སྦྱོར་བ་ཡན་ལག་དྲུག་གི་རྫོགས་རིམ་གྱི་གནད་བསྡུས་པ་རྗེའི་གསུང་བཞིན་རྒྱལ་སྟེངས་པས་མཛད་པ།
སྦྱོར་བ་ཡན་ལག་དྲུག་གི་རྫོགས་རིམ་གྱི་གནད་བསྡུས་པ་རྗེའི་གསུང་བཞིན་རྒྱལ་སྟེངས་པས་མཛད་པ་བཞུགས་སོ། །
ན་མོ་གུ་རུ་བྷྱཿ ཕྲ་རབ་རྡུལ་སོགས་བེམ་པོའི་ཁམས་ཟད་ཅིང་། །རྣམ་ཀུན་སྟོང་གཟུགས་ཕྱག་རྒྱ་ཆེན་པོ་ལས། །བྱུང་བའི་མི་འགྱུར་བདེ་བ་ཆེན་པོ་ནི། །པྲ་ཕབ་མཁའ་ལ་དབང་པོའི་གཞུ་བཞིན་དུ། །མཚན་དཔེས་སྤྲས་པའི་ལོངས་སྤྱོད་རྫོགས་པའི་སྐུར། །གང་དུ་ཤར་བའི་བླ་མ་དུས་འཁོར་གྱི། །ཞབས་ཀྱི་པདྨོར་གུས་པས་ཕྱག་བཙལ་ཏེ། །མང་དུ་གསུངས་པའི་རྒྱུད་ཀྱི་སྙིང་པོའི་དོན། །སྐལ་བཟང་སྐྱེ་བོ་བགྲོད་པའི་ལམ་གྱི་མཆོག །རྨད་བྱུང་ཡན་ལག་དྲུག་གི་གདམས་པའི་གནད། །སྔོན་མེད་ལེགས་བཤད་བརྗེད་དུ་ཕངས་པ་རྣམས། །རྡོ་རྗེ་འཆང་ཆེན་བླ་མའི་གསུང་བཞིན་འདྲི། །སྦྱོར་བ་ཡན་ལག་དྲུག་གི་བླ་མ་དམ་པ་ཉེ་བརྒྱུད་ཀྱི་ལོ་རྒྱུས་ནི། རྣལ་འབྱོར་
གྱི་དབང་ཕྱུག་དཔེ་མེད་འཚོ། དེས་ཚོང་དཔོན་གྱི་བུ་དཔལ་འཛིན། དེས་པཎྜི་ཏ་འོད་བྱེད་ལྷ། དེས་ཐམས་ཅད་མཁྱེན་པ་ཆོས་ཀྱི་འབྱུང་གནས་ཞི་བ། དེས་གྲུབ་ཐོབ་ཉི་མ་དཔལ་ཡེ་ཤེས། དེས་རིན་ཆེན་འཚོ། དེས་བི་བྷཱུ་ཏི་ཙནྡཱ། ཡང་ན་ཆོས་འབྱུང་ཞི་བས་པཎྜི་ཏ་གྲགས་པའི་ལྷ་ལ། དེས་པཎྜི་ཏ་ཆོས་འབངས། དེས་བི་བྷཱུ་ཏི། དེས་མང་པོ་ལ་གནང་དུ་ཟིན་ཀྱང་། བླ་མ་ཀོ་བྲག་པ་དང་། གཡུང་ཕུག་པ། ཉེག་པོ་ཆོས་ལྡན་གསུམ་ལ་གནང་། ཡང་བི་བྷཱུ་ཏི་ལ་ཤ་བ་རི་དབང་ཕྱུག་དངོས་སུ་བྱོན་ནས་གནང་བར་ཡང་བྱེད། བླ་མ་དེ་གསུམ་ལ་གོ་ལུང་པ་གཞོན་ནུ་དཔལ་གྱིས་ཞུས། དེས་ལོ་ཙཱ་བ་ཆེན་པོ་ཐར་པ་བ། དེས་བུ་རིན་པོ་ཆེ། དེས་བླ་མ་བདེ་ཆེན་པ་ཆོས་ཀྱི་དཔལ་བ། ཁྱུང་བོ་
ལྷས་པ་གཉིས་ལ། དེ་རྣམ་གཉིས་ལ་ཐམས་ཅད་མཁྱེན་པ་ཤར་ཙོང་ཁ་པ་ཆེན་པོ། དེས་བདག་ལ་གནང་སྟེ། རྗེ་དེའི་གསུང་བྱིན་རླབས་ཀྱི་བདུད་རྩིར་བྱོན་པ་ནི། བསྐྱེད་པའི་རིམ་པས་རྒྱུད་སྨིན་ནས། རྫོགས་རིམ་སྒོམ་ཚུལ་ལ། ཡན་ལག་དྲུག་དང་བྲལ་བས་མཆོག་མི་འགྲུབ་པར་བསྟན་པ། རྫོགས་རིམ་འདིའི་མཚན་གྱི་རྣམ་གྲངས། གང་ཟག་སོ་སོའི་བསྒོམ་བྱར་འདོད་པ་མི་རིགས་པ། ཇི་ལྟར་སྒོམ་ཚུལ་དང་བཞི་ལས། འདུས་པ་ཕྱི་མར་དང་པོའི་དོན་ལ། བསྙེན་པའི་ཡན་ལག་དྲུག་ཏུ་ནི། །བྱས་ནས་མཆོག་ནི་བསྒྲུབ་པར་བྱ། །གཞན་དག་གིས་ནི་བསྒྲུབས་གྱུར་ན། །མཆོག་ནི་འགྲུབ་པར་མི་འགྱུར་རོ། །ཞེས་གསུངས་པས། ཡན་ལག་དྲུག་དང་བྲལ་ན་མཆོག་མི་འགྲུབ་པས་ཡན་ལག་དྲུག་ངེས་པར་ཚང་དགོས་སོ། །འོ་ན་རྒྱུད་འདི་ནས་བཤད་པའི་གྲངས་ཁོ་ན་ལྟར་དགོས་སམ་སྙམ་ན། སོར་སྡུད་སོགས་དྲུག་གིས་དབུ་མ་སྦྱོང་བ་སོགས་ཀྱི་བྱེད་ལས་ཐད་ཀ་ཐད་ཀའི་གང་བྱེད་དེ་འདུག་ན་དོན་གྲུབ་པས། དྲུག་གི་ཐ་སྙད་དེ་ཁོ་ན་ལྟར་དགོས་པའང་མིན་ནོ། །ཡང་ཡན་ལག་དྲུག་གི་ཐ་སྙད་མཐུན་ཡང་། ཐམས་ཅད་དོན་གཅིག་ཏུ་འཆད་དགོས་པའང་མིན་ཏེ། རིམ་གཉིས་ཀྱི་བསྙེན་སྒྲུབ་བཞི་མིང་མཐུན་ཡང་དོན་མི་མཐུན་པ་བཞིན་དང་། ཡན་ལག་དྲུག་ཀྱང་སྒྲོན་གསལ་བཞིན་དུ། ནཱ་རོ་པས་རྒྱུད་ཕྱི་མའི་དོན་དུ་བཤད་ལ། འདི་བའི་ཡན་ལག་དྲུག་དབང་མདོར་བསྟན་བཞིན་དུ་བཤད་
དོ། །གཉིས་པ་ནི། རྣལ་འབྱོར་ཡན་ལག་དྲུག །བསྙེན་སྒྲུབ་བཞི། རྡོ་རྗེ་གསུམ། ཕྱག་རྒྱ་བཞིའི་རྫོགས་རིམ་ཞེས་མཚན་གྱི་རྣམ་གྲངས་གསུངས་པ་ལ། ཕྱག་རྒྱ་བཞི་ལ། ལས། ཡེ་ཤེས། ཕྱག་རྒྱ་ཆེན་པོ་གསུམ་ནི་གྲགས་ཆེ་ལ། རྣལ་འབྱོར་རྒྱུད་དུ་ཆོས་རྒྱ་ཞེས་པ། འདིར་ཡེ་རྒྱ་འམ་ཕྱག་རྒྱ་བཞི་པ་དམ་ཚིག་གི་ཕྱག་རྒྱ་སྟེ། འདི་ལ་འཇིག་པ་མེད་པའི་ཕྱག་རྒྱ་ཞེས་པ། འགྱུར་བ་མེད་པ་ཞེས་བསྒྱུར་བ་བདེ་བས། དམ་ཚིག་གི་ཕྱག་རྒྱ་འགྱུར་བ་མེད་པའི་བདེ་ཆེན་ཏེ། འདི་བསྒྲུབ་བྱ་ཡིན་ལ། ཕྱག་རྒྱ་སྔ་མ་གསུམ་ནི་སྒྲུབ་བྱེད་ཡིན་ནོ། །དེའང་དབང་པོ་རབ་ཕྱག་ཆེན། འབྲིང་ཡེ་རྒྱ། ཐ་མ་ལས་རྒྱ་ལ་བརྟེན་ནས་སྒྲུབ་པོ། །ཚུལ་འདིས་སེམས་འགྲེལ་སྐོར་གསུམ་གྱི་རྫོགས་རིམ་ལ་མི་འདྲ་བ་མེད་དོ། །གསུམ་པ་ནི། ཁ་ཅིག་སོར་བསམ་གཉིས་དབང་པོ་རབ། འབྲིང་གིས་སྲོག་འཛིན་གཉིས། རྗེས་དྲན་དང་ཏིང་ངེ་འཛིན་ཐ་མས་བསྒོམ། ཞེས་པ་མི་འཐད་དེ། འགྲེལ་པར་ཡན་ལག་གང་གི་སྐབས་སུའང་གང་ཟག་གཅིག་གི་ཆ་རྐྱེན་དུ་ཡན་ལག་དྲུག་ཁ་དགོས་པར་གསུངས་སོ། །བཞི་པ་ནི། བོད་ཀྱི་བླ་མ་སྔ་མ་རྣམས། སྔོན་འགྲོ་ལྟོས་མེད་དྲུག །དངོས་གཞི་རྣམ་གཞག་དྲུག །རྗེས་སྲུང་སྡོམ་དྲུག་དང་། བཅོ་བརྒྱད་དུ་མཛད་ནས། དང་པོའི་དོན། ལུས་ངག་ཡིད་གསུམ་ལ་བལྟོས་པ་མེད་པ་གསུམ། འཕོ་བའི་བདེ་བ་ལ་བལྟོས་པ་མེད་པ་དང་། ལུས་དང་དབང་པོ་
ལ་བལྟོས་པ་མེད་པ་གཉིས་བསྣན་ནས་དྲུག་ཏུ་བྱེད་དོ། །དེའི་ཚེ་ལྟོས་མེད་དྲུག་བསྙེན་པར་བཤད་པས། ཡན་ལག་དང་པོ་བཞི་ག་ཉེར་སྒྲུབ་ཏུ་བྱ་དགོས་སོ། །ཚུལ་འདི་རིམ་པ་གཉིས་ཀའི་སྔོན་འགྲོ་ཡིན་གྱི་རྫོགས་རིམ་ཁོ་ནའི་མིན་ནོ། །དངོས་གཞི་རྣམ་གཞག་དྲུག་ལ། སྐུ་རྡོ་རྗེ་ཐོག་མར་དགེ་བ་བསྙེན་པའི་ཡན་ལག་སོར་བསམ་གཉིས། གསུང་རྡོ་རྗེ་བར་དུ་དགེ་བ་ཉེར་སྒྲུབ་ཀྱི་ཡན་ལག་སྲོག་འཛིན་གཉིས། ཐ་མར་དགེ་བ་ལ་གཉིས་སུ་བྱས་ནས། ཐུགས་རྡོ་རྗེ་སྒྲུབ་པའི་ཡན་ལག་དྲུག་རྗེས་དྲན། ཡེ་ཤེས་རྡོ་རྗེ་སྒྲུབ་ཆེན་གྱི་ཡན་ལག་ཏིང་ངེ་འཛིན་དང་དྲུག་ཏུ་བྱེད་པ་ནི་རྒྱུད་འགྲེལ་གྱི་དགོངས་པ་ལེགས་པར་བཤད་པའོ། །དེའང་རྒྱུད་འདི་ལ་བརྟེན་པ་རྣམས་ཀྱིས། དབང་བཞི་པ། གསུམ་པ་དང་། དཔེ་དོན་དུ་སྦྱོར་ཞེས་སྨྲ་བ་ཙམ་མ་གཏོགས། བསྒྲུབ་བྱ་དབང་བཞི་པ་འདིའོ། །དེའི་སྒྲུབ་བྱེད་འདི་ལྟར་རོ་ཞེས་ཐོན་པ་ཉུང་བར་སྣང་ངོ་། །དེའང་རྒྱུད་འདིས་རྩལ་དུ་བཏོན་ནས་འཆད་པ་ནི། སྟོང་གཟུགས་ཕྱག་རྒྱ་ཆེན་མོ་ལ་བརྟེན་ནས་མཆོག་ཏུ་མི་འགྱུར་བའི་བདེ་བ་སྒྲུབ་པ་འདི་ཡིན་ལ། དེ་སྒྲུབ་བྱེད་ལས་དང་ཡེ་ཤེས་ཀྱི་ཕྱག་རྒྱ་གཉིས་བརྒྱུད་ནས་སྒྲུབ་བྱེད་ཡིན་ཡང་། དངོས་ཀྱི་སྒྲུབ་བྱེད་ཕྱག་ཆེན་ཁོ་ན་ཡིན་ལ། དེས་ན་རྒྱུད་འདིར་སྟོང་གཟུགས་ལ་བསྔགས་པ་ཆེ་བའི་རྒྱུ་མཚན་དེ་ཡིན་ནོ། །སྟོང་གཟུགས་ཕྱག་ཆེན་ལས་མི་འགྱུར་བའི་བདེ་བ་སྐད་ཅིག་དང་པོ་ཐོབ་ནས་དབང་བཞི་པར་འཇོག་གོ །དེས་ན་སྟོང་གཟུགས་
ཀྱི་ཉམས་སྣང་ཙམ་དང་། བདེ་བ་བན་བུན་ལ་དེ་ཙམ་མི་བསྔགས་ཏེ། ཕྱག་རྒྱ་ཆེན་མོ་ནི་རྗེས་དྲན་ཐོབ་ནས་འབྱུང་གི་དེའི་གོང་དུ་མི་འབྱུང་ངོ་། །དེས་ཕྱག་ཆེན་དེའི་གཟུགས་ནི་སོར་བསམ་གཉིས། སྲོག་འཛིན་གཉིས་ཀྱིས་སྲོག་བསྒྲུབས་པའི་སྒོ་ནས། ཕྱག་ཆེན་ལས་བདེ་བ་དངོས་སུ་འདྲེན་པས། ཕྱག་རྒྱ་གཞན་བར་དུ་བརྒྱུད་མི་དགོས་པས་དང་པོར་སྟོང་གཟུགས་ཕྱག་རྒྱ་ཆེན་མོ་བསྒྲུབས། དེ་ལ་བརྟེན་ནས་མི་འགྱུར་བའི་བདེ་བ་བསྐྱེད་ཚུལ་ལ་ངེས་པ་རྙེད་ན། ལམ་གྱི་ལུས་རྫོགས་པ་ལ་གོ་བ་ཆགས་སོ། །ཚུལ་དེ་ལ་གསུམ། བདེ་ཆེན་འདྲེན་བྱེད་སྟོང་གཟུགས་ཀྱི་སྒྲུབ་བྱེད་ཀྱི་ཡན་ལག །གཟུགས་དེ་ལ་བརྟེན་ནས་བདེ་ཆེན་དངོས་སུ་སྒྲུབ་བྱེད་ཀྱི་ཡན་ལག །བསྒོམས་པས་གྲུབ་པ་བསྒྲུབ་བྱ་ཏིང་ངེ་འཛིན་གྱི་ཡན་ལག་གོ །དང་པོ་ལ་གཉིས། གཟུགས་སྒྲུབ་བྱེད་ཀྱི་ཡན་ལག །སྲོག་སྒྲུབ་བྱེད་ཀྱི་ཡན་ལག་གོ །དང་པོ་ལ་གཉིས། གཟུགས་མ་གྲུབ་པ་སྒྲུབ་བྱེད་སོར་སྡུད་ཀྱི་ཡན་ལག །གྲུབ་ཟིན་བརྟན་པར་བྱེད་པ་བསམ་གཏན་གྱི་ཡན་ལག་གོ །དང་པོ་ལ་དྲུག །སོར་སྡུད་ཀྱི་མཚན་དོན། དང་པོ་སྒོམ་པའི་དུས་མཚམས། ཡན་ལག་ཇི་ལྟར་སྒོམ་པའི་མཚན་ཉིད། ཚད་མ་གང་ཡིན་དཔྱད་པ། དག་དབྱེ། གནས་སྐབས་དང་མཐར་ཐུག་གི་འབྲས་བུའོ། །དང་པོ་ནི། སོ་སོ་ནི་ཐ་དད་དང་། སྡུད་པ་ནི་འགོག་པ་སྟེ། དབང་པོ་ལྔ་སོ་སོ་ཡུལ་སོ་སོར་འཇུག་པ་བཀག་ནས་སྟོང་པ་ལ་འཇུག་པ་སྟེ།
དབང་པོ་ལྔ་དང་ཡུལ་ལྔའི་འབྲེལ་བ་ཆད་པ་ཡིན་གྱི། ཡིད་དང་ཆོས་ཀྱི་འབྲེལ་བ་ཆད་པ་མིན་ཏེ། ཡིད་ཀྱི་ཆོས་སྐྱེ་མཆེད་པའི་གཟུགས་སྟོང་གཟུགས་མཐོང་དགོས་པའི་ཕྱིར་རོ། །དྲི་མེད་འོད་ལས། འདིར་སྡུད་པ་ཞེས་པ་ནི། འཁོར་བ་རྣམས་ཀྱིས་སྡུད་པ་ནི། མིག་ལ་སོགས་པའི་དབང་པོ་རྣམས་གཟུགས་ལ་སོགས་པའི་ཡུལ་འཛིན་པའོ། །ཡོངས་སུ་སྤོང་བ་ནི་ཕྱིར་སྡུད་པ་ཞེས་བརྗོད་དོ། །སྟོང་པ་ཉིད་ཀྱི་གཟུགས་ལས། གཞན་ཤའི་མིག་ལ་སོགས་པ་རྣམས་ཀྱིས་གཞན་གཟུགས་ལ་སོགས་པའི་ཡུལ་འཛིན་པ་ནི། ཉེ་བའི་སྒྲུབ་པའོ། །ཞེས་སོ། །སྤྱིར་ཐུན་མོང་གི་ཏིང་ངེ་འཛིན་བརྟན་པས། དབང་ཤེས་ཀྱི་དེ་མ་ཐག་རྐྱེན་མ་ཚང་བས་དབང་ཤེས་ཡུལ་ལ་སྐྱེ་མི་ཐུབ་པ་འབྱུང་བའང་འདིར་དེ་ཙམ་གྱིས་མི་ཆོག་གི །དབང་ཤེས་ཀྱི་བཞོན་པར་གྱུར་པའི་རླུང་ཆིངས་པ་དགོས་སོ། །དེའང་ཡུལ་ཡུལ་ཅན་གྱི་འབྲེལ་བ་ཆད་པ་ཙམ་གྱིས་ཀྱང་མི་ཆོག་གི །གཞན་མཐོང་ཞེས་པ། སྟོང་པ་ཉིད་ཀྱི་ཡུལ་ལྔ་མཐོང་དགོས་ཏེ། དྲི་མེད་འོད་ལས། ཡུལ་ཡུལ་ཅན་གྱི་འབྲེལ་བ་བཅད་ནས་སེམས་སྟོང་པ་ཉིད་ལ་འཇུག་པ་ནི། སོར་སྡུད་ཀྱི་མཚན་ཉིད་དོ། །སྟོང་པའི་གཟུགས་ཀྱི་ཡུལ་རྣམས་ལ་གཞན་མིག་ལ་སོགས་པ་ལྔ་པོ་རྣམས་ཀྱིས་རབ་ཏུ་འཇུག་པའོ། ཞེས་སོ། །གཉིས་པ་ནི། སྣ་བུག་གཡས་ཀྱི་རླུང་རྒྱུ་བའི་དུས་སུ་ཐོག་མར་འགོ་འཛུགས་ཏེ། དེར་བཙུགས་ན་རླུང་སྡུད་སླ་བའི་རྟེན་འབྲེལ་ཁྱད་པར་ཅན་ཡོད་དོ། །
