ལྷ་མོ་བཞིས་ཡོངས་སུ་ཞུས་པའི་རྒྱུད།།
ལྷ་མོ་བཞིས་ཡོངས་སུ་ཞུས་པའི་རྒྱུད་བཞུགས་སོ།།
རྒྱ་གར་སྐད་དུ། ཙ་ཏུ་རྡེ་བ་ཏི་པ་རི་པྲྀཙྪ། བོད་སྐད་དུ། ལྷ་མོ་བཞིས་ཡོངས་སུ་ཞུས་པ། ༈ དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། ༈ །ལྷ་མོ་བཞི་དང་མཉམ་ལྡན་ཞིང་། །སངས་རྒྱས་གཟུགས་ཀྱིས་ཉེར་བརྒྱན་པ། །ཤིན་ཏུ་དགའ་བའི་སྦྱོར་ཆེན་ལ། །རྡོ་རྗེ་སེམས་དཔའ་ཆེར་བཞུགས་ཏེ། ༈ །འོད་ཟེར་འཆང་ཞིང་འཁྲིགས་པ་ཡི། །གསང་ཆེན་ཆོས་ཀྱི་འབྱུང་གནས་ལ། །བྱང་ཆུབ་སེམས་ནི་སྤྲོས་ནས་སུ། །ཆོས་ཀྱི་དབྱིངས་ནི་ཞུ་མཛད་དོ། ༈ །ཞུ་བའི་དངོས་པོ་དེ་མཐོང་ནས། །ལྷ་མོ་སྤྱན་མས་ཡོངས་ཞུས་པ། །བཅོམ་ལྡན་རྡོ་རྗེ་སེམས་དཔའ་ལ། །ཚིག་འདི་དག་གིས་གསོལ་བ་སྟེ། ༈ །ཆོས་ཀྱི་དབྱིངས་རྣམས་འཕྲོ་བ་ནི། །གང་ལས་སྐྱེ་བར་འགྱུར་བ་ལགས། ༈ །དང་པོ་ཇི་ལྟར་འོངས་པ་ཡིན། ༈ །དེ་
བཞིན་ཕྱིར་འགྲོ་ཇི་ལྟར་ལགས། ༈ །ཡན་ལག་མེད་པ་གང་དེ་ནི། །ཡན་ལག་དང་བཅས་གྱུར་ནས་སུ། །ལུས་དངོས་གྱུར་པ་ཇི་ལྟར་ལགས། །མིག་དང་རྣམ་བ་སྣ་དང་ནི། །དེ་བཞིན་ལྕེ་དང་ལུས་དང་ཡིད། །དབང་པོ་ཕུང་པོའི་དངོས་རྣམས་དང་། །ཁམས་རྣམས་སུ་ནི་འཇུག་པ་ཡང་། ༈ །མ་རིག་བག་ཆགས་སྲེག་པ་ཡིས། །བཅིངས་པའི་ཉོན་མོངས་འདོད་ཆགས་སོགས། །རྣམ་པར་ཤེས་པ་སྣ་ཚོགས་པ། །ཇི་ལྟར་དངོས་སུ་འདུས་པ་ལགས། ༈ །དངོས་པོ་མེད་པ་བསྒོམ་པའི་གཟུགས། །གཟུགས་སོགས་སྤྱོད་ཡུལ་མཚན་ཉིད་རྣམས། །རང་བཞིན་མེད་ཅིང་དམིགས་མེད་པ། །དམིགས་པ་དང་བཅས་ཇི་ལྟར་ལགས། ༈ །དེ་དག་ངོ་མཚར་ཆེན་པོ་ནི། །བདག་གི་ཐེ་ཚོམ་ལྷས་བཀའ་སྩོལ། ༈ དེ་ལྟར་ཞུས་མ་ཐག་ཏུ་ནི། །བཅོམ་
ལྡན་རྡོ་རྗེ་སེམས་དཔས་གསུངས། ༈ །ཤེས་རབ་ཟབ་པ་ཟད་མེད་ནི། །ཉོན་ཅིག་སྤྱན་མ་བཤད་པར་བྱ། ༈ །དཔྱད་དུ་མེད་ཅིང་ཤེས་བྱ་མིན། །དེ་བཞིན་དཔྱད་མཁན་གྱིས་ཤེས་དཀའ། །སངས་རྒྱས་ཀུན་གྱི་གསང་ཆེན་ནི། །ནམ་མཁའ་ནམ་མཁའི་སྤྱོད་ཡུལ་ལོ། ༈ །མི་ཤེས་མུན་པས་བསྒྲིབས་པས་ན། །ཉན་ཐོས་རྣམས་ཀྱིས་ཤེས་པ་མིན། །སྤྱོད་ཡུལ་བག་ཆགས་ཤེས་མཁན་ནི། །རང་སངས་རྒྱས་སུ་སྤྲུལ་པ་སྟེ། ༈ །དེ་དག་ཀུན་གྱིས་ཀྱང་མི་ཤེས། །ཤེས་མེད་སོ་སོ་སྐྱེ་བ་ཡིས། །མ་འོངས་པ་དང་འདས་པ་དང་། །ད་ལྟ་བྱུང་བའི་དུས་གསུམ་ལ། །བྱོལ་སོང་བག་ཆགས་ལས་བྱུང་བའི། །དུས་འགྲོ་ཡི་དྭགས་སྐྱེ་བ་རྣམས། །དེ་ཀུན་གྱིས་ཀྱང་མི་ཤེས་ཏེ། །སངས་རྒྱས་སྤྱོད་ཡུལ་གསང་ཆེན་པོ། ༈ །སྙིང་པོ་ཤིན་ཏུ་སྙིང་པོ་མཆོག །གང་དེ་ཐམས་ཅད་བདག་ཉིད་གནས། །སངས་རྒྱས་ཀུན་གྱིས་གསང་ཆེན་ནི། །ལྷ་མོ་ཁྱོད་ལ་གཤད་པར་བྱ། །བྱང་ཆུབ་སེམས་དག་འོད་གསལ་བ། །ཟླ་བ་ཤེས་དང་མཉམ་པའི་འོད། །དེ་ནི་ཡེ་ཤེས་ལྔ་ཡི་དངོས། །ཡུངས་དཀར་ཆེ་བའི་ཚད་ཙམ་མོ། དེ་ཡི་དབུས་ན་བཞུགས་པའི་ལྷ། །མི་གསལ་གསལ་བའི་གཟུགས་ཅན་ཏེ། ༈ །བྱེད་ཚད་ཙམ་གྱི་ཕྲ་མོ་མཆོག །ཡིད་ཀྱི་དངོས་པོ་ཐིག་ལེའི་གཟུགས། །རྟག་ཏུ་སྙིང་གི་དབུས་གནས་པ། །འོད་ཟེར་ཆེན་པོ་འབར་བ་ཅན། ༈ །ཇི་སྙེད་དགུ་ཡི་བར་དུ་ནི། །དཔྲལ་བ་ལ་གནས་རྐང་མཐིལ་བར། །ཐིག་ལེ་དེ་ཁོ་ནར་བསྡུས་ཏེ། །ལྟེ་བའི་དབུས་སུ་རྣམ་པར་གནས། ༈ །ཆ་ཤས་ལྔ་པ་ཙམ་ཡིན་ཏེ། །བཅུ་གཉིས་ཀྱི་ནི་མཐའ་མ་ལ། །ཆ་ཤས་དྲུག་གིས་མཚན་པ་ཉིད། །ང་རོ་ཐིག་ལེས་
བརྒྱན་བྱེད་པ། ༈ །རྡོ་རྗེའི་ཁོངས་ནས་བྱུང་ནས་སུ། །ས་བོན་སྐྱེ་གནས་དབུས་བཞག་སྟེ། །ཆོས་ཀྱི་དབྱིང་ནི་ཞུ་བར་བྱེད། ༈ །དེ་ནི་རིམ་པར་བསྐྱེད་བྱས་ནས། །སྒོ་དགུ་ལ་ནི་ཀུན་ཏུ་འགྲོ། །ཁྱབ་པའི་ཁྱབ་གནས་འགྲོ་ཀུན་ལ། །མི་གཡོ་ལ་སོགས་གཡོ་དང་བཅས། །ཚངས་སོགས་ལྷ་དང་ལྷ་མིན་གྱི། །གཞི་ནི་དེ་ལས་གྱུར་པའོ། །གང་ཡས་གཙོ་བོ་གནས་བྱེད་པ། །ས་དང་ནམ་མཁའ་དེ་ཞེས་གསུངས། ༈ །ཇི་སྲིད་ལུས་ལ་གནས་པའི་བར། །དེ་ཡིས་ལས་དང་ལམ་མིན་བྱེད། །དགེ་དང་མི་དགེའི་བསམ་པ་ཡང་། །བྱ་བའི་ལས་ཀུན་བྱེད་པ་ཡིན། ༈ །སྦྱོར་བ་རྟག་ཏུ་དེ་གསུངས་ཏེ། །མཆོད་པ་སྒོམ་པར་གྱུར་པ་ཡིན། །གང་ཚེ་ལས་ཀྱིས་ལུས་ཞིག་ན། །དེ་ཚེ་དེ་ཡི་རང་མཐུ་ཡིས། །དེ་འདྲའི་ལུས་སུ་དེ་འགྱུར་ཏེ། །གང་གིས་གཡོ་དང་མི་གཡོ་ཁྱབ། །ནམ་མཁའ་མཉམ་པ་ཉིད་འདྲ་བར། །དེ་ནི་གནས་པ་ཤེས་པར་བྱ། ༈ །བཅུ་གཉིས་མཐའ་ཡི་ཚིག་གི་དོན། །གང་གི་རྟག་ཏུ་བསྒྲོམ་བྱས་ན། །དེ་ནི་དངོས་གྲུབ་རྒྱས་པ་ཡི། །རྡོ་རྗེ་འཛིན་པ་རང་ཉིད་འགྱུར། ༈ །སོ་དང་མཆུ་དང་རྐང་དང་ལྕེ། །མགུལ་གནས་གང་ལ་ཡོད་པ་ནི། །གང་ལ་དེ་ཡི་ཡི་གེ་ཉིད། །དེ་ནི་ཐད་དང་གནས་ཕྱིར་རོ། །བརྗོད་པ་མེད་ཅིང་ཐེ་ཚོམ་པ། །སྒྲ་ཡིག་རྣམས་པར་སྤངས་པ་ནི། །རང་གི་ཕྱི་ནང་དེ་བཞིན་ཉིད། །བྱང་ཆུབ་སེམས་ནི་འདིར་གསུངས་སོ། ༈ །ལྷ་མོ་བཞིས་ཡོངས་སུ་ཞུག་པ་ལས། །ལྷ་མོ་སྤྱན་ནས་ཡོངས་སུ་ཞུས་པའི་ལེའུ་སྟེ་དང་པོའོ།། ༈ །།དེ་ནས་ལྷ་མོ་མཱ་མ་ཀཱིས། །རྡོ་རྗེ་ཅན་ལ་འདུ་ཞུས་ཏེ། །བྱང་ཆུབ་སེམས་ཀྱི་རིམ་པ་ཡིས། །
ཁ་སྙིང་ལྟེ་བ་གསང་བ་ལ། །འགྲོ་དང་ཕྱི་ལྡོག་བསྟན་པ་ནི། །རྡོ་རྗེ་ཆེན་པོ་བཀའ་སྩལ་འཚལ། ༈ །ཆ་ཤས་རྣམ་པ་དུ་ཞིག་གསུངས། ༈ །གནས་ཀྱི་རྣམ་པར་བསྒྱུར་བ་ར། ༈ །ཁ་དོག་རྣམ་པ་དུ་ཞིག་གསུངས། ༈ །དེ་བཞིན་གདན་ཡང་ཇི་ལྟར་མཚལ། ༈ །རྡོ་རྗེ་ཅན་གྱིས་བཀའ་སྩལ་པ། །ཆ་ཤས་བཞི་དང་མཉམ་ལྡན་ཞིང་། ༈ །པདྨ་བཞི་ལ་ཡང་དག་གནས། །སྙིང་གི་པདྨ་ལ་གནས་གནག །ཁ་ཡི་པདྨ་ལ་གནས་དཀར། །ང་རོ་ལྟེ་བའི་པདྨར་གནས། །གསང་བའི་པདྨར་ང་རོ་མཐའ། ༈ །སྟབས་ཀྱི་མཐའ་རུ་འགྲོ་བྱེད་གནས། །ཐིག་ལེ་སྦྱོར་བས་རབ་ཏུ་གནས། ༈ །སྣོམ་བྱེད་པ་དང་ཐོས་བྱེད་གང་། །དེ་ཚེ་མཐོང་བྱེད་ཟ་བྱེད་པ། །རེག་པར་བྱེད་གྱང་དོ་ཁོ་ནས། །བདེ་དང་སྡུག་བསྔལ་ཚོར་བྱེད་དོ། གང་ལས་བཞིད་བྱེད་སློབ་བྱེད་པ། །དེ་བཞིན་ཚེ་ངེ་དང་དུ་བར། །འབྱེད་པ་གཅོད་པ་དེ་ཁོ་ནས། །ཆོ་ག་རྣམ་པ་མང་པོ་ཤེས། ༈ །རྒྱལ་པོའི་དོན་ཡང་བྱེད་འགྱུར་ལ། །དབང་ཕྱུག་དོན་ཡང་དེ་བཞིན་ནོ། །བྲམ་ཟེ་རྒྱལ་པོ་རྡེའུ་རིགས་དང་། །དམངས་རིགས་སྨན་པའི་རིགས་རྣམས་དང་། །བུད་མེ་དུ་ཡང་སྤྲུལ་པར་བྱེད། །དུད་འགྲོ་ཡི་དྭགས་སྐྱེ་བ་དང་། ༈ །གཟུགས་ཅན་དང་ནི་གཟུགས་མེད་དང་། །དེ་བཞིན་འདོད་པའི་སྲིད་རྣམས་ལས། །འབྱུང་བ་ཐམས་ཅད་སྐྱེད་བྱེད་པ། །དེ་ཁོན་ཉིད་རྫུ་འཕྲུལ་གནས། །མོ་གཟུགས་དང་ནི་ཕོ་གཟུགས་གནས། །བདེ་བ་ཆེན་པོའི་གོ་འཕང་གནས། ༈ །དེ་ལྟར་དེ་བཞིན་ཉིད་ཤེས་པ། །དམ་པའི་ཡིག་འབྲུ་ཤེས་པ་གང་། །དེས་ནི་གསང་ཆེན་ཤེས་པ་སྟེ། །གང་དེས་བདག་ཉིད་ཀུན་གནས་པ། ༈ ཁ་དོག་མེད་ཅིང་ཁ་
