གཤིན་རྗེ་གཤེད་ཀྱི་འཁྲུལ་འཁོར་གྱི་མན་ངག་སྦས་དོན་ཡིག་ཆུག་ཏི་ཕྲིང་བ་ཧ་ལའི་ལོ་འདབ།
གཤིན་རྗེ་གཤེད་ཀྱི་འཁྲུལ་འཁོར་གྱི་མན་ངག་སྦས་དོན་ཡིག་ཆུག་ཏི་ཕྲིང་བ་ཧ་ལའི་ལོ་འདབ་བཞུགས་སོ།
ན་མ་བཛྲ་བྷཻ་ར་ཝ་ཙཀྲ་སིདྡྷི་ཧོ། མ་ལྕེ་ཀུན་ནས་གཡོ་བའི་འོད་འབར་ཕྲེང་འཁྲུགས་དབུས་དག་ཏུ། ཧཱུྃ་ཧཱུྃ་ཕཊ་ཕཊ་སྒྲ་སྒྲོག་གར་ཀྱིས་སྐབས་གསུམ་སྙིང་འབྱིན་བྱེད། སྤྲུལ་བ་དུ་མ་ཕྱོགས་བཅུར་འགྱེད་ཅིང་སྣ་ཚོགས་རེ་འདོད་སྐོང་། བཅོམ་ལྡན་བདེ་ཆེན་རྒྱལ་པོ་གཤིན་རྗེ་གཤེད་ལ་གུས་ཕྱག་འཚལ། ཁྲོ་གཉེར་རྣམ་པར་འབག་ཉི་མ་སྟོང་ལས་རྒྱས་པ་བཞིན་མིག་སྨན་ལྟ་བུར་གནག་པའི་ལུས་ཅན་ཁག་ཞག་རུས་པར་བརྒྱན། བདེན་གཉིས་སྟོན་ཕྱིར་འབིགས་བྱེད་རྭ་གཉིས་མ་རུང་རྡུལ་དུ་རླག །བདུད་རིགས་ལྔ་བཅུའི་མགོ་བོའི་དོ་ཤལ་མཛེས་ལྡན་རྔམ་སྟབས་མ་ཧེའི་ཞལ། ལོག་འདྲེན་རུ་ཏྲ་སྒྲོལ་མཛད་ལས་ཀྱི་གཤིན་རྗེ་རྒྱལ་གྱུར་ཅིག །མ་རུང་འདུལ་མཛད་འཁོར་ལོ་གཉིས་ཀྱི་ལས། །ལྟེ་བ་ལུགས་གསུམ་དང་དྲག་ལས་ལིངྒ་བཅའ། །
དེའི་མན་ངག་སྤས་དོན་ཡི་གེ་ནི། །གསལ་བར་བཀོད་འདི་གཞན་དུ་སྤེལ་མི་བྱ། །དེ་ཡང་མཁས་པ་སློབ་དཔོན་ཆེན་པོ་ཤནྟི་པས་མཛད་པའི་འཁོར་ལོའི་མན་ངག་དང་། །ལྟེ་བ་ལུགས་རྣམས་དང་། སློབ་དཔོན་ཞི་བའི་ཡེ་ཤེས་ཀྱིས་མཛད་པའི་མན་ངག་རྣམས་དང་། ལ་ལི་ཏ་བཛྲ་གྱིས་མཛད་པའི་གཤིན་རྗེ་གཤེད་འབྱུང་བའི་འཁྲུལ་འཁོར་ཡིག་ཆུང་རྣམས་དང་། འཇམ་དཔལ་ཡེ་ཤེས་ཀྱིས་མཛད་པའི་འཁོར་ལོའི་ལྟ་བ་ལུགས་དར་ལྟེ་བ་མར་བཞེད་པ་དང་། མར་མེད་མཛད་བཟང་པོས་མཛད་པའི་མན་ངག་ལ། ལིངྒ་བྲི་ཐབས་དང་། ནག་ཨོ་དྷིས་མཛད་པའི་བ་སྤུང་འཁོར་དང་། འཁོར་ལོའི་ལྟེ་བ་ལུགས་རྣམས་དང་། སློབ་དཔོན་མི་བསྐྱོད་པས་མཛད་པའི་འཁོར་ལོའི་དོན་རྒྱས་པར་བཤད་པ་དང་། ལིངྒ་བྲི་ཐབས་རྣམས་དང་། སོན་ཤྲིས་