གསུམ་པ་ལ། ཐབས་ཉིན་མཚན་གཉིས་སུ་དབྱེ་བ་རྒྱུ་མཚན་དང་བཅས་པ། སོ་སོའི་སྒོམ་ཚུལ། མ་གྲུབ་ན་སྤོགས་པའི་ཆོ་ག །སྒོམ་འཕྲོ་ལ་ཤི་ནའང་རྣལ་འབྱོར་གོམས་སྟོབས་ཀྱིས་འཇུག་པའོ། །དང་པོ་ལ་གཉིས། དབྱེ་བ་དངོས་དང་། དེ་ལྟར་འབྱེད་པའི་རྒྱུ་མཚན་ནོ། །དང་པོ་ནི། སྤྱིར་ལོ་ལ་ལྷོ་བགྲོད་དང་བྱང་བགྲོད། ཞག་ལ་ཉིན་མོ་དང་མཚན་མོ། ནང་སེམས་ཅན་ལ་སྐྱེ་འཆི། རྣལ་འབྱོར་པ་ལ་སྤྲོ་རིམ་དང་སྡུད་རིམ་གཉིས་འདུག་པའི་ཕྱིར་གསུངས་པ་ཡིན་ཡང་། རྒྱུ་མཚན་དུ་འགྲོ་ཚུལ་དཔྱད་དགོས་པར་སྣང་ངོ་། །གཉིས་པ་ལ་གཉིས། རྣལ་འབྱོར་གཉིས་ཀྱི་ཁུངས་དགོད་པ། སོ་སོར་དགོས་པའི་རྒྱུ་མཚན་ནོ། །དང་པོ་ནི། ཕྱག་རྡོར་བསྟོད་འགྲེལ་ལས། བསྒོམ་པ་འདི་ནི་བཅོམ་ལྡན་འདས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པར་ཡང་གསུངས་པ་འདི་ལྟ་སྟེ། ལྷ་རྣམས་ཀྱི་དབང་པོས། རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བྱེད་པ་དེས་ཇི་ལྟར་བསླབ་པར་བྱ། རབ་འབྱོར་གྱིས་སྨྲས་པ། ཀཽ་ཤི་ཀ །གང་ནམ་མཁའ་ལ་རྣལ་འབྱོར་དུ་བྱེད་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྣལ་འབྱོར་དུ་བྱེད་པའོ། །བླ་གབ་མེད་པ་ལ་རྣལ་འབྱོར་དུ་བྱེད་པ་དེ་ཤེར་ཕྱིན་ལ་རྣལ་འབྱོར་དུ་བྱེད་པའོ། །ཞེས་གསུངས་སོ། །གཉིས་པ་ནི། ཁ་ཅིག་མཚན་མོའི་རྣལ་འབྱོར་གྱི་དུས་སུ། ཉིན་མོའི་རྟགས་རྣམས་ཤར་ན། ཉིན་མོའི་རྣལ་འབྱོར་སྒོམ་མི་དགོས་ཞེས་ཟེར་བ་མི་འཐད་དེ། མུན་པ་
ལ་སྟོང་གཟུགས་འཆར་སླ་ལ། སྣང་བ་ཡོད་སར་འཆར་དཀའ་བས། མུན་པ་ལ་འཆར་ཐུབ་ཀྱང་། སྣང་བ་ལ་འཆར་ཐུབ་པའི་ངེས་པ་མེད། སྟོང་གཟུགས་རྣམ་པ་ཐམས་ཅད་དུ་འཆར་བ་ཞིག་དགོས་ཤིང་། དེ་འཆར་བ་ཐམས་ཅད་མུན་པ་ལ་བལྟོས་ན་ཧ་ཅང་ཐལ་བས། སྣང་བ་ལའང་འཆར་ཐུབ་པ་ཞིག་དགོས་སོ། །དེས་ན་མཚན་མོའི་དུས་ཉིན་རྟགས་རྣམས་ཤར་ཡང་། སྣང་བ་ལ་ངེས་པ་མེད་པས། ཐམས་ཅད་འདོད་དགུར་འཆར་བའི་ཆེད་དུ། ཉིན་མོའི་རྣལ་འབྱོར་ངེས་པར་བསྒོམ་དགོས་སོ། །ཡང་འདི་སྙམ་དུ། མཚན་རྟགས་རྣམས་མུན་པ་ལ་འཆར་སླ་བས། ཐོག་མར་མུན་པར་སྒོམ་པ་ལྟར། ཉིན་རྟགས་རྣམས་ཀྱང་ཐོག་མར་མུན་པ་ལ་བསྒོམས་ན་འཆར་སླ་མོད་སྙམ་ན། ཉིན་རྟགས་རྣམས་ནི། མཚན་རྟགས་ལས་འཆར་དཀའ་སྟེ། མཚན་རྟགས་རྣམས་རྫོགས་པར་ཤར་ནས། ཡུལ་ཡུལ་ཅན་གྱི་འབྲེལ་མ་ཆད་པར་ཉིན་རྟགས་རྣམས་འཆར་མི་སྲིད་པའི་ཕྱིར། དེས་ན་མཚན་རྟགས་རྣམས་འཆར་སླ་བས་མུན་པ་ལ་བསྒོམ། དེས་རྣམས་རྫོགས་པར་ཤར་བའི་མཚམས་ནས་ཉིན་མོའི་རྣལ་འབྱོར་བསྒོམས་པས། མཚན་རྟགས་རྣམས་འདོད་དགུར་འཆར་ཐུབ་པ་དང་། དེའི་སྟོབས་ཀྱིས་ཉིན་རྟགས་རྣམས་ཀྱང་མྱུར་དུ་འཆར་བས། རྣལ་འབྱོར་གཉིས་ཀྱིས་སོ་སོར་སྡུད་ཀྱི་ཡན་ལག་རྫོགས་པར་འཐོབ་བོ། གཉིས་པ་སོ་སོའི་སྒོམ་ཚུལ་ལ། མཚན་མོའི་རྣལ་འབྱོར་དང་ཉིན་
མོའི་རྣལ་འབྱོར་གཉིས་ལས། དང་པོ་ལ་དྲུག །གང་དུ་སྒོམ་པའི་གནས། ལུས་གནད། ལྟ་སྟངས། དབང་པོའི་བྱེད་བཅིངས་ཀྱི་ངེས་པ། བསྒོམས་པས་མྱོང་བ་སྐྱེ་ཚུལ། གང་ལ་དམིགས་པ་གཏོད་པའི་དེ་ཁོ་ན་ཉིད་ནི་བྱེད་བཅིངས་སུ་འདུའོ། །དང་པོ་ནི། སྣང་བ་ཅུང་ཟད་ཀྱང་མེད་པའི་མུན་ཁང་ཤིན་ཏུ་གནག་པ་སྟེ། དེར་བསྒོམས་ན་སྟོང་གཟུགས་འཆར་སླ་བའི་ཕྱིར་རོ། །དེའང་འདིར་པྲ་ཕབ་པ་དང་དཔེ་དོན་དུ་བྱས་ནས། པྲའི་རིགས་འགའ་ཞིག་ལ་མུན་པ་ཤིན་ཏུ་གནག་པར་མིག་འབྲས་མི་བསྒུལ་བར་བསྡད་པ་ཙམ་གྱིས་མཐོང་སྣང་འཆར་བ་བཞིན་ནོ། །གཉིས་པ་ལུས་ཀྱི་གནད་གཞན་ནི་སྤྱི་དང་མཐུན། ལག་པའི་འཇོག་སྟངས་ནི་དྲི་མེད་འོད་ལས། འདིར་ལག་པ་གཉིས་ཀས་རྡོ་རྗེ་ཁུ་ཚུར་བཅིངས་ནས་ཁུ་ཚུར་གྱིས་མཐེ་བོང་བསྡམས་པ་དག་བརླ་གཡས་དང་གཡོན་པའི་སྟེང་དུ་རྡོ་རྗེའི་གདན་ལ་གནས་པ་ནི་རྡོ་རྗེའི་ཕྱག་རྒྱར་འགྱུར་རོ་ཞེས་བྱ་བས། ལག་པ་གཉིས་རྡོ་རྗེ་ཁུ་ཚུར་བརླ་སྟེངས་སུ་བསྣོལ་བའམ་དྲང་བོར་བཞག་པ་གང་རུང་བྱའོ། །གསུམ་པ་ནི། འདུས་པའི་རྒྱུད་ཕྱི་མར་བསྙེན་པའི་དུས་སུ་གཙུག་ཏོར་ཆེ། །ཞེས་པའི་དོན་གཙུག་ཏོར་འཁོར་བསྒྱུར་གྱི་ལྟ་སྟངས་སུ་བཤད་པས། མིག་མ་ལྕིབས་ཀྱིས་ཕྱེད་བཀབ་སྟེ། ཕྱེད་མིག་སྟེང་དུ་བལྟས་ལ་མིག་འབྲས་མི་བསྒུལ་བར་བྱའོ། །འདིས་ཀྱང་སྟོང་གཟུགས་འཆར་བའི་དགོས་པ་ཡོད་དོ། །དྲི་མེད་འོད་དུ།
འཁོར་ལོ་ཅན་གྱི་ཞེས་པ་གཙུག་ཏོར་གྱི་འཁོར་ལོའི་བལྟ་བའི་ཤེས་པ་མིག་མི་འཛུམ་པར་སྟེང་དུ་བལྟ་བས་མཚན་པར་འགྱུར་རོ། །ཞེས་གསུངས་པས། རྭ་འབྲོའི་ཕྱག་བཞེས་ནམ་མཁའ་ལ་བལྟ་བར་བཞེད་པ་མི་ལེགས་སོ། །བཞི་པ་ནི། ཁ་ཅིག་བྱེད་པ་སོ་སོ་ལ་བཅིང་བ་སོ་སོར་བྱེད་པར་སྣང་སྟེ་ལེགས་པར་མི་སེམས་སོ། འཇམ་དབྱངས་ཀྱིས་མཛད་པའི་རྣལ་འབྱོར་གྱི་སྙིང་པོ་གསལ་བར། མཚན་མོ་གཡེང་མེད་ཁྱིམ་དུ་ནི། །ཤིན་ཏུ་མཉམ་གཞག་སྒྲུབ་པ་པོས། བྱེད་པ་ལྔ་ལ་བཅིངས་པ་གཉིས། །བླ་མའི་ཞལ་ལས་ཤེས་པར་བྱ། །ཞེས་མིག་གི་ལྟ་སྟངས་དེ་ཉིད་ཀྱིས། རྩ་དང་ཡན་ལག་གི་རླུང་གཉིས་ཀ་འཆིང་བར་ཁ་ཅིག་བཞེད་དོ། །འདིར་འཁྲིད་ཡིག་བྱེད་པ་ཁ་ཅིག་གིས་སོར་སྡུད་ཀྱིས་སྲོག་དྷཱུ་ཏཱིར་མི་ཚུད་ཅིང་། ཚུད་ན། ཡན་ལག་གསུམ་པ་དོན་མེད་དུ་འགྱུར་རོ། །ཞེས་ཟེར། ཁ་ཅིག་ཚུད་པར་བཞེད་ཀྱང་རྒྱུ་མཚན་ཡང་དག་བསྟན་རྒྱུ་མི་འདུག་གོ །འདིར་ཅུང་ཟད་བཤད་ན། སོར་སྡུད་ཀྱི་དུས་སུ་དབུ་མར་ཚུད་པ་དགོས་པའི་རྒྱུ་མཚན། གང་གིས་དྷཱུ་ཏཱིར་འཛུད་པའི་དམིགས་པ་གཉིས་ལས་དང་པོ་ནི། རྩ་རྒྱུད་དུ། དུ་བ་ལ་སོགས་བསྒོམ་བྱ་སྟེ། །སེམས་ནི་གཡོ་བ་མེད་བྱས་ལ། །དབུ་མ་སྦྱང་བ་བྱས་ནས་ནི། །མཆོག་ཏུ་མི་འགྱུར་བསྒོམ་པར་བྱ། །ཞེས་པ་སོར་སྡུད་དབུ་མ་སྦྱོང་བྱེད་དུ་བཤད་ལ། སྦྱོང་ཚུལ་ནི། ཆུ་འདྲེན་པ་ན་ཡུར་བའི་ནང་སེལ་བའི་དཔེས། སྦྱོང་མཁན་ནི་
རླུང་ཡིན་ལ། དེས་དབུ་མའི་ནང་དུ་མ་ཕྱིན་ན་དབུ་མ་ཇི་ལྟར་སྦྱོང་། ཡུར་བར་ཆུ་འདྲེན་པའི་ཕྱི་ནས་བསལ་ན་བཞད་གད་ཀྱི་གནས་ཡིན་ནོ། །དེས་ན་སོར་སྡུད་ཀྱིས་རླུང་དབུ་མར་མི་ཚུད་ན། དེས་དབུ་མ་ཇི་ལྟར་སྦྱོང་སོམས་ཤིགའགྲེལ་པར། འདིར་དང་པོར་སྲོག་དབུ་མར་གཞུག་པར་བྱ་སྟེ། གང་གིས་མཚན་མ་མཐོང་བར་གྱུར་པ་ཨ་ཝ་དྷཱུ་ཏཱི། ཞེས་གསུངས་ཤིང་། དུ་སོགས་ཀྱི་མཚན་མ་མཐོང་བ་སྲོག་དབུ་མར་ཞུགས་པ་ལ་བཤད་ཅིང་། སོར་སྡུད་ཀྱི་དུས་སུ་སྲོག་དབུ་མར་ཚུད་པ་མེད་ན། དང་པོར་སྲོག་དབུ་མར་འཛུད་པ་གཞག་ས་མེད་ཅིང་། གཞན་ཡང་། གཟུགས་ཀྱི་རྒྱུ་མཚན་ཉིད་པ་ནི་སོར་སྡུད་ཀྱི་སྐབས་སུ་རྟགས་བཅུ་འཆར་དགོས་པར་ནི་ཐམས་ཅད་འདོད་ལ། དེ་རྣམས་ཀྱང་རླུང་དབུ་མར་ཚུད་པ་ལས་ཡིན་ཏེ། འགྲེལ་ཆེན་དུ། འདིར་སྔགས་ཀྱི་ཐེག་པ་དང་ཕ་རོལ་ཏུ་ཕྱིན་པའི་ཐེག་པ་ལ་རྣལ་འབྱོར་རྣམ་པ་གཉིས་ཏེ། ནམ་མཁའ་དང་བླ་གབ་མེད་པ་ལ་རྣལ་འབྱོར་དུ་བྱེད་པའོ། །གང་ཞིག་ནམ་མཁའ་ལ་རྣལ་འབྱོར་གོམས་པར་བྱེད་པ་དེས་མཚན་མོ་བུག་པ་མེད་པའི་ཁྱིམ་དུ་མུན་པ་ལ་ནམ་མཁར་ཀུན་ནས་ཞེན་པའི་སེམས་དང་མིག་མི་འཛུམ་ཞིང་། རྡོ་རྗེའི་ལམ་དུ་རབ་ཏུ་ཞུགས་པ་ཞེས་འདིར་དབུ་མར་སྲོག་རབ་ཏུ་ཞུགས་པ་ལས་སྟོང་པ་ཁོ་ན་ལས་དུ་བ་ལ་སོགས་པའི་མཚན་མ་མཐོང་སྟེ། ནམ་མཁར་ཀུན་ནས་ཞེན་པའི་
