འདུས་པའི་བཤད་རྒྱུད་ལྷ་མོ་བཞིས་ཞུས་ཀྱི་རྒྱ་ཆེར་བཤད་པ་སྲོག་རྩོལ་གྱི་དེ་ཁོ་ན་ཉིད་གསལ་བ།

---

^{[མ་དཔེ་གཟིགས་ན་འདིར་གནོན།]}

འདུས་པའི་བཤད་རྒྱུད་ལྷ་མོ་བཞིས་ཞུས་ཀྱི་རྒྱ་ཆེར་བཤད་པ་སྲོག་རྩོལ་གྱི་དེ་ཁོ་ན་ཉིད་གསལ་བ་ཞེས་བྱ་བ་བཞུགས།

---

^{[མ་དཔེ་གཟིགས་ན་འདིར་གནོན།]}

དཔལ་ཐམས་ཅད་གསང་བའི་རྒྱུད་ཀྱི་དུམ་བུ་ལྷ་མོ་བཞིས་ཡོངས་སུ་ཞུས་པའི་རྒྱ་ཆེར་བཤད་པ་སྲོག་རྩོལ་གྱི་དེ་ཁོ་ན་ཉིད་གསལ་བ་ཞེས་བྱ་བ། ཟབ་ཅིང་རྒྱ་ཆེའི་གསུང་རབ་ལྟ་བའི་མིག །ལྟ་བ་ངན་པའི་རབ་རིབ་དང་བྲལ་བ། །ལེགས་པར་སྩོལ་མཛད་འཇམ་དབྱངས་བླ་མ་ཡི། །ཞབས་པད་དྲི་མ་མེད་ལ་མགོས་ཕྱག་འཚལ། །ཤིན་ཏུ་རྟོགས་དཀའ་རྟོགས་ན་རྒྱུད་སྡེའི་གནད། །ཇི་བཞིན་ཁྲོལ་བའི་མན་ངག་མཐར་ཐུག་པ། །མགོན་པོ་ཀླུ་སྒྲུབ་ཡབ་སྲས་མན་ངག་ལ། །རིང་དུ་གོམས་ལས་རྒྱུ་སྡེའི་གནད་མཐོང་ནས། །རྒྱུད་ཀྱི་སྟོན་པ་རྡོ་རྗེ་འཆང་དབང་ལ། །ཟག་མེད་དགྱེས་པ་བསྐྱེད་པའི་བཙུན་མོ་མཆོག །སྤྱན་སོགས་ལྷ་མོ་བཞི་ཡིས་ཞུས་པའི་རྒྱུད། །ཇི་བཞིན་གསལ་བར་བདག་གིས་བཤད་པར་བྱ། །ཚིག་

---

^{[མ་དཔེ་གཟིགས་ན་འདིར་གནོན།]}

ཉུང་དོན་རྒྱས་དཔག་དཀའ་འདུས་པའི་དོན། །རྡོ་རྗེ་འཆང་གི་རང་གི་རྣམ་བཤད་ཀྱིས། །ལེགས་པར་ཕྱེ་བ་བཞིན་དུ་ཤེས་འདོད་ན། །དོན་ཟབ་འདི་ནི་གུས་པའི་ཡིད་ཀྱིས་ཉོན། །འདིར་དཔལ་གསང་བ་འདུས་པའི་བཤད་པའི་རྒྱུད་ལྷ་མོ་བཞིས་ཞུས་པ་འཆད་པ་ལ་བཞི། །མཚན་གྱི་དོན། འགྱུར་གྱི་ཕྱག །གཞུང་དོན་དངོས། མཇུག་གི་དོན་ནོ། །དང་པོ་ནི། རྒྱུད་འདིའི་མཚན་ལ་རྒྱ་གར་གྱི་སྐད་དུ་ཙ་ཏུར་དེ་བ་ཏི་པ་རི་པྲིཙྪ་ཞེས་པ་བོད་ཀྱི་སྐད་དུ་བསྒྱུར་ན། ཙ་ཏུར་ནི་བཞི་དང་། དེ་བ་ཏི་ནི་ལྷ་མོ་དང་། པ་རི་ནི་ཡོངས་སུ་དང་། པྲིཙྪ་ནི་ཞུས་པ་སྟེ། སྤྱན་མ་ལ་སོགས་པའི་ལྷ་མོ་བཞིས་ཡོངས་སུ་ཞུས་པའོ། །གཉིས་པ་ནི། དཔལ་ཞེས་སོགས་ཏེ་དཔལ་ནི་ཚོགས་གཉིས་ཡོངས་སུ་རྫོགས་པ་ཡིན་ལ། རྡོ་རྗེ་སེམས་དཔའ་ནི་འཆད་པར་

---

^{[མ་དཔེ་གཟིགས་ན་འདིར་གནོན།]}

འགྱུར་ཞིང་། །ལྷག་མ་ནི་གོ་སླའོ། །གསུམ་པ་ལ་གཉིས། སྤྱིའི་དོན། ཡན་ལག་གི་དོན་ནོ། །དང་པོ་ལ་གསུམ། གླེང་གཞི་མ་གསུངས་པའི་རྒྱུ་མཚན། གཞན་འཇུག་པའི་ཡན་ལག་དགོས་འབྲེལ། འདུས་པའི་བཤད་རྒྱུད་དུ་འགྲོ་ཚུལ་ལོ། །དང་པོ་ནི། རྒྱུད་འདིའི་མགོར་འདི་སྐད་བདག་ཐོས་སོགས་ཀྱིས་གླེང་གཞི་མ་གསུངས་པའི་རྒྱུ་མཚན་གང་ཡིན་ཞེ་ན། འདི་ལ་ཡེ་ཤེས་སྙིང་པོས་མཛད་ཟེར་བའི་འགྲེལ་པ་ལས་འདི་ནི་འདུས་པའི་རྒྱུད་ཡིན་པས་རྩ་བའི་མདོར་གླེང་གཞི་གསུངས་པས་ཉེས་པ་མེད་དོ། །ཞེས་འཆད་པ་ནི། རྒྱུད་འདི་འདུས་པའི་རྒྱུད་ཀྱི་དུམ་བུ་ཡིན་པ་ནི་འདོད་དུ་མི་རུང་བས། དེའི་བཤད་རྒྱུད་ལ་བསམ་པར་མངོན་ལ། དེ་ལྟ་ནའང་རྩ་རྒྱུད་དུ་གླེང་གཞི་གསུངས་ཀྱང་བཤད་རྒྱུད་ལ་འདི་སྐད་བདག་ཐོས་སྨོས་པ་འདས་པ་དང་། རྡོ་རྗེ་ཕྲེང་བ་དང་། ཀྱཻ་རྡོར་དང་། སཾ་བྷུ་ཊ་ལྟ་བུ་མང་བས་རྒྱུ་མཚན་དེ་མ་ངེས་སོ། །དེས་ན་སྨྲི་ཏིས་མཛད་ཟེར་བའི་འགྲེལ་པ་ལས་རྒྱུད་འདྲི་གསང་བའི་མཆོག་ཅེས་བྱ་བ་སྟོང་ཕྲག་གཅིག་བཞུགས་པའི་རྒྱུད་ཕྱི་མར་བཤད་པ་ལྟར། འདི་ཐམས་ཅད་གསང་བའི་རྒྱུད་ཀྱི་དུམ་བུ་ཕྱི་མ་གཅིག་ཏུ་འདུག་པས་གླིང་གཞི་མ་གསུངས་པར་མངོན་ཏེ། འདུས་པའི་རྒྱུད་ཕྱི་མ་བཞིན་ནོ། །རྒྱུད་སྔ་མ་གཅིག་གི་དུམ་བུ་ཡིན་པ་ནི་འདི་ཉིད་ཀྱི་ལེའུ་བཞི་པ་ལས་ཤེས་ལ། ཐམས་ཅད་གསང་བའི་མཆོག་ཅེས་བྱ་བའི་རྒྱུད་ཡིན་པར་ནི་རྒྱུད་འདི་ཉིད་ལས་གསལ་ལོ། །རྒྱུད་འདིའི་འགྲེལ་པ་ཡེ་ཤེས་སྙིང་པོས་མཛད་ཟེར་བ་ལས། བྱང་ཆུབ་ཀྱི་སེམས་ཀྱི་ཚིག་དོན་འཆད་པ་ན། བྱང་ཡིག་རྡོ་རྗེ་

---

^{[མ་དཔེ་གཟིགས་ན་འདིར་གནོན།]}

ཞེས་གསུངས་ཏེ། །ཡི་གེ་ཆུབ་ནི་གཟུགས་མའི་ཚིག །སེམས་ཡིག་ཞུ་བར་གསུངས་པ་སྟེ། །ཡི་གེ་པ་ནི་བདེ་བ་ཆེ། །ཞེས་པའི་ལུང་དྲངས་ནས་བཤད་པ་དང་། །སྨྲི་ཏིས་མཛད་ཟེར་བའི་འགྲེལ་པ་ལས་ཀྱང་། །ལུང་དེ་གསང་བའི་ཐིག་ལེའི་རྒྱུད་ལས་གསུངས་པར་བཤད་ཅིང་། རྡོ་རྗེ་སེམས་དཔའ་ཞེས་པའི་འབྲུ་འཇོག་པ་ན། རྡོ་དང་རྗེ་དང་སེ་དང་མ་དང་ས་དང་པ་དྲུག་གི་དོན། མེ་ལོང་ལྟ་བུ་ལ་སོགས་པའི་ཡེ་ཤེས་ལྔ་དང་། རྣམ་སྣང་ལ་སོགས་པའི་རིགས་ལྔ་དང་། དེ་རྣམས་ལྡན་པའི་དོན་ལ་བཤད་སྣང་བས། རྒྱ་གར་བའི་གཞུང་ཁུངས་མ་ཡིན་པ་ལ་ཐེ་ཚོམ་ཟ་བར་སྣང་སྟེ། བླ་མ་དེ་དག་ནས་བརྒྱུད་པའི་མན་ངག་ཡོད་པའི་བོད་ཅིག་གིས་བཤད་དམ། ཡང་ན་བཤད་པ་དེ་དག་བོད་ཀྱིས་བཅུག་པ་ཡིན་པ་འདྲའོ། །གཉིས་པ་ནི་དགོས་པ་ལ་སོགས་པ་མ་མཐོང་བའི་གཞུང་ལ་ནི་དད་པའི་རྗེས་སུ་འབྲང་བ་རྣམས་ཀྱང་འཇུག་པར་མི་འགྱུར་ན། ཆོས་ཀྱི་རྗེས་སུ་འབྲང་བ་རྣམས་ལྟ་སྨོས་ཀྱང་ཅི་དགོས། དེའི་ཕྱིར་རྒྱུད་འདི་ལ་ཐོག་མར་དགོས་པ་ལ་སོགས་པ་བཞི་བརྗོད་པར་བྱ་དགོས་ན། བརྗོད་པར་བྱ་བ་ནི་གང་ཞིག །དགོས་པ་ནི་ཇི་ལྟ་བུ། དགོས་པའི་དགོས་པ་ནི་ཅི་ཞིག །འབྲེལ་བ་ནི་གང་སྙམ་ན། བརྗོད་པར་བྱ་ནི་ཆོས་ཀྱི་དབྱིངས་འཕྲོ་བ་དང་། ཆོས་ཀྱི་དབྱིངས་ཀྱི་རིམ་པ་དང་། ཆོས་ཀྱི་དབྱིངས་བསྡུ་བ་དང་། ཆོས་ཀྱི་དབྱིངས་ཀྱི་དོན་བསྒྲུབ་པ་བཞི་ཡན་ལག་དང་བཅས་པའོ། །དགོས་པ་ནི་རྒྱུད་འདི་ལ་བརྟེན་ནས་དོན་དེ་རྣམས་ལེགས་པར་རྟོགས་

---

^{[མ་དཔེ་གཟིགས་ན་འདིར་གནོན།]}

པའོ། །དགོས་པའི་དགོས་པ་ནི་དོན་དེ་ཁོང་དུ་ཆུད་ནས་ཉམས་སུ་བླངས་པས་རྫོགས་པའི་སངས་རྒྱས་ཐོབ་པའོ། །འབྲེལ་བ་ནི་ཉིང་དགོས་དགོས་པ་དང་། བརྗོད་བྱའི་དོན་རྟོགས་པ་རྗོད་བྱེད་གཞུང་ལ་རག་ལས་པའོ། །གསུམ་པ་ལ་གཉིས། རྩ་རྒྱུད་ཀྱི་དོན་གང་བཤད། བཤད་རྒྱུད་ནང་ཕན་ཚུན་སྦྱར་བས་ངེས་པ་བསྐྱེད་པའི་ཚུལ་ལོ། །དང་པོ་ལ་གཉིས། །མདོར་བསྟན་པ། རྒྱས་པར་བཤད་པའོ། །དང་པོ་ནི། རྒྱུད་འདི་ཐམས་ཀྱི་རྒྱུད་ཡིན་པར་ནི་རྡོ་རྗེ་སྙིང་པོ་རྒྱན་གྱི་རྒྱུད་ལས། །འདོད་ཆགས་ཆེན་པོའི་ཐབས་རྒྱུད་ཀྱི་དབྱེ་བ་བྱས་པའི་སྐབས་སུ། ལྷ་མོ་བཞིས་ཞུས་བརྒྱ་བདུན་ཅུ། ཞེས་གསུངས་ལ། །འདུས་པའི་བཤད་རྒྱུད་ཡིན་པར་ནི་རིམ་ལྔ་ལས་གསུངས་སོ། །བཤད་རྒྱུད་དུ་འགྲོ་བ་ལ་ནི་རྩ་རྒྱུད་ཀྱི་རིམ་གཉིས་ཡན་ལག་དང་བཅས་པ་གཉིས་ཀའམ། གང་རུང་གཅིག་བཤད་གཞིར་བཟུང་ནས་གཙོ་བོར་འཆད་པ་ཞིག་དགོས་ལ། རྒྱུད་འདིས་འདུས་པའི་རིམ་གཉིས་ཡན་ལག་དང་བཅས་པ་གཉིས་ཀ་འཆད་མོད་ཀྱང་གཙོ་བོར་འཆད་པ་ནི་རྫོགས་རིམ་ཡིན་ལ། དེ་ཡང་རྡོ་རྗེ་བཟླས་པ་དང་། བདག་བྱིན་གྱིས་བརླབ་པ་དང་། མངོན་པར་བྱང་ཆུབ་པ་དང་། ཟུང་འཇུག་གི་རིམ་པ་རྣམས་ཀྱང་སྟོན་མོད་ཀྱང་། གཙོ་བོར་ནི་སྲོག་རྩོལ་གྱི་གནད་རྣམས་གསལ་བར་འཆད་དོ། །གཉིས་པ་ལ་གཉིས། རྩ་རྒྱུད་ཀྱི་བསྐྱེད་རིམ་ཇི་ལྟར་བཤད་པ། རྩ་རྒྱུད་ཀྱི་རྫོགས་རིམ་ཇི་ལྟར་བཤད་པའོ། །དང་པོ་ནི། དེ་ལ་འདིས་རིམ་པ་དང་པོ་ཡན་ལག་དང་བཅས་པ་བཤད་པའི་ཚུལ་ནི། ལེའུ་དང་པོར་སངས་རྒྱས་

---

^{[མ་དཔེ་གཟིགས་ན་འདིར་གནོན།]}

ཀྱི་སྐུས་བརྒྱན་པའི་རྡོར་སེམས་ཡུམ་དང་། སྙོམས་པར་ཞུགས་པ་ལས་བྱང་ཆུབ་ཀྱི་སེམས་ཡུམ་གྱི་ཆོས་འབྱུང་དུ་སྤྲོས་པར་གསུངས་པས་ནི། དང་པོ་སྦྱོར་བའི་སྐབས་སུ་སྤྲུལ་སྐུ་རྡོར་སེམས་སུ་བསྒྱུར་བ་ལ་ལུས་དཀྱིལ་བཀོད་པ་དང་། འདུ་བྱས་པའི་རིག་མ་དང་སྙོམས་པར་ཞུགས་ནས་བྱང་ཆུབ་ཀྱི་སེམས་པད་མར་ཕྱུང་བ་བསྟན་ལ། ལེའུ་གསུམ་པར། ཆུ་ཁམས་ཕ་ལས་སྐྱེས་ཞེས་བྱ། །ཞེས་སོགས་ཚིགས་བཅད་གསུམ་གསུངས་པ་ཡང་། རྣམ་གཞག་རིམ་པར་ལུས་དཀྱིལ་གྱི་སྐབས་སུ་དྲངས་པས་དེས་ཀྱང་ལུས་དཀྱིལ་སྟོན་ལ། །ལེའུ་བཞི་པར་ལུས་དཀྱིལ་བཤད་པའི་ཕྱོགས་འགས་ཀྱང་སྟོན་ཞིང་། སྐབས་དེར་རིག་མ་དང་སྙོམས་པར་འཇུག་པ་ཡང་བསྟན་ཏོ། །དཀྱིལ་འཁོར་རྒྱལ་མཆོག་གི་སྐབས་སུ་ཡུམ་གྱི་པདྨར་བྱང་སེམས་ཕྱུང་བའི་ཐིག་ལེ་ལྷ་སོ་སོའི་སྔགས་སུ་གྱུར་པ་ནི་ལེའུ་གསུམ་པ་ལས། ཆ་ཤས་གཉིས་པ་དང་ལྡན་པ། ཞེས་སོགས་ཚིག་བཅད་གསུམ་གྱིས་སྟོན་ཏེ། སྒྲོན་གསལ་ལས། ཚིགས་བཅད་དང་པོ་གཉིས་ཀྱི་དོན་དེ་ལ་བཤད་པས་སོ། །ཚིགས་བཅད་ཕྱི་མའི་དོན་ནི་གཞུང་གི་སྐབས་སུ་གསལ་བར་འཆད་དོ། །ལེའུ་བཞི་པར་བྱང་སེམས་དང་བྷ་གའི་དཀྱིལ་འཁོར་གཉིས་གསུངས་པའི་དོན་ནི་ཚིག་དོན་གྱི་སྐབས་སུ་འཆད་པར་འགྱུར་རོ། །ལས་རྒྱལ་མཆོག་གི་སྐབས་ཀྱི་འོག་སྒོའི་ཐིག་ལེ་ཕྲ་མོ་ནི། ལེའུ་དང་པོའི་སྐབས་ཀྱིས་མཚན་ཉིད་མཚུངས་པའི་

---

^{[མ་དཔེ་གཟིགས་ན་འདིར་གནོན།]}

ཚུལ་གྱིས་བསྟན་པར་སྦྱོར་ན་རུང་ལ། བཟླས་པ་ནི་ལེའུ་གསུམ་པའི་སྔགས་འདུས་པ་དྲིས་པའི་ལན་གྱི་ཕྱོགས་གཅིག་གིས་ཀྱང་སྟོན་དུ་རུང་ངོ་། །གླུས་བསྐུལ་བའི་ངོར་བཞེངས་པ་ལ་ཉེར་སྤྱོད་དང་འདོད་ཡོན་དང་གསང་མཆོད་ཀྱི་མཆོད་པ་ནི་ལེའུ་བཞི་པར་མཆོད་པ་ཞུས་པའི་ལན་གྱིས་བསྟན་ཏོ། །ཁ་ཟས་ཀྱི་རྣལ་འབྱོར་གྱི་ཕྱོགས་གཅིག་ཕན་ཡོན་དང་བཅས་པ་ལེའུ་བཞིན་པའི་ནང་གི་སྦྱིན་སྲེག་གིས་བསྟན་པ་ནི་མདོར་བྱས་སུ་གསུངས་ལ། ཟ་བ་དང་སྤྱོད་ལམ་གྱི་དུས་ཀྱི་རང་ལྷར་བསྒོམ་པ་ནི། གང་ཡང་འགའ་ཞིག་ཞི་བའི་ལས། །ཞེས་པའི་རྐང་པ་དྲུག་གིས་བསྟན་ཏོ། །དེ་ལྟར་ལྷའི་རྣལ་འབྱོར་བསྒོམས་པས་ནུས་པ་རྙེད་པ་ན་ཞི་སོགས་ཀྱི་ལས་རབ་འབྱམས་སྦྱིན་སྲེག་སོགས་ཀྱིས་སྒྲུབ་པ་ཡང་། ལས་རྒྱལ་མཆོག་ཏུ་མདོ་བསྲེ་ལས་གསུངས་ལ། དེ་ནི་ལེའུ་བཞི་པར་རྫས་ཀྱིས་སྒྲུབ་པ་དང་ སྔགས་ཀྱིས་སྒྲུབ་པ་དང་། ཕྱིའི་སྦྱིན་སྲེག་གིས་ཅི་རིགས་པར་བསྟན་ཏོ། །དེ་ལྟར་རིམ་པ་དང་པོའི་ཏིང་ངེ་འཛིན་གྱི་དོན་བསྟན་པ་དེ་དག་གིས་རྩ་བའི་རྒྱུད་ཀྱི་གཞུང་གང་འཆད་པ་ནི་གོ་བར་སླ་ལ། དོན་ཕྲ་བ་འགའ་ཞིག་བསྟན་པ་ནི་ཚིག་དོན་གྱི་སྐབས་སུ་འཆད་དོ། །གཉིས་པ་ནི། རྩ་རྒྱུད་ལས། ཕུང་པོ་ལྔ་རིགས་ལྔར་བཤད་པ་སོགས་ཀྱི་གཞུང་གིས་ལུས་དབེན་ཡང་བསྟན་པར་སྤྱོད་བསྡུས་ལས་གསུངས་པས། འདིར་ལུས་དཀྱིལ་བཤད་པ་ལུས་དབེན་ལ་སྦྱར་དུ་རུང་བས་སྦྱོར་ནའང་། སྦྱར་བར་བྱའོ། །རྡོ་རྗེ་བཟླས་པ་ལ་གཉིས་ལས། རླུང་གི་དེ་ཉིད་ནི། རྩ་རྒྱུད་ལེའུ་གསུམ་པ་ལས་སྣའི་རྩེ་མོར་ཡུངས་ཀར་གྱི་

---

^{[མ་དཔེ་གཟིགས་ན་འདིར་གནོན།]}

འབྲུ་ཙམ་གྱི་རིན་ཆེན་ཁ་དོག་སྣ་ལྔ་པ་དང་། ལེའུ་དྲུག་པ་ལས། སྣའི་རྩེ་མོར་ཡུངས་ཀར་བསྒོམ་པར་གསུངས་པ་གཉིས་ཀྱིས་རླུང་གི་དེ་ཉིད་མི་གསལ་བར་བསྟན་པ་རྒྱུད་འདིའི། དེ་ཉིད་ཡེ་ཤེས་ལྔ་ཡི་དངོས། ཞེས་པའི་རྐང་པ་བཞིས་སྟོན་པར་རིམ་ལྔ་ལས་གསུངས་སོ། །དེ་ནི་མཚན་པ་ཙམ་སྟེ། དེའི་གོང་གི། བྱང་ཆུབ་སེམས་དག་ཅེས་པའི་རྐང་པ་གཉིས་དང་། འོག་གི་ཕྱེད་ཚད་ཙམ་གྱི་ཞེས་སོགས་དང་པོའི་བྱུང་ཁུངས་དང་། འོངས་པའི་ལམ་དང་། ཕྱིར་སྡུད་པ་དྲིས་པའི་ལན་གསུམ་ཞར་བྱུང་དང་བཅས་པས་རླུང་གི་དེ་ཉིད་སྙིང་ཁའི་མི་ཤིགས་པའི་ཐིག་ལེ་དང་བཅས་པ་བསྟན་ཏོ། །དེ་ཡང་ལེའུ་དང་པོར་དཀྱིལ་འཁོར་བཞིའི་རླུང་སོ་སོར་མ་ཕྱེ་བར་བསྟན་ལ། ལེའུ་གཉིས་པའི་བྱང་ཆུབ་སེམས་ཀྱི་རིམ་པ་ཡིས། །ཁ་སྙིང་ལྟེ་བ་གསང་བ་ལ། །ཞེས་སོགས་ཀྱིས་ལེའུ་དང་པོར་བཤད་པའི་ཡེ་ཤེས་ལྔའི་ངོ་བོ་ཉིད་ཀྱི་རླུང་ལ་དཀྱིལ་འཁོར་བཞིའི་རླུ་དུ་ཕྱེ་ནས་མི་ཤིགས་པའི་ཐིག་ལེ་ལས། འགྲོ་འོང་བྱེད་ཚུལ་ལ་སོགས་པ་གསལ་བར་བསྟན་ཏོ། །རྡོར་བཟླས་བྱེད་པའི་བྱེད་ཚུལ་གྱི་གནད་ཐུན་མོང་མ་ཡིན་པ་ལེའུ་དང་པོ་གཉིས་ཀྱི་གཞུང་དེ་དག་གིས་བསྟན་པ་ནི་ཚིག་དོན་གྱི་སྐབས་སུ་འཆད་དོ། །དེ་ནས་སྔགས་ཀྱི་དེ་ཉིད་ནི། བཅུ་གཉིས་ལྔ་ཡི་ལྔ་པ་ཡང་། །ཞེས་སོགས་ཀྱིས་བསྟན་ཏོ། །རྡོར་བཟླས་བྱས་པའི་ནང་གི་རྐྱེན་དང་། ཕྱིའི་ཕྱག་རྒྱ་ལ་བརྟེན་ནས་རོ་རྐྱང་གི་རླུང་དང་། བྱང་ཆུབ་ཀྱི་སེམས་ཨ་བ་དྷཱུ་ཏཱིར་སྡུད་ཅིང་རོ་མཉམ་དུ་བྱེད་པ་ནི་ལེའུ་གསུམ་པར་ཆོས་ཀྱི་དབྱིངས་བསྡུ་བ་

---

^{[མ་དཔེ་གཟིགས་ན་འདིར་གནོན།]}

དང་། །རྡོ་རྗེ་གསུམ་གྱི་ལན་གཉིས་དང་། ཁམས་གཉིས་རོ་མཉམ་དུ་ཇི་ལྟར་འགྱུར་དྲིས་པའི་ལན་གྱི་ཕྱོགས་གཅིག་གིས་སྟོན་ཏོ། །སེམས་ཅན་སྐྱེ་བའི་རིམ་པའི་ཞུས་ལན་གྱིས་སྒྱུ་ལུས་གང་ལས་བསྒྲུབ་པའི་གཞི་བསྟན་ལ། འོད་གསལ་ལས་ལྡང་བའི་ཞུས་ལན་གྱིས་ཀྱང་མཚན་ཉིད་མཚུངས་པའི་སྒོ་ནས་བདག་བྱིན་རླབས་སྟོན་དུ་རུང་ངོ་། །ལས་ཉོན་གྱི་གཞིའི་ཞུས་ལན་གྱིས་རྡོར་བཟླས་ཀྱི་དམིགས་པ་རླུང་གི་བྱ་བ་སྟོན་པ་ནི་ཚིག་དོན་གྱི་སྐབས་སུ་ཤེས་པར་བྱའོ། །འོད་གསལ་ལ་ལྡང་པའི་དྲི་བའི་སྐབས་དང་། ལེའུ་བཞི་པའི་ཆོས་དབྱིངས་བསྒྲུབ་པའི་ལན་གྱིས་འོད་གསལ་སྟོན་ལ། འོད་གསལ་ལས་ལྡང་བའི་དྲི་བའི་ལན་གྱིས་ནི་ཟུང་འཇུག་གི་སྐུ་སྟོན་ནོ། །ལེའུ་དང་པོའི་མཇུག་ཏུ་ཕན་ཡོན་ལ་སོགས་པ་སྟོན་པ་དང་། ལེའུ་གསུམ་པའི་གོང་བུའི་བསྡུ་བ་དང་རྡོར་སེམས་ཀྱི་རང་བཞིན་ཞུས་པའི་ལན་ལ་སོགས་པ་རྣམས་ནི་ཚིག་དོན་གྱི་སྐབས་སུ་བཤད་པར་བྱའོ། །རྩ་རྒྱུད་ཀྱི་རྫོགས་རིམ་གྱི་གཞུང་གང་རྒྱུད་འདིས་བསྟན་པའི་ཚུལ་སྦྱོར་བ་རྣམས་ཀྱང་ཕལ་ཆེར་རྟོགས་པར་སླ་བས། ཐམས་ཅད་མ་བྲིས་སོ། །གཉིས་པ་ནི། རྩ་རྒྱུད་ཀྱི་དོན་འཆད་པའི་བཤད་རྒྱུད་རྣམས་རིམ་པ་བཞིན་དུ་བསྒྲིགས་པ་ན། སྔ་མར་མི་གསལ་བ་ཕྱི་མར་གསལ་བར་སྟོན་པས། བཤད་རྒྱུད་ནང་ཕན་ཚུན་སྦྱར་བས་ངེས་པ་བསྐྱེད་པའི་གདམས་ངག་གི་རིམ་ལྔར་རླུང་གི་དེ་ཉིད་འཆད་པའི་སྐབས་སུ་རྒྱུད་འདི་དང་། རྒྱུད་ཕྱི་མ་དང་། རྡོ་རྗེ་ཕྲེང་བ་གསུམ་རིམ་པར་བཀོད་པའི་སྐབས་ལས་ཤིན་ཏུ་གསལ་ལོ། །དེའི་མན་ངག་གིས་འདིར་ཡང་བཤད་ན། སྙིང་

---

^{[མ་དཔེ་གཟིགས་ན་འདིར་གནོན།]}

གའི་མི་ཤིགས་པ་དང་། རྡོར་བཟླས་སྦྲག་པ་འདིར་བཤད་པ་འདིས། རྒྱུད་ཕྱི་མར། རང་སྔགས་སྙིང་གར་བསམས་ནས་ནི། །སྲོག་ནི་ཐིག་ལེར་གནས་པར་བཞག །ཅེས་པ་དང་། རྡོ་རྗེ་ཕྲེང་བར་གདོང་གི་སྣང་རྩེར་འོད་ཀྱི་ཐིག་ལེ་དང་། སྙིང་གའི་སྣ་རྩེར་སྔགས་ཀྱི་ཐིག་ལེ་བསྒོམ་པར་བཤད་པ་དང་། དགོངས་པ་ལུང་སྟོན་ལས། དང་པོ་གཅིག་ནི་དགུ་དབུས་ན། །ཞེས་སོགས་གསུངས་པ་དང་། རང་བཞིན་གྱིས་གྲུབ་དང་པོ་གཅིག །ཅེས་སོགས་དང་། བདག་ཉིད་འདི་འདྲར་བྱས་ནས་ནི། །ཆོས་ཀྱི་དཀྱིལ་འཁོར་བྲི་བར་བྱ། །ཞེས་སོགས་རྣམས་ཀྱི་དོན་ཡང་རྒྱུད་འདིར་བཤད་པ་དང་དོན་མཐུན་པར་གོ་ནུས་ལ། དེ་ལྟར་བྱ་དགོས་པའི་རྒྱུ་མཚན་ནི། རྡོར་ཕྲེང་གི་ལེའུ་དྲུག་པ་ལས་ཤིན་ཏུ5།དབྱེ་བར་དཀའ་བའི་སྙིང་གའི་མདུད་པ་མ་གྲོལ་བར་དུ་མདུད་པས་བཅིངས་པའི་ནང་གི་མི་ཤིགས་པ་ལ་རླུང་སྡུད་པར་མི་ནུས་ཤིང་། དེ་མ་ནུས་ན་དེར་རླུང་རྣམས་ཐིམ་པ་ལས་འོད་གསལ་འཆར་བའི་རྟོགས་པ་བསྐྱེད་མི་ནུས་པས་རྩ་མདུད་དེ་དབྱེ་དགོས་པ་དང་། དེ་འབྱེད་པ་རྡོར་བཟླས་ཀྱིས་བྱེད་པར་གསུངས་པས་ཤེས་སོ། །སྙིང་གའི་རྩ་མདུད་འབྱེད་པ་ནི་དབུ་མའི་མདུད་པ་འགྲོལ་བ་ཐམས་ཅད་ཀྱི་གཙོ་བོ་གལ་ཆེེ་ཤོས་ཡིན་པར་རྡོར་ཕྲེང་གི་སྐུ་གསུང་ཐུགས་ཀྱི་སྙིང་པོའི་ལེའུ་ལས་ཤེས་པས། འདུས་པའི་ལུགས་ཀྱིས་སྙིང་གར་གནད་དུ་བསྣུན་པ་ཉིད་ལུས་ལ་གནད་དུ་བསྣུན་པའི་མཐར་ཐུག་ཏུ་བྱ་དགོས་པར་ཤེས་པ་ཡིན་ནོ། །རྡོར་བཟླས་ཀྱིས་སྙིང་གར་རླུང་བསྡུས་

---

^{[མ་དཔེ་གཟིགས་ན་འདིར་གནོན།]}

པའི་ཚེ་དེའི་སྡུད་རིམ་ལ་སྟོང་པ་བཞི་འཆར་བར་ནི་དགོངས་པ་ལུང་སྟོན་ལས། ཇི་ལྟར་འོ་མ་ཁྱབ་པར་ནི། །མར་གསར་གནས་པར་གྱུར་པ་ཡིན། །དེ་བཞིན་གོས་དཀར་ལ་སོགས་ལ། །ཞི་བ་ཉིད་ནི་དེ་གནས་སོ། །ཞེས་འོ་མ་གཤིགས་པ་ལས། མར་གསར་འབྱུང་བ་ལྟར་གོས་དཀར་མོའི་རླུང་ཉིས་བརྒྱ་ཉེར་ལྔ་ལ་སོགས་པའི་རྡོ་རྗེའི་བཟླས་པ་ལ་འབད་པ་ལས་ཀྱང་། ཞི་བ་སྟེ་སྟོང་པ་བཅོ་བརྒྱད་ཀྱི་རྟོགས་པའམ། མདོར་བསྡུ་ན་སྟོང་པ་བཞིའི་ཏིང་ངེ་འཛིན་སྐྱེ་བར་གསུངས་པས་སྟོང་པ་བཞི་འཆར་པ། སྟོང་པ་བཞིའི་ངོ་བོ་ནི་བཤད་རྒྱུད་གཞན་ལས་ཀྱང་ཡེ་ཤེས་རྡོ་རྗེ་ཀུན་ལས་བཏུས་གསལ་བས། དེ་ནས་གསུངས་པ་བཞིན་དུ་ཤེས་པར་བྱ་དགོས་སོ། །དེ་ལྟར་སྲོག་རྩོལ་གྱི་སྐབས་འདྲ་བ་གཅིག་ལའང་བཤད་རྒྱུད་ཕན་ཚུན་དུ་བཤད་པ་སྒྲིག་ཤེས་ན། རྩ་རྒྱུད་ཀྱི་དོན་རྣམས་རེ་རེ་འཆད་པ་ལ་ཡང་བཤད་རྒྱུད་སོ་སོས་དེས་པ་མི་འདྲ་བ་བསྐྱེད་ཚུལ་རྣམས་ཤེས་པས། རྩ་རྒྱུད་གཅིག་ལའང་བཤད་རྒྱུད་མི་འདྲ་བ་མང་པོ་འོང་བའི་རྒྱུ་མཚན་རྣམས་ལ་ངེས་པ་རྙེད་ཅིང་། གདམས་ངག་གི་མཐར་ཐུག་རྩ་རྒྱུད་ཡིན་པ་དང་། དེ་ལྟར་ཡིན་པ་ལ་ངེས་པ་སྐྱེད་བྱེད་བཤད་རྒྱུད་ལ་ཐུག་པ་དང་། དེ་ལྟར་དངོས་པོ་ལ་གནས་ཀྱང་བླ་མའི་ཞལ་ནས། དེ་ལྟར་ཡིན་པར་འཆད་པ་མེད་ན་ཤིན་ཏུ་རྟོགས་དཀའ་བར་རིམ་ལྔ་ལས། དཔལ་ལྡན་འདུས་པའི་རྒྱུད་དུ་ནི། །དེ་ཉིད་འདི་དག་རྒྱས་བཏབ་གནས། །བཤད་པའི་རྒྱུད་ཀྱི་རྗེས་འབྲངས་ནས། །བླ་མའི་ཁ་ལས་རྟོགས་པར་བྱ། །ཞེས་གསུངས་པ་དང་། དེ་འདྲ་བ་

---

^{[མ་དཔེ་གཟིགས་ན་འདིར་གནོན།]}

ཤིང་རྟ་ཆེན་པོ་རྣམས་ཀྱིས་གསུངས་པ་ལ་རྨད་དུ་བྱུང་བའི་ངེས་པ་རྙེད་པར་འགྱུར་རོ། །དེ་ལྟར་གྱུར་ན་རྡོ་རྗེ་འཆང་གི་གདམས་པའི་མཐར་ཐུག་རྩ་བ་དང་བཤད་པའི་རྒྱུད་རྣམས་གདམས་ངག་གཅིག་ཏུ་འཆར་ཞིང་། རྩ་བཤད་ཀྱི་རྒྱུད་རྣམས་ལ་གོ་བ་འཕྲུལ་མར་ཆགས་པས་གདམས་ངག་ལ་ནང་བྱན་ཚུད་པ་ཞེས་པའི་མིང་དོན་དང་མཐུན་པ་ཐོབ་པ་ཡིན་ནོ། །བློ་གྲོས་ཅན་གྱིས་ཕྱོགས་འདིས་རྩ་རྒྱུད་ཀྱི་དོན་ལྷག་མ་ལ་སྦྱོར་བ་ཡང་ཤེས་པར་བྱའོ། །རིམ་པ་འདི་ནི་འདུས་པར་མ་ཟད་རྒྱུད་གཞན་ལ་ཡང་འདྲ་བ་ཡིན་ནོ། །གཉིས་པ་ལ་བཞི། སྤྱན་མས་ཞུས་པའི་ལེའུ། མཱ་མ་ཀཱིས་ཞུས་པའི་ལེའུ། གོས་དཀར་མོས་ཞུས་པའི་ལེའུ། སྒྲོལ་མས་ཞུས་པའི་ལེའུའོ། །དང་པོ་ལ་ལྔ། དྲི་བའི་གཞི་གང་མཐོང་བ། དེ་མཐོང་ནས་ཇི་ལྟར་ཞུས་པ། ཞུས་པ་རྣམས་ལ་ལན་བཏབ་པ། ལན་བཏབ་པའི་དོན་བསྡུ་བ། ལེའུ་ཡི་མཚན་བསྟན་པའོ། །དང་པོ་ལ་གཉིས། རྡོར་སེམས་ཡབ་ཡུམ་མཉམ་པར་བཞུགས་ཚུལ། གསང་བའི་ཆོས་འབྱུང་ལ་བྱང་སེམས་སྤྲོས་ཚུལ་ལོ། །དང་པོ་ནི། བཞུགས་ཞེེས་དྲང་ངོ་། །གང་ན། རྣམ་རྟོག་གིས་མི་ཕྱེད་པའི་ཆོས་རྣམས་ཀྱི་རང་བཞིན་མེད་པའི་སྟོང་པ་ཉིད་དང་། སྙིང་རྗེ་ཆེན་པོ་ལྷན་ཅིག་སྐྱེས་པའི་བདེ་བ་གཉིས་ཡུལ་ཡུལ་ཅན་དུ་རོ་གཅིག་ཏུ་སྦྱོར་བའི་གོ་འཕང་མཆོག་ནི་རྒྱུད་ཀྱི་སྟོན་པ་རྡོ་རྗེ་སེམས་དཔའ་སྟེ་དེའོ། །དེའི་ཁྱད་པར་གཉིས་ལས་དང་པོ་ནི། སྤྱན་མ་ལ་སོགས་པའི་ལྷ་མོ་བཞི་དང་མཉམ་པ་སྟེ་ཡང་དག་པར་ལྡན་པའོ། །འདིའི་

---

^{[མ་དཔེ་གཟིགས་ན་འདིར་གནོན།]}

འགྲེལ་པ་ཆེ་ཆུང་གཉིས་ལས་མཉམ་པར་ལྡན་པའི་དོན་དབུས་ཀྱི་རྡོར་སེམས་ལ་ལྷ་མོ་བཞིས་མཚམས་བཞི་ནས་བསྐོར་བ་ལ་བཤད་ཅིང་། འགྲེལ་པ་ཆེ་བ་ལས་ཡང་ན་བསྙེན་པ་ལ་སྤྱན་མ། ཉེར་སྒྲུབ་ལ་མཱ་མ་ཀཱི། སྒྲུབ་པ་ལ་གོས་དཀར་མོ། སྒྲུབ་ཆེན་ལ་སྒྲོམ་མ་རང་གི་རིག་མར་བྱས་པ་ལ་བཤད་དོ། །ཞིང་ཞེས་པ་ནི་ཁྱད་པར་འོག་མ་སྡུད་པའོ། །ཁྱད་པར་གཉིས་པ་ནི། རྡོར་སེམས་དེ་ཡང་རྣམ་སྣང་ལ་སོགས་པའི་སངས་རྒྱས་ཀྱི་གཟུགས་ཏེ་སྐུས་ཉེ་བར་བརྒྱན་པ་སྟེ། ལུས་ཀྱི་དཀྱིལ་འཁོར་དང་ལྡན་པའོ། །བྱ་བ་གང་ལ་བཞུགས་ན། ཤིན་ཏུ་སྟེ་མཆོག་ཏུ་དགའ་བའི་ཡེ་ཤེས་བསྐྱེད་པའི་ཐབས་ཤེས་མཉམ་པར་སྦྱོར་བའི་མཛད་པ་ཆེན་པོ་ལའོ། །རྩ་བའི་རྒྱུད་ལས་དེ་བཞིན་གཤེགས་པ་རྣམ་སྣང་ཆེན་པོ་ཆགས་ཆེན་གྱི་ཚུལ་གྱིས་ཏིང་ངེ་འཛིན་ལ་ཞུགས་ནས་འཁོར་གྱི་དེ་བཞིན་གཤེགས་པ་ཐམས་ཅད་རང་གི་སྐུ་ལ་བཅུག་པ་ན། དེ་རྣམས་ཀྱིས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་བདག་པོ་མཉེས་པར་བྱ་བའི་ཕྱིར་དུ། ཉིད་ཀྱི་སྐུ་སྤྱན་མ་ལ་སོགས་པ་བཞི་དང་། གཟུགས་རྡོ་རྗེ་མ་ལ་སོགས་པ་ལྔ་སྟེ། ལྷ་མོ་དགུའི་གཟུགས་སུ་སྤྲུལ་པར་གསུངས་ཏེ། རྣམ་སྣང་དང་བདག་པོ་ནི་རྡོ་རྗེ་སེམས་དཔའ་ཡིན་ལ། མཉེས་པ་ནི་མཆོག་ཏུ་དགའ་བའི་བདེ་བས་ཚིམ་པར་བྱ་བའི་ཕྱིར་དུ་སྤྲུལ་པར་སྒྲོན་གསལ་ལས་གསུངས་པས། སྤྱན་མ་ལ་སོགས་པ་དང་སྙོམས་པར་ཞུགས་པས་ལྷན་སྐྱེས་ཀྱི་བདེ་བ་བསྐྱེད་པའི་དོན་ཏེ། རྩ་བའི་རྒྱུད་བཞིན་དུ་འདིར་ཡང་སྦྱར་བར་

