ཤོག་ལྷེབ་ ༥༠༡ ནས་ ༦༠༠ བར།
ཞེས་གསུངས་པ་བཞིན་ནོ། །ཚོགས་ཀྱི་ནང་དག་དུ་ཞེས་པ་ནི་འཁོར་ལོ་གསུམ་གྱི་དབུས་སུའམ་ཡང་ན་བདེ་མཆོག་གི་རྣལ་འབྱོར་འཛིན་པར་གཅིག་པའི་རྣལ་འབྱོར་ཕོ་མོའི་དབུས་སུའོ། །བཞག་པ་ནི་ཉམས་སུ་ལེན་པའོ་ཞེས་འགྲེལ་པ་གཞན་ལས་བཤད་དོ། །ཡང་སྒྲས་ཟིན་གྱི་བཤད་པ་ལས་གཞན་དུ་བཤད་ན་ག་པུར་བཅས་ནི་བྱང་ཆུབ་ཀྱི་སེམས་དང་བཅས་པའོ། །ཞེས་བཤད་དེ་དེའི་བྱང་ཆུབ་ཀྱི་སེམས་ནི་བདེ་ཆེན་དང༌། བཅས་པ་ནི་སྟོང་པ་ཉིད་དང་སྦྱར་བ་སྟེ། ཁམས་དཀར་དམར་གྱི་ངེས་དོན་ནོ། །ཚོགས་ཀྱི་ནང་དུ་བཞག་པ་ནི་མིག་སོགས་ཀྱི་དབང་པོ་དྲུག་གི་ཚོགས་དང༌། ཁྱད་པར་དུ་ཕོ་མོའི་དབང་པོ་གཉིས་ཀྱི་ཚོགས་ཏེ་དེ་རྣམས་འདུས་པའོ། །དེ་ལྟར་ན་ཚོགས་ནི་འདུས་པའི་དོན་ཏེ། སྤྱིར་ཐབས་ཤེས་ཀྱི་དབང་པོ་དྲུག་འདུས་པ་དང༌། ཁྱད་པར་དུ་ཕོ་མོའི་དབང་པོ་གཉིས་འདུས་པའོ། །དེ་གཉིས་གང་ཞེ་ན། སྦོམ་པོ་སྟེ་ཐབས་ཀྱི་རྡོ་རྗེ་དང༌། མཐའ་ལྟག་སྟེ་ཕྱག་རྒྱའི་པདྨའོ། ། དེ་ཡང་པདྨ་མན་ཆད་ཀྱི་ལུས་ནི་མཐའ་དང༌། པདྨ་ནི་དེའི་ལྟག་སྟེ་གོང་མའོ། །དེ་གཉིས་ཀྱི་རྩེ་གཉིས་སྦྱར་བའི་ངེས་དོན་ནི། ཡབ་ཀྱི་གསང་གནས་ཀྱི་རྩེའི་དྷཱུ་ཏཱིའི་མར་སྣ་དང༌། ཡུམ་གྱི་གསང་གནས་ཀྱི་རྩེའི་བྱ་རོག་གདོང་ཞེས་གྲགས་པའི་རྩ་གཉིས་ཁ་སྦྱོར་བ་ཡིན་ཏེ། རྡོ་རྗེའི་གུར་ལས། རྡོ་རྗེ་སོར་མོའི་རབ་སྦྱོར་གྱིས། །རྡོ་རྗེའི་ས་གཞི་རབ་བསྐུལ་ཏེ། །ཞེས་དང༌། ཕྱི་ནས་དེ་ཡི་བདེ་ལྡན་དུ། །རྡོ་རྗེ་སེམས་དཔའ་རབ་བཅུག་སྟེ། །རྡོ་རྗེ་བཅིང་བའི་སྦྱོར་བ་ཡིས། །རྡོ་རྗེ་མཆོད་པ་རབ་ཏུ་བརྩམ། །ཞེས་སོར་མོས་རྡོ་རྗེའི་ས་གཞི་སྟེ་རྟེན་
པདྨའི་རྩ་བསྐུལ་བ་དང༌། རྩ་སད་པའི་ཕྱི་ནས་རྡོ་རྗེ་བཅིང་བ་སྟེ་རྩ་གཉིས་མི་ཕྱེད་པར་འཆིང་བའི་སྦྱོར་བ་ཡིས་སྙོམས་འཇུག་བྱེད་པར་གསུངས་པ་ལྟར་བྱེད་པའོ། །དེ་ལྟར་བྱས་པས་སྔར་བཤད་པ་ལྟར་ཕྱག་རྒྱ་ལ་བརྟེན་ནས་རླུང་གཉིས་དབུ་མར་ཚུད་པར་འགྱུར་རོ། །འདི་ནི་རིགས་ལྡན་མ་མཆོད་པའི་གནད་དམ་པར་སྣང་ངོ༌། །རྡོ་རྗེ་མཁའ་འགྲོ་ལས། ཚོགས་ཀྱི་ནང་དུ་ཞུགས་པ་ནི། །དབང་པོ་ཐམས་ཅད་ལས་བྱུང་སྟེ། དེ་དག་ཐམས་ཅད་ཀྱི་བཅུད་ཀྱི་ར་ས་ཡ་ནའོ། །ཞེས་གསུངས་པའི་དོན་ནི་ཐབས་ཤེས་ཀྱི་དབང་པོ་རྣམས་འདུས་པ་ལས་བྱུང་བའི་བྱང་སེམས་ནི་དེ་ཐམས་ཅད་ཀྱི་བཅུད་བླངས་པའི་བཅུད་ལེན་དུ་སྟོན་པའོ། །དེ་འདྲ་བ་དེ་རྣལ་འབྱོར་པ་ཕྱག་རྒྱ་སྲོག་རྩོལ་དུ་འགྲོ་བའི་གནད་རིག་པས་རྟག་ཏུ་དེ་ལ་སྤྱད་པར་བྱའོ། །དེ་ལྟར་སྤྱད་པའི་ཕན་ཡོན་ནི། སྔར་བཤད་པ་དེ་ཞི་བའི་བཏུང་བ་ལྷའི་བདུད་རྩི་བཞིན་དུ་མྱངས་པ་སྟེ་བསྟེན་ནོ། དངོས་གྲུབ་རྟག་པ་སྟེ་སླར་མི་ལྡོག་པ་ཐོབ་པར་འགྱུར་རོ། །དེ་ལྟར་ན་མི་འཆི་བ་སྟེ་བདུད་རྩི་བཅུའི་ཕྱེད་དེ་ལྔ་པོའི་བཅུད་ལེན་གྱིས། བདེ་བའི་རྟེན་ཀུན་ད་ལྟ་བུ་རྒྱས་པར་བྱས་ནས་མཚན་ཉིད་ཚང་བའི་ཕྱག་རྒྱ་མ་བསྟེན་པ་འདི་ནི། དངོས་གྲུབ་གཉིས་པོ་ཐམས་ཅད་འཇུག་པ་སྟེ་ཐོབ་པར་བྱེད་པ་ཡིན་ནོ། །གསུམ་པ་ནི། མཆོད་བཞི་ཞེས་སོགས་ལ་གཞུང་ཡང་མི་འདྲ་བ་དང༌། འཆད་ཚུལ་མི་འདྲ་བ་མང་ཡང༌། སྔར་ལེའུའི་བསྡུས་དོན་གྱི་སྐབས་སུ་བཤད་པ་ལྟར། ནཱ་རོ་པའི་ལུགས་ཀྱི་ཕྱག་རྒྱ་བཞི་སྒོམ་པ་ལ་འཆད་དོ། །དེ་ཡང་གསང་བ་མཆོག་ཅེས་པ་ཨེ་ལྦ་མ་ཡ་ལ་བཤད་པའི་ཡི་གེ་བཞིས་རིམ་པ་བཞིན་དུ། ལས་རྒྱ་དང༌། ཆོས་རྒྱ་དང༌། ཕྱག་ཆེན་དང༌། དམ་རྒྱ་སྟོན་པར་
ཁ་སྦྱོར་ལས་གསུངས་པའི་ཕྱག་རྒྱ་བཞི་ནི་འདིར་མཆོད་པ་བཞིའོ། །མཆོད་པའི་སྐད་དོད་པཱུ་ཛ་ལ་ངེས་ཚིག་གིས་བཤད་པས་ཡིད་གང་བར་བྱེད་པ་ཞེས་པར་འགྱུར་ལ། ཕྱག་རྒྱ་བཞི་ཐུན་བཞིར་བསྒོམས་པས་ཀྱང་ཡིད་བདེ་བས་གང་བར་བྱེད་དོ། །དཔའ་བོ་ཆེན་པོ་ཧེ་རུ་ཀའི་ང་རྒྱལ་དང་ལྡན་པས་རང་གི་ཡིད་ལ་གང་འདོད་པའི་ཕྱག་རྒྱ་སྒོམ་པར་བྱེད་དོ། །དེའི་ཚེ་དབང་པོ་གཉིས་སྙོམས་པར་འཇུག་པ་ལ་བཞི་ལས། ལས་རྒྱའི་སྐབས་སུ་ནི་དབང་པོ་གཉིས་དངོས་སུ་སྙོམས་པར་འཇུག་གོ། །དམ་རྒྱའི་སྐབས་སུ་ནི་ཡིད་ཀྱིས་བསྒོམས་པའི་དབང་པོ་གཉིས་སྙོམས་པར་འཇུག་གོ། །ཆོས་རྒྱའི་སྐབས་སུ་ནི་དཔྱིད་དང་ཐིག་ལེ་གཉིས་སྙོམས་པར་འཇུག་པ་ལ་དབང་པོ་གཉིས་སྙོམས་པར་འཇུག་པའི་ཐ་སྙད་བཏགས་པ་ཙམ་མོ། །ཕྱག་ཆེན་གྱིས་སྐབས་སུ་ནི་བདེ་བ་ཆེན་པོ་དང་སྟོང་པ་ཉིད་གཉིས་སྙོམས་པར་འཇུག་པ་ལ། དབང་པོ་གཉིས་སྙོམས་པར་འཇུག་པ་ཞེས་བྱའོ། །དེ་ལྟར་སྙོམས་པར་འཇུག་པའང་སྟེ་ལས་ཀྱང་ལྷན་སྐྱེས་ཀྱི་བདེ་བས་དེ་ཁོ་ན་ཉིད་འཛིན་ནོ། །འདི་ཕྱག་ཆེན་གཅིག་པུ་ལ་སྦྱོར་མོད་ཀྱང་བཞི་ཀ་ལ་སྦྱར་ཏེ་བཞི་ཀ་བསྒོམས་པས་ལྷན་སྐྱེས་ཀྱི་བདེ་བ་འདྲེན་ལ། དེ་དྲངས་པ་ན་བཞི་ཀའི་སྐབས་སུ་ཡང་སྟོང་ཉིད་དང་སྦྱར་དགོས་སོ། །འདིའི་འོག་ཏུ་གསལ་བར་སྟོན་ནོ། །རྡོ་རྗེ་ནི་བཅོམ་ལྡན་འདས་ཧེ་རུ་ཀ་ཡིན་ལ་དེ་འཛིན་པ་ནི་འདིའི་རྣལ་འབྱོར་པའོ། །དེ་ཡིས་ཕྱག་རྒྱ་བཞི་ལ་བརྟེན་ནས་སྔར་བཤད་པའི་བདེ་སྟོང་སྦྱོར་བ་དེ་ལྟ་བུར་ནི་བྱེད་པ་ཡི་བདེ་བ་ལ། ལྷ་དང་མི་རང་དགའ་བའི་བདེ་བ་ནི་ཕྱོགས་གཅིག་ཏུ་
བསྡུས་པར་བྱས་པས་བཅུ་དྲུག་གི་ཆར་ཡང་མི་ཕོད་དོ། །ཞེས་གསུངས་ཏེ། རྫོགས་རིམ་ལ་ནུས་པ་ཁྱད་པར་ཅན་རྙེད་པའི་སྐབས་ལ་དགོངས་སོ། །བཤད་པ་དེ་རྣམས་ཕལ་ཆེ་བ་ནི། མཁས་པ་མར་དོའི་བཤད་པ་ཡིན་ཏེ། ནཱ་རོ་པའི་བཤད་སྲོལ་ལ་ཤིན་ཏུ་ལེགས་པར་སྣང་ངོ༌། །རྒྱ་འགྲེལ་མང་པོས་ཀྱང་མཆོད་བཞི་ཕྱག་རྒྱ་བཞི་ལ་བཤད་ལ། རྡོ་རྗེ་མཁའ་འགྲོ་ལས་མཆོད་བཞི་བསྐྱེད་རིམ་ལ་སྦྱར་བ་ནི། ལྭ་བ་པས་རྡོ་རྗེ་བཞིས་སྐྱེད་ལ་སྦྱར་བ་ལྟར་རོ། །གཞུང་ལྷག་མ་ནི་རྫོགས་རིམ་ལ་སྦྱར་རོ། །བཞི་པ་གསང་བ་སྒྲུབ་པའི་གནས་ལ་སྒྲ་ཇི་བཞིན་པ་ནི། ཚང་ཚིང་ནི་ནགས་ཚལ་འཁྲིགས་པའོ། །སྨན་ལྗོངས་ཞེས་པ་ལོ་ཆེན་དང་མལ་གྱི་འགྱུར་ལ་མེད་ལ། དེའི་དོད་ལ་ཕུག་དང་རི་སུལ་ཞེས་འབྱུང་ངོ༌། །ངོགས་ནི་འགྲམ་མོ། །གདོད་ནས་གྲུབ་པ་ནི་སྔོན་ཆགས་པའི་དུར་ཁྲོད་དོ། །བརྡས་བཤད་ན། བུད་མེད་ཀྱི་ཕྱག་རྒྱ་ནི་བདེ་བ་ཆེན་པོའི་བདག་ཉིད་ཀྱིས་མུ་སྟེགས་བྱེད་ཀྱི་བདག་ཏུ་ལྟ་བས་མི་གཡོ་བས་ན་རི་བོའོ། །སེམས་ཅན་དམན་པས་གཏིང་དཔག་པར་མི་ནུས་པས་ན་ཚང་ཚིང་ངོ༌། །བདུད་རྩིས་བཀང་བའི་ཁུང་བུ་ཡིན་པས་ན་ཕུག་གོ། ཐབས་ཤེས་སྦྱོར་བས་ཟབ་པ་དང་རྒྱ་ཆེ་བའི་ཆུའི་འགྲམ་མོ། །གདོད་ནས་གྲུབ་པ་ནི་སྐྱེ་འགག་སྤངས་པའི་དེ་ཁོ་ན་ཉིད་ལ། བདེ་ཆེན་གྱིས་དམིགས་པས་དེའི་རང་བཞིན་དུ་བྱས་པའོ། །འདོད་ཆགས་ཆེན་པོའི་མེས་ཉན་རང་གི་བྱང་ཆུབ་བསྲེག་པས་ན་དུར་ཁྲོད་དོ། །སྒྲས་ཟིན་དང་བརྡས་བཤད་པའི་གནས་དེར་ནི་སྙིང་པོ་ལེན་པས་ན་དཀྱིལ་འཁོར་ཏེ། མཎྜ་ནི་སྙིང་པོ་དང༌། ལཱ་ཏི་ནི་ལེན་པའོ། །སྙིང་པོ་ལེན་པའི་ཕྱི་ནང་གི་དཀྱིལ་འཁོར་ནི་ཐིག་
ལ་སོགས་པས་བྲི་བ་དང༌། ཡིད་ཀྱིས་བྲིས་བ་སྟེ་བསྒོམ་པར་བྱའོ། །དེའི་དང་པོ་ལྟར་ན་ལེའུ་གཉིས་པ་དང་འབྲེལ་ལ། གཉིས་པ་ལྟར་ན་རིམ་པ་གཉིས་ཀྱི་དཀྱིལ་འཁོར་སྒོམ་པའི་སྐབས་རྣམས་སུ་འབྲེལ་ལོ། །གཉིས་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། སྔར་འབྱུང་བཞི་སོགས་ལུས་ལ་སྦྱར་བའི་ལུས་ཀྱི་དཀྱིལ་འཁོར་དང༌། གླེང་གཞིའི་བྷ་ག་ལ་བཞུགས་སོ་ཞེས་པས་བྷ་གའི་དཀྱིལ་འཁོར་དང་བྱང་ཆུབ་སེམས་ཀྱི་དཀྱིལ་འཁོར་ཡང་བསྟན་པའི་དཀྱིལ་འཁོར་ལ་ལེའུ་འདིས་འཇུག་པར་བྱེད་པས་དཀྱིལ་འཁོར་ལ་འཇུག་པའོ། །དེའི་ལེའུ་ནི་པ་རི་ཚེད་ཞེས་པ་ཡོངས་སུ་བཅད་པ་སྟེ་བརྗོད་བྱའི་དོན་གྱི་ཡོངས་སུ་བཅད་པ་དང༌། བརྗོད་བྱེད་གཞུང་གི་ཡོངས་སུ་བཅད་པ་གཉིས་སོ། །དང་པོ་ནི་ང་གཅིག་ཡོད་པའི་གྲངས་ཀྱི་དང་པོའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་དང་པོའི་བཤད་པའོ།། ༈ །།གཉིས་པ་ལྷག་མ་ཞེ་དགུས་དོན་དེ་རྒྱས་པར་བཤད་པ་ལ་གཉིས། རིམ་གཉིས་སྒོམ་པ་སོགས་ཀྱི་སྣོད་རུང་དུ་བྱ་བ་དང༌། སྣོད་དུ་རུང་བ་ལ་གསང་བ་རྒྱས་པར་བཤད་པའོ། །དང་པོ་ལ་གཉིས། དཀྱིལ་འཁོར་བྲིས་ཏེ་བསྒྲུབས་པ་ལ་མཆོད་པ་དང༌། བསྒྲུབས་པའི་དཀྱིལ་འཁོར་དེར་དབང་བསྐུར་བའོ། །དང་པོ་ལ་གསུམ། སློབ་དཔོན་གྱི་མཚན་ཉིད། དེས་ཆོ་ག་ཇི་ལྟར་བྱ་བ། ལེའུ་ཡི་མཚན་བསྟན་པའོ། །དང་པོ་ནི། བླ་མ་ལ་མ་བལྟོས་པར་རྒྱུད་ལ་རང་དགར་འཇུག་པ་དགག་པའི་ཕྱིར་རྩ་རྒྱུད་
འདིར་གཞུང་དཀྲུགས་ཏེ་གསུངས་པ། བཤད་རྒྱུད་ལས་འཁྲུགས་བསྡེབས་ཏེ་བཤད་པ་ལྟར་བཤད་དོ། །འདིར་སློབ་དཔོན་མཚན་ཉིད་ཇི་ལྟ་བུ་དང་ལྡན་པས་དཀྱིལ་འཁོར་གྱི་ཆོ་ག་བྱ་ཞེ་ན། དཀྱིལ་འཁོར་གྱི་སློབ་དཔོན་ནི་རྒྱུད་ལས་གསུངས་པའི་མཚན་ཉིད་ཐམས་ཅད་དང་ལྡན་པའོ། ཞེས་སྤྱིར་བསྟན་ནས། ཁྱད་པར་དུ་སྟོན་པ་ནི། ཡང་དག་པའི་དེ་ཁོ་ན་ཉིད་ཀྱི་དོན་བདེ་བ་ཆེན་པོས་ཤེས་པ་དང༌། བདེ་བ་མཆོག་ལ་སོགས་པའི་རྒྱུད་ཀྱི་རྡོ་རྗེའི་ཚིག་རྣམས་ཤེས་པ་དང༌། དཔལ་ལྡན་ཁྲག་འཐུང་ཧེ་རུ་ཀའི་གསང་སྔགས་རྣམས་ལེགས་པར་ཤེས་ནས་ཟློ་བའི་བསྙེན་པ་སྔོན་དུ་སོང་བ་སྟེ། སྡོམ་འབྱུང་ལས། འདི་ལྟར་ཁ་ཅིག་གསོལ་འདེབས་པའམ། །རང་ཉིད་བསོད་ནམས་འདོད་པ་ཡིས། །དང་པོར་རང་ལྷའི་བདག་ཉིད་ཀྱིས། །འཁོར་ལོ་ལ་གནས་སྔོན་བསྙེན་བྱ། །ཞེས་གསུངས་པ་ལྟར་རོ། །བཟླས་པའི་གྲངས་ནི། གཙོ་བོའམ་རང་གི་ལྷའི་སྔགས་འབུམ་ཕྲག་དང༌། གཞན་རྣམས་ཀྱི་ཁྲི་བཟླ་བར་མངོན་བརྗོད་ལས་བཤད་དོ། །ཁྲོ་བ་མེད་པ་ནི་འཕྲལ་དུ་གནོད་པ་བྱས་པ་ལ་སེམས་མི་འཁྲུག་པའོ། །གཙང་བ་ནི་རྩ་ལྟུང་སོགས་ཀྱིས་མ་གོས་ཤིང་སེམས་འཁྱོག་པའི་སྐྱོན་དང་བྲལ་བའོ། །མཁས་པ་ནི་སྡོམ་འབྱུང་ལས། རབ་གནས་གཏོར་མིའི་ཕ་རོལ་སོན། །སྦྱིན་སྲེག་དཀྱིལ་འཁོར་དེ་ཉིད་ཤེས། །རིག་པའི་གནས་ནི་ཐམས་ཅད་རིག །ཅེས་གསུངས་པ་ལྟར་རོ། །སྦྱོར་ཤེས་ནི་ཞི་སོགས་ཀྱི་ལས་སྦྱོར་ཤེས་པའོ། །ཡེ་ཤེས་ཕ་རོལ་འགྲོ་ནི་དེ་ལྟར་ཤེས་པའི་ཕ་རོལ་ཏུ་སོན་པའོ། །དེ་འདྲ་བའི་མཚན་ཉིད་དང་ལྡན་པ་དེས་དཀྱིལ་འཁོར་
གྱི་ཆོ་ག་བྱའོ། །གཉིས་པ་ལ་བཞི། སའི་ཆོ་ག་དང༌། དཀྱིལ་འཁོར་བྲི་སྒྲུབ་ཀྱི་ཆོ་ག་དང༌། བུམ་པ་སྒྲུབ་ཅིང་དགོད་པ་དང༌། དཀྱིལ་འཁོར་མཆོད་པའི་ཆོ་གའོ། །དང་པོ་ལ་གཉིས། ས་སྦྱང་བ་དང༌། ས་གཟུང་བའོ། །དང་པོ་ནི། ས་བརྟག་པ་དང་བརྐོས་ནས་སྦྱོང་བ་ནི་རྡོ་རྗེ་མཁའ་འགྲོར་བཤད་ལ། ས་རྐོ་བ་སོགས་ཀྱི་སྦྱང་བ་མི་དགོས་པ་ལ་དེ་དང་སྡོམ་འབྱུང་ནས་གསུངས་པ་ལྟར་གྱི་སྦྱང་བ་བྱའོ། །དཀྱིལ་འཁོར་དྲི་བ་དེ་ལ་བའི་ལྕི་བ་ལྡིང་བ་སྟེ་ས་ལ་མ་ལྷུང་བ་ཡིས། དཀྱིལ་འཁོར་གང་དུ་བྱེད་པའི་ས་ནི་ཉེ་བར་བྱུག་གོ། དེས་ནི་བ་བྱུང་ལྷག་མ་ཡང་མཚོན་པས་བ་བྱུང་ལྔས་བྱུག དེ་ཙམ་གྱིས་ཆོག་གམ་སྙམ་ན། དུར་ཁྲོད་དུ་རོ་བསྲེགས་པའི་ཐལ་བ་དང་ཡང་ལྡན་པར་བྱ་ལ། དེར་ཡང་མ་ཟད་མི་འཆི་བཅུ་ཕྱེད་ཏེ་བདུད་རྩི་ལྔ་དང་ཡང་བཅས་པ་ཡིས། དཀྱིལ་འཁོར་ས་ནི་ཉེ་བར་བྱུགས་ཏེ། དེ་རྣམས་ཀྱིས་ནི་ས་སྦྱང་བ་སྟོན་ནོ། །བྱུགས་པའི་ས་དེར་ནི་དཀྱིལ་འཁོར་བྲི་བ་ཡང་དག་པར་བརྩམ་པར་བྱའོ། །རྩམ་པའི་གཞི་དེ་ཡང་དུར་ཁྲོད་དུ་ནི་ཀུན་ཏུ་སྦྱོད་པའམ། དུར་ཁྲོད་མིན་ན་ཡང་ས་དེ་དུར་ཁྲོད་ཀྱི་གནས་དེ་རུ་ནི་བསམས་པར་བྱས་ནས་དཀྱིལ་འཁོར་བརྩམ་མོ་ཞེས་སྦྱར་རོ། །ཚིག་གཉིས་པ་མལ་གྱི་འགྱུར་ལ་མ་བྱུང་ཞིང༌། ལོ་ཆེན་དང་མར་དོའི་འགྱུར་གཉིས་ཀ་ལས་འབྱུང་བས། རྒྱ་དཔེ་ལ་མི་འདྲ་བ་ཡོད་པར་གསལ་བས་རྒྱ་དཔེ་གཅིག་ལ་མ་བྱུང་བས་རྒྱ་དཔེ་ལ་མེད་ཅེས་མི་བྱའོ། །གཉིས་པ་ནི། བླ་མ་མལ་གྱི་ལུགས་ཀྱིས། ཐོད་པས་སྤྱི་བོར་
ཞེས་པ་ནས་གོ་ཆར་འགྱུར་ཞེས་པའི་བར་འདི་རྣམས་ས་གཟུང་བར་བཞེད་པ་ནི། བཤད་རྒྱུད་གཉིས་དང་མཐུན་པས་ལེགས་པ་ཡིན་ཏེ། སྡོམ་འབྱུང་ལས། སློབ་དཔོན་ལྷའི་བདག་ཉིད་ཅན་ལ་གསོལ་བ་གདབ་ཅིང༌། དེས་རྡོར་དྲིལ་བཟུང་ནས་བགེགས་སྐྲོད་པས་གཟུང་བར་གསུངས་པ་དང༌། རྡོ་རྗེ་མཁའ་འགྲོ་ལས་ཀྱང༌། ས་ཆོག་གི་སྐབས་སུ་རང་ཁྲོ་བོ་ཆེན་པོར་བསྒོམས་ནས་ཕུར་བདབ་བྱས་པའི་རྗེས་སུ་མདའི་དྲ་བ་དང༌། རྡོ་རྗེའི་ར་བ་དང་རྡོ་རྗེའི་ས་གཞི་བྱ་བར་གསུངས་པ་ཉིད་རྩ་རྒྱུད་ཀྱི་གཞུང་འདི་དག་གི་དོན་དུ་སྣང་བའི་ཕྱིར་རོ། །དེ་ལ་སྔོན་དུ་སློབ་དཔོན་ཆས་སུ་འཇུག་པ་ནི། སངས་རྒྱས་རིགས་ལྔའི་གཟུགས་བྲིས་པའི་ཐོད་པའི་འཕྲེང་བས་སྤྱི་བོ་སྟེ་མགོ་ལ་སྐྱེས་པའི་རལ་པའི་ཅོད་པན་ལ་བརྒྱན་པར་བྱས་ཤིང་ཡན་ལག་ཐམས་ཅད་རོ་བསྲེགས་པའི་ཐལ་བ་དང་བདུད་རྩི་ལྔས་བྱུགས་པ་དང་རྣ་རྒྱན་དང་མགུལ་རྒྱན་སོགས་ཀྱི་ཕྱག་རྒྱ་དག་གིས་རང་གི་ལུས་བརྒྱན་པར་བྱའོ། །གུག་སྐྱེད་དག་གིས་ལུས་བརྒྱན་ཅིང༌། །ཞེས་འགྱུར་ཁ་ཅིག་ལས་འབྱུང་ཡང༌། ཕྱག་རྒྱར་བསྒྱུར་བ་ལེགས་སོ། །རུས་འཕྲེང་ཞེས་པ་ལ་ལོ་ཆེན་གྱིས། རུས་འཕྲེང་རུས་པར་ཡང་དག་གནས། །ཞེས་བསྒྱུར་ལ། དེའི་དོན་ནི་རུས་པའི་རྒྱན་གྱིས་བརྒྱན་པ་ལ་བཤད་དེ། རུས་པའི་མཆོད་ཕྱིར་ཐོགས་སུ་མངོན་ནོ། །དུམ་བུ་གཅིག་པའི་ཐོད་པ་ལས་བྱས་པའི་འཁོར་ལོས་སྤྱི་བོར་བརྒྱན་པ་དང༌། རུས་པའི་འཕྲེང་བ་རྣམ་པར་འཕྱང་བ་ནི་མགོ་འཕྲེང་ལྔ་བཅུའི་དོ་ཤལ་ལོ། །ཁ་ཊྭཱཾ་ག་ནི་ལག་པ་གཡོན་པའི་གྲུ་མོ་ན་གནས་པ་ནི། སློབ་དཔོན་བདག་ཉིད་
དཀྱིལ་འཁོར་གྱི་དབུས་སུ་དཔལ་ཁྲག་འཐུང་ཧེ་རུ་ཀའི་ཆས་སུ་བྱས་པའོ། །དེ་ལྟར་བྱས་པ་དེ་ནས་དཔལ་ཁྲག་འཐུང་དྲན་པར་བྱ་བ་ནི་དེའི་སྒྲུབ་ཐབས་སྒོམ་པའོ། །སྐལ་ལྡན་གྱི་ཧེ་རུ་ཀར་བྱས་པ་དམ་ཚིག་པར་བསྐྱེད་པ་དང༌། དེ་དྲན་པར་བྱས་པ་ནི་ཡེ་ཤེས་པ་དྲན་པ་ལ་འཆད་དོ། །ཧེ་རུ་ཀར་བསྒོམས་པ་འདིའི་སྙིང་གས་མཚོན་པའི་ལུས་དཀྱིལ་གྱི་གནས་རྣམས་སུ་ལྷ་སོ་བདུན་གྱི་འཁོར་ལོ་དགོད་ཅེས་པས་ལུས་དཀྱིལ་སྒོམ་པ་བསྟན་ཏོ། །བདག་ཉིད་དེ་ལྟར་ཕྱིན་ནང་གི་དཀྱིལ་འཁོར་སྒོམ་པའི་གོ་བགོས་ནས་ཏེ་བསྒོམས་པའི་མཐར། བགེགས་གཞོམ་པ་སོགས་བྱའོ། །དེ་ལྟར་སྔར་ཡོད་ཀྱི་བགེགས་བཅོམ་ནས། ཕྱིས་མི་འཇུག་པར་བྱ་བའི་ཕྱིར་ཕྱོགས་དང་མཚམས་སུ་རྡོ་རྗེའི་ར་བ་རྣམས་ནི་དགོད་པ་དང༌། ཕྱོགས་སུ་བཀོད་པར་མ་ཟད་སའི་འོག་ཏུ་ཡང་ནི་གསེར་གྱི་ས་གཞི་ལ་ཐུག་པར་མཚོན་ཆ་དགོད་པ་སྟེ་སྣ་ཚོགས་རྡོ་རྗེའི་ས་གཞིར་བྱའོ། །མར་དོ་རྐྱང་པའི་འགྱུར་ལས། འཁོར་ལོའི་བདག་ཉིད་མཚོན་ཆ་མཉམ། །ཞེས་འབྱུང༌། ལོ་ཙྪཱ་བ་གཉིས་འཇུས་ཀྱི་འགྱུར་ལས། འཁོར་ལོ་མཚོན་ཆའི་འཕྲེང་བ་དག །ཅེས་འབྱུང་ཡང༌། ལོ་ཆེན་གྱི་འགྱུར་ལས། འཁོར་ལོའི་བདག་ཉིད་བཀོད་ནས་ནི། །སྟེང་དུ་སོགས་འབྱུང་བ་ལྟར་བྱ་སྟེ། ཕྱོགས་དང་འོག་ཏུ་བསྲུང་བའི་འཁོར་ལོའི་བདག་ཉིད་བཀོད་ནས་སྟེང་དུ་མདའ་ཡི་དྲ་བ་བྱ་ཞེས་པའི་དོན་དུ་བྱའོ། །སྟེང་དུ་མདའི་དྲ་བ་བྱས་པ་ལས། སླར་ཡང་མཁའ་སྤྱོད་དེ་སྟེང་དུ་རྡོ་རྗེའི་གུར་བྱས་པ་འདི་ནི་བདག་ཉིད་ལ་བགེགས་ཀྱིས་མི་ཚུགས་པའི་གོ་ཆར་འགྱུར་
རོ། །འགྲེལ་པ་ཁ་ཅིག་གིས་སྟེང་ནས་ཡེ་ཤེས་སེམས་དཔའ་སྤྱན་དྲངས་ཏེ་དམ་ཚིག་པ་ལ་བསྟིམས་པའི་རྗེས་སུ་སླར་ཡང་སྟེང་དུ་གུར་བྱ་ཞེས་འཆད་དེ། འདིའི་སྔོན་དུ་གུར་བྱེད་པ་མ་བྱུང་བས་མི་འགྲིག་གོ། སྔར་བཤད་པ་དེ་ལྟར་གོ་ཆ་དེ་རྣམས་བགོས་ན། སུམ་ཅུ་རྩ་གསུམ་པའི་ལྷའི་དབང་པོས་ཀྱང་མི་ཕྱེད་པ་སྟེ་བཞིག་པར་མི་ནུས་ན། བགེགས་གཞན་གྱིས་ལྟ་ཅི་སྨོས་ཞེས་ལྷའི་རྣལ་འབྱོར་དང་བསྲུང་འཁོར་གྱི་ཆེ་བ་བསྟན་ཏོ། །གཉིས་པ་ལ་གཉིས། དཀྱིལ་འཁོར་བྲི་བ་དང༌། དཀྱིལ་འཁོར་བསྒྲུབ་པའོ། །དང་པོ་ནི། སྔར་བཤད་པ་དེ་ལྟར་བདག་ཉིད་རབ་ཏུ་བསྲུངས་ཤིང་རྩ་བའི་སྔགས་ལ་སོགས་པ་དང༌། རྡོ་རྗེ་ཕག་མོའི་ཕྱག་རྒྱས་རྣམ་པར་བརྒྱན་ནས་དངོས་གྲུབ་ཐམས་ཅད་རབ་ཏུ་སྟེར་བའི་འཇིགས་པ་སྟེ་ཁྲོ་བོའི་དཀྱིལ་འཁོར་བྲི་བར་བྱའོ། །ཞེས་མདོར་བསྟན་ཏོ། །རྩ་རྒྱུད་དུ་སྔོན་ལ་ཚོན་གྱིས་དང༌། དེ་ནས་ཐིག་གིས་བྲི་བར་གསུངས་པ་འཁྲུགས་པ་ལ། བཤད་རྒྱུད་ལས་འཁྲུགས་བསྡེབས་ཏེ་བྲི་བར་བཤད་པ་ལྟར་བཤད་དོ། །འདི་ལ་གཉིས། ཐིག་གིས་བྲི་བ་དང༌། ཚོན་གྱིས་བྲི་བའོ། །དང་པོ་ནི། སའི་ཆོ་ག་བྱས་པའི་རྗེས་དེ་ནས་ཐིག་འདེབས་པ་ལ། ཐིག་སྐུད་ནི་སེམས་མེད་པ་སྟེ་རོའི་སྲད་བུའོ། །དེ་ནི་མི་རོ་དང་ལྷན་ཅིག་དུར་ཁྲོད་དུ་བསྐྱལ་བའི་སྐུད་པ་ས་ལ་མ་ལྷུང་བའམ། མི་རོའི་རྒྱུས་པ་ལ་བྱས་པའི་ཐིག་སྐུད་ལ་འཆད་དོ། །འམ་ཞེས་པས་དེ་མེད་ན་བདུད་རྩི་ལྔ་དང་བཅས་པའི་ཁྲག་ཆེན་པོ་སྟེ་མི་ཡི་ཁྲག་གིས་བསྒོས་པའི་ཐིག་སྐུད་ཀྱིས་ཀྱང་དཔལ་ཧེ་རུ་ཀའི་ཕོ་བྲང་
མཆོག་གི་དཀྱིལ་འཁོར་འཇིགས་པའི་ཐིག་བདབ་པར་བྱའོ། །འམ་མེད་པར་བཤད་པ་ཡང་ཡོད་དོ། །འདི་ནི་ལས་ཀྱི་ཐིག་སྐུད་གཤེར་ཐིག་ཡིན་ལ། ཡེ་ཐིག་ནི་བཤད་རྒྱུད་གཉིས་ལས་ཉེར་ལྔ་པའི་ཐིག་སྐུད་ཁ་དོག་སྣ་ལྔ་པར་བཤད་པའོ། །དཀྱིལ་འཁོར་ཆེ་ཆུང་གི་ཚད་ནི་རྩ་བའི་ཐིག་ཁྲུ་གང་པའམ་ཁྲུ་བཞི་པའམ་ཁྲུ་བརྒྱད་པའོ། །སྡོམ་འབྱུང་ལས། ཁྲུ་ཕྱེད་སོགས་ནས་ཡང་དག་བརྩམ། ཁྲུ་བརྒྱ་ཡི་ནི་བར་ཇི་སྲིད། །ཅེས་ཀྱང་གསུངས་ཏེ། སློབ་མའི་འབྱོར་པ་ཆེ་ཆུང་ལ་སོགས་པའི་དབང་གིས་མཐའ་གཅིག་ཏུ་མ་ངེས་སོ། །རྩ་ཐིག་གི་ཚད་དེ་ལ་དཀྱིལ་འཁོར་སྒོ་བཞི་པ་དང༌། ཟུར་ཏེ་གྲུ་བཞི་པ་རྟ་བབས་བཞི་ཡིས་རྣམ་པར་བརྒྱན་པར་བྱའོ། །ཀུན་ནས་ཞེས་པ་ནི་རྩ་ཐིག་གི་ཕྱོགས་ཀུན་ནས་མཉམ་པའོ། །དཀྱིལ་འཁོར་འདྲི་བའི་སྔགས་པས་ཐིག་སྐུད་ཀྱི་སྲིད་ཚད་དཀྱིལ་འཁོར་གྱི་ཉིས་འགྱུར་དུ་རྣམ་པར་དཔྱད་པའམ་བརྟག་སྟེ། སྡོམ་འབྱུང་ལས། རིང་བ་འཁོར་ལོའི་ཉིས་འགྱུར་ཏེ། །སྒོ་ཡི་ཉི་ཤུ་ཆ་དག་གོ། ཞེས་ཕྲ་སྦོམ་གྱི་ཚད་སྒོ་ཡི་ཉི་ཤུ་ཆར་གསུངས་སོ། །རྡོ་རྗེ་ཕྲེང་བ་ལས་ཐིག་སྐུད་ཆེ་ཆུང་རེ་བཞི་པའི་ཕྱོགས་ལ་རྩ་ཐིག་ནས་རྩ་ཐིག་གི་བར་གྱི་ཉིས་འགྱུར་དང༌། ཆ་ཆུང་གོ་དྲུག་པའི་ཕྱོགས་ལ་མདའ་ཡབ་ནས་མདའ་ཡབ་ཀྱི་བར་གྱི་གཉིས་འགྱུར་དུ་བཤད་དེ། འདི་དག་གི་རྣམ་གཞག་རྒྱས་པར་ལཱུ་ཨི་པའི་སྒྲུབ་ཐབས་ཀྱི་རྣམ་བཤད་དུ་བཤད་ཟིན་ཏོ། །ལྭ་བ་པའི་འགྲེལ་པར། ཆ་འཕེལ་བ་ཡི་རིམ་གྱིས་ནི། །བློ་བཟང་དཀྱིལ་འཁོར་ཐིག་གདབ་བྱ། །ཞེས་པའི་གཞུང་འབྱུང་བ་གཞན་ལ་འཆད་དོ། །མཁའ་འགྲོ་ནི་དཔའ་བོ་དང་དཔའ་
མོའོ། །དྲ་བ་ནི་དེ་དག་གི་ཚོགས་སོ། །བདེ་མཆོག་ནི་གཙོ་བོའོ། །དེ་རྣམས་མཆོད་པར་གསུངས་པ་ནི་འོག་ཏུ་འགྲེལ་པར་འཆད་ཀྱང༌། ལས་ཐིག་ཐེབས་པའི་འོག་ཏུ་ལྷ་སྟ་གོན་གྱི་དཀྱིལ་འཁོར་མཆོད་པའི་དོན་ཡིན་པས། གཞུང་གི་འཁྲུགས་བསྡེབ་མི་དགོས་སོ། །འདི་དག་གི་ཤེས་བྱེད་གཞན་དུ་གསལ་བར་བཤད་ཟིན་པས་འདིར་མ་སྤྲོས་སོ། །དེ་ལྟར་ན་རྩ་རྒྱུད་དུ་ལྷ་དང་བུམ་པ་སྟ་གོན་གཉིས་གསུངས་ལ། སྟ་གོན་ལྷག་མ་ནི་བཤད་རྒྱུད་ལས་གསུངས་པས་ཁ་བསྐང་ངོ༌། །གཉིས་པ་ནི། འདིར་རྡུལ་ཚོན་ཇི་ལྟ་བུས་དཀྱིལ་འཁོར་བྲི་སྙམ་ན། དུར་ཁྲོད་ལས་བྱུང་བའི་ཚོན་སྣ་ལྔས་བྱ་སྟེ། ཚོན་སྔོན་པོ་ནི་རོ་བསྲེགས་པའི་སོལ་བའི་ཕྱེ་མས་བྱའོ། །ཚོན་དམར་པོ་ནི་དུར་ཁྲོད་ཀྱི་སོ་ཕག་གིས་སོ། །ཚོན་དཀར་པོ་ནི་མི་རུས་ཀྱི་ཕྱེ་མས་སོ། །ཚོན་སེར་པོ་ནི་ཡུང་བ་དང་མི་རུས་ཀྱི་ཕྱེ་མ་ལྷན་ཅིག་སྦྱར་བས་སོ། །ཚོན་ལྗང་ཁུ་ནི་མི་རུས་ཀྱི་ཕྱེ་མ་དང་ལོ་མ་ལྗང་ཁུའི་ཕྱེ་མ་དང་ལྡན་པ་ཡིས་དཀྱིལ་འཁོར་བཟང་པོ་བྲི་བར་བྱའོ། །སྡོམ་འབྱུང་ལས། ཕྱེ་མ་རིན་ཆེན་ལྔ་རང་བཞིན། །ཡང་ན་འབྲས་ལ་སོགས་རྣམས་ཀྱིས། ཞེས་ཀྱང་གསུངས་པས། དུར་ཁྲོད་ཀྱི་རྫས་ལས་བྱུང་བའི་ཚོན་ནི་དཀྱིལ་འཁོར་བྱེ་བྲག་པ་འགའ་ཞིག་ལ་དགོངས་སོ། །ཚོན་རྩི་རྣམས་བྱིན་གྱིས་བརླབས་ལ། དེ་ནས་ཚོན་དེས་དཀྱིལ་འཁོར་དེའི་དབུས་སུ་སྣ་ཚོགས་པདྨ་ནི་ལྟེ་བར་འདབ་མ་བརྒྱད་དང་བཅས་པ། འབར་བ་དང་བཅས་པ་སྟེ་འོད་ཟེར་འབར་བའི་རྣམ་པ་ཅན་གཞག་པ་སྟེ་བྲི་བར་བྱའོ། །གེ་སར་ཡང་དག་ལྡན་པ་ནི་ཟེའུ་འབྲུ་དང་གེ་སར་གཉིས་ཡོད་པའི་དང་པོ་ནི་ལྟེ་བ་ཡིན་ལ། གཉིས་པ་ནི་ལྟེ་བ་
