ཡི་གེ་བཞི་བསྲུང་བ་དང་མན་ངག་རྩ་གསུམ་དང་གཤིན་རྗེ་སྦྱོར་ཚུལ་རྩལ་འབྲེལ་དང་བཅས་པ་རྣམས།
ཡི་གེ་བཞི་བསྲུང་བ་དང་མན་ངག་རྩ་གསུམ་དང་གཤིན་རྗེ་སྦྱོར་ཚུལ་རྩལ་འབྲེལ་དང་བཅས་པ་རྣམས་བཞུགས་སོ།
ན་མོ་བཛྲ་བྷཻ་ར་ཝཱ་ཡ། བླ་མ་དང་དཔལ་རྡོ་རྗེ་འཇིགས་བྱེད་ཆེན་པོ་དབྱེར་མ་མཆིས་པའི་ཞབས་ལ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །ཡི་གེ་བཞི་པའི་བསྲུང་བ་ནི།ཐོག་མར་ལྡང་བའི་རྣལ་འབྱོར་གྱིས་ལངས་ནས། དེ་རྗེས་འདི་ལྟར་བྱའོ། །མདུན་གྱི་ནམ་མཁའི་གནས་སུ་པདྨ་དང་ཉི་མ་དང་། མ་ཧེའི་གདན་གྱི་སྟེང་དུ། ཧཱུཾ་ལས་གྲི་གུག་ཧཱུཾ་གིས་མཚན་པ་དེ་ཡོངས་སུ་གྱུར་པ་ལས། དཔལ་རྡོ་རྗེ་འཇིགས་བྱེད་ཆེན་པོ་སྐུ་མདོག་དམར་པོ། ཞལ་གཅིག་ཕྱག་གཉིས་པ། གཡས་རལ་གྲི་ནམ་མཁའ་ལ་འཕྱར་བ། གཡོན་སྡིགས་མཛུབ་ཐུགས་ཀར་མཛད་པ། མ་ཧེའི་གདོང་པ་ཅན། དམར་ཞིང་ཟླུམ་པའི་སྤྱན་གསུམ་དང་ལྡན་པ། ཞབས་གཡས་བསྐུམ་ཞིང་གཡོན་
བརྐྱང་པའི་སྟབས་ཀྱིས་བཞུགས་པ། རུས་པའི་རྒྱན་རྣམས་ཀྱིས་བརྒྱན་པ། དབུ་སྐྲ་ཁམ་པ་གྱེན་དུ་བརྫེས་པ། ལིང་ག་དམར་པོ་གྱེན་དུ་ལངས་པ་ཞིག་བསྒོམ། དེའི་ཐུགས་ཀར་པདྨ་དཀར་པོ་འདབ་མ་བཞི་པ་བསྒོམ། པདྨའི་ལྟེ་བར་རྣམ་སྣང་། ཤར་གྱི་འདབ་མ་ལ་མི་བསྐྱོད་པ་སོགས་བསྒོམ། རང་ཐ་མལ་དུ་གནས་པ་དེ་ཡི་དམ་གྱིས། ཤངས་བུག་ནས་རྔུབས་ཏེ་སྐུའི་དབྱིབས་བརྒྱུད་ནས་རྣམ་སྣང་གི་ཐུགས་ཀར་གནས་པར་བསམས་ལ། ཨེ་ས་བྷྱོ་བཟློག་སྲུངས་ཞེས་དངོས་སུ་རང་གིས་བརྗོད། བསྒོམ་དོན་ལ་ཡི་དམ་གྱིས་བསྲུང་བར་མོས། །ན་མོ་བཛྲ་བྷཻར་ཝཱ་ཡ། བླ་མ་དང་དཔལ་རྡོ་རྗེ་འཇིགས་བྱེད་ཀྱི་ལྷ་ཚོགས་ལ་ཕྱག་འཚལ་
