དཔལ་རྡོ་རྗེ་ཕྲེང་བ་ལས་གསུངས་པའི་དྲང་ངེས་ཀྱི་སྔགས་བཏུ་ཞིང་བྱིན་གྱིས་བརླབ་པའི་ཆོ་ག་རྗེའི་གསུང་བཞིན་ཟིན་བྲིས་སུ་བཀོད་པ།
དཔལ་རྡོ་རྗེ་ཕྲེང་བ་ལས་གསུངས་པའི་དྲང་ངེས་ཀྱི་སྔགས་བཏུ་ཞིང་བྱིན་གྱིས་བརླབ་པའི་ཆོ་ག་རྗེའི་གསུང་བཞིན་ཟིན་བྲིས་སུ་བཀོད་པ་བཞུགས་སོ། །
རྗེ་བཙུན་དམ་པ་འཇམ་པའི་དབྱངས་དང་དབྱེར་མ་མཆིས་པ་ཤར་ཙོང་ཁ་པ་ཐམས་ཅད་མཁྱེན་པའི་ཞབས་ལ་དུས་ཐམས་ཅད་དུ་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་དུས་ཐམས་ཅད་དུ་རྗེས་སུ་བཟུང་དུ་གསོལ། །རྣལ་འབྱོར་ཆེན་པོའི་རྒྱུད་དཔལ་རྡོ་རྗེ་འཕྲེང་བའི་ལེའུ་བཅོ་ལྔ་པ་དང༌། ཉི་ཤུ་རྩ་གཉིས་པ་གཉིས་ལས། དྲང་ངེས་ཀྱི་ཡི་གེ་གསུམ་གྱི་སྔགས་བཏུ་བ་དང་བྱིན་རླབས་བྱ་བའི་ཚུལ་ལ་གསུམ། སྦྱོར་བ་དང༌། དངོས་གཞི་དང༌། མཇུག་གི་བྱ་བའོ། །དང་པོ་ལ་གསུམ། སློབ་མ་སྣོད་རུང་དུ་བྱས་ནས་བླ་མ་མཉེས་པར་བྱ་བ། བཏུ་གཞིའི་སྔགས་བཀོད་ནས་དེ་ལས་སྔགས་བཏུ་བ། བཏུས་པའི་སྔགས་ལ་ཕྱི་
ནང་གི་མཆོད་པས་རྒྱས་པར་མཆོད་པའོ། །དང་པོ་ནི། གསེར་དང་དོ་ཤལ་གོས་དང་ནི། །རིན་ཆེན་སྣ་ཚོགས་ཡོན་ཏན་མཆོག །བྲན་དང་ལས་བྱེད་གྲངས་མེད་དང༌། །དད་ཅིང་གུས་པ་ལ་སོགས་ཀྱིས། །ཇི་ལྟར་བཞེད་པ་སྟོན་པ་ལ། །རྙེད་པར་དཀའ་བའི་དངོས་གྲུབ་ཀྱིས། །སྔགས་ཀྱི་དོན་སྟོན་བླ་མ་ནི། །དགོངས་པ་ཡོངས་སུ་རྫོགས་པར་བྱ། ཞེས་གསུངས་པའི་དོན་སློབ་མ་དཔལ་གསང་བ་འདུས་པའི་དབང་ཡོངས་སུ་རྫོགས་པ་ཐོབ། དམ་ཚིག་དང་སྡོམ་པ་ལ་གནས། རིམ་གཉིས་ཀྱི་མན་ངག་དང་ལྡན་པས་བླ་མ་ལ་ཕྱི་ནང་གསང་བའི་མཆོད་པ་དང་ཡོན་གྱིས་མཉེས་པར་བྱའོ། །གཉིས་པ་ནི། ཕྱག་བྱས་རྡོ་རྗེ་སྔགས་པ་ཡིས། །
ཡང་དག་བཟུང་ནས་འབྲས་བུའི་དོན། །མི་ཡི་རུས་པའི་སྨྱུ་གུ་དང༌། །ས་གཞི་རིན་ཆེན་རབ་འབར་བ། །ཡང་ན་དུར་ཁྲོད་ཐལ་བ་ནི། །རབ་བརྡལ་དངོས་གྲུབ་སྟེར་བར་བྱེད། །ཐོག་མར་དབང་བསྐུར་བླང་བྱས་ནས། །མདུན་དུ་དཀྱིལ་འཁོར་ལ་སོགས་བྱ། །བགེགས་མཐར་བྱེད་པའི་གཏོར་མ་ནི། །ཆེན་པོ་གཙུག་ལག་ཁང་དུ་སྦྱིན། །སྐུ་གསུང་ཐུགས་ནི་སྒྲུབ་བྱེད་པའི། །མཚུངས་པ་མེད་པའི་སྔགས་བཏུ་བྱ། །དང་པོ་ཡི་གེའི་ཐོག་མ་བྲི། །དབྱངས་ཡིག་ལྔ་པར་ཡང་དག་ལྡན། །སྡེ་ཚན་ཐ་མའི་མཐའ་ཆ་ལྡན། །སྐུ་ཡི་ས་བོན་དུ་ནི་བརྗོད། །ཐོག་མའི་ཡི་གེ་ཉིས་འགྱུར་ལ། །ཨུཥྨ་ན་ཡི་ཆ་དང་ལྡན། །མཚུངས་པ་མེད་པའི་སྔགས་བཏུ་བྱ། །གསུང་གི་རྡོ་རྗེ་སྙིང་པོ་མཆོག །ཨུཥྨ་ན་ཡི་ཆ་དང་བཅས། །དབྱངས་ཡིག་དྲུག་པས་ཡང་དག་ལྡན། །སྡེ་ཚན་ཐ་མའི་མཐའ་ཆར་བཅས། །ཐུགས་ཀྱི་རྡོ་རྗེ་གོ་འཕང་གསལ། །སྐུ་གསུམ་རྡོ་རྗེའི་དམ་ཚིག་གསུམ། །འཇིག་རྟེན་གསུམ་ཡང་འགྲུབ་པར་བྱེད། ཅེས་གསུངས་པ་ལྟར། ས་གཞི་བདུད་རྩི་ལྔ་དང་བ་བྱུང་གིས་སྐྱང་ནུལ་གྱི་རྣམ་པར་བྱས་ལ་རིན་པོ་ཆེ་སྣ་ལྔ་གང་འགྲུབ་ཀྱི་ཕྱེ་མ་བརྡལ་བའམ། དུར་ཁྲོད་ཀྱི་ཐལ་བས་ཀྱང་རུང་སྟེ། དེ་དག་བརྡལ་བའི་གཞི་ལ། ཟུར་གསུམ་པའི་ཆོས་འབྱུང་གི་ཐིག་བཏབ་ལ། དེའི་དབུས་སུ་སྣ་ཚོགས་པདྨ་འདབ་བརྒྱད་སྤྱི་འགྲོ་ལྟར་ཚོན་གྱིས་བྲིས། ཤར་གྱི་འདབ་མ་ལ་ཨཱ་ལི་བཅུ་དྲུག །དེ་ནས་
བརྩམས་པའི་འདབ་མ་བདུན་ལ། ཀ་ཙ་ཊ་པ་ཡ་ཤའི་སྡེ་པའི་ཡི་གེ་རྣམས་མ་ཚང་བ་མེད་པར་ལེགས་པར་འདྲི། དེ་ལྟར་བཏུ་བའི་གཞི་ལེགས་པར་འདུ་བྱས་ནས། རིམ་གཉིས་ཀྱི་མན་ངག་ཉན་པའི་སྐབས་སམ། རྒྱུད་འགྲེལ་གྱི་བཤད་པའི་སྐབས་གང་རུང་ལ། སློབ་དཔོན་དང་མཚན་ཉིད་ལྡན་པའི་སློབ་མས་དཀྱིལ་འཁོར་བསྒྲུབ་ཅིང་མཆོད། ཚོགས་ལ་ལོངས་སྤྱད་པའི་རྗེས་སུ། ཐོག་མར་དབང་བསྐུར་བླང་བྱས་ནས། །མདུན་དུ་དཀྱིལ་འཁོར་ལ་སོགས་བྱ། །བགེགས་མཐར་བྱེད་པའི་གཏོར་མ་ནི། །ཆེན་པོ་གཙུག་ལག་ཁང་དུ་སྦྱིན། ཞེས་པའི་དོན་ཁྲོ་བོ་བཅུ་དང་ཕྱོགས་སྐྱོང་བཅོ་ལྔ་ལ་འབུལ་རྒྱུའི་ཕྱི་ནང་གི་མཆོད་པ་གཏོར་མ་བཟང་པོ་རྒྱན་དང་བཅས་པ་གཉིས་ལེགས་པར་བཤམ། གཏོར་མ་དང་ཆོ་གའི་སྐྱེད་ཆོག་བྱིན་རླབས་ཆོ་གའི་གཞུང་བཞིན་ཡོངས་སུ་རྫོགས་པར་བྱས་ལ། རང་ཉིད་ཞེ་སྡང་རྡོ་རྗེ་སེམས་དཔའ་སུམ་བརྩེགས་ཅན་གྱི་ང་རྒྱལ་བརྟན་པོ་ལ་གནས་པའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་ཁྲོ་བོ་བཅུ་དང་ཕྱོགས་སྐྱོང་བཅོ་ལྔ་འཁོར་དང་བཅས་པ་སྤྱན་དྲངས་ཏེ་ཕྱི་ནང་གི་ཕྱོགས་མཚམས་རྣམས་སུ་གནས་པ་ནི། ནང་གི་ཤར་དུ་གཤིན་རྗེ་གཤེད་ནག་པོ་རྣམ་སྣང་གི་དབུ་རྒྱན་ཅན་ནག་དཀར་དམར་པའི་ཞལ་གསུམ་ཕྱག་དྲུག་གི་གཡས་དབྱུག་པ་འཁོར་ལོ་རྡོ་རྗེ། གཡོན་
