དཔལ་ཡང་ལེ་ཤོད་རིག་འཛིན་གྲུབ་པའི་དགའ་ཚལ་གྱི་སྒྲུབ་སྡེའི་བཅའ་ཡིག་སྡོམ་གསུམ་མཛེས་རྒྱན།
དཔལ་ཡང་ལེ་ཤོད་རིག་འཛིན་གྲུབ་པའི་དགའ་ཚལ་གྱི་སྒྲུབ་སྡེའི་བཅའ་ཡིག་སྡོམ་གསུམ་མཛེས་རྒྱན་ཞེས་བྱ་བ་བཞུགས་སོ།།
ཁྱབ་བདག་གདོད་མའི་མགོན་པོ་དང་དབྱེར་མ་མཆིས་པ་དཔལ་ལྡན་བླ་མ་དམ་པའི་ཞབས་ལ་གུས་པ་ཆེན་པོས་ཕྱག་འཚལ་ལོ། །ཚད་མེད་དགེ་ཚོགས་ཀྱིས་བསྐྲུན་མཚན་དཔེ་གསལ་འབར་བལྟ་བས་མི་ངོམས་སྐུ། །ཡན་ལག་དྲུག་ཅུ་རྫོགས་པ་གང་འདུལ་གདུལ་བྱའི་རེ་བ་ཡོངས་སྐོང་གསུང། །སྤྲོས་པ་ཀུན་བྲལ་མཁྱེན་གསུམ་ཡེ་ཤེས་མཁའ་ཁྱབ་མཁའ་ཡི་རྡོ་
རྗེའི་ཐུགས། །ཡོན་ཏན་ལྷུན་གྲུབ་ཕྲིན་ལས་ཐོགས་མེད་ཤཱཀྱའི་རྒྱལ་པོས་རྟག་ཏུ་སྐྱོངས། །ཐུབ་བསྟན་གླིང་བཞིའི་དབུས་ན་མངོན་འཕགས་པའི། །སྔ་འགྱུར་ཐེག་མཆོག་རི་རྒྱལ་ལྷུན་མཐོའི་སྤོར། །གནས་བཅས་འདུས་སྡེ་ལྷ་དབང་ཚོགས་རྣམས་ཀྱིས། །བླང་དོར་བཅའ་ཁྲིམས་རྣམ་བཞག་འབྲི་བར་བྱ། །དེའང་རྒྱལ་བའི་དབང་པོ་དྲི་མེད་འོད་ཟེར་
གྱིས། །ས་ཕྱོགས་དབེན་ཞིང་མཚན་ཉིད་ཚང་བ་དང་། །གྲུབ་ཐོབ་གོང་མས་ཞབས་ཀྱིས་བཅགས་པ་དང་། །ཉམས་གྲིབ་མེད་པས་དམ་ཅན་འདུ་བ་དང་། །རྣམ་གཡེང་འདུ་འཛིའི་རྐྱེན་རྣམས་མེད་པ་དང་། །མཐུན་རྐྱེན་ཡོ་བྱད་བསྒྲུབ་པར་སླ་བ་དང་། །མི་དང་མི་མིན་འཚེ་བ་མེད་པའོ། །ཞེས་གསུངས་པ་ལྟར་གནས་ཀྱི་མཚན་ཉིད་རྣམས་ལེགས་པར་ཚང་བ་པདྨའི་སྒྲབ་གནས་ཐམས་ཅད་ཀྱི་རྒྱལ་པོ་ཤྲཱི་བཛྲ་ཧེ་རུ་ཀའི་ཕོ་བྲང་། རྩ་གསུམ་དམ་ཅན་རྒྱ་མཚོ་སྤྲིན་བཞིན་དུ་འདུ་བས་བག་དྲོ་ལ་བྱིན་ཆགས་པ་བལ་ཡུལ་ཡང་ལེ་ཤོད་རིག་འཛིན་གྲུབ་པའི་དགའ་ཚལ་ཞེས་ཡོངས་སུ་གྲགས་པའི་སྒྲུབ་སྡེ་འདི་སྟོང་ལྡིར་གྱི་འུད་གོག་མི་ཆེ་ནའང་རྙིང་བསྟན་གྱི་ཆུ་འགོ་གངས་ལ་ཐུག་པ་ལྟ་བུ་ཡིན། ཁྱད་པར་སྙིང་ཐིག་འདི་ལ་ད་ལྟའི་བར་དུ་སྙིང་པོའི་བསྟན་འཛིན་ཟམ་མ་ཆད་པར་
བྱོན་པ་ཞིག་ཡིན་པས། དེ་དག་གི་རྗེས་སུ་སྐྱེས་པའི་རང་རེ་རྣམས་ཀྱང་བརྒྱུད་པའི་རབས་མ་ཆད་ཙམ་ཡོང་དུ་རེ་ནས་སྒྲུབ་སྡེ་ཆུང་ངུ་འདི་ཡང་བསྟན་པ་སྤྱི་དང་བྱེ་བྲག་ལ་བསམ་ནས་འབད་པ་ཆེན་པོས་གསར་དུ་བསྐྲན་པ་ཡིན་པས། འདིར་བཞུགས་དགེ་འདུན་རྣམས་ཀྱིས་སྤང་བླང་བྱ་དགོས་གལ་ཆེ་བ་རགས་རིམ་བཅའ་ཁྲིམས་ཡི་གེར་འགོད་པར་བྱ་སྟེ། དེ་ཡང་འདིར་སྒྲིག་ཞུགས་ཚང་མ་སྙིང་ནས་ཐར་འདོད་ངེས་འབྱུང་གི་བསམ་པས། རང་བློས་དང་བླངས་བྱས་པ་ཤ་སྟག་ལས་ལྟོ་གོས་མ་ཕྱིད་པ་སོགས་འཇིགས་སྐྱོབ་དང་ལེགས་སྨོན་གྱི་ཀུན་སློང་ཁོ་ན་ལ་བརྟེན་པ་ཆེར་མེད་ཕྱིར་མཆོག་དམན་བར་གསུམ་ཀུན་གྱིས་ཐུགས་ངེས་ཞུ་རྒྱུ་ལ། འོ་སྐོལ་རྣམས་སྤྱིར་སྟོན་མཆོག་ཐུགས་རྗེའི་བདག་ཉིད་ཅན་དེའི་རྗེས་འཇུག་ཡིན་བཞིན་བསམ་སྦྱོར་ཐམས་ཅད་བསླབ་པ་རིན་པོ་
ཆེ་རྣམ་པ་གསུམ་དང་ཅི་མཐུན་བྱས་ཏེ་རང་རང་ཐར་པའི་ལམ་སྣེ་ཟིན་ཅིང་། གཞན་གྱི་དད་རྫས་ཆུད་མ་ཟོས་པ་ཞིག་དགོས་རྒྱུ་ཡིན་འདུག །དེ་བྱེད་པ་ལ་ང་སེར་མོ་བ་དང་དགེ་སློང་ཡིན་སྙམ་ནས་དཀོར་ཟ་ཤེས་པ་ཙམ་གྱིས་ཆོག་རྒྱུ་མིན། འོ་ན་ཆོས་བྱེད་སྟངས་ཅི་ལྟར་བྱེད་ཅེ་ན། འཆི་བ་མི་རྟག་པས་རྒྱུད་བསྐུལ། ཚེ་འདིའི་བདེ་སྐྱིད་ལ་ཞེན་པ་ལོག །ཁམས་གསུམ་གྱི་བདེ་འབྱོར་ཐམས་ཅད་རྨི་ལམ་གྱི་རྒྱལ་སྲིད་ལྟར་སྙིང་པོ་མེད་པར་ཤེས་ནས། དད་པ་དམ་ཚིག་གི་རྨིང་བཏིང་། དཀའ་སྤྱད་སྙིང་རུས་ཀྱི་འཕྲང་ལ་གཅུར། གྱོང་ལྟོ་གོས་གཏམ་གསུམ་ལ་བསྐུར་བ་དང་། བློ་ཕུགས་ཆོས་ལ་གཏད། ཆོས་ཕུགས་སྤྲང་ལ་གཏད། སྤྲང་ཕུགས་ཤི་ལ་གཏད། ཤི་ཕུགས་གྲོག་སྟོང་ལ་གཏད། ཅེས་ཇོ་བོ་བཀའ་གདམས་པའི་གཏད་པ་བཞི་པོ་འདི་ཆོས་པ་
ཀུན་གྱི་སྤྱི་ནོར་ཡིན་པས། དེ་བཞིན་བྱུང་ན་ཆོས་སྒོར་ཞུགས་པ་ལ་དོན་འབྲས་ཆེན་པོ་འགྲུབ་པ་ཡིན་ཀྱང་དེང་སང་ནི་སྙིགས་མ་ལྔ་བདོ་ཞིང་བསྟན་པ་རྟགས་ཙམ་ལ་ཉེ་བས་གང་དང་སུ་ཡིན་ཡང་ཆོས་ཀྱི་ལག་ལེན་ཆོས་ནས་བཤད་པ་ལྟར་ཐེབ་མཁན་དཀོན་ཀྱང་སེམས་རྒྱུད་ཆོས་ཀྱིས་ཐུལ་ནས་དད་རྫས་ཀྱིས་རང་རྒྱུད་མ་ཚིག་པ་ཞིག་ཅི་ནས་དགོས་ཤིང་། ཚུལ་ཁྲིམས་ཀྱི་ཀུན་སྤྱོད་མིག་ལྟོས་ལ་རག་ལས་པས། རྒྱལ་བསྟན་ཡུན་དུ་གནས་ཤིང་། དད་ལྡན་དང་བ་འདྲེན་པའི་མིག་རྐྱེན་དུ་ཆེ་བ་སོགས་དགོས་དབང་དུ་མ་ཡོད་པས། འདིར་སྒྲིག་ཞུགས་རྣམས་སྔོན་ནས་དགེ་ཚུལ་དང་དགེ་སློང་ཡིན་ན་སྨོས་མ་དགོས། དེ་མིན་གསར་བུ་རྣམས་ཐོག་མར་མཁན་སློབ་མདུན་ནས་རབ་བྱུང་གི་སྡོམ་པ་ཞུས་ཏེ་བསྟན་པ་རྟགས་ཀྱི་ཆེ་བ་གོས་ངུར་སྨྲིག་གི་རྒྱལ་མཚན་གཟན་
ཤམ་རེ་མནབ་དགོས། བཙུན་པས་རྒྱ་ཆས་དང་མཐའ་མིའི་གོས་སློག་གྱོན་པ་ལར་ཡང་བསྟན་པའི་མིག་ལྟོས་ལ་ཤིན་ཏུ་གནོད་ཅིང་སྐྱེ་བོ་ཕལ་པས་མཐོང་ན་ཞེ་ཁྲེལ་བ་དང་། བསྟན་པ་ལ་མི་གུས་པའི་གཞིར་འགྱུར་བས་རྒྱན་པར་ཀུན་སྤྱོད་དང་བ་འདྲེན་པ་བྱེད། འདུལ་བའི་དབང་དུ་བྱས་ན། སྲོག་གཅོད་པ། མ་བྱིན་པ་ལེན་པ། མི་ཚངས་པ་སྤྱོད་པ། མི་ཆོས་བླ་མའི་རྫུན་སྨྲ་བ་སྟེ་རྩ་བའི་ཕམ་པ་བཞིའི་ནང་ནས་སྣེ་གཅིག་བྱས་ན་དགེ་ཚུལ་སློང་གི་སྡོམ་པ་རྩད་ནས་ཤོར། ཞག་གཅིག་གསང་ན་སྐྱེ་བ་དེ་ལ་སོ་སོར་ཐར་པའི་སྡོམ་པ་རྒྱུད་ལ་མི་སྐྱེ། ཕྱི་མར་ཚ་དམྱལ་དུ་སྡུག་བསྔལ་མྱོང་། ལྷག་མའི་ལྟུང་བས་སྡོམ་པ་གཏན་ནས་ཤོར་མི་ནུས་ཀྱང་གྲངས་མང་ན་ཉེས་ཚད་ཕམ་ལྟུང་དང་འདྲ་བས་དེ་དག་ལ་བག་ཡོད་པ་མཛད་གལ་ཆེ། རྩ་བ་ཕམ་པ་བཞི་དང་འགལ་ན། དགེ་
འདུན་གྱི་གྲལ་དང་དད་རྫས་ལ་ལོངས་མི་སྤྱོད་ཅིང་བླ་མ་མཆེད་གྲོགས་དད་རྫས་སྦྱིན་བདག་བཅས་ཆུད་མི་གསོན་པར་གནས་དབྱུང་ཕྱི་ལམ་ཁེགས་པ་དགོས། དེས་ན་གཙོ་ཆེར་སོ་ཐར་གྱི་སྡོམ་པ། བྱང་སེམས་ཀྱི་བསླབ་པ། གསང་སྔགས་ཀྱི་དམ་ཚིག་གསུམ་ལ་ཅི་ཤེས་གང་ནུས་ཀྱིས་བསྲུང་སྡོམ་མིག་འབྲས་བཞིན་བཙའ་བར་མཛད་པ་ན་སྒྲིག་ཁྲིམས་ཀྱི་བཅའ་བཀོད་ཞོར་ལ་འབྱུང་ཞིང་། ཆོས་ཟེར་བའི་རྣམ་དཔྱོད་ཅན་ཟུར་དུ་བྱ་རྒྱུ་མེད། ཡང་ཡུལ་དུས་གནས་སྐབས་དགོས་གལ་དང་བསྟུན་པའི་སྤང་བྱ་འགའ་ཞིག་དམིགས་བསལ་དུ་སྨྲོས་པ་ལ། བཀའ་མདོ་རྒྱུད་ལུང་མན་ངག་ཐམས་ཅད་ནས་དངོས་སུ་བཀག་པའི་ཤ་ཆང་གཉིས་ཀྱི་ཉེས་དམིགས་ཅུང་ཟད་ཅིག་ལུང་ལ་བརྟེན་ནས་འཆད་པར་བྱ་སྟེ། དེའང་ངོར་ཆེན་རྡོ་རྗེ་འཆང་ཀུན་དགའ་བཟང་པོའི་ཞལ་ནས།
དེ་ལ་དམ་པའི་ཆོས་སྒྲུབ་པའི་རྟེན་ཁྱད་པར་ཅན་དལ་འབྱོར་གྱི་ལུས་རྣམ་པར་དག་པ་ཐོབ་པའི་དུས་འདིར་བླ་ན་མེད་པའི་བྱང་ཆུབ་རིན་པོ་ཆེ་བསྒྲུབ་པའི་དོན་དུ། ཡང་དག་པའི་ལྟ་བ་དང་སྤྱོད་པ་རྣམ་པར་དག་པ་ལ་ཚུལ་བཞིན་དུ་གནས་ཏེ། དལ་འབྱོར་གྱི་རྟེན་ཆོས་དང་མཐུན་པའི་འཚོ་བ་རྣམ་པར་དག་པས་ཡུན་རིང་དུ་འཚོ་བར་བྱ་དགོས་པ་ལ། སྐྱེས་བུ་མི་མཁས་པའི་ངང་ཚུལ་ཅན་རྣམས་ནི་བག་མེད་པའི་ཆང་དང་། སེམས་ཅན་བསད་པའི་ཤ་ཁྲག་གིས་དལ་འབྱོར་འཚོ་བར་བྱེད་ཅིང་། འདི་དག་ཀྱང་དམ་པའི་ཆོས་འདུལ་བ་དང་། རྡོ་རྗེ་ཐེག་པ་ལས་ལོངས་སྤྱོད་པར་གསུངས་སོ་ཞེས་གཏན་ཚིགས་ཀྱང་འགོད་པར་བྱེད་དོ། །འདི་ལྟ་བུ་ནི་ཚུལ་བཞིན་མ་ཡིན་པ་ལ་རང་ཉིད་ཞུགས་ཤིང་། གཞན་དག་ཀྱང་དེ་ལ་སྦྱོར་བ། སྦལ་པའི་དོང་གི་སྦལ་པ་རྨ་ཅན་ལྟ་བུ་རྒྱལ་བ་དགྱེས་
པའི་སྤྱོད་པ་ལས་ཉམས་པ། མི་དགེ་བའི་བཤེས་གཉེན་གྱིས་ཡོངས་སུ་བཟུང་བ་རང་ཉིད་ལ་ཕུང་ཁྲོལ་ཆེན་པོ་སྐྱེད་པར་བྱེད་པའི་སྤྱོད་ལམ དང་གྲུབ་པའི་མཐའ་ངན་པ་ཡིན་པས་འདི་དགག་པར་བྱ། ཞེས་རྒྱུ་མཚན་དང་བཅས་པ་གསུངས་ཤིང་། ལང་ཀར་གཤེགས་པའི་མདོ་ལས། ལྟར་འདོད་ཆགས་ཐར་པ་ལ། །བར་ཆད་བྱེད་པར་འགྱུར་བ་བཞིན། །དེ་ལྟར་ཤ་དང་ཆང་ལ་སོགས། །བར་ཆད་བྱེད་པར་འགྱུར་བ་འོ། །ཞེས་ཤ་ཆང་གཉིས་སྟབས་གཅིག་ཏུ་བཀག་པའི་ལུང་དང་། མདོ་དྲན་པ་ཉེར་བཞག་ལས། ཆང་ནི་དུག་གི་མཆོག་ཡིན་ཏེ། །ཆང་འཐུང་བ་ལ་བསྟེན་མི་བྱ། །ཆང་འཐུང་བ་ལ་བསྟེན་པ་ནི། །དགེ་བའི་ཆོས་རྣམས་ཉམས་པར་འགྱུར། །གང་གིས་རྟག་ཏུ་ཆང་བརྟེན་པ། །དེ་ཡི་བློ་ནི་མི་བརྟན་ཞིང་། །བློ་ཡོ་བ་ལ་
ཆོས་མེད་དེ། །དེ་ལྟ་བས་ན་ཆང་སྤོངས་ཤིག །ཅེས་དང་། ཆང་གིས་སེམས་ཅན་དམྱལ་བར་འགྲོ། །དེ་བཞིན་ཡི་དྭགས་འཇིག་རྟེན་དང་། །ཆང་གི་སྐྱོན་གྱིས་བསླུས་པ་ཡི། །མི་དག་དུད་འགྲོ་རྣམས་སུ་འགྲོ། །དུག་གི་ནང་ན་དུག་ནི་ཆང། །དེ་བཞིན་དམྱལ་བའི་ནང་ན་དམྱལ། །ནད་ཀྱི་ནང་ན་ནད་མཆོག་ནི། །ཆང་ཞེས་མཁས་པ་རྣམས་ཀྱིས་བཤད། །བློ་དང་དབང་པོ་ཉམས་བྱེད་ཅིང། །རིན་ཆེན་ཆོས་ནི་ཟད་བྱེད་ལ། །ཚངས་པར་སྤྱོད་པ་འཇིག་པར་བྱེད། །ཅེས་དང་། ཆང་ལ་བརྟེན་པའི་མི་དག་ནི། །ཆོས་རྣམས་ཀུན་གྱི་སྟ་རེ་ཡིན། །ངོ་ཚ་མེད་པར་བྱེད་པའི་མཆོག །སྤང་བ་དག་ཏུ་ཉེ་བར་བརྟེན། །བློ་ནི་ཤིན་ཏུ་རྨོངས་བསྐྱེད་ཅིང་། །འཇིག་རྟེན་གཉིས་ནི་རྣམ་འཇིག་བྱེད། །ཐར་པའི་ཆོས་ལ་མེ་ལྟ་བུར། །སྲེག་བྱེད་ཉིད་ནི་ཆང་ཡིན་
ནོ། །ཞེས་དང་། མདོ་སྡེ་ལས་རྣམ་འབྱེད་ལས། ཆང་གི་ཉེས་དམིགས་སུམ་ཅུ་རྩ་དྲུག་གསུངས་པ་དང་། །དགའ་བ་ཅན་གྱིས ཞུས་པའི་མདོ་ལས་ཀྱང་། ཆང་བཏུང་བ་ལས་མངོན་པར་དགའ་བའི་མིས། །བདག་ལ་ཕན་དང་གཞན་ལ་བདེ་མི་ནུས། །རྨོངས་དང་མདོག་ངན་བྱེད་པ་ཆང་ཡིན་ཏེ། །ཇི་ལྟར་ཧ་ལའི་དུག་བཞིན་དེ་མི་བཏུང་། །ཞེས་དང་། དེ་ཉིད་ལས། དགའ་བ་ཅན། འབྲུའི་ཆང་དང་། བཅོས་པའི་ཆང་དང་། བག་མེད་པའི་གནས་ཀྱི་ཉེས་དམིགས་སུམ་ཅུ་རྩ་ལྔ་ནི་འདི་དག་ཡིན་པར་རིགས་པར་བྱ་སྟེ། སུམ་ཅུ་རྩ་ལྔ་པོ་གང་ཡིན་ཞེ་ན། ཚེ་འདི་ལ་ནོར་ཟད་པ་དང་། ནད་རྣམས་རྒྱས་པར་བྱེད་པ་དང་། འཐབ་པ་དང་། རྩོད་པ་འགྱེད་པ་དང་། དོན་མེད་པ་ལ་བལྟ་བ་དང་། གྲགས་པ་མ་ཡིན་པ་ཀུན་ཏུ་འབྱུང་བར་བྱེད་
པ་དང་། ཤེས་རབ་ཉམས་ཆུང་བར་བྱེད་པ་དང་། ལོངས་སྤྱོད་ཐོབ་པ་མི་ཐོབ་པར་འགྱུར་བ་དང་། ལོངས་སྤྱོད་ཐོབ་པ་ཡོངས་སུ་ཟད་ཅིང་ཡོངས་སུ་གཏུགས་པར་འགྱུར་བ་དང་། གསང་མི་ཐུབ་པར་འགྱུར་བ་དང་། དེའི་ལས་ཀྱི་མཐའ་ཡོངས་སུ་འགྲིབ་པ་དང་། མཐུ་སྟོབས་ཆུང་ངུར་བྱེད་པར་འགྱུར བ་དང་། མར་མི་འཛིན་པར་འགྱུར་བ་དང་། ཕར་མི་འཛིན་པར་འགྱུར་བ་དང་། དགེ་སྦྱོང་དུ་མི་འཛིན་པར་འགྱུར་བ་དང་། བྲམ་ཟེར་མི་འཛིན་པར་ ྨ འགྱུར་བ་དང་། རིགས་ཀྱི་གཙོ་བོ་ལ་བསྙེན་བཀུར་མི་བྱེད་པར་འགྱུར་བ་དང་་། སངས་རྒྱས་ལ་མ་གུས་པར་འགྱུར་བ་དང་། ཆོས་ལ་མ་གུས་པར་འགྱུར་བ་དང་། དགེ་འདུན་ལ་མ་གུས་པར་འགྱུར་བ་དང་། བསླབ་པ་ཡང་དག་པར་བླངས་པ་ལ་མ་གུས་པར་འགྱུར་བ་དང་། ཚུལ་ཁྲིམས་འཆལ་
