མི་འཁྲུགས་པའི་སྨོན་ལམ་ཞིང་ཁམས་མྱུར་བགྲོད།

རྡོ་རྗེ་མི་འཁྲུགས་པའི་སྨོན་ལམ་ཞིང་ཁམས་མྱུར་བགྲོད་བཞུགས། བཅོམ་ལྡན་མི་འཁྲུགས་མགོན་པོ་བདག་ལ་དགོངས། །བདག་གིས་སྨོན་ལམ་ཇི་ལྟར་བཏབ་པ་ཀུན། །གེགས་མེད་པར་ཡང་འབད་མེད་ལྷུན་གྲུབ་ཏུ། །མྱུར་དུ་འགྲུབ་པར་བྱིན་གྱིས་བརླབ་ཏུ་གསོལ། །བདག་གི་དེ་རིང་དམ་ཆོས་སྒྲུབ་ལ་སོགས། །དུས་གསུམ་བསགས་པའི་རྣམ་དཀར་བསོད་ནམས་ཀྱིས། །བདག་གི་ཚེ་འདི་འཕོས་མ་ཐག་པ་ནས། །མངོན་པར་དགའ་བའི་ཞིང་དུ་སྐྱེ་བར་ཤོག །དེ་རུ་སྐྱེས་ནས་མགོན་པོ་མི་འཁྲུགས་པས། །ཐེག་པ་ཆེན་པོའི་དམ་ཆོས་གསུངས་པ་ལས། །མགོན་པོ་ཁྱོད་བཞིན་ཚུལ་ཁྲིམས་རྣམ་དག་ཐོབ། །བྱང་ཆུབ་སེམས་ཀྱིས་བདག་རྒྱུད་གང་བར་ཤོག །སྤྱན་དང་མངོན་ཤེས་གཟུངས་དང་ཏིང་འཛིན་སོགས། །རྒྱལ་སྲས་གཞན་ལས་ཁྱད་པར་འཕགས་པ་ཐོབ། །དོན་གཉིས་འགྲུབ་པའི་ཐབས་མཁས་རྨད་བྱུང་གཉིས། །ལམ་ལྔ་ས་བཅུ་མྱུར་དུ་བགྲོད་པར་ཤོག །བདག་ནི་མགོན་པོ་ཁྱེད་ཀྱིས་རྗེས་བཟུང་ནས། །ཐེག་ཆེན་ལམ་ནས་རྫོགས་པའི་སངས་རྒྱས་ཀྱི། །གོ་འཕང་ཐོབ་ནས་སྐྱེ་དགུ་མ་ལུས་པ། །འཇིགས་རུང་འཁོར་བའི་མཚོ་ལས་སྒྲོལ་བར་ཤོག །ཅེས་རྡོ་རྗེ་མི་འཁྲུགས་པའི་སྨོན་ལམ་ཞིང་ཁམས་མྱུར་བགྲོད་འདི་ཡང་། ཡར་ཐང་དགོན་གྱི་ལྷ་རྗེ་ངག་དབང་དོན་བཟང་གི་ངོར། ཐུབ་བསྟན་དགེ་ལེགས་རྒྱ་མཚོས་སྦྱར་བའོ། །
༈ བདག་དང་འགྲོ་རྣམས་སངས་རྒྱས་ཐོབ་བྱའི་ཕྱིར། །ཚུལ་ཁྲིམས་མེ་ཏོག་ལྟ་བུར་བསྲུང་བ་ལ། །ཉེས་ལྟུང་དྲི་མའི་འདམ་གྱིས་མ་གོས་པར། །དགེ་སློང་མི་འཁྲུགས་པ་དང་མཚུངས་པར་ཤོག། །།