རི་ཆོས་མཚམས་ཀྱི་ལྷན་ཐབས།
རི་ཆོས་མཚམས་ཀྱི་ལྷན་ཐབས་བཞུགས་སོ།།
བླ་མ་ལ་ཕྱག་འཚལ་ལོ། །འདིར་སྦས་ཡུལ་ཡོལ་མོ་གངས་རའི་ཡང་ཁྲོད་སྒྲུབ་སྡེ་ཀུན་བཟང་ཆོས་གླིང་དུ་ལོ་གསུམ་ཕྱོགས་གསུམ་སྒྲུབ་པའི་དམ་བཅའ་བརྟན་པོ་བཟུང་བའི་སྐལ་ལྡན་སློབ་བུ་གསར་པ་རྣམས་ཀྱིས་རྒྱུན་པར་ཐུན་མཚམས་རྣམས་སུ་ཉམས་ལེན་ཆོས་སྤྱོད་ཀྱི་རིམ་པ་ཇི་ལྟར་བྱ་ཚུལ་གོ་བདེ་བར་འགོད་པ་ལ། དེའང་ཐོག་མར་དབང་ཐོབ་ཅིང་དམ་ཚིག་
ལ་གནས་པའི་སྒྲུབ་པ་པོ་རྣམས་ཐོ་རངས་ལྡང་བའི་དུས་ཆུ་ཚོད་གསུམ་ཙམ་གྱི་ནམ་མ་ལངས་པའི་སྔོན་དུ་ནས་ལྡང་བའི་རྣལ་འབྱོར་གྱིས་ལངས། ལུས་གནད་སྐྱིལ་ཀྲུང་བཅའ། ངག་གནད་རླུང་རོ་ཞལ་ཤེས་ལྟར་ལན་གསུམ་མམ་དགུ་ཕྲུག་ཏུ་འབུད། དེ་ནས་ངག་བྱིན་རླབས་ལྕེ་དབང་རཾ་ཡིག་སོགས་དང་དབྱངས་གསལ་རྟེན་སྙིང་བཅས་སོ་སོར་བདུན་རེ་
དང་། ཨོཾ་སམྦྷ་ར་སམྦྷ་ར་བི་མཱ་ན་སཱ་ར་མ་ཧཱ་ཛམྦྷ་ཧཱུཾ། ཞེས་འགྱུར་སྔགས་ལན་བདུན་བཟླ། ངག་བྱིན་རླབས་འདི་ཐུན་ཕྱི་མ་གསུམ་ལ་མི་དགོས། དེ་ནས་ཡིད་གནད་ཀུན་སློང་བཅོས་ཏེ་སེམས་བསྐྱེད་ལེགས་པར་གསལ་བཏབ། དེ་ནས་བླ་མ་ལ་གསོལ་བ་འདེབས་པའི་ཕྱིར་དུ་ངག་འདོན་རྡོ་གྲུབ་གསུང་རྣམ་མཁྱེན་ལམ་བཟང་གཞུང་བཞིན། བླ་མ་མཁྱེན་ཞེས་རྒྱང་འབོད་ལན་གསུམ་གྱིས་བོས་ལ། སྙིང་དབུས་དད་པའི་སོགས་ཚིག་རྐང་དྲུག་གིས་བཞེངས་༴ བསྐུལ་གྱིས། སྙིང་གའི་བླ་མ་དབུ་མའི་ལམ་བརྒྱུད་སྤྱི་བོར་དགྱེས་བཞིན་བཞུགས་པར་བསམ་ལ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་སྐུ་བཞིའི་བདག་ཉིད་དཔལ་ལྡན་བླ་མ་དམ་པ་ལ་གསོལ་བ་འདེབས་སོ། །བདག་ལ་དབང་བསྐུར་བྱིན་གྱིས་བརླབ་ཏུ་གསོལ། ཟབ་ལམ་གྱི་རྟོགས་པ་ཁྱད་པར་ཅན་
རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཀ་དག་གནས་ལུགས་ཀྱི་ལྟ་བ་རྟོགས་པར་བྱིན་གྱིས་བརླབ་ཏུ་གསོལ། ལྷུན་གྲུབ་སྣང་བཞིའི་ཡེ་ཤེས་མཐར་ཕྱིན་པར་བྱིན་གྱི་བརླབ་ཏུ་གསོལ། ཞེས་གསོལ་བ་འདེབས་པ་དང་དབང་བླང་ཐུགས་ཡིད་བསྲེ་ཞིང་ཅི་གནས་སུ་མཉམ་པར་བཞག་པ་སྟེ། ལུས་གནད། ངག་གནད། སེམས་གནད། བླ་མ་བསྒོམ་ནས་གསོལ་བ་འདེབས་པ་དང་བཞི་པོ་ནི་ཐུན་གྱི་སྔོན་འགྲོའམ་སྔོན་འགྲོའི་སྔོན་འགྲོ་བྱ་བ་ཡིན་པས། ཐུན་ཐམས་ཅད་ལ་འདི་མེད་དུ་མི་རུང་བ་དེ་ལྟར་ཤེས་དགོས། ཐུན་རྗེས་མ་རྣམས་ཀྱི་བླ་མ་གསོལ་བ་འདེབས་པ། སྤྱི་བོར་བླ་མ་བསྒོམ་ཞིང་གསོལ་འདེབས་གོང་ལྟར་བྱ་བ་ལས། བླ་མ་རྒྱང་འབོད་དང་བཞེངས་བསྐུལ་གྱི་ཚིག་རྐང་དྲུག་བཅས་དོར་བ་ཁྱད་པར་རོ། །དེ་ནས་ཁྲིད་ཀྱི་རིམ་པ་
རྣམས་མོས་སློབ་ཙམ་གྱིས་མི་ཆོག་པར་སྨིན་ཁྲིད་ཀྱི་ལུགས་ལྟར་བྱེད་དགོས་པས་ལོ་དང་པོར་སྔོན་འགྲོ་བློ་ལྡོག་རྣམ་བཞི་དང་། སེམས་བསྐྱེད་ཀྱི་བསླབ་བྱ་བཅས་པར་ཞག་བརྒྱའི་བར་བློ་སྦྱོང་བ་སྔོན་དུ་འགྲོ་བས། ཐུན་མིན་ནང་གི་སྔོན་འགྲོ་སྐྱབས་འགྲོ་ནས་བཟུང་ཕྱི་སྒྲུབ་བླ་མའི་རྣལ་འབྱོར་བར་འབུམ་ལྔ་རྣམས་ལམྱོང་བ་དང་རྟགས་ཐོན་ཐོན་དུ་བསགས་སྦྱངས་བྱ། ལོ་བར་པ་ལ་ནང་སྒྲུབ་རིག་འཛིན་འདུས་པ་ནས་བཟུང་། རྩ་གསུམ་ཞི་དྲག་རྣམས་ལ་དུས་གྲངས་རྟགས་གསུམ་གང་རུང་དང་སྦྱར་བའི་བསྙེན་སྒྲབ་ལས་གསུམ་རྫོགས་པར་བྱ། ལོ་ཐ་མ་ལ་རྩ་རླུང་དང་རྫོགས་ཆེན་ཁྲེགས་ཆོད་ཐོད་རྒལ་ལ་རྩེ་གཅིག་ཏུ་ཉམས་ལེན་བསྐྱང་བ་སྟེ། དེ་ལྟར་ལམ་ཐུན་མོང་དང་ཁྱད་པར་གང་དང་གང་གི་སྐབས་སུ་བབ་པ་དེ་དང་དེའི་ཐུན་ལ་འཇུག་ཅིང་། ནམ་ལངས་པ་དང་ཐུན་
གྲོལ་ལ། འདིར་བསང་གཡོག་པས་དུང་དཀར་གྱི་བརྡ་བཏང་ཚེ། ཀུན་གྱིས་རི་བོ་བསང་མཆོད་བཏང་གྲུབ་པ་དང་ཞོགས་ཇ་བཞེས། དེ་ནས་སྔ་ཐུན་ལ་འཇུག་ཐུན་གྲོལ་ནས། སྙིང་ཐིག་སྤུངས་གཏོར་བསྡུས་པ་དང་། སྙིང་ཐིག་སྤུངས་གཏོར་བསྡུས་པ་དང་། མཆོག་གླིང་གཏེར་གསར་མཆོག་སྦྱིན་སྤྱད་གྲོལ་བཅས་བཏང་ནས། བརྐྱང་ཕྱག་བརྒྱ་རྩ་རེ་འཚལ་བ་དང་སྦྲགས། ལྟུང་བཤགས་དང་ཞི་ཁྲོའི་བཤགས་ཆུང་། ཡེ་ཤེས་སྐུ་མཆོག་མ་བཅས་ངག་ཏུ་འདོན། དེ་ནས་གུང་ཚིགས་བཞེས། བར་འདིར་ཁྲིད་ཡིག་དང་། དམ་པ་གོང་མའི་རྣམ་ཐར་མགུར་འབུམ་ཞལ་གདམས་སྐོར་མཇལ་བ་སོགས་ཆོས་སྤྱོད་ཀྱི་བྱ་བས་འདའ་བར་བྱའོ། །དེ་ནས་ཕྱི་དྲོའི་ཆུ་ཚོད་དང་པོ་ཙམ་ནས་དགོང་ཐུན་ལ་འཇུག་ཅིང་གྲོལ་བའི་རྗེས། གསང་སྔགས་ནང་གཏོར་མཁྱེན་བརྩེའི་གསུང་རྩ་གསུམ་ཆོས་
སྲུང་རྒྱ་མཚོའི་བསྐང་བཤགས་དང་གཏོར་བསྔོས་བསྡུས་པ་དངོས་གྲུབ་མཆོག་སྦྱིན་བཏང་། དེ་ནས་སྐུ་རིམ་སྐོར། ཟབ་མདོ། སེང་གདོང་གདུགས་དཀར་བཅས་བཏོན་ལ་ཐལ་བརྡེབ་བྱ། དེ་ནས་སྤུངས་གཏོར་བསྡུས་པའི་དབུར་ཡོད་པའི་ཇོ་བོ་ཁ་སརྦ་ཎིའི་བདག་བསྐྱེད་གསལ་བཏབ་ལ་ཡིག བདུན་ཕྲེང་སྐོར་གསུམ་ཙམ་བཟླ། གསུར་གཡོག་པས་དུང་དཀར་བཏང་བ་དང་། ཀུན་གྱིས་དཀར་གསུམ་ཞིང་ཁམས་ཀུན་ཁྱབ་བཏང་རྗེས། བཟང་སྤྱོད་བདེ་སྨོན་བར་དོའི་སྨོན་ལམ་དུས་མཐར་གདབ་པའི་སྨོན་ལམ་སོགས་གང་རྒྱས་བཏོན་ལ། ནུབ་ཇ་བཞེས། དེ་ནས་ས་རུབ་པ་དང་བསྟན་སྲོད་ཐུན་ལ་འཇུག །ཐུན་གྲོལ་རྗེས། ལུས་སྦྱིན་བཏང་། མཐར་སྐུ་གསུམ་ཞིང་ཁམས་སྦྱོང་བའི་གསོལ་འདེབས་སྨོན་ལམ་དང་། རྫོགས་ཆེན་གཞི་
ལམ་འབྲས་བུའི་སྨོན་ལམ། ལེགས་སྨོན་དངོས་གྲུབ་རྒྱ་མཚོམ་བཅས་གྲུབ་པ་དང་ཉལ་བའི་རྣལ་འབྱོར། དང་པོ་སྔོན་འགྲོའི་སྐབས་སུ་བླ་མ་སྤྱི་བོའི་ཚངས་བུག་ནས་མར་བྱོན། སྙིང་པདྨ་འདབ་བཞིའི་རྣམ་པར་གནས་པའི་ནང་དུ་བཞུགས་པ་དེའི་འོད་ཀྱིས་རང་ལུས་སྣོད་བཅུད་དང་བཅས་པ་འོད་གསལ་དུ་སྦྱངས་པའི་ནང་གསལ་ཐིམ་ལ་མ་རྨུགས་པའི་ངང་དུ་གཉིད་ལོག་པས་རྨི་ལམ་དང་འོད་གསལ་ཟིན་པར་འགྱུར་ལ། བར་དུ་བསྐྱེད་རིམ་གྱི་སྐབས་སུ་སྙིང་གའི་སྔགས་འཁོར་ལ་སེམས་བཟུང་སྟེ། དེ་ཉིད་བཟླ་བཞིན་པར་ཉལ་བ་དང་། ཐ་མ་རྫོགས་ཆེན་སྐབས་སུ་ཤེས་བྱ་བུམ་པར་བསྡུ་བའི་མན་ངག་ལྟར་ཉལ། སླར་ཡང་ཐོ་རངས་ལྡང་བའི་རྣལ་འབྱོར་སོགས་སྔར་བསྟན་པ་བཞིན་ཉམས་སུ་ལེན་པ་བཅས་ཉིན་ཞག་ཕྲུག་གཅིག་གི་ཐུན་མཚམས་ཀྱི་བྱ་བ་
རྣམས་བསྟན་ཟིན། ཐུན་དངོས་གཞིའི་ཡུན་རིང་ཐུང་སྙོམས་པར་ཆུ་ཚོད་གསུམ་ཙམ་རེ་བྱས་ན་རན་པར་མཐོང་། ཐུན་གྲོལ་བསྡམས་ཀྱི་བརྡ་རྭ་དུང་བདུན་འབུད་འདི་ཀཿཐོག་དམ་པ་བདེ་གཤེགས་ཀྱི་ལུགས་ཏེ་རྙིང་ལུགས་གྲགས་ཆེ་བས་དེ་བཞིན་འབུད། གཞན་ཡང་བཟའ་བཏུང་གཡོས་བསྐོལ་དང་། གུང་ཚིགས་སྐབས་སོགས་ཀྱི་འདོན་དམིགས་རྣམས་མདོ་སྔགས་ཟུང་འཇུག་གི་སྤྱོད་ཡུལ་ལམ་ཁྱེར་སངས་རྒྱས་ལམ་ཞུགས་ལྟར་བྱའོ། །ད་ནི་ཞར་བྱུང་རྗེ་བླ་མ་རིན་པོ་ཆེའི་ཁྲིད་ཡིག་ཀུན་བཟང་ཞལ་ལུང་གི་ཟིན་བྲིས་སུ་བསྟན་པའི་འབྲེལ་བ་བཞི་ལྡན་ཞེས། འདུན། སྨན། དམ་བཅའ། བླ་མ་གསོལ་བ་འདེབས་པ་དང་བཞི་ལས། ཕྱི་མའི་དོན་སྐྱབས་གསོལ་ཐུགས་རྗེའི་བསྐུལ་ཞིང་ར་མདར་སྦྲན་པའི་ཚིག་གཞན་དུ་ཡང་ཡང་ཞལ་འཕངས་པ་ནི་འདི་
ལྟ་སྟེ། བླ་མ་རྒྱལ་བ་འགྲོ་བའི་མགོན། །འགྲོ་བ་སྐྱོབ་པའི་དོན་བརྩོན་པ། །སྟོབས་ཆེན་འཇིགས་པ་ཀུན་སེལ་བར། །དེ་རིང་ཉིད་ནས་སྐྱབས་སུ་མཆི། །དེ་ཡི་ཐུགས་སུ་ཆུད་པའི་ཆོས། །འཁོར་བའི་འཇིགས་པ་སེལ་བ་དང་། །བྱང་ཆུབ་སེམས་དཔའི་ཚོགས་ལའང་། །དེ་བཞིན ཡང་དག་སྐྱབས་སུ་མཆི། །འདི་ནི་འཇིགས་པས་རྣམ་སྐྲག་པས། །ཀུན་ཏུ་བཟང་ལ་འདི་ཉིད་དབུལ། །འཇམ་པའི་དབྱངས་ལའང་འདི་ཉིད་ཀྱིས། འདི་ཡི་ལུས་འདི་དབུལ་བར་བགྱི། །ཐུགས་རྗེའི་སྤྱོད་པ་མ་འཁྲུལ་པའི། །སྤྱན་རས་གཟིགས་མགོན་དེ་ལ་ཡང་། །ཉམ་ཐག་ང་རོས་འོ་དོད་འབོད། ། སྡིག་ལྡན་འདི་ལ་བསྐྱབ་ཏུ་གསོལ། །འཕགས་པ་ནམ་མཁའི་སྙིང་པོ་དང་། །ས་ཡི་སྙིང་པོ་དག་དང་ནི། །ཐུགས་རྗེ་ཆེ་མགོན་ཐམས་ཅད་ལ། །
