སྤྲིན་བྲལ་བའི་མན་ངག་དང་། རྟ་མགྲིན་ཤྭ་ན་བཞིས་བསྐོར།
སྤྲིན་བྲལ་བའི་མན་ངག་དང་། རྟ་མགྲིན་ཤྭ་ན་བཞིས་བསྐོར་བཞུགས་སོ། །
ན་མོ་གུ་རུ་མཉྫུ་གྷོ་ཥཱ་ཡ། སྤྲིན་བྲལ་བའི་ཚུལ་ནི། རོ་རས་ལ་འོག་གི་སྔགས་བྲིས་པ་མདུན་དུ་བཀྲམ། རོ་རས་གདན་དུ་བྱས་ནས། ཇི་ལྟར་བདེ་བར་འཁོད་དེ། སྐྱབས་འགྲོ་སེམས་བསྐྱེད་བྱས་ལ།སྭ་བྷཱ་ཝས་ཆོས་ཐམས་ཅད་སྟོང་པར་སྦྱངས། སྟོང་པའི་ངང་ལས་སྣ་ཚོགས་པདྨ་དང་ཉི་མའི་སྟེང་དུ། ཧཱུཾ་ལས་པདྨ་དམར་པོ་ཧཱུཾ་གིས་མཚན་པ། དེ་ཡོངས་སུ་གྱུར་པ་ལས། རང་ཉིད་ཁྲོ་བོའི་རྒྱལ་པོ་རྟ་མགྲིན། སྐུ་མདོག་དམར་པོ་དམར་ནག་དཀར་བའི་ཞལ་ཅན། རྩ་ཞལ་གྱི་སྟེང་ན་རྟ་མགོ་ལྗང་གུ །ཕྱག་བརྒྱད་ཀྱི་གཡས་དང་པོས་བ་དན་རྩེ་གསུམ་པའི་ཕྱག་རྒྱ་མཐེ་བོས་མཐེའུ་ཆུང་མནན་ནས་སོར་མོ་ལྷག་མ་གསུམ་བརྐྱངས་པ། གཉིས་པས་
སྣ་ཚོགས་རྡོ་རྗེ། གསུམ་པས་རལ་གྲི། བཞི་པས་མདའ། གཡོན་དང་པོས་སྣ་ཚོགས་པདྨ། གཉིས་པས་འཕང་མདུང་། གསུམ་པས་མེ་ལོང་། བཞི་པས་གཞུ་འཛིན་པ། ཞབས་བཞིའི་མདུན་མ་གཉིས་གཡས་བརྐྱངས་དང་། རྒྱབ་མ་གཉིས་གཡོན་བརྐྱངས་པའི་འོག་ཏུ། ཚོགས་བདག་དང་དབང་ཕྱུག་མནན་པ། ཧཱུཾ་གི་སྒྲས་གདུག་པ་ཅན་ཐམས་ཅད་འཇིལ་བར་མཛད་པ། ཤིན་ཏུ་ཆེ་བའི་སྐུ། ཁྲོ་བོའི་ཉམས་དང་རྒྱན་ཐམས་ཅད་རྫོགས་པ། དེའི་སྤྱི་བོར་ཨོ། མགྲིན་པར་ཨཱཿ ཐུགས་ཀར་ཧཱུཾ། ཧཱུཾ་ལས་འོད་ཟེར་འཕྲོས་པས། རང་བཞིན་གྱི་གནས་ནས་རང་འདྲའི་ཡེ་ཤེས་པ་སྤྱན་དྲངས་པ་ལ་མཆོད་ནས། ཛཿ ཧཱུཾ་བཾ་ཧོཿ དགུག་གཞུག་བཅིང་མཉེས་བྱ།
སླར་ཡང་འོད་ཟེར་འཕྲོས་པས་དབང་ལྷ་སྤྱན་དྲངས། མཆོད། གསོལ་བ་གདབ། དབང་གི་ཆུས་ལུས་གང་། ཆུ་ལྷག་མ་ཡར་འཁྱིལ་བ་ལས། རྩ་ཞལ་གྱི་དབུ་ལ་འོད་དཔག་མེད་པས་དབུ་བརྒྱན་པར་བསམས་ལ། ༀ་ཧ་ཡ་གྲཱི་བ་ཨརྒྷཾ་པྲ་ཏཱི་ཙྪ་ཧཱུཾ་སྭཱཧཱ། སོགས་ཀྱིས་མཆོད། བསྟོད་པ་ཅི་ཤེས་པས་བསྟོད། ཧཱུཾ་ལས་བྱུང་བའི་ལྗགས་ཁ་དོག་དམར་པོ་རྒྱ་ཆེན་པོར་གྱུར་པ་བསྐྱོད་པས་ཆུ་འཛིན་པའི་སྤྲིན་ཐམས་ཅད་ཞལ་དུ་གསོལ་བ་དང་། དབུགས་ཕྱིར་སྤྲོ་བའི་ཚེ་དེས་སྤྲིན་རྣམས་རྡུལ་ཕྲ་རབ་ཏུ་གཏོར་ཞིང་། ཐུགས་ཀ་ནས་ཁྲོ་བོའི་ཚོགས་མཚོན་ཆ་སྣ་ཚོགས་པ་བསྣམས་པ་སྐུ་ལས་མེ་འབར་བ་དཔག་མེད་སྤྲོས་པས་སྤྲིན་ཐམས་ཅད་བྲལ་བར་བསམས་ལ། ༀ་ཏརྫ་ཡ་ཏརྫ་ཡ་ཤ་མ་ཤ་ན་པྲི་ཡ་ཡ་ཕཊ་སྭཱཧཱ། ཞེས་བཟླས་པས་འགྲུབ་པོ་ཞེས་རྗེ་བཙུན་མཚུངས་མེད་བློ་བཟང་གྲགས་པའི་དཔལ་གྱི་ཞལ་སྔ་ནས་ཀྱིས་གསུངས་སོ། །རྟ་མགྲིན་གྱི་སྒོ་ནས་ཆར་གཅོད་པའི་མན་ངག་འདིའང་། ཧ་ཅང་ཆར་ཆེས་པས་སྤྱིལ་བུ་རྣམས་ལ་ཞིག་རལ་དང་། ཞིང་རྣམས་ལའང་ཆར་ཆེས་པའི་གནོད་པ་བྱུང་དུས། སྔ་མ་བཞིན་དུ་ཞུས་པའི་ངོར་གནང་བའི་མན་ངག་ཡིན་པར་གདའོ། །སརྦ་མངྒ་ལཾ། །༈ རྟ་མགྲིན་ཤྭ་ན་བཞིས་བསྐོར་བཞུགས། བླ་མ་དང་དཔལ་རྟ་མགྲིན་ལ་ཕྱག་འཚལ་ལོ། །དང་པོར་སྐྱབས་སུ་འགྲོ་ཞིང་སེམས་བསྐྱེད་པར་བྱའོ། །དེ་ནས་སྙིང་གར་པདྨ་དང་ཉི་མ་ལ་གནས་པའི་ཧཱུཾ་ལས་འོད་འཕྲོས།
ནམ་མཁར་བླ་མ་དང་། སངས་རྒྱས་བྱང་ཆུབ་སེམས་དཔའ་ཐམས་ཅད་སྤྱན་དྲངས་པ་ལ་ཡན་ལག་བདུན་པ་བྱ། ཚད་མེད་པ་བཞི་བསྒོམ། སྦྱོར་བ་ཚོགས་བསག་པའོ། །དེ་ནས་སྭ་བྷྭ་ཝས་སྟོང་པར་གྱུར། དེའི་ངང་ལས་ཧཱུཾ་ལས་སྣ་ཚོགས་རྡོ་རྗེའི་ལྟེ་བ་ཧཱུཾ་གིས་མཚན་པ་ལས་འོད་ཟེར་ཕྱོགས་བཅུར་འཕྲོས། སྟེང་ཐམས་ཅད་རྡོ་རྗེའི་བླ་བྲེ། འོག་ཐམས་ཅད་རྡོ་རྗེའི་ས་གཞི། ཕྱོགས་ཐམས་ཅད་རྡོ་རྗེའི་ར་བ། ཕྱི་རོལ་ཐམས་ཅད་ཡེ་ཤེས་ཀྱི་མེ་འབར་བའི་བསྲུང་བའི་འཁོར་ལོ་བསྐལ་པ་འཇིག་པའི་རླུང་གིས་ཀྱང་མི་ཐར་བར་གྱུར།དེའི་དབུས་སུ་བྷྲཱུཾ་ལས་རིན་པོ་ཆེ་སྣ་ཚོགས་པའི་གཞལ་ཡས་ཁང་གྲུ་བཞི། སྒོ་བཞི་དང་ལྡན་པ་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པཾ་ལས་པདྨ། རཾ་ལས་ཉི་མའི་སྟེང་དུ་ཧྲཱིཿ ལས་གསེར་གྱི་རྡོ་རྗེ་རྩེ་ལྔ་པ་ཧྲཱིཿ ས་མཚན་པ་ལས་འོད་འཕྲོས། འདུས་ཡོངས་སུ་གྱུར་པ་ལས། གཙོ་འཁོར་ལྔ་ཅིག་ཅར་དུ་སྐུ་ཡོངས་སུ་རྫོགས་པར་གྱུར། དེ་གསལ་གདབ་པ་ནི། བདག་ཉིད་སྐུ་མདོག་དམར་པོ་ཞལ་གསུམ་ཕྱག་དྲུག །ཞབས་བཞི་པ། རྩ་བའི་ཞལ་སྐུ་མདོག་དང་མཚུངས་པ། གཡས་དཀར་བ། གཡོན་ལྗང་བ། དམར་ཞིང་ཟླུམ་པའི་སྤྱན་གསུམ་གསུམ་དང་ལྡན་པ། རབ་ཏུ་བགྲད་པའི་ཞལ་མཆེ་བ་རྣམ་པར་གཙིགས་པ། སྨིན་མ་དང་སྨ་ར་དམར་སེར་གྱེན་དུ་འབར་བ། དབུ་སྐྲ་ཁམ་
སེར་གྱེན་དུ་བརྫེས་པའི་གསེབ་ནས་རྟ་མགོ་ལྗང་གུ་རྟ་སྐད་འཚེར་བཞིན་པ་གསུམ་འདོན་པ། ཐོད་སྐམ་གསུམ་གསུམ་གྱིས་དབུ་བརྒྱན་ཅིང་། ཐོད་རློན་གྱི་ཕྲེང་བའི་དོ་ཤལ་ཅན། སྦྲུལ་རིགས་ལྔས་རྣམ་པར་བརྒྱན་པ། གཡས་ཀྱི་དང་པོས་གསེར་གྱི་རྡོ་རྗེ་རྩེ་ལྔ་པ་འཕྱར་བ། གཉིས་པས་གསེར་གྱི་ཞགས་པ། གསུམ་པས་སེང་ལྡེང་གི་དབྱུག་པ། གཡོན་དང་པོས་ཐོད་པ་ཁྲག་གིས་གང་བ་ཐུགས་ཀར་བཟུང་བ། གཉིས་པ་ན་རལ་གྲི། གསུམ་པའི་ཕྱག་སོར་མོ་རབ་ཏུ་གདེངས་པ་བརྐྱངས་པ་ལས་རིགས་ལྔའི་ཁྱུང་འཕྲོས་ནས་གདུག་པ་ཅན་ཐམས་ཅད་ཚར་གཅོད་པ། གླང་པོ་ཆེའི་ཀོ་བས་སྟོད་གཡོགས་ཤིང་སྟག་གི་པགས་པའི་ཤམ་ཐབས་ཅན། ཞབས་བཞི་གཡས་ཅུང་ཟད་བསྐུམ་ཞིང་གཡོན་བརྐྱངས་པའི་དོར་སྟབས་ཀྱིས་སྦྲུལ་བརྒྱད་དྲིལ་བའི་སྟེང་དུ་ཚངས་པ་བརྒྱ་བྱིན་མནན་པ། ཁྲོ་བོའི་གད་རྒྱངས་རབ་ཏུ་སྒྲོག་པའི་དབྱངས་ཀྱི་ང་རོས་ཁམས་གསུམ་ཐམས་ཅད་འཇིགས་པ་ལས་ཀྱང་ཆེས་ཤིན་ཏུ་འཇིགས་པར་མཛད་པའི། ཤར་དུ་རྡོ་རྗེ་ལས་བྱེད་མ། ལྷོར་གཤིན་རྗེ་ལས་བྱེད་མ། ནུབ་ཏུ་ཀླུའི་ལས་བྱེད་མ། བྱང་དུ་གནོད་སྦྱིན་ལས་བྱེད་མ། རིམ་པ་བཞིན་དཀར་སྔོ་དམར་སེར་གྱི་ཁ་དོག་ཅན། གཡས་ཐམས་ཅད་ཀྱིས་གྲི་གུག་ནམ་མཁའ་ལ་འཕྱར་བ། གཡོན་ཐམས་ཅད་ཀྱིས་ཐོད་པ་སྙིང་གར་བཟུང་བ། རབ་ཏུ་ཁྲོ་མོའི་རྣམ་པ་ཅན། གཡས་བསྐུམས། གཡོན་བརྐྱངས་སུ་འཁོད་པ། སོ་སོའི་
