སངས་རྒྱས་སོ་ལྔའི་མངོན་རྟོགས་དང་། ལྷ་སྐུའི་ཕྱག་ཚད།
སངས་རྒྱས་སོ་ལྔའི་མངོན་རྟོགས་དང་། ལྷ་སྐུའི་ཕྱག་ཚད་བཞུགས་སོ། །
སངས་རྒྱས་སོ་ལྔའི་སྐུ་བྲི་བར་བརྩམས་པ་ན། ལྷ་བཟོས་སྐུ་མདོག་ཇི་ལྟར་འབྲི་མ་ཤེས་ནས། རྗེ་ལ་ཞུས་ཚེ་གསོལ་བ་བཏབ་པས་ཇི་ལྟར་བྲི་བའི་གོ་རིམ་དང་མཐུན་པར་སྐུའི་སྣང་བ་དངོས་སུ་བསྟན་པ་ལྟར་འབྲིར་བཅུག་པས་ཕྱི་ནས་ཀྱང་གཟིགས་པ། མདོ་དང་མཐུན་པའི་བཀོད་པའོ། །ཀླུ་དབང་རྒྱལ་པོ་མགུལ་ཕྱིན་མཐིང་ག །མགུལ་ཡན་དཀར་པོ། ན་བཟའ་གོས་འཁྱུད་པ། ཕྱག་གཉིས་ཐུགས་ཀར་རྡོ་རྗེ་ནང་བསྡམས་ཀྱིས་མཛུབ་མོ་གཉིས་བསྒྲེང་བའི་རྩེ་ཅུང་ཟད་མ་རེག་པའི་བར་དུ་མཐེ་བོང་གཤིབས་པ། ཤཱཀྱ་ཐུབ་པ་སེར་པོ་གཡས་ས་གནོན་གཡོན་མཉམ་གཞག །རྡོ་རྗེ་སྙིང་པོས་རབ་ཏུ་འཇོམས་པ་སེར་པོ། ཕྱག་གཉིས་ཆོས་འཆད། རིན་ཆེན་འོད་འཕྲོ་
དམར་པོ་ཕྱག་གཉིས་མཉམ་གཞག །དཔའ་བོའི་སྡེ་སེར་པོ། གཡས་སྐྱབས་སྦྱིན། གཡོན་ཐུགས་ཀར་ཐལ་མོ་ཅུང་ཟད་གཟུར་བ་ལས་མཐེ་བོང་དང་མཐིལ་ཕྱིར་བསྟན་པ། དཔལ་དགྱེས་སེར་པོ་ཕྱག་གཉིས་ཆོས་འཆད། རིན་ཆེན་མེ་དམར་པོ་ཐུབ་པ་འདྲ། རིན་ཆེན་ཟླ་འོད་དཀར་པོ་ཐུབ་པ་འདྲ། མཐོང་བ་དོན་ཡོད་ལྗང་གུ་དཔའ་བོའི་སྡེ་དང་འདྲ། རིན་ཆེན་ཟླ་བ་དཀར་པོ་ཆོས་འཆད། དྲི་མ་མེད་པ་མཐིང་ཁ་མཉམ་གཞག །དཔལ་སྦྱིན་སེར་པོ་ཆོས་འཆད། ཚངས་པ་སེར་པོ་ཐུབ་པ་འདྲ། ཚངས་པས་བྱིན་དམར་པོ་ཆོས་འཆད། ཆུ་ལྷ་དཀར་པོ་མཉམ་གཞག །ཆུ་ལྷའི་ལྷ་དཀར་པོ་ཆོས་འཆད། དཔལ་བཟང་སེར་པོ་དཔའ་བོའི་སྡེ་དང་འདྲ། ཙནྡན་
དཔལ་དཀར་པོ་ཐུབ་པ་དང་འདྲ། གཟི་བརྗིད་མཐའ་ཡས་དམར་པོ་ཆོས་འཆད། འོད་དཔལ་མཐིང་ཁ་ཆོས་འཆད། མྱ་ངན་མེད་པའི་དཔལ་དམར་སྐྱ་མཉམ་གཞག །སྲེད་མེད་ཀྱི་བུ་སེར་པོ་ཆོས་འཆད། མེ་ཏོག་དཔལ་སེར་པོ་དཔའ་བོའི་སྡེ་དང་འདྲ། ཚངས་པའི་འོད་ཟེར་སེར་པོ་ཐུབ་པ་འདྲ། པདྨའི་འོད་ཟེར་དམར་པོ་ཐུབ་པ་འདྲ། ནོར་དཔལ་མཐིང་ཁ་མཉམ་གཞག །དྲན་པའི་དཔལ་སེར་པོ་མཉམ་གཞག །མཚན་དཔལ་ཤིན་ཏུ་ཡོངས་གྲགས་དཀར་པོ་གཡས་ཆོས་འཆད། གཡོན་མཉམ་གཞག །དབང་པོ་ཏོག་གི་རྒྱལ་མཚན་མཐིང་ཁ་གཡས་རྒྱལ་མཚན་ཕྲག་པ་གཡོན་ཕྱོགས་སུ་བསྒྲེང་བ། གཡོན་པ་མཉམ་གཞག །ཤིན་ཏུ་རྣམ་པར་གནོན་པ་མཐིང་ཁ། གཡས་རལ་གྲི་ཐུགས་གར་འཛིན་པ། གཡོན་མཉམ་གཞག །གཡུལ་ལས་ཤིན་ཏུ་རྣམ་པར་རྒྱལ་བ་མཐིང་ཁ། ཕྱག་གཉིས་གོ་ཁྲབ་སེར་པོ་འཛིན་པ་རྣམ་པར་གནོན་པས་གཤེགས་པ་མཐིང་ཁ། ཕྱག་གཉིས་ས་གནོན། ཀུན་ནས་སྣང་བ་བཀོད་པ་དམར་པོ། རིན་ཆེན་པད་མས་རྣམ་པར་གནོན་པ་དམར་སེར། གཉིས་ཀ་གཡས་སྐྱབས་སྦྱིན། གཡོན་མཉམ་གཞག །རི་དབང་གི་རྒྱལ་པོ་སེར་པོ་ཕྱག་གཉིས་མཉམ་གཞག་གི་སྟེང་ན་རི་བོ་འཛིན་པའོ། །༈ ན་མོ་གུ་རུ་མཉྫུ་གྷོ་ཥཱ་ཡ། ལྷ་སྐུའི་ཕྱག་ཚད་རྒྱལ་བའི་གཟུགས་བརྙན་ལེགས་པར་བལྟ་བའི་མེ་ལོང་ཞེས་བྱ་བ། བླ་མ་དང་རྗེ་བཙུན་གསུང་གི་དབང་ཕྱུག་
ལ་གུས་པ་ཆེན་པོས་ཕྱག་འཚལ་ལོ། །རབ་མཛེས་མཚན་དཔེའི་ཉིན་བྱེད་སྐལ་ལྡན་མིག་གི་པདྨོར་བདུད་རྩིར་བཀོད་མཛད་ཅིང་། །ཚངས་དབྱངས་ནམ་མཁའི་རྔ་གསང་སྒྲོག་པས་ཆར་འདོད་སྲིད་ཞིའི་སྙིང་གི་གདུང་བ་སེལ། །གང་ཐུགས་མཁའ་ལྟར་སྤྲོས་པས་དབེན་ཡང་ཤེས་བྱའི་རྒྱུ་སྐར་མཐའ་དག་གསལ་མཛད་པའི། །རྗེ་བཙུན་འཇམ་དབྱངས་མཁྱེན་བརྩེའི་སྤྱན་རས་ཀུན་ཏུ་གཡོ་བས་དགེ་ལེགས་སྩོལ་གྱུར་ཅིག །གང་གིས་མཛད་པའི་རྣམ་སྤྲུལ་པ། །འཕགས་ཡུལ་བི་ཤཱ་ཀརྨ་དང་། །གངས་ཅན་བསོད་ནམས་རྒྱལ་མཚན་སོགས། སྐྱེ་དགུའི་ཕུན་ཚོགས་ཞིང་གྱུར་པའི། །མཁས་མཆོག་རྣམས་ལ་གུས་ཕྱག་འཚལ། །བློ་གསལ་རིག་པ་འཛིན་པ་ཡི། །དོན་གཉེར་བུང་བའི་གླུས་བསྐུལ་བས། །གཟུགས་སྐུའི་མཚན་ཉིད་པདྨོའི་ནགས། །བདག་བློའི་ཟེར་གྱིས་འབྱེད་པར་བྱ། །དེའང་ཐོག་མར་སྐུ་གཟུགས་ཀྱི་ཕན་ཡོན་བསྟན་པའི་སྒོ་ནས་རང་རྒྱུད་ལ་དད་པ་འདྲེན་ནུས་པ་ཞིག་གལ་ཆེ་བར་སྣང་བས། རྒྱུད་དང་མདོ་ཡི་ཕན་ཡོན་བཤད་པ་དང་། །བདེ་གཤེགས་སྐུ་གཟུགས་མཆོད་པའི་བསོད་ནམས་དང་། །ཐལ་མོ་བཅུ་དང་ཐལ་མོ་དགུ་པ་དང་། །གདོང་བ་བརྒྱད་པའི་ཚད་ཀྱི་མཚན་ཉིད་དེ། །ཚད་དང་མི་ལྡན་ཉེས་པའི་སྐྱོན་རྣམས་དང་། །ལྷ་བཟོ་སྦྱིན་བདག་མཚན་ཉིད་འདི་དྲུག་བཤད། །དཔལ་གསང་བ་འདུས་པ་ལས། །མཆོད་རྟེན་སངས་རྒྱས་ཐམས་
ཅད་ཀྱི། །བཞུགས་གནས་ཕོ་བྲང་ཡིན་པར་བཤད། །ཅེས་པ་དང་། བདེ་མཆོག་སྡོམ་པ་འབྱུང་བའི་རྒྱུད་ལས། སྔགས་པ་ལས་ནི་དང་པོ་བས། །གཟུགས་བརྙན་ལ་སོགས་བྱ་བ་སྟེ། །བྲིས་སྐུ་བསྒྲུབས་ན་མྱུར་བར་ནི། །དངོས་གྲུབ་རྒྱ་ཆེན་ཐོབ་པར་འགྱུར། །ཞེས་དང་། འཇམ་དཔལ་རྩ་བའི་རྟོག་པར་ཡང་། ལུས་སྦྱང་བ་བྱས་ལ། རང་གི་ལག་གིས་མཆོད་རྟེན་བྱས་ན་མཚམས་མེད་པ་ལྔ་བྱས་པས་ཀྱང་འགྲུབ་བོ། །མཆོད་རྟེན་འབུམ་བྱས་ན་རིག་པ་འཛིན་པའི་འཁོར་ལོས་བསྒྱུར་བར་འགྱུར་ཏེ། བསྟན་བཅོས་ཐམས་ཅད་མངོན་པར་ཤེས་པ་ལ་ཐམས་ཅད་ཤེས་པ་དང་ལྡན་ཞིང་། བསྐལ་པར་གནས་ལ། ཤི་ནས་ཀྱང་སྐྱེ་བ་རྣམས་སུ་རྒྱལ་པོ་བྱེད་ཅིང་ངན་སོང་དུ་མི་འགྲོ། ཡུལ་དབུས་སུ་ཉི་མ་ཤར་བ་ལྟ་བུའི་དབང་པོ་ཐམས་ཅད་དང་ལྡན་པར་འགྱུར། ཐོས་པ་འཛིན་པ་དང་སྐྱེ་བ་དྲན་པར་འགྱུར་རོ། །ཡང་། བསྐལ་པ་བྱེ་བར་བྱས་པའི་སྡིག །ཤིན་ཏུ་མི་བཟད་གང་ཡིན་པ། །ས་སྟེང་རི་མོ་མཐོང་བ་ཡིས། །དེ་ཡི་མོད་ལ་བྱང་བར་བྱེད། ཅེས་དང་། འཇིག་རྟེན་དོན་དུ་སྐྱོབ་པ་ཡི། །སྐུ་གདུང་རྣམས་ལ་མཆོད་བྱེད་ན། །དེས་ནི་བདེ་བ་མྱོང་འགྱུར་ཏེ། །མི་ཉུང་ལྷ་ཡི་འཇིག་རྟེན་དུ། །རྒྱལ་པོའམ་ཡང་ན་ལོངས་སྤྱོད་དང་། །རྙེད་དཀའ་སྔགས་ཀྱི་དངོས་གྲུབ་རྣམས། །རྣམ་པ་སྣ་ཚོགས་རྙེད་པ་དང་། །འགྲོ་དང་སྤྱོད་པ་སྣ་ཚོགས་དང་། །འཇིག་རྟེན་ཕུན་སུམ་ཚོགས་པའི་མཆོག །གདུགས་དང་ཐར་པ་རྣམ་གསུམ་
རྒྱན། །སྐུ་གདུང་རྣམས་ནི་མཆོད་བྱས་ན། །དངོས་གྲུབ་རྣམས་ནི་ཐོབ་པར་འགྱུར། །ཞེས་གསུངས་ཤིང་། འཕགས་པ་དོན་དམ་མངོན་པར་ངེས་པའི་མདོར། རྒྱལ་བའི་དབང་པོས་བཀའ་སྩལ་པ། དེ་བཞིན་གཤེགས་པའི་སྐུ་སྲེད་མེད་ཀྱི་བུ་ཆེན་པོ་ལྟ་བུར་ཀུན་ཏུ་མཛེས་པ་འདི་ནི་སྔོན་དེ་བཞིན་གཤེགས་པའི་སྐུ་གཟུགས་བྱས་པ་དང་། མཆོད་རྟེན་ཞིག་པ་བཅོས་པ་དང་། གཞན་དག་འཇིགས་པ་ལ་དབུགས་དབྱུང་བ་བྱས་པས་འགྲུབ་ཅེས་གསུངས་ཤིང་། དེ་བཞིན་གཤེགས་པའི་གཟུགས་བརྙན་བཞེངས་པའི་ཕན་ཡོན་ཡང་དག་པར་བརྗོད་པའི་མདོ་ལས་ཀྱང་། དགེ་སློང་དག །དེ་བཞིན་གཤེགས་པའི་གཟུགས་བརྙན་བྱེད་པའི་གང་ཟག་སྦྱིན་པ་པོ་ལ། ཕན་ཡོན་ལྔ་ཡོད་དེ། ལྔ་གང་ཞེ་ན། གཞལ་མེད་ཁང་ཆེན་པོར་གནས་པ་དང་། བོངས་ཚོད་བཟང་བར་གྲགས་པ་དང་། སྤྲོ་བ་མང་བ་དང་། ཚེ་རིང་བ་དང་། གྲགས་པ་དང་ལྡན་པ་དང་། བདེ་བ་མང་བ་སྟེ། དགེ་སློང་དག་འདི་ནི་དེ་བཞིན་གཤེགས་པའི་གཟུགས་བརྙན་བྱེད་པའི་གང་ཟག་སྦྱིན་པ་པོའི་ཕན་ཡོན་དང་པོ་ཡིན་ནོ། །གཞན་ཡང་། ཕྱུག་པ་དང་། ནོར་མང་བ་དང་། ལོངས་སྤྱོད་ཆེ་བ་དང་། ཡོ་བྱད་མང་བ་དང་། བདག་དབང་བ་དང་། བདག་གིར་བྱ་བ་མང་བ་དང་། ནོར་དང་། འབྲུ་དང་། དབྱིག་དང་། གསེར་དང་། མཛོད་དང་། བང་བའི་ཚོགས་མང་བ་དང་། རྟ་དང་། གླང་པོ་ཆེ་དང་། བ་ལང་དང་། ལུག་དང་། བྲན་
ཕོ་དང་། བྲན་མོ་དང་། ལས་བྱེད་པ་དང་། ཞོ་ཤས་འཚོ་བ་མང་བ་དང་། བློན་པོ་དང་། མཛའ་བཤེས་དང་། གཉེན་དང་། སྣག་གི་གཉེན་མཚམས་མང་པོར་འགྱུར་ཏེ། དགེ་སློང་དག །འདི་ནི་ཕན་ཡོན་གཉིས་པ་ཡིན་ནོ། །དགེ་སློང་དག་གཞན་ཡང་། གཟུགས་བཟང་བ་དང་། ལྟ་ན་སྡུག་པ་དང་། མཛེས་པ་དང་། མདོག་གསེར་ལྟར་བཟང་བ་དང་། མགོ་གདུགས་ལྟར་ཟླུམ་པ་དང་། ལག་པ་རིང་བ་དང་། དཔྲལ་བའི་དབྱེས་ཆེ་བ་དང་། སྨིན་མཚམས་བར་མ་ཆད་པ་དང་། ཡན་ལག་དང་ཉིང་ལག་ཐམས་ཅད་དང་ལྡན་པ་དང་། རྒྱན་ཐམས་ཅད་ཀྱིས་བརྒྱན་པར་འགྱུར་ཏེ། དགེ་སློང་དག་འདི་ནི་ཕན་ཡོན་གསུམ་པ་ཡིན་ནོ། །དགེ་སློང་དག་གཞན་ཡང་། འཁོར་ལོས་བསྒྱུར་བའི་རྒྱལ་པོ་འཁོར་བཟང་པོ། རིན་པོ་ཆེ་སྣ་བདུན་དང་ལྡན་པ། བུ་སྟོང་གིས་བསྐོར་བར་འགྱུར་ཏེ། དེའི་བུའམ། ཆུང་མའམ། བྲན་ནམ་ཉེ་བར་འཚོ་བ་གང་ཡིན་པ་དེ་དག་ཐམས་ཅད་དེ་ལ་གུས་པར་ཉན་པ་དང་། བཀའ་ཉན་པར་བྱེད་དེ། དགེ་སློང་དག་འདི་ནི་ཕན་ཡོན་བཞི་པའོ། །དགེ་སློང་དག་གཞན་ཡང་། དེ་ལུས་དང་བྲལ་ན། བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་སུ་སྐྱེ་བར་འགྱུར་ཏེ། དེར་སྐྱེས་ནས། ལྷའི་རྒྱལ་པོ་ཁྱད་པར་ཅན། ལྷ་དང་ལྷའི་བུ་དང་། ལྷའི་བུ་མོ་རྣམས་ཀྱི་རྟེན་དུ་འགྱུར་ལ། གནས་བཅུ་པོ་ལྷའི་ཚེ་དང་། ལྷའི་མདོག་དང་། ལྷའི་སྟོབས་དང་། ལྷའི་བདེ་བ་དང་། ལྷའི་དབང་ཕྱུག་ལ་དབང་བྱེད་པ་དང་། ལྷའི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྣམས་ཀྱིས་དགའ་བར་བྱེད་དེ། དགེ་སློང་དག་འདི་ནི་དེ་བཞིན་གཤེགས་པའི་གཟུགས་
བརྙན་བྱེད་པའི་གང་ཟག་སྦྱིན་པ་པོའི་ཕན་ཡོན་ལྔ་པ་ཡིན་ནོ། །ཞེས་བཀའ་སྩལ་ཏོ། །འཕགས་པ་སའི་སྙིང་པོ་འཁོར་ལོ་བཅུ་པ་ལས་ཀྱང་། རིགས་ཀྱི་བུ། གཞན་ཡང་འདི་ལྟ་སྟེ། གལ་ཏེ་ཕ་རོལ་ཏུ་ཕྱིན་པ་ཐོབ་པ་རྣམ་པར་གྲོལ་བ་བརྒྱད་དང་ལྡན་པ། བསམ་གཏན་ལ་སྙོམས་པར་ཞུགས་པའི་དགྲ་བཅོམ་པ་ཆེན་པོ་ཤ་སྟག་གིས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡོངས་སུ་གང་བ་ནི། འདི་ལྟ་སྟེ། འབྲས་ཀྱི་ལྗང་བུའམ། ཏིལ་ལམ། འོད་མའམ། འདམ་བུའམ། བུ་རམ་ཤིང་གི་ཚལ་ལྟ་བུར་གྱུར་ལ། དེ་དག་ཐམས་ཅད་བཅིང་བ་ལྔས་བཅིངས་ནས་ལོ་བརྒྱ་སྟོང་སྙེད་ལོན་པ་ལས། མཐུ་ཆེན་པོ་དང་ལྡན་པའི་གང་ཟག་གཅིག་འཇིག་རྟེན་དུ་མངོན་པར་བྱུང་སྟེ། བསོད་ནམས་འདོད་པའི་ཕྱིར་དེ་དག་གི་བཅིང་བ་ཐམས་ཅད་བཀྲོལ་ནས། དགྲ་བཅོམ་པ་དེ་དག་ཐམས་ཅད་སྤོས་ཆུས་བཀྲུས་ཏེ། ཆོས་གོས་དང་ལྷུང་བཟེད་ལོ་བརྒྱ་སྟོང་གི་བར་དུ་ཕུལ་ནས། གནས་ཁང་དང་། ཁྲི་སྟན་དང་། གོས་དང་། བསོད་སྙོམས་དང་། ནད་ཀྱི་གསོས་སྨན་དང་། འཚོ་བའི་ཡོ་བྱད་རྣམ་པ་སྣ་ཚོགས་ཀྱང་ཡིད་བཞིན་དུ་བྱེད་ལ། དགྲ་བཅོམ་པ་དེ་དག་མྱ་ངན་ལས་འདས་ནས་ཀྱང་། མཆོད་པ་བྱས་ཏེ་བསྲེགས་ནས་དེ་དག་གི་རིང་བསྲེལ་བསྡུས་ནས་རིན་པོ་ཆེ་སྣ་བདུན་གྱིས་མཆོད་དམ་དེ་མཆོད་རྟེན་གྱི་ནང་དུ་བཅུག་གོ །གཞན་ཡང་། རིན་པོ་ཆེའི་རྒྱལ་མཚན་དང་། བ་དན་དང་། གདུགས་དང་།
སྤོས་དང་། མེ་ཏོག་དང་། རོལ་མོ་རྣམ་པ་སྣ་ཚོགས་ཀྱིས་མཆོད་པའི་བསོད་ནམས་ཀྱི་ཕུང་པོ་བས། སངས་རྒྱས་ཀྱི་རིང་བསྲེལ་གྱི་ཕྱིར་མཆོད་རྟེན་བརྩིགས་པའི་བསོད་ནམས་ཀྱི་ཕུང་པོ་མང་སྟེ། དགྲ་བཅོམ་པ་བཅིངས་པ་བཀྲོལ་ཏེ་མཆོད་པ་བྱས་པའི་བསོད་ནམས་ཀྱིས་བརྒྱའི་ཆར་ཡང་ཉེ་བར་མི་འགྲོ། སྟོང་གི་ཆ་དང་། བརྒྱ་སྟོང་གི་ཆ་དང་། བྱེ་བའི་ཆ་དང་། ཁྲག་ཁྲིག་གི་ཆར་ཡང་ཉེ་བར་མི་འགྲོ་བས་ན། རྩིས་ཀྱི་ཆ་དང་། གྲངས་ཀྱི་ཆ་དང་། དཔེའི་ཆའམ། རྒྱུའི་ཆར་ཡང་ཉེ་བར་མི་འགྲོའོ། །ཞེས་གསུངས་སོ། །འཕགས་པ་རྨད་དུ་བྱུང་བའི་མདོར་ཡང་། ཛམྦུའི་གླིང་དཔག་ཚད་བདུན་སྟོང་པ་དང་། ལུས་འཕགས་ཀྱི་གླིང་དཔག་ཚད་བརྒྱད་སྟོང་པ་དང་། བ་ལང་སྤྱོད་ཀྱི་གླིང་དཔག་ཚད་དགུ་སྟོང་པ་དང་། སྒྲ་མི་སྙན་གྱི་གླིང་དཔག་ཚད་སྟོང་ཕྲག་བཅུ་པ་དང་། ལྷའི་དབང་པོའི་ཁང་བཟང་རྣམ་པར་རྒྱལ་བྱེད་རྣམས་རིན་པོ་ཆེ་སྣ་བདུན་གྱི་རང་བཞིན་དུ་བྱས་ཏེ། དད་པའི་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་རྒྱུན་ཏུ་ཞུགས་པ་རྣམས་དང་། ལན་ཅིག་ཕྱིར་འོང་བ་རྣམས་དང་། ཕྱིར་མི་འོང་བ་རྣམས་དང་། དགྲ་བཅོམ་པ་རྣམས་དང་། རང་སངས་རྒྱས་རྣམས་དང་། ཕྱོགས་བཞིའི་དགེ་སློང་གི་དགེ་འདུན་ལ་ཕུལ་བ་བས། གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པའི་མཆོད་རྟེན་འཇིམ་
པ་ལས་སྐྱ་རུ་རའི་འབྲས་བུ་ཙམ་བྱས་ལ། ཁབ་ཙམ་གྱི་སྲོག་ཤིང་བཙུགས་ཏེ། རྒྱ་ཤུག་གི་ལོ་མ་ཙམ་གྱི་གདུགས་གསོལ་ནས། ནས་ཀྱི་འབྲུ་ཙམ་གྱི་སྐུ་གཟུགས་བྱས་ལ། ཡུངས་འབྲུ་ཙམ་གྱི་རིང་བསྲེལ་བཅུག་ན། དེ་ནི་དེ་བས་བསོད་ནམས་ཆེའོ་ཞེས་ང་སྨྲའོ། །ཀུན་དགའ་བོ་ཛམྦུའི་གླིང་ཡང་ལྟ་ཞོག །ཤར་གྱི་ལུས་འཕགས་གླིང་ཡང་ལྟ་ཞོག །ནུབ་ཀྱི་བ་ལང་སྤྱོད་ཀྱང་ལྟ་ཞོག །བྱང་གི་སྒྲ་མི་སྙན་ཡང་ལྟ་ཞོག །ལྷའི་དབང་པོ་བརྒྱ་བྱིན་གྱི་ཁང་བཟང་རྣམ་པར་རྒྱལ་བྱེད་ཅེས་བྱ་བའང་ལྟ་ཞོག་སྟེ། ཀུན་དགའ་བོ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡོད་དེ། དེ་རིགས་ཀྱི་བུའམ། རིགས་ཀྱི་བུ་མོ་དད་པ་གང་ལ་ལ་ཞིག་གིས། རིན་པོ་ཆེ་སྣ་བདུན་གྱི་རང་བཞིན་དུ་བྱས་ཏེ། རྒྱུན་ཏུ་ཞུགས་པ་རྣམས་དང་། ལན་ཅིག་ཕྱིར་འོང་བ་རྣམས་དང་། ཕྱིར་མི་འོང་བ་རྣམས་དང་། དགྲ་བཅོམ་པ་རྣམས་དང་། རང་སངས་རྒྱས་རྣམས་དང་། ཕྱོགས་བཞིའི་དགེ་སློང་གི་དགེ་འདུན་ལ་ཕུལ་བ་བས། གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པའི་མཆོད་རྟེན་འཇིམ་པ་ལས་སྐྱུ་རུ་རའི་འབྲུ་ཙམ་དུ་བྱས་ལ། ཁབ་ཙམ་གྱི་སྲོག་ཤིང་བཙུགས་ཏེ། རྒྱ་ཤུག་གི་ལོ་མ་ཙམ་གྱི་གདུགས་གསོལ་ནས། ནས་ཀྱི་འབྲུ་ཙམ་གྱི་སྐུ་གཟུགས་བྱས་ལ། ཡུངས་འབྲུ་ཙམ་གྱི་རིང་བསྲེལ་
བཅུག་ན། དེ་ནི་དེ་བས་ཆེས་བསོད་ནམས་ཆེའོ། །ཞེས་ང་སྨྲའོ། །དེ་ཅིའི་ཕྱིར་ཞེ་ན། ཀུན་དགའ་བོ། དེ་བཞིན་གཤེགས་པ་ནི་ཡེ་ཤེས་དཔག་ཏུ་མེད་པའོ། །ཚུལ་ཁྲིམས་དཔག་ཏུ་མེད་པའོ། །བཟོད་པ་དཔག་ཏུ་མེད་པ། བརྩོན་འགྲུས་དཔག་ཏུ་མེད་པ། བསམ་གཏན་དཔག་ཏུ་མེད་པ། ཤེས་རབ་དཔག་ཏུ་མེད་པ། བྱམས་པ་དཔག་ཏུ་མེད་པ། སྙིང་རྗེ་དཔག་ཏུ་མེད་པ། དགའ་བ་དཔག་ཏུ་མེད་པ། བཏང་སྙོམས་དཔག་ཏུ་མེད་པ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། སྟོབས་བཅུ་དང་། མི་འཇིགས་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་དྲན་པ་ཉེ་བར་བཞག་པ་གསུམ་དང་། སྙིང་རྗེ་ཆེན་པོ་མ་འདྲེས་པ་སྟེ། ཀུན་དགའ་བོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། ཡོན་ཏན་དཔག་ཏུ་མེད་པའི་ཕྱིར་རོ། །ཞེས་གསུངས་སོ། །ལས་རྣམ་པར་འབྱེད་པའི་མདོར་ཡང་། བྲམ་ཟེའི་ཁྱེའུ་ནེ་ཙོ་ལ་བཀའ་སྩལ་པ། དེ་བཞིན་གཤེགས་པའི་མཆོད་རྟེན་བཞེངས་པའི་ཕན་ཡོན་བཅོ་བརྒྱད་དེ། བཅོ་བརྒྱད་པོ་གང་ཞེ་ན། རྒྱལ་པོ་ཆེན་པོའི་ཁྱིམ་དུ་སྐྱེ་བ་དང་། གཟུགས་བཟང་བ་དང་། མཛེས་ཤིང་མིག་ཏུ་སྡུག་པར་འགྱུར་བ་དང་། དབང་པོ་རྣོ་བར་འགྱུར་བ་དང་། ལུས་རྡོ་རྗེའི་ཚོགས་ལྟར་འགྱུར་བ་སྟེ། གཡོག་འཁོར་ཆེན་པོར་འགྱུར་བ་དང་། གཡོག་འཁོར་མི་ཕྱེད་པ་དང་། ལོངས་སྤྱོད་ཆེན་པོར་འགྱུར་བ་དང་། མངོན་དུ་འགྲོ་བར་
བྱ་བར་འགྱུར་བ་དང་། བརྟན་དུ་འགྱུར་བ་དང་། ཕྱོགས་བཅུར་བརྗོད་པ་དང་། སྒྲ་དང་། ཚིགས་སུ་བཅད་པ་རྒྱ་ཆེན་པོ་མངོན་དུ་འབྱུང་བར་འདོད་པ་དང་། ལྷ་དང་མིས་མཆོད་པར་འགྱུར་བ་དང་། ནོར་མང་པོ་དང་ལྡན་པར་འགྱུར་བ་དང་། འཁོར་ལོས་བསྒྱུར་བའི་རྒྱལ་སྲིད་ཐོབ་པར་འགྱུར་བ་དང་། ཚེ་དང་ལྡན་པར་འགྱུར་བ་དང་། ལུས་རྡོ་རྗེའི་ཚོགས་ལྟར་འགྱུར་བ་དང་། ལུས་མཚན་དང་དཔེ་བྱད་ཀྱིས་བརྒྱན་པར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅོ་བརྒྱད་པོ་འདི་དག་ནི་དེ་བཞིན་གཤེགས་པའི་སྐུ་བཞེངས་པའི་ཕན་ཡོན་ནོ། །ཞེས་གསུངས་སོ། །གསལ་རྒྱལ་གྱིས་ཞུས་པའི་མདོར་ཡང་། ཐུབ་པའི་དབང་པོའི་མཆོད་རྟེན་བཞེངས་པ་ཡིས། །མྱ་ངན་རྣམས་བསལ་ལུས་ཀུན་རྒྱས་པ་ཡི། །གཙོ་བོར་གྱུར་པའི་རིན་ཆེན་མཛོད་མང་དང་། །ས་སྟེང་དགྲ་ཡི་ཚོགས་ལས་རྒྱལ་བར་འགྱུར། །ཞེས་འབྱུང་ངོ་། །ཡོངས་སུ་མྱ་ངན་ལས་འདས་པ་ཆེན་པོའི་མདོར། རྟག་ཏུ་དགའ་བའི་སེམས་བསྐྱེད་དེ། །སངས་རྒྱས་གཟུགས་སམ་རྟེན་ཡང་རུང་། །མཐེ་བོང་ཙམ་ཞིག་གང་བྱས་པ། །མི་གཡོ་ཞིང་དེར་སྐྱེ་བར་འགྱུར། །ཞེས་བཀའ་སྩལ་ཏོ། །བུ་མོ་རྣམ་དག་གིས་ཞུས་པ་ལས་གསུངས་པ། གཞན་ཡང་བུ་མོ། བྱང་ཆུབ་སེམས་དཔའ་ནི་ཆོས་རྣམ་པ་བརྒྱད་དང་ལྡན་པའི་ཕྱིར་སངས་རྒྱས་རྣམས་ཀྱི་སྤྱན་སྔར་པདྨ་
ལས་བརྫུས་ཏེ་སྐྱེ་བར་འགྱུར་རོ། །བརྒྱད་གང་ཞེ་ན། སྲོག་ལ་བབ་པར་གྱུར་ཀྱང་། གཞན་གྱི་ཉེས་པ་མི་བརྗོད་པ་དང་། སེམས་ཅན་རྣམས་དཀོན་མཆོག་གསུམ་ལ་སྐྱབས་སུ་འགྲོ་བར་བསྐུལ་བ་དང་། ཐམས་ཅད་བྱང་ཆུབ་ཀྱི་སེམས་ལ་འགོད་པ་དང་། ཚངས་པར་སྤྱོད་པ་ལ་གོས་པ་མེད་པ་དང་། དེ་བཞིན་གཤེགས་པའི་སྐུ་གཟུགས་དག་བྱས་ནས་པདྨའི་གདན་ལ་འཇོག་པ་དང་། སེམས་ཅན་མྱ་ངན་བྱེད་པ་དག་གི་མྱ་ངན་སེལ་བར་བྱེད་པ་དང་། ཁེངས་ཤིང་ང་རྒྱལ་བྱེད་པ་དག་གི་མདུན་དུ་རྟག་པར་བདག་ཉིད་དམན་པར་བྱེད་པ་དང་། གཞན་ལ་འཚེ་བར་མི་བྱེད་པ་གང་ཡིན་པའོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། གལ་ཏེ་སྡུག་བསྔལ་གཟིར་གྱུར་ཀྱང་། །ནམ་ཡང་གཞན་གྱི་སྐྱོན་མི་སྨྲ། །རྟག་པར་དཀོན་མཆོག་གང་བསྔགས་པ། །སངས་རྒྱས་སྤྱན་སྔར་བརྫུས་ཏེ་སྐྱེ། །བྱང་ཆུབ་སེམས་ནི་བསྐྱེད་པ་དང་། །ཐམས་ཅད་མཁྱེན་པར་ཉེར་བསྐུལ་ནས། །རྟག་ཏུ་ཚངས་པར་གང་སྤྱོད་པ། །སངས་རྒྱས་སྤྱན་སྔར་བརྫུས་ཏེ་སྐྱེ། །གསེར་གྱིས་སངས་རྒྱས་གཟུགས་བརྒྱན་ཏེ། །རིན་ཆེན་པདྨའི་གདན་ལ་བཞག །སེམས་ཅན་མྱ་ངན་གང་སེལ་བ། །སངས་རྒྱས་སྤྱན་སྔར་བརྫུས་ཏེ་སྐྱེ། །ང་རྒྱལ་བྱེད་པ་དེ་དག་ལ། །སློབ་མ་བཞིན་དུ་བདག་དམན་ཞིང་། །གཞན་ལ་གང་ཞིག་མི་འཚེ་བ། །སངས་རྒྱས་སྤྱན་སྔར་བརྫུས་ཏེ་སྐྱེ། །ཞེས་སོ། །བུ་མོ་རིན་ཆེན་གྱིས་ཞུས་པ་ལས། དེ་བཞིན་
གཤེགས་པའི་སྐྱེས་བུ་ཆེན་པོའི་མཚན་ཐུ་བོ་ཆེ་ཆེན་པོའི་ལུས་ཀུན་ནས་མཛེས་པ་འདི་ནི། སྔོན་དེ་བཞིན་གཤེགས་པའི་སྐུ་གཟུགས་བཞེངས་པ་དང་། མཆོད་རྟེན་ཞིག་པ་བཅོས་པ་དང་། གཞན་འཇིགས་པ་དག་དབུགས་ཕྱུང་བ་དང་། སེམས་ཅན་མི་མཐུན་པ་སྡུམ་བྱས་པས་འགྲུབ་སྟེ། བུ་མོ། སྔོན་དགེ་བའི་རྩ་བའི་ཆོས་ཚད་མེད་གྲངས་མེད་པ་འདི་དག་སྤྱད་པས། དེ་བཞིན་གཤེགས་པའི་སྐུ་ལ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་མངོན་པར་འགྲུབ་བོ། །ཞེས་དང་། འཕགས་པ་དཀོན་མཆོག་སྤྲིན་ལས་ཀྱང་། རིགས་ཀྱི་བུ། བྱང་ཆུབ་སེམས་དཔའི་ཆོས་བཅུ་དང་ལྡན་ན་མངལ་གྱི་དྲི་མས་མ་གོས་པར་སྐྱེའོ། །བཅུ་གང་ཞེ་ན། འདི་ལྟ་སྟེ། དེ་བཞིན་གཤེགས་པའི་སྐུ་གཟུགས་བཞེངས་པ་དང་། མཆོད་རྟེན་ཞིག་པ་གསོ་བ་དང་། དེ་བཞིན་གཤེགས་པའི་མཆོད་རྟེན་ལ་སྤོས་ཀྱི་བྱུག་པ་འབུལ་བ་དང་། ཁྲུས་ཀྱི་སྤོས་ཆུ་འབུལ་བ་དང་། ཕྱག་བདར་བྱ་བ་དང་། སྐྱང་ནུལ་བྱ་བ་འབུལ་བ་དང་། ཕ་མ་ལ་ལུས་ཀྱི་རིམ་གྲོ་བྱེད་པ་དང་། མཁན་པོ་དང་སློབ་དཔོན་ལ་ལུས་ཀྱི་རིམ་གྲོ་བྱེད་པ་དང་། ཚངས་པ་མཚུངས་པར་སྤྱོད་པ་རྣམས་ལ་ལུས་ཀྱི་རིམ་གྲོ་བྱེད་པ་དང་། དེ་དག་ཀྱང་ཟང་ཟིང་མེད་པའི་སེམས་ཀྱིས་ཏེ། ཟང་ཟིང་དང་བཅས་པའི་སེམས་ཀྱིས་མ་ཡིན་པ་དང་། དགེ་བའི་རྩ་བ་དེའང་འདི་ལྟར་དགེ་བའི་རྩ་བ་འདིས་སེམས་ཅན་ཐམས་ཅད་མངལ་གྱི་དྲི་མས་མ་གོས་པར་སྐྱེ་བར་གྱུར་ཅིག །ཅེས་ཡོངས་སུ་བསྔོ་ཞིང་། དེའང་བསམ་
པ་ཐག་པ་ནས་སེམས་པ་སྟེ། རིགས་ཀྱི་བུ། ཆོས་བཅུ་པོ་དེ་དག་དང་ལྡན་ན་མངལ་གྱི་དྲི་མས་མ་གོས་པར་སྐྱེའོ། །པདྨ་དཀར་པོའི་མདོར་ཡང་བཀའ་སྩལ་པ། རྒྱལ་བ་མྱ་ངན་འདས་པ་དེ་དག་གི །རྒྱལ་བའི་རིང་བསྲེལ་དག་ལ་སུ་མཆོད་ཅིང་། །རིང་བསྲེལ་མཆོད་རྟེན་སྟོང་ཕྲག་དུ་མ་དག །གསེར་དང་དངུལ་དང་འོན་ཏེ་ཤེལ་གྱི་འམ། །རྡོ་ཡི་སྙིང་པོའི་མཆོད་རྟེན་གང་གིས་བྱས། །བཻ་ཌཱུརྱ་མཆོག་དེ་བཞིན་ཨནྡ་རྙིལ། །ལ་ལས་མུ་ཏིག་ཀེ་ཀེ་རུ་ལས་བྱས། །དེ་དག་གིས་ཀྱང་བྱང་ཆུབ་ཐོབ་པར་འགྱུར། །གང་གིས་མཆོད་རྟེན་རྡོ་ལས་བྱས་པ་དང་། །གང་གིས་ཨ་ཀ་རུ་འམ་ཙནྡན་ནམ། །གང་གིས་ཐང་ཤིང་མཆོད་རྟེན་བྱས་པ་དང་། །ལ་ལས་ཤིང་ངམ་གཞན་ལས་བྱས་པ་དང་། །ས་འམ་སོ་ཕག་ལ་ནི་བརྩིགས་པ་ཡི། རྒྱལ་བའི་མཆོད་རྟེན་དགའ་བཞིན་བྱས་པ་དང་། །དེ་ཕྱིར་ས་རྡུལ་ཕུང་པོ་དག་ལས་ཀྱང་། །མྱ་ངམ་དགོན་པ་དག་ཏུ་བྱས་པ་དང་། །བྱིས་པ་རྩེད་མོའི་ཕྱིར་དང་དེ་དག་ཏུ། །གང་གིས་རྒྱལ་བ་དེ་ཕྱིར་མཆོད་རྟེན་དག །བྱེ་མ་ལས་ནི་ཕུང་པོར་བྱས་པ་ཡང་། །དེ་རྣམས་ཀྱིས་ཀྱང་བྱང་ཆུབ་ཐོབ་པར་འགྱུར། །ལ་ལས་དེ་བཞིན་རིན་ཆེན་གཟུགས་བྱས་པ། །སུམ་ཅུ་རྩ་གཉིས་མཚན་དང་ལྡན་པའི་གཟུགས། །གང་གིས་དེ་ཕྱིར་བྱས་པ་དེ་དག་ཀྱང་། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །ལ་ལས་དེར་ནི་རིན་ཆེན་སྣ་བདུན་དང་། །ལ་ལས་དེ་བཞིན་ཟངས་དང་འཁར་བ་ལ། །བདེ་བར་གཤེགས་པ་རྣམས་ཀྱི་གཟུགས་བྱས་པ། །དེ་དག་
ཐམས་ཅད་བྱང་ཆུབ་ཐོབ་པར་འགྱུར། །ཞ་ཉེ་དང་ནི་ལྕགས་སམ་ས་ཡང་རུང་། །བདེ་བར་གཤེགས་པ་རྣམས་ཀྱི་གཟུགས་བྱས་ཏེ། །ལྟ་ན་སྡུག་པའི་འཇིམ་པའི་ལས་བྱེད་བཅུག །དེ་དག་ཐམས་ཅད་བྱང་ཆུབ་ཐོབ་པར་འགྱུར། །གང་གིས་རྩིག་ངོས་གཟུགས་ཀྱི་རི་མོ་དག །བསོད་ནམས་རྒྱལ་མཚན་ཡོངས་སུ་རྫོགས་པའི་སྐུ། །བདག་གིས་བྲིས་སམ་འདྲི་རུ་བཅུག་ཀྱང་རུང་། །དེ་དག་ཐམས་ཅད་བྱང་ཆུབ་ཐོབ་པར་འགྱུར། །སྐྱེས་བུ་དག་གམ་འོན་ཏེ་གཞོན་ནུའང་རུང་། །གང་དག་ལ་ལ་དེ་ན་སློབ་པའི་ཚེ། །རྩེད་མོ་དག་དང་གསར་བ་བྱེད་པ་ན། །རྩིག་ངོས་སེན་མོ་ཤིང་བུས་གཟུགས་བྲིས་པ། །དེ་དག་ཐམས་ཅད་བྱང་ཆུབ་ཐོབ་འགྱུར་ཏེ། །དེ་དག་ཐམས་ཅད་སྙིང་པོ་ཅན་དུ་འགྱུར། །ཐམས་ཅད་ཀྱང་ནི་སྲོག་ཆགས་བྱེ་བ་སྒྲོལ། །བྱང་ཆུབ་སེམས་དཔའ་མང་པོ་ཡང་དག་འཛུད། །དེ་བཞིན་གཤེགས་པ་རྣམས་ཀྱི་རིང་བསྲེལ་དང་། །འཇིམ་པའི་གཟུགས་དང་མཆོད་རྟེན་དག་ལའང་རུང་། །རྩིག་ངོས་བྲིས་དང་རྡུལ་ཕུང་མཆོད་རྟེན་ལ། །དེ་ལ་མེ་ཏོག་དང་ནི་སྤོས་གསོལ་ཏེ། །དེར་ནི་གང་གིས་རབ་སྙན་ཅང་ཏེའུ་དང་། །དུང་དང་རྔ་ཆེན་རོལ་མོའི་སྒྲ་བྱེད་བཅུག །བྱང་ཆུབ་མཆོག་རབ་མཆོད་པར་བྱ་བའི་ཕྱིར། །གང་དག་རྔ་རྣམས་རབ་ཏུ་རྡུང་བྱེད་ཅིང་། །པི་ཝང་དང་ནི་ཕེག་དང་འཁར་བའི་རྔ། །རྫ་རྔ་རྒྱུད་གཅིག་གླིང་བུ་ཡིད་འོང་དང་། །ཨ་ཀོ་ན་ད་རབ་ཏུ་སྙན་བྱིན་པ། །དེ་དག་ཐམས་ཅད་བྱང་ཆུབ་འཐོབ་པར་
འགྱུར། །བདེ་བར་གཤེགས་པ་རྣམས་ལ་མཆོད་པའི་ཕྱིར། །གང་དག་ལྕགས་ཀྱི་སིལ་ཁྲོལ་བརྡུང་བཅུག་དང་། །ཆུ་ལ་བཏབ་དང་ཐལ་མོ་བརྡབས་པ་དང་། །ཡིད་དུ་འོང་ཞིང་སྙན་པའི་གླུ་དབྱངས་དང་། །རིང་བསྲེལ་དེ་དག་རྣམ་མང་མཆོད་བྱས་པ། །དེ་དག་ཐམས་ཅད་འཇིག་རྟེན་སངས་རྒྱས་འགྱུར། །བདེ་གཤེགས་རིང་བསྲེལ་ལ་ནི་ཅུང་ཟད་ཀྱང་། །སིལ་སྙན་གཅིག་བརྡུངས་པ་ཡི་སྒྲ་བྱུང་བ། །མེ་ཏོག་གཅིག་ཙམ་གྱིས་ནི་མཆོད་པ་དང་། །བདེ་གཤེགས་གཟུགས་ནི་རྩིག་ངོས་བྲིས་པ་ལ། །འཁྲུགས་བཞིན་པ་ཡི་སེམས་ཀྱིས་མཆོད་ན་ཡང་། །དེ་དག་རིམ་གྱིས་སངས་རྒྱས་བྱེ་བ་མཐོང་། །མཆོད་རྟེན་དེ་ལ་གང་གིས་ཐལ་མོ་སྦྱར། །ཡོངས་སུ་ཚང་བའི་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་བཏུད་པ་དང་། །དེ་བཞིན་ལུས་ཀྱང་ལན་ཅིག་བཏུད་པ་དང་། །གང་གི་རིང་བསྲེལ་གནས་པ་དེ་དག་ལ། །ཡེངས་པའི་སེམས་ཀྱིས་སངས་རྒྱས་ཕྱག་འཚལ་ཞེས། །ཚིག་གཅིག་ལན་འགའ་བརྗོད་པར་བྱས་པ་ཡང་། །དེ་དག་ཀུན་གྱིས་བྱང་ཆུབ་མཆོག་འདི་འཐོབ། །ཅེས་པ་སོགས་རྒྱས་པར་གསུངས་སོ། །དགེ་བའི་རྩ་བ་ཡོངས་སུ་བསྔོ་བའི་མདོར་ཡང་གསུངས་པ། །བརྟན་པའི་བློ་གྲོས་གཞན་ཡང་མངོན་པར་ཤེས་པ་མྱུར་བ་ཉིད་དུ་བྱ་བའི་ཕྱིར། དེ་བཞིན་གཤེགས་པའི་མཆོད་རྟེན་མཆོད་པ་དང་། ཕྱིར་བཅོས་པ་དང་། བྱི་དོར་བྱ་བ་ལྷུར་བླང་བར་བྱ་སྟེ། བརྟན་པའི་བློ་གྲོས། དེ་ལ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག །དེ་བཞིན་གཤེགས་པའི་མཆོད་རྟེན་
བྱི་དོར་བྱེད་པ་དེ་ནི་སྨོན་ལམ་གྱི་མཆོག་རྣམ་པར་དག་པ་བཞི་རྗེས་སུ་འཐོབ་བོ། །བཞི་གང་ཞེ་ན། གཟུགས་ཀྱི་སྨོན་ལམ་གྱི་མཆོག་རྣམ་པར་དག་པ་དང་། དལ་བ་ཕུན་སུམ་ཚོགས་པ། ཡང་དག་པར་བླང་བ་བརྟན་པ། དེ་བཞིན་གཤེགས་པ་ལྟ་བའི་སྨོན་ལམ་གྱི་མཆོག་རྣམ་པར་དག་པའོ། །ཞེས་དང་། དེ་བཞིན་གཤེགས་པའི་སྐུ་གཟུགས་ཀྱི་ལེའུར་ཡང་གསུངས་པ། སའམ། རྡོ་ཐལ་ལམ། ཤིང་ངམ། རྡོའམ། རུས་པའམ། ལྕགས་སམ། གསེར་རམ། དངུལ་ལམ། བེ་ཌཱུརྱའམ། ཤེལ་ལམ། མུ་ཏིག་དམར་པོའམ། རྡོའི་སྙིང་པོའམ། སྤུག་གམ། དུང་ངམ། མན་ཤེལ་ལམ། སྤོས་སམ། རས་སམ། ཤིང་ལེབ་བམ། རྩིག་ངོས་ལ་དེ་བཞིན་གཤེགས་པའི་སྐུ་གཟུགས་བཞེངས་པར་བྱའོ། །རལ་བ་གསོ་བར་བྱའོ། །གྲུམས་པ་འཆོས་པར་བྱ་སྟེ། དེ་བཞིན་གཤེགས་པའི་སྐུ་གཟུགས་བྱས་ན། རིགས་དམའ་བ་རྣམས་དང་། སྡིག་པ་བྱེད་པའི་རིགས་རྣམས་དང་། ལོག་པར་ལྟ་བའི་རིགས་སུ་མི་སྐྱེ། ཡན་ལག་གང་ཡང་མ་ཚང་བར་མི་འགྱུར་རོ། །གལ་ཏེ་མཚམས་མེད་པ་ལྔ་བྱས་སུ་ཟིན་ཀྱང་དེ་བཞིན་གཤེགས་པ་ལ་དད་པ་རྙེད་དེ་སྐུ་གཟུགས་བྱས་ན། ལས་དེས་སེམས་ཅན་དམྱལ་བ་ཆུང་ངུ་མྱོང་སྟེ། ཐེག་པ་གསུམ་གང་ཡང་རུང་བས་ངེས་པར་འབྱུང་བར་འགྱུར་རོ། །དཔེར་ན་མི་ཞིག་མི་གཙང་བས་རེག་པ་ལ། རབ་ཏུ་དག་པར་བཀྲུས་ཏེ། སྤོས་ཀྱིས་བྱུགས་ན། དྲི་མི་ཞིམ་པ་དེ་མེད་པར་འགྱུར་རོ། །དེ་བཞིན་དུ་མཚམས་མེད་པ་
བྱས་པ་དེའི་སྡིག་པའང་མེད་པར་འགྱུར་རོ། །མི་དགེ་བ་བཅུའི་ལས་ཀྱི་ལམ་དང་ལྡན་པའང་དེ་བཞིན་གཤེགས་པ་ལ་དད་པ་རྙེད་དེ། དེའི་སྐུ་གཟུགས་བྱས་ན། དེའི་སྡིག་པ་དེ་ཇི་ལྟར་མེའི་ཕུང་པོས་མར་ཚིག་སྟེ། དུ་བའང་མི་མངོན་པ་བཞིན་དུ་དེའི་སྡིག་པ་དེའང་མི་སྣང་བར་འགྱུར་རོ། །ཞེས་གསུངས་སོ། །སྐུ་གཟུགས་བཞེངས་པའི་ཕན་ཡོན་གྱི་མཚན་ཉིད་དེ་དང་པོའོ། །གཞན་ཡང་མཆོད་པའི་ཕན་ཡོན་ནི། རྒྱལ་བ་དངོས་སུ་མཆོད་པ་དང་། ཡོངས་སུ་མྱ་ངན་ལས་འདས་ནས་མཆོད་པ་ལ་བསོད་ནམས་ཁྱད་པར་མེད་དེ། མེ་ཏོག་བརྩེགས་པའི་མདོ་ལས། སེང་གེ་རྣམ་པར་བརྩེ་བ་གང་གིས་དེ་བཞིན་གཤེགས་པ་མཐོང་སྟེ། སེམས་དང་བས་མཆོད་པ་དང་། གང་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་རིང་བསྲེལ་ཡུངས་འབྲུ་ཙམ་ལ་མཆོད་པ་བྱེད་པ་ནི་རྣམ་པར་སྨིན་པ་མཉམ་པར་ཤེས་པར་བྱ་སྟེ། བྱེ་བྲག་གམ་ཐ་དད་དུ་བྱ་བ་མེད་དོ། །ཞེས་དང་། འཕགས་པ་དཀོན་མཆོག་བརྩེགས་པར། དྲང་སྲོང་རྒྱས་པས་ཞུས་པ་ལས་ཀྱང་། དྲང་སྲོང་ཆེན་པོ། གང་ལ་ལ་ཞིག་བཅོམ་ལྡན་འདས་ཡོངས་སུ་མྱ་ངན་ལས་འདས་པ་དང་། ད་ལྟར་བཞུགས་པ་ལ་མཆོད་པ་བྱེད་པ་དེའི་རྣམ་པར་སྨིན་པ་ནི་མཚུངས་པ་དང་མཉམ་ཞིང་འདྲའོ། །ཞེས་ང་འཆད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་རྣམས་ནི་ཆོས་ཀྱི་སྐུས་རབ་ཏུ་ཕྱེ་བ་ཡིན་གྱི། གཟུགས་ཀྱི་སྐུས་རབ་ཏུ་ཕྱེ་བ་མ་ཡིན་པའི་ཕྱིར་རོ། །གང་ལ་ལ་ཞིག །ང་འདུག་པའམ། ཡོངས་
