ཤོག་ལྷེབ་ ༦༠༡ ནས་ ༧༠༠ བར།
བ་ལས་གཞན་དུ་མི་འགྱུར་བ་སྟེ་ངེས་པར་འགྱུར་རོ། །མཆོད་གཏོར་སྔོན་དུ་འགྲོ་བས་མར་ངོ་ལ་སྲོག་ཆགས་སྣ་ཚོགས་ཀྱི་ཐོད་པ་དུར་ཁྲོད་ཀྱི་སས་བཀང་ལ། དེར་ཡུངས་ཀར་བསྐྲུན་ཏེ་དུས་དུས་སུ་དེའི་ཆེད་དུ་གཏོར་མ་སྦྱིན་པ་དང་བསྲུང་བའི་སྔགས་སུམྦྷ་སོགས་བཟླའོ། །ཕྱིས་ཡུངས་ཀར་མ་ནོར་བར་གཏུམས་ལ་སོ་སོ་ལ་སྔགས་མིང་སྤེལ་དང་བཅས་པ་ཁྲི་ཁྲི་བཟླས་ནས་ཐུམ་པོར་བྱས་ཏེ། གང་དང་གང་རང་གཞན་སུ་ལ་བཏགས་པ་དེ་དང་དེར་སྣང་ངོ༌། །སྣང་བར་འདོད་ན་ཐིག་ལེ་བྱས་པའམ་ཐུམ་པོ་བཏགས་ན་སྣང་བར་འགྱུར་ཞིང༌། མི་སྣང་བར་འདོད་ན་ཐིག་ལེ་ཕྱིས་པའམ་ཐུམ་པོ་བཀྲོལ་ན་མི་སྣང་བར་འགྱུར་རོ། །འདོད་ན་བྱིས་པ་དང་ཞེས་བྱ་བ་ལ་སོགས་པ་ནི་ཐོད་པ་སོ་སོར་ཡུངས་ཀར་བསྐྲུན་པ་སོགས་ཀྱི་སྦྱོར་བ་བྱས་པས་སོ། །བསྒྲུབ་བྱའི་རྐང་རྗེས་ཀྱི་ས་དང་དུར་ཁྲོད་ཀྱི་ཐལ་བས་གཟུགས་བརྙན་བྱས་ལ། དྲག་ཤུལ་སྤྱོང་པའི་རྫས་ཀྱིས་འཁྲུལ་འཁོར་ལས་དང་མཐུན་པའི་བསྐུལ་ཚིག་སྨོས་པ་ཅན། སྐུད་པ་ནག་པོས་དཀྲིས་པ་དེའི་སྙིང་གར་གཞུག་གོ། དེ་ནས་དེ་ལ་བསྒྲུབ་བྱ་བསྟིམས་ལ་སྔགས་བསྐུལ་ཚིག་དང་བཅས་པ་ཟློས་ཤིང་མི་རུས་ཀྱི་ཕུར་པ་རྣོན་པོ་སོར་བརྒྱད་པ་ལ་སོགས་པར་བཏབ་ན། ཚིག་འཕྲོག་པ་ལྐུགས་པ་དང༌། མཐོང་བ་འཕྲོག་པ་ལོང་བ་དང༌། ཉན་པ་འཕྲོག་པ་འོན་པ་དང༌། སྣ་འཕྲོག་པ་དྲི་མི་ཚོར་བ་དང༌། ལྕེ་འཕྲོག་པ་རོ་མི་ཚོར་བར་བྱེད་དོ། །གཟུགས་སྟོང་ཕྲག་དུ་མར་
བྱེད་པ་ནས་ལྕེ་འཕྲོག་པར་བྱེད་པའི་བར་ལ། ལྭ་བ་པ་དང་ལྷ་སྦས་ཀྱི་འགྲེལ་པར་ཆོ་ག་གཞན་མང་པོ་བཤད་པ་རྣམས་ཚིག་མངས་སུ་དོགས་ནས་སྔོན་གྱི་ལོ་ཙཱ་བའི་མན་ངག་ལས་འབྱུང་བ་རྣམས་འདིར་བཀོད་དོ། །བསྒྲུབ་བྱ་གང་གི་ཁྲག་འདྲེན་འདོད་པ་དེའི་ཁྲག་འདྲེན་པར་བྱེད་པ་དང༌། རེངས་པར་བྱེད་པ་ནི་བཤད་ཟིན་ཏོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་སྐུ་གསུམ་འགྲུབ་པ་དང་སྙིང་པོའི་སྔགས་ཀྱི་ལས་ཚོགས་ཀྱི་ཆོ་གའི་ལེའུ་སྟེ་བཅུ་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་བཅུ་པའི་བཤད་པའོ།། ༈ །། གཉིས་པ་ལེའུ་བཅུ་གཅིག་པ་ལ་བཞི། བཤད་པར་དམ་བཅའ་བ། སྐྱེ་བདུན་བརྟག་པའི་ཐབས། སྐྱེ་བདུན་གྱི་རོ་ཙ་ན་ལ་བརྟེན་ནས་ལས་སྒྲུབ་པ། །ལེའུ་ཡི་མཚན་བསྟན་པའོ། །དང་པོ་ནི། ལེའུ་བཅུ་པའི་རྗེས་དེ་ནས་སྙིང་པོའི་ལས་སྔར་བཤད་པ་ལས་བཞན་ཡང་སྒྲུབ་པ་པོས། མྱུར་དུ་དངོས་གྲུབ་ལ་འཇུག་པའི་དངོས་གྲུབ་ཐོབ་པར་འགྱུར་བ་བཤད་པར་བྱའོ། །དེ་གང་ཞེ་ན། སྐྱེ་བ་བདུན་པའི་བར་དུ་བར་མ་ཆད་པར་མིར་འབྱུང་བ་སྟེ་སྐྱེས་པའི་རོ་ཙ་ན་ལ་སོགས་པ་སྒྲུབ་པ་པོ་གང་གིས་བསྟེན་པ་ཙམ་གྱིས་དངོས་གྲུབ་འགྲུབ་པའོ། །གཉིས་པ་ནི། མིའི་འགྲོ་བའི་སྐྱེས་བུ་སྟེ་སྐྱེས་པ་གང་ཞིག་ལུས་ཀྱི་རྡུལ་དྲི་ཞིམ་པོར་འབྱུང་བ་དང༌། ཚིག་བདེན་པར་སྨྲ་བ་དང༌། ཡུན་རིང་པོར་མིག་མི་འཛུམས་པ་ལ་སྐལ་ལྡན་གྱིས་ཁུ་བ་མྱུར་དུ་མི་འབྱུང་བ་ལ་
འདོད་པ་དང༌། མིག་ཡུན་རིང་པོར་གདངས་པ་ལ་འདོད་པ་དང༌། མྱུར་དུ་འཛུམ་པར་བྱེད་པ་ལ་འདོད་པའི་ལུགས་གསུམ་བཤད་པ་ལ། གཞུང་བོད་དཔེ་བཞིན་ཡོད་ན་སྔ་ཕྱི་གཉིས་འོང་དོན་མེད་པས་བར་པ་ལྟར་རོ། །དེའི་ཚད་ནི་ཐ་མལ་པའི་མིག་འཛུམས་ཐེབས་བདུན་གྱི་བར་དུ་མི་འཛུམས་པ་ལ་བཞེད་དོ། །ཡིད་ལ་ཁྲོ་བ་མེད་པར་གྱུར་པ་དང༌། ཁ་ནས་དབུགས་དྲི་ཞིམ་པ་འབྱུང་བ་དེ་ནི་སྐྱེ་བ་བདུན་བར་མ་ཆད་དུ་མིའི་སྐྱེ་བར་གྱུར་པའི་རྟགས་ཡིན་ནོ། །དེ་འདྲ་བའི་དྲི་ཞིམ་པོ་ནི་རོ་ཙ་ནའི་འབྲས་བུ་ཡིན་པས། དེས་དེ་རྗེས་སུ་དཔག་པར་བྱའོ། །གྲིབ་མ་རིམ་པ་བདུན་པ་བྱ་ངང་པའི་འགྲོས་ཅན། སྙིང་རྗེ་དེ་དང་ཡང་དག་པར་ལྡན་པ་ཞེས་པ་འདི་ལོ་ཆེན་དང་མལ་གྱི་འགྱུར་ལ་མེད་ལ། གཉིས་འདུས་དང་མར་དོ་རྐྱང་པའི་འགྱུར་ལས་འབྱུང་ངོ༌། །གསུམ་པ་ནི། དེ་བསྟེན་ནས་ཞེས་པ་ལ་བྷ་བ་བྷ་དྲས་དྲི་ཞིམ་པོ་དེ་བསྣམས་པས་རོ་ཙ་ན་ཡོད་པར་དཔོག་པ་ལ་བཤད་དེ། དེའི་སྐད་དོད་ལ་བསྣམས་པ་ཡོད་གསུང་ངོ༌། །སྐྱེ་བདུན་དེ་ཤི་བ་ན་དེའི་སྙིང་ཁ་ན་རོ་ཙ་ན་ཡོད་དེ་དེ་བླངས་ལ། དཔལ་ཧེ་རུ་ཀའི་སྙིང་པོའི་སྔགས་བརྒྱ་རྩ་བརྒྱད་བཟླས་ནས་དཔྲལ་བར་ཐིག་ལེ་བྱས་ན། སྟེང་དུ་སྟེ་ནམ་མཁའ་ལ་ལྡིང་བར་འགྱུར་ཞིང༌། ས་ནས་དཔག་ཚད་བྱེ་བའི་སྟེང་དུ་འགྲོ་བར་འགྱུར་རོ། །དེ་བསྟེན་པ་སྟེ་བསྣམས་པ་ཙམ་གྱིས་འཇིག་རྟེན་གསུམ་པོ་ཐམས་ཅད་ཤེས་པའི་མངོན་ཤེས་ཅན་དུ་འགྱུར་རོ། །དཔག་ཚད་བྱེ་བ་ལྔ་བཅུར་ཉིན་ཞག་གཅིག་
གིས་ཕར་འགྲོ་ཞིང༌། ཚུར་ལ་འོང་བར་འགྱུར་རོ། །ལྷའི་ལུས་ལྟར་རྒས་པ་མེད་ཅིང་ཚེ་རིང་བ་ཡང་ཐོབ་པར་འགྱུར་རོ། །རོ་ཙ་ན་ནི་གུར་ཀུམ་གྱི་མདོག་ཅན་ཅིག་ཡིན་པར་དཀའ་རྒྱལ་གྱིས་བཤད། བླ་མ་གོང་མ་རྣམས་སེར་པོ་ཆུ་ཐུམ་གྱི་རྣམ་པ་ལྟ་བུ་བ་ལང་གི་མིག་ཙམ་ཞིག་ཡོད་གསུང་ངོ༌། །དེ་ལེན་ལུགས་ལ་ཕམ་ཐིང་པ་སྐུ་མཆེད་བགྲེས་པ་རྣམས་ཀྱི་བཞེད་པས། དེ་བྱང་ཆུབ་སེམས་དཔའ་ཡིན་པས་དེ་ལ་སྒྲུབ་པ་པོས་བསྙེན་བཀུར་བྱས་ཏེ། གསོལ་བ་བཏབ་པས་དེས་ལུས་སྟེར་བ་ཡིན་གསུང་ལ། བླ་མ་བལ་པོ་ཀ་ན་ཀ་ཤྲཱི་ཆེན་པོའི་རྗེས་སུ་འབྲངས་ནས་དེ་ལ་བསྒྲལ་བའི་ཐབས་དགོས་པར་བཞེད་ཅེས་བླ་མ་མལ་གྱི་ལུགས་འཛིན་པ་དག་ཟེར་མོང་ཀྱང༌། སྐལ་ལྡན་གྱིས་རང་ཉིད་ཤི་བའི་སྐྱེ་བདུན་གྱི་རོ་ཙ་ན་བླང་བར་བཤད་དོ། །ཞེས་གསུང་པ་ལེགས་སོ། །དཀའ་རྒྱལ་ཟླ་བས་ལེའུ་བཅུ་པའི་ལས་ཚོགས་ཐམས་ཅད་ཀྱང་སྐྱེ་བདུན་ལ་བརྟེན་ནས་བྱེད་གསུང་སྟེ། གང་འདོད་པའི་གཟུགས་སུ་བྱེད་དོ་ཞེས་པ་ཡན་ཆད་ཐམས་ཅད་ལ་བྱེད་པར་མངོན་ནོ། །དཔལ་ཧེ་རུ་ཀའི་སྙིང་པོས་སྐྱེ་བདུན་ལ་བརྟེན་ནས་ལས་སྒྲུབ་པ། སྒྲུབ་པ་པོ་གང་གིས་ཤེས་པ་དེ་ལ་དངོས་གྲུབ་གང་དང་གང་འདོད་པ་དེ་དང་དེ་སྟེར་བར་འགྱུར་རོ། །བཞི་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། སྐྱེ་བ་བདུན་པའི་མཚན་ཉིད་དང་དེའི་ལུས་ལ་བརྟེན་ནས་དངོས་གྲུབ་སྒྲུབ་པའི་ཆོ་གའི་ལེའུ་སྟེ་བཅུ་གཅིག་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་
བཤད་པ་སྦས་པའི་དོན་ཀུན་གསལ་བ་ལས་ལེའུ་བཅུ་གཅིག་པའི་བཤད་པའོ།། ༈ །།གསུམ་པ་ཉེ་སྙིང་གིས་ལས་སྒྲུབ་པ་ལ་གསུམ། བཤད་པར་དམ་བཅའ་བ། ལས་སྦྱོར་དངོས། ལེའུ་ཡི་མཚན་བསྟན་པའོ། །དང་པོ་ནི། ལེའུ་བཅུ་གཅིག་པའི་རྗེས་དེ་ནས་དངོས་གྲུབ་ཐམས་ཅད་ཐོབ་པར་བྱེད་པའི་ཉེ་བའི་སྙིང་པོ་ལ་བརྟེན་པའི་ལས་ཀྱིས་ནི། །འཇིག་རྟེན་གསུམ་ན་ཡོད་པ་གང་ཅི་ཡང་རུང་བའི་དངོས་གྲུབ་དེ་རྣམས་ཀུན་སྐད་ཅིག་གིས་ཏེ་མྱུར་དུ་འགྲུབ་པ་བཤད་པར་བྱའོ། །གཉིས་པ་ལ་དྲུག །ས་གཡོ་བ་སོགས་ཀྱི་ལས་སྦྱོར་བཞི་བསྟན་པ། མིག་ལ་བརྟེན་པའི་ལས་སྦྱོར། མཁའ་སྤྱོད་སྒྲུབ་པའི་རི་ལུའི་ལས་སྦྱོར། ཁྲག་འདྲེན་པ་སོགས་ཀྱི་ལས་དྲུག་རྗེས་འཛིན་དང་བཅས་པ། མི་སྣང་བ་སོགས་ཀྱི་ལས་བདུན་རྗེས་འཛིན་དང་བཅས་པ། ཆུ་བོ་གྱེན་དུ་ཟློག་པ་སོགས་ཀྱི་ལས་ལྔ་རྗེས་འཛིན་དང་བཅས་པའོ། །དང་པོ་ནི། རྒྱུད་ལ་རང་དགར་འཇུག་པ་དགག་པའི་ཕྱིར། ཊ་ཕ་ནས་ཨོཾ་གྱི་བར་བཟློག་སྟེ་བཀོད་པ་ནི། ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ་ཅེས་པའོ། །འདི་ནི་ཧེ་རུ་ཀའི་སྙིང་པོའི་སྔགས་དང་ཉེ་བའི་སྙིང་པོའོ། །གསང་སྔགས་ཉེ་སྙིང་འདི་འབུམ་བཟླས་པས་ས་འོག་ས་སྟེང་ས་བླའི་འཇིག་རྟེན་གསུམ་གཡོ་བར་བྱེད་ན། ཡང་གི་སྒྲས་གཞན་ལྟ་ཅི་སྨོས་པའོ། ། ལས་སྦྱོར་འདི་ནཱ་རོ་པས་གྲུབ་པ་ཡིན་གསུང་ངོ༌། །གྲོག་ལ་རོའི་སེན་རྩི་དང༌། གི་ཧཾ་དང༌། རང་གི་ཁུ་བ་བསྲེས་པའི་སྣག་ཚས་
དབུས་སུ་པདྨ་འདབ་མ་དྲུག་པ་ལྟེ་བ་གེ་སར་དང་ལྡན་པ། ལྟེ་བར་ཟླ་བའི་དཀྱིལ་འཁོར་གྱིས་བརྒྱན་པ། རྡོ་རྗེའི་ཕྲེང་བས་བསྐོར་བ། དེའི་ཕྱི་རོལ་ཏུ་འཁོར་ལོ་དཀར་པོ་རྩིབས་དྲུག་པ་བྲི། པདྨའི་འདབ་མ་དྲུག་ལ་ཡི་གེ་བདུན་པ་གཡས་སྐོར་དུ་དགོད། འཁོར་ལོའི་རྩིབས་རྣམས་ལ་གོ་ཆའི་རྣལ་འབྱོར་མ་དྲུག་གི་སྙིང་པོ་བྲི། དབུས་སུ་བདུན་པ་ཧེ་རུ་ཀ །ཞེས་འབྱུང་བ་ནི་པདྨ་ལ་ཡི་གེ་བདུན་དགོད་པར་གསུངས་པས། པདྨའི་ལྟེ་བ་ལ་ཧཱུཾ་དགོད་པའི་དོན་ནོ། །བླ་མ་སྔ་མས་བསྒྲུབ་བྱའི་མིང་བསྐུལ་ཚིག་དང་བཅས་པ་ཡང་བྲི་ཞེས་ཟེར་རོ། །དེ་ནས་ཉེ་སྙིང་འདོན་ཞིང་རྗེས་སུ་ཆགས་པའི་བསམས་པས། བསྒྲུབ་བྱ་གང་ན་ཡོད་པའི་ཕྱོགས་སུ་བལྟས་ལ་ལག་པ་གཉིས་ཀ་གདེངས་ཤིང་གཡོ་བས། བསྒྲུབ་བྱ་མདུན་ན་ཁ་བཞིན་གསལ་བར་བསྒོམས་ཏེ། ཕྱག་རྒྱ་དང་སྙོམས་པར་འཇུག་པའི་རྗེས་སུ་ཆགས་པས་བསྒྲུབས་ན། ལྷ་དང་ལྷ་མ་ཡིན་དང་གནོད་སྦྱིན་དང་སྲིན་པོ་དང་ཀླུ་དང་དྲི་ཟ་དང་མིའམ་ཅི་རྣམས་གང་འདོད་པ་འགུགས་པར་བྱེད་ན། ས་ལ་སྐྱེས་པ་རྣམས་ལྟ་ཅི་སྨོས། ཡང་ན་ཙན་དན་དམར་པོ་དང་སྐེ་ཚེ་དང་ལན་ཚྭ་དང་བསྒྲུབ་བྱའི་རྐང་རྗེས་ཀྱི་ས་ལ་གཟུགས་བརྙན་བྱས་ཏེ། གྲོ་ག་ལ་སྔར་བཤད་པའི་འཁོར་ལོ་བྲིས་ལ་སྙིང་གར་བཅུག་ནས་དགུག་གཞུག་བྱས། མིང་སྤེལ་དང་བཅས་པ་བཟླས་ན། རྒྱལ་པོ་ནོར་དང་འཁོར་དང་བཅས་པ་དབང་དུ་འགྱུར་རོ། །རྒྱ་མཚོ་དང་འབབ་ཆུ་དང་རྫིང་བུ་དང་ལ་སོགས་པས་ཆུ་མིག་གི་ཆུ་སྐེམས་པའམ་གནོན་པ་སྟེ་རེངས་པར་བྱེད་པ་ནི་སྔགས་ཀྱི་ནུས་མཐུ་ཐོབ་པས།
སྔར་གྱི་འཁྲུལ་འཁོར་ལ་སྤེལ་ཚིག་སྤོས་པས་སྔགས་སྤེལ་ཚིག་དང་བཅས་པ་བཟླས་པས་འགྲུབ་བོ། །གང་དུ་ཉེ་སྙིང་འབུམ་ཕྲག་བདུན་བཟླས་པའི་གནས་དེར་ཟངས་ལ་སོགས་པ་ལ་གཟོད་རིས་བྱས་པའི་འཁོར་ལོ། ཙན་དན་དམར་པོ་དང་སྲིན་ལག་གཡོན་པའི་ཁྲག་གིས་དབང་གི་འཁྲུལ་འཁོར་བྲིས་ལ། རབ་གནས་བྱས་ཏེ་སྔགས་བཟླས་ཤིང་ལུས་ལ་བཅངས་ན་མཁའ་འགྲོ་མ་ཐམས་ཅད་སྒྲུབ་པ་པོའི་མངག་གཞུག་བྱེད་པ་སྟེ་བཀའ་ཉན་ཅིང་བགེགས་མི་ནུས་སོ། །གཉིས་པ་ནི། ལག་པ་གཡོན་པར་ཟླ་བའི་དཀྱིལ་འཁོར་གྱི་སྟེང་དུ། སྔར་གྱི་འཁོར་ལོ་ཙན་དན་དཀར་པོས་བྲིས་ལ། ལས་དང་རྗེས་སུ་མཐུན་པའི་འོད་ཟེར་འཕྲོ་བ་བཀོད་ལ་ཉེ་སྙིང་འདིས་ཆུ་ལ་ཡོངས་སུ་བཟླས་ཏེ་དེས་འཁོར་ལོ་བགྱིས་པའི་ཆུས། བདག་ཉིད་ཀྱི་མིག་བཀྲུས་ན་སྐྱེ་བ་བདུན་པའི་མི་ཤེས་པར་འགྱུར་ཞིང༌། འདས་པ་དང་མ་འོངས་པ་ཡང་ཤེས་པར་འགྱུར་རོ། །དེ་བཞིན་དུ་འཁོར་ལོ་དང་ལྡན་པའི་ལག་པས་མིག་ལ་རེག་ཅིང་སྔགས་བཟླས་ན། ཚེ་ཟད་པ་དང་འཆི་བ་ཉིད་དུ་སྣང་བ་སྟེ་དེའི་རྟགས་དང་ལྡན་པ་ཡང་མཚན་མ་ངན་པ་སྔ་མ་ལོག་ནས། ཚེ་རིང་བ་དང་གསོན་པོར་སྣང་བའི་རྟགས་དང་ལྡན་པར་འགྱུར་རོ། །གཉིས་འདུས་ཀྱི་འགྱུར་ལས། ཚེ་ཟད་པ་ཡང་འཆི་བ་བཞིན་དུ་སྣང་བ་དང༌། ཚེ་རིང་བ་གསོན་པར་སྣང་བར་འགྱུར་རོ། ཞེས་པ་ལྟར་ན་ཚེ་རིང་ཐུང་གི་རྟགས་ཤེས་པར་འགྱུར་བའོ། །འཁོར་ལོ་དང་ལྡན་པས་མིག་ལ་ཉེ་སྙིང་
སྤེལ་ཚིག་དང་བཅས་པས་མངོན་པར་སྔགས་ནས་གང་ལ་བལྟས་པ་དེ་གནོན་པ་སྟེ་རེངས་པར་འགྱུར་རོ། །གསུམ་པ་ནི། དཔའ་བོ་གཡུལ་དུ་ཤི་བའི་རྐང་མཐིལ་གྱི་པགས་པ་བླངས་ཏེ་དཔའ་བོ་གྲིར་ཤི་བའི་མི་དེ་ཉིད་ཀྱི་ཁྲག་དང་ལྷན་ཅིག་བཏགས་ལ། ལིག་བུ་མིག་སྨན་ནི། གཉིས་འདུས་ཀྱི་འགྱུར་ལས། རྣ་བའི་མིག་སྨན་ཞེས་འབྱུང་ལ། དེའི་དོན་ལ་བཤད་པ་གཞན་འདུག་ནའང་ལིག་བུ་ནི་རྣ་བ་ཡིན་ལ། རྣ་བར་དེས་རེག་པ་ཙམ་གྱིས་མིག་གཉིས་གསལ་བར་འགྱུར་བར་ལྷ་སྦས་ཀྱིས་བཤད། རྡོའི་བྱེ་བྲག་ཅིག་ཡིན་ཟེར། དེ་ནི་གླིང་མཐའ་ནས་རྙེད་པ་དང་ཟེར། གླིང་གཞན་ནས་རྙེད་ཅེས་ཀྱང་ཟེར་རོ། །དེ་དང་ལྡོང་རོས་དང་གི་ཧཾ་དང་གུར་ཀུམ་དང་དཔའ་བོའི་སྙིང་ཁྲག་དང་བསྣོས་པ་སྟེ་དེས་ཡང་དང་ཡང་དུ་སྦངས་པའི་རི་ལུ་ཐོད་པར་བཅུག་སྟེ་གྲིབ་མ་ལ་བསྐམས་ལ། བྷ་བ་བྷ་དྲས། གསེར་དང་ཟླ་བ་ཉིན་བྱེད་རྣམས། །རིག་བྱེད་གསུམ་བཞི་ཚད་མན་ཆ། ཐུབ་པ་གསུམ་མདའ་ར་ཏིས་ལྷག །རི་ལུ་རིམ་པས་དཀྲི་བར་བྱ། ཞེས་བཤད་པ་ལྟར་གསེར་དངུལ་ཟངས་གསུམ་གྱི་ལྕགས་གསུམ་གྱིས་དཀྲིས་པ་བྱས་ཏེ། ཡང་རིང་ལུ་དེ་ལྷག་པར་གནས་པ་བྱའོ། །ལྷག་གནས་ནི་རབ་གནས་བྱེད་པ་ལ་བཤད་པ་ལྟར་རབ་གནས་བྱའོ། །སྐར་མ་རྒྱལ་ལ་བྱ་ཞེས་པ་གཉིས་འདུས་དང་མར་དོ་རྐྱང་པའི་འགྱུར་ལ། ལྷག་གནས་བྱེད་པ་ལ་སྦྱོར་ལ། ལོ་ཆེན་དང་མལ་གྱི་འགྱུར་ལས། སྐར་མ་རྒྱལ་ལ་བབ་པ་ན་དཔལ་ཧེ་རུ་ཀའི་ཞལ་དུ་བཅུག་ལ་ཞེས་འོག་མ་དང་སྦྱོར་བའི་ཕྱི་མ་ལྟར་ལེགས་སོ། །སྐར་མ་རྒྱལ་ལམ་རྒྱུ་སྐར་
བཟང་པོ་གཞན་ལ། དུར་ཁྲོད་ལ་སོགས་པ་དབེན་པའི་གནས་སུ་ཚོན་སྣ་ལྔའི་ཆུ་ཚོན་གྱིས་དཀྱིལ་འཁོར་བྲིས་ཏེ་བསྒྲུབས་ཤིང་མཆོད་པའི་རྗེས་ལ། དེའི་དབུས་སུ་བསྒྲུབ་བྱ་སྟེ་རོ་གཙང་མ་བཞག །དེའི་ཁར་སྔར་གྱི་རི་ལུ་བཅུག་པ་ནི། དཔལ་ཧེ་རུ་ཀའི་ཞལ་དུ་བཅུག་པའི་དོན་ནོ། །དེ་ནས་རོ་དེ་ལ་གུ་གུལ་གྱིས་བདུག་ཅིང་རང་གི་ལག་པ་གཡོན་པས་རོ་དེའི་ཁ་བཀབ་སྟེ། ཡང་ཉེ་སྙིང་བརྒྱ་རྩ་བརྒྱད་བཟླས་ན་རོ་དེས་རི་ལུ་དེ་ཁ་ནས་འབྱིན་ལ། དེ་རང་གི་ཁར་བཅུག་ན་སྒྲུབ་པ་པོ་དེ་དེའི་མོད་ལ་མི་སྣང་བར་འགྱུར་ཞིང༌། ལུས་ཀྱི་གྲིབ་མ་མེད་པར་འགྱུར་ཏེ། ལྷ་རྣམས་ཀྱིས་ཀྱང་མཐོང་བར་མི་འགྱུར་ན། ས་སྟེང་གི་མི་རྣམས་ཀྱིས་མི་མཐོང་བ་ལྟ་སྨོས་ཀྱང་ཅི་དགོས། འདི་ལ་མར་དོས། རང་གི་སྙིང་གའི་ཧཱུཾ་ལས་འཕྲོས་པའི་ཧཱུཾ་རོའི་སྙིང་གར་བཀོད་ནས་དེ་ཡོངས་སུ་གྱུར་པ་ལས་དེ་ཉིད་བདེ་མཆོག་ཞལ་གཅིག་ཕྱག་གཉིས་པ་ཕྱག་རྒྱ་དྲུག་ལ་སོགས་པས་བརྒྱན་པ་བསམས་ལ། དེའི་སྙིང་གའི་ཧཱུཾ་ལས་འོད་ཟེར་འཕྲོས་པས་གཟོད་མ་ནས་གྲུབ་པའི་ཡི་གེ་བདུན་པའི་ལྷ་རྣམས་མཆོད་དེ། དེ་དག་འོད་དུ་གྱུར་པ་དཔའ་བོའི་སྙིང་གའི་ཡི་གེ་ཧཱུཾ་དང་ཉེ་བར་འདུས་པས། ཡི་གེ་བདུན་པའི་ལྷའི་ངོ་བོས་ཞུགས་པར་བསྒོམ་མོ། །དེ་ནས་རི་ལུ་དཔའ་བོའི་ཁར་བཅུག་ལ་བཟླས་བརྗོད་བྱ། ཞེས་འཆད་དོ། །དེ་བཞིན་དུ་རི་ལུ་དེ་ཁ་ལས་བཏོན་ན་སྣང་བར་འགྱུར་རོ། །བདེ་མཆོག་ཉུང་ངུའི་རྒྱུད་འདིར་མཁའ་སྤྱོད་གྲུབ་པའི་རི་ལུ་འདི་ནི་དཔའ་བོ་ཧེ་རུ་ཀ་རང་ཉིད་ཀྱིས་གསུངས་པ་ཡིན་ནོ། །བཞི་
པ་ནི། དཔལ་ཧེ་རུ་ཀ་ནི་རྩ་བའི་སྔགས་དེའི་སྙིང་པོ་ཡི་གེ་ཉི་ཤུ་རྩ་གཉིས་པ་དེའི་ཉེ་བའི་སྙིང་པོ་ཡི་གེ་བདུན་པའི་སྔགས་འདིས་མིའི་མགོ་བོའི་ཐོད་པ་རྨ་མེད་པ་ཤ་མེད་ཅིང་མ་ཉམས་པར་བྱས་ལ། སྔོན་དུ་བསྙེན་པ་བྱས་ཤིང་རྡོ་རྗེ་དྲག་པོ་ཧེ་རུ་ཀའི་རྣལ་འབྱོར་དང༌ལྡན་པས། ཧཱུཾ་བརྗོད་པ་ལས་སྐྱེས་པའི་དུམ་སྐྱེས་མ་མཚོན་ཆ་ཐོགས་པ་རང་གི་སྣ་བུག་གཡས་པ་ནས་ཕྱིར་ཕྱུང་སྟེ། དེས་བསྒྲུབ་བྱ་གང་གི་མིང་ནས་བཟུང་བ་དེའི་བཤང་ལམ་དང༌། རྡོ་རྗེ་དང་སྙིང་ག་དང་མགྲིན་པ་དང་དཔྲལ་བའི་རྩ་ལྔ་ཕུག་ནས་ཁྲག་གི་རྒྱུན་གྱིས་ཐོད་པ་ཡོངས་སུ་གང་བར་བསྒོམ་ཞིང༌། གཡས་པའི་སྡིགས་མཛུབ་ཀྱི་རྩེ་མོས་ཐོད་པ་ལ་མཉེས་ནས་སྔགས་མང་དུ་བཟླས་ན་དེའི་ཁྲག་འགུགས་པར་འགྱུར་ཞིང༌། ལུས་ཀྱི་ཤ་ཟད་པར་བྱེད་དོ། །སླར་འཚོ་བར་འདད་པས་གཡོན་པའི་སྡིགས་མཛུབ་ཀྱི་རྩེ་མོས་ཞི་བའི་སེམས་ཀྱིས་ཡང་དང་ཡང་དུ་མཉེས་ཤིང༌། སྣ་བུག་གཡོན་པ་ནས་ཞུགས་པའི་དུམ་སྐྱེས་མའི་ཕྱག་གི་ཐོད་པའི་ཁྲག་གིས་བསྒྲུབ་བྱའི་ལུས་ཡོངས་སུ་གང་བ་བསྒོམས་ན་སླར་འཚོ་བར་འགྱུར་རོ། །ཉེ་སྙིང་སྤེལ་ཚིག་དང་བཅས་པ་བཟླས་ཏེ་ཐོད་པ་དེ་བསྒྲུབ་བྱའི་མགོ་བོའི་ཐོད་པ་ཡིན་པར་བསམས་ནས་ཁུ་ཚུར་བསྣུན་ན། གང་གི་མིང་ནས་སྨོས་ཏེ་བྱས་པ་དེའི་ཀླད་པ་ན་བར་འགྱུར་རོ། །ཞི་བའི་སེམས་ཀྱིས་གསང་སྔགས་རྗེས་སུ་དྲན་པས་དངོས་སུ་ཐོད་པའི་ནང་འོ་མས་བཀང༌། དངོས་སུ་མེད་ན་བཀང་བར་བསྒོམས་ན་ཉེ་བར་ཞི་བར་འགྱུར་རོ། །གི་ཧི་ལཾ་ཉེ་སྙིང་བཟླས་ཏེ་དཔྲལ་བར་ཐིག་ལེ་བྱས་ནས་གང་ལ་བལྟས་པ་དེ་རྒྱས་བཏབ་པ་སྟེ་རེངས་
པར་འགྱུར་རོ། །ཉི་མ་གུང་ལ་ཁྲོས་པའི་སེམས་ཀྱིས་དུར་ཁྲོད་ཀྱི་རས་སམ། མཆོད་སྦྱིན་གྱི་ཤིང་གི་ལོ་མ་ལ་མི་རུས་ཀྱི་སྨྱུ་གུས་རོ་སོལ་དང་དུག་དང་མིའི་ཁྲག་གིས་སྔར་བཤད་པའི་འཁོར་ལོ་བྲིས། རོ་སོལ་ལ་བསྒྲུབ་བྱའི་གཟུགས་བརྙན་བྱས་པའི་སྙིང་གར་འཁོར་ལོ་དེ་བཅུག་ལ། སྐེ་ཚེས་བྱུག་ཅིང་ཚེར་མའི་མེ་ལ་ཡང་ཡང་བསྲོ། ལག་པ་གཡོན་པར་ཡང་འཁོར་ལོ་བྲིས་པའམ་བསྒོམས་ལ། སྡིགས་མཛུབ་ལ་སྔགས་ཡོངས་སུ་བཟླས་ཏེ་བསྒྲུབ་བྱ་གང་ལ་སྡིགས་མཛུབ་བྱས་པ་དེ་བྱས་པ་དེའི་མོད་ལ་རིམས་ཀྱིས་ཐེབས་ཤིང་ལྷུང་བ་སྟེ་ས་ལ་འགྱེལ་བར་འགྱུར་རོ། །གཟུགས་བརྙན་དེ་རོ་བསྲེགས་པའི་དབུས་སུ་བརྐོས་པར་བཞག་ནས། མི་རུས་ཀྱི་ཕུར་བུས་བཏབ་སྟེ་ཚེར་མས་བར་མཚམས་མེད་པར་བཀང་ལ། སྙིང་གར་ཆུ་ཚན་བླུགས་ཤིང་སྤེལ་ཚིག་དང་བཅས་པའི་སྔགས་བཟླས་ལ་རྐང་པས་ས་ལ་བསྣུན་ན་གང་གི་མིང་ནས་སྨོས་པ་དེ་དེའི་མོད་ལ་འཆི་བར་འགྱུར་རོ། །ཆུ་ལ་སྔགས་སྤེལ་ཚིག་དང་བཅས་པ་བཟླས་ཏེ་ས་ལ་གཏོར་ཞིང་གཟུགས་བརྙན་འོ་མས་བཀྲུས་ན་གསོས་པར་འགྱུར་རོ། །ཡུང་བའམ་ལྡོང་རོས་ཀྱིས་དུར་ཁྲོད་ཀྱི་རས་ལ་འཁྲུལ་འཁོར་བྲིས་ལ། ཙན་དན་དམར་པོའི་རྡུལ་དང་ལན་ཚྭ་དང་སྐེ་ཚེ་དང་བསྒྲུབ་བྱའི་རྐང་རྗེས་ཀྱི་ས་རྣམས་གཅིག་ཏུ་བྱས་པའི་ཕྱེ་མ་དང༌། ལྕགས་ཕྱེ་བསྲེས་ལ་དུར་ཁྲོད་ཀྱི་རས་ཀྱིས་གཏུམས་ཏེ་ལམ་གྱི་བཞི་མདོར་ས་ལ་སོར་བརྒྱད་བརྐོས་ཏེ། དགྲའི་མིང་སྤེལ་དང་བཅས་
པར་ལན་བདུན་བཟླས་ནས་སྦས་ལ། ཉེ་སྙིང་གི་སྔགས་བཟླས་པའི་མཛུབ་མོའི་རྩེ་མོ་དེས་སྐྱེ་བོ་སྟོང་ཕྲག་ལ་ཡང་སྡིག་མཛུབ་བྱས་ན། དེ་ཐམས་ཅད་གནོན་པ་སྟེ་རེངས་པར་འགྱུར་རོ། །ལན་སྟོང་དུ་ཡང་བསྡིགས་པར་བྱས་ན་ཞེས་འཆད་པ་དོན་མིན་ནོ། །ལོ་ཆེན་དང་མལ་གྱིས་དེ་ཐམས་ཅད་ཅེས་བསྒྱུར་བ་བདེའོ། །འཁྲུལ་འཁོར་བཏོན་ནས་འོ་མས་བཀྲུ་ཞིང་སླར་གསོ་བའི་སྔགས་ཀྱི་ཚིག་གིས་ནི་གྲོལ་བར་འགྱུར་རོ། །སྨེ་ཤ་ཅན་ཏེ་རིགས་ངན་གྱི་རོ་བསྲེགས་པའི་ཐལ་བར་བསྒྲུབ་བྱའི་གཟུགས་བྱས་ལ། བསྒྲུབ་བྱའི་མིང་སྤེལ་དང་བཅས་པའི་འཁྲུལ་འཁོར་བྲིས་པ་སྙིང་གར་བཅུག་སྟེ། དེ་ཉིད་ཀྱི་ཐལ་བ་ལ་བཟླས་བརྗོད་ལན་བདུན་ནམ་བརྒྱ་བྱས་ཏེ་གང་གི་གཟུགས་སུ་བྱ་བའི་སེམས་ཅན་དེ་རྗེས་སུ་དྲན་དེ་སྔར་གྱི་གཟུགས་དེ་ལ་བསྣུན་པ་བྱས་ན། གང་གི་གཟུགས་སུ་བྱ་འདོད་པ་དེའི་གཟུགས་འཛིན་པར་འགྱུར་རོ། །ལོ་ཆེན་དང་མལ་གྱི་འགྱུར་ལས། སེམས་ཅན་གང་རྗེས་སུ་དྲན་ཏེ་བསྣུན་པ་དེའི་གཟུགས་ཞེས་འབྱུང་བ་ལེགས་སོ། །ལྔ་པ་ནི། སྔར་བཤད་པའི་ཙན་དན་ལ་སོགས་པའི་སྨན་གྱིས་སྦྱིན་སྲེག་བྱས་པའི་ཐལ་བས་བསྒྲུབ་བྱའི་གཟུགས་བྱས་ལ། དེའི་སྙིང་གར་འཁོར་ལོ་བཅུག་ནས་ཐལ་བ་དེ་ཉིད་ལ། བསྒྲུབ་བྱའི་མིང་ནས་སྨོས་པའི་ཉེ་སྙིང་གི་བཟླས་བརྗོད་བརྒྱ་བྱས་ཏེ། གང་ལ་བསྣུན་པ་དེ་སུམ་ཅུ་རྩ་གསུམ་པའི་ལྷ་ཉིད་ཀྱིས་ཀྱང་མི་མཐོང་ངོ༌། །སླར་གསོ་བའི་བསམ་པས་ཆུ་ལ་ཉེ་སྙིང་སྤེལ་ཚིག་དང་བཅས་པ་བརྒྱ་བཟླས་པས་གཏོར་ན་སླར་སྣང་བར་འགྱུར་རོ། །བསྒྲུབ་བྱའི་མིང་
སྤེལ་ཚིག་དང་བཅས་པའི་འཁོར་ལོ་བྲིས་ཏེ། སྨྱོ་བྱེད་ད་དུ་རའི་འབྲས་བུ་རྩ་བ་སྡོང་བུ་ལོ་མ་ཡལ་ག་ལྔ་དང་ལྡན་པར་བྱས་ནས། ཁྱི་སྨྱོན་གྱི་ཐོད་པ་ཁ་སྦྱར་གྱི་བར་དུ་གཞུག །དུར་ཁྲོད་ཀྱི་ཐལ་བའི་འཇིམ་པས་སྲུབས་བསྡམས་ཏེ། ཉེ་སྙིང་སྤེལ་ཚིག་དང་བཅས་པ་ལན་བདུན་དུ་དབུགས་མི་འབྱིན་པར་བཟླས་ལ། དུར་ཁྲོད་དུ་བཅུག་ན་གང་གི་མིང་ནས་བཟླས་པ་དེ་སྨྱོ་བར་འགྱུར་རོ། །བསྒྲུབ་བྱའི་སྐྱེ་བོ་སྟོང་ཡང་སྨྱོ་བར་འགྱུར་རོ། །ཞི་བའི་ཡིད་ཀྱིས་བཏོན་ནས་འོ་མས་བཀྲུས་ན་གྲོལ་བར་འགྱུར་རོ། །ཁང་སྟོང་དུ་སོང་སྟེ་མཁའ་འགྲོ་མ་གང་གི་མིང་ནས་སྨོས་ཏེ། རང་གི་གཙུག་ཕུད་ལ་ལན་བཅུ་བཟླས་ཏེ་མདུད་ན། གནོད་པའི་མཁའ་འགྲོ་མ་ཐམས་ཅད་གུད་དུ་འགྲོ་བར་འགྱུར་རོ། །འོང་བར་མཛོད་ཅིག་ཅེས་པའི་སྤེལ་ཚིག་དང་བཅས་པ་བཟླས་ན་འོང་བར་འགྱུར་ཟེར་རོ། །ཁང་སྟོང་དུ་སོང་སྟེ་ཉེ་སྙིང་ལན་བརྒྱ་བཟླས་ནས་རང་གི་གཙུག་ཕུད་སྤྱི་བོར་བཅིངས་ལ་མིག་བགྲད་དེ་ཇི་སྲིད་བཟླས་པ་དེ་སྲིད་དུ་མི་སྣང་བར་འགྱུར་རོ། །གཙུག་ཕུད་དཀྲོལ་ན་སླར་སྣང་བར་འགྱུར་རོ། ། འཁྲུལ་འཁོར་བྲིས་པའི་ཁམ་ཕོར་རམ་ཐོད་པ་ལ་བསྐུལ་ཚིག་དང་བཅས་པའི་ཉེ་སྙིང་མངོན་པར་བཟླས་ཏེ་ཁམ་ཕོར་སོགས་ཕྱེ་མར་བྱས་ནས། སྟེང་དང་འོག་དང་ཕྱོགས་བཞི་དང་མཚམས་བཞི་རྣམས་སུ་གཏོར་ན་ལྷ་དང་ལྷ་མ་ཡིན་དང་གནོད་སྦྱིན་དང་སྲིན་པོ་དང༌། དྲི་ཟ་དང་མིའམ་ཅི་དང་ལྟོ་འཕྱེ་ཆེན་པོ་ཐམས་ཅད་ཀྱང་འཆིང་བར་འགྱུར་རོ། །གྱོ་དུམ་ལ་བཟླས་ནས་ཕྱོགས་མཚམས་
