མན་ངག་སྙེ་མའི་ཟིན་བྲིས་རྗེ་ཉིད་ཀྱིས་གནང་བ།
མན་ངག་སྙེ་མའི་ཟིན་བྲིས་རྗེ་ཉིད་ཀྱིས་གནང་བ་བཞུགས་སོ། །
མན་ངག་སྙེ་མའི་སྙེ་མ་ལྔ་པ་ལས། དེ་ཉིད་ཀྱི་ཕྱིར་བྱང་ཆུབ་ཀྱི་སེམས་ཀྱི་རང་བཞིན་དང་ལྡན་པའི་དགའ་བ་བཞི་རྣམས་སྤྲོས་ཞེས་གསུངས་པ་ནི། དགའ་བ་ཞེས་བྱ་བ་ལ་སོགས་པ་སྟེ། དཔའ་བོ་ནི་སྒྲུབ་པ་སྟེ། བདག་དང་གཞན་རྣམས་ལ་ཕ་རོལ་ཏུ་ཕྱིན་པ་འགྲོ་བ་རྣམས་ཀྱི་དོན་དུ་བརྩོན་འགྲུས་རྩོམ་པའི་ཕྱིར་དེ་ཉིད་ནི་དགའ་བ་སྟེ། དགའ་བ་ལས་གཞན་པའི་བདེ་བར་ལོངས་སྤྱོད་པའི་སྦྱོར་བ་མེད་པའི་ཕྱིར་རོ། །མཆོག་ཏུ་དགའ་བ་རྣལ་འབྱོར་མ་ཞེས་པ་ནི་ལེགས་པར་རོལ་པའི་དགའ་བས་དོན་དུ་གཉེར་བའི་ཕྱིར་ལ། ཤིན་ཏུ་གསང་བའི་མཆོག་ཏུ་དགའ་བའི་ཁྱད་པར་གྱི་ངོ་བོ་ལ་ཤིན་ཏུ་གསལ་བས་སོ། །མ་ལུས་ཞེས་པ་ནི་ཤེས་རབ་དང་ཐབས་ཀྱི་རང་བཞིན་དེས་
འདིར་སྐྱེས་པ་དང་བུད་མེད་དག་གི་བསམ་པ་མཉམ་པའི་ཕྱིར་རོ། །དགའ་བ་མཆོག་གི་རང་བཞིན་དག་ནི་དཔའ་བོ་དང་རྣལ་འབྱོར་མ་དག་འདུས་པ་དང་འདྲ་བའི་ཕྱིར་རོ། །དེའི་བདེ་བའི་ཐབས་ཞེས་པ་ནི་དེའི་ཤིན་ཏུ་དགའ་བའི་བདེ་བའི་ཐབས་དག་ནི་འདིའི་དེ་མ་ཐག་པའི་རྒྱུའོ། །ཞེས་པས་དེའི་བདེ་བའི་ཐབས་ཐམས་ཅད་རིག་སྟེ། ཐམས་ཅད་མཁྱེན་པ་ལྷན་ཅིག་སྐྱེས་པའི་དགའ་བའི་རང་བཞིན་གྱི་ཕྱིར་བཅོམ་ལྡན་འདས་སོ། །འདི་དག་གི་ངོ་བོ་མཚོན་པར་འདོད་ནས་གསུངས་པ་དང་པོ་ཞེས་པ་ལ་སོགས་པ་སྟེ། དགའ་བ་ཙམ་ནི་མཆོག་མ་ཡིན་པས་བདེ་བ་ཆུང་ངུ་མ་རྣམ་པ་སྣ་ཚོགས་པའི་གཟུང་བ་དང༌། འཛིན་པའི་རྣམ་པར་རྟོག་པ་ལས་འབྱུང་བའི་འཁྱུད་པ་དང༌། འོ་བྱེད་པ་ལ་
སོགས་པ་དང༌། པདྨ་དང་རྡོ་རྗེ་གཉིས་ཡང་དང་ཡང་དུ་རེག་པས་ཤིན་ཏུའང་བདེ་བ་འདོད་པའི་མཚན་ཉིད་ཀྱི་རྡོ་རྗེ་པདྨར་འདྲུད་པའི་མཐར་ཐུག་པ་སྟེ། ཤེས་རབ་བཅུ་དྲུག་ལོ་ལོན་པ། །དཔུང་པ་གཉིས་ཀྱིས་འཁྱུད་པ་ཡི། །དྲིལ་བུ་རྡོ་རྗེ་མཉམ་སྦྱོར་བ། །སློབ་དཔོན་གྱི་དབང་རབ་བརྗོད་པ། །ཞེས་བརྟག་པ་གཉིས་པ་ལས་གསུངས་སོ། །མཆོག་ཏུ་དགའ་བ་ནི་གོང་ནས་གོང་དུ་བདེ་བ་འདོད་པའི་མཚན་ཉིད་ཀྱང་དགའ་བའི་མཆོག་ཉིད་ཀྱིས་ལྡོག་པའི་བདེ་བའི་ཡེ་ཤེས་ཀྱིས་ཉེ་བར་ལོངས་སྤྱོད་པ་རྣམ་པར་སྨིན་པའི་ངོ་བོས་གཟུང་བ་དང་འཛིན་པའི་རྣམ་པར་རྟོག་པ་གཉིས་བསྲབ་པར་གྱུར་ནས་མི་སྒྲིབ་པའི་ཕྱིར་རོ། །རྣམ་པར་དགའ་བ་བརྗོད་ཅེས་པ་ནི་ཁྱད་པར་གྱིས་རོལ་པའི་བདེ་བ་འདོད་པའི་ངོ་བོ་ཉིད་དང་ཆགས་པ་རྣམ་པར་དག་པས་ལོངས་སྤྱོད་པ་ལྷག་པར་མི་འབྲལ་བའི་རྣམ་པར་རྟོག་པ་ཉེ་བར་མཚོན་པ་འདིར་དེའི་བདེ་བ་དག་གིས་ལོངས་སྤྱད་པ་ཞེས་རྣམ་པར་ཉེད་པའི་ངོ་བོ་རབ་ཀྱི་གནས་སྐབས་ཀྱི་བདེ་བར་འདོད་ཆགས་པའི་ངོ་བོར་འཛིན་པའི་རྣམ་པར་རྟོག་པ་དང་ལྡན་པ་དེ་དང་བྲལ་བས་ལྷག་པས་ཏེ། དེ་སྐད་དུ་བརྟག་པ་གཉིས་པ་ལས་གསུངས་པ། གསུམ་པ་འདོད་ཆགས་བྲལ་བའི་ཕྱིར། གསུངས་སོ། །བཞི་པ་ལྷན་ཅིག་སྐྱེས་པ་ཞེས་པ་ནི། ལྷན་ཅིག་སྐྱེས་པའི་དགའ་བ་ཀུན་རྫོབ་བྱང་ཆུབ་ཀྱི་སེམས་ཀྱི་རང་བཞིན་རང་གི་ངོ་བོ་སྟོང་པ་ཉིད་ཀྱི་བདེ་བ་ཆེན་པོས་ཉམས་སུ་མྱོང་བས་རྣམ་པར་མི་རྟོག་པ་
ཅན་ཏེ། དེའི་ཕྱིར་ན་ཆགས་པའི་བདེ་བ་སྤངས་པ་དང༌། དེ་ལས་ལྡོག་པའི་མངོན་པར་ཞེན་པ་སྤངས་ཏེ། དེ་གསུངས་པ་ནི། མཚན་ཉིད་བྲལ་བ་གསུམ་ལས་གཞན། །ཆགས་དང་ཆགས་བྲལ་རྣམ་པར་སྤངས། །ཞེས་པའོ། །དེ་ཅི་འདིར་མཐོང་བའི་ལམ་ཡིན་ནམ་ཞེ་ན། དེ་ནི་མ་ཡིན་ཏེ། ཐབས་ཀྱི་ཁྱད་པར་གྱི་ས་དང༌། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ས་དང༌། བླ་མའི་བྱིན་རླབས་ཀྱིས་ཐོབ་ལ། རང་གིས་ཐོབ་པ་དེ་ལྟར་འགྱུར་རོ། །འདིར་དེ་ཉིད་ནི་དབུགས་དབྱུང་བ་གཉིས་སུ་བརྗོད་དོ། །བདེ་བ་ཆེན་པོའི་ཡེ་ཤེས་དང་སྟོང་པ་ཉིད་དག་པའི་བདག་ཉིད་གཅིག་པའི་ཕན་ཚུན་རྒྱས་བཏབ་པ་དགའ་བ་བསྐྱེད་པ་དང༌། རྡོ་རྗེ་འཛིན་པའི་ཚུལ་གྱིས་ཕྱིར་དེ་བཞིན་གཤེགས་པ་དང་རྡོ་རྗེ་འཛིན་པར་ངེས་པར་འབྱུང་བར་འགྱུར་རོ། །ཞེས་པ་དང་། དེའི་ལམ་ཐོབ་པ་ཞེས་པ་ནི་དེ་བཞིན་གཤེགས་པའི་དབུགས་དབྱུང་བ་དང༌། རྡོ་རྗེ་འཛིན་པའི་དབུགས་དབྱུང་བ་དང་བསྐྱེད་པའི་ཕྱིར་རོ། །ཇི་སྐད་དུ་གསུངས་པ། ཐབས་དང་ཐབས་བྱུང་དབྱེ་བ་ཡིས། །བཞི་པའི་དོན་ནི་གཉིས་སུ་འདོད། །གཅིག་ནི་དེ་བཞིན་གཤེགས་པས་འགྲུབ། །གཞན་ནི་རྡོ་རྗེ་འཛིན་པར་འདོད། །ཅེས་པའོ། །འོ་ན་ལྷན་ཅིག་སྐྱེས་པའི་དགའ་བའི་རྗེས་སུ་དགའ་བྲལ་གྱི་དགའ་བ་རིགས་ཏེ། ཇི་སྐད་དུ་བརྟག་པ་གཉིས་པ་
ལས། ལྷན་ཅིག་སྐྱེས་དགའི་རང་བཞིན་དང༌། །མཆོག་མཐའ་དགའ་བྲལ་དང་པོར་འདོད། །ཅེས་སོ། །ཞེ་ན་མ་ཡིན་ཏེ། མཆོག་དགའི་མཐའ་དང་དགའ་བྲལ་ཏེ། །གང་གིས་ཐོག་མ་མཆོག་དགའ་ལས། །དེའི་རྗེས་སུ་དགའ་བྲལ། དེའི་རྗེས་སུ་ལྷན་ཅིག་སྐྱེས་པའི་ཞེས་པ་དོན་གྱིས་ཐོབ་པའི་ཕྱིར་རོ། །གང་དུ་མཆོག་གི་མཐའ་བྲལ་བའི་དང་པོར་མཆོག་དང་བྲལ་བ་གཉིས་ཀྱི་བར་དུའོ། །ཞེས་པའི་དོན་སྨྲས་པ་དེ་ནི་རིགས་པ་མ་ཡིན་ཏེ། དགའ་བྲལ་དང་པོར་མཚོན་པར་བྱ། །དེ་ནི་དགའ་བ་གསུམ་སྤངས་པ། །ཞེས་གསུངས་པའི་ཕྱིར་རོ། །དེས་ནི་བྲལ་བའི་དང་པོ་ཞེས་བྲལ་བའི་དུས་ཉིད་དུ་གསུངས་པས། ལྷན་ཅིག་སྐྱེས་པ་དང་པོར་འདི་ཉིད་མཚོན་པར་བྱ། ཞེས་བསྒྲུབས་པས་སོ། །ལྷན་ཅིག་ཤར་བས་རྣམ་པར་རྟོག་པ་ཉིད་ནུབ་པས་གོང་ནས་གོང་དུ་མཚོན་པར་འགྱུར། ཞེས་པ་དང༌། དེ་ཉིད་ཡེ་ཤེས་རྡོ་རྗེ་བསྡུས་པའི་རྣལ་འབྱོར་ཆེན་པོའི་རྒྱུད་ལས་གསུངས་པ། སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཡེ་ཤེས་གསུམ་གྱི་དབྱེ་བ་ལས། །གསལ་བར་འདི་ལས་མཚོན་པར་འགྱུར། །ཞེས་པ་དང༌། རིམ་པ་ལྔ་པ་ལས། མཚན་མོ་སྣང་བའི་ཆ་ལས་གསལ་བར་ཉི་མའི་ཟེར་འགྱེད་ཉིན་མོ་སྣང་བ་ཆེན་པོ་ཡིན། །མཚམས་ནི་སྣང་བ་ཐོབ་པ་རང་གི་རང་བཞིན་རྣམས་ཀྱིས་ལྷན་ཅིག་མིན་པར་འདིར་སྦྱོར་བ། །མཚན་མིན་ཉིན་པར་མིན་ལ་
མཚམས་ཀྱང་མིན་པའི་གང་ཞིག་རང་བཞིན་རྣམས་ལས་རྣམ་གྲོལ་བ། །རྟོགས་པའི་སྐད་ཅིག་འདིར་ནི་ཐུབ་པའི་མཆོག་གིས་རྣལ་འབྱོར་པ་རྣམས་ཀུན་གྱིས་རྟོགས་བྱར་གསུངས། །ཞེས་པ་འདིས་ཀྱང་དགའ་བ་གསུམ་གྱི་རང་བཞིན་ནི་མཚོན་བྱ་ལ། མཚན་ཉིད་མེད་པ་ནི་བཅོམ་ལྡན་འདས་ཀྱིས་བཞི་པར་གསུངས་ཏེ། མཚན་ཉིད་བྲལ་བ་གསུམ་ལས་གཞན་ཞེས་པ་འདིས་ནི། འདིར་ཇི་ལྟར་ལྷན་ཅིག་སྐྱེས་པའི་རྗེས་སུ་དགའ་བྲལ་རིགས་པ་སྟེ། མཚོན་པར་མི་ནུས་པའི་ཕྱིར་རོ། །དགའ་བྲལ་གྱི་རྗེས་སུ་དྲན་པ་དེ་ཉིད་མཚན་ཉིད་ཀྱི་ཉམས་སུ་མྱོང་བའི་ཐབས་ཀྱང་མ་བསྟན་པར་ཐལ་བ་ལ། ལྷན་ཅིག་སྐྱེས་པ་འཆར་བའི་གནས་ཉིད་ལ་ནི་རྩོད་པ་མེད་པ་ཉིད་དོ། །གང་དུ་མཚན་ཉིད་དེ་ཉམས་སུ་མྱོང་བ་མེད་པའི་ཕྱིར་འདིར་ཡང་ཞེ་ན། མ་ཡིན་ཏེ་ཐོ་རངས་ཀྱི་དུས་བཞིན་དུ་མཚམས་ཀྱང་ངོ༌། །འོ་ན་དེ་ལྟར་ནའང་དེའི་ངོ་བོ་ཉེ་བར་མཚོན་དུ་མེད་པ་ཉིད་དོ་ཞེ་ན། བདེན་ཏེ། ཉམས་སུ་མྱོང་བའི་ཐབས་ཉིད་དུ་ཉེ་བར་བསྟན་པས་སོ། །འོ་ན་དེ་ཉིད་ཀྱི་ཐབས་ཀྱང་བསྒོམ་པར་བྱ་བ་མི་རིགས་སོ་ཞེ་ན་དེ་ནས་མ་བཟུང་སྟེ། དེའི་ཉེ་བར་མཚོན་པའི་མངོན་པར་ཞེན་པ་རྣམས་འདིར་དེ་མི་སྲིད་པའི་ཕྱིར་རོ་ཞེ་ན། བདེན་ཏེ། དེ་ལྟར་འགྱུར་བའི་བདག་ཉིད་དེ་དེ་ལྟར་ཤར་བར་བྱེད་པའི་ཇི་ལྟ་བ་ནི་བླ་མས་བསྟན་པར་བྱ་བ་ཉིད་དེ། དེ་ལྟར་གཉིས་ཀའི་འདོད་པ་ཉེ་བར་མཚོན་པའི་རིམ་པས་གསལ་བར་བྱས་
པའོ། །དེ་ཁོ་ན་བསྟན་པའང༌། འདིར་མཆོག་མཐའ་དགའ་བྲལ་དང་པོ་ཅན། །ཞེས་པ་ནི་འདིར་ཡང༌། མཆོག་གི་མཐའ་ནི་མཆོག་གི་མཐའ་གང་ཞིག་གིས་དང་པོ་དགའ་བྲལ་ལ། དགའ་བྲལ་དང་པོ་ནི་མཆོག་དང་བྲལ་བའི་དགའ་བ་དག་གི་མཐར་གཉིས་པ་ཞེས་པའི་དོན་ཏོ། །དེའི་དེ་ཁོ་ན་ཉིད་དེ་ཇི་ལྟ་བུ་ཞེས་པ་ལ། ཐོག་མ་ཐ་མ་དབུས་མེད་པ། །སྲིད་མེད་མྱ་ངན་འདས་མིན་ཏེ། །འདི་ནི་མཆོག་ཏུ་བདེ་ཆེན་ཉིད། །གཞན་མིན་བདག་ཀྱང་མ་ཡིན་ཏེ། །ཞེས་པ་དང་པོ་དང་ཐ་མ་དང་དབུས་ཀྱི་སྐྱེ་བ་དང་འགག་པ་དང་གནས་པ་རྣམས་བཀག་པས་ཆོས་ཐམས་ཅད་སྟོང་པ་ཉིད་དང་བདེ་བ་ཆེན་པོར་རོ་གཅིག་པར་ཐབས་འདིས་མངོན་པར་རྟོགས་པར་བྱེད་དོ་ཞེས་ལན་གྱི་དོན་ཏོ། །དགའ་བ་དང་བྲལ་བ་དང་མཆོག་ཏུ་དགའ་བ་རྣམས་བཀག་པས་མི་འཕོ་བའི་ཕྱིར་ན་སྲིད་པ་དང་ཞི་བ་ལ་མི་གནས་པའི་ལྷན་ཅིག་སྐྱེས་པའི་དེ་ཁོ་ན་ཉིད་ཅེས་པའོ། །དེ་ལྟར་ཡང༌། མཆོག་མཐའ་དབུས་དང་བྲལ་བའོ། །སྟོང་དང་སྟོང་མིན་ཧེ་རུ་ཀ །ཞེས་ཏེ། འདིར་མཆོག་ཏུ་དགའ་བའི་མཐར་གང་ཞིག་གི་དབུས་ཀྱི་དགའ་བྲལ་དེའི་རྗེས་ཐོགས་ཉིད་དུ་འབྲེལ་བ་ཅན་གྱི་མཚོན་བྱ་ནི་སྟོང་པ་སྟེ། ངོ་བོ་ཉིད་དང་བྲལ་བའི་ཕྱིར་རོ། །སྟོང་མིན་ནི་ད་ལྟར་བརྗོད་པའང་མི་དམིགས་པའི་ཕྱིར་རོ། །གཉིས་སྤངས་ནས་བདེ་བ་ཆེན་
