དཔལ་གསང་བ་འདུས་པའི་སྒྲུབ་ཐབས་རྣལ་འབྱོར་དག་པའི་རིམ་པ།
དཔལ་གསང་བ་འདུས་པའི་སྒྲུབ་ཐབས་རྣལ་འབྱོར་དག་པའི་རིམ་པ་བཞུགས། །
ཁྱབ་བདག་རྡོ་རྗེ་སེམས་དཔའ་བསྙེན་སྒྲུབ་བཞིའི་སྦྱོར་བས་མཉེས་པར་བྱེད་པའི་འདུས་པའི་སྒྲུབ་ཐབས་རྣལ་འབྱོར་དག་པའི་རིམ་པ་ཞེས་བྱ་བ།གང་གི་ཡིད་འཕྲོག་ཞབས་ཀྱི་པདྨ་ཟུང༌། །འབྲལ་མེད་དད་པས་གཙུག་ན་སྟེན་བྱེད་པ། །དེ་ཡི་བློ་གྲོས་ཡར་ངོའི་ཟླ་བཞིན་དུ། །རྒྱས་མཛད་འཇམ་དབྱངས་བླ་མ་དེ་ལ་འདུད། །འོད་གསལ་ལྷ་ཡི་ལམ་ལས་འཁྲུངས། །ཟུང་འཇུག་དབང་པོའི་གཞུ་ལྟ་བུ། །དཔལ་ལྡན་དང་པོའི་མགོན་དེ་ཡི། །མཛད་པས་ཁྱེད་རྣམས་སྐྱོང་གྱུར་ཅིག །གར་མཁན་མཆོག་དེས་འགྲོ་བ་འདུལ་བའི་ཕྱིར། །སྣ་ཚོགས་སྤྲུལ་པའི་ཉམས་ཀྱིས་གར་མཛད་པས། །ཉིད་སྐུའི་ཆ་ཤས་སུམ་ཅུ་རྩ་གཉིས་ཀྱི། །འཁོར་ལོ་མཆོག་ཏུ་སྤྲུལ་ལ་ཕྱག་འཚལ་
ནས། །མི་བསྐྱོད་འཁོར་ལོའི་རྣལ་འབྱོར་གྱིས། །ཐ་མལ་སྣང་ཞེན་ཀུན་བཅད་ནས། །གང་སྣང་ལྷ་ཡི་འཁོར་ལོར་ནི། །འཆར་བའི་སྒྲུབ་པ་བདག་གིས་བཤད། །ཚུལ་འདི་མཁས་པའི་འཕྲེང་བས་གསལ་མཛད་མོད། །དེ་ལྟ་ནའང་འདིར་འབད་འགལ་ཅི་ཡོད། །མཛེས་ཤིང་ཡིད་འཕྲོག་ལང་ཚོའི་དཔལ་ཅན་ཀྱང༌། །རྒྱན་བཟང་བཏགས་པས་མཛེས་པ་མ་མཐོང་ངམ། །འདིར་དང་པོར་སངས་རྒྱས་ཀྱི་ཐེག་པའི་བསམ་པ་སྨོན་པ་དང་འཇུག་པའི་སེམས་སྦྱོང་བ་ལ་ལེགས་པར་བསླབས་ཏེ། དཔལ་གསང་བ་འདུས་པའི་དཀྱིལ་འཁོར་དུ་དབང་བསྐུར་བ་ཐོབ་ཅིང༌། དེའི་དུས་སུ་ཁས་བླངས་པའི་དམ་ཚིག་དང་སྡོམ་པ་སྲུང་བ་ལ་བརྩོན་པ། བླ་མ་ལས་ལྷའི་རྣལ་འབྱོར་སྒོམ་པའི་གནང་བ་ཐོབ་པའི་རྟེན་གྱི་གང་ཟག་
གིས། གནས་ཀྱི་དེ་ཉིད་མེ་ཏོག་དང་འབྲས་བུ་དང་ཆུ་ཡིད་དུ་འོང་བས་བརྒྱན་པའི་རི་བོའམ། སྐྱེ་བོའི་རྒྱུན་ལུགས་ཀྱིས་དབེན་པའི་ས་ཕྱོགས་གཞན་ཡང་རུང་སྟེ། ཡིད་དང་མཐུན་པའི་དགོན་པར་འཇམ་པའི་སྟན་ལ་ཁ་ཤར་དུ་ཕྱོགས་པས། སེམས་དཔའི་དཀྱིལ་མོ་ཀྲུང་གིས་འདུག་སྟེ། སྔོན་འགྲོའི་གཏོར་མ་བཏང་ནས་སྒྲུབ་པའི་བར་ཆད་ཞི་བའི་འཕྲིན་ལས་བཅོལ་ལོ། །དེ་ནས་བདག་གཉིས་སུ་འཛིན་པའི་བག་ཆགས་ཀྱིས་བསླད་པའི་དབང་གིས། འགྲོ་བ་གསུམ་པོ་མ་རིག་པའི་མུན་པས་རྨོངས་པར་བྱས་པ་རྣམས་ལ་བལྟས་ལ། སྙིང་རྗེ་ཆེན་པོའི་སེམས་བསྐྱེད་དེ། རང་མི་བསྐྱོད་རྡོ་རྗེར་གསལ་བའི་ཐུགས་ཀར། སྣ་ཚོགས་པདྨ་དང་ཉི་མ་ལ་གནས་པའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས། རང་བཞིན་གྱི་གནས་ནས་བླ་མ་དང་གཉིས་སུ་མེད་པའི་མི་བསྐྱོད་པའི་དཀྱིལ་འཁོར་སྤྱན་དྲངས་ལ། འོད་ཟེར་རང་གི་སྙིང་ཁར་བསྡུའོ། །སྙིང་ཁའི་ས་བོན་གྱི་འོད་ཟེར་ལས་བྱུང་བའི་མཆོད་པའི་ལྷ་མོ་རྣམས་ཀྱིས་མཆོད་པར་བསམས་ལ། ༀ་སརྦ་ཏ་ཐཱ་ག་ཏ་ཨརྒྷཾ་པུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲི་ཡེ་ཨཿཧཱུཾ་གིས་མཆོད་ཡོན་དང༌། དེ་བཞིན་དུ་ཨརྒྷཾ་གྱི་གནས་སུ་པཱ་ཏྱཾ་གིས་ཞབས་བསིལ་དང༌། པུཥྤེས་མེ་ཏོག་དང༌། དྷུ་པེས་བདུག་སྤོས་དང༌། ཨཱ་ལོ་ཀེས་མར་མེ་དང༌། གན་དྷེས་དྲི་དང༌། ནཻ་ཝེ་ཏེས་ཞལ་ཟས་དང༌། ཤཔྟས་རོལ་མོ་དང༌། རཱུ་པས་གཟུགས་དང༌། ཤཔྟས་སྒྲ་དང༌། གན་དྷེས་དྲི་དང༌། ར་སས་རོ་དང༌། སྤརྴ་ཞེས་སྦྱར་བས་རེག་བྱ་མཆོག་གིས་མཆོད་དེ་ལྷ་མོ་རྣམས་ས་བོན་ལ་
བསྡུས་ལ། གང་ཞིག་གཟུགས་དང་ཚོར་བ་འདུ་ཤེས་འདུ་བྱེད་དང༌། །རྣམ་པར་ཤེས་དང་སྐྱེ་མཆེད་དྲུག་དང་དབང་པོ་དྲུག །ས་ཆུ་མེ་དང་རླུང་དང་ནམ་མཁའ་ཐམས་ཅད་ནི། །བྱང་ཆུབ་སེམས་འདྲ་རྒྱ་ཆེན་དེ་ལ་ཕྱག་འཚལ་ལོ། །གཏི་མུག་ཉེས་པ་འདོད་ཆགས་རྡོ་རྗེ་ཆོས་བཅས་གང༌། །རིག་པའི་སྦྱོར་བ་ལས་བྱུང་རྟག་ཏུ་རབ་འབྲེལ་བར། །རྣམ་པ་སྣ་ཚོགས་དགའ་བས་མྱོས་པའི་དངོས་གྱུར་པ། །བྱང་ཆུབ་སེམས་འདྲ་རྒྱ་ཆེན་དེ་ལ་ཕྱག་འཚལ་ལོ། །སྡུད་དང་དགའ་དང་རྣམ་པ་དེ་བཞིན་མི་འགྱུར་དང། །རྒྱུ་དང་འབྲས་བུའི་རང་བཞིན་སེམས་སུ་རྗེས་ཐོགས་ཆོས། །རྨོངས་དང་ཞེ་སྡང་འདོད་ཆགས་སྒྲིབ་པ་རྡོ་རྗེ་སྟེ། །བྱང་ཆུབ་སེམས་འདྲ་རྒྱ་ཆེན་དེ་ལ་ཕྱག་འཚལ་ལོ། ཞེས་པས་ལྷ་སུམ་ཅུ་སོ་གཉིས་ལ་ཕྱག་བྱའོ། །དེ་ནས། གང་ཞིག་ཐོག་མེད་སྲིད་པའི་ཆུ་ཀླུང་དུ། །མ་ལུས་ཀུན་རྟོག་གིས་བསགས་རྙོག་པ་རྣམས། །ཐུགས་རྗེ་ཆེ་ལྡན་སྤྱན་སྔར་དེ་དག་ནི། །ཆོ་ག་བཞིན་དུ་ཐམས་ཅད་བཤགས་པར་བགྱི། །རྫོགས་སངས་རྒྱས་དང་བྱང་ཆུབ་སེམས་དཔའ་དང༌། །འཕགས་པ་གཞན་གྱིས་དགེ་བ་གང་མཛད་པ། །དེ་དག་ཀུན་ལ་ཡང་དག་ཡི་རང་བཞིན། །བྱང་ཆུབ་ཏུ་ནི་ཡོངས་སུ་བསྔོ་བར་བགྱི། །ཡིད་ཀྱི་རོལ་པ་དྲི་མེད་ཟླ་འདྲས་བསྒྲུབས། །སྙིང་རྗེ་དམ་པ་མཐའ་ཡས་པ་ཡི་ཐབས། །རང་གི་ཡིད་ལ་གནས་པར་གྱུར་པ་ཡི། །བདེར་གཤེགས་རྣམས་ལ་རྟག་ཏུ་སྐྱབས་སུ་མཆི། །རྟོག་པ་མ་ལུས་པ་ལས་ངེས་གྲོལ་ཞིང༌། །སེམས་དཔའ་དམ་
པ་རྣམས་ཀྱི་ཕུན་ཚོགས་གཞི། །དངོས་པོ་ཐམས་ཅད་རོ་གཅིག་ངོ་བོ་ཉིད། །དམ་པའི་ཆོས་ལ་རྟག་ཏུ་སྐྱབས་སུ་མཆི། །འཆིང་བ་རྣམས་ལས་ཡང་དག་གྲོལ་གྱུར་ཅིང༌། །སྙིང་རྗེ་མཆོག་གིས་བསྐྲུན་པའི་དཔལ་དང་ལྡན། །རབ་ཏུ་དགའ་སོགས་ས་ལ་རབ་བཞུགས་པ། །བརྟུལ་ཞུགས་དབང་པོའི་ཚོགས་ལ་སྐྱབས་སུ་མཆི། །བསམ་དང་རྣམ་པར་སྨིན་པ་དག་གྱུར་པས། །སྒྲིབ་པ་ཀུནགྱི་བག་ཆགས་ཡང་དག་འབྱིན། །ལྷག་པར་མོས་པས་རྣམ་པར་བརྒྱན་པ་ཡི། །སེམས་ནི་བྱང་ཆུབ་དམ་པར་བསྐྱེད་པར་བགྱི། །བདེར་གཤེགས་སྲས་བཅས་རྣམས་ཀྱི་ལམ་གཅིག་པུ། །སྦྱིན་སོགས་རྣམ་བཅུ་དཀར་པོའི་ཡོན་ཏན་ཚུལ། །རྫོགས་སངས་རྒྱས་བདག་མ་ལུས་ངོ་བོའི་བློས། །ཡང་དག་ཉིད་དུ་ད་ནི་གནས་པར་བགྱི། ཞེས་འཁོར་གསུམ་རྨི་ལམ་བཞིན་དུ་བལྟས་ནས་སྡིག་པ་བཤགས་པ་དང༌། གང་ཟག་ལྔའི་དགེ་བ་ལ་ཡི་རང་ཞིང་དགེ་བ་བསྔོ་བ་དང༌། དཀོན་ཅོག་གསུམ་ལ་སྐྱབས་སུ་འགྲོ་བ་དང༌། བྱང་ཆུབ་ཀྱི་མཆོག་ཏུ་སེམས་སྐྱེད་པ་དང༌། ལམ་ལ་བརྟེན་པར་ཡི་དམ་འཆའ་བ་རྣམས་ཀྱི་དོན་ལེགས་པར་དྲན་པར་བྱས་ལ་བྱའོ། །རིགས་ལྔ་སྤྱི་དང་སོ་སོའི་དམ་ཚིག་སྔར་བཟུང་བ་ཐམས་ཅད་ལ་དེ་ལས་འདའ་བར་མི་བྱ་བར་བརྟན་པོར་གཟུང་ངོ་སྙམ་དུ་བསམས་ལ། སངས་རྒྱས་བྱང་ཆུབ་སེམས་དཔའ་ཀུན། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བྱ་བ་ནི། །དུས་འདི་ནས་ནི་བཟུང་ནས་
ནི། །བྱང་ཆུབ་སྙིང་པོར་མཆིས་ཀྱི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང༌། །དགེ་བའི་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་བདག་གིས་གཟུང༌། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བདག་གིས་གཟུང༌། །རྡོ་རྗེ་རིགས་མཆོག་ཆེན་པོ་ཡི། །རྡོ་རྗེ་དྲིལ་བུ་ཕྱག་རྒྱ་ཡང༌། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་དང་གསང་བ་ཐེག་པ་གསུམ། །དམ་ཆོས་སོ་སོར་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་སོ་སོར་གཟུང༌། །མཆོད་པའི་ལས་ནི་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང༌། །
མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་དབྱུང་ཞིང༌། །སེམས་ཅན་མྱ་ངན་འདས་ལ་དགོད། ཅེས་བརྗོད་དེ་ཚོགས་ཞིང་རང་གནས་སུ་གཤེགས་སོ། །ཚོགས་ཞིང་སྤྱན་དྲང་པ་ནས་སྡོམ་གཟུང་བའི་བར་ནི་སྙིང་རྗེ་ཆེན་པོ་ལ་དམིགས་པའི་དེ་ཉིད་ཀྱིས་མཚོན་པའི་དོན་ལ་འགྲེལ་པ་རྣམས་ཀྱིས་མན་ངག་གིས་ཁ་བསྐང་བ་སྟེ། མཐུན་རྐྱེན་བསྟེན་པའི་ཕྱིར་བསོད་ནམས་ཀྱི་ཚོགས་བསགས་པའོ། །དེ་ནས་ཆོས་རྣམས་ཀྱི་ངོ་བོ་རྒྱུ་འབྲས་གསུམ་རང་གི་མཚན་ཉིད་ཀྱིས་གྲུབ་པས་སྟོང་པའི་སྟོང་པ་ཉིད་དུ་བསྒོམས་ཏེ་ཐ་མལ་གྱི་སྣང་བ་ཐམས་ཅད་བསལ་ལ། ༀ་སྭ་བྷཱ་ཝ་ཤུདྡྷ་སརྦ་དྷརྨཱཿསྭ་བྷཱ་ཝ་ཤུད་དྷོ྅ཧཾ། ཞེས་བརྗོད་དོ། །སྟོང་པའི་ངང་ལས་པཾ་ལས་སྣ་ཚོགས་པདྨའི་ལྟེ་བར་ཨཱ་ལས་བྱུང་བའི་ཉི་མའི་དཀྱིལ་འཁོར་གྱི་སྟེང་དུ། བྷྲུཾ་སེར་པོ་ལས་བྱུང་བའི་འཁོར་ལོ་སེར་པོ་རྩིབས་བཅུ་པ་གཡས་སྐོར་དུ་མགྱོགས་པར་འཁོར་བ། རྡོ་རྗེ་འབར་བའི་སྤྲིན་གྱི་ཕྲེང་བ་ཕྱོགས་བཅུར་འཕྲོ་བ། ལྟེ་བའི་ནང་གི་དབུས་སུ་སྣ་ཚོགས་པདྨ་དང་ཟླ་བའི་གདན། ཕྱོགས་མཚམས་ཀྱི་རྩིབས་བརྒྱད་ཀྱི་རྩེ་མོ་དང་ལྟེ་བའི་ནང་གི་སྟེང་འོག་གི་རྩིབས་ལ་ཅུང་ཟད་མ་རེག་པར་སྣ་ཚོགས་པདྨ་དང་ཉི་མའི་གདན་རེ་རེ་བསམ་མོ། །གདན་དབུས་མའི་སྟེང་དུ་རང་ཉིད་རྡོ་རྗེ་འཆང་སྐུ་མདོག་དཀར་པོ་དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་གསུམ་རྡོ་རྗེ་འཁོར་ལོ་པདྨ། གཡོན་གསུམ། དྲིལ་བུ། རིན་ཆེན། རལ་གྲི་འཛིན་པ།
འོད་ཀྱི་དཀྱིལ་འཁོར་གྱིས་རྣམ་པར་མཛེས་པ། མཚན་སུམ་ཅུ་རྩ་གཉིས་དང་དཔེ་བྱད་བརྒྱད་ཅུས་བརྒྱན་པ། རིན་པོ་ཆེའི་རྒྱན་དང་དར་སྣ་ཚོགས་ཀྱི་ན་བཟའ་ཅན། རང་དང་འདྲ་བའི་རྡོ་རྗེ་དབྱིངས་ཀྱི་དབང་ཕྱུག་མས་འཁྱུད་པའི་ཐུགས་ཀར་ཡེ་ཤེས་སེམས་དཔའ་དང༌། གནས་གསུམ་དུ་རྡོ་རྗེ་གསུམ་གྱི་ངོ་བོའི་ཡི་གེ་གསུམ་གྱིས་མཚན་པར་བསྒོམ་མོ། །ཡབ་ཡུམ་སྙོམས་པར་ཞུགས་པའི་སྙིང་ཁའི་ཧཱུཾ་ཡིག་གི་འོད་ཟེར་གྱིས་མི་བསྐྱོད་པ་ལ་ཁྲོ་བོ་བཅུས་བསྐོར་བ་སྤྱན་དྲངས་པ་ཁའམ་སྤྱི་བོ་ནས་ཞུགས། རྡོ་རྗེའི་ལམ་ནས་ཡུམ་གྱི་པདྨར་ཞུ་བའི་ཐིག་ལེ་བཅུ་གཅིག་ཧཱུཾ་རིང་པོ་བཅུ་གཅིག་ཏུ་གྱུར། དེ་རྣམས་ཡོངས་སུ་གྱུར་པ་ལས་མི་བསྐྱོད་པ་དང་ཁྲོ་བོ་བཅུར་གྱུར་པའི་མི་བསྐྱོད་པ་ནག་པོ་ནག་དཀར་དམར་བའི་ཞལ་གསུམ་ཕྱག་དྲུག་ཕྱག་མཚན་སྔར་བཤད་པ་ལྟ་བུ་འཛིན་པར་གྱུར་ནས་ཐུགས་ཀར་དྲངས། བཛྲ་དྷྲིཀ་ཅེས་པས་ཐུགས་ཀ་ནས་ཕྱིར་ཕྱུང༌། ཕྱོགས་བཅུར་འཕྲོས་སངས་རྒྱས་ཀྱི་མཛད་པ་མཛད། ཁྱད་པར་དུ་ཞེ་སྡང་ཅན་རྣམས་ཀྱི་ཞེ་སྡང་སྦྱངས་ནས་མི་བསྐྱོད་པའི་གོ་འཕང་ལ་བཀོད། སྤྲུལ་པ་རྣམས་གཅིག་ཏུ་འདུས་ཡེ་ཤེས་པ་དང་དབྱེར་མེད་དུ་འདྲེས་ནས་རང་ལ་རྗེས་སུ་ཞུགས་པས། སྔར་གྱི་ཟླ་བ་ཉི་གདན་དུ་གྱུར་པའི་སྟེང་ན་རང་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག་ཁྲོ་བ་དང་འདོད་ཆགས་ཆེན་པོ་འདྲེས་པའི་ཉམས་ཅན་མཆེ་བ་ཅུང་ཟད་གཙིགས་པ་རྩ་ཞལ་ནག་པོ་དྲག་པོ་དང༌། གཡས་ཞལ་དཀར་པོ་ཞི་བ་དང༌། གཡོན་ཞལ་དམར་པོ་ཆགས་པའི་ཉམས་ཅན། ཕྱག་གཡས་ཀྱི་དང་
པོ་ན་རྡོ་རྗེ་རྩེ་དགུ་པ། ལྷག་མའི་ཕྱག་མཚན་དང་རྒྱན་ལ་སོགས་པ་སྔར་བཤད་པ་ལྟ་བུ། འོད་དམར་པོ་འབར་ཞིང་འཁྲུག་པའི་དབུས་ན། རྡོ་རྗེ་དབྱིངས་ཀྱི་དབང་ཕྱུག་མ་རེག་བྱ་རྡོ་རྗེ་མ་སྔོན་མོ་ཞལ་གསུམ་ཕྱག་དྲུག་པར་གྱུར་པ་དང་སྙོམས་པར་འཇུག་པའི་ཚུལ་གྱིས་བཞུགས་པ་སེམས་དཔའ་གསུམ་གྱི་བདག་ཉིད་ཅན་དུ་བསམ་སྟེ། བཀའི་འཁོར་ལོའི་གཙོ་བོ་སྐྱེད་པའི་དེ་ཉིད་དོ། །གཤིན་རྗེ་གཤེད་ནག་པོ་རྣམ་སྣང་གི་དབུ་རྒྱན་ཅན། རྩ་ཞལ་ནག་གཡས་དཀར་གཡོན་དམར་བའི་ཞལ་གསུམ། ཕྱག་དྲུག་གི་གཡས་དབྱུག་པ་འཁོར་ལོ་རྡོ་རྗེ། གཡོན་ཐུགས་ཀར་ཞགས་པ་བཟུང་ནས་སྡིགས་མཛུབ་མཛད་ཅིང༌། དྲིལ་བུ་དགྲ་སྟ་འཛིན་པ། ཐུགས་ཀར་དྲངས། ཡ་མཱནྟ་ཀྲི་ཏ་ཀྱིས་ཕྱུང་སྟེ་ཤར་གྱི་རྩིབས་ཀྱི་རྩེ་མོའི་སྟེང་གི་རང་གི་གདན་ལ་གཡོན་བརྐྱང་གིས་འཁོད། དེ་བཞིན་དུ་སྦྱར་ལ། ཤེས་རབ་མཐར་བྱེད་དཀར་པོ་རིན་འབྱུང་གི་དབུ་རྒྱན་ཅན། དཀར་ནག་དམར་བའི་ཞལ་གསུམ། ཕྱག་དྲུག་གི་གཡས་རྡོ་རྗེ་རྡོ་རྗེས་མཚན་པའི་དབྱུག་པ་དཀར་པོ་རལ་གྲི་འཛིན་ཅིང༌། གཡོན་སྔ་མ་དང་འདྲ་བ་པྲཛྙཱན་ཏ་ཀྲི་ཏ་ཀྱིས་དབྱུང༌། རྟ་མགྲིན་དམར་པོ་འོད་དཔག་མེད་ཀྱི་དབུ་རྒྱན་ཅན། དམར་ནག་དཀར་བའི་ཞལ་གསུམ་ཕྱག་དྲུག་གི་གཡས་པདྨ། རལ་གྲི། གཏུན་ཤིང༌། གཡོན་དྲིལ་བུ་བསྙེམས་པ་དང་བཅས་པས་དཀུར་བརྟེན་ཅིང་དགྲ་སྟ་ཞགས་པ་འཛིན་པ། པད་མཱན་ཏ་ཀྲི་ཏ་ཀྱིས་དབྱུང༌། བགེགས་མཐར་བྱེད་སྔོན་པོ་དོན་གྲུབ་ཀྱི་དབུ་རྒྱན་ཅན། སྔོ་དཀར་དམར་བའི་ཞལ་གསུམ། ཕྱག་དྲུག་གི་གཡས་སྣ་ཚོགས་རྡོ་རྗེ། འཁོར་ལོ། གཏུན་ཤིང་འཛིན་ཞིང༌། གཡོན་གཤིན་རྗེ་
