འཇམ་དབྱངས་ཞི་ཁྲོ་སྦྲགས་སྒྲུབ་ཐུན་མོང་མ་ཡིན་པ།
འཇམ་དབྱངས་ཞི་ཁྲོ་སྦྲགས་སྒྲུབ་ཐུན་མོང་མ་ཡིན་པ་བཞུགས་སོ། །
ལྷག་པའི་ལྷ་རྗེ་བཙུན་འཇམ་དཔལ་དབྱངས་ལ་ཕྱག་འཚལ་ལོ། །འཇམ་དབྱངས་ཞི་ཁྲོ་སྦྲགས་སྒྲུབ་ལ་གསུམ། ཡབ་ཀྱི་ཞི་ཁྲོ་སྦྲགས་སྒྲུབ་ཡུམ་གྱི་ཞི་ཁྲོ་སྦྲགས་སྒྲུབ། ཡབ་ཡུམ་གཉིས་ཀའི་ཞི་ཁྲོ་སྦྲགས་སྒྲུབ་བོ། །ཡབ་ལ་སྐུའི་ཞི་ཁྲོ་སྦྲགས་སྒྲུབ། གསུང་གི་ཞི་ཁྲོ་སྦྲགས་སྒྲུབ། ཐུགས་ཀྱི་ཞི་ཁྲོ་སྦྲགས་སྒྲུབ། དང་པོ་ནི། རང་དམ་ཚིག་སེམས་དཔའ་རྡོ་རྗེ་འཇིགས་བྱེད་ཀྱི་ཐུགས་ཀར་ཡེ་ཤེས་སེམས་དཔའ་འཇམ་དཔལ་ཨ་ར་པ་ཙ་ན། དེའི་ཐུགས་ཀར་ཏིང་ངེ་འཛིན་སེམས་དཔའ་རལ་གྲི་བཀོད་ནས་སྒོམ་པ་ནི་འཆད་པ་གཙོ་བོར་བྱེད་པའི་སྐབས་ཡིན་ལ། དམ་ཚིག་སེམས་དཔའ་ཡི་དམ་གྱི་ཐུགས་ཀར་ཡེ་ཤེས་སེམས་དཔའ་འཇམ་དཔལ་ཡེ་ཤེས་སེམས་དཔའ། དེའི་
ཐུགས་ཀར་ཏིང་ངེ་འཛིན་སེམས་དཔའ་རལ་གྲི་བཀོད་ནས་སྒོམ་པ་ནི་རྩོད་པ་གཙོ་བོར་བྱེད་པའི་སྐབས་ཡིན། དམ་ཚིག་སེམས་དཔའ་ཡི་དམ་གྱི་ཐུགས་ཀར་ཡེ་ཤེས་སེམས་དཔའ་འཇམ་དཔལ་གཞོན་ནུར་གྱུར་པ། དེའི་ཐུགས་ཀར་ཏིང་ངེ་འཛིན་སེམས་དཔའ་རལ་གྲི་བཀོད་ནས་སྒོམ་པ་ནི་རྩོམ་པ་གཙོ་བོར་བྱེད་པའི་སྐབས་ཡིན་ནོ། །གསུང་གི་ཞི་ཁྲོ་སྦྲགས་སྒྲུབ་ནི་རལ་གྲི་ལ་ཡ་མ་རཱ་ཛཱས་བསྐོར་བའི་ཕྱི་རོལ་དུ་ཨ་ར་པ་ཙ་ནས་བསྐོར་བའོ། །ཐུགས་ཀྱི་ཞི་ཁྲོ་སྦྲགས་སྒྲུབ་ནི་རལ་གྲིའི་དབུས་སུ་ཧཱུཾ་ཡིག་དང་། དེའི་དབུས་སུ་རལ་གྲི་བཀོད་པའོ། །ཡུམ་གྱི་ཞི་ཁྲོ་སྦྲགས་སྒྲུབ་ལ་སྐུ་གསུང་། ཐུགས་ལས། དང་པོ་ནི། རོ་ལངས་མའི་ཐུགས་ཀར་དབྱངས་ཅན་མ། དེའི་ཐུགས་
