རྟོག་པ་གསུམ་པའི་རྣམ་བཤད་པ་ལ་གཤིན་རྗེ་གཤེད་ཀྱི་འཁྲུལ་འཁོར་གྱི་ཆོ་ག་རྒྱ་ཆེར་བཤད་པ་ཁམས་གསུམ་རྣམ་པར་རྒྱལ་བའི་ཉི་འོད་དོ།
རྟོག་པ་གསུམ་པའི་རྣམ་བཤད་པ་ལ་གཤིན་རྗེ་གཤེད་ཀྱི་འཁྲུལ་འཁོར་གྱི་ཆོ་ག་རྒྱ་ཆེར་བཤད་པ་ཁམས་གསུམ་རྣམ་པར་རྒྱལ་བའི་ཉི་འོད་དོ།
ན་མོ་བཛྲ་བྷཻ་ར་ཝ་ཡ་མཎྜལ་བྷྱོ༔ འཇམ་དཔལ་དཔའ་བོ་ཐོས་པའི་གར་མཛད་པས། །ནམ་སོའི་རྩ་ལག་མ་ལུས་དྲུངས་འབྱིན་ཅིང་། ཁམས་གསུམ་ཟད་བྱེད་མ་ཧེའི་ཞལ་གདངས་པ། །བླ་མ་གཤིན་རྗེ་གཤེད་ལ་ཕྱག་འཚལ་ལོ། །དེ་ཉིད་མཉེས་བྱས་བསྙེན་སྒྲུབ་མཐར་སོན་པས། །གང་གིས་འཁྲུལ་འཁོར་ཆོག་ལ་སྦྱར་ན། །རབ་འབྱམས་ལས་ཀུན་སྒྲུབ་ལ་ཐོགས་མེད་པའི། །སྟོབས་ལྡན་འཁོར་ལོའི་མན་ངག་སྙིང་པོ་སྦྱིན། །དེ་ཡང་བཅོམ་ལྡན་འདས་རྡོ་རྗེ་འཇིགས་བྱེད་ཀྱི་རྩ་བའི་རྒྱུད་རྒྱས་པ། །བླ་མ་སྔ་མ་རྣམས་ཤཱཽ་ཀ་འབུམ་པ་ཞེས་འཆད་ཅིང་། །རྡོ་རྗེ་སློབ་དཔོན་གྲུབ་པས་མཛད་པའི་འགྲེལ་བ་ལས་རྩ་བའི་རྒྱུད་སྟོང་ཕྲག་བཅོ་བརྒྱད་ལ་ཞེས་བཤད་པ་དེ་ལས་གྲུབ་ཆེན་ལཱ་ལི་ཏ་བཛྲ་གྱིས་ཕྱུང་ནས། ཨུ་རྒྱན་ནས་འཕགས་པའི་ཡུལ་དུ་གང་ན་དྲངས་པའི། །རྩ་བའི་རྒྱུད་ཀྱི་དུམ་
བུ། དངོས་གྲུབ་བསྒྲུབ་པའི་རྟོག་པ། །རྟོག་པ་བདུན་པ་འདི་ཉིད་ཀྱིས་ནི་གཙོ་བོར་ཐུན་མོང་གི་དངོས་གྲུབ་སྒྲུབ་པའི་ཚུལ་སྟོན་པ་ཡིན་ལ། དེ་ཡང་བསྐྱེད་རིམ་གྱི་རྣལ་འབྱོར་རབ་ཕྲ་མོ་ཡང་མཐའ་ཕྱིན་པས་ནི། རྫས་དང་སྨན་དང་སྦྱིན་སྲེག་འཁྲུལ་འཁོར་སོགས་གང་ལ་ཡང་ལྟོས་པ་མེད་པར་བསམ་གཏན་ཙམ་གྱིས་ལས་ཐམས་ཅད་ཐོགས་པ་མེད་པར་དུས་ཤིན་ཏུ་མྱུར་བ་ཞག་བདུན་ལ་སོགས་པ་འགྲུབ་པར་ནུས་པས། དེ་ལྟ་བུའི་དབང་དུ་བྱས་པའི་བསམ་གཏན་གྱི་ལས་བསྒྲུབ་པའི་ཚུལ་རྟོག་པ་བདུན་པས་འཆད་ལ། བསྐྱེད་རིམ་གྱི་རྣལ་འབྱོར་འབྲིང་ཕྲ་བོ་མཐར་མ་ཕྱིན་ཀྱང་རགས་པ་ཙམ་ཞིང་མཐར་ཕྱིན་པ་བཟླས་པས་ལྷ་མ་ཉེས་པར་བྱས་པ་དག་གིས་ཀྱང་འཁྲུལ་འཁོར་སོགས་ལ་མི་ལྟོས་པར་སྦྱིན་སྲེག་ཙམ་གྱིས་ལས་རབ་འབྱམས་ཐམས་ཅད་བསྒྲུབས་པར་ནུས་
པས། དེ་ལྟ་བུའི་དབང་དུ་བྱས་པའི་སྦྱིན་སྲེག་གི་ལས་བསྒྲུབ་ཚུལ་ནི་རྟོག་པ་དྲུག་པས་འཆད་ཅིང་། བསྐྱེད་རིམ་གྱི་རྣལ་འབྱོར་ཐ་མ། བསྐྱེད་རིམ་ཕྲ་རགས་གཉིས་མཐར་མ་ཕྱིན་ཀྱང་། དབང་བསྐུར་བ་ལེགས་པར་ཐོབ་པས་དམ་ཚིག་དང་སྡོམ་པ་ལ་གཅེས་སྤྲས་སུ་བྱེད་ཅིང་། ལྷའི་རྣལ་འབྱོར་ལ་གོམས་པར་བྱས་པའི་ང་རྒྱལ་ཤིན་ཏུ་བརྟན་པ་དང་། ལྷས་བྱིན་གྱིས་བརླབས་པའི་མཚན་མ་ཐོབ་པའམ། དེ་མ་ཐོབ་ཀྱང་རྩ་སྔགས་སམ་ཡི་གེ་བཅུ་པ་གང་ཡང་རུང་བ་བྱེ་བ་སོགས་ཀྱིས་བཟླས་པ་དང་། བཟླས་པའི་བཅུ་ཆའི་ཁ་སྐོང་གི་སྦྱིན་སྲེག་དང་བཅས་པ་ཡོངས་སུ་རྫོགས་པ་ཞིག་གིས་ཆོ་ག་ཇི་ལྟ་བ་བཞིན་དུ་མ་ནོར་བར་བསྒྲུབ་ན་འཁྲུལ་འཁོར་ཉིད་ཀྱིས་ནི་རྒྱས་དབང་གྲག་གི་ལས་རབ་འབྱམས་བསྒྲུབ་པར་ནུས་པས། དེ་ལྟ་བུ་བསྒྲུབ་པའི་འཁོར་ལོའི་ཆོ་ག་རྟོག་པ་གཉིས་པས་སྟོན་ལ། རྟོག་པ་ལྷག་མ་བཞིས་དེ་ལྟ་བུའི་ལས་རབ་འབྱམས་རྣམས་འགྲུབ་པའི་རྒྱུའི་གཙོ་བོ་ལྷའི་རྣལ་འབྱོར་དང་། བསྙེན་སྒྲུབ་ཡན་ལག་དང་བཅས་པ་སྟོན་ཏོ། རྭ་བ་དག་ནི། སྦྱིན་སྲེག་གི་རྟོག་པ་ཡང་འཁོར་ལོའི་རྟོག་པ་དང་འབྲེལ་ཏེ། འཁོར་ལོ་བསྒྲུབས་ཟིན་པའི་མཐར་འཁོར་ལོ་སྦྱིན་སྲེག་རུ་བྱེད་པ་དང་འབྲེལ་ལོ། རྟོག་པ་བདུན་པ་ཡང་འཁྲུལ་འཁོར་དང་དང་འབྲེལ་ཏེ། འཁྲུལ་འཁོར་སྤ་བ་བྱས་ནས་བསྒྲུབ་པའི་དུས་ཀྱི་བསམ་གཏན་བསྟན་པ་ཡིན་ནོ་ཞེས་འཆད་དོ། གཞན་ཡང་གཤིན་རྗེ་གཤེད་ནག་པོའི་རྒྱུད་ཀྱི་ལེའུ་དྲུག་པ་ནས་འཁོར་ལོ་འབྲི་བ་དང་། བཞི་པ་དང་ལྔ་བས་འཁྲུལ་འཁོར་ཀྱི་ལས་བསྒྲུབ་ཚུལ་བསྟན་ལ། གདོང་དྲུག་གི་རྒྱུད་ཀྱི་རྟོག་པ་དང་པོས་འཁྲུལ་འཁོར་འབྲི་བ་དང་ལས་བསྒྲུབ་བ་བསྟན་ཅིང་། གཤིན་རྗེ་གཤེད་དམར་པོའི་རྒྱུད་ལེའུ་བཅུ་
དགུ་པའི་ལེའུ་གཉིས་པ་ནས་འཁྲུལ་འཁོར་གྱི་ལས་བསྒྲུབ་པ་བསྟན། ལེའུ་བཅུ་གསུམ་པ་ནས་འཁྲུལ་འཁོར་འབྲི་བ་བསྟན་ལ། རྩ་རྒྱུད་རྣམས་ནས་དེ་ལྟར་གསུངས་པའི་དོན། བཤད་རྒྱུད་རྟོག་པ་གསུམ་པས་ཞི་པར་འཆད་དོ། དེ་ཡང་རྟོག་པ་གསུམ་པའི་རྟོག་པ་དང་པོས་འཁོར་ལོ་འབྲི་བའི་ཆོ་ག་དང་། རྟོག་པ་གསུམ་པས་འཁྲུལ་འཁོར་ཀྱིས་ལས་བསྒྲུབ་པའི་ཡན་ལག་བསྟན་ཅིང་། རྟོག་པ་གཉིས་པས་བདུད་རྩི་སྒྲུབ་པ་བཅུད་ལེན་དང་བཅས་པ་འཆད་ལ། འདིར་ནི་རྟོག་པ་གསུམ་གྱི་དང་པོ་དང་གསུམ་པ་ཞིབ་ཏུ་བཤད་ཅིང་། རྟོག་བདུན་གྱི་རྟག་པ་གཉིས་པ་དང་ཡང་ལེགས་པར་སྦྱར་ཏེ་བླ་མའི་མན་ངག་གིས་རྣམ་པར་བརྒྱན་ཏེ་གསལ་བར་བྲི་བར་བྱའོ། དེ་ལ། དོན་དམ་ཆོས་སྐུ་ཞི་བ་ཉིད། གང་འདིར་ཁམས་གསུམ་རྣམ་རྒྱལ་ཏེ། གཤིན་རྗེའི་དགེ་ཞེས་གྲགས་པ་ཡི། འཁོར་ལོ་སྐོར་བའི་ཆོ་ག་བཤད། ཅེས་པ་ནི་བཤད་པར་དམ་བཅའ་བའོ། ཡོན་ཏན་ལྡན་པའི་སྔས་པས་ནི། ཞེས་བྱ་བ་ནི། ཤེས་རབ་དང་སྙིང་རྗེ་སོགས་ཀྱིས་ཡོན་ཏན་དང་ལྡན་པའོ། ཆོ་ག་བཞིན་དུ་བསྙེན་པ་ཡིས། ཞེས་བྱ་བ་ནི་བསྙེན་པ་ཚུལ་བཞིན་དུ་རྫོགས་པར་བྱས་ཏེ། དེ་གཉིས་ཀྱིས་འཁོར་ལོའི་ལས་སྦྱོར་བྱེད་པ་པོའི་མཚན་ཉིད་བསྟན་ཏོ། དུར་ཁྲོད་དབེན་པ་ལ་སོགས་པ། ཞེས་པས་གང་དུ་འབྲི་བའི་ནས་བསྟན་ནོ། དེ་ནས་འབྲི་པའི་སྔོན་དུ་ཇི་ལྟར་བྱ་བ་ནི་མཎྜལ་ཁྲུ་དོའི་ཚད་དུ་བྱ། ཞེས་པས་དཀྱིལ་འཁོར་ཁྲུ་དོ་གྲུ་བཞི་པ་ཕྱི་དོར་ལེགས་པར་བྱ་སྟེ། ཁྲུ་དོའི་ཚད་དུ་བྱེད་པ་ནི་ཁོར་ལོའི་ཐིག་གི་ཕྱི་མཐའ་ནས་ཕྱི་མཐའི་རང་ལ་སོར་བཞི་བཅུ་ཞེ་བརྒྱད་ཡོད་པའི་ཕྱིར་རོ། དྲི་དང་
བ་ཡི་རྣམ་ལྔ་དང་། ཉི་ཟླ་སོགས་པས་བྱི་དོར་བྱ། ཞེས་པ་ནི། དྲི་བཟང་དང་། བ་བྱུང་ལྔ་དང་། ཉི་མ་སྟེ་ཁྲག་དང་། ཟླ་བ་སྟེ་ཁུ་བ་དང་། དེ་གཉིས་ཀྱིས་མཚོན་པའི་བདུད་རྩི་ལྔའི་རི་ལུ་ཆང་ལ་སྦྱར་བ་དང་བཅས་པས་གཞི་དེ་བྱུག་པར་བྱའོ། ཤ་ལ་སོགས་པ་དམ་རྫས་ལྔ། གཞན་ཡང་ཚོགས་ཀྱི་འཁོར་ལོ་དང་། ཕྱི་ནས་མཆོད་པའི་ཕྱེ་བྲག་གི །ལེགས་པར་མཆོད་པ་བྱས་ནས་ནི། ཞེས་པ་ནི་དེ་ལྟར་ས་གཞི་བྱི་དོར་བྱས་ནས། ཤ་ལྔ་ལ་སོགས་པ་དངོས་སུ་ཡོད་པ་འམ། དེར་བསྒོམས་ནས་བྱིན་གྱིས་བརླབས་པའི་ཤ་དང་ཆང་ལ་སོགས་པའི་དམ་རྫས་རྣམས་ཚོགས་པར་བྱས་ནས། སྒྲུབ་པ་པོ་རྣམས་བདག་བསྐྱེད་སྒྲུབ་ཐབས་རྫོགས་པར་བསྒོམས་པ་བཟླས་པ་དང་བཅས་པ་བྱས་ནས་བདག་མདུན་གྱི་དཀྱིལ་འཁོར་ལ་མཆོད་བདུད་རྩི་མྱོང་བ་ཚོགས་ཀྱི་འཁོར་ལོ། འཇིག་རྟེ་དང་འཇིག་རྟེན་ལས་འདས་པའི་གཏོར་མ་མ་དང་བཅས་པ་བྱ་བའི་དོན་ཏེ། སློབ་མ་ལ་སློབ་པ་དང་ལས་ལ་སྦྱོར་བ་གཉིས་ཀའི་ཚེ་བྱ་དགོས་སོ། དེ་ལྟར་སྔོན་དུ་བྱ་བ་རྣམས་ཟིན་པའི་འོག་ཏུ་བྲིས་པ་སོགས་ཀྱིས་བྱ་བ་བརྩམ་པར་བྱ་སྟེ། དེ་ལ། འཁོར་ལོ་གྲི་དང་བཏུབ་དང་། དྲང་དང་བསྲེ་དང་སྤོ་བ་རྩོམ། ཞེས་པ་ནི་སྡོམ་གྱི་ཆིག་སྟེ། དེ་ཡང་བཞིའི་འཁོར་ལོ་འབྲི་བ་དང་། སྔགས་བཏུ་བ་དང་། སྔགས་དྲང་བ་དང་། སྔགས་བསྲེ་བ་དང་། འཁོར་ལོ་སྤོ་བ་དང་། འཁོར་ལོ་སྦ་བ་དང་། འཁོར་ལོ་བསྐུལ་བ་དང་། མཇུག་གི་བྱ་བ་སྟེ། བྱ་བ་བརྒྱད་བརྩམ་པར་བྱའོ། དེ་ལྟར་བརྒྱད་ལས་ཐོག་མར་གཞིའི་འཁྲུལ་འཁོར་བྲི་བ་བརྗོད་པར་བྱ་བ་ལ། སྔགས་པ་རྣལ་འབྱོར་ལྡན་པ་ཡིས། ལྷོ་ཡི་ཕྱོགས་སུ་ཁ་བ་ལྟས་ཏེ། དམ་ཚིག་རྗེས་སུ་དྲན་པ་ཡིས། ཨོཾ་བཛྲ་ས་མ་ཡ་སྟྭཾ། གསང་སྔགས་འདི་
ནི་དྲན་བྱེད་ཅིང་། འཁོར་ལོ་བྲི་བ་བརྩམ་པར་བྱ། ཞེས་གསུངས་པའི་དོན་ནི། རང་ལྷའི་ང་རྒྱལ་ལ་གནས་པས་ཁ་ལྷོ་ཕྱོགས་སུ་བལྟས་ཏེ། དམ་ཚིག་རྗེས་སུ་དྲན་པས། ས་མ་ཡ་སྟྭཾ། ཞེས་བརྗོད་དེ། ཐིག་འདེབས་པ་ལ་འཇུག་པའོ། ལྷོ་ཕྱོགས་སུ་ཁ་བལྟབ་ནི་བསད་ལས་སོགས་དྲག་པོའི་དབང་དུ་བྱས་པའོ། དེ་ལ་ཐོག་མར་ལྷོ་བྱང་གི་ཚངས་ཐིག །དེ་ནས་ཤར་ནུབ་ཀྱི་ཚངགས་ཐིག །དེ་ནས་ཟུར་ཐིག་གཉིས་གདབ་པར་བྱའོ། དེ་ནས་ཐིག་སྐུད་སོར་བརྒྱད་པས་དབུས་ནས་ཟླུམ་བོར་བསྐོར་བར་བྱ་ཞིང་། དེ་ཉིད་ལ་ཐིག་བཞི་སྙམས་པར་བཏབ་ནས་རེའུ་མིག་དགུ་པར་བྱའོ། དེ་མིག་དགུ་པའི་ཟླུམ་ཐིག་ལས། སོང་བཞི་ཕྱིར་སོང་བ་ནས་སླར་ཡང་ཟླུམ་ཐིག་གཅིག་བསྐོར་ནས། དེ་དང་རེ་མིག་དགུ་བའི་ཟླུམ་ཐིག་གི་བར་དེ་ལ་ཕྱོགས་བཞིར་རེ་མིག་རེ་རེ་དང་། མཚམས་བཞིར་རེ་མིག་གཉིས་གཉིས་ཏེ། འདིའི་ཕྱོགས་བཞིའི་རེ་མིག་རྣམས་ཀྱི་དབུས་ནས་ཚངས་ཐིག་འགྲོ་ལ། མཚམས་བཞིར་ཟུར་ཐིག་གི་གཡས་སུ་རེ་མིག་རེ་དང་གཡོན་དུ་རེ་མིག་རེ་འོང་ངོ་། རེ་མིག་བཅུ་གཉིས་པའི་ཟླུམ་ཐིག་ལས་སོར་བཞི་ཕྱིར་སོང་བ་ནས་སླར་ཡང་ཟླུམ་པོའི་ཐིག་བསྐོར་ནས། དེ་དང་རེ་མིག་བཅུ་གཉིས་པའི་ཟླུམ་ཐིག་གི་པར་དེ་ལ། རེ་མིག་བཅུ་གཉིས་པའི་ཕྱོགས་ཀྱི་རེ་མིག་བཞིའི་ཐད་དུ། དེ་དག་ལས་ཅུང་ཟད་ཆུང་བའི་རེ་མིག་རེ་རེ་དང་། མཚམས་རྣམས་སུ་ཟུར་མིག་དབུས་སུ་སོང་བའི་མིག་རེ་རེ་གཡས་གཡོན་དུ་རེ་མིག་རེ་རེ་སྟེ་རེ་མིག་དྲུག་པར་བྱའོ། དེ་ལ། དབུས་ནས་སོང་ཚད་བཅུ་དྲུག་པ། ཀུན་ཏུ་ཟླུམ་པོར་བསྐོར་བ་ནི། འདི་ནི་ནང་གི་འཁོར་ལོ་སྟེ། །
རིམ་པ་གསུམ་ད་བསྐོར་བ་ལ། སྒོ་མེད་ལྕགས་མཁར་བཅུ་དྲུག་བྱ། འདི་ནི་གཤིན་རྗེའི་གྲོང་ཁྱེར་ཏེ། སྲིད་གསུམ་གྱིས་འཇུག་པའང་ཡིན། ཞེས་གསུངས་པའི་དོན་ནི། དབུས་ནས་ཕྱོགས་རེར་སོར་ཚད་བཅུ་དྲུག་པའི་ཐིག་གིས་ཀུན་ཏུ་ཟླུམ་པར་བསྐར་པ་འདི་ནི་ནང་གི་འཁོར་ལོ་སྟེ། ཟླུམ་ཐིག་རིམ་པ་གསུམ་དུ་བསྐོར་བའི་གསུམ་པ་ལ་སྒོ་མེད་ལྕགས་མཁར་བཅུ་དྲུག་མཚོན་པའི་རེ་མིག་བཅུ་དྲུག་བྱ་ཞིང་། བཅུ་དྲུག་པོ་འདི་ནི་འཆི་བདག་ག་ཤིན་རྗེའི་ཁྱེར་ཏེ། སྲིད་པ་གསུམ་གྱི་སེམས་ཅན་རྣམས་ཀྱི་སྲོག་གི་འཇུག་པ་སྟེ་འགྲོ་ས་ཡིན་ནོ་ཞེས་བྱ་བའོ། ཟླུམ་ཐིག་གསུམ་པ་དེ་ནས་ཕྱིར་སོར་བརྒྱད་སོང་བ་ནས་ཟླུམ་ཐིག་བསྐོར་ནས། སོར་བརྒྱད་ཀྱི་ས་དེ་ཆ་མཉམ་གསུམ་དུ་པ་གོས་ཏེ། ནང་གི་ཟླུབ་ཐིག་གསུམ་པ་དང་། སོར་བརྒྱད་ཀྱི་ཕྱི་རོལ་གྱི་ཟླུམ་ཐིག་གཉིས་ཀྱི་བར་དུའང་ཟླུམ་ཐིག་གཉིས་བསྐོར་ནས། ནང་གི་འཁོར་ལོའི་ཕྱི་རོལ་ཏུ་མུ་ཁྱུང་གསུམ་རིམ་འོང་བར་བྱའོ། མུ་ཁྱུད་གསུམ་པོ་རེ་རེ་ཡང་རེ་མིག་ཁང་པ་སུམ་ཅུ་རྩ་གཉིས་རྩ་གཉིས་དང་ལྡན་པར་གྱས་ཏེ། ཤར་གྱི་ཚངས་ཐིག་ནས་ནུབ་ཀྱི་ཚངས་ཐིག་བར་ལ་གཡས་སུ་རེ་མིག་བཅུ་དྲུག་རེ་དང་། གཡོན་དུ་རེ་མིག་བཅུ་དྲུག་རེའོ། དོན་དེ་ནི། དེ་ཡི་ཕྱི་རོལ་མུ་ཁྱུང་གསུམ། ཀུན་ཏུ་ལྕགས་རིས་བསྐོར་བ་སྟེ། མུ་ཁྱུང་དེ་དག་རེ་རེ་ལ། ཁཔ་སུམ་ཅུ་རྩ་གཉིས་མཛེས། ཞེས་པས་བསྟན་ཏོ། འགྲོ་བ་ཆོས་བཞིན་སྤྱོད་པ་ཡིན། འཁོར་ལོ་འདི་ལྟར་བྲིས་ནས་ནི། ཞེས་པ་གོ་སླ་ལ། དཔེ་ཁ་ཅིག་ལས། འཁོར་ལོ་ཆོས་བཞིན་སྤྱོད་པ་ཡིས། ཞེས་འབྱུང་བ་ལྟར་ན། འཁོར་བའི་ཆོས་རྟེན་འཕྲེལ་ཡན་ལག་བཅུ་གཉིས་བར་མ་ཆད་པར་འཁོར་བས་བདེ་བ་གཅོད་པ་བཞིན་དུ། རེ་
མིག་རྣམས་བར་མ་ཆད་པར་འཁོར་བས་མི་མཐུན་ཕྱོགས་གཅོད་པའི་འཁོར་ལོ་འདི་ལྟར་བྲིས་ནས་ནི་ཞེས་བྱ་བའི་དོན་ནོ། དེ་ནས་མཐའི་མུ་ཁྱུད་ཀྱི་ཤར་གྱི་ཚངས་ཐིག་ནས་ནུབ་ཀྱི་ཚངས་ཐིག་ཏུ་སླེབ་པའི་བ་ར་གཡས་ཀྱི་རེ་མིག་བཅུ་དྲུག་ལ། ཀ་ཁ་ག་གྷ། ཙ་ཚ་ཛ་ཛྷ། ཊ་ཋ་ཌ་ཎྜ་ཎ། ཏ་ཐ་ད། ཞེས་པའི་ཡི་གེ་བཅུ་དྲུག་ད་ཉ་གཉིས་མེད་པ། ཤར་གྱི་ཚངས་ཐིག་གི་འགྲམ་གྱི་རེ་མི་གནས་མགོ་བརྩམས་ཏེ་བྲི་བར་བྱའོ། དེ་ནས་གོང་གི་འཕྲོ་ལ་འཐུད་དེ། ནུབ་ཀྱི་ཚངས་ཐིག་གི་འགྲམ་གྱི་རེ་མིག་ནས་བརྩམས་ནས། ཤར་གྱི་ཚངས་ཐིག་གི་འགྲམ་གྱི་རེ་མིག་གི་བར། རེ་མིག་བཅུ་དྲུག་ལ་རིམ་པ་བཞིན་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། ཞེས་པའི་ཡི་གེ་བཅུ་དྲུག་བྲི་བར་བྱའོ། དེ་ནས་དེའི་ནང་མ་མུ་ཁྱུད་བར་མ་ལ། ཤར་གྱི་ཚངས་ཐིག་གི་འགྲམ་གྱི་རེ་མིག་ནས་མགོ་བརྩམས་ཏེ། ནུབ་ཀྱི་ཚངས་ཐིག་གི་འགྲམ་གྱི་རེ་མིག་ཚུན་ཆད་གཡས་ཀྱི་རེ་མིག་བཅུ་དྲུག་ལ། ཨ་ཨ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨ༔ ཞེས་པ་དབྱངས་ཡིག་བཅུ་དྲུག་བྲི་བར་བྱ་ཞིང་། དེ་བཞིན་དུ་ཤར་གྱི་རེ་འུ་མི་གནས་མགོ་བརྩམས་པའི་གཉོན་གྱི་རེ་འུ་མིག་བཅུ་དྲུག་ལའང་དབྱངས་ཡིག་བཅུ་དྲུག་བྲི་བར་བྱ་སྟེ། དབྱངས་ཡིག་ཚར་གཉིས་ཀའི་མགོ་ཤར་ཀྱི་རེའུ་མིག་ནས་བརྩམ་པའོ། དོན་འདི་དག་ནི། ཕྱི་རོལ་མུ་ཁྱུད་ཐ་མ་ལ། ཡི་གེ་གསོགས་ད་ཡིག་མཐའ། ང་ཉ་བསལ་ནས་དགོད་པར་བྱ། ཡི་གེ་དྷ་སོགས་ཀྵ་ཡིག་མཐའ། དེ་ཡི་རྗེས་སུ་བྲི་བར་བྱ། མུ་ཁྱུད་དབྱས་མ་དག་ལ་ནི། དབྱངས་ཡིག་བཅུ་དྲུག་ཉིས་འགྱུར་རོ། ཞེས་པས་བསྟན་
ཏོ། བཏུ་དང་དགོད་སོགས་རྩོམ་པ་ན། མཚན་མ་འདི་དག་ཤེས་པར་བྱ། ཟླ་བ་མིག་དང་ཡོན་ཏན་དང་། རིག་བྱེད་མདལ་དང་དབང་པོ་དང་། རྒྱ་མཚོ་བཀྲ་ཤིས་གཟའ་དང་ཕྱོགས། དྲག་པོ་ཉི་མ་ཡན་ལགས། ཚོས་ཞེས་བྱ་བར་རབ་ཏུ་གྲགས་ཞེས་བྱ་བ་ནི་བརྡའི་ཚིག་སྟེ། གང་གང་གི་བརྡ་ཚིག་ཡིན་ཞེས་ན། ཟླ་བ་ནི་གཅིག་གོ། མིག་ནི་གཉིས་སོ། ཡོན་ཏན་ནི་གསུམ་མོ། རིག་བྱེད་ནི་བཞིའོ། མདའ་ནི་ལྔའོ། དང་པོ་ནི་དྲུག་གོ། རྒྱ་མཚོ་ནི་བདུན་ནོ། བཀྲ་ཤིས་ནི་བརྒྱད་དོ། གཟའ་ནི་དགུའོ། ཕྱོགས་ནི་བཅུའོ། དྲག་པོ་ནི་བཅུ་གཅིག་གོ །ཉི་མ་ནི་བཅུ་གཉིས་སོ། ཡན་ལག་ནི་བཅུ་གསུམ་མོ། ས་ནི་བཅུ་བཞིའོ། ཚེས་ནི་བཅོ་ལྔའོ། དེ་ལྟར་ཤེས་པར་བྱས་ནས། སྔགས་བཏུ་སོགས་ཀྱི་ཚེ། བཀྲ་ཤིས་ཁང་པ་ཞེས་པ་ཁང་བ་བརྒྱད་པ་དང་། ཡེ་གེ་མིག་གི་ཚད་ལེན་ཞེས་པ་ཡི་གེ་གཉིས་ལེན་པ་སོགས་ལ་གོ་བར་བྱའོ། དེ་ལྟར་གཞིའི་དཀྱིལ་འཁོར་བྲི་བའི་ཚུལ་བཤད་ཟིན་ཏོ། གཉིས་པ་སྔགས་བཏུ་བ་ནི། ཕྱི་རོལ་མུ་ཁྱུད་ཐ་མ་ལ། ཤར་ཀྱི་ཚངས་ཐིག་ནས་བརྩམས་ཏེ། རིམ་མིན་གཟའ་ཅན་ཁང་པ་ནས། ཡི་གེ་བཀྲ་ཤིས་ཙམ་བླངས་ཏེ། ནང་གི་ངོས་ཀྱི་མུ་ཁྱུད་ཀྱི། ཚངས་ཐིག་གིས་ནི་ངོས་དགལ། ཕྱོགས་བཞིར་མིག་གི་ཚད་དུ་སྦྱིན། ཞེས་པ་སྟེ། མུ་ཁྱུད་ཐ་མའི་ཤར་ཀྱི་ཚངས་ཐིག་གི་ཁ་ཕྱིར་ལྟའི་གཡོན་གྱི་རེའུ་མིག་དང་ངོ་ནས། གཡོན་སྐོར་དུ་བགྲངས་པའི་གཟའ་ཅན་ཁང་པ་སྟེ་རེའུ་མིག་དགུ་བའི་ནང་ནས་ཡི་གེ་ཡབ་ཀྲ་ཤིས་ཀྱི་ཚད་དེ་ལན་བརྒྱད་ཀྱི་བར་དུ་བླངས་ནས། མུ་ཁྱུད་ནང་མ་དབྱངས་ཡིག་བཀོད་པའི་མུ་ཁྱུད་ཀྱི་ནང་རོལ་དེའི་ཤར་གྱི་ཚངས་
ཐིག་གི་གཡས་ཀྱི་རེ་མིག་དང་གཡོན་གྱི་རེ་མིག་གཉིས་སུ་ཡི་གེ་ཡ་རེ་རེ་བྲི་ཞིང་། དེ་བཞིན་དུ་ཕྱོགས་གཞན་གསུམ་གྱི་འང་ཆངས་ཐིག་གི་གཡས་གཡོན་གྱི་རེ་མིག་རྣམས་སུའང་རེ་རེ་སྟེ། ཕྱོགས་རེར་ཡ་གཉིས་གཉིས་བྲི་བར་བྱའོ། འདིར་ཤར་ཞེས་པ་སྤྱིའི་དབང་དུ་བྱས་ན་ལྷོ་ཡིན་མོད་ཀྱང་། དབུས་ཀྱི་ཡི་གེ་ཡ་ཁ་ལྷོ་ལ་བལྟས་པའི་དབུས་ཀྱི་ཡི་གེ་དེ་ཉིད་ཀྱི་ཁ་གང་ལྟའི་མདུན་ལ་ཤར་དུ་བྱས་པའི་དབང་དུ་བྱས་ནས་ལྷོ་ལ་ཤར་ཞེས་ཐ་སྙད་བྱས་པའོ། རིམ་མིན་ཕྱོགས་ཅན་ཁང་པ་ནས། ཡི་གེ་མིག་གི་ཚད་བླངས་ཏེ། ཤར་དུ་དེ་ཡི་གཡས་གཡོན་བཞག །ཅེས་པ་ནི། ཤར་ནས་གཡོན་སྐོར་དུ་བགྲངས་པའི་རེ་མིག་བཅུ་པ་ནས་ཡི་གེ་མ་ལན་གཉིས་བླངས་ཏེ། ཤར་གྱི་ཡ་བྲིས་པའི་རེ་མིག་གཉིས་ཀྱིས་འགྲམ་གཡས་གཡོན་གྱི་རེ་མིག་གཉིས་སུ་རེ་རེ་བྲི་ཤར་བྱའོ། རིམ་མིན་བཀྲ་ཤིས་ཁང་བ་ནས། དབྱངས་ཡིག་གཉིས་པ་ཅན་བླངས་ཏེ། མིག་གི་ཚད་དུ་བྱས་ནས་ནི་དེ་ཡི་ངོས་ལ་རེ་རེ་བཞག །ཅེས་པ་ནི། མུ་ཁྱུད་ཕྱི་མའི་ཤར་གྱི་ཚངས་ཐིག་གི་འགྲམ་ནས་གཡོན་སྐོར་དུ་བགྲངས་བའི་རེ་མིག་བརྒྱད་པ་ནས། ཡི་གེར་བླངས་ཏེ། ར་དེ་ལ་དབྱངས་ཡིག་གཉིས་པ་ཨཱ་རིང་པོ་སྲོག་ཏུ་བཅུག་པརས་རཱའི་ང་པོར་བྱས་ཏེ། མུ་ཁྱུད་ནང་མའི་ཤར་གྱི་མ་བྲིས་པའི་རེ་མིག་གཉིས་པོའི་འགྲམ་གཡས་གཡོན་གྱི་རེ་མིག་གཉིས་སུ་རཱ་རིང་པོ་དེའི་བྲི་བར་བྱའོ། ནུབ་ཀྱི་ཚངས་ཐིག་ནས་བགྲངས་ཏེ། རྒྱ་མཚོ་ཅན་གྱི་ཁང་བ་ནས། དབྱངས་ཡིག་བཅུ་གཅིག་དང་ལྡན་པ། མིག་གི་ཚད་དུ་བླངས་ནས་ནི། ལྷོ་ཕྱོགས་དེ་ཡི་གཡས་གཡོན་བཞག །ཅེས་པ་ནི། ནུབ་ཀྱི་ཚངས་ཐིག་གི་འགྲམ་དྡ་བྲིས་པའི་རེ་མིག་ནས་མགོ་བརྩམས་ཏེ་རིམ་པ་བཞིན་བགྲངས་པའི་རེ་མིག་བདུན་པ་ནས། ཡི་གེ་མ་ལན་གཉིས་བླངས་ཏེ། དེ་གཉིས་ལ་དབྱངས་
ཡིག་བཅུ་གཅིག་པ་ཨེ་ཐུན་དུ་སྲོག་ཏུ་བཅུག་ནས་མུ་ཁྱུད་ནང་མའི་ལྷོའི་ཚངས་ཐིག་གི་གཡས་གཡོན་ཡ་བྲིས་པའི་རེ་མིག་གཉིས་པོ་དའི་འགྲམ་གཡས་གཡོན་གྱི་རེ་མིག་གཉིས་སུ་མེ་རེ་རེ་བྲི་བར་བྱའོ། ནུབ་ནས་རིམ་པ་མིན་པ་ཡི། ཟླ་བ་ཅན་གྱི་ཁང་པ་ནས། དབྱངས་ཡིག་བཅུ་གསུམ་དང་ལྡན་པ། མིག་གི་ཚད་དུ་བླངས་ནས་ནི། ལྷོ་རུ་དེ་རྗེས་སྦྱིན་པར་བྱ། ཞེས་པ་ནི་ནུབ་གྱི་ཚངས་ཐིག་ནས་བསྐོར་ཕྱོགས་རིམ་པ་མིན་པ་སྟེ་གཡོན་སྐོར་བྱས་པའི་ཟླ་བ་ཅན་ཏེ། རེ་མིག་དང་པོ་ནས་ཡི་གེ་ད་ལན་གཉིས་བླངས་པ་ལ། དབྱངས་ཡིག་བཅུ་གསུམ་པ་ཨོ་ཐུང་དུ་སྲོག་ཏུ་བཅུག་ནས། ལྷོའི་རེ་མིག་ཡི་གེ་མེ་བྲིས་པ་གཉིས་པོ་དེའི་འགྲམ་གཡས་གཡོན་གྱི་རེ་མིག་གཉིས་སུ་ཡི་གེ་དོ་རེ་རེ་བྲི་བར་བྱའོ། དེ་ཉིད་དབྱངས་ཡིག་གསལ་བ་ནི། མིག་མི་ཚད་དུ་བླངས་ནས་ནི། སྔོན་བཞིན་ནུབ་ཀྱི་ཕྱོགས་སུ་སྦྱིན། ཞེས་པ་ནི། དེ་ལ་དབྱངས་ཡིག་ཨོ་བཅུ་པ་བསལ་བ་སྟེ་ཕྱུང་ནས་ནི། ཡི་གེ་ད་རྐྱང་བ་ལན་གཉིས་བླངས་ཏེ། མུ་ཁྱུད་ནང་མའི་ནུབ་ཀྱི་ཡས་བྲིས་པའི་རེ་མིག་གཉིས་པོ་དེའི་འགྲམ་གཡས་གཡོན་གྱི་རེ་མིག་གཉིས་སུ་ད་རེ་རེ་བྲི་བར་བྱའོ། ནུས་ནས་བཀྲ་ཤིས་ཁང་པ་ནས། དབྱངས་ཡིག་བཅུ་གསུམ་དང་ལྡན་པ། མིག་ཏི་ཚད་དུ་བླངས་ནས་ནི། ནུབ་ཀྱི་ངོས་སུ་དེ་རྗེས་སྦྱིན། ཞེས་པ་ནི། ནུབ་ནས་བགྲངས་པའི་བཀྲ་ཤིས་ཁང་པ་སྟེ་རེའུ་མིག་བརྒྱང་བ་ནས་ཡི་གེ་ཡ་དབྱངས་ཡིག་བཅུ་གསུམ་པ་ཨོ་ཐུང་དུ་དང་ལྡན་པར་བྱས་པའི་ཡོ་མིག་གི་ཆད་དུ་སྟེ་ལན་གཉིས་བླངས་ནས་ནི་ནུབ་གྱི་ཡི་གེ་དེ་བྲི་བའི་རེ་མིག་གཉིས་པོ་དེའི་ངོས་གཡས་གཡོན་གྱི་རེ་མིག་གཉིས་སུ་དེ་རྗེས་བྱིན་ཅིང་བྲི་བར་བྱའོ། བྱང་ནས་བཀྲ་ཤིས་ཁང་པ་ནས། དབྱངས་ཡིག་བཅུ་གཅིག་པ་
ལྡན་པ། མིག་གི་ཚང་དུ་བླངས་ནས་ནི། བྱང་གི་ངོ་ལ་དེ་རྗེས་སྦྱིན། ཞེས་པ་ནི། བྱང་གི་ཚངས་ཐིག་ནས་ཤར་གྱི་ཕྱོགས་ལ་ཚུར་བགྲངས་པའི་བཀྲ་ཤིས་ཁང་བ་རེའུ་མིག་བརྒྱད་པ་ནས། ཡི་གེ་ཀྵ་དབྱངས་ཡིག་བཅུ་གཅིག་པ་ཨེ་ཐུང་དུ་དང་ལྡན་པ་མིག་གི་ཚད་དུ་གླངས་ནས་ནི། བྱང་གི་ཡ་བྲིས་པའི་རེ་མིག གཉིས་པོ་དེའི་ངོས་གཡས་གཡོན་གྱི་རེ་མིག་གཉིས་པ་དེ་རྗེས་སྦྱིན་པ་སྟེ་བྲིའོ། རླུང་གི་ས་བོན་ཞེས་བྱ་ལ། མིག་མི་ཚད་བླངས་དེ་རྗེས་སྦྱིན། ཞེས་པ་ནི། རླུང་གིས་བོན་ཡི་གེ་ཡ་མིག་གི་ཚད་བླངས་ཏེ། ཀྵེ་བྲིས་པའི་གཡས་གཡོན་གྱི་རེ་འུ་མིག་གཉིས་སུ་དེ་རྗེས་སྦྱིན་ཞིང་བྲི་བར་བྱའོ། མདའ་ཅན་ཁང་པ་ནང་གནས་པ། འོད་ཀྱི་གོང་བུར་བྱས་པ་དང་། དེ་ཉིད་ནས་ནི་བགྲངས་པ་ཡི། ས་ཅན་ཁང་པ་ཅང་གནས་པ། དབྱངས་ཡིག་གསུམ་པ་ལྡན་པ་དག །ཟླ་བའི་ཚད་དུ་བླངས་ནས་ནི། བྱང་ཤར་མཚམས་སུ་རེ་རེ་སྦྱིན། ཞེས་གསུངས་ཏེ། ཤར་གྱི་ཚངས་ཐིག་ནས་གཡས་སྐོར་ལ་བགྲངས་པའི་མདའ་ཅན་ཁང་པ་རེའུ་མིག་ལྔ་པ་ན་གནས་པའི་ཡི་གེ་ཙ་འོད་ཀྱི་གོང་བུར་བྱས་པ་སྟེ་ཚ་དང་བརྩེགས་ནས་ཙྪ་ཞེས་བྱས་པ་དང་། རེའུ་མིག་ལྔ་པ་དེ་ཉིད་དང་པོར་བྱས་ནས་ནི་གཡས་སྐོར་ལ་བགྲངས་པའི་ས་ཅན་ཁང་པ་རེ་མིག་བཅུ་བཞི་པ་ན་གནས་པའི་ཡི་གེ་ན་དབྱངས་ཡིག་གསུམ་པ་ཨི་ཐུང་དུ་ལྡན་པ་སྟེ་བཅུག་པ་དག་ཟླ་པའི་ཚད་དེ་ཡི་གེ་རེ་རེ་བླངས་ནས་ནི། བྱང་ཤར་མཚམས་སུ་རེ་རེ་སྦྱིན་པ་སྟེ། བྱང་ཤར་གྱི་ཟུར་ཐིག་ཁ་ནང་དུ་ལྟ་བའི་གཡས་ཀྱི་རེ་འུ་མིག་ཏུཙྪ་དང་། གཡོན་གྱི་རེའུ་མིག་ཏུ་ནི་བྲི་བར་བྱའོ། རྒྱ་མཚོ་ཁང་པ་ནང་གནས་པ། དབྱངས་ཡིག་གཉིས་
པ་ལྡན་པ་དང་། རིམ་མིན་ཡོན་ཏན་ཁང་བ་ནས། ཟླ་བའི་ཚད་དུ་ཟུངས་ནས་ནི། ཤར་ལྷོ་མཚམས་སུ་དེ་བཞིན་སྦྱིན། ཞེས་པ་ནི། ཤར་གྱི་ཚངས་ཐིག་ནས་རིམ་མིན་གཡས་བསྐོར་ཀྱིས་བགྲངས་པའི་རྒྱ་མཚོ་ཅན་གྱི་ཁན་བ་རེའུ་མིག་བདུན་པའི་ནང་ན་གནས་པའི་ཡི་གེ་ཛ་དབྱངས་ཡིག་གཉིས་པ་ཨཱ་རིང་པོ་དང་ལྡན་པར་བྱས་པའི་ཛཱ་རིང་པོ་དང་། ཤག་ཡི་ཚངས་ཐིག་ནས་རིམ་མིན་ཏེ་གཡོན་སྒོན་ནས་བགྲངས་བའི་ཡོན་ཏན་ཅན་རེའུ་མིག་གསུམ་པ་ནས་ཡི་གེ་ཟླ་བའི་ཚད་དུ་རེ་རེ་བཟུང་ནས་ནི། ཤར་ལྷོ་མཚམས་སུ་དེ་བཞིན་སྤྱིན་ཏེ། ཤར་ལྷོའི་ཟུར་ཐིག་དབུས་སུ་བཞག་པའི་ཁ་ནང་ལྟའི་གཡས་ཀྱི་རེའུ་མིག་ཏུ་ཛཱ་རིང་པོ་དང་། གཡོན་གྱི་རེའུ་མིག་ཏུ་ཡི་གེ་ས་བྲི་བར་བྱའོ། རིམ་མིན་བཀྲ་ཤིས་ཁང་བ་ནས། དབྱངས་ཡིག་ལྔ་པ་ལྡན་པ་དང་། ཡན་ལག་ཅན་གྱི་ཁང་བ་ནས། ཟླ་བའི་ཚད་དུ་བླངས་ནས་ནི། ལྷོ་ནུབ་མཚམས་སུ་དེ་བཞིན་སྦྱིན། ཞེས་པ་ནི། ཤར་གྱི་ཚངས་ཐིག་མས་གཡོན་བསྐོར་དུ་བགྲངས་པའི་རིམ་མིན་བཀྲ་ཤིས་ཁང་པ་རེའུ་མིག་བརྒྱད་པ་ནས་ཡི་གེར་དབྱངས་ཡིག་ལྔ་པ་ཨུ་ཐུང་དུ་དང་ལྡན་པར་བྱས་པས་རུ་ཐུང་དུ་དང་། ཤར་ནས་གཡས་བསྐོར་དུ་བགྲངས་བའི་ཡན་ལག་ཅན་གྱི་ཁང་པ། རེའུ་མིག་བཅུ་གསུམ་པ་ནས་ཡི་གེ་ཎ་ཟླ་བའི་ཚད་དུ་རེ་རེ་བླངས་ནས་ནི། ལྷོ་ནུབ་མཚུམས་སུ་དེ་བཞིན་སྦྱིན་པར་བྱ་སྟེ། ལྷོ་ནུབ་ཀྱི་ཟུར་ཐིག་དབུས་སུ་བཞག་པའི་ཁ་ནང་ལྟའི་གཡས་ཀྱི་རེའུ་མིག་ཏུ་རུ་དང་། གཡོན་གྱི་རེའུ་མིག་ཏུ་ཎ་བྲི་བར་བྱའོ། རིམ་མིན་ཚེས་ཅན་ཁང་པ་ནས། དབྱངས་ཡིར་གསུམ་པ་ལྡན་པ་དང་། རིམ་མིན་བཀྲ་ཤིས་ཁངས་པ་ནས། ཟླ་བའི་ཚད་དུ་བླངས་ནས་ནི། ནུབ་བྱང་མཚམས་སུ་དེ་བཞིན་སྦྱིན། །
ཞེས་པ་ནི། ཤར་ནས་རིམ་མིན་ཏེ་གཡོན་བསྐོར་གྱི་ཚེས་ཅན་ཁང་པ་རེའུ་མིག་བཅོ་ལྔ་པ་ནས་ཡི་གེ་ན་དབྱངས་ཡིག་གསུམ་པ་ཨི་ཐུང་དུ་དང་ལྡན་པར་བྱས་པའི་ནི་དང་། རིམ་མིན་བཀྲ་ཤིས་ཁང་པ་གཡོན་བསྐོར་གྱིས་རེའུ་མིག་བརྒྱད་པ་ནས་ཡི་གེ་ར་བཟླ་བའི་ཚང་དུ་རེ་རེ་བླངས་ནས་ནི། ནུབ་བྱང་མཚམས་སུ་དེ་བཞིན་སྦྱིན་པར་བྱ་སྟེ། ནུབ་བྱང་གི་ཟུར་ཐིག་དབུས་སུ་བཞག་པའི་ཁ་ནང་ལྟའི་གཡས་ཀྱི་རེའུ་མིག་ཏུ་ནི་དང་། གཡོན་གྱི་རེའུ་མིག་ཏུ་ནིར་བྲི་བར་བྱའོ། དེ་དག་ནི་དབྱངས་གསལ་གྱི་ཡི་གེ་ལས། རྩ་སྔགས་ཡི་གེ་སོ་གཉིས་པ་བཏུ་པའོ། སྔགས་བཏུ་བ་བཤད་ཟིན་ཏོ། གསུམ་པ་སྔགས་དྲང་པ་ནི། དེ་ལྟར་འགོད་པར་བྱས་ནས་ནི། དེ་ནས་དརྔ་པ་བརྩམ་པར་བྱ། ཞེས་གསུངས་ཏེ། བཤད་ཟིན་པ་དང་། འཆད་འགྱུར་གྱི་མཚམས་སྦྱོར། དེ་ནས་དྲང་པའི་ཆོ་ག་དངོས་ལ། དམ་ཚིག་རྗེས་སུ་དྲན་བྱེད་ཅིང་། རྡོ་རྗེ་ཤུགས་དང་ལྡན་པ་ཡིས། ཞེས་པའི་དོན་ནི། འོག་ཏུ། ཨོཾ་བཛྲ་ས་མ་ཡ་སྟཾ། དམ་ཚིག་གི་སྔགས་སོ། ཨོཾ་བཛྲ་བེ་ག་ཧཱུྃ། རྡོ་རྗེ་ཤུགས་ཀྱི་སྔགས་སོ། ཞེས་གསུངས་པ་ཡང་དྲངས་ཏེ་བཤད་པར་བྱ་བ་ལ། རང་ལྷའི་ང་རྒྱལ་དང་ལྡན་པས། ཨོཾ་བཛྲ་ས་མ་ཡ་སྟྭཾ། ཞེས་བརྗོད་ཅིང་། དམ་ཚིག་རྗེས་སུ་དྲན་པར་བྱས་ལ། ཨོཾ་བཛྲ་བེ་ག་ཧཱུྃ། ཞེས་བརྗོད་ནས་རྡོ་རྗེ་ཤུགས་ཀྱིས་འཇུག་པས། འཁོར་ལོའི་ཐིག་གི་འོག་ནས་འཛུལ་ཏེ་དབུས་སུ་ཕྱིན་པར་མོས་ལ། དེ་ནས་མུ་ཁྱུད་ལ་བཀོད་པའི་བཏུས་པའི་ཡི་གེ་སོ་གཉིས་བོ་དེ་ཉིད། ནང་གི་རེ་མིག་ལྔ་དང་། དེའི་ཕྱིར་རེའུ་མིག་བཅུ་གཉིས་ཏེ་རེ་མིག་བཅུ་བདུན་པོ་དེའི་ནང་དུ་དྲང་པར་བྱའོ། ཤར་གྱི་ཚངས་ཐིག་ངོས་གཉིས་