མཛད་པའི་མན་ངག་ཡིག་ཆུང་རྣམས་དང་། སློབ་དཔོན་བྱང་ཆུབ་སྙིང་པོས་མཛད་པའི་དེ་ཉིད་གསལ་བར་བྱེད་པ་དང་། ཨ་མོ་གྷ་བཛྲ་གྱིས་མཛད་པའི་ཞི་བ་ལས་བདུན་གྱི་ཡིག་ཆུང་དང་། སློབ་དཔོན་རྡོ་རྗེ་གྲུབ་པས་མཛད་པའི་དྲག་པོ་ཕྱོགས་གཅིག་པར་གྲགས་པའི་འཁོར་ལོའི་ལིངྒའི་གཡས་ཕྱོགས་རྣམས་སྔོན་དུ་ལྟེབ་གསུངས་པ་དང་། འབིར་བ་པས་མཛད་པས་འཁོར་ལོའི་སྤབ་དོན་དང་། མན་ངག་རབ་ཏུ་གསལ་བ་ཞེས་པ་དང་། གཞོན་ནུ་ཟླ་བས་མཛད་པའི་མན་ངག་དོན་རྒྱས་པར་བཤད་པ་དང་། དོན་ཡོད་རྡོ་རྗེས་མཛད་པའི་འཁོར་ལོའི་ཟུར་རྒྱན་ལིངྒའི་བཤད་ཚུལ་དང་། སློབ་དཔོན་བློ་བཟང་སྙིང་པོས་མཛད་པའི་མན་ངག་ཕྱོགས་གཅིག་པར་གྲགས་པ་དང་། ནག་པོ་པས་མཛད་པའི་གསང་བ་གནད་ཀྱི་དྲིས་ལན་དང་། འཇིམ་ལོ་ཙྪ་བས་མཛད་པའི་འཁོར་ལོའི་མན་ངག་ལིངྒའི་བྲི་ཚུལ་རྣམས་དང་། རྭ་སྐྱོ་གཉིས་ཀྱིས་འཁྲུལ་འཁོར་ཀྱི་མན་ངག་འཁོར་ལོའི་ལྟེ་བ་ལུགས་རྣམས་དང་། གྲུབ་ཐོབ་འགར་གྱིས་མཛད་པའི་སྒྲུབ་ཐབས་ཀྱི་མན་ངག་ཡིག་ཆུང་རྣམས་དང་། བོད་ཀྱི་གྲུབ་ཐོབ་དཔལ་འཛིན་བཟང་པོས་མཛད་པའི་མན་ངག་དང་སྙན་བརྒྱུད་གཅིག་མར་གྲགས་པ་རྣམས་དང་། རྒྱ་དོན་ཀུན་དགའ་བརྩོན་འགྲུས་ཀྱིས་མཛད་པའི་འཁོར་གྱི་མན་ངག་རྣམས་དང་། བུ་སྟོན་རིན་ཆེན་གྲུབ་ཡིས་མཛད་པའི་འཁྲུལ་འཁོར་གྱི་གཞུང་དང་དེའི་མན་ངག་ཟུར་རྒྱད་དང་། རྐང་སྟོན་ཆོས་ཀྱི་རལ་གྲིས་མཛད་པའི་མན་ངག་དང་། ལྷོ་བྲག་པ་སྔགས་བཙུན་ཆོས་ཀྱི་རྒྱལ་མཚན་གྱིས་མཛད་པའི་འཁྲུལ་འཁོར་ཟུར་གྱི་རྒྱན་དང་། གཙང་ལ་སྟོད་པ་བླ་མ་སེང་གེས་མཛད་པའི་མན་ངག་