གཤེད་དང་འདྲ་བ་བིགྷྣན་ཏ་ཀྲི་ཏ་ཀྱིས་དབྱུང༌། མི་གཡོ་བ་ནག་པོ་རྣམ་སྣང་གི་དབུ་རྒྱན་ཅན། ནག་དཀར་དམར་བའི་ཞལ་གསུམ། ཕྱག་དྲུག་གི་གཡས་རལ་གྲི། རྡོ་རྗེ། འཁོར་ལོ། གཡོན་ཐུགས་ཀར་སྡིགས་མཛུབ། དགྲ་སྟ་ཞགས་པ་འཛིན་པ། ཨ་ཙ་ལས་དབྱུང༌། འདོད་རྒྱལ་སྔོན་པོ་རིན་འབྱུང་གི་དབུ་རྒྱན་ཅན། ནག་དཀར་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་ཧཱུཾ་མཛད་ཀྱི་ཕྱག་རྒྱ་འཆིང་ཞིང༌། ལྷག་མ་གཡས་རྡོ་རྗེ། རལ་གྲི། གཡོན་ཞགས་པ། ལྕགས་ཀྱུ་འཛིན་པ་ཊཀྐི་རཱ་ཛས་དབྱུང༌། ཧཱུཾ་མཛད་ཀྱི་ཕྱག་རྒྱ་ནི། ལག་པ་གཉིས་རྡོ་རྗེ་ཁུ་ཚུར་དུ་བྱས་པའི་རྒྱབ་སྦྱར་ནས་མཐེའུ་ཆུང་གཉིས་སྦྲེལ་ཞིང་སྡིགས་མཛུབ་གཉིས་བརྐྱང་པའོ། །དབྱུག་སྔོན་ཅན་སྔོན་པོ་འོད་དཔག་མེད་ཀྱི་དབུ་རྒྱན་ཅན། སྔོ་དཀར་དམར་བའི་ཞལ་གསུམ། ཕྱག་དྲུག་གི་གཡས་རྡོ་རྗེས་མཚན་པའི་དབྱུག་པ་སྔོན་པོ། རལ་གྲི། འཁོར་ལོ། གཡོན་ཐུགས་ཀར་ཞགས་པ་བཟུང་ནས་སྡིགས་མཛུབ་མཛད་ཅིང༌། པདྨ། དགྲ་སྟ་འཛིན་པ་ནཱི་ལ་དཎྜས་དབྱུང༌། སྟོབས་པོ་ཆེ་སྔོན་པོ་དོན་གྲུབ་ཀྱི་དབུ་རྒྱན་ཅན། ནག་དཀར་དམར་བའི་ཞལ་གསུམ། ཕྱག་དྲུག་གི་གཡས་རྡོ་རྗེས་མཚན་པའི་དབྱུག་པ་ནག་པོ། རྡོ་རྗེ། འཁོར་ལོ། གཡོན་ཐུགས་ཀར་ཞགས་པ་བཟུང་ནས་སྡིགས་མཛུབ་མཛད་ཅིང༌། རྩེ་གསུམ། དགྲ་སྟ་འཛིན་པ་མ་ཧཱ་བཱ་ལས་དབྱུང༌། གཙུག་ཏོར་འཁོར་ལོས་བསྒྱུར་བ་སྔོན་པོ་མི་བསྐྱོད་པའི་དབུ་རྒྱན་ཅན། སྔོ་དཀར་དམར་བའི་ཞལ་གསུམ། ཕྱག་དྲུག་གི་དང་པོ་གཉིས་གཙུག་ཏོར་གྱི་
ཕྱག་རྒྱ་འཆིང་ཞིང༌། གཡས་ལྷག་མ་རྡོ་རྗེ། པདྨ། གཡོན་སྡིགས་མཛུབ། རལ་གྲི་འཛིན་པ་ཨུཥྞཱི་ཥ་ཙཀྲ་ཝརྟིས་དབྱུང༌། གཙུག་ཏོར་གྱི་ཕྱག་རྒྱ་ནི། ལག་པ་གཉིས་གན་རྐྱལ་དུ་མཉམ་པོར་བརྐྱང་པའི་སྲིན་ལག་གི་སེན་མོའི་སྟེང་དུ་མཐེ་བོའི་སེན་མོ་བཟུང་ནས་མཐེའུ་ཆུང་གཉིས་ཁབ་ལྟར་བྱ། གུང་མོ་གཉིས་རྩེ་སྤྲད་ལ་མཛུབ་མོ་དག་དབུས་སུ་རྭའི་རྣམ་པར་བྱ་བར་ཨ་བྷྱ་ཀ་རས་བཤད་དོ། །གནོད་མཛེས་རྒྱལ་པོ་སྔོན་པོ་མི་བསྐྱོད་པའི་དབུ་རྒྱན་ཅན། ནག་དཀར་དམར་བའི་ཞལ་གསུམ། ཕྱག་དྲུག་གི་གཡས་རྡོ་རྗེ། འཁོར་ལོ། རིན་པོ་ཆེ། གཡོན་ཐུགས་ཀར་ཞགས་པ་བཟུང་ནས་སྡིགས་མཛུབ་མཛད་ཅིང༌། པདྨ། རལ་གྲི་འཛིན་པ་སུམ་བྷ་རཱ་ཛས་དབྱུང་ལ་རང་གི་གདན་ལ་དགོད། ཁྲོ་བོ་བཅུ་པོ་ཐམས་ཅད་ཀྱང་དབུ་སྐྲ་དམར་སེར་གྱེན་དུ་བརྫེས་ཤིང་སྨིན་མ་དང་སྨ་ར་དམར་སེར་རབ་ཏུ་འབར་བ། ཞལ་རེ་རེ་ལ་ཡང་དམར་ལ་ཟླུམ་པའི་སྤྱན་གསུམ་གསུམ་དང་ལྡན་ཞིང༌། མཆེ་བ་རྣོན་པོ་བཞི་བཞི་གཙིགས་པ། ཧ་ཧའི་གད་རྒྱངས་དྲག་པོ་སྒྲོགས་ཤིང༌། བཞིན་ཤིན་ཏུ་འགྱུར་བའི་ཁྲོ་གཉེར་ཅན། གསུས་ཁྱིམ་ཆེ་ཞིང་གསུས་པ་འཕྱང་བ། རིན་པོ་ཆེའི་རྒྱན་སྣ་ཚོགས་པས་བརྒྱན་ཅིང་སྟག་གི་པགས་པའི་ཤམ་ཐབས་ཅན། སྦྲུལ་མཐའ་ཡས་སྔོན་པོས་དབུ་སྐྲ་བཅིངས་ཤིང༌། འཇོག་པོ་དམར་པོས་རྣ་རྒྱན་བྱས་པ། རིགས་ལྡན་ཁྲ་བོས་དཔུང་པ་ལ་བརྒྱན་ཞིང་། པདྨ་དཀར་པོས་མགུལ་རྒྱན་བྱས་པ། དུང་སྐྱོང་སེར་པོས་ལག་གདུབ་བྱས་ཤིང། སྟོབས་རྒྱུ་ལྗང་གུས་མཆོད་ཕྱིར་ཐོགས་བྱས་པ། ནོར་རྒྱས་ཀྱི་བུ་བདུད་རྩིའི་ཁ་དོག་
ལྟ་བུས་སྐ་རགས་བྱས་ཤིང༌། པདྨ་ཆེན་པོ་དཀར་པོས་རྐང་གདུབ་བྱས་པ། སྐུ་ལས་སྐྱེས་པའི་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་གདུག་པ་ཅན་ཐམས་ཅད་ཚར་གཅོད་པའི་ཚུལ་གྱིས་བཞུགས་པར་བསམ་སྟེ། འཁོར་ཁྲོ་བོ་སྐྱེད་པའི་དེ་ཉིད་དོ། །དེ་ནས་འོག་གི་གནོད་མཛེས་ལ་བལྟས་པས་དེས་སྤྲུལ་པའི་གནོད་མཛེས་གཉིས་པ་འོངས་ནས་མདུན་དུ་འདུག་སྟེ་བདག་གིས་ཅི་ཞིག་བགྱི་ཞེས་བཀའ་ནོད་པ་ལ། ༀ་སུམྦྷ་ནི་སུམྦྷ་ཧཱུཾ། གྱཧྞ་གྱཧྞ་ཧཱུཾ། གྱཧྞ་པ་ཡ་གྱཧྞ་པ་ཡ་ཧཱུཾ། ཨཱ་ན་ཡ་ཧོ། བྷ་ག་ཝན། བི་དྱ་རཱ་ཛ་ཧཱུཾ་ཕཊ། ཅེས་བརྗོད་དེ། གནོད་མཛེས་ལ་བོས་ནས་བགེགས་རྣམས་ཟུང་ལ་ཁུག་ཅིག་ཅེས་བཀའ་བསྒོས་པས། གནོད་མཛེས་ཀྱི་ཕྱག་གཡས་ཀྱི་དང་པོའི་རྡོ་རྗེ་དེ། རྡོ་རྗེ་ལྕགས་ཀྱུར་གྱུར་ནས། བགེགས་ཀྱི་གཙོ་བོ་ཕྱོགས་སྐྱོང་བཅུའི་སྙིང་ནས་ལྕགས་ཀྱུས་བཀུག །མགྲིན་པ་ཞགས་པས་བཅིངས་ཏེ་བཀུག་ནས་ཁྲོ་བོ་བཅུ་ལ་གཏད་པས། ཕྱི་རོལ་དུ་ཧཱུཾ་རིང་པོ་ལས་གྲུབ་པའི་ཁྲོན་པཔ་འབྲུབ་ཁུང་གི་རྣམ་པ་ཅན་དུ་བཅུག་པར་བསམ་མོ། །སྟེང་འོག་གི་བགེགས་སྟེང་འོག་ཏུ་འཇུག་པ་མི་བདེན་རིམ་པ་བཞིན་ཤར་གྱི་ཤར་དང་ནུབ་ཀྱི་ནུབ་ཏུ་གཞུག་གོ །དེ་ནས་བྱང་གི་བདུད་རྩི་འཁྱིལ་བས་སྤྲུལ་པའི་བདུད་རྩི་འཁྱིལ་པ་གཉིས་པ་དེ། སྟོད་ཁྲོ་བོ་བདུད་རྩི་འཁྱིལ་བའི་རྣམ་པ་ཅན་ལ། ལྟེ་བ་མན་ཆད་མདུད་རྩེ་གཅིག་པའི་དབྱིབས་ཅན་གྱི་ཕུར་བུ་མེ་དཔུང་རབ་ཏུ་འབར་བ་བཅུར་གྱུར་ཏེ། ཤར་ནས་བརྩམས་ཏེ་ཕྱོགས་བཞི་དང༌། མེ་ནས་བརྩམས་ཏེ་མཚམས་
བཞི་དང༌། སྟེང་འོག་གི་ཕྱོགས་སྐྱོང་འཁོར་དང་བཅས་པའི་མགོ་བོར་ཟུག་པར་བསམ་མོ། །དེ་ནས་རང་གིས་ཡིད་ཀྱིས་གནོད་མཛེས་ལ་ཕུར་བུ་སྐུལ་བའི་བཀའ་བསྒོས་པས་གནོད་མཛེས་ལངས་ནས། ༀ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྚན་ཕཊ་ཕཊ། ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ་ཕཊ། ཧཱུཾ་ཧཱུཾ་ཧཱུཾབཛྲ་ཀཱི་ལ་ཡ། བཛྲ་དྷ་ར་ཨཛྙཱ་པ་ཡ་ཏི་སརྦ་བིགྷྣཾ་ཀཱ་ཡ་ཝ་ཀ་ཙིཏྟ་བཛྲ་ཀཱི་ལ་ཡ་ཧཱུཾ་ཧཱུཾ་ཧཱུཾ་ཕཊ་ཕཊ། ཅེས་བརྗོད་ཅིང༌། ཕྱག་མཚན་རྡོ་རྗེ་ལྕགས་ཀྱུ་རྡོ་རྗེ་ཐོ་བ་མེ་འབར་བར་འགྱུར་པས། ཤར་ནས་བརྩམས་ཏེ་རིམ་པ་བཞིན་ཕུར་བུའི་སྤྱི་བོ་ནས་བརྡུངས་པས། བགེགས་རྣམས་ཀྱི་སྤྱི་བོ་ནས་རྐང་མཐིལ་གྱི་བར་དུ་ཕུར་བུ་བཏབ་པས། ལུས་ངག་ཡིད་གསུམ་གཡོ་འགུལ་མེད་པར་བསམས་ལ། སྤྲུལ་པའི་གནོད་མཛེས་འོག་གི་གནོད་མཛེས་ལ་བསྡུའོ། །འདིར་མདོ་བསྲེ་ལས། ༀ་གྷ་གྷ་ཞེས་བྱ་བ་ལ་སོགས་པའི་སྔགས་ཀྱིས་གནོད་མཛེས་ལ་བཀའ་བསྒོས་ཏེ་ཕུར་བུ་གདབ་བོ། ཞེས་སྔགས་འདི་རང་གིས་གནོད་མཛེས་ལ་བཀའ་བསྒོ་བའི་སྔགས་སུ་གསུངས་པ་དང༌། རྡོ་རྗེ་སེམས་དཔའི་སྒྲུབ་ཐབས་ལས། དེ་ནས་གནོད་མཛེས་རྒྱལ་པོ་ལངས་ནས་སྔགས་བརྗོད་ཅིང༌། རྡོ་རྗེ་ཐོ་བས་བརྡུང་བར་བསམ་པར་བྱའོ། ཞེས་སྔགས་འདི་གནོད་མཛེས་ཀྱིས་བརྗོད་ནས་ཕུར་བུ་ཐོ་བས་བརྡུང་བར་བསྒོམ་པར་བཤད་པ་གཉིས་འགལ་ལོ་སྙམ་ན། འདིར་བཀའ་བསྒོ་བའི་ཡུལ་ནི། སྒྲོན་གསལ་ལས། བཛྲ་ཀཱི་ལའི་དོན་རྡོ་རྗེ་ཕུར་བུ་ལ་བོས་ཏེ། བཛྲ་དྷ་ར་སོགས་ཀྱི་དོན་རྡོ་རྗེ་འཆང་གི་བཀའ་
ཉོན་ཅིག་ཅེས་བསྐུལ་ནས། གདུག་པ་རྣམས་ཀྱི་ལུས་ངག་ཡིད་གསུམ་ལ་ཕུར་བུས་ཐོབ་ཅེས་པའི་དོན་དུ་བཤད་པས་བཀའ་བསྒོས་ནི་རྡོ་རྗེ་ཕུར་བུའོ། །དེས་ན་མདོ་བསྲེའི་དོན་ནི་རང་གིས་ཡིད་ཀྱིས་གནོད་མཛེས་ལ་ཕུར་བུ་རྡུང་བར་བཀའ་བསྒོས་པ་ན། དེས་གྷ་གྷ་ཞེས་སོགས་ཀྱི་སྔགས་བརྗོད་ནས་ཕུར་བུ་འདེབས་པའོ། །རྡོ་རྗེ་ཕུར་བུ་ཡང་ལྷའི་རྣམ་པ་ཙམ་གྱི་དབྱིབས་ཅན་མ་ཡིན་གྱི་བདུད་རྩི་འཁྱིལ་པ་ཡིན་ནོ། །དེ་ནས་ཁྲོ་བོ་དང་ཕུར་བུ་ལས་རྡོ་རྗེའི་མེ་འོད་རབ་ཏུ་འབར་བ་ཕྱོགས་བཅུར་འཕྲོས་པས་འཁོར་གྱི་བགེགས་གདུག་པ་ཅན་རྣམས་ཚིག་པས་ཕན་ཚུན་འབྲོས་པར་བསམ་སྟེ། བགེགས་ལ་ཕུར་བུས་གདབ་པའི་དེ་ཉིད་དོ། །དེ་ནས་ཊཀྐི་ཧཱུཾ་ཛཿཞེས་ལན་བཞི་བརྗོད་པས་ཁྲོ་བོ་རྣམས་ཀྱི་ཕྱི་རུ་ལྕགས་ཀྱི་རྡོ་རྗེའི་ར་བ་དང༌། ཆུ་དང༌། མེ་དང༌། རླུང་གི་ར་བ་བཞི་བསམ། ཧཱུཾ་ལས་ལྕགས་ཀྱི་ར་བའི་སྟེང་དུ་རྡོ་རྗེའི་གུར་མཆོད་རྟེན་ལྟ་བུ་དང༌། གུར་གྱི་འོག་ར་བའི་སྟེང་དུ་རྡོ་རྗེ་བླ་རེ་དང༌། འོག་གཞི་ཧཱུཾ་ལས་རྡོ་རྗེའི་ས་གཞི་དང༌། ཕྱིའི་ཕྱོགས་མཚམས་ཐམས་ཅད་དུ་མདའི་དྲ་བ་ཡེ་ཤེས་ཀྱི་མེ་རབ་ཏུ་འབར་བ་འཕྲོ་བར་བསམ་མོ། །ལྷ་རྣམས་ཀྱི་སྤྱི་བོར་ཟླ་བ་ལ་ༀ་དཀར་པོ། མགྲིན་པར་པདྨ་ལ་ཨཱཿདམར་པོ། སྙིང་ཁར་ཉི་མ་ལ་ཧཱུཾ་སྔོན་པོ་བསམས་ལ། གོ་ཆ་བྱ་ཞིང་ངག་ཏུ་ཡང་བཟླ་སྟེ། ར་བ་ལ་སོགས་པས་བསྲུང་བའི་དེ་ཉིད་དོ། །དེ་ལྟར་སྒྲུབ་ཐབས་དངོས་གཞིའི་སྔོན་དུ་འགྲོ་བའི་ཡན་ལག་གཉིས་བསྟན་
ནས། དངོས་གཞི་རྟེན་དང་བརྟེན་པའི་རྣལ་འབྱོར་གཉིས་ཀྱི་རྟེན་གྱི་རྣལ་འབྱོར་གང་དུ་འཚང་རྒྱ་བའི་གནས་སྒྲུབ་པ་ནི། སྣོད་ཀྱི་སྲིད་པ་འཇིག་པ་དང་ཆགས་པ་དང་རྗེས་སུ་མཐུན་པར་བསྒོམ་པར་བྱ་སྟེ། དངོས་པོ་མེད་པས་སྒོམ་པ་མེད། །བསྒོམ་པར་བྱ་བ་སྒོམ་པ་མིན། །དེ་ལྟར་དངོས་པོ་དངོས་མེད་པས། །སྒོམ་པ་དམིགས་སུ་མེད་པའོ། ཞེས་བརྗོད་ལ་སྣོད་བཅུད་ཐམས་ཅད་དོན་དམ་པར་ངོ་བོ་ཉིད་མེད་པས། སྒོམ་པ་དང་བསྒོམ་པར་བྱ་བ་དང་སྒོམ་པ་པོ་གསུམ་མི་དམིགས་པའི་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པའི་རང་བཞིན་དུ་བསམས་ལ། བསྲུང་འཁོར་དང་སྣོད་བཅུད་ཐམས་ཅད་འོད་གསལ་དུ་གཞུག་པར་བྱའོ། །འདི་ནི་ཡེ་ཤེས་ཀྱི་ས་སྟོང་ཉིད་སྒོམ་པའི་དེ་ཉིད་དེ། དོན་དམ་པའི་བསྲུང་བ་ཡང་ཡིན་ནོ། །སྟོང་པའི་ངང་ལས་སྐད་ཅིག་གིས་རྡོ་རྗེ་ས་གཞི་ར་བ་གུར་བླ་རེ་མེ་རི་དང་བཅས་པ་རྫོགས་པའི་དབུས་སུ། ཆོས་འབྱུང་དཀར་པོ་ཟུར་གསུམ་པ་གདེངས་ཀ་ཆེ་བ་གྱེན་དུ་ཕྱོགས་ཤིང༌། རྩེ་མོ་ཕྲ་བ་ཐུར་དུ་ཟུག་པའི་ནང་དུ་སྣ་ཚོགས་པདྨའི་ལྟེ་བར་ཧཱུཾ་ཡཾ་ཧཱུཾ་གི་ཡཾ་སྔོ་སྐྱ་ལས་བྱུང་བའི་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་ཧཱུཾ་གཉིས་ལས་བྱུང་བའི་རྡོ་རྗེ་གཉིས་ཀྱིས་ཕྱོགས་གཉིས་བརྒྱན་པ། ཧཱུཾ་རཾ་ཧཱུཾ་གི་རཾ་དམར་པོ་ལས་བྱུང་བའི་མེའི་དཀྱིལ་འཁོར་དམར་པོ་གྲུ་གསུམ་པ། ཧཱུཾ་གཉིས་ལས་བྱུང་བའི་རྡོ་རྗེ་གཉིས་ཀྱིས་ཕྱོགས་གཉིས་བརྒྱན་པ། ཧཱུཾ་བཾ་ཧཱུཾ་གི་བཾ་དཀར་པོ་ལས་བྱུང་བའི་ཆུའི་དཀྱིལ་འཁོར་དཀར་པོ་ཟླུམ་པོ། ཧཱུཾ་གཉིས་ལས་བྱུང་བའི་རྡོ་རྗེ་གཉིས་ཀྱིས་ཕྱོགས་གཉིས་
བརྒྱན་པ། ཧཱུཾ་ལཾ་ཧཱུཾ་གི་ལཾ་སེར་པོ་ལས་བྱུང་བའི་སའི་དཀྱིལ་འཁོར་སེར་པོ་གྲུ་བཞི་པ། ཧཱུཾ་གཉིས་ལས་བྱུང་བའི་རྡོ་རྗེ་གཉིས་ཀྱིས་ཕྱོགས་གཉིས་བརྒྱན་པ་བསྐྱེད་ལ་སྤྱན་སོགས་བཞིའི་ངོ་བོར་བསམ་མོ། །དཀྱིལ་འཁོར་བཞི་པོ་གཅིག་ཏུ་འདྲེས་པ་ལས་སྣ་ཚོགས་རྡོ་རྗེར་གྱུར་པར་བསམ་སྟེ། རྡོ་རྗེ་སའི་ཆ་བསྐྱེད་པའི་དེ་ཉིད་དོ། །སྣ་ཚོགས་རྡོ་རྗེའི་ལྟེ་བའི་སྟེང་དུ། བྷྲུཾ་དཀར་པོ་སངས་རྒྱས་ཀྱི་སྤྲིན་གྱི་འོད་ཟེར་འཕྲོ་བ་ཡོངས་སུ་གྱུར་པ་ལས། གཞལ་ཡས་ཁང་མཚན་ཉིད་ཐམས་ཅད་དུས་གཅིག་ཏུ་རྫོགས་པར་བསམས་ལ། རིམ་གྱིས་གསལ་གདབ་པ་ནི། གྲུ་བཞི་པ་སྒོ་བཞི་པ། ཕྱི་ནས་རིམ་པ་བཞིན་དཀར་སེར་དམར་ལྗང་སྔོ་བའི་རིམ་པ་ལྔ་དང་ལྡན་པའི་རིན་པོ་ཆེའི་རྩིག་པས་བསྐོར་བའི་སྟེང་ན། རིན་པོ་ཆེའི་ཕ་གུ་གཞི་དམར་པོ་ལ་རིན་པོ་ཆེ་ཟུར་གསུམ་དང་གྲུ་བཞི་ལ་སོགས་པས་སྤྲས་པ། དེའི་སྟེང་ན་གནས་པའི་གསེར་གྱི་སྐ་རགས་བཞིའི་ཕྱི་ངོས་སུ། ཆུ་སྲིན་གྱི་ཁ་ནས་མུ་ཏིག་གི་དོ་ཤལ་དང་དོ་ཤལ་ཕྱེད་པ་འཕྱང་པ་དེའི་ཕྱི་ངོས་སུ་བྱ་འདབ་ལས་འཕྱང་བའི་རིན་པོ་ཆེའི་ཤར་བུ། དེའི་སྟེང་དུ་པདྨ་འདབ་མ་ཕྱེད་པའི་དབྱིབས་ཅན་གྱི་མདའ་ཡབ་ལ་གནས་པའི་གསེར་གྱི་བུམ་པ་ནས་འཐོན་པའི་རྒྱལ་མཚན་དང་བ་དན་བརྒྱད་བརྒྱད་ཀྱིས་མཛེས་པར་བྱས་པ། ཕྱིའི་སྟེང་གི་ཟུར་བཞི་ལ་གདུགས་བཞིས་བརྒྱན་པ། རྩིག་པའི་འགྲམ་ནས་འདོད་ཡོན་གྱི་སྣམ་བུ་དམར་པོས་བསྐོར་བ་ལ། བཞུགས་སྟབས་དང་ཁ་དོག་སྣ་
