བྱ་སྤྱོད་ཀྱི་སྤྱིའི་ཆོ་གའི་རྣམ་པར་བཞག་པ་རིགས་གསུམ་ལ་སྦྱོར་ཚུལ་རྗེའི་ཕྱག་བཞེས་བཞིན་འདུལ་བ་འཛིན་པས་བཀོད་པ།
བྱ་སྤྱོད་ཀྱི་སྤྱིའི་ཆོ་གའི་རྣམ་པར་བཞག་པ་རིགས་གསུམ་ལ་སྦྱོར་ཚུལ་རྗེའི་ཕྱག་བཞེས་བཞིན་འདུལ་བ་འཛིན་པས་བཀོད་པ་བཞུགས་སོ། །
བླ་མ་དམ་པ་རྣམས་ལ་ཕྱག་འཚལ་ལོ། །རྒྱུད་ལེགས་པར་གྲུབ་པ་དང་། དཔུང་བཟང་གིས་ཞུས་པ་དང་། བསམ་གཏན་ཕྱི་མ་ལ་སོགས་པ་བྱ་བ་སྤྱིའི་རྒྱུད་ལ་སོགས་པ་ནས་གསུངས་པ་དང་མཐུན་པར་བྱ་སྤྱོད་ཀྱི་ཆོ་ག་དང་བསྙེན་པ་ཇི་ལྟར་བྱ་བའི་ཚུལ་ནི། བྱ་རྒྱུད་ལ་དཔལ་རྡོ་རྗེ་རྣམ་པར་འཇོམས་པ་སོགས་རྡོ་རྗེའི་རིགས་དང་། དོན་ཡོད་ཞགས་པ་སོགས་པདྨའི་རིགས་དང་། རྗེ་བཙུན་རྣམ་པར་རྒྱལ་མ་སོགས་དེ་བཞིན་གཤེགས་པའི་རིགས་ཏེ་རིགས་གསུམ་དུ་འདུས་པས། རིགས་གསུམ་གྱི་ཆོ་ག་གང་བྱེད་པ་ལ་དབང་བའི་དབང་ལེགས་པར་ཐོབ་པ། བྱང་སེམས་ཀྱི་སྡོམ་པ་དང་སྔགས་ཀྱི་དམ་ཚིག་དང་ལྡན་ཞིང་། ཇི་ལྟར་བྱ་བའི་རིམ་པ་ལ་མཁས་པའི་སྒྲུབ་པ་པོས་བྱ་དགོས་སོ། །ཇི་ལྟར་བྱ་བའི་ཆོ་ག་ནི། དེ་བཞིན་གཤེགས་པའི་རིགས་བཅོམ་ལྡན་འདས་མ་གདུགས་དཀར་ཅན་ལ་མཚོན་ན། བཟླས་བརྗོད་ཀྱི་སྔོན་དུ་ཇི་ལྟར་བྱ་བ་ལ། ཐོག་མར་གནས་ཁང་དུ་ཇི་ལྟར་བྱ་བ་ནི།
ཐལ་མོ་བཀན་པ་ལས་མཛུབ་མོ་གཉིས་ཅུང་ཟད་བཀུག་པ་དེ་བཞིན་གཤེགས་པའི་རིགས་ཀྱི་དམ་ཚིག་གི་ཕྱག་རྒྱ་མགོ་ལ་བཞག་ནས། ༀ་ཏ་ཐཱ་ག་ཏ་ཨུདྦྷ་ཝ་ཡེ་སྭཱཧཱ། ཞེས་བརྗོད་ནས། ཕྱོགས་བཅུའི་སངས་རྒྱས་ཐམས་ཅད་ལ་དམིགས་ལ་ཐལ་མོ་སྦྱར་ཏེ། ༀ་སརྦྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་བཛྲ་པྲ་ཎ་མེ་ན་སརྦ་ཏ་ཐཱ་ག་ཏ་བཛྲ་པཱ་ད་བནྡ་ནཱཾ་ཀ་རོ་མི། ཞེས་ཕྱག་བྱའོ། །ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བྱང་ཆུབ་སྙིང་པོ་ལ་མཆིས་ཀྱི་བར་དུ་བདག་ཉིད་དུས་ཐམས་ཅད་དུ་ཡོང་ཡེ་འབུལ་ན། སངས་རྒྱས་དང་བྱང་ཆུབ་སེམས་དཔའ་ཆེན་པོ་རྣམས་ཀྱིས་བདག་བཞེས་སུ་གསོལ། བདག་ལ་དངོས་གྲུབ་བླ་ན་མེད་པ་སྩལ་ཏུ་གསོལ། ཞེས་ལུས་དབུལ། སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །བདག་དང་གཞན་དོན་
སྒྲུབ་སླད་དུ། །བདག་གིས་བྱང་ཆུབ་སེམས་བསྐྱེད་དོ། །ཕྱོགས་བཅུ་དག་ན་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་གསོན། །བདག་གིས་རྫོགས་པའི་བྱང་ཆུབ་ཕྱིར། །དེང་ནས་བྱང་ཆུབ་སེམས་བསྐྱེད་དོ། ཞེས་སྐྱབས་སུ་འགྲོ་བ་དང་བྱང་ཆུབ་ཏུ་སེམས་བསྐྱེད། ལག་པ་གཉིས་སོར་མོ་ཕན་ཚུན་བསྣོལ་ཏེ་ཁུ་ཚུར་བཅིངས་ལ་མཐེའུ་ཆུང་གཉིས་གཤིབས་ཏེ་བསྒྲེང་མཛུབ་མོ་རྩེ་མོ་སྦྱར་བའི་གློར་མཐེ་བོང་གཉིས་བཙུགས་པའི་ཕྱག་རྒྱ་དང་། ༀ་བཛྲ་ཀྲོ་དྷ་མ་ཧཱ་བཱ་ལཱ་ཧ་ན་ད་ཧ་པ་ཙ་བིདྷྭ་ན་ས་ཡ་ཨུཙྪུཥྨ་ཀྲོ་དྷ་ཧཱུཾ་ཕཊ། ཅེས་པ་ཁྲོ་བོ་མནོལ་བ་མེད་པའི་སྔགས་རྒྱས་བསྲུང་བར་བྱ་ཞིང་བཟའ་བཏུང་དང་བཤང་གཅིའི་ཚེའང་བསྲུང་བར་བྱའོ། །སྙིང་གར་ཟླ་བ་ལ་རྣམ་སྣང་གི་ངོ་བོ་མ་ཡིག་དང་། མགོ་བོ་ལ་མི་གཡོ་བའི་ངོ་བོ་ཧ་ཡིག་གཉིས་འབར་བའི་ཕྲེང་བ་འཁྲུག་པར་གྱུར་ པར་བསམ། ༀ་སྭ་བྷཱ་ཝ་ཤུདྡྷཿ སརྦ་དྷརྨཱཿ སྭ་བྷཱ་ཝ་ཤུདྡྷོ྅ཧཾ། ཆོས་ཐམས་ཅད་རང་བཞིན་གྱིས་དག་པར་གྱུར་ པར་མོས་པ་བྱའོ། །དེ་ནས་གནས་ཁང་ནས་ཕྱིར་བྱུང་སྟེ་སོ་ཤིང་བཅའ་བ་སོགས་དང་ལྷའི་ཁང་པ་སོགས་བྱི་དོར་བྱའོ། །སྔར་བཤད་པའི་དམ་རྒྱ་བཅིངས་ནས། ༀ་ཏ་ཐཱ་ག་ཏ་ཨུདྦྷ་བ་ཡེ་སྭཱ་ཧཱ། ཞེས་དང་། དེ་ནས་ཕྱི་རོལ་ཏུ་ཁྲུས་བྱས་ནས་སྒྲུབ་ཁང་དུ་འཇུག་པའི་ཚུལ་ནི། སྐྱེ་བོ་འདུ་བ་དང་། འཇིགས་པ་མེད་པའི་འཇུག་ངོགས་སུ་སོང་ནས་ལག་པ་གཉིས་ཀྱི་སོར་མོ་ཕྱི་རོལ་ཏུ་བསྣོལ་ཏེ་བཀུག་ནས་མཛུབ་མོ་གཉིས་གཤིབས་ཏེ་བསྒྲེང་མཐེ་བོང་གཉིས་དེའི་དྲུང་དུ་བཞག་པའི་ཕྱག་རྒྱས་ས་གཙང་མ་ལ་གཏུགས་ཏེ། ༀ་ནི་ཁ་ན་བ་སུ་དྷེ་སྭཱ་ཧཱ། ཞེས་བརྗོད་ལ། ས་བླངས་ཏེ་ཆ་གསུམ་དུ་བགོས་པ་གནས་གཙང་མར་བཞག་གོ །མཐེ་བོང་གིས་མཐེའུ་ཆུང་གི་སེན་མོ་མནན་ལ་སོར་མོ་ལྷག་མ་རྣམས་རྡོ་རྗེའི་མཚན་ཉིད་དུ་བྱས་ཏེ། བསྣོལ་ནས་དཔུང་བར་བཞག །ཡ་སོས་མས་མཆུ་མནན་ལ་ཁྲོ་བོའི་ལྟ་བས་བལྟ་ཞིང་།ན་མོ་རཏྣ་ཏྲ་ཡཱ་ཡ། ན་མཿ ཙཎྜ་བཛྲ་པཱ་ན་ཡེ། མ་ཧཱ་ཡཀྵ་སེ་ན་པ་ཏ་ཡེ། ན་མོ་བཛྲ་ཀྲོ་དྷཱ་ཡ། ཏཏྱ་ཐཱ། ༀ་ཧུ་ལུ་ཧུ་
ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ། ཅེས་བདུད་རྩི་ཐབ་སྦྱོར་གྱིས་རང་བསྲུང་། རྡོ་རྗེ་ཁུ་ཚུར་གཉིས་ནང་དུ་བཅིངས་ཏེ་མཛུབ་མོ་ཕྱུང་ནས་བསྒྲེང་ལ་མགོ་ནས་རྐང་བར་ཐུག་གི་བར་དུ་བྲབ་ཅིང་། ༀ་ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ། ཅེས་ལུས་ཀྱི་བགེགས་བསལ་ལོ། །ཐལ་མོ་བཀན་པ་ལས་མཐེའུ་ཆུང་གཉིས་བསྣོལ་བའི་བར་དུ་སྲིན་ལག་གཉིས་བཞག་གུང་མོ་གཉིས་གཤིབས་ཏེ་བསྒྲེང་དེའི་ཚིགས་གསུམ་བར་མཛུབ་མོ་བཀུག་སྟེ་མཐེ་བོང་གཉིས་སྦྱར་ནས་དབུས་སུ་བཞག་ལ། ༀ་བཛྲ་ཨགྣི་པྲ་ཏི་བ་ཏཱ་ཡེ་སྭཱ་ཧཱ། ཞེས་རྡོ་རྗེའི་གོ་བསྐོན། ཕྱག་རྒྱ་སྔ་མ་དེ་ཉིད་ལས་མཛུབ་མོ་གཉིས་བཀྱེད་ནས་རྡོ་རྗེའི་ཚུལ་དུ་བྱས་པ་གོ་ཆའི་ཕྱག་རྒྱ་དང་། ན་མོ་རཏྣ་ཏྲ་ཡཱ་ཡ། ༀ་ཁ་ཀི་ལྀ་ཧཱུྃ་ཕཊ། ཅེས་མགོ་བོ་དང་། དཔུང་མགོ་གཉིས་དང་སྙིང་ག་དང་། མགྲིན་པ་རྣམས་སུ་རེག་ལ་གོ་ཆ་བྱའོ། །གཡོན་པའི་སོར་མོ་དབུས་མ་གཉིས་མཐེ་བོང་གིས་མནན་ལ་མཛུབ་མོ་དང་མཐེའུ་ཆུང་གདུ་བུའི་ཚུལ་དུ་བྱས་ཏེ་སོར་མོ་དབུས་མའི་ཚིགས་དབུས་མར་གཟུག །གཡས་པའི་སོར་མོ་དབུས་མ་གསུམ་རྡོ་རྗེའི་ཚུལ་དུ་བྱས་ཏེ་རྐེད་པའི་ཕྱོགས་སུ་བཞག་པ་བགེགས་བསལ་བའི་ཕྱག་རྒྱ་དང་། ན་མོ་བཛྲ་ཡ་ཧཱུཾ། ཧ་ན་དྷུ་ན་མ་ཐ་བི་དྷྭ་ན་ས་ཡ་ཨུད་ས་ར་ཡ་ཕཊ། ཅེས་ཕྱག་རྒྱས་ས་དང་ཆུ་ལ་གཏུག་གོ །ན་མོ་རཏྣ་ཏྲ་ཡཱ་ཡ། ན་མཿ ཙཎྜ་བཛྲ་པཱ་ཎ་ཡེ། ༀ་ཧ་ན་ཧ་ན། བཛྲ་བཛྲ་ཎ་ཧ། ཞེས་པའི་སྔགས་འདི་ཆུ་ལ་གདབ་བོ། །གཡོན་པའི་མཐེ་བོས་མཐེའུ་ཆུང་གི་སེན་མོ་མནན་ལ་སོར་མོ་ལྷག་མ་རྣམས་རྡོ་རྗེའི་མཚན་ཉིད་དུ་བྱས་པའི་ཕྱག་རྒྱས་ཆུ་ལ་གཏུགས་ནས། ༀ་ཀཱི་ལི་ཀཱི་ལ་བཛྲ་ཧཱུཾ་ཕཊ། ཅེས་ཆུ་དེས་ས་ལ་བསང་གཏོར་བྱའོ། །ༀ་བཛྲ་ཧ་ར་ཧཱུཾ། ཞེས་ལན་བདུན་བསྔགས་པའི་སའི་ཆ་གཅིག་བླངས་ཏེ་ཆུའི་ནང་དུ་ལྟེ་བ་ནུབ་ཙམ་དུ་ཞུགས་
ནས་ཁྲུས་རས་དང་བཅས་པར་ཁྲུས་བྱས་ཏེ་དེའང་ས་ཕུང་པོས་ལུས་ཀྱི་ལྟེ་བ་མན་ཆད་བཀྲུ་བའོ། །དེ་ནས་སའི་ཆ་གཉིས་པས་ལག་པ་བཀྲུས་ནས་གཡས་ཀྱི་ཐལ་མོ་བཀན་པ་ལས་མཛུབ་མོ་མཐེ་བོའི་དྲུང་དུ་བཞག་ཅིང་མཐེ་བོང་ཡང་མཛུབ་མོའི་ཚིགས་དབུས་མར་བྱས་པའི་དབྱངས་ཅན་གྱི་ཕྱག་རྒྱ་དང་། ༀ་ཤྲུ་ཏི་སྨྲྀ་ཏི་དྷ་རྀ་ནི་ཧཱུྃ་ཕཊ། ཞེས་པས་ཉེ་རེག་གི་དོད་ཐུབ་བྱ་བའམ་ཡང་ན་འོག་ནས་འབྱུང་བ་ལྟར་ཉེ་རེག་བྱའོ། །ༀ་སུ་སི་ཏི་ཀ་རྀ་སྭཱ་ཧཱ། ཞེས་གཙུག་ཕུད་བཅིངས་ནས་བསྲུང་བར་བྱའོ། །དེ་ནས་སའི་ཆ་གསུམ་པ་བླངས་ཏེ། ༀ་བྷུ་ར་ཛ་ལ་ཧཱུཾ་ཕཊ། ཅེས་བསྔགས་ཤིང་གཡས་ནས་བསྐོར་ཅིང་ཉི་མ་ལ་བསྟན་ནས་ལུས་ཐམས་ཅད་ལ་བསྐུ་བར་བྱའོ། །གཡས་པའི་ཐལ་མོས་བཀན་པ་ལས་གུང་མོ་དང་སྲིན་ལག་བཀུག་སྟེ་མཐེ་བོའི་རྩེ་མོས་མནན་མཛུབ་མོ་དང་མཐེའུ་ཆུང་ཅུང་ཟད་བཀུག་པ་ཆུ་དཀྲུག་པའི་ཕྱག་རྒྱ་དང་།ན་མོ་རཏྣ་ཏྲ་ཡཱ་ཡ། ན་མཿ ཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷ་ཡ། དཾཥྚོ་ཏ་ཀ་ཊ་བྷཻ་ར་བཱ་ཡ། ཏཏྱ་ཐཱ། ༀ་ཨ་མྲྀ་ཏ་ཀུཏྜ་ལི། ཁ་ཁ། ཁཱ་ཧི་ཁཱ་ཧི། ཏིཥྛ་ཏཥྛ། བནྡྷ་བནྡྷ། ཧ་ན་ཧ་ན། གརྫ་གརྫ། པི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣཾཱ་བི་ན་ཡ་ཀཱ་ན། མ་ཧཱ་ག་ཎ་པ་ཏི། ཛཱི་བི་ཏཱནྟ་ཀ་རཱ་ཡ་སྭཱ་ཧཱ། ཞེས་ཆུ་དཀྲུགས་ནས། ༀ་ར་ཏེ་ར་ཏེ་བུདྡྷ་ཡ་སྭཱ་ཧཱ། ཞེས་ཆུ་ཁྱོར་བ་གསུམ་དཀོན་མཆོག་གསུམ་ལ་དབུལ་ལོ། །ༀ་ཨ་མྲྀ་ཏ་སྭཱ་ཧཱ། ཞེས་རང་གི་མགོ་བོར་ཆུ་སྙིམ་པ་གསུམ་བླུག་ལ་ལག་པ་བཀྲུས་ཏེ་སྔགས་དེ་ཉིད་ཀྱིས་ཆུ་སྙིམ་པ་གསུམ་གྱིས་བདག་ཉིད་ལ་དབང་བསྐུར་བར་བྱའོ། །རྗེ་བཙུན་མ་གདུགས་དཀར་ཅན་གྱི་ལྷ་ཚོགས་སྤྱན་དྲངས་ཏེ་པདྨ་ལ་བཞུགས་པར་བསམ། ༀ་སརྦ་ཏ་ཐཱ་ག་ཏ་ཨ་མྲྀ་ཏེ་སྭཱ་ཧཱ། ཞེས་སྐུ་བསིལ་ལོ། །
ༀ་སརྦ་ཏ་ཐཱ་ག་ཏ་ཨུཥྞཱི་ཥ་སི་ཏཱ་ཏ་བ་ཏྲེ་ཧཱུཾ་ཕཊ་སྭཱ་ཧཱ། ཞེས་ཉེར་གཅིག་བཟླའོ། །དེ་ནས་ལྷའི་ཁང་པའི་དྲུང་དུ་ཕྱིན་པ་དང་རྐང་པ་བཀྲུས་ནས་ཤར་རམ་བྱང་དུ་ཁ་བལྟས་ནས་ཉེ་རེག་བྱ་སྟེ་དེའི་ཚུལ་ནི། ཙོག་ཙོག་བུར་འདུག་ཅིང་ངག་བཅད་ལག་པ་གཉིས་པུས་མོའི་ནང་དུ་འོང་བར་བྱ། གཡས་པ་གན་རྐྱལ་དུ་གནས་པའི་གུང་མོ་དང་སྲིན་ལག་ཅུང་ཟད་བཀུག་ལ་ཁ་ལ་ཕྱོགས་པར་བཟུང་ངོ་། །ཟེའུ་འབྲུའི་ཆས་ཁ་ལ་ལན་མང་དུ་བྱབ་ཅིང་ལན་གཉིས་གསུམ་དུ་རྣ་བུག་གཉིས་དང་། མིག་གཉིས་དང་། སྣ་དང་། ཁ་དང་། ལག་པ་དག་དང་། ལྟེ་བ་དང་། མགོ་ལ་རེག་ནས་ཆུ་ཧུབ་གསུམ་འཐུངས་ཏེ། མཆུ་ལ་ལན་གཉིས་ཀྱི་ཕྱི་བར་བྱའོ། །དེའི་སྡོམ་ནི། ཁ་རྣ་མིག་སྣ་ཁ་ལག་སྟེ། །མགོ་ཞེས་པའོ། །དེ་ནས་གནས་སུ་ཞུགས་ཏེ་ལྷ་རྣམས་མངོན་སུམ་དུ་དམིགས་ནས་སྔར་བཤད་པའི། ༀ་སརྦ་ཏ་ཐཱ་ག་ཏ་ཀཱ་ཡ། སོགས་ཀྱིས་ཕྱག་བྱས་ནས། ༀ་བི་ར་ཛ་བི་ར་ཛ། མ་ཧཱ་བཛྲི་ས་ཏ་ས་ཏ། ས་ར་ཏེ་ས་ར་ཏེ། ཏྲ་ཡ་ཏྲ་ཡི། བིརྡྷ་མ་ནི་སཾ་བྷན་ཛ་ནི་ཏ་ར་མ་ཏི་སིདྡྷི་ཨ་གྲེ་ཏཾ་སྭཱ་ཧཱ། ཞེས་དམ་ཚིག་ལ་འཇུག་པ་འདི་བཟླས་པར་བྱའོ། །ཆས་སུ་ཞུགས་ཏེ་སྟན་ལ་འཁོད་ནས་མཆོད་པ་བྱིན་གྱིས་བརླབ་པ་ནི། སྤོས་ཆུ་ལག་མཐིལ་དུ་བླུག་ལ་དེ་བཞིན་གཤེགས་པའི་རིགས་ཀྱི་སྙིང་པོ། ཛི་ན་ཛིཀ །ཅེས་པ་འདི་ལན་གསུམ་བཟླས་ལ་རང་གི་སྤྱི་བོར་བསང་གཏོར་བྱས་ཏེ་འབགས་པའི་སྐྱོན་ལ་སོགས་པ་བསལ་བར་བྱའོ། །ན་མོ་རཏྣ་ཏྲ་ཡཱ་ཡ། ཞེས་པ་ནས། ཧ་ན་ཧ་ན་ཨ་མྲྀ་ཏེ་ཧཱུྃ་ཕཊ། ཞེས་པ་སྔར་བཤད་པའི་བདུད་རྩི་ཐབ་སྦྱོར་གྱི་སྔགས་ཀྱིས་ཀུ་ཤ་ལ་སོགས་པའི་གདན་ལ་བསང་གཏོར་བྱས་ནས་གདན་དེ་ལ་བཀྲ་ཤིས་སམ་པདྨའམ་རྡོ་རྗེ་སྐྱིལ་ཀྲུང་གང་རུང་གིས་འདུག་པར་བྱའོ། །བུ་མོས་བཀལ་པའི་སྐུད་པ་གསུམ་ལ་སོགས་པ་གྲངས་
མི་མཉམ་པ་སྒྲིལ་ནས་མདུད་པ་གྲངས་མི་མཉམ་པ་བོར་བའི་དབུས་སུ་པོ་དེ་ཙེ་ལ་སོགས་པ་དེ་བཞིན་གཤེགས་པའི་རིགས་ཀྱི་ཕྲེང་རྡོག་གཅིག་བཏགས་པ་སྤོས་ཀྱིས་བྱུགས་པ་ལ། ༀ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནི་སརྦ་ཨརྠ་སཱ་དྷ་ནི་སྭཱ་ཧཱ། ཞེས་དེ་བཞིན་གཤེགས་པའི་རིགས་ཀྱི་གདུ་བུའི་རིག་སྔགས་འདི་བརྒྱ་བཟླས་པའི་གདུ་བུ་ལག་པ་གཡས་པའི་མཁྲིག་མ་ལ་བཅིང་བར་བྱའོ། །དེ་ནས་ཀུ་ཤའི་བསང་བྱེད། ཛི་ན་ཛིཀ །ཅེས་བརྗོད་ཅིང་། སྲིན་ལག་གཡས་པ་ལ་གདགས་སོ། །དར་རམ་རས་དམར་པོ་ལ་བྱས་པའི་ཟེའུ་ཁ་སྟེ་ཐོད་ལ། ༀ་རཀྵ་རཀྵ་མ་ན་སརྦ་བུདྡྷ་ཨ་དྷིཥྛ་ན་ཨཏྨ་ཙི་བར་སྭཱ་ཧཱ། ཞེས་པ་བཏབ་ལ་མགོ་ལ་བཅིང་། གོས་ལའང་སྔགས་དེ་ཉིད་བཏབ་ལ་གྱོན་ནོ། །ༀ་སུ་སི་ཏི་ཀ་རི་སྭཱ་ཧཱ། ཞེས་པས་སྔར་བཞིན་གཙུག་ཏོར་བཅིང་ངོ་། །སངས་རྒྱས་ཆོས་དང་ཚོགས་མཆོག་ལ། །ཞེས་པ་ནས། དེང་ནས་བྱང་ཆུབ་སེམས་བསྐྱེད་དོ། །ཞེས་སྔར་བཤད་པ་བཞིན་སྐྱབས་སུ་འགྲོ་བ་དང་སེམས་བསྐྱེད་པ་བྱའོ། །སྔར་བཤད་པའི་བདུད་རྩི་ཐབ་སྦྱོར་གྱི་སྔགས་སམ་ཡང་ན།ༀ་ཏྲཾ་བནྡྷ་སྭཱ་ཧཱ། ཞེས་པ་བདེ་བཞིན་གཤེགས་པའི་རིགས་ཀྱི་ལས་ཐམས་ཅད་དང་། ཛི་ན་ཛིཀ །ཅེས་པ་བཟླས་པའི་སྤོས་ཆུ་འཐོར་ཡབ་ཀྱིས་གཏོར་ཏེ་མཆོད་རྫས་ཀྱི་བགེགས་བསལ་བར་བྱའོ། །སྔར་བཤད་པའི་བགེགས་བསལ་པའི་ཕྱག་རྒྱ་ལས་གཡོན་པའི་གུང་མོ་གཡས་པའི་སོར་མོ་དབུས་མ་གསུམ་རྡོ་རྗེའི་ཚུལ་དུ་བྱས་པས་བཟུང་བ་གཟི་བྱིན་བསྐྱེད་པའི་ཕྱག་རྒྱས་མེ་ཏོག་ལ་སོགས་པའི་མཆོད་རྫས་རྣམས་ཀྱི་སྟེང་དུ་བྲིམ་ཞིང་། ༀ་ཏེ་ཛ་ཏེ་ཛཿ ས་ནི་སིདྡྷི་སཱ་དྷ་ཡ་ཧཱུཾ་ཕཊ། ཅེས་གཟི་བྱིན་བསྐྱེད་པའི་སྔགས་བཟླས་པས། མཆོད་པ་རྣམས་ཕུལ་དུ་བྱུང་བའི་ལྷ་རྫས་སུ་གྱུར་པར་བསམ་མོ། །ན་མོ་རཏྣ་ཏྲ་ཡཱ་ཡ། ཞེས་པ་ནས། ཨ་མྲྀ་ཏེ་ཧཱུྃ་ཕཊ།
ཅེས་པ་སྔར་བཤད་པའི་བདུད་རྩི་ཐབ་སྦྱོར་གྱི་སྔགས་དང་། ཛི་ན་ཛིཀ །ཅེས་པའི་སྙིང་པོས་མཆོད་པ་རྣམས་བྱིན་གྱིས་བརླབ་པར་བྱའོ། །བདག་དང་གནས་ལ་སྲུང་བ་བྱ་བ་ནི། ༀ་ཧ་ན་ཧ་ན་ཨ་མྲྀ་ཏེ་ཧཱུྃ་ཕཊ། ཅེས་པ་སྔར་བཤད་པའི་ལུས་ཀྱི་བགེགས་བསལ་བའི་སྔགས་འདི་དང་ཕྱག་རྒྱས་བདག་ཉིད་བསྲུངས་ནས་རིགས་ཀྱི་ལས་ཐམས་ཅད་པའི་སྔགས་སམ། ཡང་ན་སྔར་བཤད་པའི། ན་མོ་རཏྣ་ཏྲ་ཡཱ་ཡ། ཞེས་པ་ནས། ཨ་མྲྀ་ཏེ་ཧཱུྃ་ཕཊ། ཅེས་པ་བདུད་རྩི་ཐབ་སྦྱོར་གྱི་སྔགས་སྤོས་ཆུ་ལ་བཟླས་ནས་བདག་ལ་གཏོར་ལ་བགེགས་བསལ་བར་བྱའོ། ། ༀ་ཀཱི་ལི་ཀཱི་ལ་བཛྲི་བཛྲི་བྷུར་བནྡྷ་བནྡྷ་ཧཱུཾ་ཕཊ། ཅེས་སྤོས་ཆུ་ལ་ལན་བདུན་བཟླས་ཏེ་ཕྱོགས་ཀུན་ཏུ་བསང་གཏོར་བྱའོ། །ལག་པ་གཉིས་ཀྱི་གུང་མོ་དང་སྲིན་ལག་རྣམས་ཕན་ཚུན་གདུ་བུ་ལྟར་བྱས་པ་སོ་སོའི་དྲུང་དུ་རྩེ་མོ་སྦྱར་ཏེ་མཐེའུ་ཆུང་དང་མཛུབ་མོ་གཉིས་གཤིབས་ཏེ་བསྒྲེང་། མཐེ་བོང་ཕུར་བུའི་ཚུལ་དུ་བྱས་ཏེ་ས་ལ་བཙུགས་པ་ཕུར་བུའི་ཕྱག་རྒྱ་དང་། ༀ་ཀཱི་ལི་ཀཱི་ལ་བཛྲི་བཛྲི་བྷུར་བནྡྷ་བནྡྷ་ཧཱུཾ་ཕཊ། ཅེས་བརྗོད་པས། བགེགས་རྣམས་ལ་ཁྲོ་བོ་རྡོ་རྗེ་ཕུར་བུས་བཏབ་པས་གཡོ་འགུལ་མེད་པར་གྱུར་ པར་བསམ་མོ། །ༀ་སུ་སིདྡྷི་ཀ་ར་ཛྭ་ལི་ཏ། ཨ་ནནྟ་མུརྟ་ཡེ་ཛྭ་ལ་ཛྭ་ལ། བནྡྷ་བནྡྷ། ཧ་ན་ཧ་ན་ཧཱུཾ་ཕཊ། ཅེས་པ་རིགས་གསུམ་སྤྱིའི་སྔགས་དང་། ༀ་ཛྭ་ལ་ཧཱུཾ། ཞེས་པ་དེ་བཞིན་གཤེགས་པའི་རིགས་ཀྱི་སྔགས་བཟླས་པའི་བདུག་པས་བདུག་སྟེ། སྟེང་གི་ལྷའི་གདོན་རྣམས་བཅིངས་པར་གྱུར་པར་བསམ། ཛི་ན་ཛི་ཀ །ཅེས་བཟླས་པའི་སྤོས་ཆུས་ཁོ་ར་ཁོར་ཡུག་ཏུ་གཏོར། བྷྲུཾ་ༀ་ཨ་མྲྀ་ཏོ་དྡྷ་ཝ་ཨུ་དྡྷ་ཝ་ཧཱུྃ་ཕཊ། ན་མོ་རཏྣ་ཏྲ་ཡཱ་ཡ། ན་མཿ ཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ན་པ་ཏ་ཡེ། ༀ་
སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུྃ། གྲྀཧྞ་པ་ཡ་གྲྀཧྞ་པ་ཡ་ཧཱུྃ། ཨཱ་ན་ཡ་ཧོ་བྷ་ག་ཝན་བིདྱཱ་རཱ་ཛ་ཧཱུཾ་ཕཊ་སྭཱ་ཧཱ། ཞེས་པ་རིགས་གསུམ་གྱི་རིག་པའི་རྒྱལ་པོའི་སྔགས་བརྗོད་པས། ཕྱོགས་ཀྱི་བགེགས་ཐམས་ཅད་བཅིངས་པར་གྱུར་པར་བསམ་མོ། །སྔར་གྱི་ཕུར་བུའི་ཕྱག་རྒྱ་ལས་མཐེ་བོང་གཉིས་གྱེན་དུ་བསྒྲེང་བ་ར་བའི་ཕྱག་རྒྱ་དང་། ན་མོ་རཏྣ་ཏྲ་ཡཱ་ཡ། ན་མཿ ཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ན་པ་ཏ་ཡེ། ཏཏྱ་ཐཱ། ༀ་ས་ར་ས་ར། བཛྲ་པྲ་ཀ་ར་ཧཱུཾ་ཕཊ། ཅེས་བརྗོད་པས། རྡོ་རྗེའི་རྭ་བས་བར་མཚམས་མེད་པར་བསྐོར་བར་གྱུར་པར་བསམ་མོ། །ར་བའི་ཕྱག་རྒྱ་ཉིད་ཁ་ཐུར་དུ་བསྟན་ནས་བསྐོར་ལ། ན་མོ་རཏྣ་ཏྲ་ཡཱ་ཡ། ན་མཿ ཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ན་པ་ཏ་ཡེ། ༀ་བྷི་སྥུ་རཀྵ་བཛྲ་པཱ་ཎི་ཧཱུཾ་ཕཊ། ཅེས་པས། རྡོ་རྗེ་ར་བའི་སྟེང་དུ་རྡོ་རྗེའི་གུར་དུ་གྱུར་པར་བསམ་མོ། ། ན་མོ་རཏྣ་དྲ་ཡཱ་ཡ། ཞེས་པ་ནས། ཨ་མྲྀ་ཏེ་ཧཱུྃ་ཕཊ། ཅེས་སྔར་བཤད་པའི་བདུད་རྩི་ཐབ་སྦྱོར་གྱི་སྔགས་དང་སྔར་གྱི་ཕུར་བུའི་ཕྱག་རྒྱ་བཅས་ལ། ༀ་ཀཱི་ལི་ཀཱི་ལ་བཛྲི་བཛྲི་བྷུར་བནྡྷ་བནྡྷ་ཧཱུཾ་ཕཊ། ཅེས་པས། ར་བ་ལ་སོགས་པ་རྣམས་བྱིན་གྱིས་བརླབ་པར་བྱའོ། །ཁུ་ཚུར་བཅིངས་ཏེ་མཐེ་བོས་སེན་མོ་རྣམས་མནན་མཛུབ་མོ་ཕྱུང་ལ། དབུས་ནས་བསྐོར་ཞིང་། ན་མཿ ས་མནྟ་བཛྲ་ཎཾ། ༀ་ཏ་ར་ཏ་ར། ཏུ་རུ་ཏུ་རུ། མ་ཊ་མ་ཊ། བྷནྡྷ་བྷནྡྷ། སརྦ་ཏྲ་ཨ་པྲ་ཏི་ཧ་ཏེ། ས་སི་མེ་ས་མ་བནྡྷ་ཀུ་རུ་ཀུ་རུ། ཏ་ར་ཏ་ར། ས་མནྟ་བཛྲེ་ས་མནྟ་བཛྲེ། ཀུ་རུ་ཨ་མ་ལེ་ཀུ་རུ་ཎ། མ་ཡེ་ཏུ་ཏ་ཡེ་ཏུ་ཏ་ཡེ། པ་ར་པ་ར། ཀ་ར་ཀ་ར། སུ་མི་མ་ས་མནྟ་བིདྷྭན་ས་ཡེ། ཛྭ་ལ་ཡ་སྭཱ་ཧཱ། ཞེས་བརྗོད་པས།
རྡོ་རྗེ་ར་བའི་ཕྱོགས་ཐམས་ཅད་དུ་མེ་དཔུང་འབར་བས་ཁྱབ་པར་གྱུར་པར་བསམས་ལ་མཚམས་བཅིང་ངོ་། །བཟླས་བརྗོད་སོགས་ཀྱི་དངོས་གཞི་ལ་ཇི་ལྟར་བྱ་བ་ནི། ༀ་སྭ་བྷཱ་ཝ་ཤུདྡྷཱཿ སརྦ་དྷརྨཱཿ སྭ་བྷཱ་ཝ་ཤདྡྷོ྅ཧཾ། དེ་ལྟར་བདག་གི་དེ་ཁོ་ན་ཉིད་དོན་དམ་པར་སྤྲོས་པ་ཐམས་ཅད་དང་བྲལ་བ་ཇི་ལྟར་ཡིན་པ་དེ་བཞིན་དུ་ལྷའི་དེ་ཁོ་ན་ཉིད་ཀྱང་དེ་བཞིན་ཡིན་པས། དེ་གཉིས་ཆུ་དང་འོ་མ་འདྲེས་པ་བཞིན་དུ་རྣམ་པར་མི་རྟོག་པའི་སྣང་བའི་སྒོ་དེ་ཉིད་དུ་བདག་དང་ལྷའི་དེ་ཁོ་ན་ཉིད་དབྱེར་མི་ཕྱེད་པར་གྱུར། སྟོང་པ་ཉིད་བསྒོམ་པ་ནི་ལྷ་དྲུག་གི་དང་པོ་དོན་དམ་པའི་ལྷའོ། །སྟོང་པའི་ངང་ལས་ༀ་སརྦ་ཏ་ཐཱ་ག་ཏ་ཨུཥྞཱི་ཥ་སི་ཏཱ་ཏ་པ་ཏྲེ་ཧཱུཾ་ཕཊ་སྭཱ་ཧཱ། ཞེས་པའི་སྔགས་ཀྱི་གདངས་ཀྱི་རྣམ་པར་ནམ་མཁའ་ལ་གྲག་པར་གྱུར་པར་བསམ་པ་ནི་གཉིས་པ་གདངས་སམ་སྒྲའི་ལྷའོ། །བདག་དང་ལྷའི་དེ་ཁོ་ན་ཉིད་དབྱེར་མི་ཕྱེད་པའི་རྣམ་པ་ཅན་གྱི་རང་གི་སེམས་ཟླ་བའི་དཀྱིལ་འཁོར་དུ་གྱུར་པའི་སྟེང་དུ་སྔགས་ཀྱི་གདངས་ཀྱི་རྣམ་པར་ནམ་མཁའ་ལ་གྲག་པ་དེ་ཤིན་ཏུ་དག་པའི་དངུལ་ཆུ་གསེར་གྱི་བྱེ་མ་ལ་ཞེན་པ་ལྟར། ཡིག་འབྲུ་བྲིས་པའི་རྣམ་པ་ཅན་དུ་འཁོད་པར་བསམ་པ་ནི་གསུམ་པ་ཡི་གེའི་ལྷའོ། །ཡོངས་སུ་གྱུར་པ་ལས། གདུགས་དཀར་པོའི་ཏོག་ལ་ༀ་སརྦ་ཏ་ཐཱ་ཐ་ཏ་ཨུཥྞཱི་ཥ་སི་ཏཱ་ཏ་པ་ཏྲེ་ཧཱུཾ་ཕཊ་སྭཱ་ཧཱ། ཞེས་པས་མཚན་པར་གྱུར། ཟླ་བ་དང་ཕྱག་མཚན་སྔགས་དང་བཅས་པ་ལས་འོད་ཟེར་སྣ་ཚོགས་བྱུང་བའི་རྩེ་མོ་ལས་གདུགས་དཀར་མོ་ཅན་གྱི་ལྷའི་གཟུགས་དཔག་ཏུ་མེད་པ་བྱུང་ནས་ནམ་མཁའི་
དབྱིངས་ཐམས་ཅད་ཁྱབ་པར་བྱས། རྒྱལ་བ་ཐམས་ཅད་ལ་མཆོད་པའི་སྤྲིན་ཆེན་པོ་སྤྲུལ་པས་ལེགས་པར་མཆོད། གཞན་ཡང་སྤྲིན་ཆེན་པོ་སྤྲུལ་པ་ལས་བདུད་རྩིའི་ཆར་རྒྱུན་བབ་པས་དམྱལ་བ་ལ་སོགས་པའི་འགྲོ་བ་ཐམས་ཅད་ཀྱི་སྡུག་བསྔལ་གྱི་མེ་རྣམས་ཞི་ཞིང་དེ་རྣམས་ཚིམ་པར་བྱས། ལྷའི་སྐུ་དང་བཅས་པའི་འོད་ཟེར་སླར་ལོག་ནས་རང་གི་སེམས་ཟླ་པའི་དཀྱིལ་འཁོར་དང་ཕྱག་མཚན་སྔགས་དང་བཅས་པ་ལ་ཞུགས་པ་ལས། རང་ཉིད་བཅོམ་ལྡན་འདས་མ་གདུགས་དཀར་པོ་ཅན་སྐུ་མདོག་དཀར་མོ། རྡོ་རྗེ་གཙུག་ཏོར་ཕྱིར་བཟློག་པ་ཆེན་མོ། སྤྲུལ་པའི་དབུ་སྟོང་མངའ་བ་ཕྱག་སྟོང་མངའ་བ། སྤྱན་བྱེ་བ་བརྒྱ་སྟོང་མངའ་བ། མི་ཕྱེད་འབར་བའི་མཚན་རྟགས་ཅན་རྡོ་རྗེ་ཡངས་པ་ཆེན་མོ། ས་གསུམ་གྱི་དཀྱིལ་འཁོར་ལ་མངའ་མཛད་མ། རྩ་བའི་ཕྱག་དང་པོ་གཉིས་ཀྱིས་གདུགས་དཀར་པོའི་ཡུ་བ་ཐུགས་ཀར་འཛིན་ཅིང་། ཕྱག་ལྷག་མ་རྣམས་ཀྱིས་མཚོན་ཆ་རབ་ཏུ་འབར་བ་སྣ་ཚོགས་པ་འཛིན་པ། དར་གྱི་སྟོད་གཡོགས་དང་སྨད་གཡོགས་ཅན་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་ཅིང་ཞབས་རྡོ་རྗེའི་སྐྱིལ་ཀྲུང་གིས་བཞུགས་པའི་ལྷར་བསྒོམ་ཞིང་རང་དང་ཐ་མི་དད་པའི་ང་རྒྱལ་བྱ་བ་ནི་བཞི་པ་གཟུགས་ཀྱི་ལྷའོ། །དེའི་སྤྱི་བོར་ༀ་ལས་འཁོར་ལོ་དཀར་པོའི་ལྟེ་བར་ༀ་གྱིས་མཚན་པ། མགྲིན་པར་ཨཱཿ ལས་པདྨ་དམར་པོའི་ལྟེ་བར་ཨཱཿ ས་མཚན་པ། ཐུགས་ཀར་ཧཱུཾ་ལས་རྡོ་རྗེ་སྔོན་པོའི་ལྟེ་བར་ཧཱུཾ་གིས་མཚན་པ། སྔར་བཤད་པའི་དེ་བཞིན་གཤེགས་པའི་རིགས་ཀྱི་དམ་རྒྱ་བཅིངས་ལ།
ༀ་ཏ་ཐཱ་ག་ཏ་ཨུདྦྷ་ཝ་ཡེ་སྭཱ་ཧཱ། ཞེས་བརྗོད་པས་ཐུགས་ཀ་དང་སྨིན་མཚམས་དང་མགྲིན་པ་དང་དཔུང་མགོ་རྣམས་སུ་རེག་ལ་བྱིན་གྱིས་བརླབ་པ་ནི་ལྔ་པ་ཕྱག་རྒྱའི་ལྷའོ། །དེ་ལྟར་བསྐྱེད་ཟིན་པའི་ལྷ་དེ་ཉིད་ལ་དམིགས་ནས་གསལ་འདེབས་པ་སོགས་ཀྱི་དཔྱད་སྒོམ་དང་སེམས་རྩེ་གཅིག་པའི་འཇོག་སྒོམ་བྱེད་པ་ནི་དྲུག་པ་མཚན་མའི་ལྷའོ། །དེ་ལྟར་བྱ་སྤྱོད་ཀྱི་སྐབས་སུ་ལྷ་དྲུག་སྒོམ་དགོས་པར་རྣམ་འཇོམས་ཀྱི་རྒྱུད་རྒྱས་པར་གསལ་བར་གསུངས་པ་སློབ་དཔོན་སངས་རྒྱས་གསང་བའི་རྣམ་འཇོམས་ཀྱི་འགྲེལ་པ་ལས། དང་པོར་ཁྲུས་བྱས་རྣལ་འབྱོར་པས། །རྡོ་རྗེ་གདན་ལ་གནས་ནས་ནི། །མཆོད་དང་གསོལ་བས་ལྷ་དྲུག་བསྒོམ། །སྟོང་པ་ཡི་གེ་སྒྲ་གཟུགས་དང་། །ཕྱག་རྒྱ་མཚན་མ་དྲུག་ཡིན་ཏེ། ཞེས་དྲངས་ཤིང་སངས་རྒྱས་དང་བྱང་ཆུབ་སེམས་དཔའ་ཞུགས་པ་སྟོང་པ་ཉིད་ལ་སོགས་པའི་བྱང་ཆུབ་པ་དྲུག་གིས་བདག་ཕྱག་ན་རྡོ་རྗེར་བྱ་བ་དང་། ཞེས་དང་། བྱ་རྒྱུད་བསམ་གཏན་ཕྱི་མ་ལས་ཀྱང་། བདག་ཉིད་འདི་འདྲར་བྱས་ནས་ནི། །སྔགས་ཀྱི་རྣམ་པར་ཤེས་པ་བསྒོམ། ཞེས་པའི་འགྲེལ་པར། སྔགས་ཀྱི་རྣམ་པར་ཤེས་པ་ནི་གསང་སྔགས་རྣམ་པ་དྲུག་ཅེས་གསུངས་ལ་དེའང་ལྷ་དྲུག་ཡིན་ནོ། །ཡང་འགྲེལ་པ་དེ་ཉིད་ལས། འདི་ནི་རེ་ཞིག་སྤྱིའི་གསང་སྔགས་ཀྱི་རྣམ་པར་ཤེས་པ་སྒོམ་པའི་རིམ་པའོ། །གང་ཁ་ཅིག་ཏུ་རྣམ་པ་གཞན་དུ་གསུངས་པ་དེ་དག་ཏུའང་དེ་བཞིན་ཏུ་སྦྱར་བར་བྱའོ། ཞེས་བྱ་རྒྱུད་པའི་ལྷའི་རྣལ་འབྱོར་གྱི་བསྐྱེད་ཆོག་འདི་དང་འདྲ་མི་འདྲ་ཐམས་ཅད་ལ་སྦྱོར་བར་བཞེད་དོ། །དེ་དག་གིས་ནི་བྱ་རྒྱུད་ལ་རང་ཉིད་ལྷར་སྒོམ་པ་མེད་ཅེས་པའང་ཁེགས་སོ། །དེ་ནས་ཆུ་གཉིས་ཉེར་སྤྱོད་ལྔ་རོལ་མོ་དང་བཅས་པ་འོག་ནས་འབྱུང་བ་ལྟར་སྔགས་དང་ཕྱག་རྒྱ་དང་བཅས་པས་དབུལ་བར་བྱའོ། །བསྟོད་པ་ནི། རྒྱལ་བ་
ཀུན་གྱི་མཚན་མཆོག་གཙུག་ཏོར་ནས། །ལེགས་པར་བྱུང་བའི་རྨད་བྱུང་ལྷ་མོ་ནི། །གཞན་གྱིས་མི་ཐུབ་གཙུག་ཏོར་གདུགས་དཀར་ཞེས། །ཡོངས་སུ་གྲགས་པ་དེ་ལ་ཕྱག་འཚལ་ལོ། །སྤྲུལ་པའི་དབུ་དང་ཕྱག་ནི་སྟོང་མངའ་ཞིང་། །བྱེ་བ་བརྒྱ་སྟོང་སྤྱན་ལྡན་དཔའ་མོ་གང་། །ཕས་རྒོལ་འཇོམས་ལ་ཐོགས་མེད་མཐུན་ལྡན་པའི། །མི་ཕྱེད་འབར་བའི་རྟགས་འཆང་དེ་ལ་འདུད། ཅེས་པས་བསྟོད། ཡེ་ཤེས་པ་གཞུག་པ་དང་དབང་བསྐུར་ཞིང་རྒྱས་གདབ་པ་སོགས་པཎྜི་ཏ་གཞན་གྱིས་གསུངས་པ་ལྟར་བྱས་ནའང་རུང་ལ། སློབ་དཔོན་སངས་རྒྱས་གསང་བ་སོགས་ཀྱིས་མ་བཤད་པ་ལྟར་ནའང་འགལ་བ་མེད་ཅེས་གསུང་ངོ་། །མདུན་དུ་ཡེ་ཤེས་བ་སྤྱན་དྲངས་ཏེ་མཆོད་པ་སོགས་ཀྱི་ཚུལ་ལ་རྟེན་བསྐྱེད་པ་ནི། རང་གི་མདུན་དུ། བྲིས་སྐུ་ལ་སོགས་པ་གང་དུ་བཀྲམ་པའི་ཕྱོགས་སུ་དམིགས་ལ། རིན་པོ་ཆེ་དུ་མ་ལས་བྱས་པའི་ས་གཞི་གསེར་གྱི་བྱེ་མ་བརྡལ་བར་གྱུར་ པར་བསམ། ༀ་ཙ་ལ་བཱི་ཧཱུཾ་སྭཱ་ཧཱ། ཞེས་བརྗོད་པས་བྱིན་གྱིས་བརླབ། དེའི་སྟེང་དུ་འོ་མའི་རྒྱ་མཚོ་ཆེན་པོ་ཉ་ལྕིབས་ལ་སོགས་པའི་སྐྱོན་དང་བྲལ་བ་པདྨ་དང་ཨུཏྤལ་ལ་སོགས་པའི་མེ་ཏོག་གིས་བརྒྱན་པ། རིན་པོ་ཆེའི་བྱའི་ཚོགས་མང་བོ་ལྡིང་བར་གྱུར། ༀ་བི་ན་ལ་བྷ་ཧ་ཧཱུཾ། ཞེས་པས་བྱིན་གྱིས་བརླབ།དེའི་དབུས་སུ་རི་རབ་གྲུ་བཞི་པ་ངོས་བཞི་ན་གསེར་དང་དངུལ་དང་ཨིནྡྲ་ནཱི་ལ་དང་སྤུར་ལོང་ལས་བྱས་པའི་ཐེམ་སྐས་ཀྱི་ཕྲེང་བས་བརྒྱན་པ། མཐའ་ཐོག་ཐག་དཔག་བསམ་གྱི་ཤིང་ལེགས་པར་འཁྲུངས་པ་ལ་རྣམ་པར་རྒྱལ་བའི་བ་དན་སྟོང་འཕུར་བས་བརྒྱན་པ། དེའི་སྟེང་དུ་
༼མ་ཚོང་མེད།༽པདྨའི་སྡོང་པོ་རིན་པོ་ཆེ་དུ་མས་བརྒྱན་པའི་རིན་པོ་ཆེ་སྣ་ཚོགས་ཀྱི་འདབ་མ་ཅན། གསེར་གྱི་ཟེ་བ་དང་སྤུར་ལོང་གི་ཟེའུ་འབྲུ་དང་ལྡན་པ། སྙིང་པོའི་ཐོག་ལ་གསེར་དངུལ་གྱི་རི་མོས་བསྐོར་བ། དཔག་ཚད་དུ་མའི་ཁྱོན་ཅན་རི་རབ་ཀྱི་དབུས་བརྟོལ་ནས་བྱུང་བའི་ལྟེ་བར་བྷྲུཾ་ལས་བྱུང་བའི་གཞལ་ཡས་ཁང་གྲུ་བཞི་སྒོ་བཞི་པ། ཕྱི་ནས་རིམ་པ་བཞིན་སྔོ་སེར་དམར་ལྗང་དཀར་པའི་རྩིག་པ་རིམ་པ་ལྔ་དང་ལྡན་པའི་རིན་པོ་ཆེའི་རྩིག་པས་བསྐོར་པའི་སྟེང་ན། རིན་པོ་ཆེའི་ཕ་གུ་གཞི་དམར་པོ་ལ་རིན་པོ་ཆེ་ཟུར་གསུམ་དང་གྲུ་བཞི་ལ་སོགས་པས་སྤྲས་པ། དེའི་སྟེང་ན་གནས་པའི་གསེར་གྱི་སྐ་རགས་བཞིའི་ཕྱི་ངོས་སུ། ཆུ་སྲིན་གྱི་ཁ་ནས་མུ་ཏིག་གི་དོ་ཤལ་དང་དོ་ཤལ་ཕྱེད་པ་འཕྱང་བ། དེའི་ཕྱི་ངོས་སུ་བྱ་འདབ་ལས་འཕྱང་བའི་རིན་པོ་ཆེའི་ཤར་བུ། དེའི་སྟེང་ན་པདྨ་འདབ་མ་ཕྱེད་པའི་དབྱིབས་ཅན་གྱི་མདའ་ཡབ་ལ་གནས་པའི་གསེར་གྱི་བུམ་པ་ནས་འཐོན་པའི་རྒྱལ་མཚན་དང་བ་དན་བརྒྱད་བརྒྱད་ཀྱིས་མཛེས་པར་བྱས་པ་ཕྱིའི་སྟེང་གི་ཟུར་བཞི་ལ་གདུགས་བཞིས་བརྒྱན་པ། རྩིག་པའི་འགྲམ་ནས་འདོད་ཡོན་གྱི་སྣམ་བུ་དམར་པོས་བསྐོར་བ་ལ་བཞུགས་སྟབས་དང་ཁ་དོག་སྣ་ཚོགས་པའི་ལྷ་མོ་རྣམས་ཀྱིས་མཆོད་པ་བྱེད་བཞིན་པ། སྒོ་དང་སྒོ་ཁྱུད་ཀྱི་ཕྱིའི་མཚམས་དང་རྩིག་པའི་ཕྱི་ནང་གི་ཟུར་བཞིར་ཟླ་ཕྱེད་ལ་གནས་པའི་རིན་པོ་ཆེ་དམར་པོའི་སྟེང་དུ་རྡོ་རྗེས་བརྒྱན་པ།