ནས། ཡི་གེ་ཟུང་ལྡན་དྲངས་བྱས་ནས། དབུས་ཀྱི་ཁང་པར་གཞག་པར་བྱ། ཞེས་པ་ནི་ཤར་ཀྱི་ཚང་ཐིག་གི་ངོས་གཡས་གཡོན་གྱི་རེ་མིག་ན་བཀོད་པའི་ཡི་གེ་ཡ་གཉིས་པོ་དྲངས་ལ། ལེ་ཚེ་དགུ་བའི་དབུས་ཀྱི་ལེ་ཚེའི་ནང་གི་ཤར་དུ་ཡ་གཉིས་གཤིབས་ཏེ། མགོ་དབུས་སུ་བསྟན་ནས་བྲི་བར་བྱ་ཞིང་། དེ་མ་ཐག་སྡར་མུ་ཁྱུད་གྱི་རེ་མིག་ལ་བཀོད་པའི་ཤར་གྱི་ཡ་གཉིས་པོ་དེ་དབྱི་བར་བྱའོ། ཕྱོགས་གཞན་ཚང་ཐིག་ངོས་དག་ནས། དེ་བཞིན་ཟུང་ལྡན་དྲངས་ནས་ནི། དེ་བཞིན་དབུས་ཀྱི་ཁང་པར་བཞག ཅེས་པ་ནི། སྔར་ཤར་གྱི་འདྲེན་ཚུལ་ཇི་ལྟ་བ་བཞིན་དུ། ཕྱོགས་གཞན་གསུམ་གྱི་ཚངས་ཐིག་གི་གཡས་གཡོན་གྱི་རེ་མིག་གཉིས་གཉིས་ན་བཀོད་པའི་ཡ་གཉིས་གཉིས་པོ་རྣམས་དྲངས་ཏེ། ལེ་ཚེ་དགུ་པའི་དབུས་ཀྱི་ལེ་ཚེའི་ནང་གི་ལྷོང་ཡ་གཉིས་གཤིབས། ནུབ་ཏུ་ཡ་གཉིས་གཤིབས། བྱང་དུ་ཡ་གཉིས་གཤིབས་ཏེ། ཡ་བརྒྱད་པོ་ཐམས་ཅད་མགོ་དབུས་སུ་བསྟན་པ་བྲིའོ། དེ་མ་ཐག་མུ་ཁྱུད་ཀྱི་ཕྱོགས་གསུམ་གྱི་ཡ་གཉིས་པོ་རྣམས་དབྱི་བར་བྱའོ། དེ་ནས་ཤར་ཀྱི་ཡི་གེ་ཡང་། ཟུང་ལྡན་གཉིས་པ་དྲངས་ནས་ནི། རིམ་པ་གཉིས་པའི་ཁང་པར་བཞག ཕྱོགས་གཞན་དུ་ཡང་དེ་བཞིན་ནོ། ཞེས་པ་ནི། དེ་ནས་ཤར་གྱི་ཡི་གེ་ཟུང་ལྡན་གཉིས་པ་མ་ཟུང་ལྡན་དྲངས་ནས་ལེ་ཚེ་དགུ་པའི་ཤར་གྱི་ལེ་ཚེའི་ནང་དུ་མ་གཉིས་པོ་གཤིབས་ཏེ་མགོ་ནང་དུ་བསྟན་ནས་བྲི་བར་བྱ་ཞིང་། དེ་མ་ཐག་སྔར་གྱི་མ་གཉིས་པོ་དབྱི་བར་བྱའོ། རིམ་པ་གཉིས་པ་ཞེས་གསུངས་པ་ནི། དབུས་ཀྱི་ལེ་ཚེ་རིམ་པ་དང་པོ་དང་། མཐའི་ལེང་ཚེ་བརྒྱད་པོ་རིམ་པ་གཉིས་པར་བྱས་པའོ། དེ་ནས་ཕྱོགས་གཞན་གསུམ་དུ་བཀོད་པའི་ཡི་གེ་ཟུང་། ལྷོའི་
མེ་མེ་དང་། ནུབ་ཀྱིང་དང་། བྱང་གི་ཀྵེ་ཀྵེ་རྣམས་དྲངས་ཏེ། རིམ་པ་བཞིན་ལྷོའི་ལེ་ཚེ་དང་། ནུབ་ཀྱི་ལེ་ཚེ་དང་། བྱག་གི་ལེ་ཚེ་རྣམས་སུ་སྔར་ལྟར་བྲི་ཞིང་རིམ་པ་བཞིན་སྔར་གྱི་ཡི་གེ་ཟུང་རྣམས་དཔྱི་བར་བྱའོ། ཤར་གྱི་ཟུང་ལྡན་གསུམ་པ་ཡང་། རིམ་པ་གསུམ་པའི་ཁང་པར་བཞག །ཕྱོགས་གཞན་དུ་ཡང་དེ་བཞིན་ནོ། ཞེས་པ་ནི། ཤར་གྱི་ཟུང་ལྡན་གསུམ་པ་རཱ་རཱ་དྲངས་ཏེ། ལིང་ཚེ་དབུས་མ་ལ་ལྟོས་ཕའི་རིམ་པ་གསུམ་པ་རེ་མིག་བཅུ་གཉིས་པའི་ཤར་གྱི་ཁང་པ་སྟེ་རི་མིག་ཤར་མ་གཅིག་པོ་དེའི་ནང་དུ་ཡི་གེ་རཱ་གཉིས་པོ་གཤིབས་ཏེ་མདོ་ནང་དུ་བསྟན་ནས་བྲི་ཞིང་སྔར་གྱི་རཱ་གཉིས་པོ་དབྱི་བར་བྱའོ། ད་བཞིན་དུ་ཕྱོགས་གཞན་གསུམ་གྱི་འང་ཟུང་ལྡན་གསུམ་པ་དོ་དོ་དང་། ཡོ་ཡོ་དང་། ཡ་ཡ་རྣམས་རིམ་པ་བཞིན་དུ་དྲངས་ཏེ། རེ་མིག་བཅུ་གཉིས་པའི་ལྷོ་དང་། ནུབ་དང་བྱང་གི་རེ་མིག་རེ་རེར་ཡི་གེ་གཉིས་གཉིས་བྲིས་ལ། སྔར་གྱི་ཡི་གེ་ཟུང་། དོ་དོ་ལ་སོགས་པ་རྣམས་རིམ་པ་བཞིན་དབྱི་བར་བྱའོ། མཚམས་ཀྱི་ཡི་གེ་ཡ་བྲལ་ནི། རང་རང་ནང་གི་མཚམས་སུ་དྲངས། ཞེས་པ་ནི། མཚམས་ཀྱི་ཡི་གེ་ཡ་བྲལ་ཏེ་ཟུང་མེད་པའི་རེ་རེ་བ། བྱང་ཤར་གྱིཙྪ་དང་ནི། ལྷོ་ཤར་ཀྱི་ཛཱ་དང་ས། ལྷོ་ནུབ་ཀྱི་རུ་དང་ཎ། ནུབ་བྱང་གི་ནི་རང་ར་རྣམས། རང་རང་རི་ཐད་དྲང་གི་ནང་གི་རེ་མིག་བཅུ་གཉིས་པའི་མཚམས་ཀྱི་རེ་མིག་རེ་རེར་ཡི་གེ་རེ་རེ་དྲངས་ནས་བྲི་བར་བྱ་ཞིང་། སྔར་གྱི་ཡི་གེ་བརྒྱད་པོ་རིམ་བཞིན་དབྱི་བར་བྱའོ། དེ་དག་བྱུང་གའི་ཁན་སྟོང་དུ། དབྱངས་ཀྱི་ཡི་གེ་དྲང་བར་བྱ། དབྱངས་ཀྱི་ཡི་གེའི་གཞི་ལ་ནི། མིང་གི་ཡི་གེ་དྲང་པར་བྱ། ཞེས་པ་ནི། ཡི་གེ་སོ་གཉིས་པོ་དེ་དག་ཕྱུང་བ་སྟེ། ཕྱིས་
པའི་ཁང་པ་སྟེ་ར་མིག་སྟོང་པ་རྣམས་སུ་རང་རང་གི་ཐད་གྱི་ཕྱིའི་རེ་མིག་ན་ཡོད་པའི་དབྱངས་ཡིག་དེ་དང་དེ་དྲངས་ནས་བྲི་བར་བྱ་ཞིང་། དབྱིངས་ཡིག་སྔ་མ་རྣམས་དབྱི་བར་བྱའོ། དབྱངས་ཡིག་རྣམས་ཕྱིས་པའི་ས་གཞི་ནི་རང་རང་གི་ཐད་ཀྱི་ཕྱིའི་རེ་མིག་ན་ཡོད་པའི་མིང་གི་ཡི་གེ་སྟེ་གསལ་བྱེད་ཀྱི་ཡི་གེ་དེ་དང་དེ་དྲངས་ནས་བྲི་བར་བྱ་ཞིང་། གསལ་བྱེད་ཀྱི་ཡི་གེ་སྔ་མ་རྣམས་དབྱི་བར་བྱའོ། མིང་གི་ཡི་གེའི་གཞི་ལ་ནི། སོ་སོའི་ལས་དང་མཐུན་པ་ཡི། བསྐུལ་བའི་ཡི་གེ་དགོད་པར་བྱ། ཞེས་པ་ནི་གསལ་བྱེད་ཕྱིས་པའི་ཤུལ་རྣམས་སུ་ལས་གང་སྒྲུབ་པ་དེ་དང་མཐུན་པའི་བསྐུལ་སྔགས་བྲི་བར་བྱའོ། བསྐུལ་སྔགས་ཇི་ལྟ་བུ་ཞེ་ན། བསད་དང་བསྐྲད་དང་དབྱེ་བ་ལ། ཡི་གེ་ཕཊ་ནི་བཞག་པར་བྱ། མནན་པ་ལ་ནི་ཡི་གེ་ཝཾ། ཞི་བ་ལ་ནི་ཡི་གེ་ཨོཾ། རྒྱས་པ་ལ་ནི་དེ་བཞིན་སྭ། དབང་ལ་ཧོཿཡིག་བརྒྱན་པ་སྟེ། དགུག་པ་ལ་ནི་ཡི་གེ་ཛཿ ཞེས་གསུངས་ཏེ། རྒྱུད་འདིའི་དཔེ་ཁ་ཅིག་ལས། དབང་ལ་བཾ་གྱིས་བརྒྱན་པ་སྟེ། ཞེས་འབྱུང་བ་ནི་མ་དག་པ་སྟེ། དམར་ནག་གི་རྒྱུད་ལས་ཧོཿབྲི་བར་བཤད་པ་དང་འགལ་བའི་ཕྱིར་རོ། དེས་ན་གསལ་བྱེད་ཕྱུང་བའི་ཤུལ་གྱི་རེ་མིག་རྣམས་སུ། བསད་བསྐྲད་དབྱེ་བ་ལ་ཕཊ། མནན་པ་དང་སྐུགས་པར་བྱེད་པ་ལ་ལཾ། ཞི་བ་ལ་ཨོཾ། རྒྱས་པ་ལ་སྭ། དབང་ལ་ཧོཿ སྐྱེས་པ་དགུག་ཕ་ལ་ཛཿ བུད་མེད་དགུག་པ་ལ་ཧྲཱིཿབྲི་བར་བྱ་ཞིང་། ལག་ལེན་ལ་འདི་བཞིན་གྱིས་ཆོ་ག་ལ་བླ་མ་དག །ཕཊ་ཆེ་གེ་མོ་མ་ར་ཡ་ཕཊ་ཅེས་པ་དང་། ཨོཾ་ཆེ་གེ་མོའི་ནད་གདོན་ཐམས་ཅད་ཤན་རིང་ཀུ་རུ་ཨོཾ། ཞེས་སོགས་འདོད་ཏེ། གང་བྱས་ཀྱང་ཆོག་གོ །དམར་ནག་གི་རྒྱུད་ལས། མངོན་སྤྱོད་ལ། ཧཱུྃ་ཕཊ་གཉིས་ཀ་བཞག་པ་དང་། ཞི་བ་ལ། མགོར་ཨོཾ་
ནམཿམཇུག་ཏུ་ནམཿབཞག་པའང་བཤད་ལ། ཡང་དམར་ནག་གི་རྒྱུད་ལས། དང་པོ་ཨོཾ་ཡིག་མཐར་ནམཿམཐར་ཝཥྚ་བོཥྚ། ཧཱུྃ་ཕཊ་ཡི་གེ་ལྡན་ས་བོན། ཞི་བ་རྒྱས་པ་དབང་མཐར་བྱེད། ཅེས་པའི་འགྲེལ་བར་གྲུབ་ཆེན་དཔལ་འཛིན་གྱིས། ཕྱག་འཚལ་ཞེས་པ་ཨོཾ་མོ། དེའི་ཕྱི་ནས་ན་མའོ། དེའི་རྗེས་ལ་སྔགས་དང་མིང་ངོ་། མཐའ་དང་ལྡན་པར་ཡང་ན་མའོ། ཞེས་བྱ་བའི་སྭཱ་ཧཱའི་ལྟག་ཏུ་ཡང་ན་མ་ཐ་སྟེ་ཞི་བ་ལའོ། རྒྱས་པ་ལ་ནི་ཝཥྚ་ཕོཥྚའོ། དབང་ལ་ནི་བོཥྚ་དང་ཧོཿཧཱུཾ་ཕཊ་ནི་མཐར་རེ་མངོན་སྤྱོད་ལའོ། ཞེས་གསུངས་ལ། སྤྱིར་གང་བྱས་ཀྱང་འདྲ་བར་མངོན་ཡང་། འཇིགས་བྱེད་ལ་གོང་དུ་བཤད་པ་ལྟར་དང་། དམར་ནག་གཉིས་ཀྱི་འཁྲུལ་འཁོར་ལ་དཔལ་འཛིན་གྱིས་བཤད་པ་ལྟ་བྱའོ། བློ་བཟང་སྙིང་པོས་གོང་བུ་དགུག་པ་ལ་ཛཿརྐང་པ་དགུག་པ་ལ་ཧྲཱིཿཞེས་བཤོད་དོ། དེ་ནས། དེ་ལ་ལས་ཀྱི་འོད་ཟེར་ནི། ཞི་བ་ཆུ་སྟེ་རྒྱས་པས། དབང་ལ་རླུང་སྟེ་དྲག་པོ་མེ། དབྱེ་དགུག་བསྒྲད་པ་དྲག་པོར་མཐུན། མནན་པ་དག་ནི་རྒྱས་པ་བཞིན། ཞེས་གསུངས་པའི་དོན་ནི། ཞི་བ་ལ་ཆུ་སྟེ་འོད་ཟེར་དཀར་པོ། རྒྱས་པ་ལས་སྟེ་འོད་ཟེར་སེང་པོ། དབང་ལ་རླུང་སྟེ་འོད་ཟེར་སྔོན་པོ། དྲག་པོ་ལ་མེ་སྟེ་འོད་ཟེར་དམར་པོའོ། འདིའི་དཔེ་ཁ་ཅིག་ལས། དབང་ནི་མེ་སྟེ་དྲག་པོ་རླུང་། ཞེས་འབྱུང་བ་ནི། གཤེད་དམར་གྱི་རྒྱུད་ལས། དབང་གི་སྐབས་སུ། རང་ལུས་ལས་འཕྲོས་འོད་ཟེར་ནི། དམར་པོ་ལྕགས་ཀྱུའི་དབྱིབས་རྣམས་ཀྱིས། ཞེས་པ་དང་། རྒྱུད་སྡེ་བྱིན་ཅན་སྤྱིའི་རྣམ་བཞག་དང་མཐུན་པར་བཞེད་དོ། དེ་ཡང་འདི་ལྟར་གསུངས་པའི་དགོས་པ་
གཉིས་ཏེ། འདིར་སྐབས་སུ་བབས་པའི་དོན་ལ་སྦྱར་བ་དང་། དེས་མཚོན་ནས་སྐབས་གཞན་ལའང་སྦྱར་བའོ། དང་པོ་ནི། སྔར་བཤད་པའི་རྡོ་རྗེ་ཤུགས་ཀྱིས་སྔགས་ཀྱི་འཀོར་ལོའི་ཐིག་གི་འོག་ནས་འཛུལ་ནས་དབུས་སུ་འདུག་པར་མོས་ཏེ། ཡི་གེ་རྣམས་འདྲེན་པ་ན། ཞི་བའི་འཁོར་ལོ་ཡིན་ན། རང་རྡོ་རྗེ་འཇིགས་བྱེད་དཀར་པོ་ལས་འོད་ཟེར་དཀར་པོ་ལྕགས་ཀྱུ་ལྟ་བུ་འཕྲོས་པས་ཡིག་འབྲུ་རྣམས་དྲངས་པར་བསམ་པ་དང་། རྒྱས་པ་དང་མནན་པ་ལ་ལྷ་དང་འོད་ཟེར་སེར་པོ། དབང་དང་དགུག་པ་ལ་ལྷ་དང་འོད་ཟེར་དམར་པོ། བསད་པ་ལ་ལྷ་དང་འོད་ཟེར་ནག་པོར་བསྒོམས་ཏེ། འོད་ཟེར་གྱི་ལྕགས་ཀྱུས་ཡི་གེ་རྣམས་དྲངས་པར་བསམ་ལ་ཡི་གེ་རྣམས་རིམ་པ་བཞིན་དྲང་ངོ་། གཉིས་པ་དེས་མཚོན་ནས་སྐབས་གཞན་དུ་འང་སྦྱར་བ་ནི། འདིར་མ་ཟད་འཁོར་ལོ་བསྐུལ་བ་དང་བསྒྲུབ་པའི་དུས་སུའང་བདག་མདུན་གྱི་ལྷ་དང་འོད་ཟེར་ལས་ཀྱི་དབྱེ་བས་ཁ་དོག་འདི་བཞིན་དུ་བྱ་དགོས་པའི་དོན་ནོ། སྔགས་དྲངས་པ་བཤད་ཟིན་ཏོ། བཞི་པ་སྔགས་བསྲེ་བ་ནི། དྲང་པའི་སྦྱོར་བ་བྱས་ནས་ནི། བསྲེ་བའི་སྦྱོར་བ་བརྩམ་པར་བྱ། ཞེས་བྱ་བ་ནི་མཚམས་སྦྱར་ཞིང་བྱ་བའི་རིམ་པ་བསྟན་པའོ། གཉིས་མེད་སྔགས་དང་ལྡན་པ་ཡིས། ཞེས་པ་ནི། འོག་ཏུ་སྔགས་རྣམས་ཕྱོགས་གཅིག་ཏུ་བཤད་པའི་སྐབས་སུ། ཨོཾ་བཛྲ་ཨ་ས་མེ། དྲི་ས་མེ། མ་ཧཱ་ས་མ་ཡེ་སྭཱ་ཧཱ། ཡི་གེ་བསྲེ་བའི་སྔགས་སོ་ཞེས་གསུངས་པ་ལྟར། སྔགས་དེ་བརྗོད་ཅིང་། ཆོས་ཐམས་ཅད་མཉམ་ཉིད་དུ་མོས་ནས་ཡི་གེ་བསྲེ་བར་བྱའོ། ཇི་ལྟར་བསྲེ་བར་བྱ་ཞེ་ན། དབུས་ཀྱི་བཀྲ་ཤིས་ཡི་གེ་ཡ། ཟླ་ལྟར་འོད་ཀྱི་གོང་བུར་བྱ། འོད་ཀྱི་གོང་བུ་དེ་ནང་དུ། འདོད་པའི་བསྒྲུབ་བྱ་བཞག་པར་བྱ། དེ་དཀྱིལ་རང་མིང་དང་པོ་བཞག ཅེས་གསུངས་
ཏེ། དབུས་ཀྱི་ཡི་གེ་ཡ་བཀྲ་ཤིས་ཏེ་བརྒྱད་པོ་ཟླ་བ་ཞུ་བ་ལྟར་འོད་ཀྱི་གོང་བུ་གཅིག་ཏུ་གྱུར་པར་བསམ་ཞིང་། འོད་ཀྱི་གོང་བུ་དེ་ཡོངས་སུ་གྱུར་པ་ལས་ཡི་གེ་ཡ་གཅིག་ཏུ་གྱུར་པ་མོས་པར་བྱས་ལ། ཡ་བརྒྱད་པོ་ཕྱིས་ནས་དབུས་སུ་ཡེ་གེ་ཡ་ཆེན་པོ་གཅིག་བྲིས་ཏེ། དེ་ཡང་མ་ཡིག་ལ་ཁ་བ་ལྟས་པའོ། ཡ་ཡིག་ཆེན་པོ་དེའི་ནང་དུ་ཧཱུྃ་ཕཊ་མིང་རུས་ཆེ་གེ་མོས་མ་ར་ཡ་ཧཱུྃ་ཕཊ། ཅེས་པ་ལྟ་བུའི་བསྒྲབ་བྱའི་མིང་རུས་སྤེལ་ཚིག་དང་བཅས་པས་བསྐོར་བའི་དབུས་སུ་བསྒྲུབ་བྱའི་མིང་ཡིག་དང་པོ་བཞག་པ་བྲི་བར་བྱའོ། ཕྱོགས་ཀྱི་ཁྱིམ་ན་གནས་པ་ཡི། ཡི་གེ་ཟུང་ལྡན་ཐབས་ཅད་ཀྱང་། དེ་ཚ་འོད་ཀྱི་གོང་བུར་བྱ། ཞེས་པ་ནི། དེ་ནས་རིམ་པ་བཞིན་ལེ་ཚེ་དགུའི་ཕྱོགས་ཀྱི་ལེ་ཚེ་བཞིན་བྲིས་པའི་ཡི་གེ་ཟུང་རྣམས་དང་། དེ་ནས་རེ་མིག་བཅུ་གཉིས་པའི་ཕྱོགས་ཀྱི་རེ་མིག་བཞིའི་ཡི་གེ་ཟུང་རྣམས་འོད་ཀྱི་གོང་བུར་འདྲེས་ནས་ཡི་གེ་རེ་རེར་སོང་བར་བསམས་ལ། རེ་མིག་རེ་ན་ཡི་གེ་གཉིས་ཡོང་བ་རྣམས་ཕྱི་ཏེ། དེའི་ཤུལ་དུ་ཡི་གེ་རེ་རེ་བྲི་བར་བྱའོ། དེ་ཡང་རྟོག་བདུན་གྱི་རྟོག་པ་དང་པོ་ལས། དེ་དབུས་འཁོར་ལོ་བྲི་བ་ནི། རེ་མིག་དགུ་པ་ཟླུམ་པོའོ། སྒོ་གཅིག་པ་ནི་དབྱེ་བར་བྱ། ལྷག་མ་ཡོངས་སུ་བཅད་པར་བྱ། ཞེས་གསུངས་བ་ནི། འཁོར་ལོའི་རེ་མིག་དགུ་བའི་དབུས་ཀྱི་ལེ་ཚེའི་ཡ་གཅིག་པོའི་ནང་དུ་བསྒྲུབ་བྱའི་མིང་ཡིག་གཞུག་པར་བྱ་ཡི། རྩ་སྔགས་ཀྱི་ཡི་གེ་ལྷག་མ་གང་གི་ནང་དུ་ཡང་མིང་ཡིག་གཞུག་པར་མི་བྱ། ཞེས་བྱ་བའི་དོན་འདི་ཡང་སྟོན་པ་ཡིན་ཏེ། གཞན་དག་གིས་མ་ཤེས་པར་སྣང་ངོ་། སྔགས་ཀྱི་རྒྱལ་པོ་བཅུ་གཡང་། བཅུ་གཉིས་ཁྱིམ་དུ་སྤེལ་ཏེ་
བྲི། ཞེས་པ་ནི་རྒྱ་དཔེ་མ་དག་པ་ལས་བསྒྱུར་བའི་སྐྱོན་ཏེ། བཅུ་དྲུག་ཁྱིམ་དུ་སྤེལ་རེ་བྲི། ཞེས་བྱ་བ་ཡིན་ནོ། སྔགས་ཀྱི་རྒྱལ་པོ་ཡི་གེ་བཅུ་པ་ནི་འཇིགས་བྱེད་ཀྱི་དབང་དུ་བྱས་པ་སྟེ། འཇིགས་བྱེད་ལ་ཧྲཱིཿཥྚིའི་མཇུག་ན་ཧཱུྃ་གཅིག་དང་ཕཊ་གཅིག་ལས་མེད་དེ། སྭཱ་ཧཱ་ཡང་མེད་པས་སོ། ག་ཤེད་དམར་ལ་ནི་ཧཱུྃ་གཉིས་ཕཊ་གཉིས་སྭཱ་ཧཱ་རྣམས་ཡོད་པས་ཡི་གེ་བཅུ་བཞི་ཡིན་ལ། དེའི་ཕྱིར་ཡི་གེ་བཅུ་བ་དང་བཅུ་བཞི་པ་འཁྲུལ་འཁོར་ལ་འགོད་ཚུལ་སོ་སོར་ཤེས་དགོས་སོ། དེ་ལ་ཡི་གེ་བཅུ་བའི་འགོད་ཚུལ། རྭ་པ་ཕལ་ཆེ་བ་དག མ་ཡིག་གི་ཐད་ཀྱི་རེ་མིག་བཅུ་དྲུག་པའི་ཕྱོགས་ཀྱི་རེ་མིག་དང་པོར་ཨོཾ་ཧྲཱིཿདེ་ནས་གཡས་བསྐོར་དུ་རེ་མིག་རེ་རེ་བར་དུ་དོར་ནས། ར་མིག་གསུམ་པར་ཥྚི། ལྔ་པར་ཝཾ། བདུན་པར་ཀྲྀ། དགུ་པར་ཏ། བཅུ་གཅིག་པར་ནན། བཅུ་གསུམ་པར་ཧཱུྃ། བཅོ་ལྔ་པར་ཕཊ་འབྲི་ལ། རྭ་བ་ཁ་ཅིག ཕཊ་མི་འབྲི་བར་ཏ་ཨན་ན། ཞེས་པས་འགོད་པ་ནི་ནོར་བ་ཆེན་པོ་སྟེ། ཡི་གེ་བཅུ་བའི་ཡི་གེ་བཅུའི་ཡ་གྱལ་དུ་འོང་དོན་མེད་པ་གཅིག་དཀྱུས་སུ་བཅུག་ཅིང་འོང་ངེས་ཤེས་པ་གཅིག་ཆད་པའི་ཕྱིར་རོ། རང་ལུགས་ནི་སློབ་དཔོན་མི་བསྐྱོད་པས་མཛད་པའི་རྟོག་བདུན་གྱི་འགྲེལ་པ་ལས། མ་ཡིག་གི་ཐད་ཀྱི་ལྟོའི་རེ་མིག་དབུས་མ་རེ་མིག་དང་པོར་བྱས་པ་ལ། ཨོཾ་དེ་ནས་གཡས་བསྐོར་དུ་རེ་མིག་རེ་རེ་བར་དུ་དོར་ནས། རེ་མིག་གསུམ་པ་ལ་ཧྲཱིཿ ལྔ་པ་ལ་ཥྚི། བདུན་པ་ལ་ཝི། དབུ་པ་ལ་ཀྲྀ། བཅུ་གཅིག་པ་ལ་ཏཱ་ན་ན། བཅུ་གསུམ་པ་ལ་ཧཱུཾ། བཅོ་ལྔ་པ་ལ་ཕཊ་དགོད་པར་གསུངས་པ་ལྟར་བྱའོ། དམར་ནག་གི་འཁྲུལ་འཁོར་ལ་ཡི་གེ་བཅུ་བཞི་པ་དགོད་ཚུལ་ནི། སློབ་དཔོན་
མར་མེ་མཛད་བཟང་པོ་དང་། ན་ག་པོ་དྷའི་རེ་མིག་རེ་རེར་ཡང་ཡི་གེ་བཅུ་བཞི་རྫོགས་པར་བསྒྲུབ་བྱའི་མིང་སྤེལ་ཚིག་དང་བཅས་པ་འགོད་པར་བཤད་ལ། འོན་ཀྱང་གྲུབ་ཆེན་དཔལ་འཛིན་གྱིས། དེའི་རེ་མིག་དང་པོ་ལ་ཨོཾ། དེའི་རྒྱབ་ཏུ་ཧྲཱིཿའོ། དེའི་གཉིས་པ་ལ་ཥྚིཿའོ། དེའི་རྒྱབ་ཏུ་ཝའོ། གསུམ་པ་ལ་ཀྲྀའོ། དེའི་རྒྱབ་ཏུ་ཏཱའོ། བཞི་པ་ལ་ནི་ནའོ། དེའི་རྒྱབ་ཏུ་ཡང་ནའོ། ལྔ་པ་ལ་ནི་ཧཱུྃ་ངོ། དེའི་རྒྱབ་ཏུ་ཡང་ཧཱུྃ་ངོ་། དྲུག་པ་ལ་ནི་ཕའོ། དེའི་རྒྱབ་ཏུ་ཡང་ཊའོ། བདུན་པ་ལ་ཡང་དེ་ཉིད་དོ། བརྒྱད་པ་ལ་ནི་སྦུའོ། དེའི་རྒྱབ་ཏུ་ཧཱའོ། དེ་ལྟར་མདོར་བསྡུས་ནས་བྲི་བར་བྱའོ། ཧྲཱིཿཨོཾ་ཝི་ཥྚིཿཏཱ་ཀྲྀ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བ་བ་རེ་མིག་བརྒྱད་པོ་ལ་དགོད་པཪ་བྱའོ། ཡང་འདི་ནི་མངོན་སྤྱོད་ཙམ་ལ་ཡིན་ནོ། ཞི་པ་ལ་སོགས་པ་ལ་ནི་ཚུལ་ཇི་ལྟར་བ་བཞིན་ནོ། ཞེས་གསུངས་པར་ལྟར་བྱ་ལ། མན་སྙེ་ལས། ཨོཾ་ཧྲཱིཿཞེས་དང་ཥྚིཿལཱི་ཞེས་དང་། ཏཱ་ཞེས་དང་། ནན་ཞེས་དང་། ཧཱུྃ་ཧཱུྃ་ཞེས་དང་། ཕཊ་ཕཊ་ཅེས་དང་། སྭཱ་ཞེས་དང་ཧཱ་ཞེས་པའོ། ཞེས་སྔ་མ་དང་ཅུང་མི་འདྲ་བར་གསུངས་ལ། ནག་པོ་པས་བྱས་ཟེར་བ་ལས་ཀྱང་བཤད་པ་ལས་ཡིད་བརྟན་དཀའ་བར་སྣང་བས་མ་བྲིས་སོ། དེ་ལྟར་རེ་མིག་བརྒྱད་ལ་ཡི་གེ་བཅུ་པ་དང་བཅུ་བཞི་པ་གང་བཀོད་ཀྱང་རུང་། བར་བར་དུ་དོར་བའི་རེ་མིག་བརྒྱད་པོ་ལ། བསྒྲུབ་བྱའི་མིང་ལ་སོ་སོའི་བསྐུལ་ཚིག་དང་བཅས་པ་སྤེལ་རེ་བྲིའོ། ནང་གི་རེ་མིག་དགུ་པའི་ཟུར་གྱི་རེ་མིག་བཞིར་གང་བྲི་བར་བྱ་ཞེ་ན། དོ་འདི་བསྟན་པའི་ཕྱིར་དུ་རྟོག་པ་གསུམ་པ་འདིར། བྱིན་རླབས་ཧཱུྃ་ཞེས་
བྱ་བ་ཡང་། ཁང་པ་བཞི་ལ་ཟུང་རེར་མཛེས། ཞེས་གསུངས་ལ་དཔེ་ཁ་ཅིག་ལས། ཁང་པ་བཞི་ལ་ཟུར་རེས་མཛེས། ཞེས་འབྱུང་ངོ་། འོན་ཀྱང་འདི་དང་མཐའ་འཆོད་པར་གོ་བ་ལ་རྟོག་པ་བདུན་པའི་རྟོག་པ་གནིས་པ་འཁྲུལ་འཁོར་གྱི་རྟོགས་པ་ལས་ལ་ཚེ་བཅུ་དྲུག་པའི་འཁྲུལ་འཁོར་གསུངས་པའི་རྒྱུད་དོན་ལེགས་པར་གོ་དགོས་པར་སྣང་ཞིང་། རྟོག་བདུན་གྱི་ཏོན་གཏན་ལ་འབེབས་པ་ལ་ཡང་ཕན་ཆེ་བར་སྣང་བས་ཅུང་ཟད་ཞིབ་པར་བ་བཤད་པར་བྱའོ། དེལ་རྭ་སྐྱོ་གཉིས་ཀའི་བཞེད་པས། རྟོག་བདུན་གྱི་ལེ་ཚེ་བཅུ་དྲུག་པའི་འཁོར་ལོ་ནི། རྟོག་པ་གསུམ་པ་ལས་གསུངས་པ་འདི་ལས་གཞན་པའི་འཁྲུལ་འཁོར་དུ་བཞེད་ཅིང་། དེ་ལ་ཆོས་རྗེ་བུས། དེ་ལྟར་བཞེད་པ་མི་འཐད་དེ། རྟོག་བདུན་གྱི་རྒྱ་འགྲེལ་བཞི་ག་ལས་འཁོར་ལོ་འདི་ཡིན་པར་བཤད་ཅིང་། རྟོག་པ་གསུམ་པའི་རྟོག་པ་དང་པོ་འདི་དེའི་བཤད་རྒྱུད་ཡིན་པའི་ཕྱིར་དང་། གཞན་ཡང་འཇིགས་བྱེད་བྱི་འཁྲུལ་འཁོར་སྟོན་པའི་རྒྱ་གཞུང་ཐམས་ཅད་ལས། འཁོར་ལོ་འདི་ཉིད་བཤད་པའི་ཕྱིར་རོ། ཞེས་གསུངས་ལ། འོན་ཀྱང་རྩ་རྒྱུད་ཀྱི་འཁྲུལ་འཁོར་དང་བཤད་རྒྱུད་ཀྱི་འཁྲུལ་འཁོར་རྣམ་པ་ཐམས་ཅད་དུ་འདྲ་དགོས་པས་མཁྱབ་སྟེ། རྩ་རྒྱུད་ནས་བཤད་པའི་དཀྱིལ་འཁོར་དང་བཤད་རྒྱུད་ནས་གསུངས་པའི་དཀྱིལ་འཁོར་ལྷ་གྲངས་སོགས་ཨི་འདྲ་བ་དུ་མ་ཞིག་ཀྱེ་རྡོར་སོགས་རྒྱུད་དུ་མ་ལ་མཐོང་བའི་ཕྱིར་རོ། དེ་ལ་ཐོག་མ་རྭ་བའི་བཞེད་པ་ཞིབ་ཏུ་བཤད་ན། རྟོག་བདུན་ལས། རྡོ་རྗེ་འཇིགས་བྱེད་ཆེན་པོའི་འཁོར་ལོ་ལི་ཚེ་བཅུ་དྲུག་པ་བྱ་རོག་ཆེན་པོའི་སྒྲོ་རྩའི་སྨྱུ་གུས་བསམ། མི་རུས་ཀྱི་སྨྱུ་གུས་གཅེར་བུ་
སྐྲ་བཤིག་བ་ཁ་ཁོར་བལྟས་ཏེ་མ་ཧེའི་གདོང་གི་སྦྱོར་བས་བྲི་བར་བྱའོ། མེ་གཉིས་ཀྱི་བར་དུ་བསྒྲུབ་བྱིའི་མིང་དང་བཅས་པ་བཞག དེ་ལ་ཡི་གེ་བཅུ་པས་བསྐོར། ཧཱུྃ་བརྒྱད་ཀྱང་བྲི། ཟུར་དུ་ཕཊ་བྲི། ཞེས་གསུངས་པས་འདི་སྙིང་པོ་རྐྱང་བའི་འཁྲུལ་འཁོར་བསྟན་ལ། ཡང་རྟོག་པ་དེ་ལས། དེ་ལ་ལེ་ཚེ་བཅུ་དྲུག་པའི་འཁོར་ལོ་རབ་ཏུ་སྦྱོར་བ་གཞན་ཡང་གསུངས་ཏེ། འོན་ཀྱང་འདིའི་ཁྱད་པར་ནི་ཡི་གེ་སུམ་ཅུ་རྩ་གཉིས་ཀྱི་སྔགས་དང་ལྡན་པའི་ཡི་གེ་བཅུའི་སྔགས་སྒྲུབ་བྱའི་མིང་དང་བཅས་པ། ལྷན་ཅིག་ཏུ་ཡི་གེ་དང་སྔགས་སྤེལ་ལ་འགོད། ཅེས་གསུངས་པས་རྩ་སྔགས་དང་སྙིང་པོ་སྦྲགས་པི་འཁྲུལ་འཁོར་བསྟན་ཅིང་། དེ་གཉིས་ཀྱིས་མཚོན་ནས། རྩ་སྔགས་རྐྱང་བའི་འཁྲུལ་འཁོར། ཉེ་སྙིང་རྐྱང་བའི་འཁྲུལ་འཁོར། རྩ་སྔགས་དང་ཉེ་སྡིག་སྦྲགས་པའི་འཁྲུལ་འཁོར། སྙིང་པོ་དང་ཉེ་སྙིང་སྦྲགས་པའི་འཁྲུལ་འཁོར། སྔགས་གསུམ་སྦྲགས་པའི་འཁྲུལ་འཁོར་ཏེ། འཁྲུལ་འཁོར་བདུན་བསྟན་ནོ། དེ་ལ་ལེ་ཚེ་བཅུ་དྲུག་པའི་འཁོར་ལོ་ནི། དང་པོ་ལྟེ་བ་བཟླུམ་པོ་གཅིག་བསྐོར། དེའི་ཡང་ཕྱིར་ཐིག་ཟླུམ་གཅིག་བྱས་ནས། དེ་ནས་ཐིག་བཞི་མཐའི་ཟླུམ་པོ་ལ་རེག་པ་རེ་མིག་དགུའི་ཐིག་བཞིན་དུ་བཏབ་པས། ལྟེ་བའི་ཕྱི་རོལ་གྱི་རིམ་པ་ལ་རེ་མིག་བརྒྱུད། དེའི་ཡང་ཕྱི་རོལ་གྱི་རིམ་པ་ལ་རེ་མིག་བརྒྱད་དེ། དེ་ལྟར་རེ་མིག་བཅུ་དྲུག་གོ། འཁོར་ལོ་དེ་ཉིད་ལ་སྔས་དགོད་ཚུལ་ནི། སྙིང་པོ་རྒྱང་བའི་འཁྲུལ་འཁོར་ལ། འཁོར་ལོ་ལྟེ་བར་ཆོས་འབྱུང་གྲུ་གསུམ་བསྣོལ་མ་གཅིག་བྲི། དེའི་དབུས་སུ་རཾ་ཆེ་གེ་མོ་མར་ཡ་རཾ། ཞེས་པ་བྲི། དེ་ལ་སྙིང་པོ་ཡི་གེ་བཅུ་པས་འཁོར་བར་བསྐོར་རོ། དེ་ནི་རྟོག་བདུན་ལས། མེ་
གཉིས་ཀྱི་བར་དུ་བསྒྲུབ་བྱའི་མིང་དང་ཅས་པ་བཞག །དེ་ལ་ཡི་གེ་བཅུ་པས་བསྐོར་ཞེས་པའི་དོན་ཡིན་ཏེ། དེ་ཡང་འཁྲུལ་འཁོར་གྱི་མེ་གཉིས་ནི་ཆོས་འབྱུང་ཉིས་རྩེགས་སྔགས་ཀྱི་མེ་ནནི་རཾ་གཉིས་ཏིང་ངེ་འཛིན་གྱི་མེ་ནི་འཁྲུལ་འཁོར་སྒྲུབ་པའི་ཆེ་རཾ་གཉིས་ཡོངས་སུ་གྱུར་པ་ལས་མེ་གྲུ་གསུམ་འབར་བའི་ཕུང་པོར་བསྒོམ་པའོ། ལྟེ་བའི་ཕྱིའི་ལེ་ཚེ་བརྒྱད་ལ། ཕྱོགས་ཀྱི་ལེ་ཚེ་བཞི་པོ་རེ་རེའི་ནང་དུ་ཡང་། ཧཱུྃ་རཾ་ཆེ་གེ་མོ་མ་ར་ར་ཧཱུྃ་རཾ། ཞེས་པའི་མཐར་སྙིང་པས་བསྐོར་བ་རེ་རེ་བྲི། དེ་ནི་རྟོག་བདུན་ལས་ཧཱུྃ་བརྒྱད་ཀྱང་བྲི་ཞེས་པའི་དོན་ནོ། མཚངས་ཀྱི་ལེ་ཚེ་བཞི་པོ་རེ་རེར་ཡང་། ཕཊ་རཾ་ཆེ་གེ་མོ་མར་ལ་ཕཊ་རཾ། ཞེས་པའི་མཐར་སྙིང་པོར་བསྐོར་བ་བྲི། དེ་ནི་རྟོག་བདུན་ལས། ཟུར་དུ་ཕཊ་བྲི། ཞེས་པའི་དོན་ནོ། ཞེས་པའི་དོན། དེའི་ཕིའི་ལེ་ཚེ་བརྒྱད་པོ་རེ་རེ་ཡག་། རཾ་ཆེ་གེ་མོ་མ་ར་ཡ་རཾ། ཞེས་པའི་མཐའ་སྙིང་པོས་བསྐོར་བའི་བྲིའོ། ཉེ་སྙིང་རྐྱང་བའི་འཁྲུལ་འཁོར་ནི། སྙིང་པོ་དང་ཉེ་སྙིང་བ་རྗེ་བ་མ་གཏོགས་བསྔར་ཇི་ལྟ་བ་བཞིན་ནོ། རྩ་སྔགས་རྐྱང་བའི་འཁྲུལ་འཁོར་ནི། དབུས་ཀྱི་ཏླེ་བ་ལ་འགོད་ལུགས་རྩ་སྔགས་སྙིང་པོ་བ་རྗེ་བ་མ་ཏོགས་སྔར་བཞིན་ལ། ལེ་ཚེ་རྣམས་སུ་མིང་ཡིག་མཐར་རྟེན་དང་བཅས་པ་སྔར་ལྟར་བཀོད་པའི་མཐར་སྐོར་ལ་རྩ་སྔགས་འགོང་ཚུལ་ནི་ལེ་ཚེ་ནང་མ་བརྒྱད་པོ་རེ་རེ་ནང་དུ་ཡི་གེ་བཞི་ཕྱོགས་མཚམས་སུ་དགོད་དེ། ཤར་གྱི་ལེ་ཚེར་ཡ་མ་རཱ་ཛཱ། ཤར་ལྷོའི་ཨེ་ཚེར་ས་ངོ་མ་ཡ། སོགས་གཡས་སྐོར་དུ་འགོད་ཅིང་། དེ་ཡང་མིང་ཡིག་མཐའ་རྟེན་དང་བཅས་པ་དབུས་སུ་བཀོད་པར་ལ་ཡི་གེ་བཞི་གའི་མགོ་བོ་དབུས་ཀྱི་མིང་ཡིག་ལན་དུ་བསྟན་ནས། མིང་ཡིག་གི་ཕྱོགས་བཞིར་ཡི་གེ་རེ་རེ་མིང་གིག་དབུས་སུ་བྱས་པའི་ཤར་ནས་བརྩོམ་ཏེ་ཡི་གེ་བཞི་པོ་གཡས་སྒོར་དུ་འགོད་དོ། ཕྱིའི་ལེ་ཚེ་བརྒྱད་པོར་ཡང་
རཾ་ཆེ་གེ་མོ་མར་ཡ་རཾ། ཞེས་པའི་མཐའ་ཡི་གེ་བཞི་ཚོམགས་ཀྱི་བསྐོར་བ་བཤད་མཐག་པ་ཇི་ལྟ་བ་བཞིན་ནོ། རྩ་སྔགས་དང་སྙིང་པོ་སྦྲག་སཱི་བ་འཁྲུལ་འཁོར་ནི། ལྟེ་བ་དང་ནང་གི་ལེ་ཚེ་བརྒྱད་ལ་སྙིང་པོ་དང་མིང་ཡིག་སོགས་སྔར་ལྟར་དགོད་ཅིང་། ཕྱིའི་ལེ་ཚེ་རྩ་སྔ་ཚོམས་སུ་འགོད་ཚུལ་སྔར་བཞིན་དུ་བྱའོ། དེ་ནི་རྟོག་བདུན་ལས། དེ་ལ་ལེ་ཚེ་བཅུ་དྲུག་པའི་འཁོར་ལོ་རབ་ཏུ་སྦྱོར་བ་གཞན་ཡང་གསུངས་ཏེ། འོན་ཀྱང་འདིའི་ཁྱད་པར་ནི། ཡི་གེ་སུམ་ཅུ་རྩ་གཉིས་ཀྱི་སྔས་དང་ལྡན་པ། ཡི་གེ་བཅུ་པའི་སྔགས་བསྒྲུབ་བྱིའི་མིང་དང་བཅས་པ་ཞེས་སོགས་ཀྱི་དོན་ནོ། དེ་ཡང་རྒྱུད་ཚིག་དེའི་དོན། འོན་ཀྱང་གོང་དུ་སྙིང་པོ་རྐྱང་བའི་འཁྲུལ་འཁོར་བཤད་པ་དེ་དང་འདིའི་ཁྱད་པར་ནི། གོང་དུ་བཤད་པ་དེ་ལ་ཡི་གེ་བཅུ་བརྐྱང་བ་ལས་མེད་ཀྱང་འཁོར་ལོ་འདི་ནི་རྩ་སྔགས་ཡི་གེ་སུམ་ཅུ་རྩ་གཉིས་ཀྱི་སྔགས་དང་ལྡན་པའོ། རྩ་སྔགས་སུམ་ཟད་ཡི་གེ་བཅུ་བའི་སྔགས་བསྒྲུབ་བྱའི་མིང་དང་བཅས་པ་ཞེས་བྱ་བའོ། རྩ་སྔགས་དང་ཉེ་སྙིང་སྦྲགས་པའི་འཁྲུལ་འཁོར་ནི། སྙིང་པོའི་དོད་ལ་ཉེ་སྙིང་བ་རྗེ་བ་མ་གཏོགས་རྩ་སྔགས་དང་སྙིང་པོ་སྦྲགས་པའི་འཁྲུལ་འཁོར་ཇི་ལྟ་བ་བཞིན་ནོ། སྙིང་པོ་དང་ཉེ་སྙིང་སྦྲགས་པའི་འཁྲུལ་འཁོར་ནི། ལྟེ་བ་དང་ནང་གི་རེ་མིག་བརྒྱད་ལ་འགོད་ཚུལ་ཉེ་སྙིང་རྐྱང་བའི་འཁྲུལ་འཁོར་ཇི་ལྟར་བ་བཞིན་ལ། རེ་མིག་ཕྱི་མ་བརྒྱད་ལ་འགོད་ཚུལ་སྙིང་པོ་རྐྱང་བའི་འཁྲུལ་འཁོར་ཇི་ལྟ་བ་བཞིན་དུ་བྱས་པའོ། གསུམ་ག་སྦྲགས་པའི་འཁྲུལ་འཁོར་ནི། ལྟེ་བ་ལ་འགོད་ཚུལ་ཉེ་སྙིང་རྐྱང་བའི་འཁྲུལ་འཁོར་ཇི་ལྟ་བ་བཞིན་དང་། རེ་མིག་ནང་མ་བརྒྱད་ལ་འགོད་ཚུལ་སྙིང་པོ་རྐྱང་བའི་འཁྲུལ་འཁོར་ཇི་ལྟ་བཞི་དང་། རེ་མིག་ཕྱི་མ་བརྒྱད་ལ་འགོད་ཚུལ་རྩ་སྔགས་རྐྱང་བའི་འཁྲུལ་འཁོར་ཇི་ལྟ་བ་བཞིན་དུ་བྱས་པའོ། དེ་ཡང་ཉེ་སྙིང་སོགས་རེ་རེའི་བསྙེན་པ་བྱས་པ་ཡིན་ན་རེ་རེ་རྐྱང་བའི་འཁྲུལ་འཁོར་རྣམས་དང་། གཉིས་གཉིས་ཀྱི་
