བླ་མའི་རྣལ་འབྱོར་དངོས་གྲུབ་འགུགས་པའི་ལྕགས་ཀྱུ།

བླ་མའི་རྣལ་འབྱོར་དངོས་གྲུབ་འགུགས་པའི་ལྕགས་ཀྱུ་ཞེས་བྱ་བ་བཞུགས་སོ། །ཨོཾ་སྭཱ་སྟི། བླ་མའི་རྣལ་འབྱོར་དངོས་གྲུབ་འགུགས་པའི་ལྕགས་ཀྱུ་ཞེས་བྱ་བ། བླ་མ་དམ་པའི་ཞབས་ལ་ཕྱག་འཚལ་ལོ། །ཡིད་མ་གཡེང་བས་འདི་ལྟར་བརྗོད་ཅིང་དོན་བསམ་པར་བྱ་སྟེ། ཆོས་རྣམས་ཐམས་ཅད་རང་གི་སེམས་སྣང་ཙམ། །རང་གི་སེམས་ཀྱང་གསལ་སྟོང་བརྗོད་དུ་མེད། །སྣང་བ་མ་འགགས་སྣ་ཚོགས་ཅི་ཤར་ཡང་། །རང་རིག་སྐད་ཅིག་འདི་ལ་གཡོ་བ་མེད། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རང་སེམས་དག་པའི་སྣང་བ་འོག་མིན་ཞིང་། །ཞིང་འདིའི་དབུས་སུ་གཞལ་མེད་ཁང་པ་མཛེས། །དེ་དབུས་སེང་ཁྲི་པདྨ་ཉི་ཟླའི་སྟེང་། དྲིན་ཅན་རྩ་བའི་བླ་མ་དམ་པ་བཞུགས། །གཟི་བརྗིད་དཔག་མེད་གསེར་གྱི་ལྷུན་པོ་འདྲ། །འོད་ཟེར་ཉི་མ་འབུམ་གྱི་མདངས་དང་ལྡན། །བདག་ལ་དགྱེས་པའི་ཞལ་རས་འཛུམ་དཀར་གཡོ། །སྟེང་གི་ཕྱོགས་ལ་བརྒྱུད་པའི་བླ་མ་རྣམས། །རྫུ་འཕྲུལ་བཀོད་པ་སྣ་ཚོགས་བཅས་པ་དང་། །སྐུ་ཡི་མཐའ་སྐོར་ཕྱོགས་རྣམས་ཐམས་ཅད་དུ། །ཧེ་རུ་ཀ་དང་རྡོ་རྗེ་ཕག་མོ་སོགས། །ཡི་དམ་ལྷ་ཚོགས་ཐམས་ཅད་སྤྲིན་ལྟར་འཐིབས། །སངས་རྒྱས་བྱང་སེམས་ཕྱོགས་བཅུའི་མཁའ་དབྱིངས་ཁྱབ། །སྤྲུལ་པའི་དགྲ་བཅོམ་ས་གཞི་ཁྱབ་པ་དང་། །མཁའ་འགྲོ་ཆོས་སྐྱོང་སྲུང་མའི་ཚོགས་རྣམས་ཀྱང་། །རང་རང་འཁོར་དང་རྫུ་འཕྲུལ་དཔག་མེད་བཅས། །བཀའ་ལ་ཉན་ཅིང་གསུང་བཞིན་སྒྲུབ་པས་བཞུགས། །གང་ལ་གང་འདུལ་སྤྲུལ་པ་ཕོ་ཉའི་ཚོགས། །གློག་ལྟར་འཁྱུགས་ཤིང་བུ་ཡུག་འཚུབས་པ་བཞིན། །ས་དང་བར་སྣང་རི་ཀླུང་མེད་པར་ཁྱབ། །ཐམས་ཅད་སྐུ་ནི་བཀྲག་མདངས་འོད་དང་ལྡན། །གསུང་ནི་ཐེག་ཆེན་དམ་པའི་ཆོས་སྒྲ་སྒྲོགས། །ཐུགས་ནི་འོད་གསལ་བདེ་བ་ཆེན་པོའི་ངང་། །མཛད་པ་འཕྲིན་ལས་མ་ངེས་ཅིར་ཡང་སྟོན། །ཀུན་ཀྱང་རྗེ་བཙུན་བླ་མའི་སྤྲུལ་པ་སྟེ། །གཞན་ཡང་འཁོར་འདས་སྣང་བ་མ་ལུས་པ། །མཚན་ལྡན་བླ་མའི་ཡེ་ཤེས་ཆོ་འཕྲུལ་ཙམ། །བདག་གི་ལུས་དང་ལོངས་སྤྱོད་ཅི་མཆིས་དང་། །དུས་གསུམ་བསགས་པའི་དགེ་བ་ཅི་ཡོད་དང་། །ཕྱོགས་བཅུའི་ཞིང་ན་བདག་པོས་མ་བཟུང་བའི། །མཆོད་པའི་བྱེ་བྲག་ཇི་སྙེད་མཆིས་པ་དང་། །དགྲ་གཉེན་བར་མས་བསྡུས་པའི་སེམས་ཅན་རྣམས། །འགྲོ་དྲུག་ནམ་མཁའི་མཐས་གཏུགས་ཇི་སྙེད་དང་། །སྲིད་པ་གསུམ་གྱི་ལོངས་སྤྱོད་གང་མཆིས་དང་། །བདག་གི་ཡིད་ཀྱིས་སྤྲུལ་དང་སྨོན་ལམ་མཐུས། །སངས་རྒྱས་བྱང་སེམས་དཔའ་བོ་མཁའ་འགྲོར་བཅས། །དུས་གསུམ་ཕྱོགས་བཅུར་འབྱུང་བ་ཐམས་ཅད་ཀྱི། །ཡེ་ཤེས་རང་སྣང་ལས་གྲུབ་མཆོད་པའི་ཚོགས། །གྲངས་མེད་ཚད་མེད་བསམ་གྱིས་མི་ཁྱབ་པ། །མཆོག་ཏུ་བརྗིད་བག་ཆགས་པའི་ཚུལ་དང་བཅས། །བླ་མའི་ཐུགས་དང་རང་སེམས་དབྱེར་མེད་པ། །སྐྱེ་མེད་ཆོས་སྐུའི་ཆོ་འཕྲུལ་ཙམ་དུ་བསྒོམ། །སངས་རྒྱས་ཀུན་འདུས་བླ་མ་རིན་པོ་ཆེ། །དམ་ཆོས་ཀུན་འདུས་ཆོས་རྗེ་རིན་པོ་ཆེ། །དགེ་འདུན་ཀུན་འདུས་འདྲེན་མཆོག་རིན་པོ་ཆེ། །བླ་མ་ཀུན་འདུས་གཅིག་ཆོག་རྒྱལ་པོ་ཁྱོད། །ཡི་དམ་ཐམས་ཅད་ཁྱོད་ཀྱི་སྐུ་ལ་ཚང་། །མཁའ་འགྲོ་ཆོས་སྐྱོང་ཐམས་ཅད་ཕོ་ཉར་སྤྲུལ། །རྡོ་རྗེ་འཆང་ཆེན་ཁྱེད་ལ་གསོལ་བ་འདེབས། །མོས་པའི་བུ་ལ་ད་ལྟ་བྱིན་གྱིས་རློབས། །སྟུག་པོ་བཀོད་པའི་ཞིང་དུ་རྡོ་རྗེ་འཆང་། །དྲག་པོ་འདུལ་ཚེ་ཧེ་རུ་ཀ་དཔལ་སྐུ། །ཆགས་བྲལ་རྣམས་ལ་ཤཱཀྱ་ཐུབ་པར་བསྟན། །དཀའ་ཐུབ་ཅན་ལ་དྲང་སྲོང་ཚུལ་འཛིན་ཅིང་། །ཐེག་གསུམ་ལམ་དུ་ཞུགས་པའི་སེམས་ཅན་ལ། །བྱང་སེམས་རང་རྒྱལ་ཉན་ཐོས་ཚུལ་དུ་སྟོན། །ཚངས་དང་ཁྱབ་འཇུག་འདོད་ལྷ་དབང་པོ་དང་། །དབང་ཕྱུག་ལ་སོགས་ལྷ་ཡི་གཟུགས་སུའང་སྟོན། །ཁ་ཅིག་ཏུ་ནི་རྒྱལ་སྲིད་སྤྱོད་ལ་དགྱེས། །གཞན་དུ་རིག་པའི་བརྟུལ་ཞུགས་སྤྱད་པ་སྤྱོད། །ལ་ལར་ངུར་སྨྲིག་འཛིན་པའི་གཟུགས་ཀྱང་འཆང་། །གང་ལ་གང་འདུལ་སྐུ་ལ་གསོལ་བ་འདེབས། །སེམས་ཅན་ཀུན་གྱི་བསམ་པ་ཇི་བཞིན་དུ། །ཁྱོད་ཀྱི་བསྟན་པ་འདི་ཡང་བསམ་མི་ཁྱབ། །ཇི་ལྟར་མཁའ་ལ་སྤྲིན་དང་འཇའ་ཚོན་སོགས། །རྣམ་པ་སྣ་ཚོགས་གཟུགས་བརྙན་སྣང་ན་ཡང་། །ནམ་མཁའ་ལས་བྱུང་ནམ་མཁའི་ངོ་བོ་དང་། །ནམ་མཁའི་ངང་དུ་ཐིམ་པར་འགྱུར་བ་བཞིན། །སྤྲོས་བྲལ་ཅི་ཡང་མ་ཡིན་ཆོས་ཀྱི་སྐུ། །འབད་རྩོལ་མེད་ཀྱང་ལྷུན་གྲུབ་འཕྲིན་ལས་ཅན། །གང་ལ་གང་འདུལ་མཛད་པ་སྤྱིར་བསྟན་ཡང་། །རང་རིག་རང་གསལ་སྤྲོས་བྲལ་དབྱིངས་ཀྱི་ངང་། །སྐྱེ་འགག་མེད་ཅིང་འགྲོ་འོང་གནས་དང་བྲལ། །དོན་དམ་སྐུ་ཅན་ཁྱེད་ལ་གསོལ་བ་འདེབས། །རྟག་ཏུ་གུས་པའི་ཡིད་ཀྱིས་ཕྱག་འཚལ་ཞིང་། །སྐྱབས་གནས་ཀུན་འདུས་ཁྱེད་ལ་སྐྱབས་སུ་མཆི། །མཆོད་པ་ཐམས་ཅད་དབྱེར་མེད་ངང་དུ་འབུལ། །རང་བཞིན་མེད་ཀྱང་སྡིག་ཀུན་མཐོལ་ལོ་བཤགས། །འཁོར་འདས་དགེ་བ་ཀུན་ལ་རྗེས་ཡི་རང་། །གྲགས་སྟོང་བརྗོད་བྲལ་གསུང་ལ་ཆད་པ་མེད། །ཆོས་ཀྱི་སྐུ་ལ་སྐྱེ་འཆི་མི་མངའ་ཡང་། །ཆོས་འཁོར་རྒྱུན་མི་འཆད་པར་བསྐོར་བ་དང་། །འགྲོ་བའི་དོན་ལ་རྟག་ཏུ་བཞུགས་སུ་གསོལ། །ཐུགས་ཡིད་དབྱེར་མེད་དོན་དུ་བསྔོ་བར་བགྱི། །བླ་མེད་བྱང་ཆུབ་མཆོག་ཏུ་སེམས་བསྐྱེད་བགྱི། །རྗེ་