བླ་མའི་བཀའ་དྲིན་དྲན་པའི་གསོལ་འདེབས།

བླ་མའི་བཀའ་དྲིན་དྲན་པའི་གསོལ་འདེབས་བཞུགས་སོ། །ཨོཾ་གུ་རུ་བུདྡྷ་བོ་དྷི་སཏྭ་བྷྱོ་ན་མོ་ན་མཿ བླ་མ་སངས་རྒྱས་བཀའ་དྲིན་ཅན་གྱི་ཞབས་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་དུས་ཐམས་ཅད་དུ་རྗེས་སུ་བཟུང་དུ་གསོལ། མཚོན་རྣོན་བྱེ་བ་ཕྲག་ཁྲིག་སྟོང་གིས་ཀྱང་། །མ་ཆོད་མི་ཆོད་ཆོད་པར་མི་འགྱུར་བའི། །བདག་འཛིན་འཆིང་བ་དམ་པོ་གཅོད་མཛད་པ། །བླ་མ་སངས་རྒྱས་བཀའ་དྲིན་ཅན་ལ་འདུད། །གོ་མཚོན་སྟར་བའི་དཔའ་བོ་མང་པོས་ཀྱང་། །མ་ཆོམས་མི་ཆོམས་ཆོམས་པར་མི་འགྱུར་བའི། །མི་ཟད་ཉོན་མོངས་གཡུལ་ངོ་སེལ་མཛད་པ། །བླ་མ་སངས་རྒྱས་བཀའ་དྲིན་ཅན་ལ་འདུད། །བྱེ་བ་ཕྲག་ཁྲིག་འབུམ་གྱི་ཉི་མས་ཀྱང་། །མ་སྐམ་མི་སྐམ་སྐེམ་པར་མི་འགྱུར་བའི། །སྲིད་པའི་ཆུ་བོ་ཆེན་པོ་སྐེམ་མཛད་པ། །བླ་མ་སངས་རྒྱས་བཀའ་དྲིན་ཅན་ལ་འདུད། །རྡོ་རྗེ་རབ་ཏུ་འབར་བ་དུ་མས་ཀྱང་། །མ་ཤིགས་མི་ཤིགས་ཤིགས་པར་མི་འགྱུར་བའི། །ང་རྒྱལ་རི་བོ་མཐོན་པོ་སྙིལ་མཛད་པ། །བླ་མ་སངས་རྒྱས་བཀའ་དྲིན་ཅན་ལ་འདུད། །ཉི་ཟླ་ནོར་བུ་འབར་བའི་འོད་ཀྱིས་ཀྱང་། །མ་སེལ་མི་སེལ་སེལ་བར་མི་ནུས་པའི། །མ་རིག་མུན་པ་མུན་ནག་སེལ་མཛད་པ། །བླ་མ་སངས་རྒྱས་བཀའ་དྲིན་ཅན་ལ་འདུད། །རྟེན་ཅིང་འབྲེལ་འབྱུང་དབང་པོ་ཀུན་གྱིས་ཀྱང་། །མ་མཐོང་མི་མཐོང་མཐོང་བར་མི་འགྱུར་བའི། །བདེ་གཤེགས་སྙིང་པོ་མངོན་སུམ་མཐོང་མཛད་པ། །བླ་མ་སངས་རྒྱས་བཀའ་དྲིན་ཅན་ལ་འདུད། །ཡིད་ཀྱི་རྣམ་ཤེས་ཤིན་ཏུ་སྒྲིན་པོས་ཀྱང་། །མ་རིག་མི་རིག་རིག་པར་མི་འགྱུར་བའི། །རང་བྱུང་ཡེ་ཤེས་རང་གིས་རིག་མཛད་པ། །བླ་མ་སངས་རྒྱས་བཀའ་དྲིན་ཅན་ལ་འདུད། །སེམས་དང་སེམས་བྱུང་རབ་ཏུ་གསལ་བས་ཀྱང་། །མ་ཤེས་མི་ཤེས་ཤེས་པར་མི་འགྱུར་བའི། །རང་བཞིན་འོད་གསལ་རང་གིས་ཤེས་མཛད་པ། །བླ་མ་སངས་རྒྱས་བཀའ་དྲིན་ཅན་ལ་འདུད། །བུ་ལ་ཤིན་ཏུ་བྱམས་པའི་ཕ་མས་ཀྱང་། །མ་སྦྱིན་མི་སྦྱིན་སྦྱིན་པར་མི་འགྱུར་བའི། །དོན་དམ་ཆོས་སྐུའི་གཏེར་ཆེན་སྩོལ་མཛད་པ། །བླ་མ་སངས་རྒྱས་བཀའ་དྲིན་ཅན་ལ་འདུད། །གྲུ་གཟིངས་མཉན་པ་དེད་དཔོན་བྱེ་བས་ཀྱང་། །མ་བརྒལ་མི་བརྒལ་བརྒལ་བར་མི་འགྱུར་བའི། །སྡུག་བསྔལ་རྒྱ་མཚོ་ཆེ་ལས་སྒྲོལ་མཛད་པ། །བླ་མ་སངས་རྒྱས་བཀའ་དྲིན་ཅན་ལ་འདུད། །དེ་སླད་ཁྱེད་ཀྱི་བཀའ་དྲིན་བསམས་པ་ན། །སྟོང་གསུམ་རིན་ཆེན་བདུན་གྱིས་རབ་བཀང་ནས། །གུས་པས་ཉིན་རེ་བཞིན་དུ་རྟག་འབུལ་ཡང་། །དྲིན་ལན་བྱེ་བའི་ཆར་ཡང་ལོན་མ་ལགས། །དྲིན་ཅན་ཁྱོད་ཀྱི་བྱ་བ་བསྒྲུབ་སླད་དུ། །བསྐལ་པར་བྱེ་བ་ཕྲག་ཁྲིག་འབུམ་ཕྲག་བརྒྱར། །སྒོ་གསུམ་མི་ངལ་བྲན་བཞིན་རབ་བཀོལ་ཡང་། །བཀའ་དྲིན་ཆ་ཡི་ཆ་ཡང་ལོན་མ་ལགས། །རྟག་ཏུ་ཚུལ་གནས་ཐོས་དང་བསམ་ལྡན་པས། །རྡོ་རྗེ་རྣལ་འབྱོར་ཉིན་དང་མཚན་སྒོམ་ཞིང་། །བརྩེ་བས་གཞན་ལ་ཕན་དང་བདེ་བསྒྲུབ་ན། །ཁྱེད་ཀྱི་དྲིན་ལན་ཅུང་ཟད་ལོན་ནམ་སྙམ། །དེ་སླད་ཁྱོད་ཀྱི་དགོངས་པ་བསྒྲུབ་སླད་དུ། །ཚུལ་ཁྲིམས་ཏིང་འཛིན་ཤེས་རབ་དྲི་མ་མེད། །ནམ་མཁའ་རྒྱ་མཚོ་ཉི་མའི་འོད་ལྟ་བུས། །རང་དང་གཞན་གྱི་དགོས་པ་འགྲུབ་པར་ཤོག །དྲིན་ཅན་ཁྱེད་དང་རྟག་ཏུ་མི་འབྲལ་ཞིང་། །ཟང་ཟིང་བྱེ་བ་བསྒྲུབ་པའི་བསྙེན་བཀུར་གྱིས། །དྲིན་ཅན་བླ་མ་རྟག་ཏུ་མཉེས་བྱས་ནས། །བླ་མ་ལྟ་བུའི་གོ་འཕང་མྱུར་ཐོབ་ཤོག །སྤྲང་པོ་ཤེས་རབ་རྒྱལ་མཚན་གྱིས་བཀོད་པའོ།། །།