ཤོག་ལྷེབ་ ༤༠༣ ནས་ ༥༠༠ བར།
བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ཞེས་བྱ་བ་བཞུགས་སོ།།
དཔལ་འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ཞེས་བྱ་བ། རྗེ་བཙུན་བླ་མ་འཇམ་པའི་དབྱངས་ཀྱི་ཞབས་ཀྱི་པདྨོ་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །ཨིནྡྲ་ནཱི་ལའི་རི་བོ་ཆེན་པོ་ལ། །མཚམས་སྤྲིན་གཞོན་ནུས་འཁྱུད་པ་ལྟ་བུ་ཡི། །དཔལ་ཆེན་ཧེ་རུ་ཀ་དང་རྗེ་བཙུན་མའི། །ཞབས་ཀྱི་པདྨར་གུས་པས་ཕྱག་འཚལ་ལོ། །བརྩེ་བས་བསྐྱོད་པའི་རྫུ་འཕྲུལ་ཤུགས་ཀྱིས་ནི། །ལམ་འདིའི་སྒྲུབ་པ་པོ་ནི་གང་ན་གནས། །དེར་ནི་བྱོན་ནས་རྟག་ཏུ་གྲོགས་མཛད་པ། །སྙིང་པོའི་རྣལ་འབྱོར་མ་ལ་བདག་ཕྱག་འཚལ། །
པུལླི་ར་སོགས་གནས་མཆོག་ཉེར་བཞི་ན། །སྤྲུལ་པའི་སྐུ་ཡི་སྣང་བ་མ་བསྡུས་པར། །སྒྲུབ་པ་པོ་ལ་རྟག་ཏུ་བྱིན་རློབ་པའི། །དཔའ་བོ་རྣལ་འབྱོར་མ་ཡིས་བྱིན་གྱིས་རློབས། །བསམ་མི་ཁྱབ་ཀྱི་མཐུ་སྟོབས་ཆེན་པོ་ཡིས། །སྒྲུབ་པ་པོ་ལ་འཚེ་བའི་བགེགས་འཇོམས་པ། ། སྒོ་མཚམས་མ་ལ་གུས་པས་བདག་འདུད་ཀྱིས། །མངོན་པར་འདོད་པའི་དོན་རྣམས་འགྲུབ་པར་མཛོད། །གང་གི་ཐུགས་རྗེ་ཆེན་པོས་བསྐྱོད་པའི་སྤྱན་རས་གཡོ་བའི་ཆ་ཤས་སྙིང་ལ་ཞུགས་པས་ཀྱང༌། །ཐོག་མ་མེད་ནས་རྗེས་སུ་ཞུགས་པའི་རྨོངས་པའི་དྲ་བ་དམ་པོའི་འཆིང་བ་རབ་བཅད་ནས། །ཡིད་ནི་རྒྱལ་བའི་གསུང་རབ་རྣམས་ལ་ཆོས་ཀྱི་རྒྱལ་སྲིད་
སྐྱོང་བའི་དགའ་བདེ་ལ་རོལ་པའི། །ངོ་མཚར་མཛད་པས་འགྲོ་བ་དབུགས་འབྱིན་མཛད་པའི་འཇམ་དབྱངས་བླ་མ་དེ་ཡིས་བྱིན་གྱིས་རློབས། །དཔལ་ལྡན་ཧེ་རུ་ཀ་ཡི་ཞབས་པད་ལ། །གང་གིས་རེག་པའི་གྲུབ་ཆེན་རྣམས་ཀྱི་ལུགས། །ཇི་བཞིན་འཛིན་མཛད་ནཱ་རོ་ཏ་པ་སོགས། །རྒྱ་བོད་མཁས་པའི་བླ་མ་རྣམས་ལ་འདུད། །དངོས་གྲུབ་རིན་ཆེན་ཀུན་གྱི་གཏེར། །མན་ངག་དུ་མའི་རླབས་ཕྲེང་འཁྲིགས། །བདེ་མཆོག་སྦས་ཆུའི་རྒྱ་མཚོ་ལ། །བདག་འདྲས་རྒལ་བར་ག་ལ་ནུས། །དེ་ལྟ་ན་ཡང་མཁས་ལས་རིམ་བརྒྱུད་པའི། །ལེགས་པར་བཤད་པས་རྩ་རྒྱུད་བཤད་པའི་རྒྱུད། །ཇི་བཞིན་སྦྱོར་ལ་བློ་གྲོས་སྣང་བ་ནི། །ཅུང་ཟད་རྙེད་པས་འདིར་ནི་སྤྲོ་བར་གྱུར། །ཚུལ་འདི་རྣམ་དཔྱོད་རབ་ཡངས་དོན་གཉེར་ཅན། །དེ་དག་རྣམས་ཀྱི་མིག་གི་བདུད་རྩི་དང༌། །རྣ་བར་གཏམ་སྙན་འཕྲིན་དང་ཡིད་ལ་ནི། །རྨད་བྱུང་དགའ་བ་རབ་ཏུ་རྒྱས་བྱེད་དེ། །སྦས་པའི་རྒྱུད་དོན་ལྟ་བའི་མེ་ལོང་ངོ༌། །འདིར་འཛམ་བུའི་གླིང་འདི་ཉིད་ཀྱི་ཡུལ་ཉི་ཤུ་རྩ་བཞི་སོགས་ན། དཔའ་བོ་དང་དཔའ་མོའི་དབང་ཕྱུག་མའི་སྤྲུལ་པའི་དཀྱིལ་འཁོར་སྤྲུལ་པ་ད་དུང་ཡང་བཞུགས་པས། ནུས་པ་དང་ཡོན་ཏན་ཐམས་ཅད་མྱུར་དུ་འཐོབ་ཅིང༌། དུས་ཀྱི་མཐར་ཡང་ནུས་པ་མི་ཉམས་པར་ཐོགས་པ་མེད་པར་འབྱུང་བའི་ཕྱིར། བྱིན་རླབས་ཅན་དུ་གྲགས་པའི་དཔལ་འཁོར་ལོ་སྡོམ་པར་བརྗོད་པ། བདེ་མཆོག་བསྡུས་པའི་རྒྱུད་གཏན་ལ་འབེབས་པ་ལ་གསུམ། སྔོན་དུ་གསུང་རབ་སྤྱིའི་རྣམ་པར་བཞག་པ་དང༌། བྱེ་
བྲག་ཏུ་བདེ་མཆོག་གི་རྒྱུད་རྣམས་ཀྱི་རྣམ་པར་བཞག་པ་དང༌། ཉུང་ངུའི་རྩ་རྒྱུད་བཤད་པ་ལ་ཇི་ལྟར་འཇུག་པའོ། །དང་པོ་ལ་རྒྱལ་བའི་བསྟན་པ་ཁོ་ན་ཐར་འདོད་ཀྱི་འཇུག་ངོགས་སུ་བསྟན་པ་དང༌། དེ་ལ་འཇུག་པའི་རིམ་པ་མི་འདྲ་བའི་སྒོ་བསྟན་པ་རྣམས་ནི་རྒྱས་པར་རྡོ་རྗེ་འཆང་གི་ལམ་གྱི་རིམ་པར་བཤད་ཅིང༌། ཕ་རྒྱུད་དང་མ་རྒྱུད་གཉིས་ཀྱི་རྣམ་པར་བཞག་པ་ནི་གསང་བ་འདུས་པའི་མཐའ་དཔྱོད་ཀྱི་སྤྱི་དོན་སོགས་སུ་རྒྱས་པར་བསྟན་ཟིན་པས་འདིར་མ་སྤྲོས་སོ། །གཉིས་པ་ལ་གསུམ། རྩ་བཤད་དང་ཆ་མཐུན་གྱི་རྒྱུད་ངོས་གཟུང་བ་དང༌། བདེ་མཆོག་གི་རྒྱུད་གསུངས་པའི་གནས་དང་དུས་བསྟན་པ་དང༌། བཤད་རྒྱུད་ཀྱིས་རྩ་རྒྱུད་ཇི་ལྟར་བཤད་པའོ། །དང་པོ་ལ་གཉིས། རྩོད་མེད་ཀྱི་རྒྱུད་ངོས་གཟུང་བ་དང༌། བཤད་རྒྱུད་རྩོད་པ་ཅན་རྣམས་བསྟན་པའོ། །དང་པོ་ནི། འདིར་དཔལ་འཁོར་ལོ་བདེ་མཆོག་གི་སྐོར་གྱི་རྒྱུད་རྩོད་མེད་རྣམས་ཀྱི་རྣམ་གཞག་རགས་པ་ཅིག་བརྗོད་ན། སློབ་དཔོན་རྡོ་རྗེས་རྩ་བའི་རྒྱུད་ལེའུ་འབུམ་པ། རྒྱུད་ཕྱི་མ་ནམ་མཁའ་དང་མཉམ་པ་ཤོ་ལོ་ཀ་འབུམ་པ། ཕྱི་མའི་ཕྱི་མ་ལེའུ་ལྔ་བཅུ་རྩ་གཅིག་ཤོ་ལོ་ཀ་བདུན་བརྒྱ་པའོ། །ཞེས་བཤད་ལ། བོད་ཀྱི་བླ་མ་ཁ་ཅིག་ཀྱང་དེ་ལྟར་བཞེད་མོད་ཀྱང་ཁུངས་ཐུབ་པའི་ཤེས་བྱེད་ནི་མི་སྣང་ངོ༌། །དེས་ན་མཁའ་འགྲོ་རྒྱ་མཚོ་ལས། དེ་ལྟར་དེས་བརྗོད་འབུམ་གསུམ་ལས། །ཕྱུང་བ་བདེ་མཆོག་ཉུང་ངུ་སྟེ། །ཨ་ཡིག་ལ་སོགས་ཀྵ་
ཡིག་མཐར། །ལེའུ་རྣམས་ཇི་ལྟའི་རིམ་པ་ཡིས། །དེ་ཁོ་ན་ཉིད་ལྡན་པར་སྦྱར། །ཞེས་བདེ་མཆོག་ཉུང་ངུའི་བསྡུས་རྒྱུད་མངོན་བརྗོད་འབུམ་ཕྲག་གསུམ་ལས་ཕྱུང་བར་བཤད་དོ། །ཀུན་སྤྱོད་ལས། འབུམ་དུ་བརྗོད་པའི་རྒྱུད་ལས་ནི། །བདེ་མཆོག་བཏུས་པར་གྱུར་པ་དང༌། །ནམ་མཁའ་དང་ནི་མཉམ་པའི་རྒྱུད། །འབུམ་གཅིག་ན་ཡང་འདི་དག་བཤད། །ཅེས་ནམ་མཁའ་དང་མཉམ་པའི་རྒྱུད་འབུམ་ཕྲག་གཅིག་ཏུ་བཤད་པ་ནི་སྔ་མ་དང་མཐུན་ལ། འབུམ་ཕྲག་གཅིག་པའི་མངོན་བརྗོད་ལས་བདེ་མཆོག་ཉུང་ངུའི་རྒྱུད་བཏུས་པར་བཤད་དེ། ཉུང་ངུའི་རྒྱུད་གང་ལས་བཏུས་པའི་མངོན་བརྗོད་འབུམ་པ་དང༌། ནམ་མཁའ་དང་མཉམ་པའི་རྒྱུད་གཉིས་སོ་སོར་གསུངས་སོ། །དེ་ལྟར་གཉིས་བཤད་པ་ནི། ཧེ་རུ་ཀ་མངོན་འབྱུང་ལས། འབུམ་ཕྲག་འབུམ་ཕྲག་གསུམ་ལས་བཤད། །རྒྱུད་ཀྱི་སྙིང་པོ་བསྡུས་པ་ཡིན། །ཞེས་པའི་འགྲེལ་པ་ལས། མངོན་སྤྱོད་རྒྱས་པ་འབུམ་ཕྲག་གསུམ་པ་དང༌། བསྡུས་པ་འབུམ་ཕྲག་གཅིག་པར་བཤད་པས་མི་འགལ་ཞེས་གསུངས་པ་ལྟར་ཡིན་པས་རྩ་རྒྱུད་རྒྱས་པ་ལ་མི་འདྲ་བ་གཉིས་ཡོད་དོ། །རྩ་རྒྱུད་ལས། རིག་པ་རྒྱ་མཚོ་ལས་ཇི་བཞིན། །དཔའ་བོས་མདོར་བསྡུས་གསུངས་པ་ཡིན། །ཞེས་གསུངས་པའི་རིག་པ་རྒྱ་མཚོ་ནི། རྒྱལ་བ་བཟང་པོ་དང་དཔའ་བོ་རྡོ་རྗེས་རྒྱུད་ཆེན་པོར་བཤད་ལ། བོད་ཁ་ཅིག་རྩ་རྒྱུད་འབུམ་ཕྲག་གཅིག་པར་འཆད་དོ། །དེ་རྣམས་ལས་ད་ལྟ་ནི་ཕྱོགས་འདིར་ཉུང་ངུའི་རྩ་རྒྱུད་
ང་གཅིག་པ་ཁོ་ནའོ། །བཤད་རྒྱུད་མང་པོ་ཡང་རང་རང་གི་རྒྱུད་རྒྱས་པ་ལས་བསྡུས་པའི་བསྡུས་རྒྱུད་ཡིན་པས་བསྡུས་རྒྱུད་གང་ཡིན་རྩ་རྒྱུད་མིན་ཡང་ང་གཅིག་པ་ལྟ་བུ་ནི་རྩ་རྒྱུད་དོ། །བཤད་པའི་རྒྱུད་ནི་དཀའ་རྒྱལ་ཟླ་བས། མཁའ་འགྲོ་འབྱུང་དང་ཀུན་སྤྱོད་དང༌། །དེ་བཞིན་མཚན་མཆོག་བླ་མའི་རྒྱུད། །ཁ་སྦྱོར་རྒྱུད་དང་བཞི་པོ་ནི། །བཤད་པའི་རྒྱུད་དུ་ཤེས་པར་བྱ། །ཞེས་གསུངས་པའི་མཁའ་འགྲོ་ནི་རྡོ་རྗེ་མཁའ་འགྲོ་དང༌། བླ་མ་ནི་མངོན་བརྗོད་བླ་མ་དང༌། ཁ་སྦྱོར་ནི་སམ་བྷུ་ཊ་དང༌། འབྱུང་བ་ལ་སྤྱིར་ཧེ་རུ་ཀ་མངོན་འབྱུང་དང༌། ཕག་མོ་མངོན་འབྱུང་དང༌། སྡོམ་པ་འབྱུང་བ་གསུམ་ཡོད་ཀྱང༌། བཤད་རྒྱུད་དུ་བྱས་པའི་འབྱུང་བ་ནི་འཆད་པར་འགྱུར་རོ། །དེ་ལྟར་བྱས་ན་བཤད་རྒྱུད་ལྔ་ཡོད་པས། རྒྱུད་དང་ཞེས་པའི་དང་ནི་སོ་སོར་འབྱེད་པའི་དང་དུ་བྱའོ། །ཇོ་བོའི་འགྲེལ་པར་བཤད་རྒྱུད་བཞིར་བཤད་པའི་གསུམ་ནི་འབྱུང་བ་དང༌། མངོན་བརྗོད་དང༌། རྡོ་རྗེ་མཁའ་འགྲོར་བཤད་ལ། བཞི་པ་ནི་ཀུན་སྤྱོད་ལ་བྱེད་པ་དགོངས་པའོ། །ནཱ་རོ་པའི་སློབ་མ་རྒྱ་གར་དཱ་རི་ཀ་པ་ཞེས་པཎྜི་ཐང་ཆུ་བའི་བླ་མ་ནི། རྣལ་འབྱོར་མ་བཞི་ཞལ་སྦྱོར་བ་དང༌། མཁའ་འགྲོ་རྒྱ་མཚོ་གཉིས་ལྔའི་སྟེང་དུ་བསྣན་ནས་བཤད་རྒྱུད་བདུན་དུ་བྱེད་ཟེར། བོད་ཀྱི་མཁས་པ་དག །སྡོམ་འབྱུང་འགྲེལ་པར་བསྡུས་རྒྱུད་ཡིན་ལ་རྒྱུད་ཕྱི་མའང་ཡིན། བཤད་རྒྱུད་ཀྱང་ཡིན་པར་བཤད་པས་སྡོམ་
འབྱུང་དང༌། ཕག་མོ་མངོན་འབྱུང་ནི་རྒྱུད་ཉིད་ལས། བཤད་རྒྱུད་དུ་བཤད་པས་དེ་གཉིས་སྔ་མ་བདུན་ལ་བསྣན་པས་བཤད་རྒྱུད་དགུར་བྱའོ། །ཞེས་ཟེར་རོ། །དེ་ལ་བདེ་མཆོག་གི་རྒྱུད་ལ་ནི་རྩ་བ་དང་བཤད་པའི་རྒྱུད་གཉིས་སུ་མ་ངེས་ཏེ། ཨ་ལངྐ་ཀ་ལ་ཤས། བཤད་རྒྱུད་དང་ཡན་ལག་གི་རྒྱུད་གཉིས་སོ་སོར་བགྲངས་ཤིང༌། སངས་རྒྱས་གསང་བས་ཀྱང༌། བཤད་རྒྱུད་དང་ཆ་མཐུན་གྱི་རྒྱུད་གཉིས་སོ་སོར་མཛད་པ་ལྟར་འདིར་ཡང་མི་འགལ་བས་དེ་བཞིན་དུ་བྱའོ། །དེ་ལྟར་བྱས་ན་ཀུན་སྤྱོད་ཁ་སྦྱོར་རྡོ་རྗེ་མཁའ་འགྲོ་གསུམ་ནི་བཤད་པ་ལྟར་ཡིན་ལ། མངོན་བརྗོད་ལ་ནི་འགྲེལ་པར་རེས་བཤད་རྒྱུད་དང༌། རེས་རྩ་རྒྱུད་དུ་བྱས་ཀྱང་བཤད་རྒྱུད་དུ་བྱའོ། །ཕག་མོ་མངོན་འབྱུང་ནི་དེ་ཉིད་ལས། བཤད་པའི་རྒྱུད་ཕྱི་མ་ལས་ཕག་མོ་མངོན་པར་འབྱུང་བ་ཞེས་བྱ་བ། ཞེས་གསུངས་ལ། བཤད་པའི་རྒྱུད་ཕྱི་མ་ནི་མངོན་བརྗོད་ལ་བྱ་སྟེ། འདི་མངོན་བརྗོད་ཀྱི་ལེའུ་བཅུ་གཉིས་པ་ལ་དེའི་ལེའུ་གསུམ་པ་ནས་འབྱུང་བ་སོགས་འགའ་ཞིག་བསྣན་པར་འདུག་པས། དེ་ལས་ཕྱུང་བའི་དོན་ནོ། །དེའི་ཕྱིར་མངོན་བརྗོད་ལས་ལོགས་པའི་བཤད་རྒྱུད་མིན་ནོ། །སྡོམ་པ་འབྱུང་བ་ནི་རྒྱུད་རྒྱས་པ་འབུམ་ཕྲག་གསུམ་པ་ལས། ལྷན་སྐྱེས་ཀྱི་རྟོག་པ་བཤད་པ་འཆད་པའི་ཤིན་ཏུ་གལ་ཆེ་བ་ཅིག་ཡོད་པས་འགྲེལ་པས་བཤད་རྒྱུད་དུ་མཛད་པ་ལྟར་བྱའོ། །དཀའ་རྒྱལ་ཟླ་བ་དང་ཇོ་བོས་འབྱུང་བ་ཞེས་པ་མ་གཏོགས་པ་གསལ་ཁ་མེད་ལ། བོད་སྔ་མ་ཁ་
ཅིག་ཧེ་རུ་ཀ་མངོན་འབྱུང་དུ་འདོད་ཅིང༌། དེ་ཡང་དབང་བསྐུར་བའི་བཤད་རྒྱུད་ཡིན་ཟེར་མོད་ཀྱང༌། རྩ་རྒྱུད་ལས་མི་འབྱུང་བའི་དབང་གི་རྣམ་གཞག་ཆེར་མེད་པ་དང༌། གཞན་ཡང་བཤད་རྒྱུད་དུ་འགྲོ་བའི་རྒྱུ་མཚན་གསལ་བར་མི་སྣང་བས་ཕྱོགས་མཐུན་གྱི་རྒྱུད་དུ་བྱའོ། །མཁའ་འགྲོ་རྒྱ་མཚོ་དང་རྣལ་འབྱོར་མ་བཞི་ཞལ་སྦྱོར་བ་ཡང་ཕྱོགས་མཐུན་གྱི་རྒྱུད་དུ་བྱས་ན་ལེགས་པར་སེམས་སོ། །ཇོ་བོས་བཤད་རྒྱུད་བཞིར་མཛད་པ་ནི་བདེ་མཆོག་སྒོས་ཀྱི་བཤད་རྒྱུད་ལ་དགོངས་སོ། །དེ་ལྟར་ན་མལ་གྱོའི་རྗེས་འབྲང་དག །ཕམ་ཐིང་པ་རྒྱལ་དཀའ་ཟླ་བའི་རྗེས་སུ་འབྲངས་ནས་བཤད་རྒྱུད་ལྔར་བྱེད། ཅེས་སྔར་དྲངས་པའི་མཁའ་འགྲོ་འབྱུང་བ་ཀུན་སྤྱོད་དང༌ཞེས་སོགས་ཀྱི་རྗེས་སུ་འབྲངས་ནས། བླ་མ་ཕམ་ཐིང་པ་བཤད་རྒྱུད་ལྔར་བཞེད་ཅེས་ཟེར་བ་ལེགས་ཏེ། ཕག་མོ་མངོན་འབྱུང་མངོན་བརྗོད་བླ་མ་ལས་ལོ་གསུམ་བགྲངས་པའི་ལུགས་སོ། །གཉིས་པ་ནི། བདེ་མཆོག་གི་སྐུ་གསུང་ཐུགས་ཀྱི་འཁོར་ལོའི་བཤད་རྒྱུད་ར་ལི་ཉེར་བཞི་འཕྲོས་པའི་རྒྱུད་བརྒྱད་དེ་སོ་གཉིས་ལ། བོད་ཀྱི་མཁས་པ་དག་འཕྲོས་པའི་རྒྱུད་ལ། ཁ་ཅིག་རྙོག་པ་མེད་པའི་རྒྱུད་བསྣན་ནས་བརྒྱད་དུ་འདོད་པ་དང༌། ཁ་ཅིག་སྟོབས་ཆེན་ཡེ་ཤེས་རྒྱལ་པོའི་རྒྱུད་གྲངས་སུ་མི་བགྲང་བར་རྙོག་མེད་དང༌། རི་གི་ཨ་ར་ལི་གཉིས་བསྣན་ནས་བརྒྱད་དུ་བྱེད་པ་ལ། རི་གི་ཨ་ར་ལི་ནི་བདེ་
མཆོག་གི་བཤད་རྒྱུད་ཡིན་རྒྱུ་ཡང་མེད་ཅིང༌། དེ་རྣམས་ཀྱི་ཟླ་ལ་བསྲེ་བར་ཕངས། རྙོག་མེད་ནི་རྒྱུད་ཡང་དག་ཅིག་ཡིན་པ་འདྲ། འདི་རྣམས་སྔ་ནས་ཀྱང་རྒྱུད་རྩོད་པ་ཅན་དུ་གྲགས་ཤིང༌། རྒྱུད་ཡང་དག་མིན་པར་ངེས་པ་འགའ་ཞིག་སྣང་ལ། གཞན་རྣམས་ཐེ་ཚོམ་གྱི་གཞིར་སྣང་བས་དཔྱད་པར་བྱའོ། །ཞེས་དང༌། ནམ་མཁའ་དང་མཉམ་པའི་རྒྱུད་ཀྱང་ཐེ་ཚོམ་ཟ་བ་དང༌། མཁའ་འགྲོ་མ་ཐམས་ཅད་ཀྱི་སྐུ་གསུང་ཐུགས་གཉིས་སུ་མེད་པ། བསམ་གྱིས་མི་ཁྱབ་པའི་རྡོ་རྗེ་ཕག་མོ་མངོན་པར་འབྱུང་བའི་རྩ་རྒྱུད་ལ་ལེའུ་བཅུ། རྒྱུད་ཕྱི་མ་ལ་ལེའུ་གཉིས་བྱས་པ་དང༌། ཕག་མོ་མངོན་འབྱུང་གི་རྒྱུད་ལེའུ་ཉེར་གཉིས་བྱས་པ། ལོ་ཙྪཱ་བ་ཡེ་ཤེས་བཟང་པོས་བསྒྱུར་ཟེར་བ་གཉིས་རྒྱུད་རྫུན་མར་སྣང་གསུངས་ཞིང༌། འབུམ་ཕྲག་གསུམ་པ་ལས་ཕྱུང་བའི་སྒྱུ་འཕྲུལ་དྲ་བ་ཆེན་མོ་རལ་པ་གྱེན་དུ་བརྫེས་པའི་རྒྱུད། སྒྱུ་མ་ཆེན་མོ་ཞེས་བྱ་བ་འདི་ནི་མེ་ཏྲི་མཁའ་སྤྱོད་ཀྱི་རྒྱུད་ཆུང་ངུ་གཅིག་ལོགས་སུ་བཀོལ་བར་སྣང་ཞེས་གསུང་སྟེ། མང་དུ་མཁྱེན་ཞིང་སྙིང་ཁམ་ཆུང་ལ་བློ་གྲོས་ཆེ་ལ་ཞིབ་པ་རྣམས་ཀྱིས་ལེགས་པར་དཔྱད་པར་བྱའོ། །གཉིས་པ་ནི། བདེ་མཆོག་གི་རྒྱུད་གསུངས་པའི་གནས་ལ་མངོན་བརྗོད་འགྲེལ་པ་ནས་རི་རབ་ཀྱི་རྩེར་གསུངས་པར་བཤད། གདུལ་བྱ་བཏུལ་བའི་གནས་ནི་འཛམ་བུའི་གླིང་ཡིན་ཟེར། རྩ་རྒྱུད་ཀྱི་འགྲེལ་པ་ཨིནྡྲ་བྷཱུ་ཏིས་མཛད་ཟེར་བར། དང་པོ་རི་རབ་ཀྱི་རྩེར་གསུངས་ནས་ཕྱིས་འབྲས་སྤུངས་སུ་གསུངས་པར་བཤད་དོ། །དུས་ནམ་གྱི་ཚེ་
གསུངས་པ་ནི། སློབ་དཔོན་རྡོ་རྗེས་མཛད་པའི་འགྲེལ་པར། གཉིས་ལྡན་གྱི་དུས་དབང་ཕྱུག་བཏུལ་བའི་ཚེ་གསུངས་པར་འདོད་ཀྱང༌། བོད་ཀྱི་བླ་མ་རྣམས་རྩོད་ལྡན་གྱི་དུས་སུ་གསུངས་པར་བཞེད་པ་ནི། མཁའ་འགྲོ་རྒྱ་མཚོ་ལས། རྩོད་ལྡན་དུས་ཀྱི་སའི་ནང་དུ། །བཅོམ་ལྡན་མཐའ་ཡས་པས་འདི་གསུངས། །ཤཱཀྱ་སེང་གེས་གསུངས་པའི་རྒྱུད། །ཅེས་གསུངས་ཤིང༌། འགྲེལ་པར་ཡང་མཁའ་འགྲོ་རྒྱ་མཚོའི་རྒྱུད་རྒྱས་པ་རྩོད་ལྡན་གྱི་དུས་སུ་ཤཱཀྱ་སེང་གེས་གསུངས་པར་བཤད་ལ། དེས་གཞན་ཡང་མཚོན་ནོ། །རྩ་རྒྱུད་ཀྱི་འགྲེལ་པ་ཁ་ཅིག་ནས། བསྐྱར་ནས་མ་གསུངས་པའང་བཤད་མོད་ཀྱང༌། སྔ་མ་ལྟར་རིགས་ཏེ། གུར་ལས། སྙིགས་མའི་དུས་སུ་ཚེ་ཐུང་ཞིང་ཉོན་མོངས་ཤས་ཆེ་བ་རྣམས་ཀྱི་དོན་དུ། རྩ་རྒྱུད་རྒྱས་པ་ལས་བསྡུས་ནས་གསུངས་པར་བཤད་པས་ཤེས་སོ། །སྟོན་པ་པོ་ནི་ཧེ་རུ་ཀས་གསུངས་པས་བདེ་མཆོག་སྟོད་འགྲེལ་དུ་གསུངས་པ་ལྟར་རྩ་རྒྱུད་ལས་ཀྱང༌། དཔའ་བོ་བསྡུས་ནས་གསུངས་པ་ཡིན། །ཞེས་གསུངས་སོ། །ཞུ་བ་པོ་ནི་ཕག་མོ་ཡིན་པར་དེ་ཉིད་ལས་བཤད་ལ། ཕྱག་ན་རྡོ་རྗེས་ཞུས་པར་སློབ་དཔོན་ལྭ་བ་པ་བཞེད་དེ། རྩ་རྒྱུད་ལས། གཟུགས་དང་ལས་ཀྱི་གསང་བ་གང༌། །ཇི་ལྟར་གནས་པ་དཔའ་བོ་ཉོན། །ཞེས་གསུངས་པ་དང་མཐུན་ནོ། །སྡུད་པ་པོ་ནི་མཁའ་འགྲོ་རྒྱ་མཚོ་ལས། བསྡུ་བ་མཛད་པ་སོགས་རྣམས་ཀྱིས། །
བདག་ལས་བགྲོད་པ་དེ་ཐོབ་བོ། །མ་མོ་ཐམས་ཅད་འདུས་རྣམས་ཀྱིས། །རྡོ་རྗེའི་གནས་རྣམས་སུ་བསྡུས་སོ། །གཅིག་ལ་གཅིག་གིས་བཞེད་པ་ནི། །གསོལ་བ་འདེབས་ཤིང་གསོལ་འདེབས་མཛད། །བཅོམ་ལྡན་འདས་ཀྱིས་གསུངས་པ་ཡི། །ཚིག་འདི་ལ་ནི་མངོན་པར་དགའ། །ཞེས་རྣལ་འབྱོར་མ་རྣམས་ཀྱིས་རྡོ་རྗེའི་གནས་སུ་བསྡུས་པར་གསུངས་པའི་གནས་ནི་ཨོ་རྒྱན་དུ་འཆད་དོ། །གསུམ་པ་ལ་གསུམ། བཤད་རྒྱུད་ཀྱིས་རྩ་རྒྱུད་འཆད་པའི་དོན་གྱི་གཙོ་བོ་ངོས་གཟུང་བ་དང༌། ཐུན་མོང་མ་ཡིན་པའི་བཤད་རྒྱུད་ཀྱིས་ཇི་ལྟར་བཤད་པ་དང༌། ཐུན་མོང་བའི་བཤད་རྒྱུད་ཀྱིས་ཇི་ལྟར་བཤད་པའོ། །དང་པོ་ནི། བཤད་རྒྱུད་ཀྱིས་རྩ་རྒྱུད་འཆད་པའི་དོན་ལ་མང་དུ་ཡོད་ཀྱང༌། གཅོ་བོ་ནི་རྫོགས་རིམ་ཡིན་ལ་རྫོགས་རིམ་ལ་ནི། བདེ་མཆོག་གི་སྐོར་དུ་ཡང་སྦྱོར་བ་ཡན་ལག་དྲུག་དང༌། འདུས་པའི་རིམ་པ་ལྔའི་རྣམ་གཞག་གཉིས་གསུངས་ཏེ། མཁའ་འགྲོ་རྒྱ་མཚོ་ལས། སོ་སོར་སྡུད་དང་དེ་བཞིན་དུ། །བསམ་གཏན་སྲོག་རྩོལ་འཛིན་པ་དང༌། །རྗེས་སུ་དྲན་དང་ཏིང་འཛིན་ཏེ། །སྦྱོར་བའི་མཚན་ཉིད་རྣམ་དྲུག་གོ། ཞེས་གསུངས་ཤིང༌། རྒྱུད་དེ་ཉིད་ལས། སོ་སོར་སྡུད་པ་ཁྭ་གདོང་མ། །འུག་གདོང་མ་ནི་བསམ་གཏན་འདོད། །སྲོག་རྩོལ་དུ་ནི་གནས་པ་ཁྱི། །འཛིན་པ་ལ་ནི་ཕག་མོའོ། །རྗེས་དྲན་གནས་པ་ཕོ་ཉ་མོ། །ཏིང་ངེ་འཛིན་ནི་བརྟན་པར་འདོད། མཆེ་བ་མོ་ནི་རྒྱས་བསྟན་ཐོབ། །འཇོམས་མ་འབྲས་བུ་ཀུན་བདག་སྐྱེས། །འཁོར་བ་ལས་ནི་གྲོལ་
གྱུར་པ། །ཞེས་ཕག་གདོང་མ་མ་གཏོགས་པའི་སྒོ་མ་གསུམ་ཕག་མོ་དང་བཞི། གཤིན་རྗེ་ཕོ་ཉ་མོ་དང་བརྟན་མ་སྟེ་མཚམས་མ་གཉིས་དང་དྲུག །སྦྱོར་བ་ཡན་ལག་དྲུག་ཏུ་རིམ་པ་བཞིན་བཤད་ལ། འགྲེལ་པ་ལས་དེ་རྣམས་རྟོགས་སླ་བ་དང༌། བླ་མའི་ཞལ་ལས་ཤེས་པར་བྱ་བར་བཤད་དོ། །ལཱུ་ཨི་པའི་འགྲེལ་པ་ཁྱད་པར་གསལ་བྱེད་ལས། ལཱུ་ཨི་པའི་སྒྲུབ་ཐབས་ལས་གསུངས་པའི་རིམ་གཉིས་ལ་སྦྱོར་བ་ཡན་ལག་དྲུག་གི་རྣམ་གཞག་མཛད་དོ། །ཡང་མཁའ་འགྲོ་རྒྱ་མཚོ་ལས། རང་གི་སྐུ་ནི་སྒྱུ་མ་མཉམ། །བདག་བྱིན་བརླབ་འདི་ཕྲ་མོ་དང༌། །རྡོ་རྗེ་བཟླས་རང་མཚན་ཉིད་དོ། །རྫོགས་པའི་བྱང་ཆུབ་སེམས་ཀྱི་གཏེར། །དེ་ལས་ལྷག་མ་ཟུང་འཇུག་གོ། ཞེས་སོ། །དེ་ལ་རང་གི་སྐུ་སྒྱུ་མ་དང་མཉམ་པ་སྟེ་མཚུངས་པའི་བདག་བྱིན་རླབས་ཤིན་ཏུ་རྟོགས་དཀའ་བས། ཕྲ་མོར་གྱུར་པ་ནི་རིམ་པ་གསུམ་པ་བདག་བྱིན་རླབས་ཀྱི་རིམ་པ་སྒྱུ་ལུས་སོ། །རྡོ་རྗེ་བཟླས་པའི་རང་གི་མཚན་ཉིད་ནི་རྡོ་རྗེ་བཟླས་པའི་རིམ་པ་སྟེ་རིམ་པ་དང་པོའོ། །མངོན་པར་རྫོགས་པར་བྱང་ཆུབ་པའི་རིམ་པ་ནི་རིམ་པ་བཞི་པ་སྟེ་མིང་གཞན་འོད་གསལ་གྱི་རིམ་པའོ། །སེམས་ཀྱི་གཏེར་ནི་སེམས་དབེན་ནམ་སེམས་དམིགས་ཀྱི་རིམ་པ་སྟེ་རིམ་པ་གཉིས་པའོ། །སྔར་བཤད་པ་བཞི་ལས་ལྷག་མ་ནི་ཟུང་འཇུག་གི་རིམ་པ་སྟེ་རིམ་པ་ལྔ་པའོ། །གཞན་ཡང་ལཱུ་ཨི་པའི་གཞུང་ནས་འབྱུང་བའི་རྫོགས་རིམ་རྣལ་འབྱོར་ཆེན་པོ་དང༌།
དྲིལ་བུ་པས་མཛད་པའི་རིམ་པ་ལྔ་པ་དང༌། ནག་པོ་པས་མཛད་པའི་རིམ་པ་བཞི་པ་སོགས་ཡིན་ལ། མངོན་བརྗོད་ཀྱི་འགྲེལ་པ་ལས་ཀྱང༌། རྫོགས་པའི་རིམ་པ་ནི་རྒྱུད་འདི་ནས་རྩ་སྒོམ་པ་དང༌། རླུང་སྒོམ་པ་དང༌། ཐིག་ལེ་སྒོམ་པ་དང༌། དྲོད་སྒོམ་པ་དང༌། བྱང་ཆུབ་ཀྱི་སེམས་སྒོམ་པ་དང་མཚན་བཅས་སྒོམ་པ་ལྔ་ཡིན་ལ། ཡེ་ཤེས་ཀྱི་ཚོགས་དོན་དམ་པའི་བདེན་པ་སྒོམ་པ་ནི་སྒྱུ་མ་ལྟ་བུ་དང༌། འོད་གསལ་སྟོང་པ་ཉིད་སྒོམ་པ་དང༌། ཟུང་འཇུག་སྒོམ་པ་དང་གསུམ་སྟེ། སྲོག་ཨ་ཝ་དྷཱུ་ཏཱིར་འཇུག་པའི་ཐབས་བསམ་གཏན་སྒོམ་པ་ནི་ལྔ་ཡིན། ཡེ་ཤེས་ཀྱི་ཚོགས་དོན་དམ་པའི་བདེན་པ་སྒོམ་པ་ནི་གསུམ་ཡིན། ཞེས་བདེ་མཆོག་གི་རྫོགས་རིམ་ལ་འདུས་པའི་རྫོགས་རིམ་གྱི་ཐ་སྙད་བྱས་པ་མང་དུ་བཤད་ཅིང༌། རྫོགས་རིམ་ལ་སྲོག་དྷཱུཾ་ཏཱིར་ཚུད་པའི་ཐབས་ཤིག་དང༌། ཚུད་པ་ལ་བརྟེན་ནས་སྒོམ་པའི་སྐབས་གཉིས་སོ་སོར་བྱས་ཏེ། བདེ་མཆོག་ཏུ་མ་ཟད་བླ་མེད་ཀྱི་རྫོགས་རིམ་གཞན་སྒོམ་པ་ལ་ཡང་དེ་གཉིས་ཤེས་དགོས་སོ། །གཉིས་པ་ལ་གཉིས། མངོན་བརྗོད་དང་རྡོ་རྗེ་མཁའ་འགྲོས་ཇི་ལྟར་བཤད་པ་དང༌། སྡོམ་འབྱུང་དང་རྣལ་འབྱོར་མ་ཀུན་སྤྱོད་ཀྱིས་ཇི་ལྟར་བཤད་པའོ། ། དང་པོ་ལ་གཉིས། མངོན་བརྗོད་བླ་མས་ཇི་ལྟར་བཤད་པ་དང༌། རྡོ་རྗེ་མཁའ་འགྲོས་ཇི་ལྟར་བཤད་པའོ། །དང་པོ་ལ་གཉིས། བསྐྱེད་རིམ་ཇི་ལྟར་བཤད་པ་དང༌། རྫོགས་རིམ་ཇི་ལྟར་བཤད་པའོ། །དང་པོ་ལ་གཉིས། བསྐྱེད་རིམ་རྩ་རྒྱུད་
དུ་མི་གསལ་བའི་ཚུལ་དང༌། དེ་བཤད་རྒྱུད་འདིས་གསལ་བར་བཤད་ཚུལ་ལོ། །དང་པོ་ནི། བདེ་མཆོག་རིམ་ལྔ་ལས། འཁོར་ལོ་སྡོམ་པར་སྦས་པ་ཡི། །བྱིན་རླབས་རིམ་པ་བཤད་པར་བྱ། །ཞེས་གསུངས་པ་ལྟར་རྩ་རྒྱུད་ལེའུ་ང་གཅིག་པར་རྫོགས་རིམ་རྣམས་སྦས་པར་མ་ཟད། ནག་པོ་སྤྱོད་པའི་སྒྲུབ་ཐབས་ལས། འཁོར་ལོ་སྡོམ་པའི་གསང་བའི་དོན། །གྲུབ་པ་གསང་སྔགས་ཀུན་བསྡུས་པ། །ཀླ་ཀློའི་སྐད་ཀྱིས་སྦས་པ་སྟེ། །དེ་ཡི་སྒྲུབ་ཐབས་བདག་གིས་བཤད། །ཅེས་གསུངས་པ་ལྟར་བསྐྱེད་རིམ་ཡང་སྦས་ཏེ། ཀུན་སྤྱོད་ལས་ཀྱང་བསྐྱེད་རིམ་གྱི་སྐོར་མང་པོ་སྦས་པར་གསུངས་སོ། །དེ་ཡང་རྩ་རྒྱུད་ལེའུ་གཉིས་པར། གཞལ་ཡས་ཁང་གི་དབུས་སུ་པདྨའི་ལྟེ་བར་ཧེ་རུ་ཀ་ཞལ་བཞི་པ་དང༌། ཕག་མོ་ཡབ་ཡུམ་གཉིས་དགོད་པ་དང༌། དཔའ་མོ་ཉེར་བཞི་ཕྱོགས་དང་མཚམས་སུ་དགོད་པ་དང༌། དེ་བཞིན་དུ་དཔའ་བོ་ཡང་དགོད་པ་དང༌། མ་མོ་ཐམས་ཅད་ཕྱོགས་དང་མཚམས་སུ་དགོད་པར་བཤད་དེ། ལྷ་རེ་གཉིས་ཀྱི་དཀྱིལ་འཁོར་རོ། །གཙོ་བོ་ཡབ་ཡུམ་གྱི་སྐུ་མདོག་ནི། །ཉེར་བདུན་པར་སྤྱོད་པའི་སྐབས་སུ། མཚན་མོ་རྟག་པར་གཅེར་བུ་སྟེ། །གནག་དང་དམར་བར་རྟག་ཏུ་བྱ། །ཞེས་པས་ཧེ་རུ་ཀའི་མདོག་གནག་པ་དང༌། ཕག་མོ་དམར་མོར་བསྟན་པར་བླ་མ་རྣམས་བཞེད་དེ། ལྭ་བ་པའི་འགྲེལ་པར་ཡང་དེ་བཞིན་དུ་བཤད་དོ། །སོ་བཞི་པར། དཔའ་བོའི་དབང་པོ་ཞལ་བཞི་པ་
