ཤོག་ལྷེབ་ ༨༠༡ ནས་ ༩༠༩ བར།
ཐུན་མཚམས་གསུམ་དུ་ཉི་མ་བདུན་གྱི་བར་དུ་སྦྱིན་སྲེག་བྱའོ། །དེ་བཞིན་དུ་རྒྱལ་རིགས་དག་ལ་སྦྱིན་སྲེག་བདུན། རྗེའུ་རིགས་ལ་སྦྱིན་སྲེག་ལྔ༌། དམངས་རིགས་ལ་ནི་སྦྱིན་སྲེག་གསུམ། ཐ་མ་གདོལ་པ་ལ་སོགས་པ་ལ་ནི་སྦྱིན་སྲེག་གཅིག་བྱའོ། །དེ་ལྟར་དཔའ་བོས་རིགས་ཀྱི་རིམ་གྱིས་དུས་ཟླ་བ་གཅིག་ནི་ཞེས་པ་སྔར་ལས་ཚོགས་རྣམས་ཉི་མ་བདུན་གྱིས་འགྲུབ་པར་བཤད་པ་དང་མི་མཐུན་པས། རྒྱ་དཔེ་དང་འགྲེལ་པར། སྟན་གཅིག་ལ་ནི་མཉམ་བརྟེན་ནས། །ཞེས་འབྱུང་བ་ལྟར་ཏེ་སྟན་དེ་གདན་གཅིག་ལ་ཡབ་ཡུམ་གཉིས་ཀ་མཉམ་པར་བརྟེན་ནས་སྔགས་ཀྱི་ནུས་པ་སྒྲུབ་པ་པོས་བྲམ་ཟེ་ལ་སོགས་པའི་འགྲོ་བ་རིགས་ལྔ་པོ་ཐམས་ཅད་དགུག་པར་བྱའོ། །གསུམ་པ་ནི། དཔའ་བོ་སྟེ་སྒྲུབ་པ་པོས་ཆོ་ག་སྔ་མ་སྟེ་ལྷའི་རྣལ་འབྱོར་དང་སྦྱིན་སྲེག་གི་ཆོ་ག་སྔོན་དུ་འགྲོ་བས། གཟུགས་སྒྲ་སོགས་ཀྱི་འདོད་ཡོན་ལ་བརྟེན་པའམ། རང་གང་དབང་དུ་བྱེད་འདོད་པའི་བསྒྲུབ་བྱ་དབང་དུ་བྱེད་པའི་ཐབས་བསྟེན་ན་དབང་དུ་བྱ་བ་ཐོབ་པར་འགྱུར་རོ། །ས་སྟེང་དུ་འདོད་པའི་དབང་ཕྱུག་སྟེ་དབང་ཕྱུག་ཆེན་པོ་བཞིན་དུ་བསོད་ནམས་ཀྱི་དཔལ་དང་ལྡན་ཞིང༌། གཟུགས་ལ་སོགས་པའི་སྐལ་བ་བཟང་པོར་སྐྱེ་བར་འགྱུར་ལ། སྒྲུབ་པ་པོ་ནི་མཁའ་འགྲོ་མ་རྣམས་ཀྱི་ཡིད་དུ་འོང་བར་འགྱུར་བར་ཐེ་ཚོམ་མེད་དོ། །ལེའུ་འདིར་རྫོགས་རིམ་བརྟན་པོར་སོང་བ་ན་དབང་དུ་བྱ་བ་ལ་སོགས་པའི་ལས་རྣམས། ཞག་
བདུན་ཚུན་ཆད་ཀྱིས་འགྲུབ་མི་འགྲུབ་བརྟགས་པས། འགྲུབ་པར་སྣང་ན་ཕྱག་རྒྱ་ཆེན་པོའི་དངོས་གྲུབ་མྱུར་དུ་འགྲུབ་པའི་མཚན་མ་རྟོག་པ་སྟོན་ནོ། །གོང་མ་རྣམས་བསྐྱེད་རིམ་བརྟན་པ་ན་ཡང་དེ་ལྟར་རྟོགས་པར་བཞེད་དོ། །གསུམ་པ་ནི། དཔའ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྒྱལ་རིགས་ལ་སོགས་པའི་རིགས་ལྔ་དང་ཕྱག་རྒྱ་རིགས་ལྔ་པོ་དབང་དུ་བྱ་བ་དང༌། དེ་ལ་བརྟེན་ནས་ཕྱག་རྒྱ་ཆེན་པོ་བསྟེན་པའི་ལེའུ་སྟེ། བཞི་བཅུ་པའོ།། །།འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས། ལེའུ་བཞི་བཅུ་པའི་བཤད་པའོ།། ༈ །།གསུམ་པ་ཡི་གེ་ཉེར་བཞིའི་དཀྱིལ་འཁོར་དགོད་པའི་ལེའུ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུ་ཡི་མཚན་བསྟན་པའོ། །དང་པོ་ནི། ལེའུ་བཞི་བཅུ་པ་བཤད་པ་དེ་ནས་ལས་རྣམས་ཀྱི་རབ་མཆོག་རྫོགས་རིམ་ལ་གནས་པའི་དངོས་གྲུབ་ཐམས་ཅད་འགྲུབ་པར་སྟོན་པ་སྔགས་ཀྱི་རྣལ་འབྱོར་གང་གིས་ཤེས་ནས་སྒྲུབ་པ་པོས་བསྒྲུབས་པས་འགྲུབ་པ་བཤད་པར་བྱའོ། །འདི་བསྐྱེད་རིམ་པས་ཀྱང་སྒྲུབ་མོད་ཀྱང༌། འདིར་རྫོགས་རིམ་པས་མཆོག་གི་དངོས་གྲུབ་འགྲུབ་པའི་མཚན་མ་རྟོག་པ་ཡིན་པས། འགྲེལ་པ་གསུམ་ལས་རྫོགས་རིམ་པ་ལ་སྦྱར་རོ། །གང་གིས་ཏེ་དེས་སྔགས་ཀྱི་སྒྲུབ་པ་རྙེད་དཀའ་ཞིང་གསང་བར་གྱུར་པ་བཤད་པའི་རྒྱུད་ཕྱི་མ་དང༌། བླ་མའི་ཁ་ལས་ཤེས་པར་བྱ་བ་ཞེས་གསུང་ངོ༌། །གཉིས་པ་ལ་
གཉིས། བསྒྲུབ་པར་བྱ་བའི་ལས་ཀྱི་དབྱེ་བ། དེ་འགྲུབ་པའི་རྒྱུ་བསྟན་པའོ། །དང་པོ་ནི། བསྒྲུབ་པར་བྱ་བའི་ལས་ལ་ནི་ལས་ཆེན་བཅུ་གཉིས་ཏེ། དབང་དུ་བྱ་བ་དང་དགུག་པ་གཉིས་གཅིག་ཏུ་བྱས་པ་དང༌། མཛའ་བ་དབྱེ་བར་བྱ་བ་དང༌། བསད་པ་དང་བསྐྲད་པ་གཉིས་གཉིས་སུ་བྱས་པ་དང༌། ལ་སོགས་པས་ཞི་རྒྱས་གཉིས་བསྡུས་ཏེ་དེ་གཉིས་སོ་སོར་བྱའོ། །སེམས་རྨུགས་པར་བྱེད་པ་དང༌། རེངས་པར་བྱ་བ་དང༌། དྲན་པ་ཉམས་པར་བྱེད་པ་རྨོངས་པར་བྱེད་པ་གསུམ་དང༌། ཕུར་བུས་གདབ་པ་དང༌། ཚིག་གི་སྦྱོར་བ་ཁྱད་པར་ཅན་བྱེད་པ་འཕྲོག་པ་དང་ངག་ལྐུགས་པར་འགྱུར་བ་དང་རྣ་བ་འོན་པ་དང་དེ་བཞིན་དུ་མིག་ལོང་བ་སྟེ་བཞི་ནི་དབང་པོ་རེངས་པར་བྱེད་པ་ཞེས་གཅིག་ཏུ་བྱའོ། །མ་ནིང་ཉིད་དུ་བྱ་བ་དང་གཟུགས་ནི་སྣ་ཚོགས་པར་ཡོངས་སུ་འགྱུར་བ་སྟེ་བཅུ་གཉིས་སུ་བྱེད་པ་ནི་བླ་མ་གོང་མའི་ལུགས་སོ། །སྐལ་ལྡན་ལ་སོགས་པའི་ལུགས་ཀྱིས་དབང་དགུག་གཉིས་གཅིག །བསད་བསྐྲད་གཉིས་གཅིག །ཚིག་འཕྲོག་ལྐུགས་པར་འགྱུར་བ་གཅིག་ཏུ་བྱས་ནས་བཅུ་གཉིས་སུ་བྱེད་པར་མངོན་ནོ། །སྐབས་འདིར་ཞལ་བཞི་པ་ལ་སོགས་པའི་སྔགས་ཀྱིས་འཁྲུལ་འཁོར་ལ་བརྟེན་ནས་ལས་སྒྲུབ་པ་བཤད་དེ། ཚིག་མངས་སུ་དོགས་ནས་མ་བྲིས་སོ། །གཉིས་པ་ལ་གཉིས། མདོར་བསྟན་པ་དང༌། རྒྱས་པར་བསྟན་པའོ། །དང་པོ་ནི། ལས་ཆེན་བཅུ་གཉིས་པོ་འདི་དག་ནི་རྟག་ཏུ་སྒྲུབ་
པ་པོ་ཡིས་བསྒྲུབས་ན་ནི། འདོད་པའི་དངོས་གྲུབ་སྒྲུབ་པ་པོ་ལ་ནི་དྲན་པ་ཙམ་གྱིས་འགྲུབ་པར་འགྱུར་བར་ཐེ་ཚོམ་མེད་དོ། །འདི་ནི་གང་ཟག་རབ་ལ་དགོངས་ཏེ། འཁྲུལ་འཁོར་གྱིས་སྒྲུབ་པ་ནི་འབྲིང་པོ་དང༌། དམན་པའི་དབང་དུ་བྱས་པའོ། །གཉིས་པ་ལ་གསུམ། མཁའ་འགྲོ་མས་གནས་ཀུན་ཏུ་ཁྱབ་པར་བསྟན། གནས་ཀྱི་གཙོ་བོ་ངོས་གཟུང་བ། བསྒོམས་ཤིང་མཆོད་པས་བསྲུབ་པར་བསྟན་པའོ། ། དང་པོ་ནི། དྲན་པ་ཙམ་གྱིས་དངོས་གྲུབ་འཐོབ་པའི་ཆོ་ག་དེ་དག་གང་ཞེ་ན། ཡུལ་ཐམས་ཅད་ཀྱི་བླ་མ་སྟེ་གོང་མ་ནི། འཛམ་བུ་གླིང་གི་ཡུལ་གྱི་གནས་དང༌། ལ་སོགས་པས་ཉེ་བའི་གནས་ནས་ཉེ་བའི་དུར་ཁྲོད་ཀྱི་བར་བསྡུ་སྟེ། ཡུལ་ཉེར་བཞིའི་མཁའ་འགྲོ་མས་ནི། ཡུལ་ཐམས་ཅད་ཁྱབ་པར་གནས་སོ། །མཁའ་འགྲོ་མ་དེ་དག་ཀྱང་གང་ཞེ་ན། པུལླི་ར་མ་ལ་ཡ་ལ་སོགས་པའི་ཡུལ་དང་ཡུལ་དུ་མངོན་པར་སྐྱེ་བ། བདེ་བ་ཆེན་པོའི་ཡེ་ཤེས་དང་ལྡན་པའི་རང་རང་གི་དཔག་ཏུ་མེད་པའི་སྐྱེ་གནས་ཏེ། དོན་དམ་པའི་བྱང་ཆུབ་སེམས་ཀྱི་རྒྱ་མཚོའོ། །དེས་བསྐྱེད་པ་ཅི་ཞིག་ཅེ་ན། རྡོ་རྗེ་སྟེ་གཉིས་སུ་མེད་པའི་ཡེ་ཤེས་ཀྱི་རང་བཞིན་གྱི་དཀྱིལ་འཁོར་གྱི་གཙོ་མོ་རྣམས་བསྡུས་པར། རབ་གཏུམ་མ་ལ་སོགས་པ་དེ་རྣམས་ནི། རྡོ་རྗེའི་ལུས་ཀྱི་ཁམས་ཉེར་བཞིའི་ངོ་བོར་བསྟན་པའི་མཁའ་འགྲོ་མ་ཉེར་བཞི་རུ་བཤད་དོ། །བསྡུ་ན་དྲན་པ་ཙམ་གྱིས་ལས་ཀྱི་དངོས་གྲུབ་སྟེར་བའི་མཁའ་འགྲོ་མ་ནི། རབ་གཏུམ་མ་ལ་སོགས་པ་ཡིན་ནོ། །དེ་དྲན་པ་ཙམ་གྱིས་ཞི་ལ་སོགས་ཀྱི་དངོས་གྲུབ་སྟེར་ན་ནི། མཆོག་གི་
དངོས་གྲུབ་མྱུར་དུ་འགྲུབ་པའི་མཚན་མར་ཤེས་པར་བྱའོ། །གཉིས་པ་ལ་གསུམ། ཡུལ་ཉེར་བཞི་བསྟན་པ་དང༌། དེ་རྣམས་ཀྱི་རྣལ་འབྱོར་མའི་བྱིན་རླབས་འཇུག་ཚུལ། དེ་རྣམས་རྣལ་འབྱོར་མ་གང་གིས་བསྡུས་པའོ། །དང་པོ་ནི། ལེའུ་བཞི་པར་རྣལ་འབྱོར་མ་ཉེར་བཞི་མས་རིམ་ནས་བཟློག་སྟེ་བསྟན་པ་བཞིན་དུ། འདིར་དེ་དག་གི་གནས་ཉེར་བཞི་ཡང་བཟློག་སྟེ་སྟོན་པ་ནི། ཀུ་ལུ་ཏ་དང་མ་རུ་ཞེས་པ་མྱ་ངན་གྱི་ཡུལ་དང༌། སིན་དྷུའི་ཡུལ་དང་ན་ག་ར་དང༌། སུ་ཝརྞ་དྷི་པ་དང༌། སོ་རཥྚ་དང་། གྲྀ་ཧ་དེ་བ་ཏ་དང༌། པྲེ་ཏ་པུ་རི་དང༌། ཧི་མ་ལ་ཡ་དང༌། ཀཉྩི་དང༌། ལཾ་པ་ཀའི་ཡུལ་དང༌། ཀ་ལིང་ག་དང༌། ཀོ་ས་ལ་དང༌། ཏྲི་ཤ་ཀུ་ནེ་དང༌། ཨོ་ཏྲེ་དང༌། ཀ་མ་རཱུ་པ་དང༌། མཱ་ལ་ཝ་དང༌། དེ་བི་ཀོ་ཊི་དང༌། ར་མེ་ཤྭ་རི་དང༌། གོ་ད་བ་རི་དང༌། ཨརྦུ་ཏ་དང༌། ཨུ་རྒྱན་དང༌། ཛཱ་ལནྡྷ་ར་དང༌། པུ་ལླི་ར་མ་ལ་ཡ་སྟེ་སྐུའི་འཁོར་ལོ་ནས་བརྩམས་ནས། ཐུགས་ཀྱི་འཁོར་ལོའི་མཐར་ཐུག་པའོ། །སོགས་ཀྱི་གྲོང་མཐའ་དང་ཉེ་བའི་གྲོང་མཐའ་ལ་སོགས་པའི་མཐར་ཐུག་པ་བསྡུས་ཏེ་གནས་སུམ་ཅུ་རྩ་གཉིས་སོ། །གཙོ་མོ་ཉེར་བཞི་གནས་པའི་ཡུལ་ནི་འདི་དག་སྟེ། དཔའ་བོ་ཉེར་བཞིའི་གནས་ཀྱང་དེ་རྣམས་སོ། །གཉིས་པ་ནི། ཡུལ་ཉེར་བཞི་པོ་འདི་དག་གི་བུ་མོ་གང་ཐོད་པའི་དུམ་བུ་ལ་སོགས་པའི་དཔའ་བོ་དང་གཉིས་སུ་མེད་པ་སྟེ་སྙོམས་པར་འཇུག་པའི་རྣལ་འབྱོར་མ་དེ་ཀུན་ནི་རང་གི་འདོད་པ་ཙམ་གྱིས་གཟུགས་མི་འདྲ་བ་དུ་མ་སྤྲུལ་པ་ཅན་ནོ། །རྣལ་འབྱོར་མ་ཉེར་
བཞི་པོ་དེ་རྣམས་ཅིའི་ཕྱིར་དཀྱིལ་འཁོར་དུ་དགོད་པར་བྱ་སྙམ་ན། ཉེར་བཞི་པོ་འདི་རྣམས་ཕྱི་དང་ལུས་ཀྱི་དཀྱིལ་འཁོར་ལ་བཀོད་ནས་བསྒོམས་པས། ཡིད་ཀྱི་ཤུགས་ཀྱིས་ཏེ་ཡིད་ཀྱི་ཤུགས་ལྟར་ཤིན་ཏུ་མགྱོགས་པར་སོང་ནས་སྒྲུབ་པ་པོ་ལ་བྱིན་གྱིས་རློབ་པ་ལ་འཇུག་པ་ཡིན་ནོ། །འདི་རྣམས་བསྒོམས་པས་ཡུལ་ཁྱད་པར་ཅན་དེ་རྣམས་ན་གནས་པའི་དཔའ་མོ་དང་མྱུར་དུ་འཕྲད་ལ། དེ་ལ་བརྟེན་ནས་ལམ་ཚེགས་མེད་པར་ཆེས་ཤིན་ཏུ་མྱུར་བར་འགྱུར་རོ། །གསུམ་པ་ནི། རྣལ་འབྱོར་མ་དྲུག་ཅེས་པ་ནས་གཙོ་མོ་ཡིན་ཞེས་པའི་བར་ལ་ནཱ་རོ་པའི་མན་ངག་གིས་ལོ་ཙྪ་བ་གཉིས་ཀྱིས་འཆད་ཚུལ་ནི། རྣལ་འབྱོར་མ་དྲུག་ནི་ལཱ་མ་དང་གཟུགས་ཅན་མ་དང་བྱིས་བཅས་མ་དང་ཡོངས་གྱུར་མ་དང་ཨེ་ཧི་ཀ་དང་མི་ལྡོག་མ་སྟེ། དེ་དྲུག་གིས་ཡུལ་ཉེར་བཞི་ན་གནས་པའི་རྣལ་འབྱོར་མ་རྣམས་བསྡུས་སོ། །ཇི་ལྟར་བསྡུས་ཤེ་ན། ཀུ་ལུ་ཏ་ནི་སྐུ་འཁོར་གྱི་བྱང་ཤར་ན་གནས་པའི་བརྩོན་འགྲུས་ཆེན་མོའོ། །མ་རུའི་ཡུལ་ན་མ་མོ་རྣམས་ཞེས་པ་དེ་རྣམས་ཀྱི་གཙོ་མོ་ནུབ་བྱང་གི་འཁོར་ལོ་སྒྱུར་མའོ། །སིན་དྷུའི་ཡུལ་ན་གནས་པ་ལྷོ་ནུབ་ཀྱི་སྟོབས་ཆེན་མའོ། །རིགས་ཀྱི་གཙོ་མོ་ན་ག་རར་ཞེས་པ་དེ་ན་གནས་པ་ཤར་ལྷོའི་ཤིན་ཏུ་དཔའ་མོ་སྟེ། སྐུ་འཁོར་གྱི་མཚམས་མ་བཞི་པོ་དེ་རྣམས་ལཱ་མའི་བདག་ཉིད་ཀྱིས་བསྡུས་སོ། །ལཾ་པ་ཀ་སུ་ཝརྞ་དྷི་པ་ན་གནས་པ་ལྷོའི་འཁོར་ལོའི་གོ་ཆ་མ་དང༌། སཽ་རཥྚར་རིགས་ཀྱི་ལྷ་མོ་རྣམས་ཡིན་ནོ་ཞེས་པ་དེ་རྣམས་ཀྱི་གཙོ་མོ་ནུབ་ཀྱི་ཆང་འཚོང་མ་དང༌། ཀཏྱ་ཆེ་གྲི་ཧ་དེ་བ་ཏར་གནས་
པ་བྱང་གི་དུམ་སྐྱེས་མ་དང༌། པྲེ་ཏ་པུ་རི་ན་གནས་པ་ཤར་གྱི་འཁོར་ལོའི་ཤུགས་ཅན་མའོ། །མཁའ་འགྲོ་གཟུགས་ཅན་མ་རུ་བཅས་ཞེས་པ་སྐུ་འཁོར་གྱི་ཕྱོགས་བཞི་པོ་ན་གནས་པ་དེ་རྣམས་ནི་གཟུགས་ཅན་མའི་བདག་ཉིད་ཀྱིས་བསྡུས་སོ། །ཧི་མ་ལ་ཡའི་རིར་གནས་པ། གསུང་འཁོར་གྱི་བྱང་ཤར་གྱི་མཁའ་འགྲོ་གདོང་མ་དང༌། ཀཉྩི་ན་གནས་པ་ནུབ་བྱང་གི་རྟ་སྣ་མ་དང༌། པཉྩ་ལ་ལཾ་པ་ཀ་ན་གནས་པ་ལྷོ་ནུབ་ཀྱི་ཤིན་ཏུ་བཟང་མོ་དང༌། ཀ་ལིང་ག་ན་གནས་པའི་བརྟུལ་ཞུགས་འཛིན་པ་ཁྱིམ་ལྷ་མོ་ཞེས་པ་ཤར་ལྷོའི་སྔོ་བསངས་ལྷ་མོ་སྟེ། གསུང་འཁོར་གྱི་མཚམས་མ་དེ་རྣམས་བྱིས་བཅས་མོས་བསྡུས་སོ། །མལ་གྱིས་ནི་ཡོངས་གྱུར་མས་བསྡུས་པར་འཆད་དོ། །ཀོ་ས་ལར་གནས་པའི་ཤ་ཟན་མ་ལྷོའི་ཆ་འཐུང་མ་དང༌། ཡི་དྭགས་གྲོང་ཨོ་ཌེ་ན་གནས་པའི་རྡོ་རྗེ་མཁའ་འགྲོ་ནི་བྱང་གི་འཇིགས་བྱེད་ཆེན་མོ་དང༌། སྤོམ་དབང་ཕྱུག་ཀ་མ་རཱུ་པ་ན་གནས་པ་ཤར་གྱི་ས་བསྲུངས་མ་དང༌། ཏྲི་ཤ་ཀུ་ནེར་གནས་པ་ནུབ་ཀྱི་རླུང་ཤུགས་མ་སྟེ། གསུང་འཁོར་གྱི་ཕྱོགས་ན་གནས་པ་བཞི་པོ་ནི་ཁཎྜ་རོ་ཧི་ཡོངས་གྱུར་མས་བསྡུས་སོ། །མལ་ནི་བྱིས་བཅས་མོས་བསྡུས་པར་འཆད་དོ། །པུལླི་ར་མ་ལ་ཡར་གནས་པ་ཐུགས་འཁོར་གྱི་ཤར་གྱི་རབ་གཏུམ་མ་དང༌། དེ་བཞིན་ཞེས་པ་ཨུ་རྒྱན་ན་གནས་པ་ནུབ་ཀྱི་འོད་ལྡན་མ་དང༌། ཨརྦུ་ཏ་ན་གནས་པ་ལྷོའི་སྣ་ཅན་མ་དང༌། གསེར་རི་ཛཱ་ལནྡྷ་རར་གནས་པ་བྱང་གི་གཏུམ་
མིག་མ་སྟེ། ཐུགས་འཁོར་གི་ཕྱོགས་མ་བཞི་པོ་དེ་རྣམས་ནི་སྨེ་ཤ་ཅན་རིགས་སྐྱེས་ཞེས་པ་ཨེ་ཧི་ཀས་བསྡུས་སོ། །བུད་མེད་སྟོང་ཕྲག་ཉེ་ཤུ་གཅིག་ནི་ཡུལ་དེ་རྣམས་ཀྱི་རྣལ་འབྱོར་མ་རེ་རེ་ལ་ཡང་འཁོར་དེ་སྙེད་ཡོད་ཅེས་པའོ། །ལྷག་མ་གཞན་དག་ནི་མཱ་ལ་ཝ་ན་གནས་པ་བྱང་ཤར་གྱི་ཤིང་གྲིབ་མ་དང༌། དེ་བི་ཀོ་ཊི་ན་གནས་པ་ནུབ་བྱང་གི་བྱང་གི་ལང་ཀའི་དབང་ཕྱུག་མ་དང༌། ར་མེ་ཤྭ་རིར་གནས་པ་ལྷོ་ནུབ་ཀྱི་མིའི་ཐུང་མ་དང༌། གོ་ད་བ་རིར་གནས་པ་ཤར་ལྷོའི་དཔའ་བློ་མ་སྟེ། ཐུགས་འཁོར་གྱི་མཚམས་མ་བཞི་པོ་དེ་རྣམས་ནི་མི་ལྡོག་མའི་རིགས་ཡིན་ནོ། །བསྲུབ་པ་ཆེ་ནི་རྡོ་རྗེ་ཕག་མོའོ། །དེའི་ནི་ཤྲཱི་ཧེ་རུ་ཀའོ། །གཙོ་མོ་ཡིན་ན་ནི་ཕག་མོ་སྟེ། དེའི་ཁོངས་སུ་གཏོགས་པ་ནི་མཁའ་འགྲོ་མ་སོགས་བཞི་དང་ཁྭ་གདོང་མ་སོགས་བརྒྱད་དོ། །དེ་ལྟར་ན་རྣལ་འབྱོར་མ་སོ་དྲུག་པོ་ཐམས་ཅད་ཀྱང་ཕག་མོས་བསྡུས་ལ། དེ་ཉིད་ཀྱང་བཅོམ་ལྡན་འདས་ལས་ཐ་དད་པ་མ་ཡིན་ནོ། །མཁའ་འགྲོ་ཞེས་སོགས་ནི་མཁའ་སྤྱོད་མ་དང་ས་སྤྱོད་མ་དང་ས་འོག་སྤྱོད་མ་ཡིན་པས་འདི་རྣམས་ཀྱིས། མཐོ་རིས་དང་ས་སྟེང་དང་ས་འོག་གི་འཇིག་རྟེན་གསུམ་པོ་ཀུན་ལ་ཁྱབ་པར་བཞུགས་སོ་ཞེས་འཆད་དོ། །སྐལ་ལྡན་གྱིས་མཁས་པ་གཞན་གྱི་བཞེད་པ་བཀོད་པ་ལ་གཉིས་ལས། ཀོང་ཀ་ན་པའི་བཞེད་པ་ནི། རྣལ་འབྱོར་མ་དྲུག་ནི་ཡུམ་གྱི་གོ་ཆའི་དཔའ་མོ་དྲུག་གོ། མ་རུའི་ཡུལ་ན་གནས་པའི་མ་མོ་ནི་སྒོ་མཚམས་མ་བརྒྱད་དེ་ཐམས་ཅད་ཀྱང་གདུག་པ་རྨོངས་པར་བྱེད་པའོ། །སིན་དྷཱུའི་ཡུལ་གྱི་ལཱ་མ་ནི་དེའི་རིགས་སུ་
གཏོགས་པའི་རྣལ་འབྱོར་མ་དྲག་མོ་རྣམས་སོ། །རིགས་ཀྱི་གཙོ་མོ་ནི་མཁའ་འགྲོ་མའོ། །གཟུགས་ཅན་མ་ནི་ཙུམྦི་ཀ་སོགས་ལས་ཐ་དད་པའི་གཟུགས་ཅན་མའོ། །པཉྩ་ལ་ནི་ལྔ་ལེན་གྱི་ཡུལ་ཏེ་གནས་དང་ཉེ་བའི་གནས་ལས་གཞན་པའི་གྲུབ་པའི་གནས་ཀྱི་ཁྱད་པར་རོ། །དེ་དག་ལ་སོགས་པ་ནི་ཉེ་བར་མཚོན་པ་ཙམ་དུ་ཟད་དེ། རྒྱ་ཆེར་ནི་གྲུབ་པའི་རྣལ་འབྱོར་མ་སྟོང་ཕྲག་ཉི་ཤུ་རྩ་གཅིག་ཡོད་དོ། །ཞེས་བཞེད་དེ་རེ་རེ་ཙམ་མ་གཏོགས་པ་ལང་ཀ་དང་དཔའ་བོ་ཡང་དེ་དང་འདྲའོ། །ལོ་ཆེན་གྱིས། ཀ་ཏྱ་ཆེ་ལ། ཡི་དྭགས་ཡུལ་དུ་ནག་མོ་ཆེ། ཞེས་དང༌། ཡི་དྭགས་གྲོང་དུ་ཞེས་པ་ལ་ཡི་དྭགས་གྲོང་དུ་ཤ་ཆེན་ཟ། ཞེས་བསྒྱུར་རོ། །དཔལ་ཨུ་རྒྱན་པའི་ཞལ་སྔ་ནས་ཀྱི་བཞེད་པ་བཀོད་པ་ནི་མངས་པས་འཇིགས་ནས་མ་བྲིས་སོ། །དཀྱིལ་འཁོར་གྱི་གཙོ་མོ་ནི་འཁོར་ལོ་གསུམ་ན་བཞུགས་པའི་མཁའ་འགྲོ་མ་ཉེར་བཞི་དང༌། ཉེར་བཞི་པོ་འདིས་རྒྱུ་བ་དང་མི་རྒྱུ་བའི་འཇིག་རྟེན་གསུམ་གྱི་སྣོད་དང༌། འགྲོ་བ་ཀུན་ལ་འདི་ཡིས་ཁྱབ་པ་སྟེ་དེ་ཐམས་ཅད་དུ་རྒྱུ་བའོ། །གསུམ་པ་ནི། མཁའ་འགྲོ་མ་ཡི་འདའ་བར་མི་བྱ་བའི་དམ་ཚིག་འདི་ནི་ཏིང་ངེ་འཛིན་གྱི་སྤྲུལ་པའི་ཕྱི་དང་ནང་ལུས་ལ་མཁའ་འགྲོ་མ་རྣམས་སྒོམ་པ་ཉིད་ཡིན་ཏེ། རིམ་པ་གཉིས་ཀྱི་བསམ་གཏན་དང་སོགས་ཀྱིས་བཟླས་པ་ལ་སོགས་པས་ཞི་སོགས་ཀྱི་ལས་གང་ཅི་ཡང་རུང་བ་རྣམས། ས་སྟེང་ན་ནི་རྫོགས་པ་སྟེ་འགྲུབ་པར་འགྱུར་བའོ། །སྔགས་པས་རྟག་ཏུ་ཏིང་ངེ་འཛིན་
ལ་མཉམ་པར་བཞག་པས་མཚན་མོ་ནམ་མཁའི་གོས་ཅན་ཏེ་གཅེར་བུར་བྱས་ལ་གསང་སྤྱོད་བྱ་ཞིང༌། རྟེན་གྱི་གང་ཟག་སྐྱེས་པའམ་གལ་ཏེ་གཡོན་པ་རུ་སྟེ་བུད་མེད་ཀྱང་རུང་རྣལ་འབྱོར་མ་ཀུན་དང༌། དཔའ་བོ་རྣམས་མཉེས་པའི་ཐབས་ཕྱག་རྒྱ་གར་གྱི་མཆོད་པ་ཡིས། རང་བྱུང་ལྷན་ཅིག་སྐྱེས་མ་རྟག་ཏུ་མཆོད་ན་ནི་དངོས་གྲུབ་མ་ལུས་ཤིང་ལུས་པ་མེད་པ་འགྲུབ་ཅིང་སྟེ་འགྲུབ་པའི་ཐབས། གཡོན་པ་ཤེས་རབ་མའི་མཆོད་པ་ལ་རབ་ཏུ་འཇུག་པར་བྱའོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། པུ་ཛ་ལ་སོགས་པའི་ཡི་གེ་ཉི་ཤུ་རྩ་བཞིས་མཚོན་པའི་གནས་ཉེར་བཞི་དཔའ་བོའི་དཀྱིལ་འཁོར་དགོད་པའི་ཆོ་གའི་ལེའུ་སྟེ། བཞི་བཅུ་རྩ་གཅིག་པའོ།། །།འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས། ལེའུ་བཞི་བཅུ་རྩ་གཅིག་པའི་བཤད་པའོ།། ༈ །།བཞི་པ་རྒོད་པའི་སྔགས་དང་མཁའ་འགྲོའི་གཟུགས་ཀྱི་རྒྱུའི་ལེའུ་ལ་གསུམ། བཤད་པར་དམ་བཅའ་བ། བཤད་པ་དངོས། ལེའུ་ཡི་མཚན་བསྟན་པའོ། །དང་པོ་ནི། ལེའུ་ཞེ་གཅིག་པ་བཤད་པ་དེ་ནས་ལེའུ་ཞེ་གཉིས་པ་བཤད་པར་བྱའོ། །ཞེས་ཁོང་ནས་བླང་སྟེ། དེ་ནས་ཞེས་པའི་ཚིག་གི་ནུས་པ་ལས་སོ། །གཉིས་པ་ལ་གཉིས། བཤད་ཚུལ་དང་པོ་དང༌། བཤད་ཚུལ་གཉིས་པའོ། །དང་པོ་ལ་གཉིས། བཞད་པ་བྱ་ཚུལ་དང༌། གསང་བའི་མཚན་མ་འཕྲོས་དང་བཅས་པའོ། །དང་པོ་ནི། སྔར་ལེའུ་སོ་དགུ་པར་བཞད་པ་བརྒྱད་ཀྱིས་རྒོད་པ་
བསྟན་པ་དེ་འདིར་གསལ་བར་བྱེད་པ་ནི། དཔའ་བོ་སྟེ་སྒྲུབ་པ་པོས་བུ་མོ་མིག་བཟང་མ་རྙེད་ནས་དེ་དང་ལྷན་ཅིག་སྦྱར་བའི་རང་བྱུང་གི་མེ་ཏོག་གི་ཆུ་རྡོ་རྗེས་འཐུངས་ནས་ཧ་ཧ་སོགས་ཀྱི་སྔགས་འདིས་བཞད་པ་རྗེས་སུ་དྲན་ནས་བརྒད་པར་བྱའོ། །ཕྱག་རྒྱ་དང་ལྷན་ཅིག་ཏུ་སྒྲུབ་པ་པོས་སྙོམས་པར་ཞུགས་ནས། སྔགས་བརྒྱད་ཀྱིས་རྒོད་པ་འདི་ལྟར་བྱ་བ་ཉིད་ནི་རྟག་ཏུ་བྱ་ཞིང༌། དེ་ཡང་མཚན་མོ་རྟག་ཏུ་ཤ་ཟ་བ་དང་ཆང་འཐུང་བ་དང་བཅས་པར་བྱའོ། །སྔགས་གསུམ་བྱ་བ་འདི་ཡིས་ནི། ཞེས་ལྭ་བ་པའི་འགྲེལ་པར་འདོན་པས། ཨོཾ་སརྦ་བཛྲ་ཀ་མི་ནི། སརྦ་བྷ་ཀྵ་ཤོ་དྷ་ཡ། གུ་ཧྱ་བཛྲེ་ནི་སྭཱ་ཧཱ། ཞེས་པའི་སྔགས་ལན་གསུམ་དུ་བཟླས་པར་བྱ་བ་འདི་ཡིས་སྙོམས་པར་ཞུགས་ན་མྱུར་དུ་བདེ་བ་ཆེན་པོའི་དངོས་གྲུབ་འཐོབ་པར་འགྱུར་རོ། །དེ་ལྟར་ཞུགས་པའི་བྱང་ཆུབ་ཀྱི་སེམས་པ་དམར་གནས་པ་རང་གིས་འཐུངས་པ་དང༌། དེ་བཞིན་དུ་ཕྱག་རྒྱ་མ་དེ་ལ་བྱིན་པ་དང༌། པད་མའི་མཆོག་ཆེན་པོའི་གནས་དེར་རང་གི་དངོས་གྲུབ་གྲུབ་པར་བྱ་བའི་སེམས་ཀྱིས་རེག་པ་སྟེ་རྡོ་རྗེ་སྦྱར་བར་བྱས་ལ། རྣམ་པ་བརྒྱད་པའི་སྔགས་བཏོན་ནས་བཞད་པར་བྱའོ། །གཙོ་མོ་ཆེ་ཞེས་པ་ལ། གཙོ་བོ་ཆེ་ཞེས་དང༌། ཆང་གི་མྱོས་པའི་སྔགས་པ་ཞེས་པ་ནི། རིགས་ལྡན་ཆེན་མོ་ཞེས་པ་ནི་སྔགས་དང་ལྡན་མ་བཅུད་ཀྱིས་མྱོས་མ་ཅན་ནོ། །ཞེས་བསྒྱུར་བ་ལེགས་པས། རང་གི་ཕྱག་རྒྱ་རིགས་ལྡན་མཚན་མོར་བྱས་པ་བྱང་
ཆུབ་ཀྱི་སེམས་འབབ་པའི་བཅུད་ཀྱིས་མྱོས་པ་ཅན་མ་ཞེས་པའི་དོན་ནོ། །གང་གི་ཕྱིར་དེ་བཞིན་གཤེགས་པ་ཐམས་ཅད་ནི་སྒྲུབ་པ་པོའི་ལུས་ཀྱི་དཀྱིལ་འཁོར་དུ་འདུས་ཤིང༌། དེ་བཞིན་དུ་ལྷ་མོ་ཐམས་ཅད་ཀྱང་རང་གི་ཕྱག་རྒྱ་རིགས་ལྡན་མ་ཆེན་མོ། རེག་བྱ་རྡོ་རྗེ་མར་བསྒོམས་པའི་ལུས་ཀྱི་དཀྱིལ་འཁོར་དུ་འདུས་པ་དེའི་ཕྱིར། ཕྱག་རྒྱ་མོ་དེ་ཉིད་མཆོད་པར་བྱའོ། །རེག་རྡོ་རྗེ་མ་ཉིད་ཇི་འདྲ་བ་ཞེ་ན། བདེན་པར་སྨྲ་བས་ཚངས་པར་སྤྱོད་པ་དང༌། ཐོག་མཐར་ཞེས་པའི་རྐང་པ་ལ། བལྟ་དང་བཞད་པའི་ཕྱག་རྒྱས་བསྒྲུབ། ཅེས་འབྱུང་བས། མིག་གིས་བལྟ་བའི་ཕྱག་རྒྱ་ནི་ལས་ཀྱི་ཕྱག་རྒྱའོ། །དེ་ནི་བསྙེམས་པ་སྟེ་འགྱིང་བ་དང་བཅས་པས་མིག་གཡོན་གྱིས་སྒྲུབ་པ་པོ་ལ་བལྟ་བའི་གྲགས་ལྡན་མ་སྟེ། འདིས་སྒྲུབ་པ་པོ་ལ་བདེ་བ་ཆེན་པོ་སྟེར་བ་གྲགས་པ་དང་ལྡན་པ་ལ་བརྟེན་ཏེ་བཞད་པ་བརྒྱད་ཀྱི་སྒོ་ནས་ཡེ་ཤེས་ཆེན་པོ་བསྒྲུབ་པར་བྱའོ། །མཚན་མོའམ་དེ་བཞིན་དུ་ཉིན་མོར་ནི། ཕྱག་རྒྱ་དང་སྦྱོར་བ་འདིས་ནི་བཞད་པ་དག་ཏུ་སྟེ་དེ་ལ་ཡིད་ནང་དུ་ཆུད་པས་གོམས་པར་བྱས་ན། ཕྱག་རྒྱ་ཆེན་པོ་མཆོག་གི་དངོས་གྲུབ་འགྲུབ་པའི་རྟགས་སམ་མཚན་མ་སྐྱེ་བར་འགྱུར་རོ། །གཉིས་པ་ནི། དངོས་གྲུབ་མཆོག་ལ་མངོན་དུ་ཕྱོགས་པའི་གཟུགས་དང་ལས་ཀྱི་གསང་བའི་མཚན་མ་གང་ཇི་ལྟར་གནས་པ་ནི། དཔའ་བོ་ཕྱག་ན་རྡོ་རྗེ་ཉོན་ཞེས་བཀའ་སྩལ་ཏོ། །ལེའུ་བཅུ་གཉིས་པར་རི་ལུ་འདི་ནི་དཔའ་བོ་རང་ཉིད་ཀྱིས་གསུངས་པ་ཡིན་ནོ། ཞེས་པའི་དཔའ་བོ་ནི་ཧེ་རུ་ཀ་ཡིན་ལ།
འདིར་དཔའ་བོ་ཞེས་པ་ནི་ཉོན་ཞེས་པ་ཕྱག་ན་རྡོ་རྗེ་ལ་གསུངས་པར་ལྭ་བ་པས་བཤད་པ་ལྟར་ཡིན་ནོ། །གཟུགས་དང་ལས་ཀྱི་གསང་བའི་མཚན་མ་ནི། ལྭ་བ་པས་དབང་ཕྱུག་གི་ཡོན་ཏན་བརྒྱད་ལ་བཤད་ལ། ཡོན་ཏན་བརྒྱད་ནི་སྤྱོད་བསྡུས་ལས། གཟུགས་ཕྲ་བ་དང་རེག་པ་ཡང༌། །ཁྱབ་པ་ཡང་དག་ཐོབ་པ་ཉིད། །རབ་ཏུ་གསལ་བ་ཉིད་བརྟན་པ། །དབང་ཕྱུག་ཉིད་དང་འདོད་དགུར་འགྱུར། ཞེས་པའོ། །དེའི་དོན་བོད་སྔ་མ་རྣམས་ཀྱིས་བཤད་པ་ནི། དབང་ཕྱུག་གི་ཡོན་ཏན་བརྒྱད་ཀྱི་བཤད་པ་མ་མཐོང་བར་སྣང་བས། སྤྱན་རས་གཟིགས་བརྟུལ་ཞུགས་ཀྱིས་དབང་ཕྱུག་གི། ཡོན་ཏན་བརྒྱད་བཤད་པ་དང་སྦྱར་བར་བྱའོ། །དེ་ལ་དབང་ཕྱུག་གིས་སེམས་ཅན་གྱི་སྐྱེ་འཇིག་བྱེད་པ་ཕྲ་བ་དང༌། སྣོད་ཀྱི་སྐྱེ་འཇིག་བྱེད་པ་ཡང་བ་དང༌། དེ་གཉིས་ཀ་སྐྱེ་འཇིག་བྱེད་པ་བདག་པོར་གྱུར་པ་ཡིན་ལ། འདིར་ནི་རྣལ་འབྱོར་པས་དེ་རྣམས་སྤྲུལ་པ་དང་སྡུད་པ་བྱེད་ནུས་པའོ། །ཕྱི་མ་ནི་ཡང་དག་པར་ཐོབ་པས་བསྟན་ཏོ། །འབྱུང་པོ་ཀུན་གྱིས་མཆོད་པར་བྱ་བ་ནི་འོད་དང་གཟི་བརྗིད་ཀྱིས་གཞན་རྣམས་ཟིལ་གྱིས་གནོན་པའི་རབ་ཏུ་གསལ་བའམ་སྣང་བས་བསྟན་ཏོ། །སེམས་ཅན་རྣམས་ལ་ཚར་བཅད་དང་རྗེས་འཛིན་གྱི་དབང་ཡོད་པ་ནི་དབང་དུ་གྱུར་པའོ། །ཡོན་ཏན་ལ་འདོད་དགུར་དབང་སྒྱུར་བ་ནི་འདོད་དགུར་ལྡན་པའོ། །གང་ཐོབ་པར་འདོད་པའི་དོན་དེ་ལྟར་ཐོབ་ནུས་པ་ནི་དགའ་དགུར་གནས་པ་སྟེ་དེ་ནི་བརྟན་པས་བསྟན་ཏོ། །དེ་
རྣམས་ལ་གཟུགས་མི་འདྲ་བ་དུ་མ་སྟོན་པ་ནི་གཟུགས་ཀྱི་ཡིན་ལ། ཁྱབ་པ་དང་དབང་དུ་གྱུར་བ་སོགས་ནི་ལས་ཀྱི་གསང་བའོ། །དེ་ཡང་སྤྱོད་བསྡུས་ལས། སྤྱོད་པ་རྣམ་པ་གསུམ་ཟླ་བ་ཕྱེད་དམ། ཟླ་བ་གཅིག་གམ་ཟླ་བ་དྲུག་བསླབས་པར་གྱུར་པས། ཕྱག་རྒྱ་ཆེན་པོའི་དངོས་གྲུབ་ཐོབ་པའི་མཚན་མ་ཉེ་བར་འབྱུང་བར་འགྱུར་ཏེ། དེ་ལ་མཚན་མ་ནི་འདི་དག་ཡིན་ནོ། །ཞེས་གསུངས་པའི་དོན་དུ་སྣང་བས་ཟླ་བ་དྲུག་ཚུན་ཆད་དུ་མཆོག་འགྲུབ་པའི་མཚན་མའོ། །དབང་ཕྱུག་གི་ཡོན་ཏན་བརྒྱད་ཐོབ་པ་དེའི་ཚེ་བཀྲེས་སྐོམ་གྱིས་གནོད་པར་མི་འགྱུར་ཞིང༌། བཤང་གཅི་ལ་སོགས་པ་ཡང་ལྡོག་གོ། འདི་དག་ཐམས་ཅད་རྨི་ལམ་དང་ཁྱད་པར་མེད་པར་དམིགས་པས། དུས་རྟག་ཏུ་རྣལ་འབྱོར་པ་དེ་ནི་མིག་གཉིས་ནས་མཆི་མ་འཕྱུང་སྟེ། དེ་ཡང་ཀྱེ་མ་སེམས་ཅན་འདི་ཀུན་ནི། འཁོར་བ་ལས་ཐར་པའི་ཐབས་དམ་པ་འདི་ལྟ་བུ་སྐད་ཅིག་ཀྱང་མི་སྒོམ་པར། སྡུག་བསྔལ་མི་བཟད་པ་ཅན་གྱི་འཁོར་བ་སྐྱབས་མེད་པ་འདིར། སྐྱེ་རྒ་ན་འཆི་ལ་སོགས་པའི་འཇིགས་པས་འཁྲུགས་ཤིང༌། གཡོ་བ་དང་ལྡན་པ་འདི་ལ་སྙིང་རྗེ་དྲག་ཏུ་སྐྱེའོ། །རིག་མའི་པདྨ་ལ་བརྟེན་ནས་བདེ་བའི་བདུད་རྩི་ལངས་པ་སྟེ་འཛགས་པ་ལས། ལྷན་སྐྱེས་ལ་དད་པས་དེ་ཡི་ལུས་ཀྱི་སྤུ་ཡང་ལྡང་བ་དང༌། གཞིག་པར་དཀའ་བས་རྡོ་རྗེ་དང་འདྲ་བའི་ཁམས་གསུམ་པའི་འཁོར་བ་ལས་འགོམ་པ་སྟེ་འདའ་བར་བྱའོ་སྙམ་པའི་བསམ་པས་རིག་མས་སྐྱེས་པ་ལྟར་བྱེད་པའོ། །འདི་ལྭ་བ་པའི་འགྲེལ་པ་ལས། ལྷ་
