ཤམྦྷ་ལའི་སྨོན་ལམ་ཐོར་བུ།
ཤམྦྷ་ལའི་སྨོན་ལམ་ཐོར་བུ་བཞུགས། དུས་ཀྱི་འཁོར་ལོ་བླ་མ་དབྱེར་མེད་ལ། །གུས་པས་སྐྱབས་གསོལ་འདིར་བསགས་རབ་དཀར་མཐུས། །ཤམྦྷ་ལ་རུ་རིགས་ལྡན་སྲས་གྱུར་ཏེ། །བསྟན་འགྲོ་ཡོངས་ལ་རླབས་ཆེན་ཕན་ཐོགས་ཤོག །ཅེས་པའང་མ་ཏིས་སོ།། ༈ བསོད་ནམས་བསགས་དགེས་བདག་སོགས་འགྲོ། །འདི་ཕྱི་ཀུན་ཏུ་ཡང་དག་གི །ཆོས་མཐུན་ཁོ་ནས་ལེགས་འཚོ་ཞིང་། །རྐྱེན་ངན་གང་གིས་བསྒྱུར་མེད་ཤོག །ཅེས་པའང་མ་ཏིས་སོ།། ༈ རབ་དཀར་འདིས་མཚོན་སྐྱེ་འཕགས་དགེ་ཆེན་གྱིས། །དུས་མཐར་རྒྱལ་བསྟན་དབུ་འཕང་མཐོ་བ་དང་། །ཆབས་གཅིག་འགྲོ་ལ་ཕན་བདེ་ཡོངས་སྤེལ་ཞིང་། །བསྟན་འགྲོའི་བསྲུང་རིམ་རླབས་ཆེན་སྤྱོད་གྱུར་ཅིག །ཅེས་པ་འདི་ཡང་མ་ཏིས་སོ།། ༈ དགེ་འདིས་རྣལ་འབྱོར་ཡན་ལག་དྲུག །རིམ་པའི་མཐར་ཕྱིན་ཟུང་འཇུག་སྐུ། །དུས་ཀྱི་འཁོར་ལོ་མྱུར་འགྲུབ་སྟེ། །མ་ལུས་འགྲོ་ལ་ཕན་ཐོགས་ཤོག །ཅེས་པའི་དུས་འཁོར་སྨོན་ལམ་ཉེར་བསྡུས་འདི་དགེ་མ་བྱང་ཆུབ་སྒྲོན་ལ་མཁོ་ནས། མ་ཏིས་སོ།། ༈ རབ་དགེས་ཚེ་འདི་འཕོས་མ་ཐག་པ་རུ། །ཤམྦྷ་ལ་རུ་ཆོས་རྒྱལ་གདུལ་ཞིང་དུ། །ཚེ་ལུས་དེ་ལ་གསང་ཆེན་ལམ་མཐར་ཕྱིན། །དུས་འཁོར་རྡོར་འཆང་གོ་འཕང་མྱུར་ཐོབ་ཤོག །ཅེས་ཤམྦྷ་ལའི་སྨོན་ལམ་བསྡུས་པ་འདི་དགེ་མ་བྱང་ཆུབ་སྒྲོན་ལ་མཁོ་ཕྱིར། མ་ཏིས་སོ།། ༈ བདག་གིས་སྐྱེ་བ་འདི་ནས་འཕོས་མ་ཐག །སྔགས་ཀྱི་ཞིང་དེར་མ་འགགས་བཞུགས་པའི་དྲུང་། །ཐུགས་སྲས་མཆོག་གི་ཐུ་བོར་སྐྱེས་ནས་ཀྱང་། །ཚེ་གཅིག་གསང་ཆེན་ལམ་བཟང་མཐར་ཕྱིན་ཤོག །ཅེས་པའི་སྨོན་ལམ་འདི་ཡང་བརྩོན་འགྲུས་དཔལ་གྱི་ངོར། མ་ཏིས་སྨྲས།