ཀར་པི་ཝང་ངོ་། །གསུང་གི་ཞི་ཁྲོ་སྦྲགས་སྒྲུབ་ནི། པི་ཝང་ལ་རོ་ལངས་མའི་སྔགས་ཀྱིས་བསྐོར་བའི་ཕྱི་རོལ་དུ་དབྱངས་ཅན་མའི་སྔགས་ཀྱིས་བསྐོར་བའོ། །ཐུགས་ཀྱི་ཞི་ཁྲོ་སྦྲགས་སྒྲུབ་ནི་པི་ཝང་གི་དབུས་སུ་གྲི་གུག་དང་། དེའི་དབུས་སུ་པི་ཝང་བཀོད་པའོ། །ཡབ་ཡུམ་གཉིས་ཀའི་ཞི་ཁྲོ་སྦྲགས་སྒྲུབ་ནི། །རྡོ་རྗེ་འཇིགས་བྱེད་ཀྱི་ཐུགས་ཀར་རོ་ལངས་མ། དེའི་ཐུགས་ཀར་རལ་གྲི་ལ་ཡ་མ་རཱ་ཛཱས་བསྐོར་བའི་ཕྱི་རོལ་དུ་ཨ་ར་པ་ཙ་ནས་བསྐོར་བའོ། །རོ་ལངས་མའི་ཐུགས་ཀར་འཇམ་དབྱངས། དེའི་ཐུགས་ཀར་གྲི་གུག །དེ་ལ་དབྱངས་ཅན་མའི་སྔགས་དང་། དེའི་ཕྱི་རོལ་དུ་རོ་ལངས་མའི་སྔགས་ཀྱིས་བསྐོར་བའོ། །ཡབ་ཡུམ་གཉིས་ཀའི་དམ་ཚིག་སེམས་དཔའ། ཡེ་ཤེས་སེམས་དཔའ། ཏིང་ངེ་འཛིན་སེམས་དཔའི་སྔགས་ཐམས་ཅད་ཞལ་སྦྱོར་ཞིང་འོད་ཟེར་རྣམས་ཕན་ཚུན་འཁྱུད་པར་བསྒོམ་པའོ། །དེ་ཡང་གསུང་རབ་ཀྱི་གོ་བ་ཁྱད་པར་ཅན་རྒྱུད་ལ་སྐྱེ་བ་གཙོ་བོར་བྱེད་ན་འཇམ་དབྱངས་ཨ་ར་པ་ཙ་ན་ལ་གཙོ་བོར་བྱེད། ལྟ་བ་རྣམ་དག་གཙོ་བོར་བྱེད་ན་འཇམ་དཔལ་གཞོན་ནུར་གྱུར་པ་ལ་གཙོ་བོར་བྱེད། སྤྱོད་པ་སྙིང་རྗེ་ཁྱད་པར་ཅན་དང་། བློ་ཆོས་སུ་འགྲོ་བ་དང་། བྱང་ཆུབ་ཀྱི་སེམས་ལ་གཙོ་བོར་བྱེད་ན་འཇམ་དབྱངས་དཀར་པོ་ལ་གཙོ་བོར་བྱེད། རྫོགས་རིམ་གྱི་རྟོགས་པ་ཟབ་མོ་གཙོ་བོར་བྱེད་ན་འཇམ་དབྱངས་ནང་སྒྲུབ་ལ་གཙོ་བོར་བྱེད། སྒྲ་དང་སྙན་དངགས་དང་། སྡེབས་སྦྱོར་སོགས་ལ་གཙོ་བོར་བྱེད་ན་འཇམ་དཔལ་ཡེ་ཤེས་སེམས་དཔའ་དང་དབྱངས་ཅན་མ་ལ་གཙོ་བོར་བྱེད། ནོར་སྒྲུབ་དང་།
