རྗེ་རིན་པོ་ཆེའི་འཇིགས་བྱེད་ཀྱི་ཕྱག་མཚན་སོགས་ཀྱི་བཤད་པའི་ཟིན་བྲིས།
རྗེ་རིན་པོ་ཆེའི་འཇིགས་བྱེད་ཀྱི་ཕྱག་མཚན་སོགས་ཀྱི་བཤད་པའི་ཟིན་བྲིས་བཞུགས་སོ། །
ན་མོ་བཛྲ་བྷཻ་ར་ཝྭ་ཡ། དཔལ་རྡོ་རྗེ་འཇིགས་བྱེད་ཀྱི་མངོན་རྟོགས་སྒོམ་དུས། མགོར་རྡོ་རྗེ་སེམས་དཔའི་བསྒོམ་བཟླས་བྱེད་པ། བོད་ཀྱི་བླ་མ་རྣམས་ཀྱི་ཕྱག་ལེན་ལ་འབྱུང་བས་གྲུབ་ནའང་ལེགས། མི་དགོས་ཁ་མེད་རང་ཡང་མིན་གསུངས།ཐོག་མར་སྔོན་འགྲོའི་གཏོར་མ་གཏོང་བ་ཡང་། སྤྱི་གཏོར་གྱིས་གཏོང་བ་དང་། ཕྱོགས་སྐྱོང་རྐྱང་བའི་གཏོར་ཆོག་གིས་བསྔོ་བ་སོགས་བོད་ན་ཡོད་ནའང་། དཀྱིལ་འཁོར་བའི་ལྷ་ཚོགས་དང་། ཕྱོགས་སྐྱོང་བཅུ་ལ་འབུལ། དཀྱིལ་འཁོར་བ་ལ་བར་ཆད་མི་འབྱུང་བར་གསོལ་བ་གདབ་པ་དང་། ཕྱོགས་སྐྱོང་ལ་དེའི་འཕྲིན་ལས་བཅོལ་བ་ལ་སོགས་པ་ལ་ལི་ཏའི་གཞུང་ན་ཡོད་པ་ལྟར་ལེགས་
གསུངས། དེ་ནས་མཆོད་པ་བྱིན་རླབས་དང་། སྐྱབས་འགྲོ་སེམས་བསྐྱེད་དང་། རང་སྐད་ཅིག་གིས་ལྷར་གསལ་བའི་ཐུགས་ཀའི་ས་བོན་ལས་འོད་ཟེར་འཕྲོས་པས་ཚོགས་ཞིང་སྤྱན་དྲངས་པ་རང་ནས་བྱས་པས་ཆོག་པ། རྒྱ་གར་པའི་གྲུབ་ཆེན་མང་པོའི་བཞེད་པ་ཡིན་ཞིང་། ཡིག་བརྒྱའི་བསྒོམ་བཟླས་ནི་དམ་ཚིག་ཉམས་ཆག་གསོ་བ་དང་། ལྷག་ཆད་ཁ་སྐོང་ལ་མཇུག་ཏུ་བྱེད་པར་བཤད་པས། དེས་ཁྱབ་གསུངས། བསྲུང་འཁོར་གྱི་ཁྲོ་བོ་བཅུ་པོ་འདི་རྣམས་ཀྱི་མངོན་རྟོགས་ནི་ལ་ལི་ཏའི་གཞུང་ན་ཡོད་པ་ལྟར་བཀོད་ཅིང་། ཞལ་ཕྱག་མི་གསལ་བ་རྣམས་མན་སྙེ་ལས་ཁ་བསྐངས་ནས་བཤད་པ་ཡིན་
གསུངས། གནོད་མཛེས་དང་། རྡོ་རྗེ་ས་འོག་གཉིས་ལ་ལར་མིང་གི་རྣམ་གྲངས་སུ་བཤད་ཀྱང་། འདིར་ཐ་དད་དུ་བྱེད་པ་ཡིན་ནོ་གསུངས་སོ། །རིགས་བདག་ཀྱང་དང་པོ་ནས་རང་ཆས་སུ་ཡོད་པས། རྟིང་ལ་དབང་བསྐུར་ནས་རིགས་བདག་གིས་རྒྱས་འདེབས་མི་དགོས། འདིར་བསྲུང་འཁོར་གྱི་ཁྲོ་བོ་རྣམས་བསྐྱེད་ནས། ཡེ་ཤེས་པ་གཞུག་པ་ཙམ་མ་གཏོགས་སྔགས་བཟླ་བ་མ་བཤད་པ་ལ་སྐྱོན་མེད་དེ། བསྲུང་འཁོར་རང་གསལ་བར་བསྒོམ་པ་རང་གིས་བགེགས་བཟློག་པར་བཤད་པས་སོ། །བཟླ་བར་འདོད་ན། གསང་འདུས་ནས་འབྱུང་བ་ལྟར་རམ། བྱིངས་མི་ནུས་ན་གཙོ་བོའི་སྔགས་སུམ་འབུམ་བཟླས་པ་རང་གིས་ཆོག་ཅིང་། དེའང་ཁྲོ་བོ་ཐམས་ཅད་ཀྱི་བཟླས་པར་ཆོག་གསུངས། སོ་སོར་བཟླ་ན། རྡོ་རྗེ་ས་འོག་གི་ༀ་ཨཱཿ བཛྲ་པཱ་ཏ་ཧཱུཾཧཱུཾ། ཞེས་པ་ཡིན་གསུངས། དེ་ནས་དཀྱིལ་འཁོར་དངོས་གཞི་བསྒོམ་དུས། བསྲུང་འཁོར་གྱི་ཁྲོ་བོ་རྣམས་གཙོ་བོ་ལ་བསྡུ་བའི་ལུགས་ལ་ལ་ཡོད་ཀྱང་། འདིར་མི་བསྡུ་བའི་ལུགས་སུ་བྱེད། རྡོ་རྗེ་འཇིགས་བྱེད་ཀྱི་ཕྱག་གཡོན་གྱི་ཐོད་པ་ནི། དིང་སང་ཡོངས་སུ་གྲགས་པའི་ཐོད་པ་ཁྲག་གིས་གང་བའོ། །ཐོད་ཚལ་ནི། ཐོད་པ་ལ་སྐྲ་དང་བཅས་པའི་པགས་པ་འབྱར་བའོ། །བྷི་དྷི་པཱ་ལ་ནི། གཞོན་ནུ་ཟླ་བའི་འགྲེལ་པ་ལས། ལྕགས་དབྱུག་གི་རྩེ་མོ་ལ་རྨ་བྱའི་སྒྲོ་མདོངས་ཀྱི་