༼མ་ཚོང་མེད།༽སྒོ་བཞི་སོ་སོའི་མདུན་དུ་སྟེགས་བུ་གྲུ་བཞིའི་སྟེང་དུ་བུམ་པ་ལ་གནས་པའི་ཀ་བ་བཞི་བཞིས་བཏེག་པའི་རྟ་བབས། གསེར་དང་། ཤར་བུ་དང་། རིན་པོ་ཆེ་དང་། རྟ་རྨིག་དང་། མུན་སྣམ་དང་། བ་རཎྜ་དང་། མུན་པ་དང་། ཤར་བུ་དང་། རིན་པོ་ཆེ་དང་། རྨིག་པ་དང་། མདའ་ཡབ་སྟེ་སྣམ་བུ་བཅུ་གཅིག་དང་ལྡན་པའི་རྩེ་མོར་ཆོས་ཀྱི་འཁོར་ལོའི་གཡས་གཡོན་དུ་རི་དྭགས་ཕོ་མོ་དང་བཅས་པ།རྟ་བབས་ཀྱི་གཡས་གཡོན་དུ་བུམ་པ་བཟང་པོ་ལས་སྐྱེས་པའི་དཔག་བསམ་གྱི་ཤིང་ལ། རྒྱལ་སྲིད་རིན་པོ་ཆེ་སྣ་བདུན་དང་། བར་བར་དུ་གྲུབ་པ་ཐོབ་པ་དང་། སྤྲིན་གྱི་གསེབ་ནས་བྱུང་བའི་ལྷ་མེ་ཏོག་གི་འཕྲེང་བ་བཟུང་བ་རྣམས་ཀྱིས་ཀུན་ནས་མཛེས་པར་བྱས་པ། ཀ་པ་བརྒྱད་ཀྱིས་བཏེག་པའི་རྡོ་རྗེའི་གདུང་གིས་མཛེས་པར་ཕུབ་པའི་རྩེ་མོ་རྡོ་རྗེ་རིན་པོ་ཆེའི་ཏོག་གིས་སྤྲས་པ། ལྷ་དང་མི་ལས་ཡོན་ཏན་ཁྱད་པར་དུ་འཕགས་པའི་ཁང་བཟང་དམ་པ་ཕྱི་བལྟས་ནང་གསལ་བ། ནང་བལྟས་ཕྱི་གསལ་བའི་ནང་གི་སྟེང་དང་འོག་གི་ས་གཞི་ཐམས་ཅད་ཤར་སྔོ། ལྷོ་སེར། ནུབ་དམར། བྱང་ལྗང་། དབུས་དཀར་བར་གྱུར་པའི་ནང་དུ་སྣ་ཚོགས་པདྨ་འདབ་མ་བརྒྱད་པའི་ལྟེ་བའི་སྟེང་དུ་སེང་གེའི་ཁྲི། ཤར་དུ་གླང་པོ་ཆེ། ལྷོར་རྟ་མཆོག །ནུབ་ཏུ་རྨ་བྱ། བྱང་དུ་ནམ་མཁའ་ལྡིང་གི་ཁྲི་རྣམས་དང་། དེའི་ཕྱི་རོལ་ཏུ་འཁོར་ལོ་སེར་པོ་རྩིབས་བཅུ་དྲུག་པ་དང་། སྟེང་འོག་གི་གནས་གཉིས་དང་གྲྭ་བཞིའི་ཕྱི་ནང་གཉིས་གཉིས་དང་། སྒོ་བཞི་རྣམས་སུ་སྣ་ཚོགས་པདྨ་དང་ཉི་མ་དང་ཟླ་བའི་གདན་གསུམ་གསུམ་བསམས་ལ། ཕྱག་འཚལ་བའི་ཐལ་མོ་ལས་ཕན་ཚུན་
བསྣོལ་ཏེ་གཡས་པའི་མཐེ་བོས་གཡོན་པའི་མཐེ་བོ་མནན་ལ། ན་མཿ སརྦྦ་ཏ་ཐཱ་ག་ཏཱ་ནཱཾ་སརྦ་ཐཱ་ཁཾ་ཨུད་ག་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ཞེས་པའི་སྔགས་བརྒྱ་བཟླས་ལ་བྱིན་གྱིས་བརླབ་པར་བྱའོ། ། སྟེང་དུ་བླ་རེ་ཡང་སྐད་ཅིག་གིས་བྱུང་བར་གྱུར་ པར་བསམ། བརྟེན་པ་ལྷ་སྤྱན་དྲངས་ཏེ་བཞུགས་སུ་གསོལ་བ་ནི། གསེར་དངུལ་དང་ཟངས་ལ་སོགས་པའི་སྣོད་དུ་འབྲས་ཡོས། ཀུ་ཤ། དྲི་བཟང་པོའི་སྤོས། མེ་ཏོག་དཀར་པོ་ཏིལ་ལ་སོགས་པ་དང་སྦྱར་བའི་ཆུ་གཙང་མ་བཤམས་ལ་བདུག་སྤོས་ཀྱིས་བདུག་ཅིང་། ༀ་དྲཾ་བནྡྷ་སྭཱ་ཧཱ། ཞེས་རིགས་ཀྱི་ལྷ་ཐམས་ཅད་པ་བདུན་བཟླས་ལ་བྱིན་གྱིས་བརླབས་ནས། མདུན་དུ་བྲིས་སྐུ་ལ་སོགས་པ་གང་དུ་ཡོད་པའི་ཕྱོགས་སུ་བལྟས་ཏེ། ༀ་སརྦ་ཏ་ཐཱ་ག་ཏ་ཀཱ་ཡ། ཞེས་སོགས་སྔར་བཤད་པའི་སྔགས་ཀྱིས་ཕྱག་བྱ། དེ་ནས་པུས་མོ་ས་ལ་བཙུགས་ནས་སོར་མོ་རྣམས་ཕན་ཚུན་དུ་བསྣོལ་ཏེ་ཐལ་མོ་བཀན་ལ་མཛུབ་མོ་གཉིས་གཤིབས་ཏེ་བསྒྲེང་ཞིང་མཐེ་བོང་གཉིས་གཡབ་པ་སྤྱན་དྲང་བའི་ཕྱག་རྒྱ་དང་། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདས། །བདག་གི་མཆོད་ཡོན་འདི་བཞེས་ནས། །མཆོད་པས་བདག་ལ་དགྱེས་པར་མཛོད། །ཛི་ན་ཛི་ཀ །ཨེ་ཧྱེ་ཧི། ཞེས་སྤྱན་དྲངས་ལ། མཆོད་ཡོན་གྱི་སྣོད་བཟུང་ནས། ༀ་སརྦ་ཏ་ཐཱ་ག་ཏ་ཨུཥྞཱི་ཥ་སི་ཏཱ་ཏ་པ་ཏྲེ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་མགོའི་ཐད་ཀ་ནས་མཆོད་ཡོན་དབུལ་ལོ། །བཅོམ་ལྡན་འདས་མ་གདུགས་དཀར་མོ་ཅན་གྱི་ལྷ་ཚོགས་ལ་རིག་སྔགས་དང་གསང་སྔགས་དང་ཁྲོ་བོ་དང་ལེགས་ལྡན་ནག་པོ་ཆེན་པོ་དང་མངག་གཞུག་པ་དང་མངག་
གཞུག་མ་ལ་སོགས་པ་ནམ་མཁའི་དབྱིངས་ཁྱབ་ཅིང་ཁོར་ཡུག་ཏུ་བསྐོར་བ་བྱོན་པ་ནི་དབུས་ཀྱི་སེང་གེའི་ཁྲི་ལ་བཅོས་ལྡན་འདས་མ་གདུགས་དཀར་པོ་ཅན་སྐུ་མདོག་དཀར་མོ་ཞེས་པ་ནས ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། ཞེས་པའི་བར་སྔར་བཞིན་བསྒོམ། ཤར་གྱི་ཁྲི་ལ་དྲག་ཤུལ་ཆེན་མོ་དཀར་མོ། ལྷོའི་ཁྲི་ལ་གཏུམ་པ་ཆེན་མོ་སེར་མོ། ནུབ་ཀྱི་ཁྲི་ལ་འབར་བ་ཆེན་མོ་དཀར་མོ། བྱང་གི་ཁྲི་ལ་སྟོབས་ཆེན་མོ་ལྗང་གུ་རྣམས་གཡས་རྡོ་རྗེ་ཁུ་ཚུར་དཀུར་བརྟེན་ཅིང་། གཡོན་རིན་པོ་ཆེའི་བུམ་པ་འཛིན་པ། ཤར་གྱི་རྩིབས་བཞིའི་དང་པོ་ལ་གོས་དཀར་མོ་སེར་མོ། གཉིས་པ་ལ་ཁྲོ་གཉེར་ཅན་སྔོ་སངས། གསུམ་པ་ལ་རྒྱལ་བའི་རྡོ་རྗེ་ཕྲེང་བ་མ་ལྗང་གུ །བཞི་པ་ལ་པདྨའི་མངོན་མཚན་མ་དམར་མོ་རྣམས་གཡས་པ་བགྲང་འཕྲེང་དང་གཡོན་ཨུཏྤལ་འཛིན་པ། ལྷོའི་རྩིབས་བཞིའི་དང་པོ་ལ་གཞན་གྱིས་མི་ཐུབ་མ་དཀར་མོ། གཉིས་པ་ལ་རྡོ་རྗེ་འགྲོས་ཅན་མ་སེར་མོ། གསུམ་པ་ལ་ཞི་བའི་ལྷ་རྣམས་ཀྱིས་མཆོད་མ་ནག་མོ། བཞི་པ་ལ་གཟི་བརྗིད་ཆེན་མོ་ལྗང་གུ་རྣམས་གཡས་རྡོ་རྗེ་རིན་པོ་ཆེ་འཛིན་ཅིང་གཡོན་དབྱིག་པ་ལ་བརྟེན་པ། ནུབ་ཀྱི་རྩིབས་བཞིའི་དང་པོ་ལ་སྟོབས་ཆེན་མ་དམར་མོ། གཉིས་པ་ལ་རྡོ་རྗེ་ལུ་གུ་རྒྱུད་སེར་མོ།གསུམ་པ་ལ་རྡོ་རྗེའི་རིག་འཛིན་མ་དཀར་མོ། བཞི་པ་ལ་རྡོ་རྗེ་རིག་གསེར་འཕྲེང་ལྗང་གུ་རྣམས་གཡས་རྡོ་རྗེ་དང་གཡོན་བགྲང་འཕྲེང་འཛིན་པ། བྱང་གི་རྩིབས་བཞིའི་དང་པོ་ལ་རྡོ་རྗེ་རིན་ཆེན་མ་དམར་མོ། གཉིས་པ་ལ་རྡོ་རྗེ་
གཙུག་ཏོར་མ་དཀར་མོ། གསུམ་པ་ལ་རྣམ་པར་བསྒྱིངས་པའི་རྡོ་རྗེ་མ་ལྗང་གུ །བཞི་པ་ལ་གསེར་འོད་ལྟ་བུའི་སྤྱན་མངའ་མ་སེར་མོ་རྣམས་གཡས་སྣ་ཚོགས་རྡོ་རྗེ་དང་གཡོན་བགྲང་འཕྲེང་འཛིན་པ། སྟེང་དུ་སྒྲོལ་མ་དང་འོག་ཏུ་པདྨའི་སྤྱན་གཉིས་དཀར་མོ་གཡས་སྐྱབས་སྦྱིན་དང་གཡོན་མཉམ་གཞག་གི་ཕྱག་རྒྱ་མཛད་པ། དེའི་ཕྱི་རོལ་གྱི་ཤར་ལྷོར་སྒེག་མོ་དཀར་མོ་རྡོ་རྗེ་རྩེ་ལྔ་པ་གཉིས་བསྙེམས་པའི་ཚུལ་གྱིས་འཛིན་པ། ལྷོ་ནུབ་ཏུ་ཕྲེང་བ་མ་སེར་མོ་ཕྲེང་བ་འཛིན་པ། ནུབ་བྱང་དུ་གླུ་མ་དམར་མོ་པི་ཝཾ་འཛིན་པ། བྱང་ཤར་དུ་གར་མ་ལྗང་གུ་རྡོ་རྗེ་རྩེ་གསུམ་པ་གཉིས་བསྣམས་ནས་གར་བསྒྱུར་བ། དེའི་ཕྱི་རོལ་གྱི་ཤར་ལྷོར་བདུག་པ་མ་དཀར་མོ་བདུག་སྤོས་ཀྱི་སྣོད་འཛིན་པ། ལྷོ་ནུབ་ཏུ་མེ་ཏོག་མ་སེར་མོ་མེ་ཏོག་གི་སྣོད་འཛིན་པ། ནུབ་བྱང་དུ་མར་མེ་མ་དམར་སྐྱ་མར་མེའི་སྡོང་བུ་འཛིན་པ། བྱང་ཤར་དུ་དྲི་ཆབ་མ་ལྗང་གུ་དྲིའི་དུང་ཆོས་འཛིན་པ། ཤར་སྒོར་ལྕགས་ཀྱུ་མ་དཀར་མོ་ལྕགས་ཀྱུ་འཛིན་པ།ལྷོ་སྒོར་ཞགས་པ་མ་སེར་མོ་ཞགས་པ་འཛིན་པ། ནུབ་སྒོར་ལྕགས་སྒྲོག་མ་དམར་མོ་ལྕགས་སྒྲོག་འཛིན་པ། བྱང་སྒོར་དྲིལ་བུ་མ་ལྗང་གུ་རྡོ་རྗེ་དྲིལ་བུ་འཛིན་པ། ཐམས་ཅད་ཀྱང་ཡིད་ཙམ་ཁྲོས་ཤིང་གཙོ་མོ་ལ་གཟིགས་པ། དར་གྱི་སྟོད་གཡོགས་དང་སྨད་གཡོགས་ཅན། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ།
ཕྱི་རོལ་གྱི་ཤར་ལྷོར་སྣ་ཚོགས་པདྨ་དང་ཉི་མའི་སྟེང་དུ་ལེགས་ལྡན་ནག་པོ་ཆེན་པོ་ཞལ་གཅིག་ཕྱག་གཉིས་གཡས་གྲི་གུག་དང་གཡོན་ཐོད་པ་བསྣམས་པ། ཞབས་གཡས་བརྐྱང་གཡོན་བསྐུམ་པའི་སྟབས་ཀྱིས་བཞུགས་ཤིང་མ་མོའི་ཚོགས་ཀྱིས་བསྐོར་བ། ཐམས་ཅད་ཀྱི་སྤྱི་བོར་ༀ་ལས་འཁོར་ལོ་དཀར་པོའི་ལྟེ་བར་ༀ་གྱིས་མཚན་པ། མགྲིན་པར་ཨཱཿ ལས་པདྨ་དམར་པོའི་ལྟེ་བར་ཨཱཿ ས་མཚན་པ། ཐུགས་ཀར་ཧཱུཾ་ལས་རྡོ་རྗེ་སྔོན་པོའི་ལྟེ་བར་ཧཱུཾ་གིས་མཚན་པ། ༀ་ཏ་ཐཱ་ག་ཏ་ཨུདྦྷ་ཝ་ཧེ་སྭཱ་ཧཱ། ཞེས་སྔར་བཤད་པའི་ཕྱག་རྒྱས་ལྷ་རྣམས་ཀྱི་ཐུགས་ཀ་ལ་སོགས་པའི་གནས་བཞི་བདག་བསྐྱེད་ཀྱི་སྐབས་ལྟར་བྱིན་གྱིས་བརླབས་པར་བྱའོ། །དེ་ནས།བཅོམ་ལྡན་ཐུགས་རྗེས་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་ནས་ཀྱང་། །ཐུགས་ལ་དགོངས་ཤིང་གནང་བར་མཛོད། །བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །རྒྱས་པ་ལ་མོས་ན་ཐལ་མོ་སྦྱར་བ་པདྨ་ཁ་ཕྱེ་བའི་ཚུལ་དུ་བྱས་པ་དང་། ༀ་ཀ་མ་ལཱ་ཡ་སྭཱ་ཧཱ། ཞེས་པ་དང་། ལག་པ་གཉིས་ཀའི་སོར་མོ་དབུས་མ་གསུམ་རྡོ་རྗེ་ལྟར་བྱས་ལ། ༀ་བཛྲ་ཨ་ས་ན་ཧཱུཾ་ཕཊ་ཅེས་ཀྱང་བརྗོད། སོར་མོ་དབུས་མ་གཉིས་གཉིས་གཅིག་ཏུ་སྦྱར་བ་དཔའ་བོའི་འདུག་སྟངས་ཀྱི་ཕྱག་རྒྱ་དང་། ༀ་བཛྲ་ཀ་ཧཱུཾ་ཕཊ། ཅེས་གདན་ཕུལ་ལ་བཞུགས་སུ་གསོལ། དེ་ནས་ཕྱག་རྒྱ་བསྟན་པ་ནི་ལག་པ་གཡས་པའི་མཐེ་བོས་མཐེའུ་ཆུང་གི་སེན་མོ་མནན་ལ་
སོར་མོ་ལྷག་མ་རྣམས་རྡོ་རྗེ་ལྟར་བྱས་པ་དམ་ཚིག་རྡོ་རྗེའི་ཕྱག་རྒྱ་དང་། ཤཾ་ཀ་རེ་ས་མཱ་ཡེ་སྭཱ་ཧཱ། ཞེས་བརྗོད་ལག་པ་གཉིས་ཕན་ཚུན་ཏུ་ཁུར་ཚུར་བཅིངས་ནས་མཐེ་བོང་གཉིས་བསྟན་པ་དེ་བཞིན་གཤེགས་པའི་རིགས་ཀྱི་ཕྱག་རྒྱ་དང་། ཛི་ན་ཛི་ཀ །ཅེས་བརྗོད་ཅིང་། ༀ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། ཅེས་དེ་བཞིན་གཤེགས་པའི་རིགས་ཀྱི་སྔགས་ཡུངས་ཀར་ལ་བཟླས་པ་གཏོར་ལ་ཕྱི་འབྲང་གི་བགེགས་བསྐྲད་དོ། །དེ་ནས་མཆོད་པ་ནི། སྔར་བཞིན་སྔགས་ཀྱི་བསངས་པའི་རྗེས་སུ། ༀ་པྲ་ཝ་ར་སད་ཀཱ་རཾ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་སོགས་ཆུ་གཉིས་ཉེར་སྤྱོད་ལྔ་རོལ་མོ་དང་བཅས་པའི་སྔགས་འོག་ནས་འབྱུང་བ་དང་དེ་བཞིན་གཤེགས་པའི་རིགས་ཀྱི་སྔགས་བརྗོད་པས་ཀྱང་བསང་ཞིང་། གཟི་བྱིན་བསྐྱེད་པ་ནས་བྱིན་གྱིས་བརླབ་པའི་བར་ཡང་སྔར་བཞིན་བྱའོ། །བདེ་བར་གཤེགས་སོ་བཅོམ་ལྡན་འདས། །ཚུལ་གཤེགས་འདིར་ནི་བཞུགས་སུ་གསོལ། །བདག་གི་མཆོད་ཡོན་བཞེས་ནས་ཀྱང་། །ཐུགས་ཀྱིས་ཐུགས་དཔག་མཛད་ཏུ་གསོལ། །བདག་ནི་ཁྱེད་ལ་གུས་དང་ལྡན། །མཐེའུ་ཆུང་དང་སྲིན་ལག་གཉིས་ནང་དུ་ཕན་ཚུན་བསྣོལ་ཏེ་གུང་མོ་གཉིས་གཤིབས་ཏེ་བསྒྲེངས་པའི་ཚིགས་གསུམ་པར་མཛུབ་མོ་བཀུག་མཐེ་བོང་གཉིས་ངོས་ལ་སྦྱར་བའི་མཆོད་ཡོན་གྱི་ཕྱག་རྒྱ་དང་།ༀ་སརྦ་ཏ་ཐཱ་ག་ཏ་ཨུཥྞཱི་ཥ་སི་ཏཱ་ཏ་པ་ཏྲེ་ས་པ་རི་ཝཱ་ར། ཞེས་པ་ཡན་མཆོད་སྔགས་འོག་མ་རྣམས་ཀྱི་མགོར་ཡང་སྦྱར་རོ། །ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་མཆོད་ཡོན་དང་། གཡས་པའི་ཁུ་ཚུར་གྱི་མཛུབ་མོ་དང་མཐེ་བོང་སྐམ་པ་ལྟར་བྱས་ནས་ཞབས་བསིལ་གྱི་སྣོད་ནས་མེ་ཏོག་བླངས་ཏེ་སོར་མོ་རྣམས་རིམ་གྱིས་བཀྲོལ་བའི་ཕྱག་རྒྱ་དང་། སྔར་གྱི་ཚིགས་བཅད་ཀྱི་མཆོད་ཡོན་ཞེས་པའི་
གནས་སུ་ཞབས་བསིལ་ཞེས་བཅུག་ནས། ༀ་པྲ་ཝ་ར་སད་ཀཱ་རཾ་པདྱཾ་པྲ་ཏཱིཙྪ་སྭཱ་ཧཱ། ཞེས་ཞབས་བསིལ་དང་། དེ་ནས་འབྱོར་ན་མེ་ལོང་ལ་གཟུགས་བརྙན་ཤར་བ་ལ་ཁྲུས་གསོལ། མ་འབྱོར་ན་ཐལ་མོ་བཀན་པ་ལས་མཛུབ་མོའི་རྩེ་དང་མཐེ་བོང་གི་རྩེ་མོ་གཉིས་སྦྱར་བས་སྐུ་བསིལ་བའི་ཕྱག་རྒྱ་དང་། ༀ་སརྦ་དེ་བ་ཏཱ་ཨ་ཙི་ན་ཏཱི་ཨ་མྲྀ་ཏེ་སྭཱ་ཧཱ། ཞེས་གསེར་ལ་སོགས་པའི་རིན་པོ་ཆེའི་བུམ་པ་དུ་མ་ནས་བྱུང་བའི་སྤོས་ཆུའི་སྤྲིན་ཆེན་པོས་སྐུ་བསིལ་བར་བསམ་མོ། །དེ་ནས་ཡིད་ཀྱིས་ན་བཟའ་དང་རྒྱན་དང་། རོལ་མོས་མཆོད་པ་དང་། བསྟོད་པ་རྣམས་བྱ་བའམ། ཡང་ན། སྣ་ཚོགས་དབང་པོའི་གཞུ་ལྟར་རབ་བཀྲ་བ། །གང་ལ་རེག་ན་བདེ་བའི་རྒྱུར་འགྱུར་བའི། །གོས་བཟང་རིན་ཆེན་བདག་བློ་སྦྱང་ཕྱིར་འབུལ། །བཟོད་པ་དམ་པའི་གོས་ཀྱིས་བརྒྱན་པར་ཤོག །ༀ་བཛྲ་ཝསྟྲ་ཡེ་ཨཱཿ ཧཱུཾ་སྭཱ་ཧཱ། ཞེས་ན་བཟའ་དང་། རྒྱལ་བ་མཚན་དཔེའི་རང་བཞིན་རྒྱན་ལྡན་ཕྱིར། །རྒྱན་གཞན་དག་གིས་བརྒྱན་པར་མི་འཚལ་ཡང་། །རིན་ཆེན་རྒྱན་མཆོག་ཕུལ་བས་འགྲོ་ཀུན་གྱིས། །མཚན་དཔེས་བརྒྱན་པའི་སྐུ་ལུས་ཐོབ་པར་ཤོག །ༀ་བཛྲ་ཨཱ་ལཾ་ཀ་ར་ཝ་པུ་ཥ་ཎི་ཨཱཿ ཧཱུཾ་སྭཱ་ཧཱ། ཞེས་རྒྱན་དང་། འོག་ནས་འབྱུང་བ་ལྟར་རོལ་མོ་དབུལ་ཞིང་བསྟོད་པ་སྔར་ལྟར་བྱའོ། ། གཙང་ཞིང་གཙང་མ་ལས་བྱུང་བའི། །ལྷ་རྫས་བཟང་པོའི་དྲི་འདི་དག །བདག་ནི་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །གཡས་སྐྱབས་སྦྱིན་བྱས་པའི་མཁྲིག་མ་ནས་གཡོན་པས་བཟུང་བ་དྲིའི་ཕྱག་རྒྱ་དང་། ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་རི་པཱུ་ཛི་ཏེ་སྭཱ་ཧཱ། ཞེས་དྲི་ཆབ་དང་། འོག་མ་གསུམ་ལའང་འབུལ་སྔགས་འདི་བརྗོད་དོ། །ལག་པ་གཉིས་སོར་མོ་ཕན་ཚུན་བསྣོལ་ཏེ་ལག་པའི་ནང་