ལ་སྙིང་པོའི་རྣལ་འབྱོར་མ་བཞིས་བསྐོར་བ་དང༌། ང་གཅིག་པར་ཧེ་རུ་ཀ་ཕྱག་བཅུ་གཉིས་པ་དཔའ་བོ་དང་དཔའ་མོའི་ཚོགས་དང་བཅས་པར་བསྒོམ་པར་གསུངས་ཏེ། ཧེ་རུ་ཀ་དེ་རྣམས་ནི་འབྲས་བུའི་ཧེ་རུ་ཀའི་དབང་དུ་བྱས་སོ། །ལེའུ་སོ་གཉིས་པར་ཧེ་རུ་ཀ་དཀར་པོ་ཞལ་བཞི་པ་ཕྱག་བཞི་ནས་འབུམ་གྱི་བར་དུ་ཡོད་པ་ལ། དེའི་སྐུ་མདོག་ཅན་གྱི་ཕག་མོ་ཡུམ་དུ་བྱས་པ་ཅིག་བཤད་དེ། འདི་ནག་པོ་པས་རྒྱུའི་ཧེ་རུ་ཀ་ལ་བཤད་ལ། འཆད་ཚུལ་གཞན་ཡང་ཡོད་དོ། །གཞན་ཡང་ལེའུ་བཞི་པར་དཔའ་མོ་ཉེར་བཞིའི་མིང་དང༌། ཞེ་བརྒྱད་པར་དཔའ་བོ་ཉེར་བཞིའི་མིང་ཙམ་བཤད་ཀྱང༌། འཁོར་གྱི་ལྷ་དྲུག་ཅུའི་ཞལ་ཕྱག་གི་གྲངས་དང་ཕྱག་མཚན་རྣམས་མི་གསལ་ལ། སྐུ་མདོག་ཀྱང་མི་གསལ་ལོ། །དེ་བཞིན་དུ་ཕུང་ཁམས་སྐྱེ་མཆེད་བྱིན་གྱིས་རློབ་པ་དང༌། ཚོགས་ཞིང་ལ་ཚོགས་གསོག་པ་དང༌། བསྲུང་འཁོར་གཉིས་སྒོམ་པ་དང༌། འབྱུང་བ་རིམ་བརྩེགས་དང༌། རི་རབ་དང་གཞལ་ཡས་ཁང་བསྐྱེད་པ་མི་གསལ་ལ། བརྟེན་པ་ལྷ་བསྐྱེད་པ་ལ་ཡང་རི་རབ་ཀྱི་སྟེང་དུ་སྣ་ཚོགས་པདྨའི་ལྟེ་བར་དབྱངས་གསལ་ལས། ཧེ་རུ་ཀ་བསྐྱེད་ཅེས་པ་མ་གཏོགས་པ་མངོན་བྱང་ལྷག་མ་ལས་བསྐྱེད་ཚུལ་དང༌། དམ་ཚིག་པ་ལ་ཡེ་ཤེས་པ་གཞུག་པ་དང༌། དབང་བསྐུར་དང་རྒྱས་གདབ་དང་གཏོར་མ་བསྐྱེད་ཚུལ་སོགས་མི་གསལ་ཞིང་ཁྲིགས་ཆགས་སུ་ཡང་མ་བཤད་དོ། །གཉིས་པ་ནི། དེ་ལྟར་རྩ་རྒྱུད་ན་མི་གསལ་བའི་བསྐྱེད་རིམ་དེ། མངོན་རྟོགས་ཁྲིགས་ཆགས་སུ་གསལ་བར་མངོན་བརྗོད་ནས་
འཆད་པ་ནི། དེའི་ལེའུ་བཞི་པ་ནས་ཡིན་ཏེ། ལེའུ་དེར་བསྐྱེད་རིམ་གང་དུ་སྒོམ་པའི་གནས་དང༌། དེར་སྒོམ་པ་ལ་ཚོགས་ཞིང་སྤྱན་དྲངས་ནས་ཚོགས་བསག་པ་དང༌། ལྷ་བཅུ་བདུན་གྱིས་ཕུང་ཁམས་སྐྱེ་མཆེད་བྱིན་གྱིས་བརླབ་པ་དང༌། བསྲུང་འཁོར་ཐུན་མོང་བ་དང་ཐུན་མོང་མ་ཡིན་པ་གཉིས་དང༌། དེ་ནས་སྟོང་ཉིད་སྒོམ་པ་དང་འབྱུང་བ་རིམ་བརྩེགས་རི་རབ་དང་བཅས་པའི་བསྐྱེད་ཆོག་དང༌། རི་རབ་ཀྱི་སྟེང་དུ་རྣམ་སྣང་ལས་གཞལ་ཡས་ཁང་བསྐྱེད་པར་བཤད་ཅིང༌། དེ་མན་ཆད་དུ་ཚོགས་གསོག་ནས་གཞལ་ཡས་ཁང་བསྐྱེད་ཆོག་གི་བར་མ་བཤད་དོ། ལེའུ་བཞི་པར་བཤད་པ་འདི་དེ་རྣམས་ཀྱི་ཐུན་མོང་བ་ཡིན་པ་ལ་དགོངས་སོ། །བརྟེན་པའི་དཀྱིལ་འཁོར་འཆད་ཚུལ་དཀྱིལ་འཁོར་འགའ་ཡར་ཞིག་གི་རྣམ་གཞག་བསྟན་ན། བསྐྱེད་རིམ་འཆད་ཚུལ་ལ་གོ་བ་ཆེ་བར་འགྱུར་བས་ཅུང་ཟད་བཤད་ན། སྐུའི་བདེ་མཆོག་ཡབ་ཡུམ་གྱིས་གཙོ་བོ་བྱས་པ་ལ་སྙིང་པོའི་རྣལ་འབྱོར་མ་བཞི་དང༌། སྐུ་འཁོར་གྱི་དཔའ་བོ་དང་དཔའ་མོ་བཅུ་དྲུག །སྒོ་མཚམས་མ་བརྒྱད་དེ་ལྷ་སུམ་ཅུའི་དཀྱིལ་འཁོར་ཅིག་དང༌། དེ་བཞིན་དུ་གསུང་གི་བདེ་མཆོག་ཡབ་ཡུམ་ལ་གསུང་འཁོར་གྱི་དཔའ་བོ་དང་དཔའ་མོ་བཅུ་དྲུག གཞན་སྔར་བཞིན་ཏེ་ལྷ་སུམ་ཅུའི་དཀྱིལ་འཁོར་ཞིག་དང༌། ཐུགས་ཀྱི་བདེ་མཆོག་ཡབ་ཡུམ་ལ་ཡང་ཐུགས་འཁོར་གྱི་དཔའ་བོ་དང་དཔའ་མོ་བཅུ་དྲུག གཞན་སྔར་བཞིན་ཏེ་དེ་ཡང་ལྷ་སུམ་ཅུའི་དཀྱིལ་
འཁོར་རོ། །དམ་ཚིག་གི་བདེ་མཆོག་ཡབ་ཡུམ་ལ་སྙིང་པོའི་རྣལ་འབྱོར་མ་བཞི་དང༌། སྒོ་མཚམས་མ་བརྒྱད་ཀྱིས་བསྐོར་བའི་ལྷ་བཅུ་བཞིའི་དཀྱིལ་འཁོར་ཞིག་དང༌། དེ་ནས་བདེ་མཆོག་ཡབ་ཡུམ་ལ་སྙིང་པོའི་རྣལ་འབྱོར་མ་བཞིས་བསྐོར་བའི་ལྷ་ལྔའམ་དྲུག་པ་ཅིག་བཤད་དེ། ཡེ་ཤེས་སམ་བདེ་བ་ཆེན་པོའི་བདེ་མཆོག་གཙོ་བོར་བྱས་པའོ། །དཀྱིལ་འཁོར་དེ་ལྔ་ག་ལ་རྒྱུ་འབྲས་ཀྱི་རྡོ་རྗེ་འཛིན་པ་གཉིས་གཉིས་དང༌། ཡེ་ཤེས་པ་གཞུག་པ་དང༌། དབང་བསྐུར་དང༌། སོ་སོའི་བཟླས་པ་དང༌། ལངས་པའི་དུས་སུ་གོ་ཆ་གཉིས་བྱེད་པ་སོགས་བཤད་དོ། །དེ་ནས་གཞལ་ཡས་ཁང་གི་ལྟེ་བར་དཔའ་བོ་གཅིག་པུའི་དཀྱིལ་འཁོར་ཞེས་པ་གཙོ་བོ་བདེ་མཆོག་མངོན་བྱང་ལས་བསྐྱེད་པའི་ལུས་ཀྱི་དཀྱིལ་འཁོར་ཞིག་བཤད་དེ། གཞལ་ཡས་ཁང་ལ་འགོད་པའི་ལྷ་ཡང་ཡབ་ཡུམ་ཟུང་གཅིག་ལས་མེད་ཅིང༌། དེ་གཉིས་ཀ་གདན་གཅིག་ལ་འགོད་པས་དཔའ་བོ་གཅིག་པ་ཟེར་བ་ཡིན་ནོ། །དེས་ན་ལུས་དཀྱིལ་ལ་བསྲུང་འཁོར་གསུམ་པོ་གང་ཡང་མི་སྒོམ་པ་དང༌། འབྱུང་བ་རིམ་བརྩེགས་རི་རབ་དང་བཅས་པའི་གཞལ་ཡས་ཁང་བསྐྱེད་པ་དང༌། གཞིའི་ཧེ་རུ་ཀ་མངོན་བྱང་ལས་བསྐྱེད་པ་ལུས་དཀྱིལ་སྒོམ་པ་དང་འགལ་བར་འདོད་པ་ནི་བཤད་རྒྱུད་ལེགས་པར་མ་རྟོགས་པའི་སྐྱོན་ནོ། །ལྷ་རེ་གཉིས་པའི་དཀྱིལ་འཁོར་ལ་ཡང་མི་འདྲ་བ་དུ་མ་དང༌། གཞན་ཡང་བདེ་མཆོག་གི་དཀྱིལ་འཁོར་དུ་མ་ཞིག་བཤད་དེ། དཀྱིལ་འཁོར་རྣམས་ཀྱི་བསྐྱེད་ཚུལ་ནི་རྟེན་
གཞལ་ཡས་ཁང་སྔོན་དུ་བསྐྱེད་ནས། བརྟེན་པ་ལྷ་རྗེས་སུ་བསྐྱེད་པའི་ལུགས་སུ་གསུངས་སོ། །བཤད་རྒྱུད་འདི་ལས་བདེ་མཆོག་གི་རིམ་པ་དང་པོའི་དཀྱིལ་འཁོར་དུ་མ་ཞིག་གསུངས་པ་ཐམས་ཅད་ཀྱང༌། རྩ་རྒྱུད་ལས་གསུངས་པའི་བསྐྱེད་རིམ་ཉིད་འཆད་པ་ཡིན་པས། རྩ་རྒྱུད་ལ་བསྐྱེད་རིམ་བྱུང་བ་ཐམས་ཅད་ལོ་ནག་གཉིས་གང་རུང་གི་བསྐྱེད་རིམ་ལ་སྦྱོར་བ་ལ་ནི་ཤིན་ཏུ་རྒྱ་ཆུང་བའི་སྐྱོན་ཡོད་དོ། །གཉིས་པ་ནི། རྒྱུད་འདིའི་རྫོགས་རིམ་རྣམས་ནི་བསྐྱེད་རིམ་སྦས་པ་ལས་ཀྱང་ཆེས་ཤིན་ཏུ་མི་གསལ་ལ། བཤད་རྒྱུད་ཀྱིས་རྫོགས་རིམ་འདི་སྟོན་ཤེས་སུ་ཆུག་ཀྱང་རྩ་རྒྱུད་ཀྱི་སྐབས་འདི་དང་འདིར། སྦས་པ་འཆད་པའི་ཚུལ་རྟོགས་པ་ཤིན་ཏུ་ཡང་དཀའ་བར་བྱུང་འདུག་པ་ནི་འཆད་པར་འགྱུར་རོ། །བཤད་རྒྱུད་འདིར་རྫོགས་རིམ་གསལ་བར་བྱས་ཚུལ་ནི། ལེའུ་བཞི་པར། རྟག་ཏུ་སྙིང་ལ་གནས་པ་ཡི། །ཞེས་སོགས་ཀྱིས་བདག་བྱིན་རླབས་ཀྱི་རིམ་པ་གསུངས་པར་དྲིལ་བུ་པས་བཤད་ལ། བཅུ་བཞི་པར་རིམ་པ་བཞི་པ་ནས་གསུངས་པའི་གཏུམ་མོའི་རྫོགས་རིམ་སྟོན་ལ། ཉེར་ལྔ་པ་དང་ང་དྲུག་པ་གཉིས་ཀར་ལཱུ་ཨི་བའི་རྫོགས་རིམ་རྣལ་འབྱོར་ཆེན་པོ་བཤད་ཅིང༌། གཞན་ཡང་ཅུད་ཟད་མི་གསལ་བའི་ཚུལ་གྱིས་རྫོགས་རིམ་ཉུང་ཤས་རེ་བསྟན་པ་མང་ངོ༌། །དེ་རྣམས་ལ་ཡང་སྲོག་དྷཱུ་ཏཱིར་འཛུད་པའི་ཐབས་དང༌། ཐབས་དེས་དྲངས་པའི་བདེ་བ་ཆེན་པོ་ལ་
སོགས་པ་གཉིས་ཤེས་དགོས་སྟེ། སྟོང་པ་ཉིད་ཀྱི་ལྟ་བ་དང་བདེ་སྟོང་དབྱེར་མེད་ཀྱི་ཡེ་ཤེས་ལ་བསྔགས་པ་ཤིན་ཏུ་མང་ངོ༌། །གཉིས་པ་ནི། རྡོ་རྗེ་མཁའ་འགྲོའི་ལེའུ་དང་པོ་དང་གཉིས་པའི་ཆ་ཤས་དང༌། བཅུ་གཉིས་པ་དང་བཅུ་བཞི་པ་ནས་བསྐྱེད་རིམ་མི་འདྲ་བ་མང་དུ་གསུངས་ཤིང༌། བཅུ་གཅིག་པར་གཏུམ་མོའི་རྣལ་འབྱོར་མདོར་བསྡུས་ནས་གསུངས་པ་དེ་ཉིད། བཅོ་ལྔ་པར་འཁོར་ལོ་བཞི་ལ་བརྟེན་པའི་ཚུལ་གྱིས་རྒྱས་པར་བཤད་དེ། འདི་ལ་ཡང་སྲོག་དྷཱུ་ཏཱིར་འཛུད་པའི་ཐབས་དང༌། བཙུད་པ་ལ་བརྟེན་ནས་སྐྱེས་པའི་རྫོགས་རིམ་གྱི་ཚུལ་གཉིས་ཤེས་པར་བྱའོ། །གཞན་ཡང་ལེའུ་དང་པོར་བདེ་སྟོང་གི་ཐབས་ཤེས་གཉིས་མང་དུ་གསུངས་ཤིང༌། ལེའུ་གཉིས་པར་ཡབ་ཀྱི་རྩ་སྔགས་ཀྱི་ངེས་དོན་རྒྱས་པར་བཤད། ཞེ་དགུ་པར་ཕྱག་རྒྱ་མ་བཞིའི་དབྱེ་བ་དང༌། དེ་རྣམས་ཀྱི་གསང་གནས་ཀྱི་ཁྱད་པར་མི་འདྲ་བའི་སྟོབས་ཀྱིས་བྱང་ཆུབ་སེམས་ཀྱི་བཅུད་འཆིང་ཚུལ་དང༌། རྫས་ལ་བརྟེན་ནས་བྱང་སེམས་རིང་དུ་འཛིན་ཚུལ་དང༌། འདོད་པའི་བསྟན་བཅོས་ལས་བཤད་པའི་ཀར་ནའི་བྱེད་པ་མང་དུ་གསུངས་སོ། །ཞེ་གཉིས་པར་ལེའུ་དང་པོའི་གཞུང་ཕལ་ཆེ་བ་ལ་བཤད་པ་ཞིབ་ཏུ་མཛད་ལ། ཞེ་དྲུག་པར་རྩ་རྒྱུད་ཀྱི་ལེའུ་གཉིས་པར་མི་གསལ་བའི་ཆོ་ག་མང་པོ་དང༌། ལེའུ་གཞན་ཕལ་ཆེ་བ་ནས་ལས་ཚོགས་མང་པོ་གསུངས་སོ། །གཉིས་པ་ལ་གཉིས། སྡོམ་འབྱུང་གིས་ཇི་ལྟར་བཤད་པ་དང༌། ཀུན་སྤྱོད་ཀྱིས་ཇི་ལྟར་བཤད་པའོ། །དང་པོ་ནི། སྡོམ་འབྱུང་
གི་ལེའུ་དང་པོར་བསྐྱེད་རིམ་ཞུས་པའི་ལན་ལེའུ་གཉིས་པས་བཤད་པ་ལ། སྤྱིར་སྐྱེ་གནས་བཞི་དང༌། མིའི་གླིང་བཞིའི་གསུམ་ལོངས་སྤྱོད་ཀྱིས་པ་དང༌། འཛམ་བུའི་གླིང་ལས་ཀྱིས་པ་དང༌། དེའི་གཙོ་བོ་ཡུལ་དབུས་པ་ཡིན་པ་དང༌། འཛམ་གླིང་གི་མིའི་རྟེན་ལ་ཆགས་བྲལ་གྱི་ཚུལ་གྱིས་འཚང་རྒྱ་བའི་ཚུལ་བཞི་དང༌། སྒྱུ་མ་ལྟ་བུའི་ཏིང་ངེ་འཛིན་མ་ཤེས་པས་སྔོན་ལས་ཀྱིས་སྐྱེ་འཆི་བྱེད་པ་དང༌། ཤི་ནས་བར་དོར་གནས་པ་དང༌། དེ་ནས་ཕ་མའི་ཀུན་སྦྱོར་ལས་མངལ་དུ་སྐྱེ་ཚུལ་དང༌། མངལ་ནས་ཕྱི་རོལ་དུ་སྐྱེ་ཚུལ་གསུངས་ཏེ། འདིས་ནི་བསྐྱེད་རིམ་མི་སྟོན་གྱི། བསྐྱེད་རིམ་སྐྱེ་ཤི་བར་དོ་གསུམ་དང་མཐུན་པར་སྒོམ་པའི་མཐུན་ཡུལ་སྟོན་ནོ། །དེ་ཡང་རྒྱུད་འདི་དྲངས་ནས་བཤད་པའི་རྣམ་གཞག་རིམ་པའི་དགོངས་པའོ། །སྐྱེ་ཤི་བར་དོ་གསུམ་དང་རྣམ་པ་མཐུན་པར་བསྐྱེད་རིམ་སྒོམ་པ་འདི། བདེ་མཆོག་གི་རྒྱུད་རྣམས་ལས་འདི་ཉིད་གསལ་བས། བདེ་མཆོག་གི་དཀྱིལ་འཁོར་གྱི་འཁོར་ལོའི་བསྐྱེད་རིམ་སྒོམ་པ་ཐམས་ཅད་ལ་འཁྱེར་དགོས་ཤིང༌། དེའི་རྒྱུ་མཚན་གྱིས་བདེ་མཆོག་གི་རྫོགས་རིམ་གྱི་སྐབས་སུ་ཡང༌། འཆི་རིམ་དང་མཐུན་པར་འོད་གསལ་སྒོམ་པ་དང༌། བར་དོ་དང་མཐུན་པར་སྒྱུ་མའི་སྐུ་སྒོམ་པ་སོགས་ཤེས་དགོས་སོ། །མཐུན་ཡུལ་གསུམ་དང་མཐུན་པར་སྒོམ་པའི་བསྐྱེད་རིམ་ནི་ལེའུ་བཅུ་གསུམ་པ་ནས་སྟོན་ཏེ། འབྱུང་བ་རིམ་བརྩེགས་རི་རབ་དང་བཅས་པ་བསྐྱེད་པ་དང༌། རི་རབ་ཀྱི་སྟེང་དུ་སྣ་ཚོགས་རྡོ་རྗེ་དང༌།
དེའི་སྟེང་དུ་པདྨ་དང༌། དེའི་དབུས་སུ་ཨཱ་ལི་ཀཱ་ལི་ལས་ཧེ་རུ་ཀ་ཞལ་གསུམ་ཕྱག་དྲུག་པ་ཡུམ་བཅས་ལ་རྣལ་འབྱོར་མ་བཞི་དང༌། སྒོ་མཚམས་མ་བརྒྱད་ཀྱིས་བསྐོར་བ་ཡན་ལག་དང་བཅས་པ་ཅིག་གསུངས་ཏེ། ལཱུ་ཨི་པ་ལྟར་རྟེན་དང་བརྟེན་པ་གཉིས་དུས་གཅིག་ཏུ་བསྐྱེད་པའི་ལུགས་སོ། །གཞན་ཡང་ལེའུ་བཅུ་བདུན་པ་དང་བཅོ་བརྒྱད་པས་དབང་ཆོག་གི་སྐོར་རྣམས་གསུངས་སོ། །རྫོགས་པའི་རིམ་པ་ནི། ལེའུ་གསུམ་པར་རྫོགས་རིམ་པའི་ལྷ་སྐད་ཅིག་གིས་སྒོམ་ཚུལ་དང༌། སྣ་ཚོགས་ཐབས་དང་སྙིང་རྗེའི་སྟོབས། །ཟུང་འཇུག་གཉིས་མེད་ལྷུན་གྱིས་གྲུབ། །དཀྱིལ་འཁོར་སྙིང་པོ་མཆོག་ཡིན་ནོ། །ཞེས་ཟུང་འཇུག་གི་རིམ་པ་དང༌། ཀུན་རྫོབ་སྐྱེ་བ་འབྱུང་བ་ལས། །དངོས་མེད་ཀྱང་མིན་ཆད་མེད་ཕྱིར། །ལྷན་སྐྱེས་ཆོས་རྣམས་ཐམས་ཅད་ཀྱི། །ལྷན་སྐྱེས་དགའ་བའི་རང་བཞིན་དང༌། །རང་བྱིན་བརླབ་དང་རང་བྱུང་སྟེ། །ཞེས་འོད་གསལ་ལས་ཀུན་རྫོབ་སྒྱུ་མའི་སྐུའི་སྐྱེ་བ་འབྱུང་བས་དངོས་མེད་དང༌། ཆད་པའི་མཐའ་སྤངས་པའི་རང་བྱིན་བརླབ་དང༌། བདེ་ཆེན་མངོན་པར་རྫོགས་བྱང་ཆུབ། །དེ་བཞིན་ཕྱག་རྒྱ་ཆེན་པོ་མཆོག །ཅེས་མངོན་པར་བྱང་ཆུབ་པ་འོད་གསལ་གྱི་རིམ་པ་རྣམས་བསྟན་ཞིང༌། །ལེའུ་ལྔ་པ་དང་དྲུག་པར་པདྨ་མགོན་པོ་སོགས་ཀྱི་མཆོག་པོ་ལྔའི་རླུང་དང༌། རླུང་གི་དེ་ཉིད་དང་སྔགས་ཀྱི་དེ་ཉིད་གཉིས་རིམ་ལྔའི་རྡོ་རྗེ་བཟླས་པའི་རིམ་པ་ནས་འབྱུང་བ་བཞིན་དུ་གསུངས་པས་རྡོར་བཟླས་བསྟན་ཏེ། རྩ་རྒྱུད་ཀྱི་བཟླས་པའི་སྔགས་ཀྱི་ངེས་དོན་ནོ། །ལེའུ་ལྔ་པར་སྙིང་གར་
སྔགས་ཀྱི་ཐིག་ལེ་སྒོམ་པའི་རྫོགས་རིམ་དང༌། སྙིང་གའི་བུམ་པ་ཅན་བསྟན། སོ་གཅིག་པར་འཁོར་ལོ་བཞི་ལ་བརྟེན་པའི་གཏུམ་མོའི་གནད་ཆེ་བ་རྣམས་བསྟན་ཏེ། རྡོར་བཟླས་མན་ཆད་དེ་རྣམས་ཀྱིས་སྲོག་དྷཱུ་ཏཱིར་འཛུད་པའི་ཐབས་གསུངས་སོ། །ཐབས་དེ་ལ་བརྟེན་ནས་བདེ་སྟོང་སྦྱོར་བ་ནི་ཉེར་དགུ་པ་དང་སོ་གསུམ་པར་རྒྱས་པར་བསྟན་ནོ། །ཡང་སོ་གཅིག་པར་ཕྱག་རྒྱ་མ་བཞི་སོ་སོའི་མཚན་ཉིད་དང༌། བཞི་པོ་རེ་རེ་ལ་རོལ་ཚུལ་མི་འདྲ་བ་རེ་གསུངས་ཤིང༌། ཉེར་གཅིག་པས་དྲོད་ཐོབ་ནས་སྤྱོད་པ་བྱེད་ཚུལ་རྒྱས་པར་གསུངས་སོ། །གཉིས་པ་ནི། ཀུན་སྤྱོད་ཀྱི་ལེའུ་དང་པོ་ནས་བཅུ་པའི་བར་གྱིས་བསྐྱེད་རིམ་ཡན་ལག་དང་བཅས་པ་གསུངས་ཏེ། དེ་ཡང་དེའི་ལེའུ་ལྔ་པ་ལས། ཇི་ལྟར་ནང་གི་བདག་ཉིད་ཤེས། །ཕྱི་ཡི་དཀྱིལ་འཁོར་དམ་པ་ཡིན། །རྣམ་དགོད་ཇི་ལྟར་རབ་བསྟན་པ། །སྙིང་པོ་ཐམས་ཅད་བསྡུས་པ་སྟེ། ཞེས་གསུངས་པ་ལྟར་ཕྱི་དཀྱིལ་དང་ལུས་དཀྱིལ་གཉིས་ཀ་ལ་འགོད་པའི་དབང་དུ་བྱས་ནས་གསུངས་པ་ལ། ཕྱི་དཀྱིལ་ལ་ལྷ་དྲུག་ཅུ་རྩ་གཉིས་ཚང་བ་དང༌། ལུས་དཀྱིལ་ལ་མ་མོ་བཅུ་གཉིས་དང༌། གཙོ་བོ་ཡབ་ཡུམ་མ་གཏོགས་པའི་ལྷ་རྣམས་དགོད་པ་བསྟན། ལྷ་བཅུ་བཞི་ལུས་ལ་མ་བཀོད་པ་ནི། ཁ་སྦྱོར་ལ་སོགས་པ་ནས་དེ་རྣམས་ཀྱང་ལུས་ལ་དགོད་པར་གསུངས་པས། ལུས་དཀྱིལ་ལ་ཡང་ལྷ་ཚང་བ་ཡོད་དོ། །ཧེ་རུ་ཀའི་ཞལ་གྱི་གྲངས་དང་སྐུ་མདོག་མ་བསྟན་པ་ནི་རྩ་རྒྱུད་ན་ཡོད་པ་ལ་དགོངས་སོ། །ཕག་མོ་མན་ཆད་ཀྱི་ལྷ་རེ་གཅིག་པོ་ཐམས་
ཅད་ཀྱང་ཞལ་གཅིག་ཕྱག་གཉིས་པར་བཤད་ལ། དཔའ་བོ་ཉེར་བཞིའི་སྐབས་སུ་མར་དོའི་འགྱུར་ལས། རང་གི་མཚན་མས་ལེགས་འཁྱུད་ཅིང༌། །ཞེས་པ་ལས་མི་གསལ་ཡང༌། ལོ་ཆེན་དང་ཤེས་རབ་གྲགས་ཀྱིས་བསྒྱུར་བ་ལས། རྡོ་རྗེ་དྲིལ་བུས་ལེགས་འཁྱུད་ཅིང༌། །ཞེས་འབྱུང་བ་ལེགས་ཤིང༌། འགྲེལ་པར་ཡང་དེ་བཞིན་དུ་འབྱུང་ངོ༌། །དེ་རྣམས་ཀྱི་ཕྱག་མཚན་ཡང་དྲིལ་བུ་པ་དང་འདྲའོ། །ཡུམ་གྱི་སྐུ་མདོག་དམར་པོར་བཤད་ཅིང༌། རྣལ་འབྱོར་མ་བཞི་ལ་སྣ་ཚོགས་གཟུགས་ཅན། ཞེས་གསུངས་པ་ནི་རེ་རེའི་སྐུ་མདོག་ལ་མིན་གྱི་བཞི་གའི་དབང་དུ་མཛད་པའོ། །སྒོ་མཚམས་མ་བརྒྱད་ཀྱི་ནང་ནས་མཚམས་མ་བཞི་ལ་དམིགས་ཀྱིས་བཀར་ནས་ཕྱེད་གཟུགས་སུ་གསུངས་པས་སྒོ་མ་བཞིའི་ཁ་དོག་སྔོན་པོ་སོགས་རེ་རེ་བར་གོ་ནུས་སོ། །དེ་ལྟར་གོ་ན་སྒོ་མ་བཞི་རྣལ་འབྱོར་མ་བཞི་དང་འདྲ་བར་གསུངས་པའི་ཤུགས་ཀྱིས། རྣལ་འབྱོར་མ་བཞི་ཡང་སྒོ་མ་བཞི་དང་ཁ་དོག་མཚུངས་པར་གོ་ནུས་སོ། །འཁོར་ལོ་གསུམ་གྱི་ལྷའི་ཁ་དོག་ནི། དྲུག་པ་ལས། དེ་ལྟར་མ་ལུས་འཁོར་ལོར་གནས། །མདོག་དབྱེ་ཆོ་གའི་རིམ་བཞིན་ནོ། །ཞེས་འཁོར་ལོ་གསུམ་པོ་མ་ལུས་པར་གནས་པའི་སྐུ་མདོག་གི་དབྱེ་བ་ནི་ཆོ་ག་སྟེ། རིགས་ཀྱི་རིམ་པ་བཞིན་ཡིན་ནོ། ཞེས་པའི་དོན་ཡིན་ལ། དེའི་དོན་ཡང་མངོན་བརྗོད་ལས། ཡང་ན་སྐུ་གསུང་ཐུགས་ཀྱི་ནི། །ཅི་འདོད་མདོག་ནི་དབྱེ་བ་བྱ། །ཞེས་སྐུ་གསུང་ཐུགས་ཀྱི་དབྱེ་བས་ཇི་ལྟར་འདོད་པའི་ཁ་དོག་ཏུ་བྱ་བར་བཤད་དོ། སྐུ་འཁོར་གྱི་ལྷ་དཀར། གསུང་འཁོར་གྱི་ལྷ་
དམར། ཐུགས་འཁོར་གྱི་ལྷ་སྔོན་པོར་བྱ་བའི་དོན་ནོ། །འདིའི་ལྷ་རེ་གཉིས་ནི་དྲིལ་བུ་པའི་ལུས་དཀྱིལ་གྱི་ལྷ་ཇི་བཞིན་ཡིན་ལ། སྐྱེད་ཚུལ་ནི་ཏ་ཐཱ་ག་ཏ་རཀྵི་ཏའི་འགྲེལ་པར་ལཱུ་ཨི་པའི་ལུགས་ཀྱི་མངོན་བྱང་ལྔ་ལས་བསྐྱེད་པ་ལྟར་བཤད་དེ། རྟེན་དང་བརྟེན་པ་གཉིས་ཀ་དུས་གཅིག་ཏུ་བསྐྱེད་པའི་ལུགས་སོ། །དེས་ན་དྲིལ་བུ་པའི་ལུས་དཀྱིལ་གྱི་སྐབས་སུ་ཡང་མངོན་བྱང་ལས་བསྐྱེད་ཚུལ་ལཱུ་ཨི་པ་ལྟར་བྱེད་པ་ལེགས་སོ། །ལེའུ་བཅུ་གཉིས་པ་ནས་ལྷན་སྐྱེས་ཀྱི་ཡེ་ཤེས་ཀྱི་བསྔགས་པ་དང༌། རྫོགས་རིམ་རྣལ་འབྱོར་ཆེན་པོ་བཤད་ལ། འདི་ལ་ཡང་སྲོག་དྷཱུ་ཏཱིར་འཛུད་པའི་རྫོགས་རིམ་དང༌། བཙུད་པ་ལ་བརྟེན་ནས་སྐྱེས་པའི་རྫོགས་རིམ་གཉིས་ཤེས་དགོས་ཏེ། གཞན་དུ་རྒྱས་པར་བཤད་ཟིན་ཏོ། །ལེའུ་བཅུ་བཞི་པ་ནས་ནུས་པ་རྙེད་ནས་སྤྱོད་པ་བྱ་ཚུལ་སྟོན་ཏེ། གཞན་ཡང་རྩ་རྒྱུད་ན་མི་གསལ་བ་མང་པོ་བཤད་དོ། །གསུམ་པ་ནི། ཡང་དག་པར་སྦྱོར་བ་དང་ཁ་སྦྱོར་དང་ཁ་སྦྱོར་ཐིག་ལེ་ཞེས་པ་ནི་རྒྱུད་འདིའི་མཚན་གྱི་རྣམ་གྲངས་ཡིན་ལ། རྒྱུད་ཕྱི་མ་དང་བཅས་པ་ལ་བརྟག་པ་བཅུ་གཅིག་གོ། འདི་ལ་བོད་ཀྱི་བླ་མ་ཁ་ཅིག་རྒྱུད་འདི་རྒྱལ་པོ་ཨི་བྷཱུ་ཏིས། རྒྱུད་སྡེ་འབུམ་ཕྲག་སུམ་ཅུ་རྩ་དྲུག་གི་བཤད་རྒྱུད་དུ་འདོད་དོ། །ད་ལྟ་དངོས་སུ་ངོ་སྤྲད་དུ་ཡོད་པ་རྒྱུད་སྡེ་བཅུ་དྲུག་གི་བཤད་པའི་རྒྱུད་ཡིན་པར་བཤད་པ་བྱེད་དོ། །ཞེས་ཟེར་རོ། །དེ་ལ་འདོད་པ་དང་པོ་ནི་ཨིནྡྲ་བྷཱུ་ཏིས་མཛད་ཟེར་བའི་སཾ་བྷུ་ཊིའི་འགྲེལ་པ་ལས། འདིར་རེ་ཞིག་རྣལ་འབྱོར་དང་རྣལ་འབྱོར་མའི་
རྒྱུད་རྒྱས་པ་འབུམ་ཕྲག་སུམ་ཅུ་རྩ་དྲུག་ལས་བྱུང་བ། རྒྱུད་ཉུང་ངུ་བརྟག་པ་བཅུ་གཅིག་གི་བདག་ཉིད་ཅན་ཁ་སྦྱོར་ཐིག་ལེ་ཞེས་བྱ་བ་ནི་རྗོད་པར་བྱེད་པའོ། །ཞེས་ཁ་སྦྱོར། རྒྱུད་འབུམ་ཕྲག་སོ་དྲུག་པ་ལས་བྱུང་བ་ཞེས་པའི་དོན་མ་ངེས་པ་ཞིག་སྟེ། དེའི་དོན་ནི་རྒྱུད་འབུམ་ཕྲག་སོ་དྲུག་པ་ལས་བསྡུས་པའི་དོན་དུ་སྣང་ལ། དེ་ཙམ་གྱིས་དེ་རྣམས་གྱི་བཤད་རྒྱུད་དུ་མི་འགྲུབ་སྟེ། དཔེར་ན་མངོན་བརྗོད་འབུམ་པ་ལས་ཉུང་ངུའི་རྩ་རྒྱུད་བསྡུས་པ་བཞིན་ནོ། །འདོད་པ་གཉིས་པ་ལ་ཡང་ཤེས་བྱེད་ཁུངས་ཐུབ་མི་སྣང་ངོ༌། །བོད་ཀྱི་བླ་མ་གཞན་ཁ་ཅིག །སྤྱིར་རྒྱུད་འདི་རྒྱུད་ཐམས་ཅད་དང༌། ཁྱད་པར་དུ་རྒྱུད་སྡེ་བཞི་བཅུའི་བཤད་རྒྱུད་ཡིན་ཟེར་བ་ལ་ཡང་ཤེས་བྱེད་ཡང་དག་ཅི་ཡང་མི་སྣང་ཞིང༌། ཁྱད་པར་དུ་ཁ་སྦྱོར་འདིར་རྒྱུད་གཞན་གྱི་དོན་བཤད་པ་རྣམས་ལ། རྒྱུད་དེ་དང་དེའི་བཤད་རྒྱུད་དུ་བྱེད་པ་ནི་རྒྱུ་མཚན་མ་ངེས་པ་འབའ་ཞིག་ཏུ་སྣང་སྟེ། ཚིག་མངས་སུ་དོགས་ནས་མ་བྲིས་སོ། །རྒྱུད་འདིའི་འགྲེལ་པ་དཔའ་བོ་རྡོ་རྗེས་བྱས་ཟེར་བ་ལས། འདི་བཤད་རྒྱུད་ཡིན་པས་རྒྱུད་དགུའི་བཤད་རྒྱུད་ཡིན། ཡང་ན་རང་དགའ་བའི་རྒྱུད་ཡིན་ཞེས་ཟེར་ཏེ། རྒྱུད་དགུ་ནི་རྒྱུད་ཐམས་ཅད་ཀྱི་གླེང་གཞི་གསང་བ་ཡང་དག་པར་སྦྱོར་བ་ཞེས་པའི་གླེང་གཞི་དང༌། བསང་བ་དང༌། ཁ་སྦྱོར་གསུམ་པོ་རེ་རེ་ལ་དགུ་དགུར་བྱས་པའི་དགུ་ཚན་ལ་བྱེད་པར་སྣང་སྟེ་ཡིད་བརྟན་མི་སྣང་ངོ༌། །དེས་ན་སྔར་གྱི་བོད་ཀྱི་བླ་མ་གཞན་རྣམས་གསུང་པ་ལྟར། བདེ་མཆོག་དང་ཀྱཻ་རྡོར་ཐུན་མོང་གི་བཤད་རྒྱུད་ཡིན་ལ། བདེ་མཆོག་གི་བསྐྱེད་རིམ་ནི་བརྟག་པ་གསུམ་
པའི་རབ་བྱེད་བཞི་པ་ལས། མངོན་བྱང་ལྔ་ལས་བདེ་མཆོག་རྡོར་སེམས་ཞལ་གསུམ་ཕྱག་དྲུག་པར་བསྐྱེད་པ་ལ། འཁོར་གྱི་ལྷ་ཉེར་བརྒྱད་ཀྱིས་བསྐོར་བ་ཅིག་བཤད་དེ། མན་སྙེར་བཞད་མ་སོགས་ཀྱི་ལྷ་མོ་བརྒྱད་རྒྱུད་གཞན་དུ་གསུངས་པ་ཡང་རིག་པར་བྱའོ། ཞེས་མང་དུ་མཁྱེན་པ་རྣམས་གདམས་པར་བྱེད་དོ། ཞེས་གསུངས་པས་ལྷ་སོ་བདུན་གྱི་དཀྱིལ་འཁོར་ཡན་ལག་དང་བཅས་པ་ཅིག་གསུངས་སོ། །བརྟག་པ་དྲུག་པའི་རབ་བྱེད་བཞི་པ་ལ་ས་ར་ཧ་སྱ་ལ་སོགས་པའི་ཡི་གེ་བཅུ་དྲུག་ལ་སོགས་པའི་བཤད་པ་དང༌། ཡུལ་ཉེར་བཞི་ནང་ལུས་ལ་སྦྱར་བ་དང༌། དཔྱིད་དང་ཐིག་ལེ་དང༌། འཁོར་ལོ་བཞིའི་ཡི་གེའི་གཙོ་བོ་རྣམས་དང༌། ལུས་ཀྱི་རྩ་དང་ཁམས་དང༌། འབྱུང་བ་རིམ་བརྩེགས་སོགས་ནང་ལ་སྦྱར་བ་དང༌། སྦྱིན་སྲེག་ནང་དུ་སྦྱར་བ་སོགས་དུ་མ་ཞིག་གསུངས་པ་ལ། འཁོར་ལོ་བཞི་ལ་བརྟེན་པའི་གཏུམ་མོའི་རྣལ་འབྱོར་གཙོ་བོར་སྟོན་ཞིང༌། དེ་ལས་དགའ་བ་བཞི་འབྱུང་བ་སོགས་སྟོན་ཏེ། འདི་ལ་ཡང་སྲོག་དྷཱུ་ཏཱིར་འཛུད་པའི་ཐབས་དང༌། བཙུད་པ་ལ་བརྟེན་ནས་སྐྱེས་པའི་རྫོགས་རིམ་གཉིས་ཤེས་པར་བྱའོ། །བརྟག་པ་ཕྱི་མ་ལས། དབང་བསྐུར་གྱི་སྐོར་ཡང་མང་དུ་གསུངས་ལ། བརྟག་པ་སྔ་མ་ལས་ཀྱང་དབང་གོང་མ་བསྐུར་བའི་ཚུལ་ཡང་གསུངས་སོ། །དེ་ལྟར་རྩ་རྒྱུད་ཤིན་ཏུ་མི་གསལ་བའི་བཤད་རྒྱུད་མང་པོ་ནི་རྩ་རྒྱུད་ཀྱི་རང་འགྲེལ་ཡིན་པས། རྩ་རྒྱུད་དང་བཤད་རྒྱུད་ལེགས་པར་འབྱོར་བ་ཤིན་ཏུ་གལ་ཆེའོ། །གསུམ་པ་ལ་གསུམ།