ཆུན་པོ་བཅིངས་པ་ལ་བཤད་དོ། །ཀ་ཎ་ཡ་ནི། མདུང་ཕྱེད་པའི་རྣམ་པར་བཤད་པ་ཡོད་ཀྱང་། རྡོ་རྗེ་རྩེ་གཅིག་པའི་རྣམ་པའོ། །རྩ་ཕྱག་གཉིས་ཀྱིས་གླང་ལྤགས་འཛིན་པར་ལཱ་ལི་ཏའི་གཞུང་ལས་བཤད་ཅིང་། ཤྲཱི་བྷ་དྲ་དང་། འཇམ་དཔལ་ཡེ་ཤེས་རྣམས་ཀྱིས་གསལ་བར་བཤད་ནས། དེ་བཞིན་དུ། ཕྱག་མཚན་འཛིན་པའི་ཕྱག་རྣམས་ནི་གཡས་ཀྱི་དང་པོ་ན་གྲི་གུག་ཅེས་སོགས་ཡོད་གསུངས། །གླང་ལྤགས་འཛིན་པའི་ཕྱག་གཉིས་པོ་མས་འགྱེད་ཀྱི་དབང་དུ་བྱས་ན། དཔྱི་མགོའི་ཐད་དུ་གླང་ལྤགས་འོང་བས། དེ་ལྟར་ན། བདེ་མཆོག་ལྟར། གླང་ལྤགས་འཛིན་པའི་ཕྱག་གཉིས་ཀྱི་སྡིགས་མཛུབ་ཀྱི་རྩེ་མོ་སྨིན་མཚམས་དང་མཉམ་པར་ཞེས་སྨོས་པ་དང་འགལ་གསུངས། ཕྱག་འགྱེད་པ་ལ་ལུགས་མང་ན་ཡང་། སོག་པ་ནས་འགྱེད་པ་ལེགས་གསུངས། སྐྱེ་མཆེད་བྱིན་རླབས་ལ། གཞུང་རྣམས་ལས། སྐྱེ་མཆེད་བྱིན་གྱིས་བརླབས། ཟེར་བ་ཙམ་ལས་གསལ་ཁ་མ་བྱུང་ཡང་། ཛྙཱ་ན་ཀ་རས་མིག་ས་སྙིང་སོགས་སུ་སྡུད་པས་དེ་ཡི་ལུགས་སུ་བྱས། ལྷར་མི་སྐྱེད་པར། ཡིག་འབྲུ་རྣམས་ལྷར་མོས་པ་བྱེད་པའི་ལུགས་ཀྱང་ཡོད་པས། དེ་ལྟར་བྱས་པ་ཡིན། དབང་བསྐུར་ནས། རིགས་བདག་གིས་འཇམ་དཔལ་གྱི་སྤྱི་བོར་རྒྱས་འདེབས་པ་བོད་ཀྱི་བླ་མ་རྣམས་བཞེད་ནའང་། ལཱ་ལི་ཏའི་གཞུང་ལས། མི་བསྐྱོད་རྩ་བའི་ཞལ་ལ་འོ། །ཞེས་དང་། རྟོག་
བདུན་གྱི་འགྲེལ་པ་གཉིས་ལས་ཀྱང་དེ་བཞིན་བཤད་པས། མ་ཧེའི་ཞལ་གྱི་མཚོག་མའི་སྟེང་། མདུན་ངོས་སུ་ཅུང་ཟད་ཉེ་བར། ཁྲོ་ཞལ་དམར་པོའི་བདུན་ཙམ། རྩ་ཞལ་གྱི་དབུ་རྒྱན་གྱི་བར་དེར་རྒྱས་འདེབས། དེ་ལ་མི་བསྐྱོད་པ་ལ་རིགས་མང་ནའང་། ཡོངས་གྲགས་ཀྱི་མི་བསྐྱོད་པ། སྐུ་མདོག་སྔོན་པོ་གཡས་པ་ས་གནོན། གཡོན་ཏིང་ངེ་འཛིན། རྡོ་རྗེ་སྐྱིལ་ཀྲུང་གིས་བཞུགས་པ་དེ་ལ་བྱེད་དགོས་གསུངས། ལྷ་དམ་ཚིག་པ་རྟོག་པས་བཟོས་ནས་བསྒོམས་པ་ལ། ཡེ་ཤེས་པ་སྔོན་ཚོགས་གཉིས་ཀྱི་འབྲས་བུ་ལས་གྲུབ་པའི་རྫོགས་པའི་སངས་རྒྱས། རང་འདྲའི་རྡོ་རྗེ་འཇིགས་བྱེད་ཀྱི་དཀྱིལ་འཁོར་སྤྱན་དྲངས་པ་དེ། སྙིང་ག་ནས་སྤྲོས་པའི་སྒོ་བ་བཞིའི་ཐོ་བ་གཤིན་རྗེ་གཤེད་ཀྱིས་རང་རང་གི་སྤྱི་བོར་དགུག །དབྱུག་པ་གཤིན་རྗེ་གཤེད་ཀྱིས་གཞུག་ཅེས་པ། ལུས་ཀྱི་ནང་དུ་བཅུག་ནའང་ཆ་མ་འདྲེས་པའི་ཚུལ་དུ་ཡོད་པ་དེ་པདྨ་གཤིན་རྗེ་གཤེད་ཀྱིས་མི་འབྲལ་བར་དབྱེར་མེད་དུ་བཅིངས་པས། དམ་ཚིག་པ་མ་ཧེའི་ཞལ་ལ། ཡེ་ཤེས་པའི་མ་ཧེའི་ཞལ་དབྱེར་མེད་འདྲེས་པ་སོགས། ཕྱག་མཚན་ལ་ཕྱག་མཚན་སོགས་ནས་རྡུལ་ཕྲན་གྱི་བར་དུ་འདྲེས་པར་བྱས། རལ་གྲི་གཤིན་རྗེ་གཤེད་ཀྱིས་མི་དགའ་བཞིན་དུ་སྡོད་དགོས་པ་མ་ཡིན་པར། དགེས་བཞིན་དུ་དུས་ཇི་སྲིད་པར་བཞུགས་པར་བྱས་པ་ཡིན་གསུངས། འགའ་ཞིག །སྒོ་བ་བཞི་མེད་པའི་དཔའ་གཅིག་ལྟ་བུ་ལ། ཡེ་ཤེས་པ་གཞུག་དུས། ཛཿ ཧཱུཾ་བཾ་ཧོཿ དང་། སྒོ་བ་བཞི་ཡོད་པ་རྣམས་ལ། ཨངྐུ་ཤ་ཛཿ ཞེས་
སོགས་དགོས་ཟེར་བ་རིགས་པ་མིན་ནོ་གསུངས། རླུང་གི་དཀྱིལ་འཁོར་པདྨའི་འོག་ན་ཡོད་པ་འདིའི་ཁྱད་ཆོས་ཡིན།དེའི་དོན་ནི། དུར་ཁྲོད་རླུང་གི་ཁམས་ཡིན་པས། བསད་བསྐྲད་ཀྱི་ལས་བྱེད་པ་དང་མཐུན་པར། འདིའང་ཁྲོ་བོའི་ནང་ནས་ཀྱང་ཤིན་ཏུ་དྲག་པོ་ཡིན་པས། སྐུ་ལས་སྐྱེས་པའི་འོད་ཟེར་ཡེ་ཤེས་ཀྱི་མེས། བགེགས་གདུག་པ་ཅན་རྣམས་བསྲེགས་ཏེ་ཐལ་བར་བྱས་པའི་ཐལ་བ་ཡང་རླུང་གིས་གཏོར་བར་བྱེད་པ་དང་། རླུང་རང་གིས་ཀྱང་བགེགས་ཐམས་ཅད་ཕྱོགས་མཐའ་ཡས་པར་གཏོར་བའི་མཚོན་བྱེད་ཡིན་གསུངས། བཟླས་པའི་དུས་སུ་ཐུགས་ཀའི་ས་བོན་གྱི་མཐར། སྔགས་འཕྲེང་དགོད་པ་དེ་ནང་སྐོར་དུ་ཉེ་བའི་སྙིང་པོ་ཡ་མཱནྟཀ་དང་། བར་སྐོར་དུ་ཧྲཱིཿ ཥྚྲཱིཿ དང་། ཕྱི་སྐོར་དུ་ཡ་མ་རཱ་ཛ། འགོད་པར་བཞེད་པ་མང་ནའང་། དཀྱིལ་འཁོར་ལ་ས་བོན་འགོད་པའི་རིམ་པ་བཞིན་བྱ། བཟླས་པའི་རིམ་པའང་། སུམ་ཆར་བསྡེབས་ནས་བཟླ་བའམ། རེ་རེ་ཞིང་བཟླ་བ་གང་བྱས་ཀྱང་ཆོག་ནའང་། གཙོ་ཆེར་རྩ་སྔགས་བཟླ་བ་མན་ངག་ཡིན་གསུངས། དམིགས་པ་ནི། ཐུགས་ཀ་ནས་སྔགས་ཕྲེང་འཕྲོས་པའི་འོད་ཟེར་གྱིས་སྲིད་པ་གསུམ་ཁྱབ་པར་བྱས་ནས། སེམས་ཅན་དཔག་ཏུ་མེད་པའི་དོན་བྱས། ཐམས་ཅད་རྡོ་རྗེ་འཇིགས་བྱེད་དུ་བྱས་ནས། སྙིང་གའི་ས་བོན་ལ་ཐིམ་ཞིང་། ཡང་སྔར་བཞིན་སྤྲོ་བ་སོགས་བྱེད་པའམ། ཡང་ན། སྙིང་ཁའི་སྔགས་ཀྱི་ཡི་གེ་འོད་ཟེར་འབར་བ་ལ་སེམས་མ་ཡེངས་པར་གཏད་ནས་བཟླས་ན། དངོས་གྲུབ་མྱུར་བ་ཡིན་
གསུངས། ལ་ལི་ཏའི་གཞུང་ནས་བཤད། བསྙེན་པའི་གྲངས་ཚད་ཀྱང་གང་ཟག་གི་ལས་འཕྲོ་ལ་རག་ལས་པས། གཅིག་ཏུ་མ་ངེས་གསུངས། ལཱ་ལི་ཏའི་གཞུང་ལས། ཧྲཱིཿ ཥྚྲཱིཿ ལ་ལས་སྔགས་སུ་བྱས་པའང་ཡོད་གསུངས། ཏིང་ངེ་འཛིན་སེམས་དཔའི་མཐའ་སྐོར་དུ། ཉེ་སྙིང་། སྙིང་པོ། རྩ་སྔགས་རྣམས་རིམ་གྱིས་ནང་ནས་རིམ་པ་བཞིན་འགོད་དགོས་པའི་ངེས་པ་མེད་དེ། དེའི་རྒྱུ་མཚན། ལཱ་ལི་ཏའི་གཞུང་གི་ལྷ་སྒྲུབ་ཐབས་ཀྱི་དཀྱིལ་འཁོར་གྱི་ས་བོན་འགོད་པའི་སྐབས་སུ། ཧྲཱིཿ ཥྚྲཱིཿ ནང་གི་རེ་མིག་དགུ་ལ་བཀོད་ནས། ལྷ་སྣམ་ལ་ཡ་མ་རཱ་ཛ་དང་། སྒོ་བཞིར་ཡ་མཱནྟ་ཀ་བྱུང་བའི་ཕྱིར་རོ། །གསུངས་སོ། །ཡ་མ་རཱ་ཛའི་མཐར་ཧཱུཾ་གཉིས་ཕཊ་གཉིས་ལཱ་ལི་ཏའི་གཞུང་ན་ཡོད་པ་ལྟར་བྱ་དགོས་གསུངས། ཟློ་བའི་ཚེ་ཞལ་དགུ་ཁས་ཟློ་བའི་དམིགས་པ་བྱས་པས། དགུ་འགྱུར་དུ་འགྲོ་སྟེ། ཀྱཻ་རྡོ་རྗེ་ལའང་། ཞལ་བརྒྱད་ཀར་གྱིས། ཟློ་བ་ཡོད་པས་སོ། །བཟླས་པའི་ཚེ་ཐུགས་ཀར་སྔགས་འཕྲེང་འགོད་ལུགས། དཀྱིལ་འཁོར་གྱི་ས་བོན་འགོད་པའི་རིགས་འགྲོས་འདི་སྦྱར་ན་ལེགས་གསུངས། དབུས་ཀྱི་མཚན་མ་ལ་རོ་མགོ་མེད་འགོད་པ་ནི་མི་ལེགས་ཏེ། དབུས་ཀྱི་འདི་གདན་ཡིན་པས་རོ་ཚང་མ་འགོད་དགོས་ཤིང་། ཤར་གྱི་མགོ་དེ་ཚངས་པའི་མགོ་བོ་ཡིན་པས། དབུས་ཀྱི་རོ་དེའི་མགོ་བོ་ཡིན་ན་ཚངས་པའི་མིན་པའི་ཕྱིར་རོ། །ལག་པ་རྒྱུ་མ་སོགས་ཀྱང་ཚངས་པའི་ཡིན་པར་འགྱུར་བའི་སྐྱོན་མེད་དེ། རྒྱུ་མ་སོགས་མཚན་མ་རྣམས་མིའི་རྒྱུ་མ་ཡིན་པར་བཤད་པ་དང་འགལ་བའི་ཕྱིར་དང་། རྟོག་བདུན་གྱི་འགྲེལ་པ་
གཉིས་ཞེས་པའི་གཅིག་གཞོན་ནུ་ཟླ་བ་དང་། གཅིག་སོ་ན་ཤྲཱིས་མཛད་དོ། །དབུས་མའི་དཀྱིལ་འཁོར་རྡོ་རྗེ་ར་བར་རྭ་ལོ་བཞེད་པ་བཞིན་ལེགས་ནའང་། ཁོང་བས་ཀྱང་། ཁྲག་ཞག་འཁྲུག་པའི་རྒྱ་མཚོ་བཤད་པས། དེ་མ་དག །དཀྱིལ་འཁོར་ནང་གི་རྡོ་རྗེ་ར་བ་འདི། བཅོམ་ལྡན་འདས་བཞུགས་ས་ཡིན། སྐུ་ཕྱེད་ཙམ་དུ་སླེབ་པ་བྱེད། དེ་ཕྱིར་འབྱིན་པའི་དབང་དུ་བྱས་ན་འགོངས་པའི་ཚད་ཙམ་ཡིན་པ་དགོས་སོ། །བྲི་བྱ་ལ་རེ་མིག་དགུ་ཡོད་པ་མ་གཏོགས་བསྒོམ་བྱ་ལ་རེ་མིག་དགུ་མེད་ཅིང་། ཕྱོགས་མདོག་རེ་མིག་དགུ་ཡོད་པ་བཞིན་དགོས་ཤིང་། གཞལ་ཡས་ཁང་དབུས་མའི་བྱ་འདབ་ཀྱི་འབབ་ཆུ། ཕྱི་མའི་ཐོག་སྟེང་དུ་སླེབ་པ་ཅིག་དགོས་ཤིང་། རིན་ཆེན་ཕ་གུ་ཆ་ཕྲན་གཅིག་ཡོད་པ་དེ་ཕྱི་ནས་དཀར་པོའི་དབང་དུ་བྱས་པ་ཡིན་ན། རྩིག་པ་དམར་པོའི་ཕྱེད་ནོན་པ་བྱས་པས། ཕྱིའི་ཕ་གུའི་ཆ་ཕྲན་ཕྱེད་འཕར་བ་གཅིག་འོང་ཞིང་། ནང་ངོས་སུ། ཕ་གུས་མ་ནོན་པའི་རྩིག་པའི་སྟེང་དུ། ལྕམ་རྩ་བཏང་ནས་ཐོག་ཕུབ་པས་ཕ་གུ་དང་ཁ་ཏ་བཅད་དུ་འོང་བ་དགོས་གསུངས། རྩིག་པ་དང་ཕ་གུའི་སྟེང་ནས་ཀ་ཐུང་དང་བྲེ་ཕུལ་བྱས་ནས། རྒྱ་ཕིབས་ཀྱི་ཐོག་འདེགས་པ་ཡིན་ཏེ། འདི་གཞལ་ཡས་ཁང་གི་རྒྱན་ནམ། ཐིགས་ཁང་ལྟ་བུ་ཡིན་པས། དོན་ལ་ཐོག་གཉིས་ཡོད་གསུངས། ལྷ་ཞེ་དགུ་བྱེད་ན། དཀྱིལ་འཁོར་གྱི་ལྷ་རྣམས་ཀྱི་གདན་ཐམས་ཅད་ཀྱི་འོག་ཏུ་རླུང་གི་དཀྱིལ་འཁོར་བཤད་པ། ལཱ་ལི་ཏའི་གཞུང་ན་འདུག་ནའང་། གཞན་ཕལ་ཆེ་བ་ལ་མི་འདུག་ཅིང་། ཡོད་ན་ནི་ཤིན་ཏུ་
ལེགས་པའི་རིགས་དེར་འདུག་གསུངས། འཁོར་མངོན་བྱང་ལྔ་སྐྱེད་པར་བྱེད་པའི་སྐབས་སུ། རང་རང་གི་ཟླ་གདན་གྱི་སྟེང་དུ་མིང་ཡིག་དང་པོ་ལས་སྐྱེས་པའི་ཕྱག་མཚན་མགོ་བོ་སོགས་བསམ། དེ་ལ་རིགས་བཞི། ཡུམ་བཞི། ལྷ་སྣམ་ལ་གནས་པའི་སེམས་དཔའ་རྣམས་དང་། སྒོ་བཞི་དང་གྲྭ་བཞིའི་རྡོ་རྗེ་ལྕགས་ཀྱུ་སོགས་བཞི་དང་། རྡོ་རྗེ་གནོད་མཛེས་སོགས་སྐྱེད་དེ། དེ་རྣམས་ཀྱི་ཐུགས་ཀར་ཨ་ལས་སྐྱེས་པའི་ཉི་མའི་དཀྱིལ་འཁོར། དེ་ལས་འོད་ཟེར་འཕྲོས། སངས་རྒྱས་སོགས་བཞི་སྤྱན་དྲངས་པ་དང་། ལྷ་རང་རང་དང་བཅས་པ་རང་རང་གི་ཐུགས་ཀའི་ཉི་མའི་དཀྱིལ་འཁོར་ལ་ཞུགས་པས། རང་རང་གི་གདན་གྱི་སྟེང་དུ། ཉི་མའི་དཀྱིལ་འཁོར་གྱི་འོད་ཀྱིས་དཔག་ཚད་བརྒྱ་སྟོང་ཁྱབ་པར་གྱུར།དེ་ནས་ཉི་མའི་དཀྱིལ་འཁོར་དེ་རྣམས་ཀྱི་སྟེང་དུ། ཆུ་ལས་ཆུ་བུར་གྱི་ཚུལ་དུ། དབུས་ཀྱི་ལེ་ཚེ་དགུ་ལ་ༀ་ཧྲཱིཿ ཥྚྲཱིཿ སོགས་དང་། ལྷ་སྣམ་ལ་ཡ་མ་རཱ་ཛ་སོགས་དང་། སྒོ་བཞི་ལ་ཡ་མཱནྟ་ཀ་དང་། གྲྭ་བཞིའི་སྟེང་དུ་ཧཱུཾ་གསུམ་དང་ཕཊ་གཅིག་ཏུ་གྱུར། དེ་རྣམས་ལས་འོད་ཟེར་འཕྲོས་པས། སངས་རྒྱས་སོགས་བཞི་སྤྱན་དྲངས་ཏེ་ཐིམ་པ་ལས། རང་རང་གི་ཕྱག་མཚན་མགོ་བོ་སོགས་སུ་གྱུར། དེ་ལས་འོད་ཟེར་འཕྲོས། སངས་རྒྱས་བཞི་སྤྱན་དྲངས་ཏེ་ཐིམ་པས། རྡོ་རྗེ་མགོ་བོ་སོགས་ལས་ལྷ་ཐམས་ཅད་བསྐྱེད། ཐམས་ཅད་ཞལ་མ་ཧེའི་ཞལ་ཅན། ཕྱག་གཉིས་པོས་ཕྱག་མཚན་རང་མིང་དང་མཐུན་པ་གཉིས་འཛིན་པར་བྱེད་པ། མ་ཧེའི་གདན་ལ་བཞུགས་པ་སྔ་རབས་པ་རྣམས་བཞེད་དེ་མི་དགོས་
གསུངས། ཕྲ་མོའི་རྣལ་འབྱོར་གྱིས་སྟེང་འོག་གི་སྣ་རྩེར་རྡོ་རྗེ་ཕྲ་མོ་ལ་སེམས་འཛིན་པ་འདི། ཤཱནྟི་པས་མཛད་པའི་འཇིགས་བྱེད་ཀྱི་ལས་ཚོགས་ཆེན་པོ་ལས་བཤད་གསུངས། འཇིགས་བྱེད་ཀྱི་མངོན་རྟོགས་འདི་ལཱ་ལི་ཏའི་གཞུང་ལ་གཞི་བྱས། དེར་མི་གསལ་བ་རྣམས་གྲུབ་ཆེན་གཞན་ཁུངས་ཐུབ་ཀྱི་བཞེད་པས་བརྒྱན་ཅིང་། ཡང་། སམྦུ་ཊའི་དྲན་པ་བདུན་པའི་རབ་བྱེད་བཞི་པ་ནས། རྡོ་རྗེ་འཇིགས་བྱེད་བཤད་པ་རྟོག་བདུན་ཇི་ལྟ་བ་དང་འདྲ་བར་ཡོད་པས། དེའི་འགྲེལ་པ་ཨ་བྷྱ་ཡས་མན་ངག་སྙེ་མར་ཞིབ་པར་བཀྲལ་བ་རྣམས་ཀྱིས་མི་གསལ་བ་ཐམས་ཅད་ཁ་བསྐངས་ཏེ་བཤད་པ་མ་གཏོགས། རང་བཟོ་དང་ཁུངས་མེད་པའི་འདྲ་བསྒྲིགས་པ་སོགས་མ་ཡིན་པར་རྒྱུད་དང་གྲུབ་ཆེན་རྣམས་ཀྱི་བཞེད་པ་ཇི་ལྟ་བ་བཞིན་བྱས་པ་ཡིན་གསུངས། སྤྱིར། དབུ་མ་ལ། མགོན་པོ་ཀླུ་སྒྲུབ་ཚད་མའི་སྐྱེས་བུར་འཛིན་པ་ལྟར། འཇིགས་བྱེད་འདོད་པ་རྣམས་ཀྱིས་གྲུབ་ཆེན་ལཱ་ལི་ཏའི་གཞུང་རྣམས་ལ་མ་འགལ་བ་ཞིག་དགོས་ཏེ། ཆོས་ཚུལ་འདི་ལ་གྲུབ་ཆེན་འདི་ཚད་མའི་སྐྱེས་བུ་ཡིན་པའི་ཕྱིར་གསུངས། འདིར་མངོན་བྱང་ལྔའི་རིམ་པ་ནི། རླུང་གི་དཀྱིལ་འཁོར་གྱི་སྟེང་གི་ཟླ་བའི་དཀྱིལ་འཁོར་མེ་ལོང་ཡེ་ཤེས། རྒྱུའི་འཇམ་དཔལ་གྱི་ཐུགས་ཀའི་ཉི་མའི་དཀྱིལ་འཁོར་ལ་སངས་རྒྱས་སོགས་བཞི་དང་། འཇམ་དཔལ་རང་དང་བཅས་པ་ཐིམ་པས། ཉི་མའི་དཀྱིལ་འཁོར་གྱི་འོད་ཀྱིས་དཔག་ཚད་བརྒྱ་སྟོང་ཁྱབ་པར་གྱུར་པ་དེ་མཉམ་ཉིད་ཡེ་ཤེས། དེའི་སྟེང་
དུ་ཧཱུཾ་ཡིག་ནག་པོ་ཆུ་ལས་ཆུ་བུར་གྱི་ཚུལ་གྱིས་བྱུང་བར་བསྒོམ་པ་སོ་སོར་རྟོག་པའི་ཡེ་ཤེས། དེ་ལས་འོད་འཕྲོས་འདུས་པས། རྡོ་རྗེ་ནག་པོའི་གཟུགས་སུ་གྱུར་པ་དེ་བྱ་སྒྲུབ་ཡེ་ཤེས། སྐུ་ཡོངས་སུ་རྫོགས་པ་ཆོས་དབྱིངས་ཡེ་ཤེས་སྦྱོར་དགོས་པས། དེ་ལ་དང་པོ་རྡོ་རྗེ་གྲུབ་པའི་དུས་འདི་མའི་མངལ་དུ་ཕ་མའི་ཁུ་ཁྲག་རྣམ་ཤེས་གསུམ་ཚོགས་པ་ལས། བུའི་ཡན་ལག་ཆ་ཤས་སོགས་རྫོགས་པ་ལ་སྦྱོར་ལ། དེའི་ལུས་ལ་རྣམ་ཤེས་ཡོད་པ་མཚོན་པའི་རྡོ་རྗེའི་ལྟེ་བ་ལ་ཧཱུཾ་ཡིག་འགོད་དོ་གསུང་། སངས་རྒྱས་སོགས་བཞི་སྤྱན་དྲངས། ཡང་ཡང་བསྟིམ་པའི་དགོས་པ། བྱིས་པ་ཐ་མལ་བའི་ལུས་ལ་ཕུང་སོགས་ལྔ་དང་། དབང་པོ་ལ་སོགས་ཡོད་པ་སྦྱང་གཞི། དེ་རྣམས་ལྷའི་ཕུང་སོགས་སུ་བསྒྱུར་བའི་ཕྱིར། རྣམ་སྣང་སོགས་རྒྱལ་བ་རྣམས་བཅུག་པས། ཕུང་པོ་ལྔ་རིགས་ལྔར་འགྱུར་ཞིང་། དེས་མཚོན་ནས། སེམས་མ་རྡོ་རྗེ་མ་སོགས་ཀྱིས་ཁམས་རྣམས་ཡུམ་དང་སེམས་དཔའ་རྣམས་ཀྱིས་དབང་པོ་རྣམས་སེམས་དཔའ་དང་། ཁྲོ་བོ་རྣམས་ཀྱིས་ལས་དབང་རྣམས་ཁྲོ་བོར་འགྱུར་བའི་དགོས་པ་དང་། སྐྱེ་མཆེད་བྱིན་གྱིས་བརླབས་པས། དེ་བཞིན་གཤེགས་པའི་རྡོ་རྗེའི་མིག་དང་རྣ་བ་སོགས་སུ་འགྱུར་བའི་དགོས་པ་ཡོད། ཉི་མའི་དཀྱིལ་འཁོར་སོགས་འོད་ཟེར་སྤྲོ་བསྡུ་བྱེད་པ་འདི་སངས་རྒྱས་ཀྱིས་སེམས་ཅན་གྱི་དོན་བྱེད་པ་མཚོན་ནའང་། དངོས་གཞི། བྱིས་པའི་ལུས་སེམས་ཀྱི་རྩལ་རྫོགས་ནས་དགེ་མི་དགེའི་བྱ་བ་སོགས་ལ་འཇུག་པ་ཆོས་ཉིད་ཡིན་པས། དེའི་སྦྱོང་བྱེད་ཡིན་གསུངས། མདུན་བསྐྱེད་ཀྱི་
མཚན་མ་འགོད་པའི་སྐབས་སུ། ཨ་མོ་གྷའི་དཀྱིལ་ཆོག་ཏུ། དབུས་ཀྱི་རོའི་སྟེང་དུ་གྲི་གུག་བྲི་བར་བྱའོ། །ཞེས་བཤད་ནའང་། དབུས་ཀྱི་རོའི་སྟེང་དུ་རྡོ་རྗེ་ནག་པོ་རྩེ་དགུ་པ་བྲི་ཞིང་། གྲི་གུག་ཤར་གྱི་སྣམ་བུ་ལ་བྲིས་པས། ལྷ་རྣམས་ལ་རལ་གྲིའི་མིང་ཡོང་ནའང་། རལ་གྲིའི་ཚབ་ལ་རྡོ་རྗེ་ཡོད་པས། གྲངས་ཆད་པའི་སྐྱོན་མེད་དོ། །འོ་ན་གཡས་ཀྱི་མཚན་མ་དང་པོ་ལས་ལྷ་མི་བསྐྱེད་པར་མི་ཡོང་བའི་སྐྱོན་ཡོད་དོ་ཟེར་ན། དེ་མེད་དེ། གཡས་ཀྱི་མཚན་མ་དང་པོ་ལས་ལྷ་མི་བསྐྱེད་པར། མཚན་མ་གཞན་ལས་ལྷ་བསྐྱེད་པ་ཤིན་ཏུའང་མི་ཡོང་གསུང་