བཙུན་སྒྲོལ་བའི་མགོན་པོ་ཁྱོད་ཉིད་ཀྱི། །སྐུ་གསུང་ཐུགས་ཀྱི་བྱིན་གྱིས་རློབས་པ་དང་། །དབང་བཞི་རྫོགས་པར་ད་ལྟར་བསྐུར་དུ་གསོལ། །ལུས་ལ་ལྷན་སྐྱེས་བདེ་ཆེན་བསྐྱེད་པ་དང་། །ངག་ལ་རིགས་སྔགས་ནུས་པ་བརྟན་པ་དང་། །སེམས་ལ་འོད་གསལ་ཡེ་ཤེས་འཆར་བ་རུ། །མཚན་ལྡན་བླ་མའི་ད་ལྟར་བྱིན་གྱིས་རློབས། །བླ་མའི་དཔྲལ་མགྲིན་ཐུགས་ཀ་ལྟེ་བ་ལས། །འོད་ཟེར་བྱུང་ནས་བདག་གི་གནས་བཞིར་ཐིམ། །སྐུ་གསུང་ཐུགས་དང་ཡེ་ཤེས་རྡོ་རྗེ་ཡི། །བྱིན་གྱིས་བརླབས་ཤིང་དབང་བཞི་ཐོབ་པར་གྱུར། །སླར་ཡང་བུམ་པའི་ཆུ་ཡིས་བུམ་དབང་བསྐུར། །བྱང་ཆུབ་སེམས་ཀྱིས་གསང་བའི་དབང་བསྐུར་ཞིང་། །མཉམ་སྦྱོར་བདེ་བའི་ཤེས་རབ་ཡེ་ཤེས་དང་། །འཛིན་མེད་ཕྱག་ཆེན་བཞི་བའི་དབང་ཡང་བསྐུར། །རེ་ས་གཞན་ན་མེད་དོ་ཆོས་ཀྱི་རྗེ། །སྐྱབས་གནས་གཞན་ན་མེད་དོ་རིན་པོ་ཆེ། །ཆུ་ལ་ཆུ་བཞག་བཞིན་དུ་དབྱེར་མེད་ཅིང་། །འབྲལ་མེད་གནས་ལུགས་རྟོགས་པར་བྱིན་གྱིས་རློབས། །བླ་མ་བྱང་ཆུབ་སེམས་ཀྱི་བདུད་རྩིར་ཞུ། །རྩ་འཁོར་བཞི་པོ་གང་བས་དབང་བཞི་ཐོབ། །བླ་མ་རང་སེམས་དབྱེར་མེད་ཆོས་སྐུའི་ངང་། །རྩ་བྲལ་ལྷུན་གྲུབ་ཆེན་པོའི་ངང་དུ་བཞག །ཅེས་པ་འདི་ནི་མཆོག་ཏུ་གྱུར་པའི་བླ་མའི་རྣལ་འབྱོར་ཏེ་ཚེ་གཅིག་ལུས་གཅིག་ལ་སངས་རྒྱས་སྟེར་བར་ཐེ་ཚོམ་མེད་དོ། །རྒྱལ་ཁམས་པ་ཏཱ་ར་ནཱ་ཐས་རང་ལོ་ཉེར་དགུ་པ་ལ་དཔལ་བཟང་ལྡན་དུ་བྲིས་པའོ།། །།
སྐྱེ་ཞིང་སྐྱེ་བ་དག་ནི་ཐམས་ཅད་དུ། །རིགས་བཟང་བློ་གསལ་ང་རྒྱལ་མེད་པ་དང་། །སྙིང་རྗེ་ཆེ་ཞིང་བླ་མར་ལ་གུས་ཤིང་། །དཔལ་ལྡན་བླ་མའི་དམ་ཚིག་ལ་གནས་ཤོག །དཔལ་ལྡན་བླ་མའི་རྣམ་པར་ཐར་བ་ལ། །སོགས་བརྗོད་དོ།།