དཔལ་རྣམ་པར་སྣང་མཛད་ཀྱི་སྒོ་ནས་ངན་སོང་ཐམས་ཅད་ཡོངས་སུ་སྦྱོང་བའི་དཀྱིལ་འཁོར་གྱི་ཆོ་ག་རྒྱུད་དོན་གསལ་བ།
དཔལ་རྣམ་པར་སྣང་མཛད་ཀྱི་སྒོ་ནས་ངན་སོང་ཐམས་ཅད་ཡོངས་སུ་སྦྱོང་བའི་དཀྱིལ་འཁོར་གྱི་ཆོ་ག་རྒྱུད་དོན་གསལ་བ་ཞེས་བྱ་བ་བཞུགས་སོ། །
དཔལ་རྣམ་པར་སྣང་མཛད་ཀྱི་སྒོ་ནས་ངན་སོང་ཐམས་ཅད་ཡོངས་སུ་སྦྱོང་བའི་དཀྱིལ་འཁོར་གྱི་ཆོ་ག་རྒྱུད་དོན་གསལ་བ་ཞེས་བྱ་བ། བླ་མ་དང་བཅོམ་ལྡན་འདས་ཐམས་ཅད་རིག་པ་རྣམ་པར་སྣང་མཛད་ཀྱི་ཞབས་ལ་གུས་པས་ཕྱག་འཚལ་ལོ། །རྒྱལ་བའི་ཡེ་ཤེས་ལྔ་དང་རྣམ་ཐར་བཞི། །སྟོང་ཉིད་རྟོགས་པ་བཅུ་དྲུག་སྦྱིན་སོགས་བརྒྱད། །དད་བརྩོན་དྲན་དང་ཏིང་འཛིན་ཡོན་ཏན་རྣམས། །སུམ་ཅུ་རྩ་བདུན་ལྷ་ཡི་དཀྱིལ་འཁོར་དུ། །ཇི་བཞིན་ཤར་བ་ཟབ་གསལ་གཉིས་མེད་ལ། །གུས་པས་བཏུད་ནས་ངན་སོང་སྦྱོང་བ་ཡི། །རྒྱུད་དོན་ཇི་བཞིན་ཆོ་གའི་རིམ་པ་རྣམས། །མཁས་པའི་ལུགས་བཞིན་འདིར་ནི་གསལ་བར་བྱ། །འདིར་བཅོམ་ལྡན་འདས་ཀུན་རིག་རྣམ་པར་སྣང་མཛད་ཀྱི་དཀྱིལ་འཁོར་དུ་དབང་བསྐུར་བ་
ལེགས་པར་ཐོབ་ནས། དམ་ཚིག་དང་སྡོམ་པ་ཚུལ་བཞིན་དུ་སྲུང་བ་ལ་བརྩོན་པའི་སྒྲུབ་པ་པོས། ཐོག་མར་སྔོན་འགྲོ་གཏོར་མ། ༀ་བཛྲ་ཡཀྵ་ཧཱུཾ། ཧཱུཾ་བཛྲ་ཨཱ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུཾ་ཕཊ། ཅེས་པས་གཟི་བྱིན་བསྐྱེད། ༀ་སྭ་བྷཱ་ཝ་ཤུདྡྷཿ སརྦྦ་དྷརྨྨཿ སྭ་བྷཱ་ཝ་ཤུདྡྷོ྅ཧཾ། ཞེས་པས་སྟོང་པར་སྦྱངས། སྟོང་པའི་ངང་ལས་ༀ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ༀ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་གཏོར་མ་དྭངས་ཤིང་ཐོགས་པ་མེད་པ་ཟག་པ་མེད་པའི་བདེ་བ་ཁྱད་པར་ཅན་བསྐྱེད་པར་གྱུར་པར་བསམ། ༀ་ཨ་ཀཱ་རོ་མུ་ཁཾ་སརྦྦ་དྷརྨྨཱ་ཎཾ་ཨཏྱ་ནུད་པནྣ་ཏྭཱཏ་ༀ་ཨཱཿ ཧཱུཾ་ཕཊ་སྭཱ་ཧཱ། ཞེས་པ་གསུམ་གྱིས་བྱིན་གྱིས་བརླབ། མགོན་པོ་ཀུན་གཤེགས་གདན་ལ་བཞུགས། །ད་ལྟ་སྙིགས་
མ་ལྔ་ཡི་དུས། །གཤེགས་ཤིང་བཞུགས་པའི་གནས་ངན་ཡང་། །ཤཱཀྱའི་བསྟན་པ་བསྲུང་བ་དང་། །བདག་ཅག་རྣམས་ལ་ཕན་གདགས་ཕྱིར། །གནས་འདི་ཉིད་དུ་གཤེགས་སུ་གསོལ། །ཨེ་ཧྱེ་ཧི་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར་ས་མ་ཡེ་སྭཱ་ཧཱ། ཞེས་པས་སྤྱན་དྲངས།ༀ་ད་ཤ་དི་ཀ་ལོ་ཀ་པཱ་ལ་ས་པཱ་རི་ཝ་ར་པྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། དེ་བཞིན་དུ་སྦྱར་ཏེ། པཱ་དྱཾ་པྲ་ཏཱིཙྪ་སྭཱ་ཧཱ། པུཥྤཾ་ཙྪ་སྭཱ་ཧཱ། དྷཱུ་པཾ་སྭཱ་ཧཱ། དཱི་པཾ་སྭཱ་ཧཱ། གནྡྷཾ་སྭཱ་ཧཱ། ནཻ་ཝི་ཏྱ་སྭཱ་ཧཱ། ཤཔྟ་སྭཱ་ཧཱ་ཞེས་པས་མཆོད་ནས། ༀ་ད་ཤ་དི་ཀ་ལོ་ཀ་པཱ་ལ་ས་པ་རི་ཝཱ་ར་ན་མཿ སརྦྦ་ཏ་ཐཱ་ག་ཏཱ་བྷྱོ་བི་ཤྭ་མུ་ཁེ་བྷྱཿ སརྦ་ཏད་ཁཾ་ཨུད་ག་ཏེ་སྥ་ར་ཎ་ཧི་མཾ་ག་ག་ན་ཁཾ་གྲིཧྞེ་དཾ་བི་ལ່་ཏེ་སྭཱ་ཧཱ། ཞེས་པ་གསུམ་གྱིས་གཏོར་མ་དབུལ། ཤར་ཕྱོགས་རྡོ་རྗེ་ཅན་གྱི་ལྷ་ཚོགས་བཅས། །གཏོར་མ་ཕུལ་བ་འདི་དག་བཞེས་སུ་གསོལ། །མེ་དང་གཤིན་རྗེ་བདེན་བྲལ་སྲིན་པོའི་བདག །ཆུ་བདག་རླུང་བདག་ནོར་གྱི་བདག་པོ་སྟེ། །དབང་ལྡན་ལྷ་སྟེ་འབྱུང་པོའི་བདག་པོ་དང་། །སྟེང་གི་ཉི་ཟླ་ཚངས་པ་ཆེན་པོ་དང་། །ལྷ་རྣམས་ཀུན་དང་ས་ཡི་ཀླུ་རྣམས་དང་། །རི་ཡི་ལྷ་དང་གནོད་སྦྱིན་ཚོགས་བཅས་ལ། །སོ་སོ་སོ་སོར་གཏོར་མ་ཕུལ་བ་རྣམས། །རབ་ཏུ་དགྱེས་པ་ཡིས་ནི་བཞེས་ནས་ཀྱང་། །རང་རང་ཕྱོགས་སུ་ལེགས་པར་གཞུགས་ནས་སུ། །རང་གི་བུ་སྨད་མཛའ་བཤེས་གཉེན་འདུན་དང་། །ནང་མི་དམག་དང་དཔུང་བཅས་ཐབས་ཅིག་ཏུ། །མེ་ཏོག་དྲི་དང་བདུག་པ་གཏོར་མར་བཅས། །འདི་རྣམས་བཏུང་ཞིང་ལེགས་པར་གསོལ་ནས་ཀྱང་། །བདག་གི་
ལས་འདིའི་འབྲས་བུ་མཆིས་པར་མཛོད། །ཕྱོགས་སྐྱོང་འཁོར་དང་བཅས་པ་རྣམས་ཀྱིས་བདག་གི་དགེ་བའི་བྱ་བ་རྣམས་མཐར་ཕྱིན་པ་དང་དེའི་བར་ཆད་ཞི་བའི་འཕྲིན་ལས་མཛོད་ཅིག །དེ་ནས་ༀ་བཛྲ་ཡཀྵ་ཧཱུཾ། ཞེས་པས་མཆོད་རྫས་རྣམས་བསངས། ཧཱུཾ་བཛྲ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུཾ་ཕཊ། ཅེས་པས་གཟི་བྱིན་བསྐྱེད། ༀ་སྭ་བྷཱ་ཝ་ཤདྡྷཿ སརྦྦ་དྷརྨྨཱཿ སྭ་བྷཱ་ཝ་ཤུདྡྷོ྅ཧཾ། གིས་སྟོང་པར་སྦྱངས། སྟོང་པའི་ངང་ༀ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ༀ་འོད་དུ་ཞུ་བ་ལས་བྱུང་བའི་མཆོད་ཡོན། ཞབས་བསིལ། མེ་ཏོག བདུག་སྤོས། སྣང་གསལ། དྲི་ཆབ། ཞལ་ཟས། རོལ་མོ་རྣམས་དྭངས་ཤིང་ཐོགས་པ་མེད་པ་ནམ་མཁའ་དང་མཉམ་པར་གྱུར་པར་བསམ། ༀ་ཨརྒྷཾ་ཨཱཿཧཱུཾ། ༀ་པཱ་དྱཾ་ཨཱཿ ཧཱུཾ། ༀ་བཛྲ་པུཥྤེ་ཨཱཿ ཧཱུཾ། ༀ་བཛྲ་དྷཱུ་པེ་ཨཱཿ ཧཱུཾ། ༀ་བཛྲ་ཨཱ་ལོ་ཀེ་ཨཱཿ ཧཱུཾ། ༀ་བཛྲ་གནྡྷེ་ཨཱཿ ཧཱུཾ། ༀ་བཛྲ་ནཻ་ཝིདྱ་ཨཱཿ ཧཱུཾ། ༀ་བཛྲ་ཤཔྟ་ཨཱཿ ཧཱུཾ། ཞེས་སྔགས་ཕྱག་རྒྱ་དང་བཅས་པས་བྱིན་གྱིས་བརླབ། དེ་ནས། ཐུགས་རྗེ་ཁྱབ་པའི་ཐུགས་དང་ལྡན་གྱུར་ཅིག །བློ་གྲོས་སྡིག་བྲལ་གཏི་མུག་ཚོགས་ཀུན་བཅོམས་། །མ་ལུས་རིགས་ཀྱི་པདྨའི་ནང་བཞུགས་པ། །བདེ་བར་གཤེགས་པ་རྣམས་ལ་སྐྱབས་སུ་མཆི། །བློ་མཆོག་རྣམས་ཀྱི་ཀུན་དགའ་ར་བ་སྟེ། །དམན་པས་འཇིགས་པ་རྣམས་ཀྱི་རྒྱལ་བྱེད་ཚལ། །སྲིད་པའི་འབྱོར་པ་ཟིལ་གྱིས་གནོད་པའི་མཆོག །གསུང་མཆོག་ཆོས་ལ་བདག་ནི་སྐྱབས་སུ་མཆི། །འདོད་ཆགས་
ལ་སོགས་སྦྲུལ་གྱི་དུག་བཅོམ་ཞིང་། །བློ་གྲོས་རྣམ་རྒྱལ་ཐུགས་རྗེ་ཆེ་ལྡན་པ། །བརྟུལ་ཞུགས་དབང་པོའི་ཚོགས་ལ་སྐྱབས་མཆི་ཞིང་། །སྲིད་དང་བྲལ་བ་རྣམས་ལ་བདག་ཕྱག་འཚལ། །རྒྱུ་ཡི་རྗེས་ལ་བདག་པོའི་ཡུལ་བདག་ཉིད། །འབྲས་བུའི་སྟོབས་ཀྱིས་དགྲ་ལས་རྒྱལ་གྱུར་པ། །སྙིང་རྗེའི་རྩ་བ་ཟུག་ཅིང་ཡང་དག་རྟོགས། །མཉམ་མེད་བྱང་ཆུབ་སེམས་ནི་བསྐྱེད་པར་བགྱི། །ཞེས་པ་གསུམ་གྱིས་སྐྱབས་འགྲོ་སེམས་བསྐྱེད་བྱ། །ༀ་སྭ་བྷཱ་ཝ་ཤུདྡྷཿ སརྦྦ་དྷརྨཱཿ སྭ་བྷཱ་ཝ་ཤུདྡྷོ྅ཧཾ། ཆོས་ཐམས་ཅད་གང་ཟག་དང་ཆོས་ཀྱི་བདག་མེད་པ་རང་བཞིན་གྱིས་རྣམ་པར་དག་པར་གྱུར་པར་བསམ། སྟོང་པའི་ངང་ལས་སྣ་ཚོགས་པདྨ་དང་ཟླ་བའི་གདན་གྱི་སྟེང་དུ་ཧཱུཾ་ལས་རང་ཉིད་ཕྱག་ན་རྡོ་རྗེ་དཀར་པོ་གཡས་རྡོ་རྗེ་ཐུགས་ཀར་འཛིན་ཅིང་གཡོན་དྲིལ་བུ་དཀུར་བརྟེན་པ། སེམས་དཔའི་སྐྱིལ་མོ་ཀྲུང་གིས་བཞུགས་པར་བསམ། དེའི་ལྐོག་མར་ཧྲཱིཿ ལས་པདྨ་དམར་པོ་འདབ་མ་བརྒྱད་པ་ལྕེའི་ཐད་ཀའི་འདབ་མ་གཅིག་ལྕེར་གྱུར་པའི་སྟེང་དུ། ཨ་ལས་ཟླ་བའི་དབུས་སུ་ཧཱུཾ་ལས་རྡོ་རྗེ་དཀར་པོ་རྩེ་ལྔ་པ། དེ་ལྕེ་ལ་ཐིམ་པས་ལྕེ་རྡོ་རྗེའི་རང་བཞིན་དུ་གྱུར་པར་བསམ། ༀ་བཛྲ་ཛ་ཧྭཱ་ཞེས་བྱིན་གྱིས་བརླབ། ལག་པ་གཉིས་སུ་ཨ་ཨ་ལས་ཟླ་བའི་དཀྱིལ་འཁོར་རེ་རེ། དེའི་སྟེང་དུ་ཧཱུཾ་ཧཱུཾ་ལས་རྡོ་རྗེ་དཀར་པོ་རྩེ་ལྔ་པ་རེ་རེ། དེ་ཞུ་ལག་པ་ལ་ཐིམ་པས་རྡོ་རྗེའི་ལག་པ། སོར་མོ་རྣམས་ཀྱང་རྡོ་རྗེ་རྩེ་གཅིག་པར་གྱུར་པར་བསམ། རང་གི་
ཐུགས་ཀར་ཉི་མའི་སྟེང་དུ་ཧཱུཾ་དེ་ཡོངས་སུ་གྱུར་པ་ལས་རང་ཉིད་ཁྲོ་བོ་འཇིག་རྟེན་གསུམ་ལས་རྣམ་པར་རྒྱལ་བ་སྐུ་མདོག་སྔོན་པོ་ཞལ་གཅིག་ཕྱག་གཉིས་ཧཱུཾ་མཛད་ཀྱི་ཕྱག་རྒྱས་རྡོ་རྗེ་དང་དྲིལ་བུ་འཛིན་པ། གཡས་བསྐུམ་ཞིང་གཡོན་བརྐྱང་པའི་སྟབས་ཀྱིས་བཞུགས་པ། དེའི་ཐུགས་ཀར་ཉི་མའི་སྟེང་དུ་ཧཱུཾ། ༀ་སརྦྦ་བིད་ༀ། ༀ་སརྦྦ་བིད་ཨཱཿ ༀ་སརྦ་བིད་ཧཱུཾ། ཞེས་པའི་རིགས་གསུམ་སྤྱིའི་སྔགས་རྒྱས་གནས་གསུམ་བྱིན་གྱིས་བརླབ། རྡོ་རྗེ་བསྡམས་པ་ལས་མཐེ་བོང་དང་མཐེའུ་ཆུང་སོ་སོར་བརྐྱང་སྟེ་མཛུབ་མོ་དང་སྲིན་ལག་པདྨ་འདྲ་བར་བཀུག་ནས་སྤྱི་བོར་བཞག །ༀ་བུདྡྷ་ཨ་བྷི་ཥིཉྩ་ༀ། དེ་ཉིད་ལས་གུང་མོ་གཉིས་རྡོ་རྗེ་འདྲ་བར་བསྙམ་ལ་མཐེ་བོང་དང་མཐེའུ་ཆུང་བརྐྱང་བ་དཔྲལ་བར་བཞག །ༀ་བཛྲ་ཨ་བྷི་ཥཉྩི་ཧཱུཾ། དེ་ཉིད་ལས་མཛུབ་མོ་དང་སྲིན་ལག་རིན་པོ་ཆེ་འདྲ་བར་བྱས་ཏེ་རྣ་ལྟག་གཡས་སུ་བཞག །ༀ་རཏྣ་ཨ་བྷི་ཥཉྩ་ཏྲཱཾ། མཐེའུ་ཆུང་དང་མཐེ་བོང་སོ་སོར་བསྙམས་ལ་ལྷག་མ་རྣམས་བརྐྱང་སྟེ་པདྨ་འདྲ་བར་བྱས་ནས་ལྷག་པར་བཞག །ༀ་པདྨ་ཨ་བྷི་ཥཉྩ་ཧྲཱིཿ ལག་པ་གཡོན་པས་དེ་བཞིན་དུ་བསྒྱུར་ཞིང་བྱ་བ་རྣ་ལྟག་གཡོན་པར་བཞག །ༀ་ཀརྨ་ཨ་བྷི་ཥིཉྩ་ཨཱཿ རྡོ་རྗེ་ཁུ་ཚུར་གཉིས་ཀྱིས་མདུད་པ་བཅིང་པའི་ཚུལ་གྱིས། སྙིང་ག །མགྲིན་པ། ལྟག་པ། ཡང་སྙིང་ག །ནུ་མའི་བར། ཡང་སྙིང་ག མགྲིན་པ། རྒྱབ། དཔྲལ་བའི་སྟེང་དུ་མདུད་
པའི་ཚུལ་གྱིས་གོ་བསྐོན་ཏེ། དེའི་སྡོམ་ནི། སྙིང་མགྲིན་ལྟག་པ་སྙིང་ག་དང་། །ནུ་བར་སྙིང་ག་མགྲིན་རྒྱབ་དཔྲལ། ཞེས་སོ། །ༀ་ཊུཾ། ཁུ་ཚུར་གཉིས་སྒེག་པ་དང་བཅས་པས་ཐ་མ་ལ་སོགས་པ་ནས་རིམ་གྱིས་བཀྲོལ་ཏེ་མཐར་མཉམ་པའི་ཐལ་མོ་བརྡབས་ལ། ༀ་བཛྲ་ཏུ་ཥྱ་ཧོཿ དར་དཀར་པོ་ཞེང་དུ་ཁྲུ་གང་བ་དཀྱུས་སུ་ཁྲུ་ཉི་ཤུ་པས་གནས་རྣམས་སུ་མདུད་ནས་རྣ་བའི་སྟེང་དུ་སོར་བཞི་ཙམ་ཕྱུང་ལྷག་མ་ཕྱེ་སྟེ་བརྐྱང་པ་ལུས་དང་མཉམ་པར་གྱུར་པར་བསམ། ཁྲོ་བོ་སྤྱན་དྲང་པ་ནི། རྡོ་རྗེ་བསྡུ་བའི་ཕྱག་རྒྱ་དང་། ༀ་བཛྲ་མ་ཧཱ་ཀྲོ་དྷ་རཱ་ཛཱ་ས་པ་རི་ཝཱ་ར་བཛྲ་ས་མཱ་ཛཿཧཱུཾ་ཡེ་ཤེས་བསྐལ་པ་མེ་ལྟར་འབར་བའི་འོད། །མ་རིག་འདོད་པའི་མུན་ཁམས་ཐམས་ཅད་སྲེག །ཞེ་སྡང་གཤིན་རྗེའི་འཇིགས་པ་ཐམས་ཅད་འཇོམས། །དཔའ་བོ་ཆེན་པོ་དཔའ་མཚན་སྟག་ལྤགས་ཅན། །ལོག་འདྲེན་སྲིན་པོའི་མཐའ་གནོན་དགྲ་འདུལ་བ། །རིག་པའི་རྒྱལ་པོ་ཁྲོ་བོ་བཞུགས་སུ་འཚལ། །ལོག་འདྲེན་འདུལ་བའི་སླད་དུ་སྤྱན་འདྲེན་ན། །འགྲོ་བའི་དོན་དུ་མཆོད་ཀྱིས་གཤེགས་སུ་གསོལ། ཞེས་ཁྲོ་བོ་དཔག་ཏུ་མེད་པ་སྤྱན་དྲངས་པས་བྱོན་པར་བསམ། ༀ་བཛྲ་མཧཱ་ཀྲོ་དྷ་རཱ་ཛཱ་ས་པ་རི་ཝཱ་ར་ཨེ་ཧྱེ་ཧི། པྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། པདྨ་ཀ་མ་ལ་ཡེ་སྟཾ། ཞེས་གདན་དབུལ། ༀ་བཛྲ་མཧཱ་ཀྲོ་དྷ་རཱ་ཛཱ་ས་པ་རི་ཝཱ་ར་པྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། དེ་བཞིན་དུ། བཱ་དྱཾ་པྲ་ཏཱིཙྪ་སྭཱ་ཧཱ། ཞེས་ཆུ་གཉིས་དང་། ས་པ་རི་ཝཱ་ར་ཞེས་པ་ཡན་འོག་མ་ཀུན་གྱི་འགོར་སྦྱར་ཞིང་། པྲ་ཏཱིཙྪ་
ཨཱཿ ཧཱུཾ། ཞེས་མཇུག་ཏུ་སྦྱར་ནས། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤཔྟ་པྲ་ཏཱིཙྪ་ཨཱཿ ཧཱུཾ་ཞེས་ཉེར་སྤྱོད་ལྔ་རོལ་མོ་དང་བཅས་པ་དབུལ། དེ་ནས་བསྟོད་པ་ནི། ཧཱུཾ་ཆོས་ཉིད་སྟོང་པ་གཉིས་མེད་ངང་ཉིད་ལས། འཇིག་རྟེན་སྤྱོད་པའི་ཚུལ་ཡང་མི་སྤོང་ཞིང་། །ཐབས་ལ་མཁས་པས་འཇིགས་བྱེད་སྐུར་སྟོན་པ། །ཁྲོ་ཆེན་འབར་བའི་ཚོགས་ལ་ཕྱག་འཚལ་ལོ། །ཡེ་ཤེས་ཞི་བའི་ངང་ལས་མ་གཡོས་ཀྱང་། །སྐུ་ཡི་ཆ་ལུགས་ཟ་བྱེད་རྔམ་སྟབས་ཅན། །གསུང་གི་ང་རོ་འབྲུག་སྟོང་ལྡིར་བའི་སྒྲོས། །མ་ལུས་དབང་དུ་སྡུད་ལ་ཕྱག་འཚལ་ལོ། །ལྷག་པའི་ཡེ་ཤེས་རོལ་པ་སྟོན་མཛད་ཅིང་། །བསྡིགས་པའི་མཚོན་ཆ་སྣ་ཚོགས་ཕྱག་ན་བསྣམས། །ཉོན་མོངས་དུག་ཆེན་རྩད་ནས་འཇོམས་མཛད་པ། །སྦྲུལ་གདུག་རྒྱན་གྱིས་བརྒྱན་ལ་ཕྱག་འཚལ་ལོ། །བསྐལ་པའི་མེ་ལྟར་འབར་བའི་ཀློང་དཀྱིལ་ན། །དཔའ་བོའི་སྟང་སྟབས་བརྐྱང་བསྐུམ་ཚུལ་དུ་བཞུགས། །ཉི་ཟླ་འབར་བའི་སྤྱན་གྱི་སྡང་མིག་གིས། །བགེགས་དཔུང་བསྲེག་པར་མཛད་ལ་ཕྱག་འཚལ་ལོ། །གཏུམ་ཆེན་དུས་མཐའི་མེ་ལྟར་གཟི་བརྗིད་འབར། །གློག་སྟོང་འགྱུ་འདྲའི་ཁྲོ་གཉེར་མཆེ་བ་གཙིགས། །རྔམ་པའི་ང་རོ་འབྲུག་སྒྲ་སྟོང་བཞིན་སྒྲོག །ཁྲོ་རྒྱལ་བགེགས་ཚོགས་འདུལ་ལ་ཕྱག་འཚལ་བསྟོད།ཧཱུཾ་འཇིགས་པའི་ཧཱུཾ་སྒྲ་ངེས་སྒྲོག་ཅིང་། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་ཐམས་
ཅད་སྩོལ་བའི་ལྷ། །བགེགས་ཀྱི་དགྲ་ལ་ཕྱག་འཚལ་བསྟོད། །ཅེས་པས་བསྟོད། ཧཱུཾ། དཀྱིལ་འཁོར་ཆེན་པོའི་ས་གཞི་ལ་གནས་པའི། །ལྷ་ལ་སོགས་པའི་བགེགས་ཚོགས་ཀུན་ཉོན་ཅིག །ང་ནི་གནས་འདིར་དཀྱིལ་འཁོར་ཆེན་པོ་འདྲི། །ཁྱེད་རྣམས་འདི་ནས་གཞན་དུ་འགྲོ་བར་གྱིས། །གལ་ཏེ་ང་ཡི་བཀའ་ལས་འདའ་བྱེད་ན། །ཡེ་ཤེས་ཅན་གྱི་རྡོ་རྗེ་འབར་བ་ཡིས། །མགོ་བོ་ཚལ་པ་བརྒྱར་ནི་འགས་འགྱུར་ཞིང་། །བགེགས་རྣམས་བརླབ་པར་འགྱུར་བར་གདོན་མི་ཟ། །ཞེས་བགེགས་ལ་བཀའ་བསྒོ། །གནས་སྲུང་བ་ནི། གཡོན་པའི་རྡོ་རྗེ་ཁུ་ཚུར་སྙིང་གར་བཞག་གཡས་པ་རྡོ་རྗེ་གསོར་ཞིང་། ༀ་བཛྲ་ཛྭཱ་ལ་ཨ་ན་ལཱརྐྐ་ཧཱུཾ། ཞེས་པས་བགེགས་ལ་བསྣུན་བར་བསམ། རྡོ་རྗེ་བསྡམས་པ་ནང་དུ་བཅིངས་ལ་ཁ་སྟེང་དུ་བསྟན་ཏེ་སོར་མོ་རྣམས་འབར་བ་ལྟ་བུར་བྱས་པའི་མཐེ་བོང་རྩེ་སྦྱར་བ་སྲིན་ལག་དང་གུང་མོའི་བར་དུ་འཛིན་པ་རྡོ་རྗེ་མེའི་ཕྱག་རྒྱ་དང་། ༀ་བཛྲ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུཾ་ཕཊ། ཅེས་པས་བགེགས་རྣམས་བསྲེགས་པ་ལ་སོགས་པར་བསམ། རྡོ་རྗེ་བསྡམས་པའི་སྟེང་ནས་མཐེ་བོང་གཉིས་བརྐྱང་ནས་མཉམ་སྟེ་བཞག་པ་རྡོ་རྗེ་སྤྱན་གྱི་ཕྱག་རྒྱ་དང་། ༀ་བཛྲ་ནཻ་ཏྲི་བནྡྷ་སརྦྦ་བིགྷཱན། བསྣུན་ཅིང་བསྲེགས་ཀྱང་མ་ཤི་སྟེ་མི་འབྲོས་པའི་བགེགས་རྣམས་བཅིངས་པར་བསམ། རྡོ་རྗེ་བསྡམས་པ་བརྐྱང་སྟེ་ཁ་སྦུབ་པ་ས་ལ་བཞག་ནས། ༀ་བཛྲ་ཌི་ཌྷོ་མེ་བྷ་ཝ་རཀྵ་སརྦྦཾ་སྭཱ་ཧཱ། འོག་རྡོ་རྗེའི་ས་གཞིར་གྱུར་པར་བསམ། རྡོ་རྗེ་ཁུ་ཚུར་གཉིས་མགལ་མེའི་འཁོར་ལོ་བཞིན་
དུ་བསྐོར་ཏེ་མགོ་བོའི་སྟེང་དུ་མཛུབ་མོ་གཉིས་ལྕགས་ཀྱུའི་ཚུལ་དུ་བཞག་པ་རྡོ་རྗེ་འཇིགས་བྱེད་སྤྱན་གྱི་ཕྱག་རྒྱ་དང་། ༀ་ཧུ་ལུ་ཧུ་ལུ་ཧཱུཾ་ཕཊ། སྟེང་དུ་རྡོ་རྗེའི་གུར་དུ་གྱུར་པར་བསམ། རྡོ་རྗེ་ཐལ་མོའི་མཐེ་བོང་གཉིས་བརྐྱང་ལ་མཛུབ་མོ་གཉིས་མཆེ་བ་ལྟར་བྱས་པ་རྡོ་རྗེ་གནོད་སྦྱིན་གྱི་ཕྱག་རྒྱ་དང་། ༀ་བཛྲ་ཡཀྵ་ཧཱུཾ། གུར་གྱི་འོག་ཏུ་རྡོ་རྗེའི་བླ་རེར་གྱུར་པར་བསམ། རྡོ་རྗེ་ཁུ་ཚུར་གཉིས་ཀྱི་མཐེའུ་ཆུང་གཉིས་ལུ་གུ་རྒྱུད་དུ་སྦྲེལ་མཛུབ་མོ་གཉིས་རྩེ་སྤྲད་དེ་བཟློག་ནས་སྤྱི་བོར་བཞག་པ་རྡོ་རྗེ་གཙུག་ཏོར་གྱི་ཕྱག་རྒྱ་དང་། ༀ་དྲུཾ་བནྡྷ་ཧཾ། ཤར་རྡོ་རྗེའི་ར་བར་གྱུར་པར་བསམ། རྡོ་རྗེ་ཁུ་ཚུར་གཉིས་ཀྱི་མཁྲིག་མ་མདུད་ནས་ཞགས་མིག་ལྟར་བྱས་པ་རྡོ་རྗེ་ཞགས་པའི་ཕྱག་རྒྱ་དང་། ༀ་ཧཱུཾ་བཛྲ་པཱ་ཤ་ཧྲཱིཿ ཤར་གྱི་ར་བའི་ནང་དུའང་རྡོ་རྗེའི་ར་བར་གྱུར་པར་བསམ། རྡོ་རྗེ་བསྡམས་པ་ལས་མཐེ་བོང་གཉིས་སེམས་དཔའི་སྐྱིལ་ཀྲུང་དུ་བྱས་ཏེ་མཛུབ་མོ་གཉིས་མཉམ་པོར་གཤིབས་ཏེ་ཕྱེ་ལ་མཐེའུ་ཆུང་གཉིས་བ་དན་ལྟར་བྱས་པ་རྡོ་རྗེ་བ་དན་གྱི་ཕྱག་རྒྱ་དང་། ༀ་བཛྲ་པ་ཏཱ་ཀེ་པཱ་ཏཱཾ་ཀེ་ནི་རནྚ། ནུབ་རྡོ་རྗེའི་ར་བར་གྱུར་པར་བསམ། རྡོ་རྗེ་གནོད་སྦྱིན་གྱི་ཕྱག་རྒྱ་དེ་ཉིད་ཁ་དྲུང་དུ་བཞག་པ་རྡོ་རྗེ་ནག་མོའམ་རྡོ་རྗེ་དུས་ཀྱི་ཕྱག་རྒྱ་དང་། ཧྲཱིཿ བཛྲ་ཀཱ་ལི་རུ་ཊ་མ་ཊ། བྱང་རྡོ་རྗེའི་ར་བར་གྱུར་པར་བསམ།རྡོ་རྗེ་ཁུ་ཚུར་གཉིས་ཁ་སྟེང་དུ་བསྟན་པ་རི་བོ་འདེགས་པའི་ཚུལ་དུ་བྱས་པ་རྡོ་རྗེ་རྩེ་མོའི་ཕྱག་རྒྱ་དང་། ༀ་བཛྲ་ཤེ་ཁ་ར་རུ་ཊ་མ་ཊ། ལྷོ་རྡོ་རྗེའི་ར་བར་གྱུར་པར་བསམ། རྡོ་རྗེ་ཧཱུཾ་མཛད་ཀྱི་ཕྱག་རྒྱ་ལས་མཛུབ་མོ་དང་གུང་མོ་གཉིས་རྡོ་རྗེ་ལྟར་བྱས་
པ་རྡོ་རྗེ་ལས་ཀྱི་ཕྱག་རྒྱ་དང་། ཧཱུཾ་བཛྲ་ཀརྨཿ ཕྱོགས་མཚམས་ཐམས་ཅད་དུ་རྡོ་རྗེའི་ར་བ། རྡོ་རྗེ་ཁུ་ཚུར་གཉིས་རྒྱབ་སྦྱར་མཐེའུ་ཆུང་གཉིས་སྦྲེལ་མཛུབ་མོ་སྡིགས་མཛུབ་བྱས་པ་ཧཱུཾ་མཛད་ཀྱི་ཕྱག་རྒྱ་དང་། ཧཱུཾ་ནང་རྡོ་རྗེའི་ར་བར་གྱུར། རྡོ་རྗེ་བསྡམས་པ་དང་། ༀ་བཛྲ་བན་དྷ་བཾ། སླར་ཡང་ར་བའི་སྟེང་དུ་རྡོ་རྗེའི་གུར་དུ་གྱུར། རྡོ་རྗེ་ཁུ་ཚུར་གཉིས་ཀྱི་མཛུབ་མོ་དང་མཐེའུ་ཆུང་མདུད་པ་བཀན་ནས་སྙིང་གར་བཞག་པ། གཡས་སྐོར་དུ་བསྐོར་བ་རྡོ་རྗེ་འཁོར་ལོའི་ཕྱག་རྒྱ་དང་། ༀ་སརྦྦ་བིད་མཎྜལ་བཛྲ་ཙཀྲ་ཧཱུཾ། མདུན་དུ་བཅོམ་ལྡན་འདས་ཀུན་རིག་གི་རྟེན་དང་བརྟེན་པར་བཅས་པའི་དཀྱིལ་འཁོར་གྲུབ་པར་གྱུར། ཕྱག་རྒྱ་དེ་ཁར་བཞག་ལ་བལྟ་བཞིན་དུ་སྔགས་དེ་ཉིད་བརྒྱ་རྩ་བརྒྱད་བཟླས་པས་དཀྱིལ་འཁོར་མངོན་སུམ་ལྟར་དམིགས་ལ། ༀ་སརྦྦ་ཏ་ཐཱ་ག་ཏ་པཱ་ད་བན་དྷ་ནཾ་ཀ་རོ་མི། ཞེས་ཕྱག་བྱ།ཐལ་མོ་བརྐྱང་བ་ལས་གུང་མོ་གཉིས་ནང་དུ་བཀུག་པའི་ཕྱག་རྒྱ་དང་། ༀ་སརྦྦ་ཏ་ཐཱ་ག་ཏ་པྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་མཆོད་ཡོན་དང་དེ་བཞིན་དུ། གཡས་པའི་རྡོ་རྗེ་ཁུ་ཚུར་གྱི་མཐེ་བོང་དང་མཛུབ་མོའི་སྐམ་པས་ཞབས་བསིལ་གྱི་ཆུ་དང་མེ་ཏོག་འགྱིང་བའི་ཚུལ་གྱིས་སོར་མོ་རྣམས་བསྐོར་ཞིང་བླངས་ལ་མཛུབ་མོ་དང་གུང་མོ་དང་སྲིན་ལག་དང་མཐེའུ་ཆུང་རྣམས་རིམ་གྱིས་དགྲོལ་བའི་ཕྱག་རྒྱ་དང་། པཱ་ཏྱཾ་པྲ་ཏཱིཙྪ་སྭཱ་ཧཱ། ཞེས་པས་ཞབས་བསིལ་དང་། རྡོ་རྗེ་ཁུ་ཚུར་གཉིས་ཀྱིས་མེ་ཏོག་འབུལ་བའི་ཚུལ་གྱིས་གྱེན་དུ་འཐོར་བའི་ཕྱག་རྒྱ་དང་། ༀ་སརྦྦ་ཏ་ཐཱ་ག་ཏ་པུཥྤེ་པཱུ་ཛ་མེ་གྷ་ས་མུ་དྲ་སྥ་
ར་ཎ་ས་མ་ཡེ་ཧཱུཾ་ཞེས་པས་མེ་ཏོག་དང་། རྡོ་རྗེ་ཁུ་ཚུར་གཉིས་ཀྱིས་བདུག་པ་འབུལ་བའི་ཚུལ་དུ་ཐུར་དུ་སྤུགས་པའི་ཕྱག་རྒྱ་དང་། དྷཱུ་པེ་ཞེས་པས་བདུག་སྤོས་དང་། རྡོ་རྗེ་ཁུ་ཚུར་གཉིས་ཀྱི་མཐེ་བོང་གཤིབས་ཏེ་བསྒྲེང་བའི་ཕྱག་རྒྱ་དང་། ཨཱ་ལོ་ཀེ་ཞེས་པས་སྣང་གསལ་དང་། རྡོ་རྗེ་ཁུ་ཚུར་གཉིས་བརྐྱང་ནས་རང་གི་སྙིང་གར་དྲི་བྱུག་པའི་ཚུལ་དུ་བྱེད་པའི་ཕྱག་རྒྱ་དང་། གནྡྷེ་ཞེས་པས་དྲི་མཆོག་དང་། རྡོ་རྗེ་བསྡམས་པས་རལ་གྲི་འདེབས་པའི་ཚུལ་དང་ཨ་ཀཱ་རོའི་སྔགས་སམ། ཡང་ན་ནཻ་ཝི་དྱ་ཞེས་ཞལ་ཟས་དང་། རྡོ་རྗེ་ཁུ་ཚུར་གྱིས་རོལ་མོ་དཀྲོལ་པའི་ཚུལ་ལམ་རོལ་མོ་དཀྲོལ་ཞིང་། ཤཔྟ་ཞེས་པས་རོལ་མོ་རྣམས་ཀྱིས་མཆོད།དེ་ནས་སྡིག་པ་བཤགས་པ་ནི། དབང་མེད་བདག་གིས་མི་དགེ་བགྱིས་པ་དང་། །རྗེས་སུ་ཡི་རང་ཡང་ན་བགྱིད་སྩལ་གང་། །དེ་དག་ཐམས་ཅད་བྱང་ཆུབ་མཆོག་གི་ནི། །སྤྱན་སྔར་ད་ལྟ་མ་ལུས་སོ་སོར་བཤགས། །དགེ་བ་ལ་ཡི་རང་བ་ནི། བདེ་གཤེགས་སྲས་ཀྱི་ཚོགས་གཉིས་ཟབ་པ་དང་། །རྒྱ་ཆེན་འགྲོ་བ་མ་ལུས་པ་ཡི་དོན། །སྒྲུབ་པར་བྱེད་དང་དེ་ལས་གཞན་ལ་ཡང་། །རྟག་ཏུ་བདག་ནི་རྗེས་སུ་ཡི་རང་ངོ་། །ཆོས་འཁོར་བསྐོར་བར་བསྐུལ་བ་ནི། ཕྱོགས་བཅུའི་སངས་རྒྱས་བཅོམ་ལྡན་འདས་ཆོས་ཀྱི་འཁོར་ལོ་བསྐོར་བར་མི་མཛད་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བའི་ཕྱིར་བསྐུལ་བར་བགྱིའོ། །མྱ་ངན་ལས་མི་འདའ་བར་གསོལ་བ་གདབ་པ་ནི། ཕྱོགས་བཅུའི་སངས་རྒྱས་བཅོམ་ལྡན་འདས་
ཡོངས་སུ་མྱ་ངན་ལས་འདའ་བར་བཞེད་པ་གང་ཡིན་པ་དེ་དག་ཐམས་ཅད་ལ་མྱ་ངན་ལས་མི་འདའ་བར་གསོལ་བར་འཚལ་ལོ། །བསྔོ་བ་ནི། བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་འདིར་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོས་གཟིར་ལས་དགྲོལ། །དེ་ནས་སྡོམ་པ་གཟུང་བ་ནི། སངས་རྒྱས་བྱང་ཆུབ་སེམས་དཔའ་ཀུན། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བྱ་བ་ནི། །དུས་འདི་ནས་ནི་བཟུང་ནས་ནི། །བྱང་ཆུབ་སྙིང་པོར་མཆིས་ཀྱི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་བདག་གིས་བཟུང་། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བདག་གིས་བཟུང་། །རྡོ་རྗེ་རིགས་མཆོག་ཆེན་པོ་ཡི། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ནི་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་བྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་དང་གསང་བ་ཐེག་པ་གསུམ། །དམ་ཆོས་སོ་སོར་བཟུང་བར་བགྱི། །ལས་ཀྱི་རིགས་མཆོག་
ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་སོ་སོར་བཟུང་། །མཆོད་པའི་ལས་ནི་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱང་ངན་འདས་ལ་དགོད། །ཅེས་པས་སྡོམ་པ་བཟུང་།སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་པར་གྱུར་ཅིག་སྙམ་པའི་བཏང་སྙོམས་ཏེ་ཚད་མེད་པ་བཞི་སྒོམ། ཚོགས་ཞིང་རང་གནས་སུ་མི་དམིགས་པར་གྱུར། དེ་ནས་ལག་པ་གཉིས་བཀན་ལ་སོར་མོ་རྣམས་ཕན་ཚུན་རྩེ་སྤྲད་དེ་མདུན་དུ་བཞག་ལ། ལག་མཐིལ་གཉིས་སུ་ཨ་ཨ་ལས་ཟླ་བའི་དཀྱིལ་འཁོར་རེ་རེ། གཡས་པའི་དབུས་སུ་ཧཱུཾ་སྔོན་པོ། གཡོན་པའི་དབུས་སུ་ཨཱཿ དཀར་པོ། དེ་དག་གི་མཐའ་སྐོར་དུ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཞེས་ཨཱ་ལི་ལན་གཉིས་བརྗོད་དེ། དབྱངས་ཡིག་བཅུ་དྲུག་འོད་ཟེར་འབར་བ་དང་བཅས་པས་གང་བར་གྱུར།སོར་མོ་རྣམས་མེ་ལོང་ལྟར་དྭངས་པའི་མཐེ་བོང་གཉིས་ལ་ༀ་དཀར་པོ། མཛུབ་མོ་གཉིས་ལ་ཧཱུཾ་སྔོན་པོ། གུང་མོ་གཉིས་
ལ་ཏྲཱཾ་སེར་པོ། སྲིན་ལག་གཉིས་ལ་ཧྲཱིཿ དམར་པོ། མཐེའུ་ཆུང་གཉིས་ལ་ཨཿ ལྗང་གུ་ལས། གཡས་པ་རྣམས་ལ་རིམ་པ་བཞིན་རྣམ་སྣང་དཀར་པོ། མི་བསྐྱོད་པ་སྔོན་པོ། རིན་འབྱུང་སེར་པོ། འོད་དཔག་མེད་དམར་པོ། དོན་གྲུབ་ལྗང་གུ །གཡོན་པ་རྣམས་ལ་རིམ་པ་བཞིན། རྡོ་རྗེ་དབྱིངས་ཀྱི་དབང་ཕྱུག་མ་དཀར་མོ། །རྡོ་རྗེ་ཐུགས་མ་སྔོན་མོ། རྡོ་རྗེ་དབང་བསྐུར་མ་སེར་མོ། རྡོ་རྗེ་མཚོན་ཆ་མ་དམར་མོ། རྡོ་རྗེ་ཀུན་མ་ལྗང་གུ་རྣམས་ཕན་ཚུན་ལྷ་དང་ལྷ་མོའི་ཁྱད་པར་མ་གཏོགས་པ་ཕྱག་མཚན་རྒྱན་ལ་སོགས་པ་རིགས་ལྔ་དང་འདྲ་བར་གྱུར། ཐལ་མོ་གཉིས་ཕན་ཚུན་མ་རེག་ཙམ་དུ་བྱས་ལ། ༀ་ཨཱཿ ནྱོ་ནྱ་ཨ་ནུ་ག་ཏཱཿ སརྦྦ་དྷརྨྨཱ་ཞེས་ལྷ་ཕན་ཚུན་ཞལ་ཕྱོགས་པར་བསམ། རྡོ་རྗེ་ཐལ་མོ་བྱས་ལ། པ་ར་སྥ་ར་ཨ་ནུ་པྲ་བཥྚཱིཿ སརྦྦ་དྷརྨྨཱཿ བཛྲ་ཨཉྫ་ལིཿ ཞེས་ལྷ་ཕན་ཚུན་མར་མེ་གཅིག་ལས་གཉིས་ཆད་ཀྱི་ཚུལ་དུ་འཕྲོས་ཏེ་འདྲེས་པར་བསམ། རྡོ་རྗེ་བསྡམས་པ་བཅིངས་ལ། ཨ་ཏྱནྟ་ཨ་ནུ་པྲ་བིཥྚཱཿ སརྦྦ་དྷརྨྨཱཿ བཛྲ་བནྡྷ། ཞེས་པས་ཕན་ཚུན་རོ་གཅིག་ཏུ་གྱུར། བཛྲ་བནྡྷ་ཏྲཊ། ཅེས་བརྗོད་ཅིང་སྙིང་གར་རྡོ་རྗེ་བསྡམས་པ་སྒྲ་དང་བཅས་པ་ལན་གསུམ་དྲལ་པས་ཁམས་གསུམ་གྱི་ཉོན་མོངས་པའི་བག་ཆགས་ཀྱི་འཆིང་བ་གཞིག་དཀའ་བ་རང་བཞིན་གྱིས་འོད་གསལ་བ་བསྒོམས་པས་བཅད་པར་གསམ་མོ། །རྡོ་རྗེ་འབེབས་པའི་དམ་རྒྱ་བཅིངས་ལ་དེར་བསྒོམ་ཞིང་། བཛྲ་ཨཱ་པེ་ཤ་ཞེས་བརྗོད། ཨཿ ཨཿ ཞེས་བརྗོད་ཅིང་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་དང་པོའི་རྡོ་རྗེ་ཁ་དོག་དམར་པོ་འོད་དམར་པོ་འབར་བ་རང་གི་སྙིང་གར་ཞུགས་
ནས་བདག་ཉིད་ཀྱི་ལུས་ཀུན་ཏུ་གང་བར་བསམ། ཏིཥྛ་བཛྲ་དྲྀ་ཌྷོ་མེ་བྷ་ཝ། ཤཱ་ཤྭ་ཏོ་མེ་བྷ་ཝ་ཧྲི་ད་ཡཾ་མེ་ཨ་དྷི་ཏིཥྛ་སརྦྦ་སདྡྷི་མེ་པྲ་ཡཙྪ་ཧཱུཾ། ཧ་ཧ་ཧ་ཧ་ཧོཿ ཞེས་དབབ་པ་བརྟན་པར་བསམ།རྡོ་རྗེ་ཁུ་ཚུར་གྱི་དམ་རྒྱ་བཅིངས་ལ། བཛྲ་མུཥྚི། ཞེས་བརྗོད། ༀ་བཛྲ་མཥྚི་བཾ། ཞེས་ཕྱག་རྒྱ་དེ་ཉིད་དགྲོལ་བར་བྱའོ། །ཕྱག་རྒྱ་བཅིང་བ་སྤྱིའི་ཆོ་གའོ། །ༀ་ཤཱུ་ནྱ་ཏཱ་ཉྫཱ་ན་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ༀ་སྭ་བྷཱ་ཝ་ཤུདྡྷཿ སརྦྦ་དྷརྨཱཿ སྭ་བྷཱ་ཝ་ཤདྡྷོ྅ཧཾ། ཆོས་ཐམས་ཅད་རང་བཞིན་གྱིས་རྣམ་པར་དག་པར་གྱུར། སྟོང་པའི་ངང་ལས་ཧཱུཾ་ཡཾ་ཧཱུཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན། དེའི་སྟེང་དུ་ཧཱུཾ་རཾ་ཧཱུཾ་ལས་མེའི་དཀྱིལ་འཁོར་དམར་པོ་གྲུ་གསུམ་པ། དེའི་སྟེང་དུ་ཧཱུཾ་བཾ་ཧཱུཾ་ལས་ཆུའི་དཀྱིལ་འཁོར་དཀར་པོ་ཟླུམ་པོ། དེའི་སྟེང་དུ་ཧཱུཾ་ལཾ་ཧཱུཾ་ལས་སའི་དཀྱིལ་འཁོར་སེར་པོ་གྲུ་བཞི་པ། དེའི་སྟེང་དུ་ཧཱུཾ་སུཾ་ཧཱུཾ་ལས་རི་རབ་རིན་པོ་ཆེ་སྣ་བཞིའི་རང་བཞིན་གྲུ་བཞི་པ། དེའི་སྟེང་དུ་པཾ་ལས་སྣ་ཚོགས་པདྨ་དེའི་སྟེང་དུ་ཧཱུཾ་ལས་སྣ་ཚོགས་རྡོ་རྗེའི་ལྟེ་བར་བྷྲུཾ་ཡོངས་སུ་གྱུར་པ་ལས། རིན་པོ་ཆེ་སྣ་ཚོགས་ལས་གྲུབ་པའི་ཕྱིའི་གཞལ་ཡས་ཁང་དང་། དེའི་ཕྱེད་ཀྱི་ཚད་དུ་ནང་གི་གཞལ་ཡས་ཁང་། གཉིས་ཀའང་གྲུ་བཞི་སྒོ་བཞི་པ། ཕྱི་ནས་རིམ་པ་བཞིན་སྔོ་སེར་དམར་ལྗང་དཀར་བའི་རྩིག་པ་རིམ་པ་ལྔ་དང་ལྡན་པའི་རིན་པོ་ཆེའི་རྩིག་པས་བསྐོར་བའི་སྟེང་ན། རིན་པོ་ཆེའི་ཕ་གུ་གཞི་དམར་པོ་ལ་རིན་པོ་ཆེ་ཟུར་གསུམ་དང་གྲུ་བཞི་ལ་སོགས་པས་སྤྲས་པ། དེའི་སྟེང་ན་གནས་པའི་གསེར་གྱི་སྐ་
རགས་བཞིའི་ཕྱི་ངོས་སུ་ཆུ་སྲིན་གྱི་ཁ་ནས་མུ་ཏིག་གི་དོ་ཤལ་དང་དོ་ཤལ་ཕྱེད་པ་འཕྱང་བ།དེའི་ཕྱི་ངོས་སུ་བྱ་འདབ་ལས་འཕྱང་བའི་རིན་པོ་ཆེའི་ཤར་བུ། དེའི་སྟེང་ན་པདྨ་འདབ་མ་ཕྱེད་པའི་དབྱིབས་ཅན་གྱི་མདའ་ཡབ་ལ་གནས་པའི་གསེར་གྱི་བུམ་པ་ནས་འཐོན་པའི་རྒྱལ་མཚན་དང་བ་དན་བརྒྱད་ཀྱི་མཛེས་པར་བྱས་པ། ཕྱིའི་སྟེང་གི་ཟུར་བཞི་ལ་གདུགས་བཞིས་བརྒྱན་པ། རྩིག་པའི་འགྲམ་ནས་འདོད་ཡོན་གྱི་སྣམ་བུ་དམར་པོས་བསྐོར་བ་ལ་བཞུགས་སྟབས་དང་ཁ་དོག་སྣ་ཚོགས་པའི་ལྷ་མོ་རྣམས་ཀྱིས་མཆོད་པ་བྱེད་བཞིན་པ། སྒོ་དང་སྒོ་ཁྱུད་ཀྱི་ཕྱིའི་མཚམས་དང་རྩིག་པའི་ཕྱི་ནང་གི་ཟུར་བཞིར་ཟླ་ཕྱེད་ལ་གནས་པའི་རིན་པོ་ཆེ་དམར་པོའི་སྟེང་དུ་རྡོ་རྗེས་བརྒྱན་པ། ཕྱིའི་སྒོ་བཞི་སོ་སོའི་མདུན་དུ་སྟེགས་བུ་གྲུ་བཞི་པའི་སྟེང་དུ་བུམ་པ་ལ་གནས་པའི་ཀ་བ་བཞི་བཞིས་བཏེགས་པའི་རྟ་བབས། གསེར་དང་། ཤར་བུ་དང་། རིན་པོ་ཆེ་དང་། རྟ་རྨིག་དང་། མུན་སྣམ་དང་། ཝ་རཎྜ་དང་། མུན་པ་དང་། ཤར་བུ་དང་། རིན་པོ་ཆེ་དང་། རྨིག་པ་དང་། མདའ་ཡབ་སྟེ་སྣམ་བུ་བཅུ་གཅིག་དང་ལྡན་པའི་རྩེ་མོར་ཆོས་ཀྱི་འཁོར་ལོའི་གཡས་གཡོན་དུ་རི་དྭགས་ཕོ་མོ་དང་བཅས་པ། རྟ་བབས་ཀྱི་གཡས་གཡོན་དུ་བུམ་པ་བཟང་པོ་ལས་སྐྱེས་པའི་དཔག་བསམ་གྱི་ཤིང་ལ་རྒྱལ་སྲིད་རིན་པོ་ཆེ་སྣ་བདུན་དང་། བར་བར་དུ་གྲུབ་པ་ཐོབ་པ་དང་སྤྲིན་གྱི་གསེབ་ནས་བྱུང་བའི་ལྷ་མེ་ཏོག་གི་ཕྲེང་བ་བཟུང་བ་རྣམས་ཀྱིས་ཀུན་ནས་མཛེས་པར་བྱས་པ། པད་རའི་ཕྱི་རོལ་ཏུ་ཁོར་ཡུག་རྡོ་རྗེའི་ར་བ་མེ་རི་དང་བཅས་པ། གཞལ་ཡས་ཁང་གི་ནང་དུ་རྡོ་རྗེ་དང་རིན་པོ་ཆེ་དང་པདྨ་དང་སྣ་ཚོགས་རྡོ་རྗེས་