དང་འདབ་མའི་མཚམས་སུ་ཁ་དོག་དམར་སེར་གྱི་རྣམ་པ་ཅན་གྱི་རི་མོས་འཁོར་བ་སྟེ་དེ་ཡོད་པར་བྱའོ། །དེས་མཚོན་ནས་སྐུ་གསུང་ཐུགས་ཀྱི་འཁོར་ལོ་རྣམས་ཀྱང་བྲི་སྟེ། གཞན་དུ་རྒྱས་པར་བཤད་ཟིན་ཏོ། །དེ་ལྟར་རྟེན་གྱི་དཀྱིལ་འཁོར་བྲིས་པ་ལ་བརྟེན་པའི་དཀྱིལ་འཁོར་བྲི་ཚུལ་ནི། མངོན་བརྗོད་ལས་ལྷ་རང་རང་གི་ཡི་གེ་སྟེ་ས་བོན་དང༌། ཕྱག་མཚན་དང་། ལྷ་སོ་སོའི་ཕྱག་གིས་རང་གི་ཕྱག་རྒྱ་འཆིང་བའི་རྣམ་པ་དང༌། ལྷ་སོ་སོའི་གཟུགས་བརྙན་དང༌། མེ་ཏོག་གི་ཚོམ་བུ་དགོད་པར་གསུངས་ལ། ལྟེ་བར་དགོད་བྱ་དཔའ་བོ་སོགས་ཀྱིས་ཀྱང་དཀྱིལ་འཁོར་ལ་ལྷའི་སྐུ་བྲིས་པ་བསྟན་པར་འཆད་པ་ཡང་ཡོད་དོ། །ཧ་ཧ་ཞེས་པའི་སྒྲ་ཆེར་བཞད། །ཅེས་པ་དང་བསྟུན་ན་ལྷ་དམ་ཚིག་པ་དཀྱིལ་འཁོར་དུ་ཡིད་ཀྱིས་དགོད་པ་ལ་ཡང་གསལ་བས། སྤྱིར་གཉིས་ཀ་ལ་བཤད་དུ་རུང་ཡང་གཙོ་བོར་དཀྱིལ་འཁོར་སྒྲུབ་པ་ལ་བྱའོ། །གཉིས་པ་ནི། དེ་ལྟར་རྟེན་དང་བརྟེན་པའི་དཀྱིལ་འཁོར་གྱི་མཚན་མ་གང་རུང་བྲིས་ཟིན་པ་དང༌། དཀྱིལ་འཁོར་སྒྲུབ་པ་ལ་ཀུན་སྤྱོད་དང་སྡོམ་འབྱུང་གི་དགོངས་པ་ལཱུ་ཨི་པའི་ལུགས་ལྟར་རྟེན་དང་བརྟེན་པ་གཉིས་ཀ་དུས་གཅིག་ཏུ་སྐྱེད་པ་ཡིན་ན། རླུང་ནས་རི་རབ་དང་པདྨའི་བར་དུ་བསྐྱེད་པའི་མཐར། ལེའུ་ང་གཅིག་ལས་གསུངས་པ་ལྟར། དབྱངས་གསལ་སོགས་ཀྱི་མངོན་བྱང་ལས་རྟེན་དང་བརྟེན་པ་བསྐྱེད་པའི་འོག་ཏུ་གཞལ་ཡས་ཁང་གསལ་གདབ། དེ་ནས་འདིར་བཤད་པ་བཞིན་དུ་ལྷ་རྣམས་གསལ་གདབ་བོ། །མངོན་བརྗོད་ལྟར་རྟེན་སྔོན་དུ་བསྐྱེད་ནས་བརྟེན་པ་རྗེས་སུ་
སྐྱེད་པ་ཡིན་ན། སྔོན་དུ་རི་རབ་ཀྱི་བར་རང་རང་གི་ས་བོན་ལས་བསྐྱེད། རྣམ་སྣང་ལས་གཞལ་ཡས་ཁང་བསྐྱེད་པའི་འོག་ཏུ་དབུས་ཀྱི་པདྨའི་ལྟེ་བར་མངོན་བྱང་ལས་ལྷ་རྣམས་བསྐྱེད་པར་བྱའོ། །དེ་ཡང་པདྨའི་ལྟེ་བར་དགོད་པར་བྱ་བའི་དཔའ་བོ་ཧེ་རུ་ཀ་ནི་འཇིག་རྟེན་ན་མཐུ་ཆེ་བར་གྲགས་པའི་འཇིག་བྱེད་དེ་དབང་ཕྱུག་ཀྱང་ནི། འཇིགས་པར་མཛད་པ་གཟི་བརྗིད་ཆེན་པོ་ཤིན་ཏུ་འབར་བ། ཧ་ཧ་ཞེས་པའི་སྒྲ་ཆེན་པོས་ནམ་མཁའ་ཁྱབ་པར་བཞད་པ་དབུ་རེ་རེ་ལ་ཐོད་པ་སྐམ་པོ་ལྔ་ལྔའི་འཕྲེང་བའི་རྒྱན་དང་ལྡན་པ། བདེ་བ་ཆེན་པོའི་ངོ་བོ་ཉིད་དུ་གྱུར་པས་ན་བཟང་པོ། ཞལ་བཞི་མངའ་བའི་ཞལ་རེ་རེ་ལ་སྤྱན་གསུམ་གསུམ་དང་ལྡན་པ། གླང་པོ་ཆེ་དཀར་པོའི་པགས་པ་རློན་པ་རྣམ་པར་བགོས་པ་སྟེ་མགོ་གཡས་དང་སྤུ་ཕྱིར་བསྟན་ནས་རྒྱབ་ཏུ་བཀབ་པ། དཔྲལ་བའི་རྡོ་རྗེ་ཕྲེང་བའི་མཐར་ཐུག་པའི་བར་དུ་སྨིན་མ་བཟང་པོ་འབྱེས་པ་སྟེ་གྱེས་པ། ཕྱག་གཡོན་ན་ཁ་ཊྭཱཾ་ག་དང་མིའི་ཐོད་པ་བསྣམས་པ། བརྒྱ་ཕྱེད་དེ་མི་མགོ་རློན་པ་ལྔ་བཅུ་རྒྱུ་མ་རློན་པ་ལ་བརྒྱུས་པའི་ཕྲེང་བས་མགུལ་བ་ལ་རྣམ་པར་བརྒྱན་པའོ། །ཧེ་རུ་ཀ་དེའི་མདུན་ན་འཁྱུད་པའི་ཚུལ་གྱིས་གནས་པའི་ལྷ་མོ་ནི། རྡོ་རྗེ་ཕག་མོ་གདུག་པ་ཅན་ལ་བསྡིགས་པར་མཛད་པས་ན་རབ་འཇིགས་མ། དཔལ་ཧེ་རུ་ཀ་ལ་མདུན་ཕྱོགས་པར་བྱས་ནས་བཞུགས་པ། སྤྱན་གསུམ་པ་དྲག་མོའི་གཟུགས་ཅན་མ། ཀ་པཱ་ལའི་ནང་ནི་བདུད་རྣམས་ཀྱི་ཨནྟྲ་སྟེ་རྒྱུ་མ་དང་ཁྲག་གིས་བཀང་བ་ཕྱག་གཡོན་པས་འཛིན་པ། ཁ་ནས་རུ་དྷི་ར་སྟེ་ཁྲག་འཛག་ཅིང༌། ཕྱག་
གཡས་པས་ལྷ་དང་ལྷ་མིན་དང་མིར་བཅས་པ་ལ་ཕྱོགས་ཀུན་ཏུ་ནི་སྡིགས་མཛུབ་བྱེད་པའོ། །གཙོ་བོ་ཡབ་ཡུམ་གྱི་ཕྱག་མཚན་གསལ་བར་མ་བཤད་པ་ནི། རྩ་རྒྱུད་ཀྱི་དོན་བཤད་རྒྱུད་ཀྱིས་མི་འདྲ་བ་དུ་མར་འཆད་པ་ལ་དགོངས་པ་ཡིན་པས། རྩ་རྒྱུད་ཀྱི་དོན་ཚང་བ་ནི་ཕྱོགས་རེ་བ་ལ་མི་གཟུང་ངོ༌། །འོན་ཀྱང་ལོ་ནག་དྲིལ་གསུམ་ལ་སོགས་པའི་ཆོ་ག་ལག་ཏུ་ལེན་པ་ལ་ནི། སྐབས་སུ་གང་བབ་ཀྱི་ལུགས་དང་བསྟུན་ལ་འདི་དག་གི་དོན་བཤད་པར་བྱ་སྟེ། དཔེར་ན་ལཱུ་ཨི་པས་ཡུམ་གྱི་ཕྱག་གཡས་ན་རྡོ་རྗེ་བསྣམས་པ་དང༌། དྲིལ་བུ་པས་གྲི་གུག་བསྣམས་པར་བཤད་པ་གཉིས་ཀའང་རྩ་རྒྱུད་ཀྱི་དོན་དུ་འགྱུར་བ་ལྟ་བུའོ། །དེ་བཞིན་དུ་ཡབ་ཀྱི་ཕྱག་མཚན་ལྷག་མ་ཡང་བཤད་རྒྱུད་ལས་མི་འདྲ་བ་མང་དུ་བཤད་པས། སྐབས་སུ་གང་བབ་ཀྱི་བཤད་པ་དང་སྦྱར་རོ། །དེ་དག་ཀྱང་སོ་སོའི་ལུགས་ཀྱི་སྒྲུབ་ཐབས་ལས་ཤེས་དགོས་པས་འདིར་མ་བཤད་དོ། །ལྷག་མ་རྣམས་ལའང་དེ་བཞིན་དུ་ཤེས་པར་བྱའོ། །རྡོ་རྗེ་ཕག་མོའི་ནི་རིགས་ལས་བྱུང་བའི་མཁའ་འགྲོ་མ་ནི་རབ་གཏུམ་མ་ལ་སོགས་པ་ཉི་ཤུ་རྩ་བཞི་རྣམས། ཤར་ལ་སོགས་པའི་ཕྱོགས་བཞིར་འགོད་པ་ན་ཤར་ནས་གཡོན་སྐོར་དང༌། མེ་ནས་མཚམས་གཡས་སྐོར་དུ་བསྒོམས་ལ་མཆོད་པར་བྱའོ། །འཁོར་ལོའི་དབུས་སུ་ཞེས་པ་ནི་གཞལ་ཡས་ཁང་གི་ནང་དུ་ཞེས་པའམ། ཡང་ན་འཁོར་ལོའི་རྩིབས་ཀྱི་དབུས་ཞེས་པའོ། །དཔའ་མོ་ཉེར་བཞི་ཁོ་ནའམ་ཞེ་ན། དཔའ་མོ་ཉེར་བཞི་བསྒོམས་ནས་མཆོད་པ་དེ་བཞིན་དུ། གཞལ་ཡས་ཁང་འདིར་ནི་དཔའ་བོ་
ཉེར་བཞི་ཡང་བསྒོམས་ལ་མཆོད་པར་བྱའོ། །འཁོར་ལོར་ཡང་དག་གནས་པ་ནི་འཁོར་ལོའི་རྩིབས་ཀྱི་དབུས་སུ་གནས་པའོ། །གལ་ཏེ་སྒྲུབ་པ་པོ་དངོས་གྲུབ་འདོད་ན་དཔའ་མོ་དང་གཉིས་སུ་མེད་པ་སྟེ་ཡུམ་དང་བཅས་པའི་དཔའ་བོ་མཆོད་པར་བྱའི་གང་རུང་རེ་རེ་ནི་མིན་ནོ། །འོག་གི་མ་མོ་ཞེས་པ་གཉིས་ཀྱིས་མ་མོ་བཅུ་གཉིས་པོ་དགོད་པ་བསྟན་པར་བླ་མ་སྔ་མ་རྣམས་བཞེད་པ་ལེགས་པས། མ་མོ་བཅུ་གཉིས་པོ་ཐམས་ཅད་ཀྱི་ནང་ནས་མཁའ་འགྲོ་མ་ལ་སོགས་པ་བཞི་ནི་པདྨའི་ལྟེ་བའི་ཕྱོགས་བཞི་དང༌། ཁྭ་གདོང་མ་ལ་སོགས་པ་བཞི་ནི་སྒོའི་ཕྱོགས་བཞིར་དགོད་ལ། གཤིན་རྗེ་བརྟན་མ་སོགས་བཞི་ནི་སྒོའི་མཚམས་བཞིར་དགོད་པ་སྟེ་བསྒོམ་པར་བྱའོ། །དེ་བཞིན་དུ་ཐོད་པ་དང་བཅས་པའི་བུམ་པ་བཞིའམ་ཐོད་པ་བཞི་ནི་པད་འདབ་ཀྱི་མཚམས་བཞིར་དགོད་དོ། །དེ་དག་ནི་དམ་ཚིག་པ་བསྐྱེད་པའོ། །འཁོར་གྱི་ལྷ་རྣམས་ལའང་རྩ་རྒྱུད་ལས་ཕྱོགས་གཅིག་ལ་གསལ་ཁ་མ་བརྗོད་པ་ནི། བཤད་རྒྱུད་རྣམས་ལས་ལྷའི་སྐུ་མདོག་དང་གྲངས་དང་ཕྱག་མཚན་སོགས་མི་འདྲ་བ་དུ་མ་འཆད་པ་ལ་དགོངས་ལ། ལོ་དྲིལ་སོགས་ད་ལྟ་ལག་ལེན་བྱེད་པ་ལ་ནི། རང་རང་གི་སྒྲུབ་ཐབས་ཀྱི་སྟེང་ནས་འདི་དང་སྦྱར་དགོས་པས་འདིར་མ་བཀོད་ལ། ཕྱོགས་གཅིག་ལ་གསལ་ཁ་མ་བཏོད་པ་ཉིད་བཤད་རྒྱུད་དང་སྦྱར་ན་འཆད་བདེ་བས། འདིར་ཡང་ཕྱོགས་རེ་བའི་བཤད་པ་མ་བྱས་ཏེ། སྐབས་གཞན་དུ་ཡང་དེ་བཞིན་དུ་ཤེས་པར་བྱའོ། །ཡེ་ཤེས་པ་གཞུག་པ་ནི། ནམ་མཁའི་མཁའ་འགྲོ་མ་སྟེ་ཐུགས་འཁོར་གྱི་དཔའ་མོ་ཡེ་ཤེས་པ་རྣམས་ནི། རང་གི་
ཡིད་ཀྱིས་ཐམས་ཅད་སྟེང་དུ་སྟེ་ནམ་མཁའ་ལ་སྤྱོད་པའི་ཐུགས་འཁོར་དམ་ཚིག་པ་ལ་དགོད་པ་སྟེ་དེ་ལ་གཞུག་གོ། ས་སྟེང་སྟེ་བསྲུང་འཁོར་གྱི་མཁའ་འགྲོ་མ་ཡེ་ཤེས་པ་གང་ཡིན་པ་ནི། དཀྱིལ་འཁོར་གྱི་གསུང་གི་མཁའ་འགྲོ་མ་དམ་ཚིག་པ་ལ་དགོད་པ་སྟེ་གཞུག་གོ། གང་ཡང་ས་འོག་གི་མཁའ་འགྲོ་མ་སྟེ་སྐུ་འཁོར་གྱི་མཁའ་འགྲོ་མ་ཡེ་ཤེས་པ་དེ་རྣམས་ནི་ས་འོག་རྣམས་སུ་སྟེ་སྐུ་འཁོར་གྱི་དམ་ཚིག་པ་རྣམས་ལ་དགོད་དོ། །དཀྱིལ་འཁོར་དུ་ཞེས་པ་ནི་སྔ་མ་དང་ཕྱི་མ་གཉིས་ལ་ཡང་སྦྱར་ལ། སྟེང་དུ་དང་འོག་ཏུ་ཞེས་པའི་ཤུགས་ཀྱིས་བར་དུ་དགོད་ཅེས་པ་ཡང་གོ་བར་བྱའོ། །བླ་མ་རྣམས་འདི་ལྟར་འཆད་པ་ལྭ་བ་པ་དང་ལྷ་སྦས་ཀྱི་ཡང་དགོངས་པར་སྣང་ངོ༌། །དེས་ནི་དམ་ཚིག་པ་ལྷག་མ་ལ་ཡང་ཡེ་ཤེས་པ་གཞུག་པ་མཚོན་པར་བྱའོ། །ཆོ་ག་ལྷག་མ་ནི་དཀྱིལ་ཆོག་ལས་ཤེས་དགོས་སོ། །དེ་ལྟར་ན་འདིར་དབང་གི་དཀྱིལ་འཁོར་དུ་ལྷ་རེ་གཉིས་དགོད་པར་གསུངས་ལ། དེ་ཁོ་ནར་མ་ངེས་ཏེ་བཤད་རྒྱུད་ལས་ལྷ་ལྔ་དང༌། བཅུ་གསུམ་དང༌། སུམ་ཅུ་དང༌། དཔའ་བོ་གཅིག་པ་སོགས་ཀྱི་དཀྱིལ་འཁོར་ཡང་བཤད་པས། དེ་དག་གི་དཀྱིལ་འཁོར་དུ་དབང་བསྐུར་པ་སོགས་ཀྱང་ཤེས་དགོས་སོ། །གསུམ་པ་ནི། དཀྱིལ་འཁོར་སྒྲུབ་པ་བཤད་ཟིན་པ་དེ་ནས་བུམ་པ་བྱ་བ་སྟེ་བྱེད་ཚུལ་ནི་བཤད་པར་བྱའོ་ཞེས་སྦྱར་རོ། །བུམ་པ་ལ་རྩ་བ་སྟེ་ཞབས་སྟེགས་བྱེད་པ་དང༌། ཁ་དོག་ནག་པོ་དང༌། སོགས་ཀྱིས་བསྡུས་པ་མི་སྡུག་པ་དང༌། སེར་ཀ་ལ་སོགས་པའི་སྐྱོན་
མེད་པར་བྱའོ། །བུམ་པའི་ནང་རྫས་ནི། མུ་ཏིག་དང་གསེར་དང་རིན་ཆེན་ཏེ་མུ་མེན་དང༌། བྱུ་རུ་དང་དངུལ་དང༌། ཕྲེང་བར་ཟངས་མ་ཡང་རིན་པོ་ཆེ་ལྔ་ལ་བགྲངས་པས་རིན་པོ་ཆེ་ལྔ་དང༌། བཟའ་བ་ནི་བདུད་རྩི་ལྔའོ། །ཀུན་གྱིས་ནི་འབྲུ་ལྔ་དང་སྨན་ལྔ་ལ་སོགས་པ་ཡང་གཟུང་ངོ༌། །དེ་རྣམས་དང་བཅས་པའི་ཆུ་ཡིས་ལེགས་པར་དགང་ངོ༌། །བདུད་རྩི་ལྔ་ལ་སོགས་པ་དང་དྲི་བཟང་པོའི་ཆུས་བཀང་བའི་སྣོད་ཐོད་པ་ནི་བུམ་པའི་སྟེང་དུ་གཞག་པར་བྱའོ། །བུམ་པའི་མགྲིན་པ་སྲད་བུས་དཀྲིས་བ་དང༌། ཁ་ནི་འདབ་མ་སྟེ་ཤིང་ལོ་གསར་པས་བརྒྱན་པ་དང༌། རས་ཀྱི་གོས་གསར་པ་ཟུང་གིས་ནི་མགྲིན་པ་ལེགས་པར་དཀྲིས་པར་བྱ་ལ། བསང་སྦྱངས་ཏེ་བུམ་པ་སྐྱེད་པ་དང༌། དེའི་ནང་དུ་ལྷ་སྐྱེད་པ་དང་སྔགས་ཟློ་བ་སོགས་བྱེད་པ་ནི་བུམ་པ་སྒྲུབ་པའོ། །དེ་ནས་དགོད་པ་ནི། བུམ་པ་བརྒྱད་ནི་ཤར་ལ་སོགས་པའི་སྒོ་བཞི་རུ་གཉིས་གཉིས་དང་བུམ་པ་དགུ་པ་ནི་མདུན་དུ་དགོད་པར་ལྭ་བ་པས་བཤད་པ་ནི་ཤར་དུ་དགོད་པ་ལ་བཤད་དོ། །དགུ་པ་དབུས་སུ་འགོད་པ་ལྟར་ན་གོང་དུ་སྟ་གོན་གྱི་དུས་ལ་དགོངས་པ་འདྲའོ། །བཞི་པ་ལ་གཉིས། དཀྱིལ་འཁོར་བརྒྱན་པ་དང༌། དཀྱིལ་འཁོར་མཆོད་པའོ། །དང་པོ་ནི། གསེར་དང་དངུལ་དང་མུ་ཏིག་དང་དེ་དག་ལས་གཞན་པའི་རིན་ཆེན་རྣམས་ཀྱིས་མཛེས་པར་བྱའོ། །ལོ་ཆེན་གྱི་འགྱུར་ལ་རམ་ཞེས་པ་མེད་དོ། །མཛེས་པར་བྱེད་ལུགས་ནི་སྔར་བཤད་པའི་རིན་ཆེན་དང་གསེར་ལ་སོགས་པ་རྣམས་ཀྱིས། དཀྱིལ་འཁོར་གྱི་ས་གཞིའི་ཕྱིའི་ཕྱོགས་ཀུན་ཏུ་མཛེས་པར་སྤྲས་པར་བྱའོ། །
གཉིས་པ་ནི། གྲོང་མཆོག་སྟེ་དཀྱིལ་འཁོར་ཡིད་དུ་འོང་བ་མཆོད་ན་ནི། དངོས་གྲུབ་འགྲུབ་པ་ཉིད་དུ་ཐེ་ཚོམ་མེད་པས་མཆོད་པར་བྱའོ། །སློབ་དཔོན་བདག་ཉིད་ལ་དྲི་ཞིམ་པོའི་ཆུ་ཡིས་ལེགས་པར་གདབ་པར་བྱའོ། །སྒོ་ནི་ཞལ་ལོ། །ཀུན་ནས་ནི་ཞལ་བཞི་ཕྱོགས་ཀུན་ཏུ་ཡོད་པ་སྟེ་རང་ཉིད་ཧེ་རུ་ཀ་ཞལ་བཞི་པར་བྱས་པ་ལ་གདབ་ཅེས་པའོ། །འདི་དཀྱིལ་འཁོར་རྡུལ་ཚོན་གྱིས་བྲིས་ཟིན་ནས་སྒྲུབ་པར་རྩོམ་པའི་སྐབས་ལ་འཆད་དོ། །གལ་ཏེ་དངོས་གྲུབ་མཆོག་འདོད་ན་མར་མེ་བརྒྱ་ནི་དབུལ་བར་བྱའོ། །གལ་ཏེ་དངོས་གྲུབ་མཆོག་འདོད་ན་མར་མེ་བརྒྱ་དབུལ་བ་དེ་བཞིན་དུ་དྲི་བརྒྱ་དང་མེ་ཏོག་བརྒྱ་དང་སྤོས་བརྒྱ་དང་མར་མེ་བརྒྱ་ཡང་དབུལ་བར་བྱའོ། །ཆོ་ག་ཞེས་པའི་རྐང་པ་གཅིག་ལོ་ཆེན་དང་མལ་གྱི་འགྱུར་ལ་མེད་དོ། །མར་མེ་བརྒྱ་ལན་གཉིས་སྨོས་པའི་དང་པོ་ནི་ཏིལ་མར་གྱི་མར་མེ་དང༌། གཉིས་པ་ནི་ངེས་པར་གཞག་དགོས་པའི་ཕྱིར་དུ་ཡིན་ཏེ། མར་མེ་བརྒྱ་གཙོ་བོ་ཡིན་པའི་ཕྱིར་རོ་ཞེས་སྐལ་ལྡན་ནོ། །ཡང་ཁ་ཅིག་ཕྱི་མ་སྒྲ་ཇི་བཞིན་པ་དང༌། སྔ་མ་ཤ་ལྔ་ལ་འཆད་ཀྱང༌། བྷ་བ་བྷ་དྲས་སྔ་མ་ཐུན་མོང་གི་མར་མེ་དང༌། ཕྱི་མ་མར་ཁུ་ཆེན་པོའི་མར་མེ་ལ་འཆད་པ་ལྟར་བྱའོ། །གང་ལ་མཆོད་ན། ཧེ་རུ་ཀ་ཞེས་པའི་རྐང་པ་གཉིས་ཀྱིས་སྟོན་ནོ། །རྒྱལ་མཚན་ལྔས་མཆོད་པ་ཡང་དཀྱིལ་འཁོར་ལ་ཡིན་ནོ། །དེ་བཞིན་དུ་ཁ་དོག་སྣ་ཚོགས་པའི་གོས་ཟུང་ལྷ་རེ་རེ་ལ་རེ་རེ་དང༌། མ་འབྱོར་ན་ཐུན་མོང་དུ་གཅིག་གོ། སྟེང་ནས་འཕྱང་བའི་མེ་ཏོག་གི་ཕྲེང་བ་མི་འདྲ་
བ་དུ་མ་དང༌། སྟེང་དུ་བླ་རེ་དང་ལོགས་སུ་ཡོལ་བ་དག་ཇི་ལྟར་མཛེས་པ་དེ་བཞིན་བྱའོ། །དེ་བཞིན་དུ་བཟའ་བ་དང༌། བཅའ་བ་དང༌། བཏུང་བ་ཞིམ་པོ་ཡིས་རབ་མཉམ་གཞག་པ་སྟེ་ཡིད་རྩེ་གཅིག་ཏུ་བྱས་ཏེ་དཀྱིལ་འཁོར་མཆོད་པར་བྱའོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། དཀྱིལ་འཁོར་གྱི་འཁོར་ལོ་དགོད་པ་དང༌། དེ་ལ་མཆོད་པའི་ཆོ་གའི་ལེའུ་སྟེ་གཉིས་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་གཉིས་པའི་བཤད་པའོ།། ༈ གཉིས་པ་བསྒྲུབས་པའི་དཀྱིལ་འཁོར་དེར་དབང་བསྐུར་བ་ལ་དྲུག །དང་པོ་བླ་མ་དང་ལྷ་མཉེས་པར་བྱ་བ། དཀྱིལ་འཁོར་དུ་གཞུག་ཅིང་དབང་བསྐུར་བ། ཡོན་དབུལ་བ་ཕན་ཡོན་དང་བཅས་པ། དབང་བསྐུར་བ་ངེས་པར་དགོས་པར་བསྟན་པ། དབང་བསྐུར་བའི་ཆེ་བ་བསྟན་པ། ལེའུ་ཡི་མཚན་བསྟན་པའོ། །དང་པོ་ནི། ལེའུ་གཉིས་པ་བཤད་ཟིན་པ་དེ་ནས་གསུམ་པ་འཆད་དོ་ཞེས་སྦྱར་རོ། །སྒྲུབ་པ་པོ་སྟེ་དབང་བསྐུར་བར་བྱ་བའི་སློབ་མས་དང་པོར་ཏེ་དབང་གི་སྔོན་དུ་སློབ་དཔོན་ལེགས་པར་མཉེས་པར་བྱའོ། །གང་གིས་ན་ལུས་ངག་ཡིད་ཀྱི་དངོས་པོ་ཀུན་གྱིས་སོ། །དེ་ཡང་དངོས་གྲུབ་འདོད་པས་ཤིན་ཏུ་མཉམ་པར་བཞག་པ་སྟེ་རྩེ་གཅིག་ཏུ་གུས་པས། ནུས་པ་ཇི་ལྟར་ཡོད་པས་བླ་མ་མཆོད་པར་བྱས་ཏེ། དབང་གི་དོན་དུ་གསོལ་བ་གདབ་པར་བྱའོ། །དྲིལ་བུ་སྒྲ་སྒྲོགས་པ་ཅན་སྟེང་ནས་དཔྱངས་པ་དང༌། མེ་ཏོག་དང་སྤོས་རྣམས་ཀྱིས་ཀྱང་སྟེང་ནས་བརྒྱན་ཞིང་ངོ༌། །ཤིན་ཏུ་སྒྲ་སྙན་པའི་དྲིལ་བུ་
དཀྲོལ་བ་དང༌། སྒྲུབ་པ་པོ་ཡིས་རྔ་སྟེ་ཅང་ཏེའུ་བརྡུང་ཞིང༌། ཧ་ཧ་ཞེས་ནི་བརྗོད་པར་བྱའོ། །འདི་ལ་བརྡས་བཤད་ན་ལྭ་བ་པས་དྲིལ་བུ་ནི་ལོ་གྲངས་བཅུ་དྲུག་མའི་བུ་མོར་གསུངས་ལ། རྔ་ནི་ལོ་གྲངས་བཅུ་གཉིས་མའོ། །ཞེས་གསུངས་པས། སྒྲུབ་པ་པོ་ཡིས་ཞེས་པ་ནི། སྒྲུབ་པོ་ཤིན་ཏུ་མཉམ་གཞག་པས། །ཞེས་དང༌། སྒྲུབ་པོ་དེ་ཡིས་ཐམས་ཅད་ནི། །ཞེས་སློབ་མ་ལ་སྒྲུབ་པ་པོར་གསུངས་པས་རྔ་རྡུང་མཁན་ནི་སློབ་མ་ཡིན་ལ། དེའི་ཕྱིར་དྲིལ་བུ་དཀྲོལ་མཁན་ཡང་སློབ་མ་ལ་བྱའོ། །ཤིན་ཏུ་སྒྲ་སྙན་པ་ནི་ངག་སྙན་ཞིང་གཟུགས་མཛེས་ལ་རེག་བྱ་ཁྱད་པར་ཅན་མ་དང༌། བརྡུང་པ་ནི་རྗེས་སུ་ཆགས་པར་བྱ་བ་ལ་བཤད་དོ། །དཀྲོལ་བ་ཡང་དེ་དང་འདྲ་བས་སློབ་མས་རིག་མ་དེ་དག་ལ་སྙོམས་འཇུག་བྱེད་པའོ། །དེ་སྐབས་གང་དུ་ཡིན་ཞེ་ན། སློབ་མ་ལ་ཤེས་རབ་ཡེ་ཤེས་ཀྱི་དབང་བསྐུར་བའི་སྐབས་ལ་བྱ་དགོས་པས། འདིས་དབང་གསུམ་པ་བསྐུར་བ་སྟོན་ཏེ། དབང་གི་གོ་རིམ་ལས་བཟློག་སྟེ་བསྟན་པའོ། །བྷ་བ་བྷ་དྲས་དྲིལ་བུ་འཁྲོལ་བས་དྲིལ་བུའི་དབང་བསྟན་པར་ཡང་བཤད་དོ། །གཉིས་པ་ལ་གཉིས། དཀྱིལ་འཁོར་དུ་གཞུག་པ་དང༌། ཞུགས་པ་ལ་དབང་བསྐུར་བའོ། །དང་པོ་ནི། སྔར་བཤད་པ་དེ་ལྟར་དཀྱིལ་འཁོར་ལ་མཆོད་པའི་ཆོ་གའི་རིམ་པ་བཞིན་དུ་མཆོད་ནས། རྡུལ་ཚོན་ནམ་རས་རིས་ཀྱི་དཀྱིལ་འཁོར་དུ་གཞུག་པར་བྱའོ། །ཞེས་སྦྱར་རོ། །ཡང་དྲིལ་བུ་དཀྲོལ་བ་སོགས་བརྡས་ཤར་པ་དེ་ལྟར་རྡོ་རྗེ་དང་པདྨ་བྱིན་གྱིས་བརླབས་ནས་སྙོམས་པར་འཇུག་པའི་ཆོ་ག་
བཞིན་དུ་ཤེས་རབ་མའི་ལུས་ཀྱི་དཀྱིལ་འཁོར་གཟུགས་སྡུག་སྒྲ་སྙན་དྲི་ཞིམ་རོ་མཆོག་རེག་བྱ་འཇམ་པ་སྟེ་འདོད་པའི་ཡོན་ཏན་ཀུན་དང་ལྡན་པ་ལ་སྙོམས་འཇུག་གི་སྒོ་ནས་མཆོད་ནས་བྷ་གའི་དཀྱིལ་འཁོར་དུ་གཞུག་པར་བྱའོ། །ཞེས་ཀྱང་སྦྱར་རོ། །དེ་གཉིས་ཀྱི་དང་པོ་ལྟར་ན་སྟ་གོན་གྱི་སྐབས་སུ་བུར་བྱས་པས་ན་བུ་སྟེ། མཛེས་པ་ཡིན་དུ་འོང་བ་ཡོལ་བའི་ཕྱི་རོལ་ཏུ་འཁོད་པ་དེ་རྣམས་ཀྱི་གདོང་ལ་ནི་དར་རམ་རས་ཀྱིས་ལེགས་པར་དགབ་པར་བྱའོ། །དེ་ལ་དར་ནི་མི་གསལ་བ་མཚོན་ལ། བཀབ་པ་ནི་གསང་བ་མཚོན་པ་ཡིན་ཏེ། ཇི་སྐད་དུ་དར་ནི་མི་གསལ་མཚོན་པ་སྟེ། །བཀབ་པ་གསང་བ་མཚོན་པའོ། ཞེས་སོ། །དེ་ལྟར་མིག་བཀབ་ནས་སུ་ཐལ་མོ་མེ་ཏོག་གིས་བཀང་བ་སྟེ་མེ་ཏོག་ཕྲེང་བ་ཐལ་མོའི་བར་དུ་འཛིན་དུ་གཞུག་ལ། ཡོལ་བའི་ནང་དུ་ཡང་དག་པར་ནི་ཞུགས་པ་སྟེ་གཞུག་པར་བྱའོ། །དེ་ནས་སྒྲུབ་པོ་སྟེ་སློབ་མ་ཤིན་ཏུ་མཉམ་པར་བཞག་པ་སྟེ་མ་ཡེངས་པས་དཀྱིལ་འཁོར་ལ་བསྐོར་བ་བྱས་ནས་ནི། ཧེ་རུ་ཀའི་ཕོ་བྲང་ཉམས་དགའ་བར་གཞུག་པར་བྱ་སྟེ། དཀྱིལ་འཁོར་གྱི་ནང་དུ་ཡིད་ཀྱིས་ཞུགས་པར་སྒོམ་པའོ། །བློ་བཟང་ཞེས་པའི་རྐང་པ་གཅིག་ལོ་ཆེན་དང་མལ་གྱི་འགྱུར་ལ་མེད་དེ་མི་དགོས་པ་འདྲའོ། །ལྷོ་ཡི་ཕྱོགས་སུ་ལུས་བརྟེན་པ་ནི་ཁ་ཅིག །བདེ་མཆོག་ཞལ་ལྷོར་བལྟས་པས་དེ་ངོས་ནས་ཞུགས་པ་ལ་འཆད་དོ། །ལྭ་བ་པས་ལྷོ་ཡི་ཕྱོགས་སུ་བརྟེན་ནས་མེ་ཏོག་དོར་བ་མཚོན་བྱེད་དུ་མཛད་ནས། སྒོ་གཞན་གསུམ་དུ་ཡང་མེ་ཏོག་འདོར་བ་དང༌། དེ་ལྟར་དོར་བས་དངོས་གྲུབ་མི་འདྲ་བ་
འཐོབ་པར་བཤད་དོ། །དེ་ནས་སྔར་ཐལ་མོའི་བར་དུ་བཟུང་བའི་མེ་ཏོག་དཀྱིལ་འཁོར་གྱི་སྟེང་དུ་དོར་བར་བྱའོ། །དེ་ནས་མིག་དར་ཕྱེ་ལ་དཀྱིལ་འཁོར་གྱི་སྟེང་དུ་གཏོར་བའི་མེ་ཏོག་དེ་གང་དུ་ལྷུང་བའི་ལྷ་དེ་ནི། སློབ་མ་དེའི་རིགས་ཀྱི་ལྷ་ཡིན་ནོ་ཞེས་རྣམ་པར་ཏེ་ཁྱད་པར་དུ་བསྟན་ཞིང༌། ཤྲཱི་ཧེ་རུ་ཀ་དང་སོགས་ཀྱིས་ལྷ་གཞན་དང༌། དེའི་གནས་གཞལ་ཡས་ཁང་རྣམས་བསྟན་པར་བྱའོ། །འདིར་ལྭ་བ་པས་དཀྱིལ་འཁོར་ཙམ་ཞིག་དེ་ལ་བསྟན་པར་བྱའི། དཀྱིལ་འཁོར་གྱི་དེ་ཁོ་ན་ཉིད་བསྟན་པར་མི་བྱ་བར་གསུངས་སོ། །འོ་ན་འཕགས་པ་ལྷ་དང་ཀླུ་བྱང་སོགས་ཀྱིས་སྐབས་འདིར་དཀྱིལ་འཁོར་གྱི་དེ་ཉིད་སྟོན་པར་བཤད་པ་ཇི་ལྟར་ཡིན་ཞེ་ན། འདི་ལ་ཁ་ཅིག་་དེ་ཉིད་མི་སྟོན་པ་ནི། སློབ་མ་རིགས་ལྔའི་སྡོམ་པ་མ་བཟུང་ཞིང་རྡོ་རྗེ་སློབ་དཔོན་གྱི་དབང་མི་ཞུ་བ་རྣམས་ལ་ཡིན་ལ། སྐབས་འདིར་དེ་ཉིད་བསྟན་པར་བཤད་པ་ནི། སྔར་སྡོམ་པ་བཟུང་ཞིང་སློབ་དཔོན་དང་སློབ་མའི་དབང་ཚིག་ཆོད་དུ་ཞུ་བ་ལ་ཡིན་ཞེས་འཆད་མོད་ཀྱང༌། ལྭ་བ་པས་ནི་གསང་དབང་བསྐུར་བའི་རྗེས་སུ་དཀྱིལ་འཁོར་བསྟན་ཞེས་བྱ་བ་ནི། ཐམས་ཅད་ཟིན་ནས་དཀྱིལ་འཁོར་གྱི་དེ་ཁོ་ན་ཉིད་ལ་སོགས་པ་ཐམས་ཅད་རྫོགས་པར་བསྟན་པར་བྱའོ་ཞེས་གསུངས་ཤིང༌། དབང་གསུམ་པ་དྲིལ་བུ་འཁྲོལ་བ་སོགས་ཀྱིས་བསྟན་པ་དགོངས་པར་སྣང་བས། དབང་གོང་མ་རྣམས་ཀྱང་ཟིན་ནས་དེ་ཁོ་ན་ཉིད་རྫོགས་པར་སྟོན་པ་ཡིན་པས། སློབ་དཔོན་གྱི་དབང་གི་རྗེས་སུ་དཀྱིལ་འཁོར་གྱི་དེ་ཉིད་སྟོན་པ་ཙམ་ལ་མི་བྱའི། རིམ་པ་གཉིས་ཀའི་དབང་
དུ་བྱས་པའི་དེ་ཉིད་སྟོན་པ་ལ་བྱའོ། །དེ་ལྟར་ན་ལྷ་ངོ་སྟོན་པའི་སྐབས་སུ་བསྐྱེད་རིམ་གྱི་དབང་དུ་བྱས་པའི་དཀྱིལ་འཁོར་གྱི་དེ་ཉིད་སྟོན་པ་དང༌། དེ་ཉིད་རྫོགས་པར་སྟོན་པ་དབང་རྫོགས་ནས་བྱེད་པ་གཉིས་མི་འགལ་ལོ། །གཉིས་པ་ལ་གཉིས། དབང་བསྐུར་བ་དངོས་དང༌། དེའི་མཐར་ཕྱག་བྱའོ། །དང་པོ་གཉིས། བུམ་དབང་བསྐུར་བ་དང༌། དབང་གོང་མ་བསྐུར་བའོ། །དང་པོ་ནི། མེ་ཏོག་དོར་བའི་སློབ་མ་དེ་ནི་མེ་ཏོག་གང་ལ་ཕོག་པའི་ལྷ་དེའི་རིགས་ཀྱི་མིང་ཅན་དུ་འགྱུར་བར། སློབ་དཔོན་གྱིས་ནི་མིང་དབང་བསྐུར་བའི་ཚེ་དེའི་མིང་སྟེ་གསང་མཚན་བསྟན་པའི་སྒོ་ནས་མིང་དབང་བསྐུར་རོ། །འདིར་སྡོམ་འབྱུང་ལས། ཆུ་དང་ཅོད་པན་རྡོ་རྗེ་དང༌། །དྲིལ་བུ་མིང་གི་དབང་བསྐུར་ཏེ། །དབང་ལྔ་དེ་བཞིན་གཤེགས་བདག་ཉིད། །བརྟུལ་ཞུགས་ལུང་བསྟན་ཉིད་དང་ནི། །རྗེས་གནང་དབུགས་དབྱུང་ཕྱིར་མི་ལྡོག །སྦྱིན་བྱ་བུམ་པར་ཡང་དག་འགྱུར། ཞེས་བུམ་དབང་ལ་བཅུ་གསུངས་པ་ལ་མིང་དབང་ནི་སྐབས་འདིར་གསུངས་ལ། དྲིལ་བུ་སྒྲ་སྙན་འཁྲོལ་བ་སྒྲ་ཇི་བཞིན་པར་བཤད་པ་ན། སློབ་མས་དྲིལ་བུ་འཁྲོལ་བ་ཡིན་པས་དྲིལ་བུའི་དབང་བསྟན། ལེའུ་གཉིས་པར་བུམ་པ་ལྷག་གནས་གསུངས་པ་ནི། ཆུ་དབང་བསྐུར་བའི་ཆེད་ཡིན་པས་ཆུ་དབང་སྟེ་དབང་གསུམ་བསྟན་ཏོ། ཅོད་པན་དང་རྡོ་རྗེའི་དབང་དང་ཕྱིར་མི་ལྡོག་པའི་དབང་ལ་སོགས་པ་བདུན་ནི་བཤད་རྒྱུད་ནས་ཁ་བསྐང་སྟེ་འདིར་མ་བཤད་པ་རྣམས་དཀྱིལ་ཆོག་ལས་ཤེས་དགོས་སོ། །གཉིས་པ་ནི། བུམ་དབང་བསྐུར་བ་དེ་ནས་སློབ་མ་ལ་གསང་དབང་སྦྱིན་པའི་དོན་དུ་སློབ་དཔོན་ཧེ་རུ་ཀའི་ཏིང་ངེ་
འཛིན་ལ་ལེགས་པར་ནི་མཉམ་པར་བཞག་སྟེ་སློབ་མས་ཕུལ་བའི་རིག་མ་མཚན་ཉིད་དང་ལྡན་པའི་ཕྱག་རྒྱ་རྡོ་རྗེ་ཕག་མོར་བྱས་པ་ལ་སྙོམས་པར་འཇུག་པའི་མཆོད་པ་བྱའོ། །སྙོམས་པར་ཞུགས་པའི་རྗེས་དེ་ནས་སློབ་དཔོན་གྱིས་གསང་དབང་བསྐུར་བའི་ལས་འདི་ཡང་དག་པར་སྤྱད་པར་བྱའོ། །དུས་ནམ་གྱི་ཚེ་སྙམ་ན། ཕྱི་དེ་ཉིན་ཞེས་པ་ནམ་ཕྱེད་ན་དབང་བསྐུར་བ་ལ་བཤད་པ་ནི། འགྲེལ་པ་མང་པོས་ཉི་མ་གཉིས་པ་ལ་བཤད་པས། སྟ་གོན་ལ་ལྟོས་པའི་ཉི་མ་གཉིས་པའི་ནམ་ཕྱེད་ན་བྱ་ཞེས་པའོ། །དེ་ནས་ཞེས་པའི་རྐང་པ་བཞིས་གསང་དབང་བསྟན་པར་གོང་མ་རྣམས་བཞེད་པ་ནི་འགྲེལ་པ་མང་པོ་དང་མཐུན་ནོ། །མཚལ་ཆེན་ནི་ཁྲག་ཆེན་པོ་ཡིན་ལ། ཁྲག་གི་སྐད་དོད་རཀྟ་ནི་ཆགས་པ་ལ་ཡང་འགྲོ་བས་ཡབ་ཡུམ་གྱི་ལུས་ངག་ཡིད་གསུམ་ཆགས་པ་ལས་བྱུང་བ་ཞེས་བཤད་དེ། བླ་མ་ཡབ་ཡུམ་སྙོམས་པར་ཞུགས་པ་ལས་བྱུང་བའི་ཐིག་ལེའོ། །དེ་ལ་འབྲུ་གསུམ་ལན་གསུམ་དུ་བཟླས་པ་ཡིས་སྔགས་པས་སློབ་མ་དེའི་སྙིང་ག་དང་མཛོད་སྤུ་དང་མགྲིན་པ་དང་སྤྱི་གཙུག་རྣམས་སུ་ཐིག་ལེ་བྱའོ་ཞེས་འཆད་དོ། །འགྲེལ་པ་གཞན་གྱིས་ནི་བླ་མ་ཡབ་ཡུམ་སྦྱོར་ཐབས་ཀྱི་སྐབས་སུ་སློབ་མའི་གདོང་བཅིངས་པ་ལ། སྙིང་པོ་དང་ཉེ་སྙིང་དང་ཕྲེང་བའི་སྔགས་བཟླས་པའི་ཐིག་ལེས། སྔར་བཤད་པའི་གནས་བཞི་དང་མིག་གཉིས་དང་ཁ་སྟེ་གནས་བདུན་དུ་གསང་བའི་རྫས་སྟེར་བ་དང༌། སློབ་མས་ཀྱང་ཁར་བྱིན་པ་བདུད་རྩི་བཞིན་དུ་མྱང་བར་བྱའོ། །ཞེས་གསང་དབང་བསྐུར་བའི་དུས་ཉིད་དུ་བྱ་བར་འཆད་དེ། འདི་ནི་
