རྡོ་རྗེ་རྩེ་མོའི་ཟིན་བྲིས་རྗེ་ཉིད་ཀྱིས་གནང་བ།
རྡོ་རྗེ་རྩེ་མོའི་ཟིན་བྲིས་རྗེ་ཉིད་ཀྱིས་གནང་བ་བཞུགས། །
རྩེ་མོའི་དབུས་ཀྱི་དཀྱིལ་ཆོག་བཞིན། ཤར་གྱི་ལིང་ཚེར་ ཕྱོགས་གཞན་བཞི་པོ་ལའང༌། དེ་བཞིན་གཤེགས་པ་ལྔ་པོ་དབུས་དང་འདྲ་བ་བཅས། རྣམ་སྣང་གིས་ཧཱུཾ་ཞེས་བརྗོད་པས། དེ་བཞིན་གཤེགས་པ་བཞི། རྡོར་སེམས་དང་བཅས་པ་རྣམས་རང་གི་སྙིང་གར་བསྡུས་ཏེ། ཧཱུཾ་ཞེས་བརྗོད་པས་ཐུགས་ཀའི་རྡོར་སེམས་ལ་བསྐུལ་བས་རྡོར་སེམས་ཀྱི་ཐུགས་ཀའི་རྡོ་རྗེ་ལས་ཁྲོ་བོ་དཔག་ཏུ་མེད་པ་བྱུང་ཏེ། འཇིག་རྟེན་གྱི་ཁམས་ཐམས་ཅད་དུ་མ་རུངས་པ་ཐམས་ཅད་བཏུལ་ནས་ཚུར་འདུས་རྡོ་རྗེ་རིགས་ཀྱི་ལྷ་སོ་དགུར་གྱུར་ནས་དཀྱིལ་འཁོར་ལ་འཁོད་པར་གྱུར་ཏེ། དེ་ནས་རྣམ་སྣང་གིས་ཧཱུཾ་ཞེས་བརྗོད་པས་རྣམ་སྣང་གི་ཐུགས་ཀའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་
ནས་ཕྱག་ན་རྡོ་རྗེ་བྱུང་སྟེ། དེ་བཞིན་གཤེགས་པ་བྱང་ཆུབ་སེམས་དཔའི་འཁོར་དང་བཅས་པ་ཐམས་ཅད་བྱིན་གྱིས་བརླབས་ཏེ་སྤྱན་དྲངས་ལ་དམ་ཚིག་གི་དཀྱིལ་འཁོར་དུ་བཅུག་སྟེ། དམ་ཚིག་གིས་བཅིངས་ནས་གཅིག་ཏུ་འདུས། ཤར་དུ་ཁྲོ་བོ་རྡོ་རྗེ་སེམས་དཔའ། ལྷོ་རུ་ཁྲོ་གཉེར་ཅན་སོགས་སྐུ་མདོག་ཕྱག་མཚན་རྣམས་འདི་ལྟ་བུ་གསལ་འདེབས་ ནས་རང་རང་ འཇིག་རྟེན་གྱི་སངས་རྒྱས་བྱང་སེམས་ཐམས་ཅད་ གི་གནས་སུ་འཁོར། ཁྲོ་བོ་ཆེན་པོར་གྱུར་ནས་རྣམ་སྣང་གི་ཐུགས་ཀར་ཞུགས་ཏེ། ཁྲོ་བོའི་ང་རྒྱལ་བྱས་ ཨེ་མའི་བྱང་ཆུབ་ཀྱི་ནི་སེམས་སོགས་ནས་ཧཱུཾ་མཛད་ཀྱི་གཟུགས་ཀྱིས་ཕྱུང་སྟེ་ཤར་གྱི་ལིང་ཚེ་ལ་འཁོད་པར་གྱུར། དེ་བཞིན་དུ་ཕྱོགས་གཞན་གསུམ་ལའང་འདིའི་རིགས་པས་འགྲེའོ། །རྣམ་སྣང་གིས་བསྡུ་བའི་དུས་
སུ་དབུས་ཀྱི་རྡོར་དབྱིངས་དང་འདྲ་བ་ལ་ཕྱོགས་མཚམས་ཀྱི་ལྷ་ཐམས་ཅད་གཙོ་བོ་གཅིག་པོ་ལ་ཐིམ། གཅིག་པོའང་དམ་ཚིག་པའི་གཙོ་བོ་ལ་ཐིམ། སྤྲོ་བའི་དུས་སུའང་གཙོ་བོའི་ཐུགས་ཀའི་གཙོ་བོ་ལས་རང་འཁོར་རྣམས་སྤྲོས་ལ་བསྟིམ་མོ། །དེ་ལ་ཧཱུཾ་མཛད་བཞི་ནི་གཡོན་ཐུགས་ཀར་སྔིགས་མཛུབ་གཡས་འཕྱར་བ་ལ། ཁྱད་པར་རིན་ཆེན་ཧཱུཾ་མཛད་གཡོན་དཔྲལ་བ། ཁྲོ་བོ་རྡོར་སེམས་གཡས་འཕྱར། གཡོན་དཀུར་བརྟེན། རྒྱལ་པོ་སོགས་གསུམ་ཕྱག་གཉིས་རང་གི་མཚན་མ་འཛིན་པའོ། །རིན་ཆེན་གཟི་བརྗིད་གཉིས་གཡོན་ཐུགས་ཀ་ལ་ཁྱད་པར་རིན་ཆེན་གཡས་དཔྲལ་བ། གཞན་གཉིས་པོ་དཀུར་བརྟེན། ནུབ་ཀྱི་བཞི་ག་གཡོན་སྔིགས་མཛུབ་ཐུགས་ཀ །བྱང་གི་རྡོརྗེ་ལས་གཡོན་སྔིགས་འཛུབཐུགས་ཀ །གཡས་འཕྱར། གཞན་གསུམ་པོ་རང་མཚན་དྲག་པོ་མ་གཏོགས་རྣམས་གཡོན་དཀུར་བརྟེན། འཁྱིལ་པ་འོད་བཟའ་མི་བཞི་རྣམས་གཡོན་དཀུར་བརྟེན། གཡས་ཐུགས་ཀ །གླང་སྣ་གཉིས། ཕྲེང་བ་གཉིས་རྣམས་གཡོན་འཕྱར་བ། མེ་བཟའ་མིའང་འཕྱར་བ། འཇིགས་པ་པ་བཟའ་མི་གཡས་འཕྱར། གཡོན་དཀུར་བརྟེན། ལྕགས་ཀྱུ་བཟའ་མི་གཡོན་འཕྱར་བ། དུས་བཟའ་མི་གཡོན་དཀུར་བརྟེན། གཞན་རྣམས་དཀུར་བརྟེན། རྡོ་རྗེ་དབྱིག་པ་དང་ཟེར། སྨུག་པ་བཟའ་མི་བཞི་རྣམས་གཡས་ཀྱང་འཕྱར་བའོ།། སློབ་དཔོན་སེམས་ཆུང་བྱེད་ན་བྱང་ཤར་
རམ། མི་མཐུན་ཕྱོགས་ཟིལ་གྱིས་གནོན་ནུས་ན་རང་གི་ཡིད་དང་རྗེས་སུ་མཐུན་པའི་གནས་སུའོ། །ས་ལྷའི་མཆོད་གཏོར་སྔོན་འགྲོས་ས་ལ་རྒྱུ་བའི་ལྷ་ཀུན་ལན་གསུམ་བརྗོད། དྲག་པོའི་སྤྱིན་སྲེག་མི་རུས་ཀྱི་ཕྱེ་མས་སོ། །དེ་རབ་འདོམ་གང༌། འབྲིང་ལྐོག་མ། ཐ་མ་པུས་མོ། །ས་དཀར་ན་རབ། དེ་མིན་ན་ཆུ་ལ་འོ་མ་ཙནྡན་དཀར་པོ་བཏབ་པའི་སྤོས་ཆུ་དྲི་ཞིམ་པོས་སྦྲུས་པའམ། ཐུན་གྱི་སས་བཀང་ངོ༌། །བའི་རྣམ་ལྔ་ནི། བ་དམར་སེར། དབྱར་རྩ་ཟ་དུས་ཀྱི་ལྕི་བ་ས་ལ་མ་ལྷུངས་པ། ཆུ་འོ་མ་མར་ཞོ་སྟེ་ལྔ། ལ་ལན་རེ་ཁའི་ཆུ་ཟེར་ཏེ་མ་དག །དེ་རྣམས་ལྕི་བ་ཉི་མ་ལ་སྐམ་ཐག་ཆོད་པ་དང༌། ལེགས་པར་བརྡུངས་ཏེ་དར་ཚགས་བྱ། དེ་ལ་ཞོ་འོ་མ་མར་གསུམ་པོ་བསྲེས་ནས་སྐམ། དེ་ལ་ཆུ་བསངས་ཏེ་ལན་གསུམ་ཙམ་སྐམ་ཐག་ཆོད་པར་བྱའོ། །དེ་ནས་རིལ་བུ་གང་འདོད་བྱས་ནས། དཀྱིལ་འཁོར་གྱི་ལས་བྱའོ་གསུངས། ཡུང་ཆུ་ཐལ་བ་བསྲེས་ནས་བྱེད་པར་ཡང་བཤད། ཕྱག་ལེན་ལ་སོ་སོ་མཛད། ཐལ་བ་རྙེད་ན་སྦྱིན་སྲེག་གི་ཐལ་བ། མ་རྙེད་ན་གང་ཡང་རུང་བའོ། །བ་དྲི་བྱུག་དུས་སྔོན་ལ་དཀྱིལ་ནས་དེ་ནས་དབང་ལྡན་ནས་འཐེན་ནས་རྒྱ་ཇེ་ཆེར་བཏང་ངོ༌། །སྟེང་དུ་བླ་བྲེ་བྲེ་བ་ནས་གྲྭ་བཞིར་སྤོས་སྣོད་བཞག་པ་ཡན་ཆད་ཀྱི་རྒྱན་དང་མཆོད་རྫས་ཀྱིས་གཟུང་པའོ། །ཆེད་དུ་གཏད་པའི་བཟླས་སྒོམ་གྱི་བར་བྱས་ནས་དམ་ཚིག་གསུམ་བཟུང་འདི་ནས་རྡོར་དྲིལ་དངམི་འབྲལ་བར་བཤད། དེ་ནས་
སྒྲུབ་གྲོགས་རྣམས་ཀྱིས་དེ་བཞིན་གཤེགས་པ་ཐམས་ཅད་ཀྱི་ང་རྒྱལ་བཟུང་ནས་གསོལ་བ་འདེབས་པ་སྔོན་བྱུང་དང་བསྟུན་པའོ། །ཕྱག་ལེན་ལ་མཆོད་ཡོན་སྔོན་འགྲོའི་ཉེར་སྤྱོད་ལྔ། སྒེག་སོགས་དེ་ནས་མཚན་བརྒྱ་བྱེད་པ་ལ་བླ་མ་སྨད་ལུགས་པ་རྣམས་ཀྱིས་དང་པོའི་ཕྱག་ལེན་ལ། ཤར་ནས་དེ་བཞིན་གཤེགས་པའི་རིགས་ཀྱི་མཚན་བརྒྱ་ལྷོ་ནས་རིན་ཆེན་རིགས། ནུབ་ནས་པདྨའི་རིགས། བྱང་ནས་ལས་རིགས་ཀྱི་མཚན་བརྒྱ་བྱེད། དེ་རྡོར་དབྱིངས་པ་ལ་མི་དགོས། ཅིས་ཀྱང་རིགས་འབྱེད་ན། ཤར་ནས་ཤར་སེམས་བཞི། དེ་བཞིན་དུ་ཕྱོགས་གསུམ་ག་ལའང་རང་རང་གི་སེམས་དཔའ་བཞི་བཞིས་བསྟོད། གསོལ་གདབ་ཀྱི་དུས་སུ་རྒྱད་སྡེ་གཞན་དང་མཐུན་པར་མཎྜལ་འབུལ་བ་ལ་གཡོན་སྔོན་འགྲོའི་གཞི་བཅའ་དང༌། པུས་མོ་གཡས་འཛུགས། ཕུར་པ་འདེབས་དུས་གཡས་སྔོན་འགྲོའི་གཞི་བཅའ་དང༌། པུས་མོ་གཡོན་འཛུགས་སོ། །བསང་ཆུའི་བུམ་པ་གནོད་སྤྱིན་གྱི་སྔགས་རྒྱས་བསངས། སྭ་བྷཱ་བས་སྦྱངས་པའི་དང་ལས། པཾ་ལས་པདྨ། ཨ་ལས་ཟླ་བའི་སྟེང་དུ་བཾ་དང༌། ཧཱུཾ་ལས་བསྐྱེད་པ་ཡོད་པ་ལས་སྔོན་མ་དག་གསུང༌། བཾ་ལས་རིན་པོ་ཆེའི་བུམ་པ་ལྟོ་བ་ཡངས་ཤིང་མཆུ་འཕྱང་བ། ལྷ་རྫས་ཀྱི་གོས་ཀྱིས་མགུལ་བཅིངས་པ། དཔག་བསམ་གྱི་ཤིང་གིས་ཁ་བརྒྱན་པའི་ནང་དུ། སྨན་ལྔ། འབྲུ་ལྔ། རིན་པོ་ཆེ་ལྔ། དྲི་ལྔ། སྙིང་པོ་ལྔ་སྟེ་ལྔ་ལྔ་ཉི་ཤུ་རྩ་ལྔ་
དང་ལྔན་པ། ༀ་ཏཱཔ་ཏེ་ཏཱཔ་ཏེ་མཧཱ་ཏཱ“པཏེ་སྭཱཧཱ། ཞེས་བས་ལྷའི་དལ་འགྲོའི་རང་བཞིན་གྱི་ཆུ་བཀུག་པའི་ནང་དུ་ཧྲཱིཿལས་པདྨ། ས་མ་ཡ། ཨ་ལས་ཟླ་བའི་དཀྱིལ་འཁོར། དེའི་སྟེང་དུ་བཛྲ་ཡཀྵ་ཨ་ལས་ཁྲོ་བོའི་རྡོ་རྗེས་མཚན་པའི་རྡོ་རྗེའི་མཆེ་བ། དེ་ལས་ཁྲོ་བོ་རྡོ་རྗེ་ནག་པོ་ཞལ་གཅིག་ཕྱག་གཉིས་པ་སོགས་མངོན་རྟོགས་བཞིན་བསྐྱེད། དེ་ལ་བཛྲ་ཨངྐུ་ཤ་ཛཿསོགས་ཀྱིས་ཡེ་ཤེས་པ་དགུག་གཞུགས་སོགས་བྱ། དེ་ལ་ཕྱག་རྒྱ་བཞིས་རྒྱས་གདབ། དབང་བསྐུར་བཛྲ་ཡཀྵ་བརྒྱ་རྩ་བརྒྱད་ཟེར་ཡང༌། ལན་གསུམ་བཞི་བཟླས་པའི་མཆོད་ཡོན་སྔོན་འགྲོའི་མཆོད་པ་དང་བསྟོད་པ་བྱ། དེ་ནས་རྡོ་རྗེ་གནོད་སྦྱིན་གྱི་དམ་རྒྱས་གཟུགས་ཐག་བཟུང་ལ། བཛྲ་ཡཀྵ་བརྒྱ་རྩ་བརྒྱད་བཟླས་སོ། །དེ་ནས་སྟ་གོན་ལ། གཞལ་ཡས་ཁང་གྲུ་བཞི་སྒོ་བཞི་རྟ་བབས་བཞི་དང་བཅས་པའི་དབུས་སུ། གྲུ་བཞི་སྒོ་བཞི་རྟ་བབས་མེད་པ་མཚན་ཉིད་ཐམས་ཅད་ཡོངས་སུ་རྫོགས་པའི་གཞལ་ཡས་ཁང་དང་བཅས་པའི་དབུས་སུ། ཨཿ སིང་ཨཿ སོགས་གདན་བསྐྱེད། དེ་ནས་དབུས་སུ་སེངྒེའི་ཁྲི་དང་པད་ཟླའི་སྟེང་དུ་རྣམ་པར་སྣང་མཛད་སྐུ་མདོག་དཀར་པོ་ཞལ་བཞི་ཕྱག་གཉིས་སོགས་བསྐྱེད། དེ་ནས་སྨད་ལུགས་པའི་ཕྱག་བཞེས་ལ་དེ་མ་ཁད་བཛྲ་ཨངྐུ་ཤ་ཛཿསོགས་ཀྱིས་བར་སྣང་ནས་ལྷ་དབབ། དེ་ནས་མཆོད་གཡོག་པས་སྒོས་མཆོད་ཀྱིས་མཆོད།
དེ་བཞིན་དུ་རིམ་པ་བཞིན་མཆོད། ཡང་ན་ལྷ་བསྐྱེད་ཆོག་ཚར་རེ་བཏང་ནས་དགུག་གཞུག་ཐུན་མོང་བྱས་ཀྱང་ཆོག་གོ །དེ་ནས་རྣམ་རྒྱལ་བུམ་པ་སྔར་གྱི་རིགས་འགྲེས་ཤེས་ལ། རྡུལ་ཚོན་གྱི་དཀྱིལ་འཁོར་ལྷ་སྒྲུབ་པ་ནི། དེ་ནས་སྟ་གོན་གྱི་ལྷ་རྣམས་ནམ་མཁའི་དབྱིངས་སུ་བཞུགས་སུ་གསོལ། གཞལ་ཡང་ཁང་བབས་ཏེ་རྡུལ་ཚོན་གྱི་གཞལ་ཡས་ཁང་དང་གཉིས་སུ་མེད་པར་འདྲེས་པར་གྱུར་ཏེ། གྲུ་བཞི་སྒོ་བཞི་རྟ་བབས་བཞི་དང་བཅས་པ་བསྐྱེད་པའི་དབུས་ཀྱི་སེང་གེའི་ཁྲི་དང༌། པད་ཟླའི་སྟེང་དུ་བཛྲ་དྷཱ་ཏུ། ཨཿ དང་རྡོ་རྗེ་རྩེ་ལྔ་པ་ལས་རྣམ་པར་སྣང་མཛད་བསྐྱེད། དེ་བཞིན་དུ་ཤར་དུ་གླང་པོ་ཆེའི་ཁྲི་དང་པད་ཟླའི་སྟེང་དུ། བཛྲ་དྷཱ་ཏུ་ཧཱུཾ་དང་རྡོ་རྗེ་ལས་མི་བསྐྱོད་པ་བསྐྱེད། གཞན་གསུམ་ལའང་དེའི་རིགས་པ་འགྲེའོ། །རྣམ་སྣང་གི་མདུན་དུ་པད་ཟླའི་སྟེང་དུ་སཏྭ་བཛྲིར། སེམས་མ་རྡོ་རྗེ་མ་རྡོ་རྗེ་སེམས་དཔའ་འདྲ་བ་རྡོ་རྗེ་རྩེ་ལྔ་བའི་ནང་དུ་སྐུ་ཆུད་བ་བསྐྱེད། གཞན་གསུམ་ལའང་འགྲེའོ། །མི་བསྐྱོད་པའི་མདུན་དུ་པད་ཟླའི་སྟེང་དུ་བཛྲ་སཏྭ་ཧཱུཾ། རྡོ་རྗེ་ལས་སྐྱེས་པའི་རྡོར་སེམས། དེ་བཞིན་དུ་འབེབས་པའི་བར་དུ་རང་རང་གི་སྙིང་པོ་ས་བོན་ཕྱག་མཚན་ལས་བསྐྱེད། བསྐལ་བཟང་རྣམས་རིག་པ་ལས་བསྐྱེད། །དེ་ནས་བཛྲ་ཨཾ་ཀུ་ཤ་ཛཿསོགས་ཀྱིས་ཡེ་ཤེས་པ་དགུག་བཞུགས་སོགས་བྱ། དེ་ནས་རྣམ་སྣང་ནས་འབེབས་པའི་བར་དང༌། བསྐལ་བཟང་གི་བར་གྱི་དམ་
རྒྱས་སྒྲུབ། དེ་ནས་བཛྲ་དྷཱ་ཏུ་སོགས་རང་རང་གི་སྙིང་པོས་བར་སྣང་ནས་ལྷ་ཕབ་ལ་བསྟིམ། དེ་ལ་དམ་རྒྱས་སྒྲུབ་པ་རེ་རེའི་རྗེས་སུ་ཕབ་ཀྱང་ཆོག་གོ །དེ་ནས་ཆོས་ལས་ཕྱག་ཆེན་གསུམ་གྱི་རྒྱས་གདབ་བོ། །དེ་ནས་ལྷག་ཆད་ཁ་སྐོང་སོགས་བྱའོ། །བུམ་པ་སྒྲུབ་པ་གོང་གི་རིགས་པས་འགྲེ་ཞིང༌། ལྷ་བསྐྱེད་པ་རྡུལ་ཚོན་དཀྱིལ་འཁོར་སྒྲུབ་པ་དང་འདྲའོ། །བུམ་པའི་ཆེ་ཆུང་གི་ཚད་འཕགས་པ་ཌ་བ་ཏི་ཆོ་ག་གཟུངས་འདུས་ལས་གསུངས་པ། རིམས་ནད་ཀྱི་ཆོ་ག་ལས་ལྷུང་བ་ཟེད་ཀྱི་ཚད་དང་མཉམ་པར་བཤད་དོ། །དཔལ་མཆོག་དཀྱིལ་འཁོར་དབུས་མའི་རྡོར་སེམས་ལ། གཙུག་ཏོར་གྱི་རྩེ་མོ་ནས་ཡས་མར་བརྩམས་ཏེ། རིན་པོ་ཆེ་དང༌། པདྨ་དང་། སྣ་ཚོགས་རྡོ་རྗེ། རྣ་ལྟག་གཡས་ཀྱི་རྩེ་མོ་ན་རིན་པོ་ཆེ། “གཡོནགྱི་རྩེ་མོ་ན་སྣ་ཚོགས་རྡོ་རྗེ། རྣ་ལྟག་གཡས་ནས་གཡོན་དུ་པདྨའི་ཕྲེང་བས་བསྐོར། རིགས་ལྔ་ལ་བྲིས་པ་མི་སྣང༌། རྡོ་རྗེ་ཡིད་ལས་བྱུང་བ་ནི་ཨུཏྤལ་ཁ་མ་བྱེ་བའི་མདེའུ་ཅན་གྱི་མདའ་གཞུ་བཀང་བ། གཡས་སུ་རྡོ་རྗེ་ཀཱི་ལི་ཀཱི་ལ་ནི། དང་པོའི་རྡོ་རྗེ་བཟུང་ནས་ལེགས་སོ་སྦྱིན་པའི་ཚུལ་འདྲ་བ་ལ་འཁྱུད་པ་མི་གདའ། དྲན་མ་ཕྱག་གཡས་ཆུ་སྲིན་གྱི་ཏོག་ལ་མཚན་པའི་རྒྱལ་མཚན། གཞན་འདྲ། དེ་དང་རྡོ་རྗེ་སྙེམས་མ་འདྲ། ཤར་གྱི་ལེའུ་ཚེ་ལ་མི་བསྐྱོད་པ་དཀར་པོ་གཡས་ས་གནོན་གྱིས་མཐེའུའི་ཕུགས་སུ་
རྡོ་རྗེ་འཛིན། གཡོན་མཉམ་གཞག །གཡས་སུ་ཕྱག་རྡོར་དང་འཇམ་དཔལ་གཉིས་དཀྱིལ་ཆོག་དང་འདྲ། ལྷའོ་ལེའུ་ཚེ་ལ་རིན་ཆེན་འབྱུང་ལྡན། གཡས་མཆོག་སྦྱིན་གྱིས་རིན་པོ་ཆེ། གཡོན་མཉམ་གཞག །ནམ་མཁའི་སྙིང་པོ་ནམ་མཁའ་མཛོད་དཀྱིལ་ཆོག་བཞིན། ནུབ་ཏུ་འོད་དཔག་མེད་ཆོས་འཆད་ཀྱི་ཕྱག་རྒྱས་རྡོ་རྗེ་པདྨའི་སྡོང་བུ་དཀུར་འཛིན་པ། གཡོན་གྱི་སྙན་གྱི་ཐད་དུ་ཁ་ཕྱེ་བའི་ཚུལ། འཇིག་རྟེན་དབང་ཕྱུག་དཀྱིལ་ཆོག་བཞིན། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་གཡས་རྡོ་རྗེ་ཁུ་ཚུར་ཁ་ཕྱིར་བསྟན་པའི་གུང་མོའི་རྩེ་མོ་ན་འཁོར་ལོ་བསྣམས་པའོ། །བྱང་དུ་དོན་གྲུབ་དཀྱིལ་ཆོག་བཞིན། རྡོ་རྗེ་ཁུ་ཚུར་མདུན་དུ་རྡོ་རྗེ་ཁུ་ཚུར་གཉིས་ཀྱིས་དང་པོའི་རྡོ་རྗེ་འཚིར་བ། རྡོ་རྗེ་གནོད་སྦྱིན་དཀྱིལ་ཆོག་བཞིན། འབར་བའི་ཕྲེང་བ་མི་སྣང༌། ཕྱི་སྒེག་བཞི་དཀྱིལ་ཆོག་བཞིན། ནང་སྒེག་རྣམས་ཀྱང་འདྲ། ཀར་ཏི་ཀ་གདོང་དྲུག །ཞལ་གསུམ་གསུམ་དྲུག་སྟེ། རྩེགས་ཞལ་གཡས་འགྱེད་གཡོན་འགྱེད། གཡས་གཉིས་ན་རྡོ་རྗེ་དང་རལ་གྲི་སྔོན་པོ། གཡོན་ན་རིན་པོ་ཆེ་དང་པདྨ། འོག་མ་གཉིས་དཀུར་བརྟེན། གོང་མ་གཉིས་དཔུང་ཁར་ཕྱག་མཚན་འཛིན་པ། ཚངས་པ་གསེར་མདོག །གཡས་ཀྱིས་རྡོ་རྗེ་ཐུགས་ཀར་འཛིན། གཉིས་པ་བགྲང་ཕྲེང་དཔུང་ཁར། གཡོན་སྤྱི་བླུགས་དཀུར་བརྟེན། གཉིས་པ་དབྱུག་པ་དཔུང་ཁར། ཞིབ་འདྲ། ལྷ་ཆེན་གཡས་རྡོ་རྗེ་སྔོན་པོ་རྩེ་གསུམ་དང་མཆོག་སྦྱིན། གཉིས་པ་
