རྗེའི་གསུང་སྦྱོར་དྲུག་གི་ཟིན་བྲིས་ཤར་ཁ་བ་རིན་ཆེན་ཆོས་རྒྱལ་གྱིས་གནང་བ་ཞུས་ནས་བཀོད་པ།
རྗེའི་གསུང་སྦྱོར་དྲུག་གི་ཟིན་བྲིས་ཤར་ཁ་བ་རིན་ཆེན་ཆོས་རྒྱལ་གྱིས་གནང་བ་ཞུས་ནས་བཀོད་པ་བཞུགས། །
ཤྲཱི་ཀཱ་ལ་ཙཀྲ་ཡེ། དཔལ་ལྡན་བླ་མ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་རྣམས་ཀྱི་ཞབས་ལ་ཡིད་གུས་པ་ཆེན་པོས་ཉེ་བར་བཏུད་དེ་ཕྱག་འཚལ་ཞིང་སྐྱབས་སུ་མཆིའོ། །ལུས་རྣམ་སྣང་གི་ཆོས་དང་ལྡན་པའི་སྨིན་མའི་དབུས་དབུ་མའི་རྩ་ནང་དུ་སེམས་དང་མིག་འབྲས་གཉིས་སྣའི་ཕྱོགས་སུ་ཧྲིལ་བྱས་ལ་ཕྱེད་མིག་གྱེན་དུ་ཕྱོགས་པའི་ལྟ་སྟངས་ཀྱི་རྩེ་གཉིས་དབུ་མའི་ནང་དུ་འཕྲད་པ་སྒོམ་པ་ཡིན་པས་རྩ་འཁོར་ནས་ཐད་དཀར་སོར་བཞི་ན་ཡོད་ན་མི་འགལ་ལོ། །དེ་ལྟར་མཚན་མོ་དང་ཉིན་མོའི་རྣལ་འབྱོར་གཉིས་བསྒོམས་པས་རྟགས་བཅུ་གོ་རིམས་ངེས་ཅན་དུ་རྫོགས་པ་སྟེ། བསམ་གཏན་གྱི་ཡན་ལག་ལྔའི་སྒོ་ནས་བརྟན་པར་བྱེད་དགོས་སོ། །དེ་ལྟར་་ཡིན་ཡང་
ད་ལྟ་གོ་རིམས་ངེས་པའི་སྒོམ་པ་མིན་པས། རྟགས་བཅུ་གོ་རིམས་ངེས་པ་ཅན་རྫོགས་པར་འཆར་བ། གསལ་བ། སྲ་བ། རང་གི་ལུས་ལ་འོད་ཀོར་གྱིས་འཁོར་བ་སོགས་འབྱུང་ཡང་། རྟགས་བཅུ་གཅིག་པ། དུས་ཀྱི་རྩ་ལ་མཐོང་བ་ཅུང་དཀའ་ལ། དེ་མཐོང་བར་བྱེད་པ་དང་། ཁྱད་པར་གསུང་འདུས་སོགས་སུ། གཉིད་ཀྱི་འོད་གསལ་རླུང་སྟོབས་ཀྱིས་ཟིན་པས་བླ་མའི་མན་ངག་གིས་ལུས་ཀྱི་ནང་རྩ་འཁོར་གྱི་དབུས་ནས་ཕྱི་རོལ་ཏུ་ལོགས་སུ་མཚོན་བྱེད་ཀྱི་སྒྱུ་ལུས་སུ་ལྡང་ནུས་པ་ཡོད་པ་བཞིན་དུ། འདིར་ཡང་། དགའ་བཞིའི་མཐར་ལུས་ཀྱི་ནང་རྩ་འཁོར་གྱི་དབུས་དེ་ཉིད་དུ་རྗེས་དྲན་རྗེས་མཐུན་པར་ལྡང་བ་ཡོད་ལ། དེའི་རྒྱུར་ད་ལྟར་གྱི་སྟོང་གཟུགས་རྣམས་ལ་རང་གི་
སེམས་ཀྱིས་དབང་ཐོབ་ནས་འདུན་པ་ཙམ་གྱིས་རྗེས་སུ་བྱེད་པ་སྒྲུབ་པ་ཡིན་ནོ། །དེ་དག་ནི་སྣོད་བཅུད་རྣམས་མཐའ་ནས་རིམ་གྱིས་བསྡུས་ཏེ་རྣལ་འབྱོར་པ་རང་གི་ལུས་ཀྱི་ནང་དུ་འཇུག་པ་དང་། སྨིན་མའི་དབུས་དབུ་མའི་རྩ་འཁོར་གྱི་དབུས་སུ་བསྡུས་ལ་སྔར་བཤད་པའི་སེམས་དང་། ལྟ་སྟངས་དང་གསུམ་གཅིག་ཏུ་བྱས་ནས་དམིགས་རྣམ་སྐྱོང་པ་དང་། རེས་འགའ་སྟོང་གཟུགས་རྣམས་ལ་སྒོས་སུ་དེ་ལྟར་བྱ་བའོ། །རྟགས་ཀྱི་སྟོང་གཟུགས་དབུ་མའི་རྩ་འཁོར་གྱི་ཐད་ནམ་མཁར་འདུག་པ་རྣམས་ཀྱི་ནང་ནས་གང་འདོད་པ་ཞིག་རྩ་འཁོར་གྱི་དབུས་སུ་འདུག་པར་བསྒོམས་ལ་བཟུང་ནས་སྔར་ལྟར་བསྐྱངས་པས་གང་བཟུང་བ་དེ་མ་གཏོགས་གཞན་ཀུན་དག་ནས་འགྲོའོ། །བསམ་གཏན་གྱིས་བརྟན་པར་བྱེད་པ་ལའང་། ཡན་ལག་ལྔའི་སྟེང་དུ་འདི་མཛད་དོ། །རྡོར་བཟླས་སོགས་སྲོག་ཐུར་གང་རུང་རེ་རེ་ལ་དམིགས་པ་དང་བུམ་པ་ཅན་སོགས་གཉིས་ཀ་ལ་དམིགས་པའི་སྲོག་ཐུར་དབུ་མར་བསྲེག་པ་སྲོག་རྩོལ་དང་། སྲོག་ཐར་འདྲེས་པ་རྩ་འཁོར་ལོ་དྲུག་གི་ལྟེ་བར་སེམས་རྟེན་གྱི་ཐིག་ལེ་ངང་གཅིག་ཏུ་བྱས་དམིགས་པས་འཛིན་པ་ནི་འཛིན་པའོ། །དེ་ལྟ་ན། གཏུམ་མོ་འབར་ཀྱང་སླ་ལ་གེགས་མེད་པས་འཛིན་པ་འདི་མཛད་དོ། །རླུང་དབུ་མར་ཞུགས་པའི་རྟགས་སྣ་བུག་གི་སྒོར་ངེས་ཅན་མཉམ་པོར་གྱུར་པ་ན་སྲོག་ཐུར་སོགས་རང་གི་རླུང་ཀུན་གཅིག་ཏུ་བསྡུས་པ་
བོང་ཚོད་སྲན་མའམ། ཡུངས་ཀར་གྱི་ཚོད་དམ། ཁ་དོག་སྔོ་ལ་དམར་བའི་མདངས་ཅན་ལྟེ་བའི་རྩ་འཁོར་གྱི་དབུས་སུ་བཞག་ལ་སེམས་བཅུག །འགྲོ་འོང་བཀག་ནས་མི་བདེ་བ་མེད་ཙམ་དུ་གཡོ་མེད་དུ་གཟུང་བར་བྱའོ། །འདི་ལ་གནས་ཆ་རྙེད་ན་གོ་རིམས་ངེས་པའི་འཛིན་པ་ལྟ་བུ་ཁམས་གསུམ་པའི་སྟོང་གཟུགས་མི་འཆར་ཡང་། སོར་བསམ་གྱིས་གཟུགས་རྙེད་ནས་ཞུགས་པ་ཡིན་པས། སྟོང་གཟུགས་དུ་མ་འཆར་དགོས་ཀྱང་དགོས་ལ་འཆར། དེ་ལྟར་བྱས་ཀྱང་སྲོག་མ་ཆིངས་པའམ། འཛིན་པ་མཐར་ཕྱིན་ཀྱང་དབུ་མ་ནས་གཏུམ་མོ་བསྐུལ་བའི་སྟོབས་ཀྱིས་བྱུང་བའི་ཞུ་བདེ་མཚན་ཉིད་ཚང་བ་མེད་པའི་དབང་པོའི་རིགས་ཡོད་སྟེ། སོ་སོར་སྡུད་པ་ལ་སོགས་པས་སྔགས་པ་རྣམས་ཀྱི་འདོད་པ་ཞེས་པ་ལྷན་སྐྱེས་ཀྱི་བདེ་བ་མཚན་ཉིད་ཚང་བ་མ་གྲུབ་ན་ནོར་བུར་ནཱ་ད་སྒོམ་པ་གསུངས་པས། ལུས་ཀྱི་འདུག་སྟངས་རྐང་པ་གཡོན་པའི་རྟིང་པས་རྡོ་རྗེའི་རྩ་བ་གནོན་པ་གནད། གཡས་པའི་སོར་མོའི་རྩེ་མོ་གཡོན་པའི་པུས་མོའི་འོག་ཏུ་ཆུག་ཙམ་བྱ། ལག་པ་རྡོ་རྗེ་ཁུ་ཚུར་གཡོན་ནང་དུ་འོང་བ་བྱས་ནས་སྙིང་གར་བསྣོལ། ནཱ་ད་རླུང་ཧཱུཾ་གི་སྒྲ་ཅན་བྱ་བ་ལ་བཤད་ཀྱང་། རྡོ་རྗེ་ནོར་བུའི་དབུས་ན་རྩ་དབུ་མའི་མར་སྣ་ཡོད་པས། དེའི་ནང་དུ་ཧཱུཾ་ཡིག་ནས་འབྲུ་ཙམ་མགོ་ཐུར་དུ་བལྟ་བ། རྩེ་མོ་ཕྱིན་ཏུག་ཙམ་ཞིག་དང་། ལྟེ་བ་མན་གྱི་རོ་རྐྱང་དབུ་མ་གསུམ་གསལ་
བཏབ། མགོ་མདུན་དུ་སྐུར་ཙམ་བྱས་ཏེ། སྣ་ནས་ཧཱུཾ་ཞེས་པ་རླུང་གི་སྒྲ་དྲག་པོ་གཅིག་བྱ་བ་དང་ལྷན་དུ་ནོར་བུའི་ནང་གི་ཧཱུཾ་དེ་རོ་རྐྱང་ལ་དམིགས་པས་ཡེ་མ་ཤོར་བ་བྱས་བསྒྲིམས་ཏེ། རྒྱུ་མ་ཕྱི་ནང་ལོག་པ་ལྟར་ཧྲིལ་བྱས་ལ་མགོ་གྱེན་དུ་བལྟས་པ་དབུ་མའི་ནང་ན་ཡར་འཐེན་ཏེ་ལྟེ་བའི་རྩ་འཁོར་གྱི་དབུས་སུ་སེམས་དང་ལྷན་ཅིག་བཞག །རྐང་སོར་རྣམས་བསྐུམ་བྱ་ཞིང་མིག་གི་ལྟ་སྟངས་སོར་སྡུད་དང་འདྲ་བར་བྱའོ། །འདི་ལ་ལུས་ཀྱི་འདུག་སྟངས་དང་ཧཱུཾ་ཡིག་གི་སྒྲ་དྲག་པོ་བྱ་བ་གཙོ་བོ་ཡིན་པས་ཡུན་རིངས་ན་དྲག་ཏུ་མི་འབྱུང་གསུང་ངོ་། །འདི་དང་ལོངས་སྤྱོད་ཀྱི་རླབས་འཚིར་བའི་བཙན་ཐབས་གཉིས་ཀ་ལ་རླུང་མཉམ་རྒྱུར་སོང་ནས་མ་གཏོགས་མི་ཉན་ནོ། །དེ་ལྟར་བྱས་པས་དབུ་མ་ནས་གཏུམ་མོ་ཚུལ་བཞིན་དུ་སྦར་ཏེ་དགའ་བ་བཞི་པ་ལྷན་སྐྱེས་ཀྱི་བདེ་བ་ཆེན་པོས་སྟོང་པ་ཉིད་ཀྱི་དོན་ངེས་པར་བྱས་པའི་མཐར་ཕྱག་རྒྱ་ཆེན་མོ་དྲན་པ་ཙམ་གྱིས་ལུས་མ་བརྟགས་པའི་སྟོང་གཟུགས་ཡབ་ཡུམ་དུ་ཤར་བ་ནི་རྗེས་དྲན་ནོ། །སྲོག་འཛིན་གྱི་ཏིང་ངེ་འཛིན་མཚན་ཉིད་ཚང་བ་མ་ཐོབ་ཀྱང་དགའ་བཞི་རིམ་ཅན་དུ་ངེས་པའི་མཐར་སྟོང་གཟུགས་རྗེས་མཐུན་པ་འདོད་ལྷའི་རྣམ་པ་ཅན་དང་། རྡུལ་ཕྲ་རབ་ཀྱི་རྣམ་པ་ཅན་ལ་སོགས་པས་འཁྱུད་དེ་མི་འགྱུར་བའི་བདེ་བ་ཆ་མཐུན་ཙམ་ཞིག་སྟེར་བ་འོང་བས་དེ་དྲན་པས་ལྡང་བ་ལ་ནི་འཛིན་པའི་སྐབས་སུ་སྟོང་གཟུགས་དུ་མ་ཤར་བ་ན་འདིར་རྗེས་དྲན་དུ་ལྡང་
སྙམ་པའི་འདུན་པ་དྲག་པོ་དང་། བསམ་གཏན་གྱི་སྐབས་སུ་སེམས་ཀྱི་དབང་སྒྱུར་ཐོབ་པར་སྒྲུབ་པ་དེ་ལ་འདི་དག་མཐུན་པ་ཙམ་གྱི་རྗེས་སུ་བྱེད་པ་ཡིན་པས་དགའ་བཞིའི་མཐར་དྲན་པར་བྱས་ལ་ལྡང་སྙམ་པའི་འདུན་པ་དྲག་པོ་བྱ་བའོ། །འཛིན་པའི་སྐབས་སུ་དེ་ལྟར་བྱེད་པའང་གཏུམ་མོ་མ་འབར་གོང་དུ་སེམས་རྟེན་ལ་གནས་ཆ་རྙེད། སྟོང་གཟུགས་ཤར་བའི་དུས་ན་ཡིན་ནོ། །ཡན་ལག་བཞི་པའི་རྗེས་དྲན་མཚན་ཉིད་ཚང་བར་ལྡང་ཐུབ་ཀྱང་ལྷ་མོ་དེས་བདེ་བ་མི་སྟེར་བའི་གང་ཟག་འོང་སྟེ། གཟུགས་རྣམས་ཀྱིས་མགུ་བར་མ་གྱུར་ན་ཞེས་པ། སྟོང་གཟུགས་ཀྱི་མཆོག་མི་འགྱུར་གྱི་བདེ་བ་སྟེར་མ་ཉན་ན་ཞེས་པ་ཡིན་པས། ལས་རྒྱ་དང་སྙོམས་པར་འཇུག་པར་བྱའོ། །འདི་སྲོག་རྩོལ་དུ་འགྲོ་བ་ལ་དོན་འདི་རྣམས་ཚང་དགོས་ཏེ། མཚན་ལྡན་གྱི་ཡུལ་ངོས་བཟུང་། དབང་གིས་སྣོད་རུང་དུ་བྱས་པ། དམ་ཚིག་དང་སྡོམ་པ་དག་པ། སྔགས་དང་རྒྱུད་ཤེས་པ། སྟོང་ཉིད་ལྟ་བ་ཕུ་ཐག་ཆོད་པར་གོ་བ་ལྔ་དགོས་སོ། །ཞེས་འབྱུང་ཡང་། ཡུལ་ནི་རྟོག་ཤེས་པས་བརྟགས་ན་མང་བར་འདུག་གསུང་། དབང་མཚན་ཉིད་ཚང་བ་ཐོབ་པ་དང་། རྩ་ལྟུང་གིས་མ་གོས་པ་ངེས་པར་དགོས་སོ། །བཞི་པ་རྒྱུད་དོན་མཐའ་དག་ཤེས་པ་མ་རྙེད་ཀྱང་། མཁའ་གསང་བྱིན་གྱིས་རློབ་པ་དང་། ལྷའི་རྣལ་འབྱོར་ལ་བྱང་བ། དགའ་བཞི་བསྐྱེད་པའི་ས་ཚིགས་ལ་མཁས་ཤིང་། དམིགས་ཕྱེད་