གྲུབ་ཆེན་གང་གི་མན་ངག་ལ་བརྟེན་ནས་འཆད་པ་དང༌། དེ་ལ་བརྟེན་ནས་འཆད་པའི་བཤད་ཚུལ་བསྟན་པ་དང༌། རྩ་བའི་རྒྱུད་བཤད་པའི་ཚུལ་དངོས་སོ། །དང་པོ་ནི། སྤྱི་རྒྱུད་རྒྱས་པ་ལས་བཏུས་པའི་རྩ་བའི་རྒྱུད་རྣམས་གང་ལ་བརྟེན་ནས་འཆད་པ་ལ་ཚུལ་གསུམ་གསུངས་ཏེ། བདེ་མཆོག་སྟོད་འགྲེལ་ལས། རྒྱུད་ཤིན་ཏུ་རྒྱས་པ་ཉན་པའི་སྐལ་པ་དང་མི་ལྡན་པའི་དོན་དུ། རྒྱུད་རྒྱས་པ་ལས་བསྡུས་ནས་བསྟན་པའི་རྒྱུད་རྣམས་ཀྱི་རྡོ་རྗེའི་ཚིག་ཟབ་མོ་རྣམས་བསྡུས་པའི་རྒྱུད་གཞན་ནམ། བྱང་ཆུབ་སེམས་དཔའི་འགྲེལ་པ་འདི་ལྟ་བུའམ་བླ་མ་དམ་པའི་མན་ངག་གི་རྗེས་སུ་འབྲངས་ནས་རྟོགས་པར་བྱ་བར་གསུངས་ཏེ། དང་པོ་ནི་དང་པོའི་རྒྱུད་རྒྱས་པ་ལས་བསྡུས་པའི་བཤད་རྒྱུད་གཞན་ལ་བརྟེན་ནས་འཆད་པ་དང༌། གཉིས་པ་ནི་བདེ་མཆོག་སྟོད་འགྲེལ་ལྟ་བུའི་བྱང་ཆུབ་སེམས་དཔའི་འགྲེལ་པ་ལ་བརྟེན་ནས་འཆད་པ་དང༌། གསུམ་པ་ནི་འཕགས་པ་ཡབ་སྲས་ལྟ་བུ་དང་ལོ་ནག་དྲིལ་གསུམ་ལྟ་བུ་ལ་སོགས་པའི་མན་ངག་ལ་བརྟེན་ནས་འཆད་པ་ཡིན་པས། བྱང་ཆུབ་སེམས་དཔའ་རྣམས་ཀྱི་བཞེད་པ་ལ་ཡང་དེའི་འགྲེལ་པ་ཁོ་ན་ལ་བརྟེན་ནས་བཤད་དགོས་ཞེས་པ་མིན་ནོ། །དེ་རྣམས་ཀྱི་སྐོར་དུ་ཡང་མངོན་ཤེས་ཐོབ་པ་ཁོ་ནས་འགྲེལ་པ་བྱ་བར་གསུངས་པའི་དོན་ཡང༌། མངོན་ཤེས་ཐོབ་ལུགས་གཞན་མང་པོ་གསུངས་པ་ལ་མིན་གྱི། བདེ་བ་ཆེན་པོས་དེ་ཁོ་ན་ཉིད་ཀྱི་དོན་མངོན་དུ་རྒྱུར་བའི་སྟོབས་ཀྱིས་དྲངས་པའི་མངོན་ཤེས་ལྔ་ཐོབ་པ། དྲིལ་བུ་ཞབས་དང་ཌོཾ་བི་ཧེ་རུ་ཀས་བཤད་པ་ལྟ་བུ་ཡིན་ལ། དེ་ཡང་དང་པོར་
རྒྱུད་ཀྱི་དགོངས་པ་འགྲེལ་པའི་སྲོལ་མ་ཕྱེ་བའི་སྔོན་དུ། རྒྱུད་དེ་དང་དེའི་ལམ་སྲོལ་དང་པོ་ལ་འབྱེད་པ་ལ་ཡིན་གྱི། སྔ་མས་སྲོལ་ཕྱེ་བའི་རྗེས་སུ་ཞུགས་ནས་རྒྱུད་དོན་འགྲེལ་པ་ལ་མངོན་ཤེས་ཐོབ་དགོས་པར་སྟོན་པ་མིན་ནོ། །ཁ་ཅིག་རྒྱུད་འགྲེལ་ཙམ་བྱེད་པ་ལ་མངོན་ཤེས་ཐོབ་དགོས། དེ་མེད་པར་བྱས་ན་དམྱལ་བར་འགྲོ་བར་འཆད་ཅིང༌། མངོན་ཤེས་ཐོབ་པའི་ཕྱོགས་ན་མེད་པར་རང་གིས་རྒྱུད་ཀྱི་བཤད་པ་རྩོམ་པ་ནི་རང་གིས་རང་ལ་ཅོ་འདྲི་བ་ཡིན་ནོ། །དེ་ལྟར་གསུམ་ལས་འདིར་ནི་དང་པོ་དང་གསུམ་པ་གཉིས་ལ་བརྟེན་པའི་འཆད་ལུགས་ཡིན་ལ། དེ་ཡང་ལོ་ནག་དྲིལ་གསུམ་གྱི་བསྐྱེད་རྫོགས་ཀྱི་གཞུང་ལ་བརྟེན་ཞིང་རྩ་བཤད་ལེགས་པར་སྦྱར་ཏེ། དཔལ་ནཱ་རོ་ཏ་པའི་མན་ངག་ལ་བརྟེན་ནས་འཆད་པ་ཡིན་པས། ཁྱད་པར་དུ་འཕགས་པའི་བཤད་པའོ། །ལོ་དྲིལ་གཉིས་ཀྱི་གཞུང་ན་རྩ་རྒྱུད་ཀྱི་ཚིག་འདིས་རིམ་གཉིས་འདི་སྟོན་མི་གསལ་ཡང༌། དེ་གཉིས་ཀྱི་མན་ངག་ལེགས་པར་ཤེས་ན། རྩ་བཤད་ལེགས་པར་སྦྱར་བའི་མན་ངག་ལ་བརྟེན་ནས་ཤེས་ནུས་ཏེ། ཚིག་དོན་གྱི་སྐབས་སུ་འཆད་པར་འགྱུར་རོ། །ནག་པོ་སྤྱོད་པའི་གཞུང་དཔྱིད་ཐིག་ལས་ནི། དེ་ནས་དེ་བཞིན་གཤེགས་པ་གང་ཡང་རུང་བའི་སྐུའི་དཀྱིལ་འཁོར་དང༌། སྦྱིན་སྲེག་དང་མཆོད་སྦྱིན་དང་བཟླས་པ་དང༌། བསྒོམ་པ་ལ་སོགས་པའི་ཆོ་གའི་བྱ་བ་ཕྱི་རོལ་དང་མཐུན་པར། ནང་གི་ངོ་བོས་ཡང་དག་པར་རབ་ཏུ་བཤད་པར་བྱའོ། །ཞེས་སོ། །དེ་ལ་དེ་
བཞིན་གཤེགས་པའི་སྐུ་གང་ཡང་རུང་བ་ནི་སྒྲུབ་པ་པོ་གང་ཡང་རུང་བའི་ལུས་སོ། །དེའི་སྐུའི་དཀྱིལ་འཁོར་ནི་ལུས་ཀྱི་དཀྱིལ་འཁོར་རོ། །དེ་ལྟར་ན་དཀྱིལ་འཁོར་ནས་སྒོམ་པའི་བར་ལ་ཕྱི་བསྐྱེད་རིམ་དང་ནང་རྫོགས་རིམ་གཉིས་གཉིས་ཡོད་ལ། སོགས་ཀྱིས་བསྡུས་པ་སྔགས་བཏུ་བ་ལ་ཡང་སྔགས་བཏུ་བའི་གཞི་དང༌། བཏུས་པའི་སྔགས་ཟློ་བ་གཉིས་ཡོད་དོ། །དེ་ཡང་རྡོ་རྗེ་མཁའ་འགྲོ་ལས། རྣལ་མའི་སྦྱོར་བ་རྟོགས་བྱའི་ཕྱིར། བཅོས་མ་ཡི་ནི་བསྒོམ་པ་དང༌། །བཅོས་མ་ཡི་ནི་བཟླས་པ་བྱ། །ཞེས་གསུངས་པ་ལྟར་བསྒོམ་བཟླས་སོགས་ལ་རྣལ་མ་དང་བཅོས་མ་གཉིས་གཉིས་བྱ་སྟེ། སྔ་མ་དང་དོན་གཅིག་གོ། ཕྱི་ནང་དང་བཅོས་མ་བཅོས་ཀྱི་བཤད་པ་དང༌། དྲང་ངེས་ཀྱི་བཤད་པ་ནི་འདིར་དོན་གཅིག་ཏུ་གཟུང་ངོ༌། །དེ་དག་གིས་ནི་རྩ་རྒྱུད་ཀྱི་གཞུང་འདིས་ནང་མ་བཅོས་པའི་རྫོགས་རིམ་འདི་བསྟན་ཟེར་བ་མ་བྱུང་ཡང༌། རྩ་རྒྱུད་ཀྱིས་དཀྱིལ་འཁོར་སོགས་བསྟན་པའི་དོན་ལ་རིམ་པ་གཉིས་ཀའི་བཤད་པ་རེ་དགོས་པར་ཤེས་སོ། །གཉིས་པ་ལ་གསུམ། ལེའུ་ང་གཅིག་ཏུ་བསུངས་པའི་གྲངས་ཀྱི་དོན་དང༌། ལེའུ་ང་གཅིག་བཤད་པ་གསུམ་དུ་སྦྱར་བ་དང༌། ལེའུ་སོ་སོའི་བསྡུས་དོན་གྱི་འགྲེལ་བསྟན་པའོ། །དང་པོ་ནི། རྒྱུད་འདི་ལ་ང་གཅིག་ཏུ་བྱས་པ་ནི། མཁའ་འགྲོ་རྒྱ་མཚོ་ལས། དེ་ལྟར་ངེས་བརྗོད་འབུམ་གསུམ་ལས། །ཕྱུང་བ་བདེ་མཆོག་ཉུང་ངུ་སྟེ། །ཨ་ཡིག་ལ་སོགས་ཀྵ་ཡིག་མཐར། །ལེའུ་རྣམས་ཇི་ལྟའི་རིམ་པ་ཡིས། །དེ་ཁོ་ན་ཉིད་ལྡན་པར་
སྦྱར། །ཞེས་ལེའུ་རྣམས་རྩ་རྒྱུད་ལས་ཇི་ལྟར་འབྱུང་བའི་རིམ་པ་ཡིས། ཨ་ནས་ཀྵ་ཡིག་གི་བར་ལ་སྦྱར་ལ། དེ་ཡང་དེ་ཁོ་ན་ཉིད་ལྡན་པར་སྦྱར་ཞེས་གསུངས་སོ། །འོ་ན་དབྱངས་གསལ་གྱི་ཡི་གེ་ལྔ་བཅུ་ཡོད་ལ། ལེའུ་ང་གཅིག་ཡོད་པས་མ་མཐུན་ནོ་སྙམ་ན། སྐྱོན་མེད་དེ་ཡི་གེ་སོ་སོའི་དེ་ཉིད་སྦྱར་བ་ལྔ་བཅུ། ང་གཅིག་པ་ནི་སྤྱིའི་དེ་ཉིད་དང་སྦྱར་བར་བྱ་བ་ཡིན་པའི་ཕྱིར་རོ། །དབྱངས་གསལ་གྱི་དེ་ཁོ་ན་ཉིད་དང་སྦྱར་ཚུལ་ནི། དབྱངས་ནི་ཐབས་ཀྱི་ཕྱོགས་དང༌། གསལ་བྱེད་ནི་ཤེས་རབ་ཀྱི་ཕྱོགས་ཡིན་ཞིང༌། དེ་གཉིས་ཀའང་དབྱེར་མེད་པ་ཡིན་པས་རྒྱུད་ཀྱི་ལེའུ་ཐམས་ཅད་ཀྱང་ཐབས་ཤེས་གཉིས་མེད་ཀྱི་བརྗོད་བྱ་དང་ལྡན་པར་བསྟན་པའི་ཕྱིར་ཡི་གེ་རྣམས་དང་སྦྱར་རོ། །གཞན་ཡང་དབྱངས་གསལ་གྱི་དོན་ཁམས་དཀར་དམར་གྱི་འདུ་འཕྲོད་ལ་བརྟེན་ནས། སྐྱེས་པའི་ལྷ་སྐྱེས་ཀྱི་བདེ་བ་ཆེན་པོ་ཉིད་ཀྱི་དབང་དུ་བྱས་ནས་རྒྱུད་ཀྱི་དབུ་ཞབས་ཐམས་ཅད་འཇུག་པ་ཡིན་ནོ། །ཞེས་རྟོགས་པའི་ལུང་དུའང་ཡིན་ཏེ། དེ་ལ་དགོངས་ནས་ཀུན་སྤྱོད་ལས། ཨཱ་ལི་ཀཱ་ལི་མ་གཏོགས་པར། །གལ་ཏེ་ཆོས་འདི་འདོད་ན་ནི། །དེ་ཡི་ངལ་བ་དོན་མེད་དེ། །འབྲས་བུ་ཐོབ་པར་མི་འགྱུར་རོ། །ཞེས་གསུངས་སོ། །ཤློ་ཀའི་གྲངས་ནི་བདེ་མཆོག་སྟོད་འགྲེལ་ལས་བདུན་བརྒྱ་པར་གསུངས་སོ། །གཉིས་པ་ནི། ནཱ་རོ་པའི་ལུགས་ཀྱིས་ལེའུ་ལ་བསྡུས་དོན་བྱེད་ཚུལ་འདི་ལ། མཁས་པ་སུ་མ་ཏི་ཀཱི་རྟིའི་ཉུང་ངུའི་རྒྱུད་ཀྱི་མཚམས་སྦྱོར་མཛད་པ་འདི་ཉིད་དཔང་པོར་བྱས་ན། ནཱ་རོ་པའི་བཤད་སྲོལ་ཤིན་
ཏུ་དག་པ་ཅིག་འོང་ངོ༌། །དེ་ཡང་ཉུང་ངུའི་མཚམས་སྦྱོར་ལས། དང་པོར་རེ་ཞིག་བསྐྱེད་པ་དང་རྫོགས་པའི་རིམ་པ་གཉིས་ཀྱིས་བསྡུས་པའི་དོན་ཐམས་ཅད་ལེའུ་དང་པོས་མདོར་བསྟན་ནས། གཉིས་པ་ནས་ལེའུ་ལྔ་བཅུ་པའི་བར་གྱིས་རྒྱས་པར་བསྟན་ཏེ། ཀུན་གྱི་ཐ་མའི་ལེའུ་ནི་དེ་རྣམས་གཅིག་ཏུ་མཛད་དེ་བཅོམ་ལྡན་འདས་ཀྱིས་གསུངས་པའོ། །ཞེས་རྒྱུད་ཆུང་ངུ་འདི་གསུམ་དུ་སྦྱར་བའི་བཤད་པ་འདི་ནི་ནཱ་རོ་པའི་དགོངས་པའོ། །ཞེས་གསུངས་སོ། གསུམ་དུ་སྦྱར་ཞེས་པ་ནི་ལེའུ་དང་པོ་མདོར་བསྟན་དང་སྦྱར་བ་དང༌། གཉིས་པ་ནས་ལྔ་བཅུ་པའི་བར་རྒྱས་བཤད་དང་སྦྱར་བ་དང༌། ང་གཅིག་པས་མདོ་རྒྱས་ཀྱི་ལེའུ་དེ་རྣམས་ཀྱི་དོན་གཅིག་ཏུ་བསྡུས་ཏེ་སྦྱར་བའི་བཤད་པ་ཡིན། ཞེས་པའོ། །གསུམ་དུ་སྦྱར་ཞེས་པ་འདི་ལ་བོད་ཁ་ཅིག་ནཱ་རོ་པའི་ལུགས་ཀྱིས་ཁ་སྦྱོར་གསུམ་གྱི་བཤད་པ་བྱེད་པ་ཡིན་ཟེར་བ་ནི། མཚམས་སྦྱོར་གྱི་དོན་མ་ངེས་པར་དོན་མེད་པའི་ཐ་སྙད་སྦྱར་བའི་བཤད་པའོ། །ཡང་བོད་འགའ་ཞིག་གསུམ་དུ་སྦྱར་ཞེས་པ་གཞན་ནས་མདོར་བསྟན་རྒྱས་བཤད་དོན་བསྡུ་ཞེས་པ་འབྱུང་བ་ལྟར་དུ་བཟུང་ནས། གཉིས་པ་མན་ཆད་རྣམས་ལ་དང་པོར་མདོར་བསྟན་པ་དང༌། རང་རང་གི་སྐབས་སུ་རྒྱས་པར་བཤད་ཚུལ་དང༌། ཐ་མར་དེའི་དོན་བསྡུས་ཚུལ་རེ་འཆད་པར་སྣང་ངོ༌། །འདིར་དོན་བསྡུས་པ་ནི་ལེའུ་ལྔ་བཅུའི་དོན་རྣམས་ལམ་གྱི་རིམ་པ་གཅིག་ཏུ་བསྡུས་ཏེ་བསྟན་པས། སྔར་གྱི་རྒྱས་བཤད་ལས་གསལ་དུ་སོང་བ་ཡིན་པས་བཤད་པ་དེ་ཡང་ནཱ་རོ་པའི་འཆད་ཚུལ་མིན་ནོ། །གསུམ་པ་ལ་
གསུམ། བསྡུས་དོན་སོ་སོར་བསྟན་པ་དང༌། ལམ་གྱི་རིམ་པ་གཅིག་ཏུ་བསྒྲིགས་པ། ནཱ་རོ་པ་ནས་བརྒྱུད་པའི་ཚུལ་ལོ། །དང་པོ་ལ་དྲུག །དབང་བསྐུར་བ་དང་དེ་ལ་དེ་ཉིད་བསྟན་པའི་བསྡུས་དོན་དང༌། སྔགས་བཏུ་བ་དང་དངོས་གྲུབ་སྒྲུབ་པའི་བསྡུས་དོན་དང༌། དངོས་གྲུབ་གཉིས་ཀ་ཕོ་ཉ་མོའི་དྲིན་ལས་འགྲུབ་པའི་བསྡུས་དོན་དང༌། ལམ་གྱི་གྲོགས་དམ་ཚིག་དང་བོགས་འབྱིན་པའི་སྤྱོད་པའི་བསྡུས་དོན་དང༌། ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་བཞིའི་བསྡུས་དོན་དང༌། དངོས་གྲུབ་མྱུར་དུ་འགྲུབ་པའི་མཚན་མ་རྟོགས་པའི་བསྡུས་དོན་ནོ། །དང་པོ་ནི། ཉུང་ངུའི་མཚམས་སྦྱོར་ལས། དེ་ལ་དབང་བསྐུར་ནས་ནི། དེ་ཉིད་བསྟན། །ཞེས་པའི་ཚིག་གིས་ཐེག་པ་གསང་སྔགས་ལ་དང་པོ་དབང་བསྐུར་བའོ། །དེ་ལ་དཀྱིལ་འཁོར་སྔོན་དུ་འགྲོ་བ་ལས་ལེའུ་གཉིས་པས་ནི་དཀྱིལ་འཁོར་རོ། །གསུམ་པས་ནི་དབང་བསྐུར་བའོ། །ཞེས་གསུངས་སོ། །ལེའུ་དང་པོ་ལས། གདོད་ནས་གྲུབ་པའི་དུར་ཁྲོད་དུ། །དེར་ནི་དཀྱིལ་འཁོར་བྲི་བར་བྱ། །ཞེས་གསུངས་པ་གཉིས་པ་དང་གསུམ་པས་འཆད་པ་ཡིན་ནོ། །དེ་ལ་སྔོན་དུ་དབང་མ་བསྐུར་བ་ལ་རིམ་གཉིས་ཀྱི་དེ་ཉིད་བསྟན་ན། དངོས་གྲུབ་རིང་བས་དབང་བསྐུར་ནས་དེ་ཉིད་བསྟན་པར་གསུངས་པས་གསང་སྔགས་ལ་དང་པོར་དབང་བསྐུར་བ་དགོས་ཤིང༌། དྲིལ་བུ་པས། དབང་སྐུར་དཀྱིལ་འཁོར་སྔོན་འགྲོ་བར། །རྡོ་རྗེ་འཆང་གིས་གསུངས་པ་སྟེ། ཞེས་གསུངས་པ་ལྟར་སྔོན་དུ་དཀྱིལ་
འཁོར་དགོས་པ་ནི་ལེའུ་གཉིས་པས་སྟོན་ནོ། །དེ་ཡང་རྟེན་གྱི་དཀྱིལ་འཁོར་ཁོ་ན་མ་ཡིན་གྱི། བརྟེན་པའི་དཀྱིལ་འཁོར་ཡང་བཀོད་ནས་མཆོད་པ་དང༌། བུམ་པ་རྣམས་ཀྱི་མཚན་ཉིད་དང་དགོད་པ་སོགས་གསུངས་སོ། །གསུམ་པ་དཀྱིལ་འཁོར་དུ་གཞུག་པ་དང༌། མེ་ཏོག་དོར་བ་དང༌། མིང་དབང་སོགས་རང༌། གསང་དབང་དང༌། དབང་གསུམ་པར་བསྐུར་བ་བསྟན་ཏོ། །མལ་གྱི་ལུགས་འཛིན་པ་དང༌། མར་དོའི་བཤད་པ་གཉིས་ཀས་ལེའུ་བཞི་པར་དེ་ཉིད་བཞི་སྟོན་པས་དབང་བཞི་པ་བསྐུར་བ་བཤད་པར་འདོད་དེ། ཉུང་ངུའི་མཚམས་སྦྱོར་ལས། བཞི་པས་ནི་དབང་བསྐུར་བའི་དོན་གྱི་ངོ་བོ་ཉིད་དོ། །ཞེས་གསུངས་པའི་དོན་བཞི་པས་དབང་བསྐུར་བ་ལ་བཤད་པར་བྱ་བའི་དོན་གྱི་ངོ་བོ་ཉིད་དེ་ཉིད་བཞི་འཆད་པའི་དོན་ཡིན་པས། དེ་དང་ཡང་མཐུན་པར་བྱས་པས་ཆོག་པར་སྣང་ངོ༌། །ཡང་མཚམས་སྦྱོར་ལས། དེ་ལྟར་ལེའུ་གསུམ་པོས་ནི་དེ་ནས་གསང་བ་ཞེས་བྱ་བ་ནས། མཉན་པར་གྱིས་ཞེས་པའི་བར་དུ་བཤད་དོ། །ཞེས་གསུངས་སོ། །འདིའི་དཔེ་ཁ་ཅིག་ལས་ལེའུ་གསུམ་པས་ཞེས་འབྱུང་བ་དག་སྟེ། རྒྱས་བཤད་ཀྱི་ལེའུ་གསུམ་པའོ། །ལེའུ་དེས་དེ་ནས་གསང་བ་ཞེས་སོགས་ཀྱིས་བསྟན་པའི་རིམ་གཉིས་ཀྱི་དོན་རྣམས་བཤད་ཅེས་པའི་དོན་ནོ། །བཤད་དོ་ཞེས་པའི་འཕྲོ་ཉིད་ནས། འདིས་ནི་དེ་ལྟར་འཆད་པར་འགྱུར་གྱི། བ་ལང་གནས་ཀྱི་ལྕི་སྐམ་དང༌། །ཞེས་བྱ་བ་ལ་སོགས་པ་སྔོན་དུ་འགྲོ་བའི་སྒོམ་པའི་དཀྱིལ་འཁོར་རྒྱས་པར་བཤད་པ་ཡང་འདི་ཉིད་ཡིན་པས། དེ་ལས་
ལོགས་ཤིག་ཏུ་མ་བརྗོད་དོ། །ཞེས་འབྱུང་བའི་དོན་ནི་ལེའུ་སོ་གཉིས་པར་འཆད་པར་འགྱུར་བའི། བ་ལང་གནས་ཞེས་སོགས་ཀྱིས་འབྱུང་བ་རིམ་བརྩེགས་བསྐྱེད་པ་བསྟན་ནས། དེ་སྔོན་དུ་འགྲོ་བའི་དཀྱིལ་འཁོར་སྒོམ་པ་ཡང་ལེའུ་གཉིས་པར་བཤད་པ་འདི་ཉིད་ཡིན་པས་འོག་ཏུ་འབྱུང་བ་རིམ་བརྩེགས་སྒོམ་པ་བཤད་པའི་འཕྲོ་ནས། གཉིས་པ་ལས་ལོགས་སུ་དཀྱིལ་འཁོར་སྒོམ་པ་མ་བཤད་ཅེས་པའི་དོན་ནོ། །གཉིས་པ་ནི། དེ་ལྟར་དབང་ལེགས་པར་ཐོབ་པ་དེས་དེ་ནས་གསང་བ་ཞེས་པ་ནས་མཉན་པར་གྱིས་ཞེས་པའི་མདོར་བསྟན་པའི་དོན། །ལེའུ་བཞི་པས་བཤད་པའི་རིམ་གཉིས་སྒོམ་པའི་བསམ་གཏན་དང༌། བཟླས་བརྗོད་ཀྱི་དངོས་གྲུབ་འགྲུབ་པར་གསུངས་པའི་བཟླས་བརྗོད་ལ་ནི། །སྔགས་དག་དགོས་ལ་དེ་ལ་སྔགས་བཏུ་བ་དགོས་པའི་ཚུལ་ནི་མཚམས་སྦྱོར་ལས། དེ་ནས་གསང་སྔགས་ཟློས་པའི་བཟླས་བརྗོད་དང༌། །བསམ་གཏན་གྱིས་ཀྱང་འགྲུབ་པར་འགྱུར། ཞེས་བྱ་བ་རྣམ་པར་འགྲེལ་བ་ལ། ལྔ་པ་ནས་བརྒྱད་པའི་བར་གྱི་ལེའུ་བཞི་དང༌། ཉི་ཤུ་རྩ་ལྔ་པ་ནས་སུམ་ཅུ་པས་ནི་གོ་རིམ་འཆོལ་བའི་ལས་བཟླས་པའི་སྔགས་བཏུ་བ་བསྟན་ཏེ། རྒྱུད་ལ་སློབ་དཔོན་མེད་པར་སྔགས་ཀྱི་བཟླས་པ་དགག་པའི་དོན་ཡིན་པར་རྟོགས་པར་བྱའོ། །ཞེས་གསུངས་སོ། །ཉི་ཤུ་རྩ་ལྔ་པ་ནས་ཞེས་པ་ཡི་གེ་མ་དག་སྟེ། འོག་ནས་ཉེར་དྲུག་པ་ནས་ཉེར་དགུའི་བར་གྱི་ལེའུ་བཞིས་འདི་སྟོན་ལོགས་སུ་བཤད་པའི་ཕྱིར་རོ། །དེས་
ན་ཉེར་ལྔ་པ་དང་ཞེས་འོང་རྒྱུ་ཡིན་ནོ། །དེ་ལ་ལེའུ་ལྔ་པ་ལས་ནི་ཡབ་ཀྱི་རྩ་སྔགས་ཀྱི་གསལ་བྱེད་བཏུ་བ་དང༌། བདུན་པས་རྩ་སྔགས་ཀྱི་དབྱངས་བཏུ་བ་དང༌། ཉེར་ལྔ་པ་ལས་མགོར་ཨོཾ་དང་མཐར་ཧཱུཾ་ཧཱུཾ་ཕཊ་སྦྱར་བའི་རྩ་སྔགས་ཉིད་གསུངས་ལ། ལེའུ་དྲུག་པ་ལས་ཡབ་ཀྱི་སྙིང་པོ་དང་ཉེ་སྙིང་གི་ཡི་གེའི་གྲངས་ཙམ་དང༌། ཡབ་ཀྱི་གོ་ཆའི་སྔགས་བཏུ་བ་དང༌། བརྒྱད་པ་ལས་ཡབ་ཀྱི་སྙིང་པོ་དང་ཡུམ་གྱི་གོ་ཆའི་སྔགས་བཏུ་བ་བསྟན། སུམ་ཅུ་པ་ལས་ཞལ་བཞི་པའི་སྔགས་བཏུ་བ་དང་བཏུས་པའི་སྔགས་གཉིས་ཀ་བསྟན་ཏོ། །གོ་རིམ་འཆོལ་བ་ཞེས་པ་ནི་སྙིང་པོ་བཟློག་སྟེ་བསྟན་པ་སོགས་སོ། །འགྲུབ་འགྱུར་ཞེས་པའི་འབྲས་བུ་འགྲུབ་པ་ལེའུ་དུས་སྟོན་པ་ནི། མཚམས་སྦྱོར་ལས། འདི་ལྟར་བཟླས་པའི་དངོས་གྲུབ་མཆོག་དང་ཐ་མའི་མཚན་ཉིད་ལས། འཇིག་རྟེན་པའི་དངོས་གྲུབ་བསྟན་པ་ནི། དགུ་པ་ནས་བཅུ་བཞི་པའི་མཐར་ཐུག་པ་དང༌། བཞི་བཅུ་རྩ་གཅིག་པ་ནས་ལེའུ་ལྔ་བཅུ་པའི་བར་དུ་ཤེས་པར་བྱའོ། །གོང་དུ་སྐུ་གསུམ་སྦྱར་བས་འཇིག་རྟེན་ལས་འདས་པའི་མཆོག་གི་དངོས་གྲུབ་བསྟན་ཏོ། །ཞེས་གསུངས་ཏེ། བཟླས་པའི་དངོས་གྲུབ་ཅེས་པ་ནི་མཚོན་པ་སྟེ། བསམ་གཏན་དང་བཟླས་པ་གཉིས་ཀའི་སྒོ་ནས་ཀྱི་དངོས་གྲུབ་སྒྲུབ་པའོ། །དེ་ལ་ལེའུ་དགུ་པ་ནས་ཡབ་ཀྱི་རྩ་སྔགས་ཀྱིས་ཐུན་མོང་གི་དངོས་གྲུབ་སྒྲུབ་པ་དང༌། བཅུ་པའི་ཕྱོགས་གཅིག་གིས་ཡབ་ཀྱི་སྙིང་པོའི་སྒོ་ནས་ལས་སྒྲུབ་པ་དང༌། བཅུ་གཅིག་པས་སྐྱེ་བདུན་བརྟག་པ་དང༌། དེའི་སྙིང་ག་ནས་རོ་ཙ་ན་བླངས་
ཏེ་ཡབ་ཀྱི་སྙིང་པོས་ལས་སྒྲུབ་པ་བསྟན། བཅུ་གཉིས་པས་ཡབ་ཀྱི་ཉེ་སྙིང་གིས་ལས་སྒྲུབ་པ་བསྟན། བཅུ་གསུམ་པས་གོ་ཆའི་སྔགས་ཀྱིས་ལས་སྒྲུབ་པ་བསྟན། བཅུ་བཞི་པས་ཧེ་རུ་ཀ་བོང་ཞལ་ཅན་གྱི་སྒོ་ནས་སྐྱེ་བདུན་གྱི་སྒྲུབ་པ་བསྟན། ཞེ་གཅིག་པ་ནས་ཞེས་པ་ནི་ཡི་གེ་མ་དག་པར་གསལ་ཏེ། འོག་ནས་སོ་དགུ་པ་ནས་ཞེ་གཉིས་པའི་བར་བཞི་ལ་ལོགས་སུ་བཤད་པའི་ཕྱིར་རོ། །དེས་ན་ཞེ་གསུམ་པ་ནས་ཞེས་འོང་རྒྱུར་སྣང་ངོ༌། །ཞེ་གསུམ་པས་ཡབ་གྱི་ཉེ་སྙིང་གིས་ལས་སྒྲུབ་པ་དང༌། ཞེ་བཞི་པས་ཡབ་ཀྱི་ཉེ་སྙིང་དང་ཡུམ་གྱི་གོ་ཆས་ལས་སྒྲུབ་པ་དང༌། ཞེ་ལྔ་པས་དཔའ་མོའི་གོ་ཆས་ལས་སྒྲུབ་པ་དང༌། ཞེ་དྲུག་པས་ཧ་ལྔ་ལ་བརྟེན་ནས་ལས་སྒྲུབ་པ་དང༌། ཞེ་བདུན་པས་སརྦ་བུདྡྷཱ་ཌཱ་ཀི་ནི་ཡི་སྔགས་ཀྱི་ལས་སྒྲུབ་པ་དང༌། ཞེ་བརྒྱད་པས་སངས་རྒྱས་མཁའ་འགྲོ་མའི་སྔགས་དངོས་དང༌། རྣལ་འབྱོར་མ་བཞི་དང་དཔའ་བོ་ཉེར་བཞི་རྟག་ཏུ་སྒོམ་པ་བསྟན། ཞེ་དགུ་པས་སྐྱེ་བདུན་བརྟག་པ་རྒྱས་པར་དང༌། ལྔ་བཅུ་པས་བཛྲ་བེ་རོ་ཙ་ནའི་སྔགས་ཀྱིས་ལས་སྒྲུབ་པ་བསྟན་ཏོ།། །མཆོག་གི་དངོས་གྲུབ་ནི་བཅུ་པའི་ཕྱོགས་གཅིག་གིས་སྐུ་གསུམ་འགྲུབ་པར་བསྟན་པས་སྟོན་ཏེ། དང་པོ་ལས། དངོས་གྲུབ་རྟག་པ་ཐོབ་པར་འགྱུར། ཞེས་མདོར་བསྟན་པའི་བཤད་པའོ། །དེ་ཡང་རྫོགས་རིམ་གྱི་ལམ་གྱི་སྐུ་གསུམ་ཞིབ་ཏུ་བཤད་པ་ན། དེ་ཉིད་གོང་ནས་གོང་དུ་སོང་བའི་རིམ་པས་འཐོབ་པ་རྟོག་པར་ནུས་སོ། །དངོས་
གྲུབ་གཉིས་བསྟན་པ་ནི་ཐུན་མོང་གི་དངོས་གྲུབ་ལ་བྲོད་པ་སྐྱེས་ནས། དེ་གྲུབ་པ་ན་མཆོག་ལ་འཇུག་པའི་ཕྱིར་ཡིན་ནོ། །ཞེས་སྔ་མ་རྣམས་གསུང་ཡང་བླ་མེད་ཀྱི་གདུལ་བྱའི་གཙོ་བོ་ནི། བསྐྱེད་རིམ་མཐར་ཕྱིན་ནས་འཇིག་རྟེན་པའི་དངོས་གྲུབ་དོན་དུ་མི་གཉེར་བར། རྫོགས་རིམ་ལ་འཇུག་པ་ཡིན་པར་གཞུང་དུ་མ་ལས་བཤད་པས་མི་ལེགས་སོ། །དེས་ནས་བསྐྱེད་རིམ་གྱི་མཐར་འཇིག་རྟེན་པའི་དངོས་གྲུབ་སྒྲུབ་པ་ནི། བླ་མེད་ཀྱི་གདུལ་བྱ་དབང་པོ་དམན་པ་རྣམས་ཀྱི་ཚུལ་ལོ། །གསུམ་པ་ནི། ཡང་མཚམས་སྦྱོར་ལས། དེ་ལྟར་འདི་ལ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ནི། རྣལ་འབྱོར་མའི་བཀའ་དྲིན་ལས་འགྱུར་བ་དེ་འདིར་བསྟན་པའི་དོན་དུ། བཅོ་ལྔ་པ་ནས་ཉི་ཤུ་རྩ་བཞི་པའི་བར་གྱིས་ནི། ཕོ་ཉ་ལྷན་ཅིག་སྐྱེས་དངོས་གྲུབ། །ཅེས་པ་ལ་སོགས་པ་རྣམ་པར་འགྲེལ་ཏེ། འདིས་རྣལ་འབྱོར་མ་གསུམ་གྱི་དབྱེ་བ་ཤེས་པར་བྱ་བའི་ཕྱིར་ཡི་གེའི་བརྡ་དང༌། རིགས་དྲུག་གི་དབྱེ་བ་དང༌། མིང་གི་རྣམ་གྲངས་དང༌། མཁའ་འགྲོ་མའི་རིགས་ཀྱི་མཚན་ཉིད་དང༌། ལཱ་མའི་རིགས་ཀྱི་མཚན་ཉིད་དང༌། ལག་པའི་བརྡ་དང༌། ལྟ་བའི་ཕྱག་རྒྱ་དང༌། ཡན་ལག་གི་ཕྱག་རྒྱ་དང༌། མཚན་མའི་ཕྱག་རྒྱ་དང༌། ངག་གི་བརྡ་རབ་ཏུ་ཤེས་པར་འགྱུར་བ་འདི་ནི། བྱེ་བྲག་བཅུས་ཕོ་ཉའི་མཚན་ཉིད་ལེའུ་བཅུར་གོ་རིམ་ཇི་ལྟ་བ་བཞིན་བསྟན་ཏོ། །ཞེས་གསུངས་པའི་དོན་ནི། དངོས་གྲུབ་གཉིས་ནི་རྣལ་འབྱོར་མའི་བཀའ་དྲིན་ལས་འགྲུབ་པ་འདིར་བསྟན་པའི་དོན་དུ། ལེའུ་
དང་པོར། ཕོ་ཉ་ལྷན་ཅིག་སྐྱེས་དངོས་གྲུབ། ཅེས་པ་ནས། འདོད་པ་ཡི་ནི་དངོས་གྲུབ་བྱ། །ཞེས་རིགས་ལྡན་མ་མཆོད་པ་ལ་བརྟེན་ནས་དངོས་གྲུབ་བསྒྲུབ་པར་བྱའོ། །ཞེས་པའི་མདོར་བསྟན་རྒྱས་པར་འཆད་པ་ལ། ལེའུ་བཅོ་ལྔ་པ་ནས་ཉེར་བཞི་པའི་བར་ལེའུ་བཅུ་གསུངས་སོ། །འདིས་རྣལ་འབྱོར་མ་གསུམ་གྱི་དབྱེ་བ་ཤེས་པར་བྱ་བའི་ཕྱིར། ཞེས་པ་ནི་ལེའུ་དེ་རྣམས་ཀྱིས་སྔགས་སྐྱེས་མ་ལ་སོགས་པ་གསུམ་སོ་སོར་ཤེས་པར་བྱེད་པ་མ་གསུངས་ཀྱང༌། མཁའ་འགྲོ་མ་དེ་རྣམས་དང་ཕྲད་པ་ལ་བརྟེན་ནས། འདི་རྣལ་འབྱོར་མ་གསུམ་པོའི་འདི་ཡིན་ཞེས་དང༌། ཡུལ་འདི་ན་འདི་ཡོད་ཅེས་བསྟན་པ་ལ་བརྟེན་ནས་ཤེས་པའོ། །ལེའུ་བཅུ་པོ་སོ་སོས་བརྡ་ལ་སོགས་པ་འདི་སྟོན་ཤིན་ཏུ་བསྡུས་ནས་བསྟན་པ་འདི་ཅུང་ཟད་བཤད་ན། མཁའ་འགྲོ་མའི་རིགས་ལྡན་མ་མཆོད་པ་ལ་དེ་ངོ་ཤེས་དགོས། ངོ་ཤེས་པ་ལ་བརྟག་དགོས། བརྟགས་པ་ན་བཅོ་ལྔ་པ་དང་ཉི་ཤུ་པ་དང་ཉེར་གཉིས་པ་དང༌། ཉེར་བཞི་པར་དཔའ་བོ་དང་སྲིང་མོར་ཤེས་པར་འགྱུར་བར་གསུངས་པ་ལྟར་ཤེས་པར་བྱེད་པའི་བརྟག་པ་ལ། ཡི་གེ་རེ་རེ་བའི་བརྡ་ནི་བཅོ་ལྔ་པ་དང༌། ཡི་གེ་དུ་མ་ཚོགས་པའི་ངག་གི་བརྡ་ནི་ཉེར་བཞི་པས་བསྟན་ཏེ། ངག་ལ་བརྟེན་ནས་ཤེས་པར་བྱེད་པའོ། །ལུས་ཀྱི་བརྡས་ཤེས་པར་བྱེད་པ་ལ། ཉི་ཤུ་པས་ལག་པ་གཙོ་བོར་བྱས་པའི་ལུས་ཀྱི་བརྡ་དང༌། ཉེར་གཅིག་པས་བལྟ་བའི་ཕྱག་རྒྱའི་ལུས་ཀྱི་བརྡ་དང༌། ཉེར་གཉིས་པས་ཡན་