སུ་གཏོར་བ་དེ་ཉིད་ཀྱིས་མཁའ་འགྲོ་མའི་གནོད་པའི་སྦྱོར་བ་ཐམས་ཅད་འཕྲོག་པར་འགྱུར་རོ། །ཁྱི་འམ་ཅེ་སྤྱང་གི་མཇུག་མ་བསྒྲུབ་བྱའི་མལ་འོག་ཏུ་སྦས་ནས་སྟན་དང་མལ་ཁྲི་ལ་སྐྱེས་པ་དང་བུད་མེད་འདུག་པ་ལ་བལྟས་ཏེ་སྔགས་བརྒྱ་རྩ་བརྒྱད་བཟླས་ན་འབྱར་བར་འགྱུར་རོ། །གྲོལ་བར་འདོད་པའི་ཡིད་ཀྱིས་ནི་མཇུག་མ་ཕྱུང་སྟེ་སྔགས་བཟླས་ན་གྲོལ་བར་འགྱུར་ཟེར་རོ། །དྲུག་པ་ནི། ཐོད་པ་དང་བཅས་པའི་འཁྲུལ་འཁོར་ལ་ཉེ་སྙིང་གི་སྔགས་སྤེལ་ཚིག་དང་བཅས་པ་ཡོངས་སུ་བཟླས་ཏེ་འབབ་ཆུའི་ཆུ་བོར་བཅུག་ན་རྒྱུན་ཕྱོགས་ལས་བཟློག་སྟེ་འབབ་པར་འགྱུར་རོ། །ཐོད་པ་དང་བཅས་པའི་ལས་སྦྱོར་དེ་ཉིད་ཀྱིས་ཆུ་བོའི་རྦ་རླབས་གནོན་པར་འགྱུར་ཞིང༌། བཟློག་པའི་ཡིད་ཀྱིས་བཟླས་ན་ནི་ཟློག་པར་འགྱུར་རོ། །སྤེལ་ཚིག་དང་བཅས་པའི་སྔགས་བཟླས་ཏེ་གདོང་སྟེང་དུ་ལྟ་བཞིན་དུ་སྟོང་ཕྲག་གཅིག་བཟླས་ན་ཆར་ཆེན་པོ་གཅོད་པར་འགྱུར་རོ། །དགྲ་བོ་གཞན་གྱི་དཔུང་ལ་མངོན་དུ་ཕྱོགས་ནས་གྱོ་དུམ་ལ་བཟླས་བརྗོད་སྟོང་བྱས་ཏེ་ཕྱོགས་བཅུར་གཏོར་ནས་གཡུལ་དུ་ཞུགས་ན་མཚོན་ཆ་བརྒྱས་བསྣུན་ཀྱང་གནོད་པའི་ཚོར་བ་འབྱུང་བར་མི་འགྱུར་ཞིང༌། མཚོན་གྱིས་ཆོད་པར་ཡང་མི་འགྱུར་ཏེ། མཚོན་གྱིས་མི་ཕྱེད་པའི་རྡོ་རྗེའི་ལུས་ཅན་དུ་འགྱུར་རོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། ཉེ་བའི་སྙིང་པོའི་ལས་ཚོགས་ཀྱི་ཆོ་གའི་ལེའུ་སྟེ་བཅུ་གཉིས་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་
པའི་དོན་ཀུན་གསལ་བ་ལས་ལེའུ་བཅུ་གཉིས་པའི་བཤད་པའོ།། ༈ །།བཞི་པ་གོ་ཆའི་སྔགས་ཀྱིས་ལས་སྒྲུབ་པ་ལ་གསུམ། བཤད་པར་དམ་བཅའ་བ། ལས་ཚོགས་དངོས། ལེའུའི་མཚན་ནོ། །དང་པོ་ནི། ལེའུ་བཅུ་གཉིས་པའི་རྗེས་དེ་ནས་དཔའ་བོའི་གོ་ཆ་ཡི། སྔགས་ཀྱིས་ལས་སྒྲུབ་པ་རྣམས་ནི་གོ་རིམ་བཞིན་དུ་བཤད་པར་བྱའོ། །དེ་ཡང་འཇིག་རྟེན་གསུམ་ན་གང་ཡོད་པའི་ཡིད་ལ་གང་འདོད་པ་དེ་དག་ཀུན་སྒྲུབ་པའོ། །གཉིས་པ་ལ་བཞི། འཇིགས་པ་སེལ་བ་ལ་སོགས་པའི་ལས་བརྒྱད་སླར་དགྲོལ་བ་དང་བཅས་པ། དབང་དུ་བྱེད་པ་དང་རས་གོས་ལ་བརྟེན་པའི་ལས་ཚོགས། ལས་སྦྱོར་རྣམས་འགྲུབ་པའི་ཐུན་མོང་གི་ཐབས། ཤིང་དུ་བྱེད་པ་སོགས་ཀྱི་ལས་གཉིས་སླར་དགྲོལ་བ་དང་བཅས་པའོ། །དང་པོ་ནི། གོ་ཆའི་སྔགས་ཀྱིས་ལས་སྒྲུབ་པ་དེ་ལ་གོ་ཆའི་སྔགས་ཟློས་བཞིན་དུ་ཡང་ལམ་དུ་ཞུགས་ན་རྐུན་མ་དང་སྟག་གིས་འཇིགས་པར་མི་འགྱུར་ཞེས་པའི་ལས་སྦྱོར་ནི། སྒྲུབ་པ་པོས་སྐར་མ་རྒྱལ་དང་གཟའ་ཉི་མའི་དུས་སུ་གྲོ་ག་ལ་གུར་ཀུམ་དང་རོའི་སེན་རྩི་དང་རང་གི་ཁྲག་དང་གི་ཧཾ་གིས་ཟླ་བའི་དཀྱིལ་འཁོར་གྱི་དབུས་སུ་རྡོ་རྗེ་རྩེ་གསུམ་པ་ཁ་གྱེས་པ་བྲི། དེའི་ལྟེ་བའི་མཐར་རིམ་པ་གཉིས་པའི་མུ་ཁྱུད་དང༌། དབུས་སུ་པདྨ་འདབ་མ་དྲུག་པ་ལྟེ་བ་དང་བཅས་པ་བྲི། པདྨའི་ལྟེ་བར་ཧཱུཾ་ཆེ་གེ་མོ་ལ་ཆོམ་རྐུན་རཀྵ་ཧཱུཾ་ཞེས་པ་ལྟ་བུ། ལས་གང་ཡིན་གྱི་མིང་སྤེལ་ཚིག་དང་བཅས་པ་ཧཱུཾ་གཉིས་ཀྱི་བར་དུ་ཆུད་པ་བྲི། འདབ་མ་དྲུག་
ལ་ཤར་ནས་བརྩམས་ནས། ཨོཾ་དང་ན་མ་དང་སྭཱ་ཧཱ་དང་བཽ་ཥཌ་དང་ཧཱུཾ་ཧཱུཾ་དང་ཕཊ་བྲི། ཧཱ་ཧཱི་ཧཱུཾ་ཧཻ་ཧཽ་ཧཿ རྣམས་སྤངས་པའི་ཧ་ཧི་ཧུ་ཧེ་ཧོ་ཧཾ་རྣམས་རྡོ་རྗེའི་ལྟེ་བའི་མུ་ཁྱུད་ལ་དགོད་དོ། །ལྭ་བ་པའི་འགྲེལ་པར་རྡོ་རྗེ་མཁའ་འགྲོའི་རྒྱུད་ཚིག་དྲངས་པ་ཙམ་མ་གཏོགས་པ། བྲི་ཚུལ་མི་གསལ་བ་ལ་ལྷ་སྦས་ཀྱིས། ཧ་ལ་སོགས་པ་ཐུང་ངུ་དྲུག་རྡོ་རྗེའི་ལྟེ་བའི་མུ་ཁྱུད་ལ་དགོད་པར་བཤད་ཅིང༌། ཧཱ་རིང་པོ་སོགས་དྲུག་མི་འགོད་པར་སྣང་བས། རྡོ་རྗེ་མཁའ་འགྲོའི་འགྲེལ་པར་པདྨ་འདབ་མ་དྲུག་པ་གཉིས་དང༌། ཧཱ་རིང་པོ་སོགས་དྲུག་དགོད་པར་བཤད་པ་དང་མི་མཐུན་ནོ། །དེ་ནས་རབ་གནས་བྱས་ནས་ཐུན་གསུམ་དུ་བཟླ་ཞིང་མཆོད་པ་བྱས་ནས། ལན་བདུན་དུ་བཟླས་ཏེ་གོས་ཀྱི་མཐའ་མ་མདུད་དེ། སྔགས་ཟློས་བཞིན་དུ་ལམ་དུ་ཞུགས་ན་རྐུན་མ་སོགས་ཀྱི་འཇིགས་པ་མི་འབྱུང་ངོ༌། ཡང་ཞེས་པ་ལོ་ཆེན་དང་མལ་གྱི་འགྱུར་ལ་མི་འབྱུང་ལ། གཉིས་འདུས་དང་མར་དོ་རྐྱང་པའི་འགྱུར་ལ་འབྱུང་བ་ལ། ལྭ་བ་པའི་འགྲེལ་པར་ཡ་ང་བའི་ལམ་དུ་ཞུགས་ན་ཞེས་འབྱུང་ངོ༌། །མི་སྣང་བར་འགྱུར་བའི་ལས་སྦྱོར་ནི། འཁོར་ལོ་དེ་ཉིད་ཀྱི་ལྟེ་བ་ལ་མཐའ་ཐིག་ལེའི་གཟུགས་ཀྱིས་བསྐོར་ཏེ། བསྒྲུབ་བྱ་འཁོར་དང་བཅས་པ་རྨོངས་པར་གྱིས་ཤིག་ཅེས་སྤེལ་ཚིག་དང་བཅས་པ་བྱས་ཏེ་ཆོས་ཀྱི་དབྱིངས་སུ་བསྒོམས་ཏེ་གོ་ཆའི་སྔགས་ཟློས་བཞིན་དུ་ལམ་དུ་ཞུགས་ན་གཞན་གྱིས་མི་མཐོང་ལ། གོ་ཆ་ཟློས་བཞིན་དུ་ཡང་རྒྱལ་པོའི་ཕོ་བྲང་གི་བུད་མེད་ཀྱི་གནས་སུ་ཞུགས་ན་ཡང་མི་སྣང་བར་འགྱུར་ཏེ། གནས་དེ་ནས་གང་འདོད་པ་དེ་བླངས་ཏེ་
འགྲོ་བར་འགྱུར་ཞིང༌། ལྷ་རྣམས་ཀྱིས་ཀྱང་མི་མཐོང་ངོ༌། །རོ་རས་ལ་ལྡོང་རོས་དང་ཡུང་བའི་ཁུ་བས་ཨ་ཤོ་ཀའི་སྨྱུ་གུས་སྔར་གྱི་འཁོར་ལོ་ཁྱད་པར་དུ་ཐིག་ལེས་བསྐོར་བ་བྲིས་ཏེ། གོ་ཆའི་སྔགས་བརྒྱ་བཟླས་ལ། དེ་ནས་བསྒྲུབ་བྱ་དཔུང་དང་བཞོན་པར་བཅས་པའི་མིང་སྤེལ་དང་བཅས་པ་བཟླའོ། །དེ་ནས་བསྒྲུབ་བྱའི་རྐང་རྗེས་ཀྱི་ས་དང༌། གླང་པོ་ཆེའི་རྐང་རྗེས་ཀྱི་རྡུལ་དང༌། དུར་ཁྲོད་ཀྱི་ཐལ་བ་ལ་བསྒྲུབ་བྱའི་གཟུགས་བྱས་ལ། དེའི་སྙིང་ཁར་འཁོར་ལོ་དེ་བཅུག་སྟེ། མེ་ཏོག་སེར་པོས་གཏོར་ལ་རྐང་པ་གཡོན་པས་མནན་ཏེ། སྔགས་བརྒྱ་རྩ་བརྒྱད་བཟླས་ཏེ་ས་བརྐོས་པར་བཅུག་ནས་གཡོགས་པའི་སྟེང་དུ། སྙིང་གའི་ཐད་ཀར་སའི་ཁང་པ་ལྟ་བུ་བྱས་ནས་བཞག་སྟེ་ལག་པ་གཡས་པས་གང་ལ་རེག་པའི་དམག་སྟེ་དེ་གཏིང་རིང་དུ་བརྐོས་ནས་གཙུགས་པའི་མདུང་བཞིན་དུ་རེངས་པར་འགྱུར་ཏེ། སུམ་ཅུ་རྩ་གསུམ་པའི་ལྷས་ཀྱང་མི་གཡོའོ། །གོ་ཆའི་སྔགས་ཟློས་པའི་རྐང་པས་བསྣུན་ནས་ས་འོག་ནས་བཏོན་ཏེ་འཁོར་ལོ་འོ་མས་བཀྲུས་ན་ཐར་བར་འགྱུར་རོ། །རང་གི་ཁྲག་ལ་གོ་ཆའི་སྔགས་ལན་གསུམ་བཟླས་ནས་ཁར་བཅུག་ལ་ཕྱིར་ཕྱུང་སྟེ་ཐིག་ལེ་བྱས་ལ་གང་དང་ལྷན་ཅིག་སྨྲ་བ་དང༌། གང་གིས་བདག་མཐོང་ཞིང་བདག་གིས་གང་མཐོང་བ་དེ་ཐམས་ཅད་ཀྱི་ཁྲག་འདྲེན་པར་བྱེད་དོ། །དགྲ་བོ་གང་གི་ཁྱིམ་དུ་ཁྲོ་རྒྱལ་བསྒོམས་ནས་ཁྲོ་བ་དང་བཅས་པས་གོ་ཆའི་སྔགས་ལན་སྟོང་དུ་སྤེལ་ཚིག་དང་བཅས་པ་བཟླས་ན་ཐམས་ཅད་
རིམས་ཀྱིས་བཏབ་པར་འགྱུར་རོ། །ཞི་བའི་བསམ་པས་ཆུ་ལ་ལན་ལྔ་བཟླས་ཏེ་གཏོར་ན་སླར་འཚོ་བར་འགྱུར་རོ། །གཞན་དང་རྩོད་པ་བྱེད་ན་བསྒྲུབ་བྱའི་རྐང་རྗེས་ཀྱི་ས་དང༌། དུར་ཁྲོད་ཀྱི་ས་དང༌། གྲོག་མཁར་གྱིས་གསུམ་བསྲེས་བ་ལ་བསྒྲུབ་བྱའི་གཟུགས་བྱས་ལ། ཆེ་གེ་མོའི་ཝཱ་ཀ་ཧ་རནྟུ་ཞེས་པའི་སྤེལ་ཚིག་དང་བཅས་པའི་འཁོར་ལོ་བྲིས་པའི་སྙིང་གར་བཅུག །དེ་རྐང་པ་གཡས་པས་མནན་ལ་ཡིད་ཀྱིས་བདག་གི་སྙིང་གར་འཁོར་ལོ་བསྒོམས་ལ། འོད་ཟེར་སྔགས་ཀྱི་རང་བཞིན་གཅིག་གི་སྟེང་དུ་གཅིག་བརྩེགས་པ་རི་རབ་ཙམ་དུ་སྣ་བུག་གཡས་པ་ནས་སྤྲོས། དེས་བསྒྲུབ་བྱའི་ལྕེ་མནན་པར་བསམས་ལ་བསྒྲུབ་བྱ་གང་གི་གདོང་ལ་བལྟས་ཏེ་སྔགས་སྤེལ་ཚིག་དང་བཅས་པ་བཟླས་པས་དེའི་ཚིག་འཕྲོག་པར་འགྱུར་རོ། །འབབ་ཆུའི་འགྲམ་དང་ལྟིང་ཀར་གནས་ཏེ་ཁྲོ་བོའི་རྒྱལ་པོ་བསྒོམས་ལ་ཆུའི་རྡུལ་ཕྲ་རབ་ཐམས་ཅད་དཀྱིལ་འཁོར་གྱི་ལྷའི་གཟུགས་སུ་བསྐྱེད་པའི་ལྕང་ལོའམ་དབུ་རྒྱན་གྱི་གཟུགས་སུ་བསམས་ནས། སྔགས་སྟོང་བཟླས་ན་ཆུའི་སྟེང་དུ་གནས་ཏེ་ཐང་ལ་ཇི་ལྟ་བ་དེ་བཞིན་དུ་ཆུ་ལ་ཡང་དེ་བཞིན་དུ་འགྲོའོ། །ཆུའི་ནང་དུ་ཞུགས་ན་ཆུ་བོའམ་རྒྱ་མཚོ་ཡང་མི་གཡོ་བར་གནས་པར་འགྱུར་རོ། །གཉིས་པ་ནི། ལག་པ་གཡས་པ་དཔའ་བོ་དྲུག་དང༌། གཡོན་པ་དཔའ་མོ་དྲུག་ཏུ་བསྐྱེད་དེ། ཡབ་ཡུམ་སྙོམས་པར་ཞུགས་པར་བསྒོམས་ལ། ལག་པ་གཉིས་དྲིལ་ཕྱིས་ཏེ་ཕན་ཚུན་མཉེ་ཞིང་གོ་ཆའི་སྔགས་སྟོང་བཟླས་ན་རྣལ་འབྱོར་མ་རྣམས་དབང་དུ་འགྱུར་རོ། །རྣལ་འབྱོར་མ་
ནི་སྣ་ཚོགས་པའི་གཟུགས་ཏེ། རང་བཞིན་ཅན་མཁའ་འགྲོ་མའི་རིགས་སུ་སྐྱེས་པ་དང༌། དེ་བཞིན་དུ་ལཱ་མ་དང༌། ཁཎྜ་རོ་ཧི་དང༌། དེ་བཞིན་དུ་གཟུགས་ཅན་མ་རུ་རབ་ཏུ་གྲགས་པ་དེ་དང༌། སོགས་ཀྱིས་རབ་གཏུམ་མ་སོགས་ཀྱི་རྣལ་འབྱོར་མ་དེ་ཀུན་ཏེ་ཐམས་ཅད་སྒྲུབ་པ་པོ་དེའི་དབང་དུ་འགྱུར་རོ། །སྦྲུལ་གྱི་རྒྱལ་པོ་རྙེད་ནས་དེའི་དཀར་ནག་གི་མཚམས་སུ་དུམ་བུར་བྱས་ལ། དཀར་པོ་དང་ནག་པོ་སོ་སོར་བཞག་ལ། རས་བལ་གྱི་ས་བོན་བླངས་ལ་ཡར་ངོའི་སྐར་མ་རྒྱལ་གྱི་ཉིན་ས་བོན་ལ་དཀར་པོའི་དུམ་བུའི་ཞག་དང་ཤས་བསྒོས་ལ་ས་ལ་གདབ། མར་ངོའི་རྒྱལ་གྱི་ཉིན་ནག་པོའི་དུམ་བུའི་ཞག་དང་ཤས་ས་བོན་ལ་བསྒོས་ལ་གདབ་ཅིང༌། དེ་དག་གི་ཞག་དང་ཤས་ས་ལ་ཡང་སྦག་གོ །དེ་ནས་རྫོགས་པར་སྐྱེས་པ་དང་ཡར་ངོའི་རྒྱལ་གྱི་ཉི་མ་ལ་དཀར་པོའི་ཆས་བསྒོས་པའི་རས་བལ་ལ་རྣལ་འབྱོར་མ་སེར་སྐྱས་བཀལ་ཏེ་དེ་ཉིན་རྫོགས་པར་ཐ་ག་པ་སེར་སྐྱས་ཐགས་སུ་བཏག་གོ། མར་ངོའི་རྒྱལ་ལ་ནག་པོས་བསྐྱེད་པའི་རས་བལ་བླངས་ལ། རྣལ་འབྱོར་མ་སྔོན་མོས་བཀལ་ལ་དེ་ཉིན་ཐ་ག་པ་སྔོན་པོས་བཏག་གོ། དེ་ལྟར་སྐར་མ་རྒྱལ་གྱི་སྦྱོར་བས་རས་དཀར་པོ་དང་ནག་པོ་བསྒྲུབས་ཏེ། རས་ལ་གོ་ཆའི་སྔགས་སྟོང་ཕྲག་སོ་དགུ་བཟླས་ཤིང༌། ཨ་ཀ་རུ་ནག་པོ་དང་དུམ་བུ་ནག་པོའི་ཤ་དང་རུས་པས། ནག་པོས་བསྐྱེད་པའི་རས་བདུག་གོ། ཤཾ་ཁ་པུཥྤ་དང་དུམ་བུ་དཀར་པོའི་ཤ་དང་རུས་པ་དཀར་པོས་བསྐྱེད་པའི་རས་ལ་བདུག་སྟེ། དེ་ཡང་སྔགས་བརྒྱ་རྩ་
བརྒྱད་བཟླས་ནས་བདུག་གོ། དེ་ནས་བླ་མ་དང་དཔའ་བོ་དང་རྣལ་འབྱོར་མ་རྣམས་ལ་མཆོད་པ་བྱས་ནས་ལྷའི་རྣལ་འབྱོར་ལ་དམིགས་ཏེ། རས་དེ་རྣལ་འབྱོར་མའི་བཀས་དཀར་པོ་ཡར་ངོ་དང༌། ནག་པོ་མར་ངོ་ལ་བགོའོ། །དེ་གྱོན་པའི་ལུས་ཀྱིས་རྣལ་འབྱོར་པ་ཏིང་ངེ་འཛིན་ལ་མཉམ་པར་བཞག་པས་སྟོང་ཕྲག་བཅུ་བཟླས་ན་དེའི་འོག་ཏུ་མི་སྣང་བ་འགྲུབ་པར་འགྱུར་ཏེ། རས་དེ་གྱོན་པའི་ལུས་ཀྱིས་དེའི་གྲིབ་མ་ཙམ་ཡང་མི་མཐོང་བར་དཔག་ཚད་སྟོང་གི་བར་དུ་ནམ་མཁར་འགྲོ་ཞིང་ལྷ་རྣམས་ཀྱིས་ཀྱང་མི་སྣང་བར་འགྱུར་ཞིང༌། གང་དུ་འདོད་པ་དེར་འགྲོ་བར་འགྱུར་རོ། །དེས་ཕྱིའི་རྒྱ་མཚོའི་མཐར་ཐུག་པའི་ས་རྣམས་སུ་འགྲོ་བར་འགྱུར་རོ། །སྟེང་གི་རྒྱུན་དུ་སྟེ་ཕྱོགས་སུ་འོག་མིན་ནམ་སྤྲིན་མེད་ཀྱི་བར་དུ་འགྲོ་བར་འགྱུར་རོ། །གསུམ་པ་ནི། གཟུགས་ལ་སོགས་པ་གང་དང་གང་མིག་ལ་སོགས་པའི་དབང་པོའི་ལམ་སྟེ་ཡུལ་དུ་གྱུར་པ། ཡུལ་དེ་དང་དེའི་རང་བཞིན་དུ་འགྲོ་བ་སྟེ་ཡུལ་གྱི་རོ་མྱོང་བར་བྱེད་པ་ན། མཆོག་ཏུ་སྟེ་སྔོན་དུ་དོན་དམ་པའི་བདེན་པ་ལ་དམིགས་པའི་མཉམ་པར་ཏེ་སྟོང་པ་ཉིད་དང་སྙིང་རྗེ་དབྱེར་མེད་པའི་བྱང་ཆུབ་ཀྱི་སེམས་ལ་བཞག་པ་སྟེ་དེའི་བདག་ཉིད་དུ་འཛིན་པའི་སྦྱོར་བ་སྟེ་རྣལ་འབྱོར་གྱི་སངས་རྒྱས་ཐམས་ཅད་ཀྱི་རང་བཞིན་གྱི་དེ་ཁོ་ན་ཉིད་ལ་འཇུག་པར་འགྱུར་བ་དེ་ལྟར་བྱའོ། །རྣལ་འབྱོར་མ་བཞི་ཞལ་སྦྱོར་བའི་རྒྱུད་ལས་ཀྱང༌། གང་གང་དབང་པོའི་ལམ་ཉིད་དུ། །འགྱུར་བ་དེ་དེ་རང་བཞིན་གྱིས། །འདོད་པ་ཀུན་ལ་ལོངས་སྤྱད་པས། །སངས་རྒྱས་ཀུན་གྱི་རང་བཞིན་འཐོབ། ཅེས་གསུངས་པ་ལྟར་
བདེ་སྟོང་དབྱེར་མེད་ཀྱི་ངོ་བོར་མོས་ནས་འདོད་ཡོན་ཀུན་ལ་ལོངས་སྤྱོད་པས་ལས་ཚོགས་རྣམས་བསྒྲུབ་པར་བྱའོ། ཞེས་པའི་དོན་ཏེ། ལེའུ་དགུ་པར་སྔགས་ཀྱི་དེ་ཉིད་ཤེས་དགོས་པར་བསྟན་པ་བཞིན་ནོ། །བཞི་པ་ནི། སྔར་བསྐྱེད་པའི་ཆོ་གས་རོའི་ཁར་བསྐྱེད་པའི་ཤིང་ཡོངས་འདུའི་ཁུ་བཅུད་བླངས་ལ། དེ་ལ་བཟླས་བརྗོད་སྟོང་བྱས་ཏེ་གང་ལ་ཐིག་ལེ་བྱས་ཏེ་ཤིང་དུ་བསྒོམས་ན་དེ་ཤིང་དུ་འགྱུར་རོ། །ཆུ་ལ་ལན་བདུན་བཟླས་པས་གཏོར་ན་སླར་འཚོ་བར་འགྱུར་རོ། །སྔར་བཤད་པའི་ཆོ་ག་དེ་ཉིད་ཀྱིས་ཡུངས་དཀར་གྱི་ས་བོན་བྲམ་ཟེའི་ཐོད་པར་བསྐྱེད་པ་བླངས་ནས། ཡང་གླང་པོ་ཆེའི་ཐོད་པར་བཏབ་ལ་དེའི་འབྲས་བུ་སྨིན་པའི་ཕྱེ་མ་དང༌། གླང་པོ་ཆེ་དང་བསྒྲུབ་བྱའི་རྐང་རྗེས་ཀྱི་རྡུལ་བླངས་ཏེ་བཟླས་བརྗོད་སྟོང་བྱས་ནས་གང་ལ་བསྣུན་པ་དེ་གླང་པོ་ཆེར་འགྱུར་རོ། །དེ་ལ་ཞོན་ན་གླང་པོ་ཆེ་སྟོང་ལས་ཀྱང་རྒྱལ་བར་འགྱུར་རོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། གོ་ཆའི་སྔགས་ཀྱི་ལས་ཚོགས་ཀྱི་ཆོ་གའི་ལེའུ་སྟེ་བཅུ་གསུམ་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་བཅུ་གསུམ་པའི་བཤད་པའོ།། ༈ །།ལྔ་པ་སྙིང་པོས་ལས་སྒྲུབ་པ་གཞན་བསྟན་པ་ལ་དྲུག །བཤད་པར་དམ་བཅའ་བ། ལས་སྦྱོར་དངོས། གྲུབ་པའི་ཕན་ཡོན། གྲུབ་པའི་ཚུལ། དེའི་སྔགས་པ། ལེའུའི་མཚན་ནོ། །དང་པོ་ནི། གོ་ཆའི་ལས་བསྟན་པ།
དེ་ནས་བདག་ཉིད་བོང་བུའི་ཞལ་གྱི་རྣམ་པའི་རྣལ་འབྱོར་སྒྲུབ་པ་པོས་དངོས་གྲུབ་མྱུར་དུ་འགྲུབ་པའི་སྒྲུབ་ཐབས་དེ་ནི་བཤད་པར་བྱའོ་ཞེས་སྦྱར་རོ། །འདི་སྒོམ་པ་དགོས་པ་གང་གི་དོན་དུ་ཡིན་ཞེ་ན། དཀའ་རྒྱལ་ཟླ་བས་ཧེ་རུ་ཀ་ཤིན་ཏུ་མཛེས་པ་ཡིན་ན། ཅིའི་ཕྱིར་མི་སྡུག་པ་བོང་བུའི་གདོང་དུ་བསྒྱུར་ཞེས་པའི་ལན་དུ། ཡིད་ནི་ཐམས་ཅད་དུ་སོང་ཞིང་བཟློག་དཀའ་བས་སྔར་བཤད་པའི་ལས་རྣམས་འགྲུབ་པར་མི་འགྱུར་བས་ཡིད་ཀྱི་ཤུགས་ཟློག་པར་བྱེད་པའི་བོང་བུས་རྣམ་པ་སྒོམ་པ་བསྟན་ཞེས་འཆད་པ་ནི། ལོ་ཅཱ་བ་གཉིས་ཀའི་ལུགས་ཀྱིས་སྔར་བཤད་པའི་ལས་ཚོགས་རྣམས་མྱུར་དུ་འགྲུབ་པའི་ཕྱིར་དུ་རྣལ་འབྱོར་འདི་བསྟན་ཞེས་འཆད་པ་དང་མཐུན་ཏེ། བྷཱ་བ་བྷ་དྲས་ཀྱང་ཡིད་ཀྱི་ཤུགས་བཟློག་བྱ་རུ་འཆད་དོ། །འགྲེལ་བ་གསུམ་ལས། ཡིད་ཀྱི་ཤུགས་ཀྱིས་བཟློག་བྱའི་ཕྱིར་ཞེས་བཏོན་ནས་ཡིད་ཀྱི་ཤུགས་ཟློག་བྱེད་དུ་འཆད་ལ། དེ་ཡང་གཉིས་ཀའི་བཤད་སྦྱར་ལས། བོང་བུའི་རྣལ་འབྱོར་གྱི་ཤུགས་ཀྱིས་བཟློག་པར་བཤད་པ་ལྟར་རོ། །གང་ལས་ཟློག་པ་དང༌། བཟློག་ནས་ཇི་ལྟར་བྱེད་པ་ནི། ལྭ་བ་པས། ལྟ་བ་ངན་པ་དང་སྒྲིབ་པ་ཐམས་ཅད་ལས་བཟློག་ནས་དག་པར་འགྱུར་བའི་ལུས་རྨི་ལམ་ལྟར་ལོངས་སུ་བརྗེ་བས། གཡོ་བ་དང་བྲལ་ཏེ་མི་ཤིགས་པའོ། །ཞེས་གསུངས་སོ། །ལྟ་བ་ངན་པ་ཞེས་སོགས་ལ་ལྷ་སྦས་ཀྱི་འགྲེལ་པར་ཆོ་ག་འདིས་ཕྱིན་ཅི་ལོག་གི་སྒྲིབ་པ་ཐམས་ཅད་རྣམ་པར་བསྒྱུར་བའོ། །དེས་དག་པའི་ལུས་སུ་འགྱུར་བ་ནི། ཞེས་དང༌། རྨི་ལམ་གྱི་ལུས་བཞིན་དུ་ཐོགས་པ་མེད་ཅིང་ཤིགས་པའོ། །
ཞེས་འབྱུང་བ་བདེའོ། །ཕྱིན་ཅི་ལོག་གི་སྒྲིབ་པ་ནི་ལུས་དག་པའི་སྒྱུ་མའི་སྐུར་འགྱུར་བ་ལ་གེགས་བྱེད་པ་སྟེ། དེ་སྤངས་པ་ནི་བསྒྱུར་བའོ། །གེགས་དེ་སྤངས་པ་དེས་དག་པའི་ལུས་སུ་འགྱུར་བའི་དཔེ་ནི། །ལུས་རགས་པ་ལས་ལོགས་སུ་བྱེད་པར་སྣང་བའི་རླུང་སེམས་ཙམ་གྱི་རྨི་ལམ་གྱི་ལུས་བཞིན་དུ་འབྱུང་ལུས་རགས་པ་ལས་ལོགས་སུ་བྱེ་བའི་རླུང་སེམས་ཙམ་གྱི་སྒྱུ་མའི་སྐུ་འགྲུབ་པའོ། །བརྗེ་བ་ནི་སྔར་རྣམ་སྨིན་གྱི་ལུས་རགས་པ་ཡན་ལག་གི་རྣམ་པ་ཅན་ལས་མེད་པ་དེ་སྒྱུ་མའི་སྐུར་བརྗེས་པའོ། །སྐུ་དེ་ནི་སྒྱུ་མས་སྤྲུལ་པའི་ལུས་བཞིན་དུ་གང་ལ་ཡང་ཐོགས་པ་མེད་ཅིང༌། གང་གིས་ཀྱང་མི་ཤིགས་པ་རྡོ་རྗེའི་སྐུའོ། །འདི་ནི་བོང་ཞལ་ཅན་དུ་སྒོམ་པའི་སྒོས་ཀྱི་དགོས་པ་མིན་གྱི། ཧེ་རུ་ཀའི་བསྐྱེད་རིམ་སྒོམ་པ་སྤྱིའི་དགོས་པའོ། །དེ་ཡང་རིམ་པ་དང་པོ་ནི་སྒྱུ་མའི་སྐུ་མཚན་ཉིད་པ་རྒྱུད་ལ་སྐྱེ་བའི་རྒྱུད་སྨིན་བྱེད་ཙམ་མོ། །རྫོགས་རིམ་གྱི་སྐབས་ཀྱི་ཐུན་མོང་མ་ཡིན་པའི་རྒྱུ་ནི། ལཱ་བ་པས། འདིའི་དཀྱིལ་འཁོར་བཤད་པའི་མཐར། དཀྱིལ་འཁོར་པ་ཐམས་ཅད་ཀྱང་སྙིང་རྗེ་ཆེན་པོས་ཡོངས་སུ་བཟུང་བ་ཆོས་བདག་མེད་པ་ལས་བྱུང་བའོ། །ཞེས་ཆོས་བདག་མེད་པ་སྙིང་རྗེ་ཆེན་པོ་སྟེ། བདེ་བ་ཆེན་པོས་ཡོངས་སུ་བཟུང་བའི་འོད་གསལ་གྱི་ཡེ་ཤེས་ལས་འབྱུང་བར་བསྟན་ཏེ། འོད་གསལ་གྱི་རླུང་སེམས་ཙམ་ལས་སྒྱུ་མའི་སྐུ་འབྱུང་བའོ། །བསྐྱེད་རིམ་ལ་ཡང་དེའི་ཆ་མཐུན་ཙམ་ཡོད་ཀྱང༌། གཙོ་བོ་ནི་རྫོགས་རིམ་གྱི་སྐབས་སུ་འབྱུང་ངོ༌། །ལྷ་སྦས་ཀྱི་འགྲེལ་བར་ཆོས་
བདག་མེད་པའི་ངོ་བོའོ། །ཞེས་འབྱུང་བ་ནི་རང་བཞིན་དང་འབྱུང་བ་གཉིས་ལ་སྐད་དོད་ཐུན་མོང་བ་ཡོད་པ་མ་ཕྱེད་པའི་འགྱུར་སྐྱོན་ནོ། །རྨི་ལམ་གྱི་ལུས་བཞིན་དུ་གཟུགས་བརྗེ་བའི་སྒྱུ་མའི་སྐུ་འོད་གསལ་ལས་བྱུང་བར། ལྭ་བ་པ་དང༌། ལྷ་སྦས་ཀྱིས་བཤད་པ་འདི། བདེ་མཆོག་ལ་ཡང་ཤིན་ཏུ་གལ་ཆེའོ། །གཉིས་པ་ལ་གཉིས། སྒྲས་ཟིན་ལྟར་བཤད་པ་དང༌། བརྡས་བཤད་པའོ། །དང་པོ་ནི། འདིར་ལེའུ་ཡི་མཚན་གྱི་སྐབས་སུ་ཧེ་རུ་ཀ་བོང་བུའི་རྣམ་པར་མཛད་པ་ཅེས་གསུངས་པས། བོང་བུའི་རྣམ་འབྱོར་བདག །ཅེས་པ་ནི་གཙོ་བོ་ཡིན་ལ། གཙོ་བོ་བོང་ཞལ་ཅན་ཡིན་པ་དེ་བཞིན་དུ་མཁའ་འགྲོ་མ་དང་ལྭ་མ་དང་ཁཎྜ་རོ་ཧི་དང་གཟུགས་ཅན་མ་བཞི་ཡང་བོང་བུའི་ཞལ་གྱི་རྣམ་པ་ཅན་ཞལ་ནས་ཁྲག་འཛག་པའོ། །བོང་ཞལ་ནི་དཀའ་རྒྱལ་གྱིས་གདོང་ཙམ་གྱི་བོང་བུ་ཡིན་ཏེ། ཞེས་བཤད་པ་ལྟར་བྱ་ཡི། དབུ་རིལ་པོ་ནི་མིན་ནོ། །ལོ་ཆེན་དང་མལ་གྱི་འགྱུར་ལས། རྣལ་འབྱོར་མ་ནི་ལཱ་མའི་གཟུགས། །ཞེས་འབྱུང་ལ། འགྲེལ་བ་གཉིས་ལས། རྣལ་འབྱོར་མ་ནི་ཕག་མོར་བཤད་པས་བོང་ཞལ་ཅན་གྱི་ལྷ་དྲུག་གོ། ཡང་དེ་དག་གིས། རྣལ་འབྱོར་མ་ནི་འདོད་པའི་གཟུགས། །ཞེས་ཀྱང་འདོན་ཞིང༌། རྣལ་འབྱོར་མ་ནི་འཁོར་ལོ་གསུམ་ལ་གནས་པའི་རྣལ་འབྱོར་མ་དང༌། འདོད་པའི་གཟུགས་ནི་བོང་བུའི་གདོང་ཅན་དུ་འཆད་ལ། ཁ་ཅིག་འདོད་པའི་དབང་གིས་གཟུགས་གཞན་དུ་བྱེད་པ་ལ་འཆད་དོ། །དེ་ལྟར་ན་རྩ་རྒྱུད་དུ་ཟིན་པ་ལ་ལྷ་དྲུག་ཏུ་བཞེད་པ་དང༌། ལྷ་སུམ་ཅུར་བྱེད་པའི་ལུགས་གཉིས་ཡོད་པའི་སྔ་མ་ཁས་བླངས་ལ། ལྷག་མ་བཤད་རྒྱུད་
ཀྱིས་ཁ་བསྐངས་ཏེ་རེ་གཉིས་པར་བྱའོ། །དེ་ལ་ཐུགས་འཁོར་དང་གསུང་འཁོར་དང་སྐུ་འཁོར་གྱི་དཔའ་བོ་རྣམས་ནི་རིམ་པ་བཞིན་དུ་མཁའ་ལྡིང་དང༌། རྨ་བྱ་དང༌། སེངྒེའི་གདོང་པ་ཅན་དང༌། སྒོ་མ་བཞི་ནི་ཁྭ་ལ་སོགས་པ་བཞིའི་གདོང་པ་ཅན་དང༌། མཚམས་མ་བཞི་ནི་མངོན་བརྗོད་མང་པོ་ལས། མ་ཧེ་དང་རི་དྭགས་ཀྱི་གདོང་པ་ཅན་དུ་བཤད་དེ། དཀའ་རྒྱལ་དང་བཤད་སྦྱར་གྱིས་ཀྱང་དེ་བཞིན་དུ་བཤད་དོ། །ལྭ་བ་པས་མ་ཧེ་དང་རི་དྭགས་དང་སྟག་དང་གུང་གི་གདོང་པ་ཅན་དུ་གསུངས་སོ། །འོ་ན་འཁོར་ལོ་གསུམ་གྱི་རྣལ་འབྱོར་མ་རྣམས་གདོང་བརྙན་ཇི་ལྟར་བྱ་ཞེ་ན། བྷ་བ་བྷ་དྲས་བོང་ཞལ་ཅན་དུ་བཤད་ལ། གདོང་གི་གཟུགས་མི་བསྒྱུར་བའི་ལུགས་ཀྱང་ཡོད་པར་རྡོ་རྗེ་མཁའ་འགྲོའི་འགྲེལ་པར་བཤད་དོ། །མཁའ་འགྲོ་ནི་མཁའ་འགྲོ་མའོ། །རྩེ་གསུམ་ནི་སྦྲུལ་གྱིས་དཀྲིས་པའི་མདུང་རྩེ་གསུམ་མོ། །ལག་ན་ཞེས་པ་ན་གྲི་གུག་དོར་ཏེ་རྩེ་གསུམ་འཛིན་པར་བཤད་པ་ལྟར་ན་གཡས་ཀྱི་ཕྱག་དང་པོ་ན་བསྣམས་པའོ། །རྡོ་རྗེ་མཁའ་འགྲོའི་འགྲེལ་པར་གཡོན་དང་པོས་རྩེ་གསུམ་དང༌། གཉིས་པ་ན་ཐོད་པ། གཡས་དང་པོས་ཁ་ཊྭཱཾ་ག །གཉིས་པ་ན་གྲི་གུག་བསྣམས་པར་བཤད་དེ། ལྭ་བ་པ་དང་ཡང་མཐུན་པར་མངོན་ནོ། །ཁྱད་པར་བཤད་པ་དེ་རྣམས་མ་གཏོགས་པ་ལྷག་མ་རྣམས་ལཱུ་ཨི་པ་དང་མཐུན་པར་བཞེད་པ་ལྟར་བྱས་ཏེ་མངོན་རྟོགས་རྫོགས་པར་བསྒོམ། བཟླས་པའི་སྐབས་སུ་ཡབ་ཀྱི་སྙིང་པོའི་སྔགས་ཀྱིས་སྒྲུབ་པར་བཞེད་པ་ལྟར་བྷ་བ་བྷ་དྲས་ཀྱང༌།