ཚོགས་པའི་ལྷ་མོ་རྣམས་ཀྱིས་མཆོད་པ་བྱེད་བཞིན་པ། སྒོ་དང་སྒོ་ཁྱུད་ཀྱི་ཕྱིའི་མཚམས་དང༌། རྩིག་པའི་ཕྱི་ནང་གི་ཟུར་བཞིར། ཟླ་ཕྱེད་ལ་གནས་པའི་རིན་པོ་ཆེ་དམར་པོའི་སྟེང་དུ་རྡོ་རྗེས་བརྒྱན་པ། སྒོ་བཞི་སོ་སོའི་མདུན་དུ་སྟེབས་བུ་གྲུ་བཞིའི་སྟེང་དུ་བུམ་པ་ལ་གནས་པའི་ཀ་བ་བཞི་བཞིས་བཏེག་པའི་རྟ་བབས་གསེར་དང་ཤར་བུ་རིན་པོ་ཆེ་རྟ་རྨིག །མུན་སྣམ་བ་རཎྜ་མུན་པ་ཤར་བུ་རིན་པོ་ཆེ་རྨིག་པ་མདའ་ཡབ་སྟེ་སྣམ་བུ་བཅུ་གཅིག་དང་ལྡན་པའི་རྩེ་མོར་ཆོས་ཀྱི་འཁོར་ལོའི་གཡས་གཡོན་དུ་རི་དྭགས་ཕོ་མོ་དང་བཅས་པ། རྟ་བབས་ཀྱི་གཡས་གཡོན་དུ་བུམ་པ་བཟང་པོ་ལས་སྐྱེས་པའི་དཔག་བསམ་གྱི་ཤིང་ལ། རྒྱལ་སྲིད་རིན་པོ་ཆེ་སྣ་བདུན་དང༌། བར་བར་དུ་གྲུབ་པ་ཐོབ་པ་དང༌། སྤྲིན་གྱི་གསེབ་ནས་བྱུང་བའི་ལྷ་མེ་ཏོག་གི་ཕྲེང་བ་བཟུང་བ་རྣམས་ཀྱིས་ཀུན་ནས་མཛེས་པར་བྱས་པའོ། །གཞལ་ཡས་ཁང་གི་ནང་དཀྱིལ་འཁོར་གྱི་ཕྱེད་ཀྱི་ཚད་ཀྱི་ཕྱི་ངོས་སུ། འོད་ཟེར་རྣམ་པ་ལྔའི་ཕྲེང་བས་བསྐོར་བའི་ནང་དུ། རྡོ་རྗེ་རྩེ་གསུམ་པས་ཟླུམ་པོར་བསྐོར་བ་ལ་བརྟེན་པའི་ཤར་དུ་འཁོར་ལོ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་རལ་གྲིས་མཚན་པའི་ཀ་བ་གཉིས་གཉིས་ཀྱིས་བཏེགས་པའི་རྡོ་རྗེའི་གདུང་གིས་མཛེས་པར་ཕུབ་པའི་རྩེ་མོ་རྡོ་རྗེ་རིན་པོ་ཆེའི་ཏོག་གིས་སྤྲས་པ། རིམ་པ་གཉིས་པའི་གྲྭའི་གཡས་གཡོན་གཉིས་སུ་བདུད་རྩིས་བཀང་བའི་རིན་པོ་ཆེའི་བུམ་པ་གཉིས་གཉིས་ཏེ་བུམ་པ་བརྒྱད་ཀྱིས་མཛེས་པ། ལྷ་དང་མི་ལས་ཡོན་ཏན་ཁྱད་པར་དུ་འཕགས་པའི་ཁང་བཟང་དམ་པ།
ཕྱི་ལྟས་ནང་གསལ་བ་ནང་ལྟས་ཕྱི་གསལ་བའི་ནང་གི་སྟེང་དང༌། འོག་གི་ས་གཞི་ཐམས་ཅད་ཤར་དཀར་ལྷོ་སེར་ནུབ་དམར་བྱང་ལྗང་དབུས་སྔོ་བར་གྱུར་པའི་ནང་དུ། སྣ་ཚོགས་པདྨའི་གདན་སུམ་ཅུ་རྩ་གཅིག །གཙོ་བོ་དང་ཁྲོ་བོ་བཅུ་ལ་ཉི་མ། རྣམ་སྣང་སོགས་ཤར་ཕྱོགས་པ་རྣམས་ལ་ཟླ་བ། མཱ་མ་ཀི་ལ་རྡོ་རྗེ། དེ་མ་གཏོགས་པའི་ལྷོ་ཕྱོགས་པ་རྣམས་པ་རིན་པོ་ཆེ། ནུབ་ཕྱོགས་པ་རྣམས་ལ་པདྨ་དམར་པོ། བྱང་ཕྱོགས་པ་རྣམས་ལ་སྣ་ཚོགས་རྡོ་རྗེའི་གདན་བསམ་སྟེ། རྟེན་གྱི་དཀྱིལ་འཁོར་སྐྱེད་པའི་དེ་ཉིད་དོ། །གང་དུ་འཚང་རྒྱ་བའི་གནས་དེར། ཇི་ལྟར་འཚང་རྒྱ་བའི་རིམ་པ་མཛད་པ་དང་བཅས་པ་སྒོམ་པ་བརྟེན་པའི་རྣལ་འབྱོར་ནི། སྣོད་ཆགས་པའི་འོག་ཏུ་བསྐལ་པ་དང་པོའི་མི་འཆགས་པ་དང་ཆོས་མཐུན་པར་བསྒོམ་སྟེ། སྐད་ཅིག་གིས་ལྷག་པར་མོས་པ་ཙམ་གྱིས་ལྷ་སུམ་ཅུ་རྩ་གཉིས་དུས་གཅིག་ཏུ་བསྐྱེད་ལ། རིམ་གྱིས་གསལ་གདབ་པ་ནི། དབུས་ཀྱི་གདན་ལ་རང་ཉིད་རྡོ་རྗེ་འཆང་སྔོན་པོ་སྔོ་དཀར་དམར་བའི་ཞལ་གསུམ། ཕྱག་དྲུག་ཕྱག་མཚན་སྔར་བཤད་པའི་རྡོ་རྗེ་འཆང་དང་འདྲ་བ། དབུ་སྐྲ་རལ་པའི་ཐོར་ཚུགས་ཅན་རིན་པོ་ཆེའི་དབུ་རྒྱན་གསོལ་བ། རིན་པོ་ཆེའི་སྙན་རྒྱན་དང༌། སྙན་གོང་ཨུཏྤ་ལའི་གདེངས་ཀ་དང་དར་དཔྱངས་ཀྱིས་མཛེས་པར་བྱས་པ། རིན་པོ་ཆེའི་མགུལ་རྒྱན། མུ་ཏིག་གི་སེ་མོ་དོ། རིན་པོ་ཆེའི་དོ་ཤལ། ཕྱག་གདུབ་དང་ཞབས་གདུབ། རིན་པོ་ཆེའི་འོག་པག་སྟེ་རིན་པོ་ཆེའི་རྒྱན་བརྒྱད་ཀྱིས་བརྒྱན་པ། སྐུ་སྟོད་ལྷ་རྫས་ཀྱི་གོས་ཀྱི་
ག་ཤལ་བྱས་ཤིང༌། སྐུ་སྨད་ལྷ་རྫས་ཀྱི་དར་གྱི་ཤམ་ཐབས་འཕྱར་བ། མཚན་བཟང་པོ་སོ་གཉིས་དང༌། དཔེ་བྱད་བཟང་པོ་བརྒྱད་ཅུས་བརྒྱན་པ། རང་དང་འདྲ་བའི་རེག་བྱ་རྡོ་རྗེ་མས་འཁྱུད་ཅིང༌། འོད་ཀྱི་དཀྱིལ་འཁོར་གྱིས་བསྐོར་བའི་དབུས་ན། སེམས་དཔའི་སྐྱིལ་མོ་ཀྲུང་གིས་བཞུགས་པར་བསམ་མོ། །ཁྲོ་བོ་བཅུ་མ་གཏོགས་པ་ལྷ་ཕོ་རྣམས་དབུ་སྐྲ་སྔར་བཤད་པ་དང་འདྲ་ལ། ལྷ་མོ་དགུ་རལ་པ་ཕྱེད་བཅིངས་སུ་སྔ་མ་རྣམས་བཞེད་དོ། །ལྷ་ཐམས་ཅད་ཀྱི་རིན་པོ་ཆེའི་རྒྱན་རྣམས་འདྲ་ཞིང༌། ལྷ་ཉེར་གཉིས་ཀྱི་ན་བཟའ་ཡང་སྔར་བཞིན་ནོ། །ཤར་དུ་རྣམ་སྣང་དཀར་པོ་དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་འཁོར་ལོ་རྡོ་རྗེ་པདྨ་དཀར་པོ། གཡོན་དྲིལ་བུ་རིན་ཆེན་རལ་གྲི་འཛིན་པ། ལྷོར་རིན་འབྱུང་སེར་པོ་སེར་ནག་དཀར་བའི་ཞལ་གསུམ། ཕྱག་དྲུག་གི་གཡས་ནོར་བུ་རྡོ་རྗེ་འཁོར་ལོ། གཡོན་དྲིལ་བུ་པད་སེར་རལ་གྲི་འཛིན་པ། ནུབ་དུ་འོད་དཔག་མེད་དམར་མོ་དམར་ནག་དཀར་བའི་ཞལ་གསུམ། ཕྱག་དྲུག་གི་གཡོན་དང་པོས་དྲིལ་བུ་དང་བཅས་པའི་པདྨ་དམར་པོའི་རྩ་བ་དཀུར་བརྟེན་ནས་འཛིན་ཅིང༌། གཡས་དང་པོ་ཐུགས་ཀར་པདྨ་ཁ་འབྱེད་པར་མཛད་པ། ལྷག་མ་གཡས་རྡོ་རྗེ་འཁོར་ལོ། གཡོན་རིན་པོ་ཆེ་རལ་གྲི་འཛིན་པ། བྱང་དུ་དོན་གྲུབ་ལྗང་གུ །ལྗང་ནག་དཀར་བའི་ཞལ་གསུམ། ཕྱག་དྲུག་གི་གཡས་རལ་གྲི་སྣ་ཚོགས་རྡོ་རྗེ་འཁོར་ལོ། གཡོན་དྲིལ་བུ་པད་ལྗང་ནོར་བུ་འཛིན་པ། དེ་བཞི་ཀ་མི་བསྐྱོད་པའི་ཅོད་པན་ཅན་ནོ། །ཤར་ལྷོར་སྤྱན་མ་དཀར་མོ་རྣམ་སྣང་གི་དབུ་རྒྱན་ཅན།
ཞལ་ཕྱག་དང་ཕྱག་མཚན་རྣམ་སྣང་དང་འདྲ་བ་ལ་ཁྱད་པར་དུ་གཡས་ཐ་མས་ཨུཏྤ་ལ་དཀར་པོ་འཛིན་པའོ། །ལྷོ་ནུབ་ཏུ་མཱ་མ་ཀི་སྔོན་མོ་མི་བསྐྱོད་པའི་དབུ་རྒྱན་ཅན། ཞལ་ཕྱག་དང་ཕྱག་མཚན་མི་བསྐྱོད་པ་དང་འདྲ་བ་ལ། ཁྱད་པར་དུ་གཡས་ཐ་མས་ཨུཏྤ་ལ་སྔོ་དམར་འཛིན་པའོ། །རྩ་རྒྱུད་ལེའུ་བཞི་པ་ལས་ཨུཏྤ་ལ་མཐིང་ཁར་བཤད་པ་བཞིན་སྒྲོན་གསལ་ལས་ཀྱང་སྔོན་པོར་བཤད། ལེའུ་བཅུ་གསུམ་པ་ལས་སྔོ་དམར་དུ་བཤད་པའི་འགྲེལ་པ་ལས་རྩ་དམར་བ་ཞེས་བཤད་ལ། ཁ་ཅིག་སྔོ་ལ་དམར་བའི་མདངས་ཡོད་པ་དང༌། ཁ་ཅིག་རྩ་བ་དམར་བ་ལ་འཆད་དོ། །ནུབ་བྱང་དུ་གོས་དཀར་མོ་དམར་མོ་འོད་དཔག་མེད་ཀྱི་དབུ་རྒྱན་ཅན། ཞལ་ཕྱག་དང་ཕྱག་མཚན་འོད་དཔག་མེད་འདྲ་བ་ལ། ཁྱད་པར་དུ་པདྨ་དམར་པོའི་གནས་སུ་ཨུཏྤ་ལ་དམར་པོ་སྡོང་བུ་བཅས་ཏེ་འཛིན་པའོ། །བྱང་ཤར་དུ་སྒྲོལ་མ་ལྗང་གུ་དོན་གྲུབ་ཀྱི་དབུ་རྒྱན་ཅན། ལྗང་ནག་དཀར་བའི་ཞལ་གསུམ། ཕྱག་དྲུག་གི་གཡས་སྣ་ཚོགས་རྡོ་རྗེ་འཁོར་ལོ་རྡོ་རྗེས་མཚན་པའི་ཨུཏྤ་ལ། གཡོན་དྲིལ་བུ་རིན་ཆེན་རལ་དྲི་འཛིན་པའོ། །རིམ་པ་གཉིས་པའི་ཤར་ལྷོར་གཟུགས་རྡོ་རྗེ་མ་དཀར་མོ་རྣམ་སྣང་གི་དབུ་རྒྱན་ཅན། ཞལ་ཕྱག་དང་ཕྱག་མཚན་སྤྱན་མ་དང་འདྲ་བ་ལ། ཁྱད་པར་དུ་རྩ་ཕྱག་གཉིས་ཀྱིས་མེ་ལོང་དམར་པོ་འཛིན་པ། ལྷོ་ནུབ་ཏུ་སྒྲ་རྡོ་རྗེ་མ་སེར་མོ་རིན་འབྱུང་གི་དབུ་རྒྱན་ཅན། སེར་ནག་དཀར་བའི་ཞལ་གསུམ། ཕྱག་དང་ཕྱག་མཚན་མཱ་མ་ཀཱི་དང་འདྲ་བ་ལ། ཁྱད་པར་དུ་རྩ་ཕྱག་གཉིས་ཀྱིས་པི་ཝང་སྔོན་པོ་སྒྲེང་བ། ནུབ་བྱང་དུ་དྲི་རྡོ་རྗེ་མ་
དམར་མོ་འོད་དཔག་མེད་ཀྱི་དབུ་རྒྱན་ཅན། ཞལ་ཕྱག་དང་ཕྱག་མཚན་གོས་དཀར་མོ་དང་འདྲ་བ་ལ། ཁྱད་པར་དུ་རྩ་ཕྱག་གཉིས་ཀྱིས་དྲིའི་དུང་ཆོས་འཛིན་པ། བྱང་ཤར་དུ་རོ་རྡོ་རྗེ་མ་ལྗང་གུ་དོན་གྲུབ་ཀྱི་དབུ་རྒྱན་ཅན། ཞལ་ཕྱག་དང་ཕྱག་མཚན་སྒྲོལ་མ་དང་འདྲ་བ་ལ། ཁྱད་པར་དུ་རྩ་ཕྱག་གཉིས་ཀྱིས་རོའི་སྣོད་འཛིན་པའོ། །ལྷ་མོ་དགུ་པོ་ཐམས་ཅད་ཤིན་ཏུ་སྒེག་ཅིང༌། བཞིན་འཛུམ་བག་དང་ལྡན་པ། ཟུར་གྱིས་ལྟ་བ་ལ་སོགས་པའི་རྣམ་འགྱུར་གྱིས་མཛེས་པ། ལང་ཚོ་དར་ལ་བབ་ཅིང་འདོད་པའི་ཡོན་ཏན་ལྔའི་དགའ་བས་རོལ་བ། རེག་བྱ་རྡོ་རྗེ་མ་ནི་ཤམ་ཐབས་འཕྱར་བའོ། །ཤར་སྒོའི་གཡས་གཡོན་གྱི་གདན་ལ་རིམ་པ་བཞིན་བྱམས་པ་དང་ས་སྙིང་དཀར་པོ་རྣམ་སྣང་གི་དབུ་རྒྱན་ཅན། ཞལ་ཕྱག་དང་ཕྱག་མཚན་རྣམ་སྣང་དང་འདྲ་བ་ལ་ཁྱད་པར་དུ་བྱམས་པའི་ཕྱག་དང་པོས་ཀླུ་ཤིང་གི་མེ་ཏོག་སྡོང་བུ་དང་བཅས་པ་འཁོར་ལོས་མཚན་པ་འཛིན་པ། ལྷོ་སྒོའི་གཡས་གཡོན་གྱི་གདན་ལ་རིམ་པ་བཞིན། ཕྱག་རྡོར་དང་ནམ་སྙིང་སེར་པོ་རིན་འབྱུང་གི་དབུ་རྒྱན་ཅན། ཞལ་ཕྱག་དང་ཕྱག་མཚན་རིན་འབྱུང་དང་འདྲ་བའོ། །ནུབ་སྒོའི་གཡས་གཡོན་གྱི་གདན་ལ་རིམ་པ་བཞིན། འཇིག་རྟེན་དབང་ཕྱུག་དང་འཇམ་དཔལ་དམར་པོ་འོད་དཔག་མེད་ཀྱི་དབུ་རྒྱན་ཅན། ཞལ་ཕྱག་དང་ཕྱག་མཚན་འོད་དཔག་མེད་དང་འདྲ་བའོ། །བྱང་སྒོའི་གཡས་གཡོན་གྱི་གདན་ལ་རིམ་པ་བཞིན། སྒྲིབ་སེལ་དང་ཀུན་བཟང་ལྗང་གུ་དོན་གྲུབ་ཀྱི་དབུ་རྒྱན་ཅན། ཞལ་ཕྱག་དང་ཕྱག་མཚན་དོན་གྲུབ་དང་འདྲ་བའོ། །རྣམ་སྣང་ནས་ཀུན་བཟང་གི་བར་གྱི་ལྷ་ཐམས་ཅད་ཞི་བ། འོད་ཀྱི་དཀྱིལ་འཁོར་
རབ་ཏུ་འབར་བའི་དབུས་ན་རང་རང་གི་གདན་ལ་རྡོ་རྗེ་སྐྱིལ་མོ་ཀྲུང་གི་བཞུགས་པར་བསམས། ཤར་སྒོར་གཤིན་རྗེ་གཤེད། ལྷོ་སྒོར་ཤེས་རབ་མཐར་བྱེད། ནུབ་སྒོར་རྟ་མགྲིན། བྱང་སྒོར་བགེགས་མཐར་བྱེད། ཤར་ལྷོར་མི་གཡོ་བ། ལྷོ་ནུབ་ཏུ་འདོད་རྒྱལ། ནུབ་བྱང་དུ་དབྱུག་སྔོན་ཅན། བྱང་ཤར་དུ་སྟོབས་པོ་ཆེ། སྟེང་དུ་གཙུག་གཏོར་འཁོར་ལོས་བསྒྱུར་རྒྱལ། འོག་ཏུ་གནོད་མཛེས་རྒྱལ་པོ་རྣམས་ཀྱང་སྔར་བཤད་པ་བཞིན་དུ་བསམ་མོ། །དེ་ནས་རང་གི་ཐུགས་ཀ་ནས་འོད་ཟེར་འཕྲོས། སེམས་ཅན་ཐམས་ཅད་བཀུག་ནས་དཀྱིལ་འཁོར་གྱི་ཕྱོགས་བཞི་ནས་ཐོགས་པ་མེད་པར་འཇུག་པའི་རྡོ་རྗེ་སེམས་དཔའི་འཇུག་པས་ཞུགས་པ་ལ་ཡབ་ཡུམ་སྙོམས་པར་ཞུགས་པའི་བྱང་ཆུབ་སེམས་ཀྱི་འོད་ཟེར་གྱིས་དབང་བསྐུར་བས། དེ་བཞིན་གཤེགས་པ་ཐམས་ཅད་ཀྱི་བདེ་བ་དང་ཡིད་བདེ་བ་ཐོབ་སྟེ། རྡོ་རྗེ་སེམས་དཔར་གྱུར་ནས་རང་རང་གི་ཞིང་དུ་གཤེགས་པར་བསམ་སྟེ། ལྷག་མོས་ཀྱི་ལྷའི་འཁོར་ལོ་དགོད་པའི་དེ་ཉིད་དོ། །དེ་ནས་རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས། རྣམ་སྣང་ནས་གནོད་མཛེས་ཀྱི་བར་རྣམས་སྤྱན་དྲངས་ཏེ་འོག་ནས་འཆད་པའི་སྤྱི་བོ་ལ་སོགས་པའི་གནས་སུ་དགོད་ལ། གཟུགས་ཀྱི་ཕུང་པོ་ལ་སོགས་པ་དང་ངོ་བོ་དབྱེར་མེད་དུ་མོས་པའི་ཁ་སྦྱར་གྱི་སྦྱོར་བ་བྱས་ནས། རང་གི་ལུས་དེ་བཞིན་གཤེགས་པ་ཐམས་ཅད་ཀྱི་རྡུལ་ཕྲ་རབ་ལས་བསྒྲུབས་པའི་ལུས་ཀྱི་དཀྱིལ་འཁོར་དུ་མོས་པར་བྱ་སྟེ། ལྷག་མོས་ཀྱི་དཀྱིལ་འཁོར་
ལུས་ལ་བསྡུ་བའི་དེ་ཉིད་དོ། །དེ་ཉིད་བཅུ་གཅིག་པོ་དེ་རྣམས་ནི། རྣལ་འབྱོར་དངོས་གཞིའི་སྔོན་དུ་འགྲོ་བའི་དེ་ཉིད་དོ། །དེ་ནས་ལུས་དཀྱིལ་གྱི་ལྷ་རྣམ་སྣང༌། སྤྱན་མ། སའི་སྙིང་པོ། གཟུགས་རྡོ་རྗེ་མ། བྱམས་པ། གཤིན་རྗེ་གཤེད་མི་གཡོ་བ་རྣམས་རིམ་གྱིས་འོད་གསལ་དུ་ཐིམ། དེ་ནས་རིན་འབྱུང་མཱ་མ་ཀཱི། ཕྱག་རྡོར་སྒྲ་རྡོ་རྗེ་མ། གཞན་གྱི་མི་ཐུབ་པ་འདོད་པའི་རྒྱལ་པོ་རྣམས་འོད་གསལ་དུ་ཐིམ། དེ་ནས་འོད་དཔག་མེད་གོས་དཀར་མོ། ནམ་མཁའི་སྙིང་པོ་དྲི་རྡོ་རྗེ་མ། རྟ་མགྲིན་དབྱུག་སྔོན་ཅན་རྣམས་འོད་གསལ་དུ་ཐིམ། དེ་ནས་དོན་གྲུབ་སྒྲོལ་མ། འཇིག་རྟེན་དབང་ཕྱུག་རོ་རྡོ་རྗེ་མ། སྒྲིབ་སེལ་རེག་བྱ་རྡོ་རྗེ་མ། ཀུན་བཟང་བགེགས་མཐར་བྱེད་སྟོབས་པོ་ཆེ་རྣམས་འོད་གསལ་དུ་ཐིམ། དེ་ནས་གཙུག་ཏོར་འཁོར་ལོས་བསྒྱུར་བ་གནོད་མཛེས་འཇམ་དཔལ་རྣམས་རིམ་གྱིས་འོད་གསལ་དུ་ཐིམ་ཞིང༌། གཙོ་བོ་ཡང་འོད་གསལ་དུ་ཐིམ་པར་བསྒོམས་ལ།ༀ་ཤཱུ་ནྱ་ཏཱ་ཛྙ་ན་བཛྲ་སྭ་བྷཱ་ཝ་ཨཱཏཏྨ་ཀོ་྅ཧཾ། ཞེས་བརྗོད་དེ་རིགས་ལྔའི་ངོ་བོའི་ཕུང་སོགས་རྣམས་འོད་གསལ་དུ་ཞུགས་པ་དེ་ངའོ་སྙམ་པའི་ང་རྒྱལ་བྱའོ། །འདི་ནི་བསྐལ་པ་དང་པོའི་མི་རིམ་གྱིས་ཐ་མལ་པར་གྱུར་ཏེ། ཕུང་སོགས་རིམ་གྱིས་ཐིམ་ནས། འཆི་བའི་འོད་གསལ་མངོན་དུ་བྱས་པ་དང་རྗེས་སུ་མཐུན་པར་སྒོམ་པས་འཆི་བ་ཆོས་སྐུར་འཁྱེར་བའི་རྣལ་འབྱོར་ཏེ། དོན་དམ་པའི་དཀྱིལ་འཁོར་ལ་འཇུག་པའི་དེ་ཉིད་དང༌། དེ་བཞིན་ཉིད་ལས་བྱང་ཆུབ་པ་ཞེས་ཀྱང་བྱའོ། །འདི་ནས་བཟུང་སྟེ་ཡེ་ཤེས་ཀྱིས་སྒོམ་པའི་བར་ནི་བསྙེན་པའི་ཡན་