པོའི་ངོ་བོར་གནས་པའི་ཕྱིར་ལ། དེ་ཉིད་བཅོམ་ལྡན་འདས་ཏེ། ཧེ་རུ་ཀ་ཞེས་བྱ་བའི་དོན་ཏོ། །མཆོག་དང་བྲལ་དགའ་དག་གི་དབུས་སུ་མཚོན་བྱ་བལྟས་ལ་བརྟན་པོར་གྱིས་ཞེས་པ་ནི། འདིར་གལ་ཏེ་སོ་སོ་སྐྱེ་བོའི་ངག་ཡིན་ན་ཅི་སྟེ། འདི་ལ་གུས་པར་བྱེད་དེ། དེ་ནས་ལུང་ཡིན་ན་ནི་དེའི་དོན་འདི་ཡིན་ཏེ། དབུས་མ་དགའ་བ་ཙམ་ཉིད་དོ། །ཞེས་པ་བརྟག་པ་གཉིས་པ་ལས་གསུངས་པས། དགའ་བ་དང་མཆོག་དགའ་དང་དགའ་བྲལ་རྣམས་ཡོད་པར་འགྱུར་བ་ཉེ་བར་འཆར་བའི་ལྷན་ཅིག་སྐྱེས་པ་མཚོན་པར་བྱ་བ་ཞེས་པའི་དོན་དྲུག་པོ་དེའི་རང་བཞིན་ངེས་པར་བཟུང་བའི་ཕྱིར་མཆོག་ནི་རབ་སྟེ། ལྷན་ཅིག་སྐྱེས་པའི་དེ་གཉིས་ཀའི་དབུས་སུ་མཚོན་པར་བྱ་ཞེས་པའི་དོན་ཏོ། །བདེ་བའི་ཕྱིར་མཆོག་ནི་མཆོག་དགའ་སྟེ། འདིས་ལྷན་ཅིག་སྐྱེས་པའི་དགའ་བ་ཉིད་དེ། མཆོག་དགའ་ཉིད་ནི་ཐོབ་པའོ། །སྣ་ཚོགས་སྤངས་པའི་སྐད་ཅིག་མ་ཞེས་བཤད་པས་སོ། །ཕྱག་རྒྱ་བཞི་པའི་གཞུང་ན། སོ་སོའི་སྐྱེ་བོའི་གདམས་ངག་མི་ཤེས་པས་བྱས་པའི་ཕྱིར། ཕན་ཚུན་འགལ་བས་འཕགས་པས་གསུངས་པ་མ་ཡིན་ཏེ། དེ་ལྟར་ཡང་འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱི་རིམ་པ་ལྔ་པའི་དོན་གསལ་བར་བྱེད་པར་འཕགས་པ་ཤཱཀྱ་བཤེས་གཉེན་གྱི་ཞགས་ཀྱིས་ཀྱང་གསུངས་ཏེ། སྟོང་དང་དེ་བཞིན་ཤིན་ཏུ་སྟོང༌། །གསུམ་པ་སྟོང་པ་ཆེན་པོ་དང༌། །བཞི་པ་ཐམས་ཅད་སྟོང་པ་ནི། །རྒྱུ་
དང་འབྲས་བུར་རབ་དབྱེ་བས། །ཤེས་རབ་ཐབས་སུ་མཉམ་སྦྱོར་བས། །རྫོགས་པ་ཉེ་བར་ཐོབ་པ་ཡི། །རྫོགས་པ་ཉེ་བར་ཐོབ་གྱུར་ནས། །ཐམས་ཅད་སྟོང་པ་འོད་གསལ་བའི། །རྒྱུ་ཡི་རིམ་པ་དག་དང་ནི། །རྣམ་ཤེས་གསུམ་གྱི་སྦྱོར་བ་ལས། །སྟོང་པ་གསུམ་ནི་མཉམ་སྦྱར་བས། །བླ་མེད་གོ་འཕང་འཐོབ་པར་འགྱུར། །སྣང་བ་སྟོང་དང་ཤེས་རབ་བཞིན། །ཞེས་པ་སྣང་བ་མཆེད་པ་གསུངས། །ཤིན་ཏུ་སྟོང་པ་ཐོབས་དང་ལྡན། །ཞེས་པ་ནི་སྣང་བ་མཆེད་པ་སྦྱོར་བ་ལས་སྐྱེས་པ། སྣང་བ་ཉེ་བར་ཐོབ་པ་ནི་དེ་བཞིན་ཉེ་བར་ཐོབ་པའོ། །ཞེས་པ་དང༌། སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཡེ་ཤེས་གསུམ་གྱི་དབྱེ་བ་འདིར། །གསལ་བར་འདིར་ནི་མཚོན་པར་འགྱུར། །ཆགས་པ་ཉིད་ནི་ཆགས་བྲལ་དང༌། །དེ་ཡི་གཉིས་པ་ཞེས་གསུངས་པ་དང༌། འདི་སྐད་དུ་གཞན་ཉིད་དུའང་གསུང་རབ་ཀྱི་དོན་རྣམས་ཕན་ཚུན་མི་འགལ་ཏེ། དེའང་ངེས་པར་བརྗོད་པའི་རྒྱུད་བླ་མ་ལས། འཁྱུད་དང་དེ་བཞིན་འོ་བྱེད་པས། །སྣ་ཚོགས་རྣམ་པས་སྣ་ཚོགས་ཚུལ། །བྷ་ག་ལིངྒའི་སྦྱོར་བ་ཡིས། །རྣམ་པར་སྨིན་པའི་ཡེ་ཤེས་མཆོག །ཕྱག་རྒྱ་རྣམ་པར་ཉེད་བྱས་ལ། །མཚན་ཉིད་བྲལ་བ་མྱུར་བར་མཚོན། །དགའ་བ་དང་པོ་ཡེ་ཤེས་དང༌། །མཆོག་ཏུ་དགའ་བར་ཡང་དག་ལྡན། །ཤིན་ཏུ་དགའ་ལས་གྲུབ་པ་ཆེ། །ལྷན་ཅིག་སྐྱེས་དགའི་ཕྱི་མར་རོ། །ཞེས་པ་དང༌། རྒྱུད་གཞན་གྱི་ཕྱི་མ་ལས། དགའ་
བ་དང་ནི་བསྐྱོད་བྱས་པས། །བདེ་བར་གནས་ལས་མི་གཡོ་བས། །ཐུན་གཅིག་ཡང་ནི་ཉིན་གཅིག་གམ། །ཟླ་ཕྱེད་ཡང་ན་ལོ་གཅིག་གམ། །བསྐལ་པའམ་བསྐལ་པ་སྟོང་ཕྲག་ཏུ། །ཡེ་ཤེས་མངོན་སྦྱོར་གྱིས་གནས་བྱ། །རྣལ་འབྱོར་པ་ཡིས་ཇི་སྲིད་དུ། །བྱང་ཆུབ་གཤེགས་གསོལ་མི་བྱེད་པས། །དེ་སྲིད་དགའ་བ་ལས་སྐྱེད་བདེ། །རྒྱུན་མི་འཆད་པར་འཐོབ་པར་འགྱུར། །དངོས་གྲུབ་ཀུན་གྱི་གཏེར་གྱུར་པའི། །བྱང་ཆུབ་སེམས་ནི་ལྷུངས་གྱུར་ན། །ཕུང་པོ་རྣམ་ཤེས་བརྒྱལ་འགྱུར་བས། །གང་དུ་དགའ་བའི་དངོས་གྲུབ་འགྱུར། །ཞེས་པ་དང༌། ཕྱག་རྒྱ་ཆེན་པོའི་ཐིག་ལེ་ལས་ཀྱང༌། བརྟན་པ་མཆོག་ཏུ་བདེ་བ་སྟེ། །མི་བརྟན་པ་ནི་ཇི་ལྟར་བདེ། །ཞེས་པ་དང༌། བཅུ་དྲུག་ཕྱེད་ཕྱེད་ཐིག་ལེ་འཆང༌། །ཞེས་པའོ། །ཕྱག་རྒྱ་ཆེན་པོ་འགྲུབ་པའང་མི་རིགས་ཏེ། ལྷན་ཅིག་སྐྱེས་པའི་ཉམས་སུ་མྱོང་བའི་ཐབས་གཞན་མི་སྲིད་པས། ལྷན་ཅིག་སྐྱེས་པའི་ངོ་བོ་ཉིད་ནི་འབའ་ཞིག་མི་རིགས་པའང་མེད་ཅེས་སྔོན་བཞིན་གྱི་འདོད་པ་ནི་གདམས་ངག་མི་རིགས་པ་རྣམས་སྨྲ་སྟེ། གང་དུ་རིགས་པ་མེད་པའི་བདག་ཉིད་ཅན་གྱི་བཙན་ཐབས་ཀྱི་སྦྱོར་བ་དེ་ཉིད་ཀྱིས་བདེ་བ་ཁྱད་པར་ཅན་གྱི་བར་དགའ་བྲལ་གསུམ་པ་ལྷན་ཅིག་སྐྱེས་པ་བཞི་པ་ལས་གཞན་པའི་ལྷན་ཅིག་སྐྱེས་པ་གསུམ་པ་དགའ་བྲལ། བཞི་པ་ཞེས་སྨྲས་པ་དེ་དག་ནི་མ་རྟོགས་པ་ཉིད་དོ་ཞེས་
པ་སྟེ། སྤྲོས་པ་ལ་དགོས་པ་མེད་དོ། །སྐབས་སུ་བབ་པ་བསྟན་པ་ནི་དེ་ལ་བོ་ལའི་རྩ་བ་ནས་གསང་བའི་པདྨ་རྡོ་རྗེ་ནོར་བུ་སྔོན་དུ་དགའ་བ་ལ་སོགས་པ་གསུམ་པ། ནོར་བུའི་དཀྱིལ་དུ་ནི་ལྷན་ཅིག་སྐྱེས་པའོ་ཞེས་པ་ནི་རྣམ་པར་བཞག་པ་གཅིག་ལ། པདྨའི་ནམ་མཁའ་དང་ནོར་བུའི་ཟེ་འབྲུ་དག་བཙིར་བའི་གནས་སུ། རྡོ་རྗེའི་སྐྱིལ་ཀྲུང་གིས་སེམས་ནི། །ནོར་བུའི་ནང་དུ་ཆུད་པ་ལྟར། །གང་དུ་སྐྱེ་འགྱུར་ཡེ་ཤེས་ཀྱི། །ཡེ་ཤེས་དེ་ཡི་ངོ་བོ་དམིགས། །ཞེས་དཔལ་མཆོག་དང་པོའི་རྒྱུད་ལས་གསུངས་པའི་ཕྱིར། ཆུ་སྐྱེས་ཀྱི་དབུས་ནི་སྟོང་པ་ཉིད་ཀྱི་ཡུལ་དག་དེར་རྡོ་རྗེའི་མཐའ་ཡོངས་སུ་མཚན་པའོ། །ཡང་ན་རྡོ་རྗེ་སྐྱིལ་ཀྲུང་ནི་བསྟེན་པ་ལས་ནོར་བུའི་ནང་དུ་ཆུད་པའི་ཤེས་པ་ཤེས་རབ་ཡེ་ཤེས་ཀྱི་རང་བཞིན་དེ་དང་འདྲ་བའི་ཡེ་ཤེས་ངེས་པར་རྟོགས་ཤིང་ཐོབ་པའི་བར་དུ་འཇུག་པའི་རྒྱུད་གཞན་རྣམས་སུའང་ལྷན་ཅིག་སྐྱེས་པ་ནོར་བུའི་ནང་དུ་ཆུད་པར་ནི་གསལ་བར་མང་དུ་གསུངས་ཏེ། ཁ་ཅིག་ལས་བཤད་པ་ནི། གང་དུ་དྲུད་པའི་བར་ནི་དགའ་བ་ལ་འདྲུད་པས་བྱང་ཆུབ་ཀྱི་སེམས་ནོར་བུ་དང་ཉེ་བའི་ཇི་སྲིད་ནོར་བུའི་མདུན་དུ་རེག་པའི་བར་ནི་མཆོག་ཏུ་དགའ་བའོ། །རིན་པོ་ཆེའི་རྩེ་མོ་ནས་ཇི་སྲིད་དུ་རྡོ་རྗེའི་ནང་དུ་དེའི་རྩེ་མོར་རམ། ཐོད་པ་ལྷུང་བ་ལས་མི་འདོད་ཀྱང་དེ་ཉིད་བློས་ཁ་ཅིག་རྡོ་རྗེའི་ཁ་རུ་ལྷན་ཅིག་སྐྱེས་པའི་དགའ་བ་ལ། བྱང་ཆུབ་ཀྱི་སེམས་ལྷུང་བ་དེ་ནི་དགའ་བྲལ་གྱི་དགའ་བ་སྟེ། གཉིས་སོད་གཉིས་མཉམ་རྡོ་རྗེ་ལྷུང་དང་པདྨར་རེག །
རྡོ་རྗེ་ལྷུང་བ་མི་བསྐྱོད་པ། །པདྨར་རེག་པ་རྡོ་རྗེ་སྟེ། །རྒྱུ་ལ་འབྲས་བུ་རྒྱས་བཏབ་པ། །བདེ་བ་ཆེན་པོ་རྒྱལ་པོ་ཉིད། །ཅེས་འདོད་པ་ནི་མ་བསྡམས་པས་ལྷུང་བ་ཡིན་ཏེ། པདྨར་ནོར་བུ་ཡང་དག་པར་རེག་པའི་གནས་སྐབས་དེ་ཉིད། བྱང་ཆུབ་ཀྱི་སེམས་སུ་མྱོང་བའི་སྦྱོར་བ་ལ། རྡོ་རྗེའི་ཕྱི་རོལ་ཏུ་བྱུང་ནས་པདྨ་རེག་པ་དེ་ལ་ནི་ཉམས་སུ་མྱོང་བའི་དྲིའང་མེད་དོ། །བྲལ་བའི་དགའ་བ་ཉིད་ཀྱང་མ་ཡིན་ལ། བདེ་བ་ཆེན་པོའི་རྒྱལ་པོ་ཉིད་ཀྱི་རྡོ་རྗེ་སེམས་དཔའ་ཡང་མ་ཡིན་ཏེ། བདེ་བ་མྱོང་བ་དང་བྲལ་བ་གང་དུ་རྡོ་རྗེ་སེམས་དཔའ་ཡོད་པ་མ་ཡིན་ནོ། །དེ་བདེ་བ་ཉམས་སུ་མྱོང་བ་ལས་གཞན་དུ་འགྱུར་བའི་བདེ་བ་ཆེན་པོའི་ངོ་བོ་མི་བསྐྱོད་པ་དང་ཕན་ཚུན་རྒྱས་བཏབ་པའང་མེད་དེ། ཆོས་དང་ཆོས་ཅན་ནི་སྟོང་པ་ཉིད་དང་སྙིང་རྗེ་གཉིས་སུ་མེད་པ་དེའི་བདག་ཉིད་ལ་རྒྱས་བཏབ་པར་བརྗོད་ཀྱི། དུས་ཐ་དད་པ་ལ་ནི་དེའི་བདག་ཉིད་ཀྱང་མེད་ལ། རིན་པོ་ཆེ་ལས་གཞན་པའི་རྡོ་རྗེའི་ཁར་ལྷན་ཅིག་སྐྱེས་པའི་བདེ་བ་ཆེན་པོ་ཉམས་སུ་མྱོང་བའང་མ་ཡིན་ན། འདིར་དེ་ཁོ་ན་ཉིད་རིག་པ་གང་དུ་རིན་པོ་ཆེའི་ནང་དུ་ཆུད་པའི་བདག་དང་གཞན་གྱི་གྲུབ་པའི་མཐའ་ལ་གཞན་གྱིས་ཐལ་འགྱུར་བྱེད་པ་དེའང་མང་དུ་མི་ཤེས་པའི་མངོན་པར་འདོད་པ་ཅན་ནོ། །ནོར་བུའི་དབུས་སུ་སོ་སོར་རང་གིས་རིག་པ་རྣམ་པ་ཐམས་ཅད་ཀྱི་མཆོག་གིས་ཡོངས་སུ་སྤྲས་པའི་ཀུན་རྫོབ་ཀྱི་བདེ་བ་ཆེན་པོ་ཉམས་སུ་མྱོང་བའི་དོན་