སྦས་ཀྱི་འགྲེལ་པའི་འགྱུར་བཟང་བར་སྣང་བས་དེ་བཞིན་དུ་བཤད་དེ། འགོམ་པར་བྱ། ཞེས་འབྱུང་ངོ༌། །དེ་བཞིན་དུ་རིག་མ་གཅེར་བུར་བྱས་ཏེ་ནུ་མ་དང༌། མཚན་ཁུང་དང་བྱིན་པ་དང༌། པདྨ་ལ་བལྟ་ཞིང་གནས་དེ་དག་ཏུ་ལག་པས་མཉེས་ནས་སྦྱོར་ཐབས་ཀྱིས་མཆོད་པར་བྱའོ། །འདི་ནི་འདོད་པའི་དབང་ཕྱུག་མ་ཕྱག་རྒྱ་མ་ཀུན་གྱི་དབང་པོའི་ཚོགས་ཐམས་ཅད་ཀྱི་བདེ་བའི་རོ་རིམ་པ་ཉིད་དེ་བཞིན་དུ་ཉམས་སུ་མྱོང་བར་བྱའོ། །དབུགས་འབྱིན་ནི། ལྭ་བ་པས་ཤེས་རབ་ཀྱི་རླུང་རྣམས་ཀྱིས་འབབ་པའོ་ཞེས་གསུངས་པའི་དོན་ནོ། །ཕོ་ཉ་མོའི་རྩ་དབུ་མའི་རླུང་ཐབས་ཀྱི་རྩ་དབུ་མའི་སྒོར་ཞུགས་པས་རྐྱེན་བྱས་ནས། བྱང་ཆུབ་ཀྱི་སེམས་འབབ་པའི་གནད་ཤིན་ཏུ་ཟབ་པ་ཅིག་ཡིན་ཏེ། བློ་གྲོས་ཆེ་ལ་ཞིབ་པས་བཤད་རྒྱུད་རྡོ་རྗེ་ཕྲེང་བ་ལ་བརྟེན་ནས་ཤེས་དགོས་པར་ཡོད་དོ། །བསྒུལ་བ་ནི་བྱང་ཆུབ་ཀྱི་སེམས་བབ་པས་ལུས་འདར་བའོ། །རྒོད་པ་ནི་བཞད་པའི་ལུས་ཀྱིས་རིག་མ་གནོན་པའོ། །སྒེག་པའི་གར་ནི་གར་གྱི་འགྲོས་ཀྱིས་རིག་མ་ལ་འཇུག་པའོ། །ངོ་མཚར་བ་ནི་སོ་སྐྱེ་རྣམས་རྨད་དུ་གྱུར་པར་མཛད་པའོ། །དེ་ལྟར་མཛད་པས་རྣལ་འབྱོར་མ་གང་དག་སྣ་ཚོགས་པ་སྟེ་ཐམས་ཅད་ཀྱི་མདུན་དུ་འདི་ལྟར་བརྒད་པར་བྱའོ། །ཞེས་པའི་དོན་ནོ། །དེ་ཡང་ཕྱག་རྒྱ་མོ་དང་བཞད་པའི་སྔགས་ནི་རྗེས་སུ་དྲན་པར་བྱས་ལ་བརྒད་པར་བྱའོ། །བཞད་པའི་སྔགས་བརྒྱད་ནི་ཧ་ཧཱ་ཧེ་ཧཻ་ཧོ་ཧཽ་ཧཾ་ཧཿ རྣམ་པ་བརྒྱད་དེ་འདི་དག་གིས་རྒོད་པའོ། །
བཤད་པ་དེ་རྣམས་ནི་ལྭ་བ་པའི་འགྲེལ་པར་གསལ་བར་འབྱུང་བས་ཁ་བསྐངས་པའོ། །གཉིས་པ་ནི། སྐལ་ལྡན་ལ་སོགས་པ་ནི་མེ་ཏོག་ཆུ་ནི་སྔར་དང་འདྲ། སྔགས་ནི་རྩ་སྔགས་སམ་ཡི་གེ་བདུན་པ་དང༌། དེ་བཞིན་སྦྱིན་ནི་འཁོར་ལོ་གསུམ་ལ་གནས་པ་ལ་སྦྱིན་པ་དང༌། གཙོ་མོ་ཆེ་ཞེས་པ་ལ་ནག་མོ་ཆེ་ཞེས་འདོན་ཞིང༌། དོན་ནི་རྡོ་རྗེ་ཕག་མོ་ལ་འཆད་དེ་ལས་རྒྱ་དེར་སྒོམ་པའོ། །ཐོག་མ་ཞེས་སོགས་ལ་ཐོག་མ་བར་དང་ཐ་མར་ཕྱག་རྒྱ་རང་གི་དབང་དུ་འགྱུར་བ་དང༌། བཞད་པ་ཉིད་ཕྱག་རྒྱ་ཡིན་པས་ན་རོལ་ཞིང་རྒོད་པ་གཙོ་བོར་གྱུར་པ་ནི་དགའ་བར་བྱེད་པ་དང༌། ཕྱག་རྒྱ་དེས་ལྟ་བའི་བསྙེམས་པར་སྟོན་ཞིང༌། རང་གི་བཞད་པའི་བསྙེམས་པ་དང་ལྡན་པའི་ལྷ་མོ་ནི་གྲགས་པ་དང་ལྡན་པར་འགྱུར་རོ། །བཞད་པ་དེ་ནི་ཉེ་བར་མཚོན་པ་ཙམ་མོ་རབ་ཏུ་དགའ་བའི་བདེ་བ་ཐམས་ཅད་ཀྱང་མཚན་མོའམ་ཉིན་མོར་བྱའོ་ཞེས་སྦྱར་རོ། །གཟུགས་དང་ལས་ཀྱི་ཞེས་བྱ་བ་ལ་སོགས་པ་ནི་སྒྲུབ་པ་པོ་མཐོང་བ་དང༌། གྲུབ་པའི་ལྷ་མོ་རྣམས་སྔོན་མ་བྱུང་བའི་གཟུགས་དང་བྱ་བ་དག་སྟོན་པར་བྱེད་དེ། དེའི་ལས་བསྟན་པ་དང༌། ལས་ཀྱི་ལན་བསྟན་པ་ནི་རྟག་ཏུ་ཞེས་སོགས་ཏེ། ལྷ་མོའི་བྱེ་བ་ནི་རྡོ་རྗེ་ལ་ནི་ཞེས་སོགས་སོ། །སྒྲུབ་པ་པོའི་བྱ་བ་ནི་དབུགས་འབྱིན་ཞེས་སོགས་ཏེ། དབུགས་འབྱིན་ནི་རླུང་རྒྱུ་བ་མེད་པར་བྱེད་པའོ། །སྒེག་པ་དང་ཞེས་བྱ་བ་ནི་གར་གྱི་ཁྱད་པར་རོ། །སྣ་ཚོགས་ནི་སྒྲུབ་པ་པོའི་ལས་སོ། །ཞེས་འཆད་དོ། །ཕོ་ཉ་མོ་ལས་སྣ་
ཚོགས་པ་ལ་དབང་བྱེད་པའི་དབང་ཕྱུག་མ་རྣམས་མཆོག་ཏུ་དགའ་བར་ཏེ་རྗེས་སུ་ཆགས་པར་བྱེད་པའོ། །ཧ་ཧཱ་ཞེས་སོགས་བྱ་བར་གསུངས་པ་འདི་རྣམས་ཉེ་བར་ཏེ་ཕོ་ཉ་མོ་ཁྱད་པར་ཅན་རྣམས་ཀྱི་མངོན་སུམ་དུ་སྒྲུབ་པ་པོས་བྱའོ། །རྟག་ཏུ་སྟེ་སྒྲུབ་པ་པོ་ལ་གནས་པ་དེ་སྲིད་དུ་ངུ་ཞིང་མཆི་མ་འབྱུང་བར་བྱེད་པ་དེ་དག་བསྔགས་ལ། ངུ་བ་དང་མཆི་མ་འབྱུང་བ་དང་བཞད་པ་བརྒྱད་ཀྱི་སྔགས་ཟློ་བ་དེ་ཉིད་ཀྱིས་ཕོ་ཉ་མོ་དེ་དག་དགའ་བར་འགྱུར་ཞིང༌། བསམ་གཏན་ཏེ་ལྷའི་རྣལ་འབྱོར་དང༌། སྔགས་ཀྱིས་བཟླས་པས་ལེགས་པར་སྦྱོར་བ་སྟེ་ཤིན་ཏུ་མནན་པ་ནི་རང་གི་རིག་མ་རྣལ་འབྱོར་མའོ། །གཙོ་མོ་སྟེ་རབ་གཏུམ་མ་ལ་སོགས་པའི་དཔའ་མོ་རྣམས་དང༌། ཁཎྜ་ཀ་པཱ་ལ་ལ་སོགས་པའི་དཔའ་བོ་རྣམས་དང་ལྷན་ཅིག་ཏུ། ལུས་ཀྱི་བ་སྤུ་ལྡང་བ་དང༌། ལྷན་ཅིག་སྐྱེས་པའི་བདེ་བ་ཉམས་སུ་མྱོང་བར་འགྱུར་རོ། །རྡོ་རྗེ་ལ་ནི་འགོམ་མི་བྱ། ཞེས་པ་ལྟར་ན་རང་གི་རྡོ་རྗེ་པདྨར་གཞུག་པ་ལས་འགོམ་པར་མི་བྱ་བའོ། །དེ་ནི་གཡོན་པ་སྟེ་རྣལ་འབྱོར་མ་རྣམས་ཀྱིས་ཡོངས་སུ་བརྟགས་པ་སྟེ་ངེས་པར་དགོངས་པ་ཡིན་ནོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྒོད་པའི་སྔགས་རྣམ་པར་བརྒྱད་དང༌། མཁའ་འགྲོ་མའི་གཟུགས་ཀྱི་རྒྱུ་སྟེ་རབ་གཏུམ་མ་ལ་སོགས་པའི་གཟུགས་ཀྱི་སྤྲུལ་པའི་ཆོ་གའི་ལེའུ་སྟེ་བཞི་བཅུ་རྩ་གཉིས་པའོ།། །།འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་
ཀུན་གསལ་བ་ལས། ལེའུ་བཞི་བཅུ་རྩ་གཉིས་པའི་བཤད་པའོ།། ༈ །།བཅུ་གཅིག་པ་ཐུན་མོང་གི་དངོས་གྲུབ་སྒྲུབ་པའི་ཚུལ་གཞན་བསྟན་པ་ལ་ལྔ། ཡབ་ཀྱི་ཉེ་སྙིང་དང་གོ་ཆས་ལས་བསྒྲུབ་པ། དཔའ་མོའི་གོ་ཆ་དང་ཧ་ལྔ་ལ་བརྟེན་ནས་ལས་བསྒྲུབ་པ། སངས་རྒྱས་མཁའ་འགྲོ་མའི་སྔགས་ཀྱིས་སྒྲུབ་པ་དང་ལྷ་སྒོམ་པ་རྟག་ཏུ་བྱ་བ། སྐྱེ་བདུན་བརྟག་པ་རྒྱས་པར་བསྟན་པ། ཡུམ་གྱི་སྙིང་པོའི་སྔགས་ཀྱིས་ལས་བསྒྲུབ་པའོ། །དང་པོ་ལ་གཉིས། ཡབ་ཀྱི་ཉེ་སྙིང་ལ་བརྟེན་ནས་བསྒྲུབ་པ་དང༌། དེ་དང་ཡུམ་གྱི་གོ་ཆ་ལ་བརྟེན་ནས་བསྒྲུབ་པའོ། །དང་པོ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུ་ཡི་མཚན་བསྟན་པའོ། །དང་པོ་ནི། ཞེ་གཉིས་པ་བཤད་པ་དེ་ནས་སྒྲུབ་པ་པོ་རྣམས་རྣལ་འབྱོར་མ་རྣམས་ཀྱིས་རྗེས་སུ་གཟུང་བའི་དོན་དུ། སྤྱན་རས་ཀྱིས་གཟིགས་པའི་ཐབས་བཤད་པར་བྱའོ། །དགོས་པ་གང་གི་དོན་དུ་རྣལ་འབྱོར་མ་རྣམས་ཀྱིས་སྤྱན་རས་ཀྱིས་གཟིགས་པའི་ཐབས་འཆད་ཅེ་ན། རྣལ་འབྱོར་མས་སྤྱན་རས་ཀྱིས་གཟིགས་ན། སྒྲུབ་པ་པོས་མི་རྣམས་དཔའ་བོ་ཐོད་པའི་དུམ་བུ་ལ་སོགས་པ་ལྟར། རྣལ་འབྱོར་མ་རབ་གཏུམ་མ་སོགས་དང༌། གཉིས་སུ་མེད་པར་སྙོམས་པར་འཇུག་པར་འགྲོ་བར་འགྱུར་བའི་ཕྱིར་དུའོ། །སྒྲུབ་པ་པོ་ཇི་འདྲ་བ་ཞིག་ལ་སྤྱན་རས་ཀྱིས་གཟིགས་པར་འགྱུར་ཞེ་ན། པུ་ལླི་ར་ལ་སོགས་པའི་གནས་ཀྱི་གནས་དང་ཉེ་བའི་གནས་ལ་སོགས་པའི་དབྱེ་བའི་ཆོ་ག་ཕྱི་དཀྱིལ་དང༌། ནང་ལུས་དཀྱིལ་ལ་ཇི་ལྟར་སྒོམ་པ་ཤེས་པ་དང༌།
ཤེས་ནས་ཀྱང་དེ་དག་སྒོམ་པ་ལ། དུས་རྟག་ཏུ་མངོན་པར་དགའ་ཞིང་སྒོམ་པ་ལ་སྤྱན་རས་ཀྱིས་གཟིགས་པར་འགྱུར་རོ། །འདིས་ནི་ཕོ་ཉ་མོ་མཆོག་རྣམས་དང་འདུས་ཏེ་ལམ་བགྲོད་པ་ལ། ལུགས་འདིའི་སྒྲུབ་ཐབས་ཕྱིན་ཅི་མ་ལོག་པར་ཤེས་ནས་དུས་རྒྱུན་དུ་སྒོམ་དགོས་པར་སྟོན་ཏེ། འདི་ལ་ངེས་པ་ཆེན་པོ་རྙེད་དགོས་སོ། །གཉིས་པ་ལ་ལྔ། གང་དུ་གཟིགས་པའི་གནས། གཅེར་བུའི་མཆོད་པ། བར་ཆད་བསྲུང་བའི་སྔགས། སྔགས་ཀྱི་ནུས་པ་ཐོབ་པ་ལ་བརྟེན་ནས་ལས་བསྒྲུབ་པ། ལས་ཀྱི་ནུས་པ་འགྲུབ་པའི་ཐབས་སོ། །དང་པོ་ནི། འོ་ན་གནས་གང་དུ་གནས་པ་ལ་རྣལ་འབྱོར་མས་གཟིགས་པར་འགྱུར་ཞེ་ན། ལམ་བཞི་འདུས་པའི་མདོའམ་རང་གི་ཁྱིམ་དག་གམ། དཔའ་བོ་སྟེ་ཕྱོགས་སྐྱོང་ལ་སོགས་པའི་གནས་དང་རི་བོར་ནི་གནས་ཤིང༌། བཟའ་བ་དང་བསྲུང་བ་དང་བསྟེན་པའི་དམ་ཚིག་རྣམས་ཚུལ་བཞིན་དུ་སྲུང་བ་ལ་གནས་པ་ལ། མཁའ་འགྲོ་མ་ཡིས་པདྨའི་མཚོ་ལ་ངང་པའི་ཚོགས་འདུ་བ་བཞིན་དུ། ཡུལ་ཐག་རིང་པོ་ནས་ཀྱང་ཐུགས་རྗེའི་སྤྱན་གྱིས་གཟིགས་པར་འགྱུར་ཏེ། གདུལ་བྱ་སྣོད་དང་ལྡན་ཞིང་རྣལ་འབྱོར་མ་རྣམས་ཐུགས་རྗེ་ཆེན་པོས་ཐུགས་གདུངས་པའི་ཕྱིར་རོ། །དམ་ཚིག་གནས་ལ་མཁའ་འགྲོ་མ། །རིང་པོ་ནས་ཀྱང་གཟིགས་པར་འགྱུར། ཞེས་འབྱུང་བ་གོ་བདེའོ། །གཉིས་པ་ནི། རྣལ་འབྱོར་པ་གོས་མེད་པ་གཅེར་བུར་བྱས་ཏེ། ཕྱག་རྒྱ་མོ་མཆོད་པ་ནི་གཅེར་བུའི་མཆོད་པའོ། །མཆོད་པའི་ལས་ཉིད་ཀྱིས་ནི་ཡོངས་
སུ་གྲོལ་བར་འགྱུར་རོ། །ཕྱག་རྒྱ་གཅེར་བུར་མཆོད་པ་ཡི། །ལས་ཉིད་ཀྱིས་ནི་ཡོངས་སུ་གྲོལ། ཞེས་འབྱུང་ངོ༌། །དེ་ཡང་སྟག་ལྤགས་ཀྱི་གོས་ཉིད་ཀྱིས་ནི་བཀབ་པ་སྟེ་སྨད་དཀྲིས་པ་དང༌། འམ་གྱི་སྒྲས་གཅེར་བུ་དང༌། གཞན་ནི་རུས་རྒྱན་ཡན་ལག་ལ་བཞག་པས། ཇི་ལྟར་པདྨ་ལ་ཆུས་མི་གོས་ཤིང༌། མཁའ་ལ་ཉི་མའི་གདུང་བས་མི་གནོད་པ་བཞིན་དུ། འདོད་པ་རྣམས་ལ་ལོངས་སྤྱད་པ་ཉིད་ཀྱིས་རྣལ་འབྱོར་པ་ལ་གོས་པར་མི་འགྱུར་ཏེ། རྒྱུད་རྡོར་ཕྲེང་ལས། བཀག་པ་དག་ཀྱང་བྱེད་པས་ན། །བྱ་དང་བྱ་མིན་རྣམ་སྤངས་ཏེ། །པདྨ་ལ་ནི་འདམ་གྱིས་བཞིན། །ངོ་བོ་ཉིད་ཤེས་གོས་མི་འགྱུར། ཞེས་གསུངས་སོ། །གོས་པར་མི་འགྱུར་བ་ནི་སེམས་རྒྱུད་ལ་ཉོན་མོངས་མི་སྐྱེ་བའི་དོན་མིན་ཏེ། ལམ་འདི་ཉོན་མོངས་པ་ཆགས་པ་ལམ་དུ་བྱེད་པ་ཡིན་པའི་ཕྱིར་རོ། །དེས་ན་དེའི་དུས་ཀྱི་ཉོན་མོངས་ཀྱི་ཉེས་དམིགས་ངན་འགྲོར་འཁྲིད་པའི་ཉེས་པས་མི་གོས་ཞེས་པའི་དོན་ནོ། །དེ་ཡང་ངོ་བོ་ཉིད་ཤེས་ཞེས་གསུངས་པས། བྱང་སེམས་མི་འཕོ་བར་འཛིན་ནུས་པ་ཙམ་གྱི་མི་ཆོག་གི ། དེ་ཁོ་ན་ཉིད་ཀྱི་ལྟ་བ་ཕུ་ཐག་ཆོད་པ་སོགས་མང་པོ་ཞིག་དགོས་སོ། །བྲམ་ཟེ་ཆེན་པོས་ཀྱང༌། འཁོར་འདས་མ་ལུས་པའི་རང་བཞིན་སྟོང་ཉིད་ཤེས་པའི་སྟོང་པ་དང་སྦྱོར་རྒྱུ་མེད་པར། དབང་པོ་གཉིས་སྦྱོར་ལས་བྱང་སེམས་མི་འཕོ་བར་བདེ་བ་གྲུབ་པ་ཙམ་ནི། སྲིད་པའི་རྩ་བ་བདེན་འཛིན་གྱི་མ་རིག་པ་ལ་ཅི་ཡང་མི་གནོད་པས། བདེ་བ་དེ་ཇི་ཙམ་སྤྱད་བཞིན་བདེ་འཛིན་དེས་དྲངས་པའི་སྲེད་པ་ཇེ་
འཕེལ་དུ་འགྲོ་བས། སྐོམ་སྲེད་ཅན་གྱིས་སྨིག་རྒྱུ་ལ་ཆུར་འདུ་ཤེས་ནས་ཞུགས་པ་དང་འདྲ་བས། དེ་འདྲ་བ་ནི་སྨད་ལ། སྔར་བཤད་པ་ལྟར་གྱི་བདེ་སྟོང་སྦྱོར་ནུས་པ་ལ་ནི། ཐབས་དེ་མེད་ན་ས་གསུམ་གྱི་འགྲོ་བའི་རེ་བ་སྐོང་བའི་སངས་རྒྱས་མྱུར་དུ་མི་འཐོབ་པས། མྱུར་ལམ་གྱི་སྒོ་ནས་བསྔགས་པ་མཛད་དེ། ས་ར་ཧས། མ་ལུས་རང་བཞིན་གང་གིས་མི་ཤེས་པ། །ཀུན་ཏུ་རུ་ཡི་སྐབས་སུ་བདེ་ཆེན་སྒྲུབ་པ་ནི། །ཇི་ལྟར་སྐོམ་པས་སྨིག་རྒྱུ་སྙེག་པ་བཞིན། །སྐོམ་ནས་འཆི་ཡང་ནམ་མཁའི་ཆུ་རྙེད་དམ། །རྡོ་རྗེ་པདྨ་གཉིས་ཀྱི་བར་གནས་པ། །བདེ་བ་གང་གིས་རྣམ་པར་རོལ་པ་ནི། །ཅི་སྟེ་བདེ་བསྟེན་ནུས་པ་མེད་པས་ན། །ས་གསུམ་རེ་བ་གང་གིས་རྫོགས་པར་འགྱུར། ཞེས་གསུངས་སོ། །གཅེར་བུ་དང་པགས་པའི་གོས་བགོས་ནས་འདོད་པ་སྤྱོད་པ་དེ་བཞིན་དུ་སྐྲ་ཡང་གྲོལ་བས་ཕྱག་རྒྱ་མཉེས་པའི་ལས་རྣམས་ཐམས་ཅད་བརྩམ་པར་བྱའོ། །ཡང་ན་གཅེར་བུ་སྐྲ་གྲོལ་བས་དེ་ལ་གུས་པར་བྱས་ནས་ལས་ཐམས་ཅད་བསྒྲུབ་པར་བྱ་བའམ། བསླབ་པ་དང་དབང་བསྐུར་བ་སོགས་ཀྱི་ལས་ཐམས་ཅད་བརྩམ་པར་བྱའོ། །ཞེས་གསུང་ངོ༌། །གཙོར་གྱུར་ཞེས་པ་འགྱུར་གཞན་གཉིས་ལ་མེད་ཅིང༌། འགྲེལ་པ་རྣམས་ལས་ཀྱང་མི་འབྱུང་ངོ༌། །གསུམ་པ་ནི། གཅེར་བུར་སྙོམས་འཇུག་ལ་སོགས་པའི་ལས་བྱེད་པ་ལ་བགེགས་སྐྱེ་བར་མི་འགྱུར་རམ་སྙམ་ན། ལས་ཐམས་ཅད་རྩོམ་པ་ལ་ཡབ་ཀྱི་རྩ་བའི་སྔགས་དང༌། དེ་
བཞིན་དུ་གཞན་ཏེ་ཞལ་བཞི་པའི་སྔགས་ཀྱིས་ར་བ་དང་འདྲ་བ་དང་། གུར་དང༌བླ་རེ་དང་མདའི་དྲ་བ་དང༌། མེའི་དྲ་བའི་སྔགས་རྣམས་ཀྱིས་ཕྱོགས་རྣམས་བཅིང་བར་ནི་འཇུག་པ་ཡིས་བསྲུངས་ནས་བྱེད་པ་ནི། ལྷ་ཡུལ་བའི་ལྷའི་ཚོགས་རྣམས་ཀྱིས་ཀྱང་མ་མཐོང་བར་ཏེ་མི་མཐོང་ན། མི་རྣམས་ཀྱིས་ལྟ་ཅི་སྨོས་པས་དེ་བྱས་ནས་གཅེར་བུའི་མཆོད་པ་སོགས་ཀྱིས་ཤིག་ཅེས་པའོ། །ལོ་ཆེན་གྱིས། ལྷ་ཡུལ་ལྷ་ཡི་ཚོགས་ཀྱིས་ཀྱང༌། །མ་མཐོང་བར་ནི་མཆོད་པ་གྱིས། །ཞེས་བསྒྱུར་པ་ལྟར་ལྷ་སྦས་ཀྱི་འགྲེལ་པར་ཡང་འབྱུང་བ་ལེགས་སོ། །བཞི་པ་ལ་གཉིས། སྔགས་ཀྱི་ནུས་པ་ཁྱད་པར་བ་རྙེད་པའི་ཚུལ་དང༌། དེ་ལ་བརྟེན་ནས་ལས་རྣམས་སྒྲུབ་པའི་ཚུལ་ལོ། །དང་པོ་ནི། སྙིམ་པ་མེ་ཏོག་གིས་བཀང་སྟེ་དེ་ལ་སྔགས་ཀྱིས་བསྔགས་ནས་ནམ་མཁའ་ལ་གྱེན་དུ་འཐོར་བ་ན། དེ་རྣམས་མཁའ་ལ་སྤྱོད་པ་སྟེ་ནམ་མཁར་གནས་ནས་མེ་ཏོག་དེ་དག་གཅིག་ཀྱང་ས་ལ་མ་ལྷུང༌ཞིང༌། མེ་ཏོག་ས་ལ་ལྷུང་བ་མ་མཐོང་ན་ལས་ཐམས་ཅད་བྱེད་པར་ནུས་ལ། སའི་གནས་ཀྱི་ཁྱད་པར་ཏེ་ཁྱད་པར་བ་རྣམས་ལ་གནས་པ་དང༌། མཁའ་ལ་འགྲོ་བ་སྟོང་ཕྲག་གིས་མཚོན་ནས་སྟེང་གི་ཕྱོགས་ན་གནས་པ་ཐུགས་པ་མེད་པ་རྣམས་ཀྱི་གནས་ལ་དབང་ནི་བྱེད་པར་འགྱུར་ཞིང༌། ངག་གི་དབང་ཕྱུག་མ་སྟེ་དབྱངས་ཅན་མ་ལ་སོགས་པའི་ལྷའི་བུ་མོ་རྣམས་དང༌། གསུང་གི་དབང་པོ་སྟེ་སྨྲ་མཁས་པ་ལྷའི་བླ་མ་ཕུར་བུ་དང༌། དེས་མཚོན་པའི་ལྷ་ཆེན་པོ་གཞན་རྣམས་འགུགས་པར་འགྱུར་རོ། །ལྷ་དང་ལྷ་ཞེས་པ་ནི་མང་པོ་སྡུད་པའི་ཟློས་སྒྲ་སྟེ། དེ་ཀུན་གྱི་
གཏམ་སྟེ་སྐད་ཤེས་ཤིང༌། སྐར་མའི་རྒྱུ་བ་རྣམས་ཀྱང་ཤེས་པར་འགྱུར་རོ། །གོ་རིམ་ཞེས་སོགས་ནི་འགྲེལ་པ་རྣམས་ལ་མེད་ལ། ཡོད་པ་ལྟར་ན་སྐད་རྣམས་གོ་རིམ་མི་འཆོལ་བར་ཤེས་པའི་དོན་ནོ། །གཉིས་པ་ལ་གསུམ། མི་སྣང་བ་དང་ཤིང་དགུག་པ། རྨི་ལམ་བརྟག་པ་དང་པྲ་དབབ་པ། ནད་ཞི་པ་ལ་སོགས་པའི་ལས་སྒྲུབ་པའོ། །དང་པོ་ནི། གྲོང་གྲོང་ནི་གྲོང་མང་པོ་སྡུད་པའི་ཟློས་སྒྲའོ། །དེ་བཞིན་དུ་དགོན་པ་དབེན་པ་དང༌། གྲོང་ཁྱེར་དང་ནི་ལམ་གྱི་བཞི་མདོ་དང༌། ཤིང་གཅིག་ནི་ཤིང་གཞན་གྱི་གྲིབ་མས་ཤིང་དེ་མི་ནོན་ཞིང༌། ཤིང་དེའི་གྲིབ་མས་ཀྱང་ཤིང་གཞན་མི་ནོན་པའི་ཤིང་ངོ༌། །ཞིང་སྐྱོང་ལ་སོགས་པ་ལྷག་པར་གནས་པའི་དཔའ་བོའི་ཁྱིམ་དང༌། རི་རྩེ་དང་དབང་ཕྱུག་ཆེན་པོའི་མཚན་མ་སྟེ་ལིང་གའི་དྲུང་དུ་སྙིང་པོ་ལ་ཉེ་བས་ཉེ་བའི་སྙིང་པོ་ཡི་གེ་བདུན་པ་རྟག་ཏུ་དྲན་ཏེ། མི་སྣང་བ་སྒྲུབ་པའི་སྒོ་ནས་ཟློས་ན། ལྷ་དང་མི་གཞན་གྱིས་མཐོང་བར་མི་འགྱུར་བས་མི་སྣང་བ་འགྲུབ་བོ། །སྔར་བཤད་པའི་གནས་དེ་དག་ཏུ་བསྒྲུབས་ན་འགྲུབ་པ་དེ་བས་ན། གྲོང་ལ་སོགས་པའི་ཡུལ་ཕྱོགས་འདི་དག་ཏུ་སྒྲུབ་པ་པོ་ནི་རྟག་ཏུ་གནས་པ་ཡིན་ནོ། །རང་ཧེ་རུ་ཀར་གསལ་བའི་སྙིང་ཁར་པདྨ་འདབ་མ་དྲུག་པ་ལ་ཉེ་སྙིང་ཡི་གེ་བདུན་གྱི་བདག་ཉིད་ཅན་ཁ་དོག་དམར་པོ་བསམས་ནས། སྔགས་ཁ་དོག་དམར་པོ་བུང་བ་འཁྲིགས་པ་ལྟ་བུར་འཕྲོས་པ་ཤིང་སྡོང་གི་རྩེ་མོར་བསམས་ནས། ཡི་གེ་བདུན་པ་དང་དབྱེར་མི་ཕྱེད་པར་འདྲེས་
པར་བསམས་ན་ཤིང་སྡོང་དེ་དམའ་བ་སྟེ་འགྱེལ་པར་འགྱུར་རོ། །ཤིང་དྲུང་ཞེས་པ་ལྟར་ན་ཤིང་གི་རྩ་བར་སེམས་པ་ཡིན་མོད་ཀྱང་བྷ་བས་རྩེ་མོར་ཡི་གེ་བདུན་སེམས་པར་བཤད་དོ། །ས་རྣམས་ཞེས་པ་ལ་ས་འཛིན་ཞེས་འབྱུང་ཞིང༌། དེའི་དོན་རྡོ་ཡི་རི་བོ་ལ་བཤད་དེ་སྔར་ལྟར་བྱས་ན་དེ་རྣམས་ཀྱང་ནི་འགྱེལ་བར་འགྱུར་བ་ལས་གཞན་དུ་མིན་ནོ། །གཉིས་པ་ནི། རང་ཧེ་རུ་ཀར་གསལ་བའི་ལུས་ཀྱི་སྙིང་གར་པདྨ་དམར་པོ་འདབ་མ་དྲུག་པ་ཅིག་བསམ། དེའི་ལྟེ་བ་འདབ་མ་དང་བཅས་པ་བདུན་ལ། ཉེ་སྙིང་གི་ཡི་གེ་རེ་རེ་རྣམ་པར་བཀོད་དེ། མལ་འོག་གི་ས་ལ་བདུད་རྩི་ལྔས་བྱུགས་ཏེ། ཀུ་ཤ་སྟན་དུ་བྱས་པ་ལ་ཉལ་ལ། ཡི་གེ་བདུན་གྱི་བདག་ཉིད་ཅན་གྱི་སྔགས་གྲངས་བརྒྱ་རྩ་བརྒྱད་པ་ཉིད་དུ་བཟླས་ཏེ། རང་ལས་མཁའ་འགྲོ་མའི་འཁོར་སྤྲོས་ནས་འཇིག་རྟེན་གསུམ་དང་ལྷན་ཅིག་འདྲེས་ནས། སླར་ཡང་རང་གི་སྣ་བུག་གཡོན་པ་ནས་ཞུགས་ཏེ། ཉལ་བའི་ཆོ་ག་བཞིན་དུ་ཉལ་ན་རྨི་ལམ་དུ་ནི་བྱ་བ་ཀུན་རང་གི་ཡིད་ལ་འདོད་པ་ཐམས་ཅད་སྟོན་པར་འགྱུར་རོ་ཞེས་གསུང་ངོ༌། །བཤད་སྦྱར་ལས། རང་གི་ལུས་ལ་དཀྱིལ་འཁོར་གྱི་འཁོར་ལོ་རིམ་པ་ཇི་ལྟ་བ་བཞིན་དུ་བསྒོམས་ལ། བདུད་རྩི་ལྔས་བྱུགས་པའི་ཀུ་ཤའི་སྟན་ལ་ཉལ་ཏེ་སྔགས་བརྒྱ་རྩ་བརྒྱད་བཟླས་ནས་ཉལ་བས་རྣལ་འབྱོར་མས་རྨི་ལམ་དུ་སྟོན་ནོ་ཞེས་འཆད་དོ། །དཔའ་བོས་རང་གི་ལུས་ལ་རྣམ་བཀོད་ཀྱི་དོན། རང་གི་སྤྱི་བོ་དང༌། དཔྲལ་བ་དང༌། མིག་གཉིས་དང༌། ཁ་དང་ཕྲག་པ་དང༌། སྙིང་གར་ཟླ་བའི་དཀྱིལ་
འཁོར་གྱི་སྟེང་དུ་ཁ་དོག་དཀར་པོའི་ཡི་གེ་བདུན་དགོད་ཅེས་འཆད་དོ། །བྷ་བས་བདག་གི་ལུས་ལ་བཀོད་པའི་དོན། མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་ལ། ཨོཾ་ནས་བགྲངས་པའི་ཡི་གེ་དྲུག་དང༌། ཡིད་ལ་ཧཱུཾ་བཀོད་པའི་མཐར་ཕཊ་དགོད་པར་འདོད་དོ། །རྨི་ལམ་རྟོག་པ་འདི་ནི་བྱ་སླ་ཞིང་དོན་ཆེ་བ་དང༌། གྲུབ་ཆེན་སོ་སོའི་མན་ངག་ལས་འབྱུང་བ་ཡིན་པས་ཀུན་ཤེས་ན་གཅིག་ལ་མ་བྱུང་ཡང་བརྟག་པ་གཞན་ལ་བྱས་པས་ཆོག་པས་བཀོད་དོ། །བླ་མ་གོང་མའི་མན་ངག་ནི། འབབ་ཆུའི་འགྲམ་གྱི་བྱེ་མ་དང་ཀུ་ཤ་ལ་སྔགས་བརྒྱ་རྩ་བརྒྱད་བཟླས་ཤིང་བདུད་རྩི་ལྔ་གཏོར་ལ། ས་ཕྱོགས་གཙང་མར་བྱེ་མའི་སྟེང་དུ་འདུག་སྟེ་རང་གི་སྙིང་གར་འཁོར་ལོ་བསམས་ལ། བཟླས་བརྗོད་ཀྱི་སྔགས་བདག་གི་ཁ་དང་མིག་དང་རྣ་བ་དང་སྣ་ནས་འཕྲོས་ཏེ། སེམས་ཅན་ལ་ཁྱབ་པར་བྱས་ཤིང་སླར་བསྡུ་པའི་སྦྱོར་བས་གསང་སྔགས་ཟློ་ཞིང༌། གློ་གཡས་པ་ཕབ་ནས་ཉལ་ན་ཇི་སྐད་བཤད་པ་དེ་བཞིན་དུ་འགྱུར་རོ། ཞེས་གསུང་ངོ༌། །རྨི་ལམ་དུ་ཡིད་ལ་འདོད་པ་སྟོན་ཚུལ་ནི། དུས་མིན་པར་འཆི་བ་དང༌། བཅོམ་པ་དང་ཉམས་པ་སོགས་ཀྱི་བྱ་བ་ཀུན་ཏུ་གང་གྱུར་པ་དང༌། བྱ་བ་དང་མི་བྱ་བ་རྣམ་པ་སྣ་ཚོགས་པ་སྔར་བཤད་པ་ལས་གཞན་དག་ཐམས་ཅད་ཀྱང་རྨི་ལམ་དུ་རྣལ་འབྱོར་མས་སྟོན་ནོ། །དུས་མིན་ཞེས་པའི་རྐང་པ་གཅིག་ལ་དུས་མ་ཡིན་པར་འཆི་བ་བཅོམ་པ་སྟེ་སེལ་བར་བྱེད་ཅིང༌། ཉམས་པ་འཕེལ་
བར་བྱེད་པར་འགྲེལ་པ་གསུམ་ལས་འཆད་དེ། དུས་མིན་དུ་འཆི་བ་སོགས་ཀྱི་མཚན་མ་མཐོང་ན། འདི་ལ་འདི་ལྟར་གྱིས་ཞེས་ཐབས་བསྟན་པས་དུས་མིན་གྱི་འཆི་བ་སེལ་བ་སོགས་བྱེད་པའོ། །ལྷས་རྨི་ལམ་དུ་ལུང་སྟོན་པ་དེ་བཞིན་དུ་ལྷའི་མཐུས་པྲ་ཕབ་པས་བྱ་བ་དང་མི་བྱ་བ་སྟོན་པ་ནི། མཛེས་པའི་གཞོན་ནུ་མའམ་ཁྱེའུ་གཞོན་ནུ། དུས་ཚོད་མིན་པ་ཞེས་པ་དགོངས་མོ་བོས་ཏེ་མིག་བཀབ་ལ་ཉེ་སྙིང་གི་སྔགས་བརྒྱ་རྩ་བརྒྱད་དུ་བཟླས་པས་བསྔག་གོ། ཐོ་རངས་ཇི་ལྟ་བ་བཞིན་དུ་སྟོན་པར་འགྱུར་ཏེ། ཁང་པའི་ནང་དུ་མར་མེ་སྤར་ལ། དྲི་བཟང་པོའི་ཆུས་བཀང་བའི་བུམ་པས་བྲིས་སྐུ་དང་སྐུ་གཟུགས་རྣམས་ལ་ཡང་དག་པར་མཆོད་དོ། །རལ་གྲིའམ་ཆུ་དང་མར་མེ་དང་མེ་ལོང་བསྟན་ལ། སྔགས་པས་བདག་ཉིད་རྟག་ཏུ་དཔལ་ཧེ་རུ་ཀའི་རྣལ་འབྱོར་དང་ལྡན་པས། པྲ་སེན་ནི་འབེབས་པར་བྱེད་ཅིང༌། དཔལ་ཧེ་རུ་ཀ་བསྒོམས་ནས་ཉེ་སྙིང་ལན་བདུན་དུ་བཟླས་བརྗོད་བྱས་པས་དགེ་བ་སྟེ་བྱར་རུང་བ་དང༌། མི་དགེ་བ་སྟེ་བྱར་མི་རུང་བ་རྣམས་ལྷའི་མཐུས་སྟོན་པར་འགྱུར་རོ། །ཡང་ན་མཐེ་བོང་ཏིལ་མར་གྱིས་བཀྲུས་ལ། སེན་རྩི་ཞེས་པ་རྒྱ་སྐྱེགས་ཀྱི་ཁུ་བས་བྱུགས་ཏེ། གཞོན་ནུའམ་གཞོན་ནུ་མ་ལ་བསྟན་ན་སུ་ཞིག་གིས་ནོར་ཁྱེར་བ་སྨྲ་བར་འགྱུར་ཞིང༌། བཅོམ་པ་དང་ཉམས་པ་ལ་སོགས་པ་ཡང་སྟོན་པར་འགྱུར་ཏེ་མཐེ་བོང་ལ་པྲ་དབབ་པའོ། །གསུམ་པ་ལ་ལྔ། སྔགས་དང་འཁོར་ལོ་ལ་བརྟེན་ནས་ནད་ཞི་བར་བྱ་བ། དབང་གི་སྦྱིན་སྲེག་གདམ་ང་དང་བཅས་པ།
ལས་ཀྱི་དབྱེ་བས་ཁ་དོག་གི་དབྱེ་བ་བསྟན་པ། དུག་དང་རིམས་ལ་སོགས་པ་འཇིག་ཚུལ། རྒྱན་པོ་དང་གཡུལ་ལས་རྒྱལ་བ་ཞར་བྱུང་དང་བཅས་པའོ། །དང་པོ་ནི། པྲ་འབེབས་པ་བཤད་པ་དེ་ནས་དཔའ་བོ་ཧེ་རུ་ཀའི་ཉེ་སྙིང་ཡི་གེ་བདུན་པའི་སྔགས། འཁོར་ལོ་ལ་དགོད་པའི་དབྱེ་བ་མི་འདྲ་བ་ཉིད་ཀྱི་ལས་སྒྲུབ་ཚུལ་བཤད་པ་ནི། ཉི་མའི་དཀྱིལ་འཁོར་གྱི་དབུས་སུ་ཉེ་སྙིང་གི་ཧཾ་ལ་སོགས་པས་དངོས་སུ་དགོད་པ་སྟེ་བྲི་བའམ་ཡིད་ཀྱིས་བསམས་ནས་ནི། དེའི་དབུས་སུ་ནད་པ་བསམས་ཏེ་སྦེལ་ཚིག་དང་བཅས་པས་ཉེ་སྙིང་སྟོང་གི་བར་དུ་བཟླས་པར་བྱ་ཞིང༌། ལག་པ་ལ་སྔགས་ཀྱི་ཡི་གེ་ཤེལ་གྱི་རྣམ་པ་ལྟ་བུར་ནི་བསྒོམས་ལ་ནད་ཀྱིས་གདུངས་པའི་ནད་པ་ལ་བསྟན་པར་བྱས་ན། ལག་པ་མཐོང་བ་ཙམ་གྱི་མོད་ལ་ནི་ནད་ཀུན་འཇོམས་པར་ཐེ་ཚོམ་མེད་དོ། །སྐབས་འདིར་བསྒྲུབ་བྱའི་སྙིང་ཁར་དེའི་རྣམ་ཤེས་མཐེ་བོང་གི་ཚད་ཙམ་དྲི་མ་མེད་པའི་ཤེལ་ལྟར་བསྒོམས་ན་ནད་ལས་གྲོལ་བར་འགྱུར་རོ་ཞེས་འགྲེལ་པ་མང་པོས་འཆད་དེ་གཞུང་གིས་ཟིན་པར་འདོད་དོ། །སྟོན་ཀའི་དུས་ཀྱི་ཟླ་བ་འདྲ་བའི་ཟླ་བའི་དཀྱིལ་འཁོར་བསམས་ལ། དེ་ལ་ཟླ་བའི་དབུས་སུ་ཕྱོགས་བཞི་དང་དེའི་དབུས་སུ་རེའུ་མིག་ལྔ་བྱས་པས། མཚམས་སུ་བཞི་དང་བཅས་པའི་རེའུ་མིག་དགུ་རྣམ་པར་བཀོད་ཅིང༌། དེའི་དབུས་སུ་ཨོཾ། ཤར་དུ་ཧྲིཿ ལྷོར་ཧ། ནུབ་ཧ། བྱང་དུ་ཧུཾ། ཡང་དབུས་སུ་ཧུཾ། མཚམས་བཞིར་ཕཊ་བཞིའམ། ཊ་མ་གཏོགས་
པའི་ཕ་བཞི་དགོད་དེ། ཡི་གེ་ཤེལ་གྱི་མདོག་ལྟར་དཀར་པོར་སྣང་ཞིང་གསལ་བའི་འཁོར་ལོར་ནད་རྣམས་ཀུན་སེལ་བ་ལ། བསྒྲུབ་བྱ་དབུས་སུ་གནས་པའི་འཁོར་ལོ་ལག་པ་གཡོན་པར་བསྒོམས་ཏེ། རྒྱུ་བ་དང་མི་རྒྱུ་བའི་དུག་གིས་ཟིན་པའི་མགོ་བོར་བཞག་ལ། དེ་ལས་བདུད་རྩིའི་རྒྱུན་བབ་པས་ལུས་ཐམས་ཅད་ལ་དུག་མེད་པར་བསམས་ན་དུག་མེད་པར་འགྱུར་རོ། །དེ་བཞིན་དུ་རིམས་དང་གདོན་དང་སོགས་ཀྱི་སྒྲས་རྒྱུ་བ་དང་མི་རྒྱུ་བའི་དུག་དང༌། བརྗེད་བྱེད་དང་གཟེར་ནད་ཀྱི་སྒྲས་ལྷོག་པ་སོགས་དང༌། མཛེ་ཅན་དང་མཆེ་བའི་དུག་གིས་ཟིན་པ་སོགས་ཀྱི་ནད་རྣམས་དང༌། དེ་དག་ལས་གཞན་པའི་ནད་ཀུན་ཐེ་ཚོམ་མེད་པར་ནི་ཟླ་བའི་གཟུགས་ལ་ཡི་གེ་བདུན་པ་བཀོད་པ་ལག་པ་གཡོན་པར་བསམས་ནས་ནད་ཀྱིས་གདུངས་པ་ལ་བསྟན་པའམ་བྱབ་པར་བྱས་ཤིང༌། སྔགས་ཀྱི་ཡི་གེ་དེ་རྣམས་ཀྱི་འོད་ཟེར་བདུད་རྩིའི་རང་བཞིན་ཅན་བྱུང་སྟེ། ཤར་ལ་སོགས་པའི་ཕྱོགས་བཅུར་རྣམ་པར་འབྱེར་བ་སྟེ་ཁྱབ་པར་བསྒོམས་ན་དུག་ལ་སོགས་པ་སེལ་ལོ། །གཉིས་པ་ནི། སྦྱིན་སྲེག་གི་དུས་ནི་མཚན་མོ་གསང་བ་སྟེ་དབེན་པ་ལ་གནས་ཏེ། གཽ་ནི་དོན་མང་པོ་ལ་འཇུག་ཀྱང་འདིར་ནི་བ་ལང་ངོ༌། །མཾ་ས་ནི་ཤའོ། །དེ་ནི་བུ་རམ་དང་སྦྲང་རྩི་དང་ཤ་ཁ་རའི་མངར་གསུམ་ལ་བཏགས་པ་སྟེ། དེ་གསུམ་གྱིས་སྦགས་པའི་བསྲེག་རྫས་ཡི་གེ་བདུན་གྱི་གསང་སྔགས་ཀྱིས་སྦྱིན་སྲེག་བྱེད་ལུགས་ཤེས་པས། དབང་གི་ལས་ཐམས་ཅད་
