དབུས་བཟའ་མཁའ་འགྲོ་བདེ་བའི་རྡོ་རྗེའི་རྣམ་ཐར་ཆེན་མོའི་མཇུག་གི་ཁ་སྐོང་ཉུང་ངུ་གཡུ་ཡི་ཕྲ་ཚོམ།
དབུས་བཟའ་མཁའ་འགྲོ་བདེ་བའི་རྡོ་རྗེའི་རྣམ་ཐར་ཆེན་མོའི་མཇུག་གི་ཁ་སྐོང་ཉུང་ངུ་གཡུ་ཡི་ཕྲ་ཚོམ་ཞེས་བྱ་བ་བཞུགས་སོ། །
མཚུངས་མེད་རྗེ་བཙུན་བླ་མ་དམ་པ་ཀུན་བཟང་བདེ་སྐྱོང་དབང་མོའི་ཞབས་ལ་གུས་པ་ཆེན་པོས་ཕྱག་འཚལ་ཞིང་སྐྱབས་ཀྱི་མཆོག་ཏུ་བསྟེན་ནོ། །ཐུགས་བརྩེ་བས་རྗེས་སུ་ཟུངས་ལ་རྟག་ཏུ་བྱིན་གྱིས་བརླབ་པར་མཛད་དུ་གསོལ། །གསང་ཆེན་བཀའ་ཡི་སྡུད་པོ་མཁར་ཆེན་བཟའ། །ཡང་དག་གྲུབ་པའི་དགྱེས་སྟེ་ཤེལ་དཀར་མཚོ། །ཟུང་འཇུག་སྤྲུལ་པའི་ཟློས་གར་སྨིན་ལེགས་གཟུག །བདེ་ཆེན་བདེ་བའི་རྡོ་རྗེ་གཙུག་ན་མཛེས། །གང་གི་རྟོགས་བརྗོད་རྒྱས་པའི་མཆོད་སྡོང་ཆེ། །མ་ཚང་ཞལ་སྐོང་ཕྲ་རྒྱན་འདིར་སྤྲས་ཀྱི། །གནས་གསུམ་ཌཱ་ཀིས་རྗེས་སུ་གནང་བ་དང་། །སྐལ་ལྡན་དད་པའི་གསོས་སུ་དགའ་བས་ལོངས། །དེ་ཡང་དུས་གསུམ་རྒྱལ་བ་ཐམས་ཅད་བསྐྱེད་པའི་ཡུམ་ཆོས་དབྱིངས་ཀུན་ཏུ་བཟང་མོ་དང་གཉིས་སུ་མེད་པ། རྡོ་རྗེ་ཐེག་པ་རྒྱ་མཚོའི་འབྱུང་
གནས་རྡོ་རྗེ་བཙུན་མོ་བཛྲ་ཝཱ་རཱ་ཧཱི་དེ་ཉིད་ཞིང་འདིར་བསམ་བཞིན་མི་མོའི་གཟུགས་སུ་བྱོན་པ། གསང་བ་གསུམ་གྱི་ཆེ་བའི་ཡོན་ཏན་རྒྱ་མཚོ་ལྟ་བུ་མངའ་བ།ལས་འཕྲོ་གཏེར་དང་། ཟབ་མོ་དག་སྣང་། སྙན་བརྒྱུད་མན་ངག་སྟེ་ཟབ་རྒྱས་ཆོས་ཚུལ་འཛད་མེད་ནམ་མཁའི་མཛོད་ལ་རང་དབང་འབྱོར་བ་ལས། ཕྱོགས་དུས་ཀྱི་གདུལ་བྱ་བགྲང་བ་ལས་འདས་པ་སྨིན་གྲོལ་ལ་བཀྲི་བའི་ཕྲིན་ལས་འགྲན་པའི་ཟླ་དང་བྲལ་བ་ཞིང་སྔགས་ལྷན་སྐྱེས་ཀྱི་རྡོ་རྗེའི་ཕོ་ཉ་མོ་བདག་ཅག་གི་རྣམ་འདྲེན་དམ་པ་ཀུན་བཟང་ཆོས་ཉིད་དབང་མོའམ། བདེ་ཆེན་བདེ་བའི་རྡོ་རྗེ་ཞེས་བོད་ཁ་བ་ཅན་གྱི་ཞིང་ཀུན་ཏུ་མཚན་སྙན་གྲགས་ཀྱིས་ཁྱབ་པའི། མཚན་ལྡན་ཡེ་ཤེས་ཀྱི་མཁའ་འགྲོ་མ་དེ་ཉིད་ཀྱི་མཛད་ཚུལ་རྣམ་ཐར་རྒྱས་པའི་མཇུག་མཐུད་ཅུང་ཟད་འཆད་པ་ལ་གཉིས། སྐུ་ཚེ་སྨད་ཀྱི་རྣམ་
ཐར་མདོ་ཙམ་བསྟན་པ་དང་། ཐ་མའི་མཛད་པ་བསྟན་ཚུལ་བཤད་པའོ། །དང་པོ་ནི། འདི་སྐད་ཅེས་བརྗོད་པར་བྱ་སྟེ། སྔོན་གྱི་བསྐལ་པ་འཇིག་རྟེན་གྱི་ཁམས་སྣ་ཚོགས་པའི་འོད་ཅེས་བྱ་བར་སངས་རྒྱས་རྔ་སྒྲའི་བསྟན་པ་ལ་མཆོག་ཏུ་གུས་པའི་རྒྱལ་པོའི་བུ་མོ་ཡེ་ཤེས་ཟླ་བ་ཞེས་བྱ་བ་ཞིག་ཡོད་དེ། དེས་ཤིན་ཏུ་དད་པའི་སྟོབས་ཀྱིས་སྟོན་འཁོར་རྣམས་ལ་མཆོད་པ་བྱས་ནས་བྱང་ཆུབ་ཏུ་སེམས་བསྐྱེད་པའི་ཚེ། འདི་སྐད་དུ། འདི་ན་སྐྱེས་པ་མེད་ཅིང་བུད་མེད་མེད། །བདག་མེད་གང་ཟག་མེད་ཅིང་རྣམ་རིག་མེད། །ཕོ་མོར་བཏགས་པ་འདི་ནི་ཡ་མ་བརླ། །འཇིག་རྟེན་བློ་ངན་རྣམ་པར་འཁྲུལ་བར་འགྱུར། །ཅེས་བྱ་བ་ལ་སོགས་པ་ཆེད་དུ་བརྗོད་དེ། སྐྱེས་པའི་རྟེན་ལ་བྱང་ཆུབ་འདོད་པ་ནི་མང་ལ། བུད་མེད་ཀྱི་ལུས་ཀྱིས་འགྲོ་བའི་དོན་བྱེད་པ་ནི་འགའ་ཡང་མེད་དོ། །དེ་བས་ན་འཁོར་
བ་མ་སྟོངས་ཀྱི་བར་དུ་བུད་མེད་ཀྱི་གཟུགས་ཀྱིས་འགྲོ་བའི་དོན་བྱའོ། །ཞེས་དམ་བཅས་ནས་འཕགས་མ་སྒྲོལ་མར་གྱུར་པ་དང་མཚུངས་པར་དྲི་མེད་ཀུན་དགའི་གཏེར་བྱོན་མཚོ་རྒྱལ་རྣམ་ཐར་ལེའུ་བདུན་མ་ལས། གུ་རུས་བཀའ་བསྩལ་པ། མཁའ་འགྲོ་ཡེ་ཤེས་མཚོ་རྒྱལ་ཁྱོད་རང་སྣང་ཙམ་དུ་ཚེ་གཅིག་ལ་དཔལ་ཀུན་ཏུ་བཟང་མོ་དང་གོ་འཕང་མཉམ་ནས། གཞན་སྣང་དུ་གང་ལ་གང་འདུལ་དུ་སྤྲུལ་པ་ཇི་སྙེད་ཅིག་བཀོད་ནས་ཁྱོད་ཀྱི་སྤྲུལ་པ་བསམ་གྱིས་མི་ཁྱབ་པ་ཞིག་འབྱུང་༔ འཛམ་གླིང་བྱེ་བ་ཕྲག་བརྒྱ་ན༔ སེམས་ཅན་རེ་རེའི་མདུན་དུ་ཡང་སྤྲུལ་པ་རེ་རེ་སྤྲུལ་ནས་གང་ལ་གང་འདུལ་དུ་སྟོན་ཅིང་༔ འབྲེལ་ཚད་ཆོས་ཉིད་ཟད་པའི་ས་ལ་བཀོད་པར་འགྱུར༔ མདོར་ན་འཁོར་བ་དོང་ནས་སྤྲུགས་པའི་མཐར་ཐུག་གི་བར་ལ་ཁྱོད་ཀྱི་སྤྲུལ་པ་ལ་
ཟད་པ་མེད༔ ཁྱད་པར་ཐུབ་པའི་བསྟན་ཞབས་སྙིགས་མ་ལྔ་བདོ་བའི་དུས་སུ༔ ཁྱོད་ཀྱི་སྐུའི་སྤྲུལ་པ་རིགས་ལྔ་རྟགས་ཀྱིས་མངའ་གསོལ་བས༔ འབྲེལ་ཚད་དོན་དང་ལྡན་པ་གཅིག༔ གངས་ཅན་བོད་ཀྱི་དབུས་སུ་འབྱུང་༔ ཞེས་དང་། མཚོ་རྒྱལ་ཁྱོད་ཀྱིས་ཞུས་པའི་གདམས་ངག་ཟབ་ཆོས་རྣམས་དཀར་ཆག་ལ་བཏབ་ནས་གཏེར་དུ་སྦས་ཏེ་སྨོན་ལམ་བཏབ་ན༔ ཁྱོད་ཀྱི་སྤྲུལ་པ་རྣམས་དང་དུས་མཚུངས་པར་སེམས་ཅན་གྱི་དོན་བྱེད་པར་འགྱུར་རོ༔ ཞེས་དང་། སྟག་ཤམ་མཚོ་རྒྱལ་རྣམ་ཐར་ལས། ཡོན་ཏན་སྐུ་སྤྲུལ་དབུས་ནས་མཁའ་འགྲོ་འབྱུང་༔ ཞེས་སོགས་ཁུངས་ལྡན་གྱི་གཏེར་ལུང་མང་པོ་དཔང་པོར་གྱུར་ཅིང་། རང་གཏེར་ལས་ཀྱང་། མ་འོངས་ཉི་ཤུ་སྙིགས་མ་ལྔ་ཡི་ཚེ༔ ང་སྤྲུལ་ང་དང་གཉིས་མེད་ཁྱིམ་པའི་ཚུལ༔ ཆུ་འབྲུག་ལོ་མ་སྤྱི་མགྲིན་སྙིང་ག་རུ༔ པཾ་དང་ཧ་རི་
ནི་སའི་རི་མོ་བཀྲ༔ སུ་ཁའི་མིང་ཅན་ཟབ་མོ་གཏེར་ལ་སྤྱོད༔ པད་འབྱུང་སྤྲུལ་པའི་གྲོགས་དང་འཕྲད་ནས་ཀྱང་༔ གཏེར་གཉིས་བསྟན་པའི་སྒྲོན་མེ་འཛིན་པ་འབྱུང་༔ དེ་དུས་ཆོས་འདིའི་སྒོ་འཕར་རབ་འབྱེད་ནས༔ ཆོས་བདག་མཆོག་བཞི་ཡ་བརྒྱད་ཉེར་ལྔ་སོགས༔ སྨོན་ལམ་དུས་སུ་འཛོམས་ནས་ཆོས་འདིར་འཕྲལཿ བཟང་འབྲེལ་ཚེ་འདིར་མི་གནས་གཏན་སྲིད་ཐོབ༔ ངན་འབྲེལ་སྐྱེ་བ་བདུན་ནས་དཔལ་རིར་འདྲེན༔ ཐེ་ཚོམ་མེད་དོ་རྡོ་རྗེའི་བཀས་མི་བསླུ༔ ཞེས་རྡོ་རྗེའི་ལུང་གིས་ཡང་ཡང་བསྔགས་པའི་གཏེར་སྟོན་གྲུབ་པའི་དབང་མོ་དེ་ཉིད་དབུས་འགྱུར་ར་ས་འཕྲུལ་སྣང་གི་གཙུག་ལག་ཁང་དང་ཉེ་བར་ཡབ་ཡུམ་རིགས་རུས་ཆོ་འབྲང་བཟང་པོའི་སྲས་སུ་རབ་བྱུང་བཅོ་ལྔ་པའི་ཆུ་ཕོ་འབྲུག་ལོ་སྤྱི་ལོ་༡༨༩༢ངོ་མཚར་བའི་ལྟས་དུ་མ་དང་བཅས་སྐུ་
བལྟམས་པ་ནས་བཟུང་། དགུང་གྲངས་བཞི་བཅུ་རྩ་གསུམ་ལ་ཕེབས་པ་ཤིང་ཁྱི་ལ་ཐུག་པ་ཡན་གྱི་ཕྱི་ནང་གསང་བའི་རྣམ་ཐར་ཞལ་གསུང་ཤིན་ཏུ་རྒྱས་པ་སྐལ་ལྡན་དད་པའི་མཆོད་སྡོང་ཞེས་བྱ་བ་ཤོག་གྲངས་ལྔ་བརྒྱར་ལོངས་པ་དང་། གཞན་ཡང་མ་དང་མཁའ་འགྲོའི་གསང་ཚིག་གཏེར་འབྱུང་ལོ་རྒྱུས་ཐོར་བུ་ལེ་ཚན་རྣམས་སུ་དད་པའི་སྤུ་ལོང་དབང་མེད་དུ་གཡོ་བའི་ངོ་མཚར་རྨད་དུ་བྱུང་བའི་འཕགས་ཆེན་དམ་པའི་མཛད་པ་རབ་ཏུ་གསལ་བས་མོས་ཤིང་དོན་དུ་གཉེར་བ་མཆིས་ན་དེ་དག་ལས་རྟོགས་པར་བྱ། འདིར་དེ་རྣམས་སུ་མི་གསལ་བ་གདུལ་བྱ་ཐུན་མོང་གི་སྣང་ངོ་དང་བསྟན་པའི་མཛད་ཚུལ་ལོ་ཟླའི་དུས་ཚིགས་ངེས་པ་འགའ་ཞིག་རྣམ་ཐར་ཆེན་མོའི་མཇུག་མཐུད་ཀྱི་ཚུལ་དུ་སྨོས་པ་ལ། དེ་ཡང་མཚན་ལྡན་ཡེ་ཤེས་ཀྱི་མཁའ་འགྲོ་མ་དེ་ཉིད་དགུང་གྲངས་ཞེ་ལྔར་
ཕེབས་པ་ཤིང་ཕག་ལོ་ལ་བོད་ཆེན་པོའི་སའི་ཐིག་ལེ་ཨ་བོ་སེ་ར་དགོན་གྱི་ཡང་དབེན་དུ་མཉམ་རྗེས་རིས་མེད་འོད་གསལ་ཁོར་ཡུག་གི་དགོངས་པ་ལས་གཡོ་བ་མེད་བཞིན་དུ་བསྡུ་དངོས་བཞིའི་སྒོ་ནས་སྨིན་གྲོལ་བདུད་རྩིའི་ཆོས་ཆར་འབེབས་པས་གཞན་དོན་རྒྱ་ཆེན་པོ་མཛད་བཞིན་པའི་ངང་ནས་བཞུགས་པ་ན། བཀའ་བཞིན་སྒྲུབ་པའི་མཆོད་པས་མཉེས་པའི་སློབ་མའི་གཙོ་བོ་བསོད་སྤྲུལ་སྣ་ཚོགས་རང་གྲོལ་ཞི་བར་གཤེགས་པའི་རྗེས་ཀྱི་བྱ་བ་རྣམས་ཌཱ་ཀི་ཆེན་མོ་ཉིད་ནས་ཐུགས་དགོངས་ཆོས་དབྱིངས་སུ་རྫོགས་ཐབས་མཐར་ཕྱིན་པར་གནང་བའི་སྐབས་འདས་རྗེས་ངོ་མཚར་ཅན་བབ་པ་ཟུར་དུ་གསལ། སྐབས་འགར་རྗེ་མོ་རང་ཉིད་ལ་ཡང་ཞིང་ཁམས་འཕོ་བའི་ལྟས་སུ་འདི་སྣང་དབྱིངས་སུ་ནུབ་སྟེ་དག་པའི་ཞིང་ཁམས་མུ་མཐའ་དང་བྲལ་བ་འབའ་
ཞིག་གཟིགས་པ་སོགས་བྱུང་སྐབས། ཀཿཐོག་ངེས་དོན་དབང་པོའི་སྐུ་ཕྲེང་བཞི་པ་ཕྱག་སྤྲུལ་རིན་པོ་ཆེ་པདྨ་ཕྲིན་ལས་རྒྱ་མཚོས་དངོས་འབུལ་སྤམ་མཐོ་བ་དང་དམ་ཚིག་གི་རྫས་ཐབས་ཤེས་རྡོར་དྲིལ་དང་བཅས་ཕུལ་ནས་བརྟན་བཞུགས་ཟབ་ནན་འབུལ་གནང་མཛད་པའི་རྟེན་འབྱུང་གིས་འདི་ལོའི་སྐུ་ཚེའི་འཕྲང་སེལ། དེ་ནས་ལི་སྟོད་སྐལ་བཟང་དགོན་དུ་ཕྱག་ཕེབས་ཏེ། གཏེར་ཆེན་བདུད་འཇོམས་གླིང་པའི་དངོས་སློབ་བླ་མ་དམ་པ་ཚེ་མཆོག་ལས། ལས་རབ་གླིང་པའི་རྟེན་འབྲེལ་ཉེས་སེལ་དབང་ལུང་གསན་ཞིང་། སྔོན་ཆད་རྟེན་འབྲེལ་འཕྱུགས་པའི་ཉེས་སྐྱོན་མཐའ་དག་ད་རེས་འདིས་སོར་ཆུད་པ་ཡིན་ཞེས་གསུངས། གཏེར་སྲས་རྡོར་དགྲའམ་གསང་བདག་མི་འགྱུར་རྡོ་རྗེས་གདན་དྲངས་ཏེ་གསང་བའི་ལས་རྒྱར་བསྟེན་པས་ཌཱ་ཀི་ཉིད་ཀྱིས་སྔོན་ཆད་བརྡ་མ་ཁྲོལ་བ་ཡོན་ཏན་