སེམས་ནི་མིག་ནི་མི་འཛུམ་རྡོ་རྗེའི་ལམ་ལ་རབ་ཏུ་ཞུགས་པ་ཡི། །སྟོང་པ་ལས་ནི་དུ་བ་སྨིག་རྒྱུ་རབ་གསལ་དྲི་མ་མེད་པ་ནམ་མཁའ་ཉི་དང་མར་མེ་དང་། །ཞེས་པ་ནས་མཚན་མོའི་རྣལ་འབྱོར་གྱིས་མཐོང་ཞེས་གསུངས་ཤིང་། མདོར་བསྡུས་དང་པོར་ཡང་། དེ་བཞིན་སེམས་ཀྱི་འོད་གསལ་རྟོག་པ་ཡི། །སྒོམ་པའི་ཐབས་རྣམས་དག་གིས་མི་མཐོང་སྟེ། །དེ་ཉིད་དུ་ནི་རྐྱང་མ་དག་དང་ནི། །རོ་མ་གཅིག་ཏུ་སྦྱར་བས་མཐོང་བར་འགྱུར། །ཞེས་དང་། ཤ་བ་རིའི་གཞུང་ཆུང་དུའང་། རླུང་བཅུ་དྷཱུ་ཏཱིར་ཚུད་གྱུར་པ། །སོ་སོར་དཔྱོད་པའི་ཡན་ལག་གོ །ཞེས་གསུངས་སོ། །སྲོག་རྩོལ་དུ་ཐལ་ཟེར་བ་འདོད་པས་ཆོག་ཅིང་དེ་ལྟ་ནའང་ཡན་ལག་གསུམ་པ་དགོས་མེད་དུ་མི་འགྱུར་ཏེ། དེ་གཉིས་དངོས་ཀྱི་དམིགས་ཚུལ་མི་འདྲ་བར་འོག་ཏུ་སྟོན་ནོ། །འོ་ན་ཐབས་གང་གིས་དྷཱུ་ཏཱིར་འཛུད་སྙམ་ན། འགྲེལ་པར་རྒྱུད་གཞན་དག་གིས་རྟོགས་པར་བྱ་བར་གསུངས་པ་ལྟར་རི་གི་ཨ་ར་ལི་ལས། མིག་གཉིས་མ་ཕྱེ་མ་བཙུམ་པར། །སྨིན་མའི་བར་དུ་སེམས་བྱས་ན། །མུན་པ་མི་བཟད་པ་ཡི་ཚུལ། །དང་པོར་རྣལ་འབྱོར་པས་མཐོང་འགྱུར། །ཞེས་རྐང་པ་དང་པོས་ལྟ་སྟངས། །གཉིས་པས་དམིགས་པ་གང་ལ་གཏོད་ཚུལ། ཐ་མས་རྟགས་གང་འཆར་བསྟན་ཏོ། དེ་བཞིན་གཤེགས་པའི་རྡོ་རྗེས། སོར་བསམ་གཉིས་རིམ་པ་དང་པོ་ལ་སྦྱར་བ་ཞིག་དང་། ཡང་སོར་སྡུད་ལ་བཤད་པ་གཉིས་པ་ཞིག་མཛད་པའི་སྐབས་སུ་མིག་གཉིས་གྱེན་དུ་ལྡོག་ནས་ནི། །སྨིན་མའི་
དབུས་སུ་སེམས་གཏད་དེ། །ཞེས་དང་། རྩ་བའི་རྒྱུད་ལས་ཀྱང་། སོ་སོར་སྡུད་པས་སྨིན་མ་དག་གི་དབུས་སུ་དྷཱུ་ཏཱིའི་ནང་དུ་བཞག་པར་བྱའོ་ཞེས་དྲངས་ཤིང་། འདི་བའི་ལུགས་ཀྱིས་དྷཱུ་ཏཱིའི་ཡར་སྣ་སྨིན་དབུས་ན་ཡོད་པར་བཞེད་པས་དེར་སེམས་བཟུང་བར་གསུངས་ཏེ། འདི་ཉིད་ཀྱི་རྩ་རྒྱུད་ལས། སོ་སོར་སྡུད་པ་ཕྱག་རྒྱ་ཆེ། །ནམ་མཁའ་སྟོང་པའི་མཚན་ཉིད་དོ། །གང་ཞིག་ཁོ་ནར་ཡིད་དག་ནི། །གཏོད་པར་བྱེད་པ་ཕྱོགས་སྣ་ལ། །མཚན་མའི་མཐར་ནི་རེ་ཁཱ་གང་། །ཞེས་དང་། ལྟེ་བའི་གོང་དུ་གདོལ་མོར་བརྗོད། །ཨ་ཝ་དྷཱུ་ཏཱི་མི་ཡི་སྣ། །འོད་ཟེར་ལྔ་ཡི་རང་བཞིན་སྲོག །དཀྱིལ་འཁོར་ལྔ་ནི་འབབ་བྱེད་པ། ཞེས་བྱ་བས། འདིར་མིའི་སྣ་ནི་དྷཱུ་ཏཱི་ཙམ་ལ་བྱེད་པས། སོར་སྡུད་ཀྱི་སྐབས་སུ་ཡིད་སྣའི་ཕྱོགས་སུ་གཏོད་པར་བཤད་ལ། ལུང་ཕྱི་མས་དྷཱུ་ཏཱི་ལ་བཤད་པས་ཡིད་དྷཱུ་ཏཱིའི་ཕྱོགས་སུ་གཏོད་པ་གསལ་བོར་བཤད་དོ། །སྤྱིར་སོར་བསམ་གཉིས་འཁོར་སྒྱུར་གྱི་ལྟ་བ་དང་། སྲོག་འཛིན་བགེགས་མཐར་བྱེད་ཀྱི་ལྟ་བར་བཤད་ཀྱང་། དམིགས་ཀྱིས་བསལ་ན་འགྲེལ་པར། བགེགས་མཐར་བྱེད་ནི་བདུད་རྩི་འཁྱིལ་བའོ། །དེའི་ལྟ་བ་ནི་བདུད་རྩིའི་གནས་སུ་སོན་པ་སྟེ། དཔྲལ་བར་སོན་པའོ། །བགེགས་མཐར་བྱེད་ཀྱི་ལྟ་བ་བདུད་རྩིའི་གནས་སུ་སོན་པ་དེ་ཡིས་ཉེ་བར་སྒྲུབ་པ་ལ་ཡན་ལག་དྲུག་གོ །ཀྱང་ཡིག་གིས་སྲོག་རྩོལ་དང་འཛིན་པ་བྱ་སྟེ། སྲོག་གི་གཟུགས་བརྙན་མཐོང་བར་གྱུར་པ་ན་ཉེ་བའི་སྒྲུབ་པའོ། །ཞེས་བྱ་ལ་མདོར་
ན་བགེགས་མཐར་བྱེད་པའི་ལྟ་བ་ནི་བདུད་རྩིའི་གནས་དཔྲལ་བར་སོན་པའོ། །དེ་ཡིས་ཞེས་པ། གོང་གི་སོར་བསམ་གཉིས་བསྙེན་པའི་ཡན་ལག་ཏུ་བཤད་པས། བདུད་རྩིའི་གནས་དཔྲལ་བར་སོན་པས་བསྙེན་པའི་ཡན་ལག་ཐོབ་པ་དེ་ཡིས་ཉེ་བར་བསྒྲུབ་པ་ཡན་ལག་དྲུག་ཅེས་པ་ལ། འགྱུར་མང་ལས། ཡན་ལག་དྲུག་གི་ཉེར་སྒྲུབ་ལ་ཞེས་བསྒྱུར་བ་བདེ་བས། དེས་ན་བསྙེན་པའི་ཡན་ལག་ཐོབ་པ་དེ་ཡིས་ཀྱང་། ཉེར་སྒྲུབ་ཀྱི་ཡན་ལག་སྲོག་འཛིན་བསྒོམ་དགོས་ཤིང་། བསྒོམས་པས་སྲོག་གི་གཟུགས་བརྙན་མཐོང་བ་ན་དེ་གྲུབ་པའོ། །ཞེས་གསུངས། དེས་ན་བདུད་རྩིའི་གནས་སུ་སོན་པའི་ལྟ་བ་སྒོམ་པ་གཅིག་བཤད། སྲོག་འཛིན་གཉིས་ནི་མིན། བསམ་གཏན་སོར་སྡུད་བརྟན་བྱེད་ཡིན་པས། སོར་སྡུད་ཀྱི་སྐབས་སུ་སྒོམ་པ་འོས་མེད་ཀྱི་དམིགས་བསལ་ལོ། །འགྲེལ་པའི་ཀྱང་གི་ནུས་པའང་དེ་ལྟར་བྱ་དགོས་ཤིང་། མདོར་ན། དེ་ཡིས་ཤེས་པ་དང་། འཛིན་པ་བྱ་སྟེ་ཞེས་པ་དང་། མཐོང་བར་གྱུར་པ་ན་ཞེས་པའི་ནུས་པའང་། བདུད་རྩིའི་གནས་དཔྲལ་བའི་རྩ་འཁོར་ལ་བལྟས་ཤིང་གནད་དུ་བསྣུན་པས་སོར་བསམ་གཉིས་བསྙེན་པའི་ཡན་ལག་ཐོབ་པའི་གང་ཟག་དེས་སྲོག་འཛིན་ཉེར་སྒྲུབ་ཀྱི་ཡན་ལག་བསྒོམ་པར་བྱའོ། །ཞེས་བློ་གྲོས་ཀྱིས་དཔྱོད་ཤེས་ན་རྒྱུད་འགྲེལ་དེ་གཉིས་ཀྱིས་གསལ་བོར་བསྟན་སྣང་ངོ་། །སྔར་དྲངས་པའི་རྩ་རྒྱུད་ཀྱི་ལུང་ནི་འདིའི་ཡང་ཁུངས་ཡང་དག་གོ །དེས་ན་སོར་སྡུད་སྲོག་དྷཱུ་ཏཱིར་སྡུད་པའི་བརྒྱུད་པའི་
སྲོག་རྩོལ་ཡིན་ཡང་། ཡན་ལག་གསུམ་པའི་སྲོག་རྩོལ་ནི་དངོས་སུ་རླུང་ལ་དམིགས་ནས་སྲོག་འགོག་པས། དམིགས་པ་དངོས་མི་འདྲ་ཞིང་། སྲོག་རྩོལ་ནི་སྲོག་རྩོལ་གྱི་ཕྱོགས་གཅིག་གི་མིང་གིས་བཏགས་པས། འདིར་འགྱུར་བའི་སྐྱོན་ཡང་མེད་དོ། །དེས་ན་སྲོག་རྩོལ་ནི་རྒྱ་ཆུང་ཆུང་ཞིག་ལ་མི་བཟུང་ངོ་། །དེ་ལྟར་བྱས་ན་དཔྲལ་བར་མ་དག་པའི་གནས་སྐབས་བསྐྱེད་པའི་ཐིག་ལེ་ཡོད་ལ། སོར་སྡུད་ཀྱིས་དེ་སྦྱངས་ནས་དག་པའི་ལུས་བསྐྱེད་པས་སྐུ་རྡོ་རྗེའི་རྣལ་འབྱོར་ལའང་ཤིན་ཏུ་འགྲིག་གོ །དུས་ཞབས་པས་ཀྱང་། དཔྲལ་བའི་ཐིག་ལེར་སྲོག་བཅུག་ལ། །ས་རླུང་རྒྱུ་བའི་དུས་སུ་བསྒོམ། །ཞེས་དཔྲལ་བར་གནད་དུ་བསྣུན་པར་བཤད་དོ། །ལྔ་པ་ནི། དེ་ལྟར་ལུས་ལ་གནད་དུ་བསྣུན་ཏེ་བསྒོམས་པ་ལས། སྟོང་པ་ལས་ནི་དུ་བ་སྨིག་རྒྱུ་རབ་གསལ་ཞེས་སོགས་སྔར་དྲངས་པ་དང་། རྒྱུད་ཕྱི་མར། དང་པོ་སྨིག་རྒྱུ་ལྟ་བུ་དང་། །གཉིས་པ་དུ་བ་ལྟ་བུ་ཡིན། །གསུམ་པ་མཁའ་སྣང་མེ་ཁྱེར་བཞིན། །བཞི་པ་མར་མེ་ལྟ་བུ་དང་། །ལྔ་པ་སྤྲིན་མེད་ནམ་མཁའ་འོ། །ཞེས་དང་། གུར་དུའང་དེ་བཞིན་འབྱུང་ངོ་། །མཁའ་སྣང་ནི་མེ་ཁྱེར་བཞིན་དུ་གསལ་ལོ། །དེའང་དུ་སོགས་ཀྱི་ཉམས་སྣང་གང་བྱུང་གིས་མི་ཆོག་གི་དྷཱུ་ཏཱིར་ཚུད་པ་ལས་དེ་རྣམས་ཤར་བ་དགོས་ཏེ། སྔར་བཤད་ཟིན་ཏོ། །གཉིས་པ་ཉིན་མོའི་རྣལ་འབྱོར་ལ། གནས་ནི་བླ་གབ་མེད་པའི་ཕྱོགས་ཆུ་དང་གངས་ཀྱི་བསེར་མས་མིག་
ལ་མི་གནོད་པའི་སར། སྔ་དྲོ་ནུབ། ཕྱི་དྲོ་ཤར་དུ་བལྟས་ཏེ་རྒྱབ་ཉི་མར་བསྟན་ཏེ་བསྒོམ། གུང་གི་དུས་སུ་ཉི་ཟེར་གྱིས་མིག་ལ་གནོད་པས་སོ། །གཞན་ལུས་གནད་སོགས་སྔ་མ་བཞིན་ནོ། །བསྒོམས་པས་མྱོང་བ་སྐྱེ་བའི་ཚུལ་ནི། རྒྱུད་ལས། འབར་བ་དང་ནི་ཟླ་བ་ཉི་མ་རྡོ་རྗེ་རྣམས་དང་མཆོག་གི་ཆ་དང་ཐིག་ལེ་མཐོང་བར་འགྱུར། །དེ་ཡི་དབུས་སུ་སངས་རྒྱས་གཟུགས་ནི་ཡུལ་དང་རྣམ་པར་བྲལ་བ་དུ་མ་ལོངས་སྤྱོད་རྫོགས་པའི་སྐུ། །ནམ་མཁའ་ཆུ་འཛིན་བྲལ་བ་དག་ལ་རྣལ་འབྱོར་པ་ཡིས་བགྲད་པའི་མིག་གིས་བལྟ་བར་བྱ་བ་སྟེ། །རེ་ཁཱ་ནག་པོ་དྲི་མེད་འོད་ཟེར་འཕྲོ་བ་དུས་ཀྱི་རྩ་ལ་མཐོང་བར་འགྱུར་གྱི་བར་དུའོ། ཞེས་དང་དྲི་མེད་འོད་ལས། དེ་ནས་སྤྲིན་མེད་པའི་ནམ་མཁའ་ལ་བལྟ་སྟེ། ནམ་མཁའ་དེ་ལས་ཀྱང་། ཉིན་མོའི་རྣལ་འབྱོར་གྱིས། ནམ་མཁའ་ལས་བྱུང་རང་བྱུང་བ། །ཤེས་རབ་ཡེ་ཤེས་མེ་བོ་ཆེ། ཞེས་འབར་བ་མཐོང་སྟེ། སྤྲིན་མེད་པའི་ནམ་མཁའ་ལའོ། །དེ་བཞིན་དུ། འོད་ཆེན་རྣམ་པར་སྣང་བར་བྱེད། །ཡེ་ཤེས་སྣང་བ་ལམ་མེ་བ་ནི་ཟླ་བ་སྣང་བའོ། །འགྲོ་བའི་མར་མེ་ནི་ཉི་མའོ། །ཡེ་ཤེས་སྒྲོན་མེ་ནི་རྡོ་རྗེ་སྟེ་སྒྲ་གཅན་ནོ། །གཟི་བརྗིད་ཆེན་པོ་འོད་གསལ་བ་ནི་གློག་སྟེ་མཆོག་གི་ཆའོ། །སྔགས་མཆོག་མངའ་བདག་རིག་སྔགས་རྒྱལ་ནི་ཐིག་ལེའོ། །དེ་ལྟར་མཚན་མ་རྣམ་པ་བཅུ་སྟེ། འདུས་པ་ལ་སོགས་པར་མཚན་མོའི་རྣལ་འབྱོར་དང་། མཚན་ཡང་དག་པར་བརྗོད་པ་ལས་ཉིན་མོའི་རྣལ་འབྱོར་གྱིས་བཅོམ་ལྡན་འདས་ཀྱིས་གསུངས་སོ། །ཞེས་གསུངས་
ཏེ། དེ་ལ་འབར་བ་ནི་མེ་འབར་བ་ལྟ་བུ་དང་། ཐིག་ལེ་ནི་དབྱིབས་ཟླུམ་པོ། ཁ་དོག་སྔོན་པོ། དེའི་ནང་དུ་དབང་པོ་ལྔའི་ཡུལ་ལྔ་འདྲ་བ་དང་། ཆོས་ཀྱི་སྐྱེ་མཆེད་པའི་གཟུགས་ཁ་ཅིག་དང་། ལྷ་སྐུ་སོགས་དུ་མ་ལོངས་སྤྱོད་རྫོགས་པའི་སྐུ་དང་། དྷཱུ་ཏཱིའི་ནང་དུ་རེ་ཁུ་ནག་པོ་ལ་འོད་དང་ལྷ་སྐུ་སོགས་འཆར་བ་མཐོང་སྟེ། དེ་རྣམས་ཐིག་ལེར་བསྡུས་ཏེ་ཉིན་རྟགས་དྲུག་མཚན་རྟགས་བཞི་སྟེ་རྟགས་བཅུ་པོ། རླུང་བཅུ་དྷཱུ་ཏཱིར་ཚུད་པ་ལས། འཆར་བ་ཡིན་གྱི་གཡས་རླུང་ཚུད་པས་མཚན་རྟགས། གཡོན་རླུང་ཚུད་པས་ཉིན་རྟགས་འཆར་བར་འདོད་པ་མི་འཐད་དོ། །རོ་མ་ལ་རྒྱུ་བའི་རླུང་ཚུད་ན་རྐྱང་མ་ནས་རྒྱུ་བ་མ་ཚུད་པ་མི་སྲིད་དེ། གཡོན་ལ་རྒྱུ་བ་ན། གཡས་ཀྱི་དེ་ཉིད་འཕོས་ནས་རྒྱུ་བ་ཡིན་ཞིང་། དཀྱིལ་འཁོར་ལྔའི་རླུང་གཅིག་ཉིད་གཡས་གཡོན་ལ་འཕོས་ནས་རྒྱུ་བ་ཡིན་པའི་ཕྱིར་རོ། །གཡས་དང་གཡོན་གྱི་རླུང་གཉིས་སོ་སོར་བསྡུས་པས། རྟགས་གཉིས་སོ་སོར་འཆར་བར་འདོད་ན་དེ་གཉིས་རིམ་གྱིས་འཆར་ལ། དེ་ལྟ་ན་ཅིག་ཅར་འཆར་བའི་རྒྱུ་མཚན་བཤད་དཀའོ། །འོ་ན་རླུང་བཅུ་དྷཱུ་ཏཱིར་འདུས་པས། རྟགས་གཉིས་རིམ་ཅན་དུ་འཆར་བ་ཇི་ལྟར་ཡིན་ཞེ་ན། བཤད་པར་བྱ་སྟེ། མཚན་རྟགས་རྣམས་ནི་རླུང་དྷཱུ་ཏཱིར་ཚུད་ཙམ་ལ་འཆར་ལ། ཉིན་རྟགས་རྣམས་ནི་དྷཱུ་ཏཱིར་ཞུགས་གནས་ཐིམ་པ་ལས་འཆར་རོ། །ཤ་བ་རིས་ཀྱང་། དྷཱུ་ཏཱིར་རླུང་བཅུ་ཚུད་གྱུར་པས། །ཉིན་དང་མཚན་མོའི་རྟགས་བཅུ་མཐོང་། །སོ་སོར་སྡུད་པའི་