པའི་ཐབ་ཏུ་སྟོང་ཕྲག་བརྒྱད་དུ་སྦྱིན་སྲེག་བྱས་ན། སྔགས་པས་ནང་བར་གྱི་དུས་སུ་ནི། གསེར་སྲང་སྟོང་ནི་རྙེད་པར་འགྱུར་ལ། སྦྱིན་སྲེག་སྟོང་ཕྲག་བཅུ་ཡིས་ནི་ཡུལ་འཁོར་དམ་པ་སྟེ་མཆོག་རྙེད་པར་འགྱུར་རོ། །སྦྱིན་སྲེག་གིས་སྒྲུབ་པ་ལས་ཡང་ན་སྔར་བཤད་པའི་གནས་གང་དང་གང་དུ་གསང་སྔགས་ཀྱི་རྒྱལ་པོ་ཉེ་སྙིང་ནི། ཞི་བ་ལ་སོགས་པའི་དོན་དུ་བསམས་ནས་ཟློ་བ་དེ་ཡི་ཚེ། གནས་དེ་དང་དེར་ནི་དོན་དེ་སྐྱེ་བ་སྟེ་འབྱུང་བར་འགྱུར་བར་ཐེ་ཚོམ་མེད་དོ། །བོད་ཁ་ཅིག་ན་རེ་ཞིང་གང་དུ་སྐྱེ་འདོད་པའི་གནས་སུ་སྐྱེ་བར་བྱའོ་སྙམ་ནས། ཉེ་སྙིང་བརྒྱ་རྩ་བརྒྱད་རེ་བཟླས་ན་གནས་གང་དུ་སྐྱེ་འདོད་པ་དེར་སྐྱེའོ་ཞེས་འཆད་པ་ནི་དོན་མིན་ཏེ། ལས་སྒྲུབ་པ་ལ་སྦྱིན་སྲེག་བྱེད་མི་བྱེད་གཉིས་ཀྱི་ཚུལ་སྟོན་པར་སྣང་བའི་ཕྱིར་རོ། །གསུམ་པ་ནི། དཀྱིལ་འཁོར་གྱི་ལྷ་དང་མེ་ལྷ་དང༌། སྔགས་ཀྱི་ཁ་དོག་དང༌། ཆས་གོས་དང༌། མེ་ཏོག་ལ་སོགས་པའི་མཆོད་རྫས་རྣམས་ཁ་དོག་དཀར་པོར་བྱས་པ་ཡིས་ནི། ནད་དང་གདོན་ལ་སོགས་པ་ཞི་བར་འགྱུར་བའི་ལས་འགྲུབ་ཅིང༌། དེ་རྣམས་ཁ་དོག་ནག་པོར་བྱས་པས་སྐད་ཅིག་དག་གིས་ཏེ་མྱུར་དུ་གསོད་པར་བྱེད་དོ། །དེས་མཚོན་ནས་བསྐྲད་པ་དང་དབྱེ་བ་སོགས་ཀྱང་ཤེས་པར་བྱའོ། །དེ་རྣམས་དམར་པོར་བྱས་པས་ནི་བསྒྲུབ་བྱ་དབང་དུ་འགྱུར་པ་སྟེ་དེ་ཡང་འཕྲལ་དུ་ངེས་པར་འགུགས་པར་འགྱུར་རོ། །ལྷ་ལ་སོགས་པ་རྣམས་ཀྱི་ཁ་དོག་སེར་པོ་བྱས་པ་ཡིས་གཞན་གྱི་དཔུང་ལ་སོགས་
པ་ཐམས་ཅད་གནོན་པ་སྟེ་རེངས་པར་འགྱུར་ཏེ། ལས་སོ་སོ་ལ་ཁ་དོག་གི་དབྱེ་བ་སོ་སོར་བཤད་པ་འདི་ནི་བསྟན་བཅོས་ཏེ་རྒྱུད་རྣམས་ལས་ངེས་པ་ཡིན་ནོ། །ཐམས་ཅད་གནོན་ཞེས་པའི་གནོན་བྱ་སྟོན་པ་ནི་ལྷ་ལ་སོགས་པ་ཁ་དོག་སེར་པོ་ཡིས་ནི་གཞན་གྱི་དཔུང་ནི་གནོན་པ་དང༌། ཆུ་ལ་འགྲོ་བའི་གྲུ་དང༌། གཞན་གྱིས་བྱས་པའི་འཁྲུལ་འཁོར་དང༌། གླང་པོ་ཆེ་ལ་སོགས་པ་གནོན་པ་སྟེ་རེངས་པར་བྱེད་དོ། །དེ་རྣམས་ཁ་དོག་དཀར་པོ་ཡིས་ནི། ཡིད་ལ་བསམས་པ་ཙམ་གྱིས་ནི་དུས་མ་ཡིན་པའི་འཆི་བའི་རྒྱུ་ཡང་ཞི་བར་བྱས་ཏེ། འཆི་བ་དེ་ལས་ངེས་པར་སློང་བ་སྟེ་ཐར་བར་འགྱུར་རོ། །དུག་སྦྲུལ་ཆེན་པོ་བརྒྱའི་མཆེ་བའི་དུག་གིས་ཟིན་པའི་དུག་གི་ནད་དེ་ཡང་དེ་ལས་མྱུར་དུ་སློང་བ་སྟེ་ཐར་བར་བྱེད་དོ། །བཞི་པ་ནི། དུག་གིས་བརྒྱལ་བ་རྣམས་སྒྲུབ་པ་པོས་མཐོང་ནས་བརྒྱལ་བ་དེ་ལས་རབ་ཏུ་སད་པའི་ཐབས་བྱས་པས། བརྒྱལ་བ་ལས་རབ་ཏུ་སད་བར་འགྱུར་ལ། ཉིན་གཅིག་པ་ལ་སོགས་པའི་རིམས་དང༌། གཟའ་ལ་སོགས་པའི་གདོན་དང༌། བརྗེད་བྱེད་ཀྱི་གདོན་གྱིས་ཟིན་པ་རྣམས་ནི། སྔགས་པའི་ལག་པ་གཡོན་པར་འཁོར་ལོ་བྲིས་པ་མཐོང་བས་འཇིག་པ་སྟེ་དེ་རྣམས་ཉམས་པར་འགྱུར་རོ། །ལྔ་པ་ནི། རྒྱན་པོ་སྟེ་ཤོ་འདེབས་པ་དང༌། གཡུལ་དུ་འཇུག་པའི་དུས་སུ་ཉེ་སྙིང་གི་འཁོར་ལོ་དང་བཅས་པའི་ལག་པའི་ཁུ་ཚུར་བཅིངས་ཏེ། ཡིད་ལ་ཉེ་སྙིང་གི་སྔགས་སྤེལ་ཚིག་དང་བཅས་པ་རྟག་ཏུ་ཟློས་པར་བྱེད་ན། ཁུ་ཚུར་མ་བཀྲོལ་བ་དེ་སྲིད་དུ་རང་གང་འདོད་པའི་བྱ་བ་ཐམས་ཅད་སྒྲུབ་པ་སྟེ་འགྲུབ་པར་འགྱུར་ལ།
གལ་ཏེ་དགྲ་བོ་ལག་ན་ནི་མཚོན་ཆ་འཕྱར་པར་བྱེད་པ་ཡང༌། ཇི་སྲིད་ཁུ་ཚུར་མ་བཀྲོལ་བར་དུ་མཚོན་ཆ་གཏོང་བར་མི་ནུས་སོ། །ལས་སྦྱོར་འདི་ལ་ལཱ་བ་པས། ལྡོང་རོས་སམ་ཡུང་བས་ལག་པ་གཡོན་པའམ་ཟངས་ལེབ་ལ་འཁོར་ལོ། ཆེ་གོ་མོའི་ལུས་ལ་འཁོར་ལོ་ཐམས་ཅད་ཟློག་ཅིག་ཅེས་པ་སྤེལ་ཚིག་དང་བཅས་པ་བྲིས་ལ། སྔགས་སྟོང་བཟླས་ནས་ཁ་བསུབས་ལ་རྡོ་རྗེའི་ཆུ་རུ་གཞུག །དེ་ནས་བླངས་ཏེ་སྔགས་བཟླས་ཤིང་ཁུ་ཚུར་གྱི་ནང་དུ་བཅུག་ན། ཁུ་ཚུར་མ་བཀྲོལ་བར་དུ་མཚོན་ཆས་མི་ཚུགས་སོ། །འགེགས་ནས་ཤི་བའི་རོའི་ཁར་རྡོ་རྒྱུས་བཅུག་དེ་ནས་བླངས་ཏེ། རང་ཁ་ནུབ་ཕྱོགས་མིན་པར་བལྟས་ནས་འཁོར་ལོ་འདི་བྲིས་ན་བྲིས་པ་ཙམ་གྱིས་རྒྱན་པོ་ལས་རྒྱལ་བར་འགྱུར་རོ་ཞེས་འཆད་དོ། །ཡང་ན་ལ་གཞན་ཡང་ཞེས་འབྱུང་བ་ལེགས་པས་སྔར་བཤད་པའི་དཔུང་གནོན་པ་སོགས་ལས་གཞན་པའི་ཕ་རོལ་པོའི་ལུས་ངག་རེངས་པར་བྱེད་པའི་བྱ་བ་ཐམས་ཅད་ནི། འཁོར་ལོ་ལག་པར་བཅུག་ནས་ཁུ་ཚུར་བཅིངས་པས་སྔར་བཤད་པ་དེ་བཞིན་ཉིད་དུ་སྒྲུབ་པར་བྱེད་པ་སྟེ་བསྒྲུབ་པར་བྱའོ། །སྔགས་པ་རང་ཉིད་ཀྱིས་འབྲས་བུ་དང༌། མེ་ཏོག་དང༌། དེའི་འདབ་མ་དང་སོ་རྩི་དང་དེ་བཞིན་དུ་ཁ་ཟས་གཞན་རྣམས་ལའང་ལག་པ་གཡོན་པར་ཟླ་བ་དང༌། འཁོར་ལོ་རེའུ་མིག་དགུ་པ་ལ་ཉེ་སྙིང་སྔར་བཞིན་བཀོད་ནས། དེ་ལས་བདུད་རྩི་འཛགས་པས་དེ་ཐམས་ཅད་ལ་ཁྱབ་པར་བསམས་ཏེ་ལོངས་སྤྱོད་པར་བྱ་བ་ནི་
གདམས་ངག་གོ་ཞེས་འཆད་པ་ལྟར་བྱའོ། །ལྔ་པ་ནི། དེ་ལྟར་སྔར་བཤད་པའི་ལས་སྒྲུབ་པའི་ནུས་པ་འགྲུབ་པའི་ཐབས་ནི། སྔར་བཤད་པའི་གནས་སུ་གནས་ནས་ལུས་ཏེ་སྐུའི་སྦྱོར་བ་སྟེ་རྣལ་འབྱོར་བྱེད་པ་ནི་དང་པོ་སྟེ། དཔལ་འཁོར་ལོ་བདེ་མཆོག་གི་གཟུགས་ཀྱི་བདག་ཉིད་དུ་རྫོགས་པར་བྱེད་པའོ། །དེ་བཞིན་དུ་གཉིས་པ་ནི་ཡིད་ཀྱིས་ལྷ་མོ་ཕག་མོ་སྒོམ་པའོ། །ནུས་པ་ཡིན་ཞེས་པ་སྐད་དོད་ལ་ཡིད་ཀྱི་ཡིན་ཞེས་པར་ཡོད་གསུངས་པ་ལྟར་རོ། །གསུམ་པ་དག་ནི་ངག་ཉིད་དེ་ཞེས་པ་ནི་མཁའ་འགྲོ་མ་ནས་གཤིན་རྗེ་བརྟན་མ་ལ་ཐུག་པར་མཆོད་པ་དང་བསྟོད་པ་ནས་གཟུང་བ་སྔོན་དུ་འགྲོ་བས། རིམ་པ་ཇི་ལྟ་བ་བཞིན་དུ་རྫོགས་པར་བྱས་ནས་སྔགས་ཀྱི་བཟླས་པ་ལས་ལས་ཐམས་ཅད་འགྲུབ་པར་འགྱུར་རོ། །ཞེས་པའི་དོན་ནོ་ཞེས་ཏ་ཐཱ་ག་ཏ་རཀྵི་ཏས་འཆད་དེ། སྔོན་དུ་སྒྲུབ་ཐབས་བཟླས་པ་དང་བཅས་པ་ལ་གོམས་པར་བྱས་ནས་ཕྱིས་ལས་བསྒྲུབ་ཅེས་པའི་དོན་ནོ། །བཞི་པ་དམིགས་པར་མི་འགྱུར་ཏེ་ཞེས་པ་འགྲེལ་པ་རྣམས་དང་ལོ་ཆེན་གྱི་འགྱུར་ལ་མེད། ཡོད་པ་རྣམས་ཀྱི་ལུགས་ཀྱིས་ལུས་ངག་ཡིད་ཀྱི་སྦྱོར་བ་གསུམ་ལས་གཞན་མེད་པའི་དོན་དུ་འཆད་དོ། །སྔར་བཤད་པ་ལྟར་གོམས་པའི་མཐར་ལས་རྣམས་བསྒྲུབས་ན། སྔགས་ཀྱི་རྒྱལ་པོ་ཉེ་སྙིང་གིས་འགྲུབ་པར་འགྱུར་རོ། །གང་འགྲུབ་པ་ནི་ས་གཞི་ཤིང་གིས་མཚོན་པ་དང་བཅས་པ་ཕྱིའི་ཕྱོགས་བཞིའི་རྒྱ་མཚོ་ཆུ་ཡི་སྐ་རགས་བཏགས་པ་སྟེ་བཅིངས་པ་དེ་ལ་གནས་པའི་དངོས་གྲུབ་འགྲུབ་པ་འདིར་ནི་ཐེ་ཚོམ་མེད་དོ། །ས་གསུམ་གྱི་ཁམས་གསུམ་གྱི་རྒྱུ་བ་
བཅུད་ཀྱི་སེམས་ཅན་དང༌། མི་རྒྱུ་བ་སྣོད་ཀྱི་འཇིག་རྟེན་དང་བཅས་པར་དམོད་པ་འདེབས་པ་སྟེ། ངག་ཙམ་གྱིས་ཚར་གཅོད་པ་དང་ཕན་འདོགས་པའི་རྗེས་སུ་འཛིན་པར་ནུས་པ་ཡིན་ནོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། ཉེ་བའི་སྙིང་པོའི་སྒོ་ནས་ལས་སྒྲུབ་པའི་ཆོ་གའི་ལེའུ་སྟེ། བཞི་བཅུ་རྩ་གསུམ་པའོ།། །།འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས། ལེའུ་བཞི་བཅུ་རྩ་གསུམ་པའི་བཤད་པའོ།། ༈ །།གཉིས་པ་དེ་དང་ཡུམ་གྱི་གོ་ཆ་ལ་བརྟེན་ནས་བསྒྲུབས་པ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུ་ཡི་མཚན་བསྟན་པའོ། །དང་པོ་ནི། ལེའུ་ཞེ་གསུམ་པ་བཤད་པའི་རྗེས་དེ་ནས་ལས་རྒྱའི་ཕོ་ཉ་མོ་ལ་བརྟེན་ཏེ། ཡི་གེ་བདུན་པ་གོ་ཆའི་རྣལ་འབྱོར་མ་དྲུག་གི་སྔགས་དང་ལྡན་པས། བསྒྲུབ་བྱ་གང་དུ་སྟེ་ལ་དབང་ལ་སོགས་པའི་ལས་ཡང་དག་པར་བརྩམས་ན་བརྩམས་པ་དེ་ཡི་མོད་ལ་ལས་རྣམས་མྱུར་དུ་འགྲུབ་པ་བཤད་པར་བྱའོ་ཞེས་སྦྱར་རོ། །གཉིས་པ་ལ་གསུམ། དབང་གི་སྒོ་ནས་དགུག་པའི་ལས། གནོན་པའི་ལས་སླར་དགྲོལ་བ་དང་བཅས་པ། སྨྱོ་བྱེད་ཀྱི་ལས་སླར་དགྲོལ་བ་དང་བཅས་པའོ། །དང་པོ་ལ་གཉིས། འཁོར་ལོ་ལ་བརྟེན་ནས་དགུག་པ་དང༌། སྦྱིན་སྲེག་ལ་བརྟེན་ནས་དགུག་པའོ། །དང་པོ་ནི། ལག་པ་གཡོན་པའི་དབུས་སུ་སྟེ་མཐིལ་དུ་འཁོར་ལོ་རྩིབས་དྲུག་པའི་དབུས་སུ་སྣ་ཚོགས་
པདྨ་འདབ་མ་དྲུག་པ་བྲི། དེའི་ལྟེ་བ་ལ་ཨོཾ། འདབ་མ་ལ་ཧྲིཿཧ་ཧ་ཧུཾ་ཧུཾ་ཕཊ་ཅེས་པ་དགོད། འཁོར་ལོའི་རྩིབས་དྲུག་ལ་རྣལ་འབྱོར་མའི་གོ་ཆའི་སྔགས་ཨོཾ་བཾ་ལ་སོགས་པ་དྲུག་ལས་དང་རྗེས་སུ་མཐུན་པའི་ཁ་དོག་ཅན། བསྒྲུབ་བྱའི་མིང་དང་སྤེལ་བ་རྣམ་པར་དགོད། ཡི་གེ་བདུན་པའི་ཆོ་ག་ཡིས་ཞེས་པ་དང༌། རྣལ་འབྱོར་མ་དྲུག་ཡང་དག་གནས། ཞེས་པ་ལ། ལག་དབུས་ཡི་གེ་བདུན་དགོད་བྱ། །རྣལ་འབྱོར་མ་དྲུག་རྩིབས་དྲུག་གནས། ཞེས་དཀའ་རྒྱལ་གྱི་འགྲེལ་པར་འབྱུང་བ་ལྟར་གོ་བར་བྱའོ། །ལག་པ་གཡོན་པའི་འཁོར་ལོ་དང་མིང་སྤེལ་བའི་བསྐུལ་ཚིག་དང་ལྡན་པར་ཟློས་ཤིང༌། སྔགས་ལས་འོད་ཟེར་ལྕགས་ཀྱུའི་རྣམ་པ་ཅན་འཕྲོས་པས། བསྒྲུབ་བྱ་གང་ཞིག་རང་གི་གཟུགས་འཛིན་པ་ཅན་བཀུག་པར་བསམས་ནས། ཁ་ནས་གསང་སྔགས་ཀྱི་རྒྱལ་པོ་ཡི་གེ་བདུན་པ་ཟློས་བཞིན་པས། བསྒྲུབ་བྱ་གང་ལ་རང་གི་ལག་པ་དེ་བསྟན་པའི་བསྒྲུབ་བྱ་དེ་ནི་ངེས་པར་འགུགས་པར་འགྱུར་རོ། །གཉིས་པ་ནི། ཙན་དན་དམར་པོའི་རྡུལ་ཏེ་བྱེ་མ་དང༌། དེ་བཞིན་དུ་སྐེ་ཚེ་དང་ལན་ཚྭ་དང་བསྒྲུབ་པར་བྱ་བའི་རྐང་རྗེས་ཀྱི་ས་གཅིག་ཏུ་སྡོམ་པར་བྱས་ནས་ཞིབ་ཏུ་བཏག་པར་བྱ། ཟླ་བ་དང་ཉི་མ་བཀོད་པའི་ལག་པ་གཉིས་ཀྱིས་མཉེས་ལ་ཐབ་ཁུང་དུ། གོ་ཆའི་རྣལ་འབྱོར་མ་དྲུག་གི་འཁོར་ལོ་བྲིས་ཏེ་མཚན་མོའི་དུས་སུ། སྨེ་ཤ་ཅན་གདོལ་པའི་མེའམ་དུར་ཁྲོད་ཀྱི་མེ་ལ། རྣལ་འབྱོར་མའི་སྔགས་བསྐུལ་ཚིག་དང་ལྡན་པས་ཕྱེ་མ་སྲེག་པའི་སྦྱིན་སྲེག་བྱའོ། །དེ་ནས་ཐལ་བ་ལ་བསྒྲུབ་བྱའི་གཟུགས་བརྙན་བྱས་ཏེ། གྲོ་ག་ལ་འཁོར་ལོ་ཇི་
ལྟ་བ་བཞིན་བྲིས་ནས་དེའི་སྙིང་གར་བཅུག་སྟེ། བདག་ཉིད་ལ་མངོན་དུ་ཕྱོགས་པར་བཞག་ལ། བསྒྲུབ་བྱ་མྱོས་པ་བཀུག་གཟུགས་བརྙན་ལ་བཅུག་སྟེ། མིང་སྤེལ་དང་བཅས་པའི་སྔགས་བཟླས་པའི་སྦྱོར་བ་འདི་ནི་བརྩམ་པར་བྱས་ལ། ཇི་སྲིད་བརྒྱ་ཕྲག་གཅིག་གི་བར་དུ་བཟླས་ན་དེས་ནི་ངེས་པར་ཏེ་གདོན་མི་ཟ་བར་འགུགས་པར་འགྱུར་རོ། །གང་ལ་དགུག་པའི་ལས་བྱེད་པའི་བསྒྲུབ་པར་བྱ་བའི་བདག་ཉིད་ནོར་བདག་དང་ནོར་དང་འཁོར་གྱི་སྐྱེ་བོ་རྣམས་རང་གི་དབང་དུ་འགྱུར་རོ། །ལས་ཀྱི་སྦྱོར་བ་འདི་ནི་གྲུབ་པ་སྟེ་གཞན་དུ་མི་འགྱུར་བར་རྟག་པ་སྟེ་རྣམ་པ་གཞན་དག་ཏུ་འགྱུར་བར་ནི་ང་མི་སྨྲའོ། །གཉིས་པ་ནི། རྡུལ་དེ་ཉིད་ནི་སྔར་བཤད་པའི་ཙནྡན་དམར་པོ་ལ་སོགས་པའི་ཕྱེ་མ་མང་པོ་སྟེ་དེ་བླངས་ནས་སུ་ལྕགས་ཀྱི་ཕྱེ་མ་དང་ནི་རྣམ་པར་བསྲེའོ། །དེ་ནས་དུར་ཁྲོད་ཀྱི་རས་ལ་བསྒྲུབ་བྱའི་མིང་སྤེལ་ཚིག་དང་བཅས་པ་བྲིས་པར་གཏུམས་ནས་ནི། སྤེལ་ཚིག་དང་བཅས་པའི་སྔགས་ལན་བདུན་བཟླས་ལ་ལམ་བཞི་མདོ་རུ་ཟབས་སུ་སོར་བརྒྱད་ཙམ་དུ་ས་བརྐོས་ནས། དགྲ་ཡི་མིང་དང་བཅས་པར་ནི་བསྒྲུབ་བྱ་གང་གི་མིང་སྨོས་པའི་སྔགས་བཟླས་ཏེ། ས་བརྐོས་པ་དེར་སྦས་པར་གྱུར་པ་དེ་ནི་མྱུར་དུ་གནོན་པ་སྟེ་རེངས་པར་འགྱུར་རོ། །སླར་གསོ་བར་འདོད་ན་འཁོར་ལོ་ས་འོག་ནས་བཏོན་ནས་འཁོར་ལོའི་ནང་གི་ཕྱེ་མ་དེ་ཉིད་ལ། དགྲོལ་བའི་སྤེལ་ཚིག་དང་བཅས་པའི་སྔགས་བཟླས་ནས་ནི། འབད་དེ་བ་ཡི་འོ་མ་གཙང་མ་ཡིས་འཁོར་ལོ་བཀྲུས་པ་ཡིས།
རེངས་པ་དེ་ནི་སླར་ཡང་གསོས་པར་གྱུར་ན། སླར་སོས་པ་འགྲུབ་པ་ཉིད་དུ་ཐེ་ཚོམ་མེད་དོ། །གསུམ་པ་ནི། སྔར་བཤད་པའི་ཕྱེ་མ་བཞི་པོ་དེ་ནི་བླངས་ནས་ནི་སྨྱོ་བྱེད་ཐང་ཁྲོམ་པའི་རྩ་བ་སྡོང་བུ་འདབ་མ་མེ་ཏོག་འབྲས་བུ་ལྔ་དང་ལྡན་པ་རུ་བྱས་པ་དེས་ནི། དུར་ཁྲོད་ཀྱི་རས་ཏེ་རོ་རས་ལ་དགྲ་ཡི་མིང་སྤེལ་ཚིག་དང་བཅས་པའི་འཁོར་ལོ་སྔར་བཤད་པ་བྲིས་པ་བཅུག་ལ། རས་དེས་བཅིངས་པ་སྟེ་གཏུམས་ནས། བསྒྲུབ་བྱའི་མིང་སྤེལ་ཚིག་དང་བཅས་པའི་སྔགས་ལན་བརྒྱར་བཟླས་བརྗོད་བྱས་ནས་ནི། དུར་ཁྲོད་དུ་ནི་ས་བརྐོས་ནས་ངེས་པར་སྦས་ན། བསྒྲུབ་བྱ་དེ་འཕྲལ་དུ་སྨྱོ་བ་ཉིད་དུ་འགྱུར་རོ། །སླར་གསོ་བར་འདོད་ན་བཏོན་པ་ཉིད་ཀྱིས་ཐར་བར་འགྱུར་ཏེ། དེ་ཡང་འཁོར་ལོ་ས་འོག་ནས་བཏོན་ནས་བ་ཡི་འོ་མ་གཙང་མ་ཡིས་འབད་པས་བཀྲུ་བར་བྱས་ཏེ། སླར་ཡང་གསོ་བར་བྱེད་པ་དག་བྱས་ན། སོས་པ་འགྲུབ་པ་ཉིད་དུ་ཐེ་ཚོམ་མེད་དོ། །དེ་བཞིན་ཞེས་པ་ནི་སྔར་དང་འདྲ་བར་བསྟན་ཏོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། རྣལ་འབྱོར་མ་དྲུག་གི་གོ་ཆ་དང་ཉེ་སྙིང་ཡི་གེ་བདུན་གྱིས་ལས་སྒྲུབ་པའི་ཆོ་གའི་ལེའུ་སྟེ། བཞི་བཅུ་རྩ་བཞི་པའོ། ། འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུལ་གསལ་བ་ལས། ལེའུ་བཞི་བཅུ་རྩ་བཞི་པའི་བཤད་པའོ།། ༈ །།གཉིས་པ་དཔའ་མོའི་གོ་ཆ་དང་ཧ་ལྔ་ལ་བརྟེན་ནས་ལས་བསྒྲུབ་པ་ལ་གཉིས། དཔའ་མོའི་གོ་ཆ་དང་ཚིག་གི་དངོས་གྲུབ་སྒྲུབ་པའི་ཆོ་ག་དང༌། ཧ་ལྔ་
ལ་བརྟེན་ནས་ལས་བསྒྲུབ་པའོ། །དང་པོ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུ་ཡི་མཚན་བསྟན་པའོ། །དང་པོ་ནི། ལེའུ་ཞེ་བཞི་པ་བཤད་པ་དེ་ནས་བཤད་པའི་ལས་རྣམས་ལས་ཕུལ་དུ་བྱུང་བའི་ལས་ཀྱི་རབ་མཆོག་ནི། ངག་གི་ནུས་པ་ཁྱད་པར་ཅན་གྱི་དངོས་གྲུབ་གྲུབ་པ་ལ་བརྟེན་ནས་ལས་བྱེད་པ་བཤད་པར་བྱའོ། །གཉིས་པ་ལ་བཞི། ཚིག་གི་དངོས་གྲུབ་བསྒྲུབ་པའི་ཐབས། དེ་ལ་བརྟེན་ནས་དགུག་པའི་ལས་དུ་མ་བསྒྲུབ་པ། ཐབས་གཞན་ལ་བརྟེན་ནས་ཚིག་གི་དངོས་གྲུབ་བསྒྲུབ་པ། དེ་ཐོབ་ནས་ལས་མི་འདྲ་བ་དུ་མ་ཚིག་གིས་བསྒྲུབ་པའོ། །དང་པོ་ནི། ཀ་ར་བཱི་ར་ནི་རྟ་བོང་གི་རྔོ་གསོད་པར་བྱེད་པས་རྟ་གསོད་དུ་གྲགས་པ་སྟེ། དོན་རེ་ལྗགས་པ་ཡིན་ལ། དེ་ལ་དཀར་ནག་གཉིས་ཡོད་པའི་ནག་པོ་ལ་མེ་ཏོག་དམར་པོ་འོང་བས། དེའི་མེ་ཏོག་དམར་པོ་བརྒྱ་རྩ་བརྒྱད་ནི་བླངས་ནས་སུ་འབད་དེ་བ་ཡི་འོ་མས་བཀྲུས་ལ། དཔའ་མོའི་གོ་ཆའི་སྔགས་ཀྱིས་བཟླས་བརྗོད་བརྒྱ་ཡང་བྱ་བ་ཡིན་ནོ། །དེ་ལྟར་སྔགས་ལན་རེ་བཟླས་པའི་མེ་ཏོག་གིས་རང་བྱུང་གི་ལིང་གའི་སྤྱི་བོར་བསྣུན་པར་བྱའོ། །དེ་ལྟར་ལྷའི་རྣལ་འབྱོར་ལ་ཤིན་ཏུ་མཉམ་པར་བཞག་པས་ཉི་མ་སྟེ་ཞག་བདུན་དུ་འོ་མ་འཐུང་ཞིང་ཁྲུས་བྱ་བ་ཡིན་ནོ། །ཞག་བདུན་སོང་བ་དེ་ནས་ཞག་གསུམ་སྨྱུང་བར་གནས་པ་བྱས་ཏེ་ཉིན་ཞག་བཅུ་གཅིག་པ་ལ་མེ་ཏོག་དེ་དག་ནི་བླངས་ནས་སུ། ཀ་ར་བཱི་རའི་ཤིང་ཤུན་ལ་བརྒྱུས་ཏེ་རྒྱ་མཚོར་འགྲོ་བའི་ཆུ་བོ་ཆེན་པོའི་
འགྲམ་དུ་སོང་ནས་ནི་རྣལ་འབྱོར་མའི་འཁོར་ལོ་མཆོད་དེ། མེ་ཏོག་རྣམས་རེ་རེ་ནས་ནི་ཆུ་ལ་དོར་རོ། །དེ་དག་ཐམས་ཅད་ཀྱང་རིམ་པ་བཞིན་དུ་མེ་ཏོག་རེ་ལ་སྔགས་ལན་རེ་རབ་ཏུ་བཟླས་ནས་བྱའོ། །ཆུ་བོར་མེ་ཏོག་ཐ་མ་དོར་བའི་དུས་སུ་ནི། ཆུ་བོ་རྒྱུན་ལས་བཟློག་སྟེ་རབ་ཏུ་འབབ་ན། སྙིམ་པས་མེ་ཏོག་ཆུ་དང་བཅས་པར་བླངས་ནས་ནི། སོས་མ་རེག་པར་མེ་ཏོག་ཆུ་བཅས་དེ་འཐུངས་ན། འདི་ཡི་གསང་བའི་རྒྱུད་འབུམ་པ་ལས་འབྱུང་བའི་ཚིག་གི་དངོས་གྲུབ་ནི། སྒྲུབ་པ་པོ་ཡིས་འགྲུབ་པར་འགྱུར་རོ། །གཉིས་པ་ལ་གསུམ། སྐྱེ་གནས་ཀྱི་ཕྱག་རྒྱ་བཅིངས་པ་ལ་བརྟེན་ནས་དགུག་པ། སྦྱིན་སྲེག་ལ་བརྟེན་ནས་དགུག་པ། ཀ་ར་བཱི་རའི་མེ་ཏོག་ལ་བརྟེན་ནས་ལས་བསྒྲུབ་པའོ། །དང་པོ་ནི། ཚིག་གི་དངོས་གྲུབ་གྲུབ་པ་དེ་ནས་སྐྱེ་གནས་ཀྱི་ཕྱག་རྒྱ་ནི། དཀའ་རྒྱལ་གྱིས་ནམ་མཁའི་དབུས་སུ་སྣ་ཚོགས་པདྨ། དེའི་ཕྱི་རོལ་ཏུ་སྟོན་ཀའི་ཟླ་བ་ལྟར་དཀར་བའི་ཟུར་གསུམ་པ་ལ་འཆད་དོ། །ཆོས་འབྱུང་གི་ཕྱག་རྒྱར་མངོན་ནོ། །བྷ་བས། སྐྱིལ་ཀྲུང་བྱས་ལ་རྡོ་རྗེ་བསྡམས་པ་བྱས་ནས། གུང་མོ་གཉིས་ཀྱི་ཁ་དང་མཐེ་བོང་གཉིས་ཀྱི་ཁ་སྦྱར་ཏེ། མཛུབ་མོ་གཉིས་བསྒྲེངས་ཏེ་ཕན་ཚུན་སྦྱར་བ་ནི་སྐྱེ་གནས་ཀྱི་ཕྱག་རྒྱར་འཆད་དོ། །འགྲེལ་པ་གཞན་ནས་སྐྱེ་གནས་ཀྱི་ཕྱག་རྒྱ་བཅིང་བ་ནི། ཕྱིའི་རིག་མ་དང་ཁ་སྦྱར་གྱི་སྦྱོར་བ་ལ་འཆད་དེ། ཆོས་འབྱུང་གི་ཕྱག་རྒྱ་འཆིང་བ་དང༌། རིག་མ་ལ་བརྟེན་པ་གཉིས་ཀ་ལ་བརྟེན་ནས་སྒྲུབ་པའོ། །ཆོས་འབྱུང་གི་ཕྱག་རྒྱ་དེ་བཅིངས་ལ། དགུག་པའི་སྔགས་སྤེལ་ཚིག་དང་བཅས་པ་བརྒྱ་རྩ་བརྒྱད་དུ་བཟླས་ནས་ནི། སྔགས་པ་བསྒྲུབ་བྱའི་
གཟུགས་བརྙན་གྱི་ཕྱོགས་སུ་མངོན་པར་ཕྱོགས་ནས། བསྒྲུབ་པར་བྱ་བའི་གཟུགས་བརྙན་གྱི་ལྟོ་བར་འཁོར་ལོ་གནས་པ་སྟེ་བཅུག་པ་དེ་ལ་ཡིད་ཀྱིས་དམིགས་པ་ལས་གནས་བཞིན་དུ། བློ་དང་ལྡན་པ་སྟེ་སྒྲུབ་པ་པོས་ཐུན་གསུམ་དུ་ལག་པ་གཡོན་པའི་མཐེ་བོས་སྐུད་པ་མནན་ལ་མཐེའུ་ཆུང་གིས་གསང་གནས་ཀྱི་སྐུད་པ་བསྐྱོད་པར་བྱ་སྟེ་གཟུགས་བརྙན་བྱ་ཚུལ་སོགས་ནི་འཆད་པར་འགྱུར་རོ། །དེ་ལྟར་བྱས་ན་བྲམ་ཟེ་གསོད་པས་མཚོན་པའི་སྡིག་ཆེ་བ་དག་གིས་ཀྱང༌། ཞག་བདུན་གྱིས་བརྒྱ་བྱིན་དང་སོགས་པས་དབང་ཕྱུག་ལ་སོགས་པ་ཡང་ངེས་པར་འགུགས་སོ། །འདི་འདྲའི་རིགས་རྣམས་སྔར་སྡིག་ཆེན་པོ་བྱས་ཀྱང་ཕྱིས་ཐེག་པ་འདིར་ཞུགས་ནས། སྡིག་སྤངས་པའི་ནུས་པ་ཁྱད་པར་ཅན་རྙེད་པ་ལ་དགོངས་སོ། །སྔར་བཤད་པའི་བསྒྲུབ་བྱའི་གཟུགས་གང་ལས་བྱེད་པ་སོགས་བཤད་པ་ནི། ཙནྡན་དམར་པོའི་རྡུལ་དང་བསྒྲུབ་བྱའི་རྐང་རྗེས་ཀྱི་ས་ལ་ནི། གང་འགུགས་པའི་བསྒྲུབ་པར་བྱ་བའི་གཟུགས་བརྙན་བྱས་ལ། སྒྲ་དང་པི་པི་ལིང་དང་ཕོ་བ་རིས་ཏེ་ཚ་བ་གསུམ་གྱིས་གཟུགས་བརྙན་དེའི་ལུས་ལ་བསྐུ་ཞིང༌། དེར་མ་ཟད་སྤྲ་ཚིལ་གྱིས་ཀྱང་དེའི་ལུས་ལ་རབ་ཏུ་བྱུག་གོ། འགྲེལ་པ་གཞན་རྣམས་ནས་སྤྲ་ཚིལ་ལ་གཟུགས་བརྙན་བྱས་ཏེ། ཙནྡན་དམར་པོའི་ཕྱེ་མ་དང་ཚ་བ་གསུམ་གྱིས་བྱུག་ཅེས་འཆད་དོ། །འདིའི་ལྟོ་བར་གཞུག་རྒྱུའི་འཁོར་ལོ་ནི་འཆད་པར་འགྱུར་རོ། །དེ་ནས་སྒྲུབ་པ་པོ་ཡིས་གཟུགས་བརྙན་གྱི་གསང་གནས་སུ་སྟེ་མོ་ཡིན་ན་སྐྱེ་གནས་དང༌། ཕོ་ཡིན་ན་ལིང་ག་ནས་ཟངས་མའི་ཁབ་
ཀྱིས་ཕུག་ནས་ནི། དེའི་ཤུལ་ནས་སྐུད་པ་བརྒྱུས་ལ་སྐུད་པ་དེ་མཐེའུ་ཆུང་གིས་བསྐྱོད་པ་ཡིན་ནོ། །བཤད་སྦྱར་ལས་གཟུགས་བརྙན་གྱི་མདུན་དུ་ཡབ་ཡུམ་ཁ་སྦྱར་དུ་བྱས་ཏེ། སྔགས་སྤེལ་ཚིག་དང་བཅས་པ་བཟླ་ལ། དེའི་རྗེས་སུ་མཐེའུ་ཆུང་ཞེས་བྱ་བ་ལ་སོགས་པ་ནི། དེ་ལ་ཡིད་ཀྱིས་གནས་ཞེས་པའི་མཐར་ཏེ། རྡོ་རྗེས་གཡོན་པའི་མཐར་རྩ་བའི་སྒྲར་བརྗོད་དོ། །དེ་ཡིད་ཀྱིས་ཐུན་གསུམ་དུ་བསྐྱོད་པར་བྱའོ་ཞེས་འཆད་པ་ལྟར་ན། བཟླས་པ་ལ་ཡིད་ཀྱིས་གནས་པར་བྱས་པའི་མཐར་གསང་གནས་ཀྱི་རྡོ་རྗེས། གཡོན་པ་སྟེ་བུད་མེད་ལ་ལོངས་སྤྱད་པའི་མཐར། རྩ་བ་སྟེ་འོག་མའི་སྒྲར་བརྗོད་པ་མཐེའུ་ཆང་གིས་གསང་གནས་ཀྱི་སྐུད་པ་བསྐྱོད་པ་ན། ཡིད་ཀྱིས་བསྒྲུབ་བྱའི་པདྨ་བསྐྱོད་པར་སེམས་པ་ཐུན་གསུམ་དུ་བྱའོ། །ཡང་དེ་ལས། འདིས་ནི་རྣལ་འབྱོར་པ་སྒྲུབ་པ་པོས་ཆགས་པ་ཅན་གྱི་ཐམས་ཅད་ཀྱི་ཐམས་ཅད་རྫོགས་པར་འགྱུར་བར་བསྟན་པ་ཡིན་ནོ། ཞེས་འབྱུང་སྟེ། དེ་ལྟར་བྱས་པ་དེས་བསྒྲུབ་བྱ་རང་ལ་ཆགས་པ་ཅན་གྱི་འདོད་པ་ཐམས་ཅད་རྫོགས་པར་བྱས་པས་ཡུན་རིང་པོར་རང་གི་དབང་དུ་འགྱུར་བའི་དོན་ནོ། །བྷ་བས་ནི་མཐེའུ་ཆུང་ནི་གོ་ཆའི་རྣལ་འབྱོར་མ་དྲུག་གི་སྔགས་ཀྱི་ཡི་གེའི་ཕྲེང་བ་སྤེལ་ཚིག་དང་བཅས་པ་ཤོག་བུ་ལ་བྲིས་པ། བསྒྲུབ་བྱའི་རྐང་རྗེས་ཀྱི་ས་ལ་སོགས་པ་ལས་བྱས་པའི་གཟུགས་བརྙན་གྱི་ལྟོ་བར་གཞུག་གོ། བསྐྱོད་པ་ནི་སྔགས་དེ་བཟླས་པར་བྱ་བ་སྟེ་དེ་ཡང་གཟུགས་བརྙན་གྱི་མདུན་དུ། ཐུན་གསུམ་དུ་དེ་ཡིད་ལ་གནས་པར་བྱས་ཏེ་ཟློས་པའོ་ཞེས་འཆད་དོ། །སྔར་བཤད་པའི་གཟུགས་བརྙན་དེ་སེང་
ལྡེང་གི་མེའི་འདག་མ་དུ་བ་མེད་པ་ལ། ལས་སྦྱོར་ལ་མཁས་པས་ཉི་མ་བདུན་དུ་ཐུན་རེ་ལ་སྔགས་ལན་བརྒྱར་བཟླས་ཏེ་སྤྲ་ཚིལ་མ་ཞུ་ཙམ་བྱས་ཏེ་བསྲོ་བར་བྱའོ། །དེ་ལྟར་བྱས་པས་བཟླས་པའི་མཐར་ནི། མིའི་བདག་པོ་དང་མདུན་ན་འདོན་ཏེ་བློན་པོ་ཆེན་པོ་དང༌། བཙུན་མོ་འཁོར་དང་བཅས་པ་ནི་ངེས་པར་འགུགས་པར་བྱེད་པ་ཡིན་ནོ། །མིའི་བདག་པོ་འཁོར་དང་བཅས་པའི་མིང་སྔགས་དང་སྤེལ་བའི་ཚིག་གོ་ཆའི་སྔགས་ཀྱིས་འཁོར་ལོ་སྔར་བཤད་པ་གྲོ་གའི་འདབ་མར་བྲི་བར་བྱ་སྟེ། དེ་ཡང་ཡི་དྭགས་ནི་རོའོ། །དེའི་སེན་རྩི་ནི་དེའི་སེན་མོ་ལ་བསྐུས་པའི་རྒྱ་སྐྱེགས་སོ། །རོ་ཙ་ན་ནི་གི་ཧཾ་སྟེ་དེ་གཉིས་ཀྱི་སྣག་ཚས་མཉམ་པར་བཞག་པ་སྟེ་ཡིད་མ་ཡེངས་པས་བྲིས་ནས་ནི། བསྒྲུབ་བྱའི་གཟུགས་བརྙན་གྱི་ལྟོ་བར་གཞུག་ལ། དེ་ནས་བསྒྲུབ་བྱའི་མིང་དང་སྔགས་སྤེལ་ནས་གང་གཟུགས་བརྙན་ལ་མངོན་པར་ཕྱོགས་ཏེ་བརྒྱ་ཞག་བདུན་དུ་བཟླས་ནས་སེང་ལྡེང་གི་མེ་དུ་བ་མེད་པ་ལ་གཟུགས་བརྙན་དེ་བདུགས་ཤིང་སྟེ་བསྲོ་བར་བྱ་ཞིང༌། ཡང་དུར་ཁྲོད་ཀྱི་མེ་སྟེ་དུར་ཁྲོད་ཀྱི་སོལ་བའམ་ཐལ་བའི་མེ་ལ་གདུང་པར་བྱ་སྟེ། དགུག་པའི་ལས་བསྒྲུབ་པའི་ཕྱིར་དུ་བཤད་དོ། །བསྲོ་བའི་ཚད་ནི་ཇི་སྲིད་དུ་གཟུགས་བརྙན་གྱི་སྤྲ་ཚིལ་མ་ཞུ་བར་བསྲོས་པར་གྱུར་ན། ཞག་བདུན་དུ་སྔགས་བརྒྱ་རྩ་བརྒྱད་བཟླས་པའི་མཐར་ནི། རྒྱལ་པོ་ཕལ་པ་དང༌། དེར་མ་ཟད་འཁོར་ལོ་སྒྱུར་བ་དང་བཅས་པར་ཡང་ངེས་པར་འགུགས་པར་འགྱུར་བ་ཡིན་ནོ། །གཉིས་པ་ནི། བསྒྲུབ་པར་བྱ་བའི་རྐང་རྗེས་ཀྱི་ས་དང༌།