ཐུགས་ཀར་ཞགས་པ་བཟུང་ནས་སྡིགས་མཛུབ་མཛད་ཅིང་དྲིལ་བུ་དགྲ་སྟ་འཛིན་པ། ཞེས་པ་ནས་སྐུ་ལས་སྐྱེས་པའི་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་གདུག་པ་ཅན་ཐམས་ཅད་ཚར་གཅོད་པའི་ཚུལ་གྱིས་བཞུགས་པར་གྱུར། ཞེས་པའི་བར་ཐུན་མོང་དང་ཐུན་མོང་མ་ཡིན་པའི་སྐུ་མདོག་རྒྱན་ཆ་ལུགས་སྒྲུབ་ཐབས་བཞིན་གསལ་བར་བསྐྱེད། ཕྱིའི་ཤར་དུ་རྡོ་རྗེ་མཚོན་ཆ་སེར་པོ་མིག་སྟོང་པ་ས་སྲུངས་དཀར་པོ་ལ་ཞོན་པ། གཡས་རྡོ་རྗེ། གཡོན་སྡིགས་མཛུབ་ཅེས་པ་ནས་སའི་ལྷ་མོ་སེར་མོ་པདྨ་ལ་གནས་པ་པདྨ་འཛིན་པ་དབང་པོ་ལ་སོགས་པའི་འཇིག་རྟེན་པ་རྣམས་སྐད་ཅིག་གིས་འོད་གསལ་དུ་བཅུག་པ་ལས་འདུས་པའི་ལྷ་ཤེས་རབ་མ་དང་བཅས་པའི་སྐུར་བཞེངས་པའི་ལྗགས་ཧཱུཾ་ལས་སྐྱེས་པའི་རྡོ་རྗེ་རྩེ་གཅིག་པ་དམར་པོ་འོད་ཀྱི་སྦུ་གུ་ཅན་རྣམས་སུ་གྱུར། དེ་ནས་ཆུ་བཞི་ཕུལ་ཏེ། ཁྲོ་བོ་རྣམས་ལ་གྲུབ་ན་འདུས་པའི་རྒྱུད་ནས་གསུངས་པའི་ཕྲེང་སྔགས་ཀྱིས་གཏོར་མ་དབུལ། དེ་མ་གྲུབ་ན་མཁའ་འགྲོ་མ་རྡོ་རྗེ་གུར་ནས་གསུངས་པའི་ཁྲོ་བོའི་ཕྲེང་སྔགས་ཀྱིས་གཏོར་མ་ཕུལ་ན་ཕན་ཡོན་ཆེས་ཤིན་ཏུ་ཆེ་བར་རྒྱུད་ནས་གསུངས་པ་ལྟར་བྱ། དེ་ཙམ་མ་གྲུབ་ན་ༀ་ཨཱཿ ཡ་མནྟ་ཀྲི་ཏ་ཧཱུཾ། ཞེས་སོགས་རང་རང་གི་མཚན་སྔགས་ཀྱིས་གཞུང་ལྟར་ཕུལ། ཕྱོགས་སྐྱོང་ལ་ༀ་ཨཱཿ དུས་གསུམ་སྐྱེས་པ་ཀུན་དང༌ཞེས་པ་ནས། ཞི་བ་དང་ནི་བསྲུང་བར་མཛད་
དུ་གསོལ། །དེ་ནས་ཞལ་བསིལ། མཆོད་ཡོན༌། སོ་རྩི་རྣམས་ཕུལ། ༀ་ཨཱཿབཛྲ་མ་ཧཱ་ཀྲོ་དྷ་རཱ་ཛ་ས་པ་རི་ཝ་ར་པུཥྤེ་པྲ་ཏཱི་ཙྪ་ཧཱུཾ་ཞེས་པ་ནས། ཤཔྟ་ཉེར་སྤྱོད་རོལ་མོའི་བར་ཕྱིའི་མཆོད་པ་དང༌། ནང་གི་མཆོད་པས་མཆོད།ཧཱུཾ་ཆོས་དབྱིངས་སྟོང་པ་གཉིས་མེད་ངང་ཉིད་ལས། ཞེས་སོགས་རྡོ་རྗེ་དྲིལ་ཐབས་དབྱངས་ཀྱི་ང་རོ་དང་བཅས་པས་ཁྲོ་བོ་རྣམས་ལ་བསྟོད། ཧཱུཾ་ས་ཡི་ཕྱོགས་ནི་འདི་ཉིད་དུ། །གསང་བ་འདུས་པ་མངོན་བརྗོད་པའི། །རྣལ་འབྱོར་ཆེན་པོའི་དམ་ཚིག་རྒྱུད། །དུས་ཀུན་ཏུ་ནི་སྤྱོད་འགྱུར་ཞིང༌། །རྒྱུན་དུ་དེ་དོན་སྒྲུབ་པ་རྣམས། །སྲུང་བའི་དོན་དུ་རྟག་ཏུ་ནི། །གཤིན་རྗེ་གཤེད་སོགས་ཁྲོ་བོ་བཅུས། །བགེགས་རྣམས་ལ་ནི་ཕུར་བུ་ཐོབ། ཅེས་ལན་གསུམ་དུ་བྱའོ། དེ་ལྟར་ཁྲོ་བོ་དང་ཞིང་སྐྱོང་ལ་གསོལ་བ་བཏབ་བགེགས་བསལ་ནས། སྔགས་བཏུ་བ་དངོས་ནི། དང་པོ་ཡི་གེའི་ཐོག་མ་འདྲི། །དབྱངས་ཡིག་ལྔ་པར་ཡང་དག་ལྡན། །སྡེ་ཚན་ཐ་མའི་མཐའ་ཆ་ལྡན། སྐུ་ཡི་ས་བོན་དུ་ནི་བརྗོད། ཅེས་པའི་དོན་དབྱངས་ཡིག་དང་པོའི་ཨ་ཐུང་བཏུས་ལ། དེ་ནས་དབྱངས་ལྔ་པའི་ཨུ་ཐུང་དུ་བཏུ་ཞིང༌། ཨའི་ཡི་གེ་ཨུ་ཡིག་མཐོང་བ་ལས། སྒྲ་མདོ་ལས། ཨའི་ཡི་གེ་ཨུའི་ཡི་གེ་ལ་ཨོ་སྟེ་ཕ་རོལ་ཡང་དབྱིའོ། ཞེས་པ་ལྟར་ཨ་དང་ཨུ་མཚམས་སྦྱར་ཏེ་ཨོར་བྱས་ལ། ཨ་ཨུ་གཉིས་དབྱི། སྡེ་ཚན་ཐ་མ་པ་སྡེའི་ཐ་མ་མ་ཡིག་
རྗེས་སུ་ང་རོར་བྱིན་ལ། བཏུ་གཞིའི་དབྱངས་གསལ་བཀོད་པའི་པདྨའི་ལྟེ་བའི་སྟེང་དུ་བཀོད་དེ་སྐུ་རྡོ་རྗེའི་ས་བོན་དུ་བརྗོད་དེ་ཤེས་པར་བྱའོ། །ཡི་གེ་གཉིས་པ་ཨ་བཏུ་བ་ནི། ཐོག་མའི་ཡི་གེ་ཉིས་འགྱུར་ལ། །ཨུཥྨ་ན་ཡི་ཆ་དང་ལྡན། ཞེས་པའི་དོན་ཨ་ཐུང་ངུ་གཉིས་བཏུས་ལ། སྒྲ་མདོ་ལས། མཚུངས་པ་འདྲ་བའི་ཡི་གེ་ལ་རིང་པོར་འགྱུར་ཏེ། ཞེས་པ་ལྟར། ཨ་གཉིས་མཚམས་སྦྱར་ནས། ཨ་རིང་པོ་གཅིག་ཏུ་བྱས་ཏེ་པདྨའི་ལྟེ་བར་ༀ་གྱི་འོག་ཏུ་དགོད། ཨུཥྨ་ནའི་ཆ་ཧ་ཡིག་སྲོག་མེད་ཚེག་དྲག་ཏུ་བྱས་ལ་གསུང་རྡོ་རྗེའི་སྙིང་པོ་མཆོག་ཏུ་ཤེས་པར་བྱའོ། །དེ་ནས་ཧཱུཾ་ཡིག་བཏུ་བ་ནི། ཨུཥྨ་ནའི་ཆ་དང་བཅས། །དབྱངས་ཡིག་དྲུག་པར་ཡང་དག་ལྡན། །སྡེ་ཚན་ཐ་མའི་མཐའ་ཆར་བྱས། ཞེས་པའི་དོན་ཨུཥྨ་ན་མཐའི་ཡི་གེ་ཧ་དང་དབྱངས་ཡིག་དྲུག་པ་ཨུ་དང༌། སྡེ་ཚན་ཐ་མའི་མཐའི་ཆ་མ་རྣམས་བཏུས་ལ། ཧ་དང་དབྱངས་ཡིག་དྲུག་པ་མཚམས་སྦྱར་བས་ཧཱུཾ། དེ་ལ་སྡེ་ཚན་ཐ་མའི་མཐའ་ཆ་མ་ཡིག་ཀླད་ཀོར་དུ་བྱིན་པའི་ཧཱུཾ་གྲུབ་པ་ནི་པདྨའི་ལྟེ་བར་ཨཱའི་འོག་ཏུ་དགོད། དེ་རྣམས་ནི་དྲང་དོན་གྱི་སྔགས་བཏུ་བའི་ཚུལ་ལོ། །ངེས་དོན་གྱི་སྔགས་བཏུ་ཚུལ་ནི་སྔགས་ཀྱི་བྱིན་རླབས་དངོས་གཞིའི་སྐབས་སུ་འཆད་པར་འགྱུར་རོ། །གསུམ་པ་བཏུས་པའི་སྔགས་ལ་ཕྱི་ནང་གི་མཆོད་པས་རྒྱས་པར་མཆོད་པ་ནི། བགེགས་མཐར་བྱེད་
ཀྱིས་བསངས། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས་སྐད་ཅིག་གིས་རྡོ་རྗེའི་ར་བ་གུར་བླ་བྲེ་མེ་རི་དང་བཅས་པ་ཡོངས་སུ་རྫོགས་པའི་དབུས་སུ་ཆོས་འབྱུང་དཀར་པོ་ཟུར་གསུམ་པ་གདེངས་ཀ་ཆེ་བ་གྱེན་དུ་ཕྱོགས་པ་རྩེ་མོ་ཕྲ་བ་ཐུར་དུ་ཟུག་པའི་དབུས་སུ། སྣ་ཚོགས་པདྨ་འདབ་མ་བརྒྱད་པའི་ལྟེ་བར་ཉི་མའི་དཀྱིལ་འཁོར་ལ་གནས་པའི་ༀ་ཨཱཿ ཧཱུཾ་ལས་རྡོ་རྗེ་ༀ་ཨཱཿ ཧཱུཾ་གིས་མཚན་པ་ཡོངས་སུ་གྱུར་པ་ལས་རྡོ་རྗེ་འཆང་སྔོན་པོ་མི་བསྐྱོད་པའི་དབུ་རྒྱན་ཅན་སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། དབུ་སྐྲ་རལ་པའི་ཐོར་ཚུགས་ཅན་མཚན་བཟང་པོ་སོ་གཉིས་དང༌། དཔེ་བྱད་བཟང་པོ་བརྒྱད་ཅུས་བརྒྱན་པ། རེག་བྱ་རྡོ་རྗེ་མ་སྔོན་མོ་མི་བསྐྱོད་པའི་དབུ་རྒྱན་ཅན་སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ་པདྨ་གཡོན་དྲིལ་བུ་རིན་ཆེན་རལ་གྲི་འཛིན་པ། དབུ་སྐྲ་རལ་པ་ཕྱེད་བཅིངས་སུ་བྱས་པ་ཤིན་ཏུ་སྒེག་ཅིང་བཞིན་འཛུམ་བག་དང་ལྡན་པ། ཟུར་གྱི་བལྟ་བ་ལ་སོགས་པའི་རྣམ་འགྱུར་གྱིས་མཛེས་པ་ལང་ཚོ་དར་ལ་བབ་ཅིང་འདོད་པའི་ཡོན་ཏན་ལྔའི་དགའ་བས་རོལ་པ། ཡབ་ཡུམ་གཉིས་ཀྱི་ཕྱག་དང་པོ་གཉིས་ཀྱིས་ཕན་ཚུན་དུ་འཁྱུད་པ། གཉིས་ཀའང་རིན་པོ་ཆེའི་དབུ་རྒྱན་གསོལ་བ། རིན་པོ་ཆེའི་སྙན་རྒྱན་དང༌། སྙན་གོང་ཨུཏྤ་ལའི་གདེངས་ཀ་དང་དར་
དཔྱངས་ཀྱིས་མཛེས་པར་བྱས་པ། རིན་པོ་ཆེའི་མགུལ་རྒྱན་དང༌། མུ་ཏིག་གི་སེ་མོ་དོ་དང༌། རིན་པོ་ཆེའི་དོ་ཤལ་དང༌། ཕྱག་གདུབ་དང༌། ཞབས་གདུབ་དང༌། རིན་པོ་ཆེའི་འོག་པག་སྟེ་རིན་པོ་ཆེའི་རྒྱན་བརྒྱད་ཀྱིས་བརྒྱན་པ་སྐུ་སྟོད་ལྷ་རྫས་ཀྱི་གོས་ཀྱི་ག་ཤལ་བྱས་ཤིང་སྐུ་སྨད་ལྷ་རྫས་ཀྱི་དར་གྱི་ཤམ་ཐབས་ཅན། འོད་ཀྱི་དཀྱིལ་འཁོར་རབ་ཏུ་འབར་བའི་དབུས་ན་རྡོ་རྗེ་སྐྱིལ་ཀྲུང་གིས་བཞུགས་པ། དེའི་སྤྱི་གཙུག་ནས་སྐྲ་མཚམས་ཀྱི་བར་དུ་ༀ་དཀར་པོ་ཡོངས་སུ་གྱུར་པ་ལས་རྣམ་སྣང་དཀར་པོ། སྐྲ་མཚམས་ནས་མགྲིན་པའི་བར་དུ་ཨཿདམར་པོ་ཡོངས་སུ་གྱུར་པ་ལས་འོད་དཔག་མེད་དམར་པོ། མགྲིན་པ་ནས་ནུ་མ་གཉིས་ཀྱི་དབུས་ཀྱི་སྙིང་གའི་བར་དུ་ཧཱུཾ་སྔོན་པོ་ཡོངས་སུ་གྱུར་པ་ལས་མི་བསྐྱོད་པ་སྔོན་པོ། སྙིང་ག་ནས་ལྟེ་བའི་བར་དུ་སྭཱ་སེར་པོ་ཡོངས་སུ་གྱུར་པ་ལས་རིན་འབྱུང་སེར་པོ། ལྟེ་བ་ནས་བརླའི་རྩ་བའི་བར་དུ་ཧ་ལྗང་གུ་ཡོངས་སུ་གྱུར་པ་ལས་དོན་གྲུབ་ལྗང་གུ །ལྔ་ག་མི་བསྐྱོད་པའི་དབུ་རྒྱན་ཅན་ནོ། །ལྟེ་བར་ལཾ་ལས་སྤྱན་མ་དཀར་མོ་རྣམ་སྣང་གི་དབུ་རྒྱན་ཅན། སྙིང་གར་མཾ་ལས་མཱ་མ་ཀཱི་སྔོན་མོ་མི་བསྐྱོད་པའི་དབུ་རྒྱན་ཅན། མགྲིན་པར་པཾ་ལས་གོས་དཀར་མོ་དམར་མོ་འོད་དཔག་མེད་ཀྱི་དབུ་རྒྱན་ཅན། སྤྱི་གཙུག་ཏུ་ཏཱཾ་ལས་སྒྲོལ་མ་ལྗང་གུ་དོན་གྲུབ་ཀྱི་དབུ་རྒྱན་ཅན། མིག་གཉིས་སུ་ཐླཱ་ཡོངས་སུ་གྱུར་པ་ལས་ས་སྙིང་དཀར་པོ་རྣམ་སྣང་གི་དབུ་རྒྱན་ཅན། མིག་
གི་སྒོར་ཛཿཡོངས་སུ་གྱུར་པ་ལས་གཟུགས་རྡོ་རྗེ་མ་དཀར་མོ་རྣམ་སྣང་གི་དབུ་རྒྱན་ཅན། ཡབ་ཡུམ་གཉིས་ཀྱི་ཕྱག་དང་པོ་གཉིས་ཀྱིས་ཕན་ཚུན་དུ་འཁྱུད་པ། རྣ་བར་ༀ་ཡོངས་སུ་གྱུར་པ་ལས་ཕྱག་རྡོར་སེར་པོ་རིན་འབྱུང་གི་དབུ་རྒྱན་ཅན། རྣ་བའི་སྒོར་ཧཱུཾ་ཡོངས་སུ་གྱུར་པ་ལས་སྒྲ་རྡོ་རྗེ་མ་སེར་མོ་རིན་འབྱུང་གི་དབུ་རྒྱན་ཅན། སྣར་ༀ་ཡོངས་སུ་གྱུར་པ་ལས་ནམ་སྙིང་སེར་པོ་རིན་འབྱུང་གི་དབུ་རྒྱན་ཅན། སྣའི་སྒོར་བཾ་ཡོངས་སུ་གྱུར་པ་ལས་དྲི་རྡོ་རྗེ་མ་དམར་མོ་འོད་དཔག་མེད་ཀྱི་དབུ་རྒྱན་ཅན། ལྕེའི་རྩ་བར་ༀ་ཡོངས་སུ་གྱུར་པ་ལས་འཇིག་རྟེན་དབང་ཕྱུག་དམར་པོ་འོད་དཔག་མེད་ཀྱི་དབུ་རྒྱན་ཅན། ལྕེའི་སྒོར་ཧོཿ ཡོངས་སུ་གྱུར་པ་ལས་རོ་རྡོ་རྗེ་མ་ལྗང་གུ་དོན་གྲུབ་ཀྱི་དབུ་རྒྱན་ཅན། རྡོ་རྗེ་ལ་ༀ་ཡོངས་སུ་གྱུར་པ་ལས་སྒྲིབ་སེལ་ལྗང་གུ་དོན་གྲུབ་ཀྱི་དབུ་རྒྱན་ཅན། རྡོ་རྗེའི་སྒོར་ཁཾ་ཡོངས་སུ་གྱུར་པ་ལས་རེག་བྱ་རྡོ་རྗེ་མ་སྔོན་པོ་མི་བསྐྱོད་པའི་དབུ་རྒྱན་ཅན། སྙིང་གར་ཧཱུཾ་ཡོངས་སུ་གྱུར་པ་ལས་འཇམ་དཔལ་དམར་པོ་འོད་དཔག་མེད་ཀྱི་དབུ་རྒྱན་ཅན། ཚིགས་རྣམས་ལ་སཾ་ཡོངས་སུ་གྱུར་པ་ལས་ཀུན་བཟང་ལྗང་གུ་དོན་གྲུབ་ཀྱི་དབུ་རྒྱན་ཅན། སྤྱི་གཙུག་ཏུ་མ་ཡོངས་སུ་གྱུར་པ་ལས་བྱམས་པ་དཀར་པོ་རྣམ་སྣང་གི་དབུ་རྒྱན་ཅན། རྣམ་སྣང་ནས་བྱམས་པའི་བར་གྱི་ལྷ་ཐམས་ཅད་རིན་པོ་ཆེའི་རྒྱན་དང་དར་སྣ་ཚོགས་པའི་ན་བཟའ་ཅན། ལག་པ་གཡས་ལ་ཧཱུཾ་ཡོངས་སུ་གྱུར་པ་ལས་གཤིན་རྗེ་གཤེད་ནག་པོ་རྣམ་སྣང་གི་དབུ་རྒྱན་ཅན། ལག་པ་