ལག་གོ །དེ་ནས་གདན་དབུས་མའི་སྟེང་དུ། ཧཱུཾ་ལས་ཉི་མའི་དཀྱིལ་འཁོར། དེའི་དབུས་སུ་ༀ་ལས་ཟླ་བའི་དཀྱིལ་འཁོར། དེའི་སྟེང་དུ་ཨཱ་ལས་པདྨ་དམར་པོ་འདབ་མ་བརྒྱད་པའི་སྟེང་ན། ༀ་ཨཱ་ཧཱུཾ་གི་ཡི་གེ་གསུམ་སྟེང་ནས་སྟེང་དུ་བརྩེགས་པར་བསམ་སྟེ། ཉི་མ་ལ་སོགས་པ་ལ་དམིགས་པ་ལྡང་བའི་དེ་ཉིད་དོ། །དེ་ཐམས་ཅད་གཅིག་ཏུ་འདྲེས་པ་ལས་ཟླ་བའི་དཀྱིལ་འཁོར་ཆ་ཐམས་ཅད་ཡོངས་སུ་རྫོགས་པ་གཅིག་ཏུ་གྱུར་པར་བསམ་པ་ནི། མཐར་ཟླ་བ་ལ་དམིགས་པའི་དེ་ཉིད་དོ། །དེ་ལས་འོད་ཟེར་འཕྲོས་པས་སྣོད་བཅུད་ཐམས་ཅད་བསྡུས་ཏེ་ཟླ་བ་ལ་གཞུག་ལ། ༀ་དྷརྨཱ་དྷཱ་ཏུ་སྭ་བྷཱ་བ་ཨཱཏྨ་ཀོ྅་ཧཾ། ཞེས་བརྗོད་དེ། སྣོད་བཅུད་ཀྱི་ཆོས་ཐམས་ཅད་ཀྱི་རྩ་བ་རླུང་སེམས་ཙམ་ཟླ་བར་སྣང་བ་དེ་ངའོ་སྙམ་དུ་ང་རྒྱལ་བརྟན་པར་བྱ་བ་ནི། ཡེ་ཤེས་ཙམ་ལ་སྙོམས་པར་འཇུག་པའི་དེ་ཉིད་དོ། །ལྡང་བ་ནས་འདིའི་བར་ནི། ཟླ་བ་ལས་བྱང་ཆུབ་པ་སྟེ། བྱང་ཆུབ་པ་གཉིས་ཀྱི་བདག་ཉིད་དེ་ཉིད་བཞི་ནི་རྣལ་འབྱོར་གྱི་དངོས་གཞིའོ། །ཟླ་བའི་སྟེང་དུ་ཆུ་ལས་ཆུ་བུར་རྡོལ་བའི་ཚུལ་དུ། ཟླ་བ་ལས་བྱུང་བའི་ༀ་དཀར་པོ་ཨཱ་དམར་པོ་ཧཱུཾ་སྔོན་པོ་སྒོམ་པ་ནི། ས་བོན་ལས་བྱང་ཆུབ་པའི་དེ་ཉིད་དོ། །དེ་ལས་འོད་ཟེར་འཕྲོས། ཕྱོགས་བཅུ་ནས་རིགས་ལྔ་འཁོར་དང་བཅས་པ་དཔག་ཏུ་མེད་པ་སྤྱན་དྲངས་དེ་ལ་ཐིམ་སྟེ། ཡོངས་སུ་གྱུར་པ་ལས་རྡོ་རྗེ་དཀར་པོ་རྩེ་ལྔ་པ་ལྟེ་བ་ལ་ༀ་ཨཱ་ཧཱུཾ་གིས་མཚན་པ་བསམས་ལ། བཛྲ་ཨཱཏྨ་ཀོ྅ཧཾ་ཞེས་བརྗོད་ལ་རྡོ་རྗེའི་ང་རྒྱལ་བྱ་སྟེ། ཕྱག་མཚན་
ལས་བྱང་ཆུབ་པའི་དེ་ཉིད་དོ། །རྡོ་རྗེ་ཡི་གེ་དང་བཅས་པ་ཡོངས་སུ་གྱུར་པ་ལས། སྔར་བཤད་པ་ལྟ་བུའི་དང་པོའི་མགོན་པོ་ཡུམ་མེད་པ་བསྐྱེད་དེ། སྐུ་རྫོགས་པ་ལས་བྱང་ཆུབ་པའི་དེ་ཉིད་དོ། །བྱང་ཆུབ་པ་དེ་གསུམ་ནི་རྗེས་སུ་རྣལ་འབྱོར་རོ། །འདི་ནི་འཆི་བའི་འོད་གསལ་ལས། ཡིད་ཀྱི་ལུས་ཅན་གྱི་བར་དོ་གྲུབ་པ་དང་རྗེས་སུ་མཐུན་པར་བསྒོམས་པས། བར་དོ་ལོངས་སྐུར་འཁྱེར་བའི་རྣལ་འབྱོར་རོ། །དེ་ནས་རང་བཞིན་གྱི་གནས་ནས་དེ་བཞིན་གཤེགས་པ་ཡབ་ཡུམ་སེམས་ཅན་འདུལ་བའི་ཕྱིར་དུ་སྙོམས་པར་ཞུགས་པའི་བྱང་ཆུབ་ཀྱི་སེམས་ལས་གྲུབ་པའི་མི་བསྐྱོད་པས། ནམ་མཁའི་ཁམས་ཐམས་ཅད་ཁྱབ་པར་བྱས་དེས་སེམས་ཅན་ཐམས་ཅད་ལ་བྱིན་གྱིས་བརླབས་པས། ཟག་པ་མེད་པའི་བདེ་བ་དང་ཡིད་བདེ་བ་ཐོབ་པར་གྱུར། མི་བསྐྱོད་པ་ཐམས་ཅད་ཀྱང་གཞལ་ཡས་ཁང་གི་ནང་དུ་གཅིག་ཏུ་འདྲེས་པ་ལ། རང་ཉིད་རྗེས་སུ་ཞུགས་པས་སྤྲུལ་སྐུ་རྡོ་རྗེ་སེམས་དཔའ་སྔོན་པོ། ཞལ་ཕྱག་དང་ཕྱག་མཚན་སྔར་བཤད་པ་ལྟ་བུར་བསྒོམས་པ་ནི་སྤྲུལ་སྐུར་བསྒྱུར་བའི་དེ་ཉིད་དོ། །དེ་ནས་ལུས་དཀྱིལ་སྒོམ་པ་ལ། ཐོག་མར་ལུས་རྟེན་གྱི་དཀྱིལ་འཁོར་དུ་གསལ་གདབ་པ་ནི། ལུས་ཀྱི་མདུན་རྒྱབ་དང་གཡས་གཡོན་བཞི་དཀྱིལ་འཁོར་གྱི་ཟུར་བཞི། ཁ་དང་སྣ་དང་བཤང་གཅིའི་ལམ་གྱི་བུག་པ་བཞི་སྒོ་བཞི། རྣམ་རྟོག་གི་བཞོན་པ་ཡེ་ཤེས་ལྔ་དག་པའི་རླུང་ཁ་དོག་ལྔ་པ་ནི་རྩིག་པ་རིམ་པ་ལྔ། ལྕེའི་རྣམ་ཤེས་ནི་རིན་པོ་ཆེའི་ཕ་གུ །རྒྱུ་མ་དྲ་བ་དང་རྒྱུས་པ་དྲ་ཕྱེད། བྱང་སེམས་དཀར་པོའི་ཆ་ཟླ་ཕྱེད་དང༌། མིག་གི་རྣམ་ཤེས་མེ་ལོང་
དང༌། སྣའི་རྣམ་ཤེས་མེ་ཏོག་གི་ཕྲེང་བ་དང༌། ལྕེའི་དབང་པོ་དྲིལ་བུ་དང༌། ལུས་ཀྱི་དབང་པོའི་ཚོགས་རྔ་ཡབ་ཏུ་གྱུར་པ་རྣམས་ནི་དྲ་བ་དང་དྲ་ཕྱེད་ཀྱི་རྒྱན་ནོ། །རྣ་བ་དང་ལུས་ཀྱི་རྣམ་ཤེས་ནི་མདའ་ཡབ་ལ་གནས་པའི་བ་དན་དང་དར་འཕན། རྗེ་ངར་བརླ་དཔུང་ལག་ངར་གྱི་རྐང་བརྒྱད་ནི་ཀ་བ་བརྒྱད། ལྟོ་བ་ནི་དཀྱིལ་འཁོར་གྱི་ནང་གི་བུམ་པ། རྣ་བའི་དབང་པོ་ནི་མཚམས་རྣམས་ཀྱི་ཟླ་ཕྱེད་རྡོ་རྗེ། ཕུང་པོ་ལྔ་རྣམ་པར་དག་པ་ནི་དཀྱིལ་འཁོར་གྱི་ཁ་དོག་ལྔ། གསང་གནས་དང་ལྟེ་བ་དང་སྙིང་ཁ་དང་གདོང་གི་སྣ་རྩེ་བཞི་ནི་རྟ་བབས་བཞི། མིག་གི་དབང་པོ་ནི་དེའི་སྟེང་གི་འཁོར་ལོ། ཡིད་ཀྱི་རྣམ་ཤེས་ནི་རི་དྭགས། སྣའི་དབང་པོ་ནི་རྟ་བབས་ཀྱི་བ་དན། ཡིད་ཀྱི་དབང་པོ་ནི་དབུས་ཀྱི་པདྨ་སྟེ། དེ་ལྟར་ལུས་ཀྱི་ཆ་རྣམས་གཞལ་ཡས་ཁང་དུ་བསྒོམ་སྟེ། ལུས་རྟེན་གྱི་དཀྱིལ་འཁོར་དུ་བསྒོམ་པའི་དེ་ཉིད་དོ། །དེ་ནས་ལུས་བརྟེན་པའི་དཀྱིལ་འཁོར་དུ་བསྒོམ་པ་ནི། སྤྱི་གཙུག་ནས་སྐྲ་མཚམས་ཀྱི་བར་དུ་གཟུགས་ཕུང་གི་ངོ་བོ་ༀ་དཀར་པོ་ཡོངས་སུ་གྱུར་པ་ལས་རྣམ་པར་སྣང་མཛད། དེ་བཞིན་དུ་སྦྱར་ཏེ། སྐྲ་མཚམས་ནས་མགྲིན་པའི་བར་དུ་འདུ་ཤེས་ཀྱི་ངོ་བོ་ཨཱཿདམར་པོ་ལས་འོད་དཔག་མེད། མགྲིན་པ་ནས་ནུ་མ་གཉིས་ཀྱི་བར་གྱི་སྙིང་ཁའི་བར་དུ་རྣམ་ཤེས་ཀྱི་ངོ་བོ་ཧཱུཾ་སྔོན་པོ་ལས་མི་བསྐྱོད་པ། སྙིང་ཁ་ནས་ལྟེ་བའི་བར་དུ་ཚོར་བའི་ངོ་བོ་སྭ་སེར་པོ་ལས་རིན་ཆེན་འབྱུང་ལྡན། ལྟེ་བ་ནས་བརླའི་རྩ་བའི་བར་དུ་འདུ་བྱེད་ཀྱི་ངོ་བོ་ཧ་ལྗང་གུ་ལས་དོན་ཡོད་གྲུབ་པ་བསྐྱེད་དེ། ཕུང་པོ་
གཤེགས་པར་སྒོམ་པའི་དེ་ཉིད་དོ། །ལྟེ་བར་ལུས་ཀྱི་སའི་ཁམས་ཐམས་ཅད་ཀྱི་ངོ་བོ་ལཾ་ལས་སྤྱན་མ། དེ་བཞིན་དུ་སྦྱར་ལ། སྙིང་ཁར་ཆུའི་ཁམས་ཀྱི་ངོ་བོ་མཱཾ་ལས་མཱ་མ་ཀཱི། མགྲིན་པར་མེའི་ཁམས་ཀྱི་ངོ་བོ་པཾ་ལས་གོས་དཀར་མོ། སྤྱི་བོར་རླུང་གི་ཁམས་ཀྱི་ངོ་བོ་ཏཱཾ་ལས་སྒྲོལ་མ་བསྐྱེད་དེ། ཁམས་གཤེགས་མར་སྒོམ་པའི་དེ་ཉིད་དོ། །མིག་ཏུ་མིག་དབང་གི་ངོ་བོ་ཐླཱི་ལཾས་སའི་སྙིང་པོ། རྣ་བར་རྣ་བའི་དབང་པོའི་ངོ་བོ་ༀ་ལས་ཕྱག་ན་རྡོ་རྗེ། སྣར་སྣའི་དབང་པོའི་ངོ་བོ་ༀ་ལས་ནམ་སྙིང༌། ལྕེར་ལྕེ་དབང་གི་ངོ་བོ་ༀ་ལས་འཇིག་རྟེན་དབང་ཕྱུག །སྙིང་ཁར་ཡིད་དབང་གི་ངོ་བོ་ཧཱུཾ་ལས་འཇམ་དཔལ། རྡོ་རྗེའི་སྒོར་ལུས་ཀུན་གྱི་དབང་པོའི་ངོ་བོ་ༀ་ལས་སྒྲིབ་སེལ། ཚིགས་རྣམས་ལ་ཚིགས་ཀྱི་ངོ་བོ་སཾ་ལས་ཀུན་བཟང༌། སྤྱི་གཙུག་ཏུ་རྩ་རྒྱུས་ཀྱི་ངོ་བོ་མ་ལས་བྱམས་པ་བསྐྱེད་དེ། མིག་སོགས་སེམས་དཔར་སྒོམ་པའི་དེ་ཉིད་དོ། །མིག་གི་སྒོར་ལུས་ཀྱི་གཟུགས་ཀྱི་རང་བཞིན་ཛཿལས་གཟུགས་རྡོ་རྗེ་མ་ས་སྙིང་དང་སྙོམས་པར་འཇུག་པ། དེ་བཞིན་དུ་སྦྱར་ལ། རྣ་བའི་སྒོར་སྒྲའི་རང་བཞིན་ཧཱུཾ་ལས་སྒྲ་རྡོ་རྗེ་མ་ཕྱག་རྡོར་དང་སྙོམས་པར་འཇུག་པ། སྣའི་སྒོར་དྲིའི་རང་བཞིན་བཾ་ལས་དྲི་རྡོ་རྗེ་མ་ནམ་སྙིང་དང་སྙོམས་པར་འཇུག་པ། ལྕེར་རོའི་རང་བཞིན་ཧོ་ལས་རོ་རྡོ་རྗེ་མ་འཇིག་རྟེན་དབང་ཕྱུག་དང་སྙོམས་པར་འཇུག་པ། རྡོ་རྗེའི་སྒོར་རེག་བྱའི་རང་བཞིན་ཁཾ་ལས་རེག་རྡོ་རྗེ་མ་སྒྲིབ་སེལ་དང་སྙོམས་པར་འཇུག་པ་བསྐྱེད་དེ། གཟུགས་སོགས་སེམས་མར་སྒོམ་པའི་དེ་ཉིད་དོ། །ལག་པ་གཡས་པར་དེའི་ངོ་བོ་ཧཱུཾ་ལས་གཤིན་རྗེ་གཤེད། ལག་པ་
གཡོན་པར་དེའི་ངོ་བོ་ཧཱུཾ་ལས་གཞན་གྱིས་མི་ཐུབ་པ། ཁ་ལ་དེའི་ངོ་བོ་ཧཱུཾ་ལས་རྟ་མགྲིན། རྡོ་རྗེ་ལ་དེའི་ངོ་བོ་ཧཱུཾ་ལས་བདུད་རྩི་འཁྱིལ་པ། དཔུང་པ་གཡས་པའི་རྩ་བར་དེའི་ངོ་བོ་ཧུཾ་ལས་མི་གཡོ་བ། དཔུང་པ་གཡོན་པའི་རྩ་བར་དེའི་ངོ་བོ་ཧཱུཾ་ལས་འདོད་པའི་རྒྱལ་པོ། པུས་མོ་གཡས་ལ་དེའི་ངོ་བོ་ཧཱུཾ་ལས་དབྱུག་སྔོན་ཅན། པུས་མོ་གཡོན་ལ་དེའི་ངོ་བོ་ཧཱུཾ་ལས་སྟོབས་པོ་ཆེ། སྤྱི་གཙུག་ཏུ་དེའི་ངོ་བོ་ཧཱུཾ་ལས་གཙུག་ཏོར་འཁོར་ལོས་སྒྱུར་བ། རྐང་མཐིལ་དུ་དེའི་ངོ་བོ་ཧཱུཾ་ཡོངས་སུ་གྱུར་པ་ལས་གནོད་མཛེས་རྒྱལ་པོ་བསྐྱེད་དེ། ཡན་ལག་ཁྲོ་བོར་སྒོམ་པའི་དེ་ཉིད་དོ། །དེ་ལྟར་ལྷ་སུམ་ཅུ་སོ་གཉིས་པོ་བསྐྱེད་པའི་འོག་ཏུ་རེ་རེ་ནས་རིམ་པ་བཞིན་ཕུང་པོ་ལྔ་དང༌། ཁམས་བཞི་དང་མིག་ལ་སོགས་པ་བརྒྱད་དང༌། གཟུགས་ལ་སོགས་པ་ལྔ་དང༌། ལག་པ་གཡས་པ་ལ་སོགས་པ་བཅུའི་ངོ་བོར་བསམ་པར་བྱ་སྟེ་ཤིན་ཏུ་རྣལ་འབྱོར་རོ། །ལྷ་རྣམས་ཀྱི་སྐུ་མདོག་ལ་སོགས་པ་ནི་སྔར་བཤད་པ་བཞི་དུ་བསྒོམ་སྟེ། ལྡང་བའི་ཡི་གེ་ནས་འདིའི་བར་ནི་ཉེ་བར་བསྒྲུབ་པའི་ཡན་ལག་གོ །དེ་ནས་སྔར་ཡོངས་སུ་རྫོགས་པར་བསྐྱེད་པའི་ལྷ་དམ་ཚིག་པ་ཙམ་དུ་འཛིན་པའི་རྣམ་རྟོག་རྡོ་རྗེ་གསུམ་གྱི་ཡེ་ཤེས་སེམས་དཔའ་རྗེས་སུ་ཞུགས་པས་གསལ་བའི་ཕྱིར། རང་གི་སྤྱི་བོར་ༀ་ལས་བྱུང་བའི་ཟླ་བའི་དཀྱིལ་འཁོར་ཡོངས་སུ་རྫོགས་པའི་ལྟེ་བར་ༀ་དཀར་པོ་འོད་ཟེར་ཁ་དོག་ལྔ་འཕྲོ་བ་ལས། སྤྱན་མའི་ཚོགས་ནམ་མཁའ་གང་བ་སྤྲོས་པས། སྐད་ཅིག་གིས་སྐུ་རྡོ་རྗེ་རྣམ་སྣང་གི་ཚོགས་
ནམ་མཁའ་གང་བ་སྤྱན་དྲངས་པའི་དབུས་ན་བཞུགས་པའི་བདག་པོ། རྣམ་པར་སྣང་མཛད་སྤྱན་མ་དང་སྦྱོར་བའི་མདུན་ན་རང་ཉིད་གནས་པར་བསམས་ལ། དཔལ་ལྡན་སངས་རྒྱས་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུས་ནི་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུས་ནི་མཛད་དུ་གསོལ། ཞེས་རྣམ་སྣང་གཙོ་འཁོར་ལ་རྡོ་རྗེ་གསུམ་མི་ཕྱེད་པ་རྡོ་རྗེ་འཆང་དུ་བསྒོམས་པ་བདག་གི་ལུས་ད་ལྟ་ཉིད་དུ་བྱིན་གྱིས་བརླབ་ཏུ་གསོལ་ཞེས་གསོལ་བ་བཏབ་པས། སྤྲོས་པའི་སྤྱན་མ་དང་སྤྱན་དྲངས་པའི་རྣམ་སྣང་གི་ལྷའི་ཚོགས་གཉིས་པོ་ཐམས་ཅད་ཕན་ཚུན་རྗེས་སུ་ཆགས་པ་སྔོན་དུ་འགྲོ་བས། སྙོམས་པར་ཞུགས་མཆོག་ཏུ་དགའ་བའི་བདེ་བ་མྱོང་བའི། འོད་ཟེར་དཀར་པོའི་ངོ་བོར་ཞུ་བ་ཡེ་ཤེས་སེམས་དཔའི་ཚུལ་གྱིས། རྣམ་པར་སྣང་མཛད་ཀྱི་སྒོ་ནས་ཞུགས་ཏེ། ཡེ་ཤེས་ཀྱི་ས་ཐོབ་པས་ལུས་ཐམས་ཅད་བཀང་སྟེ་ཚིམ་ནས་སྐུའི་དབང་ཕྱུག་ཐོབ་པར་བསམས་ལ། སངས་རྒྱས་ཀུན་གྱི་སྐུ་གང་ཡིན། །ཕུང་པོ་ལྔ་ཡིས་རབ་བཀང་བས། །སངས་རྒྱས་སྐུ་ཡི་ངོ་བོ་ཡིས། །བདག་ཀྱང་དེ་དང་འདྲ་བར་ཤོག །ཅེས་སྨོན་ལམ་བཏབ་པས། དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེའི་བདག་ཉིད་དུ་ང་རྒྱལ་བརྟན་པར་བྱས་ལ། ༀ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་
ཨཱཏྨ་ཀོ྅ཧཾ། ཞེས་བརྗོད་དེ་བྱིན་གྱིས་བརླབ་པ་ནི། སྐུ་བྱིན་གྱིས་བརླབ་པའི་དེ་ཉིད་དོ། །དེ་ནས་ལྕེའི་དབུས་སུ་ཨཱཿལས་བྱུང་བའི་པདྨ་དམར་པོ་འདབ་མ་བརྒྱད་པའི་ལྟེ་བར་ཨཱཿ དམར་པོ་འོད་ཟེར་ལྔ་འཕྲོ་བ་ལས། གོས་དཀར་མོའི་ཚོགས་ནམ་མཁའ་གང་བ་སྤྲོས་པས། སྐད་ཅིག་གིས་གསུང་རྡོ་རྗེའི་ཚོགས་ནམ་མཁའ་གང་བ་སྤྱན་དྲངས་པའི་དབུས་ན་བཞུགས་པའི་གཙོ་བོ། འོད་དཔག་མེད་གོས་དཀར་མོ་དང་སྦྱོར་བའི་མདུན་ན་རང་ཉིད་གནས་པར་བསམས་ལ། ཆོས་ཀྱི་གསུང་ལམ་དཔལ་ལྡན་པ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། ཞེས་གཙོ་འཁོར་ལ་སྔར་བཞིན་བདག་གི་ངག་ད་ལྟ་ཉིད་དུ་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་པས། ལྷའི་ཚོགས་གཉིས་པོ་ཐམས་ཅད་སྔར་བཞིན་སྙོམས་པར་ཞུགས། མཆོག་ཏུ་དགའ་བའི་བདེ་བ་མྱོང༌བས། འོད་ཟེར་དམར་པོའི་ངོ་བོར་ཞུ་བ་ཡེ་ཤེས་སེམས་དཔའི་ཚུལ་གྱིས། ལྕེ་ལ་ཞུགས་ཏེ་ཡེ་ཤེས་ཀྱི་ས་ཐོབ་པས་ལུས་ཐམས་ཅད་བཀང་སྟེ་ཚིམ་ནས། གསུང་གི་དབང་ཕྱུག་ཐོབ་པར་བསམས་ལ། རྡོ་རྗེ་ཆོས་ཀྱི་གསུང་གང་ཡིན། །ངེས་པའི་ཚིག་ནི་ཕུན་སུམ་ཚོགས། །
བདག་གི་ཚིག་ཀྱང་དེ་འདྲ་ཞིང༌། །ཆོས་འཛིན་པ་དང་འདྲ་བར་ཤོགཅེས་སྨོན་ལམ་བཏབ་པས། དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེའི་བདག་ཉིད་དུ་ང་རྒྱལ་བརྟན་པར་བྱས་ལ། ༀ་སརྦ་ཏ་ཐཱ་ག་ཏ་ཝ་ཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་དེ་བྱིན་གྱིས་བརླབ་པ་ནི། གསུང་བྱིན་གྱིས་བརླབ་པའི་དེ་ཉིད་དོ། །མདོ་བསྲེ་ལས། ལྐོག་མར་པདྨ་ལ་ཨཱ་ཡིག་སྒོམ་པའང་བཤད་པས་དེ་གཉིས་གང་རུང་གིས་ཆོག་གོ །དེ་ནས་སྙིང་ཁའི་དབུས་སུ་ཧཱུཾ་ལས་བྱུང་བའི་ཉི་མའི་དཀྱིལ་འཁོར་གྱི་ལྟེ་བར་ཧཱུཾ་སྔོན་པོ་འོད་ཟེར་ལྔ་འཕྲོ་བ་ལས། མཱ་མ་ཀཱིའི་ཚོགས་ནམ་མཁའ་གང་བ་སྤྲོས་པས། སྐད་ཅིག་གིས་ཐུགས་རྡོ་རྗེའི་ཚོགས་ནམ་མཁའ་གང་བ་སྤྱན་དྲངས་པའི་དབུས་ན་བཞུགས་པའི་གཙོ་བོ། མི་བསྐྱོད་པ་མཱ་མ་ཀཱི་དང་སྦྱོར་བའི་མདུན་ན་རང་ཉིད་གནས་པར་བསམས་ལ། དཔལ་ལྡན་རྡོ་རྗེ་ཐུགས་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། ཞེས་གཙོ་འཁོར་ལ་སྔར་བཞིན་བདག་གི་ཡིད་ད་ལྟ་ཉིད་དུ་བྱིན་གྱིས་བརླབས་ཏུ་གསོལ་ཞེས་གསོལ་བ་བཏབ་པས། ལྷའི་ཚོགས་གཉིས་པོ་ཐམས་ཅད་སྔར་བཞིན་སྙོམས་པར་ཞུགས། མཆོག་ཏུ་དགའ་བའི་བདེ་བ་མྱོང་ནས། འོད་ཟེར་