ལག་གི་ཁྱད་པར་གྱི་ཕྱག་རྒྱའི་ལུས་ཀྱི་བརྡ་སྟེ། དེ་ལྟར་ལེའུ་ལྔས་མཁའ་འགྲོ་མའི་ཕྱག་རྒྱ་རྟོག་པ་བསྟན་ཏོ། །དེ་ལྟར་སྤྱིར་རྣལ་འབྱོར་མར་ཤེས་པས་མི་ཆོག་གི། བྱེ་བྲག་གི་རིགས་རྟོགས་དགོས་པ་ལ་ལེའུ་བཞི་ལས། བཅུ་དྲུག་པས་རིགས་དྲུག་གི་མཚན་ཉིད་བསྟན་ཏེ། བདག་ཉིད་གང་འདོད་པའི་རིགས་དང་མཐུན་པར་ཤེས་པར་བྱས་ནས་མཆོད་པའི་ཕྱིར་དུའོ། །བཅུ་བདུན་པས་ནི་མཁའ་འགྲོ་མ་རྣམས་སྡུད་པར་བྱེད་པའི་མཁའ་འགྲོ་མ་བདུན་ཚན་གཉིས་མིང་གི་རྣམ་གྲངས་ཀྱིས་བསྟན། བཅོ་བརྒྱད་པས་མཁའ་འགྲོ་མའི་རིགས་ཀྱི་མཚན་ཉིད་ཀྱི་དབྱེ་བ་བསྟན། བཅུ་དགུ་པས་ལཱ་མའི་རིགས་ཀྱི་མཚན་ཉིད་ཀྱི་དབྱེ་བ་ལྔ་བསྟན་ཏོ། །བརྟགས་པས་མཁའ་འགྲོ་མར་ཤེས་ཀྱང་རང་ལ་རྗེས་སུ་ཆགས་པ་མེད་ན་དེ་ཁོ་ན་ཉིད་ཀྱི་མཆོད་པ་བྱར་མི་རུང་བས། རང་ལ་ཆགས་པའི་རྟགས་མཁའ་འགྲོ་མའི་ཁྱད་པར་གྱི་མཚན་མའི་ཕྱག་རྒྱ་ཉེར་གསུམ་པས་བསྟན་ཏོ། །སྤྱིར་གསང་སྔགས་བླ་མེད་པའི་སྒྲུབ་པ་པོ་ཐམས་ཅད་ལ་ཕོ་ཉ་མོ་མཚན་ཉིད་ཚང་བས་གྲོགས་བྱས་ན་ལམ་མྱུར་པ་ཡིན་པ་ལ། ཁྱད་པར་དུ་བདེ་མཆོག་ལམ་ལེགས་པར་ཤེས་ནས་སྒྲུབ་པ་བྱེད་པ་རྣམས་ལ། མཁའ་འགྲོ་མའི་ཕོ་ཉ་མོ་ཁྱད་པར་ཅན་རྣམས་ཀྱིས་བྱིན་གྱིས་རློབ་པ་དང༌། ལམ་གྱི་གྲོགས་མཛད་པ་ཆོས་མྱུར་བ་ཡིན་པས་ད་ལྟ་དངོས་སུ་ལག་ལེན་ལ་མ་ཐེབས་ཀྱང༌། ཚེ་རབས་གཞན་དུ་བརྡ་དང་བརྡའི་ལན་དངོས་སུ་བྱེད་པའི་རྟེན་འབྲེལ་སྒྲིག་པ་ཁྱད་པར་ཅན་དུ་འགྱུར་བས། འདི་དག་གི་ཚུལ་ལ་
མཁས་པ་དང་དོན་ཡང་ཡང་ཡིད་ལ་བྱེད་པ་ལ་གོམས་པར་བྱའོ། །བཞི་པ་ནི། ཡང་མཚམས་སྦྱོར་ལས། དེའི་རྗེས་ལ། དམ་ཚིག་རྟག་ཏུ་བསྐྱང་བར་བྱ། ཞེས་བྱ་བ་ལ་སོགས་པའི་དོན་རྫོགས་པར་བྱེད་པ་ལ། ཉི་ཤུ་རྩ་དྲུག་པས་ནི་ཡོངས་སུ་ཤེས་པའི་ཕོ་ཉ་མོ་མཉེས་པར་བྱེད་པ་བསྲུང་པའི་དམ་ཚིག་བསྟན་ཏོ། །ཉི་ཤུ་རྩ་བདུན་པས་ནི་ཐོབ་པའི་ཕྱག་རྒྱ་མཉེས་པ་དེའི་བཀས་སྤྱོད་པ་བྱ་བ་སྟེ། རྣལ་འབྱོར་པ་ཉིད་ཅེས་བྱ་བ་ལ་སོགས་པའི་མཚན་ཉིད་ཀྱི་དོན་རྫོགས་པར་བྱེད་པ་སྤྲོས་བཅས་ཀྱི་སྤྱོད་པ་བསྟན་ཏོ། །ཉི་ཤུ་རྩ་བརྒྱད་པ་དང་ཉི་རྩ་དགུ་པས་ནི་སྤྲོས་བཅས་ཀྱི་སྤྱོད་པའི་བྱ་བ་བསྟན་ཏོ། །ཞེས་གསུངས་པའི་དོན་ནི་ལེའུ་དང་པོར། རྟག་ཏུ་དམ་ཚིག་བསྐྱང་བར་བྱ། །ཞེས་པའི་མདོར་བསྟན་གྱི་དོན་རྒྱས་པར་འཆད་པ་ལ། ཉེར་དྲུག་པས་བརྡ་ལ་བརྟེན་ནས་ཤེས་པའི་ཕོ་ཉ་མོ་མཉེས་པར་བྱེད་པ་ལ་བསྲུང་བའི་དམ་ཚིག་བརྒྱད་བསྟན་ཏེ། དེ་ནི་མཚོན་པ་ཙམ་ཡིན་པས། རྩ་ལྟུང་གི་བསྲུང་བའི་དམ་ཚིག་སོགས་ཀྱང་བསྐྱང་དགོས་སོ། །ཕྱག་རྒྱ་མ་ཁྱད་པར་ཅན་མཉེས་པར་བྱས་པ་ན་དེའི་བཀས་སྤྲོས་བཅས་ཀྱི་སྤྱོད་པ་བྱ་བ་ནི། ཉེར་བདུན་པ་དང་ཉེར་བརྒྱད་པ་དང་ཉེར་དགུ་པས་བསྟན་ཏོ། །ཡང་མཚམས་སྦྱོར་ལས། དེ་ནས་སུམ་ཅུ་བརྒྱད་པས་ནི་ཡང་རྣལ་འབྱོར་པ་ཉིད་ཅེས་བྱ་བ་ལ་སོགས་པའི་དོན་རྫོགས་པར་བྱ་བའི་ཕྱིར། སྤྲོས་མེད་དང་ཤིན་ཏུ་སྤྲོས་མེད་ཀྱི་སྤྱོད་པ་རྒྱས་པར་བསྟན་ཏོ། །ཞེས་གསུངས་ཏེ། སྤྱོད་པའི་མདོར་བསྟན་ནི་ལེའུ་དང་པོར། རྣལ་འབྱོར་པ་
ཉིད་བསོད་ནམས་མཆོག །དག་བྱེད་སྡིག་པ་འཇིག་བྱེད་པ། །ཞེས་གསུངས་པའོ། །དེ་ནས་མཚམས་སྦྱོར་ལས། དེ་ནས། སྦྲང་རྩི་མཚལ་དང་ག་པུར་བཅས། །ཞེས་བྱ་བ་ལ་སོགས་པའི་བཤད་པ་ནི། སུམ་ཅུ་རྩ་གཅིག་པ་ལ་སོགས་པ་ལེའུ་གསུམ་གྱིས་སྤྱོད་པ་ཐམས་ཅད་ལ་མཁོ་བ་བཟའ་བའི་དམ་ཚིག་བསྟན་ཏེ། དེ་ཡང་ལག་པའི་མཆོད་པ་དང༌། རྫས་ཀྱི་ཁྱད་པར་གྱི་མིང་དང༌། ཁ་ཟས་ཀྱི་ཆོ་གའི་དབྱེ་བ་གསུམ་དུ་ཤེས་པར་བྱའོ། །ཞེས་གསུངས་ཏེ། སོ་གཅིག་པས་ལག་མཆོད་དང༌། སོ་གཉིས་པས་རྫས་ཀྱི་ཁྱད་པར་གྱི་མིང་དང༌། སོ་གསུམ་པས་ཁ་ཟས་ཀྱི་ཆོ་གའི་དབྱེ་བ་བསྟན་ཏེ། བཟའ་བའི་དམ་ཚིག་བསྐྱང་བའོ། །དམ་ཚིག་གཉིས་ཀྱིས་བསྟེན་པའི་དམ་ཚིག་ཀྱང་མཚོན་ནོ། །ལྔ་པ་ནི། ཡང་མཚམས་སྦྱོར་ལས། དེའི་རྗེས་ལ། མཆོད་བཞི་དེ་བཞིན་དཔའ་བོ་ཆེ། །ཞེས་བྱ་བ་ལ་སོགས་པ་རྣམ་པར་འགྲེལ་བ་ནི་སུམ་ཅུ་རྩ་བཞི་པ་ལ་སོགས་པ་ལེའུ་བཞི་སྟེ། ཕྱག་རྒྱ་ཆེན་པོ་དང་ཆོས་ཀྱི་ཕྱག་རྒྱ་དང་ལས་ཀྱི་ཕྱག་རྒྱ་དབང་དུ་བྱ་བ་གོ་རིམ་ཇི་ལྟ་བ་བཞིན་དུ་རྟོགས་པར་བྱའོ། །དམ་ཚིག་གི་ཕྱག་རྒྱ་ནི་དཀྱིལ་འཁོར་གྱི་འཁོར་ལོ་སྒོམ་པའི་མཚན་ཉིད་བཞིན་དུ་བསྟན་པས་ན། འདིར་དེ་ལས་ལོགས་ཤིག་ཏུ་རྒྱས་པར་མ་བསྟན་ཏོ། །ཞེས་གསུངས་པའི་དོན་ནི་ལེའུ་དང་པོར། མཆོད་བཞི་དཔའ་བོ་ཆེན་པོ་ནི། །ཞེས་སོགས་ཀྱིས་ཕྱག་རྒྱ་བཞི་མདོར་བསྟན་རྒྱས་པར་འགྲེལ་པ་ནི། སོ་བཞི་པ་ནས་སོ་བདུན་པའི་བར་ལེའུ་བཞིའོ། །དེ་ཡང་སོ་བཞི་པས་ཕྱག་ཆེན་དང༌། སོ་ལྔ་པས་ཆོས་ཀྱི་ཕྱག་
རྒྱ་དང༌། སོ་དྲུག་པས་ལས་རྒྱ་བསྟེན་ཚུལ་དང༌། སོ་བདུན་པས་ལས་རྒྱས་རང་གི་དབང་དུ་བྱེད་པའི་ཐབས་བསྟན་ལ། དམ་ཚིག་གི་ཕྱག་རྒྱ་ནི་སྔར་དཀྱིལ་འཁོར་གྱི་དབུས་སུ་ཧེ་རུ་ཀ་ཡབ་ཡུམ་དགོད་པའི་སྐབས་སུ་བཤད་པ་དེ་ལས་ལོགས་ཞིག་ཏུ་མ་བསྟན་པར་གསུངས་ཏེ། དམ་ཚིག་གི་ཕྱག་རྒྱ་ནི་གཞུང་གཞན་ནས་ཡེ་ཤེས་ཀྱི་ཕྱག་རྒྱར་བཤད་པའི་ཡིད་ཀྱིས་རྡོ་རྗེ་ཕག་མོ་སོགས་བསྒོམས་པའི་ལྷ་མོའོ། །འདི་ལ་བླ་མ་མར་དོ་དང་མལ་གྱི་ལུགས་འཛིན་པ་གཉིས་ཀའི་ལུགས་ཀྱིས་ལེའུ་སོ་དྲུག་པས་དམ་ཚིག་དང༌། ལས་རྒྱ་གཉིས་ཀ་བསྟན་པར་བཞེད་པ་དང་མི་འགལ་ཏེ། དམ་རྒྱ་སྤྱིར་མ་བསྟན་པ་མིན་གྱི་རྒྱས་པར་མ་བསྟན་ཞེས་གསུངས་པའི་ཕྱིར་རོ། །དེའི་དོན་ནི་ལས་རྒྱ་ལས་ལོགས་སུ་གསལ་བར་མ་བསྟན་ཞེས་པའི་དོན་ནོ། །དྲུག་པ་ནི། ཡང་མཚམས་སྦྱོར་ལས། དེ་ནས་རྣལ་འབྱོར་གསུམ་གྱི་ཐུན་མོང་དུ་གྱུར་པའི་དངོས་གྲུབ་ཀྱི་མཚན་མ་ནི། སུམ་ཅུ་རྩ་དགུ་པ་ནས་བཞི་བཅུ་རྩ་གཉིས་པའི་བར་གྱིས་བསྟན་ཏོ། །ཞེས་གསུངས་པའི་དོན་ནི་རྣལ་འབྱོར་ཏེ་སྤྱོད་པ་གསུམ་གྱི་ཐུན་མོང་གི་འབྲས་བུ་མཆོག་མྱུར་དུ་འགྲུབ་པའི་མཚན་མའམ་རྟགས་ནི། སོ་དགུ་པ་ནས་ཞེ་གཉིས་པའི་བར་ལེའུ་བཞིས་སྟོན་ནོ། །ང་གཅིག་པའི་དོན་དང་བསྡུས་དོན་དེ་ལྟར་བྱེད་པ་དེ་ཇི་ལྟར་ཡིན་པ་ནི། མཚམས་སྦྱོར་ལས། དེ་ལྟར་མདོ་དང་རྒྱས་པར་བསྟན་པའི་དོན་རྣམས་ཀྱི་མཚན་ཉིད་ལེའུ་ལྔ་བཅུ་རྩ་གཅིག་པས་
གཅིག་ཏུ་བསྡུས་ནས། བཅོམ་ལྡན་འདས་ཀྱིས་བསྟན་ཏོ་ཞེས་བླ་མའི་མན་ངག་གོ། ཞེས་གསུངས་ཏེ། ང་གཅིག་པས་མངོན་པར་རྟོགས་པའི་རིམ་པ་གཅིག་ཏུ་བསྡུས་ཚུལ་ནི། དེ་ཉིད་ཀྱི་སྐབས་སུ་འཆད་པར་འགྱུར་རོ། །བསྡུས་དོན་དེ་ལྟར་བྱེད་པ་ནི་རྗེ་བཙུན་ཆེན་པོ་ནཱ་རོ་ཏ་པའི་མན་ངག་ཏུ་བསྟན་ཏོ། །གཉིས་པ་ནི། དེ་ལྟར་རྩ་རྒྱུད་ཀྱི་དབུ་ཞབས་ཀྱི་དོན་རྣམས་ཀྱང་ལམ་ཉམས་སུ་ལེན་པའི་རིམ་པ་ལ་སྐོར་ནས་ལམ་དུ་འཁྱེར་ཤེས་པ་ནི། མང་དུ་བཤད་པའི་སྙིང་པོ་དམ་པ་ཡིན་པས་ཕྱོགས་གཅིག་ཏུ་བསྒྲིགས་ཏེ་བཤད་ན། དེ་ལྟར་ལེའུ་གཉིས་པ་དང་གསུམ་པ་ནས་འབྱུང་བའི་དབང་གི་སྐོར་རྣམས་བཤད་རྒྱུད་གཉིས་ཀྱིས་ཁ་བསྐངས་པའི་དབང་ལེགས་པར་ཐོབ་པར་བྱ་སྟེ། དེ་ནི་ལམ་རིམ་པ་གཉིས་ཡན་ལག་དང་བཅས་པ་ལ་ཉན་བསམ་སྒོམ་གསུམ་བྱེད་པའི་སྣོད་རུང་དུ་སྒྲུབ་པའི་ཐབས་དམ་པ་ཡིན་པའི་ཕྱིར་རོ། །སྣོད་རུང་དུ་སོང་ནས་ནི། དེ་ནས་གསང་བ་བཤད་བྱ་བ། །ཞེས་སོགས་ཀྱི་དོན་ལེའུ་བཞི་པ་དང༌། ཕྱག་རྒྱ་བཞི་སྟོན་པའི་ལེའུའི་དོན་རྩ་བཤད་ལེགས་པར་སྦྱར་ཏེ་རིམ་གཉིས་བསྒོམ་པར་བྱ་སྟེ། དེ་ནི་ལམ་གྱི་གཞུང་སྲོང་བའོ། །ལམ་དེ་ཡང་དམ་ཚིག་སྐྱོང་བའི་གྲོགས་དང་ལྡན་པར་བྱའོ། །དེ་ལྟར་བསྒོམས་ཤིང་བསྐྱངས་པས་ནུས་པ་རྙེད་པ་ན་ཕོ་ཉ་མོ་ཁྱད་པར་ཅན་དང་ཕྲད་པར་འགྱུར་ལ། དེའི་ཚེ་དེའི་བཀས་ཕོ་ཉ་མོ་ལ་བརྟེན་ནས་སྤྱོད་པ་བྱ་བ་ནི་ལམ་ལ་བོགས་འབྱིན་པའི་ཐབས་དམ་པའོ། །རིམ་པ་གཉིས་སོ་སོའི་སྐབས་སུ་སྤྱོད་པས་
བོགས་བཏོན་པ་ན། ཐུན་མོང་དང་མཆོག་གི་དངོས་གྲུབ་གཉིས་མྱུར་དུ་འགྲུབ་པར་འགྱུར་རོ། །རྩ་རྒྱུད་ཤིན་ཏུ་མི་གསལ་ཞིང་འཁྲུགས་པར་གྱུར་པ་གྲུབ་ཐོབ་ཀྱི་མན་ངག་གིས་བཤད་པས། ལམ་ལ་ངེས་པ་བླ་ན་མེད་པ་སྟེར་བ་འདི་ནི་མཁས་པ་རྣམས་ཀྱི་ཡིད་འཕྲོག་པར་སྣང་བས། ཕྱིས་འབྱུང་གི་མཁས་པ་ནཱ་རོ་པའི་བཤད་སྲོལ་ལ་བརྟེན་པ་རྣམས་ཀྱིས་ཀྱང་དེ་ཁོ་ན་བཞིན་དུ་བཤད་པར་བྱའོ། །གསུམ་པ་ནི། དེ་འདྲ་བའི་བཤད་སྲོལ་མཆོག་ཏུ་གྱུར་པ་ནི་དཔལ་ནཱ་རོ་པ་ལ་མངའ་བ་ཡིན་ལ། དེ་ལ་སློབ་མ་མང་ཡང་བདེ་མཆོག་གི་སློབ་མ་གཙོ་བོ་བཞི་སྟེ། མཱ་ན་ཀ་ཤྲཱི་ཛྙཱ་ན་དང༌། པྲཛྙ་རཀྵི་ཏ་དང༌། ཕི་ཏོང་ཧཾ་དུ་དང༌། ཕཾ་ཐིང་པའོ་ཞེས་ཟེར་རོ། །དང་པོ་ནི། མར་དོས་བྱང་ཕྱོགས་ཀྱི་སྒོ་གླེགས་པར་གྲགས་པར་བཤད་དེ་ནཱ་རོ་པའི་རྗེས་སུ་སྒོ་གླེགས་པ་མཛད་པའོ། །གསུམ་པ་ནི་ཕམ་ཐིང་པའི་གཅེན་པོ་ཆོས་ཀྱི་བློ་གྲོས་ཞེས་པ་ནཱ་རོ་པའི་སྤྱན་སྔར་ལོ་བཅུ་གཉིས་བཞུགས་ནས་རྒྱ་ནག་གི་རི་བོ་རྩེ་ལྔར་འབྱོན་ཟེར་བ་དེར་མངོན་ནོ། །བཞི་པ་ནི་བལ་པོ་ཕམ་ཐིང་པ་ཞེས་ཀྱང་ཟེར། བལ་ཡུལ་ན་ཨ་དེས་བ་ཆེན་པོར་གྲགས། དགེ་སློང་འཇིགས་མེད་གྲགས་པ་ཞེས་ཀྱང་ཟེར་བ་དེ་ཡིན། དེས་ནཱ་རོ་པའི་སྤྱན་སྔར་ལོ་དགུ་བཞུགས། བདེ་མཆོག་གི་སྒོ་ནས་དམན་པ་དང་འབྲིང་གི་དངོས་གྲུབ་ཐོབ། དེའི་གཅུང་པོ་དུས་འཁོར་བས་ནཱ་རོ་པ་ལ་ལོ་ལྔ་བསྟེན། དེའི་གཅུང་པོ་ཐང་ཆུ་པས་ཀྱང་ནཱ་རོ་པ་ལ་བདེ་མཆོག་གསན། ཁ་ཆེ་
བྱང་ཆུབ་བཟང་པོས་ཀྱང་ནཱ་རོ་པ་བསྟེན་ནས་བདེ་མཆོག་གསན་ནོ། །སྔར་བཤད་པ་བཞིའི་དང་པོ་གཉིས་དང༌། ཕམ་ཐིང་པ་ལ་ཀ་ན་ཀ་ཤྲཱིས་གསན། དེ་ལ་བལ་ཕོ་བ་ཏན་ཏ་ཞེས་ཀྱང་ཟེར། སུ་མ་ཏི་ཀཱིརྟི་ཞེས་ཀྱང་ཟེར་བ་ཐམས་ཅད་མཁྱེན་པ་ཆུང་ངུར་གྲགས་པ་དེས་གསན། མཱ་ན་ཀ་ཤྲཱི་དང་ཕམ་ཐིང་པ་གཉིས་ལ་ཡང་དངོས་སུ་གསན། བལ་པོ་ཐུགས་རྗེ་ཆེན་པོས་ཀྱང་ཀ་ན་ཀ་ཤྲཱི་ལ་གསན། དེ་རྣམས་ལས་བོད་དུ་བརྒྱུད་པ་ལ་ལུགས་མང་དུ་ཡོད་ཀྱང་བོད་དུ་ཕན་འདོགས་ཆེ་བ་ལ་མལ་གྱོ་ལོ་ཙཱ་བ་བློ་གྲོས་གྲགས་དང༌། མར་པ་དོ་པར་གྲགས་པའི་ལོ་ཙྪཱ་བ་མཚན་ངོ་བོ་ཆོས་ཀྱི་དབང་ཕྱུག །གསང་མཚན་མཉྫུ་ཤྲཱི་བཛྲ་བ་ཞེས་པ་གཉིས་སོ། །དེ་ལ་མལ་གྱོས་ཕམ་ཐིང་པ་སྐུ་མཆེད་གསུམ་དང༌། ཁ་ཆེ་བྱང་ཆུབ་བཟང་པོ་དང༌། སུམ་མ་ཏི་ཀཱིརྟི་དང༌། བལ་པོ་ཐུགས་རྗེ་ཆེན་པོ་ལ་གསན། མར་དོར་ཕམ་ཐིང་པ་དང་སུ་མ་ཏི་ཀཱིརྟི་གཉིས་ལ་གསན་ནོ། །རྗེ་བཙུན་ས་སྐྱ་པ་ཆེན་པོས་པུ་རངས་ལོ་ཆུང་དང༌། རྨ་ལོ་ཙྪ་བ་དང༌། མལ་ལོ་ཙྪ་བ་རྣམས་ལ་བདེ་མཆོག་གསན་ཀྱང་མལ་གྱི་ལུགས་ལ་ཚད་མར་མཛད། མལ་དང་ས་ཆེན་གྱིས་རྩ་རྒྱུད་ལ་ཡིག་ཆ་མ་མཛད། མལ་གྱི་གསུང་བགྲོས་ས་ཆེན་གྱི་བཤད་པ་རྣམས། དེའི་སློབ་མ་པུ་ཎྱེ་བཛྲ་ཞེས་པ་ཅིག་གིས་རྩ་རྒྱུད་རྒྱ་ཆེར་འགྲེལ་པ་མུ་ཏིག་འཕྲེང་བ་ཞེས་པ་ཅིག་ཏུ་ཞིབ་ཏུ་གཏན་ལ་ཕབ། མར་དོས་རྩ་རྒྱུད་ཀྱི་རྣམ་བཤད་ཅིག་མཛད། དེའི་སློབ་མ་གཟེ་བ་བདེ་མཆོག་རྡོ་རྗེ་དང༌། རྒྱ་ནམ་མཁའ་དབང་ཕྱུག་དང༌།
ཅོག་རོ་ཆོས་ཀྱི་རྒྱལ་མཚན་རྣམས་ཀྱིས་བདེ་མཆོག་ཤིན་ཏུ་དར་བར་མཛད་དོ། །བླ་མ་འཕགས་པ་འོད་ཅེས་པ་ཇོ་བོ་ལུགས་དང༌། ལོ་ཆུང་དང་ས་སྐྱ་པའི་ལུགས་ཀྱི་དབང་དང་ཁྲིད་དང་བཤད་པ་མངའ་བ་ཅིག་གིས་བུ་སྟོན་ཐམས་ཅད་མཁྱེན་པ་ལ་གནང༌། ཡང་བླ་མ་དེས་མར་དོའི་ལུགས་ཀྱི་བཤད་ལུང་ཡང་རྩེ་བ་ལ་ཞུས་གསུང་པས་ཁོང་ལ་ལོ་ཙ་བ་མཁས་པ་གཉིས་ཀ་ལ་བརྒྱུད་པའི་ནཱ་རོ་པའི་བཤད་སྲོལ་མངའོ། །བུ་སྟོན་ཞབས་ཀྱི་མཛད་པའི་རྩ་རྒྱུད་ཀྱི་རྣམ་བཤད་ཆེན་མོའི་བཤད་ལུང་དེའི་སློབ་མ་བླ་མ་བདེ་ཆེན་པ་ཆེན་པོ་ལ་བདག་གིས་ཐོས་སོ།། ༈ །། གསུམ་པ་ལ་བཞི། མཚན་གྱི་དོན། འགྱུར་གྱི་ཕྱག །གཞུང་གི་དོན། མཇུག་གི་དོན་ནོ། །དང་པོ་ལ་གཉིས། མཚན་བསྒྱུར་བ་དང༌། མཚན་བཤད་པའོ། །དང་པོ་ནི། རྒྱ་གར་ན་སྐད་རིགས་བཞི་ཡོད་པ་ལས་ལེགས་པར་སྦྱར་བའི་སྐད་དུ་ནི། རྒྱུད་འདིའི་མཚན་ཤྲཱི་ནས་ནཱ་མའི་བར་རོ། །དེ་བོད་ཀྱི་སྐད་དུ་བསྒྱུར་ན། ཤྲཱི་ནི་དཔལ་ལོ། །ཧེ་རུ་ཀ་ནི་ཁྲག་འཐུང་ངོ༌། །ཁ་ཅིག་རུ་ཞེས་པའི་རུ་ཏི་ར་ཁྲག་ལ་འཇུག་པས། ཡི་གེའི་ཟུར་དེ་ཙམ་ལ་བརྟེན་ནས་ཁྲག་འཐུང་ཞེས་བསྒྱུར་བ་ནི་འགྱུར་ལེགས་པ་མིན་ནོ་ཞེས་ཟེར་མོད་ཀྱང༌། མར་དོའི་ལུགས་འཛིན་པ་དག་ཡི་གེ་གསུམ་ལ་ཡི་གེ་བསྣན་པའི་ངེས་ཚིག་གི་བཤད་པ་བྱས་པས་ཁྲག་འཐུང་དུ་སོང་བར་བཤད་པ་ལེགས་སོ། །དེ་ཡང་ཧེ་ལ་རོལ་པ་དང༌། རུ་ཏི་ར་ཁྲག་དང་ཀ་པཱ་ལ་ཐོད་པ་སྟེ། བསྡུ་ན་ཐོད་ཁྲག་ལ་
རོལ་པར་འགྱུར་བས་ཁྲག་འཐུང་དུ་བསྒྱུར་རོ། །རཱ་ཛ་ནི་རྒྱལ་པོ་དང༌། ཙ་ཀྲ་ནི་འཁོར་ལོ་དང༌། སཾ་བར་ནི་སྡོམ་པ་དང༌། བྷི་དྷ་ན་ནི་བརྗོད་པ་དང༌། ཡོ་གི་ནི་ནི་རྣལ་འབྱོར་མ་དང༌། རུད་ཏ་ར་ནི་བླ་ན་མེད་པ་དང༌། སརྦ་ཏན་ཏྲ་ནི་རྒྱུད་ཐམས་ཅད་དང༌། ཏྲོད་ཅེས་པའི་ཏྲའི་ན་རོར་སོང་བའི་ཨུ་དང་སྦྱར་བས་ཨུད་ཏ་ར་ནིས་བླ་མ་དང༌། སཾ་བ་ར་ནི་བདེ་མཆོག་དང༌། སཾ་གྲ་ཧ་ནི་བསྡུས་པ་དང༌། ནཱ་མ་ནི་ཞེས་བྱ་བའོ། །མཚན་ལ་མི་འདྲ་བ་མང་དུ་འདུག་ནའང་འདི་མར་དོ་རྐྱང་པའི་འགྱུར་ལྟར་རོ། །གཉིས་པ་ནི། ཀུན་སྤྱོད་ལས། ཤྲཱི་ནི་གཉིས་མེད་ཡེ་ཤེས་ཏེ། །ཞེས་གསུངས་པའི་གཉིས་སུ་མེད་པའི་ཡེ་ཤེས་ནི། འདོད་ཅིང་བསྟེན་པར་བྱ་བས་ན་དཔལ་ལོ། །ཧེ་རུ་ཀ་ནི་བཤད་ཟིན་ལ། དེའི་བཤད་པ་གཞན་ནི་འཆད་པར་འགྱུར་རོ། །རྒྱལ་པོ་ནི་ཐོད་ཁྲག་ལ་རོལ་པ་རྣམས་ཀྱི་གཙོ་བོའོ། །སྡོམ་པ་ནི་འདུས་པ་མཆོག་གོ། སྡོམ་རྒྱུ་ནི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་གསང་བ་གསུམ་གྱི་ལས་སོ། །དེ་ཉིད་ནི་སྐུ་གསུང་ཐུགས་ཀྱི་འཁོར་ལོ་ཡང་ཡིན་ནོ། །སྡོམ་ཚུལ་ནི་སྡོམ་རྒྱུ་དེ་ཐམས་ཅད་དབྱེར་མི་ཕྱེད་པར་གཅིག་ཏུ་སྡོམ་པ་སྟེ། བདེ་སྟོང་གཅིག་ཏུ་སྡོམ་པ་དང་སྐུ་གསུང་ཐུགས་གསུམ་ལྷན་སྐྱེས་ཀྱི་ཧེ་རུ་ཀ་གཅིག་གི་ངོ་བོར་སྡོམ་པ་སྟེ། སྡོམ་འབྱུང་ལས། སྐུ་གསུང་ཐུགས་ཀྱི་ཡང་དག་ལས། །རྣམ་པ་ཐམས་ཅད་གཅིག་སྡོམ་པ། །སྡོམ་པ་བདེ་མཆོག་བྱང་ཆུབ་སྟེ། །བརྗོད་པར་བྱ་མིན་བསྟན་དུ་མེད། །འདུས་པ་སྡོམ་པ་དག་གི་མཆོག །ཅེས་གསུངས་སོ། །
བརྗོད་པ་ནི་འཁོར་ལོ་སྡོམ་པར་གྲགས་པའོ། །རྣལ་འབྱོར་མ་བླ་ན་མེད་པས་ནི་འདི་མ་རྒྱུད་དུ་སྟོན་ནོ། །རྒྱུད་དེ་ཐམས་ཅད་ཀྱི་བླ་མ་ནི་གོང་མ་སྟེ་མཆོག་གོ། །རྒྱུད་ནི་འདུས་པ་ཕྱི་མ་ལས། རྒྱུད་ནི་རྒྱུན་ཞེས་བྱ་བར་གྲགས། །རྒྱུན་དེ་རྣམ་པ་གསུམ་འགྱུར་ཏེ། །གཞི་དང་དེ་བཞིན་རང་བཞིན་དང༌། །མི་འཕྲོགས་པ་ཡིས་རབ་ཕྱེ་བ། །རྣམ་པ་རང་བཞིན་རྒྱུ་ཡིན་ཏེ། །དེ་བཞིན་མི་འཕྲོགས་འབྲས་བུའོ། །གཞི་ནི་ཐབས་ཤེས་བྱ་བ་སྟེ། །གསུམ་གྱིས་རྒྱུད་ཀྱི་དོན་བསྡུས་པའོ། །ཞེས་རྒྱུད་ཀྱི་སྒྲ་དོན་ནི་རྒྱུན་ཆགས་པ་དང༌། དེ་ལ་རང་བཞིན་ཞེས་པ་སྒྲུབ་པ་པོ་རིན་པོ་ཆེ་ལྟ་བུའི་གང་ཟག་གི་རང་བཞིན་རྒྱུ་རྒྱུད་དང༌། གཞི་ཞེས་པ་རིམ་གཉིས་ཀྱི་བསྙེན་སྒྲུབ་ཡན་ལག་བཞི་ཐབས་རྒྱུད་དང༌། མི་གནས་པའི་མྱ་འདས་རྡོ་རྗེ་འཆང་ངམ་ཟུང་འཇུག་གི་སྐུ། གཞན་གྱིས་འཕྲོག་པར་མི་ནུས་པ་འབྲས་བུའི་རྒྱུད་དུ་ནཱ་རོ་པས་བཤད་དེ། དོན་གྱི་རྒྱུད་ལ་གསུམ་དུ་ཕྱེ་བའོ། །ཤཱནྟི་པ་དང་ཨ་བྱ་ཀ་རས་རྒྱུ་རྒྱུད་སེམས་ཀྱི་ཆོས་ཉིད་ལ་བཤད་དོ། །དེ་གསུམ་བརྗོད་བྱར་སྟོན་པའི་སྒྲ་ལ་ཡང་རྒྱུད་ཅེས་བྱ་སྟེ་འདིར་ཕྱི་མའོ། །སཾ་བ་ར་རྟིང་མ་བདེ་མཆོག་ཏུ་བསྒྱུར་བ་ནི་སཾ་སུ་ཁ་ན་བདེ་བ་དང༌། བ་ར་ནི་མཆོག་ཡིན་པ་ལ་བསམས་ཏེ། ཁ་སྦྱོར་གྱི་རྒྱུད་ཕྱི་མ་ལས། དེ་ནས་སྡོམ་པའི་སྒྲས་བརྗོད་པར་བྱ་སྟེ། སཾ་ཞེས་པ་ནི་བདེ་བའོ། །བ་ར་ཞེས་པ་ནི་ཁྱད་པར་དུ་འཕགས་པ་ཞེས་བྱ་བའི་དོན་ནོ། །ཞེས་གསུངས་པ་བཞིན་ཏེ།
སཾ་བ་རའི་དོན་འདི་དང་སྔ་མ་གཉིས་ཀ་ཤེས་དགོས་སོ། །བསྡུས་པ་ནི་རྩ་རྒྱུད་རྒྱས་པ་ལས་ཚིག་བསྡུས་ནས་གསུངས་པའོ། །གཉིས་པ་ནི། བཅོམ་ལྡན་འདས་དང་དཔལ་ནི་གོ་སླའོ། །མཉམ་སྦྱོར་ལས། རྡོ་རྗེ་སྟོང་པ་ཉིད་དུ་བརྗོད། །སེམས་དཔའ་ཡེ་ཤེས་ཙམ་ཉིད་དེ། །དེ་དག་བདག་ཉིད་གྲུབ་པ་ནི། །རྡོ་རྗེ་སེམས་དཔའ་ཞེས་བརྗོད་དོ། །ཞེས་གསུངས་པ་ལྟར། རྡོ་རྗེ་སྟོང་པ་ཉིད་མཐར་ཐུག་པ་དང་སེམས་དཔའ་ཡེ་ཤེས་གཉིས་རོ་གཅིག་ཏུ་ཞུགས་པ་གྲུབ་པ་ལ་ཕྱག་འཚལ་ལོ་ཞེས་པ་ནི་ལོ་ཙྪ་བའི་ཕྱག་གོ། །གསུམ་པ་ལ་གཉིས། ཐོག་མར་འདི་སྐད་སོགས་དངོས་སུ་མ་སྨོས་པའི་རྒྱུ་མཚན། ཚིག་གི་དོན་བཤད་པ་དངོས་སོ། །དང་པོ་ནི། རྒྱུད་འདི་ལ་ཐོག་མར་འདི་སྐད་བདག་ཐོས་སོགས་མི་སྨོས་པའི་རྒྱུ་མཚན་གང་ཡིན་ཞེ་ན། སྐལ་ལྡན་གྲགས་པས་འདི་རྒྱུད་རྒྱས་པ་འབུམ་སྡེ་ལས་བཏུས་ལ། དེར་འདི་སྐད་སོགས་སྨོས་པས་དེའི་རྒྱུད་ཕྱི་མ་འདིར་དེ་མ་སྨོས་ཞེས་འདོད་པ་དང༌། སྟོན་པ་མི་གནས་པའི་མྱ་ངན་ལས་བསྟན་པའི་ཕྱིར་མ་སྨོས་ཞེས་འདོད་པ་དང༌། བསྟན་དུ་མེད་པའི་ཆོས་ཉིད་ལ་བསྟན་བྱ་དང་སྟོན་པ་པོ་གཅིག་ཏུ་བསྟན་པའི་ཕྱིར་མ་སྨོས་པར་འདོད་པ་དང་འདི་སྐད་སོགས་མེད་པར་མཚན་བརྗོད་བཞིན་དུ་ཐེག་པ་ཆེན་པོ་སྟོན་པར་མཛད་དོ། །ཞེས་འདོད་པའི་གཞན་ལུགས་བཞི་བཀོད་ནས། རང་ལུགས་ནི་དང་པོའི་སངས་རྒྱས་རྣམས་ནི་རྒྱུན་ཆད་པ་མི་མངའ་བའི་ཕྱིར། ཆོས་ཀྱི་རྣམ་གྲངས་འདི་ནི་ཐོག་མ་མེད་པའི་རྒྱུན་ཅན་ཡིན་ཏེ། ཤཱཀ་ཐུབ་ལས་སྔ་བར་གནས་ཏེ། །སངས་
རྒྱས་བྱེ་བ་དཔའ་བོ་ནི། །བྱེ་བ་ཉིད་ཀྱིས་ལེགས་པར་གསུངས། །ཞེས་བཤད་པ་ལྟ་བུའོ། །དེའི་དོན་ནི་དུས་ཀྱི་དབང་གིས་སྲེག་པའི་བསྐལ་པ་ལ་སོགས་པས། ཤེར་ཕྱིན་ལ་སོགས་པ་ནུབ་པ་ན་ཤཱཀྱ་ཐུབ་པས་ཡང་གསུངས་སོ། །བདེ་མཆོག་ནི་དེ་ལྟར་མ་ཡིན་ཏེ་སངས་རྒྱས་ཀྱི་ཞིང་བརྗོད་དུ་མེད་པ་རྣམས་ནི་རྒྱུན་མི་འཆད་པ་ཉིད་ཀྱིས་ཉམས་སུ་བླངས་ནས་གནས་པའི་ཕྱིར་རོ་ཞེས་ཟེར་རོ། །འདོད་པ་དང་པོ་ལ་བོད་ཁ་ཅིག་གིས་ཀྱཻ་རྡོར་འབུམ་ལྔའི་རྒྱུད་རྒྱས་པ་ལས་བསྡུས་ཏེ་ལོགས་སུ་བསྟན་པ་བརྟག་གཉིས་ལ་འདི་སྐད་སོགས་གསུངས་པ་ལྟར། འབུམ་དུ་བརྗོད་པ་ལས་བསྡུས་ཏེ་ལོགས་སུ་བསྟན་པའི་རྒྱུད་འདི་ལ་ཡང་སྨོས་ན་འགལ་བ་ཅི་ཡོད་ཅེས་སུན་འབྱིན་ནོ། །དེ་ལ་རྒྱུད་རྒྱས་པ་ལས་བསྡུས་པའི་བསྡུས་རྒྱུད་ཡིན་པ་ཙམ་རྒྱུ་མཚན་དུ་བྱས་ནས། རྒྱས་པ་ལས་ལོགས་སུ་འདི་སྐད་སོགས་མ་བསྟན་པར་འདོད་ན་སྐྱོན་དེ་འཇུག་ཀྱང་དེ་ཙམ་རྒྱུ་མཚན་དུ་བྱེད་པ་མིན་ནོ། །འོ་ན་ཅི་ཞེ་ན། རྒྱུད་ཀྱི་ཐོག་མ་ནས། དེ་ནས་གསང་བ་བཤད་པར་བྱ། །ཞེས་དེ་ནས་ཀྱི་སྒྲ་ཐོག་མར་འབྱུང་བ་རྒྱུད་སྔ་མའི་འཕྲོ་འདི་འདྲ་བའི་རྒྱུད་བསྡུས་པ་ལས། འདི་སྐད་སོགས་མ་བསྟན་ཞེས་པའི་དོན་ཡིན་གྱི། རྒྱུད་རྒྱས་པ་ལས་བསྡུས་པའི་རྒྱུད་ཡིན་ན། འདི་སྐད་སོགས་མི་སྨོས་པ་ཡིན་ནོ་ཞེས་འདོད་པ་མིན་ནོ། །ལྭ་བ་པའི་འགྲེལ་བ་ལས་ཀྱང་དེ་ནས་ཀྱི་ཚིག་གིས་རྒྱུད་སྔ་མའི་མཐའ་ཅན་དུ་བསྟན་པར་གསུངས་སོ། །དེས་ན་ལུགས་འདི་ལ་ཡང་སྔར་བཞིན་དུ་འགོག་པ་ནི་ཕྱོགས་སྔ་མ་མ་
