སྨོན་ལམ་གལ་པོ་ཆེ།

སྨོན་ལམ་གལ་པོ་ཆེ་བཞུགས་སོ། །ན་མོ་གུ་རུ། ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་བདག་ལ་དགོངས་སུ་གསོལ། བླ་མ་དཀོན་མཆོག་གསུམ་གྱི་བྱིན་རླབས་དང་། །མཁའ་འགྲོ་ཆོས་སྐྱོང་ཀུན་གྱི་མཐུ་རྩལ་དང་། །དགེ་བ་གང་བསགས་ཀུན་གྱི་ནུས་མཐུ་དང་། །དོན་དམ་མཁའ་ཁྱབ་ཆེན་པོའི་བྱིན་རླབས་ཀྱིས། །ཚེ་འདི་ཉིད་ལ་ད་ལྟ་འདི་ཉིད་དུ། །ལན་ཆགས་ཐམས་ཅད་གཏན་ནས་ཁྱེར་བ་དང་། །ལས་ངན་ཐམས་ཅད་གཏན་ནས་ཟད་པ་དང་། །རླུང་སེམས་ཐམས་ཅད་གཏན་ནས་འགགས་པར་ཤོག །ཚེ་འདི་ཉིད་ལ་ད་ལྟ་འདི་ཉིད་དུ། །ཉེས་སྐྱོན་ཐམས་ཅད་གཏན་ནས་ཟད་པ་དང་། །ཡོན་ཏན་ཐམས་ཅད་རྫོགས་པར་ཐོབ་པ་དང་། །འདུན་མ་ཐམས་ཅད་ཤིན་ཏུ་ལེགས་པར་ཤོག །ཚེ་འདི་ཉིད་ལ་ད་ལྟ་འདི་ཉིད་དུ། །བླ་མ་མཆོག་གི་བྱིན་གྱིས་རློབས་པ་དང་། །ཡི་དམ་མཆོག་གིས་རྗེས་སུ་འཛིན་པ་དང་། །དབང་མཆོག་ཐོབ་ནས་མྱུར་དུ་གྲོལ་བར་ཤོག །ཚེ་འདི་ཉིད་ལ་ད་ལྟ་འདི་ཉིད་དུ། །གནས་མཆོག་ཁྱད་འཕགས་མྱུར་དུ་རྙེད་པ་དང་། །ཟས་མཆོག་བཅུད་མཆོག་སྨན་མཆོག་རིན་ཆེན་མཆོག །ཆོས་མཆོག་ཐོབ་ནས་མྱུར་དུ་གྲོལ་བར་ཤོག །ཚེ་འདི་ཉིད་ལ་ད་ལྟ་འདི་ཉིད་དུ། །རིག་པ་གསུམ་དང་སྤྱན་ལྔ་མངོན་ཤེས་དྲུག །ས་བཅུ་དབང་བཅུ་སྟོབས་བཅུ་མྱུར་ཐོབ་ནས། །བསྟན་དང་འགྲོ་ལ་ཕན་ཆེན་མྱུར་བྱེད་ཤོག །ཚེ་འདི་ཉིད་ལ་ད་ལྟ་འདི་ཉིད་དུ། །རྡོ་རྗེ་ལྟ་བུར་དཔའ་བར་འགྲོ་བ་དང་། །ནམ་མཁའ་མཛོད་སོགས་ཏིང་འཛིན་ཀུན་ཐོབ་ནས། །མཁའ་མཉམ་འགྲོ་བའི་དོན་ཀུན་བྱེད་པར་ཤོག །ཚེ་འདི་ཉིད་ལ་ད་ལྟ་འདི་ཉིད་དུ། །རྩ་བཟང་རབ་མཆོག་གྱུར་པ་མྱུར་སྐྱེས་ཤིང་། །ཡེ་ཤེས་ཕེབས་ནས་བདག་འཛིན་འགགས་པ་དང་། །འགྱུར་མེད་བདེ་ཆེན་མྱུར་དུ་ཐོབ་པར་ཤོག །ཚེ་འདི་ཉིད་ལ་ད་ལྟ་འདི་ཉིད་དུ། །ཞུ་བདེ་འགྱུར་བཅས་མྱུར་དུ་འགགས་པ་དང་། །ཞུ་བདེ་འགྱུར་མེད་ཡོངས་སུ་རྫོགས་པ་དང་། །རང་བཞིན་འགྱུར་མེད་མྱུར་དུ་ཐོབ་པར་ཤོག །ཚེ་འདི་ཉིད་ལ་ད་ལྟ་འདི་ཉིད་དུ། །ནམ་མཁའི་མཐའ་ཁྱབ་རྫུ་འཕྲུལ་ཀུན་ཐོབ་ཅིང་། །ཕྱོགས་བཅུ་ཀུན་ཏུ་མྱུར་བར་རབ་སོང་སྟེ། །འཕགས་པ་ཀུན་མཆོད་འགྲོ་ཀུན་སྨིན་བྱེད་ཤོག །ལེགས་པ་ཀུན་དང་རྟག་ཏུ་འཕྲད་པ་དང་། །ཉེས་པ་ཀུན་དང་རྟག་ཏུ་བྲལ་བ་དང་། །གང་བྱས་ཐམས་ཅད་ཤིན་ཏུ་ལེགས་པ་དང་། །ཅི་བསམ་ཐམས་ཅད་ཡིད་བཞིན་འགྲུབ་པར་ཤོག །ད་ལྟ་རྩེ་གཅིག་སྒྲུབ་པ་འཕེལ་བའི་རྐྱེན། །གནས་འཁོར་ལ་སོགས་མཐུན་རྐྱེན་ཕུན་ཚོགས་ཤིང་། །རྩེ་གཅིག་སྒྲུབ་པ་ཉམས་སུ་ལེན་པ་ལ། །འགལ་རྐྱེན་བར་ཆད་གང་ཡང་མེད་པར་ཤོག །འཕགས་པ་ཀུན་གྱི་བྱིན་རླབས་ཆེན་པོ་དང་། །དགེ་བ་ཀུན་གྱི་མཐུ་སྟོབས་ཆེན་པོ་ཡིས། །གསོལ་བ་གང་བཏབ་མྱུར་དུ་ཐེབས་པ་དང་། །སྨོན་ལམ་འདི་དག་ངེས་པར་འགྲུབ་གྱུར་ཅིག །ཕྱོགས་བཅུ་ཀུན་ཏུ་ཐུབ་བསྟན་རྒྱས་པ་དང་། །བདུད་ཁ་ནག་པོའི་ཚོགས་རྣམས་ཞི་བ་དང་། །རྣལ་འབྱོར་བདག་ཅག་དཔོན་སློབ་འཁོར་བཅས་ཀྱི། །འདོད་དོན་ཡིད་ལ་བསམ་པ་འགྲུབ་པར་ཤོག །སངས་རྒྱས་སྐུ་གསུམ་བརྙེས་པའི་བྱིན་རླབས་དང་། །ཆོས་ཉིད་མི་འགྱུར་བདེན་པའི་བྱིན་རླབས་དང་། །དགེ་འདུན་མི་ཕྱེད་འདུན་པའི་བྱིན་རླབས་ཀྱིས། །ཇི་ལྟར་བསྔོས་བཞིན་སྨོན་ལམ་འགྲུབ་པར་ཤོག །ཅེས་པ་འདི་ཡང་རྟོན་པ་བཞི་ལྡན་གྱིས་སྦྱར་བའོ།། །། ཤུབྷཾ། མངྒ་ལཾ།