དཔལ་ཇོ་ནང་པ་ཆེན་པོའི་བསྟན་འབར་མ།

དཔལ་ཇོ་ནང་པ་ཆེན་པོའི་བསྟན་འབར་མ་བཞུགས། རྒྱལ་བའི་རྒྱལ་ཚབ་རྒྱལ་བ་ཇོ་ནང་པ། །ཆོས་ཀྱི་དབང་ཕྱུག་ཀུན་མཁྱེན་ཆོས་ཀྱི་རྗེ། །བསྟན་པ་རིན་ཆེན་བསྟན་པའི་སྙིང་པོ་མཆོག །ཕྱོགས་དུས་ཀུན་ཏུ་ཡུན་རིང་འབར་གྱུར་ཅིག །བདེན་སྟོབས་བསླུ་མེད་དཀོན་མཆོག་རིན་ཆེན་གསུམ། །རང་བཞིན་རྣམ་དག་ཆོས་དབྱིངས་འགྱུར་མེད་མཐུས། །རྒྱལ་བ་གཉིས་པ་ཀུན་མཁྱེན་ཇོ་ནང་པའི། །བསྟན་པ་ཕྱོགས་ཀུན་ཡུན་རིང་འབར་གྱུར་ཅིག །ཐུབ་དབང་རྣམས་ཀྱིས་གྲངས་མེད་བསྐལ་པའི་བར། །རྒྱ་ཆེན་རྨད་བྱུང་ཚོགས་གཉིས་བསགས་པའི་མཐུས། །རྒྱལ་བ་གཉིས་པ་ཀུན་མཁྱེན་ཇོ་ནང་པའི། །བསྟན་པ་ཕྱོགས་ཀུན་ཡུན་རིང་འབར་གྱུར་ཅིག །དུས་གསུམ་རྒྱལ་རྣམས་འཁོར་བའི་ཕྱི་མཐའི་བར། །རིམ་གསུམ་ཆོས་ཀྱི་འཁོར་ལོ་ལེགས་གསུངས་འདིས། །རྒྱལ་བ་གཉིས་པ་ཀུན་མཁྱེན་ཇོ་ནང་པའི། །བསྟན་པ་ཕྱོགས་ཀུན་ཡུན་རིང་འབར་གྱུར་ཅིག །ཀུན་རྫོབ་ཆོས་ཀུན་གདོད་ནས་སྟོང་པའི་གཞིར། །སྐུ་གསུམ་ཉིན་བྱེད་དཀྱིལ་འཁོར་ཡོངས་རྒྱས་པ། །ཡེ་ནས་བཞུགས་པ་ཇོ་ནང་ཆེན་པོའི་ལུགས། །ཚུལ་དེ་ཕྱོགས་དུས་ཀུན་ཏུ་དར་གྱུར་ཅིག །མཁྱེན་པ་གསུམ་གྱི་རྣམ་པ་མ་ལུས་པ། །གཞན་སྟོང་ལྟ་བ་ཆེན་པོས་རྒྱས་བཏབ་སྟེ། །ཐེག་མཆོག་ལམ་བགྲོད་ཇོ་ནང་ཆེན་པོའི་སྲོལ། །ལམ་འདི་ཕྱོགས་དུས་ཀུན་ཏུ་དར་གྱུར་ཅིག །མི་ཤེས་མུན་པ་དྲུངས་ནས་ཕྱུང་བ་ན། །གདོད་ནས་བཞུགས་པའི་སྟོབས་བཅུའི་སངས་རྒྱས་ཉིད། །མངོན་དུ་གྱུར་འདི་ཇོ་ནང་ཆེན་པོའི་ལུགས། །ཚུལ་དེ་ཕྱོགས་དུས་ཀུན་ཏུ་དར་གྱུར་ཅིག །བསྟན་པའི་མངའ་བདག་རྒྱལ་བ་ཇོ་ནང་པའི། །བསྟན་པའི་པད་ཚལ་ས་སྟེང་ཀུན་ཏུ་ཁྱབ། །ཐོས་བསམ་སྒོམ་གསུམ་འཆད་རྩོད་རྩོམ་གསུམ་གྱི། །འོད་སྟོང་གཟི་བརྒྱས་ཡུན་རིང་འབར་གྱུར་ཅིག །བསྟན་པ་འཛིན་རྣམས་གཞན་སྟོང་དབུ་མའི་སྲོལ། །ལེགས་པར་འབྱེད་པའི་ལུང་དང་རིགས་པ་ཡི། །བློ་གྲོས་མཆོག་གི་སྣང་བ་རབ་རྒྱས་ནས། །ཚུལ་དེ་ཕྱོགས་དུས་ཀུན་ཏུ་སྤེལ་བ་ལ། །མི་མཐུན་རྐྱེན་ངན་མ་ལུས་རབ་ཞི་ཞིང་། །མཐུན་རྐྱེན་ལེགས་ཚོགས་ཡར་ངོའི་ཟླ་བཞིན་འཕེལ། །དགེ་མཚན་འབུམ་གྱིས་ས་གསུམ་འགེངས་བཞིན་པར། །ཇོ་ནང་པ་ཡི་བསྟན་པ་རྒྱས་གྱུར་ཅིག །རྔ་བོ་ཆེ་མདོར་རྒྱལ་བའི་མཚན་འཛིན་ཅིང་། །རྒྱལ་བའི་དགོངས་པ་མཐའ་དག་ཚུལ་བཞིན་དུ། །མཁྱེན་པའི་སྐྱེས་བུ་མཆོག་ཏུ་ལུང་གིས་བསྔགས། །མཐར་ཐུག་དབུ་མ་ཆེན་པོའི་ཤིང་རྟ་ཆེ། །གངས་ཅན་མཁས་དང་གྲུབ་པ་ཡོངས་ཀྱི་དབུས། །རྒྱུ་སྐར་དབུས་ན་ཉ་རྒྱས་ཟླ་བཞིན་འཕགས། །རྒྱལ་བ་གཉིས་པ་ཀུན་མཁྱེན་ཇོ་ནང་པའི། །བསྟན་པ་ཕྱོགས་ཀུན་ཡུན་རིང་འབར་གྱུར་ཅིག །འཁོར་ལོ་གསུམ་གྱི་དགོངས་དོན་ཚུལ་བཞིན་དུ། །ལེགས་པར་ཕྱེ་བ་དཔལ་ལྡན་ཇོ་ནང་པའི། །རྨད་བྱུང་བསྟན་པ་ས་སྟེང་ཡོངས་ལ་ཁྱབ། །ཕྱོགས་རྣམས་ཀུན་ཏུ་དར་ཞིང་རྒྱས་གྱུར་ཅིག །ཅེས་དཔལ་ཇོ་ནང་པ་ཆེན་པོའི་བསྟན་འབར་མ་འདི་ཡང་། རྔ་བའི་བསྭེ་མཆོག་སྤྲུལ་རིན་པོ་ཆེ་གང་གི་ཞལ་སྔ་ནས་ཀྱི་རང་རེའི་ཇོ་ནང་པ་ཆེན་པོའི་བསྟན་པ་རྒྱས་བྱེད་ཀྱི་སྨོན་ཚིག་བསྟན་འབར་མ་ཞིག་བྲི་བར་གྱིས་ཞེས་བཀའ་བསྩལ་པ་ལ་བརྟེན་ནས། ཐུབ་བསྟན་དགེ་ལེགས་རྒྱ་མཚོས་སྦྱར་བའོ།། །།
བསྐལ་བཟང་སྒྲོན་མེ་སྟོང་ཕྲག་ལས། །ཐུགས་བསྐྱེད་པད་དཀར་ལྟར་འཕགས་པ། །འགྲོ་མགོན་ཤཱཀྱའི་རྒྱལ་པོ་ཡི། །བསྟན་པ་ཡུན་རིང་འབར་གྱུར་ཅིག །ཐེག་གསུམ་མཐར་ཐུག་སེང་གེའི་སྒྲ། །ངེས་དོན་འཁོར་ལོ་ཐ་མ་ཡི། །སྡེ་སྣོད་དགོངས་འགྲེལ་བཅས་པ་ཀུན། །ཡུན་རིང་བསྟན་པ་འབར་གྱུར་ཅིག །ས་བཅུའི་དབང་ཕྱུག་མི་ཕམ་པ། །ཤིང་རྟ་ཆེན་པོ་ཐོགས་མེད་མཆེད། །རྩོད་དུས་ཀུན་མཁྱེན་ཞི་བའི་ཞབས། །དགོངས་དོན་ཚུལ་བཞིན་བཀྲལ་བ་ཡི། །བཀའ་སྲོལ་གངས་རིའི་ལྗོངས་འདི་ན། །གཟུ་བཙན་འཇིག་རྟེན་མིག་གཅིག་གི །བཀའ་དྲིན་ཆེན་པོས་སྣང་བྱས་པའི། །བསྟན་པ་ཡུན་རིང་འབར་གྱུར་ཅིག །རིགས་ལྡན་ཆེན་པོ་ཀུན་སྤངས་པ། །རྒྱལ་བ་ཡེ་ཤེས་བྱང་ཆུབ་སེམས། །ཡོན་ཏན་རྒྱ་མཚོ་ཆོས་ཀྱི་མཛོད། །ཁྱད་པར་རྒྱལ་བས་ལུང་བསྟན་པ། །ཀུན་མཁྱེན་ཆེན་པོ་བདེ་བར་གཤེགས། །ཡོངས་རྫོགས་བསྟན་པ་རྒྱ་མཚོའི་བདག །ངེས་དོན་དབུ་མའི་ཤིང་རྟ་ཆེ། །ཆོས་ཀྱི་རྒྱལ་པོ་ཇོ་ནང་པའི། །བརྒྱུད་འཛིན་མཁས་ཤིང་གྲུབ་པའི་ཚོགས། །གྲངས་མེད་སྤྱི་དང་ཁྱད་པར་དུ། །གསང་བདག་སྒྲོལ་བའི་མགོན་པོ་ཡི། །བསྟན་པ་ཡུན་རིང་འབར་གྱུར་ཅིག །ངེས་དོན་ཕྱིར་མི་ལྡོག་པའི་གཏམ། །འོད་གསལ་བདེ་གཤེགས་སྙིང་པོའི་ཚུལ། །ལེགས་པར་རྣམ་པར་ཕྱེ་བ་ཡི། །བསྟན་པ་ཡུན་རིང་འབར་གྱུར་ཅིག །འཕོ་བའི་འཇིགས་འཇོམས་རྒྱུད་ཀྱི་རྒྱལ། །ཕྱི་ནང་གཞན་དང་དེ་བཞིན་ཉིད། །ཟུང་འཇུག་རྣལ་འབྱོར་ཡན་ལག་དྲུག །ཡུན་རིང་བསྟན་པ་འབར་གྱུར་ཅིག །ཤཱཀྱ་སེང་གེའི་བསྟན་པ་ལ། །མདོ་དོན་གཞན་སྟོང་དབུ་མ་དང་། །སྔགས་དོན་རྡོ་རྗེའི་རྣལ་འབྱོར་ལས། །མཐར་ཐུག་ཆོས་ཚུལ་གཞན་མེད་པའི། །ཡིད་ཆེས་བསྐལ་བ་བཟང་ལྡན་ཏེ། །རྟོགས་ནས་གཞན་ལ་སྟོན་ནུས་པའི། །དམ་པའི་སྐྱེས་བུས་ས་སྟེང་ཁྱབ། །བསྟན་པ་ཡུན་རིང་འབར་གྱུར་ཅིག །ཅེས་པའི་དཔལ་ཇོ་ནང་པ་ཆོས་ཀྱི་རྒྱལ་པོ་ཡབ་སྲས་ལ་མི་ཕྱེད་པའི་འདུན་པ་ཅན། ཀུན་མཁྱེན་སི་ཏུའི་བཀའ་འབངས་ཐ་ཤལ་པ་ཀརྨ་ངག་དབང་ཡོན་ཏན་རྒྱ་མཚོས་དཔལ་འཛམ་ཐང་གི་ཆོས་སྡེར་རྟེན་འབྲེལ་ཆེད་དུ་བྲིས་པ་དགེ་ལེགས་འཕེལ། །
མཇུག་བྱང་།