པ་མ་མཐའ་དགོས། ཡབ་ཡུམ་གཉིས་ཀའི་དབུ་མའི་མར་སྣའི་རྩ་འཚོལ་བ་དང་། སྤྲོད་འཆིང་ལ་མཁས་པ་འདི་གཙོ་བོ་ཡིན་ནོ། །སྐྱེ་གནས་ཨ་ལས་པདྨར་བསྐྱེད་པ་དེའི་དབུས་ན། དྷཱུཾ་ཏཱི་ཧཱུཾ་ལས་རྡོ་རྗེར་བསྐྱེད་པ་དེ། སོར་མོས་དྲུད་པས་རྙེད་པ་དང་། སད་ནུས་ཀྱང་། ཁུ་རྡུལ་སོགས་ཀྱི་དྲི་མས་ཁ་འབྱར་ཡོད་པ་དེ་ལྕེ་རྩེ་ལ་ཧྲི་བཀོད་དེ། ཆོས་འབྱུང་དུ་བཅུག་ནས་དྲུང་པས་སད་དེ། ལས་སུ་རུང་ནས་ཁབ་ལ་རེག་པ་ལྟར་ལྕེ་རྩེ་ལ་ཧྲད་དེ་མ་བྱུང་གི་བར་ལ་མྱུལ་ལོ། །དེ་ལྟར་སད་ན། ཡབ་ཀྱི་རྡོ་རྗེ་ལས་སུ་རུང་བས་ཡུམ་གྱི་པདྨ་འབྱེད་ནུས་པ་ལྟར། རྡོ་རྗེའི་དབུས་ན་ཨ་ལས་པདྨར་བསྐྱེད་པའང་ཡུམ་གྱི་ངེས་འབྱེད་ནུས་ཏེ། འདི་ནི་ཆོས་ཉིད་དོ། །དེ་ལྟར་གྱུར་པ་དང་། ཕན་ཚུན་བཅུག་ལ་ནོར་བུའི་དབུས་ཞེས་པ་མགྲིན་པ་མགོ་སྒྱེར་གྱི་མཚམས་ན་རྩ་འཁོར་ཡོད་པས་དེར་ཡུམ་གྱི་རྩས་སླེབ་པ་ངེས་པར་དགོས་ཏེ་རིགས་བརྟག་པའི་ཚེ་ཆོས་འབྱུང་གི་ནང་རྩ་ཕྲ་འང་རིང་པོ་འབྲིང་དུ་གསུངས་པའང་དེ་ཡིན་ནོ། །ལྔ་པ་ནི། དེ་དུས་ཡིད་ཤེས་བདེ་བ་ཆེན་པོའི་ངོ་བོར་སྐྱེས་ཡོད་པས་དོན་དྲན་པ་ཙམ་གྱིས་བདེ་སྟོང་སྦྱོར་ནུས་སོ། །དྲན་རྒྱུའི་ལྟ་བ་ནི་གཅིག་དང་དུ་བྲལ་སོགས་གཏན་ཚིགས་གང་རུང་ཞིག་གིས་ལེགས་པར་གཏན་ལ་འབེབས་ནུས་པ་ཞིག་དགོས་སོ། །དེ་ལྟར་ཡིན་ན་ལག་ཏུ་བླང་དུ་ཡོད་དོ། །འདི་རྗེས་དྲན་སྒྲུབ་བྱེད་དུ་གསུངས་པས་དེ་ལྟར་ཡང་ཤེས་དགོས་སོ། །གོང་དུ་བཤད་པའི་སྟོང་གཟུགས་