སྙན་བརྒྱུད་དང་། གཙང་སྟོད་བ་སློབ་དཔོན་རིན་ཆེན་ཟླ་བ་དབང་ཕྱུག་གིས་མཛད་པའི་ཞལ་གང་མས་དང་། ལྷོ་བྲག་པ་ཆོས་ཀྱི་སེང་གེའི་མན་ངག་དང་། ཡར་ལུང་བ་རྡོ་རྗེ་འཛིན་པ་ཆོས་དབྱིངས་རྡོ་རྗེའི་ཞལ་ཤེས་དང་། ཡག་འགྲོབ་པ་སྔགས་འཆང་བསོད་ནམས་རྒྱ་མཚོའི་མན་ངག་དང་། སྙིགས་དུས་ཀྱི་རྒྱལ་བ་གཉིས་པ་ཤར་ཙོང་བ་པ་སུ་མ་ཏི་ཀི་རྟིའི་གསུངས་སྒྲོས་ཐོབ་བུ་བ་རྣམས་ཕྱོགས་གཅིག་ཏུ་བསྡུས་ཏེ། མཐོང་བརྒྱུད་དབལ་ལྡན་བླ་མའི་མན་ངག་ཕྱག་ལེན་ཇི་ལྟ་བ་བཞིན་བརྒྱུད་པའི་མན་ངག་མ་བསླང་བ་རྣམས་ཡིག་ཆུང་འདིར་བསལ་བར་བྱ་སྟེ། དེ་ཡང་འཁོར་ལོའི་ལྟེབ་ལུགས་རྣམ་པ་གསུམ་དུ་བཤད་འདུག་པ་ལ། དར་ལྟེ་བས་རྦ་རླབས་བྲང་ཐུམ་ལྟར་དང་གསུམ་ལས། གོང་འཇམ་ཞིང་བུམ་པ་འཇི་མ་ལོས་བཞེད། བར་མ་རྩུ་བཅིང་སྟོབས་ཆེ་བར་སློབ་དཔོན་རྡོ་རྗེ་གྲུབ་པ་དང་སོན་ཤིས་བཞེད། འོག་མ་ཤིན་ཏུ་མྱུར་ཞིང་ང་ལ་འཇམ། བྱང་ཆུབ་སྙིང་པོས་རྣོ་ལ་མྱུར་བར་གསུངས། ལྟེ་བ་ལུགས་གཉིས་པ་རྭ་སྐྱོ་གཉིས་ཀྱི་ལུགས། ལ་ལས་དུས་འཁོར་རྒྱུད་ནས་དྲང་ཡང་ཟེར། འཇམ་སྟོབས་མྱུར་བའི་མན་ངག་རང་ལ་མི་བཟློག བླ་མས་གསུངས། དར་ལྟེ་བ་ལྷ་སྡེ་དག་བྱས་ན་བཟང་། མི་སྡེ་དག་ལ་རྦ་རླབ་ལྟར་དུ་ལྟེང་། བྲང་ཐུམ་ནང་རྒྱས་དག་ལ་མྱུར་བར་གསུངས། དགེ་བོ་བློ་བུར་དུ་བུང་མ་བྱེད་རྒྱུ་རེད། འཕྲིན་ལས་བཞི་དང་ལྟེ་བ་ལྟར་དུ་བྱེད། ཡང་མ་ན་སྙེ་ལས། རྦ་རླབ་བྲང་ཐུམ་དྲབ་བོ་དག་ལ་དགོས། ཞི་རྒྱས་དག་ལ་དར་ལྟེ་བ་བྱེད་ཅེས་གསུངས། ལྟེ་བ་ལུགས་གསུམ་གང་བྱེད་ཀྱང་སྟེང་འཁོར་དང་འོག་འཁོར་གཉིས་ཀྱི་བར་དུ་ལིངྒ་གཞུག་ལ། མ་ནོར་བར་ལིངྒ་དང་འཁོར་ལོའི་གཡས་ཀྱི་ཕྱོགས་ནས་དང་པོ་བཅག་
མན་ངག་གང་ཞིན་དུ་དྲིལ་བར་བྱའོ། ད་ནི་དྲག་པོའི་ལིངྒ་བྲི་ཐབས་ལ། གསོན་པོ་མིག་བགྲད་པ་ལྟ་བུ་ཡང་མ་ཡིན། ཤི་བ་མིག་བཙུམ་བ་ལྟ་བུ་ཡང་མ་ཡིན་ཞིང་། གོས་དང་བྲལ་བ་དུས་རིང་ཅིང་ཚིགས་ཆེན་བཞི་འབུར་བ་ཉམ་ཐག་བ་དབང་མེད་གཅེར་བུ་སྐྲ་ལྷུག་ལ་གཟིངས་པ། ལྟོ་བ་ཆེ་བ་མྱ་ངན་གྱི་ཟུག་རྡུ་ཅན་བུག་པ་དགུ་ནས་ཁྲག་དང་རྣམ་འབབ་པ། རྨ་དང་ཤུ་བའི་ཕྲེང་བས་སྟོད་སྨད་ཀུན་ནས་ཁྱབ་པ། ཡན་ལག་ཐམས་ཅད་གནམ་ལྕགས་འབར་བས་ཐབ་བསད་ནམ་དུ་བཅིངས་པ། སྨེ་སྔགས་ཀྱི་སྐང་འབྱིན་པ་ལྟ་བུ་བྲིས་པའི་སྙིང་ཁར་ཡི་གེ་ཎི་ཆེན་པོ་དེའི་དཀྱིལ་དུ་བསྒྲུབ་བྱའི་མིང་ཡིག་དང་པོ་འམ། བླ་དྭགས་རུས་དང་བཅས་པ་བྲིས་པའི་མཐར་ལུས་ངག་ཡིད་གུམ་གཞུག་ཅིག སྒྲོལ་ཅིག ནོན་ཅིག ཅེས་བྲིའོ། མིང་རུས་ཎི་དང་བཅས་པ་ལ་བསྒྲུབ་བྱ་དེའི་དྲི་རྫས་སོགས་ཀྱི་ཐིག་ལེ་བཏབ་ཅིང་ཎིའི་ཕྱོགས་བཞི་ཛ་བཞིས་བསྐོང་བ། འཁོར་ལོ་གཉིས་ལ་ད་ཉ་གཉིས་སྤང་བ་དང་། ལིངྒལ་ཡང་ང་ཉ་གཉིས་བྲི་བར་བྱ་སྟེ། འཁོར་ལོའི་ང་ཉ་གཉིས་སྤོང་བ་ནི། བཞང་ཡང་དགེ་ཆུང་ལྟ་བུའི་མཚན་མ་དགོད་པ་ནི། སྙིག་ཁར་ཎི། དེའི་མཐའ་ཛ། སྤྱི་བོར་ལམ་ནན་བཞི། ཡ་ཊ་ཆུ་བ་ཁ། མ་མཆུ་ལ་ཐམ། ཁ་ལ་གཤིན་རྗེད་ལོང་། རྣ་བ་གཉིས་ལ་འོན་བཞི། དཔུང་བ་གཉིས་ལ་ཆག ལག་པ་གཉིས་ལ་ཞ། གསང་གནས་ལ་ཚ། བརླ་ལ་དུང་། རྐེང་བ་ལ་ན། ཉག་གཉིས་ལ་གྲིམ། ལྷག་ཁུང་དུ་ཝཾ། རྐང་པ་ཞབས་ལ་ཡི། འདོ་མ་དུ་ཡི་གེ་འབྱུང་ལྔའི་
ས་བོན་ཏེ། ཡཾ་རཾ་ལཾ་ཝཾ་ཨེ་བྲི། སྔགས་རྣམས་གནས་རྣམས་སུ་བཀོད་ཅིང་། སྙིང་ཁའི་ཎི་ཛ་བཞིའི་མཐར། གཞིན་རྗེ་ཡབ་ཏི་དང་། ཕྱྭ་སད་དང་། གཤིན་རྗེ་འབེབས་མ་རྣམས་ལ་ཆེ་གེ་མོ་འདི་ཞེས་བྱ་བའི་ལུས་ངག་ཡིད་གསུམ་གཉེར་དུ་གཏད་དོ། མ་ཤོང་ཅིག ཁུག་ཅིག རེང་ཏུ་ཆུག །ཁྲག་ནད་དང་། སྨྱོ་འབོག་སྣ་ཚོགས་ཐོང་ཅིག ཅེས་དང་། གཤིན་རྗེ་གླང་མགོ་ཅན་དང་། རྨིག་པ་དང་། གཤིན་རྗེ་ཕོ་ན་མོ་དང་། གཤིན་རྗེ་མཆེ་བ་མ་རྣམས་ཆེ་གེ་མོ་གཉེར་གཏད་དོ། མ་ཤོང་ཅིག རེད་དུ་ཆུག །ཁྲག་ནད་དང་སྨྱོ་འབོག་སྣ་ཚོགས་ཐོང་ཅིག །ཅེས་དང་། གཤིན་རྗེ་རལ་བ་ཚོང་དགུ་དང་། མིག་དམར་དང་། མཚོན་མོ་ནག་མོ་དང་། དུས་མཚན་མ་རྣམས་ལ་ཆེ་གེ་མོ་འདི་གཉེར་དུ་གཏད་དོ། མ་ཤོར་ཅིག ཁུག་ཅིག། ཟས་སྐམ་ལ་གཏད་འཐུང་སྐལ་ལ་གཏད་དོ་བསད་སྐལ་དུ་གཏད་དོ། མ་ཤོར་ཅིག དེའི་ཕྱི་རོལ་དུ་སྡགས་སམ་གཞན་དམོད་བཅོམ་སྣ་ཚོགས་བྲིས་པའི་ཕྱིར་རོལ་ཏུ། རྒྱ་བྲམ་ཤི་ཤུ་རྩ་གཅིག་བྲིས་པའི་བར་བར་དུ། ཡ་མ་དང་ཛ་དང་ཡཾ་རཾ་ལཾ་ཝཾ་ཨེ་ལ་སོགས་པ་འབྱུང་བཞིའི་ཤོག་བུའི་གྲྭར་མ་སོང་བ་ཉི་ཤུ་རྩ་གཅིག་བྲིའོ། འདིའི་མན་ངག་དམ་པ་ལ། འཁོར་ལོ་ལ་རང་ཁྲག་དགོས་པ་ནི། འཁོར་ལོ་ལ་རང་བསྡིགས་མཛུབ་བྱས་པའི་རང་ཁྲག་དགོས་པ་ནི། གཅོད་བྱེད་ཀྱི་འཁོར་ལོ་དྲག་སྔགས་སུམ་ཅུ་རྩ་གཉིས་ཡིན་ཏེ། རང་ཡི་དམ་དུ་བསྒོམ་ལ། ཁ་ལྷོ་ཕྱོགས་སུ་བསྡིགས་མཛུབ་བྱས་པའི་ཁྲག་གོ ལིངྒ་ལ་རང་གི་དྲི་རླངས་མ་སོང་བྱེད་པ་གལ་ཆེའོ། དེ་ཡང་དྲི་མདང་ཁ་རླངས་དང་མཆིས་སྣབ་ལ་སོགས་པ་གཏན་ནས་མ་སོང་བར་བྱེད་པ་རྗེ་ཉིད་དང་། བླ་མའི་གསུང་དང་། མཁས་གྲུབ་ཤནྟི་བ་རྣམས་སོགས་ཀྱི་གསུང་གྲོས་