གངས་ཅན་སཱ་ལའི་སྨན་ལྗོངས་ཀྱི་ཞིང་འདིར་ཉམས་མེད་བུ་རམ་ཤིང་བའི་ལྟ་གྲུབ་འཛིན་པའི་སྒྲུབ་བརྒྱུད་ཀྱི་ཤིང་རྟ་བརྒྱད་དམ། ཆོས་བརྒྱུད་ཆེན་པོ་ས་དགེ་རྙིང་གསུམ། ཇོ་འབྲུག་བཀའ་གསུམ་རྣམས་ཡོད་པ་ལས། དཔལ་ལྡན་རྒྱལ་བ་ཇོ་ནང་པའི་རང་ལུགས་ངེས་གསང་གཞན་སྟོང་དབུ་མ་ཆེན་པོའི་སྲོལ་གངས་ལྗོངས་འདིར་ཐོག་མར་འབྱེད་པ་པོ་ནི་རྒྱལ་བ་སངས་རྒྱས་ཀྱི་ཚངས་པའི་མགུར་ནས་ཡང་ཡང་ལུང་གིས་བསྔགས་པའི་ཀུན་མཁྱེན་ཇོ་ནང་པ་དོལ་པོ་བ་ཤེས་རབ་རྒྱལ་མཚན་གང་ཉིད་ཡིན་ལ། དེའི་ཆོས་བརྒྱུད་འཛིན་པའི་ཆོས་སྡེ་ཇི་སྙེད་ཅིག་བྱུང་བ་ལས། ད་ལན་ཡང་གཙང་ཞོལ་དགོན་ངེས་དོན་གཞན་སྟོང་བཀྲ་ཤིས་ཆོས་འཁོར་གླིང་གི་གྲྭ་བཙུན་པ་དཔལ་ལྡན་རྒྱ་མཚོ་གང་གིས། ཇོ་ནང་པའི་གྲྭ་རིགས་རྣམས་ལ་རང་ལུགས་ཀྱི་ཞལ་འདོན་ཞིག་མཁོ་གལ་ཆེ་བའི་བབ་དང་བསྟུན་ཞིང་། རྗེ་བཙུན་རྡོ་རྗེ་འཆང་ཆེན་པོ་བླ་མ་ཡོན་ཏན་བཟང་པོས་ཇོ་ནང་པའི་ཞལ་འདོན་ཕྱོགས་བསྒྲིགས་བྱེད་དགོས་པའི་བཀའ་གསུང་ཕབ་པ་གུས་པས་སྤྱི་བོར་བླངས་ཏེ། ཇོ་ནང་པའི་ཞལ་འདོན་རིན་ཆེན་ཕྲེང་བ་ཞེས་པའི་དེབ་འདི་དཔར་བསྐྲུན་ཐེངས་གསུམ་པ་ཡིན་ནོ། །དེ་ལྟར་བསྐྲུན་པའི་རྣམ་དཀར་གྱི་བསོད་ནམས་ཀྱི་མཐུ་ལ་བརྟེན་ནས་མཉམ་མེད་ཤཱཀྱ་སེངྒེའི་ལུང་རྟོགས་ཀྱི་བསྟན་པ་རིན་པོ་ཆེ་སྒོ་ཀུན་ནས་དར་ཞིང་རྒྱས་པ་དང་། ཁྱད་པར་དུ་གཞན་སྟོང་དབུ་མ་ཆེན་པོའི་ལྟ་གྲུབ་བླ་ན་མ་མཆིས་པ་འདི་ཉིད་ཕྱོགས་དུས་གནས་སྐབས་ཀུན་ཏུ་དར་བ་དང་། རང་ཅག་ཁ་བ་ཅན་གྱི་སེམས་ཅན་རྣམས་འཚེ་མེད་ཞི་བདེའི་ལམ་བཟང་ལ་ཞུགས་ནས། ཆོས་སྐུ་དོན་དམ་པའི་ས་ལ་རིང་མིན་མྱུར་དུ་བགྲོད་པར་གྱུར་ཅིག ཅེས་པ་འདི་ནི་གྲྭ་དཔལ་ལྡན་རྒྱ་མཚོས་ཞལ་འདོན་གྱི་དེབ་འདི་དཔར་སྐྲུན་བྱེད་སྐབས་ཉིད་ཀྱི་བཞེད་དོན་བཞིན། འབྲས་རབ་འབྱམས་པའི་མིང་ཙམ་འཛིན་པ་དངོས་གྲུབ་དཔལ་ནས་བྲིས་པའོ། །སརྦ་མངྒ་ལཾ།། །