རྡོ་རྗེ་དབྱིངས་ཀྱི་འཁོར་སྒྱུར་གྱི་བསྙེན་པའི་རིམ་པ་སོགས་རྗེ་ཉིད་ཀྱིས་ཟིན་བྲིས་སུ་གནང་བ།
རྡོ་རྗེ་དབྱིངས་ཀྱི་འཁོར་སྒྱུར་གྱི་བསྙེན་པའི་རིམ་པ་སོགས་རྗེ་ཉིད་ཀྱིས་ཟིན་བྲིས་སུ་གནང་བ་བཞུགས་སོ། །
རྡོར་དབྱིངས་ཀྱི་ལྷག་པའི་ལྷའི་བསྙེན་པ་ནི། དཀྱིལ་ཆོག་ལྟར་ཡིན་ལ། འཁོར་སྒྱུར་གྱི་བསྙེན་པའི་རིམ་པ་ནི། དང་པོར་དཀྱིལ་འཁོར་བྱེད་པའི་སར་སློབ་དཔོན་ཤར་ནས་དཀྱིལ་འཁོར་ལ་ཕྱོགས་པར་བྱས་ནས། ཆ་གསུམ་འབྲིང་པོ་བཏང་སྟེ། དེའང་རྣལ་འབྱོར་གསུམ་གང་རུང་ལ་གནས་སོ། །དེ་ལ་ཁྲོ་བོའི་རྣལ་འབྱོར་ནི། ནང་ཁྲུས་ནས་གོ་བགོ་བའི་བར་རོ། །རྣལ་འབྱོར་གཅིག་ལྡན་ནི། སྙིང་གའི་བདག་འཇུག་དང་པོར་གཞི་ལུས་ལ་རྡོར་སེམས་གཅིག་པུ་བསྒྲུབས། དེ་ལ་སྒྲུབ་ཆེན་བཅུག་ནས་གཞི་བྱིན་རློབ་པ་ལ་སོགས་དང་། རྡོར་སེམས་དང་སྒྲུབ་ཆེན་ལ་རང་རང་གི་ཕྱག་རྒྱ་བཞིས་རྒྱས་འདེབས་པ་ཙམ་བྱེད། གཞན་རྣལ་འབྱོར་ཆེན་པོ་དང་འདྲ་བའོ། །རྣལ་
འབྱོར་ཆེན་པོ་ནི་དཀྱིལ་ཆོག་ཇི་ལྟ་བ་བཞིན་ཡིན་ལ། གཞི་ལུས་དང་། ལྕེ་ལག་བྱིན་བརླབ་ཀྱི་གོང་དུ་རྡོར་སེམས་སུ་བསྐྱེད་པ་ནི་ཁྱད་པར་དེར་འདིས་ལྷ་བསྙེན་ལའང་རྣལ་འབྱོར་གསུམ་ཤེས་པར་བྱའོ། །དེ་དག་མ་གྲུབ་ཀྱང་རུང་སྟེ། དཀྱིལ་འཁོར་གྱི་དབུས་སུ་དྲིའི་ཐིག་ལེ་མེ་ཏོག་དང་བཅས་པ་དགོད། དེའི་མདུན་དུ་ཚོམ་བུའི་གཡས་ནས་བརྩམས་པའི་ཉེར་སྤྱོད་ཚར་གཅིག་བཤམ། དེའི་ཕྱིར་གཏོར་ཆུང་གཅིག་བཤམ། ཚོམ་བུའི་གཡོན་ནས་འགོ་བཟུང་སྟེ། ཡུངས་ཀར་སོགས་ལྔ་བཤམ་མོ། །དེ་ནས་མཆོད་པ་བསང་སྦྱང་བྱིན་བརླབ་བྱས་ནས་སྐྱབས་འགྲོ་སོགས་སྔོན་དུ་བཏང་སྟེ། ཁྲོ་བོའི་རྣལ་འབྱོར་ཙམ་བྱས་ལ། གཏོར་མ་བསངས་སྦྱངས་བྱིན་གྱིས་
བརླབས། བྱིན་གྱིས་བརླབ་པའི་སྔགས་རྒྱས་མཆོད། སྤྱན་འདྲེན་གྱི་དྲིལ་གསིལ་ལྟར་བྱས་ནས། ས་ལ་རྒྱུ་བ་སོགས་ལན་གསུམ་བྱ། དེ་ནས་ལངས་ཏེ། ཡུངས་ཀར་སོགས་ལྔ་གཡས་པས་བླངས་ནས་དབང་ལྡན་ནས་བརྩམས་པའི་གཡས་བསྐོར་བྱ་ཞིང་གདོན་འབྱིན་གྱི་སྔགས་བརྗོད་ལ་དཀྱིལ་འཁོར་ལ་གཏོར། བ་བྱུང་དང་དྲི་བཟང་གིས་གཏོར་རྗེས་སུ་སྟེགས་བུ་ལ་ཕྱེ་མ་མེད་པར་བྱུག །དེ་ནས་དབུས་དང་དབང་ལྡན་སོགས་གྲྭ་བཞིར་རིན་པོ་ཆེ་བརྡར་ཏེ་ས་སྦྱང་བའོ། །ས་བཟུང་བ་ལ་དཔལ་དང་བསོད་ནམས་འཕེལ་བ་དང་། ས་བྱིན་རླབ་དང་། ལྷ་འབྱོན་པ་དང་ས་རྡོ་རྗེར་བྱ་བའི་ཕྱིར་རྒྱན་དང་རྟེན་དང་མཆོད་རྫས་ཀྱིས་ས་བཟུང་བ་དང་། དབང་ལྡན་ནས་བརྩམས་པའི་བའི་ཆུས་ཆག་ཆག་གདབ་པར་བྱ།དེ་ནས་རྡོར་དྲིལ་ཐོགས། དཀྱིལ་འཁོར་གྱི་དབུས་སུ་སོང་། ཁ་ཤར་དུ་ཕྱོགས། ཙོག་པུར་འདུག་སྟེ། གཡོན་དཀུར་བརྟེན། གཡས་ཐུགས་ཀར་བཞག་པའི་ཕྱག་ཆེན་བཅའ། དེའི་སྔགས་གཅིག་བཟླ། གཡས་པ་རྡོ་རྗེ་རྩེ་གསུམ་པའི་ཕྱག་རྒྱ་བྱས་པ་ས་ལ་གཏུགས་ནས་སྔགས་དང་ཡིག་བརྒྱ་ལན་བདུན་བཟླས་ནས། ས་ཕྱོགས་འདིར་རྡོར་དབྱིངས་ཀྱི་དཀྱིལ་འཁོར་འདྲི་བར་བྱའོ། །ཞེས་བརྗོད་དེ་ས་བཟུང་བའོ། །དེ་ནས་ཉི་མ་དེ་ཉིད་དམ། ཞག་གིས་ཆོད་ན་སང་སྔ་བར་སྟེགས་བུའི་དབུས་དང་། སྒོ་སོ་སོར་སྒོའི་སློབ་དཔོན་དང་བཅས་པའི་གདན་བཤམ། དེ་དག་རེ་རེའི་མདུན་དུའང་ཉེར་སྤྱོད་ཚང་བ་རྡོར་དྲིལ་དང་བཅས་པ་དང་། སློབ་དཔོན་
གྱི་མདུན་དུ་དུང་ཆོས་སུ་དྲི་ཞིམ་པའི་བསང་ཆུ་འཐོར་ཡབ་དང་བཅས་པ་བཤམ་མོ། །མལ་ནས་ལངས་པ་ན། པཱ་ད་སོགས་ཀྱིས་ཤར་ཕྱོགས་ལ་ཕྱག་བྱ། སྒྲུབ་ཁང་གི་ཕྱིར་སོང་སྟེ། ཁྲུས་ཆུས་གནོད་སྦྱིན་གྱི་སྔགས་རྒྱས་བསངས། དེ་ཉིད་བརྗོད་ཅིང་ཁྲུས་བྱ། དེ་ཚེ་གུ་གུལ་གྱི་དུད་པས་མཐའ་སྐོར་ནས་བདུག་ཅིང་རོལ་མོ་དྲག་པོ་བྱ། དེ་ནས་ཙོག་པུར་རྟིང་བ་གཉིས་ལ་འཕོང་ཚོས་བཞག་ལ་བསྡད། གཡོན་རྡོ་རྗེ་ཁུ་ཚུར་དུ་ཆུ་བླུག་ལ་གཡས་པས་དེ་ནས་བླངས་ཏེ། ཁ་སྣ། མིག་རྣ། ཁ་ལག་མགོ་ལྟེ་བ་རུ་བྱབས་ནས་གཡོན་པའི་ཆུ་ལ་ཧུབ་གསུམ་བྱས་ཏེ། ཁུ་ཚུར་དེའི་མ་མཐའ་གཡོན་པ་དང་། ཡ་མཐའ་གཡས་པའི་ཁའི་གྲྭ། ཕྱི་དེ་ནས་སྨྲ་བ་བཅད། སྒྲུབ་གྲོགས་དང་བཅས་པ་སྤོས་དུད་ཀྱི་སྣ་དྲངས་ཏེ་ནང་དུ་འོངས་པ་དང་། རང་རང་གི་གདན་གྱི་མདུན་དུ་མཉམ་པའི་སྟབས་ཀྱིས་ལངས་ནས། ཁྲོ་བོའི་ཁུ་ཚུར་གྱིས་གཡོན་གཡས་སུ་ལུས་བསྐོར་ནས་དབང་ལྡན་མཐོང་བའི་བར་བལྟའོ། །དེ་ནས་ཁང་བ་སྟན་གོས་རྒྱན་དང་བཅས་པ་བསངས་ནས་གོས་སོགས་བགོ །ས་མ་ཡ་སྟྭཾ་ཞེས་པས་གདན་ལ་བསྡད་བསང་ཆུ་ལ་གནོད་སྦྱིན་གྱི་ལས་རྒྱས་གཏུགས་ནས་དེའི་སྔགས་བདུན་དང་། རྩེ་མོའི་སྔགས་རྒྱས་གཏུགས་ནས་བདུན་བཟླའོ། །དེ་ཉིད་གྱི་ཚེ་སློབ་མ་རེང་བུའི་དུད་པས་བདུག །དེ་ནས་ཆུ་གཏོར་ལ་ཤར་ནས་དབྱངས་བྱ་བའམ། མེད་ན་རང་གིས་བརྗོད་ནས། ༀ་སརྦ་སཾ་