ལོ། །རྗེ་བླ་མ་ཆོས་ཀྱི་རྒྱལ་པོ་ཙོང་ཁ་པ་ཆེན་པོ་ལ་ཡི་དམ་རང་ཉིད་ཀྱིས་གསུངས་པའི་མན་ངག་ཆེས་ཟབ་པ། གདོན་བགེགས་ཀྱི་གནོད་པ་དྲག་པོ་བྱུང་བའམ། ཁྱད་པར་དུ་ཕ་རོལ་གྱི་རྦོད་གཏོང་དང་། བྱད་ཁ་དྲག་པོ་བྱུང་ན། དེ་ཉིད་བཟློག་པར་བྱེད་པའི་གདམས་པ་ཐུན་མོང་མ་ཡིན་པ་ནི། རང་ཉིད་གཤིན་རྗེ་གཤེད་ཀྱི་རྣལ་འབྱོར་བསྒོམ། ང་རྒྱལ་ཤིན་ཏུ་བརྟན་པའི་གདེང་དང་ལྡན་པར་བྱས་ལ། ཁ་ལྷོ་ནུབ་ཏུ་བསྟན་ཏེ། གོས་ཕྱི་མ་མགོ་གཤམ་ལྡོག་ནས་གྱོན། ལྷམ་གཉིས་ཕྲག་པ་གཡས་གཡོན་ལ་བཀལ་བའི། ལྷམ་གྱི་མཐིལ་མདུན་ཕྱོགས་དང་། ཡུ་བ་རྒྱབ་ཕྱོགས་ལ་བསྟན། ཞྭ་མོ་གདན་དུ་བཏིང་། རྐང་པའི་མཐེ་བོང་གིས་མདུན་དུ་འབྲུབ་ཁུང་ཟུར་གསུམ་རྩེ་མོ་ཕར་ལ་བསྟན་པ་བྲི། དེ་ནས་རང་ཉིད་ཞྭ་མོ་བཏིང་བའི་སྟེང་དུ་སྐྱིལ་ཀྲུང་གྲུ་གསུམ་བཅས་ཏེ་འདུག་ནས། མདུན་གྱི་ཧོམ་ཁུང་གྲུ་གསུམ་དེ་ཉིད་ཡངས་ཤིང་རྒྱ་ཆེ་བ། གཏིང་ཤིན་ཏུ་རིང་བ། དབང་ཆེན་གསེར་གྱི་ས་གཞི་ལ་ཐུག་པར་བསྒོམས་ནས། ཧོམ་ཁུང་དེའི་ནང་དུ་འདོད་ཆགས་ཀྱི་ཆུ་འཁྲུགས། ཞེ་སྡང་གི་མེ་འབར། གཏི་མུག་གི་དུ་བ་འཁྲིགས། ནད་ཀྱི་ན་བུན་འཐིབས། དེའི་ནང་དུ་ཆུད་པ་ཙམ་གྱིས་དགྲ་བགེགས་སེམས་མྱོས་ཤིང་དྲན་པ་ཉམས། ལུས་འབྲལ་བར་བྱེད་ནུས་པ་དེ་ལྟ་བུར་བསྒོམ་པར་བྱའོ། །དེ་འདྲ་བའི་ཧོམ་ཁུང་དེའི་ནང་ན། ཆོས་ཀྱི་རྒྱལ་པོ་ལ་སོགས་པའི་ཟ་བྱེད་གཤིན་རྗེའི་ཚོགས། འཇིགས་སུ་རུང་བ་ཁ་གདངས་
པ། རབ་ཏུ་ཁྲོས་པ་དཔག་ཏུ་མེད་པ་རང་ལ་མདུན་བསྟན་ནས་ཡོད་པར་བསམས་ལ། དེ་ནས་རང་གཤིན་རྗེ་གཤེད་ཀྱི་ང་རྒྱལ་ཤིན་ཏུ་བརྟན་པས་ཁྲོས་པའི་སེམས་ལ་གནས་པར་བྱས་ཤིང་། རང་གི་སྙིང་གའི་ས་བོན་ལས་སྤྲོས་པའི་ཁྲོ་བོ་གཤིན་རྗེ་གཤེད་ཞགས་པ་དང་ལྕགས་ཀྱུ་འཛིན་པ་དཔག་ཏུ་མེད་པ་སྤྲོས་ཏེ། དགྲ་བགེགས་བྱད་མ་ལ་དམིགས་པའི་