སུ་མྱ་ངན་ལས་འདས་པ་ལ་མཆོད་ན་བསོད་ནམས་མཚུངས་པའི་ཕྱིར། འདི་གཉིས་ལ་བསོད་ནམས་ཀྱི་ཁྱད་པར་ཅུང་ཟད་ཀྱང་མེད་དོ། །ཞེས་པ་ལ་སོགས་དུ་མ་ཞིག་གསུངས་ཤིང་། མཆོད་པའི་བྱེ་བྲག་ནི། སངས་རྒྱས་བཅོམ་ལྡན་འདས་རྣམས་ནི། འཇིག་རྟེན་ཐམས་ཅད་ལས་མངོན་པར་འཕགས་ཤིང་། བསོད་ནམས་དང་ཡེ་ཤེས་ཀྱི་ཚོགས་ནམ་མཁའ་ལྟ་བུར་དཔག་ཏུ་མེད་པའི་ཕ་རོལ་ཏུ་སོན་པས། ཡོན་གནས་དམ་པ། བླ་ན་མེད་པ། མཉམ་པ་མེད་པ། མཚུངས་པ་མེད་པ་ཉིད་ཀྱི་ཕྱིར། དེའི་སྐུ་གཟུགས་དང་། མཆོད་རྟེན་མཆོད་པ་དང་། བསྐོར་བ་ལ་སོགས་པའི་དགེ་བའི་རྩ་བ་ཡང་དཔག་ཏུ་མེད་ཅིང་། མཐར་ཡོངས་སུ་མྱ་ངན་ལས་འདས་པའི་ཆོས་སུ་གསུངས་ཏེ། ཇི་སྐད་དུ། ལས་རྣམ་པར་འབྱེད་པའི་མདོར། བྲམ་ཟེའི་ཁྱེའུ་ནེ་ཙོ་ལ་བཀའ་སྩལ་པ། བྲམ་ཟེའི་ཁྱེའུ། དེ་བཞིན་གཤེགས་པའི་མཆོད་རྟེན་ལ་ཐལ་མོ་སྦྱར་བའི་ཕན་ཡོན་ནི་བཅུ་པོ་འདི་དག་སྟེ། བཅུ་གང་ཞེ་ན། རྒྱལ་པོ་ཆེན་པོའི་ཁྱིམ་དུ་སྐྱེ་བ་འཐོབ་པ་དང་། རྒྱ་ཆེ་བའི་གཟུགས་དང་། རྒྱ་ཆེ་བའི་གཡོག་འཁོར་དང་། རྒྱ་ཆེ་བའི་མཆོད་པ་དང་། བཀུར་སྟི་དང་། རྒྱ་ཆེ་བའི་ནོར་དང་། རྒྱ་ཆེ་བའི་ཐོས་པ་དང་། རྒྱ་ཆེ་བའི་དད་པ་དང་། རྒྱ་ཆེ་བའི་དྲན་པ་དང་། རྒྱ་ཆེ་བའི་ཤེས་རབ་དང་། རྒྱ་ཆེ་བའི་རྟོགས་པ་འཐོབ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་ཐལ་མོ་སྦྱར་བའི་ཕན་ཡོན་ནོ། །ཕྱག་བཙལ་བའི་ཕན་ཡོན་བཅུ་སྟེ། བཅུ་
གང་ཞེ་ན། གཟུགས་བཟང་སྟེ་མདོག་གསེར་གྱི་ཁ་དོག་ལྟ་བུར་འགྱུར་བ་དང་། མཛེས་ཏེ་མིག་ཏུ་སྡུག་པར་འགྱུར་བ་དང་། སྐད་སྙན་ཞིང་བཟུང་བའི་ཚིག་ཏུ་འགྱུར་བ་དང་། བག་ཚ་བ་མེད་པར་འཁོར་གྱི་ནང་དུ་འགྲོ་བ་དང་། ལྷ་དང་མི་རྣམས་དགའ་བར་འགྱུར་བ་དང་། གཟི་བརྗིད་ཆེན་པོར་འགྱུར་བ་དང་། གཟི་བརྗེད་ཆེན་པོའི་གང་ཟག་འདི་ལྟ་སྟེ། སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་རྣམས་དང་། སངས་རྒྱས་ཀྱི་ཉན་ཐོས་རྣམས་དང་འགྲོགས་པར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། དེ་དག་ནི། དེ་བཞིན་གཤེགས་པའི་མཆོད་རྟེན་ལ་ཕྱག་བཙལ་བའི་ཕན་ཡོན་ནོ། །ཕྱག་བདར་བྱས་པའི་ཕན་ཡོན་བཅུ་སྟེ། བཅུ་གང་ཞེ་ན། གཟུགས་བཟང་བ་དང་། ལྟ་ན་སྡུག་པ་དང་། མཛེས་པར་འགྱུར་བ་དང་། སྐད་སྙན་པར་འགྱུར་བ་དང་། དེའི་འདོད་ཆགས་དང་། ཞེ་སྡང་དང་། གཏི་མུག་བསྲབས་པར་འགྱུར་བ་དང་། ལམ་དུ་འགྲོ་ན། གསེག་མ་དང་། རྩྭ་དང་། གྱོ་མོ་རྣམས་མེད་པར་འགྱུར་བ་དང་། བཙུན་པའི་རིགས་སུ་སྐྱེ་བར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི། དེ་བཞིན་གཤེགས་པའི་མཆོད་རྟེན་ལ་ཕྱག་བདར་བྱས་པའི་ཕན་ཡོན་ནོ། །གདུགས་ཕུལ་བའི་ཕན་ཡོན་ལ་བཅུ་སྟེ། བཅུ་གང་ཞེ་ན། འཇིག་རྟེན་ན་གདུགས་ལྟ་བུར་འགྱུར་བ་དང་། ལུས་ལ་གདུང་
བ་མེད་པར་འགྱུར་བ་དང་། སེམས་ལ་གདུང་བ་མེད་པར་འགྱུར་བ་དང་། འཇིག་རྟེན་གྱི་རྟེན་དུ་འགྱུར་བ་དང་། བདག་པོའི་ལས་བྱེད་ཅིང་གསོག་པ་དང་། འཁོར་ལོས་བསྒྱུར་བའི་རྒྱལ་སྲིད་ཡང་དང་ཡང་དུ་འཐོབ་པ་དང་། དབང་ཆེ་བར་གྲགས་པར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། དེ་དག་ནི། དེ་བཞིན་གཤེགས་པའི་མཆོད་རྟེན་ལ་གདུགས་ཕུལ་བའི་ཕན་ཡོན་ཡིན་ནོ། །དྲིལ་བུ་ཕུལ་བའི་ཕན་ཡོན་བཅུ་སྟེ། བཅུ་གང་ཞེ་ན། གཟུགས་བཟང་བར་འགྱུར་བ་དང་། སྒྲ་སྙན་པར་འགྱུར་བ་དང་། ཡིད་དུ་འོང་བ་དང་སྨྲ་བ་དང་ལྡན་པར་འགྱུར་བ་དང་། ཀ་ལ་པིང་ཀའི་སྒྲ་ལྟ་བུར་སྨྲ་བ་དང་ལྡན་པར་འགྱུར་བ་དང་། བཟུང་བའི་ཚིག་ཏུ་འགྱུར་བ་དང་། རབ་ཏུ་དགའ་བར་འགྱུར་བ་དང་། ཀུན་ཏུ་དགའ་བ་རྒྱ་ཆེན་པོའི་སྒྲ་ཐོས་པ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་དྲིལ་བུ་ཕུལ་བའི་ཕན་ཡོན་ནོ། །བ་དན་ཕུལ་བའི་ཕན་ཡོན་བཅུ་སྟེ། བཅུ་གང་ཞེ་ན། འཇིག་རྟེན་ན་རྒྱལ་མཚན་ལྟ་བུར་འགྱུར་བ་དང་། མཛའ་བཤེས་དང་། བློན་པོ་དང་། ཉེ་དུ་དང་། སྣག་གི་གཉེན་མཚམས་རྣམས་ཀྱིས་བསྟི་སྟང་དུ་བྱེད་བླ་མར་བྱེད་རི་མོར་བྱེད་མཆོད་པར་བྱེད་པ་དང་། ཕྱོགས་དང་ཕྱོགས་མཚམས་རྣམས་སུ་དེའི་གྲགས་པ་དང་།
བརྗོད་པ་དང་། སྒྲ་དང་། ཚིགས་སུ་བཅད་པ་མངོན་དུ་འབྱུང་བ་དང་། གཟུགས་བཟང་ཞིང་ལྟ་ན་སྡུག་ལ་མཛེས་པར་འགྱུར་བ་དང་། སྐྱེ་བ་གཞན་རྣམས་སུ་ཚེ་རིང་ཞིང་རིང་དུ་གནས་པར་འགྱུར་བ་དང་། དབང་ཆེ་བར་གྲགས་པར་འགྱུར་བ་དང་། རིགས་བཙུན་པར་སྐྱེ་བར་འགྱུར་བ་དང་། ལོངས་སྤྱོད་ཆེན་པོར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་བ་དན་ཕུལ་བའི་ཕན་ཡོན་ནོ། །གོས་ཕུལ་བའི་ཕན་ཡོན་བཅུ་གཉིས་ཏེ། བཅུ་གཉིས་གང་ཞེ་ན། མཛེས་ཤིང་ལྟ་ན་སྡུག་པར་འགྱུར་བ་དང་། པགས་པ་འཇམ་པ་དང་། པགས་པ་སྣུམ་པ་དང་། པགས་པ་སྲབ་པ་དང་། དེའི་ལུས་ལ་རྡུལ་དང་དྲི་མ་མི་འཆགས་པ་དང་། དེའི་གོས་བཟང་པོ་བཟང་པོར་འགྱུར་བ་དང་། གདིང་བ་དང་། བགོ་བ་ཕྲ་མོ་རྙེད་པར་འགྱུར་བ་དང་། ངོ་ཚ་ཤེས་པ་དང་། ཁྲེལ་ཡོད་པ་ཕུན་སུམ་ཚོགས་པར་འགྱུར་བ་དང་། མཐོང་ན་དགའ་བར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་གཉིས་པོ་དེ་དག་ནི། དེ་བཞིན་གཤེགས་པའི་མཆོད་རྟེན་ལ་གོས་ཕུལ་བའི་ཕན་ཡོན་ནོ། །མེ་ཏོག་ཕུལ་བའི་ཕན་ཡོན་བཅུ་སྟེ། བཅུ་གང་ཞེ་ན། འཇིག་རྟེན་ན་མེ་ཏོག་ལྟ་བུར་འགྱུར་བ་དང་། དེའི་སྣའི་དབང་པོ་ནམ་ཡང་ཉམས་པར་མི་འགྱུར་བ་དང་། ལུས་ཀྱི་དྲི་ང་བ་རྣམ་པར་དག་པར་འགྱུར་བ་དང་། དྲི་ཞིམ་པོ་འབྱུང་བར་
འགྱུར་བ་དང་། ཕྱོགས་དང་ཕྱོགས་མཚམས་སུ་དེའི་ཚུལ་ཁྲིམས་ཀྱི་དྲི་ངད་ལྡང་བར་འགྱུར་བ་དང་། འཇིག་རྟེན་གྱི་མངོན་དུ་འགྲོ་བར་བྱ་བར་འགྱུར་བ་དང་། སྡུག་པའི་ཆོས་རྣམས་ཐོབ་པར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་མེ་ཏོག་ཕུལ་བའི་ཕན་ཡོན་ནོ། །ཕྲེང་བ་ཕུལ་བའི་ཕན་ཡོན་བཅུ་སྟེ། བཅུ་གང་ཞེ་ན། འཇིག་རྟེན་ན་ཕྲེང་བ་ལྟ་བུར་འགྱུར་བ་དང་། ལུས་ཀྱི་དྲི་ང་བ་རྣམ་པར་དག་པར་འགྱུར་བ་དང་། ཕྱོགས་དང་ཕྱོགས་མཚམས་སུ་ཚུལ་ཁྲིམས་ཀྱི་དྲི་ཞིམ་པོའི་དྲི་ངད་ལྡང་བ་དང་། རྟག་ཏུ་དྲི་ཞིམ་པར་འགྱུར་བ་དང་། བརྒྱན་པར་འགྱུར་བ་དང་། གཡོག་འཁོར་མི་ཕྱེད་པར་འགྱུར་བ་དང་། སྐྱེས་པ་དང་བུད་མེད་རྣམས་ཀྱི་ཡིད་དུ་འོང་བར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་ཕྲེང་བ་ཕུལ་བའི་ཕན་ཡོན་ནོ། །མར་མེ་ཕུལ་བའི་ཕན་ཡོན་བཅུ་སྟེ། བཅུ་གང་ཞེ་ན། འཇིག་རྟེན་ན་མར་མེ་ལྟ་བུར་འགྱུར་བ་དང་། དེའི་མིག་གི་དབང་པོ་ནམ་ཡང་འགག་པར་མི་འགྱུར་བ་དང་། ཤའི་མིག་རྣམ་པར་དག་པར་འགྱུར་བ་དང་། ལྷའི་མིག་རྣམ་པར་དག་པ་ཐོབ་པར་འགྱུར་བ་དང་། དགེ་བ་དང་མི་དགེ་བའི་ཆོས་
རྣམས་ལ་ཤེས་རབ་འབྱུང་བར་འགྱུར་བ་དང་། མ་རིག་པ་དང་གཏི་མུག་གི་མུན་པ་སེལ་བ་དང་ཤེས་རབ་ཀྱི་སྣང་བ་ཐོབ་པར་འགྱུར་བ་དང་། དེ་འཁོར་བ་ན་འཁོར་བའི་ཚེ་ནམ་དུའང་མུན་པ་ན་གནས་པར་མི་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་མར་མེ་ཕུལ་བའི་ཕན་ཡོན་ནོ། །སྤོས་ཕུལ་བའི་ཕན་ཡོན་བཅུ་སྟེ། བཅུ་གང་ཞེ་ན། འཇིག་རྟེན་ན་སྤོས་ལྟ་བུར་འགྱུར་བ་དང་། སྣའི་དབང་པོ་རྣམ་པར་དག་པར་འགྱུར་བ་དང་། ལུས་ཀྱི་དྲི་མི་ཞིམ་པ་རྣམ་པར་དག་པར་འགྱུར་བ་དང་། རྟག་ཏུ་དྲི་ཞིམ་པར་འགྱུར་བ་དང་། གཟུགས་བཟང་བར་འགྱུར་བ་དང་། འཇིག་རྟེན་གྱི་མངོན་དུ་འགྲོ་བར་བྱ་བར་འགྱུར་བ་དང་། སྡུག་པའི་ཆོས་རྣམས་ཐོབ་པར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་སྤོས་ཕུལ་བའི་ཕན་ཡོན་ནོ། །རོལ་མོ་སིལ་སྙན་ཕུལ་བའི་ཕན་ཡོན་བཅུ་སྟེ། བཅུ་གང་ཞེ་ན། གཟུགས་བཟང་ཞིང་ལྟ་ན་སྡུག་པར་འགྱུར་བ་དང་། སྐད་སྙན་པར་འགྱུར་བ་དང་། ཡིད་དུ་འོང་བ་སྨྲ་བ་དང་ལྡན་པར་འགྱུར་བ་དང་། གྲགས་པ་དང་ལྡན་པར་འགྱུར་བ་དང་། བཟུང་བའི་ཚིག་ཏུ་འགྱུར་བ་དང་། རྟག་ཏུ་དགའ་བར་འགྱུར་བ་དང་། ཀུན་དགའ་བའི་སྒྲ་རྒྱ་ཆེན་པོ་རྟག་ཏུ་ཐོབ་པར་
འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། དེ་དག་ནི་དེ་བཞིན་གཤེགས་པའི་མཆོད་རྟེན་ལ་རོལ་མོ་སིལ་སྙན་ཕུལ་བའི་ཕན་ཡོན་ནོ། །འཕགས་པ་སྤྱན་རས་གཟིགས་ཀྱི་མདོར་ཡང་བཀའ་སྩལ་པ། རྒྱལ་བའི་མཆོད་རྟེན་སྤོས་བྱུག་ཕུལ་བྱས་ན། །བཅོམ་ལྡན་འདས་ཀྱི་བསྟན་པ་འཇིག་འགྱུར་ཚེ། །ཛམྦུའི་གླིང་དུ་སྐྱེ་བར་མི་འགྱུར་ཞིང་། །དེ་ནི་དེ་ཚེ་མཐོ་རིས་བདག་པོར་འགྱུར། །རྒྱལ་བའི་མཆོད་རྟེན་སྤོས་བྱུག་ཕུལ་བྱས་ན། །དྲི་མི་ཞིམ་དང་མི་གཙང་སྨད་པ་རྣམས། །རྟག་ཏུ་སྤོང་ཞིང་ཚུལ་ཁྲིམས་ཕུང་པོར་གནས། །དེ་ནི་རྟག་ཏུ་ཚངས་སྤྱོད་མཆོག་འདི་སྤྱོད། །འདི་ནས་ཤི་འཕོས་མཐོ་རིས་ལྷ་དབང་འགྱུར། །རིང་པོར་མི་ཐོགས་དོན་མཐོང་རྣམས་ལ་རྟོག །ལྷ་རྣམས་ལ་ནི་རྒྱ་ཆེ་དོན་ཡང་བྱེད། །བཅོམ་ལྡན་རྒྱལ་བ་མཆོད་རྟེན་གསལ་བྱས་ན། །དེ་ནི་མི་ཁོམ་བརྒྱད་པོ་ཀུན་སྤོང་ཞིང་། །དེ་ནི་དལ་འགྱུར་དེ་བཞིན་ཁྱད་པར་འཕགས། །དེ་ནི་སངས་རྒྱས་མཚུངས་མེད་མཆོད་པ་བྱེད། །བག་ཡོད་བློ་གྲོས་བརྟན་ལ་དཔའ་བོར་འགྱུར། །འདོད་པའི་ཡོན་ཏན་དག་ལ་དགའ་མི་བསྐྱེད། །མི་དམན་སེམས་ཀྱིས་མངོན་པར་འབྱུང་བར་འགྱུར། །དེ་ནི་ནམ་ཡང་བྱང་ཆུབ་སེམས་མི་འདོར། །ཚུལ་ཁྲིམས་སྐྱོན་མེད་ཤིན་ཏུ་སྡོམ་པར་འགྱུར། །རྣམ་དག་འདོད་ཆགས་བྲལ་བའི་ཆོས་ཀྱང་འཐོབ། །དེ་ནི་མདོག་ངན་དུས་