ཤོ་དྷ་ནེ་སྭཱ་ཧཱ་དང་། གནོད་སྦྱིན་རྩེ་མོའི་སྔགས་ཀྱིས་བསང་བ་ནས་སྤྲུལ་པའི་བར་བྱ། དེ་ནས་ལྷོ་ནས་མཆོད་པ་བྱིན་རླབས་ཀྱི་དབྱངས། རང་རང་གི་སོ་སོའི་སྔགས་རྒྱས་ལན་གསུམ་གསུམ་དུ་བྱིན་དབབ། དེ་ནས་གར་བསྐོར་ཏེ་རྡོར་དྲིལ་ལ་མེ་ཏོག་དབུལ་ལ། གཡོན་སྟེང་གཡས་འོག་ཏུ་བསྣོལ་ཏེ་བླངས་ནས། གཡོན་དཀུར་བརྟེན། གཡས་པས་གསོར་བ་སོགས་བྱས་ལ་ཧཱུཾ་ལས་རྡོར་སེམས་སུ་བསྐྱེད། ཞུ་བ་ལས་རྡོ་རྗེར་བལྟ། རྡོ་རྗེ་བྱིན་རླབས་ཀྱི་དབྱངས་ནུབ་ནས་བྱ། དེ་ནས་དྲིལ་བུ་ལག་པ་གཡོན་པའི་མཐིལ་དུ་བཞག་ནས། ཨ་ལས་རྡོ་རྗེ་བསྙེམས་མར་བསྐྱེད་པ་སོགས་བྱས་ནས་བྱིན་གྱིས་བརླབ་པའི་དབྱངས་བྱང་ནས་བྱ། དྷཱརྨཱཿ སོགས་ཀྱི་སྔགས་བརྗོད་པ་ན་ཅུང་ཟད་དཀྲོལ། སྲིད་པ་ནས་ཞེ་ནའི་བར་དུ། རྡོ་རྗེའི་ལྟེ་བ་དང་དྲིལ་བུའི་ཞལ་སྦྱར་བ་བཟུང་། འདི་ལྟར་ནས་གར་བསྐོར་ཚིག་ཐ་མའི་ཚེ་རྡོར་སེམས་ཀྱི་ཕྱག་ཆེན་བྱས་ནས་ཅུང་ཟད་དཀྲོལ་ཏེ། ལེན་པའི་ལག་སྟངས་ཀྱིས་བཞག་གོ །དེ་ནས་སྐྱབས་སུ་འགྲོ་བ་སོགས་ནས་གོ་བགོ་བའི་བར་བྱའོ། །ༀ་བཛྲ་མ་ཧཱ་ཀྲོ་དྷ་རཱ་ཛ་ས་པ་རི་ཝཱ་ར་བཛྲ་ས་མཱ་ཛཿ ཞེས་པ་གཅིག་ལ་རྡོ་རྗེ་བསྡུ་བའི་ཕྱག་རྒྱ་བྱས་ནས་སེ་གོལ་གསུམ་གཏོགས། སྤྱན་དྲངས་པ་དང་། ༀ་བཛྲ་མ་ཧཱ་ཀྲོ་དྷ་རཱ་ཛ་ས་པ་རི་ཝཱ་ར་ཨེ་ཧྱེ་ཧི། པདྨ་ཙནྡྲ་ཨཱ་ས་ན་ཏིཥྛཾ་ཏུ་སྭཱཧཱ། ཞེས་པ་དང་། ལག་པ་གཉིས་ཀྱི་མཐེ་བོང་དང་། མཐེའུ་ཆུང་སོ་སོར་སྦྱར་ཏེ། པད་འདབ་ལྟར་བྱས་ལ་གདན་དབུལ། ཉེར་སྤྱོད་ཀྱིས་མཆོད།
བསྟོད་པ་ལ་རིགས་ལྔའི་དྲིལ་སྟབས་བྱ། དཀྱིལ་འཁོར་ས་གཞི་མའང་བརྗོད། རྡོར་དྲིལ་དང་བཅས་པས་གནས་གཞི་དང་ཕྱོགས་མཚམས་བཞི་བསྲུང་། དེ་ནས་གཡོན་དྲིལ་བུ་བཞག་པའམ་བཅས་པ་གང་རུང་གིས་རྡོ་རྗེ་ཁུ་ཚུར་སྙིང་གར་བཞག་ནས་བསྣུན་བསྲེག་ནས་ལུས་བཅིང་བའི་བར་བྱའོ། །ཧུ་ལུའི་ཕྱག་རྒྱ་ལ་ཕྱི་ལ་བསྐོར་བའི་ཕྱག་ལེན་སྣང་ངོ་། །དེ་ནས་མཆོད་པ་བསང་བ་སོགས་དཀྱིལ་ཆོག་བཞིན་བྱ། དམིགས་བསལ་མེད་པའི་མཆོད་པ་ལ་རང་གི་ལྷ་ཞེས་པ་མེ་ཏོག་ཕོག་པ་ལ་བྱེད་གསུངས། བཛྲ་མུཿ གཅིག་ལ་ནང་ཕྱི་ཐད་ཀར་སེ་གོལ་གསུམ་བྱེད་པ་དང་། བཛྲ་བནྡྷ་བཾ་དང་དབབ་པ་བསྡུ་བ་རྣམས་དང་། ལྟུང་བ་སློང་བ་སྡིག་པ་དྲལ་བ་ལ་གསུམ་གསུམ་བྱེད་པ་ཕྱག་ལེན་ནོ། །ཚོགས་རྟེན་གྱི་སྔགས་ཚར་བ་དང་། ཡང་རྡོ་རྗེ་བསྡུ་བ་གཅིག་བྱེད། ཕྱག་རྒྱ་ཆེན་པོ་ནམ་མཁའི་ཕྱོགས་ནས་བབ་ཅེས་པར། དེར་དུས་ནས་མཆོག་ཡིན་པའི་བར་ལ་ཕྱག་ཆེན་གྱི་དྲིལ་གསིལ་ལྟར་བྱས་ནས་པཱ་ད་སོགས་ཀྱིས་ཕྱག་བྱེད། དེ་ནས་ཡང་དྲིལ་གསིལ་སྔར་ལྟར་དང་། མ་ལུས་པ་ནས་གསོལ་གྱི་བར་ལན་གསུམ་བྱེད་དེ། བསམ་གཏན་གྱི་རིམ་པ་བསྒོམས་ནས་བྱ། དཀྱིལ་འཁོར་རྒྱལ་མཆོག་བསྐྱེད་དེ་བཞིན་གཤེགས་པ་གང་ཡིན་གྱི་ཕྱག་ཆེན་བཅིངས་ནས། གཞན་ཡི་གེ་ཇི་ལྟ་བ་བཞིན་བརྗོད། བསྡུ་བ་དང་པོའི་དུས་སུ་དམ་ཚིག་པའི་རྣམ་སྣང་གི་ཐུགས་ཀར་རིགས་ལྔ་རེ་གཞི་
མ་ལ་འཇོགཕྱག་རྒྱ་བཞིས་རྒྱས་འདེབས་པ་རྩ་བའི་ལྷ་ཉིད་དེ་འོག་མ་ལའང་ངོ་། །སྒོ་དབྱེ་བ་ན། ཧཱུཾ་མཛད་ཀྱི་ཕྱག་རྒྱ་བཅས་ནས། ཧཱུཾ་ཞེས་བརྗོད་ནས། བདག་ཉིད་སྐད་ཅིག་གིས་ཧཱུཾ་མཛད་དུ་གྱུར་ཅེས་བརྗོད། ཕྱག་རྒྱ་དགྲོལ་བ་ན། གནས་དེ་དང་དེར་སེ་གོལ་གསུམ་གསུམ་བྱ་ཞིང་། སྔགས་སམ་སྙིང་པོའང་གསུམ་གསུམ་བརྗོད། འདིའི་ཚེ་ཕྱག་རྒྱ་བཀྲོལ་བ་ཙམ་ཡིན། སེམས་མ་རྡོ་རྗེ་མ་སྤྱི་བོར་བཀྲོལ་བ་ན་གཤེགས་པ་ཡིན། ཕྱག་རྒྱ་བཀྲོལ་བ་ན་བཞི་ག་དང་། ལས་རྒྱས་འགྲོལ་བ་ཡོད་ཀྱང་འདི་དམ་རྒྱས་བྱེད། ལྷ་བསྙེན་གྱི་ཚེ། ལུས་དང་དཀྱིལ་འཁོར་གཉིས་ཀར། འགྲོལ་བས་སེམས་མ་བཞིའང་འགྲོལ། འཁོར་སྒྱུར་གྱི་བསྙེན་པའི་ཚེ། དཀྱིལ་འཁོར་གྱི་ལྷ་ནམ་མཁར་བཞག་དགོས་པས་སེམས་མ་བཞི་མི་དགྲོལ། ༀ་ལེགས་སོ་ཞེས་སོགས་རྡོ་རྗེ་སྲུང་བ་སོགས་བཞི་བསྐྱེད་པའི་གནས་བཞི་བསྲུང་བཀྲ་ཤིས་བསྡུས་པ་ཞིག་བྱས་ནས། མཎྜལ་དབུལ་བ་སོགས་ལ་འཇུག་པའི་ཚེ་ཡིན་ནོ། །འདི་ལྷ་བསྙེན་ལ་ཡིན་གྱི། བསྙེན་པ་གཞན་ལ་དཀྱིལ་ཆོག་གི་མཇུག་ནས་འབྱུང་བ་ལྟར་བྱའོ། །བསྙེན་པ་གསུམ་གྱི་དང་པོ་གཉིས་ལ་གཞི་ལུས་གང་ཡིན་དང་། ཐ་མ་ལ་ལྷ་རེ་རེ་ནས་བསྙེན་པ་བྱ་ཞིང་འཁོར་སྒྱུར་གྱི་བསྙེན་པ་ལ། རྡོར་སེམས་ཀྱི་དབང་དུ་བྱས་ནས་བཟླའོ། །གསོལ་གདབ་ཀྱི་སྔོན་དུ་མཆོད་པ་བསང་སྦྱང་བྱས་ནས་བསྟོད་མཆོད། བསྟོད་པ་བྱེད་པ་དང་། མཎྜལ་བཤམས་ཟིན་པ་བླངས་
