བཅོམ་ལྡན་འདས་སྨེ་བརྩེགས་ཀྱི་སྒྲུབ་ཐབས་རྗེས་གནང་བ།
བཅོམ་ལྡན་འདས་སྨེ་བརྩེགས་ཀྱི་སྒྲུབ་ཐབས་རྗེས་གནང་བ་བཞུགས་སོ། །
བླ་མ་དམ་པ་རྣམས་ལ་ཕྱག་འཚལ་ལོ། །བཅོམ་ལྡན་འདས་སྨེ་བ་བརྩེགས་པ་བསྒོམ་པར་འདོད་པས། སྐྱབས་འགྲོ་དང་སེམས་བསྐྱེད་པ་སྔོན་དུ་སོང་ནས། སྭ་བྷཱ་ཝས་སྟོང་པར་བསྒོམ། སྟོང་པའི་ངང་ལས་པཾ་ལས་པདྨ། རཾ་ལས་ཉི་མའི་སྟེང་དུ། ཧཱུཾ་ལྗང་སྔོན་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་རང་གི་སྡིག་པ་དང་སྒྲིབ་པ་ཐམས་ཅད་སྦྱངས། དེ་ཡོངས་སུ་གྱུར་བ་ལས། རང་ཉིད་ཁྲོ་བོ་སྨེ་བ་བརྩེགས་པ་སྐུ་མདོག་ལྗང་སྔོན། ཞལ་གསུམ་ཕྱག་དྲུག་པ། རྩ་ཞལ་ལྗང་གུ །གཡས་དཀར། གཡོན་དམར་བ། ཕྱག་དང་པོ་གཉིས་ཐུགས་ཀར་སྡིགས་མཛུབ་བསྣོལ་བ། གཡས་ཀྱི་འོག་མ་གཉིས་རྡོ་རྗེ་དང་རལ་གྲི་འཛིན་པ། གཡོན་འོག་མ་གཉིས་ཞགས་པ་དང་ལྕགས་ཀྱུ་འཛིན་པ།
ཞལ་རེ་རེ་ལ་སྤྱན་གསུམ་གསུམ་དང་ལྡན་པ། ཁྲོ་གཉེར་མཆེ་བ་གཙིགས་པ། སྐྲ་ཁམ་པ་གྱེན་དུ་བརྫེས་པ། སྐུ་ལ་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། སྐུ་སྟོད་ལ་དར་ལྗང་སྔོན་གྱི་ན་བཟའ་གསོལ་བ། སྐུ་སྨད་ལ་སྟག་གི་པགས་པའི་ཤམ་ཐབས་ཅན། ཞབས་གཡས་ཅུང་ཟད་བསྐུམ་པ། གཡོན་བརྐྱངས་པས་བཞུགས་པའོ། དེའི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུཾ། ཧཱུཾ་ལས་འོད་ཟེར་འཕྲོས་པས། ཡེ་ཤེས་པ་མདུན་གྱི་ནམ་མཁར་སྤྱན་དྲངས་ལ། ཨརྒྷཾ་ལ་སོགས་པས་མཆོད་ནས། ཛཿ ་ཧཱུཾ་བཾ་ཧོཿ ས་རང་དང་གཉིས་སུ་མེད་པར་བསྟིམ། ཡང་ཧཱུཾ་ལས་འོད་འཕྲོས་དབང་གི་ལྷ་རིགས་ལྔ་འཁོར་དང་བཅས་པ་སྤྱན་དྲངས་ལ། ཨརྒྷཾ་ལ་སོགས་པས་
མཆོད་ནས། ༀ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས། དེ་བཞིན་གཤེགས་པ་ཐམས་ཅད་ཀྱི་ཞལ་ནས། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཞེས་གསུངས་ཤིང་སྤྱི་བོ་ནས་ཡེ་ཤེས་ཀྱི་ཆུས་དབང་བསྐུར་བས། དྲི་མ་ཐམས་ཅད་དག །ཆུ་ལྷག་མ་ཡར་ལུད་པས། དོན་ཡོད་གྲུབ་པས་དབུ་བརྒྱན་པར་བསམ་མོ། །སྔགས་བཟླ་བར་འདོད་ན། རང་གི་སྙིང་གར་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ལྗང་སྔོན། དེའི་མཐར་གཡས་སྐོར་དུ། ༀ་བྷཱུར་ཀུཾ་མཧཱ་པྲཱ་ཎཱ་ཡེ་བྷཱུར་རྩི་བྷཱུར་ཀི་བྷི་མ་ནཱ་སེ་ཨུ་ཙུཥྨ་ཀྲོ་དྷ་ཧཱུཾ་ཧཱུཾ་ཕཊ་ཕཊ་སྭཱཧཱ། ཞེས་པས་བསྐོར་བར་བསམ་མོ། །དེ་དག་ལས་འོད་འཕྲོས་འཕགས་པ་མཆོད། སེམས་ཅན་ཀྱི་དོན་བྱས། ཚུར་འདུས་རང་གི་སྡིག་པ་དང་སྒྲིབ་པ་ཉམས་གྲིབ་ལ་སོགས་པ་མི་གཙང་བ་ཐམས་ཅད་དག་པར་བསམ། བསོད་ནམས་དང་ཡེ་ཤེས་ཀྱི་ཚོགས་རྒྱས་པར་བསམ་ཞིང་། གོང་གི་སྔགས་བཟླ་བར་བྱའོ། །ཡང་རང་གཞན་གྱི་དོན་དུ་ཁྲུས་བྱེད་པར་འདོད་ན། རང་སྔར་བཤད་པ་ལྟར་ལྷར་བསྒོམ། མདུན་དུ་ཟངས་གཞོང་ལ་སོགས་པའི་སྣོད་ཁ་ཏེབ་ཀྱི་ནང་དུ། སྲོག་ཆགས་མེད་པའི་ཆུ་གཙང་མ་བླུག་ལ། དེའི་སྟེང་དུ་ཟླ་བའི་དཀྱིལ་འཁོར། དེའི་སྟེང་དུ་གོང་གི་སྔགས་ཀྱི་ཡིག་འབྲུ་ཁ་དོག་ལྗང་གུ་རྣམས་ཀྱིས་ཁེངས་པར་བསམ་མོ། །དེ་ནས་རང་གི་སྙིང་ག་ནས་ས་བོན་དང་ཡིག་འབྲུ་ལས་འོད་ཟེར་འཕྲོས་པས། མདུན་གྱི་ཡིག་འབྲུ་ལ་ཕོག །དེ་ལས་བདུད་རྩིའི་རྒྱུན་བབས་པར་བསམ་ཞིང་
གོང་གི་སྔགས་བཟླ་བར་བྱའོ། །བཟླས་པ་ཚར་བ་དང་། ཨརྒྷཾ་ལ་སོགས་པས་མཆོད་ནས། སྔགས་བཟླས་པའི་མཆིལ་མ་ཟངས་གཞོང་དུ་བཏབ་པས། ཟླ་བ་དང་ཡིག་འབྲུ་འོད་དུ་ཞུ་ནས་ཆུ་ལ་ཐིམ་པར་བསམས་ལ། རང་གཞན་གྱི་ཁོང་དུ་བཏང་བ་དང་། ཁྲུས་བྱས་ན། དམེ་དང་། མཛེ་དང་། ཡུག་ས་དང་། ཉམས་གྲིབ་ལ་སོགས་པ་མི་གཙང་བ་ཐམས་ཅད་སེལ་བའི་མཆོག་ཏུ་འགྱུར་རོ། །ཟས་དང་། གནས་དང་། གྲོགས་ལ་སོགས་པ་ཉམ་ང་བ་བྱུང་བའི་ཚེ་རང་ལྷར་དྲན་པ་ཙམ་བྱས་ལ། སྔགས་ལན་གསུམ་ཙམ་བཟླས་པས་ཐུབ་པར་ངེས་སོ། །འདིའི་བརྒྱུད་པ་ནི་རྡོ་རྗེ་སྨེ་བ་བརྩེགས་པ། དཔལ་ལྡན་ཨ་ཏི་ཤ། དགོན་པ་བ་དབང་ཕྱུག་རྒྱལ་མཚན། སྣེའུ་ཟུར་པ་ཡེ་ཤེས་འབར། དགྱེར་སྒོམ་གཞོན་ནུ་གྲགས། དཔོན་སྟོན་གཞོན་ནུ་འབྱུང་གནས། དཔལ་ལྡན་དགོན་པ་བ། བླ་མ་དོ་བ། བླ་མ་བཀྲ་ཤིས་རྒྱལ་མཚན། མགོན་པོ་ཚུལ་ཁྲིམས་སོ། །མངྒ་ལཾ། །