བསྙེན་པ་བྱས་པ་ཡིན་ན། གང་ལ་བསྙེན་པ་བྱས་གཉིས་གཉིས་སྦྲགས་པའི་འཁྲུལ་འཁོར་དང་། གསུམ་གལ་བསྙེན་པ་བྱས་པ་ཡིན་ན་གསུམ་སྦྲགས་པའི་འཁྲུལ་འཁོར་བྱ་ཞིང་། དེ་ལ་ཡང་གང་བསྙེན་པ་སོང་བ་མང་བ་དེ་ནང་དུ་བྲིལ། ཉུང་བ་དེ་ཕྱིར་བྲི་བར་བྱའོ། ཞེས་བྱ་བ་འདི་དག་ནི་རྭ་པའི་མན་ངག་ཞི་བ་ལ་བཀོད་པའོ། འདི་ལ་ཆོས་རྗེ་བུས་རྟོགས་བདུན་ལས། ཧཱུྃ་བརྐྱད་ཀྱང་བྲི། ཟུར་དུ་ཕཊ་བྲི། ཞེས་པའི་དོན། ཧཱུྃ་བརྒྱད་ཕྱོགས་སུ་བྲི་བ་དང་། ཕཊ་བརྒྱད་ཟུར་དུ་བྲི་བ་མི་འཐད་དེ། རྟོག་པ་གསུམ་པ་ལས། བྱིན་རློབས་ཧཱུྃ་ཞེས་བྱ་བ་ཡང་། ཁང་པ་བཞི་ལ་ཟུར་རེས་མཛེས། ཞེས་ཧཱུྃ་བྲུར་དུ་བྲི་བར་བཤད་པ་དང་འགལ་བའི་ཕྱིར་རོ། ཞེས་གསུངས་པ་ནི། ཕྱོགས་དེ་ཁས་ལེན་པའི་ངོར་གནོད་བྱེད་ཡང་དག་མ་ཡིན་ཏེ། ཕྱོགས་དེ་ཁས་ལེན་པ་དང་། རྟོག་པ་བདུན་པའི་གཞུང་དེས་བཤད་པའི་འཁྲུལ་འཁོར་དང་རྟོག་པ་གསུམ་པའི་གཞུང་དེས་བཤད་པའི་འཁྲུལ་འཁོར་གཉིས་དོན་མི་གཅིག་པར་འདོད་པའི་ཕྱིར་རོ། འོན་ཀྱང་རང་ལུགས་པ་ནི། སློབ་དཔོན་མི་བསྐོད་པའི་འགྲེལ་བ་སོགས་ཀྱིས་ཀྱང་རྟོག་བདུན་གྱི་འཁྲུལ་འཁོར་འདི། རྟོག་པ་གསུམ་པའི་འཁྲུལ་འཁོར་དང་དོན་གཅིག་པའི་ལུགས་སུ་བཤད་ཅིང་། དུས་འཁོར། སམྦྷུ་ཊི། མན་སྟེ། འདི་དང་རང་གི་རྒྱུད་ཀྱི་འགྲེལ་པ་དང་། གཤིན་རྗེ་གཤེད་ཀྱི་འཁྲུལ་འཁོར་འཆད་པའི་རྒྱ་གཞུང་གཞན་ཡང་དུ་མ་ཞིག་འདུག་པ་གང་ན་འང་རྭ་བ་སོགས་རྟོག་བདུན་གྱི་དོན་དུ་བཞེད་པའི་འཁྲུལ་འཁོར་དེ་འདྲ་ཟུར་ཙམ་ཡང་བཤད་པ་མི་འདུག་པས། རྟོག་བདུན་དང་རྟོག་པ་གསུམ་པའི་འཁྲུལ་འཁོར་དོན་གཅིག་ཏུ་བྱས་ན་ལེགས་སོ། ཞེས་གསུང་ངོ་། འོན་རྟོག་བདུན་གྱི་རྒྱུད་ཆིག་དེ་དག་གི་ཚིག་དོན་ཇི་ལྟར་བཤད་པར་བྱ་སྙམ་ན། འདི་གཉིས་
དོན་གཅིག་ཏུ་འཆད་པ་ལ་ནི། རྟོག་བདུན་གྱི་ཚིག་གི་འཁྲུལ་གཞི་ཆེ་བ་འདུག་པས་དེ་ལི་ཚིག་དོན་འཆད་པ་གལ་ཆེ་བར་སྣང་ངོ་། དེ་ལ་མེ་གཉིས་ཞེས་པ་ནི། སློབ་དཔོན་སོ་ན་ཤྲིས་མཛད་པ་དང་། རྡོ་རྗེ་གྲུབ་བས་མཛད་པའི་རྟོག་བདུན་གྱི་འགྲེལ་བར། རཾ་ནི་མེའི་ས་བོན་ཡིན་པས་རྒྱུ་ལ་འབྲས་བུའི་མིང་བཏགས་ནས་རི་ཆེ་གེ་མོ་མང་ཡ་རཾ་ཞེས་པའོ། གཞོན་ནུ་ཟླ་བའི་འགྲེལ་བར། མེ་གཉིས་གྲུ་གསམ་ཉིས་བརྩེགས་ལ་བཤད་ཀྱང་། སློབ་དཔོན་མི་བསྐྱོད་པས། པཊ་ནི་མེ་དང་འདྲ་བའི་ཕྱིར་མེར་བརྗོད་དེ། ཕཊ་མར་ཡ་ཕཊ། ཅེས་པ་ལ་བཞེད་པ་ལྟར་ལགས་པས། ལེ་ཚེ་བཅུ་དྲུག་པའི་དེའི་ལེ་ཚེའི་ནང་དུ་ཕཊ་ཆེ་གེ་མོ་མར་ཡ་ཕཊ། ཅེས་པ་བཞག་པ་ནི། མེ་གཉིས་ཀྱི་བར་དུ་བསྒྲུབ་བྱའི་མིང་དང་བཅས་པ་བཞག་ཅེས་པའི་དོན་ནོ། ཕཊ་མེ་དང་འདྲ་བའི་དོན་ཡང་མེས་གདུང་བར་བྱེད་པ་ལྟར། ཕཊ་གཉིས་ཀྱི་བར་དུ་བསྒྲུབ་བྱའི་མ་ཇི་ཡིག་བསྒུབ་བྱངདནོགས་སུ་མོས་ཤང་བསྐྱེད་ན་བཅུག་པའི་སྦྱོར་བས། བསྒྲུབ་བྱ་གདུང་བར་བྱེད་པའི་ཕྱིར་རོ། དེ་ལ་ཡི་གེ་བཅུ་པས་བསྐོར། ཞེས་པའི་དོན་ཡང་མིང་ཡིག་མེ་གཉིས་ཀྱི་བར་དུ་བཅུག་པ་ཇེ་ལ་ཡི་གེ་བཅུ་པས་བསྐྲོར་ཞེས་པ་མ་ཡིན་གྱི། ལེ་ཚེ་བཅུ་དྲུག་པ་དེ་ལ་ཚེའི་ནང་དུ་ཡི་གེ་བཅུ་པ་བྲིས་པས་བསྐོར་ཞེས་བའོ། ཧཱུྃ་བརྒྱད་ཀྱང་བྲི། ཟུར་དུ་ཕཊ་བྲི། ཞེས་པ་ནི། ནང་གི་རེ་མིག་དགུ་བའི་ཟུར་གྱི་རེ་མིག་བཞིར་ཧཱུྃ་བརྒྱན་དང་ཕཊ་བརྒྱད་བྲི་བའི་དོན་ཏོ། ལང་རྟོག་བདུན་ལས། དེ་ལ་ལང་ཚེ་བཅུ་དྲུག་པའི་འཁོར་ལོ་རབ་ཏུ་སྦྱོར་བ་གཞན་ཡང་གསུངས་ཏེ། ཞེས་པ་ནི། ལེ་ཚེ་བཅུ་དྲུག་པའི་འཁོར་ལོ་ལ་བརྟེན་ནས་གོང་དྲུ་བ་བཤད་པའི་ལས་བསྒྲུབ་ཚུལ་ལས་གཞན་བའི་ལས་སྒྲུབ་
པའི་བར་ཏུ་སྦྱོར་བ་གསུངས་ཏེ། ཞེས་པའི་དོན་ཡིན་གྱི་ལེ་ཚེ་བཅུ་དྲུག་པའི་འཁོར་ལོ་སྔ་མ་མ་ཡིན་པའི་ལེ་ཆོ་བཅུ་དྲུག་པའི་འཁོར་ལོ་གཞན་གསུངས་རེ་ཞེས་བྱ་བའི་དོན་མ་ཡིན་ནོ། འོན་ཀྱང་འདིའི་ཁྱད་པར་ནི། ཞེས་གསུངས་པའི་དོན་ཡང་། མི་གཉིས་ཀྱི་བར་དུ་ཞེས་སོགས་ཀྱི་རྒྱུད་ཚིག་སྔ་མས་བསྟན་པའི་འཁོར་ལོ་དང་འཁོར་ལོ་འདི་མི་འདྲ་བའི་ཁྱད་པར་ནི། ཞེས་པའི་དོན་མ་ཡིན་གྱི། འོན་ཀྱང་ལེ་ཚེ་བཅུ་དྲུག་པའི་འཁོར་ལོ་འདིའ་སྔགས་འགོད་ཚུལ་གྱི་ཁྱད་པར་གོང་དུ་མ་བཤད་པ་འདིར་རྒྱས་པར་འཆད་པ་ནི། ཞེས་པའོ། དེ་ཡང་གང་ཞེ་ན། ཡི་གེ་སུམ་ཅུ་རྩ་གཉིས་ཀྱི་སྔགས་དང་ལྡན་པ་ཞེས་གསུངས་ཏེ། ནང་གི་རེ་མིག་བཅུ་བདུན་ལ། རྩ་སྔགས་ཡི་གེ་སུམ་ཅུ་རྩ་གཉིས་ཀྱི་སྔགས་ཞང་ལྡན་པ་ཞེས་པའོ། ཡི་གེ་བཅུ་བའི་སྔགས་བསྒྲུབ་བྱའི་མིང་དང་བཅས་པ་བཞེས་པ་ནི། ཕྱིའི་རེ་མིག་བཅུ་དྲུག་ལ་ཡི་གེ་བཅུ་བའི་སྔགས་བསྒྲུབ་བྱའི་མིང་དང་བཅས་པ་བཞག །ཅེས་པའོ། འོ་ན་རེ་མིག་བཅུ་དྲུག་གི་རེ་མིག་རེ་རེར་ཡང་བསྒྲུབ་བྱའི་མིང་དང་ཡི་གེ་བཅུ་པ་གཉིས་ཀ་ཇི་ལྟར་འཇོག་སྙམ་མ། ལྷན་ཅིག་ཏུ་ཡི་གེ་དང་སྔགས་གསལ་དགོད་དོ། ཞེས་གསུངས་ཏེ། མིང་གི་ཡི་གེ་དང་ཧྲཱིཿཥྚིའི་སྔས་རེ་མིག་བཅུ་དྲུག་ལ་སྤེལ་བ་འགོད་དོ། ལྷན་ཅིག་ཏུ་ཞེས་པ་ནི། མིང་ཡིག་བྲིས་པའི་རེ་མིག་དང་ལྷན་ཅིག་བཅུ་གཤིབས་པ་ལ་སྔགས་བྲིས་པའི་རེ་མིག་དེ་དང་ལྡན་ཅིག་ཏུ་གཤིབས་པའང་མི་གི་ལ་མིང་ཡིག་བྲིས་པས་རེ་མིག་ཅེས་པའི་དོན་ནོ། འདི་དག་གིས་ནི་གོང་དུ་མེ་གཉིས་ཀྱི་བར་དུ་བསྒྲུབ་བྱའི་མིང་དང་བཅས་པ་བཞག དེ་ལ་ཡི་གེ་བཅུ་པས་བསྐོར། ཞེས་གསུངས་པ་དེའི་བྲི་ཆུལ་རྒྱས་པར་བཤད་པ་ཡིན་ནོ།
དེ་ལྟར་ན་མེ་ཚེ་བདུ་དྲུག་ལ་ཡི་གེ་བཅུ་པ་གོང་དུ་བཤད་པ་ལྟར་བཀོད་པའི་བར་དུ་དོར་བའི་ལེ་ཚེ་སྟོང་པ་རྣམས་སུ། ཕཊ་ཆེ་གེ་མོ་མ་ར་ཡ་ཕཊ། ཅེས་པ་རེ་རེ་བྲིས་པའི་དོན་ཏེ། རྟོག་པ་གསུམ་པར། བཅུ་དྲུག་ཁྱིམ་དུ་སྤེལ་ཏེ་བྲི། ཞེས་པའི་དོན་ཡང་དེ་ཉིད་དོ། དེས་ན། བྱིན་རློབ་ཧཱུྃ་ཞེས་བྱ་བ་ཡང་། ཁང་པ་བཞི་ལ་ཟུར་རེར་མཛེས། ཞེས་པའི་དོན་ནི། ནང་གི་རེ་མིག་དགུའི་ཟུར་གྱི་ཁང་པ་བཞི་རེ་རེར་ཡང་ཧཱུྃ་ཕཊ་ཆེ་གེ་མོ་མར་ཡ་ཧཱུྃ་ཕཊ། ཅེས་པ་བྲི་བའི་དོན་ཏེ། དེ་ལྟར་བྲིས་པའི་ཧཱུྃ་བརྒྱད་དང་། ཕཊ་བརྒྱད་དུ་འགྱུར་པ་ནི་རྟོག་བདུན་ལས། ཧཱུྃ་བརྒྱད་ཀྱང་བྲི། ཟུར་རྣམས་སུ་ཕཊ་རྣམས་བྲི། ཞེས་པའི་དོན་ཡིན་ལ། བྱིན་རློབ་ཞེས་པ་ནི། མིང་ཡིག་ཧཱུྃ་གཉིས་ཀྱིས་བྱིན་གྱིས་བརླབས་ཤིང་བར་དུ་བཅུག་པའི་དོན་ནོ། དེ་ལྟར་ཡང་གཤིན་རྗེ་གཤེད་དམར་ནག་གི་རྒྱུད་གནིས་ལས། བསྒྲུབ་བྱའི་མིང་ནི་སྦྱིན་བྱ་བ། མཚམས་ཀྱི་སྟོང་པ་དག་ཏུའོ། ཧཱུྃ་གཉིས་ཀྱི་ནི་རྟེ་ན་བྱས་པས། དགོས་པ་ཐམས་ཅད་སྒྲུབ་པར་བྱེད། ཅེས་གསུངས་པས་འགོད་ཚུལ་དེ་ལྟར་ཡིན་པ་གདོན་མི་ཟ་ལ། མན་སྙི་ལས་ཀྱང་། ཟུར་གྱི་རེ་མིག་བཞི་རྣམས་སུ་རེ་མིག་སོ་སོར་ཧཱུྃ་ཆེ་གེ་མོ་རཀྵ་ཞེས་པ་ལ་སོགས་པ་དང་། ཧཱུྃ་ཞེས་རབ་ཏུ་སྦྱོར་བས་ཞེས་གསུངས་པའི་ཕྱིར། རྒྱ་བོད་དམར་པོ་ཧཱུྃ་ཟུར་དུ་མི་འགོད་པར་ཕྱོགས་སུ་འགོད་པ་དང་། ན་ག་བྷོ་དྷིས། འཁོར་ལོ་སྟེང་མའི་ཟུར་བཞིར་ཧཱུྃ་ཆེ་གེ་མོ་མར་ཡ་ཧཱུྃ། འཁོར་ལོ་འོག་མའི་ཟུར་བཞིར་ཕཊ་མ་ར་ཡ་ཕཊ། ཅེས་འགོད་པ་སོགས་དོན་མ་ཡིན་ནོ། འདི་དག་དྲག་པོའི་ལས་གྱི་དབང་དུ་བྱས་
པ་སྟེ། ཞིབ་སོགས་ལ་ནི། ནམཿཆེ་གེ་མོ་ཤན་ཏིང་ཀུ་རུ་ན་མཿ ཞེ་སོགས་འགོད་པར་བྱ་ཞིང་། སྔགས་ཀྱི་སྤེལ་ཚིག་སྦྱོར་ཚུལ་ཞིབ་པར་འོག་ཏུ་འཁོར་ལོ་སྦོ་བའི་སྐབས་སུ་བཤད་པར་བྱའོ། དེ་ལྟར་ན་སྔགས་བསྲེ་བ་དང་མཚམས་དང་རེ་མིག་བཅུ་དྲུག་ཏུ་འགོད་ཚུལ་སོགས་བཤད་ཟིན་ཏོ། ཡོངས་སུ་དག་པ་བཀོད་བྱས་ནས། མཆོད་ཅིང་གཏོར་མ་བྱས་ནས་ནི། ཞེས་པ་ནི། དེ་ལྟར་སའི་འཁོར་ལོ་རྫོགས་པར་ཡོངས་སུ་དག་པར་བཀོད་པར་བྱས་ནས། འཁོར་ལོ་དེ་ལ་དངོས་སུ་བཤམས་པའི་མཆོད་གཏོར་རྣམས་བསང་སྦྱངས་བསྐྱེད་ཅིང་བྱིན་གྱིས་བརླབས་ནས། འབུལ་བར་བྱས་ཏེ། དེ་ཡང་ཡཀྵེ་མ་མེད་སོགས་ཀྱི་ཡི་གེ་བཅུ་བདུན་པོ་དེ་ལྟ་བཅུ་གསུམ་དང་ཐོད་པ་བཞིར་མོས་ནས་དེ་ལ་གཏོར་མ་སོགས་ལྷ་བཅུ་གསུམ་མ་ཇི་ལྟ་བ་བཞིན་དུ་འབུལ་བ་ཡིན་ནོ། ལྔ་པ་འཁོར་ལོ་སྤོ་བ་ལ། སྦོ་བ་དག་ནི་བརྩམས་པར་བྱ། ཞེས་པ་ནི་མཚམས་སྦྱར་བའོ། འདི་ལ་བཅུ། གང་ལ་བྲི་བའི་གཞི། གང་གིས་འབྲི་བའི་སྣག་ཚ། འབྲི་བའི་སྙུ་གུ། འབྲི་བའི་ཚེ་གང་ལ་ཁ་བལྟ་བའི་ཕྱོགས་དང་བཅས་པའི་ཁྱད་པར། འབྲི་བ་ལ་འཇུག་པའི་དུས་ཀྱི་ཕྱག་རྒྱ་དང་སྔགས། འཁོར་ལོ་སོ་སོ་ལ་ཕྱིའི་རི་མོ་མེ་འདྲ་བའི་རྣམ་དབྱེ། དབུས་ཀྱི་ཡི་གེ་འཕོ་ཚུལ་དང་ཡི་གེ་གཞན་གྱི་མགོ་སྟོན་ཕྱོགས་ཀྱི་ཁྱད་པར། ལས་སོ་སོའི་སྔགས་དང་སྤེལ་ཚིག་གི་རྣམ་དབྱེ། ས་འཁོར་གནམ་འཁོར་ཀྱི་ཁྱད་པར་ལེགས་པར་མ་བྲིས་པའི་ཉེ་དམིགས་དང་བཅས་པ། སའི་འཁོར་ལོ་བསྟིམ་ཞིང་བདེན་སྟོབས་བརྗོད་ནས་རབ་ཏུ་གནས་པར་བྱ་བའོ།་དང་པོ་ནི། ལས་ཀྱི་དབྱེ་བ་ཇི་ལྟ་བར། འཁོར་ལོའི་རས་ནི་བླངས་བྱས་ནས། ཞི་བ་དང་ནི་རྒྱས་པ་ལ། ཤིན་ཏུ་དགེ་བའི་རས་ལ་བྱ། དབང་
དད་དགུག་པ་སྨན་འཚོང་སོགས། བསང་དང་དབྱེ་དང་བསྐྲད་པ་དང་། མནན་པ་ལ་ནི་དུར་ཁྲོད་རས། ཞེས་གསུངས་ཏེ། འཁོར་ལོ་བྲི་བའི་གཞི་ལས་མི་འདྲ་བའི་དབྱེ་བ་ཇི་ལྟ་བ་དང་མཐུན་པར་བླངས་ནས་དེ་ལ་བྲི་བར་བྱའོ། དེ་ཡང་ཞི་བ་དང་རྒྱས་པ་ནི་ཤིང་ཏུ་དགེ་བ་སྟེ། བཀྲ་ཤིས་པའི་རས་ལ་བྲི་བར་བྱ། ཞེས་འདིར་བཤད་པ་དང་། དམར་ནག་གི་རྒྱུད་ལས། གྲོ་གའམ་སྙུག་མའི་ཤུན་པ་ལ་བྲི་བར་བཤད་པ་ལྟར་དང་། དུས་འཁོར་ལས། ནྱ་གྲོ་ཏའི་ལོ་མ་དང་། བིར་བ་པས་དར་དཀར་པོ་འམ། རས་དཀར་པོ་གཙང་མ་དང་། གདོང་དྲུག་གི་རྒྱུད་ལས་བླ་གོར་ཤོ་ཞའི་ཤུན་པ་ལ་བྲི་བར་བཤད་པ་དག་གང་ཡང་རུང་བའོ། བསྲུང་བའི་འཁོར་ལོ་འབྲི་བའི་གཞི་ཡང་ཞི་རྒྱས་དང་འདྲའོ། དབང་དང་དགུག་པ་ལ་སྨད་འཚོང་མའི་འདོམས་དཀྲིས་ཀྱི་རས་དང་། སོགས་པས་བསྡུས་པ་ནི་དམར་ནག་གི་རྒྱུད་ལས་དབང་ལ་གྲོ་གའམ་རས། དགུག་པ་ལ་དུར་ཁྲོད་ཀྱི་རས་སམ་ཟླ་མཚན་གྱིས་གོས་པའི་རས་ཞེས་གསུངས་པ་རྣམས་ལས་གང་ཡང་རུང་བའོ། བསད་པ་དང་དབྱེ་བ་དང་བསྐྲད་པ་དང་མནན་པ་བཞི་ཀ་དུར་ཁྲོད་ཀྱི་རས་ཞེས་པ་རོ་རས་ལ་བྲིར་རུང་ལ། ཁྲད་པར་ནི། ངག་མནན་པ་འཁོར་ལོ་ཁམ་ཕོར་སོ་མ་བཏང་བ་ལ་བྲི་བར་གདོང་དྲུག་གི་རྒྱུད་ནས་བཤད། ལྐུགས་པར་བྱ་བ་ཡང་དེ་དང་འདྲའོ། ཡང་གདོང་དྲུག་གི་རྒྱུད་ལས། དབྱེ་བའི་འཁོར་ལོ་རྟ་དང་མ་ཧེའི་པགས་པ་ལ་བྲི་བར་བཤད་པ་ནི་འཁོར་ལོ་གཅིག་རྟ་དང་གཅིག་མ་ཧེའི་པགས་པ་ལ་འབྲི་བ་ཡིན་ལ། རིམས་ཀྱིས་ཐེབས་པར་བྱ་བ་ལ། དུར་ཁྲོད་ཀྱི་གྱོ་མོ་ཆེ་བ་ལ་འབྲི་བར་བཤད་དོ། དུས་འཁོར་ནས་རྨོངས་པ་དང་རིངས་པ་
ལ་ཨ་རྐའི་ལོ་མ་ཡོངས་སུ་སྨིན་པ་ལ་འབྲི་བར་བཤད་དོ། དྲག་པོའི་འཁོར་ལོ་གང་ཡིན་ཡང་རོ་རས་ལ་འབྲི་བར་བཤད་པ་མང་ཞིང་རྟོག་བདུན་ལས་ཀྱང་བཤད་པས་འདིར་དེ་ལ་འབྲི་ཚུལ་བརྗོད་པར་བྱ་སྟེ། དེ་ཡང་བོད་དུ་རྒྱ་གར་ཀྱི་རོ་རས་ལྟ་བུ་རྙེད་དཀའ་ན་ཡང་། མི་གྲིར་ཤི་བའི་རོ་རྙེད་པ་ལ་རས་སྨ་དར་གང་ཡང་རུང་བ་བཀབ་ནས་ཅུང་ཞིག་བཞག་པ་རླངས་ཏེ་དེ་ལ་བྲི་བར་བྱ་ཞིང་། རྟོག་བདུན་ལས། སྔོན་དུ་གསུངས་པའི་རྫས་དང་ལྷན་ཅིག་ཏུ། བྱ་རོག་གིས་ཟས་བཏོགས་པའི་ལྷག་མ་མི་གཙང་བ་དང་། རྣམ་པར་སྣང་མཛད་དང་ལྷན་ཅིག་ཏུ་དུར་ཁྲོད་ཀྱི་རས་ལ་བྱུག་སྟེ། ཞེས་གསུངས་ལ། རྣམ་པར་སྣང་མཛད་ནི་དགེ་བོའི་དྲི་ཆེན་ནོ། སྔོན་དུ་གསུངས་པའི་རྫས་ནི། གོང་དུ་དུག་དང་། ཁྲག་དང་། ལན་ཚྭ་དང་། སྐེ་ཚེ་དང་། ནི་མ་པ་དང་། ད་དུ་རའི་ཁུ་བ་ཞེས་གསུངས་པ་རྣམས་ཡིན་པས། དེ་རྣམས་དང་། སློབ་དཔོན་འཇམ་དཔལ་ཡེ་ཤེས་ཀྱིས་གྲོ་ཕྱེས་ཀྱང་བྱུག་པར་བཤད་པ་ལྟར། རྫས་དེ་རྣམས་ཀྱིས་རོ་རས་ལ་བྱུག་ཅིང་ཨུར་ཆགས་རེ་བྱས་པ་ཐང་ཤ་ཆོད་པར་རྐྱངས་ཏེ། དེ་ལ་སློབ་དཔོན་འཇམ་དཔལ་ཡེ་ཤེས་ཀྱིས་རོའི་སྐྲས་ཐིག་འདེབས་པར་བཤད་ཀྱང་། མ་རྙེད་ན་ཐིག་སྐུད་གཞན་གྱིས་ཀྱང་རུང་བས། འཁོར་ལོའི་ཐིག་གདབ་པར་བྱའོ། རྭ་བ་དག་གི་ལག་ལེན་ལ་རོ་རས་ཀྱིས་དོད་ཐུབ་ཏུ་བྱས་ནས་ཤོག་བུ་ཚིལ་ཆེན་གྱིས་ཅུང་ཟད་བྱུག་པ་ལ་བྱེད་ཀྱང་འཐད་པར་མི་སེམས་ཤིང་། རྟོག་བདུན་ལས་བསྐྲད་པའི་འཁོར་ལོ་རྒྱལ་མཚན་གྱི་རས་ལ་འབྲི་བར་བཤད་དོ། དེ་ཡང་དབང་བྱུག་ལ་ཕུལ་བའི་རྒྱལ་མཚན་གྱི་རས་སོ་ཞེས་འཆད་དོ། གཉིས་པ་གང་གིས་འབྲི་བའི་སྣག་ཚ་ནི། གྷི་ཝཾ་གུར་ཀུམ་ཞི་རྒྱས་ལ། དབང་དང་
དགུག་བཙནྡན་དམར། མནན་པ་ལ་ནི་ལྡོང་རོས་སོགས། །བསྒྲད་ལ་བྱ་རོག་ཁྲག་གིས་ཏེ། །དབྱེ་བ་རྟ་དང་མ་ཧེ་སོགས། །བསད་པ་དུག་ལ་སོགས་པས་བྲི། །ཞེས་གསུངས་ཏེ། སྐྱེས་བ་ཞི་བ་ལ་གུར་ཀུམ། བུད་མེད་ཞི་བ་ལ་གྷི་ཝཾ། བསྲུང་བ་དང་རྒྱས་པ་ལ་གུར་ཀུམ། སྐྱེས་པ་དང་བུད་མེད་གཉིས་ཀ་ཞི་བར་བྱེད་པ་ལ་ག་པུར་དང་ཙནྡན་བསྲེས་པས་སྣག་ཚ་བྱ། དབང་དང་དགུག་པ་ལ་ཙནྡན་དམར་པོ་དང་རྒྱ་སྐྱེགས་ཀྱི་ཁུ་བ་དང་། རང་གི་སྲིན་ལག་གཡོན་པའི་ཁྲག་གི་འབྲི་ཞིང་། ཁྱད་པར་དགུག་པ་ལ་རྒྱ་སྐྱེགས་ཀྱི་ཁུ་བ་དང་སྲིན་ལག་གི་ཁྲག་ཕྱེད་མར་བསྲེས་པར་བཤད་ཅིང་། གཤེད་ང་མར་གྱི་རྒྱུད་ལས་སྒ་རློན་པ་འང་བསྲེ་བར་བཤད་དོ། མནན་པ་ལ་ནི་ལྡོང་རོས་དང་། སོགས་ཀྱི་སྒྲས་འབྲས་བུ་གསུམ་གྱི་ཁུབ་ལ་ཡུང་བ་དང་བ་བླ་བསྲེས་བས་སོ། ཁྱད་པར་ངག་མནན་པ་ལ། དེ་དག་གི་སྟེང་དུ་སྨོ་བྱེད་ཀྱི་ཁུ་བ་དང་། དུར་ཁྲོད་ཀྱི་སོལ་བ་དང་བཙག་རྣམས་བསྲེས་པས་བྲིས་ཏེ། སྨྱོ་བྱེད་དང་ད་དུར་དང་ཐང་ཁྲོམ་པ། ཀ་ཤོ་ཀ་ན་རྣམས་མིང་གི་རྣམ་གྲངས་སོ། སྐྲད་པ་ལ་བྱ་རོག་གི་ཁྲག་གིས་སོ། དེའང་རྐྱང་པ་འམ། ཡང་ན་དམར་ནག་གི་རྒྱུད་ལས། ཁྲག་དང་རོ་བསྲགས་པའི་ཐལ་བ་དང་། དུག་དང་ལན་ཚྭ་དང་། སྐྱེ་ཚེ་དང་། རིལ་མར་དང་། སྨྱོ་བྱེད་ཀྱི་ཁུ་བ་རྣམས་བསྲེས་པས་འབྲི་བར་བཤད་དེ། གང་ཡང་རུང་བའོ། དབྱེ་བ་ལ་རྟ་དང་མ་ཧེའི་ཁྲག་དང་། སོགས་ཁོང་ནས་སྡུད་རྒྱུ་ནི་གདོང་དྲུག་གི་རྒྱུད་ལས། བྱི་ལ་དང་ཁྱིའི་ཁྲག་དང་། ནི་མ་པའི་ཁ་བ་དང་། སྐེ་ཚེ་བསྲེས་བས་བྲི་བར་བཤད་པ་ལྟར་ལོ་
བསད་པ་ལ་དུག་ལ་སོགས་པ་ཞེས་གསུངས་པའི་སོགས་ཁོང་ནས་སྡུད་རྒྱུ་ནི་རྟོག་བདུན་ལས། དུག་དང་། ཁྲག་དང་། ལན་ཚྭ་དང་། སྐེ་ཚེ་དང་། ནི་མ་པ་དང་། ད་དུ་རཱི་ཁུ་བ་ཡིས། ཞེས་གསུངས་པ་རྣམས་ཡིན་ལ། དམར་ནག་གི་རྒྱུད་ལས། སྐེ་ཚེ་དང་། ལན་ཚ་དང་། དུག་དང་ནི་མ་བ་དང་། ཚ་བའི་མར་ཁུ་དང་། ཚབ་གསུམ་དང་། དུར་ཁྲོད་གྱི་སོལ་བ་དང་། སྨྱོ་བྱེད་ཀྱི་འདབ་མའི་ཁུ་བ་དང་། གཏུམ་པའི་ས་བོན་དང་། མཛུབ་མོའི་ཁྲག་དང་། ཙ་ཏྲ་ཀའི་ཁུ་བ་དང་། ཚྭ་སྒོ་ཅན་གྱི་ས་དང་། གདོལ་བའི་རྫ་མའི་དྲེག་པས་བྲི་བར་བཤད་དོ། ནི་མ་པ་ནི་བོད་དག་དབྱི་མོང་ཡིན། ཞེས་སྨྲ་བ་མང་ན་ཡང་། དེས་ངེའི་དོང་ཐུབ་པར་སྨྲ་ན། སྒྲུབས་ཤིག གཞན་དོན་གཅིག་པར་འདོད་ན་ཤིན་ཏུ་དོམ་ཤེས་པར་ཟད་དེ། མདོག་ལྗང་ནག རོ་ཤིན་ཏུ་ཁ་བ་ལ་ཅུང་ཟད་ཚ་བ་མཉམ་པ། ནུས་པ་ཆེས་ཤིན་ཏུ་བསེལ་བ། རྒྱ་གར་དང་བལ་བོ་སོགས་ན་སྡོང་པོ་ཆེན་པོ་སྐྱེས་ཞིག་ཡིན་ཏེ། ད་ལྟ་བོད་དུ་ཐོན་པ་དག་ཅིང་ཀའི་རྩ་བ་དང་དབྱིབས་མཐུན་ཤས་ཆེའོ། དབྱི་མོང་གི་ནུས་པ་དྲོད་ཤིན་ཏུ་ཆེ་བས་འདྲ་དོན་མེད་དོ། ཚ་བའི་མར་ཁུ་ནི་སྐེ་ཚེ་སོགས་བཅིང་བའི་ཁུ་བ་ཡིན་ལ། ཁ་ཅིག་བསྣམ་ན་དྲི་ཚ་བ་བྲོ་བའི་འབྲུའི་མར་ཁུ་ལ་འདོད་དོ། བཟླུམ་པའི་ས་བོན་ནི། གདོལ་བའམ་བཤན་པའི་ཁུ་བའོ། ཚབ་གསུམ་ནི། སྒ། པི་པི་ལིང་། ཕོ་བ་རིལ་ལོ། ཚྭ་སྒོ་ཅན་གྱིས་ནི། བ་ཚྭ་ཅན་གྱིསའོ། གདོང་དྲུག་ལས། རིམས་གྱིས་ཐེབས་པར་བྱ་བ་ལ་ཨ་རྐའི་ཤིང་དང་། སྒེ་ཚེ་དང་། ཁྲག་གིས་བྲི། རྒྱས་པ་ལ་བཞི་མཉམ་གྱི་སྦོས་ཀྱིས་བྲི། དབང་ལ་གྷི་ཝང་དང་། ཟླ་མཚན་དང་། སྲིན་ལག་གི་ཁྲག་དང་། བིལ་བའི་ལོ་མའི་ཁུ་བ་དང་། རས་དམར་
བོའི་ཁུ་བས་བྲི་བར་བཤད་དོ། རྭ་བདག་བསད་པ་ལ་ཡུགས་མོའི་དོར་རྟ་བཀྲུས་པའི་ཁུ་བ་དང་། དབྱེ་བ་ལ་གུ་གུལ་ནག་པོ་དང་། ལྷ་མ་འབོག་བཀྲུས་པའི་ཁུབ་བསྲེ་བ་མན་ངག་ཏུ་བྱེད་དོ། གསུམ་པ་འབྲི་བར་བྱེད་པའི་སྨྱུ་གུ་ནི་དགེ་བའི་ལས་ལ་བཟང་པོའི་ཤིང་། དགེ་མིན་ལ་ནི་རུས་པ་དང་། ལྕགས་ལ་སོགས་པས་བྲི་བར་བྱ། ཞེས་གསུངས་ཏེ། དགེ་བའི་ལས་ཞི་རྒྱས་བསྲུངས་བ་གསུམ་ལ་ཤིང་བཟང་པོ་ཙནྡན་དཀར་པོ་ལ་སོགས་པའི་སྨྱུ་གུས་བྲལ། དྲག་བོའི་ལས་ལ་ནི་མི་རུས་དང་ལྕགས་དང་། རྟོག་བདུན་དང་དམར་ནག་གི་རྒྱུད་ལས་གསུངས་པ་ལྟར། བྱ་རོག་ཆེན་པོའི་སྒྲོ་རྩའི་སྨྱུ་གུས་བྲི་བར་བྱ་ཞིང་། ཆེན་པོ་སྨོས་པ་ནི་ཁྭ་ཏ་ལས་ཁྱད་པར་བྱ་བའི་ཕྱིར་རོ། གཤེད་དམར་གྱི་འཁྲུལ་གྱི་གསལ་བྱེད། བྱང་ཆུབ་སྙིང་པོས་མཛད་པ་ལས་དུས་འཁོར་དྲངས་ནས། ཞི་བ་ལ་དུར་བ། རྒྱས་པ་ལ་ཀུ་ཤ །བསྐྲད་པ་ལ་བྱ་རོག་ཆེན་པོའི་སྒྲོ་རྐང་། དབང་ལ་གསེར། དགུག་པ་ལ་ཙནྡན་དམར་པོ་འམ་སེང་ལྡེང་། རྨོངས་རེངས་ལ་ཀ་པེའམ་ཨ་རྐའི་ཤིང་གི་སྨྱུ་གུས་འབྲི་བར་བཤད་བྱང་། རྟོག་པ་བདུན་པ་དང་གསུམ་པ་ལས་གསུངས་པ་ལྟར་གྱིས་ཆོག་གོ །བཞི་པ་བྲི་བའི་ཚེ་གང་ལ་ཁ་ལྟ་བའི་ཕྱོགས་དང་བསམ་པའི་ཁྱད་པར་ནི། ཞི་བ་ཤར་ཏེ་དབང་ལ་ནུབ། རྒྱས་པ་བྱང་སྟེ་དྲག་པོ་ལྷོ། གཞན་ཡང་ཅི་རིགས་སྦྱར་བར་བྱ། ཞེས་གསུངས་ཏེ། འཁྲུལ་འཁོར་འབྲི་བ་དང་། འཁྲུལ་འཁོར་གྱི་རབ་གནས་དང་། འཁྲུལ་འཁོར་ལས་ལ་སྦྱོར་བའི་སྐབས་གསུམ་ག་རུ་ཞི་བ་ལ་ཁ་ཤར་དུ་ལྟ་ལ། རྒྱས་པ་ལ་བྱང་དུ་ལྟ། དབང་ལ་ནུབ་ཏུ་ལྟ། དྲག་པོ་ལ་ལྷོར་
ལྟའོ། གཞན་ཡང་ཅི་རིགས་སུ་སྦྱར་བ་ནི། བསྲུང་བཞི་བ་དང་འདྲ། དགུག་པ་དབང་དང་འདྲ། རེ་ངས་པ་དང་། ལྐུགས་བ་མནན་པ་དང་འདྲ་བ་སོགས་སོ། དེ་ཡངརྟོག་བདུན་ལས། སྦྱིན་སྲེག་གི་ལས་འདི་རྣམས་སྒྲུབ་པ་འཆད་པའི་སྐབས་སུ་ཞི་བ་ལ་ཁ་ཤར། རྒྱས་པ་ལ་བྱང་། དབང་ལ་ནུབ། བསད་བསྐྲད་ལ་ལྟོ། རེངས་བ་ལ་བྱང་དུ་ལྟ་བར་བཤད་ཅིང་། དེ་དང་འདི་རིགས་པ་ཤིན་ཏུ་མཚུངས་པས། འདིར་དྲག་པོ་ལྷོ། ཞེས་གསུངས་པ་སྤྱིར་བཏང་དུ་བྱས་ནས། དམིགས་བསལ་རྨོངས་རེངས་མནན་པ་ལྐུགས་པྲ་བྱེད་པ་རྣམས་ཁ་བྱང་དུ་ལྟ་བ་བྱས་ན་ཤིན་ཏུ་ལེགས་ལ། དབྱེ་བ་ལ་ནི་བསད་བསྐྲད་དང་འདྲ་བར་ཁ་ལྷོར་ལྟོའོ། རྭ་བའི་མན་ངག་ལ། རྦོད་གཏོང་བཟློག་པ་ལ་ཁ་བྱང་ནུབ་ལ་ལྟ་ཞེས་ཟེར་རོ། བསམ་པའི་ཁྱད་པར་ནི། ཞི་བ་ལ་བྱམས་པའི་སེམས་དང་། རྒྱས་པ་ལ་རབ་ཏུ་དགའ་བའི་སེམས་དང་། དབང་དང་དགུག་པ་ལ་ཆགས་པའི་སེམས་དང་། དྲག་པོ་ཐམས་ཅད་ལ་སྤྱིར་བཏང་དུ་རྒྱུ་དུས་ཀྱི་ཀུན་སློང་བསྒྲུབ་བྱ་ལ་སྙིང་རྗེ་ཆེན་པོས་ཀུན་ནས་བསླངས་ཤིང་། ལས་སྦྱོར་བྱེད་པའི་དེ་དུས་ཀྱི་བསམ་པ། ཤིན་ཏུ་ཁྲོས་པ་དང་། ཁྱད་པར་དུ་བསད་བསྐྲད་སོགས་གང་བྱེད་པ་དེ་ལ་འདི་གསད་པར་བྱའོ་སྙམ་པ་དང་། བསྐྲད་པར་བྱའོ་སྙམ་པ་སོགས་སུ་དྲག་ཏུ་དམིགས་པའོ། དུས་ཀྱི་ཁྱད་པར་ནི། ཞི་རྒྱས་བསྲུང་བ་དབང་གུས་རྣམས་ཡང་ངོ་དང་། དྲག་ལས་ཐམས་ཅད་མང་ངོ་ལ་བྱ་བར་བཤད་པས་འཁོར་ལོ་འབྲི་བ་དང་ལས་ལ་སྦྱོར་བ་གཉིས་ཀ་དུས་དེ་དང་དེ་ལ་བྱའོ། དེ་ཡང་ཞི་བ་ཆོས་གཅིག་ལ། རྒྱས་པ་བླ་བ་ཉ་བ་ལ། དབང་ཡར་ངོ་ཚེས་བརྒྱད་ལ། དྲག་ལས་ཐམས་ཅད་དམར་ངོའི་བཅུ་བཞི་ལ་བརྩམ་
པར་གསུངས་པས་འཁོར་ལོ་གྲིབ་ཡང་དུས་དེ་དང་དེ་ལ་བྱ་སྟེ། དགྲ་ནག་གི་རྒྱུད་ལས། ཚེ་ཅིག་ལ་ནི་ཞི་བ་བྱ། ཟླ་བ་ཉ་ལ་རྒྱས་པ་སྟེ། བཅུ་བཞི་ལ་ནི་མངོན་སྤྱོད་དོ། དབང་གི་ལས་ནི་ཚེས་བརྒྱད་དོ། ཞེས་གསུངས་པས་འགྲེལ་པས། གཞན་གསུམ་ཡར་ངོ་དང་བཅུ་བཞི། མར་དོ་ལ་ཡང་བཤད་དོ། དེ་ཡང་ཟི་བ་བསྲུད་བ་རྒྱས་པ་དབང་དགུས་པ་རྣམས་གཟའ་སྐར་དུས་སྦྱོར་ཤིན་ཏུ་བཟང་བ་ལ་བྲི་བར་བྱའོ། འཁྲུལ་འཁོར་བསྒྲུབ་ཅིང་ལས་ལ་སྦྱོར་བའི་ཐོབ་མའི་ཉི་མ་འང་དེ་ལྟ་བུ་ལ་བྱ་ལ། དྲག་པོའི་འཁྲུལ་འཁོར་འབྲི་བ་དང་བསྒྲུབ་ཅིང་ལས་སྦྱོར་བའི་དངོས་གཞི་ནི། གཟའ་སྐར་ཤིན་ཏུ་ངན་པ་དང་། དྲག་གཟའ་རྒྱུ་བ་ལ་བྱའོ། ཞི་བ་བསྲུང་བ་རྒྱས་པ་རྣམས་སྔ་དྲོ་བྲི་བར་བྱ་ཞིང་། འཁྲུལ་འཁོར་བསྒྲུབ་ཅིང་ལས་སྦྱོར་བ་ཡང་སྔ་དྲོའི་དུས་སྣས་བརྩམ་པར་བྱའོ། དབང་དགུག་གཉིས་བྲི་བ་དང་ལས་ལ་སྦྱོར་བ་དགོང་མོ་བྱ་ཞིང་། དྲག་ལས་ཀྱི་བྲི་བ་དང་ལས་ལ་སྦྱོར་བ་ལ་འཇུག་པ་གཉིས་ཀ་ཉིན་ཕྱེད་མཚན་ཕྱེད་ནས་བྱའོ། དེ་ཡང་ཞི་རྒྱས་བསྲུང་བ་གསུམ་བྲི་བ་དང་ལས་ལ་སྦྱོར་བ་ནི། རླུང་སྣ་བུག་གཡོན་ཁོ་ན་ནས་རྒྱུ་བའི་དུས་དང་། དབང་དགུག་དྲག་པོ་རྣམས་གཡོས་ཁོ་ན་ནས་རྒྱུ་བའི་ཚེ་བརྩེམ་པར་བྱའོ། འཁོར་ལོའི་རབ་གནས་ཀྱི་དུས་ཀྱང་དེ་དག་དང་འདྲའོ། ལྔ་པ་འབྲི་བ་ལ་འཇུག་པའི་དུས་ཀྱི་ཕྱག་རྒྱ་དང་སྔགས་ནི། ལག་ཐལ་མོ་སྦྱར་ལ། གུང་མོ་གཉིས་རྩེ་སྤྲད། མཐེ་ལུ་ཆུང་གཉིས་ཀྱང་དེ་བཞིན་དུ་སྦྱར། མཛུབ་མོ་དང་མིང་མེད་གཉིས་བགུག །མཐེ་བོང་གཉིས་མཉམ་པར་བྱས་པ་གཤིན་རྗེ་གཤེད་ཀྱི་དམ་རྒྱ་
བདིངས་ལ། ཨོཾ་ཧྲཱིཿཥྨིཿཝི་ཀྲི་ཏཱ་ན་ན་མ་མ་ཤ་ཏྲུཾ་མར་ཡན་ཤ་ཡ་སྟྭཾ་བྷ་ཡ་བ་ན་དྷ་ཡ་ཧཱུྃ་ཧཱུྃ་ཕཊ་ཕཊ་ཅེས་བཟླས་ཤིང་འབྲི་སྟེ། དྲག་པོའི་དབང་དུ་བྱས་ཀྱི། ཞི་བ་ལ་ནི་ཧྲཱིཿཥྚཱིཿའབའ་ཞིག་བཟླས་ཤིང་འབྲིས། ཕྱག་རྒྱ་ནི་ཐོག་མར་སྨྱུ་གུ་ལེན་པ་ཡང་འཇུག་པའི་སྔོན་དུ་ཡིན་གྱི། ཕྱག་རྒྱ་བཅིངས་བཞིན་པས་འབྲི་བ་མ་ཡིན་ནོ། དྲུག་པ་འཁོར་ལོ་སོ་སོ་ལ་ཕྱིའི་རི་མོ་མི་འདྲ་བའི་རྣམ་དབྱེ་ནི། དམར་ནག་གི་རྒྱུད་ལས། གཤིན་རྗེའི་ལུས་གནས་བསད་པ་ལ། རྟ་དང་མ་ཧེ་དག་ལས་དབྱེ། རྡོ་མོའི་ལུས་གནས་བསྐྱང་བ་ལ། ཞི་བ་ཟླ་བའི་དཀྱིལ་འཁོར་ལ། རྒྱས་པ་ཟླ་བ་སེར་པོ་ལ། བཙུན་མོའི་སྙིང་གར་དབང་དུ་བྱེད། ལྐུགས་པར་ཡི་ལུས་ལ་གནས། ལྷུན་པོའི་དབུས་སུ་རེངས་བ་སྟེ། སེང་གེ་ཤ་ར་བྷ་གནས་དགུག དེ་ལྟར་གཞན་རྣམས་ལ་མཚོན་བྱ། ཞེས་གསུངས་ཏེ། བསད་པ་ལ་འོག་འཁོར་ཙ་མུན་ཊིའི་གཟུགས་ཀྱི་ལྟོ་བ་དང་། སྟེང་འཁོར་ལས་གཤིན་གྱི་གཟུགས་ཀྱི་ལྟོ་བར་བྲི་བར་བྱ་ལ། དབྱེ་བའི་འཁོར་ལོ་རྟ་དང་མ་ཧེ་ལ་གནས་པ་ནི། འོག་འཁོར་རྟའི་རྒྱབ་དང་། སྟེང་འཁོར་མ་ཧེའི་རྒྱབ་ཏུ་བྲིས་ནས་རྟ་དང་མ་ཧེ་གཉིས་མཐོ་མཇུག་བསྣོལ་མར་འབྲི་བའོ། བསྐྲད་པའི་འཁོར་ལོ་སྣ་མ་མང་པོས་རྡ་མོའི་ཁོག་པད་འབྲི་ཡང་། དེ་མ་ཡིན་གྱི་འཁོར་ལོའི་ཡི་གེ་དབུས་མཁར་རྡ་མོའི་གདོང་ལ་བལྟ་བར་བྱས་ནས། རྡ་མོའི་རྒྱབ་ཏུ་བསྐྱོན་ཏེ། ཤ་སྒོའི་ཐོག་ཏུ་འབྲི་བ་ཡིན་ནོ། ཞི་བ་ཟླ་བའི་དཀྱིལ་འཁོར་གྱི་དབུས་སུ་འབྲི་ལ། འདི་ལ་ཟླ་བའི་འོད་ཟེར་ཀྱི་མཐའ་ནས་རེ་ཁས་བསྐོར་བར་བྱང་ཆུབ་སྙིང་པོ་བཤད་ལ། ཞི་ན་ཐམས་ཅད་ལ་ཟླ་བའི་ཁ་དོག་དཀར་པོ་ཡིན་ནོ། རྒྱས་པ་ཐམས་ཅད་