སྙིང་པོའི་སྔགས་འབུམ་ཕྲག་བདུན་བཟླས་ནས་ལས་བྱ་བ་དང༌། མངོན་བརྗོད་ལས་ཉེ་སྙིང་བཟླས་པར་ཡང་བཤད་དོ། །གཉིས་པ་ནི། བོང་ཞལ་ཅན་སྒོམ་པའི་ཡིད་ཀྱི་ཤུགས་ཀྱིས་དག་པའི་སྒྱུ་མའི་སྐུར་བྱེད་པ་འདི་ལ། རྫོགས་རིམ་ཞིག་ཀྱང་བཤད་པ་ནི། ལྭ་བ་པའི་འགྲེལ་པ་ལས། དབུགས་རྣམས་ལྟེ་བའི་རྩ་བ་ནས། །གཡས་དང་གཡོན་པ་གཉིས་དག་གི། ཟླ་བ་ཉི་མར་རྣམ་པར་བཤད། །ཆུ་ཤིང་མེ་ཏོག་ལྟ་བུ་ནི། །ལྟེ་བའི་རྩ་བ་ནས་འགྲེང་བ། །བ་ལང་རྨིག་འདྲའི་པདྨ་ནི། །བོང་བུའི་རྣམ་པར་ཤེས་པར་བྱ། །འོག་ཏུ་ཕྱོགས་པའི་པདྨ་གང༌། །ཟླ་བའི་འོད་འདྲས་རྣམ་བརྒྱན་པ། །དེ་དབུས་རྟག་ཏུ་སྟོང་པ་ནི། །ཧཱུཾ་ཡིག་རླུང་གི་རང་བཞིན་ཅན། །འབར་བ་མར་མེ་ལྟ་བུ་སྟེ། །འོག་གི་རླུང་ནི་ཡོངས་གང་ལས། །སྙིང་ག་ནས་ནི་སྟེང་དུ་རྒྱུ། །སྤྱོ་བོ་ཕུག་སྟེ་འགྲོ་བར་བཤད། །ཅེས་གསུངས་སོ། །དེ་ལ་སྣ་བུག་ཏུ་རྒྱུ་བའི་དབུགས་རྣམས་ལྟེ་བའི་རྩ་བ་ནས། གཡས་རོ་མ་དང་གཡོན་རྐྱང་མ་དག་གི་རྩ་ལ་རྒྱུ་བ་གཡས་ཉི་མ་དང༌། གཡོན་ཟླ་བའི་རླུང་དུ་རྣམ་པར་བཤད་དེ། ལྟེ་བའི་རྩ་བ་ནས་གྱེན་དུ་འགྲེང་བའི་རོ་རྐྱང་གི་རྩ་གཉིས་ཀྱང་བསྟན་ཏོ། །ཆུ་ཤིང་གི་མེ་ཏོག་ལྟ་བུ་ནི། །སྙིང་གའི་རྩ་འཁོར་གྱི་དབུས་ཀྱི་རྩ་དབུ་མ་ཡིན་ཏེ། བཤད་རྒྱུད་ལས། སྙིང་གི་ནང་སོན་པདྨ་ནི། ། འདབ་མ་བརྒྱད་པ་སྙིང་པར་བཅས། །དེ་ཡི་ནང་དུ་སོན་པའི་རྩ། །མར་མེའི་རང་གི་ངོ་བོ་ཅན། །ཆུ་ཤིང་གི་ནི་མི་ཏོག་ལྟར། །བརྐྱང་ཞིང་ཁ་ནི་འོག་ཏུའོ། །ཞེས་གསུངས་ཏེ་རྐང་པ་ཐ་མས་ཆུ་ཤིང་གི་མེ་ཏོག་དང་འདྲ་ཚུལ་བསྟན་ཏོ། །རྩ་དེ་ལྟེ་བའི་རྩ་བ་ནས་གྱེན་
དུ་འགྲེང་བར་བསྟན་པས་ནི་རྩ་དབུ་མ་བསྟན་ནོ། །བ་ལང་གི་རྨིག་པ་འདྲ་བ་ནི་དེའི་རྨིག་པ་ཁ་བྲག་ཏུ་ཡོད་པའི་གཡས་གཡོན་གཉིས་རྒྱས་ཤིང་དབུས་སྟོང་པར་ཡོད་པ་བཞིན་དུ། རོ་རྐྱང་གི་རྩ་གཉིས་རླུང་གིས་རྒྱས་པའི་དུས་སུ་དབུས་མ་རླུང་རྒྱུ་བས་སྟོང་པའོ། །དེའི་པདྨ་ནི་རྩ་འཁོར་ཏེ། དེ་ལ་མང་དུ་ཡོད་ཀྱང་འདིར་ལྟེ་བའི་པདྨའི་རྩ་འཁོར་རོ། །དེའི་ཕྱི་དབྱིབས་གྲུ་གསུམ་གྱི་རྣམ་པར་ཡོད་པར་བཤད་པས། དེ་ནི་བོང་བུའི་གདོང་གི་རྣམ་པར་ཡོད་པས་བོང་བུའི་རྣམ་པར་ཤེས་པར་བྱ་བར་གསུངས་སོ། །དེས་ན་ལཱུ་ཨི་པའི་རྫོགས་རིམ་ལྟར་ལྟེ་བའི་འཁོར་ལོ་ལ་བརྟེན་ནས་གནད་དུ་བསྣུན་པ་དང༌། དེ་ལ་བརྟེན་ནས་སྐྱེས་པའི་རྫོགས་རིམ་སྒོམ་པ་ནི། བུང་བུའི་གདོང་ཅན་སྒོམ་པའི་ཡིད་ཀྱི་ཤུགས་སོ། །སྙིང་ག་ནས་འོག་ཏུ་ཕྱོགས་པའི་ཆོས་ཀྱི་འཁོར་ལོའི་པདྨ་གང་ཡིན་པ་དེ་ཡང་བ་ལང་རྨིག་འདྲའི་པདྨའོ། །པདྨ་དེའི་དབུས་སུ་ཧཱུཾ་ཡིག་ཟླ་བའི་འོད་ཟེར་འདྲ་བས་བརྒྱན་པ་ནི། བཤད་རྒྱུད་ལས། ཧཱུཾ་ཡིག་མགོ་ཐུར་དུ་ལྟ་བ་ལ་ཁ་བ་ལྟ་བུའི་བདུད་རྩི་འཛག་པར་གསུངས་པའོ། ། རྟག་ཏུ་ནི་རྒྱུན་དུའོ། །སྟོང་པ་ནི་རྣལ་འབྱོར་གྱི་སྟོབས་ཀྱིས་དྷཱུ་ཏཱིར་བཅུག་པའི་རླུང་གིས་སྟོང་པ་སྟེ་མ་བསྒོམས་པའི་དུས་སུའོ། །རླུང་གི་རང་བཞིན་ཅན་ནི་རྣལ་འབྱོར་གྱི་སྟོབས་ཀྱིས་སྲོག་དྷཱུ་ཏཱིར་བཅུག་པས་རླུང་གིས་རང་བཞིན་ཅན་དུ་གྱུར་པའོ། ། དེ་ནས་ལྟེ་བ་ནས་ཙ་ཎྜ་ལི་དབུ་མར་འབར་བ་ནི། འབར་བ་མར་མེ་ལྟ་བུ་ཞེས་པའོ། །ལྟེ་བའི་གཏུམ་མོ་འབར་བའི་རྒྱུ་ནི། ལྟེ་བའི་འོག་གི་གསང་གནས་ཀྱི་རླུང་ཡོངས་སུ་གང་བ་སྟེ་
གཡོས་པ་ལས་སོ། །གཏུམ་མོའི་མེས་ཐོག་མར་ལྟེ་བ་དང༌། དེ་ནས་སྙིང་ག་དང༌། དེ་ནས་སྟེང་དུ་སྟེ་མགྲིན་པ་དང༌། དེ་ནས་སྤྱི་བོ་སྟེ་འཁོར་ལོ་བཞི་ཡི་ལྟེ་བ་ཕུག་སྟེ་གྱེན་དུ་འགྲོའོ། །མེ་སྤྱི་བོར་ཕྱིན་པས་བྱང་སེམས་དྲངས་ནས་གསང་གནས་ཀྱི་རྩེའི་བར་དུ་འཛག་པ་ནི། སྔ་མའི་ཤུགས་ཀྱིས་ཤེས་པར་ནུས་སོ། །དེ་ལྟར་ཡས་བབས་དང་མས་བརྟན་གྱི་མཐར། ཡུལ་ཅན་ལྷན་སྐྱེས་ཀྱི་བདེ་བ་ཆེན་པོས། ཡུལ་བདག་མེད་པའི་དེ་ཁོ་ན་ཉིད་འཛིན་པ་ནི། སྔར་བཤད་པའི་སྙིང་རྗེ་ཆེན་པོས་ཆོས་ཀྱི་བདག་མེད་གཟུང་བའོ། །དེ་འདྲ་བའི་འོད་གསལ་གྱི་རླུང་སེམས་ཙམ་ལས་གྲུབ་པའི་རྨི་ལམ་གྱི་ལུས་བཞིན་དུ། ལྷ་སོ་བདུན་གྱི་སྒྱུ་མའི་སྐུ་འགྲུབ་བོ་ཞེས་བཤད་པར་བྱའོ། །ལྭ་བ་པས་གཡེང་བ་ཀུན་སྤངས་ཏེ་ལྐུགས་པའི་ཚུལ་དུ་བྱས་ནས། སྔར་བཤད་པའི་རིམ་གཉིས་ཟླ་བ་དྲུག་བསྒྲུབས་ན། བོང་བུའི་མཁའ་འགྲོ་འགྲུབ་ལ། དེ་གྲུབ་ན་ཚེ་རིང་ཐུང་སོགས་ཤེས་པའི་དངོས་གྲུབ་བཤད་པ་རྣམས་འགྲུབ་པར་བཤད་ཅིང༌། བསྐྱེད་རིམ་གྱི་ལས་ཚོགས་ཟུར་པ་མ་བཤད་དོ། །འགྲེལ་པ་གཞན་བཞི་ལས། རྡུལ་ཚོན་གྱིས་དབང་གི་དཀྱིལ་འཁོར་བཞིན་དུ་བྲིས་པ་ལ། དཀྱིལ་འཁོར་བའི་ལྷའི་སྔགས་བྲིས་པའི་དབུས་སུ། འབྲས་ཕྱེ་ལས་བོང་བུའི་གཟུགས་བྱས་པ་བཞག་སྟེ། བོང་ཞལ་ཅན་གྱི་རྣལ་འབྱོར་དང་ལྡན་པས་སྔགས་རྒྱུན་མ་ཆད་དུ་བཟླས་ཏེ། དབུས་ཀྱི་གཟུགས་བརྙན་ལ་བལྟས་པས། གང་ཤེས་པར་འདོད་པ་དེ་སྣང་བར་འགྱུར་བ་མན་ངག་ཡིན་གསུང་ངོ༌། །གསུམ་པ་ནི། དེ་ལྟར་བོང་བུའི་རྣལ་འབྱོར་བསྒྲུབས་
པས་གྲུབ་ན་ཚེ་ཟད་པ་དང་ནི་ཚེ་རིང་བ་ཡང་སྣང་བ་ཡིན་ཏེ། རང་གཞན་གྱི་ཚེ་རིང་ཐུང་ཤེས་པར་འགྱུར་རོ། །འདིར་ནི་རྣལ་འབྱོར་པ་དེ་སྔར་བོང་བུར་གྱུར་པ་ཡིན་ན། དེ་བཞིན་དུ་བོང་བུར་མཐོང་བ་དང༌། སྔོན་དུ་སྟེ་སྐྱེ་བ་སྔོན་མར་གླང་པོར་གང་སོང་བ་དེ་གླང་པོའི་གཟུགས་ཅན་དུ་མཐོང་ངོ༌། །དེ་བཞིན་དུ་རང་དང་གཞན་གྱི་སྐྱེ་བ་གང་དང་གང་སྔོན་གྱི་སྐྱེ་བར་གྱུར་པ་དག །དེ་དང་དེའི་གཟུགས་སུ་སྣང་བར་བོང་བུའི་རྣལ་འབྱོར་པས་ནི་འདིར་མཐོང་བར་འགྱུར་རོ། །ཁྱད་པར་དུ་སྔོན་ནས་སྐྱེ་བ་བདུན་དུ་བར་མ་ཆད་པའི་མི་ཤེས་པར་འགྱུར་ལ། དངོས་གྲུབ་སྟེར་བའི་སྐྱེ་བ་བདུན་པའི་ཤ་ཡོད་པར་གྱུར་ན། ཤ་དེ་ཡི་སྦྱིན་སྲེག་དང་གཏོར་མ་དང༌། རྣམ་རྟོག་མེད་པར་མཚན་མོ་གསངས་ཏེ་ཟ་བ་དག་བྱས་ན། སྒྲུབ་པ་པོ་ལྷ་ཡི་ལུས་སུ་འགྱུར་བ་སོགས་ཀྱི་དངོས་གྲུབ་འགྲུབ་པར་འགྱུར་རོ། །དེ་བཞིན་དུ་ཤ་དེ་ལ་བརྟེན་ནས་དཔག་ཚད་བརྒྱ་ཕྲག་ནི་སྟོང་གི་སྟེང་དུ་སྐད་ཅིག་ལ་འགྲོའོ། །བོང་བུའི་རྣལ་འབྱོར་འདི་ནི་སྔགས་མཆོག་གཙོ་བོའམ་དམ་པ་སྟེ་མཐུ་སྟོབས་ཆེ་བའོ། །གང་ལས་ཤེ་ན། མཁའ་འགྲོ་མ་ཡི་སྟེ་རྡོ་རྗེ་རྣལ་འབྱོར་མ་རྣམས་དང་གནས་དང་ཉེ་བའི་གནས་ལ་སོགས་པར་ལྷན་ཅིག་ཏུ་མཉམ་པར་སྦྱོར་བ་སྒྲུབ་པར་བྱེད་པས་ན་མཐུ་སྟོབས་ཆེའོ། །བཞི་པ་ནི། བོང་བུའི་རྣལ་འབྱོར་པས་མཚན་མ་སྟེ་དུང་གི་ཕྲེང་བས་སྔགས་གང་ཟློས་པ་ནི་ཟླ་བ་གཅིག་གིས་འགྲུབ་པར་འགྱུར་རོ། །དེ་ལྟར་འགྲུབ་པ་འདི་ནི་གསང་བའི་རྒྱུད་བདེ་མཆོག་འདི་ཡི་ཡབ་ཀྱི་སྙིང་པོ་དགེ་བ་འདི་ཡིས་
ཡིན་ནོ། །ལྔ་པ་ནི། བོང་བུའི་རྣལ་འབྱོར་གྱི་རིམ་གཉིས་ཀྱི་དེ་ཉིད་མཆོག་ཤེས་པའི་རྣལ་འབྱོར་པ་དེ་ནི། བདེ་མཆོག་འདིར་ཐབས་ཤེས་ཁྱད་པར་ཅན་སྦྱོར་བའི་རྣལ་འབྱོར་པ་རུ་ཐེ་ཚོམ་མེད་དོ། །གོང་དུ་བཤད་པ་དེ་དག་ཐམས་ཅད་ནི་མཁའ་འགྲོ་དྲ་བའི་བདེ་བ་མཆོག་གི་རྒྱུད་འདིར་བརྗོད་པ་ཡིན་གྱི། འདིའི་སྐོར་ལས་གཞན་དུ་མི་འབྱུང་བས་གཅེས་པར་གཟུང་ངོ༌། །དྲུག་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། དཔལ་ཧེ་རུ་ཀ་བོང་བུའི་རྣམ་པར་མཛད་པའི་ཆོ་གའི་ལེའུ་སྟེ་བཅུ་བཞི་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་བཅུ་བཞི་པའི་བཤད་པའོ།། ༈ །།གསུམ་པ་རིགས་ལྡན་མ་མཆོད་པ་རྒྱས་པར་བཤད་པ་ལ་ལྔ། མཁའ་འགྲོ་མ་སྤྱིར་ཤེས་པའི་དོན་དུ་ཡི་གེ་རེ་རེ་བའི་ངག་གི་བརྡ། མཁའ་འགྲོ་མའི་རིགས་བྱེ་བྲག་ཏུ་ཤེས་པར་བྱ་བའི་ཐབས། མཁའ་འགྲོ་མའི་རིགས་སྤྱིར་ཤེས་པར་བྱེད་པའི་ལུས་ཀྱི་བརྡ། ཤེས་པ་རྣམས་ལ་རང་ལ་རྗེས་སུ་ཆགས་པ་བརྟག་པ། མཁའ་འགྲོ་མ་སྤྱིར་ཤེས་པར་བྱེད་པའི་ཡི་གེ་དུ་མ་ཚོགས་པའི་ངག་གི་བརྡའོ། །དང་པོ་ལ་བཞི། བཤད་པར་དམ་བཅའ་བ། བརྡ་བསྟན་པ་དངོས། དོན་བསྡུས་ཏེ་སྦྱིན་ཚུལ་བསྟན་པ། ལེའུ་ཡི་མཚན་བསྟན་པའོ། །དང་པོ་ནི། བཅུ་བཞི་པའི་རྗེས་དེ་ནས་སྒྲུབ་པ་པོ་གང་ཞིག་རྣལ་འབྱོར་མ་རྣམས་ཀྱི་བརྡར་གྱུར་པ་ཤེས་པ་དག །བརྡ་ཤེས་པ་དེ་ཉིད་ཀྱིས་འདོད་པའི་དོན་དེ་ཐེ་ཚོམ་མེད་པར་གྲུབ་པ་སྟེ་འགྲུབ་པ་ནི་བཤད་
པར་བྱའོ། །སྡོམ་པ་ཐམས་ཅད་ཅེས་པ་སྔར་བཤད་པའི་བཤད་རྒྱུད་རྣམས་ལ་འཆད་པ་ནི། འཁོར་ལོ་སྡོམ་པའི་སྐོར་གྱི་རྒྱུད་ཀྱི་རྣལ་འབྱོར་པ་ལ་ཞེས་པའོ། །ཁ་ཅིག་ནི་ཉན་ཐོས་ལ་སོགས་པ་ལ་སྦ་བར་བྱ་བའི་སྡོམ་པ་སྲུང་བ་དེའི་དོན་དུ་ཞེས་ཟེར་རོ། །གཉིས་པ་ནི། ཌ་ཞེས་བྱ་བ་ནི་སྐྱེས་བུ་སྟེ་སྐྱེས་པར་སངས་རྒྱས་རྣམས་ཀྱིས་བཤད་ལ། ཌི་ཞེས་པ་ནི་བུད་མེད་ཀྱི་བརྡ་ཡིན་ནོ། །བརྡ་འདི་རྣམས་ནི་དོན་དེ་དང་དེ་ལ་འཇུག་པར་འཇིག་རྟེན་ན་ཡང་མ་གྲགས་ལ། སྒྲའི་བསྟན་བཅོས་སོགས་བསྟན་བཅོས་གཞན་ལ་ཡང་མེད་པས། དེ་བཞིན་གཤེགས་པ་ཉིད་ཀྱིས་དོན་དེ་རྣམས་སྟོན་པར་བཀས་བཅད་པའོ། །འོ་ན་བརྡ་འདི་དག་གིས་མཁའ་འགྲོ་མར་ཤེས་པར་བྱེད་ཚུལ་ཇི་ལྟར་ཡིན་སྙམ་ན། གཅིག་གིས་ཌ་ཞེས་ཟེར་བ་ལ་ཅིག་ཤོས་ཀྱིས་ཌི་ཞེས་ལན་འདེབས་པ་ལྟ་བུས་ཤེས་པར་བྱེད་པ་ནི་མིན་ནོ། །འོ་ན་ཇི་ལྟར་ཡིན་ཞེ་ན། དཀའ་རྒྱལ་གྱིས་སྐྱེས་པའམ་བུད་མེད་དུ་བཤད་པར་བྱ་བ་ལ། ཌི་ཞེས་བརྗོད་པ་ནི་བརྡ་སྟེ། དེ་ལྟར་བཤད་པ་རྟོགས་པ་ནི་བརྡའོ། །དེ་བཞིན་དུ་ཡང་ཐམས་ཅད་དུ་བལྟ་བར་བྱའོ། ཞེས་བཤད་པ་ལྟར། གཅིག་གིས་ཌ་ཞེས་བརྗོད་པ་ནི་ཅིག་ཤོས་ཀྱིས་དེའི་དོན་སྐྱེས་པ་ཡིན་པར་གོ་ན་བརྡ་ཤེས་པའོ། །དེ་ཡང་ལྭ་བ་པས་བསམ་པ་གཅིག་པ་ཉིད་ཀྱི་ཕྱིར། །དེ་རྣམས་མཉེས་པར་འགྱུར་རོ། །ཞེས་གསུངས་པ་ལྟར། དེ་ལྟར་ཤེས་ན་གཉིས་ཀ་བློ་མཐུན་པས་མཁའ་འགྲོ་མ་རྣམས་མཉེས་པར་འགྱུར་རོ། །ཚུལ་དེས་འོག་མ་
རྣམས་ཀྱི་བརྡས་ཤེས་པར་བྱེད་ཚུལ་ཡང་ཤེས་པར་བྱའོ། །ཕུ་ཞེས་བྱ་བ་ནི་གནོན་པ་སྟེ་རེངས་པའི་བརྡ་ཡིན་ལ། སུ་ཞེས་བྱ་བ་ནི་ཟ་བ་ཉིད་ཀྱི་དོན་ནོ། །མ་ཞེས་པ་ནི་མ་རུ་བཤད་ལ་ཡཱ་ཞེས་པ་ནི་ཆུང་མ་དང༌། བྷི་ཞེས་པ་སྲིང་མོ་དང༌། དེ་བཞིན་དུ་བཱི་ཞེས་པ་མཛའ་མོ་དང༌། ལུ་ཞེས་པ་བུ་མོ་དང༌། སྟི་ཞེས་པ་ཁྲག་ཏུ་ཤེས་པར་བྱའོ། །དེ་བཞིན་སོ་དང་པེ་དང་ཧེ་དང་བྷ་དང༌། བྷུ་དང་བཱི་དང་བྷུ་དང་ཌྷི་དང༌། ག་དང་སྟྲི་དང་ཀུ་དང་ཧ་དང་། ཛ་དང་ཀ་དང་བྷ་དང་སྭཱ་དང༌། མི་དང་བ་དང་པེ་དང་གྷ་དང༌། ཀ་དང་ས་དང་ར་དང་དུ་དང༌། སུ་དང་ན་དང་ས་དང་ཨ་དང༌། ཨཱ་དང་ན་དང་སོ་ནི་རིམ་པ་བཞིན་དུ་ཞི་བའི་བཏུང་བ་དང་བཏུང་བ་ཞུ་བའི་རྫས་དང༌། ཤ་དང་ཟ་བ་དང༌། འདྲེས་པ་སྟེ། འདས་པ་དང༌། དུར་ཁྲོད་དང་རོ་དང་རྣལ་འབྱོར་མ་དང༌། ལཱ་མའི་རིགས་དང་གཟུགས་ཅན་མ་དང་མཁའ་འགྲོ་མའི་རིགས་དང༌། ཁཎྜ་རོ་ཧི་དང༌། བྱིན་པ་གཉིས་དང་དཔུང་པ་ཟུང་དང་གསོང་པོར་སྨྲ་བ་དང༌། ལེགས་པར་འོངས་པ་དང༌། ཉ་དང་བཟའ་བ་དང་བཏུང་བྱ་བཏུང་བ་དང་བགྲོད་བྱ་དང་བགྲོད་བྱ་མིན་པ་དང༌། འདོད་པ་དང་བུད་མེད་སྐྱེས་པ་གཞན་ལ་མི་འགྲོ་བ་དང་ཁྱོ་མེད་མ་དང་སྤྱོད་ངན་མ་དང༌། སྐལ་བཟང་མ་དང་སྐལ་ངན་མ་དང་དམ་ཚིག་ཅན་དང་དམ་ཚིག་མེད་པ་དང༌། འོངས་བ་དང་མ་འོངས་པ་དང་ཆགས་པའི་བརྡ་ཡིན་ནོ། །གསུམ་པ་ནི། སྔར་བཤད་པ་འདི་དག་ནི་ཡི་གེ་རེ་རེ་བའི་བརྡ་ཡིན་ཏེ། དཔའ་བོ་སྟེ་མིང་པོ་དང༌། སྲིན་མོར་ཤེས་པར་བྱེད་པ་ནི་བརྡ་འདི་དག་གིས་རང་དང་མཁའ་འགྲོ་མ་རྣམས་ཡིད་ཤིན་
ཏུ་ཉེ་བར་བྱེད་པའི་དོན་ནོ། །འདུ་ཤེས་པར་ཞེས་པ་འགྱུར་གཞན་ལ་མེད་པ་ལྟར་བདེའོ། །སྐལ་ལྡན་གྱིས་བརྡ་འདི་རྣམས་གྲུབ་པའི་རྣལ་འབྱོར་མ་རྣམས་ཀྱི་བརྡར་བཤད་པ་ལྟར་ཡིན་ལ། དངོས་གྲུབ་བརྙེས་པའི་ཕོ་ཉ་མོའི་བརྡ་ཡིན་ནོ། །གུས་པ་དང་ཞེས་སོགས་ལ་ལོ་ཆེན་གྱི་འགྱུར་ལས། དད་པ་དང་མི་ལྡན་པ་རྣམས་ལ་སྦྱིན་པར་མི་བྱའོ། ཞེས་འབྱུང་བ་ལྟར་ལེགས་ལ། མི་སྦྱིན་པ་ནི་བརྡ་དང་དེའི་དོན་བཤད་པ་རྣམས་སོ། །དམ་ཚིག་མཆོག་ཡིད་དུ་འོང་བ་དང་ལྡན་ཞིང༌། བླ་མ་ལ་ཕན་འདོགས་པ་སྟེ་བསྙེན་བཀུར་བ་བྱེད་པའི་གུས་པ་དང་ལྡན་པ་རྣམས་ལ་བརྡ་འདི་རྣམས་སྦྱིན་པར་བྱའོ། །བཞི་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། ཡི་གེ་རེ་རེ་བའི་བརྡའི་ཆོ་གའི་ལེའུ་སྟེ་བཅོ་ལྔ་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་བཅོ་ལྔ་པའི་བཤད་པའོ།། ༈ །།གཉིས་པ་མཁའ་འགྲོ་མའི་རིགས་བྱེ་བྲག་ཏུ་ཤེས་པར་བྱེད་པའི་ཐབས་ལ་བཞི། མཁའ་འགྲོ་མ་དྲུག་གི་རིགས་སོ་སོར་བསྟན་པ། མཁའ་འགྲོ་མ་བདུན་གྱི་མིང་གི་རྣམ་གྲངས། མཁའ་འགྲོ་མའི་རིགས་ཀྱི་དབྱེ་བ། ལཱ་མའི་རིགས་ཀྱི་དབྱེ་བའོ། །དང་པོ་ལ་གསུམ། བཤད་པ་དམ་བཅའ་བ། བཤད་བྱ་བསྟན་པ་དངོས། ལེའུ་ཡི་མཚན་བསྟན་པའོ། །དང་པོ་ནི། བཅོ་ལྔ་པའི་རྗེས་དེ་ནས་འོག་ནས་འཆད་པའི་མཚན་ཉིད་དང་ལྡན་པའི་
སྐལ་བཟང་དང༌། མཚན་ཉིད་དང་མི་ལྡན་པའི་སྐལ་ལྡན་མིན་པ་ནི་མདོར་བསྡུས་ནས་ནི་བཤད་པར་བྱའོ། །འོག་ནས་སྐལ་མིན་དངོས་སུ་མི་སྟོན་ཀྱང༌། སྐལ་ལྡན་གྱིས་མཚན་ཉིད་བསྟན་པ་ལས་བཟློག་པ་ནི་སྐལ་མིན་དུ་གོ་བའི་དོན་ནོ། །སྐལ་ལྡན་ནི་ཕོ་ཉ་མོའི་དམ་ཚིག་མཆོག་ལ་གནས་པ་སྟེ་སྒྲུབ་པ་པོའི་ཡིད་དུ་འོང་ཞིང༌། དེ་ལ་ཕན་འདོགས་པར་བྱེད་པ་ཡིན་ལ། དེ་རྣམས་ཀྱི་མཚན་ཉིད་ནི་བླ་མ་ལ་གུས་པ་ཉིད་དེ་ཁོ་ན་ལ་སྦྱིན་པར་བྱའོ། །ཚིག་རྐང་དང་པོ་གཉིས་ལ། དེ་ནས་གསང་བའི་བཟའ་བྱ་དང༌། བཟའ་མིན་མདོར་བསྡུས་རབ་བཤད་བྱ། །ཞེས་ཀྱང་འབྱུང་ཞིང༌། དེ་ལ་འགྲེལ་པ་གཉིས་སུ་བཤད་པ་ཡང་བྱས་མོད་ཀྱང༌། རྒྱ་དཔེ་ལ་མི་འདྲ་བ་མང་པོ་ཡོད་པར་སྣང་ངོ༌། །དུས་ལྡན་ལ་སྦྱིན་པ་དེ་ནས་དཔའ་བོ་དང་རྣལ་འབྱོར་མ་འདུ་བའི་དུས་སུ། རང་རང་གི་རིགས་ཀྱི་དབྱེ་བ་བཟུང་ན། དཔའ་བོ་དང་རྣལ་འབྱོར་མ་གཉིས་སུ་མེད་པ་སྟེ་གཉིས་ཀ་ཡང༌། རིགས་བདུན་དུ་བཤད་པ་རིགས་དྲུག་ཏུ་འགྱུར་ལ། སྒྲུབ་པ་པོ་གང་གིས་དེ་ཤེས་པ་ཙམ་གྱིས་དངོས་གྲུབ་གཉིས་མྱུར་དུ་འཐོབ་པ་དེ་བཤད་པར་བྱའོ་ཞེས་སྦྱར་རོ། །དེ་ནས་རིགས་ཀྱི་ཞེས་སོགས་ལ་འགྱུར་མི་འདྲ་བ་མང་ངོ༌། །གཉིས་པ་ལ་གཉིས། རིགས་བདུན་དུ་དབྱེ་བ་དང༌། རིགས་དྲུག་ཏུ་བསྡུ་བའོ། །དང་པོ་ནི། སྔར་བཤད་པ་ལྟར་མཁའ་འགྲོ་མའི་རིགས་ཙམ་དུ་ཤེས་ཀྱང༌། བྱེ་བྲག་གི་རིགས་མི་ཤེས་ན་རང་རིགས་ཀྱི་མཁའ་འགྲོ་མ་དང་འདུ་བ་མི་ཤེས་པས། དེའི་ཕྱིར་དུ་བྱེ་བྲག་གི་རིགས་སྟོན་པ་ལ། མཁའ་འགྲོ་མའི་
བུད་མེད་གང་ཞིག་ཁ་དོག་པདྨའི་རྩ་བ་ལྟར་དཀར་ལ། མིག་གི་དབྱིབས་པདྨའི་འདབ་མ་ལྟར་དཀྱུས་རིང་བ། རྟག་ཏུ་གོས་ནི་དཀར་པོ་ལ་དགའ་བ། ཙནྡན་གོར་ཤིརྵ་གསར་པའི་དྲི་དང་ལྡན་པ། བདེར་གཤེགས་ཀུན་གཅིག་ཏུ་འདུས་པ་རྡོ་རྗེ་སེམས་དཔའ་ཉིད་ལ་དགའ་བ་སྟེ་དད་པ་ནི། བདེར་གཤེགས་འདུས་པ་རྡོར་སེམས་དེའི་རིགས་ལས་བྱུང་བར་ཤེས་པར་བྱའོ། །བུད་མེད་གང་ཞིག་གསེར་བཙོ་མའི་ཁ་དོག་དང་འདྲ་ཞིང༌། དམར་བ་དང་སེར་བའི་གོས་ལ་དགའ་ལ། ཛཱ་ཏིའི་ཤིང་གི་སྣ་མའི་མེ་ཏོག་གི་དྲི་དང་ཙམ་པ་ཀའི་དྲི་དང་ལྡན་པ་དེ་ནི། དཔའ་བོའི་རྗེས་འགྲོའམ་རྗེས་ཆགས་རིན་འབྱུང་གི་རིགས་སུ་འགྱུར་རོ། །བུད་མེད་གང་ཞིག་ཁ་དོག་ཨུཏྤལ་སྔོན་པོ་ལྟར་སྔོ་བསངས་དང༌། གོས་ནི་སྔོན་པོ་འཛིན་པ་ལ་དགའ་བ་དང༌། སྔོན་པོར་སྣང་བའི་ཨུཏྤ་ལའི་དྲི་དང་ལྡན་པ་དེ་ནི། དཔའ་བོ་ཧེ་རུ་ཀ་དྲག་པོའི་རྗེས་སུ་འགྲོ་བ་སྟེ་དེའི་རིགས་སོ། །བུད་མེད་གང་ཞིག་གཟུགས་མཛེས་མ་སྟེ། པགས་པ་པདྨ་དཀར་པོའི་འདབ་མ་དང་འདྲ་བར་དཀར་བ། རྟག་ཏུ་པདྨའི་རྩ་བའི་དྲི་བྲོ་བ་དེ་ནི། དཔའ་བོའི་བློ་སྟེ་འོད་དཔག་མེད་ཀྱི་རིགས་སོ། །དེ་བཞིན་ནི་སྔ་མ་ཧེ་རུ་ཀའི་རིགས་སུ་བསྟན་པ་བཞིན་དུ་ཞེས་པའོ། །བུད་མེད་གང་ཞིག་དམར་ལ་དཀར་བའི་དམངས་ཆགས་པས་དམར་ཞིང་དཀར་བ། གཟུགས་བཟང་ལ་གོས་ནི་དམར་པོ་ལ་དགའ་བ་དང༌། མལླི་ཀ་དང་ཨུཏྤ་ལའི་དྲི་དང་ལྡན་པ་དེ་ནི། རྡོ་རྗེའི་རིགས་ལས་བྱུང་བ་མི་བསྐྱོད་པའི་རིགས་ཡིན་ནོ། །གཟུགས་བཟང་ཁ་ནི་
དམར་བ་དང༌། ཞེས་འགྱུར་གཞན་ལས་འབྱུང་ངོ༌། །བུད་མེད་གང་ཞིག་ཁ་དོག་སེར་ཞིང་ལྗང་བ་གོས་ནི་དཀར་པོ་འཆང་བར་དགའ་བ། མགོ་ལ་མེ་ཏོག་གི་དྲི་དང་ལྡན་པ་ནི། དེ་བཞིན་གཤེགས་པ་དོན་གྲུབ་ཀྱི་རིགས་ཀྱི་རྗེས་སུ་འགྲོ་བ་སྟེ་དེའི་རིགས་ཡིན་ནོ། །བུད་མེད་གང་ཞིག་ཁ་དོག་དམར་བ་དང༌། དམར་པོ་དེའི་མདོག་གི་གོས་འཆང་བ་ལ་དགའ་ཞིང་རྟག་ཏུ་ག་པུར་གྱི་དྲི་དང་ལྡན་པ་ནི་རྣམ་སྣང་གི་རིགས་ཀྱི་རྗེས་སུ་འགྲོ་བ་སྟེ་དེའི་རིགས་ཡིན་ནོ། །དེ་ལྟར་རྣལ་འབྱོར་མའི་རིགས་རྣམས་ནི་བདུན་པོ་ཧེ་རུ་ཀ་ངས་བཤད་པ་ཡིན་ནོ། །རྡོར་སེམས་ནི་རྒྱུ་རྡོ་རྗེ་འཛིན་པ་དང༌། ཧེ་རུ་ཀ་འབྲས་བུ་རྡོ་རྗེ་འཛིན་པ་ཡིན་ལ། དེ་གཉིས་སོ་སོར་བྱས་ན་རིགས་བདུན་དང༌། བསྡུས་ན་རིགས་དྲུག་ཡིན་ནོ་ཞེས་ནཱ་རོ་པའི་མན་ངག་གིས་འཆད་པའི་ལུགས་ལྟར་བཤད་དོ། །འགྲེལ་པ་གཞན་ལས། རིགས་ལྔ་དང་ཕག་མོ་དང་དྲུག །རྡོ་རྗེ་འཆང་གི་རིགས་དང་རིགས་བདུན་དུ་འཆད་ལ། ལྭ་བ་པས། བྲམ་ཟེ་རྣམ་སྣང་བཤད་པ་སྟེ། རིན་ཆེན་ཙཎྚ་རི་ཞེས་བྱ། གར་མཁན་དཔག་མེད་མགོན་པོ་སྟེ། །ཆོས་མཁན་དོན་ཡོད་རྡོ་རྗེ་ཅན། །མི་བསྐྱོད་པ་ཡི་ཌོཾ་བི་སྟེ། །དྲུག་པ་རྡོ་རྗེ་སེམས་དཔའ་ཡི། །རྒྱལ་རིགས་སུ་ནི་ཤེས་པར་བྱ། བདུན་པ་ཧེ་རུ་ཀ་ཡི་ནི། །སྣ་ཚོགས་རིགས་བྱུང་དམངས་རིགས་སོ། ཞེས་འཆད་པའི་རིགས་བདུན་ནི་བླ་མ་གོང་མ་དང་མཐུན་ནོ། །འདིར་མཁའ་འགྲོ་མའི་ཕྱག་རྒྱ་རིགས་བདུན་གཙོ་བོ་ཡིན་མོད་ཀྱང༌། མིའི་ཕོ་ཉ་མོ་ཡང་རིགས་བདུན་དུ་བཤད་དེ། དེ་ལྟར་ན་རྣལ་འབྱོར་པ་རང་གི་རིགས་
མེ་ཏོག་ཕོག་པའི་ལྷའི་རྗེས་སུ་འབྲངས་ལ་ཤེས་པར་བྱས་ཏེ། དེ་ནས་རང་གི་རིགས་ཅན་གྱི་རྣལ་འབྱོར་མ་རྣམས་མཆོད་པར་བྱའོ། །དེ་ལྟར་བཤད་པ་བདུན་ནི་ལག་པ་གཡོན་པས་ཟ་བ་དང༌། རྐང་པ་གཡོན་པ་སྔོན་དུ་སྤོ་བ་སོགས་ཀྱི་གཡོན་པའི་ཀུན་སྤྱོད་ལ་རྟག་ཏུ་དགའ་ལ། བདུན་པོ་འདི་དག་རང་གི་རིགས་ཀྱི་ཕྱག་རྒྱས་རྒྱས་བཏབ་པ་དང༌། རང་རང་གི་མདོག་གི་རིགས་ཀྱིས་ཁྱབ་པ་སྟེ་དེ་ལས་མི་འདའོ། །གཉིས་པ་ནི། རང་རང་གི་རིགས་ཀྱི་རིག་པའི་ཡི་གེ་ཨོཾ་ལ་སོགས་པ་དང༌། ཨོཾ་ཛི་ན་ཛིཀ་ལ་སོགས་པ་སྨྲ་བས་རིགས་དྲུག་པོ་སོ་སོའི་རྗེས་སུ་འབྲང་བར་འདིར་གྱུར་པ་འདི་ལ་ཁ་དོག་སྟེ་རིགས་དྲུག་ཏུ་འགྱུར་རོ། །ཞེས་མདོར་བསྟན་ཏོ། །ཁ་དོག་གི་སྐད་དོད་ཝརྞ་ནི་རིགས་དང་ཁ་དོག་དང་ཡི་གེ་དང་བརྗོད་པ་ལ་འཇུག་པས། འདིར་རིགས་སུ་བསྒྱུར་ན་ལེགས་སོ། །རྡོར་སེམས་རང་གི་ཕྱག་རྒྱ་སྟེ་ཕྱག་མཚན་འཆིང་བ་སྟེ་འདྲི་བ་དང༌། རྡོར་སེམས་རང་གི་རིགས་ལས་བྱུང་བའི་སྔགས་ཚིག་ཏུ་སྨྲ་བ་ནི་རྡོར་སེམས་ཀྱི་རིགས་ཡིན་ནོ། །བུད་མེད་གང་ཞིག་རྟག་ཏུ་གཡོན་ནས་འགྲོ་ཞིང༌། རྣལ་འབྱོར་པ་ལ་ཡང་རྟག་ཏུ་གཡོན་ལ་སྟེ་གཡོན་ནས་བསྐོར་བ་དང༌། སྐད་ཆེན་པོར་སྨྲ་བ་དང༌། མིག་གཡོན་ནས་བལྟ་བས་རྣམ་པར་བལྟ་བ་དང༌། བུད་མེད་རྣམས་མཐོང་བའི་ཚེ་རབ་ཏུ་སྟེ་མང་པོར་སྨྲ་བ་དེ་ནི། རིན་འབྱུང་གི་རིགས་ཀྱི་ཕོ་ཉ་མོ་དམ་ཚིག་དང་ལྡན་པར་བཤད་དོ། །བུད་མེད་རྣམས་ཀྱིས་གང་གསོལ་བ་བཏབ་པ་དེ་བྱེད་ཅིང༌། རང་གི་རིགས་
ཀྱི་ས་བོན་ཧྲི་ལ་སོགས་པ་རབ་ཏུ་སྨྲ་བ་དང༌། པདྨའི་རིགས་ཀྱི་བྱ་བ་ཀུན་སྤྱོད་རྣམས་མི་འདོར་བ་དང༌། རང་གི་རིགས་ཀྱི་བྱ་བ་སྟོན་པའི་བསྟན་བཅོས་ལས་གསུང་པ་རྣམས་སྐྱོང་བ་དང༌། རང་གི་རིགས་ཀྱི་སྙིང་པོ་རིག་པ་ཟློས་པ་དེ་ནི་སྣང་མཐའི་རིགས་ཀྱི་བུད་མེད་དམ་ཚིག་དང་ལྡན་པར་བརྗོད་དོ། །སོར་མོ་དཔྲལ་བར་གང་འཆིང་བའི་ཕྱག་འཚལ་བ་ན། གཡོན་པའི་ལུས་ཀྱིས་རྟག་ཏུ་འདུད་པ་དང༌། ལྷ་མོ་སྟེ་བུད་མེད་རྣམས་དང་ཀུན་ཏུ་སྨྲ་བ་དེ་ནི་ངེས་པར་བདེན་པར་འགྲོ་བ་སྟེ། རང་རྗེས་སུ་འཛིན་པར་ངེས་པ་མི་བསྐྱོད་པའི་རིགས་སོ། །རྐང་པའི་མཐེ་བོང་གཡོན་པས་ས་ལ་ནི་རི་མོ་འདྲི་བར་བྱེད་ཅིང༌། རང་གི་མགོ་ནི་འཕྲུག་པར་བྱེད་པ་དང༌། ཟུར་མིག་གིས་བལྟ་ཞིང་ལག་པ་གཡོན་གྱིས་སྟོན་པ་ནི་དོན་གྲུབ་ཀྱི་རིགས་སོ། །དེ་མཐོང་བ་དེའི་ཚེ་སྒྲུབ་པ་པོས་བུད་མེད་དེའི་རང་གི་རིགས་དྲན་པ་ཁྱད་པར་དུ་བྱའོ། །མཁུར་བའམ་ཀོ་སྐོ་དག་དང་ནི་སྣ་དག་ཏུ་ནི་སོར་མོ་སྟོན་པ་དང༌། ཟུར་གྱིས་བལྟ་ཞིང་རིག་པའི་རྒྱལ་པོའི་སྔགས་ལན་ཅིག་ཟློས་ནས་རིག་པ་སྟེ་རང་རིགས་ཀྱི་སྒྲུབ་པ་པོ་ལ་རྣམ་པར་བལྟ་བ་དང༌། བདེན་པར་འགྲོ་བ་སྟེ་བརྫུན་མི་སྨྲ་བའི་རྣལ་འབྱོར་མ་དེ་ནི། ངེས་པར་རྣམ་སྣང་གི་རིགས་ཀྱི་ཕོ་ཉ་མོ་དམ་ཚིག་ཡིན་ནོ། །རིགས་དྲུག་གི་བཤད་པ་འདི་རྣམས་ཀྱང་ནཱ་རོ་པའི་མན་ངག་གིས་འཆད་པ་ལྟར་བཤད་པའོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྣལ་འབྱོར་མ་བདུན་དང་རིགས་དྲུག་གི་མཚན་ཉིད་བརྟག་པའི་ཆོ་གའི་ལེའུ་སྟེ་བཅུ་དྲུག་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་