---

^{[མ་དཔེ་གཟིགས་ན་འདིར་གནོན།]}

བྱའོ། །དུས་ནི་དུས་ཆེན་པོ་འཁོར་བ་ཇི་སྲིད་བར་རོ། །ཏེ་ནི་ལྷག་མ་འདྲེན་པའོ། །གཉིས་པ་ནི། རྡོར་སེམས་དེ་ལྟར་བཞུགས་ནས་ཅི་ཞིག་མཛད་ཅེ་ན། ཕུང་པོ་ལ་སོགས་པའི་ཆོས་ཀྱི་དབྱིངས་ཏེ་རྒྱུ་བྱང་སེམས་ཀྱི་ཏིག་ལེ་ནི་ཞུ་བ་མཛད་དོ། །ཇི་ལྟར་ན། ཡུམ་གྱི་ཆོས་ཀྱི་འབྱུང་གནས་པད་མ་ལ་བྱང་ཆུབ་ཀྱི་སེམས་ཐིག་ལེ་སྤྲོས་པ་སྟེ་ཕབ་ནས་སུ་ཞུ་བར་མཛད་དོ། །ཆོས་འབྱུང་དེ་གསང་བར་བྱ་བ་ཆེན་པོ་སྟེ་མཆོག་ཏུ་གསུངས་པ་ནི། དེའི་ངེས་པའི་དོན་དེ་ལྟར་ཡིན་པས་དེ་ལའང་དེ་སྐད་ཅེས་བྱ་སྟེ། ངེས་པའི་དོན་ནི་གསང་བ་གྲུབ་པ་ལས། ཆོས་ཀྱི་འབྱུང་གནས་སྤངས་པ་ཡི། །ཆོས་གནས་དག་པ་གཞན་དག་མེད། །གད་ལ་སངས་རྒྱས་ཀུན་འབྱུང་ཞིང་། །སངས་རྒྱས་བྱང་ཆུབ་རབ་གནས་པའོ། །ཞེས་སངས་རྒྱས་ཀྱི་ཡོན་ཏན་གྱི་ཆོས་ཀུན་འབྱུང་བའི་གནས་སུ་གྱུར་པའི་དག་པའོ། །དག་པ་ཡང་དེ་ཉིད་ལས། གང་ཞིག་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ཚུལ་དག་གིས། །གནས་ཤིང་དངོས་གྲུབ་བཟང་སྟེར་བ། །ཤེས་རབ་ཅེས་བྱའི་མིང་གི་གནས། །དེ་ལ་གནས་པ་གང་ཡིན་པ། །བྷ་ག་ཞེས་བྱའི་ཡི་གེ་གཉིས། །དག་པའི་དེ་ཉིད་ཤེས་བྱ་སྟེ། །དོན་དམ་པ་སྟེ་བདག་གིས་བསྟེན། །ཞེས་རྒྱལ་བ་ཐམས་ཅད་ཀྱི་སྐུ་གསུང་ཐུགས་མཚོན་པའི་ཟུར་གསུམ་པའི་ཚུལ་གྱིས་ཤེས་རབ་ཀྱི་ལུས་ལ་ཡོད་པའི་བྷ་ག་ཞེས་བྱ་བ་ལ་གནས་པའི་ཨེ་ཝཾ་གྱི་ཡི་གེ་གཉིས་ཀྱི་དོན་ལ་གསུངས་པའོ། །དེ་ལ་ཨེའི་ངེས་དོན་ནི་སྟོང་པ་ཉིད་དང་། ཝའི་ངེས་དོན་ནི་ཐུགས་རྗེ་བདེ་བ་སྟེ། ཝ་ཡིག་གི་ཐིག་

---

^{[མ་དཔེ་གཟིགས་ན་འདིར་གནོན།]}

ལེའི་དོན་དེ་གཉིས་དབྱེར་མེད་པར་སྦྱོར་བའི་རྨད་དུ་བྱུང་བ་ཡིན་ཏེ། རྒྱུད་རྡོ་རྗེ་ཕྲེང་བ་ལས། ཨེ་ནི་སྟོང་པ་ཉིད་དུ་གསུངས། །དེ་བཞིན་ཝ་ནི་ཐུགས་རྗེ་དང་། །ཐིག་ལེ་དེ་གཉིས་སྦྱོར་ལས་བྱུང་། །དེ་སྦྱོར་བ་ཡི་རྨད་མཆོག་གོ །ཞེས་སོ། །དེ་ནི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལ་ཁྱབ་པའི་ཆོས་ཀྱི་ཕྱག་རྒྱ་རྒྱུད་ཀུན་གྱི་གླེང་གཞིའི་ཐོག་མར་གསུངས་པའི་དོན་ལ་བཤད་དོ། །ཡི་གེ་གཉིས་ཀྱི་ངེས་དོན་བྷ་ག་ལ་གནས་པའི་ཚུལ་ནི། ལྷའི་དབང་པོས་ཞུས་པའི་བཤད་རྒྱུད་ལས། ཡི་གེ་ཨེ་ནི་མར་གྱུར་ལ། ཝ་ནི་ཕ་ཞེས་བྱ་བར་གྲགས། །ཐིག་ལེ་དེར་ནི་སྦྱོར་བ་སྟེ། །སྦྱོར་དེ་ཤིན་ཏུ་རྨད་བྱུང་བའོ། །ཞེས་གསུངས་པ་ལྟར་ཡབ་ཡུམ་སྦྱོར་བ་དང་། དེ་གཉིས་ཀྱི་རྟགས་གཉིས་ཐིག་ལེ་དང་བཅས་པ་ལ་ཨེ་ཝཾ་དུ་གསུངས་པའི་རྟགས་ཀྱི་ཨེ་ཝཾ་སྦྱར་བ་ལས་བྱུང་བའི་དོན་ནོ། །ཆོས་འབྱུང་དེ་ཇི་འདྲ་བ་སྙམ་ན་འོད་ཟེར་ཁ་དོག་ལྔ་འཆང་བ་སྟེ་འཛིན་ཞིང་འོད་ཟེར་འཁྲིགས་པ་སྟེ་དེས་དེ་གང་བའོ། །རྩ་བའི་རྒྱུད་ལས། འོད་ཟེར་རྣམ་ལྔས་ཁྱབ་པ་ཡི། །པདྨ་རྡོ་རྗེ་བསྒོམ་པར་བྱ། །ཞེས་གསུངས་པའི་འགྲེལ་པ་སྒྲོན་གསལ་ལས། ཡབ་ཡུམ་སྙོམས་པར་འཇུག་པའི་དུས་སུ་རྡོ་རྗེ་དང་པད་མ་འོད་ཟེར་སྣ་ལྔས་གང་བར་བསྒོམ་པར་གསུངས་པ་དང་མཐུན་པར་འདིར་ཡང་བཤད་དེ། འདིར་ཆོས་འབྱུང་ལ་གསུངས་པ་ནི་མཚོན་པ་ཙམ་མོ། །འགྲེལ་པ་གཉིས་ལས་ཐིག་ལེ་ཡུམ་གྱི་པད་མར་ཕབ་པ་ཡི་གེ་ཀྵུཾ་གི་ངོ་བོར་གནས་པ་འོད་དུ་བྱས་པ་ནི་ཞུ་བའི་དོན་དུ་འཆད་དོ། །སྔོན་བྱུང་འདི་རྗེས་འཇུག་སྒྲུབ་པ་པོས་ཐིག་ལེ་ཕྲ་མོ་བསྒོམ་

---

^{[མ་དཔེ་གཟིགས་ན་འདིར་གནོན།]}

པ་ལ་སྦྱོར་ན། རྡོ་རྗེ་བཞིས་བསྐྱེད་པའི་སྒྲུབ་ཐབས་བསྡུས་པ་ལ་སྦྱོར་ན་དངོས་སུ་ཡིན་ལ། སྒྲུབ་ཐབས་རྒྱས་པའི་ཐིག་ལེ་ཕྲ་མོ་བསྒོམ་པ་ལ་སྦྱོར་ན་མཚན་ཉིད་མཚུངས་པའི་སྒོ་ནས་སྦྱར་རོ། །གཉིས་ལ་གཉིས། ཞུས་པའི་མཚམས་སྦྱོར། ཞུས་པའི་ཚུལ་དངོས་སོ། །དང་པོ་ནི། ཐིག་ལེ་པདྨར་ཞུ་བའི་དངོས་པོ་དེ་མཐོང་ནས་གསོལ་བ་སྟེ། ཞེས་ཚིག་རྣམས་སྦྱར་རོ། །གང་གིས་ན། ལྷ་མོ་སྤྱན་མས་ཡོངས་སུ་ཞུས་སོ། །གང་ལ་ན། ཉོན་མོངས་པའི་ཀུན་ནས་ཉོན་མོངས་པ་ལ་སོགས་པ་བཅོམ་པ་དང་ལྡན་པའི་རྡོ་རྗེ་སེམས་དཔའ་ལའོ། །ཚིག་གང་གིས་ན། འོག་ནས་འབྱུང་བའི་ཚིག་འདི་དག་གིས་ནི་གསོལ་ལོ། །ཚིག་འདི་དག་ནི་ཞེས་ཀྱང་ཁ་ཅིག་ལས་འབྱུང་ངོ་། །གཉིས་པ་ལ་གཉིས། །སོ་སོའི་དྲི་བ། ཐུན་མོང་གི་དྲི་བའོ། །དང་པོ་ལ་དྲུག །དང་པོའི་འབྱུང་ཁུངས་ཞུས་པ། དེ་ནས་འོངས་པའི་ལམ་ཞུས་པ། སླར་བསྡུས་ཏེ་འགྲོ་བའི་ཚུལ་ཞུས་པ། སེམས་ཅན་སྐྱེ་བའི་རིམ་པ་ཞུས་པ། ལས་ཉོན་གྱི་གཞི་ཞུས་པ། འོད་གསལ་ལས་ལྡང་བའི་ཚུལ་ཞུས་པའོ། །དང་པོ་ནི། ཆོས་ཀྱི་དབྱིངས་བྱང་ཆུབ་ཀྱི་སེམས་རྣམས་ཡུམ་གྱི་པད་མར་འཕྲོ་བ་སྟེ་སྤྲོས་པ་ནི་དང་པོ་གནས་གང་ལས་སྐྱེ་བར་འགྱུར་བ་ལགས་ཞེས་དང་པོའི་འབྱུང་ཁུངས་ཞུས་སོ། །འདིའི་ལན། དེ་ཉིད་ཡེ་ཤེས་ལྔ་ཡི་དངོས། །ཞེས་སོགས་ཀྱིས་རླུང་གི་དེ་ཉིད་སྟོན་པར་རིམ་ལྔ་ལས་གསུངས་པས། དྲི་བའི་སྐབས་སུ་ཡང་ཐིག་ལེ་རྐྱང་པ་དྲིས་པ་མིན་གྱི་རླུང་དང་ཐིག་ལེ་འདྲེས་པའི་རླུང་ཡང་དྲིས་པ་ཡིན་ནོ། །

---

^{[མ་དཔེ་གཟིགས་ན་འདིར་གནོན།]}

རླུང་དང་ཐིག་ལེ་འདྲེན་མར་འབྱུང་བ་ནི། རྒྱུད་ཕྱི་མ་ལས། ཡེ་ཤེས་ལྔ་ཡི་རང་བཞིན་དབུགས། །འབྱུང་བ་ལྔ་ཡི་ངོ་བོ་ཉིད། །གོང་བུའི་གཟུགས་ཀྱིས་ཕྱུང་ནས་ནི། །སྣ་ཡི་རྩེ་མོར་རབ་ཏུ་བརྟག །ཅེས་ཡེ་ཤེས་ལྔའི་དབུགས་ཏེ་རླུང་རྣམས་གོང་བུ་སྟེ། ཐིག་ལེའི་གཟུགས་ཀྱི་ཡུམ་གྱི་པདྨར་འབྱུང་བར་སྒྲོན་གསལ་ལས་གསུངས་སོ། །ཚུལ་དེ་ནི་འོངས་པའི་ལམ་དང་ཕྱིར་སྡུད་པའི་དྲིས་ལན་གཉིས་ལ་ཡང་འདྲའོ། །མདོ་བསྲེ་ལས། རྩ་རྒྱུད་ལེའུ་དང་པོར་སྔར་བཤད་པ་ལྟར་ལྷ་མོ་དགུའི་གཟུངས་དཀྱིལ་སྤྲུལ་པ་དེ། བཅོམ་ལྡན་འདས་ཀྱིས་བྱང་ཆུབ་ཀྱི་གོ་འཕང་ནི་འདོད་ཆགས་ལས་སྐྱེ་བར་བསྟན་པའི་ཕྱིར་ཡིན་ལ། སྔོན་བྱུང་དང་མཐུན་པར་རྗེས་འཇུག་གིས་ཀྱང་དང་པོ་སྦྱོར་བའི་སྐབས་སུ་རིག་མ་འདུ་བྱས་ནས་སྙོམས་པར་འཇུག་པར་བྱ་བར་བསྟེན་པར་གསུངས་ལ། ལྷ་མོ་བཞི་དང་མཉམ་ལྡན་ཞིང་། །ཞེས་སོགས་ཀྱིས་ཀྱང་གཟུངས་དཀྱིལ་སྤྲུལ་པ་དེ་འཆད་པ་ཡིན་ནོ། །དེས་ན་བྱང་ཆུབ་ཀྱི་གོ་འཕང་ནི། སྐྱེ་འཆི་བར་དོ་གསུམ་སྐུ་གསུམ་དུ་བསྒྱུར་བའི་སྐུ་གསུམ་མོ། །དེ་འདོད་ཆགས་ལས་སྐྱེ་བ་ནི་སྤྱན་མ་ལ་སོགས་པའི་རིག་མས་སྔར་བཤད་པའི་ཨེ་ཝཾ་གྱི་ངེས་དོན་མཆོག་ཏུ་དགའ་བའི་ཡེ་ཤེས་བསྐྱེད་པའི་སྒོ་ནས་ཡིན་ཏེ། དེ་ནི་ཕྱིའི་རྐྱེན་ཕྱག་རྒྱ་ལ་བརྟེན་ནས་སྟོང་པ་བཞིའི་ཡེ་ཤེས་བསྐྱེད་པའོ། །དེའི་ནང་གི་རྐྱེན་སྲོག་རྩོལ་རླུང་གི་རྣལ་འབྱོར་ནི། སྤྱན་མ་སོགས་དང་སྙོམས་པར་ཞུགས་པའི་བྱང་སེམས་ཡུམ་གྱི་པད་མར་ཕྱུང་བའི་དང་པོའི་འབྱུང་ཁུངས་གང་ཡིན་སོགས་དྲིས་པའི་ལན་

---

^{[མ་དཔེ་གཟིགས་ན་འདིར་གནོན།]}

གྱིས་སྟོན་ནོ། །དེའི་ཕྱིར་རྒྱུད་འདིས་འོད་གསལ་མངོན་དུ་འགྱུར་བའི་ཐབས་སྲོག་རྩོལ་རླུང་གི་རྣལ་འབྱོར་གཙོ་བོར་སྟོན་པ་ཡིན་ཞིང་། རྩ་རྒྱུད་ཀྱི་ཡང་གཙོ་བོར་གཟུངས་དཀྱིལ་སྤྲུལ་པ་འཆད་པ་ཡིན་ནོ། །བཤད་རྒྱུད་དགོངས་པ་ལུང་སྟོན་དུ་ཡང་གཟུངས་དཀྱིལ་སྤྲུལ་པའི་ལྷ་མོ་དགུ་སོར་བཞག་ཏུ་མཛད་པ་གཅིག་དང་། ལྷ་མོ་དགུ་རླུང་བཅུ་ལ་བཤད་པ་གཅིག་དང་གཉིས་བྱུང་བ་ཡང་། སྔར་བཤད་པའི་ཕྱི་ནང་གི་རྐྱེན་གཉིས་སྟོན་པར་ཤེས་པར་བྱ་སྟེ། དེའི་ལྟར་ན་སྤྱན་མ་སོགས་བཞིས་ནི་ངེས་དོན་དུ་ན་འབྱུང་བ་བཞིའི་རླུང་གི་དེ་ཉིད་སྟོན་ནོ། །གཉིས་ནི། ཡུམ་གྱི་པདྨར་ཞུ་བའི་ཐིག་ལེ་དེ་དང་པོའི་འབྱུང་ཁུངས་ཀྱི་གནས་དེ་ནས་ཇི་ལྟར་འོངས་པའི་ལམ་གང་ཡིན་ཞེས་ལམ་ཞུས་སོ། །གསུམ་པ་ནི། དང་པོ་ཇི་ལྟར་འོངས་པའི་ལམ་ཞུས་པ་དེ་བཞིན་དུ་མཐར་ཕྱིར་ཇི་ལྟར་འགྲོ་བ་ཡང་ཞུས་པ་སྟེ། དེའི་དོན་ནི་ལུས་ཀྱི་ཕྱི་ནང་གཉིས་ཀྱི་ཕྱི་རོལ་ཏུ་ཇི་ལྟར་འགྲོ་དྲིས་པ་མིན་ཏེ། ཡབ་ཀྱི་གསང་བའི་རྡོ་རྗེ་ལས་ཕྱི་རོལ་ཏུ་འགྲོ་བ་ནི་མཐོང་ནས་དྲིས་པ་ཡིན་པས་སླར་དྲི་མི་དགོས་ལ། ཐིག་ལེ་དབང་པོའི་སྒོ་རྣམས་སུ་ཕྱི་རོལ་ཏུ་འགྲོ་བའང་དྲིས་པ་མིན་ཏེ། ཡིན་ན། སྒོ་དགུ་ལ་ནི་ཀུན་ཏུ་འགྲོ། །ཞེས་པ་ལན་དུ་བྱ་དགོས་ན། དེ་ནི་ལུས་རིམ་གྱིས་བསྐྱེད་པའི་ཚུལ་སྟོན་པར་སྣང་བས་དྲི་བ་བཞི་པའི་ལན་དུ་སྣང་བའི་ཕྱིར། དེའི་ལན་མིན་ནོ། །དེས་ན་ཕྱིར་འགྲོ་བའི་ཕྱིར་ནི་སླར་གྱི་དོན་དང་། འགྲོ་བ་ནི་གང་དུ་འདུ་བའི་གནས་སུ་འགྲོ་བ་སྟེ། དེང་སྡུད་པའི་

---

^{[མ་དཔེ་གཟིགས་ན་འདིར་གནོན།]}

དོན་ནོ། །བཞི་པ་ནི། གང་རྐང་པ་དང་ལག་པ་ལ་སོགས་པའི་ཡན་ལག་མེད་པའི་ཐིག་ལེ་དེ་ནི། ལག་པ་ལ་སོགས་པའི་ཡན་ལག་དང་བཅས་པར་སྐྱེས་པར་གྱུར་ནས་སུ་སེམས་ཅན་གྱི་ལུས་ཀྱི་དངོས་པོ་རགས་པར་འགྱུར་བའི་ཚུལ་ཇི་ལྟར་ལགས་ཞེས་སྤྱིར་ཞུས་སོ། །དེ་ཉིད་ལ་ཁྱད་པར་སྐྱེད་བྱེད་ཀྱི་སྒོ་ནས་ཞུས་པ་ནི་མིག་གི་དབང་པོ་ནས་ཡིད་ཀྱི་དབང་པོའི་བར་དྲུག་པོ་རྣམས་སུ་ཐིག་ལེ་རླུང་དང་བཅས་པ་འཇུག་པ་དང་། དེར་མ་ཟད་གཟུགས་ལ་སོགས་པའི་ཕུང་པོ་ལྔའི་དངོས་པོ་རྣམས་དང་། ཁམས་བཅོ་བརྒྱད་དམ་བཞི་རྣམས་སུ་ཐིག་ལེ་རླུང་བཅས་འཇུག་པའང་ཇི་ལྟར་ལགས་ཞེས་སེམས་ཅན་སྐྱེ་བའི་རིམ་པ་ཇི་ལྟར་ཡིན་ཞུས་སོ། །ལྔ་པ་ནི། མ་རིག་པའི་བག་ཆགས་དང་བསྲེས་པ་ཡིས་འཁོར་བར་བཅིངས་པའི་སེམས་ཅན་རྣམས་ཀྱི་ཉོན་མོངས་པ་འདོད་ཆགས་དང་། སོགས་ཀྱི་སྒྲས་ཞེ་སྡང་སོགས་ཀྱི་ཉོན་མོངས་དང་། དེས་ཀུན་ནས་བསླངས་པའི་ལས་ཀྱིས་རྣམ་པར་ཤེས་པ་ལ་ལས་ཀྱི་བག་ཆགས་སྣ་ཚོགས་པ་བཞག་པ་དེ་རྣམས་དངོས་སུ་ན་རྩ་བ་གང་དུ་འདུས་པའི་འདུས་ཚུལ་ཇི་ལྟར་ལགས་ཞེས་ལས་དང་ཉོན་མོངས་པའི་གཞི་ཞུས་སོ། །དྲུག་པ་ནི། དངོས་པོ་སྟེ་རང་བཞིན་མེད་པ་འོད་གསལ་སྒོམ་པ་ལས་ལྷའི་གཟུགས་དམིགས་པ་དང་བཅས་པར་ལྡང་བ་ཇི་ལྟར་ལགས་ཞེས་ཞུས་ཏེ། ཐེ་ཚོམ་གྱི་རྒྱུ་ནི། དེའི་ཚེ་གཟུགས་དང་སོགས་ཀྱིས་བསྡུས་པ་སྒྲ་དྲི་རོ་རེ་བྱ་ཆོས་ཏེ་དབང་པོ་དྲུག་གི་སྤྱོད་ཡུལ་གྱི་མཚན་ཉིད་རྣམས་རང་བཞིན་མེད་ཅིང་དམིགས་སུ་མེད་པའི་ཕྱིར་རོ་སྙམ་

---

^{[མ་དཔེ་གཟིགས་ན་འདིར་གནོན།]}

ནས་ཞུས་པའོ། །གཉིས་པ་ནི། སྤྱན་མ་བདག་གིས་ཐེ་ཚོམ་ཞུས་པའི་དྲི་བ་དྲུག་པོ་ངོ་མཚར་ཆེན་པོ་ཅན་དེ་དག་ནི་ལྷའི་གཙོ་བོ་རྡོ་རྗེ་སེམས་དཔའ་ཁྱེད་ཀྱིས་ལན་བཀའ་སྩལ་ནས་ཐེ་ཚོམ་ཆོད་ཅིག་ཅེས་སྤྱིར་ཞུས་ཏེ། འདི་ནི་སྔར་གྱི་དྲི་བ་རེ་རེའི་མཐར་དོན་གྱིས་འཐོབ་བོ། །གསུམ་པ་ལ་གཉིས། ལན་འདེབས་པའི་མཚན་སྦྱོར་ལན་གདབ་པ་དངོས་སོ། །དང་པོ་ནི་སྔར་བཤད་པ་དེ་ལྟར་ཞུས་མ་ཐག་ཏུ་ནི་དེའི་ལན་བཅོམ་ལྡན་འདས་རྡོ་རྗེ་སེམས་དཔས་གསུངས་སོ་ཞེས་སྡུད་པ་པོའི་ཚིག་གིས་མཚམས་སྦྱར་རོ། །གཉིས་པ་ལ་བཞི། ཞུ་མཁན་གྱི་ཆེ་བ་བརྗོད་དེ་ཉན་པར་བསྐུལ་བ། དྲིས་པའི་དོན་རྟོགས་དཀའ་བར་བསྟན་པ། དྲི་བའི་ཆེ་བ་བརྗོད་དེ་བཤད་པར་ཞལ་གྱིས་བཞེས་པ། དྲི་བ་སོ་སོའི་ལན་རྒྱས་པར་བཤད་པའོ། །དང་པོ་ནི། དཔག་དཀའ་བའི་གནས་འབྱེད་པར་ནུས་པའི་ཤེས་རབ་ཟབ་པ་དང་། སྤོབས་པ་མ་གཏུགས་པའི་ཤེས་རབ་ཟད་པ་མེད་པ་ནི་གང་ལ་མངའ་བའི་སྤྱན་མ་ཞེས་ཞུ་བ་པོའི་ཆེ་བ་བརྗོད་དེ་བོས་ནས། སྣོད་ཁ་སྦུབ་པ་ལ་སོགས་པའི་ཉན་པ་པོའི་སྐྱོན་གསུམ་དང་བྲལ་བར་ཉོན་ཅིག་དང་། དྲིས་པའི་ལན་རྣམས་བཤད་པར་བྱའོ་ཞེས་ཉན་པར་བསྐུལ་ལོ། །གཉིས་པ་ལ་གསུམ། བརྟག་དཔྱད་མཁན་གྱིས་རྟོགས་དཀའ་བ། ཉན་རང་གིས་རྟོགས་དཀའ་བ། དེ་དག་ལས་གཞན་པའི་སོ་སྐྱེས་རྟོགས་དཀའ་བར་བསྟན་པའོ། །དང་པོ་ནི། འདིར་གང་གིས་མི་ཤེས་པར་གསུངས་པའི་གང་ཟག་ནི་ཉན་རང་གཉིས་དང་

---

^{[མ་དཔེ་གཟིགས་ན་འདིར་གནོན།]}

གྲུབ་མཐའ་ལ་ཞུགས་པའི་སོ་སྐྱེ་དང་། མ་ཞུགས་པའི་སོ་སོ་སྐྱེ་བོའོ། །གང་མི་ཤེས་པར་གསུངས་པའི་དོན་ནི་འགྲེལ་པ་གཉིས་ཀྱིས་ཆོས་ཉིད་ལ་བཤད་ཀྱང་། སྔར་དྲིས་པའི་དོན་དེ་རྣམས་མི་ཤེས་པར་སྟོན་པའི་སྐབས་ཡིན་པས་ཆོས་ཉིད་ཁོ་ན་ལ་མི་བྱ་ལ། ཆོས་ཉིད་ཀྱང་སྐབས་འདིར་བདེ་སྟོང་གཉིས་ཡུལ་ཡུལ་ཅན་དུ་སྦྱར་བའི་དོན་དམ་ལ་བྱའི་སྟོང་པ་ཉིད་ཙམ་ལ་མིན་ནོ། །སཾ་བྷུ་ཊ་ལས་ཀྱང་ཉན་རང་གིས་མི་ཤེས་པའི་བར་འདི་དང་མཐུན་པར་འབྱུང་མོད་ཀྱང་། མི་ཤེས་པའི་དོན་དེར་བཤད་པ་ལས་གཞན་མང་པོ་ཞིག་འདིར་ཡོད་པས་གཅིག་ཏུ་མི་བཟུང་ངོ་། །དེ་ལ་ཉན་རང་དང་གྲུབ་མཐའ་ལ་མ་ཞུགས་པའི་སོ་སྐྱེས་མི་ཤེས་པ་ནི་སྒྲ་སོར་བཞག་གིས་ཆོག་ལ། གྲུབ་མཐའ་ལ་ཞུགས་པའི་སོ་སོ་སྐྱེ་བོ་ནི་གསང་སྔགས་བླ་མེད་ལ་བརྟེན་ནས་དེ་དག་གི་དོན་རྟོགས་པའི་སོ་སོ་སྐྱེ་བོ་རྣམས་མ་གཏོགས་མོད། འོན་ཀྱང་དྲི་བ་དེ་དག་གི་དོན་ཡོངས་སུ་རྫོགས་པར་མཁྱེན་ནས་རང་དབང་དུ་ལན་འདེབས་པ་ནི། སངས་རྒྱས་ཉག་གཅིག་ཡིན་པས་སངས་རྒྱས་ཀྱི་སྤྱོད་ཡུལ་དུ་གསུངས་སོ། །དཔྱད་དུ་མེད་པ་ནི་བརྟག་པར་བྱ་བ་མིན་པར་མན་ངག་སྙེ་མར་འབྱུང་བ་ལྟར་ཡིན་ལ། དེ་ནི་དོན་རགས་པ་ཡུལ་དུ་བྱེད་པའི་སོ་སོ་སྐྱེ་བོའི་བློས་མི་ཤེས་པའོ། །ཤེས་བྱ་མིན་པ་ནི་རྣམ་པར་ཤེས་པར་བྱ་བ་མིན་པར་མན་ངག་སྙེ་མར་འབྱུང་བ་ལྟར་ཡིན་ལ། དེ་ནི་རྣམ་པར་ཏེ་ཁྱད་པར་ཞིབ་པ་དཔྱོད་པའི་སོ་སྐྱེའི་བློས་མི་ཤེས་པ་སྟེ། དེ་གཉིས་ནི་རང་གི་སྡེ་པའི་དབང་དུ་བྱས་པའོ། །རང་གི་སྡེ་བས་

---

^{[མ་དཔེ་གཟིགས་ན་འདིར་གནོན།]}

མི་ཤེས་པ་དེ་བཞིན་དུ་དཔྱད་མཁན་ཏེ་ཕྱི་རོལ་པའི་རྟོག་གེ་བ་རྣམས་ཀྱིས་ཤེས་པར་དཀའ་འོ། །སཾ་བྷུ་ཊ་ལས། དེ་བཞིན་རྟོག་གེ་པས་མི་རྟོགས། །ཞེས་པའི་དོན་མན་ངག་སྙེ་མར་ཕྱི་རོལ་པ་ལ་བཤད་དོ། །འོ་ན་དྲིས་པའི་དོན་དེ་རྣམས་སུའི་སྤྱོད་ཡུལ་ཡིན་སྙམ་ན། ཡང་དག་པར་རྫོགས་པའི་སངས་རྒྱས་ཀུན་གྱི་སྤྱོད་ཡུལ་དུ་གྱུར་པའི་གསང་ཆེན་ཡིན་ལ། དེ་ནི་ནམ་མཁའ་སྟེ་དེ་དང་འདྲ་བའི་འོད་གསལ་ནམ་མཁའ་སྟེ་དེའི་རྣམ་པ་ཇི་བཞིན་དུ་ཞུགས་པའི་ཡེ་ཤེས་ཀྱི་སྤྱོད་ཡུལ་ལོ། །འདི་ནི་དྲི་བ་དྲུག་པོ་དེ་རྣམས་ཀྱི་གཙོ་བོ་འོད་གསལ་དང་ཟུང་འཇུག་གི་དབང་དུ་མཛད་པའོ། །གཉིས་པ་ནི། དེ་ལྟར་སོ་སོ་སྐྱེ་བོས་མི་ཤེས་ན་འཕགས་པ་ཉན་ཐོས་དང་། རང་སངས་རྒྱས་ཀྱིས་ཤེས་སམ་སྙམ་ན། ཉན་ཐོས་རྣམས་ཀྱིས་ཀྱང་དྲི་བ་དེ་དག་གི་དོན་ཤེས་པ་མིན་ནོ། །དེའི་རྒྱུ་མཚན་ནི། དེ་དག་གི་དོན་ཤེས་པ་ལ་གེགས་སུ་གྱུར་པའི་མི་ཤེས་པའི་མུན་པས་བསྒྲིབས་པས་ནའོ། །རང་སངས་རྒྱས་ཀྱི་སྤྲུལ་པ་སྟེ་བསྐྱེད་པའི་ཡེ་ཤེས་དེ་དག་ཀུན་གྱིས་ཀྱང་མི་ཤེས་སོ། །དེའི་རྒྱུ་ནི། དྲི་བའི་དོན་དེ་དག་ཤེས་པ་ལ་སྒྲིབ་པའི་མ་རིག་པའི་བག་ཆགས་ཀྱི་མཐུ་སད་པའི་རྗེས་སུ་སོན་པའོ། སཾ་བྷུ་ཊར། བག་ཆགས་སད་པའི་ཡེ་ཤེས་གང་། །རང་སངས་རྒྱས་ཀྱི་སྤྲུལ་པ་སྟེ། ཞེས་འབྱུང་ངོ་། །གཞུང་འདིར། སྤྱོད་ཡུལ་བག་ཆགས་ཤེས་མཁན་ནི། །རང་སངས་རྒྱས་སུ་སྤྲུལ་པ་སྟེ། །ཞེས་འབྱུང་བའི་དོན། གཟུགས་སོགས་ཕྱིའི་སྐྱེ་མཆེད་དྲུག་བག་ཆགས་ཀྱི་དབང་གིས་

---

^{[མ་དཔེ་གཟིགས་ན་འདིར་གནོན།]}

སྣང་མོད་ཀྱང་། ཀུན་བཏགས་པ་ཙམ་དུ་རྟོགས་པ་ནི་ཤེས་མཁན་ཡིན་ལ། དེ་ནི་རང་སངས་རྒྱས་སུ་སྤྲུལ་པའོ་ཞེས་འགྲེལ་པ་ལས་འཆད་དོ། །གསུམ་པ་ནི། གལ་ཏེ་ཚངས་པ་ལ་སོགས་པས་འཇིག་རྟེན་ཆགས་པ་སོགས་ཤེས་པས་དེ་དག་གིས་ཤེས་པར་མི་རུང་ངམ་སྙམ་ན། སོ་སོའི་སྐྱེ་བོ་དེ་རྣམས་ཀྱིས་ཀྱང་མི་ཤེས་ཏེ། དེ་དག་གིས་མ་འོངས་པ་དང་འདས་པ་དང་ད་ལྟར་བྱུང་བའི་དུས་གསུམ་ལ་སྟེ། གསུམ་དུ་དེ་ཁོ་ན་ཉིད་ཀྱི་དོན་ཤེས་པ་མེད་པའི་ཕྱིར་རོ། །བྱོལ་སོང་ལ་སོགས་པ་རིག་པ་དང་ལྡན་པ་འགའ་ཡོད་པས་དེ་དག་གིས་ཤེས་མི་ནུས་སམ་སྙམ་ན། བྱོལ་སོང་གི་བག་ཆགས་ནི་མི་དགེ་བའི་ལས་སོ། །དེ་ལས་བྱུང་བའི་དུད་འགྲོ་དང་ཡི་དྭགས་ཀྱི་སྐྱེ་བ་པ་རིག་པ་དང་ལྡན་པ་དེ་རྣམས་ཀུན་གྱིས་ཀྱང་མི་ཤེས་སོ། །དེས་ན་དྲི་བའི་དོན་དེ་དག་ནི་སངས་རྒྱས་རྣམས་ཀྱི་སྤྱོད་ཡུལ་དུ་གྱུར་པའི་གསང་བ་ཆེན་པོ་ཡིན་པས། དེའི་ལན་ཡང་རང་དབང་དུ་སངས་རྒྱས་མ་གཏོགས་པས་འཆད་པར་མི་ནུས་སོ། །གསུམ་པ་ནི། རྒྱུད་རྣམས་སུ་གསུངས་པའི་རྫོགས་རིམ་ནི་རྣལ་འབྱོར་གཞན་ལ་ལྟོས་ན། སྙིང་པོའོ། །ཤིན་ཏུ་སྙིང་པོ་ནི་དེ་རྣམས་ཀྱི་ཡང་སྙིང་པོར་གྱུར་པ་རྡོ་རྗེའི་བཟླས་པ་ནས་ཟུང་འཇུག་གི་བར་མཆོག་ཏུ་གྱུར་པ་སངས་རྒྱས་ཀུན་གྱི་གསང་བ་ཆེན་པོའི་མན་ངག་གང་ཡིན་པ་དེ་ནི། ལྷ་མོ་སྤྱན་མ་ཁྱོད་ལ་བཤད་པར་བྱའོ། །ཞེས་དྲིས་པའི་ལན་རྣམས་བཤད་པར་ཞལ་གྱིས་བཞེས་སོ། །དེ་ཡང་རྡོ་རྗེ་བཟླས་པའི་དམིགས་པ་རླུང་གི་དེ་ཉིད་དང་། བདག་བྱིན་གྱིས་བརླབ་པའི་གཞི་རླུང་སེམས་ཙམ་གྱི་

---

^{[མ་དཔེ་གཟིགས་ན་འདིར་གནོན།]}

གཉུག་མའི་ལུས་དང་། གཞིའི་འོད་གསལ་གང་སེམས་ཅན་ཐམས་ཅད་ལ་རང་གི་བདག་ཉིད་དུ་གནས་པ་དེ་དག་གི་དབང་དུ་བྱས་པའི་རྫོགས་རིམ་འཆད་པའོ། །འགྲེལ་པ་གཉིས་ལས་སྙིང་པོ་སྐུ་གསུང་ཐུགས་དང་། དེའི་རང་བཞིན་རྡོར་སེམས་ཀྱི་ངོ་བོ་མི་རྟོག་ཡེ་ཤེས་ཤིན་ཏུ་སྙིང་པོ་མཆོག་དང་། དེའི་ངོ་བོ་སྣོད་བཅུད་ཀུན་གྱི་རང་བཞིན་དུ་ཁྱབ་པར་བཤད་ཅིང་། འགྲེལ་པ་ཆེ་བ་ལས་སྙིང་པོ་ཕྱི་དཀྱིལ་དང་། ཤིན་ཏུ་སྙིང་པོ་ལུས་དཀྱིལ་ཕྲ་མོའི་ཏིང་ངེ་འཛིན་ལ་བཤད་ཅིང་། རིམ་ལྔའི་འགྲེལ་པ་རྣམས་སུ་ཡང་དེ་གཉིས་ཀྱི་དོན་མང་དུ་བཤད་སྣང་ནའང་། སྔར་བཤད་པ་ཉིད་གཞུང་ལ་གནས་པར་མཐོང་ངོ་། །ཡང་འགྲེལ་པ་གཉིས་ལས་ཚིགས་བཅད་འདིས་དང་པོའི་འབྱུང་ཁུངས་ཀྱི་ལན་བསྟན་པར་འཆད་མོད་ཀྱང་། དྲི་བ་སྤྱིའི་ལན་དུ་འཐད་དོ། །བཞི་པ་ལ་དྲུག །དང་པོའི་འབྱུང་ཁུངས་ཀྱི་ཞུས་ལན། སླར་བསྡུས་ཏེ་འགྲོ་བའི་ཚུལ་གྱིས་ཞུས་ལན། དེ་ནས་འོངས་པའི་ལམ་གྱི་ཞུས་ལན། སེམས་ཅན་སྐྱེ་བའི་རིམ་པའི་ཞུས་ལན། ལས་ཉོན་གྱི་གཞིའི་ཞུས་ལན། འོད་གསལ་ལས་ལྡང་བའི་ཚུལ་གྱི་ཞུས་ལན་ནོ། །དང་པོ་ལ་གཉིས། རྡོར་བཟླས་ཀྱི་དམིགས་པ་རླུང་གི་དེ་ཉིད་བསྟན་པ། དེའི་རྩ་བའི་གནས་མི་ཤིགས་པའི་ཐིག་ལེ་བསྟན་པའོ། །དང་པོ་ནི། རླུང་དང་ཐིག་ལེའི་བྱང་ཆུབ་ཀྱི་སེམས་རང་བཞིན་གྱིས་དག་ཅིང་འོད་གསལ་བ་ཞེས་པའོ། །ཡང་ན་བྱང་ཆུབ་ཀྱི་སེམས་དག་ཅེས་པའི་དག་ནི་གཉིས་ཚིག་ཡིན་པས་རླུང་དང་ཀུན་ཏ་

---

^{[མ་དཔེ་གཟིགས་ན་འདིར་གནོན།]}

ལྟ་བུའི་བྱང་ཆུབ་ཀྱི་སེམས་སོ། །རླུང་ལ་བྱང་ཆུབ་ཀྱི་སེམས་སུ་བཤད་པ་ནི་དགོངས་པ་ལུང་སྟོན་ན་མང་ངོ་། །འོད་གསལ་བ་ནི་ཐིག་ལེའི་ཁ་དོག་དང་རླུང་གི་འོད་ཟེར་རོ། །ཐིག་ལེ་ནི། ཟླ་བ་དང་ཤེལ་དང་མཉམ་པ་སྟེ་འདྲ་བའི་འོད་གསལ་བའོ། །བྱང་ཆུབ་ཀྱི་སེམས་རླུང་དེ་ཉིད་མེ་ལོང་ལྟ་བུ་ལ་སོགས་པའི་ཡེ་ཤེས་ལྔའི་དངོས་པོ་སྟེ། ངོ་བོར་གྱུར་པའི་རླུང་འོད་ཟེར་ལྔ་པ་ཡིན་ལ། དེ་ཉིད་ལ་རྩ་བའི་རྒྱུད་ལས་སྣའི་རྩེ་མོར་ཡུངས་ཀར་གྱི་ཚད་ཙམ་གྱི་རིན་ཆེན་ཁ་དོག་སྣ་ལྔ་པ་བསྒོམ་པར་བྱའོ། །ཞེས་དོན་གཞན་ལ་སྒྲ་འགལ་བའི་དགོངས་པའི་ཚིག་གིས་གསུངས་སོ། །རྩ་རྒྱུད་ལས་སྣའི་རྩེ་མོར་ཡུངས་ཀར་གྱི་ཚད་ཙམ་གྱི་རིན་ཆེན་ཁ་དོག་སྣ་ལྔ་པ་བསྒོམ་པར་གསུངས་པའི་དོན་རྒྱུད་འདིའི། དེ་ཉིད་ཡེ་ཤེས་ལྔ་ཡི་དངོས། །ཞེས་སོགས་ཀྱི་རླུང་གི་དེ་ཉིད་ལ་བཤད་པར་རིམ་ལྔ་ལས་གསུངས་པས། འདིར་ཡུངས་ཀར་ཆེ་བའི་ཚད་ཙམ་ནི་རྩ་རྒྱུད་ཀྱི་གཞུང་འདིའི་བཤད་བྱར་བཀོད་པའོ། །འདིའི་འགྱུར་ནི། རིམ་ལྔ་ལས། ཡུངས་ཀར་གྱི་ནི་འབྲུ་ཚོད་ཙམ། །ཞེས་འབྱུང་ལ། རྩ་རྒྱུད་ལས་ཀྱང་དེ་ལྟར་འབྱུང་ངོ་། །རྒྱུད་འདིར་ཡེ་ཤེས་ལྔ་ཡི་དངོས། ཞེས་གསུངས་པའི་དོན་རྒྱུད་ཕྱི་མ་ལས་གསལ་བར་གསུངས་ཞེས་རིམ་ལྔར་གསུངས་པ་ནི། ཡེ་ཤེས་ལྔ་ཡི་རང་བཞིན་དབུགས། །ཞེས་ཡེ་ཤེས་ལྔའི་ངོ་བོའི་རླུང་ལ་བཤད་པ་ཡིན་ལ། དོན་དེ་སླར་ཡང་རྡོ་རྗེ་ཕྲེང་བས་བཤད་པར་རིམ་ལྔ་ལས་གསུངས་པ་ནི། སྣ་སྒོ་གཡས་ནས་རྒྱུ་བའི་མེའི་རླུང་དམར་པོ་པདྨ་མགོན་པོ་དང་། སྣ་བུག་

---

^{[མ་དཔེ་གཟིགས་ན་འདིར་གནོན།]}

གཡོན་པ་ནས་རྒྱུ་བའི་རླུང་གི་རླུང་ལྗང་སེར་ལས་ཀྱི་མགོན་པོ་དང་། སྣ་བུག་གཉིས་ཀ་ནས་རྒྱུ་བའི་ས་རླུང་སེར་པོ་རིན་ཆེན་མགོན་པོ་དང་། གཉིས་ཀ་ནས་རྒྱུ་བའི་ཆུ་རླུང་དཀར་པོ་རྡོ་རྗེ་མགོན་པོ་དང་། འཆི་བའི་ལུས་ལས་འབྱུང་བའི་ཁྱབ་བྱེད་ཀྱི་རླུང་རྣམ་སྣང་གི་རླུང་དུ་རིགས་ལྔར་ཕྱེ་ནས་གསུངས་སོ། །དེའི་ཕྱིར་ཡེ་ཤེས་ལྔ་གང་གི་རླུང་གང་ཡིན་པ་ཡང་དེས་ཤེས་པར་བྱའོ། །རྩ་རྒྱུད་ལེའུ་གསུམ་པ་ལས། རིན་ཆེན་ཁ་དོག་སྣང་ལྔ་པ། །སྣའི་རྩེ་མོར་བསྒོམ་པར་གསུངས་པ་ནི། རྒྱུད་ཕྱི་མ་ལས། རིན་ཆེན་ཁ་དོག་སྣ་ལྔ་པ། །སྲོག་དང་རྩོལ་བ་ཞེས་བྱར་བཤད། །ཅེས་དེའི་དོན་རླུང་གི་དེ་ཉིད་ལ་བཤད་ལ། རྩལ་རྒྱུད་ལེའུ་དྲུག་པ་ལས། སྣ་ཡི་རྩེ་མོར་ཡུངས་ཀར་བསམ། །ཞེས་གསུངས་པ་དང་། རྩ་རྒྱུད་ལེའུ་གསུམ་པ་ལས། རིན་ཆེན་ཁ་དོག་སྣ་ལྔ་པ། །ཡུངས་ཀར་གྱི་ནི་འབྲུ་ཚད་ཙམ། །སྣའི་རྩེ་མོར་བསྒོམ་པར་གསུངས་པའི་ཡུངས་ཀར་གྱི་སྒྲས་བསྟན་པའི་ངེས་དོན་གྱིས་རླུང་གི་དེ་ཉིད་བསྟན་པར་ཡང་། རྡོ་རྗེ་འཕྲེང་བ་ལས། སྣ་རྩེར་ཡུངས་ཀར་ཞེས་བྱ་བ། །སྲོག་དང་རྩོལ་བའི་བརྟག་པ་སྟེ། །ཞེས་གསལ་བར་གསུངས་སོ། །རྒྱུད་གཉིས་པོ་ལས་དེ་ལྟར་བཤད་པ་དེ་ཉིད་ཀྱིས་རྒྱུད་འདིར་གསུངས་པའི་ཡུངས་ཀར་གྱི་སྒྲའི་ངེས་དོན་ཡང་རླུང་ལ་བཤད་པར་ཤེས་དགོས་པར་རིམ་ལྔའི་དགོངས་པ་ཡིན། སྔར་བཤད་པ་ལྟར་བཤད་དགོས་སོ། །ཡུངས་ཀར་གྱི་འབྲུའི་ཚད་ཙམ་གྱི་སྒྲས་བསྟན་པའི་རླུང་དེའི་དབུས་ན་བཞུགས་པའི་ལྷ་ནི་པད་མ་