བྱད་གཟུགས་ཇི་ལྟ་བ་བཞིན་དུ་སྙིང་ག་ནས་ལྕགས་ཀྱུས་བཀུག་ཅིང་། མགྲིན་པ་ནས་ཞགས་པས་བཅིངས་ཏེ། རླུང་གི་དཀྱིལ་འཁོར་ལ་བསྐྱོན་ནས། གཤིན་རྗེའི་ཁྲོ་བོས་རྒྱབ་ནས་བརྡེག་ཅིང་། འཇིགས་པའི་སྒྲ་སྒྲོགས་པས་བཀུག་པར་བསམས་ལ། ལག་པ་ལྕགས་ཀྱུའི་ཕྱག་རྒྱ་བཅིངས་ཏེ། དགྲ་བགེགས་བྱད་མ་ཨཾ་ཀུ་ཤ་ཛཿཞེས་བརྗོད་པ་ལན་གསུམ་མམ། བདུན་ལ་སོགས་པས་དགུག་གཞུག་དྲག་པོ་ཡང་ཡང་བྱའོ། །དེ་ལྟར་དགུག་གཞུག་དྲག་ཏུ་བྱས་པས་དངོས་སུ་ཁུགས་པའི་མོས་པ་བརྟན་པོ་བྱས་ཏེ། དགྲ་བགེགས་བྱད་མ་ཅི་ཡིན་ཀྱང་། དེའི་གཟུགས་དགུག་ཐེབས་རིམ་པ་ཁ་ཡར་དུ་བྱས་པ་རྣམས་རིམ་པ་བཞིན། ཧོམ་ཁུང་གི་གཤིན་རྗེའི་ཞལ་དུ་སྟོབ་པ་དང་། རང་གི་ཕྲེང་བ་ལ་བསྟིམ་པ་དང་། ཧོམ་ཁུང་གི་ནང་དུ་བཅུག་ཅིང་བསྟིམ་པ་གསུམ་བྱའོ། །དེ་ནས་རང་གི་ལག་པ་གཡས་པའི་གུང་མཛུབ་དངུལ་གྱི་བརྟན་པ། མཐེ་བོང་གསེར་གྱི་སྟ་རེར་བསྒོམས་ནས་དགྲ་བགེགས་བྱེད་མ་གང་ལ་དམིགས་པ་ཐམས་ཅད་ཀྱི་སྐེ་སྟ་རེས་
རྦད་རྦད་བཅད་ནས། ཧོམ་ཁུང་གི་ནང་དུ་བསྐྱུར་བས། ཧོམ་ཁུང་གི་ནང་གི་གཤིན་རྗེ་རྣམས་ཀྱི་ཞལ་དུ་ཁྱུར་ཁྱུར་སོང་བར་བསམས་ལ། ཕྲེང་བ་ལག་པ་གཡས་པའི་གུང་མཛུབ་ལ་བཀལ་ནས། མཐེ་བོང་གིས་ཕྲེང་རྡོག་ཕྱིར་བཅད་ཅིང་། ཨེས་བྷྱོ་བཟློག །ཅེས་བཟླས་པར་བྱ་སྟེ། ཕྲེང་རྡོག་རེ་ཕྱིར་བསྐྱུར་བ་དང་། སྔགས་རེ་དང་དམིགས་པ་རེ། དུས་མཉམ་དུ་འོང་བར་བྱའོ། །དེའང་རང་གི་ཁང་པའི་ནང་དུ་ཐོག་མར་རང་གི་གདོང་གཡས་དཀར། གཡོན་དམར། དབུས་ནག་པོའི་རྣམ་པར་བསྒྱུར་བའམ། ཡང་ན་བོང་ང་ནག་པོ་ཆུང་ངུ་ཞིག །གུ་གུལ་རྡོག་པོ་ཞིག །མགར་གྱི་སོལ་རྡོག་ཅིག་རྣམས་ཆུ་ནང་དུ་བསྐྱུར་བ་ལ། ཧྲཱིཿཥྚྲཱིཿསོགས་མང་དུ་བསྔགས་པའི་སྔགས་ཆུ་བྱས་ལ། དེས་རང་གི་ཁ་གདོང་དང་རྐང་ལག་བཀྲུ། དེ་ནས་ཐོག་ཁའམ། ས་ཕུག་སོགས་དབེན་པར་སོང་སྟེ། ཆས་འཇུག་དང་། ཧོམ་ཁུང་དགུག་གཞུག་བཟླས་པ་རྣམས་གོང་དུ་བཤད་པའི་རིམ་པ་ལྟར་བྱའོ། །བཟླས་པ་རྫོགས་པ་དང་། གོས་ཀྱི་ཐ་མ་ནས་བཟུང་སྟེ། ལན་གསུམ་ཧོམ་ཁུང་བྲིས་པ་དེ་ལ་བརྡབས་ནས། ཧོམ་ཁུང་བསུབ་པ་དང་དུས་མཉམ་དུ། ཟ་བྱེད་གཤིན་རྗེའི་ཚོགས་རྣམས་ཀྱིས་ཟས་སྐལ་འཐུང་སྐལ་དགྲ་བོ་བྱད་མ་འདི་ལ་གྱིས་ལ་སོང་ཞིག །རྒྱུག་ཅིག །ཅེས་བརྗོད་པས་སོང་བར་བསམས་ལ། བདེན་སྟོབས་བརྗོད་དོ། །དེ་ནས་ལྷམ་མགོ་གཤམ་བསྒྱུར་ལ་གྱོན། གོས་གཞན་རྣམས་དྲང་པོར་གྱོན་ནས་ནང་དུ་འོངས་ནས། སྔགས་ཆུས་
གདོང་དང་རྐང་ལག་བཀྲུས་ཏེ། སྲུང་འཁོར་བསྒོམས་ཏེ། ལྷའི་རྣལ་འབྱོར་ལ་གནས་པར་བྱའོ། །ཡར་ངོ་མ་ཡིན་མར་ངོ་སྟེ། །བཅུ་བདུན་བཅུ་དགུ་ཉེར་གཅིག་གམ། །ཉེར་གསུམ་ཉེར་ལྔ་ཉེར་བདུན་དང་། །ཉེར་དགུ་ཁོ་ནར་བྱེད་ཀྱང་རུང་། །ཧ་ཅང་མཐར་ཐུག་ནུབ་རེ་བཞིན། །སྔ་དྲོ་མ་ཡིན་ཕྱི་དྲོ་སྟེ། །ཉི་མ་རྒས་དང་མཉམ་དུ་བྱ། ཁ་ནི་ལྷོ་ནུབ་དག་ཏུ་བལྟ། །ཡུན་རིང་དྲགས་ན་བཟློག་ཉེན་ཆེ། །ཡི་དམ་མ་བསྙེན་བར་ཆད་འབྱུང་། །དམ་ཚིག་མི་གཙང་ན་མི་བྱ། །འདི་ནི་རང་གི་བཟློག་པ་ཡིན། །ཡོད་པས་ཆོག་པའི་གདམས་པ་འདི། །སྣོད་ལྡན་མིན་པ་ཀུན་ལ་གསང་། སྣོད་ལྡན་རེ་རེ་ཙམ་ལ་ཡང་། །ལུང་ནོད་བཀའ་རྒྱས་བཏབ་ལ་བྱིན། ཅེས་གསུངས་སོ། །འདི་ནི་གཤིན་རྗེ་བ་གཞན་ལའང་། ཨེ་ས་བྷྱོ་བཟློག །ཅེས་པའི་མན་ངག་ཡོད་པ་དང་སྔགས་དེ་འདྲའང་གདམས་ངག་གི་གནད་གཞན་ཡེ་མི་འདྲ་བའི་ཁྱད་པར་ཆེ་ཞིང་། མང་པོ་ལ་འཕེལ་ན་རང་ལ་འཁོར་་བའི་དགྲའི་ལག་ཆར་སོང་དོགས་ཡོད་པས་ཤིན་ཏུ་གསང་ཞིང་སྦྱིན་པའི་ཡུལ་བརྟག་པ་ཤིན་ཏུ་གལ་ཆེའོ། །གསུང་གསལ་བར་བཀོད་པ་ཡིན་པས་དཔེ་གཞན་གྱིས་མཐོང་དོགས་ཤིན་ཏུ་གལ་ཆེའོ། །གུ་ཧྱ་ས་མ་ཡ་ཨྠྀི།། བཅོམ་ལྡན་འདས་རྡོ་རྗེ་འཇིགས་བྱེད། རྗེ་བཙུན་ཙོང་ཁ་པ་ཆེན་པོ། །མཁས་གྲུབ་ཆོས་རྗེ། །༈ རྩ་དང་བཤིན་རྗེ་སྦྱོར་ཚུལ་བཞུགས་སོ། ན་མོ་བཛྲ་བྷེ་ར་ཝཱ་ཡ། གྲུབ་ཆེན་དཔལ་འཛིན་གྱི་དངོས་ཀྱི་སློབ་མ་མཆོག་གྲུབ་ཆེན་མ་ཏི་པ་ཞེས་བྱ་བས་རྗེས་སུ་བཟུགས་ནས་
དངོས་གྲུབ་བརྙེས་པའི་རྒྱ་གར་ཤར་ཕྱོགས་ཀྱི་པཎྡི་ཏ་ད་རྦན་ཨཱརྻ་ཨཱ་ཙ་རྱའི་དཔལ་གཤིན་རྗེ་གཤེད་ཀྱི་མན་ངག་ལས་འབྱུང་བ་ནི། དཔལ་གཤིན་རྗེ་གཤེད་ཀྱི་རྒྱུད་ལས། སྦས་པ་བླ་མའི་ལུང་གི་བཤད། ཕྱི་དང་ནང་དང་གཞན་རྣམས་ཀྱི། །དུས་དགྲའི་ཚུལ་ནི་ཤེས་བྱ་སྟེ། །ལྷོ་ཕྱོགས་ས་འོག་རིམ་པ་བདུན། །སྒོ་མེད་མུན་ཁང་བཅུ་དྲུག་ན། །ཆོས་ཀྱི་རྒྱལ་པོ་ལས་ཀྱི་འཁོར། །བྱེ་བ་འབུམ་བཅས་གཤིན་རྗེ་སྟེ། །བརྒྱད་གཉིས་གྲུབ་པ་ཕུན་སུམ་ཚོགས། །གདུལ་དཀའ་འདུལ་ཕྱིར་མི་སྡུག་གཟུགས། །འཇམ་དཔལ་དབྱངས་གང་དེ་ཡི་གཤེད། །ལྷར་བཅས་འཇིག་རྟེན་ཀུན་གྱི་སྐྱབས། །བདུད་དང་དེ་ཡི་རིགས་གྱུར་གང་། །ལོག་པར་ལྟུང་བ་གཤིན་རྗེ་ཡིན། །སྙིང་རྗེ་ཆེན་པོ་ཁྲོ་ཚུལ་གྱིས། །ཚར་གཅོད་པ་ནི་གཤེད་ཡིན་ནོ། །ཀཱ་ལི་ཕ་སྟེ་ཨཱ་ལི་མ། །གཡས་དང་གཡོན་པ་གཤིན་རྗེ་སྟེ། །ཀུན་འདར་མ་ནི་དབུས་གནས་སུ། །གང་ཞིག་གཉིས་སུ་མེད་དེ་བཤད། །ཉི་མ་ཟླ་བའི་ལམ་གཉིས་པོར། །འགྲོ་བ་གང་ཡིན་གཤིན་རྗེ་སྟེ། །དེ་ཡང་དབུས་སུ་གང་གནས་པ། །ཡེ་ཤེས་དེ་ནི་གཤེད་ཡིན་ནོ། །ཐ་མལ་སྙིང་གི་དབུས་སོང་རྩ། །ཉོན་མོངས་ངོ་བོ་ཉིད་ཡིན་ཏེ། །སྲིད་པའི་རྩ་བ་གཤིན་རྗེར་བཤད། །རྣལ་འབྱོར་པ་ལ་ཚུལ་དེ་ཉིད། །ཡང་དག་ཡེ་ཤེས་ཉིད་དུ་འགྱུར། །དེ་ནི་དེ་ཡི་གཤེད་ཡིན་ནོ། །ཨ་ནི་གདོད་ནས་སྐྱེ་བ་མེད། །རྒྱུ་ནི་གང་ཡིན་སྙིང་རྗེ་སྟེ། །དབྱེར་མེད་གྱུར་པ་དེ་ཡི་གཤེད། །སྲིད་པའི་ཕུང་པོ་དེ་ཡི་