ལོངས་པར་བཀག་པ་ཡིན་ནོ། །ཡང་བོད་ཁ་ཅིག་ལྭ་བ་པས་བདེ་མཆོག་རྩ་རྒྱུད་འབུམ་ཕྲག་གསུམ་པར་འདི་སྐད་བདག་ཐོས་སྨོས། འདི་དེ་ལས་བསྡུས་པའི་ཕྱི་མ་ཡིན་པས་མ་སྨོས། ཞེས་ཟེར་བ་མི་འཐད་དེ། དྲི་མེད་འོད་ལས་རྩ་རྒྱུད་རྒྱས་པ་ནི་འདི་སྐད་བདག་ཐོས་མེད་པར་བཤད་པའི་ཕྱིར་རོ། །ཞེས་འདི་སྐད་བདག་ཐོས་ཡོད་པའི་རྒྱུད་རྒྱས་པ་ལས་བསྡུས་པའི་ཕྱི་མ་ཡིན་པས། འདིར་འདི་སྐད་བདག་ཐོས་མ་སྨོས་པར་བཤད་པ་ནི། སྔར་བཤད་པ་ལྟར་ཕྱོགས་སྔ་མ་གཏན་ནས་མ་ལོངས་པ་ཡིན་ལ། དྲི་མེད་འོད་ལས་མངོན་བརྗོད་འབུམ་ཕྲག་གཅིག་པ་ལ་འདི་སྐད་བདག་ཐོས་སོགས་མེད་པར་བཤད་པ་དང༌། མངོན་བརྗོད་འབུམ་ཕྲག་གསུམ་པ་ལ་ཡོད་པར་བཤད་པ་གཉིས་ལ་འགལ་མེད་པའི་ཕྱིར་ཏེ། རྒྱུད་རྒྱས་པ་ལ་མི་འདྲ་བ་གཉིས་ཡོད་པའི་ཁུངས་རྣམས་བཤད་ཟིན་ཏོ། །དེས་ན་ལྭ་བའི་ན་བཟའ་ཅན་ལྟ་བུའི་རྒྱ་གར་གྱི་གྲུབ་ཆེན་ལ་སྐྱོན་འཛིན་པ་ནི་ཤིན་ཏུ་མི་རིགས་པ་ཆེན་པོའོ། །རྒྱུད་བསྡུས་པ་འདི་ལ་ཡང་འདི་སྐད་བདག་ཐོས་སོགས་ཀྱི་ཚིག་གསལ་པོ་མེད་པ་ཡིན་གྱི། མི་གསལ་བའི་ཚུལ་གྱིས་ཡོད་པར་བཅོམ་ལྡན་འདས་ཉིད་ཀྱིས་གསུངས་ཏེ་འཆད་པར་འགྱུར་རོ། །འདོད་པ་གཉིས་པ་ཡང་མི་འཐད་དེ། མཚན་ཉིད་ཀྱི་མདོ་སྡེའི་ཕྱོགས་ལ་འདི་སྐད་བདག་ཐོས་སོགས་སྟོན་པ་མྱང་ངན་ལས་འདས་རྗེས་སུ་སྡུད་པ་པོས་སྡུད་པར་བཤད་ཀྱང༌། འདིར་བཤད་རྒྱུད་རྡོ་རྗེ་འཕྲེང་བ་དང་དགོངས་པ་ལུང་སྟོན་སོགས་ལས་གསུངས་པ་ལྟར། སྟོན་པ་ཉིད་
ཀྱིས་འདི་སྐད་བདག་ཐོས་སོགས་ལ་བཤད་པ་མཛད་པས། མྱ་ངན་ལས་འདས་རྗེས་སུ་བསྡུས་པས་མ་ཁྱབ་པའི་ཕྱིར་དང༌། སྟོན་པ་མི་གནས་པའི་མྱང་ངན་ལས་འདས་པ་བརྙེས་པར་སྟོན་པ་གསང་འདུས་སོགས་ཀྱིའང་ལུགས་ཡིན་པས། དེ་རྣམས་ལ་ཡང་འདི་སྐད་སོགས་མི་སྟོན་པར་ཐལ་བའི་ཕྱིར་རོ། །འདོད་པ་གསུམ་པ་ཡང་མི་འཐད་དེ། ཀྱཻ་རྡོར་ལས། འཆད་པ་པོ་ང་ཆོས་ཀྱང་ང༌། །ཞེས་གསུངས་པས་དེར་ཡང་འདི་སྐད་སོགས་མི་སྟོན་པར་འགྱུར་རོ། །འདོད་པ་བཞི་པ་ཡང་མི་འཐད་དེ། འདི་སྐད་སོགས་མེད་པར་བཤད་པ་མཚན་བརྗོད་དང་འདྲའོ་ཞེས་བསྟན་པ་ན། དེར་ཡང་དོགས་པ་དེ་འཇུག་པས་བརྒལ་བ་ཉིད་ལན་དུ་སོང་བའི་ཕྱིར་རོ། །རང་ལུགས་བཞག་པ་ཡང་མི་འཐད་དེ། ཤཱཀ་ཐུབ་ལས་སྔ་བའི་གསུང་རབ་ལ་འདི་སྐད་སོགས་མེད་པར་སྒྲུབ་མི་ནུས་པའི་ཕྱིར་དང༌། སངས་རྒྱས་བྱེ་བ་སོགས་ཀྱིས་གསུངས་པ་འདི་སྐད་སོགས་ཡོད་པའི་རྒྱུད་དུ་མ་ལ་ཡང་ཡོད་པའི་ཕྱིར་དང༌། ཕྱོགས་བཅུའི་ཞིང་མཐའ་ཡས་པར་ཉམས་སུ་ལེན་པ་རྒྱུན་མ་ཆད་དུ་ཡོད་པ་མངོན་བརྗོད་དང༌། སྡོམ་འབྱུང་དང་ཤེར་ཕྱིན་གྱི་མདོ་ལ་སོགས་པ་ལ་ཡང་ཡོད་པའི་ཕྱིར། དེ་རྣམས་ལ་ཡང་འདི་སྐད་སོགས་མ་སྨོས་པར་འགྱུར་རོ། །གཉིས་པ་ལ་གསུམ། ལེའུ་དང་པོས་རྒྱུད་དོན་ཀུན་མདོར་བསྟན། ལྷག་མ་ཞེ་དགུས་དོན་དེ་རྒྱས་པར་བཤད། ལེའུ་ང་གཅིག་པས་སྔ་མ་རྣམས་ཀྱི་དོན་བསྡུས་ཏེ་བསྟན་པའོ། །དང་པོ་ལ་གཉིས། གཞུང་དངོས་དང༌། ལེའུའི་
མཚན་བསྟན་པའོ། །དང་པོ་ལ་བཞི། གསང་བ་བཤད་པར་དམ་བཅའ་བ། གསང་བ་ཉན་པར་བསྐུལ་བ། ལམ་གྱི་གསང་བའི་བགྲོད་པ་རྫོགས་པར་བྱེད་པའི་ཐབས། གསང་བ་སྒྲུབ་པའི་གནས་བསྟན་པའོ། །དང་པོ་ནི། དེ་ནས་ཞེས་པ་ལ་སྐད་དོད་ཨཱ་ཐ་ཞེས་པ་ཡོད་ལ། དེ་ལ་ནཱ་རོ་པས་ཚུལ་བཞིར་བཤད་དེ། རྩ་རྒྱུད་སྔ་མ་རྫོགས་ནས་དེའི་ཕྱི་མའི་རྒྱུད་འཆད་པའི་སྐབས་སྦྱོར་བ་སྟེ་ཡི་གེའི་དོན་ནོ། །ཨཱ་ལ་ཡི་གེ་བསྣན་པས་ཨ་ཀཱ་རོ་མུ་ཁཾ་སརྦ་དྷརྨ་ཎཾ་ཞེས་པ་ནི་ཆོས་ཐམས་ཅད་རང་བཞིན་གྱིས་སྐྱེ་བ་མེད་པ་རྟོགས་པའི་ཡེ་ཤེས་ཀྱི་ཚོགས་དང༌། དེའི་ཟླ་སྟོབས་ཀྱིས་ཐ་ནི་བསོད་ནམས་ཀྱི་ཚོགས་ཏེ་སྤྱིའི་དོན་ནོ། །ཨཱ་ཤེས་རབ་ཀྱི་པདྨ་དང༌། ཐ་ཐབས་ཀྱི་རྡོ་རྗེ་ནི་སྦས་པ་སྟེ། སྦས་པའི་ནང་ནས་འདོད་ཆགས་ཆོས་སྦས་སོ། །ཨཱ་ནི་རྣམ་པར་དག་པའི་ཤེས་རབ་དང༌། ཐ་ནི་དམིགས་པ་མེད་པའི་སྙིང་རྗེ་བདེ་བ་ཆེན་པོ་སྟེ་མཐར་ཐུག་པའོ། །གཞན་ཡང་ཨཱ་ཐ་ཞེས་པ་དོན་བཞི་ལ་འཇུག་སྟེ། བཀྲིས་པ་དང༌། ཚིག་ཕྲད་ཀྱི་དོན་དང༌། དེ་མ་ཐག་པའི་དོན་དང༌། དབང་དུ་བྱ་བའི་དོན་ཏེ། དང་པོ་ནི་འདི་ལ་འཇུག་པ་རྣམས་བཀྲ་ཤིས་པར་བྱེད་པའོ། །གཉིས་པ་ནི་དེ་ནས་བཅོམ་ལྡན་འདས་མྱ་ངན་འདས་པའི་དུས་དེ་ཉིད་ན་ཞེས་བྱ་བ་ལྟ་བུ་སྟེ། འདི་ནི་རྒྱུད་རྒྱས་པ་གསུངས་པ་དེ་ནས་བསྡུས་པ་གསུངས་པ་ན་འདི་ལྟར་བཤད་ཅེས་པའོ། །གསུམ་པ་ནི་དེ་ནས་དེ་མ་ཐག་ཏུ་སོམ་ཉི་ཐམས་ཅད་རྣམ་པར་བཅད་ནས་ཞེས་བྱ་བ་ལ་སོགས་པ་ལྟ་བུ་སྟེ། འདིར་ནི་རྩ་རྒྱུད་རྒྱས་པ་གསུངས་པའི་དེ་ནས་ཏེ། དེ་མ་ཐག་ཏུ་འདི་
གསུངས་ཞེས་བར་མ་ཆད་པ་གསལ་བར་བྱེད་དོ། །བཞི་པ་རྒྱུད་དབུ་ཞབས་ཐམས་ཅད་སྟོང་པ་དང་སྙིང་རྗེ་དབྱེར་མེད་པའི་དབང་དུ་བྱས་པར་སྟོན་ཏེ། འདིར་བཤད་པ་བཞི་ག་སྦྱར་རོ། །ཐེག་པ་འདིའི་རིགས་མེད་པ་རྣམས་ལ་གསལ་བར་མ་བྱས་པས་ན་གསང་ཆེན་ནོ། །གསལ་བར་མི་བྱེད་པའི་རྒྱུ་མཚན་ཡང་སྦ་བར་འོས་པ་ཡིན་ལ། དེ་ཡང་བདུན་ཏེ། གསང་བ་དེ་ཉིད་ཡུལ་དང་ནི། གསང་བ་རྒྱས་པའི་འཁོར་ལའོ། །གསང་བ་སྦས་པ་བདེན་པ་སྟེ། གསང་བ་གསང་བའི་པདྨའོ། །གསང་བ་ས་བོན་གྱིས་དགའ་བ། །གསང་བ་ཐམས་ཅད་འདུས་པ་སྟེ། གསང་བ་བར་ཆད་མེད་བདེའོ། །ཞེས་ལྭ་པ་བའི་འགྲེལ་བར་དྲངས་ཏེ། ཅུང་ཟད་ཙམ་མ་གཏོགས་པ་ཁ་སྦྱོར་ཕྱི་མ་ནས་ཀྱང་དེ་བཞིན་དུ་བཤད་དོ། །དེ་རྣམས་ཀྱི་དོན་ལ། དང་པོ་ནི་ཤེས་རབ་ཀྱི་ཡུལ་དེ་ཁོ་ན་ཉིད་དང༌། གཉིས་པ་ནི་ལྷའི་འཁོར་ལོ་དང༌། གསུམ་པ་ནི་ཁ་སྦྱོར་ཕྱི་མ་ལས། གསང་བ་ནི་དམ་པའི་དངོས་པོ་སྦས་པའོ་ཞེས་གསུངས་པས་སྦས་པ་མཆོག་རྣམས་སོ། །བཞི་པ་ནི་རྩ་བའི་འཁོར་ལོ་ལ་པདྨར་བཤད་པ་དང༌། ཕྱག་རྒྱའི་པདྨ་དང༌། ལྔ་པ་ནི་སྦྱི་བོའི་ས་བོན་ཧཾ་ལས་བྱང་སེམས་འཛགས་པ་ལས་སྐྱེས་པའི་དགའ་བ་དང༌། དྲུག་པ་ནི་རྡོ་རྗེ་དང་པདྨ་སོགས་ཀྱི་གསང་བ་རྣམས་འདུས་པ་དང༌། བདུན་པ་ནི་ཡུལ་དེ་ཁོ་ན་ཉིད་དང་ཡུལ་ཅན་གཉིས་བར་དུ་ཆད་པ་མེད་པ་རོ་གཅིག་ཏུ་ཞུགས་པའོ། །སློབ་དཔོན་ཀོང་ཀ་ན་པ་བསང་བ་ཁྱད་པར་གྱི་གཞིར་བྱས་ནས། ཤྲཱི་ཧེ་རུ་ཀ་ཞེས་པའི་
རྐང་པ་བཞི་དེའི་ཁྱད་པར་གྱི་ཆོས་སུ་སྦྱར་རོ། །བཤད་པ་དེ་གཉིས་དང་བླ་མ་རྣམས་འདིའི་གསང་བ་ལ་ལམ་དང་འབྲས་བུའི་གསང་བ་གཉིས་ལ་སྦྱོར་བར་བཤད་པ་ལ་ནི་དོན་མི་མཐུན་པ་མེད་དོ། །དེ་འདྲ་བའི་གསང་བ་བཤད་པར་བྱའོ་ཞེས་དམ་བཅས་པ་ལ་འཆད་བྱེད་ཀྱི་གཞུང་ཇི་ལྟ་བུ་སྙམ་ན། རྩ་རྒྱུད་རྒྱས་པ་ལས་བཏུས་པའི་གཞུང་མདོར་བསྡུས་པ་སྟེ། དེ་ཡང་དོན་ནི་བསྡུས་པ་མིན་གྱི་རྒྱས་པའོ། །ཞེས་མིན་རྒྱས་པའི་དོན་དུ་བཤད་དོ། །རྩ་རྒྱུད་གང་ལས་ན་ལང་ཀ་རྒྱས་བཟང་དང་དཔའ་བོ་རྡོ་རྗེ་སོགས་ཀྱིས་ནམ་མཁའ་དང་མཉམ་པའི་རྒྱུད་འབུམ་པ་ལས་བཏུས་པར་འཆད་དོ། །ཀུན་སྤྱོད་ལས་ནི་རྒྱུད་འདི་གང་ལས་བཏུས་པའི་རྩ་རྒྱུད་འབུམ་པ་དང༌། ནམ་མཁའ་དང་མཉམ་པ་གཉིས་སོ་སོར་གསུངས་སོ། །ལྭ་བ་པས་རྩ་རྒྱུད་འབུམ་ཕྲག་གསུམ་པ་ལས་བཏུས་པར་བཤད་པ་མཁའ་འགྲོ་རྒྱ་མཚོ་དང་མཐུན་ནོ། །དཔེ་ཁ་ཅིག་ལས། དེ་ནས་དེ་ལས་གསང་བ་བཤད། ། ཅེས་པ་ལྟར་ན་རྒྱུད་རྒྱས་པ་དེ་ལས་བཏུས་ཏེ་འཆད་ཅེས་པའོ། །ཡང་ཁ་ཅིག་ལས། དེ་ནས་དེ་ཕྱིར་གསང་བ་བཤད། །ཅེས་པ་ལྟར་ན་ཞུ་བ་པོས་ཞུས་པ་དེའི་ཕྱིར་རམ་ཆེད་དུ་བཤད་ཅེས་པའོ། །གཉིས་པ་ལ་གཉིས། མཉན་བྱའི་གསང་བ་དང༌། དེ་ཉན་པར་བསྐུལ་བ་ལ་དངོས་སོ། །དང་པོ་ལ་གཉིས། གསང་བ་རྣམ་པར་བཞག་པ་བསྡུས་ཏེ་བསྟན་པ་དང༌། རྣམ་པར་བཞག་པ་དེ་ཅུང་ཟད་རྒྱས་པར་བཤད་པའོ། །དང་པོ་ལ་གཉིས། དྲང་བའི་དོན་དང༌། ངེས་པའི་དོན་དུ་བཤད་པའོ། །དང་པོ་ནི། སྒྲུབ་པ་པོ་བདག་
ཉིད་ཤྲཱི་སྟེ་དཔལ་ཧེ་རུ་ཀ་ཞལ་ཕྱག་གི་རྣམ་པ་ཅན་དུ་བྱས་པ་དང༌། རིག་མ་རྡོ་རྗེ་ཕག་མོར་བྱས་པ་གཉིས་ཡང་དག་པར་སྦྱོར་བའི་ལྷའི་སྐུ་ཕྱག་རྒྱ་ཆེན་པོའི་མཚན་ཉིད་ཅན་གཙོ་བོ་ཡབ་ཡུམ་དང༌། དེའི་འཁོར་ཕུན་སུམ་ཚོགས་པ་ལ་མཁའ་འགྲོ་མ་ནི་སྙིང་པོའི་རྣལ་འབྱོར་མ་བཞི་ལ་སོགས་པ་རྣལ་འབྱོར་མ་སོ་དྲུག་དང༌། དེས་མཚོན་ནས་དཔའ་བོ་ཉེར་བཞི་སྟེ་དྲ་བ་ནི་དེ་རྣམས་ཀྱི་ཚོགས་སོ། །སཾ་བ་རའི་སཾ་མམ་ཤཾ་ནི་བདེ་བ་དང༌། བ་ར་ནི་མཆོག་སྟེ་བདེ་བ་མཆོག་ལ་བཤད་པས་འཁོར་དེ་རྣམས་སྐད་ཅིག་རེ་རེ་ལ་བདེ་བས་མཉེས་པའི་ཕྱིར་རོ། །རྐང་པ་ཐ་མ་འཁོར་ལ་སྦྱོར་བ། ལྭ་བ་པའི་བཤད་པ་འདི་བླ་མ་སྔ་མའི་བཤད་སྲོལ་ལ་ཡང་སྦྱར་ན་ལེགས་ཏེ། འདི་ནི་གསང་བ་བསྐྱེད་རིམ་ལ་སྦྱར་བའོ། །གཉིས་པ་ནི། ཤྲཱི་ཧེ་རུ་ཀ་ཡང་དག་སྦྱོར་ཞེས་སོགས་ཀྱི་གཞུང་འདི་འདྲའི་རིགས་རྣམས་རྩ་རྒྱུད་ཀྱི་འགྲེལ་བ་གཞན་རྣམས་ནས། དང་པོར་སྲོག་དྷཱུ་ཏཱིར་འཛུད་པའི་ཐབས་རྣམས་ལ་སྦྱར་བའི་ངེས་དོན་གྱི་བཤད་པ་ཕལ་ཆེར་མི་འབྱུང་བ་ནི། དཔའ་བོ་རྡོ་རྗེའི་འགྲེལ་པ་ལས། རྫོགས་པའི་རིམ་པའོ། །འདིར་ཁྱད་པར་ཡོད་པ་རྣམས་ནི་མ་བྲིས་ཏེ། བླ་མ་ལ་མི་ལྟོས་པ་དང༌། གདམས་ངག་ཆེན་པོ་བསྲུང་བའི་ཕྱིར་རོ། །དེའི་ཕྱིར་རྟོག་པ་སྔོན་དུ་སོང་བས་བླ་མ་མཉེས་པར་བྱས་ལ། དཔལ་ཧེ་རུ་ཀ་མངོན་པར་བརྗོད་པའི་རྗེས་སུ་འབྲང་བ་རྟོགས་པར་བྱའོ། །ཞེས་འབྱུང་བ་ལྟར་དེ་རྣམས་ཀྱི་མན་ངག་ལོགས་སུ་ཤེས་པར་བྱ་བ་ལ་བསམས་སོ། །ནཱ་རོ་པའི་
བཤད་སྲོལ་འདི་ལ་གཞུང་རྣམས་ཀྱི་རྫོགས་རིམ་ཡང་རྒྱུད་ཀྱི་བཤད་པའི་སྐབས་སུ་རགས་རིམ་རེ་འབྱུང་བ་ལྟར་གཞན་དུ་ཡང་འབྱུང་སྟེ། འདིར་ནི་དེའི་ལུགས་ལྟར་འཆད་དོ། །བླ་མ་ཁ་ཅིག་ཤྲཱི་ལ་སོགས་པའི་ཡི་གེ་བཞི། རྩ་འཁོར་བཞི་དང༌། དགའ་བ་བཞི་དང༌། རྣལ་འབྱོར་བཞི་དང༌། དབང་བཞི་ལ་སོགས་པ་དུ་མ་ཞིག་ལ་སྦྱོར་མོད། མན་ངག་གི་བཤད་པ་ལ་ཡང་དེའི་བཤད་པ་ཐམས་ཅད་ལ་གཞུང་ཚད་ལྡན་གྱི་ཁུངས་མི་དགོས་ཀྱང༌། དོན་གྱི་གཙོ་བོ་རྣམས་ལ་གཞུང་གི་ཁུངས་མེད་པའི་འདོད་པས་ཀུན་བཏགས་པ་ལ་མན་ངག་གི་བཤད་པར་བྱས་ན། བཤད་པ་ལྟར་སྣང་ཐམས་ཅད་ལ་ཡང་རང་གི་བརྒྱུད་པ་སངས་རྒྱས་ནས་དེད་པ་མན་ངག་ཡིན་ཞེས་འཆད་པར་སྣང་བས། རྣམ་པར་དབྱེ་བ་འབྱེད་མི་ནུས་པས་ཆོས་ཡང་དག་ནུབ་པའི་རྐྱེན་དུ་འགྲོ་བའི་ཕྱིར་སྤང་པར་བྱའོ། །ཡང་རྒྱུད་དང་འགྲེལ་བའི་ཁུངས་ཡོད་དུ་ཆུག་ཀྱང༌། དེ་རྣམས་འདུག་ཚད་ནས་གཡབས་པའི་བཤད་པ་ལ་ཡང་ཧ་ཅང་བཤད་པའི་སྐྱོན་ཡོད་པས་འཚམ་པ་རེ་བཤད་པར་བྱའོ། །འདིར་བླ་མ་མ་དོས་ཧེ་རུ་ཀ་དཔྱིད་དང་ཕག་མོ་ཐིག་ལེར་བྱས་པའི་སྟེང་ནས་རིམ་པ་བཞི་པ་དང་སྦྱོར་བ་ལེགས་པས་དེ་ལྟར་བཤད་ན། བཤད་རྒྱུད་ཁ་སྦྱོར་ཐིག་ལེ་ལས་གསུངས་པ་ལྟར། དཔྱིད་ཐིག་ཏུ་ཡང་བཤད་པ་ན། ཤྲཱི་ཧེ་རུ་ཀ་ནི་སྙིང་གའི་རྩ་འཁོར་གྱི་དབུས་སུ། མགོ་ཐུར་བསྟན་གྱི་ཧཱུཾ་སྟེ་བསན་ཏ་ཞེས་པའི་དཔྱིད་དོ། །ཕག་མོ་ནི་ལྟེ་བའི་རྩ་འཁོར་གྱི་དབུས་ཀྱི་གཏུམ་མོ་ཁྲག་གི་ཐིག་ལེ་ཨཾ་ཡིག་སྟེ། ཏི་ལ་ཀ་ཞེས་པའི་ཐིག་ལེའོ། །རྩ་འཁོར་དེ་གཉིས་སྟེང་
མ་ཐུར་བསྟན་དང་འོག་མ་གྱེན་བསྟན་དུ་ཁ་སྦྱོར་གྱི་རྣམ་པར་ཡོད་པ་ནི། དེ་གཉིས་ཡང་དག་པར་སྦྱོར་བའོ། །དེ་ལྟར་བཤད་པ་དེ་དང་བཤད་རྒྱུད་ལ་བརྟེན་ནས་མགྲིན་པའི་རྩ་འཁོར་གྱི་ཨོཾ་ཡིག་དང༌། སྤྱི་བོའི་རྩ་འཁོར་གྱི་ཧཾ་ཡིག་གཉིས་སྟེང་དང་འོག་ཏུ་སྦྱོར་བ་ཡང་གོ་བར་ནུས་པས། རྐང་པ་དང་པོས་རྒྱུད་ཀྱི་རིམ་པ་སྟོན་ནོ། །མཁའ་འགྲོ་མ་ནི་རྩ་སོ་དྲུག་དང་དྲ་བ་ནི་རྩའི་ཚོགས་སོ། །རྩ་དེ་དག་གི་ནང་ནས་རྒྱུ་བའི་རླུང་གིས་བསྐུལ་བའི་བྱང་སེམས་བབ་པ་ལས་སྐྱེས་པའི་ཡེ་ཤེས་ནི་སྡོམ་པ་ཞེས་པ་བདེ་བའི་མཆོག་གོ། དེ་ལྟར་ཡང་དེ་ཉིད་གསལ་བ་ལས། རྣལ་འབྱོར་མ་རྩ་སུམ་ཅུ་དྲུག །རྩ་ནི་མགོ་ལས་སྐྱེས་ཞེས་བརྗོད། །དེ་ཡིས་བསྐུལ་བའི་ཡེ་ཤེས་ནི། །མཆོག་ཏུ་དགའ་བའི་ངོ་བོ་སྟེ། །ཞེས་གསུངས་སོ། །གཞན་ཡང་དེ་ཁོ་ནར་ཆོས་རྣམས་རྒྱུས་སྟོང་པའི་ཧེ་དང༌། རང་གི་ངོ་བོ་ཉམས་པ་སྟེ་དེས་སྟོང་པའི་རུ་དང༌། གནས་གང་དུ་ཡང་མི་གནས་པའི་ཀ་སྟེ། དེ་འདྲ་བའི་སྟོང་པ་ཉིད་དང་ཤྲཱིའི་དོན་བདེ་བ་ཆེན་པོའི་ཡེ་ཤེས་གཉིས་ཡང་དག་པར་སྦྱོར་བ་ནི། ཤྲཱི་ཧེ་རུ་ཀ་ཡང་དག་སྦྱོར་གྱི་དོན་ཡིན་ཏེ། དེ་ཉིད་གསལ་བ་ལས། ཧེ་ནི་རྒྱུ་དང་བྲལ་བ་སྟེ། །རུ་ནི་ངོ་བོ་ཉམས་པས་སོ། །ཀ་ནི་གང་ནའང་མི་གནས་པ། །ཤྲཱི་ནི་གཉིས་སུ་མེད་པར་གནས། །ཞེས་གསུངས་སོ། །ཤྲཱི་ཧེ་རུ་ཀ་ཡང་དག་སྦྱོར་གྱི་དོན་གཞན་ཡང་དེ་ཉིད་གསལ་བ་ལས། ཤྲཱི་ཞེས་བྱ་བ་བྷ་གར་བརྗོད། །ཧེ་རུ་ཀ་ནི་སེམས་ཞེས་བྱ། །མཁའ་དབྱིངས་གནས་པ་དེ་ཉིད་དེ། །
ཤྲཱི་ཧེ་རུ་ཀ་ཞེས་བྱར་བརྗོད། །རྒྱུད་བྱེད་པ་ནི་ཡེ་ཤེས་ཏེ། །དེ་ལས་སྐྱེས་པ་ཞེས་བྱ་སྟེ། །རྣལ་འབྱོར་མ་རྣམས་ལེགས་འདུས་པའི། །ཛཱ་ལ་དྷ་ར་དཔལ་གནས་སུའོ། །ཞེས་གསུངས་སོ། །དེ་དག་གི་དོན་ནི་བྷ་ག་སྟེ་དེ་ཡང་གང་ལ་བརྟེན་ནས་བྱང་ཆུབ་ཀྱི་སེམས་འབབ་པའི་གནས་སོ། །ཤྲཱི་ནི་དཔལ་ཡིན་ལ་དཔལ་གྱི་གནས་ནི་བྷ་ག་སྟེ། རྣལ་འབྱོར་མ་སྟེ་རྩ་རྣམས་ལེགས་པ་འདུས་པའི་གནས་ནང་གི་ཡུལ་ཉེར་བཞིའི་ཡ་གྱལ་སྤྱི་གཙུག་ཛཱ་ལ་དྷ་ར་སྟེ། གནས་འདིའི་ཧཾ་ཡིག་ལས་བྱང་སེམས་འབབ་པའི་ཕྱིར་རོ། །དེ་ལྟར་ཡས་བབས་ཀྱི་དུས་སུ་ཐོག་མར་དེ་ནས་བྱང་སེམས་འབབ་པའི་ཕྱིར་དང༌། མས་བརྟན་གྱི་དུས་སུ་དེར་བྱང་སེམས་བརྟན་ན་བདེ་བ་བརྟན་པའི་ཕྱིར་ན་དཔལ་གྱི་གནས་ཞེས་བྱའོ། །ཧེ་རུ་ཀ་བྱང་ཆུབ་ཀྱི་སེམས་ལ་བཤད་པ་ཀུན་རྫོབ་པ་ལ་བྱས་ན་ཀུནྡ་ལྟ་བུ་ཡིན་ལ། དེ་དང་སྦྱོར་བ་ནི་དེ་རྩ་འཁོར་གྱི་ལྟེ་བར་སྦྱར་བ་ལས་དགའ་བ་རྣམས་སྐྱེ་བའོ། །དོན་དམ་པ་ལ་བྱས་ན་བདེ་བ་ཆེན་པོ་སྟེ་དེ་དང་ནམ་མཁའི་དབྱིངས་སྟོང་པ་ཉིད་གཉིས་སྦྱོར་བ་ནི་ཡང་དག་སྦྱོར་གྱི་དོན་ནོ། །རྒྱུད་བྱེད་པ་སྟེ་མཛད་པ་པོ་ལ་ཧེ་རུ་ཀ་ཞེས་ཟེར་བའི་ངེས་དོན་ནི་ལྷན་ཅིག་སྐྱེས་པའི་ཡེ་ཤེས་སོ། །དེ་ནི་ཤྲཱིའི་དོན་བྷ་ག་ལས་སྐྱེས་པའོ། །རྐང་པ་གཉིས་རྫོགས་རིམ་ལ་སྦྱར་བའི་རྐང་པ་དང་པོ་ལ་བཤད་པ་གསུམ་ཡོད་པའི་དང་པོ་དང༌། གསུམ་པའི་ཧེ་རུ་ཀའི་ཕྱོགས་གཅིག་དང༌། ཤྲཱི་ན་རྫོགས་རིམ་པའི་བདེ་ཆེན་འདྲེན་པའི་ཐབས་དང༌། བཤད་པ་གཉིས་པ་དང་གསུམ་པའི་ཧེ་རུ་ཀའི་ཕྱོགས་གཅིག་དང༌། རྐང་པ་
ཐ་མའི་བཤད་པས་ནི་ཐབས་དེས་དྲངས་པའི་བདེ་བ་དང་སྟོང་པ་སྦྱར་བའི་བདེ་སྟོང་དབྱེར་མེད་བསྟན་ཏོ། །ཧེ་རུ་ཀ་དང་རྡོ་རྗེ་ཕག་མོ་སོགས་ཞལ་ཕྱག་གི་རྣམ་པ་ཅན་དུ་བྱུང་བ་ཐམས་ཅད། ཡང་ན་བསྐྱེད་རིམ་ལ་སྦྱོར་ཡང་ན་འབྲས་བུའི་སྐབས་ལ་སྦྱར་ནས། རྫོགས་རིམ་ལ་མི་སྦྱོར་བ་ནི་བསྐྱེད་རིམ་པས་ལྷ་སྐྱེད་པ་སྔགས་སྐུ་དང༌། རྫོགས་རིམ་པས་ལྷ་སྐྱེད་པ་ཡེ་ཤེས་ཀྱི་སྐུ་གཉིས་ཀྱི་ཁྱད་པར་དང༌། རྟོག་པས་བཏགས་ནས་ལྷའི་སྐུ་སྐྱེད་པ་དང༌། བཏགས་པ་མིན་པར་རླུང་སེམས་ཙམ་ལས་དོན་ལ་ལྷ་སྐུར་སྐྱེས་པའི་ཁྱད་པར་རྣམས་ལེགས་པར་མ་ཕྱེད་པསའི་སྐྱོན་དུ་སྣང་ངོ༌། །དེས་ན་བཤད་རྒྱུད་ལས། བསྐྱེད་པའི་རྣལ་འབྱོར་དཀྱིལ་འཁོར་བསྒོམ། །རྟུལ་འབྲིང་དག་གིས་བསམ་པར་བྱ། །རྣོན་པོ་སྐད་ཅིག་རྣམ་པ་ཡིས། །སེམས་ཙམ་ཉིད་ཀྱི་དཀྱིལ་འཁོར་ཏེ། སྐད་ཅིག་རྣམ་པའི་རྣལ་འབྱོར་གྱིས། །རྫོགས་པའི་རིམ་པ་བསྒོམ་པར་བྱ། །ཁམས་གསུམ་རང་བཞིན་གཞལ་ཡས་ཁང༌། །སྲོག་ཆགས་རྣམས་ནི་དཀྱིལ་འཁོར་པ། །སྐད་ཅིག་རྣམ་པའི་རྣལ་འབྱོར་གྱིས། །དེ་དབུས་དཀྱིལ་འཁོར་བདག་པོའོ། །ཞེས་དང༌། དེ་བཞིན་ཉིད་རྒྱས་བཏབ་འཁོར་ལོ། །མཁའ་བཞིན་སྟོང་ཉིད་དེ་བཞིན་ནོ། །བདག་མེད་དང་ནི་དེ་བཞིན་ཉིད། །སྣ་ཚོགས་ཐབས་དང་སྙིང་རྗེའི་སྟོབས། །ཟུང་འཇུག་གཉིས་མེད་ལྷུན་གྱིས་གྲུབ། །དཀྱིལ་འཁོར་སྙིང་པོ་མཆོག་ཡིན་ནོ། །ཞེས་བསྐྱེད་རིམ་པ་དང་རྫོགས་རིམ་པའི་དཀྱིལ་འཁོར་གྱི་འཁོར་ལོའི་ལྷ་གཉིས་སོ་སོར་གསུངས་ཤིང༌།
སྐད་ཅིག་རྣམ་པ་ཡིས་སེམས་ཙམ་གྱི་དཀྱིལ་འཁོར་ཞེས་པ་ནི། ཆུ་ལས་ཉ་ལྡང་བ་བཞིན་དུ་འོད་གསལ་གྱི་རླུང་སེམས་ཙམ་ལས་དཀྱིལ་འཁོར་གྱི་འཁོར་ལོར་ཡུད་ཙམ་ལ་ལྡང་བའི་རིམ་པ་སྟོན་པ་ཡིན་གྱི། དཀྲོངས་སྐྱེད་བྱེད་པའི་དོན་མིན་ནོ། །དེས་ན་རྟུལ་འབྲིང་བསྐྱེད་རིམ་མཐར་ཕྱིན་གྱི་བར་དང་རྣོན་པོ་ནི་དེ་མཐར་ཕྱིན་པ་ལ་བརྟེན་ནས་རྫོགས་རིམ་པའི་ཡེ་ཤེས་ཀྱི་སྐུ་སྒོམ་ནུས་པ་ནས་ཡིན་ཏེ། གང་ཟག་གཅིག་ཉིད་ལམ་གྱི་རིམ་པ་གཉིས་ལ་བལྟོས་ནས་དབང་པོའི་རིམ་པ་སོ་སོ་བར་བཞག་པར། མཁས་པ་ཨ་བྷྱ་ཀ་ར་དང༌། རཏྣ་རཀྵི་ཏ་རྣམས་བཞེད་དོ། །དེ་བཞིན་ཉིད་དང་བདག་མེད་པ་ཐམས་ཅད་སྟོང་པ་ནམ་མཁའ་ལྟ་བུའི་དོན་གྱི་འོད་གསལ་གྱི་ཤེས་རབ་དང༌། དེས་རྒྱས་བཏབ་པ་སྟེ་དེ་དང་དབྱེར་མེད་པའི་སྙིང་རྗེའི་སྟོབས་སྣ་ཚོགས་པའི་སྐུ་མདོག་ཅན་གྱི་འཁོར་ལོའི་ཐབས་གཉིས་སྦྱོར་བ་ནི་ཟུང་འཇུག་གི་ལྷའི་དཀྱིལ་འཁོར་དུ་གསུངས་སོ། །སྣང་ཕྱོགས་ཀྱི་རྫོགས་རིམ་སྒྱུ་མའི་སྐུ་འདི་ནི་རྒྱུད་འདིའི་ལུགས་ལ་ཡང་ཤིན་ཏུ་གལ་ཆེ་སྟེ། མཁའ་འགྲོ་རྒྱ་མཚོ་ལས། ལྷ་ཡི་རྣམ་པའི་རྣལ་འབྱོར་བདག སྐད་ཅིག་མངོན་སུམ་བྱེད་པ་པོ། །ལུགས་མ་ལ་སོགས་རྣལ་འབྱོར་གྱིས། །རྣམ་པར་བྱས་པའི་དབྱིབས་སུ་འགྱུར། །སྟོང་ཉིད་རྣལ་འབྱོར་རང་བཞིན་གཟུགས། །བདག་བྱིན་བརླབ་པའི་མཚན་ཉིད་དོ། །བདག་བྱིན་བརླབ་བྲལ་རྣལ་འབྱོར་པ། །སྤུན་ཀོགས་དུམ་བུ་བཞིན་ཤེས་བྱ། །འདི་འདྲའི་མཚན་ཉིད་མཆོག་གྱུར་པ། །སྐྱེ་བོ་ཕྱུགས་རྣམས་ཀྱིས་མི་ཤེས། །དེ་ཕྱིར་སྒྱུ་འཕྲུལ་འདི་བསྒོམས་ན། །བླ་ན་མེད་པའི་བྱང་ཆུབ་འཐོབ། །ཅེས་གསུངས་ཏེ།
ལྷའི་རྣམ་པའི་རྣལ་འབྱོར་གྱི་བདག་ཉིད་རྣལ་འབྱོར་པས་སྐད་ཅིག་ཙམ་གྱིས་མངོན་སུམ་བྱེད་པ་པོ། སྟོང་པ་ཉིད་འོད་གསལ་གྱི་རྣལ་འབྱོར་ཏེ་དེ་དང་དབྱེར་མེད་པར་སྦྱོར་བའི་འོད་གསལ་གྱི་ཡེ་ཤེས་ཀྱི་རང་བཞིན་ཏེ་ངོ་བོར་གྱུར་པའི་གཟུགས་ནི། བདག་བྱིན་གྱིས་བརླབ་པའི་མཚན་ཉིད་དོ། །ཞེས་སྒྱུ་མའི་སྐུ་ངོས་གཟུང་ངོ༌། །ལྷའི་རྣམ་པ་དང་གཟུགས་ཞེས་གསུངས་པའི་གཟུགས་ཀྱི་རྣམ་པ་ཇི་ལྟ་བུ་ཞིག་ཡིན་པ་ནི། ལུགས་མ་ཞེས་པའི་རྐང་པ་གཉིས་ཀྱིས་བསྟན་ཏེ། དེ་དང་རས་བྲིས་སོགས་ཀྱི་ལྷ་ཞལ་ཕྱག་གི་རྣམ་པ་ཅན་ལ་དམིགས་ནས་སྒོམ་པའི་སྐུ་དང་འདྲ་བའི་གཟུགས་སོ། །སྒྱུ་མའི་སྐུ་དེ་དང་བྲལ་ན་སྦུན་ཀོགས་བཞིན་དུ་སྙིང་པོ་མེད་པ་དང༌། མཚན་ཉིད་མཆོག་དེ་ཡང་ཕྱུགས་དང་འདྲ་བ་རྣམས་ཀྱིས་མི་ཤེས་པ་དང༌། སྒྱུ་འཕྲུལ་ཏེ་སྒྱུ་མའི་སྐུ་དེ་བསྒོམས་ན་བྱང་ཆུབ་མྱུར་དུ་འཐོབ་པར་གསུངས་ཏེ། སྐུ་འདི་སྒྲུབ་མི་ཤེས་ན་རྫོགས་རིམ་གྱི་གཙོ་བོ་གཉིས་ཡོད་པའི་ཕྱེད་མི་ཤེས་པ་ཡིན་ནོ། །ཚུལ་འདི་ལཱུ་ཨི་པ་དང་དྲིལ་བུ་པའི་རྫོགས་རིམ་ལས་ཀྱང་འབྱུང་བར་དེ་དག་གི་རྣམ་བཤད་དུ་བཤད་ཟིན་ཏོ། །དེས་ན་རྫོགས་རིམ་ལ་སྟོང་ཕྱོགས་བདེ་སྟོང་དབྱེར་མེད་ཀྱི་ཧེ་རུ་ཀ་དང༌། སྣང་ཕྱོགས་བདེན་གཉིས་དབྱེར་མེད་ཀྱི་སྒྱུ་མའི་སྐུའི་ཧེ་རུ་ཀ་གཉིས་ཤེས་པར་བྱ་སྟེ། །འདི་སྐབས་འོག་མ་རྣམས་སུ་ཡང་ཡང་དང་ཡང་དུ་ཤེས་པར་བྱའོ། །དེ་དག་ནི་གསང་བ་རྫོགས་རིམ་ལ་སྦྱར་བའོ། །རྐང་པ་གཉིས་པ་དང་གསུམ་པས་གསང་བའི་ལམ་གྱི་ཁྱད་པར་སྟོན་པ་རིམ་གཉིས་ཐུན་མོང་དུ་