ལ་འཁོར་ལོ་ཟླ་བ་སེར་པོའི་དབུས་སུ་འབྲི་སྟེ། ཞི་རྒྱས་ཀྱི་འཁོར་ལོ་གང་ཡིན་ཀྱང་འཁོར་ལོའི་བྱིའི་ཟླུམ་ཐིག་ལས་ཅུང་ཟད་ཕྱིར་ཐལ་བ་ནས་ཟླ་བའི་ཕྱི་མཐའ་དང་། དེའི་མཐའ་ནས་འོད་ཟེར་གཡས་སྐོར་དུ་འཁོར་ལོའི་རི་མོ་དང་བཅས་པ་བྱའོ། དུས་འཁོར་ལས་རྒྱས་བ་གླང་པོ་ཆེའི་ལུས་ལ་འབྲི་བར་བཤད་ལ། མན་སྙེང་རྟའི་ལུས་ལ་འབྲི་བར་བཤད་པས་དེ་རྣམས་གང་བྱས་ཀྱང་ཆོག་གོ །བྱང་ཆུབ་སྙིག་པོས་འཁོར་ལོའི་གསལ་བྱེད་ལས། དེ་ལ་ཞི་བའི་འཁོར་ལོའི་ཕྱི་རོལ་ཟླ་བའི་དཀྱིལ་འཁོར་ཀྱིས་བསྐོར་ཞིང་རེ་ཁས་བསྐོར་བས་བྱའོ། རྒྱས་པ་ལ་གླང་པོ་ཆེས་བསྐོར་བར་བྱ་སྟེ། ཇི་ལྟར་གླང་པོ་ཆེའི་ལྟོ་བར་འཁོར་ལོ་ཆུད་པའོ། བསད་པ་ལ་ཡི་དྭགས་ཀྱི་ལུས་སོ། བསྐྲད་པ་ལ་རྔ་མོའི་ལྟོ་བར་རོ། དབང་དུ་བསྡུ་བ་ལ་རི་དྭགས་ཀྱི་ལྟོ་བར་རོ། དགྲུག་པ་ལ་ལྟའི་ལྟོ་བར་རོ། རྨོངས་པ་ལ་ར་འམ་ལུག་གི་ལྟོ་བར་རོ། མནན་པ་ལ་རུས་སྦལ་གྱི་ལྟོ་བར་རོ། ཇི་ལྟར་འཁོར་ལོ་ལྟོ་བར་འགྱུར། ཕྱི་རོལ་གཟུགས་ཀྱང་དེ་བཞིན་ནོ། ཞེས་བཤད་ཅིང་། རྭ་བ་སོགས་སྔ་མ་འགའ་ཞིག་གིས་བཞེད་པས། ཞི་བས་འཇིགས་པ་བརྒྱད་ལས་སྐྱོབ་བར་གསུངས་པས། ཆུའི་འཇིགས་པ་ཞི་བར་བྱེད་པ་རི་རབ་ཀྱི་དབུས་སུ་འབྲི། མེའི་འཇིགས་པ་ཞི་བར་བྱེད་པ་ཚུའི་དབུས་སུ་འབྲི། དུག་ཞི་པར་བྱེད་པ་རྨ་བྱའི་ཁོག་པར་འབྲི། མཆོད་ཆའི་འཇིགས་པ་ཞི་བར་བྱེད་པ་མེས་བསྐོར་བའི་དབུས་སུ་འབྲི། ནད་ཞི་བར་བྱེད་པ་དྲང་སྲོང་གི་ལྟོ་བར་འབྲི། རྦོད་གཏོང་ཞི་བར་བྱེད་པ་གཤིན་རྗེ་ཕ་མའི་ལྷོ་བར་འབྲི། གཅན་གཟན་གྱི་འཇིགས་
བཞི་བ་བྱེད་པ་སེང་གེའི་ལུས་ལ་འབྲི། བཙོན་ར་ཞི་བར་བྱེད་པ་རྒྱལ་པོའི་ལུས་ལ་འབྲི་ཞེས་འདོད་ཅིང་རྒྱས་པ་ལའང་། ཚེ་རྒྱས་པར་བྱེད་པ་བུམ་པའི་ནང་དུ། སྟོབས་རྒྱས་པར་བྱེད་པ་གླང་པོ་ཆེའི་ལུས་ལ། དབང་པོ་རྒྱས་པར་བྱེད་པ་ཚངས་པའི་ལུས་ལ། མདངས་རྒྱས་པར་བྱེད་པ་ཤང་ཤང་གི་ལུས་ལ། ལོངས་སྤྱོད་རྒྱས་པར་བྱེད་པ་གནོད་སྦྱིན་གྱི་ལུས་ལ། རིགས་རྒྱུད་རྒྱས་པར་བྱེད་པ་བཙུན་མོའི་གཟུགས་ཀྱི་ཁོག་པར་གྲི་ཞེས་འདོད། དབང་གི་མོས་པ་རྣམས་བཞི་འགྲུབ་པར་གསུངས་བ་ལའང་། ལུས་མཛེས་པར་བྱེད་པའི་འཁྲུལ་འཁོར་སྨད་འཚོང་མའི་ལུས་ལ། ངག་སྙན་པར་བྱེད་པ་ཀ་ལ་པིང་གའི་མགྲིན་པར། སེམས་འདུན་པར་བྱེད་པ་མི་གཞོན་ནུའི་ལུས་ལ། རང་གཞན་གྱི་གཙོ་བོར་མཐོང་བར་བྱེད་པ་རྡོ་རྗེ་སློབ་དཔོན་གྱི་གཟུགས་ཀྱི་ལུས་ལ་བྲི། དབྱེ་བས་གསང་སྡེ་བརྒྱད་དང་འབྱེད་པར་གསུངས་པ་ལ། རིགས་ཀྱི་གསང་སྡེ་བུད་མེད་ཀྱི་ལུས་ལ། རུས་ཀྱི་གསང་སྡེ་སྐྱེས་པའི་ལུས་ལ། ཚེ་ཡི་གསང་སྡེ་གཙད་པོའི་ལུས་ལ། འབྲང་གི་གསང་སྡེ་བྲན་མོའི་ལུས་ལ། ཕོ་ལྷའི་གསང་སྡེ་དྲི་ཟའི་ལུས་ལ། དགྲ་ལྷའི་གསང་སྡེ་ནམ་མཁའ་ལྡིང་གི་ལུས་ལ། ཞང་ལྷའི་གསང་སྡེ་མིའམ་ལུས་ལ། ཡུལ་ལྷའི་གསང་སྡེ་ལྟོ་འབྱོའི་ལུས་ལ་འབྲི། མནན་པས་དབང་པོ་དྲུག་འཆིང་བར་གསུངས་པ་ལ། རྣ་བའོ་ན་པར་བྱེད་པ་འཕང་བའི་ལུས་ལ། མིག་ལོང་བར་བྱེད་པ་དམུས་ལོ་ལོང་གི་ལུས་ལ་བྲི། སྣ་ཞོམ་པར་བྱེད་པ་མཐའ་ཤིང་གིས་བསྐོར་བའི་དབུས་སུ། ནང་ལྐུགས་པར་བྱེད་པ་མཐའ་རལ་གྲི་རྩེ་མོ་ཕྱིར་བསྟན་པས་བསྐོར་བའི་དབུས་སུ། ལུས་སྐེམས་པར་བྱེད་པ་མཐའ་མེས་བསྐོར་བའི་དབུས་སུ། སེམས་མྱོས་པར་བྱེད་
པ་མཐའ་ཆུས་བསྐོར་བའི་དབུས་སུ་བྲི་ཞེས་འདོད་ཀྱང་། རྒྱུད་དང་གྲུབ་ཆེན་གྱིས་དངོས་སུ་གསུངས་པ་ལྟར་བྱས་ན་ལེགས་སོ། དེ་ཡང་གོང་དུ་བགྲངས་བའི་དགྲ་ནག་གི་རྒྱུད་དེའི་འགྲེལ་བར་གྲུབ་ཆེན་དཔལ་འཛིན་གྱིས་གཤིན་རྗེའི་ལུས་ལ་གནས་ཞེས་བྱ་བ་ནི་གཤེན་རྗེའི་ལྟོ་བར་གནས་པའོ། རྟ་དང་མ་ཧེ་ནི་རྒྱབ་ཏུའོ། བསྐྲང་བ་ནི་གདོན་པའོ། རྔ་མོའི་ལུས་ལ་བསྐྱོན་ཞེས་བྱ་བ་ནི་རྒྱབ་ཏུ་གནས་མའོ། བཙུན་མོའི་སྙིང་ག་ནི་པདྨའོ། ར་ལ་ཞེས་བྱ་བ་ནི་རའི་སྙིང་ལ་གནས་པའོ། རི་བོའི་དཀྱིལ་དུ་ཞེས་བྱ་བ་ནི་སྟེང་དང་འོག་དང་གཡས་གཡོན་དང་། མདུན་རྒྱབ་ཀྱི་རིའི་དཀྱིལ་དུ་བཞག་པ་ཞེས་བྱ་བའི་དོན་ནོ། ཤར་བྷ་ནི་རྐང་པ་བརྒྱད་ཡོད་པའི་སེང་གེའོ། དེ་བཞིན་དུ་སྨྱོ་བར་བྱ་བ་ནི་མྱོས་པའམ། སྦྲེའུ་ལ་སོགས་པ་ལ་བསྒྲུབ་བྱ་དགོད་པར་མཚོན་པར་བྱ་བའོ། ཞེས་གསུངས་པ་ལྟར་བྱའོ། དེས་ན་ཞི་རྒྱས་བསད་བསྐྲད་དབྱེ་བ་རྣམས་གོང་དུ་བཤད་ཟིན་པ་ལྟར་བྱ་ལ། དབང་གི་འཁོར་ལོ་བཙུན་མོའི་གཟུགས་ཀྱི་དྷ་གའི་དཔུས་སུ་བྲི། ལྐུགས་པར་རིའི་སྙིང་གར་བྲི་ཞིང་། འགྱུར་གཞན་འགའ་ཞིག་ལས་ལུག་གི་ཞེས་འབྱུང་ལ། བྱང་ཆུབ་སྙིང་པོས་ཀྱང་ཀུག་གི་སྙིང་གར་བྲི་བ་དང་། རའི་སྙིང་གར་བྲི་བ་གདམས་ཅན་དུས་ཤད་དོ། མནན་པ་དང་རེངས་པའི་འཁོར་ལོ་ཐམས་ཅད་རི་རབ་ཀྱི་དབུས་སུ་འབྲི་བ་ཡིན་ལ། དེ་ཡང་སྔ་མ་དག་རི་རབ་གཅིག་གི་དགྱིལ་དུ་འབི་བ་ལྟར་བྱེད་པ་མ་ཡིན་གྱི། གྲུབ་ཆེན་ཀྱིས་གསུངས་པ་ལྟར། སྟེང་འོག་གཡས་གཡོན་མདུན་རྒྱབ་རྣམས་སུ། ལྷུན་པོ་སེར་པོ་རེ་རེ་བྲིས་པའི་
ལྷུན་པོ་ཐམས་ཅད་ཀྱི་རྩ་བ་ནང་དུ་བསྟན་པའི་རྩ་བ་རྣམས་འཇོམས་པའི་དབུས་སུ་འབྲི་བ་ཡིན་ནོ། སེང་གེ་ཤར་བྷ་ནི་སེང་གེ་རྐང་མ་བརྒྱད་པ་ཞེས་གྲགས་བ་སྟེ། དེ་ཡང་སྔ་མ་མང་པོས། སེང་གེ་གཅིག་ལ་ད་ལྟ་ཡོངས་སུ་གྲགས་པའི་རྐང་པ་འདི་བརྒྱད་ཡོད་པ་བྲིས་པ་ནི་ནོར་བ་སྟེ། ཡོངས་སུ་གྲགས་པའི་རྐང་ལག་བཞི་དང་། གཡས་གཡོན་དུ་གཤོག་པ་གཉིས་གཉིས་ཏེ། བརྒྱད་ཡོད་པ་དེས་འགྲོ་བའི་བྱ་བ་ཁྱད་པར་རྐང་པ་དང་འདྲ་བའི་ཕྱིར་རྐང་བ་བརྒྱད་དོ། དགུག་པ་ནི་དེའི་ལུས་ལ་གནས་པའོ། ཡང་ན་མནན་པ་རུས་སྦལ་གྱི་ལྟོ་བར་བྲིས་རྐྱང་རང་ངོ་། མྱོས་པར་བྱེད་པ་སྦེ་འུའི་སྟེང་གར་འབྲི་བར་བྱའོ་སྒ་བདུན་པ་དབུས་ཀྱི་ཡི་གེ་ཚུལ་དང་ཡི་གེ་གཞན་གྱི་མགོ་སྟོན་ཕྱོགས་ཀྱི་ཁྱད་པར་ནི། དུས་འཁོར་དང་དེའི་ལུགས་སུ་བྱས་པའི་འཁོར་ལོའི་གསལ་བྱེད་ལས། དབུས་སུ་དབྱེ་བ་ལ་ཡ། བསད་པ་ལ་མ། ད་བང་བ་རཱ། རེངས་བ་ལ་ཀྵེ། དགུག་པ་ལད། རྨོངས་པ་ལ་མེ། སྟོབས་བྱེད་པ་ལ་དོ། སྟོབས་བྱེད་པ་ལ་དོ། ཞི་བ་ལས། བསྐྲད་པ་ལ་ཙྪ། རིམ་བྱེད་པ་ལ་ཎ་བསྐྱོད་པ་ལ་རུ། རྒྱལ་བར་བྱེད་པ་ལ་ཛཱ། གདུང་བ་ཞི་བར་བྱེད་པ་ལ་ཡོ། དགྲ་བཟློག་པ་ལ་མིའོ། རཱ་དང་མཐའི་ཡ་དང་ནི་སྟེ། ཡི་གེ་གསུམ་དབུས་སུ་མ་སོང་། ལྷག་མ་དབུས་སུ་ཡི་གེ་གང་སོང་བ་དེའི་གནས་སུ་ཡ་ཡིག་འགྲོའོ། ཡི་གེའི་མགོ་སྟོན་ཕྱོགས་ནི། ཞི་བ་དང་། སྟོབས་བྱེད་པ་དང་། རྒྱལ་བར་བྱེད་པ་རྒྱས་པ་དང་མཐུན། གདུང་བཞི་བར་བྱེད་པ་དང་། དགྲ་བཟློག་པའང་རང་བསྲུང་བ་བཞི་བ་དང་མཐུན་པས་དེ་དག་ལ་དབུས་ཀྱི་ཡི་གེ་བྱང་གི་ད་ལ་ཁ་བལྟ། ཡི་གེ་གཞན་ཐམས་ཅད་མགོ་ཕྱིར་བསྟན་ནས། ཁ་ནང་ལ་བལྟའོ། དབང་དང་དགུག་བ་དང་རི་མས་བྱེད་པ་དང་གསུམ་ལ། དབུས་ཀྱི་ཡི་གེ་ལྷོའི་
མ་ལ་ཁ་བསྟན། ཡི་གེ་གཞན་ཐམས་ཅད་ཁ་ཕྱིར་བསྟན་ཏོ། རྨོངས་པ་དང་རེངས་བ་ལ་དབུས་ཀྱི་ཡི་གེ་ནུབ་ཀྱི་མེ་ལ་ཁ་བསྟན། ཡི་གེ་གཞན་ཐམས་ཅད་ཀྱི་གཞོགས་གཡས་དབུས་སུ་བསྟན་ཏོ། བསད་པ་དང་བསྐད་པ་དང་དབྱེ་བ་དང་བསྐྱོད་པ་སྟེ། བཞི་ལ་དབུས་ཀྱི་ཡི་གེ་ཀྵེ་ལ་ཁ་བསྟན། ཡི་གེ་གཞན་ཐམས་ཅད་ཀྱི་གཞོགས་གཡོན་དབུས་སུ་སྟོན། ཞི་བསོགས་ལྔ་ལ་འཁྲུལ་འཁོར་གྱི་མཐའ་ཆུའི་དཀྱིལ་འཁོར་རམ་ཝ་ཡིག་གིས་བསྐོར་ལ། ཟླ་བའི་དཀྱིལ་འཁོར་དམ། གླང་པོ་ཆེའི་ལུས་ལ་གཞུག བསད་པ་སོགས་བཞི་ལ་རླུང་གི་དཀྱིལ་འཁོར་རམ་ཡ་ཡིག་གིས་བསྐོར། དབང་སོགས་གསུམ་ལ་མེའི་དཀྱིལ་འཁོར་རམ་ར་ཡིག་གིས་བསྐོར། རྨོངས་རངས་གཉིས་ལ་སའི་དཀྱིལ་འཁོར་རམ་ལ་ཡིག་གིས་བསྐོར་བར་བཤད་དོ། བོད་ཀྱི་བླ་མ་སྔ་མ་མང་པོ་ཡང་དུས་འཁོར་དང་དའི་རྗེས་སུ་འབྲང་བའི་འཁོར་ལོའི་གསལ་བྱེད་ནས་གསུངས་པའི་ཡི་གེ་འཕྲོ་ཚུལ་དང་། མགོ་སྟོན་ཕྱོགས་འདི་ལྟར་ཕྱག་ལེན་ལ་བྱེད་པ་འདུག་ན་འང་། དུས་འཁོར་ཀྱི་དེ་ནི་ལས་སོ་སོ་སྒྲུབ་པའི་ཕྱོགས་ཀྱི་རྣམ་གཞག་དང་དུས་དང་། ཁ་དོག་གི་དབྱེ་བ་སོགས་རྒྱུད་སྡེ་གཞན་རྣམས་དང་ཚུལ་ཡེ་མི་འདྲ་ཞིང་། དེའི་དབང་དུ་བྱས་པའི་ཡི་གེ་འཕོ་ཚུལ་དུ་འདུག་པས། དེ་ལྟར་བྱེད་ན་ཁ་ལྟ་ཕྱོགས་ཀྱང་ཞི་བ་ལ་ལྷོར་བསྡད་ནས་བྱང་དུ་བལྟ་བ་དང་། རྒྱས་པ་ལ་བདེན་བྲལ་དུ་བསྡད་ནས་དབང་ལྡན་དུ་ཁ་བལྟ་བ་དང་། དགུག་པ་ལ་ལྷོར་བལྟ་བ་དང་། བསད་པ་ལ་ནུབ་ཏུ་བསྡང་ནས་ཁ་ཤར་དུ་བལྟ་བ་སོགས་དང་། དུས་ཀྱང་ཉིན་ཞག་གཅིག་ལ་ཐུན་བརྒྱད་དུ་བྱས་
པའི་ཐུན་གསུམ་པ་ལ་བསད་པའི་ལས་བྱ་བར་གསུངས་པ་སོགས་སྔར་ལྟར་བྱེད་དགོས་ལ། དེ་ལྟ་ན་གཤིན་རྗེ་གཤེད་དམར་ནག་འཇིགས་གསུམ་གྱི་རྒྱུདདང་གྲུབ་ཆེན་གྱི་གཞུང་རྣམས་ལས། ཞི་བ་ལ་ཁ་ཤར་དུ་བལྟ་བ་སོགས་དང་། ཉིན་ཕྱེད་མཚན་ཕྱེད་ན་གསང་བར་བྱ་བའི་ལས་བྱ་བར་གསུངས་བ་སོགས་ཐམས་ཅད་དང་མི་མཐུན་པར་བྱེད་དགོས་པས། རྣམ་གཞག་མི་མཐུན་པ་ཐམས་ཅད་གཅིག་ཏུ་བསྲེ་བར་མི་བྱ་ཞིང་། དུས་འཁོར་ཀྱི་དེ་ལྟར་བྱེད་ན་དཀྱིལ་འཁོར་དང་ལྷའི་ཕྱོགས་མདོག་ཀྱང་ཤར་ནག་ལྷོ་དམར་བྱ་ར་དཀར་ནུས་སེར་བ་བྱེད་དགོས་པས་བསམ་མ་ནོ་ལེགས་པར་ཐོངས་ཤིག དུས་འཁོར་ཀྱི་རྒྱུད་དང་འགྲེལ་ཆེན་ལས། དབུས་ཀྱི་ཡི་གེ་འཕོ་ཚུལ་སྔར་ལྟར་གསུངས་ཀྱང་། དབུས་ཀྱི་ཡི་གེ་འཕྲོས་པ་ན། མཐའི་ཡི་གེ་རྣམས་ཀྱི་མགོ་གཞོགས་སྟོན་ཚུལ་འཕོ་བ་འཁོར་ལོའི་གསལ་བྱེད་ལས་བཤད་པ་གོང་དུ་བསྟན་པ་དེ་འདྲ་བ་ནི། རྒྱུད་དང་འགྲེལ་བ་གང་ལས་ཀྱང་མ་གསུངས་ཤིང་། དེན་གྱིས་ཐོབ་པར་ཡང་མི་སྣང་བར་དུས་འཁོར་ཀྱི་ལུགས་གཞིར་བཞག་ལ་ཡང་ཡིད་བརྟན་མི་རུང་བར་སྣང་ངོ་། ཆོས་རྗེ་བུས། གཤིན་རྗེ་གཤེད་ནག་པོ་སྐོར་གསུམ་གྱི་རྒྱུད་འགྲེལ་རྒྱ་གཞུང་རྣམས་ལས་ཡི་གེའི་གཙོ་བོ་འཕྲོ་བ་དང་ཁ་སྟོན་ཕྱོགས་མ་གསུངས་ལ་ཞེས་གསུངས་མོད། ཤིན་ཏུའང་བཤད་དེ་འདི་ལྟར། དགྲ་ནག་གི་རྒྱུད་ཀྱི་དཀའ་འགྲེལ་དུ་གྲུབ་ཆེན་དཔལ་འཛིན་གྱིས་ཞི་བའི་ལས་ལ་ཡི་གེ་ཡ་ཤར་དུ་འོང་བར་བཤད་ཅིང་། བསད་པ་ལ་ཡ་དབུས་སུ་འོད་པར་དམར་ནང་འཇིགས་གསུམ་འགྲེལ་པ་ཕལ་ཆེ་བ་དང་བཅས་པ་ལས་བཤད་པར་འུ་བུ་ཅག་ཐམས་ཅད་མཐུན་སྣང་
དུ་གྲུབ་ཟིན་པ་མ་ཡིན་ནམ། དེ་ལྟར་ན་ཞི་བ་ལ་ཀྵེ་དབུས་སུ་འོང་བར་དེ་ཉིད་ཀྱིས་འབད་པ་མེད་པར་གྲུབ་བོ། ཞི་བ་ལ་ཀྵེ་དབུས་དང་བསྡ་པ་ལ་ཡ་དབུས་སུ་འོང་བར་གྲུབ་པ་ན། རྒྱས་པ་ལ་མ་དབུས་དང་། དབང་དགུག་ལ་མེ་དབུས་སུ་འོང་བ་ཡང་ལེགས་པར་གྲུབ་བོ། བསད་པ་ལ་ཡང་མེ་དབུས་སུ་བྱས་པའི་མདུན་གྱི་རེ་མིག་དུ་མ་འོང་བ་ནི་བསད་པ་ལ་དབུས་ཀྱི་ཡི་གེ་ཁ་ལྷོ་ལ་བལྟས་པའི་དབང་དུ་བྱས་པ་ཡིན་པར་སློབ་དཔོན་མི་བསྐྱོད་པས་བཤད་པ་དྲངས་ནས་རང་ཉིད་ཀྱིས་ཀྱང་དེ་ལྟར་ཞལ་གྱིས་བཞེས་བཞིན་དུ་སླར་ཡང་དབུས་ཀྱི་ཡི་གེའི་ཁ་བལྟ་ཕྱོགས་མ་བཤད་དོ། ཞེས་གསུངས་བ་ནི་ཁས་བླངས་ཆེས་འགལ་བ་ཡིན་ཏེ། བསད་པ་ལ་དབུས་ཀྱི་ཡི་གེ་ཁ་ལྷོ་ལ་བ་ལྟ་བར་དངོས་སུ་བཤད་པ་ན། ཞི་བ་ལ་དབུས་ཀྱི་ཡི་གེ་ཁ་ཤར་བ་བལྟ་བ་དང་། དབང་དགུག་ལ་ནུབ་ལ་བལྟ་བ་དང་། རྒྱས་པ་ལ་བྱང་ཅུ་བལྟ་བར་ཤུགས་ལ་འབད་མེད་དུ་འགྲུབ་པའི་ཕྱིར་རོ། རྒྱ་སྟོན་པ་སོགས་བཟློག་པ་དང་རྨོངས་རེངས་མནན་པ་ལ་དབུས་སུ་ཡི་གེད་ཁ་བྱང་ལ་བསྟན་པ་བྲི་བ་དང་། འཁོར་ལོ་བསྐུལ་བ་ན་ཡང་དབུས་སུ་རྡོ་རྗེ་འཇིགས་བྱེད་ལྟང་གུ་བསྒོམ་པར་འདོད་ཀྱང་། བཟློག་པ་ལ་ཞི་དྲག་གཉིས་ཡོང་བས་ཞི་བ་ནི་བསྲུང་བ་དང་འདྲ་བས་དབུས་སུ་ཀྵེ་འོང་ལ། དྲག་པོ་ནི་དྲག་ལས་གཞན་དང་འདྲ་བར་མངོན་ཞིང་། མནན་པ་རེངས་པ་སོགས་ལ་རྒྱུད་པའི་ཉིད་དུ། མནན་པ་དག་ནི་རྒྱས་པ་བཞིན། ཞེས་གསུངས་པས་ལྷ་སེར་པོར་རིགས་ཤིང་། དེའི་ཕྱིར་ཡི་གེ་ཡང་མ་དབུས་སུ་འོང་བར་རིགས་སོ། བསད་པ་སྒྲད་དབྱེ་བ་དྲག་པོའི་དགུག་པ་རྣམས་ལ་དབུས་སུ་ཡི་གེ་ཁ་ལྷོའི་མ་ཡིག་བལྟས་པ། མནན་
རེངས་ལྐུགས་པ་སྨོ་བར་བྱེད་པ་རྣམས་ལ་ཡི་གེ་མ་དབུས་སུ་ཁ་བྱང་ལ་བལྟས་པ། ཞི་བ་དང་བསྲུང་བ་ལ་དབུས་སུ་ཡི་གེ་ཀྵེ་ཁ་ཤར་དུ་བ་ལྟས་པ། རྒྱས་པ་ལ་དབུས་སུ་ཡི་གེ་མཐ་བྱང་གིད་ལ་བལྟས་པ། དབང་དང་དབང་གི་དགུག་པ་ལ་དབུས་སུ་ཡི་གེ་མེ་ཁ་ནུབ་ཏུ་བལྟས་པ་བྲི་ཞིན། དབུས་སུ་ཡི་གེ་གཞན་གང་སོང་བ་དེའི་ཤུལ་དུ་ཡ་ཡིག་འགྲོའོ། དོན་འདི་ནི། ལས་སོ་སོའི་འོད་ཟེར་ཀྱི་དབྱེ་བ་སྔར་གསུངས་པ་དང་། ལས་སོ་སོ་ལ་ལྷག་གང་བསྒོམ་ཞིང་ཁ་གང་ལ་བལྟ་བ་བཤད་པ་དང་ལེགས་པར་གུང་འགྲིགས་པས་གདོན་མི་ཟ་བའི་ཡིད་ཅེས་ཀྱི་གནས་ཡིན་ལ། དབུས་ཀྱི་ཡི་གེ་ཁ་སྟོན་ཕྱོགས་འཕོས་པའི་དབང་གྱིས་མཐའི་ཡི་གེ་ཁ་སྟོན་ཕྱོགས་འཕོད་དགོས་པ་མ་ཡིན་ཏེ། དེ་ལྟར་ཚད་ལྡན་གྱི་གཞུད་གང་ལས་ཀྱང་མ་བཤད་ཅིང་། དེ་དགོས་ན་དཀྱིལ་འཁོར་གྱི་གཙོ་བོ་ཞལ་གང་བསྟན་ལ་འཁོར་ཀྱི་ལྷ་རྣམས་ཀྱང་ཞལ་སྟོན་དགོས་པར་ཐལ་བའི་ཕྱིར་རོ། ཁྱབ་པ་ཡོད་དེ། འཁྲུལ་འཁོར་གྱི་ཡི་གེ་བཅུ་བདུན་པོ་འདི་དཀྱིལ་འཁོར་ཀྱི་ལྷ་བཅུ་གསུམ་ཐོད་པ་བཞི་དང་བཅུ་བདུན་གྱི་ངོ་བོར་བཤད་པའི་ཕྱིར་རོ། དབུས་ཀྱི་མ་གཏོགས་པའི་ཡི་གེ་གཞན་རྣམས། ཁ་ཅིག་བཟློག་པ་ལ་ཡི་གེ་དབུ་ནང་བསྟན། བསྲུང་བ་དུ་ཕྱིར་བསྟན་ཞེས་འདོད་པ་ཡོད་ཀྱང་། རང་ལུགས་ནི་མ་ན་ངག་སྙེ་མ་ལས་ཡི་གེ་ཐམས་ཅད་དབུ་ཕྱི་རོལ་ཏུ་བསྟན་པའ། ཞེས་གསུངས་པ་ལྟར་ཞི་རྒྱས་དབང་དྲག་གི་འཁོར་ལོ་གང་ཡིན་ཀྱང་དབུ་ཕྱིར་བསྟན་བྱ་སྟེ་འདི་ལ་གནད་ཆེན་པོ་ཡོད་དོ། ཞར་ལ་ཡི་གེ་འགའ་ཞིག་འབྲི་མི་འབྲིའི་རྣམ་དབྱེ་བཤད་ན། དམག་ནག་གི་རྒྱུད་ལས། མཐའ་ཡི་ཡ་བོར་ཞི་བ་ལ། ཡི་གེ་ནི་གཉིས་དབྱི་
བར་བྱ། ཕྱི་ནས་དཀྱིལ་གྱི་ཡ་སྤངས་ཏེ། ཡི་གེ་ལྷག་མ་ཅེ་བདེ་བར། ཞེས་གསུངས་པའི་དོན། ཆོས་རྗེ་བུ་ལ་སོགས་པ་མང་པོ་ཞིག་རྒྱུད་ཚིག་དེས་ཞི་རྒྱས་ཀྱི་འཁྲུལ་འཁོར་ལ་ཡི་གེ་བཞི་པོ་དེ་མི་འབྲི་བར་བསྟན་པ་ཡིན་ཞིང་། དེར་མ་ཟད་སློབ་མ་ལ་སློབ་པའི་སྐབས་སུ་ཡང་འཁྲུལ་འཁོར་བྲིས་ནས་ཞག་འགའ་རེ་འཇོག་པ་ཡིན་ན། ཡི་གེ་བཞི་པོ་དེ་ཕྱིས་ནས་ལྷག་མ་རྣམས་འཇོག་པ་ཡིན་ཏེ། ཤན་ཏི་བའི་དགྲ་ནག་གི་འགྲེལ་པར། སློབ་མ་ལ་བསྟན་པ་ལ་སོགས་པའི་ཆེད་དུ། འཁྲུལ་འཁོར་ལ་སོགས་པ་བྲིས་པ་ལ་དོན་མ་གྲུབ་པས་རེ་ཤིག་ཉིད་ཞག་འགའ་ཞིག་སླར་མི་འཕྱི་བ་ལྟར་ན། འཁྲུལ་འཁོར་གྱི་རེའུ་མིག་གི་མཐའི་ཡ་དབྱི་ཞིང་ཡི་གེ་ནི་གཉིས་ཀྱང་སྟེ། དབུས་ཀི་ཡ་ཡང་དབྱི་སྟེ་ཡི་གེ་ལྷག་མ་རྣམས་གཞག་གོ། དགོས་པ་གྲུབ་མ་ཐག་ཏུ་ནི་མ་ལུང་བར་དབྱི་སྟེ། འདི་ནི་གཞན་དུ་བྱང་ན་ནི། འཁོར་ལོ་འདི་ནི་འཇིགས་པ་ཆེ། བྲིས་པ་གང་དུ་བསྟན་གནས་པའི། ཁྱིམ་དུ་རྟག་ཏུ་འཐབ་མོ་ནི། ཡི་གེ་བྲིས་པས་འབྱུང་བའོ། ཞེས་བྱ་བའི་ཉེས་པར་འགྱུར་བས་སོ། ཞེས་དང་། གཞོན་ནུ་ཟླ་བའི་འགྲེལ་བ་ལས། ལས་གྲུབ་ནས་འཁྲུལ་འཧོར་གནས་པ་ལ་དགོས་པ་མེད་བས་ནི། རིམ་པ་བཞིན་དུ་དབྱི་བའི་དོན་དུ་གསུངས་བ། ཞི་བར་ཞེས་གསུངས་ཏེ། ལས་གྲུབ་པ་དང་དགོས་པ་ཉེ་བར་གྲུབ་ནས་གང་གི་ཚེ་བསྲུང་བ་རིག་པར་བྱེད་པ་དེའི་ཚེ་འཁོར་ལོ་འཛིན་པ་ཡང་ཡི་གེ་བཞི་པོ་དེ་དག་ཕྱིས་ཏེ་གཟུང་བར་བྱ་བ་ནི་མན་ངག་གོ ལྷག་མ་ཞེས་པ་ནི་ཡི་གེ་བཞི་པོ་ཕྱིས་པ་ལས་གཞན་དག་གོ། ཇི་ལྟར་བདེ་བ་ཤེས་པ་ནི་ཇི་ལྟར་འདོད།
བར་དབྱི་བ་འམ་གཞག་པར་བྱའོ། ཞེས་གསུངས་པའི་ཕྱིར་རོ། ཞེས་བཞེད་ལ། ཁ་ཅིག་རྒྱུད་ཀྱི་ཚིག་དེའི་དོན་ནི། དྲག་པོའི་འཁྲུལ་འཁོར་ཀྱི་ལས་གྲུབ་ཟིན་པའི་འོག་ཏུ། སྔར་རེངས་པ་སོགས་ཀྱི་གནོད་པ་བས་པ་དེ་ཞི་བར་བྱེད་ན་ཡི་གེ་བཞི་པོ་དེ་ཕྱིས་པས་ཡི་གེ་ལྷག་མ་རྣམས་བཞག་ཀྱང་དུང་སྟེ་ཅི་བ་དེར་བྱས་པས་སྔར་གནོད་པ་བྱས་བ་དེ་ཞི་བར་འགྱུར་ཞེས་པའི་དོན་ཡིན་གྱིས། དང་པོ་ནས་ཞི་བའི་ལས་བསྒྲུབ་པའི་འཁྲུལ་འཁོར་ལ་ཡི་གེ་བཞི་པོ་དེ་མི་འབྲི་བར་སྟོན་པ་མ་ཡིན་ཏེ། དབུས་སུ་ཡི་གེ་གཞན་གང་སོང་བ་དེའི་ཤུལ་དུ་ཡ་འབྲི་དགོས་པས་སོ། ཞེས་འཆད་དོ། ཤན་ཏི་བའི་འགྲེལ་བའི་དགོངས་པ་ནི། དྲག་པོའི་འཁྲུལ་འཁོར་ས་ལ་བྲིས་ནས་ཞག་འགའ་རེ་འཇོག་པ་ལ་ཡི་གེ་བཞི་དབྱི་དགོས་པར་སྟོན་པ་ཙམ་དུ་འདུག་པས། དེས་ཞི་བའི་འཁྲུལ་འཁོར་ལ་ཡི་གེ་ཡིན་འབྲིང་མི་རུང་བས་གྲུབ་པ་ལ་ཅི་ཡང་མི་ཕན་པས་སྣང་ལ། གཞོན་ནུ་ཟླ་བའི་འགྲེལ་བ་དེས་ནི། དྲག་པོའི་འཁོར་ལོ་ལས་གྲུབ་ཟིན་པའི་འོག་ཏུ་ཡི་གེ་གཞི་པོ་དེ་ཕྱིས་ནས་འཇོག་པར་བཤད་པ་ཙམ་དུ་འདུག་པས། དེས་ཀྱང་ཞི་རྒྱས་ཀྱི་འཁོར་ལོ་ལ་ཡི་གེ་བཞི་པོ་དེ་མི་འབྲི་བར་འགྲུབ་པ་ལ་ཅི་ཡང་མི་ཕན་པར་སྣང་ངོ་། འོན་ཀྱང་མན་ངག་སྙེ་མ་ལས་ཞི་བའི་དོན་ཁོ་ན་ལ་ནི་ཡ་གཉིས་དང་ནི་གཉིས་མི་འབྲིའོ། དེས་གནས་བཞི་རྣམས་སུ་རབ་ཏུ་སྦྱོར་བའོ། ཞེས་ཞི་བ་ལ་ཡི་གེ་བཞི་པོ་དེ་མི་འབྲི་བར་ཡི་གེ་བ་ནི་པོ་དེའི་གནས་སུ་སྤེལ་ཚིག་སྦྱར་བའི་སྔགས་འབྲི་བར་གསུངས་བས་རང་ལུགས་ལ་དེ་ལྟར་བྱས་ན་ལེགས་སོ། དེས་ན་དབུས་སུ་ཀྵེ་སོང་བའི་ཚེ་ཐོབ་ཐང་ལ་དེའི་དོད་དུ་ཡ་འགྲོ་རྒྱུད་ཡིན་ནའང་། དངོས་
སུ་ཡི་མི་འབྲི་བ་ནམཿཆེ་གེ་མོ་ཤནྟིཾ་ཀུ་རུ་ན་མཿཞེས་འགྲི་བ་ལྟབུའོ། ཚུལ་འདི་ནི་རྒྱས་པ་དང་བསྲུང་བ་ལའང་འདྲའོ། ཞི་རྒྱས་དབང་གསུམ་ལའང་དབུས་ཀྱི་ཡི་གེའི་ནང་དུ་བསྒྲུབ་བྱའི་མིང་ལས་དེ་དང་དེའི་སྔགས་སྤེལ་ཚིག་དང་བཅས་པས་བསྐོར་བ་འཇོག་པ་ནི་སྔར་དྲག་པོ་ལ་བཤད་པ་དང་རིགས་པ་འདྲའོ། བརྒྱད་པ་ལས་སོ་སོའི་སྔགས་དང་སྤེལ་ཚིག་གི་རྣམ་དབྱེ་བཤད་པ་ནི། ནང་གི་གྲྭ་བཞི་དང་ཕྱིའི་རེའུ་མིག་བཅུ་དྲུག་གི་བར་གྱི་རེའུ་མིག་རྣམས་ལ་འབྲི་བའི་ལས་སོ་སོའི་སྔགས་དང་སྤེལ་ཚིག་གི་ཁྱད་པར་ནི་འདི་ལྟ་སྟེ། བསད་པ་ལ་ཧཱུྃ་ཕཊ་ཆེ་གེ་མོ་མ་ར་ཡ་ཧཱུྃ་ཕཊ། ཅེས་པའོ། དེ་ཡང་ཚ་བའི་རིམས་བྱེད་པར་འདོད་ན། ཧཱུྃ་ཕཊ་ཆེ་གེ་མོ་ལ་ཚ་བའི་རིམས་གྱིས་ཤིག་ཧཱུྃ་ཕཊ། ཅེས་པ་དང་། གྲང་བའི་རིམས་བྱེད་པ་འདོད་ན། ཧཱུྃ་ཕཊ་ཆེ་གེ་མོ་ལ་གྲང་བའི་རིམས་ཀྱིས་ཤིག་ཧཱུྃ་ཕཊ། ཅེས་སོགས་སྦྱོང་། ཞི་བ་ལ་ཨོཾ་ནཱ་མཿཆེ་གེ་མོའི་སྡིག་པ་ཐམས་ཅད་ཤན་ཏིང་ཀུ་རུ་ན་མཿཞེས་པ་འམ། ཨོཾ་ན་མཿཆེ་གེ་མོ་འམ། ཡང་ན་གྲོན་ཁྱེར་ཆེ་གེ་མོའམ། ཡང་ན་དགེ་འདུན་གྱི་སྡེ་ཆེ་གེ་མོའི་ནད་ཐམས་ཅད་ཅེས་པའམ། རིམས་ཐམས་ཅད་ཤན་ཏིང་ཀུ་རུ་ན་མ༔ ཞེས་པའམ། ཨོཾ་ན་མཿཆེ་གེ་མོའི་ཚེའི་བར་དུ་གཅོད་པ་ཐམས་ཅད་ཅེས་པ་འམ། ཡང་ན་གདོན་ཐམས་ཅད་ཅེས་པའམ། ཡང་ན་ཆེ་གེ་མོའམ་དགེ་འདུན་གི་སྡེ་ཆེ་གེ་མོ་པ་རྣམས་ཀྱི་བཤད་སྒྲུབ་ཀྱི་བར་དུ་གཅོད་པ་ཐམས་ཅད་ཅེས་པའམ། ཆེ་གེ་མོའམ། ཡང་ན་གྲོང་ཁྱེར་རམ། ཡང་ན་དགེ་འདུན་གྱི་སྡེ་ཆེ་གེ་མོ་ལ་ཕ་རོལ་གྱི་དམག་ཚོགས་དང་ཚོམ་རྐུན་གྱི་གནོད་པ་ཐམས་ཅད་ཅེས་པའམ། རྒྱལ་
པོའི་ཆད་པ་ཞེས་པའམ། མེའི་འཇིགས་པ་དང་། ཆུའི་འཇིགས་པའམ། དུག་གི་འཇིགས་པའམ། གཅན་གཟན་གྱི་འཇིགས་པ་ཐམས་ཅད་ཤན་ཏིང་ཀུ་ཏུ་ནམཿཞེས་སོགས་སྐབས་དང་མཐུན་པར་སྦྱར་ལ། རང་དོན་དུ་བྱེད་ན་ཆེ་གེ་མོའི་གནས་སུ་བདག་གི་སྐད་དོད་མ་མ་ཞེས་པ་གཞུག་པར་བྱའོ། བསྲུང་བ་ཡིན་ན་ཧཱུྃ་ཆེ་གེ་མོ་ལ། ནད་དམ། གདོན་ནམ། དགྲའི་གནོད་པའམ། བྱད་སྟེམས་དང་རྦོད་གཏོང་གི་གནོད་པ་ཐམས་ཅད་ར་ཀྵ་ཧ྄ཱུྃ། ཞེས་བྲི་སྟེ། བསྲུང་བ་ལ་ཐོག་མཐར་ཧཱུྃ་སྦྱོར་བར་མན་སྙེ་ལས་བཤད་པས་སོ། རྒྱས་པ་ལ་སྭཱ་ཧཱ། ཆེ་གེ་མོའི་ཚེ་འམ། བསོད་ནམས་སམ། འཁོར་དང་ལོངས་སྤྱོད་ངམ། ཤེས་རབ་བམ། ཆེ་གེ་མོའམ། དགེ་འདུན་གྱི་སྡེ་ཆེ་གེ་མོའི་བཤད་སྒྲུབ་བམ། དཔལ་དན་བླ་མ་ཆེ་གེ་མོའི་འཕྲིན་ལས་པུཥྚིཾ་ཀུ་རུ་སྭཱ་ཧཱ། ཞེས་བའམ། ཡང་ན། བཽ་ཥ་ཊ་ཆེ་གེ་མོའི་ཚེ་སོགས་བུཥྚིཾ་ཀུ་རུ་བཽ་ཥ་ཊ་སྭཱ་ཧཱ་ཞེས་སྦྱར་ལ། ཪང་དོན་དུ་བྱེད་ན་ཆེ་གེ་མོའི་གནས་སུ་མ་མ་འཇུག་བསྔར་ལྟར་རོ། དབང་ལ་གང་ཟག་གཞན་དེ་བདག་གི་དབང་དུ་བསྡུ་བར་འདོད་ན། ཧོ་མ་མ་ཆེ་གེ་མོ་ཝ་ཤི་ཀུ་རུ་ཧོཿ ཞེས་པ་འམ། ཡན་ན། ཝ་ཥྚ་མ་མ་ཝཥྚ་མ་ན་ཆེ་གེ་མོ་ཝཥྚ་ཅེས་པ་ཧའ་རུང་དང་། གང་ཟག་གཞན་དེ་བདག་གི་བླ་མ་ལྟ་བུས་དབང་དུ་བྱས་པའི་ཕྱིར་དུ་བདག་གིར་འཁྲུལ་འཁོར་བྱེད་པ་ཡིན་ན། མ་མ་ཞེས་པའི་གནས་སུ་བླ་མ་ལྟ་བུ་དེའི་མིང་གཞུག་གོ དགུག་པ་ལ་ལྷ་མོ་འམ། ཀླུ་མོ་འམ། གནོད་སྦྱིན་མོའམ། མིའི་བུ་མོ་དགུག་པ་ཡིན་ན། ཧྲཱིཿཆེ་གེ་མོ་ཨ་ཀརྵ་ཡ་ཧྲིཿཞས་པ་དང་། རྒྱལ་པོ་སོགས་སྐྱེས་པ་དགུག་པ་ཡིན་ན་ཛཿཆེ་གེ་མོ་ཨ་ཀརྵ་ཡ་ཛཿཞེས་བྱའོ། མནན་པ་ལ། ལཾ་ཆེ་
ཆེ་མོ་སྭ་སྠ་ནི་སྟཾ་བྷ་ཡ་ལཾ་ཞེས་པའམ། ལཾ་ཆེ་གེ་མོའི་ལུས་ངག་ཡིད་གསུམ་སྟཾ་བྷ་ཡ་ལཾ། ཞེས་པ་འམ། ལཾ་ཆེ་གེ་མོའི་དབང་པོ་དྲུག་སྟཾ་བྷ་ཡ་ལཾ། ཞེས་བྱའོ། ངག་མནན་པའམ་རེངས་པར་བྱེད་པ་ལ་ནི། ལཾ་བདག་གམ། ཡང་ན། བདག་གི་དཔལ་ལྡན་བླ་མ་ཆེ་གེ་མོས། ཇི་ལྟར་བསམ་པའི་དོན་ལ་ཟློག་པར་བྱེད་པའམ། མི་སྙན་པ་སྨྲ་བར་བྱེད་པའི་གང་ཟག་ཆེ་གེ་མོའི་ངག་དེ་མནན་པར་གྱིས་ཤིག་ལཾ། ཞེས་པའམ། དེ་སྲཾ་ཀྲི་ཏའའི་སྐད་དུ་འབྲི་ན། ལཾ་དེ་བ་དཏྟ་སྱ་ཐཱ་པྲཱ་རཾ་བྷ་ཀ་ར་ཡེ་ཀྲི་ཡེ་ཝ་ར་ཡ་ཏོ་བི་རུ་པ་ཀཾ་ཝ་ཏ་ཏེ་ཡ་ཛྙ་ན་དྷ་སྱ་ཝ་ཀ་སྟཾ་བྷ་ཡན་ན་ཀུ་རུ་ལཾ་ཞེས་བྱའོ། ལྐུགས་པར་བྱེད་པ་ལ་ལཾ་ཆེ་གེ་མོའི་ཨུ་ཁཾ་བྷན་དྷ་ཡ་མཾ་ཞེས་བྱའོ། དབྱེ་བ་ལ་ཕཊ་གང་ཟག་ཆེ་གེ་མོ་དང་ཆེ་གེ་མོའམ། སྡེ་ཆེ་གེ་མོ་དང་ཆེ་གེ་མོའམ། བིདྷེ་ཤ་ཡ་ཕཊ་ཅེས་པའམ། ཕཊ་གང་ཟག་ཆེ་གེ་མོ་དང་དེའི་ལྷའམ་སྲུང་མཆེ་གེ་མོ་བི་དེ་ཤ་ཡ་ཕཊ། ཅེས་པའོ། བསྐྲད་པ་ལ་ཧཱུྃ་ཕཊ་ཆེ་གེ་མོ་ཨུཙྪ་ཊ་ཡ་ཧཱུྃ་ཕཊ། ཅེས་བྲིའོ། གཞན་ཡང་མིང་སྤེལ་བྱེད་ཚུལ་གྱི་རྣམ་འཕེལ། ཀུན་སྦྱོར་ཡལ་ག་འགོག་པ་དང་། སྡུད་དགན་ནི་སྤེལ་བ་དང་། ཁ་སྦྱོར་འདི་དག་དྲུག་རྣམས་ནི། སྔགས་བརྗོད་རྣམས་ཀྱི་བཀོད་ལུགས་དྲུག །ཆོ་ག་ཉམས་པས་མི་འགྲུབ་ཅིང་། འདོད་པའི་ཉོན་མོངས་འབའ་ཞིག་སྟེ། རྨོངས་པས་བྱེ་བ་བརྒྱད་ཡང་ནི། སྔགས་རྣམས་འདི་ནི་འགྲུབ་པའི་འགྱུར། ཀུན་སྦྱོར་ཞི་བར་ཤེས་པ་བྱ། ཡལ་ག་དབང་དུ་བསྡུ་བར་འདོད། །འགོག་པ་གསོད་པར་རབ་ཏུ་བརྗོད། །བསྡུད་བས་སྔང་བ་དྲན་པར་འགྱུར། །སྤེལ་བ་རྒྱས་པ་ཤེས་པར་བྱ། །ཁ་སྦྱོར་ལས་ནི་ཐམས་ཅད་དུའོ། །ཞེས་གསུངས་