བར་འགྱུར་བ་དང་། དབང་པོའི་སྒོ་མ་བསྡམས་པར་འགྱུར་བ་དང་། བག་མེད་པས་བུད་མེད་དོན་དུ་གཉེར་བར་འགྱུར་བ་དང་། ཉེ་དུ་དང་སྣག་གི་གཉེན་མཚམས་དང་མཛའ་བཤེས་དང་བློན་པོ་དག་གིས་སྤོང་བར་འགྱུར་བ་དང་། སྐྱེ་བོ་མང་པོ་དག་གི་ཡིད་དུ་མི་འོང་བར་འགྱུར་བ་དང་། སྐྱེ་བོ་མང་པོ་དག་དང་མི་མཐུན་པར་འགྱུར་བ་དང་། ཆོས་མ་ཡིན་པ་སྤྱོད་པར་འགྱུར་བ་དང་། ཆོས་མ་ཡིན་པ་ཡོངས་སུ་འཛིན་པར་འགྱུར་བ་དང་། དམ་པའི་ཆོས་ཡོངས་སུ་སྤོང་བར་འགྱུར་བ་དང་། ངོ་ཚ་ཤེས་པ་དང་ཁྲེལ་ཡོད་པ་སྤོང་བར་འགྱུར་བ་དང་། དེའི་མཛའ་བ་དག་དང་གནས་ཀྱང་མཁས་པ་རྣམས་ལ་ཡོངས་སུ་འདྲི་བར་མི་སེམས་པ་དང་། བདག་མེད་པ་རྣམས་བག་མེད་དུ་སྤྱོད་པར་འགྱུར་བ་དང་། དེ་བཞིན་གཤེགས་པའི་གསུང་རབ་ཀུན་ནས་
མི་གནས་པ་དང་། མྱ་ངན་ལས་འདས་ལ་ཐག་རིང་དུ་འགྱུར་བ་དང་། སྨྱོན་པར་འགྱུར་བའི་ལས་བྱས་ཤིང་བསགས་པས་ལུས་ཞིག་ནས། ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དག་ཏུ་སྐྱེ་ཞིང་གལ་ཏེ་དེ་ནས་ཤི་འཕོས་ཏེ། འདིར་མི་རྣམས་དང་སྐལ་པ་མཉམ་པར་སྐྱེ་ན་ཡང་། དེ་གང་དང་གང་དུ་སྐྱེས་པ་དེར་སྨྱོན་པར་འགྱུར་ཞིང་དྲན་པ་མི་གསལ་བར་འགྱུར་ཏེ། དགའ་བ་ཅན། འབྲུའི་ཆང་དང་། བཅོས་པའི་ཆང་། བག་མེད་པའི་གནས་ཀྱི་ཉེས་དམིགས་ནི་སུམ་ཅུ་རྩ་ལྔ་པོ་འདི་དག་ཡིན་པར་རིག་པར་བྱའོ། །ཞེས་དང་། དགེ་སྡིག་རྣམ་འབྱེད་ཀྱི་མདོ་ལས། ཚེ་འདིར་ཆང་འཐུང་ཞིང་མྱོས་པ་རྣམས་ནི་རབ་ཏུ་ཚ་བ་ཟངས་ཁུ་འཐུང་བའི་དམྱལ་བར་ལྟུང་ངོ་། །ཞེས་རྒྱས་པར་གསུངས་པ་སོགས་མདོའི་ལུང་མཐའ་ཡས་པ་ཡོད། སྔགས་
ནས་ཀྱང་བཀག་པའི་ཚུལ། ཇི་སྐད་དུ། ངན་སོང་སྦྱོང་རྒྱུད་ལས། ཆང་ནི་བཏུང་བར་མི་བྱ་ཞིང་། །ཤ་ལ་སོགས་པ་བཟའ་མི་བྱ། །ཞེས་དང་། རྡོ་རྗེ་རྩེ་མོ་ལས། ཕུང་ཁྲོལ་ཀུན་གྱི་རྩ་བ་ནི། །ཆང་ནི་ཡོངས་སུ་སྤང་བར་བྱ། །ཞེས་དང་། སྡོམ་འབྱུང་ལས། སྔགས་པ་ཆང་གིས་མྱོས་གྱུར་ཅིང་། །འདོད་པ་ལ་བརྐམ་འཁྲིག་པར་བྱེད། །གར་བྱེད་དེ་བཞིན་རྒོད་པ་དང་། །འཐབ་མོ་ལ་སྤྲོ་རྣམ་པར་འཁྲུལ། སྨོད་ཅིང་སེམས་པར་བྱེད་པས་ཀྱང་། །དམྱལ་བ་ངུ་འབོད་དུ་འཚེད་འགྱུར། །ཞེས་དང་། དགོངས་པ་ལུང་སྟོན་ལས། ཉ་དང་ཤ་དང་དེ་བཞིན་ཆང་། །གཤང་གཅི་ཁུ་བ་ཁྲག་རྣམས་ནི། །སྐྱེས་བུ་གླེན་པས་ཟ་བྱེད་ཅིང་། །མེད་པར་སྨྲ་བ་ཆོས་སུ་སྒྲོག །ཅེས་པ་ལ་སོགས་རྒྱུད་སྡེ་གོང་འོག་
གཉིས་ཀའི་ལུང་ཤིན་ཏུ་མང་། ཆོས་དང་འཇིག་རྟེན་གཉིས་ཀའི་བྱ་བ་ལ་ཕུང་ཁྲོལ་དང་བསྟན་པའི་ཞབས་འདྲེན་དང་འཇིག་པའི་རྒྱུ་རྐྱེན་མཁའ་འགྲོ་ཆོས་སྐྱོང་འཁྲུགས་ཤིང་། བླ་མ་དང་དགེ་འདུན་གྱི་སྐུ་ཚེ་མཛད་ཕྲིན་ལ་བར་ཆད་ཆེན་པོར་གྱུར་པའི་ལོ་རྒྱུས་མང་པོ་ཡོད་པ་དཔེར་ན། རྩེ་ལེ་སྣ་ཚོགས་རང་གྲོལ་རང་ཉིད་ཀྱི་དགོན་པ་གོང་འོག་གསུམ་གྱི་གྲྭ་ཚང་རྣམས་སུ་ཆང་ཁྲིམས་དམ་པོ་མཁའ་འགྲོ་ཆོས་སྐྱོང་དཔང་དུ་བཙུགས་ཏེ་མནའ་བསྒགས་ནས་བསྡམས་པ་ན། གྲྭ་པ་འགའ་ཡིས་ངོས་ལྐོག་བྱས་པའི་རྐྱེན་གྱིས་ལྷ་སྲུང་ལ་གྲིབ་ཕོག་ནས་རྩེ་ལེ་རང་ཉིད་སྐུ་ཚེ་ལོ་བཞི་ཙམ་བསྟུངས་པ་མནལ་ལམ་དུ་གཟིགས་ཚུལ་རྩེ་ལེ་རང་་གི་རྣམ་ཐར་ན་གསལ་བ་འདི་ལྟར། ཁྱད་པར་རབ་བྱུང་དགེ་འདུན་སྡེ་ཚོགས་ཀྱི། །བསྟན་པའི་ཞབས་འདྲེན་རྒྱུ་རྐྱེན་བག་མེད་པའི། །སྤྱོད་པ་མ་ལུས་
ཆང་གི་སྐྱོན་ལས་འབྱུང་། །སྔོན་ཚེ་བདུད་རྒྱལ་དགའ་རབ་དབང་ཕྱུག་གི། །བུ་མོ་བདུན་གྱིས་སངས་རྒྱས་བསྟན་པ་ལ། །གནོད་པ་སྣ་རེ་འཁྱོལ་བར་སྨོན་ལམ་བཏབ། །དེ་ལས་བུ་མོ་ཆེ་ཤོས་མྱོས་བྱེད་མས། །ཆང་ཞེས་བྱ་བའི་སྨྱོ་བྱེད་རྫས་གྱུར་ནས། །འཇིག་རྟེན་ཁམས་ཀྱི་སྐྱེ་འགྲོ་སེམས་འཁྲུལ་པས། །བྱ་དང་མི་བྱའི་སྤྱོད་པ་གོ་ལྡོག་ཅིང་། །དགེ་སྦྱོང་རྣམས་ཀྱི་ཚུལ་ཁྲིམས་རྨང་ཞིག་ནས། །བསྟན་པའི་གཞི་མ་འཇིག་པར་སྨོན་ལམ་བཏབ། །དེ་ཡི་མཐུ་ལས་ཆང་གིས་འཇིག་རྟེན་ཁྱབ། །ཆོས་དང་འཇིག་རྟེན་གཉིས་ཀྱི་ཕུང་འདྲེར་གྱུར། །བསྟན་པའི་བདག་པོ་ཐུབ་དབང་ཞལ་བཞུགས་ཚེ། །ཁྱིམ་བདག་རྟོག་ལྡན་ཞེས་བྱའི་བུ་རབ་བྱུང་། །ལེགས་འོངས་ཞེས་པ་སྡེ་སྣོད་གསུམ་ཤེས་ཤིང་། །དགྲ་བཅོམ་འབྲས་ཐོབ་མངོན་ཤེས་རྫུ་འཕྲུལ་
ལྡན། ཀླུ་རྒྱལ་སོག་མ་མེད་པ་འཁོར་དང་བཅས། །མེ་ཡི་ཁམས་ལ་སྙོམས་འཇུག་རྫུ་འཕྲུལ་གྱིས། །བཏུལ་བར་མཛད་པའི་འཕགས་པ་དེ་ལྟ་བུའང་། །ཆང་གིས་སྨྱོས་ཏེ་ལམ་པོ་ཆེར་ཉལ་བ། །སྟོན་པ་འཁོར་དང་བཅས་པས་གཟིགས་པའི་ཚེ། །ལྟོས་ཤིག་རྫུ་འཕྲུལ་ཐོབ་ཀྱང་འདི་འདྲ་བའི། གནས་སྐབས་ལ་ལྟོས་ཆང་གི་བཏུང་བ་ནི། །བག་མེད་སྤྱོད་དེ་ང་ཡི་ཉན་ཐོས་མིན། །ང་ཡང་དེ་ཡི་སྟོན་པ་མིན་ནོ་ཞེས། །ཐུགས་ཀྱི་གཏིང་ནས་ཁྲེལ་བའི་བཀས་བཅད་མཛད། །དེ་ཕྱིར་བསྟན་པ་འཇིག་པའི་རྒྱུ་རྐྱེན་ཆང་། །སྤང་པར་མི་ནུས་དགེ་སྦྱོང་མི་རུང་ཞེས། །རང་གི་དགོན་པ་གསུམ་ཀར་ཆང་ཁྲིམས་བསྡམས། །ཁྱད་པར་གྲྭ་ཚང་ཉིད་དུ་མང་ཇ་སོགས། །བཞེས་སྒོ་བབས་ཀྱིས་བཟང་ཕྱིར་ཆང་རག་གི། །དྲི་མ་གཏན་ནས་མེད་པར་གཞི་བྱེས་ལམ། །
ཀུན་ལ་ཁྱད་མེད་དགོས་ཞེས་ནན་གྱིས་སྨྲས། །རེ་ཞིག་ལོ་གསུམ་བར་དུ་ཚད་བཙུགས་ནས། །དཀོན་མཆོག་རྩ་གསུམ་མཁའ་འགྲོ ཆོས་སྐྱོང་ཀུན། །དཔང་དུ་བཞག་ནས་མནའ་ཡིས་བསྡམས་པ་ལ། །ལ་ལས་ཐུབ་ཀྱང་ལ་ལས་ངོས་ལྐོག་དང་། །མི་དྲན་དགུ་དྲན་ལོག་སྤྱོད་དུ་མས་།དེ་འདྲའི་མནའ་གྲིབ་མཁའ་འགྲོ་ཆོས་སྐྱོང་ཕོག །དེ་ཡི་ཉེས་པས་རང་གི་ཚེ་ཚད་ཀྱང་། །ལོ་བཞི་བསྟུངས་ཞེས་རྨི་ཉམས་གསལ་པོར་མ་མཐོང་། །ཞེས་གསུངས་པ་དང་། སྙིགས་དུས་ཀྱི་ཐམས་ཅད་མཁྱེན་པ་འཇིགས་མེད་གླིང་པས། བཟོད་པའི་དཀའ་ཐུབ་ལེགས་མོད་དེ། །དེ་བས་ཆང་མི་འཐུང་བ་དགའ། །དྲན་པ་ཉམས་དང་ཚུལ་ཁྲིམས་ཀྱི། །ཆོམ་པོར་ཤེས་པར་གྱིས་ཤིག་གུ། །ཞེས་དང་། འཁྲུལ་ཞིག་འཇའ་ལུས་པ་པདྨ་
བདུད་འདུལ་གྱིས། ཆང་ནི་ཉེས་ཚོགས་ཀུན་གྱི་གཞི། །རྩ་བ་ཡིན་པར་རྒྱལ་བས་གསུངས། །བག་མེད་སྤྱོད་པས་ཚེ་འདིར་གཡེང་། །གདམས་ངག ཟབ་མོ་རླུང་ལ་བསྐུར། །ཆང་གིས་རྙེད་དཀའི་དལ་འབྱོར་ཕུང། །ཉོན་མོངས་རྒྱས་ཤིང་མི་དགེ་སྤྱོད། །ཆང་གིས་དགེ་བའི་དཔུང་ཚོགས་འཇོམས། སྒོམ་སྒྲུབ་དགེ་སྦྱོར་གཡེང་ལ་ཤོར། །ཆང་གིས་མི་རྟག་དྲན་མི་བསྐུལ། །ཨ་འཐས་རྟག་འཛིན་བརྒྱ་ཕྲག་བྱེད། །ཆང་གིས་འཁོར་བའི་ཉེས་མི་ ོ རྟོགས། །ཞེན་ཆགས་སྐྱིད་འདོད་བདེ་སྣང་ཤར། །ཆང་གིས་ལས་འབྲས་ཁྱད་དུ་བསད། །བག་ཆགས་ཉེས་དམིགས་མང་པོ་བསགས། །ཆང་གིས་ཚེ་དང་བཀྲག་མདངས་འཕྲོག །སྐྲ་དཀར་གཉེར་མ་ལྷག་པར་མགྱོགས། །ཆང་གིས་བསོད་ནམས་ཉམས་པར་བྱེད། །གསེར་དངུལ་ལ་སོགས་ཆང་
རིན་སྟེར། །ཆང་གིས་ངག་འཆལ་འཁྲུལ་གཏམ་སྨྲ། །གསང་ཚིག་སྦ་བར་མི་ཐུབ་ཕུང་། །ཆང་གིས་བཟའ་བཏུང་མང་པོ་དྲན། མི་དགོས་དགུ་དགོས་སྣ་ཚོགས་དགོས། །ཆང་གིས་རྟོག་ཚོགས་དྲན་པ་མང་། །མི་དྲན་དགུ་དྲན་དུ་མ་དྲན། །ཆང་གིས་རྣམ་ཤེས་དབང་མེད་འཁྲུགས། །མངོན་ཤེས་མཁྱེན་པ་ཡོད་དོ་ཟེར། །ཆང་གིས་སྒྱ་ལུས་འབྱུང་བཞི་འཁྲུགས། །དབང་ལྔ་ཚོགས་བརྒྱད་གསལ་ལོ་ཟེར། །ཆང་གིས་ ི དགའ་བྱེད་བདུད་ཀྱིས་བསླུ། །རིག་པ་དགུ་འགྱུར་གསལ་སྣང་འོང་། །ཆང་གིས་མི་བསླུ་གང་ཡང་མེད། །མཐོང་ནས་དམའ་སར་མང་པོ་ཕབས། ཆང་གིས་ནད་ཀྱི་སྣ་འདྲེན་པས། །བཅོས་མེད་ནད་ཀྱིས་མང་པོ་འཆི། །ཆང་གིས་གདོན་གྱི་སྣ་འདྲེན་པས། །འཐབ་རྩོད་འཁྲུག་གཞི་མང་པོ་སློང་། །
ཆང་གིས་བརྒྱལ་ནད་སྙིང་རླུང་བསླང་། །སྨྱོན་པ་བཞིན་དུ་ཅི་ཟེར་མེད། །ཆང་གིས་སྙིང་གཟེར་སེམས་འཁྲུག་ཅིང་། །སྡང་སེམས་ཁོང་ཁྲོ་མེ་ལྟར ཆང་གིས་བདག་འཛིན་ང་རྒྱལ་ཆེ། །རྒྱལ་པོ་ལྟ་བུའི་འདུ་ཤེས་སྐྱེ། །ཆང་གིས་ཁྲེལ་དང་ངོ་ཚ་བོར། །སྡོམ་རལ་དམ་ཉམས་ལོག་གཡེམ་སྤྱོད། །ཆང་གིས་དོན་མེད་ཕྲག་དོག་བྱེད། །ཚིག་གི་བསྟོད་སྨད་ཙམ་ལ་བལྟ། །ཆང་གིས་མ་རིག་གཏི་མུག་འཕེལ། །བླུན་རྨོངས་དྲན་ཉམས་དབང་པོ་འཆོར། །ཆང་གིས་མ་ཤི་གསོན་རོ་བྱེད། །དགྲ་བོ་ཡིན་ཡང་དེའི་དྲུང་འགྱེལ། །ཆང་གིས་འཆི་བདག་གཤེད་མ་བྱེད། །ཕལ་ཆེར་སྲོག་གཅོད་མང་པོ་འོང་། །མདོ་སྡེ་དྲན་པ་ཉེར་བཞག་ལས། །ཆང་གིས་གཡེང་བའི་མི་དག་ནི། །གསོན་ཡང་ཤི་བ་དག་དང་མཚུངས། །ཞེས་སོགས་བསླུ་མེད་ལུང་
ལས་གསུངས། །སྲོག་རྩོལ་ནང་དུ་རླུང་ཞུགས་ནས། །རྣམ་ཤེས་ལས་རླུང་རྟ་ལ་ཞོན། །བག་ཆགས་ཉོན་མོངས་ཐང་ལ་རྒྱུག དགའ་འོ་བདེ་ཞིང་སྐྱིད་དོ་ཟེར། །ལས་རླུང་རྟ་རྒོདམྱོས་འགྱུར་བཏུང་། །སེམས་ཀྱི་བྱིས་པས་དེར་ཞོན་ནས། །ཐར་ལམ་གདམས་པ་ཕྱི་རུ་བཞག ངུ་འབོད་ལྕགས་མཁར་འབེན་གཏད་ཅིང། །ཐར་མེད་འཁོར་བའི་ཐང་ནས་རྒྱུག །ཉིན་རེ་བཞིན་དུ་ས་ཚུགས་རེ། །བསྒྲོད་ཅིང་འགྲོ་བའི་བརྩོན་འགྲུས་ཀྱིས། །ནམ་ཞིག་སླེབས་པར་ཐེ་ཚོམ་མེད། །རྒྱུད་ལས་གསུངས་པ་འགྱུར་མེད་ནི། །སུ་ཞིག་ཆང་གིས་མྱོས་གྱུར་པ། །དེ་ལ་གེགས་ནི་མང་པོ་འབྱུང་། །སྔགས་པ་ཆང་གིས་མྱོས་གྱུར་ན། །ངུ་འབོད་གནས་སུ་འཚེད་པར་འགྱུར། །གསུངས་བཞིན་ཆང་ནི་སྟོབས་ཆེ་བས། །བཙན་དུག་བཞིན་དུ་
སྤོང་བ་གཅེས། །ཞེས་གསུངས་པ་དང་། དཔལ་སྤྲུལ་འཇིགས་མེད་ཆོས་ཀྱི་དབང་པོས། ཁོང་པའི་ནང་དྲན་པ་ཡོད་པ་དག་གིས་གནས་སྐབས་དང མཐར་ཐུག་གི་ཉེས་པ་ཐམས་ཅད་ཀྱི་འབྱུང་གནས། ལྟུང་བའི་སྒོ་བཞི་གཅིག་ཆར་དུ་འབྱེད་པའི་ལྡེའུ་མིག །འདི་ཕྱིའི་དགེ་ལེགས་ཐམས་ཅད་འཇོམས་པར བྱེད་པའི་དགྲ་མ་རུངས་པ་ལྟ་བུ་མྱོས་བྱེད་ཆང་གི་བཏུང་བ་སྤངས་ནས་སྡིག་མེད་ཀྱི་ཁ་ཟས་བཟང་པོས་ལུས་འཚོ་བར་བྱའོ། །ཞེས་དང་། གྲུབ་དབང་དྷརྨ་ ི སེང་གེས། མདོར་ན་ཆང་ནི་ཅུང་ཟད་བཏུང་བ་ཙམ་གྱིས་དགེ་བའི་ལས་ཐམས་ཅད་སྒྲིབ། མི་དགེ་བ་རྒྱུད་ལ་མེད་པ་རྣམས་སྣ་འདྲེན། ཡ་རབས་ཀུན་གྱིས་སྨད། འདོད་སྲེད་ཆུ་ལྟར་འཁྲུགས། ཞེ་སྡང་མེ་ལྟར་འབར། གཏི་མུག་མུན་ལྟར་འཐིབས། ཕྲག་དོག་རླུང་ལྟར་འཚུབས། ང་རྒྱལ་ཁེངས་
