སེང་བཟློག
སེང་བཟློག་བཞུགས། ཨོཾ་སྭཱ་སྟི། སངས་རྒྱས་ཆོས་ཚོགས་མ་ལན་གསུམ་བརྗོད། ཨོཾ་སྭ་བྷཱ་ཝ ས་སྦྱངས། སྟོང་པའི་དབྱིངས་སུ་ཧཱུཾ་ལས་སྲུང་འཁོར་ནང་། །ཨེ་ལས་ཆོས་འབྱུང་པད་ཉི་དབུགས་བྲལ་སྟེང་། །ཧཱུཾ་ལས་རང་ཉིད་ཁམས་གསུམ་ཁྱབ་པའི་སྐུ། །ཕྱི་ནང་གསང་བའི་མི་མཐུན་ཕྱོགས་ཀུན་འཇོམས། །སྐུ་མདོག་སྔོན་མོ་ཞལ་གཅིག་ཕྱག་གཉིས་མ། །གྲི་ཐོད་ཁ་ཊྭཱཾ་རུས་པའི་རྒྱན་གྱིས་བརྒྱན། །གཡས་བསྐུམ་གཡོན་བརྐྱང་མེ་དཔུང་ཀློང་ན་བཞུགས། །སེང་གདོང་མཁའ་འགྲོའི་གཙོ་ལ་ཕྱག་འཚལ་ལོ། །འཁོར་ཚོགས་རྣལ་འབྱོར་མ་ནི་བྱེ་བས་བསྐོར། །ཨོཾ་ཨཱཿཧཱུཾ་ཞེས་སྐུ་གསུང་ཐུགས་རྡོ་རྗེ། །མི་བསྐྱོད་དབུ་རྒྱན་དམ་ཡེ་དབྱེར་མེད་འདྲེས། །མཆོད་པའི་སྤྲིན་དང་བསྟོད་དབྱངས་རྒྱ་མཚོས་ཁྱབ། །ཨཿཀཿསཿམཿརཿཙཿཤཿདཿརཿསཿམཿརཿཡཿཕཊཿ ཅེས་ཉེར་གཅིག་སོགས་བཟླས་ལ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། མཁའ་འགྲོ་མ་སེངྒེའི་གདོང་བ་ཅན་ལ་འཁོར་འཇིག་རྟེན་དང་འཇིག་རྟེན་ལས་འདས་པའི་མཁའ་འགྲོ་མ་བྱེ་བ་འབུམ་གྱིས་བསྐོར་བ་དང་བཅས་པ་རྣམས་ཀྱི་བཀའ་བདེན་པ་དང་། བདེན་པ་དང་བདེན་པ་ཆེན་པོའི་བྱིན་གྱིས་བརླབས་ཀྱིས། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་གནོད་ཅིང་འཚེ་བའི་དགྲ་བགེགས་གདུག་པ་ཅན་ཐམས་ཅད་དང་། ནད་རིམས་དང་། ཡམས་ནད་དང་། སྡེ་བརྒྱད་འབྱུང་པོའི་གནོད་པ་དང་། རྨི་ལམ་ངན་པ་དང་། མཚན་མ་ངན་པ་དང་། ལྟས་ངན་པ་དང་། ལོ་སྐེག་ཟླ་སྐེག་ཞག་སྐེག་ཆག་ཆེ་ཉམ་ང་བྱད་ཁ་རྦོད་གཏོང་ལ་སོགས་པ་མདོར་ན་མི་མཐུན་པའི་ཕྱོགས་ངན་པ་ཐམས་ཅད་ཕྱིར་བཟློག་པར་གྱུར་ཅིག །མེད་པར་གྱུར་ཅིག །ཞི་བར་གྱུར་ཅིག །རབ་ཏུ་ཞི་བར་གྱུར་ཅིག །ཁྲོ་མོ་འབར་བའི་ཚོགས་རྣམས་ཀྱིས། །དགྲ་བགེགས་རྣམས་ནི་ཐམས་ཅད་ཀྱི། །ལུས་ངག་ཐལ་བའི་རྡུལ་དུ་རློགས། །རྣམ་ཤེས་ཆོས་ཀྱི་དབྱིངས་སུ་སྒྲོལ། །བགེགས་དང་ལོག་པར་འདྲེན་པ་རྣམས། །གདུལ་དཀའ་འདུལ་མཛད་དཔའ་མོ་ཡི། །ཤིན་ཏུ་གཏུམ་པའི་ཁྲོ་གཟུགས་ཀྱིས། །མ་རུང་པ་རྣམས་ཚར་གཅོད་ཤོག །རྫོགས་པའི་བྱང་ཆུབ་སྒྲུབ་པ་ལ། །ཕྱི་དང་ནང་གི་འཚེ་བ་ཡི། །བར་དུ་གཅོད་པ་ཐམས་ཅད་ཀུན། །ཉེ་བར་ཞི་བར་མཛད་དུ་གསོལ། །གཞན་ཡང་སྐྱེ་བ་འདི་ཉིད་དུ། །མི་མཐུན་ཕྱོགས་ཀུན་ཞི་བ་དང་། །ཚེ་རིང་ནད་མེད་ཕུན་སུམ་ཚོགས། །གཏན་དུ་བདེ་བ་ཐོབ་པར་ཤོག །ཅེས་པ་འདི་ཡང་ཏཱ་ར་ནཱ་ཐས་སྨྲས་སོ།། །།