པའི་དོན་ནི། ཞིབ་ལ་ཀུན་སྦྱོར་ཏེ་དང་པོར་བསྒྲུབ་བྱའི་མིང་དང་ཐ་མ་སྤེལ་སྔགས་བཏགས་པ་སྟེ། དཔེར་ན་ཆེ་གེ་མོ་ཞེས་བྱ་བའི་སྡིག་པ་སོགས་ཤནྟིཾ་ཀུ་རུ་ཨོཾ། ཞེས་པ་ལྟ་བུའོ། དབང་སྡུད་ལ་ཡལ་ག་ནི་དང་པོར་སྔགས་དང་མིན་ཐ་མར་བྱས་པ་སྟེ། ཧོ་ཆེ་གེ་མོ་ཝ་ཤཾ་ཀུ་རུ་ཞེས་བ་ལྟ་བུའོ། གསོད་པ་ལ་འགོག་པ་ནི། སྔགས་ཀྱི་ཡི་གེའི་བར་བར་དུ་མིང་གི་ཡི་གེ་བཀོད་པ་སྟེ། ཧཱུྃ་ཆེ། ཕཊ་གེ། ཧཱུྃ་མོ། ཕ་མར་ཕཊ། ཞེས་པ་ལྟ་བུའོ། སྔང་པའམ་དབྱེ་བ་ལ་སྡུད་པ་ནི། མིང་གི་ཡི་གེའི་བར་བར་དུ་སྔགས་ཀྱི་ཡི་གེ་སྤེལ་བ་སྟེ། ཆེ་ཧཱུྃ། གེ་ཕཊ། མོ་ཧཱུྃ། ཞེས་ཕཊ། པ་ཧཱུྃ། བཾ་དྭེ། ཤ་ཡ་ཀུ་རུ་ཕཊ། ཅེས་པ་ལྟ་བུའོ། རྒྱས་པ་ལ་སྤེལ་བ་ནི། དང་པོར་སྔགས། དེ་ནས་མིང་། དབུས་སུ་སྔགས། ཐ་མར་ཡང་སྔགས་ཏེ། དཔེར་ན། ཝ་ཥྚ་ཊ་ཆེ་གེ་མོ་པུ་ཥྚིཾ་ཀུ་རུ་ཝ་ཥ་ཊ་པུཥྚིཾ་ཀུ་རུ་ཝ་ཥྚ། ཞེས་པ་ལྟ་བུའོ། ཁ་སྦྱོར་ཞེས་པའི་མིང་སྤེལ་བྱེད་ཚུལ་འདི་ནི་ལས་གང་བསྒྲུབ་བྱང་ཐམས་ཅད་ལ་འདི་ལྟར་བྱར་རུང་ལ། དེ་ཡང་ཐོག་མཐའ་གཉིས་སུ་སྔགས་པར་དུ་མིང་བཅུག་པ་སྟེ། ནམཿཆེ་གེ་མོ་ཤནྟི་ཀུ་རུ་ནམཿ ཞེས་པ་ལྟ་བུ་སྟེ། གོང་དུ་ལས་སོ་སོའི་སྤེལ་ཚིག་སྦྱོར་ཚུལ་རྒྱས་པར་བཤད་པ་ཐམས་ཅད་ཁ་སྦྱོར་འདི་ཉིད་ཡིན་ནོ། དགུ་བས་འཁོར་གནས་འཁོར་གྱི་ཁྱད་པར་ལེགས་པར་མ་བྲིས་པའི་ཉེས་དམིགས་དང་བཅས་པ་ལ་གཉིས་ལས། དང་པོ་འཁོར་ལོ་གཉིས་ཀྱི་འབྲི་ཚུལ་གྱི་ཁྱད་པར་ནི། ཞི་རྒྱས་དབང་དང་དགུག་པ་ལ། ས་སྐོར་རིམ་བཞིན་བཀོད་བྱས་ཏེ། གནས་སྐོར་དག་ནི་རིམ་ལས་བཟློག བསད་བསྐྲད་དབྱེ་དང་མནན་པ་ལ། ས་སྐོང་རིམ་ལས་བཟློག་པ་དང་། གནམ་སྐོར་དག་
ནི་རིམ་བཞིན་བྲི། ཞེས་གསུངས་ཏེ། ཞི་རྒྱས་དབང་དགུག་རྣམས་ལ་འཁོར་ལོ་འོག་མས་འཁོར་རིམ་བཞིན་དུ་གཡས་སྐོར་དུ་བྲི་སྟེ། དེ་ཡང་ཞི་བ་ལ་ཐོག་མར་དབུས་ཀྱི་ཀྵེ་བ་ཤར་ལ་བསྟན་བྲིས། དེ་ནས་ཤར་གྱི་རེ་འུ་མིག་ཡའི་གོ་སར་སྔགས་སྤེལ་ཚིག་དང་བཅས་པ་བྲི། དེ་ནས་ལྷོའི་མ། དེ་ནས་ནུབ་ཡི་མེ། དེ་ནས་བྱང་གི་ད། དེ་ནས་རེ་མིག་བཅུ་གཉིས་པའི་ཤར་གྱི་རེ་མིག་དབུས་མ་པ་འབྲི་ཡ་དེར་སྔགས་སྤེལ་ཚིག་དང་བཅས་པ་བྲི། དེ་ནས་གཡས་སྐོར་ལ་ཙྪ་འབྲི། དེ་ནས་ནི་འབིས་ར་ནིའི་དོད་ལ་སྔགས་སྤེལ་ཚིག་དང་བཅས་པ་འབྲི། དེ་ནས་རཱ། དེ་ནས་ཛཱཿ དེ་ནས་ས། དེ་ནས་ངོ་། དེ་ནས་ཎ། དེ་ནས་ཡོ། དེ་ནས་ནིའི་གོ་སར་ནིའི་དོད་ལ་སྔགས་སྤེལ་ཚིག་དང་བཅས་པ། དེ་ནས་ར་བྲི། དེ་ནས་རེའུ་མིག་བཅུ་དྲུག་པ་ལ། སྔགས་བཏུ་བའི་ཚེ་ཀྵེ་འབྲི་བའི་རེའུ་མིག་དེ་རེའུ་མིག་ཤར་མ་ཡིན་པས་དེའི་ཐད་ཀྱི་རེའུ་མིག་དབས་མ་ལ་ཨོ། དེ་ནས་ག་ལས་སྐོར་དུ་རེ་མིག་རེ་རེ་བར་དུ་ངོར་ནས་གོང་དུ་བཤད་ཟིན་པ་ལྟར་བྲི། དེ་ནས་དབུས་ཀྱི་ལེ་ཚེ་དབུ་བའི་ཤར་ལྷོ་ནས་བརྩམས་ཏེ་ཟུར་བཞིའི་སྔགས་སྤེལ་ཚིག་དང་བཅས་པ་བྲི། དེ་ནས་རེ་མིག་བཅུ་དྲུག་པའི་བར་གྱི་སྤེལ་སྔགས་རྣམས་བྲི་ལ། ཞི་བའི་གནམ་འཁོར་ཏེ་འཁོར་ལོ་སྟེང་མ་ལ། དབུས་སུ་ཡི་གེ་ཀྵེ་ཁ་ནུབ་ལ་བལྟས་མགོ་ཤར་ལ་བསྟན་པ་བྲི། ཀྵེ་ཁ་ནུབ་ལ་བལྟས་པའི་དབང་དུ་བྱས་པའི་མདུན་གྱི་རེའུ་མིག་དེ་ནུབ་ཀྱི་རེ་མིག་ཡིན་པས་དེར་སྔགས་སྤེལ་ཚིག་དང་བཅས་པ་བྲི། དེ་ནུབ་ཏུ་བྱས་པའི་ལྷོའི་རེ་མིག་ཏུ་དེ་ནས་མ་ཡིག་བྲི། དེ་ནས་ཤར་དུ་མེ་བྲི། དེ་ནས་བྱང་དུ་བྲི། དེ་ནས་རེ་མིག་བཅུ་གཉིས་
པ་ལ་ཡང་ཀྵེ་ཁ་བལྟས་པའི་ཕྱོགས་ནུབ་ཏུ་བྱས་པའི་ནུབ་ཀྱི་རེ་མིག་དབུས་མར་སྔགས་སྤེལ་ཚིག་དང་བཅས་པ་བྲི། དེ་ནས་རེ་མིག་དེ་ནུབ་ཡིན་པའི་དབང་དུ་བྱས་ནས་དེའི་གཡོན་གྱི་རེ་མིག་ཏུ་རཱ། དེ་ནས་ནིའི་དོད་ལ་སྔགས་སྤེལ་ཚིག་དང་བཅས་པ། དེ་ནས་ཡོ་དེ་ནས་ཎ། དེ་ནས་རུ། དེ་ནས་ཤར་གྱི་རེའུ་མིག་ཏུ་དོ། དེ་ནས་ས། དེ་ནས་ཛཱ། དེ་ནས་རཱ། དེ་ནས་ཡང་ནིའི་འོད་སྔར་ལྟར། དེ་ནས་ཙྪ། དེ་ནས་རེ་མིག་བཅུ་དྲུག་པ་ལ། དབུས་ཀྱི་ཀྵེ་ཁ་བལྟས་པ་ནུབ་ཏུ་བྱས་པའི་ནུས་ཀྱི་རེའུ་མིག་དབུས་མར་ཨོ། དེ་ནས་གཡོན་སྐོར་དུ་རེའུ་མིག་རེ་རེ་བར་དུ་དོར་ནས་ཡི་གེ་བཅུ་པ་བཀོད། དེ་ནས་ནང་གི་མཚམས་བཞི་དང་ཕྱིའི་བར་དུ་རྣམས་སུ་སྔགས་སྤེལ་ཚིག་དང་བཅས་པ་བྲི་བ་སྔར་བཞིན་ནོ། འདི་ལྟར་བྱས་ན་སྟེང་འོག་གི་ཡི་གེ་ཐམས་ཅད་རང་གི་ཐད་དུ་མ་འཆུགས་པར་འགྲིག་འོག་བ་ཡིན་ནོ། དེ་བཞིན་རྒྱས་པ་ལ། ཐོག་མར་དབུས་སུ་ཡི་གེ་མཁ་བྱང་ཡི་ད་ཡིག་ལ་བསྟན་པ་བྲི། དེ་ནས་བྱང་གི་ད་བྲི། དེ་ནས་ཤར་གྱི་ཀྵེ། དེ་ནས་ལྷོར་ཡའི་གོ་སར་སྔགས་སྤེལ་ཚིག་དང་བཅས་པ་བྲི། དེ་ནས་ནུབ་ཀྱི་མེ་བྲི། རེའུ་མིག་བཅུ་གཉིས་པ་ལ། ཐོག་མར་བྱང་གི་དའི་ཐད་ཀྱི་རེ་མིག་ཏུ་ཡོ། དེ་ནས་བྱང་ཤར་གྱི་ནིའི་དོད་ལ་སྔགས་སྤེལ་ཚིག་དང་བཅས་པ། དེ་ནས་རཱ། དེ་ནས་ཤར་གྱི་ཡའི་དོད་ལ་སྤེལ་ཚིག་དང་བཅས་པ། དེ་ནས་ཙྪ། དེ་ནས་ནིའི་དོད་ལ་སྤེལ་སྔགས། དེ་ནས་རཱ། དེ་ནས་ཛཱ་དེ་ནས་ས། དེ་ནས་དོ། དེ་ནས་རུ། དེ་ནས་ཎ། དེ་ནས་རེའུ་མིག་བཅུ་དྲུག་པ་ལ་ཐོག་མར་བྱང་གི་དའི་ཐད་ཀྱི་རེ་མིག་ཏུ་ཨོཾ། དེ་ནས་གཡས་སྐོར་དུ་ཡི་གེ་བཅུ་པ་འགོད་པ་སྔར་བཞིན། དེ་ནས་ནང་གི་ཟུར་བཞི་དང་ཕྱིའི་བར་དུ་དོར་བ་རྣམས་ལ་སྤེལ་སྔགས་འབྲི་
བའང་སྔར་བཞིན་ནོ། དེ་ནི་རྒྱས་པའི་ས་འཁོར་ཡིན་ལ། གནམ་འཁོར་ལ་དབུས་ཀྱི་མ་ཁ་ལྷོར་བསྟན་པ་དང་། ད་ཡིག་ལྷོར་འབྲི་ཞིང་སྤེལ་སྔགས་བྱང་དུ་འབྲི་བ་དང་། རྩིབས་བཅུ་གཉིས་པ་ལ་ལྷོའི་རེ་མིག་དབུས་མར་ཡོ། དེ་ནས་གཡས་སྐོར་དུ་ཎ་དང་། རུ་དང་། དོ་དང་། ས་དང་། ཛཱ་དང་། བྱང་གི་རེ་མིག་དབུས་མར་རཱ་དང་། དེ་ནས་སྤེལ་སྔགས་དང་། ཙྪ་དང་། སྤེལ་སྔགས་དང་། ར་དང་། སྤེལ་སྔགས་ཀྱི་རིམ་པས་དགོད་པར་བྱའོ། དེ་ནས་རེ་མིག་བཅུ་དྲུག་པ་ལ། ཐོག་མར་ལྷོའི་དའི་ཐང་ཀྱི་རེ་མིག་ཏུ་ཨོཾ། དེ་ནས་ཤར་ལྷོར་འཕོས་ཏེ་གཡོན་སྐོར་གྱི་ཡི་གེ་བཅུ་པ་དགོད་ཅིང་། ནང་གི་ཟུར་བཞི་དང་བར་བར་གྱི་སྤེལ་སྔགས་དགོད་པ་སྔར་ལྟར་རོ། དབང་དགུག་ལ། ས་འཁོར་ནི། ཐོག་མར་དབུས་སུ་ཡི་གེ་མེ་ཁ་ནུབ་ལ་བསྟན་པ་བྲི། དེ་ནས་ནུབ་ཏུ་ཡ། དེ་ནས་བྱང་དུ་ད། ཤར་དུ་ཀྵེ། ལྷོར་མ་རིམ་བཞིན་བྲི། དེ་ནས་རེ་མིག་བཅུ་གཉིས་པའི་ནུབ་ཀྱི་ཡའི་ཐད་ཀྱི་རེ་མིག་ཏུ་དོ། དེ་ནས་གཡས་སྐོར་དུ་རིམ་བཞིན་དུ་རུ་དང་། ཎ་དང་། ཡོ་དང་། ནི་དང་། ར་དང་། ཡ་དང་། ཙྪ་དང་། ནི་དང་། རཱ་དང་། ཛཱ་དང་། ས་རྣམས་བྲིའོ། དེ་ནས་རེ་མིག་བཅུ་དྲུག་པ་ལ། ཐོག་མར་ནུབ་ཀྱི་ཡའི་ཐད་ཀྱི་ར་མིག་ཏུ་ཨོཾ། དེ་ནས་ནུབ་བྱང་གི་རེ་མིག་ཏུ་འཕོས་ཏེ་གཡས་སྐོར་ཀྱིས་ཡི་གེ་བཅུ་པ་དགོད། དེ་ནས་ཟུར་བཞི་དང་བར་བར་དུ་སྤེལ་སྔགས་དགོད་དོ། གནམ་འཁོར་ནི། ཐོག་མར་དབུས་སུ་ཡི་གེ་མེ་ཁ་ཤར་བསྟན་བྲི། དེ་ནས་ཤར་དུ་ཡ། བྱང་དུ་ད། ནུབ་དུ་ཀྵེ། ལྷོར་མ། དེ་ནས་རེ་མིག་བཅུ་གཉིས་མ་ལ་ཤར་གྱི་ཡའི་ཐད་དུ་དོ། དེ་ནས་གཡོན་སྐོར་དུ་རུ་དང་
ཎ་དང་། ཡོ་དང་། ནི་དང་། དེ་ནས་ར་དང་། ཡ་དང་། ཙྪ་དང་། ནི་དང་། རཱ་དང་། ཛཱ་དང་། ས་རྣམས་རིམ་པ་བཞིན་དུ་བྲིའོ། དེ་ནས་རེ་མིག་བཅུ་དྲུག་པ་ལ་ཤར་གྱི་ཡའི་ཐར་དུ་ཨོཾ། དེ་ནས་གཡོན་སྐོར་དུ་ཡི་གེ་བཅུ་པ་དགོད་པ་དང་། ནང་གི་ཟུར་དང་ཕྱིའི་བར་བར་དུ་སྤེལ་སྔགས་དགོད་པ་སྔར་བཞིན་ནོ། བསད་པ་ལས་འཁོར་གཡོན་སྐོར་དུ་འབྲི་སྟེ། ཐོག་མར་དབུས་སུ་ཡི་གེ་ཡ་ཁ་ལྷོར་བསྟན། དེ་ནས་ལྷོའི་རེ་མིག་ཏུ་མ། དེ་ནས་ཤར་དུ་ཀྵེ་བྲི་བ་སོགས་དང་། རེ་མིག་བཅུ་གཉིས་པ་ལ་ཐོག་མར་ལྷོའི་མ་ཡིག་གི་ཐད་དུ་རཱ། དེ་ནས་ཤར་ལྷོར་འཕོས་རེ་ཛཱ་འབྲི་བ་སོགས་དང་། རེ་མིག་བཅུ་དྲུག་པ་ལ་ཐོག་མར་ལྷོའི་མ་ཡིག་གི་ཐད་དུ་ཨོཾ། དེ་ནས་རེ་མིག་གཅིག་པོར་ཏེ་ཤར་ལྷོར་ཧྲཱིཿའབྲི་བ་སོགས་གཡོན་སྐོར་དང་། གནམ་འཁོར་ལ་གཡས་སྐོར་དུ་བྱ་སྟེ། ཐོག་མར་དབུས་སུ་ཡ་ཁ་བྱང་བསྟན། དེ་ནས་བྱང་གི་མ། དེ་ནས་ཤར་གྱི་ཀྵེ་འབྲི་བ་སོགས་དང་། རེ་མིག་གཅུ་གཉིས་པ་ལ། ཐོག་མར་བྱང་གི་མའི་ཐད་དུ་རཱ། དེ་ནས་བྱང་ཤར་དུ་འཕོས་ནས་གཡོན་སྐོར་དུ་བྱ་སྟེ། ལྷོའི་དའི་ཐད་དུ་ཡོ་བྲི་བ་སོགས་དང་། དེ་ནས་རེ་མིག་བཅུ་དྲུག་པ་ལ་ཐོག་མར་བྱང་གི་མའི་ཐད་དུ་ཨོཾ། དེ་ནས་ཤར་དུ་འཕོས་ཏེ་གཡས་སྐོར་ལ་ཡི་གེ་བཅུ་པ་དགོད། དེ་ནས་ཟུར་བཞི་དང་བར་གྱི་རེ་མིག་རྣམས་སུ་སྤེལ་སྔགས་དགོང་པ་སྔར་བཞིན་ནོ། བསྐྲད་པ་དང་དབྱེ་བའང་བསད་པ་ཇི་ལྟ་བ་བཞིན་ནོ། མནན་པ། ངག་རེས་པ། ལྒུགས་པ། སྨྱོ་བར་བྱེད་པ་རྣམས་ལས་འཁོར་ལ་དབུས་ཀྱི་མ་ཁ་བྱང་གི་དལ་བསྟན། དེ་ནས་ནུབ་ཀྱི་མེ། ལྷོའི་ཡ། ཤར་གྱི་ཀྵེ། དེ་ནས་རེ་
མིག་བཅུ་གཉིས་པ་ལ། དང་པོར་བྱང་དིག་དའི་ཐད་ནས་བརྩམས་ཏེ་གཡོན་སྐོར། དེ་ནས་རེ་མིག་བཅུ་དྲུག་པ་ལ་བྱང་གི་དའི་ཐད་དུ་ཨོཾ་བྲིས་པ་ནས་མགོ་བརྩམས་ཏེ་གཡོན་སྐོར་དུ་བྲི་ཞིང་། གནམ་འཁོར་ལ་གཡས་སྐོར་དུ་བྲི་བ་དང་། དབུས་ཀྱི་མཁླ་ལྷོར་བསྟན། ད་ལྷོ་དང་ཡ་བྱང་དུ་བྲི་བ་སོགས་སྔར་གྱི་རིགས་སྒྲེལ་ཏེ་བྱའོ། འདི་དག་ལ་མཐའི་མུ་ཁྱུད་གསུམ་དབྱངས་གསལ་བསྐུལ་སྔགས་དང་བཅས་པས་ལ་བྲི་བ་ལྟར་འབྲི་བར་སློབ་དཔོན་མི་བསྐྱོད་པས་བཤད་ཅིང་། གཞན་ཐམས་ཅད་ཀྱིས་ས་ལ་འབྲི་བ་ནི་སྔགས་བཏུ་བའི་ཆེད་ཡིན་པས་སྤོས་པ་ན་དྲི་མི་དགོས་པའི་ལུགས་སུ་མཛད་ལ། རང་ལུགས་ནི་བྲི་གཞི་ལ་ཤོད་ན་བྲིས་ཀྱང་རུང་ལ། མི་ཤོང་བ་སོགས་ཡིན་ན་ངེས་པར་བྲི་དགོས་པ་མིན་ནོ། གཤེད་དམར་གྱི་འཁྲུལ་འཁོར་བྱི་གསལ་བྱེད་ལས་འཁོར་ལོ་ལོ་སྟེང་མ་ལ་མིང་སྤེལ་མི་འབྲི་བར་བཤད་ཀྱང་གཞན་གང་ནས་ཀྱང་མ་བཤད་ཅིང་ཡིད་ཆེས་བར་དཀའོ། སློབ་དཔོན་མི་བསྐྱོད་པས་ཡི་གེ་ཐམས་ཅད་རེ་ཁ་ལ་མ་རེག་པར་བྲི་བར་གསུངས་པ་ལྟར་ངེས་པས་བྱ་དགོས་ལ། སྟེང་འོག་གི་ཡི་གེ་གཅིག་ཐོག་ཏུ་གཅིག་ཐོག་ཏུ་གཅིག་ཡེ་མ་འཆུགས་པར་འོང་བ་གལ་ཆེའོ། བོད་ཀྱི་བླ་མ་སྔ་མ་དག་དྲག་པོའི་འཁོར་ལོ་རྣམས་ལ་རང་གི་དྲི་མ་སོགས་ཡེ་མ་འདྲེས་པ་དང་། རང་གི་ལུས་ཀྱི་གྲིབ་མ་འང་མ་ཕོག་པ་དགོས་སོ་ཞེས་གསུང་ལ། དགྲ་ནག་གི་འགྲེལ་པར་གྲུབ་ཆེན་དཔལ་འཛིན་གྱིས་བསད་པའི་སྐབས་སུ་རང་གྲག་ཅེས་པ་སྲིན་ལགས་གིའོ། ཞེས་དང་། བསྐྲད་པའི་སྐབས་སུ། རང་ཁྲག་ཅེས་པ་ནི་རང་གི་ལག་པ་གཡོན་པའི་མཛུབ་མོའི་ཁག་གོ །ཤེས་བཤད་དོ།
ཞེས་གསུངས་ཤིང་། བྱང་ཆུབ་སྙིང་པོས་བསད་པའི་འཁྲུལ་འཁོར་གྱི་སྣག་ཚལ་རང་གི་སྡིགས་མཛུབ་ཀྱི་ཁྲག་ཅེས་བཤད། གཞོན་ནུ་ཟླ་བས་ཀྱང་དགྲ་ནག་གི་འགྲེལ་བར་བསད་པའི་སྐབས་སུ་མཛུབ་མོ་རང་གིའོ་ཞེས་གསུངས་སོ། གཉིས་པ་ལེགས་པར་མ་བྲིས་པའི་ཉེས་དམིགས་ནི། འདི་ལྟར་ལེགས་པར་མ་བྲིས་ན། འཁོར་ལོ་རང་ལ་བཟློག་པར་འགྱུར། དེ་བས་ནན་ཏན་བསྐྱེད་དེ་བྱ། ཞེས་གསུངས་ཏེ། འདི་ལྟར་གོང་དུ་རྒྱས་པར་བཤད་པ་ལྟར་བློས་ཞིབ་ཏུ་ངེས་པར་བྱ་སྟེ་ལེགས་པར་བྲི་དགོས་ཀྱི། ཅུང་ཟད་ཅིག་འཆུགས་ན་ཡང་དྲག་པོའི་འཁོར་ལོ་ཡིན་ན་རང་ལ་བཟློག་པར་འགྱུར་ལ། ཞི་རྒྱས་སོགས་ཡིན་ན་འང་འབྲས་བུ་ལོག་པར་འབྱིན་པར་འགྱུར་རོ། དེ་བས་ན་ནན་ཏན་བསྐྱེད་ལ་ཅུང་ཟད་ཀྱང་མ་འཆུགས་ཤིང་མ་ནོར་པར་བྱའོ། སྤེལ་ཚིག་སྦྱོར་བའི་ཚེ་འང་བོད་ཀྱི་སྔགས་གསར་རྙིང་མང་པོས་ཞི་བ་ཤནྟིཾ་ཀུ་རུ་སྭཱ་ཧཱ། ཞེས་ཟེར་བ་ལྟ་བུ་བྱས་ན། ཤནྟིཾ་ཞེས་པའང་བོད་སྐད་དུ་ཞི་བ་ཞེས་པ་ཡིན་པས། ཞི་བ་ཞི་བར་མཛོད། ཅེས་པར་འགྱུར་ལ། ཞི་བ་ཞི་ན་མ་ཞི་དགོས་པས་མ་ཞི་བར་མཛོད། ཅེས་པར་འགྱུར་བ་ལྟ་བ་དང་། ལྷས་བྱིན་གྱིས་མཆོད་སྦྱིན་བསད་པར་འདོད་ནས་འཁྲུལ་འཁོར་བྱེད་པ་ལ། མཆོད་སྤྱིན་དགྲ་བོ་མར་ཡ་ཕཊ་ཅེས་བྲིས་ན། མཆོད་སྦྱིན་དགྲ་བོ་ལྷས་བྱིན་ཡིན་པས་ལྷས་བྱིན་རང་ཉིད་གསོད། ཅེས་པར་འགྱུར་པ་ལྟ་བུ་སོགས་ངེས་པར་བྱས་ནས་མ་ནོར་བར་བྱ་བ་ཤིན་ཏུ་གཅེས་སོ། བཅུ་པ་སའི་འཁོར་ལོ་བསྟིམ་ཞིང་བདེན་སྟོབས་བརྗོད་ནས་རབ་ཏུ་གནས་པར་བྱ་བ་ནི། རས་ཀྱི་འཁོར་ལོ་ལེགས་ཟིན་ནས། མཎྜལ་ལ་གནས་འཁོར་ལོ་
དེ། རས་ཀྱི་འཁོར་ལོང་སྤྱན་དྲངས་ཏེ། རྡོརྗེ་བསྡུ་བའི་སྦྱོར་བ་ཡིས། མཎྜལ་འཁོར་ལོ་མཆོད་ནས་ནི། བདེན་པའི་བྱིན་བརླབས་དམིགས་པར་བྱ། ཞེས་གསུངས་ཏེ། དེ་ལྟར་རས་ཀྱི་འཁོར་ལོ་ལེགས་པར་བྲིས་ཟིན་ནས། མཎྜལ་སའི་དཀྱིལ་འཁོར་ལ་གནས་པའི་འཁོར་ལོ་དེ་རས་ཀྱི་འཁོར་ལོར་སྤྱན་དྲད་པར་བྱ་སྟེ། ཨོཾ་བཛྲ་ས་མ་ཡ་ཛཿཞེས་པའི་བསྔགས་བརྗོད་ཅིང་། རྡོ་རྗེ་བསྡུ་བའི་ཕྱགརྒྱ་བྱས་ནས་ས་ལ་བྲིས་པའི་འཁོར་ལོ་དག་ལ་བྲིས་པ་ལ་ཐིམ་པར་བསམས་ནས། ཛཿཧཱུྃ་བཾ་ཧོཿ ཞེས་བརྗོད་པར་བྱའོ། དེ་ནས་རབ་གནས་དངོས་གཞི་ནི། སློབ་དཔོན་མི་བསྐྱོད་པའི་རྟོག་བདུན་གྱི་འགྲེལ་པར། ཡི་གེ་བཅུ་བདུན་པོ་དེ་དག་ལྷ་བཅུ་བདུན་གྱི་རང་བཞན་དུ་རྣམ་པར་བསྒོམས་ལ། རང་གི་སྙིང་གའི་ས་བོན་གྱི་འོད་ཟེར་རྣམས་ཀྱིས་གཤིན་རྗེ་གཤེད་ལྷ་བཅུ་བདུན་གྱི་བདག་ཉིད་ཀྱི་ཡེ་ཤེས་ཀྱི་དཀྱིལ་འཁོར་སྤྱན་དྲངས་ལ་མདུན་དུ་རྣམ་པར་བཞུགས་སུ་གསོལ་ལ་མཆོད་ཡོན་ལ་སོགས་པ་ཕུལ་ནས་སྔགས་བྲིས་པའི་འཁོར་ལོ་ལ་ཐོ་བ་ལ་སོགས་པས་སྦྱོར་བས་བཅུག དེ་ནས་ལས་དང་རྗེས་སུ་མཐུན་པར་གསུངས་པའི་རིམ་པས་བདག་ཉིད་རྣམ་པར་བསྒོམས་ལ། སྔགས་ཡོངས་སུ་བཟླས་ཏེ་ལས་ཡོངས་སུ་བསྒྲུབ་པར་བྱའོ། ཞེས་གསུངས་པ་ལྟར་བྱ་སྟེ། དེ་ཡང་ཐོག་མར་འཁོར་ལོ་བསངས་སྦྱངས་ནས་འཁོར་ལོའི་ཡི་གེ་བཅུ་བདུན་པོ་དེ་ལྷ་བཅུ་གསུམ་ཐོད་པ་བཞི་དང་བཅུ་བདུན་དུ་བསྐྱེད་པ་སྒྲུབ་ཐབས་ལྟར་བྱ་སྟེ། ཐོད་པ་བཞི་ཡང་རྡོ་རྗེ་མ་བཞིའི་ངོ་བོ་ཡིན་པས་ལྷ་བཅུ་བདུན་ཞེས་གསུངས་སོ། ཕྱིའི་
དེ་མིག་བཅུ་དྲུག་ལྕགས་མཐར་སྒོ་མེད་བཅུ་དྲུག་ཏུ་དངོས་སུ་མོས་པ་བྱ་ཞིང་། ཡི་གེ་བཅུ་བོ་རྣམས་འཇིགས་བྱེད་ཕྱག་གཉིས་པ་མ་ཧེ་གནས་པས་བསྐྱེད་དེ་སྐུ་མདོག་ནི་ལས་དང་རྗེས་སུ་མཐུན་པའོ། དེ་ནས་ལྟ་ཐམས་ཅད་ཀྱི་སྐྱེ་མཆེད་སྐུ་གསུང་ཐུགས་བྱིན་གྱིས་བརླབས། དེ་ནས་རང་གི་སྙིང་གའི་ཧཱུྃ་གི་འོད་ཟེར་ཀྱིས་བསྒོམས་པ་དང་འདྲ་བའི་ཡེ་ཤེས་པ་རྣམས་སྤྱན་དྲངས། མཆོད་ཡོང་ལ་སོགས་པས་མཆོད། མུ་དག་ར་ཛཿསོགས་ཕྱག་རྒྱ་དང་བཅས་པས་དགུག་གཞུག་བཅིངས་མཉེས་པར་བྱ། དེ་ནས་དབང་ལྷ་སྤྱན་དྲངས་མཆོད་གསོལ་བ་བཏབ་པས་དབང་བསྐུར་རིགས་བདག་གིས་རྒྱས་གདབ། དེ་ནས་ནང་གི་ཟུར་བཞི་དང་རེ་མིག་བཅུ་དྲུག་པའི་བར་བར་གྱི་རེ་མིག་གི་མིང་ཡིག་རྣམས་ཡོངས་སུ་གྱུར་པ་ལས་བསྒྲུབ་བྱ་དེ་དངོས་སུ་བསྐྱེད། དེ་ནས་དྲག་ལས་གང་ཡིན་ཀྱང་བསྒྲུབ་བྱ་ལྷ་དང་དབྲལ་བ་དང་ཁ་སྦྱོང་དབྱེ་བ་འོག་ནས་འཆད་པ་ལྟར་རྒྱས་པར་བྱེད་ལ། དེ་ནས་བསྒྲུབ་བྱ་དགུག་པའི་དམིགས་པ་འོག་ནས་འཆད་པ་ལྟར་བྱ་སྟེ། བསྒྲུབ་བྱ་བསྐྱེད་པ་དེ་དང་དེ་ལ་ཐིམ་པར་བསྒོམས་ནས་བསྒྲུབ་བྱ་དངོས་ཡིན་པའི་ངེས་པ་བརྟན་པོ་བྱ། ཞི་བ་རྒྱས་པ་དབང་དགུག་རྣམས་ལ་ཁ་སྦྱོར་དབྱེ་བ་མི་བྱེད་པར་བསྒྲུབ་བྱ་དགུག་པའི་དམིགས་པ་རང་རང་གི་སྐབས་སུ་འོག་ནས་འཆད་པ་ལྟར་བྱས་ལ་བསྟིམ་ནས་དོན་དུ་ཞེན་པ་ཤུགས་དྲག་པོ་བྱ་སྟེ། བསྒྲུབ་བྱ་དེའི་ཞི་བ་ལ་ཟླ་བའི་དཀྱིལ་འཁོར་ལ་འདུག་པ་དང་། རྒྱས་པ་ལ་ཟླ་བའི་དཀྱིལ་འཁོར་སེར་པོའི་དབུས་སུ་འདུག་པ་དང་། བསད་པ་ལ་རླུང་གི་དཀྱིལ་འཁོར་ནག་པོའི་སྟེང་ན་མེ་གྲུ་གསུམ་རབ་ཏུ་འབར་བའི་དབུས་ན་གཅེར་བུར་གནས་པ་སོགས་ལས་
སོ་སོ་དང་མཐུན་པ་འོག་ཏུ་འཁོར་ལོ་བསྐུལ་བའི་སྐབས་ནས་འབྱུང་བ་ལྟར་བསྒོམ། དེ་ནས་ལྷ་ལ་མཆོད་བསྟོད་བདུད་རྩི་མྱང་བ་གཏོར་མ་རྣམས་བྱ། དེ་ནས་ལྷ་རྣམས་འོད་དུ་ཞུ་བ་ལས་ཡི་གེ་དེ་དང་དེའི་རྣམ་པར་གྱུར་པར་བསྒོམ་པའམ། ལྷ་ཞུ་བ་མ་བྱས་ཀྱང་རུང་ངོ་། དེ་ནས་བདེན་སྟོབས་བརྗོད་པར་བྱ་སྟེ། ལངས་ནས་ལྷ་ལ་ཕྱག་བྱ་སྟེ། དེ་བཞིན་གཤེགས་པའི་བཀའ་བདེན་པར་གྱུར་ཅིག ཅེས་དེ་བཞིན་གཤེགས་པས་གསུངས་པའི་ལས་སྦྱོར་འདི་དང་འདིས་འབྲས་བུ་འདི་དང་འདི་འབྱིན་པའི་ཚུལ་ནི་ཇི་ལྟར་གསུངས་པ་ལྟར་མི་སླུ་བར་བདེན་ངེས་སྙམ་པའི་དད་པ་དང་ངེས་བ་ཤུགས་དྲག་པོས་ལན་གསུམ་བརྗོད་པར་བྱ་ཞིང་། གཞན་ཡང་། ཆོས་ཉིད་བསམ་གྱིས་མི་ཁྱབ་པའི། དོན་ལ་ཐེ་ཚོམ་མེད་པ་ཡི། མཁས་པ་ལ་ནི་དངོས་གྲུབ་ཉེ། ཞེས་འོག་ནས་གསུངས་པ་ལྟར། ཆོས་ཐམས་ཅད་རང་བཞིན་གྱིས་གྲུབ་བ་རྡུལ་ཙམ་མེད་པའི་སྟོང་བ་ཉིད་ལ་ངེས་པ་ཤུགས་དྲག་བསྐྱེད་ནས། དེ་འདྲ་བའི་སྟོང་པ་ཉིད་ཡིན་པའི་རྒྱུ་མཚན་གྱིས་འདི་འདྲ་བའི་ལས་སྦྱོར་རྣམས་ཀྱང་རང་རང་གི་འབྲས་བུ་འབྱིན་པ་ལ་མི་སླུ་བའི་ངེས་པ་བསྒོམ་པ་གལ་ཆེ་སྟེ། རྒྱུད་སྡེ་བཞིའི་ལས་སྦྱོར་ཐམས་ཅད་ཀྱང་བ་བཤད་པ་བཞིན་འགྲུབ་པ་དང་མྱུར་དུ་འགྲུབ་པ་ནི་དེ་ཁོ་ན་ཉིད་རྟོགས་པའི་ལྟ་བས་ཟིན་པ་ལ་རག་ལས་ཤིང་། དེ་སྟོབས་ཆེན་འགྲུབ་པ་མྱུར་ལ་སྟོབས་ཆུང་ན་འགྲུབ་བ་བུལ་བ་སོགས་སུ་རྒྱུད་སྟེ་ཆེན་པོ་རྣམས་ལས་ནན་ཆེ་བར་ཡང་དང་ཡནང་དུ་ལན་དུ་མ་ཞིག་གསུངས་བ་འདི་གོ་བ་གལ་ཆེ་སྟེ་འདི་ཡང་དེ་ལྟར་གོ་དགོས་སོ། འཁོར་ལོ་སྦོབ་བཤད་ཟིན་ཏོ། ད་ནི་འཁོར་
ལོ་སྦ་བ་སོགས་བཤད་པར་བྱ་སྟེ། དེ་ཡང་རྒྱུད་འདིར། ཇི་ལྟར་གསུངས་པའི་ཆོ་ག་བཞིན། འཁོར་ལོ་སྦ་བར་བྱས་ནས་ནི། གསང་སྔགས་བཟླས་པ་བརྩམ་པར་བྱ། ཞེས་པ་ཙམ་ལས་མ་གསུངས་པས། རྟོག་བདུན་གྱི་འགྲེལ་བ་རྣམས་དང་། སློབ་དཔོན་མི་བསྐྱོད་པས་མཛད་པའི་གཤིན་རྗེ་གཤེད་ཀྱི་འཁོར་ལོའི་དོན་རྒྱས་པར་བཤད་པ་ལ་སོགས་བ་རྒྱུད་དང་རྒྱ་གཞུང་དང་བླ་མའི་མན་ངག་བཞན་དུ་བརྗོད་པར་བྱའོ། དེ་ལ་ལས་སོགས་སོ་སོའི་ཁོར་ལོ་སྦ་བ་བསྐུལ་བ་མཇུག་གི་བྱ་རྣམས་ཕྱོགས་རེར་བཤད་པར་བྱ་བ་ལ། རྒྱུད་འདི་དག་ཏུ་ནི་གཙོ་བོར་དྲག་ལས་སྟོན་པས་ཐོག་མར་བསད་པའི་འཁྲུལ་འཁོར་སྦས་ལ་སོགས་པ་གསུམ་བཤད་པར་བྱ་སྟེ། དེ་ཡང་ཐོག་མར་ལིངྒ་བཅའ་བ་ལ། སློབ་དཔོན་ཞི་བའི་ཡེ་ཤེས་ཀྱིས། དུར་ཁྲོད་དང་ལམ་བཞི་མདོ་དང་། ཤིང་གཅིག་དང་། གྲོག་མཁར་གྱིས་དང་། ཆུའི་འགྲམ་གཉིས་ཀྱིས་དང་། མཚན་མ་གཅིག་པ་དང་། རྒྱལ་པོའི་སྒོ་ཁང་གིས་དང་། དགྲ་བོའི་དྲི་ཆེན་དང་དྲི་ཆུ་དང་། དུར་ཁྲོད་ཀྱི་སོལ་བས་དགྲ་བོའི་གཟུགས་བརྙན་སོར་བརྒྱུད་པ་བྱས་པའི་སྙིང་གར་འཁོར་ལོ་གཞུ་གཅེས་བཤད་ཀྱང་། རང་ལུགས་ནི་སློབ་དཔོན་མི་བསྐྱོད་པས་བཤད་པ་ལྟར། དགྲ་བོའི་རྐང་རྗེས་ཀྱིས་ས་དང་། བཤང་གཅི་བྱས་པའི་ས་དང་། ཆུ་འགྲམ་གྱིས་དང་། དུག་དང་ཁྲག་སྣ་ཚོགས་དང་། སྦྲ་ཚིལ་རྣམས་བསྲེག་ནས་དགེ་བོའི་གཟུགས་བརྙན་སོར་བཞི་བ་བྱས་པའི་སྙིང་གར་ཧྲཱིཿཥྚིཿའིའཇུག་ཏུ་ཕཊ་མིང་རུས་ཆེ་གེ་མོ་མ་ར་ཡ་ཕཊ། ཅེས་བ་གྲོགས་སོགས་ལ་དུར་ཁྲག་གིས་བྲིས་བ་གཞུག །དེ་ནས་སྒྲུབ་ཐབས་བསྒོམས་ཏེ་རང་ལྷའི་ང་རྒྱལ་ཤུགས་ཅན་ལ་གནས་པས། མདུན་དུ་
ཡཾ་ལས་རླུང་གི་དཀྱིལ་འཁོར་གྱི་སྟེང་ན་ཟླ་བ་ལ་གནས་པའི་གཤིན་རྗེ་ནག་པོ་རབ་ཏུ་ཁྲོས་པ་ལྕགས་ཀྱུ་དང་ཞགས་པ་ཐོགས་པ་བསྐྱེད། དེ་ལ་ལྟོ་ཕྱོགས་རིམ་པ་བདུན་གྱིས་འོག་ན་གཤིན་རྗེ་བསྒོམས་པ་དང་འདྲ་བ་བཀུག་ལ་བསྟིམ། དེ་ལ་བཀའ་བསྒོ་བའི་བསམ་པས། ཨོཾ་ཀ་ལ་རུ་བ་ཧཱུྃ་ཕཊ་མིང་རུང་ཆེ་གེ་མོ་ཨ་ཀརྵ་ཡ་ཛཿ ཞེས་དྲག་ཏུ་བརྗོད་པས། གཤིན་གེ་སྐད་ཅིག་ལ་ཐོགས་པ་མེད་པར་སོང་སྟེ། བསྒྲུབ་བྱའི་སྙིང་ནས་ལྕགས་གྱུས་ཕུག མགྲིན་པ་ཞགས་པས་བཅིངས་ཏེ། ཡཾ་ལས་རླུང་གི་དཀྱིལ་འཁོར་ནག་པོའི་སྟེང་དུ་རཾ་ལས་བྱུང་བའི་མེ་གྲུ་གསུམ་རབ་ཏུ་འབར་བའི་དབུས་སུ་བཞག་སྟེ། རང་དབང་མེད་པར་ཁྲིད་འོངས་ནས་རང་གི་མདུན་ན་སྐྲག་ཅིང་འདར་བར་འདུག་པར་དམིགས་པ་ཤིན་ཏུ་བརྟན་པོ་བསྒོམས་ལ། དེ་ལ་འོག་ནས་འཆད་པ་ལྟར་ལྷ་དང་དབྲལ་བ་ནན་ཏན་བསྐྱེད་ལ་བྱའོ། དེ་ནས་ཛཿཧཱུྃ་བཾ་ཧོཿབསྒྲུབ་བྱ་ལིངྒ་ལ་ཇ་གུག་གཞུག་བཅིངས་དབྱེར་མེད་པར་བསྒིམ་ལ། ལིངྒ་དེ་བསྒྲུབ་བྱ་དངོས་སུ་མོས་པ་ཤུགས་ཅན་བྱའོ། དེ་ནས་ལིངྒ་དེའི་སྙིང་ག་ལྟེ་བ་གསང་གནས་ལྐོག་མ་སྨིན་མཚམས་ཏེ་གནས་ལྔར་མི་རུས་ཀྱི་ཕུར་པ་བཏབ། ཚིགས་ཐམས་ཅད་ལ་དུག་གི་ཚེར་མ་རྣོན་པོས་བཏབ་ལ་དགང་ངོ་། དེ་ནས་རང་གི་ཐུགས་ཀའི་ས་བོན་ལས་སྤྲོས་པའི་ཁྲོ་བོ་ག་ཤིན་རྗེ་གཤེད་ཕྱག་ན་མཚོན་ཆ་སྣ་ཚོགས་པ་ཐོགས་པ་རྣམས་ཀྱིས་བསྒྲུབ་བྱའི་ལུས་ལ་མཚན་གྱིས་འདེབས་པ་བརྗེག་ཅིང་ཟ་བ་དང་། སྤྲུལ་བའི་གནན་གཟན་སྣ་ཚོགས་པས་ཟ་ཞིང་ཉམ་ཐག་པས་སྐད་ངན་ཙེ་རེརེ་འདུག་པར་བསྒོམས་ལ། སེམས་མ་ཡེངས་པར།
ཨོཾ་ཧྲཱིཿཥྚིཿཝི་ཀྲི་ཏ་ན་ན་ཆེ་གེ་མོ་མར་ཡ་ཧཱུྃ་ཕཊ། ཅེས་མི་མང་ཞིག་བཟླས་པར་བྱ་སྟེ་དེ་ནི་ལིངྒ་བཅའ་བའོ། དེ་ནས་འཁོར་ལོ་སྦ་བ་ནི། གྲོ་ག་འམ་ཤོག་གུ་ལ་ལིངྒ་དཔེ་ཆུང་ལྟར་བྲིས། དེའི་དབྲལ་བར་རུས། སྙིང་གར་མིང་། ལྟེ་བར་ཚ། བརླ་ལ་བླ་དགྲ་བྲིས་པ་ལ། བསྒྲུབ་བྱ་དགུག་པ། ལྷ་དང་དབརླ་བ། ལིངྒ་ལ་བསྟིམ་པ་རྣམས་སྔར་ལྟར་བྱས་ནས་བསྒྲུབ་བྱ་དངོས་སུ་མོས་ཏེ། སྟེང་འོག་གི་འཁོར་ལོ་གཉིས་རེ་མིག་གཅིག་ཐོག་ཏུ་གཅིག་ཡེ་མ་འཆུགས་པར་ཁ་སྦྱར་བའི་དབུས་ཀྱི་ཡཾ་གཉིས་ཀྱི་བར་དུ་སྙིང་ག་འོང་བ་བྱས་ནས་ལིངྒ་དེ་འཁོར་ལོ་གཉིས་ཀྱི་བར་དུ་བཅུག་སྟེ། དེ་ནས་འཁོར་ལོ་གཉིས་སྦྲགས་པ་དེ་ལྟེ་བ་ལུགས་ཡེ་མ་ནོར་བར་མན་ངག་བཞིན་ལྟེ་བ་ནས་རོའི་སྒྲས་འཁོར་ལོ་ཡེ་མི་མཐོང་གི་བར་དུ་རྒྱ་གྲམ་དུ་དཀྲིའོ། དེ་ནས་རབས་ཆད་ཀྱི་ཐོད་པ་འམ། མཛེ་ཐོད་དམ། གྲིར་ཤི་བའི་ཐོད་པ་གང་ཡང་རུང་བ་མཚན་ངན་གཉིས་ཁ་སྦྱར་བའི་རབ་དུ་འཁོར་ལོ་སྟེང་འོག་མ་ནོར་བར་བཅུག་པར་བྱའོ། དེ་ཡང་ཐོད་པ་སྟེང་མའི་ཚངས་བུག་གི་ཐད་ནས་སྨྱུ་གུ་འབྲིང་པོ་ཤོད་པ་ཙམ་གྱིས་བུག་པ་གཅིག་བྱ། ཐོད་པ་སྟེང་མའི་ནང་དུ་མེའི་དཀྱིལ་འཁོར་དམར་པོ་གྲུ་གསུམ་རཾ་གྱིས་མཚན་པ་བྲིས་པའི་དབུས་སུ་ཕཊ་ཆེ་གེ་མོ་མཏ་ཡ་ཕཊ་ཅེས་པ་བྲི། ཐོད་པ་དེའི་རྒྱབ་ཏུ་རི་རབ་ལྷུན་པོ་སེར་པོ་གསེར་གྱི་རི་བདུན་གྱིས་བསྐོར་བ། དེའི་སྟེང་དུ་དབང་ཆེན་གྱིས་དཀྱིལ་འཁོར་སེར་པོ་གྲུ་བཞི་པ། དེའི་དབུས་སུ་རྡོ་རྗེ་རྒྱ་གྲམ་སེར་པོས་མནན་པ་རྣམས་བྲི། ཐོད་པ་འོག་མའི་ནང་དུ་རླུང་གི་དཀྱིལ་འཁོར་ནག་པོ་ཡཾ་གྱིས་མཚན་པའི་དབུས་སུ་ཨོཾ་ཆེ་གེ་མོ་ཨ་བེ་ཤ་ཡ་ཨཿཨཿཞེས་བ་བྲི། ཐོད་པ་འོག་མ་དེའི་རྒྱབ་ཏུ་