ཡན་ལག་གོ །ཞེས་གསུངས་ཤིང་། སྤྱིར་ནི་ཏིང་ངེ་འཛིན་ཐུན་མོང་བ་བསྐྱངས་པས་ཀྱང་། འོད་དང་ནམ་མཁའི་འོད་འདྲ་བ། རི་མོ་ནམ་མཁའི་དབྱིངས་འདྲ་མཐོང་བར་ལང་གཤེགས་ལས་གསུངས་སོ། །དེས་ན་རླུང་དྷཱུ་ཏཱིར་ཚུད་མ་ཚུད་གཉིས་ཀ་ལས་དུ་བ་སོགས་འདྲ་བ་འབྱུང་བས་ཁྱད་པར་ཕྱེད་པ་གལ་ཆེ་སྟེ། མུ་སྟེགས་དང་ཐུན་མོང་བའི་ཏིང་ངེ་འཛིན་འགའ་ཞིག་ལ་རྣལ་འབྱོར་བླ་ན་མེད་པའི་རྫོགས་རིམ་དུ་འཛིན་པ་མང་དུ་མཐོང་བས། ལམ་རྣམ་དག་ལ་བག་ཆགས་འཇོག་པའི་བགེགས་ཆེན་པོར་སྣང་ངོ་། །ཁྱད་པར་རྣམས་མ་ཕྱེད་ན། དུ་སོགས་ཀྱི་རྟགས་གང་ཤར་སོར་སྡུད་ཀྱི་རྟགས་སུ་སྐྱེས་པར་རློམ་ཞིང་། རྟགས་དེ་དག་སྐྱེས་པ་ན། རྒྱུད་འགྲེལ་ནས་བཤད་པའི་ཡོན་ཏན་དེ་དག་རང་ལ་མི་འདུག་པར་རིག་ནས། རྒྱུད་སྡེ་ནས་དེ་ལྟར་བཤད་ཀྱང་མི་བདེན་ནོ་སྙམ་ནས་སྡིག་གསོག་པ་ཐམས་ཅད་རླུང་དྷཱུ་ཏཱིར་ཚུད་པའི་རྟགས་དང་། ཏིང་ངེ་འཛིན་ཐུན་མོང་བའི་རྟགས་རྣམས་མ་ཕྱེད་པའི་སྐྱོན་ཡིན་ནོ། །དེ་ལྟར་མ་ཕྱེད་ན། མཚན་ཉིད་ཐེག་པ་ལ་སྟོང་གཟུགས་ཁྱད་པར་ཅན་གྱི་སྒྲུབ་བྱེད་ཡོད་པར་འདོད་དགོས་པས་ཧ་ཅང་ཐལ་ལོ། །དེས་ན་རླུང་དྷཱུ་ཏཱིར་ཚུད་མ་ཚུད་ཀྱི་རྟགས་རྣམས་ཀྱི་ཁྱད་པར་རྣམས་སྒྲོན་གསལ་དུ། བརྟན་གྱུར་རྡོ་རྗེའི་ལམ་ནས་ནི། །ཞེས་པའི་འགྲེལ་པར། རྡོ་རྗེའི་ལམ་ནས་ཞེས་པ། འདའ་བར་མི་བྱ་བའི་མཚན་མ་ལྔའི་རིམ་གྱིས། ཞེས་པའི་སྐབས་སུ་བཤད་པ་བཞིན་གོ་དགོས་ལ་ཞལ་ལུང་གི་འགྲེལ་པ་
མཛེས་པའི་རྒྱན་དུ། དབང་པོའི་རླུང་ཅུང་ཟད་ལྡོག་པར་རྩོམ་པ་དང་། ལོག་པ་དང་། དྷཱུ་ཏཱིར་ཚུད་པ་དང་། ཐིམ་པ་ལས་རྟགས་རྣམས་འཆར་བར་གསུངས་པ་ནི་ལེགས་པས་ཚུལ་དེ་ལྟར་ཤེས་པར་བྱའོ། །གསུམ་པ་སྤོགས་ཆོག་ནི། དུས་ཞབས་པས། སོ་སོར་སྡུད་པའི་སྤོགས་པ་ནི། བྱེད་བཅིངས་དྲག་ཏུ་བརྩམ་པར་བྱ། །ཞེས་བྱེད་བཅིངས་དམ་དུ་གཏོང་བར་བཞེད་པ་དང་། ཁ་ཅིག་ཟངས་ཆུས་བཀང་བའི་ནང་དུ་མིག་སྤྲིད་སྤྲིད་དུ་བལྟ། དེ་ནས་ནམ་མཁར་བལྟས་པས་སྟོང་གཟུགས་འཆར་ཞེས་སོགས་ཁམས་པ་རྒ་ལོའི་མན་ངག་ཡིན་གསུངས་སོ། །དང་པོའི་དོན་དཔྱད་དགོས་ཏེ། དམ་དུ་གཏོང་བའི་དོན་གང་ཡིན། ལུས་གནད་སོགས་མ་བྱུང་བ་འཆོས་པ་ཡིན་ན་ནི། དེ་ནི་རྩ་བའི་སྒོམ་ལུགས་མ་ཤེས་པ་ཡིན་ལ་སྤོགས་ཆོག་ནི་སྒོམ་ལུགས་ཤེས་ནས་བསྒོམས་པས་ཀྱང་མ་གྲུབ་ན་བྱེད་པ་ཡིན་ཏེ། སྒོམ་ཚུལ་སློབ་པ་ཙམ་སྤོགས་ཆོག་ཏུ་ཇི་ལྟར་འཐད། སྒོམ་ཚུལ་ཤེས་ནས་བསྒོམས་པས་མ་གྲུབ་པ་ལ་སྒོམ་ཚུལ་དེ་ཉིད་དམ་དུ་གཏོང་བ་སྤོགས་ཆོག་ཡིན་ན་ནི། དེས་མ་གྲུབ་པ་ལ་ཇི་ལྟར་བྱ་བྱས་པ་ལ་དེ་མ་གྲུབ་ན་དེ་ཉིད་བྱའོ། །ཞེས་པར་སོང་བས། དེ་འདྲའི་སྤོགས་ཆོག་དགོས་པ་མེད་དོ། །གཉིས་པའི་དོན་ཀྱང་གནད་མ་རྙེད་པ་ཡིན་ཏེ། རླུང་དྷཱུ་ཏཱིར་སྡུད་པའི་ཐབས་མེད་པར་སྟོང་གཟུགས་འབའ་ཞིག་འཆར་བའི་ཐབས་ལ་འབད་ཀྱང་། རླུང་དྷཱུ་ཏཱིར་མ་ཚུད་པའི་སྟོང་
གཟུགས་ཇི་ཙམ་ཤར་ཡང་། སྟོང་གཟུགས་ཀྱི་ཕྱག་ཆེན་སྒྲུབ་པའི་ཡན་ལག་ཏུ་མི་རུང་བས་སོར་སྡུད་ཀྱི་ཡན་ལག་ཏུ་མི་རུང་ངོ་། །དེས་ན་འདིར་རླུང་དྷཱུ་ཏཱིར་ཚུད་པ་ལས་བྱུང་བའི་སྟོང་གཟུགས་འཆར་དགོས་ལ། དེ་ལ་སྔོན་དུ་རླུང་དྷཱུ་ཏཱིར་ཚུད་པ་དགོས་ལ། དེ་ཡོད་ན་སྟོང་གཟུགས་རང་ཤུགས་ཀྱིས་འབྱུང་བས། སྤོགས་ཆོག་གཞན་མི་དགོས་སོ། །དྷཱུ་ཏཱིར་འཛུད་ཐབས་མེད་པར་སྤོགས་ཆོག་གི་གཞི་སྟོང་གཟུགས་ལ་བྱས་ན། རྩ་བ་བོར་ནས་ཡལ་ག་འཚོལ་བ་བཞིན་ནོ། །དེས་ན་རྒྱུད་ལས། སོ་སོར་སྡུད་པ་ལ་སོགས་རྣམས་ཀྱིས་གལ་ཏེ་སྔགས་པ་རྣམས་ཀྱི་འདོད་པ་གྲུབ་པར་མ་གྱུར་ན། །ཞེས་པའི་འགྲེལ་པར་སོ་སོར་སྡུད་པ་ལ་སོགས་པས་གཡས་པ་དང་གཡོན་པའི་རླུང་མ་ཆིངས་པ་ཉིད་ཀྱིས། ཞེས་གསུངས་པའི་སོར་སྡུད་ཀྱི་རླུང་དྷཱི་ཏཱིར་མ་ཆིངས་ན། དེའི་ཚེ་བཙན་ཐབས་བྱ་བར་བཤད་པ་ལྟར་བྱའོ། །གལ་ཏེ་སྒོམ་འཕྲོ་ལ་ཤི་ནའང་ཚེ་རབས་གཞན་དུ་སྔགས་སྤྱོད་པའི་རྟེན་ཁྱད་པར་ཅན་ཐོབ་སྟེ་ལམ་བསྒོམས་པའི་བག་ཆགས་ཀྱིས་ལམ་མྱུར་དུ་རྒྱུད་ལ་སྐྱེས་ནས་མཆོག་འཐོབ་པར་འགྱུར་རོ། །བཞི་པ་ནི། དབང་པོའི་མངོན་སུམ་ཚད་མ་དང་འདྲ་བས་ན་དབང་པོའི་མངོན་སུམ་མོ། །དེའང་སྟོང་པ་ཉིད་ཀྱི་གཟུགས་སྒྲ་སོགས་ཀྱི་ཡུལ་ཅན་ཡིན་པས་དབང་པོའི་མངོན་སུམ་དང་འདྲ་ལ། མངོན་སུམ་ནི་རྟོག་པ་དང་བྲལ་བ་ལ་སྟོང་གཟུགས་སོགས་གསལ་བར་སྣང་བ་ཡིན་ཏེ། རྣམ་འགྲེལ་ལས། རྣམ་རྟོག་རྗེས་སུ་འབྲང་བ་ལ། །དོན་གསལ་
སྣང་བ་ཅན་མ་ཡིན། །ཞེས་གསུངས་པས་སོ། །མ་འཁྲུལ་བའི་དོན་ནི། གནས་སྐབས་དང་མཐར་ཐུག་གི་འབྲས་བུ་འགྲུབ་པ་ལ་མི་སླུ་བ་ཡིན་ནོ། །ལྔ་པ་ནི། དབྱེ་བ་རྣམ་པ་བཅུའོ། །དྲུག་པ་ནི། གནས་སྐབས་ཀྱི་འབྲས་བུ་སྔགས་ཀྱི་ཚིག་འཛིན་པ་སོགས་དང་། མཐར་ཐུག་ཡེ་ཤེས་ཀྱི་ཕུང་པོ་སོགས་དྲུག་དྲི་བྲལ་དུ་གྱུར་པ་འཐོབ་སྟེ། རྟགས་འདི་རྣམས་ཡན་ལག་དྲུག་གི་སྐབས་ཐམས་ཅད་ལ་ཁྱབ་པས་དྲུག་པ་རྡོར་སེམས་ཀྱི་རིགས་ཡིན་ནོ། །རྒྱུད་ལས། སོ་སོར་སྡུད་པའི་རྣལ་འབྱོར་པ་ནི་ཡུལ་དང་རྣམ་པ་བྲལ་བ་སྔགས་རྣམས་ཀུན་གྱིས་བྱིན་གྱིས་རློབ། །ཅེས་པའི་འགྲེལ་པར། ད་ནི་སོ་སོར་སྡུད་པ་ལ་སོགས་པའི་འབྲས་བུ་གསུངས་པ། སོ་སོར་ཞེས་པ་ལ་སོགས་པ་སྟེ། འདིར་གང་གི་ཚེ་སོ་སོར་སྡུད་པས་གཟུགས་བརྟན་པར་གྱུར་པའི་རྣལ་འབྱོར་པ་རྣམ་པར་དག་པར་གྱུར་པ་དེའི་ཚེ་སྔགས་རྣམས་ཀུན་གྱིས་བྱིན་གྱིས་བརླབ་པར་འགྱུར་ཏེ། ཚིག་གིས་མཆོག་སྦྱིན་པ་ལ་སོགས་པ་སྦྱིན་པར་འགྱུར་རོ། ཞེས་དང་། འདིར་དང་པོའི་ལས་ལ་སོ་སོར་སྡུད་པ་ནི་རྒྱལ་བའི་དབང་པོ་ཞེས་པ་ཡེ་ཤེས་ཀྱི་ཕུང་པོའོ་ཞེས་གསུངས་ཤིང་། འདུས་པར། སོ་སོར་སྡུད་ལ་སྙོམས་ཞུགས་པས། །སྔགས་རྣམས་ཀུན་གྱིས་བྱིན་གྱིས་བརླབ། །ཅེས་གསུངས་སོ། །མདོར་ན་རླུང་དྷཱུ་ཏཱིར་མ་ཚུད་ན། མཆོག་མི་འགྱུར་གྱི་བདེ་ཆེན་འདྲེན་པའི་སྟོང་གཟུགས་ཀྱི་ཕྱག་ཆེན་མི་འགྲུབ་ལ། སོར་
སྡུད་སྒོམ་པ་ནི། སྟོང་གཟུགས་དེ་འདྲ་བའི་སྒྲུབ་བྱེད་ཡིན་ཞིང་། དེས་ན་སོར་སྡུད་ཀྱི་ཐོག་མར་རླུང་དྷཱུ་ཏཱིར་ཚུད་པའི་སྒོམ་པ་ཞིག་དང་། བར་དུ་དེ་ལྟར་བསྒོམས་པས་རླུང་དྷཱུ་ཏཱིར་ཆིངས་ཏེ། དབང་པོ་ལྔ་དང་ཡུལ་ལྔའི་འབྲེལ་བ་ཆད་པ་དང་། མཐར་དེའི་སྒོ་ནས་སྟོང་གཟུགས་མཐོང་སྟེ། རེ་ཁཱ་ནག་པོ་སྐྲའི་ཚད་ཙམ་ལ་ཨ་ཝ་དྷཱུ་ཏཱིའི་ནང་དུ་མཐོང་བ་ན་སོར་སྡུད་ཀྱི་ཡན་ལག་མཚན་ཉིད་ཚང་བ་ཡིན་པས། མཚམས་དེ་ནས་བརྟན་བྱེད་བསམ་གཏན་གྱི་ཡན་ལག་སྒོམ་པ་ཡིན་ནོ། །དེས་ན་འདི་ལ་ཡན་ལག་ལྔ་སྟེ། དང་པོར་བསྒོམས་པའི་དུས་མཚམས། གང་སྒོམ་པའི་ཡན་ལག །དག་དབྱེ་ཚད་མ། འབྲས་བུའོ། །དང་པོ་ནི། སོར་སྡུད་ཀྱི་རྟགས་བཅུ་རྫོགས་པ་ནའོ། །གཉིས་པ་ལ། དགོས་པ་གང་གི་ཕྱིར་སྒོམ་པ། ཡན་ལག་གི་དབྱེ་བ། བསམ་གཏན་གྲུབ་པའི་ཚད་བསྟན་པའོ། །དང་པོ་ནི། སོར་སྡུད་ནི་གཟུགས་མ་གྲུབ་པ་འགྲུབ་པའི་ཕྱིར་སྒོམ་པ་ཡིན་ལ། བསམ་གཏན་ནི་དེ་གྲུབ་ཟིན་བརྟན་པའི་ཕྱིར་སྒོམ་པ་ཡིན་ནོ། །འོ་ན་དམིགས་པ་གཞན་ཞིག་བསྒོམས་ནས་བརྟན་པར་བྱེད་པ་ཡིན་ནམ། ཇི་ལྟར་ཡིན་ཞེ་ན། དམིགས་པ་དེ་ཉིད་གོམས་པས་རྒྱུན་བརྟན་པར་བྱེད་པ་ཡིན་ནོ། །གཉིས་པ་ནི། འདུས་པ་ལས། བསམ་གཏན་རྣམ་པ་ལྔ་རུ་འགྱུར། །རྟོག་པ་དང་ནི་དཔྱོད་པ་དང་། །དགའ་བ་དང་ནི་བདེ་བ་དང་། །སེམས་ཀྱིས་རྩེ་གཅིག་ཉིད་དང་ལྔ། །ཞེས་པས་རྟོག་པ་ནི། སྟོང་གཟུགས་རགས་པ་མཐོང་བའོ། །དཔྱོད་པ་ནི་སྟོང་གཟུགས་
ཕྲ་བ་མཐོང་བའོ། །དགའ་བདེ་ནི་ཕན་ཡོན་ཡིན་ཏེ། རིམ་པ་བཞིན་ལུས་དང་སེམས་ཤིན་སྦྱངས་འདྲེན་པའི་སེམས་ཀྱི་དགའ་བ་དང་། ལུས་ཀྱི་བདེ་བའོ། །ཤེས་རབ་ནི་འདུས་པར་སེམས་རྩེ་གཅིག་པ་ནི། ཤེས་དང་ཤེས་བྱ་ཅུང་ཟད་པའི། །རང་སེམས་ལྔ་པར་ཤེས་པར་བྱ། །ཞེས་གསུངས་པ་ལྟར་ཡུལ་ཡུལ་ཅན་གྱི་འབྲེལ་བ་ཆད་པའོ། །ཁ་ཅིག་ཡན་ལག་སོ་སོ་ལ་སྒོམ་ཚུལ་རེ་རེ་བྱེད་པར་སྣང་སྟེ། ཡན་ལག་འདི་དག་བསམ་གཏན་བསྒོམས་པས་རྟོགས་པ་སྐྱེས་པའི་རིམ་པ་ཡིན་གྱི་སྒོམ་ཚུལ་སོ་སོ་བ་མི་དགོས་སོ། །གསུམ་པ་ནི། སོར་སྡུད་ཀྱི་སྐབས་སུ་ལུས་ལ་གནད་དུ་བསྣུན་པའི་དམིགས་པ་དེ་ཉིད་བསྒོམས་པས་ཡེ་ཤེས་ཀྱི་ཡན་ལག་ཡུལ་ཡུལ་ཅན་གྱི་འབྲེལ་བ་ཆད། རྟོག་དཔྱོད་ཀྱི་ཡན་ལག་སྟོང་གཟུགས་ཕྲ་རགས་མཐོང་ནས་སྟོང་གཟུགས་དེ་ཉིད་བསྒོམས་པས་ཏིང་ངེ་འཛིན་ཐུན་འཁྱོངས་པའི་མཐར། ཕན་ཡོན་གྱི་ཡན་ལག་ལུས་སེམས་ཤིན་སྦྱངས་སྐྱེས་པ་ན་བསམ་གཏན་གྱི་ཡན་ལག་གྲུབ་པ་ཡིན་ཏེ། རྒྱུད་ལས། བསམ་གཏན་དག་ཀྱང་ཤེས་རབ་རྟོག་དང་དཔྱོད་པ་གཡོ་དང་དགའ་དང་གཡོ་མེད་བདེ་བ་རྩེ་གཅིག་སེམས་པའོ། ཞེས་དང་། དེའི་འགྲེལ་པར། དེ་བཞིན་དུ་གཟུགས་དེ་ཉིད་ལ་ཤེས་རབ་ཅེས་པ་ནི་ལྟ་བའོ། །རྟོག་པ་ཞེས་པ་ནི་དངོས་པོར་འཛིན་པའོ། །དཔྱོད་པ་ཞེས་པ་ནི་ངེས་པའི་དོན་ནོ། །དགའ་བ་ཞེས་པ་ནི་གཟུགས་ལ་ཆགས་པའོ། །གཡོ་མེད་བདེ་བ་ཞེས་པ་ནི་གཟུགས་དང་ལྷན་ཅིག་སེམས་གཅིག་ཏུ་བྱེད་པའོ། །དེ་ལྟར་གཟུང་བ་