རྣམས་ཀུན་ཏུ་སྤོང་། །འཆལ་བའི་ཤེས་རབ་མ་ལུས་རྣམ་པར་སྤོང་། །ཤེས་རབ་རྒྱ་ཆེན་གྱུར་ནས་སྤྱོད་ལ་གནས། །ཁ་ཟས་གཙང་མ་དག་ཀྱང་རྙེད་འགྱུར་ཞིང་། །ཁྱད་འཕགས་ཁ་དོག་ལྡན་ཞིང་ལྟ་སྡུག་ལ། །རེག་དང་ལྡན་ཞིང་རབ་མཛེས་གོས་རྣམས་འཐོབ། །དད་པའི་ཤུགས་སྐྱེད་བཅོམ་ལྡན་མཆོད་རྟེན་ལ། །མེ་ཏོག་སྐམ་པོ་ཉལ་ཉིལ་ཕྱགས་བྱས་ན། །འདོད་པ་དམན་པ་སྡུག་བསྔལ་བྱེད་པ་སྤོང་། །སྟོབས་བཅུ་མངའ་བའི་དེད་དཔོན་བརྙེས་པར་བྱེད། །དེ་ནི་མཛེས་ཤིང་རྣམ་དག་ལུས་སུ་འགྱུར། །སྐྱེ་བོ་མང་པོས་མཆོད་འོས་བལྟ་འོས་འགྱུར། །དེ་ལ་རྒྱལ་པོ་གནོད་པར་སེམས་མི་འགྱུར། །ངན་སོང་ས་ཡི་ལམ་ངན་ཐམས་ཅད་གཅོད། །བྱང་ཆུབ་སེམས་དཔའི་ཚུལ་ཁྲིམས་ཕུང་པོར་གནས། །བག་ཡོད་མྱ་ངན་རྣམས་དང་སྐྱོན་རྣམས་སྤོང་། །ནད་རྣམས་དུ་མ་མ་ལུས་རྣམ་པར་སྤོང་། །བསྐལ་པ་མཐའ་ཡས་རྣམས་སུ་དབུགས་འབྱིན་འཐོབ། །སྦྱིན་གནས་མཚུངས་མེད་སངས་རྒྱས་ཐོབ་པར་འོང་། །མཚུངས་མེད་ཐོབ་ཅིང་ལྷ་མིས་མཆོད་འོས་འགྱུར། །རྣམ་དག་ལུས་ལྡན་རྒྱན་གྱིས་བརྒྱན་པར་འགྱུར། །ལྷ་ཡི་མེ་ཏོག་རབ་མཛེས་མནྡ་ར། །མཚུངས་མེད་པ་ཏ་ལ་ཡང་སུ་འབུལ་དང་། །མཆོད་རྟེན་མེ་ཏོག་ཉལ་ཉིལ་སུས་ཕྱགས་པ། །དེ་དག་རྣམ་སྨིན་འདྲ་སྟེ་མཆོག་ཏུ་འགྱུར། །ཞེས་པ་ལ་སོགས་དུ་མ་གསུངས་སོ། །ཁང་བུ་བརྩེགས་པའི་མདོ་ལས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། ཕྱག་བདར་བྱས་
པའི་ཕན་ཡོན་ནི་ལྔར་འགྱུར་ཏེ། གང་ཞེ་ན། བདག་གི་སེམས་དང་བར་འགྱུར་བ་དང་། གཞན་གྱི་སེམས་དང་བར་འགྱུར་བ་དང་། ལྷ་རྣམས་ཡིད་དགའ་བར་འགྱུར་བ་དང་། མཛེས་པའི་ལས་བྱས་ཤིང་བསགས་པ་དང་། ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷ་རྣམས་སུ་སྐྱེ་བར་འགྱུར་རོ། །སྙིང་རྗེ་པདྨ་དཀར་པོའི་མདོར་ཡང་། ཕན་ཡོན་བསམ་གྱིས་མི་ཁྱབ་པ་གསུངས་པ་ལས་རྒྱུ་འབྲས་ཀྱི་དཔེ་འདི་ལྟར་བསྟན་ཏེ། ཀུན་དགའ་བོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ལྟར་བཞུགས་པ་ལ་གང་བསྟི་སྟང་དུ་བྱེད་པ་ལྟ་ཞོག །ཡོངས་སུ་མྱ་ངན་ལས་འདས་པའི་སྐུ་གདུང་ལ་མཆོད་པ་བྱེད་པའང་ལྟ་ཞོག །ཀུན་དགའ་བོ། གང་དག་ཁ་ཅིག །ཐ་ན་རྨི་ལམ་དུ་དེ་བཞིན་གཤེགས་པའི་མཆོད་རྟེན་མཐོང་ནས། སེམས་དང་བར་བྱེད་ན། ཀུན་དགའ་བོ། དགེ་བའི་རྩ་བ་དེའི་འབྲས་བུ་མྱ་ངན་ལས་འདའ་བ་ཡིན་ཏེ། མྱ་ངན་ལས་འདས་པ་ཀླས་ཤིང་མྱ་ངན་ལས་འདས་པའི་མཐས་གཏུགས་པར་འགྱུར་བར་ང་སྨྲའོ་ཞེས་དང་། ཉ་མཚོ་ནང་ནས་འདྲེན་པའི་དཔེར་མཛད་ནས་བཀའ་སྩལ་པ། དེ་བས་ན་རིགས་ཀྱི་བུ་དག །དེ་བཞིན་གཤེགས་པ་ལ་ཡོན་ཕུལ་བའི་དགེ་བའི་རྩ་བ་ནི་འབྲས་བུ་ཆེན་པོ་དང་། རྙེད་པ་ཆེན་པོ་དང་ལྡན་པ་དག་སྟེ། རིགས་ཀྱི་བུ་དག །དེ་བཞིན་གཤེགས་པ་ལ་ཡོན་ཕུལ་བའི་དགེ་བའི་རྩ་བ་ནི། དེ་ལྟ་བུ་དག་ལ་བཞག་པ། བསོད་ནམས་ཀྱི་ཞིང་ཆེན་པོ་ལ་བཏབ་པ་
དེ་དག་ལ་ནི། ཐ་ན་ཡུན་རིང་པོ་ཇི་སྲིད་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུའང་ཆུད་ཟ་བར་མི་འགྱུར་རོ། །དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་ནི་མྱ་ངན་ལས་འདས་པ་ཡིན་ཏེ། མྱ་ངན་ལས་འདའ་བར་འགྱུར་རོ། །ཀུན་དགའ་བོ། དོན་ཤེས་པར་བྱ་བའི་ཕྱིར། ངས་དཔེ་འདི་བྱས་པ་ལ་དོན་དུ་ལྟ་བ་གང་ཞེ་ན། ཀུན་དགའ་བོ། ཉ་ཞེས་བྱ་བ་དེ་ནི་སོ་སོ་སྐྱེ་བོའི་ཚིག་བླ་དྭགས་སོ། །མཆིལ་བ་ཞེས་བྱ་བ་ནི་དེ་བཞིན་གཤེགས་པ་ལ་དགེ་བའི་རྩ་བ་བསྐྱེད་པའི་ཚིག་བླ་དྭགས་སོ། །སྲད་བུ་ཞེས་བྱ་བ་དེ་ནི་བསྡུ་བའི་དངོས་པོ་བཞིའི་ཚིག་བླ་དྭགས་སོ། །ཉ་ཞེས་བྱ་བ་དེ་ནི་དེ་བཞིན་གཤེགས་པའི་ཚིག་བླ་དྭགས་སོ། །ཉ་གསོན་པོ་ཞེས་བྱ་བ་དེ་ནི་སེམས་ཅན་མྱ་ངན་ལས་འདས་པའི་འབྲས་བུ་ལ་འགོད་པའི་ཚིག་བླ་དྭགས་སོ། །ཀུན་དགའ་བོ། རྣམ་གྲངས་འདིས་ཀྱང་ཁྱོད་ཀྱིས་འདི་ལྟར་རིག་པར་བྱ་སྟེ། གང་སངས་རྒྱས་ལ་ཡོན་ཕུལ་བ་ནི་ཇི་སྲིད་མྱ་ངན་ལས་འདས་པར་འགྱུར་བ་མ་གཏོགས་པར་ཇི་སྲིད་ཡུན་རིང་པོར་ཡང་འཇིག་པ་མེད། ཡོངས་སུ་ཟད་པ་མེད། མཐར་ཐུག་པ་མེད་དོ། །ཞེས་སོགས་རྒྱས་པར་གསུངས་ཤིང་།ཆོས་རྒྱལ་སྲོང་བཙན་སྒམ་པོས་མཛད་པའི་རྒྱལ་རབས་ཀ་ཁོལ་མར་ཡང་། འཇམ་དཔལ་གྱིས། བཅོམ་ལྡན་འདས་ད་ལྟ་སེམས་ཅན་རྣམས་ཀྱི་མཆོད་པའི་རྟེན་སངས་རྒྱས་ཉིད་ལགས་ཏེ། ཡོངས་སུ་མྱ་ངན་ལས་འདས་ནས་ཇི་ལྟར་བགྱི་བ་བཀའ་སྩལ་ཏུ་གསོལ། ཞེས་ཞུས་པས། བཅོམ་ལྡན་འདས་ཀྱིས་བཀའ་སྩལ་
པ། ང་ཡི་འཁོར་ནི་རྣམ་བཞི་ཡིས། །ད་ལྟར་ང་ལ་མཆོད་བྱས་དང་། །མ་འོངས་པ་ན་དད་པ་ཡིས། །གཟུགས་བརྙན་རྣམས་ལ་མཆོད་པ་ལ། །ཁྱད་པར་ཅུང་ཟད་ཡོད་མ་ཡིན། །བསོད་ནམས་མཉམ་ཞིང་རྣམ་སྨིན་མཉམ། །ཅི་དེ་སངས་རྒྱས་བྱིན་རླབས་ཏེ། །སོ་སོ་སྐྱེ་བོས་ཤེས་མི་འགྱུར། །དེ་ཕྱིར་སངས་རྒྱས་མ་བྱོན་པའི། །ཞིང་ན་སྐུ་གཟུགས་ཡོད་མིན་ཞིང་། །མཐའ་འཁོབ་ཀླ་ཀློ་རྣམས་ན་མེད། །བསྟན་པ་ནུབ་ན་ཡོད་མིན་ཞིང་། །མུ་སྟེགས་བྱོལ་སོང་སོགས་མི་མཐོང་། །དེ་ཕྱིར་སྐུ་གཟུགས་སྤྲུལ་པ་ཡིན། །ཞེས་གསུངས་ཤིང་། དེའི་ཚེ་ལྷ་ཚངས་པ་དང་། བརྒྱ་བྱིན་དང་། ཁྱབ་འཇུག་རྣམས་ཀྱིས། སངས་རྒྱས་ཀྱི་ཆོས་སྐུ་མཚོན་བྱེད་མཆོད་རྟེན་དང་། ལོངས་སྐུ་སྤྲུལ་པའི་སྐུ་རྣམས་བཞེངས་ཤིང་། དེ་དག་དང་ཚུལ་མཚུངས་པར་རྒྱལ་པོ་ཉིད་ཀྱིས་ཀྱང་། མཐའ་འདུལ་ཡང་འདུལ་ལ་སོགས་པའི་གཙུག་ལག་ཁང་བརྒྱ་རྩ་བརྒྱད་སྐྱེ་དགུའི་བསོད་ནམས་ཀྱི་ཞིང་བླ་ན་མེད་པ་རྣམས་བཞེངས་སོ། །འདི་ལྟ་བུའི་ཕན་ཡོན་འབྱུང་བའང་ཤིན་ཏུ་རིགས་ཏེ། ཐུབ་པའི་དབང་པོ་འདིས་མུ་མཐའ་མེད་པའི་འགྲོ་བ་རྣམས་ཀྱི་དོན་དུ་སྙིང་རྗེ་ཆེན་པོའི་གཞན་དབང་དུ་ནི་གྱུར་པས། དཔག་པར་དཀའ་བའི་སྙིང་སྟོབས་ཀྱི་རྣམ་པར་ཐར་པ་ཕྱོགས་ཙམ་ཞིག་གིས་ཀྱང་ཡིད་ཆེས་ཤིང་། དེ་དག་བལྟ་བར་བྱའོ། །རྣམ་གྲངས་འདི་དག་གིས་ནི་རྒྱལ་བ་སྲས་དང་བཅས་པ་ཐམས་ཅད་མཚོན་པར་བྱེད་དོ། །བསོད་ནམས་ཀྱི་ཞིང་སྐུ་གཟུགས་མཆོད་པའི་ཕན་ཡོན་གྱི་ལེའུ་སྟེ་
གཉིས་པའོ། །གཟུགས་སྐུའི་ཆུ་གཏེར་ཕན་ཡོན་ནོར་བུ་ཡིས། །ལེགས་པར་གང་བ་སྲེད་ལྡན་བདག་གིས་མཐོང་། །སྤྲོ་དགའི་དེད་དཔོན་ལྷག་བསམ་གྲུ་རྫིངས་ཅན། །ལེགས་བཤད་དབང་གི་རྒྱལ་པོ་འདིར་བླངས་སོ། །དེའང་འདི་ལྟ་སྟེ། སྐུ་གཟུགས་ཆེ་ཆུང་གང་བྱེད་ཀྱི། །ཤིང་ཚད་ཐོག་མར་བླངས་ནས་ནི། །བཞེངས་སྐུ་འགྱིང་ནི་མེད་པ་ལ། །ཆ་ནི་བཅུ་གཉིས་སྙོམས་པར་བགོ །འགྱིང་ཅན་ཞལ་གང་བཟླུམས་པ་ཡིས། །ཆ་ནི་བཅུ་གཅིག་ཤེས་པར་བྱ། །བཞུགས་སྐུ་བདུན་དུ་བགོ་བ་ཡིན། །དེ་ཡི་ཆ་གཅིག་དག་ལ་ནི། །ཆ་ཆེན་གདོང་དང་ཐལ་མོ་དང་། །མཐོ་དང་ཞལ་ཚད་ཅེས་པ་རྣམས། །མིང་གི་གྲངས་སུ་རིག་པར་བྱ། །དེ་ནི་ཕྱེད་བཅས་བཅུ་གཉིས་སུ། །ཤིན་ཏུ་སྙོམས་པར་བགོས་པ་ནི། །སོར་དང་ཆ་ཕྲན་དག་ཏུ་བརྗོད། །དེ་ལྟར་གྱུར་པའི་བརྒྱད་ཀྱི་ཆ། །ནས་ཞེས་མིང་གི་རྣམ་གྲངས་རྣམས། །སོ་སོར་མ་འདྲེས་ཤེས་པར་བྱ། །དེ་ལྟའི་ཚད་ཀྱིས་གཞལ་བྱའི་ཡུལ། །མཆོག་གི་སྤྲུལ་སྐུ་ལོངས་སྐུ་བཅས། །དཔལ་ལྡན་གསང་བ་འདུས་པ་དང་། །བདེ་དགྱེས་དུས་ཀྱི་འཁོར་ལོ་སོགས། །དྲང་སྲོང་ཁྲོས་པའི་སྐུ་རྣམས་སོ། །སྐུ་ཡི་སྲིད་དང་ཞེང་མཉམ་ལས། །ནྱ་གྲོ་ཏ་ལྟར་ཆུ་ཞེང་གབ། །སྲིད་ཞེང་སོ་སོར་ཞལ་ནི་བཅུ། །གཙུག་ཏོར་ནང་དུ་བྱས་པ་ཡི། །རལ་བའི་ཅོད་པན་ཐལ་མོའི་ཚད། །འཇིགས་བྱེད་དུས་མཚན་ཆ་ཕྲན་བརྒྱད། །ཉི་མ་སོར་གཅིག་པདྨ་གསུམ། །དྲིལ་བས་གདན་ནི་ཞལ་གང་ངོ་། །དེ་ནི་བཅུ་གཉིས་ཆ་རུ་བརྗོད། །བཞུགས་སྐུ་ཞལ་ཚད་བདུན་
ཞེས་པ། །སྐུ་ཡི་ཕྱེད་ཚད་གསང་གནས་ཡན། །ཞལ་ལྔ་ནོར་བུ་ཆ་ཕྲན་གཉིས། །གསང་བའི་འོག་ནས་སྤྱི་བོར་བཞི། །པདྨ་ཆ་ཆེན་ཕྱེད་དང་གཉིས། །དེ་རྣམས་ལ་ནི་ཞལ་བདུན་ནོ། །ད་ནི་ནང་ཚན་དབྱེ་བ་ལ། །གཙུག་ཏོར་སོར་བཞི་ཐོད་པའི་དཔངས། །ཕྱེད་བཅས་སོར་མོ་བཞི་རུ་བྱ། །སྐྲ་མཚམས་དག་ནས་མཛོད་སྤུ་དང་། །དེ་ནས་ཤངས་ཀྱི་རྩེ་ཡི་བར། །སོ་སོར་ཆ་ཕྲན་བཞི་ཡི་ཚད། །ཀོས་ཀོ་ཕྱེད་བཅས་ཆ་ཕྲན་བཞི། །མགྲིན་པ་སོར་བཞི་ཐུགས་ཀ་དང་། །ལྟེ་བ་གསང་བའི་ཆུ་སྐྱེས་བར། །སོ་སོར་ཐལ་མོའི་ཚད་ཡིན་ཏེ། །ཆུ་སྐྱེས་སྟེང་ནས་གཙུག་ཏོར་བར། །ཕྱེད་བཅས་དྲུག་ཅུ་རེ་གསུམ་གྱི། །སོར་མོ་དག་དང་ལྡན་པའོ། །དེ་ནས་དཔྱི་ནི་སོར་བཞི་དང་། །བརླ་ནི་ཆ་ཆེན་གཉིས་སུ་བྱ། །པུས་མོ་སོར་བཞི་རྗེ་ངར་ལ། །ཐལ་མོ་གཉིས་སུ་བཤད་པ་ཡིན། །བོལ་ནི་ཕྱེད་བཅས་ཆ་ཕྲན་བཞི། །གསང་བའི་གནས་ནས་ཞབས་ཀྱི་མཐར། །ཕྱེད་བཅས་དྲུག་ཅུ་རེ་གསུམ་གྱི། །ཆ་ཕྲན་དག་དང་ལྡན་པར་བྱ། །ད་ནི་ཞེང་གི་ཚད་བཤད་པ། །ཐུགས་ཀའི་ཚངས་པའི་རི་མོ་ནས། །མཆན་ཁུང་རྩེ་བར་ཞལ་གྱི་ཚད། །དཔུང་པ་སོར་མོ་ཉི་ཤུ་ལ། །ཕྱག་ངར་ཆ་ཕྲན་བཅུ་དྲུག་ཡིན། །ཕྱག་མགོ་བཅུ་གཉིས་སོར་མོའི་ཚད། །མཁྲིག་མ་གྲུ་མོའི་ཚིགས་གཉིས་ལ། །ཆ་ཕྲན་རེ་རེ་སྦྱིན་པ་ཡིས། །བསྡོམས་པས་ཕྱེད་བཅས་རེ་གསུམ་འགྱུར། །དེ་ནི་ཅིག་ཤོས་དག་ལའང་སྦྱར། །དེ་ལྟར་སྲིད་ཞེང་ཞལ་བཅུ་པ། །སོར་མོ་བརྒྱ་དང་ཉི་ཤུ་ལྔའི། །ཚད་ནི་མཁས་པས་ཤེས་པར་