---

^{[མ་དཔེ་གཟིགས་ན་འདིར་གནོན།]}

མགོན་པོ་སོགས་ཀྱི་རིགས་ལྔའོ། །རླུང་དེའི་རང་གདངས་སྔགས་ཀྱི་དེ་ཉིད་དུ་བྱིས་པ་ལ་མི་གསལ་བ་རྣལ་འབྱོར་པ་ལ་གསལ་བའི་གཟུགས་ཏེ། རང་བཞིན་ནམ་བདག་ཉིད་ཅན་ནོ། །རིམ་ལྔར། མི་གསལ་གསལ་བའི་བདག་ཉིད་ཅན། །ཞེས་བསྒྱུར་རོ། །དེ་ཉིད་ཡེ་ཤེས་ཞེས་པ་གཞི་ཐིག་ལེ་ལ་སྦྱར་ནས་ཀྱང་བཤད་དུ་རུང་བས་དེའི་ཚེ་ནི་ཇི་ལྟར་རིགས་པར་སྦྱར་ནས་བཤད་དོ། །གཉིས་པ་ནི། གནས་ཞེས་ཁྱད་པར་གྱི་གཞིར་དྲང་ངོ་། །གང་ན་ཡིད་ཀྱི་དངོས་པོ་སྟེ་སེམས་ཀྱི་རྟེན་མི་ཤིགས་པའི་ཐིག་ལེའི་གཟུགས་སོ། །འདི་ནི་སྲོག་འཛིན་གྱི་རླུང་ཕྲ་རགས་གཉིས་ཀྱི་ནང་ནས་ཕྲ་བ་འོད་གསལ་གྱི་རླུང་དང་། ལྷན་ཅིག་སྐྱེས་པའི་རླུང་ཞེས་བཤད་པ་དང་། དང་པོར་མངལ་དུ་བར་དོའི་ཤེས་པ་ཞུགས་པའི་ཕ་མའི་ཁུ་ཁྲག་གི་རིགས་འདྲའི་ཐིག་ལེ་དཀར་དམར་དང་། དེ་རྣམས་ལ་བརྟེན་པའི་ཡིད་དང་། འོད་གསལ་དང་བཅས་པ་ཅི་རིགས་པར་འགྱུར་རོ། །ཐིག་ལེ་དེའི་ཚད་ནི་ཡུངས་ཀར་ཆེ་བའི་ཚད་ཀྱི་ཕྱེད་ཀྱི་ཚད་ཙམ་པ་མཆོག་ཏུ་ཕྲ་བ་སྟེ། འདི་ནི་སྒོམ་པ་པོས་བསྒོམ་པའི་དོན་དུ་གསུངས་པའོ། །གང་དུ་ན། སྙིང་གི་རྩ་འདབ་བརྒྱུད་ཀྱི་པདྨའི་དབུས་ཀྱི་ཨ་ཝ་དྷཱུ་ཏཱིའི་ནང་ནའོ། །དུས་ནི་ཇི་སྲིད་འཚོའི་བར་རྟག་ཏུའོ། །བཤད་རྒྱུད་རྡོར་འཕྲེང་ལས། སྙིང་གིའི་པདྨའི་སྦུབས་མཁའ་ལ། །ཡེ་ཤེས་རྡོ་རྗེ་རྟག་ཏུ་ཞུགས། །ཞེས་གསུངས་པ་དང་། རྒྱུད་འདིར་གསུངས་པ་གཉིས་དོན་འདྲའོ། །ཐིག་ལེ་ཇི་འདྲ་བ་སྙམ་ན་འོད་ཟེར་ཆེན་པོ་ལྔ་འབར་བ་ཅན་ནོ། །སཾ་བྷུ་ཊར། མ་མོ་ཕྱེད་པ་མཆོག་ཏུ་ཕྲ། ཞེས་གསུངས་པ་དང་

---

^{[མ་དཔེ་གཟིགས་ན་འདིར་གནོན།]}

ཕྱེད་ཚད་ཙམ་གྱི་ཞེས་གསུངས་པ་གཉིས་དོན་མི་འདྲ་བར་སྣང་ངོ་། །རྩ་རྒྱུད་ལས། སྣ་རྩེར་ཡུངས་ཀར་གྱི་ཚད་ཙམ་བསྒོམ་པར་གསུངས་པའི་སྣ་རྩེ་ལ་རྡོ་རྗེ་ཕྲེང་བར་གསུངས་པ་ལྟར་གསང་བ་དང་སྙིང་ག་དང་གདོང་གི་སྣ་རྩེ་གསུམ་ཡོད་པའི་གདོང་གི་སྣ་རྩེར་ཕྱག་མཚན་ཕྲ་མོ་དང་། འོད་ཀྱི་ཐིག་ལེ་ཞེས་པ་རླུང་འབྱུང་འཇུག་བསྒོམ་པ་གཉིས་བཤད་པའི་ཕྱི་མ་དང་། སྙིང་གའི་སྣ་རྩེར་སྔགས་ཀྱི་ཐིག་ལེ་མི་ཤིགས་པ་བསྒོམ་པ་དང་། གསང་བའི་སྣ་རྩེར་རྫས་ཀྱི་ཐིག་ལེ་བསྒོམ་པ་གསུམ་རྒྱུད་འདིར་བཤད་དོ། །དེའི་དང་པོ་ནི། དེ་ཉིད་ཡེ་ཤེས་ལྔ་ཡི་དངོས། །ཞེས་པར་བཤད་ཟིན་ལ། གཉིས་པ་ནི་སྐབས་འདིར་བཤད་དེ། ལེའུ་གསུམ་པའི་སྒྲོན་གསལ་དུ་བཤད་པ་དང་མཐུན་ནོ། །བྱང་ཆུབ་སེམས་དག་ཅེས་པ་ནས། གཟུགས་ཅན་ཏེ། ཞེས་པའི་བར་གྱིས་རླུང་དང་ཐིག་ལེ་འདྲེན་མར་འབྱུང་བའི་བྱང་ཆུབ་ཀྱི་སེམས་ཀྱི་དོན་བཤད་ལ། ཕྱེད་ཚད་ཙམ་གྱི་ཞེས་པའི་རྐང་པ་བཞིས་དེ་དག་དང་པོ་གང་ལས་འབྱུང་བའི་འབྱུང་ཁུངས་སྙིང་གའི་མི་ཤིགས་པའི་ཐིག་ལེ་བསྟན་ནོ། །འོ་ན་སྙིང་གའི་མི་ཤིགས་པའི་ཐིག་ལེ་བསྟན་པ་འདི་བྱང་ཆུབ་ཀྱི་སེམས་ཀྱི་དང་པོའི་འབྱུང་ཁུངས་ཡིན་པར་གང་ལས་ཤེས་སྙམ་ན། འོག་ནས་ཕྱིར་འགྲོ་བ་དྲིས་པའི་ལན་དུ། དཔྲལ་བ་ལ་གནས་རྐང་མཐིལ་བར། །ཐིག་ལེ་དེ་ཁོ་ནར་བསྡུ་སྟེ། །ཞེས་སྤྱི་བོ་ནས་རྐང་པའི་བར་གྱི་རླུང་སེམས་རྣམས་མཐར་སྡུད་པ་ན། སྙིང་ཁའི་ཐིག་ལེ་དེ་ཁོ་ནར་སྡུད་པར་གསུངས་པས་ཤེས་ཏེ། མཐར་སྡུད་པ་

---

^{[མ་དཔེ་གཟིགས་ན་འདིར་གནོན།]}

ནི་དང་པོར་གང་ནས་འོངས་པའི་གནས་དེ་ཉིད་དུ་སྡུད་པ་ཡིན་པའི་ཕྱིར་རོ། །དེ་ལྟར་ན་ཡུམ་གྱི་པདྨར་སྤྲོས་པའི་རླུང་དང་ཐིག་ལེའི་བྱང་ཆུབ་ཀྱི་སེམས་ཀྱི་དང་པོའི་འབྱུང་ཁུངས་ཞུས་པ་ནི། ཕྱོགས་གཅིག་གིས་གཞན་རྣམས་མཚོན་པས་ན་རླུང་དང་ཐིག་ལེ་སྤྱིའི་དབང་དུ་མཛད་པར་ཤེས་པར་བྱའོ། །གལ་ཏེ་ཡབ་ཀྱི་གསང་གནས་ནས་ཡུམ་གྱི་པད་མར་ཕྱུང་པའི་ཐིག་ལེ་ནི་སྤྱི་བོ་བདེ་ཆེན་གྱི་འཁོར་ལོའི་དབུས་ནས་འབྱུང་བ་མ་ཡིན་ནམ། ཐིག་ལེ་དེ་སྙིང་ཁའི་མི་ཤིགས་པ་ལས་འབྱུང་བར་སྟོན་པ་ཇི་ལྟར་རིགས་སྙམ་ན། བདེན་ཏེ་འདིར་ནི་དང་པོའི་འབྱུང་ཁུངས་ཀྱི་དབང་དུ་བྱས་པས་སྐྱོན་མེད་དེ། འདི་ལྟར་དང་པོ་ཁུ་ཁྲག་གི་དབུས་སུ་བར་དོའི་ཤེས་པ་ཞུགས་པའི་གནས་དེ་ནི་སྙིང་ཁ་ཡིན་པ་དང་། དེ་ནས་ལུས་ཡན་མན་དུ་ཆགས་པར་རྣལ་འབྱོར་སྤྱོད་པའི་སའི་དངོས་གཞི་ལས་གསུངས་པས། ལྟེ་བའི་དམར་ཆ་དང་སྤྱི་བོའི་དཀར་ཆ་གཉིས་ཀྱིའང་དང་པོའི་འབྱུང་ཁུངས་ནི་སྙིང་ཀའི་ཐིག་ལེ་ཡིན་ནོ། །རྒྱུད་རྡོ་རྗེ་ཕྲེང་བ་ལས། རྩ་བདུན་ཁྲི་ཉིས་སྟོང་ཡང་དང་པོར་སྙིང་ཀའི་རྩ་ལས་རིམ་པ་བཞིན་དུ་གྱེས་པར་བཤད་ཅིང་། དང་པོར་སྙིང་གར་སྲོག་འཛིན་གྱི་རླུང་ཆགས་པ་ལས་རླུང་གཞན་རྣམས་སྐྱེ་བར་གསུངས་པས་ལུས་དང་པོ་སྙིང་ག་ནས་ཆགས་པ་ནི་རྒྱུད་འདི་རྣམས་ཀྱིའང་ལུགས་སོ། །རྩ་དང་ཐིག་ལེ་དཀར་དམར་ཆགས་པ་གཉིས་ཕྱི་མ་སྔ་ཡང་རྩ་ཨ་ཝདྷཱུ་ཏཱི་ཆགས་པའི་དུས་སུ་དེས་རྟེན་བྱས་པའི་དབང་གིས་དེའི་ནང་དུ་སེམས་ཀྱི་རྟེན་གྱི་ཐིག་ལེ་དང་རླུང་གནས་པར་འགྱུར་བ་མི་འགལ་ལོ། །དེ་བས་

---

^{[མ་དཔེ་གཟིགས་ན་འདིར་གནོན།]}

ན་གནས་སྐབས་སུ་བདེ་བའི་རྟེན་སྤྱི་བོ་དང་། དྲོད་ཀྱི་རྟེན་ལྟེ་བར་གནས་པ་ཡིན་ཡང་། མཐར་གཏུགས་པའི་རྟེན་ནི་སྙིང་ཁར་གནས་པ་ཡིན་པས་སྙིང་ཁ་ལུས་ཀྱི་གནད་མཐར་ཐུག་པ་ཡིན་ནོ། །གཉིས་པ་ལ་གཉིས། དངོས་ཀྱི་དོན། ཞལ་ལ་སྔགས་ཀྱི་ཐིག་ལེ་བཤད་པའོ། །དང་པོ་ནི། རླུང་དང་ཐིག་ལེ་འདྲེས་པའི་བྱང་ཆུབ་ཀྱི་སེམས་དེ་མཐར་སྡུད་པའི་ཚེ་ཕྱིར་ཇི་ལྟར་འགྲོ་ཞེ་ན། ཇི་སྙེད་དེ་སྲིད་དུ་མིག་གཉིས་དང་རྣ་བུག་གཉིས་དང་སྣ་བུག་གཉིས་དང་ལྕེ་དང་བཤང་གཅིའི་བུག་པ་གཉིས་ཏེ་སྒོ་དགུའི་བར་དེ་སྲིད་དུ་འཇུག་པ་དང་། ཇི་སྲིད་དུ་དཔྲལ་བ་ནས་རྐང་མཐིལ་གྱི་བར་དེ་སྲིད་དུ་དེ་རྣམས་ལ་གནས་པའི་རླུང་དང་སེམས་རྣམས་མཐར་སྡུད་པའི་ཚེ་སྙིང་ཁའི་མི་ཤིགས་པའི་ཐིག་ལེ་དེ་ཁོ་ནར་བསྡུས་ཏེ་སྙིང་གའི་རྩ་འདབ་ཀྱི་པདྨའི་ལྟེ་བའི་དབུས་སུ་རྣམ་པར་གནས་སོ། །འདིའི་ལེའུ་གཉིས་པ་ལས་ཀྱང་། སྐྱེ་དང་བསྡུས་ནས་འཇིག་པ་ལ། །ཐིག་ལེའི་གཟུགས་སུ་རབ་གནས་སོ། །ཞེས་སྐྱེ་བའི་ཚེ་ཡང་ཐིག་ལེའི་གཟུགས་སུ་སྐྱེས་ནས་གནས་ཤིང་དེ་ལས་སྐྱེ་བ་དང་། མཐར་བསྡུས་ནས་འཇིག་པའི་ཚེ་ཡང་ཐིག་ལེའི་གཟུགས་སུ་གནས་པ་ལ་སྡུད་པར་གསུངས་སོ། །ཡུམ་གྱི་པདྨར་སྤྲོས་པའི་བྱང་སེམས་ནི་དྲི་བའི་སྐབས་དབྱེ་བར་བཞེད་ནས་དེ་ལྟར་བསྟན་པ་ཙམ་ཡིན་པས། ཕྱིར་འགྲོ་བའམ་སླར་སྡུད་པའི་ཚུལ་དྲིས་པའི་གཞི་ནི་དེ་ཁོ་ནར་མི་གཟུང་ངོ་། །གཞི་དུས་ཀྱི་མཐའི་སྡུད་རིམ་དེ་བཞིན་དུ་ལམ་གྱི་སྐབས་སུ་ཡང་སྙིང་གར་རླུང་

---

^{[མ་དཔེ་གཟིགས་ན་འདིར་གནོན།]}

སེམས་སྡུད་པ་ཡིན་ཏེ། རིམ་ལྔ་ལས། མགོ་བོ་ནས་ནི་རྐང་པའི་བར། །ཇི་སྲིད་སྙིང་གར་ཕྱིན་པའི་བར། །རྣལ་འབྱོར་ཡང་དག་མཐའ་ལ་འཇུག །རིལ་པོར་འཛིན་པ་ཞེས་བཤད་དོ། །ཞེས་སྤྱི་བོ་ནས་མར་སྡུད་པའི་མཐའ་དང་། རྐང་པ་ནས་ཡར་སྡུད་པའི་མཐའ་གཉིས་ཀ་སྙིང་གར་བསྟན་པའི་སྒོ་ནས་ཡང་དག་པའི་མཐའ་འོད་གསལ་དུ་འཇུག་པ་གསུངས་ལ། ཡང་དེ་ཉིད་ལས། དབུགས་ཀྱི་རླུང་ནི་མེ་ལོང་ལ། །ཇི་ལྟར་ཀུན་ཏུ་ཐིམ་གྱུར་པ། །དེ་བཞིན་རྣལ་འབྱོར་ཡང་དག་མཐར། །ཡང་དང་ཡང་དུ་འཇུག་པར་བྱེད། །ཅེས་དཔེར་ན་མེ་ལོང་ལ་ཧས་བཏབ་པའི་རླངས་པ་རྣམས་མེ་ལོང་གི་ཕྱོགས་ཀུན་ནས་དབུས་སུ་འདུ་བ་ལྟར། ལུས་ཀྱི་སྟེང་འོག་རྒྱབ་མདུན་གཡས་གཡོན་གྱི་རླུང་རྣམས་ཀྱང་དབུས་སྙིང་གར་འདུས་ནས་འོད་གསལ་མངོན་དུ་བྱེད་པར་གསུངས་པས། དོན་གྱི་འོད་གསལ་ལྷན་ཅིག་སྐྱེས་པའི་ཡེ་ཤེས་ཡོངས་སུ་རྫོགས་པར་འཆར་བའི་གནས་ནི་སྙིང་ཁ་ཡིན་ལ། དེའི་ཐབས་མཆོག་ཀྱང་དེར་རླུང་སེམས་སྡུད་པའི་བསམ་གཏན་གཉིས་དང་། རྡོ་རྗེ་བཟླས་པ་ལ་སོགས་པ་རྣམས་ཡིན་ནོ། །འདིའི་གནད་ཤེས་ན་སྙིང་ཁར་སེམས་དཔའ་གཞན་གཉིས་བརྩེགས་པའི་སེམས་དཔའ་སུམ་བརྩེགས་བྱས་པ་ལ། སྣོད་བཅུད་དང་དཀྱིལ་འཁོར་བ་རྣམས་རིམ་གྱིས་བསྡུས་ནས་མཐར་ཏིང་ངེ་འཛིན་སེམས་དཔའ་ལ་སྡུད་ཅིང་། དེ་ཡང་རིམ་གྱིས་འོད་གསལ་དུ་འཇུག་པར་གསུངས་པ་རྣམས་ཀྱི་དོན་ཤེས་པར་འགྱུར་རོ། །འགྲེལ་པ་ལས་ནི། བྱང་ཆུབ་སེམས་དཔའ་དག་ཅེས་པ་

---

^{[མ་དཔེ་གཟིགས་ན་འདིར་གནོན།]}

ནས། ཕྲ་མོ་མཆོག །ཅེས་པའི་བར་གྱིས་དེ་བཞིན་གཤེགས་པ་ཐམས་ཅད་རང་གི་ལུས་ལ་ཐིམ་ནས་བྱང་ཆུབ་ཀྱི་སེམས་སུ་གྱུར་པའི་ཁ་དོག་དཀར་བ་དང་ལྡན་པ་ཡེ་ཤེས་ལྔའི་ངོ་བོ་དེ་རྡོ་རྗེའི་ལམ་ནས་རིག་མའི་པདྨའི་སྣ་རྩེར་རྡོ་རྗེར་གྱུར་ཏེ། དེའི་དཀྱིལ་དུ་དེའི་ཕྱེད་ཚད་ཙམ་གྱི་ཀྵུཾ་བསྒོམ་པ་དེ་ལས་རང་པོ་དང་ཡེ་ཤེས་འགའ་ཙམ་ལ་དབང་བ་ལ་མི་གསལ་ལ། འཕགས་པ་ལ་གསལ་བའི་ཕྲ་མོའི་རྣལ་འབྱོར་བརྟན་ལ། ཡིད་ཀྱི་དངོས་པོ་ཞེས་པ་ནས། འབར་བ་ཅན་ཞེས་པའི་བར་གྱིས་རང་གི་སྙིང་གའི་དབུས་སུ་དེ་བཞིན་གཤེགས་པ་ཐམས་ཅད་འདུས་ཏེ་བྱང་ཆུབ་ཀྱི་སེམས་འོད་གསལ་དུ་གྱུར་ནས། ཙ་ན་ཀའི་འབྲུ་ཚོད་ཙམ་གྱི་ཡིད་དང་མི་ཕྱེད་པའི་ཐིག་ལེའི་གཟུགས་ཀྱི་དབུས་སུ་ཀྵུཾ་བསྒོམ་པའི་ཐིག་ལེའི་རྣལ་འབྱོར་དང་། དགུ་ནི། ནུ་མ་ལག་རྩེ་མགྲོན་པ་དང་། །མ་མཆུ་དེ་བཞིན་འགྲམ་པ་མིག །རྣ་རྩེ་སྤྱི་བོ་ཡན་ལག་མཆོག །ཅེས་པའི་ལུས་ཀྱི་གནས་དགུ་དང་། དཔྲལ་བ་ནས་རྐང་མཐིལ་གྱི་བར་གྱི་མཐེ་བོང་གི་རྩ་བ་ལ་སོགས་པ་ལུས་ཀྱི་གནས་བཅོ་ལྔ་ལ་ཁྱབ་པའི་བྱང་ཆུབ་ཀྱི་སེམས་སྙིང་གའི་ཐིག་ལེ་དེ་ཁོ་ནར་བསྡུས་ཏེ། སྙིང་གའི་པདྨ་ལས་བབས་ནས་ལྟེ་བའི་པདྨའི་དབུས་སུ་གནས་པར་འཆད་དོ། །ལྟེ་བ་ཞེས་པ་སྙིང་ཁའི་པདྨའི་ལྟེ་བ་ལ་མ་བཤད་པ་དང་། འགྲེལ་པ་ཆེ་བས་སྙིང་སྒོ་ང་ལྟ་བུ་ཉིད་སྙིང་ཁར་བཤད་པ་ནི་དོན་དུ་མི་སྣང་ལ། བཤད་པ་གཞན་རྣམས་ཀྱང་ཡེ་ཤེས་ཞབས་ལུགས་དང་མཐུན་པར་བྱས་པའི་ལུགས་

---

^{[མ་དཔེ་གཟིགས་ན་འདིར་གནོན།]}

སུ་སྣང་ཡང་། དེ་དག་དང་ཇི་བཞིན་མི་མཐུན་ཞིང་། འཕགས་སྒོར་གྱི་བཞེད་པ་རྣམས་དང་ཡང་མི་མཐུན་ནོ། །ལུས་ཀྱི་གནས་བཅོ་ལྔ་ནི། ཞལ་ལུང་ལས། མཐེ་བོང་རྩ་དང་རྗེ་ངར་དང་། བརླ་གཉིས་དང་ནི་གསང་བའི་གནས། །ལྟེ་བ་དང་ནི་གསུས་པ་དང་། །ནུ་མ་གཉིས་དང་ལག་རྩེ་དང་། །མགྲིན་པ་དང་ནི་མཆུ་གཉིས་དང་། འགྲམ་པ་གཉིས་དང་མིག་གཉིས་དང་། །རྣ་བའི་རྩ་དང་སྤྱི་བོ་དང་། །ཚིགས་ཀུན་ཐིག་ལེ་ཨ་སོགས་ཀྱི། །གཟུགས་སུ་གནས་པ་བཀུག་བྱས་ནས། །མི་ཤིགས་ཐིག་ལེར་ཐིམ་པར་བྱ། །ཞེས་རྐང་པའི་མཐེ་བོང་ནས་སྤྱི་བོའི་བར་བཅོ་ལྔ་ལ་གནས་པའི་ཐིག་ལེ་ཨ་ནས། ཨཽའི་བར་བཅུ་བཞི་དང་། ཚིགས་ཀུན་ལ་གནས་པའི་ཐིག་ལེ་ཨཾ་ཨཿ འི་གཟུགས་སུ་གནས་པར་བཤད་པ་ཡིན་ལ། དེ་རྣམས་སྙིང་ཁའི་ཐིག་ལེ་ལ་སྡུད་པར་བཤད་དོ། །འདི་རྣམས་ཟླ་བ་ཡར་ངོའི་ཚེས་གཅིག་ནས་བཅོ་ལྔའི་བར་དུ་གཡོན་གྱི་རྐང་པ་ནས་གྱེན་དུ་འཛེག་ལ། མར་ངོའི་བཅུ་དྲུག་ནས་གནམ་སྟོང་གི་བར་དུ་སྤྱི་བོ་ནས་གཡས་ཀྱི་རྐང་པའི་མཐེ་བོང་གི་བར་དུ་ཐུར་དུ་བབས་ནས་ཚིགས་ཀུན་ལ་གནས་པར་བཤད་དོ། །དཔྲལ་བ་ལ་གནས་ཞེས་སོགས་རྣམས་ཐིག་ལེ་སྡུད་པ་ལ་སྦྱོར་ན་ཞལ་ལུང་བཞིན་བྱའོ། །འགྲེལ་པ་གཉིས་ཀྱིས་ཇི་སྙེད་དགུ་ཞེས་པའི་རྐང་པ་བཞི་ཡང་དང་པོའི་འབྱུང་ཁུངས་ཞུས་པའི་ལན་དུ་སྦྱོར་མོད་ཀྱང་། སླར་སྡུད་པའི་ལན་དུ་ཤིན་ཏུ་གསལ་བས་དེའི་ལུགས་སུ་བཤད་དོ། །གཉིས་པ་ནི། བཅུ་གཉིས་ཀྱི་ནི། ཞེས་སོགས་ཀྱི་དོན་འགྲེལ་པ་གཉིས་ཀྱིས། དེའི་དབུས་ན་བཞུགས་

---

^{[མ་དཔེ་གཟིགས་ན་འདིར་གནོན།]}

པའི་ལྷ། ཞེས་སྔར་ཡིག་འབྲུ་སྦས་པ་འཆད་པ་ཡིན་ལ། །དེ་ཡང་མ་ནིང་གི་ཡི་གེ་བཞི་དོར་བའི་དབྱངས་ཀྱི་བཅུ་གཉིས་པ་ནི་ཨཿ འོ། །དེའི་མཐའ་ནི་ཀ་སྡེའི་ཐོག་མ་ཀའོ། ཆ་ཤས་དྲུག་པ་ནི་ཡ་ནས་བགྲངས་པའི་ཥའོ། །དེས་མཚན་པ་ནི་ཀ་ལ་བཏགས་པའོ། །ང་རོ་ནི་ཞབས་བསྐྱེད་ཨུའོ། །ཐིག་ལེ་བརྒྱན་བྱེད་པ་ནི་སྟེང་གི་ཟླ་ཚེས་དང་ཐིག་ལེའི། །དེ་དག་བསྡུ་ན་ཀྵུཾ་སྟེ་དེ་ནི་ཀ་དང་ཥ་དང་ཨཱུ་དང་ཟླ་ཚེས་དང་ཐིག་ལེ་སྟེ་ཆ་ཤས་ལྔ་པ་ཅན་ཡིན་ནོ། །ཞེས་འཆད་དོ། །འདི་ཡེ་ཤེས་ཞབས་ལུགས་དང་བསྟུན་པར་ནི་སྣང་ལ། ལུགས་དེ་ལ་ནི་ཕྱོགས་བཅུའི་སངས་རྒྱས་ཀྱི་བདུད་རྩི་འགུགས་པ་ན་ཀྵུཾ་གི་གཟུགས་སུ་འགུགས་པར་བཤད་པ་མིན་པ་སྙིང་ཁ་དང་གསང་གནས་སུ་ཀྵུཾ་བསྒོམ་པ་མི་སྣང་ངོ་། །སྔགས་བཏུ་བ་འདི་དག་གིས་སྙིང་གའི་སྔགས་ཀྱི་ཐིག་ལེ་སྟོན་པར་སྣང་ལ། དེ་ནི་རྡོ་རྗེ་འཕྲེང་བ་ལས་ཐིག་ལེ་གསུམ་རྣམ་པར་ཕྱེ་པའི་ལེའུ་ལས་ཧཱུཾ་དུ་བཤད་ལ། རྡོ་རྗེ་དང་པདྨ་སྦྱོར་བའི་ལེའུ་ལས་སྙིང་ཁར་ཨ་ཡིག་བཤད་ཅིང་། སྤྱོད་བསྡུས་སུ་དྲངས་པའི་རྒྱུད་ལས་ཀྱང་སྙིང་ཁའི་མི་ཤིགས་པ་ཨ་ཡིག་ལ་བཤད་དོ། །དེའི་ཨ་ཡི་འདིར་མི་སྟོན་ཞིང་། ཧཱུཾ་ཡིག་ལ་གསལ་བས་ཧཱུཾ་ཡིག་ལ་བཤད་དོ། །དེ་ལ་ཆ་ཤས་ནི་ཚན་པ་སྟེ་སྡེ་ཚན་ནོ། །ལྔ་ནི་ཀ་ཙ་ཊ་ཏ་པའི་སྡེ་ཚན་ནོ། །ལྔ་པ་ནི་པ་སྡེའོ། །ཅན་ནི་རང་གི་ཆ་ལྔ་དང་ལྡན་པའོ། །དེའི་ཐོག་མ་ནས་བགྲངས་ན་བཅུ་གཉིས་པ་ནི་སའོ། །དེའི་མཐའ་མ་ནི་ཧའོ། །དེ་ལ་ཆ་ཤས་ཏེ་དབྱངས་དྲུག་གིས་ཏེ། དྲུག་པ་ཨུ་རིང་

---

^{[མ་དཔེ་གཟིགས་ན་འདིར་གནོན།]}

པོས་མཚན་པ་ཉིད་ཀྱིས་ཧཱུའོ། །དེའི་སྟེང་དུ་མ་ཡིག་རྗེས་སུ་ང་རོ་ཐིག་ལེར་བྱས་ནས་བརྒྱན་པས་ཧཱུཾ་མོ། །འདི་ནི་སྙིང་གར་སྔགས་ཀྱི་ཐིག་ལེ་ཧཱུཾ་བསྒོམ་པའི་ལུགས་སོ། །འགྲེལ་པ་གཉིས་ཀྱིས་ཆ་ཤས་ཞེས་པའི་རྐང་པ་བཞི་དང་། རྡོ་རྗེའི་ཁོང་ནས་བྱུང་ནས་སུ། །ཞེས་པ་དང་ལྔས་དང་པོ་ཇི་ལྟར་འོངས་པའི་ལམ་དྲིས་པའི་ལན་བསྟན་པར་འཆད་པ་ནི་དོན་དུ་མ་མཐོང་ངོ་། །གསུམ་པ་ནི། བྱང་ཆུབ་ཀྱི་སེམས་དང་པོ་འོངས་པའི་ལམ་གང་ཡིན་སྙམ་ན། རྩ་ཨ་ཝ་དྷཱུ་ཏཱི་རྡོ་རྗེ་ནོར་བུའི་རྩེ་བར་དུ་གནས་པར་བཤད་པས་རྡོ་རྗེའི་ཁོང་ན་གནས་པའི་ཨ་ཝ་དྷཱུ་ཏཱིའི་ནང་ནས་བྱུང་ནས་སུ་ས་བོན་བྱང་ཆུབ་ཀྱི་སེམས་དེ་ཡུམ་གྱི་སྐྱེ་གནས་པདྨའི་དབུས་སུ་བཞག་སྟེ་ཆོས་ཀྱི་དབྱིངས་བྱང་ཆུབ་ཀྱི་སེམས་ཀྱི་ཐིག་ལེ་ནི་ཞུ་བར་བྱེད་དོ། །དེས་ནི་རྩ་ཨ་ཝ་དྷཱུ་ཏཱིའི་ལམ་ནས་འོངས་པར་བསྟན་པས། རྣལ་འབྱོར་གྱིས་སྡུད་པའི་ཚེ་ཡང་ལམ་དེ་ནས་སྙིང་ཁའི་མི་ཤིགས་པ་ལ་སྡུད་དགོས་པར་བསྟན་ཏོ། །འགྲེལ་པ་གཉིས་ཀྱིས་རྐང་པ་ཕྱི་མ་གཉིས། དེ་བཞིན་ཕྱིར་འགྲོ་ཇི་ལྟར་ལགས། །ཞེས་པའི་ལན་དུ་འཆད་པ་ནི། ཡབ་ཀྱི་ལུས་ཀྱི་གསང་གནས་རྡོ་རྗེ་ལས་ཕྱིར་འགྲོ་བ་དྲིས་པའི་ལན་བསྟན་པར་འདོད་པར་སྣང་ལ། དེ་ནི་སྔར་པདྨ་ལ་བྱང་སེམས་སྤྲོས་ནས་ཞུ་བར་མཛད་པར་བསྟན་པ་ཉིད་ཀྱིས་ངེས་ཟིན་པས་དྲི་མི་དགོས་ལ། དྲི་བ་ཉིད་ལན་དུ་སོང་བས་མི་རིགས་པའི་ཕྱིར་རོ། །བཞི་པ་ནི། སྔར། ཡན་ལག་མེད་པ་གང་དེ་ནི། །ཞེས་དྲིས་པའི་ལན་སྟོན་ཏེ། བྱང་ཆུབ་ཀྱི་སེམས་པདྨར་སྤྲོས་པ་དེ་ནི་མེར་མེར་པོ་ལ་སོགས་པའི་རིམ་

---

^{[མ་དཔེ་གཟིགས་ན་འདིར་གནོན།]}

གྱི་ཡན་ལག་དང་བཅས་པར་བསྐྱེད་པར་བྱས་ནས་སྔར་བཤད་པའི་མིག་ལ་སོགས་པའི་དབང་པོའི་སྒོ་དགུ་ལ་ནི་ཀུན་ཏུ་འགྲོ་སྟེ། བྱང་ཆུབ་ཀྱི་སེམས་ཀྱིས་གནས་དེ་དག་ཏུ་ཁྱབ་པར་བྱེད་ཅིང་། འགྲོ་བ་ཀུན་ལ་ཁྱབ་པར་བྱས་ནས་གནས་སོ། །དེས་ན་མི་གཡོ་བ་སྣོད་ཀྱི་འཇིག་རྟེན་དང་། གཡོ་བ་བཅུད་ཀྱི་འཇིག་རྟེན་དང་བཅས་པའི་གཞི་ནི་རླུང་སེམས་འདྲེས་པའི་བྱང་ཆུབ་ཀྱི་སེམས་དེ་ཡིན་ལ། སྣོད་བཅུད་གཞན་ནི་དེ་ལས་ཡོངས་སུ་གྱུར་པའི་རྣམ་འགྱུར་རོ། །བཅུད་ཀྱི་འཇིག་རྟེན་ཇི་འདྲ་བ་སྙམ་ན། ཚངས་པ་ལ་སོགས་པའི་ལྷ་དང་། ཐགས་བཟང་རིས་ལ་སོགས་པའི་ལྷ་མིན་ལ་སོགས་པའི་སེམས་ཅན་ཏེ་དེ་རྣམས་ཀྱི་གཞིའོ། །མི་གཡོ་བ་ལ་སོགས་པ་ཞེས་པའི་སོགས་ནི་དེའི་སྐད་དོད་དང་པོ་ལའང་འཇུག་པས་དང་པོར་སྣོད་ཀྱི་གཞི་བྱེད་པའི་དོན་ནོ། །སྔར་རླུང་སེམས་ཡན་ལག་མེད་པ་ཡན་ལག་དང་བཅས་པའི་ལུས་རགས་པའི་དངོས་པོར་ཇི་ལྟར་འགྱུར་དྲིས་པ་ནི། དེ་དག་ཏུ་རིམ་གྱིས་འགྱུར་བའི་གཞི་མཐར་གཏུགས་པ་གང་ཡིན་དྲིས་པ་ཡིན་ལ། དེའི་ལན་ནི་རླུང་སེམས་ཙམ་ཞིག་གི་གཞི་ནི་དེ་དག་ཏུ་ཡོངས་སུ་འགྱུར་བའོ། །ཞེས་སྟོན་པ་ཡིན་པས་དྲི་བ་ཉིད་ལན་དུ་སོང་བའི་སྐྱོན་མེད་དོ། །འདི་ནི་རྡོ་རྗེ་ཕྲེང་བ་ལས། སྐྱེ་དང་གནས་དང་འཇིག་པ་དང་། །སྲིད་པ་བར་མར་གནས་པ་སྟེ། །ཇི་སྙེད་འཇིག་རྟེན་གྱིས་བཏགས་པ། །སེམས་ཀྱི་རླུང་གི་རྣམ་འཕྲུལ་ལོ། །ཞེས་དང་། དགོངས་པ་ལུང་སྟོན་ལས་ཀྱང་། ཇི་སྲིད་འཇིག་

---

^{[མ་དཔེ་གཟིགས་ན་འདིར་གནོན།]}

རྟེན་བཏགས་པ་དང་། །དེ་བཞིན་བཏགས་པ་སྣ་ཚོགས་རྣམས། །རྣམ་རྟོག་བྱང་ཆུབ་སེམས་ཞེས་པའི། །རླུང་ལས་རྟག་ཏུ་འབྱུང་བ་ཡིན། །བདེ་སྡུག་ལ་སོགས་ཆོས་རྣམས་ཀྱི། །ས་བོན་ལྟ་བུར་བཤད་པ་ཡིན། །ཞེས་གསུངས་པ་རྣམས་དང་དོན་གཅིག་ཏུ་གོ་བར་བྱའོ། །དེས་ན་སྣོད་བཅུད་ཀྱི་འཇིག་རྟེན་འཇིག་པ་ནའང་མི་ཤིགས་པའི་ཐིག་ལེ་དེ། འགོག་པ་སྟེ་འགགས་ནས་མི་ཟད་ལ། འཇིག་རྟེན་ཆགས་པའི་ཚེ་ཡང་རླུང་སེམས་ཙམ་གྱི་མི་ཤིགས་པའི་ཐིག་ལེའི་རྐྱེན་ལ་བརྟེན་ནས་འབྱུང་བ་དང་། དེ་མ་ཤེས་པས་འཇིག་རྟེན་ཚངས་པའི་སྒོ་ང་ལས་སྐྱེ་བར་རྟོག་པའི་ལྟ་བ་ངན་པ་སྐྱེ་བར་གསུངས་ཏེ། ཞལ་ལུང་ལས། ཚངས་སོགས་ལྷ་དང་ལྷ་མིན་སོགས། །ཐམས་ཅད་རབ་ཏུ་མི་སྣང་ཡང་། །ཐིག་ལེ་འགོག་པར་མི་འགྱུར་ཏེ། །རྒྱུ་དང་མི་རྒྱུར་བཅས་པ་ཀུན། །སླར་ཡང་དེ་ལས་འབྱུང་བར་བྱེད། །དེ་བས་སྐྱེ་བོ་རྣམས་ཀྱིས་ནི། །ཡང་དག་མ་རྟོགས་པ་ཡི་ཕྱིར། །ཚངས་པའི་སྒོ་ང་ལས་སྐྱེས་པར། །འཁྲུལ་བས་ཆོས་ཀུན་གྱིས་མ་བསྒུལ། །ཞེས་སོ། །སྣོད་བཅུད་གང་ལ་གནས་པར་བྱེད་པའི་གཙོ་བོ་རླུང་སེམས་དེ་ནི་ས་དང་ནམ་མཁའ་ལ་གནས་པ་ཀུན་དེའི་རྣམ་འགྱུར་རོ། །ཞེས་པ་གང་གསུངས་པའོ། །དེ་དག་གིས་ནི་ལྷ་དང་ལྷ་མིན་ལ་སོགས་པའི་འགྲོ་བ་ཐ་དད་ཀྱི་ལུས་དང་། འདོད་གཟུགས་ལ་སོགས་པའི་ཁམས་ཐ་དད་ཀྱི་ལུས་རྣམས་ནི་གནས་སྐབས་ཙམ་གྱི་ལུས་ཏེ། དེ་རྣམས་དོར་ཡང་ངའོ་སྙམ་པའི་ཐ་སྙད་ཀྱི་གདགས་གཞིར་གྱུར་པའི་སེམས་ཅན་གྱི་ལུས་མི་ལྡོག་པའི་ཕྱིར་རོ། །དེས་ན་གནས་སྐབས་དེ་

---

^{[མ་དཔེ་གཟིགས་ན་འདིར་གནོན།]}

རྣམས་ཀྱི་ལུས་དོར་ཡང་དུས་ཀུན་ཏུ་མི་འཁྲུལ་བའི་སེམས་ཅན་གྱི་གཉུག་མའི་ལུས་ནི་རླུང་སེམས་ཙམ་གྱི་ལུས་སུ་ཟད་པར་བསྟན་ལ། དེ་ཉིད་སྒྱུ་མའི་སྐུ་གང་ལས་བསྒྲུབ་པའི་གཞི་ཡང་ཡིན་པས་འདི་སྒྱུ་ལུས་ཀྱི་ཡན་ལག་ཏུ་བྱའོ། །རྐང་པ་གཉིས་པོ་དེའི་དོན་དང་འདྲ་རུང་གཅིག་རྡོ་རྗེ་ཕྲེང་བ་དང་། སཾ་བྷུ་ཊ་ལས་ཀྱང་འབྱུང་མོད་ཀྱང་འདི་དང་དོན་གཅིག་ཏུ་བཤད་དུ་མི་རུང་ངོ་། །ལྔ་པ་ནི། སྔར། མ་རིག་བག་ཆགས་སྲེད་པ་ཡིས། །ཞེས་ལས་ཉོན་གྱི་གཞི་དྲིས་པའི་ལན་སྟོན་པ་ནི་ཇི་སྙེད་ཅེས་སོགས་སོ། །ཇི་སྙེད་དེ་སྲིད་དུ་རླུང་སེམས་ཀྱི་མི་ཤིགས་པ་སེམས་ཅན་གྱི་ལུས་ལ་གནས་པ་དེ་སྲིད་ཀྱི་བར་དུ་རླུང་སེམས་དེ་ཡིས་དགེ་བའི་ལས་དང་། ལས་མིན་པ་སྟེ། མི་དགེ་བའི་ལས་རྣམས་བྱེད་ལ། དེར་མ་ཟད་དགེ་བའི་ལས་དང་མི་དགེ་བའི་ལས་ཀྱི་བསམ་པ་སྟེ། ཀུན་ནས་སློང་བྱེད་ཀྱི་ཉོན་མོངས་པ་ལ་བྱེད་པས། འཁོར་བར་འཁོར་བའི་བྱ་བའི་ལས་ཀུན་བྱེད་པ་ཡིན་ནོ། །འདི་ནི་རླུང་གིས་སེམས་གཡོས་ནས་རང་བཞིན་བརྒྱད་ཅུའི་རྟོག་པ་དང་། དེ་ལས་ཉོན་མོངས་དང་། དེས་ལས་བསགས་ཏེ་འཁོར་བར་འཁོར་བར་སྟོན་པས། རླུང་གི་དབང་གིས་འཁོར་ཚུལ་གཙོ་བོར་བཤད་པས། ལས་ཀྱི་རླུང་རྣམས་ཨ་ཝ་དྷཱུ་ཏཱིའི་ལམ་ནས་སྙིང་ཁའི་མི་ཤིགས་པ་ལ་སྡུད་པའི་ཐབས་མི་ཤིགས་པ་བསྒོམ་དགོས་པ་ཡིན་ཏེ། ཞལ་ལུང་ལས། གང་གིས་ཀྱང་ནི་མི་ཤིགས་པ། །ཇི་སྲིད་འདི་ནི་ལུས་གནས་པ། །