དང་འཛིན་པའི་དབྱེ་བས་བསམ་གཏན་རྣམ་པ་བཅུ་པའོ། །ཞེས་གསུངས་སོ། །ཡེ་ཤེས་སྤྱན་གྲུབ་ལས། སྣང་བའི་སྟེང་དུ་འོད་གསལ་བཟུང་། །ཕྲ་བའི་འོད་ལ་བརྟེན་ནས་ནི། །རགས་པའི་འོད་ཆེན་ངོ་སྤྲད་པས། །རྟོག་མེད་འོད་ལས་སྲིད་འདས་སྣང་། །སྲོག་རྩོལ་སྒོ་རུ་འོད་གསལ་བཟུང་། །འགྱུ་བ་རླུང་གི་དེ་ཉིད་ཤེས། །རླུང་ལྔའི་ཁ་དོག་མཐོང་བར་འགྱུར། །དྷཱུ་ཏཱིའི་ནང་དུ་འོད་གསལ་བཟུང་། །རྟོག་མེད་སེམས་ཀྱི་དེ་ཉིད་ཤེས། །རྡོ་རྗེ་ལུས་ཀྱི་གནས་ལུགས་མཐོང་། །གསང་སྔགས་ཆོས་ལ་མཁས་པར་འགྱུར། །ཞེས་པ་དང་། མངོན་ཤེས་སྒྲུབ་པ་རྣམས་འདིའི་སྤོགས་ཆོག་ཏུ་བྱེད་པར་སྣང་སྟེ། མངོན་ཤེས་ནི། བསམ་གཏན་གྲུབ་ཟིན་ནས་བྱེད་རྒྱུ་ཡིན་པས། འདི་མ་གྲུབ་པ་འགྲུབ་པའི་སྤོགས་ཆོག་ཏུ་ཇི་ལྟར་འཐད། གཞན་དེ་རྣམས་ཀྱང་སྟོང་གཟུགས་ཁོ་ནའི་སྤོགས་ཆོག་ཏུ་སྣང་བས། འདིའི་སྤོགས་ཆོག་འོག་ཏུ་འཆད་དོ། །དག་དབྱེ་ནི། རྣམ་ཤེས་ཀྱི་ཕུང་པོ་རྣམ་པར་དག་པ་རྒྱལ་བ་མི་བསྐྱོད་པ་ཡིན་ལ། དབྱེ་བ་ནི། ཡན་ལག་ལྔ་ལ་ཡུལ་ཡུལ་ཅན་གྱིས་ཕྱེ་ན་བཅུར་འགྱུར་ཏེ། འགྲེལ་པར། བསམ་གཏན་མི་བསྐྱོད་པ་ཉིད་དོ། །ཞེས་པ་རྣམ་པར་ཤེས་པའི་ཕུང་པོ་སྟེ། རྣམ་པ་བཅུ་ནི། ཡུལ་ཡུལ་ཅན་བཅུ་པོ་རྣམས་གཅིག་ཉིད་དུ་སྣ་ཚོགས་གཟུགས་ལ་བསམ་གཏན་པའོ། ཞེས་པའོ། །འབྲས་བུ་ནི། གནས་སྐབས་སུ་མངོན་ཤེས་ལྔ་འཐོབ་ཅིང་སངས་རྒྱས་ལ་ཆོས་ཉན། མཐར་ཐུག་ནམ་མཁའི་ཁམས་དང་། རྣམ་ཤེས་ཀྱི་ཕུང་པོ་སོགས་དྲུག་ཚན་གཅིག་སྒྲིབ་བྲལ་
དུ་དག་པ་རྒྱལ་བ་མི་བསྐྱོད་པ་སོགས་དྲུག་ཚན་གཅིག་འགྲུབ་པར་བྱེད་དོ། །སོར་བསམ་གཉིས་སྐུ་རྡོ་རྗེ་སྒྲུབ་བྱེད་བསྙེན་པའི་ཡན་ལག་ཐོག་མར་དགེ་བའི་འཁྲིད་ཡིན་ནོ་ཞེས་གསུངས་སོ། །གཉིས་པ་སྲོག་སྒྲུབ་བྱེད་ཀྱི་ཡན་ལག་ལ། སྤྱིར་བླ་མེད་ཀྱི་རྒྱུད་རྣམས་ལས། རླུང་དྷཱུ་ཏཱིར་ཞུགས་པ་དང་། གནས་པ་དང་། ཐིམ་པ་གསུམ་བཤད་ལ། རྒྱུད་འདིར་ནི་ཐིམ་པ་ནི་བཅིངས་པ་དང་། བསྲེས་པ་དང་། བསད་པ་ཞེས་བཤད་པ་རྣམས་ཡིན་ལ། ཞུགས་གནས་གཉིས་ཡན་ལག་རེ་རེར་བཤད་པས། འདི་ལ་གཉིས། སྲོག་རོ་རྐྱང་ལ་རྒྱུ་བ་བཀག་ནས་དྷཱུ་ཏཱིར་འཇུག་པར་བྱེད་པའི་ཡན་ལག་སྲོག་རྩོལ། ཞུགས་གནས་བརྟན་པར་བྱེད་པའི་ཡན་ལག་འཛིན་པའོ། །དང་པོ་ལ་དྲུག་ལས། མཚན་དོན་ནི། རྩོལ་བའི་སྐད་དོད་ལ་ཨ་ཡ་མ་ཞེས་པ་འགོག་པ་དང་། མཆུར་རིང་བ་ལ་འཇུག་པ་ལས་འདིར་ནི་འགོག་པའི་དོན་དུ་བཤད་དེ། དེ་ལ་སྲོག་ནི་རླུང་ཡིན་ལ། དེ་རོ་རྐྱང་ལ་རྒྱུ་བ་བཀག་ནས་དྷཱུ་ཏཱིར་འཛུད་པ་ནི་རྩོལ་བའི་དོན་ཏེ། སྒྲུབ་ལེར་སྲོག་གི་རྩོལ་བ་དག་ཀྱང་ལམ་ནི་གཉིས་པོ་དག་ནི་བསྒྱེལ་ཞིང་དབུ་མར་སྲོག་ནི་ཞུགས་པ་དག་ཏུ་འགྱུར། །ཞེས་པའི་འགྲེལ་པར། ལམ་ནི་གཉིས་པོ་ཞེས་པ་གཡོན་དང་གཡས་པའི་ལམ་བསྒྱེལ་བ་སྟེ་འགོག་ཅིང་དབུ་མའི་ལམ་དུ་རབ་ཏུ་ཞུགས་པའོ། །དེའང་དཀྱིལ་འཁོར་བཅུ་འགག་པ་ལས་རྣམ་པ་བཅུའོ། །ཞེས་གསུངས་སོ། །འདུས་པར་སྲོག་ནི་ཚེ་དང་། རྩོལ་བ་ནི་རིང་དུ་མཆེད་
པར་བྱེད་པའི་དོན་ཡིན་གྱི་སྲོག་རྩོལ་ཞེས་འདི་དང་མི་མཐུན་པར་བཤད་ཀྱང་། རླུང་རོ་རྐྱང་ལ་རྒྱུ་བ་བཀག་ནས་དབུ་མར་འཇུག་པའི་རླུང་སྦྱོར་ལ་སྲོག་རྩོལ་གྱི་ཡན་ལག་ཏུ་བྱེད་པ་ལ། བླ་མེད་ཀྱི་རྒྱུད་ཀུན་འདྲ་བ་ཡིན་ནོ། །རྒྱུད་སྡེ་འོག་མ་དང་སྲོག་རྩོལ་ཅེས་མིང་ཙམ་མཐུན་ཡང་དོན་མི་མཐུན་ནོ། །གཉིས་པ་དུས་མཚམས་ནི། དང་པོར་སོར་བསམ་གཉིས་སྒོམ་པའི་དུས་སུ། དངོས་སུ་རླུང་ལ་མ་དམིགས་ཀྱང་། ལུས་ཀྱི་གནད་ཆེ་སར་བསྣུན་པས་རླུང་དབུ་མར་ཚུད་དེ་དབུ་མ་སྦྱངས་པའི་མཚམས་ནས་ཡིན་ཏེ། དེ་ནས་རླུང་ལ་དངོས་སུ་དམིགས་པའི་སྲོག་རྩོལ་བསྒོམས་ན་གནད་དུ་འགྲོ་ཚབས་ཆེ་བའི་དགོས་པ་ཡོད་པའི་ཕྱིར་རོ། །དེ་ལ་དགོངས་ནས་རྒྱུད་འདིར་གོ་རིམ་དེ་ལྟར་བཤད་པ་ཡིན་ཏེ། ཡེ་ལེར་དུ་བ་ལ་སོགས་སྒྲུབ་པ་བྱས་ནས་འཆི་བའི་འཇིགས་པ་བྱེད་པའི་དབུ་མ་དག་ནི་བསྒྲུབ་པར་བྱ། ཞེས་དང་། མཆོག་མི་འགྱུར་དུ། དུ་བ་ལ་སོགས་པའི་མཚན་མ་བསྒོམས་པས། ལས་དང་པོ་བ་དབུ་མ་ཡོངས་སུ་སྦྱངས་པ་ཞེས་གསུངས། གསུམ་པ་ཡན་ལག་དངོས་ལ། དབྱེ་བ། སྒོམ་ཚུལ། མ་གྲུབ་ན་སྤོགས་པའི་ཆོ་ག་གསུམ་ལས། དང་པོ་ནི། བླ་མ་སྔ་མ་རྣམས། རྡོར་བཟླས། རྔུབ་པ། དགང་བ། གཞིལ་བ། རེ་ཙ་ཀ །བུམ་པ་ཅན་ཏེ་དྲུག་ཏུ་བཞེད་ཀྱང་། གནས་སྐབས་འདིར་བུམ་པ་ཅན་དང་། ཡེ་ལེར། སྡོམ་ཆེན་གྱི་སྐབས་སུ་རྡོར་བཟླས་གསུངས་ཤིང་། དེ་གཉིས་ཀྱིས་དགོས་པ་འགྲུབ་པས། རྒྱུད་གཞན་ནས་ཁ་འགེང་མི་དགོས་ཤིང་།
དེས་ན་དབྱེ་བ། རྒྱུད་འགྲེལ་ལས་བྱུང་ཚོད་བུམ་པ་ཅན་དང་། རྡོར་བཟླས་གཉིས་སུ་བྱའོ། །གཉིས་པ་ནི། དངོས་སུ་རོ་རྐྱང་ལ་རྒྱུ་བ་མ་བཀག་པར་བསྒོམ་པ་རྡོ་རྗེ་བཟླས་པ་སྒོམ་ཚུལ་དང་། དངོས་སུ་རྒྱུ་བ་བཀག་ནས་བསྒོམ་པ་བུམ་པ་ཅན་སྒོམ་པ་གཉིས་ལས། དང་པོ་ལ་དྲུག་ལས། སྒོམ་པའི་གནས་དང་། ལུས་གནད་སོགས་ནི་སོར་སྡུད་དང་འདྲ་ལ། ཁྱད་པར་ནི། རྐང་པ་གཡོན་པའི་རྟིང་བས་དྲི་ཆེན་གྱི་ལམ་བཀག་པའམ། རྡོ་རྗེའི་རྩ་བ་མནན་པའོ། །ལྟ་སྟངས་ནི་སོར་སྡུད་ལྟར་བདུད་རྩི་འཁྱིལ་བའི་ལྟ་བ་སྟེ། དེ་ལ་དྲང་ངེས་གཉིས་ལས། ངེས་དོན་གྱི་བགེགས་མཐར་བྱེད་རླུང་ཡིན་ལ། དེ་ལ་ལྟ་བ་ནི། ཡིད་ཀྱིས་དམིགས་པ་ཡིན་ཏེ། རྡོར་བཟླས་ཀྱིས་རླུང་འཇུག་གནས་ལྡང་གསུམ་ལ་དམིགས་ལ། བུམ་པ་ཅན་གྱིས་རླུང་གཉིས་ཁ་སྦྱར་དུ་བྱས་པ་ལ་དངོས་སུ་དམིགས་པའོ། །དྲང་དོན་གྱི་བགེགས་མཐར་བྱེད་ཀྱི་ལྟ་བ་ནི། མིག་གིས་བལྟ་བའོ། །གསུམ་པ་བྱེད་བཅིངས་ནི། བྱེད་པ་ནི་དབང་པོ་དེའང་ལྟ་སྟངས་གཙོ་བོ། བཅིངས་པ་ནི་རླུང་ཡིན་ཏེ། ཕྱག་རྡོར་བསྟོད་འགྲེལ་དུ། སྲོག་རྩོལ་ཞེས་བྱ་བ་ནི་ལ་ལཱ་ན་དང་། ར་ས་ན་གཡོན་པ་དང་། གཡས་པའི་ལམ་འགོག་པ་ལས་སྲོག་གི་རླུང་རྟག་ཏུ་དབུ་མ་ཨ་ཝ་དྷཱུ་ཏཱིའི་ནང་དུ་རབ་ཏུ་འཇུག་པ་སྟེ། ཨ་ཝ་དྷཱུ་ཏཱིར་དགང་བ་དང་། བུམ་པ་ཅན་དང་། དབྱུང་བའི་སྦྱོར་བས་ༀ་ཡིག་གིས་འཇུག་པ་དང་། ཧཱུཾ་ཡིག་གིས་
འགོག་པ་དང་། ཨཱཿ ཡིག་གིས་འབྱུང་བ་ཟླ་བ་དང་སྒྲ་གཅན་དང་ཉི་མའི་རང་བཞིན་གྱི་རྣལ་འབྱོར་པས་བྱེད་པས་སྲོག་རྩོལ་གྱི་ཡན་ལག་གོ །ཞེས་གསུངས་པའི་དོན་བཤད་ན། དེ་ལ་སྲོག་རྩོལ་ཞེས་པའི་རྩོལ་བའི་དོན། ལ་ལཱ་ན་ཞེས་པ་ནས་འགོག་པ་ལས་ཞེས་པའི་བར་གྱིས་རོ་རྐྱང་ལ་རྒྱུ་བ་འགོག་པར་བཤད་ལ། སྲོག་གི་དོན་ནི། རླུང་ཞེས་རླུང་ལ་བཤད་ཅིང་། ལས་ཞེས་པ་དང་། ཨ་ཝ་ཞེས་པ་ནས་འབབ་པ་སྟེ་ཞེས་པའི་བར་གྱིས་རོ་རྐྱང་ལ་རྒྱུ་བ་འགོག་པ་ལས་ཨ་ཝ་དྷཱུ་ཏཱིར་འབབ་པར་བཤད་དོ། །ཨ་ཝ་དྷཱུ་ཏཱིར་དགང་ཞེས་པ་མན་ཆད་ཀྱིས་ནི་རོ་རྐྱང་ལ་རྒྱུ་བ་འགོག་པའི་ཐབས་སྟོན་ཏེ། ཟླ་བ་སྟེ་སྐུ་རྡོ་རྗེ་ༀ་ཡིག་གི་རང་བཞིན་གྱིས་དགང་བ་སྟེ་ནང་དུ་འཇུག་པ་དང་། སྒྲ་གཅན་ཏེ་ཐུགས་རྡོ་རྗེ་ཧཱུཾ་གི་རང་བཞིན་གྱིས་བུམ་པ་ཅན་ཏེ་ནང་དུ་གནས་པ་དང་། ཉི་མ་སྟེ་གསུང་རྡོ་རྗེ་ཨཱཿ འི་རང་བཞིན་གྱིས་ཕྱིར་དབྱུང་བའི་སྦྱོར་བ་བྱའོ། །གནས་གང་ནས་བྱེད་ཅེ་ན། ཨ་ཝ་དྷཱུ་ཏཱིར་དགང་བ་དང་ཞེས་གསུངས་པས། དབུ་མ་ཉིད་ནས་འཇུག་གནས་དབྱུང་བའི་སྦྱོར་བ་བྱའོ། །རྣལ་འབྱོར་པས་བྱེད་པ་ཞེས་པ་ནི། ད་ལྟ་དྷཱུ་ཏཱི་ནས་འབྱུང་འཇུག་མི་བྱེད་པ་སྟེ། དབུ་མ་ནས་འཇུག་གནས་ལྡང་གསུམ་གྱི་སྦྱོར་བ་བྱེད་པ། རྣལ་འབྱོར་པས་བྱེད་པ་སྟེ་མོས་པས་བྱེད་པའོ། །སྲོག་ཅེས་པ་མན་ནི། སྦྱོར་བ་དེ་ནི་སྲོག་འགོག་པའི་ཡན་ལག་ཐབས་སོ་ཞེས་བསྟན་ཏོ། །མདོར་ན་གཞུང་དེས་རླུང་གི་གདངས་གསུམ་དང་ཡི་གེ་གསུམ་དབྱེར་མེད་དུ་སྦྱར་