དམ་པར་རང་བཞིན་མེད་པ་དབུ་མའི་ལམ་གྱི་ངོ་བོ་ལ་དབུ་མ་ལས་གཞན་དུ་འདོད་པ་ཞེས་པ་ནི་མ་ཡིན་ཏེ། ངེས་པར་བློ་ཆུང་བའི་འཕྲལ་བཟོ་རྣམས་ལ་ཆེད་དུ་བྱེད་པ་ལ་དགོས་པ་མེད་པའོ། །གཞན་དུའང་རྣམ་པར་བཞག་པ་ནི། །གཙུག་ཏོར་ནས་ནི་སྨིན་མཚམས་ཀྱི། །ས་བོན་པདྨར་འགྲོ་དགའ་བ། །མགྲིན་པ་སྙིང་ག་མཆོག་ཏུ་དགའ། །སྣ་ཚོགས་རོལ་པའི་ལྟེ་བར་གནས། །གསང་བའི་པདྨར་འགྲོ་བ་གང༌། །དེར་ནི་དགའ་བྲལ་འགྱུར་བའོ། །གསང་གནས་རྡོ་རྗེ་ནོར་བུ་འབར། །ཟགས་མིན་ལྷན་ཅིག་སྐྱེས་དགའ་བ། །རབ་ཏུ་མི་གནས་མྱ་ངན་འདས། །ཆགས་པ་ཆེན་པོ་མི་འགྱུར་གཙོ། །དགའ་བྲལ་འབད་སོགས་ཀྱིས་མི་འབོ། །དེ་འདིར་མྱ་ངན་འདས་པར་གནས། །ཞེས་དུས་ཀྱི་འཁོར་ལོ་ལས་བརྗོད་དེ། དེ་ལ་རབ་ཀྱི་རྣམ་པར་རྟོག་པ་རགས་པ་མེད་པ་ནི་དགའ་བའོ། །རབ་ཀྱི་རགས་པ་མེད་པ་ནི་མཆོག་དགའ་འོ། །འབྲིང་གི་རགས་པ་མེད་པ་ནི་བྲལ་བའོ། །ཐ་མའི་རགས་པ་མེད་པ་ཙམ་གྱིས་ཕྲ་མོ་ཡོད་ཀྱང་ལྷན་སྐྱེས་སུ་རྣམ་པར་བཞག་པའོ། །ཕྲ་མོའི་རྣམ་པར་རྟོག་པ་ནི་ཆུང་དང་འབྲིང་དང་ཆེན་པོའི་དབྱེ་བས་ཐ་དད་པར་རིམ་པ་ཇི་ལྟ་བ་བཞིན་དུ་མེད་པས་དགའ་བ་བཞི་ཞེས་པའི་དོན་དུ་བཤད་པའི་ཉེ་བར་བསྟན་པའི་གདམས་ངག་ལས་ཤེས་པར་བྱའོ། །བུད་མེད་ཀྱིའང་གསང་བ་ཆུ་སྐྱེས་ཀྱི་ལྟེ་བ་ནི་ནོར་བུ་ལྟ་བུ་ཡིན་ལ། གང་དུ་ཕྱག་རྒྱ་ཆེན་པོའི་ཐིག་ལེ་ལས། གཉེར་མ་རིམ་པ་གསུམ་གནས་
པའི། །གྲུ་གསུམ་དེ་ཡི་རྩེ་མོར་ནི། །གྲུ་གསུམ་ལྟེ་བའི་རྣམ་པ་ནི། །རྡོ་རྗེའི་རང་བཞིན་ཅན་དུ་གསལ། །གྲུ་གསུམ་པོ་ནི་རྩ་རྣམས་ཀྱི། །གནས་སུ་མཆོག་ཏུ་དྲན་པར་བྱ། །ཞེས་གསུངས་སོ། །དེ་བཞིན་དུ་དབང་བསྐུར་བ་གསུམ་བསྟན་ནས། བཞི་པའི་རིམ་པ་སོ་སོར་སྒྲུབ་པར་འདོད་པའི་དགའ་བ་བཞི་རྣམ་པར་དག་པའི་ངོ་བོ་དབང་བཞི་པ་སྟོན་པར་འདོད་ནས་གསུངས་པ་ནི། དེ་ནི་ཞེས་པ་ལ་སོགས་པ་སྟེ། བཞི་པ་དེ་ཡང་དེ་ལྟར་རོ། །ཞེས་པ་ནི་དེ་ཉིད་ཀྱི་ཤེས་རབ་ཡེ་ཤེས་ཀྱི་མྱུ་གུ་ཡིས་བྱང་ཆུབ་ཀྱི་སེམས་སོ། །ཡང་ན་ཕྱིས་བཞི་པར་བརྗོད་པའོ། །དེ་ལྟར་ཞེས་པ་ནི་དེ་དང་འདྲ་བ་ཉིད་དོ། །ཇི་ལྟ་བའི་ཆོ་གས་ཞེས་དང་རབ་ཏུ་འཕེལ་བར་བྱེད་པ་དེ་ཁོ་ན་ཉིད་ཀྱི་བླ་མའི་མན་ངག་གིས་སྒྲིབ་པ་མེད་པའི་ལྷན་ཅིག་སྐྱེས་པའི་ཡན་ལག་བདུན་དང་ལྡན་པའི་ཕྱག་རྒྱ་ཆེན་པོའི་བདག་ཉིད་རྡོ་རྗེ་འཛིན་པ་ཆེན་པོའི་རང་བཞིན་དུ་བརྗོད་དོ། །དེ་ཉིད་ཀྱིས་ནི་འགྲེལ་པ་མཐའ་དྲུག་པ་ལས་བཤད་པ་ནི། སྐྱོན་ཐམས་ཅད་ཀྱི་དྲི་མ་བཀྲུས་ནས། ཡེ་ཤེས་འཆར་བར་བྱེད་པའི་བྱང་ཆུབ་ཏུ་དབང་བསྐུར་བ་ཞེས་པའོ། །དེའང་བསོད་ནམས་དང་ཡེ་ཤེས་བསགས་པ་ལས། བག་ཆགས་རྣམས་ཀྱིས་ཤེས་རབ་ཡེ་ཤེས་ཀྱི་དབང་བསྐུར་བའི་དུས་སུ་དེ་ཉིད་གསལ་པོར་སྣང་བ་དེ་ལས་གཞན་པ་རྣམས་ལས་ནི་ཚིག་གིས་བསལ་བར་བྱ་སྟེ། ཤེས་རབ་ཡེ་ཤེས་ཀྱི་ཐབས་ལས་བྱུང་བའི་ལྷན་ཅིག་སྐྱེས་པའི་མཚན་
ཉིད་ཇི་ལྟ་བ་བཞིན་མན་ངག་གི་ཡན་ལག་གཞན་དང་ལྡན་པས་བསླབས་པའི་མི་གཡོ་བའི་བདེ་བ་ཆེན་པོ་མཚོན་བྱས་ནི། ཤིན་ཏུ་བའི་ཐབས་ལས་བྱུང་བའི་རྫོགས་པའི་ཡན་ལག་ཉེ་བར་བསྐྱེད་པ་ལས་ལམ་གྱི་གནས་སྐབས་སུ་བདག་ཉིད་འགྲུབ་པའོ་ཞེས། རྒྱུད་གཞན་ལས་གསུངས་པའི་རྒྱུ་དང་འབྲས་བུ་དབྱེར་མེད་པར་ལྷག་པར་མོས་པའི་ཕྱག་རྒྱ་ཆེན་པོའི་ང་རྒྱལ་དང་ལྡན་པས་བསྒོམ་པར་བྱ་སྟེ། དེ་ལྟར་འདུས་པའི་རྒྱུད་སྟོང་ཕྲག་ཉི་ཤུ་ལྔ་ལས་གསུངས་ཏེ། རྡོ་རྗེ་སྐྱིལ་ཀྲུང་གིས་སེམས་ནི། །ནོར་བུའི་ནང་དུ་ཆུད་པར་ལྟ། །རྒྱུ་མཐུན་ལ་སོགས་བདེ་བར་རྫོགས། །ཇི་སྲིད་དྲི་མ་མེད་པའོ། །ཞེས་པའོ། །དེ་ལྟར་ཡང༌། བྷ་གར་ལིངྒ་རབ་བཞག་ནས། །བྱང་ཆུབ་སེམས་ནི་མི་འབྱིན་ཞིང༌། །ཁམས་གསུམ་མ་ལུས་པ་རྣམས་ཀྱི། །སངས་རྒྱས་གཟུགས་བརྙན་བསྒོམ་པར་བྱ། །ཞེས་པ་དང༌། བདེ་མཆོག་ལས་ཀྱང༌། ནང་དུ་ཆུད་པའི་ཡིད་ཀྱིས་ནི། །འདོད་པའི་དངོས་གྲུབ་བསྒོམ་བྱའོ། །ཞེས་ཏེ། འདིར་རྡོ་རྗེ་སྐྱིལ་ཀྲུང་གི་གདན་ལས་དེའི་ཆ་བཅུ་དྲུག་རྫོགས་པའི་རྡོ་རྗེ་ནོར་བུའི་ནང་དུ་ཆུད་པའི་བྱང་ཆུབ་ཀྱི་སེམས་ལས། ནང་དུ་ཆུད་པའི་ཡིད་ཅེས་བརྗོད་དེ། དེའི་འཕོ་བ་མེད་པའི་ལས་དང་ཡེ་ཤེས་དང་ཕྱག་རྒྱ་ཆེན་པོའི་སྦྱོར་བས། ཁམས་གསུམ་པ་བརྟན་པ་དང་གཡོ་བའི་དངོས་པོ་འདིས། རང་བཞིན་གྱི་བདག་ཉིད་ཅན་མ་ལུས་པའི་རྣམ་པ་ཐམས་ཅད་ཀྱི་མཆོག་དང་ལྡན་པའི་བདེ་
བ་ཆེན་པོའི་རང་བཞིན་ཕྱག་རྒྱ་ཆེན་པོའི་དངོས་གྲུབ་ཡོད་པ་དང༌། མེད་པ་ལས་འདས་པའི་གནས་མེད་པ་དང༌། དམིགས་པ་མེད་པར་རྟོགས་པར་བསྒོམ་པར་བྱ་སྟེ། དེ་སྐད་གསུངས་པའང་ནི། ཇི་སྲིད་རྣལ་འབྱོར་པ་ཡིས་ནི། །སྐྱེ་གནས་རྒྱུན་མི་འཆད་སྦྱོར་བས། །བྱང་ཆུབ་སེམས་སྤོང་མི་བྱེད་པ། །དེ་སྲིད་བར་དུ་དགའ་བའི་མཆོག །བདེ་བའི་ངོ་བོ་དེ་དང་ནི། །སངས་རྒྱས་གཟུགས་སུ་ཀུན་སྦྱོར་བ། །ཇི་སྲིད་ས་བོན་བརྟན་གྱུར་པས། །རྟག་ཏུ་བདག་ཉིད་བསྒོམ་པར་བྱ། །ཞེས་སོ། །དེ་ལྟར་ན་བྱང་ཆུབ་ཀྱི་སེམས་རྡོ་རྗེ་བཅོམ་ལྡན་འདས་ཀྱིས། རྡོ་རྗེ་སྐྱིལ་ཀྲུང་རྫོགས་སངས་རྒྱས། །སངས་རྒྱས་འགྲོ་བའི་ཆོས་འཛིན་འགྱུར། །རྣམ་པ་ཀུན་ལྡན་རྣམ་པ་མེད། །བཅུ་དྲུག་ཕྱེད་ཕྱེད་ཐིག་ལེ་ཅན། །ཆ་མེད་ཆ་ལས་འདས་པ་ཡི། །བསམ་གཏན་བཞི་པའི་རྩེ་མོ་འཆང༌། །འདིར་སངས་རྒྱས་འགྲོ་བའི་ཆོས་ནི་དགའ་བ་གསུམ་པོ་རོ་གཅིག་པའི་ལྷན་ཅིག་སྐྱེས་པའི་དགའ་བའོ། །དེ་འཛིན་པ་ནི་དེའི་བདག་ཉིད་ཀྱི་རྣམ་པ་ཐམས་ཅད་ཀྱི་མཆོག་དང་ལྡན་པའི་ཀུན་རྫོབ་ལ། དོན་དམ་པར་ནི་རྣམ་པ་མེད་པའི་ཐམས་ཅད་དུ་རང་བཞིན་མེད་པ་ཉིད། དེ་རྣམས་རྣམ་པ་མེད་པའི་ངོ་བོ་ཉིད་ལ་བརྗོད་ལ། དེ་ལྟར་ཡང་སློབ་དཔོན་ཀླུ་སྒྲུབ་ཀྱིས། རྣམ་བཅས་དངོས་པོ་ཀུན་བརྟགས་དང༌། །སྣང་བ་མེད་ཉིད་དུ་བརྟགས་ལ། །རྣལ་འབྱོར་
པ་ཡིས་གཅིག་བྱས་སྤྱད། །དེ་ཤེས་ཟུང་གཅིག་འཇུག་པ་ཅན། །ཞེས་བཤད་དོ། །ཆ་མེད་པ་ནི་བཅོ་ལྔའི་ཆའི་མཐའ་ལ་གནས་པའོ། །ཆ་ལས་འདས་པ་ནི་ནག་པོའི་ཚེས་གཅིག་ལ་རབ་ཏུ་ཞུགས་པའོ། །འདི་དག་གིས་ནི་ཐབས་དང་ཐབས་ལས་བྱུང་བའི་བདེ་བ་དག་དེ་ཁོ་ན་ཉིད་ཀྱི་སྟོང་པ་ཉིད་དོ། །གང་དུ་བདེ་བ་དེ་ཉིད་དེ་ཁོ་ན་ཉིད་དུ་རྟོགས་པར་གནས་པ་དེ་དག་གི་འཁྲུལ་པ་བསལ་བའི་དོན་དུ། བཅོམ་ལྡན་འདས་ཀྱིས་གསུངས་པ་ནི། གང་ཕྱིར་འབྱུང་བ་ཆེ་བདེ་བ། །དེ་ཕྱིར་བདེ་བ་དེ་ཉིད་མིན། །ཞེས་པ་སྟེ། འབྱུང་བ་ཆེན་པོའི་བདེ་བ་ཞེས་པ་ནི་ས་བོན་དང་བདེ་བ་དག་བདག་ཉིད་གཅིག་པས་སོ། །ལྷན་ཅིག་སྐྱེས་ཀྱང་རྟག་ཏུ་ཐམས་ཅད་འབྱུང་བ་མ་ཡིན་ཏེ། དེ་ལྟར་ན་ལྷན་སྐྱེས་དངོས་པོའི་ངོ་བོ་སྟེ། དེའི་དོན་དམ་སྟོང་པ་ཉིད། ཀུན་རྫོབ་རྟོགས་པའི་བདེ་བ་གལ་ཏེ་རྟོགས་ཀྱང༌། དེ་ལྟར་ནའང་རྟག་ཏུ་ཐམས་ཅད་དུ་ལྷན་ཅིག་སྐྱེས་པ་མ་ཡིན་ཏེ། སྡུག་བསྔལ་དང་བཏང་སྙོམས་ཉམས་སུ་མྱོང་བའི་དུས་ཐ་དད་པ་བསམ་གཏན་བཞི་པ་དང་གཟུགས་མེད་པའི་སྙོམས་པར་འཇུག་པ་རྟོགས་པ་བཞིན་ཉམས་སུ་མྱོང་བར་བྱས་པའི་ཕྱིར་རོ། །གང་དུ་མཚན་ཡང་དག་པར་བརྗོད་པ་ལས་གསུངས་པ་ནི། བསམ་གཏན་བཞི་པའི་རྩེ་མོ་ཅན། །ཞེས་པ་ནི། དེ་ལ་བསམ་གཏན་བཞི་པ་ནི་ལྷན་ཅིག་སྐྱེས་པའི་དགའ་བ་ལ་རྩེ་མོ་ནི་སྒྲིབ་པ་མེད་པར་རྟོགས་པའི་མཐར་ཐུག་ནས། དེའི་བདག་ཉིད་དུ་གནས་པའི་ཕྱིར་དེའི་རང་བཞིན་འཛིན་ཞེས་པའི་དོན་ནོ། །
བདེ་བ་ཆེན་པོའི་རང་བཞིན་མུ་མེད་པའི་ཁམས་གསུམ་པ་མཐོང་བར་འགྱུར་བས། བསམ་གཏན་ལ་སོགས་པའི་བདེ་བ་ཆེན་པོའི་རང་བཞིན་ཏེ། བཅོམ་ལྡན་འདས་ཀྱིས་དེ་ལྟར་གཞན་མ་ཡིན་པའི་ཐོས་པ་དེ་ལྟར་གསུངས་པ་ནི་བཟླས་པ་དང་བཤད་པའི་དོན་དུའོ། །འོ་ན་ཇི་ལྟར་ན་བདེ་བ་ལ་ལྷན་ཅིག་སྐྱེས་པར་བརྗོད་ཅེ་ན། ཇི་ལྟར་དམིགས་པ་མེད་པའི་ཐུགས་རྗེ་ཆེན་པོ་ནི། དེ་ཁོ་ན་ཉིད་མ་མཐོང་བས་ཡོད་པ་མ་ཡིན་པའི་ལྷག་པར་མོས་པར་སྒོམ་པར་བྱེད་པ་ནི་དེ་ཁོ་ན་ཉིད་རྟོགས་པའི་བདག་ཉིད་ཀྱི་ཕྱིར་ཀུན་རྫོབ་ཀྱི་ངོ་བོའང་ལྷན་ཅིག་སྐྱེས་པར་བརྗོད་དོ། །དེ་ལྟར་བདེ་བའང་རེས་འགའ་ཉམས་སུ་མྱོང་བའི་གནས་སྐབས་སུ་མ་མྱོང་བའི་གནས་སྐབས་ཀྱིས་དེ་ཉིད་མ་མཐོང་བར་ལྷག་པར་མོས་པའི་བདེ་བ་དང༌། སྙིང་རྗེ་དབྱེར་མེད་པར་ངོ་བོ་སྟོང་པ་ཉིད་ཀྱི་བདག་ཉིད་ཅན་གྱི་རྣམ་པ་ཐམས་ཅད་ཀྱི་མཆོག་དང་ལྡན་པ་བསྒོམ་པར་བྱ་བས་དེ་ཁོ་ན་ཉིད་རྟོགས་པའི་གནས་སྐབས་ཀྱི་འཇིག་རྟེན་ལས་འདས་པ་ལྷུན་གྱིས་གྲུབ་པ་ནི། བཅོས་མ་མ་ཡིན་པས་ལྷན་ཅིག་སྐྱེས་པར་བརྗོད་དོ། །དེ་ཁོ་ན་ཉིད་མ་རྟོགས་པའི་གནས་སྐབས་ཀྱིས་མྱོང་བ་ནི། ཟག་པ་དང་བཅས་པ་དང༌། མི་བདེན་པ་དང༌། མ་རྒྱས་པ་དང༌། ཡན་ལག་མ་རྫོགས་པ་དང༌། གློག་འགྱུ་བ་བཞིན་དུ་ཡུད་ཙམ་སྐད་ཅིག་ཙམ་གྱིས་འཇིག་རྟེན་པའི་ཀུན་རྫོབ་རྩོལ་བ་དང་བཅས་པ་ཉིད་ཀྱིས་ནི། བཅོས་མ་ཉིད་ཀྱང་