མཚན་པའི་ཀ་བ་བརྒྱད་བརྒྱད་ཀྱིས་བཏེག་པའི་རྡོ་རྗེའི་གདུང་གིས་མཛེས་པར་ཕུབ་པའི་རྩེ་མོར་རྡོ་རྗེ་རིན་པོ་ཆེའི་ཏོག་གིས་སྤྲས་པ། གཞལ་ཡས་ཁང་གི་ནང་གི་སྟེང་དང་འོག་གི་ས་གཞི་ཐམས་ཅད་ཤར་སྔོ། ལྷོ་སེར། ནུབ་དམར། བྱང་ལྗང་། དབུས་དཀར་བ། གཞལ་ཡས་ཁང་ནང་མའི་དབུས་སུ་འཁོར་ལོ་སྔོན་པོ་རྩིབས་བཅུ་དྲུག་པ་ལྟེ་བ་མུ་ཁྱུད་དང་བཅས་པ། དེའི་དབུས་སུ་ཨཱཿ ས່་ཨཱཿ ལས་སེང་གེས་བཏེག་པའི་རིན་པོ་ཆེའི་ཁྲི། ཤར་དུ་ཧཱུཾ་གཾ་ཧཱུཾ་ལས་གླང་ཆེན། ལྷོར་ཏྲཱཿ ཝཾ་ཏྲཱཿ ལས་རྟ། ནུབ་ཏུ་ཧྲཱིཿ མཾ་ཧྲཱིཿ ལས་རྨ་བྱ། བྱང་དུ་ཨཿ གཾ་ཨཿ ལས་ནམ་མཁའ་ལྡིང་རྣམས་ཀྱིས་བཏེག་པའི་རིན་པོ་ཆེའི་ཁྲི། ལྷའི་གནས་ཐམས་ཅད་དུ་ཧྲཱིཿ ལས་པདྨ་དང་། ཨ་ལས་ཟླ་བའི་དཀྱིལ་འཁོར། དབུས་ཀྱི་ཟླ་བའི་སྟེང་དུ་ༀ་ལས་འཁོར་ལོ་ༀ་གྱིས་མཚན་པ་ལས། དཔག་ཏུ་མེད་པའི་འོད་ཟེར་འཕྲོས།གཞལ་དུ་མེད་པའི་སེམས་ཅན་གྱི་དོན་མཛད་པ་བཅུ་གཉིས་ཀྱི་ཚུལ་དུ་བྱས། སླར་འདུས་ཆོས་ཀྱི་ཡི་གེ་ལ་ཐིམ། ཡོངས་སུ་གྱུར་པ་ལས་རང་ཉིད་བཅོམ་ལྡན་འདས་ཀུན་རིག་སྐུ་མདོག་དཀར་པོ་ཞལ་བཞི་དཀར་བ། ཕྱག་གཉིས་ཏིང་ངེ་འཛིན་གྱིས་ཕྱག་རྒྱས་འཁོར་ལོ་རྩིབས་བརྒྱད་པ་བསྣམས་ཤིང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ་དར་ལའི་སྟོད་གཡོགས་དང་སྨད་གཡོགས་ཅན། ཞི་བའི་གཟིགས་སྟངས་མཛད་ཅིང་རྡོ་རྗེའི་སྐྱིལ་མོ་ཀྲུང་གིས་བཞུགས་པ་ཉི་མའི་འོད་ཀྱི་རྒྱབ་ཡོལ་མངའ་བ། ཚངས་པ་ཆེན་པོ་པདྨའི་གདན་ལ་བཞུགས་ཏེ།
ངན་སོང་གི་རྒྱུད་ཐམས་ཅད་ཡོངས་སུ་སྦྱོང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་བཞུགས་ནས། ངན་སོང་གི་རྒྱུད་ལས་རྣམ་པར་གྲོལ་བ་ཞེས་བྱ་བའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཏིང་ངེ་འཛིན་གྱི་འོད་ཟེར་འཕྲོ་བ་དང་སྡུད་པ་མང་པོའི་ཕྲེང་བ་ཉིད་ཀྱི་དཔྲལ་བའི་མཛོད་སྤུ་ནས་ཕྱུང་ནས། དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ཀུན་ཏུ་སྣང་བར་བྱས་སོ། །ཀུན་ཏུ་སྣང་བར་བྱས་པས་སེམས་ཅན་ཐམས་ཅད་ཉོན་མོངས་པའི་འཆིང་བ་ལས་རྣམ་པར་གྲོལ་ཏེ། བདེ་བ་སོ་སོར་ཐོབ་ནས་རང་གི་གནས་ཐམས་ཅད་ཀུན་ཏུ་སྣང་བར་བྱས་ཏེ། མཆོད་པའི་སྤྲིན་སྣ་ཚོགས་ཀྱིས་མངོན་པར་མཆོད་ནས་ལན་བརྒྱ་ཕྲག་སྟོང་དུ་སྐོར་བ་བྱས་ཏེ་མགོ་བོས་ལན་བརྒྱ་ཕྲག་སྟོང་དུ་ཕྱག་འཚལ་ནས་བཅོམ་ལྡན་འདས་ཀྱི་སྤྱན་སྔར་ནོར་བུ་དྲི་མ་མེད་པའི་སྟེང་དུ་འཁོད་དེ་འདི་སྐད་ཅེས་གསོལ་ཏོ། །ཨེ་མའོ་སངས་རྒྱས་ཀྱེ་སངས་རྒྱས། །ཨེ་མའོ་སངས་རྒྱས་མཛད་པ་ལེགས། །གང་ཕྱིར་ངན་སོང་བདག་ཅག་སྦྱངས། །བྱང་ཆུབ་སྤྱོད་པ་ཉིད་ལ་བཞག །ཅེས་ཆེད་དུ་བརྗོད་པ་ཆེད་དུ་བརྗོད་ནས་མི་སྣང་བར་གྱུར་ཏོ། །དང་པོ་སྦྱོར་བའི་ཏིང་ངེ་འཛིན་ཏོ། །རང་གི་ཐུགས་ཀར་ཟླ་བའི་དཀྱིལ་འཁོར་གྱི་དབུས་སུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས་དཔག་ཏུ་མེད་པའི་འོད་ཟེར་འཕྲོས། གཞལ་དུ་མེད་པའི་སེམས་ཅན་གྱི་དོན་མཛད་པ་བཅུ་གཉིས་ཀྱི་ཚུལ་དུ་མཛད། སླར་འདུས་ཆོས་ཀྱི་ཡི་གེ་ལ་ཐིམ་ཡོངས་སུ་གྱུར་པ་ལས། ངན་སོང་སྦྱོང་བའི་རྒྱལ་པོ་སྐུ་མདོག་དཀར་པོ། ཕྱག་གཉིས་ཏིང་ངེ་འཛིན་གྱི་ཕྱག་རྒྱས་རྡོ་རྗེ་དཀར་པོ་རྩེ་
ལྔ་པ་བསྣམས་པ། ༀ་སརྦ་བིད་ཧཱུཾ། ཐུགས་ཀ་ནས་ཕྱུང་ཤར་གྱི་གདན་གྱི་སྟེང་དུ་འཁོད། དེ་བཞིན་དུ་རང་གི་ཐུགས་ཀར་ཟླ་བའི་དཀྱིལ་འཁོར་གྱི་དབུས་སུ་འོག་ནས་འབྱུང་བའི་རྒྱལ་མཆོག་རིན་ཆེན་ནས་འབེབས་པའི་བར་རྣམས་ཀྱི་རང་རང་གི་ས་བོན་ཏྲཱཾ་ལ་སོགས་པ་ལས་རང་རང་གི་ཕྱག་མཚན་རིན་པོ་ཆེ་ལ་སོགས་པ་རང་རང་གིས་བོན་གྱིས་མཚན་པ་ལས། དཔག་ཏུ་མེད་པའི་འོད་ཟེར་འཕྲོས་ཞེས་པ་ནས། ཡོངས་སུ་གྱུར་པ་ལས་ཞེས་པའི་བར་སྔར་བཞིན་སྦྱར་ལ། ཏྲཱཾ་ལས་རིན་པོ་ཆེ་ཏྲཱཾ་གྱིས་མཚན་པ་ལས། རྒྱལ་མཆོག་རིན་ཆེན་སྐུ་མདོག་སྔོན་པོ་གཡས་མཆོག་སྦྱིན་གཡོན་ཏིང་ངེ་འཛིན་གྱི་ཕྱག་རྒྱས་རིན་པོ་ཆེ་མརྒད་ཆ་དགུ་པ་བསྣམས་པ། ༀ་སརྦྦ་བིད་ཕཊ། ཐུགས་ཀ་ནས་ཕྱུང་ལྷོའི་གདན་གྱི་སྟེང་དུ་འཁོད། ཧྲཱིཿ ལས་པདྨ་ཧྲཱིཿ ས་མཚན་པ་ལས། ཤཱཀྱ་རིགས་དབང་དམར་སེར་ཕྱག་གཉིས་ཏིང་ངེ་འཛིན་གྱི་ཕྱག་རྒྱས་རྡོ་རྗེས་མཚན་པའི་པདྨ་བསྣམས་པ། ༀ་སརྦྦ་བིད་ཨཱཿ ཐུགས་ཀ་ནས་ཕྱུང་ནུབ་ཀྱི་གདན་གྱི་སྟེང་དུ་འཁོད།ཨཿ ལས་སྣ་ཚོགས་རྡོ་རྗེ་ཨཿ ས་མཚན་པ་ལས། མེ་ཏོག་ཆེར་རྒྱས་ལྗང་གུ་གཡས་སྐྱབས་སྦྱིན་གྱི་ཕྱག་རྒྱས་སྣ་ཚོགས་རྡོ་རྗེ་བསྣམས་ཤིང་གཡོན་ཏིང་ངེ་འཛིན་གྱི་ཕྱག་རྒྱ་མཛད་པ། ༀ་སརྦྦ་བིད་དྲཊ། ཐུགས་ཀ་ནས་ཕྱུང་བྱང་གི་གདན་གྱི་སྟེང་དུ་འཁོད། དེ་བཞིན་གཤེགས་པ་བཞི་པོ་ཡང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། དར་ལའི་སྟོད་གཡོགས་དང་སྨད་གཡོགས་ཅན། ཞི་
བའི་གཟིགས་སྟངས་མཛད་ཅིང་རྡོ་རྗེའི་སྐྱིལ་ཀྲུང་གིས་བཞུགས་པ་ཉི་མའི་འོད་ཀྱི་རྒྱབ་ཡོལ་མངའ་བ། ཧཱུཾ་ལས་སྤྱན་གྱིས་སྤྲས་པའི་འཁོར་ལོ་ཧཱུཾ་གིས་མཚན་པ་ལས་སྤྱན་མ་དཀར་མོ་ཕྱག་གཡས་ཐུགས་ཀར་སྤྱན་འཛིན་པ། ༀ་བུདྡྷ་ལོ་ཙ་ནེ་ཧཱུཾ། ཐུགས་ཀ་ནས་ཕྱུང་ཤར་ལྷོའི་གདན་གྱི་སྟེང་དུ་འཁོད། ཏྲཱཾ་ལས་རྡོ་རྗེ་ཏྲཱཾ་གྱིས་མཚན་པ་ལས། མཱ་མ་ཀཱི་སྔོན་མོ་གཡས་རྡོ་རྗེ་ཐུགས་ཀར་འཛིན་པ། ༀ་བཛྲ་མཱ་མ་ཀཱི་ཏྲཱཾ། ཐུགས་ཀ་ནས་ཕྱུང་ལྷོ་ནུབ་ཀྱི་གདན་གྱི་སྟེང་དུ་འཁོད། ཧྲཱིཿ ལས་པདྨ་ཧྲཱིཿ ས་མཚན་པ་ལས། གོས་དཀར་མོ་དམར་མོ་གཡས་པདྨ་འཛིན་པ། ༀ་བཛྲ་པཱཎྚ་རེ་དེ་ཧི་དེ་ཧི་སིདྡྷི་ལོ་ཀོཏྟ་ར່་པཱ་སྭཱ་ཧཱ། ཐུགས་ཀ་ནས་ཕྱུང་ནུབ་བྱང་གི་གདན་གྱི་སྟེང་དུ་འཁོད། ཨཱཿ ལས་ཨུཏྤལ་ཨཱཿ ས་མཚན་པ་ལས། སྒྲོལ་མ་ལྗང་གུ་གཡས་ཨུཏྤལ་འཛིན་པ། ༀ་བཛྲ་ཏཱ་རེ་ཏུཏྟཱ་རེ་ཏུ་རེ་ཧཱུཾ་ཧཱུཾ་ཧཱུཾ་སྭ་སྭ་སྭ་ཧཱ། ཐུགས་ཀ་ནས་ཕྱུང་བྱང་ཤར་གྱི་གདན་གྱི་སྟེང་དུ་འཁོད། བཞི་ཀའང་གཡོན་པ་གདན་ལ་བརྟེན་པའོ། །ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས་རྡོ་རྗེ་སེམས་དཔའ་དཀར་པོ་ཕྱག་གཡས་པའི་སོར་མོ་གསུམ་བསྒྲེངས་པའི་དབུས་མའི་རྩེ་མོ་ལ་དང་པོའི་རྡོ་རྗེ་རྩེ་ལྔ་པ་རང་གི་ཐུགས་ཀར་གཏོད་པའི་ཚུལ་གྱིས་འཛིན་ཞིང་། གཡོན་རྡོ་རྗེ་ཁུ་ཚུར་གྱིས་དྲིལ་བུ་ཁ་ནང་དུ་བསྟན་ཏེ་སྙེམས་པའི་ཚུལ་གྱིས་དཀུར་བརྟེན་པ། ༀ་བཛྲ་སཏྭ་ཧཱུཾ་ཐུགས་ཀ་ནས་ཕྱུང་ཤར་གྱི་རྩིབས་དང་པོའི་གདན་ལ་འཁོད།ཛཿ ལས་ལྕགས་ཀྱུ་ཛཿ ས་མཚན་པ་ལས། རྡོ་རྗེ་རྒྱལ་པོ་གསེར་མདོག་ཕྱག་གཉིས་རྡོ་རྗེ་ལྕགས་ཀྱུས་དེ་བཞིན་གཤེགས་པ་ཐམས་
ཅད་སྤྱན་འདྲེན་པར་མཛད་པ། ༀ་བཛྲ་རཱ་ཛ་ཛཿ ཐུགས་ཀ་ནས་ཕྱུང་རྩིབས་གཉིས་པའི་གདན་ལ་འཁོད། ཧོཿ ལས་མདའ་གཞུ་ཧོཿ ས་མཚན་པ་ལས། རྡོ་རྗེ་ཆགས་པ་དམར་པོ་རྡོ་རྗེས་མཚན་པའི་མདའ་ཨཏྤལ་དམར་པོ་ཁ་མ་ཕྱེ་བའི་མདེའུ་ཅན་རྡོ་རྗེའི་གཞུ་རྣ་བའི་བར་དུ་བཀང་ནས་དེ་བཞིན་གཤེགས་པ་རྣམས་འབིགས་པར་མཛད་པ། ༀ་བཛྲ་རཱ་ག་ཧོཿ ཐུགས་ཀ་ནས་ཕྱུང་རྩིབས་གསུམ་པའི་གདན་ལ་འཁོད། དྷཱུ་ལས་རྡོ་རྗེ་རྩེ་ལྔ་པ་དྷཱུས་མཚན་པ་ལས། རྡོ་རྗེ་ལེགས་པ་ལྗང་གུ་དང་པོའི་རྡོ་རྗེ་རྩེ་ལྔ་པ་གཉིས་བསྣམས་ནས་ལེགས་སོ་སྦྱིན་པའི་ཚུལ་གྱིས་དེ་བཞིན་གཤེགས་པ་རྣམས་མཉེས་པར་མཛད་པ། ༀ་བཛྲ་སཱ་དྷུ་དྷཱུ། ཐུགས་ཀ་ནས་ཕྱུང་རྩིབས་བཞི་པའི་གདན་ལ་འཁོད། ཏྲ່ཱ་ལས་རིན་པོ་ཆེ་ཏྲཱཾ་གྱིས་མཚན་པ་ལས། རྡོ་རྗེ་རིན་ཆེན་སེར་པོ་ཕྱག་གཡས་རྡོ་རྗེ་རིན་པོ་ཆེ་རང་གི་དབང་བསྐུར་བའི་གནས་སུ་འཇོག་ཅིང་། གཡོན་རྡོ་རྗེ་ཁུ་ཚུར་གྱིས་དྲིལ་བུ་ཁ་ནང་དུ་བསྟན་ཏེ་སྙེམས་པའི་ཚུལ་གྱིས་དཀུར་བརྟེན་པ། ༀ་བཛྲ་རཏྣ་ཏྲཱཾ། ཐུགས་ཀ་ནས་ཕྱུང་ལྷོའི་རྩིབས་དང་པོའི་གདན་ལ་འཁོད། བྱ་ལས་ཉི་མ་བྱས་མཚན་པ་ལས། རྡོ་རྗེ་གཟི་བརྗིད་ཉི་མའི་མདོག་ཅན། ཕྱག་གཡས་ཀྱིས་ཉི་མའི་དཀྱིལ་འཁོར་ལྟེ་བ་ན་རྡོ་རྗེ་རྩེ་ལྔ་པ་ཡོད་པའི་འོད་ཀྱིས་དེ་བཞིན་གཤེགས་པ་ཐམས་ཅད་སྣང་བར་མཛད་པ་ཐུགས་ཀར་འཛིན་ཅིང་གཡོན་པ་གདན་ལ་བརྟེན་པ། ༀ་བཛྲ་ཏེ་ཛ་རྱ། ཐུགས་ཀ་ནས་ཕྱུང་རྩིབས་གཉིས་པའི་གདན་ལ་འཁོད། བྷྲི་ལས་རྒྱལ་མཚན་
བྷྲིས་མཚན་པ་ལས། རྡོ་རྗེ་རྒྱལ་མཚན་སྔོན་པོ་ཕྱག་གཡས་དང་པོའི་རྡོ་རྗེས་མཚན་པའི་ཡིད་བཞིན་གྱི་ནོར་བུའི་ཏོག་ཅན་གྱི་རྒྱལ་མཚན་དར་དང་མུ་ཏིག་གི་ཆུན་འཕྱང་ལ་སོགས་པའི་རྒྱན་གྱིས་སྤྲས་པ་ཕྲག་པའི་ཕྱོགས་སུ་བསྒྲེང་བའི་ཚུལ་གྱིས་འཛིན་པས་དེ་བཞིན་གཤེགས་པ་ཐམས་ཅད་སྦྱིན་པའི་ཕ་རོལ་ཏུ་ཕྱིན་པ་ལ་ངེས་པར་སྦྱོར་བར་མཛད་ཅིང་གཡོན་པ་གདན་ལ་བརྟེན་པ། ༀ་བཛྲ་ཀེ་ཏུ་བྷྲི། ཐུགས་ཀ་ནས་ཕྱུང་རྩིབས་གསུམ་པའི་གདན་ལ་འཁོད། ཧཱ་ལས་སོའི་ཕྲེང་བ་ཧཱས་མཚན་པ་ལས། རྡོ་རྗེ་བཞད་པ་དུང་དང་པདྨའི་རྩ་བ་ལྟར་དཀར་བ་ཕྱག་གཡས་ཀྱིས་རྡོ་རྗེ་རྩེ་ལྔ་པ་གཉིས་ཀྱི་དབུས་སུ་ཆུད་པའི་སོའི་ཕྲེང་བ་གཉིས་ཁ་འགྲམ་གཡས་སུ་འཛིན་པས་དེ་བཞིན་གཤེགས་པ་ཐམས་ཅད་འཛུམ་པ་རྨད་དུ་བྱུང་བ་ལ་ངེས་སྦྱོར་ཞིང་གཡོན་པ་གདན་ལ་བརྟེན་པ། ༀ་བཛྲ་ཧཱ་ས་ཧཱ། ཐུགས་ཀ་ནས་ཕྱུང་རྩིབས་བཞི་པའི་གདན་ལ་འཁོར། ཧྲཱིཿ ལས་པདྨ་ཧྲཱིཿ ས་མཚན་པ་ལས། རྡོ་རྗེ་ཆོས་དཀར་དམར་ཕྱག་གཡོན་བསྙེམས་པ་དང་བཅས་པས་རྡོ་རྗེ་པདྨའི་སྡོང་བུ་དཀུར་བརྟེན་ཅིང་། གཡས་པའི་རྡོ་རྗེ་ཁུ་ཚུར་གྱི་མཐེབ་མཛུབ་གཉིས་ཀྱིས་སྙིང་གར་རྡོ་རྗེ་པདྨའི་འདབ་མ་ཁ་འབྱེད་པ། ༀ་བཛྲ་དྷརྨྨཱཿ ཧྲཱིཿ ཐུགས་ཀ་ནས་ཕྱུང་ནུབ་ཀྱི་རྩིབས་དང་པོའི་གདན་ལ་འཁོད།དྷཱིཿ ལས་རལ་གྲི་དྷཱིཿ ས་མཚན་པ་ལས། རྡོ་རྗེ་རྣོན་པོ་སྔོན་པོ་ཕྱག་གཡོན་པའི་རྡོ་རྗེ་ཁུ་ཚུར་གྱིས་ཐུགས་ཀར་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་བསྣམས་ཤིང་། གཡས་པའི་རྡོ་རྗེ་རལ་གྲི་དེ་བཞིན་གཤེགས་
པ་ཐམས་ཅད་ལ་འདེབས་པའི་ཚུལ་དུ་མཛད་པ། ༀ་བཛྲ་ཏཱིཀྵྞ་དྷཱིཿ ཐུགས་ཀ་ནས་ཕྱུང་རྩིབས་གཉིས་པའི་གདན་ལ་འཁོད། ཀྲུཾ་ལས་འཁོར་ལོ་ཀྲུཾ་གིས་མཚན་པ་ལས། རྡོ་རྗེ་རྒྱུ་གསེར་གྱི་མདོག་ཅན་ཕྱག་གཡས་པའི་གུང་མོའི་རྩེ་མོ་ན་དང་པོའི་རྡོ་རྗེས་མཚན་པའི་རྡོ་རྗེ་རྩེ་གཅིག་པའི་རྩིབས་ཅན་གྱི་འཁོར་ལོ་རྩིབས་བརྒྱད་པ་བསྐོར་བའི་ཚུལ་དུ་འཛིན་ཅིང་གཡོན་པ་གདན་ལ་བརྟེན་པ། ༀ་བཛྲ་ཧེ་ཏུ་ཀྲུཾ། ཐུགས་ཀ་ནས་ཕྱུང་རྩིབས་གསུམ་པའི་གདན་ལ་འཁོད། བྷ་ལས་ལྕེ་བྷས་མཚན་པ་ལས། རྡོ་རྗེ་སྨྲ་བ་ཟངས་ཀྱི་མདོག་ཅན་ཕྱག་གཡས་པ་དང་པོའི་རྡོ་རྗེས་མཚན་པའི་ལྕེ་བསྣམས་ནས་དེ་བཞིན་གཤེགས་པ་རྣམས་དང་སྨྲ་བར་མཛད་ཅིང་གཡོན་པ་གདན་ལ་བརྟེན་པ། ༀ་བཛྲ་བྷ་ཥ་བྷ། ཐུགས་ཀ་ནས་ཕྱུང་རྩིབས་བཞི་པའི་གདན་ལ་འཁོད། ཀཾ་ལས་སྣ་ཚོགས་རྡོ་རྗེ་ཀཾ་གིས་མཚན་པ་ལས། རྡོ་རྗེ་ལས་ཞལ་དང་བྱིན་པ་གཉིས་ནས་ཞབས་ཀྱི་བར་དཀར་པོ་ཞལ་གྱི་འོག་ནས་རྐེད་པའི་བར་དུ་དམར་སྐྱ། རྐེད་པའི་བར་དང་ཕྱག་གཉིས་སྔོ་སྐྱ། བརླ་གཉིས་སེར་སྐྱ། ལྷག་མ་མདོག་སྔོན་པོ་སྣ་ཚོགས་མདོག་གཞན་རྣམས་ཀྱང་འདི་དང་འདྲའོ། །ཕྱག་གཡས་པ་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་ཐུགས་ཀར་གཏོད་པའི་ཚུལ་གྱིས་འཛིན་ཅིང་གཡོན་སྙེམས་པ་དང་བཅས་པས་སྣ་ཚོགས་རྡོ་རྗེ་ཡུ་བ་བྱས་པའི་དྲིལ་བུ་ཁ་ནང་དུ་བསྟན་ནས་དཀུར་བརྟེན་པ། ༀ་བཛྲ་ཀརྨཱཿ ཀཾ །ཐུགས་ཀ་ནས་ཕྱུང་བྱང་གི་རྩིབས་དང་པོའི་གདན་ལ་འཁོད། རཾ་ལས་གོ་
ཆ་རཾ་གྱིས་མཚན་པ་ལས། རྡོ་རྗེ་སྲུང་བ་གསེར་གྱི་མདོག་ཅན་ཕྱག་གཉིས་ཀྱིས་མཐའ་གཉིས་སུ་རྡོ་རྗེ་རྩེ་ལྔ་པས་མཚན་པའི་རྡོ་རྗེའི་གོ་ཆ་བསྣམས་ནས་དེ་བཞིན་གཤེགས་པ་ཐམས་ཅད་ལ་གོ་བསྐོན་པའི་ཚུལ་དུ་མཛད་པ། ༀ་བཛྲ་རཀྵ་རཾ། ཐུགས་ཀ་ནས་ཕྱུང་རྩིབས་གཉིས་པའི་གདན་ལ་འཁོད། ཀྵཾ་ལས་མཆེ་བ་ཀྵཾ་གིས་མཚན་པ་ལས། རྡོ་རྗེ་གནོད་སྦྱིན་ནག་པོ་ལྟོ་བ་ཡངས་ཤིང་ཞལ་མཆེ་བ་གཙིགས་པ། ཁྲོ་བོའི་རྡོ་རྗེ་རྩེ་ལྔ་པས་རྩ་བར་མཚན་པའི་མཆེ་བ་ཞལ་གྱི་གྲྭ་གཉིས་སུ་འཛིན་པས་དེ་བཞིན་གཤེགས་པ་ཐམས་ཅད་ལ་བསྡིགས་པའི་ཚུལ་དུ་མཛད་པ། ༀ་བཛྲ་ཡཀྵ་ཀྵཾ། ཐུགས་ཀ་ནས་ཕྱུང་རྩིབས་གསུམ་པའི་གདན་ལ་འཁོད། ཥྚཾ་ལས་རྡོ་རྗེ་ཥྚཾ་གྱིས་མཚན་པ་ལས། རྡོ་རྗེ་ཁུ་ཚུར་སེར་པོ་དམ་ཚིག་གི་རྡོ་རྗེ་ཁུ་ཚུར་གྱིས་དང་པོའི་རྡོ་རྗེ་རྩེ་ལྔ་པ་འཚིར་བའི་ཚུལ་གྱིས་བཞུགས་པ། ༀ་བཛྲ་སནྡྷི་ཥྚཾ། ཐུགས་ཀ་ཕྱུང་རྩིབས་བཞི་པའི་གདན་ལ་འཁོད། ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། སྒེག་མོ་དཀར་མོ་ཕྱག་གཉིས་ཀྱིས་རྡོ་རྗེ་རྩེ་ལྔ་པ་གཉིས་སྙེམས་པའི་ཚུལ་གྱིས་མཛིན་ཅིང་མགོ་གཡོན་དུ་ཅུང་ཟད་འདུད་པ། ༀ་བཛྲ་ལཱ་སྱ་ཧཱུཾ། ཐུགས་ཀ་ནས་ཕྱུང་ཤར་ལྷོའི་ནང་གི་གྲྭའི་གདན་ལ་འཁོད། ཏྲཱཾ་ལས་རིན་པོ་ཆེའི་ཕྲེང་བ་ཏྲཱཾ་གྱིས་མཚན་པ་ལས། ཕྲེང་བ་མ་སེར་མོ་རྡོ་རྗེ་རིན་པོ་ཆེའི་ཕྲེང་བས་དེ་བཞིན་གཤེགས་པ་ཐམས་ཅད་ལ་དབང་བསྐུར་བར་མཛད་པ། ༀ་བཛྲ་མཱ་ལེ་ཏྲཱཾ། ཐུགས་ཀ་ནས་ཕྱུང་ལྷོ་ནུབ་ཀྱི་ནང་གི་གྲྭའི་གདན་ལ་འཁོད།ཧྲཱིཿ ལས་པི་ཝཾ་ཧྲཱིཿ ས་མཚན་པ་ལས། གླུ་མ་དཀར་དམར་ཕྱག་
གཉིས་རྡོ་རྗེ་མཚན་པའི་པི་ཝཾ་བརྡུང་པ་ལ་བརྩོན་པ། ༀ་བཛྲ་གཱིརྟི་ཧྲཱིཿ ཐུགས་ཀ་ནས་ཕྱུང་ནུབ་བྱང་གི་ནང་གི་གྲྭའི་གདན་ལ་འཁོད། ཨཿ ལས་རྡོ་རྗེ་རྩེ་གསུམ་པ་ཨཿ ས་མཚན་པ་ལས། གར་མ་སྣ་ཚོགས་མདོག་ཕྱག་གཉིས་ཀྱིས་རྡོ་རྗེ་རྩེ་གསུམ་པ་གཉིས་བསྣམས་ནས་གར་བྱེད་པ། ༀ་བཛྲ་ནྲྀ་ཏྱ་ཨཱཿ ཐུགས་ཀ་ནས་ཕྱུང་བྱང་ཤར་གྱི་ནང་གི་གྲྭའི་གནད་ལ་འཁོད། ཧཱུཾ་ལས་སྤོས་སྣོད་ཧཱུཾ་གིས་མཚན་པ་ལས། བདུག་པ་མ་དམར་མོ་ཕྱག་གཉིས་རྡོ་རྗེ་རྩེ་ལྔ་པས་མཚན་པའི་སྤོས་སྣོད་བསྣམས་ནས་དེ་བཞིན་གཤེགས་པ་ཐམས་ཅད་ཚིམ་པར་མཛད་པ། ༀ་བཛྲ་དྷཱུ་པེ་ཧཱུཾ་ཐུགས་ཀ་ནས་ཕྱུང་ཤར་ལྷོའི་ཕྱིའི་གྲྭའི་གདན་ལ་འཁོད། ཏྲཱཾ་ལས་མེ་ཏོག་གི་སྣོད་ཏྲཱཾ་གྱིས་མཚན་པ་ལས། མེ་ཏོག་མ་སེར་མོ་ཕྱག་གཡོན་རྡོ་རྗེ་མེ་ཏོག་གི་སྣོད་འཛིན་ཅིང་གཡས་མེ་ཏོག་གི་ཆར་འབེབས་པར་མཛད་པ། ༀ་བཛྲ་པུཥྤེ་ཏྲཱཾ་ཐུགས་ཀ་ནས་ཕྱུང་ལྷོ་ནུབ་ཀྱི་ཕྱིའི་གྲྭའི་གདན་ལ་འཁོད། ཧྲཱིཿ ལས་མར་མེའི་སྡོང་བུ་ཧྲཱིཿ ས་མཚན་པ་ལས། མར་མེ་མ་དཀར་དམར་ཕྱག་གཉིས་ཀྱིས་རྡོ་རྗེ་མར་མེའི་སྡོང་བུ་བསྣམས་ཏེ་དེ་བཞིན་གཤེགས་པ་རྣམས་སྣང་བའི་ཚོགས་ཀྱིས་མཆོད་པར་མཛད་པ། ༀ་བཛྲ་ཨཱ་ལོ་ཀེ་ཧྲཱིཿ ཐུགས་ཀ་ནས་ཕྱུང་ནུབ་བྱང་གི་ཕྱིའི་གྲྭའི་གདན་ལ་འཁོད། ཨཱཿ ལས་དྲིའི་དུང་ཕོར་ཨཱཿ ས་མཚན་པ་ལས། བྱུག་པ་མ་སྣ་ཚོགས་མདོག་ཕྱག་གཡོན་རྡོ་རྗེས་མཚན་པའི་དྲིའི་དུང་ཕོར་བསྣམས་ཏེ་ཕྱག་གཡས་ཀྱིས་དྲིའི་སྤྲིན་གྱིས་དེ་བཞིན་གཤེགས་པ་རྣམས་མཆོད་པར་མཛད་པ། ༀ་
བཛྲ་གནྡྷེ་ཨཿ ཐུགས་ཀ་ནས་ཕྱུང་བྱང་ཤར་གྱི་ཕྱིའི་གྲྭའི་གདན་ལ་འཁོད། ཛཿ ལས་ལྕགས་ཀྱུ་ཛཿ ས་མཚན་པ་ལས། རྡོ་རྗེ་ལྕགས་ཀྱུ་དཀར་པོ་ཕྱག་གཉིས་ཀྱིས་རྡོ་རྗེས་མཚན་པའི་ལྕགས་ཀྱུ་བསྣམས་ནས་དེ་བཞིན་གཤེགས་པ་རྣམས་སྤྱན་འདྲེན་པར་མཛད་པ། ༀ་བཛྲ་ཨཾ་ཀུ་ཤ་ཛཿ ཐུགས་ཀ་ནས་ཕྱུང་ནང་གི་ཤར་སྒོའི་གདན་ལ་འཁོད། ཧཱུཾ་ལས་ཞགས་པ་ཧཱུཾ་གིས་མཚན་པ་ལས། རྡོ་རྗེ་ཞགས་པ་སེར་པོ་ཕྱག་གཉིས་རྡོ་རྗེ་ཞགས་པས་དེ་བཞིན་གཤེགས་པ་རྣམས་འཇུག་པར་མཛད་པ། ༀ་བཛྲ་པཱ་ཤ་ཧཱུཾ། ཐུགས་ཀ་ནས་ཕྱུང་ལྷོ་སྒོའི་གདན་ལ་འཁོད། བཾ་ལས་ལྕགས་སྒྲོག་བཾ་གྱིས་མཚན་པ་ལས། རྡོ་རྗེ་ལྕགས་སྒྲོག་དཀར་དམར་ཕྱག་གཉིས་རྡོ་རྗེའི་ལྕགས་སྒྲོག་གིས་དེ་བཞིན་གཤེགས་པ་རྣམས་མཆིང་བར་མཛད་པ། ༀ་བཛྲ་སྥོ་ཊ་བཾ། ཐུགས་ཀ་ནས་ཕྱུང་ནུབ་སྒོའི་གདན་ལ་འཁོད། ཧོཿ ལས་རྡོ་རྗེ་དྲིལ་བུ་ཧོཿ ས་མཚན་པ་ལས། རྡོ་རྗེ་འབེབས་པ་སྣ་ཚོགས་མདོག་ཕྱག་གཡས་རྡོ་རྗེ་དྲིལ་བུ་བསྣམས་ཏེ་དེ་བཞིན་གཤེགས་པ་རྣམས་འབེབས་པར་མཛད་ཅིང་གཡོན་པ་གདན་ལ་བརྟེན་པ། ༀ་བཛྲ་གྷཎྚ་ཧོཿ ཐུགས་ཀ་ནས་ཕྱུང་བྱང་སྒོའི་གདན་ལ་འཁོད། སྤྱན་མ་ནས་འབེབས་པའི་བར་ཐམས་ཅད་ཀྱང་རབ་ཏུ་དགྱེས་པས་སྤྱན་གདངས་པ། སྒེག་པའི་ཉམས་ཅན་འཛུམ་པ་དང་བཅས་པ། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་ཅིང་དར་དཀར་པོའི་སྟོད་གཡོགས་དང་སྨད་གཡོགས་དང་བཅས་པ། སེམས་དཔའི་སྐྱིལ་མོ་ཀྲུང་གིས་བཞུགས་པ་ཟླ་བའི་འོད་ཀྱི་རྒྱབ་ཡོལ་ཅན། རང་གི་ཐུགས་
ཀར་ཟླ་བའི་དཀྱིལ་འཁོར་གྱི་དབུས་སུ། ཀལྤ་བྷ་དྲའི་མིང་ཡིག་དང་པོ་ཐིག་ལེས་བརྒྱན་པ་ལས་དང་པོའི་རྡོ་རྗེ་བཞི། རྡོ་རྗེ་རིན་པོ་ཆེ་བཞི། རྡོ་རྗེ་པདྨ་བཞི། སྣ་ཚོགས་རྡོ་རྗེ་བཞི་སྟེ་ཕྱག་མཚན་བཅུ་དྲུག་ཀལྤ་བྷ་དྲའི་མིང་ཡིག་དང་པོ་ཐིག་ལེས་བརྒྱན་པས་མཚན་པ་ལས། དཔག་ཏུ་མེད་པའི་འོད་ཟེར་འཕྲོས་གཞལ་དུ་མེད་པའི་སེམས་ཅན་གྱི་དོན་མཛད་པ་བཅུ་གཉིས་ཀྱི་ཚུལ་དུ་མཛད། སླར་འདུས་ཆོས་ཀྱི་ཡི་གེ་ལ་ཐིམ། ཡོངས་སུ་གྱུར་པ་ལས་བསྐལ་བཟང་གི་སེམས་དཔའ་བཅུ་དྲུག་ཏུ་གྱུར། ༀ་སརྦ་སཾ་སྐ་ར་པ་རི་ཤོ་དྷ་ན་དྷརྨྨཱ་ཏེ་ག་ག་ན་ས་མུད་ག་ཏེ་མ་ཧཱ་ནཱ་ཡ་པ་རི་ཝཱ་རེ་སྭཱ་ཧཱ།ཐུགས་ཀ་ནས་ཕྱུང་རྟ་བབས་དང་ལྡན་པའི་གཞལ་ཡས་ཁང་གི་ཁྱམས་ཀྱི་ལྷ་སྣམ་ནང་མའི་གདན་ལ་འཁོད་པ་ནི། ཤར་དུ་བྱམས་པ། མཐོང་བ་དོན་ཡོད། ངན་སོང་ཀུན་འདྲེན། མྱ་ངན་དང་མུན་པ་ངེས་པར་འཇོམས་པའི་བློ་གྲོས་བཞི་རྡོ་རྗེ་སེམས་དཔའ་དང་འདྲ་བ། ལྷོར་སྤོས་ཀྱི་གླང་པོ། དཔའ་བར་འགྲོ་བ། ནམ་མཁའ་མཛོད། ཡེ་ཤེས་ཏོག་བཞི་རྡོ་རྗེ་རིན་ཆེན་དང་འདྲ་བ། ནུབ་ཏུ་འོད་དཔག་མེད། ཟླ་འོད། བཟང་སྐྱོང་། དྲ་བ་ཅན་གྱི་འོད་བཞི་རྡོ་རྗེ་ཆོས་དང་འདྲ་བ། བྱང་དུ་རྡོ་རྗེ་སྙིང་པོ། བློ་གྲོས་མི་ཟད་པ། སྤོབས་པ་བརྩེགས་པ། ཀུན་ཏུ་བཟང་པོ་བཞི་རྡོ་རྗེ་ལས་དང་འདྲ་བ། ཐམས་ཅད་ཀྱང་རྒྱན་ལ་སོགས་པ་སེམས་དཔའ་དང་པོ་བཞི་དང་འདྲ་བའོ། །དཔག་ཏུ་མེད་པའི་འོད་ཟེར་འཕྲོས་ཞེས་པ་ནས་ཡོངས་སུ་
གྱུར་པ་ལས་ཞེས་པའི་བར་འོག་མ་ཀུན་ལའང་སྦྱར་ཏེ། རང་གི་ཐུགས་ཀར་ཟླ་བའི་དཀྱིལ་འཁོར་གྱི་དབུས་སུ། ཤྲ་ཝ་ཀའི་མིང་ཡིག་དང་པོ་ཐིག་ལེས་བརྒྱན་པ་ལས་འཁར་གསིལ་བཅུ་དྲུག་ཤྲ་ཝ་ཀའི་མིང་ཡིག་དང་པོ་ཐིག་ལེས་བརྒྱན་པས་མཚན་པ་ལས། ཉན་ཐོས་བཅུ་དྲུག་ཏུ་གྱུར། ༀ་བཛྲ་ཤྲ་ཝ་ཀ །ཐུགས་ཀ་ནས་ཕྱུང་ལྷ་སྣམ་བར་པའི་གདན་ལ་འཁོད་པ་ནི། ཤར་དུ་དགའ་བོ། སྒྲ་གཅན་འཛིན། ཤཱ་རིའི་བུ། མཽ་དགལ་གྱི་བུ། ལྷོར་རབ་འབྱོར། འཆར་ཀ ། མ་འགག་པ། ཀཽ་དི་ནྱ། ནུབ་ཏུ་ཉེ་བར་འཁོར། རྟ་ཐུལ། བ་ལང་བདག །ཀུན་དགའ་བོ། བྱང་དུ་མིང་ཆེན། ནོར་སྦྱིན་འཛིན། གང་པོ། འོད་སྲུངས། རང་གི་ཐུགས་ཀར་ཟླ་བའི་དཀྱིལ་འཁོར་གྱི་དབུས་སུ། པྲ་ཏཱེ་ཀའི་མིང་ཡིག་དང་པོ་ཐིག་ལེས་བརྒྱན་པ་ལས་འཁར་གསིལ་བཅུ་གཉིས། པྲ་ཏཱེ་ཀའི་མིང་ཡིག་དང་པོ་ཐིག་ལེས་བརྒྱན་པས་མཚན་པ་ལས། རང་རྒྱལ་བཅུ་གཉིས་སུ་གྱུར།བཛྲ་པྲ་ཏྱེ་ཀ ཐུགས་ཀ་ནས་ཕྱུང་ལྷ་སྣམ་ཕྱི་མའི་གདན་ལ་འཁོད་པ་ནི། ཤར་དུ་གདུང་བ་སེལ་བ། སྣང་བ་བརྩེགས་པ། ཤར་ལྷོར་འཇིགས་པ་མེད་པ། ལྷོར་དཔའ་བོ་འདུལ་བ། ཤེས་རབ་མགྱོགས་ཆེན། ལྷོ་ནུབ་ཏུ་རི་བོ་རྒྱལ་བ། ནུབ་ཏུ་སྨྲ་བའི་སྒྲ་ཆེན། བསེ་རུ་ལྟ་བུ། ནུབ་བྱང་དུ་དུག་ཆེན་འཇོམས། བྱང་དུ་རྫུ་འཕྲུལ་ཆེན་སྟོན། སེང་གེ་སྒྲ། བྱང་ཤར་དུ་ཡིད་མྱུར། ཉན་རང་ཐམས་ཅད་སྐུ་མདོག་མ་ངེས་པ་ཕྱག་ན་ལྷུང་བཟེད་འཁར་གསིལ་དང་པོ་ཏི་འཛིན་པ། ཆོས་གོས་ངུར་སྨྲིག་གསོལ་བ། ཁྱད་པར་རང་རྒྱལ་རྣམས་དབུའི་གཙུག་ཏོར་ཅུང་
ཟད་དང་བཅས་པ། རང་གི་ཐུགས་ཀར་ཟླ་བའི་དཀྱིལ་འཁོར་གྱི་དབུས་སུ། བཛྲ་ཀྲོ་དྷའི་མིང་ཡིག་དང་པོ་ཐིག་ལེས་བརྒྱན་པ་ལས་རྡོ་རྗེ་ལ་སོགས་པའི་ཕྱག་མཚན་བཅུ་དྲུག་བཛྲ་ཀྲོ་དྷའི་མིང་ཡིག་དང་པོ་ཐིག་ལེས་བརྒྱན་པ་ལས། ཁྲོ་བོ་བཅུ་དྲུག་ཏུ་གྱུར།བཛྲ་ཀྲོ་དྷ་ཐུགས་ཀ་ནས་ཕྱུང་དཀྱིལ་འཁོར་ཕྱི་མའི་སྒོ་བཞིའི་གདན་ལ་འཁོད་པ་ནི། ཤར་སྒོར་ཁྲོ་བོ་འཇིག་རྟེན་གསུམ་སྣང་། དེའི་གཡས་སུ་བདུད་རྩི་འཁྱིལ་བ། གཡོན་དུ་དུས་ཀྱི་སྲིན་མོ། རྒྱབ་ཏུ་དུས་ཀྱི་ལྕགས་ཀྱུ་མ། ལྷོ་སྒོར་ཁྲོ་བོ་འཇིག་རྟེན་གསུམ་འདུལ། གཡས་སུ་དབྱུག་སྔོན་ཅན། གཡོན་དུ་དུས་ཀྱི་དབྱུག་པ་མ། རྒྱབ་ཏུ་དུས་ཀྱི་ཞབས་པ་མ། ནུབ་སྒོར་ཁྲོ་བོ་འཇིག་རྟེན་གསུམ་འཆིང་། གཡས་སུ་མི་གཡོ་བ། གཡོན་དུ་དུས་ཀྱི་མཚན་མོ། རྒྱབ་ཏུ་དུས་ཀྱི་ལྕགས་སྒྲོག་མ། བྱང་སྒོར་ཁྲོ་བོ་འཇིག་རྟེན་གསུམ་འཇིག །གཡས་སུ་རྟ་མགྲིན། གཡོན་དུ་དུས་ཀྱི་གནོད་སྦྱིན་མོ། རྒྱ་ཏུ་དུས་ཀྱི་དྲིལ་བུ་མ། ཐམས་ཅད་ཀྱང་སྐུ་མདོག་མ་ངེས་པའམ་ཕྱོགས་མདོག་དབུ་དང་ཕྱག་མཐའ་ཡས་པ། ཕྱག་གཡས་པ་རྣམས་ཀྱིས་མཚོན་ཆ་སྣ་ཚོགས་འཛིན་ཅིང་། གཡོན་པ་རྣམས་ཀྱིས་མགོ་ཐོད་ཤས་གང་བ་དང་། མ་རུངས་པའི་རྒྱུ་མ་དྲངས་ཏེ་ཞལ་ཏུ་གསོལ་བ། སྦྲུལ་དང་མི་སྡུག་པའི་རྒྱན་གྱིས་བརྒྱན་ཅིང་སྟག་གི་པགས་པས་སྨད་དཀྲིས་པ། གཡོན་བརྐྱང་གི་སྟབས་ཀྱིས་མ་རུངས་པའི་སྙིང་གར་མནན་པ། ཁྱད་པར་ལྕགས་ཀྱུ་མ་ལ་སོགས་པ་བཞི་རང་མིང་གི་མཚན་མ་ལྕགས་ཀྱུ་ལ་
སོགས་པ་འཛིན་པ། ལྷ་ཐམས་ཅད་ཀྱི་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུཾ་སྔོན་པོ། ལྷ་རང་རང་གི་ཐུགས་ཀར་ཟླ་བའི་སྟེང་དུ་ༀ་ལ་སོགས་པའི་རང་རང་གི་ས་བོན་གྱིས་མཚན་པ། དེ་རྣམས་ལས་འོད་ཟེར་འཕྲོས་པས། བཅོམ་ལྡན་འདས་ཀུན་རིག་གི་དཀྱིལ་འཁོར་ལས་སངས་རྒྱས་དང་བྱང་ཆུབ་སེམས་དཔས་བསྐོར་བ་ནམ་མཁར་སྤྱན་དྲངས། རྡོ་རྗེ་ཁུ་ཚུར་གཉིས་ཀྱི་མཛུབ་མོ་ལྕགས་ཀྱུ་ལྟར་བྱས་ལ། ལག་ངར་གཉིས་བསྣོལ་ཏེ་གུང་མོ་དང་མཐེ་བོང་གཉིས་ཀྱིས་སེ་གོལ་བརྡེབ་པ་རྡོ་རྗེ་བསྡུ་བའི་ཕྱག་རྒྱ་བྱས་ལ། བཛྲ་ས་མཱ་ཛཿ མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཡང་དག་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཞེས་སྤྱན་འདྲེན་བསྡུས་པའམ།ཡང་ན། བཅོམ་ལྡན་བསྐལ་པ་གྲངས་མེད་དུ་མ་རུ། །འགྲོ་ལ་བརྩེ་ཕྱིར་ཐུགས་རྗེས་རྣམ་སྦྱངས་ཤིང་། །སྨོན་ལམ་རྒྱ་ཆེན་དགོངས་པ་ཡོངས་རྫོགས་པ། །ཁྱེད་བཞེད་འགྲོ་དོན་མཛད་དུས་འདི་ལགས་ན། །དེ་ཕྱིར་ཆོས་དབྱིངས་ཕོ་བྲང་ལྷུན་གྲུབ་ནས། །རྫུ་འཕྲུལ་བྱིན་རླབས་སྣ་ཚོགས་སྟོན་མཛད་ཅིང་། །མཐའ་ཡས་སེམས་ཅན་ཚོགས་རྣམས་བསྒྲལ་བའི་ཕྱིར། །ཡོངས་དག་འཁོར་དང་བཅས་ཏེ་གཤེགས་སུ་གསོལ། །ཞེས་པ་དང་ཡང་སྤྲོ་ན། ཆོས་རྣམས་ཀུན་གྱི་དབང་ཕྱུག་གཙོ། །བཙོ་མ་གསེར་གྱི་མདོག་འདྲ་
ཞིང་། །ཉི་མ་ལས་ལྷག་གཟི་བརྗིད་ཆེ། །དད་པས་སྤྱན་ནི་དྲང་པར་བགྱི། །ཞི་ཞིང་ཐུགས་རྗེ་ཆེ་ལྡན་པ། །དུལ་ཞིང་བསམ་གཏན་ས་ལ་བཞུགས། །ཆོས་རྣམས་ཡེ་ཤེས་ཆགས་བྲལ་བ། །ཀུན་ཏུ་མི་བཟད་ནུས་པར་ལྡན། །ཚུར་སྤྱོན་ཚུར་སྤྱོན་ཞི་བདག་ལྷ། །ཐུབ་པའི་སྐྱེས་མཆོག་ཐམས་ཅད་མཁྱེན། །ཤིན་ཏུ་ལེགས་བྱས་གཟུགས་བརྙན་ནི། །མཆོད་པས་འདིར་ནི་གཤེགས་སུ་གསོལ། །འདིར་ནི་གཟུགས་དང་ལྷན་ཅིག་ཏུ། །འགྲོ་བའི་དོན་དུ་བཞུགས་ནས་ཀྱང་། །ནད་མེད་ཚེ་དང་དབང་ཕྱུག་དང་། །མཆོག་རྣམས་ལེགས་པར་སྩལ་དུ་གསོལ། །ཛཿ ཧཱུཾ་བཾ་ཧོཿ མ་ཧཱ་ཀ་རུ་ཎི་ཀཱ་ཨཱརྨ་ཀ་ཨེ་ཧྱེ་ཧི། ཞེས་སྤྱན་དྲངས་ལ། བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་ནས་ཀྱང་། །ཐུགས་ལ་དགོངས་ཤིང་གནང་བར་མཛོད། །བདེ་བར་གཤེགས་སོ་བཅོམ་ལྡན་འདས། །ཚུར་གཤེགས་འདིར་ནི་བཞུགས་སུ་གསོལ། །བདག་གི་མཆོད་ཡོན་བཞེས་ནས་ཀྱང་། །འདི་ཉིད་དུ་ནི་བཞུགས་སུ་གསོལ། །ༀ་སརྦྦ་ཏ་ཐཱ་ག་ཏ་ག་ག་ན་ས་མ་ཡེ་སྭཱ་ཧཱ། ཞེས་མཆོད་ཡོན་དབུལ།ཇི་ལྟར་བལྟམས་པ་ཙམ་གྱི་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱིའོ། །ༀ་སརྦྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། ཞེས་ཁྲུས་གསོལ། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་
ན། །དེ་སྲིད་བཅོམ་ལྡན་བཞུགས་སུ་གསོལ། །ༀ་ཀ་མ་ལ་ཡེ་སྟྭཾ། ཞེས་གདན་དབུལ། ༀ་བཛྲ་པཥྤེ་ཨཱཿ ཧཱུཾ། ཞེས་སོགས་ཉེར་སྤྱོད་སོགས་ཀྱིས་མཆོད་ནས། ༀ་བཛྲ་ཨཾ་ཀུ་ཤ་ཛཿ ༀ་བཛྲ་པཱ་ཤ་ཧཱུཾ། ༀ་བཛྲ་སྥོ་ཊ་བཾ། ༀ་བཛྲ་གྷཎྚ་ཧོཿ ཞེས་སྒོ་བ་བཞིའི་དམ་རྒྱས་དགུག་གཞུག་བཅིང་མཉེས་བྱ། ༀ་བཛྲ་ཡཀྵ་ཧཱུཾ་ཞེས་རྡོ་རྗེ་གནོད་སྦྱིན་གྱི་ལས་རྒྱས་ཕྱི་འབྲང་གི་བགེགས་བསྐྲད། ༀ་བཛྲ་རཀྵ་ཧཾ། རྡོ་རྗེ་སྲུང་བའི་ལས་རྒྱས་སྲུང་བ་བྱ། ༀ་པྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་པས་མཆོད་ཡོན་དབུལ། ཕྱག་འཚལ་བའམ་མཉམ་པའི་ཐལ་མོ་དཔྲལ་བར་སྦྱར་ལ། ༀ་སརྦྦ་བིད་ༀ། སྙིམ་པའི་ཕྱག་རྒྱ་མགྲིན་པར་བཞག་ལ། ༀ་སརྦྦ་བིད་ཨཱཿ རྡོ་རྗེ་ཐལ་མོ་སྦྱར་ནས་བརྐྱང་གུང་མོ་གཉིས་དང་ཐ་མ་བཞི་སྦྱར་ནས་སྙིང་གར་བཞག་ལ། ༀ་སརྦྦ་བིད་ཧཱུཾ། ཞེས་གནས་གསུམ་བྱིན་གྱིས་བརླབ་བོ། །དེ་ནས་ཕྱག་རྒྱ་བཞིས་རྒྱས་གདབ་པའི་དང་པོ་དམ་རྒྱ་ནི། ས་མ་ཡ་སྟྭཾ། ཞེས་པས་ལག་པ་བྱིན་གྱིས་བརླབས་ཏེ། རྡོ་རྗེ་བསྡམས་པ་བཅིངས་ལ། བཛྲ་ཌིཥྚི་མ་ཊ། ཞེས་པས་མིག་གཉིས་བྱིན་གྱིས་བརླབ། ལག་པ་གཡོན་ཐལ་མོ་གན་རྐྱལ་དུ་བཞག་ལ་དེའི་སྟེང་དུ་གཡས་པའང་དེ་བཞིན་དུ་བཞག་སྟེ་མཐེ་བོང་གཉིས་ལྟོ་སྤྲད་ལ་ཞི་བའི་ལྟ་བས་ལྟ་བ་ནི་ཏིང་ངེ་འཛིན་གྱི་ཕྱག་རྒྱ་སྟེ་རྣམ་སྣང་གི་དམ་རྒྱ་བཅིངས་ལ། ༀ་སརྦྦ་བིད་ཏྲེ་ཤྱ། ཞེས་ཡེ་ཤེས་པ་ལ་བལྟ། ཛཿ ཧཱུཾ་བཾ་ཧོ། དགུག་གཞུག་བཅིང་དབང་དུ་བྱ། ས་མ་ཡ་སྟྭཾ། རྒྱབ་ཏུ་ཉི་མའི་དཀྱིལ་འཁོར་བསྐྱེད།
ས་མ་ཡ་སྟྭཾ། ཨ་ཧཾ། རང་དང་གཉིས་སུ་མེད་པར་ང་རྒྱལ་བྱ། སརྦྦ་བིད། ཞེས་པའི་སྙིང་པོ་ལན་གསུམ་བརྗོད། ༀ་སརྦྦ་བིད་སརྦ་ཨཱ་ཝ་ར་ཎཱ་བི་ཤོ་དྷ་ནེ་ཧ་ན་ཧཱུཾ་ཕཊ། གཙོ་བོའི་སྔགས་ཀྱང་ལན་གསུམ་བརྗོད་དོ། །དེ་བཞིན་དུ་ས་མ་ཡ་སྟྭཾ། ནས་སྙིང་པོ་ལན་གསུམ་བརྗོད་པ་སྔར་བཞིན་བྱས་ལ། རྡོ་རྗེ་བསྡམས་པ་ལས་མཐེ་བོང་དང་མཐེའུ་ཆུང་གཉིས་བརྐྱང་མཛུབ་མོ་དང་སྲིན་ལག་གཉིས་པདྨ་འདྲ་བར་བཀུག་པ་སྦྱོང་རྒྱལ་གྱི་ཕྱག་རྒྱ་དང་། ༀ་སརྦྦ་བིད་ཧཱུཾ། དེ་ཉིད་ལས་མཛུབ་མོ་དང་སྲིན་ལག་གཉིས་རིན་པོ་ཆེ་འདྲ་བར་བྱས་པ་རྒྱལ་མཆོག་རིན་ཆེན་གྱི་ཕྱག་རྒྱ་དང་། ༀ་སརྦྦ་བིད་ཕཊ། མཐེའུ་ཆུང་དང་མཐེ་བོང་གཉིས་སོ་སོར་མཉམ་ལ་ལྷག་མ་རྣམས་བརྐྱང་བ་ཤཱཀྱ་རིགས་དབང་གི་ཕྱག་རྒྱ་དང་། ༀ་སརྦ་བིད་ཨཿ ལག་པ་གཡོན་པས་དེ་བཞིན་དུ་བསྒྱུར་ཞིང་བྱ་མེ་ཏོག་ཆེར་རྒྱས་ཀྱི་ཕྱག་རྒྱ་དང་། ༀ་སརྦྦ་བིད་ཏྲཊ། དེ་བཞིན་དུ། སུ་ར་ཏ་སྟྭཾ། བཛྲ་ཌིཥྚི་མ་ཊ། བུདྡྷ་ལོ་ཙ་ནེ་ཏྲི་ཤྱ། ཛཿ ཧཱུཾ་བཾ་ཧོཿ ས་མ་ཡ་སྟྭཾ། ཞེས་རྒྱབ་ཏུ་ཟླ་བའི་རྒྱབ་ཡོལ་བསྐྱེད། ས་མ་ཡ་སྟྭཾ། ཨ་ཧཾ་བུདྡྷ་ལོ་ཙ་ནེ། ཞེས་སྙིང་པོ་ལན་གསུམ། ༀ་བུདྡྷ་ལོ་ཙ་ནེ་ཧཱུཾ། ཞེས་སྔགས་ལན་གསུམ་བརྗོད། དེ་བཞིན་དུ་མཱ་མ་ཀཱི་ནས་ཁྲོ་བོ་བཅུ་དྲུག་གི་བར་ལ་སྦྱར་ཏེ། ཁྱད་པར་ནི། བཛྲ་མཱ་མ་ཀཱི། བཛྲ་པཎྜ་རེ། བཛྲ་ཏཱ་རེ་ཞེས་སོགས་རང་རང་གི་སྙིང་པོ་ལ་ཏྲི་ཤྱ་གདགས། ཨ་ཧཾ་གི་མཇུག་ཏུ་རང་རང་