རྒྱ་མཚོ་ནས་སྤྱན་དྲངས་པའི་མཚོ་རྒྱལ་ཐུགས་སྒྲུབ་སྐོར་གྱི་བརྡ་རང་གྲོལ་དུ་གྱུར་པའི་བདག་པོའི་རྐྱེན་དང་དེ་སྐབས་སུ་སྐུ་ལྡེམ་ནས་ཡུན་རིང་སོང་བ་ཡང་འདི་ནས་གཞི་མེད་དུ་དངས། ཐབས་ཀྱི་དཔའ་བོས་བསྐུལ་མ་དང་བཅས་བདེ་ཆེན་ཕོ་ཉའི་མྱུར་ལམ་གྱི་ཟབ་གནད་ཐུན་མོང་མ་ཡིན་པ་མགུར་མའི་ཚུལ་དུ་གཏན་འབེབས་གནང་བས་ཐུགས་དགྱེས་པའི་རྩེར་སོན། གཏེར་སྲས་མདུན་ནས་ཚུར་ལ་ཡབ་རྗེའི་གཏེར་གསར་སྐོར་གྱི་སྒྲུབ་ཆེན་ཕྱག་བཞེས་དང་གར་ཐིག་དབྱངས་གསུམ་སོགས་རང་ལུགས་གཙང་མ་མི་ཉམས་ཆེད་འབད་པས་གསན་ནས་ཐུགས་སུ་ཆུབ་པར་མཛད། དེ་ནས་རང་གནས་སུ་ཕྱག་འཁོར་ནས་ཐུགས་དམ་ལ་གནས་པའི་ཚེ། མཁའ་འགྲོ་ཀུན་གསལ་དབང་མོས་འབྱུང་འགྱུར་གསང་བའི་ལུང་བསྟན་བསྩལ་བ་ཟུར་དུ་གསལ། དགུང་
ས་ཞེ་ལྔ་མེ་བྱི་ལོར། ལུང་ཟིན་ཆོས་ཀྱི་བདག་པོ་ཉག་རོང་ཁྲ་སྐྱ་བླ་མ་བྱ་བྲལ་བ་ཤེས་རབ་འོད་ཟེར་གྱིས་སྤྱན་འདྲེན་པའི་བང་ཕྱིན་འབྱོར་བས་རྫ་ཁོག་བི་ཕུག་མཁའ་འགྲོ་ཡང་རྫོང་དུ་ཕེབས་ནས་གནས་དེའི་སྒྲུབ་བཙུན་ཕོ་མོ་རྣམས་དང་བྱིན་རླབས་ནང་ཇོ་དགོན་བཅས་ཀྱི་སྐལ་ལྡན་རྣམས་ལ་གཏེར་གསར་ཁྲོས་མ་དང་རིག་འདུས་སོགས་ཀྱི་བསྙེན་སྒྲུབ་ལས་གསུམ་གྱི་ཕྱག་ལེན་དང་བསྐྱེད་རྫོགས་ཟབ་མོའི་གདམས་ཁྲིད་འདོན་རྟ་དབྱངས་བཅས་ལྗགས་ཁྲིད་བཀའ་དྲིན་བསྐྱངས་ཤིང་། སྲུབ་དབར་རྣམས་སུ་ཡུལ་ཕྱོགས་དེའི་དད་འདུས་སེར་སྐྱ་ཕོ་མོ་ཤིན་ཏུ་མང་པོ་ལ་ཕྱག་དབང་བྱིན་རླབས་ཆོས་འབྲེལ་སོགས་སོ་སོའི་འདོད་པ་ལྟར་གནང་ནས་འབྲེལ་ཚད་ཐར་ལམ་ལ་བཀྲི་བར་མཛད། ལོ་འདིར་རྒྱ་དམར་ཀླ་ཀློའི་གཡོ་འཁྲུགས་ཀྱི་འཚུབ་མ་མདོ་སྨད་ལྷོ་བྱང་ཀུན་ཏུ་ལྡང་བའི་ཟིང་
རྐྱེན་གྱིས་ཆོས་སྒར་ཡུལ་གཅིག་ནས་གཅིག་ཏུ་འཕོ་སྐྱེས་ཀྱིས་རྫ་ཁོག །ཟླ་ཡུལ། སྙི་སྟོད་རྣམས་སུ་ཕེབས་དགོས་ཤར་ཡང་རྗེ་མོའི་ཐུགས་རྗེ་ནུས་མཐུ་ཁོ་ན་ལ་བརྟེན་ནས་མི་ཕྱུགས་གང་ལའང་གནོད་སྐྱོན་ཕྲ་མོ་ཙམ་ཡང་མ་བྱུང་། སྙིའི་ཆུ་ཚན་ཁར་སྐུའི་འཕྲོད་བསྟེན་གནང་སྐབས། དེའི་ཉེ་འདབས་སུ་ཕ་དམ་པའི་སྒྲུབ་ཕུག་དང་རང་བྱོན་ངོ་མཚར་ཅན་མང་པོ་བཞུགས་པ་སྐྱེ་བོ་ཀུན་ལ་གནས་ཀྱི་ངོ་སྤྲོད་གནང་ཞིང་ཨ་དོ་ཞེས་པའི་བྲག་ནས་ཟབ་གཏེར་ཁ་ཤས་ཀྱང་བཞེས། དེ་ནས་རྒྱའི་དམག་དཔུང་རྣམས་རེ་ཞིག་ཡུལ་དུ་ལོག་ནས་དུས་བདེ་འཇགས་བྱུང་བསྟན་དགེ་རྩེ་ཟླ་སྟོད་ཀྱི་འབྲོག་ཆེན་ཁོ་འབུད་ཅེས་པའི་ལུང་པར་བཞུགས་སྒར་སྤོས་ཏེ་ཐོགས་ཤིག་སྟན་འཇགས། སྟོན་མཇུག་ཕྱོགས་ནས་འདུས་པའི་བུ་སློབ་གསར་རྙིང་རྣམས་ལ་གཏེར་གསར་སྔོན་
འགྲོ་དངོས་གཞི་ཐོད་རྒལ་དང་བཅས་པའི་ཟབ་ཁྲིད་རྒྱུད་ཐོག་ཏུ་སྨིན་པར་བཏབ་མཛད་དེ། དཔོན་སློབ་ཐམས་ཅད་ལོ་བསྟར་འཆར་ཅན་ཞག་བརྒྱའི་བར་སྐུ་མཚམས་བཅད་རྒྱ་ལ་བཞུགས་ནས་སྟོན་འཁོར་ལྷན་ཅིག་ཏུ་ཐུགས་དམ་ཉམས་ལེན་ཁོ་ན་ལ་གཞོལ་ཞིང་མཐར་སྐུ་མཚམས་གྲོལ་རྗེས།ཉིད་ལ་གནས་དེར་ལྷ་འདྲེའི་ཆོ་འཕྲུལ་མི་བཟད་པ་སྣ་ཚོགས་བྱུང་ཞེས་གསུངས། དེ་ནས་དགུང་གྲངས་ཞེ་དྲུག་པ་མེ་གླང་ལོར། བདུད་འཇོམས་ཡབ་སྲས་ཀྱི་དངོས་སློབ་མགར་བླ་མ་དགེ་ལེགས་རྒྱ་མཚོའི་ཞལ་སློབ་གྲྭ་བཙུན་རྣམས་ཀྱིས་གདན་ཞུས་ལྟར། རྩང་སྒར་དུ་ཕྱག་ཕེབས་ནས་རི་ཁྲོད་པ་རྣམས་ལ་ངོ་སྤྲོད་དང་གེགས་སེལ་བོགས་འདོན་སོགས་སོ་སོའི་རྒྱུད་དང་འཚམས་པར་མཛད། དུས་ཤིག་མ་དང་མཁའ་འགྲོའི་ལུང་བསྟན་བྱུང་བ་ཟུར་དུ་གསལ། ཟླ་བ་དྲུག་པར་དགེ་རྩེ་གྲྭ་ལག་
དགོན་པའི་ཚེས་བཅུ་ཆེན་མོ་མཇལ་བར་ཕེབས། དེར་ཕྱག་སྤྲུལ་རིན་པོ་ཆེ་དང་མཇལ་འཕྲད་ཐོག་ཕན་ཚུན་ཐུགས་ཕེབས་པའི་གསུང་གླེང་མང་པོ་གནང་ནས་སླར་རྩང་སྒར་དུ་ཕེབས་ནས། སྐལ་ལྡན་འདུས་པའི་ཚོགས་ལ་རང་ལུགས་ས་གཏེར་སྔོན་འགྲོ། དངོས་གཞི་ཁྲེགས་ཆོད་སྣང་སྦྱང་ས་གཏེར་ཐོད་རྒལ་བཅས་པའི་སྒོམ་ཁྲིད་ཕོག་སྟེ་དཔོན་སློབ་རྣམས་འཆར་ཅན་ཞག་བརྒྱའི་མཚམས་སྒྲུབ་ལ་བཞུགས་ཤིང་སྐུ་མཚམས་གྲོལ་བའི་རྗེས་ཀྱི་གཏང་རག་ཚོགས་འཁོར་སོགས་མཐའ་རྒྱས་མཛད། ཀཿཐོག་ཕྱག་སྤྲུལ་རིན་པོ་ཆས། ཉིད་གཏེར་ཕུར་སྒྲུབ་བདུད་ལས་རྣམ་རྒྱལ་དང་། མཚོ་རྒྱལ་ཐུགས་སྒྲུབ་སོགས་ཀྱི་སྨིན་གྲོལ་རྒྱབ་རྟེན་དང་བཅས་པ་གསན་ནས་རྗེ་ཊཱ་ཀི་ཉིད་ནས་ཆོས་ཀྱི་བདག་པོར་ངོས་འཛིན་ཀྱང་གནང་། ཉག་རོང་ནས་བླ་མ་ཚུལ་ཁྲིམས་ནོར་བུ་
རྗེ་འདི་པའི་མཚན་སྙན་ཐོས་ཙམ་ནས་སྔོན་སྨོན་དུས་སུ་སྨིན་པ་ལས་མི་འཕྲོག་པའི་དད་པ་འཁྲུངས་ཏེ་ཤུལ་རིང་གི་ལམ་ནས་ཆེད་གཉེར་ཌཱ་ཀི་ཆེན་མོ་མཇལ་བར་བྱོན་ཏེ་སྐུ་མདུན་ནས་ཉིད་གཏེར་ཟབ་ཆོས་ཡོངས་རྫོགས་ཀྱི་སྨིན་གྲོལ་ལུང་བཅས་གསན་བཞེས་དང་འབྲེལ། གཏེར་ཆོས་རྒྱབ་ཆོས་གསུང་རྣམ་བཅས་པོད་དྲུག་ལོངས་པ་བཞུགས་པ་ཚང་མ་ཞལ་བཤུས་ཏེ་དག་པར་ཞུས་ཤིང་ཟབ་གཏེར་འཛིན་སྐྱོང་སྤེལ་བའི་སྐྱེས་བུར་ལུང་ནས་ཟིན་པའི་བདེན་པ་མངོན་སུམ་དུ་གྱུར། དེ་ནས་དགུང་གྲངས་ཞེ་བདུན་པ་ས་སྟག་ལོར་གཏེར་སྲས་དྲི་མེད་འོད་ཟེར་གྱི་ཡང་སྲིད་དབུས་ཕྱོགས་ཀྱི་འདུས་པ་མང་པོ་ལ་བདུད་འཇོམས་རྡོ་རྗེ་དང་སྲས་དྲི་མེད། མཁའ་འགྲོ་རང་ཉིད་དང་བཅས་པའི་གཏེར་ཁ་གསུམ་གྱི་ཆོས་སྐོར་ཡོངས་རྫོགས་ཀྱི་སྨིན་གྲོལ་རྒྱབ་རྟེན་དང་བཅས་པ་རིག་འཛིན་བརྒྱུད་
པའི་ཕྱག་བཞེས་བཞིན་སྨིན་རྒྱས་སུ་བསྩལ། དེ་སྐབས་མགར་ར་བླ་མ་དགེ་ལེགས་རྒྱ་མཚོའི་ཡང་སྲིད་ཁྲི་ཁར་མངའ་གསོལ་མཛད་སྐབས་མཁའ་འགྲོའི་ལུང་བསྟན་བྱུང་བ་ཟུར་དུ་གསལ། དེ་ནས་རྫ་ཁོག་ཏུ་ཆུ་ཚན་ལ་ཞུགས་པར་ཆིབས་བསྐྱོད་གནང་བའི་ཞོར་ལ། གཡུང་དྲུང་བོན་གྱི་རིང་ལུགས་འཛིན་པ་སྟེང་ཆེན་དགོན་སོགས་གནས་གཟིགས་དང་། གྱེར་ཟ་རི་ཁྲོད་དུ་ཤར་རྫ་པ་བཀྲ་ཤིས་རྒྱ་མཚན་ཞེས་བོན་གྱི་སྟོན་པ་ཆེན་པོ་དེ་ཉིད་ཕུང་པོ་ལྷག་མེད་འཇའ་ལུས་སུ་དེངས་མ་ཐག་པའི་སྙིགས་མའི་སྐྲ་སེན་ཙམ་ལུས་པ་ལ་མཇལ་ཁ་ཞུས། ཡུལ་དེའི་སེར་སྐྱ་ཕོ་མོ་མང་པོ་མཇལ་དུ་བྱུང་བ་རྣམས་ལ་ཕྱག་དབང་བྱིན་རླབས་ཆོས་དང་དམ་རྫས་སོགས་ཀྱིས་རེ་བ་བསྐངས་ནས་གདན་ས་རྩང་སྒར་དུ་ཕྱག་འཁོར། སྐབས་འགར་དཔོན་སློབ་རྣམས་ལྷན་རྒྱས་རི་
སུལ་དང་ལུང་སྟོང་དག་ཏུ་ལྗོངས་རྒྱུ་བར་ཕེབས་ཏེ་སྔོན་བྱོན་དམ་པའི་རྣམ་ཐར་དང་འབྲེལ་བའི་ཆོས་ཀྱི་བཀའ་སློབ་ཁོ་ན་མཛད་པ་དང་། མཚན་མོ་གཟིམས་གུར་ནང་མར་མེའི་འོད་ལ་བཀའ་ཐང་ཤེལ་བྲག་མའི་ལྗགས་ལུང་གནང་སྐབས་སྐུ་ལུས་ལ་གྲིབ་མ་མེད་པ་ཀུན་གྱིས་མངོན་སུམ་མཇལ་འདུག །བཙུན་མ་ཤེས་རབ་ལྷ་མོ་ལ་འབྱུང་འགྱུར་ལུང་བསྟན་ཞལ་གདམས་གནང་བའི་ཚིག་ལ་དཔྱད་ན་རྗེ་མོ་ཉིད་ཡུན་དུ་མི་བཞུགས་པ་ཡང་གསལ། འདི་ལོའི་དགུན་ཆོས་སྔར་རྒྱུན་བཞིན་ཁྲིད་བཀའ་རྣམས་ལེགས་པར་བསྩལ་ནས་དཔོན་སློབ་ཐམས་ཅད་ཞག་བརྒྱའི་སྐུ་མཚམས་ལ་བཞུགས་ཤིང་བཅད་རྒྱ་གྲོལ་ནས་གཏང་རག་ཚོགས་འཁོར་སོགས་མཐའ་རྒྱས་མཛད། དེ་ནས་དགུང་གྲངས་ཞེ་བརྒྱད་པ་ས་ཡོས་ལོའི་ཟླ་བ་བཞི་པའི་ཡར་ཚེས་ཤིག་ལ་བར་ཁམས་རི་བོ་ཆེའི་གདན་ས་
ནས་ཆོས་སྲིད་དཔལ་གྱིས་མངོན་པར་མཐོ་བའི་ཞབས་དྲུང་ཕྱག་མཛོད་ཚེ་དབང་གྲགས་པས་གཙོ་བྱས་ཡུལ་དེའི་བླ་སྤྲུལ་ཁག་གཞན་བཅས་ནས་ཌཱ་ཀི་ཆེན་མོ་ཉིད་སྤྱན་འདྲེན་པའི་བང་མི་ཆེད་མངགས་སྐུ་མདུན་དུ་འབྱོར་ནས་ཞུ་ཡིག་རྣམས་ཕུལ་བ་ན་རྗེས་སྟོན་ཁར་འབྱོན་རྒྱུའི་ཞལ་བཞེས་གནང་། དེའི་རིང་རེ་ཞིག་བར་སྟོང་ཟ་ར་སྐོར་གོང་མ་ཡ་དང་། སྟག་དགོན་སོགས་རྫ་རྒྱུད་ཀྱི་འབྲོག་སྡེ་རྣམས་སུ་ཆིབས་བསྒྱུར་མཛད་དེ་ཡུལ་དེ་དག་གི་སྐྱེ་བོ་རྣམས་ལ་འདོད་ཆོས་སྐྱབས་འགྲོ་དང་། ལས་འབྲས་ཀྱི་ཁྲིད་ཡིག་དྲུག་དང་སིདྡྷིའི་བཟླས་ལུང་། བླ་སྤྲུལ་གྲྭ་བཙུན་མང་པོར་དངོས་གཞིའི་ངོ་སྤྲོད་དང་ཞལ་གདམས་ལུང་བསྟན་བསླབ་བྱ་སོགས་རྒྱུད་སྨིན་པར་བསྩལ་ནས་ཐམས་ཅད་ཡིད་དགའ་མགུ་རང་པར་མཛད་དེ་ཟླ་བ་དགུ་པར་ཉག་བླ་ཤེས་རབ་འོད་
ཟེར་དང་སྟབས་སུ་གདན་ས་ནས་བསྐྱོད་དེ་རིམ་ཕེབས་ཀྱི་ལམ་ནོར་གླིང་ཚང་རྒྱལ་པོའི་ཕོ་བྲང་རྫོང་འགོར་གདན་ཞུས་ལྟར་དེར་ཕེབས་ཏེ་ཆོས་རྒྱལ་ཡབ་སྲས་དང་། བཙུན་མོ་རྣམས་ཀྱིས་དད་གུས་བཀུར་སྟི་དཔེ་མེད་མཛད་ཅིང་ཌཱ་ཀི་ཉིད་གཏེར་ལས་དབང་བཀའ་ཁ་ཤས་ཀྱང་ཞུས་ཤིང་རྫོགས་པར་རྗེས་ནས་ཞུ་རྒྱུའི་རྟེན་འབྲེལ་འཕྲོ་ཅན་དུ་བཞག་སྟེ། མཆོད་ཡོན་ཐུགས་མཐུན་དམ་ཟབ་ངང་སྐྱེལ་ཐུང་མཛད། རྨར་རོང་རྡོ་རྗེ་ཕག་མོའི་གནས་ཀྱི་ཆུ་ཚན་ཁར་ཚོགས་འཁོར་བསྐོར་ཞིང་འཇམ་མགོན་ཀོང་སྤྲུལ་གཏེར་གནས་གྲུ་གུ་རྟིང་དཀར་བྲག་ནས་ཟབ་གཏེར་ཞིག་ཀྱང་བཞེས། དེ་ནས་རིམ་བྱོན་གྱིས་ཟླ་བ་བཅུ་གཅིག་པའི་ནང་སྟག་ལུང་མ་ཐང་རི་བོ་ཆེའི་གདན་སར་ཞབས་སོར་འཁོད་སྐབས་ཕེབས་བསུ་སྣེ་ལེན་གཟབ་རྒྱས་བཅས་སྐྱབས་མགོན་ཞབས་དྲུང་བླ་བྲང་དུ་བཞུགས་