གར་བསྒྱུར་པ་ལྟ་བུ། གཡོན་དང་པོས་མདུང་རྩེ་གསུམ་དཀུར་བརྟེན་ཅིང༌། གཉིས་པ་རལ་གྲི་དཔུང་ཁར་འཕྱར། སྦྲུལ་གྱི་མཆོད་ཕྱིར་ཐོགས་སོགས་མི་སྣང༌། དབུ་མས་རང་གི་གཡོན་ནས་འཁྱུད་པ། ཕྱག་མཚན་ལྷ་ཆེན་འདྲ། ཁྱབ་འཇུག་གཡས་རྡོ་རྗེ་ཐུགས་ཀར། གཉིས་པ་དཔུང་བའི་ཐད་ཀར་དབྱུག་པ་འཛིན་པ། གཡོན་དང་པོ་དུང་དཀུར་བརྟེན། གཉིས་པ་འཁོར་ལོ་དཔུང་པའི་ཐད་ཀར་འཛིན་པ། རྡོ་རྗེ་སེར་མོ་གཡོན་རྡོ་རྗེ་སྔོན་པོ་དཀུར་བརྟེན་པ། གཡས་རྡོ་རྗེ་སེར་པོ་ཐུགས་ཀར་གཏོད་པ། འདོད་པ་ཁམས་ཀྱི་དབང་ཕྱུག་ཆད་ནས་མི་སྣང༌། བརྒྱ་བྱིན་གཡོན་རང་གི་རྡོ་རྗེ་སྔོན་པོ་དཀུར་བརྟེན་པ། གཡས་འདས་པ་རྡོ་རྗེ་སེར་པོ་ཐུགས་ཀར་གཏོད་པ་རྩེ་གསུམ་འདྲ། ཟླ་བ་དཀར་པོ་གཡས་རྡོ་རྗེ་སྔོན་པོ་ཐུགས་ཀར་གཏོད་པ། གཡོན་པདྨའི་རྩ་བ་དཀུར་བརྟེན་ཅིང༌། སྙན་གྱི་ཐད་དུ་ཁ་བྱེད་བའི་ལྟེ་བར་ཟླ་བའི་དཀྱིལ་འཁོར་དཀར་པོ། ཉི་མ་གཡས་པདྨའི་རྩ་བ་ཐུགས་ཀར་འཛིན་ཅིང༌། པདྨའི་སྟེང་ན་རྡོ་རྗེ་བསྣམས་པ། གཡོན་པདྨའི་རྩ་བ་དཀུར་བརྟེན་ཅིང༌། ཐུགས་ཀར་ཁ་བྱེ་བའི་སྟེང་ན་ཉི་མའི་དཀྱིལ་འཁོར། རྟ་གཅིག་གིས་དྲངས་པའི་ཤིང་རྟ་ལ་གནས་པའོ། །སྤེན་པ་གཡས་རྡོ་རྗེ་སེར་པོ་ཐུགས་ཀར་གཏོད་ཅིང༌། གཡོན་དབྱུག་པ་དཀུར་འཛིན་པ། མིག་དམར་གཡས་རྡོ་རྗེ་དམར་པོ་འཕྱར་པ། གཡོན་ཀེང་རུས་ཀྱི་རྐང་པ་ནས་བཟུང་ནས་མགོ་ནས་ཟ་བ། ནུབ་སྟོབས་
ཀྱི་ལྷ་དཀར་པོ་གླང་པོའི་སྣ་ཅན། གཡས་རྡོ་རྗེ་སྔོན་པོ་ཐུགས་ཀར། གཡོན་ཐོང་གཤོལ་ཟེར་ཀྱང་དབྱུག་པ་དཀུར་འཛིན། འཇུ་བ་མ་དཀྱིལ་ཆོག་བཞིན། དཔྱིད་ལྷ་གཡས་རྡོ་རྗེ་སྔོན་པོ་ཐུགས་ཀར། གཡོན་མེ་ཏོག་གི་ཕྲེང་བ་དཀུར། ཟ་བ་མ་དཀྱིལ་ཆོག་བཞིན། རྒྱལ་བ། སྒོ་བ་མ། རྣམ་པར་རྒྱལ། ནོར་སྦྱིན་རྣམས་རྡོ་རྗེ་སྔོན་པོ་ཐུགས་ཀར། གཡོན་རང་རང་གི་ཕྱག་མཚན་དཀུར་འཛིན། ནོར་སྦྱིན་གྱི་ཁྱོགས་ནི། ཅོག་རྩེ་འདྲ་བ་རླུང་ལྷ་མེ་ལྷ་ལུས་ངན་པོ་རྣམས་རྡོ་རྗེ་སྔོན་པོ་ཐུགས་ཀར། གཡོན་དཀུར་རྟེན་ནས་རང་རང་གི་ཕྱག་མཚན་འཛིན་པ། ཕག་མདོག་གཡས་རྡོ་རྗེ་སྔོན་པོ་ཐུགས་ཀར། གཡོན་དཀུར་བརྟེན་ནས་ལྕགས་ཀྱུ་འཛིན་པ། ཀླུའི་རྒྱལ་པོ་ཤེ་ཥ། སྟོང་མི་ལ་སྦྲུལ་མགོ །སྨད་སྦྲུལ་མཇུག་ཏུ་འཇུག །བྲན་མོ་རྡོ་རྗེ་ཁ་གཡས་རྡོ་རྗེ་སྔོན་པོ་ཐུགས་ཀར། གཡོན་རལ་གྲི་དཀུར་བརྟེན། གཤིན་རྗེ་མ། དུས་མ། ཚོགས་བདག་རྣམས་གཡས་རྡོ་རྗེ་སྔོན་པོ་ཐུགས་ཀར། གཡོན་དཀུར་རང་རང་གི་ཕྱག་མཚན་འཛིན་པ། ཚོགས་བདག་གླང་པོའི་མགོ་ཅན། ཕོ་ཉ་མོ། ཆུ་ལྷ། ཆུ་སྲིན་རྡོ་རྗེ་གཡས་རྡོ་རྗེ་སྔོན་པོ་ཐུགས་ཀར། གཡོན་དཀུར་བཟུང་ནས་རང་རང་གི་ཕྱག་མཚན་འཛིན་པ། ལྷོ་ཤར་གྱི་ལེ་ཚེའི་དབུས་སུ། རྡོ་རྗེ་ཧཱུཾ་མཛད་སྐུ་མདོག་ཕྱག་མཚན་དཀྱིལ་འཁོར་བཞིན་ལ། རིན་པོ་ཆེ་ལ་སོགས་པའི་ཕྲེང་བ་རྣམས་དཔྲལ་བའི་དབུས་དང་རྣ་ལྟག་གཡས་གཡོན་ན་རྩེགས་མར་
སྣང༌། ཁྲོ་བོ་རྡོ་རྗེ་འཛིནཔ་ནས་ཆུ་གྲི་འཛིན་པའི་བར་དཀྱིལ་ཆོག་དང་མཐུན། གྲི་རིང་ནི་རལ་གྲིའོ། །ཤར་དུ་འདོད་པ་ཁམས་ཀྱི་དབང་ཕྱུག་ནས། ཕྱི་རོལ་རྡོ་རྗེ་རིགས་རྣམས་དཀྱིལ་འཁོར་དབུས་མ་དང་འདྲ། ལྷོའི་དཀྱིལ་འཁོར་གྱི་ལེ་ཚེའི་དབུས་སུ། ནམ་མཁའི་སྙིང་པོ་རྟ་བདུན་གྱིས་དྲངས་བའི་ཤིང་རྟ་ལ་རྡོ་རྗེ་ཁུ་ཚུརཁ་ནང་དུ་བསྟན་པས་རང་གི་དཔྲལ་བའི་ཐད་དུ་དབང་བསྐུར་ཚུལ། རིན་ཆེན་ཅོད་པན་དཔྲལ་བར་འཛིན་པ། ནོར་སྩོལ་བའི་རིན་པོ་ཆེ་མཆོག་སྤྱིན་གྱི་བུམ་པ་འཛིན་པ། ཆོས་ཆེན་པོ་གླེགས་བམ་ཐུག་ཀར་འཛིན་པ། རོ་མྱང་ཟས་སྐོམ་གྱི་རོས་ཡོངས་སུ་གང་བའི་སྣོད་ཐུགས་ཀར་འཛིན། རིན་ཆེན་གདུགས། རིན་ཆེན་རྒྱལ་མཚན། རིན་ཆེན་སྲོག་ཤིང༌། རྔ་ཅན་མ་རྣམས་དཀྱིལ་ཆོག་བཞིན། བུམ་པ་ཤར་ལྷོ་ན་དམར་པོ། ལྷོ་ནུབ་ན་སྔོན་པོ། ནུབ་བྱང་ན་ལྗང་གུ། བྱང་ཤར་ན་སེར་པོ། སྒོའི་མཚན་མ་རྣམས་ཁ་དོག་སེར་པོ། ནུབ་ཀྱི་དཀྱིལ་འཁོར་དབུས་སུ་འཇིག་རྟེན་དབང་ཕྱུག་དཀྱིལ་ཆོག་བཞིན། ཤར་པདྨ་འདོད་ལྷ་གཡས་པདྨའི་རྩ་བ་ཐུགས་ཀར་འཛིན། གཡོན་མེ་ཏོག་པདྨ་དང་མདའ་གཞུ་དཔུང་ཐད་དུ་འཛིན་པ། གཏུམ་པའི་དབང་ཕྱུག་གཡས་དང་པོ་ཏྲི་ཤུ་ལ་ཐུགས་ཀ །གཉིས་པ་པདྨ་དཔུང་ཁར་འཛིན། གཡོན་དང་པོ་ཁ་ཊྭཱཾ་ག་དཀུར་བརྟེན། གཡས་ཐོད་པ་དཔུང་ཁར་འཛིན། པདྨ་ཁྱབ་འཇུག །ཕྱག་མཚན་འཛིན་ཚུལ་
གཏུམ་པའི་དབང་ཕྱུག་འདྲ། ཚངས་པའི་གཟུགས་འཛིན། ཞལ་བཞི་ཕྱག་མཚན་འཛིན་ཚུལགཏུམ་པའི་དབང་ཕྱུག་འདྲ། པདྨ་ས་འཛིན་ལྷ་མོ་ནི། ཕྱག་དང་པོ་གཉིས་གཅིག་གིས་གཅིག་འཛིན་པ། འོག་མ་གཉིས་རང་རང་གི་ཐད་དུ་ཕྱག་མཚན་འཛིན་པ། པདྨ་རྒྱ་མཚོ་གཡས་པདྨ་ཐུགས་ཀར། གཡོན་སྦྲུལ་ཞགས་དཀུར་བརྟེན་པ། པདྨ་ཉི་མ། གཡས་པདྨ་ཐུགས་ཀར་འཛིན། གཡོན་པདྨའི་སྡོང་པོ་དཀུར་འཛིན་པའི་འདབ་མར་ཉི་མ་རླུང་གི་གཞུ་འཛིན་པ། གཡས་གྲི་གུག་ཐུགས་ཀར། གཡོན་པ་དན་དཀུར། ས་འཛིན་ལྷ་མོ་ཤྲི། ཧྲི་གི་ངྷི་རྣམས་གཡས་རང་རང་གི་ཕྱག་མཚན་ཐུགས་ཀར་འཛིན་ཅིང༌། གཡོན་དཀུར་འཛིན། བུད་མེད་ཀྱི་གཟུགས་འཛིན་པ་དམར་པོ་གཡས་དཔང་པོར་ཁས་ལེན་གྱི་ཕྱག་རྒྱ། གཡོན་གདན་ལ་བརྟེན་པ། བྱང་དུ་རྡོ་རྗེ་ཁུ་ཚུར་གྱི་དཀྱིལ་འཁོར་ནི་དཀྱིལ་ཆོག་བཞིན་ནོ། །མེར་དཀྱིལ་འཁོར་གྱི་དབུས་སུ། འཇམ་དཔལ་ཕྱག་བཞིས་རལ་གྲི་རང་རང་གི་ཐད་དུ་འཕྱར་བ། འཁོར་རྣམས་དཀྱིལ་ཆོག་བཞིན། དབུས་ཀྱི་དཀྱིལ་འཁོར་གྱི་འཇམ་དཔལ་གྱི་དཔུང་པ་གཡས་གཡོན་དུ་ན་ཀྲ །གཞན་སྔར་བཞིན། ནམ་མཁའ་མཛོད་ཀྱི་དཀྱིལ་འཁོར་དུ་གཙོ་འཁོར་རྣམས་དཀྱིལ་ཆོག་བཞིན། ཤར་སྒོར་ཟླ་བའི་དཀྱིལ་འཁོར་གྱི་སྟེང་དུ་དོང་རྩེར་རི་མོ་དམར་པོ། ལྷོ་སྒོར་གསེར། ནུབ་གོར་མུ་ཏིག་འབྲུམ་བུ་དཀར་པོ། བྱང་གོར་པདྨ་རཱ་ག་དམར་པོ་རྣམས་ཉི་མའི་དབྱིབས་ལྟ་བུ་ཟླུམ་པོའོ། །
རྡོ་རྗེ་འཁོར་ལོའི་དཀྱིལ་འཁོར་ལ་རྡོ་རྗེ་འཁོར་ལོ་ལ་སོགས་པའི་ལིང་ཚེ་དགུའི་ལྷ་རྣམས་དཀྱིལ་ཆོག་བཞིན། འཇིག་རྟེན་པའི་དཀྱིལ་འཁོར་བཞི་པོ་དཀྱིལ་ཆོག་བཞིན། མ་མོའི་དཀྱིལ་འཁོར་གྱི་སྒོ་རང་གི་ཕྱོགས་ཀྱི་དབྱེ་བས་བྱང་ཤར་ན་གནས། ལྷ་རྣམས་ཆུངས་ནས་འབྲི་མ་ཤེས་པར་ཕྱག་མཚན་བྲིས་སྣང༌། རྡོ་རྗེ་གནོད་སྦྱིན་གྱི་མཆེ་བ་ཐམས་ཅད་ཁྲོ་བོའི་རྡོ་རྗེས་མཚན་པའི་མཆེ་བ་ཁ་འགྲམ་དུའོ། །རྡོ་རྗེ་གནོད་སྦྱིན་དཀྱིལ་ཆོག་དང་མཐུན། ཞི་བ་མདུང་གི་དཀྱིལ་འཁོར་དུ་དབང་ཕྱུག་ཆེན་པོ་ནི། ཞལ་བཞིའི་རྩ་ཞལ་ཞི་བ་ལྷག་མ་རྣམས་ཁྲོ་བ་འཁོར་ཞལ་དུ་སྣང༌། གཡས་དང་པོ་ཁ་ཊྭཱཾ་ག་ཐུགས་ཀར་གཏོད་ཅིང་། གཡོན་དང་པོ་ཁ་ཊྭཱཾ་ག་དཀུར་བརྟེན་ཅིང༌། ཕྱག་ལྷག་མ་རྣམས་རང་རང་གི་ཐུགས་ཀར་འཕྱར་བ། དེའི་སྤྱི་བོར་ཁྲོ་བོ་འཇིགས་བྱེད་བཞེངས་པ། ཕྱག་བཞིས་རང་རང་གི་ཐད་དུ་ཕྱག་མཚན་འཛིན་པ། ནག་པོ་ཆེན་པོ་གཡས་ཏྲི་ཤུ་ལ་ཐུགས་ཀར་འཛིན་གཡོན་དཀུར་བརྟེན་པ། དགའ་བྱེད་དབང་ཕྱུག་རྫ་རྔ་བརྡུང་བ། ནུབ་ཏུ་དྲིལ་ཆེན་དམར་པོ་དྲིལ་བུ་འཛིན་པ། དྲིལ་བུ་གཉིས་དཔུང་ཁར་འཛིན་པ། གར་གྱི་དབང་ཕྱུག་དཀར་པོ་གཡས་ཐུགས་ཀར་མདུང་འཛིན་ཅིང་། གཡོན་དཀུར་བརྟེན། ཐོད་པ་བཟང་པོ་ནག་པོ། གཡོན་ཐོད་པ་ཐུགས་ཀར་། གཡས་ཁུ་ཚུར་སྙིང་གར། ལྷོ་ནུབ་ཏུ་གཏུམ་དབང་ཕྱུག་ནག་པོ་ཕྱག་བཞི། གཡས་དང་པོ་ཌཱ་མ་རུ་