རླུང་གི་དཀྱིལ་འཁོར་ནག་པོའི་དབུས་སུ་ཕཊ་ཆེ་གེ་མོ་མ་ར་ཡ་ཕཊ་ཅེས་པ་བྲི། དེ་ནས་ཐོད་པ་གཉིས་ཁ་སྦྱར་ལ་རོ་སྒྲའི་སྐུད་པ་ནག་པོས་བསྔམས་ཏེ། རང་ཁ་ལྷོར་བལྟས་པའི་མདུན་དུ་རོ་སོལ་གྱིས་གྲུ་གསུམ་ནག་པོ་བཅུག་པའི་སྟེགས་བུའི་ཁ་རམ་ཉྫི་ལྟ་བུའི་སྟེང་དུ་བཞག རོ་སྐྲ་སྒྲིལ་བའི་གཟུངས་ཐག་ནང་གི་འཁོར་ལོ་བཅིངས་པའི་སྐུད་པ་ལ་བརྒྱུས་ནས་ཐོད་པ་སྟེང་མའི་བུག་ཕ་ནས་དྲངས་ཏེ་རང་གིས་གཟུང་། སྟེགས་བུའི་ཁར་འདས་པ་དང་འཇིག་རྟེན་པའི་གཏོར་མ་རྣམས་བཤམ། དུག་སྣ་ཁྲག་སྣ་བསྲེས་པའི་རློན་ཐུན་དང་། ཡུངས་ཀར་ཡུངས་ནག་སྐེ་ཚེ་ལྕགས་ཕྱེ་རྡོ་ཕྱེ་སོགས་བསྲེས་པའི་སྐམ་ཐུན་རྣམས་མདུན་དུ་བཞག་ལ། སྔགས་སྤེལ་ཚིག་དང་བཅས་པ་མང་དུ་བཟླས་པས་ཐུན་ལ་བཏབ་ཅིང་དར་བླུན་པར་བྱའོ། དེ་ནས་ཐོད་པའི་བུག་པ་ལ་ཐུན་དུ་བཅུག་ནས། དེའི་ནང་ནས་ཐུན་འཕངས་ཏེ་ཐོད་པ་འོག་མའི་ནང་དུ་ཐུན་གྱིས་འཁོར་ལོ་མ་ནུབ་ཙམ་དུ་དགང་པར་བྱའོ། དེ་ནས་ཐོད་པའི་གའུ་ཁ་སྦྱར་དེ་ཉིད་བྱིན་གྱིས་བརླབས་པར་བྱས་ཏེ། མིག་གི་ཕྱག་རྒྱ་བཅས་ལ། ཧཱུྃ་ཡ་མཱ་ན་ཏ་ཀྲི་ཏ་བཛྲ་དྷ་རྨྨཿཙཀྵ་པྲ་བེ་ཤ་ཡན། ཞེས་བརྗོད་དོ། ཞལ་གྱི་ཕྱག་རྒྱ་བྱས་ལ། ཨོཾ་ཡ་མཱ་ན་ཏ་ཀ་དེ་བ་ཤོ་དྷ་ཡ་ཏྲཾ་པྲ་བེ་ཤ་ཡ་ཕཊ། ཅེས་བརྗོད་དོ། གཙུག་ཏོར་ཀྱི་ཕྱག་རྒྱ་བཅས་ལ། ཨོཾ་ཡ་མཱནྟ་ཀ་བཛྲ་ཧྲཱིཿཞེས་བརྗོད་དོ། མཆེ་བའི་ཕྱག་རྒྱ་བཅས་ལ། ཨོཾ་བཛྲ་གུ་ཧྱ་གུ་ཧ་ལཾ། ཞེས་བརྗོད། དེ་ནས་འཁོར་ལོ་ལ་ཉེར་སྤྱོད་ལྔ་དང་ནང་མཆོད་ཀྱིས་མཆོད་ལ། གདོང་དྲུག་གི་རྒྱུད་ནས་གསུངས་པའི་ཚིག་འདིར་བསྟོད་པར་
བྱ་སྟེ། གདུག་པ་སྐྲག་བྱེད་འཁོར་ལོ་མེ་ལྟར་འབར། དུས་གསུམ་ཁྲོ་རྒྱལ་ཧེ་རུ་ཀ་ཡི་ཐུགས། ལས་རྣམས་ཀུན་བྱེད་ཕྲག་དོག་རྡོ་རྗེ་སྟེ། མ་ལུས་ཚེགས་གཅོད་གསོལ་བ་སྐུ་ཡི་དང་། ཧཱུྃ་དང་ཕཊ་ཀྱི་གདུག་རྩུབ་སྦྱོར་བ་གསུང་། ཀུན་གྱི་རང་བཞིན་བརྗོད་ཀྱི་གཤིན་རྗེ་ཡི། ལྟོར་འཛུད་དེས་ཀྱང་བཀའ་ལས་མི་འདའ་ལ། ཕྱོགས་བཅུར་སྤྲུལ་པས་གནས་ནས་འགུགས་མཛད་པ། མ་ལུས་ཀུན་བྱེད་འཁོར་ལོ་ཆེ་མཆོག་ལ། གཞན་གྱི་དོན་ཕྱིར་དེ་ལ་ཕྱག་འཚལ་ལོ། ཁྱོད་ནི་དཔའ་བོ་མཐུ་ཆེན་ཁྱོད་ཀྱི་བདུད། ང་ཡིས་ལུང་བསྟན་བདུད་རྣམས་མི་བྱེད་ཀྱང་། དམ་ལས་འདའ་ཞིང་ལོག་པ་ཀུན་བསྐྱེད་ལ། ཁྱོད་ཀྱང་དམ་ལས་མ་འདའ་ལས་རྣམས་སྒྲུབས། བདུད་རྩིའི་ཆུ་རྒྱུ་ནང་ལས་འདོད་བསྒྲུབས་ན། ངས་ནི་སྦྱིན་བྱ་བཀའ་ལས་མ་འདའ་ཞིག ཅེས་བསྟོད་ལ། དེ་ནས་རྡོ་ནག་གསུམ་གྱི་སྒྱེད་བུའམ། མཉྫིའི་ཁར་ཐོད་པ་ཁ་སྦྱར་གྱི་འོག་མ་ལ་རྫ་འདམ་རློན་བ་སྲས་མོས་གཡོགས་པ་བཞག་པའི་འོག་ནས་རོ་བསྲེགས་པའི་མགལ་དུམ་ལ་མེ་སྦར་བས་ཐོད་པའི་ནང་དྲོས་པ་ཙམ་དུ་བསྲོའོ། དེ་ནས་འཁོར་ལོ་བསྐུལ་བ་ནི། ཐོག་མར་ལྷ་དང་དབྲལ་བར་བྱ་སྟེ། དེ་ཡང་རང་ལྷའི་རྣལ་འབྱོར་བསྒོམས་ནས་ང་རྒྱལ་བརྟན་པོ་ལ་གནས་པས་གོང་དུ་བཤད་པ་ལྟར་བསྒྲུབ་བྱ་དགུག་པ་ཤུགས་དྲག་ཏུ་ཡང་ཡང་བྱས་ནས་མདུན་ན་དངོས་སོ་འདུག་པའི་མོས་པ་བརྟན་པོ་བྱ། དེ་ནས་བསྒྲུབ་བྱ་དེའི་ལུས་ལ་གནས་པའི་ཁོ་རང་གི་ཡི་དམ་གྱི་དཀྱིལ་འཁོར་དང་མགོན་སྐྱབས་བྱེད་པའི་ཡི་དམ་དང་། འཇིག་རྟེན་ལས་འདས་པའི་སྲུང་
མ་རྣམས་མངོན་སུམ་པ་ལྟ་བུར་ཡོད་པའི་དམིགས་པ་བརྟན་པོ་བྱས་ནས་དེ་དག་ལ་བསྒྲུབ་བྱའི་ཉེས་པ་བསྒྲག་པར་བྱ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་ཆེ་གེ་མོ་འདི་ལ་བསྲུང་ཞིང་སྐྱོབ་པར་བྱེད་པའི་ལྷ་ཡེ་ཤེས་ཀྱི་སྤྱན་དང་ལྡན་པ་རྣམས་གསན་དུ་གསོལ། ཆེ་གེ་མོ་ཞེས་བྱ་བ་འདིས་ཕྱོགས་བཅུའི་སངས་རྒྱས་ཐམས་ཅད་ལ་སྨད་དོ། དཀོན་མཆོག་གསུམ་དང་རྡོ་རྗེ་སློབ་དཔོན་ལ་སྨད་དོ། སངས་རྒྱས་ཀྱི་བསྟན་པ་དང་བསྟན་པ་འཛིན་པའི་གང་ཟག་ལ་གནོད་པ་འདི་དང་འདི་འདྲ་བ་བྱས་སོ། དགེ་འདུན་ཕྱེ་ཞིང་དཀྲུག་པ་དང་དགེ་འདུན་གྱི་དཀོར་འཕྲོག་པ་སོགས་འདི་དང་འདི་བྱས་སོ། སེམས་ཅན་ལ་གནོད་པ་འདི་དང་འདི་ལྟ་བུ་བྱས་སོ། ཁྱད་པར་དུ་ཆོས་བཞིན་སྤྱོད་པཔའི་སྒྲུབ་པ་པོ་བདག་གིས་ཉེས་པ་མ་བྱས་པའི་ཚུལ་འདི་དང་འདི་ལྟ་བུ་ཡིན་ཀྱང་བདག་ལ་གནོད་པ་འདི་དང་འདི་ལྟ་བུ་ཡང་དང་ཡང་དུ་བྱས་སོ། དེས་ན་བསྟན་པ་དང་སྒྲུབ་པ་པོའི་དགྲ་བོ་འདི་ལྟ་བུའི་ལུས་ལ་ཞུགས་པ་དང་མགོན་སྐྱབས་མཛད་པའི་འོས་མ་ལགས་ཤིང་དུས་མ་ལགས་ཀྱིས། འདིའི་སྐྱབས་མ་མཛད་པར་འདི་ཉིད་ཆོམས་ཤིག །ཅེས་ལན་གསུམ་གྱི་བར་དུ་བརྗོད་དོ། དེ་ནས་རང་གི་ཏིང་ངེ་འཛིན་སེམས་དཔའི་འོད་ཟེར་ལྕགས་ཀྱུ་ལྟ་བུས་དེའི་ལུས་ལ་གནས་པ་དང་སྐྱོབ་པའི་ཡེ་ཤེས་པ་རྣམས་སྤྱན་དྲངས་པས། དེའི་ལྷ་ཡེ་ཤེས་པ་ཐམས་ཅད་རྡོ་རྗེ་ཁྲོ་བོ་སྲིན་པོ་ལྟ་བུར་གྱུར་པས། བསྒྲུབ་བྱ་དེའི་ལུས་ལས་སྙིང་དང་རྒྱུ་མ་ལ་སོགས་པ་རྣམས་ཐམས་ཅད་དྲངས་ནས་ཚུལ་བྱོན་ཏེ་ཡེ་ཤེས་པ་དེ་རྣམས་རང་ལ་ཐིམ་པའི་དམིགས་པ་ཡང་ཡང་ཡིད་ཆེས་པ་བརྟན་པོ་བྱུང་
གི་བར་དུ་བྱའོ། དེ་ནས་ལྕགས་ཀྱུའི་ཕྱག་རྒྱ་བཅའ་ཞིང་། ཨོཾ་ཏྲཱིཿཥྚཱིཿཝི་ཀྲི་ཏ་ན་ན་ཆེ་གེ་མོའི་ཀྵ་སམྦུ་ཊ་དིཾ་རཀྵ་མནྟ་དེ་བ་ཏཱནྩ་ཨ་ཀརྵ་ཡ་ཛཿ ཞེས་བརྗོད་དེ། རང་གི་ཐུགས་ཀའི་ས་བོན་ལས་སྤྲོས་པའི་ཁྲོ་བོ་གཤིན་རྗེ་གཤེད་ཞགས་པ་དང་ལྕགས་ཀྱུ་ཐོགས་པ་དཔག་ཏུ་མེད་པས། བསྒྲུབ་བྱ་དེ་ལ་སྔག་པ་མཁན་གཞན་གྱིས་བྱས་པའི་བསྲུང་བ་དང་འཁོར་ལོ་དང་། རིག་སྔགས་དང་། འཇིག་རྟེན་པའི་ལྷ་སྲུང་ཐམས་ཅད་ལྕགས་ཀྱུས་བཏབ་ཅིང་ཞགས་པས་བཅིངས་ཏེ་དྲངས་ནས་བདག་ཉིད་ཀྱི་གཡོན་ལོགས་སུ་བཞག་པའི་དམིགས་པ་བརྟན་པོ་ལན་གསུམ་མམ་མདུན་ནམ་ཉེས་གཅིག་གི་པར་དུ་ཡིད་ཆེས་ཀྱི་བར་དུ་བྱས་ལ། དེ་ནས་རང་གི་ཐུགས་ཀ་ནས་སྤྲོས་པའི་ཁྲོ་བོ་སྟོད་གཤིན་རྗེ་གཤེད། སྨན་མདུང་གི་དབྱིངས་ཅན་གྱི་ཕུར་བུ་མེ་རབ་ཏུ་འབར་བ་དུ་མ་ཕྱུང་སྟེ། བསྲུང་བ་དང་འཁོར་ལོ་དང་། འཇིག་རྟེན་པའི་ལྷ་སྲུང་སོགས་དེ་དག་རེ་རེ་ནས་ཕུར་བུས་བཏབ་སྟེ་གཡོ་འགུལ་མེད་པར་བསམ་ལ། ཨོཾ་གྟ་གྷ་གྷ་ཏ་ཡ་གྟ་ཏ་ཡ། སརྦ་དུཥྚ་ན་ཕཊ་ཕཊ། ཀཱི་ལ་ཡ་ཀཱི་ལ་ཡ། སརྦ་པཱ་པཾ་ཕཊ་ཕཊ། ཧཱུྃ་ཧཱུྃ་ཧཱུྃ། བཛྲ་ཀཱི་ལ་ཡ། བཛྲ་དྷ་ར་ཨཛྙ་པ་ཡ་ཏི། ཆེ་གེ་མོ་རཀྵ་ས་སྥུ་ཏི་རཀྵ་མ་ན་ཏྲ་དེ་བ་ཏཱ་ནྩ་ཀཱི་ལ་ཡ་ཀཱི་ལ་ཡ་ཧཱུྃ་ཧཱུྃ་ཕཊ། ཞེས་ལན་མང་དུ་བརྗོད་ཅིང་། རང་གི་ཐུགས་ཀ་ནས་སྤྲོས་པའི་ཁྲོ་བོ་གཤིན་རྗེ་གཤེད་ཕྱག་གཡས་བ་རྡོ་རྗེ་ཐོ་བ་འཛིན་པ་རྣམས་ཀྱིས་གཡོན་པས་ཕུང་བུ་བཙུགས་པ་གདུང་བར་བསམ་མོ། གྲུབ་ཆེན་དཔལ་འཛིན་གྱིས། བསྲུང་བ་སོགས་དེ་དག་རང་ཉིད་ཡབ་ཡུམ་མཉམ་པར་སྦྱར་བའི་ཡུམ་གྱིས་པདྨར་བཅུག་སྟེ། སྙོམས་པར་འཇུག་ཅིང་ཕུར་གདབ་བྱ་བར་བཤད་དོ། དེ་ནས་བསྒྲུབ་བྱ་བཀུག་པ་མདུན་ན་འདུག་པ་དེ་འཁོར་ལོའི་བར་གྱིས་ལིངྒ་དང་མདུན་གྱི་
སྤྲ་ཚིལ་སོགས་ཀྱི་ལིངྒ་ལ་བསྟིམ་ནས་བསྒྲུབ་བྱ་དངོས་སུ་མོས་པ་བྱའོ། སྐབས་འདིར་སྤྲ་ཚིལ་གྱི་ལིངྒའི་བཤང་ལམ་ནས་ལྕགས་ཀྱི་གསང་ཤིང་བཙུགས་པ་རང་གི་ལག་པ་གཡས་རས་ལ་སོགས་པས་དུ་བ་མི་འཕོག་པར་ལེགས་པར་དྲིལ་ཏེ་བཟུང་ནས། རོ་བསྲེགས་པའི་མགལ་དུ་མ་ལ་སྦར་མའི་མེ་ལ་ཁྱི་ལུད་གུ་གུལ་ནག་པོ་ཡུགས་མོའི་དོར་རྟ་བཤན་པའི་འབོབ་པའི་དུམ་བུ་མུ་ཟི་ནག་པོ། ཟ་འོག་དུམ་བུ་རྣམས་བསྲེགས་པའི་དུད་པ་ལ་ཡུན་རིང་དུ་འདུག་པར་བྱ་སྟེ། ལིངྒ་བསྒྲུབ་བྱ་དངོས་སུ་མོས་ནས་དེ་ལྟར་བྱས་ན། ལྷ་དང་དབྲལ་བའི་མན་ངག་སྟེ། དེ་ཡང་རང་གི་སྒྲུབ་ཁང་དངོས་བཞི་མ་ཡིན་པའི་སྒོ་ཁང་ལྟ་བུ་ལ་སོགས་པར་བྱ་དགོས་སོ། དེའི་ཚེ་དུ་བ་རང་གི་ལུས་དང་སྣ་བུག་ལ་མ་འཕོག་པ་གལ་ཆེའོ། དེ་ནས་འཁོར་ལོའི་དབུས་ཀྱི་ཡི་གེ་བཅུ་བདུན་པོ་ལྷ་བཅུ་མདུན་དུ་བསྐྱེད། ཕྱིའི་རེ་མིག་བཅུ་དྲུག་གཤིན་རྗེའི་གྲོང་ཁྱེར་དངོས་སུ་མོས་པ་བྱ་ཞིང་དེ་དག་ཏུ་འཇིགས་བྱེད་ཕྱག་གཉིས་པ་རེ་དང་། དེ་དག་གི་མདུན་དུ་ལས་ཀྱི་གཤིན་རྗེ་སྲོག་ལ་བརྡམ་པ་རེ་རེ་བསྒོམ་ལ། དེ་དག་ལ་བསྒོམས་པ་དང་འདྲ་བའི་ཡེ་ཤེས་པ་རྣམས་སྤྱན་དྲངས་ནས་ལས་དང་ཡེ་ཤེས་ཀྱི་གཤིན་རྗེ་རང་རང་ལ་བསྟིམ། དབང་བསྐུར་རྒྱས་གདབ་བྱ། བསྒྲུབ་བྱའི་མིང་ཡིག་ཡོད་པ་ཐམས་ཅད་དུ་བསྒྲུབ་བྱ་དེ་རླུང་གི་དཀྱིལ་འཁོར་ནག་པོའི་སྟེང་ན་མེ་གྲུ་གསུམ་རབ་ཏུ་འབར་བའི་དབུས་སུ། གཅེར་བུ་ལྷ་དང་བྲལ་བ་རིང་ཅིང་མདངས་མེད་ལ་སྒྲ་ལྷུག་པར་འདུག་པ། ཡན་ལག་ཐམས་ཅད་གནམ་ལྕགས་འབར་བའི་ཐག་པས་བཅིངས་པ། རྨ་དང་ཤུ་བའི་ཕྲེང་བས་བརྒྱུས་པ། ཉམ་ཐག་ཅིང་འདར་ཡེད་ཡེད་
པར་བསམ། བདག་དང་འཁོར་ལོའི་ནང་གི་གཤིན་རྗེ་གཤེད་རྣམས་ལས་སྤྲོས་པའི་ཁྲོ་བོའི་སྲིན་པོའི་རྣམ་པ་ལྟ་བུ་ཕྱག་ན་མཚོན་ཆ་སྣ་ཚོགས་ཐོགས་པ་རྣམས་དང་། ལས་ཀྱི་གཤིན་རྗེ་འཁོར་དང་བཅས་པས་བསྒྲུབ་བྱ་གསོད་ཅིང་པགས་པ་བཤུབ་དང་། རྒྱུ་མ་དང་དོན་སྙིང་འདྲེན་པ་དང་། མིང་དང་ལྕེ་འབྲུ་ཞིང་ཡང་ལག་གཅོད་པ་སོགས་སྣ་ཚོགས་བ་བྱེད་ཅིང་། ཚར་གཅོད་པའི་སྒྲ་དག་པོ་འཇིག་སུ་རུང་བ་རྒྱུད་མི་འཆད་པ་སྒྲོག་པར་བསམ་ལ། སེམས་ཡེམ་ཡེངས་པར་རྩེ་གཅིག་ཏུ་དམགིས་པ་བསྒྲིམས་ཏེ། ལག་པ་གཡོན་པས་ཐོད་པའི་བུག་པ་ནས་དྲངས་པའི་སྐྲའི་གཟུངས་ཐག་ནག་པོ་གཟུང་། གཡས་པས་དུང་ཆེན་གྱི་ཕྲེང་བ་གཟུང་ལ། ཨོཾ་ཧྲཱིཿཥྚཱིཿཝི་གྲི་ཏ་ན་ན་ཧཱུྃ་ཕཊ། ཆེ་གེ་མོ་མ་ར་ཡ་ཧཱུྃ་ཕཊ། ཅེས་བཟླས་པ་དྲག་ཏུ་བྱ་ལ། ཁྱད་པར་ཉིད་ཕྱེད་མཚན་ཕྱེད་བསྒྲིམས་ཏེ་བྱ་ཞིང་། རྨི་ལམ་དང་ཉམས་སྣང་སོགས་རང་གི་ཉམས་ཚོད་དང་སྤྱང་ནས་ཞག་བདུན་ལ་སོགས་པ་བྱའོ། དེའི་ཚེ་བསྒྲུབ་བྱ་དངོས་སམ་སེམས་ཅན་གཞན་གྱི་རྣམ་པ་ཐོད་པ་ཁ་སྦྱོར་གྱི་ནང་དུ་འདུག་པ་དང་ཞུགས་སོང་བའི་རྨི་ལམ་དན་ཉམས་སྣང་འགའ་རེ་བྱུང་ན་ཐོད་པའི་བུག་པ་སྦྲ་ཆིལ་ལམ་ལ་ཆས་དགག་པར་བྱ་སྟེ། འོན་ཀྱང་གཟུངས་ཐག་སྔར་ལྷར་འཇོག་གོ། དེ་ལྟར་བསྒྲུབ་བྱ་དགུག་པ་ལྷ་དང་དབྲལ་བ། ལིངྒ་ལ་བསྟིམ་པ། འཁོར་ལོའི་བསྐྱེད་ཆོག་རྣམས་ཞག་རེ་ལ་ཐུན་བཞིར་བྱ་ཞིང་། སྒྲུབ་གྲོགས་དུ་ཡོད་ཀྱིས་ཀྱང་དེ་དག་རང་གིས་བྱེད་པ་ཇི་ལྟ་བ་བཞིན་དུ་བྱ་སྟེ། གཟུངས་ཐག་ནས་ཀྱང་ཐམས་ཅད་ཀྱིས་འཛིན་ནོ། དེ་ནས་ཉི་ཤུ་དགུ་དང་གཟའ་སྐོར་ཤིན་ཏུ་ངན་པ་འཛོམ་བ་ལ་དངོས་གཞི་ཡོང་པ་བྱས་ལ། དེའི་གོང་གི་ཉི་ཤུ་དྲུག་ནས། བདག་དང་འཁོར་ལོའི་ནང་གི་ལྷ་
ལས་འོད་ཟེར་དུག་གི་མེ་ལྕེ་ལྟ་བུ་དམར་ནག་འཕྲོས་པས་བསྒྲུབ་བྱའི་ལུས་མེས་བསྲེགས། རྣམ་ཤེས་སྙིང་ག་ན་ཨ་ཐུང་གི་རྣམ་པ་མར་མེ་ལྟ་བུ་ཡོད་པ་དེ་ཆུས་བསད་པ་བཞིན་ང་ཐུམས་ཐུམས་བསད་པར་བསམ་ལ། ཨོཾ་ཡ་མ་རཱ་ཛཱས་དོ་མེ་ཡ་ཆེ་གེ་མོ་བྷ་མ་ཡ་ཀུ་རུ་ཧཱུྃ་ཕཊ། ཅེས་པར་མཆད་པར་ཁྲི་ཕྲག་གཅིག་བཟླས་སོ། དེའི་དུས་སུ་ལས་གཤིན་གྱི་འཁོར་ཡ་བ་ཏི་དང་། ཕྱ་སངས་དང་། ལུ་གུ་རྒྱུས་མ་དང་། གཤིན་རྗེ་འབེབས་མ་རྣམས་ནི་བསྒྲུབ་བྱ་མགོ་འཁོར་དུ་འཇུག་པའི་ལས་ལ་ཤིས་པས། རང་གི་སྒྲུབ་གྲོགས་མཆོག་གིས་དེ་དག་སྒོས་སུ་མཆོད་གཏོར་དང་བསྐུལ་བ་དང་གཉེར་གཏང་དྲག་ཏུ་ཡང་ཡང་བྱའོ། ཉི་ཤུ་བདུན་ལ། ཡ་མེ་དོ་རུ་ཎ་ཡོ་ད་ཡ་ཆེ་གེ་མོ་རཀྵ་ཚ་དྷཱ་པ་ཡ་ཧཱུྃ་ཕཊ། ཅེས་བར་མ་ཆད་པར་ཁྲི་ཕྲག་གཅིག་བཟླས་སོ། དེའི་དུས་སུ་གཤིན་རྗེ་ཏེལ་པ་དང་། ཆོས་ཀྱི་རྒྱལ་པོ་དང་། གཤིན་གེ་ལྕགས་ཀྱུ་མ་དང་། གཤིན་རྗེ་ཞགས་པ་མ་རྣམས་ནི་བསྒྲུབ་བྱ་ཁྲག་སྐྱུགས་པའི་ལས་ཤིས་པས། སྒྲུབ་གྲོགས་མཆོག་གི་དེ་དག་སྒོས་སུ་མཆོད་གཏོར་དང་གཉེར་གཏད་དྲག་ཏུ་བྱའོ། དེ་ནས་ཉི་ཤུ་བརྒྱད་ལ། ཡད་ཡོ་ནི་ར་ཡ་ཀྵེ་ཡ་ཆེ་གེ་མོ་མུ་ཙ་ཏེ་ཡ་ཧཱུྃ་ཧཱུྃ་ཕཊ། ཅེས་པར་མཆད་པར་ཁྲི་ཕྲག་གཅིག་བཟླས་སོ། དེའི་དུས་སུ་ལས་གཤིན་གྱི་འཁོར་གླང་མགོ་ཅན་དང་། རྨིག་པ་དང་། གཤིན་རྗེ་ཕོ་ཉ་མོ་དང་། གཤིན་རྗེ་མཆེ་བ་མ་རྣམས་ནི་བསྒྲུབ་བྱ་སྨྱོ་བར་བྱེད་པའི་ལས་ལ་ཤིས་པས། སྒྲུབ་གྲོགས་མཆོག་གིས་དེ་དག་ལ་སྒོས་སུ་མཆོད་གཏོར་དང་གཉེར་གཏད་དྲག་ཏུ་བྱའོ། དེ་ནས་ཉི་ཤུ་དགུ་ལ། ཡཀྵེ་ཡ་ཙྪ་ནི་རཱ་མ་ཡ་ཆེ་གེ་མོ་མ་ར་ཡ་ཧཱུྃ་ཕཊ། ཅེས་པར་མ་ཆད་པར་ཁྲི་
ཕྲག་གཅིག་བཟླས་སོ། དེའི་དུས་སུ་རལ་པ་ཚར་དགུ་དང་། མིག་དམར་དང་། གཤིན་རྗེ་མཚན་མོ་ནག་མོ་དང་། དུས་མཚན་མོ་རྣམས་ཁྱད་པར་དུ་གསོད་པའི་ལས་ལ་བསྔགས་པས་སྒྲུབ་གྲོགས་མཆོག་གིས་དེ་དག་ལ་སྒྲོས་སུ་མཆོད་གཏོར་དང་གཉེར་གཏད་དྲག་ཏུ་བྱའོ། དེ་དག་ནི་འཁོར་ལོ་བསྐུལ་བ་དངོས་གཞིའི། གསུམ་པ་མཇུག་གི་བྱ་བ་ལ། ལས་ཀྱི་གཤིན་རྗེ་ལ་གཏད་པ་དང་། ལས་སྒྲུབ་ནས་ཇི་ལྟར་བྱ་བའོ། དང་པོ་ནི། རྟོག་བདུན་ལས། གྲོ་མཁར་གྱི་ས་ལ་གཤིན་རྗེའི་གཟུགས་ཁྲུ་གང་ཙམ། ཞག་གཅིག་པ་གསུམ་པ་ཚེ་བ། ཕྱག་གཉིས་པ། ཕྱག་ན་ཏལ་གྲི་དང་ཞགས་པ་འཛིན་པ་གཅེར་བུ་སྐྲ་བ་ཤིག་པ་བྱ། ཞེས་གསུངས་པ་ལ། སློབ་དཔོན་མི་བསྐྱོད་པས། གཡས་ན་ལྕགས་ཀྱི་དབྱུག་པ་ཐོགས་པ་ཞེས་བཤད་དེ། ཕལ་ཆེར་ད་ལྟའི་རྟོག་བདུན་གྱི་རལ་གྲི་ཞེས་པ་རྒྱ་དཔེ་མ་དག་པ་ལས་སྒྱུར་བའི་སྐྱོན་ཡིན་ནམ་སྙམ་མོ། དེ་ནས་གྲོག་མཁར་བདུན་གྱི་སའམ། སློབ་དཔོན་མི་བསྐྱོད་པས་བཤད་པ་ལྟར་སྦྲ་ཚིལ་ལ། ལས་ཀྱི་གཤིན་རྗེའི་གཟུགས་མ་ཧེའི་གདོང་བ་ཅན་ནམ། ཡང་ན་ཁྲོ་ཞལ་ཅན་ཕྱག་གཡས་ཐོད་དབྱུག་འཕྱར་ཞིང་གཡོན་པ་བསྡིགས་མཛུབ་བསྒྲེངས་པའི་རྩེ་ལ་ཞགས་པ་ནག་པོ་བཀལ་བ། གསུམ་པ་ཆེ་ཞིང་ཁ་གདངས་པ་ཤིན་ཏུ་སྤོམ་ཞིང་རོ་སོལ་གྱིས་ནག་པོར་བྱུག་པར་བྱ་སྟེ། དེ་ཡང་ཁྲུ་གང་ལས་མི་ཆུང་བ་ཁོག་པ་ཤིན་ཏུ་ཡངས་པ་བྱས་པའི་རྒྱབ་ནས་འཁོར་ལོ་འཇུག་པའི་ཧར་པོ་གཞག་པར་བྱ། དེ་ནས་གནམ་སྟོང་གི་མཚན་ཕྱེད་དུ་ཉེ་བ་ན། འཁྲུལ་འཁོར་ཀྱི་ལྷ་རྣམས་ཞུ་ནས་སྔགས་ཀྱི་ཡི་གེ་མི་འབར་བས་གྱུར་པར་བསྒོམ་ལ་འཁོར་ལོ་བཅུག་པའི་ཐོད་པ་ཁ་སྦྱར། ལས་
གཤིན་གྱི་གཟུགས་ཀྱི་སྙིང་གར་བཅུག །གཟུགས་ཀྱི་བུག་པ་སྦྲ་ཆིལ་སོགས་ཀྱིས་བཀག །དུར་ཁྲོད་དནམ་འབྱུང་པོ་དྲག་པོ་གནས་པའི་སར་ཁྱེར་ཕྱིན་ནས། ས་དེའི་མི་མ་ཡིན་ལའང་གཏོར་མ་སྦྱིན། བདེན་པ་དར་དབང་འཛུགས་བྱས་ལ་གྲོགས་གཅོལ། དེ་ནས་ས་དེར་དོང་གྲུ་གསུམ་བརྩེ་མོ་ལྷོར་བསྟན་པ་གཏིང་རིང་གཅིག་བྲུ། སྔར་བཅས་པའི་ལིངྒ་དགྲ་བོའི་ཟག་རྫས་སོགས་ལས་བྱས་པ་དེ་མགོ་འཇུག་ལྡོག་གནས་གཏིང་དུ་བཅུག དེའི་སྟེང་ནས་ལས་གཤིན་གྱི་གཟུགས་མགོ་བོ་ལྷོ་ལ་བསྟན་ཏེ་ཁ་སྦུབ་ཏུ་བཞག དེ་ནས་ལས་གཤིན་གྱི་དྲག་གཏོར་བྱས་ནས་གཏད་པར་བྱ་བ་ལ། སྐབས་འདི་དང་འཁྲུལ་འཁོར་གྱི་སྐབས་མ་ཡིན་པར་ཡང་ལས་གཤིན་གྱི་དྲག་གཏོར་བྱ་དགོས་པ་བྱུང་ན་བྱ་བའི་ཚུལ་གྱི་ཆོ་ག་གཅིག་པས་འདིར་དེའི་ཆོ་ག་བཤད་པར་བྱའོ། དེ་ཡང་འཁྲུལ་འཁོར་གཏད་པའི་སྐབས་སུ་དོང་བྲུས་པ་དེའི་མདུན་དང་། སྐབས་གཞན་གྱི་ཚེ་བྲི་སྐུ་སོགས་ཀྱི་མདུན་དུ། ཁྲག་དང་ཆང་བསྲེས་པའི་ཐོད་པ་བཀང་བའི་མཆོད་ཡོན་དང་། མེ་ཏོག་སྔོན་པོའམ་ནག་པོ་དང་། ཤ་ཆེན་གྱི་སྦོས། ཚིལ་ཆེན་གྱི་མར་མེ། དྲིའི་བྱུག་པ། ཁྲག་བྱུག་ཅིང་ཤ་ཆེན་གྱིས་བརྒྱན་པའི་བཤོས་ཐོད་རྔ་སོགས་ཀྱི་རོལ་མོ་དང་། གཏོར་མ་གྲུ་གསུམ་ཁྲག་གིས་སྦགས་ཤིང་ཤ་ཆེན་གྱིས་བརྒྱན་པ་རྣམས་བཤམ་པར་བྱའོ། དེ་ནས་རང་ཉིད་ཁ་ལྷོར་བལྟས་ཏེ་ལྷའི་རྣལ་འབྱོར་བསྒོམ་ཞིང་། གོས་ནག་པོ་གྱོན། ཁྲོ་བོའི་ལྟ་སྟངས་ཀྱིས་བལྟ་ཞིང་། ཤིན་ཏུ་ཁྲོས་པའི་སེམས་ཀྱིས་ལྷིའི་ང་རྒྱལ་བརྟན་པར་བྱ་སྟེ། མདུན་དུ་ཆོས་རྒྱལ་འཁོར་བཅས་བསྐྱེད་པ་ནི། པདྨ་དང་ཉི་མ་དང་མ་ཧེའི་སྟེང་
དུ་ཡ་ལས་ཐོད་དབྱུག་ཡས་མཚན་པ། དེ་ལས་འོད་འཕྲོས་དགྲེ་བགེགས་ཐམས་ཅད་ཚད་བཅད་ཚུར་འདུས་དབྱུག་ཐོ་ལ་ཐིམ། དེ་ཡོངས་སུ་གྱུར་པ་ལས་གཤིན་རྗེ་ཆོས་ཀྱི་རྒྱལ་པོ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ། མ་ཧེར་རབ་ཏུ་ཁྲོས་པའི་གདོང་བ་ཅན། རྭ་རྣོད་པོ་གཉིས་དང་ལྡན་པ། བསྐལ་པ་འཇིགས་པའི་དུས་ཀྱི་མེའི་ཕུང་པོ་དང་མཚུངས་པའི་སྤྱན་གསུམ་སྡང་མིག་ཏུ་བལྟ་བ། ཁ་གདངས་ཤིང་མཆེ་བ་རབ་ཏུ་འབར་བ་བཞི་གཅིག་ནས་ལྗགས་རྣམ་པར་བསྐྱོད་པ། སྨིན་མ་དང་སྨ་ར་རབ་ཏུ་འབར་ཞིང་སྐྲ་ཁམ་པ་གྱེན་དུ་འཇིགས་ལ་འཕྱང་བ། ཕྱག་གཡས་ཐོད་དབྱུག་འཕྱར་ཞིང་གཡོན་པ་བསྡིགས་མཛུབ་རབ་ཏུ་བསྒྲེངས་པས་དུས་ཀྱི་ཞགས་པ་ནག་པོ་འཛིན་པ་ཞབས་གཡས་བསྐུམ་བས་མ་ཧེ་རབ་ཏུ་ཁྲོས་པའི་རྭ་ཁྲག་གནས་བརྫིས་ཤིང་། གཡོན་བརྐྱང་པས་མ་ཧེ་རབ་ཏུ་ཁྲོས་པའི་ཚངས་སྟེང་ནས་བརྫིས་པ། སྦོམ་ཞིང་ཐུལ་ལ་གསུམ་པ་འཕྱང་བ། གཅེར་བུ་ལིངྒ་དམར་པོ་ཀྱེན་དུ་ལངས་པ། ཡང་ན་པད་ཉིད་དན་རོའི་གདན་ལ་གནས་པ། ཁྲོའི་ཞལ་ཅན། སྲིན་པོ་ཁྲོས་པ་ལྟ་བུ། ཕྱག་གཉིས་གྲི་གུར་དང་ཐོད་པ་འཛིན་པ་བྱའོ། དེའི་གཡོན་དུ་ཙི་དང་རྩེ་གསུམ་ལས་སྐྱེས་པའི་ཙ་མུཎྚི་ནག་མོ་ཞལ་གཅིག་ཕྱག་གཉིས་མ། ཁ་གདངས་ཤིང་མཆེ་བ་གཙིགས་པ། རལ་པ་ནག་པོ་གཡེངས་ཤིང་ནུ་མ་འཕྱང་བ། ཤིན་ཏུ་འཇིགས་ཤིང་མི་སྡུག་པའི་གཟུགས་ཅན། དུད་འགྲོའི་པགས་པ་རློན་པའི་གོས་གྱོན་ཅིང་། གཡས་རྩེ་གསུམ་དང་གཡོན་ཐོད་པ་འཛིན་པ། དེ་དག་གི་ནང་གི་འཁོར་དུ་ཡབ་ཏི་དང་། ཕྱ་སངས་དང་། རྨིག་པ་དང་། རལ་པ་ཆེར་དགུ་ཅན་ལ་སོགས་པ་རྒྱལ་པོའི་ཚུལ་དང་། བློན་པོའི་ཚུལ་དང་། སྡེ་དཔོན་གྱི་ཚུལ་དང་། ཕོ་
ཉའི་ཚུལ་དུ་གནས་པ། ལག་ན་འཁོར་ལོ་དང་། བེ་ཅོན་དང་གསལ་ཤིང་དང་། མདུང་ལ་སོགས་པའི་མཚོན་ཆ་སྣ་ཚོགས་པ་འཛིན་པ་རྣམས་དང་། དེ་དག་གི་ཕྱིའི་འཁོར་ཡུག་ཏུ་ཡ་མདྷུ་ཉ་དང་། ཀ་ལ་པ་ཤ་དང་། ཡ་མ་ད་ཌི་དང་། ཀ་ལ་ར་ཏྲི་དང་། གསོད་པ་མོ་དང་། ནག་མོ་དང་། ནམ་གྲུ་དང་། ཤ་ཀ་ལི་ལ་སོགས་པ་གཤིན་རྗེ་ཕོ་མོའི་ཚོགས་གཞི་གང་བ་རྣམས་ཀྱི་སྤྱི་བོར་ཨོཾ། མགྲིན་པ་ཨཱཿཐུགས་ཀར་ཧཱུྃ། རང་ཏི་ཐུགས་ཀའི་ཧཱུྃ་གི་འོད་ཟེར་ལྕགས་ཀྱུ་ལྟ་བུ་འཕྲོས་པས་ལྷོ་ཕྱོགས་རིམ་པ་བདུན་གྱིས་འོག་ནས་ལས་ཀྱི་གཤིན་རྗེ་འཁོར་དང་བཅས་པ་སྤྱན་དྲངས། རང་གི་ལག་པ་གཡས་རྡོ་རྗེ་ཁུ་ཚུར་བཅིང་། མཐེ་བོང་ནང་དུ་བཅུག །མཛུབ་མོ་བརྐྱང་བ་ཅུང་ཟད་བཀུག ལག་པ་འཕང་བསྟོད་ཅིང་འཕྱར་བའི་བེ་ཅོན་གྱི་ཕྱག་རྒྱ་བཅས་ལ། འདི་ནས་ལྷོ་ཡི་ཕྱོགས་རོལ་ན། དཔག་ཚད་བརྒྱད་ཁྲིའི་ཕ་རོལ་ན། ཐོད་པ་ལྕགས་ཀྱི་གྲོང་ཁྱེར་ན། ཡི་དྲགས་ཀུན་གྱི་སྒེ་དཔོན་པོ། མ་མོ་ཀུན་གྱི་ཚོགས་རྗེ་པོ། གསོན་གཤིན་ཀུན་གྱི་ཟབ་ཁ་པ། གསོན་པོ་བརྐོལ་འདེབས་པ་པོ། ཤི་བ་ཀུན་གྱི་གཤིན་བུ་རྗེ། དགེ་བ་ཀུན་གྱི་སྟངས་འཛིན་པ། སྡིག་པ་ཀུན་གྱི་ཆད་པ་མཁན། ལེགས་ཉེས་ཆོས་བཞིན་སྤྱོད་པ་པོ། ཆོས་རྒྱལ་གཤིན་རྗེ་ཞེས་བྱ་བ། མངོན་ཤེས་རྫུ་འཕྲུལ་མཐུ་སྟོབས་ཅན། འཁོར་བཅས་དེང་འདིར་བདག་ལ་དགོངས། །བདག་ནི་རྣལ་འབྱོར་སྒྲུབ་པ་པོ། །འཇམ་དཔལ་གཞོན་ནུའི་ཐུགས་ཀྱི་སྲས། །གཤིན་རྗེ་གཤེད་ཀྱི་རྣལ་འབྱོར་བ། །རྫོགས་པའི་བྱང་ཆུབ་སྒྲུབ་པ་པོ། །བསམ་པ་བྱང་ཆུབ་སེམས་ཀྱིས་བརླན། །རྒྱན་ནི་ཡེ་ཤེས་རྡོ་རྗེ་འཆང། །གཟི་
བྱིན་སྐུ་གསུང་ཐུགས་ཀྱིས་བསྐྱེད། །དོན་ནི་འགྲོ་བ་ཡོངས་ཀྱི་དོན། །ལས་ནི་སངས་རྒྱས་ཀུན་གྱི་ལས། །བཀའ་ནི་དཀོན་མཆོག་གསུམ་གྱི་བཀའ། །ཆོས་རྒྱལ་འཁོར་དང་བཅས་པ་ལ། །དྲག་པོའི་ལས་འདི་གཏད་པར་འདོད། །ཆེ་གེ་ཞེས་བྱའི་གདུག་པ་འདི། །གསོན་ན་འགྲོ་ཡོངས་ལ་གནོད། །དཀོན་མཆོག་གསུམ་ལ་རྣམ་པར་འཚེ། །དམིགས་ཀྱིས་རྣལ་འགྱོར་ཡོངས་ལ་སྡང། །འདི་དག་མྱུར་དུ་བསྒྲལ་བའི་ཕྱིར། །ཆོས་རྒྱལ་འཁོར་བཅས་སྤྱན་འདྲེན་ན། དམ་ཚིག་དབང་གིས་གཤེགས་སུ་གསོལ། ཨོཾ་ཧྲཱིཿཥྚཱིཿཝི་ཀྲི་ཏ་ན་ན་ཧཱུྃ་ཕཊ། ཡ་མ་རཱ་ཛཱ་ས་པ་རི་ཝ་ར་ཨ་ཀརྵ་ཡ་ཛཿཞེས་བརྗོད་པས། མདུན་དུ་ཆོས་རྒྱལ་འཁོར་བཅས་བྱོན་པར་བསམ་ལ། ཛཿཧཱུྃ་བཾ་ཧོཿ དམ་ཚིག་པ་དང་གཉིས་སུ་མེད་པར་བྱ། རང་གི་སྙིང་གའི་ས་བོན་གྱི་འོད་ཟེར་ཀྱིས་གཤིན་རྗེ་གཤེད་རིགས་ལྔ་སྤྱན་དྲངས་པ་ལ་མཆོད་ནས། འདི་ལ་དབང་བསྐུར་ཏུ་གསོལ། ཞེས་གསོལ་བ་བཏབ་པས། བཛྲི་བྷ་ཝ་ཨ་བྷི་ཥིཉྩ་མཾ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར། ལུས་ཐམས་ཅད་གང་། དྲི་མ་ཐམས་ཅད་དག ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས་རྡོ་རྗེ་ནག་པོ་རྩེ་ལྔ་པས་དབུ་བརྒྱན། དེ་ནས་ལག་པ་རྡོ་རྗེ་བསྔགས་པ་ལས། སྲིན་ལག་གཉིས་བརྐྱང་སྟེ་བཤིབས་པའི་ཕྱག་རྒྱ་བསྟན་ལ། ཨོཾ་ཧྲཱིཿཥྚཱི་ཝི་ཀྲི་ཏ་ན་ན་ཧཱུྃ་ཕཊ། ཡ་མ་རཱ་ཛཱ་ས་པ་རི་ལ་ར་ས་མ་ཡ་སྟྭཾ། ཞེས་བརྗོད་པས། དེ་དག་གིས་བདག་ལ་རླགས་ཚོལ་བའི་ནུས་པ་མེད་པར་བསམ། གཤིན་རྗེའི་རྒྱལ་པོ་འཁོར་དང་བཅས། དམ་ཚིག་དབང་གིས་འདིར་བརྟན་བཞུགས། མཆོད་པ་ཚུལ་བཞིན་བཞེས་ནས་ཀྱང་། འཕྲིན་ལས་མཛད་ཕྱི་ཇི་སྲིད་དུ། ལས་གྲུབ་པར་དུ་བཞུགས་སུ་གསོལ་
ཡ་མ་རཱ་ཛཱ་ས་མ་ཡ་སྟྭཾ། ཞེས་བརྗོད་དོ། དེའི་ཚེ་འཁྲུལ་འཁོར་གཏད་པའི་སྐབས་ཡིན་ན་དོང་ནང་གི་གཟུགས་ལ་མེ་ཏོག་གཏོར། གཞན་གྱི་ཚེ་མེ་ཏོག་འཐོར་མི་དགོས་སོ། དེ་ནས་ལག་པ་གཡས་པས་བེ་ཅོན་གྱི་ཕྱག་རྒྱ་བཅིང་གཡོན་པས་ཁྲག་ཆང་བསྲེས་པས་བཀང་བའི་ཐོད་པ་བཟུང་ལ། གཤིན་རྗེའི་རྒྱལ་པོ་འཁོར་དང་བཅས་པ་ལ་ཨརྒྷཾ་གསོལ་བས། དམར་ཡི་ཨརྒྷཾ་ཞག་གི་མེ་ཏོག་རྒྱ་མཚོ་ལྟར་མི་ཞད་པ་འབྱུང་བར་གྱུར་ཅིག ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཡ་མ་རཱ་ཛཱ་ས་པ་རི་ཝ་ར་ཨརྒྷཾ་པྲ་ཏཱིཙྪ། ཞེས་པས་མཆོད་ཡོན་དབུལ། ཡང་ལག་པ་གཡས་སྔར་གྱི་ཕྱག་རྒྱ་ལ་གནས་ཤིང་། གཡོན་པས་མེ་ཏོག་བླངས་ཏེ། གཤིན་རྗེའི་རྒྱལ་པོ་འཁོར་དང་བཅས་པ་ལ་མེ་ཏོག་ཕུལ་བས། མེ་ཏོག་གི་ཁང་པ་བརྩེགས་པ་ཏོག་དང་ཁ་པད་དུ་ལྡན་ལ། ཀ་བ་བརྒྱད་ཟུག་པ། བླ་རེ་དདུགས་དང་ཕྲེང་བས་བརྒྱན་པ་རིན་པོ་ཆེའི་རང་བཞིན་ཅན་འབྱུང་བར་གྱུར་ཅིག ས་པ་རི་ཝ་ར་ཡན་ཆད་སྔར་ལྟར་གྱི་མཇུག་ཏུ་ཨོཾ་བཛྲ་པུཥྤེ་པུཙྪ་ཧཱུྃ་ཞེས་པས་མེ་ཏོག །ཡང་ལག་པ་གཡས་སྔར་ལྟར། གཡོན་པས་ཤ་ཆེན་གྱི་སྤོས་གཟུང་ལ། གཤིན་རྗེའི་རྒྱལ་པོ་འཁོར་དང་བཅས་པ་ལ་ཤ་ཆེན་གྱི་འདུག་པ་ཕུལ་བས། གཞན་ཡས་ཁང་གི་མགུལ་བདུག་པའི་སྤྲིན་བཻ་ཌཱུརྱའི་མདོག་ལྟ་བུ་རིན་པོ་ཆེ་བརྩེགས་པ་འདྲ་བ་འབྱུང་བར་གྱུར་ཅིག ས་པ་རི་ཝ་ར་ཡན་ཆད་སྔར་ལྟར་གྱི་མཇུག་ཏུ་བཛྲ་དྷུ་པེ་པུཙྪ་ས་མ་ཡེ་ཧཱུྃ། ཞེས་པས་བདུག་སྤོས། ཡང་ཕྱག་རྒྱ་སྔཏ་ལྟར་ལ། གཡོན་པས་ཞུན་ཆེན་གྱི་མར་མེ་བཟུང་སྟེ། གཤིན་རྗེའི་རྒྱལ་པོ་འཁོར་དང་བཅས་པ་ལ་མར་མེ་ཕུལ་བས། གཞན་ཡས་ཁང་གི་ཕྱོགས་མཚམས་
སུ་མུན་བ་འཇོམས་པ་ལྟ་བུའི་འོད་གསལ་བ་འབྱུང་བར་གྱུར་ཅིག ས་བ་རི་ཝ་ར་ཡན་ཆད་སྔར་ལྟར། བཛྲ་དི་པ་བུཙྪ་ས་མ་ཡ་ཧཱུྃ། ཞེས་པས་སྣང་གསལ། ཡང་གཡས་སྔར་ལྟར། གཡོན་པས་དྲི་ཆབ་བཟུང་ལ། གཤིན་རྗེའི་རྒྱལ་པོ་འཁོར་དང་བཅས་པ་ལ་བྱུང་པ་ཕུལ་བས། ལུས་དང་གནས་གྱི་དྲི་མ་དག་སྟེ་རེག་ན་བདེ་བའི་རེག་བྱ་དང་། དྲིབ་སྣམ་བཟོད་པ་དང་ལྡན་པས་ཆིམ་པར་ཡུར་ཅིག །ས་པ་རི་ཝ་ར་ཡན་ཆད་སྔར་ལྟར། བཛྲ་གནྡྷེ་པུ་ཙྪ་ས་མ་ཡེ་ཧཱུྃ། ཞེས་པས་དྲི་ཆབ་ཡང་གཡས་སྔར་ལྟར། གཡོན་པས་ལྷ་བཤོས་བཟུང་ལ། གཤིན་རྗེའི་རྒྱལ་པོ་འཁོར་དང་བཅས་པ་ལ་བཤོས་ཕུལ་བས། ཁ་ཟས་དྲི་དང་རོ་དང་ཁ་དོག་ཕུན་སུམ་ཚོགས་པ་དང་ལྡན་པ་དང་། བདུད་རྩི་དཀར་པོ་དང་། སེར་པོ་དང་། དམག་པོ་དང་། སྔོན་པོ་དང་བཅས་པ། ཁམ་གྱི་ཟས་ལ་གནས་པ་རྣམས་ཚིལ་པར་བྱེད་པའི་མཐུ་དང་ལྡན་པ་འབྱུང་བར་གྱུར་ཅིག །ས་བ་རི་ཝ་ར་ཡན་ཆད་སྔར་ལྟར། བཛྲ་ནཻ་ཝེ་ཏྱེ་པུཙྪ་ས་མ་ཡེ་ཧཱུྃ། ཞེས་པས་ཞལ་ཟས་དང་། དེ་ནས་ནམ་མཁའ་མཛོད་ཀྱི་སྔགས་བརྗོད་ཅིང་ཐོང་རྡ་སོགས་རོལ་མོ་སྣ་ཚོགས་དབུལ་བར་བྱའོ། དེ་ནས་གཏོར་མ་སངས་སྦྱང་བྱིན་གྱིས་བརླབས། གཏོར་མ་ལག་པ་གཡོན་པས་བཏེག །གཡས་པས་པེ་ཅོན་གྱི་ཕྱག་རྒྱ་འཕྱར་ལ། ཨོཾ་ག་ལ་རུ་བ་ཡེ་དགེ་བོ་ཤ་ཏྲཱཾ་མ་ར་ཡ་ཧཱུྃ་ཕཊ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁ་ཧི། ཞེས་པ་ལན་བདུན་དང་། ཨོཾ་ཙ་མུཎྜི་དགེ་བོ་ཤ་ཏྲུཾ་མ་ར་ཡ་ཧཱུྃ་ཕཊ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་པ་ལན་བདུན་དང་སྔར་གྱི་བཤོས་འབུལ་བའི་ཚིག་གིས་བཤོས་ཀྱི་གནས་སུ་གཏོར་མ་སྦྱར་ནས་བརྗོད་དེ་གཏོར་མ་དབུལ་བར་
བྱའོ། དེ་ནས་ལག་པ་གཡས་བེ་ཅོན་གྱི་ཕྱག་རྒྱ་འཕྱར། གཡོན་ཁུ་ཚུར་ཁ་གྱེན་ལ་བསྟན་ནས་སྙིང་གའི་ཕྱོགས་སུ་བཟུང་བ་ཐོད་པའི་ཕྱག་རྒྱ་བཅས་ཏེ། ཚིག་འདི་དག་གི་བསྐུལ་བར་བྱའོ། ཧཱུྃ་བཅོམ་ལྡན་གཤིན་རྗེ་གཤེད་པོའི་བཀའ། །ཆོས་ཀྱི་རྒྱལ་པོ་དགོངས་སུ་གསོལ། །དེ་རིང་དྲག་པོའི་འཕྲིན་ལས་འདི། ཁྱོད་ཀྱི་ལས་སུ་འོང་བ་ཡིན། །ལྷ་དང་བཅས་པའི་འཇིག་རྟེན་ན། །ལེགས་ཉེས་ཆོས་བཞིན་སྤྱོད་པ་ཁྱོད། །གཤིན་རྗེ་གཤེད་ཀྱི་བཀའ་འཁོར་ན། བཀའ་ཉན་དམ་ཚིག་སྲུང་བ་ཁྱོད། །ལས་དང་རྐྱེན་གྱིས་མཆི་བ་ཡི། །སྲོག་ལ་དབང་བྱེད་བདག་པོ་ཁྱོད། །དེ་ཕྱིར་ལས་འདི་ཁྱོད་ལ་གཏད། །ཁྱོད་ཀྱི་འཁོར་འདི་མི་བསྲུན་ཏེ། །ཐ་མ་ལ་སེམས་ཅན་ཉེས་མེད་ཅིང་། །གཞན་གྱིས་བསྐུལ་བར་མ་བྱས་པར། །གློ་བུར་ཕྲད་པའང་འཛིན་བྱེད་ན། །ང་ཡིས་གཏད་པའི་ལས་འདི་རྣམས། །འཇམ་དཔལ་གཞོན་ནུའི་བཀའ་བཞིན་དུ། །དམ་ཚིག་ཕྱག་རྒྱ་མིག་ལ་བསྟན། །དམ་ཚིག་སྙིང་པོ་རྣ་བར་བསྒྲགས། །རྡོ་རྗེ་ཐ་ཚིག་སྙིང་ལ་བཞག །དམ་རྫས་མཆོད་པ་ཕུལ་ནས་ཀྱང་། །དམ་ཚིག་འཕྲིན་ལས་གཉེར་དུ་གཏད། །ལས་འདི་མངོན་དུ་སྒྲུབ་པའི་རིགས། །ཁྱོད་ཀྱིས་ལས་འདིམ་བསྒྲུབ་ན། །དཀོན་མཆོག་གསུམ་གྱི་བཀའ་ཡང་བཅག །གཤིན་རྗེ་གཤེད་པོའི་དམ་ཡང་བྲལ། །རང་གི་ཐ་ཚིག་རང་གིས་བསླུས། །དམ་ཚིག་གྲོགས་པོ་བདག་ཅག་གི། །རེ་བའི་བསམ་པ་གཏིང་ནས་བཅད། །དེ་བས་ལས་འདི་གྲུབ་པར་གྱིས། །ཁྱོད་ཀྱི་འཁོར་གྱི་དཀྱིལ་འཁོར་ན། །ཡ་མ་དྷུ་ཏི་ཞེས་བྱ་བ། །ལག་ན་ལྕགས་ཀྱུ་ནག་པོ་ཐོགས། །གང་ཞིག་གཟུང་
བར་འདོད་པ་དེ། །དབྱུགས་པ་ཙམ་གྱིས་འཛིན་པར་བྱེད། །ཁྱོད་ལ་གཉེར་དུ་གཏད་པ་ནི། །ཆེ་གེ་ཞིས་བྱའི་ཡུལ་ཁམས་ན། །ཆེ་གེ་མོ་ཞེས་བྱ་བའི་མིང་། །རུས་ནི་ཆེ་གེ་མོ་ཞེས་བྱ། །འདི་དག་འཁོར་དང་བཅས་པ་ཀུན། །ཁྱོད་ཀྱིས་དེ་རིང་གཟུང་བར་གྱིས། །གཞན་ཡང་འཁོར་ཀྱི་དཀྱིལ་འཁོར་ན། །ཀཱ་ལ་པཱ་ཤ་ཞེས་བྱ་བ། །ལག་ན་དུས་ཀྱི་ཞགས་པ་ཐོགས། །གང་ཞིག་འཛིན་པར་འདོད་པ་དེ། །བཏབ་པ་ཙམ་གྱིས་འཛིན་པར་བྱེད། །ཁྱོད་ལ་གཉེར་དུ་གཏད་པ་ནི། །ཆེ་གེ་ཞེས་བྱའི་ཡུལ་ཁམས་ན། །ཆེ་གེ་མོ་ཞེས་བྱ་བའི་མིང་། །རུས་ནི་ཆེ་གེ་མོ་ཞེས་བྱ། །འདི་དག་འཁོར་དང་བཅས་པ་ཀུན། །ཁྱོད་ཀྱིས་དེ་རིང་གཟུང་བར་གྱིས། །གཞན་ཡང་འཁོར་གྱི་དཀྱལ་འཁོར་ན། །ཡམ་དཎྚི་ཞེས་བྱ་བ། །ལག་ན་བེ་ཅོན་ནག་པོ་ཐོགས། །གང་ཞིག་གསོད་པ་འདོད་པ་དེ། །འཕྱར་བ་ཙམ་གྱིས་འཆི་བར་བྱེད། །ཁྱོད་ལ་གཉེར་དུ་གཏད་པ་ནི། །ཆེ་གེ་ཞེས་བྱའིཡུལ་ཁམས་ན། །ཆེ་གེ་མོ་ཞེས་བྱ་བའི་མིང་། །རུས་ནི་ཆེ་གེ་མོ་ཞེས་བྱ། །འདི་དག་འཁོར་དང་བཅས་པ་ཀུན། །ཁྱོད་ཀྱིས་དེ་རིང་བསས་པར་གྱིས། །གཞན་ཡང་འཁོར་གྱི་དཀྱིལ་འཁོར་ན། །ཡ་མ་དཾ་ཥྚི་ཞེས་བྱ་བ། །ཟ་བྱེད་མཆེ་བ་འབར་བ་ཅན། །གམག་ཞིག་ཟ་བར་འདོད་པ་དེ། །གཙིགས་པ་ཙམ་གྱིས་ཟ་བར་བྱེད། །ཁྱོད་ལ་གཉེར་དུ་གཏད་པ་ནི། །ཆེ་གེ་ཞེས་བྱའི་ཡུལ་ཁམས་ན། །ཆེ་གེ་མོ་ཞེས་བྱ་བའི་མིང་། །རུས་ནི་ཆེ་གེ་མོ་ཞེས་བྱ། །འདི་དག་འཁོར་དང་བཅས་པ་ཀུན། །ཁྱོད་ཀྱིས་དེ་རིང་ཟ་བར་གྱིས། །གཞན་ཡང་འཁོར་ཀྱི་དཀྱིལ་འཁོར་ན། །ཀཱ་ལ་ར་ཏྲི་ལ་སོགས་པའི། །གསོད་པ་མོ་དང་ནག་མོ་དང་། །ནམ་གྲུ་ཤ་
ཀ་ལི་ལ་སོགས། །བུད་མེད་ཚོགས་ཀྱིས་བསྐོར་བ་ནི། །ལ་ལ་ལས་ཀྱི་མེ་ལོང་ཅན། །ལ་ལ་ནད་ཀྱིས་རྒྱལ་བ་ཅན། །ལ་ལ་མཚོན་གྱི་གྲུ་གུ་ཅན། །ལ་ལ་བདུད་ཡི་ཁྲམ་བམ་ཅན། །ལ་ལ་ཤོ་རྡེའུ་དཀར་ནག་ཅན། །ལ་ལ་ལྕགས་ཀྱི་དྲེལ་རྟ་ཅན། །ལ་ལ་བོང་བུ་ག་བ་ཞོན། །ལ་ལ་རླུང་ནང་འཚུབ་མ་ཞོན། །ལ་ལ་ཆུ་བྱ་ནག་མོ་ཞོན། །ལ་ལ་ནམ་གྱི་གུང་ལ་རྒྱུ། །ལ་ལ་ཆུ་བོའི་གཞུང་ལ་རྒྱུ། །ལ་ལ་ཉི་མའི་ཟེར་ལ་རྒྱུ། །ཀུན་ཀྱང་གཞན་སྲོག་འཕྲོག་པ་སྟེ། །ཡ་བ་ཏི་དང་ཕྱ་སངས་དང་། རྨིག་པ་རལ་བ་ཚར་དགུ་སོགས། །ལ་ལ་རྒྱལ་པོའི་ཚུལ་དུ་གནས། །ལ་ལ་བློན་པོའི་ཚུལ་དུ་གནས། །ཁ་ཅིག་དག་ནི་སྡེ་དཔོན་ཚུལ། །ལ་ལ་ཕོ་ཉའི་ཚུལ་དུ་གནས། །ལག་ན་བེ་ཙེན་འཁོར་ལོ་དང་། །གསལ་ཤིང་མདུང་སོགས་མཚོན་ཆ་ཐོགས། །སོ་སོའི་སྡེ་དཔོན་མངགས་པ་དང་། །ཕོ་ཉ་ཕྱག་བརྙན་བཅས་པ་ལ། །འཕྲིན་ལས་གཉེར་དུ་གཏད་པ་ནི། །ཆེ་གེ་ཞེས་བྱའི་ཡུལ་ཁམས་ན། ཆེ་གེ་མོ་ཞེས་བྱ་བའི་མིང་། །རུས་ནི་ཆེ་གེ་མོ་ཞེས་བྱ། །འདི་དག་འཁོར་དག་བཅས་པ་ཀུན། །ཁྱོད་ཀྱིས་དེ་རིང་ཚར་ཆོད་ཅིག །ཅེས་དྲག་ཏུ་བསྐུལ་ནས། །དམར་གྱི་ཨརྒྷཾ་ལན་གསུམ་གྱི་བར་དུ་འཕྱར་ཞིང་སྤྲེངས་ལ་སྔར་གྱི་མཆོད་ཡོན་གྱི་སྔགས་བརྗོད་དོ། །དེ་ནས་མན་འཆུ་བླུད་པར་བྱ་སྟེ། དྲི་ཆབ་ཀྱི་ནང་དུ་རྡོ་རྗེའི་རྩེ་མོ་བཅུག་
ལ། ཨོཾ་བཛྲ་ཨུ་དཀར་ཧཱུཾ་ཋཿ ཞེས་ཉེར་གཅིག་བཟླས། དེ་ནས་ག་ཤིན་རྗེའི་ཞལ་དུ་རྡོ་རྗེའི་རྩེ་མོ་བཅུག་བར་བསྒོམས་ནས། འཁོར་ལོ་གཏད་པའི་སྐབས་སུ་དོང་ནང་གི་གཟུགས་ཀྱི་ཁར་དངོས་སུ་རྡོ་རྗེ་བཅུག སྐབས་ཞང་ཡིན་ན་བྲི་སྐུ་སོགས་ཀྱི་ཞལ་གྱི་ཐད་དུ་རྡོ་རྗེ་འཕྱར་བ་ལ་དྲི་ཆབ་བྲན་ལ། གཤིན་རྗེ་ཆོས་ཀྱི་རྒྱལ་པོ་འཁོར་དང་བཅས་པ་ཐམས་ཅད་ཀྱི་སྙིང་གར་ཡེ་ཤེས་ཀྱི་རྡོ་རྗེ་འོད་འབར་བ་རེ་རེ་གནས་པར་གྱུར། འདི་ནི་ཁྱོད་ཀྱི་དམྱལ་བའི་ཆུ། དམ་ཚིག་འདས་ན་སྲེག་པར་བྱེད། དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །གལ་ཏེ་དམ་ཚིག་འདས་གྱུར་ན། འཇམ་པའི་རྡོ་རྗེ་ཁྲོས་ནས་ནི། །སྙིང་ག་ནས་ནི་གཤེགས་པར་འགྱུར། །ཨོཾ་བཛྲ་ཨུད་ཀ་ཧཱུྃ་ཋཿ ཞེས་བརྗོད། དེ་ནས། སྔོན་གྱི་མཐའ་ཚིག་དྲན་བྱའི་ཕྱིར། །རྡོ་རྗེའི་ཐ་ཚིགས་འདི་བསྣན་པས། །མི་ཕྱེད་རྡོ་རྗེའི་དམ་ཚིག་ནི། །ཁྱོད་ཀྱི་སྙིང་ལ་གནས་པ་གྱུར། །ཨོཾ་བཛྲ་ས་མ་ཡ་ཏིཥྛཿཞེས་བརྗོད། དོང་ནང་གི་གཟུགས་སམ་སྐབས་གཞན་གྱི་ཚེ་བྲིས་སྐུ་སོགས་ཀྱི་སྙིང་གར་རྡོ་རྗེ་གཞག་པར་བྱའོ། དེ་ནས་སྐབས་གཞན་གྱི་ཚེ་གཏོར་མ་རོལ་མོའི་སྒྲ་དང་བཅས་པས་དགྲ་ཕྱོགས་སུ་ཁྱེར་ལ། གཏོར་མ་འཕང་ཞིང་དམོད་བསྐུལ་དྲག་ཏུ་བྱ། །གོས་དང་ཐལ་མོ་བརྡབ། །གཤིན་རྗེ་འཁོར་དང་བཅས་པ་ཁྲོས་འཁྲུགས་བརྡམ་ས་མི་བཟད་པའི་སྒྲ་དྲག་པོ་སྒྲོགས་པས་རིངས་པར་སོང་སྟེ་དགྲའི་ཡུལ་ཕྱོགས་ཁྱབ་ཅིང་ནོན་ནས། ནད་ཀྱི་ན་བུན་གཅིབས། དུག་མཚོན་གྱི་ཆར་ཕབ། དགྲ་བོ་འཁོར་བཅས་ཀྱི་ཤ་ཁག་རུས་པ་ཟོས་ཤིང་འཐུངས་པའི་ཧབ་སྒྲས་ནནམ་མཁའ་གང་བར་བསྒོམ་མོ། འཁོར་ལོ་གཏད་པའི་སྐབས་
ཡིན་ན། དེ་ནས་གཤིན་རྗེའི་གཟུགས་དེ་སས་རབ་ཏུ་དམ་པར་བསྟམས་ཏེ་སྦས་ལ། སུས་ཀྱང་སྤས་པར་མི་ཤེས་པ་དེ་ལྟར་ནན་ཏན་བསྐྱེད་པར་བྱའོ། དེའི་སྟེང་དུ་ཁྲོ་བོའི་ཚམ་དམ་གྱི་སྟང་སྟབས་བྱས་ལ། གནས་དེའི་འབྱུང་པོ་ལ་ཡང་གཏོང་མ་སྦྱིན། འཕྲིན་ལས་བཅོལ་དཔང་གཟུགས་གཏད་ལམ་བསྟན་ལ། ཕྱི་མིག་མི་བལྟ་བར་རང་གི་གནས་སུ་ལོག་སྟེ་སྔགས་ཀྱིས་བསྐུལ་བ་དང་། གཤིན་རྗེའི་རྒྱལ་པོ་དང་། མ་མོ་དང་། ཅི་བགྱི་དང་། ག་ཤིན་རྗེའི་སྐྱེས་བུ་རྣམས་ལ་ཡང་གཏོར་མ་བྱིན་ལ་དྲག་ཏུ་བསྐུལ་བར་བྱའོ། རང་གིས་བསྟེན་པའི་ཆོས་སྐྱོང་དྲག་པོ་གཞན་ཡོད་ནའང་གཏོར་མ་བྱིན་ལ་བསྐུལ་བར་བྱའོ། གཉིས་པ་ལས་གྲུབ་ནས་ཇི་ལྟར་བྱ་བ་ནི། ལས་གྲུབ་ནས་འཁོར་ལོ་སྦས་པའི་གནས་ཀྱི་འབྱུང་པོ་ལ་གཏོར་མ་བྱིན་ནས། འཁོར་ལོ་གཤིན་རྗེའི་ཁོག་པ་ནས་ཕྱུང་སྟེ། གནས་དེ་ཉིད་དུ་གཤིན་རྗེ་གཤེད་ཀྱི་ལྷ་ཚོགས་ལ་མཆོད་བསྟོད་གཏོར་མ་དང་། ལས་གཤིན་འཁོར་བཅས་ལ་འཇ་གཏང་རག་གི་གཏོར་མ་རྒྱས་པར་བྱིན་ལ། ཡི་གེ་བརྒྱ་བ་མང་དུ་བཟླས་ནས་ལྷ་ལ་བཟོད་པར་གསོལ། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །ཅེས་སོགས་ཀྱི་མཇུག་ཏུ། ཨོཾ་བཛྲ་མུཿ ཡེ་ཤེས་ཀྱི་འཁོར་ལོ་གཤེགས་སུ་གསོལ། ཨོཾ་རུ་རུ་སྥུ་རུ་ཛྭ་ལ། ཏི་ཥྛ་སིབྷ་ལོ་ཙ་ནི། སརྦ་ཨ་རྠཱ་ས་དྷ་ནི་སྭཱ་ཧཱ། ཞེས་སངས་རྒྱས་སྤྱན་གྱི་སྔགས་བཟློ་ཞིང་འཁོར་ལོ་འོ་མས་བཀྲུ། རྫས་རྣམས་ཆུ་ཀླུང་དུ་བཀྲུས་ཏེ་དོར་བར་བྱའོ། དེ་ནས་ནང་དུ་འོངས་ཏེ་བསྔོ་བ་དང་སྨོན་ལམ་རྒྱ་ཆེན་པོ་གདབ་ཅིང་བཀྲ་ཤིས་རྒྱས་པར་བྱའོ། ལྷའི་རྣལ་འབྱོར་ཤིན་ཏུ་བརྟན་པ་འམ། བཟླས་པའི་ནུས་པ་ཕུལ་
དུ་ཕྱིན་པ་ཡིན་ན། འཁོར་ལོ་ཐོད་པར་བཅུག་སྟེ་བཟླས་པ་བྱས་ནས་བསྐུལ་བས་ཆོག་གི །གཤིན་རྗེ་ལ་གཏོད་པ། ས་ལ་སྦ་ལ། ཐོད་པ་མེ་ལ་བསྲོ་བ་རྣམས་གང་ཡང་མི་དགོས་པར་བཤད་དོ། བསད་པའི་ལོའི་ཆོ་ག་བཤད་ཟིན་ཏོ། མནན་པའམ་རེངས་པའི་འཁྲུལ་འཁོར་གྱི་ཆོ་ག་ལ་ཡང་གསུམ་ལས། འཁོར་ལོ་སྦ་བ་ནི། རྫས་ལས་ཁམ་ཕོར་གྲུ་བཞི་བ་ཁ་སྦྱར་བྱས་ཏེ། སྐྱེར་བའི་མེས་སོ་གཏང་། ཁམ་ཕོར་འོག་མ་རྫའི་རང་མདོག་ཏུ་བཞག སྟེང་མ་ཡུང་བ་དང་བ་བླས་སེར་པོར་བསྒྱུར་བ་ལ་རི་མོ་གྲུ་བཞི་པ་རིམ་པ་བདུན་བྲི། དེའི་ནད་དུ་རི་རབ་ལྷུན་པོ་གྲུ་བཞི་པ། ལྕོག་ཆེན་པོ་བརྒྱད་དང་ལྡན་པའི་ལྕོག་རྣམས་ལ་ཧཱུྃ་བཾ་ཧཱུྃ་ཞེས་པ་རེ་བྲི། དེའི་སྟེང་དུ་སའི་དཀྱིལ་འཁོར་སེར་པོ་གྲུ་བཞི་པ་དེའི་སྟེང་དུ་སྣ་ཚོགས་རྡོ་རྗེ་སེར་པོ་ལྟེ་བ་ལཾ་གྱིས་མཚན་པ་བྲི། དེ་ནས་འཁོར་ལོ་ཁ་སྦྱར་བ་ལེགས་པར་ལྟེབས་ནས་སྐུད་པ་སེར་པོས་མི་མཐོང་བར་དཀྲིས་ཏེ། སྟེང་འོག་མ་ནོར་བར་ཁམས་ཕོར་ཁ་སྦྱར་གྱི་ནང་དུ་བཅུག སྐུད་པ་སེར་པོའི་རྡོ་རྗེའི་མ་དུང་བ་ཉིད་ཤུ་རྩ་གཅིག་དང་ལྡན་པས་ཁ་ཕོར་ཁ་སྦྱོར་རྒྱ་གྲམ་དུ་བཅིང་། དེ་ལ་བསྐུད་པ་སེར་པོའི་གཟུངས་ཐག་རྒྱུས་པ་བྱ་སྟེ། བ་བླས་སེར་པོར་བསྒྱུར་བའི་ས་གཞི་སྐབ་པོའི་སྟེང་དུ་བཞག །འདས་པ་དང་འཇིག་རྟེན་པའི་མཆོད་གཏོར་བཤམས། སྤྲ་ཚིལ་སོགས་ལས་ལིངྒ་བཅའ་བ་དང་། འཁོར་ལོའི་བར་དུ་ལིངྒ་གཞུག་པ་མི་དགོས་སོ། གཉིས་པ་འཁོར་ལོ་བསྐུལ་བ་ནི། རང་ཉིད་ཁ་བྱང་དུ་བསྟན། ལྷའི་རྣལ་འབྱོར་བསྒོམས་ལ་བཟླས་པ་ཅི་མང་ཞིག་བྱ། ང་རྒྱལ་བརྟན་པོ་ལ་གནས་པས་བསྒྲུབ་བྱ་དགུག་པ། ལྷ་དང་དབྲལ་བ་སྡར་ལྟར་རྒྱས་པར་
བྱས་ལ། འཁོར་ལོའི་མིང་ཡིག་ལ་བསྟིམ་ནས་བསྒྲུབ་བྱ་དངོས་སུ་བསྒོམ། །འཁོར་ལོའི་ཡི་གེ་རྣམས་རྡོ་རྗེ་འཇིགས་བྱེད་སེར་པོ་འམ། སེར་ནག་གཤིན་རྗེ་གཤེད་ཀྱིས་གསོ་བྱས་པའི་ལྟར་བསྐྱེད་པ་དང་། ཡེ་ཤེས་པ་གཞུག་པ་དང་དབང་བསྐུར་རྒྱས་གདབ་བྱ། ལྷ་རྣམས་ལས་འོད་ཟེར་སེར་པོ་འཕྲོས་པས་བསྒྲུབ་བྱའི་དབང་པོ་རྣམས་ཐམ་གྱིས་བཀག །མགོ་འཁོར། །ཡིད་མྱོས། དྲན་པ་ཉམས་པར་བསམ། །བསྒུར་བྱ་ཁ་ལྷོར་བལྟས་པའི་མགོ་བོའི་སྟེང་དུ་དབང་ཆེན་གྱི་དཀྱིལ་འཁོར། དེའི་སྟེང་དུ་རི་རབ་ལྷུན་པོ། དེའི་སྟེང་ནས་སྣ་ཚོགས་རྡོ་རྗེ་ཤིན་ཏུ་བརྗིད་པས་མནན་པར་བསྒོམ་ཞིང་། གཞན་ཡང་གསེར་གྱི་རི་མདུན་དང་རི་མན་དྷ་ར་བ་ལ་སོགས་པས་མནན་པར་བསྒོམ་ལ། གཟུངས་ཐག་ནས་བཟུང་སྟེ། ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུྃ་ཕཊ། ལཾ་ཆེ་གེ་མོ་སར་ཐ་ན་སྟཾ་བྷ་ཡ་ཧཱུྃ་ལཾ། ཞེས་ཁྲི་ཕྲག་གཅིག་པར་མ་ཆད་པར་བཟླས་སོ། ངག་མནན་པ་ལ་གཞན་སྔར་དང་འདྲ་བ་ལ། བསྒྲུབ་བྱ་གན་རྐྱལ་དུ་འགྱེལ་ཞིང་ལྕེ་བྲང་སྟེང་སུ་ཕྱིར་དྲངས་བའི་སྟེང་ནས་ལཾ་ལས་སྐྱེས་པའི་དབང་ཆེན་གྱི་དཀྱིལ་འཁོར་སེར་པོབ་མནན། དེའི་སྟེང་ནས་ཧཱུྃ་ལས་སྐྱེས་པའི་སྣ་ཚོགས་རྡོ་རྗེ་སེར་པོ་རྭ་གྱེས་པས་གཟེར་བཏབ་པ་ལྟར་བསྔ་མ། དེའི་སྟེང་ན་གཤིན་རྗེ་གཤེད་སེར་པོ་སྐུ་ཤིན་ཏུ་ལྗིང་པས་གཡོ་བ་མེད་པར་མནན་པར་བསམ་ལ། ཨོཾ་ཧྲཱིཿཥྚཱིཿཝི་ཀྲི་ཏཱ་ན་ན་ཧཱུྃ་ཕཊ་ལཾ། བདག་གིས་ཇི་ལྟར་བསམ་པའི་དོན་དགག་པ་བྱེད་པའམ། མི་སྙན་པ་སྨྲ་བྲ་བྱེད་པ་ཆེ་གེའི་ནག་སྟཾ་བྷ་ཡ་ལོ། ཞེས་ཁྲི་ཕྲག་གཅིག་བཟླ་བར་བྱའོ། ཡང་ན་རྒྱ་སྐད་དུ་བྱས་
པ་སྔར་ལྟར་བཟླས་སོ། ལྐུགས་པར་བྱ་བར་འདོད་ན་གཞན་ཐམས་ཅད་མནན་པ་དང་འདྲ་བ་ལ། དམིགས་པའི་ཁྱད་པར། བསྒྲུབ་བྱ་དེ་ལུགས་གི་སྙིང་གར་བཅུག དབང་ཆེན་གྱི་དཀྱིལ་འཁོར་གྱིས་ཟ་མ་ཏོག་བཞིན་དུ་སྦྱོར་བྱས་པར་བསྒོམ་མོ། གཞན་དམིགས་པ་མནན་པ་དང་འདྲ་བར་བྱས་ནས། ཨོཾ་ཧྲཱིཿཥྚཱིཿཝིཀྲི་ཏཱ་ན་ན་ཧཱུྃ་ཕཊ་བཾ། ཆེ་གེ་མོའི་ཁ་ཆིངས་ཤིག་ཡིད་ཆིངས་ཤིག་ལྐུགས་པས་གྱིས་ཤིག་བཾ། ཞེས་ཁྲི་ཕྲག་གཅིག་པར་མ་ཆད་པར་བཟླས་སོ། དག་རེངས་པ་སོགས་ཀྱི་མཚན་མ་བརྟན་པོ་བྱུར་ནས། མཇུག་གི་ཆོ་ག་ནི། མནན་པ། ངག་མ་ནན། ལྐུགས་པ་སུམ་ག་ལ་དུར་ཁྲོད་དམ། བྲག་དང་ཆུ་འཐབ་པའི་སར་འཁོར་ལོས་འོག་ཏུ་སྦས་ལ། རོ་གཡས་ལ་འོག་ཏུ་སྣ་ཚོགས་རྡོ་རྗེ་བྲིས། རྒྱབ་ཏུ་དབང་ཆེན་གྱི་དཀྱིལ་འཁོར་ལ་ལཾ་བྲིས་པས་ཁ་བཅད། དེའི་སྟེང་ནས་སས་དམ་པོར་གཡོགས་ཏེ་མི་མངོན་པར་བྱ་ཞིང་། བྲག་དང་ཆུ་འཐབ་ཏུ་སྦེད་ན། ཁ་ཕོར་ཡི་ཕྱི་རེ་བ་ནག་པོས་གྲིལ། དེའི་ཕྱི་ལ་ཆུའི་གྲི་ས་ལ་ཆ་གཏིང་དུ་འདམ་གྱི་འོག་ཏུ་སྦ་བར་བྱའོ། དེ་ནས་དེའི་གཞི་བདག་དང་ལས་གཤིན་ལ་གཏོར་མ་བྱིན་ནས་གཏད་པར་བྱ་ཞིང་། ལས་གཤིན་འཁོར་དང་བཅས་པས་བསྒྲུབ་བྱ་འཁོར་དང་བཅས་པ་ས་འོག་རིམ་པ་བདུན་དུ་གཤིན་རྗེའི་གྲོང་ཁྱེར་དུ་ཁྲིད་པར་བསམ་མོ། ཡང་སླར་གསོལ་བར་འདོད་ན་འཁོར་ལོའི་ཡི་གེ་ཡ་གཉིས་དང་། ནི་གནིས་དང་། སྤེལ་སྔགས་རྣམས་འོ་མས་དཀྲུས་ཏེ། འཁོར་ལོ་ལྷག་མ་མཆོད་པའི་རྟེན་དུ་གཞག་པར་བྱའོ། དེ་དག་ནནི་རྟོག་བདུན་ལས། དེ་དག་ནི་རྟོག་བདུན་ལས། ཆུའི་འགྲམ་དུ་སྤས་ན་རེངས་པར་འགྱུར། ཁྱིམ་དུ་བཞག་ན་ཞི་བར་འགྱུར། ཕྱུང་
ནས་ལེགས་པར་བཀྲུས་ན་གྲོལ་བར་འགྱུར་རོ། ཞེས་པའི་དོན་ཡིན་ནོ། དབྱེ་བ་ལ་གསུམ་ལས། སྦ་བ་ནི་དམར་ནག་གི་རྒྱུད་ལས་གསུངས་པ་ལྟར། འཁོར་ལོ་ལྐུད་པ་ནག་པོས་མི་མཐོང་བར་རྒྱ་གྲམ་དུ་བཅིངས་ཏེ། ཐོད་པ་ཁ་སྦྱར་དུ་བཅུག །སྐུད་པ་ནག་པོས་བཅིངས། རོ་སོལ་གྱིས་བྱུག་པའི་སྟེགས་བུ་ལ་བཞག མཆོད་གཏོར་སྔར་ལྟར་བཤམ་མོ། གདོང་དྲུག་གི་རྒྱུད་ལས། འཁོར་ལོ་རྟའི་སྦལ་བ་དང་མ་ཧེའི་རྨིག་པ་གཉིས་ཁ་སྦྱར་བའི་བར་དུ་འཇུག་པར་ཡང་བཤད་དོ། ཡང་འཁོར་ལོ་བཅུག་པའི་ཐོད་པ་ཁ་སྦྱང་ནི་མ་པའི་ཤིང་ལ་མེ་སྦར་བ་ལ་ནང་དྲོས་པ་ཙམ་དུ་བསྲོའོ། དེ་ནས་དུར་ཁྲོད་དུ་དོང་གྲུ་གསུམ་རྩེ་མོ་ལྷོར་བསྟན་པའི་ནང་དུ་འཁོར་ལོ་སྟེང་འོག་མནོར་བར་བཅུག ཁ་རོ་གཡས་གྱིས་བཅད་ལ་བཞག་གོ །དེ་ནས་བསྐུལ་བ་ནི། རང་ཁ་ལྷོར་བལྟས། རྡོ་རྗེ་འཇིགས་བྱེད་སྐུ་མདོག་མཐིང་ནག་གི་རྣལ་འབྱོར་རྫོགས་པ་བསྒོམ། འཁོར་ལོ་སྔགས་ཀྱི་ཡིག་འབྲུ་རྣམས་ཀྱང་རྡོ་རྗེ་འཇིགས་བྱེད་ནག་པོས་གཙོ་བྱས་པའི་ལྷ་བཅུ་བདུན་སོགས་སུ་བསྐྱེད་ནས། ཡེ་ཤེས་པ་དགུག་གཞུག་དབང་བསྐུར་མཆོད་བསྟོད་གཏོར་མ་སོགས་བྱ། བསྒྲུབ་བྱ་གཉིས་ཀ་དབུག་པ་དང་། སུ་ཕམ་པར་འདོད་པ་དེ་ལྷ་དང་དབྲལ་བ་སྔར་ལྟར་བྱས་ལ་བསྒྲུབ་བྱ་གཉིས་ག་རང་རང་གི་མིང་ཡིག་རྣམས་པ་བསྟིམ། བསྒྲུབ་བྱ་དེ་གཉིས་དངོས་སུ་མོས་པ་བྱ། དེ་ནས་བསྒྲུབ་བྱ་གཉིས་རྟ་དང་མ་ཧེ་ལ་སོགས་པ་ཞོན། མཆོད་རྣོད་པོ་ཐོགས་ཏེ་ཕན་ཚུ་ནང་འཐབ་ཅིང་། འཁོར་ལོའི་ལྷ་རྣམས་ཀྱིས་སྤྲོས་པའི་ཁྲོ་བོ་དང་གཤིན་རྗེ་དུ་མས་སོ་སོའི་ཕྱོགས་བཟུང་
ནས་དལ་མེད་དུ་འཐབ་པར་བསམ་ལ། ཧྲཱིཿཥྚཱིཿའི་མཇུག་ཏུ། ཕཊ་ཆེ་གེ་མོ་དང་ཆེ་གེ་མོ་དྷེ་ཤ་ཡ་ཕཊ། ཅེས་ཁྲི་ཕྲག་བཟླ་བར་བྱའོ། ཞེས་བཤད་ཀྱང་རྟོག་བདུན་ལས། འཁོར་ལོ་ཡང་མ་ཧེ་དང་རྟའི་ཁྲག་གིས་བྲིས་ཏེ། འདིར་ནི་སྔགས་ཀྱི་བྱེ་བྲག་གོ། ཤིན་ཏུ་མཉམ་པར་བཞག་པར་ཞག་བདུན་གྱིས་འབྱེད་པར་བྱེད་དོ། ཞེས་གསུངས་པ་ལྟར་ང་རྒྱལ་ཤིན་ཏུ་བརྟན་པས་ཞག་བདུན་ལ་སོགས་པ་བཟླས་པ་བྱས་ནས་བསྐུལ་ན་ལེགས་སོ། དེ་ནས་མཇུག་གི་ཆོ་ག་ནི། འཁོར་ལོ་ནི་མ་བའི་ཤིང་རི་རྩ་འམ་དུར་ཁྲོད་དུ་སྔར་ལྟར་སྦ་བར་བྱ་ཞིང་། སླབ་འདོན་པ་འདོད་ན་ཡི་གེ་བཀྲུ་བ་སོགས་སྔར་ལྟར་རོ། ཡང་ན་རྟོག་བདུན་ལས། གཞན་ཡང་རབ་ཏུ་དབྱེ་བའི་སྦྱོར་བ་ནི། བྱ་རོག་དང་འུག་པའི་གཤོག་སྒྲོ་དང་བྲམ་ཟེར་དང་གཏུམ་པོའི་སྐྲ་གཅིག་རུ་བྱ། ད་དུ་རའི་ཤིང་ལ་མེ་རབ་ཏུ་སྦར་ལ། དུ་བ་མེད་པའི་མེ་ལ་བསྲེགས་པ་དེའི་ཐལ་བ་བླངས་ཏེ། ཡི་གེ་བཅུ་པའི་སྔགས་བཟླས་ཏེ། བུད་མེད་སྐྱེས་པ་གཉིས་ཀྱི་བར་དུ་ཐལ་བ་དེ་བཞག་ན། སྐད་ཅིག་གིས་བྱེ་བར་འགྱུར་རོ། ཞེས་གསུངས་པ་ལྟར་བྱ་སྟེ། སྐྱེས་པ་དང་བུད་མེད་ནི་མཚོན་བཙམ་ཡིན་པས། རང་དབྱེ་བར་འདོད་པ་དེ་གཉིས་ཀྱི་གཟུགས་བརྙན་སྔར་གྱི་ལིངྒའི་རྫས་དེ་དག་ལས་བྱས་ལ་གཉིས་ཀའི་ཁོག་པར་འཁོར་ལོ་བཅུག་ལ། འཁོར་ལོ་བསྒྲུབ་པ་དང་ལིངྒ་ལ་བསྒྲུབ་བྱ་དགུག་གཞུག་སྔར་ལྟར་བྱ་སྟེ། བྱ་རོག་གི་གཤོག་པ་སོགས་བཞིད་དུ་རའི་ཤིང་གི་མེ་དུ་བ་མེད་པ་ལ་བསྲེགས་ཏེ་ཐལ་བ་གཟུགས་བརྙན་་གཉིས་ཀྱི་བར་དུ་འཐོར་ཞིང་། ཡི་གེ་བཅུ་པ་སྤེལ་ཚིག་དང་བཅས་པ་བཟླས་པས་བྱེ་བར་འགྱུར་རོ། བསྐྲད་པ་ལ་གསུམ་ལས་
འཁོར་ལོ་སྦ་བ་ནི། འཁོར་ལོ་གཉིས་ཁ་སྦྱར་ཏེ་ལྟེ་བ་ནས་སྐུད་པ་ནག་པོས་དཀྲིས་པ་ཐོད་པ་ཁ་སྦྱར་དུ་བཅུག་ནས། གཡུང་མོའི་སྐྲའི་སྐུད་པས་དུམ་བུ་དུམ་བུར་བཅིངས་ལ་ཇུར་ཁྲོད་དུ་སྦའོ། བསྐུལ་བ་ནི། འཁོར་ལོའི་བསྐྱེད་ཆོག་དང་ལྷའི་རྣལ་འབྱོར་དབྱེ་བ་དང་འདྲ། བསྒྲུབ་བྱ་དགུག་པ་དང་ལྷ་དབྱེ་སྔར་ལྟར་བྱས་ནས་འཁོར་ལོ་མིང་ཡིག་ལ་བསྟིམ་རང་ཉིད་ཁ་ལྷོར་བལྟས་ཏེ། མདུན་དུ་ཡཾ་ལས་བྱུང་བའི་རླུང་གི་དཀྱིལ་འཁོར་ནག་པོ་གཞུའི་དབྱིབས་ཅན་གྱི་སྟེང་དུ། རྔ་མོ་ཆེན་མོ་མདོག་སྔོན་པོ། དེའི་སྟེང་དུ་བསྒྲུབ་བྱ་གཅེར་བུར་བསྐྱོན་ཏེ། རླུང་གིས་བཏེག་ཅིང་རྡ་མོས་ཁྱེར་ནས། ཁ་ལྷོ་ཕྱོགས་སུ་བལྟས་ཏེ་མགྱོགས་པར་ཁྱེར་བ་ལ། རང་གི་ཐུགས་ཀ་ནས་སྤྲོས་པ་དང་། འཁོར་ལོ་ལྷ་རྣམས་ཀྱིས་སྤྲོས་པའི་ཁྲོ་བོ་དབྱུག་པ་ཐོགས་པ་དཔག་ཏུ་མེད་པ་དང་། ལས་གཤིན་འཁོར་དང་བཅས་པས་རྒྱབ་ནས་དབྱུག་པས་བརྡེག་ཅིང་བརྡུངས་ནས་རྒྱ་མཚོའི་མཐར་དེད་པར་བསམ་ལ། ཧྲཱིཿཥྚཱིཿའི་མཐར། ཕཊ་ཆེ་གེ་མོ་ཧུཙྪ་ཡ་ཕཊ། ཅེས་བཏགས་ནས་རྟགས་མ་བྱུང་བི་བར་དུ་བཟླ་བར་བྱའོ། གཞན་ཡང་རྟོག་བདུན་ལས་གསུངས་པའི་བསྐྱོད་པའི་ལས་ཀྱི་དབྱེ་བ་ཐམས་ཅད་ཀྱང་འཁོར་ལོ་འདི་ཉིད་ལ་རྫས་ལ་སོགས་པའི་དབྱེ་བས་ཕྱེ་བ་ཙམ་ཡིན་ནོ། མཇུག་གི་ལྟ་བ་ནི། ལས་གྲུབ་ནས་སླར་གསོ་བར་འདོད་ན་ཡི་གེ་བཀྲུ་བ་སྡར་ལྟར་རོ། ཞི་བའི་འཁྲུལ་འཁོར་ལ་གསུམ་ལས། འཁོར་ལོ་སྦ་བ་ནི། འཁོར་ལོ་སྟེང་འོག་ཁ་སྦྱར་མ་ནོར་བར་ལྟེ་བ། སྐུད་བ་དཀར་པོ་གཙང་མས་མཇུར་མདུད་མེད་པ་འཁོར་ལོ་མི་མཐོང་གི་བར་དུ་དཀྲི་
དེ་ནས་ཁམ་ཕོར་སོ་མ་བཏང་བ་དཀར་པོ་ནག་པོ་ར་རི་དང་ཡུལ་བ་དང་ཞབས་སྟེགས་མེད་པའི་ཁ་སྦྱར་གྱི་ནང་དུ་བཅུག མེ་ཏོག་དཀར་པོ་དང་སྦྲང་རྩིས་བཀང་། སྐུད་པ་དཀར་པོ་མདུད་པ་མེད་པས་རྒྱ་གྲམ་དུ་བཅིངས། ཁ་ཕོར་སྟེང་བའི་དབུས་ནས་བུག་པ་བྱས་པ་ལ་གཟུགས་ཐག་དཀར་པོ་དྲངས། ས་སྟེགས་དཀར་པོ་ཙན་དན་སོགས་ཀྱི་བྱུག་པའི་སྟེང་དུ་གཞག་པར་བྱའོ། དེ་ནས་བསྐུལ་བ་ནི། རང་ཁ་ཤར་དུ་བལྟས་ཏེ་རྡོ་རྗེ་འཇིགས་བྱེད་དཀར་པོའི་རྣལ་འབྱོར་གྱིས་བདག་བསྐྱེད་བཟླས་པ་སོགས་བྱ། འཁོར་ལོ་བསངས་སྦྱང་། སྔགས་ཀྱི་ཡིག་འབྲུ་རྣམས་རྡོ་རྗེ་འཇིགས་བྱེད་ཀར་པོ་འམ། གཏི་མུག་གཤིན་རྗེ་གཤེད་ཀྱིས་གཙོ་བྱས་པའི་བཅུ་གསུམ་ཐོད་པ་བཞི་སོགས་སུ་བསྐྱེད། ཡི་ཤེས་པ་བསྟིམ། དབང་བསྐུར། མཆོད་བསྟོད་གཏོར་མ་སོགས་བྱ། བསྒྲུབ་བྱ་ཟླ་བ་ལ་གནས་པ་གོས་དཀར་པོ་གྱོན་པ། རང་གི་སྙིང་གའི་འོད་ཟེར་ལྕགས་ཀྱུ་ལྟ་བུས་བཀུག་སྟེ་འཁོར་ལོའི་མིང་ཡིག་ལ་བསྟིམ་པ་བྱས་ལ། དེ་དག་བསྒྲུབ་བྱ་དངོས་སུ་མོས་པ་བྱ། རང་དང་འཁོར་ལོའི་ལྷ་རྣམས་ཀྱིས་སྤྲོས་པའི་གཤིན་རྗེ་ཤེད་དཀར་པོ་རིན་པོ་ཆེའི་བུམ་པ་དཀར་པོ་ཟླ་བ་ལྟ་བུའི་བདུད་རྩིས་གང་བ་འཛིན་པ་དུ་མས་བསྒྲུབ་བྱ་དེ་དག་གི་སྤྱི་བོ་ནས་དབང་བསྐུར། ལུས་ཀྱི་ཕྱི་ནང་ཐམས་ཅད་དག་ཅིང་། ཤེལ་དཀར་པོ་དྲི་མ་མེད་པ་ལྟར་གྱུར་པ་བསམ་ཞིང་སྡིག་པ་དང་ནད་ལ་སོགས་པ་དག་པར་བསམ་ལ་གཟུགས་ཐག་ནས་གཟུང་སྟེ། ཧྲཱིཿཥྚཱིཿའི་མཐར་ན་མཿཆེ་གེའི་སྔ་གི་པའམ། ནད་ལ་སོགས་པ་ཤནྟིཾ་ཀུ་རུ་ན་མཿསྭཱ་ཧཱ། ཞེས་པ་བསྒྲུབ་བྱ་གོས་དཀར་པོ་གྱོན་པ་དང་། མི་གཙང་བསོགས་སྐྱུགས་པ་དང་། མེ་ཏོག་དཀར་པོའི་ཕྲེང་བ་འདོགས་