པ་སྐྱེད་དེ། དགེ་བ་འཕེལ་བ་ལྟ་ཅི། སྔར་ཡོད་པའི་དགེ་བ་དང་དམ་སྡོམ་བསླབ་པ་ཐམས་ཅད་ཀྱང་ཤོར། ཕྱི་མ་ངན་སོང་དུ་མདའ འཕངས་པ་ལྟར་འགྲོ་བ་སོགས་ཉེས་པ་ཐམས་ཅད་རྩ་བ་འདི་ལས་བྱུང་བ་ཡིན་པས། སྔགས་པ་བློ་དང་ལྡན་པ་རྣམས་ཀྱིས་ཅི་ནས་སྤང་། ཁྱད་པར་དུ་རྒྱལ་འགོང་དམ་སྲི་སྙིང་ལ་ཞུགས་པའི་ཆོས་པས་ཆང་བཏུང་བ་ནི་སྨན་དུག་གི་ཕུང་པོར་སོང་བ་དང་ཁྱད་མེད་པ་ཡིན་པས་ཤིན་ཏུ་ནས་སྤང་དགོས། ཞེས་གསུངས་སོ། །ཆང་འཐུང་བ་སྤངས་པའི་ཕན་ཡོན་ནི། གོང་དུ་བཤད་པའི་ཉེས་པ་རྣམས་ལས་ལྡོག་པའི་ཡོན་ཏན་མཐའ་དག་དང་ལྡན་པ་ཡིན་ལ། ཚུལ་ཁྲིམས་ལྔའི་ཕན་ཡོན་བསྟན་པའི་མདོ་ལས། ཆང་འཐུང་བ་ནི་སྤངས་པ་ཡིས། །སྐྱེས་པ་འམ་ནི་བུད་མེད་ནི། །ཐོབ་སྟེ་དེ་ཡི་ཕན་ཡོན་ནི། །སུམ་ཅུ་རྩ་དྲུག་མི་
དམན་པར། །འདས་དང་མ་འོངས་པ་ཡི་དུས། །ད་ལྟར་བྱུང་བ་ཅུང་ཟད་དུ། །མྱུར་དུ་ཤེས་པར་འགྱུར་བ་དང་། །རྟག་ཏུ་དྲན་པ་གནས་པ་དང་དེ་ནི་སྨྱོ་བར་མི་འགྱུར་ཞིང་། །ཁྱད་པར་འཕགས་པའི་ཤེས་རབ་དང་། །མི་རྨོངས་པ་དང་བག་ཡོད་དང་། །ཚིག་ནི་ཤིན་ཏུ་གསལ་བ་དང་། །ངོ་ཚ་ཤེས་ཤིང་ཚིག་ནི་གསལ། །དེ་ནི་ལོག་པར་སྨྲ་མི་འགྱུར། །ཕྲ་མ་དང་ནི་ཚིག་རྩུབ་མེད། །དོན་མེད་པ་ལ་མི་སྨོད་ཅིང། །ཉིན་དང་མཚན་དུ་དེ་བཞིན་ང་དུ། །བྱས་པ་ཤེས་ཤིང་བྱས་པ་ཚོར། །འདོད་མེད་གཏོང་དང་ཚུལ་ཁྲིམས་ལྡན། །ཁྲོ་བ་མེད་ཅིང་ཚིག་ནི་དྲང་། །འཇིགས་པ་མེད་ཅིང་རྣམ་པར་མཁས། །ངོ་ཚ་ཁྲེལ་ཡོད་ཕུན་སུམ་ཚོགས། །འཇིགས་པ་དང་ནི་དོགས་པ་མེད། །ཡིད་གཞུངས་ཐོས་པ་འཛིན་པ་དང་། །དོན་ཡོད་སྐྱེ་བོ་མང་ནང་
མཁས། །ཆང་གི་བཏུང་བ་སྤངས་པ་ཡི། །སྐྱེས་པ་འམ་ནི་བུད་མེད་ཀྱིས། །ཕན་ཡོན་འདི་རྣམས་མྱོང་བར་འགྱུར། །ཞེས་སྤྱིར་བཤད་ལ། བྱེ་བྲག་སྡོམ་པ་གསུམ་པོའི་བཅས་པ་ལས་མ་འདས་པས་སྡོམ་ལྡན་དང་དམ་ཚིག་ཅན་ཞེས་བྱ་བའི་གྲངས་སུ་འགྲོ་འོ། །ཡང་སྡིག་ཟས་ཤ་ནི་སོ་བྱང་སྔགས་གསུམ་ནས་གནང་བ་མེད་དེ། སྟོན་པ་སངས་རྒྱས་ཀྱི་བཀའ་ལས། ངས་ཤའི་ཟས་ནི་སུ་ལའང་མ་གནང་མི་གནང་གནང་བར་མི་འགྱུར་།དེང་ཕྱིན་ཆད་ངའི་ཉན་ཐོས་རྣམས་ཤ་བཟའ་བར་མི་རུང་ངོ་ཞེས་ཁྲིམས་བསྒྲགས་པ་ཡིན། ལར་དམར་ཁེ་བྱེད་ཕྱིར་སེམས་ཅན་གསོད་མཁན་དང་། བཟའ་བའི་དོན་དུ་ཤ་ཉོ་བ་པོ་གཉིས་ཀ་དམྱལ་བ་བཙོ་བསྲེག་ལ་སོགས་པའི་སྡུག་བསྔལ་མྱོང་དགོས་ཏེ། ཇི་སྐད་དུ། ཁེ་ཡི་ཕྱིར་ནི་སེམས་ཅན་
གསོད། །ཤ་ཡི་ཕྱིར་ནི་ནོར་སྦྱིན་བྱེད། །དེ་དག་གཉིས་ཀ་སྡུག་ལས་ཅན། །ངུ་འབོད་བྱེད་ལ་སོགས་པར་བཙོ། །བསམ་པ་ངན་པས་ཤ་ཟ་ན། འཇིག་རྟེན་གཉིས་ནི་བཤིག་པའི་ཕྱིར། །ཤཱཀྱའི་བསྟན་ལ་བརྟུལ་ཞུགས་ཉམས། །ཤིན་ཏུ་མི་བཟད་དམྱལ་བར་ཡང་། །སྡིག་པའི་ལས་ཅན་དེ་དག་འདོང་། །མ་རུངས་ངུ་འབོད་ལ་སོགས་སུ། །ཤ་ཟ་དེ་དག་བཙོ་བར་འགྱུར། །རྣམ་གསུམ་དག་པའི་ཤ་རྣམས་ནི། །མ་བརྟགས་པ་དང་མ་བསླང་དང་། །མ་བསྐུལ་པ་ཡང་ཡོང་མེད་པས། །དེ་བས་ཤ་ནི་མི་ཟ་འོ། །ཞེས་དང་། རྣལ་འབྱོར་ཅན་གྱིས་ཤ་མི་བཟའ། །ང་དང་སངས་རྒྱས་དག་གིས་བཤད། །སེམས་ཅན་གཅིག་ལ་གཅིག་ཟ་བ། །ཤ་ཟན་དག་གི་རིགས་སུ་སྐྱེ། །དྲི་མི་ཞིམ་ཞིང་སྨད་པ་དང་། །སྨྱོན་པ་རྣམས་སུ་སྐྱེ་བར་འགྱུར།
གདོལ་པ་སྨེ་ཤ་ཅན་རིགས་དང་། །བཙོ་བླག་མཁན་དུ་ཡང་ཡང་སྐྱེ། །མཁའ་འགྲོ་རིགས་ཀྱི་སྐྱེ་གནས་དང་། །ཤ་ཟའི་རིགས་སུ་སྐྱེ་བར་འགྱུར། །མི་ཡི་ཐ་མ་དེ་དག་ནི། །སྲིན་དང་བྱི་ལའི་རིགས་སུ་སྐྱེ། །ཞེས་དང་། ངས་ནི་ཤ་ཡང་རྣམ་པར་སྤངས། །སངས་རྒྱས་བྱང་ཆུབ་སེམས་དཔའ་དང་། །ཉན་ཐོས་རྣམས་ཀྱིས་སྨད་པ་ལ། །ངོ་མི་ཚ་བར་ཟ་བ་ནི། །རྟག་ཏུ་སྨྱོན་པར་སྐྱེ་བར་འགྱུར། །ཤ་ལ་སོགས་པ་སྤང་བའི་ཕྱིར། །བྲམ་ཟེའི་རིགས་དང་རྣལ་འབྱོར་ཅན། །ཤེས་རབ་ཅན་དང་ནོར་ལྡན་པ། །དེ་དག་རྣམས་སུ་སྐྱེ་བར་འགྱུར། །མཐོང་དང་ཐོས་དང་དོགས་པ་།ཤ་རྣམས་ཐམས་ཅད་རྣམ་པར་སྨད། །ཤ་ཟའི་རིགས་སུ་སྐྱེ་བ་ཡི། །རྟོག་གེ་བ་རྣམས་མི་ཤེས་སོ། །ཞེས་དང་། མ་འོངས་པ་ཡི་དུས་ན་
ནི། །ཤ་ཟ་གཏི་མུག་སྨྲ་བ་དག །ཤ་ནི་སྡིག་མེད་རུང་བ་འོ། །སངས་རྒྱས་ཀྱིས་ནི་བཤད་ཅེས་ཟེར། །ཟས་ལ་སྨན་དག་འདྲ་བ་དང་། །བུ་ཡི་ཤ་དང་མཚུངས་པར་ཡང་། །ངན་པ་དང་ནི་མི་འཕྲོད་པར། །རྣལ་འབྱོར་ཅན་གྱིས་ཟས་ལ་སྤྱོད། །སེང་གེ་དག་དང་སྟག་རྣམས་དང་། །ཝ་ལ་སོགས་དང་འགྲོགས་འགྱུར་བས། །ངས་ནི་བྱིས་པས་གནས་པ་ལ། །རྟག་ཏུ་རྣམ་པ་ཀུན་ཏུ་སྨད། །ཐར་པའི་ཆོས་དང་འགལ་བའི་ཕྱིར། །མི་རྣམས་སྔངས་པར་འགྱུར་བའི་ཤ། །དེ་ཕྱིར་བཟའ་བར་མི་བྱ་སྟེ། །འདི་ནི་འཕགས་པའི་རྒྱལ་མཚན་ནོ། །ཞེས་ལང་ཀར་གཤེགས་པའི་མདོ་ལས་གསུངས་ཤིང་། མྱང་འདས་ཀྱི་མདོ་ལས། བཅོམ་ལྡན་འདས་ཀྱིས་འོད་སྲུངས་ལ་བཀའ་སྩལ་པ། རིགས་ཀྱི་བུ་དེང་ཕན་ཆད་ཉན་ཐོས་ཀྱི་ཉེ་གནས་དག་ཤ་ཟ་བར་མི་གནང་
ངོ་། །གལ་ཏེ་ཡོན་བདག་དད་པས་བྱིན་ནའང་། དེས་བུའི་ཤ་ལྟ་བུར་འདུ་ཤེས་བསྐྱེད་དོ། །བྱང་ཆུབ་སེམས་དཔའ་འོད་སྲུངས་ཀྱིས་གསོལ་པ། བཅོམ་ལྡན་འདས་ཅིའི་སླད་དུ། དེ་བཞིན་གཤེགས་པས་ཤ་འཚལ་དུ་མ་གནང་། བཀའ་སྩལ་པ། རིགས་ཀྱི་བུ། ཤ་ཟ་བ་ནི་སྙིང་རྗེ་ཆེན་པོའི་རིགས་གཅོད་པ་ཡིན་ནོ། །དེང་ཕན་ཆད་ཉེ་གནས་སུ་གྱུར་པ་རྣམས་ཀྱིས། ཤ་ཐམས་ཅད་ཟར་མི་རུང་ངོ་། །ཞེས་དང་། འོད་སྲུངས་ཤ་ཟ་བ་དག་ནི་འགྲོ་འམ། སྡོད་དམ། འདུག་གམ། ཉལ་ཡང་སེམས་ཅན་གང་ལ་དྲིས་ཕོག་པ་ཐམས་ཅད་འཇིགས་སྐྲག་གོ། །རིགས་ཀྱི་བུ་དཔེར་ན། མི་ཞིག་སྒོག་པ་ཟོས་ན་མནམ་པས། །ཐམས་ཅད་ཀྱིས་མི་འདོད་དེ་འབྱོལ་ན། དེ་ལ་ཉེ་བར་བསྙེན་པ་ལྟ་ཅི་སྨོས། ཤ་ཟ་བ་རྣམས་ཀྱང་དེ་དང་འདྲ་སྟེ།
སེམས་ཅན་རྣམས་ལ་ཤ་ཡི་དྲིས་ཕོག་ན་སྐྲག་སྟེ། ཤི་བས་འཇིགས་པའི་འདུ་ཤེས་འབྱུང་ངོ་། །ཆུ་ལ་གནས་པ་དང་། ཐང་ལ་གནས་པ་དང་། མཁའ་ལ་འགྲོ་བའི་སྲོག་ཆགས་ཐམས་ཅད་འབྱོལ་ཞིང་བྲོས་ཏེ། འདི་ནི་བདག་ཅག་གི་དགྲ་ཡིན་ནོ་ཞེས་ཟེར་རོ། །དེ་བས་ན་བྱང་ཆུབ་སེམས་དཔའ་ཤ་ཟ་བར་མི་སྩོལ་ལོ། །རིགས་ཀྱི་བུ་འདི་ལྟར་བྱང་ཆུབ་སེམས་དཔའ་ནི་ཡོངས་སུ་དག་པའི་ཟས་ཀྱང་མི་ཟ་བ་ཤ་ཟ་བ་ལྟ་སྨོས་ཀྱང་ཅི་དགོས། ཞེས་དང་། འོད་སྲུངས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ཡོན་བདག་ལ་ལྟོས་ཏེ་འཚོ་བ་དག་བསོད་སྙོམས་བྱེད་པའི་ཚེ། ཤ་དང་འདྲེས་པའི་ཟས་ཤིག་བསྩལ་ན། ཇི་ལྟར་འཚལ་བར་བགྱི། ཅིས་
བརྟག་པར་འགྱུར། བཅོམ་ལྡན་འདས་ཀྱིས་འོད་སྲུངས་ལ་བཀའ་སྩལ་པ། ཤ་དང་ཟས་སོ་སོར་ཕྱེས་ལ། ཆུར་བཀྲུས་ཏེ་བཟའ་་བྱའོ། །གལ་ཏེ་ལྷུང་བཟེད་ཤ་དང་འབགས་ཀྱང་བྲོ་བའི་རོ་མེད་ན། སྤྱོད་ཀྱང་ཉེས་པ་མེད་དོ། །གལ་ཏེ་བསོད་སྙོམས་ཀྱི་ནང་དུ་ཤ་མང་དུ་འོངས་ནའང་། བླང་བར་མི་བྱའོ། །གལ་ཏེ་ཟས་ཀྱི་ནང་དུ་ཤ་སྣང་ན་མ་ཟ་ཞིག །ཟོས་ན་ཉེས་པ་དང་བཅས་པ་སྟེ། ངས་ཤ་ཟར་མི་གནང་བ་དང་བཅས་པ་ནི་རྒྱས་པར་བསྟན་ན་ཟད་པའི་མཐའ་མེད་དེ། མྱ་ངན་ལས་འདའ་བའི་དུས་ལ་བབ་པས་ཕྱོགས་ཙམ་ཞིག་བཤད་དོ། །འདི་དག་ནི་དྲིས་པའི་ལན་བཏབ་པ་ཞེས་བྱའོ། །ཞེས་གསུངས་པ་དང་། གཞན་ཡང་སོར་ཕྲེང་ཅན་དང་། བསླབ་བཏུས་སོགས་ནས་ཤའི་ཉེས་དམིགས་ཤིན་ཏུ་མང་པོ་གསུངས་པར་མ་ཟད།
ཨོ་རྒྱན་པདྨའི་གཏེར་ཆོསཁུངས་དག་བྱང་གཏེར་ དགོངས་པ་ཟང་ཐལ 
་སྙན་རྒྱུད་སྡེ་གསུམ་གྱི་རྩ་བ་རྩ་གསུམ་རིན་ཆེན་སྒྲོན་མ་ལས། ཤ་ནི་འདི་ལྟར་སྤང་བྱ་རིམ་པར་ཡོད་དེ༔ དགེ་བསྙེན་ལ་མི་དང་མི་མ་ཡིན་པས་བསད་པ་ཟ་མི་རུང་ངོ་༔ ཚེ་ཟད་དེ་ཤི་བའི་ཤ་ནི་རུང་ངོ་༔ དགེ་ཚུལ་དང་དགེ་སློང་གིས་ཟ་མི་རུང་བའི་ཤ་ནི༔ བསད་པ་དང་༔ སྦྲུམ་མའི་ཤ་དང་༔ ཕྲུག་གུ་མ་སྨིན་པའི་ཤ་དང་༔ མེས་ཚིག་སྟེ་ཤི་བའི་ཤ་དང་༔ ཆུ་ལས་ཤི་བའི་ཤ་དང་༔ ྴ རྦབ་ཏུ་ལྷུང་སྟེ་ཤི་བའི་ཤ་དང་༔ འགགས་ཏེ་ཤི་བའི་ཤ་དང་༔ མཛོའི་ཤ་དང་༔ རྨིག་ཟླུམ་གྱི་ཤ་མི་རུང་ངོ་༔ ཁྲག་ནི་དེ་ལྟར་གོ་སླའོ༔ རྒྱས་པར་སྡེ་སྣོད་གསུམ་དུ་ལྟོས་ཤིག༔ ཅེས་དང་། གོ་མིའི་དགེ་བསྙེན་བྱ་བ་རྩ་བཞི་ཆང་དང་ཕྱི་དྲོའི་ཁ་ཟས་ཤ་དང་བདུན་སྡོམ་པ་དང་༔ ཞེས་སྟོན་པའི་
རྗེས་འཇུག་ཁྱིམ་པ་ཡན་ཆད་ལ་དངོས་སུ་བཀག་པར་མཛད། དེ་ལ་ཁ་ཅིག །དེ་ནི་སོ་ཐར་རིགས་བདུན་གྱི་དབང་དུ་བྱས་པ་སྟེ། ཐེག་ཆེན་ཕ་རོལ་ཏུ་ཕྱིན་པ་དང་། གསང་སྔགས་ལས་དེ་ཙམ་དགག་བྱ་མི་ཆེ་ཞེ་ན། དེ་ནི་ཐོས་པའི་ཤེས་རབ་ཀྱི་མིག་དང་བྲལ་བའི་སྐྱོན་དུ་ངེས་ཏེ། འདི་ལྟར་ལུང་ལས། གང་ཞིག་ཤ་ཁྲག་ལོངས་སྤྱོད་ནི། །ཁམས་གསུམ་ཕུང་བར་བྱེད་པའི་ཟས། །ཐར་པའི་སྲོག་རྩ་གཅོད་པའི་མཚོན། །བྱང་ཆུབ་ས་བོན་བསྲེག་པའི་མེ། །དལ་འབྱོར་མཐོ་རིས་འཇོམས་པའི་ཐོག །སུས་ཀྱང་ཟ་བར་མི་རུང་ན། །རྒྱལ་བའི་བསྟན་ལ་རབ་ཞུགས་པའི། །སྐྱབས་གསུམ་འཛིན་པའི་དགེ་བསྙེན་ནས། །དགེ་ཚུལ་དགེ་སློང་ཁྲིམས་ལྡན་པས། །བཟའ་བར་ནམ་ཡང་མ་གནང་ངོ་། །བྱང་ཆུབ་སེམས་དཔའི་ལམ་ཞུགས་
པས། །ཕ་མར་གྱུར་པའི་སེམས་ཅན་ཤ། །ཟོས་པའི་ཉེས་དམིགས་རྒྱ་ཆེར་འགྱུར། །གསང་བ་སྔགས་ཀྱི་ལམ་དུ་ཡང་། །ལྟ་དང་ཡེ་ཤེས་མི་ལྡན པར། །ཤ་ལ་བཟའ་བར་མི་རུང་ངོ་། །ཞེས་པ་འདི་ཙམ་ཡང་མིག་ལམ་དུ་མ་གྱུར་པ་མ་ཡིན་ནམ། དེས་ན་སྔོན་བྱོན་དམ་པའི་སྐྱེས་ཆེན་ཚད་མར་གྱུར་པ་མང་པོས་ཀྱང་ཤ་ཁྲག་དུག་ཟས་བཞིན་སྤངས་པར་མཛད་པའི་རྣམ་ཐར་གཙང་མ་ལྷུར་བཞེས་པ་ཡིན་ཏེ། མ་ཅིག་ལབ་སྒྲོན་གྱིས། ངས་ནི་ཤ་བཟའ་བ་ལྟ་ཞོག །སེམས་ཅན་མིག་སྔོ་རིག་གི་བ་དེ་མཐོང་བ་ཙམ་གྱིས་སྙིང་རྗེ་ཚད་མེད་པ་སྐྱེ་བ་འདུག་ཅེས་གསུངས། དེ་བཞིན་དུ་རིག་འཛིན་འཇིགས་མེད་གླིང་པས། ཤ་འདིའི་བདག་པོ་སྲོག་ཆགས་དེ་འཕགས་པ་ཀཱ་ཏྱ་ནས་བསོད་སྙོམས་ལ་གཤེགས་པའི་ལོ་རྒྱུས་ལྟར་སྐྱེ་བ་སྔ་མའི་ཕ་མ་ནི་ཡིན་ངེས། དེ་ཡིན་ན་ད་
ལྟའི་ཕ་མ་ལ་ཤན་པས་སྲོག་ལས་བྱས་པའི་ཤ་བྱིན་ན་བཟའ་བར་འདོད་དམ། སྙིང་རེ་རྗེ་སྙམ་དུ་བསམ་མནོ་ཞིག་བཏང་ན། བློ་གཟུར གནས་ཤིག་ཡིན་ཕྱིན་ཆད་སྙིང་རྩི་ཤུམ་ཤུམ་པ་དང་། སེམས་ཅན་དེ་ལ་སྙིང་རྗེ་དབང་མེད་དུ་མི་སྐྱེ་བའི་ཐབས་མེད་ཅེས་དང་། སྔགས་པར་ཁས་བླངས ནས་ཤ་ཆང་བག་མེད་དུ་ཟ་བ་དག །ཁྲ་སྤྱང་ལས་ཁྱད་པར་ག་ལ་ཡོད། ཅེས་གསུངས། དེ་བཞིན་དུ་སྙིང་ཐིག་གི་བརྒྱུད་པ་གོང་མ་རིག་འཛིན་འཇིགས་མེད་གླིང་པའི་དངོས་སློབ་འཇིགས་མེད་རྒྱལ་བའིམྱུ་གུ་དང་། དེའི་སློབ་མ་སེམས་དཔའ་ཆེན་པོ་འཇིགས་མེད་ཆོས་ཀྱི་དབང་པོ། འཇིགས་གླིང་སྐུ་ཕྲེང་གཉིས་པ་མཁྱེན་བརྩེ་ཡེ་ཤེས་རྡོ་རྗེའི་དངོས་སློབ་འོད་ལུས་གྲུབ་པ་པདྨ་བདུད་འདུལ། དེའི་ཡང་སློབ་བྱ་བཏང་ཚོགས་དྲུག་རང་གྲོལ་སོགས་དམ་པའི་སྐྱེས་
ཆེན་དེ་རྣམས་ཀྱིས་ཤ་ཆང་དྲི་ཙམ་ཡང་མི་བརྟེན་པའི་དམ་བཅའ་བརྟན་པོ་དང་ནམ་ཡང་མི་འགལ་བར་མཛད་དེ་མདོ་སྔགས་ཀྱི་བསྟན་པ་འཛིན་སྐྱོང་སྤེལ་ཏེ་དོན་གཉིས་ལྷུན་གྱིས་གྲུབ་པ་ཤ་སྟག་བྱུང་བ་ཡིན། དེ་ལྟ་བུའི་དགག་བྱ་དང་དགོས་པ་ཤིན་ཏུ་ཆེན་པོ་མཐོང་ནས་བདག་གིས་ཀྱང་སྔོན་གྱི་ཚེ་འཕགས་ཡུལ་དབུས་འགྱུར་མ་ག་ངྷ་རྡོ་རྗེའི་གདན་བྱང་ཆུབ་ཤིང་དབང་གི་དྲུང་དུ་ཕྱོགས་བཅུའི་རྒྱལ་བ་སྲས་དང་བཅས་པ་དཔང་དུ་གསོལ་ནས་ཤ་ཆང་སྤངས་པའི་དམ་བཅའ་ལྷུར བླངས་ཤིང་རང་གི་དགོན་ཁག་རྣམས་སུའང་ཤ་ཆང་སྤོང་དགོས་པའི་ཁྲིམས་བཅས་པ་ཡིན་པས་སླད་ནས་བདག་གི་ངག་ལ་བརྩི་མཁན་བྱུང་ན་ཀུན་གྱིས་ཆོས་་་ཀྱི་ཁྲིམས་འདི་ལས་ནམ་ཡང་མ་འདའ་ཞིག་ཅེས་སྙིང་ནས་གསོལ་བ་ལགས། གཞན་ཡང་སྔོན་གྱི་མཁས་གྲུབ་ཆེན་པོ་རྒོད་ཚང་སྣ་ཚོགས་རང་གྲོལ་གྱིས་ཤ་
ཡི་ཉེས་དམིགས་མནལ་ལམ་དུ་གསལ་བར་གཟིགས་ནས་འདི་སྐད་ཅེས་གསུངས་ཏེ། གཉིད་དུ་ཉལ་བའི་རྨི་ལམ་ཉིང་འཁྲུལ་ལ། སྔར་ནས་ཤི་བའི་རང་གི་གྲྭ་རྒན་རིགས། །གྲོང་ཆོག་མང་དུ་འགྲོ་མཁན་འགའ་རེ་དང་། །གཉེར་བྱེད་ལས་འཛིན་ཤི་བ་འགའ་དང་བཅས། །ལྷན་ཅིག མི་དགའ་བཞིན་དུ་དབང་མེད་ཕྱིན། །ཤ་ཟན་རོང་ཡིན་ཟེར་བའི་ལུང་པ་ནི། །རི་རོང་དོག་ཅིང་མུན་ནག་འཐིབས་པ་ན། །རབ་བྱུང་ཆ་བྱད་མདོག་ནག་བཞིན་མི་སྡུག །གོས་ཆེན་ལྗང་ནག་ལས་གྲུབ་སྣམ་སྦྱར་གྱོན། །བོང་ཚང་ཁང་པ་ཉིས་ཐོག་ཙམ་ཡོད་པ། །འཇིགས་སུ་རུང་བ་ཞིག་གི་འཁོར་ཡང་། །བན་རྒན་ཧམ་ཁྲོག་མི་ཚད་སུམ་འགྱུར་ཙམ། །ཆོས་གོས་གྱོན་ཅིང་ཡིད་དུ་མི་འོང་བའི། །རྣམ་འགྱུར་ཅན་དང་གཞན་ཡང་མི་ནག་ནི།
པགས་གོས་གྱོན་ཅིང་འབྲོག་པའི་རིགས་འདྲ་བ། །ལག་ཏུ་ཞགས་པ་ནག་པོ་འབའ་ཞིག་ཐོགས། །དེ་འདྲའི་དཔོན་གཡོག་མང་པོས་བདག་ལ་བསྐོར། གཙོ་བོ་དེ་ཡིས་འདི་སྐད་ཟེར་བ་ཐོས། །ཁྱོད་འདིར་དལ་བར་འདུག་པ་རྫོབ་རེ་ཆེ། །བནྡེའི་གཤེད་མར་བནྡེ་སླེབས་ཡོད་དོ། །ལེགས་ཉེས་འབྱེད་པའི་ཁྲིམས་བདག་ང་ཡིན་ནོ། །དེང་སང་ཁྱེད་ཅག་བླ་མ་མཁན་སློབ་དང་། །དགེ་འདུན་མིང་བཏགས་ཆོས་པའི་གཟུགས་བཟུང་ནས། །ཤི་གསོན་ཀུན་གྱི་སྐྱབས་ཡུལ་བྱེད་མཁན་ཚོ། །ཕ་མར་གྱུར་པའི་སེམས་ཅན་སྲོག་བཅད་པའི། །ཤ་ལ་ལྟོ་ཡི་དྭངས་མ་བྱེད་ནུས་པ། །སྙིང་སྟོབས་འདི་འདྲའི་ཆེ་ལུགས་ཨ་ལ་ལ། །གློ་བ་ཁྲག་གིས་བརྒྱངས་པའི་ཞིམ་ཟས་དང་། མཆིན་པ་འཁྱགས་སུ་བོར་བའི་མཚར་ཟས་དང་། །གསོན་ཁྲག་ཚོད་མར་བྱས་པའི་བཞེས་
སྤྲོ་སོགས། །ཁྱེད་ཅག་བཙུན་པ་རྣམས་ཀྱི་ཟ་ལུགས་ལ། །ཤ་ཁྲག་ཟས་ལ་གཅན་གཟན་བས་ཀྱང་ཧམ། །ཆང་རག་འཐུང་ལ་སྦུར་གོག་ལས་ཀྱང་སྲེད། །དཀོར་ཟས་འཚོལ་ལ་ཡི་དྭགས་ལས་ཀྱང་མུག །ད་དུང་དགེ་སློང་ཡིན་པར་ཁས་ལེན་ནམ། །ལྷུང་བཟེད་ཐོགས་ཤིང་ཤ་ཁྲག་ཟ་ལུགས་དང་། །ཆོས་གོས་ཤམ་ཐབས་ཆང་གིས་སྦང་ལུགས་དང་། །ཚོང་ཁེ་ནོར་རྫས་བུད་མེད་འཚོལ་ལུགས་རྣམས། །དཀོན་མཆོག་གསུམ་ལ་ངོ་ ྴ ཡང་མི་ཚ་འམ། །སྦྱིན་བདག་རྣམས་ཀྱི་དཀོར་ལ་ཟ་དུས་སུ། །ཤ་ཟ་ཆང་འཐུང་བྱེད་པའི་སྐྱིད་པོ་དེ། །ལས་ཀྱི་ཁྲིམས་ར་འདི་ལ་སླེབས་དུས་སུ། སྐྱིད་སྡུག་ཅི་འདུག་ལྟོས་དང་དཀོར་ཟན་ཚོ། །མ་ཀི་ཤ་ཟན་ནག་པོའི་བཙོན་ཁང་ན། །ཁྱེད་རང་རྣམས་ཀྱི་ཤ་ཡི་ཟ་ཚུལ་དང་། །བྱེད་ལུགས་མཐུན་པའི་
བཀོད་པ་ཐ་དད་དུ། །ཁྱེད་རང་བཙུན་པ་ཚོ་ལ་བྱེད་ཅིང་ཡོད། །ལ་ལ་གཙབ་ཡོད་ལ་ལ་བརྡུང་ཞིང་ཡོད། །ལ་ལ་བཙོ་ཞིང་ལ་ལ་འཁྱགས་ལ་བོར། ལ་ལ་ཁྲམ་ཉག་ཚྭ་བླུགས་བསྲེག་ཡོད་དོ། །ཁྱོད་ཀྱང་འགྲོ་རན་ད་ལྟ་དོངས་ཤིག་ཟེར། །བདག་ནི་རྨི་ལམ་ཡིན་པ་དྲན་མ་ཐུབ། །འཇིགས་ཀྱང་འཇིགས་ལ་སྐྱོ་ཡང་རབ་ཏུ་སྐྱོ། །ཞེས་གདམས་ངག་རྣམ་ཐར་གྱི་སྒོ་ནས་སྟོན་པ་དང་། འཁྲུལ་ཞིག་འོད་ལུས་པ་ཆེན་པོ་པདྨ་བདུད་འདུལ་གྱི་གསུང་མགུར་ལས། རང་རིག་འོད་གསལ་ངང་ནས་བལྟས་ཙ་ན། །ངན་སོང་སྡུག་བསྔལ་བསམ་གྱིས་མི་ཁྱབ་མཐོང་། །ཁྱད་པར་ཡང་སོས་སྡུག་བསྔལ་གླིང་བཞི་ཙམ། ། མཐོང་བ་དེ་ཡི་བཞི་ཆ་ཙམ་ཞིག་ཏུ། །བར་མཚམས་མེད་པར་ཕོ་མོ་གཅེར་བུ་ཡིས། །བཀང་ནས་མི་རྣམས་རེ་རེའི་རྩ་བ་རུ། །ལས་མཁན་ཤིན་ཏུ་མ་
རུངས་རབ་ཁྲོས་པ། །བྱ་རིགས་རི་དྭགས་གཡུང་དྭགས་གཅན་གཟན་རིགས། །མགོ་བརྙན་མི་འདྲ་ཅན་ནི་མང་པོ་ཡིས། །ལག་ན་མཚོན་ཆ་རྣོན་པོ་རེ་ཐོགས་ནས། །རྒྱུན་དུ་མི་ཤ་དུམ་བུར་བཅད་ཅིང་ཟ། །ཡང་ཡང་བཅད་ནས་ཡང་ཡང་ཤ་རྒྱས་ཤིང་། །ཇི་སྲིད་ལས་མ་ཟད་པར་མི་འཆི་བའི། །བག་ཆགས་འཛད་མེད་དེ་ཡི་རང་བཞིན་འཕེལ། །ཁྱད་པར་དམར་ཆོག་དེད་པའི་ཉེས་པ་འཕགས། །ཀུན་གྱིས་སྐད་ངན་འདོན་པ་འུ་རུ་རུ། །རང་སྣང་འཁྲུལ་པས་གཞན་འཁྲུལ་དེ་མཐོང་ནས། །སྡུག་བསྔལ་འདི་ལ་ཕན་ཐབས་ཅི་ཡོད་དམ། །བསམ་ཚེ་སྐད་ཅིག་མདུན་གྱི་ནམ་མཁའ་ནས། །ཐུགས་རྗེ་ཆེན་པོའི་ཞལ་ནས་འདི་སྐད་གསུངས། །ཨེ་མ། ང་དང་ཚེ་རབས་ཡང་ཡང་འབྲེལ་བའི་བུ། །ལེགས་པར་གསོན་དང་བརྩོན་
འགྲུས་སྙིང་སྟོབས་ཅན། །བསྐྱེད་རིམ་ལྷ་ལ་བརྟན་པ་ཐོབ་པ་དང་། །ཡོན་ཏན་ཡལ་ག་ཅུང་ཟད་རྒྱས་གདའ་སྟེ། །ཡོན་ཏན་ཡལ་ག་ཅུང་ཟད་རྒྱས་གདའ་སྟེ། །ཆོས་ཀྱི་རྩ་བ་བྱམས་དང་སྙིང་རྗེ་ཡིན། །ཁྱོད་ལ་བྱམས་དང་སྙིང་རྗེ་མི་མངའ་འམ། །སྙིང་རྗེ་འབྱོངས་ན་ཤ་ཟ་ནུས་མ་འོས། །ཤ་ཟོས་སྡུག་བསྔལ་འབྱུང་ལུགས་འདི་ལ་ལྟོས། །རང་བྱས་ལས་ཀྱི་རྣམ་སྨིན་རང་ལ་གྲུབ། །དུས་གསུམ་རྒྱལ་བས་མཛད་ཐབས་ཅི་ཡང་མེད། །ཤ་ཟོས་ཡོན་ཏན་ཀུན་བྲལ་ཉེས་ཚོགས་ལྡན། །བཞི་བརྒྱའི་ནད་དང་སྟོང་ཕྲག་བརྒྱད་ཅུའི་བགེགས། །ཉོན་མོངས་བརྒྱད་ཁྲི་བཞི་སྟོང་རང་གནས་འབྱུང་། །འབྲེལ་ཚད་དོན་ལྡན་བརྟུལ་ཞུགས་སྤྱོད་པ་དང་། །སྨན་དང་ཐེག་མཆོག་གསང་སྔགས་རྫས་མ་གཏོགས། །ཤ་ཟོས་པ་ལ་ཡོན་ཏན་ཏིལ་ཙམ་མེད། །ཤ་ཟ་ཅན་ནི་བདུད་དང་སྲིན་པོའི་རིགས། །ཡིན་པས་སྡོམ་
པ་ཉམས་ཤིང་ཉོན་མོངས་འཕེལ། །གཞན་ཕན་བྱམས་དང་སྙིང་རྗེའི་རྒྱུ་མེད་ཅིང་། །འབྲས་བུ་བྱང་ཆུབ་སྙིང་པོ་སྨིན་པ་དཀའ། །ཤ་ཟོས་ལུས་ལ་ཡེ་ཤེས་ལྷ་མི་འཁོར། །བྱིན་རླབས་དངོས་གྲུབ་རྟེན་འབྲེལ་ཕྲིན་ལས་མེད། །ཤ་ཟོས་ལུས་ལ་གཞན་ཕན་རྫས་མི་འབྱུང་། །ཕལ་ཆེར་ལྷ་སོགས་ཀྱིས་སྲིན་པོར་མཐོང་། །ཤ་ཟོས་ལུས་ལ་དྲི་ཟ་སྲིན་པོ་བདུད། །གཤིན་རྗེ་མོ་འདྲེ་རྒྱལ་འགོང་དམ་སྲི་འཁོར། །ཤ་ཟོས་འབྲས་བུ་དམྱལ་བར་བ་དང་། །བྱ་རིགས་ལྕེ་སྤྱང་སྲིན་པོ་སོགས་ལུས་ལེན། །དེ་བཞིན་ཤ་ཟོས་སྡུག་བསྔལ་དཔག་མེད་ཡོད། །སྤངས་ན་སྔར་བཤད་ཉེས་པ་ཀུན་བྲལ་།རྟག་ཏུ་མི་མ་ཡིན་གྱིས་སྤྱི་བོར་བཀུར། །གཙང་ལྡན་ཡང་དག་བྲམ་ཟེ་ལྷ་ལུས་མཐོང་། །ཕྱོགས་བཅུའི་སངས་རྒྱས་མ་ལུས་སྲས་འཁོར་
ནས། བཅས། །བླ་མ་ཡི་དམ་མཁའ་འགྲོ་སྤྲིན་བཞིན་འདུ། །ཁྱད་པར་བྱང་ཆུབ་སེམས་དཔའ་སེམས་མ་འཁོར། །ཤུགས་འབྱུང་བྱམས་དང་སྙིང་རྗེའི་རྒྱུ་བྱེད་ཅིང་། །འབྲས་བུ་བྱང་ཆུབ་སྙིང་པོ་མྱུར་དུ་ཐོབ། །དེ་སོགས་ཡོན་ཏན་བསམ་གྱིས་མི་ཁྱབ་འབྱུང་། །ཞེས་གསུངས་པ་ལ་བརྟེན་ནས་ཕྱིན་ཆད་ཤ་གཏན་དུ་སྤོང་བའི་དམ་བཅའ་མཛད་པ་ཡིན། ཞབས་དཀར་ཚོགས་དྲུག་རང་གྲོལ་ལྷ་སར་ཕེབས་སྐབས་བཤས་རའི་ནང་དུ་སེམས་ཅན་གསོད་པ་གཟིགས་པས་ཐུགས་་ལ་སྙིང་རྗེ་ཤས་མི་བཟོད་པ་འཁྲུངས་ཏེ་དེ་མ་ཐག་ཇོ་བོའི་དྲུང་དུ་ཕྱིན་ཆད་ཤ་མི་བཞེས་པའི་དམ་བཅའ་བརྟན་པོ་མཛད་ཚུལ་རྣམ་ཐར་ཆེན་མོ་ན་གསལ། དེང་སང་ཕྱོགས་གང་ནའང་སྦྱིན་བདག་གི་ཚོགས་གསོག་སྐུ་རིམ་དང་མི་ཤི་བའི་རྗེས་སུ་དེའི་དགེ་རྩར་མདོ་སྡེ་བཀླག་པ་དང་སྐོང་བཤགས་ཆོ་ག་སོགས་གཏོང་སྐབས་ཤ་
ཆང་གཉིས་པོ་མེད་ན་བྱེད་ཐབས་མེད་པ་ལྟ་བུ་ཞིག་བརྩི་བར་གདའ་སྟེ། འདི་ནི་ཆོས་ཕྱོགས་ནས་བློ་གཟུ་བོས་དཔྱད་ན་ཡོན་མཆོད་གཉིས་ཀར་མ་དག་པའི་སྦྱིན་པ་དང་འཚོ་བར་འགྱུར་བ་དང་། སྐྱབས་འགྲོ་སེམས་བསྐྱེད་ཀྱི་བསླབ་བྱ་དང་། གསང་སྔགས་ཀྱི་དམ་ཚིག་བཅས་ལས་འགལ་བས། གསོན་པོའི་ཚོགས་རྫོགས་པ་དང་། ཚེ་འདས་ཀྱི་སྒྲིབ་སྦྱོང་དུ་མི་འགྱུར་བ་མ་ཟད་འཚེ་བ་ཆོས་སུ་སྨྲ་བ་ཀླ་ཀློའི་གྲུབ་མཐའ་ངན་པ་ཡིན་པས། ལུགས་ངན་དེ་འདྲ་རིང་དུ་སྤངས་ནས་རྒྱལ་བ་དགྱེས་པའི་ལམ་མཆོད་སྦྱིན་གང་ཡང་སྡིག་དང་མ་འདྲེས་པ་རེ་ཅིས་ཀྱང་དགོས་པར་གདའ། དེ་ཡང་སྐྱེ་བོ་མི་མཁས་པ་ཁ་ཅིག་ན་རེ། གསང་སྔགས་ཀྱི་ཚོགས་མཆོད་དང་ཆོས་སྲུང་གི་གཏོར་བསྔོ་སོགས་ལ་དམ་རྫས་ཤ་ཆང་ནི་མེད་དུ་མི་རུང་བས་ངེས་པར་དཀྱིལ་འཁོར་དུ་
བཤམས་ཤིང་རྣལ་འབྱོར་པས་རོལ་དགོས་སོ་ཟེར། དེ་ནི་རང་ཉིད་དམྱལ་བར་འགྲོ་བའི་ལས་བསགས་ཤིང་བསོད་ནམས་ཆུང་བ་གཞན་དག་ཀྱང་དེ་ལ་སྦྱོར བ་ཡིན་ཏེ། འདི་ལྟར་ལུང་ལས། སྙིགས་མ་ལྔ་བདོར་གྱུར་པའི་དུས། །གསང་སྔགས་དམ་རྫས་ཤ་ཆང་ལ། །སྤྱོད་དུ་རུང་བའི་ཁུངས་སྨོས་ཏེ། ། ཏིང་འཛིན་ཉམས་ཀྱི་དྲོད་མེད་པར། །ཤ་ཁྲག་ཆང་ལ་ཐམས་ཅད་སྦྱོར། །འདི་ཡང་དམ་ཚིག་མེད་དོ་ཞེས། །ཆོས་བཞིན་སྤྱོད་རྣམས་ཐབས་ཀྱིས་སྨད། །དེ་འདྲ་བསྟན་པའི་མཐའ་རུ་འབྱུང། །ཀྱེེ་མ་ཀྱེ་ཧུད་དམྱལ་བ་ལས། །འགྲོ་ས་མེད་དོ་སྙིང་རེ་རྗེ། །ཞེས་པའི་ལུང་བསྟན་གྱི་ཐོག་ཏུ་བབ་པ་ལ་ཅིས་བསྙད། ཚོགས་འཁོར་སོགས་གསང་སྔགས་ཀྱི་དམ་རྫས་སུ་འོས་པའི་ཤ་ཇི་ལྟར་ཡིན་ཞེ་ན། ཀུན་བཟང་
དགོངས་པ་ཟང་ཐལ ་གྱི་ཞི་ཁྲོ་ལྷུན་གྲུབ་ཀྱི་