རྣམས་ལ་གསལ་བར་ཡོད་པས་གོ་བར་བྱ་དགོས་སོ། དེ་ལྟར་ལིངྒ་གཉིས་སུ་བྱེད་ན་མྱུར་བ་དང་། གཅིག་ཏུ་བྱེད་ན་བུལ་བ་དང་། གཅིག་གཉིས་གང་བྱེད་ཀྱང་། སྔགས་རྣམས་གཡས་བསྐོར་དང་གཡོན་བསྐྱོར་དུ་བྱེད་ཅིང་འཁོར་ལོ་གཉིས་ཀྱི་བར་དུ་བཞག་གོ། གཡས་བསྐོར་བྲིས་པ་ཡབ་ལ་སྦྱར་ཞིང་། གཡོན་བསྐོར་བྲིས་པ་ཡུམ་ལ་སྦྱར་བའི་ཡུམ་འཁོར་འོག་ཏུ་ཡབ་འཁོར་སྟེང་དུ་འོང་བ་བྱས་པའི་བར་དུ་ལིངྒ་བཞག་ལ་མན་ངག་བཞིན་དུ་ལེགས་པར་དྲིལ་ལ། སྟེང་དུ་བྱ་རོག་འུག་པ་གཉིས་ཀྱི་སྒྲོ་རྒྱ་གྲམ་དུ་བཞག འོག་ཏུ་ར་ཁྱི་གཉིས་ཀྱི་སྤུ་རྒྱ་གྲམ་དུ་བཞག་ལ། རོའི་སྐྲ་ལས་བྱས་པས་སྐུད་པ་ནག་པོས་རྒྱ་གྲམ་དུ་འཁོར་ལོ་མི་མཐོང་བར་དཀྲི། དེ་ནས་གཞུང་དུ་ཡོད་པའི་ལག་ལེན་ལྟར་བསྒྲུབ་པར་བྱའོ། འདིའི་འཁོར་ལོའི་ལྟེ་བ་ལུགས་གསུམ་དང་། ལིངྒ་གཅིག་གཉིས་སུ་བྱེད་ཅིང་། སྔགས་འགོད་ལུགས་ནི་ཞལ་ཤེས་མེད་པའི་རང་བཟོ་མ་ཡིན་ནོ། བླ་མ་གོང་མའི་གསུང་རྒྱུན་རྣམས་ཡིག་ཆུང་དུ་བྱས་པའོ། ང་ཉ་གསལ་བ་སྤངས་དང་བླང་བཀོད་ལུགས་ནི། ཡ་མ་རཱ་ཛཱབ་མ་རྒྱུད་དང་། འཇིམ་ལོའི་བཞེད་པར་སྣང་བ་ཡིན་ནོ། ཁ་ཅིག་འདི་རྣམས་མི་འཐད་ཅེས་པའི་བཤད་ལུགས་གནང་བ་དེ་དག་ཁྱོད་ཀྱིས་ཇི་ལྟར་རིག་པ་ཡིན། རྟོག་བདུན་རྟོག་གསུམ་གྱི་དགོངས་པ་མིན་རུང་ཡང་། ད་ལྟའི་གཏེར་མ་མིན་པའི་གཤིན་རྗེ་གཤེད་ཀྱི་སྐོར་ལ་བཀའ་གཏེར་མི་འདྲ་བ་རྒྱ་གཞུང་དུ་མ་དང་། དམག་ནག་འཇིགས་གསུམ་གྱི་འཁྲུལ་འཁོར་ལ་མངའ་བརྙེས་པའི་རྒྱ་བོད་གཉིས་ཀྱི་མཁས་གྲུབ་ཀྱི་དགོངས་པ་ཁྱོད་ཀྱིས་ཨེ་ལོན། མན་ངག་གི་རྩད་ཁུང་ཨེ་ཆོད། ལག་ལེན་འདི་ལྟར་འདི་ལྟར་དུ་བཏབ་པའི། སྣོན་འདས་པ་དང་ད་ལྟའི་དུས་ནའང་། ཟབ་བྱད་ཀྱི་རྟགས་མངོན་སུམ་དུ་སྣང་བ་དེ་ཡིན་མོད། ཁྱད་