བཤད་པ་སྔ་མ་ལ་ཡང་སྦྱར་ན་ལེགས་སོ། །སློབ་མ་ཡི་ནི་གདོང་ཕྱེ་ལ་ཞེས་པ་འདི་སྔར་དཀྱིལ་འཁོར་བསྟན་པའི་སྐབས་དང༌། གསང་དབང་བསྐུར་བའི་རྗེས་གཉིས་ཀར་འབྲེལ་ལོ། །དེ་ལྟར་གདོང་གཡོགས་ཕྱེ་བའི་འོག་ཏུ་དབང་གསུམ་པ་བསྐུར་བ་ནི་སྔར་བསྟན་ཟིན་ཏོ། །དེ་ཉིད་ཇི་ལྟ་བུ་ཞིག་བསྟན་པས་དབང་བཞི་པ་བསྐུར་བ་ནི་འཆད་པར་འགྱུར་རོ། །དབང་ཐམས་ཅད་རྫོགས་པ་དེ་ནས་བརྟེན་པ་ལྷ་དང་ལྷ་གང་གི་ནི་གནས་རྟེན་གང་ཡིན་པའི་དཀྱིལ་འཁོར་གཉིས་ཀྱི་དེ་ཉིད་རིམ་པ་གཉིས་ཀྱི་དབང་དུ་བྱས་པ་སྟེ། དབང་རྫོགས་པ་དེར་ནི་སྟེ་དེའི་འོག་ཏུ་རྫོགས་པར་བསྟན་ཏོ། །བླ་མ་སྔ་མ་རྣམས་ཀྱིས་ནི་དེ་ནས་དཀྱིལ་འཁོར་ཞེས་པ་རྐང་པ་གསུམ་གྱིས་དབང་གསུམ་པ་བསྐུར་བ་སྟོན་པར་བཞེད་དེ། ཤེས་རབ་མ་སློབ་མའི་ལག་ཏུ་གཏད་ནས་ཕྱག་རྒྱའི་ལུས་ཀྱི་རྩ་རྣམས་རབ་གཏུམ་ལ་སོགས་པར་སྟོན་པའི་ལུས་ཀྱི་དཀྱིལ་འཁོར་དང༌། དེའི་བྷ་གར་གནས་པའི་རྩ་འཚོལ་བ་སྟོན་པ་བྷ་གའི་དཀྱིལ་འཁོར་དང༌། གནས་སྐབས་འདིར་དགའ་བ་བཞི་འདི་སྐྱེ་ཞེས་སྟོན་པའི་བྱང་ཆུབ་སེམས་ཀྱི་དཀྱིལ་འཁོར་སྔོན་དུ་གོ་བར་བྱས་ནས། ཤེས་རབ་ཡེ་ཤེས་ཀྱི་དབང་དངོས་གཞི་བསྐུར་བ་ལ་བཤད་དེ། མན་ངག་གིས་འཆད་པའོ། །གཉིས་པ་ནི། དབང་ཟིན་པ་དེ་ནས་སློབ་དཔོན་དང་བཅས་པའི་ཕོ་བྲང་སྟེ་དཀྱིལ་འཁོར་ལ་རབ་ཏུ་སྟེ་གུས་པ་ཆེན་པོས་བཏུད་ནས། སྔར་དཀྱིལ་འཁོར་ལ་བསྐོར་བ་བྱས་པ་ལས། སླར་བླ་མ་དང་དཀྱིལ་འཁོར་གྱི་གཡོན་ནས་བརྩམས་པ་ཡིས་བསྐོར་བ་བྱའོ། །དེ་བྱས་པ་དེ་ནས་ནི་དཀྱིལ་འཁོར་དང་བླ་མ་ལ་ཕྱག་འཚལ་བའི་ཆོ་ག་སྟེ་བྱ་ཐབས་ཇི་ལྟར་གསུངས་པ་
བཞིན་དུ་ཕྱག་བྱའོ། །གསུམ་པ་ལ་གཉིས། ཡོན་དབུལ་བ་དང༌། ཕུལ་བའི་ཕན་ཡོན་ནོ། །དང་པོ་ནི། དེ་བཞིན་གཤེགས་པས་གསུངས་པ་ནི་རྒྱུད་རྣམས་ལས་གསུངས་པ་ཡིན་ནོ། །གསེར་ནི་བརྒྱ་སྟོང་ནི་གསེར་སྲང་འབུམ་མོ། །ཇི་སྐད་གསུངས་པ་ནི་རྒྱུད་གཞན་ལས་བདག་འབུལ་བར་གསུངས་པ་བཞིན་ནོ། །དངོས་པོ་ཀུན་ནི་སྒོ་གསུམ་གྱི་དངོས་པོ་ཀུན་ནོ། །དེ་བཞིན་ནི་གསེར་སོགས་ཕུལ་བ་དེ་བཞིན་དུ་དབུལ་བའོ། །བདག་འབུལ་ཚུལ་ནི་དེང་ནས་ཞེས་པ་གཉིས་ཀྱིས་བསྟན་ཏེ་ལྷག་མ་ནི་གོ་སླའོ། །གཉིས་པ་ནི། དེ་ལྟར་ཞེས་པ་གཉིས་ལ་ལོ་ཆེན་གྱི་འགྱུར་ལས། དེ་ལྟར་ངེས་པར་བྱ་བ་ནི། སྒྲུབ་པ་པོ་ཡིས་རབ་ངེས་བྱ། །ཞེས་འབྱུང་བ་གསལ་ལོ། །ངེས་པར་བྱ་དགོས་པའི་ཡོན་དབུལ་བ་ནི། སྔར་བཤད་པ་དེ་ལྟར་སྒྲུབ་པ་པོ་ཡིས་ངེས་པར་བྱ་དགོས་པར་རབ་ཏུ་ངེས་པར་བྱའོ། །དེ་ལྟར་བྱས་པ་དེ་ནས་ཏེ་དེའི་རྒྱུ་ལས་སློབ་མ་དེ་ལ་མཁའ་འགྲོ་མ་བཅུ་གཉིས་དང༌། རྣལ་འབྱོར་མ་ཉེར་བཞི་རྣམས་མཉེས་པར་འགྱུར་རོ། །མཉེས་ནས་མཁའ་འགྲོ་མ་དང༌། ལཱ་མ་དང༌། དུར་སྐྱེས་མ་དང༌། གཟུགས་ཅན་མའི་རིགས་ཀྱི་མཁའ་འགྲོ་མ་དེ་རྣམས་དང་སྒྲུབ་པ་པོ་གཉིས་ལྷན་ཅིག་ཏུ་རྣམ་པར་སྤྱོད་ཅིང་ཀུན་ཏུ་འགྲོ་བར་འགྱུར་རོ། །དེ་ལྟར་འགྲོ་བས་སྒྲུབ་པ་པོ་དེའི་ཅི་བགྱི་སྟེ་བཀའ་བསྒོ་བ་ཐམས་ཅད་མཁའ་འགྲོ་མ་དེ་དག་གིས་བྱེད་པར་ཐེ་ཚོམ་མེད་དོ། །དེ་འདྲ་བའི་རྣལ་འབྱོར་འདི་ནི་གྲུབ་པར་གྱུར་ན་འཇིག་རྟེན་གསུམ་དུ་གང་གིས་ཀྱང་མི་བཟློགས་པའི་སྟོབས་དང༌། གཞན་
གྱིས་མི་མཐོང་བའི་མི་སྣང་བ་དང༌། ཕུག་སྟེ་ས་འོག་གི་བུ་གར་རྒྱུ་བའི་ས་འོག་གི་དངོས་གྲུབ་དང༌། ནམ་མཁར་རྒྱུ་བ་སྟེ་མཁའ་སྤྱོད་དང༌། གྲུབ་པའི་སྨན་རྐང་པ་ལ་བྱུགས་པས་གང་འདོད་པའི་གནས་སུ་སླེབ་པའི་རྐང་མགྱོགས་དང༌། དེ་བཞིན་དུ་དངུལ་ཆུ་སོགས་ཀྱི་གྲུབ་པའི་རྫས་འགའ་ཞིག་ཟོས་པས། ཚེ་བསྐལ་པར་ཐུབ་པའི་བཅུད་ཀྱིས་ལེན་རྣམས་སྒྲུབ་པ་པོ་ནི་འདོད་པ་ཙམ་གྱིས་རྟག་པར་རྒྱུན་དུ་སྐྱེད་པར་འགྱུར་རོ། །གཟུགས་ནི་མི་འདྲ་བ་དུ་མའི་སྤྲུལ་པ་བྱེད་པ་དང༌། རྫུ་འཕྲུལ་གྱིས་ནམ་མཁའ་ལ་འགྲོ་བ་དང༌། ཁྱད་པར་དུ་གདུག་པའི་མཁའ་འགྲོ་མ་རྣམས་ཀྱང་ངེས་པར་ཟིལ་གྱིས་གནོན་པར་བྱེད་དོ། །ལོ་ཆེན་གྱི་འགྱུར་ལས། མཁའ་འགྲོ་རྣམས་ཀྱང་ཁྱད་པར་དུ། །ངེས་གནོན་འགྲོ་བ་ཐམས་ཀྱང༌། ཞེས་འབྱུང་ངོ༌། །མཁའ་འགྲོ་མ་རྣམས་སུ་མ་ཟད་འགྲོ་བ་གཞན་རྣམས་ལན་ཅིག་བལྟས་པ་ཙམ་གྱིས་གནོན་པར་བྱེད་དོ། །དེ་འདྲ་བའི་རྣལ་འབྱོར་པས་སྐད་ཅིག་གིས་ནི་ཐབས་ཤེས་རབ་དབྱེར་མེད་པར་སྦྱོར་བ་ཉིད་སྐྱེད་པར་བྱེད་དོ། །བཞི་པ་ནི། གལ་ཏེ་དཀྱིལ་འཁོར་དུ་དབང་བསྐུར་བ་མ་ཐོབ་ཀྱང་ལམ་བསྒོམ་པས་འབྲས་བུ་འགྲུབ་པར་འགྱུར་རམ་སྙམ་ན། སྔགས་པས་དཀྱིལ་འཁོར་མ་མཐོང་བ་སྟེ། དཀྱིལ་འཁོར་དུ་མ་ཞུགས་པ་དང་དེར་དབང་མ་བསྐུར་བར་གང་ཞིག་རྣལ་འབྱོར་པ་ཉིད་དང་དངོས་གྲུབ་འགྲུབ་པར་འདོད་པ་ནི། ནམ་མཁའ་ལ་ཁུ་ཚུར་གྱིས་བརྡེབས་ཀྱང་མི་ཕོག་པ་དང༌། སྨིག་རྒྱུའི་ཆུ་ནི་འཐུང་བར་འདོད་ཀྱང་འཐུང་མི་ནུས་པ་དང་མཚུངས་ཏེ་འབད་པ་དོན་མེད་ཅིང༌། དབང་མ་ཐོབ་པར་ཞུགས་པས་དམྱལ་བར་འགྲོ་བ་
སོགས་ཀྱི་ཉེས་དམིགས་ཤིན་ཏུ་ཆེ་བར་གསུངས་སོ། །འདིས་ནི་དབང་ལེགས་པར་མ་ཐོབ་པར་སྔགས་ཀྱི་ལམ་ལ་འཇུག་པ་དང༌། དབང་ཡང་དཀྱིལ་འཁོར་དུ་ཞུགས་ཏེ་མཐོང་ནས་དབང་རྣམས་རིམ་གྱིས་བསྐུར་བ་མ་བྱས་པར། དབང་གི་ཁྱད་པར་འགའ་ཞིག་བསྐུར་ནས་ལམ་ལ་འཇུག་པ་རྣམས་ངལ་བ་དོན་མེད་པར་བསྟན་ཏོ། །ལྔ་པ་ལ་གཉིས། འདིའི་དབང་བསྐུར་བ་མཆོག་ཏུ་བསྟན་པ་དང༌། དབང་བསྐུར་འདི་རྙེད་དཀའ་བ་ཞར་བྱུང་དང་བཅས་པའོ། །དང་པོ་ནི། བདེ་མཆོག་གི་དཀྱིལ་འཁོར་དུ་དབང་བསྐུར་བའི་རྣལ་འབྱོར་པ་དང༌། རྒྱུད་འདིའི་རྣལ་འབྱོར་འདི་ནི་རིམ་པ་བཞིན་དུ་གཞན་ལས་མཆོག་ཏུ་གྱུར་པས་རབ་ཡིན་ལ། སྦྱོར་བ་སྟེ་རྣལ་འབྱོར་གཞན་གྱི་དམ་པ་སྟེ་མཆོག་གོ། གང་ཅུང་ཟད་ཅིག་ཡིད་ལ་འདོད་པ་དེ་དང་དེར། ལྷ་དང་ལྷ་མིན་དང་མི་རྣམས་ཏེ་འདི་དག་ཟིལ་གྱི་མནན་ནས་འགྲོ་ཞིང༌། ཇི་ལྟར་འདོད་པ་བཞིན་དུ་སྤྱོད་དོ། །ལོ་ཆེན་གྱི་འགྱུར་ལས། གང་ཞིག་ཅུང་ཟད་འདོད་གྱུར་པ། ཞེས་འབྱུང་ངོ༌། །བདེ་མཆོག་གི་རྒྱུད་འདི་རུ་ནི་དབང་བསྐུར་བའི་གང་ཟག་དེ་བྱ་བ་ལ་སོགས་པའི་རྒྱུད་བཞི་པོ་ཐམས་ཅད་ཀྱི་ནི་སྒྲུབ་པ་པོར་གསུངས་ལ། འདིར་དབང་བསྐུར་ན་བལྟས་པ་སྟེ་བྱ་བའི་རྒྱུད་དང༌། རྒོད་པ་སྟེ་སྤྱོད་པའི་རྒྱུད་དང༌། ལག་པ་འཛིན་པའམ་ལག་བཅངས་ཏེ་རྣལ་འབྱོར་གྱི་རྒྱུད་དང༌། གཉིས་གཉིས་འཁྱུད་པ་སྟེ་བླ་མེད་ཀྱི་རྒྱུད་དུ་དབང་བསྐུར་བར་ནི་གྱུར་པ་ཡིན་པས། རྒྱུད་འདི་ནི་རྒྱུད་རྣམས་ཀུན་གྱི་དམ་པ་སྟེ་མཆོག་ཡིན་པས་འདིའི་རྣལ་འབྱོར་པ་ནི་ལྷ་མི་ཐམས་ཅད་
ཟིལ་གྱིས་མནན་ནས་འགྲོ་བ་ཡིན་ནོ། །མལ་གྱི་འགྱུར་ལས། རྒོད་དང་བལྟས་དང་ལག་བཅངས་དང༌། གཉིས་གཉིས་འཁྱུད་པ་ལ་སོགས་པ། ཞེས་འབྱུང་བ་ལྟར་ལེགས་སོ། །ཁ་ཅིག་སོགས་ཀྱི་སྒྲས་ནི་མ་ཡི་ཡང་མ་བླ་ན་མེད་པ་བདེ་མཆོག་གི་རྒྱུད་བསྟན། ཞེས་འདོད་མོད་ཀྱང༌། བདེ་མཆོག་གི་རྒྱུད་ཀྱང་གཉིས་སྤྲོད་ཀྱི་རྒྱུད་ཡིན་པས་དེ་ལས་ལོགས་ན་མེད་དོ། །དེའི་ཕྱིར་སོགས་ཀྱི་སྐད་དོད་མཆོག་ལ་ཡང་འགྲོ་བར་བཤད་པས། གཉིས་སྤྲོད་ཀྱི་རྒྱུད་མཆོག་ཡིན་པའི་དོན་ནོ། །འདིར་དབང་བསྐུར་བ་ཐོབ་ན་རྒྱུད་ཐམས་ཅད་ཀྱི་སྒྲུབ་པ་པོར་གསུངས་པའི་དོན་ནི། །རྒྱུད་ཐམས་ཅད་ཀྱི་མེད་མི་རུང་གི་གཙོ་བོའི་དོན་རྣམས་འདིའི་ལམ་དུ་འདུས་པ་ལ་དགོངས་ལ། འདིར་དབང་བསྐུར་ན་རྒྱུད་བཞི་པོར་དབང་བསྐུར་བར་གསུངས་པ་ནི། གཞན་རྣམས་ཀྱི་དབང་བསྐུར་རྣམས་འདི་ཐོབ་ན་ལོགས་སུ་ཞུ་མི་དགོས་པར་སྟོན་པའི་དོན་མིན་གྱི། ཨ་བྷི་ཥེ་ཀའི་སྒྲ་ལ་ངེས་ཚིག་གིས་བཤད་པ་བྱས་པས། སྡིག་པའི་དྲི་མ་འཁྲུད་པ་དང༌། ནུས་པ་འཇོག་པར་བཤད་པ་རྣམས་འདིའི་དབང་བསྐུར་གྱི་ནང་དུ་འདུས་པར་སྟོན་པ་ཡིན་ནོ། །གཉིས་པ་ནི། རྩ་བའི་རྒྱུད་དེ་ཉིད་བསྡུད་པའམ། བདེ་མཆོག་གམ་ཞེས་པ་ནམ་མཁའ་དང་མཉམ་པའི་རྒྱུད་ལ་འཆད་ཅིང༌། དེ་ཉིད་འདིའི་རྩ་རྒྱུད་རྒྱས་པར་འདོད་པ་ནང་འགལ་ཡིན་ལ། ཀུན་སྤྱོད་ལས། ནམ་མཁའ་དང་ནི་མཉམ་པའི་རྒྱུད། །འབུམ་གཅིག་ན་ཡང་འདི་དག་བཤད། ཅེས་གསུངས་པས་རྒྱུད་དེར་རྒྱུད་འདིའི་དཀྱིལ་འཁོར་མ་བསྟན་པ་མིན་ནོ། །དེས་ན་མར་དོས། སངས་རྒྱས་མཉམ་སྦྱོར་དུ་གྲགས་པ་སྒྱུ་མ་
བདེ་མཆོག་ལ་བཞེད་པ་ལེགས་པ་ཡིན་ནོ། །གསང་བ་ནི་གསང་བ་འདུས་སོ། །རྡོ་རྗེ་འཇིགས་བྱེད་ནི་དེའི་རྒྱུད་ཆེན་པོར་མངོན་པས་དེ་དག་ལས། དཀྱིལ་འཁོར་རྣམས་ཀྱི་རྒྱལ་པོ་འདི་ནི་སྔར་མ་བྱུང་ཞིང་ཕྱིས་འབྱུང་བར་མི་འགྱུར་རོ། །དེ་ལྟར་གསུངས་པས། གཞན་དེ་རྣམས་ཀྱི་དཀྱིལ་འཁོར་ལས་འདིའི་དཀྱིལ་འཁོར་མཆོག་ཡིན་ནོ། །ཞེས་པ་མིན་གྱི། རྒྱུད་ཟབ་ལ་རྒྱས་པ་དེ་དག་ཏུ་ཡང་མ་བྱུང་བས་ཤིན་ཏུ་རྙེད་དཀའོ་ཞེས་པ་དོན་ནོ། །དེ་ལྟ་མ་ཡིན་ན་རྒྱུད་དེ་རྣམས་ཀྱི་དཀྱིལ་འཁོར་ཡང་འདིར་མ་བྱུང་བས་འདི་ལས་མཆོག་ཏུ་འགྱུར་རོ། །རྒྱུད་འདིར་བཤད་པ་དང་འདིར་མ་བཤད་པར་རྒྱུད་གཞན་དུ་བཤད་པའི་དངོས་གྲུབ་གང་ཅི་ཡང་རུང་བ་དེ་ཀུན་ཏེ་ཐམས་ཅད་ནི། དཔལ་ལྡན་ཁྲག་འཐུང་སྟེ་ཧེ་རུ་ཀའི་རིམ་གཉིས་ཀྱི་རྣལ་འབྱོར་འདི་ལ་གནས་སྟེ། འདི་ལ་བརྟེན་ནས་འགྲུབ་པའོ། །སྔ་མ་རྣམས་ཀྱིས་དབང་གི་ཆེ་བ་དང༌། འདིས་དབང་དེ་ཐོབ་ནས་སྒོམ་པའི་ལམ་གྱི་ཆེ་བ་བསྟན་ཏོ། །དྲུག་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། བླ་མ་ལ་ཡོན་དབུལ་བ་དང་བཅས་པའི་དབང་བསྐུར་བའི་ཆོ་གའི་ལེའུ་སྟེ་གསུམ་པའོ། །འགྱུར་ཁ་ཅིག་ལས་ཕན་ཡོན་དང་བཅས་པ་ཞེས་དང༌། གཞན་ལས་ཡོན་ཏན་དང་བཅས་པ་ཞེས་ཀྱང་འབྱུང་ངོ༌། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་གསུམ་པའི་བཤད་པའོ།། ༈ །།གཉིས་པ་སྣོད་དུ་
རུང་བ་ལ་གསང་བ་རྒྱས་པར་བཤད་པ་ལ་བཅུ་གཅིག །ལམ་གྱི་གསང་བ་རྒྱས་པར་བཤད་པ་དང༌། སྔགས་དང་བསམ་གཏན་གྱིས་འགྲུབ་པ་རྒྱས་པར་བཤད་པ། རིགས་ལྡན་མ་མཆོད་པ་རྒྱས་པར་བཤད་པ། རྩ་སྔགས་བསྟན་ཅིང་བསྲུང་བའི་དམ་ཚིག་རྒྱས་པར་བཤད་པ། སྤྲོས་བཅས་ཀྱི་སྤྱོད་པ་རྒྱས་པར་བཤད་པ། བར་ཆད་སེལ་བའི་བསྲུང་བའི་སྔགས་བཏུ་བ། བཟའ་བའི་དམ་ཚིག་རྒྱས་པར་བཤད་པ། མཆོག་པ་བཞིའི་གསང་བ་རྒྱས་པར་བཤད་པ། སྤྱོད་པ་ལྷག་མ་གཉིས་རྒྱས་པར་བཤད་པ། དངོས་གྲུབ་འགྲུབ་པའི་མཚན་མ་བརྟག་པ། ཐུན་མོང་གི་དངོས་གྲུབ་སྒྲུབ་པའི་ཚུལ་གཞན་བསྟན་པའོ། །དང་པོ་ནི། བཤད་རྒྱུད་ལས། ཇི་ལྟར་ཉེ་བར་བསྟན་པ་བཞིན། ཕྱི་ནས་དམ་ཚིག་སྤྱོད་པར་བརྩོན། སྣོད་དུ་བྱས་པའི་རྒྱུན་ལས་ནི། །འཁོར་ལོ་ལ་སོགས་སྒོམ་རིམ་གྱིས། །ཡང་དག་མན་ངག་ཕུན་ཚོགས་རྣམས། །འགྲུབ་པར་འགྱུར་རོ་གཞན་དུ་མིན། ཞེས་དབང་གི་དུས་སུ་ཁས་བླངས་པ་བཞིན་དུ། ཕྱི་ནས་དམ་ཚིག་བསྲུང་བ་ལ་བརྩོན་པ། སྣོད་རུང་དུ་བྱས་པ་དེས་དཀྱིལ་འཁོར་གྱི་འཁོར་ལོ་སོགས་སྒོམ་པའི་རིམ་པས། ཡང་དག་མན་ངག་རྣམས་འགྲུབ་པར་འགྱུར་རོ། །དེ་ལྟར་མ་བྱས་ན་མི་འགྲུབ་པར་གསུངས་པས། དབང་ཐོབ་པ་དེས་ཐོག་མར་དམ་ཚིག་རྣམས་ཤེས་པར་བྱས་ལ་ལེགས་པར་བསྲུང་ངོ༌། །དེ་ནས་རིམ་གཉིས་ཀྱི་ལམ་བསྒོམ་དགོས་ལ། དེ་ཡང་ལེའུ་འདིར་རིམ་གཉིས་ཀྱི་དེ་ཉིད་བཞི་ཚན་གཉིས་ཀྱིས་སྟོན་ནོ། །འདི་ལ་གསུམ། བསྐྱེད་རིམ་
པའི་དེ་ཉིད་བཞི་དང༌། རྫོགས་རིམ་པའི་དེ་ཉིད་བཞི་དང༌། ལེའུའི་མཚན་བསྟན་པའོ། །དང་པོ་ནི། ལེའུ་གསུམ་པ་བཤད་པའི་རྗེས་དེ་ནས་བཞི་པ་བཤད་པར་བྱའོ། །ཞེས་སྦྱར་རོ། །མཁའ་འགྲོ་མ་རྣམས་ནི་རང་གི་གནས་སྤྱིར་གཞལ་ཡས་ཁང་དང༌། ཁྱད་པར་དུ་འཁོར་ལོ་གསུམ་ན་རྣམ་པར་འགྱིང་བ་སྟེ་རོལ་ལོ་ཞེས་པས་རྟེན་དཀྱིལ་འཁོར་གྱི་དེ་ཉིད་སྟོན་ཏེ། ཕྱི་དཀྱིལ་དང་ལུས་དཀྱིལ་གཉིས་ཀ་གཟུང་ངོ༌། །ལེའུ་གཉིས་པར་དཀྱིལ་འཁོར་གྱི་མཚན་ཉིད་གསལ་བར་བསྟན་པས་འདིར་གནས་ན་ཞེས་བསྡུས་ཏེ་གསུངས་སོ། །བརྩོན་ཆེན་ཞེས་སོགས་ནི། ཀུན་སྤྱོད་ལས། ལྷ་རྣམས་བཟློག་སྟེ་བཀོད་པ་དང༌། སྔགས་ཀྱི་དབྱེ་བ་བཟློག་པ་དང༌། སྒོམ་པ་གསང་བ་བཟློས་པ་ནི། །སྙིང་པོ་ཐམས་ཅད་རབ་སྒྲུབ་བྱེད། ཅེས་གསུངས་པ་ལྟར་ལྷ་རྣམས་གོ་རིམ་བཟློག་པར་མ་ཟད་སྔགས་རྣམས་བཟློག་པ་དང༌། སྒོམ་པ་གསང་བའི་གོ་རིམ་ཀྱང་བཟློག་ནས་གསུངས་ལ། དེའི་དགོས་པ་ནི་བླ་མའི་མན་ངག་ལ་རག་ལས་པར་བསྟན་པའི་ཆེད་དུ་ཡིན་ནོ། །འཁྲུགས་བསྡེབས་ཏེ་བཤད་ན། རབ་གཏུམ་མ་སྔོན་ལ་དང༌། བརྩོན་ཆེན་མ་རྗེས་སུ་འོང་ངོ༌། །དེ་ལྟར་ན་རབ་གཏུམ་མ་དང༌། གཏུམ་མིག་མ་དང༌། འོད་ལྡན་མ་དང༌། སྣ་ཆེན་མ་བཞི་ནི་ཐུགས་འཁོར་གྱི་ཤར་ནས་བརྩམས་ཏེ་གཡོན་སྐོར་གྱིས་ཕྱོགས་བཞིར་དགོད་དོ། །དེ་བཞིན་དུ་དཔའ་བོའི་བློ་གྲོས་མ་དང༌། མིའུ་ཐུང་མ་དང༌། ལང་ཀའི་དབང་ཕྱུག་མ་དང༌། ཤིང་གྲིབ་མ་བཞི་ནི་ཐུགས་འཁོར་གྱི་མེ་ནས་
བརྩམས་ཏེ་གཡས་སྐོར་གྱིས་མཚམས་བཞིར་དགོད་དོ། །ས་སྲུང་མ་དང༌། འཇིགས་བྱེད་ཆེན་མོ་དང༌། རླུང་ཤུགས་མ་དང༌། ཆང་འཐུང་མ་བཞི་ནི་གསུང་འཁོར་གྱི་ཤར་ནས་བརྩམས་ཏེ་གཡོན་སྐོར་གྱིས་ཕྱོགས་བཞི་དང༌། ཤྱེ་མ་ཞེས་པ་སྔོ་བསངས་དང༌། ལྗང་གུ་གཉིས་ཀར་ལ་འཇུག་པས་སྔོ་བསངས་ལྷ་མོའམ་ལྗང་ལྷ་མོ་དང༌། རབ་ཏུ་སྟེ་ཤིན་ཏུ་བཟང་མོ་དང༌། རྟ་རྣ་མ་དང༌། མཁའ་འགྲོ་གདོང་མའམ་བྱ་གདོང་མ་བཞི་ནི་གསུང་འཁོར་གྱི་མེ་ནས་བརྩམས་ཏེ་གཡས་སྐོར་གྱི་མཚམས་བཞིར་དགོད་དོ། །འཁོར་ལོའི་ཤུགས་མ་དང༌། དུམ་སྐྱེས་མ་དང༌། སྣ་ཆེན་མ་སྟེ་གླང་སྣ་མའམ་ཆང་འཚོང་མ་དང༌། འཁོར་ལོའི་གོ་ཆ་མ་བཞི་ནི་སྐུ་འཁོར་གྱི་ཤར་ནས་བརྩམས་ཏེ་གཡོན་སྐོར་གྱིས་ཕྱོགས་བཞི་དང༌། རབ་སྟེ་ཤིན་ཏུ་དཔའ་མོ་དང༌། སྟོབས་ཆེན་མ་དང༌། འཁོར་ལོ་སྒྱུར་མ་དང༌། བརྩོན་འགྲུས་ཆེན་མོ་བཞི་ནི་མེ་ནས་བརྩམས་ཏེ་གཡས་སྐོར་གྱིས་སྐུ་འཁོར་གྱི་མཚམས་བཞིར་དགོད་དོ། །སྒྲུབ་བྱེད་ཡིན་ཞེས་པ་རྒྱ་དཔེ་ལ་མེད་ཟེར་བ་ནི་རྒྱ་དཔེ་གཅིག་ལ་མ་མཐོང་བས་རྒྱ་དཔེ་ལ་མེད་པ་མིན་ལ། ལོ་ཙཱ་བ་གསུམ་གྱི་འགྱུར་ལ་ཡང་དེ་ལྟར་འབྱུང་ངོ༌། །དེས་ན་མཁའ་འགྲོ་མ་དེ་རྣམས་ནི་སྒྲུབ་པ་པོའི་དངོས་གྲུབ་སྒྲུབ་པར་བྱེད་པ་ཡིན་ཞེས་པའོ། །སྐབས་འདིར་མལ་གྱི་འགྱུར་ལས། སྐུ་གསུང་ཐུགས་ཀྱི་དབུས་སུ་ནི། །ཇི་ལྟར་ཕྱི་རོལ་ནང་དེ་བཞིན། ཞེས་པ་ཅིག་འབྱུང་ལ། མར་དོའི་འགྱུར་གྱི་དཔེ་ཁ་ཅིག་ལ་ཡང་འབྱུང་ཞིང༌། ལྭ་བ་པ་སོགས་ཀྱི་འགྲེལ་པ་ལས་ཀྱང་འབྱུང་བས་དེ་ཡོད་པ་ལེགས་སོ། །དེ་ལྟར་ན་རབ་གཏུམ་མ་ལ་སོགས་པ་རྣམས་
ཇི་ལྟར་ཕྱི་རོལ་གྱི་དཀྱིལ་འཁོར་གྱི་སྐུ་གསུང་ཐུགས་ཀྱི་འཁོར་ལོའི་རྩིབས་ཀྱི་དབུས་སུ་འགོད་པ་དེ་བཞིན་དུ། ནང་ལུས་དཀྱིལ་ལ་ཡང་སྤྱི་བོ་ནས་པུས་མོའི་བར་ཉེར་བཞིར་དགོད་པར་བྱའོ། །ཞེས་ལུས་དཀྱིལ་བསྟན་ཏོ། །ལེའུ་འདིའི་མཚན་ལ་དཔའ་བོ་དང་རྣལ་འབྱོར་མ་གཉིས་སུ་མེད་པར་དགོད་པ་ཞེས་གསུངས་ཤིང༌། ལྭ་བ་པས་ཀྱང་ལུས་དཀྱིལ་ལ་དཔའ་བོ་དང་དཔའ་མོ་གཉིས་ཀ་དགོད་པར་གསུངས་ལ། དེ་ནི་ཕྱི་དཀྱིལ་ལ་ཡང་འདྲ་བས། དེ་དག་གིས་མཚོན་ནས་ལྷ་ལྷག་མ་རྣམས་ཀྱང་ཤེས་པར་བྱའོ། །མཁའ་འགྲོ་མ་ཉི་ཤུ་རྩ་བཞི་པོ་འདི་དག་ནི་སྔོན་ཉིད་གྲུབ་པ་ཡིན་ཞེས་པ་ནི་ཉེར་བཞི་གཙོ་བར་བྱས་པས་ནི། རི་རབ་ཀྱི་རྡུལ་གྱི་གྲངས་སྙེད་རྣམས་གཟུང་སྟེ། ཉེར་བཞིས་དེ་རྣམས་བསྡུས་སོ་ཞེས་ལྭ་བ་པས་བཤད་དེ། སྔོན་ཉིད་དེ་ཐོག་མར་གྲུབ་པའི་གཙོ་མོ་རྣམས་བཤད་ཅེས་པའི་དོན་ནོ། །ལྷའི་དེ་ཉིད་བསྟན་ནས་སྔགས་ཀྱི་དེ་ཉིད་ནི། ལྷ་དྲུག་ཅུ་པོ་རང་རང་གི་མིང་དབུས་སུ་བརྗོད་པའི་སྔགས་ལ་ནི། སྔགས་ཐམས་ཅད་གསལ་བ་སྟེ་མཛེས་པར་བྱེད་པའི་ཨོཾ་ནི་ཐོག་མ་དང༌། མཐར་ནི་ཧུཾ་ཧཱུྃ་ཕཊ་དང་སྦྱར་བར་བྱ། སྟེ། དཔེར་ན་ཨོཾ་ཌཱ་ཀི་ནི་ཡེ་ཧུཾ་ཧཱུཾ་ཕཊ་ཅེས་སོགས་དང༌། ཨོཾ་ཀ་ར་ཀ་ར་ཁཎྜ་ཀ་པཱ་ལ་པྲ་ཙཎྜི་ཧཱུཾ་ཧཱུཾ་ཕཊ། ཅེས་སོགས་དང༌། ཨོཾ་ཀ་ཀ་སྱེ་ཧུཾ་ཧཱུཾ་ཕཊ་ཅེས་སོགས་སོ། །ཧེ་རུ་ཀའི་དཀྱིལ་འཁོར་སྒོམ་པ་དང༌། དེའི་ཐུགས་རྒྱུད་བསྐུལ་བའི་སྔགས་བཟླས་པ་རབ་སྟེ་ཤིན་ཏུ་མཆོག་ཏུ་གྱུར་པ་འདི་མཐོང་ན། འདི་ནི་མེ་དང་འདྲ་ལ་གཞན་དག་སྟེ་རྒྱུད་སྡེ་གཞན་གསུམ་གྱི་ལྷ་
སྒོམ་པ་དང༌། སྔགས་ཟློ་བ་ནི་འབུས་སྙིང་པོ་ཟོས་པའི་རྩྭ་དང་མཚུངས་པ་སྟེ་སྟོབས་ཆུང་བའི་དོན་ནོ། །ལོ་ཆེན་གྱི་འགྱུར་ལས་གཞན་དག་སྙིང་པོ་མེད་རྩྭ་མཚུངས། ཞེས་འབྱུང་ངོ༌། །དེའི་རྒྱུ་མཚན་ནི། འདིའི་རྣལ་འབྱོར་གྱིས་མངོན་པར་འདོད་པའི་དངོས་གྲུབ་ཐམས་ཅད་སྩོལ་བར་བྱེད་པའི་ཕྱིར་རོ། །ཡེ་ཤེས་ཀྱི་དེ་ཁོ་ན་ཉིད་ནི། སྔར་དཔའ་མོ་ཉེར་བཞི་བཤད་པ་དེ་ཁོ་ནའམ་སྙམ་ན། དཔའ་བོ་ཉིད་དུ་འགྱུར་བ་གྲུབ་པ་སྟེ་རྫོགས་པར་བྱའོ། །འདི་ལྷའི་དེ་ཉིད་ཀྱི་སྐབས་སུ་འབྲེལ་ལོ། །ཁྱིམ་དུ་ནི་ཕྱག་རྒྱའི་པདྨའི་ནང་ཡིན་ལ། དཀྱིལ་འཁོར་མཐོང་བ་ནི་སྙོམས་འཇུག་གི་དུས་སུ་དེའི་བདེ་བས་དཀྱིལ་འཁོར་མཆོད་པ་ལ་འཆད་དེ། དེའི་དུས་སུ་བྱང་ཆུབ་སེམས་ཀྱི་དཀྱིལ་འཁོར་མཐོང་བ་ལ་བྱས་ན་ལེགས་སོ། །ཚུལ་དེ་ཤེས་ནས་རྟག་ཏུ་བསྒོམ་པར་བྱའོ། །དེ་ལྟར་བསྒོམས་ན་དངོས་གྲུབ་རྣམས་དེ་བཞིན་གཤེགས་པས་གསུངས་པ་བཞིན་དུ་འཐོབ་བོ། །དེ་ལྟར་བསྐྱེད་རིམ་པའི་དེ་ཉིད་བཞི་ལ་སྦྱར་ཏེ་བཤད་པས་ནི། འབྱུང་བཞི་རི་རབ་གཞལ་ཡས་ཁང་དང་བཅས་པ་བསྒོམས་པའི་ནང་དུ་ཕྱི་དཀྱིལ་གྱི་ལྷ་རྣམས་དང༌། ནང་ལུས་དཀྱིལ་གྱི་ལྷ་རྣམས་སྒོམ་པ་དང༌། དེ་ལྟར་བསྒོམས་པའི་ཕྱི་ནང་གི་ལྷའི་ཐུགས་རྒྱུད་བསྐུལ་བའི་བཟླས་པ་བྱེད་པ་དང༌། ཡབ་ཡུམ་སྙོམས་པར་ཞུགས་ཏེ་བསྐྱེད་རིམ་པའི་བདེ་ཆེན་བསྐྱེད་ནས་སྒོམ་པ་བསྟན་ཏེ། བསྐྱེད་རིམ་གྱི་གནད་ཚང་བ་སྟོན་ནོ། །གཉིས་པ་ནི། ཡང་གཞུང་དེ་རྣམས་རྫོགས་རིམ་གྱི་དེ་ཉིད་བཞི་ལ་སྦྱར་ཏེ་བཤད་པ་ལ། རྟེན་གྱི་དཀྱིལ་འཁོར་གྱི་དེ་ཉིད་ནི། འབྱུང་བཞི་རི་རབ་གཞལ་
ཡས་ཁང་དང་བཅས་པ་ནང་ལུས་ལ་སྦྱར་ལ། བསྐྱེད་རིམ་གྱི་ལུས་དཀྱིལ་སྒོམ་པའི་དབང་དུ་བྱས་པ་འདིར་མིན་ཞིང༌། ལུས་ལ་གནད་དུ་བསྣུན་པའི་ཐབས་ཀྱིས་གང་ལ་གནད་དུ་བསྣུན་པའི་རྡོ་རྗེའི་ལུས་འཆད་པ་རྫོགས་རིམ་གྱི་དབང་དུ་བྱས་པ་ལེའུ་དང་པོར་བཤད་པ་བཞིན་ནོ། །བརྟེན་པ་ལྷའི་དེ་ཉིད་ནི། ནང་གི་རབ་གཏུམ་མ་སྤྱི་བོའི་རྩ་ལ་སྦྱོར་བ་སོགས་ལུས་ཀྱི་རྩ་རྣམས་ལ་སྦྱོར་བ་ནི་མི་འཐད་དེ། བསྐྱེད་རིམ་པའི་ལུས་དཀྱིལ་གྱི་སྐབས་སུ་ཡང༌། རྩ་དེ་རྣམས་ལས་ལྷ་བསྐྱེད་དགོས་པས་རྩ་ལ་སྦྱོར་བ་བསྐྱེད་རིམ་ལ་ཡང་ཡོད་པའི་ཕྱིར་རོ། །དེས་ན་ལྷ་སོ་བདུན་ཞལ་ཕྱག་གི་རྣམ་པ་ཅན་འདི་ལ་བསྐྱེད་རིམ་པའི་སྔགས་ཀྱི་སྐུ་དང༌། རྫོགས་རིམ་པའི་ཡེ་ཤེས་ཀྱི་སྐུ་གཉིས་ཡོད་པའི་གཉིས་པ་ནི། སྒྱུ་མའི་སྐུ་ཞེས་བཤད་པ་དེ་ཡིན་ཏེ། དེ་དང་བྲལ་ན་རྣལ་འབྱོར་པ་སྤུན་ཀོགས་བཞིན་དུ་སྙིང་པོ་མེད་པར་མཁའ་འགྲོ་རྒྱ་མཚོ་ལས་གསུངས་པ་སྔར་བཤད་ཟིན་ཏོ། །ཇོ་བོ་ཆེན་པོའི་ལཱུ་ཨི་པའི་འགྲེལ་པ་ལས་ཀྱང༌། འོན་ཀྱང་ཀུན་རྫོབ་ཏུ་རླུང་དང་སེམས་ཙམ་ལས་ལྷ་སུམ་ཅུ་རྩ་བདུན་མེ་ལོང་གི་གཟུགས་བརྙན་ལྟར་གསལ་ལ་རྫོགས་པ། འཇའ་ཚོན་ལྟར་ཁ་དོག་དང་བཅས་པ། ཆུ་ཟླ་ལྟར་སྒྲོ་སྐུར་དང་བྲལ་བར་ལྟོས་ཤིག །དེ་ནི་རྒྱུ་དང་རྐྱེན་ལས་སྐྱེ་བས་ཀུན་རྫོབ་བོ། ཞེས་བདེ་མཆོག་གི་ལུགས་ལ་ཡང་སྒྱུ་མའི་སྐུའི་དཀྱིལ་འཁོར་ཤིན་ཏུ་གསལ་བར་བསྟན་ནོ། །སྔགས་ཀྱི་དེ་ཉིད་ནི། སྔགས་བཟླས་པའི་ངེས་དོན་རྡོར་བཟླས་སོགས་ལུས་ལ་གནད་དུ་བསྣུན་པའི་རྫོགས་རིམ་