ཙནྡན་དམར་པོ་ཉིད་དང་ནི། དུར་ཁྲོད་ཀྱི་ཐལ་བར་བསྲེགས་པ་ཞེས་བྱ་སྟེ། མལ་གྱི་འགྱུར་ལས། དུར་ཁྲོད་ཐལ་བར་བསྲེགས་པ་རྣམས། ཞེས་འབྱུང་བ་ལེགས་སོ། །རྫས་དེ་རྣམས་སྒྲུབ་པ་པོ་ཡིས་གཅིག་ཏུ་བསྡུས་ལ། གང་འགུགས་པའི་གཟུགས་བརྙན་བྱའོ། །དེ་ནས་གཟུགས་དེ་སེང་ལྡེང་གི་མེ་དུ་བ་མེད་པ་ལ་རབ་ཏུ་འབད་པས་བསྲོ་བར་བྱའོ། །དེ་ནས་རྡུལ་ཏེ་གཟུགས་བརྙན་དེ་ལག་པ་གཉིས་ལ་སྔར་བསྟན་པའི་འཁོར་ལོ་གཉིས་བཀོད་དེ། མཉེས་ནས་གཟུགས་ཕྱེ་མར་བཀྲུམས་པ་དེས་སྦྱིན་སྲེག་བྱའོ། །ཇི་སྲིད་དུ་དགུག་པ་མ་གྲུབ་ཀྱི་བར་དེ་སྲིད་དུ་སྦྱིན་སྲེག་བྱས་པས་འགྲུབ་པར་འགྱུར་རོ། །རྡུལ་དེ་བླངས་ནས་ཞེས་པའི་རྐང་པ་གཉིས། གཉིས་འདུས་ཀྱི་འགྱུར་ལ་མེད་ལ། འགྱུར་གཞན་གཉིས་ལས་ཀྱང་མེད་པ་ནི་བཤད་སྦྱར་དང་མཐུན་ནོ། །ཡོད་པ་ལྟར་ན་རྡུལ་ཏེ་གཟུགས་བརྙན་དེ་བླངས་ནས་མ་ཡེངས་པར་དབུགས་ཕྱིར་མི་འབྱིན་པར་ནང་དུ་བསྡམས་ཏེ་དུར་ཁྲོད་དུ་སྦས་ན་ཞེས་པ་ཏེ་སྦྱིན་སྲེག་མི་བྱེད་པའི་ལུགས་སོ། །དེ་ལྟར་བྱས་ན་ནི་བསྒྲུབ་བྱ་དེ་བརྒྱལ་ཞིང་སེམས་དང་བྲལ་བ་དང་འདྲ་བ་དང༌། ཅི་ཡིན་མི་ཤེས་པར་རྣམ་པར་རྨོངས་ཤིང་དེར་མ་སོང་ན་ཉོན་མོངས་པ་སྟེ་སྡུག་བསྔལ་གྱིས་གདུངས་པ་དང་ལྡན་པར་མཐོང་ནས། རླུང་གི་ཤུགས་ལྟར་མགྱོགས་པར་འོངས་ནས་ནི། སྒྲུབ་པོ་པོའི་སྟེང་ནས་འོག་ཏུ་ལྷུང་བར་འགྱུར་རོ། །གསུམ་པ་ནི། སྦྱིན་སྲེག་བཤད་པ་དེ་ནས་ལས་ཀྱི་ཕོ་ཉ་མོ་ཞེས་པ་སྐྱེས་པའི་རོ་སྲེག་སར་བུད་མེད་མཆོངས་ཏེ་མཉམ་དུ་བསྲེགས་པའི་སར་སོང་ནས། བུད་མེད་དེའི་མིང་ནས་བོས་ལ་
ཁྱོད་ཀྱིས་བདག་གི་བྱ་བ་འདི་ནི་རྟག་ཏུ་གྱིས་ཤིག་ཅེས་ལན་གསུམ་དུ་བསྒོ་བ་འཛིན་དུ་གཞུག་པར་བྱའོ། །ཀ་ར་བཱི་རའི་ལྕུག་མ་ནི་རླན་དང་བཅས་པ་གྲུ་མོ་ནས་དཔུང་པ་རྫོགས་པའི་བར་གྱི་ཚད་དང་མཉམ་པའམ་ལག་པ་ཕྱེད་དང་གཉིས་ཀྱིས་ཚད་ཙམ་བླངས་ལ། འབར་བར་འགྱུར་བའི་རོ་བསྲེགས་པའི་མེ་ལ་དོར་ཏེ། ཇི་སྲིད་དུ་ལྕུག་མ་དེ་ནི་མ་ཚིག་པར་མྱུར་དུ་སོང་སྟེ་དེ་བླངས་ལ་རེག་པ་སྟེ་དཔའ་མོའི་གོ་ཆའི་སྔགས་ལན་བདུན་བཟླས་ནས་ནི། གང་ཞིག་བཟླས་ཏེ་ཞེས་པ་ནི་ཆེ་གེ་མོ་འདིར་ཤོག་ལ། ཁྱེའུ་འམ་བུ་མོ་ཆེ་གེ་མོ་འདིར་ཁྲིད་ལ་ཤོག་ཅིག་ཅེས་བཟླས་ཏེ། ལག་པ་གཡོན་པས་གཡོན་ཕྱོགས་སུ་བསྐོར་ན་ནི། བསྐོར་བ་དེས་ནི་སྐོར་བ་དེའི་སྐད་ཅིག་ལ་སྐྱེས་པའམ་བུད་མེད་རང་གི་གཟུགས་མཛེས་པ་ཅན་རླུང་གི་ཤུགས་ཀྱིས་འོང་བར་འགྱུར་རོ། །ཆེ་གོ་མོ་འདིར་ཤོག་ལ་ཞེས་པ་ནི་སྔར་གྱི་བུད་མེད་ཤི་བ་དེར་མངོན་པས་སྔ་མ་དང་འདི་གཉིས་སྦྲེལ་རྒྱུའོ། །གསུམ་པ་ནི། ཀ་ར་བཱི་རའི་མེ་ཏོག་དམར་པོ་ལ་སྔགས་བརྒྱ་རྩ་བརྒྱད་བཟླས་ཏེ་པུ་ཤྱ་སྟེ་རྒྱལ་གྱི་སྦྱོར་བ་ལས་མེ་ཏོག་བླངས་ཏེ། སྒྲུབ་པ་པོས་གི་ཧཾ་གིས་བྱུགས་ལ་མེ་ཏོག་མྱོས་བྱེད་ཀྱི་ཆུ་ལ་ཡང་དག་པར་གནས་པ་ལ་བརྒྱ་རྩ་བརྒྱད་བཟླས་ནས། རང་ཆུ་བོ་ཆེན་པོར་ཞུགས་ནས་ནི་ལྟེ་བ་མན་ཆད་ཆུར་བཅུག་སྟེ་སྔགས་སྟོང་ཕྲག་གཅིག་བཟླས་པར་བྱའོ། །དེའི་རྗེས་སུ་སྒྲུབ་པ་པོ་རང་ལག་པ་ཐལ་མོ་སྦྱར་བའི་དབུས་སུ་སྒྲུབ་གྲོགས་ཀྱིས་མེ་ཏོག་འདབ་མ་རྒྱས་ཤིང༌། ཟེའུ་འབྲུ་སོགས་ཉམས་
པ་མེད་པ་གནས་པ་སྟེ་གཞུག་པར་བྱའོ། །ཕྱིར་ཀླགས་ཏེ་ཞེས་པ་ལ་ལེགས་བཀང་སྟེ་ཞེས་འབྱུང་བས་ལག་པ་གཉིས་སྒྲུབ་གྲོགས་ཀྱིས་བཅུག་པའི་མེ་ཏོག་གིས་ལེགས་པར་བཀང་སྟེ་ཆུ་དང་བཅས་པ་སོ་ལ་མ་རེག་པར་བཏུང་བར་བྱའོ། །འཐུངས་པའི་རྗེས་དེ་ནས་སྒྲུབ་པ་པོ་དེ་ཡིས་ཚིག་ཙམ་གྱིས་ལས་ཐམས་ཅད་འགྲུབ་པའི་ཚིག་གི་དངོས་གྲུབ་ཐོབ་པར་འགྱུར། །ལྷ་སྦས་ཀྱིས། སྐྱེ་གནས་དབུས་གནས་མེ་ཏོག་དེ། ཞེས་འདོན་པ་ལྭ་བ་པ་ཡི་ཡང་དགོངས་པར་སྣང་བས། དེ་གཉིས་ལ་ལག་པ་སྦྱར་བའི་དབུས་གནས་ཞེས་པ་མེད་དོ། །དེ་དག་གི་ལྟར་ན་ཉི་ཟླ་གཟས་ཟིན་པའི་ཚེ། སྐྱེ་གནས་གཉིས་ཏེ་གསང་གནས་གཉིས་ཁ་སྦྱར་བའི་དབུས་སུ་མེ་ཏོག་དམར་པོ་གཞུག་པར་བཞེད་དེ། ཉི་ཟླ་གཟའ་ལས་གྲོལ་བ་དང་བཏོན་ནས་ཆུ་དང་བཅས་པ་འཐུང་བར་མངོན་ནོ། །བཞི་པ་ལ་གཉིས། དགུག་པ་དང་དྲག་པོའི་ལས། དགུག་པའི་ལས་བྱེ་བྲག་ཏུ་བཤད་པའོ། །དང་པོ་ནི། ཚིག་གི་དངོས་གྲུབ་གྲུབ་པའི་དགོས་པ་ནི། རྒྱལ་པོའམ་རྒྱལ་པོའི་ཆུང་མ་ནི་དགུག་པའི་ཡིད་ཀྱིས་མིང་ནས་སྨོས་ཏེ་ཁུག་ཅིག་ཅེས་བརྗོད་ན་ངེས་པར་འགུགས་པར་འགྱུར་རོ། །དེ་བཞིན་དུ་བརྗོད་པས་ལྷར་བཅས་པའི་ལྷ་མིན་དང་མི་རྣམས་ནི་མྱུར་དུ་དབང་དུ་བྱེད་པར་འགྱུར་རོ། ཁྲོས་པའི་བསམ་པས་ཆེ་གེ་མོ་སོད་ཅིག་ཅེས་པའི་ཚིག་གིས་གསོད་པར་འགྱུར་ཞིང༌། མཛའ་བ་དབྱེ་བ་དང་གནས་ནས་བསྐྲད་པ་ཉིད་ཀྱང་བྱེད་དེ། མདོར་ན་སྒྲུབ་པ་པོ་ཡིས་ཚིག་ཙམ་གྱིས་ཚར་གཅོད་པ་ཉིད་བྱེད་པར་འགྱུར་རོ། །འདི་དང་འདི་རེངས་པར་གྱུར་ཅིག་ཅེས་པའི་ཚིག་ཙམ་གྱིས་ནི་ཆུ་བོ་དང་ཤིང་རྟ་དང་
འཁྲུལ་འཁོར་དང་རྒྱ་མཚོ་དང༌། གླང་པོ་དང་རྟ་དང་དེ་བཞིན་དུ་སྤྲིན་དང་སྐྱེས་བུ་སྟེ་སྐྱེས་པ་དང༌། འམ་གྱི་སྒྲས་བུད་མེད་དང་ཡང་ན་བྱ་ཡང་གནོན་པ་སྟེ་རེངས་པར་བྱེད་དེ། མདོར་ན་ཡིད་ཀྱིས་བསམས་ནས་ཡིད་ལ་ལས་གང་བྱ་བར་འདོད་པ་ཐམས་ཅད་ཚིག་ཙམ་གྱིས་བྱེད་པར་འགྱུར་བ་ནི། ཚིག་གི་དངོས་གྲུབ་གྲུབ་པའི་མཐུ་ཡིན་ནོ། །གཉིས་པ་ནི། བསྒྲུབ་བྱ་དགུག་པ་ཡི་ནི་སྦྱོར་བ་དག་ཁྱད་པར་དུ་བཤད་པར་བྱ་སྟེ། དེ་ནི་བུད་མེད་ཐམས་ཅད་རྨོངས་པ་སྟེ་མྱོས་པར་བྱེད་པ་ཞེས་པ་ནི་མཚོན་པ་ཙམ་མོ། །དེ་སྟོན་པ་ནི་ཀ་ར་བཱི་རའི་མེ་ཏོག་དམར་པོ་ཁྲོས་པའི་ཚེ་ཡང་དག་པར་བླངས་ནས་སུ། རིག་པ་སྟེ་དཔའ་བོའི་གོ་ཆའི་སྔགས་ལན་བརྒྱ་བཟླས་པ་དང་ཕྱག་རྒྱའི་སྐྱེ་གནས་ཀྱི་དབུས་སུ་གཞུག་པར་བྱ་སྟེ། དེའི་དོན་མེ་ཏོག་དེ་ནི་ཕྱིའི་ལས་རྒྱ་དང་ཁ་སྦྱར་བྱས་པའི་ཕྱག་རྒྱའི་གསང་བའི་གནས་སུ་ངེས་པར་སྦྱར་བ་སྟེ་དེར་བཅུག་པའོ། །གཉིས་སུ་མེད་པའི་ཡེ་ཤེས་ཀྱི་རྣལ་འབྱོར་དང་ལྡན་པའི་སྔགས་པས། གོ་ཆའི་སྔགས་མིང་སྤེལ་དང་བཅས་པ་བརྒྱ་ཕྲག་གཅིག་ཏུ་བཟླས་ནས། སྐྱེ་གནས་ཀྱི་དབུས་ཀྱི་མེ་ཏོག་དེ་ལས་སྒྲུབ་པ་པོ་ཡིས་མེ་ཏོག་གཅིག་བླངས་ལ། མེ་ཏོག་དེ་ཡིས་ནི་གང་ལ་བསྣུན་པ་དེ་ནི། བསྣུན་པའི་མོད་ལ་རང་གི་དབང་དུ་འགྱུར་རོ། །དབང་དུ་འགྱུར་ཚུལ་ནི། མེ་ཏོག་བསྣུན་པའི་མཐུས་བསྒྲུབ་བྱ་དེ་བརྒྱལ་ཞིང་སེམས་དང་བྲལ་བ་སྟེ་དྲན་པ་ཉམས་པ་དང༌། ཡན་ལག་གི་ཚིགས་ཀུན་གྱི་བྱ་བ་བྱེད་པ་ལ་རང་དབང་མེད་པར་སྒྲུབ་པ་པོ་ཡི་གཞན་དབང་དུ་འགྱུར་བ་སྟེ། སྔར་གྱི་སེམས་ན་
མངོན་གྱུར་དུ་ལྡོག་པ་རུ་སྟེ་ལོག་ནས། སྐད་ཅིག་གིས་ནི་རང་གི་དབང་དུ་བྱེད་པ་འདི་ནི་སྔགས་ཀྱི་སྦྱོར་བ་ལ་ཡིད་ཆེས་པ་ལས་དངོས་གྲུབ་འགྲུབ་པ་སྟེ། དབང་དུ་བྱེད་པའི་ལས་དོན་ཡོད་པ་སྟེ་ལས་བརྩམས་པའི་འབྲས་བུ་ཡོད་པར་བྱེད་པ་ཡིན་ནོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། ལེའུ་འདི་ཡི་མཚན་ལ། མར་དོ་རྐྱང་པ་དང་གཉིས་འདུས་ཀྱི་འགྱུར་ལས། རྣལ་འབྱོར་མ་དྲུག་དང་ཚིག་གི་དངོས་གྲུབ་ལུང་བསྟན་པ་ཞེས་འབྱུང་ལ། ལོ་ཆེན་གྱིས་རྣལ་འབྱོར་མ་དྲུག་གི་ཚིག་གི་དངོས་གྲུབ་ལུང་བསྟན་པ་ཞེས་བསྒྱུར་མོད་ཀྱང༌། མལ་གྱིས་རྣལ་འབྱོར་མ་དྲུག་གི་ཚིག་གི་དངོས་གྲུབ་དང༌། དགུག་པའི་ཆོ་ག་ཞེས་བསྒྱུར་བ་དཔའ་བོ་རྡོ་རྗེའི་འགྲེལ་པ་དང་མཐུན་ཞིང༌། དོན་ཡང་ལེགས་པས་གོ་ཆའི་རྣལ་འབྱོར་མ་དྲུག་གི་སྔགས་ཀྱིས་ཚིག་གི་དངོས་གྲུབ་སྒྲུབ་པ་དང༌། དེ་གྲུབ་པ་ལས་དགུག་པ་སོགས་ཀྱི་ལས་སྒྲུབ་པའི་ཆོ་གའི་ལེའུ་སྟེ་བཞི་བཅུ་རྩ་ལྔ་པའོ།། །། འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས། ལེའུ་བཞི་བཅུ་རྩ་ལྔ་པའི་བཤད་པའོ།། ༈ །།གཉིས་པ་ཧ་ལྔ་ལ་བརྟེན་ནས་ལས་བསྒྲུབ་པ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུ་ཡི་མཚན་བསྟན་པའོ། །དང་པོ་ནི། ལེའུ་ཞེ་ལྔ་པ་བཤད་པ་དེ་ནས་ཡི་གེ་ཧ་ལྔ་ལ་བརྟེན་ནས་ནི། བསད་ལས་སོགས་ལས་རྣམས་ཐམས་ཅད་རབ་ཏུ་སྒྲུབ་པར་བྱེད་པ་བཤད་པར་བྱའོ། །དགོས་པ་ནི། སྒྲུབ་པ་པོ་གང་གིས་ཤེས་ནས་
ཉམས་སུ་བླངས་བ་ཙམ་གྱིས་ནི། མྱུར་དུ་དངོས་གྲུབ་རབ་ཏུ་འཇུག་པ་སྟེ་འཐོབ་པ་དེའི་ཕྱིར་དུ་བཤད་དོ། །གཉིས་པ་གསུམ། བསད་པའི་ལས། གཟུགས་བསྒྱུར་བའི་ལས། མངལ་འཕོ་བའི་ལས་སོ། །དང་པོ་ནི། ཧ་ལྔ་ནི་མར་དོ་རྐྱང་པའི་འགྱུར་ལ། ཧཻ་ཧོ་ཧཱོ་ཧཾ་ཧ་ཞེས་འབྱུང་ལ། གཉིས་འདུས་ཀྱི་འགྱུར་ལ། ཧཾ་ཧཽ་ཧི་ཧཻ་ཧ་ཞེས་འབྱུང་ཞིང༌། འགྱུར་གཞན་རྣམས་ལ་ཡང་མི་འདྲ་བ་མང་དུ་སྣང་ནའང༌། བྷ་བས་སྔར་དཔའ་བོའི་གོ་ཆ་དྲུག་ལ་ཨ་ཨི་ཨུ་གསུམ་དང་ཨེ་དང་ཨོ་སྟེ་ལྔ། ཧ་ལ་ཞུགས་པའི་ལྷག་མའི་དབྱངས་ལྔ་ཧ་ལ་ཞུགས་པའི་ཧཱ་ཧཱཾ་ཧཱུ་ཧཻ་ཧཽ་ལྔ་ལ་བཞེད་པ་ལྟར་བྱའོ། །དེ་འདྲ་བའི་ཡི་གེ་ཧ་ལྔ་ལག་པར་འཁོར་ལོ་རྩིབས་ལྔ་པ་དངོས་སུ་བྲི་བའམ་བསམས་ལ། ཡི་གེ་ལྔ་བསམས་པའམ་བྲིས་པ་ཡིས། སྔགས་བསྐུལ་ཚིག་དང་ལྡན་པས་མདའ་དང་ལྡན་པའི་ལག་པས་མཉེས་ནས་ནི། སྦྱིན་སྲེག་བྱས་ཏེ་རྩ་ལྔ་ཁབ་ཀྱི་རྣམ་པ་ཅན་གྱི་ཁས་ཕུག་ནས། ཁྲག་འགུགས་བཞིན་པ་ཐོད་པར་འབབ་པར་བསམས་ན། བསྒྲུབ་བྱ་ཁ་ནས་ཀྱང་ནི་ཁྲག་འཛག་ཅིང་དགྲ་བོ་དེ་ཡི་མོད་ལ་འཆིའོ། །འཁོར་ལོ་རྩིབས་ལྔ་པ་བྱེད་ན་ལྟེ་བ་ལ་དབྱངས་རིང་པོ་ལྔའི་ཐ་མ་ཧཿ ཚེག་དྲག་ཅན་བྲིའོ། །རང་གི་ཁྲག་དང་སྲིན་ལག་གི་སྟེ་བུད་མེད་བུ་མེད་པའི་ཁྲག་དང་ལྷན་ཅིག་བསྲེས་ཏེ། ཐོད་པར་གནས་པ་སྟེ་བཞག་ལ། བསྒྲུབ་བྱའི་མིང་སྤེལ་ཚིག་དང་ལྡན་པར་བཟླས་ཤིང༌། ལག་པས་ཁྲག་ཇི་སྲིད་སྐམས་སྐམས་ཀྱི་བར་དུ་དེ་མཉེས་ན། དེས་ནི་བསྒྲུབ་བྱ་རྣམ་པར་འཇིག་པ་སྟེ་འཆིའོ། །གལ་ཏེ་རྫས་གཉིས་པོ་དེ་
མེད་པའི་ཚེ་ཁྲོ་བ་འབར་བ་དང་བཅས་པས་མིག་དམར་པོ་ཡིས། ཧ་ལྔ་མིང་སྤེལ་དང་བཅས་པ་བཟླས་ན་ནི་དཔུང་ཚོགས་བཞོན་པར་བྱས་པ་ཡི་རྒྱལ་པོ་དང༌། དེས་མཚོན་ནས་བསྒྲུབ་བྱ་གང་ཡིན་མྱུར་དུ་འཆི་བར་བྱེད་དོ། །བྱི་ལ་དང་ནི་ནེའུ་ལེ་དང་ཁྭ་དང་ཝ་དང་ཆུ་སྐྱར་ལྔའི་ཤ། ཟླ་བ་ལ་གནས་པའི་ཧ་ལྔ་ལས་བསྐྱེད་ལ། དེ་དག་གིས་མཁའ་འགྲོ་མ་སྟོབས་ཅན་ལ་སྦྱར་བ་སྟེ་གཏོར་མ་སྔོན་དུ་འགྲོ་བས་སྦྱིན་སྲེག་བྱས་ན། ཤ་འདི་དག་གིས་བསད་པ་སོགས་མྱུར་དུ་འགྲུབ་པ་ཡིན་པར་རྒྱུད་འདི་ལ་ནི་ཐེ་ཚོམ་མེད་དོ། །གཉིས་པ་ནི། རི་བོང་དང་ལ་སོགས་པས་ཅེ་སྤྱང་ལ་སོགས་པའི་སྤུ་ལས་ནི་སྲད་བུ་བྱས་ཏེ་ཧ་ལྔ་ལན་སྟོང་དུ་བཟླས་ནས། བསྒྲུབ་བྱ་གང་གི་མགུལ་དུ་བཅིངས་པར་གྱུར་པ་དེ་ནི། རི་བོང་ལ་སོགས་པ་དེ་དང་འདྲ་བའི་གཟུགས་སུ་འགྱུར་རོ། །གསུམ་པ་ནི། རང་གི་ལག་པར་ཧ་ལྔའི་བཟླ་བརྗོད་སྟོང་བྱས་ཏེ་ཀ་ར་བཱི་རའི་མེ་ཏོག་དང་བཅས་པས་སྦྲུམ་མ་ལ་ནི་རེག་པར་གྱུར་ན་མངལ་ནི་རྣམ་པར་འགྱུར་རོ། །ཡི་གེ་རེ་རེ་མངོན་བཟླས་ནི་ཧ་ལྔའི་ཡི་གེ་རེ་རེའི་གྲངས་ཀྱི་འབུམ་ཕྲག་བཟླས་ལ། དེ་ནས་ལས་ལ་སྦྱར་བའི་དོན་ནོ། །ལག་པས་ལུས་ལ་རེག་པ་བཏང་ན་མངལ་འཕོ་བ་ལས་ཐར་བར་འགྱུར་བ་ཡིན་ནོ། །ཁྲོས་པས་བསྒྲུབ་བྱ་གང་ལ་སྡིགས་མཛུབ་བྱས་ཏེ་དྲག་སྔགས་བཟླས་པའི་བསྒྲུབ་བྱ་དེ་འཆི་ལ། སླར་ཡང་ཞི་བས་སྔགས་བཟླས་ཏེ་སྡིགས་མཛུབ་བཀྲོལ་ན་འཚོ་བར་བྱེད་པ་ཡིན་ནོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས་ཡི་གེ་ཧ་ལྔ་ལ་བརྟེན་ནས་
ལས་སྒྲུབ་པའི་ཆོ་གའི་ལེའུ་སྟེ་བཞི་བཅུ་རྩ་དྲུག་པའོ།། །།འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས། ལེའུ་བཞི་བཅུ་རྩ་དྲུག་པའི་བཤད་པའོ།། ༈ །།གསུམ་པ་སངས་རྒྱས་མཁའ་འགྲོ་མའི་སྔགས་ཀྱིས་བསྒྲུབ་པ་དང་ལྷ་སྒོམ་པ་རྟག་ཏུ་བྱ་བ་ལ་གཉིས། སངས་རྒྱས་མཁའ་འགྲོ་མའི་སྔགས་ཀྱིས་ལས་བསྒྲུབ་པ་དང༌། དཔའ་བོ་དང་རྣལ་འབྱོར་མ་རྣམས་རྟག་ཏུ་བསྒོམ་པར་བྱའོ། །དང་པོ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུ་ཡི་མཚན་བསྟན་པའོ། །དང་པོ་ནི། ཞེ་དྲུག་པས་ཧ་ལྔའི་ལས་བསྒྲུབ་པ་བསྟན་པ་དེ་ནས་དེ་ལས་གཞན་ཡང་ཡང་དག་པར་བཤད་པར་བྱའོ། །དེ་གང་སྙམ་ན། མཁའ་འགྲོ་མ་ཀུན་འདུས་པ་རྡོ་རྗེ་ཕག་མོའི་ཉེ་བའི་སྙིང་པོ། འདིའི་ལེའུ་འོག་མ་ནས་གོ་རིམ་བཟློག་སྟེ་བསྟན་པས་ལས་བསྒྲུབ་པའོ། །ཁ་ཅིག་བཻ་རོ་ཙ་ནའི་སྔགས་ལ་འཆད་མོད་ཀྱང༌། འགྲེལ་པ་གཞན་གྱིས་སངས་རྒྱས་མཁའ་འགྲོ་མའི་སྔགས་ལ་བཤད་པ་ལེའུ་འདིའི་མཚན་དང་མཐུན་ནོ། །དགོས་པ་ནི། ཉེ་བའི་སྙིང་པོའི་སྔགས་འདི་ནི་བཟླས་བརྗོད་བྱས་པ་ཙམ་གྱིས་ཀྱང་དབང་ལ་སོགས་པའི་དངོས་གྲུབ་ཐམས་ཅད་བསྐྱེད་པར་བྱེད་པ་ཡིན་པ་དེའི་ཕྱིར་དུ་བཤད་དོ། །གཉིས་པ་ལ་གཉིས། དབང་དང་དྲག་པོའི་ལས་ཀྱིས་བསྒྲུབ་པ་དང༌། གཞན་དུ་བསྒྱུར་བའི་ལས་ཀྱིས་བསྒྲུབ་པའོ། །དང་པོ་ནི། བསྙེན་པ་སྔོན་དུ་སོང་བ་དེ་ནས་མཁའ་འགྲོ་མའི་རིག་པ་
ཆེན་མོ་སྟེ། སངས་རྒྱས་མཁའ་འགྲོ་མའི་སྔགས་སྤེལ་ཚིག་དང་བཅས་པ་བཟླས་ན། རྒྱལ་རིགས་ལ་སོགས་པའི་རིགས་ཐམས་ཅད་དབང་དུ་བྱེད་པར་འགྱུར་རོ། །སྔགས་དེ་རྟག་ཏུ་བཟླས་བརྗོད་བྱས་ན་ཚེ་རིང་བ་སོགས་ཀྱི་དཔལ་ཆེན་པོ་སྟེ་ཕུན་ཚོགས་ཐམས་ཅད་སྐྱེད་པར་འགྱུར་རོ། །མི་རུས་ལས་བྱས་བའི་ཕུར་བུ་སོར་དྲུག་པ་བྱས་ལ། ཡུམ་གྱི་སྔགས་བརྒྱ་རྩ་བརྒྱད་མངོན་པར་བཟླས་ནས། བསྒྲུབ་བྱ་གང་གི་སྒོར་སྦས་པ་དེའི་རིགས་བརྒྱུད་རྣམས་རབས་གཅོད་པར་འགྱུར་རོ། །བྷ་བས་སྔགས་བརྒྱད་བརྒྱ་བཟླས་པར་འཆད་ཅིང༌། གཅོད་པ་ཞེས་པ་སྐྲོད་པར་འདོན་ནོ། །ཞིང་དང་བ་ལང་གི་ར་བ་དང་མ་ཧེ་དང་གླང་པོ་ཆེ་དང༌། རྟའི་གནས་སུ་ས་བརྐོས་ཏེ། སྔར་བཤད་པའི་ཕུར་བུ་ལ་སྔགས་བཟླས་ནས་སྦས་ན། ཞིང་ལ་སོགས་པ་ཐམས་ཅད་བརླག་པར་འགྱུར་རོ། །དེ་ནས་རྒྱལ་པོའམ་རྒྱལ་པོའི་བློན་པོ་དབང་དུ་བྱ་བར་འདོད་ན། ལས་སྦྱོར་ལ་མཁས་པས་ས་ལས་ཏེ་རྫ་མཁན་གྱི་ལག་པ་ལ་འབྱར་བའི་འཇིམ་པ་ལ་བྱས་པའི་བསྒྲུབ་བྱའི་གཟུགས་བརྙན་སོར་བརྒྱད་པ་བྱས་ལ། དེའི་སྙིང་གར་གྲོ་ག་སོགས་ལ་སྔགས་བསྒྲུབ་བྱའི་མིང་སྤེལ་དང་བཅས་པ་བྲིས་པ་བཞག་ལ། དེ་རྒྱལ་པོའམ་བློན་པོའི་སྒོར་བཞག་པ་སྟེ་ས་བརྐོས་ཏེ་སྦས་ནས། ཉི་ཞག་དང་པོ་ལ་མ་དུ་ལུང་ཀའི་མེ་ཏོག་དང་འབྲས་བུ་རྣམས་དང༌། ཀུ་སུ་མའི་མེ་ཏོག་བསྲེས་པའི་སྦྱིན་སྲེག་སྟོང་ཕྲག་གསུམ་དང༌། ཕྱི་ནས་དེ་རྣམས་ཀྱི་སྦྱིན་སྲེག་སྟོང་ཕྲག་བརྒྱད་བྱས་ན། རྒྱལ་པོ་ལ་སོགས་པ་དེ་དབང་དུ་འགྱུར་རོ། །སངས་རྒྱས་མཁའ་འགྲོ་མའི་སྔགས་འདི་གཉིས་ལྷ་སྒོམ་ཚུལ་དང༌། སྔགས་
ཀྱི་ཁ་དོག་སོགས་ཀྱི་སོ་སོར་བྱས་པ་ཉིད་ཀྱིས་དགུག་པ་དང༌། གནོན་པ་སྟེ་རེངས་པ་དང་རྨོངས་པ་དང༌། སྐེམས་པ་དང་རྨུགས་པ་དང༌། ཚིག་འཕྲོག་པ་སྟེ་ལྐུགས་པར་བྱེད་པ་དང༌། མིག་ལོང་བར་བྱེད་པ་དང༌། ལྕེ་དིག་པ་ཉིད་དུ་བྱེད་ལ། སླར་གསོ་བར་འདོད་ན་དེ་རྣམས་ཞི་བའི་བསམ་པས་སྔགས་བཟླས་ན། གཏོང་བར་བྱེད་པ་སྟེ་སྔགས་ཀྱི་ལས་སྦྱོར་གྱི་ནུས་པ་ལྡོག་པར་བྱེད་དོ། །གཉིས་པ་ལ་དྲུག །མཚན་གཞན་དུ་བསྒྱུར་བ། འགྲོ་བ་གཞན་དུ་བསྒྱུར་བ། རྫས་གཞན་དུ་བསྒྱུར་བ། བསམ་པ་གཞན་དུ་བསྒྱུར་བ། གཟུགས་གཞན་དུ་བསྒྱུར་བ། བདག་པོ་གཞན་དུ་བསྒྱུར་པའོ། །དང་པོ་ནི། དེ་ནས་སྐྱེས་པ་བུད་མེད་དུ་བྱ་བར་འདོད་ན། སྐྱེས་པའི་རོ་ལ་བཏགས་པའི་མེ་ཏོག་དང༌། ལྕགས་ཀྱི་སོ་ཏོག་དང༌། ཀ་ཀཎྜ་ཀཱི་ཡི་འབྲས་བུ་ནི་ནག་པོ་ཆེན་པོའི་འབྲས་བུ་ལ་འཆད་པ་ནི། ལྕུག་མ་ནག་པོ་ཞེས་པའི་འབྲས་བུ་ལ་བཤད་དོ། །ཁྭའི་སེན་མོ་ནི་བྱ་ཁྭ་ཏའི་སེན་མོ་ལ་བཤད། ལྟོགས་པའི་སེན་མོ་ཞེས་ཀྱང་འབྱུང་ལ། དོན་ནི་བྱ་རོག་གི་སེན་མོ་ལ་འཆད་པ་དང༌། ལྟོགས་ནས་ཤི་བའི་སེན་མོ་ལ་ཡང་འཆད་དེ། དེ་དང་རྐང་པའི་འོག་སྟེ་མཐིལ་གྱི་པགས་པ་རྣམས་ཆ་མཉམ་པར་བྱས་ལ། སྔར་བཤད་པའི་བུད་མེད་ཀྱི་ཐོད་པར་བསྐྱེད་པའི་ས་བོན་བླངས་ལ་རི་བོང་གི་ཁྲག་དང་ལྷན་ཅིག་ཏུ་བཏགས་ཏེ། རི་ལུ་བཅུ་གཅིག་བྱས་ལ་གྲིབ་མ་ལ་བསྐམ་མོ། །དེ་བཞིན་དུ་ཉིན་ཞག་བཟང་པོ་སྟེ་ཚེས་གྲངས་དང༌། གཟའ་སྐར་བཟང་པོ་ལ་ལག་པར་བླངས་ནས་ཁུ་ཚུར་བཅིངས་ཏེ། ཉི་མ་རེ་རེ་ཞིང་ཐུན་རེ་རེ་
ལ་སྟོང་ཕྲག་བརྒྱད་བརྒྱད་བཟླས་པའི་ཉི་མ་བཅུ་གཉིས་པ་ལ། སྐྱེས་པ་གང་གི་སྤྱི་བོར་རིལ་བུའི་བྱེ་མ་བཞག་པ་དེ་བུད་མེད་དུ་འགྱུར་རོ། །སྐྲ་བཞར་ན་ནི་སྔར་བཞིན་དུ་འགྱུར་རོ། །གཉིས་པ་ནི། དེ་ནས་སྐྱེས་པ་ཁྱིར་བྱ་བར་འདོད་ན། རྒྱལ་གྱི་ལྕགས་ཏེ་གསེར་ཁ་ན་མ་ཐོ་བ་མེད་པར་རྙེད་པའི་ནེའུ་ལེ་སྟེ་སྲེ་མོའི་མགོ་བོར་ཏེ་ཐོད་པའི་ནང་དུ། གུར་ཀུམ་དང་ལྷན་ཅིག་ཕྱེ་མར་བྱས་པ་བཞག་ལ། མཚན་མོ་སྟེ་ཞག་བདུན་གྱི་བར་དུ་སྔགས་སྟོང་ཕྲག་བརྒྱད་བཟླས་པར་བྱའོ། །ཉིན་ཞག་བརྒྱད་པ་ལ་གུར་ཀུམ་དང་མཉམ་པོར་བྱས་ཏེ། སྔགས་སྤེལ་ཚིག་དང་བཅས་པ་ལན་བརྒྱ་རྩ་བརྒྱད་མངོན་པར་བཟླས་ནས། ལས་ཐམས་ཅད་པའི་ཐབ་ཏུ་ཕྱེ་མའི་སྦྱིན་སྲེག་བྱས་ལ། དེའི་ཐལ་བ་གང་གི་སྤྱི་བོར་བཞག་པ་དེ་ཁྱིའི་གཟུགས་སུ་འགྱུར་རོ། །སླར་གསོ་བ་ནི་མཚན་མོའི་དུས་སུ་མཁའ་འགྲོ་མ་རྣམས་ལ་མཆོད་པ་ཆེན་པོ་བྱས་ཏེ་གཏོར་མ་བྱིན་ནས་གསོལ་བ་བཏབ་ན། དེའི་འོག་ཏུ་སྔར་བཞིན་དུ་རྣལ་མར་འགྱུར་རོ། །གསུམ་པ་ནི། གསེར་དངུལ་སོགས་ཀྱི་རིན་པོ་ཆེའི་རྫས་རིན་པོ་ཆེའི་རྫས་མ་ཡིན་པར་བྱ་བར་འདོད་ན། གསེར་ཤིང་སྟེ་དྷ་དུ་རའི་འབྲས་བུ་སྦྱིན་སྲེག་བརྒྱ་རྩ་བརྒྱད་སྤེལ་ཚིག་དང་བཅས་པ་བྱས་ན་རྫས་རྫས་མ་ཡིན་པར་འགྱུར་རོ། །ཨ་རུ་ར་བརྒྱད་བརྒྱའི་སྦྱིན་སྲེག་བརྒྱད་བརྒྱ་བྱས་ན་རྣལ་མར་འགྱུར་རོ། །བཞི་པ་ནི། ཅི་སྟེ་སྨྱོ་བར་བྱ་བར་འདོད་ན། བྱ་ཆེན་པོ་ནི་སྲིན་བྱའམ་འུག་པའོ། །དེའི་གནས་ཏེ་ཚང་གི་ཤིང་གིས་ཉི་མ་བདུན་གྱི་བར་དུ་སྔགས་སྟོང་ཕྲག་བརྒྱད་བཟླས་པ་སྔོན་དུ་སོང་བས་སྦྱིན་སྲེག་བྱས་ན་ཉི་མ་བདུན་པ་ལ་སྨྱོ་བར་
འགྱུར་རོ། །སླར་བཟློག་པ་སྟེ་གསོ་བ་ནི་འབྲས་ཀྱི་ཕུབ་མའི་མེ་ལ་སྦྱིན་སྲེག་སྟོང་ཕྲག་བརྒྱད་བྱས་ན་ཞི་བར་འགྱུར་རོ། །ལྔ་པ་ནི། བྱི་ལའི་སྤུ་ཟླ་བ་གཟས་ཟིན་པའི་ཚེ་བསྡུས་ལ་བླངས་ཏེ། བསྒྲུབ་བྱ་གང་གི་མིང་ནས་བརྗོད་ནས་སྤེལ་ཚིག་དང་བཅས་པའི་སྔགས་ཀྱིས་སྦྱིན་སྲེག་སྟོང་ཕྲག་བརྒྱད་བྱས་ནས། ཐལ་བ་དེ་གང་གི་སྤྱི་བོར་བཞག་པ་དེ་བྱི་ལར་འགྱུར་རོ། །ཞི་བའི་བསམ་པས་སླར་སྟོང་ཕྲག་བརྒྱད་བཟླས་ན་རྣལ་མར་འགྱུར་རོ། །བྱ་རོག་གི་རྒྱུས་པ་སྟེ་ཆུ་རྒྱུས་ལ་སྲད་བུ་བྱས་པ་གཟུང་ལ་བསྒྲུབ་བྱའི་མིང་སྤེལ་དང་བཅས་པས་སྔགས་ལན་བརྒྱད་བརྒྱར་མངོན་པར་བཟླས་ཏེ་གང་གི་མགུལ་དུ་བཅིངས་པ་དེ་བྱ་རོག་ཏུ་འགྱུར་རོ། །དེས་མཚོན་ནས་སེམས་ཅན་གང་དང་གང་གིས་རྒྱུས་པ་སྲད་བུར་བྱས་པ་ལ་མིང་སྤེལ་དང་བཅས་པའི་སྔགས་བརྒྱད་བརྒྱ་མངོན་པར་བཟླས་ཏེ་མགུལ་དུ་བཅིངས་པ་དེ་སེམས་ཅན་དེ་དང་དེ་འདྲ་བར་འགྱུར་རོ། །དེ་བཞིན་དུ་ཁྭ་དང་ཐི་བ་དང་རྨ་བྱ་དང་ཆུ་སྐྱར་དང་འུག་པ་དང་ཁྲ་དང་བྱ་རྒོད་ཀྱི་གཟུགས་འཛིན་པར་འགྱུར་རོ། །བ་ལང་གི་སྤུ་ལས་སྲད་མ་བྱས་ལ་བསྒྲུབ་བྱའི་མིང་སྤེལ་དང་བཅས་པའི་སྔགས་བརྒྱ་རྩ་བརྒྱད་བཟླས་བརྗོད་བྱས་ཏེ། མགུལ་དུ་བཅིངས་ན་དེ་བ་ལང་དུ་འགྱུར་རོ། །རྐང་བཞི་པ་དང་སོགས་ཀྱིས་རྐང་མངས་དང་རྐང་མེད་ལ་སོགས་པའི་སྲོག་ཆགས་གང་དང་གང་གི་སྤུ་ལས་སྲད་བུ་བྱས་ལ། མིང་སྤེལ་དང་བཅས་པ་སྔར་བཞིན་བཟླས་ཏེ་མགུལ་དུ་བཏགས་ན་སྲོག་ཆགས་དེ་དང་དེའི་གཟུགས་འཛིན་
པར་འགྱུར་རོ། །སྐུད་པ་དེ་རྣམས་མགུལ་ནས་བཀྲོལ་ན་ཐར་བར་འགྱུར་རོ། །དྲུག་པ་ནི། སོ་བ་ལ་ཉི་མ་བདུན་གྱི་བར་དུ་ཐུན་རེ་རེ་ལ་སྔགས་སྟོང་ཕྲག་བརྒྱད་བཟླས་ནས་ནོར་གྱི་བདག་པོ་ཆེན་པོའི་ཁྱིམ་དུ་བཅུག་ལ། ལྷག་མ་སྟེ་བཅུག་པའི་རྗེས་སུ་སྔགས་ཀྱིས་མངོན་པར་བསྔགས་པའི་ཆུས་བདག་ཉིད་ལ་དབང་བསྐུར་ཞིང་ཞག་བདུན་དུ་བཟླས་ན་མཚན་མོ་བདུན་གྱིས་སོ་བ་ཐམས་ཅད་འགུགས་པར་འགྱུར་རོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། སངས་རྒྱས་ཐམས་ཅད་ཀྱི་མཁའ་འགྲོ་མ་ནི་སརྦ་བུདྡྷ་ཌཱ་ཀི་ནི་སྟེ་དེའི་སྔགས་ཀྱི་སྒོ་ནས་ལས་སྒྲུབ་པའི་ཆོ་གའི་ལེའུ་སྟེ། བཞི་བཅུ་རྩ་བདུན་པའོ།། །།འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས། ལེའུ་བཞི་བཅུ་རྩ་བདུན་པའི་བཤད་པའོ།། །།༈ གཉིས་པ་དཔའ་བོ་དང་རྣལ་འབྱོར་མ་རྣམས་རྟག་ཏུ་བསྒོམ་པར་བྱ་བ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུ་ཡི་མཚན་བསྟན་པའོ། །དང་པོ་ནི། ཞེ་བདུན་པ་བཤད་པ་དེ་ནས་སྔ་མ་ལས་གཞན་ཡང་བཤད་པར་བྱའོ། །དེ་གང་ཞེ་ན། རྡོ་རྗེ་ཕག་མོ་ལ་སོགས་པའི་མཁའ་འགྲོ་མ་ཀུན་གྱི་སྙིང་པོའི་སྔགས་སྒྲུབ་པ་པོ་གང་དགེ་བར་བྱེད་པ། རྣལ་འབྱོར་མ་ཀུན་གྱིས་སྒྲུབ་པ་པོའི་འདོད་པའི་དོན་ཐམས་ཅད་སྒྲུབ་པར་བྱེད་པའོ། །དེ་བཞིན་དུ་སྔགས་དང་ལྷ་གང་ཞིག་བསྙེན་པའི་རྗེས་སུ་ཡིད་ལ་དྲན་ནས་བཟླས་པ་ཙམ་གྱིས། ས་འོག་ས་སྟེང་ས་བླའི་འཇིག་རྟེན་
གསུམ་པོ་གཡོ་བར་བྱེད་ཅིང༌། སྦྱིན་སྲེག་སོགས་ལ་མི་ལྟོས་པར་རྗེས་སུ་དྲན་པ་ཙམ་གྱིས་རྣལ་འབྱོར་མ་རྣམས་ཀྱི་བསྙེན་པ་ལ་འཇུག་པའི་རིམ་པས། གནས་དང་ཉེ་བའི་གནས་ལ་སོགས་པ་རྣམས་སུ་འཕྱན་ན། དེའི་མཁའ་འགྲོ་མ་རྣམས་ཀྱིས་བྱིན་གྱིས་རློབ་ཅིང༌། ཡང་དག་པའི་དངོས་གྲུབ་བདེ་མཆོག་གི་གོ་འཕང་རིམ་གྱིས་འཐོབ་པ་དེ་བཤད་པར་བྱའོ་ཞེས་པའོ། །གཉིས་པ་ལ་གསུམ། ལས་སྒྲུབ་པའི་སྔགས་ཕན་ཡོན་དང་བཅས་པ། གསང་བའི་དཀྱིལ་འཁོར་བསྒོམ་པ། དོན་བསྡུ་བའོ། །དང་པོ་ནི། སྔགས་སྟོན་པ་ན་ཧཱ་སྭཱ་ཞེས་སོགས་ལུགས་བཟློག་ཏུ་གསུངས་པ་ནི། རྒྱུད་ལ་རང་དགར་འཇུག་པ་དགག་པའི་ཕྱིར་ཡིན་ལ། གོ་རིམ་ལུགས་མཐུན་དུ་བཤད་ན། ཨོཾ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྞ་ནི་ཡེ་ཧཱུཾ་ཧཱུཾ་ཕཊ་སྭཱཧཱ། ཞེས་པའོ། །དེ་ལ་ཨོཾ་ནི་ཕྱག་འཚལ་བའོ། །གང་གི་ཆེད་དུ་ན། སརྦ་བུདྡྷ་ཌཱ་ཀི་ནཱི་ཡེ་ནི་སངས་རྒྱས་མཁའ་འགྲོ་མ་ཐམས་ཅད་དང༌། བཛྲ་ཝརྞ་ནི་ཡེ་ནི་རྡོ་རྗེ་རབ་བསྔགས་མ་སྟེ་དེའི་ཆེད་དུའོ། །ཧཱུཾ་གཉིས་ནི་སྐབས་ཀྱི་དོན་གང་ཡིན་པ་ལ་དམིགས་པ། ཕཊ་ནི་དེ་གསལ་བར་བྱེད་པ། སྭཱ་ཧཱ་ནི་དབུགས་འབྱིན་པའོ། །སྔགས་འདི་བཀླགས་པས་འགྲུབ་པ་ཞེས་པ་ནི། སྔོན་བསོད་ནམས་བསགས་པ་དག་གིས་ནི། སྔོན་དུ་བསྙེན་པ་སོགས་ལ་མི་བལྟོས་པར་ལས་རྣམས་ཀུན་བྱེད་ཅིང༌། དགེ་བར་བྱེད་པ་ཡིན་ནོ། །དེ་དག་ལས་གཞན་གྱིས་ནི་སྔོན་གྱི་བསྙེན་པ་སོགས་ལ་བལྟོས་པ་ཁོ་ནའོ། །སྔགས་དེ་གང་གི་ཡིན་ཞེ་ན། མཁའ་འགྲོ་མ་ནི་
མདོར་བསྟན་པའོ། །རྣལ་འབྱོར་མ་ནི་དེ་འཆད་པའོ། །དེ་ཡང་གང་ཞེ་ན། དུམ་སྐྱེས་མ་དང་ལཱ་མ་དང༌། སོགས་ཀྱིས་ནི་གཞལ་ཡས་ཁང་ན་བཞུགས་པ་ཐམས་ཅད་གཟུང་ངོ༌། །དེ་ལྟ་བུའི་མཁའ་འགྲོ་མ་ཐམས་ཅད་ཀྱི་སྔགས་ནི་སངས་རྒྱས་མཁའ་འགྲོ་མའི་སྔགས་འདི་ཉིད་ཡིན་པར་གྲགས་སོ། །སྔགས་དེའི་ཆེ་བ་ནི་ས་འོག་དང་ཡང་ན་མཐོ་རིས་ཏེ་ས་བླ་ལྷའི་ཡུལ་དང༌། དེ་བཞིན་ས་སྟེང་མིའི་ཡུལ་དག་ཏུ་ཡང་སྟེ་འཇིག་རྟེན་གསུམ་ན་ཡོད་པ་ཡི་ཞི་སོགས་ཀྱི་ལས་ནི་གང་དག་ཡོད་པ་རྣམས། སངས་རྒྱས་མཁའ་འགྲོ་མའི་སྔགས་ཀྱིས་དེ་དག་ཐམས་ཅད་འགྲུབ་ཅིང༌། དངོས་གྲུབ་ཀུན་འགྲུབ་པར་བྱེད་པས་དགེ་བར་བྱེད་པ་ཡིན་ནོ། །དངོས་གྲུབ་ཐམས་ཅད་རབ་ཏུ་སྩོལ་བའི་སྔགས་འདི་ལས་ཆེས་ཤིན་ཏུ་མཆོག་ཏུ་གྱུར་པའི་སྔགས་གཞན་མེད་དེ། རྒྱུ་མཚན་གང་གི་ཕྱིར་ན་སྔགས་འདི་ནི་བླ་ན་མེད་པའི་དངོས་གྲུབ་ཀྱི་ཐབས་བཟང་པོར་ནི་བསྟན་པ་ཡིན་པའི་ཕྱིར་རོ། །གཉིས་པ་ལ་གཉིས། རྟེན་བསྒོམ་པ་དང༌། བརྟེན་པ་ལྷ་བསྒོམ་པའོ། །དང་པོ་ནི། མཁའ་འགྲོ་མ་ནི་ཀུན་གྱི་བཞུགས་པའི་གནས་ནི་འདིར་མདོར་བསྡུས་ནས་བཤད་པར་བྱ་ཡི། རྒྱས་པར་བཤད་པ་ནི་མ་ཡིན་ནོ། །དེ་ཡང་གང་ཞེ་ན། རིན་པོ་ཆེ་སྣ་བདུན་གྱི་རང་བཞིན་གྱི་རི་བོ་བཟང་པོ་སྟེ་རི་རབ་རྩེ་མོ་བརྒྱད་པ་མེ་ཏོག་དང༌། འབྲས་བུ་ལ་སོགས་པ་སྣ་ཚོགས་ཀྱིས་བརྒྱན་པ་ཡིད་ཀྱིས་བྲི་བར་བྱའོ། །འདི་གནས་བསྡུས་ཏེ་སྟོན་པ་ཡིན་པས། དེས་མཚོན་ནས་འབྱུང་བ་རིམ་རྩེག་དང་གཞལ་ཡས་ཁང་གི་བར་དུ་བསྒོམ་པར་བྱའོ། །གཉིས་པ་ནི། རི་རབ་དེའི་སྟེང་དུ་གཞལ་
ཡས་ཁང་བསྒོམས་པའི་ནང་གི་དབུས་ཀྱི་པདྨ་འདབ་བརྒྱད་ཀྱི་ཕྱོགས་ཀྱི་འདབ་མ་ལ། རྟག་ཏུ་བསྒོམ་པར་བྱ་བ་ནི། ཤར་དུ་མཁའ་འགྲོ་མ་དང༌། དེ་བཞིན་དུ་བྱང་དུ་ལཱ་མ་དང༌། ནུབ་ཏུ་དུམ་སྐྱེས་མ་དང༌། ལྷོར་གཟུགས་ཅན་མ་དང༌། རྣལ་འབྱོར་མ་སོ་གཉིས་དང༌། འཁོར་གྱི་དཔའ་བོ་ཉིད་དེ་ཧེ་རུ་ཀ་ཤེས་རབ་མ་དང་བཅས་པ་དང༌། ཧ་ཧ་ཧེ་ཧེ་ཞེས་པའི་བཞད་མོ་མཛད་པ་དང༌། དཔའ་བོ་ཉི་ཤུ་རྩ་བཞིའི་མཁའ་འགྲོའི་དྲ་བའི་སྟེ་ཚོགས་ཀྱིས། བཅོམ་ལྡན་འདས་བདེ་མཆོག་གི་ལྷ་ཚོགས་རྟག་ཏུ་བསྒོམ་པར་བྱའོ། །ལེའུ་བཞི་པར་རྣལ་འབྱོར་མ་ཉེར་བཞི་གོ་རིམ་བཟློག་ནས་བསྟན་པ་བཞིན་དུ། དཔའ་བོ་ཉེར་བཞི་ཡང་གོ་རིམ་བཟློག་ནས་སྟོན་པ་ནི། དཔའ་བོ་རྡོ་རྗེ་སེམས་དཔའ་དང༌། རྣམ་པར་སྣང་བྱེད་དེ་སྣང་མཛད་དང་པདྨ་གར་གྱི་དབང་ཕྱུག་དང་དཔལ་ཁྲག་འཐུང་སྟེ་ཤྲཱི་ཧེ་རུ་ཀ་དང༌། ནམ་མཁའི་སྙིང་པོ་དང་རྟ་མགྲིན་དང༌། རིན་ཆེན་རྡོ་རྗེ་དང་སྟོབས་པོ་ཆེ་བརྒྱད་ནི་སྐུ་འཁོར་ལ་གནས་པའི་དཔའ་བོ་བརྒྱད་དོ། །མིག་མི་བཟང་དང་འཇིགས་བྱེད་ཆེན་པོ་དང༌། རྡོ་རྗེ་བཟང་པོ་དང༌། རབ་ཏུ་བཟང་པོ་དང༌། རྡོ་རྗེ་ཧཱུཾ་མཛད་དང༌། དཔའ་བོ་ཆེན་པོ་དང༌། རྡོ་རྗེ་རལ་པ་ཅན་དང་མྱུ་གུ་ཅན་ཏེ་དེ་བརྒྱད་ནི་གསུང་འཁོར་ལ་གནས་པའི་དཔའ་བོ་བརྒྱད་དོ། །རྡོ་རྗེའི་ལུས་ཏེ་སྐུ་དང༌། རྡོ་རྗེའི་འོད་དང༌། འོད་དཔག་མེད་དང་ལྷ་ཡི་དགྲ་དང༌། དེ་བཞིན་དུ་མཆེ་བ་རྣམ་པར་གཙིགས་པ་དང༌། ཀེང་རུས་དང༌། ཀེང་རུས་ཆེན་པོ་དང༌། ཐོད་པའི་དུམ་བུའོ། །འདིར་སོགས་ཀྱི་སྐད་དོད་ནི་བྷ་བའི་
འགྲེལ་པ་ལས་དང་པོར་མཛད་པ་ལྟར་བྱའི་སོགས་སུ་མི་བྱའོ། །དེ་བརྒྱད་ནི་ཐུགས་འཁོར་ལ་གནས་པའི་དཔའ་བོ་བརྒྱད་དོ། །འདི་རྣམས་ཀྱི་སྐུ་མདོག་དང་ཕྱག་མཚན་སོགས་ནི། བཤད་རྒྱུད་ལས་མི་འདྲ་བ་དུ་མར་གསུངས་པ་སློབ་དཔོན་སོ་སོའི་བཞེད་པ་ལྟར། གང་སྐབས་སུ་བབ་པ་ཉམས་སུ་བླང་བར་བྱའོ། །དེ་ལྟར་དཔའ་བོ་ཉི་ཤུ་རྩ་བཞི་ཡིས་འགྲོ་བ་འདི་དག་ཐམས་ཅད་ཀྱི་སྤྱི་བོ་དང༌། སྤྱི་གཙུག་སོགས་ནང་གི་གནས་ཉེར་བཞིར་ཁྱབ་པ་སྟེ་གནས་པར་བསྒོམ་སྟེ་རབ་གཏུམ་མ་སོགས་དང་བཅས་པའོ། །དེ་ལྟར་དཔའ་བོ་ཉེར་བཞི་པོ་རྣམས་དང༌། མཁའ་འགྲོ་མ་ཉིད་དེ་རྣལ་འབྱོར་མ་ནི་རབ་གཏུམ་ལ་སོགས་པ་ཉེར་བཞི་ནི། ཞི་སོགས་ཀྱི་བྱ་བ་སྟེ་ལས་ཀུན་སྒྲུབ་པ་ལ་སྒྲུབ་པ་པོས་སྐུ་གསུང་ཐུགས་ཀྱི་འཁོར་ལོ་གསུམ་གྱི་རྩིབས་ལ་བཞུགས་པ་བལྟ་བར་ཏེ་བསྒོམ་པར་བྱའོ། ཞེས་པ་ནི་མཚོན་པ་སྟེ། ལྷ་ལྷག་མ་རྣམས་ཀྱི་འགའ་ཞིག་ཀྱང་ཁ་བསྐངས་ཏེ་ལྷ་རེ་གཉིས་བསྒོམ་པར་བྱའོ། །དངོས་གྲུབ་སྒྲུབ་པར་འདོད་པས་ཤིན་ཏུ་མཉམ་པར་བཞག་པ་སྟེ་བྱ་བ་གཞན་གྱིས་མ་གཡེངས་པས། རྟེན་དང་བརྟེན་པའི་ལྷའི་འཁོར་ལོའི་བདག་ཉིད་འདི་ནི་རྟག་ཏུ་བསྒོམ་པར་བྱ་ཞིང༌། སྔར་ལེའུ་གཉིས་པ་དང་གསུམ་པར་བཤད་པའི་ཆོ་ག་ཡིས་མཁའ་འགྲོའི་དྲ་བ་སྟེ་ཚོགས་ཀྱིས་བསྐོར་བའི་འཁོར་ལོ་བདེ་མཆོག་བརྗོད་པ་སྟེ་མཆོད་པར་བྱའོ། །གསུམ་པ་ནི། དཀྱིལ་འཁོར་གྱི་འཁོར་ལོ་ཆེན་པོའི་རྣལ་འབྱོར་མ་རྣམས་བསྒོམ་ཞིང༌། སྔར་བཤད་པ་དེ་བཞིན་དུ་མཆོད་པ་འདི་ནི་དངོས་གྲུབ་ཀུན་གྱི་གཞི་ཡིན་པར། རྣམ་སྣང་ལ་
སོགས་པའི་སངས་རྒྱས་བྱེ་བ་དང༌། ཧེ་རུ་ཀ་ལ་སོགས་པའི་དཔའ་བོ་བྱེ་བས་ལེགས་པར་གསུངས་པའི་ལམ་དེ་ལ་ཤིན་ཏུ་བརྩོན་པར་བྱའོ། །དཔའ་བོའི་ཆེ་བ་སྟོན་པ་ནི། དཔའ་བོ་རེ་རེ་ལ་རྣལ་འབྱོར་མ་རེ་རེ་དེ་འདྲ་བའི་མཁའ་འགྲོ་མ་ནི་རེ་རེ་ཡང༌། བྱེ་བ་གྲངས་མེད་པ་ཡི་འཁོར་གྱིས་བསྐོར་རོ། །རྣལ་འབྱོར་མ་ནི་མཁའ་འགྲོ་མའི་དངོས་པོ་ནི་མཁའ་འགྲོ་མ་ཉིད་དང༌། གཟུགས་ཅན་མ་དང༌། དུམ་སྐྱེས་མ་དང་ལཱ་མ་དང༌། ལ་སོགས་པས་སྒོ་མཚམས་མ་བརྒྱད་དང༌། གཙོ་མོ་རྣམས་ཀྱི་འཁོར་གྱི་གྲངས་ཀྱང་སྔར་བཤད་པ་དེ་བཞིན་ནོ། །དེ་རྣམས་ཐམས་ཅད་ཀྱང་དངོས་གྲུབ་ཀུན་ཏེ་ཐམས་ཅད་སྩོལ་བར་བྱེད་ཅིང་སྒྲུབ་པ་པོ་དགེ་པར་བྱེད་པ་ཡིན་ནོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། དཔའ་བོ་དང་རྣལ་འབྱོར་མ་ཐམས་ཅད་ཀྱི་གནས་ཏེ་རི་རབ་སོགས་དང༌། དེའི་སྒོམ་པའི་གསང་བ་སྟེ་ལྷའི་དཀྱིལ་འཁོར་སྒོམ་པའི་ཆོ་གའི་ལེའུ་སྟེ། བཞི་བཅུ་རྩ་བརྒྱད་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས་ལེའུ་བཞི་བཅུ་རྩ་བརྒྱད་པའི་བཤད་པའོ།། ༈ །།བཞི་པ་སྐྱེ་བདུན་བརྟག་པ་རྒྱས་པར་བསྟན་པ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུ་ཡི་མཚན་བསྟན་པའོ། །དང་པོ་ནི། ཞེ་བརྒྱད་པ་བཤད་པ་དེ་ནས་དེར་བཤད་པ་ལས་གཞན་ཡང་བཤད་པར་བྱའོ། །
དེ་གང་ཞེ་ན། སྔར་བཅུ་བཞི་པར་བཤད་པ་ཇི་ལྟ་བ་དེ་བཞིན་གྱི་ཆོ་ག་སྟེ་བོང་བུའི་རྣལ་འབྱོར་སྔོན་དུ་འགྲོ་བས་ཕྱུགས་ཏེ་སྐྱེ་བདུན་བསྒྲུབ་པར་བྱའོ། །དགོས་པ་ནི་སྒྲུབ་པ་པོ་གང་གིས་རྫས་ཁྱད་པར་ཅན་དུ་བྱིན་གྱིས་བརླབས་པ་ཤེས་པ་ཙམ་གྱིས་འོག་ནས་འཆད་པའི་དངོས་གྲུབ་རྣམས་མྱུར་དུ་འགྲུབ་པར་འགྱུར་བ་དེའི་ཕྱིར་དུ་བཤད་དོ། །གཉིས་པ་ལ་གསུམ། འབྲས་ཕྱེ་ལས་ཕྱུགས་ཀྱི་གཟུགས་བརྙན་བྱ་བ། ཕྱུགས་མཆོག་གི་མཚན་ཉིད་དང་དེ་ལ་བརྟེན་པའི་ལས། ལས་སྦྱོར་དེ་མཆོག་ཏུ་བསྟན་པའོ། །དང་པོ་ནི། སྔགས་པས་དགུན་གྱི་དུས་སུ་སྐྱེས་བའི་འབྲུའི་བྱེ་བྲག་འབྲས་ས་ལུའི་ཕྱེ་མ་དང༌། འབྲས་ཕྱེའི་འཁུར་བ་ལ་མི་ལ་སོགས་པའི་ཕྱུགས་ཀྱི་གཟུགས་བརྙན་བྱའོ། །རིམ་བཞིན་ནི་མི་ལ་སོགས་པའི་གཟུགས་རིམ་པ་བཞིན་བྱ་བའོ། །ཕྱུགས་དུ་ཞེ་ན། མི་དང་རུས་སྦལ་དང་རྔ་མོང་དད་བོང་བུ་དང༌། སྤྱང་ཀི་དང་རྟ་དང་ལ་སོགས་པས་ཁྭ་དང་འུག་པ་དང་བྱ་རྒོད་ལ་སོགས་པ་གཟུང་ངོ༌། །དེ་ལྟར་སྣ་ཚོགས་ཕག་ནི་ཁ་དོག་སྣ་ཚོགས་པའི་རི་དྭགས་ཀྱི་ཁྱད་པར་ལ་བཤད་པ་སྟེ། འབྲས་ཕྱེ་ལ་ཕྱུགས་གཟུགས་བྱ་ཞེས་པའི་ཕྱུགས་ནི། ཕྱུགས་འདི་དག་ཏུ་ཤེས་པར་བྱའོ། །འདི་ནི་སྔར་དཀྱིལ་འཁོར་གྱི་དབུས་སུ་བོང་བུའི་གཟུགས་བརྙན། འབྲས་ཕྱེའམ་འབྲས་ཀྱི་འཁུར་བ་ལས་བྱས་པ་བཞག་ཅེས་པའི་ཁ་སྐོང་ངོ༌། །གཉིས་པ་ལ་གསུམ། དོན་གཉིས་བཤད་པར་དམ་བཅའ་བ། ཕྱུགས་མཆོག་གི་མཚན་ཉིད་བསྟན་པ། དེ་ལ་བརྟེན་པའི་ལས་སྦྱོར་བསྟན་པའོ། །དང་པོ་ནི། སྐྱེ་བདུན་
གྱི་མཚན་ཉིད་ཇི་ལྟར་དུ་གྱུར་པ་དང༌། སྐྱེ་བདུན་འདི་རྣམས་ཀྱི་ལས་ནི་བཤད་པར་བྱའོ། །གཉིས་པ་ནི། དང་པོར་མིའི་སྐྱེ་བ་གཅིག་དང༌། དེ་ནས་སྐྱེ་བ་གཉིས་པ་དང༌། དེ་ནས་སྐྱེ་བ་གསུམ་པ་དང༌། བཞི་པ་དང་ལྔ་པ་ཉིད་དང༌། སྐྱེ་བ་དྲུག་པ་དང༌། བདུན་པར་བར་མ་ཆད་དུ་གྱུར་པའི་མི་ནི་ཕྱུགས་རྣམས་ཀྱི་མཆོག་ཏུ་ནི་གདོན་མི་ཟའོ། །འདི་ལ་ཕྱུགས་ཟེར་བའི་རྒྱུ་མཚན་ནི་སྔར་བཤད་ཟིན་ཏོ། །མལ་གྱི་འགྱུར་ལའམ་གཉིས་དང་དམ་མེད་པ་ལེགས་སོ། །མི་གང་གི་ཁའི་དྲི་ཨུལའི་དྲི་ལྟར་ཞིམ་ཞིང༌། མིག་མི་འཛུམས་པར་རྣམ་པར་བལྟ་བ་དང༌། ཚིག་བདེན་པར་སྨྲ་ཞིང་གཞན་གྱིས་མཐོང་ན་དགའ་བ་དང༌། རྟག་ཏུ་དམ་པའི་ཆོས་སྤྱོད་པ་ལ་དགའ་བར་འགྱུར་ཞིང༌། རང་གི་སྐྱེ་བ་ཤེས་པ་དང་ལུས་ཀྱི་དྲི་ནི་རྟག་ཏུ་ཞིམ་པོ་བྲོ་བའི་མཚན་ཉིད་འདི་དག་དང་ལྡན་པ་ནི། མི་ཡི་སྐྱེ་བ་བདུན་དུ་བར་མ་ཆད་པར་འབྱུང་བ་ཡིན་ནོ། །མཚན་ཉིད་རྒྱས་པ་ནི་བཤད་རྒྱུད་ལས། སྐལ་བཟང་ཡིད་འོང་བདེ་བར་འགྲོ། སྐྲ་ཡི་མྱུ་གུ་དེ་བཞིན་རིང༌། །མིག་ནི་དཀྱུས་རིང་མིག་ཀྱང་དམར། །པདྨའི་འདབ་མ་འདྲ་བའི་གཟུགས། །དེ་ཡི་ལུས་ལ་རྡུལ་རབ་འབྱུང༌། །ལུས་ལས་ལྷ་ཡི་དྲི་འབྱུང་ཞིང༌། །ཁ་ཡི་དབུས་ནི་ག་བུར་དྲི། །ལྡན་པས་སྦྲང་མ་རྟག་ཏུ་འཁོར། །གཅིན་དང་ཕྱི་ས་གླ་རྩི་བྲོ། །ཚིག་ནི་འཇམ་པར་གྱུར་བ་དང༌། །ལག་པ་དང་ནི་རྐང་པ་འཇམ། །ཨུཏྤ་ལ་ཡི་དྲི་དང་ལྡན། །སྐྲ་དཀར་གཉེར་མ་ལས་རྣམ་གྲོལ། །ལུས་ཀྱང་སྣུམ་ཞིང་
མཉེན་པ་དང༌། །སྙིང་དང་ཐོད་པ་ལྟེ་བ་སྟེ། །དེས་ན་རོ་ཙ་ན་རུ་འགྱུར། །གྲིབ་བདུན་ངང་པའི་འགྲོས་སུ་འགྲོ། སྙིང་རྗེའི་བསམ་པ་ཅན་ཡིན་ཏེ། །དཀོན་མཆོག་གསུམ་ལ་རྟག་ཏུ་དད། །སྦྱིན་དང་ཚུལ་ཁྲིམས་དག་དང་ལྡན། །འདི་འདྲ་རྣལ་འབྱོར་པས་རྟོགས་ན། །མི་གསོད་མེ་ཡིས་འཚིག་མི་འགྱུར། །སྲོག་ཆགས་སྣ་ཚོགས་གདུག་པ་དག །གང་ཡང་རུང་པས་ཟ་མི་ནུས། །དེ་ནི་མཚན་མོ་མ་མཐོང་སྟེ། །མི་སྣང་བ་ཡི་དབང་ཕྱུག་མཆོག །འདི་འདྲ་སྔགས་པས་རྟོགས་ནས་ནི། །ཞེས་གསུངས་པ་ལྟར་གྱི་མཚན་ཉིད་ཅན་ཏེ། དེ་མཐོང་ནས་བདག་ལ་སྦྱིན་པ་སྩོལ་ཞེས་ཞུས་པ། དྲི་ཆེན་དྲི་ཆུ་བྱང་ཆུབ་ཀྱི་སེམས་བླངས་ཏེ། རིལ་བུར་བྱས་ལྕགས་གསུམ་གྱིས་དཀྲིས་ལ། དབང་པོ་གཉིས་མཉམ་པར་སྦྱར་ནས་ཉེ་སྙིང་ལན་འབུམ་བཟླས་ནས་རིལ་བུ་དེ་དེའི་ལག་ཏུ་བྱིན་ནས་བདག་ལ་སྦྱིན་པ་བྱིན་ཞེས་སྨྲས་པས། དེ་དེ་མ་ཐག་ཤི་ནས་མི་འཁྲུགས་པའི་ཞིང་དུ་སྐྱེ་ལ། རོ་དེ་དབེན་པར་ཁྱེར་ནས་བསྒྲུབ་པར་བྱའོ། །ཞེས་མངོན་བརྗོད་ལས་གསུངས་སོ། །གསུམ་པ་ལ་གཉིས། ཕྱུགས་མཆོག་ལ་བརྟེན་པའི་ལས་ཀྱིས་བསྒྲུབ་པ་དང༌། ཕྱུགས་གཞན་ལ་བརྟེན་པའི་ལས་ཀྱིས་སྒྲུབ་པའོ། །དང་པོ་ནི། དེ་འདྲ་བའི་སྐྱེ་བདུན་གྱི་ཤ་དེ་ནི་ཟོས་པ་ཙམ་གྱིས་ནི་ལྷ་ཡི་གཟུགས་ནི་འཛིན་པར་འགྱུར་ཞིང༌། དེའི་སྙིང་ཁའི་རོ་ཙ་ནའི་དྲི་བསྣམས་པའམ་དེ་ལ་རེག་པ་ཙམ་གྱིས་སམ། སྒྲུབ་པ་པོ་གང་ཞིག་རང་གི་དཔྲལ་བར་རོ་ཙ་ན་དེའི་ཐིག་ལེ་བྱེད་པ་དེ། ཐིག་ལེ་བྱས་པ་དེའི་མོད་ལའང་དངོས་གྲུབ་རྣམས་འགྲུབ་པར་
འགྱུར་པ་སྟེ། རྣལ་འབྱོར་པ་འདི་ནི་རང་གང་ལ་དགའ་བ་ཡི་གཟུགས་སུ་འགྱུར་རོ། །སྐྱེ་བདུན་དེ་ཡི་སྙིང་ཁ་ན་ཡོད་པའི་རོ་ཙ་ན་སྟེ་གི་ཧཾ། དེའི་ལས་སྦྱོར་ལ་མཁས་པ་ཡིས་ནི་བླང་ངོ༌། །སྔར་དྲངས་པའི་བཤད་རྒྱུད་ལས། སྙིང་ག་དང་ཐོད་པ་དང་ལྟེ་བ་གསུམ་ག་ན་རོ་ཙ་ན་ཡོད་པར་བཤད་དོ། །གི་ཧཾ་དེ་བླངས་ནས་ནི་ཡབ་ཡུམ་གཉིས་ཀྱི་སྙིང་པོའི་སྔགས་ནི་བཟླས་ནས་སུ་དེ་ཡི་ཐིག་ལེ་བྱ་བ་ཡིན་ལ། སེམས་ཅན་གང་དང་གང་གི་ནི་གཟུགས་སུ་བསྒྱུར་བར་བྱ་བར་འདོད་པ་ན། སེམས་ཅན་དེ་དང་དེ་ཡི་གཟུགས་སུ་ནི་སྔར་གྱི་ཐིག་ལེ་བྱས་པས་འགྱུར་བར་ཐེ་ཚོམ་མེད་དོ། །འདིའི་ལས་སྦྱོར་ལ་མཁས་པས་ཤིང་གི་ལོ་མའི་ཁུ་བ་ནི་རོ་ཙ་ན་དང་བཅས་པ་བླངས་ནས་སུ་དཔྲལ་བར་ཐིག་ལེ་བྱས་ན་ནི། ཤིང་དེའི་གཟུགས་སུ་འགྱུར་བར་ཐེ་ཚོམ་མེད་དོ། །ཕྱུགས་ཉིད་ཀྱི་བ་སྤུ་དང༌། ཕྱུགས་དེའི་བ་སྤུའི་མཚོན་ནས་སེན་མོ་དང་སོ་དང༌། པགས་པ་དང་སྐྲ་སྟེ་ཡན་ལག་ལྔ་དང་ལྡན་པ་སྟེ་ལྷན་ཅིག་བྱས་པས་ལག་ངར་གཞན་གྱི་སྤྱི་བོར་བཅིངས་ན་ནི། གང་བཅིངས་པ་དང་དེ་དུད་འགྲོ་དེའི་གཟུགས་སུ་འགྱུར་བར་ཐེ་ཚོམ་མེད་དོ། །ཕྱུགས་ཉིད་ཀྱི་ནི་བ་སྤུ་དག། །དེ་ཡི་ཡན་ལག་ལྔར་ལྡན་ཞིང༌། །ལག་པ་སྤྱི་བོར་བཅིངས་ན་ནི། ཞེས་པ་མ་གཏོགས་པ་རྐང་པ་གཞན་གཉིས་འགྲེལ་པ་རྣམས་ལ་མེད་དོ། །དེ་ཐམས་ཅད་ལ་བཅིངས་པ་དེ་བཀྲོལ་ན་ཐར་བར་འགྱུར་རོ། །ཞེས་པ་མན་ངག་གོ། འདི་རྣམས་ཀྱི་ལས་སྒྲུབ་པ་ལ་ནི་ལྷའི་རྣལ་འབྱོར་ལ་ནི་
ཤིན་ཏུ་བྱང་བར་གོམས་པ་དང༌། སྔགས་མིང་སྤེལ་དང་བཅས་བཟློས་པས་དངོས་གྲུབ་འགྲུབ་བོ། །མི་རྣམས་དུད་འགྲོ་ལ་སོགས་པར་བསྒྱུར་བ་དེ་ཅིའི་དོན་དུ་ཡིན་ཞེ་ན། མི་རྣམས་ལམ་སྒྲུབ་བཞིན་པའི་ནུས་པ་དང་ལྡན་པ་ཡིན་ནའང༌། ཉོན་མོངས་སྡིག་པ་ལ་དགའ་བ། ཞེས་འདོན་པ་ལེགས་པས། མི་རྣམས་ཕལ་ཆེར་སྡིག་པ་སྤྱད་པ་དང༌། ཉོན་མོངས་ཀྱི་ཕྱོགས་ལ་དགའ་བས། དངོས་གྲུབ་ཀྱི་ལམ་ནི་འགོག་པར་བྱེད་པ་ཡིན་པས། དེ་ལས་བཟློག་པའི་ཕྱིར་དུ་གཟུགས་དམན་པར་བསྒྱུར་བར་གསུངས་སོ། །གཉིས་པ་ནི། གླང་པོ་དང་རྟ་དང་བོང་བུ་དང་རུས་སྦལ་དང༌། རྔ་མོ་དང་ཕག་དང་ཝ་དང་ཁྲ་དང་འུག་པ་སོགས་དང༌། བྱ་རྒོད་དང་ཁྲུང་ཁྲུང་དང༌། ཁྲ་དང་ས་ར་ས་སྟེ་བཞད་རྣམས་ཀྱི་ཤ་ཆོ་ག་བཞིན་དུ་བསྒོམ་ཞིང་སྔགས་ཟློས་པས་གཏོར་མར་དབུལ་ཞིང༌། རང་གིས་ལོངས་སྤྱད་ན་གཟུགས་ངན་པ་རྣམས་ཀྱང༌། གཟུགས་བཟང་བ་ལྷའི་གཟུགས་སུ་སྒྲུབ་པ་པོ་དེ་འགྱུར་རོ། །ཁ་ཅིག་གིས་ཝའི་སྐད་དོད་ཅེ་སྤྱང་ལ་བསྒྱུར་རོ། །གཟུགས་བཟང་བ་དང་གཟུགས་ངན་པ། ཞེས་པ་ལ་བཤད་སྦྱར་ལས། གཟུགས་ངན་པ་ཡང་གཟུགས་བཟང༌། ཞེས་བསྒྱུར་བ་ཉིད་ལེགས་སོ། །སྒྲུབ་པ་པོའི་རྣལ་འབྱོར་པ་ཆེན་པོ་ནི། རང་གང་ལ་དགའ་བའི་གཟུགས་སུ་སྐྱེ་བ་སྟེ་འགྱུར་བ་དེ་ནི་ཐེ་ཚོམ་མེད་དོ། །གསུམ་པ་ནི། སྐྱེ་བདུན་གྱི་ལས་སྦྱོར་འདི་ལས་ཤིན་ཏུ་མཆོག་ཏུ་གྱུར་པ་ནི། འཇིག་རྟེན་གསུམ་ན་ཡོད་པ་མ་ཡིན་ནོ། །གསུམ་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། སྐྱེ་བོ་བདུན་པ་ལ་བརྟེན་ནས་
བཅུ་གཅིག་པར་བཤད་པ་བཞིན་གྱི་དངོས་གྲུབ་ཁྱད་པར་ཅན་བསྒྲུབ་པར་བྱ་བ་དང༌། རང་དང་གཞན་གྱི་གཟུགས་ཡོངས་སུ་བརྗེ་བའི་ཆོ་གའི་ལེའུ་སྟེ། བཞི་བཅུ་རྩ་དགུ་པའོ།། །།འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས། ལེའུ་བཞི་བཅུ་རྩ་དགུ་པའི་བཤད་པའོ།། ༈ །།ལྔ་པ་ཡུམ་གྱི་སྙིང་པོའི་སྔགས་ཀྱིས་ལས་བསྒྲུབ་པ་ལ་བཞི། སྦྱིན་སྲེག་བཤད་པ། གནས་སོགས་བཅུ་བཤད་པ། དོན་བསྡུ་བ། ལེའུ་ཡི་མཚན་བསྟན་པའོ། །དང་པོ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། དོན་བསྡུས་ཏེ་ལས་སྒྲུབ་པའི་སྔགས་བསྟན་པའོ། །དང་པོ་ནི། ཞེ་དགུ་པའི་རྗེས་དེ་ནས་དབང་གི་སྦྱིན་སྲེག་གི་ཚིག་གི་བསྒྲུབ་བྱ་ངེས་པར་དབང་དུ་བྱེད་པར་འགྱུར་བའི་ཡང་དག་པའི་ཆོ་ག་གང་གིས་ནི། མྱུར་དུ་འདོད་པའི་དངོས་གྲུབ་ཐོབ་པར་འགྱུར་བ་བཤད་པར་བྱའོ། །གཉིས་པ་ལ་ལྔ། དབང་གི་སྦྱིན་སྲེག །མངོན་སྤྱོད་ཀྱི་སྦྱིན་སྲེག །རྒྱུན་དུ་བགེགས་ཞི་བའི་ཐབས། རྒྱས་པའི་སྦྱིན་སྲེག །རེངས་པའི་སྦྱིན་སྲེག་གོ ། དང་པོ་ནི། གཽ་མཾ་ས་སྟེ་བ་ལང་གི་ཤ་དང༌། མྱོས་བྱེད་ཆང་གཉིས་བསྲེས་ཏེ་ལག་པ་གཡོན་པས་སྦྱིན་སྲེག་བྱས་ན། སངས་རྒྱས་ཀྱང་ནི་དབང་དུ་འགྱུར་ཞེས་པ་ནི་ཕུལ་བྱུང་བརྗོད་པའོ། །དེ་ལྟར་འགྱུར་ན་ཕྲན་ཚེགས་མི་ནི་སྟེ་རང་དགའ་བའི་མི་རྣམས་དབང་དུ་བྱེད་པ་ནི་སྨོས་ཀྱང་ཅི་དགོས། ཁའི་ཆུ་སྟེ་མཆིལ་མ་དང་སོ་ཤིང་དག་དང༌།
དེ་བཞིན་དུ་རང་གི་ལུས་མཉེས་པའི་ལུས་ཀྱི་དྲི་མ་དང༌། མྱོས་བྱེད་ཆང་གི་བསྲེག་རྫས་ཀྱིས་སྙིང་པོའི་སྔགས་མིང་སྤེལ་དང་བཅས་པ་ཡིས། དབང་གི་སྦྱིན་སྲེག་བྱས་ན། ཁམས་གསུམ་སྟེ་ས་གསུམ་གྱི་འགྲོ་བ་དག་ནི་རང་གི་དབང་དུ་འགྱུར་རོ། །བུད་མེད་ཀྱི་ཟླ་མཚན་གྱི་ཁྲག་དང་ཟོས་ནས་རློན་པ་སྟེ་ཟོས་ནས་སྐྱུགས་པའི་ཟས་དག་དང༌། མི་ཡི་སྐྲ་དང་ལྡན་པ་ཡིས་སྦྱིན་སྲེག་བྱས་ནས། བྱས་པའི་མོད་ལ་བསྒྲུབ་བྱ་འགུགས་པར་འགྱུར་བ་ཡིན་ནོ། །གཉིས་པ་ལ་གཉིས། དབྱེ་བའི་སྦྱིན་སྲེག་དང༌། བསད་བསྐྲད་ཀྱི་སྦྱིན་སྲེག་གོ། །དང་པོ་ནི། རང་གི་ལུས་དང་རང་གི་སྐྲ་ལ་བྷ་བས། ཁྱི་ཡི་ལུས་དང་ཁྱི་ཡི་སྤུ། ཞེས་འདོན་པས། ཁྱི་ཡི་ལུས་ཏེ་ཁོག་པ་ནས་སྐྱུགས་པ་དང༌། ཁྱི་ཡི་སྤུས་ནིམ་པའི་ཤིང་ལ་མེ་རབ་ཏུ་སྦར་ནས་དབྱེ་བའི་སྦྱིན་སྲེག་བྱས་ན། དེའི་མོད་ལ་མཛའ་བ་རྣམས་བྱེ་བར་འགྱུར་བ་ཡིན་ནོ། །གཉིས་པ་ནི། དྲག་པོའི་ཏིང་ངེ་འཛིན་ལ་མཉམ་པར་བཞག་པས་ད་དུ་ར་སྟེ་སྨྱོ་བྱེད་ཀྱི་ཤིང་གིས་མེ་སྤར་ཏེ། ཡུངས་མར་ཚན་དེའམ་སྐེ་ཚེའི་མར་ཁུ་ལ་བསྒྲེས་པ་སྟེ་དེས་སྦགས་པའི་བྱ་རོག་གི་གཤོག་པས་སྦྱིན་སྲེག་བྱས་ན། འཕྲལ་དུ་འཆི་བ་ནི་གསད་པའི་སྔགས་ཀྱིས་སོ། །གནས་ནས་སྐྲོད་པར་འགྱུར་བ་ནི་སྔགས་ལ་དེའི་སྤེལ་ཚིག་བཏགས་པས་སོ། །གསུམ་པ་ནི། སྟན་ལ་ཉལ་ཏེ་གཉིད་ལོག་པ་དང༌། མ་ཉལ་བསད་པ་དང་འདུག་པའམ་ལངས་པ་དང༌། ཟས་ཟ་བཞིན་པ་དང་དབང་པོ་གཉིས་སྦྱོར་བ་སོགས་རྣམས་ལ་ཡང༌། སྔགས་པས་རྟག་ཏུ་སྔགས་ཟློས་པར་བྱེད་ན། ཟློས་པ་དེ་ལ་བགེགས་ནི་ཡོད་པ་མ་ཡིན་ནོ། །
འདིས་ནི་སྤྱོད་ལམ་ཀུན་ཏུ་སྔགས་བཟླས་ན་བགེགས་ཀྱི་གནོད་པ་མི་འབྱུང་བར་བསྟན་ཏོ། །བཞི་པ་ལ་བཞི། ནོར་རྒྱས་པ། དངོས་གྲུབ་རྒྱས་པ། མངའ་ཐང་རྒྱས་པ། ཚེ་རྒྱས་པའོ། །དང་པོ་ནི། ཝ་ཡི་ཤ་ཡི་བསྲེག་རྫས་ཀྱིས་རྒྱས་པའི་བསྲེག་བླུགས་བརྒྱས། ཡང་དག་པའི་སྦྱིན་བླུགས་བྱེད་པའི་མི་དེ་ནི་ཟླ་བ་གསུམ་སོང་བའི་རྗེས་ལ། རིགས་རྒྱུད་ཀྱི་དབུལ་བ་འཇིག་པར་འགྱུར་རོ། །ཤ་ཆེན་གྱིས་སྲེག་རྫས་དག་གིས། གང་ཟག་ལ་ལ་ཞིག་མྱོས་བྱེད་ཆང་དང་ལྡན་པས་སྦྱིན་སྲེག། བརྒྱ་རྩ་བརྒྱད་ཀྱི་བར་དུ་སྒྲུབ་པ་པོས་ནི་ཞག་རེ་ལ་ཐུན་གསུམ་དུ་སྦྱིན་སྲེག་བྱེད་ན། ཟླ་བ་དྲུག་གིས་ས་མ་ལུས་པ་རྣམས་ལ་ལོངས་སྤྱོད་པའི་ཚུལ་གྱིས་དབང་དུ་འགྱུར་རོ། །སྦྱིན་སྲེག་གིས་ཚིམ་པར་གྱུར་པའི་མཁའ་འགྲོ་མས། སྒྲུབ་པ་པོ་དེ་ལ་རྒྱལ་སྲིད་སྟེར་བར་གདོན་མི་ཟའོ། །གཉིས་པ་ནི། དཀྱིལ་འཁོར་གྱི་ལྷ་རྣམས་ཐམས་ཅད་སོ་སོར་གསལ་བར་སྣང་བའི་བསམ་གཏན་གྱིས་བསྒོམས་ནས། ཞག་རེ་ལ་ཐུན་གཉིས་ཀྱི་བར་དུ་ཟླ་བ་གསུམ་དུ་སྦྱིན་སྲེག་བྱས་ན། སྒྲུབ་པ་པོ་རང་གི་ལུས་ནི་དེ་ཉིད་ཀྱིས་མཁའ་ལ་འགྲོ་བ་ཉིད་དེ་མཁའ་སྤྱོད་ཐོབ་པར་འགྱུར་རོ། །གོ་མཱ་ཡུ་ནི་ཝར་བསྒྱུར་མོད་ཀྱང༌། འདིར་ཅེ་སྤྱང་ལ་བསྒྱུར་བ་ལྟར་ཏེ་ཅེ་སྤྱང་གི་ཤ་དང༌། ཆང་གིས་ཕྱིའི་སྦྱིན་སྲེག་གི་ཐབ་ཀྱི་ལྷ་ལ་སྦྱིན་སྲེག་དང༌། ནང་གི་སྦྱིན་སྲེག་ཤ་དེ་མཚན་མོ་སྔགས་ཀྱི་བཟླས་བརྗོད་བྱས་ནས་ཟོས་ན། མྱུར་དུ་སྒྲུབ་པ་པོ་དེ་ཡི་ལག་ཏུ་དངོས་གྲུབ་ཐམས་ཅད་རབ་ཏུ་འཇུག་པར་འགྱུར་ཞིང༌། ཡུལ་འཁོར་
ཆེན་པོ་ཡང་ནི་འགུགས་པར་བྱེད་དོ། །དེ་ལྟར་ཉིན་རེ་ཞིང་སྦྱིན་སྲེག་གཉིས་དང་བཟླས་པ་བྱས་ན། སྒྲུབ་པ་པོ་དེ་རྒྱལ་པོ་ཉིད་དུ་བྱེད་པར་འགྱུར་རོ། །ལས་སྦྱོར་འདི་ལས་རྒྱས་པའི་ལས་གཞན་རབ་ཏུ་མཆོག་ཏུ་གྱུར་པ་ནི། ས་གསུམ་ཀྱི་འཇིག་རྟེན་གསུམ་ན་ཡོད་པ་མ་ཡིན་ནོ། །ལས་འདིས་རྣལ་འབྱོར་པ་ཆེན་པོ་རང་དགས་ཏེ་རང་གི་འདོད་པའི་དབང་གིས་འཆི་བ་དང་སྐྱེ་བར་འགྱུར་རོ། །ལྷ་ལ་སོགས་པ་སྣ་ཚོགས་པའི་གཟུགས་དུ་མ་ནི་འཛིན་ཞིང༌། འདོད་པ་ལ་རོལ་བར་བྱེད་དོ། །གསུམ་པ་ནི། བིལ་བ་སྟེ་དཔལ་འབྲས་དང༌། དེ་བཞིན་དུ་པཱ་ལ་ཤ་དང༌། ཨུ་དུམ་ཝ་ར་ཉིད་དག་ནི་སྟེ་དེ་རྣམས་ཀྱི་བསྲེག་རྫས་ཀྱིས་རྒྱས་པའི་སྦྱིན་སྲེག་འབུམ་བྱས་ན། མྱུར་དུ་ནོར་གྱི་བདག་པོ་ཆེན་པོར་འགྱུར་རོ། །གཽ་མཾ་ས་སྟེ་བ་ལང་གི་ཤ་དང༌། མྱོས་བྱེད་ཆང་གཉིས་ལེགས་པར་བསྲེས་ཏེ། རྒྱལ་སྲིད་འདོད་པས་སྦྱིན་སྲེག་བྱེད་ཅིང༌། རྣལ་འབྱོར་དབང་ཕྱུག་ནི་ལྷའི་དབང་ཕྱུག་སྟེ་དེ་མཉེས་པར་བྱས་ན། དབུལ་བོ་ཉིད་དུ་ག་ལ་འགྱུར་ཏེ་མི་འགྱུར་བར། རྒྱལ་སྲིད་ཀྱི་དཔལ་ལ་སྤྱོད་པར་འགྱུར་རོ། །གོ་མཱ་ཡུ་ཅེ་སྤྱང་གི་ཤས་ནི་སྦྱིན་སྲེག་བྱས་པས། གང་འདོད་པ་རྣམས་ཅི་བདེ་བར་ནི་འགྲུབ་པར་འགྱུར་རོ། །ཞེས་ཤ་དེས་བསྲེག་རྫས་བྱས་པའི་བསྔགས་པ་བསྟན་ཏོ། །གོ་མཱ་ཡུ་ཅེ་སྤྱང་གི་ཤ་ཡི་སྦྱིན་སྲེག་གིས་མྱུར་དུ་ནོར་བདག་རྣམ་ཐོས་ཀྱི་བུ་དང་ནོར་མཉམ་པ་ཐོབ་པར་འགྱུར་རོ། །གོ་མཱ་ཡུའི་ཤས་བསྲེག་རྫས་བྱ་བར་ཡང་ཡང་གསུངས་པ་ནི། ལས་སྦྱོར་བཤད་པ་ལ་འདི་མཆོག་ཡིན་པའི་ཕྱིར་ཏེ། ཅི་བདེ་བར་ནི་ཞེས་གསུངས་པའི་ཕྱིར་རོ། །
ཕྱིའི་བརྟུལ་ཞུགས་དང་གཙང་སྦྲ་ཡོད་ན་འགྲུབ་པར་མ་ཟད་མེད་པ་ཡིན་ནའང༌། ཇི་སྐད་བསྟན་པའི་དངོས་གྲུབ་རྣམས་ཐོབ་པར་འགྱུར་རོ། །བཞི་པ་ནི། ལྷག་པའི་ཚེར་གྱུར་བ་ནི་ཚེ་དཔག་ཏུ་མེད་པར་འགྱུར་བའོ། །དེ་ལ་ནི་དུར་བའི་བསྲེག་རྫས་ཀྱིས་རྒྱས་པའི་སྦྱིན་སྲེག་བྱས་ན། ཚེ་ཟད་པ་ཡང་ཚེ་དཔག་ཏུ་མེད་པར་འགྱུར་རོ། །འགྲེལ་པ་རྣམས་ལས། ལྷག་པའི་ཚེར་འགྱུར། ཞེས་འདོན་ནོ། །ལྔ་པ་ནི། ཀུཥྨ་ཎྞཾ་སྟེ་དེའི་མིང་ཅན་གྱི་ཤིང་གི་ས་བོན་དང༌། མུད་ག་སྟེ་མོན་སྲན་རྡེའུ་དང༌། མ་ཥཱ་སྟེ་སྲན་མ་མ་ཥཱ་དང༌། སྲན་མ་ཙ་ན་ཀ་དང༌། སྦྲང་རྩིའི་ཚིགས་མ་སྟེ་སྤྲ་ཚིལ་དང༌། སྐེ་ཚེ་དང་ཁྱིམ་གྱི་ཏ་མ་ལའི་འདབ་མ་སྟེ་བ་ཤ་ཀའི་ལོ་མ་ལ་བཤད། ཁ་ཅིག་གིས་ཁྱིམ་གྱི་སྟེང་ནས་འཕྱང་བའི་དུ་བ་ལ་འཆད་དོ། །རེ་རྣམས་ཀྱིས་སྦྱིན་སྲེག་བྱ་ཞིང༌། རྫས་དེ་རྣམས་ཆ་མཉམ་པར་བྱས་ཏེ། བསྒྲུབ་བྱའི་མིང་སྤེལ་དང་བཅས་པའི་སྔགས་བཟླས་ནས་ཁང་པའི་ཕྱོགས་གཅིག་ཏུ་བྱུགས་ན། བསྒྲུབ་བྱ་དེའི་ཁ་བཅིངས་པར་ནི་འགྱུར་བ་ཡིན་ནོ། །པ་ཤ་ཀའི་འདབ་མ་ལ་རོ་བསྲེགས་པའི་སོལ་བས་ཡི་གེ་གའི་ནང་དུ་ཆུད་པར་བསྒྲུབ་བྱའི་གཟུགས་བྲིས་ལ། ཉ་སྐྱོགས་ཀྱི་ནང་དུ་བཅུག་ནས་དུར་བ་དང་འབྲས་ཀྱི་ཕུབ་མས་བཀང་སྟེ། ཉ་སྐྱོགས་ཀྱི་རུས་པས་ཁ་བཅད། སྤྲ་ཚིལ་གྱིས་རྒྱས་བཏབ་ནས། ཕྱི་སའི་ནང་དུ་དབུགས་མི་འབྱིན་པར་བཞག་ན། བསྒྲུབ་བྱ་དེའི་ཁ་འཆིང་ངོ་ཞེས་ལྭ་བ་པ་གསུང་ངོ༌། །འདི་ནི་རྒྱུད་འདིར་ལས་སྦྱོར་གྱི་མཐའ་སྟེ། འདི་ཡན་ཆད་ལེའུ་དགུ་པ་
མན་ཆད་དུ་ལས་སྦྱོར་ཇི་སྙེད་གསུངས་པ་རྣམས། ཁྱད་པར་འགའ་ཞིག་མ་གཏོགས་པ་རིམ་པ་གཉིས་ཀའི་སྐབས་ཀྱི་ཐུན་མོང་བ་ཡིན་ལ། བསྐྱེད་རིམ་མཐར་ཕྱིན་ནས་རྫོགས་རིམ་མི་སྒོམ་པར། ཞི་སོགས་ཀྱི་དངོས་གྲུབ་རྣམས་སྒྲུབ་པ་ནི་བསྐྱེད་རིམ་པ་ཁོ་ནའི་ཡིན་ཏེ། དེ་ཡང་རྫོགས་རིམ་ལ་ལྟོས་ཏེ་གང་ཟག་དབང་བོ་དམན་པའི་དབང་དུ་བྱས་པའོ། །གསུམ་པ་ནི། སྔར་བཤད་པའི་དབང་གི་ལས་ལ་སོགས་པ་རྣམས་རང་བྱེད་པར་འདོད་པ་དེའི་ཚེ། ལས་དེའི་ཆོ་ག་ལ་སྤྱོད་པའི་རྣལ་འབྱོར་པ་ནི། གང་དུ་སྟེ་གང་ལ་དགའ་བ་དེ་དང་དེ་གྲུབ་ནས་གནས་པར་འགྱུར་རོ། །གོང་དུ་གསུངས་པའི་ལས་དེ་རྣམས་སྒྲུབ་པའི་སྔགས་ནི། ཨོཾ་བཛྲ་བཻ་རོ་ཙ་ན་ཡེ་ཧཱུཾ་ཧཱུཾ་ཕཊ་སྭཱཧཱ་ཞེས་པའོ། །འདི་གྲུབ་ཆེན་ཁ་ཅིག་གིས་ཉེ་སྙིང་དང༌། ཁ་ཅིག་གིས་སྙིང་པོར་བཤད་དེ་ཕྱོགས་རེ་ནས་གཉིས་ཀ་ལ་བཤད་དུ་རུང་བའོ། །གཉིས་པ་ལ་གཉིས། བཤད་པར་དམ་བཅའ་བ། དམ་བཅས་པའི་དོན་བཤད་པའོ། །དང་པོ་ནི། ལས་སྦྱོར་རྣམས་བཤད་པ་དེ་ནས་སྔར་བསྟན་པ་ལས་དོན་གཞན་ཡང་བཤད་པར་བྱའོ། །དེ་གང་ཞེ་ན། རྣལ་འབྱོར་མའི་བརྡས་བསྟན་པའི་རབ་དགའ་སོགས་ས་བཅུ་གནས་དང་ཉེ་བའི་གནས་ལ་སོགས་པའི་བརྡས་བསྟན་པ་བཤད་པར་བྱའོ། །གནས་ལ་སོགས་པ་དེ་ཅི་ཞིག་ཏུ་གྱུར་ནས་གནས་ཤེ་ན། དཔལ་ཧེ་རུ་ཀའི་སྐུའི་ཡན་ལག་ལག་པ་ལ་སོགས་པ་དང༌། ཚིགས་ལ་སོགས་པའི་ཉིང་ལག་ཏུ་གནས་སོ། །དེ་ནི་ཧེ་རུ་ཀའི་སྤྱི་བོ་སོགས་ཉེར་བཞི། གནས་ཉེར་བཞིའི་བདག་ཉིད་དུ་གནས་ལ། དེའི་བརྡས་ས་བཅུ་སྟོན་
པའི་དོན་ནོ། །ཧེ་རུ་ཀའི་ཡན་ལག་ཐམས་ཅད་བརྟན་པ་སྣོད་དང༌། གཡོ་བ་བཅུད་ཀྱི་བདག་ཉིད་ཅན་ནོ་ཞེས་པ་ནི་བརྟན་གཡོ་རྣམས་ས་འོག་ས་སྟེང་ས་བླ་གསུམ་དུ་འདུལ། ས་གསུམ་གྱི་དཔའ་བོ་དང་རྣལ་འབྱོར་མ་ནི་ཧེ་རུ་ཀའི་སྐུའི་ཆ་ཤས་སུ་གནས་པའི་དོན་ནོ། །བརྟན་གཡོའི་བདག་ཉིད་ཅན་ལ། བྷ་བས། ཐམས་ཅད་ཡན་ལག་སྤྱི་བོ་སྟོབས། ཞེས་འདོན་ཞིང༌། དེའི་དོན་སྤྱི་བོ་གཟུགས་ཕུང་དང༌། སྟོབས་ཕུང་པོ་ལྷག་མ་ལ་བྱས་ནས། ས་དང་གནས་ལ་སོགས་པ་ཕུང་པོ་ལ་སོགས་པའི་བདག་ཉིད། དཔལ་ཧེ་རུ་ཀའི་ཡན་ལག་དང་ཉིང་ལག་གོ། ཞེས་འཆད་དོ། །གཉིས་པ་ལ་གཉིས། གནས་སོགས་ས་བཅུར་བསྟན་པ། གནས་སོགས་བཅུས་ཀུན་ལ་ཁྱབ་པར་བསྟན་པའོ། ། དང་པོ་ལ་གཉིས། སྤྱིའི་དོན་དང༌། ཡན་ལག་གི་དོན་ནོ། །དང་པོ་ལ་གསུམ། རབ་དགའ་སོགས་ཀྱི་ས་མིང་སོ་སོས་གསུངས་ཚུལ། གནས་ལ་སོགས་པ་ལ་མི་མཐུན་པར་གསུངས་པའི་འགལ་སྤོང༌། དེ་རྣམས་གང་གི་ཕྱིར་དུ་གསུངས་པའི་གདུལ་བྱའི་དབྱེ་བའོ། །དང་པོ་ནི། རྩ་རྒྱུད་འདིར་གནས་དང་ཉེ་བའི་གནས་ནས། དུར་ཁྲོད་དང་ཉེ་བའི་དུར་ཁྲོད་ཀྱི་བར་བཅུས་རབ་དགའ་ནས་ཆོས་ཀྱི་སྤྲིན་གྱི་བར་བཅུ་བསྟན་པར་བཤད་ལ། བཤད་རྒྱུད་ལས། གནས་སོགས་བཅུའི་སྟེང་དུ་འཐུང་གཅོད་དང་ཉེ་བའི་འཐུང་གཅོད་གཉིས་བསྣན་ནས། འདི་རྣམས་ས་ནི་བཅུ་གཉིས་ཏེ། ཞེས་གནས་སོགས་བཅུ་གཉིས་ས་བཅུ་གཉིས་སུ་གསུངས་ཏེ། བརྟག་གཉིས་སུ་ཡང་དེ་བཞིན་དུ་
གསུངས་སོ། །ས་བཅུ་གཉིས་ནི། བྷ་བ་བྷ་དྲ་དང༌། ཤཱནྟི་པ་དང༌། ནག་པོ་པ་དང༌། པདྨའི་མྱུ་གུས་མཛད་པའི་ཀྱེེ་རྡོར་གྱི་འགྲེལ་པ་དང་མན་སྙེ་རྣམས་སུ། རབ་དགའ་སོགས་བཅུའི་སྟེང་དུ་མོས་སྤྱོད་ཀྱི་ས་དང༌། ཀུན་ཏུ་འོད་གཉིས་བསྣན་པ་ལ་བཤད་དེ། མོས་སྤྱོད་ནི་འཐུང་གཅོད་དང༌། ཀུན་ཏུ་འོད་ནི་ཉེ་བའི་འཐུང་གཅོད་དུ་བཤད་དོ། །ཡེ་ཤེས་ཐིག་ལེས་ས་བཅུ་དྲུག་བཤད་པ་ནི། དེ་ཉིད་ལས། གནས་ལ་སོགས་པ་དགའ་བའི་གནས། །ས་ཡི་སྒྲ་ཡིས་བརྗོད་པ་ཡིན། །མོས་པས་སྤྱོད་པ་ས་དང་པོ། །གཉིས་པ་རབ་ཏུ་དགའ་བ། གསུམ་པ་དྲི་མ་མེད་པ། བཞི་པ་འོད་བྱེད་པ། ལྔ་པ་འོད་འཕྲོ་བ། དྲུག་པ་སྤྱང་དཀའ་བ། བདུན་པ་མངོན་དུ་གྱུར་བ། བརྒྱད་པ་རིང་དུ་སོང་བ། དགུ་པ་མི་གཡོ་བ། བཅུ་པ་ལེགས་པའི་བློ་གྲོས། དེ་རྣམས་ནི་བྱང་ཆུབ་སེམས་དཔའི་སའོ། །ཆོས་ཀྱི་སྤྲིན་ནི་སངས་རྒྱས་ཀྱི་ས། ཀུན་ཏུ་འོད་ནི་ཡང་དག་པར་རྫོགས་པའི་སངས་རྒྱས་ཀྱི་ས། ཀུན་ཏུ་སྣང་བ་མཆེད་པའི་འོད་ནི་དཔལ་རྡོ་རྗེ་སེམས་དཔའ་བཅོམ་ལྡན་འདས་ཀྱི་སྤྲུལ་པའི་སྐུའི་ས། ཀུན་ཏུ་སྣང་བ་ཐོབ་པའི་འོད་ནི་ལོངས་སྤྱོད་རྫོགས་པའི་སྐུའི་ས། བརྗོད་དུ་མེད་པ་ཚད་མེད་པ་ནི་བདེ་བ་ཆེན་པོའི་ས་སྟེ། དེ་ཀུན་དགའ་བའི་བྱེ་བྲག་ལ། །སར་ནི་ཀུན་ཏུ་བཏགས་པའོ། ཞེས་གསུངས་ལ། ཡང་དེ་ཉིད་ལས། རྟག་ཏུ་སྤྲུལ་པ་ཡི་ནི་སྐུས། །ས་ནི་བཅུ་གཅིག་པ་རུ་དྲན། །ལོངས་སྤྱོད་རྫོགས་སྐུས་བཅུ་གཉིས་པ། །ཆོས་ཀྱི་སྐུ་ས་ནི་བཅུ་གསུམ་མོ། །བདེ་བ་ཆེན་པོའི་བཅུ་བཞི་པ། །གང་ཞིག་བཅོ་ལྔ་ཡི་ནི་ས། །དེ་ནི་ཡེ་ཤེས་ས་ཞེས་
བྱ། །བཅུ་དྲུག་པ་ནི་བརྟགས་པ་མིན། ཞེས་ཀྱང་གསུངས་པས་ས་བཅུ་དྲུག་གོ། དེ་ལ་མོས་སྤྱོད་ཀྱི་ས་རྡོ་རྗེ་གསང་བས་དྲོད་རྩེ་བཟོད་མཆོག་བཞི་ལ་བཤད་པ་ལྟར་སོ་སྐྱེའི་ས་ཡིན་ལ། དེའི་ལྷག་མ་རྣམས་ནི་འཕགས་པའི་སའོ། །ཡེ་ཤེས་ཐིག་ལེར་སངས་རྒྱས་དང་ཡང་དག་པར་རྫོགས་པའི་སངས་རྒྱས་གཉིས་ལ་ཁྱད་པར་ཕྱེ་བ་ནི། བདག་ཉིད་ཆེན་པོ་སེངྒེ་བཟང་པོས། ས་བཅུ་པ་ལ་ནི་བྱང་ཆུབ་སེམས་དཔའ་སངས་རྒྱས་ཁོ་ནར་བརྗོད་པར་བྱའི། ཡང་དག་པར་རྫོགས་པའི་སངས་རྒྱས་ནི་མ་ཡིན་ནོ། །ཞེས་འབྱུང་པའི་ཕྱིར། ཞེས་དེ་གཉིས་ཀྱི་ཁྱད་པར་ཕྱེ་བ་མངོན་རྟོགས་རྒྱན་གྱི་དགོངས་པ་ཡིན་པ་དེ་དང་འདྲ་སྟེ། མན་སྙེ་ལས་ཀྱང་ཁྱད་དེ་བཞིན་དུ་ཕྱེའོ། །རབ་ཏུ་དགའ་བ་ས་དང་པོར་བྱས་ན། ཀུན་ཏུ་འོད་བཅུ་གཅིག་པ་ཡིན་ལ། དེ་ལ་སྐུ་གསུམ་དང་བདེ་བ་ཆེན་པོའི་སྐུ་དང་བཞིར་ཕྱེ་བ་ལ། ས་རེ་རེར་བྱས་པས་ས་བཅོ་ལྔ། ཡང་ཡེ་ཤེས་ཀྱི་སྐུ་ལ་ཡེ་ཤེས་ཀྱི་ས་ཞེས་པ་ནི། ས་དང་པོ་ནས་བགྲངས་པའི་བཅོ་ལྔ་པ་ཡིན་ཀྱང༌། མོས་སྤྱོད་ནས་བགྲངས་པའི་བཅུ་དྲུག་པའོ། །དེ་ལྟར་བྱས་ན་དྲི་མ་ཐམས་ཅད་དང་བྲལ་བའི་དེ་བཞིན་ཉིད་ནི་ཆོས་ཀྱི་སྐུ་ཡིན་ལ། ཡེ་ཤེས་ཀྱི་སྐུ་ནི་རྟོགས་པ་ཡེ་ཤེས་ཆོས་ཀྱི་སྐུའོ། །ཡེ་ཤེས་ཐིག་ལེའི་འགྲེལ་པ་ལས་ཀྱང་ས་བཅུ་དྲུག་ཏུ་བཤད་པས། ལུགས་འདི་ལ་ས་བཅོ་ལྔ་ལས་མང་བ་མི་བྱེད་པ་མིན་ནོ། །བཤད་པའི་རྒྱུད་ལས་རབ་དགའ་སོགས་ས་བཅུའི་སྟེང་དུ། དཔེ་མེད་པ་དང་ཡེ་ཤེས་ལྡན། །རྡོ་རྗེའི་ས་སྟེ་བཅུ་གསུམ་
པ། ཞེས་གསུངས་པའི་དོན་ཡང་མན་སྙེ་ལས། ས་བཅུ་པ་ནི་བཅུ་པ་ཙམ་ལ་བྱས། དཔེ་མེད་ཀྱི་ས་ས་བཅུ་པའི་ཁྱད་པར་གྱི་ལམ། ཡེ་ཤེས་ལྡན་གྱི་ས་ནི་ས་བཅུ་པའི་བར་ཆད་མེད་པའི་ལམ། རྡོ་རྗེ་འཛིན་པའི་ས་ནི་ཀུན་ཏུ་འོད་ལ་བཤད་དོ། །བཤད་རྒྱུད་རྡོ་རྗེ་ཕྲེང་བ་ནས་བུམ་དབང་བཅུ་གཅིག་དང༌། དབང་གོང་མ་གསུམ་སྟེ་བཅུ་བཞི་པོ་ལ། དབང་བསྐུར་རེ་རེས་རེའོ། །ཞེས་ས་བཅུ་བཞིར་བཤད་པ་ཡང༌། ས་བཅུ་གསུམ་གྱི་སྟེང་དུ་མོས་སྤྱོད་ཀྱི་ས་བསྣན་པའོ། །རྡོ་རྗེ་སྙིང་པོ་རྒྱན་གྱི་རྒྱུད་ལས། བྱང་ཆུབ་སེམས་ནི་འོད་གསལ་བ། །ཀུན་ཏུ་འོད་ཀྱི་ས་ཆེན་པོ། ཞེས་དེ་ལ་ས་དང་པོར་བྱས་ནས། བཅུ་གཉིས་སོ་སོ་བདག་རིག་པ། །རྣལ་འབྱོར་ཡེ་ཤེས་ཡོངས་རྫོགས་ཉིད། །ཅེས་ས་བཅུ་གཉིས་པའི་བར་དུ་གསུངས་པ་ཡང༌། པཎ་ཆེན་མཁས་པས་ས་བཅུ་གཉིས་ཀྱི་འཆད་ཚུལ་ལྟར་བྱས་ན་ལེགས་པར་སེམས་སོ། །ཡེ་ཤེས་ཐིག་ལེའི་རྒྱུད་ཀྱི་དགོངས་པ་དང༌། རྒྱ་གར་གྱི་མཁས་པ་དུ་མ་ཞིག་གིས་བཀྲལ་བ་ལ། བཅུ་གཅིག་ཀུན་ཏུ་འོད་ལས་ལྷག་པའི་ས་ཡོད་པར་མ་བཤད་པས། ཕར་ཕྱིན་ལས་སྔགས་ཀྱི་ཐིག་པར་ས་ཡི་གྲངས་མང་བ་བྱུང་བས་འཁྲུལ་གཞི་བྱས་ནས། ཀུན་ཏུ་འོད་ལ་གནས་པ་དེ་མཐར་ཐུག་པའི་སངས་རྒྱས་མ་ཡིན་ནོ། །ཞེས་ཟེར་བ་ནི་རྫོགས་པའི་སངས་རྒྱས་ལ་སྐུར་འདེབས་ཀྱི་ཁ་ན་མ་ཐོ་བ་ཆེན་པོ་འཛིན་པས་སྤང་བར་བྱའོ། །ས་རྣམས་ལ་ཐེག་པ་འདིའི་ལུགས་ཀྱིས་ནི། ཡུལ་ཅན་ལྷན་སྐྱེས་ཀྱི་བདེ་བ་ཆེན་པོས་ཡུལ་གྱི་དེ་ཁོ་ན་ཉིད་རྟོགས་པའི་སྟེང་ནས་འཇོག་པ་མ་རྟོགས་པ། དེ་
ཁོ་ན་ཉིད་འཇིག་རྟེན་པའི་སྒོམ་བྱུང་གི་ཡེ་ཤེས་ཀྱིས་རྟོགས་པའི་སྟེང་ནས་སྦྱོར་ལམ་འཇོག་པ་དང༌། ཆོས་ཉིད་མངོན་སུམ་དུ་སྤར་མ་རྟོགས་པ་རྟོགས་པའི་སྟེང་ནས་མཐོང་ལམ་འཇོག་པ་དང༌། དེ་འདྲ་བ་མཐོང་ཟིན་གོམས་པར་བྱེད་པ་ལ་སྒོམ་ལམ་འཇོག་པ་སོགས་ནི། ཐེག་པ་གཞན་དང་འདྲ་སྟེ། དེ་ཡང་ལམ་གྱི་གཙོ་བོ་སྨོས་ཀྱི་ལམ་དེ་རྣམས་ཀྱིས་བསྡུས་པ་ལ་ངེས་པ་མེད་དོ། །ལུགས་འདིས་ལྷན་སྐྱེས་ཀྱི་བདེ་ཆེན་གྱི་བྱེ་བྲག་སོ་སོ་ལ། ས་སོ་སོར་འཇོག་པ་ནི། དེ་ཀུན་དགའ་བའི་བྱེ་བྲག་ལ། །སར་ནི་ཀུན་ཏུ་བཏགས་པའོ། །ཞེས་གསལ་བར་གསུངས་སོ། །འདི་ཡང་རང་གི་སའི་ངོས་འཛིན་ཡིན་གྱི། རབ་དགའ་སོགས་ཀྱི་ས་ཐམས་ཅད་ལ་དེ་ལྟར་འཇོག་པ་མིན་ནོ། །ས་རྣམས་ཀྱི་རྣམ་པར་བཞག་པ་དེ་ལྟར་ཡིན་ན། ལམ་ལྔའི་རྣམ་པར་བཞག་པ་ཇི་ལྟར་སྙམ་ན། ཆོས་ཉིད་མངོན་སུམ་དུ་རྟོགས་མ་རྟོགས་ལ་འཕགས་པའི་ས་ཐོབ་མ་ཐོབ་ཀྱི་སྒོ་ནས་སོ་སྐྱེ་དང༌། འཕགས་པའི་ལམ་གཉིས་སུ་འབྱེད་ཅིང༌། སོ་སྐྱེའི་ལམ་ལ་ཚོགས་སྦྱོར་གཉིས་བྱེད་པ་དང་སྦྱོར་ན། ལམ་ཐུན་མོང་བ་ནས་བཟུང་ནས་བསྒོམས་སྟོབས་ཀྱིས་རླུང་དྷཱུ་ཏཱིར་བཙུད་པ་ཐིམ་པས། སྟོང་པ་དངོས་སུ་འདྲེན་མི་ནུས་པ་དེ་སྲིད་དུ་ཚོགས་ལམ་དང༌། དེ་ནུས་པ་ནས་བདེ་བ་ཆེན་པོས་དེ་ཁོ་ན་ཉིད་མངོན་སུམ་དུ་མ་རྟོགས་པ་ཚུན་ཆད་སྦྱོར་ལམ་དང༌། དོན་གྱི་འོད་གསལ་ནས་ཟུང་འཇུག་མ་ཐོབ་པར་མཐོང་ལམ་ས་རབ་དགའ་དང༌། སློབ་པའི་ཟུང་འཇུག་ནས་མི་སློབ་པའི་ཟུང་འཇུག་མ་ཐོབ་བར་
སྒོམ་ལམ་ས་དགུ་དང་སྦྱར་རོ། །གཉིས་པ་ནི། ཁ་སྦྱོར་ལས། པུལླི་ར་མཱ་ལ་ཡ་དང༌། ཛཱ་ལ་ནྡྷ་ར་དང༌། ཨོཌྜི་ཡ་ན་དང༌། ཨརྦུ་ཏ་བཞི་གནས་དང༌། གོ་དཱ་བ་རི་དང༌། ར་མེ་ཤྭ་རི་དང༌། དེ་བཱི་ཀོ་ཊི་དང༌། མཱ་ལ་བ་བཞི་ཉེ་བའི་གནས་དང༌། ཀཱ་མ་རཱུ་བ་དང༌། ཨོ་ཊེེ་གཉིས་ཞིང་དང༌། ཏྲི་ཤ་ཀུ་ནེ་དང༌། ཀོ་ས་ལ་གཉིས་ཉེ་བའི་ཞིང་དང༌། ཀ་ལིང་ཀ་དང༌། ལམ་པ་ཀ་གཉིས་ཚནྔོ་ཧ་དང༌། ཀཉྩི་དང་ཧི་མ་ལ་ཡ་གཉིས་ཉེ་བའི་ཚནྔོ་ཧ་དང༌། པྲེ་ཏ་པུ་རི་དང༌། གྲི་ཧ་དེ་བ་ཧ་གཉིས་འདུས་པ་དང༌། སཽ་རཥྚ་དང་སུ་ཝརྞ་དྭཱི་པ་གཉིས་ཉེ་བའི་འདུས་པ་དང༌། ན་ག་ར་དང་སིནྡྷུ་གཉིས་དུར་ཁྲོད་དང༌། མ་རུ་དང་ཀུ་ལུ་ཏ་གཉིས་ཉེ་བའི་དུར་ཁྲོད་དུ་གསུངས་ཏེ། ལོ་དྲིལ་གཉིས་ལས་ཀྱང་དེ་བཞིན་དུ་འབྱུང་ངོ༌། ། མན་སྙེ་ལས། བོལ་ལ་གི་རི་དང༌། ཀོལླ་གི་རི་དང༌། པུལླི་ར་མཱ་ལ་ཡ་དང༌། རྡོ་རྗེའི་གནས་ཞེས་གསུངས་པ་རྣམས་ནི་མིང་གི་རྣམ་གྲངས་སོ། །ཁ་སྦྱོར་ལས། གསུངས་པའི་ཀཱ་ར་ཎྱ་བཱ་ཊ་ཀྲ་དང༌། ཀརྨ་བཱ་ཊ་ཀ་ཊ་དང༌། ཧ་རི་ཀེ་ལ་དང༌། བིན་དྷྱ་སྟེ་རི་བོ་འབིགས་བྱེད་ཀྱི་ནགས་དང༌། གཞོན་ནུ་མའི་གྲོང་ཁྱེར་ཏེ་ལྔ་དང༌། ཙ་རི་ཊ་དང༌། གྲོང་དང་གྲོང་ཁྱེར་གྱི་མཐའི་ས་ཞེས་རྒྱུད་གཞན་ནས་གསུངས་པ་གཉིས་ཏེ་བདུན་ནི་འཐུང་གཅོད་དང༌། དེ་རྣམས་དང་ཐག་ཉེ་བའི་ས་གཞི་བདུན་ནི་ཉེ་བའི་འཐུང་གཅོད་དང༌། དུར་ཁྲོད་ནི་རོ་འདུས་པའི་དུར་ཁྲོད་ཀྱི་ས་གཞི་དང༌། རྒྱ་མཚོའི་འགྲམ་ཞེས་པ་གཉིས་སོ། །སྐྱེད་ཚལ་དང་རྫིང་བུའི་འགྲམ་ནི་ཉེ་བའི་དུར་ཁྲོད་དེ། དུར་ཁྲོད་དང་ཉེ་བའི་དུར་ཁྲོད་འདི་དག་ཏུ་རྣལ་འབྱོར་མ་རྣམས་རེ་འགའ་འདུའོ། །པུལླི་ར་མཱ་ལ་ཡ་ལ་སོགས་པའི་
ཡུལ་རྣམས་སུ་དཀྱིལ་འཁོར་པའི་ལྷ་མོ་རྣམས་བྲམ་ཟེ་ལ་སོགས་པའི་སྐྱེ་གནས་རྣམས་སུ་སྐྱེའོ། །དེ་ལྟར་ཡང་རྡོ་རྗེ་མཁའ་འགྲོ་ལས། མཁའ་འགྲོ་མ་ཞེས་ཡང་དག་གྲགས། །རྡོ་རྗེ་དཀྱིལ་འཁོར་གཙོ་མོ་སྟེ། །ཡེ་ཤེས་ལྡན་རྣམས་ཡུལ་ཡུལ་དུ། །རང་ཉིད་སྐྱེ་གནས་རྣམས་སུ་སྐྱེ། ཞེས་དྲངས་ཏེ་འཆད་དོ། །འོ་ན་བརྟག་གཉིས་སུ། གནས་ནི་ཛཱ་ལནྡྷ་ར་དང༌། ཨོ་ཌྜི་ཡ་ན་དང༌། བཱུ་ར་ཎ་གི་རི་དང༌། ཀཱ་མ་རཱུ་པའོ། །ཉེ་བའི་གནས་ནི་མཱ་ལ་ཝ་དང༌། སིནྡྷུ་དང་ན་ག་རའོ། །ཞིང་ནི་མུ་མྨུ་ནི་དང༌། ཀཱ་ར་ཎྱ་པཱ་ཊ་ཀ་དང༌། དེ་བཱི་ཀོ་ཊ་དང༌། ཀརྨ་བཱ་ཊ་ཀའོ། །ཉེ་བའི་ཞིང་ནི་ཀུ་ལུ་ཏཱ་དང༌། ཨ་རྦུ་ཏ་དང༌། གོ་དཱ་བ་རི་དང༌། ཁ་བའི་རིའོ། །ཚནྡོ་ཧ་ནི་ཧ་རི་ཀེ་ལ་དང༌། ལམྦཱ་ཀ་དང༌། ཀཉྩི་དང༌། སཽརཥྚའོ། །ཉེ་བའི་ཚནྡོ་ཧ་ནི་ཀ་ལིང་ཀ་དང༌། གསེར་གླིང་དང༌། ཀོང་ཀ་ཎའོ། །འཐུང་གཅོད་ནི་གྲོང་དང་གྲོང་ཁྱེར་གྱི་མཐའི་ས་གཞི་དང༌། ཙ་རི་ཏྲ་དང༌། ཀོ་ཤ་ལ་དང༌། འབིགས་བྱེད་དང༌། གཞོན་ནུའི་གྲོང་ཁྱེར་ཏེ་ལྔའོ། ། ཉེ་བའི་འཐུང་གཅོད་ནི་འཐུང་གཅོད་དང་ཉེ་བ་ལྔའོ། །དུར་ཁྲོད་ནི་དུར་ཁྲོད་ཀྱི་ས་གཞི་དང་རྒྱ་མཚོའི་འགྲམ་གཉིས་སོ། །ཉེ་བའི་དུར་ཁྲོད་ནི་སྐྱེད་མོ་ཚལ་དང་རྫིང་བུའི་འགྲམ་མོ། །ཞེས་རྒྱ་ཆེར་བཤད་ལ། འདུ་བ་དང་ཉེ་བའི་འདུ་བ་གཉིས་རྒྱས་པར་མ་བསྟན་པ་དང༌། ཕྱག་ཆེན་ཐིག་ལེར་གནས་ནི་ཛཱ་ལན་དྷ་ར་དང༌། ཨོ་ཌྜི་ཡ་ན་དང༌། པཱུ་ར་ཎ་གི་རི་དང༌། ཀཱ་མ་རཱུ་པའོ། །ཉེ་བའི་གནས་ནི་མཱ་ལ་ཝ་དང༌། ན་ག་ར་དང༌། སིན་དྷུ་དང༌། སིང་ཧ་ལའོ། །ཞིང་ནི་མུ་མྨུ་ཎི་དང་དེ་བཱི་ཀོ་
ཊའོ། །ཉེ་བའི་ཞིང་ནི་ཀུ་ལུ་ཏ་དང༌། ཨ་རྦུ་ཏའོ། །ཚནྡོ་ཧ་ནི་གོ་དཱ་བ་རཱི་དང༌། ཧ་རི་ཀེ་ལའོ། །ཉེ་བའི་ཚནྡོ་ཧ་ནི་ཀཉྩི་དང༌། ལམྤཱཀའོ། །འདུ་བ་ནི་ཀརྨ་པཱ་ཊ་ཀ་དང༌། གསེར་གླིང་ངོ༌། །ཉེ་བའི་འདུ་བ་ནི་ཀོང་ཀ་ཎ་དང༌། འབིགས་བྱེད་དོ། །དུར་ཁྲོད་ནི་རབ་སོང་གི་ས་གཞི་དང༌། རྒྱ་མཚོའི་ངོགས་སོ། །ཉེ་བའི་དུར་ཁྲོད་ནི་ཙ་རི་ཏྲ་དང༌། གཞོན་ནུའི་གྲོང་ངོ༌། །འཐུང་གཅོད་ནི་ཁ་ཆེ་དང༌། ཀེ་རི་ཏའི་དཀྱིལ་འཁོར་རོ། །ཉེ་བའི་འཐུང་གཅོད་ནི་བལ་པོ་དང༌། ཀཱ་ནྱ་ཀུབ་ཛའོ། ཞེས་གསལ་བར་མཛད་པ་དང༌། རི་གི་ཨ་ར་ལའི་རྒྱུད་དུ། ཤར་ལུས་འཕགས་པོ་དང༌། འཛམ་བུ་གླིང་དང༌། བ་ལང་སྤྱོད་དང༌། སྒྲ་མི་སྙན་ནི་གནས་ཏེ། ཞེས་གསུངས་པ་ཐམས་ཅད་ཕན་ཚུན་འགལ་བར་འགྱུར་རོ་ཞེ་ན། སྐྱོན་མེད་དེ། གནས་ས་དང་པོ་རབ་དགའ་ལ་བྱས་པ་ནས། ཉེ་བའི་དུར་ཁྲོད་ཆོས་ཀྱི་སྤྲིན་ལ་བྱས་པའི་ས་རྣམས་གཅིག་ཡིན་ན། ཅིག་ཤོས་ཡིན་པར་འགལ་མོད་ཀྱང༌། སྤྱིར་གནས་ཀྱི་སྒྲས་བསྟན་པ་དང༌། ཉེ་བའི་གནས་ལ་སོགས་པའི་སྒྲས་བསྟན་པ་རྣམས་ལ། ཚ་གྲང་དང་དངོས་པོ་དང་དངོས་མེད་བཞིན་དུ་འགལ་བ་མིན་ཏེ། དོན་གཅིག་ལ་ཡང་མིང་སྣ་ཚོགས་པ་ཡོད་པའི་ཕྱིར་རོ། །དེས་ན་ཨརྦུ་ཏ་ལ་ཁ་སྦྱོར་དུ་གནས་སུ་བཤད་པ་དང༌། ཀྱཻ་རྡོར་དང་ཕྱག་ཆེན་ཐིག་ལེར་ཉེ་བའི་ཞིང་དུ་བཤད་པ་མི་འགལ་ལ། དེ་བཞིན་དུ་གོ་དཱ་བ་རི་ཕྱག་ཆེན་ཐིག་ལེར་ཚནྡོ་ཧ་ར་དང༌། ཀྱཻ་རྡོ་རྗེར་ཉེ་བའི་ཞིང་དང༌། ཁ་སྦྱོར་དུ་ཉེ་བའི་གནས་སུ་བཤད་པ་རྣམས་མི་འགལ་ཏེ། དེ་དག་གིས་གཞན་རྣམས་ཀྱང་མི་འགལ་
བ་ཤེས་པར་བྱའོ། །གཞན་ཡང་ཕྱག་ཆེན་ཐིག་ལེར། ཕྱིའི་ཡུལ་རྣམས་ནང་གི་ལུས་ལ་སྦྱོར་བ་ན། བདེ་མཆོག་དང་མི་འདྲ་བ་དུ་མ་བཤད་པ་རྣམས་ཀྱང་མི་འགལ་ཏེ། གདུལ་བྱ་སོ་སོའི་བསམ་པ་དང་མཐུན་པར་སྣ་ཚོགས་པ་ཅིག་གསུངས་པའི་ཕྱིར་རོ། །འགལ་སྤོང་འདི་དག་ནི་མན་སྙེའི་དགོངས་པར་བཤད་པའོ། །གསུམ་པ་ནི། མན་སྙེ་ལས། གདུལ་བྱ་ལྔ་ལས་དབང་པོ་རྟུལ་པོའི་དོན་དུ། ཕྱི་རོལ་གྱི་གནས་ལ་སོགས་པ་བསྟན་ཏེ། རྣལ་འབྱོར་སྒོམ་པར་མི་ནུས་པ་རྣམས་ལ་རང་ཡུལ་གྱི་ཞེན་པ་སྤང་བའི་ཕྱིར་དུ་གསུངས་སོ། །དབང་པོ་འབྲིང་པོའི་དོན་དུ་དཀྱིལ་འཁོར་གྱི་འཁོར་ལོ་གསུམ་གྱི་རྩིབས་ལ་གནས་ལ་སོགས་པར་བཞག་པ་དང༌། གདུལ་བྱ་ཆེན་པོ་ལ་གསུམ་དུ་བྱས་པའི་ཆུང་ངུའི་དོན་དུ། ལུས་ཀྱི་གནས་ཉེར་བཞི་ལ་གནས་ལ་སོགས་པར་བཞག་པ་དང༌། འབྲིང་གི་དོན་དུ་རྫོགས་རིམ་པས་ས་བོན་གྱི་ཡི་གེ་སོགས་ལ་མི་ལྟོས་པར། སྤྱི་བོ་སོགས་གནས་སོགས་སུ་དང༌། རྩ་རྣམས་ལྷ་མོར་མོས་པར་བྱེད་པ་དང༌། ཆེན་པོ་རྫོགས་རིམ་ལ་གནས་པའི་དབང་དུ་བྱས་ནས། སྟོང་ཉིད་སྙིང་རྗེ་དབྱེར་མེད་བའི་བྱང་ཆུབ་ཀྱི་སེམས་རབ་དགའ་སོགས་ལ་གནས་སོགས་སུ་བཞག་པ་སྟེ་ལྔ་དང༌། ཐ་མ་ནི་ངེས་པའི་དོན་དང༌། དང་པོ་བཞི་ནི་ལྔ་པ་ལ་ལྟོས་ནས་དྲང་བའི་དོན་ཏེ། རབ་དགའ་སོགས་གནས་ལ་སོགས་པར་བཞག་པའི་ས་དེ་དང་དེར་མོས་པ་ལས། འཇིག་རྟེན་ལས་འདས་པའི་ས་རྣམས་གསལ་བའི་ཆེད་དུ་འབད་པར་གྱུར་ན་ཅི་མ་རུང་
སྙམ་དུ་དགོངས་པའོ་ཞེས་འཆད་དོ། །དྲང་ངེས་ཀྱི་ཚུལ་དེ་ལྟར་ཡིན་པའི་ཤེས་བྱེད་དུ། མངོན་བརྗོད་ལས། མཁའ་འགྲོ་མ་ཀུན་འདི་ཉིད་དུ། །ཐུགས་རྗེ་ལྡན་རྣམས་རྣམ་པར་གནས། །སངས་རྒྱས་བྱང་ཆུབ་སེམས་དཔའ་ཀུན། ། འགྲོ་བ་གསུམ་པོའང་འདི་ཉིད་དུ། །ཉི་ཤུ་རྩ་བཞིའི་དབྱེ་བ་ཡིས། །གནས་སོགས་འདི་ཁོ་ན་ལ་གནས། །དེ་བས་དེ་རུ་བསྐོར་བ་ཡི། །སྐྱོ་བྱ་དེ་ཉིད་ཅན་གྱིས་མིན། །གལ་ཏེ་དེ་ཉིད་མེད་གྱུར་ན། །དེ་རྣམས་བསྐོར་བས་ཅུང་ཟད་མིན། །གལ་ཏེ་དེ་ཉིད་ལྡན་གྱུར་ན། །དེ་རྣམས་བསྐོར་བ་ཅི་ཞིག་དགོས། །ཕྱི་རོལ་རྣལ་འབྱོར་པ་དེ་རྣམས། །བསྐོར་བས་ཁམས་རྣམས་ཟད་པར་འགྱུར། །དེ་བས་ཕྱི་རོལ་སྤངས་ནས་ནི། །རྣལ་འབྱོར་རོལ་པས་གནས་པར་བྱ། །དཔལ་ལྡན་རྡོ་རྗེ་རྣལ་འབྱོར་མ། །རྣམ་དག་ཡེ་ཤེས་ཅན་རྣམས་ཀྱིས། །རྡོ་རྗེ་རྣལ་འབྱོར་ཅན་རྣམས་གཟིགས། །ཐུགས་རྗེས་ཁྱབ་པའི་ཐུགས་ཀྱིས་ནི། །དེ་རྣམས་དགྱེས་པས་དངོས་གྲུབ་མཆོག །ཇི་ལྟར་འདོད་བཞིན་སྩོལ་བར་མཛད། །ཅེས་དང༌། རང་གི་ལྷག་པའི་ལྷ་དམིགས་ཏེ། །དེ་ཁོ་ན་ཉིད་གཅིག་པུ་བསམ། །ལྐུགས་པའི་དངོས་པོར་རབ་གྱུར་པའི། །ཟླ་དྲུག་ཙམ་གྱིས་ངེས་པར་ནི། །རྣལ་འབྱོར་མ་ཡིས་ཉེར་བསྟེན་པའི། །རྣལ་འབྱོར་ཆེན་པོ་འདི་གསལ་འགྱུར། །ཡེ་ཤེས་འོད་ཟེར་མཆོག་མཐོང་ནས། །རྣལ་འབྱོར་མ་རྣམས་ལེགས་འདུ་སྟེ། །པདྨའི་འབྱུང་གནས་ཉམས་དགའ་བར། །ངང་པའི་ཚོགས་འདུ་ཇི་
བཞིན་ནོ། །དཔལ་ལྡན་རྡོ་རྗེ་འཛིན་དངོས་སུ། །འགྱུར་བ་འདི་ལ་ཐེ་ཚོམ་མེད། །མིག་འཁྲུལ་མཁན་བཞིན་འཇིག་རྟེན་དུ། །སེམས་ཅན་ཀུན་གྱི་དོན་བྱེད་རྣམས། །སེམས་ནི་དགའ་བར་གྱིས་ཤིག་ཅེས། །སེམས་ཅན་རྣམས་ལ་བདག་གསོལ་འདེབས། ཞེས་གསུངས་པ་རྣམས་དྲངས་ཏེ། ལྷན་སྐྱེས་ཀྱི་བདེ་སྟོང་སྦྱོར་བའི་ལམ་ལ་ངེས་པ་སྟེར་བར་བྱེད་དོ། །གཉིས་པ་ནི། སྦྱིན་པས་སེམས་ཅན་དཔག་ཏུ་མེད་པ་ཚིམ་པར་བྱེད་པའི་གནས་ནི་རབ་ཏུ་དགའ་བའི་ས་ས་དང་པོའོ། །བཟོད་པ་རབ་ཏུ་གྱུར་པས་མངོན་ཤེས་སོགས་ཕུལ་བྱུང་སྐྱེ་བའི་ཞིང་ནི་རྒྱུད་འདིར་ས་གསུམ་པ་འོད་བྱེད་པ་ཡིན་པར་ཤེས་པར་བྱ་བ་དང༌། ཚནྡོ་ཧའི་ཚནྡ་འདུན་པ་དང༌། ཨུ་ཡིག་ཕྱུང་པའི་ཨུ་ཧ་རྟོག་པ་སྟེ་འདུན་རྟོག་དང༌། རང་གཞན་གྱི་དོན་ཕུན་སུམ་ཚོགས་པ་དོན་དུ་གཉེར་བ་ནི་འདུན་པ་དང༌། འདི་ལྟ་འདི་ལྟར་བདག་གིས་དོན་དེ་བྱའོ་ཞེས་རྟོག་པ་སྟེ་དེ་ནི་ས་ལྔ་པ་སྦྱང་དཀའ་བའོ། །ཐབས་ཀྱི་ཕར་ཕྱིན་རབ་ཏུ་གྱུར་པས་ཏིང་ངེ་འཛིན་དང་མངོན་ཤེས་སོགས་མཚན་མ་མེད་པར་བརྩོལ་བས་འདུ་བ་ནི་ས་བདུན་པ་རིང་དུ་སོང་བ་ཡིན་ཞིང༌། བདག་མེད་པར་དུར་ཁྲོད་དང་མཚུངས་པའི་ཆོས་ཀྱི་དབྱིངས་རྟོགས་ནས། སེམས་ཅན་གྱིས་ཀྱང་དེ་རྟོགས་པའི་ཆེད་དུ་ཆོས་སྟོན་པ་སོགས་ལ་འབད་པ་ནི་དུར་ཁྲོད་དེ་དེ་ནི་ས་དགུ་པ་ལེགས་པའི་བློ་གྲོས་ཉིད་དོ། །ཉེ་བའི་གནས་ས་གཉིས་པ་དྲི་མ་མེད་པ་དང༌། ཉེ་བའི་ཞིང་ནི་ས་བཞི་པ་འོད་འཕྲོ་བ་དང༌། ཉེ་བའི་ཚནྡོ་ཧ་ནི་ས་དྲུག་པ་མངོན་དུ་གྱུར་བ་ཉིད་དང༌།
ཉེ་བའི་འདུ་བ་ནི་ས་བརྒྱད་པ་མི་གཡོ་བ་དང༌། ཉེ་བའི་དུར་ཁྲོད་ནི་ས་བཅུ་པ་ཆོས་ཀྱི་སྤྲིན་ནོ། །ཉེ་བ་ལྔ་པོ་དེའི་མིང་དོན་ནི། སྔ་མ་ལྔ་དང་ཉེ་བ་ཡིན་ལ། ཉེ་ལུགས་ནི་ཕན་གདགས་བྱ་དང་འདོགས་བྱེད་དུ་འབྲེལ་བ་དང༌། རང་གི་སྔ་མ་ལས་ཕུལ་དུ་བྱུང་བར་གྱུར་པ་ཡང་ཉེ་བའི་དོན་དུ་དང་ཕྱི་རོལ་གྱི་གནས་དང་ཉེ་བའི་གནས་ལ་སོགས་པའི་ཉེ་བའི་དོན་ལྔ་ཡང༌། སྔ་མ་ལ་བརྟེན་ནས་དེ་དང་ཆ་མཐུན་པའི་དོན་ཤེས་པར་བྱའོ། །དེ་ལྟར་ཤཱི་ཧེ་རུ་ཀའི་གཞུང་དུ་སྤྱོད་པ་སྟེ་གནས་དང་ཉེ་བའི་གནས་ལ་སོགས་པ་འདི་ནི། ནང་གི་སྟེ་ངེས་དོན་གྱི་བདག་ཉིད་ཅན་གྱི་ས་བཅུ་ཡིན་ལ། སྦྱིན་སོགས་ཕ་རོལ་ཏུ་ཕྱིན་པ་བཅུའི་རང་བཞིན་ཅན་གྱི་རབ་དགའ་སོགས་ཀྱི་ས་རྣམས་ནི། རྣལ་འབྱོར་མ་ཡི་བརྡ་ཡི་སྐད་ཀྱིས་གནས་ལ་སོགས་པར་བསྟན་ཏོ། །བརྡ་དང་ཀླ་ཀློའི་སྐད་གཉིས་ལ་སྐད་དོད་ཐུན་མོང་གཅིག་ཡོད་པར་འདུག་པས། ཁ་ཅིག་གིས་ཀླ་ཀློའི་སྐད་དུ་བསྒྱུར་མོད་ཀྱང་འགྱུར་མི་ལེགས་སོ། །གཉིས་པ་ནི། ཇི་ལྟར་ཧེ་རུ་ཀའི་སྐུའི་ཡན་ལག་ཐམས་ཅད་གནས་ལ་སོགས་པ་ཡིན་ཞེ་ན། མཐོ་རིས་ཏེ་ནམ་མཁའ་ལ་སྤྱོད་པའི་ཐུགས་ཀྱི་འཁོར་ལོ་དང༌། ས་སྟེང་དུ་སྤྱོད་པ་གསུང་འཁོར་དང༌། ས་འོག་ཏུ་སྤྱོད་པ་སྐུའི་འཁོར་ལོའི་བརྟེན་པ་དང་། རྟེན་འཁོར་ལོའི་རྩིབས་ཉེར་བཞི་པོ་ཐམས་ཅད་དཔའ་བོ་ཧེ་རུ་ཀའི་ཡན་ལག་དང་ངོ་བོ་དབྱེར་མེད་པས། ཧེ་རུ་ཀ་བརྟན་གཡོ་ཀུན་གྱི་བདག་ཉིད་ཅན་དུ་གསུངས་ཏེ་དེ་ལ་དགོངས་ནས་སོ། །པུ་ལླི་ར་མ་ལ་ཡ་དང༌། སོགས་པས་ཡུལ་ལྷག་མ་ཉེར་གསུམ་གང་བསྟན་པ་རྣམས། ཕྱི་རོལ་གྱི་བདག་ཉིད་དང༌། ནང་གི་བདག་ཉིད་ཅན་དུ་གནས་ཏེ། ཕྱི་མ་ནི་ནང་
ལུས་ལ་གནས་པ་དང༌། དེ་དག་གི་ངེས་དོན་བདེ་སྟོང་དབྱེར་མེད་ལ་བཤད་པའོ། །དཔལ་ལྡན་ཁྲག་འཐུང་གི་རྒྱལ་པོ་ཆེན་པོ་འདོད་པ་ཀུན་ལ་ལོངས་སྤྱོད་པ་ལ་དབང་བསྒྱུར་བས་ན། དབང་ཕྱུག་གི་གཙོ་བོ་ནི་ལམ་འདིས་བསྒྲུབ་པར་བྱ་བའོ། །ཧེ་རུ་ཀ་དེ་ཇི་འདྲ་ཞིག་ཅེ་ན། ཕྱག་དང་ཞབས་དང་ལྡན་ཞིང་སྤྱན་དང་དབུ་དང་ཞལ་དང༌། གསན་པ་སྟེ་ཐོས་པ་དང་ལྡན་པ་ཞིག་གོ། ཕྱག་ལ་སོགས་པ་དྲུག་པོ་ཇི་ལྟ་བུ་དང་ལྡན་ཞེ་ན། ཀུན་ཏུ་ཞེས་པ་དྲུག་ཀ་ལ་སྦྱར་བའི་དོན་ནི། སྐུའི་ཆ་ཀུན་གྱིས་ཕྱག་གི་བྱ་བ་བྱེད་ནུས་པ་ནི་ཀུན་ཏུ་ཕྱག་ཡིན་ལ། དེས་གཞན་ལྔ་ཡང་ཤེས་པར་བྱའོ། །འཇིག་རྟེན་ཐམས་ཅད་གཡོགས་པ་སྟེ་ཁྱབ་པར་རྣམ་པར་བཞུགས་ཞེས་མན་སྙེ་ལས་འཆད་དོ། །དེ་ལྟར་ན་ཕྱག་གིས་ལེན་པའི་བྱ་བ་བྱེད་པ་ཡང་འཇིག་རྟེན་ཐམས་ཅད་དུ་ཡིན་ལ། དེས་ལྷག་མ་རྣམས་ཀྱང་ཤེས་པར་བྱའོ། །གཡོགས་པ་ལ་འགྱུར་གཞན་ལས་ཁྱབ་པར་ཞེས་འབྱུང་ངོ༌། །དེ་རྣམས་ཀྱི་ཤེས་བྱེད་དུ། དད་པའི་སྟོབས་བསྐྱེད་པའི་མདོར། དེ་བཞིན་གཤེགས་པས་གཙུག་ཏོར་གྱིས་ཀྱང་གཟིགས་སོ། །དེ་བཞིན་དུ་མཛོད་སྤུས་ཀྱང་གཟིགས་སོ། །དེ་ལྟར་མཚན་རེ་རེས་སོ། །དེ་ལྟར་དུས་ཅིག་ཅར་དུ་ཕྱོགས་བཅུ་རྣམས་སུ། འཇིག་རྟེན་གྱི་ཁམས་རབ་འབྱམས་ཐམས་ཅད་དུ་གཟིགས་སོ། །ཞེས་གསུངས་པ་མན་སྙེ་དྲངས་སོ། །གསུམ་པ་ནི། དེ་འདྲ་བའི་ཧེ་རུ་ཀའི་རྣལ་འབྱོར་བརྟན་པར་བྱས་པ་དེ་ནས། རིམ་གཉིས་ཀྱི་བསམ་གཏན་དང་ལྡན་
པའི་སེམས་ཀྱིས་དངོས་གྲུབ་ཐམས་ཅད་བསྒྲུབ་པར་བྱ་བ་ནི། སྒྲུབ་པ་པོ་རྣམས་ལ་ཕན་པར་བྱ་བའི་ཕྱིར་དུ། གསང་བའི་དེ་ཉིད་འདི་བཅོམ་ལྡན་འདས་ཀྱིས་གསུངས་པ་ཡིན་ནོ། །བཞི་པ་ནི། དཔལ་ཧེ་རུ་ཀ་མངོན་པར་བརྗོད་པ་བསྡུས་པའི་རྒྱུད་ལས། དབང་གི་སྦྱིན་སྲེག་ལ་སོགས་པའི་སྦྱིན་སྲེག་དང༌། གནས་ལ་སོགས་པའི་བརྡ་བཅུས་ས་བཅུ་བསྟན་པའི་ཆོ་གའི་ལེའུ་སྟེ་ལྔ་བཅུ་པའོ། །འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས། ལེའུ་ལྔ་བཅུ་པའི་བཤད་པའོ།། ༈ །།གསུམ་པ་ལེའུ་ང་གཅིག་པས་སྔ་མ་རྣམས་ཀྱི་དོན་བསྡུས་ཏེ་བསྟན་པ་ལ་གསུམ། བཤད་པར་དམ་བཅའ་བ། དམ་བཅས་པའི་དོན་བཤད་པ། ལེའུ་ཡི་གྲངས་བསྟན་པའོ། །དང་པོ་ནི། ལེའུ་ལྔ་བཅུ་པའི་རྗེས་དེ་ནས་སྔར་བཤད་པའི་ལེའུ་སོ་སོའི་དོན་ལས་གཞན། སྔར་བཤད་པ་རྣམས་ཀྱི་དོན་ཕྱོགས་གཅིག་ཏུ་བསྡུས་པ་ཡང་བཤད་པར་བྱའོ། །གཉིས་པ་ལ་ལྔ། རྒྱུད་འདིའི་མན་ངག་ཤིན་ཏུ་རྙེད་དཀའ་བར་བསྟན་པ། རྙེད་སླ་བའི་ཐབས་དེ་ཉིད་བཅུ་བཞི་བསྟན་པ། བཅུ་བཞི་པོ་ལ་སྤྱོད་པའི་ཕན་ཡོན་དང་མ་དད་པའི་ཉེས་དམིགས། དེ་ཉིད་བཅུ་བཞིར་བསྡུས་པ་སྒོམ་པའི་ཚུལ། སངས་རྒྱས་ཀྱི་གསུང་རབ་གང་ཡང་མི་སྤོང་བའི་ཐབས་བསྟན་པའོ། །དང་པོ་ནི། སངས་རྒྱས་ཐམས་ཅད་ཀྱི་མན་ངག་བླ་མ་ཆེན་པོ་ལ་གུས་ཤིང་བསྙེན་བཀུར་བས་རྟོགས་པར་བྱ་བ་མ་གཏོགས་པ། གཞན་
དུ་སྡུག་བསྔལ་བས་ཀྱང་རྙེད་པར་མི་འགྱུར་བས་ན། ཤིན་ཏུ་རྙེད་པར་དཀའ་འོ་ཞེས་ཕྱག་ན་རྡོ་རྗེ་ལ་བོས་ཏེ་གསུངས་སོ། །རྙེད་དཀའ་བའི་གདམས་ངག་ནི། རང་གི་སེམས་ཆོས་རྣམས་ཀྱི་དེ་ཁོ་ན་ཉིད་ཇི་ལྟ་བ་དེ་ལྟར་རྗེས་སུ་ཞུགས་པར་གྱུར་པའི་དོན་དམ་པ་འོད་གསལ་དང༌། ཀུན་རྫོབ་པ་ཡོངས་སུ་དག་པའི་སྐུ་གཉིས་ཟུང་དུ་འཇུག་པའི་ཞིང་ཀུན་ཏུ་རྒྱུ་བའི་ཕྱག་རྒྱ་ཆེན་པོ་ཆེ་སྟེ། བདེན་པ་གཉིས་ལ་ལེགས་གནས་པའི། །ཟུང་དུ་འཇུག་པས་རྒྱུ་བ་སྟེ། །ཕྱག་རྒྱ་ཆེན་པོས་དེ་མངོན་པར། །རྫོགས་སངས་རྒྱས་བྱང་ཆུབ་བའོ། ཞེས་གསུངས་པའི་རྫོགས་སངས་རྒྱས་ནི་སྒྱུ་མའི་སྐུ་དང༌། བྱང་ཆུབ་པ་ནི་འོད་གསལ་ལོ། །ཟུང་འཇུག་དེ་ཡང་མན་ངག་གི་རིམ་པ་ཇི་ལྟ་བ་བཞིན་དུ་ཉམས་པ་མེད་པར། ལྷག་པར་ཁོང་དུ་ཆུད་ཅིང་མཐར་ཐུག་གི་བསྒྲུབ་བྱའི་རྗེས་སུ་འཇུག་པར། སྒྲུབ་པ་པོ་རྣམས་ཀྱི་སྒྲུབ་ཐབས་དང༌། སྤྱོད་པའི་ཆོ་ག་ཤིན་ཏུ་གསལ་བ། བསྐྱེད་པའི་རིམ་པ་ནས་བརྩམས་ནས་རྫོགས་པའི་རིམ་པའི་ཏིང་ངེ་འཛིན་ལ་བརྟེན་ནས། དཔལ་ཧེ་རུ་ཀ་དང་གོ་འཕང་མཉམ་པར་འགྱུར་པར་བཤད་དེ། འདིས་ནི་ཟུང་འཇུག་གི་གོ་འཕང་བསྒྲུབ་བྱར་འཇོག་པ་དང༌། དེར་བགྲོད་པའི་རིམ་གཉིས་སྤྱོད་པ་དང་བཅས་པའི་གྲུབ་ཆེན་གྱི་མན་ངག་ཉམས་པ་མེད་པར་ཁོང་དུ་ཆུད་པའི་མན་ངག་རྙེད་དཀའ་བར་བསྟན་ཏེ། ཟུང་འཇུག་ལེགས་པར་ཤེས་པ་ནི་འདུས་པ་དང་དེའི་མན་ངག་ལེགས་པར་ཤེས་པ་ལ་རག་ལས་སོ། །འགྲེལ་པར། སངས་རྒྱས་ཀུན་དང་
མཉམ་སྦྱོར་བ། །མཁའ་འགྲོ་དྲ་བའི་སྡོམ་པ་ལས། །བྱུང་བའི་ཏིང་ངེ་འཛིན་རྫོགས་པའི། །སངས་རྒྱས་བྱང་ཆུབ་ཕྱག་རྒྱ་ཆེའི། །ལས་གནས་རྣལ་འབྱོར་མ་ཡི་བཀའ། །བདེན་ཞིང་ཉེ་བར་སྤྱོད་དང་བཅས། །ལན་དང་བཅས་ཤིང་སངས་རྒྱས་སྤྱན། །མཆོག་ལས་མཆོག་ཏུ་གྱུར་པ་དང༌། །གཅིག་ལས་གཅིག་བརྒྱུད་མན་ངག་སྟེ། །ཐོས་དང་བསམས་དང་བསྒོམས་པ་ཡིས། །ཤེས་རབ་ཡེ་ཤེས་གོམས་པ་ནི། །རྣལ་འབྱོར་རྒྱུན་ཆགས་རབ་འབྲེལ་བས། །རྒྱུན་མི་འཆད་དོན་སྐལ་པ་ཅན། །ཡོངས་སུ་སྨིན་ཅིང་ཡོངས་སུ་བྱང༌། །སྣོད་ལྡན་དེ་ཡི་ཕྱིར་བསྟན་པས། །འོངས་པ་གང་ཡིན་འདིར་གཞུང་ལུགས། །རྒྱུད་རྣམས་ཀུན་ཏུ་གསང་བ་གང༌། །གསང་ཆེན་སངས་རྒྱས་ཀུན་གནས་པ། །འབུམ་ཕྲག་སུམ་འགྱུར་གང་ཡིན་ཉིད། །རབ་རྒྱས་རྒྱུད་ལས་འོངས་པའོ། ཞེས་གསུངས་སོ། །དེའི་རྐང་པ་དང་པོ་གསུམ་གྱི་དོན་ནི། སངས་རྒྱས་ཀུན་དང་མཉམ་པར་སྦྱོར་བ་མཁའ་འགྲོ་མ་རྣམས་ཀྱི་དྲ་བ་སྡོམ་པ་སྒྱུ་མ་ལྟ་བུའི་ཏིང་ངེ་འཛིན་གྱིས་སྒྲུབ་པ་ནི། རྫོགས་པའི་སངས་རྒྱས་ཏེ་ཀུན་རྫོབ་སྒྱུ་མའི་སྐུ་དང་མངོན་པར་བྱང་ཆུབ་པ་དོན་དམ་འོད་གསལ་གྱི་བདེན་པ་གཉིས་དབྱེར་མི་ཕྱེད་པ་ཕྱག་རྒྱ་ཆེན་པོ་སྒྲུབ་པའི་འཕྲིན་ལས་ཡིན་ནོ། །གནས་ཞེས་སོགས་གཉིས་ལ་ནི་ལྭ་བ་པའི་འགྲེལ་པའི་འགྱུར་གཞན་ལས། གནས་ཀྱི་རྣལ་འབྱོར་མ་རྣམས་ཀྱི་བཀའ་ལས་འབྱུང་བ་ཉེ་བར་བཏགས་པ་ཞེས་འབྱུང་བ་ལྟར་བྱའོ། །ལན་དང་བཅས་ཞེས་པ་ནི་འགྱུར་གཞན་ལ་མེད་དོ། །སངས་རྒྱས་ཀྱི་སྤྱན་ནི་སྤྱན་དང་འདྲ་བར་
གཅེས་པའི་དོན་ནོ། །འདིར་གཞུང་ལུགས་ཞེས་པ་ནི། སྔར་བཤད་པའི་མན་ངག་རྙེད་དཀའ་བའོ། །ལྷག་མ་རྣམས་ནི་སླའོ། །འགོས་འགྱུར་ལས་ཚིགས་བཅད་དུ་འབྱུང་ལ། ཤཱཀྱ་བརྩོན་འགྲུས་ཀྱི་འགྱུར་ལ་ལྷུག་པར་འབྱུང་ངོ༌། །འགོས་འགྱུར་ལས་འབུམ་ཕྲག་གསུམ་དུ་འབྱུང་བ་ལ། འགྱུར་གཞན་དང་ལྷ་སྦས་ཀྱི་འགྲེལ་པར། སྟོང་ཕྲག་གསུམ་ཞེས་བསྒྱུར་བ་ནི་དཔེ་མ་དག་པ་ལས་བསྒྱུར་བའོ། །དེ་ལྟར་རྒྱུད་འབུམ་ཕྲག་གསུམ་པ་ལས་འོངས་པའི་དོན། །བསྐྱེད་རིམ་ལ་བརྟེན་པའི་དེ་ཁོ་ན་ཉིད་བཅུ་བཞི་སྒོམ་པ་ནས། རྫོགས་པའི་རིམ་པའི་མཐར་ཐུག་པར་གྱུར་པ་ནི། ཉོན་མོངས་པ་དང་བྲལ་བས་དཔའ་བོ་སྟེ་དེའི་བརྡ་ཡི་སྐད་དུ་རྡོ་རྗེ་འཛིན་པ་ང་ཡིས་སྦས་པ་ཡིན་ནོ། །གང་དུ་སྦས་ཤེ་ན། རྒྱུད་གཞན་དུ་སྟེ་བྱ་བ་དང་སྤྱོད་པ་དང་རྣལ་འབྱོར་དང༌། རྣལ་འབྱོར་བླ་མ་རྣམས་སུའོ་ཞེས་གསུངས་པ་ལ། རྒྱུད་གཞན་ནི་རྒྱུད་སྡེ་འོག་མ་གསུམ་མོ། །སྦས་པ་ལ་གཉིས་ལས། དེར་ཡེ་མ་བསྟན་པར་སྦས་པ་ནི་རྒྱུད་སྡེ་འོག་མ་གསུམ་དང་མདོ་སྡེའི་ཕྱོགས་སུའོ། །ཚིག་བཞི་པ་ལ་འགྱུར་གཞན་ལས་རྣལ་འབྱོར་མཆོག་རྣམས་སུའོ་ཞེས་ཀྱང་འབྱུང་བས་རྣལ་འབྱོར་བླ་མེད་དོ། །དེར་སྦས་པ་ནི་རྒྱུད་དེའི་དོན་དུ་ཡོད་ཀྱང་ཚིག་མི་གསལ་བར་སྦས་པའོ། །རྒྱུ་མཚན་དེས་ན་ཤིན་ཏུ་རྙེད་དཀའ་བའོ། །དེ་ལྟར་ན་རྙེད་དཀའ་བའི་གདམས་ངག་ནི་སྤྱིར་ཧེ་རུ་ཀའི་རིམ་གཉིས་སྤྱོད་པ་དང་བཅས་པ་ཡིན་ལ། ཁྱད་པར་དུ་ནི་སྒྱུ་ལུས་ཀྱི་ཏིང་ངེ་འཛིན་གྱིས་ཟུང་
འཇུག་སྒྲུབ་ཚུལ་རྙེད་དཀའ་བར་ལྭ་བའི་ན་བཟའ་ཅན་དང༌། ལྷ་སྦས་ཀྱིས་བཤད་པ་ནི་གནད་ཤིན་ཏུ་ཆེའོ། །གཉིས་པ་ནི། དེ་ལྟར་གང་རྙེད་དཀའ་བ་དང༌། རྙེད་དཀའ་བའི་རྒྱུ་མཚན་བསྟན་པ་དེ། རྙེད་སླ་བའི་ཐབས་ནི་དེ་ཉིད་བཅུ་བཞིར་བསྡུས་པའི་སྟེང་ནས་བཤད་དགོས་པ་ཡིན་པས། འདི་ལ་གཉིས། དེ་ཉིད་བཅུ་བཞིའི་ཚིག་གི་དོན་བཤད་པ་དང༌། དེ་རིམ་པ་གཉིས་ལ་སྦྱར་ཏེ་བཤད་པའོ། །དང་པོ་ནི། དེ་ཉིད་བཅུ་བཞིའི་གྲངས་འདི་ལྟར་བྱེད་རྩ་རྒྱུད་ཀྱི་འགྲེལ་པ་ཁུངས་མ་རྣམས་ནས་མ་བཤད་ཀྱང་དངོས་སུ་གསུངས་པ་རྣམས་དེ་ཉིད་རྣམས་ཀྱི་གྲངས་ཡིན་ནོ། །དེ་ཉིད་དང་པོ་གོས་དང་ཕྱག་རྒྱ་ལྔ་ལ་སོགས་པའི་དེ་ཉིད་ནི། གོས་ཀྱི་སྐད་དོད་ནི་བ་ས་ནཾ་ཞེས་པ་གནས་དང༌། གོས་གཉིས་ཀ་ལ་འཇུག་པར་ལོ་ཙཱ་བ་མཁས་པ་དག་བཞེད་པ་ལེགས་པས། འགྲེལ་པ་རྣམས་ལས་གོས་ལ་སྟག་གི་པགས་པ་དང་གཞལ་ཡས་ཁང་གི་བཤད་པ་གཉིས་བྱུང་བའི་ཕྱི་མ་བོད་སྐད་ལ་འབྲེལ་མེད་འདྲ་བ་ཅིག་བྱུང་ཡང༌། སྐད་དོད་ཀྱི་སྟེང་ནས་ཡིན་ལ། གནས་ལ་ནི་སྒྲུབ་པ་པོའི་གནས་དང༌། དཀྱིལ་འཁོར་བའི་ལྷའི་གནས་གཉིས་སོ། །ཕྱག་རྒྱ་ལྔ་ནི། མགོ་བོའི་ནོར་བུའམ་སྤྱི་བོའི་འཁོར་ལོ་དང༌། རྣ་ཆ་དང༌། མགུལ་རྒྱན་དང༌། ལག་གདུབ་དང༌། མཆོད་ཕྱིར་ཐོགས་ལྔའོ། །ལ་སོགས་ཀྱིས་ནི་ཐལ་བ་སྡུད་པར་བཤད་དེ། ནག་པོ་པའི་དཀྱིལ་ཆོག་ལས་མགོ་ཕྲེང་དང༌། རལ་པའི་ཅོད་པན་དང་བཅོས་མའི་སྐྲ་ལ་སོགས་པས་བརྒྱན་པར་བཤད་པ་ཡང་བསྡུ་སྟེ། སྒྲུབ་པའི་གནས་སུ་སྒྲུབ་པ་པོ་ཆགས་སུ་འཇུགས་པའི་
ཚུལ་ལོ། །གཉིས་པ་ཤེས་རབ་ཡན་ལག་གི་དེ་ཉིད་ནི། ཁ་ཊཾ་གའམ་ཤེས་རབ་མའི་ཡན་ལག་གིས་འཁྱུད་པ་ལ་བཤད་དོ། །ནག་པོ་པའི་དཀྱིལ་ཆོག་ལས། ཤེས་རབ་ཡན་ལག་སྟན་གྱི་སྟེང༌། ཞེས་གསུངས་པ་ཡང་ཤེས་རབ་མ་སྟན་དུ་བྱ་བའི་དོན་ཏེ་སྔ་མ་དང་འདྲའོ། །གསུམ་པ་ཕུར་བུ་དང་གུར་གྱི་དེ་ཉིད་ནི། རྡོ་རྗེའི་ཕུར་བུ་དང༌། རྡོ་རྗེའི་གུར་དང༌། དེས་མཚོན་ནས་རྡོ་རྗེའི་ར་བ་དང༌། བླ་རེ་དང༌། རྡོ་རྗེའི་ས་གཞི་དང༌། མདའི་དྲ་བ་དང༌། མེའི་ཕྲེང་བ་ལ་སོགས་པ་སྟེ་བསྲུང་འཁོར་སྒོམ་པའོ། །ཨཱ་ལི་དང་ཀཱ་ལི་ཞེས་པ་དབྱངས་གསལ་གྱི་ཕྲེང་བ་བརྗོད་ནས། དེ་རྣམས་ཁོར་ཡུག་ཏུ་བཀོད་པ་ཡོངས་སུ་གྱུར་པ་ལས། ཟླ་བ་དང་ཉི་མའི་གཟུགས་སུ་སྒོམ་པའོ་ཞེས་བཤད་དེ། ཨཱ་ལི་ལས་ཟླ་བ་དང༌། ཀཱ་ལི་ལས་ཉི་མ་སྒོམ་པའི་ལུགས་ཏེ། དཀའ་རྒྱལ་གྱིས་ཀྱང་དེ་བཞིན་དུ་བཤད་དོ། །དེས་མཚོན་ནས། ཟླ་བ་དཀར་དམར་གཉིས་དང༌། ཟླ་བ་གཅིག་སྐྱེད་པ་ཡང་གཟུང་ངོ༌། །འདི་ལ་ཨཱ་ལིའི་དེ་ཉིད་དང་ཀཱ་ལའི་དེ་ཉིད་གཉིས་སུ་བྱ་བ་ནི་དེ་ཉིད་བཞི་པ་དང་ལྔ་པའོ། །དྲུག་པ་རྒྱུ་སོགས་སྟོང་པ་སྔོན་དུ་འགྲོ་བའི་དེ་ཉིད་ནི། མར་དོའི་ལུགས་ཀྱིས་སོགས་ཀྱི་སྐད་དོད་དང་པོ་ལའང་འཇུག་པས། རྒྱུ་བསོད་ནམས་ཀྱི་ཚོགས་དང་པོར་བྱས་ནས། སྟོང་པ་སྒོམ་པ་ཡེ་ཤེས་ཀྱི་ཚོགས་གཉིས་གསོག་པ་ལ་འཆད་ཀྱང༌། འགྲེལ་པ་རྣམས་ལས་སོགས་ཀྱི་སྟེང་ནས་བཤད་ཅིང༌། དཔའ་བོ་རྡོ་རྗེ་དང་གཉིས་ཀའི་བཤད་སྦྱར་ལས། ཧེ་ནི་རྒྱུ་སོགས་སྟོང་པ་ཉིད། ཅེས་སོགས་
གསུངས་པའི་དོན་དུ་འཆད་པས། རྟེན་སྐྱེད་པའི་སྔོན་གྱི་སྟོང་ཉིད་སྒོམ་པ་ལ་ཡང་སྦྱར་རོ། །དེ་ལྟར་བྱས་ན་རྟེན་དང་བརྟེན་པ་སྐྱེད་པའི་སྔོན་དུ་འགྲོ་བའོ། །རྒྱུ་སྟེ་སྐྱེད་པའི་བྱེད་པ་དང༌། སོགས་ཀྱིས་བསྡུས་པ་བསྐྱེད་པར་བྱ་བ་སོགས་ཐམས་ཅད་སྟོང་པ་ནི། བཞི་པ་བྱ་བ་བསྒྲུབ་པའི་ཡེ་ཤེས་སུ་འཆད་དོ། སྟོང་པ་ནི་ཟླ་ཉི་དང་ས་བོན་རྣམས་སོ་སོར་གནས་བས་སྟོང་པ་གཅིག་ཏུ་འདྲེས་པ་ལ་དགོངས་སོ། །བྱ་སྒྲུབ་ཀྱི་སྔོན་དུ་འགྲོ་བ་ནི་གསུམ་པ་སོར་རྟོག་ལ་བཤད་དོ། །བདུན་པ་འཇུག་པ་སྒྲ་ལ་སོགས་པའི་དེ་ཉིད་ནི། ལྭ་བ་པའི་འགྲེལ་པའི་འགྱུར་གཞན་ལས། སྒྲ་དང་ལ་སོགས་པས་བསྡུས་པ་ཟླ་ཉི་དང་ཕྱག་མཚན་རྣམས་རྒྱུ་རྡོ་རྗེ་འཛིན་པ་ཇི་སྲིད་པ་དེ་སྲིད་དུ་འཇུག་པ་དང༌། འཇུག་པའི་མཚན་མ་སྟེ་རྒྱུ་ནི་སྒྲ་ཙམ་ཞེས་པ་མངོན་བྱང་བཞི་པའི་སྐབས་སུ་གནས་པའི་ཧཱུཾ་མོ། ཞེས་འཆད་དེ་གཞན་གསུམ་ཡང་རྒྱུའོ། །འགྲེལ་པ་གཞན་ལས། བཟུང་བ་ནཱ་ད་སོགས་པར་གནས། ཞེས་བཏོན་ནས་ཧེ་རུ་ཀ་བཟུང་བ་སྟེ་འཇུག་ཅིང་སྐྱེད་པའི་རྒྱུར་ཡི་གེ་གསུམ་དང་ནཱ་དའི་ངོ་བོ་ཡོངས་སུ་བཟུང་བའོ་ཞེས་འཆད་དོ། །སོགས་པས་ནི་ཡི་གེ་གསུམ་ལས་འཁོར་ལོ་གསུམ་གྱི་ལྷ་རྣམས་སྤྲོ་བའོ། །བརྒྱད་པ་བསྡུས་པའི་སྦྱོར་བ་དང་ལྡན་པའི་དེ་ཉིད་ནི། ས་བོན་དང་ཟླ་ཉི་རྣམས་གོང་བུ་གཅིག་ཏུ་བསྡུས་པ་སྟེ་བྱ་བ་སྒྲུབ་པའི་སྐབས་དང་སྦྱར་རོ་གསུང་ངོ༌། །ཁ་ཅིག་སྤྲོས་པའི་ལྷ་རྣམས་ཀྱིས་སེམས་ཅན་གྱི་དོན་བྱས་པ་སྔོན་དུ་འགྲོ་བས་ཡི་གེ་གསུམ་ལ་བསྡུས་པའོ། །ཞེས་འཆད་དེ་ཇི་ལྟར་བསྡུས་པའི་ཞེས་
འདོན་ནོ། །ནས་དང་ཇི་སྲིད་ཀྱི་དོན་ནི་མངོན་བྱང་སྒོམ་པ་ནས་རྫོགས་པའི་བར་ཞེས་པའོ། །དགུ་པ་བདུད་རྩིས་ཚིམ་པར་བྱེད་པའི་དེ་ཉིད་ནི། ཤིན་ཏུ་རྣམ་པར་དག་པའི་ཡེ་ཤེས་ཀྱི་བདག་ཉིད་ཀྱི་རྡོ་རྗེ་འཛིན་པ་མཉེས་པར་བྱེད་པ་ཡིན་ལ། དེ་ཡང་ཕྱི་ནང་གི་བདུད་རྩིས་མཆོད་པའོ། །བཅུ་པ་མྱ་ངན་ལས་འདས་པའི་དེ་ཉིད་ནི། དཀྱིལ་འཁོར་སྒོམ་པ་རྫོགས་པའི་མཐར་ལྷ་རྣམས་རང་ལ་སྡུད་པའོ། །བཅུ་གཅིག་པ་ལག་པའི་མཆོད་པའི་དེ་ཉིད་ནི། ལག་པ་ལ་མཆོད་པ་དང་ལག་པས་མཆོད་པ་གཉིས་ཡིན་ཏེ། གཞན་དུ་རྒྱས་པར་བཤད་ཟིན་ཏོ། །བཅུ་གཉིས་པ་དབང་བསྐུར་བའི་དེ་ཉིད་ནི། ཆུ་དང་ཅོད་པན་དང་རྡོ་རྗེ་དང་བདག་པོ་དང༌། མིང་དང༌། སློབ་དཔོན་དང༌། བརྟུལ་ཞུགས་དང་ལུང་བསྟན་དང༌། དབུགས་དབྱུང་དང་གཟེངས་བསྟོད་དང༌། ཆོས་བཤད་པ་དང༌། གསང་བ་དང༌། ཤེས་རབ་ཡེ་ཤེས་དང༌། བཞི་པ་སྟེ་བཅུ་བཞི་ལ་བཤད་དེ། དེས་ལྷ་དབང་བསྐུར་བ་ཡང་མཚོན་ནོ། །བཅུ་གསུམ་པ་གོ་ཆ་ཆེན་པོས་ཡང་དག་པར་བསྲུང་བའི་དེ་ཉིད་ནི། ལུས་ཀྱི་སྤྱི་བོ་ལ་སོགས་པའི་གནས་ཉེར་བཞིར་ཉི་གདན་ལ། པུ་ཛ་ལ་སོགས་པའི་ཡི་གེ་ཉེར་བཞི་ཐིག་ལེ་ཅན་འགོད་པ་ནི་གོ་ཆ་ཆེན་པོ་དང༌། དེས་མཚོན་ནས་ཡབ་ཡུམ་གྱི་གོ་ཆ་གཉིས་བཀོད་ནས་སྲུང་བའོ། །བཅུ་བཞི་པ་སྔགས་རྣམས་ཀུན་གྱིས་མཆོད་པའི་དེ་ཉིད་ནི། ལཱུ་ཨི་པས་བཤད་པ་ལྟར་ལྷ་ཀུན་གྱི་སྔགས་བཏོན་ནས་མཆོད་པ་སྟེ། ལྷ་སོ་སོའི་སྐུ་ལ་དམིགས་ནས་སོ་སོའི་སྔགས་ཟློས་པའོ། །ཁ་
ཅིག་རྐང་པ་བརྒྱད་པའི་སྔགས་ཀྱིས་བསྟོད་པ་ལ་སྔགས་མཆོད་དུ་བྱེད། གཞན་དག་ཨཱ་ལི་ཀཱ་ལི་ལ་སོགས་པའི་སྔགས་ཀྱི་དོན་དྲན་པ་ལ་འཆད་དོ། །སྔར་བཤད་པ་དེ་ལྟར་དེ་ཉིད་བཅུ་བཞིར་བསྡུས་ནས་བཤད་པ་ནི། སྔར་གྱི་ལེའུ་ལྔ་བཅུའི་དོན་མདོར་བསྡུས་ནས་ནི་ཡང་དག་པར་བཤད་པ་ཡིན་ནོ། ། གཉིས་པ་ནི། རིམ་པ་གཉིས་ཀའི་ཐུན་མོང་གི་དེ་ཉིད་ནི་བཞི་སྟེ། དབང་བསྐུར་པའི་དེ་ཉིད་ཀྱི་བྱེ་བྲག་རྒྱུད་སྣོད་རུང་དུ་བྱེད་པ་ནི་ཐོག་མར་འབྱུང་ངོ༌། །ལག་མཆོད་ཀྱི་དེ་ཉིད་ནི་དབང་གི་དུས་སུ་ཐོབ་པའི་དམ་ཚིག་དང་སྡོམ་པ་སྲུང་བ་ལ། ཐུན་མོང་ཡིན་མིན་གཉིས་ལས་ཕྱི་མ་དང༌། དེའི་ཡང་གཙོ་བོ་གཡོན་པའི་ཀུན་སྤྱོད་སྤྱི་ལ་སློབ་པ་དང༌། དེའི་ནང་ནས་ཀྱང་གཙོ་བོར་འགྱུར་བའི་དམ་ཚིག་ཡིན་ནོ། །གོས་དང་ཕྱག་རྒྱ་ལྔ་ལ་སོགས་པའི་དེ་ཉིད་དང་སྔ་མ་གཉིས་ཏེ་གསུམ་དང༌། ཤེས་རབ་ཡན་ལག་གི་དེ་ཉིད་ནི་དབང་དུས་དང༌། རིམ་གཉིས་ཀྱི་དུས་ཏེ་སྐབས་གསུམ་དུ་དགོས་ཏེ་དེ་བཞི་ནི་རིམ་པ་གཉིས་ཀའི་ཐུན་མོང་བའོ། །བསྐྱེད་རིམ་ལ་སྦྱར་ཏེ་བཤད་པ་ལ་མངོན་བརྗོད་ལས་འབྱུང་བ་ལྟར། བསྐྱེད་རིམ་མཐའ་ཡས་པ་ཅིག་བཤད་པ་སོགས་བསྐྱེད་རིམ་ཀུན་ལ་འཇུག་མོད་ཀྱང༌། འདིར་གཙོ་བོར་ཉེར་བར་མཁོ་བའི་ལོ་དྲིལ་ནག་གསུམ་གྱི་གཞུང་ལ་བརྟེན་ནས་བཤད་ན། ཕུར་བུ་དང་གུར་གྱི་དེ་ཉིད་ཀྱིས་ནི། བསྲུང་འཁོར་རྒྱས་འབྲིང་བསྡུས་གསུམ་བསྡུས་ལ། དེས་མཚོན་ནས་སྦྱོར་བ་ཚོགས་བསག་སོགས་སྒྲུབ་ཐབས་དངོས་གཞིའི་སྔོན་དུ་འགྲོ་བ་རྣམས་ཀྱང་ཤེས་དགོས་པ་ནི་མངོན་བརྗོད་སོགས་བཤད་རྒྱུད་ལས་ཤེས་སོ། །ཨཱ་ལི་ཞེས་
སོགས་ཀྱི་རྐང་པ་བཞིས་མངོན་བྱང་ལྔ་བསྟན་པར་ལྭ་བ་པས་གསུངས་པ་ནི། ཁྱད་པར་འགའ་ཡར་ཙམ་མ་གཏོགས་པ་ལོ་ནག་དྲིལ་གསུམ་གསུམ་གའི་སྒྲུབ་ཐབས་ལ་ཡང་སྦྱར་དུ་རུང་ངོ༌། །འགྲེལ་པ་གཞན་གྱི་བཤད་པ་ལྟར་ན་ཡང་དཀྱིལ་འཁོར་གྱི་ལྷ་སྐྱེད་པའི་ཡན་ལན་ལ་སྦྱོར་བ་ནི་སྔར་བཤད་པས་གོ་ནུས་ལ། སྒྲ་ནི་ནཱ་ད་དང་སོགས་ཀྱིས་ནི་བར་སྲིད་མཚོན་པའི་ཡི་གེ་གཞན་ཡང་སྡུད་ལ། འཇུག་པ་ནི་རྟེན་བརྟེན་པ་དུས་གཅིག་ཏུ་སྐྱེད་པ་ལ་ནི་ཟླ་བའི་སྟེང་དུ་བབས་པ་དང༌། རྒྱུ་རྡོར་འཛིན་ཡབ་ཡུམ་མཉམ་པར་སྦྱོར་བ་ལ་ནི་ཡབ་ཀྱི་ཞལ་ལམ། སྙིང་ག་སོགས་ནས་ཞུགས་ཏེ་ཡུམ་གྱི་པད་མར་འགྲོ་བའོ། །ནས་ཞེས་པ་ནི་དེ་ནས་བཟུང་སྟེ་ཞེས་པའོ། །བསྡུས་པའི་སྦྱོར་བ་དང་ལྡན་པའི་དེ་ཉིད་ནི་དེ་ནས་བཟུང་སྟེ་ཇི་སྲིད་དམ་ཚིག་པ་དང༌། ཡེ་ཤེས་པའི་ལྷ་གཉིས་གཅིག་ཏུ་བསྡུས་པའི་སྦྱོར་བ་དང་ལྡན་པ་དེ་སྲིད་དུ་ཞེས་པ་སྟེ། ལོ་དྲིལ་གཉིས་ཀ་ལ་སྦྱར་བས་ཆོག་གོ། ནག་པོ་པ་ལྟར་ན་སྔར་བཤད་པ་ནས་བཟུང་སྟེ། ལྷ་སོ་བདུན་དང་བྱང་ཕྱོགས་སོ་བདུན་གཅིག་ཏུ་བསྡུས་པའི་སྦྱོར་བའི་བར་ལ་བྱའོ། །དབང་བསྐུར་གྱི་ཕྱོགས་གཅིག་ལྷ་དབང་བསྐུར་ནས་རིགས་བདག་གིས་རྒྱས་གདབ་པ་ཡང་འདིར་སྦྱར་རོ། །བདུད་རྩིས་ཚིམ་བྱེད་ཀྱི་དེ་ཉིད་ནི་ནང་མཆོད་དང་གཏོར་མས་མཆོད་པ་སོགས་སོ། །མྱང་འདས་དང༌། གོ་ཆ་དང་སྔགས་མཆོད་ནི་སྔར་དང་འདྲའོ། །རྫོགས་རིམ་བསྟན་ཚུལ་ནི་དེ་ཉིད་བཅུ་བཞིའི་དོན་ཧེ་རུ་ཀ་འཁོར་བཅས་སྐྱེད་པ་འོག་ཏུ་སྟོན་པའི་སྐབས་སུ་འཆད་པར་
འགྱུར་རོ། །དེ་ཉིད་བཅུ་བཞིའི་ཆིངས་བྱས་པའི་སྟེང་ནས་མན་ངག་རྙེད་སླ་བར་སྟོན་པ་དེ་ཡང་རྩ་བཤད་ལེགས་པར་མ་སྦྱར་བ་ལས་རྙེད་པར་མི་སླ་སྟེ། བཤད་རྒྱུད་ནི་རྩ་རྒྱུད་ཀྱི་མན་ངག་ལེགས་པར་རྙེད་པའི་ཆེད་ཡིན་པའི་ཕྱིར་རོ། །དེ་སྦྱོར་བ་ཡང་ལོ་ནག་དྲིལ་གསུམ་ལྟ་བུའི་གྲུབ་ཆེན་གྱི་མན་ངག་ཤེས་པའི་བླ་མས་བཤད་པ་ལས་ཡིན་གྱི་དེ་མེད་པར་མིན་ནོ། །གསུམ་པ་ལ་གཉིས། དེ་ཉིད་བཅུ་བཞི་ལ་སྤྱོད་པའི་ཕན་ཡོན་དང༌། ལམ་འདི་ལ་མ་དད་པའི་ཉེས་དམིགས་སོ། །དང་པོ་ལ་གཉིས། འདི་ཕྱིའི་ཕན་ཡོན་སྤྱིར་བསྟན་པ་དང༌། ཁྱད་པར་དུ་འཆི་བའི་དུས་སུ་འབྱུང་བའི་ཕན་ཡོན་བསྟན་པའོ། །དང་པོ་ནི། མིའི་མཆོག་གང་ཞིག་སྔར་བཤད་པའི་དེ་ཉིད་བཅུ་བཞིའི་རིམ་གཉིས་ལ། ཀུན་ནས་སྤྱོད་པ་ནི་སྔོན་བསགས་པའི་སྡིག་པ་ཐམས་ཅད་རྣམ་པར་དག་པའི་བདག་ཉིད་དུ་འགྱུར་ཏེ། སྒྲིབ་གཉིས་ཀྱི་དྲི་མ་ཐམས་ཅད་དག་པའི་དེ་བཞིན་གཤེགས་པའི་ཡེ་ཤེས་ཀྱི་ས་ཚེ་འདིར་ཐོབ་པར་འགྱུར་རོ། །གལ་ཏེ་སྒོམ་པ་ཕུལ་དུ་བྱུང་བར་འགྲོ་བ་མེད་པས་དེ་འདྲ་བ་དེ་མ་ཐོབ་ན། དེའི་ཚེ་ཅིར་འགྱུར་ཞེ་ན། སྐྱེ་དང་སྐྱེ་བར་བདེ་བར་གཤེགས་པའི་རིགས་ཏེ་སྔགས་སྤྱོད་པའི་རིགས་ཀྱི་བདེ་འགྲོའི་རྟེན་ཁྱད་པར་ཅན་དུ་སྐྱེ་བ་དང༌། དེ་འདྲ་བའི་རིགས་ཀྱི་ཆོས་སྤྱད་པ་དང་ལྡན་པའི་རྒྱལ་པོར་སྐྱེ་བར་འགྱུར་རོ། །གལ་ཏེ་ཤིན་ཏུ་སྡིག་ཆེ་བས་ཀྱང་དེ་ཉིད་བཅུ་བཞི་གོམས་པར་བྱས་ན་དེའི་ཚེ་ཅིར་འགྱུར་ཞེ་ན། སྔོན་སོགས་ནི་མལ་གྱིས་སྔོན་བསགས་སུ་བསྒྱུར་བ་བདེ་བས། ལུས་དང་ངག་དང་ཡིད་ཀྱིས་སྔོན་ཇི་ལྟར་བསགས་པའི་སྡིག་པའི་མཚན་ཉིད་ཐམས་ཅད་དམན་པ་སྟེ་ཟད་པར་བྱས་ནས།