བྱ། །སྲིད་ཞེང་ཚད་ལ་མ་གཏོགས་པའི། །དབྱེ་བ་འདི་ལྟར་བཤད་བྱ་ཡིན། །ནོར་བུའི་དཔངས་སུ་སོར་མོ་གཉིས། །ཟླུམ་པོར་བསྐོར་བ་སོར་མོ་བཞི། །གཙུག་ཏོར་བསྐོར་བ་བཅུ་གཉིས་སོ། །ཐོད་ཁྱིམ་ཟླུམ་རྒྱས་གདུགས་ལྟ་བུ། །བཞི་བཅུ་ཞེ་ལྔའི་སོར་གྱིས་བསྐོར། །གཙུག་ཏོར་རྩ་ནས་སྐྲ་མཚམས་བར། །ཚངས་ཐིག་ཐད་སོར་ཆ་ཕྲན་བརྒྱད། །དེ་ནས་དཔྲལ་བ་སོར་བཞིའི་མཚམས། །སྨིན་ཕྲག་མཛོད་སྤུ་སོར་མོ་གཅིག །སྤུ་ནི་གཡས་འཁྱིལ་ཀུན་དའི་མདོག །དེ་ཡི་འོག་ཟུར་སྨིན་མའི་བར། །རྐང་པ་གཉིས་ཀྱིས་དམན་པ་ཡི། །སོར་གཉིས་དོར་ནས་སྨིན་མའི་དཀྱུས། །ཆ་ཕྲན་བཞི་དང་སོ་སོར་ལྡན། །རེ་ཁཱའི་སྦོམས་སུ་རྐང་པ་གཅིག །ཟླ་བ་ཚེས་ལྟར་མཛེས་པར་འདྲི། །མཛོད་སྤུའི་ཐད་ནས་ཆ་ཆུང་གཉིས། །འོག་ཏུ་གཞལ་བའི་འཕྲེད་ཐིག་སྟེང་། །སྤྱན་གྱི་དབྱེ་བ་འདི་ལྟར་བྱ། །སངས་རྒྱས་པསམ་གཏན་ལ་བཞུགས་པའི། །སྤྱན་གྱི་ཞེང་ལ་ནས་གཉིས་དང་། །དཀྱུས་སུ་ནས་དྲུག་སོར་མོ་གཉིས། །གཞུ་ཡི་དབྱིབས་ཅན་ཞི་བའི་ཚུལ། །བྱང་ཆུབ་སེམས་དཔའ་རྣམས་ཀྱི་ནི། །སྤྱན་གྱི་ཞེང་ལ་སོར་མོ་ཕྱེད། དཀྱུས་སུ་ནས་བཞི་ཆ་ཕྲན་གཉིས། །ཨུཏྤལ་འདབ་ལྟར་ཤིན་ཏུ་མཛེས། །བདེ་མཆོག་རྩ་ཞལ་སྤྱན་གྱི་ཞེང་། །ནས་བཅུ་སྲིད་དུ་བཅུ་བཞི་ནས། །དྲང་སྲོང་ཁྲོས་པ་གཞན་ལའང་སྦྱར། །གཡས་གཡོན་སྤྱན་ཞེང་སོར་མོ་གཅིག །སྲིད་དུ་ཆ་ཕྲན་གཉིས་བྱས་ཏེ། །པདྨའི་འདབ་ལྟར་རབ་ཏུ་མཛེས། །རྒྱབ་ཞལ་སྤྱན་ཞེང་ནས་དྲུག་ཡིན། །དཀྱུས་སུ་ཕྱེད་བཅས་སོར་མོ་བཞི། །ཉ་ཡི་
ལྟོ་འདྲ་མཛེས་པ་ནི། །ལྷ་མོ་སྒེག་ཉམས་ཅན་ལའང་སྦྱར། །མིག་དཀྱུས་སོར་མོ་བཞི་དག་ལ། །རྐང་པ་བཞི་པའི་ཞེང་གིས་མཛེས། །ཀུན་གྱི་ཡིད་འཕྲོག་མཛེས་པའི་སྤྱན། །མིག་དབུས་སུམ་ཆའི་འབྲས་བུ་ནག །དེ་དབུས་མཐོང་མིག་ཕྱེད་བཅས་ནས། །རྫི་མ་རྐང་པ་ཕྱེད་ཀྱི་ཚད། །མིག་འབྲས་དཀར་ནག་ཆ་མཉམ་ཞིང་། །སོ་སོར་མ་འདྲེས་མཛེས་པར་བྱ། །མིག་ལྤགས་སོར་གྱི་ལྔ་ཆའི་དཔངས། །སྤྱན་གཉིས་བར་དུ་སོར་མོ་ཟུང་། །དེ་དབུས་ཤངས་ནི་སོར་གཅིག་དཔངས། །མངོན་པར་མཐོ་ཞིང་ཡིད་ཙམ་གཟུར། །དྲང་ཞིང་མཛེས་པའི་ཤངས་རྩེའི་དཔངས། །ཕྱེད་བཅས་སོར་གཅིག་རྣམ་རིག་བྱ། །ཤངས་དཀྱུས་སོར་གཅིག་སྔར་བཤད་པ། །ཤངས་ཀྱི་རྩ་བ་དག་ལ་སྦྱར། །ཤངས་རྩེ་འཆད་པས་སོར་ཕྱེད་བསྣན། །སྣ་ཡི་ཀ་བ་སོར་ཕྱེད་ཞེང་། །སྣ་བུག་རྒྱར་ཡང་དེ་བཞིན་ནོ། །སྣ་གཤོག་རྒྱས་པ་ནས་གཉིས་སོ། །བསྡོམས་པས་ཤངས་ཞེང་སོར་གཉིས་རྒྱས། །སྣ་བུག་ཟབས་སུ་སོར་གྱི་ཚད། །ཤངས་ཀྱི་འོག་ནས་མཆུ་སྒྲོས་བར། །ཡ་མཆུའི་པདྨ་ཞེས་བྱ་བ། །དཀྱུས་སུ་སོར་བཞི་ཞེང་ལ་ནི། །རྐང་པས་དམན་པའི་སོར་མོའི་དབུས། །ཅུང་ཞིག་དམའ་བ་ནས་གཅིག་གོ །གུ་ཙྪི་ཞེས་ཀྱང་རྣམ་པར་གྲགས། །དགེ་དང་མི་དགེ་འཇུག་ལྡོག་གི །ལེགས་གསུང་བདུད་རྩི་སྤྲོ་བའི་སྒོ། །འཛུམ་ཞལ་དཀྱུས་སུ་ཆ་ཕྲན་བཞི། །ཡ་མཆུའི་པད་སྒྲོས་དབུས་དག་ན། །ནེ་ཙོ་ཁྲ་ཡི་གདོང་འདྲ་བ། །འཕྱར་བའི་ངོས་ལ་རྐང་པ་གཅིག །མ་མཆུ་དག་ཀྱང་དེ་
བཞིན་ལ། །དཔངས་སུ་ནས་དྲུག་འཛུམ་པ་དང་། །རྒོད་དང་ཞལ་ནི་གདངས་པ་རྣམས། །མཁས་པས་ཉམས་དང་ལྡན་པར་བྱ། །ཀོས་ཀོའི་རྩེ་མོ་ཟླུམ་ཞིང་རྒྱས། །རྒྱ་དཔངས་སོར་མོ་གཉིས་སུ་བྱ། །ལྐོག་མ་འཕྱར་བ་སོར་མོ་བཞི། །མགྲིན་པ་བུམ་པ་ལྟར་མཛེས་པ། །ཟླུམ་རྒྱས་རི་མོ་གསུམ་ལྡན་པ། །དང་པོ་སོར་གཅིག་རྐང་པས་དམན། །གཉིས་པ་སོར་གཅིག་རྐང་པ་གཅིག །ལྷག་མ་ཆ་ཕྲན་གཉིས་སུ་བཤད། །རི་མོ་རྣམས་ཀྱི་རྩེ་མོ་ཡང་། །རིམ་གྱིས་ཕྲ་ཞིང་གྱེན་དུ་ཕྱོགས། །སོར་མོ་ཉི་ཤུ་རྩ་བཞི་ཡིས། །མགྲིན་པར་བསྐོར་བའི་ཚད་དུ་བཤད། །ཞལ་གྱི་དབྱིབས་ནི་རྣམ་བཞི་སྟེ། །བྱ་ནག་སྒོ་ང་ཏིལ་དང་ནི། །གྲུ་བཞི་པ་དང་ཟླུམ་པོ་འོ། །སྐྱེས་ཆེན་ལྷ་དང་ལྷ་མོ་ནི། །བྱ་ནག་སྒོ་ང་ཏིལ་གྱི་དབྱིབས། །མཛེས་ཤིང་བལྟ་ན་སྡུག་པ་ཡི། །ཞལ་ནི་རྣམ་གཉིས་ཉིད་དུ་བྱ། །ཡི་དྭགས་འབྱུང་བོ་ཤ་ཟ་དང་། །ཁྲོ་རྣམས་མི་སྡུག་རྣམ་པ་སྟེ། །གྲུ་བཞི་པ་དང་ཟླུམ་པོར་གསུངས། །ཞལ་གང་གྲུ་བཞིའི་ཐིག་གི་ནང་། །དཔྲལ་དཀྱུས་སོར་མོ་བརྒྱད་དམ་བཅུའི། །མཚམས་ནས་དཔྲལ་བ་གཞུ་ལྟར་གུག །ཞལ་དཔངས་འགྲམ་པའི་ཟུར་ཁུགས་ནས། །གཅིག་གཉིས་གསུམ་དང་ཕྱེད་དང་གསུམ། །སོར་མོས་ཕྲི་བས་བ་ཡིག་དང་། །ཨ་འབྲས་ཏིལ་དང་བྱ་སྒོང་དབྱིབས། །དཔལ་ལྡན་འཁོར་ལོ་སྡོམ་པ་ཡི། །ཞལ་བཞི་ལ་ཡང་སྦྱར་བྱ་སྟེ། །གཡས་ཞལ་སྒོ་ངའི་དབྱིབས་འདྲ་ཞིང་། །རྩ་ཞལ་ཨ་འབྲས་རྒྱབ་ཞལ་ཏིལ། །གཡོན་ཞལ་གྲུ་བཞི་པ་ཡིག་སྟེ། །མཁས་པས་ལྷ་ཡི་གདོང་བ་བརྒྱན། །ཤངས་ཀྱི་རྩ་བའི་ཐད་ཟུར་གྱི། །འགྲམ་པ་དག་ནས་ལེགས་སྐྱེས་པའི། །སྙན་དཀྱུས་སོར་མོ་ཕྱེད་
དང་ལྔ། །སྨིན་མའི་རྩེ་དང་སྙན་རྩེ་མཉམ། །མིག་གི་ཐད་ཟུར་འགྲམ་པ་ལས། །ཐོན་པའི་རྣ་བའི་འཁྱིལ་བ་ཞེས། །ལོགས་སུ་འཕྱར་བ་སོར་ཕྱེད་ཀྱིས། །ཤངས་འབུར་མེ་ཏོག་སྒང་བུའི་དབྱིབས། །སྲིད་དུ་སོར་གཅིག་ལྡན་པའི་འོག །རྣ་བའི་ཁུང་བུ་རྒྱ་དང་དཔངས། །ཆ་ཕྲན་གཅིག་གིས་ཉེ་བར་མཛེས། །དེ་དང་འབྲེལ་བའི་འོག་གི་ཁུང་། །རྒྱ་དཔངས་སོར་མོ་ཕྱེད་དུ་བྱ། །དེ་གཉིས་ཕྱི་མཐའ་བསྐོར་བ་ཡི། །པགས་པ་འབུར་དང་དམའ་བ་གཉིས། །སོ་སོར་རྐང་པ་གཉིས་ཀྱི་ཞེང་། །དེ་ཡི་ཕྱི་མཐའ་རྣ་བའི་རྒྱུན། །ཞེང་དུ་སོར་ཕྱེད་དཔངས་སོར་གཅིག །བསྡོམས་པས་སྙན་ཞེང་སོར་མོ་གཉིས། །རྒྱབ་ཏུ་སོར་ནི་ཕྱེད་དང་གཉིས། །འགྲམ་པ་དག་ལས་མངོན་པར་འཕགས། །སྙན་ཤལ་སོར་བཞི་ལྔ་ཡང་རུང་། །ཞེང་དུ་ཆ་ཕྲན་ཕྱེད་དང་གཉིས། །མདུན་དུ་ཕྱོགས་ཤིང་མཛེས་པར་བྱ། །སྙན་བར་མདུན་ལོགས་བཅོ་བརྒྱད་སོར། །རྒྱབ་ལོགས་སོར་མོ་བཅུ་བཞིར་བྱ། བསྡོམས་པས་སུམ་ཅུ་སོ་དྲུག་བསྐོར། །མགྲིན་དཀྱུས་སོར་བརྒྱད་ཕྱི་ཟུར་ནས། །ཕྲག་པ་ཞལ་གང་སོར་མོ་གཉིས། །དཔུང་མགོ་ཟླུམ་ཞིང་ཕྲག་གོང་རྒྱས། །དཔུང་བའི་མགོ་ནས་མཆན་ཁུང་རྩེར། །སོར་དྲུག་ནུ་མའི་བར་ཡང་ངོ་། །མཆན་ཁུང་རྩེ་ནས་ཕྲག་པའི་སྟེང་། །སོར་དགུ་ཉི་ཤུ་རྩ་བཞིས་བསྐོར། །དཔུང་ལྷུ་སོར་མོ་ཉི་ཤུ་དང་། །ཕྱག་ངར་བཅུ་དྲུག་ཚད་དག་གིས། །རང་རང་སྦོམས་སུ་རྣམ་པར་བསྐོར། །མཁྲིག་མ་བསྐོར་བ་ཆ་ཆེན་གཅིག །དཔུང་ལྷུ་ཕྱག་ངར་མཁྲིག་མ་རྣམས། །བསྐོར་བའི་སུམ་ཆ་བྲི་བྱ་ལའོ། །ཕྱག་
མཐིལ་སྲིད་ཞེང་སོར་མོ་བདུན། །གུང་མོ་སོར་ལྔ་ཚིགས་ཕྱེད་ཀྱིས། །ཕྲི་བས་མཛུབ་མོ་སྲིན་མཐེབ་ནི། །གུང་མོ་དག་ལས་སོར་ཕྱེད་དམན། །སྲིན་མཐེབ་དག་གི་ཚིགས་གཅིག་གི །མཐེབ་ཆུང་དམའ་ཞིང་སོར་མོ་རྣམས། །ཆ་མཉམ་ཚིགས་པ་གསུམ་དང་ལྡན། །ཚིགས་ཕྱེད་མཚམས་ནས་སེན་མོ་ནི། །མདོག་དམར་སྒལ་ནི་མཐོ་བར་བྱ། །སོར་མོའི་དཀྱུས་ཀྱི་སུམ་ཆ་ནི། །ཚད་པས་རང་རང་རྩ་བ་བསྐོར། །རྩ་བའི་སུམ་ཆ་ཚད་པ་སྦོམས། །དེ་ཡི་སུམ་ཆ་ཕྲི་བ་ཡིས། །སོར་མོའི་རྩེ་མོ་བསྐོར་བར་བྱ། །རིམ་གྱིས་ཕྲ་ཞིང་མཉེན་ཞིང་མཛེས། །མཁྲིག་མ་དག་ནས་སོར་བཞིའི་མཚམས། །ལེགས་སྐྱེས་མཐེ་བོང་སོར་བཞི་པ། །ཚིགས་པ་གཉིས་ལྡན་སོར་མོ་ནི། །རྩ་བའི་ཚིགས་ཀྱི་ཕྱེད་དུ་སླེབ། །མཐེ་བོང་སྦོམས་སུ་སོར་བཞིས་བསྐོར། །མཐེ་བོ་དག་གི་རྩ་བ་ནས། །མཛུབ་མོའི་རྩ་བར་སོར་མོ་གཉིས། །མཐེའུ་ཆུང་གི་རྩ་བ་ནས། །མཁྲིག་མའི་བར་དུ་སོར་ལྔ་ཡིན། །ཕྱག་མཐིལ་དུང་དང་འཁོར་ལོ་དང་། །དཔལ་གྱི་བེའུ་ལ་སོགས་པའི། །རི་མོ་དག་གིས་ལེགས་པར་སྤྲས། །མཆན་ཁུང་རྩེ་ནས་རྩེ་ཡི་བར། །ཉི་ཤུ་རྩ་ལྔའི་སོར་མོ་ནི། །རྒྱབ་མདུན་གཉིས་སུ་སོ་སོར་གནས། །མཆན་ཁུང་འོག་གི་ལོགས་གཉིས་ལ། །ཆ་ཕྲན་བརྒྱད་བརྒྱད་ཀུན་དྲིལ་བས། །དྲུག་ཅུ་རེ་དྲུག་སོར་མོས་བསྐོར། །ནུ་ཏོག་ནས་བཞི་རྣམ་པར་བརྒྱན། །ནས་གཉིས་འོད་ཀྱིས་ཀུན་ཏུ་བསྐོར། །ནུ་མའི་བར་དུ་མཐོ་ཡི་ཚད། །ནུ་མའི་ཐད་ཀྱི་མདུན་རྒྱབ་རྒྱར། །སོར་མོ་ཉི་ཤུ་ཕྱེད་དང་གསུམ། །ལོགས་གཉིས་སོ་སོར་བཅུ་གཉིས་སོར། །དྲིལ་བས་དྲུག་ཅུ་རེ་དགུས་བསྐོར། །ནུ་མའི་འོག་ནས་སོར་གཉིས་ཐད། །