དོག་དམར། །ཁ་དོག་དཀར་དང་སེར་བ་ཡི། ༈ །ཐིག་ལེའི་གཟུགས་སུ་བསྒྱུར་བ་སྟེ། །འགྲོ་དང་ཕྱིར་འོང་རྣམ་པར་བསྟན། ༈ །གང་དེ་རིག་པ་རྫུ་འཕྲུལ་ཆེ། །མཐའ་ཡས་བཅས་པ་སྣ་ཚོགས་གཟུགས། །སྐྱེ་དང་བསྡུས་ནས་འཇིག་པ་ལ། །ཐིག་ལེའི་གཟུགས་སུ་རབ་གནས་སོ། ༈ །གང་གིས་བརྒྱད་ཁྲི་རྩ་བཞིའི་ཆོས། །སྟོང་ཕྲག་བརྒྱ་རུ་ཤེས་ན་ཡང་། །དེ་ཡིས་དེ་ཉིད་མི་ཤེས་ཏེ། །དེ་དག་ཀུན་ཀྱང་འབྲས་མེད་དོ། ༈ །བཅུ་གཉིས་ལྔ་ཡི་པ་ཡང་། །བརྒྱད་ཀྱི་མཐའ་རུ་འབྱུང་བ་འདུས། །སྒྲ་ཡིག་དང་པོ་ཡི་གེ་ཨ། །ལྔ་པ་ཡིས་ནི་རང་དག་བརྒྱན། །སྙིང་རྗེ་ཆེན་པོ་ལས་བྱུང་བ། །དྲུག་པ་བཏགས་པའི་ཁ་མར་བལྟ། །གདོད་མ་ཐ་མ་དེད་པའི་ལྷ། །དེ་ནི་སྤྱི་བོར་བསྟན་པ་ཡིན། ༈ །དེ་དག་གསང་ཆེན་དམ་པ་ནི། །ལྷ་མོ་བདག་གིས་རབ་བསྟན་ཏོ། ༈ །ལྷ་མོ་བཞིས་ཡོངས་སུ་ཞུས་པ་ལས། །ལྷ་མོ་མཱ་མ་ཀཱིས་ཞུས་པའི་ལེའུ་སྟེ་གཉིས་པའོ།། ༈ །།དེ་ནས་ལྷ་མོ་གོས་དཀར་མོས། །ཡན་ལག་ཀུན་གྱིས་རབ་བཏུད་ནས། །ཐལ་མོ་སྙིག་གར་སྦྱར་བྱས་ཏེ། །རྡོ་རྗེ་སེམས་དཔའ་ལ་གསོལ་པ། ༈ །ཆོས་ཀྱི་དབྱིངས་ཀྱི་བསྡུ་བ་དང་། །སྐུ་གསུང་ཐུགས་ཀྱི་རྡོ་རྗེ་ཡི། །རང་བཞིན་ཉིད་ནི་ཇི་ལྟར་ལགས། །ལྷ་ཡི་དབང་ཕྱུག་ཁྱོད་ལ་ཞུ། ༈ །གང་གིས་འོད་ཀྱི་གོང་བུ་བསྡུ། །རྡོ་རྗེ་སེམས་དཔའ་ཇི་ལྟར་ལགས། ༈ །གསུངས་ཤིག་དེ་ཉིད་ཡིག་འབྲུའི་ཚིག །འདུས་པ་ཇི་ལྟར་འགྱུར་བ་ལགས། ༈ །ཆུ་ཡི་ཁམས་དང་མེ་ཡི་ཁམས། །ཇི་ལྟར་རོ་ནི་མཉམ་པོར་འགྱུར། །མ་ལས་སྐྱེ་བ་གསུམ་ཙམ་དང་། །དེ་བཞིན་ཕ་ལས་སྐྱེ་བ་གསུམ། །དེ་དག་དྲུག་སོགས་གོར་བུ་ལས། །
ཇི་ལྟར་མི་རྣམས་སྐྱེ་བ་ལགས། ༈ །སངས་རྒྱས་གཟུགས་ནི་བདག་མི་འཚལ། །ཐུབ་པ་ཆེན་པོ་བཀའ་སྩོལ་མཛོད། ༈ །རྡོ་རྗེ་ཅན་གྱིས་བཀའ་སྩལ་པ། །གསང་ལས་ཤིན་ཏུ་གསང་གྱུར་བ། །ཉོན་ཅིག་ལྷ་མོ་བཤད་པ་བྱ། ༈ །སྐྱེ་གནས་དབུས་སུ་རྩ་གཉིས་ནི། །གཡོན་དང་དེ་བཞིན་གཡས་པ་སྟེ། །གཡོན་དུ་བྱང་ཆུབ་སེམས་ཤེས་བྱ། །གཡས་སུ་དེ་བཞིན་རཀྟའོ། །དེ་གཉིས་ཕྲད་ནས་གཅིག་གྱུར་པ། །ཆོས་ཀྱི་དབྱིངས་ནི་འདུས་པ་ཡིན། ༈ །མུན་པ་སྐུ་སྟེ་རྡུལ་ནི་གསུང་། །སེམས་ཀྱི་རང་བཞིན་སྙིང་སྟོབས་ཏེ། །རྡུལ་ནི་རཀྟ་བྱང་སེམས་ནི། །མུན་པ་དེ་བཞིན་བསྐྱེད་པ་ཡིན། ༈ །རྡོ་རྗེ་པདྨ་མཉམ་སྦྱར་ནས། །རང་བཞིན་མཉམ་པའི་རོར་འགྱུར་ཏོ། །དྲི་ཆེན་ཆུ་དང་ཤེལ་མེ་ཏོག །དེ་བཞིན་ལྔ་པ་བྱང་ཆུབ་སེམས། །བདུད་རྩི་ལྔ་དངོས་གོང་བུར་བསྡུས། །དེ་ལས་རྡོ་རྗེ་འདིར་གསུངས། ༈ །ཆ་ཤས་གཉིས་པ་དང་ལྡན་པ། །དེ་བཞིན་དབུ་པ་ཡང་ཡིན་ནོ། །དེ་སྐད་གསུངས་པ་དེ་ལ་ནི། །སུམ་ཅུ་དང་ནི་བཅུ་དང་ནི། །དེ་བཞིན་ལྔ་པའི་ས་བོན་ཏེ། །ཆ་ཤས་གཉིས་པ་ལྔ་ཡིས་ནི། །དྲུག་པས་བཏགས་ནས་ངེས་འབྱུང་བ། །དེ་ནི་ཐིག་ལེར་གསུངས་པའོ། ༈ །ཆོས་ཀྱི་དབྱིངས་ཀྱི་ཡི་གེ་ཧཱུྃ། དེ་ཉིད་ས་བོན་སྭཱ་ཧཱ་མཐའ། །འདུས་པ་ཡིན་པར་ཤེས་པར་བྱ། ༈ །ཆུ་ཁམས་ཕ་ལས་སྐྱེས་ཤེས་པར་བྱ། །མེ་ཡི་ཁམས་ནི་མ་ལས་སྐྱེས། །ཤ་ད་ཁྲག་དང་པགས་པ་ཡང་། །མ་ལས་སྐྱེས་པ་ཞེས་བཤད་དོ། །ཚིལ་དང་རྐང་དང་ཁུ་བ་ནི། །ཕ་ལས་སྐྱེས་ཞེས་བཤད་པ་ཡིན། །གོང་བུར་ཡང་དག་བསྡུས་པ་ནི། །དེ་དག་ཙམ་བཤད་པ་ཡིན། ༈ །གཟུགས་དང་ཚོར་
དང་འདུ་ཤེས་དང་། །དེ་བཞིན་འདུ་བྱེད་རྣམ་ཤེས་རྣམས། །སངས་རྒྱས་དངོས་པོ་ལྔ་ཡི་གཟུགས། །ཕུང་པོ་ཞེས་བྱར་བཤད་པའོ། ༈ ལྷ་མོ་བཞིས་ཡོངས་སུ་ཞུས་པ་ལས། །ལྷ་མོ་ན་བཟའ་དཀར་མོས་ཞུས་པའི་ལེའུ་སྟེ་གསུམ་པའོ།། ༈ །།དེ་ནས་བཞད་པའི་ཞལ་གྱུར་ཏེ། །ལྷ་མོ་སྒྲོལ་མ་བཅོམ་ལྡན་རྣམས། །རྡོ་རྗེ་སེམས་དཔལ་ལ་ཞུགས་པ། ༈ །ཆོས་ཀྱི་དབྱིངས་ཀྱི་སྒྲུབ་པ་ནི། །གསུངས་ཤིག་རྡོ་རྗེ་ཅན་ཆེན་པོ། ༈ །རྫས་རྣམས་བསྒྲུབ་པ་བཀའ་སྩལ་འཚལ། ༈ །དེ་བཞིན་རིག་པའི་སྔགས་རྣམས་ཀྱང་། ༈ །དཀྱིལ་འཁོར་རྣམས་ནནི་བརྟགས་པ་དང་། །སྦྱིན་སྲེག་སོ་སོར་བྱ་བ་དང། ༈ །དེ་བཞིན་མཆོད་པའི་ཆོ་ག་ཡང་། །ཁྱད་པར་དུ་ཡང་བཀའ་སྩལ་འཚལ། ༈ །དེ་ལྟར་ལྷ་མོས་ཞུས་མ་ཐག །རྡོ་རྗེ་སེམས་དཔའ་བཀའ་སྩལ་པ། ༈ ཆོས་ཀྱི་དབྱིངས་ཀྱི་སྒྲུབ་པ་ནི། །ཉོན་ཅིག་ལྷ་མོའི་བཤད་པར་བྱ། །གཟུགས་དང་སྒྲ་དང་དྲི་དང་ནི། །དེ་བཞིན་རོ་དང་རེག་ལ་སོགས། །ཁམས་བཅོ་བརྒྱད་པོ་དེ་དག་ཀྱང་། །ཆོས་ཀྱི་དབྱིངས་ཞེས་བྱ་བའོ། །དེ་དག་ཉིད་ལས་བྱུང་བ་ནི། །བྱང་ཆུབ་སེམས་ཞེས་ཤེས་པར་བྱ། །བྱང་ཆུབ་སེམས་ལས་གོང་བུ་སྐྱེ། །གོང་བུ་ལས་ཀྱང་ཡིད་བསྐྱེད་དོ། །ཡིད་ལས་ནམ་མཁའི་ཁམས་ཀྱང་ནི། །ཁམས་རྣམས་དང་ནི་སྐྱེ་མཆེད་རྣམས། །དབང་པོ་ཕུང་པོ་འབྱུང་བ་རྣམས། །དེ་ལྟར་དབྱིངས་སུ་བསྡུ་བ་སྟེ། །བསྡུ་བ་དེ་ནི་བསྟན་བྱས་པ། །ཆོས་ཀྱི་དབྱིངས་ཀྱི་སྒྲུབ་པ་ཡིན། །དེ་བས་ཐམས་ཅད་ནན་ཏན་གྱིས། །སྒྲུབ་པ་ཡང་དག་སྤྱད་པར་བྱ། ༈ །དེ་ལྟར་རྟོག་པའི་རྗེས་འབྲངས་ནས། །བསྒྲུབ་པར་བྱ་བ་རབ་ཏུ་