ཀྱི་ཕྱག་ཆེན་དང་སྙོམས་པར་ཞུགས་པས་མཆོག་ཏུ་མི་འགྱུར་བའི་བདེ་བ་ཉམས་སུ་མྱོང་བ་ནི་ཡན་ལག་དྲུག་པའི་ཏིང་ངེ་འཛིན་ཡིན་ནོ། །བདེ་བ་དེ་རང་བཞིན་མེད་པའི་དོན་ལ་མཉམ་པར་བཞག་པས་བདེ་བ་སྟེར་བ་ནི་སྟོང་ཕྱོགས་ཀྱི་ཕྱག་རྒྱ་ཆེན་མོ་དྲིལ་བུ་ཞབས་ཀྱིས་ལྷན་སྐྱེས་ཀྱི་གཏུམ་མོར་བཤད་པའང་འདི་ཉིད་དོ། །འདི་གཉིས་སྤེལ་མར་ཉམས་སུ་བླངས་པས་འབྲས་བུ་མྱུར་དུ་འཐོབ་ཅེས་གསུངས་སོ། །གཞན་ཡང་འདི་ལྟར་ས་ར་ཧས། ཁྱིམ་དང་ཁྱིམ་ན་དེ་ཡི་གཏམ་སྨྲ་ཡང་། བདེ་ཆེན་གནད་ནི་ཡོངས་སུ་ཤེས་པ་མེད། ཅེས་གསུངས་སོ། །རྒྱུད་སྡེ་སོ་སོར་འབྱུང་བ་རྣམས་ཚིག་མི་མཐུན་ཡང་། དོན་ལག་རྗེས། རླུང་གཉིས་དྷཱུ་ཏཱིར་ཐིམ་པའི་འབྲས་བུ་དགའ་བ་བཞི་འདྲེན་ལ། ངེས་དེ་ཁོ་ན་ཉིད་ཕྱིན་ཅི་མ་ལོག་པར་ངེས་ནས་བསྒོམས་པའི་ལྷན་སྐྱེས་དང་། འོད་གསལ་གྱི་རྒྱུན་སྐྱོང་བ་ལམ་གྱི་སྙིང་པོར་མཛད་པ་ཞིག་ཤེས་ན། གདམས་ངག་གི་འགག་མི་འཕྱུགས་པའི་གཟེར་ཐེབས། རྒྱུད་ཀྱི་དོན་ལ་མི་འཇིགས་པའི་སྤོབས་པ་ཐོབ། ཚུལ་དེ་ལ་དགོངས་ནས། ས་ར་ཧས། ཟ་ཞིང་འཐུང་ལ་གཉིས་སྤྲོད་ཀྱིས་དགའ་ཞིང་། །རྟག་ཏུ་ཡང་དང་ཡང་དུ་འཁོར་ལོ་འགེང་། །ཆོས་འདི་ལྟ་བུས་འཇིག་རྟེན་ཕ་རོལ་འགྲུབ་འགྱུར་ཏེ། །རྨོངས་པའི་འཇིག་རྟེན་མགོ་བོར་རྡོག་པས་མནན་ནས་སོང་། །གང་དུ་རླུང་དང་སེམས་ནི་མི་རྒྱུ་ཞིང་། །ཉི་མ་ཟླ་བ་འཇུག་པ་མེད་གྱུར་བ། །མི་
ཤེས་པ་དག་གནས་དེར་སེམས་ནི་དབུགས་ཕྱུངས་ཤིག །མདའ་བསྣུན་གྱིས་ནི་མན་ངག་ཐམས་ཅད་བསྟན་ནས་སོང་། ཞེས་རྨོངས་པ་རྩད་ནས་གཅོད་པ་གདམས་ངག་ཐམས་ཅད་ཀྱི་གནད་བསྡུས་པར་གསུངས་སོ། །འདི་ལྟར་མཚན་ཉིད་ཚང་བ་ལ་ནི། མན་སྙེ་ལས། ཤེས་རབ་དང་བཅས་པའི་ཐབས་དགེ་སྙོམས་པར་འཇུག་པ་ན། ལ་ལ་ན་དང་། ར་ས་ནའི་རླུང་དག་དྷཱུ་ཏཱིར་འཇུག་པ་ན་གཏུམ་མོ་འབར་རོ། །དེའང་ཕུང་པོ་ལ་སོགས་པ་བསྲེག་ཅིང་། ཟླ་བ་འཇུ་བར་བྱེད་དོ། །ཞེས་དེ་དང་སྦྱར་བས་བྱང་སེམས་འཇུ་བར་བཤད་ལ། དེ་བཞིན་གཤེགས་པའི་རྡོ་རྗེས། དེའི་ཚེ་སྣ་བུག་གཉིས་ཀྱི་རླུང་རྒྱུ་བ་ལྡོག་པར་བཤད་པས་དྷཱུ་ཏཱིར་ཐིམ་པ་ཡིན་ནོ། །དེ་ནི་ཕྱིའི་སྲོག་རྩོལ་ལོ། །ཏི་ལོ་པས། གཟུགས་སྒྲ་དྲི་རོའི་འདོད་ཡོན་ལ། །སེམས་ལ་ཞེན་པ་བྱུང་བའི་ཚེ། །སྦྲང་མ་རྩི་ལ་སྦྱར་དང་མཚུངས། །ཞེན་པ་ཐོང་ཞིག་ནཱ་རོ་པ། ཞེས་སྤྱིར་གསུངས་པ་ལྟར་ཡིན་ལ། ཁྱད་པར་རིག་མའི་འདོད་ཡོན་ལ་མ་ཞེན་ཞིང་། དོན་དམ་པའི་ཡུལ་ལ་ཆགས་པས་སེམས་འཕྲོག་པ་དང་། ཕྱི་ནང་གི་རྟེན་འབྲེལ་ཀུན་སྒྱུ་མར་ཤེས་པ་ཤིན་ཏུ་གལ་ཆེའོ། །ཞེས་གསུངས་སོ། །གཞན་དུ་ན་ཧེ་རུ་ཀ་མངོན་འབྱུང་ལས་གསུངས་པའི་ཉེས་དམིགས་རྣམས་འབྱུང་ལ། ཁྱེ་ཆེ་ས་ན་ཉེན་ཡང་ཆེ་བ་དང་། བླ་མས་ཞིབ་ཏུ་བསྟན་དགོས་པའང་ཡོད་པས། རྣམ་དཔྱོད་ཅན་གྱིས་ཚིམ་པར་མ་སླ་བར་ཉིན་མཚན་དུ་བརྟག་པར་རིགས་སོ། །ཞེས་ཐེག་པ་བླ་ན་མེད་པའི་
ལམ་གྱི་སྲོག །གསང་བ་ལས་ཀྱང་ཆེས་གསང་བའི་མན་ངག་གནད་ཀྱི་ཉིང་ཁུ་འདི་ནི། བླ་མ་རྡོ་རྗེ་འཆང་ཆེན་པོ་དང་མི་གཉིས་པ་དེ་ཉིད་སྒོ་གསུམ་གྱི་སྒོ་ནས་གུས་པས་ཡུན་རིང་དུ་མཉེས་པར་བྱས་ལ། རིན་པོ་ཆེའི་མཎྜལ་དང་བཅས་ཏེ། གསོལ་བ་བཏབ་པ་ལས་དགྱེས་བཞིན་དུ་གནང་བ་ལ། སྔགས་ཀྱི་ཚུལ་ལ་ཉམས་སུ་ལེན་པའི་ཚུལ་གྱིས་ནན་ཏན་ཡུན་རིང་དུ་འགྲུས་པར་བྱས་ལ། ཤར་ཁ་བ་རིན་ཆེན་ཆོས་རྒྱལ་གྱིས་ཡི་གེར་འདྲི་བའི་གནང་བ་མནོས་ནས། རི་བོ་དགེ་ལྡན་གྱི་གཟིམས་ཁང་དུ་བརྗེད་བྱང་དུ་བྱས་སོ། །དཔེ་མི་ལ་མི་སྟོན་པའི་བཀའ་རྒྱས་བཏབ་བོ། །སྭ་སྟི། རྒྱལ་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདར་རྒྱས་རྣམ་གྲོལ་སྦྲང་རྩའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །སརྦ་མངྒ་ལཾ།