པ་རྨི་བ་སོགས་ཀྱི་མཚན་མ་བརྟན་པོ་མཐོད་གི་བར་དུ་བཟླ་བར་བྱའོ། མཇུག་གི་བྱ་བ་ནི། ལྷ་དང་བསྒྲུབ་བྱ་འོད་དུ་ཞུ་བས་སྔགས་དང་མིང་ཡིག་གི་རྣམ་པར་གྱུར་པར་བསྒོམས་ལ་མཆོད་བསྟོད་བཀྲ་ཤིས་བྱ་ཞིང་། མཆོད་ཁང་སོགས་སུ་མཆོད་གྲལ་དུ་དབེན་པར་ཞུགས་པ་རྒྱུན་དུ་མེ་ཏོག་དཀར་པོ་གཏོར་ཞིང་མཆོད་པར་བྱའོ། བསྲུང་བའི་འཁོར་ལོ་ནི། སྦ་བ་གོང་དང་འདྲ། བསྐུལ་བ་ལ་བདག་དང་འཁོར་ལོ་དང་བསྒྲུབ་བྱའི་བསྐྱེད་ཆོག་སྔར་དང་འདྲ། དམིགས་པའི་ཁྱད་པར་བདག་དང་འཁོར་ལོའི་ལྷ་རྣམས་ཀྱི་སྐུ་ལས་འོད་ཟེར་འཕྲོས་པ་རྣམས་བསྒྲུབ་བྱའི་ལུས་ལ་ཁྱབ་པས། བསྒྲུབ་བྱའི་བ་སྤུའི་སྒོ་ཐམས་ཅད་ཧཱུྃ་ཡིག་ལས་བྱུང་བའི་རྡོ་རྗེ་ནས་འབྲུ་ཙམ་འོད་ཟེར་འཕྲོ་བས་མཚམས་མེད་པར་གཏམས་པར་བསམ་ལ། ཧྲཱིཿཥྚཱིཿའི་མཐར། ཧཱུྃ་ཆེ་གེ་མོ་རཀྵ་ཧཱུྃ། ཞེས་པ་ཁྲི་ཕྲག་གཅིག་བཟླས་ཏེ། མཆོད་བསྟོད་སོགས་བྱ། ལྷ་རྣམས་ཞུ་བས་སྔགས་ཀྱི་ཡིག་འབྲུ་འོད་ཟེར་འཕྲོ་བར་གྱུར་པར་བསྒོམ་མོ། མཇུག་གི་བྱ་བ་ནི། བསྒྲུབ་བྱ་སྟན་དཀར་པོ་གསར་བ་ལ་འདུག བགེགས་བསྐྲད། འཁོར་ལོག་འུ་ནས་ཕྱུང་སྟེ། དར་ལ་སོགས་པ་དྲི་མ་མེད་པས་ཐུབས་བྱས། དྲི་བཟང་གིས་བྱུགས་ནས། བསྒྲུབ་བྱ་ཕོའི་དངུང་པ་གཡོན། མོའི་གཡས་སུ་གདགས་པར་བྱའོ། རྒྱས་པ་ལ་གསུམ་ལས། སྦ་བ་ནི། འཁོར་ལོ་གཉིས་ལེགས་པར་ལྟེ་བ། སྐུད་པ་སེར་པོས་མདུད་པ་མེད་པར་རྒྱ་གྲམ་དུ་དཀྲི། ཁམ་པོར་གྲུ་བཞི་སེར་པོ་མར་དང་སྦྲང་རྩིས་བཀང་བའི་ནང་དུ་བཅུག ཁམ་ཕོར་ཁ་སྦྱར། སྟེང་མའི་དབུས་ནས་གཟུངས་ཐག་ཟེར་པོ་དྲ་བ་ཁམ་ཕོར་ཁ་སྦྱར་སྐུད་
པ་སེར་པོས་མདུད་པ་མེད་པར་རྒྱ་གྲམ་དུ་དཀྲི། ས་གཞི་གཙང་མ་བ་རླན་དང་བཅས་པ་སེར་པོ་གྲུབ་ཞིར་བསྒྱུར་བའི་སྟེང་དུ་བཞག་ཅིང་། མཆོད་གཏོར་མ་ཤམ། བསྐུལ་བ་ནི། རང་ཉིད་ཁ་བྱང་དུ་བལྟས། རང་འཇིགས་བྱེད་སེར་པོའི་རྣལ་འབྱོར་རྫོགས་པ་ར་བསྒོམ། འཁོར་ལོའི་ཡིག་འབྲུ་རྣམས་འཇིགས་བྱེད་སེར་པོས་གཙོ་བྱས་པའི་ལྷ་བཅུ་གསུམ་དང་ཐོད་པ་བཞི་སོགས་སུ་བསྐྱེད། ཡེ་ཤེས་པ་བ་ནུག དབང་བསྐུར། མཆོད་བསྟོད་གཏོར་མ་སོགས་བྱ། རང་གི་ཐུགས་གའི་འོད་ཟེར་ལྕགས་ཀྱུ་ལྟ་བུས་བསྒྲུབ་བྱ་གོས་སེར་པོ་གྱོན་ཞིང་ཟླ་བ་སེར་པོའི་སྟེང་ན་གནས་པ་བཀུག་སྟེ། འཁོར་ལོའི་མིང་ཡིག་ལ་བསྟིམ་པ་ཡང་ཡང་བྱས་ནས། མིད་ཡིག་ཡོད་པ་རྣམས་སུ་བསྒྲུབ་བྱ་དངོས་སུ་ཡོད་པར་བསྙོམ། བདག་དང་འཁོར་ལོའི་ལྷ་རྣམས་ཀྱི་ཐུགས་ཀ་ནས་སྤྲོས་པའི་གཤིན་རྗེ་གཤེད་སེར་པོ་གསེར་ཀྱི་བུམ་པ་བདུད་རྩིས་གང་བ་འཛིན་པས་སྤྱི་བོ་ནས་དབང་བསྐུར། ལུས་ཐམས་ཅད་གང་། ཚེ་དང་བསོད་ནམས་དང་ཤེས་རབ་སོགས་རྒྱས་པར་བསམ་ལ། ཧྲཱིཿཥྚཱཿའི་མཐྲ་སྭཱ་ཧཱ། ཆེ་གེ་མོའི་ཚེ་འམ་བསོད་ནམས་ཤེས་རབ་སོགས་སུ་ཥྚཱི་ཀུ་རུ་སྭཱ་ཧཱ། ཞེས་མཚན་མ་མཐོང་གི་བར་དུ་བཟླ་བར་བྱའོ། མཇུག་གི་བྱ་བ་ནི། འཁོར་ལོ་ཞི་བ་ལ་བཤད་པ་ལྟར་རམ། ཡང་ན་རང་ངམ་བསྒྲུབ་བྱའི་ལུས་ཀྱི་དྲོད་དང་མ་བྲལ་པར་བཅང་བར་བྱའོ། དབང་གི་འཁོར་ལོ་ལ་གསུམ་ལས་སྦ་པ་ནི། འཁོར་ལོ་སྟེང་འོག་ཁ་སྦྱར་མ་ནོར་བར་ལྟེ་བ། སྐུ་ད་པ་དམར་པོ་ལུ་གུ་བརྒྱུད་དུ་སྤེལ་བས་རྒྱ་གྲམ་དུ་བཅིང་། ལམ་པོར་སོ་མ་བཏང་ཞིང་རྩ་བ་དང་ན་གནོག་མེད་པ་ཟླ་གམ་དམར་པོ་མར་དང་སྦྲང་རྩིས་གང་བ་ཁ་སྦྱར་གྱི་ནང་དུ་བཅུག ཁམ་
ཕོར་ཁ་སྦྱར་འཁོར་ལོ་ལྟར་སྐུད་པ་དམར་པོས་དཀྲི། ཙན་དན་དམར་པོ་སོགས་ཀྱིས་བྱུགས་པའི་ས་གཞི་ཟླ་གམ་གྱི་སྟེང་དུ་བཞག མཆོད་གཏོར་བཤམ་ཞིང་ཐུན་གསུམ་དུ་མེ་ཏོག་དམར་པོས་མཆོད། གཤེད་དམར་ཀྱི་འཁོར་ལོའི་གསལ་བྱེད་ལས། འཁོར་ལོ་ཐབ་གྱི་འོག་ཏུ་བཞག ཅེས་འབྱུང་ཡང་། རྟོག་བདུན་ལས། ཁྱིམ་གྱི་ནང་དུ་བཞག་ཅེས་པ་ཙམ་ལས་མ་གསུངས་ལ། གཞན་ཁུངས་ཐུབ་ཀྱིས་མ་གསུངས་པས་དེ་ངེས་བཟུང་དུ་མི་དགོས་སོ། དེ་ནས་བསྐུལ་བ་ནི། རང་ཁ་ནུབ་ཏུ་བལྟས་ལ་རྡོ་རྗེ་འཇིགས་བྱེད་དམར་པོའི་རྣལ་འབྱོར་རྫོགས་པར་བསྒོམ་མོ། འཁོར་ལོ་བསང་སྦྱངས་ནས། སྔགས་ཀྱི་ཡིག་འབྲུ་བཅུ་བདུན་རྡོ་རྗེ་འཇིགས་བྱེད་དམར་པོའམ་འདོད་ཆགས་གཤིན་རྗེ་གཤེད་ཀྱིས་གཙོ་བྱས་པའི་ལྷ་བཅུ་གསུམ་དང་། ཐོད་པ་བཞིར་བསྐྱེད་པ་སོགས་བྱས་ནས། ཡེ་ཤེས་པ་གཞུག དབང་བསྐུར། མཆོད་བསྟོད་གཏོར་མ་སོགས་བྱ། དེ་ནས་རང་གི་སྙིང་གའི་འོད་ཟེར་ལྕགས་ཀྱུ་ལྟ་བུས་བསྒྲུབ་བྱ་ཟླ་བ་དམར་པོའི་སྟེང་ན་གནས་པ་དགུག་པའི་དམིགས་པ་ཡང་ཡང་བྱ་སྟེ། འཁོར་ལོའི་མིང་ཡིག་རྣམ་ལ་རེ་རེ་ནས་བསྟིམ་ནས་བསྒྲུབ་བྱ་དངོས་སུ་མོས་པ་བྱ་ཞིང་། རང་གི་མདུན་དུ་ཡང་གཅིག་བཞག །དེ་ནས་བདག་དང་འཁོར་ལོའི་ལྷ་རྣམས་ལས་འོད་ཟེར་དམར་པོ་འཕྲོས། བསྒྲུབ་བྱའི་ལུས་ལ་ཕོག་པས་དམར་ལམ་ལམ་སོང་སྟེ། བསྒྲུབ་བྱའི་སེམས་རང་དབང་མེད་པར་བདག་ལ་ཆགས་ཤིང་འདུན་པར་བསམ་ལ། བསྒྲུབ་བྱ་ཡིད་མྱོས་ནས་རང་དབང་མེད་པར་བདག་གི་རྐང་པའི་
དྲུང་དུ་མགོ་བོ་ལྷུང་བར་བསྒོམས་ནས། ཧྲཱིཿཥྚཱིཿའི་མཇུག་ཏུ། ཧོ་ཆེ་གེ་མོ་བདག་གི་འམ་བླ་མ་ཆེ་གེ་མོ་ཝ་ཤཾ་ཀུ་རུ་ཧོཿ ཞེས་དབང་དུ་འདུས་པའི་རྨི་ལམ་སོགས་ཀྱི་མཚན་མ་བརྟན་པོ་མ་བྱུང་གི་བར་དུ་བཟླ་བར་བྱའོ། དེ་ལྟར་བཟླས་པ་བྱས་ཀྱང་དབང་དུ་མ་གྱུར་ན། འཁོར་ལོ་ཁམ་པོར་ནས་ཕྱུང་སྟེ་སེང་ལྡེང་གི་མེ་དུ་བ་མེད་པ་ལ་བསྲོ་ཞིང་དམིགས་པ་བརྟན་པོ་སྔགས་དྲག་ཏུ་བཟླ་བ་ཡང་ཡང་བྱའོ། དགུག་པ་ལ་ཁམ་ཕོར་གྱི་དོད་བུད་མེད་ཀྱི་ཐོད་པ་ཁ་སྦྱར་ལ་བྱེད་པ་དང་། སྐུད་པ་དམར་པོ་བསྒྲིལ་མས་བྱེད་པ་མ་གཏོགས། འཁོར་ལོ་སྦ་བ་དབང་དང་འདྲ། རང་དང་འཁོར་ལོའི་བསྐྱེད་ཆོག་དབང་དང་འདྲ། རང་དང་འཁོར་ལོའི་ལྷ་རྣམས་ལས་གཤིན་རྗེ་གཤེད་དམར་པོ་ལྕགས་ཀྱུ་དང་ཞགས་པ་ཐོགས་པ་སྤྲོས་ཏེ་བསྒྲུབ་བྱ་ཕོའི་སྙིང་ག་དང་། མོའི་བྷ་ག་ནས་ལྕགས་ཀྱུས་བཏབ། མགྲིན་པ་ནས་ཞགས་པས་བཅིང་སྟེ། རླུང་གི་དཀྱིལ་འཁོར་གྱི་སྟེང་ནས་སེང་གེ་དམར་པོ་རྐང་བརྒྱད་ལ་བསྐྱོན་ནས་མྱུར་བར་ཁྲིད་འོངས་པ་རང་གི་རྐང་པའི་དྲུང་དུ་ལྷུང་བར་བསམ་ལ། ཧྲཱིཿཥྚཱིཿའི་འཇུག་ཏུ། ཧྲི་བུད་མེད་ཆེ་གེ་མོ་ཨ་ཀརྵ་ཡ་ཧྲཱིཿ ཞེས་པ་འམ། ཛཿ སྐྱེས་པ་ཆེ་གེ་མོ་ཨ་ཀརྵ་ཡ་ཛཿ ཞེས་ཁུགས་པའི་མཚན་མ་མ་བྱུང་གི་བར་དུ་བཟླས་པར་བྱ་ཞིང་། མ་བྱུང་བ་སེང་ལྡིང་གི་མེ་ལ་བདུག་པ་སྔར་དང་འདྲའོ། ཡང་ན་རྟོག་བདུན་ལས་དབང་གི་འཁོར་ལོ་བསྒྲུབ་བྱའི་གཟུགས་བསྙན་སོར་བཅུ་དྲུག་པའི་སྙིང་གར་བཅུག་ནས་བཟླས་པ་བྱ་བར་བཤད་པ་ལྟར་བྱའོ། དབང་དགུག་གཉིས་ཀ་ལ་མཇུག་གི་བྱ་བ་ནི་ཇི་སྲིད་དབང་དུ་བྱ་བར་འདོད་ཀྱི་བར་དུ་འཁོར་ལོ་རང་གི་གནས་སུ་མཆོད་ཅིང་བཞག་
པའམ། ཡང་ན་ལས་གྲུབ་ནས་ཡེ་ཤེས་ཀྱི་འཁོར་ལོག་ཤེགས་སུ་གསོལ་ཏེ། ཡི་གེ་བཞི་དང་སྤེལ་སྔགས་བཀྲུ་བ་སྔར་ལྟར་བྱའོ། དེ་དག་གིས་ནི་འཁྲུལ་འཁོར་གྱི་ཆོ་ག་རྒྱས་པར་བཤད་ཟིན་ཏོ། རྟོག་པ་གསུམ་པ་འདིར་དེའི་སྔགས་རྣམས་ཕྱོགས་གཅིག་རུ་གསུངས་པ་ནི། གོང་དུ་རེ་རེ་ནས་སྦྱར་ནས་བཤད་ཟིན་ལ། གཞིའི་དཀྱིལ་འཁོར་བྲི་བ་དང་སྔགས་བཏུ་བ་སོགས་གོང་དུ་བཤད་པ་དེ་དག་གི་དགོས་པ་བསྟན་པ་ནི། ཨཱ་ལི་ཀཱ་ལའི་གྲོང་ཁྱེར་ནི། གསང་སྔགས་འབྱུང་བའི་རྩ་བ་སྟེ། ལས་ཀྱི་བཙོན་ར་དག་ཀྱང་ཡིན། ཡི་གེ་བཏུ་བ་མེད་ན་ནི། གསང་སྔགས་སྒྲ་ནི་ལོག་པར་འགྱུར། ཡི་གེ་ཚང་བར་མ་བཀོད་ན། གསང་སྔགས་སྒྲ་ནི་ཉམས་པར་འགྱུར། གསང་སྔགས་བརྡ་ཡིས་མ་བརྗོད་ན། སྔགས་ཀྱི་དངོས་གྲུབ་མེད་པར་འགྱུར། དྲང་བ་དག་ནི་མ་བྱས་ན། ཤིན་ཏུ་འཁོར་བར་མི་འགྱུར་རོ། ཡི་གེ་བསྲེ་བར་མ་བྱས་ན། བཅུ་དྲུག་ཁང་པ་དོན་མེད་འགྱུར། སྐོར་ཕྱོགས་ལོག་ན་དོན་མི་འགྲུབ། རིག་སྔགས་ཉམས་དང་ལོག་པ་ནི། ལྷ་མིན་གཡུལ་དུ་ཕམ་པ་དང་། དབང་པོའི་སྒྲ་ཡིས་དགྲ་བསང་བཞིན། འཁོར་ལོ་སྦོ་བ་མ་བྱས་ན། ཆོ་ག་དག་ནི་ཉམས་པད་འགྱུར། ཞེས་གསུངས་ཏེ། དེ་དག་གི་དོན་ནི། ཐོག་མར་ཨཱ་ལི་ཀཱ་ལི་བཀོད་པའི་གྲོང་ཁྱེར་རེ་མིག་ནི་གསང་སྔགས་ཡི་གེ་སོ་གཉིས་པོ་འབྱུང་བའི་རྩ་བ་སྟེ་གཞི་ཡིན་ལ། དྲག་ལས་སྒྲུབ་པའི་བཙོན་ར་སྟེ། རེ་མིག་མཚོན་ཁང་བསྒྲུབ་བྱ་བཙོན། ཡི་གེ་བཙོན་སྲུང་ལྟ་བུ་དག་
ཀྱང་ཡིན་ནོ། སྔགས་བཏུ་བ་མེད་ན་ནི། སྔགས་ཀྱི་སྒྲ་རིང་ཐུང་དང་འཐུག་སྲབ་གུག་བསྐྱེད་སོགས་ལོག་པ་སྟེ་མ་དག་པར་འགྱུར་ལ། ཡི་གེ་སོ་གཉིས་པོ་ཚང་བར་མ་བཀོད་ན་རྩ་བའི་གསང་སྔགས་ཀྱི་སྒྲ་ནི་ཉམས་པར་འགྱུར། ཟླ་བ་མིག་ལ་སོགས་པའི་བརྡས་མ་བརྗོད་ན་སྔགས་ཀྱི་དངོས་གྲུབ་མེད་པར་འགྱུར་རོ། ཡི་གེ་ནང་དུ་དྲང་བ་དག་ནི་མ་བྱས་ན་ནང་གི་རེ་མིག་རྣམས་སུ་སྔགས་ཀྱི་ཡི་གེས་འཁོར་བ་སྟེ་ཁྱབ་པར་མི་འགྱུར་རོ། ཡི་གེ་བསྲེ་བ་མ་བྱས་ན་ཡི་གེ་སོ་གཉིས་ཡོད་པས་ནང་གི་ཕྱོགས་བཞི་དང་དེའི་ཕྱིའི་བཅུ་གཉིས་ཏེ་རེ་མིག་བཅུ་དྲུག་གི་ཁང་པ་དོན་མེད་པར་འགྱུར་ལ། སྟེང་འོག་གི་འཁོར་ལོ་ལ་ཡི་གེ་གཡས་བསྐོར་དང་གཡོན་སྐོར་དགོད་པ་སོགས་ཀྱི་སྐོར་ཕྱོགས་ལོག་ན། ལས་བྱོར་གང་བྱེད་པའི་དོན་དེ་མི་འགྲུབ་བོ། རིག་སྔགས་ཉམས་པ་ནི་ལྷ་མིན་གཡུལ་དུ་ཕམ་པ་ལྟར་འགྱུར་ལ། སྒྲ་ལོག་པ་ནི། དབང་པོའི་དགྲ་ཡིག་དགྲ་བསད་བཞིན། ཅེས་པ་ལྷ་མིན་གྱི་དབང་པོ་གསོད་པར་འདོད་ནས་དབང་པོའི་དག་བོ་མ་ར་ཡ་ཕཪ་ཅེས་བཟླས་པས་ལྷ་མིན་རང་ཉིད་བསད་པས་འགྱུར་བ་བཞིན་ནོ། འཁོར་ལོ་རས་ལ་སྦོ་བ་མ་བྱས་ན་བྲི་བཞི་སྣག་ཚ་སྨྱུ་གུ་ལ་སོགས་པའི་ཆོ་ག་དག་ནི་ཉམས་པར་འགྱུར་རོ། ཞེས་བྱ་བའོ། རྒྱུ་ཡིན་པ་དང་སྦྱོར་བ་དང་། དད་པ་བརྟན་པོས་འགྲུབ་པར་འགྱུར། དེ་བས་ནན་ཏན་བསྐྱེད་དེ་བྱ། ཞེས་གསུངས་ཏེ། རྒྱུ་ཡིན་པ་དང་། ཞེས་པའི་དོན། རྒྱ་སྟོན་སོགས་ཀྱིས་བསྙེན་པ་ལ་ཕན་པའི་རྒྱུ་ཡིན་པ་དང་། ཞེས་ཟེར་བ་ནི་འབྲེལ་མེད་ཀྱི་བསྒྲུབ་བྱ་དེ་དྲག་པོའི་ལས་ཏེ་བྱ་རྒྱུ་ཡིན་པ་དང་། ཞེས་བྱ་བའི་དོན་ཏེ། རྟོག་བདུན་ལས། དཀོན་མཆོག་གསུམ་ལ་
གནོད་པར་བྱེད་པ་དང་། བླ་མ་ལ་བརྙས་པ་དང་། དམ་ཚིག་དང་བྲལ་བ་དང་། སྔགས་དང་རྒྱུད་ལ་འཕྱ་བར་བྱེད་པ་དང་། སེམས་ཅན་ལ་འཚེ་བར་བྱེད་པ་འདི་རྣམས་ལ་ཕན་པའི་ཕྱིར། སྔགས་པ་སྙིང་རྗེས་གདུངས་པའི་སེམས་ཀྱིས་བཤད་པའི་སྦྱོར་བ་བྱའོ། གལ་ཏེ་གཞན་ལ་བྱས་ན་དམ་ཚིག་ཉམས་ནས་ཚ་བ་ཆེན་པོར་སྐྱེའོ། རྒྱུད་གཞན་ལས་ཀྱང་གསུངས་པ། སློབ་དཔོན་ལ་ནི་སྨོད་བྱེད་དང་། ཐེག་པ་ཆེ་ལ་སྐུར་བ་དང་། སྔགས་དང་རྒྱུད་སྦྱོར་ཡེ་ཤེས་ལ། འཕྱ་བར་བྱེད་པའི་རྒྱུ་གང་ཡིན། །འདི་ནི་འབད་ལ་བསད་པར་བྱ། །ཡང་ན་གནས་ནས་དབྱང་བར་བྱ། །རྣལ་འབྱོར་སྙིང་རྗེ་མེད་པ་ཡིས། །གཞན་ལ་རུང་རུང་བྱས་ན་ནི། །དེ་ལ་དེ་བཞིན་ལས་དེ་ནི། །ཕྱིར་བཟློག་པར་ནི་འབྱུང་བར་འགྱུར། །དེ་ཕྱིར་སེམས་ཅན་འཕྱ་བའི་ཕྱིར། །རྣལ་འབྱོར་བ་ནི་འདི་ལ་འོ། །ཞེས་གསུངས་པ་དེའི་དོན་ཡིན་ནོ། །ལྷག་མའི་དོན་ནི། བཟླས་བརྗོད་འཁྲུལ་འཁོར་ལ་སོགས་པའི་སྦྱོར་བ་རྫོགས་པ་དང་། བླ་མ་དང་རྒྱུད་དོན་ཡིད་ཆེས་པའི་དད་པ་བརྟན་པོས་འགྲུབ་པར་འགྱུར་གྱི། །དེ་ལས་གཞན་པས་མི་འགྲུབ་པའི་རྒྱུ་མཚན་དེ་བས་ན་རྒྱུ་ཚོགས་དེ་དག་ཚང་བ་ལ་ནན་ཏན་བསྐྱེད་དེ་ལས་ལ་སྦྱར་བར་བྱའོ། ཞེས་བྱ་བ་སྟེ། དེ་ལྟར་ན་རྟོག་པ་གསུམ་པའི་རྟོག་པ་དང་པོའི་འཁོར་ལོའི་རྟོག་པའི་ཚིག་དོན་ཁ་སྐོང་དང་བཅས་ནས་ཞིབ་ཏུ་བཤད་ཟིན་ཏོ། ད་ནི་རྟོག་པ་གསུམ་པ་བཤད་པས་བྱ་བ་ལ། དེ་ནས་གཞན་ཡང་བཤད་བྱ་བ། ཞེས་བྱ་བ་ནི་རྟོག་པའི་མཚམས་སྦྱོར་རོ། ལས་ཀྱི་གྲོགས་ནི་བྱེ་བྲག་སྟེ། ཞེས་བྱ་བ་ནི། འཁྲུལ་འཁོར་
གྱི་ཚེ་གའི་ལས་ཀྱི་གྲོགས་ཏེ་ཆོ་གའི་ཡན་ལག་གོ། སྦྱོར་བ་དངོས་གཞི་མཇུག་གི་ཆོ་ག་དང་བཅས་པ་སྟོན་པ་ནི། རྟོག་པ་དང་པོ་དང་གསུམ་པ་འདིའི་བརྗོད་བྱའི་བྱེ་བྲག་སྟེ་ཁྱད་པར་ཡིན་ནོ། ཞི་བ་ལ་ནི་ཟླ་བ་ཡིན། རྒྱས་པ་དེ་བཞིན་མིག་ཏུ་གྲགས། དབྱེ་བ་ཡོན་ཏན་ཞེ་པ་སྟེ། དབང་དུ་བྱ་བའི་རིག་བྱེད་ཡིན། དབུག་པ་ལ་ནི་དེ་བཞིན་མདའ། བསྐྲད་དང་མནན་ལ་དབང་པོ་བཞིན། མནན་པ་རྗེས་སུ་འབྲང་བ་ཡིས། བསད་པ་ནི་རྒྱ་མཚོར་འདོད། ཅེས་པ་ནི། བླ་མ་སྔ་མ་དག་ན་རེ། ཞི་བའི་ལས་ཀྱི་འཁོར་ལོ་བསྐུལ་བའི་ཚེ་ག་དངོས་གཞི་ལ་ཟླ་བ་སྟེ་ཉི་མ་གཅིག རྒྱས་པ་ལ་ཉི་མ་གཉིས། དབྱེ་བ་ལ་ཉི་མ་གསུམ། དབང་ལ་བཞི། དགུག་པ་ལ་ལྔ། བསྐྲད་མནན་དབང་པོ་བཞིན་དུ་ཉི་མ་དྲུག མནན་པ་དྲུག་གི་རྗེས་སུ་འབྲང་བ་བདུན་ཡིན་པས་ཉི་མ་བདུན། བསད་ལས་ཀྱི་དངོས་བཞི་ལ་ཉི་མ་བདུན། ཞེས་འཆད་པ་ནི། དབང་དགུག་ལ་ཉི་མ་མང་ཉུང་དགོས་པ་སོགས་ཀྱི་འགྲུབ་དཀའ་སླ་མེད་ལ། བསྐྲད་མནན་གཉིས་ཀ་ཉི་མ་དྲུག་ཏུ་སྨྲས་མ་ཐག་ཡང་མནན་པ་ཉི་མ་བདུན་དུ་སྨྲ་བ་དང་འགལ་ཞིང་། བསད་ལས་དངོས་གཞིའི་ཉི་དྲངས་སློབ་དཔོན་མི་བསྐྱོད་པ་སོགས་རྒྱ་གར་མཁས་པས་བཤད་པ་གང་དང་ཡང་མི་མཐུན་ལ། རང་གིས་ཀྱང་བསད་ལས་ཀྱི་འཁྲུལ་འཁོར་ཀྱི་མན་ངག་ཏུ་ཉིན་གཅིག་ལས་ཀྱི་འགྲུབ་པའི་གནད་ཞེས་སྨྲས་པ་དང་འགལ་ལོ། སྤྱིར་ཡང་འཁོར་ལོས་སྒྱུར་རྒྱལ་གསོད་པ་དང་བསོད་ནམས་ཤིན་ཏུ་དམན་པའི་བཤན་པ་ལྟ་བུ་གཅིག་གསོད་པའི་འཁྲུལ་འཁོར་ལ། ལས་སྦྱོར་འགྲུབ་དཀའ་སླ་སྟོང་འགྱུར་ལས་ཀྱང་ཆེ་ཞིང་། དེ་བཞིན་དུ་འཁོར་ལོ་སྒྱུར་རྒྱལ་སོགས་
དབང་དུ་བསྡུ་བ་སྐྱེ་བོ་ཕལ་བ་དབང་དུ་བསྡུ་བའི་ཁྱད་པར་དང་། ཤེས་རབ་དང་ཆོས་རྒྱས་པར་བྱེད་པ་དང་། ནོར་རྒྱས་པ་དང་། བུ་མོ་ཕལ་བ་དགུག་པ་དང་། ལྷའི་བུ་མོ་དགུག་པ་སོགས་ཁྱད་པར་ཤིན་ཏུ་ཆེའོ། སྒུབ་པ་པོའི་ནུས་པ་ཆེ་ཆུང་སོགས་ཁྱད་པར་ཤིན་ཏུ་ཆེབས། འཁྲུལ་འཁོར་བསྒྲུབ་པའི་ཉི་མའི་གྲངས་མཐའ་གཅིག་ཏི་ངེས་པ་གཏན་ནས་བྱད་མི་རུང་ངོ་། དེས་ན་རང་ལུགས་ནི། རྒྱུད་འདིའི་དཔེ་མང་པོ་ལས། ཞི་བའི་ལས་ནི་ཟླ་བ་ཡིན། ཞེས་དང་། དགུག་པའི་ལས་ནི་དེ་བཞིན་མདའ། བསྐྲད་མནན་ལས་ནི་དབང་པོ་བཞིན། མནན་པའི་རྗེས་སུ་འབྲང་བ་ཡང་། བསང་བའི་ལས་ནི་རྒྱ་མཚོར་འདོད། ཅེས་འབྱུང་བ་ལྟར་བཤད་པར་བྱ་སྟེ། དེ་ཡང་འདི་དག་ནི་འཁོར་ལོ་ལ་བརྟེན་ནས་བསྒྲུབ་པར་བྱ་བའི་ལས་ཀྱི་དབྱེ་བསྟོན་པ་ཡིན་པས། ཞི་བ་ཉི་མ་གཅིག་ཅེས་བཤད་པར་བྱ་བ་མ་ཡིན་གྱི། ཞི་བའི་ལས་ནི་ཟླ་བ་སྟེ་ལས་དང་པོའོ། རྒྱས་པ་ནི་མིག་སྟེ་ལས་གཉིས་པའོ། དབྱེ་བ་ནི་ཡོན་ཏན་ཏེ་དེ་ལས་གསུམ་པའོ། དབང་དུ་བྱ་བ་རིག་བྱེད་དེ་ལས་བཞི་བའོ། དགུག་པའི་ལས་ནི་མདའ་ལྟེ་ལས་ལྔ་བའོ། བསྐྲད་དང་མནན་པའི་ལས་ནི་དབང་པོ་སྟེ་ལས་དྲུག་པའོ། ཞེས་པ་ནི་ལས་དེ་དག་ཕྱོགས་གཅིག་ཏུ་གྲངས་འཛིན་གཅིག་ཏུ་བཀྲང་བ་སྟེ། མདོ་སྔགས་ཀྱི་གཞུང་ལུགས་རྣམས་ན་འདི་འདྲ་བའི་གྲངས་ཀྱི་དབྱེ་བསྡུ་ཤིན་ཏུ་མང་ངོ་། བསད་པའི་ལས་ནི་རྒྱ་མཚོ་སྟེ་ལས་བདུན་པར་འདོད་ངོ་། འདི་དག་གྲོགས་ཀྱི་གྲངས་ལ་སྦྱར་
ནའང་བཤད་རྒྱུ་ཅུང་ཟད་ཡོད་མོད་ཀྱང་། ལས་དེ་དག་སྒྲུབ་གྲོགས་ཀྱི་མང་ཉུང་གི་ཁྱད་པར་དེ་ལྟ་བུ་དགོས་པའི་རྒྱུ་མཚར་ཅི་འང་བསྟན་རྒྱུ་མེད་པར་མི་ལེགས་སོ། ལས་རྣམས་དེ་དག་རེ་རེ་ལའང་། །འཕགས་ཚོགས་མཆོད་སྦྱིན་དང་པོ་སྟེ། །ཉི་མ་གཉིས་པ་གཏོར་མ་སྦྱིན། །གསུམ་པ་བཟླས་པ་རྣམ་པར་འབད། །བཞི་པ་སྦྱིན་བསྲེག་ཚང་བར་བྱ། །ལྔ་བ་ལས་ཀྱི་འཁོར་ལོ་བསྐོར། །དྲུག་པ་བསམ་གཏན་རྩེ་གཅིག་བྱ། །བདུན་པ་ལས་ཀྱི་ལྷག་ཆད་བསྐང་། །ཞེས་པ་ནི། ལས་དེ་དག་རེ་རེ་ལ་ཡང་སྦྱོར་བ་ནི། ཉི་མ་དང་པོ་ལ་དགེ་འདུན་གྱི་བསྙེན་བཀུར་གྱིས་མཚོན་པའི་སྦྱིན་པ་དང་ཚ་ཚྭ་སོགས་བསོད་ནམས་རྒྱ་ཆེན་པོ་བྱ། ཉི་མ་གཉིས་པ་ལ་ལན་ཆགས་གྱི་གཏོར་མ་མང་དུ་བྱ་ཞིང་། མཁའ་འགྲོ་ཆོས་སྐྱོང་ལ་གཏོར་མ་རྒྱ་ཆེར་ཕུལ་ནས་ལས་འགྲུབ་པའི་འཕྲིན་ལས་གཅོལ། ཉི་མ་གསུམ་པ་ལ་རང་གི་ལྟའི་བཟླས་པ་ལ་འབད། ཉི་མ་བཞི་པ་ལ་ལྷ་དབང་དུ་བྱ་བ་རང་རང་གི་བཟླས་པའི་མ་དག་པ་སོགས་སྦྱོར་བའི་སྦྱིན་བསྲེག་བྱ། ལྔ་པ་ལ་འཁོར་ལོ་སྦ་བ་དང་བསྒྲུབ་པར་བྱ། དྲུག་པ་ལ་འཁོར་ལོ་བསྐུལ་བའི་བསམ་གཏན་དང་བཟླས་པ་རྩེ་གཅིག་ཏུ་བསྒྲིམ། བདུན་པ་ཞེས་པ་ནི་དངོས་གཞི་ཉི་མ་གཅིག་གིས་ཆོག་པའི་དབུག་དུ་བྱས་པའི་མཚོན་བྱེད་ཙམ་ཡིན་པས། འཁོར་ལོ་བསྐུལ་བ་ཉི་མ་དུ་བྱས་པ་རྫོགས་པའི་ཕྱི་དེ་ཉིད་དེ་ལྷག་ཆད་བསྐད་པས་མཚོན་པའི་མཇུག་ཆོག་རྣམས་བྱའོ་ཞེས་བྱ་བའི་དོན་ཏེ། གྲོགས་ཀྱི་ལས་ལ་ཁྱད་པར་དུ། ལས་ནི་གཙོ་བོས་གང་སྒྲུབ་དེའི། འཁོར་ལོ་བསྐོར་བ་ཉི་མ་བཞིན། ཞེས་པ་ནི། སྒྲུབ་གྲོགས་དུ་ཡོད་ཀྱིས་ཀྱང་གཙོ་བོས་ལས་གང་གི་འཁོར་ལོ་བསྐོར་བ་དེའི་སྦྱོར་བ་དང་། དངོས་གཞི་དང་མཇུག་གི་ཆོག་ཉི་མའི་གྲངས་ལ་སོགས་པ་
ཡང་གཙོ་བོས་བྱེད་པ་ཇི་ལྟ་བ་བཞིན་དུ་བྱའོ། ཞེས་པའི་དོན་ནོ། གོང་དུ་བཤད་པ་དེ་ལྟར་བྱས་པའི་ཕ་ཡོན་ནི། ལས་ཀྱི་བྱེ་བྲག་འདི་ཤེས་ན། ཞིབས་འཇིགས་པ་བརྒྱད་ལས་སྐྱོབས། །རྒྱས་པས་ཡོན་ཏན་དྲུག་དང་ལྡན། །དབང་གིས་མོས་པ་རྣམ་བཞི་འགྲུབ། །དབྱེ་བས་གསང་སྡེ་བརྒྱུ་དང་འབྱེད། །མནན་པས་དབང་པོ་དྲུག་འཆིང་བྱེད། །གཞན་ནི་ཇི་ལྟར་དེ་བཞིན་ནོ། །ཞེས་གསུངས་ཏེ། གཞན་རྣམས་གོང་དུ་བཤད་པས་ཤེས་ལ། །རྐང་པ་ཐ་མའི་དོན་ནི། །དེ་དག་ལས་གཞན་བསད་པ་དང་། བསྐྲད་པ་སོགས་ནི་ཇི་ལྟར་འདོད་པ་དེ་བཞིན་དུ་འབྱུང་པོ་ཞེས་བྱ་བ་སྟེ། འདི་ལྟར་གསུངས་པ་ཡང་མཚོན་པ་ཙམ་ཡིན་གྱི་དགོས་པ་འདྲ་མ་སྨོས་པ་ཡང་དུ་མ་ཞིག་འགྲུབ་པར་ནུས་སོ། སྔགས་དང་རྫས་ཀྱི་སྦྱོར་བ་ལ། དཔྱད་ན་དངོས་གྲུབ་མི་འགྲུབ་སྟེ། །གལ་ཏེ་ཡིད་གཉིས་ཟ་གྱུར་ཏམ། །བསམ་པ་འགྱུར་རམ་དད་པ་ཉམས། །དེ་ཚེ་དངོས་གྲུབ་ཉེ་བ་ཡང་། །ཕྱིར་བཟློག་འགྱུར་བར་གདོན་མི་ཟ། །དད་པ་བརྟན་པོ་བསྒྲུབས་པ་ན། །ནམ་མཁའ་མེད་པར་གྱུར་ན་ཡང་། །སྔགས་ཀྱི་དངོས་གྲུབ་མེད་མི་སྲིད། །ལྷ་དང་དྲང་སྲོང་གིས་བཤད་པའི། །རིགས་སྔགས་སླུ་བ་མི་སྲིད་ན། །འདོད་ཆགས་བྲལ་བས་བཤད་པ་ཡི། །གསང་སྔགས་སྦྱོར་བ་བསླུ་བ་ནི། །མ་བྱུང་འབྱུང་བར་མི་འགྱུར་རོ། །ཆོས་ཉིད་བསམ་གྱིས་མི་ཁྱབ་པའི། །དོན་ལ་ཐེ་ཚོམ་མེད་པ་ཡི། །མཁས་པ་ལ་ནི་དངོས་གྲུབ་ཉེ། །ཡང་ན་བླུན་པོ་དད་པ་བརྟན། །
དེ་ལ་སྦྱོར་བའི་དངོས་གྲུབ་ཉེ། །རྟོག་ཅིང་དཔྱོད་པའི་རྟོག་གེ་པ། །དེ་ལ་སྦྱོར་བའི་དངོས་གྲུབ་རིང་། །མན་ངག་དམ་པ་བསྟན་བྱས་ཀྱང་། །སློབ་མ་ཡིད་གཉིས་ཡོད་པ་ན། །དེ་ལ་དངོས་གྲུར་རིང་བར་བཤད། །བླ་མས་མན་ངག་བསྟན་བྱས་ཀྱང་། །སློབ་མ་ཡིད་གཉིས་མི་ཟ་ཞིང་། །བླ་མའི་མན་ངག་དམ་པ་ཞེས། །གཅེས་པར་བྱས་ན་འགྲུབ་པར་ངེས། །དེ་ཡི་ཕྱིར་ན་སྔགས་པ་ཡིས། །རང་གི་ཡིད་གཉིས་སྤང་བའི་ཕྱིར། །བླ་མ་མཉེས་པར་བྱ་བ་གཅེས། །བསྙེན་བཀུར་བྱས་ན་ནུས་མཐུ་ཆེ། །གསང་སྟེ་སྤྱོད་པས་བར་ཆད་མེད། །ཡོན་ཆེན་ཕུལ་བར་བྱས་ན་ནི། །རང་སེམས་རིན་ཆེན་རྣམས་གཉིས་འགྱུར། །རིན་ཆེན་གཉིས་ལས་གྲུབ་པ་འགྱུར། །དཀོན་པར་གྱུར་ན་བསྔགས་པ་བརྗོད། །བསྔགས་ན་ཡོད་ཏན་འགྱུར་གྱུར་ཏེ། །བསྔགས་པ་དག་ནི་མ་བྱས་ན། །ཇི་ལྟར་ཡིད་བཞིན་ནོར་བུ་ཡང་། །གང་གིས་བསྔགས་པ་མ་བྱས་པ། །དེ་ལ་འདོད་དོན་མི་སྟེར་རོ། །དད་པ་སངས་རྒྱས་དད་པ་ཆོས། །དད་པ་དགེ་འདུན་དད་པ་མ། །དད་པ་བླ་མ་དད་པ་ཕ། །དད་པ་ལམ་ཆེན་དད་པ་གྲུ། །དད་པ་ཡིད་བཞིན་ནོར་བུ་སྟེ། །དད་པ་གསང་སྔགས་དངོས་གྲུབ་ཉིད། །དད་པ་བསོད་ནམས་ནོར་ཡིན་ཏེ། །དེ་ཡི་ཕྱིར་ན་སྔགས་པ་ཡིས། །རང་སེམས་དདད་པ་བསྐྱེད་པའི་ཕྱིར། །གཞན་ལ་གུས་པས་མཆོག་ཏུ་བསྐུར། །ཞེས་གསུངས་པ་རྣམས་ལས། །ཆོས་ཉིད་བསམ་གྱིས་མི་ཁྱབ་པའི། །ཞེས་སོགས་སྔར་བཤད་ཟིན་ཅིང་། རང་སེམས་རིན་
ཆེན་རྣམས་གཉིས། ཞེས་པ་ནི། བླ་མ་ལ་དད་པ་དང་། རྒྱུད་དོན་གྱི་མན་ངག་ལ་ཡིད་ཆེས་ཤིང་དང་པའོ། གཞན་རྣམས་ནི་གོ་སླའོ། དེ་ལྟར་ན་རྟོག་པ་གསུམ་པ་འཁྲུལ་འཁོར་གྱི་ཆོ་གའི་ལས་ཀྱི་རྒྱུད་བསྟན་པ་ཞེས་བྱ་བའི་རྟོག་པ་དེ་ཉིད་བཤད་ཟིན་ཏོ། བསྐྱེད་རྫོགས་སྔགས་ཀྱི་དེ་ཉིད་མི་ཤེས་ཀྱང་། ཆགས་སྡང་དབང་གིས་ཕན་གནོད་ལས་སྦྱོར་ལ། ཡིད་སོང་བཟླས་པའི་གྲངས་ཙམ་ལྷུར་ལེན་པའི། སྤུན་ལྐོགས་ལྟ་བུའི་སྔགས་པ་མང་ན་ཡང་། སྔགས་དང་ལྷ་ཡི་དེ་ཉིད་ལེགས་རྟོགས་ཤིང་། །མན་ངག་རྒྱུད་དོན་ཇི་བཞིན་ཁོང་དུ་ཚུད། །རྡོ་རྗེ་འཆང་གི་གསུང་ལྟར་བསྒྲུབ་པ་ཡི། །མཁས་པ་དགྱེས་པའི་སྔགས་པ་རྙེད་པར་དཀའ། །དེ་ཕྱིར་བླུན་པོའི་རང་བཟོས་བསླད་པ་ཡི། །མན་ངག་དུ་མས་རང་གཞན་བསླུ་མཐང་ནས། རྒྱུད་དང་གྲུབ་ཆེན་བླ་མའི་དགོངས་པ་བཞིན། །འཁྲུལ་མེད་འཁོར་ལོའི་ཆོ་ག་བདག་གིས་བཤད། །དེ་ཡི་དགེ་བས་མཐའ་དག་འགྲོ་བ་ཀུན། །བདེ་སྟོང་མཆོག་གི་ཡེ་ཤེས་འཁོར་ལོ་ཡིས། །མ་རིག་འཁྲུལ་འཁོར་མ་ལུས་རྒྱུད་བཅད་དེ། །འཇམ་དཔལ་གཤིན་རྗེ་གཤེད་དང་མཚུངས་གྱུར་ཅིག །བཅོམ་ལྡན་འདས་གཤིན་རྗེ་གཤེད་ཀྱི་འཁྲུལ་འཁོར་གྱི་ཆོ་ག་ཞི་བཏུ་རྣམ་པར་ཕྱེ་བ་འཁྲུལ་འཁོར་གྱི་རྟོག་པའི་རྒྱ་ཆེན་བཤད་པ་ཁམས་གསུམ་ལས་རྣམ་པར་རྒྱལ་བའི་ཉི་འོད་ཅེས་བྱ་བ་འདི་ནི། དགྲ་ནག་གི་རྒྱུད་དང་། དེའི་འགྲེལ་བ་གྲུབ་ཆེན་དཔལ་འཛིན་དང་ཤན་ཏི་བ་དང་གཞོན་ནུ་ཟླ་བས་མཛད་པ་རྣམས་དང་
རྟོག་བདུན་དང་། དེའི་འགྲེལ་བ་བཞི་དང་། སློབ་དཔོན་མི་བསྐྱོད་པས་མཛད་པའི་གཤིན་རྗེ་གཤེད་ཀྱི་འཁོར་ལོའི་དོན་རྒྱས་པར་བཤད་པ་དང་། ལ་ལི་ཏ་བཛྲས་མཛད་པའི་གཤིན་རྗེ་གཤེད་འབྱུང་བ་དང་། གཤིན་རྗེ་གཤེད་ཀྱི་འཁོར་ལོའི་མན་ངག་ནག་པོ་དྷིས་མཛད་པ་དང་། སློབ་དཔོན་ཞི་བའི་ཡ་ཤེས་ཀྱིས་མཛད་པའི་འཇིགས་བྱེད་ཀྱི་འཁོར་ལོ་བསྐོར་བའི་ལས་དྲག་པོ་ཕྱོགས་གཅིག་པ་དང་། ཨ་མོ་གྷ་བཛྲས་མཛད་པའི་ཞི་བའི་ལས་བདུན། དྲག་པོའི་ལས་བདུན་བིར་བ་པས་མཛད་པའི་གཤེད་དམར་ཀྱི་འཁྲུལ་འཁོར་གྱི་ཕྲེང་བ་དང་། སློབ་དཔོན་བྱང་ཆུབ་སྙིང་པོས་མཛད་པའི་དུས་འཁོར་དང་བསྟུན་པའི་འཁོར་ལོའི་གསལ་བྱེད་གཉིས་དང་། དུས་འཁོར་ནས་གསུངས་པ་དང་། དམར་པོ་གདོང་དྲུག་གི་རྒྱུད་གཉིས་ནས་གསུངས་པ་དང་། མན་ངག་སྟེ་མ་དང་། བོད་ཀྱི་རྭ་སྐྱོ་གཉིས་བརྒྱུད་པ་དང་བཅས་པའི་བཤད་པ། མན་ངག་དང་ཞལ་ཤེས་ལ་སོགས་པ་འཁྲུལ་འཁོར་གྱི་རྣམས་གཞག་ཐམས་ཅད་ཁོང་དུ་ཆུད་ཅིང་། རྡོ་རྗེ་འཆང་དང་དབྱེར་མ་མཆིས་ཤིང་། རྡོ་རྗེ་འཇིགས་བྱེད་ཉིད་ལས་དངོས་སུ་དབང་མནོས་པའི་གྲུབ་པའི་དབང་ཕུག་ཐམས་ཅད་མཁྱེན་པ་བློ་བཟང་གྲགས་པའི་དཔལ་གྱི་ཞལ་སྔ་ནས་དགེས་བ་ཆེན་པོའི་རྗེས་སུ་བཟུང་བའི་བཀའ་དྲིན་ལས་མདོ་རྒྱུད་མཐའ་ཡས་པའི་མན་ངག་གི་གནང་ལ་མི་འཁྲུལ་བའི་ངེས་པ་རྙེད་པའི་གཤིན་རྗེ་གཤེད་ཀྱི་རྣལ་འབྱོར་བ་མང་དུ་ཐོས་པའི་བཙུན་པ་དགེ་ལེགས་དཔལ་བཟང་པོས་རང་གི་རྡོ་རྗེ་སློབ་མ་དུ་མས་གསེར་གྱི་མཎྜལ་དང་བཅས་ཏེ་ནན་གྱིས་གསོལ་བ་བཏབ་པའི་
ངོར། ཉད་སྟོད་རི་བོ་མདངས་ཅན་གྱི་དགོན་པར་སྐྱར་བ་འདིས་བྱང་སེམས་ཅན་ཕན་པ་རྒྱ་ཆེན་པོ་འབྱུང་བར་གྱུར་ཅིག། །།ཨོཾ་སྭ་སྟི། རྒྱལ་བསྟན་པད་ཚལ་ཕན་བདེའི་དྲི་གསུང་ཅན། །བཤད་སྒྲུབ་འདབ་རྒྱས་རྣམ་གྲོལ་སྦྲང་རྩིའི་བཅུད། །འགྲོ་ཀུན་སྤྱོད་ཕྱིར་སྡེ་དགེ་ལྷུན་གྲུབ་སྟེང་། །ཆོས་སྡེ་ཆེ་ནས་ཆོས་སྦྱིན་ཆར་འདི་སྤེལ། །ཤུབྷཾ།། །།སརྦ་ཛ་ག་ཏཾ།། །།