བརྟག ༈ །ཆོས་རྣམས་སྒྲུབ་པ་བཤད་ནས་སུ། །རྫས་བརྒྱད་ཡན་ལག་སྒྲུབ་པ་བཤད། ༈ །རིལ་བུ་རིག་སྨན་དངོས་གྲུབ་དང་། །ས་འོག་རལ་གྲིའི་དངོས་གྲུབ་དང་། །ནམ་མཁའ་འཕུར་དང་མི་སྣང་དང་། །ཤི་བ་མེད་དང་ནད་འཇོམགས་སོ། ༈ །མི་དང་གླང་པོ་ཆེ་དང་རྟ། །གླང་དང་ཁྱི་དང་པོང་བུ་དང་། ༈ །རྔ་མོ་མ་ཧེ་སྦྱང་གི་རྣམས། །ཆ་ནི་མཉམ་པོ་བྱ་བ་སྟེ། །མཐེ་བོང་ཚིགས་ཚད་ཙམ་དུ་ནི། །ཤིན་ཏུ་མཉམ་པར་བཞག་ནས་སྦྱར། །དྲི་ཆེན་དྲི་ཆུ་རཀྟ་དང་། །བྱང་ཆུབ་སེམས་ནི་ནས་ཚད་ཙམ། །སྔགས་བཟླས་ནས་ནི་སྦྱར་བྱས་ཏེ། །བྱིན་གྱིས་བརླབས་ཀྱང་བྱ་བའོ། །ཕྱག་འཚལ་བ་ནི་ཡེ་གེ་ཨཱཿ དབུས་སུ་དེ་བཞིན་ཧཱུྃ་བྱས་ཏེ། །འབར་བའི་ཧྲཱི་ཡིག་འབར་བྱེད་པས། དགུ་པོ་དེ་ནི་རབ་ཏུ་བསྒྲུབ། ༈ །ལན་ནི་ཉི་ཤུ་རྩ་གཅིག་ཏུ། །སྔགས་བཟླས་ནས་ནི་ཕྱེ་མར་བཏགས། །ཡུངས་ཀར་ལྔ་ཡི་ཚད་ཙམ་ནི། །ལྔ་དང་ལྔ་ཚད་སྦྱོར་བར་བྱ། ༈ །ཆོས་བརྒྱད་དང་ནི་བཅུ་བཞི་ལ། །རིལ་བུ་རྣམས་ནི་བྱས་ས་སུ། །པདྨའི་སྣོད་ལ་བཞག་བྱས་ཏེ། །སྟོང་ཕྲག་བརྒྱད་ནི་བཟླ་བར་བྱ། །མཚམས་བཞི་ལ་ནི་བསྒོམ་བྱས་ནས། །ཉིད་དང་ཉིད་དུ་བཟའ་བར་བྱ། ༈ །དེ་ནི་བསྐལ་པ་མཐའ་ཡི་བར། །དངོས་གྲུབ་རྒྱས་པར་འགྲོ་བ་སྟེ། །གཟི་བརྗིད་མདངས་སྟོབས་བརྩོན་འགྲུས་དང་། །ལྔ་པ་ལ་ནི་སྨོན་ལམ་ཡང་། །མངོན་པར་ཤེས་པ་ལྔ་ཐོབ་པ། །རིལ་བུ་ཆེན་པོ་ཟོས་ཕྱིར་རོ། །རྫས་ཀྱི་སྒྲུབ་པ་གསུངས་རྫོགས་ནས། །རིག་པའི་སྔགས་རྣམས་བདག་ལ་སྩོལ། ༈ །ཨེ་ཡིག་དང་ནི་བཾ་ཡིག་དང་། །ལཾ་ཡིག་དབུས་སུ་ཡང་དག་གནས། །དང་པོའི་མདོག་ནི་དམར་པོ་སྟེ། །གཉིས་པ་ཡི་ནི་མདོག་དཀར་པ། །གསུམ་པ་ཁ་དོག་སེར་པོར་