སྟན་འཇགས། ཟླ་བ་བཅུ་གཉིས་པར་དབུ་ཚུགས་ཏེ་ཞབས་དྲུང་མཛོད་པ་དང་བླ་སྤྲུལ་ཁག་དབུས་ཆོས་ཞུ་འདུས་པ་བརྒྱ་ཕྲག་བརྒལ་བ་ལ་གཏེར་ཁ་གསུམ་གྱི་སྨིན་གྲོལ་རྒྱབ་རྟེན་དང་བཅས་པ་ལེགས་པར་བསྩལ། དེ་སྐབས་དབང་གི་སྟ་གོན་མཛད་དུས་དབང་ཁང་དུ་ཡོལ་བས་མཚམས་བཅད་ཡོད་པའི་ཕྱི་ལ་ཉེ་གནས་བླ་མ་ཚུལ་ཁྲིམས་རྡོ་རྗེ་དང་། ཤེས་རབ་འོད་ཟེར་རྣམ་གཉིས་བཞུགས་པ་ལ་ནང་ནས་རྗེ་བཙུན་ཌཀྐི་ཉིད་ཀྱི་བཀའ་ལས། རང་རེའི་ཚེ་འདི་དང་ཕྱི་མའི་བར་ལ་འུ་ཅག་གི་བར་གྱི་ཡོལ་བ་འདི་ཙམ་ལས་མེད་གསུངས་པ་དེ་སྐབས་ཐུགས་སྣང་གང་ཡང་བྱུང་མི་འདུག་ཀྱང་རྗེས་ནས་བསམ་ན་མྱུར་དུ་ཞིང་ཁམས་བརྗེ་རྒྱུའི་ཕྱི་མཐའ་གསལ་བར་གཟིགས་པའི་གསུང་དུ་སྣང་། ཟླ་བ་དེའི་ཚེས་བཅུ་བདུན་ཉིན་རྩང་སྒར་བུ་སློབ་རྣམས་
ལ་ཕྱི་མཐའི་བསླབ་སྟོན་གདམས་ངག་འབྱུང་འགྱུར་ལུང་བསྟན་དང་བཅས་པ་སྤྲིངས་ཡིག་ཚུལ་དུ་བསྩལ། དེ་ནས་དགུང་གྲངས་ཞེ་དགུའི་རང་སྐག་ཐོག་ཕེབས་པ་ས་འབྲུག་ལོའི་ཆོ་འཕྲུལ་ཟླ་བ་དཔོན་སློབ་ཉུང་ཤས་ཤིག་གསང་སྟབས་ཀྱིས་མདོ་ཁམས་གནས་ཆེན་ཉེར་ལྔའི་ཡ་གྱལ་སྤོ་ནེ་བྲག་དཀར་ཨོ་རྒྱན་རྫོང་དུ་ཕེབས་ཏེ་ཞག་འགའ་ལ་ཐུགས་དམ་མཛད། ཉིན་གཅིག་གནས་ཀྱི་ལྟེ་བ་མཱ་ར་ཏི་ཀ་ཞེས་པའི་སྒྲུབ་ཕུག་གི་སྒོ་གདོང་གཡོན་ངོས་བྲག་གཡང་ཤིན་ཏུ་གཟར་བ་མི་གཏན་ནས་མི་ཐར་བ་ལ་མ་འགགས་རྫུ་འཕྲུལ་གྱི་རོལ་པས་ཐོགས་མེད་དུ་བྱོན་ཏེ་གཏེར་ཁ་ཞིག་བཞེས་པར་མཛད་པའི་བྲག་གཡང་ངོས་སུ་འདམ་ལ་བཏབ་པ་ལྟ་བུའི་ཞབས་རྗེས་མང་པོ་བྱུང་བ་ད་ལྟའང་ཀུན་གྱི་མཐུན་སྣང་དུ་མཇལ་རྒྱུ་ཡོད། དེ་ནས་བླ་མ་ཤེས་རབ་འོད་ཟེར་དང་ཉག་སྤྲུལ་ཡབ་སྲས། ཉེ་
གནས་ཚུལ་རྡོར་བཅས་དཔོན་སློབ་ལྷན་རྒྱས། གནས་དེའི་གཤམ་སྒྲུབ་ཕུག་གཏིང་རིང་པོར་སྒྲོན་མེའི་སྣང་བ་ལ་བརྟེན་ནས་ཕེབས་ཏེ་བྲག་རིའི་ཁོངས་གསེང་དུ་གུ་རུ་རིན་པོ་ཆེ་དང་རྗེ་འབངས་རྣམས་ཀྱི་སྒྲུབ་དཀྱིལ་དང་ཕྱག་ཞབས་ཀྱི་རྗེས་སོགས་རང་བྱོན་ངོ་མཚར་ཅན་མང་པོ་བཞུགས་པ་སྐྱེ་བོ་ཀུན་ལ་མཚོན་པར་མཛད་ཅིང་ཟབ་གཏེར་ཁ་ཤས་ཀྱང་སྤྱན་དྲངས་ནས་གཏེར་ཤུལ་བསྡམས་པར་མཛད། གནས་དེ་ཉིད་དུ་འཇམ་དཔལ་སྒྲུབ་ཐབས་ཤེས་རབ་བློ་འཕེལ་ཆ་ལག་དང་བཅས་པ། གུ་རུའི་ཐུགས་སྒྲུབ་བྱིན་རླབས་གཏེར་མཛོད། ཚེ་སྒྲུབ་ཡང་གསང་སྙིང་པོ་བཅས་གཏན་ལ་འབེབས་པར་མཛད་ནས། ལས་ཅན་སློབ་བུ་རྣམས་ལ་རིམ་གྱིས་སྤེལ་བར་མཛད། དེ་ནས་ཟླ་བ་གཉིས་པར་ས་མདོ་བཀྲ་ཤིས་འཁྱིལ་དུ་ཕེབས་ནས། ཉག་སྤྲུལ་ཡབ་སྲས་
དབུས་འདུས་པའི་ཚོགས་རབ་ཏུ་མང་པོ་ལ་སླར་ཡང་གཏེར་ཁ་གསུམ་གྱི་དབང་ལུང་ཁྲིད་གསུམ་རང་ལུགས་བརྒྱུད་པའི་ཕྱག་བཞེས་བཞིན་སྨིན་རྒྱས་སུ་བཀའ་དྲིན་བསྩལ། འདི་ནི་རང་གཏེར་ལས། ལྷོ་ཕྱོགས་མངྒའི་མིང་འཛིན་གནས་ཀྱི་ཆར༔ ཁྱོད་ཀྱི་གདུལ་བྱའི་ལྷག་མ་དེ་རུ་བབ༔ ཅེས་གསུངས་པ་ལྟར་སྐུ་ཚེ་འདིའི་གདུལ་བྱའི་ཕྱི་མ་ནི་དེར་འདུས་ཀྱི་སྐལ་ལྡན་རྣམས་ཡིན་པར་མངོན་ནོ། །ད་ནི་གཉིས་པ་ཐ་མའི་མཛད་ཚུལ་བསྟན་པ་ལ་གཉིས། དངོས་རྙེ དང་འཕྲོས་དོན་བརྗོད་པས་མཇུག་བསྡུ་བའོ། །དང་པོ་ནི། །དེ་སྐབས་ཉེ་གནས་ཚུལ་རྡོར་ལ་བཀའ་ལས་ཁོ་མོའི་སྨིན་མཚམས་ནས་མཆེད་པའི་འོད་། མདངས་ཀྱི་ཀློང་དུ་ཞི་ཁྲོ་ལོངས་སྤྱོད་རྫོགས་པའི་སྐུ་ཡོངས་སུ་རྫོགས་པ་ཤར་གྱི་འདུག་ཅེས་གསུངས། ཡང་ད་ནི་ཁོ་མོ་ཡུན་དུ་འཚོ་བའི་ངེས་པ་མེད། ད་ལྟ་
ཤི་ནའང་བློ་ལྷག་ལུས་པ་ནི་ཅང་མེད། གང་ཞེ་ན་གཏེར་སྟོན་ཡབ་སྲས་ཀྱི་བསྟན་པ་རིན་པོ་ཆེ་འདི་ཉིད་འཛིན་སྐྱོང་སྤེལ་གསུམ་གྱི་བྱ་བ་རྒྱ་མི་ཆུང་བ་འགྲུབ་ཡོད་པས་ཞེ་བློ་བདེ་བ་ཡིན་ཞེས་གསུངས། དེ་སྐབས་ཞམ་རིང་པ་སུས་ཀྱང་ཞབས་པད་ཡུན་དུ་བརྟན་དགོས་པའི་ཞུ་བ་དང་གལ་སྲིད་སྐུ་མི་བཞུགས་པ་ཡིན་ན་རྗེས་སུ་ཇི་ལྟར་བགྱིད་ཀྱི་ཞལ་ཆེམས་བསྩལ་བར་གསོལ་བ་འདེབས་པ་བཅས་གང་ཡང་བྱུང་མི་འདུག་སྟབས་རྗེས་ནས་བློ་འགྱོད་ཤིན་ཏུ་ཆེ་ཞེས་རྡོ་རྗེའི་མཆེད་ལྕམ་འགའི་ངག་ལས་ཐོས། དེ་ནས་ས་ག་ཟླ་བར་སྐུ་བསྙུན་ཚུལ་བསྟན་ཏེ། འཁོར་བུ་སློབ་རྣམས་ནས་གསོལ་སྨན་དང་ཞབས་བརྟན་རིམ་གྲོ་རྒྱ་ཆེར་བསྒྲུབས་ཀྱང་བསྙུན་གཞི་དྭངས་བསྐྱེད་མ་བྱུང་བར་ཉིན་གཅིག་བཀའ་ལས་ད་ནི་ཁོ་མོ་འདིར་སྡོད་པས་མི་ཡོང་། མྱུར་དུ་རི་བོ་
ཆེའི་གདན་སར་འཁྱོལ་བ་བྱེད་དགོས་ཞེས་ཕེབས་ཕྱམ་ལ་གདན་དྲངས་ཏེ་ལམ་བར་ཆེན་མོ་མདར་ཞག་ས་མཛད་ཅིང་རི་ཁྲོད་གསར་པ་ཆགས་བཏབ་ཡུལ་ས་དཔྱད་གཟིགས་ནས་རི་ཁྲོད་ཀྱི་མིང་རྩ་གསུམ་ཆོས་འཁོར་གླིང་ཞེས་བསྩལ། དེའི་སང་ཉིན་དཔལ་རི་བོ་ཆེའི་ཞབས་དྲུང་བླ་བྲང་ཡང་རྩེར་ཞབས་སོར་འཁོད་ནས་ཉིན་ཤས་ཅང་མི་གསུང་བར་སྐུ་དྲང་པོར་བཞུགས་མཛད་དེ་སྐུ་དངོས་ཀྱི་གདུལ་བྱ་རྫོགས་ནས། དགུང་གྲངས་ཞེ་དགུར་ཕེབས་པ་རབ་བྱུང་བཅུ་དྲུག་པ་ལྕགས་ཕོ་འབྲུག་གི་ལོ་སྤྱི་ལོ་༡༩༤༠ སྣོན་ཟླའི་དམར་ཕྱོགས་ཀྱི་རྫོགས་པ་དང་པོའི་ཉི་མ་ཕྱེད་ཡོལ་ལ་སྤྱན་ལྟ་སྟངས་གཡོ་བ་དང་བཅས་ཧིཀ་སྒྲ་དྲག་པོ་ཞིག་མཛད་པ་དང་ཆབས་ཅིག་གཟུགས་སྐུའི་བཀོད་པ་བདེ་ཆེན་པདྨ་འོད་ཀྱི་ཕོ་བྲང་དུ་ཨ་མ་མཐིང་འོད་འབར་མའི་ཐུགས་ཀར་བསྡུས་སོ། །ཀྱེ་མ་ཀྱི་ཧུད་འགྲོ་བའི་
སྒྲོན་མེ་ནུབ། །ལས་ངན་བདག་སོགས་མ་རིག་སྨག་ཏུ་ཚུད། །ཐར་ལམ་གསལ་བའི་སྣང་བྱེད་སུ་ལ་རེ། །ཐུགས་ཀྱིས་འདོར་རམ་བླ་མ་མཁའ་འགྲོའི་རྗེ། །གཏེར་གཉིས་བསྟན་པའི་བ་དན་ཆེར་གཡོ་བ། །དེ་རིང་གདུགས་ལ་ས་འདིར་འགྱེལ་གྱིས་མེད། །བདུད་འགོང་དམ་སྲི་ཀླ་ཀློའི་ཚོགས་དར་ན། །ཕྲིན་ལས་ནུས་མཐུའི་རུ་མཚོན་སུ་ཡིས་བསྒྲེང་། །ཤིན་ཏུ་སྙིགས་མའི་མཐར་ལྷུང་སྐྱེ་འགྲོ་ལ། །ཉིད་ཀྱིས་སྐྱོང་བར་ཞལ་བཞེས་མཛད་ལགས་ན། །ད་ལྟ་ཞི་བར་གཞོལ་བའི་ཚུལ་འདི་ཅི། །སྔོན་གྱི་གོ་ཆ་ཡལ་བར་འདོར་ཕོད་དམ། །སྨིན་གྲོལ་བྱིན་རླབས་ནུ་ཞོས་ལེགས་བསྐྱངས་པའི། །བྱམས་ལྡན་མ་ཁྱེད་བུ་ལ་བརྩེར་དགོངས་ཏེ། །དགྱེས་པའི་ཞལ་སྟོན་གསུང་གིས་དབུགས་དབྱུང་ནས། །མྱུར་དུ་ཡུམ་ཆེན་དགོངས་པར་འུབ་ཆུབ་མཛོད། །
ཅེས་སྨྲས་སོ། །དེ་དག་གི་སྐབས་སུ་སྐུ་གསུང་ཐུགས་ཐོབ་པའི་རྟགས་སུ་ནམ་མཁའ་གཡའ་དག་པ་དང་། སྒྲ་འུར་བ། ས་གཡོ་བ། འཇའ་ཚོན་གྱི་གུར་ཕུབ་པ་སོགས་ངོ་མཚར་བའི་རྟགས་ཀུན་གྱི་མཐུན་སྣང་དུ་བྱུང་བས་སྐྱེ་རྒུ་རྣམས་རབ་ཏུ་དད་པའི་གནས་ལ་བཀོད། དེ་ནས་སྐུ་གདུང་རིན་པོ་ཆེ་དྲི་བཟང་པོའི་ཆུས་བཀྲུས་ཤིང་ལོངས་སྐུའི་ཆས་གསོལ་བ་ལ། མཆོད་པ་རྒྱ་ཆེན་པོ་བཤམས་ཏེ། སྐྱབས་མགོན་ཞབས་དྲུང་དེ་ནི་རིན་པོ་ཆེ་དང་། སྲས་སྤྲུལ་རྣམ་གཉིས་རྒྱུ གཙོ་བོར་བཞུགས་པའི་འདུས་པ་རྣམས་ཀྱིས་ཀློང་སྙིང་བླ་མ་མཆོད་པའི་ཆོ་ག་དང་འབྲེལ་བར་བདག་འཇུག་དབང་བླངས་དང་། ཚོགས་ཀྱི་མཆོད་པ་སོགས་ཉིན་བསྟར་མཛད། ཟླ་འདིའི་ཚེས་ཉེར་ལྔ་ལ་དགོན་པའི་རྒྱབ་རིའི་ངོས་སུ་སྤུར་ཁང་བཞེངས་ཏེ་དེར་གདན་དྲངས་ཚེ། སྐུ་གདུང་འོད་དུ་དེངས་པའི་ལྷག་མ་
བྱིས་པ་ལོ་བརྒྱད་ཀྱི་ཚོད་ཙམ་ལས་མ་ལུས། གདུང་བཞུ་དུས་སྤྱན་ཡ་གཅིག་ཀུན་གྱིས་མཐོང་བར་སྒྲ་དང་བཅས་ལྷོ་ཕྱོགས་ཀྱི་ནམ་མཁར་འཕུར་སོང་འདུག །དེ་རྗེས་གདུང་རུས་བསལ་སྐབས་འབྱུང་བས་མི་ཤིགས་པའི་གདུང་ཤཱ་རི་རཾ་སྲན་སྦོས་ཙམ་སྣུམ་ལ་བཀྲག་མདངས་འོད་དང་ལྡན་པ་ཞིག་བྱོན་པ་བུ་སློབ་ཞིག་གིས་རྙེད་འདུག་པ། དུས་ཕྱིར་ལྷ་སྲས་དཔལ་རྣམ་མགུལ་གྱི་གའུར་བཅངས་པ་ཁོ་བོས་ཀྱང་མངོན་སུམ་མཇལ་བའི་སྐལ་བཟང་ཐོབ། དེ་ནི་རྟ་མཆོག་རོལ་པ་གསང་བ་མན་ངག་གི་རྒྱུད་འཁོར་འདས་རང་གྲོལ་ལྡུས། མེ་ཏོག་ཆར་དང་འཇའ་འོད་སྐུ༔ ནམ་མཁའ་དྭངས་པ་ཆོས་སྐུ་སཿ ཞི་ཁྲོའི་སྐུ་དང་ཡི་གེ་དང་༔ གདུང་གཅིག་རྐྱང་པ་འོང་བ་ཡང་ཡོད༔ ཅེས་དང་། སྔར་ཞལ་བཞུགས་སྐབས་མཁའ་འགྲོས་ལུང་བསྟན་ལས། ཁྱོད་ཀྱང་
མི་གནས་འདས་པའི་ཚེ༔ སྐུ་གདུང་མཁའ་འགྲོས་དྲང་ཡང་སྲིད༔ ཡང་ན་གདུང་དང་རིང་བསྲེལ་དང་༔ ཡིག་འབྲུ་ཕྱག་མཚན་ལ་སོགས་འབྱུང་༔ ཞེས་གསུངས་པ་དང་ཤིན་ཏུ་འགྲིགས་པར་སྣང་། དེ་ནས་རིགས་ཀྱི་སྲས་མོ་ཆོས་དབྱིངས་སྒྲོན་མ་དང་། སྐྱེས་མཆོག་ཚུལ་ཁྲིམས་རྡོ་རྗེ་རྣམ་གཉིས་ཀྱིས་དངུལ་གྱི་གདུང་རྟེན་ལ་གསེར་གྱི་པ་ཏྲ་དང་རིན་ཆེན་སྣ་ཚོགས་ཀྱི་ཕྲ་རྒྱན་བཏབ་པ་མདའ་ཚད་ཙམ་བཞེངས་པའི་གཟུངས་གཞུག་རིང་སྲེལ་རྣམ་བཞི་སྤྱི་དང་། ཁྱད་ནྟི པར་དུ་ཌཱ་ཀི་ཉིད་ཀྱི་གདུང་རུས་དབུ་ལྗོན་བསྙེན་ཕྲེང་ཐུགས་དམ་པོ་ཏི་ཉིད་ཀྱི་གཏེར་བྱོན་ཐུབ་སྐུ་ངོ་མཚར་ཅན་དང་། རྡོ་ཡི་སྒྲོན་བུ་ཤོག་སེར་སོགས་བྱིན་རླབས་ཅན་རྣམས་བཅུག་ནས་རབ་ཏུ་གནས་པ་དང་བཅས་པ་ལེགས་པར་གྲུབ་པ་ཉིད་གདན་དྲངས་ཏེ་མདོ་སྨད་གཏེར་སྒར་ཡང་དབེན་དུ་བཞུགས་སུ་གསོལ་