བཤད་ན། བྱེད་ལས་ཀྱི་ཁྱད་པར་ནི་མངོན་པར་འདོད་པའི་ཐོབ་བྱའི་དོན་ཕྱོགས་རེ་བ་མིན་པར་ཀུན་ཏེ་མ་ལུས་སྒྲུབ་པར་བྱེད་པའོ། །ཟབ་པའི་ཁྱད་པར་ནི་ཕར་ཕྱིན་ཐེག་པའི་སྐོར་ལས་བླ་མ་སྟེ་གོང་མར་གྱུར་པ་རྒྱུད་སྡེ་འོག་མ་གསུམ་ལས་ཀྱང༌། བླ་མ་སྟེ་གོང་མར་འགྱུར་ཞིང་གོང་ན་མེད་པའི་གསུང་རབ་ཀྱི་ལམ་མོ། །འདོད་པའི་དོན་ཀུན་སྒྲུབ་བྱེད་པ། །ཞེས་པའི་ཤུགས་ཀྱིས་དངོས་གྲུབ་གཉིས་བསྒྲུབ་བྱར་བསྟན་པས་ནི་འབྲས་བུའི་གསང་བ་བསྟན་ཏོ། །ཞེས་གོང་མ་རྣམས་གསུང་ངོ༌། །གཞུང་དེ་རྣམས་ཀྱིས་ནི་རྒྱུད་ཀྱི་དགོས་འབྲེལ་ཡང་སྟོན་ཏེ། གསང་བ་གསུམ་ཡན་ལག་དང་བཅས་པ་ནི་འདིའི་བརྗོད་བྱའོ། །དེ་འདི་ལ་བརྟེན་ནས་ཇི་ལྟ་བ་བཞིན་དུ་རྟོགས་པ་ནི་དངོས་ཀྱི་དགོས་པ་ཡིན་ལ། དེ་ལ་བརྟེན་ནས་རིམ་གཉིས་སོ་སོ་ལ་ནུས་པ་རྙེད་པ་ཡང་དགོས་པའོ། །དགོས་པའི་དགོས་པ་མཆོག་ནི་སངས་རྒྱས་དང༌། ཕལ་པ་ནི་འཇིག་རྟེན་པའི་དངོས་གྲུབ་བོ། །དངོས་ཀྱི་དགོས་པ་རྗོད་བྱེད་ལ་རག་ལས་པ་དང༌། ཉིང་དགོས་དགོས་པ་ལ་རག་ལས་པའི་ཆ་ནི་འབྲེལ་བའོ། །གཉིས་པ་ལ་གསུམ། དོན་དངོས་དང༌། རྙེད་དཀའ་བ་དང༌། བདེ་སྟོང་སྦྱོར་བའི་དཔེ་བསྟན་པའོ། །དང་པོ་ལ་གསུམ། གསང་བ་མཆོག་ཅེས་སོགས་ཀྱི་རྐང་པ་གཉིས་བཤད་པ་དང༌། མཁའ་འགྲོ་ཀུན་དངོས་ཞེས་སོགས་ཀྱི་རྐང་པ་བཞི་བཤད་པ་དང༌། འབྱུང་བ་ཞེས་སོགས་ཀྱི་རྐང་པ་གཉིས་བཤད་པའོ། །དང་པོ་ལ་གཉིས། དྲང་བའི་དོན་དུ་བཤད་པ་དང༌། ངེས་པའི་དོན་དུ་བཤད་པའོ། །དང་པོ་ལ་གཉིས། འདི་སྐད་སོགས་ཀྱི་གླེང་གཞི་
ལ་སྦྱར་ཏེ་བཤད་པ་དང༌། བསྐྱེད་པའི་རིམ་པ་ལ་སྦྱར་ཏེ་བཤད་པའོ། །དང་པོ་ལ་གཉིས། གླེང་གཞིའི་ཚིག་ཇི་ལྟར་གསུངས་པ་དང༌། དེ་རྣམས་ཀྱི་དོན་བཤད་པའོ། །དང་པོ་ནི། གསང་བ་ཞེས་པའི་རྐང་པ་གཉིས་གླེང་གཞི་ལ་སྦྱོར་བ་ལོ་ཙྪ་བ་གཉིས་ཀྱི་བཤད་སྲོལ་ལ་འབྱུང་ལ། བདེ་མཆོག་གི་འགྲེལ་བ་གཞན་ལས་མ་བྱུང་ཡང༌། ལྭ་བ་པ་དང་ལྷ་སྦས་ཀྱི་འགྲེལ་པར་འབྱུང་བ་ཤིན་ཏུ་ལེགས་ཏེ། རྡོ་རྗེ་མཁའ་འགྲོ་ལས། བདེ་མཆོག་བླ་མ་སྟེ་ཕྱི་མར་བཤད་པའི་གསང་བ་སོགས་སྒོས་སུ་དྲིས་པའི་ལན་དུ། གསང་བ་སོགས་གླེང་གཞི་ལ་སྦྱོར་བ་གསུངས་པའི་ཕྱིར་རོ། །དེ་ཡང་རྡོ་རྗེ་མཁའ་འགྲོ་ལས། ཐོག་མ་དབུས་མཐར་ཡང་དག་གནས་པའོ། །དེ་ལ་ཐོག་མ་ནི་གསང་བ་སྟེ། འདི་སྐད་ཅེས་བྱ་བ་སྔར་འབྱུང་གནས་སུ་གྱུར་བའི་རིག་པའོ། །མཐའ་ཞེས་བྱ་བ་ནི་དགྱེས་པ་སྟེ། ཐོས་པ་ཞེས་བྱ་བ་བསྟན་པར་བྱའོ། །དབུས་ཞེས་བྱ་བ་ནི་མཆོག་སྟེ། བདག་གིས་ཞེས་བྱ་བ་ཤིན་ཏུ་དམ་པར་གྱུར་པའོ། །ཡང་དག་གནས་ནི་ཐམས་ཅད་བདག་ཉིད་དེ། དུས་གཅིག་ན་ཞེས་བྱ་བའོ། །ཞེས་གསུངས་སོ། །འདི་ལ་ལྷ་སྦས་ཀྱིས་ཐམས་ཅད་བདག་ཉིད་དུ་ཞེས་པའི་བདུན་པ་འདི་ནི་བདག་ཉིད་ཀྱིས་ཞེས་གསུམ་པར་སྦྱར་རོ། །དེས་ན་བརྒྱུད་པ་ལས་མ་ཡིན་ནོ་ཞེས་བཤད་ཅིང༌། དེ་ཉིད་ལྭ་བ་པའི་བཞེད་པར་ཡང་སྣང་བས། ད་ལྟ་འགྱུར་བའི་རྒྱུད་ལ་ཐམས་ཅད་བདག་ཉིད་ཀྱིས་དུས་གཅིག་ན་ཞེས་སྟོན་པ་འདྲ་བ་ཅིག་འདུག་ཀྱང༌། ལྭ་བ་པས་རྟག་ཏུ་བཞུགས་ཀྱིས་དུས་
སྟོན་པར་བཤད་པ་ལྟར། ཡང་དག་གནས་ནི་རྟག་ཏུ་བཞུགས་པའི་དོན་དུ་བྱ་ཞིང༌། ཐམས་ཅད་བདག་ཉིད་གྱི་དོན་སྔར་ལྟར་བྱ་སྟེ། རྒྱུད་འདི་ཐམས་ཅད་སྡུད་པ་པོས་སྟོན་པ་ལས་དངོས་སུ་ཐོས་པའི་དོན་ནོ། །གནས་གང་དུ་བཞུགས་པ་ནི་བདེ་བ་ཆེན་པོའི་གནས་སུ་དང༌། བཞུགས་པའི་སྟོན་པ་དེ་གང་ཞེ་ན། འདི་ནི་རང་བྱུང་བཅོམ་ལྡན་ཞེས་བྱ་བར་སྦྱར་རོ་ཞེས་ལྭ་བ་པས་གསུངས་སོ། །དེ་ལྟར་བྱས་ན་འདི་སྐད་བདག་གིས་ཐོས་པའི་དུས་གཅིག་ན་བཅོམ་ལྡན་འདས་ཞེས་པའི་གླེང་གཞི་རྒྱུད་འདིར་ཡོད་ལ། དེ་བཞིན་གཤེགས་པ་ཐམས་ཅད་ཅེས་པ་མན་ཆད་བཤད་རྒྱུད་ལས་ཀྱང་མི་གསལ་ལ། འགྲེལ་པ་གཉིས་ལས་ཀྱང་མི་གསལ་ལོ། །འོ་ན་དེ་མན་ཆད་ཀྱང་འདིར་དགོས་ན། བཤད་རྒྱུད་ཁ་སྦྱོར་དང་སྡོམ་འབྱུང་ལས། དེ་བཞིན་གཤེགས་པ་ཐམས་ཅད་ཀྱི་སྐུ་དང་ཞེས་པ་ནས་བཙུན་མོའི་བྷ་ག་ལ་བཞུགས་སོ། ཞེས་གསུངས་པ་ལྟར་སྦྱར་རམ། མངོན་བརྗོད་ལས། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་མཁའ་འགྲོ་དང༌། མཁའ་འགྲོ་མ་རྣམས་ཀྱི་དྲ་བ་གསང་བའི་སྙིང་པོ་ལ་བཞུགས་ཏེ། ཞེས་གསུངས་པ་ལྟར་སྦྱོར་ཞེ་ན། དེ་ཉིད་གསལ་བ་ལས་ཐབས་རྒྱུད་ཀྱི་འདི་སྐད་སོགས་ཀྱིས་བསྟན་པའི་རྫོགས་རིམ་མ་རྒྱུད་དུ། །གསང་བ་སོགས་ཀྱིས་སྟོན་པར་གསུངས་པ་ནི་གཙོ་བོ་བདེ་མཆོག་གི་དབང་དུ་བྱས་ལ། དེར་བཅོམ་ལྡན་འདས་བཤད་པའི་རྗེས་སུ་དེ་བཞིན་གཤེགས་པ་ཐམས་ཅད་ཀྱི་མཁའ་འགྲོ་དང་མཁའ་འགྲོ་མའི་དོན་བཤད་པ་འབྱུང་བས། དོན་ལ་ཁྱད་པར་ཆེར་མེད་ཀྱང་ཚིག་མངོན་བརྗོད་
ལྟར་བྱའོ། །འདི་རྣམས་ལ་ལོ་ཙཱ་བ་གཉིས་ཀྱི་བཤད་སྲོལ་ལ་དུས་གཅིག་ན་ཞེས་པ་ཡན་ཆད་འདྲ་ལ། ཐམས་ཅད་བདག་ཉིད་ཀྱིས་གནས་བསྟན། མཁའ་འགྲོ་ཀུན་དངོས་ཞེས་པའི་རྐང་པ་བཞིས་སྟོན་པ་དང༌། འབྱུང་བ་ཞེས་པའི་རྐང་པ་གཉིས་ཀྱིས་འཁོར་ཕུན་ཚོགས་བསྟན་པར་འཆད་དོ། །གཉིས་པ་ནི། གསང་བས་བསྟན་པའི་འདི་སྐད་ནི། དེ་ནས་གསང་བ་ཞེས་པ་ནས། དེ་དང་དེ་ལ་དགའ་བ་ཡིན། །ཞེས་པའི་བར་གྱི་རྒྱུད་ཀྱི་ཚོགས་མ་ལུས་པ་འདིར། འབྱུང་བ་འདི་ཁོ་ན་སྐད་དུ་སྣོད་འབྲིད་མེད་པར་ཐོས་པར་སྟོན་པའི་ཚིག་གི་ཕྲད་དེ། རྒྱ་སྐད་དུ་ཨེ་ཝཾ་ཞེས་པའོ། །དེ་ལ་གསང་བ་ཞེས་པ་ནི་འཇིག་རྟེན་དང་སྒྲའི་བསྟན་བཅོས་ལ་མེད་པའི་དེ་བཞིན་གཤེགས་པའི་བརྡ་དང༌། དཔའ་བོའི་བརྡ་དང༌། རྣལ་འབྱོར་མའི་བརྡ་དང༌། ཀླ་ཀློའི་སྐད་ཅེས་གསུངས་པ་ཡིན་ཏེ། ཕྱི་མ་ནི་བརྡའི་སྐད་ཅེས་པ་སྟེ། འོག་མ་རྣམས་ལ་ཡང་ཤེས་པར་བྱའོ། །སྔར་ཞེས་སོགས་ཀྱི་དོན་ནི་སྔར་ཕུང་པོ་དང་ཁམས་དང་སྐྱེ་མཆེད་རྣམས་ཡང་དག་པར་སྐྱེད་པར་བྱེད་པའི་ཁུ་བ་དང་ཁྲག་གོ། མཆོག་ཏུ་བདེ་བ་དེ་ལས་སྐྱེས་ཤིང་བྱུང་བས་ན་འབྱུང་གནས་ཏེ། ཞེས་ཁུ་ཁྲག་གི་འབྱུང་གནས་ལས་སྐྱེས་པའི་མཆོག་ཏུ་བདེ་བའི་རིག་པར་སྟོན་ཏེ། ཨེ་ཝཾ་དང་གསང་བའི་དོན་ནོ། །མཆོག་གིས་བསྟན་པའི་བདག་གིས་ཞེས་པ་དང༌། ཐམས་ཅད་བདག་ཉིད་ཀྱིས་ནི་སྡུད་པ་པོ་བདག་ཉིད་ཀྱིས་མངོན་སུམ་དུ་ཐོས་ཀྱིས་རྒྱུད་པ་ལས་མིན་ཞེས་པ་སྟེ་མ་ཡ་ཞེས་པའོ། །ཤིན་ཏུ་དམ་པ་ནི་ཆེས་མཆོག་ཅེས་པའི་དོན་ནོ། །དགྱེས་པས་བསྟན་
པའི་ཐོས་པ་ནི་ཐོས་པའི་ཤེས་རབ་ཀྱིས་ཐོས་པ་ཡིན་གྱི་རྒྱུད་ཀྱི་དོན་ཐམས་ཅད་མངོན་སུམ་དུ་རྟོགས་པ་ནི་མིན་པར་སྟོན་ཏེ། དེ་ལྟ་མིན་ན་སྟོན་པ་དང་སྡུད་པ་པོ་ལ་མཆོག་དམན་གྱི་ཐ་དད་མེད་པར་འགྱུར་ལ། དེ་ཡང་གླེང་གཞི་སྒྲས་ཟིན་ལྟར་འཆད་པའི་སྐབས་འདིར་མི་འདོད་དོ། །བསྟན་པར་བྱ་བ་ཡང་ཐོས་བྱུང་གི་ཤེས་རབ་ཀྱིས་བསྟན་པ་སྟེ་ཐོས་པ་ནི་ཤྲུ་ཏ་ཞེས་པའོ། །ཐོག་མ་དབུས་མཐར་ཞེས་པ་ནི། གསང་བ་མཆོག་གིས་དགྱེས་པ་ན། །ཞེས་པའི་ཚིག་གི་ཐོག་མ་དང་དབུས་དང་ཐ་མ་གསུམ་དང་སྦྱར་བའོ། །རྟག་ཏུ་བཞུགས་དང་ཡང་དག་གནས་ཀྱིས་བསྟན་པའི་དུས་གཅིག་ན་ཞེས་པ་ནི། དུས་གཅིག་གི་ཚེ་ན་འདི་ཐོས་ལ་དུས་གཞན་དུ་ནི་རྒྱུད་གཞན་ཐོས་སོ་ཞེས་པས་སྡུད་པ་པོ་ཐོས་པ་མང་བར་བསྟན། ལན་ཅིག་གི་ཚེ་འདི་ཐོས་ཀྱི་གཞན་དུ་ནི་འདི་མ་ཐོས་ཞེས་པས་རྙེད་དཀའ་བ་དང༌། དུས་སྐད་ཅིག་མ་གཅིག་ལ་འདི་ཐོས་ཞེས་སྡུད་པ་པོ་ཤེས་རབ་ཕུལ་དུ་བྱུང་བར་སྟོན་ཏོ། །དེ་ལ་ནི་རྒྱ་སྐད་དུ་ཨེ་ཀ་སྨིན་ས་མ་ཡ་ཞེས་འབྱུང་ངོ༌། །བཅོམ་ལྡན་འདས་ཀྱི་སྐད་དོད་བྷ་ག་ཝན་གྱི་བྷ་ག་ནི་སྐལ་པ་དང༌། ཝན་ནི་ལྡན་པའི་དོན་ཏེ་སྐལ་ལྡན་ནོ། །སྐལ་བ་དྲུག་ནི། ཁ་སྦྱོར་ལས། དབང་ཕྱུག་དང་ནི་གཟུགས་བཟང་དང༌། །དཔལ་དང་གྲགས་དང་ཡེ་ཤེས་དང༌། བརྩོན་འགྲུས་ཕུན་སུམ་ཚོགས་པ་སྟེ། །དྲུག་པོ་རྣམས་ལ་སྐལ་ཞེས་བྱ། །ཞེས་ཕུན་སུམ་ཚོགས་པ་དྲུག་ལ་སྐལ་བར་གསུངས་ཤིང༌། ལྡན་པའི་དོན་དེ་དྲུག་མངའ་བ་ལ་བཤད་དོ། །ཡང་བྷ་ག་ལ་ངེས་ཚིག་གི་ཚུལ་གྱིས་བྷ་ག་ནི་བཅོམ་པ་སྟེ། ཉོན་མོངས་
པ་ལ་སོགས་པའི་བདུད་བཅོམ་པའོ། །བཅོམ་པ་དེ་འདི་ལ་ལྡན་པས་བཅོམ་ལྡན་ནོ། །འདས་ཞེས་པ་ནི་བྷ་ག་ཝན་ཞེས་པ་འཇིག་རྟེན་པའི་ལྷ་ཆེན་པོ་རྣམས་ལ་ཡང་འཇུག་པས། དེ་དག་ལས་འདས་པར་བསྟན་པའི་ཕྱིར་དུ་སྔོན་གྱི་ལོ་ཆེན་རྣམས་ཀྱིས་བསྣན་པའོ། །ཡུལ་དེ་བཞིན་ཉིད་ཇི་ལྟ་བ་བཞིན་དུ་ཡུལ་ཅན་གྱི་ཡེ་ཤེས་མཐར་ཐུག་པར་གཤེགས་པས་ན་དེ་བཞིན་གཤེགས་པ་ཡིན་ལ། རྒྱུད་སྟོན་པ་པོ་ནི་དེ་བཞིན་གཤེགས་པ་ཐམས་ཅད་ཀྱི་ངོ་བོ་ཡིན་པས་ན་ཐམས་ཅད་ཀྱང་ཡིན་ནོ། །དེའི་རྡོ་རྗེ་མཁའ་འགྲོ་ནི་དཔའ་བོ་དང༌། མཁའ་འགྲོ་མ་ནི་དཔའ་མོ་དང༌། དྲ་བ་ནི་དེ་དག་གི་ཚོགས་སོ། །དེ་རྣམས་ཀྱི་གསང་བའི་སྙིང་པོ་ཞེས་པ་ནི་བཙུན་མོའི་བྷ་ག་དང་དོན་གཅིག་པས། ཆོས་འབྱུང་གྲུ་གསུམ་པའི་དབུས་ཀྱི་གཞལ་ཡས་ཁང་ན་བཞུགས་པའོ། །གཉིས་པ་ནི། ཁ་སྦྱོར་ལས་གསུངས་པ་ལྟར། དེ་ཉིད་གསལ་བར་བཤད་པ་ནི། །གསང་བ་ས་ཡི་ཁམས་ཡིན་ཏེ། །དེ་བཞིན་མཆོག་ནི་ཆུ་ཡིན་ནོ། །དགྱེས་པ་ཞེས་པ་མེ་ཡིན་ཏེ། །རླུང་ནི་ཐམས་ཅད་བདག་ཉིད་གནས། རྟག་ཏུ་བཞུགས་ནི་ནམ་མཁའ་སྟེ། །བདེ་བ་ཆེན་པོའི་རང་བཞིན་ནོ། །ཞེས་གསུངས་པ་ལྟར་ཡིན་ལ། དེས་ནི་བསྐྱེད་རིམ་སྒོམ་པའི་སྐབས་ཀྱི་འབྱུང་བ་རིམ་བརྩེགས་སྒོམ་པ་ཡང་སྟོན་པར་མངོན་བརྗོད་དང༌། ཀུན་སྤྱོད་དང༌། སྡོམ་འབྱུང་གསུམ་གས་ཤེས་ལ། རྟག་ཏུ་བཞུགས་ཀྱི་ནི་ཀྱཻ་རྡོར་ལས། བདེ་བ་ནམ་མཁའི་ཁམས་ཞེས་བྱ། །ཞེས་གསུངས་པ་ལྟར་ནམ་མཁའི་ཁམས་བདེ་བ་ཆེན་པོ་
བསྟན་ཏོ། །བླ་མ་མར་དོ་སོགས་ཀྱིས། རྟག་ཏུ་བཞུགས་ནི་རི་རབ་བོ། །ཞེས་སཾ་བྷུ་ཊ་ནས་འདྲེན་པ་ནི་གཞུང་དེ་ན་མི་སྣང་ངོ༌། བདེ་བ་ཆེན་པོས་ནི་བདེ་བ་ཆེན་པོ་མཚོན་བྱེད་ཀྱི་མངོན་བྱང་ལྔའི་སྒོ་ནས་ལྷ་སྐྱེད་པ་བསྟན་ལ། དེ་བཞིན་དུ་འབྱུང་བ་རིམ་བརྩེགས་སོགས་ཀྱང་བདེ་ཆེན་གྱི་རང་བཞིན་དུ་མོས་པར་བྱ་བར་ཡང་བསྟན་ཏོ། །རྣལ་འབྱོར་རྒྱུད་ཀྱི་མངོན་བྱང་གི་སྐབས་སུ་ཟླ་བ་ལས་ལྷ་སྐྱེད་པ་བཤད་ཀྱང༌། ཁ་དོག་དཀར་པོ་འབའ་ཞིག་ཏུ་བཤད་ཀྱི། འདིར་ནི་ཟླ་ཉི་དཀར་དམར་དང༌། ཟླ་བ་དཀར་དམར་དང༌། ཟླ་བ་གཅིག་ལས་མེད་ནའང་དཀར་ལ་དམར་བའི་མདངས་ཆགས་པ་དང་ཨཱ་ལི་ཀཱ་ལི་དཀར་དམར་བསྟན་པའི་དགོས་པ་ནི། ཁམས་དཀར་དམར་གྱི་འདུ་འཕྲོ་ལས་བདེ་ཆེན་སྐྱེད་པ་མཚོན་པའི་དོན་དུ་ཡིན་ནོ། །འདིའི་སོ་གཉིས་པ་ལས་འབྱུང་བ་རིམ་བརྩེགས་བཤད་པའི་མཐར། དུང་ཆེན་པོ་ཡི་རང་བཞིན་བྱ། །ཞེས་པ་ཡང་བདེ་ཆེན་ལ་བྱ་སྟེ། དུང་གི་སྐད་དོད་ཤཾ་ཁའི་ཤཾ་ནི་མན་སྙེ་ལས། །ཤཾ་ནི་བདེ་བ་སྟེ་ཁམས་གསུམ་ལས་འདས་པའི་ཕྱིར་མཆོག་གོ། །ཞེས་གསུངས་པས། ཤཾ་སུ་ཁའམ་སཾ་སུ་ཁ་ནི་བདེ་བ་ཡིན་པས་བདེ་བ་ཆེན་པོའི་རང་བཞིན་དུ་བྱ་ཞེས་པའི་དོན་ཡིན་ལ། བྱེད་ལུགས་ནི་སྔར་བཤད་པ་བཞིན་ནོ། །བསྐྱེད་རིམ་པའི་འབྱུང་བ་རིམ་བརྩེགས་བཤད་པ་ན། དེའི་འཕྲོ་རི་རབ་དང་པདྨ་དང་དབྱངས་གསལ་ལས་བསྐྱེད་པ་ནི། ང་གཅིག་པ་ལས། རི་སྟེང་སྣ་ཚོགས་པདྨ་ཡི། །ལྟེ་བར་ཨཱ་ལི་ཀཱ་ལི་སྐྱེས། །ཞེས་པ་ལས་གསལ་ལ། གཞལ་ཡས་ཁང་ནི་ལེའུ་གཉིས་པར་གསལ་ལོ། །
དེའི་ལྷག་མ་རྣམས་ནི་མངོན་བརྗོད་སོགས་ཀྱི་བཤད་རྒྱུད་ལ་བརྟེན་ནས་ཤེས་པར་ནུས་སོ། །གཉིས་པ་ལ་གསུམ། གླེང་གཞི་ལ་སྦྱར་བའི་ངེས་དོན་དང༌། བསྐྱེད་རིམ་ལ་སྦྱར་བའི་ངེས་དོན་དང༌། ཡི་གེ་བཅུ་དྲུག་གི་དོན་བཅུད་ལེན་ལ་སྦྱར་བ་བཤད་པའོ། །དང་པོ་ནི། གསང་བ་མཆོག་ཅེས་སོགས་རྡོ་རྗེ་མཁའ་འགྲོ་ལས། ཨེ་ཝཾ་མ་ཡ་ལ་སྦྱར་བའི་ངེས་དོན་འཆད་པ་ནི། ཁ་སྦྱོར་ལས། ཨ་ནི་ས་རུ་ཤེས་པར་བྱ། །ལས་ཀྱི་ཕྱག་རྒྱ་སྤྱན་མ་ཉིད། །ཅེས་དང༌། ལྟེ་བར་སྣ་ཚོགས་འདམ་སྐྱེས་ལ། །སྤྲུལ་པའི་འཁོར་ལོ་རྣམ་པར་གནས། །ཞེས་པའི་ཡི་གེ་བཞི་རྩ་འཁོར་བཞི་དང༌། སྤྱན་སོགས་བཞི་ལ་སོགས་པ་བཞི་ཚན་མང་པོ་ལ་སྦྱར་ཏེ། འདིར་རི་ཞིག་རྩ་འཁོར་དང་སྤྱན་སོགས་ལ་སྦྱར་བ་བླང་ངོ༌། །དང་པོའི་དབང་དུ་བྱས་ནས་བཤད་རྒྱུད་གཉིས་ལས་འཁོར་ལོ་སོ་སོའི་ལྟེ་བ་དང་འདམ་མ་ལ་སོ་སོ་དགོད་པ་སོགས་བསྟན་ཏེ། རིམ་པ་བཞི་པའི་རྒྱུད་ཀྱི་རིམ་པ་སྟོན་ནོ། །དེ་ལ་རིམ་པ་ལྷག་མ་གསུམ་སྣོན་པ་ནི། རིམ་པ་བཞི་པ་ལས་ཤེས་པར་བྱ་སྟེ་འཁོར་ལོ་བཞི་ལ་བརྟེན་པའི་གཏུམ་མོས་ལྷན་སྐྱེས་ཀྱི་བདེ་བ་འདྲེན་པའི་ཐབས་སོ། །སྤྱན་མ་སོགས་བཞི་དང་སྦྱར་བ་ནི་ཞལ་ལུང་ལས། བུད་མེད་སྒྱུ་མའི་ཕྱག་རྒྱ་ནི། །སྒྱུ་མ་ཀུན་ལས་ཁྱད་པར་འཕགས། །སྒྱུ་མ་དེ་ཡང་འཇིག་རྟེན་འདིར། །སྤྱན་ལ་སོགས་པར་རྣམ་དག་པར། །རིགས་ནི་རྣམ་པ་བཞིར་འགྱུར་ཏེ། །ཞེས་གསུངས་པ་ལྟར། པདྨ་ཅན་ལ་སོགས་པའི་ཕྱག་རྒྱ་མ་བཞི། སྤྱན་སོགས་བཞིར་དག་པར་བཤད་དེ།
དེ་ནི་ཕྱིའི་ཕྱག་རྒྱ་ལ་བརྟེན་ནས་ལྷན་སྐྱེས་ཀྱི་དགའ་བ་འདྲེན་པའི་ཐབས་སོ། །དེས་ཡེ་ཤེས་ཀྱི་ཕྱག་རྒྱ་རིགས་བཞི་ཡང་བསྟན་པར་ཤེས་པར་བྱའོ། །ཐོས་པའི་སྐད་དོད་ཤྲུ་ཏ་ཡིན་ལ་དེའི་དོན་ཁ་སྦྱོར་ལས། ཤྲུ་ཞེས་བྱ་བ་ནི་འཛག་པར་གསུངས་སོ། །ཏ་ཞེས་བྱ་བ་ནི་གང་ཡང་བདེ་བ་ཆེན་པོའི་མགོན་པོའོ། །ཞེས་གསུངས་ཏེ་གཏུམ་མོ་བསྒོམས་པའི་མེས་བསྐུལ་བ་ལ་བརྟེན་ནས། སྤྱི་བོ་ནས་བྱང་སེམས་འཁོར་ལོ་བཞི་དང་དེ་ནས་གསང་གནས་ཀྱི་རྩེའི་བར་དུ་འཛག་པ་དང༌། དེ་ལ་བརྟེན་ནས་བདེ་བ་ཆེན་པོའི་དགའ་བ་རྣམས་དང༌། དེ་དག་གི་མགོན་པོ་སྟེ་གཙོ་བོ་ལྷན་ཅིག་སྐྱེས་པའི་དགའ་བ་སྐྱེ་བའོ། །དུས་གཅིག་ན་ཞེས་པའི་ངེས་དོན་ཁ་སྦྱོར་ལས་གསུངས་པ། དེ་ཉིད་གསལ་བ་ལས། ས་མ་ཡ་ནི་དུས་གསུངས་ཏེ། ། དུས་ནི་རྣམ་པ་གསུམ་དུ་བརྗོད། །དུས་བཟང་དང་ནི་དུས་ངན་དང༌། །བསམ་གྱིས་མི་ཁྱབ་དུས་ཉིད་དོ། །སྣ་ཡི་བུ་གའི་སྒོ་ཉིད་ནས། །འོང་བ་དུས་བཟང་ཞེས་བྱ་སྟེ། །འགྲོ་བ་ཉིད་ནི་དུས་ངན་ནོ། །དེ་དག་གཅིག་ཏུ་བརྗོད་པ་སྟེ། །གཅིག་ཏུ་ཟླ་མེད་པར་གྱུར་པ། །དུས་ནི་བསམ་གྱིས་མི་ཁྱབ་གྱུར། །སྲོག་དང་རྩལ་བ་བྲལ་བ་སྟེ། །དབུགས་འབྱུང་རྔུབ་པ་རྣམས་སྤངས་པའོ། །འགྲོ་དང་འོང་བ་ལས་གྲོལ་བ། །དུས་གཅིག་ན་ཞེས་བརྗོད་པ་ཡིན། །ཞེས་གསུངས་སོ། །སྣ་ནི་མིའི་སྣ་ཞེས་གྲགས་པའི་དྷུ་ཏཱིའི་མར་རྩེའི་གནས་སོ། །མིའི་སྣ་ཡང་ཕོ་མོ་གཉིས་ཀའི་སྣ་སྟེ་སྐྱེས་པའི་ཡང་རྡོ་རྗེའི་རྩ་བ་ནས་བརྩམས་ཏེ་སྣ་རུ་བརྗོད་པའི་ཕྱིར་རོ། །སྣ་དེར་འོང་བ་ནི་འོ་མའི་རྒྱུན་ལྟ་བུའི་བྱང་སེམས་སོ། །དུས་བཟང་པོ་ནི་དགའ་བ་གསུམ་གྱི་དུས་སོ། །འགྲོ་
བ་ནི་ཐིག་ལེ་ཕྱི་རོལ་ཏུ་སོང་བ་སྟེ། དེའི་ཚེ་མེ་བཞིན་དུ་གདུང་བར་བྱེད་པས་དུས་ངན་ནོ། །དུས་དེ་དག་གཅིག་ཏུ་བརྗོད་པ་ནི་དུས་སྔ་མ་གཉིས་སོ་སོ་བ་སྤངས་པ་ལྷན་སྐྱེས་ཀྱི་སྐབས་བསམ་མི་ཁྱབ་ཀྱི་དུས་སོ། །དེ་དག་ནི་མན་སྙེ་ལ་བརྟེན་ནས་བཤད་པའོ། །དུས་གཅིག་ནའི་དོན་གཞན་ཡང་བཤད་པ་ནི། སྲོག་དང་ཞེས་པའི་རྐང་པ་བཞི་སྟེ། རྐང་པ་དང་པོའི་དོན་ནི་གཉིས་པས་བཤད་པ་རླུང་འགྲོ་འོང་དང་བྲལ་བའི་དུས་སོ། །དེས་ནི་གཏུམ་མོ་བསྒོམས་པ་ལ་བརྟེན་ནས་རོ་རྐྱང་ནས་རླུང་འགྲོ་འོང་བྱེད་པ་དང་བྲལ་ཏེ་དབུ་མར་འཇུག་ལ། དབུ་མ་ནས་ཀྱང་འགྲོ་འོང་བྱེད་པ་དང་བྲལ་བ་སྟོན་ནོ། །རིམ་པ་བཞི་པ་ལས་ཀྱང༌། དུས་གཅིག་ན་ཞེས་བྱ་བ་ནི་དུས་གཅིག་དང༌། དུས་ཚོད་གཅིག་གོ། འགོག་པའི་དུས་དང་དཔྱིད་ཀྱི་དུས་ཞེས་བྱ་བ་སྟེ། ཇི་སྲིད་དུ་གཡས་དང་གཡོན་པའི་སྣ་བུག་ཏུ་སོང་བའི་རླུང་འགགས་པར་གྱུར་པའོ་ཞེས་བྱ་བའི་དོན་ནོ། །ཞེས་གསུངས་ཏེ་འགོག་པའི་དུས་ནི་རླུང་ཕྱི་ནང་དུ་རྒྱུ་བ་འགོག་པའོ། །དཔྱིད་ཀྱི་དུས་ནི་དཔྱིད་བཞིན་དུ་དགའ་བ་རྒྱས་པར་བྱེད་པའི་དུས་སོ། །དེའི་གོང་ཉིད་དུ། དེ་དག་གི་བཙུན་མོ་ནི་མི་ལ་སོགས་པའི་གཟུགས་ཀྱིས་གནས་པ་སྟེ། དེའི་བྷ་ག་དེར་ཞེས་བྱ་བའི་དོན་ནོ། ཞེས་གསུངས་པ་ལ་ཡང་དུས་གཅིག་ན་ཞེས་པའི་དོན་དེ་སྦྱོར་དགོས་ཏེ། ཕྱིའི་ཕྱག་རྒྱ་ལ་བརྟེན་ནས་ཀྱང་སྲོག་དབུ་མར་འཇུག་པའི་གནད་སྟོན་ནོ། །སྲོག་དྷཱུ་ཏཱིར་ཞུགས་གནས་ཐིམ་གསུམ་བྱས་པ་ལས་རྫོགས་རིམ་པའི་ལྷན་སྐྱེས་ཀྱི་དགའ་བ་སྐྱེད་པ་འདི་ནི། ཐོག་མར་ལུས་ལ་གནད་དུ་བསྣུན་
པའི་གདམས་ངག་ཐམས་ཅད་ལ་ཤེས་དགོས་པའི་གནད་ཤིན་ཏུ་ཆེ་བ་ཡིན་པས་ལེགས་པར་ཤེས་པར་བྱའོ། །བཅོམ་ལྡན་འདས་ཀྱི་དོན་ནི་དེ་ཉིད་གསལ་བ་ལས། མཆོག་ཏུ་དགའ་བའི་ངོ་བོ་སྟེ། །འདི་དེ་རང་འབྱུང་གཅིག་པུ་ཉིད། །འདི་ནི་བཅོམ་ལྡན་འདས་སུ་གསུངས། ཞེས་པས་བསྟན་ཏེ། མཆོག་ཏུ་དགའ་བ་ལྷན་སྐྱེས་ཀྱི་ཡེ་ཤེས་ལ་སྐལ་བ་དང་ལྡན་པ་དང༌། རང་གི་མི་མཐུན་ཕྱོགས་འཇོམས་པའི་ནུས་པ་ཅི་རིགས་པ་དང་ལྡན་པ་ལ་བྱའོ། །དེ་བཞིན་གཤེགས་པ་ཐམས་ཅད་ནི་དེ་ཉིད་གསལ་བ་ལས། ཐམས་ཅད་ཅེས་བྱར་རྣམ་གྲངས་པ། །སངས་རྒྱས་ཕུང་པོ་དེ་བཞིན་ཏེ། །ཞེས་དང༌། སངས་རྒྱས་ཕུང་པོ་ལས་སོགས་ཏེ། །དེ་ཡི་འབྱུང་བ་ཁམས་ཞེས་བཏགས། །ཞེས་གསུངས་ཏེ། སངས་རྒྱས་ཐམས་ཅད་ནི་དེ་བཞིན་གཤེགས་པ་ཐམས་ཅད་དོ། དེ་ནི་ཕུང་པོ་ལྔའོ། །སོགས་ཀྱིས་བསྡུས་པའི་ཁམས་རྣམས་ནི་ཕུང་པོའི་འབྱུང་བ་བཞི་ལ་ཁམས་སུ་བཏགས་སོ། །ཡང་སྔ་མའི་འཕྲོ་ཉིད་ནས། བུད་མེད་མི་སོགས་རྣམ་རྟོག་ཕྱིར། །རྣམ་རྟོག་རྣམ་པ་གཉིས་སུ་གསུངས། །ཞེས་ཏེ། འདི་བུད་མེད་དོ་འདི་མི་སྟེ་སྐྱེ་བའོ་ཞེས་རྣམ་པར་རྟོག་པའི་ཕྱིར་ན། རྟོག་པ་དེ་བརྟག་པར་བྱ་བ་ཡང་གཉིས་སུ་ཡོད་ལ། སྐྱེས་པ་ནི་དཔའ་བོ་རྡོ་རྗེ་མཁའ་འགྲོ་དང༌། བུད་མེད་ནི་མཁའ་འགྲོ་མ་ཞེས་བྱ་ལ། དེ་ཡང་ནང་ལ་བཤད་ན་རྡོ་རྗེ་མཁའ་འགྲོ་ནི་རྩ་ནང་གི་ཁམས་རྣམས་དང༌། མཁའ་འགྲོ་མ་ནི་དེ་ཉིད་གསལ་བ་ལས། སངས་རྒྱས་ཕུང་སོགས་དེ་བཞིན་ཏེ། །དེ་ཡི་མཁའ་འགྲོ་མ་དེ་དག །རྩ་ནི་སུམ་ཅུ་རྩ་དྲུག་ཉིད། །
ཅེས་གསུངས་པ་ལྟར་རྩ་སོ་དྲུག་གོ། གསང་བ་ནི་ཆོས་འབྱུང་གི་དབྱིབས་ཅན་གྱི་ཕྱག་རྒྱའི་བྷ་ག་ཡིན་ཏེ། བདེ་བ་ཆེན་པོའི་གནས་སུ་བཞུགས་ཞེས་པའི་གནས་ཀྱང་དེའོ། །སྙིང་པོ་ནི་དེ་ལ་བརྟེན་ནས་སྐྱེས་པའི་བདེ་ཆེན་ཏེ། ལས་རྒྱ་ལ་བརྟེན་ནས་སྲོག་དྷཱུ་ཏཱིར་བཙུད་པ་ལས་སྐྱེས་པའི་རྫོགས་རིམ་ལ་སྦྱར་རོ། །གཉིས་པ་ནི། རྩ་རྒྱུད་དུ་རྫོགས་རིམ་སྦས་པའི་སྐབས་མང་དུ་ཡོང་ཀྱང་འགངས་ཆེ་བ་ནི་བསྐྱེད་རིམ་གྱི་སྐབས་སུ་གསང་བ་སོགས་ཀྱི་ཚིག་བཞི་དང༌། བ་ལང་གནས་ཞེས་སོགས་ཀྱི་ཚིག་བཞིས། འབྱུང་བ་རིམ་བརྩེགས་སྒོམ་པ་དང༌། །རི་སྟེང་སྣ་ཚོགས་པདྨ་ཡི། །ལྟེ་བར་ཨཱ་ལི་ཀཱ་ལི་སྐྱེས། །ཞེས་པའི་སྟེང་དུ་རི་རབ་སྒོམ་པ་དང༌། དེའི་སྟེང་དུ་པདྨ་དང༌། དེའི་ལྟེ་བར་དབྱངས་གསལ་ལས་ཧེ་རུ་ཀ་སྐྱེས་པར་བཤད་པ་དེ་ཡིན་ནོ། ། དེར་སྦས་པ་བཤད་རྒྱུད་ཀྱིས་གསལ་བར་བསྟན་པ་ནི། ཁ་སྦྱོར་ལས། རྐང་པའི་མཐིལ་དུ་རྩོམ་ཆེན་རླུང༌། །གཞུ་ཡི་དབྱིབས་སུ་རྣམ་པར་གནས། །སུམ་མདོ་ཡི་ནི་གནས་སུ་ནི། །དེ་བཞིན་གྲུ་གསུམ་འབར་བ་ཉིད། །ཟླུམ་པོའི་རྣམ་པའི་གཟུགས་ཀྱིས་ནི། ། ཆུ་བོ་ལྟོ་བར་རྣམ་པར་གནས། །སྙིང་གར་ཡང་ནི་ས་ཉིད་དོ། །ཀུན་ནས་གྲུ་བཞི་པ་ཉིད་དོ། །སྒལ་ཚིགས་དབྱིག་གུའི་གཟུགས་ཀྱིས་ནི། །རི་རབ་རི་རྒྱལ་དེ་བཞིན་ནོ། །ཞེས་དང༌། ཇི་ལྟར་རྩོམ་ཆེན་ལ་སོགས་རིམ། །བླ་མ་དུས་ཐབས་རིམ་ཉིད་ཀྱིས། །དེ་ནི་རྫོགས་པའི་དཀྱིལ་འཁོར་གནས། །ཞེས་འབྱུང་བ་རིམ་བརྩེགས་དང༌། རི་རབ་ནང་ལ་བཤད་པ་ན། །ལུས་ཀྱི་རྐང་པ་ནས་མགོ་བོའི་བར་སྟོན་