---

^{[མ་དཔེ་གཟིགས་ན་འདིར་གནོན།]}

ལས་དང་ལས་མིན་རབ་བྱེད་པ། །བརྟན་པོ་འཇིག་པ་རབ་སྤངས་པའི། །མི་ཤིགས་ཐིག་ལེ་བསྒོམ་པར་བཤད། །ཅེས་གསུངས་པ་ལྟར་རོ། །དྲུག་པ་ནི། འོད་གསལ་ལས་ལྡང་བའི་ཚུལ། དྲིས་པའི་ལན་སྟོན་པ་ནི། སྦྱོར་བ་ནི་རྣལ་འབྱོར་ཡིན་ལ། དེ་རྟག་ཏུ་བསྒོམ་པར་ནི་རྩ་བའི་རྒྱུད་ལས་གསུངས་ཏེ། ཡུངས་ཀར་གྱི་ནི་འབྲུ་ཚོད་ཙམ། །སྣ་ཡི་རྩེ་མོར་ནན་ཏན་དུ། །རྣལ་འབྱོར་གྱིས་ནི་རྟག་ཏུ་བསྒོམ། །ཞེས་གསུངས་ལ་དེའི་ངེས་དོན་ནི། སྙིང་ཁའི་པདྨའི་ལྟེ་བར་མི་ཤིགས་པ་ཐིག་ལེའི་གཟུགས་ཅན་དང་། ལྡང་འཇུག་གནས་པའི་རྣལ་འབྱོར་གྱིས་ཉིན་མཚན་རྟག་ཏུ་བསྒོམ་པར་སྒྲོན་གསལ་ལས་གསུངས་སོ། །དེ་ལྟར་སྒོམ་པ་དེ་ངེས་དོན་གྱི་མཆོད་པ་ཆེན་པོ་ཡིན་པར་ཡང་གསུངས་ཏེ། རྩ་བའི་རྒྱུད་ལས། མཁས་པས་ཨུཏྤལ་དག་དང་། །པདྨ་རྣམ་པ་ལྔར་ཤེས་བྱ། །ཛཱ་ཏི་རྣམ་གསུམ་ཤེས་བྱས་ནས། །ལྷ་རྣམས་ལ་ནི་དབུལ་བར་བྱ། །མེ་ཏོག་ཀར་ནི་ཀ་ར་དང་། །མ་ལི་ཀ་དང་ཡུ་ཏི་ཀ །མེ་ཏོག་ཀ་ར་བི་ར་བསམ། །མཆོད་པ་ཐམས་ཅད་རབ་ཏུ་བརྟག །ཅེས་གསུངས་པའི་ངེས་དོན་བཤད་པ་ན། དགོངས་པ་ལུང་སྟོན་ལས། གང་ཞིག་རླུང་ནི་བཅུར་བསྒྲགས་པ། །དེ་ནི་པདྨ་ཨུཏྤལ་མིང་། །དེ་ཉིད་ཅེས་གྲགས་རྡོ་རྗེ་གསུམ། །ཛཱ་ཏི་གཅིག་པུ་གསུམ་དུ་འདོད། །ཀར་ནི་ཀ་ར་མ་ལི་ཀ །ཡུ་ཏི་ཀ་ར་བི་ར་ནི། །གོ་རིམ་བཞིན་དུ་སྤྱན་སོགས་ཏེ། །དབང་ཆེན་སོགས་པར་འདི་སྦྱར་རོ། །དངོས་མེད་གོ་འཕང་ལ་དགོད་པས། །ལྷ་རྣམས་ཀྱི་ནི་སྐུ་སྦྱོར་བ། །གཅིག་ཏུ་སངས་རྒྱས་ཀུན་མཉེས་པའི། །

---

^{[མ་དཔེ་གཟིགས་ན་འདིར་གནོན།]}

མཆོད་པ་ཆེན་པོར་དེ་འགྱུར་རོ། །ཞེས་པདྨ་དང་ཨུཏྤལ་རིགས་ལྔ་ལྔ་རླུང་བཅུ་དང་། ཛཱ་ཏི་རིགས་གསུམ་ལྡང་འཇུག་གནས་གསུམ་རྡོ་རྗེ་གསུམ་དུ་ཟློ་བ་དང་། ཀར་ནི་ཀ་ར་སོགས་བཞི་ལྷ་མོ་བཞིའི་ངོ་བོའི་འབྱུང་བ་བཞིའི་རླུང་དང་སྦྱར་ནས། དེ་འདྲ་བའི་རླུང་བསྒོམས་པས་དངོས་མེད་འོད་གསལ་གྱི་གོ་འཕང་ལ་དགོད་པས། དེ་ལས་ཟུང་འཇུག་གི་ལྷའི་སྐུར་སྦྱོར་བ་མཆོད་པ་ཆེན་པོར་གསུངས་སོ། །དེས་ན་ལོ་ཆེན་གྱི་འགྱུར་ལས། མཆོད་པ་བསྒོམ་པར་གྱུར་པ་ཡིན། །ཞེས་འབྱུང་ཡང་། སྨྲི་ཏིས་རྒྱུད་ཀྱི་གཞུང་ལོགས་སུ་བསྒྱུར་བ་ལས། མཆོད་པ་བསྒོམ་པར་གསུངས་པ་ཡིན། །ཞེས་བསྒྱུར་བ་ལེགས་སོ། །དེ་ལྟར་སྔར་བཤད་པ་ལྟར་སྙིང་གར་མི་ཤིགས་པ་བསྒོམ་པ་དང་། ལེའུ་གཉིས་པར་འཆད་པ་ལྟར་དེ་ལས་རྡོ་རྗེའི་བཟླས་པ་བྱེད་པའི་རླུང་བསྒོམས་པས། རླུང་རྣམས་ཨ་ཝ་དྷཱུ་ཏཱིའི་ལམ་ནས་མི་ཤིགས་པ་ལ་འདུས་ཏེ་ཐིམ་པ་ལས། འོད་གསལ་མངོན་དུ་གྱུར་པ་ལས་ལུགས་ལྡོག་ཏུ་ལངས་པ་གང་གི་ཚེ་སྔོན་གྱི་ལས་ཀྱིས་འཕངས་པའི་ལུས་ཞིག་པ་སྟེ་ལུས་བརྗེས་བ་དེའི་ཚེ། སྔར་ཀུན་རྫོབ་སྒྱུ་མའི་སྐུ་དང་དོན་དམ་འོད་གསལ་བསྒོམ་པ་དེ་ཡི་རང་གི་མཐུ་ཡིས་སྔར་བསྒོམས་པའི་སྒྱུ་མའི་སྐུ་དེ་འདྲ་བའི་ལུས་སུ་རྣལ་འབྱོར་པ་དེ་འགྱུར་ཏེ། སྐུ་གང་གིས་གཡོ་བ་བཅུད་དང་མི་གཡོ་བ་སྣོད་ཀུན་ཁྱབ་ནས་ནམ་མཁའ་དང་མཉམ་པ་ཉིད་དེ་འདྲ་བའི་སྐུ་དེ་ནི་གནས་པར་ཤེས་

---

^{[མ་དཔེ་གཟིགས་ན་འདིར་གནོན།]}

པར་བྱ་སྟེ། རྡོ་རྗེ་ཕྲེང་བ་ལས། འཇིག་རྟེན་ཁམས་འདི་མ་ལུས་པར། །བདག་ཉིད་ཡེ་ཤེས་ལུས་ཀྱིས་སྤྱོད། །གཙོ་བོ་གང་དུ་སྤྱོད་པ་ཡིས། །དེ་ཡི་ཁྱིམ་ནི་ནམ་མཁའ་ཉིད། །བདེ་བ་ཆེན་པོའི་ཏིང་འཛིན་གྱིས། །དེ་ཉིད་དུ་ནི་རྟག་ཏུ་རོལ། །ཞེས་གསུངས་སོ། །འདི་ནི་འོད་གསལ་དུ་ཞུགས་པའི་རླུང་སེམས་ཙམ་གྱི་རྒྱུ་ལས། །རྡོ་རྗེའི་སྐུར་ལྡང་བས། །དེ་ལས་གཞན་པའི་གཟུགས་སྒྲ་སོགས་དེའི་ལྡང་གཞིར་མེད་ཀྱང་། དེ་ལྟར་ལྡང་བ་མི་འགལ་བར་སྟོན་པའོ། །འགྲེལ་པ་གཉིས་ཀྱིས་གཞུང་དེ་དག་ལ་ལས་ཀྱི་ལུས་ཞིག་པ་རྣལ་འབྱོར་པ་ཤི་བ་ལ་སྦྱོར་བ་སོགས་གཞན་དུ་བཤད་མོད་ཀྱང་འཐད་པར་མ་མཐོང་སྟེ། རྡོ་རྗེ་ཕྲེང་བ་ལས། རང་བཞིན་སྣང་བའི་དབྱེ་ཤེས་ནས། །དེ་ནས་སྤྱོད་པ་རབ་ཏུ་བྱ། །ལས་ཀྱི་ལུས་ནི་ཡོངས་སྤངས་ནས། །རྡོ་རྗེའི་སྐུ་ནི་ཐོབ་པར་འགྱུར། །ཞེས་ཚེ་འདིར་འཚང་རྒྱ་བའི་སྤྱོད་པའི་འབྲས་བུ་ལ་དེ་ལྟར་གསུངས་ཤིང་། །སྒྲོན་གསལ་ལས་ཀྱང་། ཐ་མལ་བའི་ལུས་སྤོང་པར་གསུངས་པའི་དོན་རྣམས་ཚེ་འདིར་འཚང་རྒྱ་བའི་དབང་དུ་མཛད་ནས་གསུངས་ལ། སྤྱོད་བསྡུས་ལས་ཀྱང་། རྒྱལ་པོ་ཨིནྡྲ་བྷཱུ་ཏི་དང་འདྲ་བར་ཕུང་པོའི་ཁོག་པ་བརྗེས་ཏེ་རྡོ་རྗེའི་ལུས་སུ་གྱུར་ནས། ཞེས་གསུངས་པའི་ཕྱིར་རོ། །རྡོ་རྗེའི་སྐུ་འདི་དང་། མ་དག་པའི་སྒྱུ་མའི་སྐུ་གཉིས་འོད་གསལ་གྱི་མེས་སྦྱངས་མ་སྦྱངས་མ་གཏོགས་པ་མཚན་ཉིད་མཚུངས་པས། དེའི་སྒོ་ནས་སྒྱུ་ལུས་ཀྱང་བསྟན་དུ་རུང་ངོ་། །ངོ་མཚར་བའི་རྡོ་རྗེའི་སྐུ་འགྲུབ་ཚུལ་སངས་

---

^{[མ་དཔེ་གཟིགས་ན་འདིར་གནོན།]}

རྒྱས་ཐམས་ཅད་ཀྱི་མན་ངག་བརྒྱུད་པ་ལས་འོངས་པ་འདི་ནི་རྒྱས་པར་གཞན་དུ་བཤད་པར་འདོད་པས་འདིར་མདོ་ཙམ་མོ། །བཞི་པ་ལ་གཉིས། མི་ཤིགས་པའི་ཐིག་ལེ་བསྒོམས་པའི་ཕན་ཡོན་བསྟན་པ། ཏིག་ལེ་དེ་ཡི་གེའི་གཟུགས་སྒྲ་དང་བྲལ་བར་བསྟན་པའོ། །དང་པོ་ནི། པ་སྡེའི་ཐོག་མ་ནས་བགྲངས་པའི་བཅུ་གཉིས་ཀྱི་མཐའི་ཚིག་ནི། སྔར་བཤད་པའི་སྔགས་ཀྱི་ཐིག་ལེ་ཧཱུཾ་ཡིག་ཡིན་ལ། དེའི་དོན་ནི་སྙིང་གའི་མི་ཤིགས་པའི་ཐིག་ལེ་རྣལ་འབྱོར་པ་གང་གིས་རྟག་ཏུ་བསྒོམ་པ་ལ་གོམས་པར་བྱས་ན་དེ་ལྟར་བྱེད་པ་དེ་ནི་དངོས་གྲུབ་རྒྱས་པ་སྟེ་མ་ཚང་བ་མེད་པའི་རྡོ་རྗེ་འཛིན་པར་རང་ཉིད་འགྱུར་བས་དེ་བསྒོམ་པ་ལ་འབད་པར་གྱིས་ཤིག །འདིར་བསྡུས་པའི་དོན་ནི་འདི་ཡིན་ཏེ། བསྐྱེད་རིམ་ཕྲ་རགས་བརྟན་པར་བྱས་ནས་ལུས་དབེན་ལ་ལོབས་པ་ན། རྡོ་རྗེ་བཟླས་པའི་རྟེན་སྙིང་གར་མི་ཤིགས་པའི་ཐིག་ལེ་བསྒོམ་པ་དང་། དེ་ལས་རྡོ་རྗེའི་བཟླས་པ་བྱས་པའི་དབང་གིས་རླུང་རྣམས་ཨ་ཝ་དྷཱུ་ཏཱིའི་ལམ་ནས་མི་ཤིགས་པ་ལ་འདུས་པ་ན། སེམས་དབེན་གྱི་སྟོང་པ་གསུམ་འཐོབ་ཅིང་། དེའི་མཐར་རླུང་སེམས་ཙམ་ལས་སྒྱུ་མའི་སྐུ་འགྲུབ་བོ། །དེ་ནས་དེ་ཉིད་བསམ་གཏན་གཉིས་ཀྱི་འོད་གསལ་དུ་འཇུག་པ་ལ་གོམས་པར་བྱས་པས་འོད་གསལ་གྱི་རྗེས་སུ་སློབ་པའི་ཟུང་འཇུག་གི་སྐུ་འགྲུབ་ཅིང་། དེ་གོམས་པ་ཉིད་ཀྱིས་མི་སློབ་པའི་ཟུང་འཇུག་རྡོ་རྗེ་འཆང་ཐོབ་པར་འགྱུར་བའོ། །

---

^{[མ་དཔེ་གཟིགས་ན་འདིར་གནོན།]}

དེ་ལྟར་ན་ལེའུ་དང་པོར་རིམ་གཉིས་ཀྱི་ལམ་གྱི་ལུས་བཤད་པ་འདི་ཉིད་ཀྱིས་ཡན་ལག་རྣམས་ལེའུ་གཉིས་པ་ལ་སོགས་པས་འཆད་པར་ཤེས་པར་གྱིས་ཤིག །གཉིས་པ་ནི། སྔར་སྙིང་ཁར་བསྒོམ་པར་བཤད་པའི་ཡི་གེ་ཧཱུཾ་ནི། དོན་གྱི་མི་ཤིགས་པ་མཚོན་བྱེད་ཙམ་ཡིན་གྱི། དོན་གྱི་མི་ཤིགས་པ་ནི་ཡི་གེའི་སྒྲ་དང་ཁ་དོག་དང་དབྱིབས་ཀྱི་གཟུགས་གང་དུ་ཡང་མ་གྲུབ་པར་སྟོན་པ་ནི། ཁོང་པ་མགྲིན་པ་རྐན་དང་ལྕེ། །སྣ་དང་སྤྱི་བོ་སོ་དང་མཆུ། །ཞེས་སྒྲ་འབྱུང་བའི་གནས་བརྒྱད་བཤད་པའི་སོ་དང་མཆུ་དང་རྐན་དང་ལྕེ་དང་མགུལ་བ་དང་། དེས་མཚོན་པའི་སྒྲའི་གནས་གང་ལ་ཡོད་པ་དེ་ཡི་ཡི་གེ་ཉིད་དེ་ནི་ཡི་གེའི་རྐྱེན་གང་ལས་བརྗོད་མ་ཐག་ཏུ་ཟད་པ་སྟེ་འཛད་པ་དང་། ཡི་གེའི་ཁ་དོག་དང་དབྱིབས་བསྒོམས་པ་དེ་ཡང་ཟད་ཀྱང་མི་ཤིགས་པ་ནི་དེ་ལྟར་ཟད་པ་མེད་པར་གནས་པའི་ཕྱིར་ན། དོན་གྱི་མི་ཤིགས་པ་ནི་ངག་གི་ངོ་བོར་བརྗོད་པར་བྱུར་མེད་ཅིང་། བློས་ཀྱང་དངོས་སུ་ངེས་པར་མི་ནུས་པས་ཐེ་ཚོམ་པ་ཞེས་བཤད་ཀྱི་ཐེ་ཚོམ་གྱི་ཡུལ་དུ་སྟོན་པ་མིན་ནོ། །སྒྲ་སྟེ་གདངས་དང་ཡིག་འབྲུའི་གཟུགས་རྣམ་པར་སྤངས་པའི་དོན་གྱི་མི་ཤིགས་པ་དེ་ནི་རང་གི་ལུས་ཀྱི་ཕྱི་གཟུགས་སྒྲ་སོགས་དང་། ནང་མིག་ལ་སོགས་པའི་རྩ་བ་དེ་བཞིན་ཉིད་དེ་སྔར་ཆོས་ཀྱི་དབྱིངས་སུ་བཤད་པའི་རླུང་སེམས་ཀྱི་བྱང་ཆུབ་ཀྱི་སེམས་ནི་རྒྱུད་འདིར་གསུངས་སོ། །ལྔ་པ་ནི། ལྷ་མོ་བཞིས་ཡོངས་སུ་ཞུས་པའི་རྒྱུད་ཀྱི་རྣམ་པར་བཤད་པ་ལས། ལྷ་མོ་སྤྱན་མས་ཡོངས་སུ་ཞུས་པའི་

---

^{[མ་དཔེ་གཟིགས་ན་འདིར་གནོན།]}

ལེའུ་སྟེ་ལེའུ་དང་པོའི་རྣམ་པར་བཤད་པའོ།། །།གཉིས་པ་མཱ་མ་ཀཱིས་ཞུས་པའི་ལེའུ་ལ་དྲུག །ཞུ་བ་མཛད་ཚུལ། ཞུས་པའི་ལན་བཤད་པ། མི་ཤིགས་པའི་དེ་ཉིད་མི་ཤེས་པའི་ཉེས་དམིགས། རྡོར་བཟླས་ཀྱི་དམིགས་པ་སྔགས་ཀྱི་དེ་ཉིད་བཤད་པ། དྲིས་པའི་ལན་རྫོགས་པར་བསྟན་པ། ལེའུ་ཡི་མཚན་བསྟན་པའོ། །དང་པོ་ལ་གཉིས། །ཞུས་པའི་མཚམས་སྦྱོར། ཞུ་བ་དངོས་སོ། དང་པོ་ནི། །སྤྱན་མས་ཞུས་པའི་ལན་རྫོགས་པའི་རྗེས་དེ་ནས། ལྷ་མོ་མཱ་མ་ཀཱིས། རྡོ་རྗེ་ཅན་ཏེ་རྡོ་རྗེ་འཆང་ལ་འོག་ནས་འབྱུང་བའི་དོན་འདི་རྣམས་ཞུས་སོ། །ཞེས་སྡུད་པ་པོའི་ཚིག་གིས་མཚམས་སྦྱར་རོ། །ཏེ་ཞེས་པ་ནི་ལྷག་མ་འདྲེན་པའོ། །གཉིས་པ་ལ་ལྔ། གནས་བཞིའི་རླུང་འགྲོ་འོང་གསུངས་པའི་བཟླས་པ་ཞུས་པ། སྔགས་ཀྱི་ཐིག་ལེའི་ཆ་ཤས་ཞུས་པ། ཆ་ཤས་ཀྱི་གནས་ཞུས་པ། ཆ་ཤས་ཀྱི་ཁ་དོག་ཞུས་པ། ཆ་ཤས་གང་དུ་འདུ་བའི་གདན་ཞུས་པའོ། །དང་པོ་ནི། སྔར་ལེའུ་དང་པོར་གསུངས་པའི་བྱང་ཆུབ་ཀྱི་སེམས་ཀྱི་རིམ་པ་ཡི་ནང་ནས་ཕྱིར་འགྲོ་བ་དང་། ཕྱིར་ཏེ་ནང་དུ་ལྡོག་པ་རྒྱུད་གཞན་དུ་བསྟན་པའི་དོན་ནི། རྡོ་རྗེ་ཆེན་པོ་སྟེ་རྡོ་རྗེ་འཆང་གིས་བཀའ་སྩལ་པ་འཚལ་བ་སྟེ། དགོས་ཞེས་ཞུས་སོ། །བྱང་ཆུབ་སེམས་གང་ནས་འགྲོ་འོང་བྱེད་པའི་གནས་ནི་ཁ་སྟེ་མགྲིན་པ་དང་། སྙིང་ག་དང་། ལྟེ་བ་དང་། གསང་བའི་པདྨ་སྟེ་བཞིའོ། །ལ་ནི་ལྔ་པའི་དོན་ལ་བདུན་པའི་སྒྲའོ་འདིར་འགྲོ་འོང་བྱེད་པའི་བྱང་ཆུབ་ཀྱི་

---

^{[མ་དཔེ་གཟིགས་ན་འདིར་གནོན།]}

སེམས་དྲིས་པ་ནི་ལེའུ་དང་པོར་བྱང་ཆུབ་ཀྱི་སེམས་ལ་རླུང་དང་ཐིག་ལེ་གཉིས་བཤད་པའི་རླུང་ཡིན་ལ། རྒྱུད་གཞན་གང་ལས་བསྟན་པ་ནི། རྡོ་རྗེ་ཕྲེང་བ་ལས། སྟེང་གི་སྣ་ལ་ངེས་འབྱུང་བ། །གཡོན་དང་གཡས་དང་གཉིས་ཀ་དང་། །དལ་བར་རྒྱུ་དང་རྣམ་བཞིར་འགྱུར། །ནང་གི་དུས་ནི་ཡིན་པར་བཤད། །ལྐོག་མ་སྙིང་ཁ་ལྟེ་བ་དང་། །གསང་བའི་པདྨར་འགྲོ་འོང་སྟོན། །ཞེས་གསུངས་པ་དང་། དེ་འདྲ་བའི་རིགས་རྣམས་ཡིན་ནོ། །དོན་གྱི་དབང་འདི་གཟིགས་ནས། རིམ་ལྔར། དེ་ཉིད་ཡེ་ཤེས་ལྔ་ཡི་དངོས། །ཞེས་སོགས་ཀྱིས་ཡུངས་ཀར་གྱི་སྒྲས་བསྟན་པའི་སྟེང་གི་སྣ་རྩེར་རྒྱུ་བའི་རླུང་གི་དེ་ཉིད་བསྟན་པར་མཛད་པ་ཡིན་ལ། དེའི་ཕྱིར་ལེའུ་དང་པོར་ཡུམ་གྱི་པདྨར་སྤྲོས་པའི་བྱང་ཆུབ་ཀྱི་སེམས་ནི་ཐིག་ལེ་རྐྱང་པ་མིན་པར་རླུང་དང་བཅས་པ་ཡིན་པ་དང་། དེ་ཉིད་ཡེ་ཤེས་ལྔ་ཡི་དངོས། །ཞེས་སོགས་ཀྱི་དོན་རླུང་ལའང་བཤད་དགོས་པར་ལེའུ་གཉིས་པ་འདིས་ཤེས་པ་ཡིན་ནོ། །གཉིས་པ་ནི། ལེའུ་དང་པོར་བཤད་པའི་སྙིང་ཁའི་སྔགས་ཀྱི་ཐིག་ལེ་ཧཱུཾ་ཡིག་ལ་ཆ་ཤས་ཀྱི་གྲངས་རྣམ་པ་དུ་ཞིག་གསུངས་པ་སྟེ་དུ་ཞིག་ཡོད་ཅེས་དྲིས་སོ། །གསུམ་པ་ནི། ཆ་ཤས་དེ་གང་ལ་གནས་པའི་གནས་ཀྱི་རྣམ་པར་བསྒྱུར་བ་སྟེ་གྲངས་དུ་ཞིག་ཡོད་ཅེས་དྲིས་ཏེ། དཔེ་ཁ་ཅིག་ལས། གནས་ཀྱི་རྣམ་པ་དུ་ཞིག་གསུངས། །ཞེས་ཀྱང་འབྱུང་བས་རྣམ་པར་བསྒྱུར་བའི་དོན་ནི་གྲངས་སོ། །བཞི་པ་ནི། ཆ་ཤས་དེ་རྣམས་ཀྱི་ཁ་དོག་རྣམ་པ་དུ་ཞིག་གསུངས་པ་སྟེ། དུ་ཞིག་ཡོད་ཅེས་དྲིས་སོ། །

---

^{[མ་དཔེ་གཟིགས་ན་འདིར་གནོན།]}

ལྔ་པ་ནི། ཆ་ཤས་ཀྱི་ཁ་དོག་སོགས་ཞུས་པ་དེ་བཞིན་དུ། དེར་མ་ཟད་ཆ་ཤས་རྣམས་གང་དུ་འདུ་བའི་གདན་ཡང་ཇི་ལྟར་འཚལ་བ་སྟེ། ཤེས་པར་བྱ་ཞེས་ཞུས་སོ། །སྔར་བཤད་པའི་བཀའ་སྩལ་འཚལ་ཞེས་པ་ནི་འོག་མ་རྣམས་ཀྱི་མཐར་ཡང་འཐོབ་བོ། །གཉིས་པ་ལ་དྲུག །ཆ་ཤས་ཞུས་པའི་ལན། ཆ་ཤས་ཀྱི་གནས་ཞུས་པའི་ལན། དེ་རྣམས་ཀྱིས་གྲུབ་པའི་དོན། ཆ་ཤས་ཀྱི་ཁ་དོག་ཞུས་པའི་ལན། རླུང་འགྲོ་འོང་གི་བཟླས་པ་ཞུས་པའི་ལན། ཆ་ཤས་གང་དུ་འདུ་བའི་གདན་ཞུས་པའི་ལན་ནོ། །དང་པོ་ནི། དྲི་བ་དེ་རྣམས་ཀྱི་ལན་རྡོ་རྗེ་ཅན་གྱིས་བཀའ་སྩལ་པ་ནི། འོག་ནས་འབྱུང་བ་འདི་རྣམས་སོ། །སྔགས་ཀྱི་ཐིག་ལེ་དེ་ཆ་ཤས་གྲངས་བཞི་དང་མཉམ་པ་སྟེ། ཡང་དག་པར་ལྡན་ནོ། །མཉམ་པའི་སྐད་དོད་ཡང་དག་པ་ལ་ཡང་བཤད་དུ་ཡོད་པས་དེ་ལྟར་བཤད་པ་མང་དུ་སྣང་ངོ་། །ཆ་ཤས་བཞི་ནི་མགོ་བོ་དང་། མགོ་བོ་མེད་པའི་ལུས་དང་། ང་རོའམ་སྒྲ་དང་། ང་རོའི་མཐའ་འམ་སྒྲའི་མཐའ་འོ། །ཞིང་ནི་ལན་འོག་མ་སྡུད་པའོ། །གཉིས་པ་ནི། ཆ་ཤས་དེ་རྣམས་གང་ལ་གནས་སྙམ་ན། པདྨ་བཞི་ལ་ཡང་དག་པར་གནས་སོ། །འོ་ན་ཆ་ཤས་གང་པདྨ་གང་ལ་གནས་སྙམ་ན། སྙིང་གི་པདྨ་ལ་གནས་གནག །ཁ་ཡི་པདྨ་ལ་གནས་དཀར། །ང་རོ་ལྟེ་བའི་པདྨར་གནས། །གསང་བའི་པདྨར་ང་རོའི་མཐའ། །ཞེས་པ་བཞིའོ། །ཆ་ཤས་གང་པདྨ་གང་ལ་གནས་པ་སྟོན་པའི་སྐབས་འདིར། །རྐང་པ་འོག་མ་གཉིས་ཀྱིས་ང་རོ་ལྟེ་བའི་པདྨ་དང་། ང་རོའི་

---

^{[མ་དཔེ་གཟིགས་ན་འདིར་གནོན།]}

མཐའ་གསང་བའི་པདྨར་གནས་པར་བཤད་པ་བཞིན་དུ་རྐང་པ་དང་པོ་གཉིས་ཀྱིས་ཀྱང་སྙིང་ཁ་དང་ཁའི་པདྨར་ཆ་ཤས་འདི་གནས་ཞེས་བཤད་རྒྱུ་ཡིན་པ་ལ། དེ་གཉིས་ལ་འདི་གནས་མ་བཤད་པར་དེ་གཉིས་ལ་གནས་པའི་ཁ་དོག་བཤད་པ་ནི་ཤུན་ཏུ་མ་འབྲེལ་ཞིང་། ཁ་དོག་འོག་ནས་འཆད་པས་འདིར་བཤད་མི་དགོས་པའི་ཕྱིར་རོ། །བཤད་དགོས་པ་མ་བཤད་ཅིང་། བཤད་མི་དགོས་པ་བཤད་པ་འདི་ནི། རྒྱ་གར་གྱི་དཔེ་མ་དག་པ་ལས་བསྒྱུར་བའི་སྐྱོན་ནོ། །དེས་ན་ཁ་ཆེའི་མཁས་པ་ལཀྵྨཱིའི་རིམ་ལྔའི་འགྲེལ་པར་བསྒྱུར་བ་འགྱུར་ལེགས་ཏེ། དེ་ནི། མགོ་མེད་སྙིང་གའི་པདྨར་གནས། །ཁ་ཡི་པདྨར་མགོ་བོ་གནས། །ལྟེ་བའི་པདྨར་སྒྲ་གནས་ཏེ། །སྒྲ་མཐའ་གསང་བའི་པདྨ་ལའོ། །ཞེས་འབྱུང་བའོ། །དེ་ལྟར་ན་མགོ་བོ་མེད་པའི་ཧཱུཾ་གི་ལུས་ནི་སྙིང་གའི་པདྨར་གནས་ལ། ཁ་སྟེ་མགྲིན་པའི་པདྨར་ནི་ཧཱུཾ་ཡིག་གི་མགོ་བོ་གནས་སོ། །ལྟེ་བའི་པདྨར་ནི་སྒྲ་སྟེ་ཧཱུཾ་ཡིག་གི་ཞབས་བསྐྱེད་ཨཱུ་ཡིག་གནས་ཏེ། སྒྲའི་མཐའ་སྟེ་ཧཱུཾ་གི་ཐིག་ལེ་ནི་གསང་བའི་གནས་ཀྱི་པདྨ་ལ་གནས་སོ། །འགྲེལ་པ་གཉིས་ཀྱིས་ནི། ཆོས་ཀྱི་དབྱིངས་དེ་ༀ་ནག་པོ་དང་། ཀྵ་དཀར་པོ་དང་། ཧཱུཾ་དམར་པོ་དང་། ཨཱ་སེར་པོའི་གཟུགས་ཀྱིས་རིམ་པ་བཞིན་སྙིང་ཁ་དང་། ཁ་དང་ལྟེ་བ་དང་གསང་གནས་ཀྱི་པདྨ་ལ་གནས་པར་འཆད་ཀྱང་ལཀྵྨཱིའི་འགྲེལ་པར་སྔར་བཞིན་བཤད་པ་ཉིད་ལེགས་སོ། །གསུམ་པ་ལ་གསུམ། སྙིང་ཁའི་ཐིག་ལེ་ལས་འགྲོ་འོང་གི་བཟླས་པ་བྱ་བར་བསྟན་པ། མི་ཤིགས་པའི་ཐིག་ལེས་བྱ་བ་ཀུན་བྱེད་ཚུལ།

---

^{[མ་དཔེ་གཟིགས་ན་འདིར་གནོན།]}

སྔགས་ཀྱི་ཐིག་ལེ་ཤེས་པའི་ཕན་ཡོན་ནོ། །དང་པོ་ནི། འོ་ན་ཧཱུཾ་ཡིག་གི་ཆ་ཤས་བཞི་ཕྲལ་ནས་རྩ་འཁོར་བཞི་ལ་གནས་པར་བཤད་པ་དེ་དོན་གང་གི་དབང་དུ་བྱས་པ་ཡིན་ཞེ་ན། ཐབས་ཀྱི་མཐའ་རུ་འགྲོ་བྱེད་གནས། །ཐིག་ལེའི་སྦྱོར་བ་རབ་ཏུ་གནས། །ཞེས་བསྒྱུར་ཡང་། ལཀྵྨཱིའི་འགྲེལ་པར། འགྲོ་དང་འོང་བར་བྱེད་པ་འདི། ཐིག་ལེ་རྣལ་འབྱོར་རབ་ཏུ་འཇུག །ཅེས་བསྒྱུར་བ་ཉིད་ལེགས་པས་དེའི་སྟེང་ནས་བཤད་ན། ཧཱུཾ་ཡིག་གི་ཆ་ཤས་བཞི་ནི་སྙིང་ག་ལ་སོགས་པའི་རྩ་འཁོར་བཞི་ལ་གནས་ནས་ཕྱི་ནང་དུ་འགྲོ་བ་དང་འོང་བར་བྱེད་པའི་འབྱུང་བ་བཞིའི་རླུང་བཞི་པོ་འདི་ཡིན་ལ། དེ་སྙིང་ཁར་གནས་པའི་ཧཱུཾ་ཡིག་གི་ཆ་ཤས་སུ་བཤད་པ་ན་ཆ་ཤས་རྣམས་ཆ་ཅན་དུ་འདུ་དགོས་པའི་གནད་ཀྱིས་སྔུགས་ཀྱི་ཐིག་ལེ་ཧཱུཾ་ཡིག་གི་མཚོན་དོན་མི་ཤིགས་པའི་ཐིག་ལེ་ལ་དམིགས་ནས་ཕྱི་ནང་དུ་རབ་ཏུ་འཇུག་པར་བྱེད་པའི་རྡོ་རྗེའི་བཟླས་པའི་རྣལ་འབྱོར་བྱ་དགོས་པར་སྟོན་པ་ཡིན་ནོ། །ཚུལ་འདི་རྒྱུད་རྡོ་རྗེ་ཕྲེང་བ་ལས། ཧཱུཾ་ཡིག་གི་ཧ་དང་ཨཱུ་དང་མུ་གསུམ་རིམ་པ་བཞིན་གསང་བར་གནས་པའི་ཐུར་སེལ་དང་མགྲིན་པར་གནས་པའི་གྱེན་རྒྱུ་དང་། སྨིན་མཚམས་ཀྱི་འཁོར་ལོ་ལ་ཁྱབ་པའི་སྲོག་འཛིན་གསུམ་ལ་བྱས་ནས་ཡི་གེ་གསུམ་གཅིག་ཏུ་འདུས་པ་ཐུགས་ཀའི་ཧཱུཾ་དུ་གྱུར་པའི་དོན་རླུང་དེ་གསུམ་སྙིང་ཁའི་རྩ་འཁོར་གྱི་དབུས་སུ་འདྲེས་པའི་དོན་དུ་བཤད་པ་དང་རིགས་མཚུངས་པ་ཡིན་ནོ། །སྔར་ལེའུ་

---

^{[མ་དཔེ་གཟིགས་ན་འདིར་གནོན།]}

དང་པོར། །དེ་ཉིད་ཡེ་ཤེས་ལྔ་ཡི་དངོས། །ཞེས་པའི་རླུང་གི་དེ་ཉིད་བསྟན་ཡང་མི་གསལ་ལ། འབྱུང་བ་བཞིའི་རླུང་ཡང་སོ་སོར་མ་ཕྱེ་བ་དང་། སྙིང་གར་མི་ཤིགས་པའི་ཐིག་ལེ་བསྒོམ་པ་བཤད་ཀྱང་། དེ་ལས་ལྡང་འཇུག་གི་བཟླས་པ་བྱེད་པ་མི་གསལ་བ་ལེའུ་འདིར་དེའི་དོན་རླུང་ཡིན་པ་དང་། དེ་ཡང་གནས་བཞི་ལ་གནས་པའི་རླུང་འགྲོ་འོང་བྱེད་པ་ཡིན་པ་དང་། དེ་ཉིད་ཀྱང་སྙིང་ཁའི་ཐིག་ལེའི་རྣལ་འབྱོར་གྱི་ཡན་ལག་ཏུ་གསུངས་པས། སྲོག་རྩོལ་རྡོ་རྗེའི་བཟླས་པའི་བྱ་ཐབས་མཐར་ཐུག་པ་བསྟན་པ་ཡིན་ནོ། །རྩ་རྒྱུད་ལེའུ་གསུམ་པའི་སྒྲོན་གསལ་ལས། སྣ་རྩེ་གསུམ་བཤད་པའི་སྙིང་གའི་སྣ་རྩེར་མི་ཤིགས་པ་བསྒོམས་ནས་རྡོ་རྗེ་བཟླས་པ་བྱ་ཚུལ་བཤད་པ་ཡང་། བཤད་པའི་རྒྱུད་འདིའི་དོན་དུ་སྣང་ངོ་། །དེ་ལྟར་ན་སྔར། ཁ་སྙིང་ལྟེ་བ་གསང་བ་ལ། །ཞེས་ཞུས་པའི་དོན་འདིར་ཡང་བཤད་མོད་ཀྱང་གཙོ་བོར་ནི། ཐིག་ལེའི་གཟུགས་སུ་བསྒྱུར་བ་དེ། །འགྲོ་དང་ཕྱིར་འོང་རྣམ་པར་བསྟན། །ཞེས་པའི་སྐབས་སུ་འཆད་དོ། །རྡོ་རྗེ་བཟླས་པ་བྱེད་ཚུལ་འདི་རྡོར་བཟླས་བྱས་པའི་དགོས་པ། སྙིང་ཁའི་རྩ་མདུད་ཀྱི་དབུས་ཀྱི་ཨ་ཝ་དྷཱུ་ཏཱིའི་ནང་དུ་མི་ཤིགས་པ་ལ་རླུང་སྡུད་བྱེད་ཀྱི་ཐབས་མཆོག་ཡིན་པ་འདི་ཇི་བཞིན་དུ་མ་ཐོན་པས་རྡོ་རྗེ་བཟླས་པའི་གནད་མཐར་ཐུག་པ་བསྟན་པའི་འདུས་པ་རྩ་བཤད་ཀྱི་དོན་འཕགས་པ་ཡབ་སྲས་ཀྱིས་བཀྲལ་བའི་གདམས་པའི་སྲོག་རྩོལ་གྱི་གནད་ལེགས་པར་ཟིན་པ་ཤིན་ཏུ་ཉུང་བར་བྱུང་འདུག་གོ ལཀྵྨཱིས་མགོ་བོ་མེད་པའི་ཧཱུཾ་གི་ལུས་ཀྱིས་རླུང་ཕྱིར་ལྡང་བ་དང་།

---

^{[མ་དཔེ་གཟིགས་ན་འདིར་གནོན།]}

མགོ་བོས་རླུང་གནས་པ་དང་། སྒྲས་རླུང་ནང་དུ་འཇུག་པ་དང་། སྒྲའི་མཐས་རླུང་ལྡང་འཇུག་གནས་པ་ཐམས་ཅད་ཉེ་བར་བསྡུས་པ་དབུགས་དང་བྲལ་བ་བསྟན་པར་བཤད་ཀྱང་། ཆ་ཤས་བཞི་སྙིང་ཁ་ལ་སོགས་པའི་པདྨ་བཞི་ལ་གནས་ནས་འགྲོ་འོང་བྱེད་པའི་རླུང་ལ་འདིར་གསལ་བར་བཤད་པས། བཤད་པ་དེ་ཅུང་ཟད་འགྲིག་པར་མ་མཐོང་ཡང་ཆ་ཤས་བཞིའི་ཆ་ཅན་ཧཱུཾ་ཡིག་ལ་བཤད་པ་ནི་ཤིན་ཏུ་ལེགས་པར་མཐོང་ངོ་། །དེའི་ཕྱིར་སྔར་ལེའུ་དང་པོར། བཅུ་གཉིས་ཀྱི་ནི་ཐ་མ་ལ། །ཞེས་སོགས་ཀྱིས་བཏུས་པའི་སྙིང་གའི་སྔགས་ཀྱི་ཐིག་ལེའི་ཡི་གེ་ནི་ལེའུ་གཉིས་པ་འདིར་ཧཱུཾ་ཡིག་གི་དོན་དུ་བཤད་པས་ཀྵུཾ་ལ་འཆད་པ་དོན་མིན་ནོ། །གཉིས་པ་ལ་གཉིས། ཐ་མལ་པ་དང་ཐུན་མོང་བ་ལ་བྱ་བ་བྱེད་ཚུལ། རྣལ་འབྱོར་པ་ལ་བྱ་བ་བྱེད་ཚུལ་ལོ། །དང་པོ་ལ་གསུམ། མཐོང་ཐོས་ལ་སོགས་པའི་བྱ་བ་བྱེད་པ། རྒྱལ་པོ་ལ་སོགས་པ་ལ་བྱ་བ་བྱེད་པ། ཁམས་གསུམ་གྱི་བྱ་བ་བྱེད་ཚུལ་ལོ། །དང་པོ་ནི། མི་ཤིགས་པའི་ཐིག་ལེའི་རྩ་བ་ཅན་གྱི་རླུང་དེ་ཁོ་ནས་བྱེད་དོ་ཞེས་ཁྱད་པར་གྱི་གཞིར་དྲང་ངོ་། །གང་བྱེད་ན། སྣའི་དབང་པོས་དྲི་སྣོམ་པར་བྱེད་པ་དང་། རྣ་བའི་དབང་པོས་སྒྲ་ཐོས་པར་བྱེད་པ་དང་། མིག་གི་དབང་པོས་གཟུགས་མཐོང་བར་བྱེད་པ་དང་། ལྕེའི་དབང་པོས་རོ་ཟ་བ་སྟེ་མྱོང་བར་བྱེད་པ་དང་། ལུས་ཀྱི་དབང་པོས་རེག་བྱ་ལ་རེག་པར་བྱེད་པ་དང་། ཡིད་ཀྱི་དབང་པོས་བདེ་བ་དང་སྡུག་བསྔལ་ཚོར་བ་རིག་

---

^{[མ་དཔེ་གཟིགས་ན་འདིར་གནོན།]}

པར་བྱེད་པ་རྣམས་སོ། །དུས་ནི། གང་གི་ཚེ་རང་རང་གི་ཕྱི་ནང་གི་རྐྱེན་ཚོགས་པ་དེའི་ཚེའོ། །ཀྱང་ནི་སྔ་མ་སྔ་མར་མ་ཟད་པའོ། །དེ་ལྟར་ཡང་རིམ་ལྔ་ལས། རླུང་རྣམས་ཕྲ་བའི་གཟུགས་ཀྱིས་ནི། །ཤེས་དང་ཡང་དག་འདྲེས་གྱུར་ནས། །དབང་པོའི་ལམ་ནས་བྱུང་ནས་ནི། །ཡུལ་རྣམས་ལ་ནི་དམིགས་པར་བྱེད། །ཅེས་གསུངས་སོ། །རྐྱེན་གང་ལས་བཞད་གད་བྱེད་པ་དང་ངག་ཟློས་པར་བྱེད་པ་དང་། དེ་བཞིན་དུ་ཆོ་ངེ་དང་ངུ་བར་བྱེད་པ་ལ་སོགས་པའི་ངག་གི་ལས་དང་འབྱར་བ་རྣམས་སོ་སོར་འབྱེད་པར་བྱེད་པ་དང་། ཤིང་ལ་སོགས་པ་གཅོད་པར་བྱེད་པའི་ལུས་ཀྱི་ལས་དང་། འཇིག་རྟེན་གྱི་གཙུག་ལག་རིག་པ་ལ་སོགས་པ་ཆོ་ག་རྣམ་པ་མང་པོ་ཤེས་པའི་ཡིད་ཀྱི་ལས་རྣམས་ཀྱང་ཤེས་པ་དད་འདྲེས་པའི་རླུང་དེ་ཁོ་ནས་བྱེད་དོ། །གཉིས་པ་ནི། མི་ཤིགས་པ་ལ་བརྟེན་པའི་རླུང་དེ་ཁོ་ནས་འཁོར་ལོས་སྒྱུར་བ་དང་། མཁར་གྱི་རྒྱལ་པོའི་དོན་ཏེ་དགོས་པ་རྣམས་ཀྱང་བྱེད་པར་འགྱུར་ལ། ཁྱིམ་བདག་ཤིང་སཱ་ལ་ལྟ་བུའི་དབང་ཕྱུག་གི་དོན་ཡང་སྔར་བཤད་པ་དེ་བཞིན་དུ་ཤེས་པ་དང་འདྲེས་པའི་རླུང་གིས་བྱེད་དོ། །བྲམ་ཟེའི་རིགས་དང་། རྒྱལ་པོའི་རིགས་དང་། རྗེའུ་ཡི་རིགས་དང་། སྨད་པའི་རིགས་དམངས་རིགས་དང་། བུད་མེད་དུ་གྱུར་པ་ཡང་དེས་སྤྲུལ་པར་བྱེད་དོ། །ཡང་གི་སྒྲས་ནི་བཤད་ཟིན་པ་དང་མ་ཟིན་པ་གཉིས་ཀ་སྡུད་པས་སྐྱེས་པ་སྤྲུལ་པའང་བཟུང་ངོ་། །དེ་བཞིན་དུ་དུད་འགྲོ་དང་ཡི་དྭགས་སུ་སྐྱེ་བ་དང་། དེས་མཚོན་ནས་དམྱལ་བར་སྐྱེ་བ་ཡང་དེས་