ནག་པོའི་ངོ་བོར་ཞུ་བ་ཡེ་ཤེས་སེམས་དཔའི་ཚུལ་གྱིས་སྙིང་ཁར་ཞུགས་ཏེ། ཡེ་ཤེས་ཀྱི་ས་ཐོབ་པས་ལུས་ཐམས་ཅད་བཀང་སྟེ་ཚིམ་ནས། ཐུགས་ཀྱི་དབང་ཕྱུག་ཐོབ་པར་བསམས་ལ། ཀུན་ཏུ་བཟང་པོའི་ཐུགས་གང་ཡིན། །གསང་བའི་དབང་པོ་བློ་ལྡན་པ། །བདག་ཀྱང་དེ་དང་འདྲར་འགྱུར་ཞིང༌། །རྡོ་རྗེ་འཛིན་དང་མཚུངས་པར་ཤོགཅེས་སྨོན་ལམ་བཏབ་པས། དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེའི་བདག་ཉིད་དུ་ང་རྒྱལ་བརྟན་པར་བྱས་ལ། ༀ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་དེ་བྱིན་གྱིས་བརླབ་པ་ནི། ཐུགས་བྱིན་གྱིས་བརླབ་པའི་དེ་ཉིད་དོ། །འདིར་ཧཱུཾ་ཡིག་གི་གནས་ལ་རྡོ་རྗེའི་དཀྱིལ་འཁོར་ཞེས་གསུངས་པའི་དོན་སྒྲོན་གསལ་ལས་མདོར་བྱས་བཞིན་ཉི་མ་དང༌། རྡོ་རྗེ་སེམས་དཔའི་སྒྲུབ་ཐབས་ལས་རྡོ་རྗེ་ལ་བཤད་དོ། །དེ་ནས་སྐུ་གསུང་ཐུགས་ཀྱི་རྡོ་རྗེ་གསུམ་དབྱེར་མི་ཕྱེད་པ་རྡོ་རྗེ་འཆང་ཆེན་པོར་བསྒོམས་ལ། ༀ་སརྦ་ཏ་ཐཱ་ག་ཏ་ཀཱ་ཡ་ཝ་ཀ་ཙིཏྟ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཞེས་བརྗོད་དེ་རྡོ་རྗེ་འཆང་གི་ང་རྒྱལ་བྱ་བ་ནི། དམ་ཚིག་སེམས་དཔའི་སྐུ་གསུང་ཐུགས་ཐུན་མོང་དུ་བྱིན་གྱིས་རློབ་པའི་དེ་ཉིད་དོ། །དེ་ནས་རང་དམ་ཚིག་སེམས་དཔའ་རྡོ་རྗེ་འཆང་སྔོན་པོའི་ཐུགས་ཀར། སྣ་ཚོགས་པདྨ་དང་ཟླ་བའི་གདན་ལ་ཡེ་ཤེས་སེམས་དཔའ་སྐུ་མདོག་དམར་པོ། ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་རང་སྣང་གི་ཤེས་རབ་མ་ལ་འཁྱུད་
པ། ཁ་སྦྱོར་གྱི་སྦྱོར་བས་ལུས་རྒྱས་པར་བྱེད་པ་བསྒོམ་པ་ནི་ཡེ་ཤེས་སེམས་དཔའི་དེ་ཉིད་དོ། །མདོར་བྱས་ལས་ཡེ་ཤེས་སེམས་དཔའ་ཕྲ་མོ་བསྒོམ་པར་གསུངས་པའི་དོན་ནས་འབྲུའི་ཆད་ཙམ་སྒོམ་པར་མ་ག་ཏའི་པཎྜི་ཏ་ཐུབ་པ་དཔལ་བཟང་པོས་བཤད་དོ། །དེའི་ཐུགས་ཀར་ཟླ་བའི་གདན་ལ་རྡོ་རྗེ་སྔོན་པོའི་ལྟེ་བའི་ནང་དུ། ཏིང་ངེ་འཛིན་སེམས་དཔའ་ཧཱུཾ་ཡིག་སྔོན་པོ་རྟག་ཏུ་འཆར་བ་མར་མེ་ཆེན་པོ་ལྟ་བུ། མི་ཤེས་པའི་མུན་པ་འཇོམས་པའི་དོན་དུ། སྣང་བའི་ཕུང་པོ་ལྟ་བུ་བསམ་པ་ནི། ཏིང་ངེ་འཛིན་སེམས་དཔའི་དེ་ཉིད་དོ། །དམ་ཚིག་སེམས་དཔའི་རལ་པའི་ཅོད་པན་ལ། རྡོ་རྗེ་འཆང་ཆེན་པོ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་རྡོ་རྗེ་དབྱིངས་ཀྱི་དབང་ཕྱུག་མ་དང་ལྷན་ཅིག་ཁ་སྦྱོར་གྱི་སྦྱོར་བས། བྱང་ཆུབ་སེམས་ཀྱི་བདུད་རྩི་འཛག་པའི་རྒྱུན་གྱིས་ལུས་ཐམས་ཅད་ཚིམ་པར་བྱེད་པར་བསམ་སྟེ། རྣལ་འབྱོར་ཆེན་པོ་དང་སྒྲུབ་པའི་ཡན་ལག་གོ །རྣལ་འབྱོར་ཕྱི་མ་གཉིས་པོ་ནི་ཤའི་མིག་གིས་མི་མཐོང་བའི་བར་དོས་མངལ་དུ་སྐྱེ་བ་བཟུང་ནས། ཕུང་པོ་ལ་སོགས་པ་རྫོགས་པའི་ཚེ། མངལ་གྱི་སྒོར་འཐོན་པ་ན་ཤའི་མིག་གིས་མཐོང་བ་དང༌། ལོངས་སྐུ་སོ་སོ་སྐྱེ་བོ་ལ་སོགས་པས་མི་མཐོང་བས། དེ་དག་གི་དོན་བྱ་བའི་ཕྱིར་ཡུམ་གྱི་ལྷུམས་སུ་སྤྲུལ་སྐུའི་སྐྱེ་བ་བཟུང་ནས་བཙས་པའི་ཚུལ་བསྟན་པའི་ཚེ། གདུལ་བྱ་དེ་དག་གིས་མཐོང་བ་བཞིན་དུ། བར་དོ་དང་ལོངས་སྐུ་དང་འདྲ་བའི་དང་པོའི་མགོན་པོས་ཀྱང༌། མངལ་དུ་སྐྱེ་བ་བཟུང་བ་དང་འདྲ་བའི་མི་བསྐྱོད་པ་ལ་ཞུགས་པས། སྤྲུལ་སྐུ་
རྡོར་སེམས་སུ་བསྒྱུར་བ་ལ་མངལ་གྱི་སྐབས་ཡོངས་སུ་རྫོགས་པ་དང་འདྲ་བས། ༀ་ཡིག་ནས་ཏིང་ངེ་འཛིན་སེམས་དཔའ་ཧཱུཾ་ཡིག་གི་བར་གྱི་སྔགས་ཐམས་ཅད་ཀྱིས་བྱིན་གྱིས་བརླབས་པས། ཕུང་པོ་ཁམས་སྐྱེ་མཆེད་ཡན་ལག་སྐུ་གསུང་ཐུགས་ལ་སོགས་པའི་གནས་སྐབས་རྣམས་ཡོངས་སུ་རྫོགས་པའི་ཚེ། སྤྲུལ་སྐུ་ཞལ་གསུམ་ཕྱག་དྲུག་པ་ཡོངས་སུ་རྫོགས་པར་མཐོང་བ་ནི། སྐྱེ་བ་བཟུང་བའི་གནས་སྐབས་དང་མཐུན་པར་བསྒོམ་པ་སྐྱེ་བ་སྤྲུལ་སྐུར་འཁྱེར་བའི་རྣལ་འབྱོར་རོ། །དེ་ལྟར་གང་དུ་འཚང་རྒྱ་བའི་གནས་སྣོད་ཡོངས་སུ་དག་པར་གང་གིས་འཚང་རྒྱ་བའི་རྟེན་ལྷ་ཐམས་ཅད་འདུས་པའི་བདག་ཉིད་རྡོ་རྗེ་འཆང་གི་རྣལ་འབྱོར་དང་ལྡན་པས། ཇི་ལྟར་འཚང་རྒྱ་བའི་རིམ་པ་ཕུང་སོགས་རིམ་གྱིས་འོད་གསལ་དུ་ཞུགས་པའི་ཆོས་སྐུའི་ངང་ནས། ལོངས་སྐུ་དང་པོའི་མགོན་པོར་བཞེངས་ཏེ། སྤྲུལ་སྐུ་རྡོ་རྗེ་འཆང་དུ་སྤྲུལ་ནས་ཉིད་ཀྱི་སྐུ་རྟེན་དང་བརྟེན་པའི་དཀྱིལ་འཁོར་བར་སྤྲུལ་པའི་སྐུ་གསུམ་གྱི་གོ་འཕང་ནི། འདོད་ཆགས་ཀྱི་ཆོས་སྔགས་ཀྱི་སྤྱོད་པས་འཐོབ་པར་བསྟན་པའི་ཕྱིར། སྤྲུལ་སྐུ་རྡོ་རྗེ་འཆང་གིས་འདོད་ཆགས་ཆེན་པོའི་ཚུལ་གྱི་ཏིང་ངེ་འཛིན་ལ་སྙོམས་པར་ཞུགས་ནས། མཆོག་ཏུ་དགའ་བའི་བདེ་བས་ཚིམ་པར་བྱེད་པའི་ལྷ་མོ་དགུ་སྤྲུལ་པ་དེ་བཞིན་དུ། སློབ་བཞིན་པའི་རྣལ་འབྱོར་པ་འདོད་ཆགས་ཀྱི་ཀུན་སྤྱོད་ལ་དགའ་བས་ཀྱང༌། སྐུ་གསུམ་གྱི་གོ་འཕང་བསྒྲུབ་པའི་ཕྱིར། འདོད་པ་ཀུན་ལ་ལོངས་སྤྱོད་པའི་ཏིང་ངེ་འཛིན་
བསྟེན་པར་བྱའོ། །དེ་ལ་རིག་མ་འདུ་བྱ་བ་ནི། ཕྱི་རོལ་གྱི་རིག་མའམ་ཡང་ན། སྙིང་ཁ་ནས་རང་རིགས་ཀྱི་རིག་མ་ཕྱུང་ལ། སྟོང་པར་སྦྱངས་ཏེ་ཁཾ་ལས་རྡོ་རྗེ་དེ་ལས་རེག་བྱ་རྡོ་རྗེ་མར་སྔར་བཤད་པ་བཞིན་བསྐྱེད། དེའི་སྤྱི་གཙུག་ནས་སྐྲ་མཚམས་ཀྱི་བར་དུ་ༀ་དཀར་པོ་ལས་རྣམ་སྣང་སོགས་སྔར་བཤད་པ་བཞིན་ས་བོན་རྐྱང་པ་ལས་བསྐྱེད། ལྟེ་བ་སོགས་ཀྱི་གནས་བཞིར་ཡུམ་བཞི་ས་བོན་ལས་བསྐྱེད། མིག་སོགས་བཞི་དང་བྷ་གའི་རྩེ་མོར་ཛཿཧཱུཾ་བཾ་ཧོཿཁཾ་ལས་རྡོ་རྗེ་མ་ལྔ་ས་སྙིང་སོགས་ཀྱིས་འཁྱུད་པར་བསྐྱེད། ལག་པ་གཡས་ལ་རོ་ལངས་མ། གཡོན་ལ་གཞན་གྱི་མི་ཐུབ་པ། ཁ་ལ་ཁྲོ་གཉེར་ཅན། བྷ་གར་རལ་ཅིག་མ། དཔུང་པ་གཡས་ཀྱི་རྩ་བར་དེ་བཞིན་གཤེགས་པའི་ཡུམ་རྡོ་རྗེ་མ། གཡོན་ལ་སྣ་ཚོགས་རིན་ཆེན་མ། པུས་མོ་གཡས་ལ་སྣ་ཚོགས་པདྨ། གཡོན་ལ་སྣ་ཚོགས་ལས་མ། སྤྱི་གཙུག་ཏུ་ནམ་མཁའི་རྡོ་རྗེ་མ། རྐང་མཐིལ་དུ་ས་འཛིན་ལྷ་མོ་རྣམས་ཧཱུཾ་ཡིག་ལས་ཞལ་ཕྱག་དང་ཕྱག་མཚན་ཁྲོ་བོ་བཅུ་དང་འདྲ་བར་བསྐྱེད་དོ། །དེ་ནས་རྡོ་རྗེ་དང་པདྨ་འདུ་བྱ་བ་ནི། རང་གི་གསང་གནས་མི་དམིགས་པ་ལས། ཧཱུཾ་ལས་བྱུང་བའི་རྡོ་རྗེ་ལྔ་པའི་རྭ་དབུས་མའི་ནོར་བུ་ལ་ༀ་གྱིས་མཚན་ཞིང༌། བུ་ག་ཡི་གེ་ཕཊ་སེར་པོས་བཀག་པ་དང༌། ཡུམ་གྱི་གསང་གནས་མི་དམིགས་པའི་ངང་ལས་ཨཱ་ལས་བྱུང་བའི་པདྨ་དམར་པོ་འདབ་མ་བརྒྱད་པ། བུ་ག་ཡི་གེ་ཕཊ་ཀྱིས་བཀག་པར་བསྒོམ་སྟེ། རིག་མ་འདུ་བྱ་བ་སོགས་ཀྱི་དེ་ཉིད་དོ། །
དེ་ནས་རིན་འབྱུང་གི་ང་རྒྱལ་གྱིས་ཡབ་ཡུམ་རྗེས་སུ་ཆགས་པས། ཕན་ཚུན་འཁྱུད་པ་དང་འོ་བྱ་བ་དང་འཇིབ་པ་སོགས་བྱས་ལ། ༀ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཏྨ་ཀོ་྅ཧཾ། ཞེས་བརྗོད་དེ་དེ་བཞིན་གཤེགས་པ་ཐམས་ཅད་ཀྱི་རྗེས་སུ་ཆགས་པའི་རྡོ་རྗེའི་བདག་ཉིད་ངའོ་སྙམ་དུ་རྗེས་སུ་ཆགས་པའི་ང་རྒྱལ་བྱའོ། །རྗེས་སུ་ཆགས་པའི་དེ་ཉིད་དོ། །རིན་འབྱུང་ལས་རྡོ་རྗེ་འཆང་གི་ང་རྒྱལ་དུ་འཕོས་རྡོ་རྗེ་དང་པདྨའི་ནང་འོད་ཟེར་ལྔས་གང་བར་བསམས་ལ། ཧཱུཾ་གླུར་བླང་ཞིང་སྙོམས་པར་འཇུག་པའི་ལས་ལ་གནས་པར་བྱས་པས་མཆོག་ཏུ་དགའ་བའི་བདེ་བ་བསྐྱེད་ལ་བསྒོམ། མཐར་དོན་གྲུབ་ཀྱི་ང་རྒྱལ་གྱིས། ཕཊ་ཅེས་བརྗོད་པས་ལུས་དཀྱིལ་གྱི་ལྷ་ཐམས་ཅད་ཚིམ་ནས་ཞུ་བའི་ཐིག་ལེ་ཡུམ་གྱི་པདྨར་ཕབ་ལ། དེ་ཉིད་དེ་བཞིན་གཤེགས་པ་རིགས་ལྔ་ལ་སོགས་པ་ལྷ་ཐམས་ཅད་ཀྱི་འབྱུང་གནས་སུ་བསམ་ཞིང༌། བདེ་བ་ཆེན་པོས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཆོད་པར་བསམས་ལ། ༀ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཏྨ་ཀོ་྅ཧཾ། ཞེས་བརྗོད་དེ་དེ་བཞིན་གཤེགས་པ་ཐམས་ཅད་མཆོད་པའི་རྡོ་རྗེའི་བདག་ཉིད་ངའོ་སྙམ་དུ་ང་རྒྱལ་བྱ་བ་ནི། མཆོད་པའི་དེ་ཉིད་དོ། །དེ་ཡན་ཆད་ནི་དཀྱིལ་འཁོར་གསུམ་སེམས་དཔའ་གསུམ་གྱི་བདག་ཉིད་ཅན་གི་དོན་ཕུན་སུམ་ཚོགས་པ་ཏིང་ངེ་འཛིན་གྱི་རྒྱལ་པོ་མཆོག་གམ། དང་པོ་སྦྱོར་བའི་ཏིང་ངེ་འཛིན་ཏོ། །དེ་ལྟར་རང་དོན་སྐུ་གསུམ་བརྙེས་ནས་གཞན་གྱི་དོན་
ཕུན་སུམ་ཚོགས་པ་རྒྱལ་མཆོག་གཉིས་ཀྱིས་སྒྲུབ་པ་ལ། ཐོག་མར་དཀྱིལ་འཁོར་རྒྱལ་མཆོག་གི་རྟེན་གྱི་དཀྱིལ་འཁོར་ནི། ཐིག་ལེ་ཆ་གཅིག་བྷྲུཾ་དང། དེ་ཡོངས་སུ་གྱུར་པ་ལས་གཞལ་ཡས་ཁང་གྲུ་བཞི་སྒོ་བཞི་པ་སོགས་གདན་དང་བཅས་པ་བསྐྱེད། ཐིག་ལེ་ཆ་གཅིག་གདན་རྣམས་ཀྱི་སྟེང་དུ། ཆ་སུམ་ཅུ་སོ་གཉིས་སུ་གྱུར་དེ་རྣམས་ཡོངས་སུ་གྱུར་པ་ལས། ༀ་ཨཱ་ཧཱུཾ་ཧཱུཾ་ལ་སོགས་པ་རང་རང་གི་ས་བོན་གྱི་སྔགས་རྡོ་རྗེ་གསུམ་གྱི་ཡི་གེས་བྱིན་གྱིས་བརླབས་པ་སོ་གཉིས་སུ་གྱུར། དེ་ལས་རྡོ་རྗེ་ལ་སོགས་པའི་ཕྱག་མཚན་སོ་གཉིས་སུ་གྱུར། དེ་ལས་ལྷའི་སྐུར་རིམ་གྱིས་བསྐྱེད་པ་ནི་སྐྱེད་པའི་སྒོའོ། །ཡུམ་གྱི་པདྨ་ནས་ཡབ་ཀྱི་ཐུགས་ཀར་དྲངས་ཏེ། ཕྱིར་ཕྱུང་ཕྱོགས་བཅུར་འཕྲོས་པ་ནི་སྤྲོ་བའི་སྒོའོ། །དེ་ནས་རང་རང་གི་འཕྲིན་ལས་མཛད་པ་ནི་མཛད་པའི་སྒོའོ། །སྤྲུལ་པ་རྣམས་གཅིག་ཏུ་འདུས་པ་ནི་བསྡུ་བའི་སྒོའོ། །ཡེ་ཤེས་པ་སྤྱན་དྲངས་པ་དང་འདྲེས་པ་ནི་འདྲེས་པའི་སྒོའོ། །རང་རང་གི་སྤྱི་གཙུག་གི་རིགས་བདག་ཡབ་ཡུམ་གྱི་བྱང་ཆུབ་ཀྱི་སེམས་ཀྱིེས་དབང་བསྐུར་བ་ནི་དབང་བསྐུར་བའི་སྒོའོ། །སླར་བྱོན་ནས་རང་གནས་སུ་བཞུགས་པ་ནི་གནས་སུ་གནས་པའི་སྒོ་སྟེ། ལྷ་ཐམས་ཅད་སྒོ་བདུན་བདུན་དང་ལྡན་པར་བྱའོ། །དེའི་རིམ་པ་ནི་གདན་དབུས་མའི་སྟེང་དུ། རང་ཉིད་མི་བསྐྱོད་པ་མཐིང་ནག་མི་བསྐྱོད་པའི་དབུ་རྒྱན་ཅན། རེག་རྡོ་རྗེ་མ་དང་བཅས་པར་སྐྱེད་པ་ནས་གནོད་མཛེས་ཀྱི་བར་དུ་སྔར་བཤད་པ་བཞིན། རིམ་གྱིས་བསྐྱེད་ཟིན་པ་དང༌། མི་བསྐྱོད་པ་
རྡོ་རྗེའི་ལམ་ནས་ཐུགས་ཀར་དྲངས། བཛྲ་དྷྲིཀ་ཅེས་བརྗོད་པས་ཐུགས་ཀ་ནས་ཕྱིར་ཕྱུང་ཕྱོགས་བཅུར་འཕྲོས་ཆོས་ཀྱི་འཁོར་ལོ་བསྐོར་བ་ལ་སོགས་པ་སངས་རྒྱས་ཀྱི་མཛད་པ་ཐམས་ཅད་མཛད། ཁྱད་པར་དུ་ཞེ་སྡང་ཅན་རྣམས་ཀྱི་ཞེ་སྡང་སྦྱངས་ནས་མི་བསྐྱོད་པའི་གོ་འཕང་ལ་བཀོད། སྤྲུལ་པ་རྣམས་གཅིག་ཏུ་འདུས། མི་བསྐྱོད་པ་ཡེ་ཤེས་པ་དང་དབྱེར་མེད་དུ་འདྲེས། རང་གི་རིགས་བདག་ཡབ་ཡུམ་གྱི་བྱང་ཆུབ་ཀྱི་སེམས་ཀྱིས་དབང་བསྐུར། སླར་བྱོན་ནས་རང་གི་མདུན་ན་འདུག་པ་རང་གི་སྙིང་ཁར་ཞུགས་ནས་འདྲེས་པས། རང་རྡོ་རྗེ་འཆང་ཞི་བ་དེ་ཞེ་སྡང་རྡོ་རྗེར་གྱུར་ཏེ། སྔར་གྱི་ཟླ་བ་ཉི་གདན་ལ་ཐིམ་པའི་སྟེང་ན་བཞུགས་པ་སྔར་བཤད་པ་བཞིན་གསལ་གདབ།དེ་བཞིན་དུ་སྦྱར་ལ། རེག་བྱ་རྡོ་རྗེ་མ་ཕྱུང་ནས་སྔར་གྱི་རེག་བྱ་རྡོ་རྗེ་མ་ལ་བསྟིམ་སྟེ། ཁྱད་པར་ནི་འབྱིན་སྔགས་སྤརྴ་བཛྲ་དང༌། མཛད་པ་ནི་རེག་བྱ་ལ་ཞེན་པ་རྣམས་སྦྱངས་ནས། རྒྱལ་བ་རྣམས་རེག་བྱའི་བདེ་བས་མཆོད་པའོ། །རྣམ་སྣང་ལ་སོགས་པ་བཞིའི་འབྱིན་སྔགས་ནི་རིམ་པ་བཞིན། ཛི་ན་ཛིཀ་དང་རཏྣ་དྷྲིཀ་དང་ཨཱ་རོ་ལིཀ་དང་པྲཛྙཱ་དྷྲིཀ་ཡིན་ལ། སྤྱི་མཛད་ནི་འདྲི་ཞིང༌། སྒོས་མཛད་ནི་རིམ་པ་བཞིན་གཏི་མུག་ཅན་དང༌། ང་རྒྱལ་དང༌། འདོད་ཆགས་དང༌། བརྫུན་དུ་སྨྲ་བ་དང༌། ཕྲག་དོག་ཅན་རྣམས་སྦྱངས་ནས། རྣམ་སྣང་ལ་སོགས་པའི་གོ་འཕང་ལ་བཀོད་པ་སྟེ། གཤེགས་པ་འབྱུང་བའི་དེ་ཉིད་དོ། །སྤྱན་མ་ལ་
