བླ་མའི་རྣལ་འབྱོར་བྱིན་རླབས་མྱུར་སྩོལ།

བླ་མའི་རྣལ་འབྱོར་བྱིན་རླབས་མྱུར་སྩོལ་ཅེས་བྱ་བ་བཞུགས་སོ། །བླ་མའི་རྣལ་འབྱོར་བྱིན་རླབས་མྱུར་སྩོལ་ཅེས་བྱ་བ། བླ་མ་དམ་པའི་ཞབས་ལ་ཕྱག་འཚལ་ལོ། །དེ་ལ་ཐོག་མར་སྐྱབས་སེམས་ནི། མཆོག་གསུམ་ངོ་བོ་དཔལ་ལྡན་བླ་མ་ལ། །བྱང་ཆུབ་སྙིང་པོའི་བར་དུ་སྐྱབས་སུ་མཆི། །སེམས་ཅན་དོན་དུ་སངས་རྒྱས་ཐོབ་པའི་ཕྱིར། །ཟབ་ལམ་བླ་མའི་རྣལ་འབྱོར་བསྒོམ་པར་བགྱི། །མོས་གུས་ཀྱི་རྟེན་བླ་མ་སྐྱབས་གནས་ཀུན་འདུས་སུ་གསལ་གདབ་པ་ནི། རང་མདུན་ནམ་མཁར་འཇའ་འོད་འཁྲིགས་པའི་དབུས། །སེང་ཁྲི་པད་ཟླ་ཉི་མ་སྒྲ་གཅན་སྟེང་། །སྐྱབས་གནས་ཀུན་འདུས་བླ་མ་རྡོ་རྗེ་འཆང་། །ངག་དབང་ཡོན་ཏན་བཟང་པོ་ཐུགས་རྗེའི་གཏེར། །སྐུ་མདོག་དཀར་ལ་དམར་བའི་མདངས་དང་ལྡན། །བདག་ལ་དགྱེས་པའི་ཞལ་རས་འཛུམ་དཀར་གཡོ། །ཕྱག་གཉིས་ས་གནོན་ཕྱག་རྒྱའི་མཐེབ་མཛུབ་ཀྱིས། །གཡས་གཡོན་པད་དཀར་སྡོང་བོ་འཛིན་པའི་རྩེར། །རྗེ་བཙུན་སྒྲོལ་མ་རིགས་ལྡན་རྒྱལ་པོས་མཚན། །ཞབས་ཟུང་སེམས་དཔའི་སྐྱིལ་མོ་ཀྲུང་གིས་བཞུགས། །རྣམ་གསུམ་ངུར་སྨྲིག་རྒྱན་གྱིས་མཛེས་པར་ཀླུབ། །དབུ་ལ་མཁན་ཞྭ་སྙན་ཤལ་དང་ལྡན་གསོལ། །མཚན་དཔེ་གསལ་རྫོགས་འོད་ཟེར་མཁའ་མཐར་འཕྲོ། །ཟག་མེད་ཏིང་འཛིན་འབུམ་གྱི་ཉམས་ལྡན་ཞིང་། །གནས་བཞིར་སྐུ་བཞིའི་ས་བོན་འབྲུ་བཞིས་མཚན། །མཆོག་གསུམ་རྩ་གསུམ་འདུས་པའི་ངོ་བོ་གསལ། །ཡན་ལག་བདུན་པས་ཚོགས་བསགས་པ་ནི། སྐུ་བཞིའི་བདག་ཉིད་བླ་མ་སངས་རྒྱས་ལ། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །དངོས་འབྱོར་ཡིད་སྤྲུལ་མཆོད་སྤྲིན་རྒྱ་མཚོ་མཆོད། །ཐོག་མེད་ནས་བསགས་སྡིག་ལྟུང་སོ་སོར་བཤགས། །སྐྱེ་འཕགས་དགེ་བ་ཀུན་ལ་རྗེས་ཡི་རང་། །གང་འདུལ་ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་སྲིད་མཐར་བཞུགས་སུ་གསོལ། །འདིས་མཚོན་དགེ་བ་བྱང་ཆུབ་ཆེན་པོར་བསྔོ། །རྩེ་གཅིག་ཏུ་གསོལ་བ་གདབ་པ་ནི། སྤངས་རྟོགས་ཡོན་ཏན་རྒྱ་མཚོའི་ཕ་རོལ་ཕྱིན། །མཛད་འཕྲིན་བཟང་པོས་བསྟན་འགྲོའི་དོན་ཆེན་མཛད། །བཀའ་དྲིན་མཚུངས་མེད་རྩ་བའི་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་རྩེ་གཅིག་ཏུ་གསོལ་བ་བཏབ་སྟེ། ཐུགས་ཡིད་དབྱེར་མེད་ཀྱི་ངང་ནས་མཚན་སྔགས་བཟླ་བ་ནི། ཨོཾ་ཨཱཿགུ་རུ་བཛྲ་དྷ་ར་ཝཀྐིནྡྲ་གུ་ཎ་བྷ་དྲ་སརྦ་སིདྡྷི་ཧཱུཾ་ཧཱུཾ། ཅི་ནུས་བཟླ། བྱིན་རླབས་དབང་བཞི་བླང་བ་ནི། བླ་མའི་གནས་བཞིའི་ཡི་གེ་རྣམ་བཞི་ལས། །འོད་ཟེར་དཀར་དམར་མཐིང་སེར་བཞི་འཕྲོས་ཏེ། །བདག་གི་གནས་བཞིར་ཐིམ་པས་སྒྲིབ་བཞི་དག །དབང་བཞི་ཐོབ་ཅིང་སྐུ་བཞིའི་ས་བོན་ཐེབས། །བླ་མའི་གཟུགས་སྐུའི་རྣམ་པ་གནས་འགྱུར་ཏེ། །རང་གི་སྤྱི་བོར་པདྨ་ཟླ་བའི་སྟེང། །རྡོ་རྗེ་སེམས་དཔའ་ཡབ་ཡུམ་ཧེ་རུ་ཀ །རྒྱན་དང་ཆ་བྱད་ཡོངས་སུ་རྫོགས་པར་གྱུར། །ཐུགས་ཀར་ཟླ་སྟེང་ཧཱུཾ་མཐར་ཡིག་བརྒྱས་བསྐོར། །སྔར་བྱས་སྡིག་པར་གནོང་འགྱོད་དྲག་པོ་དང་། །ཕྱིན་ཆད་སྡོམ་སེམས་བརྟན་པོ་དང་བཅས་ཏེ། །མ་གཡེངས་དྲན་པའི་ངང་ནས་ཡིག་བརྒྱ་བཟླ། །ཞེས་གཉེན་པོ་སྟོབས་བཞི་ཚང་བའི་སྒོ་ནས་བདུད་རྩི་འབེབས་སྦྱོང་གི་དམིགས་པ་དང་། ཡང་ན་གནས་ལུགས་སྤྲོས་བྲལ་ལ་མཉམ་པར་བཞག་བཞིན་ཧེ་རུ་ཀའི་ཡིག་བརྒྱ་ཅི་ནུས་བཟླ། མཐར། བླ་མ་རྡོ་རྗེ་སེམས་དཔའ་བདག་ལ་དགོངས། །སྐུ་གསུང་ཐུགས་དང་རྩ་བ་ཡན་ལག་གི །དམ་ཚིག་ཉམས་ཆག་ཐམས་ཅད་མཐོལ་ཞིང་བཤགས། །ཐོག་མེད་ནས་བསགས་སྡིག་ལྟུང་སྦྱང་དུ་གསོལ། །རྡོར་སེམས་ཡབ་ཡུམ་འོད་ཞུ་རང་ལ་ཐིམ། །སྒོ་གསུམ་སྐུ་གསུང་ཐུགས་དང་དབྱེར་མེད་གྱུར། །དགེ་འདིས་རིང་མིན་ས་ལམ་མཐར་ཕྱིན་ཏེ། །དཔལ་ལྡན་བླ་མའི་གོ་འཕང་ཐོབ་པར་ཤོག །ཅེས་བླ་མའི་རྣལ་འབྱོར་བྱིན་རླབས་མྱུར་སྩོལ་ཅེས་བྱ་བ་འདི་ཡང་གཙང་ཆེན་མཆོག་སྤྲུལ་རིན་པོ་ཆེ་འཇིགས་མེད་རྡོ་རྗེའི་བཀས་བསྐུལ་བ་དང་། ཁྱད་པར་རྗེ་གང་གི་སློབ་བུ་དམ་པ་གྲྭ་བཙུན་ངག་བཟང་། དོན་ལྡན་ཟུང་གིས་ནན་གྱིས་བསྐུལ་ངོ་མི་ལྡོག་ཙམ་དུ། རྗེ་བླ་མ་གང་གི་སློབ་འབངས་ཐ་ཤལ་བ་ཀུན་དགའ་ཤེས་རབ་གསལ་བྱེད་ཀྱིས་བྲིས་པའོ།། །།སརྦ་མངྒ་ལམ། །