བཤད་པ་སྦས་པའི་དོན་ཀུན་གསལ་བ་ལས་ལེའུ་བཅུ་དྲུག་པའི་བཤད་པའོ།། ༈ །།གཉིས་པ་མཁའ་འགྲོ་མ་བདུན་གྱི་མིང་གི་རྣམ་གྲངས་ལ་བཞི། བཤད་པར་དམ་བཅའ་བ། མཁའ་འགྲོ་མ་བདུན་གྱི་མཚན་ཉིད་བསྟན་པ། མཚན་མའི་ཕྱག་རྒྱ་བསྟན་པ། ལེའུ་ཡི་མཚན་བསྟན་པའོ། །དང་པོ་ནི། བཅུ་དྲུག་པའི་རྗེས་དེ་ནས་ཡཱ་མི་ནི་སྟེ་གཤིན་རྗེ་མ་དང༌། སྐྲག་བྱེད་མ་དང་ནགས་ཚལ་མའམ་ཤིང་ལྡན་མ་དང༌། འཇིགས་གཟུགས་མ་དང༌། གཟུགས་ཀུན་སྦྱོད་མ་དང༌། མཛེས་མའམ་ཚེ་ཟ་མ་དང༌། བྷ་སུ་ར་ཞེས་པ་འོག་གསལ་མ་སྟེ་མཁའ་འགྲོ་མ་རྣམས་བདུན་གྱི་རང་རང་གི་མཚན་ཉིད་མདོར་བསྡུས་ནས་ལེའུ་འདིར་བཤད་པར་བྱའོ། །བསྡུས་མ་ཞེས་པ་ལ་བྷ་བ་བྷ་དྲས་མདོར་བསྡུས་ནས་བདུན་དུ་བྱས་པ། ཞེས་བཤད་ལ། ལོ་ཆེན་གྱི་འགྱུར་ལས་ཀྱང༌། མཁའ་འགྲོ་མ་ནི་རྣམ་པ་བདུན། མདོར་བསྡུས་མཚན་ཉིད་འདིར་བཤད་བྱ། ཞེས་འབྱུང་ངོ༌། །དཀའ་རྒྱལ་ཟླ་བས་ཀྱང༌། རྒྱུད་འདི་ལ་བདུན་ལས་ལྷག་པ་ནི་མ་གསུངས་ཀྱི། སྡུད་པར་བྱེད་མ་ཞེས་བྱ་བ་གར་བྱེད་མ་ཡང་མ་གསུངས་སོ། །དེའི་ཕྱིར་རྣལ་འབྱོར་མ་རྣམས་ཀྱི་རིགས་བདུན་ནོ། །ཞེས་བཤད་ཅིང༌། གཞུང་ལས་ཀྱང་ལན་གཉིས་སུ་བདུན་དུ་བཤད་ལ། རྒྱས་བཤད་དུ་ཡང་བརྒྱད་པ་ལ་ཟུར་དུ་བཤད་པ་བྱུང་བས་བདུན་དུ་བྱའོ། །མལ་གྱི་འགྱུར་ལས། བྷ་སུ་ར་དང་རྣམ་པ་བདུན། །སྡུད་པ་མོ་ནི་འདིར་བཤད་བྱ། ཞེས་འབྱུང་བ་ལྟར་བསྡུས་མ་ནི། འདིར་
སྡུད་པ་མོ་ལ་བྱ་ལ། དེ་ཡང་མཁའ་འགྲོ་མ་རྣམས་སྡུད་པར་བྱེད་པའི་བདུན་པོ་ཉིད་ལ་བྱའི། སྡུད་པ་མོ་ཞེས་བརྒྱད་པ་ལ་འཆད་ཅིང༌། དེ་ཡང་རྡོ་རྗེ་ཕག་མོ་ལ་འཆད་པ་དོན་མིན་ཏེ། མངོན་བརྗོད་ཀྱི་འགྱུར་གསུམ་ལས་སྔ་མ་བདུན་གྱི་གཅིག་ལ་ཕག་མོ་བགྲངས་པའི་ཕྱིར་དང༌། རྩ་རྒྱུད་བཞིན་དུ་རིགས་བདུན་དུ་བཤད་པའི་ཕྱིར་རོ། །དེས་ན་ཧེ་རུ་ཀ་མངོན་འབྱུང་ལས། ཨེ་ཧི་ཀ་དང་གར་དབང་ཕྱུག །བརྒྱད་པ་རུ་ནི་བརྗོད་པ་སྟེ། ཞེས་གསུངས་པ་དང་རྩ་རྒྱུད་གཉིས་མི་འདྲ་བས། འདིར་བརྒྱད་དུ་བྱེད་ན་གར་གྱི་དབང་ཕྱུག་མས་ཁ་བསྐང་ངོ༌། །འོ་ན་མཁའ་འགྲོ་མ་དེ་རྣམས་ཇི་ལྟ་བུ་སྙམ་ན། ཆགས་པ་ཆེན་པོའི་རང་བཞིན་ཅན་གྱི་རྣལ་འབྱོར་མ་རྣམས་ནི་ཆགས་བྲལ་གྱི་ཐེག་པ་པ་ལ་སོགས་པས་ཤིན་ཏུ་རྙེད་པར་དཀའ་ལ། དེ་བཞིན་དུ་མཁའ་འགྲོ་མ་རྣམས་ཀྱི་རིགས་ཀྱང་ཤིན་ཏུ་རྙེད་པར་དཀའ་བ་ནི། འདི་རྣམས་ཀྱི་དམ་ཚིག་གི་དཀྱིལ་འཁོར་རོ། །བདུད་རྩི་ལྔ་ཞེས་པ་ནི་ལྔ་བདུད་རྩི་ཞེས་བྱ་ལ། ལྔ་ནི་ལུས་ཀྱི་འབྱུང་བ་ལྔའོ། །དངོས་བདེན་པ་ནི་དེ་ལྔས་ཆོས་རྣམས་བསྡུས་པའོ། །ལྔ་པོ་དེའི་བདུད་རྩི་ནི་དེ་དག་གི་སྙིང་པོ་བདེ་སྟོང་དབྱེར་མེད་ལ་འཆད་དོ། །སྐལ་ལྡན་ལ་སོགས་པ་ནི་བདུད་རྩི་ལྔ་བསྟེན་པ་ལ་གོམས་པས་རྣལ་འབྱོར་མ་དེ་རྣམས་དང་ཕྲད་པ་ཡང་དག་པ་འབྱུང་བས་རྙེད་མི་དཀའ། ཞེས་ཟེར་རོ། །གཉིས་པ་ནི། གཟུགས་ཅན་མ་དང་ཙུམ་བི་ཀ་སྟེ་འོད་བྱེད་མ་དང་ལཱ་མ་དང༌། ཡོངས་གྱུར་མ་དང༌། བྱིས་བཅས་མ་དང༌། མི་ལྡོག་མ་དང༌། ཨེ་ཧི་ཀི་ལྷ་མོ་ཞེས་པ་འདི་བ་མ་སྟེ། མཁའ་འགྲོ་མ་བདུན་དུ་རྒྱུད་རྣམས་ལས་
བཤད་དོ། ཞེས་པ་ནི་མདོར་བསྟན་པའོ། །དེ་རྣམས་རིམ་པ་བཞིན་ཡཱ་མི་ནི་ལ་སོགས་པ་བདུན་གྱི་མིང་གི་རྣམ་གྲངས་སོ། །བླ་མ་སྔ་མ་རྣམས་སྔ་མ་བདུན་འཇིག་རྟེན་ལས་འདས་པ་དང་། ཕྱི་མ་བདུན་འཇིག་རྟེན་པ་ལ་གྲགས་པའི་མིང་ཡིན་ཟེར་རོ། །མངོན་པར་ཞེན་པ་སྟེ་ཆགས་པས་བལྟ་བ་དང༌། གང་སྨིན་མ་ཡོན་པོར་འདེབས་པར་བྱེད་ཅིང༌། སྔོན་དུ་གཟུགས་ཡིད་དུ་འོང་བ་བསྟན་ནས་དེ་ནས་གཟུགས་དེ་སྡུད་པར་བྱེད་པ་གང༌། ཕྱིས་ནི་གཟུགས་མི་སྡུག་པ་བསྟན་ནས་འཇིགས་པར་བྱེད་པ་དེ་ནི་གཟུགས་ཅན་མར་ཤེས་པར་བྱ་སྟེ། དེ་ལ་ནི་ཡཱ་མི་ནི་ཞེས་ཀྱང་བྱའོ། །དེ་ནི་དཔའ་བོ་བདེ་མཆོག་གི་རྣལ་འབྱོར་པས་གཉིས་སུ་མེད་པ་སྟེ་གཉིས་མཉམ་པར་སྦྱོར་བས་བསྟེན་པར་བྱའོ། །དྲུང་པ་སྟེ་ཉེ་བའི་གཉེན་ནམ་མི་དྲུང་བ་སྟེ་རིང་བ་གཉེན་མ་ཡིན་པའི་བྱིས་པ་ལ་འཁྱུད་ཅིང༌། ཙུམྦ་ན་བྱེད་པ་དེ་ནི་ཙུམྦི་ཀ་ར་ཤེས་པར་བྱ་སྟེ་དེ་ལ་སྐྲག་བྱེད་མ་ཞེས་ཀྱང་ཟེར་རོ། །འགྱུར་ཁ་ཅིག་ལས་སྡུག་པའམ་ཡོང་ན་མི་སྡུག་པ། ཞེས་ཀྱང་འབྱུང་ངོ༌། །མཁའ་འགྲོ་མ་དེ་བསྟེན་ན་སྡིག་པ་སྟེ་སྒྲིབ་པ་འཇོམས་པར་བྱེད་པ་ཡིན་པས་བསྟེན་པར་བྱའོ། །མིག་གི་ཟུར་གྱིས་བལྟ་ཞིང་གདོང་ལ་ཁྲོ་གཉེར་ལྡན་པ་སྟེ་བསྡུས་པ་དང༌། སྨིན་མ་བསྒྱུར་བ་སྟེ་བསྐྱོད་ཅིང༌། སྡིགས་མཛུབ་བྱེད་པ་དང༌། རེས་འགའ་གཞན་དབུགས་འབྱིན་པར་བྱེད་ཅིང་སླར་ཡང་འཇིགས་པར་བྱེད་པར་གང་ཡིན་པ་དང༌། གཞན་ཡང་འདི་ན་སྟེ་རེས་འགའ་དབུགས་མི་འབྱིན་པར་འཇིགས་པར་བྱེད་པ་གང་ཡིན་པ་
དེ་ནི་ལཱ་མ་ཡིན་པར་བཤད་དེ། དེ་ལ་ནི་ནགས་ཚལ་མ་ཞེས་ཀྱང་ཟེར་རོ། །མི་ལྡོག་མ་ལ་དམིགས་ཀྱིས་བསལ་ནས་མི་བསྟེན་པར་གསུངས་པས་ལཱ་མ་ཡང་བསྟེན་བྱའོ། །ཕག་དང་དྲེད་དང་བྱི་ལ་དང་ཅེ་སྤྱང་དང་རི་དྭགས་དང་རྟ་དག་དང༌། དེ་འདྲའི་རིགས་ཐམས་ཅད་དེར་ནི་སྟེ་བུད་མེད་མཐོང་བ་ན་འཇིགས་པར་བྱེད་པ་དེ་ནི། ཡོངས་སུ་གྱུར་པ་མར་བཤད་དོ། །དེ་ལ་ནི་འཇིགས་གཟུགས་མ་ཞེས་ཀྱང་བྱའོ། །ཤིན་ཏུ་དགའ་བས་རྒོད་པ་དང་དོན་འགའ་ཞིག་ལ་སོང་ནས་སླར་ཡང་མི་ལྡོག་པ་སྟེ་མྱུར་དུ་མི་འོང་བ་དང༌། སྒྲུབ་པ་པོ་ལ་རྗེས་སུ་ཆགས་པས་གསལ་བ་སྟེ་མཐོང་བར་འདོད་པ་དེ་ནི་ཁཎྜ་རོ་ཧིར་བཤད་དོ། ཞེས་སོ། །རྒྱ་དཔེ་ཁ་ཅིག་ལས། གང་དེ་བྱིས་བཅས་མ་རུ་བཤད། ཅེས་གསུང་པ་ལྟར་ལེགས་ལ། དེ་ལ་ནི་ཀུན་སྤྱོད་མའམ་ཀུན་བསྐྱོད་མ་ཞེས་ཀྱང་ཟེར་རོ། །ཡིད་ནི་འབྱུང་བ་སྟེ་མི་དགའ་བས་ལག་པའི་བོང་བའམ་རྐང་པས་སམ་གོས་ཀྱི་ཐ་མའམ། ཡང་ན་ཤིང་དག་གིས་ཀྱང་རུང་སྟེ། བཤད་པ་དེ་དག་གིས་གང་ལ་རེག་པ་ནི་འཚོ་བར་མི་འགྱུར་བ་ནི། མི་ལྡོག་མར་ཤེས་པར་བྱ་སྟེ། དེ་ནི་བསྒྲུབ་པ་སྟེ་བསྟེན་པར་བྱ་བ་མིན་པར་བཤད་དེ། དེ་ལ་ནི་འཛེས་མ་ཞེས་ཀྱང་ཟེར་རོ། །ལས་དང་པོ་ལ་སྒྲུབ་མི་ནུས། ཞེས་པ་ནི་ལོ་ཆེན་དང་མལ་དང་གཉིས་འདུས་ཀྱི་འགྱུར་ལ་མེད་ལ། ཡོད་པ་ལྟར་ན་བསྒྲུབ་བྱ་མིན་པ་དེ་ལས་དང་པོ་པས་སོ། །ཞེས་བཤད་པར་བྱའོ། །རྒོད་ཅིང་སྨྲ་ལ་ངུ་བ་སོགས་ཀྱི་རྒྱུ་མེད་པ་རུ་ངུ་ཞིང་རབ་ཏུ་ཁྲོས་པ་སྟེ། དེ་ནི་ཕྱོགས་འདིར་རིང་དུ་གནས་པས་ན་ཨེ་ཧི་ཀར་
དྲན་པ་སྟེ་བཤད་དོ། །ལྷ་མོ་ཨེ་ཧི་ཀ་དེ་ནི་གསོང་པོར་སྨྲ་བ་ཡིན་ལ། སངས་རྒྱས་པ་སྟེ་འདིའི་རྣལ་འབྱོར་མ་རྣམས་དང་ལྷན་ཅིག་ཏུ་རྟག་ཏུ་སྨྲ་བ་སྟེ་དེ་ཉིད་ནི་རྡོ་རྗེའི་རིགས་ལས་བྱུང་བ་ཡིན་ནོ། །དེ་ལ་ནི་བྷ་སུ་ར་ཞེས་ཀྱང་ཟེར་རོ། །མཁའ་འགྲོ་མ་ཡི་རིགས་ཀྱི་ཕྱག་རྒྱ་མོ་དེ་རྣམས་ནི། དཔའ་བོ་སྟེ་སྒྲུབ་པ་པོས་བསྟེན་པའི་ཕྱིར་དུ་མཚོན་པ་སྟེ་ཤེས་པར་བྱའོ། །འདི་རྣམས་སངས་རྒྱས་བདུན་ནམ་དྲུག་གི་རིགས་གང་ཡིན་པ་ནི་བཅུ་དྲུག་པ་ལྟར་ཡིན་ལ། བྱེ་བྲག་ཏུ་ཡཱ་མི་ནི་དང་གཟུགས་ཅན་མ་སོགས་ཀྱི་རིགས་གང་ཡིན་པ་ནི། ལེའུ་འདིར་བཤད་པ་བཞིན་ཤེས་པར་བྱའོ། །འདི་རྣམས་དཀྱིལ་འཁོར་ལ་དགོད་པ་དང༌། སྐུ་མདོག་དང་ཕྱག་མཚན་སོགས་དང༌། མིའི་བུ་མོ་ལ་སྦྱར་བ་རྣམས་ཤེས་པར་འདོད་ན། ལྭ་བ་པའི་དཀའ་འགྲེལ་ལས་ཤེས་པར་བྱ་ཞིང༌། འདི་དག་གིས་རྣལ་འབྱོར་མ་གང་བསྡུས་པ་ནི་འགྲེལ་པ་གཞན་རྣམས་ལས་ཤེས་པར་བྱའོ། །གསུམ་པ་ནི། ཐོད་པ་དང་དགྲ་སྟྭ་དང་ཕག་གི་མཆེ་བ་དང༌། འཁོར་ལོ་དང་ཆུ་སྲིན་གྱི་རྒྱལ་མཚན་དང༌། རལ་གྲི་དང་སྐྲག་བྱེད་དེ་གྲི་གུག་གམ་རྡོ་རྗེ་དང༌། དུང་དང་བརྒྱད་ནི་རིམ་པ་བཞིན་དུ་གཟུགས་ཅན་མ་ལ་སོགས་པའི་གཡས་ཀྱི་ཕྱག་དང་པོའི་ཕྱག་མཚན་ཡིན་ལ། གཡོན་གྱི་ནི་ཁ་ཊྭཱཾ་ག་དང་བཅས་པའི་ཐོད་པ་ནས་ཁུ་ཁྲག་གསོལ་བའོ། །ཞེས་བཤད་དོ། །དུང་ནི་འདིར་ཁ་བསྐང་བའི་གར་དབང་མའི་ཕྱག་མཚན་ནོ། །བཞི་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུད་པའི་རྒྱུད་ལས། སྔར་བཤད་
པའི་བདུན་པོ་འདིས་འཁོར་ལོ་གསུམ་གྱི་རྣལ་འབྱོར་མ་ཐམས་ཅད་ཀྱི་གཟུགས་ཡོངས་སུ་བརྗེ་བ་ནི་དེ་རྣམས་ཀྱི་གཟུགས་སུ་བསྒྱུར་བ་དང༌། ཕྱག་མཚན་དང་ཕྱག་རྒྱ་ནི་ཐོད་པ་ལ་སོགས་པ་རྣམས་གཉིས་ཀ་ཡིན་པ་ལ་དགོངས་སོ། །དེ་རྣམས་བསྟན་པའི་ཆོ་གའི་ལེའུ་སྟེ་བཅུ་བདུན་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་བཅུ་བདུན་པའི་བཤད་པའོ།། ༈ །།གསུམ་པ་མཁའ་འགྲོ་མའི་རིགས་ཀྱི་དབྱེ་བ་ལ་བཞི། བཤད་པར་དམ་བཅའ་བ། རྣལ་འབྱོར་མ་སོ་སོའི་མཚན་ཉིད། དེ་རྣམས་ཀྱི་དོན་བསྡུ་བ། ལེའུ་ཡི་མཚན་བསྟན་པའོ། །དང་པོ་ནི། ལེའུ་བཅུ་བདུན་པའི་རྗེས་དེ་ནས་སྔ་མའི་མཚན་ཉིད་ལས་མཚན་ཉིད་གཞན་ཡང་བཤད་པར་བྱའོ། །དགོས་པ་ཅིའི་དོན་ཡིན་ཞེ་ན། མཁའ་འགྲོ་མཆོག་གི་གོ་འཕང་གི་གནས་སམ་རྒྱུར་གྱུར་པ་ནི། སྒྲུབ་པ་པོ་གང་གིས་ཡང་དག་པར་ཤེས་པ་ཡིས། མཁའ་འགྲོ་མ་རྣམས་རྣལ་འབྱོར་བའི་རྗེས་སུ་འཇུག་པའི་དམ་ཚིག་ལ་གནས་པའི་ཕྱིར་དུའོ། །གཉིས་པ་ལ་དྲུག །པདྨ་གར་དབང་གི་རིགས་ཀྱི་དང༌། ཧེ་རུ་ཀའི་རིགས་ཀྱི་དང༌། རྡོ་རྗེ་ཕག་མོའི་རིགས་ཀྱི་དང༌། ཁཎྜ་རོ་ཧིའི་རིགས་ཀྱི་དང༌། ཧེ་རུ་ཀའི་རིགས་ཀྱི་དང༌། རྣམ་པར་འདྲེན་མའི་རིགས་ཀྱི་མཁའ་འགྲོ་མའོ། །དང་པོ་ནི། བུད་མེད་གང་ཞིག་དམར་ཞིང་སེར་བ་སྟེ་དམར་སེར་དང༌། པདྨའི་དྲི་ནི་རྣམ་པར་གཏོང་བ་སྟེ་རྣམ་པར་འཕྲོ་བ་དང༌། རང་བཞིན་ཞི་བའི་ལྟ་སྟངས་དང༌། སྒྲུབ་པ་པོ་ལ་ཞེན་པར་ཏེ་ཆགས་ནས་ལྟ་བའི་རྗེས་སུ་འགྲོ་བ་སྟེ་འབྲང་བ་དང༌།
བུད་མེད་གང་ཞིག་སེན་མོ་དང་མིག་དམར་བ་དང༌། དེ་བཞིན་དུ་སྐྱེ་བོ་ཀུན་ལ་བརྩེ་བ་དང་ཁྱིམ་དུ་པདྨ་འདྲི་ཞིང་དེ་ལ་མཆོད་པ་ནི་པདྨ་གར་དབང་སྟེ་འོད་དཔག་མེད་ཀྱི་རིགས་ལས་བྱུང་བའི་མཁའ་འགྲོ་མ་ཡིན་ནོ། །གཉིས་པ་ནི། བུད་མེད་གང་ལ་སྨིན་མའི་དབུས་ན་མདུང་རྩེ་གསུམ་པའི་མཚན་མ་སྣང་བ་དང༌། ལུས་ནི་སྔོ་བསངས་ལ་ཅུང་ཟད་སྐྱ་བ་སྟེ། ལུས་ནི་སྔོ་བསངས་ཅུང་ཟད་སྐྱ། ཞེས་འབྱུང་ངོ༌། །རྟག་ཏུ་རྡོ་རྗེའི་རིགས་ཀྱི་རྣལ་འབྱོར་སྒོམ་པ་གང་གི་སྟེང་རང་གི་ཁྱིམ་དུ་རྡོ་རྗེ་འདྲི་ཞིང༌། དེ་ལ་རྟག་པར་མཆོད་པར་བྱེད་པའི་མཁའ་འགྲོ་མ་དེ་ནི་དཔལ་ཧེ་རུ་ཀའི་རིགས་ལས་བྱུང་བའི་མཁའ་འགྲོ་མ་ཡིན་ནོ། །བུད་མེད་གང་གི་དཔྲལ་བར་རྩེ་གསུམ་ནི་སྣང་ཞིང༌། དེར་མ་ཟད་མདུང་ཐུང་དག་ཀྱང་སྣང་བར་གྱུར་ཅིང༌། མིག་དམར་ཞིང་ལུས་ཀྱི་མདོག་ནི་དམར་སེར་དང༌། དམར་སེར་དང་ཞེས་འབྱུང་ངོ༌། །དེ་བཞིན་དུ་རྐང་པ་དང་ལག་པ་དམར་བ་དང༌། ར་སྐྱེས་དང་ཁྱིམ་བྱ་དག་ལ་ཡང་རྟག་ཏུ་ཡིད་ནི་དགའ་བར་འགྱུར་ཅིང༌། བུད་མེད་དེའི་ཁྱིམ་དུ་རྡོ་རྗེའི་མཚན་མ་བྲིས་ནས་གང་ཞིག་རྟག་ཏུ་མཆོད་པ་བྱེད་པ་དེ་ནི་ཤྲཱི་ཧེ་རུ་ཀའི་རིགས་ལས་བྱུང་བའི་མཁའ་འགྲོ་མ་ཡིན་པར་གདོན་མི་ཟའོ། །གསུམ་པ་ནི། བུད་མེད་གང་གི་དཔྲལ་བའམ་ལག་པར་ཡང་ནི་འཁོར་ལོའི་མཚན་མ་སྣང་བར་གྱུར་པ། སྤྲིན་སྔོན་དག་དང་འདྲ་བའི་ཁ་དོག་ཅན། རྟག་ཏུ་དཔྲལ་བར་དར་ཐོད་འཆང་བ། འབྱོར་པའི་སྐལ་པ་ཆེན་པོ་ཕུན་སུམ་ཚོགས་ཞིང་མཆོག་ཏུ་བདེ་བ་དང་ལྡན་པ་གང་ཡིན་པ་དང༌།
རང་གི་ཁྱིམ་དུ་འཁོར་ལོ་འདྲི་བར་བྱེད་ཅིང༌། དེ་ལ་རྟག་ཏུ་མཆོད་པ་བྱེད་པ་དེ་ནི་རྡོ་རྗེ་ཕག་མོའི་རིགས་ལས་བྱུང་བའི་མཁའ་འགྲོ་མའི་སྟོབས་ཀྱིས་དྲེགས་པ་སྟེ་ང་རྒྱལ་བའོ། །གཡོན་པ་སྟེ་བུད་མེད་གང་ཞིག་ལུས་ཀྱི་མདོག་མིག་སྨན་ནག་པོ་དང་འདྲ་ཞིང༌། སོ་ནི་དཀར་ཞིང་མཐོ་བ་སྟེ་རིང་བ་དང༌། རྟག་ཏུ་མ་རུངས་པ་དང་སྙིང་སྟོབས་ཆེན་པོ་དང་ལྡན་པར་གྱུར་པ་དང༌། རྟག་ཏུ་ཁྲུས་བྱེད་པ་ལ་དགའ་བ་དང༌། ཁྱིམ་དུ་རྡོ་རྗེའི་མཚན་མ་འདྲི་བ་དང༌། བྲིས་པ་ལ་རྟག་ཏུ་བསམ་པ་དགེ་ཞིང་དག་པས་མཆོད་པ་བྱེད་པ་དེ་ནི། རྡོ་རྗེ་ཕག་མོའི་རིགས་ལས་བྱུང་བ་མཁའ་འགྲོ་མ་སྟོང་ཕྲག་བཅུའི་འཁོར་དང་ལྡན་པ་ཡིན་ནོ། །སྟོང་ཕྲག་བཅོ་ལྔ་ཞེས་གཞན་ལས་འབྱུང་ངོ༌། །བཞི་པ་ནི། བུད་མེད་གང་ཞིག་གསེར་གྱི་མདོག་དང་འདྲ་བར་སེར་བོར་སྣང་བ། མིག་མི་གཡོ་བ་སྟེ་མི་འཛུམས་ཤིང༌། ཁ་སྤུ་སེར་བ་དང་གང་གི་དཔྲལ་བའམ་ལག་པར་ཡང་ནི་རྡོ་རྗེའི་མཚན་མ་སྣང་བར་འགྱུར་བ། རྟག་ཏུ་རྒྱལ་སྲིད་དང་འདྲ་བའི་འབྱོར་བ་ལ་གནས་པ་དང༌། ང་རྒྱལ་གྱིས་བསྙེམས་ཞིང་ཚིག་བདེན་པར་སྨྲ་བ་དང༌། ལུས་ལས་མ་ལླི་ཀའི་དྲི་འབྱུང་ཞིང་གང་གི་སྟེ་རང་གི་ཁྱིམ་དུ་རྟག་ཏུ་རྡོ་རྗེའི་མཚན་མ་འདྲི་ཞིང༌། དེ་ལ་མཆོད་པ་ཆེར་བྱེད་པ་དེ་ནི། ཁཎྜ་རོ་ཧི་དུམ་སྐྱེས་མའི་རིགས་ལས་བྱུང་བའི་རྣལ་འབྱོར་མ་ཡི་དབང་ཕྱུག་མཆོག་གོ། དེ་ལྟར་ཧེ་རུ་ཀའི་རིགས་གཉིས་དང༌། ཕག་མོའི་རིགས་གཉིས་པ་དང༌། དུམ་སྐྱེས་མའི་རིགས་ཏེ་བཞི་ལ་རྡོ་རྗེ་བྲིས་པ་ལ་མཆོད་པར་འདྲ་ཡང་ལུས་ཀྱི་ཁ་དོག་མི་འདྲ་ལ། ཁྱད་པར་གཞན་ཡང་ཡོད་དོ། །ལྔ་པ་
ནི། བུད་མེད་གང་ཞིག་རྟག་པར་ཤ་ལ་དགའ་བ་དང༌། ལུས་སྐེམ་ཞིང་ཁ་དོག་མིག་སྨན་ནག་པོའི་མདོག་ཅན་དང༌། དཔྲལ་བར་མདུང་རྩེ་ལྟ་བུའི་རི་མོ་ཡོད་པ་དང༌། བུད་མེད་གང་ཞིག་གདུག་པའི་ལས་ལ་དགའ་བ་དང༌། རྟག་ཏུ་དུར་ཁྲོད་དུ་འགྲོ་བ་དང༌། གང་ལ་ཡང་འཇིགས་པ་མེད་ཅིང་བཙོག་མེད་དེ་གཙང་སྒྲ་མེད་པ་དང༌། བུད་མེད་གང་གི་དཔྲལ་བར་ཐིག་ལེ་ལྟ་བུའི་རི་མོ་ཡོད་པ་དང་། རང་གི་ཁྱིམ་དུ་ཐོད་པ་འདྲི་ཞིང་དེ་ལ་མཆོད་པ་དེ་ནི་དཔལ་ལྡན་ཧེ་རུ་ཀའི་རིགས་ལས་བྱུང་བའི་མཁའ་འགྲོ་མ་ཡིན་ནོ། །དྲུག་པ་ནི། བུད་མེད་གང་ཞིག་སྤྲིན་སྔོན་པོའི་མདོག་དང་འདྲ་ལ། སོ་ནི་མི་མཉམ་པ་རིང་ཐུང་དུ་གནས་ཤིང༌། རྟག་ཏུ་གདུག་པ་སྟེ་དྲག་པོའི་ལས་ལ་དགའ་བ་གཡོན་གྱི་མཆེ་བ་གཙིགས་པ་དག །དེའི་སྟེང་རང་གི་ཁྱིམ་དུ་དགྲ་སྟ་འདྲི་ཞིང༌། དེ་ལ་རྟག་ཏུ་མཆོད་པ་བྱེད་པ་དེ་ནི་འཁོར་ལོའི་རྣམ་པར་འདྲེན་པ་སྟེ་གཙོ་བོ་བདེ་མཆོག་གི་རིགས་ལས་བྱུང་བའི་མཁའ་འགྲོ་མར་ནི་ཐེ་ཚོམ་མེད་དོ། །ཁ་ཅིག་རྣམ་འདྲེན་བགེགས་མཐར་བྱེད་ལ་འཆད་དོ། །དེ་ལྟར་རིགས་བརྒྱད་ལས་དང་པོ་ནི་གསལ་ལོ། །གཉིས་པ་ནི་ཧེ་རུ་ཀའི་རིགས། གསུམ་པ་ནི་རིན་པོ་ཆེའི་རིགས། བཞི་པ་ནི་རྣམ་སྣང་གི་རིགས། ལྔ་པ་ནི་མི་བསྐྱོད་པའི་རིགས། དྲུག་པ་ནི་རྡོར་སེམས་ཀྱི་རིགས། བདུན་པ་ཧེ་རུ་ཀའི་རིགས་ཏེ། དེ་ལན་གཉིས་བསྟན་ཏོ། །བརྒྱད་པ་ནི་དོན་གྲུབ་ཀྱི་རིགས་དེ་དག་ཀྱང་སྙིང་པོའི་རྣལ་འབྱོར་མ་བཞིའི་ནང་གི་མཁའ་འགྲོ་མའི་རིགས་ཡིན་ཞེས་མཁས་པ་མར་དོ་
གསུང་ངོ༌། །འདི་རྣམས་ཀྱང་བྱེ་བྲག་གི་རིགས་ཤེས་པར་བྱེད་པའི་ཐབས་ཡིན་ལ། ཤེས་པར་བྱེད་ཚུལ་སྔ་མ་རྣམས་དང་མི་འདྲ་བས་མི་ཟློས་སོ། །གསུམ་པ་ནི། སྔར་བཤད་པའི་མཁའ་འགྲོ་མའི་ཚོགས་འདི་དག་ཀྱང༌། ཤྲཱི་ཧེ་རུ་ཀའི་རིགས་ལས་བྱུང་བ་ལ་མི་འདྲ་བའི་ཁྱད་པར་བཤད་པ་སྟེ། བདེ་མཆོག་གི་སྒྲུབ་པ་པོ་རྣམས་ལ་ཕན་པའི་ཕྱིར་དུ་སྣོད་མིན་ལ་ཤིན་ཏུ་གསང་བའི་མཚན་ཉིད་སྤྲུལ་པ་སྟེ་བཤད་པ་ཡིན་ནོ། །སྤྲུལ་པ་མེད་པར་བཤད་ཅེས་ཀྱང་གཞན་ལས་འབྱུང་ངོ༌། །བཞི་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྣལ་འབྱོར་མ་བརྒྱད་པོ་ཐམས་ཅད་ཀྱི་ཁ་དོག་གི་མཚན་ཉིད་མཚན་མ་བྲིས་པ་མཆོད་པ་ལ་བརྟེན་ནས་རིགས་སོ་སོར་ངེས་པར་བྱེད་པའི་ཆོ་གའི་ལེའུ་སྟེ་བཅོ་བརྒྱད་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་བཅོ་བརྒྱད་པའི་བཤད་པའོ།། །། ༈ གཉིས་པ་ལཱའི་མའི་རིགས་ཀྱི་དབྱེ་བ་ལ་གསུམ། བཤད་པར་དམ་བཅའ་བ། ལཱ་མའི་རིགས་སོ་སོའི་མཚན་ཉིད་བཤད་པ། ལེའུ་ཡི་མཚན་བསྟན་པའོ། །དང་པོ་ནི། ལེའུ་བཅོ་བརྒྱད་པའི་རྗེས་དེ་ནས་སྒྲུབ་པ་པོ་ཡིས་ལཱ་མའི་ཁྱད་པར་གྱི་མཚན་ཉིད་བཞིན་དང་། མིག་ལ་སོགས་པའི་ཡན་ལག་གི་ཚོགས་ཏེ་ཆ་ཤས་རྣམས་ཤེས་པར་བྱ་བ་ཡང་དག་པ་སྟེ་གསལ་བར་བཤད་པར་བྱའོ་ཞེས་སྦྱར་རོ། །གཉིས་པ་ལ་ལྔ༌། འོད་དཔག་མེད་ཀྱི་རིགས་ཀྱི་དང༌། རིན་འབྱུང་གི་རིགས་ཀྱི་དང༌། མི་བསྐྱོད་
པའི་རིགས་ཀྱི་དང༌། རྣམ་སྣང་གི་རིགས་ཀྱི་དང༌། དོན་གྲུབ་ཀྱི་རིགས་ཀྱི་ལཱ་མའི་མཚན་ཉིད་དོ། །དང་པོ་ནི། བུད་མེད་གང་གི་བྱད་བཞིན་ནི་ཡོངས་སུ་རྒྱས་པར་དང༌། ཀུན་ནས་ཟླུམ་པར་སྣང་ཞིང་ཁའི་སྨྲ་ར་རྟག་པར་ཡོད་པ་དང༌། བ་སྤུ་དང་སྨིན་མ་རིང་བ་དང༌། གོས་བཟང་པོ་ལ་དགའ་ལ་གཙང་སྦྲ་ཆེ་ཞིང་སྤྱོད་ལམ་ཞི་བ་དང༌། མི་གཡོ་བ་སྟེ་སེམས་བརྟན་པ་དང༌། ཚིག་བདེན་པར་སྨྲ་བ་དང་རྟག་ཏུ་དམ་པའི་ཆོས་ལ་དགའ་བ་དེ་ནི་དཔའ་བོ་སྟེ་སྒྲུབ་པ་པོའི་སྲིང་མོར་སངས་རྒྱས་ཀྱིས་བཤད་དོ། །དེ་མཐོང་ནས་ལག་པ་གཉིས་པདྨར་བསྐོར་བའི་ཕྱག་རྒྱ་སྦྱིན་པ་སྟེ་བསྟན་པར་བྱའོ། །ཡང་ན་རུས་སྦལ་གྱི་ཕྱག་རྒྱ་ལག་པ་གཉིས་ཐལ་མོ་སྦྱར་བ་བསྟན་པར་བྱའོ། །པགས་པའི་ཕྱག་རྒྱ་ནི་ཀྲིཥྞ་ས་རིའི་པགས་པ་འཛིན་པའི་ཚུལ་དུ་བྱེད་པའོ། །སྤྱི་བླུགས་ནི་ཐོད་པ་སྟེ་དེ་འཛིན་པའི་ཚུལ་བྱེད་པ་ནི་ཕྱག་རྒྱའི་ལན་དུ་བརྗོད་པ་ཡིན་ནོ། །བུད་མེད་དེ་ནི་ཡར་མར་གྱི་ཚེས་བཅུའི་དུས་ཚིགས་ལ། རང་གི་ཁྱིམ་དུ་པདྨ་འདྲི་བར་འགྱུར་བ་ནི། །འོད་དཔག་མེད་ཀྱི་རིགས་ཀྱི་ལཱ་མའི་རིགས་ཀྱི་བུད་མེད་ཀྱི་མཚན་ཉིད་དུ་གྱུར་པ་འདི་དག་ཡིན་ནོ། །གཉིས་པ་ནི། མཆུ་གཉིས་རློ་བ་སྟེ་འཕྱང་ཞིང་མིག་གཉིས་ཀྱི་དཀྱུས་རིང་ལ། མིག་དམར་ཞིང་སེར་སྐྱར་གནས་པ། ལོངས་སྤྱོད་ཀྱིས་ཕྱུག་ཅིང་སྐལ་པ་བཟང་བའི་དཔལ་གྱིས་ཡོན་ཏན་ཁ་དོག་སེར་ཞིང་ཙམ་པ་ཀ་ལྟ་བུར་སྣང་བ། བོང་ཚོད་ཤིན་ཏུ་རིང་བ་མིན་ཞིང་ཐུང་བའང་མིན་པར་འཚམ་པ། ཁ་དོག་སྣ་ཚོགས་པའི་
གོས་ལ་དགའ་བ། དཔྲལ་བར་རི་མོ་གསུམ་ཡོད་པ། སྐྲའི་མཚམས་སུ་གྱེན་དུ་བརྟེན་པ་སྟེ་གནས་པ་ལས་རྒོད་ཅིང་དགའ་བ་ཉིད་དག་དང༌། ལམ་ནི་རྣམ་པར་གནོན་ཅིང་གནས་པ་ཕན་ཚུན་གྱི་དཔུང་འཁྲུགས་པས་གཡུལ་དུ་འཆི་བ་རྣམས་ཀྱི་གཏམ་ལ་རྟག་ཏུ་དགའ་བ། དེ་ལྟ་བུའི་རབ་དྲེགས་མ་སྟེ་ང་རྒྱལ་བྱེད་མ་མཐོང་ནས་ནི། མཐེ་བོས་མཐེའུ་ཆུང་གི་ཚིགས་བར་པ་མནན་ནས་ལྷག་མ་རྣམས་གྱེན་དུ་བསྒྲེང་བའི་མདུང་རྩེ་གསུམ་པའི་ཕྱག་རྒྱ་བསྟན་པར་བྱའོ། རྐང་པ་གཡས་པ་བརྐྱང་ལ་རྐང་པ་གཡོན་པ་བསྐུམས་པའི་སྐྱིལ་ཀྲུང་ཕྱེད་པའི་གར་ཉིད་ཀྱང་ནི་བསྟན་པར་བྱའོ། །འདི་དང་གོང་མ་གཉིས་གདམ་ང་ཅན་དུ་མངོན་ནོ། །ཁ་ཕྱིར་བལྟས་ཏེ་གཡོན་པའི་ཕྱོགས་ནས་ཡོངས་སུ་བཟློག་སྟེ་བསྐོར་བ་ནི། རྣལ་འབྱོར་མའི་ཕྱག་རྒྱའི་ལན་ནི་ཡིན་པར་བཤད་དོ། །མར་ངོའི་བཅུ་བཞི་དང་ཚེས་བརྒྱད་ནི། རྣལ་འབྱོར་མ་དེའི་སྒྲུབ་པ་པོ་དང་འདུ་བའི་དུས་ཚིགས་ཡིན་པར་བཤད་ལ། རི་མི་འདྲི་བའི་དུས་ཀྱང་ངོ༌། །རང་གི་ཁྱིམ་དུ་མདུད་རྩེ་གསུམ་པ་ཡང་བྲིས་ནས་རྟག་ཏུ་མཆོད་པ་དེ་ནི། འཇིག་རྟེན་གྱི་དབང་ཕྱུག་གམ་དབང་པོ་རིན་འབྱུང་གི་རིགས་ཀྱི་ལཱ་མའི་མཚན་ཉིད་དུ་གྱུར་པ་ནི་སྔར་བཤད་པ་འདི་དག་ཡིན་ནོ། །གསུམ་པ་ནི། བུད་མེད་གང་གི་མཁུར་ཚོས་དག་ཏུ་ནི་ཁུང་བུར་སྣང་བའང་གནས་པར་གྱུར་ཅིང༌། དེ་བཞིན་དུ་ལུས་ཀྱི་ཁ་དོག་རྟག་ཏུ་དམར་ཞིང་ཅུང་ཟད་སེར་བ་དང་མིག་ནི་ལྗང་སེར་དུ་སྣང་བ་དང༌། དེ་བཞིན་དུ་སྐྲ་ནི་འཁྱིལ་ཞིང་ལི་བ་དང༌། མགོ་དང་དཔྲལ་བར་དར་འཕྱངས་བཅིངས་པར་སྣང་བ་དང༌། དཔྲལ་བར་རི་མོ་