ལྷན་ཅིག་སྐྱེས་པར་བརྗོད་དེ། ལྷན་ཅིག་སྐྱེས་པའི་རྗེས་སུ་བྱེད་པའི་ཕྱིར་འོད་གསལ་བ་བཞིན་ཏེ། ཇི་སྐད་དུ་ཕྱག་རྒྱ་ཆེན་པོའི་ཐིག་ལེ་ལས། གང་འདིར་དགའ་བ་སྣང་བཅས་པ། །སྣང་བ་མཆེད་པ་མཆོག་ཏུ་དྲན། །བྲལ་བ་ཉེ་བར་ཐོབ་པར་ཤེས། །ལྷན་ཅིག་སྐྱེས་པ་འོད་གསལ་བ། །ཞེས་གསུངས་སོ། །འདི་ཉིད་ནི་ལྷན་ཅིག་སྐྱེས་པ་ལས་བྱུང་བའི་དེ་ཁོ་ན་ཉིད་ཀྱི་བྱང་ཆུབ་ཀྱི་སེམས་སྟོང་པ་དང༌། སྙིང་རྗེ་དབྱེར་མེད་པ་འདི་ཅི་ཤེས་རབ་ཡེ་ཤེས་སམ་གཞན་ཉིད་ཡིན་ཞེ་ན། གཞན་མིན་ཏེ། དེ་ཉིད་འདིར་མི་མཐུན་པའི་ཕྱོགས་ཀྱིས་བཏང་ནས་རང་གི་ངོ་བོ་གསལ་བར་བྱེད་པའོ། །དེའི་ཕྱིར་ཆོ་གའི་སྐབས་འདི་ཉིད་དུ་ཤེས་རབ་ཡེ་ཤེས་ཉམས་སུ་མྱོང་བ་དང་ཡན་ལག་བསྒོམས་པ་འཕེལ་བར་བྱེད་པའི་ཕྱག་རྒྱ་ཆེན་པོའི་དབང་བསྐུར་བས་བག་ཆགས་དང་བཅས་པའི་རྣམ་པར་རྟོག་པའི་དྲི་མ་དངོས་སུ་བཀྲུས་ནས་བཞི་པ་འོད་གསལ་བ། དཔག་བསམ་གྱི་ཤིང་བཞིན་དུ་མངོན་པར་མཐོ་བ་ལ་སོགས་པ་འབྲས་བུ་རྣམས་ཀྱིས་ཇི་ལྟར་གདུལ་བྱ་ལ་ཤེས་རབ་ཡེ་ཤེས་དང་ཁ་སྦྱོར་བའི་དཔལ་བདེ་མཆོག་ལ་སོགས་པའི་སྐུའི་ལོངས་སྤྱོད་རྫོགས་པའི་སྐུ་ལ་སོགས་པས་འགྲོ་བ་ཚིམ་པར་བྱེད་པ་དང་། མི་འབྲལ་བར་མུ་མེད་པའི་དུས་ཀྱིས་གནས་པའི་ཕྱིར་གནས་པ་སྟེ། དེ་ལྟར་འདིར་ལོངས་སྤྱོད་རྫོགས་པ་དང་ཁ་སྦྱོར་བདེ་ཆེན་རང་བཞིན་མེད་པ་དང་། །ཐུགས་རྗེ་ཆིམ་
བྱེད་རྒྱུན་མི་འཆད་དང་། འགོག་པ་མེད་སྟེ་ཡན་ལག་བདུན་གྱི་མཚན་ཉིད་དང་ལྡན་པར་གསུངས། འདིར་དང་པོ་ཡན་ལག་གསུམ་གྱིས་ནི་ཐེག་པ་གཞན་དང་ཐུན་མོང་མ་ཡིན་པར་བསྟན་ཏེ། རྒྱུའི་གནས་སྐབས་སུ་བསྐྱེད་པའི་རིམ་པ་དཔལ་བདེ་མཆོག་ལ་སོགས་པའི་རང་གི་ངོ་བོར་སྒོམ་པ་གསུངས་པ་མེད་ལ། ཕ་རོལ་ཏུ་ཕྱིན་པའི་ཐེག་པར་ཡང་མཚན་དང་དཔེ་བྱད་ཀྱིས་འབར་བའི་ལོངས་སྤྱོད་རྫོགས་པའི་སྐུ་འབྲས་བུའི་གནས་སྐབས་ཉིད་དུ་མངོན་པར་མ་བརྗོད་པའི་ཕྱིར་རོ། །ཤེས་རབ་དང་སྦྱོར་བའང་མེད་ལ་དེ་ལས་སྐྱེས་པའི་བདེ་བ་ཆེན་པོའང་མེད་དོ། །ཁ་ཅིག་གིས་སེམས་ལོངས་སྤྱོད་རྫོགས་པ་དང༌། སྟོང་པ་ཉིད་ཀྱི་ཡེ་ཤེས་ཀྱི་བདག་ཉིད་ཅན་ཤེས་རབ་དང་ཁ་སྦྱོར་ཏེ། དེ་བསྒོམས་པ་ལས་སྐྱེས་པའི་བདེ་བ་ཆེན་པོ་དེའི་རང་བཞིན་མེད་པ་ཉིད་དེ་ལས་འབྱུང་བའི་ཐུགས་རྗེའོ། །ཞེས་པའི་ཡན་ལག་ལྔ་ཐུན་མོང་མ་ཡིན་པ་རྣམ་པར་བཞག་པ་ནི་རིགས་པ་མ་ཡིན་ཏེ། ཕ་རོལ་ཏུ་ཕྱིན་པའི་ཐེག་པར་ཡང་འདི་ཉིད་གསུངས་པའི་ཕྱིར་རོ། །དེས་ན་སེམས་ནི་བྱང་ཆུབ་ཀྱི་སེམས་བསྐྱེད་པའི་རིམ་པ། དཔལ་ཧེ་རུ་ཀ་ལ་སོགས་པའི་རང་བཞིན་དུ་ལྷག་པར་མོས་པར་བྱེད་པ་དང༌། དངོས་པོ་མེད་པའི་བློ་ནི་རྡོ་རྗེ་ཕག་མོ་ལ་སོགས་པ་ཉིད་དོ། །དེ་གཉིས་ཀའི་ཁྱད་
པར་ཅན་གྱི་ལྷ་ཁ་སྦྱོར་བར་བསྒོམས་པ་ལས་བྱུང་བའི་བདེ་བ་ཆེན་པོ་དེ་ནི་རང་བཞིན་མེད་པ་ཉིད་དོ། །དེ་ལྟ་བུའི་རྣམ་པའི་ལམ་སྟོན་པས་ཁྱད་པར་ཅན་གྱི་སེམས་ཅན་གྱི་དོན་བྱེད་པ་ཡོད་པས་ཀྱང་ཐུགས་རྗེ་རྒྱུན་མི་འཆད་པའོ། །ཞེས་པ་ནི་ཐུན་མོང་མ་ཡིན་པ་ཉིད་དེ། དེ་དག་ཕ་རོལ་ཏུ་ཕྱིན་པའི་ཐེག་པར་དེ་ལྟར་མ་གསུངས་པའི་ཕྱིར་རོ། །གང་དུ་དེ་ལྟར་འགྱུར་བའི་བཅོམ་ལྡན་འདས་བར་ཆད་མེད་པས་བར་མ་ཆད་པ་ཉིད་དང༌། མྱ་ངན་ལས་འདས་པའི་ཕྱོགས་གཅིག་པ་མེད་པས་འགོག་པ་མེད་པ་ནི་ཐུན་མོང་མ་ཡིན་ནོ། །ཞེས་པའི་ཡན་ལག་བདུན་ཆར་ཡང་ཐུན་མོང་བ་ཡིན་པའོ་ཞེས་བཤད་པའི་ཕྱིར། བསྐྱེད་པའི་རིམ་པ་ལའང་རྗོད་པར་བྱེད་པ་ཁ་ཅིག་གིས་ལོངས་སྤྱོད་པའི་ཡན་ལག་དེ་ཉིད་ཐབས་ཡིན་པར་འཁྲུལ་ནས། ཐུགས་རྗེའི་ཡན་ལག་ཏུ་གསུངས་པ་དེ་ནི་རིགས་པ་མ་ཡིན་ཏེ། སྡུག་བསྔལ་ལས་གདོན་པར་འདོད་པ་ནི་སྙིང་རྗེ་སྟེ། དེའང་ལས་དང་པོ་པའི་སེམས་ཅན་གྱི་ངོ་བོ་ཉིད་མི་དམིགས་པ་ལས་སྐྱེས་པར་འགྱུར་རོ། །དེའི་རྗེས་ལ་ངོ་བོ་ཉིད་མེད་པ་ཉིད་ཀྱིས་ཆོས་ལ་སྦྱོར་བའི་དམིགས་པ་མེད་པ་ནི། བྱང་ཆུབ་སེམས་དཔའ་རྣམས་ཀྱིའོ། །དེ་རྗེས་རབ་ཏུ་བྱུང་བའི་དངོས་པོའི་རྣམ་པར་རྟོག་པ་མེད་པ་ནི་སངས་རྒྱས་རྣམས་ཡིན་ཏེ། དེ་ཉིད་ཀྱི་དམིགས་པ་མེད་པ་ལྷུན་གྱིས་གྲུབ་པས་རྒྱུན་མི་འཆད་པར་འགྲོ་བའི་དོན་ལ་བརྗོད་དོ། །དེ་ལྟར་གསུངས་ཏེ། ཡིད་བཞིན་ནོར་
ལྟར་མ་ལུས་པ། །སེམས་ཅན་དོན་བྱེད་སྙིང་རྗེ་ཉིད། །ཅེས་ཏེ། དམིགས་པ་མེད་པའི་སྙིང་རྗེ་ཆེན་པོ་འདི་ཉིད་ནི། དབང་པོ་རབ་ཀྱི་ལས་དང་པོ་པས་ཀྱང་ལྷག་པར་མོས་པའི་སྒོམ་པའོ། །ཞེས་པའི་སྙིང་རྗེ་ནི་ཡན་ལག་ལོགས་ཤིག་པ་ཡིན་ནོ། །འདི་ཉིད་ནི་དབང་བཞི་པ་སྟེ། དབང་བསྐུར་སྦྱིན་ཞེས་བྱ་བ་ལ་སོགས་པས་རྒྱས་པར་འཆད་པ་ནི། དབང་པོ་རབ་ཀྱི་སེམས་ཅན་ནི་དགའ་བ་བཞི་ཉིད་དབང་བཞི་ཞེས་བསྟན་པར་འདོད་ནས། དེའང་དབང་རྣམ་པ་བཞི་ཞེས་གསུངས་ཏེ། དེའི་དགའ་བ་ལ་སོགས་པ་དེ་ལྟར་བརྟག་པ་གཉིས་པ་ལས། སློབ་དཔོན་གསང་བ་ཤེས་རབ་དང༌། །བཞི་པ་ཡང་ནི་དེ་ལྟར་ཏེ། །དབང་བཞི་པ་ཡི་གྲངས་ཀྱི་ནི། །དགའ་བ་ལ་སོགས་རིམ་ཤེས་བྱ། །ཞེས་གསུངས་སོ། །འདིར་ཡང་བྱང་ཆུབ་ཀྱི་རྟེན་ལ་རྡོ་རྗེའི་བུམ་པས་བྱ་བ་བྱེད་པའི་བུམ་པའི་དབང་གིས་སྤྱོད་པའི་བྱེ་བྲག་ལས་བྱུང་བ། སློབ་དཔོན་གྱི་དབང་ཡང་དགའ་བ་སྟེ། དེ་ལྟར་ཕྱག་རྒྱ་ཆེན་པོའི་ཐིག་ལེ་ལས། བཅུ་དྲུག་ལོ་ལོན་གཟུགས་བཟང་མ། །དགའ་བའི་རོ་ཡིས་ཚིམ་བྱས་པའི། །ཕྱག་རྒྱ་དེ་ནི་གཅེར་བུ་བྱ། །ཐོག་མར་དམ་ཚིག་སོགས་པས་མཆོད། །དེ་རྗེས་ཁ་སྦྱོར་སྦྱོར་བ་ཡིས། །ཡང་ནས་ཡང་དུ་འདོད་སྤྱད་པ། །ཇི་སྲིད་ས་བོན་འབྱུང་འགྱུར་བར། །ཅུང་ཟད་ཀྱི་ནི་བསྲུང་བར་བྱ། །ཆུ་སྐྱེས་སུ་ནི་བྱུང་བའི་ཚེ། །སྙིང་ག་ལ་ནི་མྱུར་གཏོར་བྱ། །
དེ་ནི་སློབ་དཔོན་དབང་མཆོག་ཏུ། །འགྱུར་རོ་དགའ་བའི་དབང་ཕྱུག་མ། །གསང་བའི་དབང་ནི་མཆོག་གྱུར་པ། །བཤད་ཀྱིས་གུས་པར་མཉན་པར་གྱིས། །གསང་གནས་གང་དུ་བདེ་བ་ནི། །སྐད་ཅིག་ལེགས་པར་གནས་གྱུར་པ། །དེ་ནི་གསང་བར་ཡང་དག་བཤད། །གཞན་དུ་འཇིག་རྟེན་པ་རུ་འགྱུར། །ཤེས་རབ་ཡེ་ཤེས་དབང་འགྱུར་བའི། །ཀུན་ཏུ་རྙེད་དཀའ་བཤད་པར་བྱ། །ཤེས་རབ་ས་བོན་ངོ་བོར་བཤད། །ཡེ་ཤེས་བདེ་བའི་རང་བཞིན་དྲན། །དབང་བསྐུར་ཞུ་བར་འགྱུར་བའི་བདག །ཡེ་ཤེས་གནས་སྐབས་ལས་གཞན་བདག །དེ་འགོག་པ་ནི་བཞི་པར་བརྗོད། །ལྷན་སྐྱེས་ཡེ་ཤེས་མཚན་ཉིད་དོ། །ཞེས་གསུངས་སོ།། །།མན་ངག་སྙེ་མའི་སྙེ་མ་དྲུག་པ་ལས། འོ་ན་རྣམ་པར་མི་རྟོག་པ་སྒོམ་པ་ཞེས་པའི་དོན་ཅི་ཡིན་ཞེ་ན། བདེ་བ་ཆེན་པོས་ཐབས་ཀྱི་ཆོས་ཐམས་ཅད་རང་བཞིན་མེད་པ་ཉིད་ནི་སྒོམ་པའོ། །ཞེས་བྱ་བའི་དོན་ནོ། །དེ་ཅི་བདེ་བ་ཆེན་པོ་སྒོམ་པའི་རྣམ་པར་རྟོག་པ་སྐྱོན་མ་ཡིན་ནམ་ཞེ་ན། སྐྱོན་མིན་ཏེ། དེའང་འགྲོ་བ་ཐ་དད་པ་ཉིད་པས་འགྲོ་བ་སྟོང་པ་ཉིད་ཀྱིས་ན་སྟོང་པ་ཉིད་ཀྱི་རང་བཞིན་གྱི་ཕྱིར་ལ། སྟོང་པ་ཉིད་ནི་བསམ་པར་མི་འབྱུང་ཞེས་པས། དེའི་རྣམ་པར་རྟོག་པའི་སྐྱོན་མེད་དེ། རྣམ་པར་མི་རྟོག་པའི་རྗེས་སུ་མཐུན་པའི་ཕྱིར། ཉེ་བར་བསྟན་པ་སྟེ། ཇི་སྐད་དུ། འཁྲུལ་པ་གཞན་དག་བཟློག་པ་ལ། །འཁྲུལ་པ་ཡིས་ཀྱང་ཕན་པར་བྱེད། །ཅེས་གསུངས་སོ། །དེ་ཉིད་ལས། གང་དུ་འདིའི་ངོ་བོ་ཉིད་མེད་པར་ཚད་མས་བསྒྲུབས་པ་ནི་བདག་གིས་
ཤིན་ཏུ་རྒྱས་པར་རྩ་དབུ་མའི་སྙེ་མ་ལས་ཉེ་བར་བཀོད་པ་དང་ཐུབ་པ་དགོངས་པའི་རྒྱན་ལས་ཀྱང་ལུང་གི་རྗེས་སུ་འབྲང་ནས་དང༌། མི་འཇིགས་པའི་གཞུང་འགྲེལ་ལས་ཀྱང་མདོར་བསྡུས་ནས་བསྟན་པས་སོ། །འདིར་དངོས་པོ་དང་དངོས་པོ་མེད་པ་ལས་ངོ་བོ་མེད་པར་སྤྲོས་པ་ཐམས་ཅད་པས་སོ། །དེ་དག་དངོས་པོ་དང་དངོས་པོ་མེད་པར་གནས་པས་དེ་ཉིད་ཀྱིས་ཁྱབ་པའི་ཕྱིར་ན་ཁྱབ་བྱེད་མེད་པས་ན་ཁྱབ་བྱའང་མེད་པ་སྟེ། འདི་ཉིད་ནི་དེ་ཁོ་ན་ཉིད་མཐོང་བ་ལ་མཐོང་བ་ཉིད་མངོན་པར་འདོད་ཀྱི། གཉིད་ལོག་པའམ་མིག་བཙུམ་པ་བཞིན་གང་དུ་ཡིད་ལ་མི་བྱེད་པས་ནི་མ་ཡིན་ནོ། །ཐེ་ཚོམ་གྱི་ས་བོན་དང་བྲལ་བ་ཉིད་གཟུགས་ལ་སོགས་པ་ལ་མངོན་པར་ཞེན་པ་གསལ་བར་བྱ་བའི་ཚེར་མ་ཟུག་པ་བཏོན་པ་གཞན་དེས་མ་ཡིན་གྱིས་དེ་ཉིད་ཀྱིས་དངོས་པོ་དང་དངོས་པོ་མེད་པ་དང༌། རང་དང་གཞན་གྱི་དངོས་པོ་ལ་སོགས་པའི་ཡིད་ལ་བྱེད་པ་བསལ་ནས་ཐམས་ཅད་ཡིད་ལ་བསྡུས་ནས་ཅིའང་བསམ་པར་མི་བྱ་སྟེ། དེ་ལྟར་ཡང༌། གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་བཤད་པའོ། །དེ་ཉིད་ཀྱི་གང་གིས་ཤེས་རབ་ཀྱི་སྤྱན་གྱིས་རྣམ་པར་བརྟགས་པས་ཡང་དག་པའི་ཡེ་ཤེས་ཀྱི་སྣང་བར་གྱུར་ནས་ཆོས་ཐམས་ཅད་མི་སྣང་སྟེ། དེ་ལ་དེ་ཁོ་ན་ཉིད་ཀྱིས་རྣལ་འབྱོར་གྱི་སྤྱོད་ལམ་ཐམས་ཅད་དུ་རྣམ་པར་གནས་པ་རྣམས་ཀྱིས་ཆོས་ཐམས་ཅད་མཐོང་བའང་མ་མཐོང་བ་སྟེ། རྣལ་འབྱོར་
བསམ་གྱིས་མི་ཁྱབ་པ། །བླ་མའི་དྲིན་གྱིས་རྟོགས་པ་ཉིད། །ནི་བཅོམ་ལྡན་འདས་མ་ཤེས་རབ་མ་ལས་སྐྱེ་བར་འགྱུར་ན། རྒྱུན་མི་འཆད་པར་ཚད་མ་དང་གཞལ་བྱའི་འབྲས་བུས་རྣམ་པར་འབྱེད་པ་དེས་ན་ཀུན་རྫོབ་ཏུ་རང་གསལ་བའི་ངོ་བོ་ཉིད་དུ་སྤྲོས་པ་མེད་ཀྱང་སྤྲོས་པའི་བདག་ཉིད་ཀྱི་འཁོར་བའི་རང་བཞིན་གྱི་སྡུག་བསྔལ་གྱིས་མ་རྟོགས་ཏེ། དེ་ལ་ཇི་ལྟར་བདག་གིས་རྟོགས་པར་བྱ་ཞེས་རྣམ་པར་བསམ་སྟེ། དེའི་བདག་ཉིད་ཀྱིས་འགྲོ་བ་མ་ལུས་པ་དམིགས་པའི་དམིགས་པ་མེད་པའི་ཚུལ་གྱིས་སྙིང་རྗེ་ཆེན་པོ་སྐྱེ་བར་གྱུར་ནས་དེས་བདག་ཉིད་ཅན་གྱི་རྫོགས་པའི་དཀྱིལ་འཁོར་གྱི་ངོ་བོའི་བདག་ཉིད་ཀྱིས་དངོས་པོ་ཐམས་ཅད་ཀྱི་རང་བཞིན་སྙིང་རྗེ་ཆེན་པོའི་བདག་ཉིད་ཅན་བཅོམ་ལྡན་འདས་མ་ཤེས་རབ་མ་ཕྱག་རྒྱ་ཆེན་པོའི་མིང་གཞན་ཅན་དེ་དང་བདག་ཉིད་གཅིག་པའི་ཕྱིར་དབྱེར་མེད་པའི་རང་བཞིན་དུ་བལྟས་ནས། དེའི་སྟོང་པ་ཉིད་དང་སྙིང་རྗེ་དབྱེར་མེད་པའི་བདག་ཉིད་ནི་རྣམ་པར་མི་རྟོག་པའི་རྣལ་འབྱོར་ཏེ། དེ་ལ་གང་དང་གང་གི་སེམས་བརྟན་པར་གྱུར་པ་དེ་ཉིད་དང་དེ་ནི་མཉམ་པར་བཞག་པའི་རྣལ་འབྱོར་ཉིད་ལ་དེ་ལས་གཞན་པ་ནི་མཉམ་པར་མ་བཞག་པའི་རྣལ་འབྱོར་ཉིད་དོ། །དེའི་ཕྱིར་ན་རྫོགས་པའི་རིམ་པའི་ཕྱག་རྒྱའི་སྦྱོར་བ་ལས། གཞན་ལས་ཀྱང་མཉམ་པར་བཞག་པའི་རྣལ་འབྱོར་ཉེ་བར་བསྟན་ཏོ། །བདེ་བ་ཆེན་པོའི་ཐབས་ཀྱི་ཆོས་ཐམས་ཅད་མི་རྟོག་པའི་གནས་སྐབས་ཀྱི་ཕྱག་རྒྱ་ཆེན་པོ་སྒྲུབ་པའང་ཕྱག་རྒྱའི་སྦྱོར་བ་ཉིད་ཀྱིས་སོ། །དེ་ཉིད་འདིར་སྟོང་པ་དང་སྙིང་རྗེ་བདག་ཉིད་གཅིག་པའི་སྦྱོར་བ་ནི། སོ་
སོར་སྡུད་དང་བསམ་གཏན་དང༌། །སྲོག་རྩོལ་དང་ནི་དེ་བཞིན་འཛིན། །རྗེས་སུ་དྲན་དང་ཏིང་འཛིན་དང༌། །སྦྱོར་བ་ཡན་ལག་དྲུག་ཏུ་འདོད། །ཅེས་པ་ནི་གསང་བ་འདུས་པའི་རྒྱུད་ཕྱི་མ་ལས་གསུངས་པའི་སྦྱོར་བའི་ཡན་ལག་དྲུག་སྟེ། དེ་ལྟར་ཡང་གཞོན་ནུ་མའི་གཟུགས་བརྙན་གྱི་ཚོགས་མཐོང་བ་བཞིན་དུ་དབང་པོ་རྣམས་སྟོང་པ་ཉིད་དང་རོ་གཅིག་པས་རང་གི་ཡུལ་དུ་བྱས་པ་རྣམས་ལ་མ་ཞེན་པ་ནི་སོ་སོར་སྡུད་པ་སྟེ། སོ་སོར་དེ་རྣམས་ལ་སྡུད་པས་དབང་པོ་རྣམས་བཀུག་པར་བྱེད་པས་སོ། །དེས་རྣམ་པར་གཡེང་བ་དང་བྲལ་བའི་བསམ་གཏན་ཏེ། དེའང་རྣམ་པར་རྟོག་པ་ནི་དངོས་པོ་ལ་རྟོག་པའོ། །རྣམ་པར་དཔྱོད་པ་ནི་དངོས་པོ་སྟོང་པ་ཉིད་ཀྱི་རང་བཞིན་ཉིད་དཔྱོད་པའོ། །དེ་ལྟར་ཕྱི་རོལ་གྱི་རང་བཞིན་ཡུལ་ལས་བཟློག་པའི་ཡིད་ཙམ་ནང་དུ་ཕྱོགས་པས་ལྷའི་བདག་ཉིད་ཅན་དུ་བདག་ཉིད་དམིགས་པར་བྱེད་པའི་བླ་ན་མེད་པའི་ཤེས་རབ་དང༌། ཐབས་རོ་གཅིག་པ་ཉིད་དུ་དཔྱོད་པ་གང་གིས་དེ་ཁོ་ན་ཉིད་ལ་འཇུག་པ་མངོན་པར་ཕྱོགས་པ་ཡིད་བདེ་བ་གང་དེ་ནི་དགའ་བའོ། །དེས་ལུས་སྦྱངས་པ་ལ་སོགས་པ་ནི་བདེ་བའོ། །དེ་ལྟར་བསྒོམས་པས་ནི་ཆོས་ཐམས་ཅད་སྟོང་པ་ཉིད་དུ་རོ་གཅིག་པར་མཐར་ཐུག་པའི་ཤེས་རབ་ཀྱི་བདག་ཉིད་ཀྱིས་སེམས་རྩེ་གཅིག་པ་ཞེས་པ་རྣམ་པ་ལྔའོ། །དེ་ལ་ལཱ་ལ་ན་དང་རཱ་ས་ན་གཉིས་འགགས་ནས། ཨ་བ་དྷཱུ་ཏཱིའི་ལམ་ཉིད་དུ་འཇུག་པའི་གནས་པ་དང་ལྡན་པའི་བདག་ཉིད་ཅན་གྱི་སྲོག་གི་རླུང་ཕྲ་མོ་འཇུག་པ་ནི་སྲོག་
རྩོལ་ལོ། །དེ་ལ་ཨ་བ་དྷཱུ་ཏཱི་ལས་ཕྱིར་མ་བྱུང་བར་ལྟེ་བ་དང་སྙིང་ག་དང་ལྐོག་མ་དང་དཔྲལ་བའི་པདྨའི་ལྟེ་བ་རྣམས་སུ་ས་དང་ཆུ་དང་མེ་དང་རླུང་རྣམས་ཀྱིས་རིམ་པས་བསགས་པའི་བྱང་སེམས་ཀྱི་ཐིག་ལེ་ལས་སེམས་ཀྱི་བཞོན་པའི་སྲོག་གི་རླུང་གཞུག་ཅིང་སྟོང་པ་ཉིད་དང་རོ་གཅིག་པ་ནི་འཛིན་པའོ། །དེས་ཀྱང་གཏུམ་མོ་རང་གི་ངང་གིས་འབར་ཏེ། རི་བོང་ཅན་ཡང་དེས་བསྐུལ་བས་ཤིན་ཏུ་འཇོགས་ནས་དེ་རྡོ་རྗེ་ནོར་བུའི་ནང་དུ་ཚུད་པའི་བྱང་སེམས་ཀྱི་རིམ་གྱིས་རྫོགས་པ་ལ་སོགས་པའི་བདེ་བས་གང་ནས་དྲི་མ་མེད་པའི་བར་དུ་འདོད་པས་དེ་འཛིན་པ་ལ་བཅུག་པའི་སེམས་ལ་རང་གི་ངང་གི་སྨིག་རྒྱུ་དང་དུ་བ་དང་སྲིན་བུ་མེ་ཁྱེར་དང་མར་མེ་དང༌། རྟག་ཏུ་སྣང་བ་ཞེས་པའི་མཚན་མའི་སྣང་བ་སྔོན་དུ་འགྲོ་བ་ཅན་གྱི་རྫོགས་པའི་རིམ་པ་དཀྱིལ་འཁོར་གྱི་ལྷར་གཟུགས་བརྙན་གྱི་རྣམ་པའི་རྣམ་པར་རྟོག་པ་མེད་པ་ཅན་དུ་མཐོང་ནས་འོད་ཟེར་དུ་མ་སྤྲོ་ཞིང༌། དེ་ལས་ཁམས་གསུམ་དུ་ལྷའི་འཁོར་ལོ་སྤྲོ་བའི་རང་བཞིན་ཞེས་པ་ནི་རྗེས་སུ་དྲན་པའོ། །དེ་ལ་གནས་པ་ནི་ཕ་རོལ་གྱི་ཇི་ལྟར་གདུལ་བྱ་ལའང་སོ་སོར་སྣང་བར་འགྱུར་ཏེ། དེའི་དེ་ཉིད་ཀྱི་རྣམ་པར་མི་རྟོག་པའི་རྣལ་འབྱོར་གྱིས་མི་གཡོ་བའི་བདེ་བ་ཆེན་པོའི་རང་བཞིན་ཟུང་དུ་འཇུག་པའི་ཕའི་བདག་ཉིད་ཅན་ཡེ་ཤེས་ཀྱི་སྐུ་རྡོ་རྗེ་འཛིན་པ་ཆེན་པོའི་ངོ་བོ་ནི་ཏིང་ངེ་འཛིན་ཅེས་བྱའོ། །ཡན་ལག་དྲུག་གི་ཕན་ཡོན་ནི་འདུས་པའི་རྒྱུད་ཕྱི་མ་ལས། སོ་སོར་སྡུད་པ་སྙོམས་འཇུག་པ། །སྔགས་རྣམས་ཀྱིས་ནི་
བྱིན་གྱིས་བརླབ། །བསམ་གཏན་ཡེ་ཤེས་སྙོམས་འཇུག་པས། །མངོན་ཤེས་ལྔ་ནི་ཐོབ་པར་འགྱུར། །སྲོག་རྩོལ་བས་ནི་ངེས་པར་ནི། །བྱང་ཆུབ་སེམས་དཔའ་རྣམས་ཀྱིས་གཟིགས། །རྟག་ཏུ་འཛིན་པའི་སྟོབས་ཀྱིས་ནི། །རྡོ་རྗེ་སེམས་དཔའ་མཉམ་པར་བཞུགས། །རྗེས་སུ་དྲན་པ་མཉམ་བསྒོམས་པས། །འོད་ཀྱི་དཀྱིལ་འཁོར་འབྱུང་བར་འགྱུར། །ཏིང་འཛིན་དབང་སྒྱུར་ཙམ་གྱིས་ནི། །སྒྲིབ་པ་མེད་དང་ལྡན་པར་འགྱུར། །ཞེས་པ་དང༌། ཏིང་ངེ་འཛིན་དེ་ཉིད་ནི་འདིར་སློབ་དཔོན་ཀླུ་སྒྲུབ་ཞབས་ཀྱིས་ཀྱང་གསུངས་ཏེ། སྒྱུ་འཕྲུལ་དྲ་བས་མངོན་སངས་རྒྱས། །བྱ་བ་བྱས་པའི་རྣལ་འབྱོར་ཆེ། །བདེན་པ་གཉིས་ཀྱི་ཚུལ་ལ་གནས། །དེ་ནི་གཉིས་མེད་ཡེ་ཤེས་ཏེ། །རབ་ཏུ་མི་གནས་མྱ་ངན་འདས། །སངས་རྒྱས་ཉིད་དང་རྡོ་རྗེ་འཛིན། །དེ་བཞིན་ཀུན་གྱི་དབང་ཕྱུག་ཉིད། །རྡོ་རྗེ་ལྟ་བུའི་ཏིང་ངེ་འཛིན། །རྫོགས་པའི་རིམ་པའང་དེ་ཉིད་དེ། །སྒྱུ་མ་ལྟ་བུའི་ཏིང་འཛིན་དང༌། །གཉིས་སུ་མེད་པར་དེ་བརྗོད་དེ། །སྐྱེ་བ་མེད་ལ་སོགས་སྒྲ་གང༌། །གཉིས་མེད་ཡེ་ཤེས་མཚོན་པའོ། །ཐམས་ཅད་འདི་ཡི་བརྗོད་བྱེད་དེ། །འཛིན་ནི་གཞན་དག་མ་བརྗོད་དོ། །ཡོད་དང་མེད་པའི་ཕྱོགས་སྤངས་པ། །འདི་ཉིད་རྟོགས་པའི་སངས་རྒྱས་པ། །གངྒཱ་ཀླུང་གི་བྱེ་སྙེད་ཀྱི། །ཕྱག་རྒྱ་ཆེན་པོ་བདག་ཉིད་གྲུབ། །ཅེས་སོ།། །།མན་ངག་གི་སྙེ་མ་བདུན་པ་ལས། ཇི་ལྟར་སྒྱུ་མ་རྨི་ལམ་བཞིན། །བར་དོའི་སྲེད་པ་ཇི་ལྟར་བར། །རྟག་ཏུ་
གོམས་པའི་རྣལ་འབྱོར་གྱིས། །དེ་ལྟར་དཀྱིལ་འཁོར་འགྱུར་བ་ཡིན། །ཞེས་པ་ནི་དཀྱིལ་འཁོར་རྒྱལ་མཆོག་གི་ཏིང་ངེ་འཛིན་ཏོ། །དེའི་རྗེས་སུ་དེ་བཞིན་གཤེགས་པ་ལ་སོགས་པའི་དཀྱིལ་འཁོར་གྱི་འཁོར་ལོ་སྤྲུལ་པ་རྣམས་ཀྱིས་འགྲོ་བ་རྟོགས་པའི་སངས་རྒྱས་སུ་བྱས་ནས་ཇི་ལྟར་རིགས་པར་རང་གི་ལུས་ལ་བསྡུས་པས་སོ། །རང་གིས་འཁྱུད་པའི་ལྷ་མོ་ལ་ནི་དེ་ལས་གཞན་པའི་རྣལ་འབྱོར་མ་རྣམས་ཏེ། དེ་དང་ལྷན་ཅིག་བདེ་བ་ཉམས་སུ་མྱོང་བའི་ལྟེ་བར་འབྱུང་བའི་རླུང་གིས་བསྐུལ་བའི་གཏུམ་མོ་རབ་ཏུ་དྲག་པོའི་ངོ་བོ་རི་མོའི་འོད་ཀྱིས་བསྲེགས་ན་རི་བོང་ཅན་གྱི་ཐིག་ལེའི་གཟུགས་འཇུག་པའི་རླུང་དང་ལྷན་ཅིག་རྟོགས་པའི་གཏུམ་མོ་དང་ལྷན་ཅིག་ཏུ་འགྱུར་བའི་ལྷན་ཅིག་སྐྱེས་པའི་བདེ་བ་ཉམས་སུ་མྱོང་བའི་རིམ་གྱིས་ལྟེ་བའི་དཀྱིལ་འཁོར་ལ་དམིགས་པའི་ཡིད་ཀྱིས་དམིགས་པ་མེད་པར་འགྱུར་ཏེ། དེ་ལྟར་ཡང་ནས་ཡང་དུ་བྱས་ཏེ་དེའི་རྗེས་སུ་ལས་རླུང་ལྟེ་བར་འགགས་པར་མོས་པ་ལ་ཐིག་ལེ་ཙམ་གྱི་རྣམ་པར་བལྟས་ལ་ཐིག་ལེ་དེའི་ནང་དུ་སྐད་ཅིག་གིས་རྫོགས་པའི་དཀྱིལ་འཁོར་གྱི་འཁོར་ལོ་དྲན་པར་བྱའོ། །དེ་ལྟ་བུ་ཉིད་ཀྱིས་དཀྱིལ་འཁོར་གྱི་འཁོར་ལོ་སྒྱུ་མའི་རང་བཞིན་དུ་བསྒོམ་མོ་ཞེས་པ་ནི་ལས་རྒྱལ་མཆོག་གི་ཏིང་ངེ་འཛིན་ཏོ།། །།ཡང་དེ་ཉིད་ལས། འདིས་ནི་སྟོང་པ་ཉིད་དང་སྙིང་རྗེ་དབྱེར་མེད་པའི་བྱང་ཆུབ་ཀྱི་སེམས་ཀྱི་རང་བཞིན་གྱི་ལྷའི་རྣམ་པའི་བདག་ཉིད་ཅན་གྱི་ལུས་ཀྱི་དངོས་པོའོ། །དཀྱིལ་འཁོར་སྣ་ཚོགས་པའི་ལྷའི་སྤྲུལ་པ་རྣམས་ཀྱིས་སྣ་
ཚོགས་པའི་དོན་བྱེད་པར་གསུངས་པ་དེ་གསལ་བར་བྱེད་པས་རྡུལ་ཚོན་གྱི་དཀྱིལ་འཁོར་ཡང་དཀྱིལ་འཁོར་དུ་བརྗོད་དོ། །འོ་ན་རང་བཞིན་གྱིས་རྣམ་པར་དག་པའི་དཔག་ཏུ་མེད་པའི་ཆོས་ཀྱི་རྟེན་གྱི་རང་བཞིན་གྱི་སེམས་ཉིད་དཀྱིལ་འཁོར་ཀྱང་གདུལ་བྱའི་སྐྱེ་བོ་རྣམས་ལ་གསུངས་པ་མིན་ནམ་ཞེ་ན། གསུངས་ཏེ། རྣལ་འབྱོར་པས་རྣམ་པར་དག་པའི་སེམས་ཀྱི་དཀྱིལ་འཁོར་རྣམ་པར་སྤྲོས་པའི་ཤིན་ཏུ་ཡོངས་སུ་དག་པའི་བློས་སངས་རྒྱས་སུ་མོས་པར་བྱས་པ་ཉིད་ནི་རང་བཞིན་གྱིས་ཡོངས་སུ་དག་པ་ཉིད་རྟོགས་པའི་ཕྱིར་ལ། རང་གི་སེམས་རང་བཞིན་གྱིས་དག་པ་ཡོངས་སུ་རྟོགས་པས་སངས་རྒྱས་པའི་རྣལ་འབྱོར་པ་ནི་བཞེད་པ་ཙམ་མོ། །དེ་ནས་དཀར་པོའི་ཆོས་ཐམས་ཅད་ཀྱི་རང་བཞིན་ལ་དཀྱིལ་འཁོར་དུ་བརྗོད་ཟིན་ཀྱང༌། དེ་ལྟར་ནའང་སེམས་ཅན་ཐམས་ཅད་ཀྱི་སེམས་ཀྱི་རང་བཞིན་དང་འགལ་བ་མེད་པ་དེ་ལྟར་ཡིན་ན། བསྐྱེད་པའི་རིམ་པ་བསྟན་པ་རྣམས་ལ་དགོས་པ་ཅིའང་མེད་དོ་ཞེ་ན་ཡོད་དེ། དེ་ནས་གཞན་དུ་བརྗོད་པ་གསུངས་པ་ནི། ཅི་ཞེས་པ་སྟེ་ཅིའང་ཡོད་པ་མ་ཡིན་ཏེ། གང་བྱང་ཆུབ་ཀྱི་སེམས་སྒོམ་པ་མ་ཡིན་པས་འགྲུབ་པ་མེད་ཅེས་དགོངས་པའོ། །གང་དུ་བདག་གིས་སངས་རྒྱས་རྡོ་རྗེ་འཛིན་པའི་བསྐྱེད་པའི་རིམ་པ་སྒོམ་པ་ལ་སོགས་པ་དེ་ནས་སེམས་རྒྱ་ཆུང་ངུ་མ་ལས་དང་པོ་པ་རྣམས་ལ་ཕན་པ་ཉིད་དེ་སེམས་དང་རྗེས་སུ་མཐུན་པར་འདོད་པས་འདིས་གང་བྱས་པའོ། །དེའང་གཟུགས་སྣ་ཚོགས་པའི་སྤྲུལ་
པ་རྣམས་ཀྱི་སྣ་ཚོགས་པའི་ཆ་བྱད་དང་རྒྱན་དང་བཀོད་པ་སྐལ་བ་དང་ལྡན་པ་ལ་སྤྲོས་པ་དང་བཅས་པ་ཉེ་བར་སྟོན་ནོ། །གཅིག་ཏུ་གྱུར་ནས་མང་པོར་གྱུར་པ་དང་མང་པོར་གྱུར་ནས་གཅིག་ཏུ་གྱུར་པ་དང༌། སྣང་བར་གྱུར་ནས་མི་སྣང་བར་གྱུར་པ་དང༌། མི་སྣང་བར་གྱུར་ནས་སྣང་བ་ཡང་དག་པར་སྟོན་པའི་རྣམ་པར་སྣང་མཛད་ལ་སོགས་པ་འཁོར་དང་བཅས་པའི་སངས་རྒྱས་རྣམས་ཀྱིས་གར་བྱེད་པ་ནི། གདུལ་བྱ་རྣམས་ལ་རྣམ་པར་སྟོན་པ་སྣ་ཚོགས་ཤིང་བསམ་གྱིས་མི་ཁྱབ་པའི་སྤྲུལ་པ་འདིའི་གར་ནི་ལས་དང་པོ་པ་ཉིད་ཀྱིས་བསོད་ནམས་བསགས་པའི་དབང་པོ་རབ་ཀྱི་ཤེས་རབ་ཀྱིས་འཇིག་རྟེན་པའི་འབྲས་བུ་གྲུབ་པ་ལས་སྐྱེས་པ་དད་པས་རྫོགས་པའི་རིམ་པ་བསྒོམས་པ་རྣམས་ལའང་ཤིན་ཏུའང་སྣང་བར་འགྱུར་རོ། །དེའང་དེ་ཉིད་ལས་ཡིད་ཆེས་པར་མི་ནུས་པའི་བློ་དམན་པ་ལ་དང་པོར་བསྟན་པར་མི་བྱ་སྟེ། དེའང་རྫོགས་པའི་རིམ་པ་བསྒོམས་པ་ཉིད་ཀྱིས་ཐམས་ཅད་འགྲུབ་པོ། །ཞེས་ཐོས་པས་དེའང་མི་ནུས་ལ་བསྐྱེད་པའི་རིམ་པ་ལས་ཀྱང་ཉམས་པར་འགྱུར་ཏེ། དེའི་ཕྱིར་ན་དང་པོ་བསྐྱེད་པའི་རིམ་པ་སྒོམ་པ་དེ་ཉིད་ངེས་པའི་དོན་ཞེས་ཁ་ཅིག་ཏུ་བསྟན་ཏེ། ཇི་སྐད་དུ་གསུངས་པ། རྒྱུ་འབྲས་དངོས་པོ་ཞེས་པ་ནི། །སེམས་ཀྱང་ཉམས་པར་མི་འགྱུར་རོ། །ཞེས་པའི་དོན་ཏེ། དེའི་ཕྱིར་ན་རྫོགས་པའི་རིམ་པ་ཤེས་པས་ཀྱང་ཡོངས་སུ་སྨིན་པ་ལ་བལྟོས་པ་མེད་པས་བསྐྱེད་པའི་རིམ་པ་དང་པོར་བསྒོམ་ཞེས་པའི་མན་ངག་གོ །མན་ངག་སྙེ་མ་
བཅུ་གཉིས་པ་ལས། ཡེ་ཤེས་སེམས་དཔའ་དམ་ཚིག་སེམས་དཔར་གཞུག་པ་དང༌། དེ་ནི་འདིར་ཐ་མལ་པའི་ང་རྒྱལ་ལས་བཟློག་པ་སྟེ་རང་གི་སེམས་ཀྱི་སྣང་བའི་ངོ་བོ་ཕྱག་ལ་སོགས་པ་རྣམས་སྤྲོས་པའི་ལྷའི་སྐུའོ། །ཁ་ཅིག་ནི་ས་བོན་དུ་ཡང་གསུངས་ལ། ཁ་ཅིག་ཏུ་ནི་དེ་ཉིད་དེ་མཉམ་པ་དང་འདུས་པ་སྟེ་དེའི་བདག་ཉིད་དུ་གྱུར་པའི་གཉིས་སུ་མེད་པའི་ཡེ་ཤེས་མངོན་སུམ་དུ་བྱས་པའི་ཕྱིར་འདིར་ཡེ་ཤེས་སེམས་དཔའ་ཞེས་པ་དང༌། དམ་ཚིག་སེམས་དཔའ་ནི་སེམས་ཅན་གྱི་དོན་བྱེད་པའི་ཕྱིར་དང་རྣམ་པར་དག་པའི་སེམས་ཅན་གྱི་ཐ་སྙད་ཀྱི་ཡུལ་གྱི་ཕྱིར་ལ་ས་བོན་ནི་ནུར་ནུར་པོ་བཞིན་སེམས་ཅན་ནོ། །འོ་ན་དམ་ཚིག་སེམས་དཔའ་དང་ཡེ་ཤེས་སེམས་དཔའ་ཉིད་ཁ་ཅིག་ཏུ་སངས་རྒྱས་རྣམས་ཐམས་ཅད་དང་ཁ་ཅིག་ཏུ་བྱང་ཆུབ་སེམས་དཔའ་རྣམས་དང་ཁ་ཅིག་ཏུ་འགྲོ་བ་རྣམས་དང༌། ལྷན་ཅིག་པ་དེའི་བདག་ཉིད་དུ་བཤད་ན་ཇི་ལྟར་འགལ་བ་མ་ཡིན་ཞེ་ན། དེ་ལྟར་གྱུར་ན་གཞན་གྱི་རྒྱུ་མེད་པས་རིག་བྱེད་སྨྲ་བའི་གྲུབ་པའི་མཐར་ལྷུང་བས་མཆོད་པ་དང་སྡིག་པ་བཤགས་པ་ལ་སོགས་པ་དང༌། སྙིང་རྗེ་ཆེན་པོས་སྦྱིན་པ་ལ་སོགས་པས་བསོད་ནམས་ཀྱི་ཚོགས་ཀྱང་གང་གིའང་སྤྱོད་ཡུལ་མ་ཡིན་ལ། གང་དུ་ཁ་ཅིག་གིས་ཡེ་ཤེས་སེམས་དཔའ་དང་སངས་རྒྱས་དང་བྱང་ཆུབ་སེམས་དཔའ་རྣམས་འགྲོ་བའི་རྒྱུད་གཅིག་ཏུ་གྱུར་ནས་སྤྲོ་བ་གསུངས་པ། དེ་ནི་ཤིན་ཏུའང་
འགལ་ཏེ་རྣམ་པར་ཤེས་པ་གཅིག་གི་རྒྱུད་ལ་སེམས་ཅན་ཞེས་གྲུབ་པའི་གཙོ་བོའོ། །དུས་གཅིག་ཏུ་རྣམ་པར་མི་རྟོག་པའི་ཡེ་ཤེས་དུ་མའི་ཆ་ནས་མེད་པར་གནས་པའི་བྱ་བ་གཅིག་པ་རྣམས་ནི་གཅིག་ཏུ་མོས་པ་ཉིད་ཀྱིས་ཏེ་གཟུགས་དང་དྲི་དང་རོ་དང་རེག་བྱའི་རྡུལ་ཕྲ་རབ་ཚོགས་པ་འདུས་པ་བུམ་པ་གཅིག་ཅེས་མོས་པས་ཐ་སྙད་བྱེད་པ་བཞིན་དུ་སེམས་ཅན་གྱི་ཐ་སྙད་དུ་དེ་བཞིན་ནོ་ཞེ་ན། གལ་ཏེ་བདག་དང་གཞན་གྱི་རྒྱུད་དག་གཅིག་གི་དངོས་པོར་བསྟན་ན་ནི་འགལ་བར་འགྱུར་བས་དེ་ལྟར་ན་ནི་མོས་པ་ཅན་གྱི་གཅིག་ཏུ་ལྷག་པར་མོས་པས་ནི་ས་དང་པོ་གོམས་པར་བྱེད་པ་དང་ལྡན་པ་ཉིད་དེ། སྒྲིབ་པ་མེད་པའི་བྱང་ཆུབ་སེམས་ཀྱི་རང་བཞིན་ཡོངས་སུ་དག་པ་སེམས་ཅན་དེ་དག་བདག་ཉིད་དུ་ལྷག་པར་མོས་པ་བརྟན་པོ་གུས་པ་དང་བྲལ་བར་འཇུག་པའི་སོ་སོའི་སྐྱེ་བོའི་ང་རྒྱལ་བསལ་བས་འཇིག་རྟེན་ལས་འདས་པའི་རྣམ་པར་དག་པ་ལ་ཉེ་བར་འགྱུར་བར་བྱེད་པའོ། །དེ་ལྟར་ཡང་དཔལ་དེ་ཉིད་བསྡུས་པ་ལས། མངོན་པར་བྱང་ཆུབ་པ་རྣམ་པ་ལྔར་འགྱུར་བ་བདེན་པ། ༀ་ཇི་ལྟར་དེ་བཞིན་གཤེགས་པར་འགྱུར་བ་ཐམས་ཅད་ཀྱིས་དེ་ལྟར་བདག་གི་ཡིན་ནོ་ཞེས་པའི་རྗེས་སུའང་གསུངས་ཏེ། དེ་ནས་བྱང་ཆུབ་སེམས་དཔའ་རྡོ་རྗེ་དབྱིངས་ཀྱིའོ། །དེ་བཞིན་གཤེགས་པའི་སྐུར་བདག་གིས་མངོན་པར་བྱང་ཆུབ་ནས་དེས་དེ་བཞིན་གཤེགས་པ་ཐམས་ཅད་ལ་ཕྱག་བཙལ་ནས་གསོལ་པ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་
ཀྱིས་བདག་ལ་བྱིན་གྱིས་བརླབས་ནས་མངོན་པར་བྱང་ཆུབ་པ་ནི་བདག་ལ་བསྟན་པར་མཛད་དུ་གསོལ་ཞེས་པ་སྟེ། དེ་ནས་དེ་སྐད་གསོལ་བ་བཏབ་པ་དང་དེ་བཞིན་གཤེགས་པ་ཐམས་ཅད་ཀྱིས་རྡོ་རྗེའི་དབྱིངས་ལ་དེར་སེམས་དཔའི་རྡོ་རྗེ་ཅན་ནོ། །དེ་ནས་དེ་བཞིན་གཤེགས་པ་རྡོ་རྗེ་དབྱིངས་ཀྱིས་དེའི་སྐད་ཅིག་ཉིད་ལ་དེ་བཞིན་གཤེགས་པ་ཐམས་ཅད་དང་མཉམ་པ་ཉིད་ཀྱི་ཡེ་ཤེས་ཀྱིས་འོད་གསལ་བ་མངོན་པར་རྫོགས་པར་སངས་རྒྱས་སོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་མཉམ་པ་ཉིད་ཀྱི་ཡེ་ཤེས་ཀྱི་ཕྱག་རྒྱའི་གསང་བའི་དམ་ཚིག་རབ་ཏུ་ཞུགས་པ་དང། དེ་བཞིན་གཤེགས་པ་ཐམས་ཅད་ཀྱི་ཆོས་མཉམ་པ་ཉིད་ཀྱི་ཡེ་ཤེས་ཀྱིས་རྟོགས་པའི་རང་བཞིན་གྱིས་དག་པ་དེ་བཞིན་གཤེགས་པ་ཐམས་ཅད་ཀྱི་མཉམ་པའི་རང་བཞིན་གྱིས་འོད་གསལ་བའི་ཡེ་ཤེས་ཀྱི་འབྱུང་གནས་སུ་གྱུར་ནས་ཀུན་རྫོབ་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་གྱུར་ཏེ་ཞེས་པའོ། །འདིར་རྡོ་རྗེ་དབྱིངས་ཀྱིས་མ་འོངས་པའི་སྐྱེ་བོ་ལ་དགོངས་ནས་དེ་བཞིན་གཤེགས་པའི་སྐུ་རང་བཞིན་གྱིས་ཞུས་པའོ། །དེ་ཉིད་ཀྱིས་གསུངས་པ་ནི་དེ་བཞིན་གཤེགས་པ་ཞེས་པའོ། །སེམས་དཔའ་རྡོ་རྗེ་ནི་དམ་ཚིག་སེམས་དཔའ་སྟེ། དེའི་དེ་ཉིད་དུ་ནི་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ལྔའི་བདག་ཉིད་ཀྱི་ཡེ་ཤེས་སེམས་དཔའ་རྡོ་རྗེ་འཛིན་པ་བཞུགས་པའི་རྗེས་ཐོགས་ཀྱི་སྐད་ཅིག་ལའོ། །དེ་བཞིན་གཤེགས་པ་ཐམས་
ཅད་ཅེས་པ་ལ་སོགས་པའི་དང་པོར་ཡེ་ཤེས་ཞེས་པའི་ཚིག་བཞི་མེ་ལོང་ལྟ་བུ་ལ་སོགས་པའི་ཡེ་ཤེས་བཞི་གསུངས་པ་ཡང་དག་པར་རྫོགས་པའི་སངས་རྒྱས་ཞེས་པ་འདིས་ནི་ལྔ་པའི་མཉམ་པའི་ཚིག་གིས་ནི་ཐམས་ཅད་དང་འདྲ་བར་གསུངས་སོ། །དེ་ཉིད་ཀྱི་དེ་བཞིན་གཤེགས་པ་ཐམས་ཅད་ཉིད་བདག་ཉིད་དང་ལྷན་ཅིག་ཏུ་བརྟན་པར་ལྷག་པར་མོས་པ་ནི་མཉམ་པར་རྟོགས་པའི་དོན་ཉིད་ལ། དེ་ལྟར་འགྲོ་བའང་ལྷན་ཅིག་ཏུ་ལྷག་པར་མོས་པར་བྱ་སྟེ། རང་བཞིན་གྱི་དེ་བཞིན་ཉིད་ཀྱིས་འགྲོ་བའོ། །རྒྱུ་དང་འབྲས་བུའི་གནས་སྐབས་དག་ནི་བྱང་ཆུབ་ཀྱི་སེམས་ཀྱི་རྒྱུ་ཉིད་ལས་བྱུང་བར་འགྱུར་བའི་འབྲས་བུའི་གནས་སྐབས་ཀྱི་ཡེ་ཤེས་སེམས་དཔའི་ངོ་བོ་དང་ལྷན་ཅིག་ཏུ་དེའི་བདག་ཉིད་དུ་ལྷག་པར་མོས་པར་བྱེད་ལ་གཞན་གྱི་རྒྱུད་ཀྱི་སེམས་ཅན་མཉམ་པའི་སེམས་ཅན་ནོ་ཞེས་པ་ནི་མན་ངག་གོ །དེ་བས་ན་དངོས་པོར་འགྱུར་བའི་རང་གི་དང་གཞན་གྱི་སེམས་ཀྱི་རྒྱུད་དེའི་བདག་ཉིད་སྒོམ་པ་མ་ཡིན་ལ། དེའི་རང་གི་ལས་སྤྲོས་པའང་མ་ཡིན་ནོ། །ཞེས་པ་ལ་འགལ་བ་ཅུང་ཟད་ཀྱང་མེད་དོ། །དེ་བཞིན་དུ་གཞན་དག་ཏུ་ཇི་ལྟར་རིགས་པར་གོ་བར་བྱའོ། །དེའང་ལྷ་མོ་གཅིག་ལ་ལྷ་མོ་གཞན་ནི་བསྡུས་ནས་བདག་པོ་ལ་བདེ་བ་ཆེན་པོས་མཆོད་ཅེས་བྱ་བ་གསུངས་ཏེ། དེ་ལ་ཡིད་ཀྱི་རང་བཞིན་གྱིས་ཆོས་ཀྱི་ལུས་ཐོག་མ་མེད་པ་རྣམས་ཀྱིས་དེ་རྣམས་ཀྱི་རྒྱུད་ཐ་དད་པ་ཉིད་ལྷན་ཅིག་ཡུལ་གཅིག་ཏུ་གནས་པ་ཙམ་གྱི་ནང་དུ་བསྡུས་པ་ལས་དེ་རྣམས་ཕན་ཚུན་བདག་ཉིད་གཅིག་པ་ནི་མ་ཡིན་ནོ། །རྣལ་འབྱོར་པའི་རྒྱུད་ལ་སྤྲུལ་
པ་ཉིད་ནི་དེ་དང་བདག་ཉིད་གཅིག་པ་ལའང་འགལ་བ་མེད་དེ། ལྷའི་དཀྱིལ་འཁོར་རྣམ་པ་གཉིས་ཏེ། ཁ་ཅིག་ཏུ་ཕལ་ཆེར་རྒྱུད་གཞན་ལས་ཚུལ་གཞན་དུ་བསྟན་པ་སྟེ། དཔལ་དེ་ཉིད་བསྡུས་པའི་འགྲོ་བ་འདུལ་བའི་དཀྱིལ་འཁོར་དུ་གསུངས་པ་བཞིན་ནོ། །ཁ་ཅིག་ཏུ་ནི་ཕལ་ཆེར་རྣལ་འབྱོར་པའི་རྒྱུད་ལས་སྤྲུལ་པས་ཏེ། ཇི་ལྟར་དཔལ་གསང་བ་འདུས་པ་ལས་དང༌། བདེ་མཆོག་དང་དགྱེས་པའི་རྡོ་རྗེའི་དཀྱིལ་འཁོར་གྱི་ལྷ་རྣམས་བཞིན་ནོ། །དབང་པོ་རྣོན་པོའི་སེམས་ཅན་གྱིས་ནི་གང་དུ་བདག་ཉིད་གཅིག་པར་སྒོམ་པ་མེད་དེ་དེས་ནི་སྐད་ཅིག་གིས་མངོན་པར་རྫོགས་པའི་རྡོ་རྗེ་འཛིན་པའི་སྐུ་ཉིད་ཀྱིས་གཅིག་པུའང་དཀྱིལ་འཁོར་དང་བཅས་པའི་ཤེས་རབ་དང་བཅས་པའམ་ཤེས་རབ་མེད་པར་གོམས་པར་བྱེད་དེ། དེའང་བཅོམ་ལྡན་འདས་རྡོ་རྗེ་སེམས་དཔའི་བྱང་ཆུབ་ཀྱི་སེམས་ཀྱི་རང་བཞིན་ལ་ངེས་པ་ཉིད་དུ་གོམས་པར་བྱེད་པ་ཉིད་དུ་མི་སེམས་ཏེ། འདི་ཉིད་བཅོམ་ལྡན་འདས་བྱང་ཆུབ་ཀྱི་རྡོ་རྗེ་སེམས་དཔའ་རྡོ་རྗེ་དེ་བཞིན་གཤེགས་པའི་ཤེས་རབ་དང་ཐབས་དང་ཡེ་ཤེས་ཀྱི་ངོ་བོར་འདོད་ཆགས་ལ་སོགས་པའི་རང་བཞིན་གྱིས་དེ་བཞིན་གཤེགས་པ་ལྔ་དང་རིག་མ་ལ་སོགས་པའི་ཀུན་རྫོབ་ཀྱི་གཟུགས་འཛིན་པ་ཉོན་མོངས་པ་ཡོངས་སུ་སྤངས་པའི་སེམས་ཅན་གྱི་ཁམས་དྲི་མ་མེད་པར་བྱེད་པའི་དོན་དུ་དེས་དེ་ལྟར་གདུལ་བྱ་རྣམས་དེ་ལྟར་ཡང་དག་པའི་ལམ་དུ་ཞུགས་ཤིང་སྐལ་བ་དང་ལྡན་པ་རྣམས་དེ་ཁོ་ན་ཉིད་ལ་
སྦྱོར་བར་བྱེད་པ་དེ་ལྟར་རྣམ་པར་བཞག་པས་སོ། །ཞེས་པ་ནི་དེ་ལྟར་མན་ངག་གོ །དེ་ལྟར་ཡང་རྡོ་རྗེ་སེམས་དཔའ་ལ་སོགས་པའི་ལྷ་བཞིན་དུ་ཆོས་ཐམས་ཅད་ཀྱང་རང་བཞིན་མེད་པར་བླ་མའི་མན་ངག་གིས་རྟོགས་པར་བྱའོ། །དེ་ཉིད་ཀྱིས་ན་རིམ་པ་འདིས་རྡོ་རྗེ་སེམས་དཔའ་ལ་སོགས་པ་སྒོམས་པས་ཆོས་ཐམས་ཅད་རང་བཞིན་མེད་པར་རྟོགས་པར་འགྱུར་རོ། །ཞེས་ཤེས་པས་རྡོ་རྗེ་སེམས་དཔའ་ལ་སོགས་པ་བསྒོམས་པས་ཕྱག་རྒྱ་ཆེན་པོའི་དངོས་གྲུབ་འབྱུང་བར་འགྱུར་རོ་ཞེས་བཅོམ་ལྡན་འདས་ཀྱིས་དེ་ལྟར་གསུངས་ལ། འདིར་འདི་ཉིད་ལ་དགོངས་ནས་གདུལ་བྱའི་སེམས་ཀྱི་རང་གི་མོས་པར་རྗེས་སུ་འཇུག་པས་དམ་ཚིག་ཆེན་པོ་དེ་ཁོ་ན་ཉིད་ཀྱི་རྒྱུད་ལས་གསུངས་པ་ན། འདིར་ནི་ཐམས་ཅད་ཀྱི་བདག་ཉིད། །གསང་བའི་སྙིང་པོ་ཀུན་བསྡུས་པའི། །རྡོ་རྗེ་ལྷ་མོ་ཀུན་འདུས་ནས། །གར་མཁན་ཀུན་གྱིས་གར་བྱེད་པའོ། །ཞེས་པ་སྟེ་འདིར་ཤིན་ཏུ་མང་པོ་ལེགས་པར་བརྗོད་པར་མི་ནུས་ཏེ། གཞུང་མངས་ཀྱིས་འཇིགས་པས་མ་བྲིས་སོ།། །།སྙེ་མ་བཅུ་གཉིས་པར། དེ་ལྟར་ཡང་འདས་པའི་སྲིད་པའི་གནས་སྐབས་ཉིད་ནི་བྱང་ཆུབ་སེམས་དཔའ་རྣམས་ཀྱི་ཚོགས་ཀྱི་ལམ་མོ། །འདིར་ཡང་སྦྱིན་པ་ལ་སོགས་པའི་བསོད་ནམས་གསོག་པར་བྱེད་པ་དང༌། སྔོན་གྱི་དགེ་བ་དང་མི་དགེ་བ་རྣམས་ལ་སོགས་པ་ཆོས་མཐུན་པའི་ཕྱིར་རོ། །འཆི་བའི་དུས་ལ་མངོན་དུ་ཕྱོགས་པའི་སྦྱོར་བའི་གནས་སྐབས་ཉིད་ནི་མོས་པ་སྤྱོད་པའི་ས་སྟེ། དེ་ཁོ་ན་ཉིད་ལ་
ངེས་པར་བྱེད་པའི་སྦྱོར་བའི་ངོ་བོའི་ཕྱིར་རོ། །དེའི་རྗེས་ལ་འདས་པའི་སྲིད་པ་འགགས་ནས་བར་མ་དོའི་གནས་སྐབས་ཉིད་ཀྱི་སྦྱོར་བས་གནས་སྐབས་ཀྱི་སྐྱེ་བའི་སྐད་ཅིག་མའི་བར་གྱི་གང་འགགས་པའི་མཐའི་སྐད་ཅིག་མའི་ངོ་བོ་ནི་རབ་ཏུ་དགའ་བའི་སའི་བར་ཆད་མེད་པའི་ལམ་གྱི་གནས་སྐབས་ལ། དེའི་རྗེས་སུ་བར་མ་དོར་ཇི་ལྟ་བ་བཞིན་གྱི་གཟུགས་འགགས་པའི་རྗེས་ཀྱི་མངལ་གྱི་གནས་སྐབས་ཉིད་ནི་བྱང་ཆུབ་སེམས་དཔའ་རྣམས་ཀྱི་བར་ཆད་མེད་པའི་ལམ་འགགས་པའི་རྗེས་ལ་ས་བཅུའི་གནས་སྐབས་སུ་རིག་པར་བྱ་སྟེ་ས་འདི་ཐམས་ཅད་སྒྲིབ་པ་དང་ནི་བཅས་པ་ཉིད་དོ། །སྐྱེ་བའི་གནས་སྐབས་ཉིད་ནི་སངས་རྒྱས་ཉིད་ཀྱི་གནས་སྐབས་ཏེ། འབྲས་བུ་ཡོངས་སུ་རྫོགས་པའི་སྤྱོད་ཡུལ་ལ་སོ་སོར་ཉམས་སུ་མྱོང་བ་ཉེ་བར་མཉམ་པ་སྟེ། སྐྱེ་གནས་དབང་པོ་ཐམས་ཅད་ཀྱི་སྤྱོད་ཡུལ་ལ་སོ་སོར་ཉམས་སུ་མྱོང་བས་སོ། །དེ་ལྟ་བུ་ལ་སོགས་པ་སྐྱེ་བར་བྱེད་པའི་གནས་སྐབས་ཉིད་ནི་སྤྲུལ་པའི་སྐུ་སྟེ། ལྷ་འབྱིན་པར་བྱེད་པའི་གནས་སྐབས་སོ། །དེ་ལ་མངལ་གྱི་གནས་སྐབས་སུ་བཅུ་སྟེ། ཁུ་བའི་གཟུགས་ཀྱི་གནས་སྐབས་དང༌། ནུར་ནུར་པོའི་གཟུགས་ཀྱི་གནས་སྐབས་དང༌། གོར་གོར་པོའི་གཟུགས་ཀྱི་གནས་སྐབས་དང༌། འཁྲང་འགྱུར་བའི་གཟུགས་ཀྱི་གནས་སྐབས་དང༌། གཟུགས་དང་རྗེས་སུ་མཐུན་པའི་གཟུགས་ཀྱི་གནས་སྐབས་དང༌། འབྲེལ་བ་དང་རྗེས་སུ་མཐུན་པའི་གཟུགས་ཀྱི་གནས་སྐབས་
དང༌། རང་བཞིན་དང་རྗེས་སུ་མཐུན་པའི་གཟུགས་ཀྱི་གནས་སྐབས་དང༌། ལས་བྱེད་པ་དང་རྗེས་སུ་མཐུན་པའི་གཟུགས་ཀྱི་གནས་སྐབས་དང༌། འབྲས་བུ་དང་རྗེས་སུ་མཐུན་པའི་གཟུགས་ཀྱི་གནས་སྐབས་དང༌། ཡོངས་སུ་རྫོགས་པའི་གཟུགས་ཀྱི་གནས་སྐབས་སོ། །དེ་ནི་རྣམ་པ་གསུམ་སྟེ། དབང་པོ་ཡོངས་སུ་རྫོགས་པ་དང༌། དཔེ་བྱད་དང་མཚན་ཡོངས་སུ་རྫོགས་པ་དང༌། ཆུ་དང་ཞིང་ཡོངས་སུ་རྫོགས་པ་སྟེ། འདི་རྣམས་ནི་ས་དང་པོ་རབ་ཏུ་དགའ་བ་ལ་སོགས་པ་རྣམས་དང༌ཆོས་མཐུན་པ་ཉེ་བར་མཚོན་པར་ཤེས་པར་བྱའོ། །དེ་ལྟར་དེ་དང་དེར་ལྷག་པར་མོས་པ་སྒོམ་པ་ནི་འདིར་རང་གི་སྙིང་གར་ས་བོན་གྱི་འོད་ཟེར་ལས་བཀུག་པའི་དེ་བཞིན་གཤེགས་པ་ལ་མཆོད་པ་ལ་སོགས་པ་རྣམས་ནི་བསོད་ནམས་ཀྱི་ཚོགས་ཀྱི་སའོ། །དེའི་རྗེས་སུ་སྟོང་པ་ཉིད་ལ་གཞུག་པ་ནི་སྦྱོར་བའི་གནས་སྐབས་སོ། །དེ་ནས་དེའི་གནས་སྐབས་སྲིད་པ་བར་མ་དོའི་གནས་སྐབས་ཉིད་དོ། །ཁ་ཅིག་ཏུ་ཧོ་དམར་པོ་གཉིས་དང་སྤེལ་བའི་ས་བོན་གྱི་གནས་སྐབས་ཀྱི་ཡི་གེ་གསུམ་གྱིས་ལུས་ངག་ཡིད་གསུམ་རྣམས་བསྐྱེད་པའི་ཕྱིར་རོ། །སྟོང་པ་ཉིད་ཀྱི་ཏིང་ངེ་འཛིན་ནི་འཆི་བའི་རྗེས་ཐོགས་སུ་ཡི་གེའི་གཟུགས་དེ་བསྡུས་ནས་སྒྲའི་གཟུགས་ལ་དྲི་ཟའོ་ཞེས་པ་ནི་རྒྱུད་གཞན་དུ་རྒྱས་པར་བསྟན་པས་སོ། །ས་བོན་ལ་སོགས་པའི་ཡི་གེ་དང་སྒྲ་རྣམས་ལ་རྣམ་པ་སྣ་ཚོགས་པ་སྐྱེ་བར་བྱེད་པ་ནི་ལྷའི་རྣམ་པའི་ཕྱིར་རོ། །དྲི་ཟ་ནི་རྣམ་པ་སྣ་ཚོགས་ཅུང་ཟད་སྲིད་པའི་རྣམ་པའི་ཕྱིར་སྲིད་པའོ། །
དྲི་ཟ་དང་དེའི་ཇི་ལྟ་བ་བཞིན་གྱི་གཟུགས་འགའ་ཞིག་ལ་ས་བོན་ཐམས་ཅད་བར་དོར་གནས་པ་ཉིད་དོ། །དྲི་ཟ་ཞུགས་པ་ནས་བརྩམས་ནས་ས་བོན་གྱི་ཡི་གེ་ཡོངས་སུ་གྱུར་པའི་གནས་སྐབས་ཀྱི་གནས་སྐབས་ཏེ། དེ་ནི་སྲིད་པ་སྔོན་བཞིན་རྒྱུའི་རྡོ་རྗེ་འཛིན་པའི་གནས་སྐབས་སོ། །དེ་ཉིད་ཀྱིས་ན་འདི་རྣམས་ལ་དགོངས་ནས་གསུངས་པ་ནི། ཟླ་བ་བཅུ་རྣམས་ས་རྣམས་སོ། །སེམས་ཅན་ས་བཅུའི་དབང་ཕྱུག་གོ །ཞེས་པའོ། །དེ་རྫོགས་པའི་ལྷའི་གཟུགས་ཀྱི་འབྲས་བུ་རྡོ་རྗེ་འཛིན་པའི་གནས་སྐབས་ནི་སྐྱེ་བའི་གནས་སྐབས་ཉིད་དོ། །འདིའི་རྣམ་པར་བཞག་པ་ནི་གང་དུ་ལྷ་ཞུ་བར་གྱུར་པ་ཇི་ལྟར་ཕྱག་བཅུ་དྲུག་པ་དང༌། འཇམ་པའི་རྡོ་རྗེ་ལ་སོགས་པ་ཞུ་བར་གྱུར་པ་དེའི་ཚེ་སྟོང་པ་ཉིད་ལ་ཞུགས་པ་ལ་སོགས་པ་རྣམ་པ་ལྔ་མངོན་པར་བྱང་ཆུབ་པ་ནས་བརྩམས་ནས་དྲི་ཟ་འཇུག་པའི་སྔོན་གྱི་གནས་སྐབས་ཐམས་ཅད་བར་དོར་གནས་པ་ཉིད་དོ། །དྲི་ཟ་ཞུགས་པ་ནས་བརྩམས་ནས་ས་བོན་གྱི་ཡི་གེ་ཡོངས་སུ་གྱུར་པའི་གནས་སྐབས་ཀྱིས་ནི་མངལ་གྱི་གནས་སྐབས་ཉིད་དེ། དེ་ལྟར་གནས་སྐབས་གཉིས་པོ་འདི་ནི་རྒྱུའི་རྡོ་རྗེ་འཆང་བའི་གནས་སྐབས་སོ། །དེའི་རྗེས་ལ་དེ་ཡོངས་སུ་གྱུར་པ་ལས་ལུས་སྐྱེས་པའི་གནས་སྐབས་ཉིད་ནི་འབྲས་བུའི་རྡོ་རྗེ་འཆང་གི་གནས་སྐབས་ཏེ། རྒྱུ་དང་འབྲས་བུ་གཉིས་ཀ་ལ་རྣམ་པ་ལྔ་མངོན་པར་བྱང་ཆུབ་པའི་བདེ་བ་ཆེན་པོ་འདི་དག་ལ་ཡོད་དོ། །ཞེས་