ཚེ་སྒྲུབ་དང་། བདེ་ཆེན་འབར་བ་ལ་གཙོ་བོར་བྱེད་ན་འཇམ་དབྱངས་གསང་སྒྲུབ་ལ་གཙོ་བོར་བྱེད། འཇམ་དབྱངས་ཨ་ར་ཙ་ན་ནི་གཙོ་བོ་རིགས་བདག་ཡིན་པས་འདི་སྤྲུལ་གཞི་ཡིན་ནོ། །དམ་ཚིག་སེམས་དཔའ་འཇིགས་བྱེད་ཀྱི་ཐུགས་ཀར་ཡེ་ཤེས་སེམས་དཔའ་འཇམ་དབྱངས་ཨ་ར་པ་ཙ་ན། དེའི་ཐུགས་ཀར་ཏིང་ངེ་འཛིན་སེམས་དཔའ་རལ་གྲི་ཡུ་བ་དྷཱིཿས་མཚན་པ་བཀོད། དེའི་མཐར་གྲི་གུག་གི་ཕྲེང་བ་ཡ་མ་རཱ་ཛཱས་མཚན་པས་བསྐོར་བ་དེའི་མཐར་རལ་གྲི་དྲུག་གིས་བསྐོར་བའི་ཆང་ཟུང་རྣམས་ནང་དུ་བསྟན་པ་འོད་ཟེར་རྣམ་ལྔས་སྦྲེལ་བའི་ཆང་ཟུང་ལ་ཨ་ར་པ་ཙ་ན་དྷཱིཿདྲུག་གིས་མཚན་པ་ཁ་དོག་དམར་སེར་ཡོད་པ། རལ་གྲི་ཁ་དོག་སྔོན་པོར་ཡོད་པ།རྩེ་མོ་ཕྱིར་བསྟན་པ་ལས་མེ་རབ་ཏུ་འབར་ཞིང་མགྱོགས་པར་འཁོར་བ། རལ་གྲིའི་འཁོར་ལོ་དེའི་དབུས་ཀྱི་རལ་གྲིའི་རྩེ་མོ་གྱེན་དུ་བསྟན་པ་ལ་རྒྱབ་བརྟེན་པའི་འཇམ་དབྱངས་རྡོ་རྗེ་དང་རལ་གྲི་འཛིན་པས་ཡུམ་དབྱངས་ཅན་མ་རྡོ་རྗེ་དང་དྲིལ་བུ་འཛིན་པ་ལ་འཁྱུད་པ། གཉིས་ཀའང་སྐུ་མདོག་དམར་སེར་རུས་པ་དང་རིན་པོ་ཆེའི་རྒྱན་སྣ་ཚོགས་པས་བརྒྱན་པ། ཡབ་རྡོ་རྗེ་སྐྱིལ་ཀྲུང་གིས་བཞུགས་པའི་ཡབ་ཀྱི་ཐུགས་ཀར་ཧཱུཾ་ཡིག་སྔོན་པོ་འོད་ཟེར་ཁ་དོག་ལྔ་འཕྲོ་བ། རོ་ལངས་མའི་ཐུགས་ཀར་དབྱངས་ཅན་མ་དཀར་མོ། དེའི་ཐུགས་ཀར་གྲི་གུག་གི་མཐར་དབྱངས་ཅན་མའི་སྔགས། དེའི་མཐར་རོ་ལངས་མའི་སྔགས་ཀྱིས་བསྐོར་བའོ། །གྲི་གུག་ལ་རྒྱབ་བརྟེན་པའི་དབྱངས་ཅན་མ་གྲི་