དུ་མཛུབ་མོ་གཉིས་རྩེ་མོ་གཅིག་ཏུ་བྱས་ལ་གདུ་བུའི་ཚུལ་ཏུ་བྱས་ནས་མཐེ་བོང་གཉིས་གློར་བཞག་སྟེ་པདྨ་ལྟར་བྱས་པའི་མེ་ཏོག་གི་ཕྱག་རྒྱ་དང་། གཙང་ཞིང་གཙང་མར་སྐྱེས་པ་ཡི། །ལྷ་རྫས་བཟང་པོའི་མེ་ཏོག་འདི། །བདག་ནི་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། ཅེས་མེ་ཏོག་དང་། ལག་པ་གཉིས་ཀྱི་མཐེའུ་ཆུང་སྲིད་ལག་གུང་མོ་རྣམས་ཀྱི་སོར་མོ་རྣམས་ཕན་ཚུན་དུ་སྦྱར་ཏེ་སྔ་མ་སྔ་མའི་རྒྱབ་ཀྱི་སེན་མོའི་དྲུང་དུ་བཀུག་ནས་མཛུབ་མོ་གཉིས་ལོགས་གཅིག་ཏུ་བརྐྱང་སྟེ་མཐེ་བོང་གཉིས་གློར་བཞག་པ་བདུག་སྤོས་ཀྱི་ཕྱག་རྒྱ་དང་། ནགས་ཚལ་བཅུད་ནི་ཡིད་དུ་འོང་། །དྲི་ཡི་སྦྱོར་བ་ལྷ་ཡི་རྫས། །བདག་ནི་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། ཅེས་སྤོས་དང་། སྨན་རྣམས་བཅུད་ནི་ཡིད་དུ་འོང་། །སྔགས་ཀྱི་ཞལ་ཟས་བཤོས་འདི་དག །བདག་ནི་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། ཅེས་དང་། བཟེད་པའི་ཐལ་མོ་ལས་མཛུབ་མོ་ཅུང་ཟད་བཀུག་པའི་ཕྱག་རྒྱས་ལྷ་བཤོས་དང་། གནོད་རྣམས་འཇོམས་ཤིང་བཀྲ་ཤིས་པ། །དགེ་ཞིང་མུན་པ་རྣམས་སེལ་འདི། །བདག་ནི་དད་པས་འབུལ་ལགས་ཀྱིས། །མར་མེ་འདི་དག་བཞེས་སུ་གསོལ། །ཨཱ་ལོ་ཀ་ཡ་ཨཱ་ལོ་ཀ་ཡ་བིདྱཱ་དྷ་ར་པཱུ་ཛི་ཏེ་སྭཱ་ཧཱ། ཞེས་དང་། མཐེ་བོང་དང་གུང་མོ་གཉིས་གཅིག་ཏུ་སྦྱར་ཏེ་བསྒྲེངས་ལ་ལག་པ་ཁུ་ཚུར་གཅིག་ཏུ་བྱས་པའི་ཕྱག་རྒྱས་མར་མེ་དང་། དེ་ལས་གཞན་ཡང་མཆོད་པའི་ཚོགས། །རོལ་མོ་དབྱངས་སྙན་ཡིད་འོང་ལྡན། །སེམས་ཅན་སྡུག་བསྔལ་སིམ་
བྱེད་པའི། །སྤྲིན་རྣམས་སོ་སོར་གནས་གྱུར་ཅིག །ༀ་སརྦ་ཏ་ཐཱ་ག་ཏ་ཨུཥྞཱི་ཥ་སི་ཏཱ་ཏ་པ་ཏྲེ་ས་པ་རི་ཝཱ་ར་ཤཔྟ་པྲ་ཏཱིཙྪ་སྭཱ་ཧཱ། ཞེས་སིལ་སྙན་དབུལ་ཞིང་གཞན་ཡང་མཆོད་པའི་གཟུགས་བྲིས་པ་དང་། དངོས་སུ་བཤམས་པ་དང་། མ་འབྱོར་པ་རྣམས་ཀྱང་ཡིད་ཀྱིས་རྒྱ་ཆེན་པོར་དམིགས་ཏེ་འབུལ་ལོ། །དེ་ནས་སྔར་གྱི་གནས་བྱིན་གྱིས་བརླབ་པའི་སྔགས་བརྒྱ་བཟླ་བར་བྱའོ། །བསྟོད་པ་ནི། དཀོན་མཆོག་གསུམ་དང་རིགས་གསུམ་གྱི་བདག་པོ་ལ་བསྟོད་པ་བྱ་བར་ལེགས་གྲུབ་ལས་གསུངས་པ་ནི།མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོའི་ཞིང་། །དེ་བཞིན་གཤེགས་ལ་ཕྱག་འཚལ་ལོ། །དག་པས་འདོད་ཆགས་བྲལ་བར་གྱུར། །དགེ་བས་ངན་སོང་ལས་གྲོལ་ཅིང་། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གནས། །ཞིང་གི་དམ་པ་ཡོན་ཏན་ལྡན། །དགེ་འདུན་ལ་ཡང་ཕྱག་འཚལ་ལོ། །གཞོན་ནུའི་ཆ་ལུགས་འཆང་བ་པོ། །ཤེས་རབ་སྒྲོན་མེས་རབ་ཏུ་བརྒྱན། །འཇིག་རྟེན་གསུམ་གྱི་མུན་སེལ་བ། །འཇམ་དཔལ་ལ་ཡང་ཕྱག་འཚལ་ལོ། །སངས་རྒྱས་ཀུན་གྱིས་རབ་ཏུ་བསྔགས། །ཡོན་ཏན་དམ་པ་ཀུན་བསགས་པ། །སྤྱན་རས་གཟིགས་ཞེས་མཚན་གསོལ་བ། །རྟག་པར་བརྩེ་ལ་ཕྱག་འཚལ་ལོ། །སྟོབས་པོ་ཆེ་ལ་དྲག་ཤུལ་ཅན། །རིགས་སྔགས་རྒྱལ་པོ་དགེ་བ་ཅན། །གདུལ་དཀའ་པོ་དག་འདུལ་བ་པོ། །རྡོ་རྗེ་འཛིན་ལ་ཕྱག་འཚལ་ལོ། །ཞེས་སྤྱི་ལ་བསྟོད་པ་དང་། སྒོས་བསྟོད་ནི།
རྒྱལ་བ་ཀུན་གྱི་མཚན་མཆོག་གཙུག་ཏོར་ནས། ཞེས་སོགས་སྔར་བཤད་པའི་གཙོ་མོའི་བསྟོད་པ་དང་། འཁོར་རྣམས་ལ། གཞན་གྱིས་མི་ཐུབ་དྲག་ཤུལ་ཆེ། །གཏུམ་པ་ཆེན་མོ་སྟོབས་ཆེན་མོ། །འབར་བ་ཆེན་མོ་གཟི་བརྗིད་ཆེ། །ཕ་རོལ་གནོན་ལ་ཕྱག་འཚལ་ལོ། །དཀར་མོ་ཆེན་མོ་སྟོབས་ཆེན་མོ། །འབར་བའི་ཕྲེང་བ་གོས་དཀར་མོ། །འཕགས་མ་སྒྲོལ་མ་ཁྲོ་གཉེར་ཅན། །བདུད་བཞི་འཇོམས་པ་ཕྱག་འཚལ་ལོ། །རྒྱལ་བའི་རྡོ་རྗེ་འཕྲེང་ཞེས་གྲགས། །པདྨའི་མངོན་མཚན་རྡོ་རྗེའི་མཚན། །གཞན་གྱིས་མི་ཐུབ་འཕྲེང་པ་ཅན། །གཞན་དོན་མཛད་པ་ཕྱག་འཚལ་ལོ། །རྡོ་རྗེ་ཁྭ་རྣམས་འཇོམས་པ་མོ། །ཞི་བའི་ལྷ་རྣམས་ཀྱིས་མཆོད་མ། །གཟུགས་ཞི་གཟི་བརྗིད་ཆེན་པོ་ཅན། །ཞི་མཛད་ཁྱོད་ལ་ཕྱག་འཚལ་ལོ། །འཕགས་མ་སྒྲོལ་མ་སྟོབས་ཆེན་མ། །རྡོ་རྗེ་ལུ་གུ་རྒྱུད་གཞན་དང་། །རྡོ་རྗེ་གཞོན་ནུ་རིག་འཛིན་མ། །རིག་སྔགས་འཆང་ལ་ཕྱག་འཚལ་ལོ། །ལག་ན་རྡོ་རྗེ་རིག་གསེར་འཕྲེང་། །རྣམ་པར་བསྒྱིངས་མའི་རྡོ་རྗེ་དང་། །གསེར་འོད་ལྟ་བུའི་སྤྱན་མངའ་མ། །རྡོ་རྗེ་འགྲོས་དང་དཀར་མོ་དང་། །པདྨའི་སྤྱན་དང་ཟླ་འོད་དང་། །བཅུ་ཕྲག་གཉིས་དང་གཉིས་ལྷ་མོ། །ཕྱག་རྒྱའི་ཚོགས་ལ་ཕྱག་འཚལ་ལོ། །ཞེས་པས་བསྟོད། ལེགས་ལྡན་ལ། སྲིན་པོའི་གཟུགས་ཀྱིས་གདུག་པ་ཅན། །ཚར་གཅོད་བྱང་ཆུབ་སེམས་དཔའ་སྟེ། །གྲོང་ཁྱེར་སུམ་བརྩེགས་འཇིག་བྱེད་པ། །གཏུམ་པོ་
ཁྱོད་ལ་ཕྱག་འཚལ་བསྟོད། །མདོག་ནག་གཟུགས་ཐུང་གཟི་བརྗིད་དེ། །གདུག་པ་ཚར་གཅོད་གྲི་གུག་གཡས། །གཡོན་པས་ཐོད་པ་ཁྲག་གང་བསྣམས། །ཐོད་འཕྲེང་ཅན་ལ་ཕྱག་འཚལ་བསྟོད། །ཁྲོས་པས་ཞབས་བརྡབས་ས་གཞི་གཡོ། །བཞད་པའི་གད་མོས་རི་རབ་བསྒྱེལ། །དམ་ཚིག་ཉམས་པའི་སྙིང་འབྱིན་པ། །དམ་ཚིག་ཅན་ལ་ཕྱག་འཚལ་བསྟོད། ཅེས་པས་བསྟོད། དེ་ནས།ན་མཿ སརྦ་བུདྡྷ་བོ་དྷི་ས་ཏྭ་ནཾ། སརྦ་ཏྲ་སཾ་ཀུ་རུ་མི་ཏ་ཨ་བིཛྙཱ་ར་ཤི་ནི་ན་མོ་སྟུ་ཏེ་སྭཱ་ཧཱ། ཞེས་བསྟོད་པ་འབྱུང་བའི་སྔགས་བརྒྱ་བཟླ་བར་བྱའོ། །སྡིག་པ་བཤགས་པ་ནི། འཇིག་རྟེན་དག་གི་ཕྱོགས་ཀུན་ན། །དེ་བཞིན་གཤེགས་པ་གང་བཞུགས་དང་། །དགྲ་བཅོམ་བྱང་ཆུབ་སེམས་དཔའ་དག །དེ་དག་བདག་ལ་དགོངས་སུ་གསོལ། །ཚེ་རབས་གང་ཡང་རུང་བ་ན། །བདག་གིས་སྡིག་པ་ཅི་བགྱིས་དང་། །སྔོན་གྱི་ཚེ་རབས་གཞན་དག་དང་། །ཚེ་རབས་འདི་དང་འཁོར་བ་ན། །འདོད་ཆགས་དབང་དང་བླུན་པ་དང་། །ཁྲོ་བ་དག་གིས་འཁྲུགས་གྱུར་ཏེ། །སངས་རྒྱས་ཆོས་དང་དགེ་འདུན་ནམ། །བླ་མ་དག་དང་ཕ་མ་དང་། །དགྲ་བཅོམ་བྱང་ཆུབ་སེམས་དཔའ་དང་། །སྦྱིན་གནས་གང་ཡང་རུང་བ་དང་། །དེ་ལས་གཞན་པའི་སེམས་ཅན་དག །ཡོན་ཏན་ལྡན་དང་མི་ལྡན་ལ། །སྡིག་པའི་ལས་རྣམས་གང་བགྱིས་དང་། །གང་ཡང་བགྱིད་དུ་སྩལ་བ་དང་། །གང་ཡང་ཅུང་ཟད་ཡི་རང་བ། །བག་མེད་པས་ནི་ཕྲ་མོ་ཡང་། །ལུས་ངག་ཡིད་ཀྱིས་བགྱིས་པ་
རྣམས། །དེ་དག་མ་ལུས་བློས་བསྡུས་ནས། །རྫོགས་པའི་སངས་རྒྱས་སྲས་བཅས་པ། །བདག་གིས་ད་ནི་མངོན་སུམ་བཞིན། །རབ་ཏུ་གུས་པས་ཕྱག་བཙལ་ཏེ། །སྐྱོ་བའི་ཡིད་དུ་གྱུར་པ་ཡིས། །ཐལ་མོ་སྦྱར་ཏེ་ནོངས་པ་རྣམས། །ཡང་དང་ཡང་དུ་སོ་སོར་བཤགས། །བདག་གིས་སྡིག་པ་བགྱིས་པ་རྣམས། །རྫོགས་སངས་རྒྱས་ཀྱིས་མཁྱེན་པ་བཞིན། །དེ་ལྟར་བདག་གིས་སོ་སོར་བཤགས། །སླན་ཆད་དེ་ལྟར་ཡོངས་མི་བགྱིད། ཅེས་འགྱོད་པ་དང་། སྡོམ་སེམས་དང་ལྡན་པའི་སྒོ་ནས་བྱའོ། །སྐྱབས་འགྲོ་ནི། སྲོག་ཆགས་སྡུག་བསྔལ་ཞི་བྱའི་ཕྱིར། །བདག་ཉིད་ཇི་སྲིད་འཚོ་བར་དུ། །སངས་རྒྱས་ཆོས་དང་དགེ་འདུན་ལ། །གུས་པས་ཡང་དག་སྐྱབས་སུ་མཆི། ཞེས་ཤུགས་དྲག་པོའི་གུས་པས་སྐྱབས་སུ་འགྲོ་བ་བྱའོ། །དེ་ནས། ཆོས་ཀྱི་ལོངས་སྤྱོད་སྣ་ཚོགས་ལ། །མཉམ་པར་བཞག་ནས་ཡི་རང་ངོ་། །མི་རྟོག་བློ་གྲོས་བསྐྱེད་པའི་ཕྱིར། །ཆོས་ཀྱི་འཁོར་ལོ་བསྐོར་བ་དང་། །གདུལ་བྱ་ཇི་སྲིད་ཚིམས་བར་དུ། །མྱ་ངན་མི་འདའ་གསོལ་བ་འདེབས། །སྔོན་གྱི་རྒྱལ་བའི་སྲས་རྣམས་ཀྱིས། །སྨོན་ལམ་ཇི་ལྟར་མཛད་པ་བཞིན། །བདག་ཀྱང་དགེ་བའི་སེམས་ཀྱིས་སུ། །དེ་བཞིན་དུ་ནི་སྨོན་ལམ་འདེབས། །སེམས་ཅན་ཐམས་ཅད་བདེ་བ་དང་། །ཞི་ཞིང་ནད་ཀྱང་མེད་པར་ཤོག །བདག་ནི་བྱ་བ་ཀུན་ནུས་ཤིང་། །ཡོན་ཏན་དང་ཡང་ལྡན་པར་ཤོག །ནོར་ལྡན་གཏོང་ཕོད་ཤེས་རབ་ཅན། །
བཟོད་ལྡན་དགེ་ལ་དད་པ་དང་། །སེམས་ཅན་ཚེ་རབས་ཐམས་ཅད་དུ། །སྐྱེ་བ་དྲན་ཞིང་བརྩེར་ལྡན་ཤོག །ཅེས་དེ་དག་གི་དོན་དྲན་བཞིན་པས་བྱའོ། །ཚད་མེད་པ་བཞི་སྒོམ་པ་ནི།སེམས་ཅན་རྣམས་སྡུག་བསྔལ་ཐམས་ཅད་དང་བྲལ་བར་གྱུར་ཅིག །སྙམ་པའི་སྙིང་རྗེ་དང་། བདེ་བ་ཐམས་ཅད་དང་ལྡན་པར་གྱུར་ཅིག །སྙམ་པའི་བྱམས་པ་དང་། སངས་རྒྱས་ཀྱི་བདེ་བས་བདེ་བར་གྱུར་ཅིག །སྙམ་པའི་དགའ་བ་དང་། སངས་རྒྱས་ཀྱི་མྱང་འདས་བླ་ན་མེད་པས་མྱ་ངན་ལས་འདའ་བར་གྱུར་ཅིག །སྙམ་པའི་བཏང་སྙོམས་ལ་གནས་པར་བྱའོ། །དེ་ནས། སེམས་ཅན་ཁམས་ནི་མཐའ་ཡས་པའི། །སྡུག་བསྔལ་ཉེ་བར་ཞི་བ་དང་། །ངན་འགྲོ་རྣམས་ལས་བསྒྲལ་བ་དང་། །ཉོན་མོངས་རྣམས་ལས་དགྲོལ་བའི་ཕྱིར། །སྲིད་པ་མི་བདེ་དོག་པ་ན། །སྡུག་བསྔལ་སྣ་ཚོགས་ཅི་མཆིས་པ། །དེ་ལས་ཡོངས་སུ་བསྐྱབ་པའི་ཕྱིར། །བདག་ནི་བྱང་ཆུབ་སེམས་བསྐྱེད་དོ། །སེམས་ཅན་ཕོངས་པ་ཐམས་ཅད་ཀྱི། །སྐྱབས་སུ་བདག་ཉིད་རྟག་ཏུ་ཤོག །བདག་ནི་མགོན་མེད་རྣམས་ཀྱི་མགོན། །རྟེན་མེད་རྣམས་ཀྱི་རྟེན་དུ་བབ། །སྐྱབས་མེད་རྣམས་ཀྱི་སྐྱབས་འགྱུར་ཞིང་། །སྡུག་བསྔལ་བདེ་བར་བྱེད་པ་དང་། །བདག་ནི་སེམས་ཅན་ཐམས་ཅད་ཀྱི། །ཉོན་མོངས་ཞི་བར་བྱེད་པར་ཤོག །དགེ་བའི་ལས་རྣམས་གང་དང་གང་། །འདི་དང་གཞན་དུ་བསགས་པ་རྣམས། །བསོད་ནམས་ཡེ་ཤེས་ཞེས་བྱ་བའི། །ཚོགས་ནི་རྣམ་པ་གཉིས་སུ་ཤོག །ཕ་རོལ་ཕྱིན་པ་དྲུག་སྒོ་ནས། །བདག་གི་བརྩོན་འགྲུས་གང་བརྩམས་
པ། །དེ་ཡང་སེམས་ཅན་མ་ལུས་པ། །ཐམས་ཅད་ལ་ནི་ཕན་པར་ཤོག །ཚེ་ཡི་མཐའ་ཀླས་བྱེད་པ་དང་། །གང་ཡང་ཅུང་ཟད་བྱེད་འགྱུར་བ། །མདོར་ན་སེམས་ཅན་ཐམས་ཅད་ཀྱི། །ཉོན་མོངས་ཐམས་ཅད་ཞི་བ་དང་། །གྲོལ་བར་བྱ་བའི་ཕྱིར་འབད་ཅིང་། །བྱང་ཆུབ་བར་དུ་བདག་བརྩོན་ནོ། ཞེས་ཉམ་ཐག་པའི་འགྲོ་བ་རྣམས་བསྒྲལ་བའི་ཕྱིར་དུ་སངས་རྒྱས་ཐོབ་པར་བྱའོ་སྙམ་དུ་བྱང་ཆུབ་ཀྱི་སེམས་རྒྱུད་དང་འདྲེས་ངེས་པ་བསྐྱེད་དོ། །དེ་ནས་བཟླས་པའི་དུས་སུ། ༀ་གུ་རུ་སརྦ་ཏ་ཐཱ་ག་ཏ་ཀཱ་ཡ་ཝཱ་ག་ཙིཏྟ་པྲ་ན་མེ་ཎ་སརྦ་ཏ་ཐཱ་ག་ཏ་བཛྲ་པཱ་ད་བན་དྷ་ནཾ་ཀ་རོ་མི། ཞེས་བླ་མ་དང་ལྷ་ལ་ཕྱག་བྱས་ནས་སྔགས་ཀྱི་ནོར་བུ་སྟེ་བགྲང་ཕྲེང་སྙིམ་པར་བཅུགས། ༀ་བྷ་ག་ཝ་ཏེ་སིདྡྷི་སིདྷི་ཡ་སིདྡྷརྠེ་སྭཱ་ཧཱ། ཞེས་ལན་བདུན་བཟླས་ཏེ་སྙིང་གར་ཕྲེང་བ་བླངས་ལ་ལག་པ་གཡས་གཡོན་གང་རུང་གི་གུང་མོ་དང་མཐེའུ་ཆུང་བརྐྱང་སྟེ་མཛུབ་མོ་རྒྱབ་ཏུ་བཞག་ནས་སྲིན་ལག་མཐེ་བོས་ལས་ཐམས་ཅད་ལ་བགྲང་བར་བྱ་སྟེ་དྲག་པོ་ལ་ནི་མཛུབ་མོས་བྱའོ། །དེ་ནས་རྒྱས་པ་ལ་སྤྲོ་ན་བཅོམ་ལྡན་འདས་དེ་བཞིན་གཤེགས་པའི་གཙུག་ཏོར་ནས་བྱུང་བའི་གདུགས་དཀར་མོ་ཅན་རྡོ་རྗེ་གཙུག་ཏོར་ཕྱིར་བཟློག་པ་ཆེན་མོ་ཞེས་པ་ནས། ཟས་སུ་སྦྱིན་སྲེག་ཟ་བའི་གདོན་ལས་བདག་ལ་སྲུང་བ་གྱིས་ཤིག་ཅེས་གསོལ་བ་བཏབ་ནས་བཟླས་པ་བྱའོ། །ལྷའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ། ཏཏྱ་ཐཱ། ༀ་ཨ་ན་ལེ། ཨ་ན་ལེ། བི་ཥ་དེ་བི་ཥ་དེ། བྷཻ་ར་བྷཻ་ར། བཛྲ་དྷ་རི། བནྡྷ་བནྡྷ། བཛྲ་པཱ་ཎི་
ཕཊ། ཧཱུཾ་ཧཱུཾ་ཕཊ་ཕཊ། ཧཱུཾ་དྲུཾ་བྷནྡྷ་ཕཊ། ཅེས་པ་ནི་ཉེ་བའི་སྙིང་པོ། ༀ་སརྦ་ཏ་ཐཱ་ག་ཏོཥྞཱི་ཥ་སི་ཏཱ་ཏ་པ་དྲེ་ཧཱུཾ་ཕཊ་སྭཱ་ཧཱ། ཞེས་པས་མཚན་པར་གྱུར་པར་བསམ་སྟེ། བཟླས་པ་བྱ་ཚུལ་དངོས་ནི། བསམ་གཏན་ཕྱི་མ་ལས། སྒྲ་དང་སེམས་དང་གཞི་ལ་གཞོལ། ཞེས་སོགས་ཀྱི་བཟླས་བརྗོད་ཡན་ལག་བཞི་ཚང་ཞིང་མ་ཉམས་པའི་སྒོ་ནས་བྱ་བར་གསུངས་པའི་ཡན་ལག་བཞི་ནི། གཞི་ཞེས་པས་ཡན་ལག་དང་པོ་ལྷའི་ང་རྒྱལ་དུ་བྱས་པ་དང་། གཉིས་པ་མདུན་དུ་རང་འདྲའི་ལྷ་སྒོམ་པ་བསྟན་པ། སེམས་ཞེས་པས་གསུམ་པ་ལྷའི་ཐུགས་ཀར་ཟླ་བའི་དཀྱིལ་འཁོར་འགོད་པ་བསྟན་ཅིང་། སྒྲ་ཞེས་པས་བཞི་པ་ཟླ་བ་ལ་གང་བཟླ་རྒྱུའི་སྔགས་ཕྲེང་འགོད་པ་བསྟན་ནོ། །གཞོལ་ཞེས་པས་ནི་སེམས་གཞན་དུ་མི་གཡེང་བར་རྒྱུན་མི་འཆད་པར་དམིགས་པའི་སྒོ་ནས་བཟླས་པ་བྱ་དགོས་པར་བསྟན་ཏོ། །དེའང་མདུན་བསྐྱེད་ཀྱི་ལྷ་གསལ་བར་དམིགས་ཏེ་ཐུགས་ཀར་ཟླ་བ་ལ་སྔགས་ཕྲེང་བཀོད་པའི་ཡིག་འབྲུའི་གཟུགས་ལ་གཞན་དུ་མ་ཡེངས་པར་དམིགས་ཏེ་ཤུབ་བུའི་བཟླས་པ་ཇི་ཙམ་གྲུབ་པ་བྱ་ཞིང་། ཡང་རང་ལྷར་གསལ་བར་དམིགས་ལ་དབུགས་ནང་དུ་འཇུག་པ་དང་མཉམ་དུ་མདུན་བསྐྱེད་ཀྱི་ཐུགས་ཀའི་ཟླ་བ་སྔགས་ཕྲེང་དང་བཅས་པ་རང་གི་ཐུགས་ཀར་སྤོས་པའི་ཡིག་འབྲུའི་གཟུགས་ལ་དམིགས་ཏེ་ཤུབ་བུའི་བཟླས་པ་བྱའོ། །ཡང་མདུན་གྱི་ལྷ་དང་ཐུགས་ཀའི་ཟླ་བ་སྔགས་ཕྲེང་དང་བཅས་པ་དུས་གཅིག་ཏུ་དམིགས་ཏེ་དབུགས་འབྱུང་རྔུབ་ཀྱི་སྲོག་རྩོལ་ནང་དུ་བསྡམས་ནས་ཡི་གེའི་གཟུགས་ལ་དམིགས་ཏེ་ཡིད་ཀྱིས་བཟླས་པ་བྱ་ཞིང་དབུགས་གཏོང་བ་ན་རང་ལྷར་བསྒོམས་པའི་སྐུ་ལ་ཡིད་ཀྱིས་བལྟ་ཞིང་ཡང་སྔར་བཞིན་ཡིད་བཟླས་བྱའོ། །ཡང་རང་གི་མདུན་གྱིས་མདུན་བསྐྱེད་རང་ལས་ཧ་ཅང་མི་རིང་ཞིང་ཅུང་ཟད་མཐོ་བར་བསྒོམས་ལ་དེའི་ཐུགས་ཀའི་ཟླ་བ་སྔགས་ཕྲེང་