གཡོན་ལ་ཧཱུཾ་ཡོངས་སུ་གྱུར་པ་ལས་ཤེས་རབ་མཐར་བྱེད་དཀར་པོ་རིན་འབྱུང་གི་དབུ་རྒྱན་ཅན། ཁ་ལ་ཧཱུཾ་ཡོངས་སུ་གྱུར་པ་ལས་རྟ་མགྲིན་དམར་པོ་འོད་དཔག་མེད་ཀྱི་དབུ་རྒྱན་ཅན། རྡོ་རྗེ་ལ་ཧཱུཾ་ཡོངས་སུ་གྱུར་པ་ལས་བདུད་རྩི་འཁྱིལ་བ་སྔོན་པོ་དོན་གྲུབ་ཀྱི་དབུ་རྒྱན་ཅན། དཔུང་པ་གཡས་པའི་རྩ་བར་ཧཱུཾ་ཡོངས་སུ་གྱུར་པ་ལས་མི་གཡོ་བ་ནག་པོ་རྣམ་སྣང་གི་དབུ་རྒྱན་ཅན། དཔུང་པ་གཡོན་པའི་རྩ་བར་ཧཱུཾ་ཡོངས་སུ་གྱུར་པ་ལས་འདོད་པའི་རྒྱལ་པོ་སྔོན་པོ་རིན་འབྱུང་གི་དབུ་རྒྱན་ཅན། པུས་མོ་གཡས་ལ་ཧཱུཾ་ཡོངས་སུ་གྱུར་པ་ལས་དབྱུག་སྔོན་ཅན་སྔོན་པོ་འོད་དཔག་མེད་ཀྱི་དབུ་རྒྱན་ཅན། པུས་མོ་གཡོན་ལ་ཧཱུཾ་ཡོངས་སུ་གྱུར་པ་ལས་སྟོབས་པོ་ཆེ་སྔོན་པོ་དོན་གྲུབ་ཀྱི་དབུ་རྒྱན་ཅན། སྤྱི་གཙུག་ཏུ་ཧཱུཾ་ཡོངས་སུ་གྱུར་པ་ལས་གཙུག་ཏོར་འཁོར་ལོས་སྒྱུར་བ་སྔོན་པོ་མི་བསྐྱོད་པའི་དབུ་རྒྱན་ཅན། རྐང་མཐིལ་གཉིས་སུ་ཧཱུཾ་ཡོངས་སུ་གྱུར་པ་ལས་གནོད་མཛེས་རྒྱལ་པོ་སྔོན་པོ་མི་བསྐྱོད་པའི་དབུ་རྒྱན་ཅན། ཁྲོ་བོ་བཅུ་པོ་ཐམས་ཅད་ཀྱང་དབུ་སྐྲ་དམར་སེར་གྱེན་དུ་བརྫེས་པ་སོགས་ཁྲོ་བོའི་ཉམས་ཐམས་ཅད་ཡོངས་སུ་རྫོགས་པ་ཞེས་པའི་བར། སྐུའི་དཀྱིལ་འཁོར་ལ་གནས་པའི་མངོན་རྟོགས་རྣམས་སྒྲུབ་ཐབས་ཇི་ལྟ་བ་བཞིན་བསྒོམས་ལ། ལྷ་ཐམས་ཅད་ཀྱི་སྤྱི་བོར་ༀ་དཀར་པོ། མགྲིན་པར་
ཨཱཿདམར་པོ། ཐུགས་ཀར་ཧཱུཾ་སྔོན་པོ། ཐུགས་ཀའི་ཧཱུཾ་ལས་འོད་ཟེར་འཕྲོས་པས་འདུས་པའི་དཀྱིལ་འཁོར་རྟེན་དང་བརྟེན་པར་བཅས་པ་ལ་སངས་རྒྱས་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར་སྤྱན་དྲངས། ཆུ་ཉེར་སྤྱོད་རོལ་མོ་དང་བཅས་པས་མཆོད། ཛཿ ཧཱུཾ་བཾ་ཧོཿ སྤྱན་དྲངས་པའི་ཡེ་ཤེས་པའི་དཀྱིལ་འཁོར་རྟེན་དང་བརྟེན་པར་བཅས་པ་དམ་ཚིག་པ་སོ་སོ་དང་རོ་གཅིག་ཏུ་གྱུར། ལྷ་སོ་སོའི་རིགས་བདག་ཞལ་གཅིག་ཕྱག་གཉིས་པ་ཡབ་ཡུམ་གྱི་བྱང་ཆུབ་ཀྱི་སེམས་ཀྱི་ཆུ་རྒྱུན་གྱིས་ལྷ་སོ་སོ་ལ་དབང་བསྐུར། དེ་ལྟར་བཏུས་པའི་སྔགས་ཡི་གེ་གསུམ་ལས་ལྷ་སོ་གཉིས་ཡོངས་སུ་རྫོགས་པའི་དཀྱིལ་འཁོར་ལ་འབྲུ་གསུམ་གྱི་རྣམ་པ་མ་དོར་བ་རྣམས་མཆོད་པའི་ཡུལ་དུ་བྱས་ལ། དེ་དག་ལ་མཆོད་རྫས་ཆུ་ཉེར་སྤྱོད་འདོད་ཡོན་སོགས་བཟང་ཞིང་གྱ་ནོམ་པ་གཡས་སྐོར་དུ་བཀོད་པས་མཛེས་པར་བཤམས་ལ། བསང་སྦྱང་བསྐྱེད་ཆོག་ནས་བདག་ཉིད་འབུལ་བའི་བར་ཆོ་གའི་གཞུང་བཞིན་དུ་བྱ། རྒྱུད་ཀྱི་སྟོན་པ་རྡོ་རྗེ་འཆང་ལ་རིགས་ལྔའི་ཡོན་ཏན་གྱི་སྒོ་ནས་བསྟོད་པ། མི་བསྐྱོད་རྡོ་རྗེ་ཡེ་ཤེས་ཆེ་ཞེས་སོགས་ཀྱིས་བསྟོད་དེ། དེ་ལྟར་སྔོན་འགྲོ་སྦྱོར་བའི་ཆོས་རྣམས་ལེགས་པར་གྲུབ་ནས། སྔགས་ཀྱི་རྗེས་གནང་དངོས་གཞི་ཇི་ལྟར་བྱ་བའི་ཚུལ་ལ། དྲང་དོན་གྱི་སྔགས་བཏུ་བའི་བྱིན་རླབས། ངེས་
དོན་གྱི་སྔགས་བཏུ་བའི་བྱིན་རླབས་གཉིས། དང་པོ་ནི། སློབ་མ་རྣམས་ལས་ཐམས་ཅད་པ་བཟླས་པའི་བུམ་ཆུས་ཁྲུས་བྱས། ནང་དུ་འོངས་མཎྜལ་དང་ཡོན་ཕུལ་སྟན་ལ་འདུག་པ་ལ། སློབ་དཔོན་རང་ཉིད་ལྷའི་རྣལ་འབྱོར་ལ་གནས་པས། སློབ་མ་རྣམས་རྡོ་རྗེ་འཆང་སྔོན་པོ་མི་བསྐྱོད་པའི་དབུ་རྒྱན་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། དབུ་སྐྲ་རལ་པའི་ཐོད་ཚུགས་ཅན། མཚན་བཟང་པོ་སོ་གཉིས་དང༌། དཔེ་བྱད་བཟང་པོ་བརྒྱད་ཅུས་བརྒྱན་པ། རེག་བྱ་རྡོ་རྗེ་མ་སྔོན་མོ་མི་བསྐྱོད་པའི་དབུ་རྒྱན་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ་པདྨ། གཡོན་དྲིལ་བུ་རིན་ཆེན་རལ་གྲི་འཛིན་པ། དབུ་སྐྲ་རལ་པ་ཕྱེད་བཅིངས་སུ་བྱས་པ་ཞེས་པ་ནས་འོད་ཀྱི་དཀྱིལ་འཁོར་རབ་ཏུ་འབར་བའི་དབུས་ན་ཡབ་རྡོ་རྗེའི་དཀྱིལ་ཀྲུང་གིས་བཞུགས་པའི་བར་དམིགས་པ་རྣམས་བརྡ་སྤྲོད་ཅིང་བསྒོམ་དུ་གཞུག །དེ་རྣམས་ཀྱི་སྤྱི་བོར་ༀ་དཀར་པོ། མགྲིན་པར་ཨཿདམར་པོ། ཐུགས་ཀར་ཧཱུཾ་སྔོན་པོ། རང་དང་སློབ་མའི་སྤྱི་བོའི་ༀ་དཀར་པོ་ལས་སྤྱན་མའི་ཚོགས་ནམ་མཁའ་གང་བ་སྤྲོས་པས་སྐད་ཅིག་གིས་སྐུ་རྡོ་རྗེ་རྣམ་པར་སྣང་མཛད་ཀྱི་ལྷའི་ཚོགས་ནམ་མཁའ་གང་བ་སྤྱན་དྲངས་པའི་དབུས་ན་བཞུགས་པའི་བདག་པོ་རྣམ་པར་སྣང་མཛད་