གུག་དང་ཐོད་པ་འཛིན་པས་འཇམ་དབྱངས་གྲི་གུག་དང་ཐོད་པ་འཛིན་པ་འཁྱུད་པ། གཉིས་ཀའང་སྐུ་མདོག་དམར་སེར་རུས་པ་དང་རིན་པོ་ཆེའི་རྒྱན་གྱིས་བརྒྱན་པའོ། །ནོར་སྒྲུབ་དང་ཚེ་སྒྲུབ་ལ། ཡི་དམ། རོ་ལངས་མ། འཇམ་དབྱངས། དབྱངས་ཅན་མ་ཐམས་ཅད་དམར་པོ་ལ་རལ་གྲིའི་ཚབ་ཏུ་ནོར་བུ་དང་།རྒྱལ་མཚན་ནོར་བུས་མཚན་པ་འགོད་ཅིང་། སྔགས་དེ་ཉིད་སྤེལ་ཚིག་དང་བཅས་པའོ། །ཞི་རྒྱས་དབང་དྲག་གི་ལས་གཞན་རྣམས་ཀྱང་འདིས་གོ་ནུས་ཞེས་གསུངས། འདི་ནི་ཆེས་ཤིན་ཏུ་གཉན་ཅིང་། ཐུན་མོང་མ་ཡིན་པའི་གསང་བའི་གསང་བར་འདུག་པས་གཞན་ལ་བསྟན་བྱ་མིན་ལ། གང་ཟག་ཐ་མལ་པས་ད་ལྟའི་འདི་བཞིན་བསྒྲུབས་ན་སྲོག་རླུང་གི་རྒྱུར་འགྱུར་ཉེན་ཆེ་བས་འཆུན་དཀའ། འདི་ལ་དམིགས་པ་གསལ་ཞིང་བརྟན་པར་གྱུར་ན་ཕུལ་དུ་ཕྱིན་མོད། བཤར་སྒོམ་གྱི་མོས་བློ་རེ་ཙམ་བྱས་པ་ལ་ཡང་འཇམ་དབྱངས་སྒྲུབ་ཚུལ་གཞན་དང་གཏན་ནས་མི་འདྲ་བར་ཤེས་རབ་འཕེལ་བ་ལ་ཆེས་མཆོག་ཏུ་འགྱུར་ཞིང་། བར་ཆད་ཀྱི་མཚན་མ་མི་འབྱུང་ཞེས་གསུངས། ད་ལྟའི་ཞི་ཁྲོ་སྦྲགས་སྒྲུབ་ལ་ཉི་གདན་ཟླ་གདན་དུ་བསྒྱུར་བ་དང་ཉི་གདན་འཁོར་ལོ་རྩིབས་དྲུག་པར་བསྒྱུར་བ་དང་། རྡོ་རྗེ་འཇིགས་བྱེད་རང་ཡང་ཞི་ཁྲོ་སྦྲགས་སྒྲུབ་ཡིན་མོད་ཀྱི། འདི་དང་ཕྱོགས་གཏན་ནས་མི་གཅིག་གོ། བཅོམ་ལྡན་འདས་རྡོ་རྗེ་འཇིགས་བྱེད་ལ་རྒྱུ་རྡོ་རྗེ་འཛིན་པ་འཇམ་དཔལ་དབྱངས་དང་། ཡེ་ཤེས་སེམས་དཔའ་འཇམ་དཔལ་དབྱངས་དང་། འབྲས་བུ་རྡོ་རྗེ་འཛིན་པ་དཔལ་རྡོ་རྗེ་འཇིགས་བྱེད་ཀྱི་སྐབས་སུ་ཡང་འཇམ་
དཔལ་གྱི་ཞལ་དངོས་སུ་ཡོད་པས་ཁྱད་ཆོས་གསུམ་པོ་འདིས་བཅོམ་ལྡན་འདས་རྡོ་རྗེ་འཇིགས་བྱེད་གཤིན་རྗེ་གཤེད་གཞན་རྣམས་ལས་ཁྱད་པར་དུ་འཕགས་པའོ་ཞེས་གསུངས། འདི་ལྟ་བུའི་ཞི་ཁྲོ་སྦྲགས་སྒྲུབ་ནི་ལམ་ཐུན་མོང་བས་རྒྱུད་སྦྱངས་པའི་གང་ཟག་ཁྱད་པར་ཅན་ཁྱེད་ལྟ་བུ་ལ་གསུངས་པས། སྤྱིར་