རྟོགས་པར་བྱ་བའི་དོན་ཏོ། །རྗེས་སུ་འབྲངས་ནས་ཡེ་ཤེས་ནི་གཞིའི་བདག་ཉིད་རྒྱུའི་གནས་སྐབས་སུ་ལྷག་པར་མོས་པར་བྱ་སྟེ། སྔོན་དུ་ཇི་སྐད་བཤད་པ་བཞིན་ནོ། །ཁ་ཅིག་ཏུ་ནི་གཞན་རྣམ་པར་བཞག་པ་སྟེ། ཇི་ལྟར་མདོར་བྱས་པ་བཞིན་ཏེ་དེ་ལ་སྟོང་པ་ཉིད་ནི་ཞུགས་པའི་གནས་སྐབས་གཅིག་གཅིག་གིས། ལྷག་པར་མོས་པ་བསྐྱེད་པའི་བཅོམ་ལྡན་འདས་ཀྱི་སྐུ་སྟེ། བར་མ་དོའི་སྲིད་པའི་གནས་སྐབས་ཉིད་དོ། །དེ་རྣམས་རིམ་གྱིས་འགགས་པའི་རྗེས་སུ་ཉི་མ་དང་ཟླ་བ་དང་པདྨ་དང་ཡི་གེ་གསུམ་ལས་བརྟན་པ་དང་གཡོ་བ་རྣམས་ངོ་བོ་གཅིག་ཏུ་གྱུར་པའི་བྱང་ཆུབ་ཀྱི་སེམས་ཀྱི་ཕྱག་མཚན་དང་ས་བོན་ཡོངས་སུ་གྱུར་པ་ལས་དང་པོའི་མགོན་པོའི་སྐུའི་ཏིང་ངེ་འཛིན་གྱི་སེམས་དཔའི་མིང་ཅན་ནས་ཧཱུཾ་གིས་དགོད་པའི་བར་ནི་མངལ་གྱི་གནས་སྐབས་ཉིད་དོ། །དེའི་རྗེས་སུ་སྐྱེས་པའི་གནས་སྐབས་ཉིད་ནི་གཟུགས་དང་ལང་ཚོ་ལ་སོགས་པས་བརྒྱན་པའི་བུ་མོ་དང་སྙོམས་པར་འཇུག་པ་ལ་སོགས་པའི་གནས་སྐབས་སོ་ཞེས་པའོ། །དེ་ཡིས་བཏོན་ནས་མི་བསྐྱོད་པའི་རྗེས་སུ་བཅུག་པ་ལས་སྔོན་དུ་འབྲས་བུ་རྡོ་རྗེ་འཛིན་པ་ཉིད་ཀྱི་གཟུགས་དཀར་པོ་ནི་འགལ་བ་མེད་དོ། །རྒྱུ་དང་འབྲས་བུ་དག་ལ་ནི་གཟུགས་གཞན་དུ་ངེས་པ་མེད་དེ། དེ་ལྟར་ཡང་དཔལ་སངས་རྒྱས་ཐོད་པའི་ཕྲེང་བ་ལས་ཀྱང་བདེ་མཆོག་གི་གཟུགས་གཅིག་ཉིད་དུ་གཞུག་པའོ། །ལྷ་ཁོངས་སུ་གཏོགས་པའང་ཁ་ཅིག་ཏུ་གཟུགས་གཞན་དུ་འབྲས་བུའོ། །ཁ་ཅིག་ཏུ་མེད་དོ། །
གདུལ་བྱའི་བསམ་པའི་དབང་གིས་སྙིང་རྗེའི་གཟུགས་ཀྱིས་རྣམ་པ་སྣ་ཚོགས་པ་ལ་སོགས་པའི་རྣམ་པར་བསྟན། ཕྱུང་བའི་ལྷ་བཅུག་པས་ཁ་ཅིག་ཏུ་ནི་འབྲས་བུའི་གཟུགས་གཞན་ལ། ཁ་ཅིག་ཏུ་མ་ཡིན་པ་ནི་གདུལ་བྱའི་བསམ་པའི་དབང་གིས་ཐུགས་རྗེའི་རང་བཞིན་རྣམས་ཀྱིས་རྣམ་པ་སྣ་ཚོགས་པ་སྒོམ་པར་བསྟན་པའོ། །དེ་ཉིད་ཀྱིས་ནི་འབྲས་བུའི་རྡོ་རྗེ་འཛིན་པའི་བཅོམ་ལྡན་འདས་ནི་དྲི་ཟ་འཇུག་པ་མེད་ཀྱང་ཞུ་བ་མདོར་བྱས་པའི་རིམ་པ་ལས་བསྟན་པ་ནི། དེའི་གནས་སྐབས་སུ་གདུལ་བྱའི་སྐལ་བ་དང་ལྡན་པ་མ་བྱུང་ནས། བདེ་བ་ཆེན་པོའི་རང་བཞིན་གྱི་སྐུ་ནི་ཉིད་ཀྱིས་ཀུན་ཏུ་གནས་པའོ། །ཞེས་པ་ལ་དགོངས་པའོ། །སྐལ་ལྡན་བྱུང་བ་ནི་སྙིང་རྗེ་ཆེན་པོ་དང་བྱམས་པ་དང་དགའ་བ་དང་བཏང་སྙོམས་ཀྱི་རང་བཞིན་རྣམས་ཀྱི་ས་དང་ཆུ་དང་མེ་དང་རླུང་རྣམ་པར་དག་པའི་ངོ་བོའི་སྤྱན་མ་དང་མཱ་མ་ཀཱི་དང་གོས་དཀར་མོ་སྒྲོལ་མ་རྣམས་ཀྱིས་སློང་བར་བྱེད་པར་འགྱུར་ཏེ་གང་དུ་གཞན་དོན་བྱ་བ་རྣམས་དང་སྐད་ཅིག་ཀྱང་མི་འབྲལ་བར་གང་དུའང་ཞུ་བར་དངོས་པོ་ནི་མ་ཡིན་ནོ། །ཇི་ལྟར་བཅོམ་ལྡན་འདས་ཀྱི་རྡོ་རྗེ་སེམས་དཔའ་འདིས་ཁ་ཅིག་ཏུ་སྟོང་པ་ཉིད་ཀྱི་རྗེས་ཐོགས་སུ་ཡི་གེའི་གཟུགས་ལ་སོགས་པའི་དྲི་ཟ་མ་གཟུང་སྟེ། ལས་ཀྱི་ཁྱད་པར་གྱི་དབང་གིས་ཤི་བའི་རྗེས་ཐོགས་སུ་བར་དོ་སྲིད་པའི་གནས་སྐབས་ལས་གཞན་དུ་ཆུ་ལ་གྲུ་འཕྱོ་བ་བཞིན་དུ་འགྲོ་བ་གཞན་དུ་སྐྱེ་བ་ལེན་པས་དེའི་རྗེས་སུ་འབྲངས་ནས་སྒོམ་པའང་
རྣམ་པར་བཞག་པའོ། །ཞེས་པ་ལ་དགོངས་པའོ། །དེའི་ཡི་གེའི་ངོ་བོ་ལ་སོགས་པའི་དྲི་ཟ་དང་རྗེས་སུ་མཐུན་པར་རྣམ་པར་བཞག་པ་ནི་མ་ཡིན་ནོ། །དེ་བཞིན་དུ་དེ་ཉིད་ཀྱི་རྣམ་པར་བཞག་པའི་བྱེ་བྲག་གི་དབྱེ་བ་ནི་ཤེས་རབ་ཅན་མང་དུ་ཐོས་པ་རྣམས་ཀྱིས་རང་ཉིད་ཀྱིས་གཞལ་བར་བྱའོ། །བདག་གིས་ཇི་སྙེད་ཅིག་རྗོད་པར་བྱེད་པ་རེ་ཞིག་ཅིག་བརྗོད་པར་བྱའོ།། །།མན་ངག་སྙེ་མའི་སྙེ་མ་བཅུ་གསུམ་པ་ལས། བྱང་སེམས་སུམ་ཅུ་རྩ་གཉིས་ལས། །གང་དུ་འབྱུང་གནས་འདིར་གང་བ། །དབང་པོ་ཕུང་པོར་འགྱུར་རྣམས་ཀྱི། །དེ་ཡི་རྗེས་སུ་སངས་རྒྱས་ཉིད། །ཅེས་པ་དེ་དག་ཉིད་ཀྱིས་རྡོ་རྗེ་འཛིན་པ་ཉིད་ནི་མ་ཡིན་ཏེ། འོན་ཀྱང་ཐ་མལ་པའི་དྲི་མ་གཞོམ་པ་ལྷན་ཅིག་སྐྱེས་པ་དེ་ཁོ་ན་ཉིད་རྟོགས་པར་བྱེད་པའི་ཕྱིར། ཇི་ལྟ་བའི་གདམས་ངག་ལ་རྗེས་སུ་གནས་པར་བྱས་ལ་དེས་ངལ་བ་མེད་པར་བསྒྲུབ་བྱའི་ཕྱག་རྒྱ་ཆེན་པོའི་དངོས་གྲུབ་འགྲུབ་པར་འགྱུར་རོ། །ཞེས་པའི་དོན་ཏོ།། །།མན་ངག་སྙེ་མའི་སྙེ་མ་ཉེར་གཅིག་པ་ལས། ས་སོགས་སྒོམ་པ་བཞི་པོ་ནི། །དེ་ལྟར་སྟོང་པ་བཞི་རུ་ནི། །རྫས་ནི་བརྒྱད་པོ་ཤེས་པར་བྱ། །འཇིག་རྟེན་སྐྱེ་བའི་རྒྱུ་རྣམས་སོ། །འོད་གསལ་སྟོང་པ་ཆེན་པོ་ལ། །སྟོང་པ་ལ་ནི་ཐབས་འདི་འབྱུང༌། །དེ་ཕྱིར་བསྐྱེད་པའི་ཤེས་རབ་འདི། །དེ་ལས་རླུང་ནི་ཡང་དག་འབྱུང༌། །རླུང་ལས་མེ་ནི་ཡང་དག་འབྱུང༌། །མེ་ལས་ཆུ་ནི་ཡང་དག་འབྱུང༌། །ཆུ་ལས་ས་ནི་སྐྱེས་པ་ཡིས། །སེམས་ཅན་རྣམས་ནི་ཡང་དག་འབྱུང༌། །ས་ཡི་ཁམས་ནི་ཆུ་ལ་ཐིམ། །ཆུ་ནི་མེ་ལ་ཐིམ་པ་སྟེ། །
མེ་ཡང་ཕྲ་མོའི་ཁམས་ལའོ། །རླུང་ནི་སེམས་ལ་ཐིམ་པ་སྟེ། །སེམས་ནི་སེམས་ལས་བྱུང་ལ་ཐིམ། །མ་རིག་པ་ལས་སེམས་འབྱུང་སྟེ། །དེ་ཡང་འོད་ཀྱི་བར་དུ་སོང༌། །འགོག་པ་སྲིད་པ་གསུམ་ཡིན་ནོ། །དེ་དག་ཐོག་མ་མེད་པ་རུ། །སྲིད་པའི་འཁོར་ལོས་རབ་ཏུ་འཇུག །ཇི་སྲིད་བདག་གིས་མ་མཐོང་བར། །སྒྱུ་མ་ལྟ་བུའི་ཏིང་འཛིན་ཏོ། །ཞེས་པའོ། །དེ་ལ་འོད་གསལ་ཐམས་ཅད་སྟོང་པ་ཉིད་ཞི་བའོ། །ཆེན་པོ་སྟོང་པ་སྣང་བ་ཐོབ་པ་ནི་དྲི་ཟའི་སེམས་ཀྱི་ཚུལ་གྱི་སེམས་སོ། །སྣང་བ་མཆེད་པ་ཐམས་ཅད་ཀྱི་འདོད་པ་ཁུ་བ་འབྱིན་པའི་སེམས་སོ། །སྣང་བ་ནི་ཤེས་རབ་འཛིན་པའི་སྐྱེ་བོའི་སྒོ་ནས་སོ། །དེ་ནས་ལས་ཀྱི་རླུང་གིས་བསྐྱོད་པའི་མེར་མེར་པོའི་ཚུལ་དུ་འབྱུང་བར་འགྱུར་རོ། །སེམས་དེ་དང་དེའི་རང་བཞིན་དེ་རྣམས་ཡང་བླ་ན་མེད་པའི་དགོངས་པའི་དཀའ་འགྲེལ་དུ་གསལ་པོར་བྱས་པས་བདག་གིས་མ་སྤྲོས་ཏེ། ཐིམ་པའང་ས་ལ་སོགས་པ་རྣམས་ལ་རིམ་པས་རྙིང་པ་དང་མདངས་མེད་པ། མེ་དྲོད་ཆུང་བ་དང༌། ལུས་ལ་སོགས་པ་སྤྱོད་པ་དམན་པ་ནི་སྣང་བ་ལ་སོགས་པ་སོང་བའི་རླུང་རིམ་པ་ཇི་ལྟ་བ་བཞིན་དུ་རང་བཞིན་གྱི་ལས་ལས་བྱུང་ཞིང་ཡང་འགོག་པ་སྟེ། དེ་ལ་ཐམས་ཅད་སྟོང་པ་ནི་འཆི་བའོ། །ཡང་སྔོན་བཞིན་དུ་འཁོར་བའོ། །དེ་ལྟར་འདི་ལྟར་རྐྱེན་ཙམ་ལས་སྐྱེས་པའི་ཡིད་ཐོག་མ་དང་དབུས་དང་ཐ་མར་མཐོ་བ་དང་དམའ་བའི་སྲིད་པའི་འཁོར་ལོའོ། །དེ་ལ་འདུས་པའང་རྫོགས་པ་དང༌། བསྐྱེད་པ་
དང༌། གཉིས་ཀྱིས་སྒྱུ་མ་ལྟ་བུའི་རང་བཞིན་གྱི་ཚུལ་ཏིང་ངེ་འཛིན་གྱི་ཚུལ་གྱི་བྱང་ཆུབ་ཀྱི་སེམས་ཏེ། དེ་དག་གསུངས་པ། ཧི་ཡི་ཡི་གེ་དེ་ཉིད་ཅེས་པ་ནི། ཨུ་དང་མ་དང་ཡང་དག་སྦྱར། ཧཱུཾ་གི་ཡི་གེས་བྱང་ཆུབ་ཀྱི་སེམས་སོ། །དེ་ཉིད་ཅེས་པ་ནི་དོན་ཡང་དག་པར་ལྡན་པའི་བདག་ཉིད་གཅིག་པ་ཉིད་དོ། །དེ་ལྟར་ཡང༌། དཔལ་གསང་བ་འདུས་པ་ལས་གསུངས་པ། ཁྱོད་ཀྱི་སེམས་ལུས་ལྟ་བུ་དང༌། ལུས་སེམས་ལྟ་བུ་དང༌། སེམས་ཚིག་ཏུ་བརྗོད་པ་ལྟ་བུར་སྐྱེད་ཅིག་ཅེས་པའོ། །ལུས་ཀྱི་རང་བཞིན་གྱིས་ལུས་སྐྱེད་ཅིག་པ་ནི་གང་དུ་ཇི་ལྟར་ལོངས་སྤྱོད་རྫོགས་པའི་ལུས་ཀྱི་རྣམ་པར་རྫོགས་པའི་སེམས་ཉིད་དོ་ཞེས་པའོ། །སེམས་ལུས་སུ་ནི་ཀུན་རྫོབ་ཀྱི་སེམས་ལས་གཞན་ཅུང་ཞིག་ཡོད་པ་མ་ཡིན་པའོ། །གང་ཡང་ཚིག་བརྗོད་པ་དེའི་ཚུལ་གྱིས་སེམས་ཉིད་སྐྱེད་པར་བྱེད་པའོ། །དེ་ལྟར་གཟུང་བ་དང་འཛིན་པ་སྤངས་པ་དངོས་པོ་ཉིད་དང་རོ་གཅིག་པ་ཕན་ཚུན་ལྡོག་པའི་ལུས་དང་ངག་དང་ཡིད་བྱང་ཆུབ་ཀྱི་སེམས་གསུངས་སོ། །དེ་ལྟ་བས་ན་རང་བྱིན་གྱིས་བརླབ་པའི་རིམ་པ་ཞེས་བསྟན་པའོ། །གང་འཕགས་པ་ཀླུ་སྒྲུབ་ཀྱི་ཞལ་སྔ་ནས་གསུངས་པ། བདག་བྱིན་བརླབ་པའི་རིམ་པ་ཞེས། །ཀུན་རྫོབ་བདེན་པ་རུ་ནི་བསྟན། །ཞེས་སོ། །ཡང་། འདིར་ནི་གང་ཡང་སྐྱེ་བ་མེད། །གང་ཡང་འགག་པ་ཡོད་མ་ཡིན། །སེམས་ཀྱི་རང་བཞིན་རྣམ་པར་གནས། །འཁོར་བ་ཉིད་ནས་ཤེས་པར་བྱ། །ཧཾ་གི་སྦྱོར་བ་མེད་པར་ནི། །སེམས་ཀྱི་རང་
བཞིན་གཟུང་དུ་མེད། །སེམས་ཀྱི་རང་བཞིན་རྒྱུར་གྱུར་པ། །ལས་དང་སྐྱེ་བ་ཀུན་ཏུ་འབྱུང༌། །དེ་ཉིད་རླུང་དང་ཡང་དག་ལྡན། །རྣམ་ཤེས་གསུམ་པོ་སླར་ཡང་ནི། །རྣལ་འབྱོར་པ་ཡི་ལུས་སུ་གསུངས། །སྒྱུ་མའི་ལུས་ཞེས་དེ་ལ་བཤད། །ཀུན་རྫོབ་བདེན་པ་སྒྱུ་མ་ཉིད། །ལོངས་སྤྱོད་རྫོགས་པའི་སྐུ་ཡང་དེ། །དེ་ཉིད་དྲི་ཟའི་སེམས་སུ་འགྱུར། །རྡོ་རྗེ་སྐུ་ཡང་དེ་ཉིད་ཡིན། །ཞེས་སོ། །ཀུན་ཞེས་པ་ནི་རྫོགས་པའི་རིམ་པ་དང་བསྐྱེད་པའི་རིམ་པའོ།། །།ཞེས་སོ། །འདིས་ཀྱང་སངས་རྒྱས་ཀྱི་བསྟན་པ་རིན་པོ་ཆེ་སྒོ་ཐམས་ཅད་ནས་ཕྱོགས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །སངས་གྲགས་དང༌། དཔྱལ་ཆོས་བཟང་གི་འགྱུར་ལྟར་དུ་བཀོལ་བར་སྣང༌། །སྭ་སྟི། རྒྱལ་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདར་རྒྱས་རྣམ་གྲོལ་སྦྲང་རྩའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །སརྦ་མངྒ་ལཾ། །