གི་སྙིང་པོ་དང་སྔགས་ལན་གསུམ་གསུམ་བརྗོད་དོ། །རྡོ་རྗེ་སེམས་དཔའ་ནས་འབེབས་པའི་བར་གྱི་སྔར་བཤད་པའི་འབྱིན་སྔགས་རྣམས་ཀྱི་མགོར་ༀ་དང་མཐར་ས་བོན་མེད་པ་སྙིང་པོ་དང་། ཡོད་པ་ནི་དེ་རྣམས་ཀྱི་སྔགས་སོ། །མགྲོན་ཐབས་པ་རྣམས་ཀྱི་ནི་སྔར་བཤད་པའི་ཀལྤ་བྷ་དྲ་སོགས་ཀྱི་མིང་ཡིག་ནི་སྙིང་པོ་ཡིན་ལ། སྔགས་ནི་བསྐལ་བཟང་རྣམས་ཀྱི་ནི་རང་གི་འབྱིན་སྔགས་ཡིན་ལ། གཞན་རྣམས་ཀྱི་ནི་རྩ་རིག་ཡིན་ནོ། །ལག་པ་ཐལ་མོ་ཁོང་སྟོང་དུ་སྦྱར་ལ་མཛུབ་མོ་གཉིས་གདུ་བུར་བྱས་ཏེ་མཐེ་བོའི་རྩེ་མོར་མིག་གི་ཚུལ་དུ་བྱས་པ་ནི་སྦྱན་གྱི་དམ་རྒྱའོ། །རྡོ་རྗེ་བསྡམས་པ་ལས་གུང་མོ་གཉིས་བསྒྲེང་བའི་ཚིགས་གསུམ་པར་མཛུབ་མོ་གཉིས་རྡོ་རྗེའི་ཚུལ་དུ་བཟུང་བ་ནི་མཱ་མ་ཀཱིའོ། །ཐལ་མོ་གཉིས་ཁོང་སྟོང་དུ་སྦྱར་ཏེ་པདྨ་ཁ་བྱེ་བའི་ཚུལ་དུ་བྱས་པ་ནི་གོས་དཀར་མོའི་འོ། །ཐལ་མོ་ཁོང་སྟོང་དུ་སྦྱར་བ་ལས་མཛུབ་མོ་གཉིས་བཀུག་པས་གུང་མོའི་སེན་མོ་མནན་ཏེ་མཐེ་བོང་གཉིས་དབུས་སུ་བཞག་ནས་ཅུང་ཟད་བཀུག་པ་ནི་སྒྲོལ་མའི་འོ། །རྡོ་རྗེ་བསྡམས་པ་ལས་མཛུབ་མོ་གཉིས་བརྐྱང་སྟེ་རྡོ་རྗེ་འདྲ་བར་བྱས་པ་རྡོར་སེམས་ཀྱི་དང་། དེ་ཉིད་ལས་མཛུབ་མོ་གཡས་པ་བཀུག་པ་རྒྱལ་པོའི་དང་། དེ་ཉིད་ལས་མེ་ཏོག་འདྲ་བར་བྱས་པ་ཆགས་པའི་དང་། དེ་ཉིད་ལས་སླར་བཀུག་སྟེ་མཐེ་བོང་ལ་མཛུབ་མོ་གཉིས་རྩེ་སྤྲད་པ་ལེགས་པའི་དང་། དེ་ཉིད་ལས་ཚིགས་བར་མ་བཅག་པ་རིན་ཆེན་གྱི་དང་།
དེ་ཉིད་ལས་སོར་མོ་རྣམས་འོད་ཟེར་འདྲ་བར་བཀྱེད་པ་གཟི་བརྗིད་ཀྱི་དང་། དེ་ཉིད་སྤྱི་བོར་བཞག་པ་རྒྱལ་མཚན་གྱི་དང་། དེ་ཉིད་ཁའི་མདུན་དུ་བཞག་པ་བཞད་པའི་དང་། དེ་ཉིད་ལས་པདྨ་འདྲ་བར་བྱས་པ་ཆོས་ཀྱི་དང་། དེ་ཉིད་ལས་རྩེ་མོ་ཡིད་ཙམ་བཀུག་པ་རྣོན་པོའི་དང་། དེ་ཉིད་ལས་གདུ་བུ་འདྲ་བར་བྱས་པ་རྒྱུའི་དང་། དེ་ཉིད་ལས་པདྨའི་འདབ་མ་འདྲ་བར་བྱས་པ་སྨྲ་བའི་དང་། དེ་ཉིད་ལས་རྩེ་མོ་ཡིད་ཙམ་བཀྱེད་པ་ལས་ཀྱི་དང་། དེ་ཉིད་ལས་ཤིན་ཏུ་བཀྱེད་པ་སྲུང་བའི་དང་། དེ་ཉིད་ལས་རྩེ་མོ་གཉིས་སླར་བཀུག་པ་གནོད་སྦྱིན་གྱི་དང་། དེ་ཉིད་ལས་དམ་དུ་བཀུག་པ་ཁུ་ཚུར་གྱི་དང་། སྙིང་གར་རྡོ་རྗེ་བསྡམས་པ་ལས་མཐེ་བོང་གཉིས་བསྡམས་ཏེ་གཤིབས་ནས་བཞག་པ་སྒེག་མོའི་དང་། རྡོ་རྗེ་བསྡམས་པ་རབ་ཏུ་བརྐྱང་པ་ཕྲེང་བ་འཆིང་བའི་ཚུལ་དུ་བྱས་པ་ཕྲེང་བ་མའི་དང་། རྡོ་རྗེ་བསྡམས་པ་ལས་བྱུང་བའི་རྡོ་རྗེ་ཐལ་མོས་ཚིག་འབྱིན་པའི་ཚུལ་དུ་ཁ་ནས་གྱེན་དུ་འབྱུང་བ་ལྟར་བྱེད་པ་གླུ་མའི་དང་། བསྡམས་པ་ལས་བྱུང་བའི་གར་བྱས་ལ་ཐལ་མོ་སྦྱར་བ་སྤྱི་བོར་བཞག་པ་གར་མའི་དང་། བསྡམས་པ་ཉིད་ཐུར་དུ་ལྡུགས་པའི་ཚུལ་གྱིས་མདུན་དུ་བཞག་པ་བདུག་པ་མའི་དང་། དེ་ཉིད་གྱེན་དུ་བཀྱེད་པ་མེ་ཏོག་མའི་དང་། མདུན་དུ་མཐེ་བོང་བསྙམས་ཏེ་བསྐོར་བ་མར་མེ་མའི་དང་། དེ་ཉིད་ལས་དྲི་བྱུག་པ་ལྟར་བྱས་པ་དྲིའི་དང་། དེ་ཉིད་ལས་མཛུབ་མོ་གཉིས་བཀུག་པ་ལྕགས་ཀྱུའི་དང་། དེ་ཉིད་ལས་རྩེ་མོ་གཉིས་སྤྲད་པ་ཞགས་པའི་དང་། དེ་ཉིད་
ལས་གཅིག་ལ་གཅིག་མདུད་པ་ལྕགས་སྒྲོག་གི་དང་། དེ་ཉིད་ལས་མཐེ་བོང་གཉིས་ནང་དུ་བཀུག་སྟེ་བསྐྱོད་པ་འབེབས་པའི་དང་། གཡོན་པ་དེ་བཞིན་གཤེགས་པའི་ཁུ་ཚུར་བཀན་ལ། གཡས་པའི་མཐེབ་མཛུབ་གཉིས་ཀྱིས་མཐེའུ་ཆུང་ནས་བརྩམས་ཏེ་ཕྱེ་ལ་ཐལ་མོ་ཁོང་སྟོང་དུ་བྱས་པ་ནི་བསྐལ་བཟང་རྣམས་ཀྱི་དང་། ལག་པ་གཉིས་ཐལ་མོ་སྦྱར་བའི་སོར་མོ་ཀུན་གྱིས་ཀུན་ནས་གང་བའི་བང་མཛོད་ལྟར་གནས་པ་ལས། ལག་པ་གཉིས་བཀྱེད་ནས་མཐེ་བོང་མཐེའུ་ཆུང་རྩེ་སྤྲད་དེ་སོར་མོ་རྣམས་བརྐྱང་པ་ཉན་ཐོས་ཀྱི་དང་། ལག་པ་གཉིས་ཐལ་མོ་སྦྱར་ནས་སོར་མོའི་རྩེ་མོ་རིམ་བཞིན་མཚན་མ་བསྡུས་ནས་ཁ་སྦྱོར་དུ་བྱས་ཏེ་མཐེ་བོང་གཉིས་བསྒྲེངས་ནས་བསྐུམ་པ་རང་རྒྱལ་གྱི་དང་། རྡོ་རྗེ་བསྡམས་པ་ནང་དུ་བཅིངས་ཏེ་གུང་མོ་གཉིས་རྩེ་སྤྲད་ལ་བརྐྱང་ཐ་མ་བཞི་སོ་སོར་བསྒྲེང་བ་ཁྲོ་བོའི་དམ་རྒྱའོ། །ལྷ་ཐམས་ཅད་ཀྱི་ཐུགས་ཀར་ཟླ་བའི་སྟེང་དུ་ཧཱུཾ་ལས་རྡོ་རྗེ་ལྔ་པ་ཐོག་མཐའ་མེད་པའི་ཆོས་ཉིད་ཀྱི་ངོ་བོས་མཚན་པར་གྱུར། ཆོས་རྒྱ་ནི། ལྷ་ཐམས་ཅད་ཀྱི་ལྐོག་མར་ཧྲཱིཿ ལས་པདྨ་དམར་མོ་འདབ་མ་བརྒྱད་པའི་ལྕེའི་འདམ་མར་ཨཱ་ལས་ཟླ་བའི་སྟེང་དུ་ཧཱུཾ་ལས་རྡོ་རྗེ་དཀར་པོ་རྩེ་ལྔ་པ་མཆུར་ཉལ་བས་མཚན་པར་བསམ་ལ། ༀ་བཛྲ་ཛི་ཧྭཱ། ཞེས་པས་ལྕེ་བྱིན་གྱིས་བརླབས་ཏེ་ལུས་ཀྱིས་ལྷ་སོ་སོའི་ཕྱག་ཆེན་བཅིང་བའམ་ཡང་ན་ཏིང་ངེ་འཛིན་གྱི་ཕྱག་རྒྱ་བྱས་ལ་ངག་ཏུ་ལྷ་སོ་སོའི་སྔགས་བརྗོད། ཡིད་
ཀྱིས་རྡོ་རྗེའི་ལྟེ་བ་ལ་ལྷ་རང་རང་སྔགས་ཀྱིས་མཚན་པར་གྱུར་པར་བསམ་མོ། །ལས་རྒྱ་ནི། གར་དང་གླུ་དང་རོ་དང་ཟས། །སྤྱོད་ལམ་ལ་སོགས་བདེ་བ་རྣམས། །སངས་རྒྱས་རྣམས་ལ་ཕུལ་ན་ནི། །ལས་ཀྱི་ཕྱག་རྒྱ་དབང་དུ་འགྱུར། །ཞེས་བརྗོད་ཅིང་རྡོ་རྗེ་ཁུ་ཚུར་གཉིས་ལས་བྱུང་བའི་གར་གྱི་ཁྱམས་བྱས་ལ། ལྷ་སོ་སོའི་སྙིང་པོ། སརྦྦ་བིད། ཅེས་སོགས་བརྗོད་དོ། །གཡོན་ལྟེ་བར་ཏིང་ངེ་འཛིན་གྱི་ཕྱག་རྒྱ་དང་གཡས་སྙིང་གར་རྡོ་རྗེ་འཛིན་པའི་ཚུལ་ནི་རྣམ་སྣང་གི་དང་། གཡས་རིམ་པ་བཞིན་ས་གནོན། མཆོད་སྦྱིན། ཏིང་ངེ་འཛིན། མི་འཇིགས་པའི་ཕྱག་རྒྱ་དང་། གཡོན་རྡོ་རྗེ་ཁུ་ཚུར་གྱིས་ཆོས་གོས་ཀྱི་གྲྭ་འཛིན་པའི་ཚུལ་དུ་སྙིང་གར་བཞག་པ་ནི་དེ་བཞིན་གཤེགས་པ་བཞིའི་དང་། ཡུམ་བཞི་ནི་ཕྱག་མཚན་མེད་པའི་ཕྱག་ཆེན་ལྟར་འཆིང་བའོ། །གཡོན་པའི་རྡོ་རྗེ་ཁུ་ཚུར་ཁ་ནང་དུ་བལྟས་ལ་དཀུར་བཞག །གཡས་པའི་ཁུ་ཚུར་བཀན་ཏེ་གྱེན་དུ་གཏོད་པའི་ཚུལ་གྱིས་སྙིང་གར་བཞག་པ་རྡོར་སེམས་ཀྱི་དང་། གཡས་པའི་རྡོ་རྗེ་ཁུ་ཚུར་སྙིང་གའི་མདུན་དུ་བཞག །དེའི་ཡང་མདུན་དུ་གཡོན་པའི་རྡོ་རྗེ་ཁུ་ཚུར་བཞག་ནས་ལྕགས་ཀྱུ་འཛིན་པ་ལྟར་བྱེད་པ་རྒྱལ་པོའི་དང་། གཡོན་པའི་རྡོ་རྗེ་ཁུ་ཚུར་སྙིང་གར་བཀན་ཏེ་བཞག་པའི་སྟེང་དུ་གཡས་པ་ཁ་བུབ་ཏུ་བཞག་སྟེ། ཡང་གཡས་པའི་རྡོ་རྗེ་ཁུ་ཚུར་གྱིས་མདའ་འདྲེན་པའི་ཚུལ་གྱིས་རྣ་བ་ལ་ཐུག་གི་བར་དུ་གཞུ་འགེངས་པ་ལྟར་བྱས་ནས་
མདའ་འཕེན་པའི་ཚུལ་དུ་བྱེད་པ་ནི་ཆགས་པའི་དང་། རྡོ་རྗེ་ཁུ་ཚུར་གཉིས་གཅིག་ཏུ་བྱས་ནས་སྙིང་གར་བཞག་སྟེ་མཐེབ་མཛུབ་ཀྱིས་སེ་གོལ་བརྡེབ་པ་ལེགས་སོ་སྦྱིན་པའི་ཚུལ་ནི་ལེགས་པའི་དང་། རྡོ་རྗེ་ཁུ་ཚུར་གཉིས་དབང་བསྐུར་པའི་གནས་མཛོད་སྤུར་བཞག་པ་རིན་ཆེན་གྱི་དང་། རྡོ་རྗེ་ཁུ་ཚུར་གཉིས་སྙིང་གར་གཡས་སྐོར་དུ་ཟླུམ་པོར་བསྐོར་བ་གཟི་བརྗིད་ཀྱི་དང་། གཡོན་པའི་རྡོ་རྗེ་ཁུ་ཚུར་ལ་གཡས་པའི་རྡོ་རྗེ་ཁུ་ཚུར་གྱི་གྲུ་མོ་བཙུགས་པ་ནི་རྒྱལ་མཚན་གྱི་དང་། རྡོ་རྗེ་ཁུ་ཚུར་གཉིས་རྒོད་པའི་ཚུལ་དུ་སྒེག་པ་དང་བཅས་པས་ཡོངས་སུ་བསྐོར་ནས་ཁའི་གྲྭ་གཉིས་སུ་བཞག་པ་ནི་བཞད་པའི་དང་། གཡོན་པའི་རྡོ་རྗེ་ཁུ་ཚུར་པདྨར་བསམས་ལ་སྙིང་གར་བཞག །གཡས་པའི་རྡོ་རྗེ་ཁུ་ཚུར་གྱི་མཐེབ་མཛུབ་ཀྱིས་པདྨ་ཁ་འབྱེད་པའི་ཚུལ་དུ་མཐེའུ་ཆུང་ནས་རིམ་པ་བཞིན་འབྱེད་པ་ནི་ཆོས་ཀྱི་དང་། གཡོན་པའི་རྡོ་རྗེ་ཁུ་ཚུར་སྙིང་གར་བཞག་ལ་གཡས་རྡོ་རྗེ་ཁུ་ཚུར་གྱིས་རལ་གྲི་འདེབས་པའི་ཚུལ་དུ་བྱེད་པ་ནི་རྣོན་པོའི་དང་། རྡོ་རྗེ་ཁུ་ཚུར་གཉིས་མགལ་མེའི་འཁོར་ལོ་ལྟར་གཡས་ཕྱོགས་ནས་ལུས་ཀྱི་ཕྱི་རོལ་ཏུ་བསྐོར་བ་ནི་རྒྱུའི་དང་། རྡོ་རྗེ་ཁུ་ཚུར་གཉིས་ཁ་ནས་ཚིག་དབྱུང་བའི་ཚུལ་གྱིས་གྱེན་དུ་བཏེག་པ་ནི་སྨྲ་བའི་དང་། རྡོ་རྗེ་ཁུ་ཚུར་གཉིས་ཀྱི་སོར་མོ་རྣམས་རིམ་གྱིས་དགྲོལ་བ་ལས་བྱུང་བའི་ཐལ་མོ་སྦྱར་བ་འགྲམ་པ་གཉིས་དང་སྤྱི་བོར་བཞག་པ་ནི་ལས་ཀྱི་དང་། རྡོ་རྗེ་ཁུ་ཚུར་གཉིས་ཀྱིས་སྔར་གོ་བགོ་བར་བཤད་པ་ལྟར་བྱས་ནས་མཐར་
གོ་བསྐོན་པའི་ཚུལ་དུ་བྱས་པ་ནི་སྲུང་བའི་དང་། རྡོ་རྗེ་ཁུ་ཚུར་གཉིས་ཀྱི་མཐེའུ་ཆུང་བརྐྱང་ནས་བཀུག་པ་མཆེ་བའི་རྩེ་མོ་ལྟར་བྱས་ཏེ་ཁའི་གྲྭ་གཉིས་སུ་བཞག་པ་ནི་གནོད་སྦྱིན་གྱི་དང་། རྡོ་རྗེ་ཁུ་ཚུར་གཉིས་གཅིག་གིས་གཅིག་བཙིར་བ་ནི་ཁུ་ཚུར་གྱི་དང་། རྡོ་རྗེ་ཁུ་ཚུར་གཉིས་དཀུ་གཉིས་སུ་བཞག་ལ་བསམ་པ་གཡོས་པས་མགོ་བོ་གཡོན་དུ་འདུད་པ་ནི་སྒེག་མོའི་དང་། རྡོ་རྗེ་ཁུ་ཚུར་གཉིས་ཀྱིས་ཕྲེང་བ་འཆིང་བའི་ཚུལ་དུ་བྱེད་པ་ནི་ཕྲེང་བ་མའི་དང་། རྡོ་རྗེ་ཁུ་ཚུར་གཉིས་ཀྱིས་ཁ་ནས་ཚིག་དབྱུང་བའི་ཚུལ་དུ་གྱེན་དུ་འདྲེན་པ་ནི་གླུ་མའི་དང་། རྡོ་རྗེ་ཁུ་ཚུར་གཉིས་ཀྱིས་གར་བསྐོར་བ་ནི་གར་མའི་དང་། རྡོ་རྗེ་ཁུ་ཚུར་གཉིས་ཀྱིས་བདུག་པ་འབུལ་བའི་ཚུལ་དུ་ཐུར་དུ་ལྡུགས་པ་ནི་བདུག་པ་མའི་དང་། རྡོ་རྗེ་ཁུ་ཚུར་གཉིས་ཀྱིས་མེ་ཏོག་འབུལ་བའི་ཚུལ་གྱིས་གྱེན་དུ་འཐོར་བ་ནི་མེ་ཏོག་མའི་དང་། རྡོ་རྗེ་ཁུ་ཚུར་གཉིས་ཀྱི་མཐེ་བོང་གཉིས་གཤིབས་ཏེ་བསྒྲེང་བ་ནི་མར་མེ་མའི་དང་། རྡོ་རྗེ་ཁུ་ཚུར་གཉིས་རབ་ཏུ་བརྐྱང་ནས་རང་གི་སྙིང་གར་དྲི་བྱུག་པའི་ཚུལ་དུ་བྱེད་པ་ནི་དྲི་ཆབ་མའི་དང་། གཡས་པའི་རྡོ་རྗེ་ཁུ་ཚུར་གྱི་མཛུབ་མོ་ལྕགས་ཀྱུ་ལྟར་བྱས་པས། གཡོན་པའི་རྡོ་རྗེ་ཁུ་ཚུར་གྱི་མཐེའུ་ཆུང་ལྕགས་ཀྱུ་ལྟར་བྱས་པ་ལ་བཅིངས་པ་ནི་ལྕགས་ཀྱུའི་དང་། རྡོ་རྗེ་ཁུ་ཚུར་གཉིས་ཀྱི་མཁྲིག་མའི་རྒྱབ་སྦྱར་བ་ཞགས་པའི་དང་། རྡོ་རྗེ་ཁུ་ཚུར་གཉིས་ཀྱི་མཛུབ་མོ་ལྕགས་ཀྱུ་འདྲ་བར་བྱས་ནས་ཁ་ནང་དུ་ཐད་ཀར་
བཞག་ནས་ཕན་ཚུན་མདུད་ཅིང་མཐེའུ་ཆུང་གཉིས་སྦྲེལ་བ་ནི་ལྕགས་སྒྲོག་གི་དང་། རྡོ་རྗེ་ཁུ་ཚུར་གཉིས་རྒྱབ་སྦྱར་ཏེ་བཙིར་བ་འབེབས་པའི་དང་། བསྐལ་བཟང་མན་ཆད་མགྲོན་ཐབས་པ་རྣམས་ཀྱི་ལས་རྒྱ་ནི་གར་ལས་བྱུང་བའི་ཕྱག་མཚན་མེད་པའི་ཕྱག་ཆེན་ལྟར་བཅིང་བའོ། །ལྷ་ཐམས་ཅད་ཀྱི་ཐུགས་ཀར་ཟླ་བའི་སྟེང་དུ་སྣ་ཚོགས་རྡོ་རྗེས་མཚན་པར་གྱུར།བཞི་པ་ཕྱག་ཆེན་ནི། ལུས་ཀྱི་ལྷ་སོ་སོའི་ཕྱག་ཆེན་བཅིང་ཞིང་ངག་ཏུ་ལྷ་རང་རང་གི་སྙིང་པོ་བརྗོད་ཅིང་། ཡིད་ཀྱིས་ལྷ་ཐམས་ཅད་ཀྱི་ཐུགས་ཀར་ཟླ་བའི་སྟེང་དུ་དང་པོའི་རྡོ་རྗེ་རྩེ་ལྔ་པས་མཚན་པར་གྱུར། ༀ་བུདྡྷ་ཨབྷི་ཥིཉྩ་ༀ། ཞེས་སོགས་སྔར་འཇིག་རྟེན་གསུམ་རྒྱལ་གྱི་སྐབས་སུ་བཤད་པའི་སྔགས་དང་ཕྱག་རྒྱས་ལྷ་ཐམས་ཅད་ལ་རིགས་ལྔས་དབང་བསྐུར་རོ། །དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་ཏོ། །དེ་ནས་ལུས་ཀྱིས་རྡོ་རྗེ་ཁུ་ཚུར་ལས་བྱུང་བའི་གར་སྔོན་དུ་འགྲོ་བས་རྣམ་སྣང་གི་ལས་རྒྱ་བཅིང་།ངག་ཏུ། ༀ་ན་མོ་བྷ་ག་ཝ་ཏེ་སརྦྦ་དུརྒ་ཏི་པ་རི་ཤོ་དྷཱ་ནི་རཱ་ཛཱ་ཡ། ཏ་ཐཱ་ག་ཏཱ་ཡ་ཨ་ར་ཧ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ༀ་ཤོ་དྷ་ནི། ཤོ་དྷ་ནི། སརྦྦ་པཱ་པཾ་བི་ཤོ་དྷ་ནེ་ཤུདྡྷེ། བི་ཤདྡྷེ། སརྦྦ་ཀརྨྨཱཿ ཨ་ཝ་ར་ཎཱ་བི་ཤོ་དྷ་ནེ་སྭཱ་ཧཱ། ༀ་སརྦྦ་བིད་སརྦྦ་ཨཱ་ཝ་ར་ཎཱ་བི་ཤོ་དྷ་ན་ཧ་ན་ཧཱུཾ་ཕཊ། བཅོམ་ལྡན་འདས་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོ་ཀུན་རིག་རྣམ་པར་སྣང་མཛད་ཀྱིས། ཟབ་གསལ་གཉིས་སུ་མེད་པ་ལ་སོགས་པ་ལམ་
གྱི་རྟོགས་པ་མཐའ་དག་རྒྱུད་ལ་སྐྱེ་བར་མཛད་དུ་གསོལ། ཞེས་པ་དང་། དེ་བཞིན་དུ་དེ་བཞིན་གཤེགས་པ་རིགས་བཞིའི་ལས་རྒྱ་རིམ་པ་ལྟར་བཅིང་ཞིང་། ༀ་ན་མོ་བྷ་ག་ཝ་ཏེ། ཞེས་སོགས་རྩ་རིག་དང་། ༀ་སརྦྦ་བིད་ཧཱུཾ། སྦྱོང་བའི་རྒྱལ་པོ་དང་། ༀ་སརྦྦ་བིད་ཕཊ། རྒྱལ་མཆོག་རིན་ཆེན་དང་། ༀ་སརྦྦ་བིད་ཨཱཿ ཤཱཀྱ་རིགས་དབང་དང་། ༀ་སརྦྦ་བིད་ཏྲཊ་མེ་ཏོག་ཆེར་རྒྱས་ཏེ་དེ་བཞིན་གཤེགས་པ་རིགས་རྣམ་པ་བཞིས་ཀྱང་། ཟབ་གསལ་གཉིས་སུ་མེད་པ་ལ་སོགས་པ་ལམ་གྱི་རྟོགས་པ་མཐའ་དག་རྒྱུད་ལ་སྐྱེ་བར་མཛད་དུ་གསོལ། དེ་བཞིན་དུ་ལུས་ཀྱིས་གར་སྔོན་དུ་འགྲོ་བའི་ལྷ་སོ་སོའི་ལས་རྒྱ་བཅིང་ངག་ཏུ་རྩ་རིག་དང་ལྷ་སོ་སོའི་སྔགས་བརྗོད་དེ་ལས་ལ་སྦྱར་བར་བྱའོ། །འཕྲིན་ལས་གཞན་འཚོལ་བ་ནི་གཞན་དུ་ཤེས་པར་བྱའོ། །དེ་ནས་མཆོད་པ་རྣམས་ཚོགས་ཞིང་གི་སྐབས་སུ་བཤད་པ་ལྟར་བསང་སྦྱང་བསྐྱེད་བྱིན་གྱིས་བརླབ་པ་རྣམས་བྱས་ལ། ཆུ་གཉིས་ཉེར་སྤྱོད་རོལ་མོ་དང་བཅས་པ་དབུལ་བ་ནི། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །ཇི་སྙེད་རྒྱལ་བ་སྲས་དང་བཅས། །དེ་སྙེད་རྣམས་ལ་བདག་འབུལ་ན། །ཐུགས་རྗེ་མངའ་བ་ཁྱེད་རྣམས་ཀྱིས། །ཅི་བདེ་བར་བཞེས་ནས་ཀྱང་། །སེམས་ཅན་དོན་ཀུན་མཛད་དུ་གསོལ། །ཞེས་པའི་མཆོད་ཡོན་གྱི་གནས་སུ་ཞབས་བསིལ་ནས་རོལ་མོའི་བར་རྣམས་རིམ་པ་ལྟར་སྦྱར་
བའི་ཚིགས་བཅད་ཀྱི་མཇུག་ཏུ། སྔར་བཤད་པའི་སྔགས་ཕྱག་རྒྱ་དང་བཅས་པ་སྦྱར་ཏེ་ཆུ་གཉིས་སྔོན་དུ་འགྲོ་བའི་ཉེར་སྤྱོད་ལྔ་རོལ་མོ་དང་བཅས་པ་དབུལ་ལོ། །རོལ་མོ་ནི་ཡང་ན། དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་ཡོང་ལྡན། །སེམས་ཅན་སྡུག་བསྔལ་སིམ་བྱེད་པའི། །སྤྲིན་རྣམས་སོ་སོར་གནས་གྱུར་ཅིག །ཅེས་སྔགས་དང་བཅས་པས་དབུལ་ལོ། །སྒེག་སོགས་བརྒྱད་ཀྱི་མཆོད་པ་ནི། ལུས་ཀྱི་རྡོ་རྗེ་ཁུ་ཚུར་གཉིས་ལས་བྱུང་བའི་གར་སྔོན་དུ་འགྲོ་བས། ལྷ་མོ་རང་རང་གི་ལས་རྒྱ་རིམ་པ་ལྟར་བཅིངས་ལ། ༀ་རྡོ་རྗེ་སེམས་དཔའ་བསྡུས་པ་ན། ༀ་བཛྲ་ས་ཏྭ་སུ་སཾ་གྲ་ཧཱཾ། བཛྲ་ལཱ་སྱ། རྡོ་རྗེ་རིན་ཆེན་བླ་ན་མེད། ༀ་བཛྲ་རཏྣ་མཱ་ནུ་ཏྟ་རཾ། བཛྲ་མཱ་ལེ། རྡོ་རྗེ་ཆོས་ཀྱི་གླུ་བླངས་པས། ༀ་བཛྲ་དྷརྨཿ གཱ་ཡ་ནི། བཛྲ་གཱིརྟི། རྡོ་རྗེ་ལས་ཀུན་བྱེད་པར་འགྱུར། ༀ་བཛྲ་ཀརྨཱཿ ཀ་རོད་བྷ་ཝེ། བཛྲ་ནྲྀ་ཏྱེ། ཞེས་པས་ནང་གི་སྒེག་སོགས་བཞིས་ལུས་ཀྱི་ཉམས་ལ་སོགས་པས་མཆོད་པར་བསམ། བདུག་པ་མ་ལ་སོགས་བཞིའི་ལས་རྒྱ་བཅིངས་ལ་སྔར་གྱི་ཚིགས་བཅད་དང་སྔགས་དང་པོའི་རྗེས་སུ་བཛྲ་ལཱ་སྱ་སོགས་ཀྱི་གནས་སུ། བཛྲ་དྷཱུ་པེ། བཛྲ་པུཥྤེ། བཛྲ་ཨཱ་ལོ་ཀེ །བཛྲ་གནྡྷེ། ཞེས་པ་རྣམས་རིམ་པ་ལྟར་སྦྱར་བས་མཆོད་དོ། །བསྟོད་པ་ནི། རྡོ་རྗེ་ཐར་མོ་སྦྱར་བའམ་དྲིལ་སྟབས་དང་བཅས་པས། མཉམ་མེད་མི་གཡོ་མཉམ་མེད་མཆོག་གི་ཆོས་ཉིད་ཅན། །ཐུགས་རྗེའི་བདག་ཉིད་འགྲོ་བའི་
སྡུག་བསྔལ་སེལ་བར་མཛད། །ཡོན་ཏན་མཐའ་ཡས་དངོས་གྲུབ་ཐམས་ཅད་སྦྱིན་མཛད་པ། །དྲི་མེད་མི་གཡོ་མཉམ་མེད་དམ་པའི་མཆོག་ཆོས་ཅན། །ཡོན་ཏན་ཤིན་ཏུ་ཕྲ་བའི་ཆ་ལའང་ཚད་མེད་དེ། །དཔེ་ནི་ནམ་མཁའ་དང་ཡང་བསྒྲུན་དུ་ཡོད་མ་ཡིན། །དངོས་གྲུབ་མཐའ་ཡས་མཉམ་མེད་དཔེ་དང་བྲལ་བ་རྣམས། །སེམས་ཅན་ཁམས་ལ་དངོས་གྲུབ་མཆོག་རྣམས་ངེས་པར་སྩོལ། །རྟག་ཏུ་དྲི་མ་མེད་པ་ཐུགས་རྗེའི་ཤུགས་ལས་བྱུང་། །སྨོན་ལམ་གྲུབ་པ་འགག་པ་མེད་པའི་ཆོས་ཉིད་ཅན། །འགྲོ་བའི་དོན་གྲུབ་རབ་ཏུ་བརྩོན་པ་མཐའ་ཡས་པ། །ཐུགས་རྗེ་ཆེན་པོའི་བདག་ཉིད་རྟག་ཏུ་རྣམ་པར་སྣང་། །ཚད་མེད་ཚད་དང་བྲལ་བ་ཤིན་ཏུ་རྫོགས་པ་ཡི། །བདེ་བར་གཤེགས་པའི་གོ་འཕང་དམ་པ་བརྙེས་གྱུར་ཀྱང་། །ཁམས་གསུམ་རྣམས་ལ་དངོས་གྲུབ་མཆོག་སྩོལ་མཛད་པ་ཡི། །ཐུགས་རྗེའི་སྤྱོད་པ་མི་གཡོ་འགག་པར་ཡོངས་མི་འགྱུར། །ཨེ་མའོ་ཤིན་ཏུ་བཟང་པོའི་ཆོས་ཉིད་མཆོག་དང་ལྡན། །མཆོག་སྦྱིན་རྣམས་ཀྱི་ནང་ནས་གོ་འཕང་མཆོག་བརྙེས་པ། །ཁམས་གསུམ་ཀུན་ལ་རྟག་ཏུ་དངོས་གྲུབ་མཆོག་སྩོལ་མཛད། །མགོན་པོ་དུས་གསུམ་སྒྲིབ་པ་མེད་པར་རབ་མཁྱེན་པས། །དམ་ཚིག་མཆོག་གསུམ་དངོས་གྲུབ་དམ་པ་བདག་ལ་སྩོལ། །འདི་དེ་སངས་རྒྱས་ཐམས་ཅད་ཀྱི། །ཡང་དག་ཡོན་ཏན་རྒྱས་པ་སྟེ། །ལན་ཅིག་ཙམ་ཞིག་
བརྗོད་པས་ཀྱང་། །གསང་སྔགས་ཐམས་ཅད་འགྲུབ་པར་འགྱུར། །ཞེས་པས་བསྟོད་དོ། །དེ་ནས་ལྷ་བསྒོམ་པ་ལ། རྣམ་པ་ལ་བསླབ་ཚུལ་ནི། རང་ལྷ་གང་དུ་བསྒོམ་པ་དེའི་སྐུའི་རྣམ་པ་རགས་པ་ཚང་བ་ཞིག་གསལ་བཏབ་ལ་དེ་ལ་བྱིང་རྒོད་དང་བྲལ་བར་བྱས་ཏེ་སེམས་བཟུང་། གསལ་བཏབ་པའི་ནང་ནས་བྱེ་བྲག་པ་ཞིག་ལྷག་པར་གསལ་ན་གང་གསལ་བ་དེ་ལ་སེམས་བཟུང་། དེ་མི་གསལ་ན་སྔར་བཞིན་སྤྱི་ལ་སེམས་བཟུང་ཞིང་། གང་གསལ་བཏབ་པ་ལས་གཞན་པའི་དམིགས་པ་གང་ཤར་ཡང་དེའི་རྗེས་སུ་མི་འབྲང་བར་སྔར་གྱི་དམིགས་པ་ཉིད་བསྐྱང་། ལྷ་གཅིག་གི་སྐུའི་ཆ་ཕྲ་རགས་ན་བཟའ་རྒྱན་དང་བཅས་པ་ལ་གསལ་སྣང་ཐོབ་ནས་སེམས་གནས་པ་རྙེད་པ་ན། ལྷ་གཉིས་པ་དང་སྦྲེལ་བ་སོགས་ཇེ་མང་ཇེ་མང་ལ་བཏང་ནས་མཐར་རྟེན་དང་བརྟེན་པའི་དཀྱིལ་འཁོར་གྱི་ཕྲ་རགས་ཐམས་ཅད་ལ་མངོན་སུམ་དུ་མཐོང་བ་འདྲ་བའི་གསལ་སྣང་རྙེད་རྙེད་དུ་སྦྱང་ངོ་། །ང་རྒྱལ་ལ་བསླབ་ཚུལ་ནི། རང་ལྷ་གང་དུ་བསྒོམ་པ་དེ་དངོས་ཡིན་སྙམ་པའི་ངེས་པ་ཤུགས་ཅན་ཞིག་བསྐྱེད་པ་དང་། ངེས་པ་དེ་ཉིད་ལ་རྩེ་གཅིག་ཏུ་གནས་ཏེ་ཇི་སྲིད་ང་རྒྱལ་འགྱུར་བའི་ཏིང་ངེ་འཛིན་རྙེད་རྙེད་དུ་སྦྱང་བ་གཉིས་ནི་གསལ་བ་ལ་སློབ་ཚུལ་ལོ། །དེ་ནས་དམིགས་པ་ལྷའི་འཁོར་ལོ་ལ་དམིགས་ནས་རྣམ་པ་རང་བཞིན་མེད་པར་ངེས་པའི་སྟོང་པ་ཉིད་སྒོམ་ཚུལ་ནི། ཟབ་གསལ་གཉིས་མེད་ཀྱི་ལམ་འདི་བྱང་ཆུབ་ཏུ་བགྲོད་པའི་གནད་ཆེ་ཤོས་ཤིག་ཡིན་མོད་ཀྱང་།
ཞིབ་པར་གཞན་དུ་ཤེས་དགོས་པས་དེར་ཤེས་པར་བྱའོ། །དེ་ལྟར་ཇི་སྲིད་མི་སྐྱོ་བའི་བར་དུ་རྣམ་པ་དང་ང་རྒྱལ་ལ་བསླབ་པ་རེ་མོས་སུ་བསྒོམ་ཞིང་། སྐྱོ་ན། ལྷ་ཐམས་ཅད་ཀྱི་ཐུགས་ཀར་རང་རང་གི་ས་བོན་ལ་བཟླས་པའི་སྔགས་མུ་ཏིག་གི་ཕྲེང་བ་ལྟ་བུས་བསྐོར་བ་དུས་མཐའི་མེ་དང་འདྲ་བའི་འོད་ཟེར་ཅན་དང་། ལྷ་ཐམས་ཅད་ཀྱི་ཞལ་ནས་སྔགས་ཀྱི་སྒྲ་བྱུང་བར་གྱུར། ༀ་སརྦྦ་བིད་སརྦ་ཨཱ་ཝ་རཎཱ་བི་ཤྭ་དྷན་ཧ་ན་ཧཱུཾ་ཕཊ། ཅེས་སོགས་བཟླའོ། །དེ་ཡང་དེ་བཞིན་གཤེགས་པའི་རིགས་ལ་སོགས་པ་ལ་ལག་པ་གཡོན་རྡོ་རྗེའི་ཁུ་ཚུར་སོགས་བཅིངས་ལ་གོས་ཀྱིས་གཡོགས་ཏེ་སྦ། གཡས་བོ་དེ་ཙེའི་ཕྲེང་བ་སྙིང་གར་བཟུང་ལ་མཛུབ་མོའི་རྩེ་ནས་མཐེ་བོང་གིས་དགུག་ཅིང་། ཧ་ཅང་མྱུར་བུལ་ལ་སོགས་པ་བཟླས་པའི་སྐྱོན་དང་བྲལ་བར་མེ་ཏོག་གང་ཕོག་གི་ལྷ་དེའི་འབུམ་མམ། ཡང་ན་རྩ་རིག་འབུམ་དང་། འཁོར་གྱི་ལྷ་རྣམས་ཀྱི་ཁྲི་ཕྲག་རེ་བཟླ་བར་བྱའོ། །ཐུན་མཚམས་བྱ་བར་འདོད་ན། ཆུ་གཉིས་ཉེར་སྤྱོད་ལྔ་རོལ་མོ་དང་བཅས་པ་སྔགས་དང་ཕྱག་རྒྱ་ཙམ་གྱིས་མཆོད་དེ་བསྟོད་པ་རྒྱས་བསྡུས་གང་རུང་བྱས་ལ། ༀ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། ཌྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦྦ་སིདྡྷི་མྨེ་པྲ་ཡཙྪ། སརྦྦ་ཀརྨཱཿ སུ་ཙ་མེ། ཙིཏྟཾ་ཤྲཱི་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོཿ བྷ་ག་ཝཱ་ན། སརྦྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲཱེ་བྷ་ཝ། མ་ཧཱ་ས་མ་ཡ་ས་ཏྭ་ཨཿ ཞེས་ཡི་གེ་
བརྒྱ་པས་བརྟན་པར་བྱས་ལ། གཙོ་བོ་ལས་མར་མེ་གཅིག་ལས་གཉིས་ཆད་ཀྱི་ཚུལ་གྱིས་གཉིས་པར་བྱེ་ལ། ༀ་སརྦ་བིད་ༀ། ཞེས་སོགས་འཇིག་རྟེན་གསུམ་རྒྱལ་གྱི་སྐབས་སུ་བཤད་པའི་སྔགས་དང་ཕྱག་རྒྱས་སྤྱི་བོ་མགྲིན་པ་སྙིང་ག་གསུམ་བྱིན་གྱིས་བརླབས་ལ་ཐུན་མཚམས་ཀྱི་བྱ་བ་ལ་འཇུག་གོ །ཐུན་གཉིས་ལ་བབ་པ་ན། ཁྲུས་དང་ཉེ་རེག་བྱ་སྟེ་ནང་དུ་ཞུགས་ལ་གཙོ་བོའི་དམ་རྒྱ་བཅིངས་ནས། ཛཿ ཧཱུཾ་བཾ་ཧོཿ ཞེས་བརྗོད་ཅིང་། གཙོ་བོ་དང་གཉིས་སུ་མེད་པར་གྱུར་སྔར་བཞིན་མཆོད་བསྟོད་རྒྱས་བསྡུས་གང་རུང་བྱས་ནས། སྒོམ་བཟླས་སྔར་བཞིན་བྱས་པའི་མཐར་ཡིག་བརྒྱས་བརྟན་པར་བྱ། ཐུན་གསུམ་པ་དང་བཞི་པ་ལ་འཇུག་པ་ནའང་དེ་བཞིན་དུ་བྱའོ། །ཐུན་དང་པོ་ལ་གཤེགས་འདོད་དམ་མི་འདོད་ནའང་བཞི་པའི་མཐར་གཤེགས་དགོས་པས་མཆོད་བསྟོད་རྒྱས་བསྡུས་གང་རུང་བྱས་པའི་རྗེས་སུ། བཛྲ་སཏྭ། ཞེས་དང་། ༀ་བཛྲ་སཏྭ་ས་མ་ཡ། ཞེས་སོགས་ཡི་གེ་བརྒྱ་པ་བཟླས་པས་བརྟན་པར་བྱས་ལ། བདག་གི་དགེ་བའི་ལས་རྣམས་འདི་དག་གིས། །ཞེས་སོགས་ཀྱིས་དགེ་བ་བསྔོས་ལ། །བདག་གི་ཆོ་ག་མ་ཚང་བ་གང་དག་བགྱིས་པ་དེ་དག་བཟོད་པར་མཛོད་ཅིག །ཅེས་གསོལ་བ་བཏབ་ལ། ༀ་པྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་མཆོད་ཡོན་ཕུལ་ཏེ།ༀ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་
དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ཞེས་བསྐུལ་ནས། རྡོ་རྗེ་བསྡམས་པ་ལས་གུང་མོ་གཉིས་མཉམ་སྟེ་གཤིབས་ལ་བསྒྲེངས་པས་སེམས་མ་རྡོ་རྗེ་མའི་ཕྱག་རྒྱ་སྤྱི་བོ་ནས་གྱེན་དུ་དགྲོལ་ཏེ། ༀ་བཛྲ་སཏྭ་མུཿ ཡེ་ཤེས་པ་རང་བཞིན་གྱི་གནས་སུ་གཤེགས། སྔར་བཤད་པའི་རྡོ་རྗེ་བསྡུ་བའི་ཕྱག་རྒྱ་བཅིངས་ནས། བཛྲ་ས་མཱ་ཛཿ དམ་ཚིགས་པའི་རྟེན་དང་བརྟེན་པའི་དཀྱིལ་འཁོར་རང་ཉིད་ལ་ཐིམ་པར་གྱུར་པར་བསམས་ལ། རང་ལྷའི་ང་རྒྱལ་གྱིས་ལངས་ཏེ། མཎྜལ་དབུལ་བ་དང་། གླེགས་བམ་ཀློག་པ་སོགས་བྱའོ། །ལས་རྒྱལ་པོ་མཆོག་གི་ཏིང་ངེ་འཛིན་ཏོ། ། ། །དེ་ལྟར་བསྙེན་པ་ལས་སུ་རུང་ནས། གཞན་གྱི་དོན་ལ་འཇུག་པ་ན། སྔར་གྱི་བདག་བསྐྱེད་སྐབས་ལྟར། ཐུགས་རྗེས་ཁྱབ་པའི་ཐུགས་དང་ལྡན་གྱུར་ཅིང་། ཞེས་པ་ནས་མཉམ་མེད་བྱང་ཆུབ་སེམས་ནི་བསྐྱེད་པར་བགྱི། །ཞེས་པའི་བར་གྱིས་སྐྱབས་འགྲོ་སེམས་བསྐྱེད་ལན་གསུམ་བྱས་ནས། ༀ་སྭ་བྷཱ་ཝ་སོགས་ཀྱིས་སྟོང་པར་སྦྱངས་ལ། སྟོང་པའི་ངང་ལས་ཧྲཱིཿ ལས་པདྨ་ཨ་ལས་ཟླ་བའི་སྟེང་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས། རང་ཉིད་རྡོ་རྗེ་སེམས་དཔའ་དཀར་པོ་ཕྱག་གཡས་པའི་སོར་མོ་གསུམ་བསྒྲེང་བའི་དབུས་མའི་རྩེ་མོ་ལ། དང་པོའི་རྡོ་རྗེ་རྩེ་ལྔ་པ་རང་གི་ཐུགས་ཀར་གཏོད་པའི་ཚུལ་གྱིས་འཛིན་ཅིང་། གཡོན་རྡོ་རྗེ་ཁུ་ཚུར་གྱིས་དྲིལ་བུ་ཁ་ནང་དུ་བསྟན་
ཏེ་སྙེམས་པའི་ཚུལ་གྱིས་དཀུར་བརྟེན་པ། རབ་ཏུ་དགྱེས་པས་སྤྱན་གདངས་པ་ཞེས་པ་ནས། ཟླ་བའི་འོད་ཀྱི་རྒྱབ་ཡོལ་ཅན། ཞེས་པའི་བར་དང་། རང་གི་སྤྱི་བོར་ༀ་དཀར་པོ། མགྲིན་པར་ཨཿ དམར་པོ། ཐུགས་ཀར་ཧཱུཾ་སྔོན་པོ་དེ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས་པར་བསམས་ལ། ༀ་བཛྲ་ཨཾ་ཀུ་ཤ་ཛཿ ཞེས་སོགས་སྒོ་བ་བཞིའི་སྔགས་རྒྱས་སྔར་ལྟར་དགུག་གཞུག་བྱས་ལ། ༀ་སརྦྦ་བིད་ༀ། ཞེས་སོགས་ཀྱིས་སྔར་ལྟར་གནས་གསུམ་བྱིན་གྱིས་བརླབ།སྤྲོ་ན་ཕྱག་རྒྱ་བཞིའི་རྒྱས་གདབ་བྱ། ༀ་བུདྡྷ་ཨ་བྷི་ཥིཉྩ་ༀ། ཞེས་སོགས་ཀྱིས་དབུ་བརྒྱན། སྔར་ལྟར་མཆོད་པ་བསང་སྦྱངས་ལ་སོགས་བྱས་ལ། ༀ་པྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་པ་ནས། ༀ་སརྦྦ་ཏ་ཐཱ་ག་ཏ་ཤཔྟ་པུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཞེས་པའི་བར་གྱིས་ཆུ་གཉིས་ཉེར་སྤྱོད་རོལ་མོ་དང་བཅས་པས་མཆོད། རྡོ་རྗེ་སེམས་དཔའ་སེམས་དཔའ་ཆེ། །ཞེས་པ་ནས། ཕྱག་འཚལ་ཕྱག་ན་རྡོ་རྗེ་ལ། ཞེས་པའི་བར་གྱིས་བསྟོད། སའི་ཆོ་ག་ལ་དང་པོ་ས་བསླང་བ་ནི། སྔོན་འགྲོ་གཏོར་མའི་སྐབས་ལྟར། གཏོར་མ་བྱིན་གྱིས་བརླབ་ལ། ༀ་བྷཱུ་མི་པ་ཏི་ས་པ་རི་ཝཱ་ར། ན་མཿ སརྦྦ་ཏ་ཐཱ་ག་ཏེ་བྷྱོ། ཞེས་སོགས་གསུམ་གྱིས་གཏོར་མ་ཕུལ། ༀ་བྷཱུ་མི་པ་ཏི་ས་པ་རི་ཝཱ་ར་པྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་སོགས་ཀྱི་ཆུ་གཉིས་ཉེར་སྤྱོད་ལྔ་རོལ་མོ་དང་བཅས་པས་སྔོན་འགྲོ་གཏོར་
མའི་སྐབས་ལྟར་མཆོད་ནས། ས་ལ་རྒྱུ་བའི་ལྷ་ཀུན་དང་། གང་ཡང་ས་ལ་བརྟེན་པ་རྣམས། །སེམས་ཅན་ཀུན་ལ་དགེ་དོན་དུ། །བྱམས་པའི་སེམས་ཀྱིས་གནས་པར་མཛོད། །ཅེས་པས་འཕྲིན་ལས་བཅོས་ཞིང་ས་བསླང་། །གཉིས་པ་ས་སྦྱང་བ་ནི། ༀ་བཛྲ་ཡཀྵ་ཧཱུཾ། ཞེས་པ་ལན་བདུན་བཟླས་པའི་ཡུངས་ཀར་དང་། ཆུ་དང་ཐལ་བས་དབང་ལྡན་ནས་བརྩམས་ཏེ་དེ་ཉིད་བརྗོད་ཅིང་། གཡས་སྐོར་དུ་དཀྱིལ་འཁོར་གྱི་ས་གཞི་ལ་གཏོར་ནས། དེ་ཉིད་བརྗོད་ཅིང་བ་བྱུང་ལྔས་གཡས་སྐོར་དུ་བྱུགས་ལ། དྲི་ཞིམ་པོའི་ཆུ་ཀུ་ཤའི་རྩེ་མོས་གཏོར་རོ། །གསུམ་པ་ས་བཟུང་པ་ནི། བླ་རེ་ལ་སོགས་པས་གནས་ཁང་བརྒྱན་ཏེ། དཀྱིལ་འཁོར་གྱི་དབུས་སུ་རྡོ་རྗེ་སྐྱིལ་ཀྲུང་གིས་འདུག་སྟེ། ལག་པ་གཡས་པ་ས་གནོན་གྱི་ཕྱག་རྒྱས་དཀྱིལ་འཁོར་གྱི་ས་གཞིའི་དབུས་སུ་རེག་ཅིང་། ༀ་བཛྲ་སཏྭ་ཧཱུཾ། ཞེས་པ་དང་། ༀ་བཛྲ་སཏྭ་ས་མ་ཡ། ཞེས་སོགས་ཡི་གེ་བརྒྱ་པ་ལན་བདུན་བདུན་བརྗོད་ནས་གནས་འདིར་བཅོམ་ལྡན་འདས་ཀུན་རིག་རྣམས་པར་སྣང་མཛད་ཀྱི་དཀྱིལ་འཁོར་ཆེན་པོ་བྲི་བར་བྱའོ། །ཞེས་བརྗོད་ཅིང་བློས་ཀྱང་བཟུང་ངོ་། །བཞི་པ་ས་བསྲུང་ཞིང་བྱིན་གྱིས་བརླབ་པ་ནི། བཛྲ་རཏྣ། ཞེས་བཟླ་ཞིང་གཙུག་ཏོར་གྱོན་པ་ལ་སོགས་པ་རང་ཉིད་ཆས་སུ་གཞུག །ས་མ་ཡ་སྟྭཾ། ཞེས་དཀྱིལ་འཁོར་གང་དུ་འདྲི་བའི་
དབུས་སུ་སློབ་དཔོན་དང་སྒོ་སོ་སོར་སྒོའི་སློབ་དཔོན་རྣམས་འཁོད་དེ། གཡས་རྡོ་རྗེ་བསྙེམས་པ་དང་བཅས་པས་བླངས་ཏེ་གསོར་ཞིང་གཡོན་དྲིལ་བུ་དཀུར་བརྟེན་ལ། ཊཱཀྐི་ཧཱུཾ་ཛཿ ཊཱཀྐི་ཛཿ ཧོཿ ཞེས་ལན་གསུམ་བརྗོད་དེ། རྡོ་རྗེ་དེ་རང་གི་སྙིང་གར་གཏོད་པའི་ཚུལ་གྱིས་འཛིན་ཅིང་། དྲིལ་བུ་ལག་པ་གཡོན་པའི་མཐིལ་དུ་བཞག་ལ། ཧཱུཾ་ལས་སྐྱེས་པའི་རྡོ་རྗེ་དེ་ཡོངས་སུ་གྱུར་པ་ལས་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པ། དེ་ཞུ་བ་ལས་བྱུང་བའི་རྡོ་རྗེ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་བསྙེམས་མའི་བདག་པོའི་བདག །བཅོམ་ལྡན་འདས་དཔལ་མཆོག་དང་པོའི་སྐྱེས་བུའོ། །ཨཿ ལས་སྐྱེས་པའི་དྲིལ་བུ། དེ་ཡོངས་སུ་གྱུར་པ་ལས་རྡོ་རྗེ་སྙེམས་མ་དཀར་མོ་རྡོ་རྗེ་རྩེ་ལྔ་པ་གཉིས་དཀུར་བཟུང་ནས་བསྙེམས་པ་དང་བཅས་པ་དེ་ཞུ་བ་ལས་བྱུང་བའི་དྲིལ་བུ་བཅོམ་ལྡན་འདས་དེ་བཞིན་གཤེགས་པ་སྲིད་པའི་བདག་པོ་དམ་པ་ཀུན་གྱི་མཆོག །དབང་ཕྱུག་གི་དམ་པ་དེ་ཉིད་ཆོས་ཀྱི་མཆོག་གི་བཀའ་ཡང་དག་པ་སྩོལ་བར་མཛད་པ་ནི། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་མཆོག །སྲིད་པའི་མཆོག་ནི་མཛད་པ་ཡིན། །ཞེས་བརྗོད་ནས་དྲིལ་བུ་གསིལ་ཞིང་། དྷརྨཱཿ ཞེས་བརྗོད། རྡོ་རྗེ་སེམས་དཔའི་ཕྱག་ཆེན་བཅིངས་ལ།
སྲིད་པའི་བདེ་བ་ཤིན་ཏུ་མྱུར། །སྡུག་བསྔལ་ཆེན་པོ་དག་བྱའི་ཕྱིར། །ཤིན་ཏུ་བདེ་བ་དམ་པའི་ཐབས། །དམ་ཚིག་འདི་ནི་ཤིན་ཏུ་བསྐྱེད། །འདོད་པའི་ལོངས་སྤྱོད་ཐམས་ཅད་ནི། །ཅི་འདོད་པར་ནི་བསྟེན་བཞིན་དུ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །ཞེས་བརྗོད་ནས་དྲིལ་བུའི་ཞལ་གྱི་ཐད་དུ་རྡོ་རྗེ་འཕྲེད་ལ་བཟུང་ལ། དེ་བཞིན་གཤེགས་པ་ཐམས་ཅད་ཀྱི་བླ་ན་མེད་པའི་མཆོག་ཏུ་གསང་བའི་ཐེག་པ་ཆེན་པོའི་ཆེན་པོ་དམ་ཚིག་ཆེན་པོའི་སྦྱོར་བ་ནི་བཅོམ་ལྡན་འདས་དམ་ཚིག་གོ །ཞེས་བརྗོད་དེ། རྡོར་སེམས་ཀྱི་ཕྱག་ཆེན་བཅིངས་ལ། དེ་ཅིའི་ཕྱིར་ཞེ་ན། འདི་ལྟར། དྲིལ་བུ་གསིལ་ཞིང་། དེ་བཞིན་གཤེགས་པ་ཀུན་གྱིས་ཀྱང་། །འདའ་བ་རུ་ནི་མི་མཛད་པས། །ཕྱག་རྒྱ་དམ་ཚིག་ཅེས་སུ་བསྒྲགས། །ཡིད་ཀྱི་གཟུགས་ནི་བརྟན་ཕྱིར་རོ། །ཞེས་བརྗོད་དོ། །དེ་ནས་སྔོན་འགྲོ་གཏོར་མ་སྔར་བཤད་པ་ལྟར་ཕུལ་ཏེ། ཧཱུཾ་ཙན་དན་ཆུ་ལ་བདེན་པ་བདར་བ་ཡིས། །ཕྱོགས་སུ་གཏོར་བས་ཡོངས་སུ་དག་གྱུར་ཏེ། །མི་གཙང་དྲི་མའི་ཚོགས་རྣམ་དག་གྱུར་ནས། །དྲི་མེད་ཡོན་ཏན་དག་དང་ལྡན་པར་ཤོག །ༀ་སརྦྦ་སཾ་ཤོ་དྷ་ཡེ་སྭཱ་ཧཱ། ཞེས་ལན་གསུམ་བརྗོད་ཅིང་དྲི་བཟང་གི་ཆུ་གཏོར།དེ་ནས་ༀ་བཛྲ་ཡཀྵ་ཧཱུཾ། ཞེས་མཆོད་པ་བསང་སྦྱང་ནས་བཟླས་པའི་བར་བསྙེན་པའི་སྐབས་བཞིན་རྫོགས་པར་བྱས་པའི་རྗེས་སུ། ནམ་མཁའ་ལ་