འཇམ་དབྱངས་སྒྲུབ་ཚུལ་དང་ཁྱད་པར་ཞི་ཁྲོ་སྦྲགས་སྒྲུབ་འདི་ལྟ་བུ་ཤེས་རབ་སྤེལ་བ་རྣམས་ཀྱི་ནང་ནས་འགྲན་ཟླ་དང་བྲལ་ཞིང་མཆོག་ཏུ་གྱུར་པ་རྗེ་བཙུན་རང་ཉིད་ཀྱིས་ཞལ་དངོས་སུ་བསྟན་ནས་ཡང་ཡང་གསུངས་པས་ཐུགས་ཆེས་པར་མཛད་ནས་ལྷག་པའི་ལྷ་ལ་སྒྲུབ་པ་སྙིང་པོར་མཛོད། རྗེ་བཙུན་ཉིད་ཀྱིས་དངོས་སུ་འདོམས་པར་གདོན་མི་ཟའོ། །འདི་ཅུང་ཟད་འཁྲུག་ཅིང་གོ་དཀའ་བས་ཞག་ཤས་ཚགས་མཛད་ནས་རྒྱ་དམ་དུ་མཛད་དེ་སྔས་འོག་ཏུ་སྦེད་པ་མཛོད་ལ། ཐུགས་སུ་ཆུང་པ་དང་མེ་ལྷ་ལ་འབུལ་བ་མཛད་པ་གལ་ཆེ། གང་ཟག་གཞན་ལ་གཏན་ནས་བསྟན་བྱ་མིན་ཞིང་བློར་ཤོང་དཀར། རྗེ་བཙུན་གྱིས་གནང་བ་བྱུང་ཡང་བྲི་བ་ལ་འཚུབ་འགྱུར་ཆེ་བར་བྱུང་བས་དེ་དགོངས། མདོར་ན་རྗེ་བཙུན་གྱིས་ཇི་ལྟར་གནང་བ་ལྟར་ལྷག་ཆད་མེད་པར་ཚང་མར་ཕུལ་བ་ལགས། གསུང་ཤོག་རྗེ་བཙུན་ལ་ཞུས་ནས་བསྐུར་གསུང་བ་རྟིང་དུ་མཇལ་ནས་རྒྱུ་མཚན་འབུལ་བས་དགོངས། སངས་རྒྱས་ཀྱིས་ཆོས་འཁོར་བསྐོར་བའི་དུས་ཁྱད་པར་ཅན་ལ་འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་ནས་བློ་བཟང་གྲགས་པའི་དཔལ་གྱིས་གྲུབ་པའི་དབང་ཕྱུག་རྗེ་བཙུན་མདའ་བའི་
དྲུང་དུ་ཕུལ། ནང་ན་འདུག་པ་འདི་རྣམས་ཞུ་ཡིག་གི་རྟེན་ལགས། ཉིན་མོ་བདེ་ལེགས་ཡུག་ཚང་བ་ཁ་ཚར་དང་བཅས་པ་གཅིག་དང་། ཉ་ཧ་ཁྲིའི་ཇ་སེར་པོ་ཞོ་གསུམ་ལ་རྒྱ་འདི་འབྱར་བ་འབུལ་དུ་བཏང་བ་དགེ་ལེགས་འཕེལ།། སྭ་སྟི། རྒྱལ་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདར་རྒྱས་རྣམ་གྲོལ་སྦྲང་རྩའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །སརྦ་མངྒ་ལཾ། །