ཚོགས། །གང་ཡིན་གཤིན་རྗེར་བརྗོད་པ་སྟེ། །སྐུ་གསུང་ཐུགས་ཀྱི་ཡེ་ཤེས་ལས། །རྡོ་རྗེ་འཛིན་པར་གྱུར་ཏེ་གཤེད། །ལྟེ་སྙིང་མགྲིན་པ་སྤྱི་བོ་སྟེ། །བདུད་བཞིས་བཅིངས་པ་གཤིན་རྗེ་སྟེ། །གྲོལ་བ་ནང་གི་དེ་ཁོ་ན། །མཐར་བྱེད་བཞི་ནི་གཤེད་ཡིན་ནོ། །ཡ་ལ་སོགས་པའི་ཡི་གེ་ནི། །མ་དག་ལས་ཀྱི་གཤིན་རྗེས་གཟིར། །སྲོག་གི་དེ་ཉིད་སྦྱོར་བ་ཡིས། །དག་པས་དཔལ་ལྡན་དུས་ཀྱི་དགྲ། བདུད་བཞིའི་འཆིང་བ་ལས་གྲོལ་ཞིང་། །དངོས་གྲུབ་བདེ་ཆེན་མཆོག་སྟེར་ཡིན། །ཡ་མ་གཉིས་སུ་འཛིན་པ་སྟེ། །སྤྲོས་མེད་འོད་གསལ་ཨནྟར་བརྗོད། །ཀ་ཡིག་བླ་མས་བསྟན་པ་ཉིད། །གཤིན་རྗེ་མཐར་བྱེད་ཅེས་སུ་གྲགས། ཞེས་དང་། ལྟེ་སྙིང་མགྲིན་པ་སྤྱི་བོ་བཞི། །ས་ཆུ་མེ་རླུང་ཞེས་བྱ་བ། །ང་རྒྱལ་ཞེ་སྡང་ཆགས་དང་རྨོངས། །བདུད་བཞི་པོ་ཡིས་རྣམ་པར་བཅིངས། །སྡུག་བསྔལ་ཀུན་འབྱུང་ལམ་དང་འགོག །བདེན་པ་བཞི་ལ་རྨོངས་བདག་ཉིད། །སྲིད་པའི་སྐྱེ་གནས་བཞི་མཚམས་སྦྱོར། །ཨེ་ཝཾ་ཡི་གེ་བཞི་པ་ཉིད། །དེ་བཞིན་ཡ་ཀྵེ་མ་མེ་བཞི། །མཐར་བྱེད་ཆེན་པོ་བཞི་པོ་ཉིད། །དེ་བཞིན་ཛ་ས་དོ་རུ་བཞི། །སྤྱན་དང་མཱ་མ་གོས་དཀར་སྒྲོལ། །ཙ་རྩི་ཀ་སོགས་རྣམ་པ་སྟེ། །དགའ་བ་བཞི་དང་སྐད་ཅིག་བཞི། །རྒྱུ་མཐུན་རྣམ་སྨིན་འབྲས་བུ་ཅན། །དྲི་མ་མེད་པའི་འབྲས་བུ་བཞི། །དམ་ཚིག་ལས་ཆོས་ཕྱག་རྒྱ་ཆེ། །ཕྱག་རྒྱ་བཞི་ཡིས་