སྤྱན་མ་དང་སྦྱོར་བའི་མདུན་ན་སློབ་མ་འཁོད་པའི་མོས་པ་བྱེད་དུ་གཞུག་ལ། དཔལ་ལྡན་སངས་རྒྱས་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམ་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུ་ནི་མཛད་དུ་གསོལ། །ཞེས་སྐུ་གསུང་ཐུགས་ཀྱི་རྡོ་རྗེ་གསུམ་དབྱེར་མི་ཕྱེད་པ་རྡོ་རྗེ་འཆང་དུ་བསྒོམ་པའི་བདག་གི་ལུས་ད་ལྟ་ཉིད་དུ་སྐུ་རྡོ་རྗེའི་ངོ་བོར་བྱིན་གྱིས་བརླབ་ཏུ་གསོལ། ཞེས་གཙོ་བོ་ལ་གསོལ་བ་གདབ་ཏུ་གཞུག་ཅིང༌། འཁོར་རྣམས་ལ། ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམ་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུ་ནི་མཛད་དུ་གསོལ། ཞེས་གསོལ་བ་བཏབ་པས། སྤྲོས་པའི་སྤྱན་མ་དང་སྤྱན་དྲངས་པའི་རྣམ་སྣང་གི་ལྷའི་ཚོགས་གཉིས་པོ་ཐམས་ཅད་ཕན་ཚུན་རྗེས་སུ་ཆགས་པ་སྔོན་དུ་འགྲོ་བས་སྙོམས་པར་ཞུགས། མཆོག་ཏུ་དགའ་བའི་བདེ་བ་མྱོང༌། འོད་ཟེར་དཀར་པོའི་ངོ་བོར་ཞུ་བ་ཡེ་ཤེས་སེམས་དཔའི་ཚུལ་གྱིས་སློབ་མ་རྣམས་ཀྱི་སྤྱི་གཙུག་རྣམ་པར་སྣང་མཛད་ཀྱི་སྒོ་ནས་ཞུགས། ཡེཤེས་ཀྱི་ས་ཐོབ་པས་ལུས་ཐམས་ཅད་གང་སྟེ་ཚིམ་པས་སྐུའི་དབང་ཕྱུག་ཐོབ་པར་བསམ་དུ་གཞུག་ལ། སངས་རྒྱས་ཀུན་གྱི་སྐུ་གང་ཡིན། །ཕུང་པོ་ལྔ་ཡིས་རབ་བཀང་བ། །སངས་རྒྱས་སྐུ་ཡི་ངོ་བོ་ཉིད། །བདག་ཀྱང་དེ་དང་འདྲ་བར་ཤོག །ༀ་སརྦ་ཏ་ཐཱ་ག་ཏ་ཀཱ་ཡ་བཛྲ་སཱ་
བྷཱ་ཝ་ཨཱཏཏྨ་ཀོ྅་ཧཾ་ཞེས་དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེའི་རང་བཞིན་གྱི་བདག་ཉིད་ཅན་ནོ། ཞེས་ང་རྒྱལ་འཛིན་དུ་གཞུག །རང་དང་སློབ་མ་རྣམས་ཀྱི་ལྕེའི་དབུས་སུ་ཨཱ་དམར་པོ་འོད་ཟེར་ཁ་དོག་ལྔ་འཕྲོ་བ་ལས་གོས་དཀར་མོའི་ཚོགས་ནམ་མཁའ་གང་བ་སྤྲོས་པས་སྐད་ཅིག་གིས་གསུང་རྡོ་རྗེ་འོད་དཔག་མེད་ཀྱི་ཚོགས་ནམ་མཁའ་གང་བ་སྤྱན་དྲངས་པའི་དབུས་ན་བཞུགས་པའི་བདག་པོ་འོད་དཔག་མེད་གོས་དཀར་མོ་དང་སྦྱོར་བའི་མདུན་ན་སློབ་རྣམས་འཁོད་པའི་མོས་པ་བྱེད་དུ་གཞུག་ལ། ཆོས་ཀྱི་གསུང་ལས་དཔལ་ལྡན་པ། །རྡོ་རྗེ་མི་ཕྱེད་གསུམ་བསྒོམ་པ། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་ནི་མཛད་དུ་གསོལ་ཞེས་སློབ་མ་རྣམས་སྐུ་གསུང་ཐུགས་ཀྱི་རྡོ་རྗེ་གསུམ་དབྱེར་མི་ཕྱེད་པ་རྡོ་རྗེ་འཆང་དུ་བསྒོམ་པའི་ངག་ད་ལྟ་ཉིད་དུ་གསུང་རྡོ་རྗེ་འོད་དཔག་མེད་ཀྱི་ངོ་བོར་བྱིན་གྱིས་བརླབ་ཏུ་གསོལ། ཞེས་གཙོ་བོ་ལ་གསོལ་བ་གདབ་ཏུ་གཞུག་ཅིང༌། འཁོར་རྣམས་ལ། ཕྱོགས་བཅུར་བཞུགས་པའི་སངས་རྒྱས་རྣམས། །རྡོརྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེའི་གསུང་ནི་མཛད་དུ་གསོལ། ཞེས་གསོལ་བ་བཏབ་པས་སྤྲོས་པའི་གོས་དཀར་མོ་དང་སྤྱན་དྲངས་པའི་འོད་དཔག་མེད་ཀྱི་ལྷའི་ཚོགས་གཉིས་པོ་ཐམས་ཅད་ཕན་ཚུན་རྗེས་སུ་ཆགས་པ་སྔོན་དུ་འགྲོ་བས་སྙོམས་པར་ཞུགས།
མཆོག་ཏུ་དགའ་བས་བདེ་བ་མྱོང༌། འོད་ཟེར་དམར་པོའི་ངོ་བོར་ཞུ་བ་ཡེ་ཤེས་སེམས་དཔའི་ཚུལ་གྱིས་སློབ་མ་རྣམས་ཀྱི་ལྕེ་ལ་ཐིམ་སྟེ་གསུང་གི་དབང་ཕྱུག་ཐོབ་པར་མོས་པ་བྱེད་དུ་གཞུག་ལ། རྡོ་རྗེ་ཆོས་ཀྱི་གསུང་ཞེས་སོགས་རྐང་པ་བཞི་བརྗོད།ༀ་སརྦ་ཏ་ཐཱ་ཏ་ག་ཝཱ་ཀ་བཛྲ་སྭ་བྷཱ་ཝ་ཨཏཏྨ་ཀོ་྅ཧཾ། དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེའི་རང་བཞིན་དེ་ངའོ་སྙམ་དུ་ང་རྒྱལ་འཛིན་དུ་གཞུག །རང་དང་སློབ་མ་རྣམས་ཀྱི་ཐུགས་ཀར་ཧཱུཾ་ལས་རྡོ་རྗེ་སྔོན་པོ་རྩེ་ལྔ་པའི་ལྟེ་བའི་ནང་དུ་ཧཱུཾ་སྔོན་པོ་འོད་ཟེར་ཁ་དོག་ལྔ་འཕྲོ་བ་ལས་མཱ་མ་ཀིའི་ཚོགས་ནམ་མཁའ་གང་བ་སྤྲོས་པས་སྐད་ཅིག་གིས་ཐུགས་རྡོ་རྗེ་མི་བསྐྱོད་པའི་ལྷའི་ཚོགས་ནམ་མཁའ་གང་བ་སྤྱན་དྲངས་པའི་དབུས་ན་བཞུགས་པའི་བདག་པོ་མི་བསྐྱོད་པ་མཱ་མ་ཀཱི་དང་སྦྱོར་བའི་མདུན་ན་སློབ་མ་རྣམས་གནས་པར་སེམས་སུ་གཞུག་ལ། དཔལ་ལྡན་སངས་རྒྱས་ཐུགས་འཆང་བ། །རྡོ་རྗེ་མི་ཕྱེད་གསུམ་བསྒོམ་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེའི་ཐུགས་སུ་མཛད་དུ་གསོལ། ཞེས་གཙོ་བོ་ལ་རྡོ་རྗེ་གསུམ་དབྱེར་མི་ཕྱེད་པ་རྡོ་རྗེ་འཆང་དུ་བསྒོམ་པས་བདག་གི་སེམས་ཐུགས་རྡོ་རྗེ་མི་བསྐྱོད་པའི་ངོ་བོར་ད་ལྟ་ཉིད་དུ་བྱིན་གྱིས་བརླབ་ཏུ་གསོལ། ཞེས་གཙོ་བོ་ལ་གསོལ་བ་བཏབ་ཏུ་གཞུག་ཅིང༌། དེ་བཞིན་དུ་འཁོར་རྣམས་ལ། ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་
ཕྱེད་གསུམ་བསྒོམ་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་སུ་མཛད་དུ་གསོལ་ཞེས་གསོལ་བ་བཏབ་པས། སྤྲོས་པའི་མཱ་མ་ཀི་དང་སྤྱན་དྲངས་པའི་མི་བསྐྱོད་པའི་ལྷའི་ཚོགས་གཉིས་པོ་ཐམས་ཅད་ཕན་ཚུན་རྗེས་སུ་ཆགས་པ་སྔོན་དུ་འགྲོ་བས་སྙོམས་པར་ཞུགས་མཆོག་ཏུ་དགའ་བའི་བདེ་བ་མྱོང༌། འོད་ཟེར་ནག་པོའི་ངོ་བོར་ཞུ་བ་ཡེ་ཤེས་སེམས་དཔའི་ཚུལ་གྱིས་སློབ་མ་རྣམས་ཀྱི་སྙིང་གར་ཞུགས་ཡེ་ཤེས་ཀྱི་ས་ཐོས་པས་ལུས་ཐམས་ཅད་གང་ནས་ཚིམ་པས་ཐུགས་ཀྱི་དབང་ཕྱུག་ཐོབ་པའི་མོས་པ་བྱེད་དུ་གཞུག་ལ། ཀུན་ཏུ་བཟང་པོའི་ཐུགས་གང་ཡིན། །གསང་བའི་དབང་ཐོབ་བློ་ལྡན་པ། །བདག་ཀྱང་དེ་དང་འདྲ་འགྱུར་ཞིང༌། །རྡོ་རྗེ་འཛིན་དང་མཚུངས་འགྱུར་ཤོག །ༀ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷ་ཝ་ཨཏྨ་ཀོ་྅ཧཾ་ཞེས་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེའི་རང་བཞིན་དེ་ངའོ་སྙམ་དུ་ང་རྒྱལ་འཛིན་དུ་གཞུག །སྒོ་གསུམ་བྱིན་གྱིས་བརླབས་པའི་སྐབས་རྣམས་ཀྱི་ཡེ་ཤེས་ཀྱི་ས་ཐོབ་ཅེས་པའི་དོན་ནི། འཁོར་གསུམ་པོ་རྣམས་རང་བཞིན་གྱིས་གྲུབ་པས་སྟོང་པའི་སྟོང་པ་ཉིད་རྟོགས་པའི་ལྟ་བས་ཟིན་དགོས་པའི་དོན་ཏེ། རྩ་རྒྱུད་ལེའུ་གཉིས་པ་ལས། སྐུ་དང་གསུང་དང་ཐུགས་ནམ་མཁའ་ལྟ་བུར་སྦྱར་ནས་ཞེས་པའི་དོན་ནོ། །དེ་ནས་སློབ་མ་རྣམས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་
གསུམ་དབྱེར་མི་ཕྱེད་པ་རྡོ་རྗེ་འཆང་ཆེན་པོའི་ངོ་བོར་མོས་པ་བྱེད་དུ་གཞུག །ༀ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་བཛྲ་སྭ་བྷ་ཝ་ཨཱཏྨ་ཀོ་྅ཧཾ། ཞེས་སྐུ་གསུང་ཐུགས་ཀྱི་རྡོ་རྗེ་གསུམ་དབྱེར་མི་ཕྱེད་པ་རྡོ་རྗེ་འཆང་ཆེན་པོར་མོས་སུ་གཞུག་གོ །དྲང་དོན་གྱི་འབྲུ་གསུམ་བཏུ་བ་དང་བྱིན་གྱིས་བརླབ་པའི་ཚུལ་ལོ། །ངེས་དོན་གྱི་ཡི་གེ་གསུམ་བཏུ་ཞིང་བྱིན་གྱིས་རློབ་པའི་ཚུལ་ནི། ངེས་དོན་གྱི་ༀ་ཡིག་ལ་ཨ་དང་ཨུ་དང་མ་གསུམ་ཡོད་པ་ལས། རྡོ་རྗེ་ཕྲེང་བ་ལས། ཨ་ནི་ཆོས་འཁོར་པདྨར་གནས། །རླུང་གི་འཁོར་ལོ་ལ་ནི་ཁྱབ། །འདི་ཉིད་ཁོ་ན་རླུང་ཆེན་པོ། །སྲོག་ཅེས་བྱ་བ་ཐམས་ཅད་གསུངས། ཞེས་ༀ་ཡིག་གི་ཡི་གེ་གསུམ་གྱི་ཨའི་ངེས་དོན་ནི། སྙིང་ག་ཆོས་ཀྱི་འཁོར་ལོའི་པདྨར་གནས་པའི་ཨ་ཡིག་ལ་བཤད་དོ། །ཨུ་ཡིག་ནི་ཕྲེང་བའི་འགྱུར་དག་པ་ལས། ཨུ་ནི་ལོངས་སྤྱོད་འཁོར་ལོར་གནས། །མེ་དང་ཉི་མ་འདྲ་བ་ཡི། །མགྲིན་པའི་མཐར་གནས་སྤྱི་གཙུག་མཐར། །ཁྱབ་པ་གཟི་བརྗིད་ཀྱི་ནི་ལུས། ཞེས་ཨུ་ཡིག་གི་ངེས་དོན་མགྲིན་པ་ལོངསསྤྱོད་ཀྱི་འཁོར་ལོ་ནས་བདེ་ཆེན་གྱི་འཁོར་ལོའི་བར་ལ་ཁྱབ་པ་གྱེན་རྒྱུའི་རླུང་དུ་བཤད་དོ། །དེ་ཉིད་ལས། བདེ་ཆེན་འཁོར་ལོ་ཞེས་བྱར་གནས། །ཡི་གེ་མ་ནི་ཐིག་ལེ་ཙམ། །མཐོ་བའི་ཚད་ནི་སོར་བཅུ་གཉིས། །རྒྱལ་པོའི་གཙུག་ཏོར་གནས་ན་གནས། ཞེས་མ་ཡིག་གི་ངེས་དོན་སྨིན་མཚམས་ནས་སོར་
བཅུ་གཉིས་གཞལ་བའི་གཙུག་ཏོར་གྱི་གནས་ན་གནས་པའི་བྱང་སེམས་ཐིག་ལེར་བཤད་དོ། །དྲང་དོན་ལ་ཨ་ཨུ་མ་གསུམ་མཚམས་སྦྱར་བའི་ༀ་ཡིག་སྤྱི་བོར་དགོད་པ་བཞིན་དུ་སློབ་མ་རྣམས་རྡོ་རྗེ་འཆང་དུ་གསལ་བའི་སྲོག་འཛིན་དང་གྱེན་རྒྱུ་དང་ཧཾ་གི་ཐིག་ལེ་གསུམ་བདེ་ཆེན་འཁོར་ལོའི་རྩ་མདུད་ཀྱི་དྷཱུ་ཏཱིར་ཏིང་ངེ་འཛིན་གྱི་སྟོབས་ཀྱིས་བཅིངས་པ་ལས་ཡས་བབས་ཀྱི་ཚེ་དགའ་བའི་ཡེ་ཤེས་ཀྱི་འགོ་རྩོམ། མས་བརྟན་གྱི་ཚེ་ལྷན་ཅིག་སྐྱེས་དགའི་ཡེ་ཤེས་ཡོངས་སུ་རྫོགས་པ་སྐྱེ་ཞིང་དེའི་ངོ་སྤྲད་ལ་མོས་པ་བྱེད་དུ་གཞུག །ངེས་དོན་གྱི་ༀ་ཡིག་བཏུས་ཏེ་བྱིན་གྱིས་བརླབ་ཚུལ་ལོ། །ངེ་སདོན་གྱི་ཨ་ཡིག་བཏུ་ཚུལ་ནི། ཡི་གེ་ཨ་ནི་སྔར་བཤད་ཟིན། སྲོག་གི་རླུང་ནི་མཆོག་ཡིན་ནོ། ཞེས་པ་དང༌། ཨ་ནི་ཆོས་འཁོར་པདྨ་ལས། །མགྲིན་པར་ཡི་གེ་ཨ་ཉིས་འགྱུར། །སྲོག་ཉིད་དང་ནི་ཐུར་སེལ་བ། །ཡི་གེ་ཧ་ཡི་ཀུན་ནས་ནི། །མགྲིན་པའི་དབུས་ན་གནས་པ་བཅིངས། ཞེས་སྙིང་གའི་སྲོག་འཛིན་དང༌། མགྲིན་པའི་གྱེན་རྒྱུ་གཉིས་ཨ་ཡིག་ཉིས་འགྱུར་ཨཱ་རིང་པོའི་དོན་དང༌། ཧ་ཡིས་མཚོན་པའི་མཚོན་དོན་ཐུར་སེལ་གསུམ་ཨ་ཡིག་མགྲིན་པར་འགོད་པའི་དོད། ལོངས་སྤྱོད་འཁོར་ལོའི་རྩ་མདུད་ཀྱི་དྷཱུ་ཏཱིའི་ནང་དུ་ཏིང་ངེ་འཛིན་གྱི་སྟོབས་ཀྱིས་བཅིངས་པ་ལས་ཡས་བབས་ཀྱི་ཚེ་དགའ་བའི་ཡེ་ཤེས་མཚན་ཉིད་ཚང་བ་དང༌། མས་བརྟན་གྱི་ལྷན་སྐྱེས་དེ་
ཉིད་ལས་ཕྱེ་བའི་ཁྱད་དགའི་ཡེ་ཤེས་སྐྱེ་བར་ངོ་སྤྲད་དོ། །ངེས་དོན་གྱི་ཧཱུཾ་ཡིག་ཐུ་ཚུལ་ནི། ཧ་ནི་ཐུར་སེལ་མིང་ཅན་རླུང༌། །བཤང་སྒོ་གསང་བའི་དབུས་ན་གནས། །ཡི་གེ་ཨུ་ནི་སྟེང་འགྲོའི་རླུང༌། །མགྲིན་པའི་པདྨའི་དབུས་ན་གནས། །ཡི་གེ་མ་ནི་སྲོག་རླུང་ཡིན། །དཔྲལ་བར་རླུང་གི་འཁོར་ལོ་ལ། །དེ་དག་གཅིག་གྱུར་སྙིང་ག་ལ། །ཐུགས་ཀྱི་ས་བོན་དུ་ནི་བརྗོད། ཅེས་ཧ་ཨུ་མ་གསུམ་མཚམས་སྦྱར་བའི་ཧཱུཾ་ཡིག་ཐུགས་ཀར་འགོད་པའི་ངེས་དོན་ཧས་མཚོན་པའི་ཐུར་སེལ་དང་སྙིང་ག་ནས་སྨིན་མཚམས་ཀྱི་རླུང་གི་འཁོར་ལོ་ལ་ཁྱབ་པའི་སྲོག་རླུང་མའི་དོན་དང༌། ཨུ་ཡིག་གི་དོན་སྟེང་འགྲོའམ་གྱེན་རླུང་གསུམ་སྙིང་ག་ཆོས་ཀྱི་འཁོར་ལོའི་ཨ་ཝ་དྷཱུ་ཏཱིའི་རྩ་མདུད་ཀྱི་ནང་དུ་ཏིང་ངེ་འཛིན་གྱི་སྟོབས་ཀྱིས་དབྱེར་མེད་དུ་བཅིངས་པ་ལས་ཡས་བབས་མས་བརྟན་གཉིས་ཀྱི་ཚེ་ན་མཆོག་དགའ། རིལ་འཛིན་རྗེས་གཞིག་ལྟ་བུའི་ཏིང་ངེ་འཛིན་གྱི་སྟོབས་ཀྱིས་ཆོས་ཀྱི་འཁོར་ལོའི་དབུས་ཀྱི་དྷཱུ་ཏཱིའི་ནང་དུ་རླུང་དེ་དག་དབྱེར་མེད་དུ་བཅིངས་པ་ལས་སྟོང་པ་སྔ་མ་གསུམ་སྔོན་དུ་སོང་བ་ཅན་གྱི་ཐམས་ཅད་སྟོང་པ་འོད་གསལ་གྱི་ཡེ་ཤེས་སྐྱེ་བའི་མོས་པ་བྱེད་དུ་གཞུག་ཅིང་ངོ་སྤྲད་ལ། དགའ་བ་དང་སྟོང་པ་དེ་དག་གི་ཚེ་གང་ཟག་དང་ཕུང་པོ་ལ་སོགས་པའི་ཆོས་རང་བཞིན་གྱིས་གྲུབ་པས་སྟོང་པའི་སྟོང་པ་ཉིད་དང་དབྱེར་མེད་དུ་སྦྱོར་ཚུལ་ཕྱིན་ཅི་མ་ལོག་པར་བཤད་དེ། ངེས་དོན་
གྱི་ཡི་གེ་གསུམ་བཏུ་ཞིང་བྱིན་གྱིས་བརླབ་པའི་ཆོ་གའོ། །དཔལ་གསང་བ་འདུས་པ་རྩ་བཤད་ཀྱི་རྒྱུད་ལས་ཡི་གེ་གསུམ་ལ་ལན་ཅིག་མ་ཡིན་པར་བསྔགས་པ་མཛད་པའི་དོན་ནི་དེ་དག་ཡིན་ཏེ། རྗེ་བཙུན་བླ་མ་འཇམ་པའི་དབྱངས་ཀྱི་ཐུགས་ཀྱི་བཅུད་ཕྱུང་བའི་མན་ངག་ལ་རིང་དུ་འདྲིེས་པས་བྱས་པའི་གདམས་པའོ། །མཇུག་གི་ཆོ་ག་ལ་གསུམ་ལས། གཏང་རག་གི་མཆོད་པ་ཆུ་ཉེར་སྤྱོད་འདོད་ཡོན་ལྔ་ལ་སོགས་པ་ཕྱི་ནང་གི་མཆོད་པས་རྒྱས་པར་མཆོད་ཅིང་བསྟོད། གཉིས་པ་ནི། རྒྱུ་དེ་དག་ལས་བྱུང་བའི་དགེ་བའི་རྩ་བ་རྣམས་རྒྱལ་བའི་བསྟན་པ་མི་ནུབ་ཅིང་ཡུན་རིང་དུ་གནས་པའི་རྒྱུར་བསྔོ་ཞིང་ཁྱད་པར་དུ། དགེ་བ་འདི་ཡིས་མྱུར་དུ་བདག །ཅེས་སོགས་འདུས་པའི་སྨོན་ལམ་རྒྱས་པར་གདབ། གསུམ་པ་ལས་ཀྱི་རྗེས་མི་མངོན་པར་བསྡུ་ཞིང་བཀྲ་ཤིས་ཀྱི་ཆར་དབབ་པའི་ཚུལ་ནི། ༀ་ཡོ་ག་ཤུདྡྷ་སརྦ་དྷརྨཱ་ཡོ་ག་ཤུདྡྷོ་྅ཧཾ། ཞེས་པད་ཀོར་གྱི་ཕྱག་རྒྱ་ཐུགས་ཀར་འཁྱུད་པའི་ཚུལ་བྱས་ལ། མདུན་གྱི་རྡོ་རྗེ་འཆང་ཡབ་ཡུམ་གྱི་སྐུའི་དཀྱིལ་འཁོར་ལ་ལྷ་སོ་གཉིས་བཞུགས་པའི་རྟེན་དང་བརྟེན་པའི་དཀྱིལ་འཁོར་སྤྱན་དྲངས་ཏེ་རང་དང་སློབ་མ་རྣམས་ལ་དབྱེར་མེད་དུ་བསྟིམ་ཞིང༌། ༀ་ཧཱུཾ་ཏྲཱཾ་ཧྲཱཾཿཨཱཿༀ་ཨཱཿབཛྲ་དྷྲཀ་ཧཱུཾ་ཧཱུཾ། ཞེས་བརྗོད་ཅིང་རྡོ་རྗེ་དང་བཅས་པའི་ལག་པ་གཡས་ཀྱིས་བཏུས་པའི་ཡི་གེ་རྣམས་ལ་རེག་པའི་ཚུལ་བྱས་ལ་རྡོ་རྗེ་འཆང་ཡབ་ཡུམ་ལྷ་སོ་གཉིས་ཀྱི་སྐུའི་དཀྱིལ་འཁོར་
དང་བཅས་པའི་དམ་ཚིག་པ་རྣམས་འོད་དུ་ཞུ་བ་ལས་བཏུས་པའི་ཡི་གེ་འབྲུ་གསུམ་དང༌། བཏུ་གཞིའི་དབྱངས་དང་གསལ་བྱེད་ཀྱི་ཡི་གེའི་རྣམ་པར་གྱུར་པའི་མོས་པ་བྱས་ལ་ཡི་གེ་དེ་དག་ལ་རང་གི་ལག་པ་གཡས་ཀྱིས་རེག་ནས་སློབ་མ་རྣམས་ཀྱི་ལུས་ཀྱི་གནས་གསུམ་དང་གནས་ཀུན་ཏུ་བྱུག་ཅིང་སློབ་མ་རྣམས་བྱང་ཆུབ་མ་ཐོབ་བར་དུ་ལུས་ངག་ཡིད་གསུམ་ཕྱི་ནང་གི་ཉེར་འཚེ་ལས་བསྲུངས་པའི་མོས་པ་བྱེད་དུ་གཞུག་གོ །དེ་ནས་དཔོན་སློབ་ཀུན་གྱི་ལག་ཏུ་མེ་ཏོག་བཀྲམ་ཞིང་ཡེ་དྷ་རྨཱཿཅི་འགྲུབ་བཟླས་ལ་རོལ་མོའི་སྒྲ་དང་དབྱངས་ཀྱི་ང་རོ་དང་བཅས་པས། རབ་ཡངས་ནམ་མཁའ་ཏིལ་གྱི་གང་བུ་བཞིན། །ཡོངས་སུ་གང་བའི་འདུས་པའི་ལྷ་ཚོགས་ནི། །ཁ་ཅིག་མེ་ཏོག་སྣ་ཚོགས་ཆར་འབེབས་ཤིང༌། །ལ་ལ་བཀྲ་ཤིས་གདངས་སྙན་གླུ་རུ་ལེན། །གཞན་དག་བགེགས་དཔུང་འཇོམས་པའི་ཕྲིན་ལས་ཀྱིས། །ཁྱེད་ལ་རྟག་ཏུ་དཔལ་གནས་མཛད་པ་འདི། །ཤེས་པར་གྱིས་ལ་ཡིད་བདེ་སྐྱེད་ཅིག་དང༌། །ཤིས་བརྗོད་ཕྲེང་བ་བདག་གིས་བསྒྲག་པར་བྱ། །རྨད་བྱུང་མཚན་དཔེའི་དཔལ་འབར་ལོངས་སྤྱོད་རྫོགས། །ཁ་སྦྱོར་བདེ་སྟོང་རོ་ལ་རྟག་རོལ་ཅིང༌། །དམིགས་མེད་ཐུགས་རྗེས་ཞི་བའི་མཐའ་སྤངས་པ། །རྒྱལ་བ་ཡན་ལག་བདུན་ལྡན་ལ་ཕྱག་འཚལ། །གསང་བ་ཀུན་འདུས་སྡུད་མཛད་གསང་བའི་བདག །
རྒྱུད་རྒྱལ་འདུས་པའི་ལམ་གྱི་མཆོག་བརྙེས་པ། །ཨིནྡྲ་བོ་དྷི་ཀླུ་ཡི་མཁའ་འགྲོ་མ། །བཱི་སུ་ཀལྤ་དཔལ་ལྡན་ས་ཧ་ར། །ཀླུ་སྒྲུབ་རྡོ་རྗེ་ཅན་དང་འཕགས་པ་ལྷ། །ཀླུ་བྱང་ཤཱཀྱ་བཤེས་གཉེན་མཱ་ཏཾ་ཀི། ཟླ་བའི་ཞབས་སོགས་བླ་མ་བརྒྱུད་པ་དང༌། །འཇམ་དབྱམས་ཆོས་ཀྱི་རྒྱལ་པོ་ཙོང་ཁ་པའི། །སྐུ་གསུང་ཐུགས་དང་རྣམ་དཀར་མཛད་པ་ལ། །དགེ་མཚན་ཇི་སྙེད་མཛད་པའི་བཀྲ་ཤིས་དེས། །དངོས་དང་བརྒྱུད་པའི་བླ་མ་མཆོག་རྣམས་ཀྱི། །དྲི་མེད་རྣམ་ཐར་ཇི་བཞིན་ཟིན་པ་དང༌། །བྱིན་རླབས་ཞུགས་པས་དཔལ་ལྡན་འདུས་པ་ཡི། །བསྟན་པ་རྒྱས་པར་བྱེད་པའི་བཀྲ་ཤིས་ཤོག །ཕྱོགས་བཅུའི་ཞིང་རབ་འབྱམས་ཞེས་པ་ནས། ཕྱོགས་བཅུའི་རབ་འབྱམས་ཞིང་ན་བཞུགས་པ་ཡི། །དཔལ་ལྡན་འདུས་པའི་དགེ་འདུན་དཀོན་མཆོག་ལ། །ལེགས་ཚོགས་ཇི་སྙེད་མཆིས་པའི་བཀྲ་ཤིས་དེས། །ཁྱེད་ཀྱི་མི་མཐུན་རྒྱུད་པ་ཀུན་ཟད་ཅིང༌། །དགེ་ལེགས་ཡར་ངོའི་ཟླ་བཞིན་འཕེལ་གྱུར་ནས། །ཕུན་ཚོགས་དཔལ་ལ་རོལ་པའི་བཀྲ་ཤིས་ཤོག །སྲུང་བ་ལྔའི་ཆོ་གའི་གཟུངས་ལས་གསུངས་པའི། འཇིག་རྟེན་འདི་དང་གཞན་དང་མཐོ་རིས་ན། །རིན་ཆེན་རྨད་བྱུང་རྒྱ་ཆེན་མཆོག་ཡོད་པ། །དེས་ནི་རྫོགས་པའི་སངས་རྒྱས་རིན་ཆེན་ལ། །ཅིས་ཀྱང་གྲངས་དང་བགྲང་དང་ཆར་མི་ཕོད། །ངོ་མཚར་ཤིན་ཏུ་རྨད་བྱུང་དཔག་མེད་གང༌། །རྫོགས་པའི་སངས་རྒྱས་རིན་ཆེན་འཇིག་རྟེན་མཆོག །ཇི་ལྟར་
ངའི་འདི་དེ་བཞིན་བདེན་མཆོག་ན། །བདེན་པ་འདིས་ཀྱང་ཤིན་ཏུ་བདེ་ལེགས་ཤོག །ཞི་འགོག་བདུད་རྩི་དམ་པ་གྱ་ནོམ་གང༌། །ཤཱཀྱ་ཐུབ་པས་མཉམ་གཞག་ཐུགས་ཆུད་པ། །ཆོས་དེ་དང་ནི་མཚུངས་པ་ཡོད་མིན་ཏེ། །དེ་མངོན་བྱས་ནས་ཕྱིན་ཆད་མྱ་ངན་མེད། །ངོ་མཚར་ཤིན་ཏུ་རྨད་བྱུང་དཔག་མེད་གང༌། །དམ་པའི་ཆོས་ཀྱི་རིན་ཆེན་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་འདིས་ཀྱང་ཤིན་ཏུ་བདེ་ལེགས་ཤོག །རྒྱལ་བས་གང་དག་གང་ཟག་བརྒྱད་གསུངས་པ། །དེ་དག་རྣམས་ནི་སྐྱེས་བུ་ཟུང་བཞི་སྟེ། །སྦྱིན་གནས་དེ་དག་ས་སྟེང་ཤིན་ཏུ་དཀོན། །དེ་དག་ལ་བྱིན་དཔག་ཏུ་མེད་པར་འགྱུར། །ངོ་མཚར་རྨད་བྱུང་རྨད་བྱུང་དཔག་མེད་ན། །དགེ་འདུན་རིན་ཆེན་གང་ཞིག་འཇིག་རྟེན་མཆོག །ཇི་ལྟར་ངའི་འདི་དེ་བཞིན་བདེན་མཆོག་ན། །བདེན་པ་དེས་ཀྱང་ཤིན་ཏུ་བདེ་ལེགས་ཤོག །རྒྱལ་བ་སྲས་བཅས་བསོད་ནམས་མཐུ་དག་དང༌། །ལྷ་རྣམས་ཀུན་གྱིས་ལེགས་པར་བསམས་པ་དང༌། །གསང་སྔགས་རིག་སྔགས་ཀུན་གྱི་མཐུ་སྟོབས་དང༌། །བདེན་པར་སྨྲ་བ་རྣམས་ཀྱི་བདེན་ཚིག་གིས། །བསོད་ནམས་རི་བོ་བཞིན་དུ་བརྟན་པ་དང༌། །རྒྱུད་ནི་ཉི་ཟླ་བཞིན་དུ་གསལ་བ་དང༌། །
སྙན་པས་ནམ་མཁའ་བཞིན་དུ་ཁྱབ་གྱུར་པས། །གསུམ་པོ་དེས་ཀྱང་དེང་འདིར་བདེ་ལེགས་ཤོག །ཅེས་པ་ནི་སྦྱིན་པ་གཏོང་ཞིང་ཞེས་སོགས་ཡོངས་སུ་རྫོགས་པའི་བར་དང༌། ཉིན་མོ་བདེ་ལེགས་དང༌། འདི་ན་རྒྱལ་བ་དགྲ་རྒྱལ་བདེན་གང་གིས། ཞེས་སོགས་ཤིས་པ་བརྗོད། མེ་ཏོག་གི་ཆར་དབབ། བདག་ཅག་དཔོན་སློབ་འཁོར་དང་བཅས་པ་བཟའ་ཉི་མ་དང་ཟླ་བ་སྒྲ་གཅན་ལས་རྒྱལ་བ་བཞིན་དུ་མི་འཐུན་ཕྱོགས་ཐམས་ཅད་ལས་རྒྱལ་ནས་བཀྲ་ཤིས་པར་གྱུར་ཅིག །ཅེས་བརྗོད། དཔལ་རྡོ་རྗེ་ཕྲེང་བ་ལས་གསུངས་པའི་དྲང་ངེས་ཀྱི་སྔགས་བཏུ་ཞིང་བྱིན་གྱིས་བརླབ་པའི་ཆོ་ག་འདི་ནི་ཡོངས་སུ་རྫོགས་པའི་བཤེས་གཉེན་ཆེན་པོ་དུ་མས་ཡང་ཡང་བསྐུལ་བ་ལ་བརྟེན་ནས། རྗེ་བཙུན་དམ་པ་ཤར་ཙོང་ཁ་པ་ཐམས་ཅད་མཁྱེན་པའི་མན་ངག་ལ་བརྟེན་ནས་དཔལ་གསང་བ་འདུས་པ་རྩ་བཤད་ཀྱི་རྒྱུད་ཐམས་ཅད་དང་འགྲེལ་པ་སྒྲོན་མ་གསལ་བ་སོགས་འཕགས་པ་ཡབ་སྲས་ཀྱིས་མཛད་པའི་འདུས་པའི་གཞུང་ཀུན་ལ་རིང་དུ་འདྲིས་པར་བྱས་ཏེ་རྗེ་ཐམས་ཅད་མཁྱེན་པ་ཤར་ཙོང་ཁ་པ་དེ་ཉིད་ཀྱི་ཞབས་ཀྱི་རྡུལ་སྤྱི་བོས་ལེན་པ་འདུས་པའི་རྣལ་འབྱོར་པ་སྡེ་སྣོད་འཛིན་པ་ནམ་མཁའ་དཔལ་གྱིས་གྲུབ་པའི་གནས་མཆོག་འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་དུ་སྦྱར་བའོ། །ཡི་གེ་
པ་ནི་ཡོངས་སུ་རྫོགས་པའི་པཎྜི་ཏ་ཤཱཀྱ་ཤྲཱི་བྷ་དྲའོ།། །།འདིས་ཀྱང་རྗེ་བཙུན་བླ་མའི་གསུང་རབ་དང་སངས་རྒྱས་བཅོམ་ལྡན་འདས་ཀྱི་བསྟན་པའི་སྙིང་པོ་ཕྱོགས་དུས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །སརྦ་མངྒ་ལཾ། སྭ་སྟི། རྒྱལ་བསྟན་པད་ཚལ་བན་བདེའི་དྲི་བསུང་ཅན། །བཤད་སྒྲུབ་འདབ་རྒྱས་རྣམ་གྲོལ་སྦྲང་རྩིའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྤྱིན་ཆར་འདི་སྤེལ།