སྐྱབས་འཚོལ་སྙིང་ནས་འོ་དོད་འབོད། །གང་ཞིག་མཐོང་ན་གཤིན་རྗེ་ཡི། །ཕོ་ཉ་ལ་སོགས་སྡང་བ་རྣམས། །སྐྲག་ནས་ཕྱོགས་བཅུར་འབྱེར་བྱེད་པ། །རྡོ་རྗེ་ཅན་ལ་སྐྱབས་སུ་མཆི། །སྔོན་ཆད་ཁྱོད་ཀྱི་བཀའ་ལས་འདས། །ད་ནི་འཇིགས་པ་ཆེར་མཐོང་ནས། །ཁྱེད་ལ་སྐྱབས་སུ་མཆི་ལགས་ཀྱིས། འཇིགས་པ་མྱུར་དུ་བསལ་དུ་གསོལ། ཞེས་སྤྱོད་འཇུག་ལས་བྱུང་བ་གཞན་དོན་དུ་ཚིག་ཕྲད་བསྒྱུར་བ་དང་། ༈ དཔའ་བོ་ཁྱེད་ལ་ཐུགས་རྗེའི་སྟོབས་ ི་མངའ་ཞིང་། །སྔོན་བྱུང་འབྲེལ་བའི་ལས་ཀྱི་འཕྲོ་བཙན་ན། །ཡལ་ཡོལ་བཏང་སྙོམས་ལེ་ལོ་མ་མཛད་པར། །སྙིང་ནས་ད་གཟིགས་ཐུགས་རྗེ་རྒྱལ་བའི་ལྷ། །ཞེས་རཱུ་དྲའི་སྨྲེ་བཤགས་ལས་བྱུང་བ་དང་། ༈ ཀྱེ་མ་ཀྱེ་ཧུད་དཀོན་མཆོག་ཐུགས་རྗེ་ཅན། །རྒྱལ་བ་ཁྱེད་ལ་བརྩེ་བའི་ཐུགས་མངའ་བས།
བདག་སོགས་རིགས་དྲུག་འཁོར་བའི་སྡུག་བསྔལ་ལས། །ད་ལྟ་ཉིད་དུ་ཐར་བར་བྱིན་གྱིས་རློབས། །ཞེས་ཀར་གླིང་ཞི་ཁྲོའི་ཆོས་སྤྱོད་ཐུན་བཞིའི་རྣལ་འབྱོར་ལས་གསུངས་པ་རྣམས་ཀྱང་ལས་དང་པོ་པ་དཔེ་འཚོལ་གྱི་ངལ་བ་ཅན་རྣམས་འཇུག་བདེ་བ་ལ་ཕན་པའི་བློས། དཀྱུས་གཅིག་ཏུ་བཀོད་པ་ཡིན་ནོ། །རི་ཆོས་ལྷན་ཐབས་ཉུང་ངུ་འདི། །རི་པ་སངས་རྒྱས་རྡོ་རྗེ་ཡིས། །རི་བོ་གཡང་ཅན་མགུལ་དུ་བྲིས། །རི་ཁྲོད་འགྲིམས་པའི་ཆ་རྐྱེན་ཤོག ། ༈ འོག་མིན་མཁའ་སྤྱོད་དཔལ་གྱི་ཙཱ་རི་ཏྲ། །གཉིས་པ་སྦས་པའི་ཡང་ཁྲོད་དགའ་བའི་ཚལ། །ཀུན་བཟང་ཐུགས་ཀྱི་བསྟན་པ་ཨ་ཏིའི་ཆོས། །དུས་མཐར་གླིང་འདིར་སྨིན་རྒྱས་གྱུར་ཅིག །དགེའོ།། །།
ཤོག་སྟོང་།