དཔུང་ཁར། འོག་མ་ཁ་ཊྭཱཾག་འཕྱར། གཡོན་དང་པོ་ཐོད་པ་ཐུགས་ཀར། གཞན་རྣམས་འཕྱར་བ། ཁ་ཊྭཱཾ་ག་ནག་པོ། གཡས་ཁ་ཊྭཱཾ་ག་དཔུང་ཁ། གཡོན་ཐོད་པ་ཐུགས་ཀ །བ་ལང་རྣ་བའི་དབང་ཕྱུག་ནག་པོ་ཏྲི་ཤུ་ལ་མདུང་འཛིན་ཚུལ་དང་འདྲ། དྲག་མོ་སེར་མོ་རྩེ་གསུམ་ཡང་འཛིན་ཚུལ་མདུང་དང་འདྲ། ཚངས་པ་དཀར་པོ་ཕྲེང་བ་གཡས་ཀྱི་དཔུང་ཁར། ཁྱབ་འཇུག་སེར་པོ་གཡས་འཁོར་ལོ་ཐུགས་ཀར། གཡོན་དཀུར་བཞག །གཞོན་ནུ་མ་དམར་པོ་གཡས་དྲིལ་བུ་ཐུགས་ཀར། གཡོན་དཀུར་ནག་མོ་ནག་མོ་གཡས་རལ་གྲི་ཐུགས་ཀར། གཡོན་དཀུར་བཞག །ལྷོ་ནུབ་ཏུ་ནག་མོ་ཆེ་གཡས་ཆུ་གྲི་རྣ་བའི་ཐད་དུ། གཡོན་སྡིགས་མཛུབ། ཟ་བ་མོ་ནག་མོ་རྡོ་རྗེའི་མཆེ་བ་རྣ་བའི་ཐད་དུ་འཛིན་པ། སྲིན་མོ་ནག་མོ་ཁ་ཊྭཱཾ་ག་ཐུགས་ཀར་གཡོན་དཀུར། ཞི་བ་དམར་མོ་གཡས་ཐོད་པ་ཐུགས་ཀར། གཡོན་དཀུར། བེ་ཏུན་ཊ་ལྗང་གུ་ཕྱག་གཉིས་ཐུགས་ཀར། རུས་པའི་ལུ་གུ་རྒྱུད་དེ་ལྕགས་སྒྲོག་ལྟ་བུ། གཏུམ་མོ་ནག་མོ་གཡས་རྡོ་རྗེ་ཁུ་ཚུར། གཡོན་བྱ་རྒོད་དཔུང་པར། འཇིགས་བྱེད་མ་སེར་མོ་གཡས་རྡོ་རྗེ་ཁུ་ཚུར་རྣ་བའི་ཐད་དུ། གཡོན་ཐུགས་ཀར་བྱི་བ་འཛིན། འབྱུང་པོའི་ཡི་གེ་ཏྲི་བརྒྱད་བརྒྱད། ཁ་དོག་ནག་པོ་ཏྲི་བཞི་བཞིའི་བར་དུ་ཏྲི་ཤུ་ལ་རེ་རེའོ། །དབྱུག་པའི་དབང་ཕྱུག་དམར་པོ་ལག་གཡས་ཐོད་པ་ཐུགས་ཀ། །གཡོན་འཁར་བ་དཀུར་བརྟེན། ལྗང་གུ་གཡས་ཁ་ཊྭཱཾ་ག་ཐུགས་ཀར། གཡོན་
དཀུར་བརྟེན། དྲིལ་བུའི་རྣ་སྔོན་པོ་གཡས་དྲིལ་བུ་ཐད་དུ། གཡོན་དཔུང་པའི་ཐད་དུ་ཁུ་ཚུར་འཕྱར་རོ། །ནག་པོ་ཆེན་པོ་སྐུ་མདོག་ནག་མོ། །ཞལ་གཅིག་ཕྱག་བཅུ། དང་པོ་གཉིས་ཁ་ཊྭཱཾ་ག་དང་པདྨ་ཐུགས་ཀར་འཛིན། གཡས་འོག་མ་གཉིས་ཁ་ཊྭཱཾ་ག །དེ་འོག་གཉིས་མདུང་རྩེ་གཅིག་པ། ཕྱག་རང་རང་གི་ཐད་དུ། གཡོན་གྱི་ཕྱག་ལྷག་མ་བཞི་པདྨ་འཛིན། ཞབས་གཡོན་བརྐྱང་གིས་གཙོ་འཁོར་ཐམས་ཅད་བཞུགས་པ། དེའི་བྱང་དུ་དྲག་མོ་སེར་མོ། གཡས་ཁ་ཊྭཱཾ་ཐུགས་ཀར་འཛིན་ཅིང༌། གཡོན་དཀུར་བརྟེན། ཤར་དུ་ཚངས་མ་དཀར་མོ། །ཕྱག་གཉིས་རྣ་བའི་ཐད་རིན་ཆེན་ཕྲེང་བ་འཛིན། ལྷོར་ཁྱབ་འཇུག་སེར་པོ་གཡས་འཁོར་ལོ། །གཡོན་སྡིགས་མཛུབ་ཐུགས་ཀར། ནུབ་ཏུ་གཞོན་ནུ་མ་དམར་མོ་གཡས་དྲིལ་བུ་ཐུགས་ཀར། གཡོན་ཁུ་ཚུར་དཀུར་བཞག །བྱང་ཤར་ནག་མོ་མདོག་ནག་མོ་གཡས་ཁུ་ཚུར་རྣ་བའི་ཐད་དུ་འཕྱར། གཡོན་ཐོད་ཁྲག་ཐུགས་ཀར། ཤར་ལྷོར་ནག་མོ་ཆེན་པོ་ནག་མོ། །གཡས་དབྱུག་པ་རྩེ་མོར་མེ་ཏོག་གིས་མཚན་པ། གཡོན་ཐུགས་ཀར་སྡིགས་མཛུབ། ཟ་བ་མོ་དཀྱིལ་ཆོག་ཏུ་བཤད་པ་བཞིན་སྲིན་མོ་ནག་མོ་ཕྱག་གཡས་ཐུགས་ཀར་མི་མགོས་མཚན་པའི་མདུང་རྩེ་གཅིག །གཡོན་རྡོ་རྗེ་ཁུ་ཚུར་དཀུར་བརྟེན། སྒོ་མ་བཞི་གཉིས་སྒོའི་གཡས་གཉིས་གཡོན་དུ་སྐུ་མདོག་ཕྱག་མཚན་ཞི་བ་མདུང་དང་འདྲ། རྒྱལ་བར་བྱེད་པ་ནི་གསེར་གྱི་མདའ་གཞུ་བཀང་
བའི་ནང་དུ་སེངྒེ་དཀར་པོ་ཁ་ཕྱིར་ལོག་པ་དེའི་སྟེང་གི་དབུས་སུ་རྒྱལ་བར་བྱེད་པ་དཀར་པོ། གཡས་སུ་སྦྲང་རྩེར་བྱེད་པ་སེར་པོ། གཡོན་དུ་དོན་གྲུབ་ལྗང་གུ །གསུམ་པོ་ཕྱག་གཡོན་ཐོད་ཁྲག་ཐུགས་ཀར། གཡས་མདའ་གཞུ་རྣ་བའི་ཐད་དུ་འཛིན། ཁྲོ་ཞིང་ཡ་མཆུས་མ་མཆུ་མནན་པ། སྐུ་ལ་ལྕགས་ཁྲབ་འདྲ་བ་གསོལ་བ། ཡ་ལད་ནི་སྤྱི་གཙུག་དང་རྣ་ལྟག་གཡས་གཡོན་དུ། རིན་ཆེན་ཟུར་གསུམ་པའི་རྣམ་པར་ལྟ་བུ་སྣང༌། ཤར་སྒོ་བ་དཀར་མོ་གཡས་ཁ་ཊྭཱཾ་ག་ཐུགས་ཀར་འཛིན་ཅིང༌། གཡོན་རྡོ་རྗེ་ཁུ་ཚུར་ཐུགས་ཀར། ལྷོ་སྒོར་འཕེལ་བ་ལག་ན་གཏེར་གྱི་བུམ་པ་སེར་པོ་ཐུགས་ཀར་འཛིན། མེ་ཏོག་གི་ཟ་མ་ཏོག་ནི་རག་ཨོང་ལྟ་བུ་མེ་ཏོག་གིས་གང་བའོ། །གནོད་སྦྱིན་ཟ་མོ་འདྲ། དེའི་ནང་གི་ལྷ་སྣམ་གྱི་གྲྭར། ཤར་ལྷོར་གཏུམ་པོ་སྒོ་སྔོན་པོ། ལག་གཡས་དབྱུག་པ་དཔུང་པའི་ཐད་དུ་འཕྱར། གཡོན་སྔིགས་མཛུབ་ཐུགས་ཀར། ཁྲོ་བོ་ནག་པོ་སྦྲུལ་མགོ་གཡས་ཀྱི་ཐུགས་ཀར་འཛིན། གཡོན་རྣ་བའི་ཐད་དུ་ཁུ་ཚུར་འཕྱར། མཆོག་ནག་པོ་གཡས་འཁོར་ལོ་རྣ་བའི་ཐད་དུ་འཕྱར། གཡོན་སྔོགས་མཛུབ་ཐུགས་ཀར། གསོད་པ་ནག་པོ་དཀྱིལ་ཆོག་བཞིན། བྱང་ཤར་དུ་སྲིང་མོ་བཞིའི་དཀྱིལ་འཁོར་ལ། ཤར་དུ་དགའ་བ་མོ་དམར་མོ་མདའ་གཞུ་རྣ་བའི་ཐད་དུ་འགེངས་པ། བསོད་པ་ནག་པོ་གཡས་རལ་གྲི་ནམ་མཁར་འཕྱར་ཞིང་གཡོན་ཕུབ་འཛིན། ཕག་མོ་གསེར་མདོག་གསེར་གྱི་བུམ་པ་ཐུགས་ཀར་འཛིན་པ། གྲུབ་པ་མོ་དཀར་མོ་གཡས་གྲི་རིངས་ཤང་ལང་ལྟ་བུ་ཐུགས་ཀར་
འཕྱར། གཡོན་ཐོད་པ་སྟ་ཟུར་ཐད་ན་ཕར་འཛིན་པ། རང་རང་གི་སྒོའི་ཐད་དུ་ཁ་བལྟ་བ། ཞབས་གཉིས་མཉམ་པའི་སྟབས་ལ་སྨད་ལ་ཁ་དོག་རང་གི་དང་མཐུན་པའི་སྨད་གཡོགས་གསོལ་བའོ།། ནང་ཁྲུས་ཀྱི་རྒྱ་ལེན་ལ་མེད། བ་དན་གྱི་རྒྱ་སྟག །ཉེར་སྤྱོད་དང་མཆོད་པ་ཉི་ཤུ་ལ་མེ་ཏོག་སོགས་ཁྲོ་བོའི་ཁུ་ཚུར་ལས་བྱུང་བའི་རྒྱའོ། །ཆོས་འཁོར་དྲལ་བའི་སྔགས་རྒྱ་ལན་གསུམ། མདའ་ལྔ་བསྡུས་པ་ལ་གསུམ་སྟེ། རྒྱ་ནི་དང་པོའི་རྡོ་རྗེ་བྱེད་དེ་མིན་ནོ། །ཚོགས་བསྟེན་བསྟུང་བ་ན་གཞན་རྣམས་ལ་དམ་རྒྱ་བཅིང་ཞིང༌། མཐར་བསྐལ་བཟང་རྡོ་རྗེའི་རིགས་དང་བཅས་པའི་གཞལ་ཡས་ཁང༌། བཛྲ་ས་མ་ཛ་ཛཿཧཱུཾ་བཾཧོཿ དགུག་སོགས་བྱ། རྡོ་རྗེ་དེ་ལས་རྡོ་རྗེའི་རིགས་ཐམས་ཅད་ཅེས་པའི་གོང་དུ་སྙིང་པོ་གདོན་པ་ཐོབ། དཀྱིལ་འཁོར་གྲུབ་བཞི་པའི་ཁྲོ་བོ་རྡོ་རྗེ་ལྟ་བུའི་སྔགས་ནི། ༀ་བཛྲ་ཧེ་ཏུ་ཀྲོ་ངྷ་པྲ་བི་ཤ་སོགས་ཏེ་ལན་ཅིག་གོ །ཕྱག་དང་རྒྱུན་བཤགས་དངོས་སུ་བྱ། སྡོམ་གཟུང་ཇི་ལྟར་དུས་གསུམ་སོགས་ཀྱིས་བྱ། སྟོད་སྨད་ཀྱི་གཡོགས་དང་གཙུག་ཏོར་ལ་དངོས་དང་སྔགས་བརྗོད་པའང་མེད་ཟེར་ཏེ། སྔགས་ཙམ་དགོས་པ་འདྲའོ། །རྡོ་རྗེ་ཐལ་མོ་བསྐོར་བས་ཧཱུཾ་མཛད་ལ་ཕྱག་བྱ་བ་མི་བྱེད་ཟེར་ཏེ་དཔལ་མཆོག་ལྟར་བྱས་ན་འཐད། སྙིང་གར་རྡོ་རྗེ་ཧཱུཾ་མཛད་དང་ཁྲོ་བོ་རྡོར་སེམས་བསྒོམ་པ་ལ་གནས་ཀྱི་གསལ་ཁ་མེད་པས་གང་བདེ་བྱ་སྟེ་དེས་རིན་ཆེན་ཧཱུཾ་མཛད་སོགས་ཀྱང་དཔག་གོ །སྒོ་མ་བཞིའི་ཕྱག་རྒྱ་འདི་པའི་ལུགས་དང༌། སྔགས་སྤྱི་འགྲོ་