ས་ལ་འདོད་པ་ཀུན་གྱི་དབང་ཕྱུག་ཏུ་འགྱུར་རོ། །གང་གིས་ཟད་པར་འགྱུར་སྙམ་ན། སྒྲུབ་པ་པོ་གང་ཞིག་དེ་ཉིད་བཅུ་བཞི་པོ་འདི་ནི་རྟག་ཏུ་སྒོམ་པའི་བསམ་གཏན་དེ་ཡིས་སྡིག་པ་ཟད་པར་བྱེད་དོ། །ཞལ་ཕྱག་གི་རྣམ་པ་ཅན་གྱི་ཧེ་རུ་ཀ་བསྒོམས་པས། སྔོན་བསགས་པའི་སྡིག་པ་ཇི་ལྟར་འཛད་སྙམ་པ་ལ། དེའི་དཔེ་སྟོན་པ་ནི། དཔེར་ན་མར་གྱིས་གང་བའི་སྣོད་མི་གཙང་བའི་སྙིགས་མས་གོས་པ། མེ་ཡི་དབུས་སུ་བཞག་ན་ནི་མར་སར་སྟེང་དུ་ཞུ་བར་འགྱུར་ཞིང༌། སྣོད་ཀྱི་དྲི་མའི་སྙིགས་མ་འབྱར་བ་རྣམས་འཇིག་པ་སྟེ་གོག་ནས་མར་ཁུའི་འོག་ཏུ་གནས་པར་འགྱུར་བ་དེ་བཞིན་དུ་རང་ཉིད་ཤྲཱི་ཧེ་རུ་ཀ་ཞེས་པ་ཡི་མཚན་ཅན་དུ་སྒོམ་པ། ཞལ་ཕྱག་གི་རྣམ་པ་ཅན་དང་སྟོང་ཉིད་བསྒོམས་པ་ཉིད་ཀྱིས་སྡིག་པ་འཇིག་པ་སྟེ་ཟད་པར་འགྱུར་ཏེ། ཡིད་ལ་ཧེ་རུ་ཀའི་བསམ་གཏན་བསམས་པ་སྟེ་བསྒོམས་པ་ཙམ་གྱིས་སམ། རྩ་རྒྱུད་ཀྱི་གླེགས་བམ་ཀློག་ཅིང་ཁ་ཏོན་ཏུ་བྱེད་པ་དང༌། གླེགས་བམ་བྲིས་པ་ཡིས་ཀྱང་སྡིག་པ་དག་ནས། མཐོ་རིས་ཏེ་བདེ་འགྲོའི་རྟེན་དང་ལོངས་སྤྱོད་ཀྱི་འབྱོར་པ་ཐོབ་པར་འགྱུར་བའམ། ཡང་ན་འཁོར་ལོ་སྒྱུར་བ་འཐོབ་པར་འགྱུར་རོ། །གཉིས་པ་ནི། གལ་ཏེ་གཡེང་བས་ཚེ་འདིར་དངོས་གྲུབ་མ་གྲུབ་ན་འཆི་བའི་ཚེ་ཕན་ཡོན་ནི། ལམ་འདིའི་རྣལ་འབྱོར་པ་དང་རྣལ་འབྱོར་མ་རྣམས་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བའི་ཚེ་ནི། དཔལ་ཁྲག་འཐུང་སྟེ་ཧེ་རུ་ཀ་དང༌། སོགས་ཀྱིས་བསྡུས་པ་རྗེ་བཙུན་མ་ཕག་མོ་ལ་སོགས་པའི་དཔའ་བོ་དང་རྣལ་འབྱོར་མ་
ལག་ན་མེ་ཏོག་དང༌། བདུག་སྤོས་སྣ་ཚོགས་པ་དང༌། རྒྱལ་མཚན་དང༌། བ་དན་སྣ་ཚོགས་པ་དང༌། རོལ་མོའི་སྒྲ་ནི་སྣ་ཚོགས་པ་དང༌། ཡིད་དུ་འོང་བའི་གླུའི་མཆོད་པ་སྣ་ཚོགས་ཀྱིས་མཁའ་སྤྱོད་ཀྱི་གནས་སུ་འཁྲིད་པར་བྱེད་དོ། །འགྲེལ་པ་གསུམ་ནས་མཁའ་སྤྱོད་འོད་གསལ་ལ་བྱས་ནས་དེའི་གོ་འཕང་ལ་འགོད་པར་བཤད་པ་ནི། ངེས་དོན་གྱི་བཤད་པ་ཡིན་ཏེ། འཆི་བ་འོད་གསལ་དུ་འཆར་དུ་འཇུག་པའོ། །བཤད་སྦྱར་ལས་དོན་དམ་པར་ནི་སྔོན་གྱི་གནས་ཡོངས་སུ་བཏང་སྟེ། ཁྱད་པར་དུ་འཕགས་པའི་གནས་རྣམས་ལ་བརྟེན་ནས་རྣལ་འབྱོར་པ་འགྲོའོ། །ཞེས་སྒྲས་ཟིན་ཚོད་ཀྱི་སྟེང་ནས་བཤད་པ་ནི། དྲང་དོན་གྱི་མཁའ་སྤྱོད་དེ། དཀའ་རྒྱལ་གྱིས་མཁའ་འགྲོའི་གནས་སུ་འཁྱེར་བར་འགྱུར། ཞེས་འདོན་ཏེ་མཁའ་འགྲོ་མ་བཞུགས་པའི་གནས་མཁའ་སྤྱོད་དོ། །འདིར་མིའི་རྟེན་གྱིས་མཁའ་སྤྱོད་འགྲུབ་པ་མང་དུ་གསུངས་པའི་མཁའ་སྤྱོད་གྲུབ་པ་ནི། འདིའི་ལམ་ཚུལ་བཞིན་དུ་སྒྲུབ་པའི་སྒྲུབ་པ་པོ་མིན་ཀྱང༌། མི་འགའ་ཞིག་སྔགས་དང་རྫས་ལ་སོགས་པའི་མཐུས་ནམ་མཁའ་ལ་འགྲོ་བ་སོགས་ནུས་པ་ཙམ་ལ་མི་ཟེར་གྱི་སྔགས་སྤྱོད་པའི་རྟེན་ཁྱད་པར་ཅན་གྱི་མཁའ་འགྲོ་དང༌། མཁའ་འགྲོ་མ་རྣམས་ནམ་མཁའི་དབྱིངས་ཀྱི་གནས་ཁྱད་པར་ཅན་དུ་བཞུགས་ནས་གསང་སྔགས་མཆོག་རྣམས་སྤྱོད་པའི་གནས་ཡིན་ལ། དེར་སྒྲུབ་པ་པོ་མིའི་རྟེན་ཅན་གྱི་ལུས་མ་སྤངས་པར་བགྲོད་ནུས་པ་ནི་མཁའ་སྤྱོད་གྲུབ་པ་ཡིན་ནོ། །དེ་ཚེ་འདིར་མ་གྲུབ་ཀྱང་སྐྱེ་བ་རྟིང་མ་ཉིད་ལ་འགྲུབ་
པ་ནི། སྐྱེ་བ་གཞན་དུ་མཁའ་སྤྱོད་འགྲུབ་པ་སྟེ་དེ་འདྲ་བའི་མཁའ་སྤྱོད་ལ་རིམ་པ་དུ་མ་ཞིག་ཡོད་དོ། །ཚེ་འདིར་མཁའ་སྤྱོད་འགྲུབ་ལུགས་ཀྱང་རིམ་པ་གཉིས་ཀྱི་ལམ་གྱི་མཐུ་ཉིད་ཀྱིས་འགྲུབ་པ་དང༌། མཁའ་འགྲོ་མ་དང་དཔའ་བོའི་ཁྱད་པར་འགའ་ཞིག་གིས་དེར་དངོས་སུ་འཁྲིད་པའང་ཡོད་དོ། །དེ་བཞིན་དུ་མི་ཡུལ་གྱི་བྱེ་བྲག་གི་ས་ལ་སྤྱོད་པ། རིག་པ་འཛིན་པའི་འགྲོ་བ་དུ་མས་སྔགས་སྤྱོད་པའི་གནས་ཁྱད་པར་ཅན་ཡང་མང་དུ་ཡོད་དོ། །དེས་ན་འཆི་བ་ཞེས་པ་འདི་ནི་འཇིག་རྟེན་པའི་རྣམ་རྟོག་གིས་བཞག་པ་སྟེ། རྣལ་འབྱོར་པ་ཁྱད་པར་ཅན་རྣམས་ཀྱི་འཆི་བ་ནི་གནས་བཟང་པོ་གཅིག་བཏང་ནས་བཟང་པོ་གཅིག་ཏུ་འཇུག་པ་ཡིན་ལ། དེ་ལྟ་ན་ཚེ་འདིར་ཁང་བཟང་གཅིག་ནས་གཅིག་ཏུ་བགྲོད་པ་ལ་འཆི་བ་ཞེས་མི་བརྗོད་པ་བཞིན་ནོ། །དེ་འདྲ་བའི་ཡོན་ཏན་བཤད་པའི་དཔའ་བོ་ཆེན་པོ་དཔལ་བདེ་མཆོག་དང༌། ཐོད་པའི་དུམ་བུ་སོགས་དང༌། རྣལ་འབྱོར་མ་རབ་གཏུམ་མ་ལ་སོགས་པ་དེ་དག་ས་ཡི་སྟེང་ན་ནི་རྙེད་པར་དཀའ་འོ་ཞེས་འཆད་པ་ནི། དཔའ་བོ་དང་རྣལ་འབྱོར་མ་དེ་འདྲ་རྣམས་སྒོམ་པ་ལ་བརྩོན་པ་རྣམས་ཤིན་ཏུ་རྙེད་དཀའ་བའི་དོན་ཏེ། དེ་རྙེད་དཀའ་བར་བསྟན་པས། འདི་འདྲ་བའི་ལམ་ལ་ཉམས་ལེན་བྱ་ས་ཡོད་པའི་དུས་སུ་ནི། ཤིན་ཏུ་རྙེད་དཀའ་བ་ཤེས་པར་གྱིས་ལ། ལམ་འདི་ལ་ཐོས་བསམ་སྒོམ་པ་ལ་འབད་པ་བྱོས་ཤིག་ཅེས་སྟོན་ནོ། །གཉིས་པ་ནི། དཔལ་ལྡན་ཧེ་རུ་ཀའི་རྒྱུད་ཆེན་པོ་
གང་གིས་ཤེས་ནས་མ་དད་པ་དེ་ལ་དངོས་གྲུབ་ཀུན་གྱིས་དབུལ་པོ་སྟེ་དབུལ་བ་དང༌། ངན་འགྲོ་ལ་སོགས་པའི་སྡུག་བསྔལ་གྱིས་གདུངས་པར་རྟག་ཏུ་འབྱུང་བར་འགྱུར་ན། མི་ཤེས་པར་མ་དད་པར་བྱེད་པ་ལྟ་ཅི་སྨྲོས། དེའི་ཕྱིར་རྒྱུད་ཆེན་པོ་འདི་ཤེས་པར་བྱ་བ་ལ་འབད་ཅིང༌། ཤེས་ནས་ཀྱང་ཤིན་ཏུ་གུས་པར་བྱའོ། །བཞི་པ་ནི། དེ་ཉིད་བཅུ་བཞིའི་དོན་བསྒོམས་པའི་ཕན་ཡོན་དང༌། མ་དད་པའི་ཉེས་དམིགས་ཤིན་ཏུ་ཆེ་ན། དེའི་དོན་སྒོམ་པའི་ཚུལ་ཇི་ལྟར་བྱ་སྙམ་ན། ཤྲཱི་ཧེ་རུ་ཀ་རྒྱལ་པོ་ཆེན་པོའི་གོ་འཕང་མཆོག་བསྒྲུབ་པའི་ཐབས་དེ་ཉིད་བཅུ་བཞིའི་དོན་ནི་བསྒོམ་པར་བྱའོ་ཞེས་འོག་ཏུ་སྦྲེལ་ལོ། །ཇི་ལྟར་དུ་བསྒོམ་ཞེ་ན། མགུལ་རྒྱན་དང༌། ཕྱག་དང་ཞབས་ཀྱི་གདུ་བུ་དང༌། དཔུང་པ་གཉིས་ཀྱི་རྒྱན་དང༌། རྣ་བ་གཉིས་ཀྱི་རྒྱན་དང༌། ཚངས་པའི་སྐུད་པ་དང༌། མགོ་བོ་རློན་པའི་ཕྲེང་བའི་དོ་ཤལ་དང༌། ཐོད་སྐམ་གྱི་དབུ་རྒྱན་དང༌། སྐེ་རགས་དྲིལ་བུ་གཡེར་ཁའི་སིལ་སིལ་གྱི་སྒྲ་སྒྲོགས་པ་དང་བཅས་པར་ཧེ་རུ་ཀ་ལ་སོགས་པ་བསྒོམ་པར་བྱའོ། །འོ་ན་སྐྱེད་ཆོག་ཇི་ལྟ་བུས་བསྐྱེད་པའི་ལྷ་སྒོམ་སྙམ་ན། ལེའུ་སོ་གཉིས་པར་བཤད་པའི་འབྱུང་བ་རིམ་བརྩེགས་དང༌། རི་རབ་ཀྱི་སྟེང་དུ་སྣ་ཚོགས་པདྨ་ཆེ་བ་དང༌། དེའི་དབུས་སུ་སྣ་ཚོགས་རྡོ་རྗེ་དང༌། དེའི་སྟེང་དུ་སྣ་ཚོགས་པདྨ་ཆུང་བ་དང༌། དེའི་ལྟེ་བར་ཨཱ་ལི་བཅུ་དྲུག་པ་ཕྲག་གཉིས་གཡས་སྐོར་དང་གཡོན་སྐོར་དུ་བཀོད་པ་དང༌། ཀཱ་ལི་བཞི་བཅུ་པ་ཕྲག་གཉིས་གཡས་སྐོར་དང་གཡོན་སྐོར་དུ་བཀོད་
པ་གཉིས་ཡོངས་སུ་གྱུར་པ་ལས། ཟླ་བ་དང་ས་བོན་དང་དེ་རྣམས་གཅིག་ཏུ་འདྲེས་པ་ལས་རྟེན་དང་བརྟེན་པ་རྣམས་སྐྱེས་པ་སྟེ། རྟེན་དང་བརྟེན་པ་གཉིས་ཀ་དུས་གཅིག་ཏུ་རྫོགས་པ་ལཱུ་ཨི་པའི་ལུགས་སོ། །རྟེན་དང་བརྟེན་པ་སྔ་ཕྱི་བར་བྱེད་ན་རི་རབ་ཀྱི་སྟེང་དུ་རྟེན་སྔོན་དུ་སྐྱེད་པའི་གཞལ་ཡས་ཁང་གི་དབུས་སུ། ཨཱ་ལི་ཀཱ་ལི་སོགས་ཀྱི་མངོན་བྱང་ལྔ་ལས་ཧེ་རུ་ཀ་སྐྱེད་པ་སྟེ། མངོན་བརྗོད་ལས་གསུངས་པའི་སྒྲུབ་ཐབས་དུ་མ་ཞིག་ལ་སྦྱར་དགོས་པས། ལོ་ནག་གཉིས་ཁོ་ན་ལ་སྦྱོར་བ་མིན་ལ། འོན་ཀྱང་སྐབས་སུ་གང་ཉེ་བར་མཁོ་བ་ཕྱོགས་གཅིག་པ་ལའང་སྦྱར་རོ། །དེ་ལྟར་མངོན་བྱང་ལས་སྐྱེས་པའི་ཧེ་རུ་ཀ་ནི་དཀར་མོ་སྟེ་ལྷ་མོ་ཨུ་མ་དང་དེའི་བདག་པོ་དྲག་པོ་དབང་ཕྱུག་གཉིས་ཞབས་འོག་ཏུ་རྣམ་པར་གནོན་ཞིང༌། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཕག་མོའི་སྐུ་ལ་འཁྱུད་ཅིང༌། ཉི་ཤུ་རྩ་བཞིའི་ཕྱེད་བཅུ་གཉིས་ནི། སྤྱན་བཅུ་གཉིས་དང་མ་མོ་བཅུ་གཉིས་ལ་འཆད་པ་ཡོད་ཀྱང༌། ཕྱག་ལ་འཆད་པ་ལེགས་ཏེ་ཀུན་སྤྱོད་དང་མཐུན་པའི་ཕྱིར་རོ། །དེ་འདྲ་བའི་ཕྱག་དང་ལྡན་པ་སྟེ་ཕྱག་མཚན་ལྷག་མ་ནི་བཤད་རྒྱུད་ལས་གསུངས་པ་ལཱུ་ཨི་པ་དང༌། དྲིལ་བུ་པས་མཛད་པའི་སྒྲུབ་ཐབས་དང་མཐུན་པར་བཀོད་པའི་མངོན་རྟོགས་སུ་ཤེས་པར་བྱའོ། །སྐུ་ལ་འཁྱུད་ཅེས་པས་ཡུམ་ཡང་སྟོན་པས་གཙོ་བོ་ཡབ་ཡུམ་གཉིས་དང༌། དཔའ་བོ་དང་རྣལ་འབྱོར་མའི་ཚོགས་ཀྱིས་ཡོངས་སུ་བསྐོར་བའི་
དཀྱིལ་འཁོར་བསྒོམ་པར་བྱའོ། །ལོ་ཆེན་གྱིས། དཔའ་བོ་རྣལ་འབྱོར་མ་ཚོགས་བསྐོར། ཞེས་བསྒྱུར་རོ། །ཐོད་པའི་དུམ་བུ་ལ་སོགས་པའི་དཔའ་བོ་ཉེར་བཞི་པོ་ཀུན་དང༌། མཁའ་འགྲོ་མ་ལ་སོགས་པའི་རྣལ་འབྱོར་མ་སོ་དྲུག་པོའི་འཁོར་དང་བཅས་པའི་དབུས་སུ། གཙོ་བོ་ཡབ་ཡུམ་སྙོམས་པར་འཇུག་པའི་སྦྱོར་བ་དང་ལྡན་པས་ལྷ་ཐམས་ཅད་ལ་དགྱེས་པ་སྐྱེད་པའི་བདེ་སྟོང་གཉིས་སུ་མེད་པར་གྱུར་པ། འཁོར་གྱི་ལྷ་རྣམས་འབྱིན་པ་སྟེ་སྦྲུལ་པ་དང༌། སླར་ཡང་དེ་རྣམས་རང་ལ་སྡུད་པར་མཛད་པ་ཡིན་ནོ། །དེ་ལྟར་ན་ཐོག་མར་དབང་རྫོགས་པ་ཐོབ་པའི་སྒྲུབ་པ་པོས་བསྲུང་འཁོར་དང་སྦྱོར་བ་ཚོགས་བསགས་བྱས་ཏེ་རྟེན་དང་བརྟེན་པའི་ལྷ་རྫོགས་པར་བསྐྱེད་ནས་སྒོམ་པ་དང༌། དམ་ཚིག་སྲུང་བ་དང༌། མཆོད་པ་སོགས་ནི་དེ་ཉིད་བཅུ་བཞིའི་དོན་ཡིན་ལ། འདིར་ཡང་དེ་དག་གི་གཙོ་བོ་རྣམས་སྟོན་པས། འདི་ནི་དེ་ཉིད་བཅུ་བཞིའི་དོན་གྱི་གཙོ་བོ་སྒོམ་པ་ཡིན་ནོ། །དེ་འདྲ་བ་དེ་ལ་འབྱུང་བ་རིམ་བརྩེགས་སོགས་རྟེན་གྱི་ངེས་དོན་དང༌། མངོན་བྱང་དང་དེ་ལས་ཧེ་རུ་ཀ་རྫོགས་པ་སོགས་ཀྱི་ངེས་དོན་ཡོད་པ་ནི། ལེའུ་དང་པོར་རྒྱས་པར་བཤད་ཟིན་ཏོ། །ཁྱད་པར་དུ་སྒྱུ་ལུས་ཀྱི་ཏིང་ངེ་འཛིན་གྱིས་ཟུང་འཇུག་སྒྲུབ་པ་ནི། སྒྱུ་མའི་སྐུ་འོད་གསལ་དུ་ཞུགས་པ་ལས་སྒྲུབ་པ་ཡིན་ཏེ། མཐའ་ཆོད་པར་ཤེས་པར་འདོད་ན་དཔལ་གསང་བ་འདུས་པ་ལས་ཤེས་པར་བྱའོ། །ལྔ་པ་ནི། ཆོས་སྟོན་པའི་སྐུའི་བཀོད་པ་དང༌། བརྗོད་བྱ་མི་འདྲ་བ་སྣ་ཚོགས་པ་ལ་མོས་པའི་སེམས་ཅན་ཏེ་གདུལ་བྱ་དུ་མ་ལ་སྤྱོད་པ་མི་འདྲ་བ་སྣ་
ཚོགས་པ་སངས་རྒྱས་ཀྱིས་སྟོན་པར་མཛད་དེ། ཐབས་སྣ་ཚོགས་པའི་ཚུལ་གྱིས་གདུལ་བར་བྱ་ལ། རང་གི་དབང་པོ་དང་འཚམ་པའི་ཐབས་ནི་སྣ་ཚོགས་པ་སྟོན་པ་ཡིན་ནོ། །དེ་ལྟར་ཤིན་ཏུ་ཟབ་མོའི་ཆོས་ནི་སྟོན་པ་སྟེ་བསྟན་པ་ལ། གལ་ཏེ་མོས་པ་ཐོབ་པར་མ་གྱུར་ཀྱང༌། ཆོས་དེ་ལ་སྨོད་པ་དག་ཏུ་མི་བྱ་སྟེ། གསུང་རབ་ཀྱི་བརྗོད་པར་བྱ་བའི་ཆོས་ཟབ་མོ་ཉིད་བདག་འདྲ་བས་བསམ་གྱིས་མི་ཁྱབ་བོ་སྙམ་དུ་དྲན་པར་བྱའོ། །ཐམས་ཅད་ལ་མོས་པ་མཉམ་པོ་སྐྱེ་བ་དཀའ་བས། མོས་པ་དེ་འདྲ་བ་མ་སྐྱེས་ཀྱང་མི་སྨོད་པར་བཏང་སྙོམས་སུ་བཞག་ན་ཉེས་པ་མེད་པར་གསུངས་ཏེ། མདོ་སྡེའི་རྒྱན་ལས། ཡིད་ཀྱི་ཉེས་པའི་རང་བཞིན་གདུག་པ་སྟེ། །མི་རིགས་པ་ཡི་གཟུགས་ལའང་མི་རིགས་ན། །ཐེ་ཚོམ་ཟ་བའི་ཆོས་ལ་སྨོས་ཅི་དགོས། །དེ་ཕྱིར་བཏང་སྙོམས་བཞག་ལེགས་ཉེས་པ་མེད། ཅེས་དང༌། རིན་ཆེན་ཕྲེང་བ་ལས་ཀྱང༌། དེ་བཞིན་གཤེགས་དགོངས་གསུངས་པ་རྣམས། ཤེས་པ་སླ་མིན་དེ་ཡི་ཕྱིར། །ཐེག་གཅིག་ཐེག་པ་གསུམ་གསུངས་པ། །བཏང་སྙོམས་ཀྱིས་ནི་བདག་བསྲུང་བྱ། །བཏང་སྙོམས་ཀྱིས་ནི་སྡིག་མི་འགྱུར། །སྡང་པས་སྡིག་འགྱུར་དགེ་མི་འགྱུར། ཞེས་གསུངས་སོ། །བསམ་གྱིས་མི་ཁྱབ་པ་ཇི་ལྟར་དྲན་པར་བྱ་ན། གསང་ཆེན་འདིར་བདག་སོ་སོ་སྐྱེ་བོའི་ཡུལ་མིན་པ་གང་གིས་ན། བདག་གིས་ཆོས་རྣམས་ཀྱི་ཆོས་ཉིད་དེ་ངང་ཚུལ་ཇི་ལྟར་ཡིན་པ་མི་ཤེས་པ་ཡིན་ལ། རྫོགས་པའི་སངས་རྒྱས་དང་སངས་རྒྱས་
དེ་ཡི་སྲས་ནི་བདག་ཉིད་ཆེན་པོ་ས་ཐོབ་པ་རྣམས་ཀྱིས་མཁྱེན་ནོ་སྙམ་དུ་བསམ་པར་བྱའོ། །བྱང་ས་ལས་ཀྱང༌། བྱང་ཆུབ་སེམས་དཔའ་ཟབ་ཅིང་མཆོག་ཏུ་ཟབ་པའི་གནས་དག་ཐོས་ནས། སེམས་མོས་པར་མ་གྱུར་ན། དེ་ལ་བྱང་ཆུབ་སེམས་དཔའ་དད་པ་དང་གཡོ་མེད་པས། འདི་ལྟར་བདག་ནི་ལོང་བར་གྱུར་ཏེ་མིག་མེད་ལ། དེ་བཞིན་གཤེགས་པའི་སྤྱན་གྱིས་རྗེས་སུ་སྤྱོད་པར་ཟད་པས། དེ་བཞིན་གཤེགས་པས་དགོངས་ཏེ་གསུངས་པ་སྤང་བ་ནི། བདག་གི་ཆ་མ་ཡིན་ནོ་ཞེས་ཡང་དག་པར་བསླབ་པར་བྱའོ། །དེ་ལྟར་བྱང་ཆུབ་སེམས་དཔའ་དེས་བདག་ཉིད་ནི་མི་ཤེས་པར་བརྩིས་ལ། དེ་བཞིན་གཤེགས་པ་ཉིད་ཆོས་དེ་དག་ལ་ལྐོག་ཏུ་མ་གྱུར་པར་ཡང་དག་པར་བལྟ་ན། དེ་ལྟ་ན་ཡང་དག་པར་ཞུགས་པ་ཡིན་ནོ། ཞེས་གསུངས་ཏེ། དགོངས་ཏེ་གསུངས་པ་ཡིན་ནམ་མིན་ཡང་རུང་སྟེ། ཆོས་སྤོང་བའི་ལས་ཀྱི་སྒྲིབ་པ་མི་འཛིན་པའི་ཐབས་མཆོག་ཏུ་གྱུར་པ་ཞིག་འདུག་སྟེ། འོན་ཀྱང་ཆོས་སྤོང་བའི་ལས་ཀྱི་སྒྲིབ་པ་ནི་ཤིན་ཏུ་ཕྲའོ། ཞེས་རྟོགས་དཀའ་བར་གསུངས་པ་དེ་ལྟའི་དུས་སུ་ཡང་མང་དུ་སྣང་བས་ཆོས་སྤོང་ལེགས་པར་ངོས་ཟིན་པར་བྱས་ལ། དེས་མ་གོས་པ་ལ་འབད་པར་བྱའོ། །བསམ་གྱིས་མི་ཁྱབ་པའི་རྒྱུ་མཚན་ནི། སངས་རྒྱས་རྣམས་ནི་བྱུང་བ་གྱུར་ཏམ། མ་བྱུང་ན་ཡང་རུང་སྟེ་རྣམ་པ་ཀུན་ཏུ་ཆོས་ཉིད་ནི་འཕེལ་བ་དང༌། བྲི་བ་སྤངས་བས་གནས་པ་ཡིན་པས་བསམ་གྱིས་མི་ཁྱབ་པ་ཡིན་ནོ། །འདིར་ཆོས་ཉིད་ཅེས་པ་གཤིས་ཡིན་ལུགས་ལ་བྱས་ན། ཇི་
སྙེད་པ་སྟོན་པའི་གསུང་རབ་ཟབ་མོ་རྣམས་སྤང་དུ་མི་རུང་བའི་རྒྱུ་མཚན་དུ་མི་འགྲོ་ལ། གཞན་ཡང་ཆོས་ཉིད་སྐྱེ་འགག་མེད་པར་གནས་པར་ཡང་ཆོས་ཉིད་སྟོན་པ་མི་སྤོང་པའི་རྒྱུ་མཚན་དུ་འབྲེལ་པོ་མི་འོང་ངོ༌། །དེས་ན་ཇི་ལྟ་ཇི་སྙེད་སྟོན་པ་གཉིས་ཀ་མི་སྤོང་བའི་རྒྱུ་མཚན་དུ་བྱ་ལ། དེ་ཡང་གསུང་རབ་ལས་འདི་ལས་འདི་འབྱུང་ཞིང༌། འདི་ལས་འདི་མི་འབྱུང་བ་དང༌། འདི་འདི་ལྟར་ཡིན་མིན་ཞེས་གསུངས་པ་རྣམས་ནི། དེ་ལས་འཕེལ་བ་སྟེ་ལྷག་པ་དང༌། བྲི་བ་སྟེ་ཆད་པ་མེད་པར། ཆོས་དེ་རྣམས་ཀྱི་ཆོས་ཉིད་དེ་དང་ཚུལ་ཇི་ལྟར་གནས་པ་ཙམ་ཞིག་བཤད་པར་ཟད་ལ། དེ་ཀུན་ཀྱང་བདག་གི་སྤྱོད་ཡུལ་མིན་པས་བསམ་གྱིས་མི་ཁྱབ་ཅེས་པའོ། །བདག་གིས་མ་ཤེས་པ་དང་སངས་རྒྱས་ཀྱིས་མཁྱེན་ནོ་ཞེས་དེ་ལྟར་རྣམ་པར་བཞག་པ་བྱས་ནས་ཀྱང༌། འཇིག་རྟེན་པ་ཀུན་ཏེ་གདུལ་བྱའི་ཕྱིར་དུ་གསུངས་པ་རྣམས་ལ་ཡོད་དེ་གཏན་མི་སྨད་དོ། །གདུལ་བྱའི་འཇིག་རྟེན་དེ་ཡི་བགྲོད་པ་སྟེ་འཇུག་པ་བསམ་ཡས་ཤིང༌། དེ་དང་མཐུན་པར་འཇུག་པའི་སངས་རྒྱས་ཀྱི་རོལ་པ་སྟེ་རྣམ་འཕྲུལ་གྱི་མཛད་པ་ཡང་བསམ་གྱིས་མི་ཁྱབ་པའི་ཕྱིར་རོ། །གདུལ་བྱའི་འཇུག་པ་དང་བསྟུན་ནས་གསུངས་པའི་ཆོས་ཀྱང་ཇི་ལྟ་བུ་སྙམ་ན། མདོ་སྡེ་དང་རྒྱུད་སྡེའི་ཕྱོགས་གཉིས་ལས་མདོ་སྡེ་ནི་རྒྱ་ཆེར་རོལ་པ་སོགས་ཏེ། ཕྱིའི་སྡེ་སྣོད་གསུམ་མོ། །རྒྱུད་སྡེ་ལ་བྱ་བའི་རྒྱུད་ནི་དཔའ་བོ་གཅིག་གྲུབ་སོགས་སོ། །སྤྱོད་པའི་རྒྱུད་ནི་འབྱུང་པོ་གདུལ་བྱེད་སོགས་སོ།
ཞེས་འཆད་མོད་ཀྱང་རྣམ་སྣང་མངོན་བྱང་ལ་སོགས་པའོ། །རྣལ་འབྱོར་གྱི་རྒྱུད་ནི་དེ་ཉིད་བསྡུས་པ་ལ་སོགས་པའོ། །གསང་བའི་རྒྱུད་ཀྱི་མཐའ་ནི་རྣལ་འབྱོར་བླ་མེད་ཀྱི་རྒྱུད་རྣམས་སོ། །དེ་རྣམས་ཀྱི་དབྱེ་བས་ཕྱེ་བ་ཉིད་ནི། གདུལ་བྱའི་སེམས་ཅན་རང་རང་གི་མོས་པས་ལམ་ལ་འཇུག་པ་རྣམས། རང་གི་ལམ་དེ་དང་དེ་ལ་ཇི་ལྟར་དགའ་བ་བཞིན་དུ་གསུངས་པ་རྣམས་ཏེ་དེ་རྣམས་ལ་མི་སྨད་པའོ། །བོད་ཁ་ཅིག་རྒྱུད་སྡེ་གསུམ་སྔར་ལྟར་དང༌། གསང་བས་རྣལ་འབྱོར་ཕ་བླ་མེད་དང༌། གསང་མཐས་མ་བླ་མེད་དང་དབྱེ་བས་མའི་ཡང་མ་བླ་མེད་བདེ་མཆོག་བསྟན་པ་དང༌། དེ་ལྟར་རྒྱུད་སྡེ་དྲུག་བྱེད་པ་ཡང་ལྭ་བ་པའི་ལུགས་སོ་ཞེས་པ་ནི་གཏན་མི་རིགས་ཏེ། དབྱེ་བ་ཞེས་པའི་དོན་གོང་གི་དེ་རྣམས་སུ་དབྱེ་ཞེས་པ་ཡིན་པས། དེའི་བཤད་པ་ཡི་གེའི་དོན་ལ་ཡང་མ་ཞུགས་ལ། གསང་མཐའ་ཞེས་པ་ནི་གསང་སྔགས་ཀྱི་མཐར་ཐུག་བླ་མེད་སྟོན་པས། རྒྱུད་བཞིར་འབྱེད་པའི་དོན་ཡིན་པའི་ཕྱིར་དང༌། འགྲེལ་པ་སུས་ཀྱང་དེ་ལྟར་བཤད་པ་མེད་པའི་ཕྱིར་དང༌། ལྭ་བ་པའི་གཞུང་གང་ནས་ཀྱང་དེ་ལྟར་བཤད་པ་མེད་པའི་ཕྱིར་རོ། །བྷ་བས། དེ་དང་དེ་ལ་དགའ་བ་ཡིན། ཞེས་བཏོན་ནས་རྒྱུད་ཐམས་ཅད་རྫོགས་པར་གསུངས་པ་ལ། སྡུད་པ་པོ་ལ་སོགས་པ་ཐམས་ཅད་ཀྱིས་མངོན་པར་བསྟོད་དོ་ཞེས་པའི་དོན་དུ་འཆད་པ་ནི། འདི་ལ་གཞུང་མི་འདྲ་བ་མང་དུ་འདུག་པས་ཚིག་རྐང་དེའི་གོང་མའི་
གཞུང་གཞན་ཞིག་ཡོད་ན་མ་གཏོགས་པ། བོད་དཔེ་བཞིན་དུ་ཡོད་ན་མི་འགྲིག་གོ། དེ་ལྟར་ན་ལེའུ་དང་པོས་མདོར་བསྟན་པ་ཞེ་དགུས་རྒྱས་པར་བཤད་པའི་དོན་ང་གཅིག་པས་བསྐྱེད་རྫོགས་ཀྱིས་ལམ་གྱི་རིམ་པ་གཅིག་ཏུ་བསྡུས་པ་ལ་ཐོས་བསམ་སྒོམ་གསུམ་བྱས་ལ། དཔལ་བདེ་མཆོག་གི་བསྟན་པ་རང་གཞན་གྱི་རྒྱུད་ལ་རྒྱས་པར་བྱའོ། །གསུམ་པ་ནི། དཔལ་ཧེ་རུ་ཀ་ཞེས་མངོན་པར་བརྗོད་པའི་རྩ་བའི་རྒྱུད་རྒྱས་པ་རྒྱུད་ཀྱི་རྒྱལ་པོ་ཤོ་ལོ་ཀ་འབུམ་པའི་ནང་ན་གནས་པ་སྟེ་དེ་ལས་བཏུས་པ། རྣལ་འབྱོར་མའི་རྒྱུད་ཐམས་ཅད་ཀྱི་བླ་མ་སྟེ་གོང་མ། དཔལ་ཧེ་རུ་ཀ་དཔའ་བོ་ཆེན་པོ་ཀླགས་པས་འགྲུབ་པ་ནི། རྒྱུད་ཀླགས་པས་ཀྱང་སངས་རྒྱས་མྱུར་དུ་འགྲུབ་པའོ། །ཐམས་ཅད་དུ་གཞན་གྱིས་མི་ཐུབ་པ་ནི་ཐེག་པ་གཞན་དང་རྒྱུད་སྡེ་འོག་མས་མི་ཐུབ་པ་སྟེ། དེ་རྣམས་ཐམས་ཅད་ཟིལ་གྱིས་གནོན་པའོ། །གདོད་ནས་གྲུབ་པ་ནི་ཐོག་མ་མེད་པ་ནས་སངས་རྒྱས་ཀྱི་གོ་འཕང་མྱུར་དུ་སྟེར་བར་གྲུབ་པ་སྟེ་གནས་པ་རྩ་རྒྱུད་རྒྱས་པའི་རྒྱུད་ཕྱི་མའོ། །མཚན་བསྡུ་ན་དཔལ་ཧེ་རུ་ཀ་འཁོར་ལོ་སྡོམ་པ་ཞེས་བྱ་བ། རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོ་ལས། ལེའུ་ལྔ་བཅུ་རྩ་གཅིག་པ་རྫོགས་སོ།། །།དཔལ་འཁོར་ལོ་སྡོམ་པར་བརྗོད་པ་བདེ་མཆོག་བསྡུས་པའི་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ལས། ལེའུ་ལྔ་བཅུ་རྩ་གཅིག་པའི་བཤད་པའོ།། །།བཞི་པ་
མཇུག་གི་དོན་ལ་གཉིས། གཞུང་ཡོངས་སུ་རྫོགས་པའི་ཚུལ་དང༌། བོད་དུ་གང་གིས་བསྒྱུར་བའི་ཚུལ་ལོ། །དང་པོ་ནི། དཔལ་ཧེ་རུ་ཤློ་ཀ་འབུམ་གྱི་ནང་ནས་ཕྱུང་བ་ཕྱག་རྒྱ་ཆེན་པོ་མཆོག་གི་དངོས་གྲུབ་སྒྲུབ་པའི་རྟོག་པ། དངོས་གྲུབ་དེ་ཚེ་འདི་ཉིད་ལ་སྒྲུབ་པས་རྨད་དུ་བྱུང་བ་མཁས་པ་རྣམས་ཀྱི་ཡིད་ངོ་མཚར་དང་བཅས་པར་བྱེད་པ་བསྟན་བཅོས་ཐམས་ཅད་ཀྱི་རྒྱལ་པོ་སྟེ་གཙོ་བོ་དཔལ་ཧེ་རུ་ཀ་དཔའ་བོ་ཆེན་པོ་ཀླགས་པས་གྲུབ་པ་གཞན་ཐམས་ཅད་ཀྱིས་མི་ཐུབ་པ། གདོད་ནས་གྲུབ་པའི་བླ་མ་ཉུང་ངུའི་རྩ་རྒྱུད་ལེའུ་ལྔ་བཅུ་རྩ་གཅིག་པ་རྫོགས་པར་གྲུབ་པ་ཡིན་ནོ། །གཉིས་པ་ནི། རྒྱ་གར་གྱི་མཁན་པོ་པདྨ་ཀ་ར་ཝར་མ་སྟེ་པདྨ་བྱེད་པའི་གོ་ཆ་དང༌། ཚིག་དོན་གཉིས་ཀའི་ཞུ་ཆེན་གྱི་ལོ་ཙཱ་བ་ནི་ལོ་ཀ་ནི་འཇིག་རྟེན་དང༌། ཙྪན་དོ་ཧ་ནི་འདུན་པ་སྟེ་འཇིག་རྟེན་འདུན་པ་ལ་བཤད་པ་ལྟར་རོ། །དེ་འདྲ་བའི་དགེ་སློང་རིན་ཆེན་བཟང་པོས་རྒྱ་སྐད་ལས། བོད་ཀྱི་སྐད་དུ་བསྒྱུར་ཞིང་སྟེ་གཞི་འགྱུར་མཛད་པ་ལ། ཚིག་དོན་གྱི་སྒོ་ནས་ཞུས་དག་བྱས་ཏེ། འཆད་ཉན་གྱིས་གཏན་ལ་ཕབ་པའོ། །དེའི་རྗེས་སུ་རྒྱ་གར་གྱི་མཁན་པོ་སྦས་པའི་ཉི་མ་སྟེ་ཉི་མ་སྦས་པ་དང༌། བོད་ཀྱི་ལོ་ཙཱ་བ་རྗེས་འགོས་ལྷས་བཙས་ཀྱིས་སློབ་དཔོན་ཆེན་པོ་ལྭ་བ་པའི་འགྲེལ་བ་དང་བསྟུན་ནས་ལོ་ཆེན་གྱི་འགྱུར་བཅོས་པའོ། །ཡང་སླད་ནས་རྒྱ་གར་གྱི་མཁན་པོ་སུ་མ་ཏི་ཀཱིར་ཏི་དང༌། བོད་ཀྱི་ལོ་ཙཱ་བ་མཁས་པ་ཆེན་པོ་མར་པ་དོ་བ་ཞེས་གྲགས་པ་མར་པ་ཆོས་ཀྱི་དབང་ཕྱུག་གིས་འགོས་འགྱུར་ལ་ཞུ་ཏིག་
སྟེ་ཞུས་དག་བགྱིས་ཏེ་འཆད་ཉན་གྱིས་གཏན་ལ་ཕབ་པའོ། །༈ དཔལ་ལྡན་རྒྱུད་སྡེའི་འཁོར་གྱི་དབུས་ན་ཡོན་ཏན་བྱེ་བའི་དཔལ་གྱིས་ལྷག་གེར་འབར། །རྣམ་དག་དབང་དང་དམ་ཚིག་ས་ཆེན་ལ་གནས་རིམ་གཉིས་སྲིད་ལ་དབང་བསྒྱུར་བས། །དངོས་གྲུབ་གཉིས་ཀྱི་དགའ་སྟོན་ཅི་ཡང་རྒྱས་པས་ཡ་མཚན་དགའ་བ་སྐྱེད་བྱེད་པ། །རྣལ་འབྱོར་དབང་ཕྱུག་བྱེ་བའི་འཇུག་ངོགས་དེ་ནི་རྒྱུད་ཀྱི་རྒྱལ་པོ་འཁོར་ལོ་སྡོམ། །འདི་ཡི་ཤིན་ཏུ་ཟབ་པའི་དཀའ་བའི་གནས། །རྣལ་འབྱོར་མ་ཡི་བརྡ་ཡིས་བཅིངས་ནའང༌། །དཔའ་བོ་ཉིད་ཀྱིས་རང་གི་འགྲེལ་པ་མཆོག །བཤད་རྒྱུད་དུ་མས་ཤིན་ཏུ་གསལ་བར་མཛད། །དེ་ནས་ཚུལ་འདི་ཇི་བཞིན་གཟིགས་པ་ལས། །གོ་འཕང་མཐོ་བར་གཤེགས་པའི་གྲུབ་ཆེན་དང༌། །གཞན་ཡང་རྒྱ་གར་མཁས་པ་དུ་མས་ཀྱང༌། །གྲུབ་ཆེན་སོ་སོའི་མན་ངག་བཞིན་དུ་ཕྱེ། །གང་གི་གྲགས་པ་རྒྱུ་སྐར་བདག་པོའི་འོད། །རྒྱ་བོད་མཁས་པའི་མདུན་ས་ཀུན་དའི་ཚལ། ། རབ་ཏུ་འགེངས་བྱེད་ནཱ་རོ་ཏ་པཱ་ཞེས། །དེ་ཡི་དྲི་མེད་ལུགས་བཟང་ལས་འོངས་པ། །གངས་ཅན་གདུལ་བྱ་རྣམས་ཀྱི་མིག་ཏུ་གྱུར། །སྐད་གཉིས་སྨྲ་བའི་དབང་པོ་རྣམ་གཉིས་ཀྱི། །ལེགས་པར་བཤད་པའི་སྲོལ་ལ་རབ་བརྟེན་ཞིང༌། །རྩོད་དུས་ཐམས་ཅད་མཁྱེན་པ་ལས་བརྒྱུད་པའི། །རྣམ་བཤད་འདི་ནི་རྒྱ་བོད་མཁས་པ་ཡི། །
ལེགས་བཤད་ཀུན་གྱི་ཆུ་ཀླུང་གཅིག་འདུས་ཤིང༌། །དངོས་གྲུབ་གཉིས་ཀྱི་རིན་ཆེན་གཏེར་གྱུར་པས། །སྐལ་ལྡན་ཀླུ་དབང་རྣམས་ཀྱི་ཕུན་ཚོགས་གཞི། །དཔལ་ལྡན་ལཱུ་ཨི་པ་དང་དྲིལ་བུ་པ། །ནག་པོ་སྤྱོད་པའི་གདམས་ངག་ལ་བརྟེན་ནས། །བཤད་པའི་རྒྱུད་ཀྱིས་རྩ་རྒྱུད་བཤད་པ་ན། །རྩ་རྒྱུད་གདམས་པའི་མཆོག་ཏུ་འཆར་བ་དང༌། །དྲི་མེད་དབང་དང་དམ་ཚིག་ལ་གནས་ནས། །རིམ་གཉིས་ལམ་གྱིས་ལེགས་པར་བགྲོད་ཚུལ་དང༌། །བགྲོད་ལས་དངོས་གྲུབ་མཐའ་ཡས་འགྲུབ་ཚུལ་གྱིས། །རྡོ་རྗེ་འཆང་གི་ས་རུ་བགྲོད་ཚུལ་རྣམས། །རྒྱུད་ལས་ལེགས་པར་བསྟན་པའི་ཚུལ་ཤེས་ནས། །ཚུལ་བཞིན་སྒྲུབ་པའི་རྣལ་འབྱོར་པ་དེ་ལ། །སྔགས་ཚུལ་ཇི་བཞིན་གཟིགས་པའི་མཁས་པ་རྣམས། །གསང་སྔགས་པ་ཞེས་ཟེར་བ་ཤེས་པར་མཛོད། །གསུང་རབ་དགོངས་འགྲེལ་སྤྱི་དང་ཁྱད་པར་དུ། །བདེ་མཆོག་སྐོར་ལ་རིང་དུ་འདྲིས་བྱས་ནས། །ལེགས་པར་སྦྱར་མོད་སོ་སྐྱེའི་བློར་གྱུར་པས། །ཉེས་པར་གང་གྱུར་བསམ་པ་ཐག་པས་འཆགས། །འབད་པ་ཆེན་པོས་ངལ་བ་བགྱིས་པ་ལས། །ཐོབ་པའི་རྣམ་དཀར་དགེ་བས་རང་གཞན་ཀུན། །འཁོར་ལོ་བདེ་མཆོག་ལམ་བཟང་འདིར་ཞུགས་ནས། །ཧེ་རུ་ཀ་ཡི་གོ་འཕང་མྱུར་ཐོབ་ཤོག །ཅེས་དཔལ་འཁོར་ལོ་བདེ་མཆོག་ཉུང་ངུའི་རྩ་རྒྱུད་ཀྱི་རྒྱ་ཆེར་བཤད་པ་སྦས་པའི་དོན་ཀུན་གསལ་བ་ཞེས་བྱ་བ་འདི་ནི། མང་དུ་ཐོས་པའི་དགེ་སློང་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས།
དཔལ་བདེ་མཆོག་གི་རྩ་བའི་རྒྱུད་དང༌། བཤད་པའི་རྒྱུད་དང༌། ཆ་མཐུན་པའི་རྒྱུད་ཀུན་དང༌། བདེ་མཆོག་གི་སྐོར་སྤྱི་དང༌། ཁྱད་པར་དུ་ལོ་དྲིལ་ནག་གསུམ་གྱི་གཞུང་ཀུན་དང༌། བདེ་མཆོག་གི་འགྲེལ་པ་དུ་མ་ལ་རིང་དུ་འདྲིས་པར་བྱས་པའི་མཐར། བདེ་མཆོག་གི་བཤད་སྒྲུབ་ཉམས་པ་གསོ་བའི་དོན་དང༌། རང་གི་བརྗེད་བྱད་དུ་དམིགས་ཏེ། འབྲོག་རི་བོ་ཆེ་དགའ་ལྡན་རྣམ་པར་རྒྱལ་བའི་གླིང་དུ་སྦྱར་བའི་ཡི་གེ་པ་ནི་དཀའ་བཞི་པ་རིན་ཆེན་དཔལ་ལོ།། །།