམས་ཅད་ལས་བསྲུང་ཞིང་སྐྱོབ་པ་དང༌། གནས་སྐབས་སུ་དམ་པའི་ཆོས་དང་མཐུན་པའི་འདོད་དགུའི་དཔལ་འབྱོར་ཉེར་མཁོའི་
ལོངས་སྤྱོད་བསམ་གྱིས་མི་ཁྱབ་པ་འབྱུང་བའི་སྟོང་གྲོགས་མཛད་དུ་གསོལ། བདེན་པའི་སྟོབས་བརྗོད་ལ། རྣལ་འབྱོར་ལྷ་སྲུང་མཆོད་བྱའི་ཕྱིར་ཞེས་བསྒྱུར་རོ།། ༈ བཅུ་ཚན་ལྔ་པ་ལ། སྤྱན་འདྲེན་གྱི་ཚེ། ལག་པ་གཉིས་རྒྱབ་སྤྲད་པའི་མཐེའུ་ཆུང་ལུ་གུ་རྒྱུད་དུ་སྦྲེལ་ལ། མཛུབ་མོ་གཉིས་ལྕགས་ཀྱུ་ལྟར་བྱས་པ། ཧཱུཾ་མཛད་ཀྱི་ཕྱག་རྒྱ་དང༌། སྤྱི་དང་ཁྱད་པར་གྱི་གཞི་བདག་གཉུག་མར་གནས་པ་ཐམས་ཅད་མཆོད་སྦྱིན་གྱི་གཏོར་མའི་མགྲོན་ལ་བཛྲས་མཱ་ཛཿ དེ་བཞིན་གཤེགས་པ་བཞིའི་མཚན་བརྗོད། གཏོར་མ་འདི་ཞིང་སྐྱོང་གི་མཁའ་འགྲོ་ཉི་ཤུ་རྩ་ལྔ། བོད་ཁམས་སྐྱོང་བའི་བརྟན་མ་བཅུ་གཉིས་ལ་སོགས་པ། འཛམ་བུ་གླིང་གི་ལྷ་མཐུ་བོ་ཆེ། ཀླུ་མཐུ་བོ་ཆེ། བདུད་མཐུ་བོ་ཆེ། བཙན་མཐུ་བོ་ཆེ་ལ་སོགས་པ་འཛམ་བུ་གླིང་སྤྱི་དང་བྱེ་བྲག་གི་གཞི་བདག་ཐམས་ཅད་དང་། ཡུལ་ཕྱོགས་འདིའི་ལྷ་མགོན། ཀླུ་མགོན་གཉུག་མར་གནས་པ་ཐམས་ཅད་ལ་སྦྱིན་ཞིང་བསྔོ་བར་བགྱིའོ། །ཡུལ་ཕྱོགས་འདི་དག་ཐམས་ཅད་དུ་ལོ་ཕྱུགས་རྟག་ཏུ་ལེགས་པ། ཆར་ཆུ་དུས་སུ་འབེབས་པ་མི་ནད་དང་ཕྱུགས་ནད་ཐམས་ཅད་རྒྱུན་ཆད་པ། སེམས་ཅན་ཐམས་ཅད་བདེ་ཞིང་སྐྱིད་པ། བདག་ཅག་འཁོར་དང་བཅས་པ་ཐམས་ཅད་ཀྱི་བསམ་པ་ཡིད་བཞིན་དུ་འགྲུབ་པའི་སྟོང་གྲོགས་མཛད་དུ་གསོལ། གནས་བདག་གཞི་བདག་མཆོད་བྱའི་ཕྱིར་སོགས་དང༌། ཆོས་རྣམས་ཐམས་ཅད་རྒྱུ་ལས་བྱུང༌། ཞེས་པ་ནས།
འདི་ནི་སངས་རྒྱས་བསྟན་པ་ཡིན། ཞེས་པའི་མཇུག་ཏུ། འདུས་བྱས་ཐམས་ཅད་མི་རྟག་ཅིང༌། །ཟག་བཅས་ཐམས་ཅད་སྡུག་བསྔལ་ཡིན། །མྱ་ངན་འདས་པ་ཞི་ཞིང་བདེ། །ཆོས་རྣམས་ཐམས་ཅད་བདག་མེད་པའོ།། ༈ བཅུ་ཚུན་དྲུག་པ། སྣང་སྲིད་ཀྱི་ལྷ་སྲིན་སྡེ་བརྒྱད་མཐུ་བོ་ཆེ་འཁོར་དང་བཅས་པ་ཐམས་ཅད་མཆོད་སྦྱིན་གྱི་གཏོར་མའི་མགྲོན་ལ་བཛྲ་ཨཾ་ཀུ་ཤ་ཛཿ གཏོར་མ་འདི་གནོད་སྦྱིན་འབྲོག་གནས་མཆེང་ལྔ། འཕྲོག་མ་དང་འཕྲོག་མའི་བུ་ལྔ་བརྒྱ་འཁོར་དང་བཅས་པ་རྣམས་དང༌། ནམ་མཁའ་ལྡིང་གི་རྒྱལ་པོ་གསེར་མིག་ཅན་དང༌། དྲི་ཟའི་རྒྱལ་པོ་ཟུར་ཕུད་ལྔ་པ་ཅན་དང༌། མིའམ་ཅིའི་རྒྱལ་པོ་ལྗོན་པ་རྟ་མགོ་ཅན་ལ་སོགས་པ་སྣང་སྲིད་ཀྱི་ལྷ་སྲིན་སྡེ་བརྒྱད་ཐམས་ཅད་ལ་སྦྱིན་ཞིང་བསྔོ་བར་བགྱིའོ། །བདག་དང་སེམས་ཅན་ཐམས་ཅད་ལ་གནོད་པ་གདུག་རྩུབ་ཀྱི་བསམ་པ་ཞི་ཞིང་བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པའི་སྒོ་ནས་གནས་སྐབས་དང་མཐར་ཐུག་གི་དོན་སྒྲུབ་པའི་སྟོང་གྲོགས་གྱིས་ཤིག །ལྷ་སྲིན་སྡེ་བརྒྱད་མཆོད་བྱའི་ཕྱིར་སོགས་དང༌། ཆོས་རྣམས་ཐམས་ཅད་རྒྱུ་ལས་བྱུང༌། །དེ་རྒྱུ་དེ་བཞིན་གཤེགས་པས་གསུངས། ཞེས་བརྗོད་དོ།། ༈ བཅུ་ཚན་བདུན་པ་ལ། གནོད་བྱེད་འབྱུང་པོ་གདོན་བགེགས་ལོག་པར་འདྲེན་པ་བར་དུ་གཅོག་པའི་བདུད་རིགས་ཐམས་ཅད་གཏོར་མའི་མགྲོན་ལ་བཛྲ་ཨཾ་ཀུ་ཤ་ཛཿ གཏོར་མ་འདི་བགེགས་ཀྱི་རྒྱལ་པོ་བི་ན་ཡ་ཀས་གཙོ་བྱས་པའི་བགེགས་རིགས་
སྟོང་ཕྲག་བརྒྱད་ཅུ། གདོན་རིགས་སུམ་བརྒྱ་དྲུག་ཅུ། གཙོ་བོ་རིགས་ཀྱི་གདོན་ཆེན་བཞི། བགེགས་རིགས་སྡེ་དཔོན་བཅོ་བརྒྱད། བྱིས་པའི་གདོན་ཆེན་བཅོ་ལྔ་ལ་སོགས་པ་སྔོན་གྱི་ལས་དང༌། འཕྲལ་གྱི་རྐྱེན་ལས་གྱུར་པའི། བདག་དང་སེམས་ཅན་ཐམས་ཅད་ལ་གནོད་པ་དང་འཚེ་བར་བྱེད་པའི་གདོན་དང་གནོད་བྱེད་འབྱུང་བོའི་ཚོགས་ཐམས་ཅད་ལ་སྦྱིན་ཞིང་བསྔོ་བར་བགྱིའོ། །བདག་དང་སེམས་ཅན་ཐམས་ཅད་ལ་གནོད་པ་དང་འཚེ་བ་སྤོངས་ལ། ཕན་པ་དང་བདེ་བ་སྒྲུབས། ཆོས་བསྒྲུབ་པ་རྣམས་ཀྱི་ཆོས་ཀྱི་འགལ་རྐྱེན་བར་ཆད་མི་བྱེད་པའི་དམ་ཚིག་ལ་གནས་པར་གྱིས་ཤིག །གནོད་བྱེད་འབྱུང་པོ་ཚིམ་བྱའི་ཕྱིར་སོགས་དང༌། རྒྱན་གྱིས་བརྒྱན་པར་བྱས་ཀྱང་ཆོས་སྤྱོད་ཅིང༌། ཞེས་པ་ནས། གཞན་ལ་གནོད་པ་མ་བྱེད་ཅིག །ཅེས་བརྗོད།། ༈ བཅུ་ཚན་བརྒྱད་པ་ལ། ནམ་མཁའི་མཐའ་དང་མཉམ་པའི་སེམས་ཅན་འགྲོ་བ་རིགས་དྲུག་གིས་བསྡུས་པ་ཐམས་ཅད་གཏོར་མའི་མགྲོན་ལ་བཛྲ་ཨཾ་ཀུ་ཤ་ཛཿ གཏོར་མ་འདི་འགྲོ་བ་རིགས་དྲུག་ལམ་རྒྱུད་ལྔ། སྐྱེ་གནས་རྣམ་པ་བཞི། ཁམས་གསུམ་ས་དགུས་བསྡུས་པའི་སེམས་ཅན་ཐམས་ཅད་ལ་སྦྱིན་ཞིང་བསྔོ་བར་བགྱིའོ། །དེ་ལྟར་བསྔོས་པ་ལ་བརྟེན་ནས། ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་འཁོར་བ་སྦྱིའི་སྡུག་བསྔལ་གསུམ་དང༌། འགྲོ་བ་སེམས་ཅན་གྱི་སྡུག་བསྔལ་དྲུག་
དང༌། ཕྱི་ནང་གི་སྡུག་བསྔལ་བརྒྱད་ལ་སོགས་པ། སྦྱི་དང་བྱེ་བྲག་གི་སྡུག་བསྔལ་ཐམས་ཅད་དང་བྲལ་ཞིང༌། རིགས་དྲུག་སོ་སོའི་བདེ་བ་ཁྱད་པར་ཅན་དང་ལྡན་པའི་སྒོ་ནས་ས་ལམ་གྱི་ཡོན་ཏན་བདེ་བླག་ཏུ་བགྲོད་དེ། རྣམ་མཁྱེན་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་གྱུར་ཅིག །རིགས་དྲུག་སེམས་ཅན་ཚིམ་བྱའི་ཕྱིར། ཞེས་སོགས།། ༈ བཅུ་ཚན་དགུ་པ་ལ། མཁའ་ལ་རྒྱུ་བ་དང༌། གནས་ན་གནས་པའི་ཡི་དྭགས་ཀྱི་རིགས་གངྒཱའི་ཀླུང་གི་བྱེ་བ་སྙེད་ཀྱི་གྲངས་དང་མཉམ་པ་ཐམས་ཅད་གཏོར་མའི་མགྲོན་ལ་བཛྲ་ཨཾ་ཀུ་ཤ་ཛཿ གཏོར་མ་འདི་ཡི་དྭགས་ཀྱི་རྒྱལ་མོ་ཁ་ལ་མེ་འབར་མས་གཙོ་བྱས་པའི་ཡི་དྭགས་ཕྱིའི་སྒྲིབ་པ་ཅན། 
ནང་གི་སྒྲིབ་པ་ཅན ། མེ་ལྕེའི་འཁོར་ལོ་ཅན། ཟས་སྐོམ་གྱི་སྒྲིབ་པ་ཅན། སྤྱི་མཐུན་གྱི་གྲིབ་པ་ཅན། སྒོས་གུད་ཀྱི་སྒྲིབ་པ་ཅན་ལ་སོགས་པ། མཁའ་ལ་རྒྱུ་བ་དང༌། གནས་ན་གནས་པའི་ཡི་དྭགས་ཀྱི་རིགས་སུམ་ཅུ་རྩ་དྲུག་གྲངས་ཚད་གངྒཱའི་ཀླུང་གི་བྱེ་མ་སྙེད་ཀྱི་གྲངས་དང་མཉམ་པ་ཐམས་ཅད་ལ་སྦྱིན་ཞིང་བསྔོ་བར་བགྱིའོ། །དེ་ལྟར་བསྔོས་པ་ལ་བརྟེན་ནས། ཡི་དྭགས་ཐམས་ཅད་སེར་སྣའི་ཚོགས་ཀྱི་སྒྲིབ་པ་བསམ་གྱིས་མི་ཁྱབ་པ་ཞི་ཞིང༌། ཟས་སྐོམ་དབུལ་ཕོངས་ཀྱི་སྡུག་བསྔལ་ཐམས་ཅད་ལས་གྲོལ་ཏེ། ཟས་སྐོམ་འདོད་ཡོན་ཕུན་སུམ་ཚོགས་པས་ཚིམ་ནས་ཚེ་རབས་ཐམས་ཅད་དུ་འདོད་དགུའི་དཔལ་འབྱོར་ཟད་མི་ཤེས་པ་ལ་ལོངས་སྤྱོད་