ལྟར་ཟེར་ཏེ། གྲུབ་ན་འདི་པའི་སྔགས་དགོས། ལན་གསུམ་བརྗོད་པའི་སྔགས་ནི་ཕྱག་མཚན་དབབ་པའི་སྐབས་ཀྱི་སྔགས་སོ། །ཕྱག་མཚན་གྱི་ང་རྒྱལ་བཟུང་བ་ལ་ཧཱུཾ་མཛད་ཕྱི་མ་གསུམ་ལ་མི་སྣང་ཡང༌། རཏྣ་མ་སོགས་ལན་གཉིས་བསྐྱར། དེ་བཞིན་གཤེགས་པ་ལྔའི་ཕྱག་མཚན་ཡང་རྡོ་རྗེ་ཁུ་ཚུར་ལས་བྱུང་བ་རྒྱ་གཞུང་གི་དགོངས་པའོ། །རྒྱུད་རྒྱས་པ་ལས་གསུངས་པ་མི་བྱེད་ཟེར། སེམས་དཔའ་དང་གཟི་བརྗིད་གཙུག་ཏོར་གཉིས་ཀྱི་སྔགས་ལན་རེ་དང༌། ཕྱག་རྒྱ་སྤྱི་བོར་འཇོག་སྟེ་རྒྱ་གཞུང་ན་ཡོད། ཁྲོ་བོ་མོ་སྡེར་སྙེམས་ཁྲོ་བོ་སྒེག་མོ་སྟེ། རིན་ཆེན་སྙེམས་མ་སོགས་ཀྱང་དེ་ལྟར་རོ། །འོག་ནས་བཤད་པ་ལྟར་ལྷ་ཆེན་པོ་སོགས་ལ་དེ་ནས་ཧཱུཾ་མཛད་ཀྱིས་ༀ་པཱ་ཏ་ཨཱ་ཀརྵ་ནས་ཨ་ཊ་མ་ཧོའོ་བར་དུ་དང་དེ་ནས་ཧཱུཾ་མཛད་ཀྱི་ཕྱག་རྒྱ་དེ་ལ་གནས་ནས། ༀ་བཛྲ་ཨ་ཊ་མ་ཧོ་བརྗོད། གདབ་པའི་སྔགས་རྒྱའང་དེའི་རྗེས་ལ་མཛད་པར་གདའ། རྣལ་འབྱོར་གཅིག་ལྡན་གྱི་མིག་བྱིན་རླབས་འདི་གོང་དུའང་དགོས་སམ། ལས་རྒྱལ་མཆོག་ཏུ་བཤད་པ་ལྟར་དགོས་བརྟག་གོ །གཞི་ལུས་ཀྱི་སྐབས་སུ་སྙིང་པོ་འདྲ་ཞེས་དེ་བཞིན་གཤེགས་པ་ལ་གསལ་ཞིང༌། གཞན་ལ་ཧཱུཾ་ཡིན་པ་འདྲ་སྟེ་ཆོ་ག་ལྔ་བསྐྱེད་ཀྱི་སྐབས་བཞིན་ནོ། །སྔགས་དང་གཞི་མཐུན་པ་གསུངས་ཏེ་མིན་ནོ། །རིགས་ལྔ་བབ་པའི་ཚེ་སྤྱི་འགྲོ་ལྟར་རོ། །དང་པོ་ཁྲོ་བོའི་མཚན་བརྒྱའི་ཚེ་ཉེར་སྦྱོད་སྒེག་སོགས་ཀྱིས་མཆོད། བསྟོད་ནས་ཐ་མའི་ཤློ་ཀ་ལ་དབྱངས་བྱ་སྟེ་སྤྱི་ལྟར་མཎྜལ་འབུལ། འོག་གི་སྔགས་རིང་སློབ་དཔོན་རང་གི་གདོན་གསུངས། གསོལ་གདབ་སྤྱི་དང་མཐུན་པར་
བྱེད་ན། འདིར་སློ་དཔོན་རང་གིས་བརྗོད་ཅིང༌། འོག་ཏུ་ཚིགས་བཅད་ཐ་མ་ལ་གསོལ་བ་གདབ་པ་དང༌། མཆོད་བསྟོད་སློབ་མས་བྱའོ། །རྡོ་རྗེ་དེ་རང་གི་སྙིང་གར་བཞག་ཅེས་པར་དངོས་སུ་བྱེད། རྡོར་དབྱིངས་ཀྱི་དཀྱིལ་འཁོར་ཆེན་པོའི་ཚུལ་དུ་ཞེས་པར་རྡོ་རྗེའི་རིགས་མ་གཏོགས་པའི་ལྷ་རྣམས་ཐམས་ཅད་ཁྲོ་བོའི་ཉམས་སུ་བསྐྱེད། དེའི་ཕྱིར་རིགས་བཞིའང་འདི་ནས་ཉམས་འཕོ་ཟེར་རོ། །རྡོ་རྗེ་གསོར་ཞིང་ཞེས་པ་རྣམས་ལ་དངོས་དང་སྟང་ག་གང་རུང་དམིགས་བསལ་ཅན་མིན་པ་ལ་ང་རྒྱལ་གྱི་ཞེས་པར་དེའི་ཕྱག་ཆེན་མི་བྱེད་ཟེར། ང་རྒྱལ་གྱིས་ཞེས་ངག་ཏུ་བརྗོད་ཀྱིན་སྣང༌། གཡོན་པས་དྲངས་ཏེ་གཡས་སུ་གཞུ་ཞེས་པར། ཕྱག་རྒྱ་དེ་གཡོན་ནས་གཡས་སུ་འཁྱེར་ཏེ་གཡོན་དུ་ཡོ་བ་ལའང་བྱེད། ལྷ་ཆེན་པོ་ལ་བབས་ནས་མན་ཆད་བརྗོད། མཛུབ་མོ་གཉིས་གོ་ཆ་འཆིང་བའི་ཚུལ་དུ་ཞེས་པས་སརྦ་མུ་ཏྲ་མེའི་རྒྱ་དང་འདྲ་བར་བཅིང་ངོ༌། །ཕྱག་བཞི་སྔོན་དུ་འགྲོ་བའི་སོགས་ལ། སྒོམ་དོན་ལ་དེ་རྣམས་ཀྱིས་བྱེད་པར་བསམས་ན། དངོས་སུ་རང་གི་ཕྱག་གི་སྔགས་དང༌། བཤགས་པའི་ཚིག་དང༌། ཇི་ལྟར་དུས་གསུམ་སོགས་དང་ཏི་རིནྟི་རི་རྒྱ་འཆིང་བ་སོགས་བྱེད། ཕྱག་མཚན་གྱི་དབང་བསྐུར་བ་ལ་སྔགས་བཏོན་ནས་ཁྲིམས་མཚན་ནས་དབང་བསྐུར་གྱི་བར་བརྗོད་ཀྱི་སྣང་བ་དབང་རྫས་དངོས་སུ་མེད་དོ། །དེ་ནས་མིང་དབང་ཡི་གེ་བཞིན་གདོན་ཟེར་ཏེ་བརྟག་དགོས། གཡས་གཡོན་དུ་གཅུ་ཞིང་འདྲེནཔའི་རྒྱ་ནི། གཡས་གཡོན་སོ་
སོར་བྱས་ནས་དགྲོལ་བ་བྱེད། སྔགས་རྫོགས་པ་དང་རིགས་ལྔས་བཀའ་བསྒོ་ཞེས་བརྗོད་དེ་འོག་མ་ལའང་དེས་དཔག་གོ །དེ་གཉིས་ཀས་གུང་མོ་གཉིས་ཀ་མནན་ཞེས་པ་མཐེ་བོང་དང་མཛུབ་མོ་གཉིས་ཀས་གུང་མོ་རྡོ་རྗེ་བསྡམས་པ་ལ་མནན་པ་ཡིན་ཟེར། སྙིང་གའི་གཡས་གཡོན་དུ་གཞུག་ཅིང་དྲག་ཏུ་དྲལ་ནས་གདབ་ཅེས་པ་གཡས་པ་གཡོན་པའི་སྟེང་དུ་བྱས་པའི་ཕྱག་རྒྱ་དེས་གཡས་གཡོན་སོ་སོར་དྲིལ་ཞིང་གཞི་བཅའ་ཡང་དྲལ་ནས་བྱེད་ལག་པ་གཉིས་ཀ་ཐུར་དུ་བསྟན་པ་སོགས་ནི་འབར་བའི་རྒྱ་བྱེད། ཡང་ཡང་དུ་གཏོག་པའི་ཕྱག་རྒྱ་ཞེས་པ་ལ་ཕྱག་རྒྱ་དེ་བཅས་ནས་ལན་ཁ་ཡར་འདྲེལ་བ་ལ་བྱེད། ཕྲ་མེན་མ་འགུགས་པ་ལ་གཡས་པའི་མཛུབ་མོས་གཡོན་མཛུབ་ལ་བཅིངས་ནས་བྱེད་པར་གདའ་སྟེ་བརྟག་གོ །ཡིད་ཀྱིས་ཁྲོས་ནས་བཙིར་བའི་རྒྱ། ཞེས་པ་ལག་པ་སོ་སོར་བྱས་ནས་མཐེ་བོང་བཀུག་པ་ལ་རང་རང་གི་མཛུབ་མོས་དེའི་རྒྱབ་མནན་པའོ། །ལས་རྒྱལ་དུ་བསྐལ་བཟང་ལ་རྒྱས་འདེབས་པ་འདིར་བཤད། རྡོ་རྗེའི་རིགས་རྣམས་འདིར་མི་སྐྱེད་པས་མི་དགོས་གསུངས། འོན་ཀྱང་འདིར་དབང་བསྐུར་བཤད་པས་དཀྱིལ་འཁོར་ལ་བསྐྱེད་པར་གསལ། རྒྱས་འདེབས་པ་བརྟག །དབང་བླང་ཡུལ་གྱི་དེ་བཞིན་གཤེགས་པ་ཐམས་ཅད་བསམ་ཞེས་པ་ལ་རྡོ་རྗེ་བསྡུ་བའི་སྔགས་རྒྱ་བྱེད་པ་མ་བཤད་ཀྱང་དེ་བྱུང་བ་ཐམས་ཅད་ལ་མཛད་པ་ཕྱག་ཆེན་ནོ། །གར་མའི་དམ་རྒྱ་རྡོར་དབྱིངས་ལྟར་ལ། སྡིགས་མཛུབ་བསྒྲེངས་པའོ། །རིག་མ་བཅུ་དྲུག་གི་ཚིགས་བཅད་དང་སྔགས་རྣམས་ལ་གར་གྱི་
ཁྱམས་བཅའ་བ་སྔོན་དུ་འགྲོ་བས་ཁྲོ་བོ་བཅུ་དྲུག་གི་ལས་རྒྱ་བྱ། ཕྱག་ཆེན་བྱེད་པ་མེད་གསུང༌། སྒེག་སོགས་ཀྱི་མཆོད་པ་དང་རིག་མའི་མཆོད་པ་རྣམས་ལས་རྒྱས་བྱེད་ཅིང་གླུ་དང་གར་དང་རོ་དང་ཟས་ཞེས། རོའམ་ཉམས་དགོས་པར་བཤད་པས། དེ་དག་ལའང་བཞེངས་ནས་མཛད་པར་གདའ་གསུང༌། གསང་མཆོད་བཞིའི་ཁྲོ་བོ་སྒེག་སོགས་བཞིའི་སྔགས་བརྒྱ་ཙམ་བྱེད། ས་སྦྱང་གཟུང་གི་སྔོན་དུ་ཆ་གསུམ་གཏོང་བ་ན་ཁ་ཤར་དུ་ཕྱོག་ནས་མཎྜལ་གསུམ་དང་མེ་ཏོག་ཚོམ་བུའི་གདན་བྱས་ནས། དང་པོའི་ཕྱོགས་སྐྱོང་ནས་བཏང༌། མགྲོན་གཤེགས་པ་ན། རོལ་མོ་བརྡུང་བ་རེ་དང་མཎྜལ་ཕྱི། དེ་ནས་ནུབ་ཏུ་ཕྱོགས་ནས་གཡས་ལྷའི་གཏོར་མ་བཏང་སྟེ་མགྲོན་བསྐྱེད་པ་དང་དེར་དགུག་པ་མི་བྱེད། གཏོར་སྔགས་ལ་སོགས་པ་མེད། དེ་ནས་དབུས་དང་སྒོར་སློབ་དཔོན་རྣམས་བསྡད་ནས་མཆོད་པ་བསང་སྦྱང་སོགས་བྱ། དམ་ཚིག་གསུམ་འཛིན་མི་འཛིན་ཅི་རིགས་སུ་ཡོད། ཚོགས་རྟེན་གྱི་མཆོད་པ་བྱིན་རླབས་དང་འོག་གི་དམ་ཚིག་གསུམ་བཟུང་བའང་བྱེད་དེ། གཞན་ལའང་འགྲེའོ། །ༀ་བཛྲ་པཱ་ཎི་མཧཱ་ལམ་སོགས། བླ་མ་ཆེན་པོ་སློབ་མས་བྱེད། གསོལ་གདབ་ཀྱང་འདིས་བྱ་གསུང༌། གཞན་དག་འདི་སློབ་དཔོན་གྱིས་བྱ། གསོལ་གདབ་འདི་བའི་ལུགས་གོང་དུ་བྱེད་འདིར་ཅིས་ཀྱང་བྱེད་ནའང་ཚིག་སྔ་མས་བྱ་གསུང༌། རྐང་པ་བྱིན་བརླབ་ཕྲེང་བ་ལྟར་བྱེད་པར་འདུག །དགོས་རྒྱུན་མེད་གསུང༌།
སེམས་དཀྱིལ་གྱིས་འདུག་ལ་བསྣུན་བསྲེགས་སོགས་ཟེར་ཡང་ལངས་ནས་ཁྲོ་བོར་བསྐྱེད་ཅིང་སྲུང་འཁོར་བསྒོམ་ཟེར། ལྷ་སྟ་གོན་གྱི་ཚེ་ནམ་མཁའི་གཞལ་ཡང་ཁང་འབེབས་པ་དམིགས་པ་ཙམ་གྱིས་ཆོག་གསུངས་པ་དྲིས་པ་ཡིན་གསུང་། བླ་ཆེན་ས་མ་ཡ་ཨས་འབེབས་གསུངས། ཐིག་སྐུད་བསྐྱེད་ཆོག་ལ་ཤར་དུ་ཕྱོགས་ནས་ནུབ་ཏུ་ཕྱོགས་ཏེ་སྐུད་པ་བརྐྱང་ནས་ཆོ་ག་གསུམ་བསྐྱེད་བྱེད་པར་འདུག་གསུང༌། བདེན་བྲལ་དུ་སོང་ནས་རང་རྣམ་སྣང་དུ་བསྒྱུར། གྲོགས་ལས་སུ་དཀྲོང་བསྐྱེད་བྱས་ཟིན་པ་དང༌། ཐིག་འདེབས་པ་སོགས་རང་གི་འཁོར་བསྒྱུར་གྱིས་བྱེད་པས་ཧཱུཾ་མཛད་དུ་བསྒྱུར་ནས་ཐིག་སྣ་གཏད་གསུང༌། དེ་ནས་ནུབ་ཤར་དུ་སོང་ནས་མཆོད་པ་གཉིས་ཀྱིས་མཆོད། མིག་བྱིན་གྱིས་བརླབ། ཕྱག་བྱ་ལ་གདབ་གསུང༌། འདི་ལ་ཕྱག་དང་མིག་བྱིན་བརླབ་གཅིག་འཆད་པར་སྣང་ངོ༌། །དེ་ནས་ཚོན་བྱིན་བརླབ་བྱ། ཕུར་བུ་འདིར་དབྱུང་། དེའི་སྐབས་སུ་ཆོས་དབྱིངས་ནས་བྱ་གྲུབ་དག་པ་སྟེའི་བར་བརྗོད་ཅིང༌། དྲིལ་གསིལ་རེའང་བྱེད་ཀྱིན་གདའ་ཟེར་ཕུར་བུ་འདེབས་པ་མེད་པར་སྣང་སྟེ། དམིགས་པས་བཏབ་ན་འཐད་པ་འདྲ། དེ་ནས་ཚོན་པྲ་བརྟག་པའི་ཕྱིར་བྲི་བ་དང༌། ཕྱོགས་མཚམས་སུ་ཐེབ་ཚོད་ཀྱི་ཚོན་རེ་གཏོར་ཏེ་ཆ་དབྱེ་བ་ཡིན་འདི་མཛད་པར་སྣང་བ་མཐོང་ཟེར། ཚོན་གྱིས་བྲིས་ཟིན་ནས་མཆོད་དེ། ཡེ་ཤེས་པ་གཤེགས། ཚོན་པྲ་ལའང་གོང་འོག་གཉིས་ཀར་སྔགས་བརྒྱ་ཙམ་གྱིས་མཆོད། སྐུ་དངོས་དང་ཕྱག་མཚན་ཡོད་ན་
ཕྱག་རྒྱ་བཞིའིརྒྱས་འདེབས་མི་བྱེད་ཟེར་ཏེ་བརྟག་གདན་ནམ་ཐིག་ལེ་ཙམ་ལས་མེད་ན་རྣམ་སྣང་ནས། རྡོ་རྗེ་རིགས་ཀྱི་བར་དུ་རང་རང་གི་སྔགས་དང༌། གཡས་ཀྱི་ཕྱག་མཚན་དང་པོ་ལས་བསྐྱེད། དེ་ནས་ཡེ་ཤེས་པ་སྒོ་བཞི་བཞིས་བཅུག་ནས་དམ་རྒྱས་བསྒྲུབ། དེའང་རྣལ་འབྱོར་ཆེན་པོའི་སྐབས་ལྟར་ཏེ། དཔེར་ན་ས་མ་ཡ་སྟྭཾ་ཧཱུཾ་བཛྲ་ཏྲིཥྣི་མ་ཊ་རང་རང་གི་སྔགས་བརྗོད། ཧྲི་ཤྱ་ཛཿ ཧཱུཾ་བཾ་ཧོཿ ས་མ་ཡ་སྟྭཾ་ས་མ་ཡ་སྟྭཾ་ཨཾ་ཧཾ་ༀ་བཛྲ་སཏྭ་ཀྲོ་ངྷ་སོགས་རང་རང་གི་སྔགས་གསུམ་གསུམ་བརྗོད་དེ་གཞན་དུའང་ངོ༌། །དེ་ནས་རྣམ་སྣང་ནས་འཇིག་རྟེན་པའི་བར་གྱི་སྔགས་རྣམས་བརྗོད་ནས་སྟ་གོན་གྱི་ལྷ་དབབ། འདི་ལ་རྡོ་རྗེ་བསྡུ་བ་དང་སྒོ་བ་བཞིས་དགུག་པ་སོགས་མེད་ཟེར། དེ་ནས་ཕྱག་རྒྱ་ཕྱི་མ་གསུམ་གྱིས་རྒྱས་འདེབས་པ་འདི་རྡུལ་ཚོན་གྱི་དཀྱིལ་འཁོར་སྒྲུབ་མ་ཐག་ཕྱག་རྒྱ་བཞིས་རྒྱས་འདེབས་པ་ཐམས་ཅད་ལ་འདྲ་ཟེར།ཡང་ༀ་ཧཱུཾ་ཏྲཱཾ་ཧྲཱིཿ ཨཱཿ རྣམས་དང་དེ་བཞིན་གཤེགས་པའི་རྡོ་རྗེ་ལས་རིགས་ལྔ་དང་ཧཱུཾ་ཏྲཱཾ་སོགས་ཕྱག་མཚན་ལས་རང་རང་གི་སྐུར་བསྐྱེད་པ་སེམས་དཔའ་བཅུ་དྲུག་སོགས་ལ་བྱའང་ཟེར། བླ་མ་ཆེན་པོ་ནི་བཛྲ་དྷཱ་ཏུ་ཨཱ། བཛྲོ་ཧཾ། བཛྲ་དྷཱ་ཏུ་ར་ཧཾ་སོགས་ཀྱིས་བསྒྲུབ་གསུང༌། ཡེ་ཤེས་པ་ཟུར་པ་སྤྱན་མི་འདྲེན། སྟ་གོན་གྱི་ལྷ་ཕབ་བ་ལ་དམ་རྒྱས་སྒྲུབ་ནས་གཞན་གྱིས་རྒྱས་འདེབས་གསུང༌། ལྷ་ཐམས་ཅད་གསལ་བར་བསྒོམས་ནས་ཞེས་པ་ལ། སྔགས་མི་བརྗོད་བསྒོམས་པ་ཙམ་བྱ་ཟེར། རྡོ་རྗེ་བསྡུ་བའི་སྔགས་
ཉེར་གཅིག་ཟེར་ཡང་ཁ་ཡར་ཞིག་བྱེད། ལྷ་སྟ་གོན་བྱེད་པའི་ཚེ་ༀ་ཨ་ཀཱ་རོ་སོགས་ཀྱིས་སྟོང་བར་སྦྱངས་ནས་གདན་གྱི་བར་བསྐྱེད་ཟེར། གཞལ་ཡས་ཁང་ལ་སྒོ་བ་བཞིས་དགུག་པ་མི་རུང་ཟེར། རྡོ་རྗེ་སེམས་དཔའི་ལུས་ཀྱིས་སེམས་བསྐྱེད་པ་སོགས་སྔགས་རྣམས་བརྗོད་ཟིན་པའི་མཇུག་ཏུ་ཡི་གེ་ལྟར་བརྗོད་ཟེར། ལས་འཆོལ་གྱི་སྐབས་སུ་འཇིག་རྟེན་པ་ལ་ལས་འཆོལ་མི་བྱེད་ཟེར། སློབ་མ་སྟ་གོན་གྱི་སེམས་མ་བཞིའི་སྔགས་ཀྱི་གོང་དུ་ལག་པ་གནས་བཞིར་བཞག་ནས་ཧཱུཾ་ཏྲཱཾ་ཧྲཱིཿ ཨཱཿ བརྗོད། དེ་ནས་སྔགས་བརྗོད་པ་མཛད་པར་འདུག་ཟེར། སློབ་མ་རེ་རེ་ལ་སོ་ཤིང་ནས་གཙུག་ཏོར་གྱི་བསྲུང་བའི་བར་བར་མ་ཆད་དུ་བྱེད་པ་འདི་པའི་ལུགས། ཆོས་རྗེ་པ་སོ་ཤིང་སོགས་སློབ་མ་ཐམས་ཅད་ལ་ཚན་ཚན་དུ་མཛད། སྲུང་སྐུད་མདུད་པ་བྱས་པའི་ལག་པ་མ་བཏེགས་པ་ལ་བསང་ཆུ་ནས་ཆུ་བླངས་པ་མདུད་མཚམས་སུ་ལྡུག་ཟེར། ལག་པའི་ཟེ་འབྲུའི་ཆས་ཁ་ལ་མང་དུ་བྱབ་ཅེས་པ་ཆུ་ལེན་པ་གུང་སྲིན་གྱིས་བླངས་ནས་བྱབ་པ་ནི། ཕུལ་ཁ་ཡིན་ཟེར། བདག་འཇུག་ལ་དབུགས་དབྱུང་མེད། ཕྱི་རོལ་པ་བསྡུས་པ་གཏོང་བ་ནི་ཡི་གེ་ལྟར་བྱེད། མཆོད་འབུལ་གྱི་སྔགས་རྒྱ་དངོས་སུ་མི་བྱེད་ཀྱང་ལྷ་བཤོས་མ་གཏོགས་པའི་ཉེར་སྤྱོད་བཤམ་ཟེར། སྒོ་དབྱེ་བ་ལ་གཞི་བཅའ་དང༌། གཡོན་བརྐྱང་བྱས་ནས་སྔགས་ལན་གསུམ་བྱེད། བུམ་པ་བསྡུས་པ་ལ་སྔགས་རྒྱས་སྤྲུལ་ནས་ཕྱོགས་དེའི་ལྷ་རྐང་ཐོན་དུ་བརྗོད་ནས་སྤྲུལ་ཏེ། དེའང་བསྐལ་བཟང་དང་རྡོ་རྗེའི་རིགས་མ་གཏོགས་ཟེར་རོ། །
རིགས་བཞིའི་གསོལ་གདབ་ལྷུག་པ་སློབ་མ་འདུས་པ་དང་མ་འདུས་པ་གང་རུང་བྱེད། ཆེ་གེ་ཞེས་བྱ་དང་གཉིས་ཀ་ལ་ལན་རེ་དང་ཕྱག་མེད་ཟེར། ཆུ་དབང་གི་རིན་ལ་གཡོན་བརྐྱང་བྱས་པ་ལ་དབང་བསྐུར། སྔགས་སྟོང་རྩ་བཟླ་བ་སྐབས་དེར་ཅི་གྲུབ་ཅིག་བྱས་ནས་སྔགས་དེ་ཉིད་ལ་ཨ་བྷི་ཥཱིཉྩ་བཏགས་ལ་བསྐུར། སེམས་ཅན་འདི་དག་ནི་བཟའ་བ་དང་བཏུང་བ་སྟེ་སོགས་བྱེད་པ་མེད་གསུང༌། མཆོད་མ་ཐག་དངོས་གྲུབ་ཀྱི་བརྟུལ་ཞུགས་སོགས་བྱ། མཐའི་ཕྱག་རྒྱ་དགྲོལ་བ་ན་བསྐལ་བཟང་སོགས་ཀྱི་ཕྱག་རྒྱ་འགྲོལ་བ་དང་མི་འགྲོལ་བ་ཅི་རིགས་སུ་ཡོད་ཏི་རིན་ཏི་རིའི་རྒྱ་གཅིངས་ཏེ་ཧཱུཾ་བཞི་འདོན་བཞིན་བསྐོར་བ༌། གཞན་རྣམས་ཀྱིས་རོལ་མོ་དང་སློབ་དཔོན་ཕྱག་རྒྱ་དེ་ལ་གནས་མུའི་བར་དུ་སྡོད་ཅིང་རྡོར་དབྱིངས་ལའང་དེ་ལྟར་ཟེར། དཀྱིལ་འཁོརསྡུད་པ་ན་རྩིག་པ་ལ་ཐོ་ཡེ་མ་སོང་བར་བྱས་ནས་མི་སླེབ་ན། གཞན་ཕྱག་ཆེན་རྩིག་པའི་ནང་གི་ཕྱོགས་ཕྱོགས་སུ་བསྡད་ནས་གཡོན་དྲིལ་བུ་དང་བཅས་པའི་མེ་ལོང་གཡས་རྡོ་རྗེ་དང་བཅས་པས་མཚན་མ་དམའ་རིམ་ནས་བསྡུ། དེ་ནས་ཚངས་ཟུར་རྡོ་རྗེས་དབྱི་གསུང༌། བླ་མ་མཧཱ་སུ་ཁ་ནི་དང་པོ་ཚངས་ཟུར་ནས་རྡོ་རྗེས་རྗེས་བཏོད་ནས། དེ་རྗེས་སྡུད་པ་མཛད། ལུགས་གཉིས་ཀས་ཀྱང་མུའི་རྗེས་ལ་མཐའི་མཆོད་པ་སོགས་བསྡུས་ནས་དེ་རྗེས་སུའོ། །ཕུར་བུ་འདོན་པ་ན་ཡོ་ག་པ་རྣམས་གཞི་བཅའ་མི་བྱེད་ཟེར། གཞན་ཁ་ཅིག་བྱས་ནས་འདོན་ཟེར། དབང་ལྡན་གྱི་ཕུར་བུ་རྟིང་ལ་འདོན་པ་བླ་མ་ཆེན་པོ་བཞེད།
ཆོས་རྒྱ་དང་ཕྱག་ཆེན་འཆིང་བ་ན་དེ་དག་གི་སྔགས་འདོན་ཟེར་རོ། །དྲག་པོའི་དམ་རྒྱལ་མཐེ་བོང་ཆེ་ཆུང་རྣམས་མི་སྦྲེལ་བར་ལྕགས་ཀྱུའི་རྣམ་པར་བྱེད་པར་གདའ། སྒེག་སོགས་བརྒྱད་ཀྱི་འཁོར་གྱི་ལྷ་མོ་རྣམས་ལ་བསྐྱེད་ཆོག་དང་རྒྱས་འདེབས་ཟུར་པ་མི་མཛད་པར་གདའོ།། ཁམས་གསུམ་རྣམ་རྒྱལ་རྩ་བའི་དཀྱིལ་འཁོར་ལ། དབུས་སུ་ཕ་གུ་གྲུ་བཞི་པའི་ཞེས་པ་ནི། རྒྱབ་ཡོལ་སེར་པོ་གྲུ་བཞི་པ་ཞིག་སྣང༌། རྣམ་སྣང་ཞལ་འཁོར་ཞལ་ཕྱག་གཉིས་བྱང་ཆུབ་མཆོག་གི་རྒྱ། དེའི་ཕྱོགས་བཞིར་སེམས་མ་བཞིའི་ཕྱག་མཚན། ཤར་དུ་རྡོ་རྗེ་དམར་པོ་འོད་ཟེར་སེར་པོས་བསྐོར་བ། ལྷོ་རུ་རིན་ཆེན་ཟུར་བརྒྱད་པ་དམར་སེར་འོད་ཟེར་སེར་པོ། ནུབ་ཏུ་པདྨ་དམར་པོ་འོད་ཟེར་དཀར་པོ། བྱང་དུ་སྣ་ཚོགས་རྡོ་རྗེ་འོད་ཟེར་དམར་པོས་བསྐོར། ཤར་གྱི་ལིང་ཚེའི་དབུས་སུ་རྡོ་རྗེ་ཧཱུཾ་མཛད་སྔོན་པོ་ཞབས་གཡོན་བརྐྱང་བས་དབང་ཕྱུག་དཀར་པོ་གཡས་རྩ་གསུམ་གཡོན་མདུང་རྩེ་གསུམ་པ་འཛིན་པ། རྣ་བ་གཡོན་པའི་སྟེང་ནས་མནན། དབུ་མ་གསེར་མདོག །རྡོ་རྗེ་རྩེ་གསུམ་དང་ཁ་ཊྭཱཾ་འཛིན་པ་ནུ་མའི་སྟེང་དུ་ཞབས་གཡས་པས་མནན། ཧཱུཾ་མཛད་ཞལ་བཞི་པ་མཆེ་བ་གཙིགས་ཤིང་མ་མཆུ་མནན་པ། ཁྲོ་ཞིང་རྩ་ཞལ་འཇིགས་པ་གཞན་གསུམ་ཁྲོ་ཞིང་འཛུམ་པ་འཁོར་ཞལ་ལོ། །ཕྱག་བརྒྱད་ཀྱི་དང་པོ་གཉིས་རྡོར་དྲིལ་ཧཱུཾ་མཛད་རྒྱ། འོག་མ་གཉིས་མདའ་གཞུ་རྣ་བའི་ཐད་དུ་འགེངས། གཡས་གསུམ་པ་རལ་གྲི། གཡོན་གསུམ་པ་ལྕགས་ཀྱུ། ལྷག་མ་གཡས་གཡོན་གཉིས་རྡོ་རྗེ་རྩེ་གསུམ་པ་དང་
ཞགས་པ་ཕྲག་པར་འཛིན་པའོ། །ཁྲོ་བོའི་རྡོར་སེམས་གཡས་རྡོ་རྗེ་དམར་པོ་གཡོན་སྡིགས་མཛུབ། རྒྱལ་པོ་སེར་པོ་གཡས་རིན་ཆེན་དབྱུག་ཏོ། །ཆགས་པ་དམར་པོ་གཡས་མདའ་གཞུ། ལེགས་པ་ལྗང་གུ་གཡས་རྡོ་རྗེ་དམར་པོ། ལྷོའི་ལེའུ་ཚེའི་དབུས་སུ། རིན་ཆེན་ཧཱུཾ་མཛད་དང༌། རིན་ཆེན་སེར་པོ་གཡས་རིན་པོ་ཆེ་དང་པདྨ། ཉི་མ་དམར་པོ། རྒྱལ་མཚན་སྔོན་པོ། གཡས་རྡོ་རྗེ་རྒྱལ་མཚན། བཞད་པ་དཀར་པོ། ནུབ་ཀྱི་ལེའུ་ཚེར་ཆོས་ཀྱི་ཧཱུཾ་མཛད་གཡས་པདྨས་མཚན་པའི་རྡོ་རྗེ། ཆོས་གཡས་པདྨས་མཚན་པའི་སྣ་ཚོགས་རྡོ་རྗེ། གཉིས་ཀ་མདོག་དམར་སྐྱ། རྣོན་པོ་སྔོན་པོ་གཡས་རལ་གྲི། རྒྱུ་སེར་པོ་འཁོར་ལོ་སྨྲ་བ་ཟངས་མདོག །བྱང་གི་ལེའུ་ཚེར་ལས་ཀྱི་ཧཱུཾ་མཛད་ཞལ་དཀར་པོ། མགྲིན་པ་ནས་སྙིང་ག་ཡན་ཆད་དམར་པོ། སྙིང་གནས་བརླའི་བར་སྔོན་པོ། བརླ་ནས་པུས་མོའི་བར་སེར་མོ། པུས་མོ་ནས་རྐང་མཐིལ་བར་དཀར་པོ། ཕྱག་དཔུང་པ་ནས་ལག་མགོའི་བར་སྔོན་པོ། གཡས་སྣ་ཚོགས་རྡོ་རྗེ། ཁྲོ་བོའི་ལས་སྣ་ཚོགས་པའང་ཁ་དོག་དང་ཕྱག་མཚན་གོང༌། སྲུང་བ་སེར་པོ། གནོད་སྦྱིན་ནག་པོ་གཡས་མཆེ་བ། ཁུ་ཚུར་སེར་པོ་གཡས་རྡོ་རྗེ། དེ་ཐམས་ཅད་ཀྱང་དམིགས་བསལ་མེད་པ་རྣམས་གཡས་ཐམས་ཅད་རང་རང་གི་ཕྱག་མཚན་ཕྲག་པར་འཕྱར། གཡོན་ཐམས་ཅད་སྡིགས་མཛུབ་ཐུགས་ཀར་འཛིན་པའོ། །ལྷ་སྣམ་གྱི་གྲྭར་ཤར་ལྷོར་སྒེག་མོ་སྔོན་མོ། ཁྲོ་བོའི་ཁུ་ཚུར་གཉིས་ཀྱིས་རྡོ་རྗེ་གཉིས་བསྣམས་ནས་དཀུ་གཡས་གཡོན་དུ་
བཞག་ནས་གཡོན་དུ་འགྱིང༌། ཆ་ལང་བརྡུང་བའི་ལྷ་སྔོན་མོ་བཞིས་བསྐོར་བ། ལྷོ་ནུབ་ཏུ་ཕྲེང་བ་མ་སེར་མོ། ཁྲོ་བོའི་ཁུ་ཚུར་གཉིས་ཀྱིས་ཕྲེང་བ་དཀར་པོ་དཔུང་པའི་ཐད་དུ་འཕྱར་བ། འཁོར་ལྷ་མོ་སེར་མོ་བཞིས་བསྐོར་བ་རྔ་ཟླུམ་བརྡུང་བའོ། །ནུབ་བྱང་དུ་གླུ་མ་མདོག་དམར་སྐྱ་པི་ཝང་སེར་པོ་བརྡུང་བ། གླིང་བུ་བསྒྱུར་བའི་ལྷ་མོ་དམར་མོ་བཞིས་བསྐོར་བ། ཕྱག་གཡས་ཐུགས་ཀའི་ཐ་དད་དུ་བཟུང་བའོ། །བྱང་ཤར་དུ། གར་མ་སྣ་ཚོགས་མདོག་ཅན། ཕྱག་གཉིས་ཀྱིས་རྡོ་རྗེ་རྩེ་གསུམ་པ་བསྣམས་ནས། གཡས་སྦྱི་བོ། 288གཡོན་དཀུར་བཞགས་ནས་གར་བསྒྱུར་བ། འཁོར་ལྷ་མོ་བཞི་སྣ་ཚོགས་མདོག་ལྔ་ག་གཅིག་པ། པགས་པས་གཡོགས་པ། རྔ་ཤིང་དྲ་བས་བརྒྱན་པ་མདུན་དུ་ཕྱག་གཉིས་ཀྱིས་བརྡུང་བའོ། །ཕྱིའི་ལྷ་སྣམ་གྱི་གྲྭར། ཤར་ལྷོར་བདུག་པ་མ་སྔོན་མོ། གཡོན་པ་ཁྲོ་བོའི་ཁུ་ཚུར་གྱིས་སྔིགས་མཛུབ་བསྒྲེང་བ། གཡས་སྤོས་སྣོད་ཐོགས་པ། འཁོར་བཞི་ཕྱག་གཡོན་དུ་དུང་འབུད་པ། གཡས་སྔིགས་མཛུབ་ཐུགས་ཀར། ལྷོ་ནུབ་ཏུ་མེ་ཏོག་མ་སེར་མོ། གཡོན་མེ་ཏོག །གཡས་པ་མེ་ཏོག་གི་ཆར་འབེབས་ཚུལ། རྫ་རྔ་དྲ་བ་ཅན་ཁ་གྱེན་དུ་བསྟན་ནས་བརྡུང་བའི་ལྷ་མོ་སེར་མོ་བཞིས་བསྐོར། ནུབ་བྱང་དུ་མར་མེ་མ་དམར་སྐྱ། གཡོན་ཁུ་ཚུར་ཐུགས་ཀར། གཡས་པ་རྡོ་རྗེ་ཁུ་ཚུར་གྱིས་མར་མེའི་སྡོང་བུ་ཕྲག་པ་གཡོན་པར་འཛིན། རྔ་དྲ་བ་ཅན་རོལ་མོ་བརྡུང་བའི་ལྷ་མོ་དམར་སྐྱ་བཞིས་བསྐོར། བྱང་ཤར་གྱི་གྲྭར་བྱུག་པ་མ་སྣ་ཚོགས་པའི་མདོག་ཅན། གཡོན་དྲིའི་དུང་ཆོས་ཐུགས་ཀར་
བཟུང་ནས། གཡས་ཀྱིས་དཔུང་པའི་ཐད་དུ་དྲི་བྱུགཚུལ། འཁོར་སྣ་ཚོགས་མདོག །བོད་རྔ་བརྡུང་ཚུལ་ཕྲག་པ་གཡོན་དུ། ཕྱི་ནང་གཉིས་ཀའི་སྒོ་བཞིར་ལྕགས་ཀྱུ་སྔོན་པོ། ཞགས་པ་སེར་པོ། ལྕགས་སྒྲོག་དམར་སྐྱ། དྲིལ་བུ་སྣ་ཚོགས་མདོག་གཡས་རྡོ་རྗེ། དེ་ལྟར་གཡས་ཐམས་ཅད་ཕྱག་མཚན་རྣ་བའི་ཐད་དུ་འཕྱར། གཡོན་ཐམས་ཅད་ཐུགས་ཀར་སྔིགས་མཛུབ། ཐམས་ཅད་ཀྱང་གཡོན་བརྐྱང་གིས་བཞུགས་པའོ། །དེ་ནས་ལྷ་སྣམ་ལ་བསྐལ་བཟང་ཤར་ཕྱོགས་པ་སྔོན་པོ་རྡོ་རྗེ་འཛིན་པ། བསྐལ་བཟང་གི་སངས་རྒྱས་རྣམས་ཀྱིས་ཕྱག་མཚན་གཡས་ཀྱིའོ། །ལྷོ་ཕྱོགས་པ་རྣམས་སེར་པོ་རིན་པོ་ཆེ་འཛིན་པ། ནུབ་ཕྱོགས་པ་རྣམས་དམར་སྐྱ་རྡོ་རྗེ་པདྨ་འཛིན་པ། བྱང་ཕྱོགས་པ་རྣམས་སྣ་ཚོགས་རྡོ་རྗེ་བསྣམས་པའོ། །གཡས་ཐམས་ཅད་ཕྲག་པར་འཕྱར། གཡོན་ཐམས་ཅད་སྡིགས་མཛུབ། ཐུགས་ཀར་ཞབས་ཐམས་ཅད་སྟང་སྟབས། དེ་ན་ཕྱིའི་ཁྱམས་ལ། ཤར་ཕྱོགས་དབང་ལྡན་ནས་བརྩམས་ནས་རིམ་པ་བཞིན། དྲག་པོ་མདོག་དཀར་པོ་ལག་པ་བཞི་པ། གཡས་དང་པོ་དབུ་མ་ལ་འཁྱུད་པ། གཉིས་པ་རྡོ་རྗེ་རྩེ་གསུམ་དང་བཅས་པས་ཏེ། གུང་མཛུབ་ཀྱི་རྩེ་མོར་རྡོ་རྗེ་བཞག་ནས་མཆོག་སྦྱིན་ཚུལ། གཡོན་པ་གཉིས་ཀྱིས་མདུང་རྩེ་གསུམ་པ་དང༌། རལ་གྲི་འཛིན་པ་སྟེ། རལ་གྲི་ཕྲག་པར་འཕྱར། མདུང་དཀུར་བཞག །གླང་ཁྱུ་མཆོག་དུར་སེར་ལ་ཞོན་པའོ། །མགྲིན་པ་སྔོན་པོ། གཡོན་དུ་དབུ་མ་