ཏེ། ལངས་ནས་རིགས་ལྔའི་དྲིལ་སྟབས་བྱེད་དེ་ནས་གཡས་སྔོན་འགྲོའི་གཞི་བཅའ་འཇམ་པོ་དྲིལ་གསིལ་དང་བཅས་པ་བྱས་ལ། མཎྜལ་དབུལ། སློབ་དཔོན་གྱིས་ཤར་ནས་གཡས་སུ་བརྩམ་སྟེ་བླངས། དེ་ནས་ལངས་ཏེ་ལྷོ་བྱང་དུ་བསྒྲིག །གཡས་སྔོན་འགྲོའི་གཞི་བཅའ་འཇམ་པོའི་གར་བསྐོར་བའི་མཐར་མཉམ་པ་བྱས་ལ། ང་རྒྱལ་བཟུང་། དེ་ནས་གཞུང་ཊཱིཀ་དང་དཀྱིལ་ཆོག་ལྟར་ན། དབུས་སུ་བསྡད་ནས་གནས་གཞི་བྱིན་རླབས་ཀྱི་བར་བྱ། དེ་ནས་ལངས་ནས་དབང་ལྡན་ནས་གཡོན་གཡས་སུ་བསྐོར་བ་ན། རྐང་པ་མཉམ་པ་དང་ལུས་བསྐོར་བྱ། འགྲོས་བྱེད། བསྡུས་པ་ལས་མི་བྱེད་ན། འདིར་ཁྲོ་བོ་བསྒོམ་པ་ནས་བྱིན་གྱིས་བརླབས་པའི་བར་ལ། ཁ་ཤར་དུ་ཕྱོགས་ནས་ལངས་ཏེ་བྱ། ལངས་ནས་བྱ་བ་ནི་ཆོ་ག་རྒྱས་པ་ལའང་སྟེ། ཁྱད་པར་ནི་དེར་ཁྲོ་བོ་བསྒོམ་པ་མི་དགོས་སོ། །དེ་ནས་སློབ་དཔོན་དབུས་སུ་བསྡད། ཕུར་བུ་རྣམས་མདུན་དུ་སྣོད་དུ་ནས་བླུག་པ་ལ་དབུས་དང་མཚམས་སུ་མ་ནོར་བར་བཙུགས་ལ། བསངས་སྦྱངས་ནས་བསྐྱེད་དེ། མཐའ་ཡས་ནི་སེར་པོ་ཞལ་གསུམ་ཕྱག་གཉིས་ཏིང་ངེ་འཛིན་གྱི་ཕྱག་རྒྱ་མཛད་པའོ། །རྣམ་རྒྱལ་ནི་སྔོན་པོ་ཞལ་གཅིག་ཕྱག་བརྒྱད་པ། དང་པོ་གཉིས་ཁམས་གསུམ་རྣམ་རྒྱལ་གྱི་ཕྱག་རྒྱས་རྡོར་དྲིལ་ཐུགས་ཀ་དང་། དེ་འོག་གཉིས་མདའ་གཞུ། དེ་འོག་གཉིས་རྡོ་རྗེ་པདྨ་བསྣམས་པ། གཡོན་བརྐྱང་
གི་སྟབས་ཀྱིས་དྲག་པོ་དང་གཡས་བསྐུམ་པས་དབུ་མ་མནན་པ། འབར་བའི་ཕྲེང་བའི་འོད་མངའ་བ། རིགས་ལྔ་དང་། རིན་ཆེན་དང་། པདྨ་དང་། རྡོ་རྗེ་དང་དར་དཔྱངས་ཀྱི་དབང་བསྐུར་བ་དང་ལྡན་པ། རྒྱན་ཐམས་ཅད་ཀྱིས་བརྒྱན་པའོ། །སྤྲིན་སྒྲ་ནི་ནག་པོ་ཞལ་བཞི་ཕྱག་བཞི་ཞབས་དྲུག །གཡས་གཉིས་ན་རལ་གྲི་དང་། དགྲ་སྟ། གཡོན་གཉིས་ན་ཞགས་པ་དང་གཏུན་ཤིང་བསྣམས་པའོ། །གསུས་པོ་ཆེ་ནི་སྔོན་པོ་ཞལ་གསུམ་གྱི་དབུས་མ་བཞད་པ། གཡས་གདངས་པ། གཡོན་ཚེམས་ཀྱིས་མ་མཆུ་མནན་པ། མི་བསྐྱོད་པའི་དབུ་རྒྱན་ཅན། ཕྱག་དྲུག་གི་གཡས་རྡོ་རྗེ་བེ་ཅོན། རལ་གྲི་མདའ། གཡོན་སྡིགས་མཛུབ་ཞགས་པ་དང་བཅས་པས་ནུ་མ་ཐོ་བ། གཞུ་འཛིན་པའོ། །རྒྱལ་བ་དམར་པོ་ཞལ་གསུམ་གྱི་དབུས་མ་བཞད། གཡས་ལྗགས་འདྲིལ། གཡོན་ཚེམས་ཀྱིས་མ་མཆུ་མནན་པ། ཕྱག་བརྒྱད་ཀྱི་གཡས་རྡོ་རྗེ་དབྱུག་ཐོ། ལྕགས་ཀྱུ། མདའ། གཡོན་སྡིགས་མཛུབ། ནུ་མ། པདྨ་ཞགས་པ་གཞུ་འཛིན་པའོ། །འདི་ལ་ཡེ་ཤེས་པ་དགུག་གཞུག་སོགས་བཞི་བྱེད་པའང་ཡོད། དེ་ནས་སློབ་དཔོན་དབུས་སུ་ཀཱི་ལཱ་ཡ་བགྲང་ཞིང་བསྡད། སྒྲུབ་གྲོགས་རྣམས་ཀྱིས་རྡོར་དྲིལ་ཐོགས། རྡོ་རྗེ་ལ་ཕུར་བ་འདྲིལ་བ་ལྟར་བྱ་ཞིང་དབྱངས་བྱས་ལ་བསྐོར་བ་བྱ། བཟླས་པ་ཟིན་པ་དང་། དབུས་སུ་ཕུར་བུ་འདེབས་སྟངས་བྱས་ནས་དབང་ལྡན་གྱི་འཁྲིས་སུ་གདབ། དེ་ནས་དབང་ལྡན་ནས་མེ་སོགས་སུ་གདབ་སྟེ།
དེའང་གནས་དེ་དང་དེར་ཕུར་འགྲོས་ཀྱིས་ཕྱིན་ནས། གཡོན་སྔོན་འགྲོའི་གཞི་བཅའ་དྲག་པོ་དྲིལ་གསིལ་དང་བཅས་པ་རེ་བྱས་ནས་སོ། །འདི་རྣམས་དམིགས་པ་ཙམ་ལས་འདེབས་རྒྱུ་མེད་ནའང་བྱ། ཕུར་བུ་མཆོད་པ་འདི་བ་ལ་མེད་དོ། །བསང་ཆུའི་བུམ་པ་ལས་མ་ཟིན་ན། སྔར་ལྟར་ཕྱག་རྒྱ་དགྲོལ། སང་ནས་རྣལ་འབྱོར་ཆེན་པོ་བྱ་སྟེ། དེའང་འདི་མན་ཆད་དུ། ས་བླའི་མཆོད་གཏོར་དང་། སྦྱང་བཟུང་གི་ཆོ་ག་དང་། བསང་ཆུ་བསྒྲུབ་པ་རྣམས་ལན་ཅིག་གིས་ཆོག་པས་མཆོད་པ་བསང་སྦྱང་བྱིན་བརླབ་དམ་ཚིག་གསུམ་བཟུང་བའི་བར་བདག་རྫོགས་བྱའོ། །ལྷ་སྟ་གོན་ལ་བསང་སྦྱང་སྔོན་དུ་བཏང་སྟེ། དང་སྦྱོར་ལྟར་གཞལ་ཡས་ཁང་གདན་བཅས་བསྐྱེད། དེ་ནས་ལྷ་དང་རང་རང་གི་མདུན་གྱི་དབང་ལྡན་ནས་གཡས་སུ་བརྩམས་པའི་དྲིའི་ཐིག་ལེ་མེ་ཏོག་དང་བཅས་པ་སྔགས་ཀྱིས་བཀོད་ནས་ལྷ་རེ་རེ་ཞིང་བསྐྱེད། དེ་ཟིན་པ་དང་མཐའ་མཆོད་པས་གྲུ་བཞིར་བསྐོར། ཤོག་སྐོར་བཏང་། གདན་ལ་འཁོད་ནས་དགུག་པ་སོགས་བྱའོ། །གསུམ་པ་བསང་སྦྱང་ནས་པཾ་ལས་པདྨ་དང་། ཨ་ལས་ཟླ་གདན་གྱི་སྟེང་དུ་བུམ་པ་མཚན་ཉིད་དང་ལྡན་པར་བསྐྱེད། ལྷ་གསུམ་དབུས་སུ་རྡོར་སེམས། གཡས་སུ་གནོད་སྦྱིན། གཡོན་དུ་མེ་ལྟར་འབར་བ་རྣམས་ཆོ་ག་གསུམ་ལས་བསྐྱེད། གཡོན་པའི་དམ་རྒྱ་ནི། རྡོ་རྗེ་མེའི་ཕྱག་རྒྱ་དང་། སྔགས་ཀྱང་ཐུན་མོང་
བའོ། །དེ་ལ་དྲིལ་སྔགས་གདགས་ལ་སྒྲུབ་ཆོས་དང་ཕྱག་ཆེན་རྡོར་སེམས་ལྟར་དང་། ཆོས་ཀྱི་ཡི་གེ་ནི་གསུམ་ག་ལ་རང་རང་གི་བསྟོད་པ་རེའང་བྱ། སློབ་མས་གཟུངས་ཐག་གཏོད་པ་ན་མེ་ཏོག་དང་བཅས་པས་གར་བསྐོར་ནས་བཏད། སློབ་དཔོན་གྱིས་ཀྱང་གར་བསྐོར་བ་དང་བཅས་པས་བླངས་ནས་མེ་ཏོག་དུམ་ཞིག་བཟུང་། གཞན་མདུན་དུ་བཞག་སྟེ། དེ་ནས་སྒྲུབ་གྲོགས་རྣམས་ལའང་གཟུངས་ཐག་གཏད། སྡུད་པ་ན་མས་རིམ་གྱིས་བསྡུས་ནས་ཡང་གར་བསྐོར་ཏེ། སློབ་དཔོན་གྱིས་མེ་ཏོག་དང་བཅས་པས་སློབ་མ་ལ་གཏད། དེས་ཀྱང་གར་བསྐོར་ནས་བླངས། དེ་ནས་བུམ་པར་དུང་ཆོས་ཀྱི་ཆུས་མཆོད་ཡོན་དབུལ། མེ་ཏོག་རེ་གཞུག །རེང་བུས་བདུག་གོ །དེ་ནས་གྲུབ་ན་སྦྱིན་སྲེག་སྟ་གོན་དང་། མ་གྲུབ་ན་ཕྱི་རོལ་པ་བཏང་། དེ་ནས་ནང་དུ་འོང་བ་དང་། སྐོར་བ་བྱེད་པ་ཕྱག་ལེན་ལ་སྣང་། བཤད་པ་མི་འདུག །སྒྲུབ་མཆོད་རྐྱང་བ་ཡིན་ན། བསྟོད་པ་ནས་མཆོད་ཡོན་འབུལ་བའི་བར་བྱས་ནས་སྙན་གསན་དབབ་པ་ལ་འཇུག །དབང་བསྐུར་ཡིན་ན་འདི་ནས་སློབ་མ་སྟ་གོན་ལ་འཇུག་སྟེ། དེའང་གསོལ་གདབ་དང་། མཉམ་པར་གདམས་པའི་བར་དུ། དཀོན་མཆོག་གསུམ་ལ་བདག་སྐྱབས་མཆི་སོགས་ཀྱིས་སྡོམ་པ་བཟུང་། རྣལ་འབྱོར་གྱི་སེམས་བསྐྱེད་པའི་ཚེ་དངོས་གཞི་ལྟར་མ་བརྗོད་ཀྱང་ཆོག །གནས་གཞི་བྱིན་བརླབ་ཀྱི་ཚེ་སེམས་མ་བཞིའི་ཕྱག་རྒྱས་གཏུག་པ་དང་། རྡོ་རྗེ་དང་བཅས་པའི་གཡས་པས་གང་རུང་བྱེད། མཆོད་པ་བཞི་ལས་མ་བཤད་