ཕྲིན་ལས་ཞེས་བྱ་བ་རྒྱུད་འབུམ་ཕྲག་དྲུག་ཅུ་རྩ་བཞི་ལས་སློབ་དཔོན་དགའ་རབ་རྡོ་རྗེས་བཏུས་པའི་ཚོགས་འཁོར་ལས། དང་པོ་ཚོགས་ཀྱི་འཁོར་ལོ་ལ༔ རོ་དྲུག་ཚང་བའི་ཟས་བརྒྱད་དང་༔ ཡོ་བྱད་ཕུན་སུམ་ཚོགས་པ་བཤམས༔ དེ་ཡང་མཆོག་ཏུ་བསྔགས་པ་ཤ་དང་ཆང་ཡིན་ཏེ༔ ཤ་ནི་ནད་ཡུན་རིང་གིས་ཤི་བ་མ་ཡིན་པ༔ མིའམ་གཅན་གཟན་གྱིས་བསད་པ་མ་ཡིན་པ༔ གྲི་ཐབས་སྣ་དགུ་དང་༔ དམེ་ཤ་བླང་བར་མི་བྱའོ༔ རང་རྐྱེན་ཚེ་ཟད་ནས་ཤི་བ་ཁོ་ན་བསྔགས་སོ༔ དེ་ཡང་དབང་པོ་ཚང་བ་དགོས་སོ༔ གྲིར་ཤི་བའི་ཤ་ཁྲག་ནི་གནོད་སྦྱིན་མཆོད་པའི་རྫས་ཡིན་ནོ༔ དམ་རྫས་སུ་མི་རུང་༔ རྨིག་ཟླུམ་དང་༔ མཛེ་ཅན་དང་༔ དམེ་ཤ༔ ནད་ངན་པས་ཤི་བའམ༔ རྒྱུ་ངན་པ་དངོས་པོ་རུལ་བ་ནི་མཁའ་འགྲོ་མི་མཉེས་པས་
དམ་རྫས་སུ་མི་རུང་ངོ་༔ ཞེས་གསལ་བར་གསུངས་པ་ལྟར། སེམས་ཅན་ཚེ་ཟད་ནས་ལས་ཀྱིས་ཤི་བའི་ཤ་དང་། ཁ་ཟས་ཀྱི་ཆེད་དུ་གསོད་པར་མི་འགྱུར་བའི་སྡིག་མེད་ཀྱི་ཤ་མི་ཁྱི་བ་ལང་རྟ་གླང་པོ་ལྔའི་ཤ་དང་། བདུད་རྩི་ལྔ་ཡང་ཁུ་བ་དཀར་དམར། ཀླད་པ། དྲི་ཆེན། དྲི་ཆུ་དང་ལྔ་རྣམས་ཡིན་པས་དེ་རྣམས་ལ་རྣམ་རྟོག་རང་རྒྱུད་པས་གཟིར་ཏེ་དང་དུ་བླང་མི་ནུས་བཞིན་དུ་ཁ་ཟས་ཀྱི་དོན་དུ་བསད་པའི་ཤ་ལ་གཙང་མར་འཛིན་པའི་ཆགས་སྲེད་རང་རྒྱུད་པས་བག་ཡངས་སུ་སྤྱོད་པ་ནི་གཙང་རྨེའི་གཉིས་རྟོག་གིས་བཅིངས་པ་ཡིན་པས་དང་དུ་བླང་བའི་དམ་ཚིག་དང་འགལ་ཞིང་། ཁྱི་ཕག་ལྟར་སྨྱོ་ཐབས་ཀྱིས་བག་མེད་དུ་སྤྱད་པ་ཡང་ཇི་ལྟར་རུང་། ཡེ་ཤེས་པའི་ལྷ་ལ། བསད་པའི་ཤ་ཁྲག་གིས་མཆོད་ན། མ་སྔོན་དུ་བུ་བསད་ནས་ཕུལ་བ་དང་འདྲ། དེ་བཞིན་དུ་
ཆོས་སྐྱོང་ལ་ཤ་ཁྲག་གིས་མཆོད་པའང་། བསྟན་སྲུང་དམ་ཅན་རྣམས་བྱང་སེམས་ཤ་སྟག་ཡིན་པས། སེམས་ཅན་བསད་པའི་མཆོད་རྫས་བཞེས་པ་ལྟ་ཅི་དེའི་ཕྱོགས་ཙམ་དུ་ཉེ་མི་ནུས། ལྷ་འདྲེ་ནག་ཕྱོགས་པ་རྣམས་དམར་མཆོད་ལ་ལོངས་སྤྱོད་པས་ཡོན་མཆོད་གཉིས་ཀའི་རྒྱུད་ལྷ་འདྲེས་བརླམས་ནས་མཐར་དམྱལ་བར་འགྲོ་མཁན་མང་བའང་ཤེས་དགོས། སྤྱོད་པ་དུས་ཚོད་དང་མ་འབྲེལ་བའི་སྤྱད་བྱའི་དམ་རྫས་ཤ་ལྔ་སོགས་ལ་སྲེད་ཞེན་རང་ ི རྒྱུད་པས་བག་མེད་པར་ལོངས་སྤྱད་ན་ཉམས་པའི་རྒྱུས་དངོས་གྲུབ་ཀྱི་གེགས་བྱེད་པའི་ཚུལ། དཔལ་སྤྲུལ་རིན་པོ་ཆེས། སྔགས་བླ་མེད་ཀྱི་གསང་དབང་དང་ཚོགས་ཀྱི་འཁོར་ལོ་རྣམས་ནི་རྗེས་མཐུན་ལས་དངོས་སུ་ནུས་པ་སུ་ཡང་མེད་པས་དེ་དག་ལ་བསྙད་བཞག་ནས་ཤ་ཆང་བག་མེད་དུ་སྤྱོད་ན་སྡོམ་པ་དང་དམ་
ཚིག་ཉམས་པ་ལས་དངོས་གྲུབ་ཀྱི་རྒྱུར་མི་འགྲོ། ཞེས་གསུངས། དེས་ན་རང་རེ་དང་པོའི་ལས་ཅན་རྣམས་ཏིང་ངེ་འཛིན་དང་རྟོགས་པའི་དྲོད་ཚད་བརྙེས་ནས ཤ་ཆང་བདུད་རྩིར་བསྒྱུར་བའི་ནུས་པ་མེད་བཞིན་ལྟ་སྤྱོད་མི་མཚུངས་པའི་རྩིང་སྤྱོད་ཐོ་ཅོ་དོར་ནས། ཚོགས་རྫས་དང་། ཆོས་སྐྱོང་གི་སྐོང་རྫས་སོགས་ལ་དམ་པ་གོང་མས་བསྒྲུབས་པའི་དམ་རྫས་ཆོས་སྨན་གྱི་ཕབ་གཏའ་ཙམ་སྦྱར་ན་ཆད་སྐྱོན་དུ་མི་འགྱུར་ཞིང་རུང་མཐུན་ཙམ་ཡིན་ཏེ། ཤ་ཁྲག་ཆང་གི་ཚབ་ཏུ། དགོངས་ཟང་རྩ་གསུམ་རིན་ཆེན་སྒྲོན་མ་ལས། ཤ་ལྔ་བདུད་རྩི་ལྔ་ནི་བསྒྲུབས་པའི་སྨན་ལ་བྱ༔ དངོས་སུ་ཤ་ཁྲག་དང་ཆང་ལ་ལོངས་སྤྱོད་པར་མི་རུང་ངོ་༔ ཞེས་གསུངས་པའི་དོན་ལག་ཏུ་ལེན་དགོས་པ་ལ། ད་ལྟའི་ཆོས་པ་འགའ་ཡིས། ཤ་ཆང་ཅུང་ཟད་རེ་མ་བརྟེན་ན། ལུས་སྟོབས་ཉམས་ཤིང་རླུང་ནད་
ལྡངས་ནས་འཆི་རྐྱེན་བྱེད་ཉེན་ཆེ་ཟེར་མཁན་འདུག་སྟེ། ལེགས་པར་བསམ་ན་གལ་སྲིད་བརྒྱ་ལ་སྡིག་ཟས་ཤ་ཆང་སྤངས་ནས་འཆི་བར་འགྱུར་ན་ཡང་། དེ་ནི་དོན་ཆེན་ཆོས་ཕྱིར་ཡིན་པས། རྒྱལ་བ་དགྱེས་པའི་ལམ་དུ་འགྱུར་ངེས་པས་འགྱོད་པའི་གནས་མིན་པར་འདོད་ཐོག་ཡིན་པའི་ཚུལ། དམ་པའི་སྐྱེས་བུ་རྩེ་ལེ་རིག་འཛིན་ཆེན་པོས། ཚེས་བཅུའི་མཆོད་པ་བདུད་རྩི་སྨན་རཀ་ཀྱང་། །གཙང་མའི་ཆུ་ལ་ཀ་ར་བུ་རམ་སྦྱར། གསུངས་པའི་བདུད་རྩི་རིལ་བུ་ཉིད། ཚུལ་ལྡན་སྦྱར་ནས་བཏབ་པ་མ་གཏོགས་པ། །ཆང་གི་དྲི་མ་རླུང་ཕྱོགས་ཙམ་ཡང་མེད། །ཆང་འཐུང་མཁན་དང་ཚེ་འདིར་མི་འགྲོགས་ཤིང་། །ཚེ་རབས་གཞན་དུའང་རབ་བྱུང་ཤ་ཆང་ལ། །བག་མེད་སྤྱོད་པའི་ཡུལ་ཕྱོགས་མི་སྐྱེ་བར། །སྨོན་ལམ་སྙིང་ཁུང་རུས་
པའི་དཀྱིལ་ནས་འདེབས། །ཤ་ཆང་མེད་པའི་རྐྱེན་གྱིས་ཤི་ན་ཡང་། །སངས་རྒྱས་རྣམས་ཀྱི་དགོངས་པ་རྫོགས་འགྱུར་ཞིང་། །ཆོས་པའི་ནང་ནས་ཡང་རྩེར་འགྱུར་རོ་སྙམ། །ཞེས་གསུངས་པས། ད་ལྟའི་གྲོང་ཆོག་པ་རྣམས་ཀྱི་རྗེས་སུ་རྒྱུགས་ཏེ་དཀྱིལ་འཁོར་ནང་དུ་ཤཁྲག་དངོས་སུ་བཞག་པ་ནི་བོན་དང་མུ་སྟེགས་ཀྱི་ལུགས་ཡིན་པར། སེམས་དཔའ་ཆེན་པོ་འཇིགས་མེད་ཆོས་ཀྱི་དབང་པོས། སྲུང་བ་དང་གསོལ་མཆོད་སོགས་བྱེད་པའི་སྐབས་རྫས་ཤ་གཙང་མ་ཞིག་དགོས་ཟེར་ནས། ད་ལྟ་འཕྲལ་དུ་བསད་པའི་ཤ་ཚིལ་ཁྲག་རྩ་རེ་རླངས་པ་ཕལ་ལེ་བ་དེ་ལ་གཙང་མར་འཛིན་ཞིང་དེ་དག་གིས་གཏོར་མ་དང་མཆོད་རྫས་ཐམས་ཅད་བརྒྱན་ཏེ་རྔམ་རྔམ་དང་རྫིག་རྫིག་བྱེད་པ་དེ་དག་བོན་དང་མུ་སྟེགས་པ་ལྟ་བུ་ཞིག་གི་ཆོས་ལུགས་ཡིན་ན་མ་གཏོགས་ནང་པ་སངས་རྒྱས་
པའི་ཆོས་ལུགས་ནི་མིན། ནང་པ་སངས་རྒྱས་པའི་ཆོས་ལུགས་ཡིན་ན། ཆོས་ལ་སྐྱབས་སུ་སོང་ནས་སེམས་ཅན་ལ་འཚེ་བ་སྤང་གང་དུ་འགྲོ་ཡང་དེར་སེམས་ཅན་རེའི་སྲོག་ལ་འཚེ་བ་བྱེད་ནས་བསད། ཤ་ཁྲག་ལ་ལོངས་སྤྱོད་ན་སྐྱབས་འགྲོ་དང་ཅིའི་ཕྱིར་མི་དགོས་རྒྱུ་ཡིན་པ་ལ། འགལ། ཞེས་དང་། རྒྱལ་བ་སྲས་དང་བཅས་པ་ཐམས་ཅད་ཁམས་གསུམ་གྱི་སེམས་ཅན་ཐམས་ཅད་ལ་བུ་གཅིག་པའི་མ་བཞིན་དུ་བརྩེ་བས་དགོངས་ཏེ་བཞུགས་པ་ལ། ལས་ངན་གྱི་གཞན་དབང་དུ་གྱུར་པའི་དུད་འགྲོ་བསམ་མེད་ཅིག་བསད་ནས། ཤ་ཁྲག་གིས་མཆོད་པ་བྱས་པས་རྒྱལ་བ་དགྱེས་པའི་ཐབས་མེད་རྒྱལ་སྲས་ཞི་བ་ལྷས། གང་ཞིག་ལུས་ལ་ཀུན་ནས་མེ་འབར་བ། །འདོད་པ་ཀུན་གྱིས་ཡིད་བདེར་མི་འགྱུར་ལྟར། །དེ་བཞིན་སེམས་ཅན་གནོད་
པ་བྱས་ན་ཡང་། །ཐུགས་རྗེ་ཆེ་རྣམས་དགྱེས་པའི་ཐབས་མེད་དོ། །ཞེས་རྒྱ་གཞུང་ལུང་གིས་རྒྱབ་སྐྱོར་ནས་གསུངས་པ་ལ་ཡིད་ཆེས་མི་བྱེད་ན་ཐེག་ཆེན་པར་ཅི་ལ་རུང་། བླུན་པོ་མཁས་སུ་རེ་བ་ཁ་ཅིག །སྙིང་རྗེ་ཅན་གྱིས་ཤ་ཟ། དམ་ཚིག་ཅན་གྱིས་ཆང་བཏུང་། ཞེས་ཁུངས་མེད་བདུད་ཀྱི་གསང་ཚིག རྡོལ་ཐབས་སུ་སྨྲ་བ་ཡང་གོང་དུ་སྨྲོས་མ་ཐག་པའི་ལུང་རིགས་རྣམས་ཀྱིས་ཚར་བཅད་པ་ཡིན་ནོ། །ཡང་བདུད་དང་དམ་སྲིའི་ལོག་སྨོན་གྱི་འཕྲུལ་ལས་བྱུང་བའི་རྩ སྙིགས་དུས་རྫས་ཀྱི་དུ་རུ་ཀ་ཐ་མ་ཁའི་རིགས་རྣམས་ཀྱང་དྲི་ཙམ་ཡང་བསྟེན་མི་རུང་སྟེ། རྩོད་བྲལ་གྱི་གཏེར་ཆེན་སྟག་ཤམ་བསམ་གཏན་གླིང་པའི་གཏེར་བྱོན་ཁོག་དབུབ་སྲིད་པའི་ཆོས་འབྱུང་ལས། ཟས་མེད་གོས་མེད་ཁ་ལ་དུ་བ་རྔུབས༔ འདྲེ་རྩ་ཕྱེ་ནས་རྒྱལ་བསེན་ལུས་ལ་འཇུག༔ ཅེས་དང་། རིག་
འཛིན་ཐུགས་མཆོག་རྡོ་རྗེའི་རྩ་གསུམ་ཐུགས་སྒྲུབ་དབང་ཆེན་འདུས་པ་ལས། དུས་ངན་ཐ་མའི་ཁ་ཟས་དུ་བ་རྔུབས༔ སྟེང་གི་ལྷ་ཁྲོས འོག་གི་ཀླུ་རྣམས་བརྒྱལ༔ བར་གྱི་གཉན་འཆི་མཛེ་ནད་སྣ་དགུ་དར༔ བོད་ཁམས་ལྷ་མནོལ་དགྲ་དང་གཤེད་དུ་བབས༔ སྐྱོབ་པའི་ལྷ་སྲུང་བྱེ་བྲལ་བྱད་མཐུ་ཟུག༔ ཤེས་རབ་རྩ་འགགས་ཉོན་མོངས་ལས་རླུང་རྒྱས༔ དབུ་མ་འགགས་པས་རང་རིག་གསལ་མདངས་ནུབ༔ བསོད་ནམས་མར་འགྲིབ་སྲིད་པ་ཐམས་ཅད་འཁྲུགས༔ དུས་ཀྱི་ཆར་ཆད་དུས་མིན་ཆུ་ལོག་རྡོལ༔ ལོ་ཉེས་མུ་གེ་ནད་མཚོན་བསྟུད་མར་འགྱུར༔ ཞེས་དང་། སྒམ་པོ་པ་ཨོ་རྒྱན་འགྲོ་འདུལ་གླིང་པས། སྲིན་མོའི་ཁྲག་ཐིགས་རྩྭ་སོག་ལོ་མ་དེའི། །དྲི་ཙམ་སུས་འཐུང་རྡོ་རྗེའི་དམྱལ་བར་སྐྱེ། །ཞེས་གསུངས་པ་དང་། འཁྲུལ་
ཞིག་ཆེན་པོ་པདྨ་བདུད་འདུལ་གྱིས། སྙིགས་མའི་བསླུ་བྲིད་དུག་གི་ཟས། །ལོག་པའི་འཚོ་བ་ཐ་མ་ཁ། །རྫས་ངན་ཞི་བར་བྱིན་གྱིས་རློབས། །དམ་ལྡན་ཕོ་མོའི་ཚོགས་རྣམས་གསོན། ཤེས་བཞིན་བཙན་དུག་མ་འཐུང་ཞིག །སྔོན་ཚེ་སྲིན་མོ་སྤུན་དགུ་ཡི། །མངལ་ཁྲག་འབྲས་བུའི་ལོ་མ་འདིས། །རྒྱ་བོད་གཉིས་བར་ནད་སྣ་འདྲེན། །མི་མཐུན་སྣ་ཚོགས་ལྟས་ངན་འོངས། །དམ་ཆོས་བྱིན་རླབས་ནུས་པ་འཇོམས། །དེ་ཕྱིར་སྤང་བ་ཤིན་ཏུ་གཅེས། ། གསེར་གྱི་མཆོད་རྟེན་སེར་པོ་ལ། །དུག་ཆུ་ནག་པོ་བྱུགས་པ་བཞིན། །དལ་འབྱོར་ལུས་དཀྱིལ་རྩ་ཁམས་ཀློང་། །རྫས་ངན་སྣ་དུད་སུས་བཏང་ཡང་། །དབུ་མའི་ནང་དུ་མུན་པ་འཁྲིགས། །རོ་རྐྱང་རྩ་སྦུབས་གཏན་ནས་འགག །ཨ་ཐུང་ཤི་ནས་བདེ་དྲོད་ཡལ། །སྒྲོན་དྲུག་མ་རིག་སྤྲིན་གྱིས་
གཡོགས། །འདོད་པའི་ཁ་སྣར་ཆུ་ཡང་རྡོལ། །ཉོན་མོངས་དུག་ལྔ་དགུ་འགྱུར་འཕེལ། །བརྟུལ་ཞུགས་སྤྱོད་པ་མ་གཏོགས་པ། རྫོགས་པའི་སངས་རྒྱས་བྱོན་ན་ཡང་། །འཆི་དུས་འཕོ་བ་ཐེབས་པ་མིན། །སྤངས་ན་བདེ་ཆེན་ཞིང་དུ་གྲོལ། །ཞེས་དུག་རྫས་འབྱུང་བའི་རྒྱུ་དང་། བོ་ཉེས་དམིགས་བཅས་གསལ་བར་བསྟན་ཀྱང་སྤང་བར་མི་བྱེད་པའི་ཁར། ད་དུང་ཉེས་པ་མེད་ཚུལ་གླེང་ནས་མ་རིག་སྐྱེ་བོ་མང་པོ་ཕྱིན་ཅི་ལོག་གི་ལམ་དུ་འཁྲིད་པ་ནི། དམ་སྲི་རྒྱལ་འགོང་གིས་བསླུས་པར་ཟད་དེ། གྲུབ་དབང་དྷརྨ་སེང་གེས། ད་ནི་མུ་སྟེགས་པའི་རྫས་ངན་གྱིས་བསླུས་པ་དང་། རྒྱལ་འགོང་དམ་སྲི་སྙིང་ལ་ཞུགས་པའི་དུས་རྟགས་ཀྱི་ལུང་བསྟན་མང་པོ་དུས་ལ་བབས་ནས་གདའ་བས་ཅི་དྲག་ཅེས་ཐུགས་མངོན་པར་སྐྱོ་བའི་གསུངས་བྱོན་པ་
ལགས། གཞན་ཡང་ཆུ་བཟང་བཀའ་འབུམ་དང་། ཞབས་དཀར་བའི་གསུང་དུག་དོན་རིག་པའི་མདའ་མོ་ཞེས་པ་དང་། ཟེ་ཆེན་རྒྱལ་ཚབ་པདྨ་རྣམ་རྒྱལ་གྱི་གསུང་འབུམ་སོགས་མཁས་གྲུབ་སྐྱེས་ཆེན་མང་པོས་ཡང་ཡང་དགག་པ་མཛད་འདུག་པ་འདི་དག་ལ་རྒྱུ་མཚན་དང་དགོས་པ་ཆེན་པོ་ཡོད་པས་དུག་ལ་སྨན་དུ་མི་བཟུང་ངོ་། །དེ་དག་གི་ཞར་ལ་སྤང་བར་བྱ་བ། ཤོ་རྒྱན་མིག་མང་རྩེ་བ། གློག་བརྙན་ལ་བལྟ་བ། ཚོང་དང་བུན་སྐྱེད་ལ་གཡེང་བ། གྲོང་ཆོག་འདྲེ་འདུལ་ལ་རྟག་ཏུ་འབྱམས་པ་རྣམས་ནི་ཁྱིམ་པ་སུན་འབྱིན་དང་བྱ་བ་ངན་ཞེན་གྱི་ལེ་ལོ་སྐྱེས་ཆེན་དམ་པས་ཁྲེལ་ཞིང་། འཇིག་རྟེན་ཡ་རབས་སྐྱེ་བོ་རྣམས་ཀྱིས་སྨོད་པར་འགྱུར་ལ། ཐོས་བསམ་སྒོམ་པའི་གེགས་དང་བར་ཆད་ཐུ་ཤོས་ཡིན་ཀྱང་། དེང་སང་ཆོས་པ་རྣམས་ཀྱིས་དེ་ལ་ཇི་སྙམ་མེད་པར་ཉིན་