དང་བཅས་པ་དབུགས་ནང་དུ་འཇུག་པ་དང་བསྟུན་ནས་རང་ལྷར་གསལ་བའི་ཐུགས་ཀར་སྤོས་པའི་ཡི་གེའི་གཟུགས་ལ་དམིགས་ནས་དབུགས་འབྱུང་རྔུབ་བསྡམས་ཏེ། དབུགས་མི་གཏོང་གི་བར་དུ་ཡིད་བཟླས་བྱ་ཞིང་དབུགས་གཏོང་བ་ན་དེ་དང་མཉམ་དུ་ཟླ་བ་སྔགས་ཕྲེང་དང་བཅས་པ་ཕྱིར་བཏང་ནས་མདུན་བསྐྱེད་ཀྱི་ཐུགས་ཀར་གནས་པར་བསམ་ཞིང་། ཡང་སྔར་བཞིན་རང་གི་སྙིང་གར་སྤོས་ལ་ཡིད་བཟླས་བྱ་བ་ནི་གཟུགས་ལ་དམིགས་པའི་བཟླས་པའོ། །ཡང་བཟླས་བརྗོད་ཡན་ལག་བཞི་ཐོག་མར་གསལ་བཏབ་ནས་དེའི་རྗེས་སུ་སྔགས་ཀྱི་གཟུགས་དང་ཟླ་བ་སོགས་ལ་མི་དམིགས་པར་སྔགས་ཀྱི་གདངས་ལ་དམིགས་ཏེ་ཤུབ་བུ་དང་དབུགས་འབྱུང་རྔུབ་བསྡམས་ནས་ཡིད་བཟླས་བྱའོ། །དེའང་སྔགས་གཞན་གྱིས་བཏོན་པ་རང་གིས་ཉན་པ་ལྟ་བུ་མ་ཡིན་གྱི་རང་གིས་བཟླ་བའི་ཚེ་ན་སྔགས་དེའི་སྒྲ་གྲག་པར་དམིགས་ནས་བྱེད་པ་སྟེ་ཡི་གེའི་སྒྲའམ་གདངས་ལ་དམིགས་པའི་བཟླས་བརྗོད་དོ། །སྔར་བཤད་པའི་གཟུགས་ཀྱི་ལྷ་ལ་སོགས་པའི་ལྷ་དྲུག་བསྒོམས་པའི་རྗེས་སུའང་ལྷའི་ང་རྒྱལ་བརྟེན་ཅིང་ལྷའི་གཟུགས་གསལ་བ་ལ་སེམས་རྩེ་གཅིག་ཏུ་དམིགས་ཏེ་དབུགས་འབྱུང་རྔུབ་བསྡམས་ནས་བྱིང་རྒོད་དང་བྲལ་བའི་གནས་པ་བརྟན་པོ་བསྒྲུབ་པར་བྱའོ། །ཡང་ན། སློབ་དཔོན་སངས་རྒྱས་གསང་བ་དང་ཡེ་ཤེས་མཆོག་ལས་གཞན་པའི་པཎྜི་ཏ་ཁ་ཅིག་གིས་ནི་སྔགས་ཕྲེང་ལས་འོད་ཟེར་འཕྲོས་པས་སངས་རྒྱས་མཆོད་པ་དང་སེམས་ཅན་གྱི་དོན་བྱེད་པའི་དམིགས་པའང་བཤད་པ་དེ་བཞིན་དུ་བྱའོ། །དེ་ནས་སྐབས་འདིར་གཏོར་མ་ཆ་གསུམ་སྤྱི་འགྲོ་ལྟར་དང་། དམར་གཏོར་གཅིག་སྔགས་དྲུག་ཕྱག་དྲུག་གིས་བྱིན་གྱིས་བརླབས་ལ། ༀ་མ་ཧཱ་ཀཱ་ལ་གྲྀཧྞ་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་པས་ལེགས་ལྡན་ལ་
དབུལ་ཞིང་། སྔར་གྱི་བསྟོད་པས་བསྟོད། ཕྲིན་ལས་རྒྱས་པ་འཆོལ་ན། སརྦྦ་དེ་བེ་བྷྱཿ ཕཊ། ཅེས་པ་ནས། མཚམས་བཅིང་བགྱིའོ། །ཞེས་པའི་བར་བརྗོད་དོ། །བཟླས་བརྗོད་སོགས་ཀྱི་མཇུག་ཏུ་ཇི་ལྟར་བྱ་བ་ནི། གཡས་པའི་སྲིན་ལག་གི་རྒྱབ་ཏུ་གུང་མོ་བཞག །གཡོན་པའི་སྲིན་ལག་གི་རྒྱབ་ཏུ་གུང་མོ་བཞག་ནས་སྦྱར་ཏེ་གཡས་པའི་མཛུབ་མོས་གཡོན་པའི་གུང་མོ་དང་སྲིན་ལག་དཀྲི་ཞིང་གཡོན་པའི་མཛུབ་མོས་ཀྱང་གཡས་ཀྱི་གུང་མོ་དང་སྲིན་ལག་དཀྲིས་ལ། མཐེའུ་ཆུང་གཉིས་གཤིབས་ཏེ་བསྒྲེངས་ནས་མཐེ་བོང་གཉིས་མཛུབ་མོའི་ཚིགས་དབུས་མར་བཞག་པ་བུམ་པའི་ཕྱག་རྒྱ་བྱས་ལ།བདག་ཅག་གི་དགེ་བའི་རྩ་བ་འདི་དཔལ་ལྡན་བླ་མ་དམ་པ་རྣམས་ཀྱི་སྐུ་ཚེ་རྒྱས་པ་ལ་སོགས་པའི་དངོས་གྲུབ་ཀྱི་རྒྱུར་བཅོམ་ལྡན་འདས་གདུགས་དཀར་པོ་ཅན་གྱི་ལྷ་ཚོགས་ལ་འབུལ་ལོ། །མགོན་པོ་ཁྱོད་ཀྱིས་དཔལ་ལྡན་བླ་མ་དམ་པ་རྣམས་ཀྱི་སྐུ་ཚེ་རྒྱས་པ་ལ་སོགས་པའི་དངོས་གྲུབ་བདག་ལ་སྩལ་ཏུ་གསོལ། ཞེས་དགེ་རྩ་དབུལ་ལོ། །གཞན་ཡང་སྐབས་དང་སྦྱར་ཏེ་དགེ་རྩ་འབུལ་བའི་ཚིག་ཕྲད་བསྒྱུར་རོ། །དེ་ནས་མཆོད་པ་གསར་དུ་ཅི་འབྱོར་པ་བཤམས་ལ་བསང་བ་ནས་གཟི་བྱིན་བསྐྱེད་པའི་བར་སྔར་ལྟར་བྱས་ལ་ཆུ་གཉིས་ཉེར་སྤྱོད་རོལ་མོ་དང་བཅས་པ་སྔར་བཞིན་ཕུལ་ནས་སྔར་བཞིན་བསྟོད།ཡང་ན། རྒྱལ་བ་བྱེ་བ་བདུན་དང་འཕགས་པའི་འཁོར། །དྲང་སྲོང་རིག་སྔགས་འཆང་དང་ཚངས་དབང་དང་། །དྲག་པོ་རི་སྲས་དང་བཅས་སྲེད་མེད་བུ། །ལེགས་ལྡན་ནག་པོ་གདུང་བདུན་བདེ་གཤེགས་བཅུ། །ཕྱག་འོས་ཞབས་ལ་གུས་པས་ཕྱག་བྱས་ནས། །བདེ་གཤེགས་གཙུག་ནས་གསང་སྔགས་ཚིག་ཕྱུང་སྟེ། །གང་གིས་བསྔགས་པ་འཁོར་ལ་བཀའ་སྩལ་པའི། །
དཔལ་ལྡན་གདུགས་དཀར་ཅན་ལ་བསྟོད་པར་བྱ། །འཆི་མེད་དབང་པོའི་མདུན་ས་ཆོས་བཟང་དུ། །ཤཱཀྱའི་རྒྱལ་པོའི་མཚན་མཆོག་གཙུག་ཏོར་ནས། །ལེགས་འཁྲུངས་བདུད་ཀྱི་རིགས་ཀྱིས་མི་ཐུབ་ཅིང་། །ཕས་ཀྱི་རྒོལ་བ་ཐམས་ཅད་ཕྱིར་བཟློག་པས། །གཞན་གྱིས་མི་ཐུབ་གཙུག་ཏོར་གདུགས་དཀར་ཞེས། །ཡོངས་སུ་གྲགས་པས་ས་གསུམ་ཀུན་ཁྱབ་པ། །དུས་གསུམ་རྒྱལ་བ་ཀུན་གྱི་ཡུམ་གཅིག་པུ། །བཅོམ་ལྡན་འདས་མ་ཁྱོད་ལ་བདག་ཕྱག་འཚལ། །གདོན་དང་རྒྱུ་སྐར་བཟའ་ཡི་གནོད་པ་དང་། །དུས་མིན་འཆི་དང་སྡིག་པའི་རྨི་ལམ་དང་། །དུག་མཚོན་མེ་དང་ཆུ་ཡི་གནོད་པ་སོགས། །མ་ལུས་ཞི་མཛད་ཁྱོད་ལ་ཕྱག་འཚལ་ལོ། །སྐུ་ཡི་དཀྱིལ་འཁོར་ཁྱོན་ནི་ཤིན་ཏུ་ཡངས། །དུ་མའི་ཉམས་ཅན་དབུ་ནི་སྟོང་ཕྲག་དང་། །འབར་བའི་ཕྱག་མཚན་ལྡན་པའི་ཕྱག་སྟོང་ཅན། །ས་གསུམ་དཀྱིལ་འཁོར་ཀུན་ལ་དབང་མཛད་མ། །དྲག་ཤུལ་ཆེ་སོགས་ཉེར་གཉིས་ཕྱག་རྒྱའི་འཁོར། །གདུག་པ་འདུལ་བའི་ལས་ལ་ཐོགས་མེད་པས། །ནག་པོའི་སྡེ་རྣམས་རྡུལ་དུ་བརླག་མཛད་པའི། །རིགས་སྔགས་ལྷ་མོའི་ཚོགས་ལ་ཕྱག་འཚལ་ལོ། །དུས་མིན་འཆི་དང་ནད་ཀྱི་འཇིགས་པ་སོགས། །མི་དང་མི་མིན་འབྱུང་པོས་བསྐྱེད་པ་ཡི། །འཇིགས་པ་དྲན་ནས་ཁྱོད་ལ་སྐྱབས་མཆི་ན། །འཇིགས་པ་ཀུན་ལས་རྟག་ཏུ་བསྲུང་དུ་གསོལ། །ལྷ་ཀླུ་ལྷ་མ་ཡིན་ལ་སོགས་པ་ཡི། །གདོན་ཆེན་རྣམས་དང་གཟི་
བརྗིད་མདངས་འཕྲོག་ཅིང་། །མངལ་དང་ཤ་ཁྲག་ལ་སོགས་ཟ་བ་ཀུན། །ཁྱོད་ཞབས་དྲན་པ་ཙམ་གྱིས་བཟློག་ཏུ་གསོལ། །གང་གི་སྒོ་ནས་མི་བསྲུན་སྐྱེ་བོ་ཡིས། །བདག་ཅག་བདེ་ལེགས་འཕྲོག་པའི་རིག་སྔགས་སོགས། །མ་ལུས་བཅད་དང་འབར་བའི་ཕུར་བུ་ཡིས། །དེ་དག་རྣམས་ལ་གདབ་པའི་འཕྲིན་ལས་མཛོད། །མདོར་ན་བཅོམ་ལྡན་མ་ཁྱོད་ཕྱག་རྒྱའི་ཚོགས། །སྐྱབས་སུ་བཟུང་ནས་རེ་བ་འཆའ་བ་ཡི། །ཚུལ་འདི་དགོངས་ལ་འགལ་རྐྱེན་ཀུན་ཞི་ཞིང་། །མཐུན་རྐྱེན་མ་ལུས་ཡིད་བཞིན་འགྲུབ་པར་མཛོད། ཅེས་བསྟོད་དོ། །དེ་ནས་མེ་ཏོག་དང་བཅས་པའི་ཐལ་མོ་སྙིང་གར་སྦྱར་ལ། གང་ཡང་བདག་བློ་རྨོངས་པ་ཡིས། །ཉེས་བྱས་ཅུང་ཟད་གང་བགྱིས་པ། །གང་ཕྱིར་ལུས་ཅན་སྐྱབས་ཡིན་ཕྱིར། །མགོན་ཁྱོད་དེ་ཀུན་བཟོད་པར་མཛོད། །མ་རྙེད་ཡོངས་སུ་མ་ཤེས་དང་། །གང་ཡང་ནུས་པ་མ་མཆིས་པས། །འདིར་ནི་བྱ་བ་གང་བགྱིས་པ། །དེ་ཀུན་གཙོ་བོས་བཟོད་མཛད་རིགས།།ཞེས་ནོངས་པ་བཟོད་པར་གསོལ་ཏེ་བསྟན་པ་རྒྱས་པ་ལ་སོགས་པའི་འདོད་པའི་དོན་ལ་གསོལ་བ་གདབ་བོ། །ༀ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །སྔར་གྱི་སྤྱན་དྲང་བའི་ཕྱག་རྒྱ་ལས་མཐེ་བོང་གཉིས་ཕྱིར་འགྱེད་པ་གཤེགས་སུ་གསོལ་བའི་ཕྱག་རྒྱ་དང་། ཛི་ན་ཛིཀ་གཙྪ། གཞན་ཡས་ཁང་དང་བཅས་པ་རང་བཞིན་གྱི་གནས་སུ་གཤེགས་པར་གྱུར། པར་བསམས་ཏེ་གཤེགས་སུ་གསོལ་ལོ། །རས་བྲིས་སོགས་ཡིན་ན། ༀ་སུ་པྲ་ཏིཥྛ་བཛྲ་ཡེ་སྭཱ་ཧཱ།
ཞེས་སོགས་བརྗོད་དེ་བརྟན་བཞུགས་བྱའོ། །དེ་ནས་ལག་པ་གཡོན་པ་བཀན་པའི་སྟེང་དུ་གཡས་པའི་ཐལ་མོ་བཞག་སྟེ་སོར་མོ་བསྣོལ་བའི་རྩེ་མོ་དྲུང་པར་སྦྱར་ཏེ་ཐད་ཀར་བཞག་པ་མི་མཉམ་པའི་ཡན་ལག་གི་ཕྱག་རྒྱ་གཡོན་ཕྱོགས་ནས་བསྐོར་ཅིང་། ༀ་ཧུ་ལུ་ཧུ་ལུ་ཙཎྚ་ལི་མ་ཏཾ་གི་བི་སྭཱ་ཧཱ། ཞེས་བརྗོད་དེ་སྔར་ཕྱོགས་མཚམས་བཅིངས་པ་ལ་སོགས་པ་དགྲོལ་བར་བྱའོ། །དེ་ནས་དགེ་རྩ་བསྔོས་ལ་ལས་ཀྱི་རྗེས་མི་མངོན་པར་བྱས་ནས། འཇིག་རྟེན་འདི་དང་གཞན་དང་མཐོ་རིས་ན། ཞེས་སོགས་ཤིས་པ་བརྗོད་པར་བྱའོ། །ཚུལ་དེ་ལྟ་བུས་སྔ་དྲོ་དང་གུང་དང་ཕྱི་དྲོའི་དུས་གསུམ་དུ་ཁྲུས་བྱས་ནས་བཟླས་བརྗོད་ཀྱི་ཆོ་ག་སྔར་བཤད་པ་ལྟར་བྱའོ། །ཐུན་མཚམས་སུ་ཇི་ལྟར་བྱ་བ་ནི། ལྷའི་ང་རྒྱལ་བརྟན་པར་བྱས་ལ་ཤེར་ཕྱིན་ལ་སོགས་ཀྱི་གླེགས་བམ་བཀླག་པ་དང་། རྗེས་སུ་དྲན་པ་དྲུག་བསྒོམ་པ་དང་། མཎྜལ་དང་མཆོད་རྟེན་གདབ་པ་སོགས་བྱའོ། །ཉིན་གཅིག་བཞིན་དུའང་མཆོད་པའི་སྣོད་རྣམས་བཀྲུ་བ་དང་། མེ་ཏོག་ཕུལ་བ་རྣམས་དུས་གསུམ་དུ་འཕྱག་པ་དང་། བླ་གོས་ལ་སོགས་པའི་གོས་རྣམས་དུས་གསུམ་དུ་སྔར་གྱི་གོས་བགོ་བའི་སྔགས་ཀྱིས་བསྔག་ཅིང་བཀྲུ་བའམ་བདུག་པའམ་བསང་གཏོར་བྱས་ལ། བཟླས་བརྗོད་དང་སྦྱིན་སྲེག་དང་མཆོད་པ་ལ་སོགས་ལ་ཉལ་བ་དང་འཕྲེས་པ་མ་གཏོགས་པར་རྟག་ཏུ་བླ་གོས་བགོ་ལ་ཉལ་བ་དང་ཁྲུས་བྱེད་པ་མ་གཏོགས་པར་མཐང་གོས་མི་སྤང་ཞིང་རྡུལ་གྱིས་མ་གོས་པར་བྱའོ། །བུ་མོས་བཀལ་བའི་སྐུད་པ་དམར་པོ་ལེ་བརྒན་རྩིའམ་གུར་ཀུམ་གྱིས་བཙོས་པ་ལ་མདུད་པ་བདུན་བོར་ཏེ། ༀ་ཨཱ་ཧ་ར་ཨཱ་ཧ་ར་བནྡྷ་ནི་ཤུ་ཏྲ་དྷ་ར་ཎི་སིརྡྷརྠེ་སྭཱ་ཧཱ། ཞེས་པ་སྟོང་བཟླས་ལ་སྲོད་ཀྱི་དུས་སུ་རྐེད་པ་ལ་བཅིངས་ནས་འཛག་པ་བསྲུང་བར་
བྱའོ། །ཟླ་བ་ཕྱེད་ཕྱེད་ཅིང་ཞག་གཅིག་ཏུ་སྨྱུང་བ་བྱས་ནས་བ་དམར་སེར་གྱི་འོ་མ་ཞོ་མར་བཤང་གཅི་སྟེ་བ་བྱུང་ལྔ་ཀུ་ཤ་ཆུ་དང་བཅས་པ་ལ།ན་མོ་བྷ་ག་ཝ་ཏེ་ཨུཥྞཱི་ཥ་ཡ་ༀ་བི་ཤུདྡྷེ་བཱི་རཱ་ཛཱ་ཤི་བི་ཤནྟེ་ཀ་རེ་སྭཱ་ཧཱ། ཞེས་པ་དེ་བཞིན་གཤེགས་པའི་རིགས་ཀྱི་སྔགས་འདི་ལན་བརྒྱད་བསྔགས་ནས་ཤར་དུ་བལྟས་ཏེ་ཙོག་ཙོག་བུར་འདུག་ནས་སྲང་གསུམ་མཆོད་ཡོན་གྱི་སྣོད་གང་རུང་དུ་འཐུང་ན་བཟླས་པའི་སྐབས་སུ་གླལ་དང་སྦྲིད་པ་ལ་སོགས་ཀྱི་ཉེས་པ་ཟླ་བ་ཕྱེད་དུ་དག་པར་འགྱུར་ཞིང་། བཟའ་བྱ་མིན་པ་སོགས་གང་ཟོས་པ་དེ་ཐམས་ཅད་བྱང་བར་འགྱུར་བར་ལེགས་གྲུབ་ལས་གསུངས་སོ། །གདུགས་དཀར་གྱི་མདོ་འདོན་ན། བྱང་ཆུབ་བར་དུ་བདག་བརྩོན་ནོ། ཞེས་སེམས་བསྐྱེད་པའི་རྗེས་བཟླས་པ་བྱེད་པའི་སྐབས་སུ། དབུ་ནས་རྫོགས་ཀྱི་བར་ཇི་ཙམ་གྲུབ་པ་བཏོན་ནས་གཏོར་མ་ཕྱིན་ཆད་སྔར་བཞིན་བྱའོ། །བཟླས་པའི་སྔ་རོལ་གྱི་གསོལ་གདབ་དང་། གཏོར་མའི་རྗེས་ཀྱི་ཕྲིན་ལས་འཆོལ་ཚུལ་གྱི་ཚིག་ནི། གདུགས་དམར་མཆོག་ཏུ་གྲུབ་པ་ལྟར་དུ་བཀོད་པ་ཡིན་ལ། གདུགས་དཀར་གྱི་རྒྱུད་གཞན་གྱི་སྒོ་ནས་གསོལ་གདབ་དང་ཕྲིན་ལས་འཆོལ་བའི་ཚིག་ཀྱང་འདི་ལས་དཔགས་ཏེ་ཤེས་པར་བྱའོ། ། ༈ བཅོམ་ལྡན་འདས་རྣམ་པར་རྒྱལ་མའི་སྒོམ་བཟླས་སོགས་བྱེད་ཚུལ་ནི། ༀ་སརྦ་ཏ་ཐཱ་ག་ཏ་ཨུཥྞཱི་ཥ་སི་ཏཱ་ཏ་པ་ཏྲེ་ཧཱུཾ་ཕཊ་སྭཱ་ཧཱ། ཞེས་པའི་གནས་སུ། ༀ་བྷྲཱུཾ་སྭཱ་ཧཱ། ཞེས་པའམ། ༀ་ཨ་མྲྀ་ཏ་ཨཱ་ཡུར་ད་དེ་སྭཱ་ཧཱ། ཞེས་པ་གང་རུང་བརྗོད་དོ། །དངོས་གཞིའི་བདག་བསྐྱེད་ཀྱི་སྐབས་སུ། སྟོང་པའི་ངང་ལས། ༀ་བྷྲཱུཾ་སྭཱ་ཧཱ། ཞེས་པའི་སྔགས་ཀྱི་གདངས་ཀྱི་རྣམ་པར་ནམ་མཁའ་ལ་གྲག་པར་གྱུར། ཞེས་དང་། ཡིག་འབྲུ་བྲིས་པའི་རྣམ་པ་ཅན་དུ་འཁོད་པ་ཡོངས་སུ་གྱུར་པ་ལས་སྣ་ཚོགས་རྡོ་རྗེ། རྩེ་མོ་བཅུ་གཉིས་པ་ལྟེ་བ་དཀར་
བ་མདུན་གྱི་རྭ་གསུམ་སྔོ་གཡས་ཀྱི་རྭ་གསུམ་སེར་གཡོན་གྱི་རྭ་གསུམ་ལྗང་རྒྱབ་ཀྱི་རྭ་གསུམ་དམར་པོ། ལྟེ་བར་ༀ་བྷྲཱུཾ་སྭཱ་ཧཱ། ཞེས་པས་མཚན་པར་གྱུར། ཟླ་བ་དང་ཕྱག་མཚན་སྔགས་དང་བཅས་པ་ལས་འོད་ཟེར་སྣ་ཚོགས་བྱུང་བའི་རྩེ་མོ་ལས། རྗེ་བཙུན་མ་རྣམ་པར་རྒྱལ་མའི་ལྷའི་གཟུགས་དཔག་ཏུ་མེད་པ་བྱུང་ནས། ནམ་མཁའི་དབྱིངས་ཐམས་ཅད་ཁྱབ་པར་བྱས། ཞེས་པ་ནས། ལྷའི་སྐུ་དང་བཅས་པའི་འོད་ཟེར་སླར་ལོག་ནས་རང་གི་སེམས་ཟླ་བའི་དཀྱིལ་འཁོར་དང་ཕྱག་མཚན་སྔགས་དང་བཅས་པ་ལ་ཞུགས་པ་ལས། རང་ཉིད་བཅོམ་ལྡན་འདས་རྣམ་པར་རྒྱལ་མ་སྐུ་མདོག་དཀར་མོ་ཞལ་གསུམ་ཕྱག་བརྒྱད། རྩ་ཞལ་དཀར་བ། གཡས་སེར་གཡོན་སྔོ་བའི་ཞལ་རེ་རེའང་སྤྱན་གསུམ་གསུམ་དང་ལྡན་པ། གཡོན་ཞལ་ཡིད་ཙམ་ཁྲོ་བ། མཆེ་བ་ཅུང་ཟད་གཙིགས་པ། ཕྱག་བརྒྱད་ཀྱི་གཡས་དང་པོ་སྣ་ཚོགས་རྡོ་རྗེ། གཉིས་པར་པདྨའི་སྟེང་དུ་སངས་རྒྱས་འོད་དཔག་མེད། གསུམ་པས་མདའ་འཛིན་ཞིང་། བཞི་པ་མཆོག་སྦྱིན་གྱི་ཕྱག་རྒྱ་མཛད་པ། གཡོན་དང་པོ་རྡོ་རྗེའི་ཞགས་པ་དང་བཅས་པའི་སྡིགས་མཛུབ་ཐུགས་ཀར་མཛད་པ། གཉིས་པ་མི་འཇིགས་པའི་ཕྱག་རྒྱ། གསུམ་པ་ན་གཞུ། བཞི་པ་མཉམ་གཞག་གི་ཕྱག་རྒྱའི་སྟེང་དུ་བདུད་རྩིས་གང་བའི་བུམ་པ་བསྣམས་པ། ཞབས་རྡོ་རྗེའི་སྐྱིལ་ཀྲུང་གིས་བཞུགས་པ། དར་གྱི་སྟོད་གཡོགས་དང་
