རི་ཁྲོད་ལོ་མ་ཅན་གྱི་སྒྲུབ་ཐབས་རྗེ་རིན་པོ་ཆེས་གནང་བ།
རི་ཁྲོད་ལོ་མ་ཅན་གྱི་སྒྲུབ་ཐབས་རྗེ་རིན་པོ་ཆེས་གནང་བ་བཞུགས་སོ། །
ནད་ཐམས་ཅད་འཇོམས་མ། འཕགས་མ་རི་ཁྲོད་ལོ་མ་ཅན་སྒོམ་པར་འདོད་པས་སྔོན་དུ་འགྲོ་བ་བྱས། སྭ་བྷཱ་ཝས་སྟོང་པར་སྦྱངས། པཾ་ལས་པདྨ་དང་ཟླ་བའི་སྟེང་དུ་རང་གི་ཤེས་པ་པཾ་ལས་རྡོ་རྗེ་པཾ་གྱིས་མཚན་པ་ལས་འོད་ཟེར་འཕྲོས། འཕགས་པ་མཆོད། སེམས་ཅན་ཐམས་ཅད་ཀྱི་ནད་ཐམས་ཅད་བསལ། ནད་བདག་ཐམས་ཅད་བཏུལ། ཚུར་འདུས་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་མ་རི་ཁྲོད་ལོ་མ་ཅན། སྐུ་མདོག་སེར་མོ་ཞལ་གསུམ་ཕྱག་དྲུག་མ། རྩ་ཞལ་སེར། གཡས་དཀར། གཡོན་དམར། ཞལ་རེ་རེ་ལའང་སྤྱན་གསུམ་གསུམ། མིའུ་ཐུང་ཤིན་ཏུ་ཁྲོས་པའི་ཆ་ལུགས་ཅན། ཕྱག་གཡས་དང་པོས་གསེར་གྱི་རྡོ་རྗེ་ཐུགས་ཀར་འཛིན་པ། གཉིས་པས་དགྲ་སྟ་འདེབས་པའི་ཚུལ། གསུམ་པས་མདའ་
གསོར་ཞིང་འཛིན་པ། གཡོན་དང་པོས་སྡིགས་མཛུབ་རྡོ་རྗེའི་ཞགས་པས་དཀྲིས་པ། གཉིས་པས་འབྲས་བུ་སྣ་ཚོགས་ཀྱིས་བརྒྱན་པའི་ཤིང་ལོ་གསར་བའི་རྔ་ཡབ་འཛིན་པ། གསུམ་པས་གཞུ་འཛིན་པ། ཤིང་ལོ་གསར་བའི་ན་བཟའ་མནབས་པ། མེ་ཏོག་དང་འབྲས་བུ་སྣ་ཚོགས་པས་བརྒྱན་པར་བསྒོམ་མོ། །དེའི་སྤྱི་བོར་ༀ། མགྲིན་པར་ཨཱཿ ། སྙིང་གར་ཧཱུཾ། སྙིང་གའི་པཾ་ལས་འོད་ཟེར་འཕྲོས། བཅོམ་ལྡན་འདས་མ་སྤྱན་དྲངས། མཆོད། ཛཿ ཧཱུཾ་བཾ་ཧོཿ དགུག་གཞུག་བྱ།ཡང་རིགས་ལྔ་ཡབ་ཡུམ་སྤྱན་དྲངས། མཆོད། དབང་བསྐུར་ནས་ཆུ་ལུད་པས། མི་བསྐྱོད་པས་དབུ་བརྒྱན། མཆོད་པས་མཆོད། སྙིང་གའི་པཾ་གྱི་མཐའ་སྐོར་དུ་སྔགས་ཕྲེང་གིས་བསྐོར་བའི་འོད་ཀྱིས། བགེགས་དང་ཉེ་བར་འཚེ་བ་རྣམས་དང་།
ནད་རྣམས་བསལ་བར་བསམ་ཞིང་། ༀ་པི་ཤཱ་ཙི་པརྞ་ཤ་ཝ་རི་སརྦ་ཛྭ་ར་པྲ་ཤ་མ་ཎ་ཡེ་སྭཱཧཱ། ཞེས་པ་ཅི་ནུས་བཟླས།བུམ་ཆོག་བྱེད་ན་སྤྱི་དང་མཐུན་ནོ། །རྒྱལ་བ་ཀུན་གྱི་ཡེ་ཤེས་སྒྱུ་མ་ཡི། །ཆོ་འཕྲུལ་རྣམ་པར་འཕྲུལ་བ་ལས་བྱུང་བའི། །ལྷ་མོ་གང་གིས་བསྒྲུབ་པའི་ནད་རིམས་བགེགས། །ཀུན་ཏུ་ཞི་མཛད་ཁྱོད་ལ་ཕྱག་འཚལ་ལོ། །མངྒ་ལཾ། །