ཏེ་ཨ་ཝ་དྷཱུ་ཏཱི་ནས་འཇུག་གནས་ལྡང་གསུམ་བྱེད་པར་རྣལ་འབྱོར་པས་མོས་པ་བྱེད་པ་ནི། སྲོག་གི་རླུང་རོ་རྐྱང་ལ་རྒྱུ་བ་བཀག་ནས། དབུ་མར་འབབ་ཅིང་འཇུག་པར་བྱེད་པའི་ཡན་ལག་གོ །ཞེས་གསལ་བར་བསྟན་ཏོ། །དེས་ན་ཁ་ཅིག་གཡས་ནས་རྒྱུ་བ་རོ་མ་དང་། གཡོན་ནས་རྒྱུ་བ་རྐྱང་མ་ནས་རྡོར་བཟླས་བྱེད་པར་འདོད་པ་ནི་རྡོར་བཟླས་ཀྱི་མི་མཐུན་ཕྱོགས་འབའ་ཞིག་ཡིན་ཏེ། རྡོར་བཟླས་ཀྱི་དུས་སུ་ཡིད་ཀྱིས་དབུ་མ་ནས་འབྱུང་འཇུག་བྱེད་པར་མ་མོས་ན། དངོས་པོ་ལ་རོ་རྐྱང་གི་རླུང་དབུ་མར་འཛུད་པའི་ཐབས་ཅུང་ཟད་ཀྱང་མེད་དོ། །དེས་ན་རྡོར་བཟླས་ཀྱིས་དངོས་སུ་རོ་རྐྱང་གི་འབྱུང་འཇུག་མ་བཀག་ཀྱང་། རླུང་དབུ་མར་ཚུད་པའི་གནད་ཆེ་ཤོས་ནི། ཡིད་ཀྱིས་དབུ་མ་ནས་འཇུག་གནས་ལྡང་གསུམ་བྱེད་པར་མོས་པ་ཉིད་ཡིན་པས་དེ་བོར་ནས་རྡོར་བཟླས་གཞན་ཅི་ཙམ་བྱས་ཀྱང་དགོས་པ་འགྲུབ་པ་ལ་མི་ཕན་ནོ། །ཟླ་ཉི་སྒྲ་གཅན་ཞེས་སོགས་ཀྱི་དོན་ཡང་སྔར་བཤད་པ་ལྟར་ཡིན་ལ། གོང་དེ་མ་ཐག་ཏུ་འཇུག་གནས་ལྡང་གསུམ་བྱ་བར་བཤད་པས་ཤེས་སོ། །འགྲེལ་པར། གཡོན་པ་དང་གཡས་དང་དབུ་མའི་སྲོག་ཡང་དག་པར་རྒྱུ་བས་རྡོ་རྗེ་བཟླས་པའི་རིམ་པ་དང་། མ་ནིང་གི་བཟླས་པའི་རིམ་པའོ། །ཞེས་པ་ནི། བཅོམ་ལྡན་འདས་ཀྱི་ངེས་པའོ་ཞེས་པ་དང་། འདིར་ངེས་པའི་དོན་ནི། དུས་ཐམས་ཅད་དུ་བརྟན་པར་གྱུར་པ་དང་། བུམ་པ་ཅན་གྱི་གནས་སྐབས་སུ་གྱུར་པ་ཇི་སྲིད་
བར་དུས་ཐམས་ཅད་དུ་རྣལ་འབྱོར་པས་འཇུག་པ་དང་འབྱུང་བ་ཉིད་ཀྱི་སྲོག་དབུ་མར་བསྒོམ་པར་བྱའོ། །ཞེས་གསུངས་སོ། །འོ་ན་རླུང་སྔགས་སྦྱོར་ཚུལ་འདུས་པ་དང་མི་མཐུན་པ་འདི་ཇི་ལྟར་ཡིན་ཞེ་ན། ཅུང་ཟད་མི་མཐུན་ཡང་སྲོག་རྩོལ་གྱི་གནད་མི་འཕྱུག་པས་སྐྱོན་མེད་དོ། །རླུང་སྔགས་སྦྱོར་ཚུལ་ཡང་རླུང་གི་རང་གདངས་ཡི་གེ་གསུམ་དུ་སྒྲོག་གིན་ཡོད་པ་ཉན་པའི་རྣམ་པ་ལྟ་བུར་བྱའི། ཡི་གེ་གསུམ་གྱི་གཟུགས་དང་སྒྲའི་རྣམ་པ་ལྟ་བུར་བྱས་ན་ཕྱིན་ཅི་ལོག་ཏུ་བཟུང་བས། གནད་བླ་མའི་ཞལ་ལས་ཤེས་དགོས་སོ། །ལྔ་པ་བསྒོམས་པས་མྱོང་བ་སྐྱེ་ཚུལ་ནི། བླ་མ་སྔ་མ་རྣམས་བདེ་དྲོད་དང་རྩ་རླུང་གི་ཁ་དོག་མཐོང་བ་སོགས་འབྱུང་ངོ་ཞེས་གསུངས་ཏེ། དེ་ལ་ཉམས་སྣང་ལ་རྩའི་འཁོར་ལོ་དང་། དེ་ནས་རྒྱུ་བའི་རླུང་གི་ཁ་དོག་མཐོང་བ་དང་། འཇིག་རྟེན་གྱི་ཁམས་དུ་མ་མཐོང་བ་སོགས་འབྱུང་སྟེ། དེ་དག་ནི་རྨི་ལམ་དུ་མཐོང་བ་དང་འདྲ་བས་ཁ་ཅིག་བདེན་སྲིད་ཀྱང་ཡིད་བརྟན་མི་རུང་ངོ་། །རྡོ་རྗེ་འཕྲེང་བར་ལུས་དབེན་རྫོགས་ནས་རྡོར་བཟླས་ཟླ་བ་དྲུག་བྱེད་པར་བཤད་པའི་ཟླ་བ་བཞི་པ་ལ་རྩ་འཁོར་གྱི་ཁ་དོག་མཐོང་བར་བཤད་པ་ནི་རང་བཞིན་པ་མཐོང་བ་ཡིན་ཡང་རྡོར་བཟླས་ཀྱི་མྱོང་བ་སྐྱེ་ཚུལ་ཕལ་བ་ཡིན་ལ། གཙོ་བོ་ནི་རླུང་དྷཱུ་ཏིར་ཞུགས་པའི་རྟགས་འཁྲུལ་མེད་རྣམས་འཆར་དགོས་སོ། །སྙན་རྒྱུད་ལས། སྔོན་འགྲོ་གེགས་སེལ་རྡོ་རྗེ་བཟླས་པས་རྩ་ལམ་སྦྱོང་ཞེས་བཤད་པ་ལ་བོད་ཀྱི་མཁས་པས་སྔོན་འགྲོ་ཙམ་དུ་
བྱེད་པ་མི་འཐད་ཅེས་གསུངས་པ་བདེན་ཏེ། དེ་དག་གི་དགོངས་པས་སྲོག་རྩོལ་གྱི་དངོས་གཞི་བུམ་པ་ཅན་དང་། རྡོར་བཟླས་སྔོན་འགྲོ་གེགས་སེལ་དུ་བཞེད་ལ། དེ་ནི་བརྟགས་ན་མི་འཐད་དེ། རྡོ་རྗེ་བཟླས་པས་རྩ་སྦྱོང་བར་ནི་དེ་དག་ཀྱང་བཞེད་ལ། དབུ་མ་སྦྱོང་ན་དབུ་མའི་ནང་དུ་རླུང་ཞུགས་དགོས་ཤིང་། དེ་རྡོར་བཟླས་ཀྱིས་བསྒྲུབ་ན། རོ་རྐྱང་ལ་རྒྱུ་བ་བཀག་ནས་རླུང་དྷཱུ་ཏཱིར་འཛུད་པ་སྲོག་རྩོལ་གྱི་དངོས་གཞིར་ཇི་ལྟར་མི་འཐད། ཡང་སྙན་རྒྱུད་ལས། འཇམ་རླུང་དགང་སྟོང་གི་སྦྱོར་བས་སྲོག་དབུ་མའི་ཐིག་ལེར་གཞུག་ཅེས་གསུངས་པ། རླུང་འཇམ་པོས་གང་ལ་རྒྱུ་བའི་སྣ་བུག་ནས་རླུང་ནང་དུ་དྲངས་ཏེ་ལྟོ་བ་ཁེངས་པ་དང་། རླུང་མི་རྒྱུ་བ་ཕྱོགས་ཀྱི་སྣ་བུག་ནས་བཏང་བས་མཉམ་རྒྱུར་སྒྲུབ་ཅིང་། དེས་སྲོག་དབུ་མར་འཛུད་པར་འདོད་པར་སྣང་སྟེ། རླུང་སྦྱོར་འདི་ལའང་དབུ་མའི་ནང་གི་གནད་ལ་བརྟེན་པ་མི་སྣང་བས་དེ་ཇི་ཙམ་བསྒོམས་ཀྱང་དྷཱུ་ཏཱིར་ཚུད་པ་དཀའ་ལ་དབུ་མར་ཚུད་པའི་རྟགས་མཉམ་རྒྱུར་ཐིངས་པ་གཅིག་པུས་མི་ཆོག་གི །ནང་གི་རྟགས་འཁྲུལ་མེད་རྣམས་འཆར་དགོས་སོ། །རྒྱུད་འདིའི་སྐོར་ནས་ཚུལ་འདི་གསལ་བར་མ་བྱུང་ཡང་། རྒྱུད་གཞན་ནས་འབྱུང་གསུངས་ཀྱང་རྒྱུད་བསྒྱུར་ཚད་གང་དུའང་འདུག་པ་མ་མཐོང་གསུངས་སོ། །འོན་ཀྱང་རླུང་སྦྱོར་འདི་
ལ་ཁམས་བདེ་བ་སོགས་ཀྱི་དགོས་པ་ཡོད་པས་འདི་དང་འོག་གི་རླུང་སྦྱོར་བཞིའི་བྱེད་ལུགས་ཟུར་དུ་བྱའོ། །ཡང་ཁ་ཅིག་རྔུབ་པ་དང་དགང་བ་དང་གཞིལ་བའི་རླུང་སྦྱོར་མན་ངག་འགའ་ཞིག་ལས། མན་སྙེ་དང་། འགྲེལ་པར་དགང་བ་དང་། དབྱུང་བ་དང་། བུམ་པ་ཅན་གྱི་སྦྱོར་བས་རྟག་པར་བསྙེན་པར་བྱའོ། །ཞེས་པའི་དགོངས་པར་མཛད་སྣང་སྟེ། རྒྱུད་འགྲེལ་གྱི་དགོངས་པ་ནི་ཕྱག་རྡོར་བསྟོད་འགྲེལ་ལྟར། རྡོར་བཟླས་བསྟན་པ་ཡིན་ལ། མན་སྙེའི་དགང་དབྱུང་བུམ་པ་ཅན་གསུམ་ཡང་འཇུག་གནས་ལྡང་གསུམ་ལ་བཤད་ཅིང་། ཞི་བ་ནི། བཞུགས་ནས་གཡོ་མེད་དུ་གནས་པའོ། །ཞེས་བཤད་པས། དེའི་དགོངས་པའང་མ་ཡིན་ནོ། །སྡོམ་འབྱུང་ལས། འཆི་བླུའི་སྐབས་སུ། ལུས་ཀྱི་ནང་ཐམས་ཅད་རླུང་གིས་འགེང་བ་སོགས་བཤད་ཀྱང་། དབུ་མར་འཛུད་པའི་སྲོག་རྩོལ་སྒོམ་པའི་སྐབས་སུ། དྷཱུ་ཏཱིའི་རྩ་གནད་ལ་བརྟེན་པའི་སྲོག་རྩོལ་མེད་པར། ལྟོ་བ་དགང་བའི་རླུང་སྦྱོར་བསྒོམས་པས་ནི་རླུང་དབུ་མར་ཚུད་པ་ལ་ཅིའང་མི་ཕན་ནོ། །རྒྱུད་འདིར་སྲོག་རྩོལ་གྱི་ཡན་ལག་སོགས་བཤད་པས། གཞན་ནས་ཁ་འགེང་དགོས་པའང་མ་ཡིན་ནོ། །སློབ་དཔོན་གྱི་ཁ་ནས་འོངས་པ་མ་ཡིན་ནོ། །ཞེས་གསུངས་པས་བླ་མའི་མན་ངག་གཞན་གྱིས་ཀྱང་ཁ་འགེང་མི་དགོས་ཤིང་། རྒྱུད་འགྲེལ་ལས་བཤད་པའི་སྲོག་རྩོལ་གཉིས་
པོ་ཉིད་ལ་ནན་ཏན་ཆེར་བྱའོ། །གཉིས་པ་གནས་ལ་སོགས་པ་དྲུག་ལས་གཞན་རྣམས་ནི། རྡོར་བཟླས་དང་འདྲ་ལ། བྱེད་བཅིངས་ནི་སྤྱིར་རླུང་འབྱུང་འཇུག་མི་བྱེད་པར་ནང་དུ་གནས་པ་ལའང་བུམ་པ་ཅན་དུ་བཤད་པ་ཡོད་ལ། དེ་རྒྱུད་སྡེ་འོག་མ་ལའང་ཡོད་ཅིང་། དེར་མ་ཟད་གྲངས་ཅན་ལའང་ཡོད་པར་བཤད་པས། པཎྜི་ཏ་སའི་སྙིང་པོས་མུ་སྟེགས་དང་མ་རྒྱུད་ཀྱི་རླུང་སྦྱོར་ཁྱད་པར་འབྱེད་དཀའ་གསུངས་པ་ལ་བླ་མ་སྔ་མ་རྣམས་ལྟ་བ་བྱང་ཆུབ་ཀྱི་སེམས་ཀྱིས་ཟིན་མ་ཟིན་གྱིས་འབྱེད་གསུངས་པ་རླུང་སྦྱོར་གྱི་ངོ་བོའི་སྒོ་ནས་མ་ཕྱེད་པའི་གཏམ་དུ་སྣང་སྟེ། གྲངས་ཅན་སོགས་ལ་རླུང་ཁ་སྦྱར་ནས་རླུང་བུམ་པ་ཅན་བྱེད་པ་ཙམ་ཡོད་ཀྱང་ཁྱད་པར་ཆེ་སྟེ། རྩ་འཁོར་གྱི་དྷཱུ་ཏཱིའི་དབུས་སུ་ཁ་སྦྱར་བྱས་ནས་བཟུང་ནས་ལྷན་སྐྱེས་འདྲེན་པ་མེད་པའི་ཕྱིར་རོ། །དེས་ན་རླུང་ནང་དུ་གནས་པ་ཙམ་གྱིས་བུམ་པ་ཅན་མུ་སྟེགས་དང་རྒྱུད་སྡེ་འོག་མ་ལའང་ཡོད་པས། དེ་ལས་ཁྱད་པར་དུ་གྱུར་པའི་བུམ་པ་ཅན་དགོས་པས་དེ་བཤད་པར་བྱའོ། །འདི་ལ་ལྔ། འོག་གི་རླུང་འཐེན་པའི་གོ་རིམ། སྟེང་འོག་གི་རླུང་གང་ནས་འཐེན་པ། ཐེན་ནས་གང་དུ་ཁ་སྦྱར་བྱ་བ། བྱས་ནས་ཁ་སྦྱར་དེ་ཉིད་ལ་སེམས་གཏོད་པ། གཏད་ནས་སྒོམ་པའི་ཡུན་ཚད་བསྟན་པའོ། །དང་པོ་ནི། གཞི་དུས་སུ་སྲོག་འཛིན་སྟེང་གི་སྣ་སྒོ་ནས་ཕྱིར་འབྱུང་བ་ན། ཐུར་སེལ་འོག་སྒོ་ནས་ཕྱིར་
འབྱུང་ལ། སྲོག་འཛིན་ནང་དུ་ཞུགས་པ་ན། ཐུར་སེལ་ནང་དུ་ཞུགས་ནས་ལྟེ་བའི་བར་དུ་འོང་བས། རྟོག་པ་བྱང་ན་དུས་གཅིག་ཏུ་ཁ་སྦྱར་བྱེད་ནུས་སྲིད་ཀྱང་། ད་ལྟ་ཕལ་ཆེ་བས་མི་ནུས་པས་རིམ་ཅན་དུ་འཐེན་དགོས་པས། དེའི་ཚུལ་བཤད་པར་བྱ་སྟེ། བྱང་སེམས་འཛག་པ་དང་། དེ་སྲུང་བའི་མན་ངག་མེད་ན། སྲོག་འཛིན་ངེས་པར་སྔོན་དུ་འཐེན་དགོས་ཏེ། ཐུར་སེལ་སྔོན་དུ་འཐེན་ན་འཛག་པའི་ཉེན་ཆེའོ། །དེ་འདྲའི་མན་ངག་ཡོད་ན་སྔོན་དུ་འཐེན་ཡང་སྐྱོན་མེད་དོ། །གཉིས་པ་ལ། སྔ་མ་ཕལ་ཆེར་གྱིས། སྟེང་འོག་གི་རླུང་སྤྱིར་ཁོག་པ་ཙམ་ནས་འཐེན་པ་མ་གཏོགས་གནད་དུ་འགྲོ་བའི་འཐེན་ལུགས་མི་སྣང་ལ། འཐེན་ལུགས་དེས་ཇི་ཙམ་འཐེན་ཡང་གནད་དུ་འགྲོ་དཀའ་བས། གནད་དུ་འགྲོ་ངེས་ཤེས་པའི་འཐེན་ལུགས་ཤིག་དགོས་ཏེ། འདི་ལྟར་སྟེང་རླུང་དྷཱུ་ཏཱིའི་ནང་ནས་འོག་ཏུ་འཐེན་པའི་ཚེ། འོག་རླུང་ཡང་དྷཱུ་ཏཱིའི་ནང་ནས་སྟེང་དུ་འཐེན་པ་དགོས་ཏེ་རྒྱུ་མཚན་འོག་ཏུ་འཆད་དོ། །གསུམ་པ་ནི། འོ་ན་འཐེན་ནས་གནས་གང་དུ་ཁ་སྦྱར་བྱེད་ཅེ་ན། འདི་ལའང་སྔ་མ་དག །སྟེང་འོག་གི་རླུང་ལྟེ་བའི་བར་དུ་འཐེན་ནས་ཁ་སྦྱོར་བྱེད་ཟེར་བ་ཙམ་མ་གཏོགས། གནད་རྙེད་པའི་ཁ་སྦྱར་བྱེད་ལུགས་མི་སྣང་ངོ་། །འོ་ན་ཇི་ལྟར་བྱེད་ཅེ་ན། དབུ་མར་ཚུད་པའི་སྲོག་རྩོལ་བུམ་པ་ཅན་གནད་དུ་འགྲོ་བ་ཞིག་བྱེད་ན། འདི་ལྟར་བྱ་སྟེ། སྟེང་རླུང་དང་འོག་རླུང་དྷཱུ་ཏཱིའི་ལམ་ནས་ལྟེ་བའི་བར་དུ་འཐེན་ཏེ། དྷཱུ་ཏཱི་ལ་རོ་རྐྱང་གི་མདུད་པས་བཅིངས་པའི་