ཀྱང་། དུང་ཆོས་སུ་མཆོད་ཡོན་ལག་པ་གཅིག་གིས་དང་། གཅིག་གིས་བཟེད་ཞལ་བཟུང་ནས། རང་གི་སྔགས་ཀྱིས་རེ་རེ་ཞིང་དང་། མེ་ཏོག་དབུ་དང་། དྲི་སྙིང་གར་དབུལ། སྤོས་ཞལ་ཟས་མར་མེ་རྣམས་ལག་ཏུ་སྔགས་བརྗོད་ཅིང་གཏད་དོ། །མཐར་རོལ་མོ་ཐུན་མོང་དུ་དབུལ། སོ་ཤིང་སྲུང་སྐུད་ཀུ་ཤ་རྣམས་ལ་གནོད་སྦྱིན་གྱི་སྔགས་ཀྱིས་བསང་། རང་རང་གི་སྔགས་ཀྱང་བཟླའོ། །སྲུང་སྐུད་མདུད་མཚམས་སུ་གཡོན་པའི་མཐེབ་སྲིན་གྱིས་མནན་ནས་གཡས་པ་ལས་ཆུས་དེར་རེག་པ་ཞིག་བྱའོ། །ཀྱེ་བཞིན་བཟང་ཞེས་སོགས་སུ་དཀྱིལ་འཁོར་གྱི་ཤར་སྒོ་ནས་ཕྱག་བྱེད་བཅུག་ནས་ནངས་པར་ཞེས་སོགས་བརྗོད་དགོས་པར་མངོན་ནོ། །ཕྱག་རྒྱ་བཀྲོལ་བའི་མཐར། བཀྲ་ཤིས་རེ་བྱེད་པ་ཕྱག་ལེན་ནོ། །དཀྱིལ་འཁོར་འདེགས་པའི་སྔོན་དུ་མཆོད་བསྟོད་བསྡུས་པ་ཞིག་བྱ་གྲུབ་ན་ཉེ་རེག་ནས་ཀྱང་ངོ་། །དེ་བར་དུ་ཚོམ་བུའི་དཀྱིལ་འཁོར་མི་བཤིག་སྟེ། དེ་ནས་བསྡུའོ། །དེ་ནས་ཐིག་སྐུད་རྣམས་བསངས་སྦྱངས་ནས། ཆོ་ག་གསུམ་མམ་ས་བོན་ལས་བསྐྱེད་སྟ་གོན་གྱི་ལྷའི་ཐུགས་ཀ་ནས་བྱུང་བ་མ་གཏོགས། གཞན་ཡེ་ཤེས་པ་འཇུག་པ་དང་དབང་བསྐུར་བ་སོགས་མི་དགོས་སོ། །ཐིག་སྐུད་རྣམས་ཀྱང་ཕྱག་ལེན་ལ་དབུས་དང་ཕྱོགས་བཞིར་སྣོད་སོ་སོར་འགོད་ཀྱང་། རང་གི་ལག་ཏུ་རིམ་པ་བཞིན་བཟུང་ནས་བསྐྱེད་ན་འཐད་པར་སྣང་།དེ་ནས་བསྒྲིལ་བའི་ཚེ་སྣོད་དུ་བཞག་ན་རིམ་པ་བཞིན་ལག་བསྡོགས་བྱས་ནས། དེ་རེ་རེ་ནས་གཅིག་གིས་ཁྱེར་ཏེ། སློབ་མའི་
ལག་ཏུ་གཏད། སློབ་དཔོན་བསྡད་ནས་སྔགས་གསུམ་སྒྲུབ་གྲོགས་དང་བཅས་པས་བརྗོད་ལ་ལན་གསུམ་དང་། དེ་ནས་འཁོར་སྒྱུར་གྱི་སྔགས་བརྗོད་ཅིང་། མཉམ་པོར་སོང་སོང་བར་དུ་བསྒྲིམས་ནས་གཅིག་བྱ། གཡས་པས་དྲི་བཟང་ལ་སྦགས་པའི་རས་ཀྱིས་ཐིག་སྐུད་ལ་བྱུག་ཅིང་། སཏྭ་ཧཱུཾ་བརྗོད་ཅིང་ལག་སྡོགས་བྱ། རིན་པོ་ཆེའི་སྣོད་དྲི་བཟང་བྱུགས་པའི་ནང་དུ་བཞག་ནས་མཆོད། འཛིན་པའི་རྡོ་རྗེ་བསྡམས་པ་ནང་བསྡམ་ལ་འདོད་པ་ཡོད་ཀྱང་། ཕྱི་བསྡམ་ཡིན། དཀྱིལ་འཁོར་ལ་བསང་གཏོར་བྱ་བ་ནས་ལངས་ཏེ། རྡོར་དྲིལ་སྐུད་པ་དང་བཅས་པ་ཐོགས་ནས་གྲྭ་གཉིས་སུ་སོང་ནས། རྣམ་སྣང་གི་ཕྱག་ཆེན་བཅས་ནས་བསྒྲུབ། སྒྲུབ་གྲོགས་སྤྲུལ་ཏེ། ཐིག་སྣ་གཏད་ཟིན་པ་དང་། ཤར་ནུབ་དྲང་བོར་ཕྱིན། རྡོར་སེམས་སུ་བསྒྱུར། སྟ་གོན་གྱི་ལྷ་ལ་མཆོད་པ་ལྔས་ཤར་ནས། ལྷོ་ནས་བརྒྱད་ཀྱིས། ནུབ་ནས་དབྱངས་དང་བཅས་པའི་གར་གྱིས་མཆོད། སྒྲུབ་གྲོགས་སྤྲུལ་པའི་ཚིགས་བཅད་ལའང་གྲུབ་ན་དབྱངས་བྱ། དེ་ནས་ཡིད་ཀྱིས་ཕྱག་སྔགས་བརྗོད་ནས་བྱ་སྟེ། མིག་ཉི་ཟླར་བསྐྱེད་ནས་ཐིག་འདེབས་པ་ཕྱག་ལེན་ལ་སྣང་ཞིང་། ཆོ་ག་དང་མི་མཐུན་པས་དཔྱད་དོ། །འདེབས་པའི་ཚེ་གཡས་རྡོ་རྗེ་དང་བཅས་པའི་མཐེབ་གུང་གཉིས་ཀྱིས་སྟེང་ནས་བཟུང་། དེ་ནས་འོག་ནས་ཁ་གྱེན་དུ་བསྟན་ལ་སྟེང་དུ་གསུམ་གདབ། འོག་ཏུ་བསྟན་ནས་ཚངས་ཐིག་གཉིས་དང་ཟུར་ཐིག་གཉིས་ལ་རེ་རེའམ་གསུམ་གསུམ་རྩ་ཐིག་རྣམས་ལ་སྒོ་གཉིས་ཀྱི་དྲུག་གདབ། ཐིག་སྐོར་གཡས་ནས་བྱ། གཉིས་ཀ་དུས་
གཅིག་ཏུ་མི་འགྲོ། སློབ་དཔོན་ལ་རྒྱབ་བསྟན་ནས་མི་འགྲོ་བ་ལ་བསླབ་པོ། །གནས་སྔ་མ་རྣམས་སློབ་དཔོན་གྱི་སའོ། །ཕུར་བུ་དབྱུང་བ་དང་ཕྱུང་ནས་དགང་བ་གཉིས་ཀ་འོག་ཏུ་བྱེད། རྡོར་དྲིལ་དང་བཅས་ནས་རྡོ་རྗེ་ཤུགས་ཀྱིས་འཇུག་པས་ནུབ་ནས་ཞུགས། དཀྱིལ་འཁོར་ནང་མའི་ཤར་གྱི་སྒོ་དྲུང་སར་སོང་གཡོན་བརྐྱང་དང་ཧཱུཾ་མཛད་ཀྱི་ཕྱག་རྒྱ་དང་ས་བོན་བརྗོད་ནས་ཁྲོ་བོ་རྡོ་རྗེ་གུར་ཞེས་བརྗོད་ནས་མིག་སོགས་བསྐྱེད་པ་བྱས་ལ་གཡས་པས་དྲི་བཟང་བླངས་ནས་སྔགས་བརྗོད་ཅིང་ཤར་སྒོ་ཕྱི་ནང་གཉིས་སུ་དབྱི། དེ་ནས་ལྷོ་སོགས་རིམ་པ་བཞིན་དབྱིའོ། །དེ་ནས་དབུས་དེར་བསྡད་ནས། ལིང་ཚེ་ལྔ་ལ་ཚོན་བཀོད། ས་བོན་བྲིས་པ་བསངས་སྦྱངས་ནས་སྔར་ལྟར་བསྐྱེད། བསྐྱེད་པའི་རིམ་པ་ནི་ཡི་གེ་ཇི་ལྟ་བའོ། །སྔགས་གོང་མ་བཟླ་བ་ན། རྡོར་དྲིལ་དང་བཅས་པའི་ཕྱག་རྒྱས་ས་བོན་བསུབ་ཚོན་འདྲེས་ན་སྐྱོན་ཡོད་པས་རེ་རེ་ཞིང་མཛུབ་རྩེས་ཕྱི། དབུས་མ་རྟིང་ནས་བྱ། སྦྱོར་བའི་དུས་སུ་བདེན་པ་གང་གིས་སོགས་བརྗོད་ལ། ཧཱི་བརྗོད་ཅིང་ཕྱག་རྒྱ་ཚོན་རྣམས་ཀྱི་སྟེང་དུ་བཅའོ། །དེ་ནས་རྡོར་དྲིལ་དང་བཅས་ནས་འདོད་རྒྱལ་གྱི་ཕྱག་རྒྱ་ལས་མཛུབ་མོ་གཉིས་ཀ་སྐམ་པའི་ཕྱག་རྒྱས་ཕུར་བུ་དངོས་མེད་ནའང་དབྱུང་བའི་ཚུལ་བྱ། དེ་ནས་རྩིག་པའི་ཕྱི་ནས་བརྩམས་པའི་རིམ་པ་བཞིན་དགང་ངོ་། །ཁ་ཅིག་འདི་ནི་ཆོས་དབྱིངས་དག་པ་སྟེ། །ཞེས་སོགས་ཡེ་ཤེས་ལྔའི་ཚིགས་བཅད་རེ་བཏོན་དྲིལ་གསིལ་རེ་བྱས་ནས་
འགེང་བའང་ཡོད། འདི་ཡང་ཕུར་བུ་མ་བཏབ་ཀྱང་བྱེད་པ་ཕྱག་ལེན་ལ་སྣང་ངོ་། །རྡོ་རྗེ་ཤུགས་ཀྱིས་འཇུག་པ་ནི། སྔགས་བརྗོད་རི་མོ་བཏེག་པའི་འོག་ནས་འཛུལ་བར་མོས་པ་ཙམ་ཡིན་གྱི་འདི་ལ་ཕྱག་རྒྱ་མེད་དོ། །ཐིག་སྐུད་སྒྲུབ་གྲོགས་ལ་གཏོད་པ་ན། དཀྱིལ་འཁོར་གྱི་སྟེང་དུ་འགྲོ་དགོས་བྱུང་ནའང་བྱེད་དགོས་པར་མངོན་ནོ། །དཀྱིལ་འཁོར་བྲིས་ཟིན་པ་དང་ཡེ་ཐིག་རྟིང་མ་བཏབ་ཟིན་པའི་ཚེ་མཆོད་ནས་ཡེ་ཤེས་པ་གཤེགས་པ་སོགས་བྱ། ཐིག་སྐུད་བསྡོགས་ནས་རྡོ་རྗེ་ལ་དཀྲིའོ། །བྲི་བ་ཟིན་ནས་མཐའ་རྣམས་དྲིས་བྱུག །མེ་ཏོག་བཀྲམ། དེ་ནས་གནོད་སྦྱིན་དང་རྩེ་མོའི་སྔགས་ཀྱིས་བསངས་ནས་དང་སྦྱོར་ལྟར་འབྱུང་བ་རིམ་བརྩེགས་གཞལ་ཡས་ཁང་གདན་དང་བཅས་པ་བསྐྱེད། དེ་ནས་ལྷ་རེ་རེ་ནས་ཆོ་ག་རེ་རེ་ནས་བསམ། ཡང་ན་བྲིས་པའི་ཐིག་ལེ་དེ་ཐམས་ཅད་ལས་འོད་ཟེར་འཕྲོས། འཕགས་པ་མཆོད་སེམས་ཅན་གྱི་དོན་བྱས་འདུས་ཡོངས་སུ་གྱུར་པ་ལས་རང་རང་གི་ས་བོན་དུ་གྱུར་དེ་ལས་འོད་འཕྲོས་སོགས་ལས་རང་རང་གི་ཕྱག་ཆེན་ས་བོན་གྱིས་མཚན་པར་གྱུར། དེ་ལས་འོད་འཕྲོས་སོགས་ལས་རང་རང་གི་སྐུའི་ཆ་ཤས་ཡོངས་སུ་རྫོགས་པར་གྱུར་པ་ནི་ཞེས་བྱས་ནས་རིམ་པ་བཞིན་གསལ་གདབ། འདི་ལ་སོ་སོའི་སྙིང་པོ་བརྗོད་པའམ། མིན་པ་གང་རུང་བྱ། དེ་ནས་བསྐལ་བཟང་གི་བར་ལ་དམ་རྒྱས་བཏབ་ནས་སྟ་གོན་གྱི་དཀྱིལ་འཁོར་དགུག་སོགས་བྱས་ལ། རང་རང་གི་སྙིང་པོས་བརྟན་པར་བྱས་ནས་ཕྱག་རྒྱ་ཕྱི་མ་གསུམ་གྱིས་རྒྱས་གདབ་བོ། །དེ་
ནས་མེ་ཏོག་སོགས་བླངས་ནས་སྐོར་བ་སོགས་བྱས་ཏེ། མེ་ཏོག་འབུལ་བ་ན་སྤྲོ་ན་དབྱངས་དང་བཅས་པས་བྱའོ། །སྒོ་དབྱེ་བ་ན་སྒྲུབ་གྲོགས་དང་བཅས་པས་བྱས་ན་རང་རང་གི་ཆོ་ག་ཚང་བས། དེའང་གཞི་བཅའ་འཇམ་པོ་དྲིལ་གསིལ་དང་བཅས་པས་མཐར་གཡོན་བརྐྱང་བྱས་ལ་ནུབ་དང་བྱང་ཤར་ལྷོ་ཤར་ནས་ཤར་དང་ལྷོ་ནུབ་བྱང་གིས་སྒོ་དབྱེ། དེ་ནས་བསྐོར་ལ་གདན་ལ་འཁོད་པའམ། ཤར་སྒོ་ནས་ཕྱག་གཅིག་བྱའོ། །དེ་ནས་གྲུབ་ན་ལྷ་སོ་བདུན་གྱི་ལྷ་བུམ་གང་བུམ་གཉིས་གཉིས་ཏེ་དོན་བཞི། བསང་ཆུ་འཇུག་སྒོ་བསྐལ་བཟང་གསུམ་བསྣན་པས་དོན་བདུན། དེའང་བསྐལ་བཟང་ལ་སྤྱིའི་རིག་པ་ཙམ་བཟླ་བ་མ་གཏོགས་ལྷ་མི་བསྐྱེད་ཟེར། མ་གྲུབ་ན་བུམ་པ་བཅུ་བྱས་པས་ཕྱོགས་ཕྱོགས་སམ། ཤར་ཕྱོགས་སམ། གང་བདེ་བར་བཞག །སྔར་ལྟར་བསངས་སྦྱངས་ནས་མཚན་ཉིད་དང་ལྡན་པར་བསྐྱེད་པའི་སྟ་གོན་གྱི་རྣམ་རྒྱལ་གྱི་ནང་དུ། རིགས་ལྔ་རྡོར་སེམས་དང་དྲུག་རང་རང་གི་གདན་གྱི་སྟེང་དུ་ཆོ་ག་གསུམ་གྱིས་བསྐྱེད། ཡེ་ཤེས་པ་གཞུག །ཕྱག་རྒྱ་བཞིས་རྒྱས་གདབ། མཆོད་བསྟོད་འོག་ཏུ་ཐུན་མོང་དུ་བྱ། ཕྱོགས་སོ་སོར་བུམ་ལྷ་སྤྲུལ་པ་ནི་རིགས་སོ་སོའི་ཕྱག་ཆེན་ལ་གནས། ལྷ་བརྒྱད་བརྒྱད་ཀྱི་མིང་སྨོས་ནས་སྤྲུལ། ཕྱོགས་རེ་རེའམ། ཐུན་མོང་དུ་མཐར་སྙིང་པོས་བརྟན་པར་བྱའོ། །མཆོད་བསྟོད་ཟིན་ནས་རིམ་པ་བཞིན་བཟླས་པ་བྱ། མཐར་སྟ་གོན་གྱི་ལྷ་གསུམ་ལའང་བཟླ། དེའི་གོང་དུ་བསང་ཆུ་དང་འཇུག་
སྒོ་བསྐལ་བཟང་ལའང་དམིགས་ནས་བཟླའོ། །དེ་དག་གི་མཐར་དབུས་མ་ལ་གནས་ནས། ཨུ་ད་ཀ་སྟོང་ཙམ་ཡང་བཟླ། འདི་བཟླས་ནས་རྣམ་རྒྱལ་མི་འདེགས་པར་བཤད། རྣམ་རྒྱལ་གྱི་སྟེང་དུ་དུང་ཆོས་གཟུངས་ཐག་བཞག་པའི་གཟུངས་ཐག་གིས་བུམ་པ་རྣམས་སྤྲོས་ནས་བཟླས་ཏེ་གཞན་སྔར་ལྟར་རོ། །བདག་འཇུག་ལེན་པ་ན་སྔོན་ལ་དཀྱིལ་འཁོར་ལ་བསང་སྦྱང་དང་བྲལ་བའི་མཆོད་པ་ཞིག་བྱ། དེ་ནས་བུམ་པ་ཐམས་ཅད་ནས་ཆུ་བསྡུས་ལ་བསང་ཆུའི་བུམ་པར་བླུག་ལ་མདུན་དུ་བཞག་སྟེ། མཎྜལ་དང་ཅོད་པན་ཡང་ངོ་། །ཇི་ལྟར་བལྟམས་པས་ཁྲུས་བྱས་ནས་མཎྜལ་འབུལ། དགའ་ཆེན་སོགས་ཀྱིས་གསོལ་བ་གདབ་བོ། །གནོད་སྦྱིན་དང་སྒོ་བཞིའི་སྔགས་བརྗོད་ལ་གདོང་གཡོགས་འཆིང་ཚུལ་དང་རྡོ་རྗེ་སྲུང་བའི་སྔགས་བཟླས་ཏེ། སྟོད་སྨད་ཀྱི་གཡོགས་བགོས་པར་བསམ། ཨ་ཁཾ་བཱི་ར་ཧཱུཾ་གིས་མེ་ཏོག་ཕྲེང་བ་བཟུང་། སྡོམ་པ་བཟུང་བ་ནི། ཇི་ལྟར་དུས་གསུམ་ནས་འགོད་ཀྱི་བར་རོ། །མཆོད་པ་ལྔས་མཆོད་ཅེས་པ་གོང་དུ་བླངས་ཏེ། དེའང་རྣལ་འབྱོར་གྱི་སེམས་བསྐྱེད་པ་ནས་མཆོད་པའི་བར་བྱས་ནས་འཇུག་སྒོས་དབང་བསྐུར། སེམས་མ་རྡོ་རྗེ་མ་འཆིང་བའི་ཚེ་དེ་ཉིད་ལ་བྱས་ནས་སྔགས་ལྔ་བརྗོད་དེ། དམ་གཞག་སྔར་ལྟར་བྱ། ཡེ་ཤེས་དབབ་པ་དང་པོ་དང་གཉིས་པ་དང་འབེབས་པའི་དམ་རྒྱ་དང་ཨ་རྐྱང་དང་བཛྲ་ཨ་བེ་ཤ་བརྗོད། ཁྲོ་བོའི་ཁུ་ཚུར་གྱིས་དྲལ་བ་ན། དེའི་སྐབས་ཀྱི་སྔགས་བརྗོད། མེ་ཏོག་དོར་བ་ནས་དབབ་པ་བསྡུ་བའི་བར་སྙིང་གའི་བདག་འཇུག་བཞིན་ནོ། །སློབ་