དཀྱིལ་འཁོར་པ་དང་བཅས་པའི་སངས་རྒྱས་བྱང་སེམས་བཞུགས་པར་བལྟས་ལ། བསྙེམས་པ་དང་བཅས་པས་གཡས་རྡོ་རྗེ་གསོར། གཡོན་དྲིལ་བུ་གསིལ་ཞིང་། དེང་དུས་བདག་ཚེ་འབྲས་བུ་ཡོད། །བདག་གི་གསོན་པའང་འབྲས་བུར་བཅས། །བདག་ནི་དམ་ཚིག་ལྷ་རྣམས་དང་། །མཉམ་པར་འགྱུར་བར་ཐེ་ཚོམ་མེད། །བྱང་ཆུབ་སེམས་དང་སེམས་གཅིག་པས། །བདག་ནི་ཕྱིར་མི་ལྡོག་པར་འགྱུར། །བདག་དེང་དེ་བཞིན་གཤེགས་པ་ཡི། །རིགས་སུ་སྐྱེ་བར་གདོན་མི་ཟ། །དེང་བདག་ཉི་མ་དམ་པ་སྟེ། །བདག་ཉིད་མཆོག་སྦྱིན་བླ་ན་མེད། །སངས་རྒྱས་ཐམས་ཅད་སྤྱན་དྲངས་པས། །དེང་བདག་འདུས་པ་མཆོག་ཡིན་ནོ། །ཞེས་བརྗོད་དེ་རང་སྤྲོ་བ་བསྐྱེད་ལ། ༀ་སརྦྦ་ཏ་ཐཱ་ག་ཏ་པཱ་ད་བན་དྷ་ནཾ་ཀ་རོ་མི། ཞེས་དེ་བཞིན་གཤེགས་པ་ཐམས་ཅད་ལ་ཡན་ལག་ལྔས་ཕྱག་བྱ། ལྕེ་ཧཱུཾ་ལས་བྱུང་བའི་རྡོ་རྗེར་གྱུར་པར་བསམས་ལ། བཛྲ་ཛི་ཧྭཱ། ཞེས་བརྗོད་པས་བྱིན་གྱིས་བརླབས་ནས། གཡས་སྤོས་སྣོད་ཐོགས་གཡོན་དྲིལ་བུ་གསིལ་ཞིང་།མ་ལུས་ཕྱོགས་ན་བཞུགས་པ་ཡི། །སངས་རྒྱས་རྣམས་ནི་བདག་ལ་དགོངས། །བདག་མིང་ཆེ་གེ་ཞེས་བྱ་བ་བདག །རྣམ་པར་སྣང་མཛད་དཀྱིལ་འཁོར་བྲི། །སངས་རྒྱས་ཀུན་དེང་གཤེགས་སུ་གསོལ། །དངོས་གྲུབ་འདིར་ནི་སྩལ་དུ་གསོལ། །དཀྱིལ་འཁོར་ཆེན་པོའི་ལས་རྣམས་ནི། །ཅི་ནུས་བཞིན་དུ་རབ་ཏུ་བགྱི། །ཞེས་བརྗོད་པས་སྙན་མནན། དེ་ནས་སྒོ་བཞིའི་སློབ་དཔོན་རྣམས་ཀྱིས་ཐུན་མོང་དུ་མཆོད་
པ་བསང་སྦྱངས་བྱས་ནས། ཤར་ནས་སྔགས་ཕྱག་རྒྱ་དང་བཅས་པའི་ཉེར་སྤྱོད་ལྔ་རོལ་མོ་དང་བཅས་པ་དང་། ལྷོ་ནས་སྒེག་སོགས་བཞི་དང་ནུབ་ནས་བདུག་པ་མ་སོགས་བཞིས་མཆོད། བྱང་ནས་མཉམ་མེད་མི་གཡོ། ཞེས་སོགས་ཀྱིས་བསྟོད། ཐུན་མོང་དུ་མཎྜལ་བཀོད་དེ། གུ་རུ་ཨི་དཾ་མཎྜལ་ཀཾ་ནིརྱཱ་ཏ་ཡཱ་མི། ཞེས་པས་ཕུལ་ནས། སློབ་དཔོན་གཙོ་བོའི་ང་རྒྱལ་གྱིས་གནས་པ་ལ། རྡོ་རྗེ་དྲིལ་སྟབས་དང་བཅས་པས་མགྲིན་གཅིག་ཏུ། མགོན་པོ་ཁྱེད་ལ་གསོལ་བ་ནི། །སངས་རྒྱས་ཀུན་གྱི་འཁོར་ལོ་ཆེ། །དཀྱིལ་འཁོར་ཆེན་པོ་དམ་པ་ཡི། །ཆོ་ག་མཆོག་ནི་བཤད་པར་གསོལ། །ཞེས་ཐལ་མོ་སྦྱར་བས་ལན་གསུམ་གསོལ་བ་གདབ། རྡོ་རྗེ་སློབ་དཔོན་གྱིས་རྡོ་རྗེ་ཁུ་ཚུར་གཉིས་ཀྱི་མཛུབ་མོ་བརྐྱང་ལ་རྩེ་མོ་སྦྱར་བ་འོག་ཏུ་ཕྱོགས་པས་སྤྱི་བོར་བཟུང་ཞིང་། ཧཱུཾ་བཛྲ་ཨུ་ཏིཥྛ། ཞེས་བརྗོད་པས་བསྒོམས་པའི་དཀྱིལ་འཁོར་ནམ་མཁར་བཏེག་གོ །དེ་ནས་སློབ་དཔོན་སྐྱིལ་ཀྲུང་བཤིག་ལ་ལངས་ཏེ་ཤར་དུ་ཕྱོགས་པས་མཉམ་པའི་རྐང་སྟབས་བྱས་ལ་མགོ་བོར་ཐལ་མོ་སྦྱར་ནས། ༀ་པྲ་ན་མ་མི་སརྦྦ་ཏ་ཐཱ་ག་ཏ་ན། ཞེས་དེ་བཞིན་གཤེགས་པ་རྣམས་ལ་ཕྱག་བྱས་ལ། སེམས་ཅན་མ་རིགས་པའི་མིན་པས་བསྒྲིབས་ཤིང་བདུད་ཀྱི་དབང་དུ་སོང་བ་རྣམས་ཀྱི་བདུད་བསལ་བའི་ཕྱིར་དུ། རང་ཉིད་གཙོ་བོ་ལས་བྱེ་བའི་ཁྲོ་བོ་འཇིག་རྟེན་གསུམ་ལས་རྣམ་པར་རྒྱལ་བ་སྐུ་མདོག་སྔོན་པོ་ཞལ་གཅིག་
ཕྱག་བཞིའི་དང་པོ་གཉིས་ཧཱུཾ་མཛད་ཀྱི་ཕྱག་རྒྱས་རྡོ་རྗེ་དང་དྲིལ་བུ། འོག་མ་གཉིས་པདྨ་དང་ཞགས་པ་འཛིན་པ་གཡོན་བརྐྱང་བྱས་ལ། གཡས་བསྐུམ་ཞིང་གཡོན་བརྐྱང་པའི་སྟབས་ཀྱིས་བཞུགས་པའི་མིག་གཡས་པ་མ་ལས་ཉི་མ། གཡོན་པ་ཊ་ལས་ཟླ་བ། མིག་འབྲས་གཉིས་སུ་ཧཱུཾ་ལས་རྡོ་རྗེ་རྩེ་ལྔ་པ་དང་བཛྲ་དྲིཥྚས་མཚན་པར་གྱུར། གཡོན་བརྐྱང་གིས་དབང་ལྡན་དུ་ཕྱོགས་ལ། ༀ་ཀྲོ་དྷ་དྲིཥྚི་ཧྲཱིཿ ཞེས་དཔལ་ལྡན་ནས་མཐོང་གི་བར་དུ་ཁྲོ་བོའི་རྡོ་རྗེའི་ལྟ་བས་གཡོན་སྐོར་དུ་བལྟ་ཞིང་། སླར་ཡང་དེ་བཞིན་དུ་གཡས་སྐོར་དུ་བལྟས་པས་བགེགས་ཐམས་ཅད་བསྐྲད་པར་བསམ། དེ་ནས་ཧཱུཾ་མཛད་ཀྱི་ཕྱག་རྒྱ་བཅིངས་ལ་ང་རྒྱལ་བཟུང་བ་ནི།བདག་ནི་རང་ཉིད་རྡོ་རྗེ་ཅན། །རྡོ་རྗེ་སེམས་དཔའ་བདག་རང་ཉིད། །བདག་ནི་སངས་རྒྱས་རྒྱལ་པོ་ཆེ། །བདག་ནི་རྣལ་འབྱོར་དབང་ཕྱུག་རྒྱལ། །བདག་ནི་ཕྱག་ན་རྡོ་རྗེ་བསྟན། །བདག་ནི་བདག་པོ་རྡོ་རྗེ་ཆེ། །དེང་བདག་རྡོ་རྗེ་སེམས་དཔར་གྲུབ། །ཅེས་བརྗོད་དོ། །རྐང་མཐིལ་གཉིས་སུ་ཨཿ ཨཿ ལས་བྱུང་བའི་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་འབར་བ་རེ་རེས་མཚན་པར་གྱུར། ཧཱུཾ་ཞེས་བརྗོད་ཅིང་རྡོ་རྗེའི་འགྲོས་སམ་གང་ཡང་རུང་བས་དབུས་ནས་དབང་ལྡན་དུ་སོང་སྟེ། གཡས་སྐོར་དུ་ལན་ཅིག་བསྐོར་ལ་དབང་ལྡན་ནས་ཁ་ནང་དུ་ཕྱོགས་ཏེ། རི་རབ་ཀྱི་རྩེ་ནས་རླུང་གི་དཀྱིལ་འཁོར་གྱི་བར་དུ་སྣ་ཚོགས་རྡོ་རྗེའི་རང་བཞིན་དུ་གྱུར། ཞེས་བརྗོད་ཅིང་དེ་ལྟར་བསམ་
མོ། །དེ་ནས། ༀ་བཛྲ་མ་ཧཱ་ཀྲོ་དྷ་རཱ་ཛ་ས་པ་རི་ཝཱ་ར་བཛྲ་ས་མཱ་ཛཿ ཧཱུཾ། ཡེ་ཤེས་བསྐལ་པ་མེ་ལྟར་འབར་བའི་འོད། །ཅེས་སོགས་ཁྲོ་བོ་སྤྱན་དྲང་བ་ནས་བགེགས་ལ་བཀའ་བསྒོ་བ་དང་། བསྣུན་སྲེག་བཅིང་གསུམ་ནས། ༀ་བཛྲ་བནྡྷ་བཾ། ཞེས་པའི་བར་སྔགས་ཕྱག་རྒྱ་དང་བཅས་པས་སྔར་བཞིན་སྲུང་འཁོར་བསྒོམས་ནས། ཕུར་བུ་ལྔ་དབུས་དང་མཚམས་བཞིར་བཀོད་དེ། སྔར་ལྟར་བསང་ཞིང་། ༀ་ཤཱུ་ནྱ་ཏཱ། ཞེས་སོགས་ཀྱིས་སྦྱངས་ལ། ཕུར་བུ་རྣམས་སྟོང་པ་ཉིད་དུ་གྱུར། སྟོང་པའི་ངང་ལས་སྣ་ཚོགས་པདྨ་དང་ཉི་མའི་གདན་ལྔའི་སྟེང་དུ་ཧཱུཾ་ལྔ་ཡོངས་སུ་གྱུར་པ་ལས། དབུས་ཀྱི་ཕུར་བུ་ཁྲོ་བོ་མཐའ་ཡས་སེར་པོ་ཞལ་གཅིག་ཕྱག་གཉིས་ཏིང་ངེ་འཛིན་གྱི་ཕྱག་རྒྱ་མཛད་པ། བྱང་ཤར་གྱི་ཕུར་བུ་ཁྲོ་བོ་རྣམ་རྒྱལ་སྔོན་པོ་ཧཱུཾ་མཛད་ཀྱི་ཕྱག་རྒྱས་རྡོ་རྗེ་དང་དྲིལ་བུ་འཛིན་པ། ཤར་ལྷོའི་ཕུར་བུ་ཁྲོ་བོ་སྤྲིན་སྒྲ་ནག་པོ་གཡས་རལ་གྲི་གཡོན་ཞགས་པ་འཛིན་པ། ལྷོ་ནུབ་ཀྱི་ཕུར་བུ་ཁྲོ་བོ་གསུས་པོ་ཆེ་སྔོན་པོ་གཡས་རྡོ་རྗེ་བེ་ཅོན། གཡོན་སྡིགས་མཛུབ་ཞགས་པ་དང་བཅས་པ་ནུ་མར་འཛིན་པ། ནུབ་བྱང་གི་ཕུར་བུ་ཁྲོ་བོ་རྒྱལ་བ་དམར་པོ་གཡས་རྡོ་རྗེ་གཡོན་སྡིགས་མཛུབ་ནུ་མར་འཛིན་པ། ཐམས་ཅད་ཀྱི་ལྟེ་བ་མན་ཆད་མདུང་རྩེ་གཅིག་པའི་དབྱིབས་ཅན་གྱི་ཕུར་བུ་མེ་དཔུང་རབ་ཏུ་འབར་བར་གྱུར། ༀ་བཛྲ་ཀཱི་ལི་ཀཱི་ལཱ་ཡ་སརྦྦ་
བིགྷཱ་ན་བན་དྷ་ཧཱུྃ། ཞེས་པ་བརྒྱ་རྩ་བརྒྱད་བཟླས་ནས། གཡོན་པའི་རྡོ་རྗེ་ཁུ་ཚུར་གྱིས་ཕུར་བུ་བཟུང་ལ། གཡས་རྡོ་རྗེའི་ཐོ་བ་བླངས་ཏེ། ཧཱུཾ་ཞེས་བཟློས་ཤིང་དབང་ལྡན་ནས་བརྩམས་ཏེ་དཀྱིལ་འཁོར་གྱི་གྲྭ་བཞི་དང་། དབུས་སུ་ཕུར་བུ་བཙུགས་ནས་ༀ་གྷ་གྷཱ་གྷཱ་ཏ་ཡ་གྷཱ་ཏ་ཡ་སརྦྦ་དུཥྚཾ་ཕཊཿ ཀཱི་ལཱ་ཡ་ཀཱི་ལཱ་ཡ་སརྦྦ་པཱ་པཾ་ཕཊ། བཛྲ་ཀཱི་ལཱ་ཡ་བཛྲ་དྷ་རོད་ཨཛྙཱ་པ་ཡ་ཏི་སྭཱ་ཧཱ། ཞེས་བརྗོད་ཅིང་རྡོ་རྗེའི་ཐོ་བའམ་མེད་ན་གཡས་རྡོ་རྗེ་རྩེ་གསུམ་པའི་ཕྱག་རྒྱས་ཕུར་བུའི་མགོ་ནས་བརྡུང་ཞིང་། བགེགས་རྣམས་ཀྱི་སྤྱི་བོ་ནས་རྐང་མཐིལ་གྱི་བར་དུ་ཕུར་བུ་བཏབ་པས་ལུས་ངག་ཡིད་གསུམ་གཡོ་འགུལ་མེད་ཅིང་། སྟེང་འོག་དང་ཐད་ཀར་ཁོར་ཡུག་ཆེན་པོའི་བར་དུ་འགྲོ་བ་ཐམས་ཅད་བགེགས་དང་བྲལ་བར་གྱུར། ཞེས་བརྗོད་ཅིང་དེར་བསམ་མོ། །དེ་ནས་འོག་ནས་འབྱུང་བ་ལྟར་ལས་ཐམས་ཅད་པའི་བུམ་པ་བསྒྲུབ་པར་བྱའོ། །དེ་དག་ནི་སའི་ཆོ་གའོ། ། ། །དེ་ནས་ལྷག་གནས་ལ། སའི་ལྷ་མོ་སྟ་གོན་ནི། གྲུབ་ན་གཞན་ནས་འབྱུང་བ་ལྟར་བྱའོ། །ལྷ་སྟ་གོན་ནི། ༀ་བཛྲ་ཡཀྵ་ཧཱུཾ། ཞེས་ལས་ཐམས་ཅད་པ་བཟླས་པའི་དྲིའི་ཆུས། དཀྱིལ་འཁོར་གྱི་ས་གཞི་བསང་ཞིང་བྱུག་པ་ལ་སོགས་བྱས་ལ། ལས་ཀྱི་ཐིག་སྐུད་དཀར་པོ་སུམ་སྒྲིལ་ལག་པས་བཟུང་བའི་ཆ་མ་གཏོགས་སྲིད་དུ་དཀྱིལ་འཁོར་གྱི་ཉིས་འགྱུར་སྦོམས་སུ་སྒོའི་ཉི་ཤུ་ཆ་དྲི་བཟང་པོའི་ཆུ་དང་ཕྱིའི་བདུད་རྩི་ལྔ་དང་བ་བྱུང་ལྔས་བྱུགས་ཏེ། གསེར་ལ་སོགས་
པའི་སྣོད་དུ་བཞག་ལ། བསང་སྦྱངས་སྔོན་དུ་འགྲོ་བས་རྡོ་རྗེ་གནོད་སྦྱིན་དུ་བསྐྱེད། ཡེ་ཤེས་པ་དགུག་བཞུག་དང་མཆོད་ཅིང་བསྟོད་ལ། ལག་པ་གཡས་པས་རེག་ཅིང་ལས་ཐམས་ཅད་པ་བཟླས་ཏེ་བསྲུང་བར་བྱའོ། །དེ་ཉིད་བཟླས་པའི་ཕྱིའི་བདུད་རྩི་ལྔ་དང་ཡུངས་ཀར་དང་དྲིའི་ཆུས་གཏོར་ལ་རྡོ་རྗེ་དང་བཅས་པའི་ལག་པ་གཡས་པས་རེག་ཅིང་། ༀ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ། ཞེས་བཟླས་ནས། ༀ་ཨཱཿ ཧཱུཾ། ཞེས་བརྒྱ་རྩ་བརྒྱད་བཟླས་པས་ལྷག་གནས་བྱས་ལ་ནམ་མཁར་གདབ་པ་མ་གཏོགས་ཐིག་གི་སྐོར་ཕྱོགས་དང་སློབ་དཔོན་གྱི་སྡོད་ས་ཁ་བལྟ་ཕྱོགས་སོགས་ཡེ་ཐིག་གི་སྐབས་ནས་འབྱུང་བ་ལྟར་བྱས་ལ། ཡི་གེ་གསུམ་བཟླ་ཞིང་ལས་ཐིག་རྫོགས་པར་གདབ་པའི་ཚུལ་ནི།ཤར་སོགས་ཕྱོགས་ཀྱི་ཐིག་ལེའི་སྟེང་། སྲད་བུས་བཟུང་ནས་མཎྜལ་བཞིས། །ཉ་ཡི་མགོ་དང་མཇུག་མའི་མཐར། །ཚངས་ཐིག་དང་ནི་ཟུར་ཐིག་གདབ། །ཟུར་དེ་སྒོ་ཚད་བདུན་དང་ཕྱོགས། །འོད་ཕྲེང་མཐའ་ནས་མཐའ་ཡི་བར། །ཚད་མཉམ་ཆ་དགུར་བགོ་བ་ནི། །མི་རུང་ཕྱིར་དང་ཕྱི་མ་གཉིས། །ཚད་མཉམ་བརྒྱད་ཀྱི་ཆ་རེ་དང་། །མཉམ་ཕྱིར་ཆ་བཅུར་བགོས་པ་དང་། །ཆ་དགུར་གསུངས་པ་མི་འགལ་བས། །ཚངས་པའི་དབུས་ནས་འོད་ཕྲེང་མཐར། །རིམ་བཞིན་ཚད་མཉམ་བཞི་དང་ནི། །བཞི་ཆའི་ཕྱེད་དུ་བགོས་པ་ཡི། །དང་པོ་གཉིས་པའི་གནས་སུ་ནི། །རིམ་བཞིན་
མདའ་ཡབ་ཐིག་གཉིས་གདབ། །ཚད་མཉམ་བརྒྱད་ཀྱི་ཆ་རེ་ནི། །ཆ་མཉམ་གསུམ་དུ་བགོས་པ་ཡི། །སུམ་ཆ་སྒོ་ཡི་ཚད་ཡིན་ཏེ། །སྒོ་ཁྱུད་དག་ཀྱང་དེ་བཞིན་ནོ། །ཚད་མཉམ་དང་པོའི་སུམ་གཉིས་དང་། །གཉིས་པའི་སུམ་ཆ་དང་པོར་ནི། །རིམ་བཞིན་རྩ་བའི་ཐིག་གཉིས་གདབ། །རྩ་བའི་ཕྱི་རོལ་གཅིག་དང་གཉིས། །གཅིག་གཉིས་གཅིག་དང་གཅིག་གི་མཐར། །ཐིག་དྲུག་ཟུར་ནས་ངོས་སུ་སྟེ། །ཚངས་ལས་རིམ་གྱིས་རིང་བ་ནི། །ཆུ་ཆུང་གསུམ་དུ་དང་པོའི་ཐིག །གཉིས་ཐིག་ཆུ་ཆུང་གཉིས་རྩེར་རེག །ཆ་ཆུང་བརྒྱད་དུ་གསུམ་སྟེགས་བུའི། །ཐིག་ལས་དྲང་པོའི་ཐིག་བཞི་སྟེང་། །གསུམ་ནི་ཆ་ཆུང་ལྔ་བཞི་པ། །ཆ་ཆུང་བཞི་དེའི་དང་པོ་ནི། །ངོས་ཐིག་རྩེ་མོར་ཡང་དག་རེག །གསུམ་ནི་ཆ་ཆུང་རེ་རེའི་བར། །བཞི་པའི་རྩེ་ནས་ངོས་སུ་ཐིག །ཆ་ཆུང་བཅུ་དང་ལྡན་པའོ། །རྩ་བའི་རྩེ་ནས་བྱུང་བའི་ཐིག །ཆ་ཆུང་བཞི་པ་ངོས་སྟེང་དུ། །ཆ་ཆུང་གཉིས་གཉིས་ཐད་ཀར་ནི། །ཆ་ཆུང་བརྒྱད་དེ་གསུམ་འཁྱོག་པ། །དཀྱིལ་འཁོར་ནང་མའི་ཁྱད་པར་ནི། །ཆ་ཆུང་ལྔ་རུ་གསུམ་སྟེགས་བུའི། །ཐིག་ལས་དྲང་པོའི་ཐིག་གཅིག་གོ །དེ་ནི་ཆ་ཆུང་ལྔ་པ་སྟེ། །ངོས་ཐིག་རྩེ་མོར་ཡང་དག་རེག །དེ་ཡི་རྩེ་ནས་ངོས་སུ་ཐིག །ཆ་ཆུང་བཅུ་དང་ལྡན་པའོ། །རྩ་བའི་རྩེ་ནས་བྱུང་བའི་ཐིག །ཆ་ཆུང་བཞི་པ་ངོས་སུ་གཉིས། །སྟེང་དུ་གསུམ་སྟེ་ཐད་ཀར་ནི། །ཆ་ཆུང་བརྒྱད་དེ་གསུམ་འཁྱོག་པ། །དེ་ཕྱིར་ཕྱི་མའི་ཁྱམས་ལ་
ནི། །ཆ་མཉམ་གསུམ་དུ་བགོ་བར་བྱ། །ཀ་བའི་རྩེ་ནས་ཕྱི་ངོས་སུ། །ཆ་ཆུང་རེ་རེ་དོར་བར་ཐིག །བཅུ་གཅིག་འདི་ལ་ལྔ་པ་དང་། །བདུན་པ་ཆ་ཆུང་ཕྱེད་དང་གཉིས། །དེ་ལ་ཕྱོགས་གཉིས་སུ་ནི་རྒྱར། །ཚངས་པའི་གཡས་དང་གཡོན་དུ་ནི། །ཆ་ཆུང་ཕྱེད་བཅས་མདའ་ཡི་མཐར། །སྣམ་བུ་ཆ་ཆུང་ཕྱེད་དང་གསུམ། །ཐིག་ནི་ཆ་ཆུང་ཕྱེད་དང་བཞི། །ཆ་ཆུང་དྲུག་མཐར་གཉིས་པ་དང་། །གསུམ་པ་ཆ་ཆུང་གསུམ་པའོ། །ཆ་ཆུང་བཞི་མཐར་བཞི་པ་ནི། །ཆ་ཆུང་ལྔ་སྟེ་ཟླ་ཕྱེད་བཅས། གསུམ་དོར་ནས་ནི་ཕྱེད་དང་ལྔ། །གསུམ་ནས་དྲུག་པ་ཆ་ཆུང་ལྔ། །བཞི་ནི་ཆ་ཆུང་བདུན་རྣམས་ཏེ། །ཐིག་བཅུ་གཅིག་པ་ཆ་ཆུང་ལྔ། །སྣམ་བུ་ལྔ་པའི་སྟེང་གི་ནི། །ངོས་སུ་ཆ་ཆུང་ཕྱེད་དང་བཞི། །བདུན་པའི་འོག་ལ་ཆ་ཆུང་གསུམ། །སྟེང་ནི་ཆ་ཆུང་དྲུག་སྟེང་དུ། །སྣམ་བུ་རྣམས་མཐར་སོན་པའི་ཐིག །གཞན་གྱི་མཐའ་དང་ལྷན་ཅིག་སྟེ། །ཀྱོག་པོ་གཅིག་གོ་འདི་ནང་དུའང་། །ཆ་ཆུང་ཕྱེད་ནས་དེ་བཞིན་གཞན། །ཚངས་དང་མདའ་ཡབ་ཐིག་ཕྲད་ནས། །ཆ་ཆུང་བཞི་དང་བཞི་གསུམ་ནི། །སོང་བར་ཆ་ཆུང་དགུ་དང་ནི། །བཞི་ཆས་གཡས་གཡོན་ཕྱི་རྭ་བསྐོར། །མདའ་ཡབ་ཚངས་ལས་ཆ་ཆུང་ནི། །ཕྱེད་བཅས་གསུམ་ནས་ཐད་ཀར་གཡས། །དྲུག་ནས་ཕྱེད་བཅས་བཅུ་གཉིས་ཀྱིས། །གཡོན་བསྐོར་གཡས་པ་དེ་ལས་ལྡོག །དེ་ཕྱིར་ཆ་ཆུང་རིག་བྱེད་མཐར། །ཐིག་ཟླུམ་དེ་ནས་བཞི་ཡིན་ཏེ། །སྒོ་ཕྱེད་ཕྱེད་དང་གཉིས་
དང་ཕྱེད། །སྒོ་ཚད་གཅིག་ནི་དོར་བར་རོ། །དབུས་ཀྱི་དཀྱིལ་འཁོར་ཐིག་གདབ་པ། །ཚངས་པའི་དབུས་ནས་ཆ་ཆུང་ནི། །བཅོ་ལྔའི་མཚམས་ནས་ནང་དུ་ནི། །ཆ་ཆུང་གཅིག་དང་བཞི་དང་ནི། །གཅིག་དང་གཅིག་མཐར་ཟླུམ་ཐིག་ལྔ། །ཚངས་ལས་ཕྱེད་གསུམ་གཅིག་སོང་བར། །ཟླུམ་ཐིག་ནང་མའི་མཐའ་ནས་མཐར། །རིམ་བཞིན་ཐིག་བརྒྱད་གདབ་པར་བྱ། །འཁོར་ལོའི་རྩིབས་ཀྱི་ས་ཡི་ཆ། །ཚངས་དང་ཟུར་ཐིག་གིས་བཅད་པའི། །བར་སྟོང་བརྒྱད་རྣམས་ཕྱེད་ཕྱེད་བགོ །རེ་རེའང་འཁོར་ལོའི་རྩིབས་རེ་སྟེ། །ནང་གི་ཟླུ་སྐོར་བཞི་ཆར་བགོ །ཕྱི་མའང་དེ་ཡི་ཚད་ཀྱིས་བགོ །ནང་མའི་ཆ་གཅིག་མཚམས་ནས་ཐོན། །སྒོ་ཚད་གཅིག་གི་དབུས་སོང་སྟེ། །ཕྱི་ཟླུམ་བཞི་ཆ་ལྷག་ལུས་པའི། །མཚམས་སུ་ཡང་དག་སོན་པའོ། །འདི་ནང་དུའང་ཆ་ཆུང་ཕྱེད། །དོར་ནས་དེ་བཞིན་གཞན་བྱ་སྟེ། །ཆོས་ཀྱི་འཁོར་ལོ་འདྲ་བའི་རྩིབས། །བཅུ་དྲུག་ལྡན་པའི་ཐིག་གདབ་བོ། །ཞེས་པའི་སྐོར་ཐིག་རྣམས་ནི། ཕུར་བུ་བསངས་སྦྱངས་ལ། ཧཱུཾ་ལས་བྱུང་བའི་སེང་ལྡེང་གི་ཕུར་བུ་སྟེང་རྡོ་རྗེ་རྩེ་ལྔ་པ་འོག་རྡོ་རྗེ་རྩེ་གཅིག་པའི་རྣམ་པ་ཅན་དུ་གྱུར་པར་བསམས་ལ། སྔར་བཤད་པའི་ཕུར་བུའི་སྔགས་བརྒྱ་རྩ་བརྒྱད་བཟླས་ལ་བརྡུང་བའི་སྔགས་ཀྱིས་དཀྱིལ་འཁོར་གྱི་དབུས་སུ་བཏབ་ལ་སྲད་བུ་ཉིས་བལྟབ་ཏུ་བཏགས་ལ། དབང་ལྡན་ནས་བརྩམས་ཏེ་གཡས་སྐོར་དུ་བསྐོར་རོ། །ཐིག་ཐེབས་པ་དང་ལག་པས་རྡོར་དྲིལ་བཟུང་ལ་འོག་ནས་འབྱུང་
བའི་སྔགས་དང་ཕྱག་རྒྱས་ཕུར་བུ་ཕྱུང་སྟེ། རང་གི་ལག་གི་རྡོ་རྗེའི་དབུས་སུ་ཐིམ་པར་གྱུར་པའམ། ཡང་ན་དགྲ་བགེགས་ཀྱི་ལུས་ལ་ཟུག་པར་བསམ་མོ། །ཕུར་བུ་དངོས་སུ་མེད་ནའང་བསམ་གཏན་གྱིས་དེ་ལྟར་བསྐྱེད་ལ་བྱའོ། །དེ་ནས་སྔར་ནམ་མཁར་བཏེག་པའི་རྟེན་གྱི་དཀྱིལ་འཁོར་དམིགས་པས་ཕབ་ནས། སརྦྦ་བིད། ཅེས་བརྗོད་ཅིང་དྲི་བཟང་གིས་གཙོ་བོ་ལྔའི་གནས་སུ་གྲུ་བཞི་དང་། སྤྱན་མ་ནས་ཁོར་ཡུག་པའི་བར་གྱི་རང་རང་གི་སྙིང་པོ་བརྗོད་ཅིང་། ལྷ་རང་རང་གི་གནས་རྣམས་སུ་དྲིའི་ཐིག་ལེ་ཟླུམ་པོ་བྱའོ། །དེ་ལྟར་བྱས་ནས། རྟེན་གྱི་དཀྱིལ་འཁོར་གསལ་གདབ་པའི་ཚུལ་ནི། རང་གི་མདུན་དུ་ནམ་མཁའ་ནས་རྟེན་གྱི་གཞལ་ཡས་ཁང་གནས་པར་གྱུར་པ་ནི། རིན་པོ་ཆེ་སྣ་ཚོགས་ལས་གྲུབ་པའི་ཕྱིའི་གཞལ་ཡས་ཁང་དང་། དེའི་ཕྱེད་ཀྱི་ཚད་དུ་ནང་གི་གཞལ་ཡས་ཁང་ཞེས་པ་ནས། ལྟེ་བ་མུ་ཁྱུད་དང་བཅས་པ། དེའི་དབུས་སུ་སེང་གེས་བཏེག་པའི་རིན་པོ་ཆེའི་ཁྲི། ཞེས་པ་ནས། བྱང་དུ་མཁའ་ལྡིང་རྣམས་ཀྱིས་བཏེག་པའི་རིན་པོ་ཆེའི་ཁྲི། ལྷ་རྣམས་ཀྱི་གནས་སུ་པདྨ་དང་ཟླ་བའི་དཀྱིལ་འཁོར། ཞེས་པའི་བར་སྔར་བཞིན་བྱས་ལ། བརྟེན་པའི་དཀྱིལ་འཁོར་བསྐྱེད་པའི་ཚུལ་ནི། དབུས་ཀྱི་ཟླ་བའི་དཀྱིལ་འཁོར་གྱི་སྟེང་དུ་སརྦྦ་བིད་ཡོངས་སུ་གྱུར་པ་ལས་བཅོམ་ལྡན་འདས་ཀུན་རིག་སྐུ་མདོག་དཀར་པོ། ཞལ་བཞི་དཀར་བ། ཞེས་པ་ནས་
ཉི་མའི་འོད་ཀྱི་རྒྱབ་ཡོལ་མངའ་བ། ཕྱོགས་བཞིའི་ཟླ་བའི་དཀྱིལ་འཁོར་རྣམས་ཀྱི་སྟེང་དུ་བརྦྦ་བིད་བཞི་ཡོངས་སུ་གྱུར་པ་ལས་ཤར་དུ་ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ། ཞེས་སོགས་སྔར་ལྟར་བརྗོད་ཅིང་བསྒོམ་པར་བྱའོ། །དེ་བཞིན་དུ་ཁོར་ཡུག་པའི་བར་རྣམས་ལྷ་རང་རང་གི་སྙིང་པོ་ལས་བདག་བསྐྱེད་ཀྱི་སྐབས་ལྟར་བསྐྱེད་ནས། ཐམས་ཅད་ཀྱི་གནས་གསུམ་དུ་ཡི་གེ་གསུམ་དང་རང་རང་གི་ཐུགས་ཀར་ཟླ་བ་ལ་ས་བོན་དགོད་པ་སོགས་བྱས་ལ། ལྷ་རྣམས་ཀྱི་ཐུགས་ཀའི་ས་བོན་ལས་འོད་ཟེར་འཕྲོས་པས་ནམ་མཁར་བཏེག་པའི་བརྟེན་པ་ལྷ་རྣམས་སྤྱན་དྲངས་པར་བསམས་ལ། ༀ་བཛྲ་ཨཾ་ཀུ་ཤ་ཛཿ ནམ་མཁར་བཏེག་པའི་ཡེ་ཤེས་པ་རྣམས་རང་རང་གི་དམ་ཚིག་པ་རྣམས་དང་གཉིས་སུ་མེད་པར་གྱུར།ༀ་བུདྡྷ་ཨ་བྷི་ཥིཉྩ་ༀ། ཞེས་སོགས་སྔར་བཤད་པའི་སྔགས་དང་ཕྱག་རྒྱས་རིགས་ལྔས་དབང་བསྐུར་ནས་མཆོད་པ་རེ་རེའང་ལྷ་གྲངས་དང་མཉམ་པའམ། བཅུ་ལས་མི་ཉུང་བར་བྱས་ལ་ཆུ་གཉིས་ཉེར་སྤྱོད་རོལ་མོ་དང་བཅས་པ་ལ་སོགས་པས་མཆོད་ལ་བསྟོད་པ་རྒྱས་བསྡུས་གང་རུང་བྱའོ། །ཡང་ན་སྟ་གོན་གྱི་ལྷ་བསྐྱེད་ཚུལ་ནི། ལྷ་རང་རང་གི་སྔགས་བདུན་བདུན་བརྗོད་ཅིང་དྲི་བཟང་གི་ཐིག་ལེ་སྔར་ལྟར་བྱས་ལ། བསྙེན་པའི་སྐབས་བཞིན་ཆོ་ག་གསུམ་གྱིས་ལྷ་ཐམས་ཅད་བསྐྱེད་ལ། ཡི་གེ་གསུམ་དགོད་པ་ནས་བསྟོད་པའི་བར་བྱའོ། །བུམ་པ་སྟ་གོན་ནི།
མགུལ་ཆིངས་ཁ་རྒྱན་ལ་སོགས་པ་སྤྱི་དང་མཐུན་པར་བཤམས་ལ། བུམ་པ་ལྔ་བྱེད་ན་དབུས་ཀྱི་བུམ་པར་གཙོ་བོ་དང་། ཕྱོགས་བཞིའི་བུམ་པར་རང་རང་གི་ཕྱོགས་མཚམས་ཀྱི་རྩ་བའི་ལྷ་རྣམས་བསྐྱེད་པ་ནས་མཆོད་བསྟོད་ཀྱི་བར་བྱའོ། །བུམ་པ་གཉིས་ལས་མེད་ན། བསངས་སྦྱངས་ལ། སྟོང་པའི་ངང་ལས། བཾ་ལས་བྱུང་བའི་བུམ་པ་དཀར་པོ། ལྟོ་བ་ཆེ་བ། མགྲིན་པ་རིང་བ། མཆུ་འཕྱང་བ་ལ་སོགས་པ་མཚན་ཉིད་ཐམས་ཅད་ཡོངས་སུ་རྫོགས་པར་གྱུར།ༀ་ཏཱཔྟེ་ཏཱཔྟེ་མ་ཧ་ཏཱཔྟེ་སྭཱ་ཧཱ། ལྷའི་ཆུ་བོ་གངྒཱ་དང་བུམ་པའི་ཆུ་དབྱེར་མེད་པར་གྱུར། རྣམ་རྒྱལ་བུམ་པའི་ནང་དུ། པད་ཟླའི་གདན་སུམ་ཅུ་སོ་བདུན། དབུས་ཀྱི་གདན་ལ་ༀ་ལས་འཁོར་ལོ་ༀ་གྱིས་མཚན་པ་ལས། བཅོམ་ལྡན་འདས་ཀུན་རིག་སྐུ་མདོག་དཀར་པོ། ཞེས་པ་ནས་འབེབས་པའི་བར་ཆོ་ག་གསུམ་གྱིས་བསྐྱེད་པ་ནས། ལས་བུམ་གྱི་ནང་དུ། པད་ཟླའི་གདན་ལ། ཀྵཾ་ལས་མཆེ་བ་ཀྵཾ་གིས་མཚན་པ་ལས། རྡོ་རྗེ་གནོད་སྦྱིན་སྐུ་མདོག་ནག་པོ། ཞེས་སོགས་སྔར་བཞིན་བསྐྱེད་ལ། ལྷ་ཐམས་ཅད་ཀྱི་གནས་གསུམ་དུ་ཡི་གེ་གསུམ་དགོད་པ་ནས་མཆོད་བསྟོད་ཀྱི་བར་སྔར་བཞིན་བྱས་པའི་རྗེས་སུ་བཟླས་པའི་སྔགས་ཀྱིས་བསྐོར་བའི་ལྷ་རང་རང་གི་ཐུགས་ཀའི་ས་བོན་ལས་ལྷའི་ཚོགས་འོད་འཕྲོས། འགྲོ་བའི་དོན་བྱས། སླར་འདུས་ནས་རང་རང་གི་ཐུགས་ཀའི་ས་བོན་ལ་ཐིམ་
པར་གྱུར་པར་བསམས་ལ། རང་རང་གི་དམ་རྒྱས་གཟུངས་ཐག་བཟུང་ལ། དུང་ཆོས་ལ། ༀ་བཛྲ་ཨུ་ད་ཀ་ཧཱུཾ། ཞེས་སྟོང་རྩ་བརྒྱད། རྣམ་རྒྱལ་བུམ་པ་ལ་གཙོ་བོའི་སྔགས་བརྒྱ་རྩ་བརྒྱད། གཞན་རྣམས་ཀྱི་སྔགས་བརྒྱ་རྩ་བརྒྱད་དམ་ཉེར་གཅིག་རེ། ལས་བུམ་ལ། ༀ་བཛྲ་ཡཀྵ་ཧཱུཾ། ཞེས་པ་བརྒྱ་རྩ་བརྒྱད་བཟླས་ལ། ཐམས་ཅད་ལ་ཐུན་མོང་དུ་རྩ་རིག་བརྒྱ་རྩ་བརྒྱད་བཟླས་པའི་རྗེས་སུ། གཙོ་བའི་སྔགས་དང་། ཧཱུཾ་བདུན་བཟླས་ལ་དུང་ཆོས་ཀྱིས་བུམ་པ་གཉིས་ཀར་མཆོད་ཡོན་དང་ལས་ཐམས་ཅད་པས་མེ་ཏོག་དཀར་པོ་གསུམ་གསུམ་ཕུལ་ནས། མེ་ཏོག་ནས་རོལ་མོའི་བར་གྱིས་མཆོད་ལ་ལས་ཐམས་ཅད་པ་བརྗོད་ཅིང་ལས་བུམ་གྱི་ཆུ་གཏོར་ཏེ། ཇི་སྲིད་དུ་དཀྱིལ་འཁོར་གྱི་བྱ་བ་རྣམས་མ་རྫོགས་པ་དེ་སྲིད་དུ་བགེགས་རྣམས་བཟློག་པར་མཛོད་ཅིག །ཅེས་གསོལ་བ་བཏབ་ནས། ལག་པས་བུམ་པ་ལ་རེག་ལ་བསྟོད་པ་རྒྱས་བསྡུས་གང་རུང་བྱའོ། །རང་ཉིད་བདག་འཇུག་ལེན་པའམ། གཞན་ལ་དབང་བསྐུར་བ་ཡིན་ན་སྔར་ལྟར་བུམ་པའི་བསྐྱེད་ཆོག་བཟླས་པ་དང་བཅས་པ་ཉིན་རེ་བཞིན་ཐུན་གསུམ་མམ་མ་མཐའང་ལན་རེ་བྱའོ། །སློབ་མ་སྟ་གོན་ནི། སློབ་མ་མཚན་ཉིད་དང་ལྡན་པ་གཅིག་ནས་ཉི་ཤུ་རྩ་ལྔའི་བར་ཟུང་དུ་མ་གྱུར་པ་རྣམས་ཁྲུས་བྱས་མཎྜལ་ཕུལ། པུས་མོ་བཙུགས་ཐལ་མོ་སྦྱར་ལ། སྐྱེ་རྒ་ན་འཆི་ན་ཀྲ་ཡི། །ཆུ་སྲིན་ལ་སོགས་འཇིགས་རུང་བ། །སྲིད་པའི་མཚོ་ལས་བདག་སྒྲོལ་མཛོད། །དགའ་ཆེན་སྟོན་པ་
ཁྱོད་གཅིག་པུ། །བྱང་ཆུབ་ཆེན་པོའི་ཚུལ་བརྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །ཞེས་པ་གསུམ་གྱིས་གསོལ་བ་གདབ། རྒྱས་པ་ལ་སྤྲོ་ན། ལ་ལ་གསང་སྔགས་སྒྲུབ་དོན་གཉེར། །ཞེས་སོགས་ཀུན་སློང་བཅོས་པ་དང་། །བུ་ཚུར་ཤོག་ཅིག་ཐེག་ཆེན་པོ། །ཞེས་སོགས་མོས་པ་བརྟན་པོས་འཛིན་དུ་གཞུག་པ་དག་ཀྱང་གཞན་ནས་འབྱུང་བ་ལྟར་བྱའོ། །དེ་ནས་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ། དེའི་ཆེད་དུ་ཐེག་ཆེན་གྱི་སྨོན་འཇུག་གི་སྡོམ་པ་བླངས་ལ་སངས་རྒྱས་མ་ཐོབ་ཀྱི་བར་དུ་ཚུལ་བཞིན་དུ་བསྲུང་སྙམ་དུ་བསམས་ལ།དབང་མེད་བདག་གིས་མི་དགེ་བགྱིས་པ་དང་། །རྗེས་སུ་ཡི་རང་ཡང་ན་བགྱིད་སྩལ་གང་། །དེ་དག་ཐམས་ཅད་བྱང་ཆུབ་མཆོག་གི་ནི། །སྤྱན་སྔར་ད་ལྟ་མ་ལུས་སོ་སོར་བཤགས། །བདེ་གཤེགས་སྲས་ཀྱི་ཚོགས་གཉིས་ཟབ་པ་དང་། །རྒྱ་ཆེན་འགྲོ་བ་མ་ལུས་པ་ཡི་དོན། །སྒྲུབ་པར་བྱེད་དང་དེ་ལས་གཞན་ལའང་། །རྟག་ཏུ་བདག་ནི་རྗེས་སུ་ཡི་རང་ངོ་། །ཐུགས་རྗེས་ཁྱབ་པའི་ཐུགས་དང་ལྡན་གྱུར་ཅིང་། །བློ་གྲོས་སྡིག་བྲལ་གཏི་མུག་ཚོགས་ཀུན་བཅོམ། །མ་ལུས་རིགས་ཀྱི་པདྨའི་ནང་བཞུགས་པ། །བདེ་བར་གཤེགས་པ་རྣམས་ལ་སྐྱབས་སུ་མཆི། །བློ་མཆོག་རྣམས་ཀྱི་ཀུན་དགའ་ར་བ་སྟེ། །དམན་
པས་འཇིགས་པ་རྣམས་ཀྱི་རྒྱལ་བྱེད་ཚལ། །སྲིད་པའི་འབྱོར་པ་ཟིལ་གྱིས་གནོན་པའི་མཆོག །གསུང་མཆོག་ཆོས་ལ་བདག་ནི་སྐྱབས་སུ་མཆི། །འདོད་ཆགས་ལ་སོགས་སྦྲུལ་གྱི་དུག་བཅོམས་ཤིང་། །བློ་གྲོས་རྣམ་རྒྱལ་ཐུགས་རྗེ་ཆེ་ལྡན་པའི། །བརྟུལ་ཞུགས་དབང་པོའི་ཚོགས་ལ་སྐྱབས་མཆི་ཞིང་། །སྲིད་དང་བྲལ་བ་རྣམས་ལ་བདག་ཕྱག་འཚལ། །རྒྱུ་ཡི་རྗེས་ལ་བདག་པོའི་ཡུལ་བདག་ཉིད། །འབྲས་བུའི་སྟོབས་ཀྱིས་དགྲ་ལས་རྒྱལ་གྱུར་པ། །སྙིང་རྗེའི་རྩ་བ་ཟུག་ཅིང་ཡང་དག་རྟོགས། །མཉམ་མེད་བྱང་ཆུབ་རྣམ་པར་བཟུང་བར་བགྱི། །སེམས་ཅན་རྣམས་ནི་ཡོངས་སུ་སྨིན་པའམ། །ཡང་ན་ཡོངས་སུ་བསྐྱང་པར་བྱ་ཕྱིར་རམ། །རང་གི་སེམས་ནི་དག་པར་བྱ་བའི་ཕྱིར། །འདི་དག་ཐམས་ཅད་རྩ་སོགས་བཞིན་དུ་བཏང་། །དེ་བཞིན་ཚུལ་ཁྲིམས་བཟོད་དང་བརྩོན་འགྲུས་དང་། །བསམ་གཏན་ཤེས་རབ་བླ་ན་མེད་པ་ནི། །བདག་དང་གཞན་རྣམས་དག་པར་བྱ་བའི་ཕྱིར། །སྐད་ཅིག་རེ་རེ་བཞིན་ཡང་བསྒོམ་པར་བགྱི། །བདེ་བར་གཤེགས་པ་སྔགས་ལ་མཁས་པ་ཡི། །ཆོས་རྒྱལ་རྟག་ཏུ་ལྷུན་གྱིས་གྲུབ་པ་ནི། །འགྲོ་བ་འདི་ཡིས་ཐོབ་པར་བྱ་བའི་ཕྱིར། །ཁྱད་འཕགས་གནས་ལ་བདག་ནི་གནས་པར་བགྱི། །ཞེས་རྗེས་ཟློས་ལན་གསུམ་བྱེད་དུ་གཞུག །ༀ་སརྦ་བིད་ༀ། ཞེས་སོགས་སྔར་འཇིག་རྟེན་གསུམ་རྒྱལ་གྱི་སྐབས་སུ་བཤད་པའི་སྔགས་གསུམ་ཕྱག་རྒྱ་དང་བཅས་པས་སློབ་མའི་གནས་གསུམ་བྱིན་གྱིས་བརླབས་ཏེ། སངས་རྒྱས་ཀྱི་སྐུ་གསུང་ཐུགས་དང་སློབ་མའི་ལུས་ངག་ཡིད་གསུམ་
དབྱེར་མེད་དུ་བསམས་ལ་མེ་ཏོག་སོགས་ཀྱིས་མཆོད། ཨུ་དུམ་ཝ་ར་སོགས་ཀྱི་སོ་ཤིང་སོར་བཅུ་གཉིས་བ་རྩེ་མོར་མེ་ཏོག་བཅིངས་པ་ལ། ༀ་བཛྲ་ཧཱ་ས་ཧ། ཞེས་བཟླས་ལ་སློབ་མ་ལ་བྱིན།དེས་ཀྱང་ཤར་རམ་བྱང་དུ་བལྟས་ལ་རྩེ་མོ་ནས་འཆོས་ཏེ། དྲིས་བྱུགས་པའི་མཎྜལ་གྱི་སྟེང་དུ་དེ་ཉིད་བརྗོད་ཅིང་བལྟོས་མེད་དུ་དོར་དུ་གཞུག །སོ་ཤིང་མགོ་ཤར་ལ་སོགས་པར་བསྟན་ན། རིམ་པ་བཞིན། ཞི་བ་དྲག་པོ། དབང་རྒྱས་པ། སྟེང་འོག །རིག་འཛིན་དང་ས་འོག་གི་དངོས་གྲུབ་འགྲུབ་ཅེས་བརྡ་སྤྲད་དོ། །དུང་ཆོས་སོགས་སུ་བླུག་པའི་དྲིའི་ཆུ་བཾ་ལས་བྱུང་བའི་དྲིའི་ཆུར་གྱུར་པར་བསམས་ལ། བཾ་ཞེས་པ་དང་ལས་ཐམས་ཅད་པ་བདུན་བཟླས་ལ། ༀ་ཧྲཱིཿ བི་ཤུདྡྷ་དྷརྨཱ་སརྦྦ་པཱ་པ་ནི་ཙ་ཨ་སྱ་ཤོ་དྷྱ་སརྦ་བི་ཀལྤན་ཨཱ་པ་ན་ཡ་ཧཱུཾ། ཞེས་བརྗོད་ཅིང་། ངག་གི་ཉེས་པ་སྦྱང་བའི་དོན་དུ་ཁྱོར་བ་གསུམ་བྱིན་ལ་འཐུང་དུ་གཞུག་གོ །ཧཱུཾ་ལས་བྱུང་ཞིང་དེ་བཟླས་པའི་ཀུ་ཤ་ཆེ་བ་སྟན་གྱི་དོན་དང་། དྷཱིཿ ལས་བྱུང་ཞིང་དེ་བཟླས་པའི་ཀུ་ཤ་ཆུང་བ་སྔས་ཀྱི་དོན་དུ། ༀ་བཛྲ་ཏིཀྵྞ་བཾ། ཞེས་བརྗོད་ཅིང་ལག་པ་གཡས་གཡོན་དུ་བྱིན། ཧཱུཾ་ལས་བྱུང་བའི་སྐུད་པ་དམར་པོ་སློབ་མའི་ལུས་ཚད་སུམ་སྒྲིལ་མདུད་པ་གསུམ་བྱས་པ་ༀ་བུ་དྡྷ་མཻ་ཏྲི་རཀྵ་རཀྵ་སརྦཱ་ན་སྭཱ་ཧཱ། ཞེས་བརྗོད་ཅིང་དཔུང་པ་གཡས་པར་བཅིང་ངོ་། །དེ་ནས། འཇིག་རྟེན་དུ་ནི་ཀུན་མཁྱེན་རྣམས། །རེས་འགའ་འབྱུང་ངམ་མི་འབྱུང་སྲིད། །ཨུ་དུམ་ཝ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །གང་གི་སེམས་ཅན་མཉམ་མེད་དོན། །མྱ་ངན་མི་འདའ་བྱེད་པར་ནུས། །
གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་ཤིན་ཏུ་དཀོན། །བསྐལ་པ་བྱེ་བ་དུ་མ་རུ། །སྡིག་པ་གང་ཞིག་སྔོན་བྱས་ལ། །དཀྱིལ་འཁོར་འདི་འདྲ་མཐོང་བ་ཡིས། །དེ་དག་ཐམས་ཅད་ཟད་འགྱུར་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་པ་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོང་འཕང་བླ་ན་མེད་པར་འགྱུར། །སྤྱོད་མཆོག་འདི་ལ་གང་རྣམས་ཀྱི། །བློ་གྲོས་ཤིན་ཏུ་དྲི་མ་མེད། །དེ་རྣམས་ཀྱི་ནི་སྔུག་བསྔལ་ཀུན། །འབྱུང་བའི་ངན་འགྲོ་ཡང་དག་ཞི། །བདག་ཉིད་ཆེན་པོ་ཁྱེད་རྣམས་ཀྱིས། །དེ་རིང་རྙེད་པ་མཉམ་མེད་རྙེད། །གང་གིས་ཁྱེད་རྣམས་རྒྱལ་བ་ཀུན། །བདག་ཉིད་ཆེན་པོ་སྲས་བཅས་ཀྱི། །བསྟན་འདི་ཀུན་ལ་ཡོངས་སུ་བཟུང་། །གནས་པ་སྐྱེ་བར་འགྱུར་བ་ནི། །དེ་ཡིས་ཁྱེད་རྣམས་ཐེག་ཆེན་ལ། །ལེགས་པར་སྐྱེ་བ་ཉིད་དུ་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །གང་གིས་ཁྱེད་རྣམས་འགྲོ་འགྱུར་བས། །དེ་བཞིན་གཤེགས་པར་འགྱུར་བ་ཡིན། །ཞེས་པའི་དོན་བཤད་སློབ་མ་རྣམས་སྤྲོ་བ་སྐྱེད་ལ། ལས་ཐམས་ཅད་པའི་སྔགས་ཀྱིས་བསྲུངས་ནས། ༀ་བཛྲ་ཡཀྵ་ཧཱུཾ། ཞེས་པ་བཟླས་པའི་དོན་དུ་བྱིན། རྨི་ལམ་རྟོགས་ལ་ནང་བར་ང་ལ་སྨོས་ཤིག་ཅེས་བརྗོད་ནས་མགོ་ཤར་རམ་སོ་ཤིང་གི་མགོ་གང་དུ་བསྟན་པ་དེར་སེང་གེའི་ཉལ་སྟབས་ཀྱིས་ཉལ་དུ་གཞུག །དེ་ནས་སྟ་གོན་གྱི་ལྷ་ལ་ཆུ་གཉིས་ཉེར་སྤྱོད་རོལ་མོ་དང་བཅས་པས་མཆོད་དོ། །ལག་པ་གཡས་པས་སྤོས་སྣོད་ཐོགས། གཡོན་པས་དྲིལ་བུ་གསིལ་ཞིང་། ལྕེ་ཧཱུཾ་ལས་