པར་ཁྱོད་རང་གི་ལུགས་དེ་ལག་ཏུ་ལོངས་དང་ལོ་ཟླའི་ཞག་དུས་ཨེ་ཐེབས། ཧེ། དམུས་ལོང་ས་ལམ་མི་སྒྲོད་པས། མཁས་པ་མཐོང་ན་ཞེ་སྡང་སྐྱེ། བླུན་པོ་མཐོང་ན་གཟི་མདངས་ཕྱུང་། ཡིག་ཆུང་མཐོང་ན་ཁྱད་གསོད་བྱེད། དེས་ངེས་ཡོད་ཀྱང་ཕྱིན་ཅི་བྷཻ། དེ་ལྟར་མན་ངག་དམ་པ་སྤོས། རྒྱ་བོད་ཀྱི་མཁས་གུབ་ཚད་ལྡན་རྣམས་ཀྱི་གསུང་དང་། ལག་ལེན་ཚད་མས་གྲུབ་པའི་ཕྱག་ལེན་དང་། མན་ངག་རྣམས་རང་གིས་ཀྱང་མྱོང་བས་གྲུབ་པའི་ཡིག་ཆུང་། ཞལ་ཤེས་དང་བཅས་པ་རྣམས་སྦ་གསང་མེད་པར་རྗེ་བཙུན་བླ་མའི་གསུང་ལྟར་གྲོགས་སློབ་མས་གསེར་གྱི་མཎྜལ་དང་བཅས་པ་ཕུལ་ནས་གསོལ་བ་བཏབ་ངོར་སྭ་སྟི་ཤྲིས་སྦྱར་བའོ། མཁན་པོ་དག་དབང་གྲགས་པའི་དོན་དུའོ། རྡོ་རྗེ་འཆང་དང་དབྱེར་མ་མཆིས་ཤིང་། རྡོ་རྗེ་འཇིགས་བྱེད་ཀྱི་དངོས་སུ་དབང་བསྐུར་བ་དདང་འཁྲུལ་འཁོར་འདིའི་མན་ངག་ལུང་བསྟན་དུ་ཐོབ་པའི་ཐམས་ཅད་མཁྱེན་པ་བློ་བཟང་གྲགས་པའི་དཔལ་གྱི་ཞལ་སྣ་ནས་དགྱེས་བཞིན་དུ་གནང་ཞིང་རྗེས་སུ་བཟུང་བའི་བཀའ་དྲིན་ལས་གཤིན་རྗེ་གཤེད་ཀྱི་འཁྲུལ་འཁོར་དང་མན་ངག་ལ་མཁས་པ་མང་དུ་ཐོས་པའི་བཙུན་མ་དགེ་ལེགས་དཔལ་བཟང་པོས། མདོ་སྨད་པ་ཚ་གོ་དཔོན་པོ་ངག་དབང་གྲགས་པས་ཐོག་དྲངས་དགེ་སློང་བཞི་སྡེར་གསེར་གྱི་མཎྜལ་བླ་གོས་དང་བཅས་ཏེ་གསོལ་བ་བཏབ་པའི་ངོར། དྲང་སྲོང་སྨིན་པོའི་རི་གཙུག་ལག་ཁང་དུ་སྦྱར་བ་འདིས་ཀྱང་བསྟན་པ་ལ་ཕན་ཞིང་དགེ་བགེགས་ཚར་གཅོད་པ་གྱུར་ཅིག གཤིན་རྗེ་གཤེད་ཀྱི་གཞུང་འཁྲུལ་འཁོར་མན་ངག་གི་སྦས་དོན་ཡིག་ཅུང་འདི་གཞན་དུ་མ་འཁྱེར་ཅིག ས་མ་ཡ་གུ་ཧྱ་ཨྛིཾ། ཤུ་བྷཾ། ཨོཾ་སྭ་སྟི། རྒྱལ་བསྟན་
པད་ཚལ་ཕན་བདེའི་དྲི་བསྲུང་ཅན། །བཤད་སྒྲུབ་འདབ་རྒྱས་རྣམ་གྲོལ་སྦྲང་རྩིའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །སརྦ་ཛ་ག་ཏཾ།། །།