བ་རྗེས་འཇུག་གདུལ་བྱ་རྣམས་ཀྱི་བསོད་ནམས་ཀྱི་ཞིང་དམ་པར་ད་ལྟའི་བར་མཇལ་དུ་ཡོད་དོ། །ད་ནི་ཞར་ལ་འཕྲོས་དོན་བརྗོད་པས་མཇུག་བསྡུ་བ་ལ་རྗེ་བཙུན་མཁའ་འགྲོའི་དབང་ཕྱུག་མ་དེ་ཉིད་ཀྱི་ཞལ་སློབ་རགས་རིམ་ཙམ་སྨོས་ན། ཨ་འཛོམ་འབྲུག་པ་རིན་པོ་ཆེ་འགྲོ་འདུལ་དཔའ་བོ་རྡོ་རྗེ་དང་གདུང་སྲས་འགྱུར་མེད་རྡོ་རྗེ་སྟེ་ཡབ་སྲས་གཉིས། བདུད་འཇོམས་གཏེར་སྲས་པདྨ་ལས་འབྲེལ་དང་གཅུང་རྡོ་རྗེ་དགྲ་འདུལ་སྟེ་མཆེད་ཞལ་གཉིས། ཀཿཐོག་ཕྱག་ཚ་རིན་པོ་ཆེ་པདྨ་ཕྲིན་ལས་རྒྱ་མཚོ། དཔལ་ཡུལ་སྒོ་ཆེན་སྤྲུལ་སྐུ་འཇིགས་བྲལ་ཆོས་ཀྱི་བློ་གྲོས། རི་བོ་ཆེའི་སྐྱབས་མགོན་ཞབས་དྲུང་སྤྲུལ་སྐུ། ཨ་བོ་བསོད་དགེ་སྤྲུལ་སྐུ་སྣ་ཚོགས་རང་གྲོལ། རྫ་བསྟན་འཕེལ་ཡར་དགོན་སྤྲུལ་སྐུ་ངག་འབྱུང་དང་། མར་དགོན་སྤྲུལ་སྐུ་འཆི་མེད་རྣམ་རྒྱལ། པད་གུར་
སྤྲུལ་སྐུ། པད་དཀར་སྤྲུལ་སྐུ། ཇོ་ནང་བ་གཙང་པའི་སེ་སྤྲུལ་སྐུ། སེ་ར་འཇིགས་དགའི་སྤྲུལ་སྐུ། མགར་ར་བླ་མའི་ཡང་སྲིད། མཆོག་སྤྲུལ་དོན་གྲུབ་རྗེ། ཏྲེ་ཧོར་གདོང་ཐོག་སྤྲུལ་སྐུ། རྫོགས་ཆེན་མཁན་པོ་ནོར་བུ་དབང་རྒྱལ། ཁྲ་སྐྱ་བླ་མ་ཤེས་རབ་འོད་ཟར། ཨ་སྐྱབས་ཀརྨ་དོན་ཡོད། རྩ་ཤུལ་དོན་ལི། མགོ་ལོག་རང་བྱུང་། ལྗོང་ཤུལ་ཆོས་འཕེལ། གླིང་ཚོགས་རྒྱམ། འགྱ་བ་རྣམ་དག །ཧ་ཤུལ་ཆོས་གྲགས། སྤྲུལ་སྐུ་ཀུན་བཟང་རིག་པའི་རྡོ་རྗེ། ཉག་སྤྲུལ་གུ་རུ་འོད་ཟེར་ཡབ་སྲས། ཨ་འཛོམ་སྲས་མོ་འཆི་མེད་དབང་མོ། ཁྲོམ་དགེ་མཁའ་འགྲོ་ཟླ་བ་སྒྲོན་མ། རིགས་སྲས་ཆོས་དབྱིངས་སྒྲོན་མ། གླིང་ཚང་ཆོས་རྒྱལ་དང་བཙུན་མོ་ལ་སོགས། དུས་དེར་ཡོངས་སུ་གྲགས་པའི་ཆེ་བ་གདུགས་ཐོགས་པའི་བླ་ཆེན་དཔོན་ཆེན་དང་མཁས་བཙུན་དགེ་བའི་བཤེས་གཉེན་ནས་
ཆུང་བ་སྦས་ཚུལ་བྱ་བཏང་རྣལ་འབྱོར་སྒྲུབ་བཙུན་ཕོ་མོ་ཡན་ཆད་སྟོད་སྨད་བར་གསུམ་ཀུན་ཏུ་བགྲང་གིས་མི་ལོངས་ཤིང་། དེ་དག་ཀྱང་ཕལ་ཆེ་བ་ཚེ་བློས་བཏང་གིས་ཆོས་པ་ཉམས་རྟོགས་ཡོན་ཏན་དང་ལྡན་པ་ཤ་སྟག་བྱུང་། ཐ་ན་སློབ་འབངས་ཀུན་གྱི་ཐ་ཤལ་དུ་གྱུར་པ་བདག་གིས་ཀྱང་རབ་བྱུང་བཅུ་དྲུག་པའི་མེ་ཡོས་ལོ་སྤྱི་ལོ་༡༩༢༧ཟླ་བ་དྲུག་པའི་ཉེར་ལྔའི་དུས་བཟང་ལ་ཐོག་མར་ཞལ་མཇལ་བ་ནས་བཟུང་སྟེ་ཚེ་རབས་ལས་ཀྱི་བླ་མ་ཡིན་པའི་མྱི་བག་ཆགས་བཟང་པོ་ཏུར་གྱིས་སད་དེ་ཡེ་ཤེས་མཚོ་རྒྱལ་དངོས་ཡིན་སྙམ་པ་ལས་ཐ་མལ་མིར་འཛིན་གྱི་རྟོག་ངན་ནམ་ཡང་སྐྱེ་མ་མྱོང་། ལོ་དེ་དང་ས་འབྲུག་ལོ་གཉིས་ཀྱི་དུས་སྐབས་ཅི་རིགས་པར་རང་གི་ཞང་པོ་མཁན་ནོར་བུ་དབང་རྒྱལ་གྱིས་ཞུས་པའི་ཟླ་ལ་དེ་གོང་གཏན་འབེབ་གྲུབ་པའི་ཆོས་ཉིད་མཁའ་འགྲོའི་
གསང་མཛོད་སྐོར་སྨིན་གྲོལ་ཆོས་སྒོ་ཐོག་མ་ཕྱེ་བའི་བྱིན་རླབས་ཀྱི་དྲོད་མ་ཡལ་བ་ནོད་པའི་སྐལ་བ་བཟང་པོ་ཐོབ། དེ་ནས་མཁའ་འགྲོས་ལུང་བསྟན་པ་བཞིན་ཁོ་བོ་མཁན་ཆེན་རྡོ་རྗེ་འཆང་ངག་གི་དབང་པོའི་ཞབས་ལ་གཏུགས་ནས་རྗེ་ཊཱ་ཀི་ཉིད་སྐུ་མྱ་ངན་ལས་འདས་པའི་བར་སྨིན་གྲོལ་གདམས་པའི་འཕྲོ་བསྐྱང་རྒྱུ་མ་བྱུང་ན་ཡང་། རྗེས་ནས་སྔ་མ་ཐོབ་པ་དེས་ཀྱང་མ་ཚིམ་པར་འབད་པ་ཆེན་པོས་གང་གི་ཐུགས་སྲས་ཐམས་ཅད་ཀྱི་ནང་འགྲན་པའི་ཟླ་དང་བྲལ་བ་ཆོས་ཀྱི་བདག་པོ་ཡོངས་གྲུབ་རིག་པའི་རྡོ་རྗེའམ་ཤཱི་ལ་བཛྲ་ལ་གཏེར་གསར་འདིའི་གཞུང་རྩ་བ་དང་རྒྱབ་ཆོས་བཀའ་འབུམ་བཅས་ཡི་གེ་ན་གཅིག་ཀྱང་མ་ལུས་པའི་སྨིན་གྲོལ་རྒྱབ་རྟེན་བུམ་པ་གང་བྱོར་ཞུས་ཤིང་། དེ་དང་འབྲེལ་བར་འདོན་རྟ་དབྱངས་ཕྱག་རྒྱ་གཏོར་བཟོ་ཡན་ཆད་རང་ལུགས་གཙང་མ་ཁོང་དུ་ཆུད་པར་
བྱས། དེ་ཡང་ཐོབ་ལོ་ཙམ་མ་ཡིན་པར་ངལ་བ་དང་དུ་བླངས་ནས་བཀའ་གཏེར་གླེགས་བམ་ཡོངས་རྫོགས་དང་དབང་ཙག་དཔེའུ་རིས་བཅས་གསར་དུ་བཞེངས་ནས་རྩ་བ་གསུམ་ལ་བསྙེན་སྒྲུབ་ལས་རུང་ཙམ་བཏང་བའི་ཁུལ་བགྱིས་ནས་གཞན་ལ་སྤེལ་བ་ཡིན། དེ་ཡང་ཟབ་ཆོས་འདིའི་ཆོས་སྒོ་ཐོག་མར་འབྱེད་པའི་བདག་རྐྱེན་ཀྱང་རིས་མེད་བསྟན་པ་རྒྱ་མཚོའི་མངའ་བདག་མཚུངས་མེད་མཁྱེན་སྤྲུལ་རྡོ་རྗེ་འཆང་འཇམ་དབྱངས་ཆོས་ཀྱི་བློ་གྲོས་ཙྩུ རིན་པོ་ཆེ་དང་། སྤྲུལ་པའི་གཏེར་སྟོན་བདུད་འཇོམས་འཇིགས་བྲལ་ཡེ་ཤེས་རྡོ་རྗེ་སྟེ་དཔལ་མགོན་བླ་མ་དམ་པ་དེ་གཉིས་ཀྱི་བཀའ་བསྩལ་རིན་པོ་ཆེ་གསེར་གྱི་ཅོད་པན་སྤྱི་བོར་ཕེབས་པ་ལྡོག་པར་ཕངས་ནས་ཆོས་བཀའ་འདིའི་སྨིན་གྲོལ་ཚང་མ་དགྱེས་པའི་ཞབས་ཏོག་ཏུ་དམིགས་ནས་འདྲེན་སྟོན་སོ་སོར་ཆིག་