སྐུ་ཡི་མདུན་རྒྱབ་ཉི་ཤུ་སོར། །རྩིབས་ལོགས་སོ་སོར་ཆ་ཕྲན་བཅུ། །བསྡོམས་པས་ཆ་ཕྲན་དྲུག་ཅུས་བསྐོར། །ལྟེ་བ་ནུ་མའི་བར་དག་ལ། །ཆ་ཕྲན་དག་ནི་བཅུ་དྲུག་དང་། །ནུ་མ་ཕྲག་པར་ཞལ་གང་ངོ་། །ལྟེ་བའི་ཐད་སོར་ཞེང་དྲུག་ཅུ། །ཟླུམ་པོར་བསྐོར་བས་སུམ་འགྱུར་རོ། །ལྟེ་གོང་སོར་མོ་གཅིག་གི་མཚམས། །ཞེང་ནི་སོར་མོ་བཅོ་ལྔ་ལ། །སུམ་འགྱུར་ཚད་ཀྱིས་བསྐོར་བ་ཡིན། །རྐེད་པ་ཕྲ་ཞིང་སྐབས་ཕྱེད་བྱ། །ལྟེ་ཁུང་རྒྱ་དཔངས་སོར་གཅིག་པ། །ཟབ་དང་གཡས་སུ་འཁྱིལ་བ་ཡིན། །ལྟེ་བའི་འོག་ནས་སོར་བརྒྱད་མཐར། །སྟ་ཟུར་བར་དུ་བཅོ་བརྒྱད་སོར། །བཅུ་དགུ་དག་ཀྱང་ལེགས་པར་བཤད། །དེ་དག་སུམ་འགྱུར་བསྐོར་བར་བྱ། །གསང་བའི་ཆུ་སྐྱེས་ཡུ་བ་ལ། །སོར་བཞི་ནོར་བུ་ཆ་ཕྲན་གཉིས། །ཆ་ཕྲན་དྲུག་གིས་སྦོམས་སུ་བསྐོར། །འོག་ཏུ་འཕྱང་བའི་འབྲས་བུའི་དཀྱུས། །སོར་ལྔ་ཞེང་དུ་ཆ་ཆུང་བཞི། །གཉིས་པོ་ཡིད་ཀྱིས་སྤྲུལ་པར་གསུངས། །འཕོངས་ཚོས་ཟླུམ་པོ་ཆ་ཕྲན་བརྒྱད། །འབུར་བ་ལ་ནི་ཆ་ཕྲན་གསུམ། །བརླ་ཡི་རྩ་བ་བསྐོར་བ་ལ། །ཆ་ཕྲན་སུམ་ཅུ་སོ་དྲུག་གོ །དེ་འོག་སྦོམས་སུ་སུམ་ཅུ་གཉིས། །པུས་མོའི་ཐད་སོར་ཉི་ཤུ་བརྒྱད། །རྗེ་ངར་དབུས་སུ་ཉི་ཤུ་གཅིག །ལོང་བུའི་ཐད་སོར་བཅུ་བཞི་རྣམས། སོར་མོའི་ཚད་ཀྱིས་བསྐོར་བ་ཡི། །རིམ་གྱིས་ཕྲ་ཞིང་མཛེས་པའོ། །དེ་དག་རྣམས་ཀྱི་སུམ་ཆ་ནི། །བྲིས་སྐུ་དག་ལ་བཀོད་པར་བྱ། །ཞབས་མཐིལ་སོར་མོ་བཅུ་གཉིས་ཏེ། །མཐེ་བོང་མཛུབ་མོ་སོར་མོ་གསུམ། །མཛུབ་མོའི་བཅུ་དྲུག་ཆ་ཡིས་ནི། །དམན་པའི་གུང་མོ་རིམ་པ་བཞིན། །སོ་སོར་བརྒྱད་
ཆ་བརྒྱད་ཆས་དམན། །མཐེ་བོང་སྦོམས་སུ་སོར་ལྔས་བསྐོར། །ལྷག་མ་རང་རང་དཀྱུས་ཀྱིས་བསྐོར། །སོར་མོ་ཐམས་ཅད་ཚིགས་གཉིས་པ། །སེན་མོ་རྣམས་ནི་ཚིགས་ཕྱེད་དོ། །ཞབས་མཐིལ་སོར་མོར་བཅས་པའི་དཀྱུས། །སོར་ནི་བཅོ་ལྔ་དག་དང་ལྡན། །བཅུ་ཡི་ཚད་ཀྱང་ལེགས་པར་བཤད། །སོར་མོ་རྣམས་ཀྱི་རྩ་བ་ཡི། །ཞབས་མཐིལ་ཞེང་དུ་སོར་མོ་དྲུག །དབུས་སུ་སོར་ལྔ་རྟིང་པར་བཞི། །རྟིང་པ་འབུར་བ་སོར་མོ་གཉིས། །མཐེ་བོའི་རྩ་བ་ཞབས་ཀྱི་དཔངས། །སོར་མོ་གཉིས་སུ་རིག་པར་བྱ། །མཐེའུ་ཆུང་ནས་རྟིང་པའི་བར། །དཔངས་སུ་ཆ་ཕྲན་གཅིག་ཡིན་ནོ། །ཞབས་མཐིལ་མཉམ་ཞིང་འཁོར་ལོ་སོགས། །དགེ་མཚན་རི་མོ་འདྲི་བར་བྱ། །དེས་ནི་རྫོགས་པའི་སངས་རྒྱས་ཀྱི། །ཚད་ཀྱི་དབྱེ་བ་མདོ་ཙམ་བཤད། །སངས་རྒྱས་རྣམས་ཀྱི་ཞལ་གྱི་ཚད། །ཕྱེད་བཅས་སོར་མོ་བཅུ་གཉིས་ཀྱི། །ཕྱེད་ཀྱི་ཆ་རྣམས་ཕྲི་བ་ཡིས། །སོར་མོ་བཅུ་གཉིས་ཞལ་ཚད་ཀྱི། །བྱང་ཆུབ་སེམས་དཔའ་རྣམས་ཀྱི་ཚད། །སྲིད་དང་ཞེང་དུ་ཞལ་ནི་བཅུ། །སོར་མོ་བརྒྱ་དང་ཉི་ཤུར་འགྱུར། །རལ་བའི་ཅོད་པན་སོར་མོ་ནི། །བཅུ་འམ་བརྒྱད་དུ་ལེགས་པར་བཤད། །གཞན་ནི་སྔར་བཞིན་ཤེས་པར་བྱ། །གདོང་བ་དགུ་པའི་ཚད་བཤད་པ། །སྲིད་ཞེང་ཞལ་དགུ་སོར་མོ་ནི། །བརྒྱ་དང་བརྒྱད་དུ་རིག་པར་བྱ། །ཞལ་རས་ཐུགས་ཀ་ལྟེ་བ་དང་། །གསང་བའི་གནས་བར་ཆ་ཆེན་རེ། །སོ་སོར་མ་འདྲེས་ཤེས་པར་བྱ། །ཐོད་དཔངས་སོར་གསུམ་མགྲིན་པ་ཡང་། །དེ་དག་ཚད་དང་མཐུན་པ་ཡི། །གསང་བའི་གནས་ནས་སྤྱི་བོའི་བར། །ཞལ་ནི་ཕྱེད་དང་ལྔ་རུ་འགྱུར། །བརླ་དང་བྱིན་པ་ཞལ་དོ་རེ། །བོལ་གྱི་དཔངས་དང་པུས་མོའི་དཔངས། །སོ་སོར་ཆ་ཕྲན་
གསུམ་དག་གིས། །གསང་བའི་གནས་ནས་ཞབས་ཀྱི་མཐར། །ཞལ་ནི་ཕྱེད་བཅས་ལྔ་རུ་འགྱུར། །དེས་ནི་སྲིད་ཚད་རྟོགས་པར་བྱ། །ཐུགས་ཀའི་ཚངས་པའི་རི་མོ་ནས། །མཆན་ཁུང་རྩེ་བར་སོར་མོ་བཅུ། །དཔུང་ལྷུ་ཆ་ཕྲན་བཅོ་བརྒྱད་དང་། །ཕྱག་ངར་བཅུ་བཞིའི་སོར་མོ་ཡིན། །ཕྱག་མགོ་སོར་མོ་བཅུ་གཉིས་རྣམས། །བསྡོམས་པས་སོར་མོ་ལྔ་བཅུ་བཞི། །ཞལ་ནི་ཕྱེད་བཅས་ལྔ་རུ་འགྱུར། །དེ་བཞིན་གཡས་གཡོན་མཚུངས་པ་ཡི། །ཞེང་གི་ཚད་ནི་རིག་པར་བྱ། །ནུ་མ་རྒྱ་དཔངས་ཆ་ཕྲན་བཞི། །མཁྲེགས་ཤིང་ཟླུམ་རྒྱས་ཉིད་དུ་བྱ། །རལ་བ་ཕྱེད་བཅིངས་སྒྲ་ཡི་ཚད། །སོར་དྲུག་ལྷ་མོ་རྣམས་ལ་མཛེས། །དེ་དག་ལྷ་མོ་སྒྲོལ་མ་སོགས། །དཀྱིལ་འཁོར་ས་ཡི་ལྷ་མོ་དང་། །ཆུ་ལྷ་བདེན་བྲལ་ནོར་ལྷ་དང་། །ཞི་བའི་གཟའ་དང་འདོད་ལྷ་དང་། །ཉན་ཐོས་རྣམས་ཀྱི་ཚད་དུ་བཤད། །དེ་ལྟར་ཐལ་མོ་བཅུ་པ་དང་། །ཐལ་མོ་དགུ་ཞེས་བཤད་པ་ཡིས། །མཚན་ཉིད་གསུམ་པ་རིག་པར་བྱ། །ཁྲོ་བོ་བཅུ་དང་གནོད་སྦྱིན་དང་། །ཐགས་བཟང་བདེན་བྲལ་གཤིན་རྗེ་དང་། །མེ་ལྷ་དྲག་པོའི་གཟའ་ལ་སོགས། །སྲིད་ཞེང་ཐལ་མོ་བརྒྱད་དུ་གསུངས། །ཞལ་དང་ཐུགས་ཀ་ལྟེ་བ་དང་། །གསང་བའི་གནས་རྣམས་ཆ་ཆེན་རེ། བརླ་དང་བྱིན་པ་སོ་སོར་ནི། །སོར་མོ་བཅོ་བརྒྱད་དག་ཏུ་བྱ། །ཁྲོ་བོའི་མགྲིན་ཚད་དོར་བ་ཡིན། །བོལ་དང་པུས་མོ་ཐོད་པའི་དཔངས། །སོ་སོར་ཆ་ཕྲན་བཞི་ཡིས་ནི། །སྲིད་ཀྱི་ཚད་ནི་རྟོགས་པར་བྱ། །བྲང་ཞེང་ཕྱེད་ལ་སོར་མོ་བཅུ། །དཔུང་ལྷུ་སོར་མོ་བཅུ་བཞི་དང་། །ཕྱག་ངར་ཕྱག་མགོ་ཞལ་གྱི་ཚད། །ཆ་ཤས་གཞན་ལའང་སྦྱར་བ་ཡིས། །
ཞེང་གི་ཚད་ནི་ལེགས་པར་ཤེས། །སྐུ་ཡི་སྤོམ་ཕྲ་ཡན་ལག་རྣམས། །རགས་དང་གྲིམས་དང་རོལ་པ་སོགས། །མཁས་པས་ཉམས་དང་རྗེས་སུ་བསྟུན། །སྤྲུལ་སྐུའི་དབུ་སྐྲ་བུང་བ་ནི། །ཚད་ཡིག་རྣམས་སུ་མི་གསལ་བས། །འདུལ་བ་དག་ནས་ལེགས་གསུངས་པ། །དགོན་པ་བ་དང་གྲོང་མཐའ་བའི། །རབ་ཏུ་བྱུང་བའི་སྐྲ་ཡི་ཚད། །སོར་མོ་གཉིས་སམ་ཕྱེད་བཅས་བྱ། །འཁོར་ལོ་སྡོམ་པ་ལ་སོགས་དང་། །ཁྲོ་བོའི་ཞབས་ནི་བགྲད་པ་རྣམས། མཐོ་ལྔ་རུ་ནི་གསུངས་པ་ཡིན། །ཟླ་གདན་རྒྱར་ཡང་དེ་བཞིན་ནོ། །ཐལ་མོ་བཅུ་པའི་ལྷ་རྣམས་ཀྱི། །བཞུགས་པའི་བརླ་ཡི་རྩ་བའི་དཔངས། །ཆ་ཆེན་གཅིག་ཏུ་རིག་པར་བྱ། །པུས་མོའི་དཔངས་སུ་སོར་མོ་བདུན། །སྐྱིལ་ཀྲུང་སྣོལ་མཚམས་དཔངས་སོར་བརྒྱད། །པུས་མོ་གཉིས་ཀྱི་བར་དུ་ནི། །སྐྱིལ་ཀྲུང་ཞལ་བཞི་སོར་མོ་བཞི། །རྟིང་གཉིས་བར་དུ་སོར་མོ་བཞི། །སྐྱིལ་ཀྲུང་བྱས་པའི་ཕྱི་མཐའ་ནས། །གསང་གནས་བར་དུ་སོར་བརྒྱད་དམ། །སོར་མོ་བཅུ་ཡི་བར་དུ་བྱ། །དེ་རྣམས་ཚད་དང་མཐུན་པ་ཡི། །བཟོ་ཐིག་ཅུང་ཞིག་བརྗོད་པ་ཡིན། །གཞན་ཡང་ཡན་ལག་ཉིང་ལག་སོགས། །བརྐྱང་བསྐུམས་བསྐྱེད་བྲི་སྣ་ཚོགས་པ། །མཁས་པ་རྣམས་ཀྱིས་ཤེས་བྱ་ཡིན། །དེ་ལྟར་རྨད་བྱུང་ཕྱག་ཚད་ཀྱི། །གདོང་བ་བརྒྱད་པ་ཞེས་པ་ཡིས། །མཚན་ཉིད་བཞི་པ་ལེགས་པར་བརྗོད། །སྐུ་གཟུགས་མཚན་ཉིད་མི་ལྡན་པའི། །ཉེས་དམིགས་འདི་དག་རིག་པར་བྱ། །བདེ་མཆོག་སྡོམ་པ་འབྱུང་བ་ལས། །རིང་བ་གསུམ་ནི་སྐྱོན་ཆེན་ཏེ། །ཀོས་ཀོ་མགྲིན་པ་བྱིན་པའོ། །
ངེས་པར་བདག་ཉིད་སྔགས་པ་ཡི། །གནས་ལས་ཉམས་ཤིང་སྐྲོད་པར་བྱེད། །འགྲམ་པ་བྲང་དང་རྩིབ་ལོགས་ཏེ། །གསུམ་པོ་ཞོམ་ན་སྐྱོན་ཆེན་པོ། །དོན་རྣམས་ཉམས་པར་འགྱུར་བ་དང་། །འདིར་ནི་བགེགས་འབྱུང་ཐེ་ཚོམ་མེད། །ནུ་མ་ཤངས་དང་དཔྲལ་བ་སྟེ། །གསུམ་པོ་ཡོ་ན་སྐྱོན་ཆེན་པོ། །སྒྲུབ་པོ་དེ་དག་མྱུར་བར་ནི། །དགྲ་ཡིས་རྩོད་པས་གདུང་བར་འགྱུར། །བརླ་དང་དཀུ་དང་ནམ་ཚོང་སྟེ། །གསུམ་པོ་ཉམས་ན་སྐྱོན་ཆེན་ཡིན། །ཆོམ་རྐུན་སོགས་ཀྱིས་འཇོམས་པ་འམ། །འཆི་བར་འགྱུར་བར་ཐེ་ཚོམ་མེད། །སྙན་དང་མཆུ་དང་དཔྲལ་བ་དང་། །ཤངས་ཉམས་སྤྱན་ནི་ཡོ་བའི་སྐྱོན། །ངེས་པར་སྔགས་པ་བདག་ཉིད་ལ། །སྣ་ཚོགས་བགེགས་འབྱུང་འཆི་བར་འགྱུར། །གྱེན་དུ་གཟིགས་ཤིང་དབུགས་བསྐྱོད་ཚུལ། །གདན་ལས་ཡོ་ཞིང་བསྐྱོད་ལྟ་བུ། །རང་གི་གནས་ནས་ངེས་འཕོ་ཞིང་། །དོན་རྣམས་འཇོམས་པ་ཉིད་དུ་འགྱུར། །མགྲིན་པ་ནམ་ཚོང་ལ་སོགས་པའི། །སྐྱོན་ནི་གྲངས་མེད་ཞིག་ཏུ་གནས། །འདིར་ནི་སྤྱན་སོགས་ཡོ་བ་དང་། །ཕྱག་རྒྱ་ཕྱག་མཚན་ནོར་གྱུར་ན། །མྱ་ངན་སྡུག་བསྔལ་གྱིས་རབ་གདུང་། །དེ་ཕྱིར་སྐྱོན་བརྟགས་དཔྱོད་པར་བྱ། །རྒྱབ་ཡོལ་གདུགས་དང་གདན་རྣམས་ཏེ། །གསུམ་པོ་ཆུང་ཞིང་དོག་པའི་སྐྱོན། །མཛའ་བོས་མི་སྙན་བརྗོད་པ་དང་། །དཔལ་ཉམས་འཆི་བར་འགྱུར་བ་ཡིན། །སྐྱོན་འདི་དག་ནི་སྐྱོན་ཆེན་པོ། །མཁས་པས་ལེགས་པར་བརྟག་པར་བྱ། །ཞེས་གསུངས་ཤིང་། ཨིན་དྲའི་བུས་
ཞུས་པའི་ཚད་ཡིག་ལས། སྐུ་གཟུགས་ལྷག་དང་ཆད་པ་ཡི། །ཡོན་ཏན་སྐྱོན་རྣམས་བརྗོད་བྱ་ཞིང་། །རིང་ཞིང་ཡངས་དང་ལྡན་གྱུར་ན། །གནས་རྣམས་ལེགས་པར་བརྟན་པ་སྟེ། །དབུ་ནི་གདུགས་ཀྱི་དབྱིབས་ལྟ་བུ། །ནོར་བུ་འབྲུ་ནི་ལེགས་འཕེལ་ཏེ། །དཔྲལ་བ་སྨིན་མའི་དབྱིབས་ལེགས་པས། །རྟག་ཏུ་དཔལ་ནི་སྟེར་བར་འགྱུར། །པད་སྒྲོས་ནེ་ཙོ་འདྲ་བ་ཡིས། །སྐྱེ་དགུ་སྡེ་བཅས་རྒྱལ་བར་འགྱུར། །སྐུ་ཡི་མགྲིན་པ་དུང་འདྲ་ན། །དངོས་གྲུབ་ཐམས་ཅད་རྟག་ཏུ་བྱེད། །སྐུ་སྟོད་སེངྒེའི་དབྱིབས་འདྲ་བས། །ལོ་ལེགས་དང་ནི་སྟོབས་འཕེལ་འགྱུར། །ཕྱག་ནི་གླང་ཆེན་ལག་འདྲ་བས། །འདོད་པའི་དོན་ཀུན་སྒྲུབ་པར་བྱེད། །ཕྱལ་ལེགས་འབྲས་བུ་ཕུན་སུམ་ཚོགས། །རྟག་ཏུ་ལོ་ལེགས་རྣམས་སུ་བྱེད། །བརླ་ཡི་ཆ་ལེགས་ར་བ་འཕེལ། །བྱིན་པའི་དབྱིབས་ལེགས་གྲོང་རྣམས་འཕེལ། །སྐུ་ཡི་ཞབས་ནི་ལེགས་གྱུར་པས། །ཚུལ་ཁྲིམས་རིག་པ་རབ་ཏུ་འགྲུབ། །དེ་རྣམས་སྐུ་ཡི་བསྔགས་བརྗོད་དོ། །དམན་པས་ཡུལ་ཕྱོགས་ནོར་རྣམས་འཇོམས། ཞེང་དང་སྲིད་དུ་དམན་པ་ཡིས། །མུ་གེ་དང་ནི་ཡུལ་འཇོམས་འགྱུར། །ལུས་དམན་གྱུར་པས་སྒུར་པོ་དང་། །ཤངས་དམན་པ་ཡིས་ཁྲོ་བ་དང་། །གཡོན་མིག་ཕྱུགས་རྣམས་ཟད་བྱེད་ཅིང་། །སྟེང་མིག་ནོར་ནི་འཛད་པར་བྱེད། །མིག་ཆུང་མིག་ནི་ཟླུམ་པོ་དང་། །དེ་བཞིན་དུ་ནི་མིག་ཡོན་དང་། །མིག་དམན་པ་དང་འོག་མིག་རྣམས། །རིང་དུ་རྣམ་པར་སྤང་བར་བྱ། །སྐུ་ཡི་ཕྱལ་ནི་དམན་གྱུར་ན། །འབྲུ་རྣམས་རྟག་ཏུ་ཉམས་པར་བྱེད། །སྐུ་ཡི་བརླ་ནི་དམན་གྱུར་ན། །མངལ་ནས་དམན་