མོ། །ཡེ་ཤེས་ཀྱི་དེ་ཉིད་ནི། རྡོར་བཟླས་སོགས་ནང་གི་ཐབས་དང༌། ཁྱིམ་དུ་ཞེས་པའི་ཕྱིའི་ཐབས་ལ་བརྟེན་ནས་སྲོག་དབུ་མར་ཞུགས་གནས་ཐིམ་གསུམ་བྱས་པ་ལས་བྱུང་བའི་ལྷན་སྐྱེས་ཀྱི་བདེ་ཆེན། དེ་ཁོ་ན་ཉིད་ཀྱི་དོན་ལ་དབྱེར་མེད་པར་ཞུགས་པའི་འོད་གསལ་གྱི་ཡེ་ཤེས་སོ། །དེ་ལྟར་དེ་ཉིད་བཞི་རྫོགས་རིམ་ལ་སྦྱར་ཏེ་བཤད་པའི་དང་པོས་ནི། གནད་དུ་བསྣུན་སའི་རྡོ་རྗེའི་ལུས་དང༌། གསུམ་པས་ནི་དེར་གནད་དུ་བསྣུན་པའི་ཐབས་དང༌། བཞི་པས་ནི་ཐབས་གཉིས་ཀྱིས་དྲངས་པའི་ལྷན་ཅིག་སྐྱེས་དགའི་ཡེ་ཤེས་དང༌། གཉིས་པས་ནི་ལྷན་ཅིག་སྐྱེས་དགའ་འོད་གསལ་གྱི་རླུང་སེམས་ཙམ་ལས་སྐྱེས་པའི་ཡེ་ཤེས་ཀྱི་སྐུ་སྒྱུ་མའི་ལུས་བསྟན་པས་རྫོགས་རིམ་གྱི་གནད་ཀུན་སྟོན་ནོ། །དེ་ལྟར་ཡེ་ཤེས་ཀྱི་དེ་ཉིད་དང་ལྷའི་དེ་ཉིད་གཉིས་དབྱེར་མི་ཕྱེད་པའི་དོན་འདི་དབང་བཞི་པ་བསྐུར་བའི་དུས་སུ། ཚིག་གིས་ལེགས་པར་བརྡ་སྤྲད་པ་ལ་བརྟེན་ནས་ཚིག་དབང་རིན་པོ་ཆེ་འཐོབ་བོ། །ལྭ་བའི་ན་བཟའ་ཅན་གྱིས། དབང་བསྐུར་བ་བཞི་པ་བླ་མའི་ཞལ་ལས་ཤེས་པར་བྱ་བ་ནི། འདི་སྐད་དུ། དེ་ཉིད་མ་ལུས་པའི་དོན་ཕུན་སུམ་ཚོགས་པར་བྱེད་པ་རྟོག་པའི་རྙོག་པ་དང་བྲལ་བ་ཉིད་ཀྱིས། བླ་ན་མེད་པ་ཡང་དག་པར་རིག་པ་དང་ཐ་མི་དད་པ། ཐུབ་པའི་ཚོགས་དཔག་ཏུ་མེད་པའི་འོད་ཟེར་འཕྲོ་བའི་དཀྱིལ་འཁོར་གྱི་བདག་ཉིད། ཡིད་བཞིན་གྱི་ནོར་བུ་ལྟ་བུ་བསྟན་པའི་ངོ་བོ་ཉིད་ཀྱི་ཚིག་གི་སྦྱིན་པར་བྱའོ། ཞེས་གསུངས་པ་གང་ཡིན་པ་སྟེ། ཞེས་ངོས་གཟུང་བ་ཡང་སྔར་བཤད་པ་དང་འདྲ་སྟེ། རྟོག་པའི་རྙོག་པ་དང་བྲལ་བས་ཡང་དག་
པར་རིག་པ་དང་ཐ་མི་དད་པ་ནི་འོད་གསལ་གྱི་ཡེ་ཤེས་ཡིན་ལ། འོད་ཟེར་འཕྲོ་བའི་དཀྱིལ་འཁོར་གྱི་བདག་ཉིད་ནི་སྔར་བཤད་པའི་སྒྱུ་མའི་སྐུའི་དཀྱིལ་འཁོར་རོ། །ཇོ་བོ་ཆེན་པོའི་ལཱུ་ཨི་པའི་འགྲེལ་པ་ལས་ཀྱང༌། དེ་ལྟར་བདེན་པ་གཉིས་མི་ཕྱེད་པ་ཟུང་དུ་འཇུག་པ་ནི། བྱང་ཆུབ་ཀྱི་སེམས་ཆེན་པོ་སྟེ་བཞི་པའོ། ཞེས་དོན་གྱི་དབང་བཞི་པ་ཟུང་འཇུག་ལ་གསལ་བར་གསུངས་སོ། །དེ་ལྟར་ན་དོན་གྱི་དབང་བཞི་པ་ཟུང་འཇུག་ལ་ངོ་སྤྲོད་པ་ན་ལུགས་འདི་ལ་ཡང་གནད་ཤིན་ཏུ་ཆེའོ། ། དེ་ཉིད་བཞི་ཚན་གཉིས་ལ་སྦྱར་ཏེ་འཆད་པ་འདི་ནི་ལོ་ཙཱ་བ་གཉིས་ཀྱི་བཤད་སྲོལ་ལ་བརྟེན་ནས་བཤད་པའོ། །རྩ་རྒྱུད་ཀྱི་ལེའུ་དང་པོའི་དོན་བཤད་རྒྱུད་ཀྱིས་བཤད་པ་ལས། འདི་རྒྱས་པ་མིན་ཡང་རྩ་རྒྱུད་ཉིད་ལ་ལྟོས་ན། ལེའུ་འདིས་དེ་ནས་གསང་བ་ཞེས་པ་ནས། མཉན་པར་གྱིས་ཞེས་པའི་བར་གྱི་དོན་རྒྱས་པར་བཤད་དོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། ཕྱི་དང་ལུས་ཀྱི་དཀྱིལ་འཁོར་ལ་དཔའ་བོ་དང་རྣལ་འབྱོར་མ་གཉིས་སུ་མེད་པར་དགོད་པའི་ལེའུ་སྟེ་བཞི་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་བཞི་པའི་བཤད་པའོ།། ༈ །།གཉིས་པ་སྔགས་དང་བསམ་གཏན་གྱིས་འགྲུབ་པ་རྒྱས་པར་བཤད་པ་ལ་གཉིས། བཟླས་པའི་སྔགས་བཏུ་བ་དང༌། སྔགས་བཟླས་པས་དངོས་གྲུབ་སྒྲུབ་ཚུལ་ལོ། །དང་པོ་ལ་བཞི།
རྩ་བའི་སྔགས་ཀྱི་ཡི་གེ་བཏུ་བ་དང༌། དཔའ་བོའི་གོ་ཆའི་སྔགས་བཏུ་བ། རྩ་བའི་སྔགས་ཀྱི་དབྱངས་ཡིག་བཏུ་བ། གོ་བཟློག་པའི་སྙིང་པོ་དང་དཔའ་མོའི་གོ་ཆའི་སྔགས་བཏུ་བའོ། །དང་པོ་ལ་གཉིས། གཞུང་དངོས་དང༌། ལེའུའི་མཚན་ནོ། །དང་པོ་ལ་གསུམ། སྔགས་བཏུ་བའི་གཞི་དགོད་པ། དེ་ལས་སྔགས་བཏུ་བ། བཏུས་པའི་སྔགས་ཀྱི་ཆེ་བ་བསྟན་པའོ། །དང་པོ་ལ་གཉིས། དྲང་དོན་དུ་བཤད་པ་དང༌། ངེས་དོན་དུ་བཤད་པའོ། །དང་པོ་ནི། ལེའུ་བཞི་པའི་རྗེས་དེ་ནས་ཞེས་སྦྱར་རོ། །སྟོབས་བཅུ་ལ་སོགས་པའི་ཆོས་ཀུན་འབྱུང་བ་ཡི་ཆོས་འབྱུང་རྣམ་ཐར་སྒོ་གསུམ་མོ་མཚོན་པའི་གྲུ་གསུམ་པ་བྱའོ། །དེ་ནི་སྣ་ཚོགས་པའི་སྣོད་བཅུད་ཀྱི་བདག་ཉིད་དོ། རྣམ་ཐར་གསུམ་གྱི་སྟོང་པ་དེ་ཐམས་ཅད་ཀྱི་ངོ་བོར་གནས་པའོ། །ལྟེ་བར་ནི་ཆོས་འབྱུང་གི་དབུས་སོ། །མི་ཤིགས་པ་ནི་མི་ཕྱེད་པའི་རྡོ་རྗེ་དང༌། དགེ་བ་འཛིན་པས་དགེ་བ་སྟེ་རྡོ་རྗེ་འཛིན་པའོ། །སྔགས་པས་ཆོ་ག་བཞིན་དུ་བྲི་བ་ནི་རྡོ་རྗེ་འཛིན་པའི་བདག་ཉིད་ཀྱི་ཡི་གེ་རྣམས་སོ། །དེའི་ཕྱིར་ངག་ཏུ་བརྗོད་པའི་ཆོས་ཀུན་གཅིག་ཏུ་བསྡུ་བར་བྱས་པ་བྲི་བར་བྱ་ཞེས་སྦྱར་རོ། །ཆོས་འབྱུང་འདིར་བྲི་བར་བྱ་བའི་སྔགས་ཀྱི་ཚིག་ནི་འདི་ཡིན་ཏེ། ཨཱ་ལི་དང་ཀཱ་ལི་མཉམ་པར་བྱས་པ་སྟེ་རྫོགས་པར་བྱས་པའི་སྡེ་ཚན་དག་ནི་བསྡུ་བ་སྟེ་ཚོགས་པར་བྱའོ། །མཉམ་པའི་དོན་ཚང་བ་དང་རྫོགས་པ་ལ་བཤད་པ་ནི། དེའི་སྐད་དོད་ཀྱི་སྟེང་ནས་ཡིན་ནོ། །སྡེ་ཚན་དུར་བྱེད་པ་ནི། བཞི་དང་བཞི་རུ་ཤེས་པར་བྱ་ཞེས་ཨཱ་ལིའི་སྡེ་ཚན་གཅིག་དང༌། ཀཱ་ལི་ལ་སྡེ་ཚན་ཀ། ཙ། ཊ། ཏ། པ་ལྔ་དང༌།
མཐར་གནས་དང་དྲོ་བའི་སྡེ་ཚན་བདུན་ཏེ་བརྒྱད་དོ། །འགྲེལ་པ་འགའ་ཞིག་ལས། བཞི་གཉིས་བརྒྱད་ནི་རྐང་བརྒྱད་ལ་འཆད་དོ། །ཐུབ་པ་མཆོག་གི་ཐུབ་པ་ནི་གྲངས་བདུན་གྱི་མིང་ཡིན་པས་གསལ་བྱེད་ཀྱི་སྡེ་ཚན་བདུན་དགོད་ཅིང༌། དེ་ལས་རྩ་སྔགས་ཀྱི་ལུས་བཏུས་ལ་ཕྱིས་ནི་དབྱངས་ཡིག་དེའི་ཁྱད་པར་དུ་སྦྱར་ཏེ། འདི་ནི་སྔོན་དུ་གསལ་བྱེད་ལས་ཐུ་བའི་ལུགས་སོ། །ཆོས་འབྱུང་གི་དབུས་སུ་པདྨ་བྱེད་པ་འདིར་མི་གསལ་ཡང༌། ཁ་སྦྱོར་ལས། གྲུ་གསུམ་དཀྱིལ་འཁོར་ཉམས་དགའ་བར། གསང་བའི་པད་མ་མཱ་མ་ཀཱི། །པདྨ་འདབ་མ་བརྒྱད་བྱས་ནས། །ལྟེ་བ་སྦས་པའི་སྤྱོད་ཡུལ་དུ། །འདོད་པའི་དོན་ཀུན་སྒྲུབ་བྱེད་པ། །དེར་གནས་དཔའ་བོ་ཀུན་ལས་བཏུ། ཞེས་ཆོས་འབྱུང་གི་ནང་དུ་པདྨ་འདབ་མ་བརྒྱད་པ་བྱེད་པར་བཤད་པ་ལྟར་འདིར་ཡང་བྱའོ། །དེ་ལ་ཡི་གེ་དགོད་ལུགས་ལ་མལ་གྱི་ལུགས་འཛིན་པ་དག །ཤར་གྱི་འདབ་མ་ནས་ཨ་ཀ་ཙ་ཊ་ཏ་པ་ལ་ཤའི་སྡེ་ཚན་བརྒྱད་གཡས་སྐོར་དང༌། དབུས་སུ་ཨ་འགོད་པར་འདོད་པ་ཁ་སྦྱོར་དང་མཐུན་ནོ། །མར་དོས་པདྨ་མི་བྱེད་པར་ཆོས་འབྱུང་གི་ནང་དུ་རེའུ་མིག་ཞེ་དགུ་བྱས་པ་ལ། ཀྵ་ཡིག་མ་གཏོགས་པ་དབྱངས་གསལ་གྱི་ཡི་གེ་ཞེ་དགུ་དགོད་པར་བཞེད་དོ། །ལེའུ་སུམ་ཅུ་པ་ནས་དེ་བཞིན་དུ་བཤད་ཀྱང༌། སྐབས་འདིར་ནི་མལ་གྱི་ལུགས་ལྟར་བྱས་ན་ལེགས་པར་སེམས་སོ། །བྷ་བ་བྷ་དྲས་ཆོས་འབྱུང་གི་ནང་དུ་སྣ་ཚོགས་པདྨ་ལ་རེའུ་མིག་ཞེ་དགུ་བྱས་ཏེ། ཀྵ་སྤངས་པའི་ཡི་གེ་ཞེ་དགུ་འགོད་དེ། དེའི་ལྟར་ན་པདྨའི་ལྟེ་བ་ལ་རེའུ་
མིག་ཞེ་དགུ་བྱ་དགོས་སོ། །ཆོས་འབྱུང་གི་དབུས་དེར་གནས་པའི་དབྱངས་གསལ་ལས། འདོད་པའི་དོན་ཐམས་ཅད་སྒྲུབ་པར་བྱེད་པའི་དཔའ་བོ་སྟེ་རྩ་སྔགས་བཏུ་བར་བྱའོ། །སྔགས་ལ་དཔའ་བོ་ཞེས་པ་ནི་ལྷ་དང་སྔགས་གཉིས་ངོ་བོ་དབྱེར་མེད་པའོ། །བཟླས་པས་དངོས་གྲུབ་འགྲུབ་པ་ལ་སྔགས་དག་དགོས་ལ། དག་པ་ནི་སྔགས་བཏུ་བ་ལ་རག་ལས་པས་སྔགས་བཏུ་བ་བསྟན་ཏོ། །དེ་དག་གི་ལག་ལེན་གྱི་རིམ་པ་ནི། རྣལ་འབྱོར་པ་ཕྱག་རྒྱ་དྲུག་གིས་བརྒྱན་པ་ཕྱག་རྒྱ་དང་བཅས་པ་ཕྱོགས་ཀྱི་གོས་ཅན་གྱིས། དཀྱིལ་འཁོར་གྱི་ཁང་པ་ལ་སོགས་པའི་ས་ཕྱོགས་བདུད་རྩི་ལྔས་བྱུགས་པ་མེ་ཏོག་ལ་སོགས་པས་ཡིད་འཕྲོག་པ། ཤ་ཆེན་གྱི་དུད་པས་བདུག་པར། མར་ཁུ་ཆེན་པོའི་མར་མེ་སྦར། ཕྱི་རོལ་ཏུ་གླུ་གར་ལ་སོགས་པ་སྔོན་དུ་འགྲོ་བས། ཅང་ཏེའུ་དང་དྲིལ་བུ་དཀྲོལ་ཞིང་གཏོར་མ་བྱིན་ཏེ། དུར་ཁྲོད་ཀྱི་སོ་ཕག་ལ་སོགས་པའི་རྡུལ་ཚོན་གྱིས་པདྨ་འདབ་བརྒྱད་བྲིས་ལ། ལྟེ་བར་གཞོམ་དུ་མེད་པ་དང༌། འདབ་མ་རྣམས་ལ་སྡེ་ཚན་བརྒྱད་སྔར་བཞིན་དུ་བྲི་བར་མན་སྙེ་ལས་བཤད་དེ། བླ་མ་རྣམས་ཀྱིས་ཀྱང་མངོན་རྟོགས་རྫོགས་པར་བསྒོམས། ཚོགས་ཀྱི་མཆོད་པ་བྱས་ཏེ། གཏོར་མ་བཏང་བའི་འོག་ཏུ་བྲི་བར་གསུངས་སོ། །གཉིས་པ་ནི། ཁ་སྦྱོར་ལས། གྲུ་གསུམ་དཀྱིལ་འཁོར་ཉམས་དགའ་བར། ཞེས་པ་ནས། སྔགས་ནི་ཡིག་འབྲུའི་དབང་ཕྱུག་མཆོག །ཅེས་པའི་བར་དུ་གསུངས་པ་རྣམས་དཔྱིད་ཐིག་ཏུ་སྔགས་བཏུ་བར་མཛད་པ་ནི། སྔགས་ཐུ་བའི་གཞིའི་ངེས་དོན་གྱི་བཤད་པ་ཡིན་ལ། སྔགས་དྲངས་པའི་བཏུ་གཞི་སྟོན་པའི་ཁ་སྦྱོར་གྱི་
གཞུང་ལ་ཡང་མན་སྙེ་ལས་ངེས་དོན་གྱི་བཤད་པ་མཛད་པས། འདིར་ཡང་དེ་རྣམས་ཀྱི་ངེས་དོན་བཤད་ན། གྲུ་གསུམ་དཀྱིལ་འཁོར་ཞེས་པའི་དཀྱིལ་འཁོར་ནི་ཕྱག་རྒྱའི་བྷ་གའོ། །ཉམས་དགའ་བ་ནི་ཕུལ་དུ་བྱུང་བའི་བདེ་བའི་རྒྱུར་གྱུར་པའོ། །མཱ་མ་ཀཱི་ཞེས་པ་རྡོ་རྗེ་བསྙེམས་མ་ལ་བོད་པའོ། །ཕྱག་རྒྱའི་གསང་གནས་ཀྱི་པདྨ་འདབ་མ་བརྒྱད་པ་ནི་བྷ་གའི་ནང་གི་རྩ་བརྒྱད་དོ། །ལྟེ་བ་ནི་དབུས་ཀྱི་རྩ་ཀ་ཀ་མུ་ཁ་ཞེས་པ་བྱ་རོག་གདོང་མའི་རྩའོ། །སྦས་པ་ནི་རྩ་བརྒྱད་ཀྱི་དབུས་ན་བསྡམས་ཏེ་གནས་པའོ། །སྤྱོད་ཡུལ་ནི་གཞི་སྟེ་དེར་དབུས་ཀྱི་བུག་པའོ། །དཔའ་བོ་ནི་བདེ་སྟོང་དབྱེར་མེད་ཀྱི་བྱང་ཆུབ་ཀྱི་སེམས་ཡིན་ལ། དེ་ཁོ་ན་འདོད་པའི་དོན་ཀུན་དུ་སྒྲུབ་པར་བྱེད་པ་བཏུ་བར་བྱ་སྟེ་བསྒྲུབ་པར་བྱའོ། །དེ་དག་གིས་ནི་བཏུ་གཞིའི་གྲུ་གསུམ་པའི་དཀྱིལ་འཁོར་གྱིས་ཕྱག་རྒྱའི་བྷ་ག་དང༌། པདྨ་འདབ་བརྒྱད་ཀྱིས་རྩ་བརྒྱད་དང༌། པདྨའི་ལྟེ་བས་དྷཱུ་ཏཱིའི་མར་སྣའི་རྩ་བསྟན་ལ། དཔའ་བོ་བཏུ་བ་ནི་ལེའུ་དང་པོར་བཤད་པ་བཞིན་དུ། ཡབ་ཡུམ་གྱི་རྩའི་རྩེ་གཉིས་སྦྱར་བས་ལྷན་སྐྱེས་ཀྱི་ཡེ་ཤེས་འདྲེན་པ་བསྟན་ཏེ། ཁ་སྦྱོར་གྱི་བརྟག་པ་བདུན་པར་གསུངས་པའི་ནང་བཤད་དོ། །ཡང་བརྟགས་པ་དང་པོ་ལས། གྲུ་གསུམ་དག་པ་མེ་ཡི་དབྱིབས། །དབུས་སུ་དགྱེས་པའི་ཨེ་ཝཾ་ཡིན། །གྲུ་གསུམ་དཀྱིལ་འཁོར་ཉམས་དགའ་བར། །རྡོ་རྗེ་ར་ལི་རྣམ་པར་འབྱུང༌། །བཙུན་མོའི་བྷ་ག་ཞེས་ཀྱང་བྱ། །ཆོས་ཀྱི་འབྱུང་གནས་ཞེས་བྱར་བཤད། །དེ་ཡི་ནང་སོང་པདྨ་ནི། །འདབ་མ་
བརྒྱད་པ་སྙིང་པོར་བཅས། །དེ་ལ་ཨཱ་ལི་ཀཱ་ལི་འདྲེས། །སྡེ་ཚན་བརྒྱད་ནི་རྣམ་པར་གནས། །ཞེས་དང༌། དེ་རྣམས་དབུས་སུ་ཟེའུ་འབྲུ་ལ། །པདྨའི་དབང་ཕྱུག་མ་ཡོད་དེ། །སྡེ་ཆེན་བརྒྱད་པོ་རྣམས་ཀྱིས་ནི། །ཡི་གེ་དམ་པ་ཡོངས་སུ་བསྐོར། །ཨ་ནི་ཡིག་འབྲུ་ཀུན་གྱི་མཆོག །ཅེས་གསུངས་པ་ཡང་བཏུ་གཞིའི་ནང་བཤད་དོ། །མན་སྙེ་ལས། འདིས་ནི་ལྟེ་བའི་པདྨ་ལ་སོགས་པ་ཡང་གསུངས་སོ། །ཞེས་ཨེའི་དབྱིབས་ཞེས་པས་ལྟེ་བའི་རྩ་འཁོར་སོགས་གསུངས་པར་བཤད་དེ། སོགས་ཀྱིས་ནི་འཁོར་ལོ་གཞན་གསུམ་ཡང་བསྟན་པས་འཁོར་ལོ་བཞི་ཀ་བཟུང་ངོ༌། །དེ་ཡང་ལྟེ་བ་དང་མགྲིན་པའི་རྩ་འཁོར་གྱི་ཕྱི་དབྱིབས་ཨེའི་རྣམ་པར་གྲུ་གསུམ་དུ་ཡོད་པ་དང༌། སྙིང་ག་དང་སྤྱི་བོའི་རྩ་འཁོར་གྱི་ཕྱི་དབྱིབས་ཝཾ་གྱི་རྣམ་པར་ཟླུམ་པོར་ཡོད་པར་བཤད་རྒྱུད་ལས་གསུངས་པ་ལྟར་ཡིན་ཏེ། དེ་ལྟར་ན་ཆོས་འབྱུང་གྲུ་གསུམ་པའི་ནང་དུ་བཤད་ཀྱིས་རྩ་འཁོར་གཉིས་དང༌། དེའི་ནང་དུ་པདྨའི་ཕྱི་དབྱིབས་ཟླུམ་པོར་ཡོད་པས་འཁོར་ལོ་གཞན་གཉིས་བསྟན་པར་བྱའོ། །གྲུ་གསུམ་དཀྱིལ་འཁོར་ནས་བཤད་ཅེས་པས་ནི་ཕྱག་རྒྱའི་བྷ་ག་དང་ལྟེ་བ་དང་མགྲིན་པའི་རྩ་འཁོར་གཉིས་ཀ་གཟུང་ངོ༌། །རྡོ་རྗེ་ནི་གསང་གནས་ཀྱི་རྡོ་རྗེ་དང་བྱང་སེམས་ཀུན་ཏ་ལྟ་བུ་ཡིན་ལ། ར་ལི་ནི་ཨ་ར་ལླི་ཞེས་པ་རོལ་པའི་དོན་ཏེ། བདེ་ཆེན་གྱི་བདག་ཉིད་ཀྱི་རྡོར་སེམས་རོལ་པས་བདེ་བའི་དགའ་སྟོན་འབྱུང་བའོ། །དེ་ཡི་ནང་སོང་ཞེས་པ་གཉིས་དང༌། སྡེ་ཚན་ཞེས་པ་གཅིག་སྟེ་གསུམ་གྱི་དོན་ནི། ལྟེ་བའི་རྩ་འཁོར་ཨེ་གྲུ་གསུམ་པའི་ནང་དུ་སྡེ་ཚན་བརྒྱད། རྩ་
འདབ་ལ་སྒོམ་པར་རིམ་པ་བཞི་པ་ལས་བཤད་པ་ལྟར་ཏེ། དེས་མཚོན་ནས་རྩ་འཁོར་གཞན་ལ་ཡང་ཡི་གེ་སྒོམ་པ་ཤེས་པར་བྱ་སྟེ། དེ་དག་གིས་ནི་སྔགས་བཏུ་བའི་གཞི་ནང་ལ་སྦྱར་བས། འཁོར་ལོ་བཞི་ལ་བརྟེན་པའི་གཏུམ་མོ་སྒོམ་པ་བསྟན་ཏོ། །དེ་ལ་ཨཱ་ལི་ཀཱ་ལི་འདྲེས་ཞེས་པས་བཏུ་གཞི་ཨཱ་ལི་ཀཱ་ལིའི་ནང་བཤད་གཞན་ཡང་སྟོན་ནོ། །འདྲེས་ཞེས་པ་ལ་གནས་ཞེས་ཀྱང་འབྱུང་བས། དེའི་དོན་ནི་མི་གསལ་བའི་ངོ་བོར་གནས་པ་ཡིན་ལ། དེ་ཡང་དབྱངས་གསལ་བརྗོད་པའི་དུས་སུ་ནི། སྔོན་ལ་བྷ་གའི་པདྨའི་ནང་གི་ནམ་མཁའ་ནས་རྒྱུ་བའི་རླུང་གི་སྐྱེ་གནས་ཅན་རྣམས་མི་གསལ་བའི་རང་བཞིན་དུ་སྐྱེས་ནས་ཁ་རུ་ཕྱིན་པ་ན། རྐན་ལ་སོགས་པའི་བྱེད་པ་རྣམས་ལས་གསལ་བར་སྐྱེ་སྟེ། ཇི་སྐད་དུ། ནམ་མཁའི་རླུང་ལས་རབ་བྱུང་ལུས་ལས་ནི། །བྱུང་ཞིང་ཁ་རུ་ཉེ་བར་ཕྱིན་པའི་སྒྲ། །གནས་གཞན་དག་ཏུ་རབ་ཏུ་ཕྱེ་བ་ན། །ཡི་གེ་ཉིད་འགྱུར་གང་ཡིན་དེ་སྒྲའོ། །ཞེས་བཤད་པ་ལྟར་རོ། །དབུས་ཀྱི་ཨ་ཡིག་གིས་ནི། རང་བཞིན་གྱིས་ནི་མ་སྐྱེས་ཕྱིར། །སྔགས་ནི་ཡིག་འབྲུའི་དབང་ཕྱུག་མཆོག །ཅེས་རང་བཞིན་གྱིས་སྐྱེ་བ་མེད་པའི་སྟོང་ཉིད་མཚོན་པར་གསུངས་སོ། །དེ་ལྟར་བྱས་ན་ཆོས་འབྱུང་དང་པདྨ་དང་འདབ་མའི་ཡི་གེ་རྣམས་ཀྱི་ནང་བཤད་ཀྱིས་བདེ་ཆེན་འདྲེན་པའི་ཐབས་བསྟན་ལ། ཐབས་གཉིས་ཀྱིས་དྲངས་པའི་བདེ་ཆེན་སྟོང་ཉིད་དང་སྦྱོར་བ་ནི་དབུས་ཀྱི་ཨ་ཡིག་གིས་བསྟན་ཏོ། །དྲང་དོན་གྱི་ཨ་ཡིག་ལས་སྤྱིར་ངག་གི་ཡི་གེ་ཐམས་ཅད་དང༌། ཁྱད་པར་དུ་སྔགས་ཐམས་
ཅད་འབྱུང་བ་བཞིན་དུ། ཨ་ཡིག་ངེས་དོན་ལས་ཀྱང་དངོས་གྲུབ་ཐམས་ཅད་འགྲུབ་པར་བཤད་རྒྱུད་ལས་གསུངས་སོ། །ཨ་ཡིག་གིས་སྟོང་ཉིད་མཚོན་པ་ནི་སྟོང་ཉིད་རྟོགས་པའི་ལྟ་བ་དང་བྲལ་ན། ངལ་བ་འབྲས་བུ་མེད་པས་དེ་ངེས་པར་དགོས་པ་ཤེས་པའི་དོན་ཡིན་ཏེ། རྣམ་སྣང་མངོན་བྱང་ལས། གསང་བའི་བདག་པོ་བྱང་ཆུབ་སེམས་དཔས་ཨ་ཡིག་ལ་གནས་པས་བྱ་བ་ཐམས་ཅད་བསྒྲུབ་པར་བྱའོ། །ཞེས་དང༌། མི་གཡོ་བའི་རྟོག་པ་ལས་ཀྱང༌། བྱང་ཆུབ་སེམས་ནི་བརྟན་བྱས་ནས། །སྔགས་ཀྱི་དངོས་གྲུབ་གསུངས་པ་སྟེ། །གཞན་དུ་སྔགས་གྲུབ་ཆོ་ག་ཡི། །བྱས་པ་ཐམས་ཅད་འབྲས་བུ་མེད། །དངོས་པོ་ཐམས་ཅད་མདོར་བསྡུས་པས། །རང་བཞིན་མེད་ཉིད་བསམས་པ་ལས། །བྱང་ཆུབ་སེམས་ནི་ངེས་པར་འཐོབ། །གཞན་དུ་འབབ་ཞིག་འགྱུར་བ་མིན། །ཞེས་གསུངས་པའི་ཕྱིར་རོ། །འདི་རྣམས་སྐབས་འདིར་མན་སྙེར་དྲངས་ཏེ། ཨ་ཡིག་གིས་མཚོན་པའི་སྟོང་ཉིད་ཀྱི་ལྟ་བ་ཤིན་ཏུ་གལ་ཆེ་བ་ལ་ངེས་པ་དྲང་བར་བྱའོ། གཉིས་པ་ལ་གཉིས། རྐང་བརྒྱད་ཀྱི་རྩ་སྔགས་བཏུ་བ་དང༌། ཀ་ར་ཀ་རའི་རྩ་སྔགས་བཏུ་བའོ། །དང་པོ་ལ་གཉིས། རྐང་པ་སྔོན་མ་བཞི་བཏུ་བ་དང༌། ཕྱི་མ་བཞི་བཏུ་བའོ། །དང་པོ་ནི། སྤང་ལེབ་གཙང་མ་ལ་ཐོག་མར་ཨོཾ་གྱི་ཤུལ་སྟོང་པར་བཞག །དེ་ནས་ཡི་གེ་རིམ་པ་བཞིན་དུ་བྲི་ཞེས་གསུང་ངོ༌། །འདིར་དབྱངས་ལས་ཐུ་བ་མེད་པས་ཀཱ་ལི་ལས་ཐུ་བ་ལ། དེའི་སྡེ་ཚན་བཞི་པ་ཏ་སྡེའི་ལྔ་པ་ན་གང་ཡིན་པ་དང༌། དེར་མ་ཟད་སྡེ་ཚན་
ལྔ་པ་པ་སྡེ་ཡི་ཡང་ལྔ་པ་མ་དང་སྡེ་ཚན་ལྔ་པའི་བཞི་པ་བྷ་དང༌། སྡེ་ཚན་དང་པོ་ཀ་སྡེའི་གསུམ་པ་ག་གང་ཡིན་པ་དང༌། དེ་བཞིན་དུ་ཀ་ནས་བགྲངས་པའི་ཉི་ཤུ་རྩ་དགུ་པ་ཝ་དང༌། བཞི་པ་ཏ་སྡེའི་དང་པོ་ཏ་གང་ཡིན་པ་དང༌། མཐར་གནས་པ་ཡི་སྡེ་ཚན་ཀྱི་བཞི་པ་ཝ་དང༌། མཐར་གནས་དེ་ཉིད་ཀྱི་ནི་གཉིས་པ་ར་དང༌། ཀ་ནས་བགྲངས་པའི་སུམ་ཅུ་པ་ཤ་ནི་ཡང་དག་པར་བླང་ངོ༌། །དེ་བཞིན་དུ་ཉི་ཤུ་རྩ་དྲུག་པ་ཡ་ཉིད་དང༌། གོང་གི་ཡི་གེ་དེ་དག་ཐམས་ཅད་ལེགས་པར་བསྡུས་པ་ནི་རྐང་པ་དང་པོའི་ལུས་སོ། །རྐང་པ་དང་པོ་བཏུས་པ་དེ་བཞིན་དུ་རྐང་པ་གཉིས་པ་བཏུ་བ་ནི། བརྒྱ་ཡི་ཕྱེད་ནི་ལྔ་བཅུ་ཡིན་ལ། དེའི་ཕྱིར་ནི་ཉེར་ལྔ་པ་མ་དང༌། མའི་རྗེས་དེ་ནས་སུམ་ཅུ་རྩ་གསུམ་པ་ཧ་གཟུང་བར་བྱའོ། །སྡེ་ཚན་དང་པོའི་དང་པོ་ཀ་ཉིད་དག་དང༌། མཐར་གནས་ཀྱི་གསུམ་པ་ལའོ། ། འདིར་ལ་ལ་འདོགས་རྒྱུའི་བ་མ་བྱུང་བ་ནི་འདོགས་ཀྱི་ཡི་གེ་མ་བརྩེས་པའི་དབང་དུ་མཛད་ནས་བཏུས་པའོ། །སྡེ་ཚན་དང་པོ་ཡི་ནི་གསུམ་པ་ག་ཉིད་དང༌། ཀ་ནས་བགྲངས་པའི་སུམ་ཅུ་རྩ་གཉིས་པ་ས་ཉིད་དག་དང༌། སྡེ་ཚན་བཞི་པ་ཡི་ནི་ལྔ་པ་ན་དང༌། ལྔ་པ་པ་སྡེ་ཡི་ཡང་བཞི་པ་བྷ་དང༌། མཐར་གནས་ཀྱི་དང་པོ་ཡ་གང་ཡིན་པ་སྟེ་རྐང་པ་གཉིས་པའི་ལུས་སོ། །གཉིས་པ་རྩ་སྡེ་ཡི་ནི་གསུམ་པ་ཛ་དང༌། གསུམ་པ་ཊ་སྡེའི་དང་པོ་ཊ་གང་ཡིན་པ་དང༌། ལྔ་པ་པ་སྡེ་ཡི་ཡང་ལྔ་པ་མ་དང༌། དང་པོ་ཀ་སྡེ་ཡི་ཡང་དང་པོ་ཀ་དང༌། དེ་བཞིན་དུ་ཀ་ནས་བགྲངས་པའི་བཅུ་གཅིག་པ་ཊ་ཉིད་དང༌།
དེ་བཞིན་དུ་སྔགས་བཏུ་བ་ལ་མཁས་པས་ཀ་ནས་བགྲངས་པའི་བཅུ་དྲུག་པ་ཏ་གཟུང་ངོ༌། །དེའི་འོག་ཏུ་ཀ་མ་བྱུང་བ་ནི་ཏ་ལ་འདོགས་པའི་དབང་དུ་མཛད་པའོ། །གསུམ་པ་ཊ་སྡེ་ཡི་ཡང་དང་པོ་ཊ་གང་ཡིན་པ་དང༌། དེ་བཞིན་དུ་ཉི་ཤུ་རྩ་དྲུག་པ་ཡ་རྣམས་ནི་རྐང་པ་གསུམ་པའི་ལུས་སོ། །བཞི་པ་ཏ་སྡེའི་གསུམ་པ་ད་གང་ཡིན་པ་དང༌། ཨུཥྨ་སྟེ་དྲོ་བ་ཡི་ནི་གཉིས་པ་ཥ་ཉིད་དེ། འདིར་ཡང་ཊ་མ་བྱུང་བ་ནི་སྔར་དང་འདྲའོ། །དང་པོ་ཀ་སྡེའི་དང་པོ་ཀ་གང་ཡིན་པ་དང༌། དེ་བཞིན་དུ་ཉི་ཤུ་རྩ་བདུན་པ་ར་དང༌། ཉི་ཤུ་རྩ་བརྒྱད་པ་ལ་ཡང་གཟུང་སྟེ། དེ་དག་ནི་ཀ་ནས་བགྲངས་པ་སྟེ་གཞན་ལ་ཡང་ཤེས་པར་བྱའོ། །དང་པོ་ཀ་སྡེ་ཡི་ནི་གསུམ་པ་ག་དང༌། ལྔ་པ་པ་སྡེ་ཡི་ཡང་བཞི་པ་བྷ་དང༌། དེ་བཞིན་དུ་སུམ་ཅུ་རྩ་གཅིག་པ་ཥ་བླང་ངོ༌། །བཅོ་ལྔ་པ་ཎ་ཉིད་དག་དང༌། དེ་བཞིན་དུ་ཉི་ཤུ་རྩ་ལྔ་པ་མ་དང༌། དང་པོ་ཀ་སྡེའི་གཉིས་པ་ཁ་གང་ཡིན་པ་དང༌། དེ་བཞིན་དུ་ཉི་ཤུ་རྩ་དྲུག་པ་ཡ་རྣམས་ནི་རྐང་པ་བཞི་པའི་ལུས་སོ། །གཉིས་པ་ནི། ཀ་ནས་ཀྱི་ཡི་གེ་སུམ་ཅུ་རྩ་གཉིས་པ་ས་དང༌། ཨུཥྨ་ཡི་ནི་ཐ་མ་ཧ་ཉིད་དང༌། སུམ་ཅུ་རྩ་གཉིས་པ་ས་ཉིད་དང༌། ལྔ་པ་པ་སྡེ་ཡི་ནི་བཞི་པ་བྷ་དང༌། གཉིས་པ་རྩ་སྡེ་ཡི་ནི་གསུམ་པ་ཛ་དང༌། ལྔ་པ་པ་སྡེ་ཡི་ནི་བཞི་པ་བྷ་དང༌། ཨུཥྨ་ཡི་ནི་གསུམ་པ་ས་དང༌། དེ་དག་ལས་གཞན་ཡང་ཉི་ཤུ་རྩ་བདུན་པ་ར་དང༌། ཨན་ཏསྠ་སྟེ་མཐར་གནས་ཀྱི་དང་པོ་ཡ་རྣམས་ནི་རྐང་པ་ལྔ་པའི་ལུས་སོ། །རྐང་པ་ལྔ་པ་བཏུས་པ་དེ་བཞིན་དུ་དྲུག་པ་ཡང་ཐུ་བ་ནི། ཀ་ནས་ཀྱི་ཉི་ཤུ་རྩ་གཅིག་པ་པ་དང༌། ཨན་ཏ་སྠའི་
གཉིས་པར་དང༌། སྔར་ཤ་བཏུས་པ་ལ་ལྟོས་ནས་དེ་བཞིན་དུ་སླར་ཡང་ནི་སུམ་ཅུ་པ་ཤ་དང༌། ལྔ་པ་པ་སྡེ་ཡི་ནི་དང་པོ་པ་དང༌། ཨུཥྨ་ཡི་ནི་དང་པོ་ཤ་ཉིད་དང༌། དེ་བཞིན་དུ་ཡི་གེ་དྱཱ་ཉིད་དང༌། བཞི་པ་ཏ་སྡེའི་དང་པོ་ཏ་གང་ཡིན་པ་དང༌། ཨུཥྨ་དང་པོ་ཤ་གང་ཡིན་པ་དང༌། དེ་བཞིན་དུ་ཉི་ཤུ་རྩ་བརྒྱད་པ་ལ་དང༌། དང་པོ་ཀ་སྡེའི་གཉིས་པ་ཁ་གང་ཡིན་པ་དང༌། གསུམ་པ་ཊ་སྡེའི་དང་པོ་ཊ་ཉིད་དག་དང༌། དང་པོ་ཀ་སྡེའི་གསུམ་པ་ག་གང་ཡིན་པ་དང༌། བཞི་པ་ཏ་སྡེའི་བཞི་པ་དྷ་གང་ཡིན་པ་དང༌། ཨན་ཏསྠའི་གཉིས་པར་དང༌། གསུམ་པ་ཊ་སྡེ་ཡི་ཡང་ལྔ་པ་ཎ་རྣམས་ནི་རྐང་པ་དྲུག་པའི་ལུས་སོ། །རྐང་པ་དྲུག་པ་བཏུས་པ་དེ་ནས་ཡི་གེ་བྱཱ་ནི་བླང་ངོ༌། །ཡི་གེ་དྱཱ་དང་འདི་གཉིས་རིམ་པ་བཞིན་དུ་པདྨ་དང་རྡོ་རྗེ་བྱིན་གྱིས་རློབ་པ་ཡིན་པས་ཡན་ལག་དང་བཅས་པར་བཏུས་པ་ཡིན་ཞེས་ཟེར་མོད་ཀྱང༌། ཡི་གེ་གཉིས་པོ་དེ་རྐང་བརྒྱད་ཀྱི་གྲལ་ན་ཡོད་ཅིང༌། ཡ་སྟ་བཏུས་ཀྱང་དབྱངས་ཀྱི་ཡན་ལག་བཏུས་པ་མིན་ལ། གསལ་བྱེད་ཡིན་ཀྱང་གྲལ་གྱི་གསལ་བྱེད་གཞན་ལ་གསལ་བྱེད་ཟུར་དུ་གསལ་བྱེད་བཏགས་ཏེ་བརྩེགས་པའི་འོག་མ་རྣམས་འདིར་མ་བཏུས་སོ། །བ་དང་ད་ལ་ཧ་བཏགས་པ་ལྟ་བུ་ནི་གསལ་བྱེད་ཀྱི་ཡི་གེ་རེ་རེ་ཡིན་པས། ལ་ལ་པ་དང༌། ག་ལ་ན་བཏགས་པ་སོགས་དང་མི་འདྲའོ། །དང་པོ་ཀ་སྡེ་ཡི་ནི་བཞི་པ་གྷ་དང༌། དེའི་རྗེས་ནས་ཀ་ནས་ཀྱི་བརྒྱད་པ་ཛ་ཉིད་དག་དང༌། བཞི་པ་ཏ་སྡེའི་ལྔ་པ་ན་གང་ཡིན་པ་དང༌། ལྔ་པ་པ་སྡེ་ཡི་ཡང་ལྔ་པ་མའོ། །དེའི་འོག་ཏུ་
པ་མ་བྱུང་བ་ནི་མ་དང་རྩེགས་པ་འོག་ཏུ་སྟོན་པ་ལ་དགོངས་སོ། །དེ་བཞིན་དུ་ཡི་གེ་ཉི་ཤུ་རྩ་བདུན་པ་ར་དང༌། བཞི་པ་ཡི་ནི་བཞི་པ་དྷ་དང༌། སླར་ཡང་ཉི་ཤུ་རྩ་བདུན་པ་ར་དང༌། དེ་བཞིན་དུ་ཉི་ཤུ་རྩ་དྲུག་པ་ཡ་རྣམས་ནི་རྐང་པ་བདུན་པའི་ལུས་སོ། །ཉི་ཤུ་རྩ་ལྔ་པ་མ་ཡང་དག་པར་བླང་བ་དང༌། སུམ་ཅུ་རྩ་གསུམ་པ་ཧ་ཉིད་དག་དང༌། བཞི་པ་ཡི་ནི་བཞི་པ་དྷ་དང༌། ལྔ་པ་ཡི་ནི་ལྔ་པ་མ་དང༌། བཞི་པ་ཏ་སྡེའི་ལྔ་པ་ནའོ། །དང་པོའི་དང་པོ་ཀ་ཉིད་དག་དང༌། དེ་བཞིན་དུ་ཉི་ཤུ་རྩ་བདུན་པ་ར་དང༌། ཨ་ན་ཏའི་བཞི་པ་ཝ་དང༌། དེ་བཞིན་དུ་ཉི་ཤུ་རྩ་གཅིག་པ་པ་དང༌། ཨུཥྨ་ཡི་ནི་གཉིས་པ་ཥ་ཉིད་དང༌། དེ་བཞིན་དུ་ཉི་ཤུ་རྩ་དྲུག་པ་ཡ་རྣམས་ནི་རྐང་པ་བརྒྱད་པའི་ལུས་ཐུ་བའོ། །ལོ་ཆེན་དང་མལ་གྱི་འགྱུར་ལ་རྐང་བརྒྱད་བཏུས་པའི་རྗེས་སུ་ཀ་ར་ཀ་རའི་རྩ་སྔགས་བཀོད་པ་མ་གཏོགས་པ་སྔགས་དེ་བཏུ་བ་མེད། མུ་ཏིག་ཕྲེང་བར་ཀ་ར་ཀ་ར་ལ་སོགས་པ་བཏུ་བ་ལོ་ཆུང་གི་དཔེ་ལ་ཁོང་ཉིད་ཀྱིས་བཅུག་ནས་ཡོད་དེ། དེ་ནི་རྒྱ་གར་གྱི་རྒྱ་དཔེ་ཐམས་ཅད་ལ་རྩ་རྒྱུད་ན་འདི་ན་མེད་གསུང༌། ཞེས་འབྱུང་བས་རང་བཟོ་མཁན་གཅིག་གིས་མལ་གྱི་འགྱུར་ལ་ཀ་ར་ཀ་ར་སོགས་བཏུ་བ་དཀྱུས་ལ་བཙུད་བདུག་ཅིང༌། མར་དོ་རྐྱང་པའི་འགྱུར་ལ་ཡང་བཙུད་འདུག་པས། དེ་འདྲའི་རང་བཟོ་བྲི་བར་མི་བྱའོ། །ལོ་ཆེན་གྱི་འགྱུར་འགོས་ཀྱིས་བཅོས་པ་ལ། པཎྜི་ཏ་སུ་མ་ཏི་ཀཱིརྟི་དང༌། མར་དོས་ཞུ་ཏིག་བྱས་པ་ལ་རྐང་པ་བརྒྱད་ཀྱི་སྔགས་བཏུ་བ་མ་གཏོགས་པ། ཀ་ར་ཀ་རའི་སྔགས་བཏུ་བ་མེད་ཅིང༌། སྐབས་འདིར་ཀ་ར་ཀ་རའི་སྔགས་
བཀོད་པ་ཡང་མེད་དོ། །ལོ་ཆེན་གྱི་འགྱུར་ལོ་ཙཱ་བ་ཤེས་རབ་གྲགས་དང༌། མར་དོས་གཉིས་ཀས་བཅོས་པ་ལ་ཀ་ར་ཀ་རའི་རྩ་སྔགས་ཀྱི་སྔགས་བཏུ་ཡོད་ལ། དེ་ཡང་གྲགས་པའི་ཞལ་སྔར་ཡུལ་དབུས་ཀྱི་དཔེ་ལ་གཏུགས་ནས་བསྒྱུར་ཟེར་བ་འདུག་པའི་གྲགས་པ་ནི་སུ་མ་ཏི་ཀཱི་རྟིར་མངོན་པས་ཁོང་ལ་རྒྱ་དཔེ་མི་འདྲ་བ་འགའ་ཞིག་བྱུང་བར་མངོན་ནོ། །མལ་གྱི་འགྱུར་བྱེད་པའི་པཎྜི་ཏ་ཡང་སུ་མ་ཏི་ཀཱི་རྟིར་འདུག་གོ། དེ་ལྟར་ན་བོད་ཀྱི་མཁས་པ་དག་བལ་པོ་བྷ་ཏན་ཏས་ནཱ་རོ་ཏ་པའི་དངོས་སློབ་པྲཛྙཱ་རཀྵི་ཏའི་ཕྱག་དཔེ་ལ་གཏུགས་པས། རྩ་སྔགས་རྫོགས་པའི་སྔགས་བཏུ་ཡོད་ཟེར་བ་ལྟར་ཡིན་པ་འདྲའོ། །བོད་ཀྱི་མཁས་པ་དག་འགྲེལ་པ་རྣམས་ལས་ཀྱང་རྐང་བརྒྱད་ཀྱི་སྔགས་བཏུ་བ་ལས་མེད་གསུང་ཡང༌། ལྭ་བ་པའི་འགྲེལ་པ་ལས། བཞི་པ་ཡི་ནི་ལྔ་པ་དང༌། ཞེས་བྱ་བ་ལ་སོགས་པ་རྣམས་ཀྱིས་བཅོམ་ལྡན་འདས་ཀྱི་སྔགས་ཚིག་བརྒྱད་པ་དང༌། ཀ་ར་ཀ་ར་ཞེས་བྱ་བ་ལ་སོགས་པ་དང་བཅས་པའི་རྩ་བའི་སྔགས་བཏུ་བའོ། ཞེས་རྩ་རྒྱུད་ལ་རྩ་སྔགས་ཚང་བའི་སྔགས་བཏུ་ཡོད་པར་གསུངས་པས། རྒྱ་གར་གྱི་དཔེ་ལ་མི་འདྲ་བ་མང་དུ་ཡོད་པར་འདུག་ན་ཡང༌། རྩ་སྔགས་ཚང་བའི་སྔགས་བཏུ་ཡོད་པ་ལྟར་བྱའོ། །གཉིས་པ་ལ་གསུམ། བརྒྱད་ཚན་དང་པོའི་སྔགས་བཏུ་བ་དང༌། བརྒྱད་ཚན་བར་པའི་སྔགས་བཏུ་བ་དང༌། བརྒྱད་ཚན་ཐ་མའི་སྔགས་བཏུ་བའོ། །དང་པོ་ནི། ཀཱ་ལིའི་སྡེ་ཚན་གྱི་དང་པོ་ཀ་སྡེའི་དང་པོ་ཀ་དང༌། མཐར་གནས་ཀྱི་གཉིས་པ་ར་དང༌། ཨཱ་ལི་ལ་སྡེ་ཚན་དང་པོར་བྱས་པའི་གཉིས་པ་ནི་ཀ་སྡེ་ཡིན་ལ་
དེ་ཡི་དང་པོ་ཀ་དང༌། གསལ་བྱེད་ཀྱི་སྡེ་ཚན་དྲུག་པ་མཐར་གནས་ཀྱི་ཡང་གཉིས་པ་ར་དང༌། དང་པོ་ཀ་སྡེ་ཡི་ནི་དང་པོ་ཀ་དང༌། མཐར་གནས་ཀྱི་གཉིས་པ་སྔར་བཤད་པ་དེ་བཞིན་ཏེ་ར་དང༌། གཉིས་པ་ཡི་ནི་དང་པོ་ཀ་ནི་སྔར་བཞིན་ནོ། །ཨཱ་ལི་སྡེ་ཚན་དང་པོར་བྱས་པའི་སྡེ་ཚན་བདུན་པ་ཡི་གཉིས་པ་ར་དང༌། དབྱངས་སྡེ་ནས་བགྲངས་པའི་སྡེ་ཚན་དྲུག་པ་ཡི་ཡང་བཞི་པ་བྷའོ། །འདིར་དྲུག་པ་ཡི་གསུམ་པ་ཞེས་པ་མ་དག་སྟེ་བྷ་ཐུ་དགོས་པས་སོ། །བཤད་རྒྱུད་ལས་ཀྱང་བཞི་པ་ཞེས་གསུངས་སོ། །ཀ་སྡེ་ནས་བགྲངས་པའི་བཞི་པ་ཏ་སྡེ་ཡི་ཡང་ལྔ་པ་ན་ལ། དེའི་བཞི་པ་དྷ་ཡིས་ནི་སྦྱར་བར་བྱ་བ་ནི་འོག་ཏུ་གདགས་པའོ། །མཐར་གནས་པ་ཡི་བཞི་པ་ཝ་ལ་འཆད་མོད་ཀྱང༌། འདིར་བྷ་ཐུ་དགོས་པས་ཀ་ཙ་ཊ་ཏའི་སྡེ་པ་བཞིའི་མཐར་གནས་པའི་བཞི་པ་བྷ་ལ་ཟེར་དགོས་པ་འདྲའོ། །ལྔ་པ་ཏ་སྟེ་ཡི་ཡང་ལྔ་པ་ན་ལ། དེའི་བཞི་པ་དྷ་ཡིས་ནི་གདན་དུ་བྱས་པ་སྟེ་འོག་ཏུ་གདགས་སོ། །ལྔ་པ་ཏ་སྡེ་ཡི་ནི་དང་པོ་ཏ་ལ་འོག་ཏུ་མེ་ཡི་གདན་དང་ལྡན་པ་སྟེ་ར་ཡིག་ར་སྟར་གདགས་སོ། །དེ་བཞིན་དུ་ཨུཥྨ་ཎ་ཡི་གསུམ་པ་ས་དང༌། མཐར་གནས་ཀྱི་དང་པོ་ཡ་དང༌། དབྱངས་སྡེ་ནས་བགྲངས་པའི་བཞི་པ་ཏ་སྡེ་ཡི་ན་དང་པོ་ཏ་ལ་མེ་སྟེ་ར་ཡིས་གདན་དུ་བྱའོ། །ཀ་སྡེ་ནས་བགྲངས་པའི་སྡེ་ཚན་བདུན་པ་དྲོ་བའི་སྡེ་པ་ཡི་གསུམ་པ་ས་དང༌། ཀ་སྡེ་ནས་བགྲངས་པའི་དྲུག་པ་མཐར་གནས་ཀྱི་དང་པོ་ཡ་དང༌། དང་པོར་ཀ་དང་དེའི་འོག་ཏུ་ཥ་བཏགས་ཏེ་བརྩེགས་པས་ཀྵར་གྲགས་པ་གཟུང་ངོ༌། །ལྔ་པ་པ་སྡེ་ཡི་ནི་བཞི་པ་བྷ་དང༌། མཐར་གནས་ཀྱི་དང་པོ་ཡ་དང༌། སྔར་ཀྵ་གཟུང་བ་དེ་བཞིན་དུ་སླར་ཡང་ཀ་དང་ཥ་གཉིས་རིལ་པོར་བསྡུས་པ་ཉིད་གཟུང་ངོ༌། །ལྔ་པ་པ་སྡེའི་བཞི་པ་བྷ་དང༌། བདུན་པ་
མཐར་གནས་ཀྱི་དང་པོ་ཡ་བཏུའོ། །ཨུཥྨ་ཎའི་བཞི་པ་ཧ་གཟུང་ཞིང༌། བདུན་པ་དྲོ་བ་ཡི་ནི་བཞི་པ་ཧ་ལ། རྡོ་རྗེ་སེམས་དཔས་ཕྱེ་བ། ཞེས་པ་ཁ་ཅིག་ཧའི་སྟེང་གི་ཐིག་ལེ་ལ་འཆད་པ་དོན་མིན་ཏེ། ལེའུ་བདུན་པར་འདི་རྣམས་ཀྱི་དབྱངས་ཐུ་བའི་སྐབས་སུ་ཐིག་ལེ་བཤད་པའི་ཕྱིར་དང༌། རྡོ་རྗེ་སེམས་དཔས་ཕྱེ་བར་ཡིག་གིས་ཕྱེ་བ་ལ་བཤད་པའི་ཕྱིར་རོ། །དེས་ན་འདིར་ཡང་རྡོ་རྗེ་སེམས་དཔས་ཕྱེ་བའི་དོན་ཧ་གཉིས་ལ་ར་བཏགས་པ་ལ་བྱའོ། །ཨུཥྨ་ཎ་ཡི་བཞི་པ་ནི་ཧའོ། །འོད་བྱེད་གདན་དུ་བྱས་པ་ནི་ཧ་ལ་ར་བཏགས་པས་ཧྲ་རུ་སོང་བའོ། །ཀ་སྡེ་ནས་བགྲངས་པའི་བདུན་པ་དྲོ་བའི་བཞི་པ་ཧ་ལ། དེའི་འོག་ཏུ་ཡང་ནི་མའི་གདན་ཏེ་ར་ཡིག་ར་སྟར་བྱས་པའོ། །ཧྲ་གཉིས་པོ་དེ་ཡང་མཐར་ཚེག་དྲག་དང་ནི་ཡང་དག་པར་ལྡན་པའོ། །ཀ་སྡེ་ནས་བགྲངས་པའི་ལྔ་པ་པ་སྡེ་ཡི་ནི་གཉིས་པ་ཕ་དང༌། དེ་བཞིན་དུ་ཀ་ནས་བགྲངས་པའི་ཉི་ཤུ་རྩ་གཉིས་པ་ཕ་སྟེ། དེ་གཉིས་ནི་ཕེཾ་ཕེཾ་དུ་འགྲོ་རྒྱུའི་ཕའོ། །གཉིས་པ་ནི། དབྱངས་སྡེ་དང་པོར་བྱས་པའི་དྲུག་པ་པ་སྡེ་ཡི་གཉིས་པ་ཕའི་མཐར། དེ་བཞིན་དུ་ཀ་ནས་བགྲངས་པའི་ཡི་གེ་བཅུ་གཅིག་པ་ཊ་ནི་ངེས་པར་སྦྱར་རོ། །སླར་ཡང་ཉི་ཤུ་རྩ་གཉིས་པ་ཕ་གཟུང་སྟེ། ཀ་སྟེ་ནས་བགྲངས་པའི་གསུམ་པ་ཊ་སྡེའི་དང་པོ་ཊ་དང་སྦྱར་རོ། །བཞི་པ་ཏ་སྡེ་ཡི་ནི་གསུམ་པ་ད་དང༌། ཨུཥྨ་ཎ་ཡི་བཞི་པ་ཧ་དང༌། ལྔ་པ་ཏ་སྡེའི་གསུམ་པ་ད་དང༌། བདུན་པ་དྲོ་བ་ཡི་ནི་བཞི་པ་ཧ་དང༌། དེ་ནས་ཉི་ཤུ་རྩ་གཅིག་པ་པ་བཏུའོ། །གཉིས་པ་ཙ་སྡེ་ཡི་ནི་
དང་པོ་ཙ་དང༌། ལྔ་པ་པ་སྡེ་ཡི་ནི་དང་པོ་པ་དང༌། དབྱངས་སྡེ་དང་པོར་བྱས་པའི་གཉིས་པ་ཀ་སྡེ་ལས་ཀ་ནས་བགྲངས་པའི་ཡི་གེ་དྲུག་པ་ཙ་བཏུའོ། །ལྔ་པ་པ་སྡེ་ཡི་བཞི་པ་བྷ་དང༌། དེ་བཞིན་དུ་ཀ་ཥར་གྲགས་པའི་ཀྵ་དང༌། དེ་ནས་ཀ་ནས་བགྲངས་པའི་ཉི་ཤུ་བཞི་པ་བྷ་བཏུའོ། །སླར་ཡང་རིལ་པོ་སྔ་མ་བཞིན་དུ་བཏུས་པའི་ཀྵ་དང༌། ལྔ་པ་པ་སྡེ་ཡི་གསུམ་པ་བ་དང༌། ཨུཥྨ་ཎ་ཡི་གསུམ་པ་ས་དང༌། མཐར་གནས་ཀྱི་གཉིས་པ་ར་དང༌། ལྔ་པ་ཏ་སྡེ་ཡི་བཞི་པ་དྷ་དང༌། སླར་ཡང་འོད་བྱེད་ར་ཡིག་སྦྱིན་ནོ། །ཀ་ནས་བགྲངས་པའི་ཡི་གེ་ཉི་ཤུ་པ་ན་ཡི་འོག་ཏུ་ནི་བཅུ་དྲུག་པ་ཏ་ནི་དེའི་གདན་དུ་སྟེ་དེའི་འོག་ཏུ་གདགས་སོ། །ཏ་དེའི་འོག་ཏུ་མེ་སྟེ་ར་ཡིག་གིས་གསལ་བར་བྱས་པ་སྟེ་ར་སྟར་བྱའོ། །ལྔ་པ་པ་སྡེ་ཡི་ནི་ལྔ་པ་མ་དང༌། མཐར་གནས་ཀྱི་གསུམ་པ་ལ་དང༌། ལྔ་པ་པ་སྡེ་ཡི་གསུམ་པ་བ་དང༌། དྲུག་པ་མཐར་གནས་ཀྱི་གསུམ་པ་ལ་དང༌། མཐར་གནས་ཀྱི་བཞི་པ་ཝ་སྟེ། ཁ་ཅིག་རྒྱ་གར་གྱི་དཔེ་ལ་བ་དང་ཝ་འདྲ་བ་ཡོད་ཟེར་རོ། །ཉི་ཤུ་རྩ་ལྔ་པ་མས་ཁྱད་པར་ཏེ་རྣམ་པར་དབྱེ་བ་སྟེ་མ་ལ་གདགས་སོ། །བཞི་པ་ཏ་སྡེ་ཡི་ལྔ་པ་ན་དང༌། དབྱངས་སྡེ་ནས་བགྲངས་པའི་གཉིས་པ་ཀ་སྡེ་ཡི་གསུམ་པ་ག་ལ། ཉི་མའི་བུ་ར་ཡིས་ཁྱད་པར་ཏེ་རྣམ་པར་དབྱེ་བ་སྟེ་ར་སྟར་བྱའོ། །ཨུཥྨ་ཎའི་བཞི་པ་ཧ་དང༌། ཧའི་འོག་ཏུ་བཅོ་ལྔ་པ་ཎའི་གདན་དུ་བྱའོ། །དང་པོ་ཀ་སྡེ་ཡི་ཡང་གསུམ་པ་ག་དང༌། དེ་ནས་ག་དེ་ལ་མེ་སྟེ་ར་ཡིས་གདན་ར་ལྟར་བྱའོ། །བདུན་པ་དྲོ་བ་ཡི་ནི་བཞི་པ་ཧ་དང༌། དེའི་འོག་ཏུ་བཅོ་ལྔ་པ་ཎའི་གདན་ནོ། །ཨུ་ཥྨ་ཎ་ཡི་གསུམ་པ་
ས་དང༌། ལྔ་པ་པ་སྡེའི་དང་པོ་པ་དང༌། དེ་ལ་བཅུ་དྲུག་པ་ཏ་ཡིས་གདན་དུ་བྱའོ། །དེ་ནས་ཡི་གེ་ཉི་ཤུ་གཅིག་པ་བླང་ངོ༌། །བཞི་པ་ཏ་སྡེ་ཡི་ནི་དང་པོ་ཏ་དང༌། མཐར་གནས་ཀྱི་གསུམ་པ་ལ་དང༌། དབྱངས་སྡེ་དང་པོར་བྱས་པའི་གཉིས་པ་ཀ་སྡེ་ཡི་ནི་གསུམ་པ་ག་དང༌། བཞི་པ་ཏ་སྡེ་ཡི་ནི་དང་པོ་ཏ་དང༌། ལྔ་པ་པ་སྡེ་ཡི་ནི་བཞི་པ་བྷ་དང༌། དབྱངས་སྡེ་དང་པོར་བྱས་པའི་གསུམ་པ་ཙ་སྡེའི་གསུམ་པ་ཛ་དང༌། དང་པོ་ཀ་སྡེ་ཡི་ནི་གསུམ་པ་ག་དང༌། ཨུཥྨ་ཎའི་གསུམ་པ་ས་དང༌། དེ་བཞིན་ཉི་ཤུ་རྩ་གཅིག་པ་པ་དང༌། འོད་བྱེད་དེ་ར་ཡིག་གཉིས་མཉམ་པར་ཏེ་བརྩེགས་པ་རས་མནན་པའོ། །ལྔ་པ་པ་སྡེ་ཡི་ནི་གསུམ་པ་བ་དང༌། བཞི་པ་ཏ་སྟེ་ཡི་ནི་དང་པོ་ཏ་དང༌། དབྱངས་སྡེ་དང་པོར་བྱས་པའི་སྡེ་ཚན་གསུམ་པ་ཡི་ནི་གསུམ་པ་ཛ་ལ། སྟེང་ནས་མེ་ཡི་ཡི་གེ་རས་གསལ་བར་བྱས་པ་སྟེ་བརྒྱན་པའོ། །དེ་ནས་མཐར་གནས་པའི་དང་པོར་གསུངས་པའི་ཡའོ། །དེ་ནས་ཡང་དེའི་འོག་ཏུ་ཡི་གེ་བཅུ་དྲུག་པ་ཏ་དང༌། གསུམ་པ་ཙ་སྡེའི་གསུམ་པ་ཛ་དང༌། དེའི་སྤྱི་བོར་མི་ཡི་ཡི་གེ་རས་མཚན་པ་དང༌། དེ་བཞིན་དུ་ཀ་ནས་བགྲངས་པའི་ཉི་ཤུ་རྩ་དྲུག་པ་ཡའོ། ། དང་པོ་དབྱངས་སྡེའི་དང་པོ་ཨའོ། །འདིར་ཡན་ལག་གི་དབྱངས་མི་ཐུ་ཡང་ལུས་ཀྱི་ཨ་ཐུ་བ་མི་འགལ་ལོ། །དབྱངས་སྡེ་དང་པོར་བྱས་པའི་གཉིས་པ་ཀ་སྡེའི་དང་པོ་ཀ་དང༌། ཀ་སྡེ་ནས་བགྲངས་པའི་གསུམ་པ་ཊ་སྡེའི་བཞི་པ་ཌྷ་ལ། ཀ་ནས་བགྲངས་པའི་བཅུ་གསུམ་པ་བ་ཡིས་མནན་པའོ། །དེ་བཞིན་དུ་དབྱངས་སྡེའི་
དང་པོ་ཨ་དང༌། གཉིས་པ་ཀ་སྡེའི་དང་པོ་ཀ་དང༌། གསུམ་པ་ཊ་སྡེའི་བཞི་པ་ཌྷ་ལ་སྟེང་དུ་བཅུ་གསུམ་པ་ཌ་ཡིས་མནན་པའོ། །ཨུཥྨ་ཎའི་བཞི་པ་ཧ་ལ་ཡི་གེ་ཉི་ཤུ་རྩ་བདུན་པ་རས་གདན་དུ་བྱས་པ་ཧྲའོ། །ཡ་སོགས་ཞེས་འབྱུང་བས་ཡ་ཡིག་ནས་བགྲངས་པའི་བརྒྱད་པའི་ས་བོན་ཧ་ལ། འོད་བྱེད་རས་གསལ་བ་སྟེ་ར་སྟར་བྱས་པའོ། །གཉིས་པ་ཙ་སྡེའི་གསུམ་པ་ཛ་ལ་བཅོ་ལྔ་པ་ཎ་ཡིས་སྟན་དུ་བྱས་པ་སྟེ་ཛ་ལ་བཏགས་པའོ། །ཡང་གཉིས་པ་ཙ་སྡེའི་གསུམ་པ་ཛ་སྡེ་ཚན་གསུམ་པའི་ལྔ་པ་ཎའི་སྟེང་དུ་བསྐྱོན་ནོ། །འདིར་བོད་ཀྱི་མཁས་པ་དག་རྒྱ་དཔེ་ཕལ་ཆེར་ལ་ཛ་ལ་ཎའི་གཟུགས་བསྡུས་ནས་བྲིས་པས་ཉ་དང་ཁྱད་མ་ཕྱེད་པ་དང༌། རྒྱ་དཔེ་ཁ་ཅིག་ན་ཉའི་གཟུགས་རྫོགས་པ་བཏགས་སྣང་བ་ལ། བོད་དཔེ་ཐམས་ཅད་ལ་ཡང་དེ་བཞིན་དུ་སྣང་སྟེ། སྔགས་བཏུ་བ་ལས་དེ་བཞིན་དུ་མི་འབྱུང་གསུང་ངོ༌། །གསུམ་པ་ནི། ཀ་དང་ཥའི་ས་བོན་བཏུས་ནས་ཀྵར་བྱས་པ་ལ་ཉེར་ལྔ་པ་མ་ཡིས་གདན་དུ་བྱའོ། །ཀ་དང་ཥ་གཉིས་རིལ་བོར་བྱས་པའི་མཛེས་པ་བཏུས་ནས་ནི། ཡི་གེ་མ་ཡིས་ཀྵ་དེའི་གདན་དུ་བྱའོ། །ཨུཥྨ་ཎའི་བཞི་པ་ཧ་དང༌། ཡང་བདུན་པ་དྲོ་བའི་བཞི་པ་ཧ་དང༌། ཡ་སོགས་ཏེ་ཡ་ཡིག་ནས་བགྲངས་པའི་བརྒྱད་པའི་ས་བོན་ཧ་དང༌། དེ་བཞིན་དུ་སུམ་ཅུ་རྩ་གསུམ་པར་ངེས་པ་ཧའོ། །ཡེ་ཤེས་ལྔ་པའི་བདག་ཉིད་ཧཱུཾ་ཡོངས་སུ་བཏུས་ལ། ཡང་ནི་ཧཱུཾ་དེ་ལ་གཉིས་པ་ཅིག་ངེས་པར་བྱའོ། །གཉིས་པ་ཀ་སྡེ་ཡི་ནི་དང་པོ་ཀ་དང༌། མཐར་གནས་ཀྱི་གསུམ་པ་ལ་དང༌། དེ་བཞིན་དུ་ཡི་གེ་སུམ་ཅུ་རྩ་གཉིས་པ་ས་དང༌།
དྲུག་པ་མཐར་གནས་ཀྱི་གསུམ་པ་ལ་དང༌། བདུན་པ་དྲོ་བའི་བཞི་པ་ཧ་དང༌། དེ་བཞིན་དུ་དྲུག་པ་མཐར་གནས་ཀྱི་གསུམ་པ་ལ་དང༌། ལྔ་པ་ཏ་སྡེའི་བཞི་བ་དྷ་དང༌། དྲུག་པ་མཐར་གནས་ཀྱི་གསུམ་པ་ལ་སྟེ། ཚིག་རྐང་པ་བཞི་པོ་དེ་ལ་ལན་གཉིས་གཉིས་སུ་བཟླས་པ་ཡིན་ནོ། །དེ་ལྟར། དང་པོའི་དང་པོ་ཉིད་དང་ནི། །མཐར་གནས་པ་ཡི་གཉིས་པ་ཉིད། ཅེས་སོགས་ཤློ་ཀ་སོ་གསུམ་དང་རྐང་པ་གསུམ་ནི་ལོ་ཙྪ་བ་གཉིས་འདུས་པའི་རྩ་རྒྱུད་ཀྱི་འགྱུར་ལ་འབྱུང་བ། འདིར་བཤད་པའི་དོན་དུ་བྲིས་གྱི་མར་དོ་རྐྱང་པའི་འགྱུར་ལ་མེད་པས། འདིར་དཀྱུས་ལ་གཞུག་པར་མི་བྱའོ། །འདི་དང་མངོན་བརྗོད་གཉིས་རེ་རེ་ཙམ་མ་གཏོགས་པ་འདྲའོ། །གསུམ་པ་ནི། རིག་པ་ནི་འཁོར་ལོ་གསུམ་གྱི་མཁའ་འགྲོ་མའོ། །དེའི་རྒྱལ་པོ་ནི་ཧེ་རུ་ཀའོ། །དེའི་གསང་སྔགས་ནི་སྔགས་བཏུས་པའི་རྩ་སྔགས་ཏེ། བསྒྲུབ་པར་བྱ་བ་ཐམས་ཅད་སྒྲུབ་པར་བྱེད་པའོ། །རྩ་སྔགས་འདི་ལས་ཤིན་ཏུ་མཆོག་ཏུ་གྱུར་པའི་སྔགས་ས་འོག་ས་སྟེང་ས་བླའི་འཇིག་རྟེན་གསུམ་ན་ཡོད་པ་མིན་ཏེ། དཔལ་ཧེ་རུ་ཀའི་རྩ་བའི་སྔགས་ཤེས་ནས་ཟློ་བ་ནི་མེ་དང་འདྲ་ལ། སྔགས་གཞན་དག་ནི་སོག་མ་དང་མཚུངས་ཏེ། སྟོབས་ཆེ་ཆུང་གི་ཁྱད་པར་ཆེའོ། །དངོས་གྲུབ་ཐམས་ཅད་ཀྱི་རྩ་བ་ཡང་ཡིན་ལ་སྔགས་ཀྱང་ཡིན་པས་རྩ་སྔགས་སུ་རབ་ཏུ་གྲགས་སོ། །བྱ་བ་ཐམས་ཅད་ཅེས་པ་ལ། སྒྲུབ་པ་ཐམས་ཅད་རྣམ་སྤངས་པ། ཞེས་ཀྱང་འབྱུང་ལ། དེའི་དོན་ནི་ཀླགས་པ་ཙམ་གྱིས་འགྲུབ་པ་ཡིན་ནོ། །ཞེས་ཀོང་
ཀ་ན་པ་བཞེད་ལ། བྷ་བ་བྷ་དྲ་དང་དཔའ་བོ་རྡོ་རྗེས་ཀྱང་དེ་བཞིན་དུ་བཤད་དེ། སྦྱིན་སྲེག་ལ་སོགས་པའི་སྒྲུབ་པ་གཞན་ལ་མི་ལྟོས་པར་བཟླས་པ་ཙམ་གྱིས་འགྲུབ་པའི་དོན་ནོ། །དེས་ན་འདིའི་བཟླས་པ་བྱེད་པར་འདོད་པས་རྩ་སྔགས་ཉིད་ལ་གཙོ་བོར་བྱའོ། །གཉིས་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྩ་བའི་སྔགས་ཀྱི་ལུས་ཀྱི་ཡི་གེ་བཏུ་བའི་ཆོ་གའི་ལེའུ་སྟེ་ལྔ་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ། སྦས་པའི་དོན་ཀུན་གསལ་བ་ལས་ལེའུ་ལྔ་པའི་བཤད་པའོ།། ༈ །།གཉིས་པ་དཔའ་བོའི་གོ་ཆའི་སྔགས་བཏུ་བ་ལ་གཉིས། གཞུང་དངོས་དང༌། ལེའུའི་མཚན་ནོ། །དང་པོ་ལ་གཉིས། སྔགས་གཉིས་ཀྱི་ཡི་གེའི་གྲངས་གོ་ཆའི་སྔགས་བཏུ་བ་དང་བཅས་པ་དང༌། གོ་ཆ་འགོད་པའི་གནས་བསྟན་པའོ། །དང་པོ་ནི། རྩ་སྔགས་ལས་གཞན་ཡང་འོག་ནས་འཆད་པའི་སྙིང་པོའི་སྔགས་ལ་ནི་ཡི་གེ་ཉི་ཤུ་རྩ་གཉིས་ཡོད་ལ། སྙིང་པོ་དང་ཉེ་བའི་སྙིང་པོའི་སྔགས་ལ་ནི་ཡི་གེ་བདུན་ཡོད་དོ། །འདིར་ཡ་ཚོགས་དང་ཡ་སོགས་དང་ཡ་སྡེ་ཞེས་པ་གསུམ་བྱུང་བ་ལ་དང་པོ་འགྱུར་མི་ལེགས་ཤིང༌། ཕྱི་མ་ལ་བཤད་རུང་ཙམ་སྣང་ཡང་བར་པ་ལེགས་སོ། །ཡ་ལ་སོགས་པའི་ཡི་གེ་བརྒྱད་པའི་ས་བོན་ནི་ཧའོ། །གུག་སྐྱེད་ནི་དབྱངས་སམ་ཕྱི་མོའོ། །བཅུ་གཉིས་ནི་རྀ་ལྀ་བཞི་དོར་བའི་ལྷག་མ། ཨ་ཨཱ་ནས་ཨཾ་ཨཿའི་བར་རོ། །དེ་བཞིན་ནི་བཅུ་གཉིས་པོ་ཧ་ལ་ཞུགས་པས། ཧ་ཧཱ་ཧི་ཧཱི་ཧུ་ཧཱུ་ཧེ་ཧཻ་ཧོ་ཧཽ་ཧཾ་ཧཿ སོ། །ཐུང་
ངུ་གཉིས་ཀྱི་ཡི་གེ་བར་མ་རིང་པོ་ལྔ་དང་ཐ་མ་དོར་བར་བྱའོ། །འགྱུར་གཞན་ལས། ཡི་གེ་ཐ་མ་དོར་བྱས་པ། ཞེས་པ་ལྟར་ན་གཉིས་གཉིས་ཀྱི་ཐ་མ་རིང་པོ་རྣམས་དོར་བའི་དོན་ནོ། །དེ་རྣམས་དོར་བའི་ཧ་ལ་སོགས་པ་ཐུང་ངུ་དྲུག་ནི། དཔལ་ཧེ་རུ་ཀའི་སྙིང་ག་ལ་སོགས་པའི་ཡན་ལག་དྲུག་ཏུ་བརྗོད་དོ། །དེ་ཡང་སྙིང་ཁ་ལ་སོགས་པའི་རྟེན་དང༌། བརྟེན་པ་ཧ་ལ་སོགས་པ་ངོ་བོར་དབྱེར་མེད་པས་སམ་དོན་དམ་པར་དབྱེར་མེད་པས་ཡན་ལག་དྲུག་ཅེས་བྱའོ། །རྡོར་སེམས་ལ་སོགས་པའི་དཔའ་བོ་དྲུག་གི་ཨོཾ་ལ་སོགས་པ་དང་མཉམ་པར་སྦྱོར་བ་སྟེ་སྦྱར་བར་བྱའོ། །ཡི་གེ་གང་དང་ཡིན་ན། ཧ་ལ་སོགས་པའི་ཡི་གེ་གཅིག་ཏུ་སྟེ་རེ་རེ་ཡང་དག་པར་གནས་པ་དང་སྦྱར་ཏེ། དེ་ཡང་ཧའི་གོང་དུ་ཨོཾ་དང་ཡང་དག་པར་ལྡན་པ་དེ་བཞིན་དུ། ན་མ་ཧི། སྭ་ཧ་ཧུ། པཽ་ཥད་ཧེ། ཧུཾ་ཧཱུཾ་ཧོ། ཕཊ་ཧཾ་ཞེས་སྦྱར་རོ། །དེ་ནི་སྒྲུབ་པ་པོས་དཔའ་བོ་དྲུག་གི་སྙིང་པོར་ཤེས་པར་བྱའོ། །གཉིས་པ་ནི། གོ་ཆའི་སྔགས་དང་པོ་ཨོཾ་ཧ་ནི་སྙིང་ག་ཉིད་དུ་དགོད་པ་སྟེ། སྔགས་གཉིས་པ་སྤྱི་བོར་དགོད་པར་ཤེས་པར་བྱའོ། །སྔགས་གསུམ་པ་སྤྱི་གཙུག་དག་ཏུ་སྦྱར་རོ། །སྔགས་བཞི་པ་གོ་ཆ་ཉིད་དུ་ཡིན། ཞེས་པ་ནི་ཀུན་སྤྱོད་ལས་ཕྲག་པར་དགོད་པར་གསུངས་པ་བཞིན་ནོ། །སྔགས་ལྔ་པ་ནི་མིག་ཏུ་གྱུར་པ་སྟེ་མིག་གཉིས་སུ་དགོད་དོ། །སྔགས་དྲུག་པ་མཚོན་ཆ་ཞེས་བྱར་འདོད། ཅེས་པའི་དོན་ནི། སྡོམ་འབྱུང་ལས། ཕཊ་ཧཾ་ཡན་ལག་ཐམས་ཅད་ལ་མཚོན་ཆའོ། ཞེས་གསུངས་པ་ཡིན་ནོ། །ཡན་ལག་ཐམས་ཅད་ནི་ལྭ་བ་པས། པགས་
པའི་ནང་ན་གནས་པའི་རྡུལ་ཕྲ་རབ་རྣམས་དེའི་རང་བཞིན་དང་ཁ་དོག་ཅན་དུ་བྱའོ། །ཞེས་གསུངས་པ་ལྟར། པྲཛྙཱ་རཀྵི་ཏས་ཀྱང་བཤད་པས། ལུས་དབང་གི་རྡུལ་ཕྲ་རབ་ཐམས་ཅད་རྟ་མཆོག་གི་ངོ་བོའི་ཕཊ་ཧཾ་ལྗང་གུར་མོས་པར་བྱའོ། །སྔགས་འགོད་པའི་གནས་ནི། ལྭ་བ་པས་དཔྲལ་བར་དགོད་པར་གསུངས་པ་ལྟར་བྱ་སྟེ། ལྷ་འགོད་ན་ཡང་ལུས་དབང་གི་རྡུལ་ཕྲ་རབ་ཐམས་ཅད་དེའི་ངོ་བོར་མོས་པར་བྱའོ། །ཁ་ཅིག་ཡན་ལག་ཐམས་ཅད་ལ་ཞེས་བཤད་པས་དཔྲལ་བར་འགོད་པ་འགོག་པ་མི་འཐད་དེ། དེ་ལྟ་ཡིན་ན་གཟུགས་ཕུང་ལ་རྣམ་སྣང་ཞེས་དང༌། ལུས་ལ་ཕྲག་དོག་རྡོ་རྗེའོ། །ཞེས་སོགས་བཤད་པ་ལ་ལྷ་དེ་གཉིས་སྤྱི་བོ་དང་དཔྲལ་བར་སྒོམ་པ་ཡང་མི་འཐད་པར་འགྱུར་བ་སོགས་མང་ངོ༌། །པགས་པའི་ནང་དུ་ཞེས་གསུངས་པས་གོ་ཆ་ལྷག་མ་རྣམས་ཀྱང་ལུས་ཀྱི་ནང་དུ་བཀོད་དོ། །འོ་ན་གོ་ཆ་འདི་རྣམས་ལྷ་ཇི་ཙམ་ཞིག་ལ་འགོད་སྙམ་ན། ལཱུ་ཨི་པ་དང་དྲིལ་བུ་པའི་ལུས་དཀྱིལ་ལས། གོ་ཆ་བཅུ་གཉིས་འགོད་པར་གསུངས་ཀྱང་ལྷ་གང་ལ་འགོད་མི་གསལ་ལ། དྲིལ་བུ་པའི་ལྷ་ལྔར་ནི་གཙོ་བོ་ཡབ་ཡུམ་བསྐྱེད་ཅིང་འཁོར་མ་བསྐྱེད་པའི་བར་དུ་གོ་ཆ་བཀོད་པས་གཙོ་བོ་ཡབ་ཡུམ་ཉིད་ལ་བཀོད་དོ། །ནག་པོ་སྤྱོད་པའི་སྒྲུབ་ཐབས་ལས་ནི། གཙོ་བོ་ཡབ་ཡུམ་གཉིས་ཙམ་ལ་བཀོད་ཀྱི་གཞན་ལ་མ་བཀོད་དོ། །དེ་ཡང་ཀུན་སྤྱོད་ལས། དཔའ་མོའི་གོ་ཆ་དྲུག་བཤད་པའི་མཐར། གོ་ཆ་དྲུག་ཉིད་ཕག་མོ་སྟེ། ཞེས་པ་ཨོཾ་བཾ་སོགས་ཀྱི་གོ་ཆ་དྲུག་ཕག་མོ་ལ་འགོད་པར་བཤད་པས། ཨོཾ་ཧ་སོགས་དྲུག་ཀྱང་གཙོ་བོ་ལ་འགོད་པར་
གསལ་ཏེ། དེ་དང་མཐུན་ནོ། སྤྱིར་ནི་པཎྜི་ཏ་མང་པོས་གཙོ་བོ་ཡབ་ཡུམ་ཉིད་ལ་འགོད་པ་དང༌། གཞན་འགའ་ཞིག་གིས་ལྷ་ཐམས་ཅད་ལ་གོ་ཆ་བྱེད་པར་བཤད་པ་ཡང་ཡོད་ཀྱང༌། ལོ་ནག་དྲིལ་གསུམ་གྱི་སྒྲུབ་ཐབས་ཀྱི་སྐབས་སུ་ནི་གཙོ་བོ་ཡབ་ཡུམ་ཙམ་ཞིག་གོ་ཆ་འགོད་པའི་གཞིར་གཟུང་ངོ༌། །དགག་གཞག་རྒྱས་པར་ནི་ལཱུ་ཨི་པའི་སྒྲུབ་ཐབས་ཀྱི་རྣམ་བཤད་དུ་བཤད་ཟིན་ཏོ། །འོ་ན་དེ་ལ་འགོད་པའི་གོ་ཆ་ཡང་ཇི་ལྟ་བུ་སྙམ་ན། ལྭ་བ་པས་སྔགས་དང་ལྷ་རྣམས་ཐ་དད་མེད་པར་སྔགས་ཉིད་འགོད་པ་དང༌། ཡང་ན་སྔགས་རྣམས་ལས་བསྐྱེད་པའི་ལྷ་འགོད་པའི་ཚུལ་གཉིས་བཤད་དེ། པྲཛྙཱ་རཀྵི་ཏས་ཀྱང་དེ་བཞིན་དུ་བཤད་དོ། །གོ་ཆའི་ལྷའི་སྐུ་མདོག་ཕྱག་མཚན་རྣམས་ནི་སྒྲུབ་ཐབས་ལས་ཤེས་པར་བྱའོ། །རྩ་རྒྱུད་ཀྱི་གོ་ཆའི་སྔགས་ཇི་བཞིན་དུ་ཀུན་སྤྱོད་དང་སྡོམ་འབྱུང་ལས་ཀྱང་གསུངས་ལ། ལོ་དྲིལ་གཉིས་ཀྱི་གཞུང་དུ་ཡང་དེ་བཞིན་དུ་འབྱུང་ངོ༌། །ནག་པོ་པས་བཅུ་གཉིས་པོ་རེ་རེའི་ཐོག་མར་ཨོཾ་ཡིག་སྦྱར་བ་ནི་རྡོ་རྗེ་མཁའ་འགྲོ་ལ་བརྟེན་པའོ། །མངོན་བརྗོད་ལས། སྐུ་གསུང་ཐུགས་དམ་ཚིག་སོགས་ཀྱི་བདེ་མཆོག་རིགས་སོ་སོ་ལ་གོ་ཆ་གཉིས་ཀྱི་སྔགས་རྣམས་རྩ་རྒྱུད་དང་འདྲ་བ་དང་མི་འདྲ་བ་དུ་མ་ཞིག་བཤད་དོ། །གཉིས་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་དཔའ་བོ་དྲུག་གི་གོ་ཆའི་སྔགས་བཏུ་བའི་ལེའུ་སྟེ་དྲུག་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་
ལེའུ་དྲུག་པའི་བཤད་པའོ།། ༈ །།གསུམ་པ་རྩ་བའི་སྔགས་ཀྱི་དབྱངས་བཏུ་བ་ལ་བཞི། ཡན་ལག་གི་དབྱངས་བཏུ་བ་དངོས། བཏུས་པའི་རྩ་སྔགས་ཀྱི་ཆེ་བ། རྩ་སྔགས་ཀྱི་ཐོག་མཐའི་ཡི་གེ་བཏུ་བ། ལེའུ་ཡི་མཚན་བསྟན་པའོ། །དང་པོ་ལ་གཉིས། རྐང་བརྒྱད་ཀྱི་དབྱངས་བཏུ་བ་དང༌། ཀ་ར་སོགས་ཀྱི་དབྱངས་བཏུ་བའོ། །དང་པོ་ལ་གཉིས། རྐང་པ་སྔོན་མ་བཞིའི་དབྱངས་བཏུ་བ། ཕྱི་མ་བཞིའི་དབྱངས་བཏུ་བའོ། །དང་པོ་ནི། རྩ་སྔགས་ཀྱི་ལུས་བཏུས་པ་དེ་ནས་དབྱངས་ཡིག་བཅུ་གསུམ་པ་ཨོ། ལུས་བཏུས་པའི་ཡི་གེ་གཉིས་པ་མ་དང་སྦྱར་བས་མོའོ། །དབྱངས་ཡིག་བཅུ་གཅིག་པ་ཨེ་ཡང་དག་ལྡན་པ་སྟེ་སྦྱར་བ་ཡིས། བཏུས་པའི་ཡི་གེ་དྲུག་པ་ཏ་ལ་བརྒྱན་པར་བྱའོ། །དབྱངས་ཀྱི་བཞི་པ་ཨཱི་རིང་པོ་ཉིད་ཀྱང་ནི་ཡི་གེ་བདུན་པ་ཝ་དང་སྦྱར་རོ། །དབྱངས་ཡིག་བཅུ་གཅིག་པ་ཨེ་ནི་སྔགས་བཏུ་བ་ལ་མཁས་པས་ཡི་གེ་བརྒྱད་པ་ར་དང་སྦྱར་བར་བྱའོ། །དབྱངས་ཡིག་གཉིས་པ་ཨཱ་རིང་པོ་དང་ལྡན་པར། ཡི་གེ་དགུ་པ་ཤ་ལ་བརྒྱན་པར་བྱའོ། །དབྱངས་ཡིག་གཉིས་པ་ཨཱ་ནི་ཡི་གེ་བཅུ་གཉིས་པ་ཧ་དང་སྦྱར་རོ། །དབྱངས་ཡིག་གཉིས་པ་ཨཱ་རིང་པོ་དང་ལྡན་པར། ཀ་ནས་བགྲངས་པའི་ཡི་གེ་ཉི་ཤུ་རྩ་གཅིག་པ་བ་གཟུང་ལ། མཁས་པས་ཡི་གེ་བཅུ་བཞི་པ་ལ་ལ་གདགས་སོ། །ཡི་གེ་ཉི་ཤུ་པ་ན་དང་དབྱངས་ཀྱི་གསུམ་པ་ཨི་ཐུང་ངུ་ཉིད་སྦྱར་ལ། ནི་དེ་ཡི་གེ་བཅོ་ལྔ་པ་ག་དང་སྦྱར་བ་སྟེ་དེ་ལ་གདགས་སོ། །དབྱངས་ཡིག་བཅོ་ལྔ་པ་ཨཾ་དང་ཡང་དག་ལྡན་པ་སྟེ་སྦྱར་བས། ཡི་གེ་བཅུ་དྲུག་པས་
མཛེས་པར་བྱའོ། །དེ་ཡང་ཨ་ཡིག་བརྗོད་པའི་དོན་ཡིན་པས་ཕྱིས་ལ་ཐིག་ལེ་དེ་ས་ལ་སྦྱིན་ནོ། །དབྱངས་ཡིག་གསུམ་པ་ཨི་ཐུང་ངུ་དང་ལྡན་པའི་ཡི་གེ་བཅུ་བདུན་པ་ན་རུ་འདོད་དོ། །དབྱངས་ཀྱི་གཉིས་པ་ཨཱ་རིང་པོ་ནི་ཡི་གེ་བཅོ་བརྒྱད་པ་བྷ་རུ་སྦྱར་རོ། །དབྱངས་ཡིག་གཉིས་པ་ཨཱ་རིང་པོ་ནི་ཡི་གེ་ཉི་ཤུ་རྩ་གཅིག་པ་ཊར་སྦྱར་རོ། །དབྱངས་ཡིག་ལྔ་པ་ཨུ་ཐུང་ངུ་ནི་ཡི་གེ་ཉི་ཤུ་རྩ་གསུམ་པ་ཀར་སྦྱར་རོ། །དབྱངས་ཡིག་བཅུ་གསུམ་པ་ཨོ་ནི་ཡི་གེ་ཉི་ཤུ་བཞི་པ་ཊར་སྦྱར་རོ། །སྡེ་ཚན་དང་པོ་ཀ་སྡེའི་དང་པོ་ཀ་བླངས་ནས་ནི་ཡི་གེ་ཉི་ཤུ་ལྔ་པ་ཏ་ལ་སྦྱར་བ་སྟེ་གདགས་སོ། །དབྱངས་ཡིག་གཉིས་པ་ཨཱ་རིང་པོ་དང་ལྡན་པར་ཡི་གེ་ཉི་ཤུ་རྩ་དྲུག་པ་ཊར་འགྱུར་རོ། །ཡི་གེ་ཉི་ཤུ་རྩ་བརྒྱད་པ་ད་ཉིད་ནི་དབྱངས་ཡིག་བཅོ་ལྔ་པ་ཨཾ་དང་སྦྱར་ཏེ་ཨ་ཕྱིས་ལ་ཐིག་ལེ་ད་ལ་སྦྱིན་ནོ། །གསུམ་པ་ཊ་སྡེའི་དང་པོར་ཡང་དག་ལྡན་པའི་ཊ་ཡི་འོག་མའི་ཆ་སྟེ་འོག་ཏུ་ནི་མེ་སྟེ་ར་ཡིག་དང་བཅས་པའོ། །ཊ་ལ་ར་འདོགས་པ་དེ་བཞིན་དུ་དབྱངས་ཡིག་གཉིས་པ་ཨཱ་རིང་པོ་དང་སྦྱར་བའི་ཉི་ཤུ་རྩ་དགུ་པ་ཥའོ། །ཡི་གེ་སུམ་ཅུ་རྩ་གཅིག་པ་ར་ནི་དབྱངས་ཡིག་གཉིས་པ་ཨཱ་རིང་པོ་དང་སྦྱར་རོ། །ཡི་གེ་སུམ་ཅུ་རྩ་གཉིས་པ་ལ་ནི་དབྱངས་ཡིག་བཅུ་གསུམ་ཨོ་དང་སྦྱར་རོ། །ཡི་གེ་སུམ་ཅུ་རྩ་གསུམ་པ་ག་ཉི་མའི་ས་བོན་ར་དང་ལྡན་པར་བྱ་སྟེ་ར་སྟའོ། །དབྱངས་ཡིག་བཞི་པ་ཨཱི་རིང་པོ་ནི་ཡི་གེ་སུམ་ཅུ་རྩ་བཞི་པ་བྷར་ལྡན་པར་བྱ་བ་ནི། འདོད་པའི་དོན་ཀུན་སྒྲུབ་པར་བྱེད་
པ་ཡིན་ནོ། །དབྱངས་ཀྱི་ལྔ་པ་ཨུ་ཐུང་ངུ་ནི་ཡི་གེ་སུམ་ཅུ་རྩ་བདུན་པ་མ་དང་ལྡན་པས་ནི་མཁའ་འགྲོ་མ་རྣམས་ཀྱི་ཐུགས་རྒྱུད་བསྐུལ་ནས་དངོས་གྲུབ་རྣམས་སྒྲུབ་པར་བྱེད་པ་ཡིན་ནོ། །སུམ་ཅུ་རྩ་བརྒྱད་པ་ཁ་འདི་དབྱངས་ཡིག་གཉིས་པ་ཨཱ་རིང་པོ་དང་སྦྱར་རོ། །དཔའ་བོ་དང་དཔའ་མོའི་ལྷ་རྣམས་སྒྲུབ་པའི་རྒྱུ་ནི། སྔགས་ཀྱི་ཡི་གེ་འདི་ཉིད་ཡིན་པར་ཐེ་ཚོམ་མེད་དོ། །གཉིས་པ་ནི། སྔར་བཏུས་པའི་ཡི་གེ་བཞི་བཅུ་རྩ་གཉིས་པ་སའི་འོག་གི་ཆར་ནི་སྒྲུབ་པ་པོས་མེ་སྟེ་ར་དང་སྦྱར་ལ་ར་སྟར་བྱའོ། །བཞི་བཅུ་གསུམ་པ་བྷ་ནི་དབྱངས་ཡིག་ལྔ་པ་ཨུ་ཐུང་ངུ་དང་སྦྱར་རོ། །ཡི་གེ་བཞི་བཅུ་ལྔ་པ་བྷ་ནི་དབྱངས་ཡིག་གཉིས་པ་ཨཱ་རིང་པོ་དང་སྦྱར་རོ། །དབྱངས་ཡིག་ལྔ་པ་ཨུ་ཐུང་ངུ་ནི་བཞི་བཅུ་རྩ་དྲུག་པ་ས་དང་ལྡན་པར་བྱ་སྟེ། དཔའ་བོ་ཐམས་ཅད་རབ་ཏུ་མཆོད་པ་ཡིན་ནོ། །བཞི་བཅུ་རྩ་བདུན་པ་ར་ནི་དབྱངས་ཡིག་གཉིས་པ་ཨཱ་རིང་པོ་དང་སྦྱར་རོ། །སྔགས་འདི་དག་ནི་རྡོ་རྗེ་སེམས་དཔའ་མཆོག་གི་ངོ་བོ་ཡིན་ཏེ། སྔགས་དང་ལྷ་ཐ་མི་དད་པའི་ཕྱིར་རོ། །ཡི་གེ་ལྔ་བཅུ་རྩ་གཅིག་པ་ཤ་དབྱངས་ཡིག་ལྔ་པ་ཨུ་ཐུང་ངུས་མཛེས་པ་མཆོག་ནི་ཡིན་པར་འདོད་དོ། །ལྔ་བཅུ་རྩ་གཉིས་པ་པ་དབྱངས་ཡིག་གཉིས་པ་ཨཱ་རིང་པོ་དང་སྦྱར་བ་ནི་ལྷ་རྣམས་ཞེས་སོགས་སྔར་བཞིན་བཤད་དོ། །ང་གསུམ་པ་ཤའང་དབྱངས་བཅུ་གསུམ་པ་ཨོ་དང་སྦྱར་རོ། །ཡི་གེ་བཅུ་དྲུག་པ་ཤ་དབྱངས་ཡིག་དྲུག་པ་ཨཱུ་རིང་པོ་དང་སྦྱར་བ་ནི་དགྲ་རྣམས་ངེས་པར་གཅོད་པར་བྱེད་པ་ཡིན་ནོ། །ཨན་ཏསྠ་ཡི་བཞི་པ་ཝ་དང་དབྱངས་ཡིག་གཉིས་པ་སྦྱར་བ་ནི་ཝཱ་རིང་
པོའོ། །དེ་བཞིན་དུ་དབྱངས་ཡིག་བཅོ་ལྔ་པ་ཨཾ་དང་སྦྱར་བ་ནི་སྔར་ལྟར་ཏེ། དངོས་གྲུབ་ཐམས་ཅད་སྒྲུབ་པར་བྱེད་པ་ཡིན་ནོ། །ཡི་གེ་ལྔ་བཅུ་རྩ་དགུ་པ་ཊར་འགྱུར་བ་ནི་ཊའི་འོག་ཏུ་ཝ་སྟ་རིང་པོ་བྱ། ཐིག་ལེ་ཊའི་མགོར་བྱིན་པས་ཊཱཾ་ཞེས་པའོ། །ཡི་གེ་དྲུག་ཅུ་རྩ་གཅིག་པ་དྷ། དབྱངས་ཡིག་གཉིས་པ་ཨཱ་རིང་པོ་དང་སྦྱར་རོ། །སྔགས་འདི་ཉིད་ནི་མཆོག་ཡིན་པར་བཤད་དོ། །ཡི་གེ་རེ་གཉིས་པར་དབྱངས་ཡིག་གསུམ་པ་ཨི་ཐུང་བ་དང་སྦྱར་བ་ནི་མཁའ་འགྲོ་མ་ཡི་རིག་པའི་མཆོག་ཏུ་འདོད་དོ། །ཡི་གེ་རེ་གསུམ་པ་ཎ། དབྱངས་ཡིག་བཅུ་གཅིག་པ་ཨེ་དང་ལྡན་པའི་མཛེས་པའི་ཡི་གེ་ནི་ཀུན་གྱི་མཆོག་གོ། དེ་བཞིན་དུ་ཡི་གེ་རེ་ལྔ་པ་གྷ། རྡོ་རྗེ་སེམས་དཔའ་རས་ཕྱེ་བ་སྟེ་ར་སྟར་བྱས་པའི་ས་བོན་འདི་ནི་ལྷ་རྫས་ཏེ་བདུད་རྩིའི་མཆོག་དང༌། འཇིག་རྟེན་པའི་དངོས་གྲུབ་སྦྱིན་པ་དང༌། ཐར་པ་ཆེན་པོ་སྦྱིན་པའོ། །འདིར་ལོ་ཆེན་གྱི་རྩ་རྒྱུད་ཀྱི་འགྱུར་ལ་རེ་བཞི་པ་རྡོར་སེམས་ཀྱིས་ཕྱེ་བ་དང༌། དབྱངས་ཡིག་གཉིས་པར་ལྡན་པར་འབྱུང་ལ། མལ་གྱི་འགྱུར་ལ་རེ་བཞི་པ་དབྱངས་ཡིག་གཉིས་པ་དང་སྦྱར་བ་ཡོད་ཅིང༌། རྡོར་སེམས་ཀྱིས་ཕྱེ་བ་མེད། མར་དོའི་འགྱུར་གཉིས་ཀ་ལ་རེ་བཞི་པ་ལ་བཤད་པ་མེད་དོ། །དེ་ལྟར་མི་མཐུན་ཀྱང་མལ་གྱི་ལྟར་ལེགས་པ་འདྲའོ། །མངོན་བརྗོད་རྣམས་དང༌། ལོ་ཆེན་གྱི་འགྱུར་ལས་རེ་བཞི་པ་རྡོར་སེམས་ཀྱིས་ཕྱེ་བ་དང༌། རེ་ལྔ་པ་དབྱངས་གསུམ་པ་དང་སྦྱོར་བ་མ་དག་ལ། རེ་བཞི་པ་དབྱངས་གཉིས་པ་དང་སྦྱོར་བ་
དག་པ་འདྲའོ། །རེ་དྲུག་པ་ཛ་དབྱངས་གསུམ་པ་ཨི་དང་སྦྱར་རོ། །སྔར་དེ་དག་ནི་བྱ་བ་ཀུན་ལ་གྲུབ་པ་སྦྱིན་པ་དེ་ལྟར་དེ་བཞིན་གཤེགས་པས་གསུངས་སོ། །ཡི་གེ་རེ་བདུན་པ་ན་དབྱངས་ཀྱི་གཉིས་པ་ཨཱ་རིང་པོ་དང་ལྡན་པ་སྟེ་སྦྱར་བ་ནི་རྣལ་འབྱོར་མ་ཡི་དགོངས་པ་ཀུན་སྐོང་བ་འདི་ཉིད་ཡིན་པར་ཐེ་ཚོམ་མེད་དོ། །རེ་བརྒྱད་པ་མ་དེར་ནི་བ་སྦྱར་ཏེ། ས་བོན་གྱི་ཡི་གེ་མ་འདི་ཡི་འོག་གི་ཆར་ནི་བཏགས་པ་སྟེ་གདགས་པར་བྱའོ། །ཡི་གེ་དོན་གཅིག་པ་ར་ལ་དབྱངས་ཡིག་གཉིས་པ་ཨཱ་སྦྱར་རོ། །ཡི་གེ་ཀུན་ལ་མཛེས་པ་ནི་དེ་མ་ཐག་པ་འདི་ཉིད་ཡིན་པར་ཐེ་ཚོམ་མེད་དོ། །དོན་བཞི་པ་ཧ་ནི་དབྱངས་ཡིག་གཉིས་པར་སྦྱར་བ་དག་གདོད་ནས་དངོས་གྲུབ་སྒྲུབ་པར་བྱེད་པ་ཡིན་པར་དེ་བཞིན་གཤེགས་པའི་ཞལ་ནས་གསུངས་སོ། །དོན་ལྔ་པ་དྷ་མ་མོ་སྟེ་དབྱངས་ཀྱི་དྲུག་པ་ཨཱུ་དང་ལྡན་པ་འདི་ནི་བྱ་བ་སྒྲུབ་པ་ཀུན་ལ་རྣལ་འབྱོར་རབ་མཆོག་དམ་པ་ཡིན་ནོ། །དོན་དྲུག་པ་ནི་མའོ། །ཡི་གེ་བ་མ་དེའི་འོག་ཏུ་སྦྱར་ལ། ཉི་མ་སྟེ་ར་ཡིས་ནི་དབྱེ་བ་སྟེ་པ་དེ་ལ་གདགས་སོ། །དབྱངས་ཡིག་གཉིས་པ་ཨཱ་རིང་པོ་དང་ལྡན་པའི་མེའི་ས་བོན་དེ་ལས་གཞན་པའི་མཆོག་ཏུ་མཛེས་པ་ཡོད་པ་མིན་ནོ། །མར་དོའི་འགྱུར་གཞན་ལས། ཡི་གེ་བ་ནི་དེ་སྦྱར་བྱ། ཞེས་འབྱུང་ངོ༌། །ཡི་གེ་དོན་བདུན་པ་ནའོ། །ན་དེར་ནི་འོག་ཏུ་དྷ་དང་སྦྱར་བར་བྱའོ། །ས་བོན་གྱི་སྔགས་འདི་ནི་ལྷ་རྫས་ཀྱི་མཆོག་མཁའ་འགྲོ་མ་ཡི་མཛེས་པར་འདོད་དོ། །ཡི་གེ་དོན་བརྒྱད་པ་ཀ་ནི་དབྱངས་ཡིག་གཉིས་པ་དང་སྦྱར་བའི་ས་བོན་འདི་ནི་མཆོག་ཏུ་བཟང་པོ་དངོས་གྲུབ་ཀྱི་རྒྱུའི་མཆོག་ནི་ཡིན་
པར་འདོད་དོ། །ཡི་གེ་གྱ་གཅིག་པ་པ་ནི་དབྱངས་ཀྱི་བཞི་པ་ཨཱི། དེའི་མཐའ་ཨུ་ཡིས་ཁྱད་པར་དུ་བྱེད་པས་པུའོ། །འདི་ནི་གདོད་མ་ནས་དངོས་གྲུབ་སྒྲུབ་པར་བྱེད་པ་ཡིན་ཏེ། དངོས་གྲུབ་ཀུན་ལ་འཇུག་པར་བྱེད་པའོ། །ཡི་གེ་གྱ་གཉིས་པ་ཥ། དབྱངས་ཀྱི་གཉིས་པ་ཨཱ་རིང་པོར་དང་སྦྱར་བས་ཥཱའོ། །འགྱུར་གཞན་ལ་དེ་ཡན་ཆད་ལས་དབྱངས་ཐུ་བ་མེད་ཀྱང༌། ལོ་ཙཱ་བ་གཉིས་འདུས་ཀྱི་འགྱུར་དང་མངོན་བརྗོད་ལས་ཀ་ར་སོགས་ཀྱི་དབྱངས་ཐུ་བ་ཡང་བཤད་པས། འདིར་དེ་ལྟར་བཤད་པར་བྱའོ།། །གཉིས་པ་ལ་གསུམ། བརྒྱད་ཚན་དང་པོའི་དབྱངས་ཐུ་བ། བརྒྱད་ཚན་བར་པའི་དབྱངས་ཐུ་བ། བརྒྱད་ཚན་ཐ་མའི་དབྱངས་བཏུ་བའོ། །དང་པོ་ནི། རྐང་བརྒྱད་ཀྱི་ལུས་བཏུས་པ་དབྱངས་དང་སྦྱར་བ་དེ་བཞིན་དུ་ཀ་ར་སོགས་ཀྱི་ལུས་བཏུས་པ་ཡང་དབྱངས་དང་སྦྱར་རོ། །མ་མོ་སྟེ་དབྱངས་རྣམས་ལས་ལྔ་པ་ཨུ་ཐུང་ངུ་བཏུས་པའི་ཡི་གེ་བརྒྱད་ཅུ་རྩ་བརྒྱད་པ་ཀ་ལ་སྦྱར་བས་ཀུའོ། །འདིར་མ་མོ་ཞེས་པ་རྣམས་དབྱངས་ལ་བྱའོ། །རྐང་བརྒྱད་ཀྱི་ལུས་བཏུས་པའི་ཡི་གེའི་སྟེང་དུ་ཀ་ར་ཀ་ར་བསྣན་པའི་དབང་དུ་མཛད་ནས་འདིར་གྱ་བརྒྱད་པ་ཞེས་གསུངས་སོ། །མ་མོ་རྣམས་ལས་ལྔ་པ་ཨུ་ཉིད་ཡི་གེ་གྱ་དགུ་པར་ལ་སྦྱར་རོ། །དེ་བཞིན་དུ་མ་མོ་རྣམས་ལས་ལྔ་པ་ཨུ་ཉིད་ཡི་གེ་དགུ་བཅུ་པ་ཀ་ལ་སྦྱར་རོ། །མ་མོའི་ལྔ་པ་ཨུ་ཡི་གེ་གོ་གཅིག་པ་ར་དང་སྦྱར་རོ། །མ་མོ་རྣམས་ཀྱི་གཉིས་པ་ཨཱ་ནི་ཡི་གེ་གོ་དྲུག་པ་ཏྲ་དང་སྦྱར། ཡང་དབྱངས་ཀྱི་གཉིས་པ་དང་ཡི་
གེ་གོ་དགུ་པ་ཏྲ་གཉིས་སྦྱར་བའི་ཏཱ་ས་ཡ་ནི་གདུག་པ་རྣམས་སྐྲག་པར་བྱེད་ཅིང༌། སྔགས་པ་རྣམས་ལ་བདེ་བ་འབྱུང་བར་བྱེད་པའོ། །མངོན་བརྗོད་རྣམས་ལས། མ་མོ་ཀུན་གྱི་བདེ་བའི་གནས། ཞེས་འབྱུང་ངོ༌། །དེ་ལྟར་ན་ཏྲཱ་ས་ཕྱི་མའི་ས་ནི་ཡི་གེ་བརྒྱ་པའོ། །ཡི་གེ་བརྒྱ་རྫོགས་ནས་སླར་ཡང་གཅིག་ནས་འདྲེན་པ་ལ་ཡ་ཡིག་གཅིག་ཏུ་བྱའོ། །དབྱངས་རྣམས་ཀྱི་བཅུ་གསུམ་པ་ཨོ་ནི་ཡ་ནས་བགྲངས་པའི་ཡི་གེ་གཉིས་པ་ཀྵ་དང་ལྡན་པར་བྱའོ། །དབྱངས་ལས་བཅུ་གསུམ་པ་ཨོ་ནི་ཡ་ནས་བགྲངས་པའི་ལྔ་པ་ཀྵ་ཕྱི་མ་དང་ལྡན་པ་ནི། ཀྵ་ཡང་ཀ་ར་ཞེས་གདུག་པ་རྣམས་ནི་ཟད་པར་བྱེད་ཅིང༌། མཁའ་འགྲོ་མ་རྣམས་ཀྱི་བདེ་བ་འབབ་པའི་གནས་སོ། །མ་མོ་རྣམས་ཀྱི་བདེ་བ་ཡང་དེ་བཞིན་ནོ། །དབྱངས་རྣམས་ལས་བཅུ་བཞི་པ་ཨཽ། ཡི་གེ་བརྒྱད་པ་ཧྲ་དང་ལྡན་པར་བྱ་ལ། དེ་ཉིད་དབྱངས་ཀྱི་བཅོ་ལྔ་པ་ཨཾ་གི་ཨ་ཕྱིས་ནས་ཐིག་ལེའི་གདན་དུ་བྱས་པའོ། །དབྱངས་ལས་བཅུ་བཞི་པ་ཨཽ་ནི། ཡི་གེ་དགུ་པ་ཧྲར་ལྡན་པའི་སྤྱི་བོར་ཐིག་ལེས་མཚན་པ་ནི་སྒྲུབ་པ་པོ་ལ་མཁའ་འགྲོ་མ་རྣམས་ཁྱད་པར་དུ་དགའ་བར་བྱེད་པའོ། །དབྱངས་ལས་བཅུ་གཅིག་པ་ཨེ། ཡི་གེ་བཅུ་གཉིས་པ་དང་ལྡན་ཞིང་སྤྱི་བོར་ཐིག་ལེས་མཚན་པས་ཕཻཾ་སྟེ་ཕཻཾ་གཉིས་པ་ཡང་དེ་བཞིན་ནོ། །གཉིས་པ་ནི། །དབྱངས་རྣམས་ལས་ལྔ་པ་ཨུ། ཡི་གེ་སོ་གཉིས་པ་རར་ལྡན་ནོ། །ར་སོགས་གཉིས་པར་འཇོག་པ་ནི་ཕཊ་གཉིས་ཀྱི་ཕ་དང་ཊ་སོ་སོར་བགྲངས་པ་ཡིན་གསུང་ངོ༌། །དབྱངས་གསུམ་པ་ཨི། ཡི་གེ་སོ་གསུམ་པ་དྷར་ལྡན་པས་དྷིའོ། །དབྱངས་ཀྱི་གཉིས་
པ་ཨཱ། ཡི་གེ་སོ་བཞི་པ་རར་ལྡན་པ་དང༌། དབྱངས་ཀྱི་གཉིས་པ་སོ་དྲུག་པ་མར་ལྡན་པ་དང༌། ཐོག་མ་དབྱངས་སྡེའི་གཉིས་པར་ལྡན་པའི་ཡི་གེ་སོ་བདུན་པ་ལ་དང༌། དབྱངས་ལས་གསུམ་པ་ཨི་དང་ལྡན་པའི་ཡི་གེ་བཞི་བཅུ་པ་བ་དང༌། མ་མོ་བཅུ་གཅིག་པ་ཨེ་དང་ལྡན་པའི་ཡི་གེ་ཞེ་གཅིག་པ་ན་དང༌། དབྱངས་ལས་གསུམ་པ་ཨི། ཡི་གེ་ཞེ་གཉིས་པ་གྲར་ལྡན་ཞེས་པ་དང༌། དབྱངས་གསུམ་པ་ཞེ་བཞི་པར་ལྡན་ཞེས་པ་གཉིས་རྒྱ་གར་གྱི་དཔེ་མ་དག་པ་ལས་བསྒྱུར་བ་སྟེ། མངོན་བརྗོད་ལས། དབྱངས་ཀྱི་ཡི་གེ་བདུན་པ་ནི། །ཡི་གེ་བཞི་བཅུ་གཉིས་པར་སྦྱར། །དབྱངས་ཀྱི་བདུན་པ་ཉིད་དང་ནི། །ཡི་གེ་བཞི་བཅུ་བཞི་པར་སྦྱར། ཞེས་པ་དག་སྟེ། དབྱངས་ཀྱི་བདུན་པ་རྀ། ཡི་གེ་བཞི་བཅུ་པ་ག་ལ་སྦྱར་ལ་ར་ཕྱི། གྲྀ་ཞེས་པ་དག་སྟེ། སྡོམ་འབྱུང་སོགས་ནས་ཀྱང་དེ་བཞིན་དུ་བཏུས་པའི་ཕྱིར་རོ། ཞེས་གསུང་པ་ནི་རང་གིས་སྔར་ལུས་ཐུ་བའི་སྐབས་སུ་ག་ཡིག་ར་དང་སྦྱར་བ་དང་འགལ་ཞིང༌། འབྲོག་མི་དང་ཁྱུང་པོ་སོགས་ཀྱི་བསྒྱུར་བའི་མངོན་བརྗོད་མང་པོ་ལས་ཀྱང༌། ལུས་ཐུ་བའི་སྐབས་སུ་ག་ཡིག་གཉིས་ར་དང་སྦྱར་སྣང་ལ། རྩ་རྒྱུད་ཀྱི་ལེའུ་སུམ་ཅུ་པ་ལས་ཀྱང་ག་ར་དང་སྦྱར་ནས་ཨི་ཡིག་བྱིན་འདུག་ཅིང༌། འགྲེལ་པ་རྣམས་ལས་ཀྱང་དེ་དང་མཐུན་པར་འཆད་པར་འདུག་པས། རྩ་རྒྱུད་དུ་གྲ་གཉིས་ལ་ཨི་སྟེར་བ་དག་པ་ཡིན་གྱི། རྀ་སྟེར་བ་དག་པ་མིན་ནོ། །དེས་ན། དབྱངས་ཀྱི་ཡི་གེ་བདུན་པ་ནི། ཞེས་སོགས་མངོན་བརྗོད་ལ་ཡོད་ན། རྒྱུད་
དེར་ལུས་ཐུ་བའི་སྐབས་སུ་ཇི་ལྟར་ཡོད་བརྟག་དགོས་སོ། །མངོན་བརྗོད་མང་པོ་ལས་དབྱངས་ཀྱི་གཉིས་པ་ཡི་གེ་ཞེ་གཉིས་པ་དང་སྦྱར། ཞེས་པ་ནི་ལོ་ཙཱ་བ་གཉིས་འདུས་ཀྱི་འགྱུར་ལས། དབྱངས་ཀྱི་གསུམ་པར་འབྱུང་བ་དག་གོ། སྤྱིར་ན་སྡོམ་འབྱུང་ནས་ག་རྀ་དང་སྦྱར་བ་ཡང་བཏུས་འདུག་པས་ཚུལ་གཉིས་ཡོད་པ་ཤེས་པར་བྱའོ། །མ་མོ་ལས་ནི་གཉིས་པ་ཉིད་ཡི་གེ་ཞེ་བརྒྱད་པ་པར་ལྡན་པ་དང༌། དབྱངས་གཉིས་པ་ཡི་གེ་ཞེ་དགུ་པ་ཏར་ལྡན་པ་དང༌། མ་མོའི་ལྔ་པ་ཨུ། ཡི་གེ་ང་གསུམ་པ་བྷར་ལྡན་པ་དང༌། ཡི་གེ་ང་བཞི་པ་ཛ། ཐིག་ལེ་ཀྱང་ནི་རྣམ་པར་བརྒྱན་པའོ། །ཡི་གེ་ང་ལྔ་པ་ག་ལ་སྤྱི་བོར་ཐིག་ལེས་མཚན་པ་ལ། དབྱངས་ཀྱི་གཉིས་པ་ཨ་སྦྱར་བ་དང༌། ཡི་གེ་ང་བདུན་པ་རྦ་སྤྱི་བོར་ཐིག་ལེས་མནན་པ་དབྱངས་ཀྱི་གཉིས་པ་དང་སྦྱར་བ་དང༌། ཡི་གེ་ང་བརྒྱད་པ་བ་ནི་མ་མོའི་གཉིས་པ་དང་སྦྱར་བ་དང༌། མ་མོ་གཉིས་པ་ཨཱ་ཉིད་ནི་ཡི་གེ་དྲུག་ཅུ་རྩ་ལྔ་པ་ཨ་ལ་སྦྱར་རོ། །མ་མོའི་གཉིས་པ་རེ་བརྒྱད་པ་ཨར་ལྡན་པ་ནི། དངོས་གྲུབ་ཐམས་ཅད་འགུགས་པར་བྱེད་ཅིང༌། སྒྲུབ་པ་པོ་རྣམས་ལ་དཔལ་ཏེ་ཕུན་ཚོགས་སྦྱིན་པའོ། །མ་མོའི་བཞི་པ་ཨཱི་ཉིད་ཡི་གེ་དོན་གཅིག་པ་ཧྲ་ལ་ལྡན་ཞིང༌། ཐིག་ལེས་ཀྱང་ནི་རྣམ་པར་བརྒྱན་ནོ། །མ་མོའི་བཞི་པ་ཨཱི་ཡི་གེ་དོན་གཉིས་པ་ཧྲ་ལ་ལྡན་པའི་མགོར་ཐིག་ལེ་ཡིས་ནི་མཉམ་པར་མནན་པ་ནི། སེམས་ཅན་ཐམས་ཅད་དབང་དུ་བྱེད་པའོ། །དབྱངས་ཀྱི་བཅུ་བཞི་པ་ཨཽ་དང་ངེས་པར་ལྡན་པའི་ཡི་གེ་དོན་གསུམ་པ་ཛྞཽའོ། །མ་མོའི་བཅུ་བཞི་པ་ཨཽ་ཡི་གེ་དོན་བཞི་པ་ཛྞར་ལྡན་པ་སྟེ་
སྦྱར་བས་ཛྞཽའོ། །ཧྲི་ཧྲིལ་ཐིག་ལེས་བརྒྱན་པ་དེ་བཞིན་དུ། ཛྞཽ་གཉིས་ལ་ཡང་ཐིག་ལེས་བརྒྱན་ནོ། །གསུམ་པ་ནི། དབྱངས་ཀྱི་གཉིས་པ་ཨཱ། ཡི་གེ་དོན་ལྔ་པ་ཀྵྨར་ལྡན་པ་སཀྵྨཱའོ། །འདིར་ལོ་ཙཱ་བ་གཉིས་འདུས་ཀྱི་འགྱུར་ལཀྵྨཱིའི་ཐིག་ལེ་དང༌། དོན་དྲུག་པ་དང་དོན་བདུན་པ་ཆད་ཅིང༌། མ་མོ་ལས་ནི་གཉིས་པ་ཉིད། །ཡི་གེ་བདུན་ཅུ་བརྒྱད་པར་ལྡན། །སྟེང་དུ་ཐིག་ལེས་མཚན་པའོ། ཞེས་པ་ལ་མངོན་བརྗོད་འབྲོག་འགྱུར་ལས། ཡི་གེ་བདུན་ཅུ་ལྔ་དང་སྦྱར། །ཐིག་ལེས་ཀྱང་ནི་རྣམ་པར་བརྒྱན། ཕྱི་མོ་ཡི་ནི་གཉིས་པ་ཡང༌། །ཡི་གེ་བདུན་ཅུ་དྲུག་དང་སྦྱར། །ཐིག་ལེ་གཉིས་ཀྱིས་ཡང་དག་བརྒྱན། །ཕྱི་མོ་ཡི་ནི་གཉིས་པ་ཡང༌། །ཡི་གེ་བདུན་ཅུ་བདུན་དང་སྦྱར། །མ་མོའི་བཞི་པ་ཉིད་དང་ནི། །ཡི་གེ་བདུན་ཅུ་བརྒྱད་དང་སྦྱར། །ཐིག་ལེས་མགོ་ལ་མནན་པར་བྱ། །དབྱངས་ཡིག་བཞི་པ་དག་ཀྱང་ནི། །ཡི་གེ་བདུན་ཅུ་དགུ་དང་སྦྱར། །ཐིག་ལེ་སྒྲ་ཡིས་བསྐྱེད་པ་སྟེ། །ཐིག་ལེས་ཀྱང་ནི་རྣམ་པར་བརྒྱན། ཞེས་འབྱུང་ངོ༌། །དེའི་རྐང་པ་གཉིས་པས་ཀྵ་སྔ་མའི་ཐིག་ལེ་བསྟན། ཕྱི་མོ་གཉིས་པ་དོན་དྲུག་པ་དང་སྦྱར་ཞེས་པས་ཀྵ་གཉིས་པ་བསྟན་ཏེ། ཀྱང་གྱི་སྒྲས་ཕྱི་མ་ལ་ཡང་ཐིག་ལེས་བརྒྱན་པར་སྟོན་ནོ། །དབྱངས་ཀྱི་གཉིས་པ་དོན་བདུན་པ་དང་སྦྱར་ཞེས་པས་ཧཱ་བསྟན་ཏེ། དེ་ལ་ཐིག་ལེ་གཉིས་ཀྱིས་བརྒྱན་པར་བསྟན་པས་ཧཱཾ་གཉིས་སུ་འགྱུར་རོ། །མ་མོ་བཞི་པ་དང་སྦྱར་བའི་དོན་བརྒྱད་པ་དང༌། དོན་དགུ་པ་གཉིས་ཀྱི་སྔ་མ་ལ་ཐིག་ལེས་མནན་པས་ཧཱིཾ་སྔ་མ་དང༌།
ཕྱི་མ་ལ་ཐིག་ལེས་བརྒྱན་པས་ཧཱིཾ་ཕྱི་མའོ། །ཐིག་ལེ་སྒྲ་ཡིས་བསྐྱེད་པ་ནི། །ཐིག་ལེ་ཡིས་སྒྲ་ནཱ་ད་བསྐྱེད་པའི་དོན་ཏེ། ཐིག་ལེ་ནཱ་ད་དང་ལྡན་པར་བྱའོ། །དབྱངས་རྣམས་ལས་དྲུག་པ་ཨཱུ་ཉིད། རྟའི་རྒྱལ་པོ་དོན་གྲུབ་པ་ལ་བཤད་པ་མང་ཞིང༌། སྐྱེད་པ་ནི་དེའི་ས་བོན་ཧ་ལ་བཤད་པ་མང་བས་ཧ་དེ་ལ་སྦྱར་ལ། སྟེང་དུ་ཐིག་ལེ་དང་ནཱ་དས་བརྒྱན་པས་ཧཱུཾ་སྟེ་འདི་ལ་གཉིས་སུ་བྱས་པས་བརྒྱད་ཅུ་པ་དང༌། གྱ་གཅིག་པའོ། །སྔར་འདིའི་ལུས་ཐུ་བའི་སྐབས་སུ། ལྔ་པའི་བདག་ཉིད་ཡོངས་བཏུས་ལ། ཞེས་ཐུ་ཚུལ་མི་གསལ་བ་འདིར་གསལ་བར་མཛད་ཅིང༌། ཡང་ནི་དེ་ལ་གཉིས་པར་ངེས། ཞེས་གསུངས་པས་འདིར་ཧཱུཾ་གཉིས་བྱ་དགོས་སོ། །འདིར་ཧཱུཾ་ཐུ་བ་མངོན་བརྗོད་རྣམས་ལ་ཆད་ཀྱང༌། གཉིས་འདུས་ཀྱི་འགྱུར་ལ་འབྱུང་བ་ལེགས་སོ། །དབྱངས་ཀྱི་གསུམ་པ་ཨི། ཀ་ལ་ནས་དྷ་ལའི་བར་གྱི་ཡི་གེ་བཅུ་དྲུག་ལ་ལྡན་པ་སྟེ་སྦྱར་བས་ཀི་ལི་སོགས་སུ་འགྱུར་རོ། །དེ་ལྟར་ན་ལུས་ཀྱི་ཡི་གེའི་གྲངས་ནི་བརྒྱའི་སྟེང་དུ། དགུ་བཅུ་རྩ་བརྒྱད་དུ་གཉིས་འདུས་ཀྱི་འགྱུར་ལས་འབྱུང་ངོ༌། །མངོན་བརྗོད་རྣམས་ལས་གོ་བདུན་དུ་འབྱུང་བ་ལྟར་ན། ཧཱཾ་གཅིག་ཆད་པར་འགྱུར་བས་གོ་བརྒྱད་དུ་བྱ་ལ། དོན་བདུན་པའི་སྔོན་དང་རྗེས་གཉིས་ཀར་ཧཱཾ་གཉིས་པ་འོང་ས་མི་འདུག་པས། དོན་བདུན་པའི་སྐབས་སུ་ཧཱཾ་གཉིས་ཀ་ཡོད་པ་སྔར་བཤད་པ་ལྟར་བྱ་དགོས་པར་མངོན་ནོ། །མ་མོ་རྣམས་ལས་ལྔ་པ་ཉིད། ཅེས་པ་ནས། དགུ་བཅུ་དང་ནི་རྩ་བརྒྱད་པའོ། ཞེས་པའི་བར་ལོ་ཙཱ་བ་གཉིས་འདུས་
ཀྱི་འགྱུར་ལ་འབྱུང་བ་ནི། སྐབས་འདིར་བཤད་པའི་ཆེད་དུ་བྲིས་ཀྱི་མར་དོ་རྐྱང་པའི་འགྱུར་ལ་དཀྱུས་ལ་གཞུག་པར་མི་བྱའོ། །དེ་ལྟར་དབྱངས་གསལ་གྱི་སྒོ་ནས་བཏུས་པ་འདི་ནི། རེའུ་མིག་དག་ལས་བཏུས་པ་དཔལ་ཧེ་རུ་ཀ་མགོན་པོའི་རྩ་བའི་སྔགས་མཆོག་ཏུ་ཤེས་པར་བྱའོ། །རེའུ་མིག་གི་སྐད་དོད་བཀོད་པ་ལ་ཡང་འཇུག་ཅེས་གསུང་པས། བཏུ་གཞི་ལ་དབྱངས་གསལ་བཀོད་པ་ལས་བཏུས་པའི་དོན་ནོ། །གཉིས་པ་ནི། རྩ་བའི་སྔགས་རྒྱས་པ་འདི་ནི་འདས་མ་འདས་ཀྱི་དངོས་གྲུབ་ཀུན་འགྲུབ་པའི་གནས་སམ་གཞི་ཡིན་ཞིང༌། བརྗོད་པ་ཙམ་གྱིས་འཇིགས་པ་རྣམས་ཀྱང་འཇིགས་པར་བྱེད་པའི་མཁའ་འགྲོ་མ་ཐམས་ཅད་ཀྱི་སྙིང་འཇོམས་པ་སྟེ་སྐྲག་པར་བྱེད་པ་ཡིན་ནོ། །སྐལ་ལྡན་ནི་སྙིང་འཇོམས་པ་སྟེ་སྙིང་འདྲེན་ཞིང༌རང་གི་དབང་དུ་བྱེད་པར་སྒྲུབ་པ་ཡིན་ནོ། །ཞེས་བཞེད་དོ། །དཔལ་ལྡན་ཁྲག་འཐུང་གི་ལྟ་རིག་པའི་རྒྱལ་པོའི་སྔགས་འདི་ནི་ཀླགས་པ་ཙམ་གྱིས་འགྲུབ་པ་འདོད་པའི་དོན་ཡོད་པར་བྱེད་པའོ། །གསུམ་པ་ནི། ཡི་གེ་ཨོཾ་ནི་རྩ་སྔགས་ཀྱི་དང་པོར་སྦྱར་ཏེ། ཧཱུཾ་ཧཱུཾ་ཕཊ་ནི་དེའི་མཐའ་མར་སྦྱར་བ་ནི་རྩ་སྔགས་ཏེ། སྔགས་འདི་ནི་དངོས་གྲུབ་ཐམས་ཅད་སྒྲུབ་པར་བྱེད་པ་ཡིན་ནོ། །ཧཱུཾ་གཉིས་ནི་རིང་པོ་ཡིན་པར་བཤད་དོ། །བཞི་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྩ་པའི་སྔགས་ཀྱི་དབྱངས་བཏུ་བའི་ཆོ་ག་སྟེ་བྱ་ཐབས་ཀྱི་ལེའུ་སྟེ་བདུན་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་
ལས་ལེའུ་བདུན་པའི་བཤད་པའོ།། ༈ །།བཞི་པ་གོ་བཟློག་པའི་སྙིང་པོ་དང་དཔའ་མོའི་གོ་ཆའི་སྔགས་བཏུ་བ་ལ་བཞི། སྙིང་པོའི་སྔགས་དང༌། གོ་ཆའི་སྔགས་རིན་ཆེན་བཞི་དང་བཅས་པ་དང༌། སྔགས་ཀྱི་རྗེས་གནང་བྱ་ཚུལ། ལེའུ་ཡི་མཚན་ནོ། །དང་པོ་ནི། རྩ་སྔགས་ཀྱི་དབྱངས་བཏུས་པ་དེ་ནས་སྙིང་པོ་དང་གོ་ཆའི་སྔགས་བཏུ་བ་སྟོན་ནོ། །ཧེ་རུ་ཀ་རང་གི་བདག་ཉིད་ཀྱི་སྔགས་རྣམས་དཔའ་བོ་ཉེར་བཞི་པོ་ཐམས་ཅད་དང་མཉམ་པར་སྦྱོར་བའི་མཁའ་འགྲོ་མ་ཉེར་བཞི་ཡི་དྲ་བ་སྟེ་ཚོགས་ཀྱི་རང་བཞིན་ནོ། །དེ་ཐམས་ཅད་སྡོམ་པར་བྱེད་པ་ནི་འཁོར་ལོ་བདེ་མཆོག་ཡིན་པར་འདོད་དོ། །ཌཱ་ཀི་ནི་ཛཱ་ལ་སཾ་བ་ར་དང་ཧེ་རུ་ཀཾ་གི་དོན་ནོ། །དེ་འདྲ་བའི་སྔགས་ནི་ཧཱ་སྭཱ་ཞེས་སོགས་ཏེ་གོ་རིམ་བཞིན་བཤད་པ་ནི། འདིའི་སྔགས་བཏུ་བར་ཡང་བཤད་དོ། །ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ་ཌཱ་ཀི་ནི་ཛཱ་ལ་སཾ་བ་རཾ་སྭཱ་ཧཱ་ཞེས་པའོ། །འདི་ལ་ཡི་གེ་ཉེར་གཉིས་སུ་བྱེད་ལུགས་ལ་ཁ་ཅིག་བ་དང་ཛྲ་གཉིས་སུ་བྱེད། ཁ་ཅིག་ཕ་དང་ཊ་གཉིས་སུ་བྱེད་དོ། །རིག་པའི་རྒྱལ་པོ་ཧེ་རུ་ཀའི་སྙིང་པ་འདི་ནི། རྒྱུད་གཞན་དུ་སྔར་མ་བྱུང་ཞིང་ཕྱིས་འབྱུང་བར་མི་འགྱུར་བ་བདག་གིས་ད་ལྟ་བཤད། ཅེས་སྔགས་དཀོན་པའི་ཆེ་བ་བསྟན་ཏོ། །གཉིས་པ་ནི། རྣལ་འབྱོར་མ་དྲུག་གི་ས་བོན་ནི། ཊ་ཕ་ནས་ཨོཾ་གྱི་བར་དུ་དྲུག་ཡིན་ལ། སྔགས་ཐུ་བ་ན་གོ་རིམ་མ་འཆོལ་བར་ཨོཾ་ཧཾ་ཧྲིཾ་ཧྲི་ཧཱུཾ་ཕཊ་ཅེས་པའོ། །དེ་རྣམས་ཡི་གེ་བཾ་དང་ཡོཾ་དང༌། ཡི་གེ་མོཾ་དང་ཧྲིཾ་དང་ཧཱུཾ་དང་ཕཊ་ཅེས་པ་དང་སྦྱར་ཏེ། ཨོཾ་བཾ་ཧཾ་ཡོཾ་ཧྲིཾ་མོཾ་ཧྲིཾ་ཧྲིཾ་ཧཱུཾ་ཧཱུཾ་ཕཊ་ཕཊ་ཅེས་སྦྱར་བའོ། །སྔགས་དེ་དྲུག་ནི་གོ་ཆའི་རྣལ་འབྱོར་
མ་ནི་དྲུག་ཏུ་བཤད་དེ། སྔགས་དང་ལྷ་ཐ་མི་དད་པའི་ཕྱིར་རོ། །སྡོམ་འབྱུང་ལས། སྔགས་ཉིད་རྣལ་འབྱོར་མ་ཡི་གཟུགས། །སྔགས་ཀྱི་གཟུགས་ཅན་རྣལ་འབྱོར་མ། །གལ་ཏེ་གོ་འཕང་མཆོག་འདོད་ན། །དེ་དག་དབྱེ་བ་བརྟག་མི་བྱ། ཞེས་གསུངས་པ་ལྟར་རོ། །སྐབས་འདིར་ལོ་ཆེན་དང་མལ་གྱི་འགྱུར་ལ། ཨོཾ་བཛྲ་བཻ་རོ་ཙ་ནཱི་ཡེ་ཧུཾ་ཧུཾ་ཕཊ་སྭཱ་ཧཱ། ཞེས་འབྱུང་ལ། ལོ་ཙཱ་བ་གཉིས་འདུས་ཀྱི་འགྱུར་ལ། ཨོཾ་བཛྲ་བཻ་རོ་ཙ་ནཱི་ཡེ་སྭཱ་ཧཱ། ཞེས་འབྱུང་བ་ལ། སྐལ་ལྡན་དང་དཔའ་བོ་རྡོ་རྗེའི་འགྲེལ་པར་འགྱུར་སྔ་མ་བཞིན་འབྱུང་ལ། ལངྐ་དང་བྷ་བ་བྷ་དྲའི་འགྲེལ་པར་ཕྱི་མ་བཞིན་དུ་ཡོད་དོ། །སྐལ་ལྡན་དང་ལངྐ་དང༌། དཔའ་བོ་དང༌། བྷ་བ་བྷ་དྲས་ཡུམ་གྱི་ཉེ་སྙིང་དུ་བཤད་ལ། དཀའ་རྒྱལ་ཟླ་བས་སྙིང་པོར་བཤད་དོ། །སྔགས་དེ་རྣམས་མཁའ་འགྲོ་མ་ཡི་རིག་པ་ཆེན་མོ་ཡིན་ལ། མ་བྱུང་སོགས་ནི་སྔར་བཞིན་ནོ། །གོ་ཆ་དེ་དྲུག་འགོད་པའི་གནས་དང༌། ལྷ་མོ་གང་ཡིན་པ་ནི་ཀུན་སྤྱོད་ལས། །ལྟེ་བ་སྙིང་ཁ་དེ་བཞིན་ཁ། །མགོ་དང་སྤྱི་གཙུག་གོ་ཆ་ཉིད། །དང་པོ་རྡོ་རྗེ་ཕག་མོ་ཉིད། །གཉིས་པ་གཤིན་རྗེ་མ་རུ་བཤད། །གསུམ་པ་རྨོངས་བྱེད་མ་ཉིད་དེ། །བཞི་པ་སྐྱོད་བྱེད་མ་རུ་བཤད། །ལྔ་པ་སྐྲག་བྱེད་མ་རུ་གྲགས། །དྲུག་པ་གཏུམ་མོ་ཡིན་པར་བཤད། །ཅེས་གསུངས་པ་ལྟར། །ཨོཾ་བཾ་སོགས་དང་རིམ་པ་བཞིན་དུ་སྦྱར་རོ། །གོ་ཆ་ཉིད་ཅེས་པ་ནི་ཡན་ལག་ཐམས་ཅད་ལ་མཚོན་ཆར་བཤད་དེ། དེའི་དོན་དང་དེ་འགོད་པའི་གནས་ནི་སྔར་ལེའུ་དྲུག་པར་བཤད་
པ་བཞིན་ནོ། །རྣལ་འབྱོར་མ་དྲུག་གི་སྐུ་མདོག་དང་ཕྱག་མཚན་སོགས་ནི་སྒྲུབ་ཐབས་ལས་ཤེས་པར་བྱའོ། །ས་ཡི་སྟེང་ན་རིན་ཆེན་བཞི་ཞེས་པ་ལ། བཤད་པ་མི་འདྲ་བ་འགའ་ཞིག་ཡོད་ཀྱང༌། ཕྲེང་སྔགས་དང་སྙིང་པོ་དང་ཉེ་སྙིང་དང་གོ་ཆའི་སྔགས་བཞི་ལ་འཆད་པ་ལེགས་སོ། །དེ་རེ་རེ་ལ་ཡང་ཡབ་ཡུམ་གྱི་སྒོ་ནས་ཕྱེ་ན་གཉིས་གཉིས་སོ། །དེ་རྣམས་ཀྱི་ནང་ནས་ཀྱང་ཡབ་ཡུམ་གྱི་ཕྲེང་བའི་སྔགས་ནི་དམ་པ་སྟེ་མཆོག་གོ ། དེ་དག་ནི་དཀོན་ཞིང་དགའ་བ་རྒྱས་པར་བྱེད་པ་དང༌། ཡིད་བཞིན་གྱི་ནོར་བུ་དང་འདྲ་བར་འདོད་དོན་ཐམས་ཅད་སྟེར་བས་རིན་པོ་ཆེའོ། །མཁའ་འགྲོ་མ་ཡི་རིག་པ་ཆེ་ནི་རྡོ་རྗེ་ཕག་མོ་ལ་སོགས་པའི་སྔགས་སོ། །རིག་པའི་རྒྱལ་པོ་ཧེ་རུ་ཀ་ནི་ཡབ་ཀྱི་རྩ་སྔགས་སོ། ། འདི་ནི་ཕྲེང་སྔགས་དམ་པར་བཤད་པའི་ཕྲེང་སྔགས་བཤད་པའོ། །གསུམ་པ་ནི། དང་པོར་ལེའུ་ལྔ་པ་ལྟར་རྩ་སྔགས་ཀྱི་ལུས་བཏུས་པ་བྲི། དེ་ནས་ལེའུ་བདུན་པ་ལྟར་རྩ་སྔགས་ཀྱི་དབྱངས་བཏུས་པ་ལུས་དང་སྦྱར། དེ་ནས་ཡབ་ཀྱི་སྙིང་པོ་དང་ཉེ་སྙིང་དང༌། ཡུམ་གྱི་སྙིང་པོ་དང་ཉེ་སྙིང་གཉིས་དང༌། དེ་ནས་གོ་ཆ་གཉིས་ཀྱི་སྔགས་བྲིས་པ་ཁྲི་ལ་སོགས་པའི་སྟེང་དུ་གཞག །སྔགས་རྣམས་ལྷའི་རང་བཞིན་དུ་མོས་ཏེ་མཆོད་བསྟོད་བྱ། ཚོགས་ལ་ལོངས་སྤྱད་པའི་རྗེས་སུ། སློབ་དཔོན་དང་སློབ་མ་རྣམས་ཕྱག་བཅུ་གཉིས་པ་ཡབ་ཡུམ་གྱི་ང་རྒྱལ་གསལ་བར་བྱ། སློབ་དཔོན་གྱི་དཔྲལ་བར་ཟླ་བའི་སྟེང་དུ་ཨོཾ་དཀར་པོ་ལ་རྩ་སྔགས་ཀྱིས་བསྐོར་བ་དང༌། མགྲིན་པར་ཟླ་བའི་སྟེང་དུ་ཨཱཿདམར་པོ་ལ་སྙིང་པོ་གཉིས་ཀྱིས་
བསྐོར་བ་དང༌། ཐུགས་ཀར་ཟླ་བའི་སྟེང་དུ་ཧཱུཾ་ནག་པོ་ལ་ཉེ་སྙིང་གཉིས་བསྐོར་བར་གཉིས་ཀས་བསམ་ཞིང༌། སློབ་མའི་གནས་གསུམ་དུ་ཡང་དེ་བཞིན་དུ་གཉིས་ཀས་བསམ་མོ། །དེ་ནས་རྩ་སྔགས་ཀྱི་རྗེས་ཟློས་ལན་གསུམ་བྱ་སྟེ། ལེན་རེ་རེ་ལ་སློབ་དཔོན་གྱི་དཔྲལ་བའི་སྔགས་ཕྲེང་ཨོཾ་དང་བཅས་པ་ལས་དེ་དང་འདྲ་བ་རེ་འཆད་ནས། སློབ་མའི་དཔྲལ་བའི་སྔགས་ཕྲེང་ལ་བསྟིམས་ལ་སུམ་བསྲེས་བྱས་པའི་མཐར། སློབ་མ་རྣམས་ཀྱིས་རང་རང་གི་དཔྲལ་བའི་སྔགས་ཕྲེང་དཀར་པོ་ལ་དམིགས་ལ་རྩ་སྔགས་ལན་གསུམ་མམ་བདུན་བཟླའོ། །དེ་བཞིན་དུ་སྙིང་པོ་གཉིས་ཀྱི་རྗེས་ཟློས་ལན་གསུམ་བྱས་པའི་ལན་རེ་རེ་ལ། སློབ་དཔོན་གྱི་མགྲིན་པའི་སྔགས་ཕྲེང་ཨཱཿདང་བཅས་པ་ལས་རང་འདྲ་ཆད་ནས་སློབ་མའི་མགྲིན་པའི་སྔགས་ཕྲེང་ཨཱཿདང་བཅས་པ་ལ་བསྟིམས་ལ་སྙིང་པོ་སུམ་བསྲེས་བྱ། དེ་ནས་སློབ་མ་རྣམས་ཀྱིས་རང་རང་གི་མགྲིན་པའི་སྔགས་ཕྲེང་དམར་པོ་ལ་དམིགས་ལ་སྙིང་པོ་གཉིས་ལན་གསུམ་མམ་ཉེར་གཅིག་བཟླའོ། ། ཡང་ཉེ་སྙིང་གཉིས་ཀྱི་རྗེས་ཟློས་ལན་གསུམ་བྱས་པའི་ལན་རེ་རེ་ལ། སློབ་དཔོན་གྱི་ཐུགས་ཀའི་སྔགས་ཕྲེང་ཧཱུཾ་དང་བཅས་པ་ལས་རང་འདྲ་ཆད་ནས། སློབ་མའི་སྙིང་གའི་སྔགས་ཕྲེང་ཧཱུཾ་དང་བཅས་པ་ལ་བསྟིམས་ལ། ཉེ་སྙིང་སུམ་བསྲེས་བྱས་པའི་མཐར། སློབ་མ་རྣམས་ཀྱིས་རང་གི་སྙིང་གའི་སྔགས་ཕྲེང་སྔོན་པོ་ལ་དམིགས་ལ། ཉེ་སྙིང་གཉིས་ཉེར་གཅིག་རེའམ་བརྒྱ་རྩ་
བརྒྱད་བཟླའོ། །གོ་ཆའི་རྗེས་གནང་ལ་རང་རང་གི་གནས་སུ་དགོད་མི་དགོས། རྗེས་ཟློས་ལན་གསུམ་བྱ་ཞིང༌། རང་གི་ལུས་ཀྱི་བ་སྤུའི་སྒོ་ཐམས་ཅད་ནས་སྔགས་དེ་རྣམས་ཚུར་ལ་ཞུགས་པར་བསམ་མོ། །དེ་ནས་ཐོག་མར་བཏུ་གཞི་ཨཱ་ལི་ཀཱ་ལི་བཀོད་པ་ལ་བླ་མའི་ཕྱག་གིས་བྱུག་ཅིང༌། སློབ་མའི་སྤྱི་བོར་བཞག་ལ། དེ་བཞིན་གཤེགས་པའི་ཚོགས་ཐམས་ཅད་སྤྱི་བོ་ནས་ཨཱ་ལི་ཀཱ་ལིའི་རྣམ་པས་ལུས་ལ་ཞུགས་པར་བསྒོམ། དེ་བཞིན་དུ་རྩ་སྔགས་ལ་བྱུག་ཅིང་དེའི་རྡུལ་གྱིས་སྤྱི་བོར་རེག་པ་དང༌། སྙིང་པོ་གཉིས་ལ་བྱུག་ཅིག་མགྲིན་པར་རེག་པ་དང༌། ཉེ་སྙིང་གཉིས་ལ་བྱུག་ཅིང་སྙིང་གར་རེག་པས། གནས་དེ་དག་ཏུ་དེ་བཞིན་གཤེགས་པའི་ཚོགས་ལུས་ལ་ཞུགས་པས་རྒྱུད་བྱིན་གྱིས་བརླབས་པར་བསམ། གོ་ཆའི་སྔགས་ལ་བྱུག་ཅིང་སྤྱི་བོར་རེག་པས་གོ་ཆ་བརྟན་ཅིང་བྱིན་གྱིས་བརླབས་པར་བསམ་མོ། །དེ་ནས། བཅོམ་ལྡན་བདག་ལ་སྩལ་ལགས་ཀྱིས། །བཅོམ་ལྡན་བདག་ལ་བྱིན་གྱིས་རློབས། ཞེས་ལན་གསུམ་བརྗོད་ལ་མེ་ཏོག་བླ་མ་ལ་དབུལ། བླ་མས་དེ་བླངས་ཏེ་སློབ་མའི་སྤྱི་བོར་བཞག་ལ། བཅོམ་ལྡན་འདི་ལ་སྩལ་ལགས་ཀྱིས། །བཅོམ་ལྡན་འདི་ལ་བྱིན་གྱིས་རློབས། ཞེས་པ་དང༌། བཅོམ་ལྡན་འདས་འཁོར་ལོ་བདེ་མཆོག་གི་སྐུ་གསུང་ཐུགས་ཀྱི་བྱིན་རླབས་འཇུག་པར་གྱུར་ཅིག །ཅེས་བརྗོད་དོ། །དེ་ནས་ཆང་ལ་བདུད་རྩི་སྦྱར་བས་ཡི་གེ་རྣམས་བཀྲུས་ལ། བླ་མ་རང་གིས་ཀྱང་བཏུང་ཞིང་ལུས་ལ་བྱུག །སློབ་མའི་ཡང་སྤྱི་བོ་མགྲིན་པ་སྙིང་ག་རྣམས་སུ་བྱུག་ཅིང༌། ཁྱོར་བར་བྱིན་པ་འཐུངས་ཤིང་ལུས་ལ་བྱུགས་པས་ལུས་ཀྱི་ཆ་
ཤས་རྣམས་སུ་དེ་བཞིན་གཤེགས་པའི་ཚོགས་རྣམས་ཐིམ་པར་བསམ་མོ། །མཇུག་ཏུ་ཚམ་རྔམས་སྔགས་ཀྱི་བསྲུང་བ་དང༌། གོ་ཆ་གསུམ་གྱི་བསྲུང་བ་བྱ་སྟེ། འདི་ནི་བླ་མ་སྔ་མ་རྣམས་ཀྱི་ཕྱག་བཞེས་ལ་འབྱུང་བ་ལྟར་བྲིས་པའོ། །བཞི་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། གོ་བཟློག་པའི་སྙིང་པོ་དང༌། རྣལ་འབྱོར་མ་དྲུག་གི་གོ་ཆའི་སྔགས་བཏུ་བའི་ཆོ་གའི་ལེའུ་སྟེ་བརྒྱད་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་བརྒྱད་པའི་བཤད་པའོ།། །། ༈ གཉིས་པ་སྔགས་བཟླས་པས་དངོས་གྲུབ་སྒྲུབ་ཚུལ་ལ་ལྔ། རྩ་སྔགས་ཀྱིས་ལས་བསྒྲུབ་པ། སྙིང་པོས་ལས་བསྒྲུབ་པ། ཉེ་སྙིང་གིས་ལས་བསྒྲུབ་པ། གོ་ཆའི་སྔགས་ཀྱིས་ལས་བསྒྲུབ་པ། སྙིང་པོས་ལས་བསྒྲུབ་པ་གཞན་བསྟན་པའོ། །དང་པོ་ལ་བཞི། བཤད་པར་དམ་བཅའ་བ་ཆེ་བ་དང་བཅས་པ། ལས་ཚོགས་དངོས་རྒྱས་པར་བཤད་པ། དེ་ལ་སྔགས་ཀྱི་དེ་ཉིད་ཤེས་དགོས་པར་བསྟན་པ། ལེའུའི་མཚན་བསྟན་པའོ། །དང་པོ་ནི། ལེའུ་བརྒྱད་པའི་རྗེས་དེ་ནས་རྩ་བའི་གསང་སྔགས་ཀྱི་སྒོ་ནས་དངོས་གྲུབ་སྒྲུབ་པའི་ལས་མཆོག་ཏུ་གྱུར་པ་འོག་ནས་འཆད་པ་བཞིན་དུ་གོ་རིམ་ཇི་བཞིན་དུ་སྟེ་རིམ་གྱིས་རྣམ་པར་ཏེ་སོ་སོར་བཤད་པར་བྱའོ། །སྔགས་དེ་ནི་ས་འོག་ས་སྟེང་ས་བླའི་འཇིག་རྟེན་གསུམ་ན་ཞི་སོགས་ཀྱི་དངོས་གྲུབ་གང་ཅི་ཡོད་པ་རྣམས་ཐམས་ཅད་ཅིག་གིས་ཏེ་རིང་པོ་མི་ཐོགས་པར་ལས་རྣམས་ཐམས་ཅད་
གྲུབ་པར་བྱེད་པའོ། །གཉིས་པ་ལ་གཉིས། ལས་སྒྲུབ་པའི་ཆོ་གའི་ཐུན་མོང་གི་རྣམ་གཞག་དང༌། ལས་སྒྲུབ་པའི་ཆོ་ག་སོ་སོར་བསྟན་པའོ། །དང་པོ་ནི། ལས་དམན་པ་མང་པོ་དང༌། དུས་རིང་པོར་འགྲུབ་པ་ལ་སྤྱོད་པ་མེད་པར་འགྲུབ་པ་ཡང་ཡོད་མོད་ཀྱང༌། ཇི་སྐད་བཤད་པ་བཞིན་དུ་ལས་ཐམས་ཅད་མྱུར་དུ་འགྲུབ་པ་དང༌། འཇིག་རྟེན་པའི་དངོས་གྲུབ་རྒྱུད་སྡེ་འོག་མར་མི་འབྱུང་བའི་དངོས་གྲུབ་ཆེན་པོ་རྣམས་མྱུར་དུ་འགྲུབ་པ་ལ་སྤྱོད་པ་བྱ་དགོས་སོ། །དེས་ན་འདུས་པའི་རྩ་རྒྱུད་དང༌། རྒྱུད་ཕྱི་མར་བསྐྱེད་རིམ་པས་ཀྱང་སྤྱོད་པ་བྱེད་པར་གསུངས་སོ། །དེ་ལ་སྔོན་དུ་བསྐྱེད་རིམ་ཤིན་ཏུ་བརྟན་པ་དང༌། བཟླས་པ་རྫོགས་པ་དང༌། དེའི་བཅུ་ཆའི་སྦྱིན་སྲེག་སོང་བས་སྤྱོད་པ་གསུམ་གང་རུང་བྱས་ཏེ། དེ་ནས་བཟླས་པ་སོགས་ཀྱིས་ལས་རྣམས་སྒྲུབ་པ་ཡིན་ནོ། །བསྐྱེད་རིམ་ཡང་དཀྱིལ་འཁོར་གྱི་འཁོར་ལོ་གཅིག་ལ་བརྟེན་དགོས་ལ། ལྷ་འདི་ཙམ་ཞིག་གི་ངེས་པ་མེད་དོ། །སྔགས་ལ་ཡང་རྩ་སྔགས་སྟོབས་ཆེ་མོད་ཀྱང༌། དེ་ཁོ་ན་ངེས་གཟུང་དུ་མི་དགོས་སོ། །བཟླས་པའི་གྲངས་ནི་སྡོམ་འབྱུང་ལས། རྫོགས་ལྡན་ལ་ནི་བཟླས་བྱ་གཅིག །ཉིས་འགྱུར་གསུམ་ལྡན་ལ་བཟླས་བྱ། །སུམ་འགྱུར་གཉིས་ལྡན་ལ་རབ་བརྗོད། །རྩོད་ལྡན་བཟླས་པ་བཞི་འགྱུར་རོ། །ཞེས་གསུངས་པ་ལྟར་བྱ་དགོས་སོ། །དངོས་གྲུབ་འགྲུབ་ཚུལ་ནི་ལྭ་བ་པས། བསམ་གཏན་ཙམ་དང༌། དེ་དང་བཟླས་པ་གཉིས་དང༌། དེའི་སྟེང་དུ་འཁྲུལ་འཁོར་དང་གསུམ་གྱིས་འགྲུབ་པར་བཤད་དེ། གང་ཟག་མཆོག་དམན་འབྲིང་གསུམ་ལ་དགོངས་སོ། །དེ་ཡང་དང་པོ་ནས་མིན་གྱི་ལས་སྦྱོར་གྱི་དུས་སུ་
ཡིན་ནོ། །ལས་སྦྱོར་གྱི་དུས་སུ་སྔགས་དང་སྦྱིན་སྲེག་གིས་སྒྲུབ་པ་ཡང་སྡོམ་འབྱུང་ལས་མང་དུ་གསུངས་སོ། །ཁ་ལྟ་ཕྱོགས་ནི་སྡོམ་འབྱུང་ལས། ཞི་བ་ལ་ཤར་དང༌། རྒྱས་པ་ལ་བྱང་དང༌། དབང་དང་དགུག་པ་ལ་ནུབ་དང༌། རེངས་པ་དང་བསད་པ་ལ་ལྷོར་ལྟ་བར་བཤད། རྨོངས་པ་ཡང་རེངས་པ་དང་འདྲའོ། །རྡོ་རྗེ་མཁའ་འགྲོ་ལས་བསྐྲད་པ་ལ་རླུང་དུ་ལྟ་བར་བཤད། བསྐྲད་དབྱེ་གཉིས་ཀ་ལ་ལྷོར་ལྟ་བ་ཡང་བཤད་དོ། །ཞི་བ་ལ་ལྷའི་ཁ་དོག་དཀར་པོ་དང་མེ་ཏོག་དཀར་པོ། རྒྱས་པ་ལ་ཁ་དོག་སེར་པོ་དང་མེ་ཏོག་སེར་པོ། །དབང་ལ་ཁ་དོག་དམར་པོ་མེ་ཏོག་དམར་པོ་དང༌། རིངས་པ་ལ་ཁ་དོག་སེར་པོ་མེ་ཏོག་སེར་པོ་བཤད་དེ། རྨོངས་པ་ཡང་དེ་དང་འདྲའོ། །བསད་པ་དང་བསྐྲད་དབྱེ་ལ་ཁ་དོག་ནག་པོ་བསྒོམ་མོ། ། དེ་དག་གིས་ནི་མཆོད་རྫས་གཞན་དང་སྔགས་ཀྱི་ཁ་དོག་ཀྱང་ཤེས་པར་བྱའོ། །སྡོམ་འབྱུང་ལས་ཀྱང༌། གང་གི་ལས་ཀྱི་བྱེ་བྲག་གིས། །དེ་ཡི་ཁ་དོག་སོགས་མཚོན་བྱ། གནས་དང་ལྷ་ཡི་རྣམ་པ་དང༌། སྔགས་དང་མེ་ཏོག་ཆོ་ག་བཞིན། ཞེས་གསུངས་ཤིང༌། ལས་སྒྲུབ་པའི་དུས་སུ་སྔགས་བཟླས་པའི་བཅུ་ཆའི་སྦྱིན་སྲེག་བྱེད་པ་ཡང་མང་དུ་བཤད་དོ། །ཁྱད་པར་ལྷག་མ་རྣམས་ནི་མངས་སུ་དོགས་ནས་མ་བྲིས་སོ། །གཉིས་པ་ལ་ལྔ། ཕར་ཆེར་ཚར་བཅད་ཅིང་ཞར་ལ་རྗེས་སུ་གཟུང་བའི་ལས་དང༌། ཚར་བཅད་པ་ཉིད་ཀྱི་ལས་ཚོགས་དང༌། རྗེས་སུ་གཟུང་བའི་ཞར་ལ་ལས་སྒྲུབ་ཚུལ་བསྟན་པ་དང༌། བསད་གསོ་གཉིས་དང་བཅས་པའི་ཚར་བཅད་ཀྱི་ལས་དང༌། རྗེས་
སུ་གཟུང་བའི་ལས་གཞན་བསྟན་པའོ། །དང་པོ་ནི། སེང་གེ་དང་འཕྲོག་བྱེད་དང་དབྱིག་གི་སྙིང་པོ་ལ་སོགས་པའི་ལྷ་ཐམས་ཅད་དང་མཐོང་བའི་དུག་ཅན་ལ་སོགས་པའི་ཀླུ་ཐམས་ཅད་དང༌། ཟས་སུ་མདངས་ཟ་བ་ལ་སོགས་པའི་གནོད་སྦྱིན་ཐམས་ཅད་དང༌། དྲི་ཟ་ཐམས་ཅད་ཀྱི་སྐྱེ་གནས་ཐམས་ཅད་ལན་ཅིག་དྲན་པ་ཙམ་གྱིས་གསོད་པར་བྱེད་དོ། །ལྷ་ལ་སོགས་པ་ཐམས་ཅད་ཅེས་སྨོན་ནས། ཡང་དེ་དག་གི་སྐྱེ་གནས་ཐམས་ཅད་ཅེས་སྨྲ་བ་ཅི་ཡིན་ཞེ་ན། ཀོང་ཀ་ན་པ་སོགས་ནི་གསལ་བར་བྱ་བའི་ཕྱིར་ཡིན་པས་ཟློས་སྐྱོན་མེད་ཅེས་གསུང༌། སྐལ་ལྡན་ནི་ལྷ་ཀླུ་གནོད་སྦྱིན་སོགས་ནི་སེམས་ཅན་གཞན་ལ་ལྟོས་ན་ཤིན་ཏུ་མ་རུངས་པ་ཡིན་ན། དེ་རྣམས་ཀྱང་སྐད་ཅིག་གིས་འགྲུབ་པར་བྱེད་དོ། །ཞེས་བདག་ཉིད་ཆེ་བར་བསྟན་པའི་དོན་དུ་ལན་གཉིས་སྨོས་གསུང་ངོ༌། །ལྷ་ལ་སོགས་པའི་ནང་ན་གནས་པའི་མ་རུངས་པ་ལ་མཐུ་འདི་གསུངས་ལ། དེ་ཡང་སླར་གསོ་བའི་ནུས་པ་དང་ལྡན་པས་བྱ་བར་བཤད་དོ། ། དྲན་པ་ཙམ་གྱིས་ཞེས་པ་འདི་འདྲ་རྣམས་ནི་སྔགས་བཟླས་པ་སོགས་ལ་མི་ལྟོས་པར་བསམ་གཏན་གྱིས་ལས་འགྲུབ་པའི་བསྐྱེད་རིམ་པ་ནང་ལ་གཞོལ་བ་རྣམས་ལ་ཡིན་ལ། སྔགས་ལ་གཞོལ་བས་ནི་རྩ་སྔགས་ཀྱི་མཐར་དེ་རྣམས་ཀྱི་མིང་སྦྱར་ནས། མཱ་ར་ཡ་ཕཊ་ཅེས་སྤེལ་ཏེ་བཟླས་པས་སྲོག་དང་འབྲལ་བར་བྱེད་དོ། །རྡོ་རྗེ་འཛིན་པའི་སྤྱི་བོར་ཕུལ་བའི་མེ་ཏོག་བླངས་ལ་རྩ་སྔགས་ལན་བདུན་བཏབ་སྟེ་སྤྲིན་ལ་བདུགས་ན་ནམ་མཁའ་ལས་ཆར་འབབ་པ་ཟློག་པར་བྱེད་དོ་ཞེས་ལྭ་བ་པས་བཤད་དོ། །བླ་མ་སྔ་མའི་མན་ངག་
ལས་སྤྲིན་གྱི་ཚོགས་ལ་བལྟས་ནས་ཁྲོ་བ་དང་བཅས་པས་རྩ་སྔགས་ཀྱི་མཐར། སརྦ་མེ་གྷ་ན་བི་ཀིར་ཎ་བ་ཡ་ཧཱུཾ་ཕཊ་ཅེས་བརྗོད་ཅིང༌། རང་གི་ཁ་ནས་རླུང་དམར་བྱུང་བར་བསམས་ན་སྤྲིན་འཐོར་བར་བྱེད་དོ་ཞེས་འཆད་དོ། །ཆར་འབེབས་པར་བྱེད་དོ་ཞེས་པ་ལ། ལྭ་བ་པའི་འགྲེལ་པ་ལས་མངོན་བརྗོད་ནས་འབྱུང་བ་བཞིན་དུ་རྡོ་རྗེ་ནམ་མཁའ་ལྡིང་གི་བྲིས་སྐུ་ལ་བརྟེན་ནས་ཆར་འབེབས་པ་དང༌། སྐུ་གཟུགས་ལ་ཁྲུས་གསོལ་ལ་ཆུ་འགྲམ་གཉིས་ཀྱིས་གཅིག་ཏུ་བསྲེས་པ་ལ་ཀླུའི་གཟུགས་བརྙན་མགོ་དགུ་པ་བྱས་ཏེ། ཁྲུས་བྱས་ལ་མཆོད་ནས་ཆུ་ཀླུང་དོར་བས་ཆར་འབེབས་པ་གཉིས་བཤད་ཅིང༌། རྡོ་རྗེ་མཁའ་འགྲོ་ལས་གསུངས་པ་བཞིན་དུ་གདེངས་ཀའི་དབང་ཕྱུག་གི་འཁྲུལ་འཁོར་བྲིས་པ་ལ་བརྟེན་ནས་ཆར་འབེབས་པ་སོགས་བཞི་བཤད་པ་ལ། འདིར་བཞི་པ་བཤད་ན། ཁམ་ཕོར་སོ་མ་བཏང་བར་དུག་དང་ལན་ཚྭ་དང་སྐེ་ཚེས་འཁོར་ལོ་གསུམ་གྱི་དབུས་སུ་ཆུད་པའི་པདྨ་འདབ་བརྒྱད་ཀྱི་ལྟེ་བར་ཧཱུཾ་བཾ་ཧཱུཾ། འདབ་མ་བརྒྱད་ལ་ཀླུ་རྣམས་ཀྱི་སྙིང་པོ་ས་བོན་ཧཱུཾ་གཉིས་ཀྱིས་གཟིར་བ་བྲི། རྩིབས་མཚན་དང་པདྨའི་མཐའ་ལ། ཨོཾ་བཛྲ་ཀྲོ་དྷ་མ་ཧཱ་བ་ལ་ཧ་ན་ཧ་ན་པ་ཙ་པ་ཙ་བི་དྷ་ནྶ་ཡ་ཨུཙྪ་ཏ་ཡ་སརྦ་ནཱ་གཱ་ནཱན་མཱ་ར་ཡ་ཧཱུཾ་ཕཊ། ཅེས་པ་བྲིས། དགུག་པ་སོགས་བྱས་ལ་ཡང་དག་པར་མཆོད་དོ། །ཁ་སྦྱར་དུ་བྱས་ནས་ཀླུ་གནས་པའི་སར་བཅུག་ལ། གུ་གུལ་དང༌། སརྫ་ར་ས་སྟེ་སྤོས་དཀར་དང༌། སྒོག་སྐྱ་བསྲེགས་པའི་བདུག་པ་བྱིན་ལ། སྔགས་ཀྱི་བཟླས་པ་བྱས་ན་ཆར་འབེབས་སོ། །ཆར་ཆེས་པའི་ཚེ་
ཟློག་པར་བྱེད་པ་ནི་སྔར་བཤད་པའི་རྫས་གསུམ་གྱི་བདུག་པས་ཀླུའི་རས་རིས་ལ་བདུག་ཅིང༌། བརྴ་ནི་བརྴ་ཡ་ཞེས་པའི་ཚིག་བཅུག་སྟེ་རྩ་སྔགས་བཟླ་བའམ། སྤྲིན་འཐོར་བའི་ཆོ་ག་བྱས་པས་ཟློག་པར་བྱེད་དོ། །སྤྲིན་འཐོར་བ་སོགས་གསུམ་ལ་ཀོང་ཀ་ན་པ་དྲང་ངེས་ཀྱི་བཤད་པ་གཉིས་བྱེད་པ་ལ། སྐལ་ལྡན་ནི་དེ་གསུམ་བཟླས་བརྗོད་འབུམ་མ་བྱས་པར་ཡང་བྱེད་ནུས་པས་སྒྲ་ཇི་བཞིན་པ་ཁོ་ནར་གཟུང་ངོ་ཞེས་ཟེར་རོ། །རྒྱ་མཚོའི་ནང་དུ་ཕྱིན་ཏེ་ཁྲོས་པས་རྩ་སྔགས་འབུམ་བཟླས་ན་རྒྱ་མཚོ་སྐེམས་པར་བྱེད་དོ། །ཆུ་བོ་རྒྱུན་ཕྱོགས་ལས་བཟློག་སྟེ་འབབ་པར་སྟན་པ་ནི། ཁབ་ལེན་རིགས་བདུན་གང་ཡང་རུང་བ་ལ་ཁ་ཊཾ་ག་བྱས་ནས་རྩ་སྔགས་ལན་བདུན་བཟླས་ཏེ། ལག་པ་གཡོན་པས་ཆུ་བོ་ལ་བསྣུན་ན་བཤད་པ་བཞིན་དུ་འགྱུར་རོ། །དེ་ལྟར་བྱས་པས་ཅི་ཞིག་བྱ་ཞེ་ན། སེམས་བཅས་དང་སེམས་མེད་ཀྱི་བདག་པོ་བྱེད་པས་ན་དབང་པོ། བྱ་བ་མ་ཡིན་པ་བྱེད་པ་རྣམས་དེ་ལས་བཟློག་པར་བྱེད་པའི་དོན་དུ་ཡིན་ནོ། །འགྱུར་ཁ་ཅིག་ལས་ཐོག་ཟློག་པར་བྱེད་པར་འབྱུང་བ་ལྟར་བླ་མ་སྔ་མ་རྣམས་ཀྱང་མཛད་དེ། ཁྲོས་པས་སྡིགས་མཛུབ་བསྒྲེང་སྟེ་རྩ་སྔགས་བཟླས་པའི་ཐབས་ཀྱིས་སོ། །རྩ་བའི་གསང་སྔགས་འདི་བཟླས་བརྗོད་འབུམ་བྱས་ཏེ་གཡས་བརྐྱང་གི་སྦྱོར་བས་གར་བྱེད་བཞིན་པའི་དགའ་སྤྲོ་དང་བཅས་པས། མཁའ་འགྲོ་མའི་འཁོར་རབ་ཏུ་མགུ་བར་བྱེད་པས་ས་གཡོ་བར་བྱེད་ཅིང་རོལ་པར་བྱེད་པ་དང༌། ཤིང་ལ་འཛེགས་ཏེ་གནས་དང་ཉེ་བའི་གནས་ལ་སོགས་པ་གང་དུ་འགྲོ་འདོད་པ་དེར་འགྲོ་བར་བྱེད་ཅིང་སླར་འོངས་ནས་འདུ་བར་འགྱུར་རོ། །ཕ་རོལ་གྱི་སྔགས་
ཀྱི་ནུས་པ་ཐམས་ཅད་ཕྲོགས་ཤིག །དངོས་གྲུབ་ཐམས་ཅད་ཕྲོགས་ཤིག་ཅེས་པའི་སྤེལ་ཚིག་དང་ལྡན་པས་རྩ་སྔགས་བཟླས་ན། སྔགས་ཀྱི་ནུས་པ་ཐམས་ཅད་འཕྲོག་པར་བྱེད་པ་དང༌། ཞི་བ་ལ་སོགས་པའི་དངོས་སྒྲུབ་དང༌། བཅུད་ལེན་ལ་སོགས་པའི་དངོས་གྲུབ་སྟེ་གྲུབ་པའི་རྫས་ཐམས་ཅད་འཕྲོག་པར་བྱེད་དོ། །བསྟན་པ་ལ་གནོད་པ་བྱེད་པ་སླར་མི་བྱེད་པའི་དོན་དུ། ཁྲོས་པས་རྩ་སྔགས་ཀྱི་མཇུག་ཏུ་ཛ་ཆེ་གེ་མོའི་རཀྟ་ཨཱ་ཀརྵ་ཡ་ཛཿཞེས་བཏགས་པ་བཟླས་ན། གཞན་གྱི་ཁྲག་འདྲེན་པར་བྱེད་དོ། །བསྒྲུབ་བྱ་དེ་གུས་པས་འདུད་པར་བྱེད་ན་སླར་ཁྲག་གཏོང་བའི་སྤེལ་ཚིག་དང་བཅས་པས་སྔགས་བཟླས་ན། ཁྲག་བཀུག་པ་སླར་གཏོང་བར་བྱེད་པ་སྟེ་སྔར་གྱི་གནས་སུ་འཇོག་པར་བྱེད་པའོ། །གཟུགས་བརྒྱ་སྟོང་དུ་མར་བྱེད་པ་ནི་ཕྱག་རྒྱ་ཆེན་པོའི་གོ་འཕང་ལ་གནས་པས། སྙིང་རྗེ་དང་སྨོན་ལམ་གྱི་མཐུས་གདུལ་བྱ་གང་ལ་གང་འདུལ་གྱི་བསམ་པ་དང་མཐུན་པར་དེ་དང་དེའི་གཟུགས་འཛིན་པར་བྱེད་པའོ། །དེ་ལྟ་བུ་མིན་པའི་བརྩོན་འགྲུས་དམན་པས་སྔགས་དང་སྨན་གྱིས་གཟུགས་སྣ་ཚོགས་པ་ས་བོན་གྱིས་སྒྲུབ་པ་ལ། ལྭ་བ་པའི་འགྲེལ་པར་བཞི་གསུངས་པའི་ཕྱོགས་གཅིག་ནི། ཤིང་ཨེ་རནྜ་དང་སྨྱོ་བྱེད་ཀྱི་ས་བོན་ཉི་ཤུ་དགུ་ལ་རིགས་ངན་མའི་མེ་ཏོག་གིས་བསྒོ་ཞིང༌། བདུད་རྩི་ལྔས་ཀྱང་མཉེས་ལ་ཉི་མཚན་དེ་ལ་བསྐམས་ཏེ། ཁྱི་ནག་པོའི་ཐོད་པ་དུར་ཁྲོད་ཀྱི་སས་བཀང་ལ། མར་ངོའི་ཚེ་བརྒྱད་དམ་བཅུ་བཞི་ལ་མ་མོའི་གནས་སུ་བསྐྱེད་ནས། གྲུབ་པའི་ས་བོན་བླངས་ཏེ་སྔགས་པས་
ཧེ་རུ་ཀ་དང་བླ་མ་མགོན་པོ་ཁྱད་པར་དུ་མཆོད་ལ། དུར་ཁྲོད་དུ་གཏོར་མས་མཆོད་ཅིང་མངོན་པར་བསྔགས་ཏེ་གང་འདོད་པའི་གཟུགས་བསམས་ནས་མགྲིན་པར་བཅིངས་ན་དེའི་གཟུགས་སུ་འགྱུར་ཏེ། བཀྲོལ་ན་སླར་ཡང་རང་གི་གཟུགས་སུ་འགྱུར་རོ། །ཡང་སྨན་བཟང་པོ་ལས་ཆོ་ག་བཞིན་དུ་བསྒྲུབས་པའི་དམ་ཚིག་གིས་གྲུབ་པའི་ས་བོན་ཏེ། གཟུགས་སྣ་ཚོགས་པར་སྣང་བར་འདོད་ན་ཁ་ནས་ཕྱུང་ན་ཇི་ལྟར་འདོད་པ་བཞིན་དུ་སྣང་བར་བྱེད་ཅིང༌། མི་སྣང་བར་འདོད་ན་ནི་རང་གི་ཁང་བཅུག་ན་མི་སྣང་བར་ཡང་བྱེད་དེ་རྒྱས་པར་མ་བྲིས་སོ། །ཁང་བཟང་དང་ཤིང་གི་རྩེ་མོ་ལ་སོགས་པ་ཕྱེ་མར་བྱེད་དོ། །ཞེས་པ་ནི་སྔགས་ཀྱི་རྒྱལ་པོ་མེ་འབར་བས་སྟ་རེ་བཞིན་གཏུབ་པར་བྱའོ། །ཞེས་བཤད་དེ། རྩ་སྔགས་ལས་མེ་འབར་བར་བསམས་ཏེ་དེས་གཏུབས་པར་བསམ་པའོ། །ལག་པ་གཡོན་པར་ཟླ་བའི་འོད་ལྟར་དྲི་མ་མེད་པའི་འཁོར་ལོ་བཀོད་ནས། གནས་པ་དང་རྒྱུ་བ་དང་ཡན་ལག་ལས་སྐྱེས་པ་དང༌། སྦྱར་བ་ལས་བྱུང་བའི་དུག་རྣམས་ལ་ལག་པའི་མཐིལ་བསྟན་པ་ཙམ་གྱིས་བདུད་རྩིར་བྱེད་ཅིང༌། བདུད་རྩི་དུག་ཏུ་བྱེད་པ་ནི་ལག་པའི་སྔགས་ནག་པོར་བྱས་ནས་བསྟན་པ་ཉིད་ཀྱིས་སོ། །ཟླ་བ་སྟེ་ཆང་ཟླ་བའི་འོད་ཟེར་ལྟར་དྲི་མ་མེད་པར་བསམས་པ་ཙམ་གྱིས་ཆུ་སྟེ་འོ་མར་བྱེད་དོ། །འདི་བྲམ་ཟེ་རིན་ཆེན་རྡོ་རྗེས་མཛད་ཟེར། ཀུ་སུམྦྷའི་མེ་ཏོག་བསྐམས་པའི་ཕྱེ་མ་ཤིང་ཛམྦུའི་ཁུ་བས་ལན་མང་དུ་སྦྲུས་པ་བའི་ཆུས་སྦངས་ནས། པདྨའི་སྣོད་དུ་བླུགས་པས་ཆུ་སྟེ་འོ་མ་ཡང་ཟླ་བ་སྟེ་ཆང་དང་འདྲ་བར་བྱེད་དོ། །ཚེར་མ་དང་བཅས་པའི་ཀ་རཎྜའི་
འབྲས་བུའི་ཕྱི་མ་ཤིང་ནཱ་ག་རའི་ཤུན་ལྤགས་དང་བཅས་པས་ལག་པ་སོགས་ལ་བྱུག་ན་དྲི་འཕྲོག་ཅིང༌། དེ་བཞིན་དུ་མི་ཏོག་དང་འབྲས་བུ་ལ་སོགས་པའི་དྲི་ཐམས་ཅད་འཕྲོག་པར་བྱེད་དོ། །དེ་བཞིན་དུ་མེ་ཏོག་དང་སྤོས་ལ་སོགས་པས་བདུག་པ་དེ་བདུགས་ན་ཕན་ཚུན་དུ་དྲི་འཕོའོ། །ནམ་མཁའ་ལྡིང་ཞེས་སོགས་ཀྱི་དོན་ལ། འགྲེལ་པ་གཞན་མང་པོས་ཇི་ལྟར་ནམ་མཁའ་ལྡིང་ནམ་མཁའ་ལ་འགྲོ་བ་ན་གཤོག་པ་གཉིས་བསྐྱོད་དེ་འགྲོ་བ་བཞིན་དུ། ཕྱག་རྒྱ་དང་འདུས་པ་ན་ལག་པ་གཉིས་བརྐྱང་སྟེ་སྙོམས་པར་ཞུགས་ནས་མཐར་བྱང་སེམས་རང་གི་ལྕེས་བླངས་ཏེ་ཕྱག་རྒྱའི་ཁར་སྦྱིན་ལ་ལྷག་མ་རང་གིས་བཏུང་ངོ་ཞེས་འཆད་དོ། །ལྭ་བ་པའི་འགྲེལ་པར་ནམ་མཁའ་ལྡིང་གི་གདོང་གིས་འགྲོ་བ་འབྱིན་པར་བྱེད་ཅིང༌། བུད་མེད་དང་འདུས་པ་ཞེས་འབྱུང་ལ། དེའི་དོན་ནི་གདེངས་ཀའི་དབང་ཕྱུག་གི་འཁོར་ལོ་ཡི་ཀླུ་རྣམས་སྤངས་ཤིང་ཟླ་བས་ཉེ་བར་བརྒྱན་པ་ལ། བུད་མེད་དང་སྐྱེས་བུ་བཟང་པོ་རྣམས་ཀྱི་མིང་བར་དུ་བཅུག་ནས། སྐར་མ་རྒྱལ་ལ་གི་ཧཾ་གིས་གྲོ་ག་ལ་བྲིས་ལ་མཆོད་དེ། །རང་ཧེ་རུ་ཀ་དང་རིག་མ་ཕག་མོར་བསྒོམས་ནས། གཉིས་སུ་མེད་པའི་སྦྱོར་བས་མཉམ་པར་བཞག་ལ་མཚན་ཐོག་ཐག་རྩ་སྔགས་བཟླས་ནས་འཁོར་ལོ་བུད་མེད་ཀྱི་ལུས་ལ་བཅངས་ན། དེ་ལ་རིག་པའི་རྒྱལ་པོ་རང་ཉིད་འོངས་ཏེ་འདུ་བ་ནི་བུད་མེད་དང་འདུས་པ་སྟེ་ཞི་བ་འདུས་པ་ཞེས་པའི་དོན་ཡང་དེའོ། །ལྷ་མོ་ནི་སྐད་དོད་ལ་བུད་མེད་དུ་ཡོད་གསུང༌། གོ་བཟློག་པའི་འདུག་སྟངས་ཏེ་རྐང་པའི་