བརྒྱུད་དུ་ཕུལ་བ་དང་། གནས་དུས་གཞན་དུ་ཡང་དབང་ལུང་ཚང་མ་ཚར་གསུམ་སྟེ་མདོར་ན་མཁའ་འགྲོའི་ཞལ་རླངས་ཐུ་ལེ་བའི་ཆོས་ཟབ་མོ་འདི་ཉིད་སྔ་རྗེས་ལན་ལྔ་ཙམ་འཆད་སྤེལ་བགྱིས་པ་ལགས་པས་གུ་རུ་ཡབ་ཡུམ་གྱི་བསྟན་པ་རིན་པོ་ཆེ་ལ་སྒོ་ཀུན་ནས་བྱ་བ་ཕྲན་བུ་འགྲུབ་པ་འདི་ཡང་སྔོན་གོམས་ལེགས་བྱས་ཀྱི་འབྲས་བུ་དུས་སུ་སྨིན་པར་འཁུམས། དེ་ལྟར་གོང་དུ་སྨོས་པ་དེ་དག་ནི་ཐུན་མོང་དུ་སྣང་བ་ཕྱིའི་རྣམ་ཐར་ཁོ་ན་ཐོ་རེ་ལོང་བརྗོད་པ་སྟེ། ཐུན་མོང་མ་སྒྱུ ཡིན་པ་ནང་དང་གསང་བའི་རྣམ་ཐར་ནི་འཕགས་ཆེན་དམ་པ་རྣམས་ཀྱི་ཡེ་ཤེས་ཀྱི་མཁྱེན་པའི་སྤྱོད་ཡུལ་ལས་བདག་འདྲ་སོ་སོ་སྐྱེ་བོས་བརྗོད་པའི་ཡུལ་དུ་མ་གྱུར་ཏེ། རྣམ་ཐར་ཞལ་གསུང་མ་ལངས། བདག་ལོ་སུམ་ཅུ་ནས་བཟུང་རྩ་དྲུག་བར། །ལོ་བཞིན་ལྷག་ལྷ་གང་རུང་གཞུང་བསྲངས་ནས། །ངོ་མཚར་བཀོད་
པ་ཅུང་ཞིག་ཡོད་མོད་ཀྱང་། །གསང་བཅུའི་དམ་ཚིག་ཕྲ་ཞིང་བསྲུང་དཀའ་བས། །ཟུར་ཙམ་བརྗོད་པ་བདག་གིས་ཅིའི་ཕྱིར་ཕོད། །ཅེས་གསུངས་པ་བཞིན་ཌཱ་ཀིའི་རྗེ་མོ་འདི་ཉིད་ནི་རྟག་ཏུ་དམན་ས་བཟུང་སྟེ་མ་ནུས་རྒན་མོ་ཞེས་རང་ཉིད་ལ་སྨད་པར་མཛད་པ་མ་གཏོགས་ང་རྒྱལ་ཁེངས་དྲེགས་། དང་། འཇིག་རྟེན་ཆོས་བརྒྱད་ལ་ནམ་ཡང་བརྟེན་པར་མི་མཛད། ནང་དུ་གསང་བའི་དམ་ཚིག་བསྲུང་བ་ལ་ཐུགས་ཤིན་ཏུ་སྒྲིམ་པས་དག་སྣང་དུ་ཞལ་གཟིགས་ལུང་བསྟན་བྱུང་བ་རྣམས་དགོས་དོན་མེད་པར་རླུང་ཕྱོགས་ཙམ་ཡང་སྒྲོགས་པར་མི་མཛད་པ་ནི་དྲུང་ན་གནས་པའི་གྲྭ་བུ་སློབ་རྣམས་དཔང་པོར་བཞུགས་པ་ལགས་ལ། ལོ་རྒྱུས་ཅུང་ཟད་སྨྲས་པ་འདི་ཡང་རྒྱུ་མཚན་མེད་པ་མ་ཡིན་ཏེ། ཞལ་གསུངས་རྣམ་ཐར་ཆེན་མོའི་མཇུག་ཏུ་འདི་ལྟར། ད་དུང་
ལེགས་བྱས་ཡོན་ཏན་འབྱུང་འགྱུར་རྣམས་རྟེན་འབྱུང་དགེ་བའི་ཆེད་དུ་རྗེས་ནས་རིམ་བཞིན། ལས་ལྡན་བུ་སློབ་མཁྱེན་ཡངས་བློ་གྲོས་སྤྱན་མངའ་རྣམས་ཀྱིས་སྨོས་པའི་རྟེན་འབྲེལ་དུས་སུ་སྨིན་པར་བྱེད་པའི་རྒྱུར་གྱུར་ཅིག །ཅེས་བཀའ་ཡིས་རྗེས་སུ་གནང་བའི་དགོངས་དོན་བསྒྲུབ་ཕྱིར་ལས། སྤྱི་བརྟོལ་དང་ཧོལ་རྒྱུག་བླུན་དད་ཀྱིས་བླ་མ་ཟོག་པོར་བཏང་བ་སོགས་མ་ཡིན་པར་རྗེ་བཙུན་ཆེན་མོའི་ཉེ་གནས་ཐུགས་ཟིན་གྱི་བུ་ཆེན་དོན་གྱི་རྒྱལ་ཚབ་ཏུ་གྱུར་པ་ཤཱི་ལ་བཛྲ་ལ་འཇམ་མགོན་ཆོས་ཀྱི་བློ་གྲོས་རིན་པོ་ཆེས་ཆབ་ཤོག་གི་ལམ་ནས་བཀའ་ཡིས་བསྐུལ་ཏེ་ཞུས་ལན་ས་བོན་ཙམ་ཞིག་ཕུལ་འདུག་པ་རྗེས་སུ་བདག་ལ་བསྩལ་བྱུང་བ་དེ་ལ་གཞི་བྱས། ཁ་བསྐང་དུ་འོས་པ་འགའ་ཞིག་གསར་དུ་བསྣན་པ་སྟེ་སྒྲོ་བཏགས་པ་དང་སྐུར་པ་འདེབས་པ་གཉིས་ཀའི་ཕྱོགས་སུ་མ་ལྷུང་བར་
རང་གི་བླ་མའི་རྣམ་ཐར་གྲོང་ཚིག་གི་ལམ་ནས་གསོང་པོར་བརྗོད་པ་འདི་བྱས་སོ། །འདིར་འབད་རྣམ་དཀར་མཚན་མོའི་མགོན་ཤར་བས། །ཐོག་མེད་སྒྲིབ་གསུམ་མུན་པ་རབ་བསལ་ནས། །གདོད་མའི་གནས་ལུགས་སྐུ་དང་ཡེ་ཤེས་མཛོད། །གཏིང་གསལ་གཞོན་ནུ་བུམ་སྐུར་སངས་རྒྱས་ཤོག །རྗེ་བཙུན་ཀུན་བཟང་བདེ་སྐྱོང་རྣལ་འབྱོར་མས། །ཚེ་རབས་ཀུན་ཏུ་བདག་གི་བཤེས་མཛད་དེ། །བླ་མེད་གསང་ཆེན་ཐེག་བཅུད་འབྲས་སྨིན་ནས། །དོན་གྱི་ཕག་མོའི་རང་ཞལ་མངོན་གྱུར་ཤོག །ཅེས་དབུས་བཟའ་མཁའ་འགྲོ་བདེ་བའི་རྡོ་རྗེའི་རྣམ་ཐར་ཆེན་མོའི་མཇུག་གི་ཁ་སྐོང་ཉུང་ངུ་གཡུ་ཡི་ཕྲ་ཚོམ་ཝ ཞེས་བྱ་བ་འདིའང་། དུས་མཐར་སྐྱེས་པའི་སྤོང་བ་པ་སངས་རྒྱས་རྡོ་རྗེས་རྗེ་བཙུན་ཌཱ་ཀིའི་དབང་མོ་དེ་ཉིད་སྐུ་མྱ་ངན་ལས་འདའ་བའི་ཚུལ་བསྟན་ནས་བགྲང་
བྱ་སུམ་ཅུ་རྩ་དྲུག་འདས་པ་རབ་བྱུང་བཅུ་དྲུག་པའི་མེ་ཕོ་འབྲུག་ལོ་གྲོ་བཞིན་ཟླ་བའི་དཀར་ཕྱོགས་ཀྱི་དགའ་བ་གཉིས་པ་ལ་གྲུབ་པར་བགྱིས་པའི་ཡི་གེ་པ་ནི་སྡོམ་བརྩོན་དམ་པ་བསྟན་འཛིན་དབང་རྒྱལ་གྱིས་བགྱིས་པ་སྟེ་འདིས་ཀྱང་ཟབ་གསང་རྫོགས་པ་ཆེན་པོའི་བསྟན་པ་རིན་པོ་ཆེ་སྤྱི་དང་། ཁྱད་པར་བླ་མ་ཌཱ་ཀི་བདེ་བའི་རྡོ་རྗེའི་ཟབ་གཏེར་འདི་ཉིད་ཕྱོགས་བཅུ་ཀུན་ཏུ་དར་ལ་སྨིན་ཅིང་ནམ་མཁའ་ཇི་སྲིད་བར་གནས་པའི་རྒྱུར་གྱུར་ཅིག། །།