མཚན་ཀུན་ཏུ་ཐུགས་དམ་སྙིང་པོར་བྱེད་པ་ནི་བསྟན་པ་སྙིགས་མའི་རྟགས་ཡིན་ཏེ། རང་བྱུང་རྒྱལ་བས། སྙིགས་མ་ལྔ་བདོའི་མར་འགྲིབ་དུས། །ཐུབ་པའི་བསྟན་ལ་ཞུགས་ལགས་ཀྱང། །རྒྱལ་འགོང་བདུད་ཀྱི་ཆོ་འཕྲུལ་གྱིས། །ཕལ་ཆེར་ལོག་པའི་ལམ་དུ་འཁྲིད། །ཅེས་གསུངས་པའི་ཐོག་ཏུ་བབས་པར་གདའ། བཤེས་སྤྲིང་ལས། རྒྱན་པོ་འགྱེད་དང་འདུས་ལ་བལྟ་བ་དང་། །ལེ་ལོ་སྡིག་པའི་གྲོགས་ལ་བསྟེན་པ་དང་། །ཆང་དང་མཚན་མོ་རྒྱུ་བ་ངན་སོང་བ། །གྲགས་པ་ཉམས་པར་འགྱུར་བས་དེ་དྲུག་སྤང་། །ཞེས་དང་། དུས་ཀྱི་འཁོར་ལོ་ལས་བསྟན་པ་སྔགས་ཀྱི་དམ་ཚིག་བརྟུལ་ཞུགས་ཉེར་ལྔའི་ནང་གསེས་ཉེ་བའི་སྡིག་པ་ལྔའི་དང་པོ་དང་གཉིས་པའི་དོན་སྡོམ་གསུམ་འགྲེལ་པ་དཔག་བསམ་སྙེ་མ་ལས། ཤོ་དང་མིག་མང་སོགས་ཆོ་ལོ་རྩེ་བ་དང་། བཟའ་བ་དང་རིན་གྱི་དོན་དུ་བསད་པའི་ཤ་སོགས་ཁ་ན་མ་ཐོ་བ་ཆོས་དང་མི་མཐུན་པའི་ཟས་ཟ་བས་འཚོ་བ་དང་ཞེས་གསུངས། གྲུབ་དབང་དྷརྨ་སེང་གེས། གཞན་ཡང་སྣ་ཐ་ཐ་མ་ཁའི་རིགས་དང་། ཤོ་
དང་ཆོ་ལོ་རྒྱན་འགྱེད་མདའ་རྡོ་རྩེ་བ་སོགས། དོན་མེད་ཀྱི་བྱ་བ་ཞེ་སྡང་ཕྲག་དོག་ཤུགས་ཀྱིས་འཕེལ་ཞིང་། སྙིང་པོ་མེད་པ་ཡ་རབས་ཁྱིམ་པ་རྣམས་ཀྱིས་ཀྱང་སྤང་བྱ་ཡིན་ན། ཆོས་སྒོར་ཞུགས་པ་དག་ལ་སྨོས་ཅི་༤ དགོས། ཞེས་གསུངས། དེ་བཞིན་དུ་ཚོང་བྱེད་པ་ལ་ཡང་མི་ཚངས་སྤྱོད་དང་ལོག་ལྟ་ཙམ་མ་གཏོགས་མི་དགེ་བ་བཅུ་པོ་ཕལ་ཆེར་ཚང་བས་ཆོས་པ་དང་ལྷག་པར་རབ་ཏུ་བྱུང་བ་རྣམས་ཀྱིས་ངེས་པར་སྤངས་དགོས་ཏེ། དེ་མ་སྤང་ན་ཉིན་མཚན་ཀུན་ཏུ་བློ་སེམས་དེའི་ཕྱོགས་སུ་གཡེང་ཤོར་ནས་རྒྱུད་ལ་ཐོས། །
བསམ་སྒོམ་པའི་ཡོན་ཏན་དང་འཁོན་པ་ལྟར་འགྲོ་བའི་ཚུལ། རང་བྱུང་རྒྱལ་བས། དཀོན་མཆོག་བླ་མའི་རྫས་ལ་སྲེད། །ཚོང་དང་ཁེ་སྤོག་དོན་དུ་གཉེར། །ཟ་འདོད་བསླུ་བའི་སེམས་དང་ལྡན། །བྱ་རོག་ལྟ་བུར་སྒོམ་དང་འཁོན། །ཞེས་དང་། དཔལ་སྤྲལ་རིན་པོ་ཆེས། ཚོང་ལ་སོགས་པའི་སྐབས་སུ་ཕ་རོལ་བསླུ་བྱེད་ཀྱི་རྫུན་གཏོང་བ། བྲེ་ལོག་དང་སྲང་ལོག་འཛུགས་པ་སོགས་ཀྱིས་ཕ་རོལ་གྱི་རྒྱུ་རྫས་ལེན་པ་ནི་གཡོ་སྒྱུས་མ་བྱིན་པ་དེས་ན་དེང་སང་རང་རེ་རྣམས་ནས་དངོས་སུ་རྐུ་བ་སོགས་མ་བྱས་ཕྱིན། ཚོང་སོགས་གཡོ་ཐབས་ཀྱིས་བླངས་པ་ཉེས་པ་ཡོད་སྙམ་མི་འདུག་སྟེ། གཡོ་སྒྱུ་བྱས་ཕྱིན་ཚོང་གི་ཁེ་ཇི་ཙམ་རྙེད་པ་དེ་བརྐུས་པ་དངོས་དང་ཁྱད་མེད། ཁྱད་པར་དེང་སང་གི་སྐབས་སུ་བླ་མ་དང་། སེར་མོ་རྣམས་
ནས་ཀྱང་ཚོང་བྱེད་པ་ལ་ཉེས་པའམ་སྐྱོན་དུ་མི་ལྟ་ཞིང་སྐུ་ཚེ་དེ་ལ་བསྒྲིལ་ནས་ཕོ་རྒོད་པོར་རློམ་པར་འདུག་ཀྱང་། བླ་མ་སེར་མོ་བ་ཞིག་གི་རྒྱུད་ཆུད་ཟོས་བྱེད་པ་ལ་ཚོང་ལས་ཐུ་བ་གང་ཡང་མེད་དེ། རྟག་ཏུ་དེ་ལ་གཡེང་བས་སློབ་གཉེར་དང་སྒྲིབ་སྦྱོང་སོགས་བྱེད་རྒྱུའི་བློ་གཡེལ་ཞིང་གོ་སྐབས་ཀྱང་མེད། མཚན་མོ་ཉལ་བའི་དུས་ཚུན་ཆད་ཚོང་རྩིས་ཀྱི་བསམ་བློ་གཏོང་བས་དད་པ་དང་ངེས་འབྱུང་སྙིང་རྗེ་སོགས་ཀྱི་རྩ་བ་ཆད། དུས་རྟག་ཏུ་འཁྲུལ་པའི་གཞན་དབང་དུ་འགྱུར་བ་ཡིན། ཞེས་གསུངས་པ་དང་། འཇིགས་མེད་བསྟན་པའི་ཉི་མས། དགེ་འདུན་པས་དམར་ཆོག་དང་། བཙུན་པས་ཁེ་སྤོགས་ཆེན་པོ་དང་། ཁྱད་པར་བཤས་ཚོང་བྱེད་པ། དགོན་ཁང་དུ་སེར་ཁྱིམ་འཛིན་པ་སོགས་སངས་རྒྱས་ཀྱི་བླ་འཚོང་ཞིང་རྒྱལ་བའི་བསྟན་པ་ལ་ཐན་སྐྱེལ་བ། འཕགས་པའི་
དགེ་འདུན་གྱི་རྐང་འདྲེན་ཅིང་། ལྷ་དཀར་ཕྱོགས་སྐྱོང་བས་མཐོང་ན་དམོད་འདེབས་པའི་སྤྱོད་ངན་རྣམས་རེག་ཕུང་གི་དུག་བཞིན་རིང་པོ་བས་ཀྱང་ཆེས་རིང་པོར་སྤོངས། ཞེས་གསལ་བར་གསུངས་ནའང་དེང་སང་ནི་བསྟན་པ་ཉམས་རྟགས་ཚོང་ཕལ་པ་ལས་ཐུ་བ། གསེར་སྐུ། ཐང་ཀ། གསུང་རབ་གླེགས་བམ། ཕུར་པ། རྡོར་དྲིལ་སོགས་རྟེན་རྙིང་བྱིན་རླབས་ཅན་དང་། གསང་སྔགས་ཀྱི་དམ་ཚིག་གི་རྟེན་དུ་གསང་ཞིང་བཅང་བར་འོས་པ་རྣམས་ཆོས་མེད་ཀླ་ཀློ་མུ་སྟེགས་པ་ལ་ནོར་དང་བརྗེ་ཞིང་། ཐབས་སྣ་ཚོགས་ཀྱི་སྒོ་ནས་རྒྱལ་བའི་སྐུ་གསུང་ཐུགས་རྟེན་ཉོ་ཚོང་བརྐུ་བ་དང་འཕྲོག་བཅོམ་གཏའ་མར་བཞག་པ་ཡན་ཆད་བྱེད་ནས་དཀོན་མཆོག་གི་དཀོར་དང་བླུ་ཡོན་ཟ་མཁན་བླ་སྤྲུལ་དགེ་འདུན་མན་ཆད་ནས་མི་ནག་སྐྱེ་བོ་ཡན་ཆད་དྲག་ཞན་སུ་ཡིན་
ཡང་། སྐྱབས་འགྲོ་དང་འགལ་ཞིང་། བསྟན་པ་འཇིག་པའི་ཆོམ་རྐུན། གསང་སྔགས་གསང་བ་ཐུགས་ཀྱི་དམ་ཚིག་ལས་འགལ་བ། ནང་པ་སངས་བླ་མའི་གསུང་མ་ཆོག་པར་ཕྱུག་པོ་ཞིག་གི་བསྙེན་བཀུར་ལ་ཊ་རྒྱས་པའི་བླ་བཙོང་དེ་འདྲ་ནི་དམྱལ་བར་ཁྱུ་དེད་དུ་བཏང་བའི་ས་མཁན་འབྲེལ་ཚད་ཕུང་ལ་སྦྱོར་བ་ལགས་པས་དེ་རྣམས་དང་ཁ་ལག་སྤྱོད་གསུམ་འདྲེས་པ་ཙམ་ཡང་མི་རུང་ན། དེའི་ལད་མོ་བྱེད་པ་ལྟ་ཅི་སྨོས། དབོན་སྟོན་སྐྱེར་སྒང་བའི་རྣམ་ཐར་ལས། ཕྱིན་པ་དང་། དེའི་དགོང་མོ་ལུས་པོ་ཐམས་ཅད་གཤག་གཏུབ་བྱས་པ་བཞིན་ན་ནས་སྨན་དང་རིམ་གྲོ་གང་གིས་ཀྱང་མ་ཕན་པར་ཤི་ལ་ཐུག་པར་ཐོ་རངས་ཁར་སྒྲོལ་མ་དཀར་མོ་བྱོན་ནས། ཁྱོད་ཀྱི་ནད་འདི་སྐུ་གླུད་ཟོས་པས་ལན་པ་ཡིན། དེ་ལ་གཞན་གྱིས་མི་ཕན་པས་བྲུལ་གཏོར་ཐོངས་ཤིག །དེས་དམྱལ་བའི་
ལས་ཞི་ཞིང་ནད་ལས་གྲོལ་བར་འགྱུར་རོ་ཞེས་གསུངས་ནས། བྲུལ་གཏོར་བཏང་བས་ནད་དྲག་པོ་སོས་སོ། །ཞེས་བྱུང་། ཆོས་སྙིང་ནས་བྱེད་ན་དད་ཟས་གཤིན་དཀོར་ཟ་བ་དང་། གྲོང་ཆོག་འདྲེ་འདུལ་ལ་མགོ་འཁོར་བ་རྣམས་ཀྱང་ཚོད་བག་དང་ལྡན་པར་མ་བྱས་ན། སྙིང་ཐིག་གི་རིག་འཛིན་གོང་མ་རྡོ་གྲུབ་འཇིགས་མེད་བསྟན་པའི་ཉི་མས། དེ་ལ་སངས་རྒྱས་ཀྱི་བསྟན་པ་སྤང་ཀློག་གཉིས་ཀྱིས་འཛིན་དགོས་པ་ལ། མིང་བསྟན་པ་ལ་ཞུགས་པར་བཏགས་ནས། ཡིག་ངོ་ཤེས་པ་ཙམ་ནས། དབྱར་སྟོན་གྱི་ནམ་ཟླ་ཐམས་ཅད་གྲོང་ཆོག་ལ་ཟད། དགུན་དཔྱིད་ཀྱི་ཟླ་བ་བྱུང་ཚེ་སྐྱེ་ཁ་དང་རྐྱལ་ཁའི་གཉེར་པ་ལ་བཏང་ན། ཁང་གོག་སྟོང་པ་ཤ་སྟག་གིས་ཤཱཀྱ་སེང་གེའི་བསྟན་པ་མི་ཟིན་ཅིང་། བནྡེའི་ཕ་ཁང་གཙུག་ལག་གི་ཁང་པ་
ཡིན་པས་རང་གི་ཕ་ཐོབ་ཀྱི་རལ་གྲི་ཐང་ལ་མི་འཆོར་བར་བྱ། ཞེས་གསུངས་པས། དཀོར་དང་གྲོང་ཆོག་ལ་མགོ་འཁོར་བའི་སྐྱོན་གྱིས་དགེ་སྦྱོར་ལ་ཡར སྐྱེད་མི་འབྱུང་ཞིང་། རྒྱུད་དཀོར་གྱིས་ཚིག་སྟེ། དད་པ་དང་ངེས་འབྱུང་འགྲིབ། ཆགས་སྡང་དང་རེ་དོགས་ཆེ་རུ་སོང་ནས། འཇིག་རྟེན་ཆོས་བརྒྱད་དང་འབྲེལ་བའི་བྱ་བ་མི་བྱེད་དགུ་བྱེད་བྱས་ཏེ། བླ་མ་དང་མཆེད་ལྕམ་ལ་ལོག་ལྟ་དང་སྐུར་པ་འདེབས། སྡོམ་པ་དམ་ཚིག་ཆུ་ལ་སྐྱུར། ཉེས་ལྟུང་དང་དཀོར་གྱི་རྣམ་སྨིན་ཚད་ལས་འདས་པ་ཞིག་ཁུར་ནས་ཐར་པའི་དུས་མེད་པའི་ངན་སོང་དུ་འགྲོ་བ་ལ་ཚེགས་མེད་དེ། ཇི་སྐད་དུ། དཀོར་ནག་པོ་སྲོག་གི་གྲི་ཡིན། །ཟོས་དྲགས་ན་ཐར་པའི་སྲོག་རྩ་གཅོད། ཅེས་དང་། མདོ་ལས། དགེ་སློང་གཉིས་པོ་འདིས་དད་པའི་ཟས་བཟའ་བར་གནང་གི། གཞན་
དག་ལ་ནི་ཅུང་ཟད་ཀྱང་མ་གནང་ངོ་། །གཉིས་གང་ཞེ་ན། ལྡན་པ་དང་གྲོལ་བའོ། །ཞེས་གསུངས་པས་ལྡན་པ་ནི། ཚུལ་ཁྲིམས་དང་ལྡན་པ། གྲོལ་བ་རང་རྒྱུད་གྲོལ་བ་ལ་ཟེར། ཁ་ཆེ་པཎ་ཆེན་གྱིས། རྫས་ལ་སྲེད་པས་གྲོང་ཆོག་བྱེད་པ་རྣམས། །ལོག་འཚོའི་དུག་ཆུ་མ་འཐུང་སྙིང་གཏམ་ཡིན། །དད་པས་བྱིན་པའི་ཁ་ཟས་འཇུ་བ་ལ། །བསླབ་གསུམ་རྣམ་དག་གང་རུང་ལྡན་པ་འཚལ། །ཧ་ཅང་སྡེ་ཆེན་དཀོར་ལ་རྔམ་པ་༤ རྣམས། །ངན་འགྲོའི་གཡང་ལ་མ་མཆོང་སྙིང་གཏམ་ཡིན། །ཞེས་དང་། ཀུན་མཁྱེན་འཇིགས་གླིང་གིས། རྔ་བརྡུང་། གླུད་གྱེར། གཏོ་ཡས་ལ་མགོ་འཁོར་འདི་མ་བྱས་ན་ལྟོ་མི་འདུག་ཟེར། སྲང་ཁའི་ཁྱི་ལས་ཀྱང་བྲེལ་ཚུབས་ཆེ་བར་སོང་གིས་དགོས་པས་ཚོད་ཟིན་པར་བྱ། ཞེས་དང་། དཀོན་
མཆོག་དཀོར་འཕྲོག་དགེ་འདུན་ལས་བྱེད་དང་། །ལྡན་གྲོལ་གཉིས་མེད་དཀོར་ལ་རང་དགར་སྤྱོད། ལེགས་སྨོན་དོན་གཉེར་ཁྱིམ་པ་སུན་འབྱིན་ཅན། གཞན་རྒྱུད་བསྲེག་པའི་དགེ་སྦྱོང་ལུས་སྤོང་ཤོག །ཅེས་སྨོན་ལམ་དུ་མཛད་པ་དང་། རང་བྱུང་རྒྱལ་བས། གཞན་གྱིས་ཚོགས་བསགས་བྱེད་པ་ལ། །ཡི་རང་མི་བྱེད་ཆུད་གསན་བྱེད། །དད་གཤིན་དཀོར་ལ་ཉིས་ལྡབ་ལེན། །ཡི་དྭགས་སྐྱེ་བའི་བར་ཆད་ཡིན། །ཞེས་དང་། ཆོས་སེང་གིས། ཆོས་པ་གྲོང་ཆོག་ལ་མགོ་འཁོར་བ་ནི་ཁྱི་སྨྱོན་རང་དབང་མེད་པ་དང་འདྲའོ། །ཞེས་གསུངས་པ་ལྟར་སྔོན་གྱི་གཙང་བླ་རྟ་ནག་ཅན་སོགས་དཀོར་ཟན་མང་པོ་ཞིག་ངན་སོང་གི་གནས་སུ་འོ་བརྒྱལ་བའི་ཚུལ་ལ་གཞིག་ནས་ཡོན་བདག་གི་གྲོང་ཆོག་ལ་མགོ་མ་འཁོར་བར་བྱ། གལ་ཏེ་ཤི་དགེ་གསོན་རིམ་བསྒྲུབ་རྒྱུའི་
ཆོས་ཡོན་དང་བསྙེན་བཀུར་ཞབས་ཏོག་ཚུར་འབུལ་མཁན་བྱུང་བ་ཡིན་ན། དེ་ལ་གལ་ཆུང་མི་བྱེད་པར་དམ་པ་གསུམ་དང་འབྲེལ་བའི་ཞལ་འདོན་སྨར་བ་རེ་བསྒྲུབ་དགོས། ལར་དུས་རྒྱུན་གྱི་འཚོགས་སྒྲིག་དང་ཆོས་བརྗོད་ཞལ་འདོན་ལ་མཚོན་ན། སྔ་དགོང་གཉིས་ལ་མཁར་རྔའི་བརྡས་བསྐུལ་ཏེ་ཚོགས་ཐེངས་རྀ་འཚོགས་དགོས། ཚོགས་བརྡ་བཏང་ནས་དགེ་འདུན་རྣམས་འཚོགས་གྲུབ་རྗེས་ནན་ལྟར་ཕྱི་བ་བྱུང་ན་དགེ་བསྐོས་པས་དེ་ལྟར་ཕྱིས་ནས་བྱེད་མི་ཆོག་ཅེས་བརྡ་སྦྱར། དེ་ལ་སྔ་དྲོར་སྙིང་ཐིག་རང་ལུགས་ཆོས་སྤྱོད་བསྟན་པ་ཡོངས་རྫོགས་དང་། རང་ལུགས་གནས་བརྟན་ཕྱག་མཆོད། བསམ་ལྷུན། བར་ཆད་ལམ་སེལ། བསམ་པ་མྱུར་འགྲུབ་མ་བཅས་ཀྱིས་གྲོལ། ཕྱི་དྲོར། དཔལ་ཆེན་རྒྱུན་ཁྱེར་སྔོན་དུ་འགྲོ་བས། མ་མགོན།
གཟའ། ཚེ་རིང་མ། གསེར་སྐྱེམས་རིག་འཛིན་རྩ་བརྒྱུད་མ། འདོད་གསོལ་བར་དང་། གཏོར་འགུགས་སྔགས་འབུལ། ཕྲིན་བཅོལ། མཆོད བསྟོད། བཤགས་པ། བརྟན་བཞུགས། བསྔོ་སྨོན། ཤིས་བརྗོད་བཅས་མཐར། ཤེས་རབ་སྙིང་པོ། མདོ་སྒྲུབ། སེང་གདོང་མའི་རིག་སྔགས་དང་བཟློག་པ། གདུགས་དཀར་བཟློག་པ་རྣམས་ཐལ་རྡེབ་བཅས་བྱས་ལ། བཟང་སྤྱོད། མདོ་སྔགས་སྨོན་ལམ་གཉིས་རེས་མོས་བྱ། སྐུ་གསུམ་ཞིང་ཁམས་སྦྱོང་བའི་སྨོན་ལམ། ལེགས་སྨོན་དངོས་གྲུབ་རྒྱ་མཚོ་མ་བཅས་ཀྱི་མཐར། ཕན་བདེ་འབྱུང་བའི་སོགས། དཔལ་ལྡན་བླ་མའི་སྐུ་ཚེ་སོགས། བསྟན་པའི་དཔལ་གྱུར་སོགས། རྒྱལ་བ་ཀུན་གྱི་ཉེ་ལམ་སོགས། ཐུབ་བསྟན་མཛེས་པའི་སོགས་ཀྱིས་མཐའ་བརྒྱན་ཏེ་ཚོགས་གྲོལ། ཐོ་རངས་དང་