སོགས་པ་བཞིའི་འབྱིན་སྔགས་ནི་རིམ་པ་བཞིན། མོ་ཧ་ར་ཏི་དང་དྭེ་ཥ་ར་ཏི་དང་རཱ་ག་ར་ཏི་དང་བཛྲ་ར་ཏིའོ། །མཛད་པ་ནི་རིམ་པ་བཞིན་སེམས་ཅན་ནད་དང་གདོན་གྱིས་གདུངས་པ་རྣམས་ཞི་བ་དང༌། བགེགས་ཆེན་པོས་གཟིར་བ་རྣམས་བསྲུངས་ཏེ་རྒྱས་པ་དང༌། སེམས་ཅན་གདོན་གྱིས་ཉེན་པ་རྣམས་ཞི་ཞིང་སྲུང་བ་དང༌། སེམས་ཅན་ཐམས་ཅད་དབང་དུ་མཛད་པ་སྟེ། གཤེགས་མ་དབྱུང་བའི་དེ་ཉིད་དོ། །གཟུགས་རྡོ་རྗེ་མ་ལ་སོགས་པ་བཞིའི་འབྱིན་སྔགས་ནི་རིམ་པ་བཞིན། རཱུ་པ་བཛྲ་ཤཔྟ་བཛྲ་གནྡྷེ་བཛྲ་ར་ས་བཛྲ་ཞེས་པའོ། །མཛད་པ་ནི་རིམ་པ་བཞིན། གཟུགས་དང་སྒྲ་དང་དྲི་དང་རོ་ལ་ཞེན་པ་རྣམས་སྦྱངས་ནས། གཟུགས་སོགས་ཀྱི་བདེ་བས་རྒྱལ་བ་རྣམས་མཆོད་པ་སྟེ། སེམས་མ་དབྱུང་བའི་དེ་ཉིད་དོ། །བྱམས་པ་ལ་སོགས་པ་བརྒྱད་ཀྱི་འབྱིན་སྔགས་ནི། རིམ་པ་བཞིན་མཻ་ཏྲི་དང་ཀྵི་ཏྲི་གརྦྷ་དང་བཛྲ་པཱ་ཎི་དང་ཁ་གརྦྷ་དང་ལོ་ཀི་ཤྭ་ར་དང་མཉྫུ་ཤྲཱི་དང་སརྦ་ནི་ཝ་ར་ཎ་བི་སྐཾ་བི་ནི་དང་ས་མནྟ་བྷ་དྲ་ཞེས་པའོ། །མཛད་པ་ནི་རིམ་པ་བཞིན་སེམས་ཅན་ཐམས་ཅད་ཀྱི་རྩ་རྒྱུས་དང་མིག་དང་རྣ་བ་དང་སྣ་དང་ལྕེ་དང་ཡིད་དང་ལུས་ཀྱི་སྐྱེ་མཆེད་དང་ཚིགས་རྣམས་སྦྱོང་བ་སྟེ། སེམས་དཔའ་དབྱུང་བའི་དེ་ཉིད་དོ། །གཤིན་རྗེ་གཤེད་ལ་སོགས་པ་བཅུའི་འབྱིན་སྔགས་ནི་སྔར་བཤད་ཟིན་ལ། མཛད་པ་ནི་རིམ་པ་བཞིན་དབང་པོ་ལ་སོགས་པའི་གདོན་དང༌། གཤིན་རྗེ་དང་མ་མོ་ལ་སོགས་པའི་གདོན་དང༌། ཀླུ་དང་ས་བདག་གི་གདོན་དང༌། གནོད་སྦྱིན་དང་ལོག་འདྲེན་ལ་སོགས་པའི་
གདོན་དང༌། མེ་ལྷའི་གདོན་དང༌། བདེན་བྲལ་གྱི་གདོན་དང༌། རླུང་ལྷའི་གདོན་དང༌། དབང་ལྡན་གྱི་གདོན་དང༌། ཚངས་པ་དང་ལྷའི་གདོན་དང༌། བརྟན་པ་དང་གཡོ་བའི་དུག་དང་ཀླུ་དང་ས་བདག་གི་གདོན་རྣམས་བཅོམ་པ་སྟེ། ཁྲོ་བོ་དབྱུང་བའི་དེ་ཉིད་དོ། །ཁྱད་པར་ལྷག་མ་རྣམས་ནི་སྔར་བཤད་པ་བཞིན་སྦྱར་རོ། །གཞལ་ཡས་ཁང་ཐུགས་ཀར་དྲངས། ༀ་ཨཱཿཧཱུཾ་གིས་ཐུགས་ཀ་ནས་ཕྱིར་ཕྱུང༌། ཕྱོགས་བཅུར་འཕྲོས་སྣོད་ཀྱི་ཉེས་སྐྱོན་ཐམས་ཅད་སྦྱངས། གཅིག་ཏུ་འདུས་ཡེ་ཤེས་ཀྱི་གཞལ་ཡས་ཁང་དང་འདྲེས་པ་སླར་བྱོན་ནས་སྔར་གྱི་གཞལ་ཡས་ཁང་ལ་ཐིམ་པར་བསམ་མོ། །མདོར་བྱས་ལོ་ཆེན་གྱིས་བསྒྱུར་བ་དག་པ་རྣམས་ལས། རིགས་ལྔ་དང་ཡུམ་བཞི་དང་ཁྲོ་བོ་བཞི་རང་རང་གི་མཚན་སྔགས་ཀྱིས་དབྱུང་བར་གསུངས་ཤིང༌། ཁྲོ་བོ་ལྷག་མ་དྲུག་རང་གི་སྔགས་ཀྱིས་དབྱུང་བར་གསུངས་པ་སྔ་མ་དང་འདྲ་ལ། སེམས་དཔའ་བརྒྱད་རང་གི་ས་བོན་གྱིས་སྐྱེད་པར་གསུངས་ཤིང༌། རྡོ་རྗེ་མ་ལྔ་ལ་འབྱིན་པ་དང་སྐྱེད་པའི་སྔགས་གང་ཡང་མ་གསུངས་པའི་དོན། ས་བོན་སོ་གཉིས་སྐྱེད་སྔགས་དང་རྣམ་གཞག་ལས་གསུངས་པ་བཞིན་མཚན་སྔགས་སོ་གཉིས་འབྱིན་སྔགས་སུ་བྱེད་པ་ལེགས་ཏེ། ལྷ་རྣམས་སྐྱེད་པའི་སྔགས་ལུས་དཀྱིལ་བཞིན་བྱ་དགོས་ཤིང༌། འབྱིན་སྔགས་མཚན་སྔགས་ལ་བཤད་པས་སོ་སོར་བྱ་དགོས་པའི་ཕྱིར་རོ། །དེས་ན་སེམས་དཔའ་བརྒྱད་ཀྱི་སྐྱེད་སྔགས་ཀྱིས་བཞན་རྣམས་ཀྱི་སྐྱེད་སྔགས་
དང༌། རིགས་ལྔ་སོགས་ཀྱི་འབྱིན་སྔགས་ཀྱིས་གཞན་རྣམས་ཀྱི་འབྱིན་སྔགས་མཚོན་པར་བྱའོ། །མདོར་བྱས་ལས། རང་སྔགས་ཡི་གེ་ལས་བྱུང་བ། །རྡོ་རྗེ་གསུམ་གྱིས་བྱིན་བརླབས་བདག །ཅེས་གསུངས་པས་རང་རང་གི་ས་བོན་གྱི་སྔགས་འབྲུ་གསུམ་དང་སྤེལ་བ་ཡིན་ལ། ལྷ་གཞན་ཐམས་ཅད་ཞེ་སྡང་རྡོ་རྗེའི་ཏིང་ངེ་འཛིན་གྱིས་འབྱིན་པར་གསུངས་པས། འབྱིན་པའི་ཚེ་སོ་སོའི་ང་རྒྱལ་བྱེད་པ་མིན་ནོ། །དེ་ལྟར་ལྷ་དང་གཅིག་ཏུ་དྲན་པའམ་གཅིག་ཏུ་ལྷ་དྲན་པས་དྲན་པ་གཅིག་པའི་རྣལ་འབྱོར་ལ་སློབ་པའི་གནད་བསྡུ་ན། ཐ་མལ་གྱི་སྣང་བ་རྣམས་འོད་གསལ་དུ་བསྡུས་པའི་འོག་ཏུ། ལྷག་པར་མོས་པ་དང་ས་བོན་ལ་སོགས་པ་ལས་ལྷའི་གནས་ལུས་ལོངས་སྤྱོད་མཛད་པ་རྣམས་སུ་བསྐྱེད་པ་ན། རྒྱུ་དེ་དག་ལས་རྡོ་རྗེ་འཆང་ལ་སོགས་པ་དེ་རྣམས་སུ་དངོས་སུ་སྐྱེས་པར་མོས་པའི་ངེས་ཤེས་ཀྱི་འཛིན་སྟངས་རེ་སྐྱེད་པ་དང༌། བསྒོམ་རྒྱུ་གང་ཡིན་པ་དེའི་ཁ་དོག་དང་དབྱིབས་ཀྱི་རྣམ་པ་རྣམས། ཡིད་ཀྱིས་ཇི་ལྟར་གསལ་གདབ་པ་དེ་བཞིན་དུ་འཆར་བའི་རྣམ་པ་ལ་བསླབ་པ་དང༌། དེ་གཉིས་ལ་སེམས་མི་གཡོ་བར་གནས་པའི་ཏིང་ངེ་འཛིན་བརྟན་པོ་སྐྱེད་པ་ཡིན་ཏེ། འདིའི་མན་ངག་རྒྱས་པར་གཞན་དུ་བསྟན་པ་ལས་ཤེས་པར་བྱའོ། །དེ་ཡན་ཆད་ནི་སྤྲུལ་སྐུའི་མཛད་པ་སྐུའི་སྤྲུལ་པའི་སྒོ་ནས་སེམས་ཅན་གྱི་དོན་མཛད་པ་དང༌། རྗེས་སུ་མཐུན་པར་སྒོམ་པ་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་ཏོ། །དེ་ལྟར་བསླབས་པས་ཐ་མལ་པའི་སྣང་ཞེན་
གཉིས་རགས་པའི་ལྷའི་རྣལ་འབྱོར་གྱིས་གཅོད་པར་ནུས་པའི་ཚེ། རྟོག་པའི་རྣལ་འབྱོར་ཕྲ་མོ་ལ་བསླབ་པར་གསུངས་པ་ནི། ཐིག་ལེ་ཕྲ་མོའི་ནང་དུ་རྟེན་དང་བརྟེན་པའི་དཀྱིལ་འཁོར་ཡོངས་སུ་རྫོགས་པ་སྒོམ་པ་ལ་དགོངས་པ་ཡིན་གྱི། ཕྲ་མོ་ཙམ་ལ་སེམས་འཛིན་པ་ལ་གསུངས་པ་མིན་ནོ། །དེས་ན་དཀྱིལ་འཁོར་རྒྱལ་མཆོག་གི་རྣལ་འབྱོར་ཟིན་པའི་འོག་ཏུ་རང་གི་སེམས་བརྟན་པར་བྱ་བའི་ཕྱིར། མི་བསྐྱོད་པ་གཙོ་བོ་ཡིན་ན་དེའི་སྟེང་གི་སྣ་རྩེའམ་རྡོ་རྗེའི་ཁར་ཉི་མའི་གདན་ལ་རྡོ་རྗེ་སྔོན་པོ་རྩེ་ལྔ་པ་ཡུངས་ཀར་རམ། ནས་འབྲུའི་ཚད་ཙམ་ཞིག་མི་བསྐྱོད་པའི་ངོ་བོར་བལྟས་ལ་བསྒོམ། དེ་ཡང་མཐོང་བའི་མཚན་མ་སྐྱེས་ཏེ་མི་འགྱུར་བར་བརྟན་པ་མ་ཐོབ་ཀྱི་བར་དུའོ། །སྐབས་འདིར་ནི་དྲན་པ་གཅིག་པའི་མཇུག་ཐོགས་སུ་ཇི་ཙམ་འཚམ་པ་ཅིག་སྒོམ་པ་ཡིན་ལ། དྲན་པ་གཅིག་པ་ལ་ལོབས་ནས་ནི་འདི་ལ་གཙོ་བོར་བསྒོམ་མོ། །དེ་ལ་བརྟན་པ་ན་སྒོམ་པ་ལ་དབང་དུ་གྱུར་པ་བསྐྱེད་པའི་ཕྱིར། གཉིས་དང་གསུམ་ལ་སོགས་པ་ནམ་མཁའ་ཁྱབ་པར་སྤྲོ་ཞིང་བསྡུ་བ་ལ་བསླབ། དེ་ལ་བརྟན་པ་ན་ཕྱག་མཚན་ལྷ་སྐུར་བསྒྱུར་ནས། སྤྲོ་བསྡུ་སྔར་བཞིན་དུ་བྱའོ། །མཐར་འཇོག་པའི་ཚེ་རྩ་བའི་མཚན་མ་ལ་བསྡུ་ཞིང༌། སྣ་སྒོ་གཉིས་གང་རུང་ནས་དྲངས་ལ། སྙིང་ཁར་བསྡུ་སྟེ་ཕྱག་མཚན་ཕྲ་མོ་ལ་སློབ་པའི་དེ་ཉིད་དོ། །རྣམ་སྣང་ལ་སོགས་པ་གཙོ་བོ་ཡིན་ནའང༌། འཁོར་ལ་ཕྲ་མོ་ལ་
སོགས་པ་ལ་འདོན་པ་བསྒྱུར་རོ། །དེ་ནས་རང་གི་རྡོ་རྗེའི་ཁར་ཉི་གདན་ལ་ཐིག་ལེ་སྔོན་པོ་ཡུངས་ཀར་ཙམ་ཞིག་མི་བསྐྱོད་པའི་ངོ་བོར་བལྟས་ལ། མ་བརྟན་གྱི་བར་དུ་བསྒོམ། བརྟན་པ་ན་རྡོ་རྗེ་དང་པདྨ་འདུ་བྱ་བ་སྔོན་དུ་འགྲོ་བས། ཡུམ་གྱི་པདྨར་དབྱུང་ལ་ཡུངས་འབྲུ་ཙམ་གྱི་ཐིག་ལེའི་ནང་དུ་བྱང་ཆུབ་ཀྱི་སེམས་ལས་ཕྱུང་བ་ལས། རྟེན་དང་བརྟེན་པའི་དཀྱིལའཁོར་ཡོངས་སུ་རྫོགས་པ་རིམ་གྱིས་བསྒོམ་ལ། བརྟན་པར་བྱ་བ་ནི་བུའི་ཚུལ་དུ་སྤྲོ་བའོ། །དེས་ཀྱང་སྙོམས་པར་འཇུག་པ་སྔོན་དུ་འགྲོ་བས་ལྷ་སྤྲོ་བ་ནི་ཚ་བོའི་ཚུལ་དུ་སྤྲོ་བའོ། །རིགས་གཞན་ལ་ཡང་དེའི་རིགས་པ་སྦྱར་ཏེ་ཐིག་ལེ་ཕྲ་མོའི་དེ་ཉིད་དོ། །སྤྲུལ་པའི་སྐུས་ནང་དུ་ཡང་དག་འཇོག་ལ་སོགས་པ་ཐུགས་ཀྱི་འཕྲིན་ལས་མཛད་པ་དང་མཐུན་པར་བསྒོམ་པའོ། །དེ་ནས་སློང་དུ་འགྲོ་བ་དང་ཡོངས་སུ་ཚོལ་བ་ལ་སོགས་པ་དམན་པ་ལ་འཇུག་པ་དང༌། ལོངས་སྤྱོད་གང་ལའང་མ་ཆགས་ཤིང༌། ལུས་གནས་པར་འགྱུར་བ་དེ་ཙམ་གྱིས་ཆོག་ཤེས་པས། ལྷའི་རྣལ་འབྱོར་དང་མི་ཕྱེད་ཅིང་འདོད་པ་ཀུན་ལ་ལོངས་སྤྱོད་པའི་སྔགས་པས། ལྕེ་དང་མཆུ་མི་འགུལ་ཞིང་། སྒྲ་སྤངས་པའི་ཡིད་ཀྱི་བཟླས་པ་ནི་བསྐྱེད་རིམ་པའི་རྡོ་རྗེའི་བཟླས་པ་སྟེ། རྡོ་རྗེའི་བཟླས་པའི་དེ་ཉིད་དོ། །ཚིག་ཏུ་བཟླས་པ་ལ་ནི་རྣམ་པ་བཞི་ལས་དམ་ཚིག་གི་བཟླས་པ་ནི། ཐུགས་ཀའི་ས་བོན་ལ་སྙིང་པོ་དང་ཉེ་སྙིང་གིས་བསྐོར་བར་བསམས་ལ། ཟློ་བའི་ཚེ་ས་བོན་ལས་དཀྱིལ་འཁོར་གྱི་ལྷ་ཚོགས་སྤྲོས་ཏེ་འགྲོ་བའི་དོན་བྱས་ནས། སྔགས་
དང་ལྷན་ཅིག་ཏུ་ཕྲེང་བའི་སྐུད་པ་འདྲེན་པའི་ཚུལ་གྱིས་འཇུག་པའི་རླུང་གིས་སྙིང་ཁའི་ས་བོན་ལ་གཞུག་ཅིང༌། ལྷ་སོ་སོའི་སྔགས་བརྗོད་པ་རྫོགས་པ་ན་སོ་སོར་སྤྲོ་བ་དང་སྡུད་པ་སྟེ་སྙིང་པོ་དང་ཉེ་སྙིང་གི་བཟླས་པའོ། །ཁྱོགས་ཀྱི་བཟླས་པ་ནི། ཆོས་ཐམས་ཅད་མཉམ་པ་ཉིད་ཀྱི་ང་རྒྱལ་གྱིས་སྔགས་ཕྲེང་རང་གི་ཞལ་དུ་ཞུགས་པ་རྡོ་རྗེ་ནས་འཐོན་ཏེ་པདྨར་སོང་ཞིང་རྩ་དབུ་མ་ལས་གྱེན་དུ་བྱུང་སྟེ་ཡུམ་གྱི་ཞལ་ནས་བྱུང་བ། རང་གི་ཞལ་དུ་ཞུགས་ནས་འཁོར་བར་བསྒོམ་ཞིང་ཡི་གེ་ལྷོད་ཅིང་ཞི་བའི་ཕྲེང་སྔགས་ཟློས་པ་སྟེ་རྩ་སྔགས་སམ་ཕྲེང་སྔགས་ཀྱི་བཟླས་པའོ། །ཁྲོས་པའི་བཟླས་པ་ནི། དང་པོར་ཡུམ་གྱི་ཞལ་དུ་ཞུགས་ནས་སྔར་བཞིན་འཁོར་བ་སྟུག་ཅིང་རྩུབ་པའི་ཡི་གེ་ཅན་ཏེ་འདི་ཡང་ཕྲེང་སྔགས་ཀྱི་བཟླས་པའོ། །ཁྲོ་བོའི་བཟླས་པ་ནི། སྙིང་པོ་ལ་སོགས་པ་དྲག་ཏུ་བརྗོད་པ་སྟེ་འདི་ནི་གསུམ་གའི་བཟླས་པའོ། །ས་བོན་ལ་སྔགས་རྣམས་མགོ་གྱེན་བསྟན་ཟླུམ་པོར་བསྐོར་བ་མར་མེའི་ཕྲེང་བ་བཞིན་འབར་བ་བསམས་ནས། སེམས་ཀྱིས་བྲིས་པ་བཞིན་ཟློ་བ་ནི་གོང་བུའི་བཟླས་པ་ཡིན་ལ། ཞལ་དུ་ཡོད་དང༌། ལྷ་ཐམས་ཅད་ཀྱིས་བཏོན་པར་དམིགས་ནས་ཟླ་བ་ཡང་དམ་ཚིག་གི་བཟླས་པའོ། །བཟླས་པའི་གྲངས་སུ་གཞུག་པ་ནི། ཐུན་གྱི་ངོ་བོ་ལ་ཧ་ཅང་མྱུར་བུལ་ལ་སོགས་པའི་སྐྱོན་དང་བྲལ་ཞིང༌། སེམས་རྩེ་གཅིག་པས་མ་ཡེངས་པར་བཟླས་པ་རྣམས་ཡིན་གྱི། ཐུན་བཏང་བའི་སྐབས་སུ་གང་བྱུང་བཟླས་པ་
རྣམས་གྲངས་ལ་ཕན་མི་འདོགས་ཀྱང་བཟླས་པར་ནི་བཤད་དོ། །བཟླས་བྱའི་སྔགས་ནི། ༀ་ཨཱཿཧཱུཾ་ནི་དེ་ཁོ་ན་ཉིད་ཀྱི་སྙིང་པོའོ། །ༀ་ཨཱཿབཛྲ་དྷྲིཀ་ཧཱུཾ་ཧཱུཾ། ༀ་ཨཱཿཛི་ན་ཛིཀ་ༀ་ཧཱུཾ། ༀ་ཨཱཿརཏྣ་དྷྲིཀ་སྭཧཱུཾ། ༀ་ཨཱཿཨཱ་རོ་ལིཀ་ཨཱཿཧཱུཾ། ༀ་ཨཱཿཔྲཛྙཱ་དྷྲིཀ་ཧཱ་ཧཱུཾ། ༀ་ཨཱཿམོ་ཧ་ར་ཏི་ལཱཾ་ཧཱུཾ། ༀ་ཨཱཿདྭེ་ཥ་ར་ཏི་མཱཾ་ཧཱུཾ། ༀ་ཨཱཿརཱ་ག་ར་ཏི་པཾ་ཧཱུཾ། ༀ་ཨཱཿབཛྲ་ར་ཏི་ཏཱཾ་ཧཱུཾ། །ༀ་ཨཱཿརཱུ་པ་བཛྲ་ཛཿཧཱུཾ། ༀ་ཨཱཿཤཔྟ་བཛྲ་ཧཱུཾ་ཧཱུཾ། ༀ་ཨཱཿགྷེནྡྷཾ་བཛྲ་བཾ་ཧཱུཾ། ༀ་ཨཱཿར་ས་བཛྲ་ཧོཿཧཱུཾ། ༀ་ཨཱཿསྤརྴ་བཛྲ་ཁཾ་ཧཱུཾ། ༀ་ཨཱཿམཻ་ཏྲི་མ་ཧཱུཾ། ༀ་ཨཱཿཀྵི་ཏི་གརྦྷ་ཐླཱ་ཧཱུཾ། ༀ་ཨཱཿབཛྲ་པཱ་ཎི་ༀ་ཧཱུཾ། ༀ་ཨཱཿཁ་གརྦྷ་ༀ་ཧཱུཾ། ༀ་ཨཱཿལོ་ཀི་ཤྭ་ར་ༀ་ཧཱུཾ། ༀ་ཨཱཿམཉྫུ་ཤྲཱི་ཧཱུཾ་ཧཱུཾ། ༀ་ཨཱཿསརྦ་ནི་ཝ་ར་ཎ་བིསྐཾ་བི་ནི་ༀ་ཧཱུཾ། ༀ་ཨཱཿས་མནྟ་བྷ་དྲ་སཾ་ཧཱུཾ། ༀ་ཨཱཿཡ་མཱནྟ་ཀྲི་ཏ་ཧཱུཾ་ཧཱུཾ། ༀ་ཨཱཿཔྲ་ཛྙཱནྟ་ཀྲི་ཏ་ཧཱུཾ་ཧཱུཾ། ༀ་ཨཱཿཔད་མཱནྟ་ཀྲི་ཏ་ཧཱུཾ་ཧཱུཾ། ༀ་ཨཱཿབིགྷཱན་ཏ་ཀྲི་ཏ་ཧཱུཾ་ཧཱུཾ། ༀ་ཨཱཿཨ་ཙ་ལ་ཧཱུཾ་ཧཱུཾ། ༀ་ཨཱཿཊཀྐི་རཱ་ཛཱ་ཧཱུཾ་ཧཱུཾ། ༀ་ཨཱཿནཱི་ལ་དཎྜ་ཧཱུཾ་ཧཱུཾ། ༀ་ཨཱཿམཧཱ་བཱ་ལ་ཧཱུཾ་ཧཱུཾ། ༀ་ཨཱཿཨུ་ཥྞི་ཥ་ཙཀྲ་ཝརྟི་ཧཱུཾ་ཧཱུཾ། ༀ་ཨཱཿསུམྦྷ་རཱ་ཛཱ་ཧཱུཾ་ཧཱུཾ། ཞེས་པ་ནི་སྙིང་པོའོ། །ཉེ་བའི་སྙིང་པོ་ནི་སྙིང་པོའི་སྙིང་པོར་གསུངས་པའི་མཚན་སྔགས་རྣམས་སོ། །རྩ་སྔགས་སམ་ཕྲེང་སྔགས་ནི་རྒྱུད་འདི་ལས་ཡུམ་བཞི་དང༌། ཁྲོ་བོ་དགུའི་ཕྲེང་སྔགས་གསུངས་པ་དང༌། ལྷག་མའི་ཕྲེང་སྔགས་རྒྱུད་གཞན་ལས་གསུངས་པ་རྣམས་ཡིན་ཏེ། ངག་གི་བཟླས་པའི་དེ་ཉིད་དེ་སྤྲུལ་སྐུས་ཆོས་སྟོན་པ་ལ་སོགས་པ་གསུང་གི་འཕྲིན་ལས་