སྨད་གཡོག་ཅན། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། དེའི་གཡས་སུ་སྤྱན་རས་གཟིགས་དཀར་པོ་གཡས་རྔ་ཡབ་དཀར་པོ། གཡོན་པདྨ་དཀར་པོ་བསྣམས་པ། གཡོན་དུ་གསང་བའི་བདག་པོ་སྔོན་པོ། གཡས་རྔ་ཡབ་དཀར་པོ། གཡོན་ཨུཏྤལ་སྔོན་པོའི་སྟེང་ན་རྡོ་རྗེ་བསྣམས་པ། གཉིས་ཀའང་ཞི་བའི་ཉམས་ཅན། དར་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་ཅིང་བཞེངས་པ། གཙོ་མོ་ལ་གཟིགས་པ། ཤར་དུ་མི་གཡོ་བ་སྔོན་པོ་གཡས་རལ་གྲི། ལྷོར་འདོད་རྒྱལ་སྔོན་པོ་གཡས་ལྕགས་ཀྱུ། ནུབ་ཏུ་དབྱུག་སྔོན་ཅན་སྔོན་པོ་གཡས་དབྱུག་པ། བྱང་དུ་སྟོབས་པོ་ཆེ་སྔོན་པོ་གཡས་རྡོ་རྗེ་རྩེ་གསུམ་པ་བསྣམས་པ། ཐམས་ཅད་ཀྱང་གཡོན་སྡིགས་མཛུབ་ཐུགས་ཀར་མཛད་པ། དབུ་སྐྲ་དང་སྨ་ར་དམར་སེར་འབར་ཞིང་མཆེ་བ་གཙིགས་པ། སྟག་གི་པགས་པའི་ཤམ་ཐབས་ཅན་སྦྲུལ་གྱིས་བརྒྱན་པ། ཡེ་ཤེས་ཀྱི་མེ་རབ་ཏུ་འབར་བའི་དབུས་ན་གཡས་བསྐུམ་གཡོན་བརྐྱང་པའི་སྟབས་ཀྱིས་བཞུགས་པ། སྟེང་གི་གཡས་གཡོན་དུ་གནས་གཙང་མའི་ལྷའི་བུ་གཉིས་སེར་པོ་དར་དང་རིན་པོ་ཆེའི་རྒྱན་གྱིས་བརྒྱན་པ། ཕྱག་གཉིས་བདུད་རྩིའི་བུམ་པ་བསྣམས་ནས་བཅོམ་ལྡན་འདས་མ་ལ་སྐུ་ཁྲུས་གསོལ་བ། ཐམས་ཅད་ཀྱི་སྤྱི་བོར་ༀ་དཀར་པོ། མགྲིན་པར་ཨཱཿ དམར་པོ། ཐུགས་ཀར་ཧཱུཾ་སྔོན་པོ། དཔྲལ་བར་ཏྲཱཾ་སེར་པོ། ལྟེ་བར་ཧྲཱིཿ དམར་པོ། བརླ་གཡས་གཡོན་ལ་ཨཾ་ཨཱཿ ལྗང་གུ །ཞེས་པའི་རྗེས་སུ་གནས་བཞི་བྱིན་གྱིས་བརླབ་པའམ། ཡང་ན།
ཐམས་ཅད་ཀྱི་སྦྱི་བོར་ༀ་ལས་འཁོར་ལོ་དཀར་པོ་ལྟེ་བར་ༀ་གྱིས་མཚན་པ། ཞེས་པ་ནས། ༀ་ཏ་ཐཱ་ག་ཏ་ཨུདྦྷ་ཝ་ཡེ་སྭཱ་ཧཱ། ཞེས་གནས་བཞི་བྱིན་གྱིས་བརླབས་ཏེ་མཆོད་ནས། མཛེས་ལྡན་པདྨ་དྲི་མེད་རི་བོང་ཅན། །དེ་སྟེང་སྒེག་པའི་ཉམས་ཀྱིས་ཡིད་འཕྲོག་ཅིང་། །གཟི་བྱིན་ཉི་མ་འབུམ་ལྟར་རབ་ཏུ་བརྗིད། །ཕྱག་གི་མཐིལ་ན་ཚེ་དཔག་མེད་བཞུགས་ཤིང་། །བདུད་དང་ཉོན་མོངས་དགྲ་ལས་ལེགས་རྒྱལ་བས། །འཇིག་རྟེན་གསུམ་ན་རྣམ་པར་རྒྱལ་མ་ཞེས། །གང་གི་སྙན་པ་རབ་ཏུ་གསལ་བ་ཅན། །བཅོམ་ལྡན་འདས་མ་དེ་ལ་མགོས་ཕྱག་འཚལ། །དེ་ཡི་ཀུན་ཏུ་བཟང་པོའི་ཕྲིན་ལས་རྣམས། །དགོངས་པ་ཇི་བཞིན་སྐོང་བའི་ཕུན་ཚོགས་འཁོར། །རྗེ་བཙུན་ཐུགས་རྗེའི་གཏེར་དང་གསང་བའི་བདག །དཔལ་ལྡན་ཁྲོ་བོའི་དབང་པོ་བཞི་ལ་འདུད། །འཆི་བདག་སྟོབས་འཕྲོག་བདུད་རྩིའི་རྒྱུན་འབེབས་ཤིང་། །རྡོ་རྗེ་ཚེ་ཡི་དཔལ་རབ་སྟེར་མཛད་པ། །རབ་མཆོག་ལྷ་ཡི་བུ་ནི་ཟུང་གཅིག་ལ། །རྒྱུན་དུ་དང་བས་བདག་ནི་ཕྱག་འཚལ་ལོ། ཞེས་སོགས་ཀྱིས་བསྟོད། གཙོ་མོ་རྐྱང་པ་ལས་མ་བསྐྱེད་ན་གཙོ་མོའི་བསྟོད་པ་ཉིད་བྱའོ། །མདུན་བསྐྱེད་ཀྱི་སྐབས་སུ། ནང་གི་སྟེང་དུ་འོག་གི་ས་གཞི་ཐམས་ཅད་ཤར་སྔོ། ལྷོ་སེར། ནུབ་དམར། བྱང་ལྗང་། དབུས་དཀར་བར་གྱུར་པའི་ནང་གི་དབུས་སུ་རིན་པོ་ཆེ་ལས་གྲུབ་པའི་མཆོད་རྟེན། རིན་པོ་ཆེའི་ཁྲིའི་སྟེང་ན་རིན་པོ་ཆེའི་བང་རིམ་ཟླུམ་པོ་གསུམ་དེའི་སྟེང་དུ་བུམ་གདན།
དེའི་སྟེང་དུ་བྲེ། དེའི་སྟེང་དུ་གདུགས་རིམ་པ་བཅུ་གསུམ། ཆར་ཁེབས་ཏོག་དང་བཅས་པ་མེ་ཏོག་གི་ཕྲེང་བ་དང་དར་སྣ་ཚོགས་ཀྱི་ལྡ་ལྡིས་མཛེས་པར་བྱས་པ། བུམ་པ་ཟླུམ་པོ་སྒོ་དང་བཅས་པ་ཡངས་ཤིང་རྒྱ་ཆེ་བའི་དབུས་དང་། གཡས་གཡོན། སྟེང་རྣམས་སུ་སྣ་ཚོགས་པདྨ་དང་ཟླ་བའི་གདན་ལྔ། ཕྱོགས་བཞིར་སྣ་ཚོགས་པདྨ་དང་ཉི་མའི་གདན་རེ་རེ། ན་མཿ སརྦ་ཏ་ཐཱ་ག་ཏཱ་ནཱཾ། ཞེས་སོགས་དང་། སྤྱན་འདྲེན་གྱི་སྐབས་སུ། ཛིན་ཛིཀ་ཨེ་ཧྱེ་ཧི། ༀ་སརྦ་ཏ་ཐཱ་ག་ཏ་ཨུཥྞཱི་ཥ་བི་ཛ་ཡ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་སྭཱ་ཧཱ། བཅོམ་ལྡན་འདས་གཙུག་ཏོར་རྣམ་པར་རྒྱལ་མའི་ལྷ་ཚོགས་ལ་རིག་སྔགས་དང་། གསང་སྔགས་དང་། ཁྲོ་བོ་དང་། མངག་གཞུག་པ་དང་། མངག་གཞུག་མ་ལ་སོགས་པ་ནམ་མཁའི་དབྱིངས་ཁྱབ་ཅིང་ཁོར་ཡུག་ཏུ་བསྐོར་བ་བྱོན་པ་ནི། དབུས་ཀྱི་པད་ཟླའི་གདན་ལ། བཅོམ་ལྡན་འདས་གཙུག་ཏོར་རྣམ་པར་རྒྱལ་མ་སྐུ་མདོག་དཀར་མོ། ཞེས་པ་ནས། ཕྱག་གཉིས་བདུད་རྩིའི་བུམ་པ་བསྣམས་ནས་བཅོམ་ལྡན་འདས་མ་ལ་སྐུ་ཁྲུས་གསོལ་བ། ཐམས་ཅད་ཀྱི་སྤྱི་བོར་ༀ་ལས་འཁོར་ལོ་དཀར་པོ་ལྟེ་བར་ༀ་གྱིས་མཚན་པ། ཞེས་སོགས་དང་། མཆོད་པའི་སྐབས་སུ། ༀ་སརྦ་ཏ་ཐཱ་ག་ཏ་ཨུཥྞཱི་ཥ་བི་ཛ་ཡ་ས་པ་རི་ཝཱ་ར། ཞེས་པ་མཆོད་སྔགས་ཀུན་གྱི་འགོར་སྦྱར།བསྟོད་པའི་སྐབས་སུ། རྡོ་རྗེ་འཛིན་ལ་ཕྱག་འཚལ་ལོ། ཞེས་པའི་རྗེས་སུ། མཛེས་ལྡན་པདྨ་དྲི་མེད་རི་བོང་ཅན། ཞེས་སོགས་ཀྱིས་བསྟོད་ནས། ན་མཿ སརྦ་བུདྡྷ་བོ་དྷི་སཏྭ་ནཱཾ།
ཞེས་སོགས་དང་། བཟླས་པའི་སྐབས་སུ། ལྷའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ། ༀ་བྷྲཱུཾ་སྭཱ་ཧཱ། ༀ་ཨ་མྲྀ་ཏ་ཨཱ་ཡུར་དེ་སྭཱ་ཧཱ། ཞེས་དང་། ༀ་ན་མོ་བྷ་ག་ཝ་ཏེ། ཞེས་པ་ནས། མ་ཧཱ་མུ་དྲཱ་མནྡྲ་པ་དེཿ སྭཱ་ཧཱ། ཞེས་པའི་བར་གྱིས་མཚན་པར་གྱུར་པར་བསམ་ཞིང་ཤུབ་བུའི་བཟླས་པ་སོགས་བྱས་ནས་གཏོར་མ་ཆ་གསུམ་ཕུལ་ཏེ། བདག་ཅག་གི་དགེ་བའི་རྩ་བ་འདི་དཔལ་ལྡན་བླ་མ་དམ་པ་རྣམས་ཀྱི་སྐུ་ཚེ་རྒྱས་པ་ལ་སོགས་པའི་དངོས་གྲུབ་ཀྱི་རྒྱུར་བཅོམ་ལྡན་འདས་མ་རྣམ་པར་རྒྱལ་མའི་ལྷ་ཚོགས་ལ་འབུལ་ལོ། ཞེས་སོགས་ཀྱི་དགེ་རྩ་ཕུལ་ནས་མཆོད་པའི་རྗེས་སུ། སྔར་གྱི་སྤྱི་བསྟོད་དང་། མཛེས་ལྡན་པདྨ་དྲི་མེད་རི་བོང་ཅན། ཞེས་སོགས་ཀྱིས་བསྟོད་ནས། བཟོད་གསོལ་སོགས་དང་། སྔ་ཕྱིའི་ཆོ་ག་གཞན་ཐམས་ཅད་ནི་གདུགས་དཀར་ཀྱི་སྐབས་བཞིན་བྱའོ། །བུམ་བསྐྱེད་བྱ་ཚུལ་ནི། བདག་བསྐྱེད་བསྟོད་པ་དང་བཅས་པ་ཡན་སྔར་ལྟར་རྫོགས་པར་བྱས་པའི་རྗེས་སུ། བུམ་པ་སྤྱི་དང་མཐུན་པར་བཤམས་པའི་སྟེང་དུ་མཆོད་རྟེན་ཚད་ལྡན་བཞུགས་པའི་ཐ་མར་མཆོད་ཡོན་སོགས་མཆོད་པ་ཅི་འབྱོར་པ་བཤམ། སྟོང་མཆོད་བྱེད་ན། མཆོད་ཡོན་དང་། མེ་ཏོག་དང་། བདུག་སྤོས་དང་། སྣང་གསལ་དང་། དྲི་མཆོག་དང་། ཞལ་ཟས་དང་། གདུགས་དང་། བ་དན་རྣམས་སྟོང་ཕྲག་རེ་རེ། གཞན་ཡང་མཆོད་པ་འབྱོར་ཚད་བཤམ། གཏོར་མ་སྟོང་གི་ཆས་ཀྱང་བཞག་གོ །དེ་ནས། སྭ་བྷཱ་ཝས་ སྟོང་པར་སྦྱངས་ལ། སྟོང་པའི་ངང་ལས་བཾ་ལས་བྱུང་བའི་རིན་པོ་ཆེའི་བུམ་པ་དཀར་པོ་ལྟོ་
བ་ཆེ་བ། མགྲིན་པ་རིང་བ་མཆུ་འཕྱང་བ་ལ་སོགས་པ་མཚན་ཉིད་ཐམས་ཅད་དང་ལྡན་པར་གྱུར་ པར་བསམ། དེའི་སྟེང་དུ་བྷྲཱུཾ་ལས་བྱུང་བའི་རིན་པོ་ཆེ་ལས་གྲུབ་པའི་མཆོད་རྟེན། ཞེས་པ་ནས། ཕྱོགས་བཞིར་སྣ་ཚོགས་པདྨ་དང་ཉི་མའི་གདན་རེ་རེ། ཞེས་པའི་བར་དང་། ༀ་བྷྲཱུཾ་སྭཱ་ཧཱ། ཞེས་པའི་གདངས་ཀྱིས་རྣམ་པར་ནམ་མཁའ་ལ་གྲག་པར་གྱུར། དབུས་ཀྱི་ཟླ་བའི་དཀྱིལ་འཁོར་གྱི་སྟེང་དུ་སྔགས་ཀྱི་གདངས་ཀྱི་རྣམ་པར་ནམ་མཁའ་ལ་གྲགས་པ་དེ་ཤིན་ཏུ་དག་པའི་དངུལ་ཆུ། ཞེས་པ་ནས། ལྷའི་སྐུ་དང་བཅས་པའི་འོད་ཟེར་སླར་ལོག་ནས་ཟླ་བའི་དཀྱིལ་འཁོར་དང་ཕྱག་མཚན་སྔགས་དང་བཅས་པ་ལ་ཞུགས་པ་ལས། བཅོམ་ལྡན་འདས་རྣམ་པར་རྒྱལ་མ་སྐུ་མདོག་དཀར་མོ་ཞལ་གསུམ་ཕྱག་བརྒྱད། ཅེས་པ་ནས། ཕྱག་གཉིས་བདུད་རྩིའི་བུམ་པ་བསྣམས་ནས་བཅོམ་ལྡན་འདས་མ་ལ་སྐུ་ཁྲུས་གསོལ་བ། ཐམས་ཅད་ཀྱི་སྤྱི་བོར་ༀ་ལས་འཁོར་ལོ་དཀར་པོའི་ལྟེ་བར་ༀ་གྱིས་མཚན་པ། ཞེས་པ་ནས། གནས་བཞི་བྱིན་གྱིས་བརླབ་པའི་བར་བྱས་ནས། ཤཾ་ཀ་རེ་ས་མཱ་ཡེ་སྭཱ་ཧཱ། ཛི་ན་ཛི་ཀ །ཅེས་ཕྱག་རྒྱ་བསྟན་པའི་རྗེས་སུ་མཆོད་པ་བསང་ཞིང་བྱིན་གྱིས་བརླབས་ནས། བྱང་ཆུབ་བར་དུ་བདག་བརྩོན་ནོ། ཞེས་པའི་བར་བྱ། བཟླས་པའི་སྐབས་སུ། དམིགས་པ་སྔར་ལྟར་བྱས་ལ་ཡང་མདུན་བསྐྱེད་ཀྱི་ཐུགས་ཀའི་སྔགས་འཕྲེང་ལས་འོད་ཟེར་འཕྲོས་པས་རྒྱལ་བ་སྲས་བཅས་ཀྱི་ཡེ་ཤེས་ཀྱི་བདུད་རྩི་བཀུག་ནས་བུམ་པའི་ཆུ་ལ་ཐིམ་ཞིང་ལྷའི་སྐུའི་བ་སྤུའི་བུ་ག་ནས་ཀྱང་
བདུད་རྩིའི་རྒྱུན་བབས་པས་བུམ་པ་གང་བར་བསམ་ཞིང་། ལག་པ་གཉིས་མཉམ་པའི་ཐལ་མོ་ལས་མཐེ་བོང་དང་མཛུབ་མོ་གཉིས་རྩེ་སྤྲད་པ། ལེགས་སོ་སྦྱིན་པའི་ཕྱག་རྒྱ་བཅས་ལ་གཟུངས་རིང་ཚར་གཅིག་བཟླ། དེ་ནས་ཕྱག་རྒྱ་མེད་པར་བཟླ་ཞིང་སྟོང་མཆོད་ཀྱི་སྐབས་ཡིན་ན་གཟུངས་རིང་སྟོང་ཡན་ཆད་བཟླས་པའི་རྗེས་སུ། གྲུབ་ན་ཕྱག་སྟོང་དང་སྐོར་བ་སྟོང་ཡང་བྱའོ། །དེ་ནས་ཨ་ཀཱ་རོའམ་སྔགས་དྲུག་དང་ཕྱག་རྒྱ་དྲུག་གིས་གཏོར་མ་བྱིན་གྱིས་བརླབས་པ། ༀ་ཨུཥྞཱི་ཥ་བི་ཛ་ཡ་ས་པ་རི་ཝཱ་ར་ཨི་དཾ་བ་ལ່་ཏ་ཁ་ཁ་ཁཱ་ཧི་ཁཱ་ཧི། ཞེས་པས་བཅོམ་ལྡན་འདས་མ་འཁོར་བཅས་ལ་གཏོར་མ་སྟོང་ཕུལ་བའི་རྗེས་སུ་ཆ་གསུམ་དབུལ་བ་ནས་སྲུང་འཁོར་དགྲོལ་བ་དང་ཤིས་པ་བརྗོད་པའི་བར་རྣམས་སྔར་བཤད་པ་བཞིན་བྱའོ། །ཡང་ན་བུམ་པའི་སྟེང་གི་མཆོད་རྟེན་གྱི་ནང་དུ་ལྷ་བསྐྱེད་ཚུལ་ནི། ཕྱོགས་བཞིར་སྣ་ཚོགས་པདྨ་དང་ཉི་མའི་གདན་རེ་རེ། ཞེས་པའི་རྗེས་སུ་གནས་བྱིན་གྱིས་བརླབ་པའི་སྔགས་བརྗོད་པ་ནས་སྤྱན་དྲངས་ཏེ་མཆོད་ཡོན་མགོའི་ཐད་ནས་ཕུལ་པའི་རྗེས་སུ། བཅོམ་ལྡན་འདས་རྣམ་པར་རྒྱལ་མའི་ལྷ་ཚོགས་ལ་རིག་སྔགས་དང་། ཞེས་པ་ནས། ཁོར་ཡུག་ཏུ་བསྐོར་བ་བྱོན་པ་ནི་དབུས་ཀྱི་པད་ཟླའི་གདན་ལ་བཅོམ་ལྡན་འདས་རྣམ་པར་རྒྱལ་མ་སྐུ་མདོག་དཀར་མོ། ཞེས་པ་ནས། ཐམས་ཅད་ཀྱི་སྤྱི་བོར་ༀ་ལས་འཁོར་ལོ་དཀར་པོའི་ལྟེ་བར་ༀ་གྱིས་མཚན་པ། ཞེས་སོགས་དང་། དེ་ནས། བཅོམ་ལྡན་ཐུགས་རྗེས་བྱོན་པ་ལེགས། ཞེས་པ་ནས། བགེགས་བསྐྲད་པའི་བར་བྱས་ལ། སྔ་ཕྱིའི་ཆོ་ག་གཞན་རྣམས་ནི་སྔར་
བཞིན་དུ་བྱའོ། །བུམ་པའི་ལྷ་བསྐྱེད་ཚུལ་སྔ་མ་ལ་ནི་སྤྱན་དྲང་བ་ནས་གདན་དབུལ་བའི་བར་དང་ཕྱི་འབྲང་གི་བགེགས་བསྐྲད་པ་མི་དགོས་པ་འདྲའོ། །བུམ་བསྐྱེད་གཞན་ལའང་བུམ་པའི་ལྷ་བསྐྱེད་ཚུལ་སྔ་ཕྱི་གཉིས་གང་རུང་བྱའོ། །ཁྱད་པར་ནི་བུམ་པའི་ནང་དུ་ལྷ་རང་རང་གི་གདན་བསམས་ལ་བུམ་པའི་ནང་དུ་བསྐྱེད་པར་བྱའོ། །དེ་བཞིན་གཤེགས་པའི་རིགས་རྗེ་བཙུན་འཇམ་དབྱངས་ཨ་ར་པ་ཙ་ན་ལ། ༀ་བྷྲཱུཾ་སྭཱ་ཧཱ། ཞེས་པའི་གནས་སུ། ༀ་ཨ་ར་པ་ཙ་ན་དྷཱིཿ ཞེས་པ་དང་། ལྷ་མོ་འོད་ཟེར་ཅན་ལ། ༀ་མཱ་རཱི་ཙྱཻ་མཾ་སྭཱ་ཧཱ། ཞེས་སོགས་གཞུག །བདག་བསྐྱེད་ཀྱི་སྐབས་སུ། ཡིག་འབྲུ་བྲིས་པའི་རྣམ་པ་ཅན་དུ་འཁོད་པ་ཡོངས་སུ་གྱུར་པ་ལས། རལ་གྲིའི་དབུས་སུ། ༀ་ཨ་ར་པ་ཙ་ན་དྷཱིཿ ཞེས་པས་མཚན་པར་གྱུར། ཞེས་སོགས་ཀྱིས་ཐུན་མོང་མ་ཡིན་པ་མཆོད་འབུལ་སོགས་ཀྱི་མགོར་འདོགས་ཚུལ་ཅུང་ཟད་བསྒྱུར་བ་དང་། མངོན་རྟོགས་རང་རང་གི་གཞུང་བཞིན་དང་བཟླས་བྱའི་སྔགས་མ་གཏོགས་བདག་བསྐྱེད་མདུན་བསྐྱེད་བུམ་བསྐྱེད་རྣམས་ཀྱི་ཆོ་ག་སྔ་ཕྱི་ཐམས་ཅད་སྔར་བཤད་པ་ལྟར་བྱའོ། །དེ་བཞིན་དུ་དེ་བཞིན་གཤེགས་པའི་རིགས་ཐམས་ཅད་ལ་སྦྱར་ཏེ་ཤེས་པར་བྱའོ། །རིགས་གཞན་གཉིས་ལ་སྦྱོར་ཚུལ་ནི། ༀ་ཏ་ཐཱ་ག་ཏ་ཨུདྦྷ་ཝ་ཡེ་སྭཱ་ཧཱ། ཞེས་པ་རྣམས་ཀྱི་གནས་སུ་པདྨའི་རིགས་མགོན་པོ་ཚེ་དཔག་མེད་དང་། བཅུ་གཅིག་ཞལ་ལ་སོགས་པ་རྣམས་ལ། ཐལ་མོ་སྦྱར་བ་ཁ་བྱེ་བའི་ཚུལ་དུ་བྱས་ཏེ་སྙིང་གར་བཞག་ནས། ༀ་པདྨ་ཨུདྦྷ་ཝ་ཡེ་སྭཱ་ཧཱ། ཞེས་དང་། དཔལ་ཕྱག་ན་རྡོ་རྗེ་སོགས་རྡོ་རྗེའི་རིགས་རྣམས་ལ། ཐལ་མོ་ལྡོག་སྟེ་སྦྱར་ལ་མཐེ་བོང་དང་མཐེའུ་ཆུང་གཉིས་སྦྱར་ཏེ་ལྟེ་བའི་ཐད་དུ་བཞག་ལ། ༀ་བཛྲ་ཨུདྦྷ་ཝ་ཡེ་སྭཱ་ཧཱ། ཞེས་དང་། བདག་བསྐྱེད་མདུན་བསྐྱེད་
