རྣལ་འབྱོར་གྱི་དབང་ཕྱུག་ལཱུ་ཨི་པའི་ལུགས་ཀྱི་བདེ་མཆོག་རྫོགས་རིམ་གྱི་རྣམ་བཤད་དངོས་གྲུབ་སྙེ་མ།
རྣལ་འབྱོར་གྱི་དབང་ཕྱུག་ལཱུ་ཨི་པའི་ལུགས་ཀྱི་བདེ་མཆོག་རྫོགས་རིམ་གྱི་རྣམ་བཤད་དངོས་གྲུབ་སྙེ་མ་བཞུགས་སོ།
རྣལ་འབྱོར་གྱི་དབང་ཕྱུག་ལཱུ་ཨི་པའི་ལུགས་ཀྱི་དཔལ་འཁོར་ལོ་བདེ་མཆོག་གི་རྫོགས་རིམ་རྣལ་འབྱོར་ཆེན་པོའི་རྣམ་བཤད་དངོས་གྲུབ་ཀྱི་སྙེ་མ་ཞེས་བྱ་བ། །བླ་མ་དང་རྗེ་བཙུན་འཇམ་པའི་དབྱངས་ཀྱི་ཞབས་ཀྱི་པདྨོ་ལ་གུས་པས་ཕྱག་འཚལ་ཞིང་སྐྱབས་སུ་འཆིའོ། དཔའ་བོ་དཔའ་མོའི་དབང་ཕྱུག་མ། །བྱེ་བའི་དབུས་ན་ལྷུན་པོ་ལྟར། །རབ་བརྗིད་ཧེ་རུ་ཀ་དཔལ་དང་། །རྗེ་བཙུན་རྡོ་རྗེ་ཕག་མོ་ཡི། །ཞབས་ལ་སྙིང་ནས་ཕྱག་འཚལ་ཏེ། །གྲུབ་ཐོབ་ཆེན་པོའི་རྫོགས་པའི་རིམ། །ཤིན་ཏུ་རྟོག་པར་དཀའ་བའི་གཞུང་། །སྔོན་ཆད་ཕྱོགས་འདིར་རྩ་བཤད་ཀྱི། །རྒྱུད་སྡེ་ལེག་
པར་མ་བཀྲལ་བ། བདག་གིས་བརྩོན་པ་ཆེན་པོ་ཡིས། །རིང་དུ་འབད་ལས་རྙེད་གྱུར་པ། །དེ་འདིར་བཤད་པར་བྱ་ཡི་ཉོན་། །ལཱུ་ཨི་པའི་ལུགས་ཀྱི་རྫོགས་རིམ་རྣལ་འབྱོར་ཆེན་པོའི་གཞུང་སྒྲུབ་ཐབས་སུ་བཀོད་པ་ལ་ཚིག་དོན་ཙམ་གྱི་སྟེང་ནས་དམིགས་སྐོར་སྐྱོང་རྒྱུ་རྣམས་ད་ལྟའི་བར་དུ་འདུག་ན་འང་། རྫོགས་རིམ་འདི་བདེ་མཆོག་གི་རྩ་བ་དང་ཡན་ལག་གི་རྒྱུད་གང་གིས་ཇི་ལྟར་བསྟན་པ་སོགས་ཀྱི་སྒོ་ནས་ཡིད་ཆེས་པའི་ཁུངས་ལ་བརྟེན་ཏེ་མཐའ་དག་པར་བཤད་པའི་གོ་ག་ལེགས་པར་ཆགས་པའི་བཤད་པ་མི་འདུག་གོ། །དེ་ལྟ་ན་འང་རྣམ་དཔྱོད་དང་དོན་གཉེར་ཆེ་ཞིང་གྲུབ་ཆེན་གྱི་ལམ་སྲོལ་ཇི་
འདྲ་བ་ཞིག་ཡིན་པ་མཐོང་ན་ཅི་མ་རུང་སྙམ་པའི་བསམ་པ་ཅན་རྣམས་ཀྱིས་ལེགས་པར་རྩད་བཅད་པར་རིགས་གཏེར། ལཱུ་ཨི་པའི་ལུགས་འདི་འཕགས་ཡུལ་དུ་བདེ་མཆོག་གི་རྩ་བ་རུ་གྲགས་ཤིང་། རྗེས་འབྲང་གི་གྲུབ་ཆེན་ཡང་དུམ་འདུག་པས་ཤིང་ཏུ་འགངས་ཆེ་བའི་ཕྱི་རོ། དེ་ལྟར་ན་དེ་འདྲ་བའི་རྫོགས་རིམ་རྣལ་འབྱོར་ཆེན་པོ་འཆད་པ་ལ་ལྔ། རྫོགས་རིམ་འདི་རྩ་བཤད་ཀྱི་རྒྱུད་ཀྱི་གཞུང་གང་གིས་བསྟན་པ་དང་། གཞུང་དེ་རྣམས་ཀྱིས་དོན་དེ་ཇི་ལྟར་བསྟན་པའི་ཚུལ་དང་། བསྟན་པའི་དོན་དེ་ཉམས་སུ་ལེན་པའི་རིམ་པ་དང་། ཉམས་སུ་བླངས་པས་རྒྱུད་ལ་མངོན་རྟོགས་སྐྱེས་པའི་རིམ་པ་དང་། རིམ་པ་དེ་ལ་བརྟེན་ནས་འབྲས་བུ་འགྲུབ་པའི་ཚུལ་ལོ། དང་པོ་ལ་གཉིས། ཀུན་སྤྱོད་ནས་འབྱུང་བ་དང་། མངོན་བརྗོད་སོགས་ནས་འབྱུང་བའོ། དང་པོ་ནི། སྒྲུབ་ཐབས་ཀྱི་གཞུང་ལས། །ཨཱ་ལི་ཀ་ལི་མདུན་བསམས་ནས། །རྣལ་འབྱོར་ཆེན་པོ་ངལ་བསོ་བྱ། །ཟླ་བའི་དཀྱིལ་འཁོར་རྫོགས་པ་ནི། །ལྟེ་བའི་རྩ་བར་གནས་པར་བསྒོམ། །ཡི་གེ་མཆོག་གི་གནས་གྱུར་པ། །དེ་ཡི་དབུས་སུ་གནས་པས་བསམ། །སྐུ་གསུང་ཐུགས་ཀྱི་རྡོ་རྗེ་ཅན། །ལྷ་ཡི་གཟུགས་ནི་བསྒོམ་པར་བྱ། །གོང་བུ་ལས་འདས་གྱུར་པ་དེ། །སེམས་ཉིད་དུ་ཡང་བསྒོམ་མི་བྱ། །དེ་ཡང་བསམ་གྱིས་མི་ཁྱབ་བསམ། །སེམས་པ་ཉིད་དུ་མཚོན་པ་མིན། །བསམ་གྱིས་མི་ཁྱབ་བདེ་བསམས་ན། །དེ་ལས་གཟུང་ནི་ཐོབ་པར་འགྱུར། །ཞེས་གསུངས་པ་འདི་འདིའི་རྫོགས་རིམ་གྱི་གཞུང་ཡིན་ལ། །དེ་ནི་ཀུན་སྤྱོད་ཀྱི་ལེའུ་བཅུ་གཉིས་པར་
གསུངས་པ་བཀོད་པའོ། གཉིས་པ་ནི། ཀུན་སྤྱོད་ཀྱི་ལེའུ་བཅུ་གཉིས་པར་གཞུང་སྔར་དྲངས་པ་དེའི་འཕྲོས་འགའ་ཞིག་འབྱུང་བ་ལྷག་དང་བཅས་པ་དང་། སྔར་དྲངས་པ་ཡང་རྐང་བ་འགའ་ཞིག་མཚང་བ་དང་བཅས་པ་རྣམས་རྒྱས་པར་མངོན་བརྗོད་ཀྱི་ང་དྲུག་པ་ལས། །ཐམས་ཅད་བདག་ཉིད་རྟག་བཞུགས་པར། །གང་ཞིག་སྔར་ནི་བཤད་པ་ཉིད། །དཀྱིལ་འཁོར་ལུས་ནི་ཡིན་པར་བཤད། །དེ་ནི་སྒོ་དགུ་དག་ཏུ་འགྱུར། །དེ་ལ་ལྟེ་བའི་འཁོར་ལོ་ཆེ། །ཐམས་ཅད་མཁྱེན་པ་ཞེས་ཕྱར་བཤད། །རྡོ་རྗེ་ཙན་ནི་དེར་བཞུགས་པ། །ཆ་མེད་ཆ་ནི་ནམ་སྤངས་པ། །ལུས་ཅན་རྣམས་ཀྱི་ནང་ན་རོལ། །ལུས་ལས་འདས་ཤིང་གོས་པ་མེད། ལ་ལར་གཟུགས་ཅན་དག་ཏུ་བཞུགས། །ལ་ལར་སྣ་དང་ངག་དག་དང་། །ལ་ལར་རྣམ་བསྒྲ་དག་དང་། །ལ་ལར་རྡོ་རྗེ་དྲི་ཆེན་ཆུ། །ལ་ལར་ཚོང་པར་བཅས་པའི་སེམས། །ལ་ལར་སྐོ་མ་དང་ལ་ལར་བཀྲེས། །ལ་ལར་ཁྲོད་ང་ལ་ལར་ནི། །ཞེས་པ་ནས། ལ་ལར་ཁྲག་དང་པགས་པར་འགྱུར། །ལ་ལར་མྱ་ངན་དུངས་བ་དང་། །ལ་ལར་བསྲེག་པའི་མེ་དག་ཡིན། །ལ་ལར་མཐོ་རིས་སྐྱ་བ་སྟེ། །རྣམ་པར་འཕྲུལ་བ་འདི་ལྟ་བུ། །ཐམས་ཅད་བདག་ཉིད་བཞུགས་འདི་ལ། །ལྷ་གང་ཆ་ནི་རྣམ་སྲངས་པ། དེ་ཡི་སྒྱུ་མ་སྣ་ཚོགས་འདི། །ཞེས་པའི་བར་དུ་གསུངས་ལ། །དེ་ནས། བརྟག་པ་མིན་པ་རྡོ་རྗེ་ཅན། །གཟུགས་མེད་པར་ནི་བྷ་གའི་ནང་། །ལྟེ་བའི་ནང་ན་པདྨ་ཆེ། །བཅུ་དྲུག་ཐིག་ནི་གདབ་པར་བྱ། །ཡི་གེ་དང་ཡི་དམ་མཉམས་སྦྱོར་བས། །ཁ་སྦྱོར་བྱེ་བ་བྱས་པ་ཡིན། །
དེད་བུས་རྟག་ཏུ་གསང་བ་ནི། །འབྱིན་དང་སྡུད་པར་བྱེད་པའོ། །དེ་ཉིད་རང་ཉི་རྡོ་རྗེ་ཅན། །གཅིག་པུ་རུང་འབྱུང་ཆེ་བའི་ལྷ། །དེ་ནི་སངས་རྒྱས་ཀུ་ངོས་ཞེས། །མཚན་ནི་རབ་ཏུ་བཤད་པ་ཡིན། །གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཐམས་ཅད་མཁྱེན་པས་འདི་བཤད་པ་འམ། །ཡང་ན་མི་ཤིགས་ཀུན་མཁྱེན་པ། །སྐྲ་ཡི་ཉག་མ་རྒྱ་ཡི་ཆ། །མཆོག་གི་གཟུགས་ཅན་བསམ་པ་སྟེ། །སྟོད་པ་མ་ཡིན་དམིགས་སུ་མེད། །ཡི་གེ་མེད་ཅིང་སྟོང་པ་འང་མིན། །གོས་པ་མེད་ཅིང་ས་བོན་མེད། །གཟུགས་མེད་མཚན་མ་འང་མེད་པ་སྟེ། །རྣམ་ཤེས་རང་གི་དངོས་པོ་ནི། །རྣམས་ཤེས་ཡེ་སེཧས་དག་ཏུ་གཟུང་། །ཞེས་གསུངས་ཤིང་། །དེ་ནས་རྣལ་འབྱོར་ཉམས་སུ་བླངས་པའི་མཚན་མ་བརྒྱད་གསུངས་པའི་འོག་ཏུ། །བལྟས་པ་དགོད་པ་ལག་བཅངས་དང་། །འཁྱུད་དང་གཉིས་གཉིས་ལ་སོགས་པ། །དེ་བཞིན་གཤེགས་པས་དབུགས་འབྱིན་གསུངས། །དགུ་པ་ཟླ་བའི་བླ་མ་སྟེ། །ཐམས་ཅད་འདིར་ནི་བསྟན་པ་ཡིན། །རྣམ་པ་གཞན་དང་རྩ་དང་འདྲ། །དེ་ཉིད་སྲོག་ཆགས་རྣམས་ཀྱི་སྲོག །དེ་ཉིད་མི་འགྱུར་དམ་པ་ཡིན། །དེ་ཉིད་ཐམས་ཅད་ཁྱབ་བྱེད་དེ། །ལུས་ཀུན་ལ་ནི་རྣམ་པར་གནས། །དེ་ཉིད་སངས་རྒྱས་ཡེ་ཤེས་ཏེ། །ཧེ་རུ་ཀ་དཔལ་ཡིན་པར་བཤད། །སྐྱེས་པ་མ་མིང་ལ་སོགས་ཉིད། །ཕྲ་བའི་སྙིང་པོའང་འཛིན་པ་ཡིན། །ཡེ་ཤེས་དག་ཏུ་འབྱུང་དེ་ལ། །གང་ཞིང་གསལ་གནས་རྣམས་དང་། །བསྟན་བཅོས་དག་ནི་མ་ལུས་དང་། རིག་བྱེད་གྲུབ་མཐའ་གནས་པ་རྣམས། །འཇིག་རྟེན་
འདི་དང་གཞན་དག་ཏུ། །དེ་མེད་པ་ནི་འགྲུབ་མི་འགྱུར། །རིག་བྱེད་གྲུབ་པའི་མཐའ་རྣམས་ལ། །འདི་ནི་སྙིང་པོ་རབ་ཏུ་བཤད། །ཅེས་གསུངས་ལ། །དེ་ནས་ཨ་ལི་ཀཱ་ལིའི་བསྔགས་པ་སོགས་གསུངས་པའི་འོག་ཏུ། ཨཱ་ལི་ཀཱ་ལི་མདུན་བསམས་ནས། །རྣལ་འབྱོར་ཆེན་པོས་ངལ་བསོ་སྟེ། །བསམ་གྱིས་མི་ཁྱབ་སེམས་ཉིད་དེ། །སེམས་ཀྱང་བརྟག་པར་མི་བྱའོ། །སེམས་ཙམ་ཉིད་ཀྱང་མི་བསམ་སྟེ། །དེས་ནི་འཛིན་པ་ཐོབ་པར་འགྱུར། །གང་གི་རྒྱུད་ཀུན་ལས་གསང་བ། །ཁྱོད་ལ་ཡང་ནི་བཤད་པ་ཡིན། །འདི་ནི་འབད་པས་སྦ་བྱ་སྟེ། །གཉིས་མེད་གཉིས་སུ་མེད་པར་སྡོམ། །རྣལ་འབྱོར་མ་སོགས་ཐམས་ཅད་དང་། །དཔའ་བོའི་ཡན་ལག་ཐམས་ཅད་ཀྱི། །རྣལ་འབྱོར་བ་ཡིས་འབྲས་བུ་འཐོབ། །ཅེས་གསུངས་ལ། །ཧེ་རུ་ཀ་མངོན་འགྱུར་ལས་ཀྱང་། །གང་གི་ཇི་ལྟར་སྔོན་དུ་གསུངས། །ཐམས་ཅད་བདག་ཉིད་རྟག་ཏུ་གནས། །ལུས་ཀྱི་དཀྱིལ་འཁོར་ཞེས་སུ་བརྗོད། །སྒོ་དགུ་རུ་ནི་གྱུར་པ་སྟེ། །ལྟེ་བའི་དབུས་ན་པདྨ་ཆེ། །ཐམས་ཅད་མཁྱེན་པའི་ཡེ་ཤེས་གྲགས། །དེ་ཡི་གནས་ནད་པའ་བོ་བཞུགས། །ཆ་མེད་ཆ་ནི་རྣམ་པར་སྤངས། །ལུས་རྣམས་ཀུན་གྱིས་རྣམ་པར་རྩེ། །ལུས་བྲལ་དྲི་མ་མེད་པ་སྟེ། །ལ་ལར་གཟུགས་ཀྱི་གནས་ན་བཞུགས། །ལ་ལར་སྣ་ཡི་གནས་ན་བཞུགས། །ཞེས་པ་ནས། །ཇི་ལྟར་ཀུན་ཏུ་རྣམ་པར་དབྱེ། །ལྷ་ཡིས་ཇི་སྲིད་གསུངས་པ་ཀུན། །གང་དེ་ཐམས་ཅད་བདག་ཉིད་གནས། །ཞེས་པའི་བར་དང་། །ལྟེ་བའི་རྩ་བར་པདྨ་གནས་
གེ་སར་བཅས་ཤིང་འོད་དང་ལྡན། །རང་བཞིན་ཀུན་ནི་ཤེལ་དག་ལྟར། །བཅུ་དྲུག་ལ་སོགས་ཀྱིས་ནི་བསྐོར། །ཡི་གེ་མཉམ་པར་སྦྱོར་སྟེ། །ནམ་མཁའ་སྦྱར་བའི་བདག་ཉིད་དེ། །དེ་ཡང་དབུས་སུ་སྟང་བ་ཆེ། །སྤྲོ་དང་བསྡུ་བར་བྱེད་པ་ཡིན། །གང་གི་མིང་ནི་ཀུན་རང་བཞིན། །གང་གིས་ཡོངས་སུ་གྲགས་པའོ། །ཉི་མ་ཟླ་བ་རྣམ་དག་སྟེ། །འཆར་དང་ནུབ་པར་བསྟན་པ་ཡིན། །སྡིག་པ་ཀུན་ལས་རྣམ་པར་གྲོལ། །བསོད་ནམས་ཐམས་ཅད་རྣམ་པར་འཕེལ། །པདྨའི་སྣ་རྩེར་ཡུངས་ཀར་ཙམ། །རྒྱུད་དང་མི་རྒྱུའི་རང་བཞིན་ཀུན། །ཡིད་ཀྱིས་འདས་པར་ཡང་དག་ལྡན། །ཕྱི་ཡི་དབྱངས་ནི་རྣམ་པར་སྤངས། །དེ་ཡིས་ཡེ་ཤེས་སངས་རྒྱས་ཏེ། །གཞན་གྱིས་སངས་རྒྱས་མི་འགྱུར་ཏོ། །ཞེས་དང་། རྣལ་འབྱོར་ཉམས་སུ་བླངས་པའི་མཚན་མ་བརྒྱད་གསུངས་སོ། །མངོན་བརྗོད་ལས། །ཐམས་ཅད་བདག་ཉིད་རྟག་བཞུགས་པར། །གང་ཞིག་སྔར་ནི་བཤད་པ་ཉིད། །ཅེས་གསུངས་པའི་སྔར་བཤད་པ་ནི་རྒྱུད་དེའི་ལེའུ་དང་པོ་ལ་ཡང་བསྙེག་ཏུ་ཡོད་མོད་ཀྱང་། དེ་ཁོ་ནར་མི་བྱ་བར་བརྩ་རྒྱུད་ལས། །གསང་བ་མཆོག་གིས་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །མཁའ་འགྲོ་ཀུན་དངོས་སེམས་པ་ནི། །རྡོ་རྗེ་སེམས་པའ་བདེ་བའི་མཆོག །འདི་ནི་རང་བྱུང་མཆོག་ལྡན་པའོ། །མཁའ་འགྲོ་དྲ་བའི་སྡོམ་པ་ཡིན། །ཞེས་གསུངས་པ་ལ་ཡང་བསྙེག་དགོས་ཏེ། །རྡོ་རྗེ་མཁའ་འགྲོ་ལས། །ཁྱོད་ཀྱིས་སྔར་བཤད་གསང་བ་དང་། །ཐམས་ཅད་བདག་ཉིད་རྟག་ཏུ་བཞུགས། །ཡི་གེ་བཅུ་དྲུག་རིག་པ་ཆེ། །བདེ་མཆོག་བླ་མར་བཤད་པ་དང་། །ཞེས་
གསང་བ་མཆོག་གིས་དགྱེས་པ་ན་ཞེས་སོགས་རྒྱུད་དེར་བཤད་པ་དང་། །བདེ་མཆོག་རྩ་རྒྱུད་གཉིས་ཀ་ལ་འང་སྙོག་པ་བཞིན་ནོ། །དེ་ལྟར་ན་ལྟེ་བར་ཟླ་བའི་དཀྱིལ་འཁོར་བསྒོམ་པ་སོགས་ཀྱི་རྫོགས་རིམ་རྣལ་འབྱོར་ཆེན་པོ་ནི་རྩ་རྒྱུད་ཀྱི་གང་གིས་གསུངས་པ་ཀུན་སྤྱོད་ན་མི་གསལ་ཡང་མངོན་བརྗོད་ལས་གསལ་བར་བཤད་ལ། །ཐམས་ཅད་བདག་ཉིད་རྟག་ཏུ་བཞུགས། །ཞེས་སོགས་ཀྱིས་ལྟེ་བའི་རྩ་འཁོར་ལ་བརྟེན་ནས་རྫོགས་རི་བསྒོམས་པ་དང་། དེ་ཡང་ཀུན་སྤྱོད་དང་མཐུན་པ་ནི། །མངོན་བརྗོད་ལས་གསུངས་ཤིང་ཧེ་རུ་ཀ་མངོན་འབྱུང་ཡང་མངོན་བརྗོད་དང་བསྟུན་དགོས་པར་སྔར་དྲངས་པ་རྣམས་ཀྱིས་ཤེས་པས་རྩ་རྒྱུད་དང་མངོན་བརྗོད་དང་ཧེ་རུ་ཀ་མངོན་འབྱུང་གསུམ་བསྒྲིགས་ཏེ་འདིའི་རྫོགས་རིམ་ཤེས་དགོས་ལ། བདེ་མཆོག་གི་གཞུང་གཞན་ལ་བརྟེན་ནས་ཀྱང་ཤེས་དགོས་པ་ནི་འཆད་པར་འགྱུར་རོ། །གཉིས་པ་ལ་གཉིས། །ལམ་གྱི་སྙིང་པོའི་ལྟར་བསྟན་པ་དང་། །དེ་བསྐྱེད་པའི་ཐམས་ཇི་ལྟར་བསྟན་པའོ། །དང་ལ་གཉིས། །སྤྱིར་བསྟན་པ་དང་། །སོ་སོར་ཕྱེ་སྟེ་བསྟན་པའོ། དང་པོ་ནི། བལྟས་དང་ཞེས་སོགས་གསུམ་གྱི་མཇུག་ཏུ་ཀུན་སྤྱོད་ལས། གོང་མའི་གོམག་མ་མེད་པ་ཉིད། །འདི་ཉིད་དུ་ནི་ཡང་དག་བསྟན། །མེས་ཏེ་གཞན་དག་རྩྭ་དང་འདྲ། །ཞེས་མར་དོའི་འགྱུར་ལས་འབྱུང་སྟེ། །བལྟས་པ་སོགས་བཞི་ནི་རྒྱུད་སྡེ་བཞིན་ཡིན་ལ། །དེའི་དང་པོ་གསུམ་ནི་གོང་མ་དང་བཅས་པ་དང་། །བདེ་མཆོག་ལྟ་བུ་བཞི་པ་ནི་གོང་ན་མེད་པའོ། དགུ་པ་ནི་
ཀྱི་རྡོ་རྗེ་དང་སམྲུཊ་ལས། །བསྟེན་པས་ཡང་དག་གང་འབྱུང་བ། །སློབ་མའི་ཁ་ར་ནི་བཏུང་བར་བྱ། །རོ་མཉམ་སློབ་མའི་སྤྱོད་ཡུལ་ཉིད། །དེ་ཉིད་ལ་ཡང་བྱ་བར་བྱ། །རང་རིག་ཡེ་ཤེས་ཉིད་དུ་འགྱུར། །རང་གཞན་ཡང་དག་རིག་པ་སྔངས། མཁའ་མཉམ་རྡུལ་བྲལ་སྟོང་པ་ཉིད། །དངོས་དང་དངོས་མེད་བདག་ཉིད་མཆོག །ཐབས་དང་ཤེས་རབ་ཤིན་ཏུ་འདྲེས། །ཆགས་དང་ཆགས་བྲལ་རྣམ་པར་འདྲེས། །དེ་ཉིད་སྲོག་ཆགས་རྣམས་ཀྱི་སྲེག །ཅེས་གསུངས་པས་དབང་གསུམ་པ་བསྐུར་བ་ལས་མཚོན་པའི་དོན་ཉམས་སུ་བླངས་པ་ལས་བྱུང་བའི་ལྷན་སྐྱེས་ཀྱི་ཡེ་ཤེས་སོ། །དེ་སྲོག་ཆགས་རྣམས་ཀྱི་སྲོག་ཏུ་འགྱུར་ཚུལ་ནི། །ཤིན་ཏུ་གཅེས་པས་སྲོག་དང་འདྲ་བས་སམ། །དེའི་རང་བཞིན་སྟོང་པ་ཉིད་སེམས་ཅན་རྣམས་ཀྱི་སྲོག་གི་ངོ་བོ་ཉིད་ཡིན་པའི་དོན་ནོ། །དེ་དང་བྲལ་ན་མི་འཚོ་བས་སྲོག་གོ་ཞེས་ཀྱང་འགའ་ཞིག་བཞེད་དོ། །དེ་ཉིད་མི་འགྱུར་བ་ནི་ཐོག་མར་སྐྱེ་བ་དང་མཐའ་འཇིག་པ་མེད་པའོ། །འདི་ལ་བརྟག་གཉིས་དང་སམྦུ་ཊར་ཡི་གེ་ཞེས་བསྒྱུར་བ་ནི་ཨཀྵ་ར་སྤྱིར་ཡི་གེ་ལ་འང་འདྲོ་མོད་ཀྱང་འདིར་ནི་མི་འགྱུར་ཞེས་བསྒྱུར་བ་ལྟར་ལེགས་སོ། དེ་ཉིད་ཐམས་ཅད་ཅེས་པས་སྣོད་ཀྱི་ངོ་བོ་ཉིད་དང་། །ལུས་ཀུན་ཞེས་པས་བཅུད་ཀྱི་ངོ་བོར་བསྟན་པེར་ཀུན་སྤྱོད་འགྲེལ་བར་བཤད་པ་ཡང་ལྷན་སྐྱེས་ཀྱི་དེ་ཁོ་ན་ཉིད་རང་བཞིན་རྣམ་དག་ལ་གོ་བར་བྱའོ། དེ་ཉིད་སངས་རྒྱས་ཡེ་ཤེས་ནི་འབྲས་བུའི་ལྷན་སྐྱེས་ནི་དངོས་ཡིན་ལ། །ལམ་ཀྱི་ལྷན་སྐྱེས་ནི། །འཇུག་པ་ལས། །ཇི་ལྟར་དེ་ཉིད་
རྟོགས་ལ་སངས་རྒྱས་བསྙན། །ཅེས་བུད་དྷའི་དོན་དེ་ཁོ་ན་ཉིད་ཁོང་དུ་ཆུད་པ་ལ་བཤད་པ་ལྟར་རོ། །ཧེ་རུ་ཀ་དཔལ་ཡིན་པར་བཤད་པ་ནི། །ཤྲཱི་ཧེ་རུ་ཀའི་ཡེ་ཤེས་བཞིའི་དོན། །ཤྲཱི་ནི་གཉིས་མེད་ཡེ་ཤེས་ཏེ། །ཞེས་སོགས་པ་ལྟར་ཚང་པའོ། །སྐྱེས་པ་དང་མ་ནིང་དང་སོགས་པས་བུད་མེད་སོགས་ཀྱི་ཕྲ་བ་དང་རགས་པའི་སྙིང་པོ་སྟེ་ངོ་བོ་འཛིན་པ་སྟེ་འཇིག་རྟེན་པས་ངེས་པ་ཡང་ལྷན་སྐྱེས་ཀྱི་དེ་ཁོ་ན་ཉིད་དེར་ཤར་བ་སྟེ། དེའི་རང་བཞིན་རྣམ་དག་གིས་ཆོས་ཐམས་ཅད་ལ་ཁྱབ་ཅིང་རང་བཞིན་དེ་ཡང་ཆོས་ཐམས་ཅད་ཀྱི་རྣམ་རོལ་ཏུ་ཤར་བ་སྟེ། །ངེས་དོན་གྱི་ལྷན་སྐྱེས་ཕྱོགས་ལ་སོགས་པའི་ཆ་སྤངས་པ་དེའི་སྒྱུ་མ་སྟེ་རོལ་པ་སྣ་ཚོགས་པར་ཤར་བས་ཐམས་ཅད་ཀྱི་བདག་ཉིད་དུ་བཞུགས་པར་སྔར་དྲངས་པའི་ལུང་། །ལ་ལར་གཟུགས་ཅན་དག་ཏུ་བཞུགས། །ཞེས་སོགས་རྒྱུད་གཉིས་ལས་གསུངས་པ་རྣམས་ཀྱི་དོན་ནོ། །འདི་ཡང་བརྟག་གཉིས་ལས། དངོས་པོ་ཀུན་གྱི་རང་བཞིན་འདི། །སྒྱུ་མའི་གཟུགས་ཀྱིས་ཡང་དག་གནས། །ཞེས་ཐམས་ཅད་རང་བཞིན་སྟོང་པ་ཉིད་ཀྱི་རྣམ་རོལ་ཏུ་གསུངས་ཤིང་། །གསུམ་པོ་སྤངས་པ་ཉིད་ཀྱི་ཕྱིར། །ལྷན་གཅིག་སྐྱེས་པ་བྱང་ཆུབ་བརྗོད། །ཡང་ན་དེ་ཉིད་ཐམས་ཅད་བདག །ཡང་ན་ཀུན་གྱིས་རྣམ་པྲ་སྤངས། །ཞེས་སུངས་པའི་དོན་མུ་ཏིག་ཕྲེང་བར། །ཡང་ན་ཞེས་པ་དང་གང་ཡང་ཞེས་པ་རྣམས་གྲངས་སོ། །དེ་ཉིད་ཀུན་བདག་ཉིད་ཅེས་པ་ནི་ལྷན་ཅིག་སྐྱེས་པ་དེ་ཐམས་ཅད་ཀྱི་བདག་ཉིད་ཡིན་པས་དགའ་བ་གསུམ་གྱི་རྗེས་སུ་འགྲོ་བ་ཉིད་དེ། །ཐུན་མོང་གི་བདེ་བ་
གཉིས་པོ་སྟོང་པ་ཉིད་གང་ཡིན་པ་ཐུན་མོང་པ་ཞེས་བྱ་བའི་དོན་དོན། །ཡང་ན་ཞེས་པ་རྣམ་གྲངས་གཞན་གྱིས་ཐམས་ཅད་ཀྱིས་སྤངས་པ་ནི་དགའ་བ་གསུམ་དང་བྲལ་བ་སྟེ་རང་ཏིག་པའི་ཁྱད་པར་གྱི་མཚན་ཉིད་ཀྱིས་དེ་རྣམས་ཀྱི་རྗེས་སུ་འགྲོ་བ་མེད་པ་ཡིན་ནོ། །འདི་དག་ཉིད་ཁྱད་པར་གྱི་མཚན་ཉི་འདི་དག་དང་བྲལ་བ་ལ་བརྟེན་ནས་འདི་ཡིས་གསུམ་པོ་སྤངས་པ་ཞེས་སོ། །ཞེས་ལྷན་སྐྱེས་ཀྱི་སྟེང་གི་ཐུན་མོང་བ་སྤྱིའི་མཚན་ཉིད་གཟུང་འཛིན་གཉིས་པོ་བདེན་པས་སྟོང་པ་དགའ་བ་གསུམ་རྗེས་སུ་འགྲོ་བས་ཐམས་ཅད་ཀྱིས་བདག་ཉིད་དུ་གསུངས་ལ། །ཐུན་མོང་མ་ཡིན་པ་ཁྱད་པྲ་གྱི་མཚན་ཉིད་ཉམས་སུ་མྱོང་བའི་ལྷན་སྐྱེས་ཀྱི་བདེ་བ་དང་བྲལ་བས་དགའ་བ་གསུམ་གྱིས་དེ་སྤངས་པར་བཤད་པ་ལྟར་ཏེ། །རེས་འགའ་ལྷན་སྐྱེས་ཀྱི་ཡེ་ཤེས་ཀྱིས་ཐམས་ཅད་ལ་ཁྱབ་པ་དང་། །རེས་འགའ་དགའ་བ་གསུམ་ལ་སོགས་པ་ལ་དེ་མེད་པར་བཤད་པ་རྣམས་ནི་ལྷན་སྐྱེས་ཀྱི་བདེ་སྟོང་གི་རང་བཞིན་རྣམ་དག་སྤྱིའི་མཚན་ཉིད་ཀྱིས་ཀུན་ལ་ཁྱབ་པ་དང་། །ལམ་གྱི་དྲི་མ་སྤངས་པ་ལ་སོགས་པ་ཁྱད་པར་ཐུན་མོང་མ་ཡིན་པའི་མཚན་ཉིད་གཞན་ལ་མེད་པས་གསུངས་པའི་སྟེང་ནས་ཤེས་པར་བྱའོ། །གཞན་ཡང་རང་བཞིན་གྱིས་འོད་གསོལ་བའི་རང་བཞིན་རྣམ་དག་ཆོས་གཞན་རྣམས་ལ་ཁྱབ་པར་བྱེད་པ་ནི་བདེ་བ་ཆེན་པོའི་ཡང་རང་བཞིན་ཡིན་ལ། །རང་བཞིན་དང་རང་བཞིན་ཅན་ལ་ནི་བདག་གཅིག་པའི་འབྲེལ་བ་ཡོད་པས་བདེ་བ་ཆེན་པོ་དང་ངོ་བོ་གཅིག་པའི་
རང་བཞིན་གྱིས་སྣོད་བཅུད་ཀུན་ལ་ཁྱབ་པ་ན་བདེ་བ་ཆེན་པོས་ཀྱང་དེ་རྣམས་ལ་ཁྱབ་པར་ཐ་སྙད་མཛད་པ་ཡིན་ཏེ། །ལྷན་སྐྱེས་ཀྱི་རྣལ་འབྱོར་དམ་པའི་འགྲེལ་བ་སྙིང་པོ་གསལ་བ་ལས། །ཆོས་ཉིད་ནི་ཁྱབ་པར་བྱེད་པ་སྟེ་དེ་ཉིད་ཆོས་ཀྱི་སྐུ་རང་བཞིན་གྱིས་འོད་གསལ་བ་བདེ་བ་ཆེན་པོའི་རང་བཞིན་ནོ། །བདེ་བ་ཆེན་པོ་དེ་ཉིད་ཀྱིས་ཆོས་ཐམས་ཅད་ཁྱབ་པ་སྟེ་ཆོས་རྣམས་དང་ཆོས་ཉིད་ལ་དེའི་བདག་ཉིད་ཀྱི་འབྲེལ་བ་ཡོད་པས་རྒྱུ་བ་དང་མི་རྒྱུ་བའི་དངོས་པོ་ཐམས་ཅད་བདེ་བ་ཆེན་པོའི་རང་བཞིན་དུ་གྲུབ་པ་ཁོ་ན་ཡིན་ནོ། །ཇི་སྐད་དུ། །ཆོས་ལས་ཆོས་ཉིད་ཐ་མའི་དད་པའི་ཡིན་ནོ་ཞེས་གསུངས་སོ། །ཞེས་འབྱུང་བ་ལྟར་རོ། །བདེ་བ་ཆེན་པོས་ལུས་ཅན་ཀུན་ལ་ཁྱབ་པར་གསུངས་པའི་དོན་གཞན་ཡང་ཐབས་དང་ལྡན་ན་ལུས་དེ་ལས་དེ་འབྱུང་དུ་རུང་བ་ལ་དགོངས་ནས་ཀྱང་ཡིན་ཏེ། །མན་ངག་སྙེ་མ་ལས། །འོ་ན་དེ་ཁོ་ན་ཉིད་མ་རྟོགས་པའི་གནས་སྐབས་སུ་བདེ་བ་ཆེན་པོ་ཉམས་སུ་མ་མྱོང་བ་མ་ཡིན་ནས། ཇི་ལྟར་སེམས་ཅན་ཀུན་གྱི་སེམས་ཀྱི་བདག་ཉིད་དུ་བརྗོད་ཅེ་ན། །བདེ་བ་ཆེན་པོ་ཉམས་སུ་མྱོང་བ་རུང་བ་ཉིད་ཀྱིས་སོ་ཞེས་བཤད་དོ། །དེ་ལྟར་བཤད་པ་ནི་གསང་བ་གྲུབ་པ་ལས། །རང་གི་ཏིག་པའི་ལྷ་རྫས་དེ། །ཕྱག་རྒྱ་ཆེན་ཨོ་མཆོག་ཏུ་དགེ །ཐམ་མ་ལ་ལུས་ལ་བརྟེན་ནས་གནས། །ཤེས་རབ་ཆུང་བས་མཐོང་མི་འགྱུར། །མི་འགྱུར་བ་ཡི་རང་ལུས་དེ། །ཕྱོགས་གཅིག་གིས་ནི་ཤེས་པར་བྱ། །བླ་མའི་བཀའ་དྲིན་གནས་པ་ལས། །ཇི་ལྟ་བ་བཞིན་རྣམ་པར་གནས། །རྩྭ་ཤིང་འཁྲིལ་ཤིང་ལ་སོགས་པ། །ཀུན་ཏུ་གནས་པར་གྱུར་ན་ཡང་
མི་ནི་ཐབས་དང་བྲལ་བ་ཡིས། །མེ་ནི་མཐོང་བར་འགྱུར་མ་ཡིན། །ཐབས་དང་བྲལ་ན་ནམ་དུ་ཡང་། །ལྷ་རྫས་ཡོན་ཏན་ཀུན་འབྱུང་། །གཉུག་མའི་ལུས་ལ་གནས་ན་ཡང་། །ཤེས་རབ་གཞན་པས་མཐོང་མི་འགྱུར། །ཇི་ལྟར་བུར་ཤིང་ཁུབ་བ་དང་། །ཏིལ་ལ་ཏི་ལ་མར་ཇི་ལྟར་མར། །དེ་བཞིན་ལུས་ལ་ཐམས་ཅད་དུ། །ཤེས་རབ་ཕ་རོལ་ཕྱིན་གནས། །ཞེས་རྣལ་འབྱོར་པ་རང་གིས་རིག་པའི་བདེ་བ་ཆེན་པོའི་ལྟ་རྫས་ཕྱག་རྒྱ་ཆེན་པོ་ལྷན་ཅིག་སྐྱེས་པའི་ཡེ་ཤེས་རང་གི་ལུས་ལ་གནས་པའི་དོན་ནི། །ཤིང་ལ་མེད་པ། འོ་མ་ལ་མར་གནས་པ་སོགས་དང་འདྲ་བར་གསུངས་ལ། །ཐམས་ཅད་བཅས་ན་རང་ལུས་ལས་འབྱུང་དུ་རུང་བ་ལ་ཤིན་ཏུ་གསལ་བར་གསུངས་པ་དང་མཐུན་ནོ། །གཞན་ཡང་དོན་གྱི་ལྷན་སྐྱེས་ཀྱི་ཡེ་ཤེས་དང་། །ཡུལ་གྱི་དེ་ཁོ་ན་ཉིད་གཉིས་ཕན་ཚུན་དུ་འདྲ་བར་རོ་མཉམ་དུ་ཞུགས་ཤིང་། །ཡུལ་དེ་ཡང་བརྟན་གཡོ་ཀུན་ལ་ཁྱབ་པ་ལ་དགོངས་ནས་ཀྱང་དེ་ལྟར་གསུངས་ཏེ། །ཧེ་རུ་ཀ་མངོན་འབྱུང་ལས། །གང་དེ་ཐམས་ཅད་བདག་ཉིད་གནས། །དཔའ་བོ་འདི་རྣམས་གསང་ཆེན་པོ། །ཕྱི་དང་ནང་དུ་ཡང་དག་གནས། །ཀུན་ལ་ཁྱབ་ཅིང་རྟག་ཏུ་སྟོད། །ཞེས་པ་དང་། །གཉིས་མེད་ཡེ་ཤེས་ཉིད་དང་ཡང་། །དེ་དང་འདྲ་བར་སྟོང་པ་འགྱུར། །ཞེས་གསུངས་ཤིང་། །དེ་དག་གི་དོན་གསལ་བར་མན་སྙེ་ལས་ཀྱང་། །སྟོང་པ་ཉིད་དང་རོ་གཅིག་པ་ཉིད་ཀྱི་ཕྱིར་སྟོང་པ་ཉིད་ཀྱི་ཡེ་ཤེས་ཀྱང་སྟོང་པ་ཉིད་བཞིན་དུ་དེ་ཁོ་ན་ཉིད་དུ་བརྗོད་ཅིང་དེ་ཁོ་ན་ཡང་བྱང་ཆུབ་ཀྱི་སེམས་ཏེ་དེའི་ཕྱིར་དེ་ཡང་ཁྱབ་པར་བྱེད་པ་ཁོ་ན་འོ་
ཞེས་པའོ། །ཞེས་གསུངས་སོ། །དེ་ལྟར་ལྷན་སྐྱེས་ཀྱི་བདེ་བའི་སྟེང་ནས་ཆ་སོ་སོར་ཕྱེ་ནས་སྐབས་སུ་གང་བབ་པའི་ཁྱབ་པའི་ཚུལ་རྣམས་ཤེས་པར་བྱ་ཡི། །ཆོས་འདི་ལས་ཕྱིར་རོལ་ཏུ་རྒྱུ་པ་རྣམས་ཀྱིས་རྟག་པ་དང་ཁྱབ་པ་ཁས་བླངས་པ་ལྟ་བུ་དོན་འདྲ་བ་ལ་མིང་བཟང་པོར་བསྒྱུར་བའི་ཚུལ་ཁ་ས་ཟླང་བར་མི་བྱའོ། །གལ་ཏེ་ཁོ་ན་ཉིད་ལ་བསམས་ནས་ཀུན་ལ་ཁྱབ་པར་བཤད་ན། ལྷན་སྐྱེས་ཀྱི་དེ་ཁོ་ན་ཉིད་ཅེས་ལྷན་སྐྱེས་ཀྱི་བདེ་བ་ལ་དམིགས་ཀྱིས་བཀའ་ཅི་དགོས་ཏེ་ཆོས་ཅན་གཞན་གང་རུང་གཅིག་གི་སྟེང་ནས་ཀྱང་བཤད་པས་ཆོག་པའི་ཕྱིར་རོ་སྙམ་ན། དགོས་པ་དེ་ཙམ་ཞིག་ཡིན་ན་བདེན་མོད་ཀྱང་དེ་ལྟར་མཆོད་པ་ནི་རང་རྒྱུད་ལ་ལྷན་སྐྱེས་ཀྱི་བདེ་བ་བསྐྱེད་དེ་མཉམ་གཞག་ཏུ་བསྐྱངས་པའི་འོག་ཏུ་སྣོད་བཅུད་གཞན་དང་ལྷན་སྐྱེས་ཀྱི་བདེ་བའི་དེ་ཁོ་ན་ཉིད་རང་བཞིན་སྟོང་པ་གཉིས་མཚུངས་པའི་ཚུལ་དང་། ཆོས་ཐམས་ཅད་རང་རང་གི་སྟོང་པ་ཉིད་དེར་སྣང་བ་ཡིན་པས་དེའི་རྣམ་འགྱུར་ཡིན་པ་དང་། དེ་ལྟན་དེ་དག་གི་སྟོང་པ་ཉིད་ལ་རྗེས་སུ་ཞུགས་པའི་ལྷན་སྐྱེས་ཀྱིའང་རྣམ་རོལ་ཏུ་ཤར་བར་མོས་ནས། །རྗེས་ཀྱི་ཚེ་བསྐྱངས་བས་ཡུལ་སྣང་ཐམས་ཅད་བདེ་བར་འཆར་བའི་གྲོགས་སུ་འཁྱེར་བའི་ཆེད་ཡིན་ཞིང་། །མཉམ་རྗེས་གཉིས་ཀར་བདེ་སྟོང་སྦྱར་ཏེ་བསྒོམས་པས་ནི་མྱུར་དུ་འགྲུབ་པར་འགྱུར་ཏེ། །ལྷན་ཅིག་སྐྱེས་པའི་རྣལ་འབྱོར་དམ་པ་ལས། །སྣང་བ་མེད་ཅིང་གསལ་བ་ཙམ། །བདེ་བ་ཆེན་པོ་མཐའ་ཡས་པ། །ཇི་སྲིད་ནུས་བདེ་སྲིད་དུ། །རྒྱུན་མི་ཆད་པར་བལྟ་བར་བྱ། །ལངས་བ་དང་
དངོས་པོ་ཐམས་ཅད་བདེ་བ་ཆེན་པོའི་ངོ་བོ་ཡིན་པས་རྣལ་འབྱོར་མའི་འཁོར་ལོའི་བདག་ཉིད་ཅན་དུ་མོས་པར་བྱའོ། །ཡང་དང་ཡང་དུ་བསོད་ནམས་དང་ཡེ་ཤེས་ཀྱི་ཚོགས་བསགས་པར་བྱ་བའི་ཕྱིར་རང་རིག་པའི་བདེ་བ་ཆེན་པོ་དེ་ཉིད་ཀྱིས་མཆོད་པར་བྱའོ། །ཚོགས་བསགས་པའི་བསྒོམ་པའི་ཁྱད་པར་གྱིས་ཡུན་རིང་མ་ཡིན་པར་འདོད་པའི་དངོས་གྲུབ་ཏུ་འགྱུར་རོ། །སྲོག་ཆགས་ཐམས་ཅད་བདག་ལས་བྱུང་། །ཁམས་གསུམ་ཡང་ནི་བདག་ལས་བྱུང་། །འདི་དག་ཐམས་ཅད་བདག་གིས་ཁྱབ། །འགྲོ་གཞན་རང་བཞིན་མི་སྣང་ངོ་། །དེ་ལྟར་ཤེས་ནས་རྣམླ་འབྱོར་བ། །མཉམ་པར་བཞག་པས་གང་སློབ་པ། །མི་དེ་བསོད་ནམས་དམན་ཡང་། །འགྲུབ་པར་འགྱུར་ཏེ་ཐེ་ཙོམ་མེད། །ཅེས་གསུངས་ཏེ། །ཚུལ་འདི་ནི་བརྟག་གཉིས་ཀྱི་ལེའུ་བརྒྱད་པ་སོགས་ནས་བདེ་བས་ཀུན་ལ་ཁྱབ་པར་བཤད་པ་རྣམས་ཀྱི་གནད་དམ་པའོ། །མན་སྙེ་ལས་ཀྱང་དེ་ལྟར་དུ་གསུངས་པས། །བརྟན་སོགས་གཡོ་བ་དང་བཅས་པའི། །འགྲོ་ཀུན་ཁྱབ་པས་ཁྱབ་པ་པོ། །ཞེས་སོ། འདི་ཡང་བདེ་བ་ཆེན་པོའི་ངོ་བོ་ཁོ་ནར་བསྒོམ་པར་བྱ་བཞིན་པས་ནི་འབྲས་བུ་བདེ་བ་ཆེན་པོའི་རང་བཞིན་གྱི་ཐར་པ་སྐྱེད་པར་བྱེད་དེ། །ཉེ་བར་ལེན་པ་དང་ཉེ་བར་བླང་བྱ་དག་རིགས་མཚུངས་པ་ཁོ་ནའོ་ཞེས་བཤད་དོ། །བརྟག་པ་མིན་པ་རྡོ་རྗེ་ཅན། །གཟུགས་མེད་པ་ནི་བྷ་གའི་ནང་། །ཞེས་པའི་རྟོག་པས་བརྟག་པར་བྱ་བ་མིན་པ་ནི་དེས་མ་བསླད་
པའོ། རྡོ་རྗེ་ཅན་ནི་ལྷན་སྐྱེས་སོ། །གཟུགས་མེད་པ་ཏེ་གསུགས་སུ་མེད་པའོ། །བྷ་ག་ནི་ཆོས་འབྱུང་འོད་གསལ་ལོ། །དེའི་ནང་ནི་དེར་ཡེ་ཤེས་དེ་རོ་གཅིག་ཏུ་ཞུགས་པའོ། །གསང་བ་ནི་སྟོང་པ་ཉིད་ཡིན་ལ་དེར་བཞུགས་པ་ནི་ལྷན་སྐྱེས་ཀྱི་ཡེ་ཤེས་སོ། །གསང་དེ་ཡང་ཡེ་ཤེས་མཆོག་སྟེ་དམ་པའི་ཡུལ་དང་། །དེ་ཡུལ་དུ་བྱས་ནནས་དགྱེས་པ་སྟེ་བདེ་བ་ཆེན་པོ་བསྐྱེད་པ་དང་། །གསང་བ་དེ་ཡང་ཐམས་ཅད་ལ་ཁྱབ་པའི་བདག་ཉིད་དང་། །དེར་རྟག་ཏུ་བཞུགས་པ་ནི་དེ་དོར་ནས་གང་དུ་ཡང་མ་བཞུད་པའོ། །འདི་ལ་བཤད་ཚུལ་མང་ཡང་འདིར་ལྷན་སྐྱེས་ཀྱི་ངེས་དོན་གྱི་བཤད་པ་སྐགས་སུ་བབ་པ་ལྟར་རོ། །ཌཱ་ཎི་ཌ་ཞེས་པ་ནི་ནམ་མཁའ་སྟེ་སྐད་ཀྱི་བྱིངས་ལ་བསྒྱུར་བའོ། །ཨ་ཀེ་ནི་གྱ་གྱུར་འགྲོ་བ་སྟེ་ནམ་མཁའ་ལ་ཁྱབ་པར་འགྲོ་བས་ཌཱ་ཀི་ནི་སྟེ་མཁའ་འགྲོ་མ་བཞིའོ། །དེའི་ངེས་དོན་ནི་ནམ་མཁའ་ཤེས་རབ་སྟོང་པ་ཉིད་ལ་ཁྱབ་པར་འགྲོ་བའི་ལྷན་སྐྱེས་སོ། །དེའི་དངོས་པོ་ནི་རང་གི་ངོ་བོ་ཡིན་ཏེ། །དེ་ཁོ་ན་ཉིད་གསལ་བ་ལས། །ཌེ་ནི་ནམ་མཁར་འགྲོ་བ་ཞེས། །སྐད་ཀྱི་བྱིངས་ལས་རྣམ་པར་བརྟགས། །ནམ་མཁའ་ཀུན་ཏུ་རྒྱུ་བས་ན། །མཁའ་འགྲོ་མ་ཞེས་བྱ་བར་བརྗོད། །མཁའ་འགྲོ་མ་ནི་ཐམས་ཅད་ཀྱི། །རང་བཞིན་ཉིད་ཕྱིར་དེ་ཡི་དངོས། །ཞེས་སོ། །དེས་སངས་རྒྱས་ཀུན་དངོས་ཞེས་བྱ་བའི་དོན་ཡང་གོ་བར་བྱའོ། །སེམས་དཔའ་ནི་འཁོར་བ་སྟེ་ཐམས་མཆོག་ཏུ་དགའ་བའི་ངོ་བོ་སྟེ། །རྡོ་རྗེ་སེམས་དཔའི་སེམས་དཔའི་དོན་ཡང་དེའོ། །རྡོ་རྗེ་ནི་བྱང་ཆུབ་ཀྱི་སེམས་དེ་ཉིད་སྟོང་པ་དང་དབྱེར་
མི་ཕྱེད་པའོ། །རྒྱུ་མཚན་དེས་ན་རྩ་བའི་རྒྱུད་ལས། །རྡོར་སེམས་ཞེས་པའི་འོག་ཏུ་བདེ་བའི་མཆོག་ཅེས་གསུངས་ཏེ། །བདེ་བ་ཆེན་པོ་ནམ་མཁའི་ཁམས་སྟོང་པ་ཉིད་ཀྱི་ཡུལ་ཅན་དུ་གནས་པ་ནི་བདེ་བ་གཞན་ལས་མཆོག་ཡིན་པའི་ཕྱིར་ཏེ། །དེ་ཉིད་གསལ་བ་ལས། །སེམས་དཔའ་ཞེས་པའང་འཁོར་བ་ནི། །མཆོག་ཏུ་དགའ་བའི་ངོ་བོ་ཡིན། །བྱང་ཆུབ་སེམས་ནི་མི་ཕྱེད་ཕྱིར། །འདི་ལ་རྡོ་རྗེ་སེམས་དཔར་བརྗོད། །དེ་ཡི་ཕྱིར་ན་དེ་འོག་ཏུ། །བདེ་བའི་མཆོག་ཅེས་རྒྱུད་ལས་གསུངས། །ནམ་མཁའི་ཁམས་སུ་གནས་པས་ཀྱང་། །དེ་ནི་བདེ་བའི་མཆོག་ཏུ་བརྗོད། །ཅེས་གསུངས་ཏེ་རྡོ་རྗེ་མཁའ་འགྲོར་བཤད་པ་གཞན་མཛད་པའང་ཡོད་པས་སྒོ་གཅིག་ཏུ་མ་ངེས་སོ། །མཆོག་ཏུ་དག་བ་འདི་ནི་གདུལ་བྱ་རང་རང་གི་དོར་རྣམ་སྣང་ལ་སོགས་པའི་སྐུར་འབྱུང་བས་རང་འབྱུང་མ་དེ་ཁོ་ན་ཉིད་ཇི་བཞིན་དུ་རྗེས་སུ་ཞུགས་པས་རང་འབྱུང་དང་། །སྐལ་བ་ཕུན་ཚོགས་དང་ལྡན་པས་བཅོམ་ལྡན་འདས་དང་། །མི་མཐུན་ཕྱོགས་རྩད་ནས་འབྱིན་པས་དཔའ་པོ་དང་། །དེ་ཁོ་ན་ཉིད་དང་རོ་གཅིག་པས་གཅིག་པུ་དང་། །ལུས་ལ་ལྷག་པར་བྱིན་གྱིས་རློབ་ཅིང་གསང་བའི་་་་་་་དང་སྐུལ་བ་རྒྱས་པྲ་བྱེད་པས་ན་ལྷ་སྟེ་ཆེ་བའི་ལྷ་ཞེས་ཀྱང་བྱའོ། མཁའ་འགྲོ་མའི་དྲལ་ནི་རྩ་སོ་དྲུག་གི་ཚོགས་ཡིན་ལ། །དེས་བསྐུལ་བའི་ཡེ་ཤེས་ནི་སྡོམ་པ་ཞེས་པ་སམ་བྷ་ག་སྟེ་བདེ་བ་མཆོག་གོ །དེ་འདྲ་བའི་་་་་་་ན་དམ་པར་སྟོང་བ་མ་ཡིན་
པ་ལ་མི་དམིགས་ཤིང་ཐ་སྙད་དུ་སྟོང་པ་སྟེ་མེད་པ་ལ་ཡང་དམིགས་པ་མིན་ནོ། ཧཱུྃ་ལ་སོགས་པའི་ཡི་གེ་དངས་བོན་ནཱ་ད་ཙམ་དུ་ཡང་མི་དམིགས་པ་དང་། དྲི་མས་གོས་པ་སྟེ་བསླད་པ་མེད་ཅིང་། གཟུགས་སུ་འང་མེད་ཅིང་གཉིས་སྣང་གི་མཚན་མ་ཡང་མེད་པའོ། མཚན་མ་དང་བཅས་པའི་རྣམ་ཤེས་རང་གི་སེམས་མཚན་མར་སྣང་བ་མེད་པའི་ཡེ་ཤེས་སུ་བསྐྱེད་པའི་ཚུལ་གྱིས་གཟུང་ངོ། ལྟེ་བའི་གནས་སུ་རྡོ་རྗེ་ཅན་སོགས་བཞུགས་ཞེས་པའི་དོན་ནི་བཤད་ཟིན་ལ། རྣམ་པར་རྩེ་བས་ནི་རོལ་བ་དང་། ལུས་རྣམས་ཀུན་ནི་ལུས་ཅན་རྣམས་ཀྱི་ནང་ན་ཞེས་པའི་དོན་ནོ། །ལྟེ་བའི་དབུས་ན་གནས་པའི་གསང་བ་ནི་སྟོང་པ་ཆེ་ཞེས་པ་ཡིན་ལ། །སྤྲོ་བའི་མ་འབྱིན་པར་བྱེད་པ་ནི་དེའི་བདག་ཉིད་ཡི་ལས་ལས་ཀུན་འབྱུང་བ་དང་། །མཐར་སྡུད་ས་ཡང་དེ་བྱེད་པའོ། འཇིག་རྟེན་འདིར་དེ་མེད་པས་མི་འགྲུབ་པ་ནི། །ཚེ་འདིར་མཆོག་ཐོབ་པའི་ལྷན་སྐྱེས་ཀྱི་བདེ་ཆེན་དང་སྟོང་པ་སྦྱང་བའི་མཐུ་ཉིད་དུ་ཟད་པའོ། །འཇིག་རྟེན་གཞན་དུའང་དེ་མེད་པར་མི་འགྲུབ་པ་ནི་སྐྱེ་བ་དུ་མར་བརྒྱུད་ནས་འཚང་རྒྱ་བ་ལ་ཡང་དེ་མེད་པར་མི་འཐོབ་བའོ། །རིག་བྱེད་ཀྱིས་མཚོན་པའི་ཕྱི་རོལ་པའི་གཞུང་དང་རང་གི་གྲུབ་པའི་མཐའི་གཞུང་རྣམས་སུ་སྙིང་པོའི་དོན་འཚོལ་བའི་བཙལ་བྱའི་སྙིང་པོའི་དོན་ནི་ཐབས་ཤེས་དབྱེར་མེད་ཀྱི་ལམ་འདི་ཉིད་ཡིན་པར་རྣལ་འབྱོར་བླ་མེད་ཀྱི་གཞུང་རྣམས་ལས་བཤད་དོ། །ཞེས་ངེས་པའི་དོན་མཐར་ཐུག་པའི་ལམ་དུ་གསུངས་སོ། །སྙིང་པོའི་ཐབས་ཤེས་དབྱེར་མེད་དེ་ཡང་
གསལ་བར་དཔལ་བདེ་མཆོག་འབྱུང་བ་ལས་གསུངས་ཏེ། དངོས་པོ་མེད་པའི་ཆོས་རྣམས་ལ། །བླང་དང་དོར་བ་ག་ལ་ཞིག ། བླང་བྱ་དང་ནི་དོར་བྱ་ཡི། །ཆོས་ཀུན་རྨི་ལམ་ཇི་བཞིན་ནོ། །དགའ་བ་ཡོངས་སུ་ཤེས་པ་ཡིས། །ཤེས་རབ་ཕ་རོལ་ཕྱིན་པ་མཆོག དགའ་བའི་འབྲས་བུ་གནས་པ། འདི་ནི་དངོས་མེད་བྱང་ཆུབ་པོ། །གཉིས་པོ་རོ་གཅིག་དབྱེར་མེད་པར། །དགའ་བའི་བདེ་བ་ཆེན་པོ་ཉིད། །ཤེས་རབ་སྙིང་རྗེའི་དབྱེ་བ་ནི། །སྒྲོན་མེ་དང་ནི་འོད་ཟེར་བཞིན། འདི་གཉིས་མི་ཕྱེད་བདག་ཉིད་དོ། །རོ་གཅིག་དངོས་པའི་སེམས་ཡིན་ནོ། །ཤེས་རབ་ཐས་ནི་མཉམ་སྦྱོར་བས། །རྫོགས་པའི་བྱང་ཆུབ་སྒྲུབ་བྱེད་པ། །དེ་ཉིད་ལ་ནི་བླ་མེད་པའི། །སངས་རྒྱས་ཀུན་རྣམས་རབ་ཏུ་གཞུག །དབྱེར་མེད་རྣམ་པར་ཡང་དག་རིག །གང་ཞིག་གནས་ན་རྡོ་རྗེ་སེམས། །ཇི་སྲིད་རྫོགས་བྱང་ཆུབ་པར་འགྱུར། །བདེ་བས་སྡོམ་པར་བྱས་ནས་ནི། །སྒྲུབ་པོ་བདེ་མཆོག་རྫོགས་པར་དུ། །དེ་སྲིད་དེ་ནི་མྱོང་བར་འགྱུར། །ཞེས་གསུངས་སོ། །རང་བཞིན་གྱིས་གྲུབ་པ་མེད་པའི་ཆོས་རྣམས་བླང་དོར་གྱི་རང་བཞིན་གྱིས་སྟོང་ཡང་དེར་སྣང་བ་རྨི་ལམ་གྱི་བླང་དོར་བཞིན་དུ་ཡོངས་སུ་ཤེས་པའི་དགའ་བ་སྟེ་བདེ་བ་ཆེན་པོ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། མཆོག་ནི་ཡུལ་ཅན་བདེ་བ་ཆེན་པོས་མ་བྱས་པའི་སྟོང་ཉིད་རྟོགས་པ་ལས་ཁྱད་པར་འཕགས་པའོ། དགའ་བ་བདེ་ཆེན་གང་གི་དོན་དུ་བསྐྱེད་པའི་འབྲས་བུ་སྟེ་དགོས་པ་ནི་འདག་མེད་པའི་དེ་ཉིད་བསྒོམ་
པའི་ཕྱིར་ཡིན་པས་བདེ་ཆེན་བསྐྱེད་ནས་དེ་ཁོ་ན་ཉིད་ཀྱི་དོན་ལ་རྩེ་གཅིག་ཏུ་གནས་པའི་རྟོགས་པ་ནི་རང་བཞིན་མེད་པའི་དོན་བསྒོམ་པའོ། འགྱུར་གསར་ལས། དགའ་བའི་འབྲས་བུ་ལ་གནས་པ། །རྟོག་པ་དེ་དགྲ་ང་བཞིན་བྲལ། །ཞེས་འབྱུང་ངོ་། །རང་བཞིན་མེད་པའི་སྟོང་པ་དང་བདེ་བ་ཆེན་པོ་གཉིས་རོ་གཅིག་པ་དབྱེར་མེད་པའི་ཤེས་རབ་དང་སྙིང་རྗེའོ། །དེ་གཉིས་ཀྱི་དབྱེ་བ་ནི་སྒྲོན་མེ་དང་དེའི་སྣང་བ་བཞིན་ངོ་བོ་གཅིག་ལ་ལྡོག་པ་ཐ་དད་པ་ཚམ་སྟེ་སྙིང་རྗེ་བདེ་ཆེན་དང་ཤེས་རབ་སྟོང་ཉིད་རྟོགས་པ་གཉིས་སེམས་གཅིག་གི་དངོས་པར་སྦྱོར་རོ། དེ་འདྲ་བའི་ཐབས་ཤེས་དབྱེར་མེད་དུ་སྦྱར་ནས་རྫོགས་པའི་བྱང་ཆུབ་སྒྲུབ་པ་ནི་སངས་རྒྱས་མཐའ་དག་གང་ལ་གནས་ནས་བྱང་ཆུབ་སྒྲུབ་པའི་ལམ་གོང་ན་མེད་པ་ཞེས་བྱ་སྟེ། །འགྱུར་གསར་ལས། དེ་ཉིད་སངས་རྒྱས་མཐའ་དག་གི །རབ་ཏུ་གནས་པ་བླ་ན་མེད། །ཅེས་འབྱུང་ངོ་། དེ་ལ་རྡོ་རྗེ་དང་སེམས་དཔའི་དོན་ཚང་བ་ནི་སྔར་བཤད་པ་ལྟར་རོ། དེ་འདྲ་བའི་ལམ་གྱིས་ཆོས་ཐམས་ཅད་ལྷན་སྐྱེས་ཀྱི་ངོ་བོར་བསྡོམས་ནས་བགྲོད་པ་ནི་དཔལ་བདེ་མཆོག་མ་ཐོབ་ཀྱི་བར་དུ་བྱེད་དོ། །ཞེས་ལམ་འདི་ཉིད་བགྲོད་པ་གཅིག་པར་སྟོན་པའོ། །འདི་བདེ་བར་གཤེགས་པའི་ལམ་མཆོག་ལ་ཕྱག་འཚལ་སྐབས་སུ་གསུངས་པས་སྔར་བཤད་པའི་ལམ་གྱི་སྙིང་པོ་ནི་འདི་ཉིད་དུ་ཡིད་ཆེས་པར་བྱའོ། ལམ་གྱི་སྙིང་པོ་ལ་སྣང་ཕྱོགས་སྒྱུ་མའི་ལུས་ཀྱི་རྫོགས་རིམ་གྱི་ཏིང་ངེ་
འཛིན་ཡང་དགོས་མོད་ཀྱང་། །རྣལ་འབྱོར་མའི་རྒྱུད་རྣམས་སུ་སྟོང་ཕྱོགས་བདེ་སྟོང་སྦྱོར་བའི་ལམ་ཉིད་རྩལ་དུ་བཏོན་ནས་གཙོ་བོར་འཆད་པ་ལྟར་ཏེ་འོན་ཀྱང་དེ་ནི་འཆད་པར་འགྱུར་རོ། །གཞན་ཡང་། དེ་སྲིད་དེ་ནི་མྱོང་བར་འགྱུར། །ཞེས་པའི་མཇུག་ཐོགས་སུ་སླར་ཡང་བདེ་སྟོང་གི་ཐབས་ཤེས་གསུངས་པ་ནི། སྒྱུ་མའི་རྫུ་འཕྲུལ་ཚོགས་པ་རྣམས་ལ་དེ་ཤེས་ཇི་བཞིན་ཉིད། །སྐྱེ་དང་དགའ་བ་མཐའ་དག་མཉམ་པ་ཉིད་དུ་རབ་སྤྱོད་ཅིང་། །འཇིགས་དང་འཇིགས་པར་བྱེད་མེད་བདེ་བ་འབྱུང་བའང་ཡོད་མ་ཡིན། དེ་ལྟར་རྣལ་འབྱོར་བ་ནི་རང་བཞིན་དེ་བཞིན་ཉིད་རྗེས་འགྲོ། །ཞེས་བདེ་བ་དང་དེ་སྐྱེད་བྱེད་དང་འཇིགས་པ་དང་དེ་བསྐྱེད་པའི་བྱ་བྱེད་ཐམས་ཅད་སྒྱུ་མ་ཤེས་པའི་སྒྱུ་མ་མཁན་ལ་སྒྱུ་མར་སྣང་བ་ལྟར། །རང་བཞིན་གྱིས་གྲུབ་པ་མེད་བཞིན་ད་དེར་སྣང་བར་ཤེས་པར་བྱས་ནས་རྣལ་འབྱོར་བ་དེ་བཞིན་ཉིད་ཀྱི་རང་བཞིན་ཇི་ལྟར་གནས་དེའི་རྗེས་སུ་འགྲོ་བར་སློབ་པའི་ཤེས་རབ་དང་། ཡང་དེའི་མཇུག་ཏུ། ཨེ་མའོ་བདེ་ཆེན་འདོད་པ་ཡིས། །ས་གསུམ་པོ་ནི་གང་བ་སྟེ། །ཨེ་མའོ་ཞི་བའི་བདེ་བ་འབབ། །སྣ་ཚོགས་འཁོར་དུ་ཆུང་ཅིང་རྒྱས། ཨེ་མའོ་བདེ་བ་བདེ་ཆེན་པོ། །ཨེ་མའོ་ཇི་ལྟར་ཇི་ལྟར་བཟའ། །ཨེ་མའོ་ལྷན་སྐྱེས་བདག་ཉིད་ཆེ། །ཆོས་རྣམས་ཀུན་གྱི་རང་བཞིན་ཉིད། །ཅེས་རྐང་པ་གཉིས་གཉིས་ཀྱི་དགའ་བ་རེ་རེ་སྟོན་ཞིང་། །དེ་ལའང་ཨེ་མའོ་ཞེས་ཤིན་ཏུ་ངོ་མཚར་བར་གསུངས་པ་ནི་སྔར་བཤད་པའི་སྟོང་བ་
དང་འདི་གཉིས་སྦྱར་ཏེ་བསྒོམས་པས་རྣལ་འབྱོར་བའི་ཡིད་འཕྲོག་པར་སྟོན་པའང་ཡིན་པས་ལམ་འདི་འདྲ་བ་ལ་ཤིན་ཏུ་ངོ་མཚར་བ་བསྐྱེད་པར་བྱའོ། གཉིས་པ་སོ་སོར་ཕྱེ་སྟེ་བཤད་པ་ལ་གསུམ། །ཤེས་རབ་སྟོང་པའི་ཕྱོགས་བཤད་པ་དང་། །ཐབས་བདེ་བའི་ཕྱོགས་བཤད་པ་དང་། ཐབས་ཤེས་གཉིས་མཉམ་པར་སྦྱོར་བའི་ཚུལ་བཤད་པའོ། དང་པོ་ནི། རྒྱ་རྒྱུད་ལས་རྒྱུད་ཀྱི་དོན་གྱི་གཙོ་བོ་རྣམས་དེ་ཉིད་བཅུ་བཞིར་བསྡུས་པའི་སྐབས་སུ། རྒྱུ་སོགས་སྟོང་པ་སྔོན་འགྲོ་བས། ཞེས་གསུངས་བ་ནི་ཀུན་སྤྱོད་ལས། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཡིན། །རུ་ནི་བཀོད་དང་བྲལ་བ་སྟེ། །ཀ་ནི་གང་དུ་འང་མི་གནས་པ། །ཞེས་གསུངས་པ་དེ་ཡིན་ལ། དེའི་དོན་ནི་མཁའ་འགྲོ་རྒྱ་མཚོ་ལས། །ཨེ་ཝཾ་ལ་སོགས་གཉིས་མེད་པའང་། །ཤྲཱི་ཞེས་བྱ་བའི་ཡིག་དེས་བརྗོད། །ཧེ་ཡིག་སྙིང་གནས་ཀུན་ཏུ། །ཧེ་རུ་ཀ་སོགས་རབ་འཁོར་འགྲོ། །སྒོམ་པ་ཀུན་གྱི་འབྱུང་གནས་ལས། །འཛིན་པ་ལ་སོགས་རྣམས་བསྐྱེད་འགྱུར། །དེ་ནི་རྒྱུ་སྟོང་བདག་ཉིད་དེ། །རྒྱུའི་བདག་ཉིད་དུ་མི་རྟོག་པའོ། །རང་བཞིན་ཆོས་བདག་མེད་པ་ཉིད། །དེ་ནི་སྟོང་པི་རྣལ་འགྱོར་གནས། །བཀོད་པ་གང་དག་བདག་མེད་པ། །རྟོག་པའི་དྲ་བ་ཆེན་པོ་ནི། །རུ་ཡིག་རྐྱེན་གྱི་བདག་ཉིད་ཅན། །དེ་ནི་བདག་གི་བཀོད་བྲལ་བའོ། །སླར་བརྗོད་ཀ་ནི་མ་ལུས་པའི། །བདག་གིས་གཉིས་བྱར་མེད་ཤེས་གང་། །གང་ཕྱིར་ཅི་ལའང་མི་གནས་པ། །དེ་ཕྱིར་ཀ་ཞེས་བྱ་བར་བརྗོད། །ཅེས་ཧེས་ཆོས་ཀྱི་བདག་མེད་དང་། །རུས་
གང་ཟག་གི་བདག་མེད་དེ་ཡུལ་བདག་མེད་གཉིས་དང་། །ཀས་ཡུལ་ཅན་གྱི་ཡེ་ཤེས་དང་། །ཤྲཱིས་དེ་གཉིས་དབྱར་གྱི་མེ་ཕྱེད་པར་སྟོན་ཏེ། །མདོར་ན་བདག་མེད་གཉིས་རྟོགས་པའི་ཤེས་རབ་བོ། །བདེ་མཆོག་འབྱུང་བ་ལས་ཀྱང་། འགྲོ་བ་ཆུ་ཡི་ཟླ་བ་དེ་བཞིན་མཐོང་འགྱུར་ཞིང་། །ཐོས་པ་དང་ནི་བྲག་ཆ་གཅིག་ཏུ་ཡང་དག་འཇུག །སེམས་ཀྱང་རྒྱ་དམ་སྨིག་རྒྱུ་ལྟ་བུ་བལྟ་བྱ་ཞིང་། །བཟའ་དང་བཏང་བ་ནམ་མཁའ་ལྟ་བུར་གང་གི་ཚེ། །བསྣམ་དག་གི་ནམ་མཁའི་མེ་ཏོག་དྲི་ལྟ་བུ། །ཟླ་བ་ཉི་མ་ཇི་བཞིན་སྐོར་བར་བྱེད་པའི་ཡིད། ཡང་དག་གནས་པ་རྣམས་ཀྱང་རི་རབ་དེ་མཚུངས་ཏེ། །དམིགས་པ་གཞོན་ནུ་མ་ཡི་རྨི་ལས་ཇི་བཞིན་ནོ། །ཐ་སྙད་དག་ནི་སྦྱུ་མ་མིག་འཕྲུལ་ལྟ་བུར་གནས། །དེ་ལྟར་ཇི་བཞིན་ལྷན་སྐྱེས་བདེ་འབྱུང་དེ་བཞིན་རུ། །དངོས་པོའི་རང་བཞིན་དང་བྲལ་བསམ་གྱིས་མི་ཁྱབ་ཚུལ། །རྟག་ཏུ་འཚར་བ་བདེ་གཤེགས་ལམ་མཆོག་ཕྱག་འཚལ་བསྟོད་ཅེས་མཐོང་བའི་གཟུགས་རྣམས་ཆུ་ཟླ་དང་། ཐོགས་པའི་སྒྲ་ཏནམས་བྲག་ཆ་དང་། བསྣས་པའི་དྲི་རྣམས་ནམ་མཁའི་མེ་ཏོག་གི་དྲི་དང་། བཟའ་བཏུང་གི་ངོ་རྣམས་ནམ་མཁའ་དང་། རེག་བྱ་རྣམས་གཞོན་ནུ་མས་རྨི་ལམ་དུ་རྨིས་པའི་རེག་བྱ་བཞིན་དང་། དྲུག་པ་ཡིད་ཀྱི་སེམས་ཀྱི་ཡུལ་རྣམས་སྨིག་རྒྱུའི་ཆུ་དང་མཚུངས་པར་ལེགས་པར་ཤེས་ནས། ཉི་ཟླ་བཞིན་དུ་ཅུང་ཟད་ཀྱན་མི་སྡོད་པར་ཡུལ་ལ་རྒྱག་པའི་ཡིད་ནི། །རང་བཞིན་མེད་
པའི་དོན་གཏན་ལ་ཕབ་པའི་ལྷ་ཐོག་ཏུ་རི་རབ་དང་འདྲ་བར་མི་གཡོ་བར་ཡང་དག་པར་གནས་པས་གནས་པར་བྱས་ནས་མཉམ་གཞག་ཏུ་བསྐྱངས་པའི་མཐུས་རྗེས་ཐོབ་ཏུ་ཐ་སྙད་གང་འདོགས་ཐམས་ཅད་སྒྱུ་མ་དང་མིག་འཕྲུལ་བཞིན་དང་། ཡུལ་སྣང་གང་ཤར་ཐམས་ཅད་གཞོན་ནུ་མས་རྨི་ལམ་དུ་བདེ་བ་མྱོང་བ་བཞིན་དུ་བདེ་བ་ཆེན་པོའི་ངོ་བོར་འཆར་བར་བྱ་བ་དང་། །སྔར་བཤད་པ་དེ་ལྟར་དཔེ་དེ་རྣམས་བཞིན་དུ་དངོས་པོ་རྣམས་རང་བཞིན་གྱིས་གྲུབ་པ་དང་བྲལ་བའི་ཡུལ་གྱི་གནས་ཚུལ་ཇི་འདྲ་བ་དེ་བཞིན་དུ་ལྷན་སྐྱེས་ཀྱི་བདེ་བ་འབྱུང་བ་ཡང་དེ་ཁོ་ན་ཉིད་ལ་རྗེས་སུ་ཞུགས་པར་རྟག་ཏུ་འཆར་བའི་བདེ་བར་གཤེགས་པའི་སར་བགྲོད་པའི་ལམ་རྣམས་ཀྱི་ནང་ནས་མཆོག་ཏུ་རྒྱུར་པ་དེ་ལ་ཕྱག་འཚལ་ལོ་ཞེས་སྔར་བཤད་པའི་ཐབས་ཤེས་རྒྱས་བཤད་ཀྱི་སྐབས་སུ་གསུངས་སོ། །རྡོ་རྗེ་མཁའ་འགྲོ་ལས་ཀྱང་། །ཐམས་ཅད་ནམ་མཁའི་མཚན་ཉིད་དེ། །ནམ་མཁར་ལ་ནི་མཚན་ཉིད་མེད། །ཁམས་གསུམ་པ་ནི་མ་ལུས་པའི། །འགྲོ་ཀུན་སྒྱུ་མ་ལྟ་བུ་ཡིན། །བརྟན་པ་དང་ནི་གཡོ་བ་ཡི། །འགྲོ་བ་དམིགས་སུ་མེད་པ་སྟེ། །མཐོང་བ་དང་ནི་རེག་པའི་དངོས། །ཐམས་ཅད་སྒྱུ་མ་ཇི་བཞིན་ནོ། །གང་གིས་བླུན་པོ་མཆིང་གྱུར་པ། །འདིར་དེས་མཁས་རྣམས་རྣམ་པར་རོལ། །ཕྱག་རྒྱའི་སྦྱོར་བ་འདི་ཡིས་ནི། །ས་གསུམ་མ་ལུས་བཟའ་བར་བྱ། །གཞན་དུ་གལ་ཏེ་སྦྱོར་བ་ནི། །མ་ཚང་མར་མེ་ལྟ་བུར་འདའ། །ཞེས་དང་། །གང་ཚེ་འདུས་བྱས་ཚུལ་རྣམས་ནི། །རྣམ་པར་མི་རྟོགས་སེམས་གྱིས་སུ། །མེ་ལོང་ལྟ་བུར་རབ་ཤེས་པ། །
དེ་ནི་ཤེས་རབ་བརྟན་པ་ཡིན། །གློག་དང་ཆུ་བུར་སྨིན་པ། །གང་ཚེ་འདུས་བྱས་ཚུལ་རྣམས་ནི། །གང་གིས་ཇི་ལྟར་མཐོང་གྱུར་པ། །དེ་ནི་ཤེས་རབ་བརྟན་པ་ཡིན། །མེ་ལོང་ནང་གི་གཟུགས་བརྙན་དང་། །རྨི་ལམ་སྒྱུ་མ་དྲི་ཟའི་གྲོང་། །མིག་འཕྲུལ་མཚུངས་པར་གང་གིས་མཐོང་། །དེ་ནི་གཙོ་བོ་ཡིན་པས་བརྗོད། །ཅེས་གསུངས་སོ། དེ་ལ་ནམ་མཁའ་ནི་ཐོགས་པའི་རེག་བྱ་བཀའ་ཙམ་གྱིས་མིང་ཙམ་ཡིན་པས་མཚན་ཉིད་གཞན་མེད་པ་བཞིན་དུ་ཕུང་པོ་ལ་སོགས་པའི་ཆོས་ཐམས་ཅད་ཀྱང་ནམ་མཁའི་མཚན་ཉིད་དེ་མིང་ཙམ་པ་ཡིན་ནོ། །འོན་ཀྱང་ནམ་མཁའ་ནི་དོན་བྱེད་པའི་ནུས་པས་སྟོང་བ་དང་མི་འབྲ་བས་ཁམས་གསུམ་མ་ལུས་པའི་འགྲོ་བ་ཀུན་ནི་རྫུན་པ་ཡིན་ཀྱང་དོན་བྱེད་པའི་ནུས་པ་དང་ལྡན་པའི་སྒྱུ་མ་ལྟ་བ་ཡིན་ཏེ། སྣོད་བཅུད་ཀྱི་འགྲོ་བ་རྣམས་ལ་དེ་ཁོ་ན་ཉིད་ལ་དཔྱོད་པའི་རིགས་པས་དཔྱད་ན་འགའ་ཡང་དམིགས་སུ་མེད་ལ། འོ་ཀྱང་རང་རང་གི་བྱ་བ་བྱེད་པ་ལ་མི་བསླུ་བས་མཐོང་བ་མྱོང་བ་དང་། །རེག་པ་སྣང་བ་ཐམས་ཅད་ནི་སྒྱུ་མ་ཇི་ལྟ་བ་བཞིན་དུ་ཤེས་པར་བྱའོ། གཡོ་བའི་འགྲོ་བ་རང་བཞིན་མེད་པ་ནི་གང་ཟག་གི་བདག་མེད་དང་། བརྟན་པའི་འགྲོ་བ་དང་ནང་གི་ཕུང་སོགས་ཀྱི་ཆོས་རང་བཞིན་མེད་པ་ནི་ཆོས་ཀྱི་བདག་མེད་དེ། འདི་ལ་འགྲོ་བ་ཞེས་པ་ནི་སྐད་ཅིག་གིས་མི་སྡོད་པར་འགྲོ་བ་ལ་དགོངས་ནས་སོ། འདོད་ཡོན་ལ་ཆགས་པ་གང་གིས་བླུན་པོ་འཁོར་བར་འཆིང་བ་དེས་ཐེག་པ་བླ་ན་མེད་འདིར་དེ་ཁོ་ན་ཉིད་ལ་མཁས་པ་རྣམས་ཕྱག་
རྒྱལ་སོགས་པའི་ཡུལ་ལ་རྣམ་པར་རོལ་པར་བྱེད་དོ། དེ་ལྟར་ཕྱག་རྒྱ་མ་དང་མཉམ་པར་སྦྱར་བ་ལ་བརྟེན་ནས་བདག་མེད་པའི་དོན་བསྒོམ་པ་འདི་ཡིས་ནི་ས་གསུམ་པོ་མ་ལུས་པ་བཟའ་བ་སྟེ་འོད་གསལ་དུ་བཅུག་སྟེ་མི་སྣང་བར་བྱའོ། །འོ་ན་ཕྱག་རྒྱའི་སྦྱོར་བ་དང་བྲལ་བའི་སྟོང་ཉིད་ཀྱི་རྣལ་འབྱོར་གྱིས་སྣང་བ་ཐམས་ཅད་འོད་གསལ་དུ་སྡུད་པ་ལ་འང་འདི་དང་འདྲ་འམ་ཞེ་ན། གལ་ཏེ་ཕྱག་རྒྱ་དང་སྦྱོར་བ་ལས་གཞན་དུ་སྟོང་བ་ཉིད་ཀྱི་སྦྱོར་བ་སྟེ་རྣལ་འབྱོར་ཉིད་ལ་འདྲིས་པར་བྱེད་ན། །མར་མེ་ཤི་བ་ལྟར་ཉོན་མོངས་ཙམ་ཟད་པའི་མྱ་ངན་ལས་འདས་པའི་མཐར་ལྟུང་གི་སངས་རྒྱས་མི་འཐོབ་བོ། ཕར་ཕྱིན་གྱི་ཐེག་ཆེན་དུ་ཕྱག་རྒྱའི་སྦྱོར་བ་ལ་བརྟེན་ནས་མི་བསྒོམ་ཡང་སྟོང་ཉིད་བསྒོམས་པས་ཞི་མཐར་མི་ལྟུང་བ་ནི་བསོད་ནམས་ཀྱི་ཚོགས་ཀྱི་དབྱེ་བ་མཐའ་ཡས་པའི་རྒྱ་ཆེན་པོ་ལ་བསླབས་པའི་དབང་གིས་ཡིན་ལ། དེ་ལྟར་སློབ་ན་འང་ཟབ་པ་དང་རྒྱ་ཆེ་ལ་གཉིས་ཀྱི་ནང་ནས་སྔ་མ་ལ་གཙོ་བོར་མི་སློབ་ཀྱི་ཕྱི་མ་ལ་གཙོ་བོར་སློབ་པ་ཡང་ཞི་བའི་མཐར་ལྟུང་བ་འགོག་པའི་ཕྱིར་ཡིན་ནོ། །ཐེག་པ་དེར་སྟོང་པ་ཉིད་ཀྱི་ལྟ་བ་མཚན་ཉིད་རྫོགས་པར་ཡོད་ཅིང་། གང་ཟག་གི་ཁྱད་པར་འགའ་ཞིག་ལ་ཤེས་རབ་མའི་འདོད་ཡོན་ལ་སྤྱོད་པ་གནང་བ་ཡོད་ཀྱང་། བདེ་སྟོང་སྦྱོར་འདོད་ནས་བྱེད་བ་གཏན་མ་ནི་པ་དང་དང་དམ་ཚིག་ཐུན་མོང་མ་ཡིན་པས་སྣོད་རུང་ཏུ་བསྒྲུབ་པ་དང་། །ཡུན་རྟེན་གཉིས་སྔགས་དང་ལྷའི་རྣལ་འབྱོར་ལ་སོགས་པས་སྦྱངས་བའི་ཐབས་མཁས་ཀྱང་མེད་པས། །ལས་དེར་ཕྱག་རྒྱའི་སྦྱོར་བས་ས་གསུམ་བཟའ་བར་བྱ་ཞེས་མི་
གསུངས་སོ། ཉན་རང་གི་ལམ་དུ་ནི་རྒྱ་ཆེ་བའི་ཐབས་ལ་སློབ་པ་ཡང་མེད་ལ། །ལྷན་སྐྱེས་ཀྱི་བདེ་བས་སྟོང་ཉིད་བསྒོམ་པའི་སྐོར་ཡང་མེད་པས་སྟོང་པ་ཉིད་ཀྱི་རྣལ་འབྱོར་ལ་གཙོ་བོར་འདྲིས་པས་བྱེད་ན། མ་ཚང་མར་མེ་ལྟ་བུར་འདའ། ཞེས་གསུངས་སོ། དཔལ་རྡོ་རྗེ་མཁའ་འགྲོའི་གཞུང་དེ་རྣམས་ལ་རྣལ་དཔྱོད་ཅན་གྱིས་བརྟགས་ན་ཐེག་པ་ཆེ་ཆུང་གཉིས་ཀྱི་འབྱེད་བྱེད་ཀྱི་གཙོ་བོ་ནི་སྟོང་ཉིད་རྟོགས་པའི་ཤེས་རབ་ཀྱིས་མི་བྱེད་ཀྱི་ཐབས་ཀྱིས་བྱེད་པ་དང་། དེ་ཡང་ཕར་ཕྱིན་གྱི་ཐེག་པར་ནི་ཚོགས་ཀྱི་གསལ་བའི་དབྱེ་བ་མཐའ་ཡས་པའི་རྒྱ་ཆེ་བའི་ཐབས་ཀྱིས་ཁྱད་པར་དུ་འཕགས་པ་དང་། དེ་དང་ཐེག་པ་བླ་ན་མེད་པ་གཉིས་ཀྱང་ཤེས་རབ་སྟོང་པ་ལ་མཆོག་དམན་འབྱུང་བ་མིན་གྱི་གཏན་ལ་ཕབ་པའི་སྟོང་ཉིད་ཡུལ་ཅན་བདེ་བ་ཆེན་པོས་བསྒོམ་པའི་ཐབས་མཁས་ཀྱིས་ཁྱད་པར་དུ་འཕགས་པ་དང་། རྒྱ་ཆེ་བའི་སློབ་ཚུལ་སྔར་ལྟར་མ་བྱས་ཀྱང་བདེ་ཆེན་གྱིས་སྟོང་ཉིད་བསྒོམས་པས་ཞི་བའི་མཐའ་ལྟུང་བ་འགོག་པས་ཡུལ་ཅན་ཁྱད་པར་ཅན་གྱིས་སྟོང་ཉིད་བསྒོམས་ན་དེ་ཉིད་ལ་གཙོ་བོར་བསྐྱངས་པས་ཆོ་ག་དང་། དེ་བསྒོམས་པས་ཉོན་སྒྲིབ་ཏུམ་ཟད་ཤེས་སྒྲིབ་སྤངས་པའི་མཆོག་གི་དངོས་གྲུབ་ཀྱང་ཚེ་འདིར་འགྲུབ་པར་གོ་ནུས་པས་ལམ་གྱི་གནད་རྣམས་ལ་རྐང་ཚུགས་པའི་ངེས་བརྙེད་པར་འགྱུར་རོ། བྷ་ཝ་བྷ་དྲས། ཕྱག་རྒྱའི་སྦྱོར་བ་འདི་ཡིས་ནི། ཞེས་པ་དང་། གཞན་དུ་མཚང་ཞེས་པའི་གང་མཚང་བ་ལྷའི་རྣལ་འབྱོར་ལ་བཤད་པ་ཡང་སྔར་བཤད་པའི་
དོན་གྱི་ཕྱོགས་གཅིག་ཡིན་ལ། གཙོ་བོའི་དོན་སྔར་བཤད་པ་ལྟར་བྱ་དགོས་པ་ནི་གང་གིས་ཞེས་པའི་རྐང་པ་གཉིས་དང་སྦྱར་བ་ལས་ཤིན་ཏུ་གསལ་ལོ། ཤེས་རབ་སྟོང་པའི་ཕྱོགས་བཤད་པའི་སྐབས་འདིར་ཐབས་བདེ་བའི་ཕྱོགས་བཤད་པའི་སྐབས་སུ་བཤད་རྒྱུ་འགའ་ཞིག་བཤད་པ་ནི་དོན་གྱི་ཕྱོགས་གཅིག་ཡིན་ལ། རྒྱུད་ཀྱི་ལུང་འདྲེན་སོ་སོར་མ་ཕྲལ་བར་དྲངས་ན་གོ་བ་ཆེ་བའི་གནད་ཀྱིས་ཡིན་ནོ། གང་གི་ཚེ་འདུས་བྱས་རྣམས་མེ་ལོང་གི་གཟུགས་བརྙན་ལྟར་རབ་ཏུ་ཤེས་པ་དེའི་ཚེ་ཤེས་རབ་བརྟན་པ་ཡིན་ཞེས་པ་ནི། དེའི་གོང་དུ་། གང་ཡང་ལས་རྣམས་ཐམས་ཅད་ལ། ཤེས་རབ་དང་ནི་སྦྱར་བྱ་སྟེ། དེ་ཡང་སྟོང་པའི་གནས་སུ་སྦྱར། །དེ་འདིར་བདག་ཆེན་བཀའ་ཐུབ་ཡིན། །ཞེས་ལས་གང་བྱེད་པ་ལ་དུས་ཀུན་ཏུ་སྟོང་ཉིད་རྟོགས་པའི་ཤེས་རབ་ཀྱིས་ཟིན་པར་བྱ། ཞེས་པ་དང་། ཤེས་རབ་ཐབས་ནི་མ་གཏོགས་པར། གང་ཚེ་སེམས་གཞན་མི་གཡོན། དེ་ཚེ་བྱང་ཆུབ་ཆེན་པོ་ནི། ངེས་པར་སྟེར་བ་ཉིད་དུ་བཤད། ཅེས་ཐབས་ཤེས་མཉམ་པར་སྦྱོར་བ་དང་མ་བྲལ་ན་ངེས་པར་སངས་རྒྱས་སྟེར་ཞེས་གསུངས་པའི་ཤེས་རབ་དང་སྦྱོར་བ་དང་། ཤེས་རབ་སྟོང་པ་དེ་ཅི་འདྲ་ཞིག་ལ་བྱེད་སྙམ་པ་ལ་དེ་ལྟར་གསུངས་བའོ། ཆུ་བུར་ལྟ་བུར་སྨིན་པ་ནི། རྒྱུ་རྐྱེན་གྱིས་དེ་དང་འདྲ་བར་བསྐྱེད་པའོ། འདུས་བྱས་ནི་གཟུགས་བརྙན་སོགས་དང་འདྲ་བར་རྟོགས་པ་ར་བྱ་རྒྱུ་དང་། རྟོགས་པའི་ཐབས་གཉིས་སུ་བྱ་སྟེ་དང་པོ་ནི་སྣོད་བཅུད་རྣམས་སོ། གཉིས་པ་ནི། དང་རང་གི་རྒྱུ་རྐྱེན་འདུས་ནས་བྱས་པའི་ཕྱིར་རང་བཞིན་
གྱིས་འགྲུབ་པ་མེད་དེ། གཟུགས་བརྙན་ལ་སོགས་པ་བཞིན་ནོ་ཞེས་པ་སྟེ་རྟེན་འབྲེལ་གྱི་རིགས་པའོ། དངོས་པོ་རྣམས་བདེན་པར་མ་གྲུབ་པ་གཟུགས་བརྙན་དང་སྒྱུ་མ་ལ་སོགས་པ་དང་འདྲའོ་སྙམ་པ་ཙམ་མ་གཏོགས་པ་སྒྲུབ་བྱེད་ཀྱི་རིགས་པ་མེད་ན་ཆོས་ཙམ་དུ་ཟད་པས་ཡང་དག་པའི་ལྟ་བ་མི་རྙེད་པས་སྒྲུབ་བྱེད་ཀྱི་རིགས་པས་ལུང་གི་དོན་གཏན་ལ་ཕབ་པའི་ངེས་པར་བསྐྱེད་དགོས་སོ། དེ་ཡང་རྡོ་རྗེ་མཁའ་འགྲོའི་འགྲེལ་བར། །གཅིག་དང་དུ་བྲལ་གྱི་རིགས་པས་རྒྱས་པར་གཏན་ལ་ཕབ་པས་གཅིག་དང་དུ་བྲལ་ལམ་རྟེན་འབྲེལ་ལ་སོགས་པའི་རིགས་པས་གཏན་ལ་ཕབ་པ་སྟེ་གཞན་དུ་རྒྱས་པས་གཤད་ཟིན་ཏོ། མེ་ལོང་ནང་གི་གཟུགས་བརྙན་དང་། ཞེས་སོགས་ཀྱི་རྐང་པ་བཞི་ནི་རིམ་ལྔའི་བདག་བྱིན་རླབས་ཀྱི་རིམ་པར་ཡང་འབྱུང་བས་སྒྱུ་མ་ལྟ་བུར་ཤེས་པར་བྱ་བར་ཐེག་པ་འདིར་གསུངས་ལ། སྣང་ལ་རང་བཞིན་མེད་པའི་སྒྱུ་མ་ལྟ་བུ་རྣལ་འབྱོར་བླ་ན་མེད་པ་དང་ཕར་ཕྱིན་གྱི་ཐེག་པ་གཉིས་ཐུན་མོང་བ་སྤྱི་དོན་གྱི་སྒྱུ་མ་ལྟ་བུ་དང་འཕགས་པ་ཡབ་སྲས་ཀྱིས་གསུངས་པའི་བདག་བྱིན་རླབས་སྒྱུ་ལུས་ལྟ་བུ་སྦས་དོན་གྱི་སྒྱུ་མ་ལྟ་བུ་གཉིས་ཡོད་པ་སོ་སོར་ཕྱེད་པ་གལ་ཆེའོ། དེ་ནི་གཙོ་བོ་ཡིན་ཞེས་པ་ནི་སྒྱུ་མ་ལྟ་བུ་སྔ་མ་མ་རྟོགས་ན་ཐམས་ཅད་མཁྱེན་པ་ལྟ་ཞོག་འཁོར་བ་ལས་ཐར་པ་ཡང་མི་འཐོབ་པས་ལམ་གྱི་སྲོག་ཡིན་ཏེ། རིམ་ལྔ་ལས། ཉོན་མོངས་ལས་ནི་ལམ་གྱི་ལུས། བྱེད་པ་པོ་དང་འབྲས་བུ་ནི། སྨིག་
རྒྱུ་རྨི་ལམ་ལྟ་བུ་དང་། །དྲི་ཟའི་གྲོང་ཁྱེར་ངེས་པར་མཚུངས། །ཏིང་འཛིན་འདི་ནི་མ་ཤེས་པས། །ཀུན་རྫོབ་ལ་ནི་ཉེར་དམིགས་ནས། །རྣམ་པ་སྣ་ཚོགས་ནད་རྣམས་སྐྱེ། །དེ་རྣམས་སྒྱུ་མའི་སྨན་གྱིས་འཚོ། །ཞེས་གསུངས་སོ། སྦས་དོན་གྱི་སྒྱུ་ལུས་བདག་བྱིན་རླབས་ནི། །མཁའ་འགྲོ་རྒྱ་མཚོ་ལས། །ལྷ་ཡི་རྣམ་པའི་རྣལ་འབྱོར་བདག །སྐད་ཅིག་མངོན་སུམ་བྱེད་པ་པོ། །ལུགས་མ་སོགས་ལ་རྣལ་འབྱོར་ཀྱིས། །རྣམས་པར་བྱས་པའི་དབྱིབས་སུ་འགྱུར། །སྟོང་ཉིད་རྣལ་འབྱོར་རང་བཟིན་གཟུགས། །བདག་བྱིན་རླབས་པའི་མཚན་ཉིད་དོ། །བདག་བྱིན་རླབས་བྲལ་རྣལ་འབྱོར་བ། །སྤུན་ལྐོགས་དུམ་བུ་བཞིན་ཤེས་བྱ། །འདི་འདྲའི་མཚན་ཉིད་མཆོག་གྱུར་བ། །སྐྱེ་བོ་ཕྱུགས་རྣམས་ཀྱིས་མི་ཤེས། །དེ་ཕྱིར་སྒྱུ་འཕྲུལ་འདི་བསྒོམས་ན། །བླ་ན་མེད་པའི་བྱང་ཆུབ་འཐོབ། །ཅེས་གསུངས་ལ། རིམ་ལྔ་ལས་ཀྱང་། རང་བྱིན་རླབས་པའི་རིམ་པ་ནི། །གང་གིས་བླ་མ་ལས་མ་བསྒྲུབས། མདོ་སྡེ་རྒྱུད་དང་རྟོག་པ་ལ། །དེ་ཡི་ངལ་བ་དོན་མེད་འགྱུར། །ཞེས་གསུངས་པས་ཆེས་གཙོ་བོར་གྱུར་པ་ཡིན་ལ། ཁྱད་པར་དུ་སྐད་ཅིག་ཙམ་གྱིས་མངོན་སུམ་དུ་བྱེད་པའི་ལྷའི་རྣལ་འབྱོར་བདག་བྱིན་རླབས་དང་བྲལ་ན་སྤུན་ལྐོགས་བཞིན་དུ་སྙིང་པོ་མེད་པར་གསུངས་པས་རྣལ་འབྱོར་མའི་རྒྱུད་དཔལ་བདེ་མཆོག་ལ་ཡང་སྒྱུ་ལུས་ཀྱི་རྫོགས་རིམ་མེད་མི་རུང་དུ་ཤེས་པར་གྱིས་ཤིག །མངོན་བརྗོད་བླ་མ་ལས་ཀྱང་། རང་བཞིན་
མེད་པའི་གནས་གོམས་ལས། །ལྷ་ཡི་སྙིང་པོ་སྒོམ་བྱེད་པ། །དེ་ནི་མཆོད་པ་ཆེན་པོར་འདོད། །སངས་རྒྱས་ཐམས་ཅད་རྟོགས་བྱེད་པའོ། །ཞེས་རང་བཞིན་མེད་པའི་དོན་བསྒོམ་པ་ནི་སངས་རྒྱས་ཐམས་ཅད་རྟོགས་པ་སྟེ་སྒྲུབ་པར་བྱེད་པའི་མཆོད་པ་ཆེན་པོ་དང་། །རང་བཞིན་བདག་མེད་ཆོས་རྣམས་ནི། །ནམ་མཁའ་ལྟ་བུར་དྲི་མ་མེད། །སྟོང་ཉིད་ཡེ་ཤེས་རྡོ་རྗེ་ཡིས། །སྟོང་ཉིད་རྟག་ཏུ་བསྒོམ་པར་བྱ། །ཞེས་གསུངས་སོ།། དེ་ལྟར་ན་བདེ་མཆོག་རྩ་བ་དང་བཤད་པའི་རྒྱུད་ཀུན་ལས། །རང་བཞིན་མེད་པ་བདག་མེད་པའི་སྟོང་པ་ཉིད་བསྒོམ་དགོས་པར་གསུངས་པས་བདེ་སྟོང་སྦྱར་བའི་ལམ་བསྒོམ་པར་འདོད་པས་བདག་མེད་པའི་ལྟ་བ་ཕུ་ཐག་ཆོད་པར་བཙལ་པར་བྱའོ། བླ་མེད་ཀྱི་ཐེག་པ་འདིར་དེ་འདྲ་བའི་ལྟ་བའི་གོ་བ་བཙལ་མི་དགོས་སམ་སྙམ་པའི་ལོག་རྟོག་སྔགས་ཀྱི་གཞུང་ལ་བརྟེན་ནས་འགོག་པ་རྒྱས་པར་ནི་གཞན་དུ་བཤད་ཟིན་པ་ལས་ཤེས་པར་བྱའོ། །གཉིས་པ་ནི། །འོ་ན་བདེ་སྟོང་སྦྱོར་བའི་བདེ་བ་དེ་ཅི་འདྲ་བ་ཡིན་ཞེ་ན། འདི་ལས་སེམས་རྩེ་གཅིག་པའི་རིང་ངེ་འཛིན་རྩམ་ཞིག་བསྒོམགས་པས་སེམས་ཤིན་སྦྱངས་སྐྱེས་པ་ན་དེའི་མཐུས་ལུས་ཀྱི་རླུང་རྣམས་ལས་རུང་དུ་སོང་ནས་ནང་དུ་ཕན་འདོགས་པའི་རྣམ་པ་ཅན་གྱི་ལུས་ཤིན་སྦྱངས་སྐྱེལ། དེ་ལ་བརྟེན་ནས་ལུས་ལ་བདེ་བ་དང་སེམས་ལ་དགའ་བ་ཆེན་པོ་སྐྱེ་བར་རྣལ་འབྱོར་སྤྱོད་པའི་ས་ལས་གསུངས་པ་ནི། །ཕྱི་ནང་གཉིས་ཀ་དང་། ཐེག་པ་ཆེ་ཆུང་གཉིས་ཀ་དང་། མདོ་སྔགས་
གཉིས་ཀའི་ཐུན་མོང་བ་སེམས་མི་རྟོགས་པར་འཇོག་པ་རིང་དུ་བསྐྱངས་པ་ཐམས་ཅད་ལ་འབྱུང་སྟེ། དེའི་ཚུལ་ནི་ཤེས་བྱེད་ཀྱི་ལུང་དང་བཅས་པ་བྱང་ཆུབ་ལམ་གྱི་རིམ་པར་བཤད་ཟིན་ཏོ། དེའི་ཕྱིར་དེ་འདྲ་བའི་བདེ་བ་ཡང་འདིའི་བདེ་བ་ཡིན་ནོ། །གཞན་ཡང་མཚན་ཉིད་ཀྱི་ཐེག་པ་བཤད་པའི་རླུང་འབྱུང་རྡུབ་བསྒོམ་པ་དང་། བྱ་རྒྱུད་བསམ་གཏན་ཕྱི་མ་དང་། སྤྱོད་རྒྱུད་རྣམ་སྣང་མངོན་བྱང་དུ་གསུངས་པའི་རླུང་ཕྱིར་རྒྱུ་བ་བཀག་ནས་ནང་དུ་བཟུང་སྟེ་ལྷའི་རྣལ་འབྱོར་བསྒོམས་པའི་སྲོག་རྩོལ་ཞེས་གསུངས་པ་དེ་བསྒོམས་པ་ལ་བརྟེན་ནས་ཀྱང་ལུས་སེམས་ལ་བདེ་ཆེན་སྐྱེ་བའི་ཏིང་ངེ་འཛིན་སྐྱེ་མོད་ཀྱང་། །ནང་ལུས་ཀྱི་རྩ་འཁོར་གྱི་གནས་རྣམས་སུ་གནད་དུ་བསྣུན་པའི་རླུང་གི་རྣལ་འབྱོར་མིན་པས། །དེའི་བདེ་བ་ཡང་བླ་མེད་ཀྱི་ཐེག་པར་བདེ་སྟོང་སྦྱོར་བར་བཤད་པའི་བདེ་བ་མིན་པས། །རླུང་རྡོ་རྗེའི་བཟླས་པ་དང་། །བུམ་པ་ཅན་གྱི་སྲོག་རྩོལ་རྣམས་དང་མཚུངས་པ་མ་ཡེན་ནོ། སློབ་དཔོན་སངས་རྒྱས་གསང་བས་རླུང་ཕྱིར་འགྲོ་བ་བཀག་ནས་ནང་དུ་བཟུང་སྟེ་ལྟ་བསྒོམས་རྣལ་འབྱོར་རྒྱུད་ལའང་སྦྱོར་བར་བཤད་དོ། མདོར་ན་རྣལ་འབྱོར་རྒྱུད་མན་ཆད་ཀྱི་རྒྱུད་སྡེ་གསུམ་དང་། མཚན་ཉིད་ཀྱི་ཐེག་པར་སྟོང་ཉིད་ཀྱི་དོན་ཕྱིན་ཅི་མ་ལོག་པར་བསྒོམས་པའི་འཇིག་རྟེན་ལས་འདས་པའི་ཟག་མེད་ཀྱི་བདེ་བ་མང་པོ་བཤད་མོ་ཀྱང་། ལུས་ཀྱི་རྩ་འཁོར་ཀྱི་གནས་རྣམས་སུ་གནད་དུ་བསྣུན་པ་ལས་རླུང་དུ་མར་བཙུན་པའི་དབང་གིས་གཏུམ་མོ་འབར་ནས་བྱང་སེམས་ཞུ་བའི་བདེ་བ་མ་བཤད་པས་བདེ་སྟོང་སྦྱོར་བར་གསུངས་པའི་བདེ་བའི་དོན་མེད་དོ། མན་ངག་སྙེ་མ་ལས་ཀྱང་འོ་ན་བསམ་གཏན་དང་པོ་ཟོབ་པ་རྣམས་ཀྱང་། འཁོར་ལོས་སྒྱུར་བ་རྣམས་བཞིན་དུ། བདེ་བར་ཉེ་བར་བསྟུན་ན། བདག་མེད་པ་ཉིད་གཉིས་ཀ་
རབ་ཏུ་རྟོགས་པ་ན་ལྟ་ཅི་སྨོས། དེ་ལྟར་ན་རབ་ཏུ་དགའ་བ་ལྷག་པ་ཉིད་ལས་ས་དང་ལོ་རབ་ཏུ་དགའ་བའོ་ཞེས་བརྗོད་པར་བྱ་བས་སོ་ཞེ་ན། བདེན་ཏེ་འདི་ལྷན་ཅིག་སྐྱེས་པའི་བདེ་བ་ནི་མ་ཡིན་ཏེ། དེ་ཉིད་ཀྱི་ཕྱིར་བདེ་བ་ཆེན་པོ་མ་ཡིན་ཞིང་། ལས་དང་པོ་པའི་གནས་སྐབས་སུ་ཐབས་སུ་གྱུར་པ་ཡང་མ་ཡིན་ཏེ། ཁབ་ཀྱི་བུ་ག་ནི་ནམ་མཁའི་བུ་གའོ་ཞེས་པ་ཁོ་ནས་མཁའ་དང་ཡང་མཉམ་པར་འགྱུར་པ་མ་ཡིན་པས་སོ་ཞེས་བདག་མེད་གཏན་མ་རྟོགས་པའི་བསམ་གཏན་དང་པོ་ཐོབ་པ་ལ་ཡང་བདེ་བ་རྒྱ་ཆེན་སྐྱེ་བར་གསུངས་ན། བདག་མེད་གཉིས་ཕྱིན་ཅི་མ་ལོག་པར་རྟོགས་ནས་ཡུན་དུ་མའི་བར་དུ་བསྒོམ་པའི་ཕར་ཕྱིན་གྱི་ཐེག་པ་ལ་སྟོང་ཉིད་བསྒོམས་པའི་བདེ་བ་ཆེན་པོ་སྐྱེ་བ་ལྷ་ཅི་སྨོས་ས་དང་པོ་རབ་ཏུ་དགའ་བ་ཞེས་པ་ཡང་ས་དེར་བདེ་བ་ཤིན་ཏུ་ལྷག་པས་དེ་ལྟར་བཏགས་པས་ན་བླ་མེད་ཀྱི་ཐེག་པ་བདེ་བའི་སྒོ་ནས་ཕར་ཕྱིན་གྱི་ཐེག་པ་ལས་ཁྱད་པར་དུ་འཕགས་པ་མ་ཡིན་ནོ་སྙམ་པའི་རྩོད་པ་བཀོད་པའི་ལན་དུ་སྟོང་ཉིད་བསྒོམས་པའི་བདེ་བ་ཆེན་པོ་ཡོད་པ་བདེན་ཡང་དེ་ལྷན་སྐྱེས་ཀྱི་བདེ་བ་མིན་པས་བླ་མེད་དུ་གསུངས་པའི་བདེ་བ་ཆེན་པོ་མིན་ལ། ཕར་ཕྱིན་ཐེག་པར་ལས་དང་པོ་པའི་སྐབས་སུ་ལྷན་སྐྱེས་ཀྱི་བདེ་བ་དངོས་སུ་བདྲེན་པའི་ཐབས་ཀྱང་མ་གསུངས་བས་བདེ་བ་ཆེན་པོའི་སྒོ་ནས་མཆོག་ཏུ་མ་གྱུར་པར་གསུངས་སོ། ཡང་དེ་ཉིད་ལས། འོ་ན་ཤེས་རབ་ཀྱི་ཕ་རོལ་ཏུ་ཕྱིན་པར་གང་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བདེ་བ། ཞེས་གསུངས་སོ་
ཞེ་ན། འདི་གསུངས་མོད་འདིའི་ཐབས་བསྟན་པ་ནི་མ་ཡིན་ཏེ། ཐབས་སུ་གྱུར་པ་ལྷན་ཅིག་སྐྱེས་པའི་བདེ་བ་ཆེན་པོ་ཉེ་བར་མ་བསྟན་པའི་ཕྱིར་རོ། དེའི་ཕྱིར་ངེ་ཡང་རིམ་འདི་ཁོ་ནས་རྟོགས་པར་བྱའོ་ཞེས་ཕར་ཕྱིན་གྱི་ཐེག་པར་འབྲས་བུ་བྱང་ཆུབ་ཀྱི་བདེ་བའི་རྒྱུ་ལམ་གྱི་བདེ་བ་ཆེན་པོ་མ་བསྟན་པས་འབྲས་བུའི་སྐབས་སུ་བདེ་བ་ཆེན་པོ་བཤད་དུ་ཆུག་ཀྱང་ཐེག་པ་གཉིས་ཁྱད་པར་ཆེ་བར་གསུངས་སོ། གསང་བ་གྲུབ་པ་ལས་ཀྱང་། དེ་ཉིད་དེ་ཡང་རྒྱུད་གནས་པར། །དཔལ་ལྡན་གསང་བ་འདུས་པར་གསལ། །སྤྲོས་པ་དུ་མ་རྒྱས་གྱུར་པ། གཞན་དུ་སྤས་ནས་བསྟན་པ་ཡིན། །བྱ་བ་སྤྱོད་པའི་དབྱེ་བ་ཡང་། །མདོ་སྡེའི་སྡེ་སྣོད་ལ་སོགས་སུ། །མཆོག་ཏུ་དགའ་བ་གཅིག་བུ་ཉིད། །རྣམ་པ་དུ་མར་རྣམ་པར་གནས། །ཕུང་པོ་རིན་ཆེན་སྣོད་ཉིད་དུ། །སེམས་ཅན་བསམས་པའི་བྱེ་བྲག་གིས། །དེ་ཉིད་འབད་པས་སྦས་མཛད་ནས། །སངས་རྒྱས་མགོན་པོས་རྣམས་པར་བཞག །ཅེས་ལྷན་ཅིག་སྐྱེས་དགའི་དེ་ཉིད་རྒྱུད་སྡེ་འོག་མ་དང་མདོ་སྡེ་རྣམས་གསུམ་བསྟན་པར་སྤས་པར་གསུངས་སོ། །དེས་ན་མཆོག་ཏུ་དགའ་བ་གཅིག་ཏུ་ཉིད་དེ་རྣམས་སུ་རྣམ་པ་དུ་མར་གནས་པར་གསུངས་པ་ནི་མཆོག་ཏུ་དགའ་བ་དེ་ཉིད་ལ་རིམ་གྱིས་བཀྲ་བར་བཞེད་ནས། །རྣམ་པ་མི་འདྲ་བ་ད་མར་གསུངས་ཞེས་པའི་དོན་ཡིན་གི་དེ་ཉིད་དེ་རྣམས་སུ་སྟོན་པ་མིན་ཏེ། །གཞན་དུ་ད་དེ་རྣམས་སུ་དབང་གོང་མ་རྣམས་ཀྱང་གསུངས་དགོས་ཏེ། །གསང་བ་ལ་སོགས་པའི་དབང་མ་བསྐུར་བ་ལ་བདེ་བ་ཆེན་པོའི་དེ་ཉིད་སྟོན་པ་བཀག་པའི་ཕྱིར་རོ། དེ་ལྟར་ན་སྟོང་པ་ཉིད་ཕྱིན་ཅི་
མ་ལོག་པར་ངེས་ནས་བསྒོམ་པའི་ཟག་མེད་ཀྱི་བདེ་བ་ཡིན་ཀྱང་ལྷན་སྐྱེས་ཀྱི་བདེ་བ་མིན་པ་དུ་མ་ཞིག་ཡོད་པཔའི་ཚུལ་འདིར་སྦྱངས་པ་ཞིག་ཡིན་ན། །ཕར་ཕྱིན་གྱི་ཐེག་པ་ལ་གོ་བ་རགས་པ་ཆགས་ནས་ཤེས་པ། ཡང་དེ་འདྲ་བ་དེ་ལྷའི་རྣལ་འབྱོར་ཤིན་ཏུ་བརྟན་པོ་དང་འབྲེལ་བར་འཇུག་པ་ཡིན་ཀྱང་བླ་མེད་ཀྱི་རྫོགས་རིམ་གྱི་དོན་མེད་པ་ནི། །རྒྱུད་སྡེ་འོག་མའི་གཞུང་ལ་གོ་བ་རགས་པ་ཆགས་ན་འང་ཤེས་པར་ནུས་མོད་ཀྱང་། བློ་གྲོས་ཀྱི་མུས་པ་ཤིན་ཏུ་ཞན་པའི་སྐབས་སུ་འདུག་པས་སྔར་བཤད་པའི་བདེ་བ་དང་བོ་ཙམ་ལའང་བླ་མེད་ཀྱི་བདེ་སྟོང་སྦྱོར་པའི་བདེ་ཆེན་དུ་འཛིན་པ་ཤིང་ཏུ་མང་བར་སྣང་ངོ་། དེ་ལྟར་ན་བདེ་སྟོང་སྦྱོར་བར་གསུངས་བའི་བདེ་བ་ནི་ལྷན་སྐྱེས་ཀྱི་དགའ་བ་ཡིན་པ། རྫོགས་རིམ་པའི་དགའ་བ་དེ་ཐོག་མར་སྐྱེ་བ་ནི། །རོ་རྐྱང་གི་རླུང་ཨ་ཝ་དྷཱུ་ཏཱིར་བཙུད་པའི་དབང་གིས་གཏུམ་མོ་སྤར་བས་བྱང་སེམས་བཞུས་པ་ལས་སྐྱེ་ལ། དེའི་བདེ་བ་དང་སྔར་བཤད་པའི་བདེ་བ་རྣམས་བདེ་བ་ཙམ་དུ་མཚུངས་ཀྱང་དོན་ཤིན་ཏུ་ཁྱད་ཆེ་བས་མ་འཁྲུལ་བས་སོ་སོར་ཕྱེད་པར་བྱའོ། །དེ་ལ་ནི་ཐེག་པ་འདིར་དམིགས་པ་མེད་པའི་སྙིང་རྗེ་ཞེས་ཀྱང་གསུངས་ཏེ། །མན་ངག་སྙེ་མ་ལས། ཐམབས་ནི་དམིགས་པ་མེད་པའི་སྙིང་རྗེ་ཆེན་པོ་འགྲོ་བའི་དོན་བྱེད་པ་ལྷན་ཅིག་སྐྱེས་པའི་བདེ་བ་ཆེན་པོ་རང་བཞིན་ནོ། ཞེས་གསུངས་ཏེ་དེ་ལྟར་གསུངས་པ་མང་ངོ་། ལྷན་སྐྱེས་ཀྱི་བདེ་བ་དེས་སྟོང་ཉིད་བསྒོམས་ན་སྔར་བཤད་པ་ལྟར་གྱི་རྒྱ་ཆེ་བའི་སློབ་ཚུལ་གྱི་ལམ་རྒྱས་པ་མེད་
ཀྱང་མདོར་བསྡུས་པས་འགྲུབ་པ་དང་། །ལམ་གཞན་དུ་བསྐལ་པ་གྲངས་མེད་པ་དུ་མར་བསླབ་དགོས་པ་ཡང་ལམ་འདིས་ཚེ་གཅིག་ལ་འགྲུབ་པར་གསུངས་ཏེ། །སམྦུ་ཊ་ལས། དེ་ཕྱི་དེ་རྒྱས་ཅི་ཞིག་བྱ། མདོར་བསྡུས་པས་ནི་སངས་རྒྱས་ཉིད། །བསྐལ་བ་བྱེ་བ་གྲངས་མེད་པས། །ཇི་སྲིད་སངས་རྒྱས་གང་འཐོབ་པ། །གང་གིས་དམ་པའི་བདེ་བས་ཁྱོད། །སྐྱེ་བ་འདིར་ནི་ཐོབ་པར་འགྱུར། །ཞེས་གསུངས་ཏེ། །དམ་པ་སྟེ་མཆོག་གི་བདེ་བ་ནི་ལྷན་སྐྱེས་ཀྱི་བདེ་ཆེན་ནོ། །གསང་བ་གྲུབ་པ་ལས་ཀྱང་འབྱུར་སྟེ། །སྒྲུབ་པོ་དེ་ཉིད་ལ་གཏད་པས། །བརྟུལ་ཞུགས་མེད་ཀྱང་འགྲུབ་པར་འགྱུར། །བརྟུལ་ཞུགས་པ་རྒྱ་ཕྲག་སྤྱད་བྱས་ཀྱང་། །དེ་ཉིད་དམན་ན་འགྲུབ་པའི་འགྱུར། །ཞེས་དང་། མཚམས་མེད་ལྔ་པོ་བྱེད་པ་དང་། །སྲིད་པར་ངལ་བར་བྱས་པས་ཀྱང་། །དེ་ཉིད་ལྡན་ན་འགྲུབ་འགྱུར་ཏེ། །ཞེས་གསུངས་ཏེ། །དེ་ཉིད་ཅེས་པ་ནི་ལྷན་སྐྱེས་ཀྱི་བདེ་ཆེན་གྱིས་བདག་མེད་པའོ་དོན་ལེས་པར་གཏན་ལ་ཕབ་པ་བསྒོམ་པ་ལ་བྱ་ཡི་སྟོང་རྐྱང་བསྒོམ་པ་མིན་ནོ། །ཀུན་སྤྱོད་ལས། དེ་ནས་བསྲུང་ཆ་མེད་ཅིང་བཟའ་བ་མེད། །དཀྱིལ་འཁོར་པ་ཡང་མེད་ཅིང་དཀྱིལ་འཁོར་མེད། །སྔགས་བཟླས་མེད་ཅིང་བཀའ་ཐུབ་སྦྱིན་སྲེག་མེད། །མདོར་ན་སེམས་དེ་འདུས་པའི་ཚུལ་ཅན་ཡིན། །ཞེས་བདེ་སྟོང་དབྱེར་མེད་ཀྱི་ཐབས་ཤེས་དེར་ལམ་ཀུན་འདུས་པའི་ཚུལ་ཏེ་ངོ་བོ་ཅན་དུ་གསུངས་ཏེ། །མངོན་བརྗོད་ལས་ཀྱང་དེ་བཞིན་དུ་གསུངས་སོ། །དོན་དེ་ནི་བརྟག་གཉིས་ལས་གསལ་བར་བཤད་དེ། །སྟོང་པ་སྙིང་རྗེ་དབྱེར་མེད་པ། །བྱང་ཆུབ་སེམས་ཞེས་རབ་ཏུ་བརྗོད། །སྔགས་ཀྱི་བཟླས་མེད་
བཀའ་ཐུབ་མེད་དང་སྦྱིན་སྲེག་མེད། །དཀྱིལ་འཁོར་ཅན་ཡང་མེད་ཅིང་དཀྱིལ་འཁོར་ཡང་ནི་མེད། །དེ་ནི་སྔགས་བཟླས་དེ་དཀའ་ཐུབ་དང་དེ་སྦྱིན་སྲེག །དེ་ནི་དཀྱིལ་འཁོར་ཅན་དང་དེ་ནི་དཀྱིལ་འཁོར་ཉིད། །མདོར་བསྡུས་ན་ནི་སེམས་དེ་འདུས་པའི་གཟུགས་ཅན་ནོ། །ཞེས་གསུངས་སོ། །སྟོང་པ་དང་སྙིང་རྗེ་ནི་སྔར་བཤད་ལ་དེ་གཉིས་དབྱེར་མེད་དུ་སྦྱོར་བ་ལ་བྱང་ཆུབ་ཀྱི་སེམས་ཞེས་གསུངས་ཤིང་། །དེ་ལ་སྔགས་བཟླས་ནས་དཀྱིལ་འཁོར་གྱི་བར་མེད་པར་གསུངས་པ་ནི་ཕྱིའི་སྔགས་བཟླས་སོགས་སོ། །འོན་ཀྱང་ནང་ངེས་དོན་གྱི་སྔགས་བཟླས་སོགས་དེ་ལ་ཚང་བར་སྟོན་པ་ནི་དེ་ནི་སྔགས་བཟླས་ཞེས་སོགས་སོ། །བྱང་ཆུབ་ཀྱི་སེམས་དེ་ཁོ་ན་ཉིད་ཤེས་པ་དང་། འགྲོ་བ་སྐྱོབ་པས་སྔགས་དང་། ཡང་དང་ཡང་དུ་བྱེད་པས་བཟླས་པ་དང་། །ཁ་ན་མ་ཐོ་བ་ཐམས་ཅད་འགོགས་པས་དཀའ་ཐུབ་སྟེ་བརྟུལ་ཞུགས་དང་། །ཉོན་མོངས་དང་ཕུང་པོའི་སྲེག་རྫས་འཇོགས་པས་སྦྱིན་སྲེག་དང་། །ངེས་དོན་ཀྱི་རྡོ་རྗེ་རྣལ་འབྱོར་མ་དང་ཧེ་རུ་ཀ་འདུས་པས་དཀྱིལ་འཁོར་པ་དང་། །ཆོས་ཐམས་ཅད་ཀྱི་སྙིང་པོ་ཡིན་པས་དཀྱིལ་འཁོར་རོ། །མང་དུ་སྨྲས་པས་ཅི་ཞིག་བྱ་སྟེ་མདོར་བསྡུས་ན་དེ་ཉིད་ཆོས་ཐམས་ཅད་འདུས་པའི་ཚུལ་ཅན་ཏེ་ཆོས་ཐམས་ཅད་ཀྱི་བདག་ཉིད་ཅན་ཏེ་དེའི་ཕྱིར་དེ་ཉིད་བསྐྱེད་པར་བྱ་སྟེ་དེ་ཉིད་ཀྱིས་འདོད་དོན་ཐམས་ཅད་འགྲུབ་པར་འགྱུར་རོ་ཞེས་པདྨ་ཅན་ལས་བཤད་དོ། །གཟུགས་ཅན་ཞེས་པ་ལས་ཚུལ་ཅན་
ཞེས་པ་འགྱུར་ལེགས་ལ། འདུས་པའི་ཚུལ་ཅན་གྱི་དོན་ནི་ཆོས་ཐམས་ཅད་ཀྱི་རང་བཞིན་སྟོང་པ་ཉིད་ཀྱི་བདག་ཉིད་ཅན་ཁོ་ན་ལ་མི་གཟུང་བར་དེ་ཉིད་སྔགས་བཟླས་ནས་དཀྱིལ་འཁོར་དེ་ཉིད་དོ་ཞེས་གསུངས་པས་ལམ་གཞན་རྣམས་འདིར་འདུས་པར་བཤད་དགོས་སོ། །དེ་ནི་ལམ་གཞན་གྱི་གནས་སྐབས་དང་མཐར་ཐུག་གི་དོན་གང་འགྲུབ་ཐམས་ཅད་ལམ་འདིར་མ་ཚང་བ་མེད་པ་དང་། རིང་པོར་མི་ཐོགས་པ་དང་། ལམ་བདེ་བས་འགྲུབ་པའི་ཚུལ་བྱེད་ལས་ཀྱི་སྒོ་ནས་འདིར་འདུ་བའོ། །དེ་ལྟར་ལམ་ཤིན་ཏུ་རྒྱ་ཆེ་བ་མང་པོ་ལ་བསླབ་མི་དགོས་པའི་ལྨ་མདོར་བསྡུས་དང་། །དུས་ཚེ་གཅིག་ལ་གྲུབ་པ་དང་། །དེ་ཡང་འཇུག་པ་ཤིན་ཏུ་བདེ་བ་དང་། ཚེ་འདིར་སྡིག་ཤིང་ཏུ་ཆེ་བས་ཀྱང་འགྲུབ་ཅེས་པ་དང་། །སྐྱེ་བ་སྔར་མར་ཚོགས་ཀྱི་བསགས་རྒྱབ་ཤིན་ཏུ་མེ་ཆེ་བའི་བསོད་ནམས་དམན་པས་ཀྱང་འགྲུབ་པར་གསུངས་པ་ནི་ལམ་གྱི་ཡོན་ཏན་ཡིན་ལ། དེ་ཡང་བདག་མེད་པའི་དོན་ཕུ་ཐག་ཆོད་པར་བྱས་པའི་དེ་ཁོ་ན་ཉིད་ལྷན་སྐྱེས་ཀྱི་བདེ་བས་བསྒོམས་པ་ལས་ཡིན་པས་ཡུལ་ཅན་ཁྱད་པར་ཅན་བདེ་བ་ཆེན་པོའི་གནད་ལ་མཁས་པར་བྱའོ། འདི་ཡང་ལམ་ཐུན་མོང་པས་རྒྱུད་སྦྱངས་ཤང་རྣམ་པར་དག་པའི་དབང་གིས་རྒྱུད་སྣོད་རུང་དུ་བྱས། དེའི་དུས་སུ་ཁས་བླངས་པའི་དམ་ཚིག་དང་སྡོམ་པ་ཚུལ་བཞིན་དུ་བསྲུངས་ནས་བསྐྱེད་རིམ་ལ་གོམས་པར་བྱས་པ་ལས་རྫོགས་རིམ་གྱི་རྟོགས་པ་སྐྱེ་བའི་རྒྱུད་སྨིན་ནས་ལྷན་སྐྱེས་ཀྱི་བདེ་སྟོང་མཚན་ཉིད་ཚང་བར་སྦྱོར་ནུས་པའི་སྐབས་ནས་ལམ་བསྡུས་པའི་སྙིང་པོ་ཉིད་གཙོ་བོར་བསྐྱངས་
པས་འགྲུབ་པ་ཡིན་གྱི་དང་པོ་ནས་མིན་ནོ། གསུམ་པ་ནི། སྤྱིར་བླ་མེད་ཀྱི་རྒྱུད་ཀྱི་དོན་གྱི་གནད་ཐམས་ཅད་ཨེ་ཝཾ་སོགས་ཡི་གེ་བཞི་བཅུའི་གླིང་གཞིའི་དོན་དུ་འདུས་ལ། དེའི་དོན་གྱི་གཙོ་བོ་ཡང་ཐོག་མའི་ཡི་གེ་ཨེ་ཝཾ་གཉིས་ཀྱི་དོན་དའདུའོ། དེ་ལ་ཐོབ་བྱ་འབྲས་བུའི་ཨེ་ཝཾ་དང་། ཐོབ་བྱེད་ལམ་གྱི་ཨེ་ཝཾ་དང་། དེ་འདྲེན་བྱེད་རྟགས་ཀྱི་ཨེ་ཝཾ་གསུམ་ཡོད་པའི་དང་པོ་དང་གསུམ་པ་ནི་འཆད་པར་འགྱུར་རོ། ལམ་གྱི་ཨེ་ཝཾ་ཨེ་ཡིག་དང་ཆོས་འབྱུང་གི་དབྱིབས་གྲུ་གསུམ་དུ་ཡོད་པས་བདག་མེད་པའི་དེ་བཞིན་ཉིད་མཚོན་པར་བྱེད་ལ། དེའི་ཚེ་གྲུ་གསུམ་གྱིས་ནི་རྣམ་པར་ཐར་བའི་སྒོ་གསུམ་ཡང་མཚོན་པར་བྱེད་པས་ཆོས་རྣམས་ཀྱི་ངོ་བོ་དང་རྒྱུ་དང་འབྲས་བུ་གསུམ་རང་བཞིན་གྱིས་གྲུབ་པས་སྟོང་པའི་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པའི་དོན་ཨེ་ཡིག་གི་མཚོན་དོན་ཡིན་པའི་ཕྱིར་སྟོང་བ་ཉིད་ཀྱི་ལྟ་བ་ཕུ་ཐག་ཆོད་པ་གཅིག་མེད་ན་ཨེ་ཡིག་གི་དོན་མཚང་ངོ་། དེ་ཡོད་ཀྱང་ཕྱི་ནང་གི་ལུས་ལ་གནད་དུ་བསྣུན་པ་ལས་བྱུང་བའི་བདེ་བ་ཆེན་པོ་གཅིག་མེད་ན་ཝ་ཡིག་གི་དོན་མ་ཚང་ངོ་། དེ་གཉིས་ཡོད་ཀྱང་སྟོང་ཉིད་ཀྱི་ལྟ་བ་ཞུ་བ་དེའི་ངོ་བོར་བ་སྐྱེད་པ་དང་། སྟོང་ཉིད་ཡུལ་དང་བདེ་ཆེན་ཡུལ་ཅན་བྱས་ནས་དེས་དེ་ཕྱིན་ཅི་མ་ལོག་པར་ངེས་པའི་བདེ་སྟོང་སྦྱོར་མི་ཤེས་ན་ཐིག་ལེའི་དོན་མ་ཚང་བས་ཨེ་ཝཾ་གྱི་དོན་ཐབས་ཤེས་གཉིས་སྦྱོར་བ་དགོས་ཤིང་དེ་ཉིད་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལ་ཁྱབ་པའི་དོན་གྱི་གཙོ་བོ་མདོར་བསྡུས་པའི་ཆོས་ཀྱི་རྒྱལ་པོ་ཆེན་པོའི་རྒྱས་འདེབས་ཀྱི་ཕྱག་
རྒྱར་གསུངས་ཏེ། རྡོ་རྗེ་འཕྲེང་བ་ལས། ཨེ་ནི་སྟོང་པ་ཉིད་དུ་གསུངས། །དེ་བཞིན་ཝ་ནི་ཐུགས་རྗེ་དང་། ཐིག་ལེ་དེ་གཉིས་སྦྱོར་ལས་བྱུང་། དེ་སྦྱོར་བ་ཡི་རྨད་མཆོག་གོ །ཆོས་ཕུང་བརྒྱད་ཁྲི་བཞི་སྟོང་ཁྱབ། །མདོར་བསྡུས་ཆོས་ཀྱི་ཕྱག་རྒྱའོ། །རྒྱལ་པོ་ཆེན་པོའི་ཕྱག་རྒྱ་ཉིད། །རྒྱུད་རྣམས་སུ་ནི་ཐོག་མར་གསུངས། །ཞེས་སོ། །དེ་འདྲ་བའི་གཉིས་སུ་མེད་པའི་ཡེ་ཤེས་དེ་རྒྱུད་གང་ལས་བརྗོད་པ་དེ་ལ་ནི་དེ་ཉིད་མཆོག་ཡོད་ལ་དེ་མི་སྟོན་ན་མེད་པ་ཡིན་ཏེ། རྒྱུན་ཀུན་གྱི་ནི་དོན་བསྡུས་པ། སྟོང་ཉིད་སྙིང་རྗེ་མི་ཕྱེད་པ། །གང་ལ་དེ་ཉིད་མངོན་པར་བརྗོད། །དེ་ནི་དེ་བཞིན་གཤེགས་པའི་རྒྱ། །ཨེ་ཝཾ་ཞེས་བྱའི་ཡི་གེ་གཉིས། །གང་ལ་འདི་གཉིས་མེད་པ་ནི། །དེ་ལ་དེ་ཁོ་ན་ཉིད་མེད། །ཅེས་གསུངས་སོ། །དོན་འདི་བདེ་མཆོག་འབྱུང་བ་ལས་ཀྱང་། །དེ་མཆོག་སངས་རྒྱས་ཐམས་ཅད་ཀྱི། །ཨེ་ཝཾ་ཡི་གེ་ལ་རབ་གནས། །སྐུ་གསུང་ཐུགས་ཀྱི་ཡང་དག་ལས། །རྣམ་པ་ཐམས་ཅད་གཅིག་བསྡོམས་པ། །སྡོམ་པ་བདེ་མཆོག་བྱང་ཆུབ་སྟེ། །བརྗོད་པར་བྱ་མིན་བསྟན་དུ་མེད། །གསང་བ་སངས་རྒྱས་ཐམས་ཅད་ཀྱི། །འདུས་པ་སྡོམ་པ་དག་གི་མཆོག །ཅེས་སོ། །འོ་ན་དམིགས་མེད་ཀྱི་སྙིང་རྗེའི་བདེ་བ་དང་སྟོང་བ་གཉིས་དབྱེར་མེད་དུ་སྦྱོར་ཚུལ་ཇི་ལྟར་ཡིན་སྙམ་ན། །སམྦུ་ཏ་ལས། ཆུ་དང་ལོ་མ་འདྲེས་པ་བཞིན། །གཉིས་མེད་རྣམ་པའི་སྦྱོར་བ་ཡིས། །གཉིས་པོ་འདུས་པ་གང་ཡིན་པ། །ཤེས་རབ་ཐབས་ཞེས་བྱ་བར་གྲགས། །ཞེས་ཆུ་དང་འོ་མ་འདྲེས་པ་བཞིན་དུ་སྦྱོར་བར་གསུངས་པ་ལྟར་བྱེད་པའོ། །དེ་ཡང་བདེ་བ་དང་དེའི་ཆོས་ཉིད་ངོ་བོ་དབྱེར་
མེད་ནི། །ཆོས་ཅན་གྲུབ་ཙམ་ནས་རང་ག་སྟོང་ཉིད་དང་ངོ་བོ་དབྱེར་མེད་དུ་གྲུབ་ཟིན་པས་དེ་རྣལ་འབྱོར་པས་དབྱེར་མེད་དུ་བྱ་མི་དགོས་ལ། དེ་བཞིན་དུ་སྟོང་ཉིད་རྟོགས་པའི་བློ་གཞན་ཞིག་ལ་བདེ་བས་རྒྱས་འདེབས་པ་དང་། བདེ་བ་བསྐྱེད་པའི་འོག་ཏུ་སྟོང་ཉིད་ཀྱི་ལྟ་བ་གཞན་ཞིག་གིས་རྒྱས་འདེབས་པ་ཡང་མིན་ཏེ། དེ་ལ་ནི་དཔེར་ན་སྦྱིན་སོགས་བདག་མེད་པའི་ལྟ་བས་ཟིན་ཡང་སྦྱིན་སོགས་དེ་ཉིད་ལྟ་བ་དེའི་ངོ་བོར་མི་སྐྱེ་བ་ལྟར་སྟོང་ཉིད་རྟོགས་པ་དང་བདེ་བ་གཉིས་ཕན་ཚུན་གཅིག་གཅིག་གི་ངོ་བོར་མ་སོང་བའི་ཕྱིར་རོ། འོ་ན་ཇི་ལྟར་བྱེད་སྙམ་ན། ཡུལ་ཅན་ཤེས་པ་ལྷན་སྐྱེས་ཀྱི་བདེ་བའི་ངོ་བོར་སྐྱེས་པ་དེས་ཡུལ་སྟོང་ཉིད་ཀྱི་དོན་ཕྱིན་ཅི་མ་ལོག་པ་རྟོགས་པའི་ཡུལ་ཡུལ་ཅན་ཅུ་སྦྱོར་བ་ཉིད་བདེ་སྟོང་དབྱེར་མེད་དུ་སྦྱོར་བའོ། དེ་ཡང་དོན་གྱི་ལྷན་སྐྱེས་ཀྱི་དུས་སུ་ཡུལ་ཡུལ་ཅན་གཉིས་འོ་མ་ཆུ་ལ་ཞུགས་པ་བཞིན་དུ་རོལ་གཅིག་ཏུ་གྱུར་ནས་གཉིས་སྣང་ཕྲ་མོ་འང་དག་པ་ཡིན་ལ། དོན་གྱི་ལྷན་སྐྱེས་མ་སྐྱེས་པའི་གོང་དུ་ནི་དེ། བོ་ན་ཉིད་མངོན་སུམ་དུ་མ་རྟོགས་པས་དེ་ཁོ་ན་ཉིད་ལ་མོས་པ་ཡིད་བྱེད་ཀྱི་འཇུག་པ་ཙམ་མོ། ཡུལ་སྟོང་བ་ཉིད་དང་གཉིས་མེད་དུ་སྦྱོར་ཚུལ་དེ་ལྟར་ཡིན་ལ་སྟོང་ཉིད་རྟོགས་པའི་བློ་དང་བདེ་བ་གཉིས་ངོ་བོ་དབྱེར་མེད་དུ་སྦྱོར་ཚུལ་ནི། བློ་གཉིས་ངོ་བོ་ཐ་མི་དད་ཀྱི་གྲུབ་པ་དེ་གཅིག་ཏུ་བསྐྱེད་པའོ། སྟོང་ཉིད་ཀྱི་གོ་བའི་ཕུ་ཐག་གཅོད་ལུགས་དབུ་མ་ལས་འབྱུང་བ་ལས་ལྷག་པོ་མེད་པས་ཐེག་པ་འདི་དང་ཕར་
ཕྱིན་གྱི་ཐེག་པ་གཉིས་སྟོང་ཉིད་ཀྱི་ལྟ་བ་ལ་མཆོག་དམན་མེད་དོ། ངེས་རྒྱུའི་དོན་གཅིག་ཡིན་ཀྱང་ངེས་བྱེད་ཀྱི་བློ་ལ་ལྷན་སྐྱེས་ཀྱི་བདེ་བས་སྟོང་ཉིད་ངེས་པའི་སྟོབས་འདྲ་བ་ཡུལ་ཅན་གཞན་གང་གིས་ངེས་པ་ལ་མེད་པས། སྟོང་པ་ལ་ཁྱད་མེད་ཀྱང་ཐབས་བདེ་བས་ཁྱད་པར་དུ་འཕགས་པར་གསུངས་སོ། བདག་མེད་པའི་སྟོང་ཉིད་ཕུ་ཐག་ཆོད་པ་མ་ངེས་ན་འཁོར་བ་ལས་མི་གྲོལ་ལ། ངེས་བྱེད་ལྷན་སྐྱེས་ཀྱི་བདེ་བ་མ་སྐྱེས་ན་སྔགས་ཀྱི་ལམ་མཆོག་གི་གནད་མེད་པས་རེ་རེས་མི་ཆོག་གི་གཉིས་ཀ་དགོས་པར་གསུངས་ཏེ། ས་ར་ཧ་ས། སྙིང་རྗེ་དང་བྲལ་སྟོང་པ་ཉིད་ཞུགས་པས། དེས་ནི་ལ་མཆོག་རྙེད་པ་མ་ཡིན་ནོ། འོ་ན་དེ་སྙིང་རྗེ་འབའ་ཞིག་བསྒོམས་ན་ཡང་། འཁོར་བ་འདིར་གས་ཐར་བ་ཐོབ་མི་འགྱུར། །གང་ཡང་གཉིས་པོ་སྦྱོར་བར་ནུས་པ་དེ། །འཁོར་བར་མི་གནས་མྱ་ངན་འདས་མི་གནས། ཞེས་གསུངས་སོ། དོ་ཧ་ལལ་ནི་ལྷན་སྐྱེས་ཀྱི་ཡེ་ཤེས་ཉིད་ལྨ་གྱི་སྙིང་པོར་འཆད་པས་འདིའི་སྙིང་རྗེ་ཡང་ལྷན་སྐྱེས་ཀྱི་བདེ་བ་ཡིན་ནོ། སྔར་བཤད་པ་ལྟར་ཀྱི་ལྷན་སྐྱེས་ཀྱི་བདེ་བ་སྐྱེས་པ་ན་རྣམ་རྟོག་རབས་པ་རྣམས་ལོག་ནས་སེམས་གཡོ་མེད་དུ་གནས་པ་དང་གིས་འབྱུང་བས་བདེ་བ་ཧིད་ཡུལ་གང་ལ་ཡང་མི་འཕྲོ་བར་མི་རྟོག་པ་བསྒོམ་པ་ཙམ་སྟོང་པ་བསྒོམ་པའི་དོན་ཡིན་ན། བདེ་བ་འབའ་ཞིག་བསྒོམ་ན་འཁོར་བ་ལས་མི་གྲོལ་བར་འཆད་པར་མི་རིགས་པས་བདག་མེད་པའི་དོན་ལེགས་པར་གཏན་ལ་ཕབ་པའི་ངེས་ཤེས་སྐྱོང་དགོས་སོ། བླ་མེད་ཀྱི་རྒྱུད་དང་དེའི་དགོངས་འགྲེལ་ཚད་ལྡན་རྣམས་ཀྱིས་ཁ་ཅིག་ཏུ་བདེ་བའི་ཕྱོགས་གསལ་ཞིང་སྟོང་ཉིད་རྟོགས་ཚུལ་
དེ་ཙམ་དུ་མི་གསལ་བ་དང་། ཁ་ཅིག་ཏུ་སྟོང་ཉིད་རྟོགས་ཚུལ་གསལ་ལ་བདེ་བའི་ཕྱོགས་དེ་ཙམ་དུ་མི་གསལ་བ་རྣམས་སུ་ཡང་བདེ་སྟོང་གཉིས་ཀ་སྦྱོར་བ་དོན་དུ་གཟུང་གི་རེ་རེ་བ་ལ་འཁྲུལ་བར་མི་བྱའོ། བདེ་སྟོང་དབྱེར་མེད་ཀྱི་གཏམ་ནི་རླུང་ལྟར་རབ་ཏུ་གྲགས་ཀྱང་བདེ་བ་རྣམས་ཀྱི་ཁྱད་པར་ཕྱེད་པའི་བདེ་ཆེན་དང་། སྟོང་པ་རྣམས་ཀྱི་ཁྱད་པར་ཕྱེད་པའི་སྟོང་པའི་མཐར་ཐུགས་དང་སྦྱོར་ཚུལ་ཤེས་པ་ཤིན་ཏུ་བཀོད་པ་ལ་དགོངས་ནས། ས་ར་ཧས། ཁྱིམ་དང་ཁྱིམ་ན་དེ་ཡི་གཏམ་སྨྲ་ཡང་། བདེ་ཆེན་གནས་ནི་ཡོངས་སུ་ཤེས་པ་མེད། ཅེས་གསུངས་པས་ཅུང་ཟད་རེས་ཚིམ་སླ་བར་མི་བྱ་བར་གསང་བ་ལས་ཀྱང་ཆེས་གསང་བའི་དོན་འདི་རྟོགས་པ་ལ་ཡུན་རིང་དུ་འབད་པར་བྱའོ། སྔར་བཤད་པའི་བདེ་སྟོང་དབྱེར་མེད་དེ་ཉིད་ལ་རྣལ་འབྱོར་མའི་རྒྱུད་ཀྱི་བཤད་པ་མཛད་པ་མང་པོས་བདེ་སྟོང་ཟུང་འཇུག་དང་། བདེན་གཉིས་ཟུང་འཇུག་ཅེས་བཤད་ཅིང་། འཕགས་ལུགས་ཀྱི་ཟུང་འཇུག་གི་དོན་ཡང་དེ་ལ་འཆད་པ་ཡོད་མོད་ཀྱང་། །མགོན་པོ་ཀླུ་སྒྲུབ་ཀྱི་ལུགས་ཀྱིས་ནི་སྔར་བཤད་པའི་དོན་གྱི་ལྷན་སྐྱེས་ཀྱི་བདེ་སྟོང་དབྱེར་མེད་དེ་ཙམ་ལ་ཟུང་འཇུག་དུ་མེ་བྱེད་དོ། འོ་ན་ཇི་ལྟར་བྱེད་ཅེ་ན། བྱང་ཆུབ་ཀྱི་སེམས་ལ་འོད་གསལ་གྱི་བྱང་ཆུབ་ཀྱི་སེམས་དང་ཟུང་འཇུག་གི་སེམས་གཉིས་གསུངས་པའི་ཕྱི་མ་ཡིན་ལ་དེ་ནི་སྦྱོར་བ་ཡན་ལག་དྲུག་གི་དྲུག་པའི་སྐབས་སུ་ཐབས་ཤེས་སྙོམས་པར་འཇུག་པས་གསུངས་པའི་དོན་སྒྲོན་གསལ་ལས། ཐབས་
ཀུན་རྫོབ་ཀྱི་བདེན་པ་དང་། ཤེས་རབ་དོན་དམ་པའི་བདེན་པ་གཉིས་སྦྱོར་བ་ཟུང་འཇུག་དུ་གསུངས་པ་ལྟར་ཡིན་ནོ། དེ་ལ་དོན་དམ་པའི་བདེན་པ་དངོས་ནི་ཆོས་རྣམས་ཀྱི་ཆོས་ཉིད་འདུས་མ་བྱས་ཡིན་མོད་ཀྱང་། འདིར་དེ་དང་བདེ་བ་ཆེན་པོ་གཉིས་རོ་གཅིག་ཏུ་ཞུགས་པའི་འོད་གསལ་ཀྱི་ཡེ་ཤེས་ལ་ཡང་དོན་དམ་པའི་བདེན་པ་ཞེས་ཡུལ་ཡུལ་ཅན་སོ་སོར་མ་ཕྱེ་བར་མང་དུ་གསུངས་སོ། དེ་འདྲ་བའི་དོན་གྱི་ལྷན་སྐྱེས་ཀྱི་ཡེ་ཤེས་འདི་ལ་ཡང་དོན་གྱི་འོད་གསལ་རྐྱང་བའི་སྐབས་གཅིག་དང་། ཟུང་འཇུག་གི་སྐབས་ཀྱི་འོད་གསལ་གཉིས་ལས་དང་པོ་ནི་རིམ་ལྔའི་རིམ་པ་བཞི་པར་བཤད་པའི་མངོན་པར་བྱང་ཆུབ་འདི་རིམ་པའི་འོད་གསལ་གྱི་རིམ་པ་དང་། གཉིས་པ་ནི་རིམ་པ་ལྔ་པ་ཟུང་འཇུག་གི་རིམ་པའི་ཡ་གཅིག་ཡིན་པས་གཞུང་གཞན་ནས་བཤད་པའི་བདེ་སྟོང་དབྱེར་མེད་ཀྱི་དོན་གྱི་ལྷན་སྐྱེས་ཙམ་ཞིག་ནི་ཚུལ་བཞིའི་མཐའ་དྲུག་གི་བཤད་པ་ལ་གཉིས་ཡོད་པའི་འོད་གསལ་ཀྱི་མཐར་ཐུག་ཡིན་ཀྱང་། དེའི་གོང་ན་ཟུང་འཇུགས་གི་མཐར་ཐུག་ཡོད་པས་ད་ལུང་དེར་མ་སླེབ་པོ། ཀུན་རྫོབ་བདེན་པའི་གཞུང་གཞན་ནས་ཀུན་རྫོབ་བདེན་པ་བཤད་པ་དང་འདི་མི་འདྲ་བས་འདིར་ནི་སྟོང་བའི་ཡེ་ཤེས་དང་ངོ་བོ་གཅིག་ཏུ་འཇུག་པའི་བཞོན་པར་གྱུར་པའི་ཡེ་ཤེས་ཀྱི་རླུང་འོད་ཟེར་ལྔ་བའི་ཉེར་ལེན་ལས་གྲུབ་པའི་མཚན་དཔེས་བརྒྱན་པའི་ཡོངས་སུ་དག་པའི་སྒྱུ་མའི་སྐུ་ལ་ཀུན་རྫོབ་བདེན་པར་བཤད་པ་དེའོ། འདི་འདྲ་བའི་འོད་གསལ་ཡེ་ཤེས་ནི་ཨེ་དང་། ཡོངས་སུ་དག་པའི་སྒྱུ་མའི་སྐུ་ནི་ཝ་ཡིག་གི་དོན་ཏེ་དབྱེར་མེད་དུ་སྦྱོར་རྒྱུའོ། སྦྱོར་ཚུལ་ནི་སྔ་མ་ཐུགས་དང་ཕྱི་མ་སྐུར་ངོ་བོ་གཅིག་ཏུ་སྦྱོར་བ་སྟེ་ཐིག་ལེའི་དོན་ནོ། བདེ་མཆོག་འབྱུང་བ་ལས་ཀྱང་།
དེ་བཞིན་ཉིད་རྒྱས་བཏབ་འཁོར་ལོ། །མཁའ་བཞིན་སྟོང་ཉིད་དེ་བཞིན་ནོ། བདག་མེད་དང་ནི་དེ་བཞིན་ཉིད། སྣ་ཚོགས་ཐབས་དང་སྙིང་རྗེ་སྟོབས། །ཟུང་འཇུག་གཉིས་མེད་ལྷུན་གྱིས་གྲུབ། །དཀྱིལ་འཁོར་སྙིང་པོ་མཆོག་གི་ཡིན་ནོ། །ཞེས་གསུངས་སོ། དེ་བཞིན་ཉིད་དང་སྟོང་ཉིད་བདག་མེད་ཅེས་གསུངས་པ་ནི། །དེ་དང་རོ་གཅིག་པའི་ལྷན་སྐྱེས་ཀྱི་ཡེ་ཤེས་ཡིན་ལ། །ཐབས་དང་སྙིང་རྗེའི་སྟོབས་ནི་དཀྱིལ་འཁོར་ཀྱི་འཁོར་ལོ་ཧེ་རུ་ཀ་ཡབ་ཡུམ་དུ་ཤར་བའི་སྒྱུ་མའི་སྐུ་ཡིན་ཏེ། དེ་ཉིད་ལས། ལྷ་མོ་ཧེ་རུ་ཀ་ཡེ་ཤེས། དེ་ཡི་དབྱེ་བ་བརྟག་མི་བྱ། དེ་བཞིན་ཉིད་རྒྱས་བཏབ་འཁོར་ལོ། ཞེས་གསུངས་པའི་ཕྱིར་རོ། རྒྱས་བཏབ་པ་ནི་སྔར་བཤད་པ་གཉིས་སྐུ་དང་གསུང་ཐུགས་སུ་དབྱེར་མེད་ཕྱེད་པར་སྦྱོར་བའི་དོན་ནོ། ཤྲཱི་ནི་གཉིས་མེད་ཡེ་ཤེས་ཏེ། ཞེས་གསུངས་པའི་གཉིས་མེད་ཡེ་ཤེས་ལའང་ཇོ་བོ་ཆེན་པོས་སྔར་བཤད་པའི་ཟུང་འཇུག་ལ་བཤད་པ་ལྟར་བདེན་གཉིས་དབྱེར་མེད་ཀྱི་གཉིས་མེད་ཡེ་ཤེས་གཅིག་དང་། སྔར། ཧེ་རུ་ཀ་དཔལ་ཡིན་པར་བཤད། ཅེས་པའི་སྐབས་སུ་གསུངས་པ་ལྟར་བདེ་སྟོང་དབྱེར་མེད་ཀྱི་གཉིས་མེད་ཀྱི་ཡེ་ཤེས་གཉིས་ཡོད་པས་ཤྲཱི་ཧེ་རུ་ཀ་ཞེས་པའི་དོན་ལ་ཡང་། སྣང་ཕྱོགས་སྒྱུ་ལུས་ཀྱ་ཧེ་རུ་ཀ་དང་། སྟོང་ཕྱོགས་བདེ་སྟོང་གི་ཧེ་རུ་ཀ་གཉིས་ཡོད་པ་ཤེས་པར་བྱའོ། གཉིས་པ་དེ་བསྐྱེད་པའི་ཐབས་ཇི་ལྟར་བསྟན་པ་ལ་གཉིས། ཐབས་ངོས་བཟུང་བ་དང་། དེ་ཇི་ལྟར་བསྟན་པའོ། དང་པོ་ནི། བདེ་སྟོང་གི་ལྷན་སྐྱེས་ལ་སྟོང་ཉིད་བདག་མེད་པའི་དེ་ཁོ་ན་ཉིད་རྟོགས་པ་ཇི་ལྟར་བསྐྱེད་པ་ལ་ཐོག་མར་དེའི་གོ་བ་བསྐྱེད་ཚུལ་ནི། དབུ་མའི་གཞུང་
རྣམས་ནས་གསུངས་པ་ལྟར་ལུང་དང་རིགས་པ་ལ་བརྟེན་ནས་ངེས་དགོས་སོ། ལྷན་སྐྱེས་ཀྱི་བདེ་བའི་ཆ་བསྐྱེད་པ་ནི་བདེ་བ་གཞན་གྱིས་མི་ཆོག་པས་དེ་འདྲེན་བྱེད་རྟགས་ཀྱི་ཨེ་ཝཾ་དགོས་སོ། དེ་ལ་ཨེའི་དོན་མི་ཡུལ་གྱི་བྷ་ག་རྟེན་དང་། ཝའི་དོན་ནི་དེ་ལ་བརྟེན་པའི་ཡབ་ཀྱི་རྡོ་རྗེ་དང་། བརྟེན་པ་རྡོ་རྗེ་ལ་གནས་པའི་ཐིག་ལེ་ནི་སྣ་ཚོགས་པའི་སྤྲུལ་པ་སྟོན་པར་བྱེད་པའི་རྡོ་རྗེ་སེམས་དཔའི་བདེ་བ་ཆེན་པོ་ལ་སོགས་པའི་བདེ་བ་ཀུན་གྱི་གཞི་ཡིན་ཏེ། རྡོ་རྗེ་ཕྲེང་བ་ལས། ཨེ་ནི་བྷ་གའི་མཚན་ཉིད་དེ། པདྨ་རྟེན་དུ་ཤེས་པར་བྱ། བརྟེན་པ་རྡོ་རྗེ་ཞེས་ནི་གསུངས། བརྟེན་པ་རྡོ་རྗེ་འཆང་བ་ཡིས། །དེ་ལ་གནས་པ་ཐིག་ལེའི་གཟུགས། །སྣ་ཚོགས་སྤྲུལ་པ་སྟོན་པར་བྱེད། །བདེ་བ་ཀུན་གྱི་གཞི་ཡི་གནས། །རྡོ་རྗེ་སེམས་དཔའ་བདེ་བ་ཆེ། །ཞེས་སོ། དེས་ནི་ཡབ་ཡུམ་གྱི་རྟགས་ཀྱི་ཨེ་ཝཾ་གཉིས་སྦྱར་བ་ལས་ལམ་གྱི་ཨེ་ཝཾ་འདྲེན་པའི་ཐབས་བསྟན་ནོ། །འདིས་ནི་ཡེ་ཤེས་ཀྱི་ཕྱབ་རྒྱལ་བརྟེན་ནས་བསྐྱེད་པ་འང་ཤེས་པར་བྱའོ། ནང་གི་རང་གི་ལུས་ལ་གནད་དུ་བསྟན་པ་ལས་ལམ་གྱི་ཨེ་ཝཾ་འདྲེན་པའི་ཐབས་ལུས་ཀྱི་གནད་ཀྱི་རྟགས་ཀྱི་ཨེ་ཝཾ་ཡངས་མྦུ་ཊ་ལས་གསུངས་ཏེ། སྤྱི་བོ་ལྟེ་བར་སོན་འཁོར་ལོ། ཨེ་ཡིག་རྣམ་པར་ཡང་དག་གནས། །སྙིང་གི་མགྲིན་པར་ཡང་དག་གནས། །ཝཾ་གྱི་ཡི་གེ་འདྲ་བར་འདོད། །ཅེས་སྤྱི་བོ་དང་ལྟེ་བའི་རྩ་འཁོར་ཀྱི་དབྱིབས་ཨེ་གྲུ་གསུམ་གྱི་དབྱིབས་དང་། །སྙིང་ག་དང་མགྲིན་པའི་རྩ་འཁོར་ཀྱི་དབྱིབས་ཝཾ་ཡིག་ཟླུམ་པོའི་དབྱིབས་སུ་གནས་པ་ཨེ་ཝཾ་གྱི་དོན་དུ་
བཤད་དོ། དེ་ཡང་སྡོམ་འབྱུང་འགྲེལ་བ་ལས། །ཡང་ན་ཨེ་ཡིག་ཤེས་རབ་ཀྱི་བདག་ཉིད་སྤྲུལ་པ་དང་ལོངས་སྤྱོད་རྫོགས་པའི་འཁོར་ལོའི་རང་བཞིན་ལྟེ་བ་དང་མགྲིན་པ་ལ། ཝཾ་ཡིག་ཐབས་ཀྱི་བདག་ཉིད་ཆོས་དང་བདེ་བ་ཆེན་པོའི་འཁོར་ལོའི་རང་བཞིན་ཉིད་སྙིང་ག་དང་སྤྱི་བོའི་གནས་ཀྱི་ཁ་སྦྱར་བ་བསྒོམས་ནས་ལྷན་ཅིག་སྐྱེས་པའི་དགའ་བ་འབྱུང་བར་འགྱུར་རོ། ཞེས་རྩ་འཁོར་རྣམས་ཀྱི་ལྟེ་བར་སེམས་བཟུང་བས་ལྷན་སྐྱེས་འདྲེན་པར་བཤད་པའི་དོན་ནོ། རྩ་འཁོར་བཞི་ཨེ་ཝཾ་དུ་འཇོག་ཚུལ་ནི་སྔ་མ་དང་མི་མཐུན་པས་ཅུང་མ་དག་པའོ། ལྷན་སྐྱེས་འདྲེན་པའི་ཐབས་རང་གི་ལུས་ལ་གནད་དུ་བསྣུན་སའི་གཙོ་བོ་ཡང་རྩ་ཨ་ཝ་དྷཱུ་ཏཱི་ཡིན་ཏེ། སྡོམ་འབྱུང་ལས། རྐྱང་མ་རོམ་ལོགས་གཉིས་སུ། ཨཱ་ལི་ཀཱ་ལི་རང་བཞིན་ཅན། འབྲས་བུ་རྒྱུ་ཡི་རང་བཞིན་གྱིས། །དགའ་བ་བཞི་ཡི་གཟུགས་ཅན་མ། །ལྷན་སྐྱེས་དགའི་བའི་རང་བཞིན་དང་། །གཉིས་མེད་མཆོག་གི་དབང་ཕྱུག་མ། །ཀུན་རྫོབ་ཀུནྟ་ལྟ་བུ་སྟེ། །སྒྲིབ་མེད་བདེ་བའི་གཟུགས་ཅན་མ། །ཞེས་ཨཱ་ལིའི་ངོ་བོ་རྐྱང་མ་དང་། །ཀཱ་ལིའི་ངོ་བོ་རོ་མ་གཉིས་ལ་ལོགས་གཡས་གཡོན་གཉིས་ན་གནས་པའི་མཆོག་གི་དབང་ཕྱུག་མ་དྷཱུ་ཏཱི་ལྷན་སྐྱེས་ཀྱི་དགའ་བའི་རང་བཞིན་དུ་བཤད་ལ། སྭ་བྷཱ་ཝ་ནི་རང་བཞིན་དང་འབྱུང་བ་གཉིས་ཀ་ལ་འཇུག་པས་འདིར་ནི་དགའ་བདེ་འབྱུང་བའི་དོན་ཡིན་པའི་ཕྱིར་རོ། དགའ་བཞི་སྔ་མ་སྔ་མ་རྒྱུ་དང་ཕྱི་མ་ཕྱི་མ་འབྲས་བུའི་ངོ་བོ་དང་། དྷཱུ་ཏཱི་ནས་ཀུནྟ་ལྟ་བུ་བབས་པ་ལ་སྒྲིབ་
མེད་དེ་དོན་དམ་བདེ་བའི་གཟུགས་ཅན་མ་སྟེ་ཚུལ་ཅན་སྐྱེ་བར་གསུངས་སོ། ཡང་དེ་ཉིད་ལས། ཤེས་རབ་གཟུགས་ཀྱིས་ལ་ལན། རོ་མ་ཐབས་ཀྱིས་ཡང་དག་གནས། །དེ་དག་དབུས་སུ་གནས་ལྷ་མོ། །ཨཾ་ཡིག་སྣ་ཚོགས་གཟུགས་ཅན་ན། ལྷ་མོ་སྐུ་བཞིའི་བདག་ཉིད་ཅན། །དངོས་གྲུབ་ཐས་ཅད་རབ་སྩོལ་མ། །བདེ་ཆེན་རབ་སྦྱིན་ཐམས་ཅད་ལ། །རྟག་ཏུ་ཡང་དག་བདག་ཕྱག་འཚལ། །ཞེས་ལྟེ་བར་རོ་རྐྱང་གེ་དབུས་ཀྱི་དྷཱུ་ཏཱི་ར་གཏུམ་མོའི་ངོ་བོ་ཨཾ་ཡིག་བསྒོམས་པས་བདེ་ཆེན་སྦྱིནྲ་པར་གསུངས་ཏེ། །འདི་ནི་མཚོན་པ་ཙམ་སྟེ་རྩ་འཁོར་གང་ན་ཡོད་པའི་ལྟེ་བའི་དྷཱུ་ཏཱིའི་ཡར་སྣ་མར་སྣ་རྣམས་སུ་ཡི་གེ་དང་ཐིག་ལེ་སོགས་ལ་དམིགས་པ་གཏང་ནས་བསྒོམས་པས་སྲོག་དྷཱུ་ཏཱིར་ཚུད་པའི་གནས་ཟབ་མོ་རེ་ཡོད་པ་ཀུན་ལ་ཤེས་པར་བྱའོ། །ཕྱག་འཚལ་ཞེས་པའི་མཇུག་ཐོགས་སུ། །གང་གང་གིས་ནི་བསྒོམས་པ་ཡིས། །མི་རྣམས་ཀྱི་ཡིད་ཡང་དག་སྦྱོར། །དེས་དེའི་རང་བཞིན་འགྱུར་ལྷ་མོ། །སྣ་ཚོགས་གཟུགས་ཅན་ནོར་བུ་བཞིན། །ཞེས་གསུངས་ཏེ་འདིའི་དོན་ཤེས་གལ་ཆེའོ། །གཞུང་འདི་གུར་དང་ཀུན་སྤྱོད་སོགས་རྒྱུན་མང་པོར་འབྱུང་ཞིང་གཞུང་གཅིག་ཡིན་ཀྱང་སྐབས་སྟོབས་ཀྱིས་དོན་སོ་སོ་བ་མང་པོ་ལ་བཤད་དགོས་པ་ཡོད་པ་ལས་འདིར་ནི་སྲོག་དྷཱུ་ཏཱི་ར་བསྡུས་པ་ལ་བརྟེན་ནས་ལྷན་སྐྱེས་ཀྱི་བདེ་བ་བསྐྱེད་པའི་ཆེད་དུ་སྒྲུབ་པ་པོ་གང་དང་གང་གིས་དྷཱུ་ཏཱིའི་གནད་ཆེ་བ་གང་དང་གང་དུ་ཡང་དག་པ་སྟེ་ཕྱིན་ཅི་མ་ལོག་པར་ཡིད་སྦྱར་བ་སྟེ་གཏད་ནས་
བསྒམས་ན་ལྟེ་བའི་དྷཱུ་ཏཱིར་བདེ་ཆེན་སྟེར་བའི་ལྷ་མོ་ཕག་མོའི་ངོ་བོ་ཨཾ་ཡིག་བསྒོམས་པ་དེས་རྩ་གནས་དེར་རོ་རྐྱང་ལ་རྒྱུ་བའི་རླུང་སྡུད་ནུས་པ་དེའི་རང་བཞིན་དུ་འགྱུར་ཏེ། དཔེར་ན་ནོར་བུ་ཤེལ་སྒོང་རས་དཀར་དམར་སོགས་ཀྱི་སྟེང་དུ་བཞག་པ་ན་དེ་དང་དེའི་གཟུགས་ཅན་དུ་འགྱུར་བ་བཞིན་ནོ། །ཞེས་པའི་དོན་ཏེ་ལུས་ཀྱི་གནད་ཆེ་སར་དམིགས་པ་གཏད་ནས་བསྒོམས་པས་གདམས་ངག་གི་མཐུས་གས་དེར་རླུང་བསྡུ་བར་འདོད་པ་ཇི་ལྟ་བ་བཞིན་དུ་སྡུད་ནུས་པར་འགྱུར་པའི་ཁུངས་མཆོག་ཏུ་གྱུར་པའོ། གཉིས་པ་ལ་གཉིས། ཕྱག་རྒྱལ་བརྟེན་ནས་བདེ་ཆེན་འདྲེན་པ་ཇི་ལྟར་བསྟན་པ་དང་། རང་གི་ལུས་ཀྱི་གནད་རྣམས་ལ་བརྟེན་ནས་བདེ་ཆེན་འདྲེན་པ་ཇི་ལྟར་བསྟན་པའོ། དང་པོ་ནི། ཉུང་བའི་རྩ་རྒྱུད་ལས། །ཕྱག་རྒྱ་དང་བྲལ་གསང་སྔགས་ནི། །ལུས་ཅན་རྣམས་ལ་འགྲུབ་མི་འགྱུར། །ཞེས་ཤེས་རབ་མའི་ཕྱག་རྒྱ་ལ་བརྟེན་པ་དང་བྲལ་ན་ལམ་གཞན་གྱིས་མི་འགྲུབ་པར་གསུངས་ཤིང་། །ཡང་དེ་ཉིད་ལས། དེ་བཞིན་ཕོ་ཉ་ལེགས་འགྲོགས་པས། །སྒྲུབ་པ་པོ་ཡིས་དངོས་གྲུབ་འཐོབ། །བཟླས་བརྗོད་བསམ་གཏན་མཆོག་མེད་པར། །མྱུར་བ་ཉིད་དུ་འགྲུབ་པར་འགྱུར། །སྔགས་དང་ཕྱག་རྒྱས་སྒྲུབ་པ་པོས། །མཆོད་པ་ཉིད་ལ་རབ་ཏུ་འཇུག །འདི་ལས་གཞན་པའི་མཆོད་མེད་དེ། །དེ་ལྟར་བསྟན་བཅོས་ངེས་པ་ཡིན། །ཕོ་ཉའི་ལམ་ལ་དགའ་རྣམས་ཀྱི། །
སྒྲུབ་པ་པོ་ནི་དངོས་གྲུབ་འགྱུར། །ཞེས་རྐང་པ་དང་པོ་གཉིས་པ་དང་གསུམ་པས་ཕོ་ཉོའི་ལམ་གྱིས་ཕྱིའི་བཟླས་བརྗོད་སོགས་དང་བྲལ་ཡང་འགྲུབ་པ་དང་། མྱུར་བར་འགྲུབ་པ་ཡང་དེའི་མཐུས་ཡིན་པར་གསུངས་ཏེ། རིམ་པ་དང་པོའི་སྐབས་སུ་བཟླས་བརྗོད་སོགས་བྱེད་པ་སྔོན་དུ་གཏོང་བ་འགོག་པ་ཡིན་ནོ། ཕོ་ཉའི་ལམ་ལ་བསྔགས་པ་ནི། བདག་མེད་པའི་དེ་ཁོ་ན་ཉིད་ལྷན་སྐྱེས་ཀྱི་བདེ་ཆེན་ཀྱིས་བསྒོམ་དགོས་པའི་གནད་ཀྱིས་ཡིན་ནོ། ཆུ་ལ་དེ་ཡང་ཕ་རྒྱུད་དང་མ་རྒྱུད་གཉིས་ཀའི་ལུགས་ངེས་པ་ཅན་ཡིན་པ་ནི་རྐང་པ་བརྒྱད་པས་སྟོན་པར་བཤད་དོ། དོན་གྱི་དབང་འདི་གཟིགས་ནས་རྩ་རྒྱུད་ཀྱི་ལེའུ་བཅོ་ལྔ་པ་ནས་ཉེར་བཞི་པའི་བར་གྱི་ཕོ་ཉ་མོ་ཁྱད་པར་ཅན་དང་འདུ་བའི་སྐོར་ཉིད་བཤད་ཅིང་གཞན་ཡང་ལེའུ་མང་པོ་ནས་ཡང་དང་ཡང་དུ་གསུངས་སོ། དེ་ནས་ལྷན་སྐྱེས་ཀྱི་བདེ་ཆེན་འདྲེན་པ་ལ་ཐབས་མང་དུ་ཡོད་ཀྱང་ལས་དང་པོ་པའི་སྐབས་སུ་རང་གི་ལུས་ལ་དམིགས་ཏེ་བསྒོམ་པ་སོགས་ཀྱིས་ལྷན་སྐྱེས་མཚོན་མི་ནུས་པའི་ཚེ་ཕོ་ཉ་མོ་མཚན་ཉིད་ཐམས་ཅད་ཚང་བ་ལས་མཚོན་དགོས་ཏེ། གསང་བ་གྲུབ་པ་ལས། ལས་ཀྱི་ཕྱག་རྒྱ་མཉམ་ལྡན་པས། །རྡོ་རྗེ་པདྨ་མཉམ་སྦྱོར་བས། །བདེན་པ་གསུངས་པས་མངོན་སུམ་དུ། །འདི་འདྲའི་བསྒོམ་པ་གང་གསུངས་པ། །དང་པོའི་ལས་ཅན་སེམས་ཅན་ལ། །ལས་ཀྱི་ཕྱག་རྒྱ་གང་སྤངས་ནས། །བྱང་ཆུབ་སེམས་ནི་རབ་སྟོན་པ། །གཞན་གྱིས་མཚན་པས་མི་མཐོང་སྟེ། །དང་པོའི་ལས་པས་རིག་པས་བྱ། །ཐོག་མ་བར་མཐའ་དྲི་མེད་མེད་པ། །རིག་སྟེ་གཞན་དུ་ནུས་
མ་ཡིན། ཞེས་གསུངས་པས་སོ། དེ་ལས་མཚན་བསྔོན་དུ་སོང་ན། རང་གི་ལུས་ལ་གནད་དུ་བསྣུན་པའི་རྣལ་འབྱོར་བསྒོམས་པས་སྲོག་དྷཱུ་ཏཱིར་ཚུད་པ་ལ་བརྟེན་ནས་ལྷན་སྐྱེས་བསྐྱེད་སྤང་ཞིང་། དེ་ལྟར་བྱ་ནུས་པ་ནས་ཀྱང་ཕྱིའི་རྐྱེན་ཕོ་ཉ་མོ་མཚན་ཉིད་ཚང་བ་ལ་བརྟེན་ན་ལ་མཆེས་མྱུར་བར་འགྱུར་གྱི། གཞན་དུ་མིན་པས་ཐབས་དེ་གཙོ་བོ་ཡིན་ཏེ། །ཧེ་རུ་ཀ་དངོས་འབྱུང་ལས་ཀྱང་། དཔའ་བོ་གང་ཞིང་ཕྱག་རྒྱ་དམན། སྒྲུབ་པོ་མཆོད་པར་བྱེད་པ་ནི། ཕུབ་མ་བརྡུང་དང་མཚུངས་པ་སྟེ། །ཞེས་གསུངས་སོ། འོན་ཀྱང་རྩ་རྒྱུད་ལས། །ཕོ་ཉ་རལ་གྲིའི་སོ་འདྲ་ཞིང་། །ཞེས་གསུངས་པས་བརྟེན་པར་དཀའ་བའི་དོན་དུ་ཀོང་ཀ་ན་པ་བཞེད་པ་ནི། །ཧེ་རུ་ཀ་མངོན་འབྱུང་ལས་ཀྱང་རྣལ་འབྱོར་མེད་པར་རྣལ་འབྱོར་ཆོས། །ཕྱག་རྒྱ་ལ་ནི་བགྲོད་གྱུར་དང་། །ཡེ་ཤེས་མེད་པར་ཡེ་ཤེས་ཚུལ། །དམྱལ་བར་འགྲོ་བར་ཐེ་ཚོམ་མེད། ཅེས་གསུངས་ཏེ། །ཡུལ་རྟེན་ཀུན་མཚན་ཉིད་མ་ཚང་བར་དེ་ལྟར་བྱེད་པ་ལ་ཉེས་དམིགས་ཤིན་ཏུ་ཆེ་བར་གསུངས་པ་རྣམས་ཤེས་དགོས་སོ། ཕྱག་རྒྱ་ལ་བརྟེན་པ་དང་བྲལ་ན་མི་འགྲུབ་པར་རྩ་རྒྱུད་ལས་གསུངས་པ་དེ་ཉིད་བཤད་རྒྱུངས་མྦུ་ཊ་ལས་ཀྱང་གསལ་བར་གསུངས་ཏེ། ཐབས་དང་ཤེས་རབ་མ་གཏོགས་པས་སངས་རྒྱས་ཉིད་མངོན་དུ་ཐོབ་པར་མི་འགྱུར་རོ། །དེའི་ཕྱིར་ཤེས་རབ་མ་དངོས་སུ་ཡང་དག་པར་རྫོགས་པའི་བྱང་ཆུབ་སྦྱིན་པར་བྱེད་པ་བཟང་མོ་སྤང་བར་མི་བྱ་སྟེ། ཕྱག་རྒྱ་རེར་དང་ལྡན་པ་འདི་མ་གཏོགས་པར་དངོས་གྲུབ་སྟེར་བར་མི་འགྱུར་རོ་
ཞེས་སོ། །ཕྱག་རྒྱ་བཟང་མོ་ནི་པདྨ་ཅན་ལ་སོགས་པ་ཡིན་ལ། །དེ་དག་ལ་བརྟེན་པ་ན་བྱང་ཆུབ་ཀྱི་སེམས་ཀྱི་བཅུང་ཕྱག་རྒྱའི་སྟོབས་ཀྱིས་ཀྱང་འཆིང་བར་ནུས་པ་ཡིན་ཏེ། །རྡོ་རྗེ་འཁའ་འགྲོ་ལས། །རྩུབ་ཅེས་བྱ་བ་ནི་གླང་གི་ལྕེ་ལྟར་རྩུབ་པའོ། །འཇམ་པ་ནི་པདྨ་ཅན་ཞེས་བྱ་བའོ། །འཁྲང་བ་ནི་ཁུ་བ་སྲ་བ་སྟེ་གང་གི་ཁུ་བ་འཐས་པར་གྱུར་པའོ། མཛེར་བ་ཅན་ནི་དུང་ཅན་མ་སྟེ་པདྨ་ལ་ཤ་མཛེར་ཡོད་པའོ། །བུད་མེད་འདི་དག་ནི་བཅུད་འཆིང་བ་ལ་དབང་དུ་གྱུར་བ་ཡིན་ནོ། ཞེས་གསུངས་སོ། དེའི་ངང་པོ་ནི་གླང་པོ་ཅན་དང་། །གསུམ་པ་ནི་རི་མོ་ཅན་མ་ཡིན་ལ། །རྩུབ་པ་དང་འཇམ་པ་ནི་པདྨའོ། །ཕྱག་རྒྱ་དེ་དག་ལ་བརྟེན་པའི་ཚེ་ཁམས་ཀྱི་བཅུད་འཆིང་བ་ནི་གཡས་གཡོན་ཀྱི་རླུང་དྷཱུ་ཏཱིར་ཚུང་ནས་འགྲོ་བ་ཕྱིའི་ཕྱག་རྒྱ་སྲོག་རྩོལ་དུ་འགྲོ་བའི་གནད་ཤེས་པ་ལ་རག་ལས་ཏེ། མཁའ་འགྲོ་རྒྱ་མཚོར། དེ་ནས། རྡོ་རྗེ་པདྨ་འདུ་བྱ་བ། ཇི་བཞིན་བཤད་ཀྱིས་མཉན་པར་གྱིས། །རིན་ཆེན་རྡོ་རྗེའི་རབ་སྦྱོར་བས། ཨ་ཝ་དྷཱུ་ཏཱི་ཅན་དངོས་གྲུབ། རྣལ་འབྱོར་མ་ལ་ཡང་དག་རོལ། །དོམ་དམ་པ་ཡི་ཉམས་ལ་གནས། །དེ་ཡི་སྦྱོར་བས་རོལ་པར་ནི། །གཉིས་མེད་རྒྱུད་རྣམས་ཀྱིས་འགྱུར་རོ། །ལུས་ཀྱི་ཉམས་སུ་མྱོང་བཞིན་པ། །བྱིས་པ་རྣམས་ཀྱི་བྱང་ཆུབ་འོང་། །ཧ་ཡིག་དྲུག་པ་དང་ལྡན་པའི། །ས་བོན་རྡོ་རྗེའི་ནོར་བུ་དགོད། །ཨ་ཝ་དྷཱུ་ཏཱིའི་རྩར་འབབ་སྟེ། །སྟེང་དུ་ཁ་བལྟས་དབྲལ་བར་སོན། །བསྲུང་པའི་དུས་སུ་བློ་ལྡན་གྱིས། །རང་གི་ལག་པས་རྡོ་རྗེ་གཟུང་། །ཞེས་སོ། རིན་ཆེན་ནི་དགའ་བ་
རྒྱས་པར་བྱེད་པས་པདྨའོ། ཨ་ཝ་དྷཱུ་ཏཱི་ཅན་ནི་གཟུང་འཛིན་གཉིས་ཀྱི་རྣམ་རྟོག་ཅི་རིགས་པ་སྤངས་པའི་རྣལ་འབྱོར་བའོ། བྱིས་པ་རྣམས་ཀྱི་བྱང་ཆུབ་མི་བརྡའི་བྱང་ཆུབ་ཀྱི་སེམས་ཀུནྟ་ལྟ་བུའོ། དྲུག་པ་ནི་དབྱངས་ཀྱི་དྲུག་པ་ཨཱུ་རིང་པོ་སྟེ་དེ་ཧ་དང་སྦྱར་བས་ཧཱུྃ་ཡིན་ལ། ས་བོན་རྡོ་རྗེའི་བུ་གར་བཀོད་པས་ནི་ཁམས་མི་འཕོ་བར་བྱེད་དོ། དྷཱུ་ཏཱིའི་རྩར་བྱང་སེམས་འབབ་པའི་རྒྱུ་ནི་ཕྱག་རྒྱ་དང་མཉམ་པར་སྦྱོར་བའི་རྩའི་གནད་ཀྱིས་ཡིན་ཏེ་འདིའི་གནད་གཞན་དུ་ཤེས་པར་བྱའོ། དྷཱུ་ཏཱིའི་རྩ་ནས་ནོར་བུའི་རྩེའི་བར་དུ་བབ་པ་ན་ཡས་བབས་ཀྱི་དགའ་བཞི་དང་། སྟེང་དུ་ཁ་བལྟས་པ་སྟེ་གྱེན་དུ་ལོག་ནས་དཔྲལ་བ་བར་དུ་སོན་པ་ནམས་བརྟན་གྱི་དགང་བཞི་སྐྱེའོ། ལྷག་མ་རྣམས་གོ་སླའོ། མན་སྙེ་ལས། ཤེས་རབ་དང་བཅས་པའི་ཐབས་དག་སྙོམས་པར་འཇུག་པས་ལ་ལན་དང་ར་ས་ནའི་རླུང་དང་ཨ་ཝ་དྷཱུ་ཏཱི་ར་འཇུག་པ་ན་གཏུམ་མོ་འབར་རོ། དེ་ཡང་ཕུང་པོ་ལ་སོགས་པ་བསྲེག་ཅིང་ཟླ་བ་འཇུ་བར་བྱེད་དོ་ཞེས་ལས་རྒྱ་དང་མཉམ་པར་སྦྱར་བས་གཡས་གཡོན་གྱི་རླུང་དྷཱུ་ཏཱིར་ཞུགས་ནས་གཏུམ་མོ་སྦར་བས་བྱང་སེམས་འཇུ་བར་བཤད་ལ། དེ་བཞིན་གཤེགས་པའི་རྡོ་རྗེས། །དེའི་ཚེ་སྣ་བུག་གཉིས་ཀྱི་རྒྱུ་བ་ལྔོག་པར་བཤད་པས། །རླུང་གཉིས་དྷཱུ་ཏཱིར་ཐིམ་པ་ཡིན་ཏེ། ཐས་དེ་ནི་ཕྱིའི་སྲོག་རྩོལ་ལོ། བླ་མེད་ཀྱི་རྒྱུད་སྡེ་ནས་སྲོག་རྩོལ་གྱི་ལྨ་འདི་མ་བཤད་པ་ཡང་མེད་ཅིང་བཤད་པ་ཡང་མེད་པ་ལ་ཐབས་འདིས་རླུང་དྷཱུ་ཏཱིར་སྡུད་པའི་རྒྱུ་མཚན་གྱི་གནད་ཤིན་ཏུ་རྟོགས་དཀའ་བར་སྣང་ནའང་གོ་བ་རེགས་པ་ཆགས་ན་རྒྱུད་དོན་མང་པོ་ཞིག་གོ་བ་ལ་
ཁྱད་ཆེ་བར་སྣང་ངོ་། ལས་རྒྱལ་བརྟེན་ནས་ཇི་ལྟར་འབྱུང་བའི་གཟུགས་བརྙན་ཕལ་མོ་ཆེ། ཡེ་ཤེས་ཀྱི་ཕྱག་རྒྱ་ཤིན་ཏུ་གསལ་ཞིང་བརྟན་ན་དེ་ལ་བརྟེན་ནས་ཀྱང་འབྱུང་བས་ཡེ་རྒྱལ་བརྟེན་ནས་ཀྱང་གཡས་གཡོན་གྱི་རླུང་དྷཱུ་ཏཱིར་ཚུད་པའི་སྐབས་ཡོད་དོ། གཉིས་པ་ནི། འདིའི་བསྐྱེད་རིམ་དུ་བཤད་པའི་རླུང་མེ་ཆུས་རི་རབ་དང་བཅས་པ་ལྔ་རྫོགས་རིམ་ལ་སྦྱར་ཏེ་བཤད་པ་ན། རྐང་པ་ནས་མགོ་བོའི་བར་དུ་རང་གི་ལུས་ལ་བྱ་སྟེ། དེ་ཉིད་གསལ་བ་ལས། རྐང་མཐིལ་གཞུ་ཡི་རྣམ་པ་ཡི། རླུང་གི་དཀྱིལ་འཁོར་ཡང་དག་གནས། །ལྟེ་བའི་ཕྱོགས་འདིར་མེ་ཉིད་ནི། །གྲུ་གསུམ་རྣམ་པར་འབར་བའོ། །ལྟོ་བར་ཆུ་ཞེས་གྲགས་པ་ཡི། །དཀྱིལ་འཁོར་ཟླུམ་པོའི་རྣམ་པའོ། །སྙིང་ག་རུ་ནི་ས་ཉིད་དེ། །ཀུན་ནས་གྲུ་བཞི་པ་ཡིན་ནོ། །དེ་སྟེང་མགྲིན་པའི་ཕྱོགས་སུ་ནི། །རི་ཡི་རྒྱལ་པོ་རི་རབ་དང་། །ཞེས་དང་། དེ་ཡི་རྩེ་མོ་མགོར་གསུངས་ཏེ། །ཞེས་དབྱིངས་མཐུན་པའི་སྒོ་ནས་བཤད་པའོ། །དེ་ཡང་མྦུ་ཊ་ནས་འབྱུང་བའི་དོན་ཡིན་ལ། དེ་ཉིད་ལས། རི་ནི་མགོ་བོའི་ཟེར་འབྲུ་སྟེ། །ཇི་ལྟར་རྩོམ་ཆེན་ལ་སོགས་རིམ། །བླ་མའི་དུས་ཐབས་རིམ་ཉིད་ཀྱིས། །དེ་ནི་རྫོགས་པའི་དཀྱིལ་འཁོར་གནས། །ཞེས་རྐང་པའི་མཐིལ་རྩོམ་ཆེན་ཀྱི་རླུང་ལ་སོགས་པར་བཤད་པ་ནི་བླ་མའི་མན་ངག་གི་དཀྱིལ་འཁོར་རྫོགས་རིམ་དང་སྦྱར་བའི་ལུགས་སུ་གསུངས་པས་ཀྱང་ཤེས་སོ། འདི་ཡང་རྩ་རྒྱུད་ལས་ཇི་ལྟར་བསྟན་པ་ནི། །མངོན་བརྗོད་ལས། ཐམས་ཅད་བདག་ཉིད་རྟག་བཞུགས་པར། །གང་ཞིག་སྔར་ནི་བཤད་པ་ཉིད། །དཀྱིལ་འཁོར་ལུས་ནི་ཡིན་པར་བཤད། །དེ་ནི་སྒོ་དགུ་དག་ཏུ་འགྱུར། ཞེས་
གསུངས་པ་ལས་ཤེས་པར་བྱའོ། དེ་ཡང་། གསང་བ་མཆོག་གི་དགྱེས་པ་ན། ཐམས་ཅད་བདག་ཉིད་རྟག་ཏུ་བཞུགས། །ཞེས་པའི་གསང་བ་ནི་ས་དང་། མཆོག་ནི་ཆུ་དང་། དགྱེས་པ་ནི་མེ་དང་། ཐམས་ཅད་བདག་ཉིད་ནི་རླུང་དང་། རྟག་ཏུ་བཞུགས་པ་ནི་ནམ་མཁའི་ཁམས་བདེ་བ་ཆེན་པོར་དེ་ཉིད་གསལ་བ་སོགས་ལས་གསུངས་ཏེ་སམྦུ་ཊའི་དགོངས་པའོ། དེ་ལྟར་ན་གསང་བ་སོགས་ཕྱི་བསྐྱེད་རིམ་ལ་སྦྱར་ན་འབྱུང་བཞི་རིམ་བརྩེགས་དང་ནང་རྫོགས་རིམ་ལ་སྦྱར་ན་རྡོ་རྗེའི་ལུས་སྟོན་ཏེ། དེའི་ཤུགས་ཀྱིས་རི་རབ་ཀྱི་སྦྱོར་ལུགས་གཉིས་ཀྱང་ཤེས་པར་བྱའོ། མངོན་བྱང་གི་ཨཱ་ལི་ཀཱ་ལི་འགོད་པའི་གཞི་པདྨ་ནང་ལ་སྦྱར་བ་ན། སྤྱི་བོའི་རྩ་འདབ་སོ་གཉིས་སུ་སམྦུ་ཊ་ལས་གསུངས་པ་ནི་མཚོན་པ་ཙམ་སྟེ། མགྲིན་པ་དང་སྙིང་ག་དང་ལྟེ་བ་ལ་སོགས་པའི་རྩ་འཁོར་སོགས་ལུས་ལ་གནད་དུ་བསྣུན་ས་ཀུན་བཟུང་བར་བྱའོ། དེ་ལྟར་བྱང་རུང་བ་ཡང་རྩ་རྒྱུད་ལས། ཆོས་འབྱུང་བྲིས་པའི་དབུས་སུ་དབྱངས་གསལ་བཀོད་ནས་བསྐྱེད་རིམ་པའི་སྔགས་བཏུབ་གསུངས་པ་དེ་ལ་བཤད་རྒྱུད་སམྦུ་ཊ་ནས་བཤད་མཛད་པ་ན། ལྟེ་བའི་རྩ་འཁོར་ལ་གསུངས་པའི་དོན་མན་སྙེ་ལས། འདིས་ནི་ལྟེ་བའི་པདྨ་ལ་སོགས་པ་ཡང་གསུངས་སོ་ཞེས་རྩ་འཁོར་གཞན་ལ་ཡང་བཤད་པ་དང་འདྲའོ། དེ་ལྟར་ན་བསྐྱེད་རིམ་ལ་ཧེ་རུ་ཀ་བསྐྱེད་པའི་གཞི་འབྱུང་བ་རིམ་བརྩེ་གས་རི་རབ་པདྨ་དང་བཅས་པ་བཤད་པ་དེ་ནང་རྫོགས་རིམ་ལ་བཤད་པ་ན། གང་ལ་གནད་ཏུ་བསྣུན་པས་ལྷན་སྐྱེས་ཀྱི་ཧེ་རུ་ཀ་འཆར་བའི་གཞི། བུག་པའི་སྒོ་དགུ་བ་ཅན་གྱི་རྡོ་རྗེའི་ལུས་སྤྱི་དང་བྱེ་
བྲག་གི་གནད་རྣམས་སྟོན་པར་ཤེས་པར་བྱའོ། འདི་ནི་ལཱུ་ཨི་པ་ལྟ་བུ་མངོན་བྱང་ལྔ་ལས་རྟེན་དང་བརྟེན་པ་གཉིས་ཀ་བསྐྱེད་པ་ལྟ་བུ་ལ་སྦྱོར་གྱི། རྟེན་གཞལ་ཡས་ཁང་སྔོན་དུ་བསྐྱེད་ནས་དེའི་དབུས་སུ་མངོན་བྱང་ལས་ཧེ་རུ་ཀ་བསྐྱེད་པ་ལྟ་བུ་ཡིན་ལུས་འདོམ་གང་གྲུབ་ཞི་གཞལ་ཡས་ཁང་གྲུ་བཞིར་སམྦུ་ཊྲ་བཤད་པས། རླུང་ནས་གཞལ་ཡས་ཁང་གི་བར་དང་། །དབྱངས་གསལ་འགོད་པའི་གཞི་པདྨ་ཚུན་ཆོད་གང་ལ་གནད་དུ་བསྣུན་པའི་གཞི་དང་སྦྱར་བ་བཤད་དོ། རྟག་ཏུ་བཞུགས་པའི་དོན་ནམ་མཁའི་ཁམས་བདེ་ཆེན་དུ་བཤད་པ་བསྐྱེད་རིམ་ལ་སྦྱོར་ན། བདེ་ཆེན་འདྲེན་བྱེད་མཚོན་པའི་དབྱངས་གསལ་ཟླ་བ་ཧཱུྃ་བཅས་དང་། བདེ་ཆེན་མཚོན་པའི་ཧེ་རུ་ཀ་ལ་བྱ་ཞིང་། རྫོགས་རིམ་ལ་སྦྱོར་ན། གང་དུ་ལུས་ལ་གནད་དུ་བསྣུན་སའི་བྱང་སེམས་དཀར་དམར་སེམས་དང་བཅས་བ་ལ་སྦྱར་བ་དང་། དེས་དྲངས་པའི་བདེ་ཆེན་གྱི་ཧེ་རུ་ཀ་ལ་ཡང་སྦྱར་རོ། སྣང་ཕྱོགས་གྱི་ཧེ་རུ་ཀ་ཡང་ཤེས་པར་བྱ་སྟེ། སྟོང་པའི་ངང་ལས་ནཱ་དར་ལངས་པའི་ངེས་དོན་གྱི་བཤད་པ་ལས་ཤེས་སོ། སམྦུ་ཊྲ་དབྱངས་གསལ་གྱིས་བསྐྱེད་པའི་ཟླ་བ་ནང་ལ་སྦྱར་བ་ན་ཀླད་པ་དང་ཧཱུྃ་ཡིག་ནང་ལ་སྦྱོར་བའི་སྐབས་སུ་ཧཾ་ཡིག་ལ་བཤད་པ་ཡང་མཚོན་པ་ཙམ་ཡིན་གྱི། དེ་ཁོ་ནར་མ་ངེས་ཏེ། དེ་ཉིད་གསལ་བ་ལས། དེ་ཡི་རྩེ་མོ་མགོར་གསུངས་ཏེ། འདམ་སྐྱེས་འདབ་མ་སུམ་ཏུ་གཉིས། དེ་ཡི་དབུས་སུ་ཧཾ་ཡིན་ཏེ། ཨཱ་ལི་ཀཱ་ལི་
ལས་སྤྲུལ་པ། །མི་ཤིགས་གོ་འཕང་ཉམས་དགའ་བ། །བདེ་བ་ཆེན་པོ་ཞེས་བྱབ་བརྗོད། །ཅེས་ཨཱ་ལི་ཀཱ་ཨིལ་བསྐྱེད་པའི་ཟླ་བ་བདེ་བ་ཆེན་པོ་ཡང་གསུངས་པའི་ཕྱིར་རོ། དེ་ལྟར་ངེས་དོན་གྱི་ཧེ་རུ་ཀ་བསྐྱེད་པའི་གཞི་ནི་ལུས་ཀྱི་དཀྱིལ་འཁོར་ལ་བཤད་པ་ལ་འཁོར་ལོ་བཞི་ལས་སོགས་པའི་དབུས་ཀྱི་དབུ་མ་དང་དེའི་ཡར་སྣ་མར་སྣ་སོགས་གནད་དུ་བསྣུན་ས་མང་ཡང་། ལཱུ་ཨི་པའི་ལུགས་འདི་ནི་ཀུན་སྤྱོད་ལས། །ཟླ་བའི་དཀྱིལ་འཁོར་རྫོགས་པ་ནི། །ལྟེ་བའི་རྩ་བར་གནས་པར་བསྒོམ། །ཞེས་གསུངས་པས་ལྟེ་བ་སྤྲུལ་པའི་འཁོར་ལོ་ལ་གནད་དུ་བསྣུན་པ་ཡིན་ལ། །དེ་དང་མཐུན་པར་མངོན་བརྗོད་ལས་ཀྱང་། དཀྱིལ་འཁོར་ལུས་ནི་རིན་པར་བཤད། །དེ་ནི་སྒོ་དགུ་དག་ཏུ་འགྱུར། དེ་ལ་ལྟེ་བའི་འཁོར་ལོ་ཆེ། །ཐམས་ཅད་མཁྱེན་པ་ཞེས་བྱར་བཤད། །རྡོ་རྗེ་ཅན་ནི་དེར་བཞུགས་པ། །ཞེས་ཐམས་ཅད་མཁྱེན་པ་ཞེས་གྲགས་པའི་རྡོ་རྗེ་ཅན་ངེས་དོན་ལྷན་སྐྱེས་ཀྱི་ཧེ་རུ་ཀ་ལྟེ་བར་བཞུགས་པར་བཤད་དེ། །དེ་ལ་བཞུགས་པ་ནི་སྔར་བཤད་པ་ལྟར་ཤིང་ལ་མེ་གནས། །ཞེས་པ་ལྟར་དེར་གནད་དུ་བསྣུན་པ་ལས་ལྷན་སྐྱེས་འབྱུང་བ་སྟེ། །ཧེ་རུ་ཀ་མངོན་འབྱུང་ལས། །དེ་ལྟར་གསུངས་པའི་དོན་ཡང་དེ་བཞིན་ནོ། །ཡང་མངོན་བརྗོད་ལས། །ལྟེ་བའི་ནང་ན་པདྨ་ཆེ། །བཅུ་དྲུག་ཐིག་ནི་གདབ་པར་བྱ། །ཡི་གེ་དང་ཡང་མཉམ་པར་སྤྱོད། །ཁ་སྦྱོར་བྱ་བ་བྱས་པ་ཡིན། །ཞེས་གསུངས་པའི་རྐང་པ་དང་པོ་གཉིས་ཀྱི་དོན་ནི་ལྟེ་བ་སྤྲུལ་པའི་འཁོར་ལོ་ལ་རྩ་འདབ་རིམ་པ་བཞི་ཡོད་པའི་
དང་པོ་ལ་རྩ་འདབ་བཞི། གཉིས་པ་ལ་བརྒྱད། གསུམ་པ་ལ་རྩ་འདབ་བཅུ་དྲུག་ཡོད་པའི་དོན་དུ་བཤད་ཅིང་། བཞི་པ་ལ་དྲུག་ཅུ་རྩ་བཞི་ཡོད་པར་བཤད་དོ། རྩ་འབབ་ཀྱི་རིམ་པ་གཞན་གསུམ་ནི་ཧེ་རུ་ཀ་མངོན་འབྱུང་ལས། བཅུ་དྲུག་ལ་སོགས་ཀྱིས་ནི་བསྐོར། ཞེས་པའི་སོགས་ཀྱིས་བསྡུས་སོ། ཡི་གེ་དང་མཉམ་པར་སྦྱོར་བ་ནི་ཡི་གེ་རྐྱང་བ་བསྒོམ་པ་མིན་པར་ལྟེ་བའི་རྩ་འཁོར་གྱི་དབུས་ཀྱི་དྷཱུ་ཏཱིའི་ནང་དུ་འོག་ནས་འཆད་པ་ལྟར་ཡི་གེ་བསྒོམ་པའོ། དེ་འདྲ་བའི་རྩ་དང་ཡི་གེ་གཉིས་མཉམ་པར་སྦྱོར་བ་བསྒོམས་པས་བྱ་བ་བྱས་ཚུལ་ནི། ཧེ་རུ་ཀ་མངོན་འབྱུང་ཁ་ཅིག་ལས། །ཁ་སྦྱོར་འབྱེད་པའི་བདག་ཉིད། །ཞེས་འབྱུང་བ་ལྟར་དྷཱུ་ཏཱིའི་ཁ་འབྱར་བ་འབྱེད་པར་བྱེད་པ་ཡིན་ལ། དབུ་མའི་ཁ་ཕྱེ་ན་རོ་རྐྱང་གི་ཁ་ཟུམ་པ་དང་། རོ་རྐྱང་གི་ཁ་ཕྱེ་ན་དབུ་མ་ཁ་ཟུམ་པ་ནི་ངེས་པ་ཡིན་པས་དབུ་མའི་ཁ་འབྱེད་པའི་རྣལ་འབྱོར་གྱིས་རོ་རྐྱང་ལ་རླུང་རྒྱུ་བ་འགོག་པ་ཡིན་ནོ། །ནམ་མཁའ་སྦྱོར་བའི་བདག་ཉིད་དེ། ཞེས་པ་ལྟར་ནས་འང་དྷཱུ་ཏཱིའི་ཁོང་སྟོང་གི་ནམ་མཁའ་འབྱེད་པ་ལ་སྦྱོར་བའི་དོན་ནོ། ཉི་མ་ཟླ་བ་རྣམ་དག་སྟེ། འཆང་དང་ནུབ་པར་བསྟན་པ་ཡིན། །ཞེས་པ་ནི་ཡི་གེ་དང་མཉམ་པར་སྦྱོར་བའི་ཐབས་དེ་ཉི་མ་རོ་མ་ཟླ་བ་རྐྱང་མའི་རླུང་དག་པར་བྱས་ཏེ་ལྷན་སྐྱེས་ཀྱི་ཡེ་ཤེས་འཆར་བ་དང་། ཀུན་རྟོག་ཐམས་ཅད་ནུབ་པར་བྱེད་པར་བསྟན་པ་ཡིན་ཞེས་པའོ། །པདྨའི་སྣ་རྩེར་ཡུངས་ཀ་ཙམ། །ཞེས་པའི་པདྨ་ནི་རྩ་འཁོར་ཡིན་ཏེ། །རྡོ་རྗེ་ཕྲེང་བ་ལས། །པདྨའི་མིང་ཅན་འཁོར་ལོ་རྣམས། །ཞེས་གསུངས་པ་ལྟར་རོ། དེའི་
སྣ་རྩེ་ནི། དེ་ཉིད་ལས། དེའི་ཡང་སྟེ་བ་སྣ་རུ་བཤད། ཅེས་གསུངས་པ་ལྟར་རྩ་འཁོར་གྱི་ལྟེ་བ་ཡིན་པ། དེ་ཡང་འཁོར་ལོའི་དབུས་ཀྱི་དྷཱུ་ཏཱའི་ནང་ངོ་། ཡུངས་དཀར་ལ་བཤད་པ་མང་དུ་ཡོད་ཀྱང་འདིར་ནི་ཧཱུྃ་ཡིག་དང་རླུང་ལ་བྱའོ། རྒྱུ་དང་མི་རྒྱུའི་རང་བཞིན་ཀུན་ནི་སྣོད་བཅུད་ཀུན་གྱི་རང་བཞིན་ཏེ་རྩ་བ་རླུང་དང་སེམས་མཚན་པའི་ཧཱུྃ་ངོ་། ཡིད་ཀྱི་བཟླས་པར་ཡང་དག་ལྡན། །ཕྱི་ཡི་དབྱངས་ནི་རྣམ་པར་སྤངས། །ཞེས་པ་ནི་ཕྱིའི་ངག་གི་བཟླས་པ་སྤངས་པའི་ཡིད་ཀྱི་བཟླས་པ་རྡོ་རྗེའི་བཟླས་པའོ། དེ་ནི་བསྐྱེད་རིམ་པའི་ཡིད་བཟླས་མིན་གྱི། རྫོགས་རིམ་པའི་རླུང་ལྡང་འཇུག་གནས་གསུམ་ཡི་གེ་གསུམ་དང་སྦྱར་བ་ལ་དམིགས་པའི་རྡོར་བཟླས་སོ། ལཱུ་ཨི་པའི་འགྲེལ་པར་ལཱ་བ་པས་ལྟེ་བར་རླུང་རྡོ་རྗེའི་བཟླས་པ་བཤད་པ་བཞིན་འགྲེལ་པ་གཞན་གཉིས་ཀྱིས་ཀྱང་བཤད་པ་ནི་ཀུན་སྤྱོད་ལས་མི་གསལ་ཡང་ཧེ་རུ་ཀ་མདོ་འབྱུང་དང་མཐུན་ཏེ་ངག་བཟླས་ཀྱི་དེས་དོན་བཤད་ན་དེ་ལྟར་འགྱུར་རོ། དེ་ཡི་ཡེ་ཤེས་སངས་རྒྱས་ཏེ། །གཞན་གྱིས་སངས་རྒྱས་མི་འགྱུར་རོ། ཞེས་པ་ནི་དྷཱུ་ཏཱི་ལ་གནད་དུ་བསྣུན་པའི་རྣལ་འབྱོར་གྱེས་དྲངས་པ་དེའི་ཡེ་ཤེས་ཏེ་ལྷན་སྐྱེས་ཀྱི་ཡེ་ཤེས་ཀྱིས་སངས་རྒྱས་སུ་འགྱུར་གྱི་གཞན་ཏེ་དེ་དང་འབྲལ་བས་སངས་རྒྱས་ཐོབ་པར་མི་འགྱུར་བའི་དོན་ནོ། དེ་ལྟར་ན་ལུས་ཀྱི་གནད་ལྟེ་བ་སྤྲུལ་པའི་འཁོར་ལོ་རྗེས་གཞིག་གི་སྡུད་རིམ་གྱིས་བསྡུས་ཏེ་ཧཱུྃ་ཡིག་དང་ནཱ་ད་གཉིས་དྷཱུ་ཏཱི་དང་མཉམ་པར་སྦྱོར་བ་དང་། དེ་ཡང་མི་གམིགས་པར་
སྦྱོར་བ་དང་། ལྟེ་བར་ཧཱུྃ་ཡིག་གམ་ནཱ་དང་དཀར་དཀར་ལས་ལྡང་འཇུག་གནས་གསུམ་གྱི་རྡོར་བཟླས་ཀྱི་རྣལ་འབྱོར་ཀྱི་རླུང་དྷཱུ་ཏཱིར་བཙུད་པ་ལས་ལྷན་སྐྱེས་དང་། སྒྱུ་མའི་སྐུ་བསྐྱེད་དང་ལཱུ་ཨི་པའི་རྫོགས་རིམ་དུ་བཤད་པ་ནི་རྩ་རྒྱུད་དང་རྣལ་འབྱོར་མ་ཀུན་སྤྱོད་དང་། མངོན་བརྗོད་དང་ཧེ་རུ་ཀ་མངོན་འབྱུང་གསུམ་བསྒྲིགས་ཏེ་བཤད་པ་ལས་ཤེས་པར་བྱའོ། གསུམ་པ་བསྟན་པའི་དོན་དེ་ཉམས་སུ་ལེན་པའི་རིམ་པ་ལ་གཉིས། ཉམས་སུ་བླང་བྱའི་གདམས་ངག་གི་རྣམ་གཞག་དང་། ཇི་ལྟར་ཉམས་སུ་ལེན་པའི་ཚུལ་དངོས་སོ། དང་པོ་ནི། བདེ་མཆོག་ལ་ཡང་སྤོང་བ་ཡན་ལག་དྲུག་དང་། རིམ་པ་ལྔའི་རྣམ་གཞག་གཉིས་གསུངས་ཏེ། མཁའ་འགྲོ་རྒྱ་མཚོ་ལས། སོ་སོར་སྡུད་དང་དེ་བཞིན་དུ། བསམ་གཏན་སྲོག་རྩོལ་འཛིན་པ་དང་། རྗེས་སུ་དྲན་དང་ཏིང་འཛིན་ཏེ། སྦྱོར་བའི་མཚན་ཉིད་རྣམ་དྲུག་གོ །ཞེས་དང་། རང་གི་སྐུ་ནི་སྒྱུ་མ་མཉམ། །བདག་བྱིན་བརླབ་འདི་ཕྲ་མོ་དང་། །རྡོ་རྗེ་བཟླས་རང་མཚན་ཉིད་དོ། རྫོགས་པའི་བྱང་ཆུབ་སེམས་ཀྱི་གཏེར། །དེ་ལས་ལྷག་མ་ཟུང་འཇུག་གོ །ཞེས་སོ། དེ་ལ་རང་གི་སྐུ་སྒྱུ་མ་དང་མཉམ་པར་སྟེ་མཚུངས་པའི་བདག་བྱིན་བརླབས་ཤིང་ཏུ་རྟོགས་དཀའ་བས་ཕྲ་མོར་གྱུར་བ་ནི་རིམ་པ་གསུམ་པ་བདག་བྱིན་བརླབས་ཀྱི་རིམ་པ་སྒྱུ་ལུས་སོ། རྡོ་རྗེ་བཟླས་པའི་རང་གི་མཚན་ཉིད་ནི་རྡོ་རྗེ་བཟླས་པའི་རིམ་པ་སྟེ་རིམ་པ་དང་པོའོ། མངོན་པར་རྫོགས་པར་བྱང་ཆུབ་པའི་རིམ་པ་ནི་རིམ་པ་བཞི་པ་སྟེ་མིང་གཞན་འོད་གསལ་གྱི་རིམ་པའོ། སེམས་ཀྱི་གཏེར་ནི་སེམས་དབེན་ནམ་སེམས་དམིགས་ཀྱི་རིམ་པ་སྟེ་རིམ་པ་གཉིས་པའོ། སྔར་བཤད་པ་བཞི་ལས་
ལྷག་མ་ནི་ཟུང་འཇུག་གི་རིམ་པ་སྟེ་རིམ་པ་ལྔ་པའོ། བདེ་མཆོག་འབྱུང་བ་ལས་ཀྱང་། པདྨ་མགོན་པོ་སོགས་མགོན་པོ་ལྔའི་རླུང་གཤད་པ་ལྟར། །རླུང་གི་དེ་ཉིད་སྔོན་འགྲོ་བས། །སྔགས་ཀྱི་དེ་ཉིད་བསྒུབ་པར་བྱ་སེམས་ཅན་རྣམས་ཀྱི་སྲོག་འགྱུར་ཞིང་། །ལས་ཀུན་བྱེད་པས་རླུང་དུ་བརྗོད། །རྣམ་ཤེས་བཞོན་པ་ཉིད་ཀྱང་སྟེ། །སངས་རྒྱས་གོ་འཕང་དེ་ཉིད་འཐོབ། །རྒྱུད་རྣམས་ཀུན་གྱི་གསང་བ་ཡི། །ཐབས་དང་བྱང་ཆུབ་རྒྱུ་ཡིན་ནོ། །ཞེས་རླུང་དང་སྔགས་ཀྱི་དེ་ཉིད་སྦྱོར་བར་བཤད་ཅིང་། །རྟག་ཏུ་ཐོ་རངས་ལངས་ནས་རླུང་། །སྟོང་ཕྲག་གཅིག་ནི་བགྲང་བྱ་སྟེ། །དེ་ཕྱིར་རླུང་གི་རྣལ་འབྱོར་གྱིས། །རྟག་ཏུ་མཉམ་གཞག་གནས་པར་བྱ། །ཞེས་རྡོ་རྗེའི་བཟླས་པ་གསུངས་ལ། །ཀུན་རྫོབ་སྐྱེ་བ་འབྱུང་བ་ལས། །དངོས་མེད་ཀྱང་མིན་ཆ་མེད་ཕྱིར། །ལྷན་སྐྱེས་ཆོས་རྣམས་ཐམས་ཅད་ཀྱི། །ལྷན་སྐྱེས་དགའ་བའི་རང་བཞིན་དང་། །རང་བྱིན་བརླབས་དང་རང་འབྱུང་སྟེ། །ཞེས་དང་། །བདེ་ཆེན་མངོན་པར་རྫོགས་བྱང་ཆུབ། །དེ་བཞིན་ཕྱག་རྒྱ་ཆེན་པོ་མཆོག །ཅེས་སྡོམ་འབྱུང་ལས་སྔར་དྲངས་པའི་ཟུང་འཇུག་བཤད་པའི་འཕྲེལ་གསུངས་ཏེ། །ཀུན་རྫོབ་པའི་སྐྱེ་བ་ནི་སྒྱུ་ལུས་བདག་བྱིན་བརླབས་དང་། །མངོན་པར་བྱང་ཆུབ་པ་འོད་གསལ་བ་ནི་ལྷན་སྐྱེས་ཀྱི་བདེ་བ་ཆེན་པོར་གསུངས་པས་དེ་དག་གི་ཤུགས་ཀྱིས་སེམས་དབེན་ཡང་རྟོགས་པར་འགྱུར་རོ། སྦྱོར་བ་ཡང་ལག་གཟུག་ནི་མཁའ་འགྲོ་རྒྱ་མཚོ་ལས། སོ་སོར་སྡུ་དང་ཁཱ་གདོང་མ། །ལུག་གདོང་མ་ནི་བསམ་གཏན་འདོད། །སྲོག་རྩོལ་
དུ་ནི་གནས་པ་ཁྱི། འཛིན་པ་ལ་ནི་ཕག་མོའོ། །རྗེས་དྲན་གནས་པ་ཕོ་ཉ་མོ། །ཏིང་ངེ་འཛིན་ནི་བསྟན་མར་འདོད། །མཆེ་བ་མ་ནི་རྒྱས་བརྟན་ཐོབ། །འཇོམས་མ་འབྲས་བུ་ཀུན་བདག་སྐྱེས། །འཁོར་བ་ལས་ནི་གྲོལ་གྱུར་པ། །ཞེས་ཕག་གདོང་མ་གཏོགས་པའི་སྒོམ་གསུམ་ཕག་མོ་དང་བཞི། །གཤིང་རྗེ་ཕོ་ཉ་མོ་དང་བརྟན་མ་སྟེ་མཚམས་མ་གཉིས་དང་དྲུག་སྦྱོར་བ་ཡན་ལག་དྲུག་ཏུ་རིམ་པ་བཞིན་གཤད་པ། འགྲེལ་བ་ལས་དེ་རྣམས་རྟོགས་སླ་བ་དང་བླ་མའི་ཞལ་ལས་ཤེས་པར་བྱ་བར་བཤད་དེ། ཡན་ལག་དྲུག་བདེ་མཆོག་བསྟོད་འགྲེལ་ལས་གསུངས་པ་བཞིན་དུ་མི་གསལ་ལོ། ལཱུ་ཨི་བའི་འགྲེལ་པ་ཁྱད་པར་གསལ་བྱེད་ལས། ཤིན་ཏུ་རྣལ་འབྱོར་གྱི་བར་གྱིས་བསྐྱེད་རིམ་དང་། རྣལ་འབྱོར་ཆེན་པོའི་རྫོགས་རིམ་གྱི་རིམ་པ་གཉིས་ནི། རིགས་པས་གྲུབ་པའི་ཡན་ལག་དྲུག་པའི་གོ་རིམ་ཁོ་ནས་བསྒོམ་པར་བྱའི་གཞན་དུ་ན་དངོས་གྲུབ་མི་འགྲུབ་སྟེ། འདུས་པ་ཕྱི་མ་ལས། བསྙེན་པ་ཡན་ལག་དྲུག་སྦྱོར་བས། སྒྲུབ་པའི་མཆོག་ནི་བྱས་ནས་སུ། བསྒྲུབ་པར་བྱ་ཡི་གཞན་དུན། གྲུབ་པ་མཆོག་ནི་མི་འཐོབ་པོ། །ཞེས་དྲངས་ནས་མཆོག་འགྲུབ་པ་ལ་སྦྱོར་བ་ཡན་ལག་དྲུག་གི་རིམ་པ་སྒྲུབ་དགོས་ཞེས་བསྒྲུབས་ནས་ལཱུ་ཨི་པའི་ལུགས་འདི་ལ་ཡང་ཡན་ལག་དྲུག་སྦྱོར་བར་བྱེད་དོ། སྦྱོར་ཚུལ་ནི། མིག་ལ་སོགས་པའི་ཤེས་པ་ལྔ་གཟུགས་ལ་སོགས་པའི་ཡུལ་ལྔ་ལ་འཇུག་པ་སོ་སོར་སྡུད་པ་སྟེ་འགུགས་པར་བྱེད་པ་ནི་སོར་སྡུད་དང་། དེ་ལྟར་བསྡུས་ནས་ནང་གི་ཕུང་ཁམས་
སྐྱེ་མཆེད་རྣམས་བདེ་མཆོག་ལ་སོགས་པའི་ལྷར་སྦྱོར་བ་ནི་བསམ་གཏན་ཡིན་ལ། རྟེན་དང་བརྟེན་པའི་དཀྱིལ་འཀོར་བའི་ངོ་བོ་ཙམ་དུ་རྟོག་པ་ནི་རྟོག་པ་དང་། དམིགས་པ་དེ་ལ་བརྟེན་པའི་སེམས་ཀྱིས་ངེས་པ་ནི་དཔྱོད་པ་དང་། དེ་ལྟར་ལྷ་ལ་དམགིས་པས་ཡིད་བདེ་བ་ནི་དགའ་བ་དང་། དགའ་བས་བསྒོམས་པའི་ལྷ་ལས་སེམས་པ་དང་བཅས་པའི་སེམས་ནི་བདེ་བ་དང་། བདེ་བ་དང་ལྡན་པའི་སེམས་ཏིང་ངེ་འཛིན་དུ་འགྱུར་བས་རྣམ་པ་སྣ་ཚོགས་པའི་ཐ་མལ་གྱི་ཀུན་རྫོབ་གྱི་ཡུལ་ཅན་རྟོག་པ་ལོག་པས་ལྷ་ཁོ་ན་ལ་དམིགས་པའི་སེམས་ནི་སེམས་རྩེ་གཅིག་པ་བསམ་གཏན་ཀྱི་ཡན་ལག་ལྔའོ། སྲོག་རྩོལ་ལ་སོགས་པའི་ཡན་ལག་ཕྱི་མ་བཞི་རྫོགས་རིམ་དུ་བཤད་ཅིང་། འདི་ཁོ་ན་རྒྱུད་དང་བརྒྱུད་པའི་རིམ་པ་ལས་འབྱུང་བའི་བཤད་པའོ། ཞེས་བཤད་པ་དེ་ཧེ་རུ་ཀ་ནས་དཔེ་མེད་མཚོ་ལས་བརྒྱུད་པའི་རིམ་པ་ལས་ཀྱང་བྱུང་ཞིང་རྒྱུད་ལས་ཀྱང་བཤད་ཅེས་འཆད་དོ། དེ་ནི་འཇམ་དཔལ་གྱི་ཞལ་གྱི་ལུང་དང་མཐུན་ཞིང་། རྒྱུད་ཀྱི་རྡོ་རྗེ་ཚིག་རེ་རེ་ཡང་དོན་མི་འདྲ་བ་དུ་མ་ལ་ཚད་ལྡན་གྱིས་བཤད་པ་ཡོད་པས་བཤད་པ་ཕྱོགས་གཅིག་པ་རེ་རེ་ལ་ཞེན་ནས་གཞན་སྤང་བར་མི་བྱའོ། སྲོག་རྩོལ་ལ་སོགས་པ་ནི་འཆད་པར་འགྱུར་རོ། མངོན་བརྗོད་ཀྱི་འགྲེལ་པ་ལས་ཀྱང་། །རྫོགས་པའི་རིམ་པ་ནི་རྒྱུད་འཛིན་པ་རྩ་བསྒོམ་པ་དང་རླུང་བསྒོམ་པ་དང་ཐིག་ལེ་བསྒོམ་པ་དང་དྲོད་བསྒོམ་པ་དང་བྱང་ཆུབ་ཀྱི་སེམས་བསྒོམ་པ་དང་མཚན་བཅས་བསྒོམ་པ་ལྔ་ཡིན་ལ། ཡེ་ཤེས་ཀྱི་ཚོགས་དོན་དམ་
པའི་བདེན་པ་བསྒོམ་པ་ནི་སྒྱུ་མ་ལྟ་བུ་དང་འོད་གསལ་སྟོང་པ་ཉིད་བསྒོམ་པ་དང་ཟུང་འཇུག་བསྒོམ་པ་དང་གསུམ་སྟེ། སྲོག་ཨ་ཝ་དྷཱུ་ཏཱིར་འཇུག་པའི་ཐབས་བསམ་གཏན་བསྒོམ་པ་ནི་ལྔ་ཡིན། ཡེ་ཤེས་ཀྱི་ཚོགས་དོན་དམ་པའི་བདེན་པ་བསྒོམ་པ་ནི་གསུམ་ཡིན། ཞེས་པ་དེ་མཆོག་གི་རྫོགས་རིམ་ལ་འདུས་པའི་རྫོགས་རིམ་གྱི་ཐ་སྙད་བྱས་པ་མང་དུ་བཤད་ཅིང་། རྫོགས་རིམ་ལ་རླུང་དྷཱུ་ཏཱིར་ཚུད་པའི་ཐབས་གཅིག་དང་ཚུད་པ་ལ་བརྟེན་ནས་བསྒོམ་པའི་སྐབས་གཉིས་སོ་སོར་བྱས་ཏེ། བདེ་མཆོག་ཏུ་མ་ཟད་བླ་མེད་ཀྱི་རྫོགས་རིམ་གཞན་བསྒོམ་པ་ལ་ཡང་དེ་གཉིས་ཤེས་དགོས་སོ། དེ་ལ་ཁྱད་པར་གསལ་བྱེད་ལས་སྦྱོར་དྲུག་གི་ཡན་ལག་ཕྱི་མ་བཞི་བཤད་པ་ནི། ལཱུ་ཨི་པའི་ལུགས་འདི་ལ་ཡང་ཤིང་ཏུ་འབྱོར་ལ་རྡོ་རྗེ་བཟླས་པ་ལ་སོགས་པའི་རིམ་པ་ལྔ་ཡང་འདི་ལ་སྦྱོར་བར་ཤིན་ཏུ་རུང་སྟེ་འཆད་པར་འགྱུར་རོ། །ཁྱད་པར་གསལ་བྱེད་ལས་ནག་པོ་སྤྱོད་པའི་གཞུང་ལྟར་རིམ་པ་བཞིའི་གདམས་ངག་བཤད་པ་ནི། དེར་རྫོགས་རིམ་གྱི་རྣམ་གྲངས་བཀོད་པ་ཙམ་ཡིན་གྱི་ལུགས་འདིའི་རྫོགས་རིམ་ལ་དེ་ལྟར་སྦྱོར་བ་མིན་ནོ། དེ་ལྟར་ན་བདེ་མཆོག་གི་རྫོགས་རིམ་ལ་ལུགས་མི་འདྲ་བ་ཆེ་བ་ནི་བདེ་མཆོག་བསྟོད་འགྲེལ་ནས་དུས་འཁོར་ལྟར་དུ་བཤད་པའི་སྦྱོར་བ་ཡན་ལག་དྲུག་དང་། དཔེ་མེད་མཚོ་ནས་བརྒྱུད་པའི་སྦྱོར་དྲུག་ལུགས་གཉིས་ཀྱི་གཅིག་དང་། འདུས་པ་ནས་འབྱུང་བ་ལྟར་གྱི་རིམ་ལྔའི་ཐ་སྙད་མཛད་པ་གཅིག་དང་། དྲིལ་བུ་བའི་རིམ་ལྔ་དང་། རིམ་པ་བཞི་པ་དང་། རྣལ་འབྱོར་ཆེན་པོའི་རྫོགས་རིམ་
གཅིག་སྟེ་དྲུག་ཡོད་ལ། བདེ་མཆོག་གི་ཡུལ་སྐོར་དང་ཡབ་སྐོར་ནས་ཀྱང་རྫོགས་རིམ་ཆུང་བ་འགའ་རེ་ཡོད་དོ། གཉིས་པ་ནི། རྫོགས་རིམ་ཉམས་སུ་ལེན་པའི་དུས་ནི་སྔར་བསྐྱེད་རིམ་གྱི་སྐབས་སུ་བཤད་པ་ལྟར་དག་པ་དྲན་པའི་འོག་བཟླས་པའི་གོང་དུ་ཐུན་ཇི་ལྟར་འཚམ་པ་རེ་བསྒོམ་ཞིང་། གཙོ་ཆེར་བསྐྱེད་རིམ་ལ་བསླབས་པས་བསྐྱེད་རིམ་ལ་སེམས་བརྟན་བ་ནས་གཙོ་ཆེར་རྫོགས་རིམ་བསྒོམ་པར་བྱ་སྟེ། དྲིལ་བུ་པ་དང་ལྭ་བ་པས་དེ་ལྟར་གུས་པ་དང་བཅས་པས་རྒྱུན་མི་འཆད་པར་བསྒོམ་པས་སེམས་བརྟན་པར་གྱུར་པ་དང་རྫོགས་པའི་རིམ་པའི་ཏིང་ངེ་འཛིན་བསྒོམ་པར་བྱའོ། ཞེས་གསུངས་སོ། བསྒོམ་པའི་རིམ་པ་ནི། བསྐྱེད་རིམ་ལ་སེམས་བརྟན་པོ་རྙེད་ན་མཚམས་འདི་ནས་བསྐྱེད་རིམ་ཞར་བྱུང་དུ་དང་གཙོ་བོར་རྫོགས་རིམ་སྒོམ། དེ་ལྟ་མིན་པའི་བསྐྱེད་རིམ་ལ་མང་དུ་སློབ་པ་སྔར་སོང་བ་ཡིན་ན། ཐུན་དང་པོ་ལ་བསྐྱེད་རིམ་རྒྱས་པ་ལན་གཅིག་དང་། ཐུན་གཞན་གསུམ་གྱི་དུས་སུ་བསྡུས་ནས་བསྒོམ་པའི་ཚུལ་གཉིས་བྱས་ཏེ་ལྷའི་རྣལ་འབྱོར་ཐུན་འཚམ་པ་རེ་བསྒོམ་པ་སྔོན་དུ་བཏང་ནས་ཐུན་གྱི་མཐར་ལྷ་བསྡུས་པའི་འག་ཏུ་ཧེ་རུ་ཀ་ཡབ་ཡུམ་དུ་ལངས་པའི་ལྷའི་རྣལ་འབྱོར་གསལ་གདབ་པར་བྱས་ལ་བསྒོམ་མོ། དེ་ནས་སྔར་དྲངས་པའི་སྒྲུབ་ཐབས་ཀྱི་གཞུང་ལྟར་བསྒོམ་པ་ལ། ཨཱ་ལི་ཀཱ་ལི་མདུན་བསམས་ནས། ཞེས་སོགས་འདི་སྒྲུབ་ཐབས་གཙུག་ནོར་དང་། ཡི་གེ་བདུན་པ་དང་། བདུད་རྩི་
འཛག་པའི་སྒྲུབ་ཐབས་སུ་རྫོགས་རིམ་བསྒོམ་པའི་སྐབས་སུ་དྲངས་མོད་ཀྱང་བཤད་པ་མ་མཛད། ཀུན་སྤྱོད་འགྲེལ་པར་ཡང་སྒྲུབ་ཐབས་ཀྱི་འགྲེལ་པར་ཁ་འཕངས་པ་མིན་པ་མ་བཤད་དོ། ལཱུ་ཨི་པའི་སྒྲུབ་ཐབས་ཀྱི་འགྲེལ་པར་ལྭ་བ་པས་བཀྲལ་བའི་རྗེས་སུ་འབྲངས་ནས་ཤེས་རབ་བསྲུང་བ་དང་དེ་བཞིན་གཤེགས་པའི་རྡོ་རྗེའི་འགྲེལ་པར་ཡང་དེ་བཞིན་དུ་བཤད། །ཡང་སྒྲུབ་ཐབས་ཀྱི་འགྲེལ་བ་གཞན་གསུམ་ནས་གཞུང་གི་ཚིག་དོན་སྔ་མ་གསུམ་དང་མི་མཐུན་པར་བཤད་པ་ཡོད་ཀྱང་། འདིར་འགྲེལ་བ་སྔ་མ་གསུམ་གྱི་རྗེས་སུ་འབྲང་། ཕམ་འཐིང་པ་ནས་བརྒྱུད་པ་ལ་ཡང་འགྲེལ་པ་སྔ་མ་གསུམ་དང་མཐུན་མི་མཐུན་གཉིས་འདུག་པ་ལས་འདིར་སྔ་མའི་ལུགས་ལྟར་རོ། དེ་ལ་རྣལ་འབྱོར་ཆེན་པོས་ངལ་བསོ་བར་བྱའོ་ཞེས་སྔོན་དུ་བླང་ངོ་། རྣལ་འབྱོར་ནི་སྔར་བཤད་པའི་རྫོགས་རིམ་པའི་ཐབས་ཤེས་དབྱེར་མེད་དུ་སྦྱོར་བའོ། ཆེན་པོ་ནི་འདིའི་བསྐྱེད་རིམ་ལ་རྣལ་འབྱོར་གསུམ་བཤད་པ་ལ་ལྟོས་ཏེ་བཏགས་པ་ཙམ་མིན་གྱི། བསྐྱེད་རིམ་གྱི་རྣལ་འབྱོར་རྣམས་ལས་མཆོག་ཏུ་གྱུར་པའི་དོན་ཏེ། སྒྲོན་གསལ་དུ་དྲངས་པ་ལས། །ཆེན་པོ་མཆོག་དང་ཚད་མེད་དང་། །མཁས་བརྩོན་སྤྲོ་བའི་ལས་བདག་ཉིད། །ཤིན་ཏུ་རྨད་དུ་བྱང་བྱེད་པ་པོ། །ཆེན་པོ་ཞེས་ནི་བཤད་པ་ཡིན། །ཞེས་ཆེན་པོའི་སྒྲ་དོན་བདུན་ལ་འཇུག་པར་བཤད་པའི་དང་པོ་ལྟར་རོ། །རྣལ་འབྱོར་ཆེན་པོ་དེས་ངལ་བསོ་ལུགས་ནི། །བྲམ་ཟེ་ཆེན་པོས། །འདི་ནི་ཡིད་འདུས་པ་ལ་རླུང་གིས་རླབས། །གཡོ་ཞིང་འཕྱར་ལ་ཤིན་ཏུ་མི་བསྲུན་འགྱུར། །ཞེས་གསུངས་པ་ལྟར་
ཤིན་ཏུ་འཕྱར་ཞིང་གཡོ་བའི་རླུང་གི་བཞོན་པས་ཉིན་མཚན་ཀུན་ཏུ་སེམས་འཁོར་ལོ་བཞིན་དུ་བསྐོར་བས་ཤིན་ཏུ་ངལ་བར་གྱུར་པ་དེ་འཆད་པ་ལྟར་ཀྱི་ལུས་ལ་གནད་དུ་བསྣུན་པའི་གདམས་པ་བསྒོམས་པས་མི་བསྲུན་པའི་རླུང་ཐིམ་པ་དང་དེའི་ཚེ་ལྷན་སྐྱེས་ཀྱི་ཡེ་ཤེས་ཀྱིས་སེམས་ངལ་བསོས་པའི་ཚིམ་པ་སྐྱེ་བ་སྟེ། དེ་ཁོ་ན་ཉིད་གྲུབ་པ་ལས། ལྷན་ཅིག་སྐྱེས་པའི་རླུང་རང་གི་གནས་སུ་གནས་པས་རྟོག་པའི་ཚོགས་ལས་གྲོལ་ཞིང་སྟོང་པ་ཉིད་ཀྱི་རང་བཞིན་གྱིས་ཐུགས་ཚིམ་པར་བྱེད་པ་ཅི་ཞིག་ལྟར་སྐྱེས་ཏེ། ཞེས་གསུངས་པ་ལྟར་རོ། དེ་ཉིད་ལམ་བཅོས་པ་དང་རྣལ་མའི་སེམས་ཞེས་ཀྱང་གསུངས་པས་བཅོས་མ་བཅོས་ཀྱི་མཚམས་ཀྱང་ལེགས་པར་ཤེས་པར་བྱའོ། མདུན་ཞེས་པ་སྔོན་དུ་ཡང་བསྒྱུར་བས་དང་པོའི་དོན་ཏེ། དང་པོར་ཟླ་བ་གནས་པར་བསྒོམ་ཞེས་པའོ། གང་དུ་ན་རང་དམ་ཚིག་སེམས་དཔའི་ལྟེ་བའི་རྩ་བ་སྟེ་ནང་གི་དབུས་སུའོ། ཟླ་བ་བསྒོམ་ཚུལ་ནི། ཨཱ་ལི་ཀ་ལིའི་ཕྲེང་བ་འོད་ཟེར་ལྔ་ལྡན་ལས་འཁོར་ལོ་གསུམ་གྱི་ལྷ་ཚོགས་འཕྲོ་བ་ཅན་ངག་ཏུ་བརྗོད་པས་སྣ་བུག་གཡས་པའི་རླུང་དང་འགྲོགས་ནས་ཕྱིར་འཕྲོས་པས་འགྲོ་བ་རྣམས་འཁོར་ལོ་གསུམ་གྱི་ལྷའི་བདག་ཉིད་དུ་བྱས་ཏེ། ཐོག་མ་མེད་པ་ནས་གྲུབ་པའི་དཔའ་བོ་དང་རྣལ་འབྱོར་མ་རྣམས་དང་རོ་མཉམ་པར་གྱུར་ཏེ། སྣ་བུག་གཡོན་པ་ནས་ཞུགས་ནས་ལྟེ་བར་གནས་པར་བསམས་ནས། དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་རྫོགས་པ་
དཀར་ལ་དམར་པའི་མདངས་ཅན་དབྱངས་གསལ་ལ་གཟུགས་བརྙན་བཞིན་དུ་ཤར་བ་བསམ་མོ། ཟླ་བ་དེ་ཡི་དབུས་སུ་ཧཱུྃ་གི་ཡི་གེ་མཆོད་རྡོ་རྗེ་འཆང་གི་གནས་དེ་ས་བོན་དུ་གྱུར་པ་དཀར་ལ་དམར་བའི་མདངས་ཅན་གནས་པར་བསམས་ལ་ཟླ་བ་དང་ས་བོན་ཡོངས་སུ་གྱུར་པ་ལས་རང་ཉིད་བཅོམ་ལྡན་འདས་སྐུ་གསུང་ཐུགས་ཀྱི་རྡོ་རྗེ་ཅན་ཏེ། རྡོ་རྗེ་གསུམ་མི་ཕྱེད་པའི་རྡོ་རྗེ་འཛིན་པ་སྐུ་མདོག་དཀར་པོ་གཡས་བརྐྱང་གིས་བཞུགས་པ། ནམ་མཁའི་འཇའ་ཚོན་ལྟ་བུ། ཞལ་གཅིག་ཕྱག་གཉིས་ཀྱིས་རྡོར་དྲིལ་བཟུང་ནས་ཡུམ་ལ་ལ་ཁྱུད་པའི་ལྷ་ཡི་གཟུགས་ནི་བསྒོམ་པར་བྱ་ཞིང་ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་ཐོད་པ་འཛིན་པས་འཁྱུད་པ་དང་སྙོམས་པར་འཇུག་པར་བསམ་མོ། གོང་བུ་ལས་འདས་གྱུར་པ་དེ། ཞེས་པ་ནི། དེ་ནི་གཟུགས་ལས་འདས་པ་སྟེ། ཞེས་བསྒྱུར་བ་ལེགས་སོ། བཅོམ་ལྡན་འདས་དེ་ནི་རིམ་གྱིས་ཞུ་ཞིང་ཐིམ་པ་ལས་ནཱ་དའི་གཟུགས་ཉིད་དུ་བསྒོམ་པར་བྱའོ། དེ་ཡང་སྔོན་དུ་སྣོད་བཅུད་ནས་རིམ་གྱིས་སྡུད་པ་ཡིན་ལ། སྡུད་ཚུལ་ལ། ལྭ་བ་པས་སྒྱུ་མའི་དགའ་བའི་སྒྲས་ཡང་དག་པར་བཀུག་པའི་ཁམས་གསུམ་པའི་བདག་ཉིད་ཀྱི་འཁོར་ལོ་ནི་བདག་ཉིད་ལ་རིམ་པས་ཐིབ་པར་བསྒོམ་མོ། ཞེས་གསུངས་པའི་སྒྱུ་མའི་སྐད་དོད་རོལ་པ་ལ་ཡང་འཇུག་པས་ཡབ་ཀྱིས་ཡུམ་ལ་རོལ་པའོ། དེས་ན་འགྲེལ་པ་གཞན་གཉིས་སུ་སྒྱུ་མ་ལྟ་བུ་ཞེས་བསྒྱུར་བ་མི་ལེགས། དགའ་བའི་སྒྲ་ནི་གསང་གནས་གཉིས་སྲུབ་པའི་སྒྲའོ། དེས་བཀུག་ཅེས་པ་ཙམ་ལས་འགུགས་ཚུལ་གཞན་
འགྲེལ་པ་གཉིས་ཀར་མི་གསལ་ལ། མར་དོས་འཁྱུད་པ་དང་འོ་བྱ་བ་ལ་སོགས་པའི་རྩེད་འཇོས་གནས་པས། ཕྱི་རོལ་གྱི་ཕྱག་རྒྱ་དང་སྦྱར་བ་ལྟ་བུར་རྡོ་རྗེ་ནོར་བུར་བདེ་བ་མྱོངས་བའི་ཚེ། དཀྱིལ་འཁོར་བ་ཐམས་ཅད་བདེ་བའི་ངོ་བོར་གནས་པར་བསམ། དེ་ནས་དེ་ཉིད་ལས་བདེ་བའི་རང་བཞིན་གྱི། འོད་ཟེར་དམར་པོ་འཕྲོས་པས་དཀྱིལ་འཁོར་པ་ཐམས་ཅད་ལ་ཁྱབ་པས་བདེ་བའི་རང་བཞིན་དུ་གྱུར་པར་བསམ་ཞིང་། བསྡུ་བྱེ་རྣམས་འོད་ཀྱི་རྣམ་པར་གྱུར་པར་བསམས་ནས་སྡུད་པར་བཞེད་དེ་མན་ངག་དེ་སྦྱར་བས་ཆོག་གོ །ཇོ་བོའི་འགྲེལ་པར་ཡང་། ཏིང་ངེ་འཛིན་སེམས་དཔའ་ལས་འོད་ཟེར་ལྔ་འཕྲོས་པས་འདུས་བྱས་ཀྱི་དངོས་པོ་ཐམས་ཅད་ལ་འོད་ཟེར་ལྔར་བཞུས་ཏེ་སྡུད་པར་གསུངས་སོ། དེ་ཡང་བཀུག་པའི་སྣོད་བཅུད་རྣམས་དུར་ཁྲོད་ལ་ཐིམ། དེ་ནི་རྟེན་གྱི་འཁོར་ལོ་ལ། །རྟེན་གྱི་འཁོར་ལོ་སྒོ་མཚམས་མ་བརྒྱད་དང་བཅས་པ་སྐུ་འཁོར་ལ། དེ་གསུང་འཁོག་ལ། དེ་ཐུགས་འཁོར་ལ། དེའི་ཤར་ནས་གཡོན་སྐོག་གྱི་ཕྱོགས་ན་གནས་པ་བཞི་ནི། རིམ་པ་བཞིན་མཁའ་འགྲོ་མ་ནས་བཟུང་སྟེ་གཡོན་སྐོར་ཀྱིས་ལྷ་མོ་བཞི་ལ་ཐིམ། དེ་ནས་མེ་ནས་བརྩེགས་ཏེ་མཚམས་ན་གནས་པ་བཞི་ནི། གཟུགས་ཅན་མ་ནས་བཟུང་སྟེ་གཡས་སྐོར་ཀྱིས་ལྷ་མོ་བཞི་ལ་ཐིམ། ཐོད་པ་བཞི་ཡང་གཟུགས་ཅན་མ་སོགས་བཞི་ལ་བསྡུ། ལྷ་མོ་བཞི་ཡང་རང་ངོས་ཀྱི་གཙོ་བོའི་ཞལ་བཞི་ལ་རིམ་པ་བཞིན་བསྡུ། དམ་ཚིག་སེམས་དཔའ་ཡབ་
ཡུམ་རྐྱང་པ་བསྒོམས་པ་ཡིན་ན། སྣོད་བཅུད་རྣམས་དང་ཚིག་པ་ཡབ་ཡུམ་ལ་བསྡུ། དམ་ཚིགས་པ་ཡབ་ཡུམ་ནི་ལྟེ་བའི་ཡེ་ཤེས་སེམས་དཔའ་ཡབ་ཡུམ་ལ་ཐིབ། དེ་གཉིས་ཀྱང་སྙོམས་པར་ཞུགས་པས་ཞུ་སྟེ། ཞུ་བ་དེ་ཡོངས་སུ་གྱུར་པ་ལས། སིནྡྷ་རས་བྱུགས་པའི་མུ་ཏིག་ལྟ་བའུའི་ཧཱུྃ་ཡིག་བདེ་བ་ཆེན་པོའི་རང་བཞིན་དུ་གྱུར། དེའི་ཨཱུ་ནས་ནཱ་དའི་བར་དུ་སྔ་མ་ཕྱི་མ་ལ་རིམ་གྱིས་བསྡུས་ནས། ན་ད་ཡང་སྐྲའི་རྩེ་མོ་བརྒྱ་སྟོང་གི་ཆ་ཙམ་དུ་བྱས་པ་ལ་སེམས་གཟུང་ངོ་། རབ་ཀྱིས་ནི་དེ་ཡང་མི་དམིགས་པར་བྱ་བར་འགྲིལ་པ་གསུམ་ག་ལས་བཤད་དོ། སྔ་མ་རྣམས་དམ་ཚིག་སེམས་དཔའ་ཡེ་ཤེས་སེམས་དཔའ་ལ་བསྡུས་པ་ཡིན་ལ། དམ་ཚིག་སེམས་དཔའི་གཟུགས་འདས་དང་ཡེ་ཤེས་སེམས་དཔའི་ཞུ་བ་ཡན་ལ་ཡེ་ཤེས་སེམས་དཔའི་གཟུགས་འདས་དང་ཐིག་ལེ་ནཱ་ད་ལ་ཞུགས་པའི་བར་ལ་ཏིང་ངེ་འཛིན་སེམས་དཔའི་གཟུགས་འདས་ཞེས་ཟེར་རོ། འདི་ལ་ཧཱུྃ་ཡིག་བསྒོམ་པ་ན་ལྟེ་བའི་རྒྱབ་གཞུང་ལ་ཉེ་བའི་ནང་ངོས་སྒྲུལ་པའི་འཁོར་ལོའི་དབུས་དྲང་པོའི་དྷཱུ་ཏཱིའི་ནང་དུ་ཧཱུྃ་ཡིག་གསལ་གདབ་ལ། དེའི་ཐིག་ལེའི་ནང་དུ་སེམས་ཞུགས་པ་ལྟ་བུར་བྱས་ལ། སེམས་བྱིང་རྒོད་དང་དྲ་བར་གཟུང་། དེ་ལ་སེམས་བརྟན་ན། ནཱ་ད་དེ་ཡང་སྐྲའི་རྩེ་མོ་བརྒྱ་སྟོང་གི་ཆ་ཙམ་ཞེས་པ་ནི་ཤིན་ཏུ་ཕྲ་བའི་བྱེད་པའི་དཔེ་ཙམ་སྟེ། སེམས་ཀྱིས་གསལ་གང་གཏབ་འཆག་བ་དང་། དེ་ལ་ཅི་ཙམ་ཀྱི་བར་དུ་བཞག་པས་ཆོག་པ་ན། དམིགས་པ་ཤིན་ཏུ་ཆེས་ཕྲ་བ་ལ་ཡང་སེམས་འཛིན་
ནུས་ལ། དེ་ལྟར་བྱེད་པ་ཡང་སྲོག་དྷཱུ་ཏཱིར་འཛུད་པ་དང་། ཐུགས་ནས་གནས་པ་དང་། དེར་ཐེམ་པ་བྱེད་པ་ལ་བསྔགས་པ་ཡིན་ནོ། མངོན་བརྗོད་སྔར་དྲངས་པ་ལས། ཐམས་ཅད་མཁྱེན་པས་འདི་བཤད་པའམ། ཡང་ན་མི་ཤིགས་ཀུན་མཁྱེན་པ། སྐྲ་མི་ཉག་མ་བརྒྱ་ཡི་ཆེ། མཆོག་གི་གཟུགས་ཅན་བསྒོམ་པ་སྟེ། ཞེས་གསུངས་པའི་རྐངས་པ་གཉིས་པ་ནི་མངོན་བརྗོད་གཞན་མང་པོ་ལས། མི་འགྱུར་པ་ཡི་ལམ་བཤད་པ། ཞེས་འབྱུང་བ་ལྟར་ལེགས་ལ། དོན་ནི་ཐམས་ཅད་མཁྱེན་པས་གསང་མཆོག་གིས་དགྱེས་པ་སོགས་ཀྱི་དོན་ལྷན་སྐྱེས་ལ་སྔར་བཤད་པ་ལྟར་རམ། ཡང་ན་དེ་དག་གི་དོན་ལྷན་སྐྱེས་བསྐྱེད་པའི་ལམ་ལྟེ་བའི་རྩ་འཁོར་གྱི་དབུས་ཀྱི་དྷཱུ་ཏཱིའི་ནང་དུ་མི་འགྱུར་བ་སྟེ་མེ་ཤིསས་པའི་ཐིག་ལེ་ཧཱུྃ་ཡིག་སོགས་བསྒོམ་པར་བཤད་པ་བསྒོམ་པ་ན། ནཱ་ད་སྐྲའི་རྩེ་མོ་བརྒྱར་གཤགས་པའི་ཚའི་གཟུགས་བསྒོམ་པའི་དོན་ནོ། དེ་ལམ་ཆོག་ཏུ་གྱུར་པའི་གཟུགས་ཞེས་པ་ནི། གཟུགས་དེ་བསྒོམས་པས་སྲོག་དྡྷཱི་ཏཱིར་ཞུགས་པ་ལམ་ལྷན་སྐྱེས་བསྐྱེད་པའི་དོན་ཏེ། རབ་ཀྱིས་ནི་ནཱ་ད་ལ་དམིགས་པ་ཡང་འདོར་ཞེས་པའི་རབ་ནི་ནཱ་ད་ཤིན་ཏུ་ཕྲ་བ་ལ་སེམས་བརྟན་ནས་དེ་དམིགས་རྟེན་དུ་མ་བཞག་ཀྱང་དེར་དམིགས་རྟེན་གཞན་མེད་པར་སེམས་གཟུང་བས་སྲོག་དྷཱུ་ཏཱིར་སྲུང་ནུས་པའོ། དེས་ན་ནཱ་ད་ཤིན་ཏུ་ཕྲ་བ་ལ་སེམས་བརྟན་པ་ན་དེ་ལ་དམིགས་པ་ཡང་དོར་ནས་སེམས་འཛིན་པའི་ཚེ་ཡིད་ངོར་རྩལ་སོགས་པའི་གཟུགས་སྣང་ཀུན་སྤྱད་ནུས་པ་ཡིན་ན་
གང་དུ་དམིགས་པ་གཏོད་པའི་ཐད་སོ་དེ་ལྟེ་བའི་རྩ་འཁོར་ཀྱི་དབུས་ཀྱི་དྷཱུ་ཏཱིའི་ནང་གི་ཐད་སོང་དེར་མོས་ནས་ངེས་པར་བྱ་དགོས་སོ། དེ་ལྟར་རྫོགས་རིམ་གྱི་སྐབས་སུ་ལུས་ཀྱི་གནད་རྣམས་སུ་ཧཱུྃ་ཡིག་ལ་སོགས་པ་བསྒོམ་པ་ནི་ལྷན་སྐྱེས་འདྲེན་པའི་ཆེད་དང་དེ་འདྲེན་པ་ལ་སོགས་དྷཱུ་ཏཱིར་བཞུགས་དགོས་བས་དེའི་ཕྱིར་དུ་དེ་རྣམས་བསྒོམ་པ་ཡིན་པ་དང་། དེ་ཡང་དྷཱུ་ཏཱིའི་ནང་དུ་སེམས་འཛིན་དགོས་པའི་གནད་ཤེས་པ་ལ་རག་ལས་པས། དེ་མེད་ན་ཧཱུྃ་ཡིག་སོགས་བསྒོམས་པས་སེམས་པ་དེ་གསལ་མི་རྟོག་བཅི་འདྲ་ཞིག་རྙེད་ཀྱང་། སྲོག་དྷཱུ་ཏཱིར་ཚུད་ནས་ལྷན་སྐྱེས་འདྲེན་པ་མི་སྲིད་པས་གོང་གི་གནད་རྣམས་ཤེས་དགོས་ནའང་ཇི་བཞིན་དུ་གསལ་བར་ཐོན་པའི་བཤད་པ་བྲིས་པ་མི་སྣང་བས་ཤིན་ཏུ་རྟོགས་དགའ་ཞིང་འདི་དང་འདི་འདྲའི་རིགས་གཞན་རྣམས་ལ་ཡང་གལ་ཤིན་ཏུ་ཆེའོ། འདི་ཁྱད་པར་གསལ་བྱེད་ལས། ཡང་ན་ལྟེ་བའི་པདྨ་ལ་གནས་པའི་ཉི་མ་དང་ཟླ་བ་སྦྱོར་བའི་ནང་ན་ཡོད་པའི་ས་བོན་ཧཱུྃ་ལས་བྱུང་བའི་པདྨའི་རྩ་བ་ལྟར་འོད་ཟེར་ཀྱི་རི་མོ་སེམས་བརྟན་པར་བྱེད་པའི་སྒོ་ནས་རྩ་གཉིས་ལ་སྲོག་གི་རླུང་རྒྱུ་བ་སྤངས་ནས་དབུ་མ་རབ་ཏུ་འཇུག་པས་གཏུམ་མོ་སྤར་བ་ལས་སྤྱི་བོའི་ཟླ་བ་ཞུ་ནས་འཁོར་ལོ་ཁྱབ་པའི་རིམ་བས་དགའ་བ་ལ་སོགས་པའི་དབྱེ་བའི་ཁྱད་པྲ་གྱིས་ལྷན་ཅིག་སྐྱེས་པའི་དགའ་བ་བྱུང་ནས་རྣམ་པར་རྟོག་པ་ཐམས་ཅད་སྤངས་པས་དུས་གཅིག་ཏུ་དཀྱིལ་འཁོར་མི་དམིགས་པར་བསམ། རིམ་པས་སྟོང་པ་ཉིད་དུ་བསྡུ་བར་བྱའོ། རིམ་པ་ཡང་སྔར་གྱི་ཁོ་ནའོ། ཞེས་བཤད་
ཅོང་། ཡང་ན་ཞེས་པ་ནི་ཡེ་ཤེས་སེམས་དཔའི་བསྒོམས་ནས་སྡུད་རིམ་བྱེད་པ་སོགས་བཞང་ནས་དང་པོ་ནས་ཧཱུྃ་ཡིག་ཉིད་ལ་སེམས་འཛིན་པའོ། རླུང་དྷཱུ་ཏཱིར་ཞུགས་པ་ལས་ལྷན་སྐྱེས་ཤར་བའི་ཆེ་ནི་དམིགས་པས་མ་བསྡུས་ཀྱང་རླུང་ཐིམ་པའི་གནད་ཀྱིས་དུས་གཅིག་ཏུ་དཀྱིལ་འཁོར་མི་དམིགས་པར་འགྱུར་རོ། ལྟེ་བའི་པདྨ་ལ་ཞེས་སོགས་ནི། ལྟེ་བའི་ཀུ་འཁོར་གྱི་དབུས་ཀྱི་དྷཱུ་ཏཱིའི་ནང་དུ་ཉི་ཟླ་ཁ་སྦྱོར་གྱི་ཐིག་ལེའི་ནང་དུ་ཧཱུྃ་ཡིག་བསྒོམ་པ་ཡིན་ལ། པདྨའི་རྩེ་བ་ལྟ་བུའི་འོད་ཟེར་གྱི་རིམ་མོ་ནི་ཅུང་ཟད་རིང་བའི་སྲད་བུ་ལྟ་བུའི་འོད་ཟེར་ཏེ། དེ་ལ་སེམས་གཟུང་ནས་བརྟན་པར་བྱེད་པ་ལོ། ཡང་འགྲེལ་བ་དེར་གསུང་བ་ལས་གྲུབ་པའི་མན་ངག་ནི་འདི་ཡིན་ཏེ། ཞེས་ལྟེ་བའི་རྩ་འཁོར་གྱི་དབུས་སུ་ཟླ་བ་ལ་གནས་པའི་ཤིན་ཏུ་པྲ་བའི་དབྱངས་གསལ་ལ་མཉམ་པར་སྦྱོང་བའི་དབུས་སུ་ཧཱུྃ་ཡིག་བསམས་ནས་ངེ་ནས་ཡི་གེ་དང་བཅས་པ་ལས་འོད་ཟེར་འཕྲོས་པས་སྣོད་བཅུད་ཐམས་ཅད་ངོང་དུ་བཞུགས་ནས་དབྱངས་གསལ་སྦྱོར་བ་ལ་གཞུག །ཡང་འོད་ཟེར་འཕྲོས་པས་གཙོ་བོ་ཡབ་ཡུམ་འོད་དུ་བཞུགས་ནས་སྔ་མོ་བཞིན་བཞུགས། །ཡང་འོད་ཟེར་འཕྲོག་པས་ཟླ་བ་དབྱངས་གསལ་ཧཱུྃ་དང་བཅས་པ་འོད་དུ་བཞུས་ནས་འོད་གསལ་དུ་འཇུག་པར་བཤད་དེ། དང་པོར་ཧཱུྃ་ཡིག་ལ་སེམས་བརྟན་དུ་བཅུག་ནས། དེ་ནས་སྡུད་རིམ་དེ་ལྟར་བྱའོ། འདི་ལ་དང་པོར་དམིགས་པ་བསྡུས་པའི་ཚ་མོས་པ་ཙམ་མིན་པ་ཡིན་ངོར་ཇི་ལྟ་བ་བཞིན་སྡུད་མི་ནུས་པའི་དུས་སུ་
ནི་ལྟེ་བའི་རྩ་འཁོར་གྱི་དབུས་སུ་སྔར་ལྟར་བསྒོམ་པ་བྱས་པས་ཆོག་ལ། ཡིད་ངོར་ཇི་བཞིན་དུ་སྡུད་ནུས་པའི་ཚེ་ན་རྩ་འཁོར་གྱི་དྷཱུ་ཏཱིའི་ནང་གི་ཐད་སོར་མོས་ནས་བསྒོམ་མོ། དེ་ལྟར་སྡུད་རིམ་ལ་དམིགས་པ་མི་འདྲ་བ་གསུམ་བཤད་ཀྱང་། སྔར་བཤད་པའི་རྒྱས་པ་དག་ལ་ཅུང་ཟད་འདོར་ལེན་བྱས་པའོ། སེམས་ཉིད་དུ་ཡང་བསྒོམ་མི་བྱ། ཞེས་པའི་དོན་ནཱ་ད་ཕྲར་གིས་གཉིས་གང་དུ་ཡང་མི་སེམས་པ་ཡིན་ལ། དེ་ཡང་དང་པོར་རླུང་བསྡུས་པའི་སྐབས་དང་། རླུང་ཐིག་པའི་སྐབས་གཉིས་ལས་འདིར་དང་པོའོ། ཕམ་མཐིང་པ་ནས་བརྒྱུད་པ་ལ་ལུགས་འདི་ལ་རྡོར་བཟླས་བྱེད་པ་དང་མི་བྱེད་པ་གཉིས་སྣང་ཡང་བྱེད་པ་ལཱུ་ཨི་པའི་འགྲེལ་པ་རྣམས་ཀྱི་ལུགས་ཡིན་ལ། བྱེད་ཚུལ་ནི་རིམ་པ་བཞིན་དུ་བསྡུས་པ་ལ་སེམས་རིང་དུ་བཟུང་པའི་མཐར་ཧེ་རུ་ཀ་ཡབ་ཡུམ་དུ་ལངས་པའི་དུས་སུ། ལྟེ་བའི་རྩ་འཁོར་གྱི་དབུས་ཀྱི་དྷཱུ་ཏཱིའི་ནང་དུ་ཟླ་བ་དཀར་དམར་གྱི་ལྟེར་དུ་ཧཱུྃ་ཡིག་གམ་ནཱ་ད་དཀར་དམར་བསམས་ལ། རླུང་ནང་དུ་འཇུག་པའི་དུས་སུ་དྷཱུ་ཏཱིའི་ནང་ནས་རླུང་གི་གདངས་ཨོཾ་ཡིག་གིགདངས་སུ་འཇུག་པ་བསམས་ལ། ཧཱུྃ་ཡིག་གམ་ནཱ་ད་ལ་གཞུག །དེ་ནས་ལྗང་འཇུག་གང་རུང་གི་ཡུན་ཚད་ཙམ་ཞིག་ཞུགས་པ་དེར་བཟུང་ནས་དེའི་རང་གདངས་ཨཱཿཡིག་གི་གདངས་སུ་བསམ། དེ་ནས་དྷཱུ་ཏཱིའི་ནང་གི་ཧཱུྃ་དམ་ནཱ་ད་ལས་ཕྱིར་འགྲོ་བའི་ཚེ་ཡང་དྷཱུ་ཏཱིའི་ནང་ནས་ཕྱིར་འགྲོ་བར་བསམ་ཞིང་། དེའི་ཚེ་རླུང་གི་རང་གདངས་ཧཱུྃ་གི་གདངས་སུ་འབྱུང་བར་བསམས་ལ་མ་ཡེངས་པར་རྡོ་རྗེའི་བཟླས་པ་བྱའོ། འགྲེལ་པ་གསུམ་
གར་ཡི་གེ་གསུམ་བརྗོད་ནས་རླུང་གི་རྡོར་བཟླས་བྱ་བར་གསུངས་པས། ལྡང་འཇུག་གནས་གསུམ་གྱི་གདངས་ཡི་གེ་གསུམ་ཀྱི་གདངས་དང་དབྱེར་མེད་དུ་སྦྱོར་བའི་རླུང་སྔགས་གཉིས་སྦྱོར་བ་དགོས་སོ། དེ་ནི་ཁྱད་པར་གསལ་བྱེད་ལས། གདམས་ངག་གི་ལྟ་བ་བཞིན་དུ་བྱ་བར་གཤད་པ་ཞིག་ཡིན་ལ། ལྡང་འཇུག་གནས་གསུམ་རྩ་དབུ་མའི་ནང་ནས་མ་བྱས་པར་སྤྱིར་ཁོང་པའི་ནང་ནས་འགྲོ་འོང་སོགས་བྱེད་པའི་རྡོར་བཟླས་ལ་ཅི་ཙམ་འབད་ཀྱང་སྲོག་དབུ་མར་བཙུད་པའི་ཞུགས་གནས་ཐིམ་གསུམ་ལས་ལྷན་སྐྱེས་དངོས་སུ་བསྐྱེད་ནུས་པ་མི་སྲིད་པས་རྡོར་བཟླས་ཀྱི་གནས་ཡེ་མ་རྟོགས་པ་ཡིན་ལ། རྩ་དབུ་མ་ནས་རྡོར་བཟླས་བྱེད་པ་ནི་གདམས་ངག་ཇི་ལྟ་བ་བཞིན་བྱེད་པའི་གདམས་ངག་གི་དམ་པའོ། རླུང་ཕྱིར་ལྡང་བའི་ལྷ་ཚོགས་འཕྲོས་ནས་འགྲོ་བའི་དོན་བྱེད་པ་དང་། འཇུག་པ་ན་ལྷ་རྣམས་རླུང་སྔགས་དབྱེར་མེད་དང་ལྷན་ཅིག་ནར་དུ་ཞུགས་ནས་ཐིམ་པར་བསམ་པར་འགྲེལ་པ་རྣམས་ནས་བཤད་དོ། དེ་ལྟར་ན་ལྟེ་བའི་རྩ་འཁོར་ཀྱི་དབུས་ཀྱི་དྷཱུ་ཏཱིའི་ནང་དུ་ཡི་གེ་སོགས་ལ་སེམས་འཛིན་པ་དང་། འཁོར་ལོ་དེའི་དབུས་ཀྱི་དབུ་མའི་ནང་ནས་རྡོར་བཟླས་བྱེད་པ་གཉིས་པོ་དེ་ནི་ཡན་ལག་དྲུག་གི་སྟོག་རྩོལ་གྱི་ཡན་ལག་གཅིག་སྟེ་དེར་འགྱུར་ཚུལ་ནི་འཆད་པར་འགྱུར་རོ། ཇོ་བོ་ཆེན་པོའི་འགྲེལ་པར་རྐང་པ་དང་པོ་དང་གཉིས་པ་དང་བཞི་པ་དང་དྲུག་པ་ལ་གཤད་པ་མ་མཛད་
ལ། ཟླ་བ་ནི་ཡེ་ཤེས་སེམས་དཔའི་གདན་དང་། སྐུ་གསུང་ཐུགས་ཀྱི་རྡོ་རྗེ་ཅན་ནི་ཡེ་ཤེས་སེམས་དཔའ་དང་། ཡི་གེ་མཆོག་ནི་ཏིང་ངེ་འཛིན་སེམས་དཔའ་དང་། དེ་ལས་འོད་ཟེར་སྤྲོས་ནས་ཏིང་ངེ་འཛིན་སེམས་དཔའི་བར་དུ་སྡུད་ཅིང་། དེ་ཡང་རིམ་གྱིས་རྡེ་ཕྲར་བཏང་བ་ལ་སེམས་བསྒྲིམས་ཏེ་གཏད་ནས་བསྒོམ་པ་ནི་རྫོགས་རིམ་ལ་གཉིས་ཡོད་པའི་ཕོ་ཉའི་ལམ་ལས་གཞན་པ་དང་། གཉིས་པ་ཕོ་ཉའི་ལམ་ནི་བླ་མ་ལས་ཤེས་པར་བྱ་བར་གསུངས་སོ། འགྲེལ་པ་ཡེ་ཤེས་སྒྲོན་མ་ལས། ཨཱ་ལི་ཀཱ་ལི་ཞེས་སོགས་ཀྱི་གཞུང་དབང་པོ་རབ་འབྲིང་ཐ་གསུམ་གྱི་དབང་དུ་བྱས་པའི་སྒྲུབ་ཐབས་གསུམ་དུ་བཤད་པ་དང་། དཔའ་བོ་རྡོ་རྗེས་བྱས་ཟེར་བའི་དཀའ་འགྲེལ་དུ་ཆགས་གྲོལ་གྱི་ལམ་གཉིས་ཀྱི་དབང་དུ་བྱས་ཏེ་བཤད་པ་དང་། བོད་ཁ་ཅིག །ཡི་གེ་དང་ཐེག་ལེ་བསྡུ་བའི་རྫོགས་རིམ་ལ་སྦྱར་ཏེ་འཆད་མོད་ཀྱང་ཡིད་ཆེས་མི་སྐྱེ་བར་སྣང་བསམ་བཀོད་དོ། བཞི་པ་ཉམས་སུ་བླངས་པས་མངོན་པར་རྟོགས་པ་སྐྱེ་བའི་རིམ་པ་ལ་གསུམ། སྔར་བཤད་པའི་རྣལ་འབྱོར་རྣམས་ཀྱིས་སྲོག་དྷཱུ་ཏཱིར་སྡུད་ཐུབ་ལུགས་དང་། རྣལ་འབྱོར་དེ་བསྒོམས་པ་ལས་སྲོག་དབུ་མར་ཞུགས་གནས་ཐིག་གསུམ་བྱེད་ཚུལ་དང་། དེ་ལ་བརྟེན་ནས་སྟོང་ཕྱོགས་དང་སྣང་ཕྱོགས་ཀྱི་རྫོགས་རིམ་བསྐྱེད་ཚུལ་ལོ། དང་པོ་ནི། སྔར་བཤད་པའི་ལྟེ་བའི་རྩ་འཁོར་གྱི་ལྟེ་བའི་དབུས་ཀྱི་དབུ་མའི་ནང་དུ་ཧཱུྃ་ཡིག་ལ་སོགས་པ་ལ་དམིགས་ནས་བསྒོམས་པས་ནི། རོ་རྐྱང་ནས་རླུང་བརྒྱུས་ཏེ་ཕྱིར་པྲོན་པ་བཟློག་ནས། དབུ་མར་
རྒྱུ་བར་བྱེད་པས་སྲོག་རྩོལ་ཞེས་བྱ་སྟེ། སྲོག་གི་རོ་རྐྱང་ལ་རྒྱུ་བའི་རླུང་ཡིན་ལ། རྩོལ་བའི་སྐད་དོད་ཀྱི་སྟེང་ནས་འགོག་པའི་དོན་ལ་བཤད་དུ་ཡོད་པའི་ཕྱིར་རོ། དེ་ལྟར་ཡང་ཁྱད་པར་གསལ་བྱེད་ལས། འདི་ཡང་ཉེ་བར་མཚོན་པ་ཙམ་སྟེ། ལྟེ་བར་ཕྲ་བའི་ཨཱ་ལི་ཀཱ་ལིའི་སྦྱོར་བ་འམ། ཐུགས་ལ་སོགས་པ་ལ་ཐིག་ལེ་ལ་སོགས་པའི་སྦྱོར་བའི་གསམ་གཏན་གང་དེ་ཡང་སྲོག་ཐོན་པ་བཟློག་པའི་དོན་ཉིད་ཀྱིས་སྲོག་རྩོལ་ཞེས་བརྗོད་དོ། བྱེ་བྲག་ཏུ་བསམ་གཏན་འདི་ལྟ་བའི་སྟོབས་ཀྱིས་རོ་མ་དང་རྐྱང་མ་དག་གི་རྒྱུ་བ་ལས་བཟློག་ནས་དབུ་མཏ་སྲོག་རླུང་གི་རྩོལ་བ་ནི་རབ་རྒྱུ་སྟེ་འདི་ཡང་སྲོག་རྩོལ་ཞེས་བརྗོད་དོ། ཞེས་གསུངས་ཏེ། འོག་སྒོའི་ཕྲ་མོ་བསྒོམས་པས་རོ་རྐྱང་ནས་སྣ་ཞུག་ཏུ་རྒྱུ་བའི་རླུང་འབྱུང་འཇུག་བཀག་ནས་དབུ་མར་འཛུད་པས་རྒྱུད་ཕྱི་མར་དེ་སྲོག་རྩོལ་དུ་གསུངས་བ་དང་། དེ་ཡང་ཕྱོགས་ཙམ་མཚོན་པ་སྟེ། ལྟེ་བ་དང་སྙིང་གསོགས་སུ་ཐིག་ལེ་དང་ཡི་གེ་སོགས་ལ་དམིགས་ནས་བསྒོམ་པས་ཀྱང་བྱེད་ལས་དེ་བྱེད་པའི་སྲོག་རྩོལ་དུ་ཤིན་ཏུ་གསལ་བར་བཤད་པ་འདི་རྩ་འཁོར་ཡོང་ས་རྣམས་སུ་ཡི་གེ་སོགས་འགོད་པའི་རྫོགས་རིམ་བསྒོམ་པར་གསུངས་པ་ཐམས་ཅད་ལ་ཡང་ཤེས་དགོས་སོ། འདི་ནི་ཞལ་ལུང་གི་དགོངས་པ་ཡིན་ཏེ། ཞེས་ལུང་ལས། འདུས་པ་ཕྱི་མ་ནས་གསང་བའི་སྣ་རྩེར་རྫས་ཀྱི་ཐིག་ལེ་བསྒོམ་པ་སྲོག་རྩོལ་དུ་གསུངས་པ་བཤད་པའི་དོན་བསྡུས་པ་ན། དབུགས་དགག་སྟོང་པའི་ཡན་ལག་གོ །
ཞེས་སྣ་བུག་ཏུ་རླུང་འཇུག་གི་སྤྲོ་བསྡུ་བྱེད་པ་འགོག་ཅིང་། དེས་སྟོང་བར་བྱེད་པའི་ཡན་ལག་ཏུ་གསུངས་ཏེ་དེས་ནི་སྲོག་རྩོལ་གྱི་ཡན་ལག་དང་། དབུགས་འགོག་པའི་ཡན་ལག་གཉིས་དོན་གཅིག་ཏུ་བསྟན་ལ། ཐབས་དེ་རོ་རྐྱང་ལ་རླུང་རྒྱུ་བ་འགོག་པའི་སྲོག་རྩོལ་དུ་འགྱུར་བ་དང་། ལྟེ་བར་གནད་དུ་བསྣུན་པ་གཉིས་ཀྱང་ཚུལ་ཀུན་ནས་མཚུངས་པའི་ཕྱིར་རོ། དཔལ་ཤ་བ་རི་བས་ཀྱང་། དེ་ནས་ལྟེ་བར་ཆོས་འབྱུང་ནང་དུ་ཡེ་ཤེས་ཀྱི་རང་བཞིན་ནཱ་ད་རིམ་གྱིས་བརྒྱ་དང་སྟོང་གི་ཆ་རུ་དམིགས་ཏེ། རྣལ་འབྱོར་རླུང་གིས་བཅུ་གཉིས་འགག །དོན་ཆེན་འགྲུབ་པར་ཐེ་ཚོམ་མེད། ཅེས་ལྟེ་བར་ནཱ་ད་ལ་དམིགས་ནས་བསྒོམས་པས་རླུང་བཅུ་གཉིས་འོག་ག་པར་གསུངས་པ་དང་། དེ་ཁོ་ན་ཉིད་ཡེ་ཤེས་ཡང་དག་པར་གྲུབ་པའི་རྒྱ་ཆེར་འགྲེལ་དེ་ཁོ་ན་ཉིད་བཤད་པ་ལས་ཀྱང་། འདི་ལ་ཨཾ་གི་རྣམ་པའི་གཟུགས་ཀྱི་ལྷ་མོ་དང་། ཨུའི་རྣམ་པའི་དོན་ཡོད་གྲུབ་པའི་གཟུགས་ནི་རླུང་ངོ་། དེ་གཉིས་ལྷན་ཅིག་འདྲེས་པ་ལས་རྫོགས་པ་ནི་བཾ་གྱི་ཡི་གེ་གཟུགས་སུ་སྤྲུལ་ནས་ལྟེ་བའི་འཁོར་ལོ་ལའོ། འདི་ནི་ནན་ཏན་དུ་བྱས་ནས་གཡོ་བ་མེད་པའི་སེམས་ཀྱིས་རླུང་གཉིས་འགོག་པར་བྱས་པས་ཐོག་པར་བྱེད་པའོ། ཞེས་དང་། རྡོ་རྗེ་རྣལ་འབྱོར་མའི་སྒྲུབ་ཐབས་མངོན་པར་རྟོགས་པའི་སྙེ་མ་ལས་ཀྱང་། གལ་ཏེ་དེ་ཙམ་གྱི་དཀྱིལ་འཁོར་གྱི་འཁོར་ལོ་ཆེན་པོ་ལ་ཡུན་རིང་པོར་བརྟན་པར་བྱེད་མི་ནུས་ན་དེའི་རྩེ་ལྟེ་བའི་པདྨར་གནས་བ་ཉི་མ་དང་ཟླ་བ་ཁ་སྦྱོར་གྱི་དབུས་སུ་བཾ་ཡིག་གི་ས་བོན་ལས་བྱུང་པའི་འོད་ཟེར་རིང་པོ་པདྨའི་
སྲན་བུ་ལྟ་བུ་ལ་སེམས་བརྟན་བར་བྱས་པའི་སྒོ་ནས་རྩ་གཉིས་ལ་སྲོག་རླུང་གི་རྒྱུ་བ་ཡོངས་སུ་ཐབ་བས་དབུས་སུ་ཞུགས་ནས་གཏུམ་མོ་འབར་བས་སྤྱི་བོའི་ཟླ་བ་ཞུ་བ་ལས་རིམ་གྱིས་འཁོར་ལོ་ལ་ཁྱབ་པས་དགའ་བ་ལ་སོགས་པ་རྣམས་ཀྱི་དབྱེ་བས་ལྷན་ཅིག་སྐྱེས་པའི་དགའ་བ་བྱུང་ནས་རྣམ་པར་རྟོག་པ་ཐམས་ཅད་བྲལ་བས་གཅིག་ཅར་དཀྱིལ་འཁོར་གྱི་འཁོར་ལོ་སྟོང་པར་བསྡུས་ཏེ་མི་དམིགས་པར་བསམ་མོ། ཞེས་ལྟེ་བར་བཾ་ཡིག་དང་། དེའི་འོད་ཟེར་ལ་སེམས་བཟུང་བས་རོ་རྐྱང་གི་རླུང་གཉིས་འགོག་པར་བཤད་དེ། ལྟེ་བའི་རྩ་འཁོར་ཀྱི་དབུས་ཀྱི་དྷཱུ་ཏཱིའི་ནང་དུ་སེམས་བཟུང་བའི་གདམས་ངག་གི་ཁྱད་ཆོས་སོ། འདིའི་ཁུངས་སྡོམ་འབྱུང་ལས་གསུངས་བ་ནི་དྲངས་ཟིན་ལ། སམྦུ་ཊ་ལས་ཀྱང་ངོགས་གཅོད་དང་བཅས་པ་གསུངས་ཏེ། སྟོང་པ་མཚོན་དུ་མེད་པ་ལ། ཡི་གེ་རྣལ་འབྱོར་ལ་སོགས་ཅི། བཅོམ་ལྡན་འདས་ཀྱིས་བཀའ་སྩལ་བ། དེ་ཉིད་ཇི་ལྟར་རྡོ་རྗེ་ཉོན། མཚན་གཞིན་མཚན་ཉིད་སྟོང་བ་ཉིད། སྙིང་པོ་མེད་པའི་ཆུ་ཤིང་ལས། སྙིང་པོ་བདུད་རྩི་འབྲས་བུ་ལྟར། འབྲས་བུ་རྣམ་ཤེས་ཡེ་ཤེས་ནི། །ཞེས་པ་ནས། ཇི་ལྟར་མཚན་ཉིད་ཤེས་ནས་ནི། །མཉམ་ཉིད་ཡེ་ཤེས་སེམས་ཀྱིས་ནི་དེ་ཡི་རྫོགས་པའི་བྱང་ཆུབ་ལམ། །མྱུར་བ་ཉིད་དུ་མཐོང་བར་འགྱུར། །ཞེས་གསུངས་སོ། །དེའི་དོན་ནི་སྟོང་བ་དེ་ཁོ་ན་ཉིད་ཡི་གེ་ལ་སོགས་པས་མཚོན་དུ་མེད་པ་ཡིན་པ་ལ། དེ་བསྒོམ་པའི་རྫོགས་རིམ་གྱི་སྐབས་སུ་ལུས་ཀྱི་
གནད་རྣམས་སུ་ཡི་གེ་བཀོད་པ་ལ་དམིགས་པའི་རྣལ་འབྱོར་དང་། སོགས་ཀྱིས་བསྡུས་བ་རྩ་དང་ཐིག་ལེའི་རྣལ་འབྱོར་ལ་སོགས་པ་བསྒོམ་པ་ལ་འཇུག་པ་མི་འཐད་དེ། བློས་བཏགས་གནས་བསྒོམ་པ་དེ་དེ་ཁོ་ན་ཉིད་ཀྱི་དོན་བསྒོམ་པ་མིན་པའི་ཕྱིར་རོ་སྙམ་ན། ཆུ་ཤིང་སྙིང་པོ་མེད་པ་ཡིན་ཀྱང་བདུད་རྩི་དང་འདྲ་བའི་འབྲས་བུ་མངར་པོའི་སྙིང་པོ་བསྐྱེད་པ་ལྟར། བློས་བཏབས་ནས་ཡི་གེ་སོགས་བསྐོམ་པ་ཉིད་དེ་ཁོ་ན་ཉིད་བསྒོམ་པ་མ་ཡིན་ཞིང་། སྙིང་པོ་མེད་པའི་ཆུ་ཤིང་ལྟ་བུ་ཡིན་ཀྱང་དེ་བསྒོམ་པ་ལས་འོག་ནས་འཆད་པ་ལྟར་འབྲས་བུ་མངར་པོ་དང་འདྲ་བའི་ལྷན་སྐྱེས་ཀྱི་ཡེ་ཤེས་ཀྱི་འབྲས་བུ་བསྐྱེད་པ་ལ་མི་འགལ་ཞེས་པའི་དོན་ནོ། རྣམ་ཤེས་ནི་རྣམ་པར་ཤེས་པར་བྱ་བ་སྟོང་བ་ཉིད་དེ་མཚན་གཞི་གཟུགས་སོགས་ཕུང་པོ་ལྔ་དང་དེ་རྣམས་མཚོན་པའི་མཚན་ཉིད་གཟུགས་སུ་རུང་བ་སོགས་རང་བཞིན་ཀྱིས་གྲུབ་པའི་སྟོང་བའོ། ཡེ་ཤེས་ནི་འདི་སང་ཤེས་པར་བྱེད་པར་བྱེད་པ་སྟོང་བ་དེ་རྟོགས་པའི་ལྷན་སྐྱེས་ཀྱི་བདེ་བའོ། དེ་འདྲ་བའི་བདེ་སྟོང་མཉམ་པར་སྦྱོར་བའི་ཚུལ་དང་དེ་ཇི་ལྟར་བསྐྱེད་པའི་མཚན་ཉིད་རྣལ་འབྱོར་པས་ཤེས་བར་བྱས་ནས་བསྒོམས་བས་བདེ་སྟོང་མཉམ་པ་ཉིད་དུ་སྦྱོར་བའི་ཡེ་ཤེས་ཀྱི་ལམ་མྱུར་དུ་སྐྱེ་བར་འགྱུར་རོ། མན་སྙེད། རྣལ་འབྱོར་སྦྱོང་བ་དང་། སོགས་ཀྱི་སྐད་དོད་དང་བོར་བྱས་ནས། དང་བོར་སྦྱོར་བས་དཀྱིལ་འཁོར་རྒྱལ་མཆོག་སོགས་མཚོན་པར་བྱས་ནས། དེའི་སྐབས་སུ་ཡི་གེ་ལ་སོགས་པ་བཀོད་ནས་བསྐྱེད་རིམ་བསྒོམ་པ་ལ་དོགས་གཅོད་དུ་མཛད་པ་ནི་གཞུང་དེའི་གོང་
ཉིད་དུ་བསྐྱེད་རིམ་པའི་ལྷའི་ས་ཡོན་གྱི་ཡི་གེ་སོགས་བཀོད་པ་ལ་དགོངས་ལ། འོན་ཀྱང་འདིའི་འཇུག་ཐོགས་སུ་སྙིང་གའི་པདྨའི་དབུས་སུ་ཡི་གེ་བཀོད་ནས་བསྒོམས་པ་ལས་དེ་ཁྲོ་ན་ཉིད་མཚོན་པར་གསུངས་པ་དང་ཡང་འབྲེལ་ཏེ། དོགས་གཅོད་ཀྱི་གཙོ་བོ་ནི་ཕྱི་མའོ། རྫོགས་རིམ་བསྒོམ་པའི་སྐབས་སུ་ལུས་ཀྱི་གནད་རྣམས་སུ་ཡི་གེ་དང་ཐིག་ལེ་སོགས་བཀོད་ནས་བསྒོམ་པ་འདི་ནི་འདུས་པ་ལུགས་གཉིས་དང་ལོ་ནག་དྲིལ་གསུམ་སོགས་ཀྱི་ལུགས་མང་པོ་ནས་འབྱུང་བ་ལ། ཐབས་འདིས་སྲོག་དྷཱུ་ཏཱིབསྡུས་ནས་ལྷན་སྐྱེས་བསྐྱེད་པ་ཇི་བཞིན་དུ་མ་རྟོགས་པས་འདི་རྣམས་ལ་རྩིས་ཆེ་བའི་བོད་ཀྱི་བཤད་པ་རྣམས་ལ་ཡང་ཇི་བཞིན་དུ་ཤོད་པའི་བཤད་པ་མི་སྣང་ལ། ཁ་ཅིག་ནི་དེ་འདྲ་བསྒོམ་པ་དེ་དེ་ཁོ་ན་ཉིད་བསྒོམ་པར་འོད་ད་བ་བཀག་པ་རྣམས་དརྔས་ནས་ཆོས་སྤོང་བར་སྣང་བས་རྣམ་དཔྱོད་དང་ལྡན་པ་རྣམས་ཀྱིས་ལེགས་པར་རྩད་གཅད་པར་བྱའོ། རླུང་ལ་རྡོར་བ་ཟླས་བྱེད་ལུགས་ནི། བདེ་མཆོག་བསྟོད་འགྲེལ་ལས། དེ་ནས་སྲོག་རྩོལ་ཞེས་བྱ་བ་ནི་ལ་ལན་དང་ར་ས་ན་གཡོན་པ་དང་གཡས་པའི་ལམ་འགོག་པ་ལས་སྲོག་གི་རླུང་རྟག་ཏུ་དབུ་མ་ཝ་དྷཱུ་ཏཱིའི་ལམ་དུ་རབ་ཏུ་འཇུག་པ་སྟེ། ཨ་ཝདྷཱུ་ཏཱིར་དགང་བ་དང་། བུ་མ་བ་ཅན་དང་། དབྱུང་བའི་སྦྱོར་བས་ཨོཾ་ཡིག་གིས་བརྡུག་པ་དང་། ཧཱུྃ་ཡིག་གིས་འགོག་པ་དང་། ཨཱཿཡིག་གིས་དབྱུད་བཟླ་བ་དང་། སྒྲ་གཅན་དང་ཉི་མའི་རང་བཞིན་གྱིས་རྣལ་འབྱོར་པས་བྱེད་པ་
ན་སྲོག་རྩོལ་གྱི་ཡན་ལག་གོ །ཞེས་གསུངས་ལ། ཅོག་རོ་ཏིང་ངེ་འཛིན་བཟང་པོའི་འགྱུར་ལས། །རྡུབ་པ་དང་གནས་པ་དང་དབྱུང་བའི་སྦྱོར་བས་ཞེས་བཤད་པ་ལྟར་དགང་བ་ནི། །ནང་དུ་རྡུབ་པ་དང་། བུམ་པ་ཅན་ནི་ནང་དུ་གནས་པ་ལ་བྱ་སྟེ། ཡི་གེ་གསུམ་དང་སྦུར་བའི་ལྔང་འཇུག་གནས་གསུམ་ག་དྷཱུ་ཏཱི་ནས་བྱེད་པར་བསྒོམ་དགོས་སོ། རྒྱུད་རྣམས་ལས་རླུང་གསུམ་དང་ཡི་གེ་གསུམ་སྦྱོར་ཚུལ་འདྲ་མི་འདྲ་འགའ་རེ་ཡོད་ཀྱང་གཅིག་དེས་གཟུང་དུ་བཟུང་མི་དགོས་ཀྱི་ལུགས་དེ་དག་གང་ཡང་རུང་བས་འགྲུབ་པོ། དུས་འཁོར་ཀྱི་སྐོར་ནས་སྲོག་རྩོལ་བུམ་པ་ཅན་བཤད་པ་མང་ཡང་དེ་ཁོ་ན་མིན་གྱི་བསྟོད་འགྲེལ་ལས་གསུངས་པ་ལྟར། རྡོར་བཟླས་ཀྱང་རོ་རྐྱང་ལ་རླུང་རྒྱུ་བ་བཟློག་ནས་དྷཱུ་ཏཱིར་འཇུག་པར་སྲོག་རྩོལ་དུ་ཤེས་དགོས་པས་རྡོར་བཟླས་སྲོག་རྩོལ་གྱི་སྔོན་འགྲོ་དང་གེགས་སེལ་ཙམ་དུ་འདོད་པ་ནི་རྒྱུད་ཀྱི་དོན་ལེགས་པར་མ་རྟོགས་པའོ། དྲི་མེད་འོད་ལས་ཀྱང་། འདིར་ངེས་པའི་དོན་ནི། དུས་ཐམས་ཅད་དུ་བརྟེན་པས་གྱུར་པ་དང་། བུམ་པ་ཅན་གྱི་གནས་སྐབས་སུ་གྱུར་པ་རྡི་སྲིད་པར་དུས་ཐམས་ཅད་དུ་རྣལ་འབྱོར་པས་འཇུག་པ་དང་འབྱུང་བ་ཉིད་ཀྱིས་སྲོག་དབུ་མར་བསྒོམ་པས་བྱའོ། དེ་ནས་རྣལ་འབྱོར་བསམ་དོན་མར་ཤེས་པ་ལྔ་ཐོབ་པར་འགྱུར་ཏེ། སྲོག་གི་བཟླས་པ་ལས་སོ། ཞེས་པ་ནི་བཅོམ་ལྡན་འདས་ཀྱི་ངེས་པའོ། དེ་ལྟར་མི་ཕྱེད་པའི་ལན་ལག་སྲོག་དང་ལྡན་པའི་ཡིད་ཀྱིས་བསྔགས་བཟླས་པར་བྱའོ། ཞེས་པ་ནི་རྒྱུད་ཐམས་ཅད་ལས་རྡོ་རྗེའི་ཆིག་སྟེ་སྔར་
བརྗོད་ཟིན་ཏོ། ཞེས་རྡོར་བཟླས་བྱེད་པའི་དུས་ཀུན་ཏུ་རྣལ་འབྱོར་པས་དབུ་མ་ནས་རླུང་འབྱུང་འཇུག་བྱེད་པར་བསྒོམ་དགོས་པར་གསུངས་ཤིང་། ཚུལ་དེ་འང་རླུང་གི་རྡོར་བཟླས་བྱ་བར་གསུངས་པའི་རྒྱུད་ཐམས་ཅད་ཀྱི་དབང་དུ་མཛད་པར་གསུངས་སོ། བུམ་པ་ཅན་གྱི་གནས་སྐབས་སུ་གྱུར་པའི་ཇི་སྲིད་པར་ཞེས་པ་ནི་བུམ་པ་ཅན་དང་འདྲ་པར་རླུང་འབྱུང་འཇུག་མི་བྱེད་པར་ནང་དུ་གནས་པ་བརྟན་པོ་བྱུང་བྱུང་གི་བར་དུ་རྡོར་བཟླས་བྱ་ཞེས་པའི་དོན་ཏེ། རྡོར་བཟླས་ཀྱིས་སྲོག་དྷཱུ་ཏཱིར་ཞུགས་པ་དང་གནས་པ་བརྟན་པོ་བྱེད་པའི་དོན་ནོ། རྡོ་རྗེ་སྙིང་འགྲེལ་ལས་ཀྱང་། མ་ནིང་དག་གི་གནས་ཞུགས་པ། སྔགས་ཀྱི་ཡན་ལག་མཉམས་བཟླས། །སྤྱི་གཙུག་དབུ་མའི་གནས་ཙུད་པར། །སྲིག་གི་རྒྱུན་མི་འཆད་པར་བཟླས། །ཞེས་དབུ་མའི་གནས་སུ་ཚུད་པར་རྡོར་བཟླས་བྱ་བར་གསུངས་སོ། །འོན་དྲི་མེད་འོད་ལས། །གཡོན་དང་གཡས་དང་དབུ་མའི་སྲོག་ཡང་དག་པར་རྒྱུ་བའི་རྡོ་རྗེ་བཟླས་པའི་རིམ་པ་དང་། མ་ནིང་གི་བཟླས་པའི་རིམ་པའོ། །ཞེས་རྩ་གཡས་གཡོན་ནས་སྲོག་རྒྱུ་བའི་དོན་རྡོར་བཟླས་སུ་གསུངས་པ་ཇི་ལྟར་ཡིན་སྙམ་ན། དེ་དང་འགལ་བའི་སྐྱོན་མེད་དེ། དེའི་དོན་ནི་རྩ་་གསུམ་ནས་སྲོག་རྒྱུ་བའི་རླུང་ལ་རྡོར་བཟླས་བྱེད་པའི་དོན་ཡིན་ལ། །རྩ་གཡས་གཡོན་ལ་རླུང་རྒྱུ་བའི་ཚེ་རྡོར་བཟླས་བྱེད་པ་ནའང་དངོས་སུ་རོ་རྐྱང་ལ་རྒྱུ་བ་ཡིན་ཀྱང་། དེ་དངོས་སུ་མི་འགོག་པར་དབུ་མ་ནས་འབྱུང་འཇུག་བྱེད་པར་མོས་ནས་བྱེད་པ་ལ་འགལ་བ་ཅི་ཡང་མེད་པའི་ཕྱིར་རོ་
དེས་ན་རྡོར་བཟླས་བྱེད་པ་ན་གཡས་རོ་མདང་གཡོན་རྐྱང་མའི་རྡོར་བཟླས་བྱེད་པ་ཡིན་ཟེར་ནས་རྩ་དེ་གཉིས་ནས་རླུང་འབྱུང་འཇུག་བྱེད་པར་མོས་པའི་རྡོར་བཟླས་བྱེད་པ་མང་དུ་སྣང་བ་ནི་ཡང་དག་པའི་རྡོར་བཟླས་ཀྱི་གོ་ལས་ཆེ་ཤོས་ལ་གནས་པར་ཤེས་པར་གྱིས་ཤིག གཞན་ཡང་དྲི་མེད་འོད་ལས། དབུགས་འཇུག་པ་དང་འབྱུང་བ་བདག་དང་ལྷན་ཅིག་སྔགས་ཀྱི་ཡི་གེ་རྣམས་རབ་ཏུ་འཇུག་པ་དང་། འབྱུང་བ་མེ་ཏོག་གི་ཕྲེང་བ་བཞིན་དུ་ཟླ་བ་དང་ཉི་མའི་རང་བཞིན་ལུགས་དང་མཐུན་པ་དང་མི་མཐུན་པ་བལྟ་བར་བྱའོ། ཞེས་གསུངས་པ་དང་ཡང་མི་འགལ་ཏེ། བསྟོད་འགྲེལ་ལས་དབུ་མའི་ནང་ནས་རླུང་འབྱུང་ལྔང་བྱེད་པ་ཡང་ཟླ་ཉིར་བཤད་པ་བཞིན་ཡིན་པའི་ཕྱིར་རོ། མེ་ཏོག་གི་ཕྲེང་བ་བཞིན་ཞེས་པའི་དོན་ནི། རླུང་ཕྲེང་ཐག་ལྟ་བུ་དང་། རླུང་གི་གདངས་རྐང་པ་དེ་ན་གཉིས་པ་ལྟ་བུའི་སྔགས་ཀྱི་ཡི་གེའི་གདངས་སུ་ཤར་བ་མེ་ཏོག་རེ་རེ་ལྟ་བུ་སྟོན་པ་ཡིན་གྱི། ཡིག་འབྲུའི་བ་དོག་དང་དབྱིངས་ཀྱི་གཟུགས་ཅན་དུ་སྟོན་པ་མིན་ནོ། རྒྱུད་རྡོ་རྗེ་ཕྲེང་བ་ལས། སྒྲ་དང་ཐིག་ལེའི་མང་དུ་བྱང་། རླུང་གཉིས་ཀྱི་ནི་ཕྱི་ནས་ནི། །མ་རིག་མདུད་པ་འབྱེད་པར་བྱེད། ཅེས་རླུང་འབྱུང་འཇུག་གཉིས་ལ་རྡོར་བཟླས་བྱས་པས་སྙིང་གའི་དྷཱུ་ཏཱིལ་རོ་རྐྱང་གིས་དཀྲིས་པའི་མ་རིག་པའི་མདུད་པ་འབྱེད་པར་གསུངས་ཏེ། དཔེར་ན་སྨྱུག་མོའི་སྦུབས་འགགས་པ་ཐུར་མ་རིང་པོས་དེའི་ནང་དུ་འབྱུང་འཇུག་བྱས་པས་བྱེད་པ་བཞིན་དུ་རླུང་འཇུག་གིས་ཀྱང་དེ་བཞིན་འབྱེད་དོ། རྒྱུད་དེར་སྔགས་ཀྱི་དེ་ཉིད་རྡོར་
བཟླས་ཀྱིས་དྷཱུ་ཏཱི་འབྱེད་པ་མང་དུ་གསུངས་སོ། དེ་ལྟར་ཁུངས་ཐུབ་ཀྱི་གཞུང་མང་པོ་གཞུང་མང་པོ་ལས་གསལ་བར་གསུངས་ཀྱང་། བོད་ཀྱི་གདམས་ངག་ལས་འདིའི་གནད་ཐོན་པ་ཡང་ཤིང་ཏུ་དཀར་བར་བྱུང་འདུག་པས་ལེགས་པར་རྩད་བཅད་པར་བྱའོ། གཉིས་པ་ནི། ཡེ་ཤེས་སེམས་དཔའ་ཡབ་ཡུམ་སྙོམས་འཇུག་བྱས་པའི་ཐབས་ཀྱིས་དུད་རིམ་བྱེད་པ་ནི། སྔར་རྣལ་འབྱོར་ཀྱི་སྟོབས་ཀྱིས་སྲོག་དབུ་མར་ཞུགས་གནས་ཐིམ་གསུམ་བྱས་པའི་མྱོང་བ་ཅན་གཅིག་ཡིན་ན། ཐབས་དེས་ཀྱང་སྲོག་དབུ་མར་སྡུད་ནུས་པར་འོང་ལ། དེ་ལྟ་མིན་ན་ཐབས་དེས་སྡུད་པ་སྔོན་དུ་བསྟང་ནས། ལྟེ་བའི་རྩ་འཁོར་གྱི་དབུས་ཀྱི་དབུ་མ་ཡོད་པའི་ཐད་དུ་དབུ་མའི་ནང་དུ་ཡི་གེ་སོགས་ལ་སེམས་བཟུང་བ་བརྟན་པ་ན་སྲོག་དབུ་མར་སྡུད་ནུས་པར་འགྱུར་དེ་ཡང་སྡུད་རིམ་སྔོན་དུ་མ་བཏང་ཡང་སེམས་སྔར་ལྟར་ཟིན་པ་གོམས་པ་ལས་རླུང་དབུ་མར་སྡུད་ནུས་པ་འོང་མོད་ཀྱང་། སྡུང་རིམ་རེ་དང་སྤྲགས་ནས་བྱས་ན་རླུང་སྡུད་པར་སླ་བའི་དགོས་པ་ཡོད་པས་དེ་ལྟར་བྱེད་པ་ཡིན། དེ་ལྟར་སེམས་འཛིན་པ་ན་བྱིང་པ་ཕྲ་མོ་ནས་མཆོད་ན་རླུང་འདུ་བ་ཤིང་ཏུ་དཀའ་བས་བྱིད་པ་ཕྲ་རགས་ཀུན་ཆོད་པར་བྱ། དེ་ཡང་སེམས་ལ་དར་ཐོན་པ་མེད་ན་སེམས་གསལ་དྭངས་ཀྱི་རྟོག་མེད་དུ་གནས་པ་ཡོད་ཀྱང་བྱིང་པ་ཕྲ་མོ་མི་ཁེགས་པས་དམིགས་པ་ལ་སེམས་ནང་དུ་ཞུགས་པ་ལྟར་འཛིན་པའི་གྲིམས་ཆ་བསྐྱེད། དེ་བསྐྱེད་དྲགས་ན་སེམས་གནས་སུ་མི་
ཉན་པས་ཚོད་ཟིན་པ་རང་གི་ཉམས་སྟེང་ནས་ཤེས་པར་བྱས་ཏེ། བྱིང་རྒོད་དང་བྲལ་པར་བསྐྱངས་པས་འགལ་རྐྱེན་གློ་བུར་བ་གཞན་མེད་ན་ཉིན་ཞག་གཅིག་གི་དྲུག་ཆ་ལ་ཐུན་རེར་བྱས་པའི་ཐུན་འཁྱོངས་པ་བརྟན་པོ་རྙེད་རྙེད་དུ་བསྒོམ། དེ་ལྟར་བསྒོམས་པས་རླུང་སེམས་འཇུག་པ་གཅིག་པའི་གནད་ཀྱིས་དབུ་མའི་ནང་དུ་སེམས་ཟིན་པ་རླུང་ཡང་ཟིན་པར་འགྱུར་བས་སྲོག་དྷཱུ་ཏཱིར་འཛུང་ནུས་པ་ཡིན་ནོ། འོ་ན་དེ་ལྟར་བསྒོམས་པས་སྲོག་དབུ་མར་ཚུད་པའི་རྟགས་ངེས་པ་ཅན་མྱོང་བས་གྲུབ་པ་ཅི་འདྲ་ཡོད་སྙམ་ན། འདི་ལ་བོད་གྱི་བླ་མ་འགའ་ཞིག་གི་ལུགས་ཀྱིས་རླུང་དབུ་མར་ཚུད་པའི་ཉམས་རྟགས་ལྔ་ལས་ལུས་ཀྱི་རྟགས་ནི་སྨིན་མཚམས་སུ་རླུང་འདུས་ཤིང་སྤྱི་གཙུག་ཏུ་ཟ་བ་དང་འཁྲིག་པ་སོགས་དང་། རླུང་གི་རྟགས་ནི་དབུགས་རྒྱུ་བ་མི་ཚོར་ཞིང་བརྟགས་ན་སྣ་སྒོ་གཉིས་ཀ་ནས་ཤིན་ཏུ་དལ་བར་རྒྱུ་བ་དང་། སེམས་ཀྱི་རྟགས་ནི་ཤེས་པ་གསལ་སྟོང་རྟོག་མེད་དུ་གནས་པ་དང་། མཐོང་རྟོགས་ནི་དུ་བ་ལྟ་བུ་སོགས་གསལ་ལ་བརྟན་པར་སྣང་བ་དང་། རྨི་ལམ་གྱི་རྟགས་ནི་འཕུར་བ་དང་རྟ་རྒྱུག་པ་སོགས་རྨི་བ་འབྱུང་ངོ་ཞེས་ཟེར་རོ། དེའི་རྟགས་དང་པོ་ནི་ཐེག་པ་གཉིས་ཀའི་སེམས་འཛིན་ཕལ་མོ་ཆེ་ལ་འབྱུང་ཞིང་ལུས་ལ་གནང་དུ་བསྣུན་པ་བསྒོམ་པ་ལ་ཡང་རླུང་དྷཱུ་ཏཱིར་མ་ཞུགས་པའི་གོང་སྔ་མོ་ནས་ཀྱང་འབྱུང་བ་དུ་མ་འོང་བས་རྟགས་འཁྲུལ་བ་ཅན་ནོ། རྟགས་གསུམ་པ་ནནི་ཐེག་པ་ཆེ་ཆུང་སོགས་ཀྱི་སེམས་གནས་བསྐྱངས་པ་ཐམས་ཅད་ལ་འོང་ཞིང་། དེ་ལ་ལུས་
ལ་གནད་དུ་བསྣུན་ཐབས་བྱ་མི་དགོས་ལ། རྣལ་འབྱོར་གྱི་སྟོབས་ཀྱིས་སྲོག་དབུ་མར་བཅུག་པ་ནི་རྣལ་འགྱོར་བླ་མེད་ཀྱི་གཞུང་ནས་འབྱུང་བའི་ལུས་ལ་གནད་དུ་བསྣུན་ཐམས་བྱས་པ་ཁོ་ནའི་ཁྱད་ཆོས་ཡིན་པས་ཆེས་ཤིན་ཏུ་མ་ངེས་པའི་རྟགས་སོ། རྟགས་བཞི་པ་ལ་ནི་སྲོག་དྷཱུ་ཏཱིར་བཙུད་པ་ལ་དེ་ལྟར་འཆར་བ་གཅིག་དང་། སེམས་གནས་སྤྱི་ཙམ་པ་ལ་འཆར་བ་གཉིས་ཡོད་པས་ཆེས་མ་ངེས་པའི་རྟགས་སོ། རྟགས་ལྔ་པ་ནི་ཏིང་ངེ་འཛིན་ཅུང་ཟད་ཀྱང་མ་བསྒོམས་པ་ལ་ཡང་དུ་མ་ཞིག་འབྱུང་བས་ཤིན་རུ་འཁྲུལ་བའི་རྟགས་སོ། རྟགས་གཉིས་པ་རླུང་གི་རྟགས་བཤད་པ་ལ་ནི་གཞི་ཅུང་ཟད་ཅིག་སྣང་ངོ་། དེས་ན་མི་འཁྲུལ་པའི་རྟགས་ངེས་པ་ཅན་ནི་འདི་ལྟར་ཤེས་པར་བྱ་སྟེ། རྣལ་འབྱོར་བླ་མེད་ཀྱི་གཞུང་ཁུངས་ཐུབ་ནས་འབྱུང་བའི་ལུས་ལ་གནད་དུ་བསྣུན་ཐབས་ལྟར་བཤད་པ་འདྲ་བ་ཞིག་བྱས་པ་གཞིར་བཞག་ལ། དེས་ཐུན་འཁྱོངས་བ་མ་བྱུང་བར་དུ་སྲོག་དྷཱུ་ཏཱིར་ཚུད་པ་དཀར་བས་ཐུན་འཁྱོངས་པ་ན་རང་གི་སྣ་བུག་གཉིས་གང་ཡུང་རེ་རེ་བར་རྒྱུ་བའི་འཕོས་མ་ཐག་པའི་སྐབས་ངོས་བཟུང་ལ། དེ་ནས་ལུས་གནད་དང་སེམས་ཀྱི་འཛིན་ལུགས་སྔར་བཞིན་བྱས་པའི་མཐུས་རིང་པོ་མི་ཐོགས་པར་སྣ་སྒོར་བརྟགས་པ་ན་རླུང་མཉམ་རྒྱུར་ཐེངས་བ་དང་། དེ་ཡང་ལན་རེ་རེ་གཉིས་གཉིས་ཙམ་ལ་ངེས་པ་མེད་ཀྱི་འགལ་རྐྱེན་གཞན་མེད་ན་ངེས་ཅན་དུ་ཐེངས་ཀྱིན་འདུག་པ་དང་། མཉམ་རྒྱུ་ཡང་གང་རུང་གཅིག་དྲག་ལ་ཅིག་
ཤོག་ཞན་པ་མིན་པར་དྲག་ཞན་ཤེད་མཚུངས་སུ་རྒྱུ་བ་འོང་བར་སྣང་ན། རྣལ་འབྱོར་དེའི་སྟོབས་ཀྱིས་རླུང་དབུ་མར་འཛུད་ནུས་པ་ཙམ་དུ་འཇོག་ནུས་མོད་ཀྱང་ལན་གཅིག་ཚུད་ཕྱིན་ཆད་ནས་གཡས་གཡོན་རེ་རེ་བར་མི་འཕོ་བ་མིན་ནོ། དེ་ནི་སྲོག་དྷཱུ་ཏཱིར་ཞུགས་པ་ཡིན་ལ། དྷཱུ་ཏཱིར་གནས་པ་ནི་མཚམས་འདི་ནས་དྲིལ་ཏེ་བསྒོམས་པས་སྣ་བུག་གི་རྒྱུ་བཞིན་དུ་སོང་བའི་མཐའ་ཞིབ་ཏུ་བརྟགས་པ་ན་རྒྱུ་བ་ཕྲ་མོ་ཡང་ལྡོག་པ་ཞིག་འོང་། རྟོག་ཚུལ་དེ་ངེས་དཀའ་བར་བྱུང་ན། ལུས་དྲང་པོར་གཡོ་འགུལ་མེད་པར་བདེ་མོར་གནས་པའི་དུས་སུ་ལྟོ་བ་འགུལ་མི་འགུལ་བརྟག །ཅུང་ཟད་འགུལ་བར་སྣང་ན་མ་ལོག་པའི་རྟགས་ཡིན། བརྟག་པ་འདི་ཁྱད་པར་དུ་ལྟེ་བ་མན་ཆད་ཀྱི་ཐུར་སེལ་འོག་གི་སྣ་སྒོར་འབྱུང་འཇུག་བྱེད་མི་བྱེད་རྟོག་པ་ལ་གལ་ཆེ་བ་ཡིན། སྣ་བུག་གི་རྒྱུ་བ་ཕྲ་མོ་ཡང་ལོག་པ་ཐིམ་དཀར་སླ་གཉིས་ལས། ཐིམ་དཀའ་ན་ཡུད་གཅིག་ལ་ལྟོ་བ་རླུང་གིས་ཁེངས་པ་འབྱུང་ཞིང་དེ་ནས་ཞི་བར་འགྱུར་ལ། ཞི་མ་ཐག་ལྟེ་བ་དང་གསང་གནས་ཀྱི་མེ་གནས་པའི་ཐད་ནས་དྲོད་ཁྱད་པར་ཅན་སྐྱེ། དེ་ནས་རིམ་གྱིས་ཞུ་བ་བདེ་འདྲེན་ནོ། སྣ་བུག་གི་རྒྱུ་བ་ཕྲ་མོ་ཡང་ལོག་པ་འདི་བྱིང་བ་ཕྲ་མོ་མཆོད་པར་བསགས་པས་བྱིང་བ་ཤས་ཆེ་བ་ཞིག་ལ་ཡང་འོང་སྟེ། དེ་ནི་རླུང་དྷཱུ་ཏཱིར་ཚུད་པ་དང་ཐིམ་པ་གང་ཡང་མིན་པས་ཁྱད་པར་བྱེད་པར་བྱའོ། དྷཱུ་ཏཱིར་ཐིམ་པ་བྱུང་ཡང་སླར་རླུང་ལངས་ནས་རྩ་གཉིས་ལ་རྒྱུ་བ་ནི་དུ་མ་ཞིག་འོང་ངོ་། རྡོར་བཟླས་ཀྱི་མྱོང་བ་སྐྱེ་ཚུལ་ནི། རེ་ཞིག་རླུང་གི་གདངས་ལ་
སྔགས་སུ་མོས་བ་ཙམ་ལས་མི་འོང་ཡང་། གོམས་པའི་མཐར་ཕར་ལ་མོས་པ་བྱས་པ་ཙམ་མིན་པར་ཚུར་ལ་རང་གི་གདངས་ཡི་གེ་གསུམ་གྱི་གདངས་སུ་འཆར་བའི་གསུང་གི་ང་རྒྱལ་འཕོས་པ་འབྱུང་སྟེ་བསྐྱེད་རིམ་དང་འདྲའོ། དེ་ཡང་དང་པོར་དྷཱུ་ཏཱིའི་ནང་ནས་འབྱུང་འཇུག་བྱེད་པར་མོས་པ་ཙམ་ཡིན་ཀྱང་། གདམས་ངག་གི་གནད་ལེགས་པར་ཤེས་ནས་གོམས་པ་བསྲིངས་ན་རླུང་སེམས་འཇུག་པ་གཅིག་པའི་གནད་ཀྱི་དྷཱུ་ཏཱིའི་ནང་ནས་དངོས་སུ་འབྱུང་འཇུག་བྱེད་པ་འོང་ངོ་། འདི་ལ་ཡང་སྔར་བཤད་པ་བཞིན་དང་པོར་སྣ་བུག་རེ་རེ་བར་རྒྱུ་བཞིན་པ་ན་རྡོར་བཟླས་བྱས་པའི་མཐུས་མྱུར་པོར་མཉམ་རྒྱུ་ངེས་ཅན་དུ་ཐེངས་ཀྱིན་འདུག་ན་རྡོར་བཟླས་ཀྱིས་རླུངས་དྷཱུ་ཏཱིར་ཚུད་པ་ཡིན་ནོ། དེ་ནས་སྲོག་དབུ་མར་གནས་པ་འོང་ལུགས་ནི། འབྱུང་འཇུག་གང་རུང་རེའི་ཡུན་ཚད་ཀྱིས་གནས་པ་ནི་དང་པོར་ཆེད་དུ་བྱ་དགོས་ལ། དེ་གོམས་པ་ལུན་བསྲིངས་པ་ན་མཚམས་ཞིག་ནས་ཆེད་དུ་བྱ་མི་དགོས་པར་རང་གི་ངང་གིས་གནས་པ་ཞིག་འོང་ངོ་། དེ་བྱུང་བ་ན་སླར་ཡང་གོམས་པ་བསྲེངས་པས་གནས་པ་ཇེ་རིང་ཇེ་རིང་དུ་འགྲོ། དེའི་གནད་ཀྱིས་ལྡང་འཇུག་གཉིས་ཇེ་ཐུང་དུ་སོང་ནས་མཐར་རླུང་འབྱུང་འཇུག་གི་རྒྱུ་བ་ཕྲ་མོ་ཡང་ལོག་ནས་གནས་པ་འབར་ཞིག་པར་འགྲོའོ། འདི་ཡང་དྲི་མེད་འོང་ལས། དེ་ལྟར་ཉིན་ཞག་སྟོང་ལྔ་བརྒྱ་རྣམས་ཀྱིས་དབུགས་གཡོ་བ་མེད་པར་འགྱུར་ཏེ་སྲོག་གི་བུམ་པ་ཅན་གྱི་གནས་སྐབས་འཐོབ་པར་འགྱུར་རོ། ཞེས་རྡོར་བཟླས་བྱས་
པས་རླུང་ཕྱི་ནང་དུ་འབྱུང་འཇུག་གི་གཡོ་བ་མེད་པའི་གནས་སྐབས་འཐོབ་པར་གསུངས་སོ། རྡོར་བཟླས་ལ་ཡང་རིག་པ་ལ་ངར་ཐོན་པ་རྒྱུན་ལྡན་པ་མེད་ན་བྱིང་པ་འཕེལ་བར་འགྱུར་ལ། དེར་སོང་ན་སྣ་སྒོའི་རླུང་འབྱུང་འཇུག་མི་བྱེད་པ་བྱུང་ན་ཡང་སྐྱོན་བསྐྱེད་པ་མིན་པ་ཡོན་ཏན་མི་སྐྱེ་བས་བྱིང་པ་གཅོད་པ་ག་ཆེའོ། སྲོག་དབུ་མར་གནས་པ་རྙེད་པའི་ཚེ། ལྟེ་བའི་དྷཱུ་ཏཱིའི་ནང་གི་ཡི་གེ་སོགས་ལ་དམིགས་པ་གཏད་ནས་སེམས་བཟུང་བར་བྱས་པས་མྱུར་བོར་རླུང་དྷཱུ་ཏཱིར་ཐིམ་པར་འགྱུར་རོ། དེ་ལྟར་ན་རྣལ་འབྱོར་བླ་མེད་ཀྱི་ལམ་འདིར་ལྷན་ཅིག་སྐྱེས་པའི་ཡེ་ཤེས་བསྐྱད་དེ། དེ་བསྒོམས་པས་མཆོག་འགྲུབ་པ་ལ་སྲོག་དྷཱུ་ཏཱིར་སྡུད་པ་ཞིག་མེད་མི་རུང་ཡིན་ཏེ། མཁའ་འགྲོ་རྒྱ་མཚོ་ལས། ཨ་ཝ་དྷཱུ་ཏཱིའི་སྲོག་གི་རླུང་། བརྟན་པ་ཕག་སོགས་རྣལ་འགྱོར་མ། མ་བརྟན་སྲོག་གི་རླུང་རྣམས་ཀྱིས། དངོས་གྲུབ་གསལ་བར་མི་འགྱུར་རོ། །ཞེས་སོ། ཁྱད་པར་གསལ་བྱེད་ལས་འདུས་པ་ཕྱི་མ་དྲངས་པ་ནས་ཡན་ལག་དྲུག་དང་བྲལ་ན་མཆོག་མི་འགྲུབ་པར་གསུངས་པའི་སྲོག་རྩོལ་འཆད་པ་ན། གསང་གནས་དང་ལྟེ་བ་དང་སྙིང་ག་དང་སྨིན་མཚམས་ལ་སོགས་པ་གང་ཡང་རུང་བར་ཐིག་ལེ་དང་ཡི་གེ་སོགས་ལ་དམིགས་པའི་ཐབས་གང་ཡང་རུང་བས་སྲོག་དྷཱུ་ཏཱིར་སྡུད་པ་ཐམས་ཅད་སྲོག་རྩོལ་ཡིན་པས། གཞུང་རྣམས་ལས་ལྟེ་བ་ལ་སོགས་པའི་རྩ་འཁོར་ཀྱི་གནས་ཕྱོགས་རིའི་སྲོག་རྩོ་ལ་བཤད་པ་ནི། མཚོན་པ་ཙམ་ཞེས་བཤད་ཅིང་། ཡེ་ཤེས་ཞབས་ལུགས་ཀྱི་སྦྱོར་དྲུག་གི་རྒྱ་
གཞུང་གཅིག་ལས་ཀྱང་། དེ་དང་མཐུན་པར་བཤད་པ་ལྟར་སྲོག་རྩོལ་རྒྱ་ཆེར་བཏང་ན་རྒྱུང་ནས་གསུངས་པ་ལྟར་ཡིན་གྱི། དེ་ལྟ་མིན་པས་རྒྱུད་གཅིག་ནས་སྲོག་རྩོལ་དུ་བཤད་པ་ཇི་མ་ཇི་བཞིན་དུ་མ་བྱུང་ན་ལམ་དེས་འཚང་མི་རྒྱ་བར་འཛིན་ན་ནི་ཆོས་སྤོང་བའི་སྒོ་ཆེན་པོ་ལ་གནས་པར་འགྱུར་རོ། དེ་ལྟར་སྲོག་རྩོལ་གྱི་སྒོ་མི་འདྲ་བ་མང་པོ་ཡོད་པ་བཞིན་དུ་སྒོ་དེ་དག་གི་རླུང་དང་དབུ་མར་བཙུད་ནས་གཡོ་མེད་དུ་གནས་པ་ཡང་དེ་ཙམ་ཞིག་འོང་ངོ་། དེའི་ཕྱིར་བདེ་མཆོག་བསྟོད་འགྲེལ་ལས། དེ་ནས་འཛིན་པ་ཞེས་བྱ་བ་ནི་སྲོག་གི་རླུང་ལྟེ་བ་དང་སྙིང་ག་དང་ལྐོག་མ་དང་དཔྲལ་བ་དང་དབང་ཆེན་དང་ཆུ་དང་མེ་དང་རླུང་གི་དཀྱིལ་འཁོར་རྣམས་སུ་འཇུག་པས་ཐིག་ལེ་ལ་སྲོག་གནས་ཤང་ཕྱིར་མི་འབྱུང་བ་ནི་འཛིན་པའི་ཡན་ལཏ་ཏུ་བསྟན་ཏོ། ཞེས་རླུང་དབུ་མར་འབྱུང་འཇུག་མི་བྱེད་པར་གནས་པ་ལ་འཛིན་པའི་ཡན་ལག་ཏུ་གསུངས་པ་ཡང་དུ་མ་ཞིག་འོང་ཞིང་དེ་མེད་པར་ཚེ་བ་ཆིག་ལ་མཆོག་འགྲུབ་པ་འང་མི་སྲིད་དོ། བྲམ་ཟེར་ཆེན་པོས་ཀྱང་། ཟ་ཞིང་འཐུང་ལ་གཉིས་སྤྲོད་ཀྱིས་དགའ་ཞིང་། རྟག་ཏུ་ཡང་དང་ཡང་དུ་འཁོར་ལོ་འགེངས། ཆོས་འདི་ལྟ་བུས་འཇིག་རྟེན་ཕ་རོལ་འགྲུབ་འགྱུར་ཏེ། རྨོངས་པའི་འཇིག་རྟེན་མགོ་བོར་རྡོག་པས་མནན་ནས་སོང་། གང་དུ་རླུང་དང་སེམས་ནི་མི་རྒྱུ་ཞིང་། ཉི་མ་ཟླ་བ་འཇུག་པ་མེད་གྱུར་པ། མི་ཤེས་པ་དག་གནས་དེར་སེམས་ནི་དབུགས་ཕྱུང་ཞིག །མདའ་བསྣུན་གྱིས་ནི་མན་ངག་ཐམས་ཅད་བསྟན་ནས་སོང་།
ཞེས་ཕྱི་ནང་གི་ལུས་ལ་གནད་དུ་བསྣུན་པའི་ཐབས་ཀྱིས་ཉི་ཟླའི་རླུང་དྷཱུ་ཏཱིར་བཙུད་ཅིང་། བཙུད་པ་དེའི་འབྱུང་འཇུག་གི་རྒྱུ་བ་བཅད་པ་ལ་བརྟེན་ནས་གཏུམ་མོ་འབར་བས་བཞུས་པའི་བྱང་སེམས་ཀྱིས་ལུས་བཀང་བའི་བདེ་སྟོང་སྦྱར་ནས་རྨོངས་པ་རྩད་ནས་གཅོད་པ་གདམས་ངག་ཐམས་ཅད་ཀྱི་གནད་བསྡུས་པར་གསུངས་སོ། །རླུང་དབུ་མར་འབྱུངའཇུག་མི་བྱེད་པར་གནས་པ་ཙམ་གྱིས་མི་ཆོག་གི་དེར་ཐིམ་པ་ཡང་དགོས་ཏེ། བྲམ་ཟེར་ཆེན་པོས། རླུང་དང་མེད་དང་ཆུ་དང་དབང་ཆེན་འགག་པ་ན། བདུད་རྩི་རྒྱུ་བའི་དུས་སུ་རླུང་ནི་སེམས་ལ་འཇུག ནམ་ཞིག་སྦྱོར་བ་ཞིག་གནས་གཅིག་ལ་ནི་ཞུགས་པ་ན། བདེ་ཆེན་མཆོས་ནི་ནམ་མཁའི་ཁམས་སུ་མི་ཤོང་ངོ་། ཞེས་སོ། དེ་ལ་སྦྱོར་བཞི་ནི། དགོངས་པ་ལུང་སྟོན་ལས། སྦྱོར་བ་ཞིས་བསྡུས་པ་བརྒྱ་ཕྲག་དགུ །ཞེས་ས་ཆ་མེ་རླུང་གི་སྦྱོར་བ་ཞིས་རླུང་རེ་རེ་ཡང་དགུ་བརྒྱ་རེ་རྒྱུ་བར་བཤད་པས་འབྱུང་བཞིའི་རླུང་ངོ་། གནས་གཅིག་ནི་དབུ་མ་སྟེ་དེར་ཞུགས་པའོ། དེ་བཞི་སྔ་མ་ཕྱི་མ་ལ་ཐིམ་པ་ནི། མེ་དང་རླུང་དང་དབང་ཆེན་སའི་རླུང་འགགས་པའོ། རླུང་གི་རླུང་སེམས་སྣང་བ་དང་པོ་ལ་ཐིམ་པ་ནི་རླུང་ནི་སེམས་ལ་འཇུག་པའོ། བདེ་ཆེན་སྤེ་བའི་དུས་སུ་ནི་བདུད་རྩི་སྟེ་བྱང་སེམས།་རྒྱ་སྟེ་འཛག་པའི་དུས་ཏེ་གཏུམ་མོ་འབར་བའི་མཐུས་སོ། ཡང་དོ་ཧ་ལས། མིག་ནི་མི་འཛུམ་སེམས་འགོག་དང་། །རླུང་འགག་པ་ནི་དཔལ་ལྡན་བླ་མས་རྟོགས། །གང་ཚེ་རླུང་རྒྱུ་ནི་མི་གཡོ་སྟེ། འཆི་བའི་ཚེ་ན་རྣལ་འབྱོར་མས་ཅི་བྱ། ཞེས་གདམས་
ངག་གི་གནད་རྟོགས་པའི་བླ་མས་བསྟན་པ་ལས་མུ་སྟེ་ལྟར་མིག་བཙུམས་ཏེ་མི་བསྒོམས་པར་མིག་མི་འཛུམ་པའི་ལྟ་སྟངས་ལ་གནས་ཏེ། སྲོག་དྷཱུ་ཏཱིར་སྲུང་བའི་ཐབས་ལ་སེམས་གཞན་དུ་འགྲོ་བ་བཀག་ནས་སེམས་བཟུང་བས་རླུངས་རྒྱུ་བ་འགགས་པ་སྟེ་ཐིམ་ནས་མི་གཡོ་བར་གནས་ཏེ། འཆི་བའི་རིམ་པ་བཞིན་འབྱུང་བའི་ཚེ་ན་སྟེ། དེའི་དུས་སུ་འོད་གསལ་འཆར་བའི་སྲོགས་སུ་རྣལ་འབྱོར་མའི་ཕྱག་རྒྱས་ཅི་ཞིག་བྱ་སྟེ་མི་དགོས་སོ། ཞེས་པའི་དོན་ནོ། འདིས་ནི་དེའི་དུས་སུ་མི་དགོས་པར་སྟོན་གྱི་སྔ་རོལ་ཏུ་ཕྱག་རྒྱ་ལ་སྟོས་པ་མི་འགོག་གོ །རླུང་ཐིམ་པ་དགོས་པ་འདི་དེ་ཁོ་ན་ཉིད་གྲུབ་པ་ལས་ཀྱང་གསལ་བར་གསུངས་ཏེ། ཇི་སྐད་དུ། དཔེར་ན་ནམ་མཁའི་ངོས་སུ་ཁྱབ་པའི་ཆུ་འཛིན་གྱི་ཚོགས་སྟུག་པོ་དེངས་པར་གྱུར་པ་ན་གང་དུ་སོང་བ་མི་ཤེས་པ་དེ་བཞིན་དུ་རླུང་འདི་ཡང་སྔར་རྒྱུན་མི་འཆང་བར་འབྱུང་བ་ལས་དེ་ལྟར་ཐིམ་པར་གྱུར་པ་ན། མཆོག་ཏུ་ལྡོག་ཅིང་ཚིམ་པ་ཐོབ་པས་གང་དུ་ཡང་འགྲོ་བར་མི་འགྱུར་རོ། ལྷན་ཅིག་སྐྱེས་པའི་རླུང་རང་གི་གནས་སུ་གནས་པས་རྟོག་པའི་ཚོགས་ལས་གྲོལ་ཞིང་སྟོང་བ་ཉིད་ཀྱི་རང་བཞིན་གྱིས་ཐུགས་ཚིམ་པར་བྱེད་པ་ཅི་ཞིག་ལྟར་སྐྱེས་ཏེ། ཞེས་གསུངས་ཏེ། ཀུན་རྟོག་གི་གཞོན་པའི་རླུང་དང་སྣང་མཆེད་ཐོབ་གསུམ་གྱི་རླུང་ཐིམ་ནས་སྟོང་པ་བཞི་པ་འོད་གསལ་ལྷན་སྐྱེས་ཀྱི་རླུང་རང་གནས་སུ་གནས་པའི་འདུས་སུ་
ལྷན་སྐྱེས་འཆར་བར་གསུངས་སོ། རྟགས་འཆང་ཚུལ་ནི། སྒྲུབ་ཐབས་གཙུག་ནོར་ལས། དེ་ལས་གཟུངས་ནི་ཐོབ་པར་འགྱུར། ཞེས་པའི་མཇུག་ཏུ། དང་པོ་རི་དྭགས་སྲེད་བཞིན་སྣང་བ་སྟེ། །མཚན་མ་གཉིས་པ་དུད་ཀའི་རྣམ་པ་ཅན། གསུམ་པ་སྲིན་བུ་མེ་ཁྱེར་དང་འདྲ་བ། །བཞི་པ་སྒྲོན་མེ་འབར་བ་ལྟ་བུར་གསལ། །མཚན་མ་ལྔ་པ་རྣམ་པར་མ་བརྟགས་པར། །སྤྲིན་བྲལ་ནམ་མཁའ་ལྟ་བུར་སྣང་བ་ཡིན། །དེ་ལྟ་བུ་ཡི་མཚན་མཐོབ་ནས་ནི། །ཕྱག་རྒྱ་ཆེན་པོ་ཐོབ་པར་འགྱུར་པ་ཡིན། །ཞེས་གསུངས་ཏེ། འདི་ནི་ལྟེ་བར་ལྟར་སེམས་བཟུང་བ་ལས་རྟགས་རྣམས་འཆང་བའི་སྐབས་ཏེ། སྲོག་དྷཱུ་ཏཱིར་སྡུད་པའི་ཐབས་ཐམས་ཅད་ལ་རྟགས་འདི་རྣམས་འཆར་རོ། རི་དྭགས་སྲེག་ནི་སྨིག་རྒྱའོ། རྟགས་བཞི་པོ་འདི་སྔ་མ་ལས་ཕྱི་མ་གསལ་དུ་སོང་བ་ལ་སྨིག་རྒྱུ་སོགས་དང་འདྲ་བར་གསུངས་ཀྱི་དེ་རྣམས་དང་འདྲ་བའི་སྣང་བ་འཆང་བ་མིན་ཞེས་པ་དང་། ཁ་ཅིག །རྟགས་ཅན་གྱི་ཤེས་པ་བརྟན་གཡོའི་ཚད་ཡིན་ཞེས་པ་དང་། ཁ་ཅིག དུ་བ་སོགས་དང་འདྲ་བའི་སྣང་བ་འཆར་བ་ལ་བཞེད་པ་གསུམ་བྱུང་བ་ནི་ཕྱི་མ་ཉིད་ལེགས་པ་ཡིན་ནོ། རླུང་འདུ་ཕུལ་ཆེ་ཆུང་ལ་སོགས་པའི་གནད་ཀྱིས་རྒྱ་ཆེ་ཆུང་དང་བརྟན་མི་བརྟན་སོགས་སྣ་ཚོགས་ཤིག་འཆར་བས་མཐའ་གཅིག་ཏུ་མ་ངེས་པའོ། དུ་བ་ལ་སོགས་པ་འདི་རྣམས་སྲོག་དང་དབུ་མར་སྡུད་པའི་ཐབས་ཁྱད་པར་ཅན་གྱི་སེམས་འཛིན་དང་། དེ་ལྟ་བུ་མིན་པའི་སེམས་མི་རྟོག་པར་འཇོག་པ་བསྐྱངས་པ་རྣམས་ལ་འང་
འབྱུང་པ་གཉིས་ཡོད་པ་ཁྱད་པར་ལེགས་པར་ཕྱེད་དགོས་སོ། ཐབས་སྔ་མ་ལ་འབྱུང་བ་ལ་ཡང་ཕྱིན་ཅི་ལོག་གེ་སའི་རླུང་ལ་སོགས་པ་རྣམས་ལྡོག་རུང་དུ་སོང་བ་དང་། ཅུང་ཟད་ལོག་པ་དང་། གཏན་ནས་ལོག་པའི་རྟགས་གསུམ་ཡོང་པར་སྨན་ཞབས་ཀྱིས་བཤད་པ་ལྟར་དབང་པོའི་སྒོ་རྣམས་ནས་ཕྱིར་ཧ་ཅང་གཡོ་བའི་རླུང་ཅུང་ཟད་ནང་དུ་ལྡོག་པར་རྩོམ་པ་དང་། ཅུང་ཟད་ལོག་པ་དང་། དབུ་མར་ཅུང་ཟད་ཚུད་པ་ལ་སོགས་པའི་རྟགས་ནས་བཟུངས་སྟེ། ལྨ་མཐོན་པོར་སོང་བའི་སྐབས་ཀྱི་ལྷོག་པ་དང་། ལོག་རྟགས་ཁྱད་པར་ཅན་དུ་གྱུར་པའི་རིམ་པ་དུ་མ་ཞིག་ཡོད་པ་ལས། འདིར་ནི་སྲོག་དབུ་མར་ཐིམ་པར་རྩོམ་པའི་ཐིམ་རིམ་གྱི་སྐབས་ཡིན་ཏེ། སྨིག་རྒྱུ་ནས་ནམ་མཁའི་སྤྲིན་མེད་ཀྱི་བར་རྣམས་པར་མཆད་དུ་འབྱུང་བའི་སྐབས་སོ། མཚན་མ་བརྒྱད་ནི། མངོན་བརྗོད་ལས། ཐམས་ཅད་གསལ་བྱེད་སྒྲོན་པ་ནི། དང་པོའི་མཚན་མ་དག་ཏུ་བལྟ། གསལ་བྱེད་གློག་གི་ཆ་ཙམ་སྟེ། མཚན་མ་གཉིས་པ་དག་ཏུ་བརྟག །དཀར་པོའི་འོད་ཀྱི་ཚུལ་ཅན་ནི། ཕྱོགས་བཅུ་དག་ཏུ་བལྟ་བྱ་སྟེ། །དྲུག་པ་གཟུགས་མེད་ཡེ་ཤེས་ཏེ། །བདུན་པ་དག་ནི་ཆོས་ཀྱི་དབྱིངས། །བརྒྱང་བ་རང་ཉིད་འདོད་བཞིན་དུ། །སངས་
རྒྱས་འབྲས་བུ་དག་ཡིན་ནོ། །ཞེས་གསུངས་སོ། གཉིས་པ་ལ་སྲིན་བུ་མེ་ཁྱེར་དུ་མངོན་བརྗོད་ཁ་ཅིག་ལས་གསུངས་ཏེ། ཧེ་རུ་ཀ་མངོན་འབྱུང་དང་། སམྦུ་ཊ་དང་མཐུན་ནོ། གསུམ་པ་ལ་མངོན་འབྱུང་ལས། རྡུལ་ཕྲན་དཀར་པོའི་རྣམ་པར་སྣང་། ཞེས་དང་། སམྦུ་ཊཪ་ཙན་ཀའི་དབྱིངས་སུ་བཤད་དོ། བཞི་བ་ལ་མངོན་བརྗོད་འགྲེལ་བར། འདོད་ལྷའི་ལོངས་སྤྱོད་སྣང་བ་ཞེས་འབྱུང་སྟེ། འདོད་ལྷའི་ཁམ་ཟས་ཀྱི་ལོངས་སྤྱོད་ནི་བདུད་རྩི་ཡིན་ལ། འདིར་ནང་གི་བདུད་རྩི་དཀར་པོ་རྩ་སྟོང་ཕྲག་དོན་གཉིས་ནས་འབབ་པ་མཐོང་བའོ། ལྔ་པ་ལ་མངོན་བརྗོད་མང་པོ་ལས། གཟུགས་དང་རེག་སོགས་ཀྱི་ལྷ་མོ། ཞེས་འབྱུང་བ་ལྟར་ན། ཡུལ་ལྔའི་ལྷ་མོར་སྣང་བ་བྱུང་ནས་ཡེ་ཤེས་བསྐྱེད་པའོ། མངོན་བརྗོད་ཁ་ཅིག་དང་། རྒྱུད་གཞན་ནས་གཟུགས་ཀྱི་ལྷ་མཐོང་བར་བཤད་པ་དང་། མངོན་བརྗོད་འགྲེལ་བར་གཟུགས་ཀྱི་ལྷའི་པར་བར་སྣང་བ་ཞེས་པ་ལྟར་ན་གཟུགས་ཁམས་པའི་ལྷ་རྣམས་ཕྱིའི་འདོད་ཡོན་ལ་ཆགས་པ་དང་བྲལ་ནས་ཁ་ནང་དུ་བལྟས་པའི་ཏིང་ངེ་འཛིན་གྱི་བདེ་བ་ལ་གནས་བ་བཞིན་དུ། ཡུལ་ལྔལ་ཁ་ཕྱིར་བ་ལྟས་པའི་དབང་ཤེས་རྣམས་ཐིམ་པའི་སྐབས་སོ། གཟུགས་མེད་པའི་ཡེ་ཤེས་ནི་བྲན་རྟོགས་གཡོ་བའི་རླུང་ཐིམ་པས་ཡེ་ཤེས་ཀྱི་ངོ་བོར་གཟུགས་སྒྲས་སོགས་སུ་སྣང་བའི་གཟུགས་སྣང་རགས་པ་ཐིམ་པའི་སྐབས་སོ། འདི་ལ་མངོན་འབྱུང་ཁ་ཅིག་ལས། སྲེད་མེད་ཀྱི་ལོངས་སྤྱོད་དང་། ཁ་ཅིག་ལས་འཇིགས་པའི་ལོངས་སྤྱོད་
ཅེས་ཀྱང་འབྱུང་ངོ་། བདུན་པ་ཆོས་ཀྱི་དབྱིངས་ནི་དེ་ནས་སྟོང་པ་བཞི་ཤར་པའོ། བརྒྱད་པ་རང་གི་འདོད་པ་བཞིན་དུ་སངས་རྒྱས་ཀྱི་འབྲས་བུ་ཐོབ་པ་ནི་སྟོང་པ་བཞི་པ་འོད་གསལ་ལ་སྔར་ཇི་ལྟར་འཕེན་པ་བཏང་བ་བཞིན་དུ་ཟུང་འཇུག་གི་སངས་རྒྱས་ཀྱི་སྐུར་ལངས་པ་སྟེ་སློབ་པའི་ཟུང་འཇུག་གོ །དགུ་པ་བླ་མའི་བླ་མ་ནི་མི་སློབ་པའི་ཟུང་འཇུག་སྟེ། འོད་གསལ་གྱི་བླ་མ་སྟེ་གོང་མ་སློབ་པའི་ཟུང་འཇུབ་ལས་བླ་མ་སྟེ་གོང་མར་གྱུར་བའོ། གསུམ་དེ་ལ་བརྟན་ནས་སྟོང་ཕྱོགས་དང་སྣང་ཕྱོགས་ཀྱི་རྫོགས་རིམ་སྐྱེ་ཚུལ་ལ་གཉིས། །སྟོང་ཕྱོགས་ཀྱི་རྫོགས་རིམ་སྐྱེ་ཚུལ་དང་། །སྣང་ཕྱོགས་ཀྱི་རྫོགས་རིམ་སྐྱེ་ཚུལ་ལོ། དང་པོ་ནི། ལྷུ་ཨི་པའི་འགྲེལ་པ་ཇོ་བོས་མཛད་པ་ལས། །སེམས་སྣང་བ་གསུམ་རིམ་གྱིས་ཐིམ་པར་བསམ་མོ། དེ་ཡི་མཚན་ཉིད་བསྟན་པའི་ཕྱིར། །དངོས་པོ་མེད་པའི་སེམས་ཉིད་ཡིན། ཞེས་བྱའོ། དེ་ཡང་བསམ་ཀྱིས་མི་ཁྱབ་བསམ་ནི་འོད་གསལ་དུ་བསྒོམ་པའོ། ཞེས་གསུངས་ཏེ། སེམས་ཉིད་དུ་ཡང་བསྒོམ་མི་བྱ། ཞེས་པ་དང་། དངོས་པོ་མེད་པའི་སེམས་ཉིད་ཡིན། ཞེས་པ་ནི་འགྱུར་ཁྱད་ཙམ་ཡིན། དེས་སེམས་སྣང་བ་དང་། སྣང་བ་མཆེད་པ་དང་། སྣང་བ་ཉེ་བར་ཐོབ་པ་གསུམ་བསྟན་ནོ། དེ་ཡང་ས་ཆུ་ལ་ཐིམ་པ་དང་། ཆུ་མེ་ལ་ཐིམ་པ་དང་། མེ་རླུང་ལ་ཐིམ་པའི་སྐབས་གསུམ་དུ་སྨིག་རྒྱུ་ངང་དུ་བ་དང་མེ་ཁྱེར་དུ་སྣང་བ་གསུམ་དང་། ཀུན་རྟོག་གི་གཞོན་པའི་རླུང་སེམས་ལ་ཐིམ་པའི་དུས་སུ་རླུང་མེད་པའི་མར་མེ་འབར་བ་ལྟ་
བུར་སྣང་བ་འབྱུང་། དེའི་རྗེས་སུ་མཚན་མ་ལྔ་པ་རྣམ་པར་མ་བརྟགས་པར་སྦྲིན་བྲལ་ནམ་མཁའ་ལྟ་བུར་སྣང་བ་ཡིན། ཞེས་སྔར་དྲངས་པའི་དོན་ནོ། སྤྲིན་མེད་པའི་ནམ་མཁའ་གཡའ་དག་པ་སྣང་བ་ཡིན་ཞེས་པ་འདིའི་གཙོ་བོ་འོད་གསལ་ཡིན་མོད་ཀྱང་། སྟོང་པ་གཞན་གསུམ་ཡང་འདིས་སྟོན་ནོ། དེ་ཡང་དཔེར་ན་སྟོན་གྱི་ནམ་མཁའ་གཡའ་དག་པ་ལ་ཉི་འོད་དམར་སེར་ཀྱིས་ཁྱབ་པ་དང་། སྲོད་ཀྱི་སྨག་ནག་པོའི་མུན་པས་ཁྱབ་པ་དང་། དེ་སངས་ནས་ཟླ་བའི་འོད་ཀྱིས་ཁྱབ་པའི་སྐབས་གསུམ་དང་། ནམ་མཁའི་རང་མདོག་ཇི་བཞིན་དུ་ཐོན་པའི་སློད་བྱེད་གསུམ་པོ་དེ་དང་བྲལ་བའི་ཐོ་རངས་ཀྱི་དུས་ཀྱི་ནམ་མཁའ་སྟེ་བཞི་ཡོད་དོ། དཔེ་དེ་བཞན་དུ་ཡིད་ངོར་ཕྱོགས་མཚམས་རྒྱ་ཆད་པ་མེད་པར་སྟོང་སང་ངེ་བ་ལ་འོད་ཟེར་དཀར་པོ་ཤར་བའི་རྣམ་པ་ཅན། ཡུལ་སྣང་གཞན་མི་འཆར་བ་ནི་སེམས་སྣང་བ་དང་པོ་སྟེ་སྟོང་ལ་ཞེས་ཀྱང་ཟེར་རོ། དེ་ནས་སྣང་བ་དེ་ཡང་རིམ་གྱིས་བསྡུས་ནས་ཡུལ་སྣང་གཞན་གང་ཡང་མེད་པ་སྟོང་
ཐམ་གྱིས་འགྲོ་སྟེ། དེ་ཐམས་ཅད་ཀུང་བདེ་བ་ཆེན་པོའི་ངོ་བོར་སྐྱེའོ། དེ་ནས་མུན་ནག་ལྟར་སྣང་བ་དང་དྲན་མེད་དེ་སངས་པ་ན་ཐོན་ངས་ཀྱི་ནམ་མཁའ་གཡའ་དག་པ་ཁ་དོག་སློད་བྱེད་གྱི་སྐྱོན་དང་བྲལ་བ་བཞིན་དུ་འོད་གསལ་མཐའ་དབུས་མེད་པའི་ཏིང་ངེ་འཛིན་སྐྱེ་སྟེ། ཐམས་ཅད་སྟོང་པ་ཞེས་ཀྱང་ཟེར་རོ། སྟོང་པ་བཞི་གའི་དུས་སུ་དེ་ཁོ་ན་ཉིད་ཀྱི་ལྟ་བ་དྲན་པར་བྱས་ནས་བདེ་སྟོང་སྦྱོར་བ་ཡིན་མོད་ཀྱང་གཙོ་བོ་ནི་འོད་གསལ་གྱི་དུས་སོ། བསམ་གྱིས་མི་ཁྱབ་པ་ནི། དྲིལ་བུ་པས། ཕྱི་དང་ནང་གི་རང་བཞིན་ཉིད། ཆོས་རྣམས་ཀུན་གྱི་ངོ་བོ་སྟེ། བསམ་གྱིས་མི་ཁྱབ་ཅེས་བཤད་དོ། ཞེས་གསུངས་བས་ཆོས་རྣམས་ཀྱི་ཡིན་ལུགས་སྟོང་པ་ཉིད་དེ། དེ་ནི་ཐ་སྙད་པའི་ཤེས་པ་རྣམས་དང་མཐའ་འཛིན་གྱི་བློའི་ཡུལ་ལས་འདས་པས་ན་དེ་རྣམས་ལ་ལྟོས་ཏེ་བསམ་མི་ཁྱབ་ཡིན་གྱི་བློ་གང་གིས་ཀྱང་བསམ་པར་མི་ནུས་པ་མིན་པས་བསམ་གྱིས་མི་ཁྱབ་པ་དེ་ཡང་བསམ་པར་བྱ་བར་གསུངས་སོ། དེ་ལྟར་བྱས་ན་སྔོམ་འབྱུང་ལས། གང་གི་ཚེ་ནི་དེ་ཉིད་རིག བསམ་པ་ཐམས་ཅད་བསམ་དུ་མེད། །གང་དུ་བསམ་དུ་མེད་སེམས་པ། །དེ་ཚེ་བསམ་མི་ཁྱབ་པར་འགྱུར། །ཞེས་དེ་ཁོ་ན་ཉིད་རིག་པའི་དོན་དེ་སེམས་པར་ཡང་གསུངས་ཤིང་། བསམ་པ་ཐམས་ཅད་ཀྱིས་བསམ་དུ་མེད་པར་ཡང་གསུངས་པ་གཉིས་མི་འགལ་བར་འགྱུར་ལ། སེམས་གང་གིས་ཀྱང་རིག་པ་དང་སེམས་པར་བྱར་མེད་ན་འགལ་བར་འགྱུར་རོ། ཡང་དེ་
ཉིད་ལས། ཡིད་མེད་ཡིད་ནི་བྱས་ནས་སུ། །ཅུང་ཟད་ཙམ་ཡང་བསམ་མི་བྱ། །སྟན་ལ་གནས་བྱས་བླ་མ་ཡི། །དྲིན་གྱིས་ཡང་དག་སྤར་བར་བྱ། །མཁའ་དང་ནམ་མཁའ་མཉམ་དེ་བཞིན། །སེམས་ནི་རོ་མཉམ་བསྒོམ་བྱ་སྟེ། །ཞེས་ཡུལ་དེ་ཁོ་ན་ཉིད་མཐར་འཛིན་གྱི་ཡུལ་ལས་འདས་པ་དེ་ཁོ་ན་བཞིན་དུ་མཐར་འཛིན་གྱི་དམགིས་གཏད་མ་ལུས་པར་བ་ཤིག་པའི་ཡུལ་ཅན་ཡང་དེ་དང་མཐུན་པར་ཞུགས་པའི་རོ་མཉམ་བསྒོམ་པར་གསུངས་ལ། ཅུང་ཟད་ཀྱང་མི་བསམ་པར་གསུངས་པ་གཉིས་མི་འགལ་བ་ཡང་ཤེས་པར་བྱའོ། སེམས་དཔའ་ཉིད་དུ་མཚོན་པ་མིན། །ཞེས་པ་ནི་བསམ་གྱིས་མི་ཁྱབ་པོ་སྙམ་དུ་སེམས་དཔའི་ཚུལ་གྱིས་མཚོན་པ་སྟེ་བ་རྟག་པ་མིན་ཞེས་པའི་དོན་དུ་བཤད་དོ། དེས་ན་མངོན་བརྗོད་ལས། སེམས་ཅན་ཉིད་ཀྱང་མི་བསམ་སྟེ། ཞེས་པའི་ས་ཏྭ་སེམས་དཔའ་ལ་བསྒྱུར་རྒྱུ། པ་དང་ཅན་ནི་དོན་གཅིག་ཏུ་བསམས་ནས་སེམས་ཅན་བསྐྱུར་ཏེ་མི་ལེགས་སོ། ཁྱད་པར་གསལ་བྱེད་ལས། །སེམས་རིན་པོ་ཆེ་ནམ་མཁའ་དང་མཉམ་པ་འདི་འོད་གསལ་ཉིད་དུ་གྱུར་པ་ལས་གང་སྲོག་རླུང་གིས་བརྟན་པར་གྱུར་པ་དེར་འཛིན་པའོ། ཞེས་རགས་པའི་སྲོག་རླུང་ཐིམ་ནས་ཕྲ་བའི་སྲོག་རླུང་བརྟན་པས་སེམས་འོད་གསལ་དུ་ཞུགས་པ་སྐྱོད་པ་ཡན་ལག་དྲུག་གི་འཛིན་པའི་ཡན་ལག་ཏུ་བཤད་པ་ནི། འདུས་པ་ཕྱི་མ་ལས། རང་དབང་རིན་ཆེན་དགག་པ་ཡི། གཟུང་བ་འཛིན་པ་ཡིན་པར་བཤད། སེམས་ན་འགོག་པའི་རྡོ་རྗེར་འགྱུར། ཞེས་གསུངས་པའི་དོན་དུ་འདོད་དོ་
སྒྲོན་གསལ་ལས། རང་བཞིན་གཟུགས་ལ་སོགས་པའི་ཡུལ་དང་། དབང་པོ་ནི་མིག་ལ་སོགས་པ་སྟེ། ངེ་གཉིས་དགག་པ་སྟེ་ཐིམ་ནས་དེའི་འོག་ཏུ་རིན་ཆེན་སེམས་སྲོག་རླུང་དང་བཅས་པ་བཀག་ཅིང་ནུབ་པར་གྱུར་པའི་གཟུང་བ་ནི་འཛིན་པ་སྟེ། ཡང་དག་པའི་མཐའ་འོད་གསལ་དུ་བཤད་པ་དང་མཐུན་ནོ། སེམས་རླུང་དང་བཅས་པ་ཐིམ་པ་ནི་སེམས་གསུམ་རིམ་གྱིས་ཐིམ་པའོ། སྙིང་ག་དང་ལྟེ་བ་དང་གསང་གནས་ཀྱི་སྣ་རྩེར་སེམས་བཟུང་བ་ལས་སྔར་བཤད་པ་ལྟ་བུའི་སེམས་འོད་གསལ་དུ་ཞུགས་པ་ཐམས་ཅད་འཛིན་པའི་ཡན་ལག་ཏུ་ཁྱད་པར་གསལ་བྱེད་ལས་བཤད་དོ། རླུང་དབུ་མར་ཞུགས་གནས་ཐིམ་གསུམ་བྱས་པ་ལས་བྱུང་བའི་དགའ་བ་བཞི་ནི། ཕྱག་ཆེན་ཐིག་ལེ་ལས། གང་ཕྱིར་དགའ་བ་དེ་སྣང་བ། སྣང་བ་མཆེད་པ་མཆོག་ཏུ་བཤད། །ཁྱད་དགའ་ཉེ་བར་ཐོབ་པར་ཤེས། །ལྷན་ཅིག་སྐྱེས་ཏེ་འོད་གསལ་བའོ། །ཞེས་དགའ་བ་བཞི་སྣང་མཆེད་ཐོབ་གསུམ་འོད་གསལ་དང་བཞིར་གསུངས་སོ། དེ་ཡང་མངོན་བརྗོད་ལས། དགའ་བ་དང་པོ་ཡེ་ཤེས་ཏེ། །མཆོག་ཏུ་དགའ་བ་མཉམ་པར་སྦྱོར། །སྦྱོར་བ་ཆེ་དང་ཡེ་ཤེས་སྦྱོར། །དེ་དང་ཆོ་གའི་རིམ་པའོ། །ཐིག་ལེ་གཞུང་གི་སྦྱོར་ཤེས་ན། །ཕྲ་བའི་སྦྱོར་པས་བལྟ་བར་བྱ། །ཞེས་གསུངས་པའི་དགའ་བཞིའི་རིམ་པ་ནི་ཡས་བབས་ཀྱི་རིམ་པ་ཡིན་ལ། རྐང་པ་ཐ་མ་གཉིས་ཀྱི་དོན་ནི། ཐིག་ལེའི་རྣལ་འབྱོར་བསྒོམ་པའི་གཞུང་གི་དོན་ཤེས་
ནས་ཡི་གེ་དང་ཐིག་ལེ་ཕྲ་མོའི་སྦྱོར་བ་སྟེ་རྣལ་འབྱོར་བསྒོམས་ནས་དགའ་བཞི་ཇི་ལྟར་སྐྱེ་བ་བལྟ་བར་བྱའོ་ཞེས་པའོ། འགྲེལ་པར། རྣལ་འབྱོར་དང་རྗེས་སུ་རྣལ་འབྱོར་དང་ཤིན་ཏུ་རྣལ་འབྱོར་དང་རྣལ་འབྱོར་ཆེན་པོའི་ཡེ་ཤེས་ཀྱི་ཆོ་གའི་རིམ་པའོ། ཞེས་འཆད་དེ་དགའ་བ་བཞི་དང་རིམ་བཞིན་དུ་སྦྱར་རོ། ཡང་མངོན་བརྗོད་ལས། ལྟེ་བ་སྙིང་པད་ནུ་མའི་དབུས། ལྕེ་ཡི་རྩ་དང་མགོ་སྟེང་དུ། དགའ་བ་དང་ནི་མཆོག་དགའ་ཉིད། དམ་པར་དགའ་དང་ལྷན་ཅིག་སྐྱེས། དང་པོ་འདབ་མ་དྲུག་ཅུ་བཞི། གཉིས་པ་བརྒྱད་པ་མཆོག་ཡིན་ཏེ། གསུམ་པ་འདབ་མ་བཅུ་དྲུག་པ། བཞི་པ་སུམ་ཅུ་རྩ་གཉིས་འདབ། ཕག་མོ་ལྟེ་བའི་རྩ་གནས་པ། །ལྷན་ཅིག་སྐྱེས་དགའ་ཁྲག་འཐུང་མཆོག །ཅེས་ལྟེ་བར་དགའ་བ་དང་། སྙིང་གར་མཆོག་དགའ་དང་། །ལྕེའི་རྩ་བ་སྟེ་མགྲིན་པར་དམ་པ་སྟེ་ཁྱད་པར་གྱི་དགའ་བ་དང་། མགོ་བོའི་སྟེང་སྟེ་སྤྱི་བོ་ལྷན་སྐྱེས་ཀྱི་དགའ་བ་སྐྱེ་བར་བཤད་པ་ནི་མེས་བརྟན་གྱི་དགའ་བཞིའི་རིམ་པའོ། སྙིང་པད་ནི་སྙིང་གའི་རྩ་འཁོར་ཏེ་གཞན་གསུམ་ལའང་སྦྱར་རོ། ལྟེ་བའི་རྩ་བ་ཕག་མོ་ནི་གཏུམ་མོ་ཨ་ཐུང་དང་། ལྷན་སྐྱེས་ཁྲག་འཐུང་དུ་བཤད་པ་ནི་མས་བརྟན་གྱི་ལྷན་སྐྱེས་བྱང་སེམས་གྱེན་དུ་ལོག་པ་སྤྱི་གཙུག་ཏུ་ཕྱིན་པ་ན་སྐྱེ་པས་སྤྱི་གཙུག་གི་ཧཾ་ཡིག་ཧེ་རུ་ཀར་བསྟན་པའོ། བྱང་སེམས་ཞུ་བས་གནས་གང་དུ་སླེབ་པ་ན་ཡབ་བབས་ཀྱི་དགའ་བ་ཞི་སྐྱེ་ཚུལ་ནི། རྒྱུད་རྡོ་རྗེ་ཕྲེང་བ་ལས། དེ་རྗེས་ལུགས་བྱུང་བཤད་བྱ་སྟེ། བདེ་ཆེན་
འཁོར་ལོ་སྤྱི་བོ་ལ། དེ་ནི་དགའ་བར་བཤད་པ་ཡིན། །ལོངས་སྤྱོད་འཁོར་ལོ་མཆོག་དགའ་དང་། །བྲལ་དགང་ཆོས་ཀྱི་འཁོར་ལོར་གནས། །སྤྲུལ་པའི་འཁོར་ལོར་ལྷན་ཅིག་སྐྱེས། །དགའ་བ་ཉམས་སུ་མྱོང་བར་བྱེད། །ཅེས་གསུངས་ཏེ། སྤྱི་བོ་ནས་མགྲིན་པའི་བར་དུ་སླེབས་པ་ན་དགའ་བ་སྐྱེལ། དེས་གཞན་གསུམ་ལའང་ཤེས་པར་བྱའོ། ཕྱག་ཆེན་ཐིག་ལེ་ལས་དེ་བཞི་སྦྱོར་བ་བཞིར་བཤད་དོ། མས་བརྟན་གྱི་གནས་ཀྱང་བྱང་སེམས་ནོར་བུ་ནས་བརྩམས་ཏེ་ལྟེ་བའི་འཁོར་ལོའི་བར་དུ་ལོག་པ་ན་དགའ་བ་སྐྱེ་སྟེ། དེའི་རིགས་པ་གཞན་གསུམ་ལའང་སྦྱར་རོ། མན་ངག་སྙེ་མར་མས་བརྟན་གྱི་བཞིག་ལྷན་སྐྱེས་ལ་ཆུང་ངུ་དང་བར་མ་དང་ཆེན་པོ་དང་ཆེན་པོའི་ཆེན་པོར་ཕྱེ་བར་བཤད་དེ། ཡབ་བབས་ཀྱི་བདེ་བ་བཞི་ལས་ནི་མས་བརྟན་གྱི་གཞི་བདེ་བ་ཆེ་བ་ཞིག་འོང་དགོས་སོ། དེ་ལྟར་བྱས་ན་ལུགས་ལྡོག་གི་སྣང་མཆེད་ཐོབ་གསུམ་འོང་གསལ་གྱི་ཡེ་ཤེས་སུ་མི་རུང་ཡང་ལུགས་ལྡོག་གི་དགའ་བ་གཞན་གསུམ་ལྷན་སྐྱེས་སུ་འཇོག་པ་ཞིག་བཤད་ལ། དེ་བཞིན་དུ་ལུགས་མཐུན་གྱི་སྣང་མཆེད་ཐོབ་གསུམ་དང་། དེ་གསུམ་དགའ་བ་གསུམ་དུ་བཞག་པ་ལྷན་སྐྱེས་ཀྱི་དགའ་བར་མི་འཇོག་ཀྱང་ལུགས་མཐུན་ཡས་བབས་ཀྱི་དགའ་བ་གསུམ་ལྷན་སྐྱེས་ཀྱི་དགའ་བར་འཇོག་པའི་སྐབས་གཅིག་ཀྱང་ཡོད་པར་མངོན་ནོ། འོན་ཀྱང་རླུང་དབུ་མར་ཞུགས་གནས་ཐིམ་གསུམ་བྱས་པ་ལས་བྱུང་བ་མིན་པའི་དགའ་བ་གསུམ་
ནི་ལྷན་སྐྱེས་མཚན་ཉིད་པར་འཇོག་ཏུ་མི་རུང་ངོ་། དོན་གྱི་དབང་འདི་གཟིགས་ནས་བརྟག་གཉིས་ལས། །རྫོགས་པའི་རིམ་པའི་ཕྱོགས་ལ་ནི། འདི་ལྟར་ལྷན་ཅིག་སྐྱེས་རྣམ་བཞི། །ཞེས་བསྐྱེད་རིམ་གྱི་ཕྱོགས་ལ་ལྷན་སྐྱེས་ཀྱི་དགའ་བ་ལ་དགའ་བ་ཞིར་འབྱེད་པ་མེད་ཀྱང་རྫོགས་རིམ་ལ་དེ་ཡོད་པར་བཤད་དོ། འོན་ཀྱང་རྫོགས་རིམ་གྱི་དགའ་བ་གསུམ་པ་གང་ཡིན་ཐམས་ཅད་ལྷན་སྐྱེས་སུ་འཇོག་པ་མིན་ནོ། ཡང་ཀྱི་རྡོར་ལས། ཡང་ན་ཐམས་ཅད་བདག་ཉིད་དེ། །ཡང་ན་ཀུན་གྱིས་རྣམ་པར་སྤངས། །ཞེས་པའི་དོན་ལ་སྔར་བཤད་པ་ལྟ་བུ་ཞིག་དང་། བསྐྱེད་རིམ་པའི་ཕྱོགས་ལ་དགའ་བ་གསུམ་གྱི་ལྷན་སྐྱེས་སྤངས་པ་དང་། རྡོགས་རིམ་པའི་ཕྱོགས་ལ་ལྷན་སྐྱེས་དགའ་བ་གསུམ་གྱི་བདག་ཉིད་དུ་ཡང་འགྱུར་བ་དང་གཉིས་སུ་བཤད་པར་བྱའོ། འདི་ནི་ཤིན་ཏུ་རྟོགས་པར་དཀའ་ལ་གནད་ཆེ་བ་ཞིག་ཡོད་པས་ཁོ་བོས་ཕྱོགས་ཙམ་ལ་བསྟན་པ་ཡིན་པས་ད་དུང་ཞི་བ་ཏུ་ཤེས་དགོས་སོ། མན་བརྟན་གྱི་དུས་སུ་བྱང་སེམས་གྱེན་དུ་ལོག་པ་སྤྱི་བོར་མ་བརྟན་བར་དུ་བདེ་བ་མི་བརྟན་ལ། སྤྱི་བོར་བརྟན་ནས་བདེ་བ་བརྟན་པར་གསུངས་ཏེ། ཕྱག་ཆེན་ཐིག་ལེ་ལས། དེ་ནས་སྲོག་གི་སྟེང་དུ་ཡིད། །དེ་མི་མཐུན་པས་འབབ་པར་འགྱུར། །པདྨའི་ལྟེ་བའི་དབུས་གནས་པ། །གང་དེ་ཕྱི་ནས་བརྟན་གྱུར་པ། །དེ་ཚེ་མགོན་པོ་འགྲོ་མི་འགྱུར། །ཇི་ལྟར་བུ་ག་མེད་སྣོད་དུ། །ཆུ་རྣམས་ཟད་པ་མི་གནས་ལྟར། །དེ་ཚེ་བདེ་བ་བརྟན་པར་འགྱུར། །བརྟན་པས་ལྷན་ཅིག་སྐྱེས་པའི་
དགའ། །དེ་ཕྱིར་སངས་རྒྱས་མི་ཟད་པ། །རྣལ་འབྱོར་པ་ཡིས་ངེས་པར་འཐོབ། །ཅེས་སོ། ཡིད་ནི་ཁུ་བ་དང་མི་མཐུན་པ་ནི་ལུས་ལྡོག་དང་། བརྟན་པ་ནི་སྤྱི་ནོར་ཡིན་པར་མན་སྙེ་ལས་གསུངས་སོ། འདིར་བ་བདེ་བ་ཆེན་པོ་ནི་ལམ་གྱི་སྲོག་ཡིན་ལ། དེ་བརྟན་པ་ནི་མས་བརྟན་གྱི་བདེ་བ་ལ་རག་ལས་པས་ན་དེ་བསྐྱེད་ཚུལ་གལ་ཆེའོ། དེ་ཡང་མན་སྙེ་ལས། དེའི་འཆར་བ་ནི་ནོར་བུ་ནས་བརྩམས་ནས་ལྟེ་བ་ཇི་སྲིད་པ་སྟེ་མ་འཕོས་པའི་བྱང་ཆུབ་ཀྱི་སེམས་འཕེལ་བཞིན་པས་སྟེང་དུ་ཉེ་བར་འགྲོ། ཞེས་གསུངས་པའི་ཚིག་ཟིན་ལྟར་ན་ནོར་བུ་ནས་ཕྱིར་མ་འཕོས་ན་རང་ལོག་བྱེད་པ་འདྲ་བ་ཞིག་འདུག་ཀྱང་དེ་མིན་ཏེ། མ་འཕོས་ཀྱང་སྔར་གྱི་ལམ་དེ་ཉིད་ནས་མར་འོང་བ་ལྟར་མི་བྱེད་པར་གས་སོང་ཆ་མེད་དུ་འགྲོ་བ་དང་། ཕྱིར་ལོག་ཀྱང་སྤྱི་བོ་བར་དུ་ཐལ་གྱིས་འགྲོ་བའི་ངེས་པ་མེད་པར་གནས་དམའ་མོ་ནས་གྲམ་ནས་འགྲོ་བའང་འོང་བས་དེས་ན་ཡར་ལ་འགྲིལ་ནས་སྤྱི་གཙུག་པར་དུ་འགྲོ་བ་ཞིག་དགོས་པ་ནི་རྣལ་འབྱོར་པས་ཆེད་དུ་བྱ་དགོས་ཏེ། རྒྱུད་རྡོ་རྗེ་ཕྲེང་བ་ལས། རླུང་གི་དེ་ཉིད་སྔོན་སོང་ནས། །དེ་ཉིད་སྟེང་དུ་རྒྱུ་བར་ནི། རྣལ་འབྱོར་བས་ནི་སྒྲུབ་པར་བྱེད། དེ་ལས་སྤྲུལ་པའི་འཁོར་ལོ་ནི། །དགའ་བ་ཞེས་བྱར་རྣམ་པར་ཤེས། །ཞེས་གསུངས་ཤིང་། དེ་ནས་ཆོས་འཁོར་གྱི་སྟེང་དང་། དེ་ནས་ལོངས་སྤྱོད་ཀྱི་འཁོར་ལོའི་སྟེང་དུ་འགྲོ་བ་རྣལ་འབྱོར་པས་བྱེད་པར་གསུངས་སོ། ཀུན་སྤྱོད་ལས། ཡེ་
ཤེས་ཀྱི་ཕྱག་རྒྱ་དང་སྦྱར་བ་ལས་ཀྱང་དགའ་བཞི་སྐྱེ་བར་གསུངས་ཏེ། དང་པོ་དགའ་བ་དཔའ་བོ་སྟེ། །མཆོག་ཏུ་དགའ་བ་རྣལ་འབྱོར་མ། །རབ་ཏུ་དགའ་བ་མ་ལུས་ཉིད། །བདེ་དེ་ཐབས་དེ་ཀུན་རིག་པའོ། །ཞེས་གསུངས་ཏེ། ལས་ཀྱི་ཕྱག་རྒྱ་ལ་ཡང་འདྲའོ། དེའི་དོན་ནི་འགྲེལ་པར་དགའ་བ་གསུམ་སྐྱེ་བའི་གནས་བཤད་པ་ནི། སྔར་བཤད་པ་དང་འདྲ་ཞིང་། དང་པོ་དཔའ་བོ་ལྟ་བུ་དང་། གཉིས་པ་རྣལ་འབྱོར་མ་ལྟུ་བུ་དང་། གསུམ་ཐབས་ཤེས་གཉིས་ཆར་ལ་བཤད་དེ། རབ་ཏུ་དགའ་བ་ནི་ཁྱད་དགའ་བོ། མ་ལུས་ཉིད་ནི་དགའ་བ་གསུམ་པོ་སྤངས་བའོ། དེ་ནི་བདེ་དེ་ཞེས་པ་རབ་ཏུ་དགའ་བའི་དབའ་བ་དེའོ། གསང་གནས་བསྐྱོད་པའི་ཐབས་དེ་ལ་བརྟེན་ནས་ཀུན་ནི་ཀུན་རྫོབ་བྱང་ཆུབ་ཀྱི་སེམས་རྡོ་རྗེ་ནོར་བུའི་རྩེར་རྫོགས་པའོ། རིག་པ་ནི་དེ་ལ་ལོངས་སྤྱོད་རྫོགས་པའི་སྐུའི་བདག་ཉིད་ལྷན་སྐྱེས་སོ། དེའི་ཆེ་བ་ནི། མཐོ་རིས་ས་སྟེངས་འོག་ཏུ། སྐད་ཅིག་གིས་ནི་ལུས་གཅིག་འགྱུར། ཞེས་པས་སྟོན་ནོ། དེའི་དོན་ནི་སྐད་ཅིག་གིས་ཏེ་ལྷན་སྐྱེས་ཀྱི་དགའ་བའི་སྟོབས་ཀྱིས་ས་གསུམ་པོ་ལུས་གཅིག་སྟེ་བདེ་བ་ཆེན་པོའི་རང་བཞིན་དུ་འགྱུར་པར་འགྲེལ་པས་བཤད་པ། ལྷན་སྐྱེས་ཀྱི་བདེ་སྟོང་ཁྱད་པར་བ་བསྒོམས་པའི་སྟོབས་ཀྱིས་སྣོད་བཅུད་ཀུན་ལ་རྒྱས་བཏབ་སྟེ་བསྒོམས་པས་རྣལ་འབྱོར་པ་ལ་བདེ་སྟོང་དུ་འཆར་བའི་དོན་ནོ། མར་དོས་སྲུབ་པ་ནས་བརྩམས་ཏེ་རྡོ་རྗེར་ཕྱིན་པའི་བདེ་བ་ནི་རྣམ་རྟོག་རགས་པའི་ཕྱིར་ཐབས་ཡིན་པས་
དཔའ་བོ་དང་། ནོར་བུ་དང་ཉེ་བར་ཕྱིན་པའི་བདེ་བ་ནི་ཕྲབས་ན་ཤེས་རབ་ཡིན་པས་རྣལ་འབྱོར་མ་དང་། ནོར་བུར་ཕྱིན་པའི་བདེ་བ་ནི་དེ་ཡན་ཆད་ཀྱི་གཉིས་ཀ་བསྡུས་པས་ཁྱད་དགའ་དང་། ནོར་བུའི་རྩེར་སོན་པའི་བདེ་བ་ནི་ལྷན་ཅིག་སྐྱེས་དགར་འཆད་དེ། བྱང་སེམས་ཞུ་བ་རྡོ་རྗེའི་རྩ་བར་སླེབ་པ་ན་དགའ་བ་དང་། རྡོ་རྗེའི་མགྲིན་པར་སླེབས་པ་ན་མཆོག་དགའ་དང་། ནོར་བུར་ཕྱིན་པ་ན་ཁྱོད་དགའ་དང་། ནོར་བུའི་རྩེ་མོར་སོན་པ་ན་ལྷན་སྐྱེས་སྐྱེ་བར་རྒྱ་གཞུང་གཞན་ལས་ཀྱང་བཤད་པ་དང་མཐུན་ནོ། ཕྱག་རྒྱ་གཉིས་གང་རུང་ལ་བརྟེན་པ་དང་ནང་གི་ལུས་ཀྱི་གནད་དུ་བསྣུན་པའི་དམིགས་པ་བསྐྱངས་པ་ལས་དགའ་བ་ཞི་སྐྱེས་བ་ན་མཉམ་གཞག་ལ་བདེ་སྟོང་སྦྱར་ཏེ་བསྒོམ། དེ་ལས་ལངས་པ་ན་སྔར་བཤད་པ་ལྟར་བདེ་ཆེན་གྱིས་རྒྱས་བཏབ་ནས་བསྒོམས་ན་དེ་གོམས་པ་ལ་བརྟེན་ནས་ཡུལ་སྣང་གང་ཤར་ཐམས་ཅད་བདེ་བ་འབར་བའི་གྲོགས་སུ་འགྲོ་སྟེ། མཁའ་འགྲོ་རྒྱ་མཚོ་ལས། ལས་ཀྱི་ཕྱག་རྒྱ་རབ་སྦྱོར་བས། ཉི་མ་རེ་རེ་བསྒྲུབ་པར་བྱ། དེ་ཡི་དུས་སུ་གང་མཐོང་བ། དངོས་པོ་ཀུན་ལ་བཏུང་བར་བྱ། འདོད་ཆགས་ཆེན་པོའི་ཚུལ་བདག་ཉིད། །རྟག་ཏུ་བདག་ཉིད་ལ་འབྱུང་འགྱུར། །ཞེས་གསལ་བར་གསུངས་ཏེ། འདོད་ཆགས་ཆེན་པོའི་ཚུལ་ནི་བདེ་བ་ཆེན་པོའོ། རྗེས་ཐོབ་ལ་དེ་ལྟར་བསྐྱངས་པའི་འོག་ཏུ་སླར་ཡང་ཕྱི་ནང་གི་ཐབས་གཉིས་གང་རུང་ལ་
བརྟེན་ནས་དགའ་བཞི་ཚན་པ་གཉིས་བསྐྱེད་ལ་མཉམ་པར་བཞག དེ་ལྟར་མཉམ་རྗེས་སྤེལ་བ་རྒྱུན་ལྡན་དུ་བྱའོ། གཉིས་པ་སྣང་ཕྱོགས་ཀྱི་རྫོགས་པའི་རིམ་པ་ནི། སྟོང་པ་བཞའི་སྒོ་ནས་ལུགས་མཐུན་དུ་ཞུགས་ཏེ་འོད་གསལ་དུ་གནས་ནས་མཉམ་པར་བཞག་པའི་མཐར་ལྡང་བ་ན་འོད་གསལ་གྱི་རླུང་སེམས་ཙམ་ལས་སྒྱུ་མའི་སྐུར་ལྡང་ཞིང་ལངས་པ་དེ་བསྒོམ་པའོ། དེ་ཡང་བསམ་གྱིས་ཞེས་པའི་རྐང་པ་གཉིས་ཀྱིས་སྟོན་ཏེ། བསམ་གྱིས་མི་ཁྱབ་པ་ནི་འོད་གསལ་ལོ། དེ་བསམ་པ་ནི་སེམས་གསུམ་རིམ་གྱིས་ཐིམ་ནས་འོད་གསལ་དུ་ཞུགས་པ་དེ་བསྒོམ་པའོ། དེ་བསམས་ན་སྟེ་བསྒོམས་པ་དེ་ལས་གཟུངས་འཐོབ་པ་ནི་སྒྱུ་མའི་སྐུ་འཐོབ་པའོ། ཇོ་བོའི་འགྲེལ་པ་ལས་ཀྱང་། བསམ་གྱིས་མི་ཁྱབ་དེ་བསམས་ན། ཞེས་བྱ་བ་ལ་སོགས་པ་ལ་བསམ་གྱིས་མི་ཁྱབ་པ་ནི་འོད་གསལ་ལོ། འོད་གསལ་བའི་དང་ལས་སྔར་ཀྱི་སྒྱུ་མ་ལྟ་བུའི་ལྷའི་སྐུར་དྲན་པ་ཐོབ་པ་ལ་གཟུངས་ཞེས་བྱའོ། གཟུངས་ཐོབ་པ་ནི་སྒྱུ་མ་ལྟ་བུའི་སྐུར་ལངས་པའོ། ཞེས་གསུངས་ཏེ། སྔར་འོད་གསལ་གྱི་ངང་ནས་ལྷའི་སྐུ་སྒྱུ་མ་ལྟ་བུར་ལངས་པར་བྱའོ། སྙམ་པའི་འཕེན་པ་དྲན་ནས་ལྷའི་སྐུ་དེ་ཐོབ་པ་ལ་གཟུངས་ཞེས་བྱ་སྟེ། གཟུངས་དྲན་པར་བཤད་པ་ལ་དགོངས་སོ། ལཱུ་ཨི་པའི་འགྲེལ་པ་གསུམ་ལས་ཀྱང་། ཡང་སྔ་དྲོའི་ཐུན། འོད་གསལ་ལས་ལངས་ཏེ་དཀྱིལ་འཁོར་གྱི་འཁོར་ལོར་མོས་པ་བྱས་ཏེ་ཞེས་འབྱུང་ལ།
དེ་ནི་བསྐྱེད་རིམ་གྱི་སྐབས་སུ་མོས་པ་ཡིད་བྱེད་ཙམ་ཡིན་ཀྱང་དེ་ལྟར་སྦྱངས་པས་རྫོགས་རིམ་གྱི་སྐབས་སུ་དངོས་སུ་ནུས་པ་སྔ་མ་དང་མཐུན་ནོ། འགྲེ་པ་གཉིས་ལས་གཟུངས་ཕྱག་ཆེན་གྱི་དངོས་གྲུབ་ལ་བཤད་པའི་ཕྱག་ཚན་ནི་སྒྱུ་ལུས་རྡོ་རྗེ་འཆང་གི་སྐུ་འགྲུབ་པའོ། དེ་ཡང་དངོས་བརྗོད་ལས། དེ་ནི་འཛིན་པ་ཐོབ་པར་འགྱུར། ཞེས་བསྒྱུར་ཏེ། དྷ་ར་ནི་འཛིན་པ་ལའང་པསྒྱུར་དུ་རུང་བའོ། དེའི་ལྟར་ན་རྡོ་རྗེ་འཛིན་པ་ཞེས་པ་རྡོ་རྗེ་འཆང་གི་མཚན་གྱི་ཕྱོགས་གཅིག་སྨོས་པའོ། འོད་གསལ་ལས་ལངས་པ་ན་དང་པོ་ཉེར་ཐོབ་དང་། དེ་ནས་མཆེད་པ་དང་། དེ་ནས་སྣང་བ་སྐྱེ་ལ། དེ་ནས་མར་མེ་ལྟར་འབར་ནས་སྨིག་རྒྱུའི་བར་བཞི་ལུགས་ལྡོག་ཏུ་འབྱུང་ངོ་། སེམས་ལ་ཉེར་ཐོབ་སོགས་ཀྱི་རིམ་པ་གསུམ་འབྱུང་ཡང་ལུས་སྒྱུ་མའི་སྐུར་ལྡང་བ་ནི་འོད་གསལ་ལས་ལངས་པ་དང་དུས་མཉམ་དུ་འབྱུང་ངོ་། ལུགས་འདིའི་རྫོགས་རིམ་གྱི་རྗེས་གཞིག་གི་སྡུད་རིམ་ལ་ནུས་པ་ཐོན་པའི་མཚམས་ནས་ལུས་དབེན་གྱི་སྐོར་ཅི་ཏིགས་པ་འབྱུང་ལ། རྡོ་རྗེ་བཟླས་པའི་རིམ་པ་ནི་ཤིན་ཏུ་གསལ། དེ་གཉིས་ཀྱི་རླུང་ལ་ནུས་པ་ཐོན་ནས་ལྟེ་བའི་དབུ་མའི་མདུད་པ་ལེགས་པར་གྲོལ་བའི་དབུས་སུ་རླུང་བསྡུས་ཏེ་ཐིམ་པར་མི་ནུས་པ་ཚུན་ཆད་ནི་རྡོར་བཟླས་ཀྱི་རིམ་པར་འདུ་ཞིང་། རྩ་མདུད་ལེགས་པར་གྲོལ་ནས་སྒྱུ་ལུས་དངོས་སུ་བསྐྱེད་མི་ནུས་ཚུན་ཆད་ནི་སེམས་དབེན་དུ་བསྡུའོ། སྒྱུ་ལུས་དངོས་སུ་བསྐྱེད་ནུས་པ་
ནས་དེ་ལ་བྱང་བའི་བར་ནི་བདག་བྱིན་བརླབ་ཀྱི་རིམ་པའོ། དེ་ནས་དེ་ཁོ་ན་ཉིད་ཀྱི་དོན་མངོན་དུ་གྱུར་པ་དང་། དེའི་ཐབས་ཉེ་བའི་རྒྱུ་རྣམས་ལ་ནི་འོད་གསལ་དང་མངོན་པར་བྱང་ཆུབ་པའི་རིམ་པ་ཞེས་བྱའོ། དེ་ཡང་དོ་ཧ་ལས། དེ་ཉིད་བསམས་ནས་རྣམ་རྟོག་རང་བཞིན་འགག་པར་འགྱུར། གལ་ཏེ་སེམས་ཀྱིས་སེམས་ནི་མཚོན་དུ་འགྲོ། །རྣམ་རྟོགས་དང་ནི་ཡིད་ནི་མི་གཡོ་བརྟན་པར་གནས། །ཇི་ལྟར་ལན་ཚྭ་ཚུལ་ཐིམ་པ་ལྟར། །དེ་ལྟར་སེམས་ནི་རང་བཞིན་ལ་ཐིམ་འགྱུར། ཞེས་གསུངས་པས་དེ་ཁོ་་ཉིད་ཀྱི་དོན་བསྒོམས་པས་རང་བཞིན་གྱི་རྟོག་པ་རྣམས་ཐིམ་སྟེ་ལྷན་ཅིག་སྐྱེས་པའི་བདེ་ཆེན་གྱི་སེམས་ཆོས་རྣམས་ཀྱི་རང་བཞིན་ཡིན་ལུགས་ལ་ཞུགས་ཏེ། ལན་ཚྭ་ཆུལ་ཐིམ་པ་ལྟར་གྱུར་པ་མཚོན་བྱ་དོན་གྱི་འོད་གསལ་གྱི་ཡེ་ཤེས་སོ། དེས་ན་འོད་གསལ་ལས་སྤྱུ་མའི་སྐུར་ལྡང་བར་བཤད་པའི་འོད་གསལ་ལ་གཉིས་སུ་ཕྱེ་ནས་དོན་གྱི་འོད་གསལ་ལས་ལངས་པའི་མཚམས་སུ་ནི་སྤོབ་པའི་ཟུང་འཇུག་སྒྱུ་མའི་སྐུ་འགྲུབ་ལ། མཚོན་བྱེད་དཔེའི་འོད་གསལ་ལངས་པའི་མཚམས་སུ་ནི་སྒྱུ་ལུས་དངོས་དང་རྗེས་མཐུན་པ་གཉིས་ཀྱི་ལྡང་ཚུལ་ཡོད་དེ། རྗེས་དྲན་གྱི་ཡན་ལག་ནི། འདུས་པ་ཕྱི་མ་ལས། རྗེས་དྲན་གང་ཞིག་རྣམས་བསྒོམ་པ། དེ་དང་འདྲ་པར་སྤྲོ་བར་བྱ། རྗེས་སུ་དྲན་པ་ཞེས་བཤད་དོ། ཞེས་གསུངས་པའི་དོན་སྒྲོན་གསལ་ལས། སྔར་ལུགས་མཐུན་དུ་འཇུག་པའི་དུས་སུ་སྨིག་རྒྱུན་ས་འོད་གསལ་གྱི་བར་དུ་ཐོབ་
པ་དེ་དང་འདྲ་བར་ཕྱིས་ལུགས་ལྡོག་ཏུ་ལངས་པའི་ཚེ་འོད་གསལ་ལས་ཉེར་ཐོབ་ནས་སྨིག་རྒྱུའི་བར་དུ་བྱུང་བ་ལ་བཤད་པ་བཞིན་དུ་བྱའོ། ཁྱད་པར་གསལ་བྱེད་ལས། འཛིན་པའི་མཇུག་ཐོགས་སུ་སྔར་བསྒོམས་པའི་ལྷ་ལ་རྗེས་སུ་དྲན་པ་འབྱུང་སྟེ། དེ་ཡང་བ་སྦུའི་བུ་ག་རེ་རེ་ནས་ཕུང་པོ་དང་ཁམས་དང་སྐྱེ་མཆོད་ཀྱི་ལྷ་འོད་ཟེར་གྱི་རྣམ་པར་སྤྲོ་བ་ལ་རྗེས་དྲན་དུ་བཤད་དོ། ཏིང་འཛིན་གྱི་ཡན་ལག་ནི་འདུས་པ་ཕྱི་མ་ལས། །ཐབས་དང་ཤེས་རྦ་སྙོམས་འཇུག་པས། །དངོས་པོ་ཐམས་ཅད་མདོར་བསྡུས་པ། །གོང་བུའི་ཚུལ་གྱིས་བསྡུས་ནས་ནི། །དབུས་སུ་གཟུགས་ནི་རྣམ་པར་བསྒོམ། །ཡུད་ཀྱིས་ཡེ་ཤེས་རྫོགས་བྱེད་པ། །ཏིང་ངེ་འཛིན་ཞེས་བཏགས་པ་ཡིན། །ཞེས་གསུངས་པས་སྟོན་ལ། །ཞེས་གསུངས་པས་སྟོན་ལ། །དེའི་དོན་ནི། །ཐབས་ནི་ཀུན་རྫོབ་གྱི་བདེན་པ་དག་པའི་སྒྱུ་མའི་སྐུའོ། །ཤེས་རབ་ནི་དོན་དམ་པའི་བདེན་པ་ལ་གསུངས་ཀྱང་དེ་དང་རོ་གཅིག་པའི་འོད་གསལ་གྱི་ཡེ་ཤེས་སོ། །སྙོམས་པར་འཇུག་པ་ནི་ངོ་བོ་དབྱེར་མེད་དུ་སྦྱོར་བའོ། །དངོས་པོ་ཐམས་ཅད་ནི་བརྟན་པ་དང་གཡོ་བའོ། །དེ་མདོར་བསྡུས་པ་གོང་བུའི་ཚུལ་གྱིས་ཏེ་ལྷའི་སྐུ་ཕྱག་རྒྱ་ཆེན་པོའི་གཟུགས་ཀྱིས་གཅིག་ཏུ་བྱས་ནས་སྣོད་བཅུད་དེའི་དབུས་སུ་ཟུང་འཇུག་རྡོ་རྗེ་འཆང་གི་གཟུགས་སུ་བསྒོམ་པར་བྱའོ། རིམ་པ་འདི་ཉིད་ཀྱིས་སྐད་ཅིག་ཙམ་གྱིས་ཡེ་ཤེས་ཀྱི་སྐུ་རྫོགས་པར་གྱེད་པ་ནི་ཏིང་ངེ་འཛིན་གྱི་ཡན་ལག་
དྲུག་པར་བཤད་དེ་སྒྲོན་གསལ་གྱི་དགོངས་པའོ། སྣོད་བཅུད་ཐམས་ཅད་མདོར་བསྡུས་ཏེ་ཟུང་འཇུག་གི་སྐུར་གཅིག་ཏུ་བྱེད་ཚུལ་ནི་བརྟན་གཡོ་ཐམས་ཅད་ཀྱི་རྩ་བ་ནི་རླུང་དང་སེམས་ཙམ་དུ་ཟད་ཅིང་དེ་ཡང་ཟུང་འཇུག་གི་སྐུར་གཅིག་ཏུ་བསྐྱེད་པའོ། རིམ་པ་འདི་ཉིད་ཅེས་པ་ནི། འོད་གསལ་ལས་ཆུ་ལས་ཉ་ལྡང་གི་ཚུལ་དུ་བཞེངས་པའོ། སྐད་ཅིག་ཙམ་ཞེས་པའི་ཙམ་གྱི་སྒྲས་ནི་འོད་གསལ་ལས་གཞན་གྱིས་བར་ཆོད་པ་གཅོད་དོ། སྐབས་འདིར་སྒྲོན་གསལ་ལས། སྒྱུར་འཕྲུལ་དྲ་བ་ལས་བྱིན་གྱིས་བརླབ་པ་དང་། འོངས་སུ་རྟོགས་པ་དང་། གཟུགས་ཡོངས་སུ་རྫོགས་པའི་ལྷའི་རྣལ་འབྱོར་གསུམ་གསུངས་པ་ཁུངས་སུ་དྲངས་པའི་དང་པོ་གཉིས་ནི་ལྷའི་སྐུར་དཀྲོངས་བསྐྱེད་བྱེད་པ་དང་། ས་བོན་ལ་སོགས་པ་ལས་རིམ་གྱིས་བསྐྱེད་པ་དང་། །ཟུང་འཇུག་གི་སྐུ་བསྐྱེད་པའི་ཡེ་ཤེས་ཀྱི་སྐུ་གསུམ་ཡིན་ལ། དེའི་དང་པོ་གཉིས་ནི་མོས་པ་ཡིད་བྱེད་ཙམ་གྱིས་ལྷའི་སྐུར་བསྐྱེད་པ་ཡིན་གྱི་སྒྱུ་ལུས་གཉིས་ལྟར་ལྷའི་སྐུར་སྐྱེས་པ་མིན་ནོ། སྒྲོན་གསལ་དང་མཐུན་པར་ཀླུ་བྱང་གིས་ཀྱང་། །རྣམ་པར་རྟོག་མེད་ཟབ་པ་སྟེ། །རྒྱ་ཆེ་སངས་རྒྱས་རྣམས་ཀྱི་སྐུ། །འདི་ནི་བདེན་པ་གཉིས་སུ་བཤད། །ཀུན་རྫོབ་དང་ནི་དམ་པའི་དོན། །ཕྱེ་སྟེ་སོ་སོར་ཤེས་ནས་སུ། །དེ་ནས་གཅིག་ཏུ་འདྲེས་བྱས་པའི། །ཟད་མེད་གོ་འཕང་སྒོམ་པར་བྱེད། །ཅེས་གསུངས་སོ། ཁྱད་པར་གསལ་བྱེད་ལས། འོད་གསལ་ཡེ་ཤེས་ཀྱི་རང་བཞིན་གྱི་སྐུར་
བཞེངས་པ་དེ་ཡང་ཏིང་ངེ་འཛིན་ཞེས་བཤད་དོ། །ཞེས་བཤད་པ་ནི་སྒྲོན་གསལ་ལས་བཤད་པ་བཞན་ནོ། དྲིལ་བུ་པས་ཀྱང་། རྣལ་འབྱོར་རྣམ་གསུམ་ཤེས་བྱ་སྟེ། བྱིན་གྱིས་བརླབས་དང་རབ་རྟགས་དང་། བསམ་གྱིས་མི་ཁྱབ་གཟུགས་རྫོགས་པའི། །རྣམ་འབྱོར་སངས་རྒྱས་རྣམས་ཀྱིས་བསྡགས། །གང་ཡང་ཅིག་སྦྱོར་བ་ཡིས། །རང་ཉིད་རྡོ་རྗེ་མཁའ་འགྲོར་འགྱུར། །རྫུས་ཏེ་སྐྱེས་པའི་སེམས་ཅན་བཞིན་ས་བོན་མེད་པར་བསྒོམ་བྱ་སྟེ། །ཞེས་ལྷའི་རྣལ་འབྱོར་གསུམ་བཤད་པ་ནི་སྒྱུ་འཕྲུལ་དྲ་བ་དང་འདྲ་ཞིང་། གང་ཡང་ཞེས་པ་བཞིས་ནི་རྣལ་འབྱོར་གསུམ་པའི་ལྷའི་སྐུ་སྟོན་ལ། སྐད་ཅིག་སྦྱོར་བ་ཡིས་ཞེས་པ་ནི། ཡུད་ཀྱིས་ཡེ་ཤེས་རྫོགས་བྱེད་པ། ཞེས་པ་དང་དོན་འདྲ་བས་རྫོགས་རིམ་པའི་ཡེ་ཤེས་ཀྱི་སྐུ་དང་སྒྱུ་མའི་སྐུ་སྟོན་པ་ཡིན་པས་བསྐྱེད་རིམ་པའི་ལྷ་དཀྲོངས་བསྐྱེད་ལ་སྦྱོར་བ་ནི་འདི་དག་གི་རྣམ་གཞག་གཏན་མ་རྟོགས་པའོ། འདི་བདག་བྱིན་བརླབས་སུ་བཤད་ཅིང་འོད་གསལ་དུ་སྡུང་བ་ཡང་བཤད་པས་རིམ་པ་གསུམ་པའི་སྒྱུ་མའི་སྐུ་ལ་ཤས་ཆེར་སྦྱོར་དགོས་མོད་ཀྱང་རིམ་པ་ལྔ་བའི་སྒྱུ་མའི་སྐུ་མེད་པ་ཡང་མིན་ནོ། དེ་ལྟར་ན། དེ་ལས་འཛིན་པ་ཐོབ་པར་འགྱུར། ཞེས་པའི་རྡོ་རྗེ་འཛིན་པ་རྡོ་རྗེ་འཆང་ལ་རིམ་པ་གསུམ་པའི་སྒྱུ་ལུས་རྡོ་རྗེ་འཆང་གཅིག་དང་ཟུང་འཇུག་གི་རྡོ་རྗེ་འཆང་གཉིས་ཡོད་དོ། ཁ་ཊྭཱཾ་ག་ནི་ལྷ་ཡི་སྐུ། ཤེས་རབ་ཌཱ་མ་རུ་ཡི་སྒྲ། ཉིན་མོ་བཅོམ་
ལྡན་རྡོ་རྗེ་ཅན། རྣལ་འབྱོར་མ་ནི་མཚན་མོར་བརྗོད། ཅེས་པའི་རྐང་བ་བཞིའི་ངེས་དོན་བཤད་པ། ཁ་ཊྭཱཾ་གས་ནི་སྒྱུ་མའི་ལྷ་སྐུ་སྟོན་ལ། ཌཱ་མ་རུའི་སྒྲས་ནི་ཤེས་རབ་འོད་གསལ་སྟོན་ནོ། དེའི་སྔ་མ་ནི་བཅོམ་ལྡན་འདས་རྡོ་རྗེ་ཅན་ཏེ་མཚན་དཔེའི་ངོ་བོར་དམགིས་པས་ཉིན་མོ་སྟེ་ཐབས་སོ། ཕྱི་མ་ནི་རྣལ་འབྱོར་མ་སྟེ་སྣང་བའི་སྤྲོས་པ་བསྡུས་པས་མཚན་མེ་སྟེ་ཤེས་རབ་པོ། མྱ་ངན་འདས་བྱུང་དཔའ་བོ་ནི། དྲུག་པ་སེམས་ཀྱི་སྤྲུལ་པ་སྟེ། ཞེས་པ་ལྭ་བ་པ་དང་། ཤེས་རབ་བསྲུང་བའི་འགྲེལ་བར། །མྱ་ངན་ལས་འདས་པ་འཆི་བ་དང་། དེ་ལས་བྱུང་བ་ནི་དྲི་ཟའི་སེམས་ཅན་བར་དོ་སྟེ། དེ་ཡང་མངོན་ཤེས་ལྔ་དང་མཚན་གྱིས་བརྒྱན་པའི་ལུས་རྣམ་པར་ཤེས་པ་ཙམ་གྱིས་གཟུགས་ཅན་ནོ། དེས་ན་དྲུག་པ་སེམས་ཀྱི་སྤྲུལ་པ་ཞེས་བྱའོ། དཔའ་བོ་ནི་བཅོམ་ལྡན་འདས་ཏེ་དེའི་གཟུགས་སུ་བསྒོམ་པར་བྱའོ། ཡང་ན་མྱ་ངན་ལས་འདས་པ་ནི་ཉོན་མོངས་ཞི་བའི་ཆོས་དབྱངས་སོ། དེ་ལས་བྱུང་བ་ནི་སེམས་ཅན་གྱི་དོན་མཛད་པའི་ཡེ་ཤེས་ཀྱི་སྐུའོ། དྲུག་པ་ནི་ཆོས་ཀྱི་དབྱིངས་དང་། སེམས་ཀྱི་སྤྲུལ་པ་ནི་གདུལ་བྱའི་སེམས་སམ་སེམས་ཅན་ལ་ལྟོས་ནས་སོ་སོར་སྣང་བའོ། །ཞེས་བཤད་དོ། འཆི་བའི་འོད་གསལ་གྱི་རླུང་སེམས་ཙམ་ལས་བར་དོ་གྲུབ་པ་བཞིན་དུ་ལམ་གྱི་འོད་གསལ་གྱི་རླུང་སེམས་ཙམ་ལས་ཧེ་རུ་ཀའི་སྒྱུ་མའི་ལུས་ཡེ་ཤེས་ཀྱི་སྐུར་བཞེངས་ཏེ། སེམས་ཅན་གྱི་དོན་དུ་སྤྲུལ་པ་འགྱེད་པའོ། བཤད་པ་སྔ་མའི་
དྲུག་པ་ནི། རྣམ་ཤེས་ཚོགས་དྲུག་གི་དྲུག་པ་དང་། ཕྱི་མའི་དྲུག་པ་ནི་ཡུལ་དྲུག་གི་དྲུག་པ་ཆོས་ཀྱི་དབྱིངས་ཏེ་མྱ་ངན་ལས་འདས་བཞེས་པའོ། ཇོ་བོ་ཆེན་པོའི་འགྲེལ་པ་ལས། མྱ་ངན་ལས་འདས་པ་འོད་གསལ་བ་དང་། དེ་ལས་བྱུང་བ་ལྷ་རེ་གཉིས་སོ། །དེ་གང་ལ་བརྟེན་ནས་བྱུང་ན་སེམས་གསུམ་རླུང་དང་བཅས་པ་ལས་སྤྲུལ་བའོ། ཞེས་སྣང་མཆེད་ཐོབ་གསུམ་གྱི་སེམས་གསུམ་རླུང་དང་བཅས་པ་ལས་སྒྱུ་མའི་སྐུར་ལངས་པར་བཤད་དེ་སྟོང་བ་བཞི་ལས་དངོས་བརྒྱུན་ཅི་རིགས་པར་བྱུང་བའོ། ཚིག་གི་དོན་ཅུང་ཟད་མི་འདྲ་ཙམ་བཤད་པ་སྣ་མར་བྱུང་ཡང་དོན་ནི་ཕྱི་མ་ལྟར་ཤེས་པར་བྱའོ། བསྐྱེད་རིམ་གྱི་སྐབས་སུ་སྟོང་པར་སྦྱངས་པའི་ངང་ནས་བར་དོ་མཚོན་པའི་ནཱ་དང་ལངས་པའི་གནད་ཀྱང་ཚུལ་དེ་དག་གིས་ཤེས་དགོས་ཏེ། སྒྱུ་མའི་སྐུར་ལྡང་ཚུལ་མཐའ་དག་པ་ནི་ཤིན་ཏུ་རྟོགས་དཀའ་བར་ཡོད་པས་འཕགས་སྐོར་དུ་རྒྱས་པར་གཏན་ལ་ཕབ་པ་ལས་ཤེས་པར་བྱའོ། དགེ་བ་ཆོས་ཀྱི་སྤྲུལ་པ་ནི། ཕག་མོའི་གཟུགས་སུ་བསྟན་པ་ཡིན། ཞེས་པའི་དོན་འགྲེལ་པར། དག་པའི་ཆོས་སྟོང་པ་ཉིད་ཀྱི་ངོ་བོ་ནི་ཕག་མོའི། ཞེས་བཤད་དེ། ཕག་མོས་ནི་འོད་གསལ་མཚོན་པས་དེའི་སྦྲུལ་བར་བཤད་དེ། འོད་གསལ་གྱི་ཡེ་ཤེས་ཉིད་ཧེ་རུ་ཀ་ཡབ་ཡུམ་དུ་ཤར་བའོ། ཤྲཱི་ནི་ཞེས་པ་བཞིའི་རྐང་བ་དང་པོའི་དོན་ནི། མཁའ་འགྲོ་རྒྱ་མཚོ་ལས། ཨེ་ཝཾ་ལ་སོགས་
གཉིས་མེད་པའང་། ཤྲཱི་ཞེས་བྱ་བའི་ཡིག་དེས་བརྗོད། ཅེས་གསུངས་ཏེ། ཤྲཱི་ཞེས་བྱ་བའི་ཡི་གེ་དེས་ནི་བརྗོད་པའི་གཉིས་སུ་མེད་པའི་ཡེ་ཤེས་ནི་མཚོན་པ་ཙམ་སྟེ། དེར་མ་ཟད་ཨེ་ཝཾ་ལ་སོགས་པའང་ཡི་གེ་དེས་བརྗོད་པའི་དོན་ནོ། དེ་ལྟར་ན་ཨེ་ཝཾ་ལ་གཉིས་ཏེ་བདེ་སྟོང་དབྱེར་མེད་ཀྱི་ཨེ་ཝཾ་དང་། བདེན་གཉིས་དབྱེར་མེད་ཀྱི་ཨེ་ཝཾ་གཉིས་ལས་དང་པོ་ནི་བཤད་ཟིན་ལ། གཉིས་པ་ནི། ཨེ་ཡིག་གི་དོན་ཤེས་རབ་དོན་དམ་འོད་གསལ་ལྷན་ཅིག་སྐྱེས་པའི་ཡེ་ཤེས་དང་། ཝཾ་ཡིག་གི་དོན་ཐམབས་ཀུན་རྫོབ་སྒྱུ་མའི་སྐུ་དང་། ཐིག་ལེའི་དོན་སྔ་མ་ཐུགས་དང་ཕྱི་མ་སྐུར་ངོ་བོ་དབྱེར་མེད་དུ་སྦྱོར་བའོ། དེ་ཡང་ཇོ་བོ་ཆེན་པོའི་འགྲེལ་པར། ཤྲཱི་ནི་གཉིས་མེད་ཡེ་ཤེས་ཏེ། ཞེས་པའི་དོན་ཟུང་འཇུག་ཕྱག་རྒྱ་ཆེན་པོ་ལ་བཤད་པ་གཙོ་བོ་ཡིན་མོད་ཀྱང་རིམ་པ་གསུམ་པའི་སྒྱུ་མའི་སྐུ་ཡང་བཟུང་ངོ་། ཧེའི་དོན་ནི་མཁའ་འགྲོ་རྒྱ་མཚོ་ལས། ཧེ་ནི་རྒྱུ་སྟོང་བདག་ཉིད་དེ། རྒྱུའི་བདག་ཉིད་མི་རྟོག་པའོ། རང་བཞིན་ཆོས་བདག་མེད་པ་ཉིད། དེ་ནི་སྟོང་པའི་རྣལ་འབྱོར་གནས། ཞེས་རྒྱུའི་རང་གི་ངོ་བོ་ཉིད་ཀྱིས་གྲུབ་པས་སྟོང་པའི་ཆོས་བདག་མེད་ལ་བཤད་ཅིང་། རུའི་དོན་ཡང་དེ་ཉིད་ལས། བཀོད་པ་གང་དག་བདག་མེད་པ། རྟོག་པའི་དྲ་བ་ཆེན་པོ་ནི། རུ་ཡིག་རྐྱེན་གྱི་བདུད་རྩི་ཅན། །དེ་ནི་བདག་གི་བཀོད་བྲལ་བའོ། །ཞེས་གང་ཟག་གི་བདག་ཏུ་འཛིན་པའི་རྟོག་པ་ལུས་ཅན་སྲིད་པར་འཆིས་པའི་རྐྱེན་གྱི་བདག་ཉིད་ཅན་ཏེ།
དེས་བཀོད་པ་སྟེ་སྒྲོ་བཏགས་པའི་གང་ཟག་གི་བདག་མེད་ལ་བཤད་དེ། རུ་ཡིག་བཀོད་པ་དང་བྲལ་བ། ཞེས་འབྱུང་བ་ལྟར་བཀོད་པའོ། རུ་ནི་ཚོགས་དང་བྲལ་བ་སྟེ། །ཞེས་པ་ལྟར་ན་ལཱུ་ཨི་བའི་འགྲེལ་བ་རྣམས་སུ་རུའི་དོན་བརྗོད་པ་དང་བྲལ་བ་བཤད་པ་ལྟར་བྱས་ཀྱང་ཆོག་གོ །ཡང་དེ་ཉིད་ལས། སླར་བརྗོད་ཀ་ནི་མ་ལུས་པའི། བདག་གིས་གཉིས་སྦྱར་མེད་ཤེས་གང་། གང་ཕྱིར་ཅི་ལའང་མི་གནས་པ། དེ་ཕྱིར་ཀ་ཞེས་བྱ་བར་བརྗོད། ཅེས་གསུངས་ཏེ། རུའི་རྗེས་སུ་སླར་ཡང་བརྗོད་པའི་ཀའི་དོན་ནི། ཤེས་བྱ་མ་ལུས་པའི་ཆོས་རྣམས་ཀྱི་ཡུལ་གྱི་དེ་ཁོ་ན་ཉིད་དང་དེའི་ཡུལ་ཅན་གྱི་ཡེ་ཤེས་གཉིས་རྣམ་པ་མི་མཐུན་པར་བྱར་མེད་པར་སྟོན་པས་མཁྱེན་པ་སྟེ། གང་གི་ཕྱིར་ན། དེ་ཁོ་ན་ཉིད་ལ་འཇུག་པའི་བློ་ནི་བདེན་པའི་དམིགས་གཏད་ཅི་ལའང་མི་གནས་པ་དེའི་ཕྱིར་ཞེས་པའི་དོན་ནོ། དེ་ལྟར་ན་ཧེ་དག་དང་རུས་ཡུལ་བདག་མེད་གཉིས་དང་། ཀས་ཡུལ་ཅན་གྱི་ཡེ་ཤེས་དང་། ཤྲཱིས་དེ་གཉིས་དབྱེར་མི་ཕྱེད་པ་སྟོན་ཏེ། གཉིས་མེད་ཡེ་ཤེས་གྱི་ཕྱོགས་གཅིག་གོ །སྤྱིར་དེ་ཁོ་ན་ཉིད་ཀྱི་ཡུལ་ཅན་གྱི་གཉིས་མེད་ཀྱི་ཡེ་ཤེས་ལ་ལམ་གྱི་ལྷན་ཅིག་སྐྱེས་པའི་བདེ་ཆེན་གྱི་ཡེ་ཤེས་ཀྱིས་ཡུལ་ཅན་བྱས་མ་བྱས་གཉིས་ཡོད་པའི་ཕྱི་མ་ནི་ཐེག་པ་གཞན་དང་རྒྱུ་སྡེ་འོག་མའི་ལྨ་དང་ཡང་ཐུན་མོང་བ་ཡིན་ལ། དང་པོ་ལ་རླུང་དྷཱུ་ཏིར་ཞུགས་གནས་ཐིམ་པ་ལས་བྱུང་མིན་ཀྱང་། བྱང་སེམས་
སྤྱི་བོ་ནས་གསང་གནས་ཀྱི་རྩེ་བར་དུ་ཕབ་ནས་ཕཊ་ཡིག་བསྒོམ་པ་ལ་སོགས་པའི་ཐབས་གྱིས་བཀག་པ་ལས་བྱུང་བ་བསྐྱེད་རིམ་པའི་ལམ་གཅིག་དང་། སྲོག་དྷཱུ་ཏཱིར་ཐིམ་པ་ལས་བྱུང་བའི་རྫོགས་རིམ་པའི་ལྷན་སྐྱེས་གཅིག་སྟེ་གཉིས་ཡོད་དོ། དེའི་སྔ་མ་གཉིས་ནི་སྤྱི་དོན་གྱི་གཉིས་མེད་ཡེ་ཤེས་ཡིན་ལ། གསུམ་པ་ལ་ནི་སྦས་དོན་དང་། མཐར་ཐུག་གི་དོན་གྱི་གཉིས་མེད་ཡེ་ཤེས་གཉིད་ཡོད་པ་རྣམས་ལེགས་པར་དམིགས་ཕྱེད་པ་ཤིན་ཏུ་གལ་ཆེའོ། ཁ་ཊཱཾ་ག་ནི། ཞེས་པ་ནས། གང་དུའང་མི་གནས་པའོ། ཞེས་པའི་བར་རྣམས་ལཱུ་ཨི་བའི་འགྲེལ་བ་གསུམ་དུ་བསྐྱེད་རིམ་གྱི་དག་པ་དྲན་པའི་སྐབས་སུ་སྦྱར་མོད་ཀྱང་། རྫོགས་རིམ་གྱི་ཆ་ལ་བཤད་དུ་མེད་པ་ནི་མིན་ཏེ། ཇོ་བོའི་འགྲེལ་བཤད་པ་བཞིན་ནོ། །ཁ་ཊཱཾ་ག་ནི་ལྷ་ཡི་སྐུ། ཞེས་པ་ནས། ཀ་ནི་གང་དུའང་མི་གནས་པའོ། ཞེས་པའི་བར་ལཱུ་ཨི་པས་སྒྲུབ་ཐབས་སུ་བཀོད་པ་ནི་ཀུན་སྤྱོད་ན་ཚང་བར་ཡོད་ཀྱང་། མྱ་ངན་འདས་བྱང་ཞེས་པའི་རྐང་པ་གཉིས་ལ་འགྱུར་མི་འདྲ་བ་མང་དུ་སྣང་། དེ་གཉིས་མ་གཏོགས་པ་མངོན་བརྗོད་ལས་ཀྱང་གསུངས་སོ། ལྔ་པ་དེ་ལ་བརྟེན་ནས་འབྲས་བུ་མངོན་དུ་བྱེད་པའི་ཚུལ་ནི། སྔར་བཤད་པའི་སློབ་པའི་ཟུང་འཇུག་གི་ཏིང་ངེ་འཛིན་དང་རྫོགས་རིམ་པའི་སྦྱོང་བ་རྣམས་ལ་གོམས་པར་བྱས་པས་མི་སློབ་པའི་ཟུང་འཇུག་གི་མཆོག་གི་དངོས་གྲུབ་འགྲུབ་ལ། དེ་ཡང་མཐར་ཐུག་འགྲུབ་པར་ཉེ་བ་ན་ཇི་ལྟར་འོང་བའི་ཚུལ་ནི། རྡོ་རྗེ་གུར་ལས། ཉི་མ་གཅིག་གིས་འགྲུབ་འགྱུར་རམ། ཆོ་གས་ཉི་
མ་གཉིས་ནའམ། །ཉིན་གསུམ་རབ་ཏུ་སྦྱར་བས་སམ། །དེ་བཞིན་ཉི་མ་བཞི་ཡིས་སམ། །ཉིན་ལྔར་རབ་ཏུ་སྦྱར་བ་ཡིས། འགྲུབ་འགྱུར་འདི་ལ་ཐེ་ཚོམ་མེད། མེ་ཏོག་སོགས་པས་མཆོད་བྱས་ནས་བསམ་གཏན་གནས་སུ་རབ་འདུག་སྟེ། ཕྱག་རྒྱར་ལྷན་ཅིག་རབ་ཞུགས་ནས། །རྡོ་རྗེ་སྦྱོར་བ་ཡང་དག་བརྩམ། །རྡོ་རྗེ་ཉི་མ་ནུབ་ནས་ནི། །སྦྱོར་བ་འདི་ནི་རབ་བརྩམས་ན། སྐྱ་རེངས་འཆར་བའི་དུས་སུ་ནི། །འགྲུབ་འགྱུར་འདི་ལ་ཐེ་ཚོམ་མེད། །ཅེས་པ་འདིས་སྟོན་ལ། ལུང་དེའི་དོན་མན་སྙེད། ཟླ་བ་དྲུག་ཏུ་རིག་མའི་བརྟུལ་ཞུགས་སྤྱད་ནས་ཉི་མ་བདུན་རང་གི་ལྷ་བལྟ་བར་བྱས་ཏེ། སྦྱོར་བ་རབ་ཏུ་གྱུར་པར་ཤེས་ཤིང་གང་གི་ཚེ་ཉིན་མཚན་དུ་མར་མེའི་འོད་ཀྱི་རྒྱུན་བཞིན་དུ་རྟག་ཏུ་དེ་ཁོ་ན་ཉིད་ཀྱི་རྣལ་འབྱོར་ལ་མངོན་དུ་ཕྱོགས་པར་ནུས་པ་དེའི་ཚེ་ལྷན་ཅིག་སྤྱོད་པའི་ཕྱག་རྒྱ་དང་ལྷན་ཅིག་རྡོ་རྗེ་སེམས་དཔའ་ལ་སོགས་པ་རྣམ་ལས་གང་ཡང་རུང་བའི་རྣལ་འབྱོར་མངོན་དུ་བྱས་ཏེ། ཐོ་རངས་ཀྱི་ཐུན་ནས་བརྩམས་ལ་རྫོགས་པའི་རིམ་པའི་རྣལ་འབྱོར་ཁམས་གསུམ་པ་ཐམས་ཅད་གཅིག་པའི་རང་བཞིན་མཉམ་པར་བཞག་པ་དང་མཉམ་པ་མ་བཞག་པ་གཅིག་པའི་ངོ་བོར་ལྷག་པར་མོས་ནས་རྡོ་རྗེས་རྒྱས་བཏབ་པའི་ཕྱག་རྒྱ་དང་རོ་མཉམ་པ་ཉམས་སུ་མྱོང་ཞིང་། མར་མེའི་འོད་ཀྱི་རྒྱུན་ལྟ་བུར་རྟག་པར་ཉིད་མཚན་ཐོག་ཐག་གནས་པར་བྱའོ། དེ་ནས་རབ་ཀྱི་མཐར་ཐུག་པར་སོན་པའི་
དགའ་བ་བཞིའི་དེ་ཁོ་ན་ཉིད་མངོན་དུ་བྱས་པ་ལས། སྐྱ་རེངས་འཆར་བའི་དུས་སུ་འགྲུབ་སྟེ། སྒྲུབ་ཐབས་མཆོག་རྣམས་ཀྱིས་ཞེས་བཤད་པའི་ཕྱིར། མན་ངག་ཇི་ལྟ་བར་ཕྱ་རྒྱ་ཆེན་པོ་འགྲུབ་པའི་ཉེ་བའི་ཉིན་ཞག་ལ་སྟེ། བྱང་ཆུབ་ཀྱི་སེམས་ཟླ་བའི་ཆ་མཐའ་དག་ཡོངས་སུ་རྫོགས་པའི་ཕྱིར། སྐྱ་རེངས་ཤར་བའི་དུས་སུ་ཤིན་ཏུ་ཡོངས་སུ་དག་པའི་ཡེ་ཤེས་ཀྱི་བདུད་རྩི་ཡོངས་སུ་རྫོགས་པའི་ཕྱག་རྒྱ་ཆེན་པོ་གྲུབ་པ་རྡོ་རྗེ་འཛིན་པའོ་ཞེས་བཤད་དོ། རྡོ་རྗེ་ཉི་མ་ཞེས་པ་བཞི་འདུས་པ་ལས་ཀྱང་འབྱུང་ལ། དེའི་དོན་ནི་སྒྲོན་གསལ་ལས། ཕྱི་ནང་གི་བྱང་ཆུབ་པའི་རིམ་པ་གཉིས་ལ་བཤད་པའི་དང་པོ་ནི། རྡོ་རྗེ་ཉི་མ་ནི་ཡོངས་སུ་གྲགས་པའི་ཉི་མ་ཉིད་དོ། དེ་ནུབ་པ་ནི་དམར་ཐག་ཆད་པའི་མཚམས་སུ་ཡོ་བྱད་ཅི་རྙེད་པས་བླ་མ་མཉེས་པར་བྱ་བར་གསུངས་ཏེ་ཚོགས་ཀྱི་མཆོད་པའོ། དེ་ནས་བླ་མའི་དྲིན་གྱིས་མཚན་ཕྱེད་ན། ཕྱག་རྒྱལ་བརྟེན་ནས་དབང་བསྐུར་བ་ཐོབ་ནས་སྐྱ་རེངས་འཆར་ཁའི་དུས་སུ་འོད་གསལ་ཀྱི་རིམ་པའི་ལུང་ཕོག་པས་ཀྱང་མཆོག་འགྲུབ་བོ། ནང་གི་མངོན་བྱང་གི་རིམ་པར་ལྟར་བཤད་ན། རྡོ་རྗེ་ཉི་མ་ནི་ཐབས་ཀྱི་ཡེ་ཤེས་སྙོམས་པར་འཇུག་པའི་མཚན་ཉིད་ཅན་དུ་བྱུང་བའོ། ནུབ་པ་ནི་དེ་འགགས་པ་ལ་བཤད་དེ། ཐབས་ཀྱི་ཡེ་ཤེས་ནི་སྟོན་དུས་ཀྱ་སྤྲིན་མེད་པའི་ནམ་མཁའ་གཡའ་དག་པ་ལ་ཉི་མའི་འོད་ཤར་བ་ལྟ་བུའི་སྣང་བ་མཆེད་པའོ། དེས་མཚོན་ནས་
ཤེས་རབ་ཀྱི་ངོ་བོ་ཉིད་ཀྱི་སྣང་བའི་ཡེ་ཤེས་ཀྱང་ནུབ་ཅིང་འགགས་པ་དང་། འོད་གསལ་གྱི་སྔོན་དུ་འགྲོ་བས་དེ་བསྒྲུབ་པའི་སྣང་བ་ཉེར་ཐོབ་ཀྱི་སྦྱོར་བ་འདི་ནི་བརྩམ་པ་སྡེ་འབྱུང་བའོ། སྐྱ་རེངས་འཆར་བ་ནི་མ་རིག་པ་ཉེར་ཐོབ་སྟེ། དེ་འདས་པའི་དུས་སུ་སྒྲུབ་པ་པོས་སྟོང་པ་བཞི་རིམ་གྱིས་མངོན་དུ་བྱེད་པས་ཕྱག་ཆེན་གྱི་དངོས་གྲུབ་བར་གསུངས་ཏེ། དེའི་ཚེ་འོད་གསལ་བ་བསྒོམས་པས་གཉིས་སྣང་འཁྲུལ་བའི་བག་ཆགས་སྦྱངས་ནས་ཐོ་རངས་ཆོས་ཀྱི་སྐུ་མཐར་ཐུག་པ་མངོན་དུ་གྱུར་པའི་ཚེ་སློབ་པའི་ཟུང་འཇུག་སྒྱུ་མའི་སྐུ་མི་སློབ་པའི་ཟུང་འཇུག་སྒྱུ་མའི་སྐུར་འགྱུར་ཞིང་འཁོར་བ་ཇི་སྲིད་པར་སྐུ་དེ་གཉིས་ལས་མི་གཡོ་བར་བཞུགས་སོ། དེ་འདྲ་བའི་དག་པ་གཉིས་ལྡན་གྱི་ཡུལ་གྱི་འོད་གསལ་ནི་འདུས་མ་བྱས་པས་ཆོས་ཀྱི་སྐུ་དང་། ཡུལ་ཅན་གྱི་འོད་གསལ་ནི་ཡེ་ཤེས་ཆོས་ཀྱི་སྐུ་དང་། བདེ་བ་ཆེན་པོའི་སྐུ་ཞེས་ཀྱང་བྱའོ། དེའི་རྟེན་གཟུགས་ཀྱི་སྐུ་རླུང་སེམས་ཙམ་ལས་གྲུབ་པ་ནི་ལོངས་སྐུ་ཡིན་ལ། སྐུ་དེ་གཉིས་ངོ་བོ་གཅིག་ལ་ལྡོག་པ་ཐ་དད་པ་ཙམ་ཡིན་པས་གཟུགས་སྐུ་དེ་ལ་གཉིས་སུ་མེད་པའི་ཡེ་ཤེས་ཀྱི་སྐུ་ཞེས་ལན་དུ་མར་གསུངས་པས། གཟུགས་སྐུ་སངས་རྒྱས་ཀྱི་བསམ་བསྡུས་པར་གདུལ་བྱའི་རྒྱུད་ཀྱིས་བསྡུས་པ་དང་། ཤེས་པ་ལས་ངོ་བོ་ཐ་དད་པའི་བེམ་པོར་འདོད་པ་དང་། འབྲས་བུ་སྐབས་སུ་ཡེ་ཤེས་མེད་པ་སོགས་འཕགས་པ་ཡབ་སྲས་ཀྱི་བཞེད་པར་སྨྲ་
བ་ནི་ལེགས་པར་སྨྲ་བ་མིན་པར་ཤེས་པར་བྱའོ། དེ་འདྲ་བའི་ཟུང་འཇུག་གི་སྐུ་དེས་མཆོག་གི་སྤྲུལ་པའི་སྐུ་ལ་སོགས་པའི་སྤྲུལ་པ་དུ་མ་ཞིག་མཛད་དོ། སྭགས་ཀྱི་གཞུང་གཞན་ནས་ཡེ་ཤེས་ཀྱི་རྟེན་གྱི་གཟུགས་སྐུ་སྤྲུལ་སྐུ་དང་ཐུགས་ཆོས་སྐུ་དང་། གསུང་ལོངས་སྐུར་མང་དུ་བཤད་པའི་ལུགས་ལ་ཡང་སྤྲུལ་པ་ལ་འདིས་སྤྲུལ་པ་དང་། འདི་སྤྲུལ་པའི་བྱེད་པ་པོ་དང་ལས་གཉིས་སུ་ཡོད་ལ། བྱེད་པ་པོའི་སྐུ་འདིས་ཆོས་ལ་རྫོགས་བར་ལོངས་སྤྱོད་པའི་བྱེད་པ་པོའི་ལོངས་སྐུ་དང་། བྱ་བའི་ཐབས་འདིས་ལོངས་སྤྱོད་པའི་གསུང་ལ་ལོགས་སྐུར་བཤད་པ་གཉིས་ཡོད་པར་ཤེས་པར་བྱའོ། དྲིལ་བུ་ཞབས་ཀྱིས། འདི་ནི་ངོ་བོ་ཉིད་སྐུ་སྟེ། སྟོང་ཉིད་སྙིང་རྗེ་གཉིས་མེད་པ། མ་ནིང་ཞེས་བར་བརྗོད་པ་སྟེ། ཁ་ཅིག་ཟུང་འཇུག་ཅེས་བྱར་བརྗོད། སྒྲིབ་པ་དང་བྲལ་ཆོས་སྐུ་འདིར། ཞེས་གསུངས་པའི་སྟོང་པ་དང་སྙིང་རྗེ་ནི། དེ་ཉིད་ཀྱིས། དེ་བཞིན་ཡང་དག་མཐའ་ལ་ཡང་། རྣལ་འབྱོར་པ་ནི་ཡང་དག་འཇུག །ཀུན་ཀྱང་སྣང་བ་མེད་པའི་ཚེ། སྙིང་རྗེ་དང་ནི་རོ་གཅིག་ཡིད། །འདི་ནི་སྐད་ཅིག་གིས་འཁྱུད་ཅིང་། སྟོང་པ་ཉིད་བཞིན་འཇུག་པར་བྱེད། །ཅེས་དང་། མི་འགྱུར་བདེ་ཆེན་ཡེ་ཤེས་ནི། །ཐབས་ཏེ་ཐུགས་རྗེའི་བདག་ཉིད་ཅན། །ཞེས་གསུངས་པས་གཉིས་སྣང་མེད་པར་ཡང་དག་པའི་འོད་གསལ་སྟོང་པ་ཉིད་ཇི་འདྲ་བ་དེ་བཞིན་དུ་བཞུགས་པའི་སྙིང་རྗེ་བདེ་ཆེན་གྱི་ཡེ་ཤེས་ལ་ངོ་བོ་ཉིད་ཀྱི་
སྐུར་བཤད་དེ། ཕར་ཕྱིན་ཀྱི་ཐེག་པ་ནས་དྲི་བྲལ་གྱི་དེ་བཞིན་ཉིད་ལ་ངོ་བོ་ཉིད་སྐུར་བཤད་པ་ལ་ནི་ཆོས་སྐུ་ཞེས་གསུངས་སོ། ལམ་འདིས་མཆོག་གི་དངོས་གྲུབ་ཐོག་མར་མངོན་དུ་བྱས་པའི་ཚེ་ལྟས་ཇི་ལྟར་འོད་བ་ནི། འདིའི་བཤད་རྒྱུད་སམྦུ་ཊ་ལས། དེ་ནས་གང་དུ་རིག་མའི་སྐྱེས་བུ་གྲུབ་པ་དེར་འདི་ལྟ་བུའི་ཕུན་སུམ་ཚོགས་པ་འབྱུང་སྟེ། ས་འདི་དགའ་ཟིང་མགུལ་རངས་པས་རྣམ་པ་དྲུག་ཏུ་གཡོས་ནས། བདུད་ཀྱི་གནས་ཆ་ལང་ལྟ་བུའི་སྒྲ་གྲགས་པ་དང་། ཕྱོགས་བཅུར་བསྐལ་བའི་མེ་ལྟ་བུའི་སྐར་མདའ་ལྟུང་བ་དང་། རྒྱ་མཚོ་ཆེན་པོ་འཁྲུགས་པའི་སྒྲ་དང་། ཐམས་ཅད་དུ་གནམ་རྡོ་ལྷུང་བ་དང་། དེ་ཉིད་དུ་བསྐལ་བའི་མེའི་གཟུགས་ལྟ་བུའི་ཡེ་ཤེས་ཀྱི་སྣང་བ་འབར་བ་དང་། ཕྱག་རྒྱའི་སྐྱེ་གནས་ཀྱི་སྙིང་པོར་ཁམས་གསུམ་ཐམས་ཅད་སྣང་བ་དང་། ཚོངས་པ་དང་ཁྱབ་འཇུག་དང་ཆུ་བདག་དང་བརྒྱ་བྱིན་དང་དྲག་པོ་དང་མེ་དང་སྟོབས་བཟང་པོ་དང་ཉི་མ་དང་ཟླ་བ་དང་གནོད་སྦྱིན་དང་གྲུབ་པ་དང་དྲི་ཟ་དང་མིའམ་ཅི་དང་ལྟོ་འཕྱེ་དང་ལྷའི་མཆོག་དང་རིག་པ་འཛིན་པ་དང་ཆུས་བྱུང་ལ་སོགས་པ་གང་ཞིག་གཞན་ཡང་སུམ་ཅུ་རྩ་གསུམ་དུ་གནས་པའི་ལྷ་རྣམས་དེར་འོངས་ནས་ཡང་དག་པར་དགའ་བས་མེ་ཏོག་གིས་མཆོད་པ་བྱེད་དོ། པི་ཝཾ་དང་། གླིང་བུ་དང་། ཀུ་མུན་དྷ་དང་། ཏ་མྦུ་ར་དང་། དུང་དང་། ཟངས་དུང་གི་སྒྲ་དང་། ནན་
ཏི་དང་། པ་ཊ་ཧ་དང་། རྫ་རྔས་ནམ་མཁའ་གནས་ཏེ་དེས་རྟག་ཏུ་མཆོད་པར་བྱེད་དོ། ལྷའི་བུ་མོ་དང་རིག་པ་འཛིན་པའི་རྒྱལ་པོའི་བུ་མོ་ཐམས་ཅད་ཀྱིས་གར་བྱེད་པ་དང་། སིལ་སྙན་དུ་མ་བྱེད་པ་དང་། མི་འམ་མི་དང་། གནོད་སྦྱིན་གྱིས་གླུ་ལེན་པར་བྱེད་ཅིང་གར་བྱད་པ་དང་། དེ་ལ་དགའ་བ་དང་བཅས་པས་རྒྱལ་བ་རྒྱལ་བ་ཞེས་རྟག་ཏུ་རོལ་པར་བྱེད་པ་དང་། གང་ཞིག་གྲུབ་པ་ནམ་མཁར་གནས་པའི་ལྷ་རྣམས་ཀྱིས་ནི་ལེགས་སོའི་རྣམ་པ་རབ་ཏུ་གསོལ་བར་མཛད་དོ། གང་ཞིག་དགའ་ལྡན་དུ་གནས་པའི་ལྷ་རབ་མཆོག་དང་། གང་ཞིག་ལྷའི་བུ་མོ་དང་། རིག་པ་འཛིན་པ་དང་། འོག་མིན་གྱི་བར་དུ་འོངས་ནས་ཕྱག་འཚལ་ཞིང་མེ་ཏོག་སྣ་ཚོགས་ཀྱི་རྣམ་པའི་དྲི་སྣ་ཚོགས་ཀྱི་དྲིའི་ཆར་དང་། བདུག་པ་སྣ་ཚོགས་ཀྱི་ཁྱད་པར་གྱིས་གུས་པའི་ཚུལ་གྱིས་མཆོད་པར་བྱེད་དོ། གཞན་ཡང་ཁྱོད་ལ་རྒྱས་པར་བཤད་པའི་ཚུལ་གྱི་ཅི་ཞིག་དགོས་ཏེ། བསྒྲུབ་པར་བྱ་བའི་བསོད་ནམས་ཀྱིས་ཁམས་གསུམ་དུ་སྐྱེས་པའི་མཆོད་པ་དེ་རྣམས་ཀྱིས་མཆོད་པར་བྱེད་དོ། ཞེས་གསུངས་པ་ལྟར་ཤེས་པར་བྱའོ། འདི་ལ་ཁ་སྦྱོར་གྱི་འགྲེལ་པ་རིན་ཆེན་འཕྲེང་བར། འཇིག་རྟེན་པའི་དངོས་གྲུབ་གྲུབ་པའི་མཚན་མར་བཤད་ཀྱང་། འགྲེལ་པ་དྲན་པའི་སྣང་བ་དང་མན་སྙར། མཆོག་གྲུབ་པའི་མཚན་མར་བཤད་པ་ལེགས་སོ། ཁ་སྦྱོར་དགོས་འགྱུར་དང་། འགྲེལ་པ་གཞན་གཉིས་སུ་རིག་པའི་སྐྱེས་བུ་ཞེས་འབྱུང་ལ། མན་སྙེ་དང་འབྲོག་
འགྱུར་དུ་རིག་མའི་སྐྱེས་བུ་ཞེས་འབྱུང་བ་ནི་སྐད་དོད་ཀྱི་སྟེང་ནས་དེ་གཉིས་ཀ་ལ་བསྒྱུར་དུ་རུང་བའོ། ཕྱི་མའི་དོན་ནི་འཚང་རྒྱ་བའི་རིག་མ་དང་ལྷན་ཅིག་པའི་སྐྱེས་བུ་ལ་བཤད་དོ། འོན་ཀྱང་སྒྲོན་གསལ་ལས། རིག་པ་ཆེན་པོ་ནི་དོན་དམ་པའི་བདེན་པའོ། སྐྱེས་བུ་ནི་ཀུན་རྫོབ་གྱི་བདེན་པའོ། དེ་དག་ལས་བསྐྱེད་པ་རྣམ་པ་ཐམས་ཅད་ཀྱི་མཆོག་དང་ལྡན་པ་ལ་སོགས་པ་དང་བཅས་པའི་སྐྱེས་བུ་ལྟ་བུའི་ལྷའི་སྐུ་ནི་རིག་པ་ཆེན་པོའི་སྐྱེས་བུའི་གཟུགས་ཏེ་རྡོ་རྗེ་འཆང་ཆེན་པོའོ། ཞེས་བཤད་པ་ལྟར་བྱའོ། འགོས་འགྱུར་ལས། ས་ཆེན་པོ་འདི་རྣམ་པ་དྲུག་ཏུ་གཡོས་པར་འགྱུར་ཞིང་ཡིད་དུ་འོང་བའི་སྒྲ་བསྒྲགས་ལ་ཞེས་འབྱུང་བ་ལྟར་དགའ་མགུ་སོགས་ནི་དགའ་བའི་སྒྲ་བསྒྲགས་པ་ལ་བྱའོ། གནམ་རྡོ་ལྟུང་བ་ནི། བདུད་ཀྱི་གནས་ཀུན་ཏུ་རྡོ་ཆར་འབབ་པའོ། འགོས་འགྱུར་ལས། རྒྱག་རྒྱའི་སྙིང་པོ་ཅན་གྱི་ཡེ་ཤེས་ཀྱི་མེ་འབར་བ་བསྒྱིངས་ཤིང་ཁམས་གསུམ་པོ་སྣང་བར་མཛད་དེ། ཞེས་འབྱུང་ལ། མན་སྙེར་ཕྱག་རྒྱའི་སྙིང་པོ་ནི་ཕྱག་རྒྱ་དང་ལྡན་པ་ལ་བཤད་པའི་གྲུབ་པའི་སྐྱེས་བུ་ལས་ཡེ་ཤེས་ཀྱི་མེ་འཕྲོས་པའོ། ཆུས་བྱུང་ནི། འགོས་ཀྱིས་མཚོ་སྨན་དུ་བསྒྱུར་རོ། འགོས་འགྱུར་ལས། འོག་མིན་གྱི་མཐར་ཐུག་པའི་ལྷ་རྣམས་ཀྱང་འོངས་ནས། ཞེས་འབྱུང་ལ། དེ་རྣམས་མཆོག་གྲུབ་པའི་དྲུང་དུ་འོངས་པའི་གནས་ནི་སངས་རྒྱས་པ་དེ་འདོད་པའི་མིའི་རྟེན་ལ་སྔགས་ཀྱི་ལམ་གྱིས་ཚེ་གཅིག་ལ་སངས་རྒྱས་པ་ལ་དགོངས་
པས་འདོད་ཁམས་སུ་འོངས་པའོ། འགོས་འགྱུར་ལས། སྒྲུབ་པ་པོའི་བསོད་ནམས་ཀྱིས་ཞེས་འབྱུང་བ་ནི་མན་སྙེར་བསྒྲུབ་བྱའི་བསོད་ནམས་ཀྱིས་ཞེས་པ་ལ་བསྒྲུབ་བྱ་ནི་རྡོ་རྗེ་སེམས་དཔའོ་ཞེས་བསྒྲུབ་བྱ་ལ་བཤད་པ་དང་གནད་གཅིག་སྟེ། སྒྲུབ་པ་པོས་རྡོར་སེམས་ཐོབ་པའི་བསོད་ནམས་སོ། འགོས་འགྱུར་ལས། ཁམས་གསུམ་ན་ཡོད་པའི་མཆོད་པ་ཐམས་ཅད་ཀྱིས་ཞེས་འབྱུང་བ་བདེ་ལ་གཟུགས་མེད་ཁམས་པས་མཆོད་ཚུལ་ནི། མན་སྙེ་ལས། ཁམས་དེ་ལ་གཟུགས་མེད་ཅེས་པ་ནི། གཟུགས་ཆུང་པ་ལ་གཟུགས་མེད་ཅེས་དགག་སྒྲ་བྱས་མའོ། ཞེས་འདོད་པ་དང་། ཁམས་གོང་མ་གཉིས་ཀྱི་སེམས་ཅན་རྣམས་དགོས་པའི་དབང་གིས་འདོད་ཁམས་སུ་འོངས་པ་ན། ཐོག་མ་མེད་པའི་བག་ཆགས་སད་ནས་བུད་མེད་དང་སྐྱེས་པའི་དབང་པོ་ཅན་དུང་གྱུར་ཏེ་ཚངས་མ་དང་ཚངས་པ་བཞིན་ནོ། འདོད་པ་འདི་མང་པོ་རིག་པ་རྣམས་གསུངས་སོ་ཞེས་ལུགས་དེ་རྒྱ་གར་བའི་མང་པོ་མཁྱེན་པ་རྣམས་གསུངས་པར་བཤད་དོ། ཚངས་མ་བཞིན་ཞེས་པ་ནི་སྔགས་ཀྱི་གཞུང་མང་པོ་ལས་ཚངས་པ་ལ་ཕོ་མོ་གཉིས་བཤད་ལ། དེ་གཉིས་གཟུགས་ཁམས་པ་ཡིན་པས་སོ་སྙམ་པའོ། མངོན་པའི་ཕྱོགས་ཀྱི་གཞུང་དུ་ཡང་གཟུགས་མེད་ཁམས་ཞེས་པ་སྒྲ་ཇི་བཞིན་དུ་འདོད་པ་དང་། བུ་མོ་རྐེད་པ་ཕྲ་བ་ལ་རྐེད་མེད་མ་ཞེས་པ་ལྟ་ཆུང་བ་ལ་དགག་སྒྲ་སྦྱར་བ་ཡིན་ཞེས་འདོད་པ་གཉིས་བཤད་དོ། ལམ་གཞན་གྱི་མཐར་བླ་མེད་ཀྱི་ལམ་
འགའ་ཞིག་བསྣན་ནས་འོག་མིན་དུ་འཚང་རྒྱ་བ་སོགས་ཀྱི་བཤད་པ་ནི་གཞན་དུ་རྒྱས་པར་བཤད་པ་ལས་ཤེས་པར་བྱའོ། དེ་ལྟར་ན་ཧེ་རུ་ཀ་མངོན་འབྱུང་ལས། མི་སྨྲ་ཆུ་ཡི་བྱ་བ་མེད། དུས་དང་ཚོད་ལས་རྣམ་པར་གྲོལ། གཙང་སྦྲའི་སྤྱོད་པ་རྣམ་པར་སྤངས། དེ་ཡིས་གྲོང་བའི་ཆོས་སྤྱོད་དེ། རྩད་ལྡན་དུས་སུ་དངོས་གྲུབ་འགྱུར། ཞེས་དང་། རྩོད་ལྡན་ཡོན་ཏན་བཞི་ཉིད་དེ། དངོས་གྲུབ་ཉིད་དུ་ཐེ་ཚོམ་མེད། ཅེས་ལམ་འདིས་དངོས་གྲུབ་འགྲུབ་པ་ལ་རྫོགས་ལྡན་ལ་སོགས་པའི་དུས་གཞན་གསུམ་ལས་རྩོད་ལྡན་གྱི་དུས་ཉིད་བསྔགས་ལ། དེས་ན་སམྦུ་ཊ་ལས། དེ་ལྟར་དཀའ་བ་མེད་པའི་ཐབས། ཀུན་མཁྱེན་ཐུགས་རྗེ་བཅས་པས་བསྔགས། །ཤིན་ཏུ་བདེ་བའི་སྒྲུབ་པའི་ཐབས། །བརྟུལ་ཞུགས་སྤྱོད་པ་དཀའ་ཐུབ་སྤངས། །དེ་ལྟར་བདུད་རྩིའི་རོ་རྙེད་ནས། །ཉོན་མོངས་གཞོམ་ཕྱིར་མི་བརྩོན་གང་། །ཇི་ལྟར་དཀའ་ཐུབ་བརྟུལ་ཞུགས་དེས། །སངས་རྒྱས་ཉིད་དུ་བྱ་བར་ནུས། །རང་གི་བདེ་བའི་ཐབས་རྙེད་ནས། །གང་ཞིག་བདག་དོན་མི་བྱེད་པ། །རྨོངས་པའི་བདག་ཉིད་དེ་ཡི་ནི། །སངས་རྒྱས་ཉིད་དུ་གང་དུ་འགྱུར། །ཡང་ནི་དེ་ནི་ཤེས་མི་འགྱུར། །འདིས་ནི་སངས་རྒྱས་ཐམས་ཅད་དུ། །སྐྱེ་བོ་དམ་པས་མཐོང་བ་ཉིད། །ལམ་ཀུན་རྨི་ལམ་སྒྱུ་མ་ལྟར། །སངས་རྒྱས་ཆོས་ལ་མི་ཤེས་པས། །འཁོར་བའི་རྒྱ་མཚོའི་ཕ་རོལ་ཏུ། །ཇི་སྲིད་མ་ཕྱིན་བར་དུ་བྱ། །ཞེས་འབྲོག་འགྱུར་དུ་འབྱུང་བའི་ཡང་ནི་
ཞེས་པ་མན་ཆད་ལ། འགོས་འགྱུར་ལས། དེ་ནི་སླར་ཡང་གར་འགྲོ་བ། དེ་ཡིས་ཤེས་པ་མི་འགྱུར་རོ། དེས་ན་བདེ་བ་སྒྲུབ་པའི་ཐབས། ཚོགས་མེད་པར་ནི་རྙེད་པ་ཡི། སྐྱེས་བོ་མཛེས་པ་ངེས་པར་འདིར། །ཐམས་ཅད་སྒྱུ་མ་རྨི་ལམ་བཞིན། །སངས་རྒྱས་ཉིད་དུ་བལྟས་ནས་ནི། འཁོག་བའི་རྒྱ་མཚོའི་འཇིགས་པ་ལས། ཇི་སྲིད་མ་རྒྱལ་པར་དུ་ནི། སངས་རྒྱས་བཀའ་ཡི་ཆོས་སྤྱད་བྱ། ཞེས་བྱུང་ངོ་། དེ་རྣམས་ཀྱི་དོན་ནི་བྱ་དཀའ་བས་ཡིད་གདུངས་པའི་བཀའ་སྤྱོད་ཀྱི་བརྟུལ་ཞུགས་རྣམས་དོར་ནས་འདོད་ཡོན་ལ་རང་བཞིན་ཤེས་པའི་སྒོ་ནས་ལོངས་སྤྱོད་པའི་ཤིན་ཏུ་བདེ་བས་བྱང་ཆུབ་སྒྲུབ་པའི་ལམ་འདི་འདྲ་བསྙེད་པའི་དུས་སུ་དེ་ལ་བརྩོན་པར་མི་བྱེད་ན་བདག་ལས་རྨོངས་པ་སུ་ཞིག་ཡོད་སྙམ་པ་དང་། དེ་རེས་འདི་ལམ་འབད་ན་དེ་ནས་བདག་ངན་འགྲོ་ལ་སོགས་པ་གར་འགྲོ་བ་མི་ཤེས་སོ་སྙམ་དུ་བསམས་ལ། བདེ་བ་ཁྱད་པར་ཅན་སྒོ་དུ་མས་བསྐྱེད་དེ་བདག་མེད་པའི་དེ་ཁོ་ན་ཉིད་བསྒོམ་པའི་ཚུལ་དང་། བརྟན་གཡོ་ཐམས་ཅད་ཀྱི་རྩ་བ་རླུང་སེམས་ཙམ་ལས་སྒྱུ་མའི་སྐུར་བསྐྱེད་པའི་སྒོ་ནས་ཐམས་ཅད་ཧེ་རུ་ཀའི་རང་བཞིན་དུ་བལྟ་བ་ལ་འབད་དེ་འཁོར་བའི་བག་ཆགས་འཁྲུལ་བ་ཐམས་ཅད་སྦྱོང་བའི་ཁུར་གྱིས་མི་ངལ་བར་བྱའོ། དེའི་ཕྱིར་ལམ་ཐུན་མོང་བས་ལེགས་པར་རྒྱུད་སྦྱངས་པ་དང་། རྣམ་པར་དག་པའི་དབང་བསྐུར་བའི་དུས་སུ་ཁས་བླངས་པའི་དམ་ཚིག་དང་སྡོམ་པ་བསྲུང་བ་བཞིར་བྱས་ལ། ལམ་རིམ་པ་དང་པོ་ཐུན་སོ་སོལ་བསྐྱངས་
པའི་མཐར་ཕྱི་དང་ནང་གི་བདེ་བ་བསྐྱེད་ཐབས་ཀྱི་སྒོ་ནས་བདེ་བ་ཆེན་པོ་བསྐྱེད་ནས་བདེ་སྟོང་བསྒོམ་པ་དང་། དེའི་མཐར་སྒྱུ་མའི་སྐུར་ལྔར་བ་སོགས་མོས་པ་ཡིད་བྱེད་ཚུན་ཚད་ཀྱིས་ཀྱང་སྦྱང་ངོ་། འབྲས་བུའི་བར་དུ་ཡང་དེ་བཞིན་དུ་བྱས་ཏེ་ལམ་འདིའི་བག་ཆགས་བརྟན་པར་བྱས་ན་རྙེད་དཀའ་ལ་འཇིག་སླ་བའི་དལ་འབྱོར་གྱི་ལུས་ལ་སྙིང་པོ་ལོན་པ་ཡིན་ནོ། འགྲོ་བའི་འདྲེན་མཆོག་རྡོ་རྗེ་སེམས་དཔའ་དེ། དམིགས་མེད་བརྩེ་བས་ཀུན་ནས་བསྐྱོད་པ་ཡིས། གདུལ་བྱའི་དབང་པོའི་རིམ་པ་ཇི་བཞིན་དུ། མདོ་དང་བྱ་བ་སྤྱོད་པ་རྣལ་འབྱོར་དང་། །གསང་མཐའ་རྣལ་འབྱོར་བླ་མེད་རྒྱུད་རྣམས་གསུངས། ཁྱད་པར་ཟས་མོ་རྣལ་འབྱོར་མ་ཡི་རྒྱུད། དུང་ཕྱུར་གཅིག་དང་བྱེ་བ་ཕྲག་དྲུག་གསུངས། དེ་ཡི་ནང་ནས་རྒྱལ་མཚན་ཏོག་ལྟ་བུ། དཔལ་ལྡན་འཁོར་ལོ་སྡོམ་པའི་རྩ་བའི་རྒྱུད། །བཤད་རྒྱུད་བཟང་ལ་མང་བས་གསལ་བྱས་པའི། །རྫོགས་པའི་རིམ་པ་རྣལ་འབྱོར་ཆེན་པོའི་གཞུང་། །ལྨ་འདིས་མཆོག་བརྙེས་ལཱུ་ཨི་བ་ཡི་ལུགས། གསལ་མཛད་ཝ་བའི་ན་བཟའ་ཅན་དང་ནི། ཨ་ཏི་ཤ་དང་ཤེས་རབ་བསྲུང་བ་དང་། །རྣམ་གྲོལ་ཟླ་བ་ཀུ་མཱར་སོགས་ཀྱི། །འགྲེལ་པ་དྲུག་དང་བོད་ཀྱི་བཤད་པ་དང་། །རྒྱ་གར་མཁས་པའི་བདེ་མཆོག་གཞུང་མང་ལ། །བརྟེན་ནས་རྩ་བཤད་ཆ་མཐུན་རྒྱུད་རྣམས་ནི། །ལེགས་པར་སྒྱུར་ནས་བདེ་མཆོག་རྫོགས་རིམ་ནི། །ཀུན་
གྱི་གནད་དོན་གསལ་བྱེད་འདི་བརྩམས་སོ། །རང་ཡུལ་དམན་ལ་ཆགས་པའི་རིང་དུ་དོར། །གཞན་ཡུལ་དུ་ཡང་རྣམ་གཡེང་བསྐྱུངས་ནས་ནི། །མདོ་སྔགས་གཞུང་ལ་ཕྱོགས་རིས་མཚིམ་པར། །ཐོས་བསམ་བསྒོམ་པའི་ངལ་བ་མང་བསྟན་པས། མང་ཐོས་སྒྲུབ་ལ་བརྩོན་པའི་བློ་ཆེན་ནི། །དུ་མས་རིང་དུ་འབད་ཀྱང་རྟོགས་དཀའ་བའི། །མདོ་སྔགས་ལམ་གྱི་གནད་ལ་ངེས་རྙེད་ནས། ལྟར་སྣང་ལམ་གྱིས་བཀྲ་བར་མི་ནུས་ཐབས། །རྒྱལ་བ་དགྱེས་པའི་ལམ་མད་ཕྱེ་བ་ལ། །ནོངས་པར་གྱུར་ན་བསམ་པ་ཐག་པས་འཆགས། །རྣམ་དཀར་དགེ་བའི་ཕུང་པོ་ཅི་ཡོད་པ། །མ་གྱུར་འགྲོ་ཀུན་ཀུན་མཁྱེན་ཐོབ་ཕྱིར་བསྔོ། །ཟབ་ལམ་འདི་དང་ནམ་ཡང་མི་འབྲལ་ཞིང་། །ཐོས་བསམ་བསྒོམ་པའི་བར་ཆད་ཞི་བ་དང་། །ཞིང་སྐྱེས་ལྷན་སྐྱེས་སྔགས་སྐྱེས་རྣལ་འབྱོར་མའི། །གྲོགས་ལས་ལྷན་སྐྱེས་བདེ་ཆེན་རྫོགས་པར་ཤོག །ཅེས་རྣལ་འབྱོར་གྱི་དབང་ཕྱུག་ལྡུ་ཨི་བའི་ལུགས་ཀྱི་རྫོགས་རིམ་རྣལ་འབྱོར་ཆེན་པོའི་གཞུང་གི་རྣམ་བཤད་དངོས་གྲུབ་ཀྱི་སྙེ་མ་ཞེས་བྱ་བ་འདི་ནི། ལམ་འདིའི་བསྐྱེད་རྫོགས་གཉིས་ཀ་སྦྲེལ་ནས་ཉམས་སུ་ལེན་འདོད་པའི་བཤེས་གཉེན་མང་པོ་བསྐུལ་བ་དང་། ལཱུ་ནག་དྲིལ་གསུམ་གྱི་གཞུང་གི་རྩ་བ་ལཱུ་ཨི་བའི་ལུགས་སུ་སྣང་ཞིང་དེ་ལ་ཕྱིགས་འདིར་བཤད་པ་མཐའ་ཆོད་པ་མི་སྣང་བར་མངོན་ནས། །རྫོགས་རིམ་ལུགས་གཞན་གཉིས་ཀྱི་གཞུང་གི་ཚིག་གི་དོན་དང་། དམིགས་པ་སྐྱོང་ལུགས་ཀྱེ་རིམ་འགའ་
ཞིག་མ་གཏོགས་པ་ལུགས་གསུམ་གའི་རྫོགས་རིམ་གྱི་མཐའ་དཔྱོད་རྣམས་མཐའ་ཆོད་པར་ཤཱཀྱའི་དགེ་སློང་དབལ་འཁོར་ལོ་སྡོམ་པའི་རྣལ་འབྱོར་པ་ཤར་ཙོང་ཁ་བ་བློ་བཟང་གྲགས་པའི་དཔལ་གྱིས། འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་དུ་སྦྱར་བའི་གླིང་དུ་སྦྱར་བའི་ཡི་གེ་པ་ནི་དཀའ་བཞི་པ་རིན་ཆེན་དཔལ་ལོ། འདིས་ཀྱང་བསྟན་པ་རིན་པོ་ཆེ་སྤྱི་དང་། ཁྱད་པར་དུ་དཔལ་འཁོར་ལོ་བདེ་མཆོག་གི་རིམ་པ་གཉིས་ཀྱི་བསྟན་པ་རྣམས་ཕྱོགས་དུས་ཀུན་ཏུ་རྒྱས་པར་བྱེད་ནུས་པར་གྱུར་ཅིག། །།ཨོཾ་སྭ་སྟི། རྒྱལ་བསྟན་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདབ་རྒྱས་རྣམ་གྲོལ་སྦྲང་རྩིའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུང་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ།། །།སརྦ་མངྒ་ལཾ།། །།