དཔོན་དུ་དབང་བསྐུར་བ་དཀྱིལ་འཁོར་གྱི་ཤར་སྒོའི་ཐད་དུ་དབང་སྟེགས་གྲུ་བཞི་སྒོ་གཅིག་པའི་དབུས་སུ་སྣ་ཚོགས་པདྨ་འདབ་མ་བརྒྱད་ཀྱི་ལྟེ་བར་རྡོ་རྗེ་དམར་པོ་རྩེ་ལྔ་པ་དེའི་སྟེང་དུ་སེང་གེའི་ཁྲིའི་སྟེང་དུ་པད་ཟླའི་གདན། རྡོར་སེམས་ཀྱི་སྔགས་དང་། དེའི་ཕྱག་ཆེན་གྱིས་དབང་སྟེགས་ཀྱི་སྟེང་དུ་འཁོད་པར་གྱུར་ཅེས་བརྗོད་ནས། དེའི་དམ་རྒྱ་རང་ལ་གཏུགས་ལ། རྡོར་སེམས་སུ་བསྐྱེད་པ་ནས་བྱིན་རླབས་ཀྱི་བར་བྱས་ཏེ། ས་མ་ཡ་ཨ། ཟླ་གདན་རྣམས་གསལ་གདབ། དེ་ནས་ལྷ་ཉེར་བརྒྱད་ཀྱི་སྔགས་བརྗོད་ལ། ལྷ་གསལ་གདབ། རྡོ་རྗེ་བསྡུ་བའི་སྔགས་རྒྱས་སྒྲུབ་ཆེན་གཞུག །སེམས་མ་བཞི་དང་དབྱིངས་ཕྱུག་མའི་སྔགས་རྒྱས་གནས་བཞི་བྱིན་གྱིས་བརླབ། ཉེར་སྤྱོད་དང་། སྒེག་སོགས་ཀྱིས་མཆོད། རྡོར་སེམས་ཀྱི་སྐུ་དངོས་སམ་མེད་ན་དམ་རྒྱ་སྤྱི་བོར་བཞག །བཀྲ་ཤིས་རིང་མོ་བྱེད་པ་ན་མེ་ཏོག་རེ་བདག་ལ་གཏོར། བསྟོད་པ་ན་དྲིལ་གསིལ་བྱ། ཅོད་པན་གྱི་ཚེ་དར་དཔྱངས་དང་། དེའང་སྔགས་རྒྱ་སྔོན་ལ་བྱས་ནས་དབུ་རྒྱན་བཅིང་། གཞན་སྔགས་ཀྱི་རྗེས་གནང་གི་བར་གོང་བཞིན་ནོ། །ལྷ་ཐམས་ཅད་གསལ་བར་བསྒོམ་ཞེས་པའི་དོན། རྣམ་སྣང་སོགས་ཀྱི་སྙིང་པོ་བརྗོད་ལ་གསལ་གདབ་བོ། །བདག་འཇུག་བླང་རྒྱུ་འདིར་དམིགས་ཀྱིས་བསལ་བ་དང་། ཆོ་གའི་སྡོམ་ཉིད་ཙམ་ཞིག་གོ །མི་བསྐྱོད་པ་ལ་སོགས་པ་བཞི་དང་། ཡུམ་བཞིའི་རྡོ་རྗེའི་སྒྲུབ་
ལུགས་ནི། རང་རང་གི་སྙིང་པོ་ལ་ཨ་བཏགས་ལ་ཕྱག་མཚན་དབབ། ཕྱག་མཚན་དང་མི་བསྐྱོད་པའི་ང་རྒྱལ་ནི། བཛྲོ་ཧཾ་དང་། ཨཀྵོ་བྷྱ་ཧཾ་ངོ་། །དེ་བཞིན་དུ་བཛྲ་རཏྣ་ཨ་རཏྣ་མ་ཧཱ་རཏྣ་སཾ་བྷོ་ཧཾ། བཛྲ་པདྨོ་ཧཾ། ཨ་མི་ཏཱ་བྷ་བ་ཧཾ། བི་ཤྭ་བཛྲོ་ཧཾ། ཨ་མོ་གྷ་སིདྡྷི་ར་ཧཾ་རྣམས་རིགས་གསུམ་གྱིའོ། །སཏྭ་བཛྲི་དང་། བཛྲོ་དང་། སཏྭ་བཛྲི། རཏྣ་བཛྲི། དྷརྨ་བཛྲི། པདྨོ། དྷརྨ་བཛྲི། ཀརྨ་བཛྲི། བི་ཤྭ་བཛྲི། ཀརྨ་བཛྲི་རྣམས་ཀྱི་དང་པོའི་མཐར་ཨ་དང་ཕྱི་མ་གཉིས་ལ་ཧཾ་སྦྱར་བ་ནི་ཡུམ་བཞིའོ། །ཕྱི་རོལ་རྒྱས་པ་གཏོང་བ་ན། ཤར་དུ་ཤར་པ་དང་སྟོང་པ་གཉིས། ནུབ་ཏུ་ནུབ་པ་དང་འོག་པ་གཉིས། དབང་ལྡན་དུ་དེ་བཞིན་གཤེགས་པ་དང་། སྡེ་བརྒྱད་དང་བགེགས་གཉིས་རྣམས་བཏང་། གཙྪ་ཞེས་པའི་ཚེ་རོལ་མོ་དྲག་པོ་རེ་བྱའོ། །མཆོད་པ་བཞི་བཤམ་ཟེར་ཡང་། ཉེར་སྤྱོད་ཚང་བར་བཤམ། བསྡུས་པ་གཏོང་བ་ན་རང་གི་མདུན་དུ་སྟེགས་ཀྱི་སྟེང་དུ་གཏོར་མ་གཉིས། དེའི་ནང་དུ་གཡོན་ནས་བརྩམས་པའི་ཉེར་སྤྱོད་ལྔ་བཤམ། ལྷ་ནས་སྤྱོན་ཞིག་གི་བར་ལ་ཕྱག་ཆེན་གྱི་དྲིལ་གསིལ་དང་། འབྱུང་བོ་ནས་མཆིས་མཛོད་འོག་མའི་བར་ལ་རྒྱུན་ལྡན་དུ་དྲིལ་བུ་གསིལ། དེ་ནས་རྡོར་དྲིལ་དང་བཅས་པས་གཏོར་སྔགས་ཀྱིས་དབུལ། འདིར་འབྱུང་བོ་ལ་མ་བཤད་ཀྱང་སྤྱན་དྲངས་ཤིང་གཏོར་མ་ཡོད་པས་དེ་རྣམས་ཀྱི་སྔགས་ཀྱིས་དབུལ། མཆོད་སྦྱིན་གཏོར་མ་ཞེས་པའི་དུས་སུ། ཉེར་སྤྱོད་རྣམས་མས་རིམ་ནས་གོང་མ་གོང་
མར་དྲིལ་ནས། གཏོར་མར་བླུག །དེ་ནས་མཆོད་ཡོན་བཟུང་ནས་གཏོར་མ་ལ་གཡས་བསྐོར་གསུམ་རེ་རེ་ལ་གཏོར་མར་དུམ་པ་རེ་བླུག །མཐར་མཆོད་སྦྱིན་གྱི་ལམ་ཕྱེ་བ་ན། གཏོར་མ་སྐྱེལ། རོལ་མོ་དྲག་པོ་བྱའོ། །དེ་ནས་ནང་དུ་འོང་བའི་སྒོར་དཀྱིལ་འཁོར་བསྲུང་མཁན་གྱིས་བསང་ཆུས་གཏོར། གུ་གུལ་གྱིས་བདུག །འདིར་དཀྱིལ་འཁོར་ལ་བསྐོར་བ་ཡོད་ཀྱང་མ་བཤད་དོ། །དེ་ནས་སློབ་མ་འཇུག་ན། དཀྱིལ་འཁོར་གྱི་ཤར་སྒོར་ལངས་ནས་མཆོད་ཡོན་འབུལ། མཚན་བརྒྱས་བསྟོད་ལ་དྲིལ་གསིལ་དང་བཅས་པ་བྱས་ནས། ཕྱག་བྱས་ལ་གནང་བ་ནོད་པ་ལན་གསུམ་བྱའོ། །དེའི་རྒྱུན་ལའམ་མིན་ན་སྒོ་དེར་དྲིལ་བུ་ལན་ཅིག་གསིལ། ཐལ་མོ་སྦྱར་ནས་གསོལ་བ་གདབ། ཕྱག་ལེན་ལ་སློབ་མ་འཚོག་པ་ན་བྱེད་དོ། །དེ་ནས་མཎྜལ་ཕུལ་ནས་གསོལ་བ་གདབ་པ་སོགས་བྱ། ཕྱག་བཞི་མ་གྲུབ་ན་སྒོ་དེ་དང་དེར་ཕྱིན་པ་ལ་དམིགས་པ་ཕྱག་ལེན་ལ་བྱས་ན་ལེགས། ལྷ་ལ་གསོལ་བ་གདབ་པའི་ཚེ། སློབ་དཔོན་ཤར་སྒོར་སོང་ནས་དྲིལ་གསིལ་དང་བཅས་པས་བྱེད་དོ། །རྡོར་སེམས་སུ་བསྐྱེད་པ་ན་ཕྱོགས་གཅིག་ཏུ་དམ་རྒྱས་རེག་ནས་དམིགས་པ་སྤྲོད། ཉེར་སྤྱོད་ལྔས་མཆོད་པ་ན་སྟ་གོན་ལྟར་རོ། །སློབ་མས་ཡོན་གྱི་མཆོག་ཕུལ་ཞེས་པར་མཎྜལ་རེ་བྱེད། དམ་གཞག་དང་པོ་དང་། ཐ་མ་ལ་གནས་གྱུར་པ་རྣམས་སེམས་མ་རྡོ་རྗེ་མའི་