སྲོད་ལ་རང་རང་སོ་སོའི་གྲྭ་ཤག་ཏུ། ཐོ་རངས་སྔོན་འགྲོ་དྲན་པ་ཉེར་བཞག་ཚིག་ཕྱིར་སེམས་གཞོལ་ཏེ་བཏང་བའི་མཐར། ཟངས་མདོག་དཔལ་རིའི་སྨོན་ལམ་དང་། དུས་མཐར་གདབ་པའི་སྨོན་ལམ་ལྟུང་བཤགས་བཅས་ཐོན་རྗེས་ཡོ་བྱད་དང་བརྩོན་འགྲུས་ཀྱིས་ལྕོགས་མཁན་ཡོད་ན་སྤུངས་གཏོར་བསྡུས་པ་ཙམ་རེ་བཏང་ལ་ཞོགས་ཇ་བཞེས། སྲོད་ལ་གུར་དྲག་རྟ་ཁྱུང་འབར་བའི་བསྐྱེད་བཟླས་དང་། བརྗོད་མེད་དོན་བཤགས། བདེ་གཤེགས་སྤྱི་བཤགས། རྫོགས་ཆེན་གཞི་ལམ་འབྲས་བུའི་སྨོན་ལམ་བཅས་བཏང་མཐར་ཉལ་བའི་རྣལ་འབྱོར་ལ་འཇུག །ཉིན་མོའི་གུང་ཚིགས་དུས་སུ་ཕུད མཆོད་བྱ་ཚུལ་བདེན་གཉིས་ཤིང་རྟ་ལས་ཇི་ལྟར་གསུངས་པ་བཞིན་ཡོན་སྦྱོང་སྨོན་ལམ་བཅས་རྟག་པར་མ་ཆག་པར་བྱ། གུང་གསེང་སྐབས་སོགས་རྣམ་ཀུན་
མཁན་ཆོས་ལ་དགོངས་པ་མ་ཞུས་པར་མཁར་རྔ་བརྡུངས་པའི་སྒྲ་སྐད་ཐོས་ས་ཕན་འཁྱམས་མྱུལ་དུ་མི་འགྲོ། དལ་ཁོམ་བྱུང་དུས་རྣམ་གཡེང་བག་མེད་རྩེ་འཇོ་སྐད་ཅོར་སོགས་འཇིག་རྟེན་སྐྱེ་བོའི་འདུ་ལོང་ལྟར་མི་བྱ་བར་འཇམ་ལྷིངས་ཞི་དུལ་དང་ལྡན་པས་གནས་པར་བྱ། ན་བ་བྱུང་ན་ནད་གཡོག་དང་། གལ་ཏེ་འཆི་བར་གྱུར་ན་དགེ་སྦྱོར་གསལ་འདེབས་དང་ཕུང་པོ་བསྲེག་སྦྱོང་ཞག་ཞེ་དགུའི་བར་བདུན་ཚིགས་ལ་རྡོར་སེམས་སམ་ཞི་ཁྲོའི་ཆོ་ག་རེ་གཏོང་། ཡར་་་་མར་ཚེས་བཅུ་གཉིས་ལ་རིག་འཛིན་ཡབ་ཀ་དང་ཡུམ་ཀའི་སྒོ་ནས་ཚོགས་མཆོད་རེ་གཏོང་དགོས། དེ་ཡང་འདོན་འགྲིགས་རང་སྣང་གང་དྲན་མིན་པར་ཟིན་བྲིས་རིག་འཛིན་ཞལ་ལུང་གཞིར་བཞག་བྱ་ཞིང་། མི་ཕམ་རིན་པོ་ཆེའི་བསྟན་རྒྱས་སྨོན་ལམ་རེ་འཕར་མར་འདོན་པ་ཁྱད་པར་ཡིན། ལར་སློབ་གཉེར་སོགས་
ཆོས་སྤྱོད་བཅུས་དུས་འདའ་བར་བྱ་དགོས་པས། བརྒྱུད་པ་རིན་པོ་ཆེ་འདིའི་ཐོས་བསམ་བྱ་ཡུལ་མ་ནོར་བའི་གཞུང་ལུགས་ལ་མཚོན་ན། ལས་དང་པོ་པ་རྣམས་ཐོག་མར། སྔོན་འགྲོའི་ཁྲིད་དྲན་པ་ཉེར་བཞག་དང་། ལག་ལེན་འདེབས་པ། སེམས་སྦྱོང་རྣམ་པ་བདུན་གྱི་དོན་ཁྲིད་ཐར་པའི་ཐེམ་སྐས། ཁྲིད་ཡིད་ཀུན་བཟང་ཞལ་ལུང་དང་། དེའི་ཟིན་བྲིས། སྤྱོད་འཇུག་རྩ་འགྲེལ། པཎ་ཆེན་པདྨ་དབང་རྒྱལ་གྱི་སྡོམ་གསུམ། ཡོན་ཏན་མཛོད་རྩ་འགྲེལ། བསྐྱེད་རིམ་ལྷ་ཁྲིད་འོག་མིན་བགྲོད་པའི་ཐེམ་སྐས་དང་། དཀའ་གནད། སྨིན་གྲོལ་རྒྱབ་བརྟེན་པདྨ་དཀར་པོ་སོགས་གཞུང་སྙིང་པོར་དྲིལ་བ་དང་། ངེས་ཤེས་སྒྲོན་མེ། དབུ་མ་རྒྱན་འགྲེལ། གསང་སྙིང་འགྲེལ་པ་ཕྱོགས་བཅུའི་མུན་སེལ་དང་། མི་ཕམ་སྤྱི་དོན་འོད་གསལ་སྙིང་པོ།
སྨིན་ལོའི་གསང་བདག་དགོངས་རྒྱན་དང་། ཞལ་ལུང་བཅས་དང་། དེ་དག་གི་རྒྱབ་བརྟེན་དུ་ཀུན་མཁྱེན་ཆོས་ཀྱི་རྒྱལ་པོའི་དགོངས་གཏེར་མན་ངག་གི་མཛོད་ཆེན་རྣམ་པ་བདུན་བཅས་གསང་ཆེན་བསྟན་པའི་གན་མཛོད་རྣམས་ལ་དཔེ་མཇལ་ཡན་ཆད་བྱ་ནུས་ན་བྱིན་རླབས་ཀྱི་བབ་དང་ལྡན་པས་སྐལ་བ་བཟང་པོ་ཡིན། དེ་ལྟར་གོང་དུ་སྨོས་པའི་གཞུང་གདམས་མན་ངག་གི་གནས་ལ་གོ་བ་ཆགས་ཤིང་མོས་བརྩོན་ལྡན་པ་བྱུང་རིམ་བཞིན་འདི་གའི་སྒྲུབ་ཁང་སྟེང་ཤོད་དུ་ལོ་གསུམ་ཕྱོགས་གསུམ་ལ་ཞུགས་ཚེ་བཤད་སྒྲུབ་གཉིས་ལྡན་གྱི་མིང་དོན་མ་སྟོར་བ་ཡིན། ལོ་གསུམ་གྱི་བཅའ་སྒྲིག་དམིགས་བསལ་བ་རྣམས་ནི་ཁོ་བོས་བྱས་པའི་སྒྲུབ་སྡེ་ཀུན་གྲོལ་འོད་གསལ་རྩེའི་བཅའ་ཡིག་ལ་བལྟ་བར་བྱའོ། །འདིར་འཕྲོས་དོན་ཅུང་ཟད་གླེང་ན། ཀུན་
མཁྱེན་པྲཛྙཱ་རསྨིས། རྒྱལ་བའི་བཀའ་དང་ཚད་ལྡན་མཁས་པའི་གཞུང་། །རྣམ་དཔྱོད་བརྩོན་པས་ཐོས་དང་བསམ་པར་བྱ། །ལོག་པའི་སྲོལ་ལ་ཉིན་མཚན་ཁོར་ཡུག་ཏུ། །ནན་གྱིས་བསླབ་ཀྱང་ངལ་བ་དོན་མེད་པས། །ནན་གྱིས་བསླབ་ཀྱང་ངལ་བ་དོན་མེད་པས། །དེ་ཕྱིར་མཁས་པའི་བཤད་སྲོལ་འདི་ཡིན་ཞེས། བཤེས་གཉེན་རྣམས་ལ་འདི་སྤྲིངས་སོ། །ཞེས་གསུངས་པའི་དོན་ཅུང་ཟད་བཤད་ན། ཕ་རྒོད་ཀུན་མཁྱེན་རྒྱལ་བ་ཡབ་སྲས་ཀྱིས་རྗེས་འཇུག་སྐལ་ལྡནབརྒྱུད་འཛིན་བུ་མཆོག་རྣམས་ལ་ཕ་ཕོགས་སུ་བཞག་པའི་མདོ་སྔགས་ཀྱི་གཞུང་དང་མན་ངག་གི་ཆོས་ཀྱི་བང་མཛོད་ཡིད་བཞིན་ནོར་བུས་ཀྱང་བསྒྲུན་དུ་མེད་པ་འདི་དག་རང་རེ་རྙིང་མའི་གྲལ་དུ་སྐྱེས་པ་ཀུན་གྱིས་ཐོས་བསམ་བྱ་ཡུལ་དང་གནད་འགགས་སྙིང་པོར་དྲིལ་ས་མ་ནོར་མ་འཕྱུག་པ་ཡིན་གྱི། དེ་ལས་གཞན་
དུ། ལས་དང་པོ་པས་བརྟག་དཔྱད་གང་ཡང་མེད་པར་ཕྱོགས་རིས་མེད་སྐད་ཀྱིས་གཞུང་ལུགས་ཡིན་ཟེར་ཚད་ལ་ཁྱི་དང་གློ་བའི་དཔེ་བཞིན་འཇུག་སྔ་བགྱིས་ཚེ་རང་ཉིད་ཅོལ་ཆུང་གི་རྟགས་བསྟན་པ་དང་རྙིང་བསྟན་གྱི་ཞབས་འདྲེན་དུ་འགྲོ་ཚུལ་སྙིང་ཐིག་གི་རིག་འཛིན་གོང་མ་རྣམས་ཀྱིས་ཡང་ཡང་གདམས་པ་ཡིན་ཏེ། དཔལ་སྤྲུལ་རྡོ་རྗེ་འཆང་གིས། སངས་རྒྱས་དངོས་དང་འདྲ་བའི་མཁས་གྲུབ་ཀྱི། །གཞུང་ལ་ཡིད་ཆེས་ཉམས་ལེན་མི་བགྱིད་པར་། །སོ་སྐྱེས་འཁྲུལ་པ་ལས་ཀྱང་ཉིང་འཁྲུལ་གྱི། །གཏམ་ལ་རེ་བ་ཆོས་སྐལ་ཆད་པའི་རྟགས། །ཉམས་ལེན་ཡིན་ན་ཌཱ་དྲིལ་ཁྲོལ་ཁྲོལ་དང་། །ཕྲེང་བ་ཁྲོག་ཁྲོག་ཅིས་ཀྱང་མི་དགོས་ཀྱི། །ངལ་གསོ་གསུམ་དང་ཡོན་ཏན་རིན་པོ་ཆེར། །གཞུང་ལུགས་གདམས་པར་ཤར་བའི་ཉམས་ལེན་དགོས། །དེ་ལྟར་ཤེས་ན་རྒྱལ་བའི་རྗེས་
སུ་ཞུགས། །བཤད་དང་སྒྲུབ་པའི་བསྟན་པ་དུས་གཅིག་ཟིན། ཞེས་དང་། ཐོས་པ་མེད་པ་སྲིད་ན་སྐྱོན་ཆེ་ཡང། །ལོག་པར་ཐོས་པ་དེ་བས་སྡིག་ཆེ་བས། །མཁས་པའི་གཞུང་ལ་བལྟ་ས་ཡོད་དུས་འདིར། །ཐོས་པའི་མིག་དཀྱུས་ཅི་ཕྱིར་དག་མི་བགྱིད། །སྲིད་པ་འདི་ན་ཡིད་བཞིན ནོར་གཅིག་པུ། །ཀུན་མཁྱེན་བླ་མའི་གཞུང་ལུགས་རིན་པོ་ཆེ། །འདི་ལས་གཞན་ལ་སངས་རྒྱས་ཡོད་མིན་ན། །འདི་ལ་རབ་དགའ་མི་སྐྱེ་སུ་ཞིག་ཡོད། །ཅེས་དང་། གཞུང་བཟང་གཅིག་ཤུས་ཀུན་གྲོལ་འདི་རང་ཡིན། །མན་ངག་ཆུ་བརྒྱ་ཟམ་གཅིག་འདི་རང་ཡིན། །རང་ལ་བཞག་ནས་གཞན་ལ་མ་འཚོར་ཀྱེ། སྙིང་པོ་དོར་ནས་ཤུན་པ་མ་བསྡུ་ཀྱེ། །རྩོལ་མེད་བོར་ནས་བརྩོན་པས་མ་བསྒྲུབ་ཀྱེ། །བྱར་མེད་སྐྱུར་ནས་བྱ་བྱེད་མ་མང་ཀྱེ། །ཀུན་
མཁྱེན་བླ་མའི་བརྒྱུད་དུ་སྐྱེས་ཙམ་ནས། །གཞུང་བཟང་འདི་འདྲ་མེས་པོའི་ཕ་ཕོགས་ཡིན། །ལམ་བཟང་འདི་འདྲ་ཕ་མེས་བཞག་པ་ཡིན། །བག་ཞིག ཕབ་ན་འདི་རུ་ལོས་ཀྱང་ཕབ། །ཀྱེ་མ་ཀྱེ་མ་བརྒྱུད་གསུམ་ཐུགས་རྗེ་ཆེ། །གཞུང་བཟང་མཇལ་དུ་ཡོད་པ་སྐལ་བ་བཟང། །ལམ་བཟང་བསྒྲུབ་ཏུ་ཡོད་པ་ཁ་རྗེ་ཆེ། །སངས་རྒྱས་རང་ལ་ཡོད་པ་ལོས་ཀྱང་བདེན། །དེང་སང་རྒྱལ་བ་དགྱེས་པའི་ལམ་བཟང་འདིར། །སྙིང་གི་གྲོགས་ཁྱེད་བློ་དང་ཆོས་སུ་✖ སྲེས། །སྙིང་གཏམ་ལགས་ཀྱི་སྙིང་གི་དབུས་སུ་སྟིམས། །ཞེས་གསུངས་པ་དང་མཐུན་པར། རྡོ་གྲུབ་བསྟན་པའི་ཉི་མས་མཛད་པའི་གྲུབ་དགོན་བཅའ་ཡིག་ཏུའང། གཞུང་ལུགས་ཀྱི་སྦྱངས་པ་མཐར་ཕྱིན་ནས་རང་ཉིད་བསྟན་པ་རིས་མེད་དུ་སོང་ན་མ་གཏོགས། གསར་བུའི་དུས་སུ་གཞུང་ལུགས་སྲ་སྲེ་
མང་པོ་ལ་མི་འཇུག་ཅིང་། འཆད་སྤེལ་ནུས་མཁན་ཚོས་ཀྱང་ཉན་པ་པོའི་བློ་ནུས་དང་བསྟུན་ནས་སྡེ་སྣོད་སྤྱིའི་བཤད་པས་ཁོག་ཕུབ་སྟེ། གནད་རང་ལུགས་ཀྱི་འགགས་ལ་སྒྲིལ་ཞིང་འཆད་པ་ལྟ་བུ་རང་གཞུང་ཤེས་པའི་ཡན་ལག་ཏུ་བྱེད་ན་མ་བཀགྋ།དེ་ལས་གཞན་དུ་ཀུན་མཁྱེན་ཡབ་སྲས་ཀྱི་བཤད་སྲོལ་བག་ལ་ཞ་བའི་རྒྱུར་གཏོགས་རྒྱུའི་བཤད་པ་གསར་པ་ཁྱབ་གདལ་དུ་མང་ན་རང་ཉིད་ཅོལ་ཆུང་བའི་ནང་ཆ་བསྟན་པར་མ་ཟད་རྡོ་རྗེ་སྙིང་པོའི་བསྟན་་ ྨ པའི་ཞབས་འདྲེན་དུ་འགྱུར་བས་དེ་ལྟར་མ་སོང་བ་བྱ། ཞེས་གསུངས་སོ། །གསང་བ་བླ་ན་མེད་པའི་ཐུན་མིན་སྙན་བརྒྱུད་མན་ངག་གི་ཁྲིད་ཡིག་རྣམས་ནི་སྣོད་ལྡན་གྱི་བུ་མཆོག་ལ་ཆིག་བརྒྱུད་སྨིན་ཁྲིད་དུ་གདབ་པ་ལས། ཀུན་ལ་ཚོགས་ཆོས་ཁྱབ་བརྡལ་དུ་སྒྲོགས་པ་ནི་བརྒྱུད་པ་རིན་པོ་ཆེ་འདི་ལ་མེད་པས་མ་དང་
མཁའ་འགྲོའི་བཀའ་ཆད་རིན་གྱིས་ཉོས་ནས་གཉིས་ཕུང་སྒྲུབ་མཁན་རྣམས་ལ་དགོངས་ནས། ཀུན་མཁྱེན་འཇིགས་གླིང་གིས། དུས་བསྐལ་པ་སྙིགས་མའི་བྱེད་སྤྱོད་དང་ལུང་བསྟན། །མ་འགྲོ་དྲུག་ཡོངས་ཀྱི་སྤྱི་གཙུག་ན་བབས་འདུག །ཆོས་ཚུལ་བཞིན་བྱེད་པ་ཉིན་སྐར་བས་དཀོན་པས། །མ་ཌཱ་ཀིའི་གཅེས་ནོར་ཁྱབ་བརྡལ་དུ་མ་སྒྲོགས། །ཞེས་དང་། འདི་ནི་གདོད་མའི་མགོན་པོ་ཀློང་ཆེན་ཡང་། །ཐུན་མོང་མ་ཡིན་གྲུབ་མཐའ་གང་ཡིན་པ། །དེ་ཀུན་⇨ ཚོགས་སུ་མ་གླེང་དམ་དུ་སྦོས། །གསུངས་ཤིང་ཁྲོམ་ལ་སྒྲོག་པར་མི་བཞེད་དོ། །དེ་ལྟ་མོད་ཀྱི་ད་དུས་གསང་སྔགས་ཀྱི། །དཀྱིལ་འཁོར་ར་ཁྱིའི་ཚང་དུའང་བཞེངས་བྱས་ཞིང་། །འབག་འཆམ་བྲོ་ཤོན་རྩེ་དང་ཆབས་ཅིག་པར། །ཁྲོམ་ལ་དབང་བསྐུར་བྱེད་པའི་དུས་ངན་ཤར། །དེ་ཡིས་ཆོས་ཀྱི་རོ་ཉམས་
ནུས་པ་ཡལ། །བསྒྲུབས་ཀྱང་འབྲས་བུ་འབྱིན་པའི་ཟབ་ཁྱད་བུལ། །རྒྱལ་དང་དེ་སྲས་ཐུགས་དགོངས་དབྱུང་བའི་ལས། །ཡིན་ཕྱིར་དམ་ཚིག་ལྡན་པས་སྤང་བར་བྱ། །ཞེས་གསུངས་པས། རྩ་ལྟུང་བདུན་པ་འཆོལ་ཉོག་སྤྱོད་པའི་དུག་རླངས་ཀྱིས་གསང་སྔགས་ཟབ་མོའི་བྱིན་ནུས་བསྒྲིབ་ཏུ་མ་འཇུག་ཅིག །ངེད་རང་སོ་སོའི་སྐྱེ་བོ་གསང་སྔགས་མོས་པས་སྤྱོད་པ་རྣམས་ལ་དགོས་ངེས་ཤེས་པའི་བླ་མ་དང་རྡོ་རྗེ་སྤུན་གྲོགས་ལ་དད་པ་མོས་གུས། ཆོས་ལུགས་གྲུབ་མཐའ་གཞན་དང་དེ་འཛིན་པའི་ཆོས་མཛད་ཀུན་ལ་དག་སྣང་། སྡོམ་པ་དམ་ཚིག་ལ་གཅེས་སྤྲས། ལས་རྒྱུ་འབྲས་ལ་སྤང་བླང་། རང་གི་སེམས་རྒྱུད་འདུལ་བ་དེ་རྣམས་ཅི་ནས་ཀྱང་གལ་ཆེ། དེའི་ནང་ནས་སྨིན་གྲོལ་གསང་སྔགས་ཀྱི་ཆོས་སྒོར་ཞུགས་པ་ཤ་སྟག་ཡིན་པར་བརྟེན། བླ་མ་
དང་མཆེད་གྲོགས་ཕན་ཚུན་ནང་མཐུན་པ་མ་བྱུང་ཕྱིན། གསང་སྔགས་ཀྱི་དམ་ཚིག་ཉམས་ནས་རྡོ་རྗེའི་དམྱལ་བ་ཞེས་བྱ་བ་སངས་རྒྱས་ཐམས་ཅད་ཀྱིས་ཕྲིན་ལས་མཛད་ཀྱང་ནམ་མཁའ་མ་ཞིག་བར་སྡུག་བསྔལ་ཚབས་པོ་ཆེ་མྱོང་དགོས་པ་ཞིག་ལ་སྐྱེ་བར་གསུངས་གདའ་བས་སོ་སོ་རང་ཐད་ནས་ལོག་ལྟ། ཕྲག་དོག །སྐུར་འདེབས། སྐྱོན་བརྗོད། ཤག་འགྱེད། ལྐོག་ལབ། ཟུར་ཟ་སོགས་མི་བྱ་ཞིང་། དེ་དག་རང་སྣང་མ་དག་པའི་སྐྱོན་དུ་ངོས་བཟུང་་སྟེ་དག་སྣང་སྦྱངས་དགོས་པའང་། ཇི་སྐད་དུ། གྲོགས་ཀྱི་སྤྱོད་པའི་སྐྱོན་མཐོང་ན། །རང་གི་སེམས་ཀྱི་སྐྱོན་དུ་ངེས། །རང་སྐྱོན་རང་གིས་མཐོང་བ་དང་། །དག་པའི་སྣང་བ་མཐོང་བར་ཤོག །འདུས་པའི་མཆེད་ལྕམ་མ་ལུས་ཀུན། །དམ་སེལ་རྩ་ལྟུང་མི་འབྱུང་ཞིང་། །ཉེས་པའི་དྲི་མས་གང་གོས་
པ། །སྐད་ཅིག་ཉིད་ལ་དག་གྱུར་ཅིག །ཅེས་པ་ལྟར་རྟག་ཏུ་དྲན་ཤེས་བག་ཡོད་མ་བརྟེན་ན་སྐྱོན་ཐམས་ཅད་ཀྱི་རྩ་བ་འདིས་བསྐྱེད་ཉེན་ཆེ་སྟེ། ལྷ་བཙུན་ནམ་མཁའ་འཇིགས་མེད་ཀྱིས། ཁྱད་པར་གསང་སྔགས་ཟབ་མོའི་སྒོར་ཞུགས་ཏེ་ཉམས་ལེན་སྙིང་པོར་དྲིལ་བའི་སྒྲུབ་པ་ཕོ་མོ་རྣམས་ཀྱང་སྐྱེས་པ་དང་བུད་མེད་ངན་པ་འཕང་ར་ལ་འཛོམ་པ་ལྟར་ཁྲོམ་ཚོགས་སུ་བསྡད་དེ་བླ་མ་དང་མཆེད་གྲོགས་སོགས་དྲག་ཞན་ཐམས་ཅད་ལ་ལེགས་ཉེས་ཀྱི་དགེ་སྐྱོན་གླེང་ཞིང་མཐར་གཅིག་སྐྱོན་གཅིག་ལ་བཏགས་ཏེ་ཐམས་ཅད་འཁོན། ནམ་ཕུག་དམ་ཉམས་ཀྱི་ཁྱུ་ཆེན་པོ་ཞིག་འབྱུང་ཉེན་ཡོད་པས་དེ་ལྟར་མི་བྱ། ཞེས་དང་། ཀུན་མཁྱེན་འཇིགས་གླིང་གིས། རང་གི་ཁོང་མ་ཞིག་པའི་བསམ་པ་ཚེར་མའི་ནགས་ཚལ་ལྟ་བུ་ཕྲག་དོག་དང་། ཀོ་ལོང་གིས་རྒྱུད་མ་རུང་
པར་བྱས་པས་མཆེད་གྲོགས་ཕན་ཚུན་དུ་སེལ་འཇུག །ཕོག་ཐུག་གི་གཏམ་དང་སྐྱོན་འདོགས་པ་ལ་དགའ་ཞིང་ཆུ་སྐྱར་ཉེའུ་སྒུག་པ་བཞིན་གཞན་གྱི་སྐྱོན་རྟོག་ཇི་ལྟ་བུ་ཞིག་རྙེད་ན་བསམ་པ་འདི་དུས་སྙིགས་མའི་དགོན་ཁྲོད་ཆེ་ཆུང་གང་ནའང་མང་འདུག་པས་ཉེས་པ་ཐམས་ཅད་བསྐྱེད་པའི་རྩ་བ་ཡིན་པས་རང་གཞན་སུ་འདྲའི་ཐད་དུའང་དག་སྣང་འབའ་ཞིག་སྦྱང་བ་ལ་བསླབ་དགོས། ཞེས་གསུངས་པ་འདི་རང་ཅག་ད་ལྟའི་ཆོས་པ་ཁྱུ་ཡིས་འཚོ་བ་རྣམས་ཀྱི་བྱེད་སྤྱོད་ལ་དགོངས་་ནས་གདམས་ངག་མཚང་ཐོག་ཏུ་རྒོལ་བ་ལགས་པས་ཀུན་གྱི་ཐུགས་ལ་བཅག་པར་མཛོད། སྤྱིར་ཀུན་མཁྱེན་ཆེན་པོའི་མན་ངག་མཛོད་དང་། འཇིགས་གླིང་རི་ཆོས་ཞལ་གདམས་ངོ་མཚར་རྒྱ་མཚོ། ཚེ་རིང་ལྗོངས་ཀྱི་བཅའ་ཡིག་སོགས་ལ་ཞིབ་ཏུ་གསན་དགོངས་གནང་བའི་བསླབ་སྦྱོང་ཀུན་སྤྱོད་སོགས་སྒྲིག་
ཁྲིམས་རྣམས་གཏོང་མཁན་གྱིས་གཏོང་ཁུར་མཁན་གྱིས་ཁུར་ནས་སྣེ་གཅིག་མ་འགལ་བ་ཚིག་རྗེས་དོན་གྱིས་གསོབ་པ་ཞིག་བྱུང་ཚེ་མང་དུ་ཕ་རྒན་དང་ང་འདྲ་བའི་སྤྱོད་ངན་གྱི་རྗེས་སུ་ཁྱི་ནུ་མ་དགོས་ཤིང་། དོན་དུ་ཀུན་མཁྱེན་རྒྱལ་བ་ཡབ་སྲས་ཀྱི་རྣམ་ཐར་ལ་བྱ་མིག་གྱེན་བལྟ་བྱ་བ་ལས། མིག་ཐུར་ལྟས་བྱ་རྒྱུ་མིན་ཏེ། འཇིགས་གླིང་གིས། ལར་དངོས་ཀྱི་རིང་ལུགས་འཛིན་པ་ཀུན་བསྟན་པའི་མིག་རྐྱེན་འདི་གཅེས་པར་འཛིན་པ་ལས་ཞིག་པོ་དང་། ཐོ་ཅོའི་ཀུན་ཏུ་སྤྱོད་པས་ནམ་ཡང་བསྒྱིངས་པར་མི་བྱའོ། །ཞེས་གསུངས་པ་ལྟར། རྒྱལ་བའི་ལུང་རྟོགས་ཀྱི་བསྟན་པ་རིན་པོ་ཆེ་བཤད་སྒྲུབ་འཁོར་ལོ་གཉིས་ལྡན་གྱི་སྒོ་ནས་འཛིན་མཁན་དགེ་འདུན་གྱི་སྡེ་གང་དུ་ཡོད་ཀྱང་དེ་ལ་སངས་རྒྱས་ཀྱི་བསྟན་པ་དར་ཟེར་བ་མ་གཏོགས་ཕྱིའི་གཙུག་ལག་ཁང་རྒྱ་
ཆེ་བ་དང་བཀོད་ལེགས་པ་དང་གསེར་དངུལ་དང་གོས་ཆེན་གྱི་མཆོད་རྫས་རིན་ཐང་ཆེ་བ་རྣམ་གྲངས་འཛོམ་པ་སོགས་དང་། སེམས་ཉིད་ངལ་གསོའི་ལུང་བསྟན་ལས། བཙུན་གཟུགས་མང་ན་སྡོམ་ཉམས་མང་། །དེ་དུས་སྡེ་ཡིས་ཅི་ཞིག་བྱ། །ཞེས་གསུངས་པ་ལྟར། བཙུན་པའི་གཟུགས་བརྙན་འདུལ་ཁྲིམས་དང་སེམས་བསྐྱེད་དམ་ཚིག་གང་ཡང་མི་ལྡན་པའི་གྲྭ་པ་མང་ཡང་། བསྟན་འཛིན་དང་། བསྟན་པ་དར་བར་ངོས་འཛིན་དཀའ་བས་ངོ་མཚར་དུ་མི་འཛིན།⇨ འཇིག་རྟེན་འདིའི་ཁ་ཐབས་མཁོས་ཀ་བརྒྱ་བཤིག་སྟོང་འགུགས་ཀྱི་བསྒྲུབས་པའི་ལོག་འཚོ། ལོངས་སྤྱོད་དཔལ་འབྱོར། སྟོབས་རྣམ་དཔྱོད་སོགས་ལ་ཟེར་བ་མིན་པ་ཤེས་དགོས། ཐེག་ཆེན་ལམ་གྱི་རྩ་བ་སེམས་བསྐྱེད་དང་སྔགས་ཀྱི་རིམ་གཉིས་ལ་འབད་འབུངས་མི་འདོན་པར་ཆོ་ག་བོན་གྱེར་དབྱངས་རོལ་
གྱི་སྟོང་སྒྲ་ཙམ་སྒྲ་ཙམ་ལ་སྙིང་པོར་རེ་བ་ནི་བསྟན་པ་སྙིགས་པའི་རྟགས་སུ་ཤེས་ནས་རྩ་བ་བོར་ནས་ཡལ་ག་ལ་འཇུ་བ་ཡང་ནོར་བ་ཆེན་པོ་སྟེ། ཀློང་ཆེན་རབ་འབྱམས་གཉིས་པ་འཇིགས་གླིང་གིས། བྱང་ཆུབ་ཀྱི་སེམས་དང་བསྐྱེད་རྫོགས་ཀྱི་དོན། །གོ་ཡུལ་ཙམ་དུའང་མ་ཆགས་པར། །སྐད་རོ་དང་དབྱངས་རོལ་ལ་སྒྲུབ་མཆོད་དུ། །རེ་བའི་འཇིག་རྟེན་འཁྲུལ་ལུགས་ཨང་། ཞེས་དང་། རྡོ་གྲུབ་བསྟན་པའི་ཉི་མས། ཕྱི་མའི་དུས་སུ་སྟོན་ཆེན་དང་སྡེ་དགོན་ཕལ་ཆེ་མངའ་ཐང་དང་འཁོར་སློབ་ཀྱི་གཟི་བྱིན་འགྲན་ཅིང་། དབྱངས་རོལ་དང་མདོས་གཏོར་ཙམ་ལ་སྙིང་པོར་རེ་ནས། རྙིང་བསྟན་རི་མོའི་མར་མེ་ལྟར་གྱུར་པ་ན། ཞེས་ཀུན་མཁྱེན་བླ་མ་དང་བརྒྱུད་འཛིན་མཁས་གྲུབ་ཀྱི་དབང་པོ་དེ་དག་གི་གསུངས་ལ་གོ་རྒྱུ་ཆེ། ལྷག་པར་སྙིགས་དུས་ཀྱི་སྐྱེ་བོ་
ཅོལ་ཆུང་ཆོས་ཀྱི་གནད་མ་གོ་བ་ཕལ་ཆེ་བས། རྙེད་པ་དང་བཀུར་སྟི། འདུ་འཛི་སུ་ཆེ་བ་དེ་འགྲོ་དོན་དང་འཕྲིན་ལས་རྒྱས་པ་དང་། རྒྱལ་བསྟན་དར བར་འཛིན་པ་ནི་ཤུན་པ་དང་སྙིང་པོ་ནོར་ནས། བསྟན་པའི་འགལ་རྐྱེན་བར་ཆད་ལ་སྐྱོན་དུ་མ་ཤེས་ནས་ཡོན་ཏན་མཆོག་ཏུ་རློམ་པ་སྟེ། མདོ་ལས། རྙེད་པ དང་བཀུར་སྟི་ནི་གཅིག་ཏུ་བག་མེད་པའི་རྩ་བ་ཡིན་པར་བརྟག་པར་བྱའོ། །རྙེད་པ་དང་བཀུར་སྟི་ནི་དགེ་བའི་རྩ་བ་འཕྲོག་པར་བརྟག་པར་བྱའོ། །རྙེད་པ་དང་བཀུར་སྟི་ནི། ང་རྒྱལ་དང་། རྒྱགས་པ་དང་། དྲེགས་པ་བསྐྱེད་པར་བརྟག་པར་བྱའོ། །ཞེས་གསུངས་ཤིང་། མཉམ་མེད་ཇོ་བོ་ཆེན་པོས། བསོད་ནམས་ཟེར་བའི་འདུ་འཛི་དེ་ཡང་ཆོས་ཀྱི་བར་ཆད་ཡིན་པས་སྤོངས། ཞེས་གསུངས་པས་སྟོབས་འབྱོར་མངའ་ཐང་ལ་བསྟན་པ་རྣལ་མར་མི་འཛིན་
པར། ནང་པ་སངས་རྒྱས་པའི་ཁྲིམས་ཀྱི་ཡི་གེ་མདོར་བསྡུས་པ་འདི་ལྟར། སྡིག་པ་ཅི་ཡང་མི་བྱ་ཞིང། །དགེ་བ་ཕུན་སུམ་ཚོགས པར་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཐམས་ཅད་བསྲུང་བའི་དགེ་སྦྱོང་དག །སྡུག་བསྔལ་ཀུན་ལས་ངེས་གྲོལ་ལོ། །ཞེས་གསུངས་པ་ལྟར། རང་ཉིད་ཀྱི་ཡི་དམ་དུ་བྱེད་པ་ཁོ་ན་གནད་གལ་ཆེ་བར་མ་ཟད་ཆོས་ཀྱི་འགགས་དེ་གང་འདྲ་ཞིག་ལ་བསྡུ་དགོས་ཟེར་ན་འདི་འབྲས་ལྗོངས་རྫོགས་ཆེན་པའི་རི་ཆོས་གནད་ཀྱི་ཕྲེང་བ་ལས། ཆོས་སྒྲ་སྐད་ཆེ་ལ་རྣམ་གྲངས་མང་བ་ཅི་ཐོབ་ཀྱང་འགགས་ཉམས་ལེན་སྙིང་རུས་ཀྱི་རྟིང་
ཚུགས་པ་གཅིག་ལ་འདུ། བླ་མ་ཇི་ཙམ་མཇལ་ཡང་འགགས་མོས་གུས་ལ་འདུ། དཔའ་བོ་མཁའ་འགྲོ་འདུ་མི་འདུའི་འགགས་དམ་ཚིག་ལ་འདུ། འགྲོ དོན་རྒྱ་ཆེ་ཆུང་གི་འགགས་སེམས་བསྐྱེད་དང་སྨོན་ལམ་ལ་འདུ། དག་སྣང་གི་འགགས་ཕྱོགས་རིས་ཡོད་མེད་ལ་འདུ། རྐྱེན་ལམ་དུ་ལོང་མ་ལོང་གི་འགགས་གཉེན་པོ་དགོས་མི་དགོས་ལ་འདུ། གྲུབ་པ་ཐོབ་མ་ཐོབ་ཀྱི་ཚད་རེ་དོགས་དབྱིངས་སུ་དག་མ་དག་ལ་འདུ། ལག་ལེན་གྱི་སྙིང་པོ་བདག་མེད་རྟོགས་ཚེ ནས་ཀུན་གོང་དུ་ཁུར་དགོས། བྱར་མེད་རྟོགས་ནས་འཁྲུལ་པ་ཙམ་མི་འབྱུང་བ་ཞིག་དགོས། འཛིན་མེད་རྟོགས་ནས་ལྟོ་གོས་ལ་གྱོང་ཐེག་པ་ཞིག་དགོས། ཞེན་མེད་རྟོགས་ནས་སྒྲ་ལུས་ལ་བདག་འཛིན་བྲལ་བ་ཞིག་དགོས། རི་ཁྲོད་འགྲིམ་ནས་ཤ་ཆང་སོགས་སྡིག་ཟས་དང་རྣམ་གཡེང་ལ་ཞེན་པ་ལོག་པ་ཞིག་
དགོས། ཕ་ཡུལ་བསྐྱུར་ནས་གཞན་ཡུལ་སྒྱུ་མར་ཤེས་པ་ཞིག་དགོས། རྒྱུ་འབྲས་ལ་སྤང་བླང་མེད་ན་སྣང་སྲིད་དག་པ་རབ་འབྱམས་སུ་ཤར་བ་ཞིག་དགོས་པ་ཡིན་ནོ། །ཞེས་གསུངས་པ་ལ་གོ་རྒྱུ་ཆེན་པོ་ཡོད་པ་ཡིན་པས། སྐྲ་སོར་གསུམ་བཅད། གོས་གྲུ་བཞི་གྱོན་ནས་གྲོང་ཡུལ་དུ་དམར་ལྷབ་བེ་མི་ཚེ་མི་ནག་གི་སྡུག་གཡོག་ལ་ཟད་དེ། བླ་མ་དང་ཆོས་གྲོགས་ཀྱི་ཞབས་མངོན་སུམ་དུ་འདྲེན་པ་ཞིག་ཡོང་ཉེན་ཤིན་ཏུ་ཆེ་བས་དེར་མ་སོང་བར་གཟབ་དགོས། མདོར་ན་ཚུལ་ཁྲིམས་འཆལ་བས་དཀོར་རྫས་ཁམ་གང་ཟོས་པའང་ཕྱི་མར་ཁྲོ་ཆུ་འཐུང་བའི་དམྱལ་བར་སྐྱེ་ཞིང་། དགེ་འདུན་གྱི་གདན་ལ་བསྡད་ན་ལྕགས་བསྲེགས་ཀྱི་ས་གཞིར་སྐྱེ་བ་དང་། ཚུལ་འཆལ་གཅིག་དགེ་འདུན་གྱི་ནང་དུ་འཚོགས་ན་སྦལ་པ་རྨ་ཅན་གྱི་དཔེ་ལྟར་འདུས་པ་ཐམས་ཅད་
སྡིག་པའི་ན་ཕོག་པ་དང་། དེ་ལས་ཀྱང་གསང་སྔགས་ཀྱི་དམ་ཚིག་ཉམས་པའི་མི་ནི་ལྷན་ཅིག་ཏུ་འཚོགས་པ་ལྟ་ཅི་སྨོས། ལུང་པ་གཅིག་གི་ཆུ་ལ་བཏུང ཡང་དམྱལ་བ་མནར་མེད་དུ་ཁྱུ་དེད་བཏང་བར་གསུངས་པས་རང་རང་ཐད་ནས་ཀྱང་དམྱལ་བའི་ནང་དུ་བྱོན་མ་དགོས་ཙམ་བྱུང་ན་མི་ལུས་བླངས་ནས་ཆོས་དང མཇལ་བའི་དོན་པོ་ཡིན་པ་དང་། སྤྱིར་དགེ་བའི་ཕན་ཡོན་སྣ་རེ་ལ་ཡང་བསམ་གྱིས་མི་ཁྱབ་ཅིང་སྒོས་སུ་སོ་ཐར་ལས་བྱང་སྡོམ། དེ་ལས་སྔགས་ཀྱི་དམ་ཚིག་རྣམས་ཕན་ཡོན་ཆེས་ཆེ་བས་མྱུར་དུ་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པར་ངེས་པས་དེ་ལྟར་ཐུགས་ལ་བཞག་པར་ཞུ། སྨྲས་པ། ཚངས་སྤྱོད་ངུར་སྨྲིག་གོས་འཆང་ཀུན་སྤྱོད་དག །ཤ་ཆང་ལོག་འཚོ་སྤངས་པས་འཚོ་བ་དག །མདོ་རྒྱུད་བཀའ་གཏེར་ཟུང་འཇུག་ཆོས་སྤྱོད་དག །དག་པ་
གསུམ་གྱིས་གནས་འདི་རྟག་གང་ཤོག །སྡོམ་གསུམ་ཁྲིམས་ཀྱི་ཉིན་བྱེད་གསར་པའི་གཟིས། །ཉེས་སྤྱོད་མཚན་མོའི་ཐུན་གསུམ་།དྲི་མེད་རྒྱལ་བསྟན་པདྨོའི་ཚལ་རྒྱས་ཏེ། །ཕན་བདེའི་སྣང་བས་ས་གསུམ་ཁྱབ་གྱུར་ཅིག །ཉེ་བའི་ཚནྡོ་བལ་ཡུལ་གནས་ཀྱི་།ཕུན་ཚོགས་བཀོད་སྤྲིན་རབ་མཛེས་ནགས་ཀྱི་མཐོངས། །ཡང་ལེ་ཤོད་ཀྱི་བཤད་སྒྲུབ་ཆོས་སྡེ་རུ། །འབྲོག་རྒན་བུདྡྷ་སྙོམས་ལས་ཅན་དེ་ཡིས། །བདག་བསྟོད་གཞན་སྨོད་རྙེད་བཀུར་གྲགས་འདོད་སོགས། །ཆོས་མིན་བསམ་སྦྱོར་ལྀག་པ་རྒྱང་བསྲིངས་ནས། །བཀའ་ལུང་ཚད་མ་གསུང་སྒྲོས་རྣམ་དག་བཞིན། །སངས་རྒྱས་བསྟན་པ་དར་རྒྱས་མི་ནུབ་ཕྱིར། །བྲིས་པའི་དགེ་བས་བསྟན་འཛིན་སྐུ་ཚེ་བརྟན། །རྒྱུ་སྦྱོར་ཡོན་བདག་དཔལ་འབྱོར་གཙོ།
མངའ་ཐང་དར། །རྩོད་ལྡན་རྒུད་པ་མཐའ་དག་མིང་ཙམ་སྟོངས། །ཐམས་ཅད་ཕྱམ་གཅིག་རྫོགས་འཚང་རྒྱ་གྱུར་ཅིག །ཅེས་པ་འདི་ཡང་རང་ལ་ལྟོས་པའི་རྒྱ་བལ་ཕྱོགས་ཀྱི་དགོན་ཆུང་ཤར་ནུབ་དག་གི་སྒྲིགས་ཞུགས་བསླབ་ལྡན་དགེ་འདུན་རྣམས་དང་། དེ་ལས་གཞན་ཡང་མང་ཐོས་མཁྱེན་སྤྱན་མངའ་བ་རྣམས་ལ་འདི་འདྲ་ཞུ་མ་དགོས་ཀྱང་། རང་འདྲ་བློ་དམན་འགའ་ལའང་བླང་དོར་སྟོན་པའི་མིག་ཏུ་འགྱུར་ན་ཅི་མ་རུང་སྙམ་པའི་བློས་སྤོང་བ་པ་སངས་རྒྱས་རྡོ་རྗེས་རང་ལོ་དྲུག་ཅུ་རེ་ལྔར་སོན་པ་དམར་སེར་ཅན་གྱི་ལོ་ཆུ་སྟོད་ཟླ་བའི་དཀར་ཕྱོགས་ཀྱི་ཚེས་དགེ་བ་ལ་དཔལ་ཨོ་ཊི་ཡ་ནའི་བཛྲ་ཙརྱ་པདྨ་ཀཱ་རས་ཕྱག་རྒྱ ཆེན་པོའི་རིག་འཛིན་བརྙེས་ནས་ཉོན་མོངས་པའི་བདུད་བཅོམ་པའི་བྲག་ཕུག་ཡང་ལེ་ཤོད་ཀྱི་སྒྲུབ་གནས་སུ་ལེགས་པར་སྦྱར་བ་སྟེ་འདིས་ཀྱང་བསྟན་པ་རིན་པོ་
ཆེ་མཛེས་པའི་རྒྱན་དང་བྱི་དོར་དམ་པར་གྱུར་ཅིག སརྦ་དཱ་ཀ་ལྱཱ་ཎཾ་བྷ་བ་ཏུ།།
ཤོག་སྟོང་།