། འོ་ན་རལ་གྲི་ཕྱག་མཚན་ལ་ནི་ཡོད། མཚན་མ་འགོད་དུས་མི་ཡོང་བའི་རྒྱུ་མཚན་ཅི་ཡིན་ཟེར་ན། རལ་གྲི་རྒྱུའི་འཇམ་དཔལ་བསྐྱེད་པའི་མཚན་མ་ལ་འོང་བས་འདིར་མ་བཀོད་པས་ཕྱག་སོ་བཞི་ཡིན་ནའང་། ཕྱག་མཚན་སོ་གསུམ་འོང་། གླང་ལྤགས་གཅིག་ལ་ཕྱག་གཉིས་ཀས་འཛིན་དགོས་པས། མཚན་མ་གཅིག་ཏུ་བརྩིས་པས་སོ་གཉིས་ལས་མེད་དོ་གསུངས། ཞེ་དགུའི་དུས་ཀྱི་རིགས་བཞི་ཡུམ་བཞི་མན་ཆད་ཀྱི་རྒྱུ་རྡོ་རྗེ་འཆང་དེ་བཞིན་གཤེགས་པ་རྣམས། སྐུ་མདོག་ཕྱག་མཚན་རྣམས་ལཱ་ལི་ཏའི་གཞུང་ནས་བཤད་པ་ལྟར་ཕྱོགས་མདོག་དང་། ཕྱག་མཚན་མགོ་སོགས་འཛིན་ཅིང་དེ་ལའང་། སྔ་རབས་ཀྱི་བོད་རྣམས་ཀྱིས། ལག་པ་གཉིས་དང་རྐང་པ་གཉིས་མཚན་མར་འགོད་པར་སྣང་སྟེ། དེ་ཡི་རྒྱུ་མཚན་རོ་དེའི་ལག་པ་དང་རྐང་པར་འདོད་པ་སྣང་སྟེ། ཤེས་བྱེད་དུ་སྒྲུབ་མི་ནུས། རྟོག་བདུན་
ལས། ལྷོར་ལག་པ། བྱང་དུ་རྐང་པ་ཞེས་པ་མ་གཏོགས་གཉིས་ཚིག་མེད་པས། རང་ལུགས་ལ་རེ་རེས་ཆོག་གསུངས། ལྷ་འདི་བ་རྣམས་ཞི་དྲག་དང་རྣམ་པ་ཡོ་ག་དང་མཐུན་པས། རྡོར་དབྱིངས་ལྟར་རིགས་ཤིང་། རྡོ་རྗེ་ལྕགས་ཀྱུ་སོགས་བཞི་ཡང་། རྡོར་དབྱིངས་ལྟར་རིགས་པ་དང་། འབྲས་བུའི་དུས་སུ་ནི། ཐམས་ཅད་རྡོ་རྗེ་འཇིགས་བྱེད་ཞལ་གཅིག་ཕྱག་གཉིས་པ། པད་ཟླ་ཉི་མ་ལ་གཡོན་བརྐྱངས་ཀྱིས་གནས་པ། ཕྱག་མཚན་མགོ་སོགས་འཛིན་པ་ལས་འོས་མེད། འོན་ཀྱང་སྔ་རབས་པ་རྣམས་ཀྱིས་པད་ཉིའི་སྟེང་དུ་མ་ཧེ་ནག་པོ་རེ་རེ་བྱེད་ཀྱིན་འདུག་སྟེ། འདི་ཡེ་ནས་མི་དགོས་གསུངས། བཅོམ་ལྡན་འདས་ཀྱི་ཐུགས་ཀར་ཡེ་ཤེས་སེམས་དཔའ་འགོད་པ། རྒྱ་གཞུང་རྣམས་ལས་མཁས་གྲུབ་མང་པོས་བཤད་ནའང་། ཡེ་ཤེས་སེམས་དཔའ་འདི་ལྟ་བུ་ཞིག་འགོད་དགོས་ཟེར་བའི་དམིགས་བསལ་མ་བྱུང་། སློབ་དཔོན་ཛྙཱ་ན་ཨ་ཀ་རས། འཇམ་དཔལ་རྒྱུ་རྡོ་རྗེ་འཛིན་པ་འདྲ་བ་འགོད་པར་བཤད་པས་དེ་ཡི་ལུགས་སུ་བྱས། ཏིང་ངེ་འཛིན་སེམས་དཔའ་འགོད་པ་དེ། འཇམ་དཔལ་གྱི་ཐུགས་ཀར་ཉི་མའི་སྟེང་དུ་ཧཱུཾ་ཡིག་ནག་པོ་འགོད་པའམ། ཡང་ན་ཐུགས་ཀར་ཉི་མ་ལ་རྡོ་རྗེ་ནག་པོ་རྩེ་དགུ་པ་དེའི་ལྟེ་བར་འགོད་པ་གང་བྱས་ནའང་འདྲ་གསུངས། ལཱ་ལི་ཏའི་གཞུང་ལས། རྡོ་རྗེ་མགོ་སོགས་ལ་དཀྱིལ་འཁོར་ལ་མཚན་མ་འགོད་པའི་སྐབས་སུ། སྔགས་རེ་བཤད་པ་ཡོད་དེ། བསྙེན་པའི་དུས་སུ་རེ་རེ་ཞིང་དགོས་པའི་ངེས་པ་མེད་དེ། དེའི་རྒྱུ་མཚན་ལྷ་ཐམས་ཅད་ཀྱི་ས་བོན་སྔགས་ཚན་
གསུམ་པོས་བྱས་པ་ཡིན། བཟླས་པ་བྱེད་དུས་རང་རང་གི་ཐུགས་ཀར་ཉི་མ་ལ་ས་བོན་དེ་དག་བཀོད་ནས། སྔགས་བཟླས་དུས། རང་བཅོམ་ལྡན་འདས་སུ་གསལ་བའི་ཞལ་དགུ་དང་། འཁོར་ཐམས་ཅད་ཀྱིས་ཀྱང་སྔགས་གང་ཟློས་དེ་འབྲུག་གི་སྒྲ་ལྟར་དིར་རི་རི་བཟླས་པའི་དམིགས་པ་བྱས་ན། ལྷ་ཐམས་ཅད་ཀྱི་བསྙེན་པ་བྱས་པར་འགྲོ་བས་ཤིན་ཏུ་ལེགས་གསུངས། མཚན་མ་འགོད་དུས། ལྷོའི་ལག་པའི་ཡུ་བ་དེ་ནང་དུ་བསྟན། བྱང་གི་རྐང་པའི་མགོ་དེའང་ནང་དུ་བསྟན་པས་ཡོང་གསུངས། བྷི་དྷི་བཱ་ལ་སྔ་རབས་པ་རྣམས་ཀྱིས་ཕུར་བའི་རྩེ་མོ་ལྟ་བུ་བྱས། དེའི་མགོ་ལ་རྨ་བྱའི་སྒྲོ་མདོངས་བཅིངས་པ་བྱས་འོང་གིན་འདུག་སྟེ། འདི་མི་ལེགས་ཤིང་། ལྕགས་དབྱུག་གི་རྣམ་པ་