---

^{[མ་དཔེ་གཟིགས་ན་འདིར་གནོན།]}

བྱེད་དོ། །གསུམ་པ་ནི། གཟུགས་ཅན་ཏེ་གཟུགས་ཀྱི་ཁམས་ཀྱི་སྲིད་པ་དང་། གཟུགས་མེད་པའི་ཁམས་ཀྱི་སྲིད་པ་དང་། དེ་བཞིན་དུ་འདོད་པའི་ཁམས་ཀྱི་སྲིད་པ་རྣམས་ལས་འབྱུང་བའི་སེམས་ཅན་ཐམས་ཅད་སྐྱེད་པར་བྱེད་པ། རྫུ་འཕྲུལ་ཏེ་སྣོད་བཅུད་སྣ་ཚོགས་པར་སྤྲུལ་པ་དེ་རྣམས་ཀྱི་གནས་ནི་ཤེས་པ་དང་འདྲེས་པའི་རླུང་དེ་ཁོ་ན་ཉིད་ཡིན་ཏེ། དགོངས་པ་ལུང་སྟོན་ལས། འདུ་ཤེས་ཅན་དང་འདུ་ཤེས་མེད། །སེམས་ཅན་དུ་བཏགས་འདི་གནས་པ། །དེ་རྣམས་རླུང་ལས་བྱུང་བ་སྟེ། །རླུང་ལས་སླར་ཡང་འགག་པ་ཡིན། །ཞེས་གསུངས་སོ། །གཉིས་པ་ནི། རླུང་དང་སེམས་ཀྱིས་མོའི་གཟུགས་དང་ཕོའི་གཟུགས་སུ་སྤྲུལ་ནས་གནས་པའི་ཐབས་ཤེས་མཉམ་པར་སྦྱོར་བའི་རྣལ་འབྱོར་པ་རྣམས་ལ་ནི་ཕྱག་རྒྱ་དེ་ཉིད་བདེ་བ་ཆེན་པོའི་གོ་འཕང་མཆོག་འཐོབ་པའི་གནས་སུ་གྱུར་ཏེ། དེ་ཁོ་ན་ཉིད་གྲུབ་པ་ལས། འདིར་གཉིས་སུ་མེད་ཅིང་རང་བཞིན་གྱིས་རྣམ་པར་དག་པའི་གནས་སྐབས་སུ་བདག་ཉིད་ཀྱི་དོན་དེ་རྟོགས་པར་བྱ་བའི་ཕྱིར། བདག་ཉིད་སྐྱེས་པ་དང་བུད་མེད་ཀྱི་གཟུགས་སུ་མངོན་པར་སྤྲུལ་ཏེ། ཞེས་གསུངས་པ་བཞིན་ནོ། །གསུམ་པ་ནི། སྔར་བཤད་པ་དེ་ལྟར་མི་ཤིགས་པ་གང་ཡིན་པ་དེས་རང་རང་གི་བདག་ཉིད་ཀྱིས་འགྲོ་བ་ཀུན་ལ་ཁྱབ་ནས་གནས་པའི་དེ་བཞིན་ཉིད་དེ་མི་ཤིགས་པའི་དེ་ཁོ་ན་ཉིད་ཤེས་པས་དམ་པ་སྟེ་མཆོག་གི་ཡིག་འབྲུ་སྔགས་ཀྱི་ཐིག་ལེའི་དེ་ཉིད་ཤེས་པ་གང་ཡིན་པ་དེས་ནི་གསང་ཆེན་

---

^{[མ་དཔེ་གཟིགས་ན་འདིར་གནོན།]}

སངས་རྒྱས་ཀྱི་སྤྱོད་ཡུལ་ཞེས་སྔར་བཤད་པ་དེའི་དོན་ཤེས་པ་ཡིན་ནོ། །བཞི་པ་ནི། སྔར་ཆ་ཤས་ཀྱི་ཁ་དོག་ཞུས་པའི་ལན་སྟོན་པ་ནི། ཧཱུཾ་ཡིག་གི་ཆ་ཤས་ལྟེ་བའི་པདྨར་གནས་པའི་སྒྲ་ཨཱུ་ཡིག་གི་དོན་ནི་རླུང་གི་རླུང་མཉམ་གནས་ཡིན་ལ། དེ་ནི་ཁ་དོག་མེད་པ་སྟེ་ཁ་དོག་ནག་པོའོ། །ནག་པོ་ཁ་དོག་མི་གསལ་བ་ལ་ཁ་དོག་མེད་ཅེས་དགག་པའི་སྒྲ་སྦྱོར་བོའོ། །མགྲིན་པར་གནས་པའི་ཧཱུཾ་གི་མགོ་བོའི་དོན་ནི་མེའི་རླུང་གྱེན་རྒྱུ་ཡིན་ལ། དེ་ནི་ཁ་དོག་དམར་པོའོ། །སྙིང་གར་གནས་པའི་ཧཱུཾ་གི་ལུས་ཀྱི་དོན་ནི་ཆུའི་རླུང་སྲོག་འཛིན་ཡིན་ལ། དེ་ནི་ཁ་དོག་དཀར་པོའོ། །གསང་གནས་སུ་གནས་པའི་སྒྲའི་མཐའི་དོན་ནི་སའི་རླུང་ཐུར་སེལ་ཡིན་ལ། དེ་ནི་ཁ་དོག་སེར་པོའི། །རླུང་དེ་རྣམས་གནས་དེ་དག་ཏུ་གནས་པ་དང་ཁ་དོག་ནི་རྒྱུད་རྡོ་རྗེ་ཕྲེང་བ་ལས་གསུངས་སོ། །ལྔ་པ་ནི། སྔར་གནས་བཞི་ལ་གནས་ནས་རླུང་ཕྱིར་འགྲོ་བ་དང་ནང་དུ་ལྡོག་པར་རྒྱུད་གཞན་དུ་བསྟན་པའི་དོན་བཀའ་སྩལ་དགོས་ཞེས་ཞུས་པ་ནི། རླུང་འགྲོ་འོང་གི་རྡོ་རྗེའི་བཟླས་པ་བྱེད་པ་ན་གནས་དེ་རྣམས་སོ་སོ་ནས་བྱེད་རྒྱུ་ཡིན་ནམ་ཞེས་ཞུས་པ་ཡིན་ལ། དེའི་ལན་དུ་རྒྱུད་གཞན་ལས་གནས་བཞི་ནས་རླུང་ནང་ནས་ཕྱིར་འགྲོ་བ་དང་ཕྱིར་ནང་དུ་འོང་བར་རྣམ་པར་བསྟན་པའི་དགོངས་པ་ནི། ནག་པོ་ནས་སེར་པོ་ཡི་བར་གྱི་རླུང་བཞི་སྙིང་གའི་མི་ཤིགས་པའི་ཐིག་ལེའི་གཟུགས་སུ་བསྒྱུར་པ་དེའི་འགྲོ་འོང་ལ་རྡོར་བཟླས་བྱ་དགོས་པའི་དོན་ཡིན་གྱི། གནས་བཞི་སོ་སོ་ནས་བྱེད་པ་མིན་ནོ། །དེས་ན་རྡོ་རྗེ་བཟླས་པས་ཞི་སོགས་

---

^{[མ་དཔེ་གཟིགས་ན་འདིར་གནོན།]}

ཀྱི་ལས་བསྒྲུབ་པའི་སྐབས་མ་གཏོགས་པ་རླུང་དབུ་མར་སྡུད་པའི་ཐབས་སུ་དཀྱིལ་འཁོར་བཞིའི་རླུང་ལ་བཟླས་པ་བྱེད་པ་ན་མགྲིན་པ་དང་ལྟེ་བ་དང་གསང་གནས་ནས་འགྲོ་འོང་གི་བཟླས་པ་བྱེད་པ་དང་། སྙིང་གའི་མི་ཤིགས་པ་ལ་མ་དམིགས་པར་སྙིང་ཁ་ནས་འགྲོ་འོང་གི་བཟླས་པ་བྱེད་པ་མིན་གྱི། སྙིང་གར་མི་ཤིགས་པའི་ཐིག་ལེ་ལེའུ་དང་པོར་བཤད་པ་བཞིན་བཀོད་ནས་དེ་ནས་དེ་ལས་ལྡང་འཇུག་གི་བཟླས་པ་བྱ་དགོས་ཞེས་པའོ། །རླུང་བཞི་སྙིང་ཁའི་ཐིག་ལེའི་གཟུགས་སུ་བསྒྱུར་བའི་དོན་ནི་བློས་ཐིག་ལེའི་གཟུགས་དེ་ལས་ལྡང་འཇུག་བྱེད་པར་བསྒྱུར་བའོ། །སྨྲི་ཏིས་བསྒྱུར་བའི་གཞུང་ཁ་ཅིག་ལས། ཐིག་ལེའི་གཟུགས་དངོས་དེ་འདི་ནི་ ཞེས་ཀྱང་འབྱུང་ངོ་། །དེ་ལྟར་གསུངས་པའི་གནད་གྱིས་སྔར་བཤད་པའི་ཧཱུཾ་གི་ཆ་ཤས་བཞིའི་དོན་གནས་བཞིའི་རླུང་ཁ་དོག་བཞི་ལྡན་ལ་བྱ་དགོས་པ་དང་། ཧཱུཾ་གི་ཆ་ཤས་བཞི་ཆ་ཅན་ཧཱུཾ་ཡིག་ཏུ་འདུ་བའི་དོན་རླུང་བཞི་ག་མི་ཤིགས་པའི་ཡན་ལག་ཏུ་བྱ་དགོས་པར་ཤེས་པ་ཡིན་ནོ། །གྲུབ་ཆེན་རྣམས་ཀྱི་རྫོགས་རིམ་གྱི་ལམ་སྐྱོང་རྒྱུ་གལ་ཆེ་བ་ཅིག་ནི་བདེ་སྟོང་སྦྱོར་བ་ཡིན་ལ། དེའི་བདེ་བ་ནི་ཕྱི་ནང་དང་སྔགས་དང་ཕར་ཕྱིན་ཐུན་མོང་བའི་ལམ་བཞིན་སེམས་རྩེ་གཅིག་ཏུ་གནས་པའི་ཞི་གནས་གྲུབ་པ་ན། དེའི་མཐུས་རླུང་ལས་སུ་རུང་བ་ལ་བརྟེན་ནས་ལུས་ཤིན་སྦྱངས་སྐྱེ་ལ། དེ་ལ་བརྟེན་ནས་འབྱུང་བའི་བདེ་བ་དང་། རྒྱུད་སྡེ་འོག་མའི་ལམ་བཞིན་རྩ་འཁོར་གྱི་གནད་དུ་

---

^{[མ་དཔེ་གཟིགས་ན་འདིར་གནོན།]}

མ་བསྣུན་པའི་རླུང་ནང་དུ་བཟུང་ནས་ཕྱིར་རྒྱུ་བ་བཀག་པ་ཙམ་ལ་བརྟེན་ནས་བྱུང་བ་དང་། རྡོར་བཟླས་མ་ཡིན་པའི་རླུང་འབྱུང་འཇུག་བགྲངས་པ་ལ་བརྟེན་ནས་བྱུང་བའི་བདེ་བ་གྲངས་པ་ཡང་མིན་པས། རྣལ་འབྱོར་བླ་མེད་ནས་བཤད་པའི་རྩ་འཁོར་གྱི་གནད་རྣམས་སུ་གནད་དུ་བསྣུན་པ་ལས་སྐྱེད་པའི་བདེ་བ་ཁོ་ན་ཡིན་ནོ། །དེ་བཞིན་དུ་སྟོང་པ་ཡང་སེམས་ཅིར་ཡང་མི་འཛིན་པ་ཙམ་མིན་གྱི། དབུ་མ་ནས་བཤད་པ་ལྟར་ཆོས་རྣམས་ཀྱི་ཡིན་ལུགས་ཕུ་ཐག་ཆོད་པར་གོ་བའི་བདག་མེད་རྟོགས་པའི་གོ་བ་ཡིན་ལ། དེ་བདེ་བ་ཆེན་པོའི་ངོ་བོར་སྐྱེས་པ་དེས་ཡུལ་སྟོང་པ་ཉིད་ངེས་པའི་ངེས་ཤེས་ཀྱི་རྒྱུན་སྐྱོད་བ་ནི་བདེ་སྟོང་དབྱེར་མེད་ཀྱི་ལམ་མོ། །དེ་འདྲ་བའི་ལུས་ལ་གནད་དུ་བསྣུན་ཚུལ་ནི། རྒྱུད་སོ་སོ་ལ་བརྟེན་ནས་གྲུབ་ཆེན་རྣམས་ཀྱིས་མི་འདྲ་བ་མང་དུ་གསུངས་པ་རྣམས་ལས། འཕགས་པ་ཡབ་སྲས་ཀྱིས་ཕྱི་ནང་གི་རྐྱེན་གཉིས་གསུངས་པའི་ནང་གི་རྐྱེན་ལ། ཐོག་མར་བསྒོམ་པའི་ལུས་ལ་གནད་དུ་བསྣུན་ཚུལ་ནི། སྣ་རྩེ་གསུམ་དུ་ཐིག་ལེ་གསུམ་བསྒོམ་པའི་སྲོག་རྩོལ་ཡིན་ལ། དེའི་ཡང་གཙོ་བོ་ནི་གདོང་གི་སྣ་རྩེར་འོད་ཀྱི་ཐིག་ལེ་དང་། སྙིང་གའི་སྣ་རྩེར་སྔགས་ཀྱི་ཐིག་ལེ་བསྒོམ་པ་གཉིས་སྒྲགས་པའི་རྡོ་རྗེའི་བཟླས་པ་ཡིན་གྱི་གཞན་མང་པོ་རྣམས་མ་གསུངས་སོ། །དེའི་གནད་རྒྱུད་འདིར་བཤད་པ་བཞིན་མ་ངེས་ན། རྡོ་རྗེ་བཟླས་པའི་ནུས་པ་མི་ཐོན་ཞིང་། ལམ་གྱི་སྐབས་དོན་འཕྱུག་པས། དེར་མ་སོང་བར་བྱ་བ་ལ་འབད་པར་

---

^{[མ་དཔེ་གཟིགས་ན་འདིར་གནོན།]}

གྱི་ཤིག །དྲུག་པ་ནི། གནས་དང་གདན་ནི་དོན་གཅིག་མོད་ཀྱང་། སྔར་ཆ་ཤས་ཀྱི་གནས་སྐབས་ཀྱི་གདན་དང་། ཆ་ཤས་ཀྱི་མཐར་གཏུགས་པའི་གདན་གཉིས་ཞུས་པས། སྔར་ནི་དང་པོའི་ལན་བཤད་ལ། འདིར་ནི་གཉིས་པའི་ལན་སྟོན་ཏོ། །མི་ཤིགས་པའི་དེ་ཉིད་གང་ཡིན་པ་དེ་རིག་པའི་མི་ཤིགས་པ་ནི་ཐིག་ལེའི་གཟུགས་སུ་རབ་ཏུ་གནས་པའོ། །དུས་ནམ་གྱི་ཚེ་གཟུགས་དེར་གནས་སྙམ་ན། རྫུ་འཕྲུལ་ཆེ་བ་སྟེ་སྔར་བཤད་པ་ལྟར་གྱི་རླུང་སེམས་ཀྱི་རྣམ་པར་འཕྲུལ་བ་ཆེན་པོ་མཐའ་ཡས་པའི་སྣོད་བཅུད་དང་བཅས་པའི་སྣ་ཚོགས་པའི་གཟུགས་དང་པོར་སྐྱེད་པའི་ཚེ་དང་། མཐར་དེ་རྣམས་བསྡུས་ནས་འཇིག་པ་ལ་ཕྱོགས་པའི་ཚེའོ། །བཅུད་ཀྱི་སེམས་ཅན་ཐོག་མར་སྐྱེ་བ་དང་མཐར་འཆི་བའི་ཚེ་ཐིག་ལེའི་གཟུགས་སུ་གནས་པ་ནི་སྔར་བཤད་ཟིན་ལ། སྣོད་ཀྱི་འཇིག་རྟེན་སྐྱེ་འཇིག་གི་ཚེ་དེར་གནས་པ་ནི། སྣོད་སྐྱེ་འཇིག་ཐོག་མཐར་བྱེད་པ་ན་དེའི་དུས་སུ་འཇིག་རྟེན་དེར་དེའི་སེམས་ཅན་མི་གནས་ཀྱང་། སྤྱིར་སྣོད་དེ་ལྟར་བྱེད་པའི་སེམས་ཅན་གྱི་ལས་ཐུན་མོང་བ་བསགས་པའི་དབང་གིས་བྱེད་ལ། དེའི་རྩ་བ་ཡང་རླུང་སེམས་ཀྱི་མི་ཤིགས་པའོ། །དེ་ལྟར་མི་ཤིགས་པས་གཞི་བྱས་པ་ལ་བརྟེན་ནས་རླུང་གིས་ཀུན་རྟོག་གཡོས་པའི་དབང་གིས་འཁོར་བར་འཁོར་བའི་བྱ་བ་བྱེད་པར་སྔར་དང་། འདིར་བསྟན་པ་འདི་ཤེས་པ་ན། སྲོག་རྩོལ་བསྒོམས་པས་མཐའི་འཇིག་རིམ་བཞིན་དུ་རླུང་སེམས་མི་ཤིགས་པ་ལ་བསྡུས་ནས་སྟོང་པ་བཞི་

---

^{[མ་དཔེ་གཟིགས་ན་འདིར་གནོན།]}

མངོན་དུ་བྱས་ཏེ། སྒྱུ་མ་དང་ཟུང་འཇུག་གི་སྐུ་སྔར་བཤད་པ་བཞིན་བསྒྲུབ་པར་བྱའོ་ཞེས་ཤེས་པར་བྱེད་པའོ། །སྣོད་བཅུད་ཀུན་གྱི་བྱེད་པ་པོ་གཅིག་ཏུ་འཆད་པ་འདི་ལ། རྒྱུད་གཞན་ལས་ལྷན་ཅིག་སྐྱེས་པའི་ཡེ་ཤེས་ཉིད་དེའི་རྩ་བར་འཆད་པ་མང་ཡང་འདུས་པའི་བཤད་རྒྱུད་རྣམས་སུ་ཤས་ཆེར་སྔར་བཞིན་བཤད་དོ། །གསུམ་པ་ནི། རྣལ་འབྱོར་པའམ་མཁས་པ་གང་གིས་ཉོན་མོངས་པ་བརྒྱུད་ཁྲི་བཞི་སྟོང་གི་གཉེན་པོར་བརྒྱད་ཁྲི་རྩ་བཞིའི་ཆོས་ཀྱི་ཕུང་པོ་བསྟན་པ་དེ་ཐམས་ཅད་གཅིག་ནས་གཉིས་སུ་བརྩིས་པའི་སྟོང་ཕྲག་བརྒྱ་རུ་སྟེ། འབུལ་ཕྲག་གཅིག་གི་ཆོས་དེ་སྙེད་ཤེས་ཀྱང་། དེ་ཡིས་ཆོས་ཀྱི་དབྱིངས་ཀྱི་དེ་ཉིད་མི་ཤེས་ཏེ། དེས་ན་དེ་ལྟར་ཤེས་པའི་མཁས་པ་དེ་ཡང་བླ་ན་མེད་པའི་མྱང་འདས་ཀྱི་འབྲས་བུ་མེད་དོ། །ཞེས་འགྲེལ་པ་གཉིས་ལས་འཆད་དོ། །གཞུང་འདི་ནི་སྤྱོད་བསྡུས་སུ་དྲངས་པའི་འགྱུར་ལེགས་ཏེ་དེ་ནི། ཐུབ་པ་ཆེན་པོས་ཆོས་རྣམས་ཀྱི། །ཕུང་པོ་བརྒྱད་ཁྲི་བཞི་སྟོང་ལ། །གང་གིས་དེ་ཉིད་མི་ཤེས་པར། །དེ་ཡིས་ཐམས་ཅད་འབྲས་བུ་མེད། །ཅེས་པའོ། །དེའི་སྟེང་ནས་བཤད་ན། ཐུབ་པ་ཆེན་པོ་སྟོན་པས་ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར་ཆོས་རྣམས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་པ་ལ། གང་ཟག་གང་གིས་དེ་ཁོ་ན་ཉིད་མི་ཤེས་ན། གང་ཟག་དེ་ཡིས་བླ་ན་མེད་པའི་བྱང་ཆུབ་ཀྱི་ཕྱིར་དུ་འབད་པ་ཐམས་ཅད་ཀྱིས་འབྲས་བུ་བྱང་ཆུབ་དེ་འཐོབ་པ་མེད་པས་ངལ་བ་དོན་མེད་ཅེས་པའོ། །འོ་ན་དེ་ཉིད་དེ་ཇི་འདྲ་བ་ཞིག་ཡིན་སྙམ་ན། སྤྱོད་བསྡུས་

---

^{[མ་དཔེ་གཟིགས་ན་འདིར་གནོན།]}

སུ་བདེན་པ་གཉིས་ཟུང་དུ་འཇུག་པའི་ཟུང་འཇུག་ལ་བཤད་དེ། གསང་འདུས་པའི་ཆོས་སྐད་རླུང་སེམས་ཙམ་ལས་རྡོ་རྗེ་འཆང་གི་སྐུར་བསྐྱེད་པའི་ཀུན་རྫོབ་དང་མཆོག་ཏུ་བདེ་བའི་ཡེ་ཤེས་སྟོང་པ་ཉིད་ལ་ཆུ་ལ་ཆུ་བཞག་པ་བཞིན་དུ་དབྱེར་མེད་པར་ཞུགས་པའི་འོད་གསལ་དོན་དམ་པ་གཉིས་དབྱེར་མེད་དུ་སྦྱོར་བའོ། །སྐབས་འདིར་ནི་མི་ཤིགས་པའི་དེ་ཉིད་ཡིན་ལ། དེ་ལ་ཡང་དོན་དམ་པའི་མི་ཤིགས་པ་ནི་འོད་གསལ་ཡིན་ལ། ཀུན་རྫོབ་ཀྱི་མི་ཤིགས་པ་ནི་སྒྱུ་མའི་སྐུའོ། །དེ་མངོན་དུ་འགྱུར་བའི་ཐབས་མི་ཤིགས་པའི་ཐིག་ལེ་ལ་རླུང་སེམས་སྡུད་པའི་ཚུལ་རྣམས་ཀྱང་འདིར་དེ་ཉིད་ཤེས་པར་བསྡུའོ། །དེ་རྣམས་ལེགས་པར་མི་ཤེས་ན་སྔགས་ཀྱི་ལམ་གྱིས་ཚེ་གཅིག་གིས་སངས་རྒྱས་འགྲུབ་པའི་འབྲས་བུ་ཐོབ་མི་ནུས་ཞེས་པའི་དོན་ནོ། །བཞི་པ་ནི། བཅུ་གཉིས་ཞེས་སོགས་འདི་ལ། འགྲེལ་པ་གཉིས་ཀྱིས་ནི་འདི་ལྟར་འཆད་དེ། སྔར་ཆ་ཤས་ཀྱི་ཡི་གེ་བཞི་སྦས་ནས་བསྟན་པ་འདིས་སྟོན་ཏེ། འདི་ལྟར་བཅུ་གཉིས་ནི་རྀ་ལྀ་བཞི་དོར་བའི་ཨ་ནས་བགྲངས་བའི་བཅུ་གཉིས་པ་ཨཿའོ། །ལྔ་ནི་ཀ་ཙ་ཊ་ཏ་པའི་སྡེ་ཚན་ལྔའོ། །དེའི་ལྔ་པ་ནི་པ་སྡེའི་ཐ་མ་མའོ། །དེས་ཨོ་ལ་ཀླད་ཀོར་དུ་བྱས་པས་ༀ་མོ། །ཡ་ནས་བགྲངས་པའི་བརྒྱད་ཀྱི་མཐའ་ནི་ཧའོ། །འབྱུང་བ་འདུས་པ་ནི་དེ་འབྱུང་བ་བཞིས་བསྐོར་བའོ། །སྒྲ་ཡིག་དང་པོ་ཡི་གེ་ཨ་ལ་ལྔ་པ་མ་ཡིག་གིས་བརྒྱན་པས་ཨཾ་མོ། །སྙིང་རྗེའི་རྒྱ་སྐད་ལ་

---

^{[མ་དཔེ་གཟིགས་ན་འདིར་གནོན།]}

ཀ་རུ་ཎ་ཞེས་འབྱུང་བའི་ཀ་ལ་ཡ་ནས་བགྲངས་པའི་དྲུག་པ་ཥ་བཏགས་པས་ཀྵའོ། །ཁ་མར་བལྟ་བ་ནི་ཡི་གེ་མགྲིན་པ་ནས་མགོ་ཐུར་དུ་བལྟ་བའོ། །དེའི་ཁྱད་པར་འཆད་པ་ནི་གདོད་མ་ཞེས་པ་རྐང་པ་གཅིག་གོ །སྤྱི་བོར་བསྟན་པ་ནི་ཡི་གེ་ཀྵ་གོང་དུ་སྨོས་པའོ། །ཞེས་འཆད་དོ། །དེ་ནི་སྔར་འགྲེལ་པ་ཉིད་ཀྱིས་བཤད་པའི་ཡི་གེ་བཞི་དང་མ་མཐུན་ཞིང་། ཨོ་ཐུ་བ་མ་བཤད་པར་མ་ཡིག་དེ་ཡི་ཀླད་ཀོར་དུ་བྱས་པས་ལེགས་པར་མ་མཐོང་ངོ་། །དེས་ན་འདི་ལྟར་བཤད་དེ་མ་ནིང་བཞི་དོར་བའི་དབྱངས་ཀྱི་བཅུ་གཉིས་པ་ནི་གསུང་རྡོ་རྗེའི་ས་བོན་ཨཿ འོ། །ཀ་ཙ་ཊ་ཏ་པའི་སྡེ་ཙན་ལྔ་ཡི་ཐ་མ་ནི་པ་སྡེ་ཡིན་ལ། དེ་ཡི་ལྔ་པ་ནི་མ་ཡིག་གོ །ཡ་ནས་བགྲངས་པའི་བརྒྱད་ཀྱི་མཐའ་ལ་སྟེ། མཐར་འབྱུང་བ་ནི་ཧའོ། །དེ་ལ་འདུས་པ་ནི་དེ་དང་མ་ཡིག་སྦྱར་བས་ཧཾ་མོ། །སྨྲི་ཏིས་བསྒྱུར་བའི་དཔེ་ཁ་ཅིག་ལས། བརྒྱད་ཀྱི་མཐའ་ལ་འབྱུང་བ་འདུས། །ཞེས་འབྱུང་བ་ཉིད་ལེགས་སོ། །དེ་ལ་དབྱངས་ཀྱི་དྲུག་པ་ཨཱུ་རིང་པོས་བཏགས་པའི་ཐུགས་རྡོ་རྗེའི་ས་བོན་ཧཱུཾ་མོ། །དེ་ཁ་མར་བལྟ་བ་ནི་སཾ་བྷུ་ཊར་སྙིང་གའི་རྩ་འཁོར་གྱི་དབུས་ཀྱི་ཧཱུཾ་རིང་པོ་མགོ་ཐུར་དུ་བལྟ་བར་གསུངས་ལ། ཧཱུཾ་ཡིག་འདི་ཡང་ཐུགས་ཀྱི་ས་བོན་ཡིན་པའི་ཕྱིར་རོ། །སྒྲ་དེ་དབྱངས་ཡིག་དང་པོ་ཡི་གེ་ཨ་ལ། ལྔ་པ་ཡང་ཞེས་འགྱུར་གཉིས་ཀ་ལས་འབྱུང་བའི་ཡང་གི་སྒྲས་སླར་ཡང་པ་སྡེའི་ལྔ་པ་མ་ཡིག་འཛིན་པས་དེ་ཨ་ལ་སྦྱར་བས་ཨཾ་མོ། །དེ་ལ་དབྱངས་ཀྱི་ལྔ་པ་ཨུ་ཡིག་ཐུང་དུས་ཡང་དག་པར་བརྒྱན་པས་སྐུ་རྡོ་

---

^{[མ་དཔེ་གཟིགས་ན་འདིར་གནོན།]}

རྗེའི་ས་བོན་ༀ་མོ། །ཨ་དང་ཨུ་ལས་ཨོར་འགྱུར་བར་བཤད་པས་བརྒྱན་པ་ནི་དེ་གཉིས་སྦྱར་བའོ། །སྙིང་རྗེ་ཆེན་པོ་ནི་དམིགས་པ་མེད་པའི་སྙིང་རྗེ་ཡིན་ལ། དེ་ནི་ཐེག་པ་འདིར་ལྷན་ཅིག་སྐྱེས་པའི་བདེ་བ་ལ་བཞེད་པས་དེ་བཞིན་གཤེགས་པ་རྣམས་ཀྱི་ཐུགས་སོ། །དེ་ལས་བྱུང་བ་ནི་དེའི་ངོ་བོའོ། །དེ་ནི་གདོད་མ་སྟེ་ཐོག་མར་སྐྱེ་བ་དང་ཐ་མར་འཇིག་པའི་རང་བཞིན་གྱིས་སྟོང་པའི་སྟོང་པ་ཉིད་དང་དབྱེར་མེད་པའི་ལྷ་ཡིན་ལ། དེ་འདྲ་བའི་ཐུགས་ཀྱི་ངོ་བོར་གྱུར་པའི་ཧཱུཾ་ཡིག་དེ་ནི་སྤྱི་བོ་སྟེ་རྩེ་མོ་ཡིན་ཞིང་། དེ་ཡང་སྐུ་དང་གསུང་ལས་མཆོག་ཏུ་གྱུར་པར་བསྟན་པའི་དོན་ཏེ། འདི་ནི་བཤད་རྒྱུད་རྡོ་རྗེ་ཕྲེང་བ་ལས། ཡི་གེ་གསུམ་གྱི་ངེས་དོན་འཆད་པ་ན་དེ་གསུམ་གྱི་ནང་ནས་ཧཱུཾ་ཡིག་གི་དོན་གཙོ་བོ་དང་བདག་པོར་གསུངས་པ་དང་འདྲའོ། །སྤྱི་བོའི་སྐད་དོད་རྩེ་མོ་ལའང་འཇུག་པས། དྲོད་རྩེའི་རྩེ་མོ་ཡང་སྤྱི་བོར་བསྒྱུར་བ་མང་ངོ་། །དེ་ལྟར་ན་སྔར་ནི་རླུང་གི་དེ་ཉིད་ལྡང་འཇུག་གཉིས་དང་། དེས་མཚོན་ནས་གནས་པ་བསྟན་ལ། འདིར་ནི་སྔགས་ཀྱི་དེ་ཉིད་ཡི་གེ་གསུམ་སྟོན་པས་རླུང་སྔགས་དབྱེར་མེད་དུ་སྦྱོར་བའི་རྡོ་རྗེའི་བཟླས་པ་སྟོན་པ་ཡིན་ནོ། །ལྔ་པ་ནི། བསྐྱེད་རིམ་པ་མན་ཆད་ཐམས་ཅད་ལ་ཤིན་ཏུ་གསང་བའི་གནས་ཆེན་པོ་དམ་པ་སྟེ་མཆོག་དྲི་བ་ལྔའི་ལན་དེ་དག་ནི་ལྷ་མོ་ཞེས་མཱ་མ་ཀཱི་ལ་བོས་ནས། རྡོ་རྗེ་འཆང་བདག་གིས་ཡོངས་སུ་རྫོགས་པར་རབ་ཏུ་བསྟན་ཏོ། །ཞེས་བཤད་

---

^{[མ་དཔེ་གཟིགས་ན་འདིར་གནོན།]}

ཟིན་པ་གོ་བར་མཛད་དོ། །རྩ་རྒྱུད་ཀྱི་གཟུངས་དཀྱིལ་སྤྲུལ་པའི་སྐབས་བཞིན། རྡོ་རྗེ་འཆང་སྤྱན་མ་སོགས་དང་སྙོམས་པར་ཞུགས་པའི་ཚེ་ལེའུ་དང་པོར་བཤད་པ་བཞིན་ཡུམ་གྱི་པདྨར་བྱང་ཆུབ་ཀྱི་སེམས་སྤྲོས་པ་མཐོང་ནས། དེ་ལས་བརྩམས་ཏེ་དང་པོའི་འབྱུང་ཁུངས་སོགས་དྲིས་པ་ནི་སྣ་རྩེར་ཡུངས་ཀར་བསྒོམ་པར་རྩ་རྒྱུད་ལས་གསུངས་པའི་ཡུངས་ཀར་གྱི་སྒྲས་བསྟན་པའི་གསང་བའི་སྣ་རྩེར་རྫས་ཀྱི་ཐིག་ལེ་ལས་བརྩམས་ནས་དྲིས་པ་ཡིན་ལ། དེའི་ལན་བཤད་པ་ན་གདོང་གི་སྣ་རྩེར་འོད་ཀྱི་ཐིག་ལེ་བསྒོམ་པ་མི་གསལ་བ་དང་། སྙིང་གའི་སྣ་རྩེར་སྔགས་ཀྱི་ཐིག་ལེ་བསྒོམ་པ་གསལ་བར་ལེའུ་དང་པོར་བཤད་པས་ཀྱང་སྣ་རྩེར་ཡུངས་ཀར་བསྒོམ་པར་གསུངས་པའི་དོན་འཆད་ལ། ལེའུ་འདིས་ཀྱང་ལེའུ་དང་པོར་མི་གསལ་བ་གསལ་བར་འཆད་པས་རྒྱུད་འདིས་གཟུངས་དཀྱིལ་སྤྲུལ་པ་གཙོ་བོར་འཆད་པ་དང་། རྩ་རྒྱུད་ལེའུ་གསུམ་པ་དང་དྲུག་པར་ཡུངས་ཀར་གྱི་སྒྲས་བསྟན་པའི་དོན་འཆད་པར་རིམ་ལྔ་ལས་གསུངས་པ་གཉིས་གནད་གཅིག་ཏུ་འོང་ངོ་། དྲུག་པ་ནི། ལྷ་མོ་བཞིས་ཡོངས་སུ་ཞུས་པའི་རྒྱུད་ཀྱི་རྣམ་པར་བཤད་པ་ལས། ལྷ་མོ་མཱ་མ་ཀཱིས་ཞུས་པའི་ལེའུ་སྟེ་ལེའུ་གཉིས་པའི་རྣམ་པར་བཤད་པའོ།། །།གསུམ་པ་གོས་དཀར་མོས་ཞུས་པའི་ལེའུ་ལ་གསུམ། ཞུ་བ་མཛད་ཚུལ། ཞུས་པའི་ལན། ལེའུ་ཡི་མཚན་བསྟན་པའོ། །དང་པོ་ལ་གཉིས། ཞུས་པའི་མཚམས་སྦྱོར། ཞུས་པ་དགོས་སོ། །དང་པོ་ནི། མཱ་མ་ཀཱིས་

---

^{[མ་དཔེ་གཟིགས་ན་འདིར་གནོན།]}

ཞུས་པའི་ལན་རྫོགས་པ་དེ་ནས། ལྷ་མོ་གོས་དཀར་མོས་རྡོ་རྗེ་སེམས་དཔའ་ལ་འོག་ནས་འབྱུང་བ་བཞིན་གསོལ་བ་ཞེས་ཚིག་རྣམ་པར་སྦྱར་རོ། །ཇི་ལྟར་དུ་ན། ལག་པའི་མཐིལ་གཉིས་དང་། པུས་མོའི་ལྷ་ང་གཉིས་དང་དཔྲལ་བའི་དབྱེས་ཀྱིས་ཡན་ལག་ལྔ་པོ་ཀུན་གྱིས་ས་ལ་བཏུད་ནས་སུ་ལག་པའི་ཐལ་མོ་སྙིང་གར་སྦྱར་བར་བྱ་སྟེའོ། །འདིར་ལུས་ཀྱི་ཀུན་སྤྱོད་གཉིས་དང་། ལེའུ་བཞི་པར་ཞལ་བཞད་ནས་ཞུས་པར་གསུངས་པ་གསུམ་ནི་ལྷ་མོ་བཞི་ཀའི་ཞུ་བ་མཛད་པ་ལ་སྦྱར་རོ། །གཉིས་པ་ལ་ལྔ། ཆོས་ཀྱི་དབྱིངས་ཀྱི་བསྡུ་བ་དང་རྡོ་རྗེ་གསུམ་གྱི་རང་བཞིན་ཞུས་པ། གོང་བུའི་བསྡུ་བ་དང་རྡོར་སེམས་ཀྱི་རང་བཞིན་ཞུས་པ། ཐིག་ལེའི་ཡིག་འབྲུ་དང་སྔགས་འདུས་ཚུལ་ཞུས་པ། ཁམས་གཉིས་ཀྱི་རོ་མཉམ་དང་འགྲོ་བ་སྐྱེ་ཚལ་ཞུས་པ། གང་གི་ངོ་བོར་རིགས་ལྔ་བསྒོམ་པ་ཞུས་པའོ། །དང་པོ་ནི་ཆོས་ཀྱི་དབྱིངས་བྱང་ཆུབ་ཀྱི་སེམས་ནི་བསྡུས་པ་ཇི་ལྟར་ལགས་པ་དང་། སྐུ་གསུང་ཐུགས་ཀྱི་རྡོ་རྗེ་ཡི་རང་བཞིན་ཉིད་ནི་ཇི་ལྟར་ལགས་པ་དཀྱིལ་འཁོར་པའི་ལྷའི་དབང་ཕྱུག་སྟེ་གཙོ་བོ་ཁྱོད་ལ་ཞུའོ། །གཉིས་པ་ནི། རྒྱུ་མཚན་གང་གིས་བདུད་རྩིའི་འོད་ཀྱི་གོང་བུ་བསྡུས་པ་དེ་རྡོ་རྗེ་སེམས་དཔའ་ཡི་ངོ་བོར་གྱུར་པ་ཇི་ལྟར་ལགས།གསུམ་པ་ནི། བྱང་ཆུབ་ཀྱི་སེམས་ཀྱི་ཐིག་ལེ་དེ་ཉིད་ཡིག་འབྲུའི་ཚིག་གང་དུ་འགྱུར་བ་གསུངས་ཤིག །སྔགས་འདུས་པ་སྟེ་སྦྱོར་བའི་ཚུལ་ཇི་ལྟར་འགྱུར་བ་ལགས་ཞེས་ཞུས་སོ། །བཞི་པ་ནི། ཕ་ལས་ཐོབ་

---

^{[མ་དཔེ་གཟིགས་ན་འདིར་གནོན།]}

པའི་ཆུའི་ཁམས་དང་མ་ལས་ཐོབ་པའི་མེའི་ཁམས་གཉིས་རོ་ནི་མཉམ་པོར་ཇི་ལྟར་འགྱུར་བ་ལགས། མ་ལས་སྐྱེ་བ་གསུམ་ཙམ་དང་། དེ་བཞིན་དུ་ཕ་ལས་སྐྱེ་བ་གསུམ་གང་ཡིན་པ་དང་། དྲུག་པོ་དེ་དག་ལ་སོགས་པའི་གོང་བུ་ལས་མི་རྣམས་སྐྱེ་བ་ཇི་ལྟར་ལགས་ཞེས་ཞུས་སོ། །ལྔ་པ་ནི། སངས་རྒྱས་རིགས་ལྔའོ་གཟུགས་གང་གི་ངོ་བོར་བསྒོམ་པ་ནི་བདག་གི་མི་འཚལ་བ་སྟེ་མི་ཤེས་པས་ཐུབ་པ་ཆེན་པོས་ལན་བཀའ་སྩལ་མཛོད་ཅེས་ཞུས་ཏེ། རྐང་པ་ཐ་མ་ནི་དེའི་དོན་མེད་པའི་དྲི་བ་གོང་མ་རྣམས་ཀྱི་མཐར་ཡང་སྦྱར་རོ། །གཉིས་པ་ལ་གཉིས། ལན་བཤད་པར་ཞལ་གྱིས་བཞེས་པ་དང་། ལན་བཤད་པ་དངོས་སོ། །དང་པོ་ནི། དེ་ལྟར་ཞུས་པ་ན་དེའི་ལན་རྡོ་རྗེ་ཅན་གྱིས་བཀའ་སྩལ་པ་ནི། ཐེག་པ་གཞན་ལ་གསང་བ་སྔགས་ཀྱི་ཐེག་པ་ཡིན་ལ། དེ་ལས་ཏེ་དེའི་ནང་ནས་ཤིན་ཏུ་གསང་བར་གྱུར་པ་ནི། རྒྱུད་སྡེ་འོག་མ་ལ་གསང་བར་བྱ་བ་འདིར་དྲིས་པའི་དོན་རྣམས་སོ། །དེ་ནི་ལྷ་མོ་ཞེས་གོས་དཀར་མོ་ལ་བོས་ནས་ལེགས་པར་ཉོན་ཅིག་དང་བདག་གིས་བཤད་པར་བྱའོ་ཞེས་བཤད་པར་ཞལ་གྱིས་བཞེས་སོ། །གཉིས་པ་ལ་དྲུག །ཆོས་དབྱིངས་སྡུད་པ་དང་རྡོ་རྗེ་གསུམ་གྱི་རང་བཞིན་ཞུས་པའི་ལན། ཁམས་གཉིས་ཀྱི་རོ་མཉམ་ཞུས་པའི་ལན། གོང་བུའི་བསྡུ་བ་དང་རྡོར་སེམས་ཀྱི་རང་བཞིན་ཞུས་པའི་ལན། ཐིག་ལེའི་ཡིག་འབྲུ་དང་སྔགས་འདུས་ཚུལ་ཞུས་པའི་ལན། ཕ་མ་ལས་ཐོབ་པའི་རྒྱུ་ཚོགས་ལས་འགྲོ་བ་སྐྱེ་ཚུལ་ཞུས་པའི་ལན། གང་གི་ངོ་བོ་རིགས་