པ་ཡིན་ལ། དེ་ཡང་རྫོགས་རིམ་པའི་ལུས་ཀྱི་དཀྱིལ་འཁོར་དུ་གསུངས་ཏེ། རྫོགས་རིམ་པས་གང་ལ་གནད་དུ་བསྣུན་སའི་རྡོ་རྗེའི་ལུས་སོ། །ནག་པོ་སྤྱོད་པས་ལུས་ཀྱི་དཀྱིལ་འཁོར་ལ་ཕྱི་ནང་གཉིས་བཤད་པའི་ཕྱི་ནི། དྲིལ་བུ་པས་བསྐྱེད་རིམ་གྱི་ལུས་དཀྱིལ་སྒོམ་པའི་ལུས་ལ་འབྱུང་བཞི་རི་རབ་སྦྱར་བ་ལྟ་བུ་ཡིན་ལ། ནང་ནི་དེ་མ་ཐག་ཏུ་བཤད་པའོ། །རྡོ་རྗེའི་ལུས་དེའི་གནད་དུ་བསྣུན་ས་བྱེ་བྲག་པ་ནི། །ཁ་སྦྱོར་ལས་གླེང་གཞིའི་ཨེ་ཝཾ་སོགས་ཀྱི་ཡི་གེ་བཞི་རྩའི་འཁོར་ལོ་བཞི་དང་སྦྱར་བས་ཤེས་སོ། །རི་སྟེང་ཞེས་པའི་རྐང་པ་གཉིས་སྒྲ་སོར་བཞག་ཏུ་བྱེད་ན། ལཱུ་ཨི་པ་ལྟ་བུ་རྟེན་དང་བརྟེན་པ་དུས་གཅིག་ཏུ་སྐྱེད་པ་ལ་སྦྱར་ལ། རི་རབ་ཀྱི་སྟེང་དུ་གཞལ་ཡས་ཁང་སྔོན་ལ་བསྐྱེད་པའི་དབུས་སུ་པདྨའི་ལྟེ་བར་དབྱངས་གསལ་ལས་ཧེ་རུ་ཀ་ཕྱིས་སྐྱེད་པ་ལ་སྦྱོར་ན། ལུས་ཡན་མན་དང་ཕུན་ཚུན་དུ་མཉམ་པ། ངོས་རྣམས་མཉམ་པའི་གཞལ་ཡས་ཁང་སྒོ་བཞི་པར་བྱས་ཀྱང༌། རྫོགས་རིམ་གྱི་སྐབས་སུ་གང་ལ་གནད་དུ་བསྣུན་སའི་རྟེན་ལུས་བསྟན་པར་བྱའོ། །པདྨ་དང་དབྱངས་གསལ་གྱི་ངེས་དོན་ཡང་ཁ་སྦྱོར་ལས་གསུངས་པ་ནག་པོ་པས་བཤད་པ་ནི། དེ་ཉིད་གསལ་བ་ལས། དེ་ཡི་རྩེ་མོ་མགོར་གསུངས་ཏེ། །འདམ་སྐྱེས་འདབ་མ་སུམ་ཅུ་གཉིས། །ཞེས་དང༌། དེ་ཡི་དབུས་སུ་ཧཾ་ཡིན་ཏེ། །ཨཱ་ལི་ཀཱ་ལི་ལས་སྤྲུལ་པ། །མི་ཤིགས་གོ་འཕང་ཉམས་དགའ་བ། །བདེ་བ་ཆེན་པོ་ཞེས་བྱར་བརྗོད། །བདེ་ཆེན་འཁོར་ལོ་ཆེན་པོ་ན། །སྡེ་ཚན་ཐ་མ་མིང་སྤངས་པ། །ཞེས་གསུངས་སོ། །དེའི་ངེས་དོན་ནི་པདྨའི་ལྟེ་བར་ཨཱ་ལི་ཀཱ་ལི་ལས་སྤྲུལ་བ་ལ་ཟླ་བ་ཡང་ཡོད་
མོད་ཀྱང༌། གཙོ་བོ་ནི་རྩ་རྒྱུད་ནས་ཟིན་པ་ལ་དེ་གཉིས་ལས་ཧེ་རུ་ཀ་སྐྱེད་པར་གསུངས་པ་ཉིད་འདིར་བཤད་དགོས་སོ། །རྐང་པ་ཐ་མ་གཉིས་ཀྱི་དོན་ནི་སྤྱི་གཙུགས་བདེ་ཆེན་གྱི་འཁོར་ལོ་ན་གནས་ཕ། གསལ་བྱེད་ཀྱི་སྡེ་ཚན་གྱི་ཐ་མའི་མིང་ཅན་ཀྵ་ཡིག་དོར་བའི་གོང་མ་ཧ་ལ་ཐིག་ལེ་སྦྱར་བའོ། །ཧཾ་ཡིག་དེ་ལས་བབ་པའི་ཀུནྟ་ལྟ་བུ་ལས་སྐྱེས་པའི་ལྷན་སྐྱེས་ནི་མི་ཤིགས་པ་ཞེས་པ་གཉིས་ཀྱི་དོན་ཏེ་དབྱངས་གསལ་ལས་ཧེ་རུ་ཀ་སྐྱེས་པའི་ངེས་དོན་ནོ། །ཁ་སྦྱོར་ལས་ཀྱང༌། བདུད་རྩིའི་གཟུགས་ཀྱི་འཛག་པ་ནི། །ཉིན་དང་མཚན་དུ་རྣམ་པར་གནས། །ཞེས་སྤྱི་བོའི་ཧཾ་ལས་བྱང་སེམས་འཛག་པར་གསུངས་སོ། །དེ་ལ་རྒྱུད་གཉིས་ཀའི་ལུགས་ཀྱིས་ལྷན་སྐྱེས་ཀྱི་བདེ་ཆེན་ལམ་གྱི་སྲོག་ཏུ་བྱེད་དེ། །དེ་ཉིད་གསལ་བ་ལས། རྣལ་འབྱོར་རྒྱུད་དུ་དེ་བཞིན་གཤེགས། །འདི་སྐད་བདག་གིས་ཞེས་བྱར་གསུངས། །དེ་ཉིད་རྣལ་འབྱོར་མ་རྒྱུད་དུ། །བདེ་བའི་མཆོག་ཏུ་བརྗོད་པ་ཡིན། །འདི་ཉིད་རྣལ་འབྱོར་རྒྱུད་དང་ནི། །རྣལ་འབྱོར་མ་རྒྱུད་ཅེས་བྱར་ཡང༌། །བདེ་བ་ཆེན་པོའི་ཡེ་ཤེས་མཆོག ། མེ་ཞེས་བྱ་བར་མངོན་པར་རྗོད། །ཅེས་གསུངས་སོ། །བདེ་ཆེན་དེ་སྐྱེ་བ་ལ་སྤྱི་བོའི་ཧཾ་ལས་བྱང་སེམས་དཀར་པོ་གསང་གནས་ཀྱི་རྩེ་བར་དུ་འཛག་པ་དགོས། དེ་ལ་གཏུམ་མོའི་མེ་འབར་བས་བྱང་སེམས་བཞུ་བ་དགོས་ཏེ། མངོན་བརྗོད་ལས། ཨཱ་ལི་ཀཱ་ལི་མཉམ་བྱས་ཏེ། །དེར་ན་རི་མོའི་སྦྱོར་བ་ཡིས། །སྟེང་དུ་འབར་བའི་རི་མོ་ནི། །འོག་ཏུ་འཛག་པར་བྱེད་པ་ཡིན། །འཛག་པ་ཁུ་བའི་ཚུལ་ཅན་ནི། །
འཆི་མེད་ཐིགས་པའི་གཟུགས་སུ་འགྱུར། །ཞེས་གསུངས་སོ། །གཞུང་འདི་མཧཱ་མ་ཡར་ཡང་འབྱུང་བ་ལ་ཤཱནྟི་པས་གཞན་དུ་བཤད་ཀྱང་འདིར་དེ་དང་མི་འདྲའོ། །ཨཱ་ལི་ནི་དེས་མཚོན་པའི་བྱང་སེམས་དཀར་པོ་འབབ་པའི་རྐྱང་མའོ། །ཀཱ་ལི་ནི་དེས་མཚོན་པའི་དམར་པོ་འབབ་པའི་རོ་མའོ། །མཉམ་པར་བྱས་པ་ནི་དེ་གཉིས་ཀྱི་རླུང་ལྟེ་བ་སོགས་ཀྱི་དབུས་ཀྱི་དབུ་མར་འདྲེས་པའོ། །དེར་རླུང་ཞུགས་པས་མེའི་རི་མོའམ་རེ་ཁ་དབུས་མ་ནས་སྟེང་སྤྱི་གཙུག་བར་དུ་འབར་རོ། །འབར་བ་དེས་ཧཾ་ལས་འོག་ཏུ་འཆི་མེད་དེ་བདུད་རྩི་ཁུ་བའི་གཟུགས་ཅན་འཛག་པར་གསུངས་སོ། །སྤྱི་བོའི་པདྨའི་ལྟེ་བར་ཧཾ་ལས་འཛག་པ་ལ་དེར་མེ་འབར་བས་སླེབ་དགོས་པས། དེར་ཨཱ་ལི་ཀཱ་ལི་གཉིས་ཀ་བཤད་དོ། །སྲོག་དབུ་མར་ཞུགས་ནས་གཏུམ་མོ་འབར་བ་ལ། རྩ་དབུ་མ་གནས་པའི་ལུས་ཀྱི་གནད་ཆེ་སར་གནད་དུ་བསྣུན་དགོས་པ་ལ། བྱང་སེམས་དཀར་པོ་ཤས་ཆེར་གནས་པའི་སྤྱི་བོ་བདེ་ཆེན་གྱི་འཁོར་ལོ་དང༌། དམར་ཆ་ཤས་ཆེར་གནས་པའི་ལྟེ་བ་སྤྲུལ་པའི་འཁོར་ལོ་དང༌། གསང་གནས་བདེ་སྐྱོང་གི་འཁོར་ལོ་དང༌། དཀར་དམར་ཆ་མཉམ་དུ་གནས་པ་སྙིང་ཁ་ཆོས་ཀྱི་འཁོར་ལོ་དང༌། རྩ་དབུ་མའི་ཡར་སྣ་དང་མར་སྣ་སོགས་གནད་དུ་བསྣུན་སའི་སྒོ་མང་ངོ༌། །འདི་ལ་ལཱུ་ཨི་པའི་ལུགས་ཀྱིས་ནི་ཐིག་ལེ་སྒོམ་པ་དང་རྡོར་བཟླས་བྱེད་པ་གཉིས་ཀ་ལྟེ་བ་ནས་བྱེད། དྲིལ་བུ་ཞབས་ཀྱིས་ནི་བདག་བྱིན་རླབས་གཉིས་སྙིང་གནས་དང༌། སྣ་ཚོགས་རྡོ་རྗེའི་རིམ་པ་གཉིས་དབུ་མའི་ཡར་མར་གྱི་སྣ་གཉིས་ནས་དང༌། ཛཱ་ལ་དྷ་རའི་རིམ་པ་གསང་གནས་དང༌། བསམ་མི་ཁྱབ་ཀྱི་རིམ་
པ་སྙིང་ཁ་ནས་བྱེད་དོ། །ནག་པོའི་ལུགས་ཀྱིས་ནི་རིམ་པ་བཞི་པ་ལས་གསུངས་པ་ལྟར། སྤྱིར་འཁོར་ལོ་བཞི་དང༌། ཁྱད་པར་དུ་ལྟེ་བར་གནད་དུ་བསྣུན་ནོ། །དེས་ན་བཤད་རྒྱུད་ལས་དབྱངས་གསལ་འགོད་པའི་གཞིའི་པདྨ་སྤྱི་བོའི་རྩ་འཁོར་ལ་གསུངས་པ་ནི། དང་པོར་བྱང་སེམས་གང་ནས་འཛག་པའི་གནས་ལ་དགོངས་ལ། གནས་དེ་ནས་བྱང་སེམས་འདྲེན་པའི་ཐབས་སུ་ལུས་ལ་གནད་དུ་བསྣུན་པ་ལ་ནི། འཁོར་ལོ་གཞན་གྱིས་པདྨ་དགོས་པས་དེ་རྣམས་ཀྱང་དབྱངས་གསལ་འགོད་པའི་གཞིའི་པདྨར་བྱའོ། །དབྱངས་གསལ་ལས་ཧེ་རུ་ཀ་སྐྱེད་པའི་ངེས་དོན་ནི། བྱང་སེམས་དཀར་དམར་གྱི་འདུ་འཕྲོད་ལས་ངེས་དོན་གྱི་ཧེ་རུ་ཀ་སྐྱེད་པའི་དོན་ཡིན་ལ། དེ་ཡང་སྤྱི་བོ་ཁོ་ནར་མིན་གྱི་ལུས་ཀྱི་ཆ་གཞན་དུ་ཡང་གནད་དུ་བསྣུན་པས་ཧེ་རུ་ཀ་སྐྱེད་པ་དང༌། ངེས་དོན་གྱི་ཧེ་རུ་ཀ་ལ་ཡང་སྣང་ཕྱོགས་དང་སྟོང་ཕྱོགས་ཀྱི་ཧེ་རུ་ཀ་གཉིས་ཡོད་པ་ཤེས་པར་བྱའོ། །རྩ་རྒྱུད་ཀྱི་དོན་ལ་རྫོགས་རིམ་གཞན་ཡོད་ཚུལ་ནི་སྐབས་སུ་འཆད་པར་འགྱུར་རོ། ། སྔར་བཤད་པའི་ཚུལ་གྱི་འཆད་ཤེས་ན། བཤད་རྒྱུད་ལ་བརྟེན་ནས་རྩ་རྒྱུད་ཀྱི་ཤིན་ཏུ་གསང་བའི་གནས་བཤད་པའི་གྲུབ་ཆེན་གསུམ་གྱི་མན་ངག་གི་གནད་རྣམས་ལེགས་པར་ཤེས་པར་འགྱུར་ལ། དེ་ལྟར་འཆད་མི་ཤེས་ན་ནི་ནག་པོ་པའི་རིམ་པ་བཞི་པ་ལ་ཅུང་ཟད་རེའི་བཤད་པ་སྣང་ན་ཡང༌། ལཱུ་ཨི་པ་དང་དྲིལ་བུ་པའི་རྫོགས་རིམ་ནི། རྩ་རྒྱུད་ཀྱི་སྐབས་གང་དུ་སྦས་པ་འཆད་ཤེས་པར་མི་
སྣང་ངོ༌། །གསུམ་པ་ནི། རྡོ་རྗེ་མཁའ་འགྲོ་ལས། བདེ་མཆོག་ཕྱི་མར་གསུངས་པའི་ཡི་གེ་བཅུ་དྲུག་ཞུས་པའི་ལན་དུ། ཡི་གེ་བཅུ་དྲུག་གིས་བཅུད་ལེན་གྱི་རྫས་བསྟན་ཏེ། ཡི་གེ་བཅུ་དྲུག་ནི། ར་ཧ་སྱེ་པ་ར་མ་ར་མྱེ། སརྦ་ཏྨ་ནི། ས་དཱ་སྠི་ཏཿ ཞེས་པ་སྟེ། གསང་བ་མཆོག་ཅེས་པའི་རྐང་པ་གཉིས་ཀྱི་སྐད་དོད་དོ། །དེ་རྣམས་ཕྲལ་ནས་ཡི་གེ་རེ་རེའི་དོན་རྡོ་རྗེའི་མཁའ་འགྲོར་གསུངས་པ། ལྭ་བ་པའི་འགྲེལ་པར་འབྱུང་བ་ནི། ར་ནི་མཚལ་ཆེན་པོ་ཡི་ཁམས། །ཧ་ནི་རི་ལས་སྐྱེས་པ་སྟེ། །རི་སྐྱེས་ཞེས་བྱ་མགོ་སྐྱེས་སོ། །སྱེ་ནི་དྲི་ཡི་སྣོད་ཡིན་ཏེ། །ལུས་ལ་དྲི་ནི་ཇི་ལྟར་བའོ། །པ་ནི་རླུང་དུ་གསུངས་པ་སྟེ། །ར་ན་དྲི་ཉིད་ཡིན་པར་གསུངས། །ཡི་གེ་མ་ནི་མེ་ཏོག་སྟེ། །ར་ནི་དེ་བཞིན་ལན་ཚྭའོ། །མྱེ་ནི་ཤ་ཆེན་པོར་འདོད་དེ། །ས་ནི་རབ་ཏུ་སྦྱོར་བ་ཉིད། །རྦ་ནི་མགོ་བོར་རབ་ཏུ་གསུངས། །ཏ་མ་མེ་ཡི་རྐང་ཡིན་ཏེ། །ནི་ནི་དྲི་ཡི་མར་ཁུའོ། །ས་ནི་སོ་དང་སེན་མོ་སྟེ། །དཱ་ནི་རྒྱ་མཚོ་ལས་སྐྱེས་པའོ། །སྠི་ནི་ཁ་ཡི་སྙིང་པོ་སྟེ། །ཏཿནི་ག་བུར་བསྟན་པའོ། ཞེས་གསུངས་སོ། །དེ་ལ་ར་ནི་དུས་སུ་འབབ་པའི་ཟླ་མཚན་ནོ། །ཧ་ནི་མིའི་ཀླད་པ་མ་རུལ་པ་དང༌། སྱེ་ནི་ལུས་ཀྱི་དྲི་མ་དང༌། །བཞི་པ་ལ་འགྱུར་གཞན་ལས། པ་ནི་པགས་པ་ཉིད་དུ་གསུངས། །ཞེས་འབྱུང་སྟེ་བུ་ཆུང་གི་པཌ་བ་ཞིབ་པར་སྦྱངས་པ་ཡིན་ཟེར། ར་ནི་ཁ་ཟས་སྣུམ་བག་ཅན་མ་ཟོས་པའི་དྲི་ཆེན་དང༌། མ་ནི་ལོ་བརྒྱད་མ་དང་རོལ་པ་ལས་བྱུང་བའི་ཁྲག་དང་བཅས་པ་ཞེས་གསུངས་པ་དེར་མངོན་ནོ། །ར་ནི་ཐོ་རངས་ཀྱི་དྲི་ཆུ་དང༌། མྱེ་ནི་
ཆུ་སེར་ལན་ཅིག་བཏོན་པའི་ཤ་ཆེན་དང༌། ས་ནི་མིའི་ཚིལ་གྱི་ཞུན་དང༌། རྦ་ནི་སྐྲའི་མར་ཁུ་དང་ལན་ཚྭའོ། །ཏྨ་ནི་དྲི་ཆེན་གྱི་མར་ཁུ་དང༌། ནི་ནི་རྐང་མར་དང༌། ས་ནི་གསལ་ལ། དཱ་ནི་དྲི་ཆུ་བར་པ་དང༌། སྠི་ནི་ཁ་ཆུ་དང༌། ཏཿནི་སྐྱེས་པ་དར་མའི་ཁུ་བ་ལ་འཆད་དོ། །དེ་ལྟར་བཅོ་བརྒྱད་ཡོད་ཀྱང་རྦའི་རྫས་གཉིས་གཅིག་ཏུ་དང༌། སོ་དང་སེན་མོ་གཉིས་གཅིག་ཏུ་བགྲངས་པས་བཅུ་དྲུག་གོ། །དེ་རྣམས་བསྡུས་པའི་སྙིང་པོ་ནི་བདུད་རྩི་ལྔ་སྟེ། རྡོ་རྗེ་མཁའ་འགྲོ་ལས། གསང་སོགས་རྣལ་འབྱོར་བ་ཡི་རྫས། བཤང་དང་གཅི་སོགས་ལྔ་ལ་བྱ། །ཁམས་རྣམས་སྡུད་པའི་སྡེ་ཚན་ནི། །དེ་ལྟར་བཅུད་ལེན་བསྟན་པ་ཡིན། །ཞེས་གསང་བ་ནས་རྟག་བཞུགས་པའི་བར་གྱི་ཚིག་ལྔ་བདུད་རྩི་ལྔ་ལ་སྦྱར་ཏེ། ཁ་སྦྱོར་ལས་ཀྱང་དེ་བཞིན་དུ་འབྱུང་ངོ༌། །སྐྲའི་མར་ཁུ་དང༌། དྲི་ཆེན་གྱི་མར་ཁུ་དང༌། དྲི་ཆུ་བར་བ་སྒྲུབ་ལུགས་དང༌། རྫས་རྣམས་བསྟེན་ཚུལ་ཤེས་པར་འདོད་ན་བདེ་མཆོག་གི་རྣམ་བཤད་ཆེན་མོ་ལས་ཤེས་པར་བྱའོ། །ལམ་འདིར་བདེ་བ་ཆེན་པོ་གཙོ་བོ་ཡིན་ལ། དེ་ནི་ལུས་ཀྱི་ཀུན་ཏ་ལྟ་བུ་རྒྱས་པ་ལ་རག་ལས་ཤིང༌། ལུས་གྱི་སྟོབས་རྒྱས་པར་བྱེད་པ་ལ་སྔར་གྱི་བཅུད་ལེན་ལ། ཕྱི་རོལ་གྱི་རྫས་ཀྱི་བཅུད་ལེན་གྱིས་བཅུ་དྲུག་གི་ཆར་ཡང་མི་ཕོད་པ་དང༌། རྫས་བཅུ་དྲུག་དང་བདུད་རྩི་ལྔའི་བཅུད་ལེན་བསྟེན་པ་ལས་བྱུང་བའི་བདེ་བར་སྟེན་ན། བདེ་བ་འཕེལ་བ་དང་བདེ་བ་དེ་ཡང་ཆོས་ཀྱི་དབྱིངས་དང་མཉམ་པར་སྦྱོར་བ་བསྟན་པ་ལས་ཐེར་ཟུག་ཏུ་བདེ་བ་སྟེར་བར་གསུངས་སོ། །གཉིས་
པ་ལ་གཉིས། འབྲས་བུ་ལ་སྦྱར་ཏེ་བཤད་པ་དང༌། ལམ་གྱི་རྫོགས་རིམ་ལ་སྦྱར་ཏེ་བཤད་པའོ། །དང་པོ་ནི། རྡོ་རྗེ་མཁའ་འགྲོ་ལས། མཁའ་འགྲོ་ཀུན་དངོས་སོགས་ལ་བཤད་པ་གཉིས་མཛད་པའི་ཕྱི་མ་ནི། འབྲས་བུ་ལ་སྦྱར་བ་ལྟར་བཤད་ན། མཁའ་འགྲོ་མ་ཀུན་ནི་རབ་གཏུམ་མ་ལ་སོགས་པའོ། །དངོས་པོ་ནི་ཧེ་རུ་ཀ་མཁའ་འགྲོ་མ་དེ་རྣམས་ཀྱི་རྡུལ་ཕྲ་རབ་ལས་བསྒྲུབས་པའི་རང་བཞིན་ནམ་ངོ་བོར་སྟོན་ནོ། །དེ་ཉིད་སེམས་ཅན་གྱི་དོན་ལ་ནུས་པ་དང་ལྡན་པའི་ཕྱིར་སེམས་དཔའོ། །མི་ཤེས་པའི་རི་བོ་འཇོམས་པས་ན་ཧེ་རུ་ཀའི་ཡེ་ཤེས་ནི་རྡོ་རྗེའོ། །སེམས་དཔའ་འོག་མའི་དོན་མ་བཤད་པ་ནི་སེམས་དཔའ་སྔ་མའི་དོན་བཤད་པ་དང་འདྲ་བ་ལ་དགོངས་སོ། །འདིར་རྡོ་རྗེ་མཁའ་འགྲོ་ལས། སེམས་དཔའ་རྣམ་པ་གཉིས་གསུངས་ཏེ། །སྣོད་དང་བཅུད་ཀྱི་འཇིག་རྟེན་ནོ། །བཅུད་ནི་རྒྱུད་བ་ཞེས་བཤད་ལ། །དེ་བཞིན་སྣོད་ནི་བསྟན་པའོ། །རེ་རེ་ཞིང་ཡང་གཉིས་གཉིས་ཏེ། །སྐལ་བ་བཟང་དང་སྐལ་ངན་ནོ། །ས་དང་ཆུ་དང་མེ་རླུང་གི། གཟུགས་ནི་རྣམ་པ་བཞི་རུ་གནས། །ཞེས་གསུངས་པ་ནི། སེམས་དཔའི་དོན་ནུས་པ་དང་ལྡན་པ་ལ་བཤད་པའི་གང་ལ་ནུས་པ་དང་ལྡན་པའི་སེམས་ཅན་ལ་ཡང་ནུས་པ་དང་ལྡན་པའི་སྒྲ་ཉེ་བར་བཏགས་ནས་གསུངས་ལ། དེའི་སྒོ་ནས་སེམས་ཅན་དེའི་གནས་སྣོད་ལ་ཡང་དེའི་སྒྲ་བཏགས་པའོ། །གང་ཞིག་ནུས་པ་དང་ལྡན་པའི་འདུལ་བྱེད་ལ་ནི་སྒྲ་དེ་དངོས་སུ་འཇུག་གོ ། དེ་ལྟར་ན་འདུལ་བྱེད་ཀྱི་དག་པའི་སྣོད་བཅུད་གཉིས་ནི་སྐལ་བཟང་དང༌། གདུལ་བྱའི་མ་དག་པའི་སྣོད་བཅུད་གཉིས་ནི་སྐལ་ངན་
དང༌། གཟུགས་ནི་འབྱུང་བཞིའི་ཚུལ་ལམ་རྣམ་པ་ཅན་ནོ། །བདེ་བའི་མཆོག་ནི་ཕུལ་དུ་བྱུང་བའོ། །འདི་ནི་ཞེས་པའི་ནིའི་སྒྲ་ནི་ངེས་གཟུང་སྟེ། བཅོམ་ལྡན་འདས་འདི་ཁོ་ན་རང་ཉིད་དག་པའི་བརྟན་གཡོ་མ་ལུས་པའི་ངོ་བོར་འབྱུང་བས་ན་རང་འབྱུང་ངོ༌། །བཅོམ་ལྡན་འདས་ནི་བཤད་ཟིན་ཏོ། །དཔའ་བོ་ནི་མི་མཐུན་ཕྱོགས་ཐམས་ཅད་ལས་རྒྱལ་བའོ། །མཁའ་འགྲོ་ནི་དཔའ་བོ་དང་དཔའ་མོ་རྣམས་སོ། །དྲ་བ་ནི་དེ་དག་གི་ཚོགས་སོ། །སྡོམ་པ་ཡིན་ཞེས་པ་ནི་དེ་རྣམས་ཐམས་ཅད་ཧེ་རུ་ཀ་གཅིག་གི་ངོ་བོར་སྡོམ་པ་སྟེ། དེ་ལྟར་གྱུར་པའི་བཅོམ་ལྡན་འདས་ཀྱིས་རྒྱུད་བཤད་དོ། །ཞེས་སྦྱར་རོ། །རྐང་པ་དེ་བཞིས་རྒྱུད་ཀྱི་སྟོན་པ་ཕུན་ཚོགས་བསྟན་པར་བླ་མ་རྣམས་བཞེད་པ་ནི། ལྭ་བ་པ་དང་ཡང་མཐུན་པར་སྣང་ངོ༌། །གཉིས་པ་ནི། རེ་ཞིག་སྔར་གྱི་རྐང་པ་གཉིས་དང༌། མཁའ་འགྲོ་ཀུན་དངོས་སོགས་ཀྱི་འབྲེལ་བཤད་པར་བྱ་སྟེ། སྔོན་དུ་རྐང་པ་གཉིས་ཀྱིས་བསྟན་པའི་བཅུད་ལེན་བསྟན་པས་ལུས་རྒྱས་པར་བྱས། དེ་ནས་འབྱུང་བ་རིམ་བརྩེགས་སོགས་ཀྱིས་བསྟན་པའི་རྡོ་རྗེའི་ལུས་སྤྱི་དང༌། གསང་བ་མཆོག་ཨེ་ཝཾ་མ་ཡ་ལ་སྦྱོར་བའི་ཡི་གེ་བཞིས་བསྟན་པའི་རྩ་འཁོར་བཞི་ཚོགས་པ་དང༌། སོ་སོ་བ་ལ་བརྟེན་པའི་རྫོགས་རིམ་སྒོམ་པའི་ནང་གི་ཐབས་དང༌། ཡང་ཡི་གེ་བཞིས་བསྟན་པའི་སྤྱན་མ་སོགས་ཀྱི་རིགས་ཀྱི་ལས་ཀྱི་ཕྱག་རྒྱ་བཞིའི་ཕྱིའི་ཐབས་ལ་བརྟེན་ནས། དུས་གཅིག་ན་ཞེས་པའི་དེས་དོན་སྲོག་དབུ་མར་ཞུགས་ཏེ་འབྱུང་འཇུག་མི་བྱེད་པ་དང༌། མངོན་བརྗོད་སྔར་དྲངས་པ་ལྟར་རླུང་དེས་གཏུམ་མོ་
སྦར་བ་ལ་བརྟེན་ནས། ཐོས་པའི་སྐད་དོད་ཤྲུ་ཏའི་ངེས་དོན་བཤད་པ་ལྟར། སྤྱི་བོ་ནས་བྱང་སེམས་གསང་གནས་ཀྱི་རྩེའི་བར་ཏུ་འཛགས་པ་ལས་བྱུང་བའི་བདེ་ཆེན་ལ་པདྨ་གར་དབང་ནས་ཧེ་རུ་ཀའི་བར་གྱི་ཐ་སྙད་ཀྱིས་གསུངས་པ་ནི། རྡོ་རྗེ་སེམས་དཔའ་ཧེ་རུ་ཀ །མཁའ་འགྲོ་མ་ཀུན་སྒྲ་རུ་བཤད། ཅེས་པ་ལྟར་ནང་གི་དཔའ་བོ་དང་དཔའ་མོའི་མཁའ་འགྲོ་ཀུན་གྱི་དངོས་པོ་སྟེ་ངོ་བའོ། །དེ་ཉིད་གསལ་བ་ལས་ཀྱང༌། མཁའ་འགྲོ་མ་ནི་ཐམས་ཅད་ཀྱི། །རང་བཞིན་ཉིད་ཕྱིར་དེ་ཡི་དངོས། །ཞེས་གསུངས་སོ། །སེམས་དཔའ་ནི། སེམས་དཔའ་ཞེས་པའང་འཁོར་བ་ན། །མཆོག་ཏུ་དགའ་བའི་ངོ་བོ་ཡིན། །ཞེས་གསུངས་ཏེ། འཁོར་བ་ནི་འདིར་ཐབས་བདེ་བ་ཆེན་པོ་ལ་བྱའོ། །རྡོ་རྗེ་སེམས་དཔའི་སེམས་དཔའི་དོན་ཡང་དེའོ། །རྡོ་རྗེ་ནི་བདེ་བ་དེ་ཉིད་སྟོང་པ་ཉིད་དང་དབྱེར་མེད་པར་ཞུགས་པའོ། །རྒྱུ་མཚན་དེས་ན་རྩ་རྒྱུད་ལས། རྡོར་སེམས་ཞེས་པའི་འོག་ཏུ་བདེ་བའི་མཆོག །ཅེས་གསུངས་ཏེ། བདེ་བ་ཆེན་པོ་ནམ་མཁའི་ཁམས་སྟོང་པ་ཉིད་ཀྱི་ཡུལ་ཅན་དུ་གནས་པ་ནི། །བདེ་བ་གཞན་ལས་མཆོག་ཡིན་པའི་ཕྱིར་ཏེ། བྱང་ཆུབ་སེམས་ནི་མི་ཕྱེད་ཕྱིར། །འདི་ལ་རྡོ་རྗེ་སེམས་དཔར་བརྗོད། །དེ་ཡི་ཕྱིར་ན་དེ་འོག་ཏུ། །བདེ་བའི་མཆོག་ཏུ་རྒྱུད་ལས་གསུངས། །ནམ་མཁའི་མཁས་སུ་གནས་པས་ཀྱང༌། །དེ་ནི་བདེ་བའི་མཆོག་ཏུ་བརྗོད། །ཅེས་གསུངས་སོ། །མཆོག་ཏུ་དགའ་བ་འདི་ནི་གདུལ་བྱ་རང་རང་གི་ངོར་རྣམ་སྣང་ལ་སོགས་པའི་སྐུར་འབྱུང་བས་རང་འབྱུང་ངམ། དེ་ཁོ་ན་ཉིད་ཇི་བཞིན་དུ་རྗེས་སུ་
ཞུགས་པས་རང་འབྱུང་དང༌། །སྐལ་པ་ཕུན་ཚོགས་དང་ལྡན་པས་བཅོམ་ལྡན་འདས་དང༌། མི་མཐུན་ཕྱོགས་རྩད་ནས་འབྱིན་པར་འགྱུར་བའི་ནུས་པ་དང་ལྡན་པས་དཔའ་བོའོ། །མཁའ་འགྲོ་ནི་རྩ་སོ་དྲུག་དང༌། དེ་དག་གི་ནང་གི་ཁམས་རྣམས་སོ། །དྲ་བ་ནི་ཚོགས་སོ། །དེའི་ནང་ནས་རྒྱུ་བའི་རླུང་གིས་བྱང་སེམས་བསྐྱོད་པ་ལས་བྱུང་བའི་ཡེ་ཤེས་ནི་སྡོམ་པ་སྟེ་སཾ་བ་ར་ཞེས་པ་བདེ་བ་མཆོག་གོ། །དེ་ལྟར་མཁའ་འགྲོ་ཀུན་ཞེས་སོགས་ཀྱི་རྐང་པ་བཞིའི་དོན་གྱི་བདེ་བ་ལ་ནི། ཡས་བབས་དང་མས་བརྟན་གྱི་སྐབས་ཀྱི་དགའ་བ་བཞི་ཚན་གཉིས་ཡོད་ལ། རླུང་དབུ་མར་ཞུགས་གནས་ཐིམ་གསུམ་བྱས་པ་ལས་བྱུང་བའི་དགའ་བ་བཞི་ནི། ཕྱག་ཆེན་ཐིག་ལེ་ལས། གང་ཕྱིར་དགའ་བ་དེ་སྣང་བ། །སྣང་བ་མཆེད་པ་མཆོག་ཏུ་བཤད། །ཁྱད་དགའ་ཉེ་བར་ཐོབ་པར་ཤེས། །ལྷན་ཅིག་སྐྱེས་དེ་འོད་གསལ་བའོ། །ཞེས་དགའ་བཞི་སྣང་མཆེད་ཐོབ་གསུམ་འོད་གསལ་དང་བཞིར་གསུངས་སོ། །དེ་ཡང་མངོན་བརྗོད་ལས། དགའ་བ་དང་པོ་ཡེ་ཤེས་ཏེ། །མཆོག་ཏུ་དགའ་བ་མཉམ་པར་སྦྱོར། །བདེ་བར་དགའ་བ་གྲུབ་པ་ཆེ། །ལྷན་ཅིག་སྐྱེས་དགའ་བླ་མེད་ཡིན། །སྦྱོར་བ་དང་ནི་ཤིན་ཏུ་སྦྱོར། །སྦྱོར་བ་ཆེ་དང་ཡེ་ཤེས་སྦྱོར། །དེ་དག་ཆོ་གའི་རིམ་པའོ། །ཐིག་ལེ་གཞུང་གི་སྦྱོར་ཤེས་ན། །ཕྲ་བའི་སྦྱོར་བས་བལྟ་བར་བྱ། །ཞེས་གསུངས་པའི་དགའ་བཞིའི་རིམ་པ་ནི་ཡས་བབས་ཀྱི་རིམ་པ་ཡིན་ལ། རྐང་པ་ཐ་མ་གཉིས་ཀྱི་དོན་ནི་ཐིག་ལེའི་རྣལ་འབྱོར་སྒོམ་པའི་གཞུང་གི་
དོན་ཤེས་ནས་ཡི་གེ་དང་ཐིག་ལེ་ཕྲ་མོའི་སྦྱོར་བ་སྟེ་རྣལ་འབྱོར་བསྒོམས་ནས། དགའ་བཞི་ཇི་ལྟར་སྐྱེ་བ་བལྟ་བར་བྱའོ། །ཞེས་པའོ། །འགྲེལ་བར་རྣལ་འབྱོར་དང་རྗེས་སུ་རྣལ་འབྱོར་དང་ཤིན་ཏུ་རྣལ་འབྱོར་དང་རྣལ་འབྱོར་ཆེན་པོའི་ཡེ་ཤེས་ཀྱི་ཆོ་གའི་རིམ་པའོ། །ཞེས་འཆད་དེ། དགའ་བ་བཞི་དང་རིམ་པ་བཞིན་དུ་སྦྱར་རོ། །ཡང་མངོན་བརྗོད་ལས། ལྟེ་བ་སྙིང་པད་ནུ་མའི་དབུས། །ལྕེ་ཡི་རྩ་དང་མགོ་སྟེང་དུ། །དགའ་བ་དང་ནི་མཆོག་དགའ་ཉིད། །དམ་པར་དགའ་དང་ལྷན་ཅིག་སྐྱེས། །དང་པོ་འདབ་མ་དྲུག་ཅུ་བཞི། །གཉིས་པ་བརྒྱད་པ་མཆོག་ཡིན་ཏེ། །གསུམ་པ་འདབ་མ་བཅུ་དྲུག་པ། །བཞི་པ་སུམ་ཅུ་རྩ་གཉིས་འདབ། །ཕག་མོ་ལྟེ་བའི་རྩར་གནས་པ། །ལྷན་ཅིག་སྐྱེས་དགའ་ཁྲག་འཐུང་མཆོག ། ཅེས་ལྟེ་བར་དགའ་བ་དང༌། སྙིང་ཁར་མཆོག་དགའ་དང༌། ལྕེའི་རྩ་བ་སྟེ་མགྲིན་པར་དམ་པ་སྟེ་ཁྱད་པར་གྱི་དགའ་བ་དང༌། མགོ་ཡི་སྟེང་སྟེ་སྤྱི་བོར་ལྷན་སྐྱེས་ཀྱི་དགའ་བ་སྐྱེ་བར་བཤད་པ་ནི་མས་བརྟན་གྱི་དགའ་བཞིའི་རིམ་པའོ། །སྙིང་པད་ནི་སྙིང་ཁའི་རྩ་འཁོར་ཏེ་གཞན་གསུམ་ལ་ཡང་སྦྱར་རོ། །ལྟེ་བའི་རྩ་བར་ཕག་མོ་ནི་གཏུམ་མོ་ཨ་ཐུང་དང༌། ལྷན་སྐྱེས་ཁྲག་འཐུང་དུ་བཤད་པ་ནི་མས་བརྟན་གྱི་ལྷན་སྐྱེས་བྱང་སེམས་གྱེན་དུ་ལོག་པ་སྤྱི་གཙུག་ཏུ་ཕྱིན་པ་ན་སྐྱེ་བས། སྤྱི་གཙུག་གི་ཧཾ་ཡིག་ཧེ་རུ་ཀར་བསྟན་པའོ། །གསུམ་པ་ལ་གཉིས། དྲང་དོན་དུ་བཤད་པ་དང༌། ངེས་པའི་དོན་དུ་བཤད་པའོ། །དང་པོ་ནི། འབྱུང་བ་ནི་འབྱུང་གནས་ཏེ་སྒྲའི་ཚུལ་ལོ། །དེ་ལ་སྒྲ་ནི་དབྱངས་དང་ཚུལ་ནི་དེའི་རྣམ་པ་ཅན་ཏེ། དབྱངས་གསལ་དང་སྔགས་
རྣམས་སོ། །དེ་ཡང་ཡི་གེ་ངག་ཏུ་བརྗོད་པ་མིན་གྱི། ཡིད་ལ་བྲིས་པའི་རྣམ་པ་ཅན་དུ་སྣང་བ་ཡིན་པས་སྒྲར་བཏགས་པའོ། །དེ་དག་ལས་བྱུང་བ་རྣམས་ནི་ལྷ་རྣམས་ཏེ། དེས་ན་ལྷའི་འབྱུང་གནས་སོ། །དམ་ཚིག་ནི་ལྷ་མོ་རྣམས་སོ། །དེ་རྣམས་ཀྱི་སྤྱོད་པ་ནི་སྤྱོད་པའོ། །སྤྱོད་པ་དེའི་སྤྱོད་ཡུལ་ནི་དཔའ་བོ་རྣམས་ཡིན་ནོ། །སྒྲ་ཚུལ་ལས་བྱུང་བ་ལ་ནམ་མཁའི་ནཱ་ད་དང༌། དབང་པོ་གཉིས་མཉམས་པར་སྦྱོར་བ་ལས་བྱུང་བར་འཆད་པར་ཡོད་ཀྱང་ཕྱོགས་རེ་བར་སྣང་ལ། སྔར་བཤད་པ་རྡོ་རྗེ་མཁའ་འགྲོའི་འགྲེལ་པ་ལས་འབྱུང་བ་ལྟར་ན། ལྷའི་སྐྱེད་ཆོག་ཕལ་མོ་ཆེ་ལ་འགྲོ་བར་སྣང་ངོ༌། །བླ་མ་རྣམས་རྐང་པ་གཉིས་པོ་འདི་སྔོན་བྱུང་གི་འཁོར་ལ་ཡང་སྦྱོར་ཏེ་དེ་ཡང་རུང་བར་སྣང་ངོ༌། །གཉིས་པ་ནི། །ཕུང་སོགས་སྐྱེས་པར་བཤད་པའི་ཁུ་ཁྲག་ལས་མཆོག་ཏུ་བདེ་བ་སྐྱེས་ཤིང་བྱུང་བས་ན་འབྱུང་གནས་སྒྲ་ཚུལ་ལོ། །དེ་ལས་ངེས་པར་འབྱུང་བ་རྣམས་ནི། བྱང་ཆུབ་ཀྱི་སེམས་བདེ་བ་ཆེན་པོ་སྐྱེད་པར་རྒྱུད་འདིར་བསྟན་པ་ཉིད་རྒྱུད་གཞན་དུ་ཡང་བཞེད་པ་སྟེ་འབྱུང་བར་ངེས་པའི་དོན་ནོ། །བསྡུ་ན་རྫོགས་རིམ་བསྒོམས་པས་བྱང་སེམས་དཀར་དམར་གྱི་འབར་འཛག་ལས་བྱང་ཆུབ་ཀྱི་སེམས་སྐྱེ་བའོ། །དེ་ཉིད་རྣལ་འབྱོར་པས་བསྟེན་ཞིང་བསྙེན་པར་བྱ་བས་དམ་ཚིག་གོ། དེ་ལ་སྤྱོད་པའི་སྤྱོད་ཡུལ་ནི་དབང་པོ་དྲུག་གིས་ཡུལ་དྲུག་ལ་ལོངས་སྤྱོད་པའོ། །དབང་པོ་རྣམས་ལ་ཡང་སྤྱོད་ཡུལ་ཞེས་པ་ནི། དོན་དམ་པར་ཡུལ་དབང་དབྱེར་མེད་པས་ཉེ་བར་བཏགས་པའོ། །ཡུལ་རྣམས་བདེ་
ཆེན་གྱི་རྣམ་རོལ་དུ་ཤར་བའི་ཚུལ་གྱིས་ལོངས་སྤྱོད་པས་བདེ་ཆེན་འབར་ཏེ། ཡུལ་ཡུལ་ཅན་གཉིས་སོ་སོར་མི་སྣང་བར་ལྷན་ཅིག་སྐྱེས་པར་རོ་གཅིག་པའི་གནས་སྐབས་འཐོབ་པར་འགྱུར་རོ། །འདི་ནི་རྡོ་རྗེ་མཁའ་འགྲོ་རྩ་འགྲེལ་ལ་བརྟེན་ནས་བཤད་པའོ། །ལུས་ལ་གནད་དུ་བསྣུན་པའི་རྫོགས་རིམ་སྒོམ་པ་ཐམས་ཅད་ལ་སྔར་བཤད་པ་ལྟར་འབྱུང་བས། རིམ་པ་བཞི་པ་ལྟ་བུ་ཕྱོགས་རེ་བ་ལ་བཤད་མི་དགོས་སོ། །གཉིས་པ་ནི། འཇིག་རྟེན་ཞེས་པའི་རྐང་པ་གཉིས་ལ་ལོ་ཙཱ་བ་གཉིས་ཀྱི་བཤད་སྲོལ་ཡང་མི་མཐུན་པར་སྣང་ཞིང༌། འགྲེལ་པ་གསུམ་ལས། ཐོག་མ་ཐུགས་དང་དབུས་གསུང་དང་མཐའ་སྐུའི་འཁོར་ལོ་གསུམ་ལ་གནས་པའི་དཔའ་བོ་རྣམས་མཐོ་རིས་དང་མི་ཡུལ་དང་ས་འོག་གི་འཇིག་རྟེན་གསུམ་དུ་རྙེད་པར་དཀའ་ཞེས་འཆད་དོ། །འདི་ལ་བཤད་ཚུལ་གཉིས་ལས་བཤད་པ་དང་པོ་ནི་ཐོག་མ་གསང་བ་དང་དབུས་མཆོག་དང་མཐར་དགྱེས་པ་དང༌། ཡང་དག་གནས་ཀྱི་དོན་འདི་སྐད་བདག་གིས་ཐོས་པའི་དུས་གཅིག་ན་སོགས་ཀྱི་ངེས་པའི་དོན་སྔར་བཤད་པ་ནི། ས་གསུམ་གྱི་འཇིག་རྟེན་གསུམ་ན་ཤིན་ཏུ་རྙེད་དཀའ་བ་སྟེ་རྟོགས་པར་དཀའོ་ཞེས་པའི་དོན་ནོ་ཞེས་ཏེ་རྡོ་རྗེ་མཁའ་འགྲོའི་དགོངས་པའོ། །ཡང་རྡོ་རྗེ་མཁའ་འགྲོ་ལས། འཇིག་རྟེན་གསུམ་དུ་རྙེད་དཀའ་བའི་དོན་ཟག་བཅས་ཀྱི་དངོས་པོ་གསུམ་ལས་རྙེད་པར་མི་འགྱུར་བ་ལ་བཤད་པ་ལྟར་ན། འཇིག་རྟེན་གསུམ་ནི་དགའ་བ་དང་མཆོག་དགའ་དང་ཁྱད་པར་གྱི་དགའ་བ་གསུམ་ལ་བྱའོ། །དེ་དག་གིས་ནི་གང་ལས་རྙེད་དཀའ་བ་བསྟན་ཏོ། །གང་རྙེད་པར་དཀའ་ན་ལྷན་ཅིག་སྐྱེས་པའི་
ཡེ་ཤེས་སོ། །རྙེད་དཀའ་བའི་རྒྱུ་མཚན་ནི་དགའ་བ་གསུམ་ཟག་པ་དང་བཅས་པ་ཞེས་པས་སྟོན་ནོ། །དེའི་དོན་ནི་འཇིག་རྟེན་གྱི་སྒྲས་དམིགས་པ་དང་བཅས་པའི་རྟོག་པ་སྟོན་ལ། དེ་ཡང་ཐོག་མ་དང་དབུས་ཏེ་བར་དང་མཐར་ཏེ་ཐ་མ་རྣམས་ཀྱི་ཆ་ཤས་སུ་ཕྱེ་ནས་ཡང་དག་པར་རྟོགས་པའོ། །དེ་རྣམས་ནི་བྷ་བ་བྷ་དྲའི་ལུགས་སོ། །དེ་དག་གི་དོན་བསྡུ་ན་གཉིས་སུ་སྣང་བ་དང་དེར་ཞེན་པའི་རྟོག་པ་མ་ནུབ་བར་དུ། དོན་གྱི་ལྷན་སྐྱེས་ཉམས་སུ་མྱོང་བ་མེད་པར་སྟོན་པས། རྙེད་དཀའ་བའི་ལྷན་སྐྱེས་ནི་ལྷན་སྐྱེས་ཙམ་མིན་ནོ། །གསུམ་པ་ནི། བསྲུབ་བྱ་སྟེ་གཙུབ་སྟན་དང༌། སྲབ་བྱེད་དེ་གཙུབ་ཤིང་དང་ལག་པའི་རྩོལ་བ་རྣམས་སྦྱར་བ་ལས་དུ་བ་སྐྱེ་ཞིང་མེ་མཆེད་མོད་ཀྱི། བརྟགས་ན་དེ་གསུམ་པོ་གང་ལ་ཡང་མི་གནས་ཏེ་མེ་འབྱུང་བ་མེད་དོ། ། དེ་ཇི་ལྟ་བ་བཞིན་དུ་བསྲུབ་བྱ་ཕྱག་རྒྱའི་ཆོས་འབྱུང་དང༌། སྲུབ་བྱེད་ཐབས་ཀྱི་རྡོ་རྗེ་གཉིས་ཡང་དག་པར་སྦྱོར་བ་ལས་བདུད་རྩི་ལྟ་བུའི་ལྷན་སྐྱེས་ཀྱི་ཡེ་ཤེས་སངས་རྒྱས་སྟེར་བ་པོ་འབྱུང་སྟེ། བརྟགས་ན་རྒྱུ་རྐྱེན་གང་ལས་ཀྱང་མི་འབྱུང་བ་ཤེས་པར་བྱའོ། །ནག་པོ་སྤྱོད་པས་ཀྱང༌། དཔེར་ན་གཙུབ་ཤིང་གཙུབ་སྟན་ལག་པ་ཡི། །རྩོལ་བ་ལ་བརྟེན་མེ་ཡི་རྩེ་དམིགས་པ། །བརྟགས་ནས་གཙུབ་ཤིང་ལ་སོགས་ལ་ཡོད་མིན། །དེ་བཞིན་འགྲོ་བ་གཡོ་བ་ལ་སོགས་པའོ། །འགྲོ་བ་མཐའ་དག་སོ་སོར་སྣང་བ་ཙམ། །བདེ་སོགས་ངོ་བོ་མ་བརྟགས་ཉམས་དགའ་བ། །འདི་སྐད་བདག་གི་ཞེས་བྱ་ལ་སོགས་དག །བསམ་མི་ཁྱབ་སྟེ་ཇི་ལྟ་དེ་ལྟའོ། །
ཞེས་དང༌། བསྲུབ་བྱ་སྲུབ་བྱེད་སྦྱོར་བ་ལས། །ཆོས་སྐུ་ཇི་ལྟ་དེ་བཞིན་ནོ། །ཞེས་སྣོད་བཅུད་ཀུན་བརྟགས་ན་མི་རྙེད་པ་དང༌། ཁྱད་པར་དུ་གླེང་གཞིའི་ཚིག་གིས་བཤད་པའི་བདེ་ཆེན་ལ་སོགས་པ་མ་བརྟགས་ན་ཉམས་དགའ་བ་ཙམ་དུ་ཡོད་པ། གཙུབ་པའི་མེ་ཇི་ལྟ་བ་དེ་ལྟར་དུ་ཤེས་པར་བྱ་བར་གསུངས་ཏེ། །ཕྱག་རྒྱ་དང་སྦྱར་བ་ལས་དང་ལུས་ལ་གནད་དུ་བསྣུན་པའི་ཐབས་ལས་བདེ་བ་བསྐྱེད་པ་ན། རང་བཞིན་གྱིས་གྲུབ་པས་སྟོང་པར་རྟོགས་པའི་ལྟ་བ་དང་སྦྱོར་བ་དང༌། རྗེས་ལ་སྒྱུ་མ་ལྟར་མ་བརྟགས་ཉམས་དགའ་བ་ཙམ་ཡིན་པར་ཤེས་པར་བྱ་བར་བསྟན་ཏེ། །འདི་ལ་འཆད་ཚུལ་དུ་མ་ཞིག་འདུག་ཀྱང་ནག་པོ་སྤྱོད་པ་དང༌། ལྭ་བ་པའི་ལུགས་ལྟར་བཤད་པའོ། །གཉིས་པ་ནི། སྔགས་ཀྱི་བཟླས་པ་ལ་སྙིང་པོ་སོགས་ཟློ་བ་དང༌། རྡོ་རྗེ་བཟླས་པ་སོགས་དང༌། དེ་བཞིན་དུ་བསྐྱེད་རིམ་དང་རྫོགས་རིམ་གྱི་བསམ་གཏན་གཉིས་དང༌། སོགས་ཀྱིས་བསྡུས་པར་དཀྱིལ་འཁོར་བྲི་བ་དང༌། སྦྱིན་སྲེག་དང་དམ་ཚིག་དང་སྡོམ་པ་ལ་སོགས་པ་དང༌། བཟླས་པ་དང་བསམ་གཏན་དང་ལྡན་པ་དེ་ལྟར་སྦྱོར་ཉིད་དེ་ལས་ལ་སྦྱོར་བ་ཞི་རྒྱས་སོགས་སྒྲུབ་པ་དང༌། སྦྱོར་བ་དེ་གཅིག་བུར་མ་ཟད་ཀྱི་ཆོ་གའི་ཡེ་ཤེས་ཏེ་སྒྲུབ་ཐབས་ཀྱི་དང་ལས་སྦྱོར་གྱི་ཆོ་ག་ཤེས་པའོ། །རྣལ་འབྱོར་མ་བླ་ན་མེད་པ་ཡི་བདེ་མཆོག་གི་རྩ་བའི་རྒྱུད་རྒྱས་པ་ལས་གསུངས་པ་མདོར་བསྡུས་པའི་རྒྱུད་ནི་བཤད་ཀྱིས་མཉན་པར་གྱིས་ཤིག །ཅེས་བཅོམ་ལྡན་འདས་ཀྱིས་གསང་བའི་བདག་པོ་ལ་གསུངས་པའོ། །ཞེས་ལྭ་བའི་ན་བཟའ་ཅན་ལ་སོགས་པ་མང་པོས་བཤད། རྡོ་རྗེ་ཕག་
མོ་ཞུ་བ་པོ་ཡིན་པར་བྱང་ཆུབ་སེམས་དཔའི་འགྲེལ་པ་ལས་བཤད་དེ། ཆོས་གསུང་ཐེབས་རེ་རེ་ལ་ཡང་འཁོར་རྣམས་ཀྱིས་སྟོན་པའི་སྐུའི་བཀོད་པ་མི་འདྲ་བ་དུ་མ་དང༌། ཆོས་མི་འདྲ་བ་དུ་མ་གསུངས་པར་མཐོང་བར་གསུངས་པས། ཕྱོགས་གཅིག་ལ་ཞེན་མི་དགོས་སམ་སྙམ་མོ། །རྣལ་འབྱོར་མ་བླ་ཞེས་པའི་རྐང་པ་གཅིག་དང༌། རྒྱུད་ནི་བཤད་ཀྱིས་ཞེས་པ་ལོ་ཆེན་གྱི་འགྱུར་མ་བཅོས་པ་དང༌། མལ་གྱི་འགྱུར་དང༌། ལོ་ཙཱ་བ་ཤེས་རབ་གྲགས་དང་མར་དོ་གཉིས་ཀ་འདུས་ནས་བསྒྱུར་བ་ལ་མེད་ཅིང་འགྲེལ་བ་རྣམས་ལ་མི་སྣང་ཡང༌། དོན་ལ་ནི་སྐྱོན་མི་སྣང་ངོ༌། །གསུམ་པ་ལམ་གྱི་གསང་བའི་བགྲོད་པ་རྫོགས་པའི་ཐབས་ལ་གསུམ། རིགས་ལྡན་མ་མཆོད་པ་དང༌། དམ་ཚིག་རྣམས་བསྲུང་བ་དང༌། ཕྱག་རྒྱ་བཞི་བསྒོམ་པའོ། །དང་པོ་ལ་གསུམ། རིགས་ལྡན་མ་སྤྱིར་མཆོད་པ་དང༌། རིགས་ལྡན་མ་གསུམ་ལ་བརྟེན་ནས་དངོས་གྲུབ་སྒྲུབ་པ་མཆོད་པ་དང་བཅས་པ་དང༌། རིགས་ལྡན་མ་མཆོད་པའི་ཕན་ཡོན་ནོ། །དང་པོ་ནི། མཆོད་པར་བྱ་ཞེས་སྦྱར་རོ། །གང་གིས་ན་བདག་པོའི་རྣལ་འབྱོར་དང་ལྡན་པའི་རྣལ་འབྱོར་པས་སོ། །དུས་ནམ་གྱི་ཚེ་ཞེ་ན། དུས་ཀྱི་ཁྱད་པར་གྱིས་ཞེས་པ་སྟེ་ཟླ་བ་རེ་རེའི་ཡར་ངོ་དང་མར་ངོའི་བཅུ་ལའམ། ལོ་རེ་རེའི་དགུན་ཟླ་འབྲིང་པོའི་མར་ངོའི་བཅུ་ལའོ། །ཅི་ལན་ཅིག་གམ་ཞེ་ན། མ་ཡིན་ཏེ་རྟག་ཏུ་ཞེས་རྒྱུན་མ་ཆད་དུའོ། །མཆོད་རྫས་གང་གིས་ཤེ་ན། དབུགས་ཀྱིས་དྲངས་ཏེ་འབྱུང་བར་དབུགས་འབྱིན་ཏེ་མཆིལ་མའམ། དབུགས་འབྱིན་
པའི་སྟོབས་སྐྱེད་པས་ཤ་ཆེན་ནོ། །དང་པོ་བྱིས་པ་དང་ཐམ་མ་རྒན་པོ་ལ་མི་འབྱུང་བར། བར་དུ་འབྱུང་བས་བར་མ་སྟེ་ཁྲག་གོ། །ཁམས་རྣམས་ཀྱི་ནང་ན་མཆོག་སྟེ་བྱང་ཆུབ་ཀྱི་སེམས་སོ། །དྲི་ནི་དྲི་ཆེན་ནོ། །ཆུ་ནི་རྡོ་རྗེའི་ཆུའོ། །བཅས་པ་ནི་ལྔ་ཆར་ལྷན་ཅིག་པའམ། གཉིས་པ་ལ་སོགས་པ་དང་བཅས་པས་སོ། །ཀྱང་གི་སྒྲས་ནི་ཉེར་བར་སྤྱོད་པ་ལྔ་དང་ཡང་བཅས་པ་ཞེས་སྟོན་ནོ། །གང་ལ་ན། རྒྱལ་རིགས་སོགས་འཇིག་རྟེན་ལ་གྲགས་པའི་རིགས་ལྡན་དང༌། དབང་བསྐུར་བའི་དུས་སུ་མཚོན་པའི་མི་བསྐྱོད་པ་སོགས་ཀྱི་རིགས་ལྡན་ཏེ་བསྟན་བཅོས་ལ་གྲགས་པའི་རིགས་ལྡན་མའོ། །དེ་ནི་ལོ་ཙཱ་བ་གཉིས་ཀྱི་བཤད་སྲོལ་ལ་འབྱུང་བའོ། །དབུགས་འབྱུང་བ་ནི་རང་གི་ལྷག་པའི་ལྷ་སྒོམ་པ་སོགས་ཀྱིས་ལེགས་པར་སྦྱངས་བའི་བཙུན་མོའོ། །བར་མ་ནི་གཞོན་ནུ་དང་རྒན་མོ་དག་གི་བར་མ་རྡུལ་དང་ལྡན་པའོ། །མཆོག་གམ་དམ་པ་ནི་བར་མ་ཡོན་ཏན་ཅན་ནོ། །དེ་ལ་དབྱེ་ན་ཡེ་ཤེས་ལྔ་རྣམ་པར་དག་པའི་ཕྱག་རྒྱ་མ་ལྔ་སྟེ། དང་པོ་ནི་ལོ་བཅུ་གཅིག་མ་སྟེ་དེའི་པདྨར་རོལ་བས་བཅུད་ལེན་བསྒྲུབ་པར་བྱའོ། །གཉིས་པར་ནི་བཅུ་གཉིས་མ་དང་རོལ་བས་དམ་ཚིག་དོན་དུ་གཉེར་བར་བྱ་སྟེ་འདིར་དམ་ཚིག་ནི་བདེ་ཆེན་ནོ། །གསུམ་པར་ནི་བཅུ་དྲུག་མ་དང་རོལ་བས་སྔགས་ལ་གོམས་པར་གསུངས་པའི་དོན་ནི་དངོས་གྲུབ་ཀྱི་དོན་དུ་ཡིན་ནོ། །བཞི་པར་ལོ་ཉི་ཤུ་མ་དང་རོལ་བས་ནི་མཁའ་སྤྱོད་བསྒྲུབ་བོ། །ལྔ་པར་ཉེར་ལྔ་མ་དང་རོལ་བས་དབང་བསྐུར་བའི་དོན་དུ་ཡིན་ཏེ། རྡོ་རྗེ་མཁའ་འགྲོའི་དོན་བཤད་པར་སྣང་ངོ༌། །དེ་འདྲ་བའི་
རིགས་ལྡན་མ་ལ་དྲིའི་རྫས་བཟང་པོས་བྱུགས་པ་དང༌། དེས་མཚོན་ནས་མེ་ཏོག་སྣ་ཚོགས་ལ་སོགས་པ་དང༌། གོས་དང་རྒྱན་ལ་སོགས་པ་རྣམས་ཀྱིས་བརྒྱན་པར་བྱའོ། །དེ་ཡང་ཆུ་དང་བཅས་ཞེས་པའི་ཆུ་ནི་རླུང་མཁྲིས་བད་ཀན་གྱི་ནད་སེལ་བའི་ཆང་གི་བཏུང་བ་སྣ་ཚོགས་པ་སྦྱིན་པ་དང༌། བདག་ཉིད་ཀྱིས་ལོངས་སྤྱད་པས་རིགས་ལྡན་མ་རྣམས་མཆོད་པར་བྱའོ། །རྟག་ཏུ་ནི་བར་མ་ཆད་པར་དེ་ཁོ་ན་ཉིད་སྒོམ་པའི་མཆོད་པ་བྱ་བའི་དོན་ནོ། །གང་གིས་ན་རིམ་པ་གཉིས་སྒོམ་པའི་རྣལ་འབྱོར་པས་སོ། །དུས་ནམ་གྱི་ཚེ་མཆོད་སྙམ་ན། །དུས་ཀྱི་ཁྱད་པར་ཞེས་པ་རྡོ་རྗེ་མཁའ་འགྲོ་ལས་སྔ་དྲོའི་དུས་ལ་གསུངས་ཏེ། འགྲེལ་པ་གཉིས་ལས་དེ་མཚོན་བྱེད་དུ་བྱས་པའི་དུས་དྲུག་བཤད་དོ། །འགྲེལ་བ་གཞན་གྱིས་ནི་དབང་པོ་གཉིས་འདུས་པའི་དུས་ཁྱད་པར་བ་ལ་བཤད་དོ། །བཤད་པ་གཞན་སྔར་དང་འདྲ་བ་ལ། རིགས་ལྡན་མ་ལ་སྙོམས་པར་ཞུགས་པ་ལས་དེ་ཁོ་ན་ཉིད་ཀྱི་མཆོད་པ་བྱ་བར་བཤད་པའི་ངེས་དོན་སྟོན་པ་ནི། དབུགས་འབྱིན་ནི་སྣ་བུག་གཡས་གཡོན་གྱི་རླུང་གཉིས་སོ། །བར་མ་ནི་དེ་གཉིས་རོ་རྐྱང་གཉིས་ཀྱི་བར་མ་སྟེ་དབུས་མར་སྙོམས་པར་འཇུག་པའོ། །མཆོག་ནི་རླུང་དེ་གཉིས་ལྟེ་བའི་རྩ་བར་དབུ་མར་ཞུགས་པའི་དུས་སུ་ཕྱག་རྒྱ་མི་འགྱུར་བའི་མཆོག་གོ། ཞེས་བཤད་དེ་ཚིག་ཐ་མའི་དོན་ནི་ཕྱག་རྒྱ་ལ་བརྟེན་ནས་རླུང་གཉིས་དབུ་མར་ཞུགས་པའི་དུས་སུ་ནི། ཕྱག་རྒྱ་མ་ཉིད་མི་འགྱུར་བའི་བདེ་བ་འདྲེན་པའི་ཐབས་མཆོག་ཅེས་པའོ། །དྲིའི་ཆུ་ནི་སི་ཧ་ལ་ཀཾ་སྟེ་ཁྲག་གོ། བཅས་པ་ནི་ག་པུར་ཏེ་ཁུ་བས་རིགས་ལྡན་མ་རྣམས་ལ་
མཆོད་པར་བྱའོ། །དེ་རྣམས་ནི་ལྭ་བ་པ་དང་ལྷ་སྦས་ཀྱི་འགྲེལ་པ་ལ་བརྟེན་ནས་བཤད་དོ། །གཉིས་པ་ནི། བྷ་བ་བྷ་དྲས་སེམས་ཅན་སྡུག་བསྔལ་བ་ལ་གདུང་བས་ན་ཕོ་ཉའོ། །ཞེས་པ་ནི་སྐད་དོད་ཀྱི་སྟེང་ནས་ཡིན་ལ། །བླ་མ་རྣམས་རང་གི་འདོད་པ་མྱུར་དུ་སྒྲུབ་པའི་ཕོ་ཉ་དང་འདྲ་བས་ན་ཕྱག་རྒྱ་ལ་ཕོ་ཉ་ཞེས་གསུངས་ཏེ། ལྭ་བ་པ་དང་མཐུན་ནོ། །འདི་ལ་སྐལ་ལྡན་གྱིས། ཕོ་ཉ་གསུམ་ཡོད་པ་ལས། ལྷན་ཅིག་སྐྱེས་དངོས་གྲུབ་ཅེས་པ་ནི་མཚོན་པ་ཙམ་མོ། །དེ་ལ་མཆོག་ནི་ལྷན་ཅིག་སྐྱེས་མའོ། །འབྲིང་ནི་གནས་ལས་སྐྱེས་མ་སྟེ་ཞིང་སྐྱེས་དང་གཅིག་གོ། ཐ་མ་ནི་གསང་སྔགས་ལས་སྐྱེས་མའོ། །ཡང་ན་མཁའ་ལ་དང༌། ས་ལ་དང༌། ས་འོག་ན་རྒྱུ་བ་གསུམ་རིམ་པ་བཞིན་མཆོག་ལ་སོགས་པའོ། །འདི་དག་གྲུབ་པས་དགོས་པ་ཅི་ཡོད་ཅེ་ན། ཡིད་ནི་ནང་དུ་ཆུད་པ་ཡིས་མངོན་པར་འདོད་པའི་དངོས་གྲུབ་བསྒྲུབ་པར་བྱའོ་ཞེས་འཆད་དོ། །བླ་མ་རྣམས་ལྷན་ཅིག་སྐྱེས་དངོས་ཀྱིས་ལྷན་སྐྱེས་མ་བསྟན་ལ། གྲུབ་ཅེས་པས་ཞིང་གི་བདག་ཉིད་ཆེན་པོ་ལས་རྣལ་འབྱོར་མར་གྲུབ་པ་དང༌། བསམ་གཏན་དང་བཟླས་པ་སོགས་ལས་རྣལ་འབྱོར་མར་གྲུབ་པ་བསྟན་ཏོ། །དང་པོ་ནི་མཆོག་སྟེ་དངོས་གྲུབ་གཉིས་ཀ་སྟེར་བས་སོ། །གཉིས་པ་ནི་འབྲིང་སྟེ་འཇིག་རྟེན་པའི་དངོས་གྲུབ་སྟེར་བས་སོ། །གསུམ་པ་ནི་ཐ་མ་སྟེ་དངོས་གྲུབ་གཉིས་སྟེར་མི་ནུས་ཀྱང་དེ་གཉིས་སྒྲུབ་པའི་གྲོགས་བྱེད་པས་སོ། །ཞེས་གསུང་ངོ་། །ཕོ་ཉ་མོ་གསུམ་གྱི་ངོས་འཛིན་ལ་མི་འདྲ་བ་མང་དུ་འདུག་ནའང༌། དང་པོ་ནི་དོན་གྱི་ལྷན་སྐྱེས་རྒྱུད་ལ་ཐོབ་པ་ཡན་ཆད་དེ། འཇིག་རྟེན་ལས་འདས་པའི་མཁའ་འགྲོ་མའོ། །གཉིས་པ་ནི་
གནས་སོ་གཉིས་ལ་སོགས་པར་སྐྱེས་པ་རྣལ་འབྱོར་མས་རྗེས་སུ་བཟུངས་བས་རྣལ་འབྱོར་མར་གྱུར་པའོ། །གསུམ་པ་ནི་དབང་ལ་སོགས་པས་རྒྱུད་ལེགས་པར་སྦྱངས་པ་རིམ་པ་དང་པོའི་རྣལ་འབྱོར་ལ་བྱུང་བ་སྟེ། དེ་གཉིས་ནི་འཇིག་རྟེན་པའི་རྣལ་འབྱོར་མའོ། །ཡིད་ནི་ནང་དུ་ཆུད་པ་ཡིས་ཏེ་དེ་བཞིན་གཤེགས་པ་ཐམས་ཅད་ཀྱི་སྐྱེད་མ་མོའི་ཤེས་རབ་མ་དང་སྦྱོར་ཚུལ་ཇི་ལྟར་གསུངས་པ་བཞིན་དུ་མཉམ་པར་སྦྱོར་བ་ལྡན་པས་ཡིད་གཞན་དུ་མི་གཡེང་བར་ཚིམ་པར་བྱས་པ་ལ། མངོན་པར་འདོད་པའི་དངོས་གྲུབ་བསྒྲུབ་པར་བྱའོ། །དེ་ལྟར་ཕོ་ཉ་མོ་མཆོད་པས་ཚིམ་པར་བྱེད་པའི། ཐ་མ་དང་བར་མ་དང་མཆོག་གསུམ་རྡོ་རྗེ་མཁའ་འགྲོ་ལས་གསུངས་ཏེ། སྔར་གྱི་མཆོག་དང་ཞེས་སོགས་དང་མི་གཅིག་གོ། ཕོ་ཉ་དང་སྙོམས་པར་ཞུགས་པ་ལས་བྱུང་བའི་རང་གི་རྫས་ཀྱི་ཐིག་ལེ་ཁུ་བས་སངས་རྒྱས་དང་བྱང་ཆུབ་སེམས་དཔའ་མཆོད་པར་གསུངས་པ་ལ་སྒྲས་ཟིན་ལྟར་བཤད་ན། ཆོས་འབྱུང་དུ་སྤྲོས་ལ་ལྕེས་བླངས་ཏེ་བདུད་རྩི་དེས། ཕྱི་རོལ་དུ་དཀྱིལ་འཁོར་བ་དང་ཚོགས་ཀྱི་དཔའ་བོ་དང་རྣལ་འབྱོར་མ་རྣམས་ཚིམ་པར་བྱའོ། །ཞེས་བླ་མ་རྣམས་གསུང་བ་ལྟར་རོ། །སྒྲས་ཟིན་ལས་གཞན་དུ་བཤད་ན། སངས་རྒྱས་ཏེ་ཕུང་པོ་ལྔ་དང་བྱང་ཆུབ་སེམས་དཔའ་སྟེ་མིག་ལ་སོགས་པ་རྣམས་ཚིམ་པར་བྱ་བའི་དོན་ནོ། །དབུགས་འབྱིན་མཆོག་ཅེས་པ་ནས་འདི་ཡན་ཆད་ལ་ནང་གི་རིགས་ལྡན་མ་མཆོད་པ་བླ་མ་རྣམས་ཀྱི་མན་ངག་གིས་རྒྱས་པར་བཤད་
པ་ནི། འདིར་ཚིག་མངས་སུ་དོགས་ནས་མ་བྲིས་སོ། །གསུམ་པ་ནི། རིག་ལྡན་མ་མཆོད་པའི་ཕན་ཡོན་ནི། ཕོ་ཉ་མོ་ལ་བརྟེན་ནས་སྤྱོད་པ་བྱེད་པའི་རྣལ་འབྱོར་པ་དེ། གང་ཟག་གཞན་གྱི་མིག་གིས་མཐོང་བ་དང༌། ལུས་ཀྱིས་རེག་པ་དང་རྣལ་འབྱོར་པ་དེའི་གཏམ་རྣ་བས་ཐོས་པའམ་ཡིད་ལ་དྲན་པ་ཡིས་ཀྱང༌། ལས་ཀྱི་སྒྲིབ་པའི་སྡིག་པ་ཀུན་ལས་གྲོལ་བ་སྟེ་འདག་པར་འགྱུར་བ་དེ་ལྟ་བུ་ཉིད་དུ་ཐེ་ཚོམ་མེད་ན། དེ་འདྲ་བའི་རྣལ་འབྱོར་པ་བདག་ཉིད་ཀྱིས་དག་བྱེད་ཀྱི་བསོད་ནམས་ཀྱི་ཚོགས་མཆོག་རྣམས་གསོག་པ་དང༌། སྡིག་པ་རྣམས་འཇིག་པ་སྟེ་འཇོམས་པར་བྱེད་པ་སྨོས་ཀྱང་ཅི་ཞིག་དགོས། དེ་ལྟར་ཕོ་ཉ་མོ་ལ་བརྟེན་པ་དེས་གསང་སྔགས་ཟློས་པའི་བཟླས་བརྗོད་དྲང་ངེས་གཉིས་དང༌། དྲང་ངེས་ཀྱི་བསམ་གཏན་གཉིས་ཀྱིས་དངོས་གྲུབ་གཉིས་མྱུར་དུ་འགྲུབ་པར་འགྱུར་རོ། །ཀྱང་གི་སྒྲས་བསམ་གཏན་རྐྱང་པས་ཀྱང་འགྲུབ་པར་སྟོན་ཏེ། ནང་ལ་གཞོལ་བའི་དབང་དུ་བྱས་པའོ། །ལོ་ཆེན་དང་མར་དོ་རྐྱང་པས་བསྒྱུར་བ་དང༌། རྒྱ་འགྲེལ་མང་པོ་ལས། བདེ་བ་ཡིས་ཀྱང་འགྲུབ་པར་འགྱུར། །ཞེས་པ་མ་བྱུང་ཡང༌། མར་དོ་དང་ཤེས་རབ་གྲགས་གཉིས་ཀས་བསྒྱུར་བ་དང་མལ་གྱི་འགྱུར་ལ་འབྱུང་བ་དག་སྟེ། བདེ་བ་མཆོག་སྟོད་འགྲེལ་ལས་ཀྱང་སྔགས་བཟླས་ཀྱི་འཛིན་པ་བསྟན་པའི་ཤུགས་ཀྱིས་དེའི་སྔོན་མ་སྲོག་རྩོལ་བསྟན། བསམ་གཏན་དངོས་སུ་བསྟན་པས་དེའི་སྔོན་མ་སོར་སྡུད་བསྟན། བདེ་བས་ཏིང་ངེ་འཛིན་དངོས་སུ་བསྟན་པས་དེའི་སྔོན་མ་རྗེས་དྲན་བསྟན་པར་
གསུངས་སོ། །རྒྱུད་ཀྱི་རྡོ་རྗེའི་ཚིག་རེ་རེ་ལ་དོན་མི་འདྲ་བ་དུ་མ་ཚད་ལྡན་རྣམས་ཀྱིས་བཤད་པ་ལ་འགལ་བ་མེད་ལ། མལ་གྱི་བཤད་སྲོལ་འཛིན་པ་དག་བདེ་བ་ཡིས་ཀྱང་ཞེས་པ་སྤྱོད་པ་ལ་འཆད་དོ། །གཉིས་པ་ལ་གཉིས། བསྲུང་བའི་དམ་ཚིག་བསྐྱང་བ་དང༌། བཟའ་བའི་དམ་ཚིག་བསྐྱང་བའོ། །དང་པོ་ནི། ལམ་འདིའི་སྒྲུབ་པ་པོས་ཤིན་ཏུ་མཉམ་པར་གཞག་པ་སྟེ་སྒོ་གསུམ་མ་ཡེངས་པར་བྱས་ནས། བསྲུང་བའི་དམ་ཚིག་རྩ་བ་དང་ཡན་ལག་གི་དམ་ཚིག་རྒྱུད་གཞན་ནས་གསུངས་པ་དང༌། རྒྱུད་འདིར་གསུངས་པའི་བསྲུང་བའི་དམ་ཚིག་རྣམས་རྟག་ཏུ་སྟེ་རྒྱུན་དུ་མ་ཉམས་པར་བསྐྱང་བར་བྱའོ། །དམ་ཚིག་མ་བསྲུངས་པའི་ཉེས་དམིགས་ནི། རྩ་བའི་དམ་ཚིག་ལ་སོགས་པ་ཉམས་པས་ནི་སྔར་དཀྱིལ་འཁོར་དུ་དབང་བསྐུར་བ་ཐོབ་པར་མ་འགྱུར་བ་སྟེ་ནུས་པ་ཉམས་པར་འགྱུར་ལ། སྔགས་བཟླས་པ་སོགས་ཀྱིས་ཀྱང་དངོས་གྲུབ་ཐོབ་པར་མི་འགྱུར་བ་དང༌། དེར་མ་ཟད་ཕྱི་མར་ངན་འགྲོར་འགྲོ་བ་སོགས་ཀྱི་ཉེས་དམིགས་ཤིན་ཏུ་ཆེའོ། །དེའི་ཕྱིར་དང་པོ་ནས་ཉེས་པས་མ་གོས་པ་ལ་འབད་ཅིང༌། གལ་ཏེ་རྩ་ལྟུང་བྱུང་ན་དཀྱིལ་འཁོར་བཞེངས་ནས་བླ་མ་ལས་སམ། བདག་འཇུག་གིས་སྡོམ་པ་སླར་གསོ་བར་བྱ་ལ། ལྷག་མའི་ལྟུང་བ་བྱུང་ན་བཤགས་པ་སོགས་ཀྱི་ཕྱིར་འཆོས་པའི་ཆོ་གས་དག་པར་བྱའོ། །ཕྱིས་བཅོས་སུ་རུང་ངོ་སྙམ་པས་ཀྱང་མི་བྱ་སྟེ། དེ་ནི་བཅོས་ཀྱང་སླར་ཉེས་པ་ལས་ལྡང་བར་མི་འགྱུར་ཞིང༌། ཕྱིས་བཅོས་པར་མི་འོས་པ་ཉིད་དུ་ཡང་བཤད་དོ། །ཞེས་མར་དོ་གསུང་པ་ནི་ལེགས་པ་ཡིན་ནོ། །གཉིས་པ་ནི། སྦྲང་རྩི་
ནི་སྦྲང་རྩི་ཆེན་པོའོ་ཞེས་པ་ནི་ལྷ་སྦས་ཀྱིས་མར་ཆེན་པོའོ།། ཞེས་བཤད་པ་དང་དོན་གཅིག་སྟེ་ཚིལ་ཆེན་ནམ་དེའི་ཞག་གོ། །མཚལ་ཏེ་ཁྲག་ནི་དུས་སུ་འབབ་པའི་ཟླ་མཚན་ནོ། །ག་པུར་བཅས་ནི་ག་པུར་དང་ལྷན་ཅིག་ཡོད་པའི་མེ་ཏོག་ལ་བཤད་དེ། འདི་ཁུ་བ་དང་ལྷན་ཅིག་པའི་མེ་ཏོག་ཡིན་ལ། སྔ་མ་ནི་རཀྟ་རྐྱང་པའོ། ། ཙན་དན་དམར་པོ་ནི་ཤ་ཆེན་ནོ། །སྦྱར་བ་ནི་བཤང་བ་ལ་སོགས་པ་དང་བཅས་པས་མཉམ་མེད་དེ་རོ་མཆོག་དྲུག་པོའི་བཅུད་ལེན་ནོ། །ཞེས་གསུངས་ཏེ། བདུད་རྩི་ལྔ་དང་མར་ཁུ་ཆེན་པོ་དང་དྲུག་གོ། ཐམས་ཅད་རྡོ་རྗེའི་རྡོ་རྗེ་ཀུན་ནི་ལྷ་ཀུན་གྱི་བདག་ཉིད་ཧེ་རུ་ཀའོ། །དེའི་མཚན་མ་ནི་ཐོད་པའོ། །མཚན་མ་འཛིན་ནི་ཐོད་པ་དེ་ལས་རང་གི་མཐེབ་སྲིན་གྱི་རྩེ་སྦྱར་བས་བླངས་ཏེ་མྱང་བའོ། །དེ་ཡང་རྒྱ་མཚོ་བསྲུབས་པའི་བདུད་རྩི་བཞིན་ཏུ་སྦོམ་པོ་སྟེ་མཐེ་བོང་ནི་རི་རབ་དང༌། མཐའ་ནི་མཐེའུ་ཆུང་ཡིན་ལ་དེའི་ལྟག་མ་སྲིན་ལགས་ལ་གནས་པའི་རྒྱ་མཚོར་བྱས་ཏེ་དཀྲུགས་ལ། ཨོཾ་ཧ་ཧོ་ཧྲིཿཞེས་པའི་ཧས་ཁ་དོག་དང༌། ཧོས་དྲིའི་སྐྱོན་བཅོམ། ཧྲིཿ ས་མང་པོར་སྤེལ་ཏེ། ལྷའི་རྣལ་འབྱོར་སྒོམ་པ་དང་སྔགས་ཟློ་བའི་རྣལ་འབྱོར་པ་བདུད་རྩིའི་བསྟེན་ཚུལ་རིག་པས་རྟག་ཏུ་སྤྱད་པ་སྟེ་བཟའ་བར་བྱའོ། །ལོངས་སྤྱོད་ཚུལ་ནི་འདི་སྐད་དུ། །མཁས་པས་གྲུབ་པའི་བདུད་རྩི་མྱང༌། །དང་པོར་བླ་མར་དབུལ་བྱས་ཏེ། །དེ་ཡི་རྗེས་སུ་ཧེ་རུ་ཀ །རྡོ་རྗེ་ཅན་གྱི་ཕྱིར་དབུལ་ལོ། །ཕྱག་རྒྱ་ལ་ནི་ཕུལ་ནས་ནི། །བདག་ཉིད་ཀྱིས་ནི་ཡང་དག་མྱང༌། །སྦྱོར་བ་ཀུན་གྱི་སྙིང་པོ་ཡི། །བདུད་རྩི་རྣམ་པ་ལྔར་འགྱུར་རོ། །འདི་ལྟ་བུ་ཡི་སྦྱོར་བ་ཡིས། །རྡོ་རྗེ་སེམས་དཔའ་དང་མཉམ་འགྱུར། །