ཀྱི་ཐུགས་ཀར་ཧཱུཾ་ལས་རྡོ་རྗེ་སྔོན་པོའི་ལྟེ་བར་ཧཱུཾ་གིས་མཚན་པ་ཞེས་པའི་རྗེས་སུའང་རང་རང་གི་སྔགས་འདི་དག་བརྗོད་ཅིང་། རང་རང་གི་ཕྱག་རྒྱ་འདི་དག་ཐུགས་ཀ་དང་སྨིན་མཚམས་དང་། མགྲིན་པ་དང་དཔུང་མགོ་རྣམས་སུ་རེག་ལ། བྱིན་གྱིས་བརླབ་པར་བྱའོ། ། ཛི་ན་ཛིཀ །ཞེས་པའི་གནས་རྣམས་སུ། པདྨའི་རིགས་ལ་ཨཱ་རོ་ལིཀ །ཅེས་དང་། རྡོ་རྗེའི་རིགས་ལ་བཛྲ་དྷྲིཀ །ཅེས་དང་། ༀ་སརྦ་ཏ་ཐཱ་ག་ཏོཥྞཱི་ཥ་སི་ཏཱ་ཏ་པ་ཏྲེ་ཧཱུཾ་ཕཊ་སྭཱ་ཧཱ། ཞེས་པའི་གནས་སུ་ལྷ་རང་རང་གི་སྙིང་པོ་དང་ཉེ་སྙིང་ལ་སོགས་པའི་སྔགས་དང་། གདུ་བུའི་དབུས་ཀྱི་ཕྲེང་རྡོག་ནི་པདྨའི་རིགས་ལ་པདྨའི་སྙིང་པོ་དང་། རྡོ་རྗེའི་རིགས་ལ་རུ་རག་ཤའི་ཕྲེང་རྡོག་གཅིག་བཏགས་ལ། ༀ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནེ་སརྦྦ་ཨརྠ་སཱ་དྷ་ནི་སྭཱ་ཧཱ། ཞེས་པའི་གནས་སུ། པདྨའི་རིགས་ལ།དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །མཐོང་བ་དང་ནི་ཐོས་པ་དང་། །རེག་པ་དང་ནི་དྲན་པའང་རུང་། །བདག་ནི་སེམས་ཅན་ཐམས་ཅད་ཀྱི། །ནད་རྣམས་ཀུན་གྱི་གསོས་གྱུར་ཅིག །ཏཏྱ་ཐཱ། ཀ་ཊེ་བི་ཀ་ཊེ་ཀཾ་ཀ་ཊེ་ཀ་ཊ་བི་ཀ་ཊེ། ཀཾ་ཀ་ཊེ་བྷ་ག་ཝ་ཏི་བི་ཛ་ཡེ་སྭཱ་ཧཱ། ཞེས་དང་། རྡོ་རྗེའི་རིགས་ལ། ༀ་ཀུ་ལན་དྷ་རི་བནྡྷ་བནྡྷ་ཧཱུཾ་ཕཊ། ཅེས་དང་། ༀ་ཏེ་ཛཿ ཏེ་ཛཿ ས་ནི་སདྡྷི་སཱ་དྷ་ཡ་ཧཱུཾ། ཞེས་པའི་གནས་སུ། པདྨའི་རིགས་ལ། ༀ་དྷི་བྱ་དྷི་བྱ་དྷི་པ་ཡ། ཨ་བེ་ཤ་མ་ཧཱ་ཤྲཱི་ཡ་ཡེ་སྭཱ་ཧཱ། ཞེས་དང་། རྡོ་རྗེའི་རིགས་ལ། ༀ་ཛྭ་ལ་ཛྭ་ལ་ཡ་བནྡྷ་རི་ཧཱུཾ་ཕཊ། ཅེས་དང་། དངོས་གཞི་
བདག་བསྐྱེད་མདུན་བསྐྱེད་ཀྱི་ལྷ་དྲུག་བསྐྱེད་པའི་སྐབས་སུ་ལྷ་རང་རང་གི་སྙིང་པོ་དང་། ཉེ་སྙིང་སོགས་ཀྱི་སྔགས་ཀྱི་གདངས་ཀྱི་རྣམ་པར་ནམ་མཁའ་ལ་གྲག་པར་བསམ་པ་དང་། རང་རང་གི་གདན་ཟླ་བ་དང་། ཉི་མ་ལ་སོགས་པའི་སྟེང་དུ་རང་རང་གི་སྔགས་ཀྱི་གདངས་ཀྱི་རྣམ་པར་ནམ་མཁའ་ལ་གྲགས་པ་དེ་ཡིག་འབྲུ་བྲིས་པའི་རྣམ་པ་ཅན་དུ་འཁོད་པ་ལས། རང་རང་གི་ཕྱག་མཚན་གྱི་གཙོ་བོ་རང་རང་གི་སྔགས་ཀྱིས་མཚན་པ་ལས་སྐུ་ལ་སོགས་པ་སྤྲོ་བསྡུ་བྱས་ཏེ་ལྷ་བསྐྱེད་པ་དང་སྤྱན་དྲངས་ཏེ་བཞུགས་སུ་གསོལ་ནས་གསལ་གདབ་པ་རྣམས་ནི་རང་རང་གི་མངོན་རྟོགས་ཀྱི་སྐབས་དང་སྦྱར་ལ་ཐུན་མོང་བ་རྣམས་སྔར་ལྟར་བསྒོམ་ཞིང་བརྗོད་པར་བྱའོ། །ༀ་ཏྲཾ་བནྡྷ་སྭཱ་ཧཱ། ཞེས་པའི་གནས་སུ། ༀ་ན་མོ་མ་ཧཱ་ཤྲཱི་ཡཱ་ཡེ། སཽ་མེ་སིདྡྷི་སིདྡྷི་སཱ་དྷ་ཡ། ཤི་བི་ཤི་བཾ་ཀ་རི། ཨ་བྷ་ཧ། སརྦ་ཨརྠ་སཱ་དྷ་ནི་སྭཱ་ཧཱ། ཞེས་པདྨའི་རིགས་ཀྱི་ལས་ཐམས་ཅད་པ་དང་། ༀ་ཀཱི་ལི་ཀཱི་ལ་བཛྲ་ཧཱུཾ་ཕཊ། ཅེས་རྡོ་རྗེའི་རིགས་ཀྱི་ལས་ཐམས་ཅད་པའི་སྔགས་བརྗོད་དོ། །སྤྱན་དྲང་བའི་སྐབས་སུ། མཆོད་ཡོན་གྱི་སྣོད་བཟུང་ནས་པདྨའི་རིགས་ལ་བྲང་དང་། རྡོ་རྗེའི་རིགས་ལ་ལྟེ་བའི་ཐད་ཀ་ནས་ཕུལ་ལ་བྱོན་པར་བསམ་མོ། །དེ་སྲིད་བཅོམ་ལྡན་བཞུགས་སུ་གསོལ། ཞེས་པའི་རྗེས་སུ། པདྨའི་རིགས་ལ། ༀ་ཀ་མ་ལ་ཡེ་སྭཱ་ཧཱ། ཞེས་དང་། རྡོ་རྗེའི་རིགས་ལ། ༀ་བཛྲ་ཨཱ་ས་ནི་ཧཱུཾ་ཕཊ། ཅེས་པ་ཕྱག་རྒྱ་དང་བཅས་པས་གདན་དབུལ། རྒྱས་པར་བྱེད་ན་གདན་གསུམ་ག་དབུལ་ལོ། །ཤཾ་ཀ་རེ་ས་མཱ་ཡེ་སྭཱ་ཧཱ། ཞེས་ཕྱག་རྒྱ་བསྟན་པའི་རྗེས་སུ། པདྨའི་རིགས་ལ་ལག་པ་གཉིས་ཕན་ཚུན་དུ་ཁུ་ཚུར་བཅིངས་ལ་གཡོན་པའི་མཐེ་བོང་ནང་དུ་བཅུག་སྟེ་གཡས་པའི་མཐེ་བོང་བསྟན་པ་དང་། རྡོ་རྗེའི་རིགས་ལ་དེ་ཉིད་ལས་གཡོན་པའི་མཐེ་བོང་
བསྟན་པའི་ཕྱག་རྒྱ་བྱའོ། །ༀ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། མི་གཡོ་བ། ཅེས་པའི་གནས་སུ་པདྨའི་རིགས་ཀྱི་ཁྲོ་བོའི་སྔགས། ༀ་བཛྲ་ཀྲོང་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུཾ་ཕཊ། རྟ་མགྲིན་ཤྭ་ན། ཞེས་པ་དང་། རྡོ་རྗེའི་རིགས་ཀྱི་ཁྲོ་བོའི་སྔགས། ༀ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧཱུཾ་ཕཊ། ཕྱག་རྡོར་འགྲོ་བཟང་། ཞེས་བཟླས་པའི་ཡུངས་ཀར་གཏོར་ལ་ཕྱི་འབྲང་གི་བགེགས་བསྐྲད། བསྟོད་པའི་སྐབས་སུ་ནི་སྤྱི་བསྟོད་ཀྱི་རྗེས་སུ་རང་རང་གི་བསྟོད་པ་བྱའོ། །བཟླས་པའི་སྐབས་སུ། ༀ་བྷ་ག་ཝ་ཏེ་སིདྡྷི་སིདྷ་ཡ་སིདྡྷརྠ་སྭཱ་ཧཱ། ཞེས་པའི་གནས་སུ་པདྨའི་རིགས་ལ། ༀ་བ་སུ་མ་ཏི་ཤྲི་ཡེ་སྭཱ་ཧཱ། ཞེས་དང་། རྡོ་རྗེའི་རིགས་ལ། ༀ་བཛྲ་ཡ་ཛ་ཏ་ན་ཛེ་ཡེ་སྭཱ་ཧཱ། ཞེས་བརྗོད་དོ། །སྔ་ཕྱིའི་ཆོ་ག་ཐུན་མོང་བ་གཞན་ཐམས་ཅད་ནི་གདུགས་དཀར་གྱི་ཆོ་ག་ལྟར་བྱའོ། ། ༈ བཅོམ་ལྡན་འདས་རྡོ་རྗེ་རྣམ་པར་འཇོམས་པའི་སྒོམ་བཟླས་སོགས་བྱེད་ཚུལ་ནི། ༀ་སརྦ་ཏ་ཐཱ་གཏོཥྞཱི་ཥ་སི་ཏཱ་ཏ་པ་ཏྲེ་ཧཱུཾ་ཕཊ་སྭཱ་ཧཱ། ཞེས་པའི་གནས་སུ། ན་མཤྩཎྜ་བཛྲ་ཀྲོདྷཱ་ཡ། གཏུམ་པོ་རྡོ་རྗེ་ཁྲོ་བོ་ལ་ཕྱག་འཚལ་ལོ། ། སྒོ་བ་བཞིའི་ཤར་སྒོ་བ། ཧུ་ལུ་ཧུ་ལུ། འབད་པར་གྱིས་འབད་པར་གྱིས། ལྷོ་སྒོ་བ། ཏིཥྛ་ཏིཥྛ། གནས་པར་གྱིས་གནས་པར་གྱིས། ནུབ་སྒོ་བ། བནྡྷ་བནྡྷ། ཆིངས་ཆིངས། བྱང་སྒོ་བ། ཧ་ན་ཧ་ན། སྣུན་སྣུན། འཆི་བ་མེད་པ། ཨ་མྲྀ་ཏེ་ཧཱུྃ་ཕཊ། བདུད་རྩི་འཁྱིལ་བའི། ཅེས་པ་གཞུག །དངོས་གཞིའི་བདག་བསྐྱེད་ཀྱི་སྐབས་སུ། སྟོང་པའི་ངང་ལས། ན་མཤྩཎྚ་བཛྲ་ཀྲོ་དྷཱ་ཡ། ཧུ་ལུ་ཧུ་ལུ། ཏིཥྛ་ཏཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ། ཅེས་པའི་
སྔགས་ཀྱི་གདངས་ཀྱི་རྣམ་པར་ནམ་མཁའ་ལ་གྲག་པར་གྱུར། བདག་དང་ལྷའི་དེ་ཁོ་ན་ཉིད་དབྱེར་མི་ཕྱེད་པའི་རྣམ་པ་ཅན་གྱི་རང་གི་སེམས་ཉི་མའི་དཀྱིལ་འཁོར་དུ་གྱུར་པའི་སྟེང་དུ། ཞེས་པ་ནས། ཡིག་འབྲུ་བྲིས་པའི་རྣམ་པ་ཅན་དུ་འཁོད་པ་ཡོངས་སུ་གྱུར་པ་ལས། སྣ་ཚོགས་རྡོ་རྗེའི་ལྟེ་བ་ལ་ན་མཤྩཎྜ་བཛྲ་ཀྲོ་དྷཱ་ཡ། ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ། ཅེས་པས་མཚན་པར་གྱུར། ཉི་མ་དང་ཕྱག་མཚན་སྔགས་དང་བཅས་པ་ལས་འོད་ཟེར་སྣ་ཚོགས་བྱུང་བའི་རྩེ་མོ་ལས་དཔལ་རྡོ་རྗེ་རྣམ་པར་འཇོམས་པའི་ལྷའི་གཟུགས་དཔག་ཏུ་མེད་པ་བྱུང་ནས་ནམ་མཁའི་དབྱིངས་ཐམས་ཅད་ཁྱབ་པར་བྱས། ཞེས་དང་། ལྷའི་སྐུ་དང་བཅས་པའི་འོད་ཟེར་སླར་ལོག་ནས་རང་གི་སེམས་ཉི་མའི་དཀྱིལ་འཁོར་དང་ཕྱག་མཚན་སྔགས་དང་བཅས་པ་ལ་ཞུགས་པ་ལས། རང་ཉིད་བཅོམ་ལྡན་འདས་རྡོ་རྗེ་རྣམ་པར་འཇོམས་པ་སྐུ་མདོག་ལྗང་སྔོན་ཞལ་གཅིག་ཕྱག་གཉིས་པ་གཡས་པས་སྣ་ཚོགས་རྡོ་རྗེ་ཐུགས་ཀར་འཛིན་ཅིང་། གཡོན་པ་དེས་ཡུ་བ་བྱས་པའི་དྲིལ་བུ་དཀུར་བརྟེན་པ། སེམས་དཔའི་སྐྱིལ་མོ་ཀྲུང་གིས་བཞུགས་ཤིང་རིན་པོ་ཆེའི་རྒྱན་དང་དར་སྣ་ཚོགས་ཀྱི་ན་བཟའ་ཅན། རབ་ཏུ་གདངས་པའི་སྤྱན་གསུམ་དང་ལྡན་པ། ཁྲོ་གཉེར་ཅུང་ཟད་བསྡུས་ཤིང་ཡིད་ཙམ་འཛུམ་པ། ཤིན་ཏུ་བརྗིད་ཅིང་སྤྲུལ་པ་དུ་མ་འཕྲོ་བར་གྱུར། དེའི་སྤྱི་བོར་ༀ་ལས་འཁོར་ལོ་
དཀར་པོའི་ལྟེ་བར་ༀ་གྱིས་མཚན་པ། ཞེས་པ་ནས། ཐུགས་ཀར་ཧཱུཾ་ལས་རྡོ་རྗེ་སྔོན་པོའི་ལྟེ་བར་ཧཱུཾ་གིས་མཚན་པ། སྔར་བཤད་པའི་རྡོ་རྗེའི་རིགས་ཀྱི་དམ་རྒྱ་བཅིངས་ལ།ༀ་བཛྲ་ཨུདྦྷ་བ་ཡེ་སྭཱ་ཧཱ། ཞེས་པས་ཐུགས་ཀ་ལ་སོགས་པའི་གནས་བཞི་བྱིན་གྱིས་བརླབས་ཏེ། ཡེ་ཤེས་པ་གཞུག་པ་སོགས་བྱེད་ན། ཐུགས་ཀའི་ཧཱུཾ་ལས་འོད་འཕྲོས་པས། རང་བཞིན་གྱི་གནས་ནས་དཔལ་རྡོ་རྗེ་རྣམ་པར་འཇོམས་པ་ལ་སངས་རྒྱས་དང་བྱང་སེམས་ཐམས་ཅད་ཀྱིས་བསྐོར་བ་སྤྱན་དྲངས་ལ། ཆུ་གཉིས་ནས་རོལ་མོའི་བར་གྱིས་མཆོད་ནས། ཛཿ ཧཱུཾ་བཾ་ཧོཿ ཞེས་ རང་དང་གཉིས་སུ་མེད་པར་གྱུར་པར་བསམ། སླར་ཡང་ཧཱུཾ་ལས་འོད་འཕྲོས་པས་རིགས་ལྔ་འཁོར་དང་བཅས་པ་སྤྱན་དྲངས་པ་ལ་སྔར་བཞིན་མཆོད་ནས། ༀ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱཾ། ཞེས་གསོལ་བ་བཏབ་པས། སངས་རྒྱས་རྣམས་ཀྱིས། ༀ་སརྦ་ཏ་ཐཱ་ག་ཏ་ཨབྷི་ཥེ་ཀ་ཏ་ས་མ་ཡེ་ཨཱཿ ཧཱུཾ་སྭཱ་ཧཱ། ཞེས་ཡེ་ཤེས་ཀྱི་བདུད་རྩིས་གང་བའི་བུམ་པའི་ཆུས་དབང་བསྐུར་བས་སྒོ་གསུམ་གྱི་དྲི་མ་སྦྱངས་ནས་ཆུའི་ལྷག་མ་སྤྱི་བོར་འཁྱིལ་བ་ལས་རྡོ་རྗེ་སེམས་དཔས་དབུ་བརྒྱན་པར་བསམ་མོ། ། ༀ་སརྦ་ཏ་ཐཱ་ག་ཏ་བཛྲ་བི་དཱ་ར་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་སོགས་ཕྱག་རྒྱ་སྔགས་དང་བཅས་པ་མདུན་བསྐྱེད་ཀྱི་སྐབས་ནས་འབྱུང་བ་ལྟར་གྱི་ཆུ་གཉིས་ནས་རོལ་མོའི་བར་གྱིས་མཆོད་ནས།མཚམས་སྤྲིན་གཞོན་ནུས་ཡོངས་སུ་བསྐོར་བ་ཡི། །རིན་ཆེན་མརྒད་རི་བོ་ཇི་བཞིན་དུ། །ཡེ་ཤེས་མེ་ཆེན་འབར་བའི་ཀློང་དཀྱིལ་ན། །ཁྲོ་
འཛུམ་ཉམས་ཀྱིས་བརྗིད་ལ་ཕྱག་འཚལ་ལོ། །སྤྲོས་བྲལ་ཆོས་སྐུའི་ངང་ལས་མ་གཡོས་པར། །གྲངས་མེད་སྤྲུལ་པ་ཕྱོགས་བཅུར་སྤྲོས་པ་ཡིས། །སྒྲུབ་པ་པོ་ལ་དངོས་གྲུབ་མཆོག་སྩོལ་བ། །དཔག་ཡས་རྡོ་རྗེའི་རིགས་ལ་ཕྱག་འཚལ་ལོ། །དེ་ལྟར་འཁོར་དང་བཅས་པའི་བཅོམ་ལྡན་གྱིས། །བགེགས་ཚོགས་རྣམས་ཀྱི་ཉེར་འཚེ་དེ་ཡི་རྒྱུ། །ལས་ཀྱི་སྒྲིབ་པ་བག་ཆགས་བཅས་པ་ཀུན། །མྱུར་དུ་བྱང་ཞིང་དག་པར་མཛད་དུ་གསོལ། ཞེས་པས་བསྟོད་དོ། །བདག་བསྐྱེད་ཀྱི་བཟླས་བྱེད་ན་འདིར་བྱའོ། །མདུན་བསྐྱེད་ཀྱི་སྐབས་སུ། ནང་གི་སྟེང་དང་འོག་གི་ས་གཞི་ཐམས་ཅད་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སྔོ་བར་གྱུར་པའི་དབུས་སུ། སྣ་ཚོགས་པདྨ་དང་ཉི་མའི་གདན། ན་མཿ སརྦ་ཏ་ཐཱ་ག་ཏཱ་ནཱཾ། ཞེས་སོགས་དང་། སྤྱན་འདྲེན་གྱི་སྐབས་སུ། བཛྲ་དྷྲྀ་ཀ་ཨེ་དྱ་ཧི་ཨོཾ་སརྦ་ཏ་ཐཱ་ག་ཏ་བཛྲ་བི་དུར་ས་བ་རི་ལྔ་ར་ཨརྒྷཾ་པྲ་ཏི་སྭཱ་ཧཱ། ཞེས་མཆོད་ཡོན་ལྟེ་བའི་ཐད་ནས་དབུལ་ལོ། ། བཅོམ་ལྡན་འདས་རྡོ་རྗེ་རྣམ་པར་འཇོམས་པ་ལ་རིག་སྔགས་དང་གསང་སྔགས་དང་ཁྲོ་བོ་དང་མངག་གཞུག་པ་དང་། མངག་གཞུག་མ་ལ་སོགས་པ་ནམ་མཁའི་དབྱིངས་ཁྱབ་ཅིང་ཁོར་ཡུག་ཏུ་བསྐོར་བ་བྱོན་པ་ནི། དབུས་ཀྱི་པད་ཉིའི་གདན་ལ་བཅོམ་ལྡན་འདས་རྡོ་རྗེ་རྣམ་པར་འཇོམས་པ་སྐུ་མདོག་ལྗང་སྔོན། ཞེས་པ་ནས། ཤིན་ཏུ་བརྗིད་ཅིང་སྤྲུལ་པ་དུ་མ་འཕྲོ་བར་གྱུར། དེའི་སྤྱི་བོར་ༀ་ལས་འཁོར་ལོ་དཀར་པོའི་ལྟེ་བར་ༀ་གྱིས་མཚན་པ། ཞེས་སོགས་དང་། སྤྱི་བསྟོད་ཀྱི་རྗེས་སུ། དེ་བཞིན་གཤེགས་པ་
ཐམས་ཅད་ཀྱི། །མཐུ་སྟོབས་གཅིག་ཏུ་བསྡུས་པ་ནི། །རྡོ་རྗེ་ཁྲོ་བོའི་སྐུར་བསྟན་པ། །རྣམ་པར་འཇོམས་ལ་ཕྱག་འཚལ་ལོ། །སྟོང་ཉིད་ཡེ་ཤེས་རྡོ་རྗེ་ཡི། །མི་ཕྱེད་སྲུང་བའི་འཁོར་ལོ་ནི། །ཀུན་ནས་འབར་བའི་མེ་དཔུང་གིས། །བསྐོར་བའི་གནས་ལ་ཕྱག་འཚལ་ལོ། །རྣམ་པར་རྒྱས་པའི་པདྨ་ཡི། །སྙིང་པོ་ཉི་མའི་དཀྱིལ་འཁོར་ལ། །བསྒྱིངས་པའི་ཚུལ་གྱིས་ལེགས་བཞུགས་པ། །རྡོ་རྗེ་རྣམ་འཇོམས་དཔལ་ལ་འདུད། །སྣ་ཚོགས་འཕྲིན་ལས་བསྒྲུབ་པའི་ཕྱིར། །སྐུ་མདོག་མརྒད་ལྟར་གསལ་བ། །རྒྱན་རྣམས་ཀུན་གྱིས་ལེགས་པར་སྤྲས། །སྤྲུལ་པའི་འོད་ཟེར་འཕྲོ་ལ་འདུད། །ཞལ་གཅིག་ཕྱག་གཉིས་སྤྱན་གསུམ་པ། །ཞི་དང་ཁྲོ་དང་འཛུམ་པ་དང་། །དཔའ་བ་བརྩེ་བའི་ཉམས་དང་ལྡན། །དབང་ཕྱུག་དམ་པ་ཁྱོད་ལ་འདུད། །སྣ་ཚོགས་རྡོ་རྗེ་ཕྱག་གཡས་ཀྱིས། །ཉིད་ཀྱི་ཐུགས་ཀར་བསྒྱིངས་ནས་བསྣམས། །གཡོན་པ་དྲིལ་བུ་དཀུར་བརྟེན་པ། །རྣམ་རོལ་ཁྱོད་ལ་ཕྱག་འཚལ་ལོ། །གསུང་གི་རིག་སྔགས་ང་རོའི་དབྱངས། །འབྲུག་སྒྲ་སྟོང་བཞིན་རྣམ་སྒྲོག་པས། །བདུད་དཔུང་མ་ལུས་ཟིལ་གནོན་ཅིང་། །འདོད་དགུ་སྦྱིན་པར་མཛད་ལ་འདུད། །ཁྱོད་ཐུགས་ཟབ་པས་ཉེར་ཞི་ཡང་། །རྒྱ་ཆེན་རོལ་པས་ཀུན་ཁྱབ་མཛད། །མི་གཡོ་ཀུན་འགྲོ་རྟག་བརྟན་པ། །ཡེ་ཤེས་དབང་ཕྱུག་ལ་ཕྱག་འཚལ། །ཡོན་ཏན་འཕྲིན་ལས་རིན་ཆེན་གྱི། །མི་ཟད་གཏེར་གྱུར་
མགོན་ཁྱོད་ལ། །རྟག་ཏུ་གུས་པས་གསོལ་འདེབས་ཀྱིས། །དངོས་གྲུབ་མ་ལུས་སྩལ་ཏུ་གསོལ། །ཞེས་སོགས་ཀྱིས་བསྟོད། སྔ་ཕྱིའི་ཆོ་ག་གཞན་རྣམས་ནི་སྔ་མ་རྣམས་ལ་དཔགས་ཏེ་ཐུན་མོང་དང་ཐུན་མོང་མ་ཡིན་པ་རྣམས་སྦྱར་རོ། །བུམ་བསྐྱེད་བྱ་ཚུལ་ནི། བདག་བསྐྱེད་བསྟོད་པ་དང་བཅས་པ་རྫོགས་པའི་རྗེས་སུ། བུམ་པ་སྤྱི་དང་མཐུན་པར་བཤམས་པའི་མཐར་མཆོད་པ་ཅི་འབྱོར་དང་། གཙོ་བོའི་གཏོར་མ་ཆ་གསུམ་དང་བཅས་པ་བཤམས་ལ། སྭ་བྷཱ་ཝའི་སྔགས་ཀྱིས་སྟོང་པར་སྦྱངས། སྟོང་པའི་ངང་ལས་བཾ་ལས་བྱུང་བའི་རིན་པོ་ཆེའི་བུམ་པ། ཞེས་པ་ལས། མཚན་ཉིད་ཐམས་ཅད་དང་ལྡན་པར་གྱུར་པའི་ནང་དུ་སྣ་ཚོགས་པདྨ་དང་ཉི་མའི་གདན། ན་མཤྩཎྚ་བཛྲ་ཀྲོ་དྷཱ་ཡ། ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ། ཅེེས་པའི་སྔགས་ཀྱི་གདངས་ཀྱི་རྣམ་པར་ནམ་མཁའ་ལ་གྲག་པར་གྱུར། སྣ་ཚོགས་པདྨ་དང་ཉི་མའི་སྟེང་དུ་སྔགས་ཀྱི་གདངས་ཀྱི་རྣམ་པར་ནམ་མཁའ་ལ་གྲག་པ་དེ་ཤིན་ཏུ་དག་པའི་དངུལ་ཆུ། ཞེས་པ་ནས། ལྷའི་སྐུ་དང་བཅས་པའི་འོད་ཟེར་སླར་ལོག་ནས་ཉི་མའི་དཀྱིལ་འཁོར་དང་ཕྱག་མཚན་སྔགས་དང་བཅས་པ་ལ་ཞུགས་པ་ལས། བཅོམ་ལྡན་འདས་རྡོ་རྗེ་རྣམ་པར་འཇོམས་པ་སྐུ་མདོག་ལྗང་སྔོན། ཞེས་པ་ནས། ཤིན་ཏུ་བརྗིད་ཅིང་སྤྲུལ་པ་དུ་མ་འཕྲོ་བར་གྱུར། དེའི་སྤྱི་བོར་ༀ་ལས་འཁོར་ལོ་དཀར་པོའི་ལྟེ་བར་ༀ་གྱིས་མཚན་པ། ཞེས་པ་ནས་གནས་བཞི་བྱིན་གྱིས་བརླབ་པའི་བར་བྱ་སྟེ། ཤཾ་ཀ་རེ་ས་མཱ་ཡེ་སྭཱ་ཧཱ། བཛྲ་བྷྲྀ་ཀ ཅེས་ཕྱག་རྒྱ་བསྟན་པའི་རྗེས་སུ།