---

^{[མ་དཔེ་གཟིགས་ན་འདིར་གནོན།]}

ལྔ་བསྒོམ་པ་ཞུས་པའི་ལན་ནོ། །དང་པོ་ལ་གཉིས། ཆོས་དབྱིངས་སྡུད་ཚུལ་ཞུས་པའི་ལན། རྡོ་རྗེ་གསུམ་གྱི་རང་བཞིན་ཞུས་པའི་ལན་ནོ། །དང་པོ་ནི། བྱང་སེམས་དཀར་དམར་དེ་གཉིས་ཕྲད་ནས་གཅིག་ཏུ་འདྲེས་པར་གྱུར་པ་ནི་ཆོས་ཀྱི་དབྱིངས་ནི་འདུས་པ་སྟེ་བསྡུས་པ་ཡིན་ནོ། །དེ་གཉིས་ཀྱི་རྟེན་ནི་སྐྱེ་གནས་ཀྱི་འཁོར་ལོའི་དབུས་སུ་རྩ་རོ་རྐྱང་གཉིས་ནི་རྐྱང་མ་གཡོན་དུ་གནས་ལ་དེ་བཞིན་དུ་རོ་མ་གཡས་པར་གནས་སོ། །དེའི་གཡོན་གྱི་རྩར་ནི་བྱང་ཆུབ་ཀྱི་སེམས་ཞེས་བྱ་བའི་ཁུ་བ་འབབ་ལ། དེ་བཞིན་དུ་རྩ་གཡས་སུ་རཀྟ་རྡུལ་འབབ་བོ། །རྒྱུད་འདིར་ཆོས་ཀྱི་དབྱིངས་བསྡུ་རྒྱུར་བཤད་པ་ནི། སྔར་ལེའུ་དང་པོར་བྱང་ཆུབ་ཀྱི་སེམས་ཐིག་ལེ་ལ་ཆོས་ཀྱི་དབྱིངས་སུ་བཤད་པ་ལ། དེ་ཉིད་ལེའུ་འདིར་བཤད་པའི་རྩ་གཡས་གཡོན་ལ་གནས་པའི་ཁུ་རྡུལ་གཉིས་ཡིན་པས། དེ་གཉིས་ཕྲད་ནས་ཞེས་པའི་དེ་གཉིས་ནི་ཁུ་ཁྲག་ལ་བྱ་དགོས་སོ། །འདིའི་འགྲེལ་པ་གཉིས་ཀྱི་སྐྱེ་གནས་དབུས་ཞེས་པ་བུད་མེད་ཀྱི་པདྨའི་དབུས་དང་། དེ་གཉིས་འཕྲད་ཅེས་པ་ཐབས་ཤེས་རོལ་པའི་དུས་སུ་ཁམས་དཀར་དམར་བབས་ནས་ཆུ་དང་འོ་མ་བཞིན་འདྲེས་པ་ལ་འཆད་པ་ནི་མི་འཐད་དེ། དེ་གཉིས་ཞེས་པ་ནི་སྐྱེ་གནས་ཀྱི་དབུས་ཀྱི་གཡས་གཡོན་གྱི་རྩ་ལས་རྒྱུ་བའི་ཁུ་ཁྲག་ཡིན་ལ། རྩ་དེ་གཉིས་སུ་བུད་མེད་ཀྱི་པདྨའི་དབུས་ཀྱི་གཡས་གཡོན་གྱི་རྩ་ཡིན་ན། བུད་མེད་ཀྱི་ཁུ་ཁྲག་གཉིས་འདྲེས་པར་སོང་གི་སྐྱེས་པའི་ཁུ་བ་དང་བུད་མེད་ཀྱི་

---

^{[མ་དཔེ་གཟིགས་ན་འདིར་གནོན།]}

ཁྲག་གཉིས་འདྲེས་པ་མིན་པའི་ཕྱིར་རོ། །སྐྱེ་གནས་ཞེས་འབྱུང་བས་བུད་མེད་ཀྱི་སྐྱེ་གནས་ལ་བྱ་མི་དགོས་ཏེ། ལྟེ་བ་དང་སྤྱི་བོའི་འཁོར་ལོར་ཨ་ཧཾ་གནས་པའི་འཁོར་ལོ་སྔ་མ་ལ་བརྟག་གཉིས་ལས། སྐྱེ་གནས་འཁོར་ལོའི་རྣམ་པ་ཨ། བདེ་ཆེན་གྱིའང་རྣམ་པ་ཧཾ། ཞེས་གསུངས་ལ། དེ་བུད་མེད་ཁོ་ནའི་ཨ་ཧཾ་འཆད་པ་མིན་པའི་ཕྱིར་དང་། སཾ་བྷུ་ཊ་ལས། མ་ལུས་པ་ཡི་སེམས་ཅན་གྱི། །སྐྱེ་བ་གང་ལ་བརྗོད་བྱ་བ། །གང་ཕྱིར་སྤྲུལ་པ་གནས་བརྟན་ཕྱིར། །དེ་ལ་སྤྲུལ་པའི་སྐུ་ཉིད་ཡིན། །ཞེས་གསུངས་ཤིང་། རྒྱུད་དེར་སྐྱེ་གནས་ཞེས་གསུངས་པའི་འགྲེལ་པ་མན་ངག་སྙེ་མ་ལས་ཀྱང་། སྐྱེ་གནས་ནི་འདིར་བུད་མེད་དང་སྐྱེས་པ་དག་གི་ལྟེ་བའི་འོག་གི་གནས་སོ། །ཞེས་རྟེན་གཉིས་ཀའི་ཡོངས་སུ་གྲགས་པའི་ལྟེ་བའི་བུ་གའི་འོག་ཙམ་ལ་སྐྱེ་གནས་སུ་བཤད་ལ། དེའི་འཁོར་ལོ་ལ་སྤྲུལ་པའི་འཁོར་ལོ་ཞེས་ཀྱང་ཟེར་རོ། །འོ་ན་འཁོར་ལོ་དེ་ལ་སེམས་ཅན་སྐྱེ་བའི་གནས་ཞེས་བརྗོད་པ་ཅི་ཡིན་ཞེ་ན། མན་སྙེ་ལས། བཟའ་བཏུང་བྱས་པ་ཕོ་བའི་མེས་བཞུས་པ་ལས་སྙིང་སྟོབས་ཁུ་བའི་དྭངས་མ་དང་། ཁྲག་གི་དྭངས་མ་གཉིས་རོ་རྐྱང་གི་རྩས་ལྟེ་བ་ནས་ལུས་ཀུན་ལ་ཁྱབ་པར་འབེབས་པར་གསུངས་པའི་སེམས་ཅན་གྱི་ལུས་ཐོབ་ཟིན་རྒྱས་པར་བྱེད་པས་སེམས་ཅན་སྐྱེ་བའི་གནས་སུ་གསུངས་སོ། །སྐྱེ་གནས་དབུས་སུ་ཞེས་པའི་རྐང་པ་བཞི་ནི་བདེ་མཆོག་སྡོམ་འབྱུང་དང་། སཾབྷུ་ཊར་ཡང་འབྱུང་ལ། རྣམ་གཞག་རིམ་པར་ཡང་དྲངས་ཏེ། དེ་ནི་གོང་གི་

---

^{[མ་དཔེ་གཟིགས་ན་འདིར་གནོན།]}

འཕྲོས་རྣམས་དང་བསྒྲིགས་ན་སྡོམ་འབྱུང་དྲངས་པར་མངོན་ནོ། །རྐང་པ་ཐ་མ་གཉིས་ནི། རྣམ་གཞག་ལས། དེ་དག་གཅིག་ཏུ་འདྲེས་པ་ཉིད། །ཆོས་ཀྱི་དབྱིངས་སུ་བསྡུས་པ་ཡིན། །ཞེས་དྲངས་ལ། སྡོམ་འབྱུང་ལས་ཀྱང་། དེ་དག་འདུས་པ་གཅིག་ཉིད་ནི། །ཆོས་ཀྱི་དབྱིངས་ཀྱི་རང་བཞིན་ཉིད། །ཅེས་འབྱུང་ཞིང་དེའི་འགྲེལ་པ་ལས། འདི་རྣམས་ཀྱིས་མངལ་སྐྱེས་ཀྱི་རིམ་པ་རྣམ་པར་བཤད་ནས། ཡོངས་སུ་དག་པའི་རང་བཞིན་དང་ཁུ་བ་དང་ཁྲག་དག་གི་རྟེན་གསུངས་པ། རྩ་གཉིས་ཞེས་པ་ལ་སོགས་པ་སྟེ། སྐྱེ་གནས་དབུས་ནི་ཞེས་པ་ལྟེ་བའི་འོག་གནས་སུའོ། །དེ་དག་ཅེས་པ་རྩ་དག་ཏེ། ཆོས་ཀྱི་དབྱིངས་ཀྱི་རང་བཞིན་ཉིད། །ཅེས་པ་ཨ་ཝ་དྷཱུ་ཏཱིའི་རང་བཞིན་ལས་སོ། །ཞེས་དེ་དག་ཅེས་པ་རྩ་གཉིས་དང་། ཆོས་ཀྱི་དབྱུངས་ཞེས་པ་རྩ་གཉིས་གང་དུ་འདུས་པའི་རྩ་དབུ་མ་དང་། མངལ་ན་གནས་པའི་ཁུ་ཁྲག་ལ་སོགས་པའི་རྟེན་ནི་རྩ་དེ་རྣམས་ཡིན་པས་བཤད་ཅིང་། རྣམ་གཞག་ལས་ཀྱང་ཆོས་ཀྱི་དབྱིངས་བསྡུ་རྒྱུ་རུ་མ་བྱས་པར་བསྡུ་བ་རུ་གསུངས་སོ། །མན་སྙེ་ལས། ཆོས་ཀྱི་དབྱིངས་སྟོང་པ་ཉིད་དང་། རོ་གཅིག་པའི་སེམས་ཡང་དག་པར་འཛིན་པའི་ཆོས་ཀྱི་དབྱིངས་བསྡུས་པ་ཡིན། ཞེས་ཆོས་དབྱིངས་བསྡུ་རྒྱུའི་ཐིག་ལེ་ལ་མ་བཤད་དོ། །སྡོམ་འབྱུང་དང་རྣམ་གཞག་ཏུ་འབྱུང་བ་ལྟར་རྒྱ་དཔེ་འགའ་ཞིག་ལའང་ཡོད་པར་གསལ་ལ། དེ་བཞིན་དུ་འདོན་ན་སྡོམ་འབྱུང་འགྲེལ་པར་བཤད་པ་བཞིན་

---

^{[མ་དཔེ་གཟིགས་ན་འདིར་གནོན།]}

བྱ་དགོས་ཏེ། བདག་གིས་ཀྱང་གཞན་དུ་དེ་ལྟར་བཤད་དོ། །འོན་ཀྱང་རྒྱུད་འདིར་ཆོས་ཀྱི་དབྱིངས་བསྡུ་རྒྱུའི་ཁམས་དཀར་དམར་ལ་བཤད་པ་ལྟར་གཞུང་གཞན་གྱི་རྒྱ་དཔེ་དག་པ་ལས་འབྱུང་བ་འགལ་བར་མི་སྣང་བས། འདི་དག་དོན་གཅིག་ཏུ་འཆད་ན་སྡོམ་འབྱུང་དང་རྣམ་གཞག་ཏུ་འབྱུང་བའི་སྐྱེ་གནས་ཞེས་པ་གཉིས་ཕོ་མོ་གཉིས་ཀའི་རྟེན་ཐུན་མོང་དུ་ཡིན་ལ། ལྷག་མའི་དོན་ནི་མན་སྙེར་བཤད་པ་ལྟར་གཡོན་དུ་གནས་པའི་ཕའི་ཁུ་བ་དང་། གཡས་སུ་གནས་པའི་བུད་མེད་ཀྱི་ཁྲག་གཉིས་འདྲས་པ་ལ་བྱའི། རྟེན་གཅིག་གི་རྩ་གཡས་གཡོན་གྱི་ཁུ་རྡུལ་ལ་མི་བྱའོ། །དེ་ཡང་བར་དོ་གང་དུ་འཇུག་པའི་ཁུ་ཁྲག་འདྲེས་པ་ལ་བཤད་ན་འགྲིག་པར་སྣང་ངོ་། །འདིར་བཤད་པ་ལ་ཡང་དོན་གྱི་ཕྱོགས་གཅིག་ནས་དེ་ལྟར་བཤད་དུ་རུང་བ་གཅིག་ཀྱང་སྣང་མོད། གཙོ་བོའི་དོན་ནི་རྡོར་བཟླས་བྱས་པས་རྟེན་གཅིག་གི་རོ་རྐྱང་གི་ཁམས་དཀར་དམར་གཉིས་དབུ་མར་གཅིག་ཏུ་སྡུད་པ་སྟོན་པ་ཡིན་ནོ། །དེ་ཡང་། དཔྲལ་བ་ལ་གནས་རྐང་མཐིལ་བར། །ཞེས་སོགས་ཀྱིས་སྟེང་འོག་དང་གཡས་གཡོན་ལ་སོགས་པའི་རླུང་དབུ་མར་སྡུད་པ་ལ་བཤད་མོད་ཀྱང་། དེ་དག་ལ་གནས་པའི་ཐིག་ལེ་དབུ་མའི་ལམ་ནས་མི་ཤིགས་པ་ལ་སྡུད་པ་འདིར་གསལ་དུ་བཏང་བའོ། །དེ་ལྟ་མིན་པར་ཕ་མའི་ཁུ་ཁྲག་འདྲེས་པ་ལ་བར་དོ་འཇུག་པར་བཤད་པ་ཙམ་ཞིག་ཡིན་ན། གསང་ལས་ཤིན་ཏུ་གསང་གྱུར་པ། །ཞེས་གསུངས་པ་མི་རིགས་ཏེ། དོན་དེ་མངལ་དུ་འཇུག་པ་

---

^{[མ་དཔེ་གཟིགས་ན་འདིར་གནོན།]}

སོགས་ལས་ཀྱང་རྒྱ་ཆེར་བསྟན་པའི་ཕྱིར་རོ། །གཉིས་པ་ནི། སྔར་རྡོ་རྗེ་གསུམ་གྱི་རང་བཞིན་དྲིས་པའི་ལན་སྟོན་པ་ནི། མུན་པ་ནི་སྐུ་རྡོ་རྗེ་སྟེ། རྡུལ་ནི་གསུང་རྡོ་རྗེའོ། །སྙིང་སྟོབས་ནི་སེམས་ཀྱི་རང་བཞིན་ཐུགས་སོ། །འོ་ན་རྡུལ་མུན་སྙིང་སྟོབས་གསུམ་རང་གང་ཡིན་སྙམ་ན། རྡུལ་ནི་རཀྟ་ཁམས་དམར་པོ་དང་། བྱང་སེམས་དཀར་པོ་ནི་མུན་པ་དང་། དེ་བཞིན་དུ་སྙིང་སྟོབས་ནི་ཆོས་ཀུན་སྐྱེད་པ་སེམས་ཡིན་ནོ། །ཚིགས་བཅད་འདིར་སཾ་བྷུ་ཊར། སྙིང་སྟོབས་སྐུ་དང་རྡུལ་བཅས་དག །མུན་པ་སེམས་ཀྱི་རང་བཞིན་ལས། སྙིང་སྟོབས་ཁུ་བ་རིན་ཆེན་རྡུལ། །མུན་པ་སྐྱེད་པར་བྱེད་པ་ཉིད། །ཅེས་གསུངས་ཤིང་། མན་ངག་སྙེ་མར་ཡང་། དེ་བཞིན་དུ་བཤད་དོ། །རྒྱུད་རྡོ་རྗེ་ཕྲེང་བ་ལས། “ལ་ལ་ན་དང་ར་ས་ན། ཨ་ཝ་དྷཱུ་ཏཱི་ཞེས་བྱའི་མིང་། །སྐུ་གསུང་ཐུགས་ཀྱི་རང་བཞིན་དང་། །ཞེས་དང་། ཟླ་བ་ཉི་མ་མེ་ཡི་རྩ། །གསུམ་ཞེས་བྱ་བའི་མཚན་ཉིད་དོ། །ཞེས་སྐུ་དང་གསུང་གི་རྩ་གཡས་གཡོན་གཉིས་ཉི་ཟླའི་རྩར་བཤད་པས་དེ་གཉིས་མུན་པའི་རྩར་བཤད་ན་མི་འགྲིག་པས་ཐུགས་ཀྱི་རྩ་ཨ་ཝ་དྷཱུ་ཏཱི་མུན་པ་དང་། གཡས་གཡོན་རྡུལ་དང་སྙིང་སྟོབས་ཀྱི་རྩེར་བྱའོ། །དེ་ལྟར་འདུས་པའི་བཤད་རྒྱུད་གཉིས་གུང་བསྒྲིགས་ན་རྒྱུད་གཞན་རྣམས་དང་ཡང་མཐུན་པར་སྣང་སྟེ་དཔྱད་པར་བྱའོ། །རྡོ་རྗེ་གསུམ་གྱི་རང་བཞིན་དྲིས་པ་ནི། ཁམས་དཀར་དམར་གཉིས་དང་སེམས་གསུམ་རྡོ་རྗེ་གསུམ་གང་དུ་འཇོག་དྲིས་པ་ཡིན་ལ། དེ་

---

^{[མ་དཔེ་གཟིགས་ན་འདིར་གནོན།]}

ཤེས་པ་ན་སྐུ་དང་གསུང་གི་རྡོ་རྗེ་གཉིས་ཐུགས་ཀྱི་རྡོ་རྗེར་འདུ་བའི་རྡོ་རྗེ་གསུམ་དབྱེར་མེད་པར་ཤེས་པས་རྩ་གཡས་གཡོན་གྱི་ཁམས་གཉིས་ཀྱི་རྡོ་རྗེ་གཉིས་དབུ་མའི་སེམས་ཐུགས་རྡོ་རྗེར་དབྱེར་མེད་པར་སྦྱོར་བ་ཤེས་སོ། །དེས་ན་འདིས་ཆོས་ཀྱི་དབྱིངས་སྡུད་པ་དེ་རྡོ་རྗེ་གསུམ་མི་ཕྱེད་པར་སྦྱོར་བར་བསྟན་ཏེ། རླུང་སྔགས་གཉིས་ཀྱི་རྡོ་རྗེ་གསུམ་དབྱེར་མི་ཕྱེད་པར་ཟློ་བའི་རྡོར་བཟླས་ཀྱིས་རོ་རྐྱང་ཨ་ཝ་དྷཱུ་ཏཱི་གསུམ་གྱི་ཁམས་གསུམ་གྱི་རྡོ་རྗེ་གསུམ་དབྱེར་མི་ཕྱེད་པ་བསྒྲུབ་པ་ནི་གཙོ་བོའི་དོན་ཡིན་ལ། ཞར་ལ་མའི་མངལ་དུ་ཁུ་ཁྲག་གཉིས་དང་བར་དོའི་སེམས་གསུམ་སྦྱོར་བ་ཡང་ཤེས་པར་བྱའོ། །གཉིས་པ་ནི། སྔར་ཕ་མ་ལས་ཐོབ་པའི་ཁམས་གཉིས་རོ་མཉམ་དུ་ཇི་ལྟར་འགྱུར་དྲིས་པའི་ལན་སྟོན་པ་ནི། ཡབ་ཀྱི་རྡོ་རྗེ་དང་ཡུམ་གྱི་པདྨ་གཉིས་མཉམ་པར་སྦྱར་བ་ལ་བརྟེན་ནས་ཁམས་དཀར་དམར་གཉིས་རང་བཞིན་མཉམ་པའི་རོར་འགྱུར་རོ་ཞེས་པའོ། །འདི་ནི་གཞི་དུས་སུ་མའི་མངལ་དུ་ཁམས་གཉིས་རོ་མཉམ་དུ་འགྱུར་བའི་ཐབས་བསྟན་པ་དང་། ལམ་དུས་སུ་ལམ་སྒོམ་པ་པོའི་ཁམས་གཉིས་དབུ་མར་རོ་མཉམ་དུ་འགྱུར་བའི་ཐབས་ཕྱིའི་རྐྱེན་སྟོན་པ་གཉིས་སུ་སྦྱར་རོ། །ཁམས་གཉིས་རོ་མཉམ་དུ་འགྱུར་ཚུལ་ནི་སྔར་ཆོས་དབྱིངས་སྡུད་པའི་སྐབས་སུ་བཤད་ཟིན་པས་འདིར་རོ་མཉམ་དུ་འགྱུར་བའི་ཐབས་སྟོན་ལ། དེ་ཡང་ནང་གི་རྐྱེན་ནི་སྔར་ལེའུ་གཉིས་སུ་བཤད་པས་ཤེས་ནུས་པས་འདིར་ཕྱིའི་རྐྱེན་ནོ། །དེ་ལ་གཉིས་ཡོད་

---

^{[མ་དཔེ་གཟིགས་ན་འདིར་གནོན།]}

ཀྱང་གཙོ་བོའི་དོན་ནི་ལམ་དུས་ཀྱི་ཡིན་ཏེ། གསང་ལས་ཤིན་ཏུ་གསང་གྱུར་པ། ཞེས་གསུངས་པས་གཞི་དུས་ཀྱི་ཕ་མའི་རྐྱེན་ལས་ཁམས་གཉིས་རོ་མཉམ་དུ་འགྱུར་བ་ཙམ་ལ་བཤད་དུ་མི་རུང་བའི་ཕྱིར་རོ། །འདིས་གཟུངས་དཀྱིལ་སྤྲུལ་པའི་སྐབས་སུ་རིག་མ་དང་སྙོམས་པར་འཇུག་པའི་ཆགས་ཆེན་གྱི་ཚུལ་གྱི་ཏིང་ངེ་འཛིན་འཆད་དོ། །འོ་ན་འདི་རྡོར་བཟླས་མཐར་ཕྱིན་ནས་སེམས་དབེན་བསྐྱེད་པའི་སྐབས་སུ་ཡིན་ནམ་ཞེ་ན། འདི་ལ་གཉིས་ཡོད་དེ། སེམས་དབེན་བསྐྱེད་པའི་སྐབས་སུ་ཕྱིའི་རྐྱེན་ལ་བརྟེན་པ་ནི་རིམ་ལྔ་སོགས་སུ་གསལ་ལ། རྡོ་རྗེ་བཟླས་པའི་སྐབས་སུ་བརྟེན་པ་ནི། རྩ་བའི་རྒྱུད་ལས། སློང་མོ་ཟ་ཞིང་མི་བཟླ་སྟེ། །སློང་ལའང་དགའ་བར་མི་བྱའོ། །འདོད་པ་ཀུན་ལ་ལོངས་སྤྱོད་ཅིང་། །སྔགས་ཀྱི་ཡན་ལག་མ་ཉམས་བཟླས། །ཞེས་གསུངས་ལ། དེའི་དོན་དགོངས་པ་ལུང་སྟོན་ལས་ཀྱང་། འདོད་གསུམ་དེ་ཉིད་ལོངས་སྤྱོད་ཅིང་། །སྔགས་ཀྱི་ཡན་ལག་མི་ཉམས་བཟླས། །ཞེས་དང་། རྣལ་འབྱོར་པ་ཡིས་དབུགས་རྡུབ་འབྱུང་། །སྦྱོར་བའི་དེ་ཉིད་གཅིག་པ་ཉིད། །ཤེས་རབ་ཐབས་ལ་གནས་ནས་ནི། །སྔགས་ཀྱི་ཡན་ལག་མ་ཉམས་བཟླས། །ཞེས་གསུངས་ཤིང་། རྒྱུད་ཕྱི་མར་གསང་བའི་སྣ་རྩེར་རྫས་ཀྱི་ཐིག་ལེ་སྒོམ་པའི་སྲོག་རྩོལ་གསུངས་པའི་དོན་རིག་མའི་གསང་བའི་སྣ་རྩེར་བསྒོམ་པར་སྒྲོན་གསལ་ལས་གསུངས་ཏེ། དེའི་དོན་རྡོ་

---

^{[མ་དཔེ་གཟིགས་ན་འདིར་གནོན།]}

རྗེ་ཕྲེང་བར་བཤད་པ་ལས་ཀྱང་། རྡོ་རྗེའི་རྩེ་དང་པདྨའི་རྩེར། །རླུང་མི་བཟུང་བའི་སྐད་ཅིག་ལ། །རྐན་ལ་ཡི་གེའི་སྦྱོར་བ་དང་། །ཀྵྨཾ་སྔགས་ཀྱི་སྦྱོར་བ་ཡིས། །རྣལ་འབྱོར་མཆོག་ནི་ཐོབ་པར་བྱེད། །ཅེས་གསུངས་སོ། །འདི་ནི་རྡོ་རྗེ་བཟླས་པ་ལ་ནུས་པ་ཆེན་པོ་ཐོན་པ། ཡུལ་རྟེན་གྱི་མཚན་ཉིད་གཞན་རྣམས་ཀྱང་ཚང་བ། དགག་བྱ་མེད་ཅིང་ལམ་གྱི་གྲོགས་སུ་འགྲོ་བའི་དགོས་པ་ཆེན་པོ་དང་ལྡན་པ་ལ་ཡིན་གྱི། རྡོ་རྗེ་བཟླས་པ་སྦྱོང་བ་ཙམ་ལ་མིན་ནོ། །ཕྱིའི་རྐྱེན་དེ་ལ་ཡང་དངོས་དང་བསྒོམ་པའི་ཕྱག་རྒྱ་གཉིས་ཡོད་ཅིང་ཐབས་དེ་དག་གིས་རོ་རྐྱང་གི་རླུང་སེམས་དབུ་མར་འཇུག་པའི་སྲོག་རྩོལ་དུ་འགྱུར་ཚུལ་ནི་གཞན་དུ་ཤེས་པར་བྱའོ། །གསུམ་པ་ནི། འོད་ཀྱི་གོང་བུ་བསྡུ་བ་དང་། དེ་རྡོར་སེམས་ཀྱི་ངོ་བོར་འགྱུར་ཚུལ་དྲིས་པའི་ལན་སྟོན་པ་ནི། དྲི་ཆེན་དང་དྲི་ཆུ་དང་མདོག་ཤེལ་དང་འདྲ་བའི་བད་ཀན་དང་། མེ་ཏོག་ནི་རཀ་ཏ་སྟེ་བཞི་དང་། དེ་བཞིན་དུ་ལྔ་པ་བྱང་ཆུབ་ཀྱི་སེམས་དཀར་པོ་ནི་བདུད་རྩི་ལྔའི་དངོས་པོ་ཡིན་ལ། དེ་རྣམས་བསྡུས་ཏེ་གོང་བུའི་ཚོགས་པ་གཅིག་ཏུ་བྱས་པ་དེ་ལས་ཏེ། དེའི་ཕྱིར་ཚོགས་པ་དེ་ནི་རྡོ་རྗེ་ཅན་རྡོ་རྗེ་འཆང་དུ་རྒྱུད་འདིར་གསུངས་སོ། །སཾ་བྷུ་ཊ་ལས། བཤང་དང་གཅི་བ་བད་ཀན་དང་། །ཁྲག་དང་ལྔ་པ་ཁུ་བ་ཉིད། །བདུད་རྩི་ལྔ་ཡི་གོང་བུ་དངོས། །དེ་ཕྱིར་རྡོ་རྗེ་ཅན་འདིར་བརྗོད། །ཅེས་གསུངས་པ་ལྟར་འདིར་ཡང་ཤེས་པར་བྱའོ། །འདི་མན་སྙེའི་བཞེད་པས་མངལ་དུ་ཆགས་པའི་ལུས་དེ་

---

^{[མ་དཔེ་གཟིགས་ན་འདིར་གནོན།]}

དེ་བཞིན་གཤེགས་པ་ལྔའི་ངོ་བོའི་བདུད་རྩིའི་ལྔའི་བདག་ཉིད་ཡིན་པས། དེ་བཞིན་གཤེགས་པ་ལྔ་ཚོགས་པ་དྲུག་པ་རྡོ་རྗེ་འཆང་དང་། རྡོ་རྗེ་དེ་བཞིན་གཤེགས་པ་ལྔའི་རང་བཞིན་གྱི་ལུས་ཡིན་པས་རྡོ་རྗེའི་ལུས་ཞེས་ཀྱང་གསུངས་སོ་ཞེས་འཆད་དོ། །བདུད་རྩི་ལྔའི་བཤང་གཅི་གཉིས་དང་བྱང་སེམས་དཀར་དམར་བཞི་མཐུན་ལ། དེའི་ལྷག་མ་ལྔ་པ་ལ། རྡོ་རྗེ་ཕྲེང་བ་དང་ཕྱག་ཆེན་ཐིག་ལེར་ཤ་ཆེན་དང་། སྡོམ་འབྱུང་ལས། མགོ་སྐྱེས་དེ་བཞིན་སྦུབས་ལས་སྐྱེས། །ཤ་ལས་སྐྱེས་དང་གསུམ་དུ་འགྱུར། །ཞེས་ཀླད་པ་དང་རྐང་མར་དང་ཚིལ་བུ་གསུམ་ལ་བཤད་དོ། །འགྲེལ་པ་གཉིས་ཀྱིས་ཤེལ་ནི་སྣབས་ལ་བྱས་སོ། །དེ་ལྔ་དེ་བཞིན་གཤེགས་པ་ལྔར་འཇོག་ཚུལ་ནི། རྡོ་རྗེ་ཕྲེང་བ་དང་ཕྱག་ཆེན་ཐིག་ལེར་དྲི་ཆུ་མི་བསྐྱོད་པ། དྲི་ཆེན་རྣམ་སྣང་། ཁམས་དམར་པོ་རིན་འབྱུང་། དཀར་པོ་འོད་དཔག་མེད། ཤ་ཆེན་དོན་གྲུབ་ཏུ་བཤད་དོ། །དེ་ལྟར་ན་རྒྱུ་མཚན་གང་གིས་འོད་དེ་བདུད་རྩི་ལྔ་གོང་བུར་བསྡུས་པ་ལ། རྡོ་རྗེ་འཆང་དུ་འཇོག་པའི་རྒྱུ་མཚན་ནི། དེ་བཞིན་གཤེགས་པ་ལྔ་ཚོགས་པ་རྡོ་རྗེ་ཅན་དུ་འཇོག་པ་ཡིན་ནོ། །འདིར་བདུད་རྩི་ལྔ་གསུངས་པ་ལུས་རྡོ་རྗེ་ཅན་གྱི་ལུས་སུ་བསྟན་པའི་ཕྱིར། ཡང་བཤད་དུ་རུང་མོད་ཀྱང་གཙོ་བོར་ནི། གསང་བ་གྲུབ་པ་ལས། སྦྲང་མ་སྐྱུགས་པ་འདྲེས་པ་དང་། །བཤང་དང་གཅི་བ་བསྲེས་བྱས་ནས། །སྒྲོལ་མ་ལྔ་དང་བསྲེས་པ་ཡིས། །རྟག་ཏུ་བདག་ཉིད་མཆོད་པར་བྱ། །ཞེས་

---

^{[མ་དཔེ་གཟིགས་ན་འདིར་གནོན།]}

དང་། བཙུན་མོའི་རང་བྱུང་མེ་ཏོག་ནི། །བྱང་ཆུབ་སེམས་དང་བཅས་གྱུར་པ། །བླངས་ལ་གསུང་གི་རྡོ་རྗེ་ཅན། །བདེ་བ་ཆེན་པོ་ཡང་དག་མཆོད། །ཅེས་གསུངས་པ་ལྟར་བཟའ་བའི་དམ་ཚིག་གི་ཕྱིར་ཡིན་ལ། དེ་ལྟར་བྱས་པས་ནི་བར་ཆད་ལས་བསྲུང་བ་དང་། མཁའ་འགྲོ་མ་རྣམས་དགྱེས་པ་དང་། དངོས་གྲུབ་འགྲུབ་པ་མྱུར་བ་སོགས་ཀྱི་ཕན་ཡོན་དང་ལྡན་པར་གསུངས་ལ། ཁྱད་པར་བཙུན་མོའི་ཁམས་དཀར་དམར་ཟོས་པས་ནི། རང་གི་བྱང་ཆུབ་ཀྱི་སེམས་ལྷག་པར་འཕེལ་བར་གསུངས་སོ། །བཞི་པ་ལ་གཉིས། ཐིག་ལེའི་ཡིག་འབྲུ་ཞུས་པའི་ལན། སྔགས་སྦྱོར་ཚུལ་ཞུས་པའི་ལན་ནོ། །དང་པོ་ནི། ཡུམ་གྱི་པདྨའི་ཐིག་ལེ་ཡིག་འབྲུ་གང་དུ་གནས་ཞུས་པའི་ལན་སྟོན་པ་ནི། ཆ་ཤས་ཞེས་སོགས་སོ། །འདིའི་འགྱུར་སྒྲོན་གསལ་དུ་དྲངས་པ་ལྟར་ལེགས་མོད་ཀྱང་། ཐོག་མར་འགྲེལ་པ་གཉིས་ཀྱིས་འཆད་ཚུལ་བསྟན་ན། ཆ་ཤས་གཉིས་པ་དང་ལྡན་པ་ནི། ཀྵ་སྟེ་ཀ་དང་ཥ་བརྩེགས་པའོ། །དེ་གསལ་བར་སྟོན་པ་ནི་དེ་བཞིན་ཞེས་ཏེ། ཡ་ནས་བགྲངས་པའི་དགུ་པ་ནི་ཀྵ་ཡིག་གོ །དོན་ནིའདི་ཡིན་ཏེ་ཀྵ་ལ་མ་དང་ར་དང་ཡ་བཏགས་ནས་ཞབས་སྐྱེད་རིང་པོར་བྱ་སྟེ། ཟླ་ཚེས་དང་ཐིག་ལེ་བརྩེགས་པའི་ཀྵྨཾ་སྟེ་མན་ངག་གོ །དོན་དེ་གསལ་བར་སྟོན་བཞེད་པས་དེ་སྐད་གསུངས་པ་དེ་ལ་ནི། སུམ་ཅུ་པ་ནི་མ་ནིང་བཞི་དོར་བའི་ཨ་ནས་བརྩིས་པ་ན་དའོ། །དེ་ནས་བརྩིས་པའི་བཅུ་པ་ནི་རའོ། །དེ་བཞིན་དུ་ལྔ་པ་ནི་ལ་ནས་བགྲངས་པའི་ཧའོ། །ས་བོན་ནི་ཧའི་འོག་མ་ཀྵའོ། །ཆ་ཤས་

---

^{[མ་དཔེ་གཟིགས་ན་འདིར་གནོན།]}

གཉིས་པས་ནི་ཀྵ་དངོས་བསྟན་ནོ། །ལྔ་ཡིས་ཞེས་པ་ནི་ཀྵ་ལ་མ་དང་ར་དང་ཐིག་ལེ་བྱས་པ་ཆོས་ཀྱི་དབྱིངས་ཀྱི་ཡི་གེའི་འབྲུའི་བསྡུ་བ་གསུངས་པའོ། །ཞེས་འཆད་དོ། །བཤད་པ་འདི་ལ་ནི་ཀྵ་ཡིག་ལན་དུ་མར་བསྡུས་ཤིང་། ཡ་དང་མ་བསྡུ་དགོས་པ་ཆད་ལ། ལ་ནས་བགྲངས་ན་ཧ་དྲུག་པར་འདུག་པ་ལྔ་པར་བྱས་སྣང་བས་ཡིད་ཆེས་པར་དཀའ་འོ། །དེས་ན་སྒྲོན་གསལ་ལོ་ཆེན་དང་འགོས་ཀྱིས་བསྒྱུར་བ་ལས། ཆ་གཉིས་པ་ནི་དགུ་པ་ཉིད་ཀྱིས་བཤད། །སུམ་ཅུ་བཅུ་པ་ལྔ་ཡིས་ས་བོན་ཉིད། །ཆ་གཉིས་ལྔ་པ་དྲུག་པས་ཕྱེ་བ་ནི། །བྱུང་བ་འདི་ནི་ཐིག་ལེ་ཡིན་ཞེས་བཤད། །ཅེས་འབྱུང་ངོ་། །འདི་ལའང་འཆད་ཚུལ་དུ་མ་ཞིག་སྣང་ཡང་། སྒྲོན་གསལ་གྱི་འགྲེལ་བཤད་རབ་ཏུ་སྒྲོན་གསལ་དང་། སྒྲོན་གསལ་གྱི་བསྡུད་དོན་སྙིང་གི་མེ་ལོང་གི་བཤད་པ་བཞིན་བཤད་ན། ཆ་ནི་དབྱངས་ཡིག་ཡིན་ལ། དེའི་གཉིས་པ་ནི་ཨཱའོ། །དགུ་པ་ནི་མ་ནིང་བཞི་དོར་བའི་ཨ་ནས་བགྲངས་པའི་ཨོ་ཉིད་དུ་བཤད་དོ། །ཉིད་ཀྱིས་ཞེས་པ་ཉིད་དུ་བྱའོ། །མ་ནིང་བཞི་དོར་བའི་ཨ་ནས་བགྲངས་ན་དབྱངས་བཅུ་གཉིས་དང་། ཀ་ཙ་ཊའི་སྡེ་པའི་ཡི་གེ་བཅོ་ལྔ་སྟེ་ཉེར་བདུན། ཏ་སྡེའི་དང་པོ་གསུམ་བསྣན་པས་སུམ་ཅུ་སྟེ། དེའི་ཐ་མ་ནི་དའོ། །དེའི་འོག་མ་དྷ་ནས་བགྲངས་ན་བཅུ་པ་ལའོ། །དེའི་འོག་མ་ཝ་ནས་བགྲངས་ན་ལྔ་པའི་ས་བོན་ཧ་སྟེ། མདོར་ན་ཨ་ནས་བགྲངས་པའི་ཞེ་ལྔ་པ་ཧ་ཐུ་བའི་དོན་ཡིན་གྱི་ད་དང་ལ་ཐུ་བ་མིན་ནོ། །དེ་ལྟར་

---

^{[མ་དཔེ་གཟིགས་ན་འདིར་གནོན།]}

ཨཱ་དང་ཨོ་དང་ཧ་གསུམ་པོ་གཞིར་བཞག་པའི་དང་པོ་ཨཱ་ལ་ཆ་གཉིས་ཏེ། ཨཱཿ ཡིས་ཕྱེ་བས་ཨ་གཉིས། ཨཱ་རིང་པོ་གཅིག་ཏུ་བསྡོམས་ནས་རྣམ་བཅད་ཀྱིས་བརྒྱན་པས་ཨཱཿ འོ། །ཨོ་ལ་པ་སྡེའི་ལྔ་པ་མ་ཡིག་གིས་ཕྱེ་བ་སྟེ། བརྒྱན་པས་ༀ་མོ། །ཧ་ལ་དབྱངས་ཡིག་དྲུག་པ་ཨཱུ་ཡིས་ཕྱེ་བ་སྟེ་བརྒྱན་པས་ཧཱུའོ། །དེ་ལ་སླར་ཡང་ལྔ་པ་མ་ཡིག་རྗེས་སུ་ང་རོར་བྱས་པས་ཧཱུཾ་སྟེ། དེ་ལྟ་བུ་ལས་བྱུང་བའི་འབྲུ་གསུམ་འདི་ནི་ཡུམ་གྱི་པདྨར་བྱུང་བའི་ཐིག་ལེ་ཡིན་ཞེས་བཤད་དོ། །ལེའུ་དང་པོར་བཤད་པའི་ཡུམ་གྱི་པདྨར་སྤྲོས་པའི་ཐིག་ལེ་འབྲུ་གསུམ་གྱི་ཡིག་འབྲུའི་གཟུགས་ཅན་དུ་བཤད་པ་འདི་ནི། དཀྱིལ་འཁོར་རྒྱལ་མཆོག་བསྐྱེད་པའི་ཚེ་ཐིག་ལེ་ཆ་སོ་གཉིས་སུ་གྱུར་པ་འབྲུ་གསུམ་སོ་གཉིས་སུ་གྱུར་ནས་ལྷ་བསྐྱེད་པའི་བསྐྱེད་ཆོག་སྟོན་པ་ཡིན་པས་ཀྵཱུཾ་དང་ཀྵྨཾ་དང་སྟོན་པ་མིན་ནོ། །གཉིས་པ་ནི། སྔགས་འདུས་པའམ་སྦྱོར་བའི་ཚུལ་གྱི་ལན་སྟོན་པ་ནི། གཞུང་ཕལ་ཆེ་བ་ལས། ཡིག་འབྲུ་བྲུཾ་དང་ཆོས་ཀྱི་དབྱིངས་ཀྱང་། ཞེས་འབྱུང་ཡང་། དཔེ་ཁ་ཅིག་ལས། ཆོས་ཀྱི་དབྱིངས་ཀྱི་ཡི་གེ་བྲུཾ། །ཞེས་འབྱུང་བ་དག་པས་ཆོས་ཀྱི་དབྱིངས་བྱང་ཆུབ་ཀྱི་སེམས་ཐིག་ལེ་ཡོངས་སུ་གྱུར་པའི་ཡི་གེ་བྲུཾ་ཡུམ་གྱི་སྐྱེ་གནས་ཀྱི་པདྨ་ལ་གནས་པ་དེ་ཉིད་རྣམ་སྣང་གི་ས་བོན་ཡིན་ནོ། །དེ་ནི་མཚོན་པ་ཙམ་སྟེ་མི་བསྐྱོད་པ་ནས་གནོད་མཛེས་ཀྱི་བར་གྱི་ས་བོན་ཧཱུཾ་སྭཱ་ཨཱཿ ཧཱ་ནས་ཧཱུཾ་གི་བར་རྣམས་ཀྱང་ཐིག་ལེ་ཡོངས་སུ་གྱུར་པ་ལས་ཡི་གེ་དེ་དག་གི་གཟུགས་སུ་ཡུམ་གྱི་

---

^{[མ་དཔེ་གཟིགས་ན་འདིར་གནོན།]}

པདྨར་གནས་པའོ། །ས་བོན་སོ་གཉིས་དང་འབྲུ་གསུམ་གྱི་སྔགས་གཉིས་སྦྱོར་ཚུལ་ནི། ༀ་ཨཱཿ བྲུཾ་ཧཱུཾ། ཞེས་སོགས་སུ་སྦྱོར་བའོ། སྭཱ་ཧཱ་མཐའ་ཞེས་པ་ནི། ༀ་ཨཱཿ བྲུཾ་ཧཱུཾ་སྭཱཧཱ། ཞེས་སོགས་སུ་སྦྱོར་བ་སྟེ། འདི་ནི་ལྷ་སོ་སོའི་བཟླས་པའི་སྔགས་སྦྱོར་ཚུལ་ཡིན་གྱི། བསྐྱེད་པའི་སྔགས་མིན་ནོ། །དེ་འདྲ་བའི་སྔགས་སྦྱོར་ཚུལ་དེ་ནི་སྔགས་འདུས་པའི་དོན་ཡིན་པར་ཤེས་པར་བྱའོ། །ལྔ་པ་ནི། ཇི་ལྟར་མི་རྣམས་སྐྱེ་བ་ལགས། །ཞེས་དྲིས་པའི་ལན་སྟོན་པ་ནི། མི་ལ་སོགས་པའི་ལུས་ཀྱི་ཆ་ཤས་ཆུའི་ཁམས་ཏེ་ཁམས་དཀར་པོ་ནི་ཕ་ལས་བྱུང་བའི་ཁུ་བའི་ཉེར་ལེན་ལས་སྐྱེས་པ་ཞེས་བྱ་ལ་མེའི་ཁམས་ཏེ་ཁམས་དམར་པོ་ནི་མ་ལས་བྱུང་བའི་རྡུལ་གྱི་ཉེར་ལེན་ལས་སྐྱེས་པའོ། །དེར་མ་ཟད། ཤ་དང་ཁྲག་དང་པགས་པ་ཡང་། །མ་ལས་སྐྱེས་པ་ཞེས་བཤད་དེ། །རུས་པ་རྐང་དང་ཁུ་བ་ནི། །ཕ་ལས་སྐྱེས་ཞེས་བཤད་པ་ཡིན། །གཞུང་ལས། ཚིལ་དང་རྐང་དང་ཁུ་བ་ཡང་། །ཞེས་འབྱུང་ཡང་། རྣམ་གཞག་ཏུ་དྲངས་པ་ལས། རུས་པ་ཞེས་འབྱུང་ལ། དེ་ཉིད་སཾ་བྷུ་ཊ་དང་ཡང་མཐུན་ནོ། །དྲུག་པོ་དེ་དག་ཙམ་ཞིག་ཏུ་བཤད་པ་ནི་གཟུགས་ལུས་ཀྱི་གོང་བུའི་གཙོ་བོ་ཡང་དག་པར་འདུས་པ་སྟེ་བསྡུས་པ་ཡིན་ནོ། །དེ་ལྟར་ན་དྲུག་པོ་དེ་དག་ལས་མི་རྣམས་ཇི་ལྟར་སྐྱེ་ཞེས་དྲིས་པའི་དོན་ནི། མི་རྣམས་ཀྱི་དྲུག་པོ་དེའི་ཉེར་ལེན་གྱི་རྒྱུ་ཕ་མ་གང་གིས་བྱས་པ་ལས་སྐྱེ་ཞེས་པའི་དོན་ཡིན་ལ། ལན་གྱིས་ཀྱང་དེ་

---

^{[མ་དཔེ་གཟིགས་ན་འདིར་གནོན།]}

འཆད་དོ། །དེ་ལྟར་བཤད་པས་ཀྱང་གཟུགས་ལུས་ཀྱི་ཁམས་གཞན་ཐམས་ཅད་ཐིག་ལེ་གཉིས་ཀྱི་རྣམ་འགྱུར་ཡིན་པས་རྩ་ཨ་ཝ་དྷཱ་ཏཱིར་བསྡུ་རྒྱུའི་ལུས་ཀྱི་ཁམས་ཀྱི་གཙོ་བོ་ནི་ཐིག་ལེ་གཉིས་རླུང་དང་བཅས་པ་ཡིན་པར་བསྟན་པའི་ཕྱིར་རོ། །དྲུག་པ་ནི། རིགས་ལྔ་གང་གི་ངོ་བོར་བསྒོམ་པ་ཞུས་པའི་ལན་སྟོན་ཏེ། གཟུགས་ཀྱི་ཕུང་པོ་དང་། དེ་བཞིན་དུ་སྦྱར་ལ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་སྟེ་ཕུང་པོ་ལྔ་ནི། སངས་རྒྱས་རིགས་ལྔའི་གཟུགས་ཏེ་རང་བཞིན་གྱི་དངོས་པོར་བསྒོམ་མོ་ཞེས་བྱ་བར་བཤད་པར་ཤེས་པར་བྱའོ། །རྣམ་གཞག་ཏུ་དྲངས་པ་ལ། ཕུང་པོ་ལ་སོགས་སངས་རྒྱས་ལྔའི། །རང་བཞིན་དངོས་ཞེས་བསྟན་པ་ཡིན། །ཞེས་འབྱུང་བ་ལྟར་ལེགས་ལ། དེ་ལ་ནི་སོགས་ཀྱི་སྒྲ་ཡང་ཡོད་པས། དེ་ལྟར་ན་ཁམས་བཞི་ལྷ་མོ་བཞིར་བསྒོམ་པ་སོགས་ཀྱི་ལུས་དཀྱིལ་ཡང་བསྟན་པར་གཟུང་ངོ་། །གསུམ་པ་ནི། ལྷ་མོ་བཞིས་ཡོངས་སུ་ཞུས་པའི་རྒྱུད་ཀྱི་རྣམ་པར་བཤད་པ་ལས། ལྷ་མོ་ན་བཟའ་དཀར་མོས་ཞུས་པའི་ལེའུ་སྟེ་ལེའུ་གསུམ་པའི་རྣམ་པར་བཤད་པའོ།། །།བཞི་པ་སྒྲོལ་མས་ཞུས་པའི་ལེའུ་ལ་བཞི། ཞུ་བ་མཛད་ཚུལ། ཞུས་པའི་ལན་བཤད་པ། བཤད་ཟིན་ནས་ཇི་ལྟར་མཛད་པ། ལེའུའི་མཚན་བསྟན་པའོ། །དང་པོ་ལ་གཉིས། ཞུས་པའི་མཚམས་སྦྱོར། ཞུ་བ་དངོས་སོ། །དང་པོ་ནི། གོས་དཀར་མོས་ཞུས་པའི་ལན་རྫོགས་པ་དེ་ནས་ལྷ་མོ་སྒྲོལ་མ་བཅོམ་ལྡན་མས། རྡོ་རྗེ་སེམས་དཔའ་ལ་

---

^{[མ་དཔེ་གཟིགས་ན་འདིར་གནོན།]}

ཞུས་པ་ཞེས་སྡུས་པ་པོའི་ཚིག་གིས་མཚམས་སྦྱར་རོ། །ཇི་ལྟར་ན། ཞལ་གྱི་པདྨ་བཞད་པར་གྱུར་ཏེ་ཞུས་སོ། །གཉིས་པ་ལ་དྲུག །ཆོས་ཀྱི་དབྱིངས་ཀྱི་སྒྲུབ་པ་ཞུས་པ། རྫས་ཀྱི་སྒྲུབ་པ་ཞུས་པ། སྔགས་ཀྱི་སྒྲུབ་པ་ཞུས་པ། དཀྱིལ་འཁོར་ཞུས་པ། སྦྱིན་སྲེག་བྱ་ཚུལ་ཞུས་པ། །མཆོད་པ་ཇི་ལྟར་བྱ་བ་ཞུས་པའོ། །དང་པོ་ནི། རྡོ་རྗེ་ཅན་ཆེན་པོ་ཞེས་བོས་ནས། ཕུང་པོ་ལ་སོགས་པའི་ཆོས་ཀྱི་དབྱིངས་འོད་གསལ་གྱི་སྒྲུབ་པ་ནི་གསུངས་ཤིག་ཅེས་ཞུས་སོ། །གཉིས་པ་ནི། རི་ལུ་ལ་སོགས་པའི་རྫས་བརྒྱད་པོ་རྣམས་ཀྱི་སྒྲུབ་པ་བཀའ་སྩལ་པ་འཚལ་པ་སྟེ་དགོས་ཞེས་ཞུས་སོ། །གསུམ་པ་ནི། རྫས་ཀྱི་སྒྲུབ་པ་བཤད་དགོས་པ་དེ་བཞིན་དུ་རིག་པ་སྟེ་རིག་མ་དགུག་པ་ཡི་སྔགས་ཀྱི་སྒྲུབ་པ་རྣམས་ཀྱང་བཀའ་སྩ་དགོས་ཞེས་ཞུས་སོ། །བཞི་པ་ནི། དཀྱིལ་འཁོར་གསུམ་པོ་རྣམས་སུ་བརྟགས་པ་སྟེ་བཤད་པ་དང་བསྒོམ་པ་ནི་ཁྱད་པར་དུ་ཡང་བཀའ་སྩལ་འཚལ་ཞེས་སྦྱར་རོ། །ལྔ་པ་ནི། ཕྱི་ནང་གི་སྦྱིན་སྲེག་སོ་སོར་བྱ་བའི་ཚུལ་ཁྱད་པར་དུ་ཡང་བཀའ་སྩལ་འཚལ་ལོ། །དྲུག་པ་ནི། སྦྱིན་སྲེག་བཤད་དགོས་པ་དེ་བཞིན་དུ་ལྷ་མཆོད་པའི་ཆོ་ག་ཡང་ཁྱད་པར་དུ་བཀའ་སྩལ་པ་འཚལ་ལོ་ཞེས་ཞུས་སོ། །གཉིས་པ་ལ་གཉིས། ལན་གྱི་མཚམས་སྦྱོར། ལན་བཤད་པ་དངོས་སོ། །དང་པོ་ནི། སྔར་བཤད་པ་དེ་ལྟར་ལྷ་མོ་སྒྲོལ་མས་ཞུས་མ་ཐག་ཏུ་དེ་རྣམས་ཀྱི་ལན་རྡོ་རྗེ་སེམས་དཔས་

---

^{[མ་དཔེ་གཟིགས་ན་འདིར་གནོན།]}

བཀའ་སྩལ་པ་ནི་འོག་ནས་འབྱུང་བ་རྣམས་སོ། །གཉིས་པ་ལ་དྲུག །ཆོས་ཀྱི་བྱིངས་ཀྱི་སྒྲུབ་པ་ཞུས་པའི་ལན། རྫས་ཀྱི་སྒྲུབ་པ་ཞུས་པའི་ལན། སྔགས་ཀྱི་སྒྲུབ་པ་ཞུས་པའི་ལན། དཀྱིལ་འཁོར་ཞུས་པའི་ལན། སྦྱིན་སྲེག་བྱ་ཚུལ་ཞུས་པའི་ལན། མཆོད་པ་ཇི་ལྟར་བྱ་བ་ཞུས་པའི་ལན་ནོ། །དང་པོ་ལ་བཞི། མཉན་པར་བསྐུལ་བ། ཉན་རྒྱུའི་དོན་དངོས། དོན་དེ་སྒྲུབ་པ་ལ་སྦྱར་བ། འདིར་མ་བཤད་པ་གཞན་དུ་ཤེས་པར་བྱ་བའོ། །དང་པོ་ནི། ལྷ་མོ་ཞེས་སྒྲོལ་མ་ལ་བོས་ནས་ཆོས་ཀྱི་དབྱིངས་འོད་གསལ་གྱི་སྒྲུབ་པ་ནི་ལེགས་པར་ཉོན་ཅིག་དང་། བདག་གིས་བཤད་པར་བྱའོ། །གཉིས་པ་ནི། ཆོས་ཀྱི་དབྱིངས་ཞེས་བྱ་བའོ། །ཞེས་དྲང་ངོ་། །འོ་ན་ཆོས་ནི་གང་ཡིན་དབྱིངས་ནི་གང་ཡིན་ཞེ་ན། ཆོས་ནི་ཡུལ་གཟུགས་དང་སྒྲ་དང་དྲི་དང་དེ་བཞིན་དུ་རོ་དང་རེག་བྱ་དང་སོགས་ཀྱིས་བསྡུས་པ་ཆོས་ཀྱི་སྐྱེ་མཆེད་དང་། མིག་གནས་ཡིད་ཀྱི་བར་དྲུག་དང་། མིག་གི་རྣམ་ཤེས་ནས་ཡིད་ཀྱི་རྣམས་ཤེས་ཀྱི་བར་དྲུག་སྟེ་བཅོ་བརྒྱད་པོ་དེ་དག་གོ །ཀྱང་ནི་སྡུད་པའོ། །ཁམས་ནི་རྟེན་དབང་པོ་དྲུག་དང་། བརྟེན་པ་རྣམ་ཤེས་དྲུག་དང་། དམིགས་པ་ཡུལ་དྲུག་པོ་དེ་རྣམས་ཀྱི་ཁམས་ཡིན་ལ། དེ་ཡང་སྤྱི་སྐད་ལ་གྲགས་པའི་ཁམས་བཅོ་བརྒྱད་མིན་གྱི། དྷཱ་ཏུའི་སྒྲ་ཁམས་དང་དབྱིངས་གཉིས་ཀ་ལ་འཇུག་པས་འདིར་ནི་དབྱིངས་འོད་གསལ་ལོ། །དཔེ་ཁ་ཅིག་ལས། ཆོས་ཀྱི་དབྱིངས་ཀྱིས་བྱས་པའོ། །ཞེས་འབྱུང་བ་ནི་མི་དག་སྟེ། ཆོས་ཀྱི་དབྱིངས་ལས་ཁམས་དང་སྐྱེ་མཆེད་དང་། ཕུང་པོ་

---

^{[མ་དཔེ་གཟིགས་ན་འདིར་གནོན།]}

རྣམས་འབྱུང་བ་ནི་འོག་ནས་འཆད་པས་སོ། །ཆོས་བཅོ་བརྒྱད་པོའི་དབྱིངས་འཆི་བའི་འོད་གསལ་དེ་དག་ཉིད་ལས་བྱུང་བ་ནི་སེམས་ཡིད་རྣམ་ཤེས་གསུམ་གྱི་བྱང་ཆུབ་ཀྱི་སེམས་ཞེས་བྱ་བར་ཤེས་པར་བྱ་སྟེ། ཡེ་ཤེས་རྡོ་རྗེ་ཀུན་ལས་བཏུས་ལས། འོད་གསལ་བ་ལས་བྱུང་བའི་རྣམ་པར་ཤེས་པ་དེ་ཉིད་སེམས་དང་ཡིད་དང་རྣམ་པར་ཤེས་པ་ཞེས་བྱ་བ་ཆོས་ཐམས་ཅད་ཀྱི་རྩ་བ་སྟེ་ཞེས་གསུངས་ཤིང་། དེ་གསུམ་སྣང་མཆེད་ཐོབ་གསུམ་དུ་ཡང་བཤད་ལ། དེ་ཉིད་ལ་བྱང་ཆུབ་ཀྱི་སེམས་ཀུན་ཏུ་བཟང་པོ་ཞེས་ཀྱང་སྤྱོད་བསྡུས་ལས་གསུངས་སོ། །སྣང་མཆེད་ཐོབ་གསུམ་གྱི་བྱང་ཆུབ་ཀྱི་སེམས་དེ་ལས་རླུང་མེ་ཆུ་ས་རིམ་གྱིས་སྐྱེ་བ་ནི་འབྱུང་བའི་གོང་བུ་སྐྱེ་བ་ཡིན་ལ། དེ་ནི་མིང་གཟུགས་གཉིས་ཀྱི་གཟུགས་ཡིན་ཞིང་། མིང་ནི་མིང་གཞིའི་ཕུང་པོ་ཡིན་ལ། དེ་གཉིས་ཕན་ཚུན་རྗེས་སུ་བྱེད་པར་གསུངས་པས་མིང་ལས་ཀྱང་གཟུགས་སྐྱེ་ལ། གཟུགས་ལས་ཀྱང་མིང་སྐྱེ་བ་གཉིས་ཡོད་པའི་ཕྱི་མ་ནི་གོང་བུ་ལས་ཀྱང་ཡིད་བསྐྱེད་པའོ། །མིང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་སྐྱེ་བར་གསུངས་པས། མིང་གི་ཡིད་ལས་དབང་པོའི་སྒོ་རྣམས་ཀྱི་བུ་ག་ནམ་མཁའི་ཁམས་དང་། ཀྱང་གི་སྒྲས་དེར་མ་ཟད་ཁམས་བཅོ་བརྒྱད་པོ་རྣམས་དང་། སྐྱེ་མཆེད་རྣམས་དང་། དབང་པོ་དང་། ཕུང་པོ་རྣམས་འབྱུང་ངོ་། །ཡེ་ཤེས་རྡོ་རྗེ་ཀུན་ལས་བཏུས་པ་ལས་ཀྱང་། རྣམ་པར་ཤེས་པ་དེའི་བཞོན་པ་རླུང་ངོ་། །རླུང་ལས་མེའོ། །མེ་ལས་ཆུའོ། །ཆུ་

---

^{[མ་དཔེ་གཟིགས་ན་འདིར་གནོན།]}

ལས་སའོ། །དེ་རྣམས་ལས་ཕུང་པོ་ལྔ་དང་། སྐྱེ་མཆེད་དྲུག་དང་། ཡུལ་ལྔ་སྟེ་ཞེས་གསུངས་སོ། །འོད་གསལ་བ་ལས་བྱུང་བའི་ཆོས་དེ་རྣམས་སླར་ཡང་རྩ་བའི་གནས་འོད་གསལ་གྱི་དབྱིངས་སུ་བསྡུ་བ་སྟེ། བསྡུས་པ་བརྟན་པར་བྱས་པ་ནི་ཆོས་ཀྱི་དབྱིངས་འོད་གསལ་གྱི་སྒྲུབ་པ་ཡིན་ནོ། །ཇི་ལྟར་སྡུད་ན། ཇི་ལྟར་སྐྱེས་པའི་རིམ་པ་དེ་ལྟར་ཕྱིར་སྡུད་དེ། །རྒྱུད་རྡོ་རྗེ་ཕྲེང་བ་ལས། ཇི་ལྟར་སྐྱེ་པ་དེ་ལྟའི་གནས། །ཐིམ་བར་འགྱུར་རོ་རང་བཞིན་ལས། །ཞེས་དང་། རླུང་རྣམས་མཆོག་ཏུ་ནུབ་པ་ནི། །གང་གིས་ཡང་དག་ཤེས་པ་ཡིས། །འཆི་བའི་སྐད་ཅིག་མཚན་ཉིད་ནི། །ཕན་ཚུན་དུ་ནི་ཡང་དག་སྡུད། །སྐྱེ་བའི་རིམ་ལྟར་ཐིམ་པར་འགྱུར། །ཞེས་གསུངས་སོ། །རྡོ་རྗེ་བཟླས་པ་སོགས་ལུས་ལ་གནད་དུ་བསྣུན་པའི་ཐབས་ཀྱིས་འཆི་རིམ་བཞིན་དུ་ཕུང་སོགས་ཀྱི་དབྱིངས་སུ་བསྡུས་ནས་འོད་གསལ་མངོན་དུ་བྱེད་པའི་འཆི་བ་ཆོས་སྐུའི་ལམ་ཁྱེར་འདིར་བསྟན་ཏེ། དེའི་གནད་ཀྱིས་འོད་གསལ་གྱི་ངང་ལས་བར་དོ་ཇི་བཞིན་དུ་རླུང་སེམས་ལས་ལོངས་སྐུ་བསྒྲུབ་པ་བར་དོ་ལོངས་སྐུར་འཁྱེར་བ་དང་། བར་དོས་མངལ་དུ་སྐྱེས་བ་བཟུང་བ་ན་ཤའི་མིག་གི་ཡུལ་དུ་གྱུར་པ་བཞིན་དུ་སྒྱུ་མའི་ལོངས་སྐུས་སྤྲུལ་སྐུའི་སྐྱེ་བ་བཟུང་བ་ན་ལོངས་སྐུ་མཐོང་བར་མི་ནུས་པའི་སེམས་ཅན་གྱི་ཡང་མཐོང་བའི་ཡུལ་དུ་གྱུར་ནས། མཛད་པ་མཛད་པ་སྐྱེ་བ་སྤྲུལ་སྐུར་འཁྱེར་བ་འདི་ནི་འདུས་པའི་དོན་འཕགས་པ་ཡབ་སྲས་ཀྱིས་བཀྲལ་བའི་ཁྱད་པར་གྱི་ཆོས་མཐར་ཐུག་པའོ། །

---

^{[མ་དཔེ་གཟིགས་ན་འདིར་གནོན།]}

གསུམ་པ་ནི། དེ་ལྟར་ཕུང་སོགས་འཆི་རིམ་བཞིན་འོད་གསལ་དུ་བཅུག་ནས་འཆི་བ་ཆོས་སྐུར་འཁྱེར་བ་སོགས་བྱ་དགོས་པ་དེ་བས་ན་ནན་ཏན་ཏེ་འབད་པ་ཐམས་ཅད་ཀྱིས་ཆོས་ཀྱི་དབྱིངས་འོད་གསལ་གྱི་སྒྲུབ་པ་ཡང་དག་པར་སྤྱད་པར་བྱའོ་ཞེས་འདོམས་པར་མཛད་དོ། །བཞི་པ་ནི། སྒྲུབ་པ་དེའི་བྱེད་ཚུལ་རྒྱས་པར་ནི་རྟོག་པའམ་བརྟག་པའི་རྒྱལ་པོ་འདུས་པ་རྩ་བཤད་ཀྱི་རྗེས་སུ་འབྲངས་ནས་དེར་ཇི་ལྟར་བཤད་པ་དེ་ལྟར་བསྒྲུབ་པར་བྱ་བ་ཆོས་ཀྱི་དབྱིངས་ཀྱིས་སྒྲུབ་པ་རབ་ཏུ་བརྟག་པ་སྟེ་སྤྱད་པར་བྱའོ། །གཞུང་ཕལ་ཆེར་བ་ལས། ཇི་ལྟར་གལ་པོ་ཤེས་དངོས་ཀྱི། །ཞེས་འབྱུང་ཡང་། ཁ་ཅིག་ལས། དེ་ལྟར་རྟོག་པའི་རྗེས་འབྲངས་ནས། །ཞེས་འབྱུང་བ་དག་སྟེ། ཀལ་པ་ཞེས་པ་རྟོག་པའི་སྐད་དོད་ཡིན་པ་མ་ཤེས་པར་གལ་པོ་ཞེས་བྲིས་པའོ། །གཉིས་པ་ལ་བཞི། བཤད་མ་བཤད་ཀྱི་མཚམས་སྦྱོར། རྫས་བརྒྱད་བསྒྲུབ་པ་མདོར་བསྟན་པ། རི་ལུའི་དངོས་གྲུབ་བསྒྲུབ་ཚུལ་བཤད་པ། རི་ལུ་ཟོས་པའི་ཕན་ཡོན་ནོ། །དང་པོ་ནི། ཆོས་རྣམས་ཀྱི་དབྱིངས་འོད་གསལ་བསྒྲུབ་པ་བཤད་ནས་སུ་ཞེས་བཤད་ཟིན་པའི་མཚམས་སྦྱར་ནས་རྫས་བརྒྱད་ཀྱི་ཐུན་མོང་གི་དངོས་གྲུབ་ཡན་ལག་བརྒྱད་བསྒྲུབ་པའི་ཐབས་བཤད་པར་བྱའོ་ཞེས་འཆད་འགྱུར་གྱི་མཚམས་སྦྱོར་རོ། །གཉིས་པ་ནི། དངོས་གྲུབ་བརྒྱད་ནི། རི་ལུའི་དངོས་གྲུབ་དང་། མིག་སྨན་གྱི་དངོས་གྲུབ་དང་། ས་འོག་གི་དངོས་གྲུབ་དང་། རལ་གྲིའི་

---

^{[མ་དཔེ་གཟིགས་ན་འདིར་གནོན།]}

དངོས་གྲུབ་དང་། ནམ་མཁར་འཕུར་བའི་དངོས་གྲུབ་དང་། མི་སྣང་བའི་དངོས་གྲུབ་དང་། ཤི་བ་མེད་པའི་དངོས་གྲུབ་དང་། ནད་འཇོམས་པའི་དངོས་གྲུབ་བོ། །འགྲེལ་པར་མིག་སྨན་ལན་གཉིས་བྱུང་བའི་སྔ་མ་ནི་མིག་སྨན་མིག་ལ་བྱུགས་པས་སྐུ་གསུམ་ཐུགས་ཀྱི་དངོས་གྲུབ་འགྲུབ་པ་དང་། དྲུག་པ་ནི། མིག་སྨན་མིག་ལ་བྱུགས་པས་མི་སྣང་བའི་སྐུ་གསུང་ཐུགས་རྡོ་རྗེ་དང་། ལྷ་ཀླུ་ཀུན་མཐོང་བ་ལ་བཤད་ཅིང་། སྔ་མ་རྩ་རྒྱུད་ཀྱི་ལེའུ་བཅུ་བདུན་པར་མིག་སྨན་གྱི་བསྒྲུབ་པ་བཤད་པའི་དོན་དུ་འཆད་དོ། །ལེའུ་དེར་བཤད་པའི་དོན་ནི། སྒྲོན་གསལ་ལས་དུད་པའི་མིག་སྨན་ལ་བརྟེན་ནས་དངོས་གྲུབ་རབ་མི་སྣང་བ་དང་། འབྲིང་ས་འོག་ན་གནས་པའི་གཏེར་མཐོང་བ་དང་། ཐ་མ་གཞན་དབང་དུ་བྱེད་པ་གསུམ་འགྲུབ་པར་བཤད་དོ། །ཁ་ཅིག་ལས། ནམ་མཁར་འཕུར་དང་མི་སྣང་དང་། །ཞེས་གསུངས་པ་ཡང་སྣང་བས་དྲུག་པ་ནི་མི་སྣང་བའི་དངོས་གྲུབ་ལ་བྱ་ཞིང་། སྔ་མ་ནི་མིག་སྨན་ནམ། མིག་རྣོན་ཞེས་བྱའོ། །ས་འོག་གི་དངོས་གྲུབ་ནི་འགྲེལ་པ་གཉིས་ཀྱིས། ས་འོག་ན་གནས་པའི་ལྷ་མ་ཡིན་དང་ཀླུའི་བུ་མོ་འགུགས་པ་ལ་བཤད་དོ། །རྒྱུད་འདིར་རིལ་བུའི་བསྒྲུབ་པ་མ་གཏོགས་པ་གཞན་བདུན་གྱི་བསྒྲུབ་པ་མ་བཤད་པ་ནི། ཕལ་ཆེར་ཐམས་ཅད་གསང་བའི་རྒྱུད་དུ་སྔར་བཤད་ཟིན་པས་མ་བཤད་པར་མངོན་ཏེ། འོག་ནས་དཀྱིལ་འཁོར་གསུམ་དང་ཕྱིའི་སྦྱིན་སྲེག་གཉིས་མདོར་བསྟན་དུ་བྱུང་ཡང་། དཀྱིལ་འཁོར་གཉིས་

---

^{[མ་དཔེ་གཟིགས་ན་འདིར་གནོན།]}

དང་ཕྱིའི་སྦྱིན་སྲེག་སྔར་ཐམས་ཅད་གསང་བའི་རྒྱུད་དུ་བཤད་ཟིན་པས་འདིར་མ་བཤད་པར་གསུངས་པ་བཞིན་ནོ། །འདུས་པའི་རྩ་རྒྱུད་དུ་ས་འོག་གི་དངོས་གྲུབ་བསྒྲུབ་པ་ལོགས་སུ་གསལ་བར་མ་བཤད་ཀྱང་། མིག་སྨན་བསྒྲུབ་པའི་སྐབས་སུ་ས་འོག་གི་གཏེར་མཐོང་བའི་འགྲུབ་པར་བཤད་པ་ལྟ་བུ། ས་འོག་གི་དངོས་གྲུབ་ཀྱི་ཕྱོགས་སུ་གཏོགས་པར་བཤད་པའང་ཡོད་ལ། གཞན་རྣམས་ནི་རྩ་རྒྱུད་ཀྱི་འགྲེལ་པ་སྒྲོན་གསལ་ལས་གསུངས་པ་བཞིན་ཤེས་པར་བྱ་སྟེ། འདིར་ཚིག་མངས་སུ་དོགས་ནས་མ་བྲིས་སོ། །གསུམ་པ་ལ་གསུམ། རིལ་བུའི་རྫས་སྦྱར་བ་དང་སྦྱང་པའི་ཚུལ། སྦྱངས་ནས་རིལ་བུ་བྱ་བའི་ཚུལ། བྱས་ནས་བཟླས་པ་བྱ་ཚུལ་ལོ། །དང་པོ་ནི། རིལ་བུའི་རྒྱུ་ལ་གཉིས་ལས། ཤའི་ཚད་ནི། མི་དང་གླང་པོ་ཆེ་དང་རྟ་དང་གླང་དང་ཁྱི་དང་བོང་བུ་དང་རྔ་མོང་དང་མ་ཧེ་དང་སྤྱང་ཀི་རྣམས་ཀྱི་ཤ་ནི་མཐེ་བོང་གི་ཚིགས་ཀྱི་ཚད་ཙམ་དུ་ནི་ཆ་ནི་མཉམ་པོར་བྱ་བ་སྟེ། དེ་ཡང་ཤིན་ཏུ་མཉམ་པར་བཞག་ནས་སྦྱར་རོ། །བདུད་རྩིའི་ཚད་ནི། དྲི་ཆེན་དང་། དྲི་ཆུ་དང་། རཀྟ་དང་། བྱང་ཆུབ་ཀྱི་སེམས་དཀར་པོ་ནི་ནས་ཀྱི་ཚད་ཙམ་དུ་ཆ་མཉམ་པར་བྱ་སྟེ། མཉམ་པར་བཞག་ནས་སྦྱར་ཏེ། སྔར་གསུངས་པའི་ཤེལ་ཡང་ངོ་། །སྦྱར་ཟིན་ནས་སྔགས་བཟླས་ནས་ནི་ཏིང་ངེ་འཛིན་གྱིས་རྫས་དེ་དག་གི་སྐྱོན་སྦྱར་བར་བྱ་སྟེ། དེ་ཟིན་མ་ཐག་སྔགས་དང་ཏིང་ངེ་འཛིན་གྱིས་རྫས་དེ་དག་བྱིན་གྱིས་བརླབ་པ་ཡང་

---

^{[མ་དཔེ་གཟིགས་ན་འདིར་གནོན།]}

བྱའོ། །སྔགས་ནི་ཐོག་མར་ཕྱག་འཚལ་བ་སྟེ། ༀ་ཡིག་དང་། དབུས་སུ་སྟེ་བར་དུ་ཡི་གེ་ཨཱཿ དང་། དེ་བཞིན་དུ་མཐར་ཧཱུཾ་བཞག་པར་བྱ་སྟེ་འབྲུ་གསུམ་མོ། །སྔགས་དང་ཏིང་ངེ་འཛིན་གྱིས་སྦྱོང་པའི་ཏིང་ངེ་འཛིན་ནི། ཡཾ་ལས་རླུང་གི་དཀྱིལ་འཁོར་གྱི་སྟེང་དུ། རཾ་ལས་མེའི་དཀྱིལ་འཁོར་རོ། །དེའི་ནང་དུ་ཨཱཿ ལས་སྐྱེས་པའི་ཐོད་པའི་ནང་དུ། ཤ་དགུ་དང་བདུད་རྩི་ལྔ་བསྐྱེད་ཆོག་བྱས་ལ། དེ་རྣམས་ཀྱི་དཀྱིལ་དུ་འོད་ཟེར་འབར་བའི་ཧྲཱིཿ ཡིག་དགོད། དེའི་སྟེང་དུ་ཧཱུཾ་ལས་བྱུང་བའི་རྡོ་རྗེ་བསྒོམ། དེ་ལས་འོད་ཟེར་འཕྲོས་པས། རླུང་གིས་མེ་སྦར་ནས་ཐོད་པའི་བདུད་རྩི་བསྐོལ། སྟེང་གི་རྡོ་རྗེ་ལས་ཀྱང་འོད་ཟེར་འཐུང་དུ་འབར་བས་ཤ་དང་བདུད་རྩི་སྦྱངས་པར་བསྒོམ་པར་བྱའོ། །དེ་ནས་ཧྲཱིཿ འི་འོད་ཟེར་འབར་བར་བྱེད་པས་ཁམས་གསུམ་གྱི་བདུད་རྩི་བསྡུས་ནས་གཅིག་ཏུ་གྱུར་པ་དཀར་པོར་བསྒོམ་ཞིང་། ཕྱིན་ཅི་ལོག་གི་མཐུ་བཅོམ་སྟེ་དག་པར་བསྒོམས་ལ། བདུད་རྩི་ལྔ་དང་ཤ་དགུ་པོ་དེ་ནི་དེ་ལྟར་སྦྱང་བ་རབ་ཏུ་བསྒྲུབ་པར་བྱའོ། །གཉིས་པ་ནི། དེ་ལྟར་སྦྱར་བ་དང་སྦྱངས་ཟིན་ནས་ལན་ཉི་ཤུ་རྩ་གཅིག་ཏུ་འབྲུ་གསུམ་གྱི་སྔགས་བཟླས་ནས་ནི་རྫས་རྣམས་ཕྱེ་མར་བཏག་པར་བྱའོ། །འགྲེལ་པ་གཉིས་ཀྱིས་ཁ་ནུབ་ཏུ་བལྟས་ནས་ཉེར་གཅིག་ཏུ་བཏག་ཅེས་འཆད་དོ། །བཏེགས་ཟིན་པ་དང་རིལ་བུ་བྱ་སྟེ་དེའི་ཚད་ནི་ཡུངས་ཀར་ལྔའི་ཚད་གཅིག་ཏུ་བྱས་པ་ཙམ་ནི་ལྔ་དང་ལྔ་སྟེ་ལྔ་ལྔའི་ཚད་ལ་རིལ་བུ་རེ་རེ་བྱེད་པ་འབྱོར་བར་བྱའོ། །གསུམ་པ་ནི། རིལ་བུ་རྣམས་ནི་བྱས་ནས་

---

^{[མ་དཔེ་གཟིགས་ན་འདིར་གནོན།]}

སུ། །ཚེས་བརྒྱད་དང་བཅུ་བཞི་ལ་རིལ་བུ་རྣམས་པདྨའི་སྣོད་ཐོད་པའི་ནང་དུ་གཞག་པར་བྱ་སྟེ། སྔ་དྲོ་དང་ཉིན་ཕྱེད་དང་ཕྱི་དྲོ་དང་མཚན་ཕྱེད་ཀྱི་ཐུན་མཚམས་བཞི་ལ་ནི་སྔར་བཤད་པ་བཞིན་དུ་བསྒོམས་པར་བྱས་ནས་འབྲུ་གསུམ་སྟོང་ཕྱག་བརྒྱད་ནི་བཟླས་པར་བྱ་ཞིང་། དེ་ཟིན་པ་དང་ཉིན་དང་ཉིན་དུ་སྟེ། ཉི་མ་རེ་རེ་ལ་རེ་རེ་རྒྱུན་དུ་བཟའ་བར་བྱའོ། །བཞི་པ་ནི། དེ་ལྟར་རིལ་བུ་ཟ་བ་དེ་ནི་བསྐལ་པའི་མཐའི་བར་དངོས་གྲུབ་རྒྱས་པ་སངས་རྒྱས་ཀྱི་སར་འགྲོ་བ་སྟེ། དེ་ནི་མཐར་ཐུག་གི་དངོས་གྲུབ་བོ། །དེ་མ་ཐོབ་པའི་གནས་སྐབས་སུ་ནི་ཕན་ཡོན་དྲུག་སྟེ། དང་པོ་ནི། འོད་ཟེར་གྱི་གཟི་བརྗིད་དང་ལྡན་པ་དང་། གཉིས་པ་ནི། གསེར་བཙོ་མའི་མདངས་དང་ལྡན་པ་དང་། གསུམ་པ་ནི། སྲེད་མེད་ཀྱི་བུའི་སྟོབས་དང་ལྡན་པ་དང་། བཞི་པ་ནི། དགེ་བ་ལ་སྤྲོ་ཤུགས་དྲག་པོའི་བརྩོན་འགྲུས་དང་ལྡན་པ་དང་། ལྔ་པ་ནི། འདོད་པའི་སྨོན་ལམ་འགྲུབ་པ་དང་། དྲུག་པ་ནི། རྫུ་འཕྲུལ་དང་། ལྷའི་རྣ་བ་དང་། གཞན་གྱི་སེམས་ཤེས་པ་དང་། སྔོན་གྱི་གནས་རྗེས་སུ་དྲན་པ་དང་། ལྷའི་མིག་གི་མངོན་ཤེས་ཏེ། མངོན་པར་ཤེས་པ་ལྔ་འཐོབ་པའོ། །དེ་འདྲ་བའི་ཕན་ཡོན་འབྱུང་བ་ནི་རིལ་བུ་ཆེན་པོ་ཟོས་པའི་ཕྱིར་ཏེ་ཟོས་པའི་རྒྱུ་མཚན་ལས་སོ། །གསུམ་པ་ལ་གཉིས། མཚམས་སྦྱར་བ། སྔགས་ཀྱི་བསྒྲུབ་པ་བྱ་ཚུལ་ལོ། །དང་པོ་ནི། རྫས་ཀྱི་བསྒྲུབ་པ་གསུངས་པ་རྫོགས་ནས་ཏེ། རྫོགས་པའི་འོག་ཏུ་རིག་པའི་

---

^{[མ་དཔེ་གཟིགས་ན་འདིར་གནོན།]}

སྔགས་རྣམས་བདག་ལ་གསུངས་པར་སྩོལ་ཞེས་སྔར་ཞུས་པའི་ལན་གསུངས་སོ། །གཉིས་པ་ལ་གཉིས། སྔགས་ཀྱི་བསྒྲུབ་བྱ་དགུག་པ། བསྒྲུབ་བྱ་བཀུག་ནས་ཇི་ལྟར་བྱ་བའོ། །དང་པོ་ནི། བསྒོམ་པར་བྱ་ཞེས་ཁྱད་པར་གྱི་གཞིར་དྲང་ངོ་། །གང་དུ་ན། གང་འགུགས་པར་འདོད་པའི་བུད་མེད་ཀྱི་བྷ་གའི་དབུས་སུའོ། །གང་བསྒོམ་ན། ཨེ་ཡིག་ལས་སྐྱེས་པའི་མེའི་དཀྱིལ་འཁོར་གྲུ་གསུམ་པའི་དབུས་སུ་ཨེ་ཡིག་དང་དེའི་སྟེང་དུ་བཾ་ཡིག་ལས་སྐྱེས་པའི་ཆུའི་དཀྱིལ་འཁོར་ཟླུམ་པོའི་དབུས་སུ་བཾ་ཡིག་དང་། དེའི་སྟེང་དུ་ལཾ་ཡིག་ལས་སྐྱེས་པའི་སའི་དཀྱིལ་འཁོར་གྲུ་བཞི་པའི་དབུས་སུ་ལཾ་ཡིག་ཡང་དག་པར་གནས་པའོ། །འགྲེལ་པ་གཉིས་ཀྱིས་ཨེ་ཡིག་ནི་རཾ་ཡིག་ལ་འཆད་དོ། །དེ་ཡང་དང་པོའི་ཡི་གེ་དང་དཀྱིལ་འཁོར་གྱི་མདོག་ནི་དམར་པོ་སྟེ། གཉིས་པའི་ཡི་གེ་དང་དཀྱིལ་འཁོར་གྱི་མདོག་དཀར་བ་དང་། གསུམ་པའི་ཡི་གེ་དང་དཀྱིལ་འཁོར་གྱི་ཁ་དོག་ནི་སེར་བར་བསམ་མོ། །ཇི་ལྟར་དུ་བསྒོམ་ན། དཀྱིལ་འཁོར་གསུམ་པོ་དེ་བྷ་གའི་ནང་དུ་འཁོར་ལོ་འཁོར་བ་ལྟར་བསྐོར་བ་ནི་བསྒོམ་པར་བྱའོ། །དུས་ནམ་གྱི་ཚེ་བསྒོམ་ན། ཉིན་ཕྱེད་དང་ནི་མཚན་ཕྱེད་ལའོ། །རིག་མ་འགུགས་པའི་སྔགས་ནི། ཡི་གེའི་གཟུགས་སུ་བསྒོམ་པ་དེ་དག་ཡིན་གྱི་བཟླས་པར་བྱ་བའི་སྔགས་མིན་ནོ། །རིག་པ་སྟེ་ཆོ་ག་དེ་ནི་རབ་ཏུ་སྦྱར་བ་སྟེ་བསྒོམས་ན། འགུགས་པར་བྱ་བ་དེ་ནི་སྐད་ཅིག་སྟེ་མྱུར་བ་ཁོ་ནར་འགུགས་པ་འགྲུབ་བོ། །བསམ་གཏན་གྱིས་བསྒྲུབ་པའི་

---

^{[མ་དཔེ་གཟིགས་ན་འདིར་གནོན།]}

ལས་ཚོགས་འདི་འདྲ་བའི་རིགས་རྣམས་ནི་སྟེང་འོག་གི་ཕྲ་མོའི་རྣལ་འབྱོར་བསྟན་པས་འགྲུབ་སླ་བར་བཤད་དོ། །འགུགས་པར་བྱ་བའི་ཡུལ་ནི་ལྷ་མོ་དང་ལྷ་མིན་གྱི་བུ་མོ་གཉིས་དང་། མིའི་བུ་མོ་པདྨ་ཅན་དང་དུང་ཅན་མ་དང་རི་དྭགས་ཅན་མ་དང་གླང་པོ་ཅན་མ་སྟེ་རྣམ་པ་བཞིའོ། །དེ་རྣམས་སའི་དཀྱིལ་འཁོར་ཀུན་ཏུ་སྟེ་ཀུན་ནས་དགུག་སྟེ་དང་པོ་ནི་ས་བླ་ནས། གཉིས་པ་ནི་ས་འོག་ནས། གསུམ་པ་ནི་ས་སྟེང་ནས་དགུག་གོ །གཉིས་པ་ནི། སྔར་བཤད་པའི་སྔགས་ཀྱིས་བཀུག་ནས་ཕྱག་རྒྱ་དེ་དག་རྒྱུད་ལེགས་པར་སྦྱངས་ལ་ཀུན་ཏུ་སྤྱད་པར་བྱ་སྟེ། དེའི་དགོས་པ་ནི་ཐབས་ཏེ་རོ་རྐྱང་གི་རླུང་ཨ་ཝ་དྷཱུ་ཏཱིར་འཛུད་པའི་སྲོག་རྩོལ་ལ་བརྟེན་ནས་འོད་གསལ་ཐམས་ཅད་སྟོང་པའི་ཡེ་ཤེས་བསྐྱེད་པའི་ཕྱིར་རོ། །བཞི་པ་ལ་གསུམ། བཤད་ཟིན་མ་ཟིན་གྱི་མཚམས་སྦྱོར། དཀྱིལ་འཁོར་གྱི་དབྱེ་བ། ཕྱེ་བ་སོ་སོའི་དོན་བཤད་པའོ། །དང་པོ་ནི། བྷ་གའི་དབུས་སུ་བསྒོམ་པ་དང་། དེ་བཞིན་དུ་རིག་པའི་སྔགས་ཨེ་ལ་སོགས་པ་བཤད་པ་ནི་བདག་གིས་བྱས་ཟིན་ཏེ། ཟིན་ནས་དཀྱིལ་འཁོར་ཞུས་པའི་ལན་རྣམས་ནི་བཤད་པར་བྱ་ཡིས་དགའ་མ་ཞེས་སྒྲོལ་མ་ལ་བོས་ནས། མ་ཡེངས་པའི་སེམས་ཀྱི་རྩེ་གཅིག་ཏུ་ཉོན་ཅིག་ཅེས་ཉན་པར་བསྐུལ་ལོ། །གཉིས་པ་ནི། དཀྱིལ་འཁོར་གསུམ་དུ་རྒྱུད་ལས་བཏགས་པ་སྟེ་གསུངས་པ་ཡིན་ནོ། །དེ་རྣམས་གང་ཡིན་ཞེ་ན། དཀྱིལ་འཁོར་ལུས་ཞེས་གསུངས་པ་སྟེ་ཞེས་པ་

---

^{[མ་དཔེ་གཟིགས་ན་འདིར་གནོན།]}

ནི་ལུས་ཀྱི་དཀྱིལ་འཁོར་རོ། །དཀྱིལ་འཁོར་བྷ་གར་བསྟན་པ་ཡིན། །ཞེས་པ་ནི་བྷ་གའི་དཀྱིལ་འཁོར་རོ། །དཀྱིལ་འཁོར་བྱང་ཆུབ་སེམས་དང་ནི་ཞེས་པ་ནི་བྱང་ཆུབ་སེམས་ཀྱི་དཀྱིལ་འཁོར་རོ། །དཀྱིལ་འཁོར་ཞེས་བཏགས་པ་རྣམས་ཀྱི་མིང་གི་དོན་ནི་སྙིང་པོ་འདུས་པ་ཡིན་ལ། སྙིང་པོ་ནི་གཙོ་བོ་སྟེ་ཁྱབ་བདག་རྡོ་རྗེ་སེམས་དཔའ་དང་། དེའི་ངོ་བོའི་རིགས་ལྔ་ལ་སོགས་པའི་ལྷ་དང་ལྷ་མོ་རྣམས་ཡིན་ལ། དེ་རྣམས་གནས་གང་གང་དུ་བསྐྱོད་པ་སྟེ་རྒྱུ་བར་བྱེད་ཅིང་འདུས་པ་དེ་ནི་དཀྱིལ་འཁོར་ཞེས་བཏགས་པའི་དོན་ནོ། །གསུམ་པ་ལ་གཉིས། ལུས་ཀྱི་དཀྱིལ་འཁོར་འདིར་བཤད་པ། དཀྱིལ་འཁོར་གཞན་གཉིས་སྔར་བཤད་ཟིན་པར་བསྟན་པའོ། །དང་པོ་ནི། ལུས་ཀྱི་དཀྱིལ་འཁོར་ནི། རང་གི་གཟུགས་ལ་སོགས་པའི་ཕུང་པོ་ལྔ་པོ་རྣམས་ནི་སངས་རྒྱས་རྣམས་སྣང་ལ་སོགས་པ་ལྔའི་ངོ་བོར་བསྒོམ་པར་གསུངས་པ་དང་། རང་གི་ལུས་ཀྱི་འབྱུང་བ་བཞི་ནི་རིག་མ་སྤྱན་མ་ལ་སོགས་པ་བཞིར་བཏགས་པ་སྟེ་བསྒོམ་པར་བྱ་བའོ། །མདོར་བྱས་ལྟར་ན་ལུས་དཀྱིལ་ལྷག་མ་རྣམས་བཤད་རྒྱུ་ཡིན་ནའང་། འདིར་ལྕགས་ཀྱུ་ལ་སོགས་པ་བཞི་དང་། བདུག་སྤོས་མ་ལ་སོགས་པ་བཞི་དང་། སྒེག་མོ་ལ་སོགས་པ་བཞི་སྟེ། བཅུ་གཉིས་བཤད་པ་ནི་འགྲེལ་པས་ལུས་དཀྱིལ་ལ་འཆད་པར་སྣང་ཡང་། དེ་རྣམས་ནང་ལ་སྦྱར་ཡང་ལུས་ཡོངས་སུ་འགྱུར་བའི་ལྷར་བསྒོམ་པ་ནི་མི་གསལ་ལོ། །རྣལ་འབྱོར་པས་ལུས་དཀྱིལ་བཀོད་ནས་རིག་མ་དང་