མཛད་པ་དང་མཐུན་པར་སྒོམ་པའོ། །དེ་ནས་ཡབ་ཡུམ་སྙོམས་པར་ཞུགས་པའི་རྐྱེན་གྱིས་ཡུམ་ཡབ་ལ་ཐིམ། ཡབ་དམ་ཚིག་སེམས་དཔའ་ཡེ་ཤེས་སེམས་དཔའ་ལ། དེ་ཏིང་ངེ་འཛིན་སེམས་དཔའ་ལ། དེའི་ཞབས་ཀྱུ་ཨུ་ནི་ཧ་ལ། ཧ་ནི་ཧའི་མགོ་བོ་ལ། མགོ་བོ་ནི་ཟླ་ཚེས་ལ། ཟླ་ཚེས་ནི་ཐིག་ལེ་ལ། ཐིག་ལེ་ནཱ་ད་ལ། ནཱ་ད་འོད་གསལ་དུ་ཐིམ་པར་བསམ་པའམ། ཡང་ན་སེམས་དཔའ་གསུམ་ག་ཅིག་ཅར་འོད་གསལ་དུ་ཐིམ་པར་བསྒོམ་མོ། །འདི་ནི་གཙོ་བོ་དོན་དམ་ལ་ཞུགས་པའི་དེ་ཉིད་དེ། སྐུ་དངོས་ཀྱིས་འདུལ་བའི་སེམས་ཅན་མེད་པའི་ཞིང་དུ་མྱ་ངན་ལས་འདའ་བའི་མཛད་པའི་ཚུལ་སྟོན་པ་དང་། མཐུན་པར་སྒོམ་པའོ། །དེ་ནས་ཚད་མེད་པ་བཞིའི་ངོ་བོར་གྱུར་པའི་ལྷ་མོ་བཞིས་གཙོ་བོ་མ་མཐོང་བས། གདུང་བའི་ཡིད་ཀྱིས་ལྟ་འདོད་དེ། སྙན་པའི་དབྱངས་ཀྱིས་བསྐུལ་བ་ནི། སྤྱན་མས། སེམས་ཅན་ཁམས་ན་གནས་ཀྱི་དབང་ཕྱུག་ཁྱོད་ནི་རྡོ་རྗེའི་ཐུགས། །དགའ་བ་ཡིད་འོང་དོན་ཆེན་འདོད་པས་བདག་ལ་བསྐྱབ་ཏུ་གསོལ། །མགོན་པོ་གལ་ཏེ་བདག་ནི་དེ་རིང་གསོན་པར་མཆིས་བཞེད་ན། །སེམས་ཅན་ཡབ་ཆེན་གཉེན་མཆོག་བདག་ལ་དགྱེས་པར་མཛད་དུ་གསོལ། །མཱ་མ་ཀཱིས། རྡོ་རྗེ་སྐུ་ཁྱོད་བཀའ་ཡི་འཁོར་ལོ་སེམས་ཅན་ཀུན་ལ་ཕན། །སངས་རྒྱས་དོན་དུ་བྱང་ཆུབ་དོན་དམ་རྗེས་སུ་ཕན་སྟོན་པ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །སེམས་ཅན་ཡབ་ཆེན་གཉེན་མཆོག་བདག་ལ་དགྱེས་པར་མཛད་དུ་གསོལ། །མཱ་མ་ཀཱིས། རྡོ་རྗེ་སྐུ་ཁྱོད་བཀའ་ཡི་འཁོར་ལོ་སེམས་ཅན་ཀུན་ལ་ཕན། །སངས་རྒྱས་དོན་དུ་བྱང་ཆུབ་དོན་དམ་རྗེས་སུ་ཕན་སྟོན་པ། མགོན་པོ་གལ་ཏེ་དེ་རིང་བདག་ནི་གསོན་པར་མཆིས་
བཞེད་ན། འདོད་ཆགས་དམ་ཚིག་ཆགས་པས་བདག་ལ་དགྱེས་པར་མཛད་དུ་གསོལ། །གོས་དཀར་མོས། ཁྱོད་ནི་རྡོ་རྗེའི་གསུང་སྟེ་ཀུན་ལ་ཕན་ཞིང་ཐུགས་བརྩེ་བ། །འཇིག་རྟེན་དག་གི་དགོས་པའི་དོན་མཛད་པ་ལ་རྟག་ཏུ་བརྩོན། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །རབ་དགའི་སྤྱོད་པ་ཀུན་ཏུ་བཟང་པོས་བདག་ལ་དགྱེས་པར་མཛོད། །སྒྲོལ་མས། ཁྱོད་ནི་རྡོ་རྗེ་འདོད་པ་དམ་ཚིག་མཆོག་གི་ཕན་དོན་ཆེ། །ཡང་དག་རྫོགས་སངས་རྒྱས་ཀྱི་གདུང་མཆོག་མཉམ་པ་ཉིད་གཟིགས་པ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །ཡོན་ཏན་རིན་ཆེན་མང་པོའི་གཏེར་གྱུར་བདག་ལ་དགྱེས་པར་མཛོད། །ཅེས་བསྐུལ་བས། སྔོན་གྱི་སྨོན་ལམ་དང༌། ཐུགས་རྗེའི་ཤུགས་ཀྱིས་འོད་གསལ་ལས་སེམས་དཔའ་གསུམ་གྱི་བདག་ཉིད་ཅན་གྱི་སྐུ་སྔར་བཤད་པའི་མཚན་ཉིད་དང་ལྡན་པར་བཞེངས་ཏེ། དཀྱིལ་འཁོར་པ་ཐམས་ཅད་ཀྱིས་མཐོང་བར་གྱུར་ཏོ། །འདི་ནི་བསྐུལ་བས་བསླང་བའི་དེ་ཉིད་དེ། ཞིང་གཞན་དུ་སྐལ་བ་དང་ལྡན་པ་ལ་སླར་ཡང་སྤྲུལ་པའི་མཛད་པ་སྟོན་པ་དང་མཐུན་པར་བསྒོམ་པའོ། །དེ་ནས་རང་ལ་དེ་བཞིན་གཤེགས་པ་ཐམས་ཅད་ཀྱིས་མགྲིན་གཅིག་ཏུ་རིགས་ལྔའི་ཡོན་ཏན་གྱི་སྒོ་ནས། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་པ་ཆེ། །རྡོ་རྗེ་གསུམ་མཆོག་དཀྱིལ་འཁོར་གསུམ། །གསང་བའི་དབྱངས་ལ་ཕྱག་འཚལ་ལོ། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་
བ་དགའ་བ་ཆེ། །རང་བཞིན་འོད་གསལ་མཆོག་གི་མཆོག །སྟོན་པ་རྡོ་རྗེ་ཕྱག་འཚལ་ལོ། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་མཁའ་འདྲ་དྲི་མ་མེད། །རང་བཞིན་དག་པ་གོས་པ་མེད། །རྡོ་རྗེ་སྐུ་ལ་ཕྱག་འཚལ་ལོ། །རྡོ་རྗེ་དཔག་མེད་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །རྡོ་རྗེ་གསུང་ལ་ཕྱག་འཚལ་ལོ། །དོན་ཡོད་རྡོ་རྗེ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །དག་པ་ངོ་བོ་ཉིད་ལས་བྱུང༌། །རྡོ་རྗེ་སེམས་དཔའ་ཕྱག་འཚལ་ལོ། ཞེས་པས་བསྟོད་པར་བསྒོམ་མོ། །དེ་ནས་མཆོད་པ་རྣམས་བགེགས་མཐར་བྱེད་ཀྱི་སྔགས་ཀྱིས་བསང་བ་དང༌། སྟོང་པར་སྦྱང་བ་དང༌། བསྐྱེད་པ་དང་བྱིན་གྱིས་བརླབ་པ་བྱས་ལ། སྔར་བཤད་པ་ལྟར་ཉེར་སྤྱོད་ལྔ་དང༌། འདོད་ཡོན་ལྔའི་མཆོད་པ་བྱ་བ་ནི་ཕྱི་མཆོད་དོ། །བདུད་རྩི་རིལ་བུ་བཏབ་པའི་ཆང་འོག་ནས་འཆད་པ་ལྟར་བྱིན་གྱིས་བརླབ། ལྷ་རྣམས་ཀྱིས་ལྗགས་ཧཱུཾ་ལས་བྱུང་བའི་རྡོ་རྗེ་རྩེ་ལྔ་པར་བསམས་ལ། ཐོག་མར་དངོས་དང་བརྒྱུད་པའི་བླ་མ་རྣམས་ཀྱི་མཚན་གྱི་མཐར་འབྲུ་གསུམ་བཏགས་ལ་དབུལ། དེ་ནས་ལྷ་རྣམས་ཀྱི་སྔགས་ཀྱི་མཐར་འབྲུ་གསུམ་བཏགས་ལ་དབུལ། དེ་བཞིན་དུ་ཕྱོགས་སྐྱོང་ལ་སོགས་པ་ལ་ཡང་ཟག་པ་མེད་པའི་བདེ་བས་ཚིམ་པར་བསམ་པ་ནི་ནང་མཆོད་དོ། །དེ་ནི་མི་བསྐྱོད་
པའི་རྣལ་འབྱོར་པའི་དབང་དུ་བྱས་ཀྱི་རིགས་གཞན་གྱི་རྣལ་འབྱོར་པས། ལྕེ་བྱིན་གྱིས་བརླབ་པ་ལ་ཡང་དེའི་རིགས་པ་སྦྱར་རོ། །དེ་ནས་རིག་མ་དང་སྙོམས་པར་ཞུགས་པས། མཆོག་ཏུ་དགའ་བའི་བདེ་བ་ཉམས་སུ་མྱོང་བར་བསམ་པ་ནི་གསང་མཆོད་དེ། མཆོད་བསྟོད་ཀྱི་དེ་ཉིད་དོ། །དེ་ནས་ཐུགས་ཀའི་ས་བོན་གྱི་འོད་ཟེར་གྱིས་འཁོར་གྱི་ལྷ་རྣམས་སྤྱན་དྲངས་ཏེ། རང་གི་ལུས་ཀྱི་དཀྱིལ་འཁོར་ལ་གཞུག་ཅིང༌། གཞལ་ཡས་ཁང་ཡང་བསྡུ་ལ་རང་ཡབ་ཡུམ་གཅིག་པུ་གནས་པར་བསམ་མོ། །ཡབ་ཡུམ་གཉིས་སྙོམས་པར་ཞུགས་པའི་སྦྱོར་མཚམས་ནས། བྱང་ཆུབ་ཀྱི་སེམས་ཀྱི་འོད་ཟེར་འཕྲོས་པས། སེམས་ཅན་ཐམས་ཅད་ལ་དབང་བསྐུར་སྒྲིབ་པ་སྦྱངས་ནས་ཧཱུཾ་ཡིག་ཏུ་གྱུར། དེས་ནམ་མཁའི་ཁམས་གང་བ་ཡོངས་སུ་གྱུར་པ་ལས་རྡོ་རྗེ་འཆང་དུ་བསམས་ཏེ། རང་གི་འོད་ཟེར་གྱིས་དྲངས་ནས་རང་ལ་གཞུག་སྟེ་ཉེ་བར་བསྡུ་བའི་དེ་ཉིད་དོ། །ཐུན་གཤམ་དུ་གཏོར་མའི་ཆོ་ག་ནི། གཏོར་མ་གཉིས་བགེགས་མཐར་བྱེད་ཀྱིས་བསང༌། ཤཱུ་ནྱ་ཏཱས་སྦྱང་སྟོང་པའི་ངང་ལས། ཧཱུཾ་ཡཾ་ཧཱུཾ་ལས་རླུང་གི་དཀྱིལ་འཁོར་ལྗང་སྔོན་ཟླ་གཾ་ངོས་གཉིས་སུ་རྡོ་རྗེ་གཉིས་ཀྱིས་བརྒྱན་པ། དེའི་སྟེང་དུ་ཧཱུཾ་རཾ་ཧཱུཾ་་ལས་བྱུང་བའི་མེའི་དཀྱིའ་འཁོར་དམར་པོ་གྲུ་གསུམ་པ། ངོས་གཉིས་སུ་རྡོ་རྗེ་གཉིས་ཀྱིས་བརྒྱན་པའི་སྟེང་ན། ༀ་ཨཱཿ ཧཱུཾ་ལས་བྱུང་བའི་མི་མགོའི་སྒྱེད་བུ་གསུམ་གྱི་སྟེང་དུ། ཨཱཿལས་བྱུང་བའི་ཐོད་པ་ཕྱི་དཀར་ལ་ནང་དམར་བའི་ནང་དུ། ཨཱཿལས་བྱུང་བའི་པདྨ་དམར་པོ་འདབ་མ་
བརྒྱད་པ་ཨཱཿས་མཚན་པ། དེ་ནས་རྫས་རྣམས་ལྟེ་བ་དང་ཤར་ལ་སོགས་པའི་ཕྱོགས་བཞིར་རིམ་པ་བཞིན། ཧཱུཾ་བྲུཾ་ཨཱཾ་ཛྲ་ཁཾ་ལས། མི་དང་གླང་པོ་ཆེ་དང་། རྟ་དང་བ་ལང་དང་ཁྱིའི་ཤ་རྣམས་ཡི་གེ་དེ་ལྔས་མཚན་པ། སླར་ཡང་དབུས་དང་ཕྱོགས་བཞིར་ཡི་གེ་ལྔ་ལས་བྱུང་བའི་དྲི་ཆུ་དྲི་ཆེན་རཀྟ་བྱང་སེམས་དཀར་པོ་ཤ་ཆེན་ལ་དེ་དག་དང༌། ༀ་ཡིག་གིས་མཚན་པ་བསམ་སྟེ། ཤ་ལྔ་གཤེགས་པར་འཇོག་ཚུལ་ནི་སྒྲོན་གསལ་དང༌། བདུད་རྩི་ལྔ་གཤེགས་མར་འཇོག་ཚུལ་ནི་བཤད་རྒྱུད་རྡོ་རྗེ་ཕྲེང་བ་ལས་གསུངས་སོ། །དེ་དག་གི་སྟེང་གི་བར་སྣང་ལ་ཉི་མའི་སྟེང་དུ་ཧཱུཾ་ཡིག་ལས་སྐྱེས་པའི་རྡོ་རྗེ་དཀར་པོ་རྩེ་ལྔ་པ་ཧཱུཾ་གིས་མཚན་པ། དེ་ལས་འོད་འཕྲོས་པས་རླུང་གཡོས་མེ་སྦར་ཐོད་པའི་རྫས་རྣམས་བསྐོལ་བའི་ནང་དུ། རྡོ་རྗེ་ཉི་གདན་དང་བཅས་པ་ལྷུང་ནས་དཀྲུགས་པས། རྡོ་རྗེ་དང་རྫས་རྣམས་རོ་མཉམ་དུ་གྱུར་པས། དྲི་མ་ཐམས་ཅད་སྦྱངས་ནས་ཤེལ་ལྟར་གྱུར་པར་བསམ། པདྨ་ཨཱཿདང་བཅས་པ་ཞུ་བས་ཉི་མ་ལྟར་འབར་བའི་འོད་ཀྱིས་ཡེ་ཤེས་ཀྱི་བདུད་རྩིའི་ངོ་བོར་རྟོགས་པར་བྱའོ། །ༀ་ཡིག་གི་འོད་ཟེར་ལྕགས་ཀྱུ་ལྟ་བུས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་བདུད་རྩི་བཀུག་ནས་བསྣན་པས་མང་པོར་སྦར་ཞིང་སྤེལ་བར་བསམས་ལ། ༀ་ཨཱཿ ཧཱུཾ་ལན་བདུན་བརྗོད་པས་བྱིན་གྱིས་བརླབ་བོ། །དེ་ནས་རང་གི་ཐུགས་ཀའི་ས་བོན་གྱི་འོད་ཟེར་གྱིས་ཁྲོ་བོ་བཅུ་དང་བཅས་
པའི་བསྲུང་བའི་འཁོར་ལོ་རྩིབས་བཅུ་པའི་ལྟེ་བའི་ནང་དུ། འདུས་པའི་དཀྱིལ་འཁོར་རྟེན་དང་བརྟེན་པར་བཅས་པ་དང༌། བསྲུང་འཁོར་གྱི་ཕྱི་རོལ་ཏུ་ཕྱོགས་སྐྱོང་བཅོ་ལྔ་འཁོར་དང་བཅས་པ་དང༌། ཀླུ་རྣམས་དང་སེམས་ཅན་ཐམས་ཅད་བཀུག་པར་བསམས་ལ། དཀྱིལ་འཁོར་པའི་ལྷ་རྣམས་གསལ་གདབ། ཕྱོགས་སྐྱོང་གསལ་གདབ་པ་ནི། ཕྱིའི་ཤར་དུ་རྡོ་རྗེ་མཚོན་ཆ་སེར་པོ་མིག་སྟོང་པ་ས་སྲུང་དཀར་པོ་ལ་ཞོན་པ་རྡོ་རྗེ་འཛིན་པ། དེའི་གཡས་སུ་སྒྱུ་མ་རྡོ་རྗེ་ནག་པོ་ནམ་མཁའ་ལྡིང་ལ་ཞོན་པ། གཡས་གཉིས་འཁོར་ལོ་དང་དབྱུག་ཏོ། གཡོན་གཉིས་དུང་དང་ནོར་བུ་ཀཽསྟུ་བྷ་ཐོགས་པ། མེར་རྡོ་རྗེ་མེ་དམར་པོ་སྨིན་མ་དང་རལ་པའི་ཐོད་དང་སྨ་ར་འབར་ཞིང་འཁྲུག་པ་ཤིན་ཏུ་ཚོ་བ་ར་ལ་ཞོན་པ་གཡས་གཉིས་སྐྱབས་སྦྱིན་དང་བགྲང་ཕྲེང༌། གཡོན་གཉིས་རིལ་བ་དང་དབྱུ་གུ་འཛིན་པ། ལྷོར་རྡོ་རྗེ་དུས་ནག་པོ་མ་ཧེའི་གདན་ལ་གཡས་བརྐྱང་གིས་བཞུགས་པ། སྐྲ་གྱེན་དུ་འབར་ཞིང་ཁྲོས་པ་གཡས་དབྱུག་པ་དང་གཡོན་སྡིགས་མཛུབ་མཛད་པ། ལྷོ་ནུབ་ཏུ་རྡོ་རྗེ་གཏུན་ཤིང་ནག་པོ་རོ་ལ་གནས་པ་གཅེར་བུ་མི་རུས་ཀྱིས་བརྒྱན་ཅིང་མཆེ་བ་གཙིགས་པ། གཡས་གྲི་གུག་དང་གཡོན་ཐོད་པ་འཛིན་པ། ནུབ་དུ་རྡོ་རྗེ་ཀླུ་དཀར་པོ་གདེངས་ཀ་བདུན་དང་ལྡན་པ་སྦྲུལ་ཞགས་འཛིན་པ། ནུབ་བྱང་དུ་རྡོ་རྗེ་རླུང་ལྗང་གུ་ཨེ་ཎ་ཡ་སེར་པོ་ལ་གནས་པ་རླུང་རས་འཛིན་པ། བྱང་དུ་རྡོ་རྗེ་འཇིགས་བྱེད་སེར་པོ་མི་ལ་གནས་ཤིང་སྦོམ་པ་གཡས་ནེའུ་ལེ་དང་གཡོན་པི་ཛ་པུ་ར་འཛིན་པ། དེའི་
གཡས་སུ་རྡོ་རྗེ་སྣ་རིངས་དཀར་པོ་གླང་པོ་ཆེའི་གདོང་པ་ཅན་བྱི་བ་ལ་གནས་པ་གཡས་གཉིས་ལ་ཕུག་དང་དབྱུག་པ་གཡོན་གཉིས་ལ་དུ་དང་ཕྲེང་བ་འཛིན་པ། བྱང་ཤར་དུ་རྡོ་རྗེ་ཁྲོ་བོ་དཀར་པོ་ཁྱུ་མཆོག་ལ་གནས་པ། རལ་པའི་ཐོར་ཚུགས་དང་རུས་པའི་རྒྱན་དང་ལྡན་པ། གཡས་རྩེ་གསུམ་པས་མཚན་པའི་ཁ་ཊྭཾ་ག་དང༌། གཡོན་ཅང་ཏེའུ་འཛིན་པ། དབང་ལྡན་དང་ཉེ་དབང་གི་བར་དུ་རྡོ་རྗེ་འཁྱིལ་བ་དམར་པོ་ཤིང་རྟ་ལ་གནས་པ་བཟོད་པར་དཀའ་བའི་འོད་ཟེར་ཅན་པདྨ་འཛིན་པ། རྡོ་རྗེ་འོད་དཀར་པོ་འཁོར་ལོ་ལ་གནས་པ་གཡས་ཀུ་མུ་ཏ་དང་གཡོན་བགྲང་ཕྲེང་འཛིན་པ། མི་སྨྲ་རྡོ་རྗེ་སེར་པོ་ངང་པ་ལ་གནས་པ་གཡས་པདྨ་དང་སྐྱབས་སྦྱིན། གཡོན་གཉིས་བགྲང་ཕྲེང་དང་དབྱིག་པ་འཛིན་པ། ཆུ་ལྷ་དང་བདེན་བྲལ་གཉིས་ཀྱི་བར་དུ་ཐགས་བཟང་རིས་ནག་པོ་ཤིང་རྟ་ལ་གནས་པ་རལ་གྲི་འཛིན་པ། སའི་ལྷ་མོ་སེར་མོ་པདྨ་ལ་གནས་པ་པདྨ་འཛིན་པ། དབང་པོ་ལ་སོགས་པ་འཇིག་རྟེན་པ་ཐམས་ཅད་སྐད་ཅིག་གིས་འོད་གསལ་དུ་བཅུག་པ་ལས། འདུས་པའི་ལྷ་ཤེས་རབ་མ་དང་བཅས་པའི་སྐུར་བཞེངས་པར་བསམས་ལ།ༀ་ཨཱཿཧྲཱི་པྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་ཧཱུཾ་སྭ་ཧཱ། ཞེས་པས་མཆོད་ཡོན། ཨརྒྷཾ་གྱི་གནས་སུ་པཱདྱཾ་ཞབས་བསིལ་དང༌། ཨཱཉྩ་མ་ཎཾ་གྱིས་ཞལ་བསིལ་དང༌། པྲོཀྵ་ཎཾ་བཅུག་ལ་བསང་གཏོར་དབུལ་ལ། རྡོ་རྗེ་གསོར་དྲིལ་བུ་དཀྲོལ་ཞིང༌། སྟོང་ཉིད་སྙིང་རྗེ་དབྱེར་མེད་པའི་བྱང་ཆུབ་ཀྱི་སེམས་སུ་ལྷག་པར་མོས་བཞིན་པས་
འཁོར་གསུམ་ཡོངས་སུ་དག་པས་གཏོར་མ། ༀ་ཨཱཿབཛྲ་དྷྲིཀ་ཧཱུཾ། ཛི་ན་ཛིཀ་ༀ། རཏྣ་དྷིཀ་སྭ། ཨཱ་རོ་ལིཀ་ཨཱཿ། པྲཛྙཱ་དྷྲིཀ་ཧཱ། མོ་ཧ་ར་ཏི་ལཱཾ། དྭེ་ཥ་ར་ཏི་མཱཾ། རཱ་ག་ར་ཏི་པཾ། བཛྲ་ར་ཏི་ཏཱཾ། རཱུ་པ་བཛྲ་ཛཿ། ཤཔྟ་བཛྲ་ཧཱུཾ། གྷནྡྷཾ་བཛྲ་བཾ། ར་ས་བཛྲ་ཧོཿ། སྤརྴ་བཛྲ་ཁཾ། མཻ་ཏྲི་མ། ཀྵི་ཏི་དརྦྷ་ཐླཱ། བཛྲ་པཱ་ཎི་ༀ། ཁཾ་གརྦྷ་ཨོཾ། ལོ་ཀི་ཤྭ་ར་ༀ། མཉྫུ་ཤྲཱི་ཧཱུཾ། སརྦ་ནི་བ་ར་ཎ་བི་སྐཾ་བི་ནི་ༀ། ས་མནྟ་བྷ་དྲ་སཾ། ཡ་མཱནྟ་ཀྲི་ཏ་ཧཱུཾ། པྲ་ཛྙཱན་ཏ་ཀྲི་ཏ་ཧཱུཾ། པདྨནྟ་ཀྲི་ཏ་ཧཱཱུཾ། བིགྷྣཱནྟ་ཀྲི་ཏ་ཧཱུཾ། ཨ་ཙ་ལ་ཧཱུཾ། ཊཀྐི་རཱ་ཛཱ་ཧཱུཾ། ནཱི་ལ་དཎྜ་ཧཱུཾ། མཧཱ་བཱ་ལ་ཧཱུཾ། ཨུ་ཥྞཱི་ཥ་ཙཀྲ་ཝརྟི་ཧཱུཾ། སུམྦྷ་རཱ་ཛཱ་ཧཱུཾ། སརྦ་དུ་ཥྚན་ས་མ་ཡ་མུ་ཏྲ་པྲ་བྷཾ་ཛ་ཀ་མ་མ་ཤནྟ་རཀྵ་ཙ་ཀུ་རུ་སྭཱ་ཧཱ། ཞེས་པས་ལྷ་སོ་གཉིས་ལ་དབུལ་ལོ། །དེ་ནས་རྡོ་རྗེ་གསོར་བ་ལ་སོགས་པ་སྔར་བཞིན་བྱ་ཞིང༌། ཕྱོགས་སྐྱོང་འཁོར་དང་བཅས་པ་ལ། ༀ་ཨཱཿདུས་གསུམ་སྐྱེས་པ་ཀུན་དང་ཕྱོགས་བཅུ་ཡི། །འཇིག་རྟེན་ཁམས་རྣམས་ནམ་མཁའི་མཐའ་ཀླས་པ། །རྒྱ་མཚོ་སྤྲིན་གྱི་བཀོད་པ་རབ་འབྱམས་ཀྱི། །ཤིན་ཏུ་ཕྲ་བའི་རྡུལ་སྐྱེས་དཀྱིལ་འཁོར་ནི། །ཕན་ཚུན་གཅིག་གི་ནང་དུ་གཅིག་སོན་པ། །སྙོམས་པར་འཇུག་པ་ཀུན་ཏུ་གནས་པ་ཡི། །ཆོས་ཀྱི་དབྱིངས་སུ་ཡང་དག་པར་འདུ་ཞིང༌། །ནམ་མཁའི་ཁམས་ཀྱི་ཡོངས་སུ་མཐར་ཐུག་པའི། །དུས་གསུམ་སྐྱེས་པ་ཀུན་དང་ཕྱོགས་བཅུ་ཡི། །འཇིག་རྟེན་ཁམས་རྣམས་མཐའ་ཡས་སྤྲིན་བཀོད་པ། །ནམ་མཁའ་རབ་འབྱམས་མཉམ་དང་འཇིག་རྟེན་སྐྱོང༌། །ཀུན་དང་སེམས་ཅན་ཀུན་ཡང་འདི་ལྟ་སྟེ། །རྡོ་རྗེ་མཚོན་ཆ་སྒྱུ་མ་རྡོ་རྗེ་དང༌། །རྡོ་རྗེ་མེ་དང་རྡོ་རྗེ་དུས་དང་
ནི། །རྡོ་རྗེ་གཏུན་ཤིང་རྡོ་རྗེ་ཀླུ་དག་དང༌། །རྡོ་རྗེ་རླུང་དང་རྡོ་རྗེ་འཇིགས་བྱེད་དང༌། །རྡོ་རྗེ་སྣ་རིངས་རྡོ་རྗེ་ཁྲོ་བོ་དང༌། །རྡོ་རྗེ་འཁྱིལ་བ་རྡོ་རྗེ་འོད་དང་ནི། །མི་སྨྲ་རྡོ་རྗེ་དང་ནི་ཐགས་བཟང་རིས། །ས་ཡི་ལྷ་མོ་འཁོར་དང་བཅས་པ་ལ། །མེ་ཏོག་དག་དང་བདུག་པ་མར་མེ་དང༌། །དྲི་དང་ལྷ་བཤོས་ལ་སོགས་ཡང་དག་ལྡན། །ཉེ་བར་སྤྱོད་པ་དང་ནི་གཏོར་མ་འདི། །སོ་སོར་བཞེས་ཤིང་ཉེ་བར་ལོངས་སྤྱད་ནས། །བདག་གི་དབྱིག་གསེར་ནོར་འབྲུ་ལང་ཚོ་ཚེ། །ནད་མེད་པ་དང་བདེ་བ་དམ་པ་རྣམས། །འཕྲོག་པར་བྱེད་པའི་བགེགས་དང་ལོག་འདྲེན་ཀུན། །སྡང་དང་རབ་ཏུ་སྡང་བ་ཐམས་ཅད་དང༌། །མི་དང་མི་མ་ཡིན་རྣམས་རྨོངས་པར་མཛོད། །རེངས་དང་བཅིང་དང་རྣམ་པར་འཇིག་པར་མཛོད། །བདག་ལ་དབྱིག་གསེར་ནོར་འབྲུ་ལང་ཚོ་ཚེ། །ནད་མེད་པ་དང་བདེ་བ་དམ་པ་དང༌། །བདེ་བ་ཆེན་པོ་རབ་ཏུ་འཕེལ་བ་རྣམས། །ཇི་སྲིད་བྱང་ཆུབ་སྙིང་པོའི་མཐར་ཐུག་པར། །གནང་བར་མཛད་ཅིང་རྟག་ཏུ་སྟོང་གྲོགས་དང༌། །ཞི་བ་དང་ནི་བསྲུང་བར་མཛད་དུ་གསོལ། །ཧཱུཾ་ཞེས་བརྗོད་ལ་དོན་དྲན་བཞིན་པས་དབུལ་ལོ། །མགྲོན་རྣམས་ཀྱི་ལྗགས་རྣམས་ཧཱུཾ་ལས་བྱུང་བའི་རྡོ་རྗེ་རྩེ་གཅིག་པ་དམར་པོའི་འོད་ཀྱི་སྦུ་གུས་དྲངས་ནས་གསོལ་བས་བདེ་སྟོང་དབྱེར་མེད་ཀྱི་བདག་ཉིད་ཅན་དུ་ཇི་སྲིད་འདོད་ཀྱི་བར་དུ་བསམ་མོ། །ཕྱོགས་སྐྱོང་ལ་གཏོར་མ་འབུལ་བའི་ཆོ་ག་ནི་གཏོར་སྔགས་བོད་སྐད་དུ་བསྒྱུར་བ་སྟེ། རྒྱ་སྐད་
ཀྱིས་འབུལ་ན་ཕྲེང་བ་ལས་ཤེས་པར་བྱའོ། །སླར་ཡང་ཞལ་བསིལ་དང་ཕྱག་བཀྲུ་བ་དང་སོ་རྩི་ལ་སོགས་པ་ཕུལ་ནས། ཉེར་སྤྱོད་དང་ནང་མཆོད་ཀྱིས་མཆོད་དེ། རང་གི་འདོད་པའི་དོན་སྒྲུབ་པའི་མགྲོན་ཐམས་ཅད་ལ་བཟོད་པར་གསོལ་ཞིང༌། ཐོག་མར་ༀ་དང་ཐ་མར་ཨཱཿཧཱུཾ་ཕཊ་སྦྱར་བའི་རྡོ་རྗེ་སེམས་དཔའི་ཡི་གེ་བརྒྱ་པ་བརྗོད་ནས། ༀ་ཡོ་ག་ཤུད་དྷཱཿསརྦ་དྷརྨཱ་ཡོ་ག་ཤུད་དྷོ་྅ཧཾ། ཞེས་བརྗོད་དེ་པད་ཀོར་དང་འཁྱུད་པའི་ཕྱག་རྒྱ་བྱས་ནས་རང་གི་ལྷའི་འཁོར་ལོ་བདག་ཉིད་ལ་གཞུག་ཅིང༌། དབང་པོ་ལ་སོགས་པ་ལ་སེ་གོལ་གསུམ་གཏོག་ཅིང༌། ༀ་ཨཱཿཧཱུཾ་བཛྲ་མུ་ཞེས་བརྗོད་དེ་རང་གནས་སུ་གཤེགས་སུ་གསོལ་ལོ། །སྐབས་གཞན་དུ་རང་གཞན་གྱི་དོན་དུ་གཏོར་མ་བྱེད་ན་བདག་བསྐྱེད་ཡོངས་རྫོགས་སམ། རྡོ་རྗེ་བཞིའི་ཆོ་གས་རིམ་གྱིས་སམ་ཡང་ན་གཙོ་བོ་ཡབ་ཡུམ་དུ་སྐད་ཅིག་གིས་བསྐྱེད་ལ། དྲི་བཟང་པོ་ལ་སོགས་པས་མཎྜལ་བྱས་པར་དཀྱིལ་འཁོར་པ་དམིགས་ནས་མཆོད་ཅིང་བསྟོད་པའི་འོག་ཏུ་སྔར་བཞིན་གཏོར་མགྲོན་སྤྱན་དྲང་པ་སོགས་བྱའོ། །གཞན་དོན་དུ་བྱེད་ན་བདག་དང་བདག་གི་ཞེས་པ་ཇི་ལྟར་གནས་པ་བརྗོད་ལ་གཞན་དེ་རང་དུ་བསམ་ཞིང༌། འདི་ལ་ཕན་བཏགས་པས་བདག་ལ་ཕན་བཏགས་པར་འགྱུར་རོ་སྙམ་དུ་བསམས་ན། དེའི་ལས་དེ་འགྲུབ་པར་བཤད་དོ། །དེ་ནས། དགེ་བ་འདི་ཡི་མྱུར་དུ་བདག །སངས་རྒྱས་ཀུན་གྱི་ཀུན་བདག་ཉིད། །རྡོ་རྗེ་འཆང་བ་ཐོབ་གྱུར་ཅིག །འགྲོ་བས་ཀྱང་ནི་དེ་ཐོབ་ཤོག །བྱང་ཆུབ་ཕྱིར་
ནི་སྤྱོད་གང་དང༌། །རྫོགས་སངས་རྒྱས་ཀྱི་གང་ཡིན་པ། །བྱང་ཆུབ་རྡོ་རྗེས་གང་གསུངས་པའི། །སྤྱོད་དེ་གཉིས་ཀའང་བདག་སྤྱོད་ཤོག །ཅེས་སྨོན་ལམ་གདབ་ལ། ལངས་ནས་སྤྱོད་ལམ་ལ་འཇུག་པའི་ཚེ་སྣོད་ཐམས་ཅད་གཞལ་ཡས་ཁང་དང༌། བཅུད་ཐམས་ཅད་རྡོ་རྗེ་སེམས་དཔར་བལྟའོ། །ཟས་ཀྱི་བྱ་བ་བྱེད་པའི་ཚེ་ཁ་ཟས་སྦྱང་བ་ནི་གཏོར་མ་བྱིན་གྱིས་བརླབ་པ་ལྟར་བྱ། ལྐོག་མ་སྦྱང་བ་ནི་དུང་དམར་པོའི་རྣམ་པ་ཅན་གྱི་མགྲིན་པར་ཧྲཱིཿལས་བྱུང་བའི་པདྨ་དམར་པོ་འདབ་མ་བརྒྱད་པའི་ལྟེ་བར། ཧཱུཾ་སྔོན་པོ་ལས་རྡོ་རྗེ་རྩེ་ལྔ་པ་རྭ་དབུས་མ་སྦུ་གུ་ཅན་གྱི་རྩེ་མོར་ༀ་འོད་ཟེར་ཟས་ལ་འཕྲོ་བ་བསམ་པའོ། །སྙིང་ཁ་སྦྱང་བ་ནི་སྣ་ཚོགས་པདྨ་དང་ཉི་མའི་སྟེང་དུ་ཧཱུཾ་སྔོན་པོ་ལས་རྩེ་གསུམ་གྱི་མེ་འཕྲོ་བ་བསམ་པའོ། །དེ་ནས་ལག་པ་དགང་བླུགས་སུ་མོས་པས། ༀ་གྱི་འོད་ཟེར་གྱིས་དྲངས་ཏེ་ལྕེ་ཧཱུཾ་ལས་བྱུང་བའི་རྡོ་རྗེ་རྩེ་ལྔ་པའི་སྦུ་གུ་ནས་ཞུགས་ནས། ལྷ་ཐམས་ཅད་འདུས་པའི་བདག་ཉིད་སྙིང་ཁའི་ཧཱུཾ་ལ་འབུལ་བའི་ཚུལ་གྱིས་ཟ་བ་ནི། ནང་གི་སྦྱིན་སྲེག་གོ །དེ་ཡང་གསང་གནས་སུ་ཡཾ་ལས་རླུང༌། ལྟེ་བར་རཾ་ལས་མེ། སྙིང་ཁར་ལཾ་ལས་ས། མགྲིན་པར་བཾ་ལས་ཆུའི་དཀྱིལ་འཁོར་རེ་བསམ། རླུང་གིས་མེ་སྦར་བས་ས་བསྲེགས་དེས་ཆུ་བསྐོལ་བས་ཁ་ཟས་རྣམས་བཞུས་ནས། མགྲིན་པའི་པདྨ་ནས་ཞུགས་སྙིང་ཁར་སླེབ་པ་ན་དྭངས་མས་ལྷ་རྣམས་ཚིམ། ལྟེ་བར་སླེབ་པ་ན་གཏུམ་མོའི་མེས་བསྲེགས་སྙིགས་མ་
རྣམས་ཐལ་བར་གྱུར་ཏེ་གསང་བའི་པདྨ་ནས་བརྒྱུད་ནས་འོག་སྒོར་འཐོན་པར་བསམས་ལ། ཅུང་ཟད་ཞུ་བའི་འོག་ཏུ་སྟེང་འོག་གི་རླུང་ཁ་སྦྱར་བྱས་ལ་གཟུང་ངོ༌། །དེ་རྒྱུན་པར་བྱས་ན་ནད་དང་དུག་ལ་སོགས་པས་མི་ཚུགས་ཤིང་རྒས་དཀའ་ལ་དུས་མིན་དུ་འཆི་བ་ཟློག་སྟེ། ཁ་ཟས་ཀྱི་བསམ་གཏན་གྱི་དེ་ཉིད་དོ། །ཐུན་གྱི་ངོ་བོ་དང་ཐུན་མཚམས་ཀྱི་རྣལ་འབྱོར་ཐམས་ཅད་ལ་རང་བཞིན་མེད་པར་རྟོགས་པའི་ལྟ་བས་དྲངས་པའི་སྒྱུ་མ་ལྟ་བུའི་རྩི་དང་མ་བྲལ་བ་དང༌། ཁྱད་པར་དུ་ཡབ་ཡུམ་སྙོམས་པར་ཞུགས་པའི་བདེ་བ་བསྐྱེད་པའི་ཚེ་སྟོང་པའི་ལྟ་བ་དང་དབྱེར་མེད་དུ་སྦྱར་ནས་བསྐྱེད་ལ། གཞན་ཡང་དམིགས་པ་ལྷ་ལ་སོགས་པ་ལ་དམིགས་ནས་རྣམ་པ་རང་བཞིན་མེད་པར་ངེས་པའི་གཉིས་ཚོགས་སྦྱོང་བ་ནི་ཤིན་ཏུ་གལ་ཆེའོ། །དེ་ལྟར་ནམ་གྱི་བརྒྱད་ཆ་ལུས་པའི་མཚམས་ནས་ལངས་ཏེ། ཐུན་དང་པོའི་རྣལ་འབྱོར་སྔར་བཤད་པ་བཞིན་བྱ། ཉི་མ་གུང་གི་ཐུན་དང་ཕྱི་དྲོ་ཉི་མཐའི་ཐུན་དང༌། མཚན་མོའི་གུང་ཐུན་ལ་ཡང་ལྷའི་རྣལ་འབྱོར་བསྒོམ་པའི་ཐུན་བཞི་བྱ་སྟེ། དེ་ཡང་ཐུན་ཐོག་མཐའ་གཉིས་རྒྱས་ལ་བར་པ་གཉིས་བསྡུས་ཏེ་བྱེད་པ་ལྟར་རམ། བྲེལ་ནའང་དང་པོ་རྒྱས་ལ་གཞན་གསུམ་བསྡུས་ཏེ་བྱེད་པ་དང༌། ཡང་ན་དང་པོ་ལ་ཡང་དལ་བྲེལ་གྱིས་རྒྱས་བསྡུས་གཉིས་བྱེད་ལ། གཞན་གསུམ་བསྡུས་ནས་བྱེད་པར་གསུངས་པ་བཞིན་བྱའོ། །འདིའི་བསྡུས་པ་ནི་རྡོ་རྗེ་བཞིས་སྐྱེད་པ་ལ་རྒྱས་བསྡུས་གཉིས་གསུངས་པའི་ཕྱི་མ་ཡིན་ལ། དེའི་ཚུལ་ནི་མཆོད་པའི་ང་རྒྱལ་འཛིན་
པ་ཡན་ཆད་སྔར་བཤད་པ་བཞིན་བྱ་ལ། དེའི་མཐར་བཟླས་པ་དང་མཆོད་བསྟོད་སོགས་བྱེད་པའོ། །དེ་ལྟར་བྱེད་ན་ལྷག་མོས་ཀྱི་ལྷ་ལུས་ལ་བསྡུས་པའི་ཚེ་གདན་གཞན་རྣམས་མི་དམིགས་པར་བྱའོ། །ཐུན་བཞི་ཁའི་མཐར་གཏོར་མ་མ་གྲུབ་ན་ཐ་མའི་མཐར་བྱའོ། །ཐུན་ཐ་མའི་མཐར་ཉལ་བ་ན། ལུས་དཀྱིལ་གྱི་ལྷ་རྣམས་ལྷག་མོས་འོད་གསལ་དུ་སྡུད་པ་བཞིན་བསྡུས་པའི་མཐར་སེམས་གཞན་དུ་མི་གཏོང་བར་དེ་ཉིད་ལ་རྩེ་གཅིག་ཏུ་དམིགས་ཏེ་གཉིད་ཀྱི་འོད་གསལ་གཟུང༌། ནང་པར་ལྡང་པའི་ཚེ་ལྷ་མོའི་གླུས་བསྐུལ་ནས་འོད་གསལ་ལས་ལྷའི་སྐུར་ལངས་པ་ལ་བསླབ་ལ། ལྷག་མ་རྣམས་སྔ་མ་བཞིན་བྱའོ། །ཐུན་བཞིའི་རྣལ་འབྱོར་ལ་རྩེ་གཅིག་ཏུ་དྲིལ་བའི་དབང་གིས་ལུས་སྟོབས་ཆུང་བར་སོང་ན། རང་གི་སྤྱི་བོ་ནས་མཐོ་གང་ཙམ་གྱི་བར་སྣང་ལ། ཝ་ཡིག་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ཡོངས་སུ་རྫོགས་པ། འོག་གི་དབུས་སུ་ༀ་དཀར་པོ་མགོ་ཐུར་དུ་ལྟ་བ། ཟླ་བ་དང་བཅས་པ་ལས་དེ་བཞིན་གཤེགས་པ་ལྔའི་ངོ་བོའི་བདུད་རྩི་ཁ་དོག་ལྔ་དང་ལྡན་པ་བབ་པས། སྤྱི་བོ་ནས་རྐང་མཐིང་གྱི་བར་དུ་དབང་བསྐུར་བར་བསམས་ན། རིང་པོར་མི་ཐོགས་པར་ལུས་གཟི་བརྗིད་དང་ལྡན་པར་འགྱུར་ཏེ། ལུས་རྟས་པར་བྱེད་པའི་དེ་ཉིད་དོ། །འདི་ཉིན་རེ་བཞིན་ཡི་དམ་དུ་བྱས་ནས་གོམས་ན་ཚེ་རིང་ཞིང་གཉེར་མ་དང་སྐྲ་དཀར་མེད་པར་འགྱུར་རོ་ཞེས་འཆད་དོ། །དེ་ལྟར་ལས་དང་པོ་པས་དབང་ཐོབ་ཅིང་དམ་ཚིག་དང་སྡོམ་
པ་སྲུང་བ་ལ་ཤིན་ཏུ་བརྩོན་པས། ཐུན་བཞིར་གོམས་པར་བྱས་པས། ལྷའི་རྣལ་འབྱོར་ཕྲ་རགས་གཉིས་མཐར་ཕྱིན་པའི་སྔགས་དང་ནང་ལ་མཆོག་ཏུ་གཞོལ་བས། ཞི་བ་ལ་སོགས་པའི་ལས་རྣམས་སྒྲུབ་པ་ནི། དངོས་གྲུབ་ཆུང་ངུ་སྒྲུབ་པའི་དེ་ཉིད་དོ། །ཡང་དེས་གྲུབ་པ་བརྒྱད་ལ་སོགས་པ་སྒྲུབ་པ་ནི་དངོས་གྲུབ་འབྲིང་སྒྲུབ་པའི་དེ་ཉིད་དེ་ལས་རྒྱལ་མཆོག་གོ །ཐུན་བཞིར་གོམས་པས་རྫོགས་རིམ་གྱི་རྟོགས་པ་ཡོངས་སུ་རྫོགས་པ་སྐྱེ་བའི་རྒྱུད་ལེགས་པར་སྨིན་པ་ནི་གཙོ་བོའི་དོན་ནོ། །འདི་ནས་རིག་མ་འདུ་བྱ་བའི་བར་ནི་སྒྲུབ་པ་ཆེན་པོའི་ཡན་ལག་གོ །དེ་ཉིད་སོ་བརྒྱད་དང་ཞེ་དགུར་བྱེད་པའི་ཚུལ་གཉིས་བཤད་རྒྱུད་ལ་བྱུང་ཞིང་སྔ་མ་རྒྱ་གར་བ་ཁ་ཅིག་གིས་ཀྱང་བྱས་མོད་ཀྱང༌། ཕྱི་མ་རྒྱ་དཔེ་དག་པའི་ལུགས་ཡིན་ལ། ཞེ་དགུའི་གྲངས་ནི་འགྲེལ་པས་གཞན་དུ་བཤད་ཀྱང༌། མདོར་བྱས་དང་མདོ་བསྲེ་དང་ནཱ་རོ་པའི་རྒྱུད་ཕྱི་མའི་འགྲེལ་པ་དང་བསྟུན་ནས་བཤད་དོ། །རྣལ་འབྱོར་བཞིའི་སྟེང་དུ་རྒྱལ་མཆོག་ཕྱི་མ་གཉིས་ཀྱི་རྣལ་འབྱོར་བསྣན་པས་རྣལ་འབྱོར་དྲུག་གོ །དེ་ལྟར་ན་རྩ་རྒྱུད་དང་རྒྱུད་ཕྱི་མ་ལས་བསྙེན་བསྒྲུབ་ཡན་ལག་བཞི་དང༌། བཤད་རྒྱུད་རྡོ་རྗེ་ཕྲེང་བ་ལས་ཏིང་ངེ་འཛིན་གསུམ་དང་རྣལ་འབྱོར་དྲུག་དང་དེ་ཉིད་བཞི་བཅུ་ཞེ་དགུར་བཤད་པའི་དོན་ལ་མཁས་པར་བྱས་ནས། ལམ་རིམ་པ་དང་པོ་ལ་ཐུན་བཞིར་བསྒོམས་ཏེ་སྔགས་ཀྱི་ལམ་གྱི་གཞི་ཚུགས་པར་བྱའོ། །རྒྱལ་བའི་ཆོས་ཚུལ་ཀུན་གྱི་
མཐར་ཐུག་པ། །གཏིང་མཐའ་དཔག་པར་དཀའ་བ་འདུས་པའི་དོན། །ལམ་འདིས་རྡོ་རྗེ་འཆང་གི་ས་བརྙེས་པ། །དཔལ་ལྡན་ཀླུ་སྒྲུབ་ཞབས་ལས་ལེགས་འོངས་པ། །ཐབས་མཁས་ཀུན་གྱི་དབུས་ན་ནི། །རྒྱུ་སྐར་ཁྲོད་ན་ཟླ་བ་བཞིན། །བློ་ཆེན་ལྡན་ལ་དགའ་སྐྱེད་པའི། །ངོ་མཚར་རྨད་དུ་བྱུང་བའི་གནས། །ཐབས་དང་བྲལ་བ་སྐྱེ་ཤི་བར་དོ་ཡི། །རིམ་པས་སྲིད་པར་ཡུན་རིང་ངལ་བ་དེ། །ཐབས་མཁས་ལྡན་ལ་སྐུ་གསུམ་ཉིད་དུ་ནི། །ཇི་བཞིན་འཆར་བའི་རིམ་པ་འདི་ཉིད་དོ། །དེ་ཡི་ཉེ་རྒྱུ་གཙོ་བོ་ནི། །རྫོགས་པའི་རིམ་པ་ཡིན་མོད་ཀྱང༌། །རིམ་པ་དང་པོས་མ་སྨིན་ལ། །ལམ་དེ་རྫོགས་པར་མི་སྐྱེ་བར། །དེ་ཕྱིར་རིམ་པ་དང་པོའི་སྨིན་བྱེད་ཚུལ། །གོ་བདེའི་ངག་གིས་འཇུག་པ་བདེ་བར་ནི། །ཀླུ་སྒྲུབ་མན་ངག་ཇི་བཞིན་བཀོད་པ་འདི། །ལམ་འདིར་མོས་པའི་སྐལ་ལྡན་དོན་དུ་སྦྱར། །འདིར་ནི་བདག་གིས་གང་ཞིག་ནོངས་པ་དེ། །ཐུགས་རྗེ་ཆེ་ལྡན་སྤྱན་སྔར་ཀུན་ནས་བཤགས། །འདིར་འབད་དགེ་དང་དགེ་གཞན་ཅི་མཆིས་པ། །མ་ལུས་ཐུབ་བསྟན་རྒྱས་པའི་དོན་དུ་བསྔོ། ཞེས་ཁྱབ་བདག་རྡོ་རྗེ་སེམས་དཔའི་བསྙེན་སྒྲུབ་བཞིའི་སྦྱོར་བས་མཉེས་པར་བྱེད་པ་འདུས་པའི་སྒྲུབ་ཐབས་རྣལ་འབྱོར་དག་པའི་རིམ་པ་ཞེས་བྱ་བ་འདི་ནི། དཔལ་གསང་བ་འདུས་པའི་རྣལ་འབྱོར་པ་བློ་བཟང་གྲགས་པའི་དཔལ་གྱིས། འདུས་པའི་རྩ་བ་དང་བཤད་པའི་རྒྱུད་རྣམས་དང༌། འཕགས་
སྐོར་གྱི་གཞུང་ཀུན་ལ་རིང་དུ་འདྲིས་པར་བྱས་ནས། ལམ་འདི་ལ་མོས་པ་མང་པོས་བསྐུལ་བའི་དོན་དུ། འོལ་ཀའི་བསམ་གཏན་གླིང་གི་དབེན་གནས་སུ་སྦྱར་བའོ། །སྭ་སྟི། རྒྱལ་བསྟན་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདབ་རྒྱས་རྣམ་གྲོལ་སྦྲང་རྩའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །