བླ་མའི་རྣལ་འབྱོར་བྱིན་རླབས་སྒོ་འབྱེད།

བླ་མའི་རྣལ་འབྱོར་བྱིན་རླབས་སྒོ་འབྱེད་ཅེས་བྱ་བ་བཞུགས་སོ། །རྡོ་རྗེ་འཆང་ངག་དབང་དཔལ་ལྡན་གྲགས་པའི་བླ་མའི་རྣལ་འབྱོར་བྱིན་རླབས་སྒོ་འབྱེད་ཅེས་བྱ་བ། བླ་མ་རྡོ་རྗེ་འཆང་ལ་ཕྱག་འཚལ་ལོ། །འདིར་བླ་མའི་རྣལ་འབྱོར་ཉམས་སུ་ལེན་པ་ལ། སྦྱོར་དངོས་རྗེས་གསུམ་ལས། དང་པོ་སྦྱོར་བ་སྐྱབས་སེམས་ནི། སྐྱབས་གནས་ཀུན་འདུས་བླ་མ་སངས་རྒྱས་ཉིད། །སྲིད་ཞིའི་འཇིག་ལས་སྒྲོལ་བའི་སྐྱབས་སུ་བསྟེན། །འགྲོ་རྣམས་དོན་དུ་སངས་རྒྱས་ཐོབ་པའི་ཕྱིར། །ལམ་ཟབ་བླ་མའི་རྣལ་འབྱོར་བསྒོམ་པར་བགྱི། །
གཉིས་པ་དངོས་གཞི་ལ་བཞི་ལས། དང་པོ་མོས་གུས་ཀྱི་རྟེན་བླ་མ་སྐྱབས་གནས་ཀུན་འདུས་སུ་གསལ་གདབ་པ་ནི། རང་མདུན་མཁའ་དབྱིངས་འཇའ་ཟེར་འཁྲིགས་ཀློང་དུ། །སེང་ཁྲི་པདྨ་ཉ་རྒྱས་ཟླ་བའི་སྟེང་། །རྒྱལ་ཀུན་སྤྱི་གཟུགས་བླ་མ་རིན་པོ་ཆེ། །གསུམ་ལྡན་རྡོ་རྗེ་འཛིན་པ་ཆོས་ཀྱི་རྗེ། །ངག་དབང་དཔལ་ལྡན་གྲགས་པ་བཀའ་དྲིན་ཅན། །སྐུ་མདོག་དཀར་ལ་དམར་བའི་གཟི་མདངས་རྒྱས། །ཞབས་ཟུང་རྡོ་རྗེའི་སྐྱིལ་མོ་ཀྲུང་གིས་བཞུགས། །ཕྱག་གཡས་ཐུགས་ཀར་ཆོས་འཆད་ཕྱག་རྒྱ་དང་། །ཕྱག་གཡོན་མཉམ་བཞག་སྟེང་དུ་གླེགས་བམ་འཛིན། །སྐུ་ལ་རྣམ་གསུམ་ངུར་སྨྲིག་རྒྱལ་མཚན་གསོལ། །མཁན་ཞྭ་སྙན་ཤལ་དང་བཅས་དབུ་ལ་མནབས། །བརྩེ་ཆེན་ཞལ་རས་འཛུམ་དཀར་གཡོ་བཞིན་དུ། །ཟག་མེད་ཏིང་འཛིན་མཆོག་གི་ཉམས་དང་ལྡན། །མཚན་དཔེའི་དཔལ་འབར་བལྟ་བས་མི་ངོམས་པ། །དྲི་མེད་འོད་བཟང་སྟོང་གི་ཕུང་པོ་ཅན། །རྡུལ་བྲལ་ཟག་མེད་ཡེ་ཤེས་མཆོག་གི་སྐུ། །གསུང་ནི་ཆོས་ཀྱི་སྒྲ་དབྱངས་མཁའ་མཐར་ཁྱབ། །ཐུགས་མཆོག་མཁྱེན་བརྩེ་ནུས་པ་རྒྱ་མཚོའི་དཔལ། །སྐུ་ཡི་གནས་བཞིར་ཡི་གེ་འབྲུ་བཞིས་མཚན། །སྐྱབས་གནས་མ་ལུས་འདུས་པའི་ངོ་བོར་གསལ། །
གཉིས་པ་ཡན་ལག་བདུན་པས་ཚོགས་བསགས་པ་ནི། གཏན་གྱི་སྐྱབས་མཆོག་བླ་མ་ཁྱེད་ཉིད་ལ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །ཕྱི་ནང་གསང་བའི་མཆོད་སྤྲིན་དཔག་མེད་འབུལ། །ཐོག་མེད་ནས་བསགས་སྡིག་ལྟུང་མཐོལ་ཞིང་བཤགས། །རང་གཞན་དགེ་བ་ཀུན་ལ་རྗེས་ཡི་རང་། །ཐེག་གསུམ་ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བསྐལ་བརྒྱར་བཞུགས་སུ་གསོལ། །དགེ་འདིས་འགྲོ་ཀུན་བྱང་ཆུབ་མཆོག་ཐོབ་ཤོག །
གསུམ་པ་གསོལ་བ་གདབ་ཅིང་མཚན་སྔགས་བཟླ་བ་ནི། ཟབ་རྒྱས་གདམས་པའི་ངག་གི་དབང་ཕྱུག་ཆེ། །གསང་གསུམ་ཡོན་ཏན་རྒྱ་མཚོའི་དཔལ་དང་ལྡན། །གྲགས་པའི་མཚན་འཆང་རྩ་བའི་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་རྩེ་གཅིག་ཏུ་གསོལ་བ་བཏབ་སྟེ། ཐུགས་ཡིད་དབྱེར་མེད་ཀྱི་ངང་ནས་གནས་ལུགས་ལ་མཉམ་པར་བཞག་བཞིན་མཚན་སྔགས་བཟླ་བ་ནི། ཨོཾཨཱཿགུརུབཛྲདྷརཝཀིནྡྲཤྲཱིམཱནྟྲཀཱིརྟིསརྦསིདྡྷིཧཱུཾཧཱུཾ། ཅི་ནུས་བཟླ། བཞི་པ་བྱིན་རླབས་དབང་བཞི་བླང་བ་ནི། བླ་མའི་གནས་བཞིའི་ཡི་གེ་རྣམ་བཞི་ལས། །དཀར་དམར་མཐིང་སེར་འོད་ཀྱི་ཚོགས་སྤྲོས་ཏེ། །རང་གི་གནས་བཞིར་ཐིམ་པས་དབང་བཞི་ཐོབ། །སྒྲིབ་པ་བཞི་དག་སྐུ་བཞི་མངོན་དུ་གྱུར། །
གསུམ་པ་རྗེས་བསྡུ་བསྔོ་བ་ནི། བླ་མ་ཡེ་ཤེས་བདུད་རྩིའི་རྣམ་པར་ཞུ། །སྤྱི་བོའི་གཙུག་ནས་རང་གི་ལུས་ལ་ཐིམ། །བླ་མའི་ཐུགས་དང་རང་སེམས་དབྱེར་མེད་པར། །གནས་ལུགས་སྤྲོས་བྲལ་ངང་དུ་མཉམ་པར་བཞག །དགེ་འདིས་བདག་སོགས་ཚེ་རབས་ཐམས་ཅད་དུ། །བླ་མས་རྗེས་བཟུང་གདམས་ངག་ལེགས་བརྩལ་ནས། །ལམ་ལྔ་ས་བཅུ་རིམ་གྱིས་མྱུར་བགྲོད་དེ། །སྤངས་རྟོགས་མཐར་ཕྱིན་སངས་རྒྱས་ཐོབ་པར་ཤོག །ཅེས་རྡོ་རྗེ་འཆང་ངག་དབང་དཔལ་ལྡན་གྲགས་པའི་བླ་མའི་རྣལ་འབྱོར་བྱིན་རླབས་སྒོ་འབྱེད་ཅེས་བྱ་བ་འདི་ཡང་། རྡོ་རྗེ་སློབ་དཔོན་ཆེན་པོ་བླ་མ་ཡོན་ཏན་རྒྱ་མཚོའི་བཀའ་ཕེབས་པ་དང་། ཁྱད་པར་རྗེ་གང་གི་སློབ་བུ་དམ་ཚིག་དད་གུས་དང་ལྡན་པ་དཔལ་ལྡན་རྒྱ་མཚོས་ནན་ཆེར་བསྐུལ་ངོ་མི་ལྡོག་ཙམ་དུ་རྨོངས་རྟུལ་སྙོམ་ལས་པ་པྲཛྙཱའི་མིང་ཅན་གྱིས་འབྲི་ཁུལ་བགྱིས་པའོ།། །།དར་རྒྱས་འཕེལ། །