རྒྱས་གདབ་པོ། །རིགས་བཞི་ཡེ་ཤེས་བཞི་ཡི་དངོས། །སྐུ་བཞིའི་བདག་ཉིད་ཡེ་ཤེས་སྐུ། །རྡོ་རྗེ་འཛིན་པར་བདག་ཉིད་འགྱུར། ཞེས་དང་། སངས་རྒྱས་ཐམས་ཅད་གཅིག་བསྡུས་པ། །བླ་མའི་ཐུགས་སུ་ཤེས་བྱ་སྟེ། །མི་ཕྱེད་བརྟན་པས་གུས་པ་ཡིས། །བལྟོས་པ་མེད་པའི་བསྙེན་བཀུར་བྱ། །དེ་ཉིད་ཞལ་གྱི་བཀའ་དྲིན་ལས། །འབད་པས་སྦས་པའི་དེ་ཉིད་བཙལ། ཞེས་གསུངས་སོ།། པཎྜི་ཏ་དརྤ་ན་ཨཱ་ཙརྻའི་དཔལ་གཤིན་རྗེ་གཤེད་ཀྱི་མན་ངག་ལས་འབྱུང་བ་ནི། །ཕྱི་དང་ནང་དང་གཞན་རྣམས་ཀྱི། །དུས་དགྲའི་ཚུལ་འདི་ཤེས་བྱ་སྟེ། །འདི་ལ་དུས་ཞེས་པ་གཤིན་རྗེ་ཡིན་ལ། །དེ་ལ་ཕྱི་ནང་གཞན་གསུམ་ལས། ཕྱིའི་གཤེན་རྗེ་ནི། ལྷོ་ཕྱོགས་ཞེས་པ་ནས། གཤེན་རྗེ་སྟེ། ཞེས་པས་བསྟན་ལ། དེའི་གཤེད་ནི། བརྒྱད་གཉིས་གྲུབ་པ། ཞེས་པ་ནས། འཇམ་པའི་དབྱངས་གང་དེ་ཡི་གཤེད། ལྷར་བཅས་འཇིག་རྟེན་ཀུན་གྱི་སྐྱབས། ཞེས་པས་བསྟན། ནང་གི་གཤིན་རྗེ་ནི། བདུད་དང་། ནས། གཤིན་རྗེ་ཡིན་ལ། ཞེས་པ་བསྟན། སྙིང་རྗེ་ནས། གཤེད་ཡིན་ནོ། ཞེས་པས་དེའི་གཤེད་བསྟན། ཕས་མཚོན་པ་ཀཱ་ལིའི་རླུང་གཡས་རོ་མ་ནས་རྒྱུ་བ་དང་། མས་མཚོན་པ་ཨཱ་ལིའི་རླུང་གཡོན་རྐྱང་མ་ནས་རྒྱུ་བ་ནི་གཤིན་རྗེ་ཡིན་ལ། རོ་རྐྱང་གི་རླུང་དེ་གཉིས་ཀུན་འདར་མ། དབུ་མའི་ནང་དུ་ཞུགས་གནས་ཐིམ་གསུམ་བྱས་པ་ནི་དེའི་གཤེད་ཡིན་ནོ། །ཉི་མ་རོ་མ་དང་ཟླ་བ་རྐྱང་མའི་ལམ་གཉིས་པོར་ཀུན་རྟོག་གི་
རྣམ་ཤེས་འཕོ་ཞིང་འགྲོ་བ་གང་ཡིན་པ་གཤིན་རྗེ་ཡིན་ལ། དེ་ཉིད་དབུ་མའི་ནང་དུ་ཞུགས་པའི་ཡེ་ཤེས་དེ་ནི་གཤེད་ཡིན་ནོ། །སྙིང་གའི་རྩ་འཁོར་གྱི་དབུས་ཀྱི་མདུད་པའི་ནང་གི་ཤིན་ཏུ་ཕྲ་བའི་རླུང་སེམས་ཀྱི་གཉུག་ལུས་དེ་ནི་ཐ་མལ་པ་བླ་མ་དམ་པའི་མན་ངག་དང་མི་ལྡན་པ་རྣམས་ལ། ཉོན་མོངས་བསྐྱེད་པའི་རྟེན་གྱི་ངོ་བོ་དང་སྲིད་པའི་རྩ་བ་གཤིན་རྗེ་ཡིན། རྣལ་འབྱོར་པ་ལ་ཚུལ་དེ་ཉིད་ཡང་དག་པའི་འོད་གསལ་གྱི་ཡེ་ཤེས་དང་ངོ་བོ་གཅིག་ཏུ་གྱུར་པའི་སྒྱུ་མའི་སྐུ་དེ་ནི་དེའི་གཤེད་ཡིན་ནོ། །ཡ་མཱན་གྱི་མའི་ཁོང་གི་ཨཱ་རིང་པོས་གདོད་ནས་སྐྱེ་བ་མེད་པའི་སྟོང་ཉིད་བསྟན་ལ། ཏ་ཀྲིཏ་ཀྱི་ཀའི་ར་ལ་ཞབས་ཀྱུ་གདགས་ལ་ཀ་ལ་ཀླད་ཀོར་བྱས་པས་ཀཾ་རུ་ན་ཞེས་པས་སྙིང་རྗེར་གྱུར་ལ། སྟོང་ཉིད་སྙིང་རྗེ་དབྱེར་མེད་དུ་སྦྱར་བ་དེ་གཤེད་ཡིན་ནོ། །ཀུན་རྟོག་བརྒྱད་ཅུའི་ཚོགས་ཀྱི་རྟེན་དུ་གྱུར་པའི་སྲིད་པའི་ཕུང་པོ་ནི་གཤིན་རྗེ་ཡིན་ལ། སྐུ་གསུང་ཐུགས་ཏེ་སྣང་མཆེད་ཐོབ་གསུམ་རིམ་གྱིས་ཐིམ་པ་ལས་རྡོ་རྗེ་འཛིན་པ་སྒྱུ་མའི་སྐུ་གཤིན་རྗེ་གཤེད་ཀྱི་སྐུར་བཞེངས་པ་ནི་དེའི་གཤེད་ཡིན་ནོ། །ལྟེ་བ་སྙིང་ག་མགྲིན་པ་སྤྱི་བོའི་རྩ་འཁོར་བཞི་པོ་བདུད་དེ་མདུད་པ་བཞིས་བཅིངས་པ་གཤིན་རྗེ་ཡིན་ལ། རྩ་མདུད་གྲོལ་བའི་ནང་གི་དེ་ཁོ་ན་མཐར་བྱེད་བཞི་སྟེ་དགའ་བ་བཞི་ནི་དེའི་གཤེད་ཡིན་ནོ། །ཡ་སོགས་ཡི་གེ་བཞིས་མཚོན་པའི་ས་ཆུ་མེ་རླུང་གི་རླུང་བཞི་སྟེ་སྙིང་ག་མགྲིན་པ་སྤྱི་བོའི་མདུད་པ་བཅིངས་པ་ནི་མ་དག་ལས་
ཀྱི་གཤིན་རྗེས་གཟིར་བ་ཡིན་ལ། དེ་ལས་ཀུན་རྟོག་གི་གཡོ་བ་འབྱུང་། དེའི་དབང་གིས་ང་རྒྱལ་ལ་སོགས་པའི་བདུད་བཞི་པོ་རྣམ་པར་བཅིངས་པ་དང་།བདེན་པ་བཞི་ལ་རྨོངས་པའི་བདག་ཉིད། སྲིད་པའི་སྐྱེ་གནས་བཞིར་མཚམས་སྦྱོར་བ་འབྱུང་ངོ་། །སྲོག་སྟེ་རླུང་རོ་རྐྱང་ནས་རྒྱུ་བ་བཀག་པའི་སྦྱོར་བ་ཡིས་དབུ་མའི་ནང་དུ་དག་པས་དཔལ་ལྡན་དུས་ཀྱི་དགྲ་བཞིའི་འཆིང་བ་ལས་གྲོལ་བའི་ཡེ་ཤེས་སྐྱེ་བར་འགྱུར་རོ། །ཡེ་ཤེས་དེ་ཉིད་ཨེ་ཝཾ་ཡི་གེ་བཞིས་མཚོན་པ་སོགས་སུ་འགྱུར་རོ།། སྭ་སྟི། རྒྱལ་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདར་རྒྱས་རྣམ་གྲོལ་སྦྲང་རྩའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །སརྦ་མངྒ་ལཾ།