རྩ་འཁོར་གྱི་དབུས་དྷཱུ་ཏཱིའི་ནང་དུ་རླུང་ཁ་སྦྱོར་དུ་བྱའོ། །བཞི་པ་ནི། དེར་ཁ་སྦྱོར་བྱས་ནས་དབུ་མའི་ནང་གི་ཁ་སྦྱར་གྱི་རླུང་དེ་ཉིད་ལ་སེམས་གཏོད་པ་ཡིན་ཏེ། འདུས་པར་ཉེ་བར་སྒྲུབ་པའི་དུས་སུ་ནི། །བདུད་རྩི་འཁྱིལ་པའི་གཟུགས་བརྙན་ནོ། །ཞེས་པ་དང་། རྒྱུད་དུ། བགེགས་མཐར་བྱེད་པའི་བདུད་རྩིའི་ལམ་དུ་སོང་བ་ཡིས་ཀྱང་ཉེ་བའི་སྒྲུབ་པ་ཡན་ལག་དྲུག །ཅེས་དང་། བགེགས་མཐར་བྱེད་ནི་ངེས་དོན་གྱི་རླུང་ལ་བཤད་ལ། སྟོད་འགྲེལ་དུའང་དེ། དེ་ནས་བདུད་རྩི་འཁྱིལ་པའི་གཟུགས་བརྙན་གྱི་མིང་ཅན་དགོངས་པའི་སྐབས་གཞན་གྱི་རླུང་ལ་གསུངས་སོ། །དེའང་རྣམ་པ་ལྔ་སྟེ། དེ་བཞིན་དུ་འདུས་པར། རིན་ཆེན་ལྔ་ཡི་རང་བཞིན་དབུགས། །འབྱུང་བ་ལྔ་ཡི་ངོ་བོ་ཉིད། །གོང་བུའི་གཟུགས་ཀྱིས་ཕྱུང་ནས་ནི། །སྣ་ཡི་རྩེ་མོར་རབ་ཏུ་བརྟག །ཅེས་སོགས་གསུངས་པ་ལྟར། གོང་བུའི་གཟུགས་ཀྱིས་ཞེས་པ་ལ། འགྱུར་ཁ་ཅིག་ལས། འདྲིལ་བའི་གཟུགས་ཀྱིས་ཞེས་འབྱུང་བས། ཡེ་ཤེས་ལྔའི་རང་བཞིན་དཀྱིལ་འཁོར་ལྔའི་རླུང་དེ་རོ་རྐྱང་གཉིས་ལ་སོ་སོར་རྒྱུ་བ་ཨ་ཝ་དྷཱུ་ཏཱིར་འདྲིལ་བའི་གཟུགས་ཀྱིས་ཕྱུང་བ་སྟེ། དབུ་མའི་ལམ་ནས་སྣ་དྲངས་ནས་སྣའི་རྩེ་མོ་ཞེས་པ་ལྟེ་བའི་རྩ་འཁོར་གྱི་དབུས་སུ་རབ་ཏུ་བརྟགས་ཏེ་བསྒོམ་མོ། །རྐང་པ་གསུམ་པས་རླུང་དབུ་མའི་ནང་ནས་འདྲེན་པར་བསྟན། རྐང་པ་བཞི་པས་ལྟེ་བའི་རྩ་འཁོར་གྱི་དབུས་སུ་བསྒོམ་པར་བསྟན་ཏོ། །མདོར་
ན་རབ་ཏུ་བརྟགས་པས་ཏེ་བསྒོམ་བྱའི་དངོས་པོ་དཀྱིལ་འཁོར་ལྔའི་རླུང་རོ་རྐྱང་ལ་རྒྱུ་བ་དབུ་མའི་ལམ་ནས་དྲངས་ནས། གང་དུ་སྒོམ་པའི་གནས་སྣའི་རྩེ་མོར་ཏེ་ལྟེ་བའི་རྩ་འཁོར་གྱི་དབུས་སུ་བསྒོམ་ཞེས་གཞུང་དེས་གསལ་བར་བསྟན་ཏོ། །ལྔ་པ་ནི། སེམས་གཏད་ནས་ཡང་ཡང་བསྒོམས་པས་མགོ་བོ་ན་བ་ལུས་ལ་འོད་ཀོར་མཐོང་བ། སྙིང་ག་རྡེབ་པ་སོགས་བྱུང་ན། དེ་ཕན་ཆད་དུ་བསྒོམས་ན་སྲོག་འཆད་པ་སོགས་ཉེས་དམིགས་ཡོད་པས་དེ་ཕན་ཆད་དུ་མི་སྒོམ་མོ། །དེའང་བུམ་པ་ཅན་བསྒོམས་པས་མཚམས་ཤིག་ནས་རྩ་འཁོར་གྱི་དབུས་དྷཱུ་ཏཱིའི་ནང་དུ་གནས་པ་མིན་ཡང་། ལྟེ་བའི་རྩ་འཁོར་ཙམ་དུ་རང་ཤུགས་ཀྱིས་གནས་པ་ཞིག་འོང་བས་མཚམས་དེ་ནས་འཛིན་པ་ལ་ནན་ཏན་ཆེར་བྱའི། དེ་མ་བྱུང་བར་དུ་ཨ་ན་ཚུགས་བྱས་ན་གེགས་བསྐྱེད་པས། ལུས་ལ་མི་བདེ་བ་མ་བྱུང་གི་བར་དུ་བསྒོམ་པར་བྱའོ། །དྲུག་པ་དེ་ལྟར་བསྒོམས་པས་མྱོང་བ་སྐྱེ་ཚུལ་ནི། བོད་ཀྱི་མཁས་པས་འཛིན་པའི་སྐབས་ཀྱི་མྱོང་བ་སྐྱེ་ཚུལ་རྣམས་འདིར་དྲངས་ནས་བཤད་ཀྱང་། འཛིན་པའི་སྐབས་ཉིད་དུ་བབ་བོ། །འདིའི་སྐབས་སུ་གཏུམ་མོ་འབར་བ་དང་རྩ་དང་རླུང་གི་ཁ་དོག་མཐོང་བ་ལ་སོགས་པ་ནི་ཕལ་བ་ཡིན་ལ། གཙོ་བོ་ནི་སྲོག་དབུ་མར་ཚུད་པའི་རྟགས་འཁྲུལ་མེད་རྣམས་ཡིན་པས་དེ་དག་འཆར་དགོས་སོ། །རེ་ཙ་ཀའི་རླུང་སྦྱོར་ཡང་ཟུར་དུ་འཆད་ལ། ཡང་སྙན་རྒྱུད་ལས། རྩུབ་རླུང་བུམ་པ་ཅན་གྱིས་སྲོག་དབུ་
མར་བཅིངས་ཞེས་པའི་སྔ་མས་དབུ་མར་བཙུད་པ་འདིས་དབུ་མར་གནས་པར་བྱེད་པར་འདོད་པར་སྣང་སྟེ། སྲོག་རྩོལ་གྱིས་དབུ་མར་ཚུད་པ་དང་། དེར་གནས་པ་འཛིན་པའི་བྱེད་ལས་ཡིན་གྱི། སྲོག་རྩོལ་གྱིས་དབུ་མར་གནས་པ་བསྒྲུབ་ན་འཛིན་པའི་ཡན་ལག་དགོས་མེད་དུ་འགྱུར་ཞིང་། དེས་ན་སྲོག་དབུ་མར་ཞུགས་པའི་རྟགས་འཁྲུལ་མེད་རྣམས་ནི་སྲོག་རྩོལ་གྱི་བྱེད་ལས་ཡིན་ནོ། །ཡང་སྙན་རྒྱུད་དུ། མ་ཆུད་ཅིང་མ་ཆིངས་ན་བཙན་ཐབས་ཀྱི་སྦྱོར་བས་གཡས་གཡོན་ཉི་ཟླའི་རླུང་དགག་ཅེས་དང་། འོག་སྒོ་འགགས་ན་སྲོག་གི་སྦྱོར་བས་འགྲོལ་ཞེས་གསུངས་པའི་དོན། འཇམ་རླུང་གིས་མ་ཚུད་པ་རྩུབ་རླུང་གིས་མ་ཆིངས་ན། ཀྱཻ་རྡོ་རྗེ་ལས། ལོངས་སྤྱོད་ཀྱི་ནི་བརླབས་གཉིས་པ། །རང་གི་གཡས་དང་ལག་གཞན་གྱི། །མཐེ་བོང་དང་ནི་སྲིན་ལག་གིས། །དེ་ནི་རྣལ་འབྱོར་པ་ཡིས་བཙིར། །ཞེས་ལོངས་སྤྱོད་འཁོར་ལོའི་ཁུ་རྡུལ་རླུང་གསུམ་གྱི་རྩ་གསུམ་གསུམ་གཡས་གཡོན་དུ་ཡོད་པའི་རླུང་གཉིས་རྒྱུ་བའི་རྩ་བགགས་ན། བདེ་བ་དང་མི་རྟོག་པ་སྐྱེ། རླུང་དྷཱུ་ཏཱིར་ཚུད་པར་འདོད་དོ། །དེ་འདྲའི་བཙན་ཐབས་རྒྱུད་འདིར་བཤད་པ་མེད་པས། འོག་ཏུ་འཆད་པ་ལྟར། རྒྱུད་འགྲེལ་ནས་བཤད་པའི་བཙན་ཐབས་ཉིད་བྱའོ། །རྡོར་བཟླས་ཀྱིས་རླུང་དབུ་མར་མི་ཚུད་ན་ནི་དེ་དབུ་མ་སྦྱོང་བྱེད་དང་འགལ་ཞིང་། ཚུད་ན་ནི་རླུང་སྦྱོར་དེ་གཉིས་རྡོར་བཟླས་ཀྱི་རྗེས་སུ་བྱེད་པའི་
རིམ་པ་ངེས་པས་འདིར་བཙན་ཐབས་བྱེད་དོན་མེད་དོ། །སྲོག་གི་སྦྱོར་བས་དགྲོལ་ཞེས་གསུངས་པའང་། དྲི་ཆེན་དྲི་ཆུའི་ལམ་གཉིས་འགགས་ན་ལྟེ་བའི་བར་དུ་ཐུར་སེལ་ལ་རྡོར་བཟླས་བྱེད་པའི་དོན་ནོ། །བཞི་པ་མ་གྲུབ་ན་སྤོགས་ཆོག་བཙན་ཐབས་ཀྱི་སྦྱོར་བ་ནི། སོ་སོར་སྡུད་པ་ལ་སོགས་རྣམས་ཀྱིས་གལ་ཏེ་སྔགས་པ་རྣམས་ཀྱི་འདོད་པ་གྲུབ་པར་མ་གྱུར་ན། །ནཱ་ད་གོམས་པས་བཙན་ཐབས་ཆུ་སྐྱེས་སུ་གནས་རྡོ་རྗེ་ནོར་བུར་ཐིག་ལེ་བཀག་ནས་བསྒྲུབ་པར་བྱ། །ཞེས་དང་། དེའི་འགྲེལ་པར། ད་ནི་བཙན་ཐབས་ཀྱི་སྦྱོར་བ་གསུངས་ཏེ། འདིར་གང་གི་ཚེ་སོ་སོར་སྡུད་པ་ལ་སོགས་པས་གཟུགས་མཐོང་བར་གྱུར་པ་ལ་སྲོག་མ་ཆིངས་པ་ཉིད་ཀྱིས་འགྱུར་བ་མེད་པའི་སྐད་ཅིག་མ་མ་སྐྱེས་ན་དེའི་ཚེ། ནཱ་ད་གོམས་པ་འཆད་པར་འགྱུར་བས་བཙན་ཐབས་སུ་དབུ་མར་འབབ་པར་བྱས་ནས་ཤེས་རབ་ཀྱི་ཆུ་སྐྱེས་སུ་གནས་པའི་རྡོ་རྗེ་ནོར་བུར་བྱང་ཆུབ་ཀྱི་སེམས་ཀྱི་ཐིག་ལེ་བཀག་ནས་མི་གཡོ་བས་འགྱུར་བ་མེད་པའི་སྐད་ཅིག་བསྒྲུབ་པར་བྱའོ། །ཞེས་པ་ནི་བཙན་ཐབས་ཀྱི་རྣལ་འབྱོར་རོ། །ཞེས་གསུངས་སོ། །འདིའི་དོན་བཤད་པ་ལ་གསུམ། དུས་ནམ་གྱི་ཚེ་བྱེད་པ། བྱེད་པའི་ཚུལ་དངོས། དེས་རླུང་ཆིངས་ན་སྒྲུབ་ཚུལ་ལོ། །དང་པོ་ནི། བོད་ཀྱི་མཁས་པས་རྒྱུད་འགྲེལ་དུ། འགྱུར་བ་མེད་པའི་སྐད་ཅིག་མ་མ་སྐྱེས་ན། ཞེས་པ་ལ་དགོངས་ནས། འཛིན་པའི་ཡན་ལག་ཐོབ་ནས་མཆོག་མི་འགྱུར་གྱི་བདེ་བ་མ་སྐྱེས་ན། དེའི་ཚེ་སྒོམ་ཞེས་གསུངས་པ་ནི་མི་བདེན་ཏེ།
འཛིན་པ་ཐོབ་ནས། རྗེས་དྲན་གྱི་སྐབས་སུ། ཕྱག་ཆེན་ལ་བརྟེན་ནས་བདེ་ཆེན་འདྲེན་མ་ནུས་པས་ལས་རྒྱ་ལ་བརྟེན་ནས་འདྲེན་དགོས་སྲིད་ཀྱང་། དེའི་སྐབས་སུ་རླུང་དབུ་མར་མ་ཆིངས་པའི་སྤོགས་ཆོག་བྱེད་དགོས་པ་མི་སྲིད་ལ། འདི་ནི་རླུང་དབུ་མར་མ་ཆིངས་པས་བདེ་བ་མ་སྐྱེས་ན། རླུང་དབུ་མར་འཛུད་ཐབས་སུ་གསལ་བར་བསྟན་ཏོ། །འགྱུར་བ་མེད་པའི་སྐད་ཅིག་མ་ཞེས་གསུངས་ཀྱང་མི་འགྲུབ་སྟེ། རྒྱུད་འདིར་འགྱུར་བ་མེད་པའི་བདེ་བ་ཞེས་གསུངས་པ་ཐམས་ཅད་དོན་གཅིག་ཏུ་བཟུང་ན། རྒྱུད་འདིའི་དོན་ལེགས་པར་འཆད་མི་ཐུབ་ཅིང་། སྐབས་ཀྱིས་གོ་བར་བྱེད་དགོས་པས། འདིར་ནི། འགྱུར་བ་མེད་པ་བྱང་སེམས་ནོར་བུའི་རྩེར་འཛག་པ་བཀག་ནས་ནོར་བུར་བརྟན་པའི་ལྷན་སྐྱེས་ལ་ཟེར་བ་ཡིན་ཏེ། རྡོ་རྗེ་ནོར་བུར་ཐིག་ལེ་བཀག་སྟེ་བསྒྲུབ་པར་བྱ། །ཞེས་གསུངས་པས་ཤེས་སོ། །སྔ་མ་ཁ་ཅིག་སྲོག་རྩོལ་གྱིས་མ་གྲུབ་ན་བྱེད་ཅེས་གསུང་ཡང་སོ་སོར་སྡུད་པ་ལ་སོགས་རྣམས་ཀྱིས་ཞེས་སོར་སྡུད་ཀྱིས་མ་གྲུབ་ན་བྱེད་པར་གསལ་ཏེ། བསམ་གཏན་ནི་སོར་སྡུད་ཀྱི་བརྟན་བྱེད་ཙམ་ཡིན་ལ། དེས་ན་སོགས་ཁོངས་ནས་གཙོ་བོར་སྲོག་རྩོལ་བཟུང་ངོ་། །དེའང་སོར་སྡུད་ཀྱིས་དྷཱུ་ཏཱིར་ཚུད་ནས་སྲོག་རྩོལ་བསྒོམས་ན། སྲོག་རྩོལ་གྱིས་དྷཱུ་ཏཱིར་མི་ཚུད་མི་སྲིད་པས། སོར་སྡུད་ཀྱིས་དྷཱུ་ཏཱིར་མ་ཚུད་པར་སྲོག་རྩོལ་བསྒོམ་པའི་དབང་དུ་བྱའོ། །དེས་ན་སོར་སྡུད་དང་སྲོག་རྩོལ་བསྒོམས་པས་
སྟོང་གཟུགས་མཐོང་ཡང་རླུང་དྷཱུ་ཏཱིར་འདུས་རྟགས་མ་བྱུང་ན་འདི་བསྒོམས་པས་ཚུད་པར་འགྱུར་རོ། །འོ་ན་འདིས་དབུ་མར་ཚུད་ན་དང་པོ་ནས་འདི་བསྒོམས་པས་ཆོག་མོད་སྙམ་ན་མི་ཆོག་སྟེ། དང་པོར་སྲོག་སྡུད་ཀྱི་མན་ངག་ཡུན་རིང་དུ་བསྒོམས་ནས་རླུང་ཤིན་ཏུ་ལས་རུང་དུ་མ་བྱས་པར་བཙན་ཐབས་ཀྱི་དྲག་སྦྱོར་བྱས་ན་མི་ཚུད་ཀྱི་སྟེང་དུ་གེགས་ཆེན་པོ་བསྐྱེད་པས་དང་པོ་ནས་འདི་སྒོམ་དུ་མི་རུང་ངོ་། །དྲག་སྦྱོར་གྱིས་གེགས་མེད་པར་དབུ་མར་ཚུད་ན་སྲོག་རྩོལ་སྒོམ་པ་སོགས་ངལ་བས་ཅི་ཞིག་བྱ། ཡུན་རིངས་བསྒོམས་ཀྱང་མ་གྲུབ་ན་དེའི་ཚེ་འདི་བྱེད་པར་བཤད་དེ། སྤྱིར་བླ་མེད་ཀྱི་རྒྱུད་སྡེ་ཕལ་ཆེ་བར་རླུང་དབུ་མར་བཙུད་ནས་ལྷན་སྐྱེས་འདྲེན་པ་རྫོགས་རིམ་གྱི་དངོས་གཞིར་འཆད་ཅིང་། འདིར་དེའི་སྟེང་དུ་དེའི་ཐབས་སྟོང་གཟུགས་སྒྲུབ་པ་གཙོ་བོར་འཆད་དེ། སྔར་མང་དུ་བཤད་དོ། །དེ་ལའང་རླུང་དབུ་མར་ཚུད་དགོས་ཤིང་། དེ་མ་ཚུད་ན་བཙན་ཐབས་བྱ་བར་རྒྱུད་དང་འགྲེལ་པར་བཤད་པས། དེའི་དོན་ཅུང་ཟད་བཤད་ན། རྐང་པ་དང་པོས་སོར་སྡུད་སོགས་ཀྱིས་སྲོག་སྡུད་ཀྱི་དམིགས་པ་ཡུན་རིང་དུ་བསྒོམས་པས་དུ་སོགས་ཀྱི་མཚན་མ་མཐོང་ཡང་སྲོག་དྷཱུ་ཏཱིར་མ་ཆིངས་པས་དོན་དུ་གཉེར་བྱའི་འགྱུར་མེད་ཀྱི་བདེ་བ་མ་སྐྱེས་ན་ཞེས་བསྟན། འགྲེལ་པའི་ལུང་འདིས། རླུང་དབུ་མར་ཚུད་པའི་དུ་སོགས་ཀྱི་མཚན་མ་མཐོང་བ་མེད་པར་དུ་སོགས་ཀྱི་མཚན་མ་ཅི་ཙམ་མཐོང་ཡང་། འདོད་བྱ་ལྷན་སྐྱེས་འདྲེན་མི་ནུས་