བྱུང་བའི་རྡོ་རྗེར་གྱུར། རྣམ་པར་སྣང་མཛད་བཅོམ་ལྡན་འདས། །རིག་པའི་རྒྱལ་པོ་ཁྱོད་ལ་འདུད། །སློབ་མ་རྣམས་ལ་བརྩེ་ཕྱིར་དང་། །ཁྱེད་རྣམས་ལ་ཡང་མཆོད་པའི་ཕྱིར། །མགོན་པོ་ཐུགས་རྗེ་བདག་ཉིད་ཅན། །དཀྱིལ་འཁོར་འདྲི་བར་བདག་འཚལ་ལོ། །དེ་ཕྱིར་བཅོམ་ལྡན་བདག་གུས་ལ། །བཀའ་དྲིན་གནང་བར་མཛད་པར་རིགས། །སངས་རྒྱས་འགྲོ་འཁོར་བྱ་དོན་སྩོལ། །བྱང་ཆུབ་སེམས་དཔའ་འབྲས་གནས་དང་། །གཞན་ཡང་གང་དག་གསང་སྔགས་ལྷ། །ལྷ་དང་འཇིག་རྟེན་སྐྱོང་བ་དང་། །འབྱུང་པོ་བྱང་ཆུབ་བསྟན་གནས་དང་། །སེམས་ཅན་བསྟན་ལ་མངོན་དགའ་བ། །གང་སུ་རྡོ་རྗེའི་སྤྱན་མངའ་རྣམས། །བདག་ལ་ཡང་དག་དགོངས་སུ་གསོལ། །བདག་ནི་ཆེ་གེ་རྡོ་རྗེ་ཅན། །རྣམ་པར་སྣང་མཛད་དཀྱིལ་འཁོར་ནི། །ཇི་ལྟར་ནུས་པ་ཉེར་སྤྱོད་པས། །འགྲོ་བ་སྦྱང་ཕྱིར་བྲི་བར་བྱ། །དེ་ཕྱིར་བདག་དང་སློབ་མ་ལ། །རྗེས་སུ་བརྩེ་བས་ཉེར་བཟུང་ནས། །དཀྱིལ་འཁོར་དང་བཅས་ཐམས་ཅད་ནི། །ཉེ་བར་འབྱོན་པར་མཛད་པར་རིགས། །ཞེས་ལན་གསུམ་བརྗོད་ལ་ནང་པར་སྤྱན་དྲང་བའི་ཕྱིར་སྙན་མནན། གསོལ་བ་བཏབ་པས་དགྱེས་བཞིན་དུ་གནང་བ་བྱིན་པར་གྱུར། དེ་ནས་དཀྱིལ་འཁོར་ལ་གོང་བཞིན་མཆོད་དེ་སྔར་བཤད་པའི་སྔགས་རྒྱས་བསྒོམས་པའི་དཀྱིལ་འཁོར་ནམ་མཁར་བཏེག་གོ །དེ་ནས་ཐིག་སྐུད་སྔར་བཤད་པའི་དཀར་པོ་ལྔ་ཚན་ལྔ། ཚོན་སོ་སོས་ཁ་བསྒྱུར་བའི་དཀར་པོ། སྔོན་པོ། སེར་པོ། དམར་པོ། ལྗང་གུ་རྣམས་སྣོད་སོ་སོར་བཞག་ལ་དབུས་དང་ཕྱོགས་རྣམས་སུ་བཀོད་དེ། བསང་ཞིང་སྦྱངས་ནས་རིམ་པ་བཞིན། ༀ། ཧཱུཾ། ཏྲཱཾ། ཧྲཱིཿ ཨཱཿ ལས་རིགས་ལྔར་བསྐྱེད་ལ། རང་
གཙོ་བོ་དང་སློབ་མ་རྡོ་རྗེ་གནོད་སྦྱིན་དུ་བསྐྱེད་ནས། དེ་ཉིད་བརྗོད་དེ། སློབ་མ་ལ་བྱིན་ལ། དེས་ཀྱང་དེ་ཉིད་བརྗོད་ཅིང་བླངས་ནས་གཉིས་ཀའི་ལག་པ་གཡོན་པའི་སོར་མོའི་རྩེ་མོ་ནས་མཐེ་བོའི་རྩ་བའི་བར་དུ་སྔོ། དཀར། དམར། སེར། ལྗང་བའི་རིམ་པ་བཞིན་བཀོད་ནས་བརྐྱང་ལ། ༀ་དཱིཔྟ་དྲིཥྚི་ཨཾ་ཀུ་ཤ་ཛཿ ཞེས་པ་མིག་གཉིས་སུ་བཀོད་ལ། མིག་གཉིས་རབ་ཏུ་རྫི་མ་འདེགས་ཤིང་བརྡེབས་པ་འབར་བའི་ལྟ་བས་རིགས་ལྔ་བསྐུལ་བར་བསམ་ཞིང་། བཅོམ་ལྡན་འདས་དཀྱིལ་འཁོར་ཆེན་པོའི་ཐིག་གདབ་པའི་ཕྱིར་རྡོ་རྗེའི་ཐིག་བདག་ལ་སྩོལ་ཅིག །འབར་བའི་ལྟ་སྟངས་ལྕགས་ཀྱུ་ལྟ་བུས་བཀུག་པའི་ཡེ་ཤེས་ཀྱི་ཐིག་སྐུད་སྟ་གོན་གྱི་ལྷའི་ཐུགས་ཀ་ནས་བཏང་བ། ལག་པའི་ཐིག་སྐུད་སོ་སོ་ལ་ཐིམ་པར་གྱུར།ༀ་ཨ་ནྱོ་ནྱ་ཨ་ནུ་གཱ་ཏཱ་སརྦ་དྷརྨཱཿ པ་ར་ས་པ་ར་ཨ་ནུ་པ་བིཥྚ་སརྦ་དྷརྨཱཿ ཨ་དྱནྟ་ཨ་ནུ་པྲ་བིཥྚ་སརྦ་དྷརྨཱཿ ༀ་བཛྲ་སཏྭ་ཧཱུཾ། ཞེས་གཉིས་ཀས་བརྗོད་ཅིང་ཐིག་སྐུད་དང་པོ་སོ་སོར་དང་། དེ་ནས་གཅིག་ཏུ་བསྒྲིལ། མིག་གཡས་གཡོན་མ་དང་ཊ་ལས་ཉི་མ་དང་ཟླ་བ་སེར་པོར་གྱུར། བཛྲ་དྲིཥྚ་མ་ཊ། ཞེས་བརྟན་པར་བྱས་ལ་ཐིག་སྐུད་དྲིས་བྱུགས་པའི་གསེར་ལ་སོགས་པའི་སྣོད་དུ་བཞག་སྟེ་མེ་ཏོག་ལ་སོགས་པས་མཆོད། ལས་ཐིག་ལྟར་བསྲུང་ཞིང་བདུད་རྩི་ལྔ་ལ་སོགས་པས་གཏོར་ལ་རྡོ་རྗེ་དང་བཅས་པའི་ལག་པ་གཡས་པས་རེག་ནས། ༀ་བཛྲ་ས་མ་ཡ་སཱུ་ཏྲཾ་མ་ཏི་ཀྲ་མ་ཧཱུཾ། ཞེས་བརྒྱ་རྩ་བརྒྱད་བཟླས། དེ་ནས་བུམ་པ་ཐམས་ཅད་ཀྱི་ཆུས་དཀྱིལ་འཁོར་གྱི་ས་ལ་བསང་གཏོར་བྱ་ཞིང་། ༀ་སརྦ་སཾ་ཤོ་དྷ་ནི་ཧཱུཾ་ཕཊ། ཅེས་དཀྱིལ་འཁོར་གྱི་ས་ལ་དྲིའི་ཆུས་བྱུགས་ནས་ཕྱི་རོལ་ཏུ་མེ་ཏོག་བཅལ་དུ་བཀྲམ་ལ་ནམ་མཁར་བྲི་བྱའི་དཀྱིལ་འཁོར་
བཞུགས་པར་དམིགས་ཏེ། མཆོད་ཡོན་ནས་རོལ་མའི་བར་གྱིས་མཆོད་ཅིང་བསྟོད་ནས། རང་དང་སྒྲུབ་གྲོགས་གཉིས་ཀྱི་མིག་གཉིས་ཛཿ ཛཿ ལས་ཉི་མ་དང་ཟླ་བ་འོད་ཟེར་སེར་པོ་ཅན་དུ་གྱུར།དེ་ནས་རྡོ་རྗེ་ཁུ་ཚུར་བྱས་ལ་གཡོན་པས་ཐིག་སྐུད་ལྟེ་བར་བཟུང་ཞིང་། གཡས་པས་གྲོགས་ལ། ཛྫཿ ཛྫཿ ཛྫཿ ཛ་ཛ་ཛ། ཞེས་པས་བཏགས་ལ། དེས་ཀྱང་དེ་དག་བརྗོད་ནས་གཡོན་པའི་རྡོ་རྗེ་ཁུ་ཚུར་གྱིས་ལྟེ་བར་བཟུང་ལ། ཕྱོགས་ཐམས་ཅད་རང་བཞིན་མེད་པར་མཉམ་པ་ཉིད་དོ། །ཞེས་དེར་མོས་ལ། སློབ་དཔོན་ནུབ་དང་། གྲོགས་གང་དུ་གནས་ཏེ། ༀ་བཛྲ་ས་མ་ཡ་སཱུ་ཏྲཾ་མ་ཏི་ཀྲ་མ་ཧཱུཾ། ཞེས་རྡོ་རྗེ་དང་བཅས་པའི་གཡས་པའི་མཐེ་བོང་དང་མཛུབ་མོས་ཐིག་སྐུད་བཟུང་ལ་སེ་གོལ་གྱི་སྒྲ་དང་བཅས་པས་ནམ་མཁར་གདབ། སྒྲ་དེས་ནམ་མཁའ་ཁྱབ་པའི་སངས་རྒྱས་རྣམས་བསྐུལ་ནས་བྱོན་ཏེ་ཐིག་སྐུད་ལ་ཐིམ་པར་གྱུར་པར་བསམ། དེ་ནས་སློབ་དཔོན་པུས་མོ་གཡས་གྱེན་དུ་བསླང་། གཡོན་སྐྱིལ་ཀྲུང་དང་། གྲོགས་དེ་ལས་བཟློག་པར་འདུག་སྟེ། ལག་པ་གཉིས་མཉམ་པར་ས་ལ་ཕབ་ནས་སྔགས་དེ་ཉིད་བརྗོད་ཅིང་། འོད་འཕྲེང་ནས་འོད་འཕྲེང་གི་བར་དུ་ཚངས་ཐིག་དང་པོ་བཏབ་ལ། ངོ་བོ་ཡེ་ཤེས་ལ་རྣམ་པ་སྲད་བུ་ཁ་དོག་ལྔར་སྣང་བའི་ཐིག་སྐུད་རེ་ཆད་ནས་ལས་ཐིག་ལ་ཐིམ་པར་བསམ་མོ། །དེ་ནས་རྐང་པ་རྡོ་རྗེར་བྱིན་གྱིས་བརླབས་ཏེ། གཡས་སྐོར་དུ་སློབ་མ་སློབ་དཔོན་ལ་རྒྱབ་མ་བསྟན་པར་སློབ་དཔོན་ལྷོ་དང་སློབ་མ་བྱང་དུ་གནས་ནས་ཚངས་ཐིག་གཉིས་པ་ནམ་མཁའ་དང་ས་གཞི་ལ་སྔར་བཞིན་གདབ། དེ་
ནས་ནམ་མཁར་མི་གདབ་པར། དཔོན་སློབ་གཉིས་རིམ་པ་ལྟར་སྔར་བཞིན། མེ་དང་དབང་ལྡན་ནས་ཤར་གྱི་དང་། རླུང་དང་བདེན་བྲལ་ནས་ནུབ་དང་། རླུང་དང་དབང་ལྡན་ནས་བྱང་དང་། མེ་དང་བདེན་བྲལ་ནས་ལྷོའི་རྩ་ཐིག་དང་། མེ་དང་རླུང་ནས་ཟུར་ཐིག་དང་པོ་དང་། བདེན་བྲལ་དང་དབང་ལྡན་ནས་ཟུར་ཐིག་གཉིས་པ་གདབ། དེ་བཞིན་དུ་གཡས་སྐོར་གྱིས་ཐིག་གཞན་ཐམས་ཅད་ཀྱི་སྟེང་དུ་སྔར་བཞིན་ཡེ་ཐིག་གདབ་པར་བྱའོ། །མིག་གཉིས་ཧི་ཧི་ལས་ཉི་མ་དང་ཟླ་བ་འོད་ཟེར་འབར་བ་ཅན་དུ་གྱུར། ཐར་པའི་སྒོའི་གེགས་སུ་གྱུར་པའི་སྒྲིབ་པ་རྣམས་དབྱི་བར་བྱའོ་སྙམ་དུ་བསམས་ལ། ཧི་ཧི། ཞེས་བརྗོད་ཅིང་དང་པོར་དཀྱིལ་འཁོར་གྱི་ནང་ནས་ཤར་དུ་ཁ་བལྟས་ཏེ་དྲིའི་ཆུས་ཚངས་ཐིག་གི་གཡས་གཡོན་གྱི་རྩ་ཐིག་ཆ་ཕྲན་གཉིས་གཉིས་གཡས་སྐོར་དུ་རིམ་པ་བཞིན་དབྱིའོ། །དེ་ནས་ཐིག་སྐུད་ལ་མཆོད་ནས། ༀ་ཨཱཿ ཧཱུཾ་བཛྲ་མུཿ ཞེས་ཡེ་ཐིག་ནམ་མཁའི་དེ་བཞིན་གཤེགས་པ་ལྔའི་ཐུགས་ཀར་གཤེགས་ཤིང་དམ་ཚིག་པ་རང་ལ་ཐིམ་པར་བསམ། སྔར་གྱི་ལས་ཐིག་དང་། འོག་གི་ཚོན་ལ་ཡང་གཤེགས་གསོལ་དེ་བཞིན་དུ་བྱའོ། །དེ་ནས་ཚོན་རྩི་དཀར་པོ། སྔོན་པོ། སེར་པོ། དམར་པོ། ལྗང་གུ་རྣམས་ལ་རིམ་པ་བཞིན་ༀ་ཧཱུཾ་ཏྲཱཾ་ཧྲཱིཿ ཨཱཿ ཞེས་པ་བྲིས་ལ། དཀར་པོ་དབུས་དང་གཞན་རྣམས་ཕྱོགས་བཞིར་བཀོད་ལ། བསང་སྦྱངས་ནས། ས་བོན་ལས་རིགས་ལྔར་བསྐྱེད་ནས། ༀ་བཛྲ་ཙི་ཏྲ་ས་མ་ཡ་ཧཱུཾ། ཞེས་བརྒྱ་རྩ་བརྒྱད་བཟླས། ༀ་དཱིཔྟ་དྲིཥྚ་ཨཾ་ཀུ་ཤ་ཛཿ །ཞེས་སྔར་ཡེ་ཐིག་གི་སྐབས་
བཞིན། སྟ་གོན་གྱི་ལྷའི་ཐུགས་ཀ་ནས་ཡེ་ཤེས་ཀྱི་ཚོན་སྤྱན་དྲངས་ལ་ཚོན་སོ་སོ་ལ་བསྟིམ། དེ་ནས་ཚོན་རྩི་ལ་ཧཱི་ཞེས་པ་བྲིས་ལ། ཧཱི་ཞེས་པ་རྡོ་རྗེ་མེའི་ཕྱག་རྒྱས་ཚོན་རྩི་རྣམས་མང་པོར་སྦར་བར་བསམས་ལ། མེ་ཏོག་ནས་རོལ་མོའི་བར་གྱིས་མཆོད་དོ། །ༀ་བཛྲ་བེ་གཱ་ཀྲ་མ་ཧཱུཾ། ཞེས་ཡིད་ཀྱིས་རི་མོ་བཏེག་པའི་འོག་ནས་འཛུལ་བར་བསམས་ལ་ནང་དུ་འདུག་སྟེ། ༀ་བཛྲ་ཙི་ཏྭ་ས་མ་ཡ་ཧཱུཾ། ཞེས་ཟློས་ཤིང་དབང་ལྡན་ནས་བརྩམས་ཏེ་གཡས་སྐོར་དུ་གཡོན་པའི་རྡོ་རྗེ་ཁུ་ཚུར་གྱིས་རྩིག་པ་ལྔའི་ཚོན་སོར་བཅུ་གཉིས་ཀྱི་བར་དུ་དགྱེ་ཞིང་། ཕྱིས་ནི་རང་ངམ་གཞན་གྱིས་ཅི་བདེར་ལེགས་པར་བྲིའོ། །དེ་ཡང་རྩིག་པ་ལྔ་ནི་ཕྱི་ནས་སྔོ། སེར། དམར། ལྗང་། དཀར་པོ། ཕྱོགས་ཚོན་ནི་དབུས་དཀར། ཤར་སྔོ། ལྷོ་སེར། ནུབ་དམར། བྱང་ལྗང་བ། ཀ་གདུང་དང་འཁོར་ལོའི་མུ་ཁྱུད་གཞི་སྔོན་པོ་འཁོར་ལོའི་རྩིབས་སྔོན་པོ། གོང་རས་ཕྱོགས་ཚོན། འཇིག་རྟེན་པའི་ཁོར་ཡུག་དཀར་པོ་གཞན་སྤྱི་དང་མཐུན་ནོ། །ལྷ་ཐམས་ཅད་ཀྱི་གདན་གྱི་སྟེང་དུ་སྐུ་དངོས་སམ། རང་རང་གི་ཕྱག་མཚན་ནམ། མིང་ངམ་སྐུ་མདོག་དང་མཐུན་པའི་ཚོན་གྱི་ཐིག་ལེ་བྱའོ། །བྲིས་ཟིན་པའི་མཐར་བཏེག་པའི་ཐིག་བསྟིམ་ལ། ཚོན་འཐོར་བ་རྣམས་རས་ལ་སོགས་པས་ཕྱིས་ལ་དྲིའི་ཆུས་དཀྱིལ་འཁོར་གྱི་མཐར་བྱུག །བཛྲ་སཏྭ་ཞེས་བཟླས་ཤིང་མཆོད་རྫས་རྣམས་མཐར་དགོད། བུམ་པ་ལྷག་གནས་བྱས་པ་རྣམས་སྤོས་ཀྱིས་སྣ་དྲངས་ནས། རོལ་མོའི་ཆ་བྱད་སྣ་ཚོགས་པ་དང་།
ལས་ཐམས་ཅད་པ་བརྗོད་ཅིང་དཀྱིལ་འཁོར་ལ་ལན་གསུམ་བསྐོར་ནས་རྣམ་རྒྱལ་དང་ལས་བུམ་གཉིས་ཤར་སྒོའི་ཁ་ནང་ལྟའི་གཡས་གཡོན་དུ་དགོད་དོ། །དེ་ནས་ཤར་སྒོའི་ཐད་དུ་སྟན་བདེ་བ་ལ་འདུག་སྟེ། བདག་བསྐྱེད་བསྙེན་པའི་སྐབས་བཞིན་རྒྱས་པའམ། ཡང་ན་གཙོ་བོའི་རྣལ་འབྱོར་དམ་ཚིག་པ་བསྐྱེད། ཡེ་ཤེས་པ་གཞུག །གནས་གསུམ་བྱིན་གྱིས་བརླབ། ཕྱག་རྒྱ་བཞིས་རྒྱས་གདབ། དབང་བསྐུར་མཆོད་བསྟོད་བཟླས་པའི་བར་བྱས་ལ།ༀ་བཛྲ་ཡཀྵ་ཧཱུཾ། ཞེས་ལས་བུམ་གྱི་ཆུས་དཀྱིལ་འཁོར་བསངས་ལ། ཤཱུ་ནྱ་ཏཱ་སོགས་སྔགས་གཉིས་ཀྱིས་སྟོང་པར་སྦྱང་བ་ནས། ཉི་མའི་འོད་ཀྱི་རྒྱབ་ཡོལ་མངའ་བ། ཞེས་པ་ནས་གཙོ་བོ་བསྐྱེད་པའི་བར་སྒྲུབ་ཐབས་བཞིན་དུ་བྱས་ལ། ནང་གི་ཕྱོགས་བཞིར་ཟླ་བའི་དཀྱིལ་འཁོར་རྣམས་ཀྱི་དབུས་སུ། ཤར་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ། ལྷོར་ཏྲཱཾ་ལས་རིན་པོ་ཆེ་ཏྲཱཾ་གིས་མཚན་པ། ནུབ་ཏུ་ཧྲཱིཿ ལས་པདྨ་ཧྲཱིཿ ས་མཚན་པ། བྱང་དུ་ཨཱཿ ལས་སྣ་ཚོགས་རྡོ་རྗེ་ཨཱཿ ས་མཚན་པ་ལས་འོད་ཟེར་འཕྲོས་འདུས་ཡོངས་སུ་གྱུར་པ་ལས་དེ་བཞིན་གཤེགས་པ་བཞིར་གྱུར་པ་ནི། ཤར་དུ་ངན་སོང་སྦྱོང་བའི་རྒྱལ་པོ་སྐུ་མདོག་དཀར་པོ། ཞེས་པ་ནས་རྡོ་རྗེ་འབེབས་པའི་བར་རང་རང་གི་ཟླ་གདན་གྱི་དབུས་སུ་རང་རང་གི་ས་བོན་ལས་ཕྱག་མཚན་ས་བོན་གྱིས་མཚན་པ་སྔར་བཞིན་བརྗོད་ཅིང་བསམས་ལ་ཆོ་ག་གསུམ་གྱིས་བདག་བསྐྱེད་ཀྱི་སྐབས་ལྟར་རྫོགས་པར་བསྐྱེད། མགྲོན་ཐབས་ཀྱི་ལྷ་རྣམས་བསྐྱེད་ཚུལ་ནི། རྟ་བབས་དང་ལྡན་པའི་གཞལ་ཡས་ཁང་གི་ཁྱམས་ཀྱི་ལྷ་སྣམ་ནང་མའི་ཟླ་
བའི་དཀྱིལ་འཁོར་རྣམས་ཀྱི་དབུས་སུ་ཀལྤ་བྷ་དྲའི་མིང་ཡིག་དང་པོ་ཐིག་ལེས་བརྒྱན་པ་ལས། དང་པོའི་རྡོ་རྗེ་བཞི། རྡོ་རྗེ་རིན་པོ་ཆེ་བཞི། རྡོ་རྗེ་པདྨ་བཞི། སྣ་ཚོགས་རྡོ་རྗེ་བཞི་སྟེ་ཕྱག་མཚན་བཅུ་དྲུག །ཀལྤ་བྷ་དྲའི་མིང་ཡིག་དང་པོ་ཐེག་ལེས་བརྒྱན་པས་མཚན་པ་ལས་བསྐལ་བཟང་གི་སེམས་དཔའ་བཅུ་དྲུག་ཏུ་གྱུར་པ་ནི། ཤར་དུ་བྱམས་པ་ཞེས་པ་ནས་ཁྲོ་བོ་བཅུ་དྲུག་གི་བར་ཆོ་ག་གསུམ་གྱིས་སྔར་སྒྲུབ་ཐབས་ཀྱི་སྐབས་ལྟར་བསྐྱེད། ཕྱིའི་ཁོར་ཡུག་དཀར་པོའི་པདྨ་དང་ཟླ་བའི་གདན་རྣམས་ཀྱི་སྟེང་དུ་སྐད་ཅིག་གིས་རྒྱལ་པོ་ཆེན་པོ་བཞི་འཁོར་དང་བཅས་པ། ཕྱོགས་སྐྱོང་བཅུ། གཟའ་ཆེན་པོ་བརྒྱད་རྒྱུ་སྐར་ཉི་ཤུ་རྩ་བརྒྱད་ཀྱི་འཁོར་དང་བཅས་པ། ཀླུ་ཆེན་པོ་བརྒྱད་རང་འདྲའི་ཆུང་མ་དང་བཅས་པ། འཇིགས་བྱེད་དགུ་ཆུང་མ་དང་བཅས་པ། ལྷ་ཆེན་པོ་བརྒྱད་ཆུང་མ་དང་སྟོབས་བཟང་ལ་སོགས་པའི་འཁོར་དང་བཅས། རྡོ་རྗེ་ཕྲ་མེན་མ་རྣམས་དང་། རིའི་ལྷ་དང་། ཤིང་གི་ལྷ་དང་། གྲོང་གི་ལྷ་དང་། འབྱུང་བ་བཞིའི་ལྷ་ལ་སོགས་པ་འཇིག་རྟེན་པ་རྣམས་རང་རང་གི་སྐུ་མདོག་རྒྱན་ཆ་ལུགས་སྣ་ཚོགས་དང་བཅས་པར་གྱུར་པར་བསམ།དེ་ནས་རྡོ་རྗེ་བསྡམས་པ་ལས་གུང་མོ་གཉིས་གཤིབས་ཏེ་བསྒྲེང་བ་རྡོ་རྗེ་འཛིན་མ་དཔལ་གྱི་ཕྱག་རྒྱས་མེ་ཏོག་གཟུང་སྟེ། རྡོ་རྗེ་ཤུགས་ཀྱི་འཇུག་པས་དཀྱིལ་འཁོར་གྱི་ནང་དུ་ཞུགས་པར་བསམས་ལ། རང་ཉིད་ཧཱུཾ་ལས་ཧཱུཾ་མཛད་དུ་གྱུར་པར་བསམས་ལ་དེའི་ཕྱག་རྒྱ་བཅིང་། ནུབ་ཏུ་གནས་ནས། ༀ་བཛྲོད་གྷ་ཊ་ཡ་ས་མ་ཡ་པྲ་བེ་ཤ་ཡ་ཧཱུཾ། ཞེས་ཧཱུཾ་མཛད་ཀྱི་ཕྱག་རྒྱ་བཀྲོལ་ལ་ཤར་
སྒོ་ནང་ནས་ཕྱེ་བར་བསམ། དེ་བཞིན་དུ་བྱང་དང་། ཤར་དང་། ལྷོར་གཡས་སྐོར་དུ་རིམ་པ་བཞིན་གནས་ནས་ལྷོ་སྒོ་ལ་སོགས་པ་དབྱེའོ། །ཡང་ན་རྡོ་རྗེ་ཁུ་ཚུར་གཉིས་ཁ་གྱེན་དུ་བསྟན་ལ་མཛུབ་མོ་གཉིས་བསྒྲེངས་ཏེ་ཕན་ཚུན་དུ་མཛུབ་མོ་གཉིས་ལོགས་ཀྱི་རྩེ་མོ་སྦྱར་ཏེ་མཛུབ་མོ་གཉིས་སྤྲོས་ནས་དབྱེ་བའི་ཕྱག་རྒྱས་སྒོ་དབྱེའོ། །ལྷ་ཐམས་ཅད་ཀྱི་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུཾ་སྔོན་པོ། ལྷ་རང་རང་གི་ཐུགས་ཀར་ཟླ་བའི་སྟེང་དུ་ༀ་ལ་སོགས་པའི་རང་རང་གི་ས་བོན་གྱིས་མཚན་པ། དེ་རྣམས་ལས་འོད་ཟེར་འཕྲོས་པས། བཅོམ་ལྡན་འདས་ཀུན་རིག་གི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔས་བསྐོར་བ་ནམ་མཁར་སྤྱན་དྲངས། བཛྲ་ས་མཱ་ཛཿམ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཡང་དག་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཞེས་སོགས་ཀྱིས་སྤྱན་དྲང་བ་ནས་དགུག་གཞུག་སོགས་ཀྱི་བར་སྔར་ལྟར་བྱ། དེ་ནས་སྟ་གོན་གྱི་ལྷ་ལ་ཆུ་གཉིས་ཉེར་སྤྱོད་ལྔ་རོལ་མོ་དང་བཅས་པས་མཆོད་ནས་དགུག་གཞུག་ལ་སོགས་སྔར་ལྟར་བྱས་ལ། སྟ་གོན་གྱི་ལྷ་ནམ་མཁར་བཏེག་པ་རྣམས་རང་རང་གི་དམ་ཚིག་པ་རྣམས་དང་གཉིས་སུ་མེད་པར་གྱུར་པར་བསམ། དེ་ནས་ༀ་བཛྲ་ཡཀྵ་ཧཱུཾ། ཞེས་སྔར་ལྟར་བགེགས་བསྐྲད། ༀ་བཛྲ་སན་དྷི་བཾ། ཞེས་རྡོ་རྗེ་ཁུ་ཚུར་གྱི་དམ་རྒྱས་སྒོ་བཅད། ༀ་བཛྲ་རཀྵ་ཧཾ། ཞེས་རྡོ་རྗེ་སྲུང་བས་སྔར་ལྟར་བསྲུང་བ་བྱ། དེ་ནས་མཆོད་
ཡོན་ཕུལ་ཏེ། ལྷག་རྣམས་ཀྱི་གནས་གསུམ་བྱིན་གྱིས་བརླབ་པ་དང་ཕྱག་བརྒྱ་བཞིས་རྒྱས་གདབ། དེ་ཡང་འཇིག་རྟེན་པ་སྤྱིའི་དམ་རྒྱ་ནི། ཐལ་མོ་བརྐྱང་པའམ་ཡང་ན་ཐལ་མོ་པདྨ་ལྟར་བྱས་པའོ། །ཆོས་རྒྱ་ནི་རྩ་རིག་གོ །ལས་རྒྱ་ནི་ཕྱག་མཚན་མེད་པའི་ཕྱག་ཆེན་ལྟར་རོ། །ཕྱག་ཆེན་ནི་བྲིས་པ་ཇི་ལྟ་བའོ། །ཁ་ཅིག་ནི་པདྨའི་ཕྱག་རྒྱར་བཞེད་དོ། །སྙིང་པོ་ནི་བཛྲ་ལོ་ཀ་ཞེས་པའམ་རྩ་རིག་གོ །དེ་ནས་ལྷ་ཐམས་ཅད་ལ་རིགས་ལྔས་དབུ་བརྒྱན་པའི་བར་སྒྲུབ་ཐབས་བཞིན་བྱས་ནས། ངག་ཏུ་རྩ་རིག་དང་ལྷ་རང་རང་གི་སྔགས་བརྗོད། ལུས་ཀྱིས་ལྷ་རང་རང་གི་ལས་རྒྱ་བཅིངས་ཏེ་འཕྲིན་ལས་སྔར་ལྟར་བཅོལ་ལ་ཁྱད་པར་ནི། བཅོམ་ལྡན་འདས་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོ་ཀུན་རིག་རྣམ་པར་སྣང་མཛད་ཀྱིས། རྡོ་རྗེ་སློབ་མ་རྣམས་ལ་ཟབ་གསལ་གཉིས་སུ་མེད་པ་ལ་སོགས་པ་ལམ་རྣམ་པར་དག་པ་ཉན་པ་དང་། སེམས་པ་དང་། བསྒོམ་པའི་སྣོད་ཁྱད་པར་ཅན་དུ་རུང་བར་མཛད་དུ་གསོལ། ཞེས་འཕྲིན་ལས་བཅོལ་ལོ། །དེ་ནས་མཆོད་པ་རྣམས་སྔར་བཞིན་བསང་བ་སོགས་བྱས་ལ། རྡོ་རྗེ་ཁུ་ཚུར་གཉིས་ལས་བྱུང་བའི་གར་སྔོན་དུ་འགྲོ་བས། རབ་འབྱམས་རྒྱ་མཚོ་དཔག་མེད་ན། །ཞེས་སོགས་ཀྱི་ཆུ་གཉིས་ཉེར་སྤྱོད་རོལ་མོ་དང་བཅས་པ་འབུལ་བ་ནས་སྒེག་སོགས་བརྒྱད་ཀྱིས་མཆོད་པའི་བར་སྔར་ལྟར་བྱའོ། །མཆོད་པ་ཉེར་ལྔ་པ་ནི། དཔག་མེད་བསོད་ནམས་སྟོབས་ལས་བྱུང་བ་ཡི། །ལྷ་རྫས་ལས་གྲུབ་རིན་ཆེན་ཅོད་པན་མཆོག །རྒྱལ་བ་སྲས་དང་བཅས་ལ་དབུལ་བར་
བགྱི། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །རྡོ་རྗེ་ཁུ་ཚུར་གཉིས་རང་གི་མགོར་དབང་བསྐུར་བའི་ཚུལ་དུ་བྱས་ལ། ༀ་སརྦ་ཏ་ཐཱ་ག་ཏ་རཏྣ་མུ་ཀུ་ཊི་པཱུ་ཛ་སྥ་ར་ཎ་ཁཾ། ཞེས་ཅོད་པན་དང་། དེ་བཞིན་དུ་ཚིག་རྐང་དང་པོ་དང་། ཐ་མ་གཉིས་ཀུན་ལ་སྦྱར་ཏེ། སྙན་ཤལ་མཛེས་བྱེད་རིན་ཆེན་འཁྱིལ་བའི་རྒྱན། །རྡོ་རྗེ་ཁུ་ཚུར་གཉིས་ཀྱིས་སྙན་ལ་སྙན་ཆ་འདོགས་པའི་ཚུལ་དུ་བྱས་ལ། །མུ་ཀུ་ཊིའི་གནས་སུ་ཀུཎྚ་ལཾ་ཞེས་རྣ་རྒྱན་དང་། སྔགས་ཀྱི་ཐོག་མཐའ་གཉིས་འོག་མ་རྣམས་ལའང་ཅི་རིགས་པར་སྦྱར་རོ། །མགྲིན་པ་དུང་འདྲ་མཛེས་བྱེད་མགུལ་གདུབ་མཆོག །ཧརྒ། ཞེས་མགུལ་ལ་མགུལ་རྒྱན་དང་། ཐུགས་མཚན་དཔལ་བེའུ་མཛེས་བྱེད་སེ་མོ་དོ། །ཨ་ཝ་ཧ་ར། ཞེས་བྲང་ལ་དོ་ཤལ། དཔུང་བ་མཛེས་བྱེད་དཔུང་རྒྱན་སྲུང་སྐུད་མཆོག །ཀེ་ཡུ་ར། ཞེས་དཔུང་པའི་རྩ་བའི་འོག་ཏུ་དཔུང་རྒྱན། ཕྱག་གཉིས་མཁྲིག་མར་སྤྲས་བའི་གདུ་བུ་མཆོག །པཱ་རི་ཀ་ཊཾ་ཀ །ཞེས་མཁྲིག་མའི་སྟེང་དུ་གདུ་བུ། དྲ་བས་འབྲེལ་བའི་སོར་མོའི་གདུ་བུ་མཆོག །པཱ་ཀཾ་ཝ་ལ། ཞེས་སོར་གདུབ་དང་། རྫུ་འཕྲུལ་ལྡན་པའི་ཞབས་ལ་མཛེས་བྱེད་རྒྱན། །པཱ་ད་བྷ་ར་ནཾ། ཞེས་ཞབས་ལ་ཞབས་གདུབ་དང་། རྐེད་པར་སྐ་རགས་དབུལ་ཚུལ་གྱིས་སྐ་རགས་ཏེ། རྒྱན་གྱི་ཁྱད་པར་བརྒྱད་དོ། །རིན་ཆེན་གདུགས་མཛེས་གསེར་གྱི་ཡུ་བ་ཅན། །གཡོན་པ་དེ་བཞིན་གཤེགས་པའི་ཁུ་ཚུར་བྱས་པའི་མཐེ་བོའོ་སྟེང་དུ་གཡས་པ་ཁ་ཐུར་དུ་བསྟན་པ་བརྐྱང་ལ། ཚ་ཏྲཾ་ག ཞེས་གདུགས་དང་། མི་མཐུན་བདུད་
ལས་རྒྱལ་བའི་རྒྱལ་མཚན་མཆོག །ལག་གཉིས་བརྐྱང་ལ། སྲིན་ལག་གི་ཚིགས་དབུས་མ་བཀུག་ནས་བ་དན་གསུམ་པའི་ཚུལ་དུ་བསྒྲེངས་ནས་ལག་པ་གཉིས་བརྐྱང་ནས་སྟེང་དུ་བཏེག་པ་ལྟར་བཞག་ལ། དྷྭ་ཛ་གྲ །ཞེས་རྒྱལ་མཚན་དང་། སྙན་པ་ཕྱོགས་བཅུར་གཡོ་བའི་བ་དན་འཕན། །རྡོ་རྗེ་ཁུ་ཚུར་གཉིས་ཀྱིས་ནམ་མཁའ་ལ་འཕན་འདོགས་པའི་ཚུལ་དང་། པཱ་ཏཾ་ག་ཞེས་བ་དན་དང་། ཕྱོགས་ཀུན་ཡིད་འཕྲོག་དར་གྱི་ལྡ་ལྡིས་སྤྲས། །གཡོན་པའི་ཁུ་ཚུར་སྙིང་གར་བཞག །གཡས་པའི་མཛུབ་མོ་དང་གུང་མོ་བརྐྱང་སྟེ་ནམ་མཁའ་ལ་ལྡ་ལྡི་འགེལ་བའི་ཚུལ་དང་། པཱ་ཊ་དྷཱ་མ། ཞེས་ལྡ་ལྡི་དང་། གདུང་སེལ་རྔ་ཡབ་ནོར་བུའི་ཡུ་བ་ཅན། །རྡོ་རྗེ་ཁུ་ཚུར་གཉིས་ཀྱིས་རྔ་ཡབ་གཡབ་པའི་ཚུལ་དང་། ཙ་མ་ར། ཞེས་རྔ་ཡབ་དང་། རིན་ཆེན་རྒྱན་འོད་ལྡན་པའི་བླ་རེ་བྲེས། །གཡོན་པང་པར་མཉམ་གཞག་བྱས། གཡས་ཁ་ཐུར་དུ་བསྟན་ཏེ་བླ་རེ་བསྐྱེད་པའི་བསམ་པས་ནམ་མཁའ་ལ་ཡོངས་སུ་བསྐོར་ལ། བི་ཏ་ནཾ། ཞེས་བླ་རེ་སྟེ་ཡོ་བྱད་ཀྱི་ཁྱད་པར་དྲུག་གོ །མི་འཇིགས་བཞི་ལྡན་སེང་གེའི་གདན་ལ་སོགས། །རྡོ་རྗེ་ཁུ་ཚུར་གཉིས་གཤིབས་ཏེ་སེང་གེའི་གདན་འབུལ་བའི་ཚུལ་དང་། ས່་ཧ་ཨཱ་ས་ནཾ། ཞེས་སེང་གེའི་ཁྲི་དང་། ལྷ་རྫས་ཡིད་འོང་མཛེས་པ་གཟིམས་ཆའི་ཚོགས། །ཞེས་རྡོ་རྗེ་ཁུ་ཚུར་གཉིས་ཀྱིས་གཟིམས་ཆ་བསྐོན་པའི་ཚུལ་དང་། ཤ་པ་ཨཱ་ས་ནཾ། ཞེས་གཟིམས་ཆ་དང་།ཉོན་མོངས་གྲྭ་ཟུར་སྤངས་པའི་ཕོ་བྲང་ཟླུམ། །གཡོན་པའི་ཁུ་ཚུར་སྙིང་གར་བཞག་སྟེ་གཡས་པའི་གུང་མཛུབ་ཀྱིས་ཕོ་བྲང་ཟླུམ་པོ་
འབུལ་བའི་ཚུལ་དང་། པ་རི་མཎྜ་ལེདྷྱ་ནྱ། ཞེས་ཕོ་བྲང་ཟླུམ་པོ་དང་། ཡོན་ཏན་རྒྱས་པའི་གྲུ་བཞི་གཞལ་ཡས་ཁང་། །ཕྱག་རྒྱ་སྔ་མ་དེ་ཉིད་ཀྱིས་གཞལ་མེད་ཁང་གྲུ་བཞི་འབུལ་བའི་ཚུལ་དང་། ཨ་མ་ཡ་ཙ་ཏུར་པྲ། ཞེས་གཞལ་མེད་ཁང་གྲུ་བཞི་དང་། འཇིག་རྟེན་ལས་འདས་གྲུ་བཞི་ཉིས་བརྩེགས་ཁང་། །དེ་ཉིད་ཀྱིས་གྲུབ་བཞི་ཉིས་བརྩེགས་འབུལ་བའི་ཚུལ་དང་། དྭི་ཀུ་ཊཾ་ག་རཾ། ཞེས་གྲུ་བཞི་ཉིས་བརྩེགས་དང་། རང་བཞིན་འོད་གསལ་བྱང་སེམས་ཟླ་བའི་གདན། །རྡོ་རྗེ་ཁུ་ཚུར་གཉིས་ཀྱིས་ཟླ་གདན་འབུལ་བའི་ཚུལ་དང་། ཙནྟྲ་ཨཱ་ས་ནཾ། ཞེས་ཟླ་གདན་ཏེ་གནས་ཀྱི་ཁྱད་པར་དྲུག་གོ །འདོད་པའི་འདམ་གྱིས་མ་གོས་པདྨོའི་མཆོག །རྡོ་རྗེ་ཁུ་ཚུར་གཉིས་ཀྱིས་མེ་ཏོག་འཐོར་བའི་ཚུལ་དང་། པུཥྤེ། ཞེས་མེ་ཏོག་དང་། སྟོང་ཉིད་སྒྲ་སྒྲོག་པི་ཝང་ཏིང་ཏིང་ཤག །ཝི་ནི། ཞེས་པི་ཝང་བསྒྲེང་ཞིང་ཏིང་ཤག་བརྡུང་བའི་ཚུལ་བྱ། ཐབས་ལ་མཁས་པ་ཟག་མེད་ཕུང་པོའི་དྲི། །གཡོན་པའི་རྡོ་རྗེ་ཁུ་ཚུར་སྙིང་གར་བཞག་ནས་གཡས་པའི་ཁུ་ཚུར་གྱིས་དྲིའི་ཕྱེ་མ་འགྱེད་པའི་ཚུལ་དང་། གནྡྷེ་ཞེས་དྲི་དང་། ཉོན་མོངས་བཀྲེས་སེལ་ཆོས་ཀྱི་ཞལ་ཟས་མཆོག །རྡོ་རྗེ་ཁུ་ཚུར་གཉིས་ཀྱིས་བཤོས་འབུལ་བའི་ཚུལ་དང་། ནཻ་ཝིདྱ། ཞེས་ཞལ་ཟས་དང་། ངོ་ཚ་ཁྲེལ་ཡོད་ལྡན་པ་ལྷ་ཡི་གོས། །རྡོ་རྗེ་ཐལ་མོ་གཉིས་བརྐྱང་བས་ན་བཟའ་འབུལ་བའི་ཚུལ་དང་། ཝསྟྲ། ཞེས་གོས་ཏེ་མཆོད་པའི་ཁྱད་པར་ལྔའོ། །དེ་ནས་ལག་པ་གཉིས་ཐལ་མོ་ཁོང་སྟོང་དུ་སྦྱར་བ་སྤྱི་བོར་བཞག་ལ། ༀ་ལས་རིན་ཆེན་སྣ་བདུན་དང་། དཔག་བསམ་གྱི་ཤིང་དང་། ཁ་ཟས་རོ་བརྒྱ་པ་རྣམས་ཡིད་ཀྱིས་སྤྲུལ་ལ། ༀ་
སརྦྦ་བིད། པཱུར་པཱུར། སུ་ར་སུ་ར། ཨཱ་ཝརྟ་ཡ་ཨཱཝརྟ་ཡ་ཧོ། ཞེས་པས་དབུལ། རྒྱས་པ་ལ་སྤྲོ་ན། བདེ་བར་གཤེགས་པ་ཐམས་ཅད་ལ། །འཁོར་ལོ་རིན་ཆེན་འདི་ཕུལ་བས། །སྲིད་པའི་འཁོར་ལོ་རྒྱུན་བཅད་དེ། །ཆོས་ཀྱི་འཁོར་ལོ་བསྐོར་གྱུར་ཅིག །ལག་པ་གཉིས་མཁྲིག་མ་བསྣོལ་ཏེ་རྒྱབ་སྦྱར་ལ་སོར་མོ་རྣམས་གཅིག་ལ་གཅིག་འཁྱུད་དེ་མཐེ་བོང་གཉིས་ལག་མཐིལ་དུ་བཀུག་ལ། ༀ་སརྦ་ཏ་ཐཱ་ག་ཏ་ཙཀྲ་རཏྣ་པཱུ་ཛི་ཏེ་ཧཱུཾ། ཞེས་འཁོར་ལོ་དང་། རྒྱལ་བ་སྲས་དང་བཅས་པ་ལ། །ནོར་བུ་རིན་ཆེན་འདི་ཕུལ་བས། །བཀྲེན་ཞིང་ཕོངས་པ་རྒྱུན་བཅད་དེ། །འབྱོར་པ་ཕུན་སུམ་ཚོགས་པར་ཤོག །ཁུ་ཚུར་གཉིས་ཀྱིས་མཛུབ་མོ་གཉིས་ཚིགས་བཅག་སྟེ་མཐེ་བོང་གཉིས་དང་རྩེ་སྤྲད་ལ། ཙཀྲའི་གནས་སུ། མ་ཎི། ཞེས་ནོར་བུ་དང་། སྔགས་ཀྱི་ཐོག་མཐའ་འོག་མ་ཀུན་ལའང་སྦྱར་རོ། །བཙུན་མོ་རིན་ཆེན་འདི་ཕུལ་བས། །མ་རིག་མུན་པ་རྒྱུན་བཅད་དེ། །ཤེས་རབ་དབྱིངས་ཀྱི་དོན་རྟོགས་ནས། །ཐབས་དང་ཤེས་རབ་འབྲེལ་བར་ཤོག །རྡོ་རྗེ་ཐལ་མོ་ལས། མཛུབ་མོའི་རྩེ་མོ་བཀུག་ནས་ནི། །གུང་མོ་མཉམ་པའི་ཚིགས་སུ་སྦྱར། །རྡོ་རྗེ་དབྱིངས་ཀྱི་དབང་མོར་བཤད། །ཅེས་པའི་རྒྱ་དང་། སྟྲི་ཞེས་བཙུན་མོ་དང་།བློན་པོ་རིན་ཆེན་འདི་ཕུལ་བས། །ཕྱི་ནང་གསང་གསུམ་ཐེག་གསུམ་ལྡན། །བསམ་ཡས་བསྟན་པ་རབ་འཛིན་ཞིང་། །ཡོན་ཏན་ཐམས་ཅད་ལྡན་པར་ཤོག །རྡོ་རྗེ་བསྡམས་པ་ལས་གུང་མོ་དང་ཐ་མ་བཞི་གཤིབས་ཏེ་བསྒྲེང་བའི་རྒྱ་དང་། པུ་རུ་ཥ། ཞེས་བློན་པོ་དང་། གླང་པོ་རིན་ཆེན་འདི་ཕུལ་བས། །ལྟ་ངན་
རྣམས་ནི་རབ་བསལ་བས། །བླ་མེད་ཐེག་པར་རབ་ཞོན་ཏེ། ཐམས་ཅད་མཁྱེན་གྲོང་འགྲོ་བར་ཤོག །ལག་པ་གཡོན་པའི་མཐིལ་དུ་གཡས་པའི་གྲུ་མོ་བཞག་སྟེ་བསྒྲེངས་ལ་གཡས་པའི་ཁུ་ཚུར་འོག་ཏུ་གླང་བོའི་རྣམ་པར་བྱས་པའི་གུང་མོ་གླང་བོའི་སྣ་ལྟར་བྱས་ལ། ཧསྟི། ཞེས་གླང་པོ་དང་། རྟ་མཆོག་རིན་ཆེན་འདི་ཕུལ་པས། །སྲིད་པའི་གཟེབ་ལས་ཡོངས་གྲོལ་ཏེ། །རྫུ་འཕྲུལ་མཆོག་གི་ཤུགས་ཐོབ་ནས། །སངས་རྒྱས་ཞིང་དུ་བགྲོད་པར་ཤོག །ཁུ་ཚུར་གཉིས་བཙིར་བའི་གུང་མོ་གཉིས་དང་སྲིན་ལག་གཉིས་བརྐྱང་། །མཐེ་བོང་གཉིས་རྣ་བ་ལྟར་བྱས་ལ། ཏུ་རཾ་ག་ཨ་ཤ །ཞེས་རྟ་མཆོག་དང་། དམག་དཔོན་རིན་ཆེན་འདི་ཕུལ་པས། །ཉོན་མོངས་དགྲ་ལས་རྒྱལ་གྱུར་ནས། །ཕས་ཀྱི་རྒོལ་བ་ཚར་བཅད་དེ། །སྙེངས་བྲལ་མཆོག་ནི་ཐོབ་པར་ཤོག །གཡོན་གོ་ཆ་འཛིན་པ་དང་། གཡས་མཆོག་སྦྱིན་བྱས་ལ། ཁཌྒ། ཞེས་དམག་དཔོན་ཏེ་རྒྱལ་སྲིད་སྣ་བདུན་དབུལ་ལོ། །དེ་ནས། ཁ་དོག་དབྱིབས་ལེགས་ཡིད་འོང་རྒྱན་འཕྲེང་ལྡན། ཕྱོགས་དུས་ཀུན་ན་གཟུགས་མཆོག་ཅི་མཆིས་པ། །མོས་བློས་མཆོད་གནས་རྣམས་ལ་བདག་འབུལ་བགྱི། །བཞེས་ཤིང་བླ་མེད་གྲུབ་མཆོག་སྩལ་དུ་གསོལ། །དེ་བཞིན་དུ་རྐང་པ་ཕྱི་མ་གཉིས་དང་། སྔགས་ཀྱི་ཐོག་མཐའ་ཐམས་ཅད་ལ་སྦྱར་ལ། ༀ་སརྦ་ཏ་ཐཱ་ག་ཏ་རཱུ་པ་ཀཱ་མ་གུ་ཎ་བཛྲ་པཱུ་ཛི་ཏེ་ཨཱཿ ཧཱུཾ། ཞེས་གཟུགས་དང་། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་ཡིད་འོང་སྒྲ་སྙན་ཅི་མཆིས་པ། ཤཔྟ། ཞེས་སྒྲ་སྙན་དང་།
ཕྱོགས་དུས་ཀུན་ན་ཙནྡན་སྦྲུལ་སྙིང་དང་། །ཨ་ཀར་ལ་སོགས་དབང་པོ་ཚིམ་བྱེད་རྣམས། གནྡྷེ། ཞེས་དྲི་མཆོག་དང་། ཕྱོགས་དུས་ཀུན་ན་རོ་དང་བཅུད་ལྡན་པའི། །ལུས་སེམས་བརྟས་བྱེད་རོ་མཆོག་ཅི་མཆིས་པ། །ར་ས། ཞེས་ཞལ་ཟས་དང་། ཕྱོགས་དུས་ཀུན་ན་འཇམ་མཉེན་འཁྲིལ་ཆགས་པའི། །རེག་བྱའི་ཁྱད་པར་ལུས་སེམས་ཚིམ་བྱེད་རྣམས། །སྤརྴ། ཞེས་རེག་བྱ་སྟེ་འདོད་ཡོན་ལྔ་དབུལ་ལོ། །དེ་ནས་རྡོ་རྗེ་དྲིལ་སྟབས་དང་བཅས་པས། ཆོས་དབྱིངས་ཡེ་ཤེས་རྣམ་པར་དག །རྣམ་པར་སྣང་མཛད་བཅོམ་ལྡན་འདས། །ཏིང་ངེ་འཛིན་ལྡན་ཕྱག་རྒྱ་ཅན། །ཕྱག་འཚལ་བཅོམ་ལྡན་ཀུན་རིག་ལ། །མེ་ལོང་ཡེ་ཤེས་རང་བཞིན་ལས། །སེམས་ཅན་མ་ལུས་ཐམས་ཅད་ཀྱི། །ངན་སོང་ཐམས་ཅད་སྦྱོང་མཛད་པ། །ཕྱག་འཚལ་སྦྱོང་བའི་རྒྱལ་པོ་ལ། །མཉམ་ཉིད་ཡེ་ཤེས་ཡོན་ཏན་བདག །ཡིད་བཞིན་ནོར་བུ་རིན་ཆེན་ལྟར། །སེམས་ཅན་བསམ་པ་སྐོང་མཛད་པ། །རྒྱལ་མཆོག་རིན་ཆེན་ཁྱོད་ཕྱག་འཚལ། །སོ་སོར་ཀུན་རྟོག་གསུང་གི་བདག །གསུང་རབ་པདྨ་ཁ་རྒྱས་པ། །ཁམས་གསུམ་དབུགས་དབྱུང་མཛད་པ་ཡི། །ཤཱཀྱ་རིགས་དབང་ཁྱོད་ཕྱག་འཚལ། །ནན་ཏན་ཡེ་ཤེས་འཕྲིན་ལས་བདག །སྣ་ཚོགས་སེམས་ཅན་སྡུག་བསྔལ་ཀུན། །མ་ལུས་པར་ནི་ཞི་མཛད་པ། །མེ་ཏོག་ཆེར་རྒྱས་ཁྱོད་ཕྱག་འཚལ། །སྟོང་པ་ཉིད་ཀྱི་རྡོ་རྗེ་ལས། །རྡོ་རྗེའི་རིགས་རྣམས་ཀུན་གྱི་ཡུམ། །རྡོ་རྗེ་སེམས་མཆོག་རྣམ་པར་དག །ཕྱག་འཚལ་རྡོ་རྗེ་སྤྱན་མ་ལ། །མཚན་མ་
མེད་པའི་རྡོ་རྗེ་ལས། །རིན་ཆེན་རིགས་རྣམས་ཀུན་གྱི་ཡུམ། །རྡོ་རྗེ་རིན་ཆེན་དབང་བསྐུར་མཆོག །ཕྱག་འཚལ་རྡོ་རྗེ་དབང་ཉིད་ལ། །སྨོན་པ་མེད་པའི་རྡོ་རྗེ་ལས། །པདྨའི་རིགས་རྣམས་བསྐྱེད་མཛད་པ། །རྡོ་རྗེ་པདྨ་གསང་བའི་མཆོག །ཕྱག་འཚལ་རྡོ་རྗེ་དཀར་མོ་ལ། །རྡོ་རྗེ་མངོན་འདུ་མི་བྱེད་ལས། །ལས་ཀྱི་རིགས་རྣམས་བསྐྱེད་མཛད་པ། །རྡོ་རྗེ་མཆོད་ལ་རབ་ཏུ་བརྩོན། །ཕྱག་འཚལ་རྡོ་རྗེ་སྒྲོལ་མ་ལ། །རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་དེ་བཞིན་གཤེགས་པ་ཀུན། །རྡོ་རྗེ་དང་པོ་ཀུན་ཏུ་བཟང་། །ཕྱག་འཚལ་ཕྱག་ན་རྡོ་རྗེ་ལ། །རྡོ་རྗེ་རྒྱལ་པོ་སངས་རྒྱས་མཆོག །རྡོ་རྗེ་ལྕགས་ཀྱུ་དེ་བཞིན་གཤེགས། །དོན་ཡོད་རྒྱལ་པོ་རྡོ་རྗེ་མཆོག །ཕྱག་འཚལ་རྡོ་རྗེ་འགུགས་ཁྱོད་ལ། །རྡོ་རྗེ་ཆགས་པ་བདེ་ཆེན་པོ། །རྡོ་རྗེ་མདའ་ནི་དབང་བྱེད་པ། །བདུད་ཀྱི་འདོད་པ་རྡོ་རྗེ་ཆེ། །ཕྱག་འཚལ་རྡོ་རྗེ་གཞུ་ཁྱོད་ལ། །རྡོ་རྗེ་ལེགས་པ་སེམས་དཔའ་མཆོག །རྡོ་རྗེ་མགུ་བ་དགའ་བ་ཆེ། །རབ་དགྱེས་རྒྱལ་པོ་རྡོ་རྗེ་མཆོག །ཕྱག་འཚལ་རྡོ་རྗེ་དགྱེས་ཁྱོད་ལ། །རྡོ་རྗེ་རིན་ཆེན་རྡོ་རྗེ་དོན། །རྡོ་རྗེ་ནམ་མཁའ་ནོར་བུ་ཆེ། །ནམ་མཁའི་སྙིང་པོ་རྡོ་རྗེ་ཕྱུག །ཕྱག་འཚལ་རྡོ་རྗེ་སྙིང་ཁྱོད་ལ། །རྡོ་རྗེ་གཟི་བརྗིད་ཆེར་འབར་བ། །རྡོ་རྗེ་ཉི་མ་རྒྱལ་བའི་འོད། །རྡོ་རྗེ་འོད་ཟེར་གཟི་བརྗིད་ཆེ། །ཕྱག་འཚལ་རྡོ་རྗེ་འོད་ཁྱོད་ལ། །སེམས་ཅན་དོན་རབ་རྡོ་རྗེ་དཔལ། །རྡོ་རྗེ་རྒྱལ་མཚན་རབ་དགའ་བྱེད། །རྡོ་རྗེ་ཆེན་པོ་རིན་ཆེན་དཔལ། །ཕྱག་འཚལ་རྡོ་རྗེ་དཔལ་ཁྱོད་ལ། །རྡོ་རྗེ་བཞད་མོ་བཞད་པ་ཆེ། །རྡོ་རྗེ་འཛུམ་པ་ངོ་མཚར་ཆེ། །དགའ་ཞིང་རབ་དགའ་རྡོ་རྗེ་སྟོན། །ཕྱག་འཚལ་རྡོ་རྗེ་དགའ་བ་ལ། །
རྡོ་རྗེ་ཆོས་རབ་དེ་ཉིད་དོན། །རྡོ་རྗེ་པདྨོ་རབ་དག་བྱེད། །འཇིག་རྟེན་དབང་རབ་རྡོ་རྗེ་སྤྱན། །ཕྱག་འཚལ་རྡོ་རྗེ་སྤྱན་ཁྱོད་ལ། །རྡོ་རྗེ་རྣོ་བ་ཐེག་པ་ཆེ། །རྡོ་རྗེ་རལ་གྲི་མཚོན་ཆེན་པོ། །འཇམ་དཔལ་རྡོ་རྗེ་རབ་ཏུ་ཟབ། །ཕྱག་འཚལ་རྡོ་རྗེ་བློ་ཁྱོད་ལ། །རྡོ་རྗེ་རྒྱུ་དང་སྙིང་པོ་ཆེ། །རྡོ་རྗེ་འཁོར་ལོ་ཚུལ་ཆེན་པོ། །རབ་སྐོར་རྡོ་རྗེ་ལས་བྱུང་བ། །ཕྱག་འཚལ་རྡོ་རྗེ་སྙིང་པོ་ལ། །རྡོ་རྗེ་གསུང་བ་རབ་རིག་མཆོག །རྡོ་རྗེ་ཟློས་པ་རབ་བསྒྲུབ་ཕྱིར། །མི་གསུང་རྡོ་རྗེ་མཆོག་གྲུབ་པ། །ཕྱག་འཚལ་རྡོ་རྗེ་གསུང་ཁྱོད་ལ། །རྡོ་རྗེ་ལས་རབ་རྡོ་རྗེ་དཀའ། །ལས་ཀྱི་རྡོ་རྗེ་ཀུན་རབ་འགྲོ། །རྡོ་རྗེ་ངེས་པ་རྒྱ་ཆེ་བ། །ཕྱག་འཚལ་རྡོ་རྗེ་ཀུན་ཁྱོད་ལ། །རྡོ་རྗེ་སྲུང་བ་བརྟན་པ་ཆེ། །རྡོ་རྗེ་གོ་ཆ་སྲ་བ་ཆེ། །བརྩོན་འགྲུས་མཆོག་ནི་ཐུབ་པར་དཀའ། །ཕྱག་འཚལ་རྡོ་རྗེ་བརྩོན་འགྲུས་ལ། །རྡོ་རྗེ་གནོད་སྦྱིན་ཐབས་ཆེན་པོ། །རྡོ་རྗེ་མཆེ་བ་འཇིགས་པ་ཆེ། །བདུད་འཇོམས་རྡོ་རྗེ་མི་བཟད་པ། །ཕྱག་འཚལ་རྡོ་རྗེ་དྲག་པོ་ལ། །རྡོ་རྗེ་མཚམས་སྦྱོར་རབ་བསྡུས་ཉིད། །རྡོ་རྗེ་འཆིང་བ་རབ་གྲོལ་བྱེད། །རྡོ་རྗེ་ཁུ་ཚུར་དམ་ཚིག་མཆོག །ཕྱག་འཚལ་རྡོ་རྗེ་ཁུ་ཚུར་ལ། །རྣམ་དག་རྡོ་རྗེ་ཐུགས་འཛིན་མ། །མི་དམིགས་རྡོ་རྗེ་ཏིང་འཛིན་གནས། །རྡོ་རྗེ་སྒེག་མོའི་ཚུལ་འཛིན་མ། །ཕྱག་འཚལ་རྡོ་རྗེ་བསྒྱིངས་མ་ལ། །རྣམ་དག་ཡོན་ཏན་རྡོ་རྗེ་སྟེ། །ཡིད་བཞིན་རྡོ་རྗེ་རེ་བ་སྐོང་། །རྡོ་རྗེ་གཟུགས་ཀྱི་ཚུལ་འཛིན་མ། །ཕྱག་འཚལ་རྡོ་རྗེ་འཕྲེང་བ་ལ། །རྣམ་དག་རྡོ་རྗེ་གསུང་མཆོག་མ། །རྡོ་རྗེ་བི་ཝང་འཛིན་པའི་ཚུལ། །རྡོ་རྗེ་
གསུང་མཆོག་སྒྲོག་པའི་དོན། །ཕྱག་འཚལ་རྡོ་རྗེ་དབྱངས་མཁན་ལ། །རྣམ་དག་རྡོ་རྗེ་ལས་རབ་སྟེ། །ལས་ཀྱི་རྡོ་རྗེ་འགྲོ་དོན་མཛད། །བདུད་འདུལ་རྡོ་རྗེ་ཕྱག་རྒྱ་ཅན། །ཕྱག་འཚལ་རྡོ་རྗེ་གར་མཁན་ལ། །སྤྲིན་བཞིན་རྡོ་རྗེ་བདུག་པ་མ། །ཚིམ་བྱེད་རྡོ་རྗེ་དང་ལྡན་པས། །རྡོ་རྗེ་འཕྲེང་བའི་ཚུལ་འཛིན་མ། །ཕྱག་འཚལ་རྡོ་རྗེ་བདུག་པ་ལ། །རྡོ་རྗེ་མཛེས་པའི་གཟུགས་མཛེས་ཤིང་། །རྡོ་རྗེ་མེ་ཏོག་འཐོར་བའི་ཚུལ། །བྱང་ཆུབ་ཡན་ལག་མེ་ཏོག་སྟེ། །ཕྱག་འཚལ་རྡོ་རྗེ་མེ་ཏོག་ལ། །འོད་གསལ་རྡོ་རྗེ་འབར་བའི་མེ། །རྡོ་རྗེ་སྤྱན་གྱིས་མ་རིག་སེལ། །རྡོ་རྗེ་གསལ་བྱེད་ཕྱག་རྒྱ་འཛིན། །ཕྱག་འཚལ་རྡོ་རྗེ་སྣང་བྱེད་ལ། །རྡོ་རྗེ་ཙནྡན་བདུད་རྩིའི་ཆུ། །རྡོ་རྗེ་དྲི་ཡིས་རྣམ་རྟོག་འཇོམས། །རྡོ་རྗེ་དག་བྱེད་ཕྱག་རྒྱ་འཛིན། །ཕྱག་འཚལ་རྡོ་རྗེ་དྲི་མཆོག་ལ། །རྣམ་དག་སྐུལ་བྱེད་རྡོ་རྗེའི་དོན། །རྡོ་རྗེ་སྡུད་མཛད་རྡོ་རྗེའི་དོན། །རྡོ་རྗེ་འགུགས་བྱེད་ཕྱག་རྒྱ་འཛིན། །ཕྱག་འཚལ་རྡོ་རྗེ་ལྕགས་ཀྱུ་ལ། །མི་གཏོང་རྡོ་རྗེ་ཆོས་ཀྱི་དོན། །རྡོ་རྗེ་འདྲེན་པ་མི་འགྱུར་དོན། །འཆིང་མཛད་རྡོ་རྗེའི་ཕྱག་རྒྱ་འཛིན། །ཕྱག་འཚལ་རྡོ་རྗེ་ཞགས་པ་ལ། །རྡོ་རྗེ་མི་འགྱུར་བརྟན་པའི་བདག །རྡོ་རྗེ་མགྱོགས་བྱེད་གློག་བཞིན་མྱུར། །སྒྲོག་མཛད་རྡོ་རྗེའི་ཕྱག་རྒྱ་འཛིན། །ཕྱག་འཚལ་རྡོ་རྗེ་ལྕགས་སྒྲོག་ལ། །རྡོ་རྗེ་དབབ་པ་བརྟན་པའི་བདག །བསྐྱོད་མཛད་རྡོ་རྗེ་ཀུན་གྱི་ལས། །རྡོ་རྗེ་དབབ་པའི་ཕྱག་རྒྱ་འཛིན། །ཕྱག་འཚལ་རྡོ་རྗེ་འབེབས་པ་ལ། །སྒོ་ཡི་ཁྱམས་ན་བཞུགས་པ་ཡི། །བྱམས་པ་ལ་སོགས་བཅུ་དྲུག་ནི། །རབ་དགའ་ལ་སོགས་གནས་མཛད་པའི། །
བྱང་ཆུབ་སེམས་དཔའ་ཕྱག་འཚལ་ལོ། །སྟོན་པའི་རྟགས་འཆང་ཉན་ཐོས་མཆོག །ལྷུང་བཟེད་འཁར་གསིལ་པོ་ཏི་ཕྱག །སྦྱངས་སྟོབས་ཡོན་ཏན་ཀུན་ལྡན་པའི། །ཉན་ཐོས་རྣམས་ལ་ཕྱག་འཚལ་ལོ། །རྟེན་འབྲེལ་དོན་ལ་བརྟེན་གནས་པའི། །འཕགས་པ་རང་རྒྱལ་བཅུ་གཉིས་ནི། །འབྱུང་དང་ལྡོག་ལ་རབ་ཞུགས་པའི། །རང་རྒྱལ་གཙོ་ལ་ཕྱག་འཚལ་ལོ། །ཁྲོ་བོ་སྲིན་པོའི་ཆ་ལུགས་ཅན། །སྦྲུལ་དང་མི་སྡུག་མགོས་བརྒྱན་པ། །སྟག་ལྤགས་ཀྱིས་ནི་རྣམ་དཀྲིས་ཤིང་། འཇིག་རྟེན་གསུམ་སྣང་སོགས་ཕྱག་འཚལ། །ཕྱི་ཡི་ཁོར་ཡུག་ལ་གནས་པའི། །འཇིགས་བྱེད་ལྷ་ཀླུ་གཟའ་སྐར་དང་། །ཕྱོགས་སྐྱོང་རྒྱལ་ཆེན་ཕྱག་འཚལ་ཞིང་། །འཇིག་རྟེན་པ་ཀུན་བསྟོད་པར་བགྱི། ཞེས་བསྟོད་དེ་བཟླས་པ་གང་འགྲུབ་བྱས་ནས། དངོས་གྲུབ་ཐམས་ཅད་བསྒྲུབ་པའི་ཕྱིར། །སེམས་ཅན་ཀུན་གྱི་དོན་མཛོད་ཅིག །ཅེས་གསོལ་བ་གདབ།དེ་ནས་སྒྲུབ་གྲོགས་དཀྱིལ་འཁོར་བསྲུང་དུ་བཅུག་ལ། ཕྱི་རོལ་ཏུ་ཕྱིན་ཏེ། གཏོར་མ་ཆ་གསུམ། ཡི་དྭགས་ཀྱི་གཏོར་མ་ཉེར་སྤྱོད་དང་བཅས་པ་བཤམས་ལ། བསང་གཟི་བྱིན་བསྐྱེད་ནས་མཆོད་པ་རྣམས་སྔར་ལྟར་བྱིན་གྱིས་བརླབ། གཏོར་མ་བྱིན་གྱིས་བརླབ་པ་ནི། གཡས་པའི་མཐེ་བོས་མཐེའུ་ཆུང་མནན། ལྷག་མ་གསུམ་སོ་སོར་བསྒྲེངས་ལ། ༀ་སྭ་བྷཱ་ཝ་བི་ཤུདྡྷེ་དྷརྨཱཿ ཏེ་བཛྲ་སིདྡྷི་ཧཱུཾ། ཞེས་སྦྱང་། ཐལ་མོ་གཉིས་བཀན་ལ་སྙིམ་པའི་ཚུལ་དུ་བྱས་པ་ནམ་མཁའ་མཛོད་ཀྱི་ཕྱག་རྒྱ་དཔྲལ་བར་བཞག་ལ། ན་མཿ སརྦྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦྦ་
ཏད་ཁཾ་ཨུད་ག་ཏེ་སྥ་རཱ་ཎ་ཨི་མཾ་ག་ག་ན་ཁཾ་སྭཱ་ཧཱ། ཞེས་པས་མང་པོར་སྤེལ། ལག་པའི་སོར་མོ་བསྣོལ་ལ་གུང་མོ་གཉིས་རྩེ་སྤྲད་ལ་བཅག་སྟེ་དཔྲལ་བར་བཅིངས་ནས་བཀྲོལ་ལ། ༀ་ཨ་མྲྀ་ཏེ་ཧཱུྃ་ཕཊ། ཅེས་པས་བདུད་རྩིར་བསྒྱུར། གཡོན་རྡོ་རྗེ་ཁུ་ཆུར་སྙིང་གར་བཞག །གཡས་པ་མཆོག་སྦྱིན་གྱི་ཕྱག་རྒྱ་བྱས་ལ། ༀ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨ་དྱ་ནུད་པན་ན་ཏྭད། ཅེས་པས་འདོད་པ་བསྒྲུབ་པར་བསམ། གཡས་པ་ཁྲོ་བོའི་ཁུ་ཚུར་བཅིངས་ཏེ་བསྒྲེངས་ལ་རྫས་ལ་གཏད་དེ་སེ་གོལ་གདབ་ཅིང་བགྲོལ་ལ། ན་མཿ སརྦྦ་ཏ་ཐཱ་ག་ཏ་ཨ་ཝ་ལོ་ཀི་ཏེ། ༀ་སམྦྷ་ར་སམྦྷ་ར་ཧཱུཾ། ཞེས་རྒྱ་ཆེན་ཤུགས་ལྡན་འོད་ཀྱི་སྔགས་རྒྱས་སོ་སོར་ཐོབ་པར་བྱའོ། །གཡས་མི་འཇིགས་པའི་ཕྱག་རྒྱ་བྱས་ལ། ༀ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནི་སརྦ་ཨརྠ་སཱ་དྷ་ནི་སྭཱ་ཧཱ། ཞེས་པས་མཉམ་པོར་ཐོབ་པར་བྱ།བདག་གི་བསམ་པའི་སྟོབས་དང་ནི། །དེ་བཞིན་གཤེགས་པའི་བྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །དོན་རྣམས་གང་དག་བསམས་པ་ཀུན། །དེ་དག་ཐམས་ཅད་ཅི་རིགས་པར། །ཐོགས་པ་མེད་པར་འབྱུང་གྱུར་ཅིག །ཅེས་བདེན་སྟོབས་བརྗོད། དེ་ནས་སྤྱན་དྲང་བ་ནི། པུས་མོ་གཡས་བཙུགས། གཡོན་གྱེན་དུ་བསླང་། ལག་པ་གཡས་སྤོས་ཐོགས། གཡོན་དྲིལ་བུ་གསིལ་ཞིང་། མགོན་པོ་ཀུན་གཤེགས་གདན་ལ་བཞུགས། །ད་ལྟ་སྙིགས་མ་ལྔ་ཡི་དུས། །གཤེགས་ཤིང་བཞུགས་པའི་གནས་ངན་ཡང་། །ཤཱཀྱའི་བསྟན་པ་སྲུང་པ་དང་། །བདག་ཅག་རྣམས་ལ་ཕན་གདགས་ཕྱིར། །གནས་འདི་
ཉིད་དུ་གཤེགས་སུ་གསོལ། །ཕྱོགས་སྐྱོང་འཇིག་རྟེན་སྐྱོང་བ་དབང་དང་ལྡན། །སྙིང་རྗེ་ཐབས་མཁས་ཐུགས་དམ་དཀྱེལ་པོ་ཆེ། །ལྷ་དང་དྲང་སྲོང་ཡི་དྭགས་སྲིན་པོ་ཀླུ། །རིག་འཛིན་རྒྱལ་པོ་དང་ནི་གདོན་གྱི་བདག །དེ་དག་སོ་སོའི་དབང་པོའི་སྐུར་སྟོན་པ། །ཕྱོགས་བཅུའི་འཇིག་རྟེན་སྐྱོང་བ་བཞུགས་སོ་འཚལ། །བསྟན་པ་རྒྱས་པའི་སླད་དུ་སྤྱན་འདྲེན་ན། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །ༀ་ཨེ་ཧྱེ་ཧི་ད་ཤ་དིཀ་ལོ་ཀ་པཱ་ལ་ས་པ་རི་ཝཱ་ར། རྡོ་རྗེ་བསྡུ་བའི་ཕྱག་རྒྱ་བྱས་ལ། ས་མ་ཡེ་སྭཱ་ཧཱ། ༀ་རུ་ཏྲ་ཡེ། ༀ་ཤ་ཏ་ས་ཧ་སྲ་ཨཀྵི་ཡེ། ༀ་ཨགྣ་ཡེ། ༀ་ཡ་མ་ཡེ། ༀ་ནཻ་རི་ཏ་ཡེ། ༀ་བ་རུ་ཎ་ཡེ། ༀ་བ་ཡ་བཻ་ཡེ། ༀ་ཀུ་བེ་ར་ཡེ། ༀ་ཨུརྡྷཾ་བྲཧྨ་ཎ་ཡེ། སུརྱ་གྲ་ཧ་ཨ་དྷི་པ་ཏ་ཡེ། ཙནྡྲ་ནཀྵ་ཏྲ་ཨ་དྷི་པ་ཏ་ཡེ། ༀ་ཨརྡྷ་པྲི་ཐི་ཝཱི་བྷྱཿ ཨ་སུ་རེ་བྷྱཿ ནཱ་གེ་བྷྱཿ ས་པ་རི་ཝཱ་ར་པྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་མཆོད་ཡོན་དང་། ཀ་མ་ལ་ཡེ་སྟྭཾ། ཞེས་གདན་དབུལ། དེ་ནས་ༀ་རུ་ཏྲ་ཡེ། ཞེས་པ་ནས་ནཱ་གེ་བྷྱཿ ས་པ་རི་ཝཱ་ར་པྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་སོགས་ཀྱིས་སྔོན་འགྲོ་གཏོར་མའི་སྐབས་ལྟར་ཉེར་སྤྱོད་རོལ་མོའི་བར་དབུལ།དེ་ནས། དབང་པོ་རྡོ་རྗེ་འཆང་བའི་ལྷ། །ལྷ་ཡི་རྒྱལ་པོ་གདོན་གྱི་བདག །ཤར་ཕྱོགས་གདོན་གྱི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །མེ་སྟེ་སྲེག་བྱ་ཟ་བའི་ལྷ། །དྲང་སྲོང་རྒྱལ་པོ་གདོན་གྱི་བདག །ཤར་ལྷོ་མེ་ལྷའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །གཤིན་
རྗེ་ལག་ན་བེ་ཅོན་འཆང་། །མ་མོའི་རྒྱལ་པོ་གདོན་གྱི་བདག །ལྷོ་ཕྱོགས་གདོན་གྱི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །བདེན་དང་བྲལ་བ་ལེགས་ལྡན་ལྷ། །སྲིན་པོའི་རྒྱལ་པོ་གདོན་གྱི་བདག །ལྷོ་ནུབ་གདོན་གྱི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །ཞགས་པ་ཐོགས་པ་ཆུ་ཡི་ལྷ། །ཀླུ་ཡི་རྒྱལ་པོ་གདོན་གྱི་བདག །ནུབ་ཕྱོགས་གདོན་གྱི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །རླུང་སྟེ་སྲོག་ཀྱང་འཛིན་པའི་ལྷ། །རིགས་འཛིན་རྒྱལ་པོ་གདོན་གྱི་བདག །ནུབ་བྱང་གདོན་གྱི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །གནོད་སྦྱིན་ལག་ན་དབྱུག་པ་ཐོགས། །ནོར་སྐྱོང་གདོན་གྱི་བདག་པོ་སྟེ། །བྱང་ཕྱོགས་གདོན་གྱི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །དབང་དང་ལྡན་པ་འདྲེན་པའི་ལྷ། །འབྱུང་པོའི་རྒྱལ་པོ་གདོན་གྱི་བདག །བྱང་ཤར་གདོན་གྱི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །སྟེང་གི་ཚངས་པ་ཆེན་པོ་དང་། །ཉི་མ་ཟླ་བ་གཟའ་ཆེན་པོ། །གཟའ་དང་རྒྱུ་སྐར་བཅས་པ་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །འོག་གི་ཀླུ་སྟེ་ས་ཡི་ལྷ། །ས་འཛིན་ལག་པ་ཆེན་པོ་དང་། །དམ་ཚིག་ཤེས་པའི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །ཞེས་པས་བསྟོད་དོ། །གཏོར་མ་བྱིན་པ་ནི། ༀ་རུ་ཏྲ་ཡེ། ཞེས་པ་ནས། ནཱ་གེ་བྷྱཿ ས་པ་རི་ཝཱ་ར། ན་མཿ སརྦ་ཏ་ཐ་ག་ཏ་བྷྱོཿ ཞེས་སོགས་གསུམ་དང་། ཤར་ཕྱོགས་རྡོ་རྗེ་ཅན་གྱི་ལྷ་ཚོགས་བཅས། །གཏོར་མ་ཕུལ་བ་འདི་དག་བཞེས་སུ་གསོལ། །མེ་དང་གཤིན་རྗེ་བདེན་བྲལ་
སྲིན་པོའི་བདག །ཆུ་བདག་རླུང་བདག་ནོར་གྱི་བདག་པོ་སྟེ། །དབང་ལྡན་ལྷ་སྟེ་འབྱུང་པའི་བདག་པོ་དང་། །སྟེང་གི་ཉི་ཟླ་ཚངས་པ་ཆེན་པོ་དང་། །ལྷ་རྣམས་ཀུན་དང་ས་ཡི་ཀླུ་རྣམས་དང་། །རི་ཡི་ལྷ་དང་གནོད་སྦྱིན་ཚོགས་རྣམས་ལ། །སོ་སོ་སོ་སོར་གཏོར་མ་ཕུལ་བ་རྣམས། །རབ་ཏུ་དགྱེས་པ་ཡིས་ནི་བཞེས་ནས་ཀྱང་། །རང་རང་ཕྱོགས་སུ་ལེགས་པར་བཞུགས་ནས་སུ། །རང་གི་བུ་སྨད་མཛའ་བཤེས་གཉེན་འདུན་དང་། །ནང་མི་དམག་དང་དཔུང་བཅས་ཐབས་ཅིག་ཏུ། །མེ་ཏོག་དྲི་དང་བྱུག་པ་གཏོར་མར་བཅས། །འདི་རྣམས་བཏུང་ཞིང་ལེགས་པར་གསོལ་ནས་ཀྱང་། །བདག་གི་ལས་འདིའི་འབྲས་བུ་མཆིས་པར་མཛོད། །ཅེས་པས་བསྔོ།མཆོད་སྦྱིན་གཏོར་མ་འདི་སྣོམས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་པ་སྐལ་པ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྟོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་རྣམས་མེད་པར་མཛོད། །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཆོས་འཕེལ་དང་། །བདེ་ལེགས་ཕུན་སུམ་ཚོགས་པ་དང་། །ཡིད་ལ་འདོད་པ་ཀུན་འགྲུབ་ཤོག །ཅེས་འཕྲིན་ལས་བཅོལ། །གདོན་གྱི་རིགས་སྨོས་པའི་སྒོ་ནས་སྤྱན་དྲང་བ་ནི་ལུས་ཀྱི་སྤྱོད་ལམ་སྔར་ལྟར་བྱས་ལ།
ལྷ་དང་ལྷ་མིན་གནོད་སྦྱིན་ལྟོ་འཕྱེ་གྲུལ། །ནམ་མཁའ་ལྡིང་དང་འདབ་བཟང་ལུས་སྲུལ་པོ། །དྲི་ཟ་སྲིན་པོ་གདོན་གྱི་རིགས་རྣམས་དང་། །གང་དག་ས་ལ་གནས་པའི་རྫུ་འཕྲུལ་ཅན། །བུ་སྨད་བཅས་ཤིང་གཡོག་འཁོར་ཚོགས་རྣམས་ལ། །བདག་གི་པུས་མོ་ས་ལ་བཙུགས་ནས་ནི། །ཐལ་མོ་སྦྱར་ནས་ཁྱེད་ལ་གསོལ་འདེབས་ཀྱིས། །གསན་ནས་ཕན་གདགས་སླད་དུ་འདིར་སྤྱོན་ཅིག །ༀ་ཨེ་ཧྱེ་ཧི་ལོ་ཀ་ཀཱ་ར་ཡ། དེ་བ། ནཱ་ག །ཡཀྵ། གནྡྷར་བ། ཨ་སུ་ར། ག་རུ་ཊ། ཀིནྣ་ར། མ་ཧོ་ར་ག །མ་ནུ་ཥ། ཨ་མ་ནུ་ཥ། ས་པ་རི་ཝཱ་ར་ས་མ་ཡེ་སྭཱ་ཧཱ། ༀ་དེ་བ། ཞེས་པ་ནས་ས་པ་རི་ཝ་ར་པྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་མཆོད་ཡོན་དང་། སྔར་བཞིན་གདན་ཕུལ་ནས། ཉེར་སྤྱོད་རོལ་མོ་དང་བཅས་པ་གོང་བཞིན་དབུལ་ལོ། །ༀ་དེ་བ་ཞེས་པ་ནས་ས་པ་རི་ཝཱ་ར་ན་མཿ སརྦ་ཏ་ཐཱ་ཏ་བྷྱོཿ ཞེས་སོགས་གསུམ་གྱིས་གཏོར་མ་ཕུལ་ནས།འབྱུང་པོ་གང་དག་རི་རབ་སྟེང་གནས་དང་། །དགའ་བའི་ཚལ་དང་ལྷ་ཡི་གནས་རྣམས་དང་། །ཤར་ནུབ་རི་དང་ཉི་ཟླའི་ཁྱིམ་རྣམས་དང་། །རི་བོ་ཀུན་ལ་གང་དག་གནས་པ་དང་། །རིན་ཆེན་གླིང་ན་ལྷག་པར་གང་གནས་དང་། །ཆུ་བོ་ཀུན་དང་ཆུ་བོའི་མདོ་རྣམས་དང་། །མཚོ་དང་རྫིང་བུ་སྟེང་ཀ་ཆུ་ངོགས་དང་། །གཡའ་ཆུ་སིལ་མ་ཅན་ན་གང་གནས་དང་། །གྲོང་དང་ཕྱུགས་ལྷས་གྲོང་ཁྱེར་སྟོང་པ་དང་། །ཁང་སྟོང་དག་དང་ལྷ་ཡི་ཁང་པ་དང་། །གཙུག་ལག་ཁང་དང་མཆོད་རྟེན་གནས་རྣམས་དང་། །དཀའ་ཐུབ་གནས་དང་གླང་ཆེན་བྲེས་རྣམས་དང་། །རྒྱལ་པོའི་དཀོར་ཁང་དག་ན་གང་གནས་དང་། །ལམ་སྲང་སུམ་
མདོ་དང་ནི་བཞི་མདོ་དང་། །གང་དག་ལམ་ཆེན་དང་ནི་ཤིང་གཅིག་དྲུང་། །དུར་ཁྲོད་ཆེན་པོ་ནགས་ཚལ་ཆེན་པོ་དང་། །སེང་གེ་དྲེད་དང་གཅན་གཟན་གནས་དག་དང་། །འབྲོག་ཆེན་འཇིགས་སུ་རུང་བར་གང་གནས་དང་། །གང་དག་གླིང་མཆོག་དག་ན་གནས་པ་དང་། །ལྷུན་པོ་དུར་ཁྲོད་དག་ན་གནས་པ་རྣམས། །རབ་ཏུ་དགྱེས་ཤིང་མགུ་བར་གྱུར་ནས་སུ། །ཕྲེང་བ་མེ་ཏོག་དྲི་དང་བདུག་པར་བཅས། །བསྟོད་དང་གཏོར་མ་མར་མེ་གུས་འབུལ་ན། །འདི་དག་བཏུང་ཞིང་ལེགས་པར་གསོལ་ནས་ཀྱང་། །བདག་གི་ལས་ཀྱི་འབྲས་བུ་མཆིས་པར་མཛོད། །ཅེས་གནས་སྨོས་པའི་སྒོ་ནས་འཕྲིན་ལས་བཅོལ་ལོ། །རང་ཉིད་སྐད་ཅིག་གིས་ཧཱུཾ་མཛད་དུ་གྱུར་པར་བསམས་ལ། ཁྲོ་བོ་འདོད་རྒྱལ་གྱི་ཕྱག་རྒྱ་བྱས་ཏེ། སངས་རྒྱས་ཀྱི་བདེན་པ་དང་། ཆོས་ཀྱི་བདེན་པ་དང་། དགེ་འདུན་གྱི་བདེན་པ་དང་། གསང་སྔགས་དང་། རིག་སྔགས་རྣམས་ཀྱི་བྱིན་གྱིས་བརླབས་ཀྱིས་བགེགས་ཀྱི་རིགས་གང་ཡིན་པ་དེ་དག་ཐམས་ཅད་སྐད་ཅིག་ཐང་ཅིག་ཐང་ཅིག་ཡུད་ཙམ་དེ་ཉིད་ལ་འདིར་མཆིས་པར་གྱུར་ཅིག །ༀ་ཊཱཀྐི་ཧཱུཾ་ཛཿ ཞེས་བགེགས་འཁོར་བཅས་མདུན་དུ་བཀུག་པར་བསམ།ༀ་གུང་ཀ་རི་གུང་ཀ་རི་སྭཱ་ཧཱ། ༀ་པི་ཙི་པི་ཙི་སྭཱ་ཧཱ། ༀ་གུང་གུང་སྭཱ་ཧཱ། ས་པ་རི་ཝཱ་ར་པྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་མཆོད་ཡོན་དང་། གདན་སྔར་བཞིན་ཕུལ་ཏེ། ཉེར་སྤྱོད་རོལ་མོ་དང་བཅས་པ་གོང་བཞིན་དབུལ། ༀ་གུང་ཀ་རི་ཞེས་པ་ནས། ས་པ་རི་ཝཱ་ར་ན་མཿ སརྦ་ཏ་ཐཱ་ག་ཏ་བྷྱོཿ ཞེས་སོགས་གསུམ་གྱིས་གཏོར་མ་དབུལ། གང་ཞིག་མཚན་མོ་རྒྱུ་བ་ཡི། །འབྱུང་པོ་རྣམས་དང་ཤ་ཟ་དང་། །སྲིན་པོ་ཤ་
རྗེན་ཟ་བ་དང་། །སེམས་ཅན་རྣམ་པ་སྣ་ཚོགས་དང་། །ལྗོན་ཤིང་གེལ་པ་སོགས་གནས་པ། །དེ་དང་དེ་ལ་གཏོར་མ་ནི། །བཟའ་བ་ཤ་ཆང་ལ་ཕུག་བཅས། །འབྲས་ཆན་འབྲས་བུ་མང་པོ་དང་། །མཆོད་པ་འདི་ཡིས་མགུ་བྱོས་ལ། །གནོད་པའི་བསམ་པ་ཞི་བ་དང་། །བདག་ཅག་རྣམས་ལ་ཕན་པའི་ཡིད། །དེ་རིང་ཕན་ཆད་བསྐྱེད་པར་གྱིས། །རྒྱན་གྱིས་བརྒྱན་པར་བྱས་ཀྱང་ཆོས་སྤྱོད་ཅིང་། །དུལ་ཞིང་ཡང་དག་སྡོམ་ལ་ཚངས་པར་སྤྱོད། །འབྱུང་པོ་ཀུན་ལ་ཆད་པ་སྤངས་པ་སྟེ། །དགེ་སློང་དགེ་སྦྱོང་དེ་ཡིན་བྲམ་ཟེ་དེ། །མཚོན་ཆས་མི་འཇིགས་གང་ཡང་མེད། །འཚོ་བའི་སྲོག་ལ་ཀུན་ཀྱང་འཛེམ། །རང་གི་ལུས་ལ་དཔེ་ལོང་ལ། །གཞན་ལ་གནོད་པ་མ་བྱེད་ཅིག །ༀ་ཆེན་པོའམ་ཆུང་ངུ་གང་དག་གི །ལུས་ལ་མངོན་པར་གནོད་གྱུར་པའི། །ནད་དེ་ཉེ་བར་ཕྱུང་ནས་སུ། །གདོན་དེ་རང་གི་གནས་སུ་དེངས། །དེ་ལྟར་བདག་གི་ཅི་ནུས་ཀྱི། །མཆོད་དང་བསྙེན་བཀུར་བྱས་པ་ཡིས། །དམ་ཚིག་གནས་ལ་གནས་ནས་སུ། །བདག་གི་འདོད་པ་བསྐང་བར་མཛོད། །རྟག་ཏུ་དམ་ཚིག་ལ་གནས་ཤིང་། །འདིར་ནི་ཆེ་གེ་མོ་ཞིག་གི །ནད་དེ་ཉེ་བར་སོལ་མཛོད་ལ། །གདོན་རྣམས་རང་གི་གནས་སུ་དེངས། །སརྦ་བིགྷྣྰན་ཙྪ། ཞེས་བགེགས་རྣམས་རང་གནས་སུ་གཤེགས་པར་བསམ། ༀ་དེ་བ་ཞེས་པ་ནས། ས་པ་རི་ཝཱ་ར་པྲ་ཝ་ར་སད་ཀ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། གཙྪ། ཞེས་སྡེ་བརྒྱད་གཤེགས་པར་བསམ།ༀ་རུ་ཏྲ་ཡེ། ཞེས་པ་ནས། ས་པ་རི་ཝཱ་ར་པྲ་ཝ་ར་སད་ཀ་རཾ་ཨརྒྷཾ་པྲ་ཏི་ཙྪ་སྭཱ་ཧཱ། གཙྪ། ཞེས་ཕྱོགས་སྐྱོང་འཁོར་བཅས་གཤེགས་པར་བསམ། ན་མཿ ས་མནྟ་བུདྡྷཱ་ནཾ་སརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ༀ་
སམྦྷ་ར་སམྦྷ་ར་ཧཱུཾ། ཞེས་པ་ལན་གསུམ་གྱིས་ཡི་དྭགས་ལ་གཏོར་མ་བྱིན། དེ་ནས་ཙོག་ཙོག་པུར་འདུག་ཅིང་། ངག་བཅད་ལག་པ་གཉིས་པུས་མོའི་ནང་དུ་འོང་བར་བྱ་གཡས་པ་གན་རྐྱལ་དུ་གནས་པའི་གུང་མོ་དང་སྲིན་ལག་ཅུང་ཟད་བཀུག་ལ་ཁ་ལ་ཕྱོགས་པར་བཟུང་ངོ་། །ཟེའུ་འབྲུའི་ཆས་ཁ་ལ་ལན་ནང་དུ་བྱབ་ཅིང་ལན་གཉིས་སམ་གསུམ་དུ་རྣ་བ་གཉིས་དང་། མིག་གཉིས་དང་། སྣ་དང་། ཁ་དང་། ལག་པ་དག་དང་། ལྟེ་བ་དང་། མགོ་ལ་རེག་ནས་ཆུ་ཧུབ་གསུམ་འཐུངས་ཏེ་མཆུ་ལ་ལན་གཉིས་ཕྱི་བར་བྱའོ། །དེ་ནས་སློབ་དཔོན་གྱིས་རྗེས་མནན་ཏེ། ལས་ཐམས་ཅད་པ་བརྗོད་ཅིང་ནང་དུ་འོངས་ལ་སྔར་བཞིན་རང་ཉིད་ཧཱུཾ་མཛད་དུ་བསྐྱེད། མེ་ཏོག་གི་ཕྲེང་བ་བཟུང་སྟེ། རྡོ་རྗེ་ཤུགས་ཀྱི་འཇུག་པས་དཀྱིལ་འཁོར་དུ་སྔར་བཞིན་ཞུགས་པར་བསམ་ལ། ༀ་བཛྲ་སཏྭ་ས་མ་ཡ། ཞེས་སོགས་ཡི་གེ་བརྒྱ་བ་བརྗོད་ཅིང་རྡོ་རྗེ་གསོར། དྲིལ་བུ་གསིལ་ལ། དཀྱིལ་འཁོར་ལ་བསྐོར་བ་ལན་གསུམ་བྱས་ནས་འཁོར་ལོ་ལ་བལྟས་ཏེ། མེ་ཏོག་གཙོ་བོ་ལ་དབུལ། དེ་ནས་སྔར་གྱི་སྒོ་དབྱེ་བའི་སྔགས་རྒྱས་སྒོ་བཞི་གོང་བཞིན་དབྱེ། དེ་ནས་ༀ་ས་མ་ཡ་པྲ་བེ་ཤཱ་ཡ་མི། ཞེས་སྔར་ཕུལ་བའི་མེ་ཏོག་ཕྲེང་བ་གར་བྱེད་ཅིང་བླངས་ལ་རང་གི་མགོ་ལ་བཅིངས་ཏེ། ༀ་པྲ་ན་མ་མི་སརྦ་ཏ་ཐཱ་ག་ཏཾ། ཞེས་དཀྱིལ་འཁོར་ལ་ཕྱག་བྱས་ཏེ། སེམས་ཅན་ཐམས་ཅད་ལ་དངོས་གྲུབ་ཐམས་ཅད་ཀྱི་བཀའ་དྲིན་སྩོལ་ཅིག །ཅེས་གསོལ་བ་གདབ་པར་བྱའོ། །དེ་ནས་བླ་མ་དང་གཙོ་བོ་ཐ་མི་དད་པས་དབང་གི་བྱ་བ་རྣམས་མཛད་པར་བསམ་ཞིང་དངོས་སུ་རང་
གིས་བྱས་ལ། དགའ་ཆེན་ཁྱོད་བདག་སྟོན་པ་སྟེ། ཞེས་གསོལ་བ་གདབ་པ་ནས། དམ་ཚིག་བསྒྲག་པའི་བར་སློབ་མ་ཇི་ལྟར་འཇུག་པ་བཞིན་བྱས་ལ། དངོས་གཞི་ཆུ་དབང་ནས། ཚེ་འདིའི་བདེ་བ་མ་ལུས་དང་། །ཞེས་སོགས་ཀྱི་བར་གྱི་དབང་བསྐུར་བ་རྣམས་བླངས་ཏེ། རྡོ་རྗེ་འཛིན་མའི་ཕྱག་རྒྱ་བཅིངས་ནས། ༀ་བཛྲ་དྷ་ར། རཏྣ་དྷ་ར། པདྨ་དྷ་ར། བི་ཤྭ་དྷ་ར་ཏ་ཐཱ་ག་ཏ་ས་མ་ཡ་མཱ་ཏི་ཀྲ་མ་ཏི་ཏ་ཐཱ་ག་ཏ་དྷ་ར་ཨཱཏྨ་ཀོ྅ཧཾ། ཞེས་ང་རྒྱལ་བསྐྱེད་པ་ནི་བདག་འཇུག་གོ །དེ་ནས། བདག་མིང་འདི་ཞེས་བྱ་བ་ཡི། །རྡོ་རྗེ་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་ཕན་པའི་ཕྱིར། །སློབ་མ་རྣམས་ནི་གཞུག་པར་བགྱི། །ཞེས་གསུམ་གྱིས་གསོལ་བ་གདབ། །དེ་ནས་སློབ་མ་རྣམས་ཁྲུས་བྱས། །མཎྚལ་འབུལ་དུ་བཅུག་ལ་སྙིམ་པ་མེ་ཏོག་དང་བཅས་པས་ཐལ་མོ་སྦྱར་ཏེ། དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ནི་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་བགྱི། །ཞེས་གསུམ་གྱིས་གསོལ་བ་འདེབས་སུ་གཞུག །ལས་ཐམས་ཅད་པ་བཟླས་པའི་མིག་དར་སེར་པའམ་དམར་པོས། །ༀ་ཙཀྵ་བནྡྷ་བ་ར་མ་ན་ཡེ་ཧཱུཾ། ཞེས་གདོང་གཡོགས་བཅིང་། ཨཱཿ ཁཾ་བཱི་ར་ཧཱུཾ། ཞེས་མེ་ཏོག་ཕྲེང་བ་གཏད། དེ་ནས་སྔར་སྟ་གོན་གྱི་སྐབས་བཞིན་བྱང་ཆུབ་ཏུ་སེམས་བསྐྱེད་པའི་དམིགས་
རྣམས་བརྡ་སྤྲད་ལ། དབང་མེད་བདག་གིས་མི་དགེ་བགྱིས་པ་དང་། །ཞེས་པ་ནས། ཁྱད་འཕགས་གནས་ལ་བདག་ནི་གནས་པར་བགྱི། །ཞེས་ལན་གསུམ་རྗེས་ཟློས་བྱེད་དུ་གཞུག །སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ། དེའི་ཆེད་དུ་སྔགས་ཀྱི་ཐུན་མོང་མ་ཡིན་པའི་སྡོམ་པ་བླངས་ལ། རིགས་ལྔ་སྤྱི་དང་སོ་སོའི་དམ་ཚིག་མཐའ་དག་སངས་རྒྱས་མ་ཐོབ་ཀྱི་བར་དུ་ཚུལ་བཞིན་དུ་བསྲུང་སྙམ་པ་མཛོད་ཅེས་བརྡ་སྤྲད་ལ། སངས་རྒྱས་བྱང་ཆུབ་སེམས་དཔའ་ཀུན། །ཞེས་པ་ནས། སེམས་ཅན་མྱ་ངན་འདས་ལ་དགོད། །ཅེས་པའི་བར་ལན་གསུམ་རྗེས་ཟློས་བྱེད་དུ་གཞུག །ཐམས་ཅད་རྣལ་འབྱོར་གྱི་སེམས་བསྐྱེད་པ་ནི། ༀ་སརྦ་ཡོ་ག་ཙིཏྟཾ་ཨུཏྤ་ཏ་ཡཱ་མི། ཞེས་བརྗོད་དུ་བཅུག །སྨོན་སེམས་ཀྱི་དམིགས་རྣམ་བརྡ་སྤྲད་ལ། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱའོ། །སྙམ་པའི་སྨོན་པའི་སེམས་ཀུན་རྫོབ་པ་དེ་ཉིད་སྙིང་གར་ཟླ་བའི་དཀྱིལ་འཁོར་ཡོངས་སུ་རྫོགས་པ་དང་། བདག་མེད་ཀྱི་དམིགས་རྣམ་བརྡ་སྤྲད་དེ། ཆོས་ཐམས་ཅད་རང་བཞིན་མེད་པའི་སྟོང་པ་ཉིད་དང་རང་གི་སེམས་རོ་གཅིག་ཏུ་གྱུར་པའི་དོན་དམ་བྱང་ཆུབ་ཀྱི་སེམས་ཟླ་བའི་སྟེང་དུ་རྡོ་རྗེ་དཀར་པོ་རྩེ་ལྔ་པའི་རྣམ་པར་གྱུར་པའི་མོས་པ་མཛོད་ཅེས་བརྡ་སྤྲད། རྡོ་རྗེ་མེ་ཏོག་དང་བཅས་པ་སྙིང་གར་བཟུང་སྟེ། ༀ་སུ་ར་ཏེ་ས་མ་ཡ་སྟྭཾ་ཧོཿ སིདྷྱ། བཛྲ་ཡ་ཐཱ་སུ་ཁཾ། ཞེས་བརྗོད། ༀ་བཛྲ་ཨདྷི་ཏིཥྛ་ཧཱུཾ། ཞེས་སེམས་མ་རྡོ་རྗེ་མའི་ཕྱག་རྒྱ་འཚང་དུ་གཞུག །ༀ་བཛྲ་ས་མ་ཡ་ཧཱུཾ།
ཞེས་པས་ཤར་སྒོ་ནས་དཀྱིལ་འཁོར་དུ་གཞུག །ཨ་ས་མེ། ཏྲི་ས་མེ། ཨ་ཧཱ་ས་མ་ཡེ་ཧཱུཾ། ཞེས་པས། ལྷ་རྣམས་དང་སྐལ་བ་མཉམ་པར་བྱས་སོ། །ཞེས་དེ་ལྟར་མོས་སུ་གཞུག །དེ་ནས་རྡོ་རྗེ་མགོ་བོར་བཟུང་བའམ། ཡང་ན་སེམས་མ་རྡོ་རྗེ་མའི་ཕྱག་རྒྱ་བཅིངས་པ་སྤྱི་བོར་བཞག་ནས། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས། དེས་ན་ངས་ཁྱོད་ལ་རྡོ་རྗེ་ཡེ་ཤེས་བསྐྱེད་པར་བྱ་སྟེ་ཡེ་ཤེས་གང་གིས་ཁྱོད་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་རྣམས་ཀྱང་ཐོབ་པར་འགྱུར་ན། དངོས་གྲུབ་གཞན་རྣམས་ལྟ་སྨོས་ཀྱང་ཅི་དགོས། ཁྱོད་ཀྱིས་ཀྱང་འདི་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། ཁྱོད་དམ་ཚིག་ཉམས་པར་གྱུར་ཏ་རེ། ཞེས་བརྗོད་དེ། ཕན་ཡོན་གྱི་སྒོ་ནས་དམ་ལ་བཞག །སེམས་མ་རྡོ་རྗེ་མའི་ཕྱག་རྒྱ་ཁ་ཐུར་དུ་བསྟན་པ་དང་། གྱེན་དུ་བསྟན་པ་བཅིངས་ལ་སྤྱི་བོར་བཞག་སྟེ། འདི་ནི་ཁྱོད་ཀྱི་རྡོ་རྗེའི་དམ་ཚིག་ཡིན་གྱི། གལ་ཏེ་འགའ་ཞིག་ལ་སྨྲས་ན་ཀླད་པ་འགས་པར་འགྱུར་རོ། །ཞེས་དང་། སེམས་མ་རྡོ་རྗེ་མའི་ཕྱག་རྒྱའམ་རྡོ་རྗེ་སྙིང་གར་བཟུང་ལ། ༀ་དེ་རིང་རྡོ་རྗེ་སེམས་དཔའ་རང་། །ཁྱོད་ཀྱི་སྙིང་ལ་ཡང་དག་ཞུགས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་ཉེས་དམིགས་ཀྱི་སྒོ་ནས་དམ་ལ་བཞག་གོ །རྣམ་རྒྱལ་སྟེང་གི་དུང་ཆོས་ཀྱི་ཆུ་མཐེབ་སྲིན་གྱིས་བཟུང་བའི་སྣོད་ནས་སློབ་མའི་ཁར་བླུག་ཅིང་། ༀ་བཛྲ་ཨུ་ད་ཀ་ཋཿ ཞེས་འཐུང་དུ་གཞུག །རྡོ་རྗེ་སློབ་མའི་མགོར་བཟུང་སྟེ། དེང་ནས་བརྩམས་ཏེ་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱི་ངས་འདི་
གྱིས་ཤིག་ཅེས་གང་བསྒོ་བ་དེ་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པར་ཡང་མི་བྱ་སྟེ་ཁྱོད་ཡ་ང་བ་མ་སྤངས་པར་ཤི་བའི་དུས་བྱས་ནས་དམྱལ་བར་ལྟུང་བར་འགྱུར་ཏ་རེ། ཞེས་བླ་མའི་བཀའ་ཉན་པའི་སྒོ་ནས་དམ་ལ་བཞག་གོ །སློབ་མ་རྣམས་ཀྱི། སྤྱི་བོར་ༀ་ལས་འཁོར་ལོ་དཀར་པོའི་ལྟེ་བར་ༀ་གྱིས་མཚན་པ། མགྲིན་པར་ཨཱཿ ལས་པདྨ་དམར་པོའི་ལྟེ་བར་ཨཱཿ ས་མཚན་པ། སྙིང་གར་ཧཱུཾ་ལས་རྡོ་རྗེ་སྔོན་པོའི་ལྟེ་བར་ཧཱུཾ་གིས་མཚན་པར་གྱུར་པར་བསམ། སྔར་གྱི་སྒོ་དབྱེ་བའི་ཕྱག་བརྒྱ་བྱས་ལ། ༀ་བཛྲོད་གྷ་ཊ་ཡ་ས་མ་ཡ་པྲ་བེ་ཤཱ་ཡ་ཧཱུཾ། ཞེས་རང་དང་སློབ་མ་གཉིས་ཀའི་སྙིང་ཁ་བྱེ་བར་བསམས་ལ། རང་གི་སྙིང་གར་གནས་པའི་རྡོ་རྗེ་ལས་ཨཱཿ བྱུང་སྟེ་སློབ་མའི་སྙིང་གར་གནས་པའི་རྡོ་རྗེའི་དབུས་སུ་གནས་པར་གྱུར་པར་བསམ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ཤིག །རྡོ་རྗེ་སེམས་དཔའ་བདག་ལ་འབབ་པར་མཛད་དུ་གསོལ། ཞེས་ལན་གསུམ་གསོལ་བ་འདེབས་སུ་གཞུག །སེམས་མ་རྡོ་རྗེ་མའི་ཕྱག་རྒྱ་སྙིང་གར་བཞག་སྟེ། འདིའི་རྗེས་ཟློས་བྱེད་དུ་གཞུག་གོ །འདི་ནི་རྡོ་རྗེའི་དམ་ཚིག་སྟེ། རྡོ་རྗེ་སེམས་དཔའ་ཡིན་པར་གྲགས། །ཡེ་ཤེས་རྡོ་རྗེ་བླ་མེད་འདི། །དེ་རིང་ཉིད་དུ་འབབ་པར་ཤོག །ༀ་བཛྲ་པྲ་བེ་ཤ་ཧཱུཾ། བཛྲ་ཨ་བ་ཤ་ཨཱཿ ཞེས་ལན་བཅུ་ནས་བརྒྱའི་བར་དུ་བརྗོད་ལ། སངས་རྒྱས་ཀྱི་གཉིས་སུ་མེད་པའི་ཡེ་ཤེས་ཧཱུཾ་ལ་སོགས་པའི་རྣམ་པར་སློབ་མའི་ལུས་ལ་ཐིམ་པར་བསམ། ༀ་བཛྲ་ས་མ་ཡ་ཧཱུཾ་ཕཊ། ཅེས་
བརྗོད་དུ་གཞུག་ལ་དམ་ཚིག་སྦྱིན། ༀ་བཛྲ་ས་མ་ཡ། ཧྲི་ད་ཡ་མེ། པྲ་བེ་ཤ་དྲྀ་ཌྷ་ཏིཥྛེ་ཧཱུྃ། ཞེས་སྔར་ཡེ་ཤེས་ཕབ་པ་བརྟན་པར་བསམ། སངས་རྒྱས་དངོས་གྲུབ་ཐོབ་བྱའི་ཕྱིར། །བདག་ལ་ཐུགས་བརྩེར་དགོངས་ནས་ནི། །འགྲོ་ལ་ཕན་པའི་གཙོ་ཆེན་གྱིས། །སྨན་པར་དགོངས་ནས་བཞེས་སུ་གསོལ། །ༀ་བཛྲ་པྲ་ཏི་གྲྀཧྞ་ཧཱུྃ། ཞེས་མེ་ཏོག་འདོར་དུ་བཅུག་ལ། གང་ལ་ཕོག་པ་དེ་རིགས་ཀྱི་ལྷ་ཡིན་པས་དེ་སྒྲུབས་ཤིག །ཅེས་བརྗོད། ༀ་བཛྲ་པྲ་ཏཱིཙྪ་ས་མ་ཡ་སྟྭཾ། ཞེས་ཕྲེང་བ་མགོ་ལ་བཅིངས་ལ། སློབ་མ་འདི་བྱང་ཆུབ་མ་ཐོབ་ཀྱི་བར་དུ་བཟུང་མཛོད་ཅིག །ཅེས་བརྗོད།དེ་ནས། རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །ཕྱེ་བས་ཐམས་ཅད་མཐོང་འགྱུར་བའི། །རྡོ་རྗེའི་མིག་ནི་བླ་ན་མེད། །ༀ་བཛྲ་ཧཱསྱ་ཨུད་གྷ་ཊ་ས་མ་ཡ་སྟཾ། ཞེས་པས་གདོང་གཡོགས་བསལ་ཤེས་བྱ་ཐམས་ཅད་ལ་ཐོགས་པ་མེད་པའི་མིག་ཕྱེ་བར་བསམ། ༀ་བཛྲ་པཱ་ཤྱ་ཧོ། ཀྱེ་རྡོ་རྗེ་ལྟོས། ཞེས་བརྗོད་ལ། ཤར་སྒོར་སྒོ་བ་རྡོ་རྗེ་ལྕགས་ཀྱུ། །ལྷོ་སྒོར་རྡོ་རྗེ་ཞགས་པ། ཞེས་པ་ནས། དབུས་སུ་བཅོམ་ལྡན་འདས་ཀུན་རིག་རྣམ་པར་སྣང་མཛད་ཀྱི་བར་རྣམས་ཀྱི་མཚན་བརྗོད་ལ། དེ་རྣམས་མངོན་སུམ་དུ་མཐོང་པའི་མོས་པ་མཛོད། ཅེས་བརྗོད་ལ། དེ་ནས་སྔར་ལྟར་དུང་ཆོས་ཀྱིས་ཆུ་བླུད་ལ།འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཅི་སྟེ་དམ་ཚིག་འདས་ན་ནི། །དེ་མ་ཐག་ཏུ་བཀས་ནས་གཤེགས། །རྡོ་རྗེ་འཛིན་