པུས་མོ་གཉིས་གོང་དུ་བླངས་ཏེ་པདྨ་རྒྱས་པར་བྱས་པའི་ནང་དུ་ཆུད་པའི་ཁྲག་དང་བཅས་པའི་རྩ་ཁ་བྱེ་བ་ནི་ནམ་མཁའ་ལྡིང་གི་གདོང་ངོ༌། །དེར་འགྲོ་བ་ནི་དེར་འགྲོ་པས་འདུ་བར་བྱེད་དོ། །ཞེས་སྦྱར་རོ། །ལྷ་སྦས་ཀྱི་འགྲེལ་པར་གདོང་དུ་འགྲོ་ཞེས་འབྱུང་བ་ལྟར་བྱའོ། །སྒྲུབ་པ་པོ་གང་ཞིག་སྔར་གྱི་ཐབས་དེ་ཀུན་ཏུ་སྤྱོད་པའི་སྒོ་ནས་རྩ་ཁ་བྱེ་བ་དེར་བྱང་སེམས་ཀྱི་ཐིག་ལེ་འབྱིན་པ་ལས་སྐྱེས་པའི་སྲས་དེ་ནི་དེ་བཞིན་གཤེགས་པ་ཐམས་ཅད་ཀྱི་རིགས་སུ་གྱུར་པས་མི་ཡི་མཆོག་གོ། དཔལ་དང་ལྡན་ཞིང་མཚན་དྲི་མ་མེད་པར་འགྱུར་ཏེ། དེའི་ལག་མཐིལ་ན་ཡོད་པའི་དཔལ་གང་གིས་ཀྱང་མི་འཕྲོགས་ཏེ། འབྱུང་པོ་ཐམས་ཅད་ཀྱི་མཆོད་གནས་སུ་འགྱུར་བས་འཁོར་ལོ་སྒྱུར་བ་དང་འདྲ་བར་དཔལ་དང་ལྡན་ཞིང་ཚེ་དང་ནད་མེད་པ་ཕུན་སུམ་ཚོགས་པས་མཚན་པའོ། །ཞེས་ལྭ་བ་པ་དང་ལྷ་སྦས་ཀྱི་འགྲེལ་པར་རིགས་ཀྱི་སྲས་བསྐྲུན་པ་ལ་བཤད་དོ། །གོང་དུ་བཤད་པའི་རྣམ་པ་དེ་ལྟ་བུའི་ཆོ་ག་དང་ལྡན་པའི་དངོས་གྲུབ་སྒྲུབ་པ་ཐམས་ཅད་འབྲས་བུ་དང་བཅས་པར་འགྱུར་རོ། །བླ་མ་སྔ་མ་ནི། སྨན་ནམ་མཁའ་ལྡིང་ཞེས་བྱ་བ་དེའི་མིང་ནམ་མཁའ་ལྡིང་དང་འགྲོ་བ་ཞེས་བྱ་སྟེ། སྨན་དེ་བཏགས་ཞིང་མཉེས་པའི་ཁུ་བ་ལ་ལན་བརྒྱ་རྩ་བརྒྱད་བཟླས་ནས་འཐུངས་ནས། འདོད་པ་སྤྱད་པའི་ཤུ་ཀྲ་འཐུངས་ན་ལག་མཐིལ་ན་ཡོད་པ་ལྟ་བུར་མདངས་དང་ལྡན་པ་དང་དཔལ་དང་ལྡན་པར་འགྱུར་རོ། །ཞེས་གསུང་ངོ༌། །གཉིས་པ་ནི། དྲན་པ་ཙམ་གྱིས་བསོད་པར་བྱེད་དོ་ཞེས་པ་ལ་འཁོར་ལོ་ཉི་མའི་དཀྱིལ་འཁོར་གྱི་ནང་དུ་ཆུད་པར། དུག་དང་ལན་ཚྭ་
དང་སྐེ་ཚེས་བྲིས་ལ་དུར་ཁྲོད་ཀྱི་ཐལ་བ་དང་སོལ་བས་གཟུགས་བརྙན་བྱས་ཏེ། འཁོར་ལོ་སྙིང་གར་བཅུག་ནས་བསྒྲུབ་བྱའི་རྣམ་ཤེས་དགུག་གཞུག་བྱས་པ། དུར་ཁྲོད་དུ་སྦས་ནས་མི་རུས་ལས་བྱས་པའི་ཕུར་བུས་སྙིང་གར་བཏབ་སྟེ། ཆུ་ཚན་བླུགས་ནས་ཁྲོས་པས་སྔགས་བཟླས་ན་ཉི་མ་བདུན་གྱིས་འཆི་བར་འགྱུར་རོ། །གཏུམ་མོ་སྦར་བ་འབར་བའི་ཕྲེང་བའི་ཏིང་ངེ་འཛིན་ལ་གནས་ནས། ལྷོ་ཕྱོགས་ཀྱི་རླུང་གིས་བདས་ཤིང་མེ་འབར་བར་བསམས་ན་གང་འདོད་པ་དེར་མེ་སྐྱེད་པར་བྱེད་དོ། །རྡོ་རྗེ་རྩེ་གཅིག་པ་གསོར་ཞིང་སྔགས་བཟླས་ཏེ་ས་ལ་བསྣུན་ན་ས་འོག་རྣམ་པར་གཤེག་པ་སྟེ་འདྲལ་བར་བྱེད་དོ། །ལག་མཐིལ་དུ་བསྔགས་ནས་རླུང་གི་རྗེས་སུ་བསྣུན་ན་གང་འདོད་པ་དེར་སེར་བ་འབེབས་པ་བྱེད་དོ། །ལྭ་བ་པའི་འགྲེལ་པར་ཐོག་འབེབས་པར་བྱེད་ཅེས་འབྱུང་ངོ༌། །སེར་བ་ཟློག་པར་ཡང་བྱེད་པ་ནི་གདུགས་དང་རྒྱལ་མཚན་དང་བ་དན་གྱི་རྩེ་མོར་འཁྲུལ་འཁོར་བྲིས་པ་བཏགས་ནས་གཙུགས་ན། ཡུལ་འཁོར་གང་དུ་འཁྲུལ་འཁོར་དེ་སྣང་བའི་ས་ཕྱོགས་ཐམས་ཅད་དུ་སེར་བ་ཟློག་པར་བྱེད་དོ། །ཞེས་འཆད་དོ། །དྲན་པ་ཙམ་གྱིས་གློག་སྐྱེད་པར་བྱེད་དོ་ཞེས་པ་ནི་ཀ་ར་བཱི་ར་དམར་པོ་ལ། དྲག་ཤུལ་སྤྱོད་པའི་སྣག་ཚས། ཡ་བྷ་བུད་དྷ་ཡ་ཡ་ཏ་ཧཱུཾ་ཞེས་པ་བྲིས་ནས་བཟླས་པ་བྱ་སྟེ་ནམ་མཁའི་ཕྱོགས་སུ་གཡུགས་ནས་བསྐྱུར་ན་གློག་འབྱུང་བར་བྱེད་དོ་ཞེས་ཟེར་རོ། །ལྷ་ཐམས་ཅད་ཀྱི་གཟུགས་བརྙན་གར་བྱེད་དུ་གཞུག་གོ་ཞེས་པ་ནི་དུར་ཁྲོད་ཀྱི་རས་ལ་འཁྲུལ་འཁོར་བྲིས་པ་བཏགས་ནས་ཤ་ཆེན་དང་
གུ་གུལ་དང་ལྷན་ཅིག་ཐོད་པའི་ནང་དུ་དུར་ཁྲོད་ཀྱི་སོལ་མེའམ་མེ་གཞན་ལ་བསྲེགས་པས་གུ་ལང་ལ་སོགས་པའི་གཟུགས་བརྙན་ལ་བདུགས་ན་དེ་དག་གི་གཟུགས་བརྙན་གར་བྱེད་པར་འགྱུར་རོ་ཞེས་ཟེར་རོ། །སྒྲུབ་པ་པོ་གང་གིས་བསད་ལས་གྲུབ་པར་བྱ་བའི་ཕྱིར་བསྒྲུབ་བྱ་དེའི་མིང་ནས་བཟུང་སྟེ་རྩ་སྔགས་ལན་ཅིག་བཟླས་ན་བསྒྲུབ་བྱ་དེ་དེའི་མོད་ལ་འཆི་བར་འགྱུར་རོ། །གསུམ་པ་ནི། བ་ལང་གི་ཤ་དང་བཅས་པའི་སྦྱིན་སྲེག་སྟོང་རྩ་བརྒྱད་རྩ་བའི་སྔགས་ཀྱིས་ཕུལ་ནས་མ་ལུས་པ་ལ་ལོངས་སྤྱོད་པའི་རྒྱལ་སྲིད་ཐོབ་པར་འགྱུར་རོ། །འདོད་པའི་ལོངས་སྤྱོད་ཀྱིས་སྐྱོ་ནས་མེད་པར་འདོད་ན་ཞི་བའི་སྦྱིན་སྲེག་གིས་རྒྱལ་སྲིད་ཀྱི་གཡེང་བ་སྡུད་པར་འགྱུར་རོ། །ལྷ་དང་སྔགས་ཐ་མི་དད་པའི་ཕྱིར་བཅོམ་ལྡན་འདས་སམ་བདེ་མཆོག་གི་ཕྲེང་སྔགས་འདི་ལ། དངོས་གྲུབ་སྒྲུབ་པ་ལ་ཆ་ལུགས་ཀྱི་ཁྱད་པར་གྱི་བརྟུལ་ཞུགས་མི་དགོས། ཁྲུས་དང་ཉེ་རེག་སོགས་ཀྱི་ཉེར་བར་སྤྱོད་པ་མི་དགོས། ཟས་བཅོད་པའི་སྨྱུང་བར་གནས་པ་མི་དགོས་ཏེ། ཕྲེང་བའི་སྔགས་ཀྱིས་ལས་སྒྲུབ་པའི་རྟོག་པའི་བྱ་བའི་ཆོ་ག་འདིས་ཅི་འདོད་པའི་དངོས་གྲུབ་སྒྲུབ་པའི་ལས་རྣམས་བྱའོ། །བཞི་པ་ནི། བཟླས་པ་སོང་བའི་རྣལ་འབྱོར་པས་གལ་ཏེ་ཁྲོས་པའི་བསམ་པས་སྣ་བུག་གཡས་པ་ནས་སྔགས་ཁ་དོག་སྔོན་པོ་འབར་བ་བསྒྲུབ་བྱའི་སྣ་བུག་གཡོན་པ་ནས་ཞུགས་ཏེ། བསྒྲུབ་བྱའི་ལུས་ཁྱབ་པར་འོད་འབར་བ་དེས་དཀྲུགས་ཤིང༌། སླར་དེའི་སྣ་བུག་གཡས་པ་ནས་བྱུང་སྟེ། རང་གི་སྣ་བུག་གཡོན་པར་ཞུགས་པར་བསྒོམ་མོ། །དེ་ལྟར་བཟླས་པ་བྱས་པ་ཙམ་གྱིས་བྱེ་བ་གསོད་པར་འགྱུར་རོ། །ཞི་
བའི་བསམ་པས་སྔགས་འོད་ཟེར་དཀར་པོ་སྔ་མ་བཞིན་དུ་བསྒྲུབ་བྱའི་ལུས་བསིལ་ཞིང་ཕན་འདོགས་པར་སེམས་པས་བཟླས་ན་འཚོ་བར་བྱེད་ཟེར་རོ། །སྔགས་ལན་ཅིག་ནི་རྩ་སྔགས་ལན་ཅིག་གོ། བ་རུ་རའི་ཤིང་གི་ལྷོ་ཕྱོགས་སུ་གཏོགས་པའི་ཡལ་ག་སྨེ་ཤ་ཅན་གྱི་སྟ་རེས་བཅད་ལ། ཉི་ཤུ་དགུའི་ནུབ་མོ་དུར་ཁྲོད་དུ་མེ་ལ་བསྲེགས་ཏེ། བོང་བུའི་ཆུས་མེ་བསད་པའི་ཐལ་བ་བླངས་ལ་རྩ་སྔགས་ལན་ཅིག་བཟླས་པས་བསྒྲུབ་བྱ་གང་ལ་བསྣུན་ན་དེའི་མོད་ལ་ལྟུང་བར་བྱེད་དོ། །ཤ་ཟའི་སྙིང་གར་འཁོར་ལོ་བྲིས་ལ་སྔར་བཤད་པའི་དུར་ཁྲོད་ཀྱི་ཐལ་བ་ལ་སྔགས་མིང་སྤེལ་དང་བཅས་པ་ཡོངས་སུ་བཟླས་ནས་བསྒྲུབ་བྱ་གང་ལ་བསྣུན་ན་དེ་དེའི་མོད་ལ་ཤ་ཟས་གཟུང་བར་འགྱུར་རོ། །གོང་དུ་བསྟན་པའི་དུར་ཁྲོད་ཀྱི་སོལ་བ་ལ་རྩ་སྔགས་ལན་ཅིག་བཟླས་ནས་ཉི་ཤུ་དགུའི་མཚན་མོ་སྤང་ལེབ་བམ་རྩིག་པ་ལ་དབེན་པའི་གནས་སུ། གཟའ་གང་ཡིན་པ་དེའི་མཚན་མའི་དབུས་སུ་སྔར་གྱི་འཁོར་ལོ་བྲིས་ལ། དེའི་ལྟེ་བར་བསྒྲུབ་བྱའི་སྔགས་མིང་སྤེལ་དང་བཅས་པ་བྲིས་ནས་གུ་གུལ་ཆེན་པོས་བདུགས་ན་གཟས་བཟུང་བར་འགྱུར་རོ། །སྔར་གྱི་དེ་ཐམས་ཅད་ལ་འཁོར་ལོ་འོ་མས་བཀྲུས་ནས་ཞི་བའི་བསམ་པས་བཟླས་ན་སླར་འཚོ་བར་འགྱུར་རོ། །ཨ་ཏི་མུཀྟའི་ལྕུག་མའི་ཁྲི་ལ་འདུག་སྟེ། བུ་མོས་བཀལ་བའི་སྐུ་པ་སུམ་བསྒྲིལ་བྱས་ནས་ཡུང་བས་ཁ་བསྒྱུར་ཏེ། ནུབ་ཕྱོགས་ཀྱི་ཡལ་ག་ལ་བཏགས་ལ། རང་གཅེར་བུ་སྐྲ་ཀྲོལ་བར་བྱས་ཏེ། ལག་པ་གཡོན་པས་སྣེ་མོ་ནས་བཟུང་སྟེ་ཟླ་བ་གཟས་བཟུང་བ་མ་གྲོལ་
གྱི་བར་དུ་རྩ་སྔགས་བཟླས་ལ། དེ་ནས་དེ་བླངས་ཏེ་དེའི་རྩེ་མོས་གང་ལ་བསྣུན་པ་དེ་དེའི་མོད་ལ་རླུང་གི་ཤུགས་ཀྱིས་འོང་བར་འགྱུར་ཞིང༌། སླར་བཟློག་པའི་བསམ་པས་བསྣུན་ན་རང་གནས་སུ་ཕྱིར་འགྲོའོ། །མིའི་ཐོད་ཚལ་ལ་ལྡོང་རོས་དང་ཡུང་བས་ཉི་མའི་དཀྱིལ་འཁོར་གྱི་དབུས་སུ་འཁོར་ལོ་མིང་སྤེལ་དང་བཅས་པ་བྲིས་ནས། དུར་ཁྲོད་དམ་ལམ་བཞི་མདོར་ས་འོག་ཏུ་ཁ་ཕུབ་ཏུ་བཞག་ལ། བསེག་མ་ལ་ལན་ཅིག་བཟླས་ནས་གང་ལ་རེག་པ་དེ་ཇི་སྲིད་འཚོའི་བར་དུ་རེངས་པར་འགྱུར་རོ། །ཕྱུངས་ནས་འོ་མས་བཀྲུས་ན་གྲོལ་བར་འགྱུར་རོ། །འཚུབ་མས་ཁྱེར་བའི་ཤིང་ལོ་ལ་མཆིལ་མ་དང་བྱ་རོག་གི་ཁྲག་གིས། བྱ་རོག་གི་སྒྲོ་རྩེའི་སྨྱུ་གུས་མིང་སྤེལ་དང་བཅས་པ་བྲིས་ཏེ། རླུང་གྱེན་དུ་ལངས་པ་ལ་བསྐུར་ན་གང་དུ་འདོད་པ་དེར་འགྲོ་བ་སྟེ་སྐྲོད་པར་འགྱུར་རོ། །ར་ནག་པོའི་ཡན་ལག་ལྔ་དང་ཚིལ་ཆེན་དང་གུ་གུལ་ཆེན་པོ་རྣམས་ཆ་བསྙམས་ལ། ཆང་གིས་སྦྲུས་ཏེ་མཆོད་པའི་དུས་སུ་སྦྱར་ལ་རྩ་སྔགས་ལན་ཅིག་བཟླས་ཏེ་སྤོས་ཀྱི་དུད་པ་སྦྱར་ན་དུད་པ་དེ་སྣར་སོང་བ་ཙམ་གྱི་མོད་ལ་སེམས་ཅན་ཐམས་ཅད་ལ་འབེབས་པར་འགྱུར་རོ། །ལྔ་པ་ནི། ལག་པ་གཡོན་པའི་འཁོར་ལོ་ལ་བསྒྲུབ་བྱའི་མིང་བྲི། དེ་ལ་རྣམ་ཤེས་བཀུག་ནས་ལག་པ་གཡས་པ་ལ་རྩ་སྔགས་ལན་ཅིག་བཟླས་ཏེ་བཀབ་ན་སྦྲུལ་ནག་པོས་ཟིན་པའི་དུག་གསོས་པར་བྱེད་དོ། །མཁའ་འགྲོ་རྒྱས་བཏབ་པ་སྟེ་ཟིན་པ་ལ་རྩ་སྔགས་ལན་ཅིག་བཟླས་པའི་ཆུས་གཏོར་ན་དེ་གཏོང་བར་བྱེད་དོ། །ཀ་ར་བཱི་རའི་ལྕུག་མའི་སྨྱུ་གུས་སྐྱུ་རུ་རའི་འདབ་མ་ལ་འཁོར་ལོ་མིང་སྤེལ་དང་བཅས་པ་བྲིས་ཏེ་རྩ་སྔགས་
ལན་ཅིག་བཟླས་པ་སྦྲུམ་མའི་མངལ་གང་དུ་འདོད་པ་དེར་འཕོ་བར་འགྱུར་རོ། །གསུམ་པ་ནི། དཔལ་ཧེ་རུ་ཀའི་ངེས་དོན་གྱི་ཡེ་ཤེས་ནི་མི་ཤེས་པར། དེའི་སྔགས་ལ་བརྟེན་པའི་དངོས་གྲུབ་ཀུན་མངོན་པར་འདོད་པ་ནི་རྨོངས་པས་འབྲས་འདོད་ནས་དེའི་ཕུབ་མ་བརྡུང་བ་དང་མཚུངས་སོ། །གཉིས་འདུས་ཀྱི་འགྱུར་ལས། ཧེ་རུ་ཀ་དཔལ་ཡེ་ཤེས་ནི། །མི་ཤེས་ཞེས་འབྱུང་ངོ༌། །གསང་སྔགས་ཀྱི་དེ་ཉིད་ཤེས་པ་འདི་ནི་མེད་པ་རུ། འཇིག་རྟེན་ལས་འདས་པའི་དངོས་གྲུབ་དང་ནི་འཇིག་རྟེན་པའི་དངོས་གྲུབ་ཀྱི་བདེ་བ་དག །མི་སྟེ་སྒྲུབ་པ་པོ་ཡིས་ཐོབ་པར་མི་འགྱུར་རོ། །བྷ་བ་བྷ་དྲས། བདག་མེད་པའི་སྔགས་མེད་པས་དངོས་གྲུབ་མི་འགྲུབ་བོ་ཞེས་བཤད་པ་བཞིན་དུ། བདག་མེད་པའི་དེ་ཁོ་ན་ཉིད་ཀྱི་ཏིང་ངེ་འཛིན་བརྟན་པོ་མེད་པར་སྔགས་བཟླས་པའི་དངོས་གྲུབ་ཁྱད་པར་ཅན་རྣམས་མི་འཐོབ་པ་ནི་རྒྱུད་སྡེ་བཞི་ག་ལ་ཡིན་ལ། བླ་མེད་ལ་ནི་སྟོང་ཉིད་ཀྱི་ཏིང་ངེ་འཛིན་ཁྱད་པར་བ་བདེ་སྟོང་སྦྱར་བའི་ཏིང་ངེ་འཛིན་མི་བརྟན་ན། འཇིག་རྟེན་པའི་དངོས་གྲུབ་ཡིན་ཀྱང་ཁྱད་པར་ཅན་རྣམས་བདེ་བླག་ཏུ་མི་འགྲུབ་པས་སྤྱོད་པ་བྱ་དགོས་སོ། །གསང་སྔགས་ཀྱི་ངེས་དོན་འདི་ནི་མི་ཤེས་པར། ཐེག་པ་མཆོག་འདིའི་རྣལ་འབྱོར་པ་ཉིད་མངོན་པར་འདོད་པ་དེ་ཡི་ངལ་བ་དོན་མེད་དེ། དགོས་པ་གང་གི་ཕྱིར་དུ་ངལ་བའི་འབྲས་བུ་འཐོབ་པར་མི་འགྱུར་རོ། །གོང་མས་སྔགས་ཀྱི་ངེས་དོན་མི་ཤེས་པར་བཟླས་པས་དངོས་གྲུབ་ཁྱད་པར་ཅན་འདོད་པ་འབྲས་མེད་དུ་བསྟན། འོག་མས་སྔགས་ཀྱི་ངེས་དོན་མི་ཤེས་པར་རྣལ་འབྱོར་པ་
ཁྱད་པར་ཅན་དུ་འདོད་པ་འབྲས་མེད་དུ་བསྟན་པས་མི་ཟློས་སོ། །སྔགས་ལ་སོགས་པའི་གསང་སྔགས་ཀྱིས་དངོས་གྲུབ་ཐམས་ཅད་སྦྱིན་པར་བྱེད་པ་འདི་ནི་འདོད་པའི་ཡུལ་ལ་རང་བཞིན་ཤེས་པའི་སྒོ་ནས་སྤྱོད་པའི་ཐབས་ལ་བརྟེན་ནས་ཡིན་ནོ། །སྒྲུབ་པ་པོས་སྔགས་ཀྱི་ངེས་དོན་དང༌། འདོད་སྤྱོད་ཀྱི་གཙོ་བོ་ཕྱག་རྒྱ་ལ་བརྟེན་པ་དག་སྟེ་གཉིས་སོ། །བདེ་བར་གཤེགས་པས་གསུངས་པ་འདི། ལེགས་པར་ཤེས་ནས་ཤ་ལ་སོགས་པའི་བཟའ་བ་དང༌། ཆང་ལ་སོགས་པའི་བཏུང་བའི་བཟའ་བཏུང་གི་རོ་དང་སོགས་ཀྱིས་གཟུགས་དང་སྒྲ་དང་དྲི་དང་རེག་བྱ་བསྟེན་པས། བདག་ཉིད་ལ་རབ་ཏུ་མཆོད་པར་བྱེད་པ་ནི་དངོས་གྲུབ་ཐམས་ཅད་སྒྲུབ་པར་བྱེད་པ་ཡིན་ནོ། ། ཙཱ་རུ་ནི་ལྷག་མ་ཡ་ཡང་འཇུག་མོད་ཀྱང་འདིར་དེ་མི་འགྲིག་པས། མཛེས་པ་ལ་འཆད་པ་ལྟར་འདོད་ཡོན་རྣམས་ཀྱང་ཤིན་ཏུ་ཡིད་དུ་འོང་བ་བསྟན་ཞེས་པའོ། དེ་ཡང་བདེ་ཆེན་དང་སྟོང་པ་སྦྱོར་བ་ལ་བདེ་བ་འཕེལ་དགོས་ལ། དེ་ཡང་བདེ་བའི་རྟེན་ཀུནྡ་ལྟ་བུ་རྒྱས་པ་ལ་རག་ལས་ཤིང༌། དེ་རྒྱས་པ་ལ་འདོད་ཡོན་ཁྱད་པར་ཅན་རྣམས་བསྟེན་པས་དབང་པོ་རྟེན་བཅས་རྒྱས་དགོས་པ་ཡིན་ཏེ། བརྟག་གཉིས་ལས། དེ་ལ་ག་པུར་རྒྱུ་ཡི་ཕྱིར། །ཤ་ནི་བཟའ་བ་ཉིད་དུ་བྱ། །ཁྱད་པར་དུ་ཡང་ཆང་ཉིད་དོ། ཞེས་གསུངས་པ་ལྟར་རོ། །བཞི་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྩ་བའི་སྔགས་ཀྱི་ལས་ཚོགས་ཀྱི་ཆོ་གའི་ལེའུ་སྟེ་དགུ་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་
སྦས་པའི་དོན་ཀུན་གསལ་བ་ལས་ལེའུ་དགུ་པའི་བཤད་པའོ།། ༈ །།གཉིས་པ་སྙིང་པོའི་སྔགས་ཀྱིས་ལས་བསྒྲུབ་པ་ལ་གཉིས། ལེའུ་བཅུ་པ་དང༌། ལེའུ་བཅུ་གཅིག་པའོ། །དང་པོ་ལ་གསུམ། སྐུ་གསུམ་སྒྲུབ་པ་དང༌། སྙིང་པོའི་ལས་ཚོགས། ལེའུའི་མཚན་བསྟན་པའོ། །དང་པོ་ལ་གཉིས། བཤད་པར་དམ་བཅའ་བ། སྒྲུབ་པ་པོས་སྐུ་གསུམ་འགྲུབ་པར་བསྟན་པའོ། །དང་པོ་ནི། ལེའུ་དགུ་པའི་རྗེས་དེ་ནས་རང་དང་དཔལ་ཧེ་རུ་ཀ་གཉིས་སུ་མེད་པར་སྦྱོར་བ་སྒྲུབ་པ་པོ་གང་གིས་ཤེས་པ་ཙམ་གྱིས་ནི། འགྲུབ་པར་ཐེ་ཚོམ་མེད་པ་ཡི་སྐུ་གསུམ་སྒྲུབ་པ་ནི་བཤད་པར་བྱའོ། །མལ་གྱི་འགྱུར་ལས། དེ་ནས་ཧེ་རུ་ཀ་གཉིས་མེད། སྦྱོར་བ་གང་གིས་ཤེས་ཙམ་གྱིས། །འགྲུབ་པར་ཐེ་ཚོམ་མེད་པ་ཡིས། །སྐུ་གསུམ་པོ་ནི་བཤད་པར་བྱ། ཞེས་འབྱུང་བ་བདེའོ། །གཉིས་པ་ལ་གཉིས། སྤྱིའི་དོན་དང༌། ཡན་ལག་གི་དོན་ནོ། །དང་པོ་ནི། རང་དང་ཧེ་རུ་ཀ་གཉིས་སུ་མེད་པར་སྦྱོར་བའི་ཐབས་ཀྱིས། སྐུ་གསུམ་འགྲུབ་པར་བཤད་པའི་ཐབས་དེ་གང་ཡིན་ཞེ་ན། འདི་ལ་ལྭ་བ་པས། མངོན་བརྗོད་ཀྱི་ལེའུ་བཞི་པ་དང༌། ལྔ་པ་དང༌། དྲུག་པ་ནས་བཤད་པའི་སྐུ་གསུང་ཐུགས་ཀྱི་བདེ་མཆོག་གི་དཀྱིལ་འཁོར་ལྷ་སུམ་ཅུ་པ་གསུམ་སྔར་བཤད་པས། རིམ་པ་བཞིན་དུ་སྐུ་སྤྲུལ་སྐུ་དང༌། གསུང་ལོངས་སྐུ་དང༌། ཐུགས་ཆོས་སྐུ་སྒྲུབ་པར་བཤད་དེ། རང་དང་སྐུ་གསུང་ཐུགས་ཀྱི་ཧེ་རུ་ཀ་གཉིས་གཉིས་སུ་མེད་པར་སྦྱོར་བའོ། །དེ་ནི་དཀྱིལ་འཁོར་སོ་སོའི་
སྒོ་ནས་སྐུ་གསུང་ཐུགས་ཀྱི་སྐུ་གསུམ་སྒྲུབ་པའོ།། །།དཀྱིལ་འཁོར་གཅིག་ལ་སྐུ་གསུམ་སྒོམ་ཚུལ་ལ། ཀོང་ཀ་ན་པ་ནི་ཧཱུཾ་གཅིག་པུ་ལས་བྱུང་བའི་འཁོར་ལོ་གསུམ་གྱི་གནས་སྐབས་ནི་སྤྲུལ་པའི་སྐུའོ། །བཟླས་པའི་གནས་སྐབས་སུ་འཁོར་ལོ་གསུམ་ཆར་རང་གི་ལུས་ལ་བསྡུས་ལ་ཆོ་གས་གོ་བསྐོན་པ་ནི་ལོངས་སྤྱོད་རྫོགས་པའི་སྐུའོ། །དེའི་རྗེས་ཐོགས་ལ་ཨཱ་ལི་ཀཱ་ལི་སྤྲོ་ཞིང་བསྡུ་བའི་གནས་སྐབས་ནི་ཆོས་ཀྱི་སྐུ་ཡིན་ནོ་ཞེས་བཞེད་དེ། ལང་ཀ་དང་དཔའ་བོ་ཡང་དེ་བཞིན་དུ་བཞེད་དོ། །ཧཱུཾ་གཅིག་པུ་ལས། འཁོར་ལོ་གསུམ་རྫོགས་པ་ནི་ལཱུ་ཨི་པ་ལྟར་དཀྱིལ་འཁོར་རྫོགས་པར་སྐྱེད་པ་ཡིན་ལ། དཔའ་བོས་འཁོར་ལོ་གསུམ་ལ་སོགས་པར་ཞེས་བཤད་པས་འཁོར་ལོ་གསུམ་ཙམ་མིན་ནོ། །ལང་ཀ་དང་དཔའ་བོ་གཉིས་ཀས་སྙིང་གའི་པདྨའི་ཟླ་བ་ལ། ཨཱ་ལི་དང་ཀཱ་ལིའི་སྤྲོ་བ་དང་བསྡུ་བ་ཞེས་བཤད་པས། ལུ་ཨི་པ་ལྟར་ལྟེ་བར་མི་བྱེད་པར་སྙིང་གར་བྱེད་པའི་ལུགས་སོ། །དེ་རྣམས་ཀྱི་ལུགས་ཀྱིས་ནི་གཟུགས་སྐུ་གཉིས་དང་རྗེས་སུ་མཐུན་པར་སྒོམ་པ་རིམ་པ་དང་པོ་དང༌། ཆོས་སྐུ་དང་རྗེས་སུ་མཐུན་པར་སྒོམ་པ་རྫོགས་རིམ་རྣལ་འབྱོར་ཆེན་པོ་སྒོམ་པ་ལ་མཛད་དེ། མན་ངག་ཡིན་གསུང་ངོ༌། །དཔལ་དཱ་རི་ཀ་པས། ཕྱི་དཀྱིལ་གྱི་ལྷ་སྒོམ་པ་དང༌། བྱང་ཕྱོགས་སོ་བདུན་སྒོམ་པ་དང༌། ལུས་དཀྱིལ་སྒོམ་པ་ནི་རིམ་པ་བཞིན་དུ་སྤྲུལ་སྐུ་དང༌། ཆོས་སྐུ་དང༌། ལོངས་སྐུའི་སྒྲུབ་ཐབས་སུ་གསུངས་སོ། །དང་པོ་ནི་གདུལ་བྱ་ཐུན་མོང་པའི་དོན་དུ་གསུངས་པ་ཤིན་ཏུ་རགས་པའི་སྐུའི་རྣམ་པ་ཅན་ཡིན་པས་སྤྲུལ་སྐུ་དང༌།
གཉིས་པ་ནི། བདེ་བ་ཆེན་པོའི་ཡེ་ཤེས་ཀྱིས་དེ་ཁོ་ན་ཉིད་ཀྱི་དོན་ལ་ཞུགས་པའི་རྣམ་པ་ཅན་ཡིན་པས་ཆོས་སྐུ་དང༌། གསུམ་པ་ནི་གདུལ་བྱ་མཆོག་གི་དོན་དུ་གསུངས་པ་ཤིན་ཏུ་ཕྲ་བའི་རྩ་དང་ཁམས་ཀྱི་སྒོ་ནས་གཟུགས་སྐུ་འཛིན་པའི་རྣམ་པ་ཅན་ཡིན་པས། རྩ་དང་ཁམས་བྱིན་གྱིས་བརླབས་པའི་སྒོ་ནས་བདེ་བ་ལ་རྫོགས་པར་ལོངས་སྤྱོད་པ་ལ་ལོངས་སྐུར་བཞག་སྟེ་ལེགས་པ་ཡིན་ནོ། །ཀུན་སྤྱོད་ལས་ཀྱང༌། ཆོས་དང་ལོངས་སྤྱོད་སྤྲུལ་པ་ཡི། །སྐུ་གསུམ་དག་ནི་རྣམ་སྒོམ་པ། །བྱང་ཆུབ་ཕྱོགས་ནི་སུམ་ཅུ་བདུན། །དེར་ནི་ངེས་པར་འབྱུང་བར་འགྱུར། ཞེས་བྱང་ཕྱོགས་སོ་བདུན་སྒོམ་པ་དེར་སྐུ་གསུམ་སྒོམ་པ་ངེས་པར་འབྱུང་ཞེས་གསུངས་སོ། །དེ་ལ་བདེ་སྟོང་སྦྱོར་བའི་སྒོ་ནས་བྱང་ཕྱོགས་སོ་བདུན་སྒོམ་པ་ཆོས་སྐུ་དང༌། སོ་བདུན་ཕྲ་བ་ལུས་དཀྱིལ་དང་སྦྱར་བ་སྒོམ་པ་ལོངས་སྐུ་དང༌། སོ་བདུན་རགས་པ་ཕྱི་དཀྱིལ་དང་སྦྱར་བསྒོམ་པ་སྤྲུལ་སྐུ་ཡིན་པས་དེ་དང་ཡང་མཐུན་ནོ། །འོད་གསལ་དུ་ཞུགས་པ་ནི་ཆོས་སྐུ་དང༌། དེར་འཇུག་པའི་རྟེན་ནི་སྒྱུ་མའི་སྐུ་དང༌། འོད་གསལ་ལས་བཞེངས་པའི་ཕྲ་བའི་ཟུང་འཇུག་གི་སྐུ་ནི་ལོངས་སྐུ་དང༌། སྐུ་དེས་རགས་པའི་དཀྱིལ་འཁོར་སྤྲུལ་ཏེ་སྒོམ་པ་ནི་སྤྲུལ་སྐུ་ཡིན་ཏེ། ལོ་དྲིལ་གཉིས་ཀྱི་རྫོགས་རིམ་གྱི་བཤད་པར་གསལ་བར་བཤད་ཟིན་ཏོ། །དེ་ལྟར་རིམ་པ་གཉིས་ལ་སྐུ་གསུམ་སྦྱར་དགོས་པ་ཡང༌། འབྲས་བུའི་སྐུ་གསུམ་དང་རྗེས་སུ་མཐུན་པར་ལམ་རིམ་པ་གཉིས་སུ་སྒོམ་དགོས་པའི་གནད་ཀྱིས་ཡིན་
ནོ། །འདིར་སྡོམ་འབྱུང་གི་ལེའུ་གཉིས་པར་གསུངས་པའི་སྐྱེ་ཤི་བར་དོ་གསུམ་དང་མཐུན་པར་སྒོམ་པའི་མཐུན་ཡུལ་གྱི་གཞིའི་སྐུ་གསུམ་སྦྱར་ནས་དེ་དང་མཐུན་པར་སྒོམ་པའི་རིམ་གཉིས་ཀྱི་སྐུ་གསུམ་ལ་སྦྱར་ན་ཆེས་ལེགས་སོ། །གཉིས་པ་ནི། སྔར་ཧེ་རུ་ཀ་དང་གཉིས་སུ་མེད་པར་སྦྱོར་བས་སྐུ་གསུམ་འགྲུབ་པར་བཤད་པ་འདིར་འཆད་ལ། དེ་ཡང་བསྐྱེད་རིམ་པའི་སྐུ་གསུམ་སྒོམ་པ་ཐམས་ཅད་ཧེ་རུ་ཀའི་བདག་ཉིད་དུ་སྒོམ་དགོས་པས། ཧེ་རུ་ཀ་དང་གཉིས་སུ་མེད་པར་སྦྱོར་བ་ཞེས་བྱའོ། །འདི་ནི་རྫོགས་རིམ་གྱི་ལམ་གྱི་སྐུ་གསུམ་སྐྱེ་བའི་རྒྱུད་སྨིན་བྱེད་ཡིན་ནོ། །དེ་ལྟར་བསྒོམས་པ་ལ་བརྟེན་ནས་རྫོགས་རིམ་གྱི་སྣང་ཕྱོགས་ཀྱི་ཧེ་རུ་ཀ་དང༌། སྟོང་ཕྱོགས་ཀྱི་ཧེ་རུ་ཀ་སྒོམ་པ་ནི་ལམ་གྱི་སྐུ་གསུམ་སྒོམ་པའི་མཆོག་གོ། དེ་ལྟར་ན་སྒྲུབ་པ་པོ་གང་གི་ཚེ་རྫོགས་རིམ་གྱི་ཆོས་ཀྱི་སྐུའི་ལུས་ཅན་དུ་གྱུར་པ་སྟེ། བདེ་སྟོང་དབྱེར་མེད་ཀྱི་ལྷན་སྐྱེས་ཀྱི་འོད་གསལ་དུ་ཞུགས་པ་ལ། དེ་ལྟར་སེམས་ལེགས་པར་གནས་པར་གྱུར་པ་དེའི་ཚེ་ལམ་གྱི་ཡེ་ཤེས་ཆོས་ཀྱི་སྐུ་ཞེས་ང་སྨྲའོ་ཞེས་གསུངས་ཏེ། སྒྲུབ་པ་པོ་སྟོང་ཕྱོགས་ཀྱི་ཧེ་རུ་ཀ་དང་གཉིས་སུ་མེད་པར་བྱས་པའོ། །སྒྲུབ་པ་པོ་གང་གི་ཚེ་རྫོགས་རིམ་གྱི་ལོངས་སྤྱོད་རྫོགས་སྐུའི་ལུས་ཅན་དུ་གྱུར་པ་སྟེ། ལྷན་སྐྱེས་ཀྱི་འོད་གསལ་གྱི་རླུང་སེམས་ཙམ་ལས་གྲུབ་པའི་ཧེ་རུ་ཀའི་སྐུ་གྱུར་ཅིང༌། དེ་ནས་སྒྱུ་མའི་སྐུ་དེ་ལ་མཉམ་པར་བཞག་པ་ལ་གནས་པ་དེའི་ཚེ། རྫོགས་རིམ་གྱི་ལོངས་སྤྱོད་རྫོགས་པའི་སྐུར་ང་རབ་ཏུ་སྨྲ་སྟེ། སྒྲུབ་པ་པོ་སྣང་ཕྱོགས་སྒྱུ་མའི་ལོངས་སྤྱོད་
རྫོགས་པའི་སྐུའི་ཧེ་རུ་ཀ་དང་གཉིས་སུ་མེད་པར་བྱས་པའོ། །སྒྲུབ་པ་པོ་གང་གི་ཚེ་སྤྲུལ་པའི་སྐུའི་ལུས་ཅན་དུ་གྱུར་པ་སྟེ། ཟུང་འཇུག་པའི་རགས་པའི་དཀྱིལ་འཁོར་དུ་གྱུར་ཅིང༌། དེ་ལ་སེམས་རྩེ་གཅིག་ཏུ་གནས་པར་གྱུར་པ་དེའི་ཚེ་སྤྲུལ་པའི་སྐུར་ཡང་ང་སྨྲ་སྟེ། སྒྲུབ་པ་པོ་སྣང་ཕྱོགས་ཀྱི་རགས་པའི་སྐུའི་ཧེ་རུ་ཀ་དང་གཉིས་སུ་མེད་པར་བྱས་པའོ། །ལོ་ཆེན་དང་མལ་གྱི་འགྱུར་ལ། ལེགས་སེམས་དང༌། མཉམ་གཞག་དང༌། སེམས་རྩེ་གཅིག་པ་ཞེས་པའི་རྐང་པ་གསུམ་མེད་ཀྱང༌། གཉིས་འདུས་དང་མར་ངོ་རྐྱང་པའི་འགྱུར་ལ་ཡོད་པ་ལེགས་སོ། །ཆོས་ཀྱི་སྐུར་གྱུར་པ་སོགས་གསུམ་པོ་འབྲས་བུའི་སྐབས་སུ་གནས་གྱུར་པ་ལ་འཆད་པ་ནི་མ་བརྟགས་པ་སྟེ། དེ་དག་འབྲས་བུ་ལ་འཆད་ན་སྔར་ཧེ་རུ་ཀ་དང་གཉིས་སུ་མེད་པར་སྦྱོར་བས་སྐུ་གསུམ་སྒྲུབ་པ་བཤད་པར་བྱ། ཞེས་དམ་བཅས་པ་དོན་མེད་པར་འགྱུར་ཏེ། དེ་དག་ལས་གཞན་པའི་ཐབས་འདིར་མ་གསུངས་པའི་ཕྱིར་དང༌། དེ་རྣམས་ཀྱང་སྐུ་གསུམ་བསྒྲུབ་པའི་ཐབས་ལ་མ་བཤད་པའི་ཕྱིར་དང༌། ཡེ་ཤེས་ཞེས་པའི་རྐང་པ་གཉིས་དང་ཟློས་པར་འགྱུར་བའི་ཕྱིར་རོ། །གཞུང་དེ་རྣམས་བསྐྱེད་རིམ་ལ་སྦྱོར་བའི་བཤད་པ་ཡང་རུང་ཙམ་སྣང་ཡང༌། གཙོ་བོ་ནི་རྫོགས་རིམ་ལ་སྦྱོར་རྒྱུ་ཡིན་ནོ། །དེ་འདྲ་བའི་ལམ་གྱི་སྐུ་གསུམ་སྒོམ་པ་གོམས་པར་བྱས་ན་འབྲས་བུའི་སྐབས་ཀྱི་ཡེ་ཤེས་ཆོས་སྐུ་དང༌། ལོངས་སྤྱོད་རྫོགས་པའི་སྐུ་དང་སྤྲུལ་
པའི་སྐུ་ཡང་དག་པར་ཐོབ་པར་གདོན་མི་ཟ་ཞིང༌། རྣལ་འབྱོར་པ་བདག་ཉིད་འབྲས་བུའི་ཤྲཱི་ཧེ་རུ་ཀར་ནི་འགྱུར་བ་འདི་ལ་ཐེ་ཚོམ་མེད་དོ། །ཕྱི་མ་གཉིས་ཀྱིས་སྐུ་གསུམ་ཡང་རྒྱུད་ཐ་དད་མིན་པར་ཧེ་རུ་ཀ་གཅིག་གི་བདག་ཉིད་དུ་གྱུར་པར་སྟོན་ནོ། །དགུ་པར། དངོས་གྲུབ་ཐམས་ཅད་སྒྲུབ་བྱེད་ཡིན། ཞེས་གསུངས་པའི་མཆོག་གི་དངོས་གྲུབ་སྐུ་གསུམ་འགྲུབ་པ་ཡང་འདིར་བསྟན་པ་ཡིན་ནོ། །གཉིས་པ་ལ་གཉིས། བཤད་པར་དམ་བཅའ་བ་དང༌། ལས་ཚོགས་དངོས་སོ། །དང་པོ་ནི། སྙིང་པོ་ཡི་གེ་ཉེར་གཉིས་པའི་གསང་སྔགས་འདི་ཡི་ནི་གསང་བ་སྟེ་སྒྲུབ་པ་བཤད་ཀྱིས་སྒྲུབ་པ་པོ་ཉོན་ཅིག་ཅེས་ཞུ་བ་པོ་ལ་ཉན་པར་བསྐུལ་ལོ། །གཉིས་པ་ནི། འགེགས་ནས་ཤི་བའི་རོ་ལ་རོ་ལངས་བསྒྲུབས་པ་གྲུབ་པ་ན། བདག་ལ་མཁའ་སྤྱོད་ཀྱི་དངོས་གྲུབ་བྱིན་ཅིག་ཅེས་སྨྲས་པ་ན། དེའི་ལུས་ལས་འཛགས་པའི་མར་ཁུ་བླངས་པ་སྣོད་དུ་བླུགས་ཏེ། སྙིང་པོའི་སྔགས་བཟླས་པས་རྐང་མཐིལ་ལ་བྱུགས་ན་དཔག་ཚད་བྱེ་བར་འཕགས་ནས་མཁའ་ལ་ཕར་འགྲོ་བ་དང་ཚུར་འོང་བར་འགྱུར་རོ། །སྐྱེ་བདུན་ཀྱི་རོ་ཙ་ན་དང་གང་འདོད་པའི་སྲོག་ཆགས་དེའི་ཤ་འདྲེས་པའི་ཐིག་ལེ་བྱས་པའམ་ཟོས་ན་གཟུགས་སྟོང་ཕྲག་དུ་མར་བྱེད་དོ། །ཤ་དེ་ཟོས་པའི་མཐུས་ཁང་བཟང་དང་ཤིང་དང་ཁྱིམ་ལ་འཛེགས་ཏེ་རྣལ་འབྱོར་མ་རྣམས་དང་ལྷན་ཅིག་དཔག་ཚད་བྱེ་བའི་བར་དུ་འགྲོ་བར་འགྱུར་རོ། །རྟ་རྒའི་མར་དང་ཚིལ་ཆེན་ལ་སྔགས་ཁྲི་བཟླས་ནས་རྐང་མཐིལ་ལ་བྱུགས་ན་ནམ་མཁའ་ལ་འགྲོ་བ་དང་འོང་