ཞེས་བཤད་ཡོད་པས། མདུང་ཕྱེད་པ་ལྟ་བུའི་རྩེ་མོ་ལ་རྨ་བྱའི་སྒྲོ་མདོངས་བཅིངས་པ་ལྟ་བུ་བྱས་ན་ལེགས་གསུངས། ཀ་ན་ཡ་ནི་མདུང་ཕྱེད་པ་སྟེ་མདུང་ཐུང་ཡིན་ཞིང་། མན་སྙེར། མདུང་ཐུང་ལ་ཐག་པ་བཏགས་ཡོད་པ་མདུང་གསོར་ནས་འཕངས་ཏེ། ཐག་པ་ནས་ཚུར་འཐེན་པ་ཞིག་ཡོད་པ་སྐད་དོ་གསུངས།གཏོར་མ་བྱིན་རླབས་ཀྱི་སྐབས་སུ། གོ་ལས་བ་ལང་གི་ཤ་གོས་མཚན་པ་ཟེར་བ་མི་འཐད་དེ། ཐ་མལ་བའི་ས་བོན་ལས་ཐ་མལ་བའི་ཤ་བསྐྱེད་ནས་ས་བོན་དེས་མཚན་པ། ཞེས་པ། ཐ་མལ་གྱི་ས་བོན་ལས་ཤ་ཐ་མལ་བསྐྱེད་ན། བུཾ་མེ་ལོང་ཡེ་ཤེས་ཀྱི་ངོ་བོས་མཚན་པ། ཞེས་པ་རིགས་པ་དང་། ཡང་བུཾ་ལས་ཤ་བསྐྱེད་ནས་དེ་ལ་ཐ་མལ་བའི་ཤའི་ས་བོན་གོ་ཡིས་མཚན་པ་
བྱེད་པ་ཡིན་ཞིང་། དེའི་སྟེང་དུ་ཅི་རིགས་པས་བུཾ་ལས་མེ་ལོང་ལྟ་བུའི་ཡེ་ཤེས་ཟེར་བ་འདུག་སྟེ། དེ་ཡང་། བུཾ་མེ་ལོང་ལྟ་བུའི་ཡེ་ཤེས་ཟེར་དགོས་པ་ཡིན། བུཾ་ལས་སྐྱེས་པའི་མེ་ལོང་ཡེ་ཤེས་གཟུགས་བརྙན་ཅན་མི་སྲིད་པའི་ཕྱིར། བུཾ་དེ་ཉིད་མེ་ལོང་ཡེ་ཤེས་སུ་མོས་པ་བྱེད་དགོས་གསུངས། ཡང་ཕྱོགས་བཞི་དབུས་དང་ལྔར་ཤ་ལྔ་བཀོད་ན་མཚམས་བཞིར་བདུད་རྩི་བཞི་བཀོད་ནས་དབུས་སུ་མི་འགོད་དེ། ཤས་བདུད་རྩི་གཅིག་གི་གོ་ཆོད་པ་ལ་དགོངས་པ་ཡིན། དེ་ནས་གཏོར་མའི་དུས། འཇིག་རྟེན་ལས་འདས་པ་ལ་དབུལ་བ་ལཱ་ལི་ཏའི་གཞུང་ཆུང་བ་ན་གསལ་ཞིང་། འཇིག་རྟེན་པ་ལ་དབུལ་བ་གཞུང་ཆེ་བ་ན་གསལ་ལ། དེ་ལ་ཕྱོགས་སྐྱོང་གི་སྔགས་དང་། ཧྲཱིཿ ཥྚྲཱིཿ སྤེལ་བ་དམར་ནག་གི་གཞུང་གཞན་ན་གསལ་ནའང་། ཧྲཱིཿ དང་སྤེལ་བ་མ་གཏོགས། ༀ་ནས་སྤེལ་བ་མི་འདུག །འདིར་ཡ་མཱནྟ་ཀ་དང་སྤེལ་བ་ལ། ༀ་བྷཱུ་ཙ་ར་ནཾ། ཞེས་པའི། ཙ་ར་ཞེས་པའི་སྐབས་སུ། ལ་ལར། ཙརྱ་ཞེས་འབྱུང་བའི་གཞུང་གཅིག་དང་། ཙ་ར་ཞེས་པ་ཡང་མཐོང་སྟེ། གང་བྱུང་ནའང་། དོན་ལ། ས་བླ་ལ་སྤྱོད་པའམ། མཁའ་སྤྱོད་ཅེས་པའི་དོན་ཡིན་ཏེ། ཙ་ར་དང་ཙརྱ་གཉིས་ཀ་སྤྱོད་པ་ལ་འཇུག་པས་སོ། །ཡ་པ་ཏ་ལ་ཙ་ར་ཡ་ཞེས་པའི་པ་ཏ་ས་འོག་ལ་འཇུག་ཅིང་། ཙ་ར་སྤྱོད་པ་ཡིན་པས། ས་སྤྱོད་དམ་ས་འོག་སྤྱོད་པ། མཱན་ཁེ་ཙ་ར་ཡ་ཞེས་པ་ས་སྟེང་སྤྱོད། ཏ་པཱུུར་བ་ནི་ག་ནཾ། ཞེས་པ། པཱུུར་བ་མདུན་ནམ། ཤར་ལ་འཇུག །ཀ་དཀྵི་ཡ་དི་ག་ཡ། གཡས་སམ་ལྷོ། ཧཱུཾ་པཤྩི་མ་ནི། ཞེས་པའི། པཤྩི་ནུབ་བམ་རྒྱབ། ཕཊ་
ཨུ་ཏ་ར་ཏི་ག་ཡ་ཞེས་པ། ཨུ་ཏ་ར་གཡོན་ནམ། བྱང་གི་ཕྱོགས་རྣམས་ངེས་པར་བྱས་ནས། ཧྲཱིཿ ཥྚྲཱིཿ དང་སྤེལ་བ་ལ། ༀ་ཨི་ཞེས་པ་ཨིནྡྲ་སྟེ་དབང་པོའི་མིང་ཡིག་གི་དང་པོ། དྷིཿ ཡ། ཞེས་པའི་ཡ། གཤིན་རྗེའི་མིང་ཡིག་དང་པོའོ། །ཥྚྲཱིཿ བ། ཞེས་པ་རུ་ན་ཆུ་ལྷའི་མིང་ཡིན་པས་དེ་ཡི་མིང་ཡིག་དང་པོའོ། ཝི་ཀྵི་ཞེས་པ་འདི་ལ། གནོད་སྦྱིན་གྱི་མིང་ཡིག་དང་པོ་ཡོང་རྒྱུར་རིགས་པས། ཡཀྵ་ཞེས་པས། གནོད་སྦྱིན་དེའི་མིང་ཡིག་དང་པོ་ཡ་ཡོང་རྒྱུ་ཡིན་ནའང་མ་བྱུང་ཞིང་། ཀྵ་ཞེས་པ་གནོད་སྦྱིན་གྱི་ས་བོན་དང་། དེ་མན་ཆད་རྣམས་ལ། འདི་དང་འདིའི་ས་བོན་དུ་སྦྱོར་ཤེས་པ་མི་སྣང་ནའང་། གཏོར་སྔགས་དེ་རྣམས་བརྗོད་པས། ཕྱོགས་སྐྱོང་བཅོ་ལྔ་སོགས་ཀྱིས་གཙོ་བྱས། སྲིད་པ་གསུམ་གྱི་འབྱུང་བོ་ཐམས་ཅད་ལ་འབུལ་བའི་སྔགས་ཐུན་མོང་བར་བྱས་པས་ཆོག་གསུངས། བཅོམ་ལྡན་ཆོས་རྗེ་འཇམ་དབྱངས་སྤྱན་ལམ་དུ། །ཞེས་པ་འདི། སློབ་དཔོན་ཞི་བ་ཡེ་ཤེས་ཀྱིས་མཛད་དོ། །མགྲོན་གྱིས་གཏོར་མ་གསོལ་དུས་ལྗགས་ལས་མཐུན་ཁ་དོག་ཅན་དུ་བསྐྱེད་དགོས་ཤིང་། འཕྲིན་ལས་ཞུས་པས་མཛད་པའི་ཞལ་བཞེས་མཛད་པར་མོས་པ་མ་བརྗེད་པར་བྱེད་དགོས། ལས་གཤིན་ལ་མ་ཧེའི་གདོང་ཅན་དང་། རྡོ་རྗེ་ནག་པོ་རྩེ་མོ་ལྔ་པས་དབུ་བརྒྱན་པར་བསྒོམ་པ་རྣམས་བླ་མ་རྭ་ལོའི་མན་ངག་ཡིན། ཙ་མུཎྜི་ལ་དུད་འགྲོའི་པགས་པ་གྱོན་པ་རྒྱ་གཞུང་ནས་བྱུང་ཡང་། དུད་འགྲོ་གང་ཡིན་མི་གསལ་བ་ལ། ཁ་ཅིག་སྟག་ལྤགས་བྱེད་པ་བྱུང་ནའང་། འདི་གླང་
ལྤགས་ཡིན་པར་བཞེད་པ་མང་བས་དེ་ཡི་ལུགས་སུ་བྱས་པ་ཡིན་གསུངས། ལས་གཤིན་ཡབ་ཡུམ་གཉིས་ཀྱི་མངོན་རྟོགས་ལས་འདིར་མ་བཤད་ཀྱང་། དམིགས་པ་ལ། ཡབ་ལ་གཤིན་རྗེ་ཕོ་བརྒྱད། ཡུམ་ལ་མོ་བརྒྱད་ཀྱིས་བསྐོར་བའི་དམིགས་པ་བྱེད་དགོས། མོ་བརྒྱད་ནི། གཤིན་རྗེ་བརྟན་མ་སོགས། བདེ་མཆོག་གི་མཚམས་མ་རྣམས་ཀྱི་མཚན་སྔགས་དང་འདྲ་བའི་མིང་འཛིན་པའི་གཤིན་རྗེ་མོ་བཞི་དང་། གཤིན་རྗེ་སྲེག་མ་ནག་མོ་སོགས་བཞི་སྟེ། བརྒྱད་ཀྱིས་བསྐོར་བའི་དམིགས་པ་བྱེད་དགོས་གསུངས། ཕྲེང་བ་བྱིན་རླབས་ཀྱི་རྡོ་རྗེ་འཇིགས་བྱེད་བསྐྱེད་དུས། རྒྱུ་རྡོ་རྗེ་འཛིན་པ་མི་དགོས། བདག་བསྐྱེད་ཀྱི་ཕྱག་གཉིས་པ། ཕྱག་བཞི་པ། ཞལ་གསུམ་ཕྱག་དྲུག་པ་ལྟ་བུ་ཡིན་ན་རྒྱུ་རྡོ་རྗེ་འཛིན་པ་དགོས་པར་སློབ་དཔོན་འཇམ་པའི་དབྱངས་ཀྱིས་བཤད། གཞལ་ཡས་ཁང་གི་གཞི་ལ་པ་ཏྲ་བྲིས་པ་འདི་ལ། བཤད་ཚོད་མི་འདུག་པས། རང་རེས། རྩེ་མོ་ནས། རིན་པོ་ཆེའི་མེ་ཏོག་བཀྲམ་ནས་གདའ་གསུངས་པ་བཞིན། གཞལ་ཡས་ཁང་གི་གཞི་ལ་མེ་ཏོག་བཀྲམ་པ་བྱས་པ་ཡིན་གསུངས། གཏོར་མ་བསྡུས་པ་འབུལ་དགོས་བྱུང་ནའང་རྒྱུ་རྡོ་རྗེ་འཛིན་པ་མི་དགོས་པར། འཇིགས་བྱེད་རང་དཀྲོངས་ཀྱིས་བསྐྱེད་པར་ལཱ་ལི་ཏས་བཤད་གསུངས། བགེགས་དང་ལོག་པར་འདྲེན་པ་རྣམས། །གདུལ་དཀའ་འདུལ་བྱེད་དཔའ་བོ་ནི། །ཤིན་ཏུ་གཏུམ་པའི་ཁྲོ་གཟུགས་ཀྱིས། །མ་རུངས་པ་རྣམས་ཚར་གཅོད་ཤོག །སྲིད་པ་གསུམ་འབར་སྐུ་ནི་རྗེས་ཆགས་དུལ་བར་ལྡན། །འོད་ཟེར་
སྔོན་པོ་སྟོང་ལྡན་ཉི་མ་བརྒྱ་སྟོང་ལྡན། །རྣམ་མང་སྐུ་དང་ཆ་ལུགས་རྗེས་ཆགས་སེམས་དཔར་ལྡན། །ཧེ་རུ་ཀ་དཔལ་དེ་དང་ལྷན་ཅིག་གར་བྱེད་ཤོག །ཅེས་པ་འདི། སློབ་དཔོན་ཆེན་པོ་རྣལ་འབྱོར་གྱི་དབང་ཕྱུག་ནག་པོ་སྤྱོད་པས། བར་དོར་མཆོག་གྲུབ་པའི་ཚེ་སྨོན་ལམ་ཡིན་ཞེས་ཀྱང་ཟེར་རོ། །འདི་རྣམས་རྗེ་རིན་པོ་ཆེའི་གསུང་ངག་ཟིན་བྲིས་སུ་བཏབ་པ་ཡིན་ནོ། །འཇིགས་བྱེད་ཀྱི་ཞབས་འོག་གི་བྱ་ཆེན་པོ་ནི། སྙེ་མ་བདུན་པའི་རབ་བྱེད་བཞི་པ་ནས། བྱ་ཆེན་པོ་ནི། མགོ་བོ་དཀར་ལ་ལུས་པོ་ནག་པ། དིང་སང་གི་འོལ་བར་གྲགས་པ་འདིའོ། །ཞེས་པ་ཙམ་འབྱུང་བ་ལ། དེང་སང་འགའ་ཞིག་གོ་བོར་འདོད་པ་ཡང་ཡོད། །སྭ་སྟི། རྒྱལ་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདར་རྒྱས་རྣམ་གྲོལ་སྦྲང་རྩའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །མདྒ་ལཾ། །