ཅིང༌། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་ནས། ནམ་མཁའ་མཛོད་ལ་མངའ་བརྙེས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་པར་གྱུར་ཅིག །ཡི་དྭགས་རྣམས་ནི་ཚིམ་བྱའི་ཕྱིར། ཞེས་སོགས།། ༈ བཅུ་ཚན་བཅུ་པ་ལ། ཚེ་རབས་ཐོག་མ་མེད་པ་ནས་ལན་ཆགས་བུ་ལོན་ཤ་ཁོན་ཆགས་པ་ཐམས་ཅད་གཏོར་མའི་མགྲོན་ལ་བཛྲ་ཨཾ་ཀུ་ཤ་ཛཿ གཏོར་མ་འདི་ལན་ཆགས་ཀྱི་མགྲོན་དུ་གྱུར་བ། བསད་པས་ཚེ་ཐུང་བ། བརྡུངས་པས་ནད་མང་བ། ཕྲོགས་པས་ནོར་དབུལ་བ་ལ་སོགས་པ་ཚེ་འཁོར་བ་ཐོག་མ་མེད་པ་ནས་ད་ལྟ་ལ་ཐུག་གི་བར་དུ། བདག་ལ་བུ་ལོན་སྙེག་པ་ལན་ཆགས་པ་ཤ་ཁོན་གཉེར་བ་ཐམས་ཅད་ལ་སྦྱིན་ཞིང་བསྔོ་བར་བགྱིའོ། །དེ་ལྟར་བསྔོས་པ་ལ་བརྟེན་ནས། “ཚེ་རབས་ཐོག་མ་མེད་པའི་ཟས་སྐོམ་གནས་མལ་ལུས་ལོངས་སྤྱོད་ལ་སོགས་པའི་ལན་ཆགས་ཐམས་ཅད་དང་བྲལ་བུ་ལོན་འཁོར། ཤ་ཁོན་ཐམས་ཅད་བྱང་ཞིང་དག་ནས། གང་ལ་གང་དགའ་བ་དང་། ཇི་ལྟར་མོས་བ་དང༌། གང་གིས་འདུལ་བར་གྱུར་བའི་ཆོས་དང་ཟང་ཟིང་གི་ལོངས་སྤྱོད་བསམ་གྱིས་མི་ཁྱབ་པ་དང་མི་འབྲལ་བའི་ངང་ནས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་གྱུར་ཅིག །ལན་ཆགས་ཞེས་པས་བསྒྱུར་རོ།། ༈ བཅུ་གཅིག་པ། ལྷག་མ་ལ་དབང་བ། སྐལ་བ་ཆུང་བ། བཤལ་ཆུལ་རེ་བའི་
འབྱུང་པོ་ཐམས་ཅད་ཅེས་པ་དང༌། གཏོར་མ་འདི་འབྱུང་པོ་མ་ཐོབ་པ་མ་སླེབ་པ། ཁ་ཞན་པ་དབང་ཆུང་བ། གློ་བུར་དུ་ལྷགས་པ། དབང་པོ་མ་ཚང་ཞིང་བསོད་ནམས་དམན་པ། ལྷག་མ་ལ་དབང་བ། བཤལ་ཆུ་ལ་རེ་བའི་འབྱུང་པོ་ཐམས་ཅད་ལ་སྦྱིན་ཞིང་བསྔོ་བར་བགྱིའོ། །དེ་ལྟར་བསྔོས་བ་ལ་བརྟེན་ནས། རང་རང་གི་གནས་རིགས་དང་མཐུན་པའི་འདོད་ཡོན་ལོངས་སྤྱོད་ཕུན་སུམ་ཚོགས་པ་ལ་ལོངས་སྦྱོད་ཅིང༌། མངོན་པར་མཐོ་བ་དང༌། ངེས་པར་ལེགས་པ་རྣམ་པར་གྲོལ་བའི་སྐལ་བ་ཕུན་སུམ་ཚོགས་པ་དང་ལྡན་ཞིང༌། རྣམ་མཁྱེན་སངས་རྒྱས་ཀྱི་གོ་འཕང་ཐོབ་པར་གྱུར་ཅིག །ལྷག་མ་ལ་དབང་ཚིམ་བྱའི་ཕྱིར། ཞེས་སྤོའོ། །འདི་དག་ནི་བཅུ་ཚན་རེ་རེ་ལ་དོན་གྱི་རྣམ་གྲངས་བཅུ་གཉིས་ཚང་བའིསྒོ་ནས་དོན་གྱི་རྣམ་གྲངས་བརྗོད་པ་དང༌། འདོད་དོན་ལ་སོགས་རྒྱས་པར་བརྗོད་པ་ཡིན་ནོ།། ༈ མཇུག་གི་བྱ་བ་ལ་དོན་ལྔ་སྟེ། ནོངས་པ་བཟོད་པར་གསོལ་བ། གཏོར་མགྲོན་གཤེགས་པ། འབྱུང་པོའི་བར་ཆད་བསྲུང་བ། མདོ་དང་བདུད་བཟློག་བྱ་བ། བསྔོ་བ་སྨོན་ལམ་གྱིས་རྒྱས་གདབ་པའོ། །ཡང་འགའ་ཞིག་བསྡུས་པ་ལ་དགའ་བའམ། སྐབས་འགར་ལོང་མེད་པའམ། ནང་གི་དོན་ལ་ཡིད་གཞོལ་བའམ། ཁ་ཅིག་བློ་དམན་པས་རྒྱས་པར་བརྗོད་མི་ནུས་པ། དེ་དག་གིས་དོན་གྱི་རྐང་གྲངས་ཚང་བ་བྱ་ཞིང༌། ཆོག་བསྡུས་པས་མགྲོན་ལ་སྟོབ་པའི་ཚེ། སྤྱན་འདྲེན་གྱི་སྐབས་སུ་བརྗོད་པའི་
མགྲོན་གྱི་མིང་བོས་ནས་དེ་ལ་འབུལ་ཞིང༌། ལས་འཆོལ་གྱི་སྐབས་སུ། བདག་དང་སེམས་ཅན་ཐམས་ཅད་ཀྱིས་མཐར་ཐུག་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་ཐོབ་ཅིང༌། གནས་སྐབས་སུ་དམ་པའི་ཆོས་ཀྱི་འགལ་རྐྱེན་བར་ཞི་ཞིང༌། མཐུན་རྐྱེན་བསམས་པ་ཡིད་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། དེ་བཞིན་དུ་འཕྲིན་ལས་མཛད་དུ་གསོལ། སྨོན་ལམ་གདབ་ཏུ་གསོལ། སྟོང་གྲོགས་མཛད་དུ་གསོལ། ཞེས་སོགས་འདོན་པ་སྤོ་ཞིང༌། སྦྱིན་བདག་ལ་སོགས་པ་གཞན་གྱི་དོན་དུ་གཏོར་མ་གཏོང་ན། ལས་འཆོལ་གྱི་སྐབས་སུ་སྦྱིན་པའི་བདག་པོ་འཁོར་དང་བཅས་པའི་ཞེས་སོགས་འདོན་པ་སྤོ་བ་ནི། གནས་སྐབས་སུ་རྒྱས་བསྡུས་ཐམས་ཅད་ལ་སྦྱར་བར་བྱའོ། །དེ་རྣམས་རྫོགས་ནས། ཆུ་སྦྱིན་བཏང་བར་བྱའོ། །རང་ཉིད་སྐད་ཅིག་གིས་ཧྲཱིཿལས་འཕགས་པ་སྤྱན་རས་གཟིགས་སྐུ་མདོག་དཀར་པོ་ཞལ་གཅིག་ཕྱག་གཉིས་པ། ཕྱག་གཡས་མཆོག་སྦྱིན། གཡོན་པ་བསྐྱབས་སྦྱིན་མཛད་པ། གཡས་པའི་སོར་མོ་རྣམས་ལས་ཡེ་ཤེས་ཀྱི་བདུད་རྩིའི་ཆུ་རྒྱུན་སྐྱ་འཁྱིལ་བྱུང་བས། ཡི་དྭགས་རྣམས་ཀྱི་ཁ་རུ་སིབ་སིབ་སོང་བས་བཀྲེས་སྐོམ་གྱི་དུཿཁ་ཞི་བར་བསམས་ལ། ངག་ཏུ། ཧྲཱིཿ བཾ་ༀ་ཨཱཿ ཧཱུཾ། ༀ་མ་ཎི་པདྨེ་ཧཱུཾ། ཞེས་ལན་བདུན་ནམ། བཅུ་བཞིའམ། ཉེར་གཅིག་བརྗོད། སྤྱན་རས་གཟིགས་དབང་བཙུག་ཏོར་ཅན། །ཕྱག་མཐིལ་བདུད་རྩིའི་རྒྱུན་བབ་པས། ཞེས་སོགས་ཀྱིས་བསྔོའོ། །དེ་རྣམས་ནི་དངོས་གཞིའི་ཆོ་གའོ། །སྔར་བསྟན་པའི་དོན་ཡོད་པའི་ནང་ནས། ནོངས་བ་བཟོད་པར་གསོལ་བ་ནི།
ཡི་གེ་བརྒྱ་པ་དང་། མ་འབྱོར་པ་དང་ཉམས་པ་དང་། ཞེས་སོགས་དང༌། གཏོར་མགྲོན་གཤེགས་སུ་གསོལ་བ་ནི། ༀ་ཁྱེད་ཀྱིས་སེམས་ཅན་དོན་ཀུན་མཛད། ཅེས་སོགས་དང༌། བཛྲ་མུཿས་འདས་པའི་མགྲོན་གཤེགས་སོ། །འབྱུང་པའི་བར་ཆད་བསྲུང་བ་ལ། བཛྲ་ཀྲོ་ངྷའི་སྔགས་ཀྱིས་ཆོས་སྐྱོང་གང་ཡང་རུང་བའི་ང་རྒྱལ་གྱིས་དེའི་སྔགས་བཟླས་པའིབགེགས་བསལ་ལ་འབྱུང་པོའི་བར་ཆད་བསྲུང་ངོ༌། །མདོ་དང་བདུད་བཟློག་བྱ་བ་ལ་ཤེས་རབ་སྙིང་པོ་འདོན། བདུད་བཟློག་མདོ་སྒྲུབ་ལྟར་བྱའོ། །བསྔོ་བ་སྨོན་ལམ་གྱིས་རྒྱས་གདབ་བ་ལ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ།སྦྱིན་པ་ཆེན་པོར་གྱུར་པ་འདི་ཡིས་ནི། །འགྲོ་བའི་དོན་དུ་རང་བྱུང་སངས་རྒྱས་ཤོག །སྔོན་གྱི་རྒྱལ་བ་རྣམས་ཀྱིས་མ་བསྒྲལ་བའི། །སྐྱེ་བོའི་ཚོགས་རྣམས་བདག་གིས་སྒྲོལ་གྱུར་ཅིག །འབྱུང་བོ་གང་དག་འདིར་ནི་ལྷགས་གྱུར་ཏམ། །སའམ་འོན་ཏེ་བར་སྣང་འཁོད་པའང་རུང༌། །སྐྱེ་དགུ་རྣམས་ལ་རྟག་ཏུ་བྱམས་བྱས་ཏེ། །ཉིན་དང་མཚན་དུ་ཆོས་ལ་སྦྱོད་པར་ཤོག །ཅེས་སོགས་དང༌། བླ་མེད་བླ་མའི་ཐུགས་རྗེ་དང༌། །རྒྱལ་དང་རྒྱལ་སྲས་རང་རྒྱལ་དང༌། །དགྲ་བཅོམ་བདེན་པའི་བྱིན་རླབས་ཀྱིས། །བསྔོ་བ་སྨོན་ལམ་འགྲུབ་པར་ཤོག །ཅེས་སོགས་ཀྱིས་བསྔོའོ། །ཆོས་རྗེ་བློ་བཟང་གྲགས་པའི་ཐུགས་དམ་ཕྱག་ལེན། བླ་མ་དཔལ་ལྡན་མཛེས་པས་ཞུས་པ་ལགས་སོ།། ༈ རང་གི་སྒོས་ཀྱི་གཞི་བདག་ལ་གཏོར་མ་འབུལ་བར་བྱ་སྟེ། གོང་གི་བརྒྱ་རྩའི་གཞི་བདག་གི་སྐབས་ཇི་ལྟ་བ་བཞིན་བྱ། ཁྱད་པར་ནི་གཏོར་མ་བསྔོ་
བའི་ཡུལ། གནས་འདི་ཉིད་ན་གནས་ཤིང༌། གཞི་འདི་ཉིད་ན་འཁོད་པར་བྱེད་པའི། གནས་བདག །གཞི་བདག །ཡུལ་བདག །གྲོང་བདག་གི་རིགས་སུ་གྱུར་པ་རྣམས་དང་། གཞན་ཡང་ཡུལ་ཕྱོགས་ས་ཕྱོགས་འདི་དག་ཐམས་ཅད་དབང་ཞིང་སྐྱོང་བར་བྱེད་པའི་ལྷ་ཀླུ་གནོད་སྦྱིན་སྲིན་པོའི་ཚོགས་གཉུག་མར་གནས་པ་ཐམས་ཅད་ལ་སྦྱིན་ཞིང་བསྔོ་བར་བགྱིའོ། །བདག་ཅག་འཁོར་བཅས་ཕྱོགས་དུས་གནས་སྐབས་ཀུན་ཏུ་འགྲོ་འོང་གནས་འདུག་སྤྱོད་ལམ་རྣམ་བཞི་གང་བྱེད་ཀྱང་རུང་དང་ཕྲག་དོག་མ་བྱེད་པར་གནས་མགྲོན་གྱི་དམ་ཚིག་གཉན་པོ་སྲུངས་ལ། ཆོས་བསྒྲུབ་པའི་བར་ཆད་ཐམས་ཅད་ཞི་ཞིང༌། མཐུན་རྐྱེན་བསམས་པ་ཡིད་བཞིན་དུ་འགྲུབ་པའི་སྟོང་གྲོགས་མཛད་དུ་གསོལ། ཞེས་པས་སྦྱིན་ནོ། །ཕར་ཕྱིན་དྲུག་གི་ནང་ནས་སྦྱིན་པའི་ཕར་ཕྱིན་ནི་མཆོག་ཏུ་གསུངས། དེའི་ནང་ནས་གཏོར་མ་ནི། སྦྱིན་པའི་མཆོག་པས། རབ་ཏུ་བྱུང་བ་རྣམས་ཀྱིས་རྒྱུ་ཆུང་ལ་འབྲས་བུ་ཆེ་བ་སྦྱིན་པ་རྣམ་པ་གསུམ་ལྡན་གྱི་ངོ་བོ་གཏོར་མ་བརྒྱ་རྩ་ལ་བརྩོན་པར་བྱའོ། །༈ ༀ་སྭ་སྟི། ཕན་བདེའི་འབྱུང་གནས་རྒྱལ་བསྟན་ཡོངས་འདུའི་ལྗོན། །རབ་རྒྱས་འགྲོ་ཀུན་ཐར་མཆོག་འབྲས་བཟང་ལ། །སྤྱོད་ཕྱིར་བཀྲ་ཤིས་ལྷུན་གྲུབ་ཆོས་གྲྭ་ཆེར། །ཆོས་སྦྱིན་འཛད་མེད་དལ་འགྲོའི་རྒྱུན་འདི་སྤེལ།། སརྦ་མངྒ་ལཾ།། །།ཨོཾ་སྭ་སྟི། རྒྱལ་བསྟན་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདབ་རྒྱས་རྣམ་གྲོལ་སྦྲང་རྩིའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ།། །།