བསམ། །བྷ་གའི་དབུས་སུ་བསྒོམ་པར་བྱ། །འཁོར་ལོ་ལྟར་ནི་བསྐོར་བ་ནི། །ཉིད་ཕྱེད་དང་ནི་མཚན་ཕྱེད་ལ། །རིག་པ་དེ་ནི་རབ་སྦྱར་ན། །དེ་ནི་སྐད་ཅིག་ཁོ་ནར་འགྲུབ། །ལྷ་མོ་ལྷ་མིན་བུ་མོ་འམ། །མི་ཡི་བུ་མོ་རྣམ་པ་བཞི། །ས་ཡི་དཀྱིལ་འཁོར་ཀུན་ཏུ་ནི། །སྔགས་ཀྱིས་བཀུག་ནས་སྤྱད་པར་བྱ། །སྒོམ་དང་དེ་བཞིན་རིག་པའི་སྔགས། །བདག་གིས་བཤད་པར་བྱས་ཟིན་ཏེ། །དཀྱིལ་འཁོར་རྣམས་ནི་བཤད་པར་བྱ། །དགའ་མ་སེམས་ཀྱིས་རྩེ་གཅིག་ཉོན། །དཀྱིལ་འཁོར་ལུས་ཞེས་གསུངས་པ་སྟེ། །དཀྱིལ་འཁོར་བྷ་གར་བསྟན་པ་ཡིན། །དཀྱིལ་འཁོར་བྱང་ཆུབ་སེམས་དང་ནི། །དཀྱིལ་འཁོར་གསུམ་དུ་བཏགས་པ་ཡིན། །བཏགས་པ་རྣམས་ནི་འདུས་པ་སྟེ། །གང་ན་གཙོ་བོ་བསྐྱོད་པར་བྱེད། །ཕུང་པོ་རྣམས་ནི་སངས་རྒྱས་གསུངས། །འབྱུང་བ་རིག་མར་བཏགས་པ་ཡིན། །ཆགས་པ་ལྕགས་ཀྱུ་ཁོ་ན་སྟེ། །ཞགས་པ་པདྨར་ཆུད་བྱེད་པའོ། །ཁ་སྤྲད་པ་ནི་སྒྲོག་ཡིན་ཏེ། །སྒྲ་གྲགས་པ་ནི་དྲིལ་བུར་བཤད། །སྤོས་མེ་དྲི་ཆེན་ཞེས་གསུངས་ཏེ། །མེ་ཏོག་རཀྟ་ཞེས་འདོད་དོ། །མར་མེ་ཤ་རྣམས་ཁོ་ན་ཡིན། །དྲི་ནི་བྱང་ཆུབ་སེམས་སུ་འདོད། །སྒེག་མོ་ལིང་གར་བསྟན་པ་སྟེ། །ཕྲིར་བ་བྷ་ག་ཁོ་ན་ཡིན། །དབྱངས་མ་ཧ་ཧ་ར་བསྟན་པ་དང་། །གར་མཁན་མ་ནི་ཁ་སྦྱོར་ཏེ། །བཅོམ་ལྡན་འདས་ཀྱིས་བཟང་པོར་གསུངས། །དེ་རྟོགས་པ་ནི་སྐལ་བཟང་ཡིན། །རྟོགས་པ་དེ་རྣམས་བྱམས་ལ་སོགས། །དེ་ལྟར་ནང་གི་དཀྱིལ་འཁོར་གསུངས། །དཀྱིལ་འཁོར་གཞན་ནི་སྔར་བཤད་ཟིན། །སྦྱིན་སྲེག་ལས་ནི་བཤད་པར་
བྱ། །ཉོན་ཅིག་སྦྱིན་སྲེག་རྣམ་པ་བཞི། །སྦྱིན་སྲེག་ཕྱི་དང་ནང་གསུངས་ཏེ། །ཕྱི་ནི་སྔོན་དུ་བསྟན་པ་ཡིན། །ཉོན་ཅིག་ཁྱོད་ཀྱིས་ནང་གི་ནི། །པདྨ་བཞི་རྣམས་སྦྱོར་བ་ནི། །ལུས་ཀྱི་དབུས་སུ་ཉེ་བར་གནས། །མེ་དང་དེ་བཞིན་རླུང་དང་ནི། །དབང་ཆེན་དང་ནི་ཆུ་དེ་བཞིན། །རླུང་གིས་མེ་ལ་སྦར་བྱས་ཏེ། །ཆུ་ཡིས་ཡོངས་སུ་སྨིན་པར་བྱེད། །དབང་ཆེན་དཀྱིལ་འཁོར་ལས་བྱུང་བ། །གང་དུ་མེ་ནི་བསྐྱོད་པའོ། །ར་ཡིག་མངོན་སྤྱོད་ཡི་གེ་སྟེ། །ཡ་ཡིག་དབང་གི་ལས་ཁོ་ན། །ལ་ཡིག་རྒྱས་པར་འགྱུར་བ་སྟེ། །ཝ་ཡིག་ཞི་བ་ཞེས་གསུངས་སོ། །གང་ཞིག་ཟས་དང་བཏུང་བ་ནི། །དེ་དག་ཐམས་ཅད་ཆུ་ལ་སྟེ། །པདྨ་རཀྵཿཡིག་ཁ་མར་བལྟ། །སྙིང་གི་པདྨར་བཙུད་པར་བྱ། །ལྟེ་བའི་པདྨར་འགྲོ་ཕྱི་རོལ། །ཁ་སྦྱོར་ཚུལ་དུ་སྦྱོར་བ་ཡིན། །གསང་བའི་པདྨར་འགྲོ་མ་ཐག །ཐལ་མའི་མཐའ་རུ་རྣམ་པར་བརྟག །དེ་ལྟར་སྦྱིན་སྲེག་བདག་བཤད་པ། །ཉིད་དང་ཉིད་དུ་བྱ་བ་སྟེ། །རྟག་པ་རྒྱུན་དུ་ཟས་ཟོས་ན། །ཚེ་འདི་ཁོ་ནར་འགྲུབ་པར་འགྱར། །རྒས་པ་མེད་ཅིང་ནད་ཀྱང་མེད། །ཤི་བ་མེད་ལ་འབྲས་ཀྱང་མེད། །དེ་ནི་གློ་བུར་ཤི་བ་མེད། །འཚེ་བ་ཐམས་ཅད་ཟད་འགྱུར་ཞིང་། །རྨི་ལམ་ངན་ཡང་ཞི་བར་འགྱུར། །བཟང་པོ་བསྐལ་བར་གསོན་པ་སྟེ། །སེམས་ཅན་ཐམས་ཅད་དགའ་བར་སྨྲ། །མཐོང་བཙམ་གྱིས་སྐུལ་བྱེད་དོ། །སྦྱིན་སྲེག་ལས་རྣམས་བཤད་བཤད་བྱས་ནས། །ལྷ་མོ་མཆོད་པ་བསྟན་པར་བྱ། །དྲི་དང་ཕྲེང་སོགས་གོས་རྣམས་དང་། །སྤོས་མེ་ཟས་དང་ལྷ་བཤོས་དང་། །དབང་པོ་གཉིས་ནི་རབ་སྦྱར་ནས། །བདག་ལ་མཆོད་པ་རྣམས་ནི་བྱ། །བདག་ནི་སངས་རྒྱས་རྒྱམས་ཅད་ཉིད། །སངས་རྒྱས་
ཀུན་གྱི་གནས་ཡིན་ཏེ། །དེ་བས་ནན་ཏན་ཐམས་ཅད་ཀྱིས། །རྣལ་འབྱོར་པས་ནི་རྟག་ཏུ་མཆོད། །གང་ཡང་འགའ་ཞིག་བྱ་བའི་ལས། །རྣལ་འབྱོར་པས་ནི་མཆོད་པར་བསྒོམ། །བཟའ་དང་བཏུང་བ་དེ་བཞིན་གོས། །དེ་བཞིན་དྲི་དང་ཕྲེང་ཁོ་ན། །རིག་མ་བཞི་ཡིས་རྣམ་བརྒྱན་པའི། །བདག་གིས་ལྷ་ཉིད་བསམ་པར་བྱ། །དེ་སྐད་བརྗོད་ནས་རྡོ་རྗེ་དེ། །ཅང་མི་གསུང་བའི་དངོས་པོར་བཞུགས། །དེ་ནས་ལྷ་མོ་བཞི་རྣམས་ཀྱིས། །ཕྱག་གིས་ཐལ་མོ་སྦྱར་གྱུར་ཏེ། །རབ་ཏུ་ཞལ་ནི་རྣམ་བཞས་ནས། །རབ་ཏུ་དང་པའི་སེམས་ཀྱིས་ནི། །རྣམ་པར་མི་རྟོག་པ་ཐོབ་སྟེ། །ཅང་མི་གསུང་བར་བཞུགས་གྱུར་ཏོ། །ལྷ་མོ་བཞི་ཡོངས་སུ་ཞུས་པ་ལས། །ལྷ་མོ་སྒྲོལ་མས་ཞུས་པའི་ལེའུ་སྟེ་བཞི་པའོ།། ༈ །།ཐམས་ཅད་ཀྱི་གསང་བའི་མཆོག་དམ་པ་གསང་ཆེན་ཞེས་བྱ་བའི་རྒྱུད། །ལྷ་མོ་བཞིས་ཆོས་ཀྱི་དབྱིངས་ཡོངས་སུ་ཞུས་པ། །དཔལ་ཨཽ་ཌི་ཡ་ནའི་ཡུལ་ནས་བྱུང་བ། །རྣལ་འབྱོར་མ་ཆེན་པོའི་དེ་ཁོ་ན་ཉིད་རྫོགས་སོ།། ༈ །།རྒྱལ་གར་ཀྱི་མཁན་པོ་ཤྲཱདྡྷཱ་ཀ་ར་ཝ་རྨ་དང་། བོད་ཀྱི་ལོ་ཙྭ་བ་རིན་ཆེན་བཟང་པོས་བསྒྱུར་ཞིང་ཞུས་ཏེ་གཏན་ལ་ཕབ་པའོ། །ཨོཾ་སྭ་སྟི། །རྒྱལ་བསྟན་པད་ཚལ་ཕན་བདེའི་དྲུ་གསུང་ཅན། །བཤད་སྒྲུབ་འདབ་རྒྱས་རྣམ་གྲོལ་སྦྲང་རྩིའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེ། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། མངྒ་ལཾ།། །།