རིགས་ཀྱི་བགེགས་ཐམས་ཅད་སྐྲག་པར་མཛད་པ། ཐམས་ཅད་ཡེ་ཤེས་ཀྱི་མེ་བསྐལ་པའི་མེ་འབར་བ་ལྟ་བུའི་དབུས་ན་བཞུགས་པར་གྱུར་པའི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུཾ། དེ་ལས་འོད་འཕྲོས། ཡེ་ཤེས་པ་སྤྱན་དྲངས། གཉིས་སུ་མེད་པར་གྱུར།ཡང་རིགས་ལྔ་སྤྱན་དྲངས་དབང་བསྐུར། གཙོ་བོ་ལ་འོད་དཔག་མེད། འཁོར་རྣམས་ལ་རིགས་བཞིས་ཇི་ལྟ་བར་དབུ་བརྒྱན་པར་གྱུར། དེ་ནས་གཙོ་བོའི་ཐུགས་ཀར་ཉི་མའི་སྟེང་དུ་རྟ་མགྲིན་ཞལ་གཅིགཕྱག་གཉིས་པ། ཕྱག་གཡས་སེང་ལྡེང་གི་དབྱུག་པ་འཕྱར་བ། གཡོན་ཐུགས་ཀར་སྡིགས་མཛུབ། རྟ་མགོ་གཅིག་དང་ལྡན་པའི་ཐུགས་ཀར་ཉི་མ་ལ་གནས་པའི་རྡོ་རྗེ་རྩེ་ལྔ་པའི་ལྟེ་བར་ཧྲཱིཿ མཐར་ༀ་བཛྲ་ཀྲོ་དྷ་ཧ་ཡ་གྲཱིཝ་ཧུ་ལུ་ཧུ་ལུ་ཧཱུཾ་ཕཊ། ཅེས་པས་བསྐོར་བ་ལས་འོད་འཕྲོས། སངས་རྒྱས་བྱང་སེམས་ལ་མཆོད། ཚུར་འདུས་བྱིན་རླབས་ནུས་པ་ཐམས་ཅད་བཀུག་ནས་རང་ལ་ཐིམ། བདག་ཉིད་ཁྲོ་བོའི་ནུས་པ་དང་བྱིན་རླབས་དཔག་ཏུ་མེད་པ་དང་ལྡན་པར་གྱུར། སྔགས་ཀྱི་ཕྲེང་བ་ལས་འོད་ཟེར་གྱི་ཚོགས་ལས་ཡེ་ཤེས་ཀྱི་མེ་རབ་ཏུ་འབར་བ་ལྟར་འབར་བ་མང་པོ་ཕྱོགས་བཅུར་འཕྲོས་པས་བདག་ཉིད་ལ་གནོད་བྱེད་ཀྱི་གདོན་བགེགས་ཐམས་ཅད་བྱ་སྒྲོ་མེས་བཤུར་བ་བཞིན་གྱུར་པར་བསམ་ཞིང་བཟླས་པ་བྱའོ། །གཙོ་བོའི་སྔགས་སྟོང་ཚོ་རེའི་མཐར། བཛྲ་ཤྭ་ན་ས་མ་ཡ། ཡ་མ་ཤྭ་ན་ས་མ་ཡ།
ནཱ་ག་ཤྭ་ན་ས་མ་ཡ། ཡཀྵ་ཤྭ་ན་ས་མ་ཡ། ཞེས་པའི་ཤམ་བུ་བཏགས་པ་བརྒྱ་རྩ་རེ་བཟླའོ། །གཙོ་བོ་ལ་བརྒྱ་རྩ་གཅིག་ལྟ་བུ་བཟླས་ན། ཤམ་བུ་ཅན་ཉེར་གཅིག་གོ །ༀ་བཛྲ་ཀྲོ་དྷ་ཧ་ཡ་གྲཱི་ཝ་ཧུ་ལུ་ཧུ་ལུ་ཧཱུཾ་ཕཊ། །བཛྲ་ཤྭ་ན་ས་མ་ཡ། ཡ་མ་ཤྭ་ན་ས་མ་ཡ། ནཱ་ག་ཤྭ་ན་ས་མ་ཡ། ཡཀྵ་ཤྭ་ན་ས་མ་ཡ། ཞེས་སོ། །མངྒ་ལཾ། །