དམ་རྒྱ་སྤྱི་བོར་འཇོག །འདི་བ་རྡོ་རྗེ་སྤྱི་བོར་འཇོག །འདི་ནི་སོགས་ལ་ཁ་ཐུར་བསྟན་སྙིང་ག་དང་། ཚིག་རྫོགས་མཚམས་སུ་གྱེན་བསྟན་སྤྱི་བོར་འགྲོལ་བ་བྱེད། གལ་ཏེའི་ཚེ་གྱེན་བསྟན་སྙིང་གར་འཇོག །དམ་གཞག་ལ། རྡོར་དྲིལ་དང་བཅས་ཀྱང་དྲིལ་བུ་མི་གསིལ་བ་འདི་བའི་ལུགས་སོ། །ཡེ་ཤེས་དབབ་པ་གཉིས་ཀ་ལ་ཕྱག་རྒྱ་སློབ་དཔོན་གྱིས་བཅའ། སྔགས་གཉིས་ཀས་བརྗོད། གར་གར་ལན་གྱི་ཕྱག་རྒྱ་གཉིས་ཀ་དམ་རྒྱ་རེ་རེ་ནས་ལྷ་གང་དུ་བསྒོམ་པའི་གནས་དེར་དགྲོལ། བཞི་བཞིའི་བར་དུ་གོ་བགོ་བ་གཉིས་བྱ་བ་ནི་སློབ་མ་རེ་རེ་ནས་སོ། །པད་འདབ་འདྲ་བའི་ཕྱག་རྒྱ་ནི། མཐེ་བོང་དང་མཐེའུ་ཆུང་གཉིས་ཐད་ཀར་སྦྱར་ནས་སོར་མོ་ལྷག་མ་རྣམས་གདངས་ནས་པད་འདབ་ལྟར་བྱས་པའོ། །མེ་ཏོག་འདོར་བ་ན་སྤྲོ་ན། ༀ་མཆོག་སོགས་ལ་དབྱངས་བྱ། ལྷ་སྟོན་པ་ན་ཕྱོགས་གཅིག་ཏུ་རྟེན་དང་བརྟེན་པ་རྣམས་བསྟན་ཏོ། །སློབ་མ་དང་སློབ་དཔོན་གྱི་དབང་ལ་མཎྜལ་རེ་འབུལ། དབང་སྟེགས་ནི་ཤར་སྒོའི་ཕྱོགས་སུ་རེ་རེ་ལ་རེ་རེ་བྲི། ཆེ་རྒྱས་དབང་སྟེགས་ལ་བཞག་པ་གོང་དུ་བླངས། མཆོད་འབུལ་སྟ་གོན་ལྟར་རོ། །བཀྲ་ཤིས་རྒྱས་བསྡུས་དང་དབྱངས་དང་བཅས་པ་ཅི་རིགས་སུ་བྱ། དེའི་ཚེ་རོལ་མོ་མེད་པར་མེ་ཏོག་རེ་ལངས་ནས་གཏོར། ལྷ་བུམ་དང་གང་བུམ་གཉིས་ནི་བུམ་པ་རྒྱས་ན་མེ་ཏོག་གང་ཕོག་གི་དེ་གཉིས་ཀྱིས་བྱ་ལ། བསྡུས་པ་ཡིན་
ན། མེ་ཏོག་གང་ཕོག་གི་ཕྱོགས་དེའི་བུམ་པ་གཉིས་སོ། །མེ་ཏོག་གང་ཕོག་གི་དམ་རྒྱས་གནས་བཞི་བྱིན་རླབས་བྱེད་པ་ན། རང་རང་གི་སྙིང་པོ་ལ་ཨཱ་དྷི་ཏིཥྠ་སྭ་མཾ་བཏགས་པའི་བདག་རྫོགས་ལྟར་རོ། །སྟོད་གཡོགས་སྨད་གཡོགས་ནི་བྱུང་ན་དམར་པོ་དང་། དེ་མིན་གང་རུང་ངོ་། །རིན་པོ་ཆེའི་ཅོད་པན་ནི་པྲོག་ཞུ་ལྟ་བུའོ། །གཤེགས་པ་ལ་མེ་ཏོག་ཕོག་ན་དེའི་ཁུ་ཚུར་གྱིས་དང་། གཞན་ལ་ཕོག་ན། རྡོ་རྗེ་ཁུ་ཚུར་གྱིས་སྦྱིན་པ་དང་བླང་བ་བྱས་ཏེ། སློབ་མས་ནི་ལེན་པའི་གོང་དུ་རྡོ་རྗེ་ཐལ་མོ་བསྐོར་བ་རེ་བྱའོ། །འདིའི་ཉེར་སྤྱོད་དང་སྒེག་སོགས་ལ་མཆོད་པ་གསར་དུ་བཤམ་པའམ་སྔ་མས་བྱ་ལ་སྤྲོ་ན་དབྱངས་བྱའོ། །སློབ་དཔོན་དུ་དབང་བསྐུར་བའི་སྟེགས་ནི། རྟ་བབས་དང་བྲལ་བ་མདའ་ཡབ་བར་ཚང་བ་ཞིག་འདྲི། དེའི་སྟེང་དུ་ཁྲིའམ། གདུང་ལ་པད་ཟླ་བྲིས་པ་གོས་སམ་སྟན་གྱིས་གཡོགས་པ་ལ་ཕྱག་ཆེན་རྒྱས་བཞག་ནས། བསྐྱེད་པ་སོགས་བྱ། སྒྲུབ་ཆེན་འགོད་པ་ན། རེ་རེའི་གནས་ཉེར་བརྒྱད་དུ་རང་རང་གི་སྔགས་བརྗོད་ཅིང་དམ་རྒྱས་གཏུགས། རྗེས་སུ་དམིགས་པ་ཐམས་ཅད་ཕྱོགས་གཅིག་ཏུ་སྤྲོད། ཉེར་སྤྱོད་དང་སྒེག་སོགས་ལ་དབྱངས་བྱ་ཞིང་། ཕྱི་མ་ལ་གར་ཡང་བྱ། བཀྲ་ཤིས་ལའང་དབྱངས་བྱའོ། མཚན་བརྒྱ་རྩས་བསྟོད་པ་ན། སྐོར་ས་ཡོད་ན་སེམས་དཔའི་ཕྱི་འགྲོས་བྱ་ཞིང་བསྐོར། མེད་
ན་དྲིལ་སྟབས་བྱ་ཞིང་བརྗོད། དེ་ནས་ལྷ་རེ་རེ་ཞིང་བུམ་པ་གཉིས་གཉིས་ཀྱིས་དབང་བསྐུར་ནས་དབང་དོན་རེ་བཤད། རྣམ་རྒྱལ་གྱིས་བསྐུར་བ་ན་འབྱུང་གཞུག །ཆུ་དབང་བརྟན་བྱེད་ཀྱི་ཕྱག་རྒྱ་སློབ་མ་རང་རང་གིས་བཅས་ནས་སྤྱི་བོར་འཇོག་པའང་ཡོད། སྔགས་བརྒྱ་རྩ་གཉིས་ཀ་བཟླ། ཅོད་པན་མ་གཏོགས་པའི་ཆས་འཇུག་རྣམས་སྔར་དབང་སྟེགས་ལ་བཞག་པ་ན་བྱེད། གཞན་རྣམས་འདིར་རེ་རེ་ནས་བྱའོ། །ཚིགས་བཅད་བརྗོད་པ་ན་མིག་ཐུར་གྱིས་ཕར་ལ་འཁྱེར། སྔགས་ཀྱི་ཚེ་ཚུར་ལ་འཁྱེར་བ་རེ་བྱེད། མེ་ལོང་སྟོན་པ་ན་རེག་པ་རེ་བྱས་ལ་བལྟ། དྲིལ་བུ་ལག་ན་ཡོད་པ་ཉིད་བླངས་ནས་གཏོད། མེ་ལོང་གཉིས་པ་སྟོན་པ་ན་རྡོ་རྗེ་དེའི་སྟེང་དུ་བླངས་ནས་སྟོན། འཁོར་ལོ་ལ་བདག་འཇུག་གི་ཚེ་ཕྱག་རྒྱ་རེ་དང་སྔགས་ཙམ་བྱེད། དུང་ལ་སྔགས་ཙམ་དང་པོ་ཏི་ལ་ཚིགས་བཅད་ཙམ་བརྗོད། རྡོ་རྗེ་འཁོར་ལོ་སོགས་ལ་སྦྱིན་ནམ་བྲིས་པ་སྟེར། མེད་ན་ཁྲོ་བོའི་འཁོར་ལོ་ལ་ཧཱུཾ་མཛད་ཀྱི་ཕྱག་རྒྱ་འཆའ་རུ་གཞུག །གཞན་སླ། ལུང་བསྟན་གྱི་ཚེ་སྣམ་སྦྱར་གྱོན་ནས་བྱེད་དེ་རེ་རེ་ནས་སོ། །གཟེངས་བསྟོད་དེ་དག་གི་མདུན་དུ་ཕྱོགས་གཅིག་ཏུའོ། །གསང་དབང་བསྐུར་བའི་གོང་དུ་སེམས་མ་རྡོ་རྗེ་མའི་དམ་རྒྱ་འཆིང་དུ་བཅུག་ནས་ས་མ་ཡ་ཧཱུཾ་ཞེས་བརྗོད་དུ་བཅུག །ཞུགས་ནས་ལྷ་རྣམས་ལ་གནས་པ་ལ། ལྷ་རྣམས་ལས་འོད་འཕྲོས་ནས་ཕོག་སྡིག་
སྒྲིབ་དག་པར་སེམས་ཞེས་པའི་དམིགས་པ་སྤོད་པའང་ཡོད། དེ་ནས་རྡོ་རྗེ་བྱིན་རླབས་ནི་ཞེས་སོགས་ཀྱི་ཚིགས་བཅད་དང་སྔགས་རྣམས་ཤར་ཏེ། ཀློག་པའང་ལན་རེ་མཛད། གཙོ་བོར་སྙིང་པོ་ལ་སོགས་བླང་བ་ནས་མཛད། འདིར་གསོལ་གདབ་གཉིས་ཀ་ཡིད་ཀྱིས་ཡིན། སློབ་དཔོན་གྱིས་སྙིང་པོ་ཅི་རིགས་ཤིག་བཟླས་ནས་མེ་ཏོག་བླངས་ཏེ། འདི་ནི་ཞེས་སོགས་བརྗོད་པའི་ཚེ་སྤྱི་བོར་བཟུང་ནས་གཏོད། མཛོད་ཅིག་གི་བར་རྗེས་ཟློས་ཚར་བ་དང་། རང་རང་གི་ལག་ཏུ་སྦྱིན་པ་ནི་རེ་རེ་ནས་བྱ་ལ། དེ་ནས་རང་རང་གི་སྤྱི་བོར་བཟུང་ནས་རྡོར་སེམས་ཀྱི་སྔགས་འདི་ནས་བཟླའོ། །ཕྱག་རྒྱ་བཞི་ཡེ་ཤེས་ལ་བསླབ་པ་དང་། འདས་པ་དང་། སེམས་ཞེས་པ་ནས་བསྒྲུབ་པར་བྱའི་བར་གྱི་ཚིགས་བཅད་བརྗོད་པ་ཙམ་བྱེད། དེ་ནས་ཁྱོད་ནས་འགྱུར་རོའི་བར་བརྗོད་དོ། །དེ་ནས་རང་དང་སློབ་མས་མཆོད་པ་ནས་འདིའི་བར་བསྡད་ནས་བྱ། བཅོམ་ལྡན་འདས་ཞེས་སོགས་ཀྱི་ཚེའང་བསྡད་ནས་དཀྱིལ་འཁོར་ལ་ཁ་ཕྱོགས་པར་ཐལ་མོ་སྦྱར་ལ་བྱའོ། །དེའི་རྗེས་ཉིད་ལ་དངོས་གྲུབ་ཀྱི་བརྟུལ་ཞུགས་སྔར་བཞིན་སྦྱིན་ཞིང་དེའི་སྔགས་སློབ་མས་ཀྱང་སློབ་དཔོན་གྱིས་བརྗོད་པའི་ཚེ་བརྗོད་དེ། ཆོ་ག་ནས་གཅིག་གི་བར་ལན་ཅིག་བྱ་ལ། ཚིགས་བཅད་འགྱུར་ཏ་རེའི་བར་རེ་རེ་ནས་
བརྗོད། ཚིགས་བཅད་ཀྱི་ཚེ་སེམས་མ་རྡོ་རྗེ་མའི་དམ་རྒྱ་དང་རྡོ་རྗེ་སྙིང་གར་གཏུགས་པ་གང་རུང་བྱ། དེ་ནས་སྦྱིན་སྲེག་གྲུབ་ན་ཆོ་ག་ལྟར་དང་། མ་གྲུབ་ན་དེའི་འཕྲོ་ནས་རྡོ་རྗེ་གནོད་སྦྱིན་བཟླས་པའི་ཆུས་སྤྱི་བོར་ཞེས་པ་ནས་སྲུང་བའི་བར་བྱས་ཏེ། དེའང་སྲུང་སྐུད་འཆིང་བ་ན། རྡོ་རྗེ་སྲུང་བའི་སྔགས་བཟླ་ཞིང་། སློབ་མའི་མིང་ནས་སྨོས་ཏེ། བགེགས་སོགས་ཞི་བའི་སྨོན་ལམ་བྱ། དེ་ནས་སློབ་མ་རྣམས་ཕྱག་བྱེད་དུ་བཅུག་ལ་རང་གནས་སུ་བཏང་ངོ་། །ཕྱི་རོལ་པ་གཏོང་བ་བསྡུས་པས་བྱ་སྟེ། གཏོང་ཚུལ་སྔ་མ་ཇི་ལྟ་བའོ། །མཆོད་ཡོན་ཕུལ་བའི་འོག་ཏུ་གཤེད་དམར་ནས་བྱུང་བ་ལྟར་གསོལ་གདབ་ཆེན་མོ་བྱའོ། །ཁྱོད་ཀྱི་ཞེས་པ་ནས་མཆོད་ཡོན་ཕུལ་བའི་བར་ཁ་ཅིག་ནི་བསྡད་ནས་བྱེད་ཁ་ཅིག་ལངས་ནས་ཤར་སྒོར་ཕྱིན་ཏེ་བྱེད་ཟེར། སེམས་མ་རྡོ་རྗེ་མ་བཅིངས་པ་ནས་ལྡང་དགོས་ལ། དེའང་རྡོར་དྲིལ་དང་བཅས་པ་ཡིན་ཞིང་། ཤར་སྒོར་ལངས་པ་དེ་ལ་གནས་ནས་སཏྭ་དང་ཡིག་བརྒྱ་བགྲང་ཞིང་སྐོར་བ་བྱ། དེའི་ཚེ་རོལ་མོའང་བྱ། མཐར་ཤར་སྒོར་ཕྱིན་ༀ་ཁྱེད་ཀྱིས་སོགས་ལ་དབྱངས་བྱས་ནས། ༀ་བཛྲ་མུཿ ཞེས་བརྗོད། དེ་ནས་རྡོར་སེམས་ཀྱི་ཕྱག་ཆེན་བཅའ། ཤར་རམ་ནུབ་ནས་ཤར་དུ་བལྟས་ལ། བཅོམ་ལྡན་འདས་ནས་མཛོད་ཀྱི་བར་བརྗོད། དེ་ནས་
རྣམ་སྣང་གི་ཕྱག་ཆེན་བཅས་ལ། བཅོམ་ལྡན་འདས་བཞུགས་ཤིག་གི་བར་བརྗོད་དོ། །དེ་ནས་རྡོར་སེམས་ཀྱི་ཕྱག་ཆེན་བྱས་ལ། མདོར་ན་ནས་བསམ་པར་བྱའོའི་བར་བརྗོད། དེ་ནས་གཡོན་དྲིལ་བུ་དང་བཅས་པའི་མེ་ལོང་། གཡས་རྡོ་རྗེ་དང་བཅས་པས་མཚན་མ་བསྡུས་ཏེ། དེ་ནས་ལག་པས་མ་སྙོགས་ན་ཕྱགས་མས་རྩིག་པ་ལ་ཐོ་ཡེ་མི་ཡོང་བར་བྱས་ནས་ཁོར་ཡུག་སོགས་ལ་སྒོ་བ་ལྕགས་ཀྱུ། དེ་ཕྱོགས་ཀྱི་བསྐལ་བཟང་། བདུག་པ་མ། སྒེག་མོ། མི་བསྐྱོད་པ། གཙོ་འཁོར་ལྔ། སེམས་མ་རྡོ་རྗེ་མའི་རྟགས་ཀྱི་མཚན་མ་རྣམས་མེ་ལོང་གི་སྟེང་དུ་བསྡུ། དེ་ནས་གཡས་སྐོར་དུ་ཕྱོགས་གཞན་གསུམ་ཡང་དེ་བཞིན་དུ་བསྡུའོ། །མཐར་གཙོ་བོའི་མཚན་མ་བསྡུས་ལ་དུམ་ཞིག་རང་དང་འདོད་པའི་སྤྱི་བོར་བཀོད། དེ་ནས་དབྱུག་པའི་སྣེ་མོ་ལ་རྡོ་རྗེ་བཏགས་པས། ཤར་ནས་ནུབ་བར་དུ་དྲང་བོར་སྒོའི་དབུས་ནས་རི་མོ་བྱ། དེ་བཞིན་དུ་ལྷོ་ནས་བྱང་དུ། མེ་ནས་རླུང་དུ། བདེན་བྲལ་ནས་དབང་ལྡན་དུ་བཤིག །མཚན་མ་བསྡུ་བ་དང་། རྡུལ་ཚོན་བཤིག་པའི་ཚེ་ཨ་ཀཱ་རོ་བཟླ། དེ་ནས་རྡུལ་ཚོན་རྣམས་ཕྱོགས་དེ་བར་དུ་གཞན་གྱིས་བཤིག་ཏུ་མི་རུང་། མཚན་མ་རྣམས་བུམ་སྨན་ལ་
རྡོར་དྲིལ་དང་བཅས་ཏེ་ཕུར་བུ་བཏོན་ལ། མཐེབ་སྲིན་གྱིས་ཕུར་བའི་དབལ་ལ་འོ་མས་བྱུག །ཁུང་བུར་ཡང་བླུག་གོ །དེ་ནས་དབུས་སུ་གདན་སྟེང་དུ་ཀུ་ཤ་བཏིང་བ་ལ་སློབ་དཔོན་བསྡད། སྒོའི་སློབ་དཔོན་རྣམས་ཀྱང་སྒོ་སོ་སོར་རྡོར་དྲིལ་དང་བཅས་པས་འཁོད་ནས། རི་རབ་ཀྱེ་ཞེས་པ་ནས་ཁས་བླངས་ཞེས་པའི་བར་ལ་སློབ་དཔོན་དང་སློབ་མས་དྲིས་ལན་དུ་བརྗོད། སློབ་དཔོན་ནི་རྡོར་སེམས་ཀྱི་ཕྱག་ཆེན་ལ་གནས་ནས་སོ། །དེ་ནས་རྡོ་རྗེ་སེམས་དཔའ་ཞེས་སོགས་ལ་དབྱངས་དང་། སེམས་དཔའི་ཕྱི་འགྲོས་བྱས་ནས་སློབ་དཔོན་ལ་བསྐོར་བ་བྱའོ། །རྡོ་རྗེ་ཐེག་པ་ཞེས་སོགས་ཀྱིས་རང་རང་གི་སྒོའི་ཐད་ཀ་ནས་སློབ་དཔོན་དབུས་ན་ཡོད་པའི་སར་རྡོར་དྲིལ་དང་བཅས་པའི་ལེགས་སོའི་ཕྱག་རྒྱ་བཅས་ནས། ཕུར་བསྙེན་གྱི་དུས་ཀྱི་འགྲོ་ལུགས་བཞིན་བྱས་ནས་སླར་ཡང་ཕྱིར་ལ་ཕྱག་རྒྱ་དང་འགྲོས་དེས་རང་གནས་སུ་ཕྱི་འགྲོས་བྱའོ། །དེ་ནས་སློབ་དཔོན་ཐམས་ཅད་ཀྱིས་དྲིལ་བུ་གསིལ་ཞིང་། སཏྭ་དང་ཡིག་བརྒྱ་བཟླ་ཞིང་བསྐོར་བ་བྱ། བཀྲ་ཤིས་པར་བྱའོ། །སྒྲུབ་མཆོད་སྦྲེལ་ནས་བྱེད་ན། དང་པོའི་བྱེད་ལུགས་སྔར་ལྟར་དང་། སང་ནས་མཆོད་པ་བསང་སྦྱང་། དམ་ཚིག་གསུམ་བཟུང་བ། སྐྱབས་འགྲོ་སོགས་ནས་བདག་རྫོགས་བཟླས་པ་དང་བཅས་པ་
ཚར་བ་དང་། མདུན་བསྐྱེད་ལ་ཉེར་སྤྱོད་གཅིག་གིས་མཆོད་ནས་རྡོར་སེམས་ཀྱི་དམ་རྒྱ་དང་། སྔགས་ཀྱིས་ནམ་མཁར་བཏེགས་ལ་བཞག །དེ་ནས་གནོད་སྦྱིན་རྩེ་མོས་བསངས། ཨ་ཀཱ་རོས་སྦྱངས་ནས། འབྱུང་བ་རིམ་བརྩེགས་ནས་གཞལ་ཡས་ཁང་གདན་བཅས་བསྐྱེད་ནས་ལྷ་སྔར་བཞིན་བསྐྱེད་པ་སོགས་བྱ། དེ་ལ་ཕྱག་རྒྱ་བཞིས་རྒྱས་བཏབ་ནས་མེ་ཏོག་བཟུང་བ་ནས་སྒོ་དབྱེ་བའི་བར་བྱ། ། ། །མངྒ་ལཾ། །༈ ༀ་སྭསྟི། །ཕན་བདེའི་འབྱུང་གནས་རྒྱལ་བསྟན་ཡོངས་འདུའི་ལྗོན། །རབ་རྒྱས་འགྲོ་ཀུན་ཐར་མཆོག་འབྲས་བཟང་ལ། །སྤྱོད་ཕྱིར་བཀྲ་ཤིས་ལྷུན་གྲུབ་ཆོས་གྲྭ་ཆེར། །ཆོས་སྦྱིན་འཛད་མེད་དལ་འགྲོའི་རྒྱུན་འདི་སྤེལ། སྭ་སྟི། རྒྱལ་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདར་རྒྱས་རྣམ་གྲོལ་སྦྲང་རྩའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །སརྦ་མངྒ་ལཾ། །