སེར་པོ་ཕྱག་བཞི་པ། ཕྱག་གཡས་མགྲིན་སྔོན་ལ་འཁྱུད་ཅིང༌། གཞན་རྣམས་ཡབ་དང་འདྲ། ཁྱབ་འཇུག་མདོག་ནག་པོ་ཕྱག་བཞི་པ། གཡས་དང་པོ་རྡོ་རྗེ་ཐུགས་ཀར། གཉིས་པ་དབྱུག་པ་དཔུང་ཁར་འཕྱར། གཡོན་དང་པོ་དཀུར་བཞག །གཉིས་པ་འཁོར་ལོ་ཕྲག་པར་འཕྱར། ནེ་ཙོ་འདྲ་བ་ལ་ཞོན་པ་དེའི་གཡོན་དུ་རྡོ་རྗེ་སེར་མོ་གསེར་མདོག །གདན་ཕྱག་མཚན་ཁྱབ་འཇུག་དང་འདྲ། རྡོ་རྗེ་དྲིལ་བུ་དམར་པོ་གདོང་དྲུག་པོ་རྩེགས་ཞལ། ལག་པ་བཞི་པ་གཡས་དང་པོ་མདུང་ཐུགས་ཀར། འོག་མ་རྡོ་རྗེ་དཔུང་པར་འཕྱར། གཡོན་དང་པོ་བྱ་ཕོ་དཀུར་བཞག །འོག་མ་དྲིལ་བུ་དཔུང་པའི་ཐད་དུ་འཕྱར། རྨ་བྱ་ལ་གནས་པའོ། །རྡོ་རྗེ་གཞོན་ནུ་མ་དྲིལ་བུ་དང་འདྲ། ཐུབ་པ་རྡོ་རྗེ་སེར་པོ་གདོང་བཞི་འཁོར་ཞལ་ཕྱག་བཞི་པ་གཡས་དང་པོ་རྡོ་རྗེ་ཐུགས་ཀར། འོག་མ་ཕྲེང་བ་དཔུང་ཁར་འཛིན། གཡོན་དང་པོ་དབྱུག་པ་དཀུར་བཟུང༌། འོག་མ་སྤྱི་བླུགས་ཕྲག་པར་ཐོགས། ངང་དཀར་ལ་གནས། རྡོ་རྗེ་ཞི་བ་མ་ནི་ཚངས་པ་དང་འདྲའོ། །རྡོ་རྗེ་མཚོན་ཆ་སེར་པོ་གཡོན་རང་གི་རྡོ་རྗེ་སྔོན་པོ་དཀུར་བརྟེན། གཡས་འདས་པའི་རྩེ་ལྔ་རྡོ་རྗེ་སེར་པོ་ཕྲག་པའི་ཐད་དུ་འཕྱར། གླང་པོ་ཆེ་དཀར་པོ་ལ་གནས་པའོ། །རྡོ་རྗེ་ཁུ་ཚུར་མ་རྡོ་རྗེ་མཚོན་ཆ་དང་འདྲ། ལྷོ་ཕྱོགས་སུ་རྡོ་རྗེ་འཁྱིལ་བ་དམར་པོ་པདྨ་དང་བཅས་པའི་རྡོ་རྗེ་ཐོགས། གཡོན་ཉི་མའི་དཀྱིལ་འཁོར་དང་བཅས་པའི་པདྨ་འཛིན། རྟ་བདུན་གྱིས་དྲངས་པའི་ཤིང་རྟ་ལ་གནས་པའོ། །རྡོ་རྗེ་བདུད་རྩི་འཁྱིལ་བ་དང་འདྲ། རྡོ་རྗེ་འོད་དཀར་པོ་གཡས་
རྡོ་རྗེ། གཡོན་པདྨའི་སྟེང་དུ་ཟླ་བ་འཛིན་པ། ངང་དཀར་ལ་ཞོན་པའོ། །རྡོ་རྗེ་མདངས་དང་འདྲ། རྡོ་རྗེ་དབྱུག་པ་སྔོན་པོ་གཡས་རྡོ་རྗེ་སྔོན་པོ་གཡོན་དབྱུག་པ་འཛིན་པ། རུས་སྦལ་ལ་གནས༌། རྡོ་རྗེ་སྦྱིན་མཆོག་མ་དེ་དང་འདྲ། རྡོ་རྗེ་སེར་སྨུག་ནི་མདོག་དམར་སྨུག །གཡས་རྡོ་རྗེ་དམར་པོ། གཡོན་མི་མགོ་ཐོགས་ནས་ཟ་ཚུལ། ར་སྔོ་སྐྱ་ལ་གནས་པ། རྡོ་རྗེ་རྐེད་ཆིངས་ལྗང་གུ །གཡས་རྡོ་རྗེ། གཡོན་མེ་ཏོག་གི་ཕྲེང་བ་འཛིན། ཁུ་བྱུག་ཤིང་རྟ་ལའོ། །རྡོ་རྗེ་ཟ་བ་མོ་དེ་དང་འདྲ་བ་ལས་ཁྱད་པར་གཡོན་མདུང་རྩེ་གཅིག་པ་ཕྲག་པའི་ཐད་དུ་འཕྱར། རྡོ་རྗེ་དབང་མདོག་སེ་སྐྱ། གཡས་རྡོ་རྗེ། གཡོན་ཆུ་སྲིན་རྒྱལ་མཚན་སྙིང་གར་འཛིན། ནེ་ཙོའི་ཤིང་རྟ་ལའོ། །རྡོ་རྗེ་སྒོ་བ་མ། དེ་དང་འདྲ་བ་ལས། ཁྱད་པར་མདོག་དམར་པོའོ། །ཚོགས་བདག་རྡོ་རྗེ་རྣམ་རྒྱལ་དཀར་པོ་གཡས་རྡོ་རྗེ། གཡོན་རལ་གྲི །སྦལ་པ་ལ་ཞོན། རྡོ་རྗེ་དགའ་བ་མ་དེ་དང་འདྲ། ཕོ་ཉ་རྡོ་རྗེ་ཐོ་བ་ནི་མདོག་སེར་པོ། གཡས་རྡོ་རྗེ། གཡོན་གཏུན་ཤིང་ཕྲག་པའི་ཐད་དུ་ཁྱོགས་ནི་མདོ་ལེ་མེ་ཏོག་གིས་སྤྲས་པ་ལ་གནས་པའོ། །རྡོ་རྗེ་ཕོ་ཉ་མོ་ནི་རྡོ་རྗེ་ཐོབ་བ་འདྲ་བ་ལས། ཁྱད་པར་ལག་པ་གཡོན་དུ་ཁ་ཏྲི་ཁ། དར་དབྱངས་དང་བཅས་པ་དཔུང་ཁར་འཛིན། ཕོ་ཉ་རྡོ་རྗེ་རླུང་སྔོན་པོ་གཡས་རྡོ་རྗེ། གཡོན་དབྱུག་པའིམགོ་ལ་བ་དན་འཕྱར་བ། རི་དྭགས་ཤ་བ་མོ་འདྲ་རུང་ལ་ཞོན་པའོ། །རྡོ་རྗེ་མགྱོགས་མ་དེ་དང་འདྲ། རྡོ་རྗེ་མེ་ནི། མདོག་དམར་སྨུག །གཡས་རྡོ་རྗེ་དང་དགང་ཟར།
གཡོན་གཉིས་ན་དབྱུག་པ་དཀུར། སྤྱི་བླུགས་ཕྲག་པར་ར་སྐྱེས་འདྲ་བ་ལ་ཞོན། རྡོ་རྗེ་འབར་བ་དེ་དང་འདྲ། རྡོ་རྗེ་འཇིགས་པ་སྔོན་པོ་གཡས་རྡོ་རྗེ། གཡོན་དབྱུག་པ་ཐུགས་ཀར། རོ་ལངས་ལ་གནས། རྡོ་རྗེ་འཁྱོགས་པ་ནི་དེ་དང་འདྲ་བ་ལས་ཁྱད་པར་གཡོན་ན་ཞགས་པ་དཔུང་ཁར། བྱང་ཕྱོགས་སུ་བྲན་རྡོ་རྗེ་ལྕགས་ཀྱུ་སྔོན་པོ་གཡས་རྡོ་རྗེ། གཡོན་ལྕགས་ཀྱུ་ཕག་གི་སྣ་ཅན། ཀླུའི་རྒྱལ་པོ་ཤོ་ཥ་ལ་ཞོན་པ་སྟེ། སྦྲུལ་མགོ་མེད་པའི་སྟོད་མིའོ། །སྨད་སྦྲུལ་མཇུག་འཁྱིལ་བ། བྲན་རྡོ་རྗེ་ཁ་ནི་མདོག་སྔོན་པོ་ཕག་སྣ་ཅན། གཡས་རྡོ་རྗེ་གཡོན་རལ་གྲི་དཔུག་ཁར་ཐོགས་པ་མི་ལ་གནས་པའོ། །རྡོ་རྗེ་དུས་ནི་མདོག་ནག་པོ་གཡས་རྡོ་རྗེ། གཡོན་དབྱུག་པ་དཔུག་ཁར་ཐོགས་པ། མ་ཧེ་ལ་གནས་པའོ། །རྡོ་རྗེ་དུས་མ་ནི་ནག་མོ་གཡས་རྡོ་རྗེ། གཡོན་ཁ་ཊྭཱཾ་ག་དཔུང་པའི་ཐད་དུ་འཛིན། རོ་ལངས་ལག་པ་ཐལ་མོ་སྦྱར་བ་ལ་ཞོན། རྡོ་རྗེ་བགེགས་ཀྱི་གཙོ་བོ་དཀར་པོ། གླང་པོ་ཆེའི་གདོང་ཅན། ལག་པ་བཞི་པ། གཡས་དང་པོ་རྡོ་རྗེ། འོག་མ་དགྲ་སྟ་འཕྱར་ཐབས། གཡོན་དང་པོ་མདུང་རྩེ་གསུམ་པ། གཉིས་པ་གླང་པོ་ཆེའི་མཆེ་བ་ཕྲག་པར་འཛིན། བྱི་བ་ལ་ཞོན་པ། མོ་རུལ་མ་ནི་མདོག་སྔོན་པོ་གཡས་རྡོ་རྗེ། གཡོན་ཕྱགས་ཤིང་འཛིན་པ། བྱི་བ་འདྲ་བ་ལ་ཞོན། བྲན་རྡོ་རྗེ་ཀླུ་དཀར་པོ་གཡས་རྡོ་རྗེ། གཡོན་སྦྲུལ་ཞགས་དཔུག་པའི་ཐད་དུ་འཛིན། མགོ་ལ་སྦྲུལ་མགོ་བདུན་ཡོད་པའོ། །ཆུ་སྲིན་ལ་གནས། ཆུ་སྲིན་མ་དཀར་མོ། སྦྲུལ་མགོ་བརྒྱད་ཀྱི་གདེངས་ཀ་ཡོད་པའོ། །
གཡས་རྡོ་རྗེ། གཡོན་ཆུ་སྲིན་རྒྱལ་མཚན་ཐོགས་པའོ། །མེ་མཚམས་སུ་མ་མོ་འཇིགས་མ་ལྗང་གུ། གཡས་རྡོ་རྗེ། གཡོན་རལ་གྲི་དང་ཕུབ་སྙིང་གའི་ཐད་དུ་འཛིན། བདེན་བྲལ་དུ་དཔལ་མོ་སེར་མོ་གཡས་རྡོ་རྗེ། གཡོན་པདྨ་རླུང་དུ་དབྱངས་ཅན་མ་དཀར་མོ་གཡས་རྡོ་རྗེ། གཡོན་པོ་ཝཾ་སྙིང་གར། དབང་ལྡན་དུ་དཀའ་བཟློག་ལྗང་གུ་གཡས་དང་པོ་རྡོ་རྗེ། གཉིས་པ་འཁོར་ལོ་ཐུགས་ཀར། གཡོན་དང་པོ། མེད་མིན། གཉིས་པ་རལ་གྲི་དཔུང་ཁར་འཕྱར། དེ་ལྟར་འཇིག་རྟེན་པའིལྷ་ཐམས་ཅད་རང་རང་གི་བཞོན་པའི་ལུས་ཕྱེད་དང༌། ལྷའི་ཕྱེད་མི་མངོན་ཅིང༌། རྐེད་པ་ཡན་ཆད་མི་མཐོང་བའོ། །ཕྱག་མཚན་འཛིན་ཚུལ་མི་གསལ་བ་རྣམས་གཡས་ཐམས་ཅད་རང་གི་མཚོན་ཆ་ཕྲག་པར་འཕྱར། གཡོན་ཐམས་ཅད་དཀུར་བཟུང་བའོ། །བཞོན་པའི་ཁ་དོག་མི་གསལ་བ་རྣམས། ནེ་ཙོ། རྨ་བྱ། རྟ་རྣམས་སྔོ་ལྗང༌། བྱི་བ་གྲྭ་བྱི་བ། ར་ཐལ་ཁ། མི་དང་རོ་ལངས་མི་ཤ་ཁ། རུས་སྤལ་ཤུན་པ་སེར་པོ་ལུས་དུད་ཀ །གླང་པོ་ཆེ་དང་སེངྒེ་དཀར། མ་ཧེ་དུར་སེར། ཤ་བ་སེར་སྐྱའོ། །སྒོ་ནང་མའི་རྟ་བབས་རིན་པོ་ཆེའི་ཁ་ཕྱི་ལྟ་ལ་གླང་རྒྱབ་བསྐོར་པ། ཕྱིའི་ཁྱམས་ལ་རྟ་བབས་ཀྱི་གཡས་གཡོན་དུ་རིན་པོ་ཆེའི་བུམ་པའི་ཁ་རྒྱན་གཡས་གཡོན་གྱེས་པ་ལ་རིན་ཆེན་སྣ་བདུན་བྲིས་སྣང༌། བ་དན་ཁ་དོག་སྣ་ཚོགས་པ་ལ་རྩེ་མོར་རྡོ་རྗེ་དང་ནོར་བུ་སེང་གེ་དང༌། མཁའ་ལྡིང་དང༌། སེང་གེ་གཤོག་པ་
རྒྱས་པ་དང༌། ཤ་རམ་པ་དང༌། “ངང་པ་དང༌། རྨ་བྱ་དང་། ངུར་པ་དང༌། ཤང་ཤང་དང༌། ལག་པ་དང༌། ཆུ་སྲིན་དང༌། ཉ་དང༌། དེའི་ཕྱི་རོལ་ཁོར་ཡུག་ལ་རྡོ་རྗེ་དང་མེ་རི་དང་ཆུས་བསྐོར་བ་སྣང་ངོ༌།། འདིས་ཀྱང་སངས་རྒྱས་ཀྱི་བསྟན་པ་རིན་པོ་ཆེ་སྒོ་ཐམས་ཅད་ནས་ཕྱོགས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །འདི་རྗེ་ཉིད་ཀྱིས་ཞ་ལུའི་རྒྱུད་རིས་དང་ཕྱག་ལེན་གཟིགས་དུས་ཟིན་བྲིས་སུ་གནང་བའོ།། །།མངྒ་ལཾ།