---

^{[མ་དཔེ་གཟིགས་ན་འདིར་གནོན།]}

སྙོམས་པར་འཇུག་པའི་ཚེ་རིག་མ་ལ་ཆགས་པའི་དབང་གིས་ཡིད་འགུགས་པ་ནི་རྡོ་རྗེ་ལྕགས་ཀྱུས་ལྷ་འགུགས་པ་ཁོ་ན་སྟེ་རྡོ་རྗེ་པདྨར་ཆུད་པར་བྱེད་པ་ནི་རྡོ་རྗེ་ཞགས་པས་ལྷ་བཞུག་པའོ། །རྡོ་རྗེ་དང་པདྨའི་རྩ་གཉིས་ཀྱི་ཁ་སྤྲད་ནས་མི་འབྲལ་བར་བཅིངས་པ་ནི་རྡོ་རྗེ་ལྕགས་སྒྲོག་གིས་ལྷ་འཆིང་བའོ། །རྡོ་རྗེ་དང་པདྨ་བསྐྱོད་པའི་སྙོམས་པར་འཇུག་པའི་དགའ་པའི་སྒྲ་གྲག་པ་ནི་རྡོ་རྗེ་དྲིལ་བུས་ལྷ་དབང་དུ་བྱེད་པར་བཤད་དོ། །སྤོས་མེ་སྟེ་བདུག་སྤོས་མ་ནི་དྲི་ཆེན་ཞེས་གསུངས་ཏེ། མེ་ཏོག་མ་ནི་བཙུན་མོའི་ཏཀྟ་ཞེས་བཤད་དོ། །མར་མེ་མ་ནི་ཤ་ཆེན་པོ་རྣམས་ཁོ་ན་ཡིན་ལ། དྲི་ཆབ་མ་ནི་བྱང་ཆུབ་ཀྱི་སེམས་དཀར་པོར་འདོད་དོ། །ལྷ་མོ་སྒེག་མོ་ནི་ཡབ་ཀྱི་ལིང་གར་བསྟན་པ་སྟེ། ཕྲེང་བ་མ་ནི་ཡུམ་གྱི་བྷ་ག་ཁོ་ན་ཡིན་ནོ། །དབྱངས་མ་སྟེ་གླུ་མ་ནི་རོལ་པའི་དུས་ཀྱི་ཧ་ཧ་ཞེས་པའི་སྒྲ་བསྟན་པ་དང་། གར་མཁན་མ་ནི་ཡབ་ཡུམ་ཁ་སྦྱོར་བའོ། །དེ་རྣམས་ཀྱིས་ནི་རིག་མ་དང་སྙོམས་འཇུག་ཚུལ་བཞིན་དུ་བྱེད་པ་ལ་མཆོད་པ་བརྒྱད་ཀྱི་ངེས་དོན་དང་། སྒོ་བ་བཞིའི་དགུག་གཞུག་སོགས་ཀྱི་ངེས་དོན་ཚང་བར་བཤད་དོ། །དེ་འདྲ་བའི་རྣལ་འབྱོར་དེ་ནི་བཅོམ་ལྡན་འདས་ཀྱི་བཟང་པོར་གསུངས་པས་དེ་རྟོགས་པའི་རྣལ་འབྱོར་པ་ནི་སྐལ་བ་བཟང་པོ་ཡིན་ནོ། །དེ་ལྟར་རྟོགས་པའི་རྣལ་འབྱོར་པ་དེ་རྣམས་ཀྱི་མིག་ལ་སོགས་པ་ནི་བྱམས་པ་ལ་སོགས་པ་ཡིན་ནོ། །སོགས་ཀྱི་སྒྲས་ནི་རིགས་ལྔ་དང་ཡུམ་བཞི་དང་བྱམས་པ་དངོས་སུ་བསྟན་པས། དེ་མ་གཏོགས་

---

^{[མ་དཔེ་གཟིགས་ན་འདིར་གནོན།]}

པའི་ལྷ་ལྷག་མ་རྣམས་བསྡུ་བ་སྟེ། དེ་ལྟར་ནང་གི་བདག་ཉིད་ཅན་གྱི་ལུས་ཀྱི་དཀྱིལ་འཁོར་གསུངས་སོ། །གཉིས་པ་ནི། ལུས་དཀྱིལ་ལས་གཞན་པའི་དཀྱིལ་འཁོར་གཉིས་ནི་རྒྱུད་འདིའི་སྔར་བཤད་ཟིན་པས་འདིར་མ་བཤད་དོ། །དེ་ལྟ་ནའང་བྷ་གའི་དཀྱིལ་འཁོར་ལ་གཉིས་ལས། དབང་གསུམ་པ་གང་དུ་ཐོབ་པའི་བྷ་གའི་དཀྱིལ་འཁོར་ནི་རིག་མའི་བྱ་བ་ཉིད་ཡིན་ལ། དེ་ལས་གཞན་པའི་བྷ་གའི་དཀྱིལ་འཁོར་ནི་ཡུམ་གྱི་བྷ་གར་བསྐྱེད་པའི་རྟེན་དང་བརྟེན་པའི་དཀྱིལ་འཁོར་རོ། །ཆོས་འབྱུང་བྷ་གའི་རྣམ་པ་ཅན་གྱི་དབུས་སུ་བསྐྱེད་པའི་དཀྱིལ་འཁོར་ལ། བྷ་གའི་དཀྱིལ་འཁོར་རོ་ཞེས་འགྲེལ་པས་བཤད་དོ། །བྱང་ཆུབ་སེམས་ཀྱི་དཀྱིལ་འཁོར་གཅིག་ནི་དོན་དམ་པའི་བྱང་ཆུབ་སེམས་ཀྱི་དཀྱིལ་འཁོར་ཡིན་ལ། དེ་ནི་བསྐྱེད་རིམ་གྱི་སྐབས་སུ་ལྷག་མོས་འོད་གསལ་དུ་བསྡུས་པའི་དོན་དམ་པའི་དཀྱིལ་འཁོར་དང་། རྫོགས་རིམ་གྱི་འོད་གསལ་གཙོ་བོར་བྱས་པའི་སྟོང་པ་བཞི་ལྷ་བུའོ། །འོད་གསལ་དང་ཟུང་འཇུག་གི་དོན་བྱང་ཆུབ་ཀྱི་སེམས་ནི་དབང་བཞི་པ་གང་དུ་ཐོབ་པའི་བྱང་ཆུབ་སེམས་ཀྱི་དཀྱིལ་འཁོར་རོ། །གསང་དབང་གང་དུ་ཐོབ་པའི་བྱང་ཆུབ་སེམས་ཀྱི་དཀྱིལ་འཁོར་ནི་ཀུན་རྫོབ་བྱང་ཆུབ་ཀྱི་སེམས་གཉིས་སོ། །འགྲེལ་པས་རྩ་རྒྱུད་དུ་བཤད་ཟིན་ཅེས་པ་འདུས་པའི་རྩ་རྒྱུད་ལས་དེ་གཉིས་མི་གསལ་བས་གསང་བའི་མཆོག་གི་རྒྱུད་འདིའི་སྔར་བཤད་ཟིན་པའོ། །ལྔ་པ་ལ་གསུམ། སྦྱིན་སྲེག་གི་དབྱེ་བ་བསྟན་ནས་ཉན་པར་བསྐུལ་བ། ནང་གི་སྦྱིན་སྲེག་བྱ་བའི་ཚུལ།

---

^{[མ་དཔེ་གཟིགས་ན་འདིར་གནོན།]}

དེ་ལྟར་རྒྱུན་དུ་བྱས་པའི་ཕན་ཡོན་ནོ། །དང་པོ་ནི། སྒྲོལ་མ་ཉོན་ཅིག་དང་། སྦྱིན་སྲེག་གི་ལས་རྣམས་ནི་བཤད་པར་བྱའོ། །སྦྱིན་སྲེག་ནི་རྣམ་པ་བཞི་སྟེ། ཞི་བ་དང་རྒྱས་པ་དང་དབང་དང་དྲག་པོའོ། །སྦྱིན་སྲེག་བསྡུ་ན་ཕྱི་དང་ནང་གི་སྦྱིན་སྲེག་གཉིས་སུ་གསུངས་པའི་ཕྱི་ནི་རྒྱུད་འདིར་སྔོན་དུ་སྟེ་སྔར་བསྟན་པ་ཡིན་པས་སྒྲོལ་མ་ཁྱོད་ཀྱིས་ནང་གི་སྦྱིན་སྲེག་ནི་ཉོན་ཅིག་ཅེས་བསྐུལ་ལོ། །སྔོན་དུ་བསྟན་པ་འདུས་པའི་རྩ་རྒྱུད་ལ་མི་བྱ་སྟེ། འདིར་ལས་བཞི་གིའི་སྦྱིན་སྲེག་བཤད་པར་གསུངས་ཤིང་། འདུས་པར་དེ་བཞི་མ་བཤད་ལ། བཤང་གཅི་འབྲུ་མར་ཤ་ལ་སོགས། །སྦྱིན་སྲེག་ཏུ་ནི་དབུལ་བར་བྱ། །ཞེས་སོགས་གསུངས་པས་ཀྱང་ཇི་ལྟར་བྱ་བའི་ཆོ་ག་གསལ་བར་མ་བཤད་པའི་ཕྱིར་རོ། །གཉིས་པ་ནི། པདྨ་བཞི་དང་འབྱུང་བའི་དཀྱིལ་འཁོར་བཞི་རྣམས་སྦྱོར་བ་ནི་ལུས་ཀྱི་དབུས་སུ་ཉེ་བར་གནས་པར་བསམ་མོ། །དེ་ལ་པདྨ་བཞི་ནི་འོག་ནས་ཁའི་པདྨ་ཞེས་སོགས་བཤད་པའི་གནས་བཞིའི་འཁོར་ལོ་བཞི་ཡིན་ཏེ། སྔར་སྙིང་གི་པདྨར་མགོ་མེད་ནས། །ཞེས་སོགས་ཀྱིས་བཤད་པ་བཞིན་ནོ། །དེས་ན་གནས་དེ་དག་ཏུ་པདྨའི་གདན་རེ་རེ་བསྒོམ་པར་སྟོན་པ་མིན་ནོ། །སྦྱོར་ཚུལ་ནི་ལྟེ་བའི་པདྨར་མེའི་དཀྱིལ་འཁོར་དམར་པོ་ཟུར་གསུམ་པ་དང་། དེ་བཞིན་དུ་གསང་གནས་ཀྱི་པདྨར་རླུང་གི་དཀྱིལ་འཁོར་སྔོན་པོ་ཟླ་གམ་དང་། སྙིང་གའི་པདྨར་དབང་ཆེན་ཏེ། སའི་དཀྱིལ་འཁོར་སེར་པོ་གྲུ་

---

^{[མ་དཔེ་གཟིགས་ན་འདིར་གནོན།]}

བཞི་པ་དང་། དེ་བཞིན་དུ་མགྲོན་པའི་པདྨར་ཆུའི་དཀྱིལ་འཁོར་དཀར་པོ་ཟླུམ་པོའོ། །དེ་རྣམས་རཾ་ཡཾ་བཾ་ལཾ་ལས་སྐྱེས་ཤིང་། དབུས་སུ་ཡི་གེ་དེ་དག་གིས་མཚན་པར་འགྲེལ་པས་བཤད་དོ། །དེ་ལྟར་བསྒོམས་པའི་གསང་གནས་ཀྱི་རླུང་གིས་ཏེ་རླུང་གཡོས་པས་ལྟེ་བའི་མེ་ལ་བསྐུལ་བས་མེ་དེ་སྦར་བར་བྱ་སྟེ། དེས་མགྲིན་པའི་ཆུ་གང་ཡིན་པ་དེ་འཚེད་པར་བྱེད་དོ། །གཞུང་ལས། ཆུ་ཡིས་ཡོངས་སུ་སྨིན་པར་བྱེད། ཅེས་འབྱུང་ཞིང་། དེའི་དོན་སའི་དྲོད་ཀྱིས་ཟས་ཐམས་ཅད་ཆུ་ལ་སྨིན་པར་བྱེད་པར་འགྲེལ་པས་བཤད་མོད་ཀྱང་། གཞུང་འདི་མདོར་བྱས་སུ་དཀོད་པའི་ལོ་ཆེན་གྱི་འགྱུར་ལས། ཆུ་གང་ཡིན་པ་དེ་འཚེད་བྱེད། ཅེས་དང་། ཆག་གི་འགྱུར་ལས་ཀྱང་། དེས་ཀྱང་ཆུ་ནི་འཚེད་པར་བྱེད། །ཅེས་འབྱུང་བ་ལེགས་པས། དེའི་དྲོད་ཀྱིས་ཆུ་འཚེད་པའི་དོན་ཡིན་གྱི། ཆུ་ཟས་སྨིན་པར་བྱེད་པའི་དོན་མིན་ནོ། །མེས་ཆུ་བསྐོལ་ལུགས་ནི། སྙིང་གའི་ས་གང་དུ་ལྟེ་བའི་མེ་ལྕེ་བསྐྱོད་པས་དབང་ཆེན་གྱི་དཀྱིལ་འཁོར་བསྲེགས་པ་ལས་བྱུང་བའི་དྲོད་ཀྱིས་ཆུ་བསྐོལ་བ་ཡིན་ནོ། །དེ་ལ་ར་ཡིག་ནི་མངོན་སྤྱོད་འགྲུབ་པའི་ཡི་གེ་སྟེ། ཡ་ཡིག་གིས་དབང་གི་ལས་འགྲུབ་པ་ཁོ་ནའོ། །ལ་ཡིག་གིས་ནི་རྒྱས་པའི་ལས་འགྲུབ་པར་འགྱུར་ཏེ། བ་ཡི་གིས་ཞི་བའི་ལས་འགྲུབ་པའོ་ཞེས་གསུངས་པས། ཕྱིའི་སྦྱིན་སྲེག་ལ་བརྟེན་ནས་ལས་བཞི་འགྲུབ་པ་བཞིན་དུ་ཡི་གེ་བཞི་ལས་བསྐྱེད་པའི་དཀྱིལ་འཁོར་བཞི་རླུང་གིས་རྣལ་འབྱོར་དང་བཅས་པ་བསྒོམས་པའི་ནང་གི་སྦྱིན་

---

^{[མ་དཔེ་གཟིགས་ན་འདིར་གནོན།]}

སྲེག་གིས་ཀྱང་ཕྲིན་ལས་བཞི་འགྲུབ་ཅེས་པའི་དོན་ནོ། །སྲེག་རྫས་གསུངས་པ་ནི། གང་ཞིག་ཟས་ཏེ་བཟའ་བ་དང་བཏུང་བའི་སྲེག་རྫས་དེ་དག་ཐམས་ཅད་ནི་ཆུ་ལ་སྟེ་ཆུ་ཁོལ་བར་དམིགས་པའི་ནང་དུ་ཐོག་མར་སྦྱིན་སྲེག་བྱའོ། །པདྨ་ཀྵ་ཡིག་ཁ་མར་བལྟ། །ཞེས་པ་འདི་ལ་མདོར་བྱས་སུ། །བཟའ་བ་ཁ་ཡི་པདྨ་ལས། །ཞེས་འབྱུང་བས། གཞུང་ལ་ཀྵ་ཡོད་མེད་གཉིས་ཡོད་པར་སྣང་ལ། འགྲེལ་པས་མགྲིན་པའི་ཆུའི་སྟེང་ན་ཀྵ་ཡིག་དཀར་པོ་ཁ་ཐུར་བལྟ་འོད་ཟེར་འབར་བ། ཁ་བད་ཀྱི་ཚུལ་དུ་བསྒོམ་པར་འཆད་དོ། །འོན་ཀྱང་སྔར་བཤད་པ་ལྟར་གཞུང་འདིར་བསྒྱུར་བ་ལས། གཞན་དུ་དྲངས་པའི་འགྱུར་དག་པ་མང་པོ་སྣང་ཞིང་། འདི་འཕགས་པས་བཀོད་པའི་གཞུང་དུ་ཀྵ་ཡིག་མ་བྱུང་བས་དེ་ཉིད་ཚད་མར་བྱའོ། །དེ་ལྟར་ན་བཟའ་བ་དང་བཏུང་བ་ཆུ་ལ་སྦྱིན་སྲེག་བྱས་པ་དེ་ཁ་སྟེ་མགྲིན་པའི་པདྨ་ལས་རིན་གྱིས་བབས་ཏེ། སྙིང་གི་པདྨར་གནས་པའི་སའི་དཀྱིལ་འཁོར་ལ་བཙུད་པ་བྱས་པའི་རྗེས་སུ་ལྟེ་བའི་པདྨར་གནས་པའི་མེའི་དཀྱིལ་འཁོར་དུ་ཕྱིན་པར་བྱའོ། །འདིར། ལྟེ་བའི་པདྨར་འགྲོ་ཕྱི་རོལ། །ཁ་སྦྱོར་ཚུལ་དུ་སྦྱོར་བ་ཡིན། །ཞེས་བསྒྱུར་བ་དང་། དེའི་དོན་འགྲེལ་པས། ཕྱི་རོལ་ཏུ་ཐབས་དང་ཤེས་རབ་སྦྱོར་བས་སྦྱིན་སྲེག་བྱ་བའམ། ཡང་ན་ཕྱི་རོལ་གྱི་སྦྱིན་སྲེག་ལ་ལྷ་བསྒོམ་པ་བཞིན་དུ། ལུས་དཀྱིལ་ལ་ཡང་ལྷ་བསྒོམ་པ་དང་སྦྱར་ནས་སྦྱིན་སྲེག་བྱའོ། །ཞེས་འཆད་དོ། །མདོར་བྱས་ལས། ལྟེ་བའི་པདྨར་ཕྱིན་འོག་

---

^{[མ་དཔེ་གཟིགས་ན་འདིར་གནོན།]}

ཏུ། །ཁ་སྦྱོར་བ་ཡི་སྦྱོར་བ་ཡིས། །ཞེས་འབྱུང་བ་ཉིད་ལེགས་པས། བཟའ་བཏུང་ལྟེ་བར་ཕྱིན་པའི་འོག་ཏུ་དྭངས་མས་ལྷ་ཚིམ་ཞིང་། སྙིགས་མ་རྣམས་གསང་གནས་ཀྱི་པདྨར་འགྲོ་མ་ཐག་ཚིག་ནས་ཐལ་བའི་མཐའ་རུ་གྱུར་ཏེ། བཤང་ལམ་ནས་ཐོན་པར་རྣམ་པར་བརྟག་པ་སྟེ་བསྒོམ་པར་བྱའོ། །དེ་ནས་ཅུང་ཟད་ཞུ་བའི་ཚེ་སྟེང་འོག་གི་རླུང་ཁ་སྦྱོར་བའི་ཚུལ་དུ་སྦྱོར་བའི་རྣལ་འབྱོར་བསྒོམ་པར་བྱ་བ་ཡིན་ནོ། །མདོར་བྱས་ཀྱི་འགྲེལ་པ་ཁ་ཅིག་ལས། རླུང་ཁ་སྦྱར་ལ་བཤད་དོ། །གསུམ་པ་ནི། དེ་ལྟར་སྦྱིན་སྲེག་བདག་གིས་བཤད་པ་འདི་ཉིན་དང་ཉིན་དུ་སྟེ་ཉི་མ་རེ་རེ་ཞིང་བྱ་སྟེ། རྟག་པར་རྒྱུན་དུ་ཟས་ཟོས་ན་ཚེ་འདི་ཁོ་ནར་ཕན་ཡོན་རྣམས་འགྲུབ་པར་འགྱུར་རོ། ཕན་ཡོན་ནི། ལུས་རྒས་པ་མེད་ཅིང་ནད་ཀྱང་མེད་པ་དང་། དུག་དང་སོགས་ཀྱི་སྒྲས་ཟས་མ་ཞུ་བ་ལ་སོགས་པའི་རྐྱེན་གྱིས་མི་འཆི་ལ་གང་ཟག་དེ་ནི་གློ་བུར་ཏེ་དུས་མ་ཡིན་པར་ཤི་བའང་མེད་དོ། །ཤི་བ་མེད་ལ་འབྲས་རྣམས་མེད་ཅེས་པ་ལ་མདོར་བྱས་སུ། དུག་ལ་སོགས་པས་མི་འཆི་ལ། །ཞེས་གསུངས་སོ། །གདོན་དང་བྱད་སྟེམས་ལ་སོགས་པའི་འཚེ་བ་ཐམས་ཅད་ཟད་པར་འགྱུར་ཞིང་། དེར་མ་ཟད་རྨི་ལམ་ངན་པ་ཡང་ཞི་བར་འགྱུར་བའི་ཕན་ཡོན་བཟང་པོ་རྣམས་དང་། བསྐལ་བའི་བར་དུ་གསོན་པའི་ཚེ་རིང་པ་དང་། རང་མཐོང་བའི་སེམས་ཅན་ཐམས་ཅད་ཀྱང་དགའ་ཞིང་བསྟོད་པ་སྨྲ་བ་དང་། རང་མཐོང་བ་ཙམ་གྱིས་ཕ་རོལ་པོ་རྣམས་ཡིད་བསྐུལ་བ་སྟེ་འདུན་པར་བྱེད་དོ། །དྲུག་པ་ལ་གཉིས། བཤད་ཟིན་མ་ཟིན་གྱི་

---

^{[མ་དཔེ་གཟིགས་ན་འདིར་གནོན།]}

མཚམས་སྦྱོར། བཤད་པ་དངོས་སོ། །དང་པོ་ནི། སྦྱིན་སྲེག་གི་ལས་རྣམས་བཤད་ཟིན་པར་བྱས་ནས་ལྷ་མོ་ཞེས་སྒྲོལ་མ་ལ་བོས་ནས་མཆོད་པ་ཞུས་པའི་ལན་བསྟན་པར་བྱའོ། །ཞེས་འཆད་པར་ཞལ་གྱིས་བཞེས་སོ། །གཉིས་པ་ལ་གསུམ། རང་ལ་མཆོད་པ་བྱ་བ་རྒྱུ་མཚན་དང་བཅས་པ། ལས་རྣམ་པར་དག་པའི་རྣལ་འབྱོར། མཆོད་པ་བསྒྲུབ་པའི་ཚེ་ཇི་ལྟར་བྱ་བའོ། །དང་པོ་ནི། མཆོད་པ་རྣམས་ནི་བྱའོ་ཞེས་དྲང་ངོ་། །གང་ལ་ན། སྒྲུབ་པ་པོ་བདག་ཉིད་ལྷར་བསྐྱེད་པ་ལའོ། །མཆོད་པའི་རྫས་གང་གིས་ན། དྲི་བཟང་པོ་དང་། མེ་ཏོག་ལ་སོགས་པའི་ཕྲེང་བ་དང་། སོགས་ཀྱི་སྒྲས་སྒྲ་སྙན་པ་དང་། མར་མེ་དང་། རེག་བྱ་འཇམ་པའི་གོས་རྣམས་དང་། སྤོས་མེ་སྟེ་དྲི་ཞིམ་པའི་བདུག་སྤོས་དང་། ཁ་ཟས་ཀྱི་བྱེ་བྲག་ཡིད་དུ་འོང་བ་མང་པོའི་རོ་དང་། ལྷ་བཤོས་ཀྱིས་མཆོད་པ་ནི་ཕྱིའི་མཆོད་པའོ། །གསང་ཆེན་དེ་ཁོ་ན་ཉིད་ཀྱི་མཆོད་པ་ནི། རྡོ་རྗེ་དང་པདྨའི་དབང་པོ་གཉིས་ནི་རབ་ཏུ་སྦྱར་ནས་སྙོམས་པར་འཇུག་པའི་མཆོད་པ་ཡིན་ལ། གསང་བའི་རྫས་ཀྱི་མཆོད་པ་ནི། བྱང་ཆུབ་ཀྱི་སེམས་དཀར་དམར་ལྕེས་མྱང་བའོ། །དེ་ལྟར་ཡང་གསང་བ་གྲུབ་པ་ལས། ཡིད་འོང་བཅོས་པའི་ཟས་དང་ནི། དྲི་དང་མེ་ཏོག་སོགས་བསྙེན་བཀུར། །ཉ་དང་ཤ་དང་བུར་ཆང་སོགས། །སེམས་ནི་མགུ་བར་བྱེད་པ་ཅན། །འབད་པས་དེ་ལྟ་བུས་མཆོད་ནས། དེ་ཉིད་ཆེད་དུ་བསྒོམ་པར་བྱ། ཆོ་ག་འདི་ཡིས་བསྐུལ་ན་ནི། །རྡོ་རྗེ་སེམས་དཔའ་བདག་འགྲུབ་

---

^{[མ་དཔེ་གཟིགས་ན་འདིར་གནོན།]}

འགྱུར། །བྱང་ཆུབ་སེམས་དང་ལྡན་པ་ཡིས། །བདུད་རྩི་མེ་ཏོག་མྱང་བར་བྱ། །མཁའ་དབྱིངས་རྡོ་རྗེ་དབུས་གནས་པར། །དེས་ནི་རྡོ་རྗེ་འཛིན་པའང་མཆོད། །ཅེས་གསུངས་པ་ལྟར་རོ། །འོ་ན་རང་ལ་དེ་ལྟར་མཆོད་དགོས་པའི་རྒྱུ་མཚན་གང་ཞེ་ན། རང་ཉིད་སངས་རྒྱས་སུ་བསྒོམ་པ་ལེགས་པར་ཤེས་པའི་རྣལ་འབྱོར་པ་བདག་གི་ལུས་ནི་སངས་རྒྱས་ཐམས་ཅད་ཀྱི་བདག་ཉིད་ཡིན་ལ་སངས་རྒྱས་ཀུན་གྱི་གོ་འཕང་མཆོག་སྟེར་བའི་གནས་སམ་གཞི་ཡང་བདག་གི་ལུས་འདི་ཉིད་ཡིན་ཏེ། དེ་བས་ན་ནན་ཏན་ཏེ་འབད་པ་ཐམས་ཅད་ཀྱིས་རྣལ་འབྱོར་པས་ནི་བདག་ཉིད་སངས་རྒྱས་སུ་བསྐྱེད་པ་རྟག་ཏུ་མཆོད་པ་ལ་བརྩོན་པར་བྱའོ། །གཉིས་པ་ནི། བྱེད་པ་པོ་རྣལ་འབྱོར་པས་བྱ་བ་གང་ཡང་འགའ་ཞིག་སྟེ་ཅུང་ཟད་བྱ་བ་སྟེ་བྱེད་པའི་ལུས་གཡོ་བ་དང་། ངག་སྨྲ་བ་ལ་སོགས་པའི་ལས་དེ་ཡང་རང་དང་གཞན་ལྷར་བལྟས་ནས་དེ་དག་ལ་མཆོད་པར་བསྒོམས་ནས་བྱའོ། །གསུམ་པ་ནི། ཁ་ཟས་ཟ་བ་དང་དེ་བཞིན་དུ་བཏུང་བ་འཐུང་བ་དང་གོས་བགོ་བ་དང་དེ་བཞིན་དུ་དྲི་སྣོམ་ཞིང་འབྱུག་པ་དང་། མེ་ཏོག་ལ་སོགས་པའི་ཕྲེང་བ་དང་། རྒྱན་འདོགས་པའི་ཚེ་ཡང་བདག་གི་ལྷ་གང་ཡིན་པ་དེ་ཉིད་བསམ་པར་བྱ་བ་ཁོ་ནས་བྱ་ཡི། དེའི་ང་རྒྱལ་དང་བྲལ་བས་མི་བྱའོ། །གོང་དུ་བཤད་པ་ལྟར་བྱས་ན་ལུས་ཀྱི་གཡོ་འགུལ་སོགས་ཀྱིས་ཀྱང་ཚོགས་རྒྱ་ཆེན་པོ་སྡུད་པ་ཡིན་པས་འབད་པར་བྱའོ། །ལྷ་ཅི་འདྲ་བ་ཞིག་སྙམ་ན། སྤྱན་མ་ལ་སོགས་པའི་རིག་མ་བཞི་ཡིས་རྣམ་པར་བརྒྱན་པ་སྟེ། མཛེས་པར་བྱས་པའམ་

---

^{[མ་དཔེ་གཟིགས་ན་འདིར་གནོན།]}

དགའ་བ་བསྐྱེད་པའི་རྡོ་རྗེ་སེམས་དཔའོ། །རྒྱན་གྱི་དོན་ནི་དགའ་བ་བསྐྱེད་པ་ལའང་མང་དུ་གསུངས་སོ། །འགྲེལ་པས་བཟའ་བཏུང་ལ་སོགས་པ་འབྱུང་བ་བཞིའི་ངོ་བོར་གྱུར་པ་རྣམས་ལྷ་མོ་བཞི་དང་། རྡོ་རྗེ་སེམས་དཔའི་རང་བཞིན་དུ་བསྒོམ་པའི་དོན་དུ་འཆད་དོ། །གསུམ་པ་ལ་གཉིས། སྟོན་པས་ཇི་ལྟར་མཛད་པ་དང་། འཁོར་གྱིས་ཇི་ལྟར་མཛད་པའོ། །དང་པོ་ནི། སྔར་བཤད་པ་དེ་ལྟར་ལྷ་མོ་བཞིས་དྲིས་པའི་ལན་མ་ལུས་པ་བཤད་ནས། བཅོམ་ལྡན་འདས་རྡོ་རྗེ་སེམས་དཔའ་དེ་ཅང་མི་གསུང་བའི་དངོས་པོ་སྟེ་ངོ་བོར་བཞུགས་པར་གྱུར་ཏོ། །གཉིས་པ་ནི། སྟོན་པ་ཅང་མི་གསུང་བར་བཞུགས་པ་མཐོང་བ་དེ་ནས་སྤྱན་མ་ལ་སོགས་པའི་ལྷ་མོ་རྣམས་ཀྱིས་ཕྱག་གིས་ཐལ་མོ་སྦྱར་བར་གྱུར་ཏེ། ཞལ་རབ་ཏུ་བཞད་ནས་སྟོན་པ་ལ་རབ་ཏུ་དང་བའི་སེམས་ཀྱིས་ཆོས་རྣམས་ལ་རྣམ་པར་མི་རྟོག་པ་འོད་གསལ་ཐོབ་པ་སྟེ་དེ་ལ་ཞུགས་ཏེ། ཅང་མི་གསུང་བར་གྱུར་ཏོ། །བཞི་པ་ནི། ལྷ་མོ་བཞིས་ཡོངས་སུ་ཞུས་པའི་རྣམ་པར་བཤད་པ་ལས། ལྷ་མོ་སྒྲོལ་མས་ཞུས་པའི་ལེའུ་སྟེ་ལེའུ་བཞི་པའི་རྣམ་པར་བཤད་པའོ།། །།བཞི་པ་མཇུག་གི་དོན་ལ་གཉིས། ཡོངས་སུ་རྫོགས་པའི་དོན། གང་གིས་བསྒྱུར་བའི་ཚུལ་ལོ། །དང་པོ་ནི། ཐམས་ཅད་ཀྱི་གསང་བའི་མཆོག་དམ་པའི་གསང་ཆེན་ཞེས་བྱ་བའི་རྒྱུད་ཅེས་པ་ནི་ལེའུ་སྔར་སོང་བ་དང་། ལེའུ་བཞི་པོ་འདིའི་སྤྱིའི་མཚན་ནོ། །ལྷ་མོ་བཞིས་ཡོངས་སུ་ཞུས་པ་ཞེས་

---

^{[མ་དཔེ་གཟིགས་ན་འདིར་གནོན།]}

པ་ནི་ལེའུ་བཞི་པོ་འདིའི་དགོས་ཀྱི་མཚན་ནོ། །དཔལ་ཨུ་རྒྱན་ཞེས་པ་ནི་ཨཽ་ཌི་ཡ་ཎའི་སྒྲ་ཟུར་ཆག་ནས་མིང་དེར་གྲགས་པའོ། །དེའི་ཡུལ་ནས་བྱུང་བ་ནི་དེ་ནས་སྤྱན་དྲངས་ཏེ་འཕགས་པའི་ཡུལ་དུ་བྱུང་བའོ། །རྣལ་འབྱོར་མ་ཆེན་མོའི་དེ་ཁོ་ན་ཉིད་ནི། རྡོ་རྗེ་སྙིང་པོ་རྒྱན་གྱི་རྒྱུད་ལས་རྒྱུད་འདི་ཐབས་རྒྱུད་དུ་གསུངས་པས་རྣལ་འབྱོར་མའི་རྒྱུད་དུ་སྟོན་པ་མིན་པས། སྤྱན་མ་ལ་སོགས་པའི་རྣལ་འབྱོར་མ་ཆེན་མོ་རྣམས་ཀྱི་ཤིན་ཏུ་གསང་བའི་གནས་ཀྱི་དེ་ཉིད་སྟོན་པའོ། །རྫོགས་སོ་ནི་ཡང་དག་པར་གྲུབ་པའི་དོན་ནོ། །རྣལ་འབྱོར་མ་ཆེན་མོའི་དེ་ཁོ་ན་ཉིད་ཅེས་མཚན་བཏགས་པ་ནི་རྒྱུད་འདིའི་ཆེ་བ་སྟོན་པ་སྟེ། འདི་ལྟར་ཐ་སྙད་པའི་ངོར་སྤྱན་མ་ལ་སོགས་པས་སྙོམས་པར་འཇུག་པའི་སྒོ་ནས་ཟག་མེད་ཀྱི་བདེ་བ་ཆེན་པོ་བསྐྱེད་པ་སྔོན་དུ་བཏང་ནས་དྲིས་པའི་གསང་བའི་གནས་རྣམས་ནི། སྟོན་པས་ཀྱང་གསལ་བར་སྟོན་པས། དེ་ཁོ་ན་ཉིད་ཀྱི་རྫོགས་པའི་རིམ་པ་གསལ་བ་ཡིན་ལ། དེ་ལ་དགོངས་ནས་རྒྱུད་རྡོ་རྗེ་ཕྲེང་བ་ལས་ཀྱང་། གསང་བའི་གནས་ཆེས་ཟབ་པ་རྣམས་འཆད་པ་ན། རྣལ་འབྱོར་མའི་དྲིན་གྱིས་ཤེས་དགོས་པར་མང་དུ་གསུངས་པས་འདི་ལྟ་བུའི་རྣལ་འབྱོར་མ་ཆེན་མོ་རྣམས་ཀྱི་ཁོ་ན་ཉིད་སྟོན་པའི་མན་ངག་ལས་ཤིན་ཏུ་ཟབ་པའི་གནས་རྣམས་ཤེས་པར་བྱ་སྟེ། དེའི་དོན་ལ་སྒྲུབ་པ་སྙིང་པོར་བྱས་ནས། བླ་ན་མེད་པའི་ཐེག་པའི་བསྟན་པ་ཕྱོགས་དུས་ཀུན་ཏུ་རྒྱས་པར་བྱའོ། །གཉིས་པ་ནི། རྒྱ་གར་གྱི་མཁན་པོ་ཤྲཱདྡྷཱ་ཀ་ར་ཝརྨཱ་སྟེ་དད་

---

^{[མ་དཔེ་གཟིགས་ན་འདིར་གནོན།]}

བྱེད་གོ་ཆ་དང་། བོད་ཀྱི་ཞུ་ཆེན་གྱི་ལོ་ཙཱ་པ་ཆེན་པོ་སྐྱེས་མཆོག་དམ་པ་རིན་ཆེན་བཟང་པོས་རྒྱ་སྐད་ལས་བོད་སྐད་དུ་བསྒྱུར་ཅིང་ཚིག་དང་དོན་ལ་ཞུས་དག་བྱས་ནས་འཆད་ཉན་གྱིས་ཀྱང་གཏན་ལ་ཕབ་པའོ།། །།རྨད་བྱུང་བདེ་བ་ཆེན་པོ་འདྲེན་པའི་ཐབས། །ངོ་མཚར་གཏམ་གྱི་སྙིང་པོ་སྲོག་རྩོལ་ལམ། །དཔལ་ལྡན་འདུས་པར་རྒྱས་བཏབ་བཞག་པའི་དོན། །ཕྱི་དུས་གདུལ་བྱའི་སྐྱེ་བོས་རྟོགས་དོན་དུ། །ལེགས་བཤད་རིན་ཆེན་འབྱུང་གནས་ཟླ་མེད་པ། །རྒྱལ་བ་དེ་ལ་མཉམ་སྦྱོར་གསང་མཆོད་ཀྱིས། །དགྱེས་པ་སྐྱེད་པའི་སྒྱུ་རྩལ་ལ་མཁས་ཤིང་། །མཛེས་ཀུན་གཅིག་བསྡུས་ལང་ཚོའི་དཔལ་ཡོན་ཅན། །ཤེས་རབ་ཡངས་པ་དོན་ཟབ་འདྲི་ལ་མཁས། །ཡིད་འོང་ལྷ་ཡི་བུ་མོའི་གཟུགས་ཅན་བཞིས། །ཡོངས་སུ་དྲིས་པའི་གཞུང་མཆོག་གསང་བའི་རྒྱུད། །བློ་མཆོག་ལྡན་པ་རྣམས་ཀྱི་འཇུག་ངོགས་འདི། །གླུ་སྒྲུབ་རྡོ་རྗེ་ཅན་དང་འཕགས་པའི་ལྷ། །ཀླུ་ཡི་བྱང་ཆུབ་ཤཱཀྱ་མི་ཏྲ་དང་། །ཟླ་བའི་ཞབས་ཀྱི་གཞུང་ལུགས་ཀུན་ལ་ནི། །རིང་དུ་སྦྱངས་པའི་མན་ངག་དང་ལྡན་པས། །འཇིག་རྟེན་རིན་ཆེན་གཅིག་པོ་འདུས་པ་དང་། །དེ་ཡི་ཕྱི་མ་བཤད་པའི་རྒྱུད་བཞི་ཡི། །དགོངས་པ་རིང་དུ་བརྟགས་ནས་བཤད་པ་ནི། །སྲོག་རྩོལ་དེ་ཉིད་གསལ་བ་ཞེས་བྱ་སྟེ། །ཤིན་ཏུ་དཔག་དཀའ་མཐའ་དྲུག་རྒྱས་བཏབ་དོན། །ཇི་བཞིན་གསལ་བར་སྟོན་ཕྱིར་འདི་ལ་ནི། །རྒྱ་ཆེར་བཤད་པ་སྦས་པ་མིག་འབྱེད་ཅེས། །ཡོངས་སུ་བརྗོད་ནའང་དོན་དང་ལྡན་པའི་མིང་། །

---

^{[མ་དཔེ་གཟིགས་ན་འདིར་གནོན།]}

དེང་དུས་སྐྱེ་བོ་བློ་གྲོས་མཐུ་དམན་པས། །ཇི་བཞིན་པ་དང་མུ་ཅོར་སྨྲ་བ་ཡི། །གཏམ་གྱི་སྦྱོར་བའི་ཁྱད་པར་མི་ཕྱེད་པས། །གཞན་ལ་ཕན་པ་དཀའ་བར་མཐོང་ན་ཡང་། །རང་ཉིད་ལམ་བཟང་འདི་ལ་གོམས་ཕྱིར་དང་། །བསྟན་པའི་སྙིང་པོ་ཉམས་པ་མ་བཟོད་ནས། །ཀླུ་སྒྲུབ་ལུགས་བཟང་རིང་དུ་གནས་ཕྱིར་དུ། །ངལ་བ་བྱས་ལ་བློ་ལྡན་སུ་ཞིག་སྨོད། །ཟབ་མོའི་དོན་འདི་ཞིབ་ཏུ་བརྟགས་སྦྱར་མོད། །ཚུ་རོལ་མཐོང་བ་བློ་དང་བརྩོན་པ་སོགས། །ཤིན་ཏུ་དམན་པས་སྦྱར་བས་ནོངས་པའི་ཚོགས། །ཇི་སྙེད་མཆིས་པ་བསམ་པ་ཐག་པས་འཆགས། །ཇི་བཞིན་བཤད་པའི་དགེ་ཚོགས་ཅི་མཆིས་དེས། །བདག་ཀྱང་ལམ་བཟང་འདི་དང་མི་འབྲལ་ཤོག །བསྟན་པའི་སྙིང་པོ་ཕྱོགས་བཅུར་རྒྱས་པར་ཤོག །ཀུན་གྱིས་འདི་དོན་རྟོགས་ནས་གྲོལ་བར་ཤོག །ཅེས་དཔལ་ཐམས་ཅད་གསང་བའི་མཆོག་གསང་ཆེན་ཞེས་བྱ་བའི་རྒྱུད་ཀྱི་དུམ་བུ། དཔལ་གསང་བ་འདུས་པའི་བཤད་པའི་རྒྱུད་ལྷ་མོ་བཞིས་ཡོངས་སུ་ཞུས་པ་ཞེས་བྱ་བའི་རྒྱ་ཆེར་བཤད་པ་སྲོག་རྩོལ་གྱི་དེ་ཁོ་ན་ཉིད་གསལ་བ་ཞེས་བྱ་བ་འདི་ནི། དཔལ་གསང་བ་འདུས་པའི་རྣལ་འབྱོར་པ་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས་རྩ་བ་དང་བཤད་པའི་རྒྱུད་འགྲེལ་པ་དང་བཅས་པ་དང་། ཕྲན་དྲུག་འགྲེལ་པ་དང་བཅས་པ་ལ་རིང་དུ་འདྲིས་པར་བྱས་པའི་མན་ངག་དང་། རྒྱུད་འདི་འགྲེལ་པ་གཉིས་ཀྱིས་ལེགས་པར་བཤད་པའི་ཆ་ལའང་བརྟེན་ནས་འབྲོག་རི་བོ་ཆེ་དགེ་ལྡན་རྣམ་

---

^{[མ་དཔེ་གཟིགས་ན་འདིར་གནོན།]}

པར་རྒྱལ་བའི་གླིང་དུ་སྦྱར་བའི་ཡི་གེ་པ་ནི་སྡོམ་བརྩོན་སྡེ་སྣོད་འཛིན་པ་འདུས་པའི་དོན་ཚུལ་བཞིན་དུ་བསྒྲུབ་པ་ལ་བརྩོན་པ་དར་མ་བཟང་པོའོ། །ཨོཾ་སྭ་སྟི། རྒྱལ་བསྟན་པད་ཚལ་ཕན་བདེའི་དྲི་བསྲུང་ཅན། །བཤད་སྒྲུབ་འདབ་རྒྱས་རྣམ་གྲོལ་སྤྲང་རྩེའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །མངྒ་ལཾ། །