པ་ལྷུང་བར་འགྱུར། །ཤངས་དང་སྤྱན་དང་ཕྱག་སོར་གསུམ། །ཐུང་བ་རྣམས་ནི་ཉེས་པ་ཆེ། །མགྲིན་པ་ཀོས་ཀོ་རྗེ་ངར་གསུམ། །རིང་བ་རྣམས་ནི་ཉེས་པ་ཆེ། །དབུ་དང་སྙན་དང་ཤངས་དང་གསུམ། །ཕྲ་བ་རྣམས་ནི་ཉེས་པ་ཆེ། །དེ་ཕྱིར་སྐྱོན་ཡོན་ཤེས་བྱས་ནས། །སྐུ་གཟུགས་རྣམ་པར་སྤྲོ་བར་བྱ། །ཡང་དེ་ཉིད་ལས། སྐུ་ནི་ཚད་མི་སྟེར་བ་དང་། །ཡང་ན་ནོར་རྣམས་ཟད་པར་བྱེད། །སྐུ་ནི་ཆག་པས་རིགས་ཉམས་ཤིང་། །གས་པས་ཕྱོགས་རྣམས་འཁྲུག་པར་བྱེད། །སྐུ་འམ་གལ་ཏེ་ལིང་ག་དང་། །ལྷ་མོ་མ་མོའི་ཚོགས་དེ་བཞིན། །ཆོ་གའི་ལས་ནི་ལྟ་བྱས་ནས། །མྱུར་དུ་དེ་རྣམས་གཤེགས་པར་བྱ། །མེ་ཏོག་མཆོད་རྟེན་དེ་བཞིན་དུ། །སྤོས་དང་ཞལ་ཟས་གཏོར་མ་དང་། །གོས་ལ་སོགས་པ་འབུལ་བྱ་ཞིང་། །དེ་བཞིན་སྦྱིན་སྲེག་ལས་སྦྱངས་ནས། །དགེ་དང་ཞི་བའི་ཆུ་བོ་ལ། །ལྷ་ཡི་སྔགས་ནི་བཟླས་བྱས་ནས། །སྐྲ་དང་ཐག་པ་མུན་ཛ་དང་། །ཟར་མ་དུ་ཀུ་ལ་དེ་བཞིན། །ཆོ་ག་བཞིན་དུ་བྱས་ནས་ནི། །ཐག་པ་ཡིས་ནི་བཅིང་བར་གསུངས། །ཁྱུ་མཆོག་སྟེང་དུ་བཅིངས་ནས་ནི། །ལྷ་རྣམས་རྙིང་པ་སྤྱན་དྲངས་ལ། །གོས་ཀྱི་རང་བཞིན་སྐུ་གཟུགས་ནི། །ཆུ་བོ་ཆེན་པོའི་འགྲམ་དག་དང་། །དེ་བཞིན་གཙང་བོ་འདུས་རྣམས་ལ། །དེ་རུ་དེ་བཞིན་འཕང་བར་བྱ། །གསེར་དང་དངུལ་དང་དེ་བཞིན་དུ། །ཟངས་དང་ར་གན་རང་བཞིན་ཡང་། །གལ་ཏེ་བདག་ཉིད་དཔལ་འདོད་ན། །དེ་ཀུན་མེ་ལ་ཞུ་བར་བྱ། །ཤིང་གི་རང་བཞིན་ལས་གྱུར་སྐུ། །དེ་བཞིན་གོས་
ཀྱིས་ཡོངས་གྲིབ་ནས། །སྣུམ་དང་སྦྲང་གིས་བརླན་བྱས་ལ། །སྒྲོན་མེ་གཅིག་ནི་སྦར་བར་བྱ། །ས་རྡོ་རང་བཞིན་ལས་བྱུང་སྐུ། །རི་བོའི་ཕྱོགས་གྱུར་གང་ཞིག་ཏུ། །ས་ནི་མི་གང་ཙམ་བརྐོས་ནས། །སྐུ་གཟུགས་སྦས་ཏེ་དགང་བར་བྱ། །སྐུ་གཟུགས་རྙིང་པ་གཤེགས་བྱ་བ། །གཞན་གྱིས་བྱས་ན་ཉེས་དམིགས་འབྱུང་། །བདག་ཉིད་ཆེན་པོ་རྣམས་ཀྱིས་བྱ། །དུས་ནི་བྱེ་བ་སྟོང་རྣམས་སུ། །ལྷ་ཡི་འཇིག་རྟེན་རྣམས་ཀྱིས་མཆོད། །ཅེས་གསུངས་སོ། །དེ་ལྟར་མཚན་ཉིད་མི་ལྡན་པའི། །ཉེས་སྐྱོན་བཤགས་ཤིང་སྡོམ་པ་དང་། །ཚད་ལྡན་འབད་པས་སྒྲུབ་བྱེད་པ། །དེ་ཡི་ཕན་ཡོན་བདག་གིས་མཐོང་། །སྐུ་གཟུགས་ཆེ་ཆུང་ནམ་མཁའི་རྒྱུ་སྐར་རྣམས། །འབད་མེད་སེམས་ཀྱི་ཆུ་མཚོར་ཞུགས་སམ་སྙམ། །མཚན་ཉིད་ལང་ཚོ་རྫོགས་པའི་མཛེས་སྐུ་དེས། །དད་ལྡན་ཐར་པའི་བདེ་བ་འདྲེན་ནམ་སྙམ། །རང་ཉིད་སྤྲོ་དགའི་ཟློས་གར་རྣམ་བསྐྱོད་པས། །སྔོན་བྱས་དགེ་བ་གོང་དུ་འཕེལ་ལམ་སྙམ། །མཁས་མཆོག་རི་དྭགས་རྒྱུ་བའི་ནགས་ནང་དུ། །རིག་གནས་གདོང་ལྔ་པ་ཡང་བདེ་བར་རྒྱུ། །འཆི་བདག་གཤིན་རྗེའི་འཇིགས་པས་གཙེས་གྱུར་ཀྱང་། །འགྱོད་པ་མེད་པའི་སེམས་དེ་བདེ་བར་གནས། །བདག་ལ་གློ་བ་ཉེ་བའི་བློ་གསལ་རྣམས། །ཚད་ལྡན་སྐུ་གཟུགས་སྒྲུབ་ལ་བརྩོན་པར་མཛོད། །ཕྱག་ཚད་ལྡན་དང་མི་ལྡན་པའི། །སྐྱོན་ཡོན་མཚན་ཉིད་ལྔ་པའོ། །མཛེས་པའི་མཐར་སོན་བདེ་གཤེགས་སྐུ། །སྐྱེ་དགུའི་དད་པའི་ཞིང་གྱུར་པ། །ལེགས་པར་བསྒྲུབ་པའི་ལྷ་བཟོ་ཡི། །མཚན་ཉིད་མདོ་ཙམ་བརྗོད་པར་བྱ། །
བདེ་མཆོག་སྡོམ་པ་འབྱུང་བ་ལས། །དུལ་ཞིང་བཟོ་རྣམས་ཀུན་ཤེས་ལ། །ཆོ་ག་མཐོང་ཞིང་མཉམ་གཞག་པས། །ཞེས་སོགས་གཞན་ཡང་གསུངས་པས་ན། །དད་བརྩོན་བློ་དང་ལྡན་པ་ཡིས། །སྡོམ་གསུམ་དགེ་བསྙེན་བསྙེན་གནས་ཀྱི། །རབ་འབྲིང་སྡོམ་པར་ལྡན་པ་ཡིས། །སྐུ་གཟུགས་ཕན་ཡོན་བསྟེན་བྱས་ཏེ། །རབ་དཀར་དགེ་བའི་ལམ་འདི་ལ། །འཇུག་པ་དལ་འབྱོར་དོན་ཡོད་སྙམ། །སྤྲོ་དགའི་བསམ་པས་ལྷུར་ལེན་ཞིང་། །རྙེད་དང་བཀུར་སྟིར་མི་ལྟ་ཞིང་། །བྱང་ཆུབ་སྒྲུབ་ཕྱིར་སེམས་བསྐྱེད་དོ། །དེ་ལྟའི་བློ་ནི་མ་སྨིན་ནའང་། །སྦྱིན་བདག་སུན་ནི་མ་ཕྱུང་ཞིང་། །རང་གཞན་བསོད་ནམས་མི་ཉམས་པས། །སེམས་ནི་ཡང་དག་བསྲུང་བ་དང་། །འབྱོར་བས་དབེན་པའི་དད་ལྡན་ཀྱིས། །དགེ་བའི་གྲོགས་སུ་འགྱུར་བར་བྱ། །ཕྱག་ཚད་ལྡན་པའི་ཕན་ཡོན་དང་། །ཉེས་དམིགས་དག་ཀྱང་ཡང་ཡང་བསམ། །བྱ་བ་བསྒྲུབ་པའི་སྐབས་རྣམས་སུ། །སྐུ་ལ་བརྙས་སེམས་འབྱུང་ཉེ་བས། །བཟོ་འཕྲོ་ཙམ་ཡང་བཀུར་སྟི་ཡིས། །གུས་པའི་ཚུལ་གྱིས་མཆོད་པར་བྱ། ཁྱད་པར་བླ་ན་མེད་པའི་སྐུ། །བཞེངས་ན་དབང་བསྐུར་མཆོག་ཐོབ་ཅིང་། །དམ་ཚིག་ལྷ་ཡི་རྣལ་འབྱོར་དང་། །ལེགས་པར་ལྡན་པའི་བློ་ལྡན་གྱིས། །ལག་ཆ་ལས་ཀྱི་ལྷར་བསྐྱེད་ནས། །གསང་བའི་ཚུལ་གྱིས་བསྒྲུབ་པ་དང་། །ཐ་ནའང་དཀྱིལ་འཁོར་འཇུག་པ་ཙམ། །མེད་མི་རུང་དུ་བླང་བར་བྱ། །དེ་ལྟར་ཉམས་སུ་ལེན་པ་ནི། །ཡོན་གནས་མཆོག་ཏུ་དེ་འགྱུར་ཞིང་། །ཇི་ལྟར་གསུངས་པའི་ཕན་ཡོན་རྣམས། །བདེ་བླག་ཉིད་དུ་འགྲུབ་པར་ངེས། །དེ་ལས་
བཟློག་པའི་བག་མེད་ནི། །རང་ཉིད་འཚོ་བའི་ཕྱིར་དང་ནི། །ཆང་ལ་སོགས་པས་བློ་མྱོས་ཤིང་། །འདོད་ཆེན་རང་བཟོས་སྒྲུབ་བྱེད་པ། །དེ་ནི་མི་བཟད་ངན་འགྲོའི་རྒྱུ། །མཁས་པས་བླང་དོར་ཤེས་པར་བྱ། །སྦྱིན་བདག་ལྷག་བསམ་མི་ལྡན་པ། །ཕྲག་དོག་འགྲན་སེམས་ཀུན་སློང་གིས། །ཐེག་པ་ཆུང་ཞིང་འགྱོད་སེམས་ཅན། །ངང་ཐུང་བཟོད་བསྲན་ཤིན་ཏུ་ཆུང་། །ནོར་གྱི་ཐ་ཤལ་གཡོ་སྒྱུས་སླུས། །དཔའ་བོ་བཞིན་དུ་གཟེངས་མཐོ་བ། །དགེ་བའི་ལམ་སྲོལ་སྣུབ་བྱེད་ནི། །རང་གཞན་ཕུན་ཚོགས་ཉམས་པའི་རྒྱུ། །བློ་དང་ལྡན་པས་ཐོག་མར་ནི། །ལེགས་པར་བརྟག་པ་ཤིན་ཏུ་གཅེས། །བསོད་ནམས་ཚོགས་ནི་མི་ཉམས་ཤིང་། །ལེགས་པར་སྡུད་པའི་སྦྱིན་བདག་ནི། །དད་ལྡན་བྱས་པ་ཤེས་པ་ཡིས། །ལྷ་དང་ལྷ་བཟོ་དབྱེར་མེད་དུ། །དགེ་བའི་ལམ་ལ་དད་པའི་བློས། །གཏོང་བའི་གོམ་པ་འགོད་པར་བྱེད། །ཐེག་པ་ཆེ་ཞིང་སྙིང་སྟོབས་ལྡན། །ཕན་ཡོན་མཐའ་དག་སྡུད་པར་བྱེད། །སྦྱིན་བདག་མཆོག་གི་མཚན་ཉིད་ཡིན། །དེ་ལྟར་ལྷ་བཟོ་སྦྱིན་བདག་གི །མཚན་ཉིད་དྲུག་པ་མདོ་ཙམ་བཤད། །ལེགས་བཤད་མཁས་པའི་སྲད་བུ་ཡིས། །ལེགས་པར་བརྒྱུས་པ་པདྨོའི་ཕྲེང་། །ལེགས་པར་འདྲིས་ཤིང་ཉམས་སུ་བླངས། །ལེགས་པར་འདོད་པའི་དོ་ཤལ་འདི། །ཚུལ་ཁྲིམས་དཔག་བསམ་རྐང་འཐུང་ནི། །ལུང་རིགས་འབྲས་བུ་བཟང་པོ་ཡིས། །ལེགས་པར་གང་བའི་དྲི་བསུང་དང་། །དོན་གཉེར་མང་པོས་བསྐུལ་ཕྱིར་བྲིས། །སྲིད་པའི་འཇིགས་པས་སེམས་གཡོས་ཤིང་། །ཐར་པའི་བདེ་བས་ཡིད་ཕྲོགས་པའི། །བློ་གསལ་རིག་གནས་འཛིན་པ་ཡི། །སོར་མོའི་ཕྲེང་བ་
རྣམས་བསྐྱོད་པས། །རིན་ཐང་མེད་པ་རྒྱལ་བའི་སྐུ། །དཔག་ཡས་ཚོགས་གཉིས་བསྐྲུན་གྱུར་ཅིག །མཛེས་སྐུའི་མཚན་ཉིད་འདིར་བཤད་པས། །ཆོས་སྐུ་མངོན་དུ་མཐོང་འགྱུར་ཞིང་། །རྒྱལ་སྲས་སྤྱོད་པ་རླབས་ཆེན་ལ། །བདག་གཞན་མྱུར་དུ་འཇུག་གྱུར་ཅིག །སྙིང་རྗེ་ཆེན་པོའི་གཞན་དབང་གིས། །ཉམ་ངའི་འགྲོ་བ་མ་ཟད་པར། །སེམས་ཅན་གཅིག་གི་ཕྱིར་དུ་ཡང་། །དཀའ་བ་དཔག་མེད་ལྷུར་བླངས་ནས། །སྲིད་པའི་སྡུག་བསྔལ་མྱུར་སེལ་ཤོག །ཕྱག་ཚད་ཀྱི་དབྱེ་བ་འདི་ནི་སྙིགས་དུས་ཀྱི་རྒྱལ་བ་དཔལ་ལྡན་བླ་མ་དམ་པ་བློ་བཟང་གྲགས་པའི་དཔལ་གྱི་ཞལ་སྔ་ནས་ཀྱིས་དཔལ་རི་བོ་དགེ་ལྡན་དུ་གསང་བ་བླ་ན་མེད་པའི་དཀྱིལ་འཁོར་བསླང་མ་རྣམས་དང་། ཐུབ་པ་ཆེན་པོའི་སྐུ། ཇོ་བོའི་སྐུ་ཚད་སོགས་ཡི་དམ་ཞི་ཁྲོ་དུ་མ་བཞེངས་པའི་དུས་སུ་རྒྱལ་བའི་སྐུ་གཟུགས་ཀྱི་སྒོ་ནས་ཀྱང་བསྟན་པ་དང་སེམས་ཅན་ལ་ཕན་པར་དགོངས་ནས་ཚད་ཡིག་གི་རྣམ་གྲངས་དུ་མ་ཞིག་ལས་བདེ་མཆོག་སྡོམ་འབྱུང་གི་དཀའ་འགྲེལ་རྒྱ་གར་གྱི་གྲུབ་ཆེན་རཀྵི་ཏས་མཛད་པའི་ལེའུ་སུམ་ཅུ་པ་ལས་ཕྱག་ཚད་ཀྱི་དེ་ཉིད་རྒྱས་པར་གསུངས་པ་ལས་ལེགས་པར་གཏན་ལ་ཕབ་ཅིང་། གངས་ཅན་གྱི་རིག་བྱེད་འཛིན་པ་རྣམས་ཀྱི་གཙུག་རྒྱན་སྡོམ་པ་གསུམ་ལ་སོགས་པའི་ལུང་རྟོགས་ཀྱི་ཡོན་ཏན་དུ་མས་ཐུགས་རྒྱུད་ལེགས་པར་གང་བ་ཁྱད་པར་བླ་མ་དེ་ཉིད་ཀྱི་བྱིན་རླབས་ཞུགས་པས་འཕྲིན་ལས་དང་འགྲོ་དོན་བསམ་གྱིས་མི་ཁྱབ་པའི་བཤེས་གཉེན་མཁས་པའི་དབང་པོ་བསོད་ནམས་རྒྱལ་མཚན་དང་། ཤེས་རབ་རྒྱལ་མཚན་ཞེས་ཡོངས་
སུ་གྲགས་པ་གཉིས་ཀྱིས་རྗེའི་བཀའ་བཞིན་དུ་ཐིག་དང་གོ་རིམ་རྣམས་མ་འཁྲུགས་པར་རི་མོ་དང་འབུར་དུ་དོད་པ་ལ་གཏན་ལ་ཕབ་ཅིང་དགོངས་པ་ཡང་དག་པར་བླངས་པ་རྣམས་ལ་འདྲིས་ཤིང་ལེགས་པར་སྦྱངས་པ་དཔལ་ལྡན་བླ་མ་ཙོང་ཁ་པ་ཡབ་སྲས་སོགས་བཤེས་གཉེན་དམ་པ་རྣམས་ཀྱི་ཞབས་རྡུལ་སྤྱི་བོར་ནོད་པའི་བཙུན་པ་མངྒལ་ཤཱི་ལས་ཕྱག་ཚད་ཀྱི་སྲིད་ཞེང་དུས་འཁོར་འགྲེལ་ཆེན་དང་བསྟུན་ནང་ཚན་གྱི་དབྱེ་བ་སྡོམ་འབྱུང་དང་མཐུན་པར་རང་བཟོ་སྤངས་ཏེ་གཙང་རོང་གི་བྱམས་ཆེན་དུ་ཡི་གེར་བཀོད་པའོ། །ཡི་གེ་པ་ནི་བླ་མའི་མིང་ཅན་བདག་གིས་བྲིས། །སྭ་སྟི། རྒྱལ་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདར་རྒྱས་རྣམ་གྲོལ་སྦྲང་རྩའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །སརྦ་མངྒལཾ། །