པར་བསྟན་ནོ། །དེས་ན་སྟོང་གཟུགས་ཤར་ཙམ་ལས་ལྷན་སྐྱེས་འདྲེན་པ་དང་རྫོགས་རིམ་གྱི་གཙོ་བོར་འདོད་པའང་ལུང་འདིས་བཀག་གོ །དེས་ན་རླུང་དབུ་མར་ཚུད་མ་ཚུད་ལྷན་སྐྱེས་འདྲེན་མི་འདྲེན་གྱིས་ཤེས་སོ། །གཉིས་པ་ནི། ནཱ་ད་གོམས་པས་བཙན་ཐབས་ཞེས་པ། ནཱ་ད་ཞེས་པ་སྒྲ་ཙམ་དང་། དེའང་ཧཱུཾ་གི་སྒྲའོ། །དེའི་སྒོམ་ཚུལ་ནི་རྐང་པ་རྡོ་རྗེའི་སྐྱིལ་ཀྲུང་ལག་པ་གཉིས་རྡོ་རྗེ་ཁུ་ཚུར་སྙིང་གར་བསྣོལ། མགོ་ཡིད་ཙམ་སྒུར། རླུང་སྣ་ནས་དྲག་ཏུ་དབུ་མའི་ནང་དུ་རྔུབ་པར་བྱ་སྟེ། རླུང་གི་གདངས་སྒྲ་ཧཱུཾ་སྒྲར་མོས། དེ་དང་ལྷན་ཅིག་འོག་སྒོ་གཉིས་གང་རུང་ནས་ཐུར་སེལ་ལྟེ་བའི་གོང་ཙམ་དུ་འཐེན་དེ་ནས་ཁད་ཀྱིས་ཇེ་མཐོ་ཇེ་མཐོར་འཐེན་པར་བྱའོ། །དེའང་དྲག་ལ་རྒྱུན་རིང་བར་བྱ་སྟེ། ཧ་ཅང་རིངས་ན་ཤུགས་ཟད་ནས། དྲག་པ་རྒྱུན་རིང་མི་འོང་བས། དེའང་ཐོག་མར་ཉི་ཤུ་རྩ་རེ་དཀྱུས་གཅིག་ལ་བྱ། གོམས་ནས་མང་དུ་བཏང་ངོ་། །དེ་ལྟར་བསྒོམ་པར་འདི་ནས་བཤད་ལ། རྒྱུད་གཞན་ནས་གསལ་བར་མ་བྱུང་ཡང་། བླ་མེད་ཀྱི་རྫོགས་རིམ་ཀུན་ལ་ཤེས་པར་བྱའོ། །གསུམ་པ་ནི། མཚན་བརྗོད་འགྲེལ་པར་ཉི་མ་དཔལ་ཡེ་ཤེས་ཀྱིས། རྒྱུད་ཀྱི་ལུང་འདི་ལྷན་སྐྱེས་མ་སྐྱེས་ནས། ལས་རྒྱ་ལ་བརྟེན་ནས་སྒྲུབ་པའི་ཁུངས་སུ་དྲངས་ཀྱང་། ནཱ་ད་གོམས་པས་ཞེས་པའི་འགྲེལ་པ་དང་མི་མཐུན་ནོ། །བཞི་པ་དག་དབྱེ་ནི་འདུ་བྱེད་དང་ཕུང་པོ་དག་པ་དོན་གྲུབ་དང་། དབྱེ་བ་རླུང་བཅུ་འགག་པས་བཅུའོ། །ཚད་མ་ནི་ཡིད་ཀྱི་མངོན་སུམ་ཚད་མའོ། །འབྲས་བུ་གོ་
སླའོ། །གཉིས་པ་འཛིན་པའི་ཡན་ལག་ལ་སྔར་བཞིན་དྲུག་ལས། མཚན་དོན་ནི། སྲོག་རྩོལ་གྱིས་རླུང་དབུ་མར་ཚུད་པ་འཛིན་པའམ། དབུ་མར་གནས་པར་བྱེད་པས་འཛིན་པའོ། །དུས་མཚམས་ནི། སྲོག་རྩོལ་གྱིས་དབུ་མར་ཚུད་པའི་རྟགས་འཁྲུལ་མེད་རྣམས་ཤར་ཏེ་བརྟན་པ་ནས་སོ། །ཡན་ལག་དངོས་ལ། མཚན་ཉིད་ནི། རྣལ་འབྱོར་གྱི་སྟོབས་ཀྱིས་རླུང་དྷུ་ཏིར་ཞུགས་པ་འགྲོ་འོང་མི་བྱེད་པར་དེར་གནས་པའོ། །སྲོག་རྩོལ་བུམ་པ་ཅན་ནི། རླུང་འགྲོ་འོང་མི་བྱེད་པར་གནས་པ་ཙམ་ཡོད་ཀྱང་། དབུ་མར་གནས་པ་མིན་པས་དེ་ལ་ཁྱབ་ཆེ་བའི་སྐྱོན་མེད་ལ། ཐོག་མར་འཛིན་པ་སྒོམ་པ་ལ་དྷཱུ་ཏཱིའི་ནང་དུ་གནས་པ་མེད་ཀྱང་དེ་བསྒོམས་པའི་འབྲས་བུ་ལ་ཡོད་པས་ཁྱབ་ཆུང་བའང་མིན་ནོ། །དབྱེ་བ་ནི། བོད་ཀྱི་མཁས་པས་ཉེ་བར་བསྒྲུབ་པ་ཡན་ལག་དྲུག་ཅེས་པ་ཁུངས་སུ་དྲངས་ནས། འཁོར་ལོ་དྲུག་ལ་འཛིན་པའི་འཛིན་པ་དྲུག་ཏུ་མཛད་ལ། ལུང་དེའི་དོན་ནི་དེ་མིན་ཡང་དབྱེ་བ་དེ་ལྟར་དགོས་སོ། །སྒོམ་ཚུལ་ནི། བོད་ཀྱི་མཁས་པས་རྩ་འཁོར་གྱི་དབུས་སུ་འཛིན་པར་གསུངས་པ་ལེགས་ཏེ། འཛིན་པ་ལ་རྩ་འཁོར་གྱི་དབུས་སུ་འཛིན་པ་དགོས་ན། དབུ་མར་འཇུག་པ་ལ་རྩ་འཁོར་གྱི་དབུས་སུ་དམིགས་པ་གཏོད་དགོས་པ་ཤེས་པར་གྱིས་ཤིག །སྔར་དྲངས་པའི་ལུང་དེ་བདེ་མཆོག་སྟོད་འགྲེལ་དུ། སྲོག་འཛིན་གཉིས་ཀའི་ཁུངས་སུ་དྲངས་པས་སྐྲའི་རྩེ་མོར་ཏེ་རྩ་འཁོར་གྱི་དབུས་སུ་རླུང་ཁ་སྦྱར་བྱེད་ཚུལ་སྔར་ལྟར་རོ། །དེའང་ཐོག་མར་ལྟེ་བར་བསྒོམ་ལ།
དེ་ནས་ས་ཆུ་ལ་ཐིམ་པའི་ཚུལ་གྱིས་སྙིང་ག་དང་། ཆུ་མེ་ལ་ཐིམ་པའི་ཚུལ་གྱིས་མགྲིན་པ་དང་། མེ་རླུང་ལ་ཐིམ་པའི་ཚུལ་གྱིས་དཔྲལ་བ་དང་། རླུང་ནམ་མཁའ་ལ་ཐིམ་པའི་ཚུལ་གྱིས་སྤྱི་བོ་དང་། ནམ་མཁའ་རྣམ་ཤེས་ལ་ཐིམ་པའི་ཚུལ་གྱིས་གསང་བའི་རྩ་འཁོར་གྱི་དབུས་རྣམས་སུ་བསྒོམ་མོ། །ཡང་ན་གསང་གནས་ནས་རིམ་པ་བཞིན་བྱའོ། །བསྒོམས་པས་མྱོང་བ་སྐྱེ་ཚུལ་ནི། དེ་བསྒོམས་པས་དང་པོར་རང་ཤུགས་ཀྱིས་གནས་པ་མི་འོང་ཡང་། མཚམས་ཤིག་ནས་དྷཱུ་ཏཱིར་རང་ཤུགས་ཀྱིས་གནས་པ་འོང་ལ། དེ་ནས་རྒྱུན་བསྲིངས་ནས་བསྒོམས་པས་རིམ་པ་བཞིན་ཞག་གཅིག་ཟླ་བ་ཕྱེད་དང་ཟླ་བ་གཅིག་དང་། ཟླ་བ་དྲུག་དང་། ལོ་གཅིག་དང་། རྟག་ཏུ་གནས་པ་འབྱུང་ལ། དེ་རྣམས་ལས་རིམ་པ་བཞིན། དཔྲལ་བ། སྤྱི་གཙུགམགྲིན་པ། སྙིང་ག །ལྟེ་བ། གསང་གནས། ནོར་བུའི་རྩེ་རྣམས་སུ་བྱང་སེམས་གཡོ་མེད་དུ་འཛིན་ནུས་པ། སྤྱིར་སྟོང་གཟུགས་ཀྱི་ཕྱག་ཆེན་ལ་བལྟོས་ཀྱང་། འདི་རྣམས་ཀྱིའང་ནུས་པ་ཡོད་པས་དེ་ལྟར་དུ་བཞག་གོ །རྟག་ཏུ་འཛིན་ནུས་ཞེས་པའང་ལོ་ལས་ལྷག་པའི་དུས་ཚིགས་གཅིག་བཟུང་དགོས་ཏེ། དུས་ཐམས་ཅད་དུ་འཛིན་ནུས་པ། རླུང་ཉི་ཁྲི་ཆིག་སྟོང་དྲུག་བརྒྱ་མ་འགགས་པར་མི་འབྱུང་བའི་ཕྱིར་རོ། །དྲུག་པ་ནི། ཕུང་པོ་ལ་སོགས་པ་དྲུག་དྲི་བྲལ་དུ་གྱུར་པ་འཐོབ་བོ། །རྗེས་དྲན་གྱི་དོན་ནི། འཛིན་པའི་སྟོབས་ཀྱིས་རླུང་ཆིངས་ཏེ། དེས་གཏུམ་མོ་སྦར་བས་བྱང་སེམས་ཞུ་ནས་རིམ་གྱིས་བྱིས་པ་དང་། དར་ལ་
བབ་པ་དང་། རྒན་པོའི་བདེ་བ་ལྟར། དགའ་བ་གསུམ་རིམ་གྱིས་ཉམས་སུ་མྱོང་བས། མཐར་ལྷན་སྐྱེས་ཤར་ཏེ། དེ་ནས་ལྟ་བ་དྲན་ཏེ་བདེ་སྟོང་གི་ངང་ནས། འཕེན་ཤུགས་དང་བསམས་པ་ཙམ་གྱིས་སྟོང་གཟུགས་ཀྱི་འདོད་ལྷ་ཡབ་ཡུམ་དུ་ཤར་ནས་ཕྱག་རྒྱ་ཆེན་པོ་རྗེས་སུ་དྲན་ནས་འཁྱུད་པ་ལ་གསུངས་ཏེ། བདེ་མཆོག་སྟོད་འགྲེལ་དུ། དེ་ནས་ལྷ་ཡི་གཟུགས་བརྙན་སྒྲུབ་པ་ཞེས་པ་འཛིན་པའི་སྟོབས་ཀྱིས་ལྟེ་བའི་གནས་སུ་གཏུམ་མོ་འབར་བ་རྣལ་འབྱོར་པས་མཐོང་སྟེ། སྒྲིབ་པ་ཐམས་ཅད་དང་བྲལ་བ་པྲ་ཕབ་པ་ལྟ་བུ་ཕྱག་རྒྱ་ཆེན་མོ་སངས་རྒྱས་ཀྱི་འོད་ཟེར་གྱི་སྤྲིན་མཐའ་ཡས་པ་སྤྲོ་བར་བྱེད་པའི་འོད་ཟེར་གྱི་དཀྱིལ་འཁོར་གྱིས་སྤྲས་པ། དེའི་རྗེས་སུ་དྲན་པའི་ཡན་ལག་སྒྲུབ་པར་བརྗོད་དེ། འཛིན་པའི་མཐའ་གཏུམ་མོའི་རྣལ་འབྱོར་བསྒོམ་པར་བྱའོ། །ཞེས་པའི་ངེས་པའོ། །ཞེས་དང་། དྲི་མེད་འོད་ལས། རྗེས་སུ་དྲན་པ་ལེགས་པར་དག་པ་ཞེས་པ་ལ་འདིར་རྗེས་སུ་དྲན་པ་ནི། གཟུགས་ལ་འཁྱུད་པའི་སེམས་རྣམ་པར་རྟོག་པ་དང་བྲལ་བ། དེའི་ཕྱིར་གང་གི་ཚེ་དག་པར་གྱུར་པ་དེའི་ཚེ་དྲི་མ་མེད་པའི་འོད་ཀྱི་དཀྱིལ་འཁོར་དུ་འགྱུར་རོ། །ཞེས་གསུངས་སོ། །ཏིང་ངེ་འཛིན་གྱི་དོན་ནི། རྗེས་དྲན་གྱི་སྐབས་སུ། གཙོ་བོར། སྟོང་གཟུགས་ཀྱི་ཕྱག་ཆེན་ལ་བརྟེན་ནས་མས་བརྟན་གྱི་དགའ་བཞིའི་མཐར། མཆོག་ཏུ་མི་འགྱུར་བའི་བདེ་བས་སྟོང་པ་ངེས་པའི་སེམས་བདེ་སྟོང་དུ་སོང་བ་དང་། དེའི་དུས་སུ་ཡིད་ངོར་ལུས་སྟོང་གཟུགས་ཀྱི་དུས་ཀྱི་འཁོར་ལོ་ཡབ་ཡུམ་དུ་ཤར་
བ་ཚོགས་པ་ནས་འཛིན་ཏེ། ཕྱག་རྡོར་བསྟོད་འགྲེལ་ལས། ཏིང་ངེ་འཛིན་ཞེས་བྱ་བ་ནི་འདོད་པའི་ལྷ་ལ་རྗེས་སུ་ཆགས་པ་ལས་འགྱུར་བ་མེད་པའི་བདེ་བ་ཐོབ་སྟེ། དེ་ལ་གཅིག་ཏུ་གྱུར་པའི་སེམས་གཟུང་བ་དང་འཛིན་པ་དང་བྲལ་བ་ནི་དེ་བཞིན་གཤེགས་པ་རྣམས་ཀྱི་ཏིང་ངེ་འཛིན་གྱི་ཡན་ལག་ཏུ་བརྗོད་དོ། །ཞེས་སོ། །དྲི་མེད་འོད་ལས། ཤེས་རབ་ཀྱི་བདག་ཉིད་ཀྱིས་ནི་ཞེས་པ། ཤེས་པ་དང་ཤེས་བྱ་གཅིག་ཏུ་འདྲེས་པར་གྱུར་ཏེ། འགྱུར་བ་མེད་པའི་བདེ་བའི་དབང་གི་གཟུགས་ལ་ཏིང་ངེ་འཛིན་ཏོ། །ཞེས་གསུངས་ཤིང་། འདི་ལའང་དབང་པོ་རྣོ་བརྟུལ་འབྲིང་གསུམ་གྱིས་ཕྱག་རྒྱ་གསུམ་ལ་བརྟེན་པའི་སྒོམ་ཚུལ་གསུམ་གསུངས་སོ། །ཤིང་རྟའི་སྲོལ་ཆེན་དུས་ཀྱི་འཁོར་ལོའི་རྒྱུད། །གསལ་བྱེད་སེམས་དཔའི་འགྲེལ་པ་གསུམ་གྱི་དོན། །རྗེ་བཙུན་བླ་མའི་མན་ངག་གིས་བརྒྱན་ཏེ། །བྱིན་གྱིས་བརླབས་པའི་གསུང་གི་བདུད་རྩིར་བྱོན། །འདིར་འབད་དགེ་བས་འགྲོ་རྣམས་སྲིད་མཚོ་ལས། །མྱུར་དུ་བསྒྲལ་ཏེ་ཐེག་ཆེན་ཞི་བའི་ཚལ། །རྣམ་ཀུན་ཕྱག་རྒྱ་ཆེན་པོའི་ལམ་ཞུགས་ཏེ། །དུས་ཀྱི་འཁོར་ལོ་མངོན་དུ་བྱེད་གྱུར་ཅིག །ཡན་ལག་དྲུག་གི་རྫོགས་རིམ་གྱི་གདམས་པའི་གནད་བསྡུས་པ་རྨད་དུ་བྱུང་བའི་མན་ངག་རྡོ་རྗེ་འཆང་གཉིས་པ་ཤར་ཙོང་ཁ་པ་ཆེན་པོའི་གསུང་བྱིན་རླབས་ཀྱི་བདུད་རྩིར་བྱོན་པ་བརྗེད་དུ་ཕངས་ནས། །རྗེ་བཙུན་བླ་མ་དམ་པ་དེ་ཉིད་ཀྱི་ཞབས་ཀྱི་རྡུལ་སྤྱི་བོས་ལེན་ཞིང་གསུང་གི་བདུད་
རྩིའི་རོ་ཅུང་ཟད་མྱངས་པ་ཤཱཀྱའི་དགེ་སློང་རྒྱལ་སྟེངས་པས། འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་དུ་བརྗེད་བྱང་ཡི་གེར་བཀོད་པའོ། །འདིས་ཀྱང་བསྟན་པ་རིན་པོ་ཆེ་ཕྱོགས་དུས་ཀུན་ཏུ་རྒྱས་པར་བྱེད་ནུས་པར་གྱུར་ཅིག །སྭ་སྟི། རྒྱལ་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདར་རྒྱས་རྣམ་གྲོལ་སྦྲང་རྩའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །སརྦ་མདྒ་ལཾ། །