མཆོད་པ་བསངས་ནས། བྱང་ཆུབ་བར་དུ་བདག་བརྩོན་ནོ། །ཞེས་པའི་བར་བྱ། བཟླས་པའི་སྐབས་སུ་དམིགས་པ་སྔར་ལྟར་བྱས་ལ། ལྷ་དང་སྔགས་ཀྱི་ཆེ་བ་དྲན་པའི་སྒོ་ནས་རྒྱུད་ཀྱི།རྒྱ་གར་སྐད་དུ། ཞེས་པ་ནས། སངས་རྒྱས་ཀྱི་མཐུས་ལག་ན་རྡོ་རྗེས་རབ་ཏུ་སྨྲས་སོའི་བར་ལན་ཅིག་བརྗོད་ལ། དེ་ནས་གཟུངས་རིང་དང་ཡང་སྙིང་ལ་སོགས་པ་གྲངས་བརྒྱ་རྩ་བརྒྱད་ལ་སོགས་པ་བཟླས་པའི་རྗེས་སུ། སྡིག་པ་ཐམས་ཅད་བྱང་བྱས་ནས། ཞེས་པ་ནས། རྒྱལ་པོ་རྟག་ཏུ་ཁྲུས་གྱིས་ཤིག །ཅེས་པའི་བར་ལན་ཅིག་བརྗོད་དོ། །བུམ་བསྐྱེད་གཉིས་པ་བྱ་ཚུལ་ནི་སྔ་མ་ལ་དཔགས་ཏེ་ཤེས་པར་བྱའོ། །གཏོར་མའི་སྐབས་སུ་གཏོར་མ་དང་པོ་བུམ་པའི་ལྷ་ལ་དབུལ་ལོ། །བཛྲ་བྷྲྀ་ཀ་གཙྪ། ཞེས། ཡེ་ཤེས་པ་གཤེགས། དམ་ཚིག་པ་ཆུའི་ངོ་བོར་གྱུར་པར་བསམ་མོ། །ཆོ་ག་གཞན་རྣམས་ནི་སྔ་མ་བཞིན་སྦྱར་རོ། །དེ་ནས་བུམ་པའི་ཆུ་དེས་རང་གཞན་ལ་བཀྲུ་བ་ལ་སོགས་པའི་ཚུལ་ནི། རང་གཞན་གྱི་ལུས་དངོས་ལ་སོགས་པ་བཀྲུ་ཞིང་གཟུངས་རིང་ཚར་གཅིག་བརྗོད་པའི་རྗེས་སུ། ཡང་སྙིང་གི་མཐར། སརྦ་པཱ་པཾ་ཤིནྟཾ་ཀུ་རུ་སྭཱ་ཧཱ། སྡིག་པ་ཐམས་ཅད་ཞི་བར་གྱུར་ཅིག །ཅེས་དང་། དེ་བཞིན་དུ་ཀུན་གྱི་མཐར། ཤིནྟཾ་ཀུ་རུ་སྭཱ་ཧཱ། ཞེས་སྦྱར་ཏེ། སརྦ་བིགྷྣ་ན། བགེགས་ཐམས་ཅད། སརྦ་རོ་ག ། ནད་ཐམས་ཅད། སརྦ་དུཥྚན། གདུག་པ་ཐམས་ཅད། སརྦ་ཛྭ་ར། རིམས་ཐམས་ཅད། སརྦ་ཨུ་པ་དྲ་ཝེ། ཉེ་བར་འཚེ་བ་ཐམས་ཅད། སརྦ་གྲ་ཧེ། གདོན་ཐམས་ཅད། སརྦ་ཨ་ཀཱ་ལ་མྲྀ་ཏྱུ། དུས་མ་ཡིན་པར་འཆི་བ་ཐམས་ཅད། སརྦ་དུར་སོ་བ་ནི། རྨི་ལམ་ངན་པ་ཐམས་ཅད། སརྦ་དུར་མི་ཏེ། མཚན་མ་ངན་
པ་ཐམས་ཅད། སེམས་ཀྱི་འཇིགས་པའམ་གནོད་པའི་རིགས་ཐམས་ཅད་ཞི་བར་གྱུར་ཅིག །སརྦ་ཙིཏྟ་བྷྱ་ཀུ་ལེ་ཤིནྟཾ་ཀུ་རུ་སྭཱ་ཧཱ། ཞེས་བརྗོད་ཅིང་བཀྲུ་བར་བྱའོ། །དེ་ནས་བྱབ་པ་ནི། ཤིནྟཾ་ཀུ་རུ་སྭཱ་ཧཱ། ཞེས་པའི་གནས་སུ། ཨ་པ་ན་ཡེ་སྭཱ་ཧཱ། ཞེས་པ་ཀུན་གྱི་མཐར་སྦྱར་ཏེ་ཡང་སྙིང་གི་རྗེས་སུ། སརྦ་པཱ་པཾ། ཞེས་པ་ནས། སརྦ་ཙིཏྟ་བྷྱ་ཀུ་ལེ་ཨ་པ་ན་ཡེ་སྭཱ་ཧཱ། ཞེས་བརྗོད་ཅིང་རྡོ་རྗེ་རྨ་བྱའི་མཇུག་སྒྲོ་དང་བཅས་པ་བཟུང་སྟེ་བྱབ་པར་བྱའོ། །དེ་ནས་སྲུང་བ་ནི། སྤྱི་བོར་རྡོ་རྗེ་བཟུང་ལ། ན་མ་ཤྩཎྜ་བཛྲ་ཀྲོ་དྷཱ་ཡ། ཞེས་པ་ནས། ཨ་མྲྀ་ཏེ་ཧཱུྃ་ཕཊ། ཅེས་ཡང་སྙིང་གི་མཐར། སརྦ་པཱ་པཾ་རཀྵ་རཀྵ། སྡིག་པ་ཐམས་ཅད་ལས་སྲུངས་ཤིག་སྲུངས་ཤིག །སརྦ་ཙིཏྟ་བྷྱ་ཀུ་ལེ་རཀྵ་རཀྵ། སེམས་ཀྱི་འཇིགས་པའི་རིགས་ཐམས་ཅད་ལས་སྲུངས་ཤིག་སྲུངས་ཤིག །ཅེས་ཀུན་གྱི་མཐར། རཀྵ་རཀྵ། ཞེས་སྦྱར་བ་བརྗོད་ཅིང་བསྲུང་བར་བྱའོ། །དེ་ནས་བཟུངས་རིང་ཚར་གཅིག་བརྗོད་པའི་མཐར།རྒྱལ་བ་སྲས་བཅས་བདེན་པའི་བྱིན་རླབས་དང་། །རྡོ་རྗེ་རྣམ་པར་འཇོམས་པའི་བྱིན་རླབས་ཀྱིས། །འགྲོ་བ་འདི་ལ་བདག་གིས་བསྲུངས་ཟིན་གྱིས། །འདི་ལ་སུས་ཀྱང་གནོད་པ་མ་བྱེད་ཅིག །ཅེས་བརྗོད་ནས་མེ་ཏོག་འཐོར་ཞིང་སླར་ཡང་རོལ་མོའི་སྒྲ་དང་བཅས་པས་བཀྲ་ཤིས་ཀྱི་ཚིགས་བཅད་བརྗོད་ཅིང་མེ་ཏོག་འཐོར་བར་བྱའོ། ། ༈ པདྨའི་རིགས་ཐུགས་རྗེ་ཆེན་པོ་བཅུ་གཅིག་ཞལ་དཔལ་མོ་ལུགས་ལ་སོགས་པའི་བཟླས་བརྗོད་བྱ་ཚུལ་ནི། ༀ་སརྦ་ཏ་ཐཱ་ག་ཏོཥྞཱི་ཥསི་ཏཱ་ཏ་པ་ཏྲེ་ཧཱུཾ་ཕཊ་སྭཱ་ཧཱ། ཞེས་པའི་གནས་སུ། ན་མོ་རཏྣ་ཏྲ་ཡཱ་ཡ། དཀོན་མཆོག་གསུམ་ལ་ཕྱག་འཚལ་ལོ། །ན་མཿ ཨཱརྱ་ཛྙཱ་ན་སཱ་ག་
ར། ཕྱག་འཚལ་ལོ་འཕགས་པ་ཡེ་ཤེས་རྒྱ་མཚོ། བཻ་རོ་ཙ་ན། རྣམ་པར་སྣང་མཛད། བྱཱུ་ཧ་རཱ་ཛཱ་ཡ། བཀོད་པའི་རྒྱལ་པོ་ལ། ཏ་ཐཱ་ག་ཏཱ་ཡ། དེ་བཞིན་གཤེགས་པ་ལ། ན་མཿ སརྦ་ཏ་ཐཱ་ག་ཏེ་བྷྱཿ ཕྱག་འཚལ་དེ་བཞིན་གཤེགས་པ་ཐམས་ཅད་ལ། ཨརྷ་ཏེ་བྷྱཿ དགྲ་བཅོམ་པ་ལ། སམྱཀ་སཾ་བུདྡྷེ་བྷྱཿ ཡང་དག་པར་རྫོགས་པའི་སངས་རྒྱས་ལ། ན་མཿ ཨཱརྱ། ཕྱག་འཚལ་འཕགས་པ། ཨ་ཝ་ལོ་ཀེ་ཏེ་ཤྭ་རཱ་ཡ། སྤྱན་རས་གཟིགས་དབང་ཕྱུག་ལ། བོ་དྷི་ས་ཏྭཱ་ཡ། བྱང་ཆུབ་སེམས་དཔའ་ལ། མ་ཧཱ་སཏྭཱ་ཡ། སེམས་དཔའ་ཆེན་པོ་ལ། མ་ཧཱ་ཀཱ་རུ་ཎི་ཀཱ་ཡ། ཐུགས་རྗེ་ཆེན་པོ་ཅན་ལ། ཏདྱ་ཐཱ། འདི་ལྟ་སྟེ། ༀ་དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། ཨིཊྚེ། ཝཊྚེ། ཙ་ལེ་ཙ་ལེ། གཡོ་བ་གཉིས། པྲ་ཙ་ལེ་པྲ་ཙ་ལེ། རབ་ཏུ་གཡོ་བ་གཉིས། ཀུ་སུ་མེ། མེ་ཏོག ཀུ་སུ་མེ་ཝ་རེ། མེ་ཏོག་གི་མཆོག །ཨི་ལི་མི་ལི། སེམས་ཀྱི་འབར་བ་ཞི་བར་མཛོད། ཙིཏྟ་ཛྭ་ལ་མ་ ཨ་ཡོད་པའང་ཡོད། བ་ན་ཡེ་སྭཱ་ཧཱ། ཅེས་པ་གཟུངས་རིང་ངམ། ༀ་དྷ་ར་དྷ་ར། དྷི་རི་དྷི་རི། དྷུ་རུ་དྷུ་རུ། ཨིཊྚེ། ཝནྚེ། ཙ་ལེ་ཙ་ལེ། པྲ་ཙ་ལེ་པྲ་ཙ་ལེ། ཀུ་སུ་མེ། ཀུ་སུ་མེ་ཝ་རེ། ཨི་ལི་མི་ལི། ཙིཏྟ་ཛྭ་ལ་མ་པ་ན་ཡེ་སྭཱ་ཧཱ། སེམས་ཀྱི་འབར་བ་ཞི་བར་མཛོད། ཞེས་པ་གང་རུང་གཞུག་གོ །འདིའི་གཟུངས་རིང་གི་སྐབས་སུ། བ་ལ་ཧ་བཏགས་ནས་ཞབས་ཀྱུ་བྱས་པའི་བྷུ་ཧ་ཞེས་པའི་བྷུ་ནི་མ་དག་པ་ཡིན་པས། བ་ལ་ཡ་བཏགས་ནས་ཞབས་ཀྱུ་བྱས་པའི་བྱུ་ཞེས་པ་དག་པས་བྱུ་ཧ་རཱ་ཛཱ་ཡ་ཞེས་འདོན་པར་བྱའོ། །མཚམས་སྦྱོར་ཕྲལ་ན། བི་ཨུ་ཧ་རཱ་ཛཱ་ཡ་ཞེས་པར་འགྲོ་གསུང་ངོ་། །བྱ་སྤྱོད་ཀྱི་བཟླས་པའི་སྐབས་
སུ། བཟླས་པའི་འཕྲོ་ལ་གཉིད་བྲོ་བའམ་གླལ་ལམ་སྦྲིད་པའམ་ལུད་པའམ་འོག་རླུང་ངམ་བཤང་གཅི་སོགས་བྱུང་བ་དེ་མ་ཐག་ཕྲེང་བ་བཞག་སྟེ་འཆག་པ་སོགས་བྱས་ནས་ཉེ་རེག་བྱས་ཏེ། གྲངས་ཀྱི་ཐོག་མ་ནས་བརྩམ་པར་གསུངས་ཏེ། དེ་ཡན་ཆད་བཟླས་པའི་གྲངས་སུ་མི་གཞུག་ཅེས་པའི་དོན་ཡིན་ནོ། །གཞན་ཡང་བག་མེད་པས་ལྷ་གཞན་གྱི་བཟླས་པ་བྱས་ནའང་ཡིད་ཀྱིས་གསོལ་བ་བཏབ་ནས་བཟླས་བརྗོད་བསྐྱར་བ་དང་། བགེགས་ཀྱིས་བརླམས་པ་དང་ནད་ཀྱིས་གཟིར་བ་དང་། ལྷོད་པ་དང་བག་མེད་པ་དང་ལུས་དང་སེམས་སྐྱོ་བ་དང་། ཆོ་ག་ཇི་སྐད་བཤད་པའི་དུས་ལས་འདས་པར་བྱས་པ་དང་། མ་བསྡམས་པ་དང་མི་གཙང་བས་བཟླས་བརྗོད་བྱས་པ་དང་། མཚན་མོ་རྨི་ལམ་ངན་པ་བྱུང་བས་ཉིན་མོ་རིགས་ཀྱི་བདག་པོ་གང་ཡིན་གྱི་སྔགས་བརྒྱ་མ་བཟླས་པར་བཟླས་བརྗོད་བྱས་པ་རྣམས་བཟླས་པའི་གྲངས་སུ་མི་གཞུག་པར་ལེགས་གྲུབ་ལས་གསུངས་སོ། །དེས་ན་སྔར་བཤད་པའི་འཛག་པ་བསྲུང་བ་དང་། བ་དམར་སེར་གྱི་བ་བྱུང་ལྔ་ལ་སོགས་པ་ལ་བརྟེན་པའི་བཟླས་བརྗོད་ཟླ་བ་ཕྱེད་ཀྱི་དག་བྱེད་ལ་བརྩོན་པར་བྱའོ། །བདག་བསྐྱེད་ལྷ་དྲུག་ལྟ་བུ་རྫོགས་པའི་རྗེས་སུ་ལྷ་བསྒོམ་པ་བསྙེན་པའི་གཙོ་བོ་ཡིན་པས་རྒྱ་ཆེ་བ་དང་ཟབ་པ་ལ་བསླབ་ཚུལ་གཉིས་ལས། རྒྱ་ཆེ་བ་རྣམ་པ་ལ་བསླབ་ཚུལ་ནི། རང་ལྷ་གང་དུ་བསྒོམས་པ་དེའི་སྐུའི་རྣམ་པ་རགས་པ་ཚང་བ་ཞིག་གསལ་བཏབ་ལ། དེ་ལ་བྱིང་རྒོད་དང་བྲལ་བར་བྱས་ཏེ་སེམས་བཟུང་། གསལ་བཏབ་པའི་ནང་ནས་བྱེ་བྲག་པ་ཞིག་ལྷག་པར་གསལ་ན་གང་གསལ་དེ་ལ་སེམས་བཟུང་། དེ་མི་གསལ་ན་སྔར་བཞིན་སྤྱི་ལ་སེམས་བཟུང་ཞིང་། གང་གསལ་བཏབ་པ་ལས་གཞན་པའི་དམིགས་པ་གང་ཤར་ཡང་དེའི་རྗེས་སུ་མི་འབྲང་བར་སྔར་གྱི་དམིགས་པ་
ཉིད་བསྐྱང་ངོ་། །གོ་རིམ་ལ་བསླབ་ཚུལ་ནི། ལྷ་གཅིག་གི་སྐུའི་ཆ་ཕྲ་རགས་ན་བཟའ་རྒྱན་དང་བཅས་པ་ལ་གསལ་སྣང་ཐོབ་ནས། སེམས་གནས་པ་རྙེད་པ་ན་ལྷ་གཉིས་པ་དང་སྦྲེལ་བ་སོགས་ཇེ་མང་ཇེ་མང་ལ་བཏང་ནས། རྟེན་གཞལ་ཡས་ཁང་ཡོད་པ་རྣམས་ལ་མཐར་རྟེན་དང་བརྟེན་པའི་དཀྱིལ་འཁོར་གྱི་ཕྲ་རགས་ཐམས་ཅད་ལ་མངོན་སུམ་དུ་མཐོང་བ་དང་འདྲ་བའི་གསལ་སྣང་རྙེད་རྙེད་དུ་སྦྱང་ངོ་། །རྟེན་གཞལ་ཡས་ཁང་མེད་པ་རྣམས་ལའང་སྲུང་འཁོར་སོགས་གང་བསྐྱེད་དང་། ལྷའི་སྐུའི་ཆ་ཕྲ་རགས་ཐམས་ཅད་ལ་དེ་ལྟར་བསྒོམ་པར་བྱའོ། །ང་རྒྱ་ལ་བསླབ་ཚུལ་ནི། རང་ལྷ་གང་དུ་བསྒོམས་པ་དེ་དངོས་ཡིན་ནོ་སྙམ་པའི་ངེས་པ་ཤུགས་ཅན་ཞིག་བསྐྱེད་པ་དང་། ངེས་པ་དེ་ཉིད་ལ་རྩེ་གཅིག་ཏུ་གནས་ཏེ་ཇི་སྲིད་ང་རྒྱལ་འགྱུར་བའི་ཏིང་ངེ་འཛིན་རྙེད་རྙེད་དུ་སྦྱང་བ་གཉིས་ནི་རྒྱ་ཆེ་བ་ལ་བསླབ་ཚུལ་ལོ། །དེའང་རྣམ་པ་གསལ་བ་དང་ང་རྒྱལ་བསྟན་པ་གཉིས་ཀ་དགོས་ལ། རེ་རེ་ལས་མེད་ན་ང་རྒྱལ་བརྟན་པ་ཉིད་རྒྱུད་ལྷས་བྱིན་གྱིས་བརླབ་པའི་གཙོ་བོ་ཡིན་ནོ། །ཟབ་པ་ལ་བསླབ་ཚུལ་ནི། དམིགས་པ་ལྷའི་འཁོར་ལོ་ལ་དམིགས་ལས་རྣམ་པ་རང་བཞིན་མེད་པའི་སྟོང་པ་ཉིད་བསྒོམ་པའོ། །དེ་ལས་སྟོང་པ་ཉིད་ཀྱི་ལྟ་བ་རྙེད་ནས་ལྟ་ཐོག་ཏུ་བཞག་པ་རང་བཞིན་མེད་པར་ངེས་པའི་བློའི་འཛིན་སྟངས་ཀྱི་རྣམ་པ་དང་མ་བྲལ་བའི་སྒོ་ནས། གཟུགས་རྣམས་རྟེན་དང་བརྟེན་པའི་ལྷའི་འཁོར་ལོར་ཤར་བ་ཟབ་གསལ་གཉིས་མེད་ཀྱི་ལམ་འདི་རྒྱུད་སྡེ་འོག་མ་གསུམ་གྱི་བྱང་ཆུབ་ཏུ་བགྲོད་པའི་ལམ་གྱི་གཙོ་བོ་ཡིན་ནོ། །ལྷ་དྲུག་བསྒོམ་པ་དང་བཟླས་བརྗོད་ཡན་ལག་བཞི་ནི་བླ་མེད་ཀྱི་བསྐྱེད་རིམ་བཟླས་པ་དང་བཅས་པའི་དོད་ཡིན་ལ། མེ་གནས་ཀྱི་དེ་ཉིད་དང་། སྒྲ་གནས་ཀྱི་དེ་ཉིད་དང་། སྒྲ་མཐའི་དེ་ཉིད་ཀྱི་བསམ་གཏན་གསུམ་ནི་བླ་མེད་ཀྱི་རྫོགས་རིམ་གྱི་དོད་
ཡིན་ནོ། །དེའང་མེ་གནས་སྒོམ་ཚུལ་ནི། བཟླས་བརྗོད་ཡན་ལག་བཞིའི་རྣལ་འབྱོར་གྱི་རྗེས་སུ། རང་ལྷར་གསལ་བའི་ཐུགས་ཀར་དྲི་མ་མེད་པའི་ཟླ་བའི་དཀྱིལ་འཁོར་ཕྲ་བའི་ནང་དུ་མར་མེའི་མེ་ལྕེ་ལྟ་བུའི་མེ་འབར་བའི་ནང་དུ་སྐབས་ཀྱི་སྔགས་གང་ཡིན་པ་དེ་རང་གི་སེམས་སྔགས་ཀྱི་གདངས་ཀྱི་རྣམ་པར་དྲིལ་བུའི་སྒྲ་བཞིན་དུ་རྒྱུན་མི་འཆད་པར་གྲག་པ་ལ་ཉན་པའི་རྣམ་པས་དབུགས་འབྱུང་འཇུག་བསྡམས་ཏེ་བྱང་རྒོད་དང་བྲལ་བར་སེམས་རྩེ་གཅིག་ཏུ་འཇོག་པའོ། །སྒྲ་གནས་ནི། མེ་ལ་དམིགས་པ་གཏད་ལ་སྙིང་གར་གནས་པའི་སྒྲ་འབའ་ཞིག་ལ་སྔར་ལྟར་དབུགས་འབྱུང་འཇུག་བསྡམས་ཏེ་སེམས་རྩེ་གཅིག་ཏུ་འཇོག་པའོ། །དབུགས་ཕྱིར་གཏོང་བའི་ཚེ་རང་ལྷར་བསྒོམས་པ་ལ་དམིགས་པར་བྱའོ། །སྒྲ་ལ་དམིགས་པ་ན་ལྷ་དང་ཟླ་བ་དང་མེ་གང་ལའང་མི་དམིགས་ཤིང་སྒྲའི་གདངས་འབའ་ཞིག་ལ་དམིགས་པས་མེ་གནས་དང་མི་འདྲའོ་མེ་གནས་དང་སྒྲ་གནས་གཉིས་ནི་རང་གི་སྔགས་ཡིད་ལ་འདོན་པའི་རྣམ་པ་ཅན་མིན་གྱི། གཞན་གྱིས་སྔགས་བཏོན་པ་ཉན་པ་བཞིན་དུ་སྙིང་གར་སྔགས་ཀྱི་གདངས་ཀྱི་རྣམ་པས་གྲག་པ་ལ་ཉན་པའི་རྣམ་པས་སེམས་འཇོག་པ་ཡིན་པས་བཟླས་བརྗོད་ཡན་ལག་བཞིའི་ཡིད་བཟླས་དང་མི་གཅིག་གོ །སྒྲ་མཐར་ཐར་པ་སྟེར་བའི་བསམ་གཏན་ནི། སྒྲའི་གདངས་ལ་དམིགས་པ་ཙམ་ཡང་བཞག་ལ་བདག་མེད་པའི་ལྟ་བ་ངེས་པར་བྱས་ནས་ལྟ་ཐོག་ཏུ་བཞག་སྟེ་སྒོམ་པའོ། །དེ་ལྟར་ཡང་བསམ་གཏན་ཕྱི་མ་ལས། གསང་སྔགས་མེ་གནས་དངོས་གྲུབ་སྟེར། །སྒྲ་གནས་རྣལ་འབྱོར་སྟེར་བར་དྲན། །སྒྲ་མཐར་ཐར་པ་སྟེར་བ་ཉིད། །འདི་དག་དེ་ཉིད་གསུམ་པོ་ཡིན། ཅེས་སོགས་གསུངས་སོ། །སྨྱུང་གནས་ནི་རྒྱུད་སྡེ་འོག་མ་གསུམ་གའི་ལྷ་སྒོམ་པའི་སྐབས་སུ་བྱ་བར་གསུངས་སོ། །བྱ་སྤྱོད་ཀྱི་སྤྱིའི་ཆོ་གའི་རྣམ་པར་བཞག་པ་རིགས་གསུམ་
ལ་སྦྱོར་ཚུལ་འདི་ནི། རྨད་དུ་བྱུང་བའི་མཁྱེན་པ་ཕུལ་དུ་ཕྱིན་པ་བརྙེས་ནས་གདུལ་བྱ་རྣམས་སྨིན་གྲོལ་གྱི་ལམ་ལ་འགོད་པར་མཛད་པ། ཆོས་ཀྱི་རྗེ་ཐམས་ཅད་མཁྱེན་པ་བློ་བཟང་གྲགས་པའི་དཔལ་གྱི་ཞལ་སྔ་ནས་ཀྱི་ཕྱག་བཞེས་ལྟར་དཀའ་བཞི་འཛིན་པ་གྲགས་པ་རྒྱལ་མཚན་གྱིས་རི་བོ་དགེ་ལྡན་རྣམ་པར་རྒྱལ་བའི་གླིང་དུ་ཡི་གེར་བཀོད་པའོ། །འདིས་ཀྱང་རྒྱལ་བའི་བསྟན་པ་རིན་པོ་ཆེ་སྒོ་ཐམས་ཅད་དུ་དར་ཞིང་རྒྱས་ནས་ཡུན་རིང་དུ་གནས་པར་གྱུར་ཅིག །མངྒ་ལཾ། །སྭ་སྟི། རྒྱལ་པད་ཚལ་ཕན་བདེའི་དྲི་བསུང་ཅན། །བཤད་སྒྲུབ་འདར་རྒྱས་རྣམ་གྲོལ་སྦྲང་རྩའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །