གསོལ་འདེབས་དང་ཞབས་བརྟན་གྱི་སྐོར།

གསོལ་འདེབས་དང་ཞབས་བརྟན་གྱི་སྐོར་བཞུགས། ཆོས་ཀྱི་རྗེ་ཐམས་ཅད་མཁྱེན་པའི་སྐྱེས་རབས་ཁྱད་འཕགས་བསྡུས་པ་ནི། རྒྱ་གར་སྐད་དུ། སརྦ་དྷརྨ་ཨཱ་བྷི་ཛྙཱ་ཛྭ་ཐ་ཀཱ་མ་ལ་བྷི་ཤྭ་ཊ་ཡཱ་ན་མཿ བོད་སྐད་དུ། ཆོས་ཀྱི་རྗེ་ཐམས་ཅད་མཁྱེན་པའི་སྐྱེས་རབས་ཁྱད་པར་དུ་འཕགས་པ་ཞེས་བྱ་བ། བླ་མ་དང་ཕྱོགས་བཅུའི་རྒྱལ་བ་སྲས་བཅས་ཐམས་ཅད་ལ་ཕྱག་འཚལ་ཞིང་སྐྱབས་སུ་མཆིའོ། །ཐུགས་བརྩེ་བ་ཆེན་པོས་རྗེས་སུ་བཟུང་དུ་གསོལ། དཔལ་ལྡན་བླ་མའི་སྐྱེས་རབས་ཁྱད་འཕགས་འདི། །མདོ་རྒྱུད་རྒྱ་མཚོའི་ནང་ནས་ལེགས་ཕྱུང་བས། །ངོ་མཚར་ཁྱད་འཕགས་ནམ་མཁའི་ཁྱོན་ལྟར་ཡངས། །དཔལ་འབྱོར་རྟ་ལྗང་ནོར་བུ་ལྟར་གྱུར་པ། །འཕྲིན་ལས་རབ་དཀར་ཡེ་ཤེས་རོལ་བ་ཡིས། །ཆུ་སྲིན་རྒྱལ་མཚན་ཅན་གྱི་སྡེ་རིགས་བཅས། །མདའ་ལྔའི་དབང་པོ་ཉིན་སྐར་ལྟར་སེལ་བ། །ཐུབ་པའི་རྒྱལ་ཚབ་ཀུན་མཁྱེན་ཆོས་ཀྱི་རྗེ། །བསྟན་པའི་སྒྲོན་མེ་འཛམ་གླིང་མཁས་པའི་རྒྱན། །འཆད་པའི་ལེགས་བཤད་ཐམས་ཅད་མཁྱེན་པའི་སྐད། །རྩོད་པའི་དུས་སུ་ལུང་རིགས་ཐོག་ལྕགས་འཕྲོ། །རྩོམ་པའི་ལེགས་བཤད་རྟ་བདུན་རྒྱལ་པོའི་འོད། །བདག་བློ་པད་མོའི་འདབ་སྟོང་རབ་ཕྱེ་སྟེ། །ནང་རིག་འགྱུར་མེད་གེ་སར་གསལ་མཛད་པ། །བཀའ་དྲིན་མཉམ་མེད་དཔལ་ལྡན་ཆོས་ཀྱི་རྗེ། །སྟོན་ཟླ་དྲི་མེད་ཞབས་རྡུལ་དཀྱིལ་འཁོར་དུ། །རྟག་ཏུ་གུས་པས་སྤྱི་བོར་བསྟེན་བགྱི་ཞིང་། །ཁྱེད་ཀྱི་མཛད་སྤྱོད་ཚུལ་བཞིན་ལེགས་བརྟགས་ནས། །དད་པའི་ཤུགས་ཀྱིས་མཆི་མ་རྒྱུན་དུ་བབ། །མོས་གུས་སྟོབས་ཀྱིས་བ་སྤུ་རབ་ཏུ་གཟེངས། །སྐྱེ་བ་སྔོན་དུ་བྲམ་ཟེ་པད་མ་ཕྲེང་། །སངས་རྒྱས་ཆོས་ཀྱི་སྣང་བ་དེ་བཞིན་དུ། །རྒྱལ་བུ་རིན་ཆེན་འབྱུང་གནས་དེ་བཞིན་གཤེགས། །འོད་ཟེར་ཀུན་ནས་མངོན་འཕགས་རྒྱལ་པོ་དང་། །འཕགས་པ་སྤྱན་རས་གཟིགས་དང་བརྩོན་འགྲུས་ཀླུ། །གླིང་བཞི་རྒྱལ་པོ་དེ་བཞིན་ལི་ཙ་བཱི། །བློ་འཆངས་རྟ་རྒྱལ་རུ་རུ་པར་ཙི་ཀ །འཇིག་རྟེན་དབང་ཕྱུག་བསོད་ནམས་ལྡན་པ་དང་། །འོད་བཟང་རྨ་བྱ་མཛེས་པའི་བློ་གྲོས་དང་། །རྒྱལ་བུ་མཛེས་ལྡན་གླང་ཆེན་ངང་བ་དང་། །སྤོས་ཀྱི་གླང་པོ་མཛེས་བཟང་བློ་གྲོས་ཆེ། །རྒྱལ་བུ་མྱ་ངན་མེད་པ་དེ་བཞིན་གཤེགས། །ཟླ་བའི་རྒྱལ་མཚན་རྒྱལ་པོ་ནོར་བུའི་ཕྲེང་། །པདྨ་དཀར་པོ་ཀླུ་སྒྲུབ་སྙིང་པོ་ཞེས། །སྲོང་བཙན་སྒམ་པོ་རྒྱལ་བ་འབྲི་གུང་པ། །ད་ལྟ་ཀུན་མཁྱེན་ཆེན་པོར་སྐུ་ཚེ་བཞེངས། །ནོར་བུ་ལྟ་བུར་འགྲོ་བའི་དོན་མཛད་པ། །མ་འོངས་སངས་རྒྱས་ཡེ་ཤེས་འབྱུང་གནས་ཞེས། །མཚན་བཟང་སོ་གཉིས་རོལ་བའི་རྣམ་དག་པ། །སྐྱེས་རབས་སོ་གཉིས་རྣམ་བཤད་ཁྱད་པར་འཕགས། །དཔེ་བྱད་བཟང་པོ་བརྒྱད་ཅུའི་ངོ་བོ་ཉིད། །ངོ་མཚར་རྨད་བྱུང་བརྒྱད་ཅུའི་ལེགས་བཤད་འདི། །མདོ་རྒྱུད་དག་ལས་ལེགས་པར་བསྡུས་ནས་ནི། །དད་པ་ཅན་རྣམས་མོས་གུས་བསྐྱེད་པ་དང་། །ལོག་སྨྲ་ཅན་རྣམས་སྤྲོ་བ་སྙེད་པ་དང་། །ཐར་འདོད་ཐམས་ཅད་ཆོས་ལ་འགོད་པའི་ཕྱིར། །རྣམ་བཤད་ཁྱད་འཕགས་ཞེས་བྱའི་བསྟན་བཅོས་འདི། །གཞན་ཡང་དད་ལྡན་མང་བོས་བསྐུལ་བྱས་ནས། །རང་ཉིད་ཤིན་ཏུ་མོས་པའི་སྒོ་ནས་སྦྱར། །འགལ་བ་ཅི་མཆིས་དཔལ་ལྡན་བླ་མ་དང་། །སངས་རྒྱས་བྱང་ཆུབ་ཚོགས་ལ་སོ་སོར་བཤགས། །ལེགས་པའི་དགེ་བས་བདག་གཞན་སེམས་ཅན་ཀུན། །དཔལ་ལྡན་བླ་མའི་དྲིན་གྱིས་རྗེས་བཟུང་ནས། །འགྱུར་མེད་འོད་གསལ་ཕྱག་རྒྱ་ཆེན་པོ་ཡི། །མཆོག་གི་དངོས་གྲུབ་རྒྱ་ཆེན་མྱུར་ཐོབ་ཤོག །དཔལ་ལྡན་བླ་མའི་ཞབས་པད་ལེགས་བསྟེན་ནས། །འཁོར་ལོ་གསུམ་དང་རྒྱུད་སྡེ་རྣམ་བཞིའི་ཚོགས། །དགོངས་པ་དེ་ཉིད་མཆོག་ཏུ་རབ་ཐོབ་ནས། །ཟང་ཟིང་མེད་པར་འགྲོ་ལ་སྟོན་པར་ཤོག །ཆོས་རྗེའི་རྣམ་ཐར་གསལ་སྒྲོན་ནས་ཕྱུང་བའི་སྐྱེས་རབས་ཁྱད་འཕགས་བསྡུས་པ་འདི་ནི་ཐུབ་བསྟན་ཕྱོགས་ལས་རྣམ་རྒྱལ་གླིང་དུ་ཐུགས་རྗེ་དཔལ་གྱིས་པར་དུ་བསྒྲུབས་པའི་དགེ་བས་བསྟན་པ་དང་སེམས་ཅན་ལ་ཕན་ཐོག་པར་གྱུར་ཅིག །
༈ ན་མོ་ལོ་ཀི་ཤྭ་ར་ཡ། ཤེས་བྱ་ཀུན་མཁྱེན་ཤེས་རབ་རྒྱལ་མཚན་དཔལ། །འཕྲིན་ལས་བཟང་པོ་ཉི་མའི་དཀྱིལ་འཁོར་གྱིས། །གླིང་བཞི་མུན་སེལ་ཁམས་གསུམ་ཆོས་ཀྱི་རྗེ། །ཐུབ་བསྟན་རྒྱལ་མཚན་འཛིན་ལ་སྤྱི་བོས་འདུད། །སྐུ་མཆོག་བདེ་གཤེགས་སྙིང་པོའི་ཁང་བཟང་ལ། །ལེགས་བཤད་གསུང་གི་སྒྲ་དབྱངས་རྡོ་རྗེ་འཛིན། །འཁྲུལ་མེད་ཐུགས་ལྡན་འོད་གསལ་ཆོས་ཀྱི་དབྱིངས། །མཐའ་འཁོབ་མུན་སེལ་ཁྱེད་ལ་སྤྱི་བོས་འདུད། །དུས་གསུམ་རྒྱལ་བ་རྒྱ་མཚོའི་ལུང་བསྟན་པ། །གངས་ཅན་ཁྲོད་འདིར་རྒྱལ་བའི་བསྟན་པ་སྤེལ། །སྙིགས་དུས་མགོན་མེད་དཔལ་གྱུར་དོལ་པོ་པ། །མཚུངས་མེད་ཆོས་ཀྱི་རྗེ་ལ་སྤྱི་བོས་འདུད། །སྟོབས་སོགས་ཡོན་ཏན་ལྡན་པ་ཆོས་ཀྱི་རྗེ། །མཚན་དཔེས་རབ་མཛེས་བདེ་ཆེན་ལོངས་སྤྱོད་རྫོགས། །སྤྲུལ་སྐུ་སྒྱུ་མའི་གར་གྱི་རྣམ་པར་རོལ། །སྐུ་གསུམ་དབྱེར་མེད་ཟུང་འཇུག་རྡོ་རྗེ་འཆང་། །རྒྱ་ཆེན་རྒྱུན་མི་ཆད་པའི་འཕྲིན་ལས་ཅན། །བརྒྱུད་པར་བཅས་ལ་གུས་པས་ཕྱག་འཚལ་ལོ། །ཀུན་ཏུ་བཟང་པོའི་མཆོད་པའི་སྤྲིན་དཔུང་གིས། །ནམ་མཁའི་དབྱིངས་དང་མཉམ་པའི་མཆོད་པ་འབུལ། །ཐོག་མེད་བསགས་པའི་སྡིག་ལྟུང་སོ་སོར་བཤགས། །སྐྱེ་འཕགས་དགེ་ལ་རྗེས་སུ་ཡི་རང་ངོ་། །རྫོགས་ལྡན་ཆོས་ཀྱི་འཁོར་ལོ་བསྐོར་དུ་གསོལ། །མྱ་ངན་མི་འདའ་ཡུན་རིང་བཞུགས་གསོལ་འདེབས། །དེ་ལྟར་བསྟོད་སོགས་དགེ་བའི་འགྲོ་བ་ཀུན། །དངོས་གྲུབ་རྣམ་གཉིས་ཆར་གྱིས་མཉེས་བྱས་ནས། །བྱིན་རླབས་ཆོས་ཀྱི་དཔལ་ལ་འགོད་གྱུར་ཅིང་། །ཀུན་མཁྱེན་རྒྱལ་བའི་གོ་འཕང་མྱུར་ཐོབ་ཤོག། ཅེས་པ་འདི་ཡང་ཤེས་རབ་རྒྱལ་མཚན་དཔལ་བཟང་པོས་སྦྱར་བའོ། །ཨོཾ་ཨཱཿགུ་རུ་པྲཛྙཱ་དྷྭ་ཛ་སརྦ་སིདྡྷི་ཧཱུཾ་ཧཱུཾ། །
༈ ཀུན་མཁྱེན་ཆོས་གྲགས་ལོ་ཙཱ་པཎྜི་ཏ། །ཕྱོགས་རྒྱལ་འབྲི་གུང་ཞང་སྟོན་ཉ་དབོན་པ། །ཐང་ཟུང་སྨན་ཆུ་རིན་ཚུལ་གྷ་རུང་བ། །ཕུན་ཚོགས་བསོད་ནམས་རྣམས་ལ་གསོལ་བ་འདེབས།། ༈ ལྷར་བཅས་སྐྱེ་དགུའི་འདྲེན་པ་ཟས་གཙང་གི །མདོ་སྔགས་བསྟན་པའི་རྒྱལ་མཚན་འཛིན་པ་ལ། །གངས་ཅན་འདི་ན་འགྲན་པའི་ཟླ་བྲལ་བ། །ཏཱ་ར་ནཱ་ཐའི་ཞབས་ལ་གསོལ་བ་འདེབས། །ཨོཾ་ཨཱཿགུ་རུ་ཏཱ་ར་ནཱ་ཐ་སརྦ་སིདྡྷི་ཧཱུཾ་ཧཱུཾ། ༈ མི་གཡོ་གསུམ་ལྡན་རྡོ་རྗེའི་རྣལ་འབྱོར་གྱིས། །རླུང་སེམས་དག་པས་རྟགས་བཅུ་མངོན་དུ་གྱུར། །དྷཱུ་ཏཱིའི་ལམ་སྦྱངས་འོད་གསལ་ངང་ལ་བཞུགས། །སྦྱོར་དྲུག་བརྒྱུད་པ་རྣམས་ལ་གསོལ་བ་འདེབས།། ༈ གསང་བ་ཀུན་འདུས་སྐུ་དང་རྒྱུ་འཕྲུལ་གསུང་། །དགྱེས་མཛད་ཐུགས་དང་ཡོན་ཏན་འཁོར་ལོ་སྡོམ། །འཕྲིན་ལས་འཇམ་དཔལ་རྡོ་རྗེའི་ངོ་བོ་ཉིད། །ཀུན་དགའ་ཡོན་ཏན་རྒྱ་མཚོར་གསོལ་བ་འདེབས། །དཀོན་མཆོག་རྒྱལ་ཀུན་བདེ་ཆེན་ཆོས་སྐུའི་དབྱིངས། །ཀུན་བཟང་ཧེ་རུ་ཀ་དཔལ་འཁོར་ལོ་སྡོམ། །དབྱེར་མེད་མཆོག་ཐུན་དངོས་གྲུབ་སྩོལ་བའི་མགོན། །རྣམ་སྣང་རྡོ་རྗེའི་ཞབས་ལ་གསོལ་བ་འདེབས། །སངས་རྒྱས་ཀུན་དངོས་བླ་མ་རིན་པོ་ཆེ། །ཡི་དམ་ཞི་ཁྲོ་དཔའ་བོ་མཁའ་འགྲོ་དང་། །དཔལ་མགོན་བསྟན་སྲུང་རྒྱ་མཚོ་ཀུན་འདུས་པའི། །བདག་ཉིད་དཔལ་ལྡན་བླ་མར་གསོལ་བ་འདེབས། །སྐྱེ་ཀུན་ཡབ་རྗེ་ཁྱོད་དང་མི་འབྲལ་ཞིང་། །ཚེ་རིང་ནད་མེད་བསམ་དོན་ཡིད་བཞིན་འགྲུབ། །ཐེག་མཆོག་དམ་ཆོས་དཔལ་ལ་ལོངས་སྤྱོད་ནས། །མཐར་ཐུག་རྒྱལ་བའི་གོ་འཕང་མྱུར་ཐོབ་ཤོག །ཅེས་པ་འདི་ནི་གྲོང་མིང་བ་ཚེ་དབང་རྡོ་རྗེས་བསྐུལ་ངོར། དྷརྨ་བྷ་དྲས་བྲིས་པའོ། །
༈ གཞོན་ནུའི་དུས་ནས་འཁོར་བར་ཞེན་པ་ལོག །ཕ་ཡུལ་རྒྱབ་ཏུ་བསྐྱུར་ནས་དམ་ཆོས་བཙལ། །མཚན་ལྡན་རྩ་བའི་བླ་མ་སྙིང་བཞིན་བསྟེན། །སྡོམ་གསུམ་མིག་འབྲས་བཞིན་དུ་གཅེས་སྤྲས་བྱས། །འགྲོ་ཀུན་སེམས་ལ་བཞག་ནས་དབེན་པ་བསྟེན། །རྒྱལ་སྲས་སྤྱོད་ལ་སྤྲོ་ནས་འགྲོ་དོན་མཛད། །མཚམས་པ་སྨོན་ལམ་བཟང་པོར་གསོལ་བ་འདེབས། །སྐྱེ་བ་འདི་དང་ཚེ་རབས་ཐམས་ཅད་དུ། །བཙུན་པ་ཁྱེད་དང་སྐད་ཅིག་མི་འབྲལ་ཞིང་། །ཕྱི་ནང་འགལ་རྐྱེན་བར་ཆད་ཞི་བ་དང་། །མཐུན་རྐྱེན་ལེགས་ཚོགས་ཐམས་ཅད་ལྷུན་གྲུབ་ནས། །དམ་ཆོས་བདུད་རྩིའི་དཔལ་ལ་སྤྱོད་པ་དང་། །རྣམ་མཁྱེན་ཉི་མ་མྱུར་དུ་འཆར་བར་ཤོག །ཅེས་མཆེད་གྲོགས་སྙིང་དང་འདྲ་བ་རྣམས་ཀྱིས་ཡང་ཡང་བསྐུལ་ངོར། རང་འདྲའི་དམན་པ་རྣམས་ལ་ཕན་དུ་རེ་བས་སྨོན་ལམ་བཟང་བོས་བྲིས་པའོ། །དགེ་ལེགས་འཕེལ། །
༈ ཨོཾ་སྭཱ་སྟི། རྒྱལ་ཀུན་སྤྱི་གཟུགས་ཀུན་མཁྱེན་ཇོ་ནང་པ། །ཡབ་སྲས་བརྒྱུད་འཛིན་བཅས་པའི་ཉི་འོད་ཟིལ། །ཐུགས་རྗེ་ཆོས་སྣང་དཔལ་གྱི་མགོན་པོ་ཆེ། །རྩ་བའི་བླ་མའི་ཞབས་ལ་གསོལ་བ་འདེབས། །ངེས་པ་དོན་ལ་འདུ་འབྲལ་མི་མངའ་ཡང་། །དྲང་དོན་གཟུགས་སྐུ་ཞིང་གཞན་མི་གཡེང་བར། །སྤྲུལ་པའི་ཉིན་བྱེད་རྩོལ་མེད་མྱུར་གསལ་བར། །ཐུབ་བསྟན་ཕྱོགས་ལས་རྣམ་རྒྱལ་ཆོས་ཀྱི་ཁྲིར། །གསང་གསུམ་བདུད་རྩིའི་གྲུ་ཆར་ལེགས་ཕབ་པར། །སྨོན་དོན་གེགས་མེད་རྟག་བརྟན་བདེན་པ་དང་། །མཐུ་ལྡན་སྲུང་མའི་ཕྲིན་ལས་ནུས་སྟོབས་ཀྱིས། །ངེས་དོན་བསྟན་པ་ལྷག་པར་རྒྱས་གྱུར་ཅིག །ཅེས་འཇམ་མགོན་བློ་གྲོས་གྲགས་པའི་གསུངས་བྱིན་ཅན་ལ། དམ་པ་གང་གི་དགོངས་པ་ཆོས་དབྱིངས་སུ་རྫོགས་པའི་མཛད་པ་གནང་སྐབས་སུ་མཇུག་ཏུ་ཡང་སྤྲུལ་མྱུར་འབྱོན་གདུང་འབོད་ཚུལ་དུ། མཁར་སྤྲུལ་པྲཛྙཱ་དྷརྨཱ་ཝརྟིས་འཕྲལ་དུ་བྲིས་པ་དགེ། །
༈ སེམས་ཀྱི་གནས་ལུགས་དོན་དམ་བླ་མའི་ཐུགས། །ཆོས་སྐུ་ཀུན་ཁྱབ་ཡོན་ཏན་རྒྱ་མཚོའི་གཏེར། །འཁོར་འདས་གཤིས་བཞུགས་མཛད་བཟང་ཉེར་སྩོལ་མཁན། །དམིགས་མེད་རང་གསལ་ངང་ནས་གསོལ་བ་འདེབས། །ཞེས་པ་འདི་ཡང་དཀོན་མཆོག་འཕྲིན་ལས་སོགས་ཀྱིས་ངོར། བློ་བཟང་ཆོས་འཕེལ་བས་སོ། །
༈ གསང་ཆེན་སྙིང་པོའི་ཟབ་ངག་དམ་པའི་ཕུལ། །གང་འདུལ་ཡིད་ཅན་ཚོགས་ལ་མངའ་དབང་བསྒྱུར། །ཡོན་ཏན་བྱེ་བའི་དཔལ་གྱུར་བསྟན་འགྲོའི་སླད། །སྐུ་སྐྱེས་བཟང་པོས་སླར་ཡང་ཆོས་ཆར་ཕོབས། །རིག་པ་མཆོག་གི་བརྟུལ་ཞུགས་རོལ་བའི་གར། །ཀུན་མཁྱེན་ཆེན་པོས་གསང་གསུམ་རོལ་གར་མགོན། །རང་ལུགས་བསྟན་ལ་ཉེར་ཕན་མཛད་པའི་ཕྱིར། །དུས་འདིར་སྤྲུལ་པའི་བཀོད་བཟང་ཉེ་བར་སྟོན། །རང་སྣང་ཆོས་སྐུ་རྟག་བརྟན་ཐེར་ཟུག་ཀྱང་། །གཞན་སྣང་ལོངས་སྤྲུལ་གར་བསྒྱུར་སྣ་ཚོགས་པས། །མོས་ངོར་འདའ་ཚུལ་མི་མཛད་གཟུགས་སྐུའི་འཕྲུལ། །འཁྲུལ་བྲལ་སྐུ་སྐྱེས་གསར་བས་དགེ་མཚན་ཞུ། །ཞེས་ཡང་སྤྲུལ་མྱུར་འབྱོན་དྲང་སྲོང་བདེན་མཐུ་ཞེས་པ་འདི་ཉིད་རྗེ་བཙུན་དམ་པ་ངག་དབང་ཡོན་ཏན་བཟང་པོ་མཆོག་ཉིད་གདུལ་བྱ་རྣམས་ཀྱིས་རྟག་འཛིན་ལྡོག་ཕྱིར། གཞན་སྣང་ངོར་རེ་ཞིག་དགོངས་པ་འདའ་ཚུལ་བྱས་སྐབས། གང་གི་རྒྱལ་ཚབ་དམ་པ་སྤྲུལ་འཇིགས་མེད་རྡོ་རྗེས་གཟིམས་ཁང་བདེ་ལྡན་དཔལ་གྱི་ཕོ་བྲང་དུ་བྲིས་པའོ། །
༈ གཞི་དབྱིངས་འོད་གསལ་ཆོས་སྐུ་ཀུན་ཁྱབ་དཔལ། །འགྲོ་ཀུན་རྒྱུད་ལ་རྟག་བརྟན་གཤེགས་སྙིང་དུ། །ཡེ་བཞུགས་སླར་ཡང་གདུལ་བྱ་གཞན་སྣང་ངོར། །ངག་དབང་དཔལ་ལྡན་གྲགས་པར་གསོལ་བ་འདེབས། །ཞེས་པ་འདི་སློབ་བུ་ཡོན་ཏན་རྒྱ་མཚོ་སོགས་ཀྱིས་ངོར། བློ་བཟང་ཆོས་འཕེལ་བས་བྲིས་པའོ། །
༈ དཔལ་ལྡན་ཀུན་གཟིགས་འཆི་མེད་དབང་པོའི་ཕུལ། །ཚེ་དང་ཡེ་ཤེས་མཆོག་སྩོལ་རྣམ་པར་རྒྱལ། །འཕགས་མ་ཡིད་བཞིན་འཁོར་ལོ་ཚེ་ཡི་དཔལ། །རྣམ་གསུམ་ལྷ་རྣམས་བསླུ་མེད་མཐུ་བྱིན་གྱིས། །བསྟན་ལ་སྨན་པའི་མཆོག་སྤྲུལ་གསང་གསུམ་ཁམས། །དགེ་ལེགས་དཔལ་ཡོན་ཀུན་ནས་རབ་དར་བཞིན། །བགྲེས་རྒུད་བྲལ་བའི་སྐུ་ལ་དབང་ཐོབ་སྟེ། །མཛད་འཕྲིན་བཟང་པོས་ཕྱོགས་མཐར་ཡོངས་ཁྱབ་ཤོག །ཅེས་གཙང་མཆོག་སྤྲུལ་གང་གི་ཞབས་བརྟན་སྨོན་ཚིག་འདི་ཡང་། མ་ཏིས་སྦྱར་བའོ། །
༈ རྒྱལ་ཀུན་མཁྱེན་རབ་ངག་དབང་རྣམ་པར་རྒྱལ། །མཐུ་སྟོབས་གཅིག་བསྡུས་ཀུན་བཟང་འཕྲིན་ལས་རྗེ། །སྙིང་རྗེའི་རང་གཟུགས་དཀོན་མཆོག་འཇིགས་མེད་མཆོག །འཇིགས་མེད་རྡོ་རྗེའི་ཞབས་ལ་གསོལ་བ་འདེབས། །མཆོག་གསུམ་ལྷ་དང་སྲུང་མའི་བྱིན་རླབས་དང་། །ཆོས་ཉིད་མི་འགྱུར་ཆོས་ཅན་བསླུ་མེད་དང་། །བདག་ཅག་ལྷག་བསམ་རྣམ་པར་དག་པའི་མཐུས། །དཔལ་ལྡན་བླ་མ་སྲིད་མཐར་ཞབས་བརྟན་ཤོག །འདི་ནས་བཟུང་སྟེ་བྱང་ཆུབ་སྙིང་པོའི་བར། །འབྲལ་མེད་རྗེས་བཟུང་ཐུགས་ཡིད་གཅིག་ཏུ་འདྲེས། །ས་ལམ་མཐར་ཕྱིན་སྤངས་རྟོགས་ཡོངས་རྫོགས་ཏེ། མཐར་ཐུག་བདེ་གཤེགས་སྙིང་པོ་མྱུར་མངོན་ཤོག །ཅེས་པ་འདི་ཆོས་འཕགས་སོགས་ངེས་དོན་བདེ་ཆེན་གླིང་གི་ཐུན་པ་རྣམས་ཀྱིས་བསྐུལ་ངོར། པྲཛྙཱའི་མིང་ཅན་ཀྱིས་བྲིས་པའོ། །
༈ ཞབས་བརྟན་འདོད་དོན་འགྲུབ་པའི་ནོར་བུ། ཨོཾ་སྭཱ་སྟི། སྟོང་པ་ཞི་ཞིང་སྐྱེ་བ་མེད་པའི་ཚུལ། །སྣ་ཚོགས་ཐབས་ཀྱིས་འགྲོ་ལ་འདོམས་མཁས་པ། །རྒྱལ་བ་དྲི་མ་མེད་པ་ཐུགས་རྗེའི་སྤྱན། །མཉམ་མེད་ཤཱཀྱ་སེང་གེས་དགེ་ལེགས་སྩོལ། །འཆི་བདག་བདུད་ཀྱི་སྡེ་དཔུང་བྱེ་བ་ཡང་། །གང་གི་མཚན་ཙམ་བསྙེན་པས་འདུད་འགྱུར་བ། །དཔག་མེད་འོད་མངའ་ཚེ་ཡི་ལྷ་ཚོགས་ཀྱིས། །ཤིས་པའི་དགའ་སྟོན་སྩོལ་ལ་བྱིན་ཆེན་ཕོབས། །མདོ་དོན་མཐར་ཐུག་གཞན་སྟོང་དབུ་མའི་སྲོལ། །མཁས་ཀུན་དགའ་བའི་ལམ་བཟང་རྨད་བྱུང་བ། །ཤེས་རབ་དྲི་མ་མེད་པས་གསལ་བྱེད་མཁན། །ཕུན་ཚོགས་འབྱུང་གནས་བླ་མར་གསོལ་བ་འདེབས། །སྲིད་ན་མི་འཇིགས་སྙིང་རྗེའི་གོ་བགོས་ནས། །ཀུན་ཉོན་རྒྱུ་མའི་མཚོན་ཆ་རྣམ་འཇོམས་པའི། །ཤིན་ཏུ་དཔའ་ཆེན་གཡུལ་གྱི་ཐབས་ཤོམས་པ། །འཇིགས་མེད་དཔའ་བོའི་མཆོག་ཏུ་ཞབས་བརྟན་ཤོག །ཀློག་པ་ཐོས་བསམ་འཁོར་ལོས་དུས་འདའ་ཞིང་། །སྤོང་བ་བསམ་གཏན་སྒོམ་པས་རྒྱུད་ཕྱུག་པ། །བཤད་ཅིང་སྒྲུབ་པས་བསྟན་པ་སྐྱོང་མཁས་པའི། །མཚུངས་བྲལ་བསྟན་འཛིན་ཆེན་པོར་ཞབས་བརྟན་ཤོག །རྒྱལ་མཆོག་དམ་པ་རྣམས་ཀྱི་ཐུགས་བསྐྱེད་དང་། །བདག་ཅག་དད་མོས་ལྷག་བསམ་མཐུ་བཙན་པས། །བཤེས་གཉེན་དམ་པའི་ཞབས་པད་རྟག་བརྟན་ནས། །རྣམ་དཀར་མཛད་བཟང་ཕྱོགས་བཅུར་ཁྱབ་པར་ཤོག །ཅེས་པ་འདི་ཡང་ལྕམ་མདའ་དགོན་ཆེན་མཉམ་མེད་ཇོ་ནང་པའི་ཆོས་ཀྱི་སྡེ་ཆེན་པོའི་མཁན་པོ་ཀུན་དགའ་ཤེས་རབ་གསལ་བྱེད་ཕུན་ཚོགས་འབྱུང་གནས་ཀྱི་ཞབས་བརྟན་ཞིག་དགོས་ཞེས་དོན་གཉེར་བ་གྲོལ་མཆོག དཀོན་འཕྲིན། ཆོས་རྣམ་བཅས་ནས་བསྐུལ་ངོར། ཀརྨ་པར་འབོད་པ་ཨོ་རྒྱན་འཕྲིན་ལས་པས་བྲིས།
༈ ཨོཾ་སྭཱ་སྟི། རྒྱལ་ཀུན་མཁྱེན་བརྩེ་དགའ་བཞིའི་དཔལ་མངའ་ཞིང་། །ཡོན་ཏན་འཕྲིན་ལས་མཁའ་དང་རྒྱ་མཚོའི་དཔྱིད། །ནམ་ཡང་ཟད་མེད་བསྟན་འགྲོའི་དཔལ་གྱུར་མགོན། །ཞབས་པད་བསྐལ་བརྒྱའི་བར་ཏུ་བརྟན་གྱུར་ཅིག །དཔལ་ལྡན་བླ་མའི་ཞབས་བརྟན་གསོལ་འདེབས་དད་ལྡན་སློབ་བུ་ཀུན་དགའ་སྙིང་པོས་ངོར། མཁར་སྤྲུལ་པྲཛྙཱ་དྷརྨཱ་ཝརྟིས་སོ། །
༈ ངག་གི་དབང་ཕྱུག་ངུར་སྨྲིག་རོལ་བའི་གར། །སངས་རྒྱས་ཀུན་འདུས་མཚུངས་མེད་རིན་པོ་ཆེ། །འགྲོ་བའི་བདེ་སྐྱིད་བསོད་ནམས་དཔལ་གྱི་ཞིང་། །ཚེ་ཡི་མི་མཐུན་ཀུན་ལས་རྣམ་རྒྱལ་ཤོག །ཅེས་པ་འདི་ནི་དཔལ་ལྡན་རྒྱ་མཚོ་དང་འོད་གསལ་གཉིས་ཀྱིས་བསྐུལ་ངོར། དངོས་གྲུབ་དཔལ་ནས་བྲིས་པའོ། །