གཅིག་པར་གནས་པ་དང༌། དེ་བཞིན་དུ་མགྲིན་པ་རིང་བ་དང༌། རྟག་ཏུ་གོས་དམར་པོ་ལ་དགའ་ཞིང་རྒོད་ཅིང་གླུ་ལེན་པ་དང༌། གློ་བུར་དུ་ནི་ཁྲོ་བ་དང་སེམས་ནི་རྣམ་པར་ཏེ་ཁྱད་པར་དུ་གཡོ་བ་དང༌། རྩོད་པ་ལ་དགའ་བ་སྟེ་འདི་འདྲའི་རབ་དྲེགས་མ་མི་བསྐྱོད་པའི་རིགས་ཀྱི་ཕྱག་རྒྱ་མ་མཐོང་ནས་ནི། མཐེ་བོས་སོར་མོ་གཞན་ཐམས་ཅད་མནན་ནས་སྡིག་མཛུབ་ཏུ་བྱས་པའི་འཕང་མདུང་གི་ཕྱག་རྒྱ་སྦྱིན་པར་བྱ་ལ། ཕྱག་རྒྱ་གཉིས་པ་ནི་འབད་པ་ཡིས་དྲིལ་བུ་འཁྲོལ་བ་ལྟར་བྱེད་པའི་ཕྱག་རྒྱ་སྦྱིན་པར་བྱ་སྟེ་གདམ་ང་ཅན་ནོ། །ལུས་གཡོན་གྱི་ཕྱོགས་སུ་ལྡོག་པ་སྟེ་བསྐོར་བ་ནི་ཕྱག་རྒྱའི་ལན་ནི་ཡིན་པར་བཤད་དོ། །བཞི་པ་ནི། བུད་མེད་གང་ཞིག་ལུས་བོང་ཐུང་ཞིང་བྱིན་པ་སྦོམ་ལ་རྟག་ཏུ་གོས་སེར་པོ་དགའ་ཞིང་ཕྲག་པ་དག་ནས་གོས་འཕྱང་བ། དེ་འདྲའི་བུད་མེད་མཐོང་ནས་ནི་མཐེ་བོང་དང་མཛུབ་མོ་རྩེ་སྤྲད་ལ། སོར་མོ་གཞན་པར་ཕྱེ་སྟེ་བརྐྱང་བ་འཁོར་ལོའི་ཕྱག་རྒྱ་བསྟན་པར་བྱ་ཞིང༌། འབད་པ་ཡིས་ནི་ཕྱག་རྒྱ་གཉིས་པ་མཛུབ་མོ་བརྐྱང་ལ་སོར་མོ་གཞན་ཅུང་ཟད་ནང་དུ་བསྐུམས་ཏེ། ཁ་གྱེན་དུ་ཕྱོགས་པའི་དུང་གི་ཕྱག་རྒྱ་བསྟན་པར་བྱ་ཞིང༌། ལུས་གཡོན་གྱི་ཕྱོགས་ནས་ཡོངས་སུ་བཟློག་པ་ནི་ཕྱག་རྒྱའི་ལན་ནི་ཡིན་པར་བཤད་དོ། །མར་ངོའི་བཅུ་བཞི་ནི་དེའི་འདུ་བའི་དུས་ཡིན་ཏེ། དེའི་རང་གི་ཁྱིམ་དུ་རྡོ་རྗེའི་མཚན་མ་འདྲི་བ་ནི། ཤྲཱི་ཧེ་རུ་ཀ་སྟེ་མི་བསྐྱོད་པའི་རིགས་ཀྱི་ལཱ་མའི་མཚན་ཉིད་དུ་གྱུར་པ་འདི་དག་ཡིན་ནོ། །ལྔ་པ་ནི། བུད་མེད་གང་ཞིག་ལུས་ཀུན་ལ་བ་སྤུ་མང་པོ་ཡོད་པ།
མིག་ནག་ཅིང་སེར་བ་དང་ལུས་སྦོམ་ཞིང་རྣམ་འགྱུར་མི་བཟད་པ་སྟེ་འཇིགས་སུ་རུང་བ་དང༌། བཞིན་འཕེལ་ཀ་ཆེ་ཞིང་ཁ་ཆེ་ལ་གསུས་པ་རློ་བ་སྟེ་འཕྱང་ཞིང་ཁ་དོག་ནག་པ། མིག་ཟླུམ་ཞིང་སྣ་ནི་ཉམས་པ་སྟེ་ཞོམ་པ་ལྟ་བུ་དང༌། རྟག་ཏུ་གླུ་ལ་མཁས་པ་ཆར་སྤྲིན་གྱི་མདོག་ཅན། ཡིད་འཕྲོག་པ་སྟེ་ཡིད་དུ་འོང་བ་འདི་འདྲའི་རབ་དྲེགས་མ་དོན་གྲུབ་ཀྱི་རིགས་ཀྱི་ཕྱག་རྒྱ་མ་མཐོང་ནས་ནི། ལག་པ་གཡོན་པ་བཀན་ཏེ་དེའི་སྟེང་དུ་གཡས་པའི་གྲུབ་མོ་བཞག་ལ། མཐེ་བོང་དང་མཛུབ་མོ་དག་བསྒྲེངས་ཏེ་སོར་མོ་གཞན་གསུམ་བསྐུམས་པ་གཡས་པས་བཟུང་པའི་ཀླུའི་ཕྱག་རྒྱ་བསྟན་པར་བྱ་སྟེ། འབད་པ་ཡིས་ཕྱག་རྒྱ་གཉིས་པ་འཕང་མདུང་གི་ཕྱག་རྒྱ་ཡང་ནི་བསྟན་པར་བྱ་ཞིང༌། ལུས་གཡོན་གྱི་ཕྱོགས་ནས་ཡོངས་སུ་བཟློག་པ་ནི་ཕྱག་རྒྱའི་ལན་ནི་ཡིན་པར་བཤད་དོ། །ཚེས་བཅུ་གཅིག་ནི་དེའི་འདུ་བའི་དུས་ཏེ། དེ་ལ་ཁྱིམ་དུ་མཆེ་བའི་རི་མོ་འདྲི་བར་བྱེད་དེ་དེ་ནི་རྡོ་རྗེ་ཕག་མོའི་རིགས་ལས་བྱུང་བའི་ལཱ་མའི་མཚན་ཉིད་དུ་གྱུར་པ་འདི་དག་ཡིན་ནོ། །ལཱ་མ་ལྔ་རིགས་ལྔར་འཇོག་ཚུལ་རྩ་རྒྱུད་དང་མངོན་བརྗོད་དང༌། ཁ་སྦྱོར་རྣམས་ལས་མི་གསལ་ཡང༌། འདུས་པའི་བཤད་རྒྱུད་རྡོ་རྗེ་ཕྲེང་བ་ལས་གསུངས་པ་ལྟར་བཀོད་དོ། །འདི་རྣམས་ཀྱང་མཁའ་འགྲོ་མའི་རིགས་བྱེ་བྲག་ཏུ་ཤེས་པར་བྱེད་པ་ཡིན་ཀྱང༌། རིགས་བྱེ་བྲག་པ་དང་ཤེས་པར་བྱེད་ཚུལ་ནི་སྔར་བཤད་པ་རྣམས་དང་མི་འདྲའོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། ལྭ་མའི་རིགས་ཀྱི་རྣལ་འབྱོར་མ་ལྔ་པོ་ཐམས་ཅད་ཀྱི་ཕྱག་རྒྱ་སྟོན་པ་དང༌།
ཕྱག་རྒྱའི་ལན་བསྟན་པའི་ལེའུ་སྟེ་བཅུ་དགུ་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་བཅུ་དགུ་པའི་བཤད་པའོ།། ༈ །།གསུམ་པ་མཁའ་འགྲོ་མའི་རིགས་སྤྱིར་ཤེས་པར་བྱེད་པའི་ལུས་ཀྱི་བརྡ་ལ་གསུམ། ལག་པའི་ཕྱག་རྒྱའི་བརྡ། ཡན་ལག་གི་མཚན་ཉིད་ཀྱི་བརྡ། ཁྱད་པར་གྱི་ཕྱག་རྒྱའི་མཚན་ཉིད་དོ། །དང་པོ་ལ་བཞི། བཤད་པར་དམ་བཅའ་བ། བརྡ་བསྟན་པ་དངོས། བརྡ་བསྟན་ནས་ཇི་ལྟར་བྱ་བ། ལེའུ་ཡི་མཚན་ནོ། །དང་པོ་ནི། བཅུ་དགུ་པའི་རྗེས་དེ་ནས་ལཱ་མའི་མཚན་ཉིད་བཤད་པ་ལས་གཞན་ཡང་ལག་པ་གཡོན་གྱིས་སྟོན་པའི་བརྡ་རྣམས་བཤད་པར་བྱའོ། །དགོས་པ་གང་གི་དོན་དུ་སྟོན་ཞེ་ན། བརྡ་བསྟན་པ་ཡང་དག་པར་ཤེས་པར་འགྱུར་བ་གང་གིས་མིང་པོ་དང་སྲིང་མོ་བཞིན་དུ་ཤིན་ཏུ་གདུང་བའི་དབང་དུ་གྱུར་ནས། གང་བསྒོ་བ་ཐམས་ཅད་བྱེད་པའི་ཆེད་དུའོ། །མངོན་བརྗོད་ལས། རྣལ་འབྱོར་མ་ཡིས་ལག་གཡོན་གྱིས། །བརྡ་རྣམས་ལ་ནི་འཇུག་པར་བྱ། ། ཞེས་གསུངས་པ་བཞིན་དུ་བྷ་ཧ་བྷ་དྲས་ཀྱང༌། རྣལ་འབྱོར་མས་བརྡ་བསྟན་པ་ལ་རྣལ་འབྱོར་པས་བརྡའི་ལན་བྱེད་པར་བཤད་དོ། །གཉིས་པ་ནི། མཁའ་འགྲོ་མ་གང་ཞིག་ལག་པ་གཡོན་པ་སྟོན་པ་ནི། གསོང་པོར་ཏེ་ཕྱག་འཚལ་ལོ་ཞེས་སྨྲ་བ་སྟོན་པ་ཡིན་ཏེ། རྡོ་རྗེ་མཁའ་འགྲོ་ལས། གང་ཞིག་ལག་གཡོན་སྟོན་བྱེད་པ། །ཕྱག་ནི་འཚལ་བར་བྱེད་པ་ཡིན། །ཞེས་
གསུངས་སོ། །རྣལ་འབྱོར་པ་གང་ཞིག་ལག་པ་གཡོན་པའི་སྲིན་ལག་སྟོན་པ་ནི། གསོང་པོར་སྨྲ་བའི་ལན་དུ་གྱུར་པ་ཡིན་ནོ། །དེ་ཡང་རྡོ་རྗེ་མཁའ་འགྲོ་ལས། གང་ཞིག་སྲིན་ལག་སྟོན་བྱེད་པ། །ཕྱག་འཚལ་བ་ཡི་ལན་གྱུར་ཡིན། ཞེས་གསུངས་སོ། །རྣལ་འབྱོར་མ་གང་ཞིག་ལྟོ་བ་རྡེབས་པ་ནི། བདག་ཉིད་བཀྲེས་པར་ཏེ་ལྟོགས་སོ་ཞེས་སྟོན་པས་ཟས་སྟེར་དགོས་པའོ། །བུད་མེད་གང་ཞིག་རང་གི་དཔྲལ་བ་སྟོན་པ་ནི། ནམ་མཁའ་ཡི་ལམ་ལས་ནི་འོངས་སོ་ཞེས་པའོ། །བུད་མེད་གང་ཞིག་རང་གི་ཁར་ནི་རང་གི་སོར་མོ་འཇུག་པ་ནི། ཟས་ཟོས་ཟིན་ཏོ་ཞེས་ནི་སྨྲ་བ་ཡིན་ནོ། །བུད་མེད་གང་ཞིག་ལྕེ་ནི་བསྐྱོད་པ་དག །ཟས་ཟའོ་ཞེས་ནི་སྨྲ་བ་ཡིན་ནོ། །གང་ཞིག་ཅེས་པ་རྣམས་རྣལ་འབྱོར་མ་ལ་ཤེས་པར་བྱའོ། །ཅུང་ཟད་འགྲོ་བས་པུས་མོ་དང་བྱིན་པ་ལ་རེག་པ་ནི། བདག་ངལ་ལོ་ཞེས་སྟོན་པའོ། །ལག་པ་གཡོན་པའི་མཐེ་བོས་སོར་མོ་གཞན་གྱི་རྩེ་མོ་ལ་རེག་པ་ནི། ངལ་སོས་སོ་ཞེས་སྨྲས་པ་ཡིན་ནོ། །སོ་ནི་སོས་འཆའ་བ་ནི། ཤ་ཟའོ་ཞེས་སྟོན་པའོ། །ཁྲོ་གཉེར་སྟོན་པ་དང་དེ་ལ་རེག་པ་ནི། བདག་བཅིངས་སོ་ཞེས་སྟོན་པའོ། །རང་གི་ལག་པ་མཁའ་ལྡིང་གི་གཤོག་པ་ལྟར་སྟོན་པ་ནི། བདག་གྲོལ་ལོ་ཞེས་སྟོན་པའོ། །ལྟོ་བ་རྡེབས་པ་སོགས་དགུ་ལ་ནི་བརྡ་བསྟན་པ་དེ་དག་གི་དོན། སྒྲུབ་པ་པོ་གོ་བ་ནི་ལན་དང་འདྲའོ། །ལག་པ་གཡོན་པའི་ཁུ་ཚུར་སྟོན་པ་ན། དེ་ལ་པ་ཏི་ས་སྟོན་པ་ནི་དཔྲལ་བར་སོར་མོ་གསུམ་འཕྲད་ལ་ཐོད་ཀྱི་ཚུལ་དུ་བསྟན་ཏོ། །བཞིན་རྣམ་པར་འགྱུར་བའི་ཚུལ་གྱིས་བལྟས་ནས་ནི། རང་གི་སྐྲ་ལག་པ་གཡོན་པས་
བཟུང་ནས་སྟོན་པ་ལ། དེ་ལ་ལག་པ་གཡོན་གྱིས་ཁ་ཊཱཾ་ག་འཛིན་པའི་ཚུལ་ནི་བསྟན་ཏོ། །ཡན་ལག་བསྐྱོད་པ་སྟེ་གཡོ་བར་བྱེད་པ་དེ་ལ་རྡོ་རྗེ་ཁུ་ཚུར་གཉིས་ཀྱིས་མཐེའུ་ཆུང་གཉིས་བསྒྲེངས་ཏེ་ཁ་འགྲམ་གཉིས་སུ་བཞག་པ་མཆེ་བ་གཉིས་ཀྱི་ཕྱག་རྒྱ་བསྟན་པར་བྱའོ། །ལག་པ་གཡོན་པས་ལག་པ་གཡས་པ་སྟོན་པ་ནི། གཏོར་མ་ཟའོ་ཞེས་སྨྲ་བ་ཡིན་ནོ། །ལག་པ་གཡས་པ་སྟོན་པ་ནི་དེ་ལྟར་གྱིས་ཤིག་ཅེས་སྨྲ་བའོ། །རྣ་བ་ལ་རེག་སྟེ་སྟོན་པ་ནི། བདག་དང་ལྷན་ཅིག་གནས་པར་བྱ་ཞེས་སྟོན་པའོ།། ལག་པ་གཡོན་པའི་མཐེ་བོའི་སེན་མོས་སོར་མོ་གཞན་གྱི་སེན་མོ་ལ་རེག་པ་ནི། ཤི་བའི་རོ་ཁྱེར་ཅིག་ཅེས་སྨྲ་བའོ། །ས་ལ་རི་མོ་འདྲི་བ་ནི།། དེ་རིང་དཀྱིལ་འཁོར་དུ་འཇུག་ཅེས་སྨྲ་བའོ། །ནུ་མ་ལ་རེག་པ་ནི། བདག་གི་བུ་ནི་བསྲུངས་ཞེས་སྨྲ་བའོ། །རྐང་པ་གཡོན་པའི་མཐེ་བོས་ས་ལ་རི་མོ་འདྲི་བ་ནི། བླ་མའི་སྐྱེ་བོས་ང་བསྲུངས་ཞེས་སྨྲ་བའོ།། མིག་འཛུམས་པར་བྱེད་པ་ནི། དེ་ལྟར་བྱོས་ཤིག་ཅེས་སྨྲ་བའོ།། ལག་པ་གཡོན་པས་སོར་མོའི་ཚིགས་ལ་རེག་པ་ནི། ལྷན་ཅིག་ཏུ་བདེ་བར་ཉལ་ལོ་ཞེས་སྨྲ་བའོ། །ལག་པས་ལག་པ་སྟོན་པ་སོགས་མན་ཆད་ཀྱི་དོན་ཡང་སྔར་དང་འདྲའོ། །ལེའུ་འདིར་ལག་པའི་བརྡ་མིན་པ་ཡང་མང་དུ་ཡོད་མོད་ཀྱང༌། ལག་པའི་བརྡ་ཐོག་མར་བསྟན་ཞིང༌། ལག་པའི་བརྡ་མང་བས་ལག་པའི་བརྡའི་ལེའུ་ཞེས་གསུངས་སོ། །གསུམ་པ་ནི། སྔར་བཤད་པའི་ཕོ་ཉ་མོ་དེ་དག་ཀུན་དང་ཡང་དག་པར་སྦྱད་པ་སྟེ་བསྟན་པར་བྱའོ། །
བཞི་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྣལ་འབྱོར་མ་ཐམས་ཅད་ཀྱི་ལག་པ་གཙོ་བོར་བྱས་པའི་ཕྱག་རྒྱའི་བརྡའི་ཆོ་གའི་ལེའུ་སྟེ་ཉི་ཤུ་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་ཉི་ཤུ་པའི་བཤད་པའོ།། ༈ །།གཉིས་པ་ཡན་ལག་གི་མཚན་ཉིད་ཀྱི་བརྡ་ལ་གསུམ། བཤད་པར་དམ་བཅའ་བ། བརྡ་བསྟན་པ་དངོས། ལེའུ་ཡི་མཚན་བསྟན་པའོ། །དང་པོ་ནི། ཉི་ཤུ་པའི་རྗེས་དེ་ནས་ཐབས་སླ་བ་གང་གིས་སྒྲུབ་པ་པོས་དངོས་གྲུབ་འགྲུབ་པར་འགྱུར་བ། ཉན་ཐོས་སོགས་ཀྱི་སྤྱོད་ཡུལ་མ་ཡིན་པའི་གསང་བ་ཆེན་པོའི་མཚན་ཉིད་དེ། རྡོ་རྗེ་འཛིན་པ་ང་ཡིས་སྙིང་རྗེ་ཆེན་པོའི་དབང་གིས་རབ་ཏུ་བཤད་པར་བྱའོ། །གསང་བ་ཆེན་པོའི་ལྟ་བ་ཞེས་པ་ལྟར་ན། གསང་བ་ཆེན་པོ་ནི་མཁའ་འགྲོ་མ་རྣམས་སོ། །ལྟ་བ་ནི་བརྡ་འདི་རྣམས་མིག་གིས་བལྟ་བར་བྱ་བ་གཟུགས་ཀྱི་བརྡའོ། །གཉིས་པ་ནི། བུད་མེད་གང་རང་གི་སྤྱི་གཙུག་ལ་རེག་པར་བྱེད་པ་དེ་ལ། རྣལ་འབྱོར་པས་མགོ་བསྟན་པར་བྱའོ། །གང་ཞིག་ཅེས་པ་རྣམས་ནི་མཁའ་འགྲོ་མ་ཡིན་ལ། ལན་རྣམས་ནི་རྣལ་འབྱོར་པས་སྟོན་པ་ཡིན་ནོ། །ལྭ་བ་པས་བརྡ་འདི་རྣམས་སྒྲ་ཇི་བཞིན་པར་བཤད་པས་བཤད་པ་གཉིས་པ་མེད་ཀྱང་ཆོག་གོ །དཔྲལ་བ་སྟོན་པ་དེ་ལ་རང་གི་མཁུར་ཚོས་བསྟན་ཏོ། །དེ་བཞིན་དུ་སོ་སྟོན་པ་ལ་ལྕེ་དང༌། མཆུ་སྟོན་པ་ལ་ཀོ་སྐོ་དང༌། མགྲིན་པ་སྟོན་པ་ལ་ལྟོ་བ་དང༌། ལག་པ་སྟོན་པ་ལ་དཔུང་པ་དང༌།
སུམ་སྐེད་དེ་སྐེད་རྒྱབ་ཅེས་འབྱུང་བ་སྟོན་པ་ལ་རྒྱབ་བམ་ས་ཞེས་འབྱུང་བ་དང༌། ནུ་མ་སྟོན་པ་ལ་ཀོ་སྐོ་དང༌། ལྟོ་བ་སྟོན་པ་ལ་ལྟེ་བ་དང༌། གསང་བའི་གནས་སྟོན་པ་ལ་ལིང་ག་དང༌། བརླ་སྟོན་པ་ལ་ཕིག་ཀ་ལ་འོག་ཅེས་འབྱུང་བ་དང༌། པུས་མོ་སྟོན་པ་ལ་བྱིན་པ་དང༌། རྐང་པ་སྟོན་པ་ལ་རྐང་མཐིལ་དང༌། སོར་ཚིགས་སྟོན་པ་ལ་སོར་མོ་དང༌། ས་སྟོན་པ་ལ་ནམ་མཁའ་དང༌། ནམ་མཁའ་སྟོན་པ་ལ་ཉི་མ་དང༌། ལག་པས་ནམ་མཁའ་ལ་འབབ་ཆུའི་རྣམ་པའི་རི་མོ་འཁྱོག་པོ་བྱས་ཏེ་སྟོན་པ་ལ་ལག་པ་གཉིས་ཀྱི་སོར་མོ་བརྐྱང་ནས་བསྐྱོད་པ་ཆུ་རླབས་ཀྱི་ཚུལ་དུ་བྱེད་པ་རྒྱ་མཚོའི་ཕྱག་རྒྱ་བསྟན་པར་བྱའོ། །སྔར་བཤད་པ་འདི་དག་ནི་མཁའ་འགྲོ་མ་ཡི་ནི་ལུས་ཀྱི་ཆ་ཤས་ཀྱི་ཕྱག་རྒྱར་ཐེ་ཚོམ་མེད་དོ། །སྔར་བཤད་པ་འདི་དག་བསྟན་པ་ནི་སྣོད་མིན་ལ་རྟག་ཏུ་གསང་བར་བྱ་བ་སྟེ། སྣོད་ལྡན་ལ་བརྡ་དང་བརྡའི་ལན་ཡང་དག་པ་སྟེ་ཕྱིན་ཅི་མ་ལོག་པར་སྟོན་པར་འགྲོ་བར་འགྱུར་བའོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། ཡན་ལག་གི་མཚན་ཉིད་ཀྱི་ཆོ་གའི་ལེའུ་སྟེ་ཉི་ཤུ་རྩ་གཅིག་པའོ། ། འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་ཉི་ཤུ་རྩ་གཅིག་པའི་བཤད་པའོ།། ༈ །།གསུམ་པ་ཁྱད་པར་གྱི་ཕྱག་རྒྱའི་མཚན་ཉིད་ལ་བཞི། བཤད་པར་དམ་བཅའ་བ། བརྡ་བསྟན་པ་དངོས། དོན་བསྡུ་བ། ལེའུ་ཡི་མཚན་
བསྟན་པའོ། །དང་པོ་ནི། ཉེར་གཅིག་པའི་རྗེས་དེ་ནས་གང་གིས་རྣལ་འབྱོར་མ་རྣམས་མཉེས་པར་འགྱུར་བ་གཞན་ཏེ་མཆོག་ཡན་ལག་གི་ཕྱག་རྒྱའི་ཁྱད་པར་ནི་བཤད་པར་བྱའོ་ཞེས་སྦྱར་རོ། །ལྭ་བ་པས་ལག་པའི་སྤྱི་ལས་ཁྱད་པར་ནི་སོར་མོ་རྣམས་སོ། །ཞེས་གསུངས་པས་ལག་པའི་ཁྱད་པར་གྱི་ཕྱག་རྒྱ་ཞེས་བྱའོ། །ཚུལ་ནི་རྒྱུད་ནས་གསུངས་པའི་ཆོ་ག་བཞིན་དུ་བཤད་པའོ། །དགོས་པ་གང་གི་དོན་དུ་ཡིན་ཞེ་ན། ཕྱག་རྒྱ་བསྟན་པ་གང་ཞིག་ཤེས་པས་རྣལ་འབྱོར་མས་སྒྲུབ་པ་པོ་མིང་པོ་དང༌། སྒྲུབ་པ་པོས་རྣལ་འབྱོར་མ་སྲིང་མོར་ཐེ་ཚོམ་མེད་པར་ཤེས་པར་འགྱུར་བའི་ཕྱིར་དུའོ། །དེ་ལྟར་ཤེས་ནས་ཀྱང་མིང་སྲིང་བཞིན་དུ་ཡིད་གཅུགས་པར་གྱུར་ནས་ཇི་ལྟར་བསྒོ་བ་བཞིན་དུ་བྱེད་པ་ནི། བརྡ་དང་བརྡའི་ལན་གྱི་དགོས་པའོ། །གཉིས་པ་ནི། རྣལ་འབྱོར་ཕོ་མོ་གང་ཡང་རུང་བ་གཅིག་གིས་སོར་མོ་གཅིག་ནི་སྟོན་པ་ཡིས། ལེགས་པར་འོངས་སམ་ཞེས་སྨྲ་བ་ཡིན་ལ། ཅིག་ཤོས་ཀྱིས་མཛུབ་མོ་དང་གུང་མོའི་སོར་མོ་གཉིས་ནི་བསྟན་པ་ཡིས་ལེགས་པར་འོངས་སོ་ཞེས་པའི་ལན་སྨྲ་བ་ཡིན་ནོ། །དེ་ལྟ་བུ་འདི་ནི་རྣལ་འབྱོར་མ་ཀུན་གྱི་ཡན་ལག་གི་ཁྱད་པར་གྱི་ཕྱག་རྒྱར་རབ་ཏུ་བཤད་དོ། །ལག་པ་གཡོན་གྱི་གུང་མོ་བརྐྱང་པ་སྟོན་པ་ལ། མཛུབ་མོ་ཅུང་ཟད་བསྐུམས་པའི་མིག་གི་ཕྱག་རྒྱ་ལན་དུ་ཤེས་པར་བྱའོ། །སྔགས་པ་སྟེ་སྒྲུབ་པ་པོས་རྣལ་འབྱོར་མ་གང་ལ་ཕྱག་རྒྱ་དེ་བསྟན་པ་དེ། དེའི་མོད་ལ་སྟེ་མོད་ནས་ཇི་སྲིད་འཚོའི་བར་དུ་རང་གི་དབང་དུ་འགྱུར་བར་ཐེ་ཚོམ་མེད་དོ། །དེ་བཞིན་
དུ་གུང་མོ་སྟོན་པ་ལ་མཛུབ་མོ་དང༌། སྲིན་ལག་སྟོན་པ་ལ་ལྕེ་དང༌། སྔར་བཤད་པའི་པ་ཏིས་སྟོན་པ་ལ་མདུང་རྩེ་གསུམ་དང༌། སྤྱི་བོ་སྟོན་པ་ལ་སྐྲ་མཚམས་ཀྱི་མཐའ་དང༌། ས་སྟོན་པ་ལ་ཁ་དང༌། ཁྲོ་གཉེར་སྟོན་པ་སྐྲ་མཚམས་དང༌། སོ་སྟོན་པ་ལ་མཆུ་དང༌། མགྲིན་པ་སྟོན་པ་ལ་ཁ་དང༌། དཔྲལ་བ་སྟོན་པ་ལ་མིག་བསྟན་པར་བྱ་སྟེ། སྤྱི་བོ་སྟོན་པ་ལ་སོགས་ལག་པའི་སོར་མོ་སྟོན་པར་བྱས་ན། འདི་རྣམས་ལག་པའི་ཆ་ཤས་སོར་མོའི་ཕྱག་རྒྱ་སྟོན་པར་བཤད་པ་དང་མཐུན་ནོ། །གསུམ་པ་ནི། དེ་ལྟར་རིམ་པ་བཞིན་བཤད་པའི་ཕྱག་རྒྱ་འདི་དག་ནི་རྣལ་འབྱོར་མ་ཀུན་གྱི་ཡན་ལག་གི་ཁྱད་པར་གྱི་ཕྱག་རྒྱ་ཡིན་ལ། ཕྱག་རྒྱ་འདི་དག་བསྟན་པ་ནི་རྟག་ཏུ་གསང་བ་པ་སྟེ་མཁའ་འགྲོ་མ་རྣམས་ཡང་དག་པ་སྟེ་ཕྱིན་ཅི་མ་ལོག་པར་ལྟ་བ་སྟེ་སྟོན་པར་འགྲོ་བ་སྟེ་རྟོགས་པར་འགྱུར་རོ། །བཞི་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྣམ་འབྱོར་མ་རྣམས་ཀྱི་ཕྱག་རྒྱའི་ཁྱད་པར་གྱི་མཚན་ཉིད་ཀྱི་ཆོ་གའི་ལེའུ་སྟེ་ཉི་ཤུ་རྩ་གཉིས་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་ཉི་ཤུ་རྩ་གཉིས་པའི་བཤད་པའོ།། ༈ །།བཞི་པ་ཤེས་པ་རྣམས་རང་ལ་རྗེས་སུ་ཆགས་པ་བརྟག་པ་ལ་ལྔ། བཤད་པར་དམ་བཅའ་བ། རྗེས་སུ་ཆགས་པ་ལ་མཆོད་པ། རྗེས་སུ་ཆགས་པའི་རྟགས་བསྟན་པ། མཚན་མ་བྲིས་པ་ལས་བཤད་པར་བྱ་བ། ལེའུ་ཡི་མཚན་བསྟན་པའོ། །དང་པོ་ནི། ཉེར་
གཉིས་པའི་རྗེས་དེ་ནས་མཁའ་འགྲོ་མ་ཡི་རྣམ་པར་རོལ་པའི་མཚན་ཉིད་སྒྲུབ་པ་པོ་གང་གིས་རིག་པའི་ཐབས་ཡང་དག་པར་བཤད་པར་བྱའོ་ཞེས་སྦྱར་རོ། །དགོས་པ་གང་གི་དོན་དུ་ཞེ་ན། མཁའ་འགྲོ་མའི་མཚན་ཉིད་ཁྱད་པར་བ་རིག་ནས་ཡུལ་ཐག་རིང་པོ་ནས་ཀྱང༌། དཔའ་བོ་དང་དཔའ་མོའི་སྲིང་མོ་རུ་དགོངས་པར་འགྱུར་བའི་ཕྱིར་དུའོ། །གཉིས་པ་ནི། སྒྲུབ་པ་པོ་གང་ལ་དམ་ཚིག་ཅན་མ་རྣམས་རྗེས་སུ་ཆགས་པར་གྱུར་པ་ནི། དཔའ་བོའི་སྟེ་རྣལ་འབྱོར་པས་ལོངས་སྤྱོད་པ་ལས་གཞི་དང་འདྲ་བ་ཡིན་ཏེ། ཡོན་ཏན་ཀུན་སྐྱེད་པའི་གཞིར་འགྱུར་བའི་ཕྱིར་རོ། །གང་ལ་དམ་ཚིག་ཅན་རྗེས་ཆགས། ཞེས་དང༌། ས་གཞི་བཞིན་ཞེས་པའི་འགྱུར་གོ་སླའོ། །ས་གཞི་ནི་ས་དང་འདྲ་བའི་རྣལ་འབྱོར་མའོ། །དེ་གཞིར་བྱས་པ་ནི་གང་ལ་བརྟེན་ནས་བྱང་ཆུབ་སྒྲུབ་པའི་གནས་རང་གི་རིག་མར་བྱས་པའོ། །རྣལ་འབྱོར་མའི་སྟེ་བདེ་མཆོག་གི་རྣལ་འབྱོར་པས་མཆོད་པ་ནི། སྟན་ལས་ལངས་ཏེ་དམ་དུ་འཁྱུད་པ་དང་ཙུམྦ་ན་བྱེད་པའོ། །སྡོམ་པ་ནི་བདེ་མཆོག་སྟེ་དེ་མཆོད་པའོ། །དེ་ཡང་བདེ་མཆོག་གི་སྐུ་ཕྱག་རྒྱ་ཆེན་པོའི་རྣལ་འབྱོར་གྱིས་བྱེད་པའོ། །གསུམ་པ་ནི། འོག་ནས་འཆད་པ་འདི་དག་ནི་རྣལ་འབྱོར་མ་རྣམས་ཀྱི་རྗེས་སུ་ཆགས་པའི་རྟགས་ཡིན་ནོ། །རྐང་པ་འདི་ལོ་ཆེན་དང་མལ་གྱི་འགྱུར་ལ་མེད་དོ། །གང་དག་ཅེ་ན། གོ་བཟློག་པའི་ལྟ་བ་ནི་མིག་གཡས་པས་བལྟ་བ་ལས་གོ་བཟློག་སྟེ་གཡོན་གྱིས་བལྟ་བའམ། མདུན་དུ་ལྟ་བ་སྤངས་ནས་ཕྱིར་བལྟ་བ་དང༌། བྱད་ཀྱི་བཞིན་ནི་རྣམ་པར་འགྱུར་བ་དང༌། ཅུང་ཟད་ངོ་ཚ་བས་སྨིན་མ་གཡོ་ཞིང་འཕྲིག་པ་དང༌།
ཕྱི་དང་ནང་གི་བདེ་བ་རྟག་ཏུ་གསལ་བ་དང༌། དུ་མར་བལྟ་བ་ལ་སོགས་པའི་སྤྱོད་ལམ་སྣ་ཚོགས་པ་མྱུར་དུ་སྟོན་པ་ཤེས་པར་བྱ་བ་སྟེ། དེ་བཞིན་དུ་མཁའ་འགྲོ་མ་ལས་འབྱུང་བའི་རྟགས་གཞན་ཡང་ཤེས་པར་བྱའོ། །བསྐོར་ཞིང་རྣམ་པར་འགྱུར་བ་སྟེ་བསྒྱུར་བའི་ཚུལ་གྱི་མཛོད་སྤུ་ན། རི་མོ་ཟླུམ་པོ་གསུམ་ཡོད་པ་སྟོན་པ་སྟེ། མཁའ་འགྲོ་མ་རྣམས་སུ་ངེས་པར་འགྲོ་བ་སྟེ་རྟོགས་པར་བྱེད་པ། དེའི་མཚན་མ་ཀུན་ཤེས་པར་བྱའོ། །རྣམ་འགྱུར་ཞེས་པའི་རྐང་པ་གཉིས་ཀྱི་ནང་བཤད་ནི། ལྭ་བ་པས། ཕུལ་དུ་བྱུང་བའི་བྱང་ཆུབ་ཀྱི་སེམས་ཀྱི་བདེ་བ་བསྒྲུབ་པའི་དོན་དུ། བསྐོར་བ་ནི་སྲོག་དང་རྩོལ་བའི་རླུང་ཕྱིར་འགྲོ་བ་སྡོམ་པའི་འཁྲུལ་འཁོར་གྱི་རྣམ་འགྱུར་གྱིས། བདེ་བ་ཆེན་པོ་འདྲེན་པའི་གཏུམ་མོ་ལྟེ་བར་འབར་བ་སོགས་སྲོག་སྟོང་པ་དྷཱུ་ཏཱིའི་དབུས་སུ་ཆུད་པའི་སྔགས་པས། རི་མོ་ཟླུམ་པོ་གསུམ་སྟེ་འཇིག་རྟེན་གསུམ་རོ་གཅིག་ཏུ་འདྲེ་བ་སྟེ། ས་དང་ཆུ་དང་རླུང་ཉིད་དང༌། །མེ་དང་ནམ་མཁའ་ཉིད་དང་ནི། །བདག་དང་གཞན་དུ་རྟོག་ཚོར་བ། །སྐད་ཅིག་དེ་ལ་ཀུན་མི་དམིགས། །དེ་ཡི་མོད་ལ་ལྡོག་འགྱུར་ཏེ། །བདག་གིས་བདེ་བ་ཉམས་སུ་མྱོང༌། ཞེས་གསུངས་སོ། །གློ་བུར་དུ་དགོས་པ་མེད་ཀྱང་ཅུང་ཟད་ཅིག་སོང་ནས་སླར་ཡང་རྣམ་པར་ལྡོག་པར་འགྱུར་བ་དང༌། སྔར་གྱི་གདོང་ནི་འཇིག་པར་འགྱུར། ཞེས་པ་ལྟར་ན་སྔར་གྱི་བཞིན་སླར་སྡུད་པའོ། །སྔར་བརྗོད་ཚིག་ནི་ཉམས་པར་བྱེད། ཅེས་པ་ལྟར་ན། སྔར་བརྗོད་པའི་ཚིག་དང་འགལ་བ་ཁས་བླངས་
ནས་སྔ་མ་ཉམས་པར་བྱེད་པའོ། །རྣམ་པ་དེ་ལྟར་དེ་ཡི་དེ། ཞེས་པ་ནི་འགྱུར་གཞན་དང་འགྲེལ་པ་ལ་མེད་ལ། མངོན་བརྗོད་ཁ་ཅིག་ལས། དེ་ཡི་གདོང་ནི་མཛེས་གྱུར་པ། །རྡོ་རྗེ་ལྟ་བུར་གསལ་བ་ཡིན། ཞེས་པ་ལྟར་ན་མཁའ་འགྲོ་མ་དེའི་གདོང་མཛེས་པ་ལ་རྡོ་རྗེ་ལྟ་བུའི་རི་མོ་གསལ་བར་སྣང་བའོ། །མཁའ་འགྲོ་མ་དེའི་སྒྲ་ནི་ཁུ་བྱུག་གི་སྐད་ལྟ་བུར་གསལ་བར་རྟག་ཏུ་འགྱུར་རོ། །མངོན་བརྗོད་རྣམས་ལས། གསལ་བ་དེ་ནི་རྟག་ཏུ་འགྱུར། ཞེས་འབྱུང་ངོ༌། །བཞི་པ་ནི། མཁའ་འགྲོ་མ་འདི་ཡི་མཚན་མ་རང་གི་ཁྱིམ་དུ་རྡོ་རྗེའི་གཟུགས་ལྟ་བུ་མེ་ལོང་དང་བཅས་པ་འདྲི་བ་ནི་དང་པོའོ། །རལ་གྲིའི་གཟུགས་འདྲ་བ་མེ་ལོང་དང་བཅས་པ་འདྲི་བ་ནི། མཚན་མ་འདྲི་བ་གཉིས་པར་ཡང་ནི་གྱུར་པའོ། །རྒྱལ་མཚན་དང་མདུང་གི་གཟུགས་འདྲ་བ་རྟག་ཏུ་འདྲི་བར་འགྱུར་ཞིང༌། མེ་ལོང་ཁ་སྦྱར་བ་འདྲ་བ་འདྲི་བར་ཤེས་པར་བྱའོ། །ཁྱིམ་དུ་རྡོ་རྗེ་ལ་སོགས་པའི་མཚན་མར་བྱས་པའི་གཟུགས་རྣམས་འདྲི་བ་ནི། མདོར་བསྡུས་ནས་རྣམ་པར་ཤེས་པར་བྱ་སྟེ། རི་མོ་འདྲི་བ་སོགས་ཀྱི་མཚན་ཉིད་སྔར་བཤད་པ་འདི་དག་དང་ལྡན་པ་ནི། མཁའ་འགྲོ་མ་མཆོག་ཡིན་པར་ཤེས་པར་བྱའོ། །ལྭ་བ་པའི་འགྲེལ་པར། མཚན་མར་བྱས་པའི་གཟུགས། ཞེས་པའི་རྐང་པ་གཉིས་བསྡུས་ནས། །མཚན་མའི་ཆ་བྱད་གསལ་ཤེས་བྱ། ཞེས་འབྱུང་བའི་མཚན་མའི་ཆ་བྱེད་ནི། རྡོ་རྗེ་དང་འཁོར་ལོ་དང་རིན་པོ་ཆེ་དང་། པདྨ་དང་རལ་གྲི་དང་སྣ་ཚོགས་རྡོ་རྗེ་དང་རྒྱལ་མཚན་དང་མདུང་ཐུང་ངོ༌། །གསལ་བར་ཤེས་པར་བྱ་བའི་དོན་ནི། རིགས་ཀྱི་དབྱེ་བས་རྡོ་རྗེ་དང་རྒྱལ་མཚན་དང༌།
རལ་གྲི་དང་མདུང་ཐུང་ནི་ནས་ཀྱི་འབྲུ་ཚད་ཙམ་དང༌། འཁོར་ལོ་དང་རིན་པོ་ཆེ་དང་པདྨ་དང་སྣ་ཚོགས་རྡོ་རྗེ་ནི། སྲན་མ་ཙ་ན་ཀའི་ཚད་ཙམ་སྟེ་མི་བསྐྱོད་པ་ལ་སོགས་པའི་རིམ་པ་བཞིན་དུ། རང་གི་རིགས་ཀྱི་མཚན་མ་ཁ་དོག་ལྔ་པོ་རེ་རེའི་ནང་དུ་དཀྱིལ་འཁོར་གྱི་འཁོར་ལོ་ཆུད་པ་ལ་སེམས་བརྟན་པས་ཕྲ་མོའི་རྣལ་འབྱོར་བསྒོམས་པ་ལས། ཕྱག་རྒྱ་ཆེན་པོའི་དངོས་གྲུབ་འགྲུབ་པར་གསུངས་སོ། །དེ་ལྟར་ན་རང་གི་ཁྱིམ་དུ་ཞེས་པས་ནི་རྡོ་རྗེའི་ཁྱིམ་བྷ་ག་བསྟན་ཏེ། དེས་མཚོན་ནས་རྡོ་རྗེའི་སྣ་རྩེ་ཡང་སྟོན་ཏེ། དེ་གཉིས་སུ་ཕྱག་མཚན་ཕྲ་མོའི་ནང་དུ་རང་གི་རིགས་ཀྱི་དཀྱིལ་འཁོར་སྒོམ་པ་བསྟན་ཏོ། །རྩ་རྒྱུད་དུ་གསལ་བའི་མཚན་མ་བཞི་ལ་ནས་ཀྱི་ཚད་ཙམ་དང༌། འཁོར་ལོ་སོགས་བཞི་ལ་སྲན་མའི་ཚད་ཙམ་ཞེས་གསུངས་པ་ནི་གང་བྱས་ཀྱང་འདྲའོ། །འདི་ལ་བསྐྱེད་རིམ་དུ་འགྲོ་བའི་ཆ་གཅིག་དང༌། རྣལ་འབྱོར་ཕོ་མོའི་དྷཱུ་ཏཱིའི་མར་སྣའི་ནང་དུ་ཕྱག་མཚན་བསྒོམས་པས་སྲོག་དབུ་མར་ཆུད་ནས་ལྷན་ཅིག་སྐྱེས་པའི་ཡེ་ཤེས་སྐྱེ་བའི་ཆ་གཉིས་ཡོད་པ་སོགས་གཞན་དུ་རྒྱས་པར་བཤད་ཟིན་པས་འདིར་མ་སྤྲོས་སོ། །འདི་དག་གིས་ནི་དྲིལ་བུ་བའི་ལུགས་ཀྱི་ས་བོན་དང་བཅས་པའི་སྣ་ཚོགས་རྡོ་རྗེའི་རིམ་པ་རྩ་རྒྱུད་ཀྱི་གང་གིས་བསྟན་པ་ཤེས་པར་བྱའོ། །ཡང་རྡོ་རྗེ་སོགས་བཞི་དང༌། མེ་ལོང་དང་མེ་ལོང་ཁ་སྦྱོར་གྱི་ངེས་དོན་བཤད་པ་ཡང་ལྭ་བ་པས། བྷ་གའི་དབུས་ཚུད་རྡོ་རྗེ་ཡི། །ཤིན་ཏུ་སྟོང་པ་སྒོམ་པ་ནི། །ཐམས་ཅད་ནམ་མཁའ་མཉམ་པའོ། །མ་རིག་ལ་སོགས་གླུ་བུར་བ། །
རྟོག་པའི་ཉེས་པ་རྟོག་ལས་བྱུང༌། །རང་བཞིན་རྣམ་དག་འོད་གསལ་བའི། །སེམས་ནི་མེ་ལོང་བཞིན་དུ་བལྟ། །ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་པ་ནམ་མཁའ་མཚུངས། །རལ་གྲི་ཉོན་མོངས་གཅོད་བྱེད་པ། །སེམས་ཅན་དོན་བྱེད་རྣོ་བའོ། །བསོད་ནམས་ཀྱིས་བཏེག་རྒྱལ་མཚན་བཞིན། །མདུང་ཐུང་ཉོན་མོངས་འབུགས་བྱེད་པ། །སེམས་ནི་རྩེ་གཅིག་པ་ཉིད་དོ། །དེ་ཉིད་མེ་ལྕེ་རྣོ་སྦྱོར་བས། །ཁ་སྦྱར་བདེ་བ་ཐོབ་པའོ། །ཞེས་གསུངས་སོ། །དེ་ལ་ཁྱིམ་གྱི་ནང་དུ་ཆུད་པའི་རྡོ་རྗེ་བྲིས་པ་ནི། ཕྱག་རྒྱའི་བྷ་གའི་ནང་དང་དེས་མཚོན་ནས་རྡོ་རྗེའི་རྩེར་རྡོ་རྗེ་ཆུད་པ་བསྒོམས་པ་ལ་བརྟེན་ནས་སྐྱེས་པའི་ཆོས་ཐམས་ཅད་ཀྱི་སྟོང་པ། ནམ་མཁའ་དང་མཉམ་པར་སྒོམ་པའོ། །ཆོས་རྣམས་གཟུགས་བརྙན་བཞིན་དུ་གསལ་ཞིང་དག་པའི་ནམ་མཁའ་ལྟ་བུ་ནི་རལ་གྲི་སྟེ་ཉོན་མོངས་པ་ཐམས་ཅད་གཅོད་ཅིང༌། སེམས་ཅན་གྱི་དོན་བྱེད་པ་ལ་རྣོ་བའོ། །རྒྱལ་མཚན་ནི་བསོད་ནམས་ཀྱིས་མཐོ་བར་བཏེག་པའོ། །མདུང་ཐུང་ནི་རྩེ་གཅིག་པའི་སེམས་ཀྱིས་ཉོན་མོངས་པ་འབུགས་པའོ། །ཕྱིན་ཅི་ལོག་གི་རྟོག་པ་ལས་བྱུང་བའི་མ་རིག་པ་ལ་སོགས་པའི་རྟོག་པའི་ཉེས་སྐྱོན་གླུ་བུར་བས་མ་གོས་པའི་རང་བཞིན་གྱིས་འོད་གསལ་བའི་སེམས་ནི་མེ་ལོང་གཡའ་དག་པ་བཞིན་དུ་བལྟའོ། །སེམས་དེ་ཉིད་གཏུམ་མོའི་མེ་ལྕེ་རྣོན་པོའི་རྣལ་འབྱོར་གྱིས། བདེ་བ་ཐོབ་པས་དེ་ཁོ་ན་ཉིད་གསལ་བར་བྱེད་པ་ནི། ཤིན་ཏུ་དྭངས་པའི་མེ་ལོང་གཉིས་ཁ་སྦྱར་བའོ། །ལྔ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་མཁའ་
འགྲོ་མའི་ཁྱད་པར་ཏེ་ཁྱད་པར་བའི་རྗེས་སུ་ཆགས་པ་དང༌། རྡོ་རྗེ་ལ་སོགས་པའི་མཚན་མའི་ཕྱག་རྒྱའི་མཚན་ཉིད་ཀྱི་ཆོ་གའི་ལེའུ་སྟེ་ཉི་ཤུ་རྩ་གསུམ་པའོ།། །།འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས། ལེའུ་ཉི་ཤུ་རྩ་གསུམ་པའི་བཤད་པའོ།། ༈ །།ལྔ་པ་མཁའ་འགྲོ་མ་རྣམས་སྤྱིར་ཤེས་པར་བྱེད་པའི་ཡི་གེ་དུ་མ་ཚོགས་པའི་ངག་གི་བརྡ་ལ་ལྔ༌། བཤད་པར་དམ་བཅའ་བ། ཡི་གེ་དུ་མ་ཚོགས་པའི་ངག་གི་བརྡ་དངོས། དེ་རྣམས་ཀྱི་དོན་བསྡུ་བ། རྒྱུད་འདིའི་ཐུན་མོང་མ་ཡིན་པའི་ཁྱད་ཆོས་བསྟན་པ། ལེའུ་ཡི་མཚན་བསྟན་པའོ། །དང་པོ་ནི། ཉེར་གསུམ་པའི་རྗེས་དེ་ནས་འཇིག་རྟེན་པ་དང་བསྟན་བཅོས་གཞན་ལ་གྲགས་པ་ལས་གཞན་དེ་བཞིན་གཤེགས་པའི་སྐད་གཞན་གྱི་བརྡ་རྣམས་ནི། སྒྲུབ་པ་པོ་ལ་ཕན་པའི་ཕྱིར་དུ་འདིར་བཤད་པར་བྱའོ། །དགོས་པ་ནི། བརྡ་བྱས་པ་གང་གིས་རྣལ་འབྱོར་མས་རྣལ་འབྱོར་པ་མིང་པོའམ། རྣལ་འབྱོར་པས་རྣལ་འབྱོར་མ་སྲིང་མོར་ཐེ་ཚོམ་མེད་པར་ཤེས་ནས། མིང་སྲིང་བཞིན་དུ་སེམས་ཉེ་བའི་ཕྱིར་དུའོ། །གཉིས་པ་ནི། ལག་པས་གོས་ཀྱི་མཐའ་ནས་བཟུང་སྟེ་བསྟན་ནས། པོ་ཧཾ་གི་ཞེས་བྱ་བ་ནི་གསོང་པོར་སྨྲ་བ་སྟེ་ཕྱག་མཚལ་ལོ་ཞེས་པའོ། །གོས་ཀྱི་མཐའ་རབ་ཏུ་བསྐྱོད་པར་སྟོན་ཞིང་པྲ་ཏི་པོ་ཏཾ་གི་ཞེས་སྨྲ་བ་ནི་གསོང་པོར་སྨྲ་བའི་ལན་ནོ། །དེ་བཞིན་དུ་ག་མུ་དང་ལུམྦ་དང་དེ་ཧཾ་ངཾ་དེ་ཧི་དང་ཙཌྷཱུ་ཀ་དང༌། པཱི་ར་ཎ་དང་ཀོོ་ར་བ་དང་ཀར་ནི་ཀ་དང་ཨཱ་ལི་དང༌། བ་རཱ་ཧ་དང་ཤྲ་བ་ཎ་དང་
ཨ་མྲི་ཏ་སྠ་ནི་དང་ས་མ་ག་མཱ་དང༌། ཏཱ་ལི་ཀཱ་དང་ནཱ་ར་ཀཾ་དང་ཨ་མུ་ཀཾ་དང་ཀ་ཁི་ལ་དང༌། ཤྭ་ས་ནཾ་དང་པ་རི་དྷི་དང་པི་ར་ཏི་དང་ཀྲུ་ཏ་དང༌། ཨན་ཏྱ་སྠ་དང་པ་ཤུ་ལི་ཀ་དང་བྷ་གི་ནི་དང་མེ་ད་ཀ་དང༌། གྲི་ཧཱ་ཎེ་དང་ལྕེ་སོ་ལ་རེག་པ་དང་གན་དྷ་བཱ་སི་ནཱི་དང་ཀུ་ཏ་དང༌། ཀི་ར་ཎ་དང་ཏུ་ལཾ་པ་དང་ད་རོ་དང་ནི་རོ་དྷ་དང༌། ཧྲི་པ་ཏི་དང་དྷུ་ར་ཡུ་དང་དྷུ་པ་སྤྲི་ཡ་དང་སཱ་ནུ་དང༌། ས་རི་ཏ་དང་ཨང་གུ་ལི་དང་བ་ད་ན་དང་རཱ་ཛི་ཀཱ་དང༌། ཨཱ་ད་ནཱ་དང་པག་ཏི་དང་ཚན་དོ་དང་ཙ་ལ་དང༌། པྲ་བྷ་ཧ་དང་པ་ཤུ་དང་ཡཱན་ཏི་དང་ས་སཾ་དང༌། ཕལ་གུ་ཥ་མ་དང་མཧཱ་ཀྵ་རཾ་དང་ག་དང་ནཱ་དང༌། གོ་དང་མ་དང་བྷཱ་དང་ཧཱ་དང་ཨ་སྦ་ཀ་དང༌། བྲང་ལ་རེག་པ་དང་ཁ་ལ་རེག་པ་དང་སོ་ལ་རེག་པ་དང་དྷྲི་ཞེས་པ་རྣམས་ནི་རིམ་པ་བཞིན་དུ། འགྲོ་བ་དང་འོང་བ་དང་གྲོང་ཁྱེར་དང་ཟུང་ཅིག་དང༌། སྙིང་དང་འཆི་བ་དང་དྲིལ་བུ་དང་མགོ་བོ་དང༌། སྐྲ་དང་རྣ་བ་དང༌། སྲུབ་བྱེད་དང་མི་དང༌། མཁའ་འགྲོ་མ་དང་དཀྱིལ་འཁོར་དང་དུར་ཁྲོད་དང་སྒོ་དང༌། བྲམ་ཟེའི་རིགས་དང་རྒྱལ་རིགས་དང་རྗེའུ་རིགས་དང་དམངས་རིགས་དང༌། སྨེ་ཤ་ཅན་དང་ཁྱིམ་དང་མཁའ་འགྲོ་མ་དང་ཆུ་དང༌། ཕྱག་རྒྱས་འདེབས་པ་དང་བདག་ཅག་ལྟོགས་སོ་ཞེས་པ་དང་སྲང་པ་དང་གནས་ཆེ་གེ་མོ་ནས་འོངས་སོ་ཞེས་པ་དང༌། མེ་ཏོག་དང་རྒོད་པ་དང་སོ་དང་ཆར་འབབ་པ་དང༌། ཞུ་བ་དང་ཕྱི་རོལ་དང་སྤྲིན་དང་རི་བོ་དང༌། འབབ་ཆུ་དང་ཡན་ལག་དང་གདོང་དང་ལྕེ་དང༌། སོ་དང་རྒྱལ་མཚན་དང་ཕྲེང་བ་དང་རླུང་དང༌། གྲུ་དང་རི་དྭགས་དང་དཀྱིལ་འཁོར་དང་བཞི་མདོ་དང༌། སྐྱེ་བོ་དང་ཕྱུགས་ཆེན་པོ་དང་ར་སྐྱེས་དང་མི་དང༌། ཁྱུ་མཆོག་དང་མ་ཧེ་དང་ཟ་བ་
དང་རྒྱལ་པོའི་སྐྱེས་བུ་དང༌། ནགས་ན་གནས་པ་དང་ཟོས་སོ་ཞེས་པ་དང་ངོམས་སོ་ཞེས་པ་དང་ངོ་ཚ་བའོ། །ཧཱ་རྣམ་གྲངས་སོ་ཞེས་པ་ནི་ཟ་བའི་མིང་གི་རྣམ་གྲངས་སོ། །ཧོ་ཞེས་པ་ནི་རྣམ་གྲངས་ཏེ་ཁ་ཅིག་ཏུའོ་ཞེས་པ་ནི། ཧོ་ཞེས་པ་ནི་ངོམས་པའི་མིང་གི་རྣམ་གྲངས་ཏེ། དེ་ཡང་སྐབས་ཁ་ཅིག་ཏུའོ་ཞེས་པའོ། །མར་དོ་རྐྱང་པའི་འགྱུར་ལ་དྷྲི་ཞེས་འབྱུང་ཡང་གཉིས་འདུས་ཀྱི་འགྱུར་ལ་ཧྲི་ཞེས་པ་ནི་རྩ་རྒྱུད་ཀྱི་འགྱུར་གཞན་དང་མངོན་བརྗོད་དང་མཐུན་ལ། རྡོ་རྗེ་མཁའ་འགྲོ་དང་མཁའ་འགྲོ་རྒྱ་མཚོ་ལས། ཧྲི་ཀ་ནི་ངོ་ཚ་བ་ལ་བཤད་དོ། །མར་དོ་རྐྱང་པའི་འགྱུར་ལ། སྟོང་པ་ལ་རེག་པ་ནི་མེད་དོ་ཞེས་པའོ། །མེ་ཐུ་ན་གྱིས་ཤིག་པ་ནི་བརླ་ལ་རེག་པའོ། །སྟེང་ཉིད་ནི་དེ་བཞིན་ནོ་ཞེས་བྱ་བའོ། །འོག་ནི་མེད་པའོ། །ཞེས་འབྱུང་ལ། གཉིས་འདུས་ཀྱི་འགྱུར་ལས། ཚིག་དང་པོ་འདྲ་ལ། བརླ་ལ་རེག་པ་ནི་མེ་ཐུ་ན་གྱིས་ཤིག་པའོ། །སྟོང་ཉིད་ནི་དེ་བཞིན་ནོ་ཞེས་པའོ། །ཨེ་བ་ཞེས་བྱ་བ་ནི་འོག་ན་མེད་པའོ། །ཞེས་འབྱུང་ཞིང༌། མངོན་བརྗོད་ལས་དེ་དག་དང་མི་འདྲ་བར་ཡོད་ཀྱང༌། རྡོ་རྗེ་མཁའ་འགྲོ་ལས། སྟོང་པ་ལ་རེག་པ་ནི་མེ་ཐུ་ན་གྱིས་ཤིག་པའོ། །བརླ་ལ་རེག་པ་ནི་ད་ལྟ་གྱིས་ཤིག་པའོ། །ཞེས་གསུངས་ལ། མཁའ་འགྲོ་རྒྱ་མཚོ་ལས་ཀྱང༌། སྟོང་པ་ལ་རེག་པ། འཁྲིག་པ་བརླ་ལ་རེག་པ་ནི། དེ་ལྟར་ད་ལྟ་གྱིས་ཞེས་པར། ཞེས་གསུངས་ལ། ཧེ་རུ་ཀ་མངོན་འབྱུང་ལས། གསང་བ་ལ་རེག་ན་འཁྲིག་པའོ། །ཞེས་གསུངས་པས། འདོམས་ཀྱི་བར་སྟོང་པ་ལ་རེག་ན་འཁྲིག་
པ་གྱིས་ཤིག་པ་སྟེ། སྟོང་པ་ལ་རེག་པ་དང་མེ་ཐུ་ན་གཉིས་སྦྱར་རོ། ། བརླ་ལ་རེག་ན་ད་ལྟ་དེ་བཞིན་དུ་གྱིས་ཞེས་པ་སྟེ། དེ་བཞིན་ཞེས་པ་བརླ་ལ་རེག་པ་ལ་སྦྱར་རོ། །སྟེང་དང་འོག་ཅེས་པ་ནི་ཧེ་རུ་ཀ་མངོན་འབྱུང་ལས། འོག་ན་ལྟ་ན་འོག་ན་མེད་ཅེས་པའོ། །སྟེང་དུ་ལྟ་ན་ཡོད་ཅེས་པའོ། །ཞེས་གསུངས་པ་ལྟར་བྱའོ། །ལེའུ་འདིའི་བརྡ་དང་བརྡའི་ལན་རྣམས་ཀྱང་ལེའུ་བཅོ་ལྔ་པ་ལ་བཤད་པ་དང་འདྲའོ། །གསུམ་པ་ནི། ཕྱག་རྒྱ་སྟེ་བརྡ་དང་ཕྱག་རྒྱའི་ལན་ཏེ་བརྡའི་ལན། སྣོད་མིན་ལ་གསང་བའི་བརྡ་ཉིད་དོ། །དཔའ་བོ་ཧེ་རུ་ཀས་གསུངས་པ་སྡེ་སྟེ་རིགས་བཞིའི་མཚན་ཉིད་ཤེས་པར་བྱེད་པའོ། །བྷ་བ་བྷ་དྲས་སྙིང་པོའི་རྣལ་འབྱོར་མ་བཞི་དང༌། དེ་ཐམས་ཅད་ཀྱི་བརྡའི་ཚིག་ཏུ་བཞེད་དེ། རྣལ་འབྱོར་མ་བཞིའི་རིགས་ཀྱི་བརྡ་ཐམས་ཅད་ལེའུ་འདིས་བསྟན་ཞེས་པའོ། །བཞི་པ་ནི། འདིར་རྣལ་འབྱོར་མའི་རྒྱུད་རྣམས་ཤེས་རབ་ཀྱི་ཕྱོགས་བདེ་སྟོང་དབྱེར་མེད་གཙོ་བོར་སྟོན་ལ། སྟོང་པ་དེ་ཁོ་ན་ཉིད་ཀྱི་ལྟ་བ་ནི་མགོན་པོ་ཀླུ་སྒྲུབ་ཀྱིས་རྒྱས་པར་གཏན་ལ་ཕབ་པ་ལས་ལྷག་པ་ཅིག་བཤད་རྒྱུ་མེད་པ་ལ་དགོངས་ནས་རྒྱུད་རྣམས་སུ་མདོར་བསྡུས་ཏེ་གསུངས་སོ། །དེས་ན་བདེ་བ་ཆེན་པོ་རྩལ་དུ་བཏོན་ནས་འཆད་དགོས་པ་ལ་བདེ་ཆེན་འདྲེན་པའི་ཐབས་སུ་ནང་གི་རྡོ་རྗེ་ལུས་ཀྱི་གནད་ཆེ་སར་དམིགས་པ་གཏད་དེ་སྒོམ་པ་དང༌། ཤེས་རབ་མའི་གཟུགས་ཀྱི་རྣམ་པ་ཅན་ལ་བརྟེན་ནས་བདེ་ཆེན་འདྲེན་པ་གཉིས་ལས། སྔ་མ་ནི་བླ་མེད་ཀྱི་རྒྱུད་སྡེ་ཁྱད་པར་ཅན་རྣམས་ལས་མི་འདྲ་བ་མང་དུ་གསུངས་སོ། །ཕྱི་མ་ལ་ལས་རྒྱ་དང་
བསྒོམས་པའི་ཡེ་ཤེས་ཀྱི་ཕྱག་རྒྱ་དང༌། སྟོང་གཟུགས་ཕྱག་རྒྱ་ཆེན་མོ་ལ་བརྟེན་ནས་འདྲེན་པ་གསུམ་ལས། དང་པོ་གཉིས་ནི་རྒྱུད་དུ་མ་ཞིག་ལས་འབྱུང་ལ། གསུམ་པ་ནི། སེམས་འགྲེལ་སྐོར་གསུམ་ལས་གསལ་བར་གསུངས་ཏེ། དེ་འདྲ་བ་དེ་རྒྱུད་འདིའི་དོན་ལ་ཡང་ཡོད་པ་ནི་བདེ་མཆོག་སྟོད་འགྲེལ་ལས་བཤད་དོ། །ལས་རྒྱའི་མཐར་ཐུག་ཡུལ་ཉེར་བཞི་སོགས་ཀྱི་ཕོ་ཉ་མོ་ཁྱད་པར་ཅན་དང་མྱུར་དུ་མཇལ་ཞིང་། དེ་ལ་བརྟེན་ནས་ལམ་གྱི་བགྲོད་པ་ཆེས་མྱུར་བ་ནི། ཕྱི་ནང་གི་དཀྱིལ་འཁོར་ལ་གནས་དེ་རྣམས་ཀྱི་དཔའ་བོ་དང་དཔའ་མོ་སྒོམ་ཚུལ་སོགས་དང༌། གཡོན་པའི་ཀུན་སྤྱོད་བསྟེན་ཚུལ་རྣམས་རྒྱུད་འདིའི་སྐོར་ནས་འབྱུང་བ་འདྲ་བ་གཞན་ནས་མི་འབྱུང་བས། བདེ་མཆོག་གི་ཁྱད་ཆོས་ཆེན་པོར་ཤེས་པར་བྱའོ། །དེས་ན་ཕོ་ཉ་མོ་ཁྱད་པར་ཅན་དང་འདུ་བའི་སྐོར་ལ་ལེའུ་མང་དུ་གསུངས་ཤིང༌། མགོ་མཇུག་ཀུན་ཏུ་ཕོ་ཉའི་དྲིན་གྱིས་ལམ་བགྲོད་ལུགས་ཡང་དང་ཡང་དུ་གསུངས་སོ། །དེའི་ཕྱིར་རྒྱུད་འདིར་ཚིག་ཟིན་ལ་ཀྱེ་རྡོར་བཞིན་དུ་བདེ་བའི་ཚིག་མི་མང་ཡང༌། སྔར་བཤད་པ་རྣམས་བདེ་བ་ཆེན་པོ་ཉིད་ལ་བསྐོར་ནས་འོང་བས། བདེ་ཆེན་རྩལ་དུ་བཏོན་ནས་མི་འཆད་པ་མིན་ནོ། །དེས་ན་རྒྱུད་གཞན་དང་མི་འདྲ་བའི་ཁྱད་ཆོས་གཙོ་བོར་གྱུར་པ་རྣམས་ངེས་པར་གྱིས་ཤིག །ཡང་རྒྱུད་འདིའི་དོན་ཆོས་ཉིད་སྟོང་པ་ཉིད་ཀྱི་ཕྱག་རྒྱ་ཆེན་མོ་ལ་དམིགས་པས། ལྷན་སྐྱེས་ཀྱི་བདེ་ཆེན་འདྲེན་པ་ངེས་དོན་གྱི་མཐར་ཐུག་དྲིལ་བུ་པས་རིམ་ལྔར་གསུངས་པ་ནི། དེའི་རྣམ་
བཤད་དུ་བཤད་ཟིན་པ་ལས་ཤེས་པར་བྱའོ། །ལྔ་པ་ནི། དཔལ་ཧེ་རུ་ཀ་མངོན་པར་བརྗོད་པའི་རྒྱུད་ལས། སྡེ་སྟེ་རིགས་བཞི་ཐམས་ཅད་ཀྱི་མཚན་ཉིད་དེ་མཚོན་པར་བྱེད་པའི་བརྡའི་ཚིག་གི་བརྡར་བཏགས་པའི་ཆོ་གའི་ལེའུ་སྟེ་ཉི་ཤུ་རྩ་བཞི་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས། ལེའུ་ཉི་ཤུ་རྩ་བཞི་པའི་བཤད་པའོ།། ༈ །། བཞི་པ་རྩ་སྔགས་བསྟན་ཞིང་བསྲུང་བའི་དམ་ཚིག་རྒྱས་པར་བཤད་པ་ལ་གཉིས། རྩ་སྔགས་གསལ་བར་བཤད་པ་དང༌། དམ་ཚིག་བརྒྱད་བསྟན་པའོ། །དང་པོ་ལ་གསུམ། རྩ་སྔགས་གསལ་བར་མ་བྱས་པའི་ཚུལ། ལེའུ་འདིར་རྩ་སྔགས་གསལ་བར་མཛད་ཚུལ། ལེའུ་ཡི་མཚན་བསྟན་པའོ། །དང་པོ་ནི། ཉེར་བཞི་པའི་རྗེས་དེ་ནས་སེམས་ཅན་ཀུན་གྱི་དོན་རྣམས་སྒྲུབ་པར་བྱེད་པ་མངོན་པར་འདོད་པར་བྱ་བ་ནི་བདེ་མཆོག་གོ། དེའི་རྣལ་འབྱོར་དང་ལྡན་པའི་རྣལ་འབྱོར་པ་ལ་རྩ་བའི་སྔགས་གསལ་བར་བྱའོ་ཞེས་སྦྱར་རོ། ། སྔགས་ཇི་ལྟ་བུ་ཞེ་ན། སྣོད་མིན་ལ་སྦ་བར་བྱ་བའོ། །བརྒྱད་མཐའ་ནི་ཡ་ནས་བགྲངས་པའི་བརྒྱད་པ་ཧའོ། །ཧ་དེར་སྦྱར་བ་ནི་ཨུ་ཐིག་ལེ་དང་བཅས་པར་བྱ་ཞེས་པ་ཧུཾ་སྟེ་ལྭ་བ་པའི་བཞེད་པའོ། །དེ་ལ་རྩ་སྔགས་ཀྱི་མགོར་ཨོཾ་དང་མཐར་ཧུཾ་ཧུཾ་ཕཊ་སྦྱོར་བ་ནི་སྔར་ལེའུ་བདུན་པར་བཤད་ཟིན་པས། འདིར་ཧུཾ་བསྟན་པ་ནི་རྐང་པ་བརྒྱད་དང་ཉེར་བཞི་པོ་རེ་རེའི་མཐར་ཧུཾ་ཧུཾ་ཕཊ་སྦྱོར་བ་སྟེ་མགོ་བོའི་ཨོཾ་ཡང་ཤེས་པར་བྱའོ། །སྦས་པ་དེ་དགོས་པ་གང་གི་ཕྱིར་ཡིན་ཞེ་ན།
ཉན་ཐོས་ལ་སོགས་པ་ཐེག་པ་ཆེན་པོ་གསང་སྔགས་ལ་མོས་པ་དམན་པ་དག་དང༌། མུ་སྟེགས་རྨོངས་པ་དོན་ཟབ་མོ་མི་ཤེས་པའི་སེམས་དང་ལྡན་པ་རྣམས་ཀྱིས་སྨོད་པ་བསྲུང་བའི་དོན་དུ་སྦས་སོ། །གཉིས་པ་ལ་གཉིས། དྲང་བའི་དོན་དུ་བཤད་པ་དང༌། ངེས་པའི་དོན་དུ་བཤད་པའོ། །དང་པོ་ནི། དེ་ལ་དཔའ་བོ་དང་རྣལ་འབྱོར་མ་རྣམས་ཀྱིས་གསལ་བར་གསུངས་པའི་གསང་སྔགས་ནི་འདི་ཡིན་ཏེ་ཞེས་པའི་འགྱུར་ལྟར་ན། དཔའ་བོ་དང་རྣལ་འབྱོར་མ་རྣམས་ཀྱི་ངོ་བོར་གྱུར་པའི་བཅོམ་ལྡན་འདས་ཀྱིས་གསུངས་ཞེས་པའོ། །ལོ་ཆེན་གྱི་འགྱུར་ལས། དཔའ་བོ་དང་རྣལ་འབྱོར་མ་རྣམས་ཀྱིས་མི་གསལ་བར་གསུངས་པའི་ཞེས་འབྱུང་ལ། དཀའ་རྒྱས་ཀྱི་འགྲེལ་བར་ཡང༌། དཔའ་བོ་དང་རྣལ་འབྱོར་མ་རྣམས་ཀྱི་སྔགས་ཀྱི་མཐའ་རྣམས་མ་གསུངས་ཞེས་འཆད་དོ། །ཨོཾ་ནི་ཨ་དང་ཨུ་དང་མ་གསུམ་གཅིག་ཏུ་བསྡུས་པ་སྟེ་རྡོ་རྗེ་གསུམ་གཅིག་ཏུ་བསྡུས་པ་བསོད་ནམས་ལེན་པའོ། །ན་མོ་ནི་ཕྱག་འཚལ་བའོ། །བྷ་ག་ཝ་ཏེ་བཅོམ་ལྡན་འདས་དང་ལྦཱི་རེ་ཤཱ་ཡ་དཔའ་བོའི་དབང་ཕྱུག་གོ། མ་ཧྭ་ཀལྤ་བསྐལ་པ་ཆེན་པོ། པ་ལ་ཞུགས་པའི་ཨ་དང་སྦྱར་བའི་ཨགྣི་མེ། སཾ་ནི་བྷ་ཡ་དེ་དང་མཚུངས་པའོ། །ཛ་ཊཱ་རལ་པ་མུ་ཀུ་ཊ་ཅོད་པན། ཊའི་ན་རོར་འགྲོ་རྒྱུའི་ཨུ། ཏ་ཀ་ཊཱ་ཡ་དང་སྦྱར་བ་ནི་སྟེང་དུ་བཅིངས་པའམ་བརྫེས་པའམ་མི་བཟད་པ་ཅན་ནོ། དཾཥྚྲ་མཆེ་བ་ཀ་རཱ་ལ་གཙིགས་པ། ཨུ་གྲ་དྲག་པོའི་དྲག་ཤུལ་ཅན་བྷཱི་ཥ་ན་འཇིགས་པ་མུ་ཁཱ་ཡ་ཞལ་ལོ། །ས་ཧ་སྲ་སྟོང་ཕྲག་བྷུ་ཛ་ཕྱག་བྷཱ་སུ་རཱ་ཡ་འབར་བའི་
འོད་ཅན་ནོ། །པར་ཤུ་དགྲ་སྟ་པཱ་ཤ་ཞགས་པ་ཨུ་ཏྱ་ཏ་གདེངས་པའམ་འཕྱར་བ། ཤཱུ་ལ་མདུང་ཁ་ཊྭཱཾ་ག་དྷ་རི་ཎི་ཁ་ཊྭཱཾ་ག་འཛིན་པའོ། །བྱཱ་གྷྲ་སྟག་ཨ་ཛི་ན་པགས་པ་ཨཾ་བ་ར་གོས་དྷ་རཱ་ཡ་འཛིན་པའོ། །མཧཱ་ཆེན་པོ་དྷཱུ་མྦྲ་དུ་བ་ཨནྦྷ་ཀཱ་ར་ནི་ཁ་ཅིག་མཐར་བྱེད་པ་ལ་འཆད། ཁ་ཅིག་མུན་པའི་རྣམ་པ་ལ་འཆད་དོ། །ཝ་བུ་ཥཱ་ཡ་ནི་སྐུ་ལའོ། །ཀ་ར་གཉིས་ནི་གྱིས་གཉིས་དང༌། ཀུ་རུ་གཉིས་ནི་མཛོད་གཉིས་དང༌། བྷནྔྷ་གཉིས་ནི་ཆིངས་གཉིས་དང༌། ཏྲཱ་ས་ཡ་གཉིས་ནི་སྐྲག་པར་གྱིས་གཉིས་དང༌། ཀྵོ་བྷ་ཡ་གཉིས་ནི་བསྐྱོད་པར་གྱིས་གཉིས་དང༌། ད་ཧ་གཉིས་བསྲེགས་གཉིས་དང༌། པ་ཙ་གཉིས་ཆོས་གཉིས་དང༌། བྷ་ཀྵ་གཉིས་ཟོ་གཉིས་དང༌། བ་ས་ཞག །རུ་དྷི་ར་ཁྲག །ཨནྟྲ་རྒྱུ་མ་མཱ་ལཱ་བ་ཕྲེང་བ་ལམྺི་ནེ་འཕྱང་བ། གྲིཧྣ་གཉིས་ཟུང་གཉིས་དང༌། སཔྟ་བདུན་པཱ་ཏཱ་ལ་ས་འོག་ག་ཏ་གནས་བྷུ་ཛཾ་གཱཾ་ལག་འགྲོ། སརྦཾ་བཱ་སྦྲུལ་རྣམས་སོ། །ཏ་རྫ་ཡ་གཉིས་བསྡིགས་གཉིས། ཨཱ་ཀཌྜྷ་གཉིས་ན་ཁུག་གཉིས་སོ། །རྩ་སྔགས་ལ་མངོན་བརྗོད་ལས་འདིར་བཤད་པ་ལྟར་རྐང་བརྒྱད་མགོ་ལ་བཏགས་པ་གཅིག་དང༌། མ་བཏགས་པ་ཀ་ར་སོགས་མན་ཆད་ལ་བྱས་པ་གཅིག་སྟེ་གཉིས་དང༌། རྡོ་རྗེ་མཁའ་འགྲོ་དང་ཧེ་རུ་ཀ་མངོན་འབྱུང་ལས། རྐང་བརྒྱད་མགོ་ལ་མ་བཏགས་པར་ཀ་ར་སོགས་མན་ཆད་ལ་བྱས་པ་སྟེ་མི་འདྲ་བ་འགའ་ཞིག་ཡོད་དོ། །གཉིས་པ་ལ་གཉིས། སྔགས་བརྒྱད་ཆན་དང་པོའི་ངེས་དོན་དང༌། བརྒྱད་ཚན་ཕྱི་མ་གཉིས་ཀྱི་ངེས་དོན་ནོ། །དང་པོ་ནི། ཀ་ར་ཀ་ར་མན་ཆད་ཀྱི་རྩ་སྔགས་ལ་ངེས་དོན་གྱིས་བཤད་པ་བཤད་རྒྱུད་ལས་གསུངས་པ་ནི། སྔར་ལེའུ་དགུ་པར་རྩ་སྔགས་ཀྱི་དེ་ཉིད་མི་ཤེས་
པར་དངོས་གྲུབ་འདོད་པ། འབྲས་འདོད་པས་ཕུབ་མ་བརྡུང་བ་དང་འདྲ་ཞིང༌། སྔགས་ཀྱི་དེ་ཉིད་མི་ཤེས་པར་རྣལ་འབྱོར་པར་འདོད་པ་ངལ་བ་དོན་མེད་པར་གསུངས་པའི་སྔགས་ཀྱི་དེ་ཉིད་ཤེས་པ་ཡིན་པས་གལ་ཆེའོ། དེ་ཡང་རྡོ་རྗེ་མཁའ་འགྲོ་ལས། སྔོན་བསགས་ལས་ནི་མཐར་བྱེད་པ། །མེ་དང་བཅས་ཏེ་ལན་གཉིས་བཟླས། །ཀུ་རུ་ཀུ་རུ་སེམས་པ་བྲལ། ཞེས་གསུངས་སོ། །དེ་ལ་དྲང་དོན་གྱི་སྔོན་བསགས་ནི་གསལ་བྱེད་ཀྱི་སྡེ་པའི་སྔོན་མ་ཀ་དང༌། དེའི་མཐར་མེ་སྟེ་ར་དང་བཅས་པའི་ཀ་ར་གཉིས་སོ། །ངེས་དོན་ནི་སྔོན་མ་ནི་སྔོན་བསགས་པའི་མཚམས་མེད་ལྔ་ལ་སོགས་པའི་ལས་ཀྱི་སྒྲིབ་པའོ། །དེ་ཉིད་མེ་དང་བཅས་པ་ནི་མེ་ལྟར་རྣམ་སྨིན་རྩུབ་པའོ། །ཀ་ར་གཉིས་ཚོགས་ནི་བྱེད་པ་སྟེ་སྒྲིབ་པ་དེ་ཟད་པའི་མཐར་བྱེད་པའོ། ། ལན་གཉིས་ནི་མཚོན་པ་སྟེ་སྒྲིབ་པ་ཟད་པར་བྱེད་པ་དེ་ཡང་དང་ཡང་དུ་བྱས་པའི་དོན་ནོ། །ཡང་ན་ཀ་དང་ར་གཉིས་མ་ཚོགས་པར་ཕྲལ་བ་ནི་ཟད་པར་བྱ་རྒྱུ་སྟོན་པ་ལ་སྦྱར་རོ། །འོ་ན་ལས་སྒྲིབ་ཟད་པར་བྱེད་པ་དེ་ཇི་ལྟར་བྱ་སྙམ་པ་ལ་ལས་ངན་པ་ཐམས་ཅད་ཀྱི་རྩ་བ་གཟུང་འཛིན་བདེན་པར་ཞེན་པའི་སེམས་པ་སྟེ་ཆགས་པའི་བློ་དང་བྲལ་བར་བྱོས་ཤིག་ཅེས་པ་ནི་ཀུ་རུའི་དོན་ཡིན་ལ། ལན་གཉིས་སྨོས་པ་ནི་སྔར་བཞིན་ནོ། །ཡང་རལ་པ་གྱ་གྱུ་བྷནྡྷཱ་གསལ། །དེ་ནི་སླར་ཡང་བཟླས་པར་བྱ། །འཇིག་རྟེན་གཟུགས་དང་བྲལ་བ་ཡི། །ཏྲཱ་ས་ཡ་ཞེས་བྱ་བ་བརྫུན། །དམ་པ་དེ་ནི་ལན་གཉིས་བཟླ། །ཀ་ཥ་ཤེས་བྱ་ཨོ་སྒྲར་ལྡན། །གློ་ན་བྷ་ཡ་ཡང་དག་གནས། །དེ་ཡང་སླར་ནི་བཟླས་པར་བྱ། །
ཞེས་གསུངས་སོ། །རལ་པ་གསལ་བ་བཅིངས་པ་ཞེས་བོས་ནས། སྡང་བ་རྣམས་ཆིངས་ཤིག་ཅེས་པའི་ངེས་དོན་ནི། རལ་པ་ནི་དེ་བཞིན་གཤེགས་པའི་རིགས་ཀྱི་ཚོགས་སོ། །གྱ་གྱུ་ནི་དོན་དམ་པར་རང་བཞིན་ཅི་ཡང་མེད་བཞིན་དུ་ཀུན་རྫོབ་ཏུ་བདེན་པར་ཡོད་པར་སྣང་བའོ། །དེ་དག་བཅིངས་པ་ནི་བདག་མེད་པའི་འཁོར་ལོས་དོན་དམ་པར་གཅིག་ཏུ་བྱ་བ་སྟེ་དབྱེར་མེད་པར་རོ་གཅིག་ཏུ་བྱ་བ་ཡིན་ལ། ལན་གཉིས་སུ་བཟླས་པ་ནི་སྔར་བཞིན་ནོ། །གལ་ཏེ་དེ་བཞིན་གཤེགས་པ་རྣམས་ཞལ་ཕྱག་ལ་སོགས་པའི་མཚན་མ་དང་བཅས་པའི་ཚུལ་གྱིས་སྒོམ་པས་ནི་འཁོར་བ་ཉིད་དུ་འགྱུར་རོ་ཞེ་ན། འཇིག་རྟེན་ཀུན་གཟུགས་ཏེ་ངོ་བོ་ཉིད་དང་བྲལ་བར་བསྟན་པས། དངོས་པོར་མངོན་པར་ཞེན་པ་རྣམས་ཡིད་གདུང་བའི་སྐྲག་པར་གྱིས་ཞེས་པ་ནི། ཏྲཱ་ས་ཡའི་དོན་དང་ལན་གཉིས་སྨོས་པ་ནི་སྔར་བཞིན་ནོ། །དེས་ན་ལྷ་ཞལ་ཕྱག་ལ་སོགས་པའི་རྣམ་པ་ཅན་དུ་བསྒོམས་ཀྱང་འཁོར་བ་ལས་མི་གྲོལ་བ་མིན་ནོ། །བརྫུན་གྱི་སྐད་དོང་ཨ་ལི་ཀ་དོན་གཉིས་ལ་འགྲོ་བའི་བརྫུན་ལ་བྱས་ན། དེ་ཁོ་ན་ཉིད་ལ་དཔྱོད་པའི་ཚད་མས་དཔྱོད་ན་ངོ་བོ་ཉིད་མེད་ཀྱང་འཇིག་རྟེན་སྐྲག་པ་སྤང་བའི་ཕྱིར། ཀུན་རྫོབ་ཏུ་ཇི་ལྟར་སྣང་བ་བཞིན་གྱི་བརྫུན་པ་སྒྱུ་མ་ལྟ་བུར་ཡོད་དོ་ཞེས་བསྟན་པར་བྱའོ། །ཡང་ན་ཨ་ལི་ཀ་ཕྱུགས་ལ་བྱ་སྟེ་ཕྱུགས་དང་འདྲ་བའི་བླུན་པོ་རྣམས་སྐྲག་པར་གྱིས་ཤིག་པའོ། །ཀ་དང་ཥ་བརྩེགས་པ་ནི་ཀྵའོ། །དེ་ཨོ་དང་ལྡན་པས་ཀྵོའོ། །ཀ་ཤ་གཉིས་ནི་བདར་ཏེ་བདར་རྡོ་ལྟ་བུའི་ཀུན་རྫོབ་ཀྱི་བདེན་པའོ། །དེ་ཇི་ལྟ་བུ་ཞིག་ཅེ་ན། དོན་དམ་པའི་
བདེན་པར་བདར་བ་སྟེ་རྣམ་པར་དཔྱད་པར་བྱའོ། །ཇི་ལྟར་ཨོ་ཞེས་བྱ་བ་ཨ་དང་ཨུའི་ཆ་གཉིས་པ་ཡིན་པ་བཞིན་དུ། ཤེས་རབ་དང་ཐབས་ཀྱི་ཆ་གཉིས་ཡིན་ལ། སྒྲ་ནི་ཐབས་ཤེས་དེ་ཉིད་ཉམས་སུ་མྱོང་བ་སྟེ་དེ་དང་ལྡན་པའོ། །ཐབས་ཤེས་དེ་ཉིད་གསལ་བར་སྟོན་པ་ནི། བྷ་ཡ་ནི་བྷ་ག་སྟེ་ཤེས་རབ་བོ། །དེ་ཀྵོ་ཡི་གློ་གནས་པ་ནི་ཀྵོ་དང་མཚུངས་པ་སྟེ་མཉམ་པར་ཞུགས་པའི་ཀུན་རྫོབ་ཀྱི་བདེན་པའོ། །འདི་ལྟར་བདར་ལྟ་བུའི་ཀུན་རྫོབ་ཀྱི་བདེན་པ་ལ། གསེར་ལྟ་བུའི་དོན་དམ་པའི་བདེན་པ་ལྟར་རྣམ་པར་དཔྱད་ན། རྡོ་ལ་གསེར་གྱི་རི་མོ་ཆགས་པ་ལྟར་བདེན་པ་གཉིས་མཚུངས་ཤིང་དབྱེར་མེད་པར་འགྱུར་རོ། །ཡང་ན་ཀ་ཤ་ཞེས་པ་བདར་བ་སྟེ་དེ་ཡང་ཚད་མའོ། །ཚད་མས་རྣམ་པར་དཔྱད་ཅིང་བདར་ན་གསེར་ལྟ་བུ་ཀུན་རྫོབ་ཀྱི་བདེན་པ། རི་མོ་ལྟ་བུའི་དོན་དམ་པའི་བདེན་པར་ཟད་ཅིང་མཐར་གཏུགས་པར་འགྱུར་རོ། །དེ་ཡང་ལུང་གི་ཚད་མ་འབའ་ཞིག་གིས་མ་ཡིན་པར་བསྟན་པའི་ཕྱིར། ཨོ་སྒྲར་ལྡན་ཞེས་གསུངས་ཏེ། ཨོ་ཞེས་པ་དད་པས་འཇུག་པའོ། །སྒྲ་ཞེས་པ་ལུང་ངོ༌། །ལྡན་པ་ནི་རིགས་པས་དཔྱད་པ་སྟེ། འདིར་ལུང་དང་རིག་པས་དཔྱད་ནས་ཁས་བླང་གི། དད་པ་ཙམ་གྱིས་ནི་མ་ཡིན་ནོ། །བྷ་ཡ་ནི་བྷ་བ་སྟེ་སྲིད་པ་ཡིན་ལ། གནས་པའི་སྐད་དོད་ནི་ཟད་པར་ཡང་འདྲེན་ཏེ། རིག་པས་རྣམ་པར་དཔྱད་ཅིང་བདར་ན། གཟུང་བ་ལ་སོགས་པའི་སྲིད་པའི་ཞགས་པ་ཟད་པར་འགྱུར་ཞེས་བྱ་བའི་དོན་ནོ། །ཡང༌། ས་ཡི་མཐར་ནི་
ཉི་སྟན་གནས། །མདའ་བཅུ་ཟླ་དུམ་ཐིག་ལེས་དགང༌། །དེ་ཡང་སླར་ནི་བརྗོད་པར་བྱ། །འོད་བྱེད་སྦྱངས་པ་ས་ཡི་མཐའ། །གཤེགས་སུ་གསོལ་བ་གློ་ན་གནས། །ཉིས་འགྱུར་དུ་ནི་བྱ་བ་ཡིན། །ཞེས་གསུངས་སོ། །དེ་ལྟར་ལས་ཀྱི་སྒྲིབ་པ་ཟད་པར་བྱེད་དགོས་པ་དང༌། དེ་ཡང་ལས་སྒྲིབ་ཀྱི་རྩ་བ་བདེན་ཞེན་ཟད་དགོས་པ་དང༌། དེ་ཟད་པ་ལ་བདེན་འཛིན་ཅན་རྣམས་སྐྲག་པར་བྱེད་པའི་བརྫུན་པ་སྒྱུ་མ་ལྟ་བུ་དང༌། བདེན་གཉིས་དབྱེར་མི་ཕྱེད་པར་རྟོགས་དགོས་པ་དང༌། དེ་ཡང་ལུང་ཙམ་སྐྱབས་སུ་གྱུར་པ་མིན་པར། ངེས་དོན་གྱི་ལུང་དོན་རིགས་པས་ལེགས་པར་གཏན་ལ་ཕེབས་དགོས་པར་བསྟན་ནས། ད་ནི་དེ་དང་བདེ་བ་གཉིས་སྦྱར་དགོས་པ་སྟོན་པ་ལ། ཧྲཽ་ཞེས་སོགས་ཀྱི་ངེས་དོན་ནི། ཧ་དང་དེའི་ར་སྟ་དང་དེ་གདན་དུ་བྱེད་པ་དང༌། མགོའི་ན་རོ་དང་ཟླ་ཕྱེད་དང་ཐིག་ལེ་རྣམས་བཤད་པས་སྔར་བསྟན་པའི་ཐབས་ཤེས་གསལ་བར་བྱེད་དོ། །དེ་ལ་ར་ནི་ཉི་མའི་ས་བོན་ཡིན་པས་ཉི་མ་ཞེས་བྱ་སྟེ། དེ་ཡང་ཐབས་ཀྱི་རྡོ་རྗེ་ཡིན་ཏེ། ལྷན་ཅིག་སྐྱེས་པའི་ཡེ་ཤེས་ཀྱི་སྣང་བ་སྐྱེས་པའི་ཕྱིར་རོ། །ཉི་མ་དེའི་སྟན་ནི་ཤེས་རབ་མའི་ཆོས་འབྱུང་སྟེ་རྡོ་རྗེ་གནས་སུ་གྱུར་པའི་ཕྱིར་རོ། །ཤ་ཥ་ས་ཧ་ཞེས་པའི་སའི་མཐའ་ནི་ཧ་ཡིན་ལ། དེ་ནི་ཉི་མ་དང་སྟན་གྱི་སྦྱོར་བའི་ལུས་ཐམས་ཅད་ལ་ཁྱབ་པར་བསྐྱེད་པའི་བྱང་ཆུབ་ཀྱི་སེམས་ཀུན་ད་ལྟ་བུའོ། །ཧའི་སྤྱི་བོར་གནས་པའི་ཟླ་ཕྱེད་ནི་སྤྱི་གཙུག་ནས་བྱང་སེམས་དང་པོར་འཛག་པའོ། །དེས་ཅི་ཞིག་བྱ་ཞེ་ན། མདའི་སྐད་དོད་བཱ་ན་ནི་ནགས་ཚལ་ལ་ཡང་འཇུག་པ་འདིར་ཕུང་པོ་ལྔའོ། །བཅུ་ནི་དབང་པོ་ལྔ་
དང་དོན་ལྔ་ཡིན་ལ། དེ་ནི་མ་ནིང་བཞི་དོར་བའི་བཅུ་པ་ཨཽ་ཧ་ལ་ཞུགས་པ་སྟེ་ནཱ་རོའི་དོན་ཡང་དེར་འདུས་སོ། །དུམ་བུ་ནི་དེ་རྣམས་དུ་མར་སྣང་བའོ། །ཐིག་ལེ་ནི་སྟོང་ཉིད་རྟོགས་པའི་རི་མོའོ། །དེས་དགང་བ་ནི་དབང་ཡུལ་དང་ཕུང་པོ་ལ་སོགས་པ་རྣམས། སྟོང་ཉིད་རྟོགས་པའི་རི་མོ་བྲིས་ནས་དེར་རོ་གཅིག་ཏུ་བྱས་པའོ། །དེ་རྣམས་ཀྱིས་ནི་ཉི་སྟན་གཉིས་མཉམ་པར་སྦྱོར་བ་ལས། བྱང་ཆུབ་ཀྱི་སེམས་རྡོ་རྗེ་ནོར་བུའི་ནང་དུ་གནས་པའི་ཚེ། རྣམ་པར་རྟོག་པའི་རང་བཞིན་ཐམས་ཅད་ནུབ་ནས། ལྷན་ཅིག་སྐྱེས་པའི་རང་བཞིན་རྟོགས་པར་འགྱུར་རོ་ཞེས་སྟོན་ཏེ། དེ་འདྲ་བའི་ལྷན་སྐྱེས་ཀྱི་བདེ་བ་རྙེད་པ་ན། སྔར་གཏན་ལ་ཕབ་པའི་སྟོང་ཉིད་དང་སྦྱོར་བའི་དོན་ནོ། །དེ་དག་ནི་ཧྲཽཾ་གི་དོན་ཡིན་ལ་དེ་ལན་གཉིས་སྨོས་པ་ནི་དོན་དེ་ཡང་དང་ཡང་དུ་གོམས་པའོ། །ཧྲཿཞེས་པའི་སའི་མཐའ་ཧའི་དོན་སྔར་དང་འདྲ། ར་སྟ་ནི་འོད་བྱེད་པ་མེ་སྟེ་ཤེས་རབ་ཀྱི་ཁྲག་གོ། སྦྱངས་པ་ནི་རྩ་རྒྱུད་ལས་འོད་བྱེད་གདན་དུ་བྱས་པར་གསུངས་པའི་དོན་ཏེ་བྱང་སེམས་གཉིས་འདྲེས་པའོ། །ཚེག་དྲག་གཉིས་ནི་གཤེགས་སུ་གསོལ་བ་སྟེ་ཁུ་ཁྲག་གཉིས་ཡུམ་གྱི་པད་མར་ཕབ་པའོ། །དེ་གཉིས་གློ་ན་གནས་པ་ནི་ཟོས་པ་སྟེ་ལོངས་སྤྱད་པས་ཚིམ་པའོ། །ཧྲཿལན་གཉིས་སྨོས་པ་སྔར་བཞིན་ནོ། །ཡང༌། ཟླ་གཞོན་ཐིག་གསལ་ཕེ་ཞེས་བྱ། དེ་ཡང་སླར་ནི་བཟླས་པར་བྱ། །ཞེས་གསུངས་ཏེ། ཕེ་ནི་འཛིན་པ་དོན་དམ་པར་མེད་པའོ། །དེ་མེད་ན་དངོས་པོ་འདི་དག་གང་གི་གཟུང་བར་འགྱུར་ཏེ། དེ་ནི་དེ་ལ་ལྟོས་པའི་ཕྱིར་རོ། །ཟླ་བ་གཞོན་
ནུ་སྟེ་ཟླ་ཚེས་དང་ཐིག་ལེས་ཕེའི་སྟེང་དུ་བརྒྱན་ཏེ་ཐིག་ལེ་ནི་སྐར་མའོ། །གཉིས་པོ་དེས་ནི་རང་ཉིད་གསལ་ནུས་ཀྱི་གཞན་མིན་ཏེ། འདི་ལྟར་དེ་དག་ཤར་དུ་ཟིན་ཀྱང་འགྲོ་བ་ཐམས་ཅད་མུན་པ་དང་བཅས་པར་མིག་གིས་མངོན་སུམ་དུ་མཐོང་བའི་ཕྱིར། དེ་དག་གིས་མུན་པ་གསལ་བར་ནུས་པ་མ་ཡིན་ནོ། །འོ་ན་གང་གིས་ཤེ་ན། རང་དང་གཞན་གཉིས་ཀ་གསལ་བའི་ཟླ་བ་ཉ་གང་བ་འབའ་ཞིག་ཤར་བས་སོ། །དེས་འདི་སྐད་དུ་སྟོང་པའི་རི་མོའི་བདག་མེད་པ་ཟླ་བ་ཚེས་པ་ལྟ་བུ་འབའ་ཞིག་གིས་ཀྱང༌། འགྲོ་བའི་དོན་ཇི་ལྟ་བ་བཞིན་ནུས་པ་མ་ཡིན་ལ། སྐར་མ་ལྟ་བུའི་ཀུན་རྫོབ་ཀྱི་བདེན་པ་ལྷའི་སྐུ་འབའ་ཞིག་གིས་ཀྱང་མ་ཡིན་ཏེ། གཞན་དུ་ན་བདེན་པ་གཉིས་གཉིས་སུ་མེད་པའི་ཟུང་འཇུག་གི་སྐུ་ཟླ་བ་ཉ་གང་བ་ལྟ་བུ་འབའ་ཞིག་གིས་ནུས་སོ། །ཞེས་སྟོན་ནོ། །སླར་ནི་བཟླས་པ་བྱ་ཞེས་པའི་དོན་ནི། །ཇི་ལྟར་ཟླ་བ་ཉ་གང་བ་དང་འགྲོགས་ན་སྐར་མས་ཀྱང་མུན་པ་སེལ་བ་ལྟར། གཉིས་སུ་མེད་པའི་ཟུང་འཇུག་གི་སྐུའི་རྗེས་སུ་འབྲང་བའི་བྱ་བ་ཐམས་ཅད་དེ་བཞིན་ནོ། ཞེས་བྱ་བའི་དོན་ནོ། །དེ་ལྟར་ན་ཟླ་ཚེས་ཀྱིས་མཚོན་བའི་སྟོང་ཉིད་འོད་གསལ་གྱི་ཡེ་ཤེས་དང༌། ཐིག་ལེ་སྐར་མ་ལྟ་བུས་མཚོན་པའི་སྒྱུ་མའི་ལྷའི་སྐུ་རེ་རེ་བ་མིན་པར་གཉིས་ཀ་ཚོགས་པ་ནི་ཟུང་འཇུག་དང༌། དེ་གཉིས་གང་ལ་ཚོགས་པའི་ཕེ་ནི་འོད་གསལ་སྟོང་པའི་བདག་ཉིད་ཀྱི་ཟུང་དུ་འཇུག་པའི་གང་ཟག་གོ། སྔ་མ་རྣམས་ཀྱིས་བདེ་སྟོང་དབྱེར་མེད་དགོས་པར་བསྟན་ལ། འདིས་བདེན་གཉིས་དབྱེར་མེད་ཀྱི་ཟུང་འཇུག་དགོས་པར་སྟོན་ནོ། །གཉིས་
པ་ནི། ཕཊ་ནི་བདག་མེད་པ་འོད་གསལ་གྱི་ཡེ་ཤེས་སོ། །ད་ཧ་ནི་མཚན་འཛིན་གྱི་རྣམ་རྟོག་གི་ཤིང་བསྲེགས་ཤིག་པའོ། །པ་ཙ་ནི་ཟག་བཅས་ཀྱི་ཕུང་པོ་ཚོས་ཤིག་པའོ། །བྷ་ཀྵ་ནི་རྣམ་རྟོག་གི་བདུད་ཟོ་ཤིག་པ་སྟེ། སྔར་གྱི་བདེ་སྟོང་གི་ཡེ་ཤེས་ཀྱིས་འདི་རྣམས་འཇོམས་པའི་དོན་ནོ། །བ་ས་ནས་ལམྦི་ནི་ཡི་བར་ནི་ལྷ་ལ་བསྟོད་ཅིང་བོད་པའོ། །གྲིཧྣ་དང་ཏརྫ་ཡ་ནི་ཟུང་ལ་བསྡིགས་པ་སྟེ་ཚར་ཆོད་ཅིག་ཅེས་པའོ། །གང་འཛིན་ན་ས་པྟ་ནས་སརྦཾ་བཱ་སྟེ་ས་འོག་རིམ་པ་བདུན་གྱི་སྦྲུལ་གདུག་པ་དང་འདྲ་བའི་མཚན་འཛིན་གྱི་རྣམ་རྟོག་གོ། འདི་དག་ཟུང་ལ་ཚར་ཆོད་ཅིག་ཅེས་པའོ། །ཡང་ཨཱ་ནི་ཨ་ཀ་ར་སྟེ་རྣམ་པའོ། །ཀ་ནི་མིད་པ་སྟེ་རྣམ་པ་སྣ་ཚོགས་པ་རྣམས་རོ་གཅིག་པར་མིད་པར་བྱའོ་ཞེས་པའོ། །མིད་པ་དེ་ཅི་ཞིག་ཏུ་མིད་ཅེ་ན། ཌྜྷ་ནི་སེམས་ཏེ་དེར་མིད་པར་བྱའོ། །སེམས་རྣམ་པ་དང་བཅས་པར་སྨྲ་བ་དང༌། རྣམ་པ་མེད་པར་སྨྲ་བ་གཉིས་ཀ་ཡང་སྐྱོན་དང་བཅས་པས། རྣམ་ཐར་གསུམ་གྱི་བདག་ཉིད་རང་བཞིན་གྱིས་འོད་གསལ་བར་ཡའི་དོན་ལུང་དང་རིགས་པས་གཏན་ལ་ཕབ་སྟེ་བསྒོམ་ཞེས་པའོ། །དེ་ནི་རྡོ་རྗེ་མཁའ་འགྲོར་ཨཱ་ཀཌྜྷ་ལ་ཡ་བཏུས་པའི་བཤད་པ་ཡིན་ལ། རྩ་རྒྱུད་དུ་ཡ་བཏུས་པ་མེད་དོ། །ཧྲཱིཾ་གི་ཧ་ནི་འགྲོ་བ་ཐམས་ཅད་ལ་ཁྱབ་པར་བྱེད་པ་ཧེ་རུ་ཀ་སྟེ་ཐབས་སོ། །ར་སྟ་ནི་ཉི་མ་སྟེ་ཤེས་རབ་བོ། །ཨཱི་ནི་དབྱངས་བཞི་པ་སྟེ་ཧེ་རུ་ཀའི་ལྷག་མའི་རིགས་བཞི་ཆར་གྱི་བདག་ཉིད་དོ། །ཐིག་ལེ་ནི་འོག་ནས་འབྱུང་བ་དང་འདྲའོ། །ལན་གཉིས་སྨོས་པ་ནི་ཐབས་ལ་ཤེས་རབ་ཀྱི་ཆ་སྦྱར་
བའོ། །ཛྞཽ་ནི་རྡོ་རྗེ་མཁའ་འགྲོ་མ་བཏུས་ལ་རྩ་རྒྱུད་དུ་བཏུས་པ་ལྟར་ན། ཛྞ་ནི་ངེས་ཚིག་གི་ཚུལ་གྱིས་ཛྙཱ་ན་སྟེ་ཡི་ཤེས། ཨོ་ནི་དབྱངས་ཀྱི་བཅུ་པ་སྟེ་དབང་པོ་ལྔ་དང་དོན་ལྔ། ཟླ་ཚེས་ཕུང་ཁམས་སྐྱེ་མཆེད་ཀྱི་དབྱེ་བ། ཐིག་ལེ་དེ་ཐམས་ཅད་སྟོང་ཉིད་སྙིང་རྗེ་དབྱེར་མེད་དུ་རོ་གཅིག་པའི་དོན་ནོ་གསུང་ངོ༌། །ཀྵྨཾ་གི་ཀཾ་ནི་བདེ་བའོ། །ཤའམ་ཥ་ནི་བདེ་བ་དེ་ཉམས་སུ་མྱོང་བ་སྟེ་བདེ་བ་ཆེན་པོ་རང་གིས་རིག་པའི་ཡེ་ཤེས་ནི་ཀྵའོ། །མ་ནི་སྡེ་པ་ལྔ་པ་སྟེ་བཟུང་འཛིན་གྱི་སྤྲོས་པ་ལྔ་མཚོན་ནོ། །པ་སྡེའི་མཐར་གནས་པའི་མཐའ་ནི་སྤྲོས་པ་མེད་པའི་མཐར་གཏུགས་པའོ། །ཨཱ་རིང་པོ་ནི་བདེ་བའི་རྣམ་པའོ། །ཐིག་ལེ་ནི་སྟོང་ཉིད་དོ། །མ་དེ་ཀྵའི་སྟན་དུ་བྱས་པ་ནི་འདི་ལ་བདེ་བ་ཡོད་པས་ན་སྟན་ཏེ་བྱང་ཆུབ་ཀྱི་སེམས་སོ། །སྟན་དེ་ལ་ཀྵ་གནས་པ་ནི་ལྷན་སྐྱེས་ཀྱི་བདེ་བ་འབྱུང་བའི་ཚུལ་དུའོ། །ལན་གཉིས་སྨོས་པ་ནི་འགྲོ་བ་རྣམས་བདེ་བ་ཆེན་པོའི་རང་བཞིན་ཅན་ཡིན་ན། དྲི་མས་བསྒྲིབས་པས་དེ་ཁོ་ན་ཉིད་མི་ཤེས་པར་ཟད་དོ་སྙམ་དུ་ཡིད་ཀྱི་རྟོག་པ་ཙམ་གྱིས་ཀྱང་དྲན་པར་བྱའོ། །ཧཾ་གི་ཧ་ནི་ནཱ་ད་སྟེ་སྒྲ་གཉིས་ཀྱི་ཚུལ་ཅན་ཡིན་པས་ན་ཨཱ་རིང་པོ་དང་སྦྱར་བའོ། །ཧ་དང་ཟླ་ཚེས་དང་ཐིག་ལེ་གསུམ་དུ་སྦྱར་བ་སྟེ་དེ་རྣམས་ནི་སྔར་བཤད་པ་བཞིན་ནོ། །ཧིཾ་གྱི་དབྱངས་གསུམ་པ་ཨི་ནི་ཡེ་ཤེས་གསུམ་པ་སོ་སོར་རྟོག་པའི་ཡེ་ཤེས་རྟོགས་པར་འགྱུར་བའོ། །ཧཱུཾ་གྱི་དབྱངས་ལྔ་པ་ཨུ་ནི་ཡེ་ཤེས་ལྔའི་བདག་ཉིད་དུ་གྱུར་པ་སྟེ་ལྷག་མ་ནི་སྔར་བཤད་པས་ཤེས་པར་བྱའོ། །ཀི་ལིའི་ཀ་ལ་ཐིག་ལེ་བྱིན་པའི་ཀཾ་ནི་བདེ་བའོ། །ས་དང་ཙ་ནི་བཟླུམས་
པའམ་བསྡོམས་པ་སྟེ་བདེ་བ་དང་སྟོང་པ་གཉིས་གཉིས་སུ་མེད་པར་བཟླུམས་པའོ། །དྷི་ནི་གཉིས་སུ་མེད་པའི་བདེ་བ་ལ་སྤྱོད་པའི་ཤིན་ཏུ་དག་པའི་བློའོ། །རྡོ་རྗེ་མཁའ་འགྲོར་ཧི་ལི་མེད་པར་ཙི་ལི་བཏུས་ལ། རྩ་རྒྱུད་ལས་ཧི་ལི་བཏུས་པ་ལ་ཡང་ས་དང་ཧ་གཉིས་བཟླུམས་པ་ལ་བཤད་པས་ཆོག་གོ། ཀ་ལ་སོགས་པ་བཞི་ལ་ཨི་སྦྱར་བ་ནི་མཆོག་གི་དོན་དུ་བཤད་པས། ལ་ལ་ཨི་སྦྱར་བ་ཡང་དེ་དང་འདྲ་ཞིང༌། ལ་རྣམས་ནི་ཡི་གེ་གོང་མའི་བཤད་པ་ལ་བསྡུས་ན་རུང་བ་འདྲའོ། །ཧུ་གཉིས་ནི་ཐབས་ཀྱི་ཆ་དང༌། ཟླ་ཕྱེད་དང་ཐིག་ལེ་ནི་ཤེས་རབ་ཀྱི་ཆ་སྟེ། དེ་རྣམས་སྦྱར་བའི་ཐབས་ཤེས་དབྱེར་མེད་ནི་ཧུཾ་མོ། །རྡོ་རྗེ་མཁའ་འགྲོའི་འགྲེལ་པར་རྩ་བའི་དགོངས་པ་བཤད་པ་ན། ཧུཾ་གཉིས་དང་ཕཊ་གཉིས་དང་སྭཱ་ཧཱ་མཐར་སྦྱར་རོ། །རྩ་རྒྱུད་ལེའུ་བདུན་པ་དང་། ལེའུ་འདིར་ཧུཾ་གཉིས་དང་ཕཊ་གཅིག་སྦྱར་ལ། མངོན་བརྗོད་ལས་ཧུཾ་གཉིས་དང་ཕཊ་གཉིས་སྦྱར་རོ། །ཕོ་ཉ་མོ་བརྟག་པའི་ལེའུ་བཅུའི་མཐར། རྩ་སྔགས་ཚང་བར་བསྒྲིགས་པ་ནི་ཕོ་ཉ་མོ་ལ་བརྟེན་ནས་བདེ་སྟོང་སྦྱོར་བ་ཤེས་པའི་ཆེད་ཡིན་ལ། དེ་རྩ་སྔགས་ཀྱི་ངེས་དོན་བཤད་པ་ལས་ཤིན་ཏུ་གསལ་བར་བཤད་རྒྱུད་རྩ་འགྲེལ་ལས་བཤད་པ་ནི། ལམ་གྱི་སྙིང་པོར་མཐོང་ངོ༌། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྩ་བའི་སྔགས་ཀྱི་ངེས་དོན་གསལ་བའི་ཆོ་གའི་ལེའུ་སྟེ་ཉི་ཤུ་རྩ་ལྔ་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་
བཤད་པ་སྦས་པའི་དོན་ཀུན་གསལ་བ་ལས། ལེའུ་ཉི་ཤུ་རྩ་ལྔ་པའི་བཤད་པའོ།། ༈ །།གཉིས་པ་དམ་ཚིག་བརྒྱད་བསྟན་པ་ལ་དྲུག །རྩ་བའི་སྔགས་ཀྱི་ཆེ་བ་བསྟན་པ། ཕོ་ཉ་མོ་མཆོད་པས་དངོས་གྲུབ་ཀུན་སྟེར་བ། དམ་ཚིག་དང་སྡོམ་པའི་ཆོ་ག །ཕོ་ཉ་མོ་རྣམས་མཉེས་པའི་རྒྱུ། སློབ་མ་བརྟག་པའི་ཆོ་ག །ལེའུ་ཡི་མཚན་བསྟན་པའོ། །དང་པོ་ནི། ཉེར་ལྔ་པའི་རྗེས་དེ་ནས་ཉེར་ལྔ་པར་བཤད་པ་ལས་གཞན་ཡང་བཤད་པར་བྱའོ་ཞེས་སྦྱར་རོ། །ས་གསུམ་གྱི་འཇིག་རྟེན་ནི་གསུམ་པོ་དག་ན་འདི་ལས་སྔགས་མཆོག་གཞན་ཡོད་པ་མིན་པའི་ཤྲཱི་ཧེ་རུ་ཀའི་རྩ་བའི་སྔགས་ཀྱི་ངེས་པའི་དོན་ལེགས་པར་ཤེས་ནས། སྒྲ་ཇི་བཞིན་པའི་གསང་སྔགས་ཀྱི་དོན་ཐམས་ཅད་ལ་གཙོ་བོར་འཛིན་པ་ཡོངས་སུ་འདོར་བ་སྟེ་དོར་ནས་རྩ་སྔགས་ཀྱི་ངེས་དོན་ཉིད་ལ་གཙོ་བོར་འཛིན་ནོ། །གཉིས་པ་ནི། ལུགས་འབྱུང་ལུགས་ལས་བཟློག་པ་ཡིས། །ཞེས་པ་རྣལ་འབྱོར་གྱི་བསླབ་པའི་རིམ་པ་ལས་མ་འདས་པ་ལ་འཆད་པར་ལྟར་ན། ལུགས་འབྱུང་སྟེ་བླང་བྱ་ལེན་པ་དང༌། ལུགས་བཟློག་སྟེ་སྤང་བྱ་འདོར་བ་ལས་མ་འདས་པའོ། །ཕོ་ཉ་དང་འདྲ་བས་ན་ཕོ་ཉ་སྟེ། བྱང་ཆུབ་པའི་གོ་འཕང་སྟེར་བར་ངེས་ཤིང༌། ཐམས་ཅད་དུ་གཉིས་སུ་མེད་པའི་དགའ་བའི་རང་བཞིན་ཏེ་དགའ་བ་འབྱུང་བའི་ཚུལ་གྱིས་ཡང་དག་པ་སྟེ་ལེགས་པར་གནས་ནས། འོག་སྟེ་ས་འོག་ལ་སོགས་པ་ན་གང་ཅི་ཡོད་པའི་འཇིག་རྟེན་པའི་དངོས་གྲུབ་དང༌། སྟེང་གི་སྟེ་ཕྱག་རྒྱ་ཆེན་པོའི་དངོས་གྲུབ་སྟེར་བའོ་ཞེས་འཆད་དོ། །འགྲེལ་པ་
གཞན་ལས་ནི་ལུགས་ལས་འབྱུང་བ་ཡིས་ཕོ་ཉ་རྣམས་གནས་པ་ནི། རབ་གཏུམ་མ་ནས་བརྩོན་ཆེན་མའི་བར་གྱི་ཡས་མར་གྱི་གོ་རིམ་གྱིས་གནས་པའོ། །ལུགས་ལས་བཟློག་པ་ཡིས་གནས་པ་ནི། བརྩོན་ཆེན་མ་ནས་རབ་གཏུམ་མའི་བར་གྱི་མས་ཡར་གནས་པའོ། །དེ་ལྟར་འོག་ཏུ་གནས་པ་སྟེང་དུ་སྔོན་ལ་བཀོད་ནས་བསྒོམས་ན་དངོས་གྲུབ་སྟེར་ཞེས་འཆད་དོ། །གང་དང་ལྷན་ཅིག་ཏུ་སྤྱོད་པའི་མཆོག་ལ་སྤྱོད་པ་ནི་བདག་གི་ཕོ་ཉ་མོའོ། །དེ་ཡང་སྐལ་པ་དང་ལྡན་པའི་སེམས་ཅན་གྱི་དོན་བསྒྲུབ་པའི་ཕྱིར་དུ། འོ་བྱ་བ་དང་འཁྱུད་པ་ལ་སོགས་པ་ཐམས་ཅད་དུ་སྟེར་བའི་ཚུལ་གྱིས་གནས་ཀུན་ཏུ་འགྲོ་བའོ། །དེ་འདྲ་བའི་ཕོ་ཉ་མོ་དེ་ནི་མིག་གིས་མཐོང་བ་དང་ལུས་ཀྱིས་རེག་པ་དང་ཐོས་པས་ཀྱང་དངོས་གྲུབ་ཀུན་སྟེར་ན། རྒྱུན་དུ་ཚུལ་བཞིན་དུ་བསྒྲུབས་པས་དངོས་གྲུབ་སྟེར་བ་ལྟ་ཅི་སྨོས། ཞེས་པནྜ་ཏ་གསུམ་གྱིས་བཤད་དོ། །ཕོ་ཉ་མོ་མཐོང་བ་སོགས་ཀྱིས་དངོས་གྲུབ་སྟེར་ལུགས་ནི་བདེ་བ་ཆེན་པོ་བསྐྱེད་པའི་སྒོ་ནས་ཡིན་ཏེ། རྡོ་རྗེ་གུར་ལས། བུད་མེད་མཆོག་མཐོང་ལས་བདེ་ཞིང༌། །གླུ་ཐོས་བས་ཀྱང་ཡང་དག་བདེ། །དྲི་ཞིམ་བསྣམས་ལས་བདེ་བ་ཆེ། །སྐྱེ་གནས་རེག་ལས་ཀྱང་བདེ་ཆེ། །རོ་མཆོག་བཏུང་བ་རབ་སྦྱར་བའི། །བདེ་བ་སུས་ཀྱང་བཟློག་མི་ནུས། ཞེས་གསུངས་སོ། །དེ་ལྟར་ཕོ་ཉ་མོ་མཆོག་མཐོང་བ་སོགས་ལས་བདེ་ཆེན་འབར་བ་ནི་ཞུ་བདེ་ཡིན་ལ། བདེ་བ་དེ་སྐྱེ་ལ་ལུས་ཀྱི་བྱང་སེམས་ཞུ་
བ་དགོས། དེ་ལ་གཏུམ་མོ་འབར་བ་དགོས། དེ་ནི་རླུང་འདུས་པའི་སྟོབས་ཀྱིས་མེ་སྤོར་བ་ཡིན་པས། ཕོ་ཉ་མཆོག་གིས་བྱིན་གྱིས་བརླབས་ན། མཐོང་མ་ཐག་ལ་སོགས་པར་ཡང་བདེ་ཆེན་འདྲེན་པའི་རླུང་སྡུད་ནུས་པ་སོགས་ཀྱི་མཐུ་ལས། བདེ་ཆེན་འགལ་རྐྱེན་གང་གིས་ཀྱང་བཟློག་ཏུ་མེད་པར་རྒྱུན་མི་འཆད་དུ་སྐྱེ་བས་ཕོ་ཉའི་ལམ་ཆེས་མྱུར་བ་ཡིན་ནོ། །རྟག་པར་ཏེ་རྒྱུན་དུ་ཕོ་ཉ་མོ་ལ་འཁྱུད་པ་དང་འོ་བྱ་བ་སྟེ། དེ་ཡང་བདེ་སྟོང་གཉིས་སུ་མེད་པར་སྦྱོར་བའི་རྣལ་འབྱོར་གང་ལས་འབྱུང་བའི་གནས་ཀྱི་ཁྱད་པར་ཏེ་གནས་ཁྱད་པར་བ་པདྨ་མཆོག་གོ། དེར་ཙུམྦ་ན་བྱ་ཞིང་ལྕེ་རྩེ་འདྲིལ་བས་དྲུད་ལ། ཆང་གི་བཏུང་བ་དང་ལྡན་པས་སེམས་རབ་ཏུ་དགའ་བར་བྱས་ནས། རྡོ་རྗེ་དང་པད་མ་སྦྱོར་བས་རོལ་བར་བྱའོ། །རྣལ་འབྱོར་ཇི་སྙེད་པ་འདོད་པའི་བསྟན་བཅོས་ལས་བཤད་པའི་ཀ་ར་ནའི་ཚོགས། རྡོ་རྗེ་སེམས་དཔས་གསུངས་པ་དེ་སྙེད་ཤེས་པར་བྱས་ནས་དེ་དང་མཐུན་པར་རོལ་བར་བྱེད་པ་ནི། དངོས་གྲུབ་ཐམས་ཅད་སྦྱིན་པར་བྱེད་པར་བཤད་དོ། །འགྲེལ་པ་གཞན་ལས་ནི་གནས་དང་ཉེ་བའི་གནས་ལ་སོགས་པ་རྣལ་འབྱོར་གྱི་གནས་ལ་གནས་པའི་ཕོ་ཉ་མོས་ནི། དངོས་གྲུབ་ཐམས་ཅད་སྟེར་ཏེ་ཙུམྦ་ན་དང་འཁྱུད་པ་འདོད་པའི་བསྟན་བཅོས་ལས་བཤད་པའི་རིམ་པས་བསྟན་ན་དངོས་གྲུབ་ཏུ་འགྱུར་རོ་ཞེས་འཆད་དོ། །བདེན་དངོས་སམ་བདེན་པ་ཅན་ནམ་དམ་ཚིག་དང་ལྡན་པའི་རྣལ་འབྱོར་མ་མཐོང་ན། བཟའ་བ་དང་སྟོན་མོ་དང་ཙཱ་རུ་དང་བརྡ་ལ་སོགས་པ་ཐམས་ཅད་སྦྱིན་པར་བྱའི་གཞན་དུ་སྟེ་དམ་ཚིག་
དང་མི་ལྡན་པ་ལ་ནམ་ཡང་སྦྱིན་པར་བྱ་བ་མ་ཡིན་ནོ། །ཕོ་ཉ་མོ་ཡང་གང་ཡིན་སྙམ་ན། མ་དང་སྲིང་མོ་དང་བུ་མོ་དང་ཆུང་མ་རྣམས་ཕོ་ཉ་མོར་གནས་པ་ཡིན་ལ། དེ་ཡང་ཞིང་ལས་སྐྱེས་པ་དང་སྔགས་ལས་སྐྱེས་པ་དང༌། ལྷན་ཅིག་སྐྱེས་པ་ནི་མ་ལ་སོགས་པ་སྟེ། སྤྱན་ལ་སོགས་པའི་ལྷ་མོ་རྣམས་ལ་སྙོམས་པར་འཇུག་པས་མཆོད་པར་བྱའོ་ཟེར་རོ། །དེ་རྣམས་ཀྱང་ཕོ་ཉ་མོ་གང་ལ་རྟག་ཏུ་སྔགས་སྦྱིན་པ་སྟེ་དབང་ལ་སོགས་པས་སྣོད་དུ་བྱས་པ་དེ་ཉིད་ཕོ་ཉ་མོ་བསྟེན་པ་དེ་ཡི་ཆོ་གར་བཤད་དོ། །ཁ་ཅིག་ནི་མ་ལ་སོགས་པ་རིག་མར་བཤད་པ་ལ། ཆོས་ཀྱི་བརྫུན་གྱིས་བགྲོད་པར་བྱ་བ་མ་ཡིན་པ་ལ་བགྲོད་པར་བཤད་ཅེ་ན། ཞེས་པའི་ལན་དུ་གང་ལ་སྔགས་བྱིན་པ་ཕོ་ཉ་མོ་ཡིན་གྱི། སྐྱེ་གནས་ཀྱིས་འབྲེལ་བ་ནི་མ་ཡིན་པས་འགལ་བ་མེད་དེ། བླ་མའི་ཕྱག་རྒྱ་ནི་མའོ། །ལྷན་ཅིག་ཉེན་པ་ནི་སྲིང་མོའོ། །རང་གིས་ཆོས་བསྟན་པ་ནི་བུ་མོའོ། །བླ་མས་བྱིན་པ་ནི་ཆུང་མའོ་ཞེས་འཆད་ལ། ལྭ་བ་པས་མ་ལ་སོགས་པ་སྒྲ་ཇི་བཞིན་པར་གསུངས་ཏེ། རྣལ་འབྱོར་པ་མཐོན་པོ་ལ་དགོངས་སོ། །དམའ་བ་ལ་ནི་མ་ལ་སོགས་པ་བཤད་མ་ཐག་པ་བཞིན་དུའང་ཡིན་ནོ། །གསུམ་པ་ལ་བཞི། བཤད་པར་དམ་བཅའ་བ། གཡོན་པའི་ཀུན་སྤྱོད་མཆོད་པ་དང་བཅས་པ། དམ་ཚིག་རྣམས་སོ་སོར་བསྟན་པ། དོན་བསྡུ་བའོ། །དང་པོ་ནི། ཕོ་ཉ་མོ་མཆོད་པའི་རྗེས་དེ་ནས་ཕོ་ཉ་མོ་མཉེས་པར་བྱེད་པའི་དམ་ཚིག་རྣམས་རྡོ་རྗེ་འཆང་ང་ཡིས་བཤད་པར་བྱའོ། །དམ་ཚིག་ཇི་ལྟ་བུ་ཞེ་ན། རྣལ་འབྱོར་གྱི་རྒྱུད་
མན་ཆད་དུ་ཤིན་ཏུ་རྙེད་པར་དཀའ་བའོ། །རྣལ་འབྱོར་གྱུད་དུ་ཞེས་པ་ཕ་རྒྱུད་ལ་བྱས་ནས། རྒྱུད་དེར་རྙེད་དཀའ་བ་རྣལ་འབྱོར་མའི་རྒྱུད་ཀྱི་ཐུན་མོང་མ་ཡིན་པའི་དམ་ཚིག་བརྒྱད། ཅེས་པའི་དོན་དུ་གཟུང་བར་མི་བྱ་སྟེ། གཡོན་པའི་དམ་ཚིག་ཙམ་མ་གཏོགས་པ་གཞན་རྣམས་ཕ་རྒྱུད་དང་འདྲ་བའི་ཕྱིར་རོ། །གཉིས་པ་ནི། སྐྱེས་པའམ་བུད་མེད་རྣལ་འབྱོར་མ་མཐོང་ན་གཡོན་དུ་བཞག་ནས་འགྲོ་བ་ནི། ཡིད་ལ་འདོད་པའི་འབྲས་བུ་སྟེར་བར་བྱེད་དོ། །དེ་ལྟར་ན་ཁྱིམ་མམ་ཞིང་དུ་གནས་པ་ཤིན་ཏུ་རིང་པོ་ན་གནས་པ་ཡང་ཤེས་པར་བྱས་ནས་གཡོན་ནས་སྤྱད་པར་བྱའོ། །འདིར་བུད་མེད་ནི་རྣལ་འབྱོར་མ་ལ་བཤད་པས། སྐྱེས་པ་ཡང་རྣལ་འབྱོར་པར་ཤེས་པས་སྐྱེས་པ་དང་བུད་མེད་ཙམ་མིན་ལ། ཤིན་ཏུ་རིང་པོ་ན་གནས་པ་ནི་ཞིང་ཁྱད་པར་ཅན་ན་གནས་པར་མངོན་ནོ། །གཞན་ཡང༌། བུད་མེད་དག་ནི་མཐོང་བ་ན། གཡོན་ནས་ལན་གསུམ་བསྐོར་བྱ་ཞིང༌། སྤྱི་བོས་ཕྱག་ནི་བྱས་ནས་ཀྱང༌། །ལན་གསུམ་བར་དུ་གསོལ་བ་གདབ། །ཁྱོད་མ་བདག་ནི་བུ་ཡིན་ཏེ། །ཇི་སྲིད་བྱང་ཆུབ་འབྱུང་བར་དུ། །བྱང་ཆུབ་ཡན་ལག་ནུ་མ་ལས། །བྱུང་བའི་རང་གི་འོ་མས་སྐྱོངས། ཞེས་ཀྱང་གསུངས་ཏེ། གསོལ་གདབ་ནི། ཁྱོད་མ་ཞེས་སོགས་སོ། །འདི་དངོས་སུ་མ་ནུས་ཀྱང་ཡིད་ཀྱིས་བྱ་དགོས་པའི་འདི་པའི་དམ་ཚིག་གཅིག་གོ། བྷ་བས་རང་གི་གཡོན་དུ་སྐྱེས་པའམ་བུད་མེད་བཞག་ནས་འགྲོ་བའི་སྐྱེས་པའམ་བུད་མེད་ནི། བདེ་མཆོག་གི་རྣལ་འབྱོར་པའམ་རྣལ་འབྱོར་མར་ཤེས་པར་བྱའོ། །དེའི་ཕྱིར་ཡང་འདོད་པའི་དངོས་གྲུབ་ཏུ་འགྱུར་རོ། །དེ་བས་ན་ཤིན་ཏུ་རིང་
བ་སྟེ་སྔར་བཤད་པའི་མཚན་ཉིད་མ་མཐོང་ཡང༌། གཡོན་ནས་སྐོར་ཞིང་འགྲོ་བས་མཚོན་པ་ནི་ཕོ་ཉ་མོ་སྟེ། དེ་ཡང་ཁྱིམ་དང་ཞིང་ན་གནས་པ་ཞེས་འཆད་དོ། །དཔལ་ཧེ་རུ་ཀའི་རྣལ་འབྱོར་ལས་གཞན་པའི་རྣལ་འབྱོར་མཆོག་མེད་པས། ཤྲཱི་ཧེ་རུ་ཀའི་རྣལ་འབྱོར་ནི་རྣལ་འབྱོར་རྣམས་ཀྱི་མཆོག་གོ། དེའི་ཕྱིར་རྣལ་འབྱོར་དེ་འཛིན་པའི་སློབ་དཔོན་ནི་རྣལ་འབྱོར་མཆོག་གི་སྐྱེད་བྱེད་ཡིན་པས་རྣལ་འབྱོར་རྣམས་ཀྱི་མ་དང་ཕ་ཉིད་ཡིན་ནོ། །བདེ་མཆོག་གི་རྒྱུད་འདི་རུ་ནི་དབང་སྐུར་བའི་རྣལ་འབྱོར་པ་སྒྲུབ་པ་པོ་ནི། ལེགས་པ་སྟེ་མཆོག་ཏུ་གྱུར་པ་ཡིན་ཏེ། དེས་ན་དེ་དག་ལ་བརྙས་པ་སྟེ་ཁྱད་དུ་གསོད་པ་དང༌། མི་སྤང་བ་སྟེ་མི་སྨད་པར་གུས་པས་ཅི་ནུས་པ་ཡིས་ནི་མཆོད་པར་བྱའོ། །ཀ་ཀ་གདོང་སོགས་ཞེས་པ་ནི་ལཱ་བ་པ་དང་ལྷ་སྦས་ཀྱི་འགྲེལ་བར་དམ་ཚིག་བརྒྱད་བཤད་ཟིན་པའི་འོག་ཏུ་འབྱུང་བས། དམ་ཚིག་བརྒྱད་ལ་མི་འདྲེན་ལ། འགྲེལ་པ་གཞན་ལས་སྐབས་འདིར་འཆད་ཀྱང་དམ་ཚིག་བརྒྱད་ལ་མི་འདྲེན་ནོ། ། འོ་ན་འདིར་བཤད་པ་ཅི་ཡིན་ཞེ་ན། ཁཱའི་གདོང་པ་ལ་སོགས་པ་དང་ཆོས་མཐུན་པའི་དུད་འགྲོ་མོ་ལ་ཡང་གུས་པར་བྱ། ཞེས་པའི་དོན་དུ་ཡིན་ཞེས་སྔ་མ་དག་འཆད་པ་ནི་མི་འགྲིག་གོ། འདི་ལ་སྒོ་མཚམས་མ་བརྒྱད་མཆོད་པ་དེ་བཞིན་དུ་སྒྲུབ་པ་པོས་བདེ་མཆོག་གི་རྣལ་འབྱོར་པ་རྣམས་ལ་དད་ཅིང་གུས་པས་མཆོད་ན། ཡིད་བྱིན་གྱིས་རློབ་པ་ཡིན་ནོ་ཞེས་གསུང་ངོ༌། །བྷ་བས་ནི་སྔར་གུས་པ་ཡིས་མཆོད་ཅེས་བཤད་པའི་གུས་པ་
ནི། ཀ་ཀ་སོགས་ཀྱིས་སྟོན་པ་ལ་ཁྭ་གདོང་མ་ལ་སོགས་པ་བརྒྱད་པོ་འདི་གུས་པ་དང་དད་པ་འཕེལ་བར་བྱེད་པ་ཡིན་ནོ། །དེ་ཡང་དངོས་གྲུབ་རྣམས་ཀྱི་རྒྱུ་ཡིན་ནོ་ཞེས་འཆད་དེ། བླ་མ་དང་འདི་ཡི་རྣལ་འབྱོར་པ་ལ་རྟག་པར་ཏེ་རྒྱུན་དུ་གུས་པ་ནི་དངོས་གྲུབ་རྣམས་ཀྱི་རྒྱུ་ཡིན་ལ། གུས་པ་དང་དད་པ་གོང་ནས་གོང་དུ་འཕེལ་བར་བྱེད་པ་ལ། བར་དུ་གཅོད་པའི་བགེགས་ནི་སྒོ་མཚམས་མས་བཟློག་པ་ཡིན་པས། སྒོ་མཚམས་མ་རྣམས་དངོས་གྲུབ་འཕེལ་བའི་རྒྱུ་ཡིན་ནོ་ཞེས་པ་སྟེ་ཤིན་ཏུ་ལེགས་པ་ཡིན་ནོ། །གྲོལ་བའི་སྐད་དོད་གུས་པ་དང་མོས་པ་ལ་ཡང་འགྲོ་བར་སྣང་བས། འདིར་མོས་པ་དང་གུས་པར་བསྒྱུར་བ་རྣམས་ལེགས་སོ། །གསུམ་པ་ནི། སྔར་བཤད་པའི་གཡོན་པའི་ཀུན་སྤྱོད་བརྙས་སྨོད་སྤོང་བའི་དམ་ཚིག་རྣམས་སྐྱོང་བ་ནི་དང་པོའོ། །ཀྱང་ནི་སྐྱོང་བར་བྱེད་པ་ཁོ་ན་ཞེས་ངེས་བཟུང་ངོ༌། །གཡོན་པའི་ཀུན་སྤྱོད་སྔར་བཤད་པ་ནི་མཚོན་པ་ཙམ་སྟེ། གཡོན་པའི་ཀུན་སྤྱོད་ཐམས་ཅད་ལ་གནས་པར་བྱའོ། །རྣམ་པར་རྨོངས་ཤིང་འདོད་པ་ལ་ཆགས་པས། ལྷ་མོ་སྟེ་རིག་མ་གཞན་དང་ཀུན་ཏུ་སྦྱོར་བ་སྤོང་བ་ནི་དམ་ཚིག་གཉིས་པའོ། །ལྭ་བ་པས། རྣལ་འབྱོར་མཆོག་གི་ཐབས་སྤངས་ནས། རྣལ་འབྱོར་གཞན་ལ་བརྟེན་པ་ལ་འཆད་དེ། དཔའ་བོས་ཀྱང༌། ལྷ་གཞན་དག་དང་ཀུན་སྦྱོར་བའི། །འདོད་ལ་ཆགས་པར་གྱུར་པ་ནི། ཞེས་འདོན་ནོ། །དམ་ཚིག་གསུམ་པ་ནི་བདག་དང་གཞན་གྱི་ཆར་གཉིས་སུ་འབྱེད་པ་སྤོང་བ་ལ་བཤད་པ་ནི། གཉིས་སུ་མེད་པ་རྟོགས་པ་དང་མ་བྲལ་བ་ལ་བཤད་པ་ལྟར་ཡིན་ལ། དེ་ཡང་དེ་ཁོ་ན་ཉིད་