རྒྱལ་ཁྲོས་ནས་ནི། །བདུད་བརྒྱུད་རིགས་ནི་བརླག་པར་མཛད། །དེ་བས་རྟག་ཏུ་བུ་ཁྱོད་ཀྱིས། །རྒྱལ་བས་གསུངས་པའི་དམ་ཚིག་དང་། །སྡོམ་པ་དང་ནི་བླ་མའི་བཀའ། །ཤིན་ཏུ་མོས་པས་བསྲུང་བར་བྱ། །ཁྱོད་ཀྱིས་སྲོག་ཆགས་གསད་མི་བྱ། །མ་བྱིན་པར་ཡང་བླང་མི་བྱ། །བརྫུན་དང་འདོད་ལ་སྤྱོད་པ་རྣམས། །དངོས་གྲུབ་འདོད་པས་བྱ་བ་མིན། །ཆང་ནི་བཏུང་བར་མི་བྱ་ཞིང་། །ཤ་ལ་སོགས་པ་བཟའ་མི་བྱ། །སེམས་ཅན་གནོད་པའི་སྦྱོར་བ་ནི། །ནམ་ཡང་བྱ་བ་མ་ཡིན་ནོ། །དཀོན་མཆོག་གསུམ་ནི་ཡོང་མི་སྤང་། །དུས་ཀུན་ཏུ་ནི་བྱང་ཆུབ་སེམས། །སྙིང་པོ་སྔགས་དང་ཕྱག་རྒྱ་དང་། །ལྷ་དང་བླ་མ་དེ་བཞིན་ནོ། །སྡིག་པ་ལ་སོགས་གང་ཡིན་དང་། །བླ་མའི་བཀའ་ལས་འདའ་མི་བྱ། །ལྷ་ལ་ཕུལ་བའི་རྙིང་པ་དང་། །དེ་ཡི་གྲིབ་མའང་འགོམ་མི་བྱ། །ཕྱག་རྒྱའི་གཟུགས་ལའང་དེ་བཞིན་ནོ། །སྔགས་དང་ལྷ་ལ་སྨད་མི་བྱ། །གདོན་གྱི་ལས་སོགས་བྱ་བ་མིན། །མུ་སྟེགས་ཅན་ལ་སྨད་མི་བྱ། །མདོར་ན་ཡིད་གཉིས་སོམ་ཉི་ཐེ་ཚོམ་མི་བྱ་སྟེ། །བདག་གི་དེ་ཉིད་དང་ནི་སྔགས་སོགས་དེ་བཞིན་ནོ། །ཞེས་དམ་ཚིག་སྒྲག་གོ །དེ་རྣམས་ནི་དཀྱིལ་འཁོར་དུ་འཇུག་པའི་ཆོ་གའོ། །དེ་ནས་དབང་གི་དངོས་གཞི་ནི། དཀྱིལ་འཁོར་གྱི་ཤར་དུ་དབང་སྟེགས་པདྨ་དང་ཟླ་བའི་དཀྱིལ་འཁོར་ལ་སློབ་མ་རྣམས་གནས་པར་གྱུར་པར་བསམས་ལ། སློབ་མ་མེ་ཏོག་གང་ཕོག་གི་ལྷར་བསྐྱེད་ནས་སྔར་བཞིན་མཆོད་ཡོན་སྔོན་དུ་འགྲོ་བའི་ཉེར་སྤྱོད་ལྔ་དང་། གདུགས་དང་རྒྱལ་མཚན་དང་རོལ་མོ་ལ་སོགས་པས་མཆོད་ལ། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །
ཞེས་སོགས་ཤིས་བརྗོད་ལ། ལས་བུམ་མ་གཏོགས་པའི་བུམ་པ་དུ་མ་ཡོད་ན། བུམ་པ་ཐམས་ཅད་ཀྱི་ཆུ་དུང་ཆོས་ལ་སོགས་པར་བསྡུས་པའམ། མེད་ན་རྣམ་རྒྱལ་བུམ་པ་སྤྱི་བོར་བཟུང་ལ་ཚེ་འདས་ཀྱི་དོན་དུ་བྱེད་པའི་ཚེ་རྒྱས་པ་ལ་སྤྲོ་ན། རྡོ་རྗེ་སློབ་དཔོན་ངས་སློབ་མ་ཁྱོད་ལ་བུམ་པའི་དབང་བསྐུར་བས། ལས་དང་ཉོན་མོངས་པའི་སྒྲིབ་པ་དག་ནས་བྱང་ཆུབ་སེམས་ཀྱི་བྱིན་རླབས་དང་ལྡན་པར་གྱུར་ཅིག །རིན་ཆེན་མཛེས་པའི་བཀྲ་ཤིས་བུམ་པ་འདིས། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །ལས་དང་ཉོན་མོངས་སྒྲིབ་པ་དག་གྱུར་ཏེ། །བྱང་ཆུབ་སེམས་ཀྱི་རླན་གྱིས་བརླན་པར་ཤོག །ཅེས་པ་དང་། ༀ་བུདྡྷ་ཀ་ལ་ཤ་ཨ་བྷི་ཥིཉྩ་ༀ། ༀ་བཛྲ་ཀ་ལ་ཤ་ཨ་བྷི་ཥིཉྩ་ཧཱུཾ། ༀ་རཏྣ་ཀ་ལ་ཤ་ཨ་བྷི་ཥིཉྩ་ཏྲཱཾ། ༀ་པདྨ་ཀ་ལ་ཤ་ཨ་བྷི་ཥིཉྩ་ཧྲཱིཿ ༀ་ཀརྨ་ཀ་ལ་ཤ་ཨ་བྷིཥིཉྩ་ཨཱཿ ། ཞེས་བརྗོད་ཅིང་བུམ་ཆུ་གཏོར་ལ་འཐུང་དུ་ཡང་གཞུག་ཅིང་ཆུ་དབང་བསྐུར།ཆུ་དབང་རྒྱས་པ་བསྐུར་ཚུལ་ནི། རྩ་བའི་ལྷ་ཐམས་ཅད་ཀྱི་སྙིང་པོའི་གཤམ་དུ། ༀ་བཛྲ་ཨ་བྷི་ཥིཉྩ་ཧཱུཾ། ཞེས་པ་བཏགས་ལ། ཤར་དང་ཤར་ལྷོ་ནས་མས་རིམ་བཞིན་དབང་བསྐུར། དེའི་ཚུལ་ནི། བཛྲ་ཨཾ་ཀུ་ཤ་ༀ་བཛྲ་ཨ་བྷི་ཥིཉྩ་ཧཱུཾ། བཛྲ་དྷཱུ་པེ་ༀ་བཛྲ་ཨ་བྷི་ཥིཉྩ་ཧཱུཾ། ཞེས་པ་ནས། སརྦ་བིད་ༀ་བཛྲ་ཨ་བྷི་ཥིཉྩ་ཧཱུཾ། ཞེས་ཆུ་དབང་བསྐུར་རོ། །དེ་བཞིན་དུ་ལྷོ་དང་ལྷོ་ནུབ། ནུབ་དང་ནུབ་བྱང་། བྱང་དང་བྱང་ཤར་དང་དབུས་རྣམས་ལའང་རིམ་པ་བཞིན་དུ་སྦྱར་རོ། །རྡོ་རྗེ་སློབ་དཔོན་ངས་སློབ་མ་ཁྱོད་ལ་རིགས་ལྔའི་དབུ་རྒྱན་གྱི་དབང་བསྐུར་བས་རིགས་ལྔའི་སྐུ་གསུང་ཐུགས་ཀྱི་དངོས་གྲུབ་རྟོགས་ཤིང་ཐོབ་པའི་དབང་དམ་པ་དང་ལྡན་པར་གྱུར་
ཅིག །དེ་བཞིན་གཤེགས་པའི་དབུ་རྒྱན་ཅོད་པན་འདིས། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །སྐུ་གསུང་ཐུགས་ཀྱི་ཡོན་ཏན་རབ་རྫོགས་ཏེ། །རིགས་ལྔའི་སངས་རྒྱས་མྱུར་དུ་ཐོབ་པར་ཤོག །ཅེས་དང་སྔར་བཞིན་རིགས་ལྔའི་ཕྱག་རྒྱ་བཅིངས་ལ།ༀ་བཛྲ་ཨ་བྷི་ཥིཉྩ་ཧཱུཾ། ༀ་བུདྡྷ་ཨ་བྷི་ཥིཉྩ་ༀ། ༀ་རཏྣ་ཨ་བྷི་ཥིཉྩ་ཏྲཱཾ། ༀ་པདྨ་ཨ་བྷི་ཥིཉྩ་ཧྲཱིཿ ། ༀ་ཀརྨ་ཨ་བྷི་ཥིཉྩ་ཨཱཿ ཞེས་དབུ་རྒྱན་གྱི་དབང་བསྐུར། རྡོ་རྗེ་སློབ་དཔོན་ངས་སློབ་མ་ཁྱོད་ལ་རིན་པོ་ཆེའི་ཕྲེང་བའི་དབང་བསྐུར་བས། བསམ་པ་མྱ་ངན་ལས་འདས་ཀྱང་སྦྱོར་བ་ཁམས་གསུམ་ན་འགྲོ་བའི་དོན་བྱེད་པ་ལ་མཛེས་པའི་ཡོན་ཏན་ཕུན་སུམ་ཚོགས་པ་དང་ལྡན་པར་གྱུར་ཅིག །རིན་ཆེན་མཛེས་པའི་མེ་ཏོག་ཕྲེང་བ་འདིས། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །བསམ་པ་མྱང་འདས་སྦྱོར་བ་ཁམས་གསུམ་གནས། །མཛེས་པའི་ཡོན་ཏན་ཕུན་སུམ་ཚོགས་པར་ཤོག །ཅེས་དང་། སྔར་གྱི་རྡོ་རྗེ་རིན་ཆེན་གྱི་དམ་རྒྱས་ཕྲེང་བ་འཆིང་བའི་ཚུལ་དུ་བྱ་ཞིང་། ༀ་རཏྣ་མཱ་ལ་ཨ་བྷི་ཥིཉྩ་ཏྲཱཾ། ཏྲཱཾ་ཏྲཱཾ་ཏྲཱཾ་ཏྲཱཾ། ཞེས་རིན་པོ་ཆེའི་ཕྲེང་བའི་དབང་བསྐུར། རྡོ་རྗེ་སློབ་དཔོན་ངས་སློབ་མ་ཁྱོད་ལ་དར་གྱི་ཅོད་པན་གྱི་དབང་བསྐུར་བས། ཤེས་བྱ་ཐམས་ཅད་ལ་ཐོགས་པ་མེད་པ་དང་། སེམས་ཅན་གྱི་དོན་བྱེད་པ་ལ་མཐུ་ཐོགས་པ་མེད་པའི་དབང་དང་ལྡན་པར་གྱུར་ཅིག །མཛེས་ཤིང་ཡིད་འོང་དར་གྱི་ཅོད་པན་གྱིས། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །ཤེས་བྱ་ཀུན་ལ་ཐོགས་པ་མེད་པ་དང་། །འགྲོ་བའི་དོན་ལ་མཐུ་དང་དབང་ཐོབ་ཤོག །ཅེས་དང་སྔར་
བཞིན་ༀ་ཊུཾ་གིས་གོ་བགོས་ལ། ༀ་བཛྲ་པ་ཊ་ཨ་ཝ་ལཾ་པ་ན་ཨ་བྷི་ཥིཉྩ་ཏྲཱཾ། ཞེས་དར་དཔྱངས་ཀྱི་དབང་བསྐུར། རྡོ་རྗེ་སློབ་དཔོན་ངས་སློབ་མ་ཁྱོད་ལ་རིགས་ལྔའི་ཕྱག་རྒྱས་དབང་བསྐུར་བས། རིགས་ལྔའི་ཡེ་ཤེས་ལྔའི་དབང་ཐོབ་པར་གྱུར་ཅིག །རིགས་ལྔའི་ཕྱག་རྒྱ་ལག་ཏུ་གཏད་ནས་ནི། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །སྐུ་གསུང་ཐུགས་ཀྱི་ཡོན་ཏན་རབ་རྫོགས་ཏེ། །ཡེ་ཤེས་ལྔ་ནི་མྱུར་དུ་རྟོགས་པར་ཤོག །ཅེས་དང་། ༀ་བཛྲ་མུ་དྲ་ཨ་བྷི་ཥིཉྩ་ཧཱུཾ། ༀ་བུདྡྷ་མུ་དྲ་ཨ་བྷི་ཥིཉྩ་ༀ། ༀ་རཏྣ་མུ་དྲ་ཨ་བྷི་ཥིཉྩ་ཏྲཱཾ། ༀ་པདྨ་མུ་དྲ་ཨ་བྷི་ཥིཉྩ་ཧྲཱིཿ ༀ་ཀརྨ་མུ་དྲ་ཨ་བྷི་ཥིཉྩ་ཨཱཿ ཞེས་དང་།རྡོ་རྗེ་སློབ་དཔོན་ངས་སློབ་མ་ཁྱོད་ལ་ཡུམ་ལྔའི་ཕྱག་རྒྱས་དབང་བསྐུར་བས། གསང་རྒྱུད་མཐའ་དག་རྟོགས་ཤིང་ཤེས་པ་དང་། གཞན་ལ་འཆད་ཅིང་སྟོན་པའི་དབང་དང་ལྡན་པར་གྱུར་ཅིག །ཡུམ་ལྔའི་ཕྱག་རྒྱ་སྤྱི་བོར་བཞག་ནས་ནི། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །གསང་རྒྱུད་མཐའ་དག་ཤེས་ཤིང་རྟོགས་ནས་སུ། །འཆད་ཅིང་སྟོན་པའི་དབང་དང་ལྡན་པར་ཤོག །ཅེས་དང་། རྡོ་རྗེ་དབྱིངས་ཀྱི་དབང་མོའི་ཕྱག་རྒྱ་ལས་གུང་མོ་གཉིས་མཉམ་པོར་གཤིབས་པ་སྤྱི་གཙུག་ཏུ་བཞག་ལ། ༀ་བཛྲ་དྷཱ་ར་ཎ་ཨ་བྷི་ཥིཉྩ་ཧཱུཾ། རྡོ་རྗེ་ཐལ་མོ་ལས་མཐེ་བོང་གཉིས་སྐྱིལ་ཀྲུང་དུ་བསྣོལ་ཏེ་མཐེ་བོང་གཡོན་པས་གཡས་པ་མནན་ནས། མཛུབ་མོ་གཡོན་པའི་རྩ་བ་གཡས་པས་མནན་ལ་མཛུབ་མོ་གཉིས་ཀྱི་རྩེ་མོ་ལྕགས་ཀྱུ་ལྟར་བཀུག་པ་གུང་མོ་གཉིས་མཉམ་པའི་ཚིགས་བར་མར་
སྦྱར་ལ་གུང་མོ་ནི་རལ་གྲི་ལྟ་བུར་ཚིགས་གསུམ་པ་དགུག་པར་བྱས་པ་རྡོ་རྗེ་དབྱིངས་ཀྱི་དབང་མོའི་ཕྱག་རྒྱ་དཔྲལ་བར་བཞག་ལ། ༀ་བུདྡྷ་དྷཱ་ར་ཎ་ཨ་བྷི་ཥིཉྩ་ༀ། སྔ་མ་ལས་གུང་མོ་གཉིས་ཀྱི་རྒྱབ་བཀུག་སྟེ་རིན་པོ་ཆེ་འདྲ་བར་བྱས་པ་རྣ་ལྟག་གཡས་སུ་བཞག་ལ། ༀ་རཏྣ་དྷཱ་ར་ཎ་ཨ་བྷི་ཥིཉྩ་ཏྲཱཾ། སྔ་མ་ལས་གུང་མོ་དང་སྲིན་ལག་དང་མཐེའུ་ཆུང་པདྨའི་འདབ་མ་འདྲ་བར་བྱས་པ་ལྟག་པར་བཞག་ལ། ༀ་པདྨ་དྷཱ་ར་ཎ་ཨ་བྷི་ཥིཉྩ་ཧྲཱིཿ ལག་མཐིལ་གཉིས་ཕན་ཚུན་སྤྲད་ལ་སོར་མོ་ཐམས་ཅད་བརྐྱང་བ་རྣ་ལྟག་གཡོན་པར་བཞག་ལ། ༀ་ཀརྨ་དྷཱ་ར་ཎ་ཨ་བྷི་ཥིཉྩ་ཨཱཿ ཞེས་རིགས་ལྔ་དང་ཡུམ་ལྔའི་ཕྱག་མཚན་གཉིས་ཀྱིས་ཕྱག་མཚན་གྱི་དབང་བསྐུར། རྡོ་རྗེ་སློབ་དཔོན་ངས་སློབ་མ་ཁྱོད་ལ་མིང་གི་དབང་བསྐུར་བས། མ་འོངས་པའི་དུས་ན་སངས་རྒྱས་ཀྱི་མཚན་ངེས་པ་ཅན་རྟོགས་ཤིང་ཐོབ་པའི་དབང་དམ་པ་དང་ལྡན་པར་གྱུར་ཅིག །ཀུན་རྫོབ་མཚན་ཉིད་མཚན་མ་མིང་གི་དབང་། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །མ་འོངས་སངས་རྒྱས་འཇིག་རྟེན་ཞིང་ཁམས་སུ། །དེ་བཞིན་གཤེགས་པའི་མཚན་གྱི་མིང་ཐོབ་ཤོག །ཅེས་དང་།རྡོ་རྗེ་དྲིལ་བུ་སྤྱི་བོར་བཞག་སྟེ། ༀ་བཛྲ་ནཱ་མ་ཨ་བྷི་ཥིཉྩ་ཧཱུཾ། ༀ་བུདྡྷ་ནཱ་མ་ཨ་བྷི་ཥིཉྩ་ༀ། ༀ་རཏྣ་ནཱ་མ་ཨ་བྷི་ཥིཉྩ་ཏྲཱཾ། ༀ་པདྨ་ནཱ་མ་ཨ་བྷི་ཥིཉྩ་ཧྲཱིཿ །ༀ་ཀརྨ་ནཱ་མ་ཨ་བྷི་ཥིཉྩ་ཨཱཿ ཀྱེ་དཔལ་ཆེ་གེ་མོ་རྡོ་རྗེ། ཞེས་མིང་གི་དབང་བསྐུར་ནས། སྔར་བཞིན་སྒེག་སོགས་བརྒྱད་ཀྱིས་མཆོད། དེ་རྣམས་ནི་སློབ་མའི་དབང་ངོ་། །སློབ་དཔོན་གྱི་དབང་ནི་དཀྱིལ་
འཁོར་གྱི་ཤར་དུ་ཁྲུས་དཀྱིལ་གྲུ་བཞི་པ་སོགས་མཚན་ཉིད་ཐམས་ཅད་དང་ལྡན་པ་ལ་གནས་པའི་སེང་གེའི་ཁྲིའི་སྟེང་དུ། པདྨ་དང་ཟླ་བའི་དཀྱིལ་འཁོར་ལ་སློབ་མ་རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་པར་གྱུར་པར་བསམས་ལ་ཉེར་སྤྱོད་ལ་སོགས་པས་མཆོད། ཤིས་པ་བརྗོད་ལ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་མའི་བདག་པོའི་བདག །བཅོམ་ལྡན་འདས་མཆོག་གི་དང་པོའི་སྐྱེས་བུའོ། །ཞེས་རྡོ་རྗེ་བྱིན། འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་གཟུང་། །བྱང་ཆུབ་མཆོག་ཏུ་རྒྱལ་བ་བཞེད། །ཅེས་དྲིལ་བུ་གཏད་ལ། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་ལྡན་པའི། །སྲིད་པ་དམ་པ་བྱེད་པར་འགྱུར། །ཞེས་དྲིལ་བུ་དཀྲོལ་དུ་གཞུག །སྟོང་པ་ཉིད་དང་དབྱེར་མེད་པའི་རྒྱལ་བའི་གཉིས་སུ་མེད་པའི་ཡེ་ཤེས་ནི་གསང་བའི་རྡོ་རྗེ་ཡིན་ལ། དེ་དྲན་པའི་དོན་དུ་རྡོ་རྗེ་གཟུང་སྙམ་པ་དང་། ཆོས་ཐམས་ཅད་རང་བཞིན་མེད་པའི་སྒྲ་དྲིལ་བུས་སྒྲོག་པར་སེམས་པའི་རྡོར་དྲིལ་གྱི་དེ་ཁོ་ན་ཉིད་དྲན་པའི་སྒོ་ནས་བཟུང་ཞིང་། རྡོར་སེམས་ཀྱི་ཕྱག་ཆེན་འཆིང་དུ་བཅུག་ལ་རང་རྡོ་རྗེ་སེམས་དཔའ་དཀར་པོ་ཞལ་གཅིག་ཕྱག་གཉིས་པར་གསལ་བར་དམིགས་པ་ལ་བརྟེན་ནས་པྲཛྙཱ་ཨུ་པ་སོགས་ཀྱི་དོན་ཐབས་ཤེས་རབ་དབྱེར་མེད་ཀྱི་ཟབ་གསལ་གཉིས་སུ་མེད་པའི་རྡོ་རྗེ་སློབ་དཔོན་གྱི་དབང་
གི་ངོ་བོར་གྱུར་པ་རྒྱུད་ལ་སྐྱེས་པའི་མོས་པ་མཛོད། །ཅེས་བརྡ་སྤྲད་ལ། ༀ་པྲཛྙཱ་ཨུ་པ་ས་མ་ཡོ་ག་ཨ་བྷི་ཥིཉྩ་ཧཱུཾ་ཨཿ ཞེས་རྡོ་རྗེ་སློབ་དཔོན་གྱི་དབང་བསྐུར། དེ་ལྟར་དམ་ཚིག་གསུམ་སྦྱིན་པ་དང་། ཐབས་ཤེས་རབ་དབྱེར་མེད་ཀྱི་དོན་བཤད་པ་དང་བཅས་པས་རྡོ་རྗེ་སློབ་དཔོན་གྱི་དབང་དངོས་གཞི་བསྐུར་ནས། སེམས་ཅན་གྱི་དོན་བྱ་བའི་ཆེད་དུ་ཆོས་བཤད་པ་སྤྱིའི་རྗེས་སུ་གནང་བ་ནི། རྡོ་རྗེ་སློབ་དཔོན་ངས་སློབ་མ་ཁྱོད་ལ་འཕྲིན་ལས་རྣམ་པ་བཞིའི་དབང་བསྐུར་བས། འཕྲིན་ལས་བཞིས་བདག་དང་གཞན་གྱི་དོན་བྱེད་པ་ལ་མཐུ་ཐོགས་པ་མེད་པའི་དབང་ཐོབ་པར་གྱུར་ཅིག །རྡོ་རྗེ་རྒྱ་གྲམ་ལག་ཏུ་བྱིན་ནས་ནི། །སྐལ་ལྡན་སྐྱེས་བུ་ཁྱོད་ལ་དབར་བསྐུར་བས། །འཕྲིན་ལས་རྣམ་བཞིའི་འགྲོ་དོན་མཐར་ཕྱིན་ཏེ། །ལས་ཀྱི་རིགས་ཀྱི་དངོས་གྲུབ་ཐོབ་པར་ཤོག །ༀ་བཛྲ་ཀརྨ་ཨ་བྷི་ཥིཉྩ་ཨཱཿ ཞེས་སྣ་ཚོགས་རྡོ་རྗེ་གཏད་ལ་འཕྲིན་ལས་ཀྱི་དབང་བསྐུར། རྡོ་རྗེ་སློབ་དཔོན་ངས་སློབ་མ་ཁྱོད་ལ་འཁོར་ལོ་ལག་ཏུ་བྱིན་ནས་སློབ་དཔོན་དུ་དབང་བསྐུར་བས་རྣམ་པར་སྣང་མཛད་ཀྱི་སྐུ་ཐོབ་སྟེ་ཆོས་ཀྱི་འཁོར་ལོ་བསྐོར་བའི་དཔལ་དང་ལྡན་པར་གྱུར་ཅིག །ཡོན་ཏན་རབ་རྫོགས་གསེར་གྱི་འཁོར་ལོ་འདིས། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །རྣམ་པར་སྣང་མཛད་སྐུ་མཆོག་རབ་ཐོབ་སྟེ། །ཆོས་ཀྱི་འཁོར་ལོ་མྱུར་དུ་བསྐོར་བར་ཤོག །ཅེས་དང་། བྷྲཱུཾ་ལས་བྱུང་བའི་འཁོར་ལོ། ༀ་བཛྲ་ཙཀྲ་ཨ་བྷི་ཥིཉྩ་ཧཱུཾ་བྷྲཱུཾ། ཞེས་རྐང་པ་གཉིས་ཀྱི་བར་རམ་མདུན་དུ་སྦྱིན།དབྱངས་ཡིག་ཐ་མ་ཨཿ ལས་བྱུང་
བའི་དུང་། ༀ་བཛྲ་བྷ་ཥ་རཾ། ཞེས་གཡས་སུ་དུང་བྱིན་ལ་འབུད་དུ་གཞུག །དབྱངས་ཡིག་དང་པོ་ཨ་ལས་བྱུང་བའི་སྦྱོང་རྒྱུད་ཀྱི་པོ་ཏི། ལག་པ་གཡོན་དུ་གཏད་ལ། དེང་ནས་བརྩམས་ཏེ་སེམས་བསྐྱེད་པ། །ཙམ་གྱིས་ཆོས་དུང་བླ་མེད་པ། །ཀུན་ནས་ཡོངས་སུ་བཀང་ནས་ནི། །ཆོས་ཀྱི་འཁོར་ལོ་བསྐོར་བར་གྱིས་ཞེས་བརྗོད། དབྱངས་ཐ་མ་ཨཿ ལས་བྱུང་བའི་དྲིལ་བུ། ལག་པ་གཡོན་དུ་གཏད་དེ་དཀྲོལ་དུ་བཅུག་ལ། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་མཉམ་པ་ཉིད་སྦྱོར་བས། །ཐམས་ཅད་མཆོག་ནི་མཉམ་ཉིད་གསལ། །ཞེས་བརྗོད།ཆོས་བཤད་པ་སོ་སོའི་རྗེས་གནང་ནི། རིགས་སོ་སོའི་ཆོས་ཀྱི་འཁོར་ལོ་བསྐོར་བའི་བདག་པོར་བྱ་བའི་ཕྱིར། རྡོ་རྗེ་སློབ་དཔོན་ངས་སློབ་མ་ཁྱོད་ལ་བདག་པོའི་དབང་བསྐུར་བས། རིགས་ཐམས་ཅད་དང་དཀྱིལ་འཁོར་ཐམས་ཅད་ཀྱི་བདག་པོའི་དབང་དང་ལྡན་པར་གྱུར་ཅིག །རིགས་ལྔའི་བདག་པོ་ཡི་ནི་རང་བཞིན་གྱིས། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །རྡོ་རྗེ་སེམས་དཔའ་རིགས་རྣམས་ཀུན་གྱི་བདག །རིགས་དང་དཀྱིལ་འཁོར་ཀུན་གྱི་བདག་པོར་ཤོག །ཅེས་དང་། ༀ་བཛྲ་ཙཀྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཧཱུཾ་ཧཱུཾ་ཧཱུཾ། ༀ་བུདྡྷ་ཙཀྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ༀ་ༀ་ༀ། ༀ་རཏྣ་ཙཀྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཏྲཱཾ་ཏྲཱཾ་ཏྲཱཾ། ༀ་པདྨ་ཙཀྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཧྲཱིཿ ཧྲཱིཿ ཧཱིཿ ༀ་ཀརྨཱ་ཙཀྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་ཨཿ ཨཿ ཨཿ ཞེས་བརྗོད་ལ། འཇིག་རྟེན་ཀུན་ལ་ཐམས་ཅད་དུ། སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་
ཚོགས་འདུལ་གྱུར་བའི། །རྡོ་རྗེའི་འཁོར་ལོ་རབ་ཏུ་བསྐོར། །ཞེས་རྡོ་རྗེ་གཏད། དེ་བཞིན་དུ་ཚིག་རྐང་སྔ་མ་གསུམ་གོང་བཞིན་དུ་བརྗོད་ལ་ཆོས་ཀྱི་འཁོར་ལོ་རབ་ཏུ་སྐོར། །ཞེས་འཁོར་ལོ་དང་། རིན་ཆེན་འཁོར་ལོ་རབ་ཏུ་སྐོར། །ཞེས་རིན་པོ་ཆེ་དང་། པདྨའི་འཁོར་ལོ་རབ་ཏུ་བསྐོར། །ཞེས་པདྨ་དང་། ལས་ཀྱི་འཁོར་ལོ་རབ་ཏུ་བསྐོར། །ཞེས་སྣ་ཚོགས་རྡོ་རྗེ་གཏད་དོ། །དེ་ཡང་ཚིགས་བཅད་རེ་དང་སྔགས་རེ་སྤེལ་ཞིང་དབང་བསྐུར་རོ། །རྡོ་རྗེ་སློབ་དཔོན་ངས་སློབ་མ་ཁྱོད་ལ་རིགས་ལྔའི་ཕྱག་རྒྱས་སྤྱི་བོ་ལ་སོགས་པའི་གནས་ལྔར་གཏུགས་ཏེ། ཐུགས་གསང་བའི་དབང་བསྐུར་བས། སངས་རྒྱས་ལྔའི་ཐུགས་གསང་བ་བྱང་ཆུབ་ཀྱི་སེམས་རྟོགས་པའི་དབང་དང་ལྡན་པར་གྱུར་ཅིག །རིགས་ལྔའི་ཕྱག་རྒྱ་གནས་ལྔར་བཅིངས་ནས་ནི། །སྐལ་ལྡན་སྐྱེས་བུ་ཁྱོད་ལ་དབང་བསྐུར་བས། །ཡེ་ཤེས་ལྔ་ཡི་ཡོན་ཏན་རབ་རྫོགས་ཏེ། །བྱང་སེམས་གསང་བའི་དབང་དང་ལྡན་པར་ཤོག །ༀ་སརྦ་ཏ་ཐཱ་ག་ཏ་གུ་ཧྱ་ཨ་བྷི་ཥིཉྩ་ༀ། ༀ་བཛྲ་གུ་ཧྱ་ཨ་བྷི་ཥིཉྩ་ཧཱུཾ། ༀ་རཏྣ་གུ་ཧྱ་ཨ་བྷི་ཥིཉྩ་ཏྲཱཾ། ༀ་པདྨ་གུ་ཧྱ་ཨ་བྷི་ཥིཉྩ་ཧྲཱིཿ ༀ་ཀརྨཱ་གུ་ཧྱ་ཨ་བྷི་ཥིཉྩ་ཨཱཿ ཞེས་རིགས་ལྔའི་ཕྱག་རྒྱ་སྤྱི་བོ་ལ་སོགས་པའི་གནས་ལྔར་བཞག །གུ་ཧྱ་ཞེས་པ་གསང་བའི་དོན་ནི་དཀྱིལ་འཁོར་དང་ལྷའི་དེ་ཁོ་ན་ཉིད་དང་སློབ་དཔོན་གྱི་ལས་རྣམས་ཡིན་པས། དཀྱིལ་འཁོར་གྱི་དེ་ཉིད་ནི། ཚད་མེད་བཞིའི་ཚུལ་གནོད་སེམས་ལ་སོགས་པའི་མི་མཉམ་པ་མེད་པས་གྲུ་བཞི། དྲན་པ་ལ་སོགས་པའི་
དབང་པོ་ལྔས་ཐར་པའི་གྲོང་ཁྱེར་དུ་འཇུག་པའི་སྒོ་བཞི། བསམ་གཏན་བཞིས་རྟ་བབས་བཞི། སེམས་ཅན་གྱི་བསམ་པ་ཡོངས་སུ་རྫོགས་པར་བྱེད་པས་གོས་དང་གདུགས་ལ་སོགས་པ་སྣ་ཚོགས་པའི་རྒྱན། ནང་གི་ལིང་ཚེ་བརྒྱད་ནི་རྣམ་ཐར་བརྒྱད། ལམ་འབྲས་བུ་དང་བཅས་པའི་མདོ་སྡེའི་ཆོས་འཁོར་གདུལ་བྱའི་རྒྱུད་ལ་བསྐྱེད་པར་མཛད་པ་ནི་རྡོ་རྗེ་ཕྲེང་བས་ཡོངས་སུ་བསྐོར་བ་ལ་སོགས་པ་ཡིན་ལ། ལྷའི་དེ་ཉིད་ནི། ཆོས་དབྱིངས་ཡེ་ཤེས་དང་། མེ་ལོང་ལྟ་བུ་དང་། མཉམ་ཉིད་དང་། སོ་སོར་རྟོག་པ་དང་། བྱ་བ་སྒྲུབ་པའི་ཡེ་ཤེས་ལྔ་ནི་རིམ་པ་བཞིན་རྣམ་སྣང་ལ་སོགས་པའི་དེ་བཞིན་གཤེགས་པ་ལྔ། རྣམ་པར་ཐར་པའི་སྒོ་སྟོང་པ་ཉིད། མཚན་མེད། སྨོན་མེད། མངོན་པར་འདུ་བྱ་བ་མེད་པ་ལ་དམིགས་པའི་ཏིང་ངེ་འཛིན་བཞི་ནི་སྤྱན་མ་ལ་སོགས་པའི་ཡུམ་བཞི། ནང་དང་ཕྱི་དང་གཉིས་ཀ་དང་། ཆེན་པོ་སྟོང་པ་ཉིད་ལ་དམིགས་པའི་ཏིང་ངེ་འཛིན་རང་གི་མིག་སོགས་བཞི་ལ་མངོན་ཞེན་སྤངས་པའི་ཆ་བཞི། རྡོ་རྗེ་སེམས་དཔའ་ལ་སོགས་པ་ཤར་གྱི་སེམས་དཔའ་བཞི། སྟོང་པ་ཉིད་སྟོང་པ་ཉིད་དང་། དོན་དམ་པ་སྟོང་པ་ཉིད་དང་། འདུས་བྱས་སྟོང་པ་ཉིད་དང་། འདུས་མ་བྱས་སྟོང་པ་ཉིད་ལ་དམིགས་པའི་ཏིང་ངེ་འཛིན་སྟོང་ཉིད་རྟོགས་པའི་ཡེ་ཤེས་སོགས་བཞི་ལ་མངོན་ཞེན་སྤངས་པའི་ཆ་བཞི། རྡོ་རྗེ་རིན་ཆེན་ལ་སོགས་པ་ལྷོ་ཕྱོགས་ཀྱི་སེམས་དཔའ་བཞི། མཐའ་ལས་འདས་པ་སྟོང་པ་ཉིད་དང་། ཐོག་མ་དང་ཐ་མ་མེད་པ་སྟོང་
པ་ཉིད་དང་། དོར་པ་མེད་པ་སྟོང་པ་ཉིད་དང་། རང་བཞིན་སྟོང་པ་ཉིད་ལ་དམིགས་པའི་ཏིང་ངེ་འཛིན་སེམས་ཅན་མཐའ་ཡས་པའི་དོན་བྱེད་པ་སོགས་བཞི་ལ་བདེན་ཞེན་སྤངས་པའི་ཆ་བཞི། རྡོ་རྗེ་ཆོས་ལ་སོགས་པ་ནུབ་ཕྱོགས་ཀྱི་སེམས་དཔའ་བཞི།རང་གི་མཚན་ཉིད་སྟོང་པ་ཉིད་དང་། དངོས་པོ་སྟོང་པ་ཉིད་དང་། དངོས་པོ་མེད་པ་སྟོང་པ་ཉིད་དང་། དངོས་པོ་མེད་པའི་ངོ་བོ་ཉིད་སྟོང་པ་ཉིད་ལ་དམིགས་པའི་ཏིང་ངེ་འཛིན། གཟུགས་སྐུའི་མཚན་དཔེ་སོགས་བཞི་ལ་མངོན་ཞེས་སྤངས་པའི་ཆ་བཞི། རྡོ་རྗེ་ལས་ལ་སོགས་པ་བྱང་ཕྱོགས་ཀྱི་སེམས་དཔའ་བཞི། སྦྱིན་པ་ནས་ཤེར་ཕྱིན་གྱི་བར་དྲུག་དང་། སྨོན་ལམ་དང་། ཐབས་ཀྱི་ཕར་ཕྱིན་རྣམས་ཀྱི་མི་མཐུན་ཕྱོགས་སེར་སྣ་ནས་ཐབས་མི་མཁས་པའི་བར་སྤངས་པའི་ཆ་བརྒྱད་ནི། སྒེག་མོ་ནས་དྲི་ཆབ་མའི་བར་བརྒྱད། དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་གྱི་མི་མཐུན་ཕྱོགས་མ་དད་པ་ལ་སོགས་པ་སྤངས་པའི་ཆ་བཞི་ནི་རིམ་པ་བཞིན་རྡོ་རྗེ་ལྕགས་ཀྱུ་ལ་སོགས་པ་སྒོ་བ་བཞི། ནང་སྟོང་པ་ཉིད་ལ་སོགས་པ་སྟོང་ཉིད་བཅུ་དྲུག་རྟོགས་པའི་ཆ་བཅུ་དྲུག་ནི། བྱམས་པ་ལ་སོགས་པ་བསྐལ་བཟང་གི་སེམས་དཔའ་བཅུ་དྲུག་སྟེ། མདོར་ན་སངས་རྒྱས་ཀྱི་གཉིས་སུ་མེད་པའི་ཡེ་ཤེས་དེ་ཉིད་རྟེན་དང་བརྟེན་པའི་དཀྱིལ་འཁོར་སྣ་ཚོགས་པར་ཤར་བ་ཡིན། ཞེས་བརྗོད། སློབ་དཔོན་གྱི་ལས་ཀྱི་རིམ་པ་ནི། འཁོར་དང་བཅས་པའི་དཀྱིལ་འཁོར་བྲི་བ་དང་བསྒྲུབ་པ་དང་། བདག་ཉིད་འཇུག་ཅིང་དབང་
བླང་བ་ལ་སོགས་པ་རྣམས་ཡིན་ནོ། །དེ་ནས། ལྷ་རྫས་ལས་བྱས་ལྟེ་བ་ཤིན་ཏུ་ཟླུམ། རྩིབས་སྟོང་ལྡན་ཞིང་མུ་ཁྱུད་རབ་མཉམ་བཟང་། །སྡང་བའི་དགྲ་ལས་རྣམ་པར་རྒྱལ་གྱུར་པའི། །འཁོར་ལོ་རིན་ཆེན་དམ་པས་དབང་བསྐུར་རོ། །ༀ་ཙཀྲ་རཏྣ་ཨ་བྷི་ཥིཉྩ་མཱཾ་ཞེས། འཁོར་ལོའི་དབང་དང་། དུས་གསུམ་རྒྱལ་བས་བསྐོར་བའི་འཁོར་ལོ་འདི། །མི་ཁོམ་རྒྱུན་གཅོད་རྒྱུ་དང་འབྲས་བུ་སྟོན། །འཁོར་ལོས་སྒྱུར་བའི་དབང་ཕྱུག་རིན་པོ་ཆེ། །བླ་མེད་འཁོར་ལོ་དམ་པ་བསྐོར་གྱུར་ཅིག །ཅེས་བརྗོད། རིན་ཆེན་ངོ་བོ་ལྷ་རྫས་བཻཌཱུརྱ། །ཀུན་ཏུ་དཔག་ཚད་ཙམ་དུ་སྣང་བྱེད་ཅིང་། །དྲི་མེད་ཉིན་མོ་ཇི་བཞིན་མཚན་དེ་བཞིན། །ནོར་བུ་རིན་ཆེན་དམ་པས་དབང་བསྐུར་རོ། །ༀ་མ་ཎི་རཏྣ་ཨ་བྷི་ཥིཉྩ་མཱཾ། དཀོན་མཆོག་གསུམ་གྱི་ཡོན་ཏན་རིན་པོ་ཆེ། །འཁོར་བའི་མུན་སེལ་བདེ་བའི་སྙིང་པོ་འབྱུང་། །དགོས་པ་མཆོག་སྦྱིན་ནོར་བདུན་ཕུན་སུམ་ཚོགས། །ཡིད་བཞིན་ནོར་བུ་རིན་ཆེན་སྤྱོད་པར་ཤོག །ཅེས་ནོར་བུའི་དབང་དང་། གཟུགས་མཛེས་བལྟ་ན་སྡུག་ཅིང་ཚུལ་བཟང་ལ། །པགས་པའི་མདོག་ལེགས་འཇམ་ཞིང་དྲི་མཆོག་ལྡན། །ཡིད་འོང་འདོད་དགུའི་རེག་བྱ་དང་ལྡན་པའི། །བཙུན་མོ་རིན་ཆེན་དམ་པས་དབང་བསྐུར་རོ། །ༀ་སྟྲི་རཏྣ་ཨ་བྷི་ཥིཉྩ་མཱཾ། ཕ་རོལ་ཕྱིན་བཅུས་སེམས་ཅན་སྐྱོབ་པའི་ཕྱིར། །ཤེས་རབ་གཟུགས་མཛེས་བཙུན་མོ་རིན་པོ་ཆེ། །བསྡུ་བ་རྣམ་བཞི་ཚད་མེད་བཞི་པོ་ཡི། །ཚེ་དང་ལོངས་སྤྱོད་གཏེར་ལ་སྤྱོད་པར་ཤོག །ཅེས་བཙུན་མོའི་དབང་དང་། གང་ཡང་རྒྱལ་བ་མུ་ཏིག་མདངས་
ལྡན་པས། །གསེར་སོགས་མང་པོ་ཐུབ་ལ་ཕུལ་བ་ལྟར། །བཟོད་ལྡན་མཚུངས་པའི་ཁྱིམ་བདག་ནོར་ལྡན་ཏེ། །བློན་པོ་རིན་ཆེན་དམ་པས་དབང་བསྐུར་རོ། །ༀ་པུ་རུ་ཥ་རཏྣ་ཨ་བྷི་ཥིཉྩ་མཱཾ། གང་ལ་ཅི་དགོས་དཔག་བསམ་ཤིང་ལྟ་བུར། །འགྲོ་ལ་སྙིང་བརྩེས་ཚོགས་གཉིས་རྫོགས་པ་དང་། །དབང་ཕྱུག་བཙུན་པ་བློན་པོ་རིན་པོ་ཆེ། །འཁོར་ལོས་སྒྱུར་བའི་རྒྱལ་ཚབ་ཐོབ་པར་ཤོག །ཅེས་བློན་པོའི་དབང་དང་། ཡན་ལག་ཐམས་ཅད་ལེགས་སྐྱེས་ས་ལ་ནི། །རབ་གནས་གངས་ཆེན་རི་འདྲ་གླང་པོ་ཆེ། །རྒྱལ་པོ་ལ་འོས་མཁའ་ལ་རབ་འགྲོ་བའི། །གླང་པོ་རིན་ཆེན་དམ་པས་དབང་བསྐུར་རོ། །ༀ་ཧསྟི་རཏྣ་ཨ་བྷི་ཥིཉྩ་མཱཾ། ཐེག་པ་དོན་དམ་བླ་ན་མེད་པའི་མཆོག །ཡན་ལག་བདུན་མཛེས་ཀུ་མུ་ཏ་ཡི་མདོག །གདུལ་དཀའ་སྟོབས་ཆེན་གླང་པོ་རིན་པོ་ཆེ། །ཁྱུ་མཆོག་རླབས་ཆེན་སྟོབས་ལྔ་རྫོགས་པར་ཤོག །ཅེས་གླང་པོ་རིན་ཆེན་གྱི་དབང་དང་། ཐོ་རངས་དུས་སུ་ཕྱོགས་རྣམས་མ་ལུས་པའི། །ས་རྣམས་བགྲོད་དེ་སླར་ཡང་ལྡོག་འགྱུར་བ། །རྨ་བྱའི་མགྲིན་པའི་སྤུ་ལྟར་ཡིད་འོང་བའི། །རྟ་མཆོག་རིན་ཆེན་དམ་པས་དབང་བསྐུར་རོ། །ༀ་ཏུ་རཾ་ག་ཨ་ཤྭ་རཏྣ་ཨ་བྷི་ཥིཉྩ་མཱཾ། འཁོར་བའི་ཆུ་བོ་འཇིགས་པ་བཞི་ལས་སྒྲོལ། །བརྩོན་འགྲུས་མྱུར་བའི་རྫུ་འཕྲུལ་ཤུགས་ཀྱིས་བསྐྱོད། །ཅང་ཤེས་སྤྲིན་གྱི་ཤུགས་འཆང་རིན་པོ་ཆེ། །མི་གནས་ཡེ་ཤེས་ཡིད་བཞིན་སྤྱོད་པར་ཤོག །ཅེས་རྟ་མཆོག་གི་དབང་དང་། འགྲོ་དང་ལྡོག་དང་ཀུན་ནས་འོང་འགྱུར་བའི། །
བདུད་དཔུང་མ་ལུས་འཇིག་པར་བྱེད་པ་སྟེ། །དཔལ་ལྡན་འབྱོར་པའི་དཔུང་དང་བཅས་པ་ཡི། །དམག་མི་རིན་ཆེན་དམ་པས་དབང་བསྐུར་རོ། །ༀ་ཁཌྒ་རཏྣ་ཨ་བྷི་ཥིཉྩ་མཱཾ། གནོད་པའི་དཔུང་འཇོམས་བརྩོན་འགྲུས་གོ་བགོས་ཤིང་། འཇིགས་པའི་སྐྱབས་བྱེད་འགྲོ་ལ་མི་འཇིགས་སྦྱིན། །ཐབས་དང་ཤེས་རབ་ལྡན་པའི་དམག་དཔོན་འདིས། །མཐུ་སྟོབས་རྫུ་འཕྲུལ་དཔུང་གིས་བསྲུང་བར་ཤོག །ཅེས་རྒྱལ་སྲིད་སྣ་བདུན་གྱི་གཟུགས་སམ་ཡང་ན་ཕྱག་རྒྱ་བཅིངས་ལ་དབང་བསྐུར་རོ། །དེ་རྣམས་ཀྱང་འཁོར་ལོས་སྒྱུར་བའི་རྒྱལ་པོ་རིན་ཆེན་སྣ་བདུན་གྱི་སྒོ་ནས་རང་གི་རྒྱལ་སྲིད་ལ་དབང་སྒྱུར་བ་བཞིན་དུ། རྡོ་རྗེ་སློབ་དཔོན་གྱི་དབང་བསྐུར་བས་རྒྱལ་བའི་རྒྱལ་ཚབ་ཏུ་བྱས་པའི་སློབ་མ་ཡང་རིན་ཆེན་སྣ་བདུན་དང་འདྲ་བའི་ཡོན་ཏན་གྱི་ཚོགས་ཀྱིས་ཆོས་ཀྱི་རྒྱལ་སྲིད་ལ་མངའ་སྒྱུར་བའི་དོན་དུ་རིན་ཆེན་སྣ་བདུན་གྱི་དབང་བསྐུར་བར་བྱས་པ་ཡིན་ནོ། ཞེས་བརྗོད།དེ་ནས་དམ་ཚིག་གི་དབང་ནི། དཀོན་མཆོག་གསུམ་དང་བྱང་ཆུབ་སེམས། །བླ་མ་དམ་པ་རྣམས་མི་སྤང་། །སྲོག་ཆགས་རྣམས་ནི་གསད་མི་བྱ། །མ་བྱིན་པར་ཡང་བླངས་མི་བྱ། །བརྫུན་དུ་སྨྲ་བར་བྱ་བ་མིན། །ཕ་རོལ་བུད་མེད་སྤྱད་མི་བྱ། །བླ་མ་སྨད་པར་མི་བྱ་སྟེ། །དེ་ཡི་གྲིབ་མར་མི་འགོམ་ཞིང་། །སློབ་དཔོན་མ་ཡིན་མི་བཟུང་ལ། །རྡོ་རྗེ་སློབ་དཔོན་མཚན་མི་བཟུང་། །སྔགས་དང་ཕྱག་རྒྱ་མི་སྨོད་དེ། །ལྷ་རྣམས་ལ་ཡང་སྨོས་ཅི་དགོས། །ཅི་སྟེ་གླེན་པས་སྨད་ན་ནི། །ནད་ཀྱིས་ངེས་པར་འཆི་བར་འགྱུར། །རྙིང་དང་ལྷ་ཡི་གྲིབ་མ་དང་། །
འཇིག་རྟེན་འཇིག་རྟེན་འདས་པ་ཡི། །ཕྱག་རྒྱ་ཡི་གེ་མཚན་མ་རྣམས། །གོམ་པས་འགོམ་པར་མི་བྱའོ། །དེ་བས་དཀོན་མཆོག་གསུམ་དག་དང་། །སངས་རྒྱས་བསྟན་ལ་གནོད་བྱེད་དང་། །བླ་མ་སྨོད་ལ་བརྩོན་པ་རྣམས། །མཁས་པས་བསྒྲིམས་ཏེ་བསྒྲུབ་པར་བྱ། །ཆོས་མི་ལྡན་དང་སྡིག་སྤྱོད་དང་། །རྟག་ཏུ་སེམས་ཅན་གནོད་བརྩོན་དང་། །དམ་ཚིག་སྡང་རྣམས་སྙིང་བརྩེ་བའི། །སྔགས་མཁན་གྱིས་ནི་སྔགས་ཀྱིས་བསྒྲུབ། །འཇུངས་པ་རྣམས་ཀྱི་ནོར་བསླངས་ལ། །སེམས་ཅན་ཕོངས་ལ་སྦྱིན་པར་བྱ། །བླ་མ་ལ་ནི་མཆོད་པ་དང་། །དེ་ལྟར་དམ་ཚིག་བསྒྲུབ་པ་དང་། །དཀྱིལ་འཁོར་ཕྱིར་དང་དམ་ཚིག་ཅན། །ཕན་ཕྱིར་རྒྱལ་བའི་སྲས་རྣམས་ལ། །མཆོད་ཕྱིར་མི་ཡི་དབང་པོའམ། །ཕྱུག་པོ་རྣམས་ཀྱི་ནོར་དབྲོག་གོ །སེམས་ཅན་རྣམས་ལ་ཕན་སྤྱོད་པས། །རྟག་ཏུ་དམ་ཚིག་བླ་མའི་ནོར། །སྲོག་ཆགས་སྲོག་ནི་བསྲུང་བའི་ཕྱིར། །བརྫུན་དུ་ཡང་ནི་སྨྲ་བར་བྱ། །སངས་རྒྱས་རྣམས་ནི་མཉེས་བྱ་དང་། །དམ་ཚིག་རྣམས་ཀྱང་བསྲུང་བར་བྱ། །སྔགས་རིག་པས་ནི་སྒྲུབ་པའི་ཕྱིར། །གཞན་གྱི་བུད་མེད་བསྟེན་པར་བྱ། །རྡོ་རྗེ་སེམས་དཔའི་གནས་འདུག་ནས། །ཐམས་ཅད་བྱས་ཤིང་ཀུན་ཟོས་ཀྱང་། །འགྲུབ་འགྱུར་ཉེས་པར་མི་འགྱུར་ན། །སྙིང་རྗེ་ལྡན་པས་སྨོས་ཅི་དགོས། ཞེས་བརྗོད།བཀའི་དབང་ནི། ༀ་སརྦྦ་ཏ་ཐཱ་ག་ཏ་ཨཱཛྙཱ་ཏེ་དཱ་སྱ་མི་གྲྀཧྞ་བཛྲ་སུདྡྷ་ཡེ། ༀ་བཛྲ་ཏིཥྛ་ཧཱུཾ། ཞེས་བསྐུར། དེ་ནས་སློབ་མས་སྤྱི་བོས་ཕྱག་འཚལ་ནས།
ལུས་དང་ལོངས་སྤྱོད་ཐམས་ཅད་བླ་མ་ལ་ཕུལ་ལ། བླ་མས་ཀྱང་། ཚེ་འདིའི་བདེ་བ་མ་ལུས་དང་། །འཇིག་རྟེན་ཕྱི་མའི་བདེ་མཆོག་དང་། །སངས་རྒྱས་ཉིད་ཀྱང་ཐོབ་འགྱུར་ན། །ལྷ་མིའི་བདེ་བ་སྨོས་ཅི་དགོས། །སངས་རྒྱས་ཀུན་དང་བླ་མ་མཉམ། །རྡོ་རྗེ་སློབ་དཔོན་བརྙས་ན་ནི། །རྟག་ཏུ་སྡུག་བསྔལ་ཐོབ་འགྱུར་བས། །སློབ་དཔོན་ལ་ནི་བརྙས་མི་བྱ། །རྡོ་རྗེ་སྤུན་དང་སྲིང་མོ་དང་། །རྡོ་རྗེ་མ་རྣམས་ཉིད་ལ་ནི། །རྣལ་འབྱོར་ཅན་གྱིས་བརྙས་མི་བྱ། །རྟག་ཏུ་འཁོན་དང་གཅུགས་མི་བྱ། །དཀོན་མཆོག་གསུམ་ལ་གནོད་བྱེད་ལ། །བཟོད་པ་བསྒོམ་པར་མི་བྱ་སྟེ། །བླ་མ་སྨོད་བརྩོན་མ་རུངས་དང་། །དམ་ཚིག་ལས་ནི་འདའ་བ་དང་། །དེ་སོགས་བྱེད་པ་ཚར་གཅོད་ན། །འགྲུབ་འགྱུར་ཞེས་ནི་ཀུན་རིག་གསུང་། །སེམས་ཅན་ཀུན་ལ་སྙིང་བརྩེར་ཆགས། །བསྒྲུབས་ན་མྱུར་དུ་འགྲུབ་པར་འགྱུར། ཞེས་ཕན་ཡོན་བསྟན་པའི་སྒོ་ནས་དམ་ཚིག་ལ་གནས་པར་གདམས་སོ། །གཤིན་པོ་ལ་དབང་བསྐུར་བའི་ཚེ་སྔར་བཞིན་བདག་འཇུག་བླངས་ཏེ། བཛྲ་དྷ་ར་སོགས་ཀྱིས་ང་རྒྱལ་བཟུང་ནས། བདག་མིང་འདི་ཞེས་བགྱི་བ་ཡི། ཞེས་སོགས་ཀྱིས་གསོལ་བ་བཏབ་པའི་རྗེས་སུ། དཀྱིལ་འཁོར་གྱི་ལྷོ་སྒོའི་ཆར་སྟེགས་བུ་ཁྲུ་གང་གྲུ་བཞི་པ་བྱས་ཏེ། བ་བྱུང་དང་ཙནྡན་གྱིས་བྱུག །ཁྲུས་བུམ་ལོགས་སུ་བྱེད་ན་མགུལ་ཆིངས་སྔོན་པོ་ཅན་བཅས་ལ་རྩ་རིག་སོགས་བཟླས་ལ་བཞག །སྟེགས་བུའི་སྟེང་དུ་པད་དཀར་འདབ་བརྒྱད་ཀྱི་ལྟེ་བར་འཁོར་ལོ་རྩིབས་བརྒྱད་བྲིས་པའི་སྟེང་དུ་ཁྲུས་བྱ་ཞིང་ཡི་གེ་ལེགས་པར་བཏགས་པའི་རོའམ་གོས་སམ་
མིང་བྱང་བཞག་ལ། ལས་བུམ་གྱི་ཆུ་དང་ལས་ཐམས་ཅད་པས་བསངས་ལ། ༀ་ཤཱུ་ནྱ་ཏཱ་ཞེས་སོགས་ཀྱིས་རྟེན་སྣང་བ་མི་དམིགས་པའི་སྟོང་པ་ཉིད་དུ་གྱུར། སྟོང་པའི་ངང་ལས། ཚེ་འདས་ཀྱི་མིང་ཡིག་དང་པོ་ཐིག་ལེས་བརྒྱན་པ་ཡོངས་སུ་གྱུར་པ་ལས། ཚེ་ལས་འདས་པ་ཐ་མལ་པའི་ཆ་བྱད་ཅན་ཕུང་པོ་དང་ཁམས་དང་སྐྱེ་མཆེད་ཐམས་ཅད་གསལ་ཞིང་ཡོངས་སུ་རྫོགས་པར་གྱུར་པར་བསམས་ལ། རྡོ་རྗེ་བསྡམས་པ་ནང་དུ་བཅིངས་ལ། མཛུབ་མོ་གཉིས་བརྐྱང་བ་ཅུང་ཟད་བཀུག་ནས་ལྕགས་ཀྱུ་ལྟར་བྱས་མཐེའུ་ཆུང་གཉིས་ཁབ་ལྟར་བརྐྱང་བ་དེའི་མགོར་བཞག་ནས། ༀ་བཛྲ་སཏྭ་ཧཱུཾ་ཛཿསངས་རྒྱས་ཀྱི་བདེན་པ་དང་། ཆོས་ཀྱི་བདེན་པ་དང་། དགེ་འདུན་གྱི་བདེན་པ་དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་སུ་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་དང་། ཁྱད་པར་དུ་བཅོམ་ལྡན་འདས་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོ་ཀུན་རིག་རྣམ་པར་སྣང་མཛད་འཁོར་དང་བཅས་པའི་བདེན་པ་དང་བདེན་པའི་བྱིན་གྱིས་བརླབས་ཀྱིས། ཚེ་ལས་འདས་པ་ཆེ་གེ་མོ་ཞེས་བྱ་བའི་རྣམ་པར་ཤེས་པ་སྲིད་པ་བར་དོ། ཁམས་གསུམ། འགྲོ་བ་རིགས་དྲུག །སྐྱེ་གནས་བཞིས་བསྡུས་པའི་འཇིག་རྟེན་གང་ན་གནས་ཀྱང་། སྐད་ཅིག་ཐང་ཅིག་ཡུད་ཙམ་ལ་འདིར་མཆིས་པར་གྱུར་ཅིག །ཐུགས་
ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས། ཚེ་འདས་ཀྱི་རྣམ་ཤེས་ཁ་དོག་དམར་ཞིང་གསལ་བ་ཨ་ཐུང་གི་གཟུགས་ཅན་བཀུག་སྟེ། སྤྱི་གཙུག་ནས་ཞུགས་སྙིང་གར་ཐིམ། ཁ་ཅིག་སྒོ་བ་བཞིའི་སྔགས་རྒྱས་དགུག་གཞུག་སོགས་བྱ་ཞེས་གསུང་ངོ་། །ༀ་ཤོ་དྷ་ནེ་ཤོ་དྷ་ནེ། སརྦྦ་པཱ་པཾ་ཨཱ་ན་ཡ་ཧཱུཾ། ཞེས་ཚེ་འདས་ཀྱི་སྡིག་སྒྲིབ་ཐམས་ཅད་ཀྱང་བཀུག་པར་བསམ། རྒྱས་པ་ལ་སྤྲོ་ན། རྡོ་རྗེ་ཁུ་ཚུར་གཉིས་ཀྱི་ནང་དུ་མཛུབ་མོ་ལྕགས་སྒྲོག་ལྟར་བཅིངས། ལེགས་པར་གྱེན་དུ་འཕང་བ་ལྟུང་བ་སློང་བའི་ཕྱག་རྒྱ་བྱས་ལ། ༀ་སརྦྦ་ཨ་པཱ་ཡ་ཨཱ་ཀརྵ་ཎ་བི་ཤོ་དྷ་ན་བཛྲ་ས་མ་ཡ་ཧཱུཾ་ཕཊ། ཅེས་ངན་འགྲོ་ཐམས་ཅད་དཀྱིལ་འཁོར་གྱི་ཕྱི་རོལ་ཏུ་བཀུག་པར་བསམས་ལ། དེ་རྣམས་ཀྱིས་བཅོམ་ལྡན་འདས་བདག་ཅག་སྡུག་བསྔལ་གྱིས་གཟིར་བ་འདི་ལས་བསྐྱབ་ཏུ་གསོལ། བདག་ཅག་སངས་རྒྱས་དང་ཆོས་དང་དགེ་འདུན་དང་ཁྱོད་ལ་ཡང་སྐྱབས་སུ་མཆིའོ། ཞེས་སྐྱབས་སུ་འགྲོ་བར་བསམས་ལ། རྡོ་རྗེ་བསྡམས་པ་ལས་གུང་མོ་བསྒྲེངས། མཐེ་བོང་གཉིས་མཐེའུ་ཆུང་བསྲངས་ཏེ་མཉེ་ཞིང་དྲལ་བ་སྡིག་པ་འཇོམས་པའི་ཕྱག་རྒྱ་དང་། ༀ་བཛྲ་པཱ་ཎི་བི་སྥོ་ཊ་ཡ་སརྦྦ་ཨ་པཱ་ཡ་བན་དྷཱ་ནཱ་ནི་པྲ་མོཀྵ་ཡ་སརྦ་ཨ་པཱ་ཡ་ག་ཏེ་བྷྱཿ སརྦྦ་སཏྭཱ་ན་སརྦ་ཏ་ཐཱ་ག་ཏ་བཛྲ་ས་མ་ཡ་ཏྲཊ་ཀྱིས་སྡིག་པ་ཐམས་ཅད་བཅོམས་ཤིང་ཤི་ནས་རྣམ་སྣང་གི་ཞབས་དྲུང་དུ་སྐྱེས། རྟེན་རྣམས་བ་ཚྭ་ཅན་གྱི་རྒྱ་མཚོར་དོར་བར་བསམས་པའི་བར་འདི་རྣམས་ཀྱང་བྱའོ། །ༀ་བརྦྦ་བིད་སརྦྦ་ཨ་པཱ་ཡ་བི་ཤོ་དྷ་ནེ་ཧཱུཾ་ཕཊ་སྭཱཧཱ། བཛྲ་བན་དྷ་ཏྲཊ། ཅེས་བརྗོད་ཅིང་སྔར་
ལྟར་སྙིང་གར་རྡོ་རྗེ་བསྡམས་པ་སྒྲ་དང་བཅས་པས་ལན་གསུམ་དྲལ་བས་ཚེ་འདས་ཀྱི་སྡིག་སྒྲིབ་བག་ཆགས་དང་བཅས་པ་སྦྱངས་པར་བསམ། ༀ་སརྦྦ་བིད་ༀ། ཞེས་སོགས་ཀྱིས་སྔར་འཇིག་རྟེན་སུམ་རྒྱལ་གྱི་སྐབས་ལྟར་གནས་གསུམ་བྱིན་གྱིས་བརླབ། རྡོ་རྗེ་ཁུ་ཚུར་གཉིས་བཅིངས་ནས་མཐེ་བོང་དང་གུང་མོ་དང་མཐེའུ་ཆུང་གྱེན་དུ་བསྒྲེངས་ཏེ་ཁ་སྦྱར་ནས་མཛུབ་མོ་དང་མིང་མེད་སེམས་དཔའི་སྐྱིལ་ཀྲུང་དུ་བྱས་པ་རྡོ་རྗེའི་ཕྱག་རྒྱ། སྙིང་ག་ལྐོག་མ་ཁ་ཕྱོགས་སུ། །དཔྲལ་བ་མཛོད་སྤུ་རྣ་བ་གཉིས། །མགོ་བོ་གཙུག་ཕུད་དཔུང་པ་གཉིས། །སྣ་དང་རྐེད་པ་པུས་མོ་བོལ། །ལོང་བུ་སྣ་ཡི་རྩེ་མོ་དང་། །མིག་གཉིས་དང་ནི་གསང་བ་ཡི། ཞེས་པའི་གནས་ཉེར་གཉིས་སུ་གཏུག་ཅིང་། ༀ་བཛྲ་ཨ་དྷི་ཏིཥྛ་ཛྙཱ་ན་ས་མ་ཡེ་ཧཱུཾ། ཞེས་པས་བྱིན་གྱིས་བརླབ། དེ་ནས་བགེགས་སྦྱང་བ་ནི། སྐད་ཅིག་གིས་རང་ཉིད་འཇིག་རྟེན་སུམ་རྒྱལ་དུ་གྱུར་པར་བསམས་ལ། ཁྲོ་བོ་སྤྱན་དྲང་བ་ནས། མཆོད་བསྟོད་ཀྱི་བར་སྔར་བཞིན་བྱས་ནས། གཏོར་མ་གསུམ་བཤམས་ལ་བྱིན་གྱིས་བརླབས་ཏེ། ༀ་སརྦ་བིགྷྣཱན་ན་མཿ སརྦ་ཏ་ཐཱ་ག་ཏེ་བྷྱོཿ ཞེས་སོགས་གསུམ་གྱིས་བགེགས་ལ་བསྔོ་བ་ནི་ཞི་བས་སྦྱང་བ། ཏིང་ལོའི་མར་མེ་དང་། ཆང་བུ་སྦྲགས་ནས། རྟེན་ལ་ཕྱིར་བསྐོར་ཞིང་། ༀ་སུམྦྷ་ནི་སུམྦྷ་ཧཱུཾ། གྲྀ་ཧྞ་གྲྀཧྞ་ཧཱུྃ། གྲྀཧྞ་བ་ཡ་གྲྀཧྞ་བ་ཡ་ཧཱུྃ། ཨཱ་ན་ཡ་ཧོཿ བྷ་ག་ཝཱན་བཛྲ་ཧཱུཾ། ཞེས་བརྗོད་ཅིང་། ཏིང་ལོ་དང་ཆང་བུ་གསུམ་གྱིས་བསྐོར་བ་ཞི་དྲག་ཕྱེད་མས་སྦྱང་
བ། དེ་ནས་སྔར་བཞིན་སངས་རྒྱས་ཀྱི་བདེན་པ་དང་། ཞེས་པ་ནས། བདེན་པའི་བྱིན་གྱིས་བརླབས་ཀྱིས། ཚེ་ལས་འདས་པ་ཆེ་གེ་མོ་ཞེས་བགྱི་བ་ལ། གསོན་གྱི་དུས་ན་ཚེ་གནས་པ་ལ་བར་དུ་གཅོད་ཅིང་ཚེ་འཕོས་ནས་གང་དུ་གནས་པའི་ལུས་སྲོག་དང་། མཐོ་རིས་དང་ཐར་པ་ལ་བར་དུ་གཅོད་པའི་བགེགས་ཀྱི་ཚོགས་ཐམས་ཅད་དང་། ཚེ་ལས་འདས་པའི་ཆ་བྱད་བཟུང་ནས། དེའི་ཉེ་འབྲེལ་དང་། འཇིག་རྟེན་པ་རྣམས་ལ་བསླུ་ཞིང་གནོད་པར་བྱེད་པའི་གནོད་སྦྱིན་དང་ཤ་ཟ་དང་འབྱུང་པོ་ལ་སོགས་པ་ཐམས་ཅད་གཏོར་མ་འདིས་ཚིམ་པར་གྱིས་ལ་གནོད་པ་དང་འཚེ་བའི་བསམ་པ་ངན་པ་ཐམས་ཅད་སྤོངས་ལ། ཕན་པ་དང་བྱང་ཆུབ་ཀྱི་སེམས་དང་ལྡན་པས་རང་རང་སོ་སོའི་གནས་སུ་སོངས་ཤིག །གལ་ཏེ་མི་འགྲོ་ན། ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བ་རྣམས་ཀྱིས་སྲེག་ཅིང་རྣམ་པར་འཇོམས་པར་གདོན་མི་ཟའོ་ཞེས་བརྗོད་ཅིང་སུམྦྷ་ནིའི་སྔགས་དྲག་ཏུ་བཟླ། གུ་གུལ་གྱིས་བདུག །ཡུངས་ཀར་གྱིས་བྲབ། རོལ་མོའི་སྒྲ་དྲག་ཏུ་སྦྱང་བ་ནི་དྲག་པོས་སྦྱང་བའོ། །དེ་ནས་མེ་བསང་ཞིང་སྦྱངས་ལ། རཾ་ལས་ཡེ་ཤེས་ཀྱི་མེ་འབར་བའི་ནང་དུ་ཁྲོ་བོ་རྡོ་རྗེ་མཁའ་འགྲོ་སྐུ་མདོག་མཐིང་ནག་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་ཞིང་ཞལ་གདངས་པར་སྐད་ཅིག་གིས་བསྐྱེད་ལ། ཚེ་འདས་ཀྱི་རྐང་མཐིལ་གཉིས་སུ་རླུང་གི་དཀྱིལ་འཁོར། ལྟེ་བར་ཡེ་ཤེས་ཀྱི་མེ་འབར་བ། སྙིང་གར་སྡིག་པའི་ས་བོན་པཾ་ནག་པོ་ལ་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་འདུས་པར་བསམས་ལ། ལྟེ་བའི་ཡེ་ཤེས་ཀྱི་མེ་འབར་
བའི་འོད་ཟེར་གྱིས་སྙིང་ཀའི་པཾ་དེད་ནས་སྣ་སྒོ་ནས་ཐོན། སྡིག་པ་རྭ་ཅན་གྱི་རྣམ་པར་གྱུར་ནས་རང་གི་ལག་པར་བཟུང་བའི་ཏིལ་ལ་ཐིམ་པར་བསམས་ལ།ༀ་བཛྲ་ཌཱ་ཀ་ཁ་ཁ་ཁཱ་ཧི་ཁཱ་ཧི་སརྦ་པཱ་པཾ་ད་ཧ་ན་བྷསྨི་གུ་རུ་སྭཱཧཱ། ཞེས་ཁྲོ་བོའི་ཞལ་དུ་ཕུལ་བས་གསོལ་བར་བསམ་པ་ནི་སྦྱིན་སྲེག་གིས་སྦྱང་བའོ། །དེ་ནས་བྱེ་མའམ་ཡུངས་ཀར་ལ་ཀཾ་ཀ་ནི་དང་། གཙུག་ཏོར་རྣམ་རྒྱལ་དང་། གཙུག་ཏོར་དྲི་མེད་ཀྱི་གཟུངས་དང་། ༀ་པདྨོཥྞཱི་ཥ་བི་མ་ལེ་ཧཱུཾ་ཕཊ། ཅེས་པ་རྣམས་ཉེར་གཅིག་རེ་རྩ་རིག་དང་ལྷ་རྣམས་ཀྱི་སྔགས་མིང་སྤེལ་དང་བཅས་པ་བཟླས་ནས། ༀ་སརྦ་པཱ་པཾ་ད་ཧ་ན་བཛྲ་ཧཱུཾ་ཕཊ། ༀ་སརྦ་པཱ་པཾ་བི་ཤོ་དྷ་ན་བཛྲ་ཧཱུཾ་ཕཊ། ༀ་སརྦ་ཀརྨ་ཨཱ་ཝ་ར་ཎཱ་ནི་བྷསྨི་ཀུ་རུ་ཧཱུཾ་ཕཊ། ༀ་བྷྲཱུཾ་བི་ནཱ་ཤ་ཡ་ཨཱ་ཝ་ར་ཎཱ་ནི་བཛྲ་ཧཱུཾ་ཕཊ། ༀ་དྲུཾ་བི་ཤོ་དྷ་ཡ་ཨཱ་ཝ་ར་ཎཱ་ནི་ཧཱུཾ་ཕཊ། ༀ་ཛྭ་ལ་ཛྭ་ལ་དྷ་ཀ་དྷ་ཀ་ཧ་ན་ཧ་ན་ཨཱ་ཝ་ར་ཎཱ་ནི་ཧཱུཾ་ཕཊ། ༀ་སྲུཾ་ས་ར་ས་ར་པྲ་ས་ར་པྲ་ས་ར་ཨཱ་ཝ་ར་ཎཱ་ནི་ཧཱུཾ་ཕཊ། ༀ་ཧཱུཾ་ཧ་ར་ཧ་ར་སརྦ་ཨཱ་ཝ་ཎཱ་ནི་ཧཱུཾ་ཕཊ། ༀ་ཧཱུཾ་ཕཊ་སརྦ་ཨཱ་ཝ་ར་ཎཱ་ནི་སྥོ་ཊ་ཡ་ཧཱུཾ་ཕཊ། ༀ་བྲི་ཏ་བྲི་ཏ་སརྦ་ཨཱ་ཝ་ར་ཎཱ་ནི་ཧཱུཾ་ཕཊ། ༀ་ཏྲ་ཊ་ཏྲ་ཊ་སརྦ་ཨཱ་ཝ་ར་ཎཱ་ནི་ཧཱུཾ་ཕཊ། ༀ་ཚིནྡྷ་ཚིནྡྷ་སརྦ་ཨཱ་ཝ་ར་ཎཱ་ནི་ཧཱུཾ་ཕཊ། ༀ་ད་ཧ་ད་ཧ་སརྦ་ན་ར་ཀ་ག་ཏི་ཧེ་ཏུཾ་ཧཱུཾ་ཕཊ། ༀ་པ་ཙ་པ་ཙ་སརྦ་པྲེ་ཏ་ག་ཏི་ཧེ་ཏུཾ་ཧཱུཾ་ཕཊ། ༀ་མ་ཐ་མ་ཐ་སརྦ་ཏིརྱ་ཀ་ག་ཏི་ཧེ་ཏུཾ་ཧཱུཾ་ཕཊ། ཅེས་བཟླ་ཞིང་རྟེན་ལ་བྲབ། སྔགས་དོན་དང་མཐུན་པའི་དམིགས་པ་དང་སྤེལ་ཚིག་བྱའོ། །དེ་ནས་ཁྲུས་བུམ་
མམ་རྣམ་རྒྱལ་གྱིས་དཀྱིལ་འཁོར་དང་རས་བྲིས་སོགས་ཀྱི་སྐུ་གཟུགས་མེ་ལོང་དུ་ཤར་བ་ལ། ཇི་ལྟར་བལྟམས་པ་ཙམ་གྱིས་ནི། ཞེས་སོགས་སྔགས་དང་བཅས་པས་ཁྲུས་གསོལ་བའི་ཆུ་བུམ་པར་བླུག་སྟེ། རོ་ཡིན་ན་དངོས་སུ། མིང་བྱང་ཡིན་ན་ནུབ་གོང་མ་རྣམས་ལ་མེ་ལོང་ལ་གཟུགས་བརྙན་ཤར་བ་དང་། ཐ་མ་ལ་དངོས་སུ་བཀྲུ་ཞིང་།འདི་ནི་སྦྱིན་པའི་རང་བཞིན་ཆུ། །སེར་སྣའི་དྲི་མ་སྦྱོང་མཛད་ཅིང་། །གཏོང་བ་དྲི་ཡིས་ལེགས་བསྒོས་ཆུས། །ཁྲུས་ལེགས་མཛད་ཀྱིས་ཁྲུས་བྱའོ། །ༀ་ན་མོ་བྷ་ག་ཝ་ཏེ། ཞེས་རྩ་རིག་བརྗོད་པའི་རྗེས་སུ། འཇིག་རྟེན་འདི་ནས་ཕ་རོལ་ཏུ་སོང་ཞིང་ཚེ་ལས་འདས་པ་ཆེ་གེ་མོ་ཞེས་བྱ་བའི་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་ཐམས་ཅད་དང་། ཁྱད་པར་དུ་ཉོན་མོངས་པ་སེར་སྣའི་དྲི་མ་ཐམས་ཅད་བྱང་ཞིང་དག་ནས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ་མྱུར་དུ་མངོན་པར་རྫོགས་པར་འཚང་རྒྱ་བར་གྱུར་ཅིག །ཅེས་བརྗོད། དེ་བཞིན་དུ། སྦྱིན་པ་ཞེས་པའི་གནས་སུ་ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ་ཅེས་དང་། སེར་སྣ་ཞེས་པའི་གནས་སུ། ཚུལ་འཆལ། ཁོང་ཁྲོ། ལེ་ལོ། རྣམ་གཡེང་། ཤེས་འཆལ། ཞེས་པ་རྣམས་བཅུག་ལ་སྔར་བཞིན་བཀྲུས་ལ། ཆུ་བོ་དྲུག་གིས་ཁྲུས་བྱས་པས། །བག་ཆགས་རྣམ་དྲུག་སྦྱངས་ནས་ནི། །གང་ལ་ཉེས་པ་མི་མངའ་ཞིང་། །ཁྲུས་ལེགས་མཛད་ལ་ཕྱག་འཚལ་འདུད། །ༀ་ན་མོ་བྷ་ག་ཝ་ཏེ། ཞེས་དང་། དྲི་ཆུ་
དྲུག་གིས་ཁྲུས་བྱས་པས། །དྲི་མ་རྣམ་དྲུག་སྦྱོང་མཛད་པ། །རྒྱ་ཆེན་ཡོན་ཏན་དྲུག་ལྡན་པ། །ཁྲུས་ལེགས་མཛད་ལ་ཉེས་མི་མངའ། །ༀ་ན་མོ་བྷ་ག་ཝ་ཏེ། ཞེས་དང་། དྲི་མ་རྣམ་དྲུག་དག་པ་ཡི། །ཡོན་ཏན་ཐམས་ཅད་དང་ལྡན་པ། །སངས་རྒྱས་ཐམས་ཅད་མཆོད་དོན་དུ། །དད་པས་བདག་གིས་ཁྲུས་བགྱིའོ། །ༀ་ན་མོ་བྷ་ག་ཝ་ཏེ། ཞེས་ཚིགས་བཅད་རེ་དང་རྩ་རིག་སྤེལ་བའི་མཐར། འཇིག་རྟེན་འདི་ནས་ཞེས་པ་ནས། ཁྱད་པར་དུ་ཕ་རོལ་ཏུ་ཕྱིན་པ་དྲུག་གི་མི་མཐུན་ཕྱོགས་བྱང་ཞིང་དག་ནས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་ཏེ་མྱུར་དུ་ཞེས་སོགས་བརྗོད། ཉོན་མོངས་པ་དང་དེའི་དབང་གིས་བྱུང་བའི་དུག་བསལ་བའི་ཕྱིར།འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །བཅོམ་ལྡན་སངས་རྒྱས་དུག་མི་མངའ། །སངས་རྒྱས་གཟི་ཡིས་དུག་བཅོམ་མོ། །ༀ་ན་མོ་བྷ་ག་ཝ་ཏེ། ཞེས་དང་། འཇིག་རྟེན་འདི་ནས་ཞེས་པ་ནས། ཁྱད་པར་དུ་ཉོན་མོངས་པ་དང་། དེའི་དབང་གིས་བྱུང་བའི་དུག་ཐམས་ཅད་བྱང་ཞིང་དག་ནས་མྱུར་དུ་ཞེས་སོགས་བརྗོད། དེ་བཞིན་དུ་སངས་རྒྱས་ཞེས་པའི་གནས་སུ། བཅོམ་ལྡན་དམ་ཆོས་ཞེས་དང་། དམ་ཆོས་ཞེས་དང་། ༀ་ན་མོ་ཞེས་དང་། འཕགས་པའི་དགེ་འདུན་ཞེས་དང་། དགེ་འདུན་ཞེས་དང་། ༀ་ན་མོ་ཞེས་སྤེལ་ཚིག་དང་བཅས་པ་སྦྱར་རོ། །ས་ནི་དུག་གི་མ་ཡིན་ཏེ། །ས་ནི་དུག་གི་ཕ་ཡང་ཡིན། །བདེན་པའི་བདེན་ཚིག་དེ་དག་གིས། །ཆེ་གེའི་དུག་ནི་དུག་མེད་ཤོག །དུག་ནི་ས་ཡི་
ནང་དུ་སོང་། །གང་བའི་སྣོད་དུ་དུག་སོངས་ཤིག་སྭཱཧཱ། ༀ་ན་མོ་ཆེ་གེ་མོ་ཞེས་བྱ་བའི་འབྱུང་བ་དང་འབྱུང་བ་ལས་གྱུར་པའི་དུག་ཐམས་ཅད་ཤཱིནྟཾ་ཀུ་རུ་སྭཱཧཱ། ཞེས་དང་དེ་བཞིན་དུ་སའི་གནས་སུ། ཆུ་མེ་རླུང་རྣམས་དང་། སྔགས་སྤེལ་ཚིག་དང་བཅས་པ་བྱའོ། །དེ་ནས། གང་ལ་སེར་སྣ་རྣམ་ཆགས་པ། །རྣམ་འཇོམས་དྲི་མ་མེད་མཛད་ཅིང་། །ཐུགས་ཞི་གནོད་པ་མི་མངའ་དེས། །ཁྱེད་ལ་བདེ་ལེགས་མཛད་པར་གྱུར། །འདྲེན་པ་གང་ཞིག་འགྲོ་བ་རྣམས། །ཐར་པའི་ལམ་དུ་འཛུད་མཛད་ཅིང་། །ཆོས་རྣམས་ཐམས་ཅད་སྟོན་པ་དེས། །ཁྱེད་ལ་བདེ་ལེགས་མཛད་པར་གྱུར། །སྟོན་པ་འགྲོ་བ་རྣམས་ཀྱི་རྟེན། །སེམས་ཅན་ཀུན་གྱི་དོན་གྱི་ཕྱིར། །གང་ཞིག་བདེ་བར་མངའ་མཛད་དེས། །ཁྱེད་ལ་བདེ་ལེགས་མཛད་པར་གྱུར། །སྐྱོབ་པ་གང་ཞིག་བྱམས་པ་ཡི། །ཐུགས་ཀྱིས་འགྲོ་བ་འདི་དག་ཀུན། །བུ་གཅིག་བཞིན་དུ་རྟག་བསྐྱངས་དེས། །ཁྱེད་ལ་བདེ་ལེགས་མཛད་པར་གྱུར། །གང་ཞིག་འཁོར་བར་འགྲོ་བ་ཡི། །སེམས་ཅན་ཀུན་གྱི་རྟེན་གྱུར་ཅིང་། །གླིང་དང་དཔུང་གཉེན་གྱུར་པ་དེས། །ཁྱེད་ལ་བདེ་ལེགས་མཛད་པར་གྱུར། །གང་ཞིག་ཆོས་རྣམས་མངོན་སུམ་གྱུར། །གཙང་ཞིང་བསླུ་བ་མི་མངའ་བ། །གསུང་གཙང་གཙང་མར་མཛད་པ་དེས། །ཁྱེད་ལ་བདེ་ལེགས་མཛད་པར་གྱུར། །དཔའ་བོ་ཆེན་པོ་གང་སྐྱེས་པས། །ཕུན་སུམ་ཚོགས་དོན་འབྱོར་གྱུར་ཅིང་། །དོན་གྲུབ་ཆོས་ཀྱང་གྲུབ་པ་དེས། །ཁྱེད་ལ་བདེ་ལེགས་མཛད་པར་གྱུར། །གང་ཞིག་སྐྱེས་པས་ས་རྣམས་ནི། །ནགས་ཚལ་བཅས་པ་རབ་གཡོས་ཤིང་། །སེམས་ཅན་ཐམས་
ཅད་རབ་དགའ་དེས། །ཁྱེད་ལ་བདེ་ལེགས་མཛད་པར་གྱུར། །བྱང་ཆུབ་སྙིང་པོར་གཤེགས་པ་ན། །ས་དག་རྣམ་དྲུག་གཡོས་གྱུར་ཅིང་། །བདུད་ཡིད་མི་བདེར་གྱུར་པ་དེས། །ཁྱེད་ལ་བདེ་ལེགས་མཛད་པར་གྱུར། །ཆོས་ཀྱི་འཁོར་ལོ་བསྐོར་བ་ན། །འཕགས་པའི་བདེན་པ་རྣམས་གསུངས་ཤིང་། །ཐུབ་པའི་སྙན་པ་གང་བྱུང་དེས། །ཁྱེད་ལ་བདེ་ལེགས་མཛད་པར་གྱུར། །ཡིད་འཕྲོག་གང་གིས་མུ་སྟེགས་བྱེད། །ཐམས་ཅད་ཆོས་ཀྱིས་ཕམ་མཛད་དེ། །ཚོགས་ཀུན་དབང་དུ་མཛད་པ་དེས། །ཁྱེད་ལ་བདེ་ལེགས་མཛད་པར་གྱུར། །སངས་རྒྱས་ཁྱེད་ལ་བདེ་ལེགས་མཛད། །བརྒྱ་བྱིན་ཚངས་པའི་ལྷ་རྣམས་དང་། །འབྱུང་པོ་ཀུན་གྱི་བདེ་ལེགས་ནི། །ཁྱེད་ལ་རྟག་ཏུ་སྦྱིན་གྱུར་ཅིག །སངས་རྒྱས་བསོད་ནམས་མཐུ་དག་དང་། །ལྷ་རྣམས་ཀུན་གྱི་བསམ་པ་ཡིས། །ཁྱེད་ཀྱི་འདོད་དོན་གང་ཡིན་པ། །དོན་དེ་དེ་རིང་གྲུབ་གྱུར་ཅིག །རྐང་གཉིས་ཁྱེད་ཅག་བདེ་ལེགས་གྱུར། །རྐང་བཞི་ཁྱེད་ཅག་བདེ་ལེགས་གྱུར། །ཁྱེད་ཅག་ལམ་བགྲོད་བདེ་གྱུར་ཅིག །ཕྱིར་འོང་དག་ཀྱང་བདེ་ལེགས་ཤོག །ཉིན་མོ་བདེ་ལེགས་མཚན་བདེ་ལེགས། །ཉིན་མོའི་གུང་ཡང་བདེ་ལེགས་ཤིང་། །ཁྱེད་ཅག་ཀུན་ཏུ་བདེ་ལེགས་གྱུར། །ཁྱེད་ཅག་སྡིག་པར་མ་གྱུར་ཅིག །ཅེས་དྲིལ་བུ་གསིལ་ཞིང་མེ་ཏོག་གཏོར་ལ་ཆེ་གེ་མོ་ཞེས་བྱ་བ་བདུད་དང་མི་མཐུན་པའི་ཕྱོགས་ཐམས་ཅད་ལས་རྒྱལ་ནས་ཤིན་ཏུ་བཀྲ་ཤིས་པར་གྱུར་ཅིག །ཅེས་བརྗོད། དེ་ནས་བུ་ལ་སོགས་པས་མིང་བྱང་བཟུང་ནས་ཕྱག་བྱེད་པའམ་མེད་ཀྱང་རུང་སྟེ། ཚེ་འདས་དེ་ཉིད་བསམ་པ་ཐག་པས་དཀོན་
མཆོག་གསུམ་དང་ཉེ་བའི་སྲས་བརྒྱད་ལ་སྐྱབས་སུ་འགྲོ་ཞིང་ཕྱག་བྱེད་པར་བསམས་ལ།གཙོ་བོ་རྒྱལ་བ་འགྲོ་བའི་མགོན། །འགྲོ་བ་སྐྱོབ་པའི་དོན་བརྩོན་པ། །སྟོབས་ཆེན་འཇིགས་པ་ཀུན་སེལ་ལ། །དེ་རིང་ཉིད་ནས་སྐྱབས་སུ་མཆི། །དེ་ཡི་ཐུགས་སུ་ཆུད་པའི་ཆོས། །འཁོར་བའི་འཇིགས་པ་སེལ་བ་དང་། །བྱང་ཆུབ་སེམས་དཔའི་ཚོགས་ལ་ཡང་། །དེ་བཞིན་ཡང་དག་སྐྱབས་སུ་མཆི། །བདག་ནི་འཇིགས་པས་རྣམ་སྐྲག་ནས། །ཀུན་ཏུ་བཟང་ལ་བདག་ཉིད་འབུལ། །འཇམ་པའི་དབྱངས་ལ་བདག་ཉིད་ཀྱིས། །བདག་གི་ལུས་འདི་དབུལ་བར་བགྱི། །ཐུགས་རྗེའི་སྤྱོད་པ་མ་འཁྲུལ་བའི། །སྤྱན་རས་གཟིགས་མགོན་དེ་ལ་ཡང་། །ཉམ་ཐག་ང་རོས་འོ་དོད་འབོད། །སྡིག་ཅན་བདག་ལ་བསྐྱབ་ཏུ་གསོལ། །འཕགས་པ་ནམ་མཁའི་སྙིང་པོ་དང་། །ས་ཡི་སྙིང་པོ་དག་དང་ནི། །ཐུགས་རྗེ་ཆེ་མགོན་ཐམས་ཅད་ལ། །སྐྱབས་ཚོལ་སྙིང་ནས་འོ་དོད་འབོད། །གང་ཞིག་མཐོང་ནས་གཤིན་རྗེ་ཡི། །ཕོ་ཉ་ལ་སོགས་སྡང་པ་རྣམས། །སྐྲག་ནས་ཕྱོགས་བཞིར་འབྱེར་བྱེད་པའི། །རྡོ་རྗེ་ཅན་ལ་སྐྱབས་སུ་མཆི། །སྔོན་ཆད་ཁྱེད་ཀྱི་བཀའ་ལས་འདས། །ད་ནི་འཇིགས་པ་ཆེ་མཐོང་ནས། །ཁྱེད་པ་སྐྱབས་སུ་མཆི་ལགས་ཀྱི། །འཇིགས་པ་མྱུར་དུ་བསལ་དུ་གསོལ། ཅེས་བརྗོད་པར་བསམ། དེ་རྣམས་ནི་ཕྱིར་བཟློག་གི་སྦྱང་བའོ། །དེ་ནས་གསོན་དབང་གི་སྐབས་སུ་སྔར་བཤད་པ་ལྟར་མཎྜལ་ཕུལ་ཏེ། དགའ་ཆེན་ཁྱོད་བདག་ཅེས་སོགས་ཀྱིས་གསོལ་བ་གདབ་པ་ནས། བསྒྲུབས་ན་མྱུར་དུ་
འགྲུབ་པར་འགྱུར། ཞེས་དམ་ཚིག་ལ་གནས་པར་གདམས་པའི་བར་གྱིས་དབང་བསྐུར་རོ། །རྒྱས་པ་ལ་སྤྲོ་ན། རྡོ་རྗེ་སློབ་དཔོན་ངས་སློབ་མ་ཁྱོད་ལ་བུམ་པའི་དབང་བསྐུར་བས། ཞེས་པ་ཕྱིན་ཆད་ཀྱི་ལྷུག་པ་དང་ཚིགས་བཅད་རྣམས་བརྗོད་ལ་དབང་བསྐུར། རྡོ་རྗེ་སློབ་དཔོན་ངས་ཞེས་སོགས་ཀྱི་ལྷུག་པ་དང་དབང་གི་སྨོན་ལམ་གྱི་ཚིགས་བཅད་རྣམས་ནི་བོད་སྤྲོས་པ་ལ་དགའ་བས་གཤིན་པོའི་དུར་གཤིད་བྱེད་པ་ལ་དེ་ལྟ་བུའི་མཛེས་མཛེས་ཤིག་མེད་ན་མ་ཐུལ་བས་དེ་དག་གཞུག་པའི་ཕྱིར་སྔོན་གྱི་མཁས་པ་ཆེན་པོ་དག་གིས་མཛད་པ་ཡིན་པས་བྱས་ཀྱང་ཕུན་སུམ་ཚོགས་པའི་ཡན་ལག་ཏུ་འགྱུར་ལ། དེ་རྣམས་མེད་པར་དཀྱུས་སུ་ཡོད་པ་ལྟར་དབང་བསྐུར་བས་ཆོ་ག་ཆད་པའི་སྐྱོན་ཅུང་ཟད་ཀྱང་མི་འབྱུང་ཞེས་གསུང་ངོ་། །དེ་ནས་རྟེན་པདྨ་དང་ཟླ་བའི་སྟེང་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ལས་རྡོ་རྗེ་སེམས་དཔའ་དཀར་པོ། རྡོ་རྗེ་དང་དྲིལ་བུ་འཛིན་པར་སྔར་བཞིན་བསྒོམས་ལ། ཆུ་གཉིས་ཉེར་སྤྱོད་ལྔ་རོལ་མོ་སྔགས་ཕྱག་རྒྱ་དང་བཅས་པས་གོང་ལྟར་མཆོད། ཟས་གཏད་ཅིས་ཀྱང་བྱ་དགོས་པ་བྱུང་ན། ཡོ་བྱད་རྣམས་བསངས་སྦྱངས་ལ་སྔར་གྱི་ནམ་མཁའ་མཛོད་ཀྱི་སྔགས་དང་ཕྱག་རྒྱས་ཁ་ཟས་རོ་བརྒྱ་པ་ལ་སོགས་པར་སྤྲུལ་ལ། སྔར་གྱི་འདོད་ཡོན་ལྔ་འབུལ་བའི་ཚིགས་བཅད་ཀྱིས་ཚེ་འདས་ལྷར་བསྐྱེད་པ་ལ་མཆོད་དོ། །དེ་ནས། དཀོན་མཆོག་རིན་ཆེན་དཔལ་ཞིང་དུ། །དཀོན་མཆོག་རིན་ཆེན་ལས་བྱུང་བ། །དཀོན་མཆོག་རིན་ཆེན་འོད་
ཟེར་གྱིས། །རིན་ཆེན་ཕྲེང་བ་རྣམ་དག་པ། །ཚོགས་ཀྱི་ལམ་དང་སྦྱོར་བའི་ལམ། །མཐོང་བའི་ལམ་དང་སྒོམ་པའི་ལམ། །བླ་ན་མེད་པའི་ཁྱད་པར་ལམ། །བྱང་ཆུབ་བར་ཆད་མེད་པའི་ལམ། །རྣམ་པར་གྲོལ་བའི་ལམ་དག་ལ། །བརྟེན་ནས་སྡིག་པ་ཀུན་སྦྱངས་ནས། །འཕགས་པའི་ལམ་དེར་བགྲོད་པར་ཤོག །ༀ་རཏྣེ་རཏྣེ། མཧཱ་རཏྣེ། རཏྣ་སམྦྷ་ཝེ། རཏྣ་ཀི་ར་ཎེ། རཏྣ་མཱ་ལ་བི་ཤུདྡྷེ། ཤོ་དྷ་ཡ་སརྦ་པཱ་པཾ་ཧཱུཾ་ཕཊ། ཅེས་པས་ལམ་བསྟན་ལ། པདྨ་འདམ་གྱིས་མ་གོས་ལྟར། །སྲིད་གསུམ་དྲི་མས་མ་གོས་པའི། །སྲིད་པའི་པདྨ་ལས་བྱུང་བ། །བདེ་བ་ཅན་དུ་སྐྱེ་བར་ཤོག །ༀ་པདྨེ་པདྨེ་པདྨ་སམྦྷ་བ། མཧཱ་སུ་ཁ་ཝ་ཏི་གཙྪན་ཏུ་སྭཱཧཱ། ཞེས་བརྗོད་ཅིང་མེ་ཏོག་གཏོར་ལམ་སྦྱངས་པས། ཚེ་འདས་ཀྱི་རྣམ་ཤེས་དང་ལྷ་ཡེ་ཤེས་པ་དང་དབྱེར་མེད་དུ་འདྲེས་པས་སྤྱི་གཙུག་ནས་ཐོན་ཏེ། བདེ་བ་ཅན་དུ་གཤེགས་པས་དེར་པདྨ་ལས་བརྫུས་ཏེ་སྐྱེས་ནས་དེ་ན་གནས་པའི་བྱང་སེམས་རྙིང་པ་རྣམས་ཀྱིས། ༀ་སརྦ་ཏ་ཐཱ་ག་ཏ་པྲ་ཝ་ར་སད་ཀ་རཾ་ཨརྒྷཾ་པྲ་ཏིཙྪ་ཧཱུྃ་སྭཱ་ཧཱ། ཞེས་སོགས་ཀྱིས་ཆུ་གཉིས་ཉེར་སྤྱོད་རོལ་མོའི་བར་གྱིས་མཆོད། སངས་རྒྱས་འོད་དཔག་མེད་ཀྱི་ཞལ་མཐོང་མཆོད་ནས་གདམས་པ་དང་རྗེས་སུ་གནང་བ་ཐོབ། ལྷ་རྣམས་ཀྱིས་དེ་བདག་གི་མཐུར་ཤེས་ནས། བདག་ཉིད་ལ་སྔར་ལྟར་མཆོད་ཅིང་། སངས་རྒྱས་འདྲ་བའི་སྟོན་པ་མེད། །ཆོས་དང་འདྲ་བའི་དགེ་བ་མེད། །དགེ་འདུན་འདྲ་བའི་སྣོད་མེད་དེ། །སྔགས་དང་འདྲ་བའི་འདྲེན་པ་མེད། ཅེས་ཆེད་དུ་བརྗོད་པར་བསམ། དེས་ཀྱང་
དེར་སྐྱེ་བའི་རྒྱུ་བརྟགས་པས། བདག་གིས་ཆོ་ག་བྱས་པའི་ནུས་མཐུར་ཤེས་ནས་སྐད་ཅིག་གིས་འོངས་ནས། ཨེ་མ་ཤཱཀྱ་མགོན་པོ་ཡི། །སངས་རྒྱས་མཛད་པ་ཡ་མཚན་ཆེ། །གང་ཕྱིར་ངན་སོང་ལྷུང་བ་ཡི། །སེམས་ཅན་གློག་བཞིན་མྱུར་དུ་གྲོལ། །དེ་བཞིན་གཤེགས་པའི་ཆོས་ནི་བསམ་མི་ཁྱབ། །སྔགས་ཀྱི་ཡོན་ཏན་སྣ་ཚོགས་བསམ་མི་ཁྱབ། །བྱང་ཆུབ་བརྟེན་པ་རྣམས་ཀྱང་བསམ་མི་ཁྱབ། །ཚངས་སྤྱོད་ཚུལ་ཁྲིམས་དྲི་མེད་སྐྱེ་བསམ་ཡས། །ཨེ་མ་སངས་རྒྱས་རྣམས་ཀྱི་ནི། །སྔགས་ཀྱི་བྱིན་རླབས་ཡ་མཚན་ཆེ། །གང་ཕྱིར་མཚམས་མེད་ལྟུང་བ་ཡི། །སེམས་ཅན་ལྷ་གནས་མྱུར་དུ་སྐྱེས། །ཞེས་ཆེད་དུ་བརྗོད་ནས། བདག་དང་ལྷ་ལ་གོང་བཞིན་མཆོད་དེ་སླར་ཡང་བདེ་བ་ཅན་དུ་སོང་བར་གྱུར། ༀ་སརྦ་བུདྡྷ་ཀྵེ་ཏྲ་གཙྪན་ཏུ་སྭཱཧཱ། ཞེས་བརྗོད་ཅིང་མེ་ཏོག་གཏོར། དེ་ནས། ལྷ་དང་རྣམ་ཤེས་གཤེགས་པའི་ཕུང་པོ་ལྷག་མ་རོ་ལྟ་བུའམ། བྱང་བུ་དང་སྡིག་སྒྲིབ་ལྷན་ཅིག་ཏུ་རཾ་ལས་སྐྱེས་པའི་ཡེ་ཤེས་ཀྱི་མེས་བསྲེགས་པར་བསམས་ལ།གསོན་ཅིག་དགོངས་ཤིག་རིགས་ཀྱི་བུ། །གསོན་ཅིག་ཚེ་འདས་རིགས་ཀྱི་བུ། །ཕུང་པོ་ལྔ་ཡི་བུད་ཤིང་ལ། །རྒྱལ་བ་ལྔ་ཡི་མེ་སྦར་རོ། །འབྱུང་བ་བཞི་ཡི་བུད་ཤིང་ལ། །ལྷ་མོ་བཞི་ཡི་མེ་སྦར་རོ། །དབང་པོ་དྲུག་གི་བུད་ཤིང་ལ། །བྱང་ཆུབ་སེམས་དཔའི་མེ་སྦར་རོ། །ཡུལ་རྣམ་དྲུག་གི་བུད་ཤིང་ལ། །ལྷ་མོ་དྲུག་གི་མེ་སྦར་རོ། །ལུས་ངག་ཡིད་གསུམ་བུད་ཤིང་ལ། །རྒྱལ་བའི་སྐུ་
གསུམ་མེ་སྦར་རོ། །སྐུ་གསུམ་ཡེ་ཤེས་ལྔ་ལྡན་དུ། །འགྲོ་བའི་དོན་དུ་གྲུབ་པར་ཤོག །ཅེས་བརྗོད་ཅིང་བསྲེག །དེ་དག་ནི་གཤིན་པོའི་ཆོ་གའི་ཁྱད་པར་ཏེ། ས་ཆོག་སྟ་གོན་ལ་སོགས་གཞན་རྣམས་ནི་གསོན་དབང་དང་འདྲའོ། །དེ་ནས་མཆོད་པ་ཅི་འབྱོར་གསར་དུའང་བཤམས་ལ། བསང་སྦྱངས་སོགས་སྔར་བཞིན་བྱས་ཏེ། ཆུ་གཉིས་ཉེར་སྤྱོད་ལྔ་རོལ་མོ་དང་བཅས་པ་དང་། སྒེག་སོགས་བརྒྱད་ལ་སོགས་པས་སྔར་བཞིན་མཆོད་ནས། སྣང་སྟོང་རྡོ་རྗེ་ནམ་མཁའི་དབྱིངས། །ཆོས་དབྱིངས་ཡེ་ཤེས་རྡོ་རྗེའི་སྐུ། །བྱང་ཆུབ་མཆོག་གི་ཕྱག་རྒྱ་ཅན། །ཕྱག་འཚལ་རྣམ་པར་སྣང་མཛད་ལ། །གཟུང་འཛིན་རྡོ་རྗེ་བརྟན་པའི་ས། །མེ་ལོང་ཡེ་ཤེས་རྡོ་རྗེའི་སྐུ། །བདུད་འདུལ་ཆེན་པོའི་ཕྱག་རྒྱ་མཛད། །ཕྱག་འཚལ་མི་བསྐྱོད་རྡོ་རྗེ་ལ། །རིན་ཆེན་རྡོ་རྗེ་འབར་བའི་མེ། །མཉམ་ཉིད་ཡེ་ཤེས་ངོ་བོ་ཉིད། །མཆོག་སྦྱིན་ཆེན་པོའི་ཕྱག་རྒྱ་མཛད། །ཕྱག་འཚལ་རིན་ཆེན་འབྱུང་ལྡན་ལ། །འདོད་ཆགས་རྡོ་རྗེ་ཆོས་ཀྱི་ཆུ། །ཀུན་རྟོག་ཡེ་ཤེས་ངོ་བོ་ཉིད། །ཏིང་འཛིན་ཆེན་པོའི་ཕྱག་རྒྱ་མཛད། །ཕྱག་འཚལ་སྣང་བ་མཐའ་ཡས་ལ། །ཕྲག་དོག་རྡོ་རྗེ་བསྐྱོད་པའི་མཆོག །བྱ་སྒྲུབ་ཡེ་ཤེས་རྡོ་རྗེའི་སྐུ། །སྐྱབས་སྦྱིན་ཆེན་པོའི་ཕྱག་རྒྱ་མཛད། །ཕྱག་འཚལ་དོན་ཡོད་གྲུབ་པ་ལ། ཞེས་བསྟོད་དེ་ནས་དགེ་རྩ་བསྔོས་ལ། སེམས་མ་རྡོ་རྗེ་མའི་ཕྱག་རྒྱ་བཅིངས་ཏེ། བཛྲ་སཏྭ་དང་ཡི་གེ་བརྒྱ་པ་བརྗོད་ཅིང་། ལན་གསུམ་མམ་བདུན་དུ་དཀྱིལ་འཁོར་ལ་བསྐོར་བ་བྱ། མེ་ཏོག་དང་བཅས་པའི་ཐལ་མོ་སྦྱར་ཏེ། གང་ཡང་བདག་
བློ་གཏི་མུག་པས། །ལེགས་སྤྱད་འདི་ལ་ཉེས་པ་གང་། །གང་ཕྱིར་ལུས་ཅན་སྐྱབས་གྱུར་པས། །དེ་ནི་མགོན་པོས་བཟོད་པར་མཛོད། ཅེས་སོགས་ཀྱིས་ནོངས་པ་བཟོད་པར་གསོལ། ལྷ་རང་རང་གི་དམ་རྒྱ་བཅིངས་ལ། སརྦྦ་བིད། ཅེས་སོགས་རང་རང་གི་སྙིང་པོ་ལན་གསུམ་གསུམ་བཟླ་ཞིང་། རང་རང་གི་དམ་རྒྱ་བཀྲོལ་ལ། བཛྲ་མུཿ ཞེས་སེ་གོལ་གཏོག་ཅིང་རྒྱས་གདབ་བཀྲོལ་ནས་བསྙེན་པའི་སྐབས་བཞིན། ཡེ་ཤེས་པ་གཤེགས་དམ་ཚིག་པ་རང་ལ་བསྡུའོ། །རས་བྲིས་ཡིན་ན་བརྟན་བཞུགས་བྱ། དེ་ནས་རང་རྡོ་རྗེ་སེམས་དཔར་བསྒོམས་ལ། ༀ་ཨ་ཀཱ་རོ་མུ་ཁཾ། ཞེས་སོགས་བརྗོད་ཅིང་། ཆོས་ཐམས་ཅད་སྐྱེ་མེད་དུ་མོས་ནས། རྡུལ་ཚོན་ཕྱགས་ལ་མཆོད་པ་དང་ལྡན་པས་ཁྱེར་ཏེ། གཞན་ནས་འབྱུང་བ་ལྟར་འབབ་ཆུ་ཆེན་པོ་ལ་སོགས་པར་དོར་རོ། །དེ་ནས་རྡོར་དྲིལ་བཟུང་བའི་ལག་པ་རྡོ་རྗེ་ཁུ་ཚུར་གཉིས་ཀྱི་མཛུབ་མོ་ལྕགས་ཀྱུ་བཞིན་བྱས་ཏེ། ཕན་ཚུན་འཁྱུད་པ་སྐམ་པའི་ཕྱག་རྒྱས། ༀ་བཛྲ་ཀཱི་ལ་ཨུད་ཀཱི་ལ་ཡེ་སརྦ་བིགྷྣཱན་བཛྲ་དྷཱ་ར་ཡ་ཨཱཛྙཱ་པ་ཡ་ཧཱུཾ་ཧཱུཾ་ཕཊ་ཕཊ་ཧོཿ ཞེས་བཟླས་ཏེ་ཕུར་བུ་རྣམས་དབྱུང་ངོ་། །ༀ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙྪ་ནི་སརྦྦ་ཨརྠ་སཱ་དྷ་ནི་སྭཱཧཱ། ཞེས་འོ་མ་ལ་བརྒྱ་རྩ་བརྒྱད་བཟླས་ཏེ། ཕུར་བུ་རྣམས་བཀྲུས་པས་བགེགས་རྣམས་སོས་ཏེ་སངས་རྒྱས་པར་བསམ་ཞིང་ཕུར་བུའི་ཁུང་བུ་དགང་། བསམ་གཏན་གྱི་ཕུར་བུ་བཏབ་ན་དབྱུང་བ་དང་དགང་བར་མོས་ནས་བྱའོ། །
དེ་ནས་གྲུབ་ན་ཞི་བའི་སྦྱིན་སྲེག་བྱ། ༀ་སརྦ་བིད་ༀ། ཞེས་སོགས་ཀྱིས་སྔར་ལྟར་གནས་གསུམ་བྱིན་གྱིས་བརླབ། བྱང་ཕྱོགས་ཀྱི་སེམས་དཔའ་བཞིའི་སྔགས་དང་། དམ་རྒྱ་བཅས་ལ་བསྲུང་། རྡོ་རྗེ་བསྡམས་པ་ལས་མཐེ་བོང་གཉིས་ནང་དུ་བཅུག་ནས། མཛུབ་མོའི་རྩེ་མོས་སྟེང་ནས་བཀབ་པ་སེམས་དཔའི་གཙུག་ཏོར་གྱི་ཕྱག་རྒྱ་སྤྱི་གཙུག་ཏུ་བཞག་ལ། ༀ་བཛྲ་སཏྭ་ཨུཥྞཱི་ཥ་ཧཱུཾ་ཕཊ། ཅེས་པས། དེ་བཞིན་གཤེགས་པ་ཐམས་ཅད་ཀྱི་གཙུག་གཏོར་ནས་འོད་ཟེར་ཁ་དོག་སྣ་ཚོགས་བྱུང་སྟེ། རང་གི་སྤྱི་གཙུག་ཏུ་གཙུག་ཏོར་གྱི་ཚུལ་དུ་གནས་པར་བསམས་ལ་བསྲུང་ངོ་། །དེ་ནས་སྦྱིན་བདག་ཁྲུས་བྱས། གོས་གསར་པ་བགོས་པ་ལ། ཆེ་བའི་ཆེ་མཆོག་སྟོན་པ་བླ་ན་མེད། །ཆོས་རྗེ་ཉི་མ་རྒྱལ་བའི་བྱིན་རླབས་ཀྱིས། །བདུད་དང་བགེགས་རིགས་གནོད་པའི་དགྲ་ཞི་སྟེ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཆོས་ཉིད་བདེན་པའི་ཆོས་མཆོག་བླ་ན་མེད། །དམ་ཆོས་བདུད་རྩི་བདེན་པའི་བྱིན་རླབས་ཀྱིས། །ཉེས་པའི་སྐྱོན་བྲལ་དགེ་ཚོགས་རྣམ་པར་འཕེལ། །རྟག་ཏུ་དཔལ་ལྡན་ཉིན་མཚན་བཀྲ་ཤིས་ཤོག །དགེ་འདུན་ཡོན་ཏན་རིན་ཆེན་དཔལ་འབར་བ། །རྒྱལ་སྲས་ཕན་མཛད་བདེན་པའི་བྱིན་རླབས་ཀྱིས། །ཉོན་མོངས་སྡུག་བསྔལ་གདུང་བའི་དགྲ་ཞི་སྟེ། །རྟག་ཏུ་དཔལ་གནས་ཉིན་མཚན་བཀྲ་ཤིས་ཤོག །ཚངས་དང་ལྷ་དབང་སྲུང་མའི་བྱིན་རླབས་ཀྱིས། །ཕན་མཛད་ལྷ་ཡི་བཀྲ་ཤིས་གནས་གྱུར་ཏེ། །བདེ་ལེགས་བསམ་པ་ཡིད་བཞིན་འགྲུབ་པ་དང་། །ཚེ་རིང་ནད་
མེད་བདེ་སྐྱིད་ལྡན་པར་ཤོག །ཅེས་ཤིས་པ་བརྗོད་ཅིང་མེ་ཏོག་དོར་རོ། །དེ་ནས་རྒྱས་པ་སྤྲོ་ན། བདག་གིས་རྒྱུད་དང་མཐུན་པར་ཆོ་ག་བྱས་པ་ལ་བརྒྱ་བྱིན་དང་ཚངས་པ་ལ་སོགས་པའི་ལྷ་རྣམས་དགའ་ནས་ཡང་ནས་ཡང་དུ་ཕྱག་འཚལ་ཏེ། རིན་པོ་ཆེའི་གདུགས་ལ་སོགས་པས་མཆོད་ནས་དགའ་བའི་བསམ་པས། སངས་རྒྱས་ཀུན་པས་སྔར་སངས་རྒྱས། །ཞེས་སོགས་མཚན་བརྒྱ་རྩས་བསྟོད་པར་བསམས་ལ། དངོས་སུ་རང་གིས་བསྟོད། ཅེས་ཁ་ཅིག་གསུང་ངོ་། །རྒྱུད་རྒྱལ་ངན་སོང་སྦྱོང་རྒྱུད་སྙིང་པོའི་དོན། །ལེགས་པར་བཀྲལ་བ་དཔལ་ལྡན་བླ་མའི་གསུང་། །ཇི་བཞིན་བཀོད་པའི་རྣམ་དཀར་དགེ་བ་དེས། །འགྲོ་རྣམས་ངན་འགྲོའི་རྒྱུ་བཅས་ཀུན་ཞི་ནས། །ཟབ་གསལ་གཉིས་མེད་རྣམ་སྣང་མྱུར་ཐོབ་ཤོག །འདི་ལ་ནོངས་པ་མཁས་པས་བཟོད་མཛོད་ཅིག །དཔལ་རྣམ་པར་སྣང་མཛད་ཀྱི་སྒོ་ནས་ངན་སོང་ཡོངས་སུ་སྦྱོང་བའི་དཀྱིལ་འཁོར་གྱི་ཆོ་ག་རྒྱུད་དོན་གསལ་བ་ཞེས་བྱ་བ་གསུང་རབ་མཐའ་དག་ལ་མི་འཇིགས་པའི་སྤོབས་པ་བརྙེས་ནས། གདུལ་བྱ་མཐའ་ཡས་པ་ལ་རང་རང་གི་སྐལ་བ་དང་འཚམ་པར་སྡེ་སྣོད་གསུམ་དང་རྒྱུད་སྡེ་བཞིའི་ལམ་གྱི་གནད་མཐའ་དག་པར་འདོམས་ཤིང་རྒྱས་པར་མཛད་པ་ཆོས་ཀྱི་རྗེ་རིན་པོ་ཆེ་བློ་བཟང་གྲགས་པའི་དཔལ་གྱི་ཞལ་སྔ་ནས་ཀྱི་གསུང་བགྲོས་ལྟར་གྲགས་པ་རྒྱལ་མཚན་གྱིས་རི་བོ་དགེ་ལྡན་རྣམ་པར་རྒྱལ་བའི་གླིང་དུ་ཡི་གེར་བཀོད་པའོ། །
འདིས་ཀྱང་བསྟན་པ་རིན་པོ་ཆེ་ཕྱོགས་ཐམས་ཅད་དུ་རྒྱས་པར་གྱུར་ཅིག །ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཿ །སྭ་སྟི། རྒྱལ་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདར་རྒྱས་རྣམ་གྲོལ་སྦྲང་རྩའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །སརྦ་མངྒ་ལཾ།