རྟོགས་པ་སྐྱོང་བ་དང་མ་བྲལ་བར་བྱེད་པ་ཡིན་པས། གཉིས་སུ་བྱེད་པ་མིན་ཞེས་པའམ་གཉིས་སུ་མེད་པ་ཞེས་བྱའོ། །ཐོགས་མེད་ནི་གང་གིས་ཀྱང་གཞོམ་དུ་མི་ནུས་པ་ལ་བཤད་པ་ནི། སྔགས་ཀྱི་ཐུན་མོང་མ་ཡིན་པའི་གྲུབ་མཐའ་ལས་གཞན་དུ་བཀྲི་མི་ནུས་པ་སྟེ་དམ་ཚིག་བཞི་པོའོ། །ཐོགས་མེད་མིན་ཞེས་པ་ལྟར་ན་དེ་སྤོང་བ་ལ་བྱའོ། །དམ་ཚིག་ནི་ལྷ་མོའམ་རིག་མའོ། །སྤྱོད་པ་ནི་འདོད་པ་སྤྱོད་པའོ། །སྤྱད་པ་ནི་དེ་བྱེད་པའོ། །དེའི་ཡུལ་ནི་ལས་དང་ཡེ་ཤེས་ཀྱི་ཕྱག་རྒྱ་གཉིས་སོ། །དེ་ལ་ཡང་གསུམ་པས་ནི་དེ་ལྟར་བྱེད་པ་ན། དེ་ཁོ་ན་ཉིད་ཀྱི་ལྟ་བ་དང་བྲལ་བར་སྤྱོད་པ་བཀག་ཅིང༌། བཞི་པས་ནི་ཡིད་གཞན་དུ་མི་འགྱུར་བར་བྱེད་དེ་དམ་ཚིག་ལྔ་པའོ། །མི་མོ་སྟེ་བུད་མེད་ལ་བརྟེན་ནས་རྡོ་རྗེ་དང་པདྨ་འདུ་བའི་དུས་སུ་དབང་ཕྱུག་དང་བྲལ་བར་མི་བྱ་ཞེས་ཀོང་ཀ་ན་བཞེད་པ་ནི། སྐལ་ལྡན་གྱིས་དབང་ཕྱུག་མ་དང་བྲལ་བར་མི་བྱ་བ་ལ་བཤད་དེ། ལེགས་པར་སྦྱོར་བའམ་ཤིན་ཏུ་སྦྱོར་ཞེས་པས་མ་བྲལ་བར་བྱེད་པའོ། །དེ་ཡང་ལྷན་སྐྱེས་ཀྱི་བདེ་བ་འདྲེན་པའི་ནུས་པ་མ་རྫོགས་པ་དེ་སྲིད་དུ་འབྲལ་བར་མི་བྱ་ཞེས་པ་སྟེ། དམ་ཚིག་དྲུག་པའོ། །དམ་ཚིག་དྲུག་པ་ལ་མི་འབྲལ་བར་བཤད་པ་དེ་བཞིན་དུ། བདེ་བའི་གཞི་སྤྱི་བོ་ནས་བྱང་སེམས་འཛག་པའི་དུས་སུ་ཡང་གསང་གནས་ཀྱི་རྩེ་ནས་ཕྱི་རོལ་དུ་མི་འབྲལ་བའི་ཚངས་པར་སྤྱོད་པ་བྱ་བ་ནི་དམ་ཚིག་བདུན་པའོ། །འགྲེལ་པ་གསུམ་ལས། ཚངས་པར་སྤྱོད་པ་དེ་བཞིན་གཞི། ཞེས་འབྱུང་ངོ༌། །བུ་གར་ཀུན་ཏུ་སྤྱོད་པ་སྟེ་ཡུམ་གྱི་པད་མ་ནས་བྱང་སེམས་
ལྕེས་ལེན་པའི་དུས་སུ་ཁྲོ་བ་མེད་པར་སྤྱོད་པའོ། །ཁྲོ་བ་མེད་པའི་དོན་ནི། དཔའ་བོས་བྱང་སེམས་ལེན་པའི་དུས་སུ་གཙོག་པའི་འདུ་ཤེས་མི་བྱ་བ་ལ་བཤད་པ་ལྟར་ཡིན་ཏེ། གཙོག་ཅིང་སྐྱུག་བྲོ་བའི་བསམ་པ་ནི་ཡུལ་དེ་ལ་རྒྱབ་ཀྱིས་ཕྱོགས་པའི་མི་འདོད་པ་ཡིན་པས། དེ་འདྲ་བ་དེ་ལ་སྡང་བ་ཞེས་གཞན་དུ་ཡང་འབྱུང་ངོ༌། དེ་ནི་དམ་ཚིག་བརྒྱད་པའོ། །བཞི་པ་ནི། དེ་ལྟར་སྔར་བཤད་པ་འདི་བརྒྱད་འཛིན་པ་ནི་དམ་ཚིག་ཀུན་ཏུ་སྤྱོད་པ་ཡིན་ལ། ཤེས་པ་ཙམ་ལ་མི་འཇོག་པར་ཚུལ་བཞིན་དུ་སྒྲུབ་པ་ལ་ནི་གནས་པ་ཡི་སྒྲུབ་པ་པོ་རྣམས་ཀྱིས་རྟག་ཏུ་སྟེ། ཡང་དང་ཡང་དུ་ཤེས་པར་བྱའི་བརྗེད་པར་མི་བྱའོ། །དམ་ཚིག་འདི་རྣམས་ནི་བྱ་བ་དང་སྤྱོད་པ་དང་རྣལ་འབྱོར་དང་རྣལ་འབྱོར་བླ་མ་དང་། རྣལ་འབྱོར་མའི་རྒྱུད་རྣམས་ཐམས་ཅད་ཀྱི་ཐུན་མོང་བ་སྟེ་བྱ་བ་འདྲ་བར་སྦྱོར་བས་བཅོམ་པར་མི་བྱ་བ་སྟེ་གཞོམ་པར་ནི་བྱ་སྟེ། རྒྱུད་སྡེ་འོག་མ་དེ་དང་དེ་རྣམས་ལ་རྒྱུད་སྡེ་གོང་མ་ལྟར་གྱི་འཚང་རྒྱ་བའི་རྒྱུ་མེད་པར་ཏེ་མེད་པའི་ཕྱིར་རོ་ཞེས་ལྭ་བ་པ་དང་ལྷ་སྦས་ཀྱིས་བཤད་དོ། །ཀོང་ཀ་ན་པ་ནི་དམ་ཚིག་འདི་རྣམས་ནི་རྣལ་འབྱོར་ཆེན་པོའི་རྒྱུད་ཐམས་ཅད་ཀྱི་ཐུན་མོང་བ་སྟེ་སྤྱི་ཡིན་པས་གསང་བ་སྟེ། རྒྱུད་གཞན་ཤེས་པས་ཀྱང་དགོངས་པ་འདི་རྟོགས་པར་མི་འགྱུར་རོ། །དགོངས་པ་མི་རྟོགས་པས་ན་རྒྱུ་སྟེ་ཡང་དག་པའི་གཏན་ཚིགས་མེད་པར་ནི། ཚད་མ་གཞན་གྱིས་གཞོམ་པར་ཏེ་སུན་དབྱུང་བར་མི་བྱའོ། །དེ་ལྟར་ན་ཇི་ལྟར་བྱ་ཞེ་ན། རྒྱུད་ལ་ཡིད་ཆེས་པའི་དད་པ་ཉིད་ཀྱིས་བླང་བར་བྱ་ཡི་མིག་གིས་གཟུགས་ལ་བལྟ་བ་དང༌།
ལག་པས་རེག་བྱ་ལ་རེག་པ་ལྟ་བུར་བྱར་ཡོད་པ་མ་ཡིན་ནོ། །གསང་བའི་དམ་ཚིག་འདི་ནི་སྣོད་མིན་ལ་མིང་ཙམ་ཡང་མི་བསྟན་ཅིང༌། རབ་ཏུ་འབད་དེ་སྦ་བར་བྱ་བ་སྣོད་ལྡན་ལ་བཤད་པར་བྱའོ། །བཞི་པ་ནི། བློ་དང་ལྡན་པ་སྟེ་སྒྲུབ་པ་པོས་མཐེའུ་ཆུང་སྟེ་ཕོ་ཉ་མོའི་པད་མའི་རྩ་བྱ་རོག་གདོང་ཞེས་པ་བསྐྱོད་པ་སྟེ་བསྐུལ་བར་བྱའོ། །ཅིའི་དོན་དུ་ཞེ་ན། ཕོ་ཉ་མོ་ལ་ཡང་དག་པར་གནས་པའི་མྱོས་བྱེད་འཛག་པའི་དོན་དུའོ། །སྐུལ་བྱེད་ནི་སྲིན་ལག་དང་གུང་མོའི་རྩེ་མོ་ཁ་སྦྱར་བས་བསྐྱོད་ཅེས་ཟེར་རོ། །ཀོང་ཀ་ན་པ་ནི་མཐེའུ་ཆུང་བསྐྱོད་པ་ལྷ་མོའི་མཆོད་པའི་དུས་སུ། ལྷའི་རྣལ་འབྱོར་དང་ལྡན་པར་བྱ་བའམ་སྔགས་དང་ཕྱག་རྒྱ་ལེགས་པར་བསླབས་པ་མ་རྙེད་ན། ཕྱག་རྒྱ་གཞན་ལྷའི་རང་བཞིན་དུ་བྱས་ལ་མཆོད་དོ། །ཕོ་ཉ་མོ་རྣམས་ཡང་དག་གནས་པ་ནི་དེའི་དུས་སུ་རྣལ་འབྱོར་པ་ལ་ཕོ་ཉ་མོ་ཐམས་ཅད་དགའ་བར་འགྱུར་རོ་ཞེས་འཆད་དོ། །མཐེའུ་ཆུང་ནི་བྱིན་གྱིས་བརླབས་པའི་པདྨའི་ལྟེ་བ་ཡིན་ལ། དེ་བསྐྱོད་པར་བྱ་ཞེས་དཀའ་རྒྱལ་བཞེད་དོ། །ཡང་མཐེའུ་ཆུང་ནི་ལོ་གྲངས་བཅུ་གཅིག་གི་ཚིགས་དང་ལྡན་པ་སྟེ། དེ་གཟུང་ལ་དེ་དང་རོལ་བའི་བདུད་རྩི་ལྕེས་བླངས་ཏེ་འཐུངས་ན། བཅུད་ཀྱི་ལེན་འགྲུབ་པར་བྱེད་པས་བདེ་བ་ཆེན་པོ་སྐྱེ་བའི་རྒྱུ་ཡིན་ནོ་ཞེས་ལྭ་བ་པ་གསུང་ངོ༌། །ལྔ་པ་ནི། སྒྲུབ་པ་པོ་ཡོན་ཏན་དང་ལྡན་པའི་མི་ནི་རྣམ་པ་གསུམ་དུ་གནས་ཏེ། དག་པ་དང་མ་དག་པ་དང་དེ་གཉིས་འདྲེས་པའོ། །དང་པོ་ནི་རྣམ་དག་ཅེས་བྱ་བ་ནུས་པ་ལེགས་པར་སྐྱེས་པའོ། །
གཉིས་པ་ནི་མཉེས་བྱེད་ཅེས་བྱ་བ་ནུས་པ་མ་སྐྱེས་པའོ། །གསུམ་པ་ནི་གསལ་བྱེད་ཅེས་བྱ་བ་བར་མ་སྟེ་ནུས་པ་ཅུང་ཟད་སྐྱེས་ཤིང༌། བསྟན་བཅོས་ཀྱི་དོན་རིག་པའོ། །ཡང་ན་མཉེས་བྱེད་ཅེས་པ་སྔགས་དང་རྣལ་འབྱོར་ལ་གོམས་ཤིང་མཉེས་པར་བྱེད་པའོ། །ཡོན་ཏན་དང་ལྡན་པའི་མི་བསྟན་བཅོས་ཀྱི་དོན་རིག་པ་ནི་གསལ་བྱེད་དེ། སྒྲོན་མ་དང་འདྲ་བས་སེམས་ཅན་གྱི་དོན་གྱི་བྱ་བ་ནུས་པའོ། །ཞེས་ཀོང་ཀ་ན་པའི་དགོངས་པ་དཔའ་བོ་རྡོ་རྗེས་བཤད་པ་ལྟར་རོ། །དྲུག་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། སློབ་མ་ཡོངས་སུ་བརྟག་པ་སྟེ་སློབ་མ་མཆོག་དམན་གྱི་མཚན་ཉིད་དང༌། སྡོམ་པ་སྟེ་དམ་ཚིག་བརྒྱད་ཀྱི་ཆོ་གའི་ལེའུ་སྟེ་ཉི་ཤུ་རྩ་དྲུག་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས། ལེའུ་ཉི་ཤུ་རྩ་དྲུག་པའི་བཤད་པའོ།། ༈ །།ལྔ་པ་སྤྲོས་བཅས་ཀྱི་སྤྱོད་པ་རྒྱས་པར་བཤད་པ་ལ་གཉིས། སྤྱོད་པ་སྤྱིའི་རྣམ་པར་བཞག་པ་དང༌། སྤྲོས་བཅས་ཀྱི་སྤྱོད་པ་ལེའུ་གསུམ་གྱིས་བསྟན་པའོ། །དང་པོ་ནི། སྤྱིར་སྤྱོད་པ་བྱེད་པ་ལ་སྐབས་གཉིས་ཏེ། ཐུན་མོང་གི་དངོས་གྲུབ་འགྲུབ་པ་ལ་བོགས་འབྱིན་པ་བསྐྱེད་རིམ་པའི་སྤྱོད་པ་དང༌། མཆོག་གི་དངོས་གྲུབ་མྱུར་དུ་འགྲུབ་པ་ལ་བོགས་འབྱིན་པའི་རྫོགས་རིམ་པའི་སྤྱོད་པའོ། །བསྐྱེད་རིམ་པའི་སྤྱོད་པ་ནི། ལྷའི་རྣལ་འབྱོར་ཤིན་ཏུ་བརྟན་པ་ལ་སོགས་པའི་སྐབས་ནས་བྱེད་ལ། རྫོགས་རིམ་པའི་སྤྱོད་པ་བྱེད་པའི་སྐབས་གསུམ་ནི་གཞན་དུ་རྒྱས་པར་བཤད་ཟིན་ཏོ། །རྒྱུད་འདིའི་
སྐོར་ནས་ནི་ཀུན་སྤྱོད་ལས། དང་པོར་མཉམ་གཞག་རྣལ་འབྱོར་པས། །འབད་དེ་ནུས་པ་བསྐྱེད་པར་བྱ། །ནུས་པ་སྐྱེད་པའི་རྗེས་ཐོགས་ལ། །ཡིད་ལ་འདོད་པའི་བརྟུལ་ཞུགས་སྤྱོད། །སེམས་ཅན་རྗེས་སུ་གཟུང་བའི་རྒྱུར། །དཔའ་བོ་ཆེན་པོ་རྒྱུ་བར་བྱ། ཞེས་གསུངས་ལ་སྡོམ་འབྱུང་དང་ཁ་སྦྱོར་ལས་ཀྱང་དྲོད་ཐོབ་ནས་སྤྱོད་པ་བྱ་བར་བཤད་དེ། ཉེར་དགུ་པར། ཇི་སྲིད་དྲོ་བའི་བྱ་བ་དག །མངོན་པར་བརྩོན་པས་རྟོགས་པར་བྱ། ཞེས་གསུངས་པ་འཆད་པའོ། །དྲོད་ཐོབ་པ་ནི་སྦྱོར་ལམ་བཞིའི་ཡ་གྱལ་གྱི་དྲོད་ལ་ལྭ་བ་པས་བཤད་ལ། མན་སྙེ་ལས། དྲོད་ནི་རྣལ་འབྱོར་གྱི་མཐུ་སྟེ་གང་ལས་འདི་རྣལ་འབྱོར་ལ་དགའ་བས་རབ་ཏུ་མགུ་བར་འགྱུར་བ་དང༌། གླགས་ཚོལ་བ་རྣམས་ཀྱིས་ཀྱང་འདི་ལ་མི་བཟོད་པ་དང༌། ཚར་གཅོད་པ་དང་རྗེས་སུ་འཛིན་པར་ནུས་པར་འདི་རྣམས་འགྱུར་བ་དང༌། གྲང་བ་དང་རླུང་ལ་སོགས་པ་རྣམས་ཀྱིས་ཟིལ་གྱིས་མི་ནོན་པའོ། །ཞེས་ནུས་པ་ཁྱད་པར་ཅན་ཐོབ་པ་ལ་འཆད་དོ། །སྤྱོད་པ་ནི་གསུམ་སྟེ་སྤྲོས་བཅས་དང༌། སྤྲོས་མེད་དང༌། ཤིན་ཏུ་སྤྲོས་མེད་ཀྱི་སྤྱོད་པའོ། །འདི་གསུམ་གྱི་མཚན་ཉིད་གཞུང་གཞན་དུ་མི་གསལ་ལ། སྤྱོད་བསྡུས་ནས་རྒྱས་པར་བཤད་དོ། །མན་སྙེ་ལས་སྤྱོད་བསྡུས་ལ་བརྟེན་ནས་འདིའི་སྤྱོད་པ་གསུམ་འཆད་པ་ནི་ལེགས་པས། སྤྲོས་བཅས་ནི་དཀྱིལ་འཁོར་གྱི་ལྷ་གྲངས་དང་མཉམ་པའི་རྣལ་འབྱོར་པ་ཕོ་མོ་ལྷ་རང་རང་གི་ཆས་སུ་ཞུགས་པ་འདུས་ནས། སྒྲུབ་ཐབས་བསྒོམས་པའི་མཐར་ལག་པའི་ཕྱག་རྒྱ་དང༌། དེའི་ལན་
དང་། གླུ་དང་དེའི་ལན་དང༌། གར་དང་དེའི་ལན་གྱི་སྤྲོས་པ་རྒྱས་པ་དང་བཅས་པས་འདོད་ཡོན་ལ་སྤྱོད་པའོ། །སྤྲོས་མེད་ནི་ལག་པའི་ཕྱག་རྒྱ་ལ་སོགས་པའི་སྤྲོས་པ་རྒྱ་ཆེན་པོ་རྣམས་བཞག་ནས། འདོད་ཡོན་ལ་སྤྱོད་པ་ཡིན་ཏེ། དེ་ལ་ནི་རྣལ་འབྱོར་ཕོ་མོ་ལྷ་གྲངས་དང་མཉམ་པ་རྒྱས་པ་དང༌། ཕྱག་རྒྱ་མ་ལྔའམ་བཞི་དང་ལྷན་ཅིག་བྱེད་པ་འབྲིང་དང༌། གཅིག་དང་ལྷན་ཅིག་བྱེད་པ་བསྡུས་པ་སྟེ་གསུམ་བཤད་དོ། །དེ་གཉིས་ནི་ལས་རྒྱ་བརྟེན་ནས་སྤྱོད་པ་བྱེད་པའོ། །ཤིན་ཏུ་སྤྲོས་མེད་ནི་ཕྱིའི་སྤྲོས་པ་ཀུན་བཞག་ནས་ཡེ་ཤེས་ཀྱི་ཕྱག་རྒྱ་ཙམ་ལ་བརྟེན་ནས་ཕྱག་རྒྱ་ཆེན་པོ་སྒོམ་པར་བྱེད་པ་སྟེ། འདི་ལ་བྷུ་སུ་ཀུའི་སྤྱོད་པ་ཞེས་ཀྱང་ཟེར་རོ། །ཡི་གེ་དང་པོ་ལ་བྷུཉྫ་ན་ཞེས་ཡི་གེ་བསྣན་པའི་ངེས་ཚིག་གིས་བཤད་ན་ཟས་ཟ་བ་དང༌། སུ་ཏ་ན་ཞེས་སྦྱར་ཏེ་བཤད་ན་གཉིད་ལོག་པ་དང༌། ཀུ་ཊི་ས་ར་ཞེས་སྦྱར་ཏེ་བཤད་ན་བཤང་གཅིའི་ཕྱིར་འགྲོ་བའི་འཆག་པ་སྟེ། འདུ་ཤེས་དེ་གསུམ་ཙམ་མ་གཏོགས་པ་འདུ་འཛི་སྤོང་ཞིང༌། ལུས་དང་ཚོར་བ་དང་ཡུལ་དང་དབང་པོ་གང་ལ་ཡང་མི་སེམས་པར། གཉིད་དང་འོད་གསལ་བསྲེས་པ་ཉིད་སྐྱོང་བར་བྱེད་པའོ། །ཁ་ཅིག་བྷུ་ཀྟཱ་ཞེས་སྦྱར་ན་ཟ་བ་དང་ཞེས་འཆད་དོ། །སྤྱོད་པ་བྱེད་པ་འདི་ལ་ཤ་ཟ་བཞིན་དུ་འཁྱམས་ཏེ་སྤྱོད་པ་བྱེད་པ་དང༌། ཁྱིམ་སྤོང་མི་ནུས་ན་རང་གི་ཁྱིམ་དུ་སྤྱོད་པ་བྱེད་པ་གཉིས་གསང་བ་གྲུབ་པ་ལས་གསུངས་ལ། སྡོམ་འབྱུང་ལས་ཀྱང་འདབ་མ་བསྐྱོད་པ་བཞིན་དུ་འཁྱམ་པ་དང༌། དུར་ཁྲོད་དང་ཤིང་གཅིག་ལ་སོགས་པར་བྱེད་པ་དང༌། རང་གི་ཁྱིམ་
ལ་སོགས་པར་བྱེད་པ་གསུམ་གྱི་ནང་ནས། གང་འདོད་པ་ཅིག་བྱ་བར་གསུངས་པས། གནས་མང་པོར་རྒྱུ་བ་ཅིག་ངེས་པར་དགོས་པ་མིན་ནོ། །ཁ་སྦྱོར་ལས་ཕྱོགས་ལས་རྣམ་རྒྱལ་གྱི་སྤྱོད་པ་དང༌། ཀུན་དྷར་རམ་ཨ་བ་དྷཱུ་ཏཱིའི་སྤྱོད་པ་དང༌། སྨྱོན་པའི་བརྟུལ་ཞུགས་ཀྱི་སྤྱོད་པ་ཞེས་གསུངས་པ་ཡང་སྤྱོད་པ་གསུམ་གྱི་ནང་དུ་འདུ་བ་ཡིན་གྱི་ལོགས་པ་མིན་ནོ། །བཤད་པ་ལྷག་མ་ནི་གཞན་དུ་རྒྱས་པར་བཤད་ཟིན་པས་མ་སྤྲོས་སོ། །ལེའུ་གསུམ་གྱིས་སྤྲོས་བཅས་དང༌། སོ་བརྒྱད་པས་སྤྱོད་པ་གཞན་གཉིས་སྟོན་ཚུལ་ནི་གཞུང་གི་སྐབས་སུ་བཤད་པར་བྱའོ། །གཉིས་པ་ལ་གསུམ། བརྟུལ་ཞུགས་ཀྱི་སྤྱོད་པ་མཆོད་གཏོར་དང་བཅས་པ་དང༌། ནང་གི་སྦྱིན་སྲེག་རིགས་གཅིག་དང་ལྡན་པའི་ཆོ་ག །ཕོ་ཉའི་མཚན་ཉིད་དང་དྲོད་དམ་ནུས་པ་ཐོབ་པའི་གནས་སྐབས་ཀྱི་ཆོ་གའོ། །དང་པོ་ལ་གསུམ། བཤད་པར་དམ་བཅའ་བ། བཤད་པ་དངོས། ལེའུ་ཡི་མཚན་བསྟན་པའོ། །དང་པོ་ནི། ཉེར་དྲུག་པའི་རྗེས་དེ་ནས་བཤད་པར་བྱའོ་ཞེས་སྦྱར་རོ། །གང་ན་དཔའ་བོ་སྟེ་རྣལ་འབྱོར་པའི་ཕྱག་རྒྱ་རིགས་ཀུན་ལ་སྤྱོད་པའི་ཆས་འཇུག་རུས་རྒྱན་ལ་སོགས་པའི་བརྟུལ་ཞུགས་སོ། །དཔའ་བོ་དེ་ཇི་འདྲ་ཞིག་ཅེ་ན། རྣལ་འབྱོར་མ་ཀུན་གྱི་སྒྲུབ་པ་པོའོ། །གཉིས་པ་ལ་གཉིས། སྤྱོད་པ་དང་བརྟུལ་ཞུགས་ལ་སྤྱད་ཚུལ། གཏོར་མའི་ཆོ་གའོ། །དང་པོ་ལ་གསུམ། ཕོ་ཉ་བཙལ་ནས་དེ་ལ་སྤྱོད་པའི་ཚུལ། ཆོ་ག་དང་བརྟུལ་ཞུགས་ཇི་ལྟ་བུས་སྤྱོད་པ་བྱ་བ། གཙང་སྦྲའི་མཚན་པ་ཕན་
ཡོན་དང་བཅས་པའོ། །དང་པོ་ནི། རྣལ་འབྱོར་མ་རྣམས་སྒྲུབ་པའི་ཚུལ་ཇི་ལྟར་ཡིན་ཞེ་ན། རྣལ་འབྱོར་མ་རྣམས་ཀྱི་སྔར་བཤད་པའི་མཚན་ཉིད་ཀྱི་དབྱེ་བ་སྟེ་ཁྱད་པར་རྣམས་ཤེས་པར་བྱས་ནས། རྣལ་འབྱོར་མ་རྣམས་བསྒྲུབ་པོ། །དགོས་པ་གང་གི་དོན་དུ་ཞེ་ན། ཕོ་ཉ་ལ་བརྟེན་ནས་དངོས་གྲུབ་མྱུར་དུ་འཇུག་པ་ཐོབ་པར་བྱ་བའི་དོན་དུའོ། །མྱུར་དུ་དངོས་གྲུབ་འཇུག་པར་འགྱུར། །ཞེས་འབྱུང་ངོ༌། །ཕོ་ཉ་ཚོལ་བའི་ཚུལ་ནི། རྣལ་འབྱོར་པ་དེ་སྐྱེ་བོ་ཚོགས་པའི་གྲོང་དང་གྲོང་དུ་སོང་ནས། དེ་ན་གནས་པའི་ཕོ་ཉའི་གཟུགས་ཏེ་ཁ་དོག་དང་དབྱིབས་ལ་སོགས་པ་ཡིས་ནི་མཚོན་པ་སྟེ་ཤེས་པར་བྱའོ། །འོ་ན་ཕོ་ཉ་མོ་བསྟེན་པར་དཀའ་འམ་སླ་སྙམ་ན། ཕོ་ཉ་མོ་ནི་རལ་གྲིའི་སོ་དང་འདྲ་སྟེ། རལ་གྲིའི་སོ་ལ་བརྟེན་པ་ན་འཇིགས་ཤིང་ཡིད་མ་ཡེངས་པ་དགོས་པ་དེ་བཞིན་དུ་ཕོ་ཉ་མོ་དང་འགྲོགས་པ་ལེགས་ན་སྡིག་པ་དག་པར་བྱེད་ཅིང༌། བསོད་ནམས་འཕེལ་པར་བྱེད་པས་སྒྲུབ་པ་པོས་ནི་དངོས་སྒྲུབ་འཐོབ་ལ། བསྟེན་པ་ཉེས་ན་ཕན་ཡོན་མི་འཐོབ་པར་མ་ཟད་ཉེས་དམིགས་ཤིན་ཏུ་ཆེ་སྟེ། ཧེ་རུ་ཀ་མངོན་འབྱུང་ལས། རྣལ་འབྱོར་མེད་པར་རྣལ་འབྱོར་ཆོས། །ཕྱག་རྒྱ་ལ་ནི་བགྲོད་གྱུར་དང༌། ཡེ་ཤེས་མེད་པར་ཡེ་ཤེས་ཚུལ། །དམྱལ་བར་འགྲོ་བར་ཐེ་ཚོམ་མེད། ཅེས་གསུངས་ཏེ་ཡུལ་རྟེན་ཀུན་མཚན་ཉིད་མ་ཚང་བར་དེ་ལྟར་བྱེད་པ་ལ་ཉེས་དམིགས་ཤིན་ཏུ་ཆེ་བར་གསུངས་པ་རྣམས་ཤེས་དགོས་སོ། །དེ་ལྟར་ཕོ་ཉ་ལ་བརྟེན་ནས་སྤྱོད་པ་བྱེད་པ་དེ་ནི། ངག་གི་བཟླས་བརྗོད་དང་བསྐྱེད་རིམ་གྱི་བསམ་གཏན་དང་ཕྱིའི་མཆོད་པ་མེད་པར་
ཡང་མྱུར་བ་ཉིད་དུ་སྟེ་ཚེ་འདི་ཉིད་ལ་འགྲུབ་པར་འགྱུར་བས། སྒྲུབ་པ་པོས་ནང་གི་སྔགས་བཟླས་པ་དང༌། ཕྱག་རྒྱ་ལ་བརྟེན་ནས་ནང་གི་མཆོད་པ་ཉིད་ལ་རབ་ཏུ་འཇུག་སྟེ། འདི་ལས་གཞན་པ་སྟེ་མཆོག་ཏུ་གྱུར་པའི་ལྷ་མཉེས་པའི་མཆོད་པ་མེད་དོ། །དེ་ལྟར་བསྟན་པ་ནི་ཕ་རྒྱུད་མ་རྒྱུད་ཀྱི་བསྟན་བཅོས་ཀྱི་ངེས་པ་སྟེ་མི་འགྱུར་བ་ཡིན་ནོ། །དེ་ལྟར་ཤེས་པ་ཡིས་ཕོ་ཉ་ལ་བརྟེན་པའི་ལམ་ལ་དགའ་བ་རྣམས་ཀྱི་སྒྲུབ་པ་པོ་ནི་དངོས་གྲུབ་སྒྲུབ་པ་ལ་བརྩོན་པ་ཡིན་ནོ། །རིག་པའི་སྔགས་དང་ཕྱག་རྒྱར་ཡང་དག་པར་ལྡན་པའི་སྒྲུབ་པ་པོ་ཧེ་རུ་ཀའི་རྣལ་འབྱོར་ལ་ཤིན་ཏུ་མཉམ་པར་བཞག་པས། ཙཱ་རུ་སྟེ་བདུད་རྩིའི་བཟའ་བཏུང་རྟག་ཏུ་སྟེ་ཉིན་རེ་ཞིང་ཕོ་ཉ་དང་ལྷན་ཅིག་ཏུ་བཟའ་ཞིང་བཏུང་བར་བྱ་བ་དང༌། མི་བསྐྱོད་པ་ལ་སོགས་པའི་རིགས་ཀྱི་བུད་མེད་རྣམས་ཀུན་ལ་སོ་སོར་མི་འབྱེད་པར་རིགས་གཅིག་ཏུ་བྱས་ཏེ་ལོངས་སྤྱོད་པར་བྱེ་བ་དང༌། འདི་ནི་བཟའ་བར་བྱ་བ་དང་འདི་ནི་བཟའ་བར་བྱ་བ་མིན་པར་མི་བརྟག་པ་དང༌། དེ་བཞིན་དུ་བསྲུང་བྱ་དང་བགྲོད་བྱ་ཡིན་མིན་དུ་བརྟག་པར་མི་བྱའོ། །དེ་ཁོ་ན་ཉིད་དབྱེར་མེད་པ་དེ་ཡིས་ནི་སྟེ་རྒྱུ་མཚན་དེས་ན། ཕྱག་རྒྱའི་རིགས་སོ་སོར་བྱེད་པ་དང༌། བཟའ་བྱ་ཡིན་མིན་སོགས་དེ་ཁོ་ནར་དབྱེར་མེད་ལ། དེ་ལྟར་དུ་རྟོགས་པའི་རྣལ་འབྱོར་པ་ཆེན་པོས་ཀྱང་དེ་དང་མཐུན་པར་བྱེད་པའོ། །ཕོ་ཉ་མོ་གཉིས་ནི་ཞེས་སོགས་ལ་ཀོང་ཀ་ན་པ་ནི། འཇིག་རྟེན་པ་དང་འཇིག་རྟེན་ལས་འདས་པའི་དངོས་གྲུབ་གཉིས་ཕོ་ཉ་མོ་ལ་བརྟེན་ནས་
སྒྲུབ་པའི་དངོས་གྲུབ་སྒྲུབ་པའི་ཆོ་ག་ལ་སྤྱོད་པའི་ཚེ་ནི། ཕོ་ཉ་ལ་སྤྱོད་པའི་དཔལ་ཧེ་རུ་ཀའི་རྣལ་འབྱོར་གཅིག་པུ་ཁོ་ན་མཆོག་ཏུ་གྱུར་པ་ཡིན་ནོ། །ཡང་ན་དེའི་ཚེ་ཕོ་ཉ་མོ་རྣལ་འབྱོར་མ་རབ་ཏུ་བསྐུལ་བས་དངོས་གྲུབ་སྒྲུབ་པ་སྟེ་འགྲུབ་པ་དང་ཉེ་བར་འགྱུར་བས་རྣལ་འབྱོར་དེ་མཆོག་ཡིན་ནོ། །ཞེས་བཞེད་དེ་ལང་ཀ་དང་དཔའ་བོ་ཡང་དེའི་རྗེས་སུ་འབྲང་སྟེ། ཕོ་ཉ་མོ་ཡི་སྒྲུབ་པ་གཉིས་ཞེས་པ་དང་མཐུན་ནོ། །རང་དགའ་ཉིད་དང་ཞེས་པ་ནི་སྒྲུབ་པ་པོ་རང་གང་ལ་དགའ་བའི་ཕོ་ཉ་དང་ལྷན་ཅིག་ཏུ་སྒྲུབ་པའོ། །བླ་མ་དམ་པ་གཅིག་ནས་གཅིག་ཏུ་བརྒྱུད་པའི་རིམ་གྱིས་འཐོབ་པའི་དབང་བསྐུར་བས། གང་གི་ཚེ་སྔགས་དང་ལེགས་པར་ལྡན་པར་གྱུར་པ་དེ་ཡི་ཚེ། བསྟེན་པར་བྱ་བའི་ཕོ་ཉ་རྣམས་སུ་ཡང་དག་པར་བཤད་དོ། །དེ་འདྲ་བའི་ཕྱིའི་རྣལ་འབྱོར་མ་དང་ཡང་དག་པར་སྦྱོར་བའི་ངང་ཚུལ་ཅན་དུ་གྱུར་པའི་ཚེ། ལྷན་ཅིག་སྐྱེས་པའི་ཡེ་ཤེས་ལེགས་པར་རམ་ཡང་དག་པར་རྫོགས་པར་འགྱུར་རོ། དེ་ནི་བཅོམ་ལྡན་འདས་ཀྱི་ཡེ་ཤེས་ཀྱི་རྒྱུ་དང་བྱེད་པ་ཡིན་ཏེ། དཔལ་ཧེ་རུ་ཀ་ནི་དེ་ལས་སྐྱེས་པ་ཡིན་པའི་ཕྱིར་རོ། །ཞེས་འགྲེལ་པ་རྣམས་ལས་འཆད་དོ། །ལྭ་བ་པས་ནི། དེ་ཉིད་དབྱེར་མེད་དུ་རྟོགས་པ་དེ་ཡིས་ནི། དབང་བསྐུར་བའི་དོན་དུ་རྒྱན་ཐམས་ཅད་ཡོངས་སུ་རྫོགས་པའི་ཕོ་ཉ་མོ་གཉིས་བསྒྲུབ་པར་བྱ་སྟེ། གཅིག་ནི་གསང་དབང་སྤྱིན་པའི་དོན་དང༌། གཉིས་པ་ནི་ཤེས་རབ་ཡེ་ཤེས་ཀྱི་དོན་དུའོ། །དེ་གཉིས་ལ་བརྟེན་ནས་དབང་བསྐུར་ཏེ་སྤྱོད་པ་བྱེད་པའི་རྗེས་སུ་གནང་བ་བྱིན་པ་དེ་ལ། དེའི་རྗེས་སུ་བླ་མས་ཕོ་
ཉ་གཅིག་བྱིན་ཏེ་སྤྱོད་པ་བྱེད་པའི་སློབ་མ་བདག་གཉིད་ཆེན་པོས། ཧེ་རུ་ཀའི་ཆས་སུ་ཞུགས་པའི་བརྟུལ་ཞུགས་ཀྱི་གཟུགས་ཀྱིས་ཕྱག་རྒྱ་ཆེན་པོའི་དངོས་གྲུབ་ཀྱི་ཆོ་གའི་དོན་དུ་ཕོ་ཉ་ལ་བརྟེན་ནས་བསྒྲུབ་པར་བྱའོ། །དེ་ལྟར་བླ་མའི་མན་ངག་གི་རིམ་པས་དབང་ཐོབ་པ་ནི། རྣལ་འབྱོར་མ་རྣམས་ཀྱིས་གསུངས་པའི་ཡེ་ཤེས་ཡང་དག་པར་རྫོགས་པའི་ལུས་སུ་སྐྱེ་བ་སྟེ། སངས་རྒྱས་ཐམས་ཅད་ཀྱིས་ཕྱག་བྱ་བར་འོས་པའོ། །ཞེས་འཆད་དེ། ཕོ་ཉ་གཉིས་ཞེས་སོགས་ཀྱི་རྐང་པ་གསུམ་འོག་གི་དབང་བསྐུར་བ་དང་སྦྱར་ནས་འཆད་པའོ། །བླ་མ་སྔ་མ་རྣམས་ཕོ་ཉ་གཉིས་ཞིང་སྐྱེས་དང་ལྷན་སྐྱེས་དང༌། ཕོ་ཉ་གཅིག་པུ་ཞེས་པ་སྔགས་སྐྱེས་ལ་འཆད་དོ། །གཉིས་པ་ལ་གཉིས། ཆོ་ག་ཇི་ལྟ་བུས་སྤྱོད་པ་བྱ་བ་དང༌། བརྟུལ་ཞུགས་ཇི་ལྟ་བུས་སྤྱོད་པ་བྱ་བའོ། །དང་པོ་ནི། སྤྱོད་པ་བྱེད་པའི་རྣལ་འབྱོར་པས་ཐོ་རངས་སྔ་བར་འོད་གསལ་གྱི་ངང་ནས་ལངས་ཏེ། ཐུགས་རྡོ་རྗེའི་བདག་ཉིད་ཀྱི་སེམས་ཐབས་ཤེས་ཀྱི་སྦྱོར་བ་དང་ལྡན་པས་དཀྱིལ་འཁོར་གྱི་འཁོར་ལོ་བསྒོམ་པར་བྱའོ། །ལུས་ལ་དཔའ་བོ་དྲུག་ལ་སོགས་པའི་གོ་ཆས་གོ་བསྐོན་པ་ལ་སོགས་པ་ཐམས་ཅད་བྱས་ནས་ནི། ལུས་ཐམས་ཅད་ལ་གནས་པར་ཀུན་ཏུ་སྤྱད་པ་སྟེ་གོ་ཆས་གཡོག་པར་བྱའོ། ཞེས་འཆད་དེ། ལུས་ལ་ཤིན་ཏུ་གོ་ཆ་ནི། །ལུས་ལ་གནས་པར་ཀུན་ཏུ་སྤྱད། ཅེས་འདོན་ནོ། །ལྭ་བ་པས། ཉིང་ལག་གི་ནི་བསྟན་བཅོས་རྣམས། །ལུས་ལ་གནས་པར་ཀུན་ཏུ་སྤྱད། ཅེས་
ཡན་ལག་ལས་འདས་པ་ཉིང་ལག་ཏུ་བྱས། ཤསྟ་ཎི་ཞེས་པ་མཚོན་ཆ་དང༌། བསྟན་བཅོས་གཉིས་ལ་འཇུག་པ་བསྟན་བཅོས་སུ་མཛད་ནས། ལུས་ལ་གནས་པའི་ཉིང་ལག་སྟེ་ལུས་ཀྱི་ཆ་ཤས་བྱང་སེམས་དཀར་པོ་སོགས་ཀྱི་བདུད་རྩི་ལྔ་ལ་ཀུན་ཏུ་སྤྱད་པ་ནི། བགེགས་ཐམས་ཅད་བཟློག་པ་དང༌། ཚོགས་གཉིས་འཕེལ་བའི་ཕྱིར་དུའོ། ། བསྟན་བཅོས་ནི་རྣལ་འབྱོར་གྱི་རིམ་པ་སྟོན་པའི་བསྟན་བཅོས་ཀྱིས་ཉེ་བར་མཚོན་ཞིང་བསྟན་པ་ཡིན་ལ། དེ་ཀུན་ལ་སྤྱོད་པ་ནི་ཀུན་སྤྱད་དེ། དེས་ལུས་དག་པར་བྱེད་པ་ནི། ལུས་ལ་ལྷ་བཅུ་བདུན་སོགས་འགོད་པ་དང་ལུས་དཀྱིལ་སྒོམ་པ་ལ་བཤད་དོ། །སྔར་བཤད་པ་དེ་ལྟར་རྟག་ཏུ་བསྲུང་བ་བྱས་པའི་སྔགས་པས་སྔགས་ནི་བརྗོད་པ་སྟེ་བཟླས་པར་བྱའོ། །སྔགས་བརྗོད་པ་སྟེ་བཟླས་ནས་སུ་རྣལ་འབྱོར་ནི་བདེ་ཆེན་གྱི་ཏིང་ངེ་འཛིན་ནོ། །དེ་སྐྱེ་བའི་གནས་ནི་བུད་མེད་རྣམས་སོ། །དེ་ལ་ངེས་པར་བསྟན་པ་ནི་གོ་ཆ་བྱེད་ཚུལ་བསྟན་ནས་གོ་བསྐོན་པ་ངེས་པར་བྱའོ། །སྔར་བཤད་པའི་མཚོན་ཆ་སྟེ་གོ་ཆ་རྣམས་བགོ་བ་ལ་འགོམ་པ་སྟེ་འདའ་བར་མི་བྱ་བའམ་དམ་ཚིག་རྣམས་བསྐྱང་བར་བྱའོ། །དམ་ཚིག་གཅིག་པ་ཅན་བདེ་མཆོག་ལ་སོགས་པའི་རྣལ་འབྱོར་པ་རྣམས་ལ་ཁྲོ་བ་དང་སྨད་པར་མི་བྱ་སྟེ། འཁོར་ལོ་སྡོམ་པར་དབང་བསྐུར་བའི་བླ་མ་དང་སློབ་མ་དང་ཕོ་ཉ་ལ་ཞེ་སྡང་བསྐྱེད་ན། བྱང་ཆུབ་ཏུ་སེམས་བསྐྱེད་ནས་བསྐལ་པ་བྱེ་བར་བསོད་ནམས་ཀྱི་ཚོགས་བསགས་པ་ཡང་སྐད་ཅིག་ལ་འཇོམས་པས། དེ་ལྟ་བུ་ལ་སྡང་བ་སྡོམ་པར་མངོན་པར་